Молитвослов

Автор Раб божий Константин, марта 10, 2012, 02:13:14

« назад - далее »

Раб божий Константин

Акафист святому преподобному Косьме Яхромскому.
[spoiler]Кондак 1
Избранный чудотворче и предивный угодниче Христов, скорый помощниче и молитвенниче наш, праведне отче Косьмо! Величающе прославльшего тя Господа, похвальная восписуем ти, к раце мощей твоих притекающе. Ты же, яко имеяй дерзновение ко Господу, от всяких нас бед свободи, зовущих:
Радуйся, преподобне отче наш Косьмо, теплый о нас к Богу молитвенниче!

Икос 1
Ангельскому поревновав житию и великим во отцех подобяся, всего себе отрешил еси мiрскаго сплетения, к подвигам же постничества мужески вооружився, опасно путем Божиих заповедей шествовал еси, блаженне. Темже и мы, верно чтущии твою священную память, похвалами ублажаем тя сими:
Радуйся, ангельскаго жития подражателю:
Радуйся, древних великих отец житию приемниче.
Радуйся, заповедей Божиих хранителю усердный.
Радуйся, невидимых врагов мужественный победителю:
Радуйся, отеческих Богодухновенных преданий отважный ревнителю:
Радуйся, монашескаго постническаго жительства законоположителю.
Радуйся, преподобне отче наш Косьмо, теплый о нас к Богу молитвенниче!

Кондак 2
Видя Богопромыслитель Господь души твоей доброту, направи помысл твой ко исканию единаго на потребу. Ты же, сего возжелав, навыкл еси непрестанно взывати к Богу: Аллилуия.

Икос 2
Разумея, яко Сама Владычица Небесная, явив через тебе, святый Косьмо, в лесах яхромских чудотворный образ свой, призвала есть тя к служению Ей и Спасителю нашему, ты, прехвальне отче, оставил еси болярина твоего и вся красная мира, дабы токмо Господеви и Всенепрочней Матери Его служити. Сице просим тя: молися, да сотворит всех нас Всенепорочная Дева быти верными учениками Сына Своего. Ныне же, во славе неизреченной Царицу Небесную созерцая, не забуди и нас, взывающих ти сице:
Радуйся, Пресвятей Богородице верно послуживый;
Радуйся, во дни и нощи молитвы к Ней слезно возносивый;
Радуйся, мысль благу в сердце от Нея влагаему свято сохранявый;
Радуйся, иконы Ея благоговейно почитати нас научающий;
Радуйся, милосердие и благословение Ея к нам приклоняющий;
Радуйся, купно с Нею о спасении нашем Христа умоляющий
Радуйся, преподобне отче наш Косьмо, теплый о нас к Богу молитвенниче!

Кондак 3
Силою и благодатию Божиею просвещаемь и укрепляемь бе, всехвальный отче наш Косьмо, во дни земнаго жития твоего, от силы в силу восходил еси, да прославится в тебе Христос, Его же ради подвизался еси, Его же возлюбил еси, Его же Единого вожделе душа твоя, и, волю Божественнаго Спасителя нашего исполняя, за вся благодарил еси Вседержителя. Мы же ныне просим тя: настави и нас на молитву благодарения и славословия, да купно с тобою воспоем Господу Всеблагому, милующему и спасающему нас: Аллилуйя.

Икос 3
Имуще в сердце твоем, святый отче, любы ко Господу, и воле Спасителя следуя, преселился еси во славный Киев-град, идеже начало велиих подвиг твоих духовных положил еси, мы же сие ныне убо поминающе просим тя: жаждущая наша сердца, росою ороси духовною, да Вертоградарю небесному принесем плоды добродетельныя, тебе же наставнику небесному нашему сице воспевая:
Радуйся, мудрый странниче, искавый отечества горняго.
Радуйся, Божий избранниче, от юга на север преселивыйся во спасение.
Радуйся, благою стезею шествовавый подвижничества совершеннаго.
Радуйся, неослабно трудивыйся во бдениих, пениих и пощениих.
Радуйся, добродетелей чистейшее зерцало:
Радуйся, Духа Святаго сладкогласный органе.
Радуйся, преподобне отче наш Косьмо, теплый о нас к Богу молитвенниче!

Кондак 4
Бурю волнующагося житейскаго моря благодатию Божиею безбедно преплывше, отче преподобне, благоразумне разсудив и вменивше яко уметы вся быти, краткость сея жизни и приобретения ради Христа, достигл еси вечноблаженнаго пристанища спасения, идеже со ангелы и всеми святыми поеши Богови: Аллилуиа.

Икос 4
Слышавше поучение наствник духоносных и Отцев древних святыя Киевския Лавры житию подражая, богоносне отче наш Косьмо приснопамятне, непрестанно молитвою и ума трезвостию Богу взывал еси, преподобне, и Той услыша тя воистинну. Тем и яко безплотен на земли пожив, воздержанием страсти умертвил еси и добродетели богоугодныя стяжал еси; сице и мы величаем тя:
Радуйся, сокровище Божественных разумений.
Радуйся, научивыйся исполнению Божественных хотений.
Радуйся, реко, наводненная водою Божия благодати.
Радуйся, тихообразно во смирении и кротости твою жизнь совершивый.
Радуйся, христоподражательныя кротости образ всем бывый.
Радуйся, из под спуда пустыннаго ясно светиши зарями чудес.
Радуйся, преподобне отче наш Косьмо, теплый о нас к Богу молитвенниче!

Кондак 5
Богоявленной звезде, путь верным ко Отцу Небесному указующий, воистину подобен явился еси, вернувшись в родныя края твои, благословенный Косьмо, яко ты учеником, друзьям и врагам, а прежде всего, ближним твоим являл еси образ добродетельной жизни, озарял еси всех окрест тебя сущих светом истины Христовой и ныне, нас, вспоминающих подвизи твоя подвигаеши радостно воспевати Сладчайшему Иисусу, выну тя своею благодатию укреплявшему, ангельское пение: Аллилуйя.

Икос 5
Видевше, яко ты Косьмо блаженне, был еси пастырь и наставник последующым равноангельному житию твоему, возрадовася зело великий князь московский Иоанн и попечение свое ти и обители твоея сотвори, ты бо собор чад твоих духовных к соработничеству тебе привекл еси, образ любве Божественней явил еси, преподобне отче. Сице молим тя: приклони и к нам милосердие Божие и прими благоговейно приносимыя ти величания сия:
Радуйся, покаяния глубокаго, иже есть сердце духовныя жизни, снискавый;
Радуйся, любовию к Богу и человеком пламеневый;
Радуйся, яко тебе призывающия быстро предваряеши.
Радуйся, яко любящих тя от различных бед и напастей изымаеши.
Радуйся, здравия телеснаго подателю.
Радуйся, душевнаго спасения ходатаю.
Радуйся, преподобне отче наш Косьмо, теплый о нас к Богу молитвенниче!

Кондак 6
Проповедник любве милосердныя и ревнитель жития преподническаго, благословенный Косьмо, воистину явился еси, устроив обитель в пределех Яхромских, и прославил еси ея мнозими чудесы и исцелении, такожде и ныне возведи в сердцах верных обители Духа Всесвятаго, да с тобою просвещаюшему и нас преображающему Утешителю Всеблагому воспоим: Аллилуйя.

Икос 6
Возсиял еси аки веры светильник, отче Косьмо, обители твоей такожде и окрестным людем, яко многих верою христианскою озарил еси, невидимый храм Духа Божия в себе нося, чудныя храмы основал еси, такожде и страждующим послужил еси, да вси обрящут врачевание недуг своих душевных и телесных. Сего ради прославлен еси от Подвигоположника Христа, от нас же приемлеши сия похвальныя песни:
Радуйся, плод правды, совершенство добродетелей в себе возрастивый.
Радуйся, милостью наставлениями о спасении душ горевый;
Радуйся, дивнии глаголы благодати Божия в душе своей слагавый;
Радуйся, желанное упокоение в Кресте Христовом обретый.
Радуйся, в верности и стойкости нас всех утверждаяй;
Радуйся, не удалятися от источника животворныя благодати наставляй;
Радуйся, преподобне отче наш Косьмо, теплый о нас к Богу молитвенниче!

Кондак 7
Хотяще выну Господни заповеди исполняти, кроток и незлобив был еси, отче, смирен и прост, и во всех добродетелех благоискусен, тем и Святаго Духа орган явился еси, премудре, научая и вразумляя чада твоя достойно ходити во след Христу, во смирении Тому служащым, спасение подающаго, с покаянием и надеждою воспевающим Ему: Аллилуйя.

Икос 7
Новаго и преблагословеннаго скитскаго жительства наставника тя почитаем, отче наш Косьмо, твоею бо стезею воистинну право ходити в безмолвии пустыни познахом: правый бо путь сего жительства словесы и делы показуя, яко образ одушевлен, самаго себе нам представил еси. И блажен еси истинно, яко, сотворив, научил еси, тем и велий в Царствии Небеснем, по глаголу Господню, нареклся еси. Сице и мы таковыя похвалы приносим ти:
Радуйся, чисто сердце обителью Божией сотворивый.
Радуйся, мир чрез умаление зла и богатство любви источавый;
Радуйся, заветы Евангелия Христова благовестивый;
Радуйся, нищетою духа смиренномудрием облеченный;
Радуйся, плач, омывающий и утешающий душу обретый.
Радуйся, кротостию, яже зло добром побеждаяй себе украсивый;
Радуйся, преподобне отче наш Косьмо, теплый о нас к Богу молитвенниче!

Кондак 8
Странно бе людем теплохладным видети пречудное житие твое, Косьмо богоблаженный, яко все отложив мiрское пристрастие, преподобне, и крест твой на рамо взем, чистым и немятежным умом Христу последовал еси: в пустыни, яко в раи, живый, Тому угодил еси, яко безплотен, на земли жительствуя, постом и молитвою, и всенощными стоянии страсти умертвил еси, молчанием же и богомыслием Богу соединился еси, еще на земле сый, ангельское пение воспевая Ему: Аллилуйя.

Икос 8
Всего себе на служение Богу управил еси, отче богоблаженне, волю Божию выну творя и умом на небесех пребывая; сего ради духовнаго мира созерцатель сподобился еси быти, внутренняго делания высоты молитвой непрестанной достигл еси, отонудуже умными очами сердечными Свет присносущный воистинну сподобился еси зрети, имже вельми озаренный сам световиден верным показался еси, темже приими от нас таковая:
Радуйся, яко руце твоя в молитве многажды простирал еси;
Радуйся, яко нозе твоя во бдениих зело претрудил еси.
Радуйся, словеса Божия на сердце твоем начертавый;
Радуйся, главо, о Господе присно любомудрствующий;
Радуйся, заре, от нощи к Богу утреннюющий.
Радуйся, заповеди Евангельския до конца совершивший;
Радуйся, преподобне отче наш Косьмо, теплый о нас к Богу молитвенниче!

Кондак 9
Все отложив мiрское пристрастие, отче преподобне, и крест твой на рамо взем, чистым и немятежным умом Христу последовал еси: служение игуменское с деланием внутренним умело и багоплоднейше сопрягая, и тако Христу угодил еси, ангельски на земли жительствуя, богомыслием Богу соединился еси, и ныне со ангелы и праведников соборами воспеваеши Творцу: Аллилуйя.

Икос 9
Вития многовещанныя и риторы доброгласныя по достоянию не возмогут возславити тя, богосне отче наш Косьмо, и воспети святость жития и служения твоего, милосердие, веру велию, яко всем житием и подвиги Церковь Русскую прославил еси, преподобне, яко достигл еси обожения, и сонму святых приобщился еси. Ныне со всеми святыма и ангелы молишися о нас, вопиющих ти сице:
Радуйся, душею близость Бога, Его любовь восприявый.
Радуйся, Христа Бога в сердце твоем вместивый;
Радуйся, имя Его спасительное в уме всегда носивый.
Радуйся, молитвенную сладость сердцем твоим познавый;
Радуйся, с верою и любовию за весь мир моливыйся.
Радуйся, слез благодатных поток умилительный источивый.
Радуйся, преподобне отче наш Косьмо, теплый о нас к Богу молитвенниче!

Кондак 10
Спасительнаго подвига течение многотрудное совершая, преподобне отче наш Косьмо, воистину сна твоим очим не дал еси, ниже плоти твоей упокоения, уготовал еси в себе место Господеви и селение Богу Иаковлю, тем и во дворы Его, радуяся, вшел еси, идеже всех веселящихся жилище, но, отче приснопамятне, о нас моляся не престай, да и мы возможем с тобою купно Господеви воспевати: Аллилуйя.

Икос 10
Стена твердая и прибежище благоутишное всем с молитвою теплою и верою несомненною к заступлению твоему притекающим явился еси, ищущим спасения токи благодати Божия источая, яко Господеви Всемилосердному трудолюбно поработав и вражию всю силу, козни и ловительства, яко паучину, разтерзав, победоносец показался еси и ко Христу венценосец востекл еси, радуяся. Сего ради и мы славословие тебе приносим сице:
Радуйся, ран греховных врачивателю благоискусный;
Радуйся, сердец скорбящих утешителю благословенный;
Радуйся, верными последователями Сына Божия нас быти сподобляющий;
Радуйся, желание к деланию добродетелей внушающий;
Радуйся, возлагающим упование на тя росту духовному пособствующий;
Радуйся, всех с верою приходящих к тебе благодатно освящающий;
Радуйся, преподобне отче наш Косьмо, теплый о нас к Богу молитвенниче!

Кондак 11
Пение немолчное даже до днесь совершается у святыя раки твоей, угодниче Божий Косьмо: мнози бо, в нуждах сущии, ведят тя помощника благопоспешлива и молитвенника благоуветлива. Темже ныне вся Владимирская земля благодарне вопиет прославльшему тя Богу: Аллилуия.

Икос 11
Светозарное светило, лучами христианских добродетелей сияющее, явился еси, небо церковное украшая, богомудре, сице просим тя, преподобне Косьмо, не забуди и ныне нас, воспоминающих подвизи святаго жития твоего и песнь усердно тебе приносящым ходатайствуй во спасение: тя бо, о всеблаженне, молитвенника и предстателя ко Господу стяжавше, надежды не отщетимся, верно тя чтущих и сице вопиющих:
Радуйся, Бога Отца Безначального благоговейный служителю.
Радуйся, Ипостаснаго Бога Слова неумолчный провозвестниче.
Радуйся, Бога Духа Всесвятаго избранное жилище.
Радуйся, Живоначальныя Троицы носило и похваление.
Радуйся, умственные идолы наши скоро сокрушающий;
Радуйся, ко Христу Распятому взоры духа направляющий;
Радуйся, преподобне отче нашКосьмо, теплый о нас к Богу молитвенниче!

Кондак 12
Благодать данную ти от Бога ведяще благоговейно поклоняемся святым мощем твоим, лобызаем святолепное изображение лика твоего и просим тя, святый и многомилостивый покровителю наш: призри на ны, по Бозе и Богородице на тя надежду возлагающих и вознеси о нас теплую молитву к Богу, да, грех ради наших, не отвратит Лица Своего от нас, егда вопием Ему: Аллилуиа.

Икос 12
Воспевая праведное житие твое, величаем тебя, святый отче Косьмо, славим праведное житие твое, заступниче преблагий наш, и просим тя: паки воспламени среди народа российскаго огонь веры Христовой, дабы ревнуя благочестивым деяниям прародителей своих, люди сии вернулися ко Спасителю и заповедем Его. Мы же с надеждою паки зовем ти сице:
Радуйся, от суеты многообразной ум наш освобождаяй;
Радуйся, к познанию благаго промысла Божия нас обращаяй;
Радуйся, к неленостному творению молитвы привлекаяй;
Радуйся, благоплодностью души наша наполняющий;
Радуйся, благословляти всякаго человека научающий;
Радуйся, от теплохладности и суетности сердца наша исцеляющий;
Радуйся, преподобне отче наш Косьмо, теплый о нас к Богу молитвенниче!

Кондак 13
О святый преподобный и богоносный отче наш Косьмо! Призри на нас немощных, во многия согрешения по вся дни впадающих и благоприятным твоим ходатайством избави нас от всякаго искушения противнаго и страх Божий всели в сердца наша, да в добродетели, творении дел благих и богоугодных поживше в веце сем, блаженныя кончины жизни сподобимся и со всеми в радости нескончаемей воспоем: Аллилуиа.

Молитва ко преподобному и богоносному отцу нашему Косьме Яхромскому
О, преподобне отче наш Косьмо, аще и скончал еси свою временную жизнь, но духом своим не отступай от места сего святаго. Молим тя, имея дерзновение ко Всемилостивому Спасу и Пречистой Его Матери, принеси к престолу Царя всех наши недостойныя и грешныя моления о скорбех, нуждах и напастях наших; не остави твоею помощию. Укрепи нас шествовати по стезям заповедей Господних, и безропотно нести крест свой до конца. Сохрани нас от врагов видимых и невидимых. Даруй нам христианскую кончину и на страшном суде Христовом явися нашим заступником и ходатаем. Да твоима молитвами соблюдаемы и сохраняемы пребудем, славяще Святую Троицу Отца и Сына и Святаго Духа. Аминь.[/spoiler]

Раб божий Константин

Животворящий Крест Господень

В храме святителя Иоанна Златоуста

Села Годеново

Явление Животворящаго Креста Господня празднуется

29 мая / 11 июня

(Крест явлен 29 мая 1423 года).

[spoiler]Акафист

Честному и Животворящему Кресту Господню

Кондак 1

Избранному Царем Славы и освященному крестною смертию Искупителя мира, чудодейственную силу имущему древу, составим вернии похвалу и радостно возопием: Радуйся, честное Древо, на нем бо совершися таинство всемирнаго искупления.

Икос 1

Ангельския силы, яко Божии служителии, окрест Креста Господня невидимо предстоящии, ужасающася, и поносную на земли смерть Иисусову на небеси воспеваша; мы бо, недостойнии, знамением Честнаго Креста Господня освящаяся, радостно взываем: Радуйся, честное Древо, кровию Богочеловека освященное; Радуйся, честное Древо, прославльшееся послушанием Христовым. Радуйся, честное Древо, освободившее нас от ада; Радуйся, честное Древо, низложение диавола. Радуйся, честное Древо, возглашение силы Иисусовой; Радуйся, честное Древо, на нем бо совершися таинство всемирнаго искупления.

Кондак 2

Видящи Тя, на Кресте висяща, вся Силы Небесныя, лица закрывающе, хваляша и воспеваша Твое величие, Живодавче Христе; мы бо, на земли со страхом и трепетом пред Святым Твоим Крестом предстоя, воспеваем радостно песнь: Аллилуиа.

Икос 2

Разум неуразуменный, знамением Честнаго и Животворящаго Креста Господня дивно просвещающийся, со страхом и любовию поклоняется святому Древу и непрестанно воспевает сице: Радуйся, Честный Крест Христов, из мертвых воскрешающий; Радуйся, Честный Крест Христов, проявляющий истину. Радуйся, Честный Крест Христов, на нем бо Иисус волею распяся и гвоздьми бысть пригвожден; Радуйся, Честный Крест Христов, на нем бо Святая Жертва принесеся. Радуйся, честное Древо, на нем бо совершися таинство всемирнаго искупления.

Кондак 3

Силою Честнаго и Животворяшаго Креста Господня бесы низлагаются, очищается нечистое житие наше, греховные помыслы отгоняются, озаряется чистотою сердце наше; того ради с верою творя крестное знамение и с благоговением взирая на изображение страданий Христовых, поем Богу: Аллилуиа.

Икос 3

Имея всегда пред очима нашима Крест Святый, осеняющий и освящающий святые храмы христианстии, охраняющий святыню Господню, мы со слезами благодарения воспеваем сице: Радуйся, честное Древо, источниче благ вечных; Радуйся, честное Древо, освященное плотию и кровию Богочеловека. Радуйся, честное Древо, Древо чудодейственное; Радуйся, честное Древо, Древо треблаженное. Радуйся, честное Древо, Древо жизни и спасения; Радуйся, честное Древо, на нем бо совершися таинство всемирнаго искупления.

Кондак 4

Бурю страстей лютых силен угасити Святый и Всечестный Крест Христов, той бо меч духовный, щит верных, оружие всесильное и знамение всепобеждающее, сего ради и мы недостойнии в веселии взываем Богу: Аллилуиа.

Икос 4

Слыша учение Христово, веруем в тайну спасительного искупления, поклоняемся страстем Христовым, лобызаем Крест Всесильный и радостно взываем сице: Радуйся, Честный Крест Христов, угасивший ярости пламя; Радуйся, Честный Крест Христов, поразивший богоотступников. Радуйся, Честный Крест Христов, победивший полчища вражии; Радуйся, Честный Крест Христов, отсекший главу змиеву. Радуйся, Честный Крест Христов, торжество веры и надежды христиан; Радуйся, честное Древо, на нем бо совершися таинство всемирнаго искупления.

Кондак 5

Боготочный источник исцелений бысть нам Крест Чудодейственный, на нем бо Христос волею пострада нашего ради спасения, и Божественныя длани Своя распростерши, любовию Отчею с Голгофы объя всю вселенную, сего ради возопием Ему, Богу нашему, песнь: Аллилуиа.

Икос 5

Видевши вси языцы величие славы Креста Господня и чудодейственную силу изображения и знамения его, увероваша во Святую, Живоначальную и Нераздельную Троицу и поклонишася Кресту Всечестному, сего ради взываем радостно: Радуйся, честное Древо, силою своею на добро нас вразумляющее; Радуйся, честное Древо, силою своею нас от болезней исцеляющее. Радуйся, честное Древо, славою своею вся вражия силы в бегство обращающее; Радуйся, честное Древо, славою своею венценосных царей прославляющее. Радуйся, честное Древо, величием своим их царство возвышающее; Радуйся, честное Древо, на нем бо совершися таинство всемирнаго искупления.

Кондак 6

Проповедником Богоносным явися честное Древо, из него бо бе сооружен Крест Христов, Крест четвероконечный, трисоставный, его бо земля чудодейственно израсти нетленным и зело благоухающим. Крест - покров беспомощных, на нем бо Христос волею заклан бысть. Ему бо, Спасителю мира, приносим песнь: Аллилуиа.

Икос 6

Возсиял еси яко солнце правды, Всечестный Крест Христов, в недрах земли сокровенный, несколько столетий бездушными камнями яко сокровище сберегаемый и на радость всему миру обретенный, Ему бо велегласно возопием: Радуйся, Честный Крест Христов, молитвами и усердием благочестивой царицы Елены найденный; Радуйся, Честный Крест Христов, на высоту патриархом Макарием воздвигнутый для торжественного поклонения всеми языцами. Радуйся, Честный Крест Христов, посрамивший идолопоклонство и неверие; Радуйся, Честный Крест Христов, призвавший хулителей к покаянию. Радуйся, Честный Крест Христов, яко ты Древо чудодейственное и Христоносное; Радуйся, честное Древо, на нем бо совершися таинство всемирнаго искупления.

Кондак 7

Хотяй проявити милосердие Свое Спаситель мира к роду человеческому, волею приемлет поношение, присуждается к позорной смерти, ко Кресту пригвождается и крестною смертию смерть попирает, тем бо и мы поем Ему: Аллилуиа.

Икос 7

Дивное зрелище является мирови: Богочеловек распинается, руце и нозе пригвождаются, ребра Его прободаются, страданиями Его и уничижением очищаются раны греховнаго человечества. Крест Христов является торжественно победоносным знамением Славы Божией; сего ради взываем сице: Радуйся, честное Древо, смирения образ; Радуйся, честное Древо, апостолов похвало. Радуйся, честное Древо, преподобных утверждение; Радуйся, честное Древо, мучеников крепосте. Радуйся, честное Древо, пустынножителей ограждение; Радуйся, честное Древо, на нем бо совершися таинство всемирнаго искупления.

Кондак 8

Странное чудо! Позорный крест превратися в Древо жизни и спасения, той бо вразумляет, освящает и от болезней душевных и телесных исцеляет с верою и любовию непрестанно вопиющих Богу: Аллилуиа.

Икос 8

Все греховное житие наше очищается Чудодейственным Крестом Спасителя мира, послужившим к примирению Божества с преступным человечеством, сего ради мы благодарственно возопием: Радуйся, Честный Крест Христов, являющий нам любовь и долготерпение Божие; Радуйся, Честный Крест Христов, им бо совершися призвание языков. Радуйся, Честный Крест Христов, явление благости благоуповающим; Радуйся, Честный Крест Христов, глубина упования душ, любящих Господа. Радуйся, Честный Крест Христов, сила и радость всех христиан; Радуйся, честное Древо, на нем бо совершися таинство всемирнаго искупления.

Кондак 9

Всякая житейская буря сокрушается силою крестных страданий Богочеловека Иисуса, искупивших весь мир, тем бо и мы, чествуя Всечестнаго Креста Господня святое знамение, смиренно приносим Богу любви и славы радостную песнь: Аллилуиа.
Икос 9

Витийствующий язык не может изрещи достойныя похвалы Древу всечестному, из него бо составлен бысть Чудодейственный Крест Христов, благоухающий любовию страдальца Иисуса Христа, сего ради и мы, недоумея достойно восхвалити Тя, со слезами возопием: Радуйся, честное Древо, торжество Церкви Христовой; Радуйся, честное Древо, врачевство наше и радость. Радуйся, честное Древо, освящение всех путей жизни нашей; Радуйся, честное Древо, всем христианам вспоможение. Радуйся, честное Древо, всех немощных сила и подкрепление; Радуйся, честное Древо, на нем бо совершися таинство всемирнаго искупления.

Кондак 10

Спасти хотя мир, длани Своя пречистыя Христос на Древо вознес и древо преслушания заменися Древом Сыновняго к Богу Отцу послушания, рука невоздержания, низвергшая Адама, распростертыми руками Богочеловека соединяет Своею любовию все концы мира; тем бо и мы торжественно взываем победную песнь: Аллилуиа.

Икос 10

Стена еси, ограждающая нас от всех бед и напастей, Крест Всечестный, цельбоносный источниче всех языков, осеняющихся святым твоим знамением во имя Отца и Сына и Святаго Духа, сего бо ради с веселием взываем ти: Радуйся, Честный Крест Христов, кровию Богочеловека обагренный; Радуйся, Честный Крест Христов, цветами райскими благоухающий. Радуйся, Честный Крест Христов, лучами веры нас озаряющий; Радуйся, Честный Крест Христов, лучами надежды нас подкрепляющий. Радуйся, Честный Крест Христов, лучами любви нас обогащающий; Радуйся, честное Древо, на нем бо совершися таинство всемирнаго искупления.

Кондак 11

Пение похвальное приносим ти, Божественное, Животворящее Древо Креста Господня, верных осеняющее, неверных обличающее и всех нас ограждающее от всякаго врага и супостата, сего бо ради вопием песнь: Аллилуиа.



Икос 11

Поющии твоя чудеса, Всесильный Крест Христов, мы с верою и благодарением преклоняем колена сердца нашего, со слезами лобызаем святые нози страдальца Иисуса, поклоняемся страстем Христовым и тако возопием: Радуйся, честное Древо, скипетр царей христианских непреложный; Радуйся, честное Древо, держава всей вселенной. Радуйся, честное Древо, основание благочестия; Радуйся, честное Древо, водам освящение. Радуйся, честное Древо, полям и садам плодоносие; Радуйся, честное Древо, на нем бо совершися таинство всемирнаго искупления.

Кондак 12

Благодать Твою всесильную, Господи, являет нам Древо треблаженное, той бо осеняет ум наш, вразумляет и научает пети непрестанно песнь победную: Аллилуиа.

Икос 12

На гору Голгофскую водружен бысть Крест Честный, и Ты, Создатель мира, вознесен бысть на нем яко в позор мирови, мы же, вернии, лобызаем пречистыя язвы Твоя, поклоняемся Честному Кресту Твоему, сице взывая: Радуйся, Честный Крест Христов, предназначенный Богом для таинства искупления; Радуйся, Честный Крест Христов, яко ты еси радостное знамение нашего спасения. Радуйся, Честный Крест Христов, знамение нашего освобождения; Радуйся, Честный Крест Христов, страстей наших умерщвление. Радуйся, Честный Крест Христов, совести нашей успокоение; Радуйся, честное Древо, на нем бо совершися таинство всемирнаго искупления.

Кондак 13

О Пречестное, Божественное и Животворящее Древо Креста Господня! Чудодейственною твоею силою огради мя, грешнаго, осеняющаго с верою чело мое и перси моя и вся составы и уды моя святым твоим знамением во имя Отца и Сына и Святаго Духа, во славу Святыя Троицы, во Единице прославляемой, и благодарственно воспевающаго песнь победную: Аллилуиа. Аллилуиа. Аллилуиа.



(Этот кондак читается трижды, затем икос 1 и кондак 1)





Молитва Честному и Животворящему Кресту Господню

О дивный чудодейственною силою четвероконечный и трисоставный Крест Христов, у подножия твоего во прах распростертый, поклоняюся ти, честное Древо, отгоняющее от нас всякое демонское стреляние и освобождающее нас от всех бед, скорбей и напастей. Ты бо еси Древо жизни, ты еси очищение воздуха, освящение святаго храма, ограждение нашего жилища, охранение одра моего, просвещение ума моего, сердца и всех моих чувств. Твое святое знамение ограждает мя со дня моего рождения, просвещает мя со дня моего крещения, оно со мною и на мне во вся дни живота моего на суше и на водах, оно же сопровождать мя будет до могилы, осенит и прах мой, оно бо, святое знамение Чудодейственнаго Креста Господня, возвестит всей вселенней о часе всеобщаго воскресения мертвых и последняго Страшнаго и праведнаго Суда Божия.

О Кресте Всечестный! Осенением твоим вразуми, научи и благослови мя, недостойнаго, всегда несомненно верующаго в непобедимую силу твою, огради мя от всякаго врага и супостата, исцели вся недуги моя душевныя и телесныя.

Господи, Иисусе Христе Сыне Божий! Силою Честнаго и Животворящаго Креста Твоего помилуй и спаси мя, грешнаго. Аминь.





Тропарь, глас 1

Спаси, Господи, люди Твоя, и благослови достояние Твое, победы на сопротивныя даруя, и Твое сохраняя Крестом Твоим жительство.
[/spoiler]

Раб божий Константин

Иной акафист.
[spoiler]Кондак 1
О, Преблаженнейший Кресте и всечестный, Тебе поклоняемся вернии и величаем, радующеся Божественному Твоему Воздвижению. Ты же, яко знамение победы и оружие непреоборимое, огради и покрый своею благодатию вопиющих тебе: Радуйся, Кресте всеблаженный.

Икос 1
Ангели с небесе невидимо окружиша живоносный Крест в благоговении, и видяще его, яко светоносною благодатию своею ясно осеняет верныя, стояху, взывающе к нему тако:
Радуйся, страже вселенныя; радуйся, слава Церкви.
Радуйся, исцеления изобильно источаяй; радуйся, пределы мира освещаяй.
Радуйся, источниче чудес, живот благоухаяй; радуйся, блаженнейший, благодать являяй.
Радуйся, Божественное подножие бывый; радуйся, на поклонение всех явленный.
Радуйся, чаше, нектара исполненная; радуйся, озарение вышняго облистания.
Радуйся, яко тобою вся тварь благословляется; радуйся, яко тобою поклонение Творцу возсылается.
Радуйся, Кресте всеблаженный.

Кондак 2
Видящи в себе желание обрести Крест, Елена со дерзновением глаголет царю: Желаемое душе твоей явися благосердым моему усердию. Сего ради, ищущи сильнейшее, якоже рекл еси, знамение победы твоея, вопию: Аллилуиа.

Икос 2
Разумное известие неуразумеваемо бывшее уразумевши, царица абие глаголет служителем: Потщитеся скоро извлещи от недр земных и подъяти Крест. Увидев же сей, со страхом возопи тако:
Радуйся, образе истинныя радости; радуйся, древляго проклятия упразднение.
Радуйся, сокровище, в земли злобою сокрываемое; радуйся, знамение, на небеси звездами образованное.
Радуйся, огнеобразный Кресте, четырьми лучами пламенеяй; радуйся, предзримая иногда Лествице, на высоте утвержденная.
Радуйся, Ангелом безмятежное и дивное чудо; радуйся, демонов многоплачевное поражение.
Радуйся, сокровище всесладкое Слова; радуйся, пламень заблуждения угашающий.
Радуйся, бедствующих заступниче; радуйся, подвизающихся твердый наставниче.
Радуйся, Кресте всеблаженный.

Кондак 3
Сила крестнаго древа явися тогда ко уверению истинному всех, воскреси бо безгласнаго мертвеца, и се бысть тогда дивное зрелище всем хотящим получити спасения, егда воспеша вси: Аллилуиа.

Икос 3
Имущи непобедимое оружие, Елена потщися к сыну своему. Той же абие возрадовася зело и признав великий Крест, в радости возопи к нему таковая:
Радуйся, вместилище света; радуйся, хранилище жизни.
Радуйся, дарований духовных подателю; радуйся, плавающим по бурному морю пристанище.
Радуйся, алтарю, Христа, яко жертву носяй; радуйся, лоза, ветвь имущая, таинственное вино источающую.
Радуйся, яко ты царство язык охранявши; радуйся, яко ты главы драконов сокрушаеши.
Радуйся, ясное веры познание; радуйся, всего мира избавление.
Радуйся, смертным Божие благословение; радуйся, ходатая за смертных пред Богом на себе носивый.
Радуйся, Кресте всеблаженный.

Кондак 4
Бурею ревности Божественныя внутри объята бывши, Елена, усердно искаше и обрете Крест в земли сокрываемый и на небе явлейся царю, и воздвиже сей, егоже людие видевше и верою возопиша: Аллилуиа.

Икос 4
Слышаша вси, яко возсия в мире Крест, яко солнце, и вси, наслаждающеся светом, потщахуся к нему, яко к звезде, и созерцающе виновника благ, воздвизаема освященныма рукама, воспеша Ему:
Радуйся, заре мысленнаго Солнца; радуйся, источниче неисчерпаемаго благоухания.
Радуйся, Адама и Евы воззвание; радуйся, князей ада умерщвление.
Радуйся, яко воздвизаемый, нас с собою воздвигаеши; радуйся, яко поклоняемый, души наши освящаеши.
Радуйся, Апостолов в мире проповедническая слава; радуйся, борцев противу мира сего благодатная сила.
Радуйся, неверных обличение; радуйся, верных похвало.
Радуйся, яко тобою низвержеся ад; радуйся, яко тобою прииде благодать.
Радуйся, Кресте всеблаженный.

Кондак 5
Богоподобное древо увидевше, вси да прибегнем ныне к покрову его, держаще сие, яко оружие, обратим в бегство полки врагов и коснувшеся неприкосновеннаго, воззовем ему: Аллилуиа.

Икос 5
Видевый свет с небесе, показуяй звездами знамение Креста и в нем совершенную победу над враги, великий Константин потщися извлещи из земли древо Креста и возва к нему сице:
Радуйся, неизреченнаго совета исполнение; радуйся, благочестиваго народа возношение.
Радуйся, полки врагов в бегство обращаяй; радуйся, демонов, яко пламя сожигаяй.
Радуйся, небесный скиптре Царя верных; радуйся, непобедимое оружие христолюбиваго воинства.
Радуйся, высокомерие варваров ниспровергаяй; радуйся, о душах наших попечение прилагаяй.
Радуйся, от многих зол защищение; радуйся, великих благ награждение.
Радуйся, яко тобою христоносцы радуются; радуйся, яко тобою неверные печалятся.
Радуйся, Кресте всеблаженный.

Кондак 6
Крест Господень явися, яко лествица, небес достигающая, возводя всех от земли на высоту небесную, да тамо обитати нам вкупе с лики ангельскими, оставльше ныне сущее яко не сущее, и научившеся пети: Аллилуиа.

Икос 6
Возсияв светом всем сущим во аде, Спасе, Ты облистал еси бывших в преисподней; привратницы же адские не терпяще зрети блистания Твоего, падоша, яко мертвии, избавлении же от них, видяще ныне Крест, возопиша:
Радуйся, мертвых воскресение; радуйся, печальных утешение.
Радуйся, адских хранилищ разорение; радуйся, райскаго наслаждения предвкушение.
Радуйся, жезле, египетское воинство потопивый; радуйся, жезле, израильския люди напоивый.
Радуйся, животворящее древо, разбойника спасение; радуйся, благовонный шипок, благочестивых благоухание.
Радуйся, духовнаго глада утоление; радуйся, печате, от верных восприятая.
Радуйся, двере таинств; радуйся, яко из тебе божественныя струи проистекают.
Радуйся, Кресте всеблаженный.

Кондак 7
Хотящу Моисеови избавити многострадальныя люди от гонителя, ты дан был еси ему, яко жезл, но познан был еси им, яко прообраз Божий, сего ради изумлен был еси, о Кресте, могуществом твоим и возопил еси: Аллилуиа.

Икос 7
Дивный закон давый иногда Боговидцу на Синаи, пригвожден бысть волею ко Кресту за люди беззаконныя, и упраздни древлее проклятие закона, да мы вси, видяще ныне Креста силу, воззовем ему:
Радуйся, падших возстание; радуйся, миропоклонников падение.
Радуйся, Воскресения Христова обновление; радуйся, монашествующих Божественное услаждение.
Радуйся, древо благосеннолиственное, имже покрываются вернии; радуйся, древо пророчески глаголющее, на земли возросшее.
Радуйся, Отечеству на враги поможение; радуйся, правления народнаго сильное защищение.
Радуйся, Судии Праведнаго явление; радуйся, смертных согрешающих осуждение.
Радуйся, сирот заступниче; радуйся, нищих обогатителю.
Радуйся, Кресте всеблаженный.

Кондак 8
Странное чудо видяще, призывати будем к новой жизни, возвышающеся умы до небес, яко сего ради Христос распят бысть на кресте и плотию пострада, хотя привлещи на высоту вопиющих Ему: Аллилуиа.

Икос 8
Сниде с высоты Единое Предвечное Слово, рождшееся от Девы Матери, и явльшееся в мире, яко смиренный человек. Сие восприят на Себе Крест и подаде живот взывающим Ему:
Радуйся, оружие мира; радуйся, путешествующим основание.
Радуйся, спасающимся премудрость и утверждение; радуйся, погибающим вразумление и преткновение.
Радуйся, безсмертное и живоносное произрастение; радуйся, цвете, произрастивший наше спасение.
Радуйся, яко земная с небесным соединяеши; радуйся, яко сердца земнородных просвещаеши.
Радуйся, яко тобою тление изгнася; радуйся, яко тобою скорбь упразднися.
Радуйся, неизмеримое блаженство добрых; радуйся, многоименная слава верных.
Радуйся, Кресте всеблаженный.

Кондак 9
Всякое нечестивое естество демонов паде, и устыдися род евреев, видяще, како вси с любовию поклоняются Кресту, всегда изобильно подающему исцеления взывающим ему: Аллилуиа.

Икос 9
Витий злоречивых умолкоша потоцы мудрований, егда Ты распят был еси, Христе, на Кресте: недоумевают бо еже како и на Крест восшел еси, и тления избежал еси. Мы же, прославляюще воскресение Твое, возглашаем:
Радуйся, Премудрости Божией высото; радуйся, промышления Его глубино.
Радуйся, безумных суесловов неведение; радуйся, неразумных предрецателей погубление.
Радуйся, яко Воскресение Христово нам являеши; радуйся, яко страдания Его в нашей памяти обновляеши.
Радуйся, преступление первых человек разрешивый; радуйся, врата райския открывый.
Радуйся, от всех ублажаемый; радуйся, неверным людем противляемый.
Радуйся, больным врачу; радуйся, призывающим тя в помощь защитниче.
Радуйся, Кресте всеблаженный.

Кондак 10
Спасти хотяй мир, Управитель мира сниде к нам таинственно и, Бог сый, Крест претерпе за ны, подобен нам быв во всем. Сего ради, свободив ны от всех, слышит: Аллилуиа.

Икос 10
Стену неразрушимую Божественную вселенней почитаем тя, живоносный Кресте: зане соделавый тя Творец неба и земли распростре на тебе руце, научив всех возглашати:
Радуйся, основание благочестия; радуйся, наградо наследствия.
Радуйся, мысленнаго Амалика прогоняяй; радуйся, руками Иакова прообразованный.
Радуйся, яко тобою древния образы обновишася; радуйся, яко тобою пророческия предречения исполнишася.
Радуйся, Спасителя всех носивый; радуйся, губителя душ упразднивый.
Радуйся, яко тобою мы с Ангелы совокупихомся; радуйся, яко тобою мы светом просветихомся.
Радуйся, яко почитающе, поклоняемся тебе; радуйся, яко восклицающе, взываем тебе.
Радуйся, Кресте всеблаженный.

Кондак 11
Пение всякое побеждается, аще потщится последовати обилию чудес твоих: многочисленныя бо похвалы, аще принесем ти, честный Кресте, ничтоже совершаем достойно, аще дал еси нам, тебе вопиющим: Аллилуиа.

Икос 11
Светоносное сияние подадеся Животворящим Крестом сущим во тьме: приимше бо невещественный свет, той всем освещает путь к божественному познанию, воздвигаемый же ныне возбуждает ны воспевати:
Радуйся, светило, сущих во тьме облистающее; радуйся, звездо, мир озаряющая.
Радуйся, молние, христоубийцы ослепляющая; радуйся, яко гром враги устрашаяй.
Радуйся, яко соборы православных украсил еси; радуйся, яко алтари идольские сокрушил еси.
Радуйся, яко знамение твое на небеси явися; радуйся, яко благодатию твоею лесть отгнася.
Радуйся, умерщвление плоти знаменуяй; радуйся, возстание страстей убиваяй.
Радуйся, яко на тебе Христос распят бысть; радуйся, яко тобою весь мир спасен бысть.
Радуйся, Кресте всеблаженный.

Кондак 12
Благодать даровати людем восхотев, Христос руце на Кресте распростре, призываяй вся языки, и дарует царство небесное всем поющим Ему и с верою вопиющим: Аллилуиа.

Икос 12
Поюще тебе песнь с любовию, Животворящий Кресте Господень, прославляем тя, яко распятый на тебе плотию Владыка горних сил освяти и прослави тя и научи всех взывати тебе:
Радуйся, мысленный мечу; радуйся, святое святых созерцание.
Радуйся, пророков и праведных предвозвещение; радуйся, Христова светоносная победа.
Радуйся, красото и венец святителей благочестивых; радуйся, сило и крепость иереев благоговейных.
Радуйся, истины достославное украшение; радуйся, спасения благоприятное пристанище.
Радуйся, всех светлое радование; радуйся, агарян попрание.
Радуйся, света нетленнаго лампадо; радуйся, души моея усладо.
Радуйся, Кресте всеблаженный.

Кондак 13
О, всеми воспеваемый Кресте всечестный, носивый иногда на себе всех святых Святейшее Слово! Ты имаши дарование от всякия беды избавить нас, и от вечныя муки избави о тебе вопиющих: Аллилуиа.

Этот кондак читается трижды, затем снова 1-й икос: Ангели с небеси: и 1-й кондак: О, Преблаженнейший Кресте:
Молитва
О, всесвятый и всечестный Кресте Господень! Прежде презренное и постыдное орудие казни, ныне же почитаемый и прославляемый, яко оружие спасения! Како по достоянию твоему возмогу воспевати тя? Како восприиму дерзновение принести тебе мое поклонение, аз грешный и недостойный? Точию неизреченное человеколюбие пригвожденнаго на тебе Богочеловека Христа Спасителя нашего укрепляет мя немощнаго. Сего ради, надеяся на снисхождение Его, вопию тебе: Радуйся, Кресте, основание Церкве, вселенныя утверждение, прибежище верным! Крест — демонов истребление, нечестивых погубление, неверных вразумление! Крест — дев целомудрие, Крест — праведных облегчение, заблуждающихся путь, безстыдных раскаяние, неимущим богатство, плавающим кормчий, слабым сило, сражающихся охранение, сирот питатель, вдов заступниче, неимущим упование, единая точию надежда! Ты еси воистину древо познания, на немже Единородный Сын Божий искупил еси неизмеримые долги неблагодарнаго человека Богу и Создателю его; ты еси жезл Моисеев чудотворяй, иже отверзе нам путь в рай, услаждаяй скорби наши, исцеляяй болезни наши. Ты еси Соломонов одр, на немже Царственный от Иуды Лев, плотию уснув воскресе тридневен во славе, яко победитель ада. Сего ради по достоянию воспеваю и прославляю тя, богоблаженнейший Кресте, всею душею своею в вечер и заутра и во дни, полагая на тя все упование спасения моего. Аминь.[/spoiler]

Раб божий Константин

ЧЕСТНОМУ И ЖИВОТВОРЯЩЕМУ КРЕСТУ ГОСПОДНЮ третий.
[spoiler]Кондак 1
     Приидите, христоименитии людие, составим похвалу честному Кресту, на нем же Христос, Царь славы, руце распростер, возведе нас на первое блаженство, из негоже низпадохом прелестию змиевою. Ты же, о пресвятый Кресте, яко имеяй присущую тебе силу Распятаго Христа, спасай и сохраняй от всяких бед любовно зовущия ти:
     Радуйся, честный Кресте, всерадостное знамение нашего искупления.


Икос 1
     Ангелов лицы, яко Божии служителие, Крест обстояще, вольную страсть Христа Жизнодавца прославляют. Мы же страданьми Того вечныя смерти избавльшеся, подражая горним силам, радостно взываем:
     Радуйся, Кресте, яко на тебе Христос Бог наш, волею руце распростер, спасение наше содела;
     Радуйся, яко распростершимся на тебе Христом преступление Адама и Евы, простерших руце ко древу запрещенному, упразднися.
     Радуйся, яко воздвижену бывшу на тебе, аки преступну, Законодавцу, древняя клятва, яже на нас бывшая, потребися;
     Радуйся, яко содеявшимся на тебе странным таинством род человеческий от тли смертныя свободися.
     Радуйся, яко Пострадавшим и Умершим на тебе жало смерти сокрушися;
     Радуйся, того ради страдания Бог с человеки примирися.
     Радуйся, честный Кресте, всерадостное знамение нашего искупления.


Кондак 2
     Видя падших человеков, Господи, Ты вочеловечився крест и смерть вольно плотию претерпел еси за род наш, да от смерти вечныя избавиши исповедающия Тя, Сына Божия, и вопиющия Ти: Аллилуия.


Икос 2
     Разум человеч изнемогает в постижении велия тайны Твоего, Христе, воплощения и вольнаго за ны страдания: како Ты, Бог сый безстрастный, страсть крестную, яко человек, претерпел еси и сие орудие смерти Твоея соделал еси источником жизни и спасения всем благочестно в Тя верующим и хвалебно воспевающим:
     Радуйся, Кресте, на нем же содеяся таинство от века предопределенное;
     Радуйся, яко на тебе совершися наше искупление, многообразне во образех и сенех предъявленное.
     Радуйся, яко умерый на тебе Жизнодавец кровь и воду источи, ими же грехи наша омываются;
     Радуйся, яко каплями святейшия крове Его греховныя струпы душ наших очищаются.
     Радуйся, Кресте, якоже древо животное, еже есть посреде рая Божия, христианом вожделенный;
     Радуйся, плодами безсмертия умно нас питающий и надеждою жизни вечныя малодушие наше ободряющий.
     Радуйся, честный Кресте, всерадостное знамение нашего искупления.


Кондак 3
     Крест Твой, аще и древо видимо есть существом, но Божественною одеяно есть силою, и чувственное мира выявляемо умно наше чудотворит спасение, подвизая пети Тебе: Аллилуия.


Икос 3
     Имуще пред очима нашима Крест пресвятый, святолепным поклонением той почитаем распеншагося ради на нем Спаса Христа, и лобызающе взываем:
     Радуйся, Кресте, прославленный послушанием и страданием Христовым;
     Радуйся, возвеличенный возвышением на тебе Сына Божия, Иже весь мир от падения Адамля воздвиже.
     Радуйся, яко сбывшагося на тебе ужаснаго таинства земля ужасеся и вострепета, аки бы хотя поглотити законопреступныя;
     Радуйся, яко заклавшуся на тебе Агнцу Божию завеса храма раздрася и жертва ветхозаветная упразднися.
     Радуйся, Кресте, яко распадшуся под тобою камню, каменносердечнии роди еврейстии неверием от Бога отпадоша, благодати же священства и царства лишишася;
     Радуйся, яко омрачившуся солнцу в страсти Христовой, нощь многобожия прейде и свет веры возсия.
     Радуйся, честный Кресте, всерадостное знамение нашего искупления.


Кондак 4
     Бурею злобы дышуще и завистию движими, первосвященницы иудейстии, скрыша в землю Крест Твой, Христе Боже, да не будет обличением безумие их; но той, яко сокровище драгое, из недр земли возсия, тщанием благочестивыя царицы Елены обретенный и на радость всех миру явленный, с богокрасною песнию: Аллилуия.


Икос 4
     Видевше тогда христианстии людие честнаго Креста обретение, прославляху распеншагося на нем Христа Бога, «Господи, помилуй» взывающе. Мы же ныне, подражающе им, прославляем Крест Его святый хваленьми сицевыми:
     Радуйся, Кресте, в землю сокровенный и оскверненное грехами нашими естество земное освятивый;
     Радуйся, явлением своим из недр земных хулителей воплощения и Божества Христова посрамивый.
     Радуйся, яко Пострадавый на тебе плотию прия всяку власть на Небеси и на земли, да всех и вся к Богу Отцу приведет;
     Радуйся, яко Умерый на тебе яко человек силою Божества Своего сокруши заклепы ада и изведе оттуда души праведных.
     Радуйся, Кресте, яко разбойник благоразумный, Христу сраспявыйся, Того исповедавый, тобою, аки лествицею, на Небеса взыде;
     Радуйся, яко и всех отсечением страстей Христу сраспинающихся возводиши в Царствие Небесное.
     Радуйся, честный Кресте, всерадостное знамение нашего искупления.


Кондак 5
     Господи, при Моисее иногда пророце точию образ Креста Твоего являем побеждаше враги Твоя, ныне же самый Крест Твой имуще, помощи просим: укрепи Церковь Твою и даруй ей победы на враги, да расточатся вси врази Твои, не вопиющии Ти: Аллилуия.


Икос 5
     Честнаго Креста, Христе, действо прообразив Моисей, победи противнаго Амалика в пустыне Синайстей: егда бо простираше руце, креста образ творя, укрепляхуся людие; ныне же все вещей сбытие в нас исполнися: днесь Крест воздвизается, и демони бегают, днесь тварь вся от тли свободися, яко вся Креста ради возсияша нам дарования. Темже, радующеся, вопием:
     Радуйся, Кресте, оружие Христово страшное, егоже демони трепещут;
     Радуйся, яко силою на тебе Распятаго Христа бесовстии полчища далече прогоняются.
     Радуйся, яко силою действующия в тебе Божественныя благодати победы на супротивныя христолюбивым людем даруются;
     Радуйся, яко от тебе, яко от высокорослейнаго и многоплодовитаго древа Христова страдания, плоды жизни и спасения нам произрастают.
     Радуйся, честный Кресте, всерадостное знамение нашего искупления.


Кондак 6
     Проповедником силы и Божества Христова явися иногда животворящее древо Крестное, егда прикосновением своим воскреси мертваго и к жизни возведе его, еже видевше, мнози от иудей и язык познаша велию благочестия тайну: яко спасения ради человеческаго Бог во плоти явися и страсть крестную претерпе, да спасет вопиющия Ему: Аллилуия.


Икос 6
     Якоже древо райское превелие, возвысися на Голгофе честный Крест Христов, от онудуже во всю вселенную распростре мысленныя ветви благодати и Распеншагося на нем; под егоже сению обретают прохладу палимии зноем страстей и хотящии благочестно жити о Христе Иисусе. Темже и мы, благодати Того причастницы, весело взываем:
     Радуйся, святый Кресте, древом жизни, Адама ради в Едеме насажденным, проображенный;
     Радуйся, новым Адамом, руце на тебе распростершим, миру явленный.
     Радуйся, яко под сень благодатнаго защищения твоего вси вернии прибегают;
     Радуйся, яко милосердием Даровавшаго нам тебе кающиися грешницы огня геенскаго избегают.
     Радуйся, Кресте, утешение наше в скорбех и печалех;
     Радуйся, живительная отрадо и помощь изнемогающим в борьбе с прилогами страстей, мира и диавола.
     Радуйся, честный Кресте, всерадостное знамение нашего искупления.


Кондак 7
     Хотя явити роду человеческому благости и милосердия Своего неизследимую пучину, Крест Твой, Господи, дал еси нам тверда блюстителя и прогонителя демонов. Темже вси мы, иже в Тя верующии, прославляем величие страсти Твоея, благодарно поюще Тебе: Аллилуия.


Икос 7
     Дивны дела явил еси, Господи, Крестом Твоим честным: распеншуся бо Ти на том плотию, вся тварь изменися, солнце лучи своя сокры, основания земли восколебахуся, ад сокрушися державою власти Твоея и изведе юзники, яже от века содержал есть. Сего ради увязаем той сими песненными цветы:
     Радуйся, Кресте, яко пострадавшему на Тебе вся тварь сострадаше, яко Творцу своему и Владыце;
     Радуйся, яко силу Того и Божество свидетельствоваху солнце помрачением и земля колебанием.
     Радуйся, яко Умерый на тебе не удержан бысть в мертвых, но, разрушив державу смерти, в третий день воскресе;
     Радуйся, яко воскресшу Тому проповедь евангельская, от лика апостольскаго наченшаяся, во вся концы земли изыде.
     Радуйся, Кресте, яко тобою кумирослужение и многобожие языческое упразднися;
     Радуйся, яко тебе ради правая вера во Единаго Бога, в Троице славимаго, по всей земли утвердися.
     Радуйся, честный Кресте, всерадостное знамение нашего искупления.


Кондак 8
     Странно Бога вочеловечшася и на Кресте распята бывша мысленно видяще, устранимся суетнаго мира, ум на Небеса преложше. Сего ради Бог на землю сниде и на Крест взыде, да тем, аки лествицею, на Небеса возведет вопиющия Ему: Аллилуия.


Икос 8
     Днесь Адам со Евою веселится, предлежащий видяще Крест, имже поражен бысть супостат, иже древле в рай вкушением запрещеннаго плода тех прельстивый и пленники себе сотворивый. Темже и мы, срадующеся праотцем нашим о избавлении от пленения нашего душевнаго, благоговейно воспеваем:
     Радуйся, Кресте, яко на тебе Пастырь добрый душу Свою положи за овцы Своя и даже до ада сниде, ища заблуждших;
     Радуйся, яко Той не презре дело руку Своею, Адама со Евою, но со инеми праведники исхити я из ада, яко из челюстей зверя крепкаго, и в рай всели их.
     Радуйся, яко на тебе пригвожденному Христу, пламенное оружие плещи даде и Херувим, Едем хранящий, отступи от древа жизни;
     Радуйся, яко мы, ныне Крещением возрожденнии, во Христе новые людие, невозбранно причащаемся райския пищи.
     Радуйся, Кресте, жезле силы Христовы, от Сиона посланный, имже мы пасемся на пажитех евангельских учений;
     Радуйся, яко тобою невредими сохраняемся от волков душегубных, яко Львове рыкающих и ищущих, кого поглотити.
     Радуйся, честный Кресте, всерадостное знамение нашего искупления.


Кондак 9
     Всяких бед и козней вражиих избави ны, Кресте треблаженный, яко приемтый благодать и силу от пригвожденнаго на тебе Христа, Емуже яко Богу и Избавителю нашему благодарственно и хвалебно поем: Аллилуия.


Икос 9
     Ветийство всякое земнородных не довлеет к прославлению Креста Твоего, Господи, на немже спасение наше соделал еси; темже, недоумевающе восхвалити той по достоянию, взываем сице:
     Радуйся, Кресте, яко вознесенный на тебе Спас мира мнози люди в познание Свое призва и до ныне призывает;
     Радуйся, яко возсиявый на тебе, аки на свещнице, Свет истинный вся концы земли светом боговедения озаряет.
     Радуйся, яко ныне Восток и Запад Пострадавшаго на тебе прославляют;
     Радуйся, яко и тя, яко подножие Христово, вси вернии, возносяще, прославляют.
     Радуйся, яко от тебе, яко от неизсякаемаго источника, христоименитии людие обилие благ вечных почерпают.
     Радуйся, честный Кресте, всерадостное знамение нашего искупления.


Кондак 10
     Спастися хотящим нам и под сень защищения твоего прибегающим, буди помощник, пресвятый Кресте, сохраняя ны от всех зол силою на тебе Распятаго Христа, Емуже яко Богу и Избавителю нашему благодарственно и хвалебно поем: Аллилуия.


Икос 10
     Стена еси, ограждающая нас от бед и напастей, Кресте всечестный, и столп крепкий противу лица вражия, к немуже невидимии борителие приступити не смеют, боящеся взирати на силу Твою. Сего ради с верою ограждаемся святым твоим знамением и весело воспеваем:
     Радуйся, пречестный Кресте Христов, от нападения духов злобы нас защищаяй;
     Радуйся, от различных стрел их невредимы ны сохраняяй.
     Радуйся, яко от знамения твоего, с верою благочестно творимаго, вся силы ада, яко дым от ветра, исчезают;
     Радуйся, яко тобою вся крепость их, яко воск от лица огня, истаивает.
     Радуйся, яко святии мученицы, знамением твоим ограждашеся и имя Христово призвавше, всякий вид мучений мужественно претерпеша;
     Радуйся, яко преподобнии отцы помощию силы Божества, знамению твоему присущия, бесовская страхования и страстей возстания победиша.
     Радуйся, честный Кресте, всерадостное знамение нашего искупления.


Кондак 11
     Пение всеумиленное приносим Ти, всечестный Кресте, и смиренно молимся распятому на тебе Христу Богу нашему, Иже дарова нам тебе во отраду и утешение в скорбех, да страстию Своею избавит нас от страстей душевредных и научит благоверно воспевати Ему: Аллилуия.


Икос 11
     Светом благодати Божией, таинственне ти присущия, просвети наша душевная чувствия, Кресте пресвятый, да тою озаряеми и наставляеми, не поткнемся о камень соблазна, но да возможем путем заповедей Божиих правошествовати во всей жизни нашей, воспевающе ти сице:
     Радуйся, непрестающих чудес Христовых вестниче и милосердия Его к роду человеческому проповедниче;
     Радуйся, Кресте, рода человеча обновление и Новаго Завета Христова печать и утверждение.
     Радуйся, торжество веры христианския и благонадежный якорю упования нашего;
     Радуйся, святых храмов Божиих украшение и домов благочестивых ограждение.
     Радуйся, полей и вертоградов благословение;
     Радуйся, всех стихий освящение.
     Радуйся, честный Кресте, всерадостное знамение нашего искупления.


Кондак 12
     Благодать Твою всемощную подаждь нам, Господи, да последуем Тебе, Владыце нашему, вземше крест наш, не гвоздьми пригвождающеся тому, но трудами, воздержанием и смирением, да тако причастницы будем страданий Твоих, от нихже истекают потоцы жизни вечныя, напаяющия вся правоверныя, благочестно поющия Ти: Аллилуия.


Икос 12
     Поюще величие твое, всечестный Кресте, восхваляем тя вси, яко победоносный скипетр Царя Небеснаго, нашего же спасения всерадостное знамение, темже и вопием:
     Радуйся, Кресте, православных христиан державо и несокрушимое их ограждение;
     Радуйся, святителей украшение и всех подвижников веры и благочестия сила и подкрепление.
     Радуйся, Кресте, от колыбели и до гроба на всех путех жизни нас ограждаяй и по смерти на воздушных мытарствах от духов злобы нас защищаяй;
     Радуйся, яко под знамением твоим почивающии умершии в вере и благочестии в последний день воскреснут в жизнь вечную.
     Радуйся, Кресте, явлением своим на Небеси предварити имый славное Второе пришествие Христово;
     Радуйся, яко распеншии Христа и вси невернии узрят тя тогда и горце возрыдают, любящий же Господа, зряще тя, вельми возрадуются.
     Радуйся, честный Кресте, всерадостное знамение нашего искупления.


Кондак 13
     О пречестный и животворящий Кресте Господень, всех христиан утешение! Тя ныне предлежаща видяще, возводимся мыслию к распятому на тебе Христу, Емуже и молимся смиренно, да тебе ради помилует нас грешных и сподобит в селениих райских вечно воспевати Ему: Аллилуия.

Этот кондак читается трижды, затем 1-й икос «Ангелов лицы...» и 1-й кондак «Приидите, христоименитии...».

МОЛИТВА ЧЕСТНОМУ И ЖИВОТВОРЯЩЕМУ КРЕСТУ
     Кресте честный, хранитель души и телу буди ми: образом своим бесы низлагая, враги отгоняя, страсти упраждняя и благоговение даруя ми, и жизнь, и силу, содействием Святаго Духа и честными Пречистыя Богородицы мольбами. Аминь.


Молитва иная Честному и Животворящему Кресту Господню
     О Пречестный и Животворящий Кресте Господень! Древле убо был еси казни позорныя орудие, ныне же знамение спасения нашего присно почитаемое и прославляемое! Како достойне возмогу аз, недостойный, воспети Тя и како дерзну преклонити колена сердца моего пред Искупителем моим, исповедая грехи свои! Но милосердие и неизреченное человеколюбие Распеншегося на тебе смиренное Дерзновение подает ми, да отверзу уста моя воеже славити Тя; сего ради вопию Ти: радуйся, Кресте, Церкве Христовы красота и основание, всея вселенныя — утверждение, христиан всех — упование, царей — держава, верных — прибежище, Ангелов — слава и воспевание, демонов — страх, губительство и отгнание, нечестивых и неверных — посрамление, праведных — услаждение, обремененных — ослаба, обуреваемых — пристанище, заблудших — наставниче, одержимых страстьми — раскаяние, нищих — обогащение, плавающих — кормчий, слабых — сила, во бранех — победа и одоление, сирых — верное покровение, вдов — заступниче, дев — целомудрия охранение, ненадеянных — надежда, недужных — врач и мертвых — воскресение! Ты, прообразованный чуцотворящим жезлом Моисея, животворный источник, напаяющий жаждущия духовныя жизни и услаждающий наши скорби; Ты — одр, на немже царственно почил тридневно Воскресший Победитель ада. Сего ради и утро, и в вечер, и полудне прославляю Тя, треблаженное Древо, и молю волею Распеншегося на Тебе, да просветит Он и укрепит Тобою ум мой, да открыет в сердце моем источник любве совершенней и вся деяния моя и путие, мои Тобою осенит, да выну величаю Пригвожденнаго на Тебе, грех моих ради, Господа Спасителя моего. Аминь.


Тропари Кресту Господню
Тропарь, глас 4 (Предпразднеству):
     Животворящий Крест Твоея благости, Егоже даровал еси нам недостойным Господи, Тебе приносим в молитву, спаси люди и град Твой молящийся, Богородицею, Едине Человеколюбче.


Тропарь, глас 1 (Воздвижению):
     Спаси, Господи, люди Твоя и благослови достояние Твое, победы православным христианом на сопротивныя даруя, и Твое сохраняя крестом Твоим жительство.


Кондак, глас 4:
     Вознесыйся на Крест волею, тезоименитому Твоему новому жительству, щедроты Твоя даруй, Христе Боже, возвесели силою Твоею верные люди Твоя, победы дая им на супостаты, пособие имущым Твое оружие мира, непобедимую победу.


Величание
     Величаем Тя, Живодавче Христе, и чтем Крест Твой Святый, имже нас спасл еси от работы вражия.


Празднование 14/27 сентября.[/spoiler]

Раб божий Константин

Акафист Честн?му и Животворящему Кресту Господню четвертый.
[spoiler]Кондак 1
В бранех победный, в дни мира спасительный,
Кресте честный, христианское знамение,
Тя величаем, Тебе поклоняемся
И восписуем хвалы благодарственныя.
Ты же одеян Небесною силою,
Нас сохрани, да зовем Тебе радостно:
Радуйся, Живоносный Кресте,
Благочестия Непобедимая Победа!

Икос 1
Крест всечестный окружают незримо днесь умозрители Ангели в страхе,
И благодать светоносную видяще явно,
Ныне обильно даемую верным,
Благоговейно стояще зовут таковая:

Радуйся, Кресте Ты знамя победное;
Радуйся, чудо умом неисследное.
Радуйся, Ангельским взором Твой свет удивление;
Радуйся, демонским зраком Твой вид уязвление.

Радуйся, радость премiрных обителей;
Радуйся, горесть подземных мучителей.
Радуйся, Небом явленное мiру видение;
Радуйся, горняго света над мiром горение.

Радуйся, лествица к Небу возведшая;
Радуйся, облако к свету приведшее.
Радуйся, Божие в дольний мiр ты снизхождение;
Радуйся, смертнаго в горний рай ты восхождение.

Радуйся, Живоносный Кресте, благочестия Непобедимая Победа!


Кондак 2
Распятый на Древе Христос Вседержитель,
Древо проклятия Древом спасения дивно являет
И обладает Божественной Силой многою,
Крест искупления, знамя победы,
Страшное злым, благодатное верным,
Иже Крестом осеняеми Богу поют: Аллилуиа!

Икос 2
Емлются верою силы Христовы,
Царь Константин в поле браннем моляся,
Видев же образ Креста в час полудне,
Изображенный на небе звездами
И надписание дивное: "СИМ ПОБЕЖДАЙ",
Весь вдохновенный к нему вопиет таковая:

Радуйся, Кресте звездами сияющий;
Радуйся, сильный, врага побеждающий.
Радуйся, щит и броня в битве воинству бранному;
Радуйся, град и стена в мiре братству избранному.

Радуйся, Кресте, Ты мiру хранение;
Радуйся, мирный, вражды разрушение.
Радуйся, огненный меч, силу тьмы посекающий;
Радуйся, пламенный серп, ниву зла пожинающий.

Радуйся, стран и народов хранение;
Радуйся, сел и градов ограждение.
Радуйся, очи мои просвещающий верою;
Радуйся, сердце мое озаривый надеждою.

Радуйся, Живоносный Кресте, благочестия Непобедимая Победа!


Кондак 3
Силу Креста разумевше, царица Елена
Сына желание тщится исполнити скоро:
Крестное Древо под прахом земли обрести
И явити пред мiром источник Святыни.
Тем же к Распятому сердце и ум возводящи,
Тепле молитвеннный глас вопиет: Аллилуиа!

Икос 3
Треблаженное древо Креста созерцати желая,
Повелевает царица Елена служащим:
"Крест Жизнодавца ищите усердно,
В недрах земли утаенный издревле",
Сама же стоящи взывает таковая:

Радуйся, Кресте, начало спасения;
Радуйся, светлый, заря искупления.
Радуйся, дланей Христовых благое простертие;
Радуйся, в смерти явивый и жизнь, и безсмертие.

Радуйся, выси Небес разверзающий;
Радуйся, в бездне врага сокрушающий.
Радуйся, ног Жизнодавца Святое подножие;
Радуйся, людем открывый смотрение Божие.

Радуйся, мiру Ты камень сумнения;
Радуйся, Церкви Ты слово спасения.
Радуйся, Ты погибающих паки взыскуеши;
Радуйся, Ты обольщаемым путь указуеши.

Радуйся, Живоносный Кресте, благочестия Непобедимая Победа!


Кондак 4
Ужас объемлет людей ожидавших,
Егда от земли изнесено бысть Древо Честное
И в той же час сила Креста показася предивно –
Мертвец бо воскресе Крестом осененный
И видевши страшное чудо
Возопиша Богу хвалебную песнь: Аллилуиа!

Икос 4
Трепетно радуется перед народом святая Елена
В день, егда дивно обретается Древо Честное
И востече возвестити царю превеликую радость.
Сей же царю-псалмопевцу подобися, духом торжествоваше,
Ликуя пред Богом, хвалы воздвизая Кресту таковая:

Радуйся, Кресте земли осенение;
Радуйся, чудный Небес украшение.
Радуйся, в море далече Ты пристань хвалимая;
Радуйся, в безднех воздушных Ты сила незримая.

Радуйся, стрелы во дни отвращающий;
Радуйся, страхи в нощи отгоняющий.
Радуйся, воздух и воды Крестом освящаются;
Радуйся, буря и пламень Крестом укрощаются.

Радуйся, в бурю пловцам Ты спасение;
Радуйся, в скорби Ты всем утешение.
Радуйся, сущим в пути Ты звезда путеводная;
Радуйся, сущим в морях Ты стезя мореходная.

Радуйся, Живоносный Кресте, благочестия Непобедимая Победа!


Кондак 5
Видети Крест Живодавца желающе,
Людие вси умолиша Святителя,
Да подъемля высоко, покажет народу Блаженное Древо,
Взем же Святитель своими руками, Крест воздвизает,
И вси велегласно Богу молитвенным гласом поют:
"ГОСПОДИ ПОМИЛУЙ"
И припевают Священную песнь: Аллилуиа!

Икос 5
Огнезрачен в мiре Крест воздвизаем явися
И освящаеми Им, вернии вси веселятся,
Зряще Его яко Виновника Благ,
Тем же Ему поклоняемся ныне
И вопием похвалы таковая:

Радуйся, Кресте рай вечныя сладости;
Радуйся, дивный дар Божия благости.
Радуйся, Ты воздвизаемый нас воздвизаеши;
Радуйся, Ты поклоняемый нас освящаеши.

Радуйся, вышняго града взыскание;
Радуйся, вечныя правды сказание.
Радуйся, Ты в дни скорбей нам отрада любимая;
Радуйся, Ты в годы бед нам стена нерушимая.

Радуйся, к Богу ты мiр привлекаеши;
Радуйся, стадо Христу собираеши.
Радуйся, веры лампада Тобою светлеется;
Радуйся, пламень молитвы тобою возвеется.

Радуйся, Живоносный Кресте, благочестия Непобедимая Победа!


Кондак 6
Единодушно под кровом Креста да пребудем,
Его же держаще, яко же воин оружие брани,
Сим победим врагов веры нашествия,
И лобызающе Древо Честное, священное,
Богу немолчную песнь вопием: Аллилуиа!

Икос 6
Мощь разрушив нерушимую ада,
Светом Своим озаряет Христос
Сущих в юдоли плачевней и мрачной,
И нетерпяще Небеснаго света,
Адовы силы падоша с диаволом вкупе,
Вси же спасения видевши Крест
Изыдоша в радости, славу поюще преславному Древу:

Радуйся, Кресте, оружие дивное;
Радуйся, знамя диаволу страшное.
Радуйся, Ты еси адовых уз расторжение;
Радуйся, Ты еси смертных оков низвержение.

Радуйся, входы рая отверзающий;
Радуйся, смерти врата сокрушающий.
Радуйся, страсти Христовы в сердцах обновляющий;
Радуйся, всем воскресения славу являющий.

Радуйся, Божие в мiр снизхождение;
Радуйся, с Богом людей примирение.
Радуйся, Ты безотрадных отрада желанная;
Радуйся, Ты безнадежных надежда единая.

Радуйся, Живоносный Кресте, благочестия Непобедимая Победа!


Кондак 7
Умудренному Богом вождю Моисею,
Хотящу народ свой изъяти от горькия муки,
Жезл путеводный во образ Креста подается.
Ведый же силу Креста издалеча,
В страхе пророк вопияше хвалу: Аллилуиа!

Икос 7
Плоть восприявшее Отчее Слово,
Грех человека на рамо подъемлет,
И на Кресте умирает Сын Божий,
Грех наш и клятву и смерть пригвождает,
Да вопием Ему тепле, Креста восхваляюще силу:

Радуйся, Кресте, Ты падших восстание;
Радуйся, Крепкий, Ты грешных воззвание.
Радуйся, прелесть и грех на Тебе пригвождается;
Радуйся, плоть со страстьми на Тебе распинается.

Радуйся, Ты еси образ смирения;
Радуйся, Ты еси иго терпения.
Радуйся, Ты нам Христову любовь знаменуеши;
Радуйся, Ты совершенство в любви указуеши.

Радуйся, наших печалей отгнание;
Радуйся, наших скорбей врачевание.
Радуйся, в час наказания нас укрепляющий;
Радуйся, в день испытания нам помогающий.

Радуйся, Живоносный Кресте, благочестия Непобедимая Победа!


Кондак 8
Образ смирения Спасова видевши,
Иго благое Его восприимем:
Мiра отвергшеся к Небу воспрянем,
Ибо Безгрешный распялся на Древе,
Да нас к высоте привлечет, вопиющих к Нему: Аллилуиа!

Икос 8
Крест милосердие Божие к людям являет,
Божий бо Сын воплотился от Девы,
В рабии образе с нами живет
И подъемлет наш грех нестерпимый
И страждет Безгрешный до смерти,
Нас оживляя Крестом благодатным.
Ему же ныне поем таковая:

Радуйся, Кресте, Ты честь милосердия;
Радуйся, Грозный, Ты суд жестосердия.
Радуйся, нищии духом Тобою взыскуются;
Радуйся, кротции сердцем Тобою красуются.

Радуйся, милость Тобою является;
Радуйся, правда Тобою свершается.
Радуйся, Ты умирати за ближняго учиши;
Радуйся, Ты возлюбити врага наставляеши.

Радуйся, Крест и любовь нам хваление;
Радуйся, месть и вражда нам стыдение.
Радуйся, Ты на земли в путь прискорбный нас водиши;
Радуйся, многую мзду в Небесах нам готовиши.

Радуйся, Живоносный Кресте, благочестия Непобедимая Победа!


Кондак 9
Любвеобильно пришел к человеку
Спас и Избавитель мiра Христос,
Руце Свои простирает на древе,
Всю собирая вселенную вкупе,
К горним чинам приводя естество человека,
Богу поюще вечную песнь: Аллилуиа!

Икос 9
Адовы силы не могут прияти тайну Креста Твоего, Жизнодавче,
Како Распятый и смерть претерпевый,
Смертию смерть разрушаеши сильне,
Мы же поем Воскресения Славу
И Креста Твоего благодать и державу зовуще:

Радуйся, Кресте, Ты мудрость примерная;
Радуйся, Чудный, Ты святость безмерная.
Радуйся, Бог бо воскресе, к Тебе пригвоздивыйся;
Радуйся, мiр бо спасеся, Тебе покоривыйся.

Радуйся, Кресте, Ты солнце вселенныя;
Радуйся, слава и честь вожделенная.
Радуйся, Ты под криле свое мiр собираеши;
Радуйся, Ты бо главою Небес досязаеши.

Радуйся, Кресте, ты сильных падение;
Радуйся, Крепкий, смиренных восстание.
Радуйся, Ты тишину нам Христову являеши;
Радуйся, нашу вину Ты на век упраздняеши.

Радуйся, Живоносный Кресте, благочестия Непобедимая Победа!


Кондак 10
Наше растленное все естество обновляя,
Единородный Сын Божий – Сын Девы бывает
И страждет на Древе нас ради Безстрастный
И смерть восприемлет, да нас оживит,
Светло поющих Воскресшему песнь: Аллилуиа!

Икос 10
Яко державный покров и основу вселенныя зрим Тя,
О Кресте Христов Живоносный,
Ибо Создатель небес и земли Вседержитель
Руцы Свои на Тебе простирает за грех наш,
Всех научая Тебе воспевати:

Радуйся, Кресте, Ты мiра хранение;
Радуйся, Мощный, земли утверждение.
Радуйся, новый бо рай на земли утверждаеши;
Радуйся, в смертной юдоли нам жизнь водружаеши.

Радуйся, жезле Великого Пастыря;
Радуйся, скиптре Христа Вседержителя.
Радуйся, веры, надежды, любви сочетание;
Радуйся, правды Христовой и мира вещание.

Радуйся, совесть Крестом озаряется;
Радуйся, воля Крестом управляется.
Радуйся, чуждым Ты мудрость во век необъемлемая;
Радуйся, верным Ты радость во век неотъемлемая.

Радуйся, Живоносный Кресте, благочестия Непобедимая Победа!


Кондак 11
Единодушно Тя славяще песньми святыми,
Кресте Христов, мiру радость и слава,
Како возможем достойно воспети
Бездну даров и чудес Твоих тайну.
Тем же Тебе поклоняемся присно,
Богу поюще немолчную песнь: Аллилуиа!

Икос 11
Многообразна честнаго Креста благостыня,
Сей бо хранит основание веры,
Сей единение Церкви связует,
Сей освящает исходы и входы,
Тайно вводя нас в Небесное Царство,
Научая о Бозе Ему воспевати:

Радуйся, Кресте, Ты слава церковная;
Радуйся, Крепкий, Ты сила духовная.
Радуйся, всем Ты, Святый, во Христе единение;
Радуйся, всем Ты, Благий, во Христе обновление.

Радуйся, Кресте, Ты знамя крещения;
Радуйся, Кресте, печать искупления.
Радуйся, сад напоенный пречистою Кровию;
Радуйся, меч изощренный Христовою страстию.

Радуйся, имя врагу нестерпимое;
Радуйся, пламя во век негасимое.
Радуйся, Ты наш обет от купели крещения;
Радуйся, Ты наш залог до зари Воскресения.

Радуйся, Живоносный Кресте, благочестия Непобедимая Победа!


Кондак 12
Светом сияет нам Крестное Древо,
Светом водящи в юдоли плачевной,
Веру приемлет, надежду внедряет,
В сердце любовь возгревает святую
И научает взывати во дни и в нощи: Аллилуиа!

Икос 12
Яко на светоч в нощи безрассветной,
Дух мой унылый на Тя уповает,
Кресте Христов, Живоносная сила,
Горняго града взыскуя, но вверженный долу,
Очи свои возвожу к высоте Твоей дивной
И преклоняя колена души же и тела,
Бренный и блудный взываю Ти тако:

Радуйся, Кресте, Тебе поклонение;
Радуйся, Чудный, Тебе мое пение.
Радуйся, смертным Ты путь к Небесам указуеши;
Радуйся, горних с земным Ты союзом связуеши.

Радуйся, иго смиренным любезное;
Радуйся, бремя надменным полезное.
Радуйся, в море скорбей Ты отрада желанная;
Радуйся, в бурю страстей тишина благодатная.

Радуйся, в жизни мое Ты стяжание;
Радуйся, в смерти мое увенчание.
Радуйся, Кресте, храни нас в молитве взывающих;
Радуйся, Кресте, спаси нас Тебе воспевающих.

Радуйся, Живоносный Кресте, благочестия Непобедимая Победа!


Кондак 13 (вариант для пения)
О! Многопетое Древо Креста!
О! Многопетое Древо Креста!
К Тебе яко живу взываем смиреннии,
К Тебе проливаем мольбы недостойнии.
О! Живоносное Древо Креста!
О! Живоносное Древо Креста!
Укажи нам грешным путь жизни спасительный
И в страшный час смерти нам буди прибежище.
О! Треблаженное Древо Креста!
О! Треблаженное Древо Креста!
Огради от мрачных и вечных мучений
Да к Царствию Света приидем поюще: Аллилуия!
Да к Царствию Света приидем поюще: Аллилуия!
Да к Царствию Света приидем поюще: Аллилуия!

Кондак 13 (вариант для чтения)
О! Многопетое, О! Живоносное,
О! Треблаженное Древо Креста!
К Тебе яко живу взываем смиреннии,
К Тебе проливаем мольбы недостойнии.
Укажи нам грешным путь жизни спасительный
И в страшный час смерти нам буди прибежище.
Огради от мрачных и вечных мучений
Да к Царствию Света приидем поюще:
Аллилуия! Аллилуия! Аллилуия!


Икос 1
Крест всечестный окружают незримо днесь умозрители Ангели в страхе,
И благодать светоносную видяще явно,
Ныне обильно даемую верным,
Благоговейно стояще зовут таковая:

Радуйся, Кресте Ты знамя победное;
Радуйся, чудо умом неисследное.
Радуйся, Ангельским взором Твой свет удивление;
Радуйся, демонским зраком Твой вид уязвление.

Радуйся, радость премiрных обителей;
Радуйся, горесть подземных мучителей.
Радуйся, Небом явленное мiру видение;
Радуйся, горняго света над мiром горение.

Радуйся, лествица к Небу возведшая;
Радуйся, облако к свету приведшее.
Радуйся, Божие в дольний мiр ты снизхождение;
Радуйся, смертнаго в горний рай ты восхождение.

Радуйся, Живоносный Кресте, благочестия Непобедимая Победа!

Кондак 1
В бранех победный, в дни мира спасительный,
Кресте честный, христианское знамение,
Тя величаем, Тебе поклоняемся
И восписуем хвалы благодарственныя.
Ты же одеян Небесною силою,
Нас сохрани, да зовем Тебе радостно:
Радуйся, Живоносный Кресте,
Благочестия Непобедимая Победа!
 



Молитва Всечестн?му и Животворящему Кресту.
О, Всечестный и Животворящий Кресте Господень, Кровию Христа Бога нашего освященный! Ты еси знамение победы на враги наша видимыя и невидимыя. Ты имаши явитися в час Страшного Суда Христова. Тебе смиренно поклоняюся, честно прикасаюся и любезно Тя лобызаю, нынешнее моление к Распятому на Тебе принося, да исцелит мя силою в Тебе Своею от всех недугов душевных и телесных, и сохранит от враг видимых и невидимых, и неосужденно на суде Своем одесную поставит.

Ей, Животворящий Кресте Святый! На Тебе Спас умирая за умершия грехми человеки, дух Свой яко человек испусти, Кровь же и воду источи, и сими треми едино, еже паче всех есть на потребу, спасение нам содела, во славу источника вод живых Бога Отца, Себе же от кровей девических воплощенна Бога Сына, и Бога Духа Святаго, оживляющего дух человечь.

Ихже триех во Едином Божестве славити и мне пособи от воды крещения, восприятою верою непорочною, во причастии же Плоти и Крове Господних, надеждою несомненною, и в покаянии духом сокрушенным, и любовию нелицемерною, да тако не токмо в жизни сей плачевней, яко вода мимотекущей, но и в будущем блаженнем животе прославлю Господа, пособием силы Твоея, Кресте треблаженне, и поклонюся Ему самым лица зрением Верованному, одержанием же Чаянному и наслаждением Любимому, единому в Троице славимому в безконечныя веки веков. Аминь.[/spoiler]

Раб божий Константин

Акафист Честному и Животворящему Кресту Господню пятый.
[spoiler]Кондак 1
Возбранный Воеводо, Животодавче Христе Царю, победу на враги, оружие свое дал еси нам Крест Твой пречестный, Имже избавляеми от злых благодарственно почитаем Его, кланяющеся, яко святому подножию ногу Твоею; но яко имущим силу Твою непобедимую, от всяких нас бед и страстей Тем сохрани, да похвальная воспеваем Ему:
Радуйся, Кресте пречестный, непобедимая победо.

Икос 1
Ангелов предстательства, с праведными чинами, крестообразно обстоят престол Твой, Царю славы, в четвероуголном граде Твоем вышнем, изобразующе превеликую Животворящаго Креста Твоего четвероконечнаго силу, и хваляще Его пением таковым:
Радуйся Кресте на немже Христос Животодавец умертвися.
Радуйся, на Немже Бог неудержимый пригвоздися.
Радуйся, знамение Царя Небеснаго.
Радуйся, похвало Престола Божественнаго.
Радуйся, скиптре самаго Вседержителя.
Радуйся, оружие всесильнаго победителя.
Радуйся, Имже пламенное оружие херувимское отвержеся.
Радуйся, Имже геенскаго змия жало смертоносное пресечеся.
Радуйся, Ангелом радование, бесом рыдание.
Радуйся, царем всем правоверным величание и воем их укрепление.
Радуйся, апостольская проповеди, христианом всем вразумителю.
Радуйся, церковное украшение, и всей вселенней хранителю.
Радуйся, Кресте пречестный, непобедимая победо.

Кондак 2
Видяще ужасное Креста Твоего Христе водружение, с Тобою на Нем распятым, верху горы Голгофы вси народы пришедшии на позор сей, бияху перси своя, елицы умиляхуся, аще прочии хулникоми ругающимся. Мы же вси верные зряще воздвижение Его преславное в Церкве Святой совершаемое, колми паче, попирающе вся богомерзкая хуления, сокрушаем сердца наша, умилно покланяющеся, и вопиюще: Аллилуиа.

Икос 2
Разум подаждь нам Слове Божий, да возможем разумети Креста Твоего непостижимую силу; почитати бо Его по достоинству, дело есть вышних праведных чинов, мы же земные како возможем скверными устами хвалу Его совершати! Точию молебную песнь приносяще, дерзаем с верою смиренно воспевати сице:
Радуйся, Кресте, Егоже широта, любовь Христа за всех распятаго.
Радуйся, Егоже долгота, долготерпение страдавшаго.
Радуйся, Егоже глубина, смирение Господне в страстех глубокое.
Радуйся, Егоже высота, послушание к Богу Отцу высокое.
Радуйся, широтою Твоею к спасению собираяй вся языки.
Радуйся, долготою Твоею уставленный от века, сохраняти вся веки.
Радуйся, глубиною Твоею погружая врагов Божиих преисподних.
Радуйся, высотою Твоею возвышаяй к Небеси угодников Господних.
Радуйся, Иже в Твоей широте простираеши нам лоно Авраамле.
Радуйся, Иже в Твоей долготе протязаеши нам житие вечное.
Радуйся, Иже в Твоей глубине являеши нам богатство премудрости Божия.
Радуйся, Иже в Твоей высоте воздвизаеши нам надежду Небеснаго Царствия.
Радуйся, Кресте пречестный, непобедимая победо.

Кондак 3
Силу Креста Твоего Христе Боже с небеси посли нам, да воспоем преславная и превеликая Его чудеса, тем бо знаменающе себе и просвещающе, враги наша, яко непобедимым оружием побеждаем, вопиюще: Аллилулиа.

Икос 3
Имуще Христе вси христиане крепкаго защитника и скораго в бедах помощника во всем мире, Крест Твой Животворящий, почитаем Его всемирно, похвальныя дары приносяще сице:
Радуйся, Кресте, четвероконечная красото.
Радуйся, всем четырем концем мира доброто.
Радуйся, востоку озарение дня спасения.
Радуйся, восхождение Ему к свету вышнему, Емуже Восток имя.
Радуйся, западу просвещение Света Незаходимаго.
Радуйся, избавление Ему от власти темныя запада преисподняго.
Радуйся, полудню спасение от беса полуденнаго прельстившаго в раи в полудне.
Радуйся, прохлаждение Ему от раждежения греховнаго пламене.
Радуйся, полунощи хранения от врага желавшаго престола полунощна.
Радуйся, согреяние Ея от студени к покаянию неподвижныя.
Радуйся, воспоминаяй запад смерти полунощ Суда Страшнаго.
Радуйся, возвещаяй восток света в Царствии Небесном, полудень жжения геенскаго.
Радуйся, Кресте пречестный, непобедимая победо.

Кондак 4
Бурю всяких напастей устави Христе окормлением Честнаго и Животворящаго Креста Твоего; Тем бо яко известным наставником ко всякому благотишию управляемся, и преславная Его образования и явления честно воспоминаем, зовуще: Аллилуиа.

Икос 4
Слышащих и видящих многообразная чудеса, силою Креста Твоего действуемая Христе, укрепи всех притекающих к Нему, и славящих Его сице:
Радуйся, Кресте посреде рая церковнаго яко древо жизни.
Радуйся, на Немже Плод висящ аще кто снесть, жив будет во веки.
Радуйся, яко древо еже разумети доброе и злое.
Радуйся, Имже вразумляемся уклонятися от зла и творити благое.
Радуйся, яко древо крыющее от лица Божия Адама согрешившаго.
Радуйся, под Нимже крыющуся грешнику, является лице Бога милостиваго.
Радуйся, яко древо Авраамле Мамврийское являющее Бога в Троице.
Радуйся, под Нимже повержен грешник яко Измаил услышан бывает с небеси.
Радуйся, яко древо Исааком на жертву носимое.
Радуйся, при Немже удержуется заклание роду человечу наносимое.
Радуйся, яко древо, под нимже Иаков вкопа боги чужды бездушныя.
Радуйся, Имже Христос умертви грехи, нас на душах умерщвляющия.
Радуйся, Кресте пречестный, непобедимая победо.

Кондак 5
Боготочною Твоею кровию Христе, освященный Тобой Крест оставил еси на земли, яко источник чудес многовидных, точащ пребогатую благодать, крепкою Его силою, всем жаждущим спасения вопиющим: Аллилуиа.

Икос 5
Видеша людие еврейстии в законной сени знамения различна прообразующа чудесне, честное древо Животворящего Креста Твоего Христе, и удивляхуся, мы же в благодатной истине, взирающе на самое событие прообразования Того, с верою Кресту Твоему покланяемся вопиюще сице:
Радуйся, Кресте яко древо имже Моисей горесть вод услади.
Радуйся, Имже Христос горькия слезы людий Своих на радость преложи.
Радуйся, яко древо на немже змий вознесенный исцеляше вкушенных от змиев.
Радуйся, на Немже Христос распятый оживотвори умерщвленных от грехов.
Радуйся, яко древо сажденное при исходищих вод.
Радуйся, при Немже нещадно яко вода излияся Спасительная кровь.
Радуйся, яко древо под нимже Илия избегая от Езавели напитан от Ангела.
Радуйся, под Нимже человек избегая от смерти питается от Христа.
Радуйся, яко древо имже Елисей утопшее железо восплтыти сотвори.
Радуйся, Имже Христа низведеннаго во ад человека возведе к небеси.
Радуйся, яко древо на немже умертвися Аман вместо Мардохея.
Радуйся, на Немже умертвися сама смерть вместо воскресшаго Христа.
Радуйся, Кресте пречестный, непобедимая победо.

Кондак 6
Проповедуя славу Креста Твоего Христе, явил еси во Иерусалиме знамение Его паче солнца светящее на небеси распростертое превышше святыя горы Голгофы, и досязающее до святыя горы Елеонския, на обличение невернымм, яко да увидевше облистающую крестную силу, никакоже противятся, на утверждение же и утешение всем верным вопиющим: Аллилуиа.

Икос 6
Возсия истинное древо Животворящаго Креста Твоего Христе от земли, до долгом утаении обретенное, Еже многочудесне облистая по всей вселенной, прогонит всяку лесть миродержителей тмы века сего, и просвещает истиною богоразумия всех верных, восхваляющих Его, и поющих таковая:
Радуйся, Кресте, яко древо поистине избранное на царство над всеми древесы.
Радуйся, Егоже силою человецы яко древа ходящии, возрадуются во царствии на небеси.
Радуйся, яко древо финиково, под ним Девоса Израиля суди.
Радуйся, при Немже Господь праведнейший судия, князя тмы века сего осуди.
Радуйся, яко древо на немже привязанный Олоферном Ахидор от Израилтян разрешен.
Радуйся, на Немже умерщвленный мучителми Христос от Бога Отца воскреши.
Радуйся, яко древо велие возрастшее от малейшаго всех зерна горушна.
Радуйся, всему миру славо возсиявшая от горести безчестнаго умаления.
Радуйся, яко древо под нимже суща виде Иисус Нафанаила.
Радуйся, Егоже силою осененнаго предзре Господь спасение всякаго христианина.
Радуйся, древо на неже взыде Закхей да видит Иисуса.
Радуйся, на негоже упование возлагаяй человек смиренный узрит Бога.
Радуйся, Кресте пречестный, непобедимая победо.

Кондак 7
Хотя спасти Христос род человеческий от смерти вечныя волею претерпел еси смерть временную на Кресте, и Той оставил еси нам на земли в знамение любве Твоея превеликия, еяже благодарны суще, вопием: Аллилуиа.

Икос 7
Новую показал еси благодать Владыко распныйся на Кресте, на Немже Сам безсмерен сый изволил еси умрети, да нам смертным даруеши живот безсмертный, утверждающимся о Кресте Твоем и праглашающим сице:
Радуйся, Кресте яко жезл Иаковль о немже прейде Иордан.
Радуйся, имже чрез очищение от грехов путь нам от смерти к жизни показан.
Радуйся, яко жезл Иосифов, на Егоже конец поклонися Иаков.
Радуйся, на Егоже версе написан всепокланяемый титл Иисусов.
Радуйся, жезл Моисеов о немже изведе Израиля из Египта.
Радуйся, имже Христос изведе верных Своих из ада.
Радуйся, яко жезл Ааронов прозябший во утверждение священства.
Радуйся, на немже украсися служителем Божиим цвет неувядаемаго венца.
Радуйся, яко жезл ангельский изведший огнь из камене на жертву Гедеону.
Радуйся, имже изведеся огнь любве из сердца Христова на жертву Его Господню.
Радуйся, яко жезл Давидов с пятьми каменми противу Голиафа.
Радуйся, при Немже Иисус приемый пять язв больших победи диавола.
Радуйся, Кресте пречестный, непобедимая победо.

Кондак 8
Странное явление виде великий царь Константин, яви бо ся ему в полудне образ Креста от звезд на небеси с написанием "в том знамении победиши"; он же абие появившемуся образу, знамение воинское сооружив силою крестною сопротивных вои победи, и радости исполнен, воспеваше: Аллилуиа.

Икос 8
Весь есть всем верным от злых сильный заступник, и в немощах душевных и телесных известный целитель, Христос царю всесильне, Крест Твой всечестный. Слава царем и держава; Того бо силою верные побеждают вся вражия шатания, и от всяких недугов избавляются, хваляще Его тако:
Радуйся, Кресте яко жезл силы, правления и царствия.
Радуйся, имже яко жезлом железным сокрушаются врази яко сосуды скудельныя.
Радуйся, яко жезл златый знаменующ Есфири царское милосердие.
Радуйся, Имже Бог вместо погубления, сотвори верным избавление.
Радуйся, яко жезл Иоанафанов просвещаяй медом очеса.
Радуйся, Имже в крове Христову омоченным, просвещаются верных сердца.
Радуйся, яко жезл бдящий виденный от пророка Иеремии.
Радуйся, Имже яко бодрым стражем сохраняются верные.
Радуйся, яко жезл Захариин сугубый, доброты и веры.
Радуйся, Имже Иисус пасет добре Своя овцы, отгоняет же волка.
Радуйся, яко жезл трости данныя Богослову в церковное измерение.
Радуйся, Егоже мерою, верным разделяется на небеси воздаяние.
Радуйся, Кресте пречестный, непобедимая победо.
Кондак 9
Всякое тщание христоимениый царь Константин творя, о обретении явленнаго ему Честнаго и Животворящаго Креста Господня, посылаше на взыскание Того, богомудрую матерь свою Елену во святый град Иерусалим. Еяже промышление поискавше прилежно, и обретше желаемое, возрадовашася вси вернии поюще: Аллилуиа.

Икос 9
Ветийственныя глаголы Богом умудреннаго царя, о знамении явленнаго ему Животворящаго Креста Господня, внидоша в слух воем и всем людем его; они же познавше силу крестную врагов побеждающую, верных же сохраняющую, вероваша богомудренно вопиюще таковая:
Радуйся, Кресте яко на водах ковчег Ноя с животным.
Радуйся, носящ в излиянии крове Христа с язвами.
Радуйся, яко сучец масличный знаменующ потопа престание.
Радуйся, проливающагося гнева Божия удержание.
Радуйся, яко дуга на облацех в знамение мира поставленная.
Радуйся, простираяй руце Господне ко всем нам ради мирнаго объятия.
Радуйся, яко лествица Иаковля от земли к небеси.
Радуйся, восхождение душ наших, утверждение распятаго Господня телеси.
Радуйся, яко столп огнеоблачный ведущ к земле обетования.
Радуйся, кровию и водою от ребр Господних, сподобляяй нас Небеснаго Царствия.
Радуйся, Кивот Завета носящ две скрижали закона Господня.
Радуйся, содержащ в себе закон написанный кровию Христа Бога и человека.
Радуйся, Кресте пречестный, непобедимая победо.

Кондак 10
Спаси нас Христе от всякия нужды силою Честнаго и Животворящаго Креста Твоего, Имже изволил еси избавити и спасти род человеческий; мы же преславное торжество Его почитающе, и верно покланяющеся, вопием: Аллилуиа.

Икос 10
Стена есть необоримая, и столп непоколебим во всяких бранех, и искушениих, Крест Твой Пречестный Христе: Того бо знамением благословляеми, и заступлением утверждаеми, побеждают вси верныи безчисленныя тьмы сатанины, и видимых врагов вся полки, вопиюще таковая:
Радуйся, яко Тебе изобрази Иаков пременением рук на благословение.
Радуйся, яко Тебе изъяви Моисей воздвижением рук на побеждение.
Радуйся, Егоже знаменова щит копием Иисуса Навина воздвиженный.
Радуйся, яко тогда град Гай, ныне же весь ад Тобою побежденный.
Радуйся, Егоже начерта при окне Раавы вервь червлен.
Радуйся, Имже от бездны адовы грешник сохранен.
Радуйся, Имже яко гвоздом пронзеся Сисаре геенскому глава.
Радуйся, Имже яко челюстию избавися адских филистинов Сила.
Радуйся, Имже аки удицею уловися преисподней Левиафан.
Радуйся, Имже от поглощения его свободися во своим родом Адам.
Радуйся, Имже яко печатию Бога жива, раби Его печатлеются.
Радуйся, Имже запечатленные невредимы сохраняются.
Радуйся, Кресте пречестный, непобедимая победо.

Кондак 11
Пение всякое рода человеческаго побеждается, Честнаго Креста Твоего Господи многими неизреченными чудесы; аще бо исчитаем дейстия Его, ничтоже успеваем достойно противу тем яже силою крестною даруеши всем вопиющим Тебе: Аллилуиа.

Икос 11
Светоносна светильника вознесенна от земнаго сокровения, имамы Христе света миру обретенный Крест Твой Животворящий, Егоже всесветлым воздвижением озаряеми, просвещаемся от всякаго смертоноснаго мира, вопиюще сице:
Радуйся, Кресте яко светильник в скинии Моисеовой поставленный.
Радуйся, Егоже светом Христовым мир весь просвещенный.
Радуйся, яко и трапеза с предложением животнаго хлеба.
Радуйся, и яко манны сладчайшаго Иисуса стамна.
Радуйся, яко носило, грозд вина от зелми обетования носящее.
Радуйся, и яко точило чашу спасения нам точащее.
Радуйся, яко гусль Давидов отгонящая духа нечистаго.
Радуйся, яко мечь, егоже Давид взем от Голиафа, обезглави того.
Радуйся, яко престол Давидов во Израиле воздвиженный.
Радуйся, яко столп его тысячию щитов вооруженный.
Радуйся, яко одр Соломонов обстоимый от сильных.
Радуйся, яко носильник его от древес ливанских.
Радуйся, Кресте пречестный, непобедимая победо.

Кондак 12
Благодать неизреченную всесвятым Крестом Твоим подал еси нам Христе Боже, на Немже пречистых рук Твоих простертием, рукописание грех наших растерзал еси, и от сынов гнева, сотворил еси нас сынами благодати, от сынов же тьмы сынами света; темже толикое Твое милосердие на Кресте нам совершенное, благодарными сердцы и усты славяще поем Тебе преблагому Богу: Аллилуиа.

Икос 12
Поюще преславную Креста Твоего Христе силу, покланяемся на место идеже стоясте нозе Твои пречистыя, избавльшии нас от поползновения душегубнаго, и наставляющии на путь спасения, темже и лобызающе пречистыя стопы Твоя на Кресте кровию назнаменаиныя, похвальная совершаем сице:
Радуйся, Кресте яко на Тебе Слово Божие Иисус седмь словес изрече.
Радуйся, яко тогда седмь грехов смертных аки седмь глав змиевых посече.
Радуйся, яко на Тебе Бога Отца за враги молился, грех гнева победи.
Радуйся, яко на Тебе разбойнику рай даруяй, грех любостажания погуби.
Радуйся, яко Матерь Свою чистую чистому вручая, грех нечистоты отверже.
Радуйся, яко Тебе оставленна, Себе смиряяся глаголя, грех гордыни низверже.
Радуйся, яко на Тебе, глаголя: жажду; чревоугодие утоли.
Радуйся, яко на Тебе глаголя: совершишася; леность несовершающую дел благих, удали.
Радуйся, яко на Тебе, в руце Бога Отца предаде дух Свой.
Радуйся, яко тогда грех зависти предавших Его, любовию Своею победи до конца.
Радуйся, яко о Тебе и мы уповаем житие безгрешно совершити.
Радуйся, яко Тобою сподобимся и мы душы наша Богу вручати.
Радуйся, Кресте пречестный, непобедимая победо.

Кондак 13
О Всечестный и Животворящий Кресте Господень, кровию Христа Бога нашего освященный и смертию Его нас от смерти вечныя свободивый. Ты еси знамение победы на врагов наших видимых и невидимых, ты имаши явитися на небеси в день Страшнаго Суда Христова. Тебе покланяемся, и Тебе любезно лобызающе, нынешнее моление к распятому на Тебе Судии Праведному приносим, да сохранит нас Тобою от всякаго зла и не осужденных сподоби воспевати: Аллилуиа.[/spoiler]

Раб божий Константин

Акафист Кресту Господню шестый
[spoiler]Кондак 1
Возбранный Воеводо и Господи, смерти и ада победителю, Крестом Твоим и воскресением спасение мира соделал еси посреде земли. Но яко имеяй милосердие неизреченное, спаси нас, Сыне Божий, плотию распныйся за ны, да зовем Ти:
Кресту Твоему покланяемся, Владыко, и Святое Воскресение Твое славим!

Икос 1
Ангелов Творец и Создатель всего видимаго и невидимаго, сотворивый человека и по грехопадении его не отринувый, ибо Сын Божий, представ, рече Богу и Отцу: "Се иду сотворити волю Твою, Боже", - страшныя страсти, Крест и вольную смерть предначертая себе, сего ради поклонение Тебе, Спасе наш, приносим, милосердие Твое, прежде сложения мира явленное нам, величающе сице:
Кресту Твоему покланяемся, Христе, Им же показал любовь Отца небеснаго.
Кресту Твоему покланяемся, Христе, Им же явися любовь Духа Святаго, силою крестною торжествующая.
Кресту Твоему покланяемся, Христе, Им же известися Пресвятыя Троицы правда милосердствующая.
Кресту Твоему покланяемся, Христе, яко Той есть совершение нашего спасения.
Кресту Твоему покланяемся, Христе, яко Той есть от века таинства явление.
Кресту Твоему покланяемся, Владыко, и Святое Воскресение Твое славим!

Кондак 2
Видя прегрешившия человеки зельне плачущия, Господи, умилосердився, надежду спасения подал еси им, глаголя: "Семя жены сотрет главу змия и рай паки отверзет вам", сице и о нас умилосердися, человеколюбче, и грехами умерщвленныя наши души воскреси, зовущия: Аллилуиа.

Икос 2
Разум недоразуменных обетований Твоих уразумети подавая, в образах и сени Креста Твоего силу показал еси, Господи, о сем Тебе самаго Бога разумов славим, поюще сице:
Кресту Твоему покланяемся, Христе, Его же тайнодейственно Авраам жертвоприношением Исаака предъизобрази.
Кресту Твоему покланяемся, Христе, Им же Иаков применением рук, образне дети благослови.
Кресту Твоему покланяемся, Христе, Им же Израиль из Египта изведеся.
Кресту Твоему покланяемся, Христе, Его же силою море пресечеся.
Кресту Твоему покланяемся, Христе, Им же Моисей из камени воду источи.
Кресту Твоему покланяемся, Христе, Им же жезл Ааронов процветший священство утверди.
Кресту Твоему покланяемся, Владыко, и Святое Воскресение Твое славим!

Кондак 3
Силою свыше пророки Твоя облекл еси, Спасе наш, и от Святаго Духа просвещаеми, глаголаша святии Божии человецы, Крест Твой предвещающи, яко овча на заколение ведеся, Агнче Божий, вземляй грехи мира.
Облецы и нас теплотою Духа Твоего и даждь нам с любовию Кресту Твоему поклоняющимся, пети Тебе: Аллилуиа.

Икос 3
Имеяй богатство милосердия, тако возлюби Бог мир, яко и Сына Своего единороднаго дал есть, Егоже, яко агнца закланнаго, прежде сложения мира многообразне яви. Сих ради приносим Тебе песнь славословия таковую:
Кресту Твоему покланяемся, Христе, Им же медный змий, на древо вознесенный, от змиев укушенныя исцели.
Кресту Твоему покланяемся, Христе, Им же люди, умерщвленныя грехм, оживотвори.
Кресту Твоему покланяемся, Христе, Его же силою враги победи преподобных рук вознесение.
Кресту Твоему покланяемся, Христе, Им же всем твориши от бед избавление.
Кресту Твоему покланяемся, Христе, Им же древо, вложенное во источник, ествество вод измени.
Кресту Твоему покланяемся, Христе, Его же знамением жезл ангельский Гедеонову жертву воспламени.
Кресту Твоему покланяемся, Владыко, и Святое Воскресение Твое славим!

Кондак 4
Бурю внутрь имеяй помышлений сумнительных, Исаия виде на престоле образно превознесеннаго Бога и вопияше: "Окаянен есмь человек, нечистыя устне имый". Ты же к нему: "Иди и рцы людем моим слово Мое". И шед, явственно благовести Спаса всех: яко Той язвен бысть за грехи наша и мучен бысть за беззакония наша.
Мы же, познавше Тебе, распеншагося за нас, Его же язвами исцелехом, благодарственно вопием: Аллилуиа.

Икос 4
Слышавши апостоли Твои, Господи, неизреченныя предвещания Твоя, яко подобает Тебе много пострадати, убиену быти и в третий день воскреснути, не разумеваху таинства Креста Твоего, зане сокровен бысть от них глагол сей, дондеже отверзе им ум разумети писания, просвети убо очи мысленныя нас, вопиющих Тебе и глаголющих:
Кресту Твоему покланяемся, Христе, Им же умы и сердца верных просвещаеши.
Кресту Твоему покланяемся, Христе, Им же сумнящихся в вере утверждаеши.
Кресту Твоему покланяемся, Христе, Им же грешники к покаянию обращаеши.
Кресту Твоему покланяемся, Христе, Им же демонов от человек прогоняеши.
Кресту Твоему покланяемся, Христе, яко Той есть упования христианскаго знамение.
Кресту Твоему покланяемся, Христе, яко Той есть Церкви Твоея венчание.
Кресту Твоему покланяемся, Владыко, и Святое Воскресение Твое славим!

Кондак 5
Боготочною кровию Твоею, на Кресте излиянною, искупил ны есть от клятвы законныя, распятие претерпев и копием прободся, Спасе наш, сего ради вопием Тебе: Аллилуиа.

Икос 5
Видевше жены еврейския Тебе, грядущаго на вольную страсть и падающаго под тяжестью Креста Твоего, Иисусе, плакахуся зело. К ним же обращся, Ты рекл еси: "Дщери Иерусалимския, не плачитеся о Мне, плачите же паче о себе и чад ваших, яко дние грядут, в няже рекут: "Блаженны неплоды и утробы, яже не родиша и сосцы, яже не доиша, когда начнут глаголати горам: "Падите на нас и холмам: покройте нас". Мы же в скорбех и печалех наших припадаем к Тебе, Спасе, на сем пути и вопием:
Кресту Твоему покланяемся, Христе, Им же отгоняеши от нас рыдания.
Кресту Твоему покланяемся, Христе, Им же приносиши нам радование.
Кресту Твоему покланяемся, Христе, Иже есть скорбящим утешение.
Кресту Твоему покланяемся, Христе, Иже есть болящих исцеление.
Кресту Твоему покланяемся, Христе, Им же даруеши грешникам кающимся прощение.
Кресту Твоему покланяемся, Христе, Иже есть умерщвленных грехами воскресение.
Кресту Твоему покланяемся, Владыко, и Святое Воскресение Твое славим!

Кондак 6
Проповедников богоносных вещание и глаголы пророческия исполняя, многовидныя и лютыя страсти, распятие и смерть претерпети изволил еси, Спасе. Мы же ранами Твоими исцелевше, пети навыкохом: Аллилуиа.

Икос 6
Возсия вселенней Крест Твой всечестный, на Немже грехи наша, вознесши на теле Своем, пригвоздил еси, Иисусе. Мы же, спасение получившие, вопием:
Кресту Твоему покланяемся, Христе, знамению любви Твоея неизреченныя.
Кресту Твоему покланяемся, Христе, образу милости Твоея безконечныя.
Кресту Твоему покланяемся, Христе, средостение вражды в человецех разорившему.
Кресту Твоему покланяемся, Христе, Бога с человеки соединившему.
Кресту Твоему покланяемся, Христе, мир на земли явившему.
Кресту Твоему покланяемся, Христе, светом Твоим вся просветившему.
Кресту Твоему покланяемся, Владыко, и Святое Воскресение Твое славим!

Кондак 7
Хотя сокровенную тайну от века открыти, яко овча на заколение веден был еси, Иисусе, и яко агнец прямо стригущаго его безгласен, наказание за грехи всего мира прием на себя, да нас свободиши зовущих: Аллилуиа.

Икос 7
Дивное показал еси на Кресте Твоем Божественное истощание, Сыне Божий. Темже чудящеся, вопием:
Кресту Твоему покланяемся, Христе, на Немже претерпел еси язвы гвоздинныя.
Кресту Твоему покланяемся, Христе, на Немже вкусил еси оцта и желчи смешение.
Кресту Твоему покланяемся, Христе, на Немже вися, слышал еси хулы и ругания.
Кресту Твоему покланяемся, Христе, на Немже бе вины Твоея написание.
Кресту Твоему покланяемся, Христе, на Немже вещал еси Матери Твоей утешение.
Кресту Твоему покланяемся, Христе, на Немже учредил еси ученика Твоего Матери Твоей всыновление.
Кресту Твоему покланяемся, Владыко, и Святое Воскресение Твое славим!

Кондак 8
Странна Бога вочеловечшася видяще на Кресте висяща, мертва, нага, умалена паче всех сынов человеческих, устранимся суетнаго мира, ум на небеса преложше. Сего бо ради высокий Бог на землю сниде и Крест, и смерть претерпе, да нас на небеса возведет, вопиющих Ему: Аллилуиа.

Икос 8
Весь еси любовь, весь еси желание, весь еси благость, весь еси снисхождение, весь еси милосердие и щедрот бездна, Сыне Божий, волею ради нас пострада и смертию Своею смерть умертви и Кровию Своею жизнь нам дарова поющим:
Кресту Твоему покланяемся, Христе, Им же ниспосылаеши светлость душевную.
Кресту Твоему покланяемся, Христе, Им же даруеши нам сладость сердечную.
Кресту Твоему покланяемся, Христе, Им же помогаеши нам стяжати быстроту умную.
Кресту Твоему покланяемся, Христе, Им же утверждаеши крепость телесную.
Кресту Твоему покланяемся, Христе, Им же печатлееши в нас надежду известную.
Кресту Твоему покланяемся, Христе, Им же способствуеши нам сохраняти память предвечную.
Кресту Твоему покланяемся, Владыко, и Святое Воскресение Твое славим!

Кондак 9
Все естество всея твари изменися, зряще Тебе на Кресте висима, Христе, солнце омрачися и земли основания сотрясошася, гроби отверзошася и многа телеса усопших святых возсташа, мы же, поклоняющеся страстем Твоим, Христе, зовем: Аллилуиа.

Икос 9
Витии многовещанныя, яко рыбы безгласныя, видим о Тебе, Иисусе Спасе наш, недоумеют бо глаголати, како Бог непреложный и человек совершенный на кресте пригвождается, мы же таинству дивящеся, вопием:
Кресту Твоему покланяемся, Христе, не Нем же пригвоздися Жених Церковный.
Кресту Твоему покланяемся, Христе, на Нем же в ребра прободеся Сын Божий, во Иордане и на Фаворе нареченный.
Кресту Твоему покланяемся, Христе, на Нем же руце и нозе предал еси на раны.
Кресту Твоему покланяемся, Христе, на Нем же лице Твое не отвратил еси от заплеваний.
Кресту Твоему покланяемся, Христе, на Нем же вопиял еси Отцу Небесному: "Вскую оставил еси Мене, Боже Мой, Боже Мой".
Кресту Твоему покланяемся, Христе, на Нем же умирая, гласом велиим воззвал еси: "Отче, в руце Твои предаю дух Мой".
Кресту Твоему покланяемся, Владыко, и Святое Воскресение Твое славим!

Кондак 10
Спасти хотя мир, Восточе востоком, к темному западу, естеству нашему пришед, смирился еси до смерти, смерти же крестныя.
Тем же превознесеся Твое имя паче всякаго имене, и от всех колен небесных и земных слышим: Аллилуиа.

Икос 10
Царю Небесный, утешителю, Христе, истинный, разбойника благоразумнаго во едином часе рая сподобил еси, просвети и нас Древом Крестным и спаси, да вопием во умилении хвалебныя песни Кресту Твоему поюще:
Кресту Твоему покланяемся, Христе, Им же подаеши и самым отчаянным грешникам прощение.
Кресту Твоему покланяемся, Христе, Им же сподобляеши заблудших вразумления.
Кресту Твоему покланяемся, Христе, яко Той есть напаствующих заступление.
Кресту Твоему покланяемся, Христе, яко Той есть падших возстановление.
Кресту Твоему покланяемся, Христе, яко Того силою плоть нашу со страстьми и похотьми распинаем.
Кресту Твоему покланяемся, Христе, яко Того помощию гордость всяку и грех запинающий нас отвергаем.
Кресту Твоему покланяемся, Владыко, и Святое Воскресение Твое славим!

Кондак 11
Пение всеумиленное приносим Тебе, Спасе наш, Крест Твой животворящий славим, Им же спасл еси от работы вражия, и благодарственно вопием ти: Аллилуиа.

Икос 11
Светодательна светильника сущим во тьме неразумия зрим пречестный и животворящий Крест Твой, Господи, Им же невещественный вжигающи огнь, наставляеши к разуму Божественному всех, вопиющих таковая:
Кресту Твоему покланяемся, Христе, яко Той есть вселенныя держава.
Кресту Твоему покланяемся, Христе, яко Той есть Церкви Твоея слава.
Кресту Твоему покланяемся, Христе, яко Той есть храмов Божиих украшение.
Кресту Твоему покланяемся, Христе, яко Той есть священных таинств веры нашея совершение.
Кресту Твоему покланяемся, Христе, яко Той есть честных даров благодатию Святаго Духа освящение.
Кресту Твоему покланяемся, Христе, яко Той есть мертвых грехми и плотию воскресение.
Кресту Твоему покланяемся, Владыко, и Святое Воскресение Твое славим!

Кондак 12
Благодать спасения подаждь нам, жизни подателю, Христе Боже, честным и животворящим Крестом Твоим, Им же суетнаго жития убегаем и благодатей духовных сподобляемся, да славяще Тебе, поем: Аллилуиа.

Икос 12
Поюще страшныя страсти и животворящий Крест Твой и вольную страсть, яже ради нас человеков и ради нашего спасения претерпел еси, Боже наш, веруем и исповедуем, яко воистину Сын Божий еси, пришедый в мир грешныя спасти, и во умилении зовем:
Кресту Твоему покланяемся, Христе, на Нем вознесенный всех к Себе привлекаеши.
Кресту Твоему покланяемся, Христе, Им же разбойнику благоразумному рай отверзаеши.
Кресту Твоему покланяемся, Христе, у Его же подножия сотник, Бога не ведущий, исповеда Тебе Сыном Божиим.
Кресту Твоему покланяемся, Христе, яко Тем разорил еси вереи преисподней.
Кресту Твоему покланяемся, Христе, яко на Нем совершил еси всего рода человеческаго искупление.
Кресту Твоему покланяемся, Христе, яко на Нем, смертию Твоею смерть поправ, даровал еси нам воскресение.
Кресту Твоему покланяемся, Владыко, и Святое Воскресение Твое славим!

Кондак 13
О, пресладкий и всещедрый Иисусе Христе, хотяй судити живым и мертвым, приими сие моление наше, егда явится на небеси в той Страшный День знамение Сына человеческаго, Крест Твой святый, и, узрев Тебе , грядущаго на облацех небесных с силою и славою многою, восплачутся вся колена земная, тогда нас пощади, Спасе наш, Кресту Твоему поклоняющися и вопиющих: Аллилуиа.

Молитва

Господи Иисусе Христе, Сыне Божий! Страшныя страсти Твоя, Крест и смерть поминающе, исповедуем, яко ради нас человек и ради нашего спасения, вся сия претерпети и Святую Кровь Свою излияти изволил еси, к Тебе милосердия ради Себе истощившему непреложно и до страстей преклоншемуся, Слове Божий, припадаем и молимся: согрешихом, беззаконовахом, неправдовахом, пред Тобою, всесвятый Спасителю наш, толико, яко несьмы достойны воззрети на высоту небесную от множества неправд наших.
И токмо пред животворящим Крестом Твоим, Христе, колена сердец наших преклоняем, честно Тому прикасаемся и любезно целуем - моление наше Тебе, распеншемуся на Нем приносяще о, премилосердый Господи, не отврати лица Твоего от нас и не посрами нас от надежды нашея, во всяких нуждах наших, скорбех, печалех, всегда буди помощник нам и покровитель во спасение, можеши бо, Сам искушен быв, нам искушаемым помощи.
Ниспосли милости Твоя богатыя на нас, силою честнаго и животворящего Креста Твоего ограждаемых, отмый тайнодейственне, во святей Твоей Церкви, честною Твоею Кровию грехи всех, верою, упованием и любовию Крест и смерть Твою возвещающих до дне онаго втораго Твоего в мир сей пришествия.
Подаждь нам, Владыко Вседержителю, силу и крепость благочестно и праведно пожити в нынешнем веце. На Страшном же Суде Твоем сподоби услышати, аще и недостойны, благостный глас Твой избранным Твоим: "Приидите, благословеннии Отца Моего, наследуйте царство уготованное вам от сложения мира". Да славим Тебе со Отцем Твоим, и безначальным и Пресвятым Духом во веки веков. Аминь.[/spoiler]

Раб божий Константин

Акафист святой блаженной Ксении Петербургской.
[spoiler]О помощи в многоразличных семейных и житейских обстояниях

 

Память святой Ксении Петербургской установлено совершать два раза в году: 24 января/6 февраля и 11/24 сентября.

 

Тропарь, глас 7-й

Нищету Христову возлюбивши, безсмертныя трапезы ныне наслаждаешися, безумием мнимым безумие мира обличивши, смирением крестным силу Божию восприяла еси. Сего ради дар чудодейственныя помощи стяжавшая, Ксение блаженная, моли Христа Бога избавитися нам от всякаго зла покаянием.

 

Кондак 1

Избранная угодница Христова, святая блаженная Ксение, хвалебное пение ти приносим, чтуще терпение твое и злострадание вольное; ты же, имеющи дерзновение ко Господу, во всяких бедах и напастех заступай нас, грешных, взывающих к тебе:

Радуйся, Ксение блаженная, молитвеннице о душах наших.

 

Икос 1

Равноангельски на земли пожила еси, блаженная мати, по успении мужа твоего, без приготовления христианскаго внезапу скончавшегося, отвергла еси жизнь мирскую, молящи Бога супруга твоего душу помиловати, подвиг юродства на себе приявши, стяжала еси совершенство духовное. Того ради услыши от нас похвалы сия, тебе возносимыя:

Радуйся, Христова угодница, в мире надмирно пожившая; радуйся вся прилоги мира, плоти и диавола победившая. Радуйся, нищету вольную на всю жизнь избравшая; радуйся, сокровище на Небеси имети возжелавшая. Радуйся, житием твоим Андрею, Христа ради юродивому, равная; радуйся, от всех людей православных любимая и славимая. Радуйся, о часе смертнем помнити нас призывающая; радуйся, ближняго душу паче мира сего любити нас научающая. Радуйся, Ксение блаженная, молитвеннице о душах наших.

 

Кондак 2

Видяще странное житие твое, блаженная, яко во цвете младости твоея во одежду мужа твоего усопшаго облеклася еси, именем его нареклася еси, себе умершую быти глаголющи, дом же твой и вся благая земная оставивши, скиталицу себе сотворила ей, сродницы твои безумную тя быти мняху, людие же боголюбивии воспеша: Аллилуия.

 

Икос 2

Разум, от Бога ти дарованный, в безумии мнимом сокрыла еси, блаженная Ксение; в суете же града великаго аки пустынница пребывала еси, молитвы своя к Богу возносящи непрестанно. Мы же, дивящеся житию твоему, воспеваем ти сице:

Радуйся, крест тяжкий юродства, от Бога ти данный, на рамо свое приявшая; радуйся, мнимым безумием сияние благодати сокрывшая. Радуйся, именем мужеским нарекшися, немощи женския отрешившаяся; радуйся, печали и скорби кротце терпевшая. Радуйся, все имение твое бедным людем раздавшая; радуйся, жилище Духу Святому в сердце твоем уготовившая. Радуйся, всем прибегающим к тебе благое утешение; радуйся, от смерти внезапныя избавление. Радуйся, Ксение блаженная, молитвеннице о душах наших.

 

Кондак 3

Силою, свыше ти дарованною, благодатию и мужеством, зной и стужу лютую претерпевала еси, всенощно молящися и поклоны творящи; темже и прославлена бысть святость твоя, блаженная Ксение, во Отечестве нашем многострадальнем и во всем мире православнем, да зовем с тобою Богу: Аллилуиа.

 

Икос 3

Имела еси, о мати блаженная, небо покров и землю ложе свое; о теле, во одежду ветхую облеченнем, небрегла еси, молитвы же к Богу пламенне возносила еси, сего ради воспеваем ти сице:

Радуйся, век твой земный без крова проведшая; радуйся, Небеснаго крова взыскавшая и того улучившая. Радуйся, по вся дни нощию в поли молившаяся; радуйся, поклоны земныя на вся страны света тамо творившая. Радуйся, град Петров всенощным бдением от бед ограждавшая; радуйся, гнев Божий от него многажды отвращавшая. Радуйся, благодатию Духа Святаго чудесно согреваемая; радуйся, хлам лютый душ наших молитвою твоею растаявающая. Радуйся, Ксение блаженная, молитвеннице о душах наших.

 

Кондак 4

Бурю житейскую, во граде Петрове мятущуюся, кротостию и незлобием препобеждала еси, мати блаженная, безстрастие же посреде мира суетнаго стяжала еси и тако, Духом Святым просвещаемая, взывала еси Подателю тишины сердечныя Богу: Аллилуиа.

 

Икос 4

Слышаша людие дар прозрения чудный, тобою явленный, святая мати, и удивишася. Се, жене некоей рекла еси: возми пятак, зде царь на коне: потухнет. Та же не ведающи, яко ты запаление дома ея прозрела еси, притече во свояси и узре дом свой во огни горящ: и абие по молитве твоей пламень огня угасе. Мнози же страждущии к помощи твоей прибегаху, юже стяжавше, тако взываша ти:

Радуйся, дар прозрения смирением крайним стяжавшая; радуйся, дар сей на пользу и спасение страждущим являвшая. Радуйся, свеще негасимая, к Богу в молитвах горевшая; радуйся, верою твоею пламенною запаление домов угашавшая. Радуйся, грядущия скорби людския аки настоящия зревшая; радуйся врач безмездный и милосердый людем бывшая. Радуйся, яко и нас, немощных в вере, укрепляеши; радуйся, яко сиянием святости твоея люди православныя озаряеши. Радуйся, Ксение блаженная, молитвеннице о душах наших.

 

Кондак 5

Боготечная звезда явися святость твоя на тверди града Петрова, угоднице Божия, зарею своею сердца просвещающая: уже бо людем, в безумии греха погибающим, путь спасения указала еси, к покаянию их наставляющи, во еже вопити Богу: Аллилуиа.

 

Икос 5

Видяще подвиги твоя молитвенныя, терпение хлада и зноя великое, людие ослабити желаху злострадания твоя; ты же одежду и вся ими приносимая нищим раздавала еси, нищету свою, аки сокровище, храняще. Сего ради слышиши от нас сицевая:

Радуйся, богатство твое токмо в любви к Богу и ближним полагавшая; радуйся, ничтоже земное имевшая и всех духовно богатившая. Радуйся, милостивым твоим сердцем страждущим сострадавшая; радуйся, помощь им чрез добрых людей посылавшая. Радуйся, чуждая миру, в мире живущим благо творившая; радуйся, века сего суемудрия отвергатися научившая. Радуйся, плакати с плачущими нас подвигающая; радуйся, от тяжкаго сна греховнаго пробуждающая. Радуйся, Ксение блаженная, молитвеннице о душах наших.

 

Кондак 6

Проповедана бысть святость жития твоего, блаженная, жителем града твоего, егда ты, о младенце, еще не рождшемся, пекущися, жене добрей, в доме, тобою дарованном, жившей, рекла еси: Бог тебе сына посла, теки на кладбище Смоленское. Тая же, со тщанием притекши, сироту, рожденна материю, внезапу на пути пострадавшею и скончавшеюся, в дом свой прияла есть: вся же лета жития своего, тебе благодаряще, сия семья благодатная Богу Человеколюбцу взываше: Аллилуиа. 

 

Икос 6

Возсияла есть слава подвигов твоих, блаженная мати Ксение, егда нощию на верх храма Смоленскаго камение, таящися, носила еси, дому Пречистей возградитися пособствующи. Ныне же вси молящиися во святем храме сем и во всем мире Божием, взирающе на образ твой, воспевают ти таковая:

Радуйся, тайно творити добро научающая; радуйся, к подвигом благочестия всех призывающая. Радуйся, строителем храмов Божиих помогающая; радуйся, святыню церковную возлюбившая. Радуйся, в делех благих усердное поспешение; радуйся, трудов наших на пути спасения облегчение. Радуйся, под кровом Божия Матере подвиги творившая, и тако почившая; радуйся, с Нею ныне на Небесех о нас Христа молящая. Радуйся, Ксение блаженная, молитвеннице о душах наших.

 

Кондак 7

Хотяще судьбы людския во благая устроити, повелела еси деве кротцей на Охту тещи, прорекши, яко муж твой тамо жену погребает. Та же, аще и недоумевашеся, обаче не ослушася глагола твоего, и тамо вдовца млада, над гробом жены рыдавшаго, сретила есть и утешение в молитве ему подаде. Лету же минувшу, она венчастася, и тако многая лета в любви и согласии поживше, чад своих наставляху тебе, святая мати, чтити, Богу же воспевати песнь: Аллилуиа.

 

Икос 7

Новое чудо показала еси, блаженная, посреде скверны людския душу твою, юродством сокрытую, в кротости ангельстей соблюдши. Научи и нас, мати Ксение, и малыя доли скорбей твоих не терпящих и в ропоте на Бога и ближняго дни наша иждивающих, вся свыше посылаемая в терпении сносити, да взирающе на подвиги твоя, чистым сердцем зовем ти сице:

Радуйся, миру злохладному благодатную мудрость явившая; радуйся, нищеты духовныя блаженство вкусившая. Радуйся, образ терпения и благосердия нам подающая; радуйся, смирением и покаянием от бед избавлятися научающая.Радуйся, с молитвою и любовию детей благословлявшая; радуйся, прикосновением руку твоею чудесно их исцелявшая. Радуйся, уныние тяжкое, душу сокрушающее, от нас отводящая; радуйся, надеждою несумненную на милость Божию окриляющая. Радуйся, Ксение блаженная, молитвеннице о душах наших.

 

Кондак 8

Странница бездомная протекла еси путь скорбный жития твоего в стольнем граде Отечества нашего, мати блаженная, взыскующи града вышняго, Иерусалима Небеснаго; ныне же в нем со Ангелы и всеми святыми поеши Богу: Аллилуиа.

 

Икос 8

Вся в молитвах ко Творцу пребывающи, мати святая, до успения твоего, от страданий и подвигов к жизни блаженей и вечней невозбранно прешла еси. Сего ради, преклоняюще колена сердец наших, благоговейное пение ти приносим:

Радуйся, во обителех горних с лики святых ликующая; радуйся, и нас, тебе молящихся, тамо не забывающая. Радуйся, чудеса неисчетная по успении твоем явившая; радуйся, смертно болящих, врачьми оставленных, исцелявшая. Радуйся, в пьянстве гибнущих устрашение и исправление; радуйся, места служения лишившимся благое поспешение. Радуйся, вдовиц и жен, супругом оставленных, покровительнице; радуйся, странников и безприютных питательнице. Радуйся, Ксение блаженная, молитвеннице о душах наших.

 

Кондак 9

Всякия утоли болезни, блаженая мати Ксение, на тя надеющихся и к помощи твоей усердно притекающих: якоже поминавших прежде душу твою ради души своея спасения, по завету твоему, тако и ныне помяни всех, прославляющих тя, Богу же, в тебе дивно прославленному, вопиющих непрестанно: Аллилуия.

 

Икос 9

Ветия суемудренныя разумети не могут, како ты безумием своим безумие мира сего обличила еси и немощию своею сильныя и крепкия посрамила еси: не ведают бо в тебе силы и премудрости Божия. Мы же, тя почитающе, с любовию зовем ти сице:

Радуйся, Божественнаго Духа селение; радуйся, велие к Богу дерзновение. Радуйся, у усыпальницы твоея молящимся являющаяся и им помогающая; радуйся, землею и елеем от нея многия освятившая и от недуг исцелившая. Радуйся, яко одержимых страстьми от гибели спасаеши; радуйся, яко отвергатися себе нас научаеши. Радуйся, любве и смирения путь во спасение нам указующая; радуйся, во храме Божием с нами незримо пребывающая. Радуйся, Ксение блаженная, молитвеннице о душах наших.

 

Кондак 10

Спасти люди хотящи, блаженная мати Ксение, присно даруеши им заступление твое чудное. Се деву благочестивую с вдовицею материю ея, в канун венчания у гробницы твоея усердно молившуюся, от брака спасла еси со злодеем, иже ратнаго человека уби, имя же и чин его себе присвои. В день тойже убийца оный внезапу обличен бысть и, ужасом объят, исповеда пред всеми, яко сила Божия сироту от брака с ним избави, мы же, дивящеся силе молитв твоих, нас спасающих, воспеваем Богу: Аллилуиа.

 

Икос 10

Стена еси нерушимая, преблаженная мати, и дом православных. Не остави и ныне супруги разлученныя, помози родителем, за грехи своя о чадех слезы проливающим, научи юноши и девы в чистоте себе хранити и всех нас святыню уз семейных почитати, да единеми усты воспеваем ти тако:

Радуйся, дев благочестивых от брака невернаго избавляющая; радуйся, спутника жизни добраго им обрести помогающая. Радуйся, сродник враждующих благое примирение; радуйся, слез детских осушение. Радуйся, от убиения младенцев во чреве женам грозное прещение; радуйся, на камени любве и веры домов устроение. Радуйся, супругов, смертию разлученных, утешение; радуйся, в жизни безсмертней вечное их соединение. Радуйся, Ксение блаженная, молитвеннице о душах наших.

 

Кондак 11

Пение благодарственное приносят ти, мати блаженная, людие православнии, от бед и болезней молитвами твоими избавленнии: и ныне, аще попустит нам Всеправедный Господь скорби грех наших ради, со слезами к тебе припадем, уповающе на милостивое твое о нас к Богу предстательство, да воспоем Ему: Аллилуиа.

 

Икос 11

Светозарная луча во мраце жития сего, путь ко свету неприступному освещающая, явилася еси, богомудрая Ксение, чудес множеством просиявши. В лютую же годину гонений безбожных вернии от часовни твоея не отступиша, но, презревше и страх смертный, с верою и упованием к тебе притекаху, сердцем воспевающе сице:

Радуйся, безнадежных надеяние; радуйся, в бездне отчаяния погибающих спасение. Радуйся, униженных и гонимых покровительнице; радуйся, от клеветы и суда неправеднаго защитнице. Радуйся, обидимых и обездоленных утешение; радуйся, обидящих грозное вразумление. Радуйся, града святаго Петра заступнице; радуйся, чадом земли Российския мати и питательнице. Радуйся, Ксение блаженная, молитвеннице о душах наших.

 

Кондак 12

Благодать утешений обильно изливаеши, блаженная Ксение, всем чтущим память твою и к заступлению твоему притекающим. Темже и мы, грешнии, на тя по Бозе надежду нашу возлагаем и молимся тебе усердно: не остави нас во обстояниих скорбных, умоли Господа сил, да не отпадем от веры православныя, в нейже тобою утверждаеми, зовем Ему верно: Аллилуиа.

 

Икос 12

Поюще многая твоя чудеса, блаженная мати Ксение, восхваляем тя, яко теплую нашу заступницу и скорую предстательницу. Улучающе же от тебе помощь благодатную, неустанно воспеваем ти сице:

Радуйся, светом кротости твоея вся концы земли озарившая; радуйся житием твоим постническим гордыню диавольскую посрамившая. Радуйся, дому царскому поможение и благословение; радуйся, мира Божия в сердца верных насаждение. Радуйся, о спасении Отечества нашего присно молящаяся; радуйся во Отечество Небесное нам путь указующая. Радуйся, по Богородице в скорбех и печалех наше утешение; радуйся, по Бозе грехов наших прощение и вечное спасение. Радуйся, Ксение блаженная, молитвеннице о душах наших.

 

Кондак 13

О святая блаженная мати Ксение, в житии твоем крест тяжкий понесшая. Приими от нас, грешных, моление сие, тебе приносимое, огради нас молитвами твоими от наветов духов тьмы, от бед и напастей, умоли Всещедраго Бога подати нам силу и крепость, да вземше крест свой, во след Христу грядем, поюще Ему с тобою во веки: Аллилуиа.

Трижды.

 

Икос 1

Равноангельски на земли пожила еси, блаженная мати, по успении мужа твоего, без приготовления христианскаго внезапу скончавшегося, отвергла еси жизнь мирскую, молящи Бога супруга твоего душу помиловати, подвиг юродства на себе приявши, стяжала еси совершенство духовное. Того ради услыши от нас похвалы сия, тебе возносимыя:

Радуйся, Христова угодница, в мире надмирно пожившая; радуйся вся прилоги мира, плоти и диавола победившая. Радуйся, нищету вольную на всю жизнь избравшая; радуйся, сокровище на Небеси имети возжелавшая. Радуйся, житием твоим Андрею, Христа ради юродивому, равная; радуйся, от всех людей православных любимая и славимая. Радуйся, о часе смертнем помнити нас призывающая; радуйся, ближняго душу паче мира сего любити нас научающая. Радуйся, Ксение блаженная, молитвеннице о душах наших.

 

Кондак 1

Избранная угодница Христова, святая блаженная Ксение, хвалебное пение ти приносим, чтуще терпение твое и злострадание вольное; ты же, имеющи дерзновение ко Господу, во всяких бедах и напастех заступай нас, грешных, взывающих к тебе:

Радуйся, Ксение блаженная, молитвеннице о душах наших.

 

Молитва

О святая всеблаженная мати Ксение! Под кровом Всвышняго жившая, ведомая и укрепляемая Богоматерию, глад и жажду, хлад и зной, поношения и гонения претерпевшая, дар прозорливости и чудотворения от Бога прияла еси и под сению Всемогущаго покоишися. Ныне Святая Церковь, яко благоуханный цвет, прославляет тя. Предстояще на месте погребения твоего, пред образом твоим святым, яко живей ти, сущей с нами, молимся тебе: приими прошения наша и принеси их ко Престолу милосердаго Отца Небеснаго, яко дерзновение к Нему имущая. Испроси притекающим к тебе вечное спасение, на благая дела и начинания наша щедрое благословение, от всяких бед и скорбей избавление. Предстани святыми твоими молитвами пред Всемилостивым Спасителем нашим о нас, недостойных и грешных. Помози, святая блаженная мати Ксение, младенцы светом Святаго Крещения озарити и печатию дара Духа Святаго запечатлети, отроки и отроковицы в вере, честности, богобоязненности воспитати и успехи в учении им даровати; болящия и недугующия исцели, семейным любовь и согласие низпосли, монашествующих подвигом добрым подвизатися удостой и от поношений огради, пастыри в крепости Духа Святаго утверди, люди и страну нашу в мире и безмятежии сохрани, о лишенных в предсмертный час причащения Святых Христовых Таин умоли. Ты наша надежда и упование, скорое услышание и избавление, тебе благодарение возсылаем и с тобою славим Отца и Сына и Святаго Духа, ныне и присно, и во веки веков. Аминь.[/spoiler]

Раб божий Константин

Акафист блаженной Ксении страннице Петербургской иной.
[spoiler]Кондак 1
Избранней в последняя лета от народов Российских, Божией праведнице, страннице Петрова града, Христа ради телом и духом обнищавшей, и юроду себе сотворшей составим похвалу. Ты же, о блаженная мати, яко имущи ко грешным милосердие велие, не возгнушайся молением нашим, да вси взываем:
Радуйся, блаженная мати Ксение, молений наших скорая послушательнице!

Икос 1
Ангельския Силы возрадовашася на небесех, зряще тебе, новую угодницу Божию, земною воинствующею Церковью прославляему и многи люди от жития твоего Евангельскому благочестию поучающияся. Мы же, аще и недовольно вемы о житии твоем, обаче добродетельми твоими во гресех обличаеми и просвещаеми, радующеся, тя восхваляем:
Радуйся, Ксение блаженная, на небесех ныне истинно блаженствующая;
Радуйся, Русския земли благовонный крине;
Радуйся, града Святаго Петра достойное украшение;
Радуйся, горлице Божия, себе в благоуханную жертву принесшая;
Радуйся, ластовице Богогласная, многим сладкую весну покаяния и спасения возвестившая;
Радуйся, страннице Господня, странничеству духовному ны научающая;
Радуйся, звездо-путеводительнице наша к Мысленному Солнцу;
Радуйся, немощным христианом последних времен утверждение и утешение;
Радуйся, к падшим на дно погибели милостивно нисходящая;
Радуйся, и мене, помраченнаго, светом Христовы веры просветившая;
Радуйся, токмо помыслившим о тебе скорейшую помощь подающая;
Радуйся, и не ведущим тя чудесне пособствующая;
Радуйся, блаженная мати Ксение, молений наших скорая послушательнице!

Кондак 2
Видяще родители твои и сродницы такову младу отроковицу Богом им даровану, здравием и лепотою украшену, веселящеся к пастырю церковному текоша, иже тя святым Крещением просвети и в честь преподобныя странницы Ксении-Римляныни нарече. Или бысть тамо некий Божий человек, иже будущая твоя исправления провиде, или иным образом Господь рабы Своя вразуми, да тако тя возыменуют, обаче по имени твоему бысть житие твое. Мы же, Богу, о всех и о всем промышляющему, взываем: Аллилуия.

Икос 2
Разум недоумеющ, о Ксение, имамы о делех Божиих, в тебе явленных, и что есть буйство о Христе и Духа Свята дарования. Аще и не вемы, кто есть, иже тя в Божественнем законе настави, и каково бысть во младенчестве и возрасте девичестем житие твое, обаче веруем, яко ревностно во благочестии пожила еси, и яко чрез все житие твое воспитоваше тя Всесвятый Господь, тесным путем рабы Своя ведый, во еже возмощи ти скорбь невольную и подвиг вольный понести. Сего ради возглашаем ти сицевая:
Радуйся, Святей Руси дщере истинная, духом тоя напитанная;
Радуйся, некоего славнаго рода отрасле благоуханная;
Радуйся, храма Божия теплая рачителънице;
Радуйся, молитвы, милостыни и всякаго доброделания добрая любительнице;
Радуйся, благочестивыми наставники во истиннем христианстем житии назданная;
Радуйся, в чистоте, послушании и смирении юность проводившая;
Радуйся, в честнем супружестве достойне жившая;
Радуйся, внезапу овдовевши, превелию ревность о Господе возымевшая;
Радуйся, во едином часе огнем Божия любве измененная и на подвиг вышеестественный изведенная;
Радуйся, четыредесятъ и пять лет в подвизе проведшая;
Радуйся, того ради благодать велию помогати верным стяжавшая;
Радуйся, на небеси Церковнем, яко новая звезда пресветло воссиявшая;
Радуйся, блаженная мати Ксение, молений наших скорая послушательнице!

Кондак 3
Сила Вышняго яве осени тогда Ксению, егда супруг ея, здрав и крепок сый, внезапу, спасительнаго Таинства не прием, скончася. Абие отверзошася тогда очи душевней двадесятошестолетней вдовице, и вся суета и тление привременнаго мира сего до конца обнажишася. Сердце же ея печалию разгарашеся, еда како вечнаго спасения супруг не улучит. Темже себе умрети, вместо же того жити, покаяние приносящи в злостраданиих и молитве непрестанней изволила еси. Воле же Господней вся предала еси, поющи Тому: Аллилуия.

Икос 3
Имущи, о Ксение, истинную в Бозе ко искреннему любовь, не плотскую, но паче духовную, уныние и мрачную печаль попрала еси, и мужним именем нарекшися, весело на подвиг тяжкий исшла еси, токмо на Единаго Бога и Пречистую Богородицу надеющися. Тем же мы, мужеству твоему дивящеся, воспеваем:
Радуйся, с прежнею одеждею всея воли своея и разума совлекшаяся;
Радуйся, с мужнею одеждею в терпение скорбей за того облекшаяся;
Радуйся, яко стяжала еси тую любовь, больше коея никтоже имать;
Радуйся, воистину душу за искренняго положшая;
Радуйся, не себе ктому, но Христу и ближнему жившая;
Радуйся, самый разум, яко начаток, благоприятне Богу принесшая;
Радуйся, яко образовательне мужеским именем себе нарекла еси;
Радуйся, яко женскую немощь отвергши, блаженным мужем соделалася еси;
Радуйся, тленное имение гладным и нищим расточившая;
Радуйся, сего ради в сокровищех небесных часть улучившая;
Радуйся, самое жилище твое отдавшая, да вечную обитель обрящеши;
Радуйся, не токмо избыточнаго чесо, но и самаго насущнаго не имевшая;
Радуйся, блаженная мати Ксение, молений наших скорая послушательнице!

Кондак 4
Бурею гнева и недоумения сродницы и знаемии твои смятошася, уведевше, яко ты вся имения твоя бедным расточаеши и, в мужнюю одежду облекшися, нища по стогнам града скитаешися, Андреем Федоровичем нарицающися и Ксениею глашати тя воспрещающи. Егда же тщахуся неции препятствовати ти, безумною тя именуя, Сам Господь Сил защити тя, да вси тобою ущедреннии возгласят: Аллилуиа.

Икос 4
Слышавше благочестивии людие Петрова града, яко знатная вдовица Ксения нища и яко безумна по граду скитается, дивляхуся зело. Познавше же дивныя ея кротость, незлобие и смирение, еще же зноя и дождя, ветра и мраза, и поношении от злых человек вышеестественное терпение, паче же помощь чудодейственную от тоя бываемую, разумеша в ней истинную угодницу Божию и возопиша тако:
Радуйся, в стужу в рубище и необувена ходившая, не имущи, где главы подклонити;
Радуйся, яко токмо благодать Божия согреяние тебе бысть;
Радуйся, злая поношения и надсмеяния от неразумных благодарне терпевшая;
Радуйся, сладость молитвы за обидящих благодатне вкушавшая;
Радуйся, на телесная и душевная страдания произвольне себе обрекшая;
Радуйся, яко познала еси смирения Христова в души твоей благодатное действие;
Радуйся, терпением лютых к состраданию многих подвигшая;
Радуйся, благодеяния телеси твоему отвергавшая;
Радуйся, приятыя тобою лепты абие прочим нищим подававшая;
Радуйся, великому блаженному Андрею добре поревновавшая;
Радуйся, на всяку нощь, в лето и зимний мраз коленопреклоненне вне града молившаяся;
Радуйся, яко бысть молитва твоя, яко крове излияние;
Радуйся, блаженная мати Ксение, молений наших скорая послушательнице!

Кондак 5
Боготечною звездою моею дерзаю нарещи тя, о блаженная! Ты бо иногда образом честнаго жития твоего к Церкве истинней твердо мя привлекла еси, о твоей любве, самоотвержении и нищете уведевшаго. Аще же и ныне леностне во блате страстей низлежу, к самому деланию заповедей Господних доселе не приступая, чуждым смиреннаго Духа Христова и всякия добродетели обретаяся, но молю тя, нашу скоропослушницу: очи душевнеи всеяснейше отверзи ми и ко истинному покаянию настави, да, спасыйся, с тобою воспою Богови: Аллилуия.

Икос 5
Видим в тебе, о мати Ксение, вернейший образ истиннаго Христу последования: самую бо душу твою возненавидевши, вся вящшая Евангельская заповедания в совершенней мере исполнила еси, изряднейший образ самоотвержения, простоты, кротости, всепрощения, милосердия и любве показующи. Обычныя же всим человеком скорби нивочтоже ты вменила еси, сугубейший крест юродства о Христе и от мира поругания подъемши, совершеннаго смирения ради. Темже таковыя песненныя венцы соплетем ти:
Радуйся, истинная ученице Христова, путь творения заповедей Его яве указующая;
Радуйся, в хладности и погибельнем нерадении тем ны обличающая;
Радуйся, пред всякою тварию себе нивочтоже вменившая и всем под нозе себе повергшая;
Радуйся, о чужих гресех, якоже о своих, злострадания, плач и моления Богу принесшая;
Радуйся, не токмо небо, но и любовь к тебе людей наследившая и чрез сие к благотворениям тех привлекшая;
Радуйся, правды Божией, а не человечестей ревностне взыскавшая;
Радуйся, яко болезнованием о страждущих сердце твое раздирашеся;
Радуйся, ангельским житием преискренне Богообщение стяжавшая;
Радуйся, дщере Господня истинная, в домех верных мир и любовь водворившая;
Радуйся, праведнаго обличения нетерпящими люте изгнонимая;
Радуйся, яко выну хулима, стужаема и преследуема от бесов и злых человеков была еси;
Радуйся, по словеси Господню, яко мзда твоя велия на небесех;
Радуйся, блаженная мати Ксение, молений наших скорая послушательнице!

Кондак 6
Проповедница Евангелия деятельная, о блаженная, явилася еси, чудесы многими свидетельствующи, яко едина есть вера истинная — Святая Православная, и един к Богу путь — добродетельное житие и во гресех покаяние. Тако бо купечестей жене близкую кончину предрекла еси, огнь же в доме жены благочестивыя молитвою твоею угасила еси, рекши: возьми пятак, зде Царь на коне,— потухнет; врача же, кончиною супружницы сокрушенна, утешила еси, подружие верное прозорливо тому пославши. Вся же научила еси непрестанно взывати Богу: Аллилуия.

Икос 6
Воссия в тебе, о мати Ксение, яснейший свет благодати Духа Свята, егда, якоже инии глаголют, пребыла еси негде осмь лет духоносными старцы в подвизе твоем наставляема. Егда же паки во град Петров возвратилася еси, всяческими дары изобилующи, тогда наипаче явилася еси скорбящим — теплое утешение, болящим — врачевание, обидимым — заступление, нищим — обогащение, грешным — обличение и обращение, заблуждшим — на путь истинный возвращение, известия о грядущих или упреждения некоего требующим — истинная пророчица и воли Божией возвестительница, бедствия отвращающая. Вси же, помощь тобою обретшии, благочестно навыкоша вопити тебе тако:
Радуйся, духовную помощь подающая и в насущных нуждех не оставляющая;
Радуйся, во всяцем деле блазе добрая наша споспешнице;
Радуйся, тайне нощию тяжкия камения для строения церковнаго носившая;
Радуйся, купцем и возницем в делех преспеяние чудесне подававшая;
Радуйся, всюду свет утешения и мира расточавшая;
Радуйся, яко всякому месту и дому посещение твое благословение Божие бысть;
Радуйся, страждущим и немощным младенцем, токмо коснувшися, исцеление подававшая;
Радуйся, яко тобою одинокие — подружий, сироты — матерей обретаху;
Радуйся, Царей благочестивых, яко Помазанников Божиих почитавшая;
Радуйся, кровопролитие при Царстем дворе провидевши, горце восплакавшая;
Радуйся, яко, аможе аще ты входила еси, тамо обретаху вси помощь и заступление;
Радуйся, теплая о нас молитвеннице;
Радуйся, блаженная мати Ксение, молений наших скорая послушательнице!

Кондак 7
Хотящим безумным отроком блаженную не токмо злыми словесы поношати, но и камением побити, внезапу устремися на ня, тростию яростне угрожающи. Вемы, о Ксение, яко не плотский гнев на сие подвиже тя, но веление Божие, еже от нас сокровенно, тебе же ведомо есть. Мнози убо делы святых мнятся миру соблазн быти, обаче по Бозе суть соделана. Мним, яко бысть сие, да потщатся людие милостивии от всякия обиды ограждати тя, или во образ ревности твоея противу духов нечистых и злых помыслов, или — да не помыслят ктому сии жестокосердии и инаго кого тако обидети. Мы же, выну гневом греховным и яростию побеждающиися, всеми сими наказани бывше, воспоим Богови: Аллилуия.

Икос 7
Дивни твои глаголи явишася благочестивей Параскеве, еже: гряди на Смоленское кладбище, яко Господь ти сына послал есть. Обаче, верою к тебе понуждаема, скоро тамо тече и обрете новорожденно отроча, матере своея лишившееся, еже возрасте и бысть ей чадо доброе и послушливое, старости же ея упокоение. Таковое твое благодеяние воспоминающе, возглашаху тии:
Радуйся, Божия милосердия к нам посланнице;
Радуйся, яко всеблагий Того промысл тобою явися;
Радуйся, благаго и спасительнаго жития нашего на земли устроительнице;
Радуйся, о достойнем нашем к вечности приготовлении попечительнице;
Радуйся, от деяний погрешительных или пустых нас удержавающая;
Радуйся, благотворити ближним, непрестанне молитися и каятися ны подвизающая;
Радуйся, многажды свое покровительство являющая;
Радуйся, последствия грехопадений наших изглаждающая;
Радуйся, от бед, напастей и обстояний наше ограждение;
Радуйся, наглыя смерти отвращение;
Радуйся, избавления муки вечныя наша ходатаице;
Радуйся, на Страшнем Судищи Господни твердая наша надеждо;
Радуйся, блаженная мати Ксение, молений наших скорая послушательнице!

Кондак 8
Странна и пришелица на земли, о Ксение, пожила еси и, достойне течение скончавши, уз плоти твоея разрешилася еси, да выну со Христом будеши. Егда же на месте подвигов твоих, Смоленстем кладбище, погребению предана была еси, многия тысящи православных тамо притекаху, самую насыпь могильную на всякое лето на благословение разбирающе, земля бо тая обильне чудеса и исцеления источаше. Еще же и каменныя плиты, усердствующими положенныя, на мелкия части раздробиша помощи от тебе требующия. Обаче на лепты, теми оставляемыя, часовня на могиле твоей сооружена бысть, да вси чтущии тя возгласят: Аллилуия.

Икос 8
Весь ум к Богу выну, о Ксение, ты имела еси. Аще же и образ иноческий восприяти недостойною себе помышляла еси, обаче житие поистине равноангельное проводила еси: всецелое от мира отречение, дивную чистоту, превелие самоотвержение, глубину смирения и высоту рассуждения, совершенную воле Божией преданность и любовь показующи, окрест же тебе уже благочестию оскудевающу и самому монашеству немоществовати наченшу. Сего ради вси монаси и целомудрия рачителие, изрядную любовь и веру к тебе имеюще, непрестанно воспевают:
Радуйся, со апостолом и со пророком странницей и пришелицей в земнем изгнании пребывшая;
Радуйся, яко по имени твоему бысть житие твое;
Радуйся, выну ко отечеству небесному текшая;
Радуйся, очи душевнеи непрестанно ко Горнему Иерусалиму имевшая;
Радуйся, со святым Павлом мир себе и себе миру пропявшая;
Радуйся, умершею себе именовавшая, мертвость миру сему и совершенную память смертную показующи;
Радуйся, сыном мира отребие бывшая;
Радуйся, человеком не угождавшая, да истинная раба Божия будеши;
Радуйся, вси ступени Божественныя лествицы совершенства христианскаго претекшая;
Радуйся, деятельными восхожденьми в видение первее и послежде в чертог небесный вшедшая;
Радуйся, яко праведне блаженною именуешися;
Радуйся, яко законне в подвизе юродства подвизавшися, блаженство неизреченное на небесех улучила еси;
Радуйся, блаженная мати Ксение, молений наших скорая послушательнице!

Кондак 9
Всякую надежду на сыны человеческия оставиша родители и сродницы трилетния отроковицы, вредом ушесе мучимыя, егда рекоша врачеве, яко аще не умрет, обаче слышати никакоже возможет. Егда же помазана бе отроковица елеем от блаженныя Ксении, пению заупокойному по той сотворену, абие страданий избавлена и совершенне исцелена бысть. Такожде и крестьянская жена, тяжко зубы страждущая, и военачальник, хождения лишенный, в храме твоем, Ксение, во единем часе недугов избавишася и воспеша весело: Аллилуия.

Икос 9
Ветия суемудреннии подвига юродства ради Христа разумети не могут, слово бо крестное погибающим юродство есть: иудействующим — соблазн, язычником же и невером — безумие; самих же явных чудес благодати Господней сии вси безумне отвергаются, очеса и слухи затворяюще. Мы же, буйими о Христе со апостолом быти некогда чающе, части же Евангельских юродивых дев тщащеся убежати, святей блаженной Ксении воспеваем:
Радуйся, мнящихся о себе мудрыми быти в безумии изобличающая;
Радуйся, простых и смиренных рассудительными являющая;
Радуйся, токмо обряды блюдущих, силы же благочестия отвергшихся вразумляющая;
Радуйся, хладным и маловерным нам очеса душевная отверзающая;
Радуйся, равнодушных от сна нечувствия восставляющая;
Радуйся, смиритися под крепкую руку Господню и во всем Богу предатися ны побуждающая;
Радуйся, тесный путь Креста Господня велегласно прославляющая;
Радуйся, безропотне и благодарне вся скорбная терпети понуждающая;
Радуйся, токмо себе самех во всех приключающихся виновными разумети научающая;
Радуйся, от противления судьбам Господним, малодушия, ропота и уныния опасне предостерегающая;
Радуйся, плотский разум, на Евангельский закон воздымающийся, посрамляющая;
Радуйся, в смятении, страсе и отчаянии сущих умиротворяющая;
Радуйся, блаженная мати Ксение, молений наших скорая послушательнице!

Кондак 10
Спасти некогда восхотела еси воина юнаго от лютыя безвременныя кончины и вечныя погибели, аще и не ведяше о тебе, ниже Божией помощи призываше, — беша бо безбожная времена и гонения на Церковь Божию воздымашася. Сего ради в подклети дома некоего внезапу явилася еси ему, абие изыти оттуду повелевающи, храмина бо та вражеским орудием име разрушитися; себе же тому блаженною Ксениею наименовала еси. Егда же, многим летом минувшим, уведе воин, кто еси и где покоятся мощи твоя, радостно благодаряше Бога, взывая: Аллилуия.

Икос 10
Стену нерушиму обретоша тя мнози жены и матери заблуждших и недугом пиянства отягченных: ты бо иногда чтившия тя дщери купеческия мужа, в пиянстве ожесточившася, страшным видением обличила еси, к твердому покаянию наставльши, самаго со чады огненнаго запаления избавльши, вместо же лютыя нужды и отчаяния, мир, благополучие и достаток сим доставивши. Темже и ныне в пагубе пиянства пребывающии и погибельными зелиями одурманеннии, к тебе, яко к последнему прибежищу притекают и тщи николиже от тебе отходят, с ними же и мы возглашаем:
Радуйся, падших и заблуждших к Богу водительнице;
Радуйся, всякаго порока, лукавства и лжи горькая обличительнице;
Радуйся, из бездны падения чудесне восставляющая;
Радуйся, со даром покаяния и земная благая щедре дарующая;
Радуйся, чтущим тя чрез все житие многажды пособляющая;
Радуйся, простым и знатным, в лишениих жилище и пропитание скоро доставляющая;
Радуйся, кощунника некоего многими скорбьми, нищетою и гладом мудре наказавшая;
Радуйся, токмо к покаянию обращшагося того абие ущедрившая и упокоившая;
Радуйся, жене-полковнице тщетне о научении чад пекущейся непризываемая явившаяся;
Радуйся, абие по исполнении повеленнаго тобою желаемое пославшая;
Радуйся, самаго Государя Александра Третияго от смертнаго одра восставившая и о рождении дщери Ксении супруге того прорекшая;
Радуйся, велию любовь твою и ныне на сродники земныя изливающая;
Радуйся, блаженная мати Ксение, молений наших скорая послушательнице!

Кондак 11
Пение неумолчное подобает приносити Господу за вся нам приключающаяся, добрая и злая, и восхвалити милости Его, чрез святых являемыя. Не токмо 6о в Российстей стране, но и в дальней Америце блаженная Ксения о чтущих ю попечение являет. Тако некая жена, в самодвижней колеснице со дщерию и зятем едущи, внезапу узре колесницу на краю страшныя пропасти; разумев же, яко не возможет водящаго остановити, абие ко блаженным Ксении и Пелагии мысленно воззва, и чудесне колесница удержана и невредимо повернута бе. Сего ради из глубины души благодарственне возгласиша тии: Аллилуия.

Икос 11
Световодящую лучу зрим тя, о блаженная, во мраце последних времен, во тьме неведения нашего и забвения; яко овцы бо расточени есмы, и несть пророка или вождя, и мали суть истиннии советницы; токмо книги Святых Отец и жития угодников Божиих к научению имамы и в молебники тыя Господу усердне предлагаем, тебе же, единей от тех, с надеждею взываем:
Радуйся, в годину лютую гонений беззаконным художеством века сего во храме твоем творитися не допустившая;
Радуйся, христианом гонимым и во узах держимым верною помощию бывшая;
Радуйся, пришедших помолитися тебе от злобных приставников избавльшая;
Радуйся, затворену сущу храму твоему, чрез стены и землицу благодатная исцеления подававшая;
Радуйся, чтущих тя ко взаимному назиданию и пользе тогда и ныне купно собирающая;
Радуйся, заблуждшим юным, в неверии ожесточившимся, руку спасения простирающая;
Радуйся, неверами прельщенным наследником безбожных времен ко благочестию мосте;
Радуйся, в поисках Истины мятущимся доброе обретение;
Радуйся, сомнений, недоумений и обстояний наших разрешение;
Радуйся, тончайшаго гласа совести нашея выну послушати научающая;
Радуйся, и ныне, якоже прежде, чудотворящая;
Радуйся, яко чтущая тя девица Ксения, за всенощным бдением в память твою молишися, нечаемей смерти избавлена бысть;
Радуйся, блаженная мати Ксение, молений наших скорая послушательнице!

Кондак 12
Благодать подаждь ми, Даяй всяцей души брашно духовное, да не буду токмо плоть и кровь, и уразумею путь духовный, и возмогу прославити блаженную Ксению, толикую благодать Твою стяжавшую, яко страсти и недузи, и лукавии дуси трепетни и ужасни от нея отбегаху и ктому не возвращахуся, да взывают вси православнии людие Господеви: Аллилуия.

Икос 12
Поющи Бога не оскудевай, душе моя, дондеже живеши, якоже и блаженная Ксения творяше, и сего ради ныне на небесех выну воспевает Господа и молится, во еже нам, немощным, благая не токмо глаголати, но и творити, и неуклонне и непреткновенне путем Господних повелений ходити. Темже сице ея прославляем:
Радуйся, подвигом скитальчества твоего велицей преподобной Марии подобная;
Радуйся, благодать велию, якоже и тая, стяжавшая;
Радуйся, яко чтут тя православнии народи купно с древними велицыми чудотворцы;
Радуйся, яко вси, любовью к тебе привлекаемии, изрядную пользу душам получают;
Радуйся, немощствующим иноком последних времен в недоумениих ясное вразумление;
Радуйся, утонченных козней лукаваго в нынешнем веце изобличение;
Радуйся, многострадальней России ясносветящая звездо;
Радуйся, града Святаго Петра и всих градов и весей русских теплейшая печальнице;
Радуйся, отпадшим от церковнаго единства Российским чадом покаяния всемощная просительнице;
Радуйся, гласа вечности в сердцах наших неумолчная возвестительнице;
Радуйся, всем умом, помышлением и всею крепостию Бога возлюбити вся ны наставляющая;
Радуйся, вся собрати во едино и ко Истине и блаженству вечному привести всеусильне тщащаяся;
Радуйся, блаженная мати Ксение, молений наших скорая послушательнице!

Кондак 13
О, святая блаженная мати Ксение, страннице Петрова града и наследнице горняго Иерусалима! Нынешнее наше приими убогое моление и теплейше Господа умоли: избавити нас нечувствия и сердечнаго ожесточения, даровати же нам плач и умиление, исполнити милосердия и смирения, и тако вся нам простити и помиловати нас, да с тобою купно во блаженстве вечнем воспеваем выну: Аллилуия, Аллилуия, Аллилуия!
Этот Кондак читается трижды, затем 1-й Икос «Ангельския Силы возрадовахуся...» и 1-й Кондак «Избранней в последняя лета...».

МОЛИТВА блаженной Ксении Петербургской
О, святая блаженная мати Ксение, страннице града Святаго Петра и всея России и всих православных народов дивная печальнице и чудотворице! Ты велиим и тяжким подвигом славы ради Божия на земли подвизалася еси, образ безумия на всеобщее посмеяние носящи, телесная же страдания, глад и хлад, жажду и наготу, и человечская и демонская стужания терпящи, благодать же Духа Святаго пребогатую еще в земнем житии стяжала еси. Сего ради сицевою благолепотою краснаго жития твоего, такожде и чудесы, многи и неверныя просветила еси и доселе просвещаеши, верным же многая всеразличная вспоможения, исцеления, утешения и всякая иная благодеяния подаеши.
Темже и мы, немощнии и всякому злу и нечистоте причастнии, отонудуже во многи скорби, обстояния и болезни впадшии, скорая и безотказная, и щедрая твоя вспоможения добре ведуще, с теплейшею верою и любовию к тебе притекаем и усердно молим: испроси нам твоими благоприятными ко Господу молитвами наипаче вся ко спасению благопотребная: разум к познанию заповедей Божиих просвети, сердце в твердой воли ко благочестию утверди, руце наша на благая деяния вооружи, возбрани же всякому нашему ко греху поползновению, мир Христов, всяк ум преимущ, и царство небесное, еже внутрь нас, даруй, такожде и многообразныя язвы наша уврачуй, от обстояний разреши, и всея жизни нашея течение исправи. Ближним нашим помощь Божию, просвещение духовное и телесных недугов свобождение подаждь. Вся ны от лютых агарянских нашествии защити, плененныя свирепыми безбожники братия наша свободи и порази безумную и богоборную врагов гордыню. Гладным же и немощным, бесприютным и всеми оставленным вся благопотребная душевная и телесная даруй. Не имущим жилища или места, идеже труждатися, пропитания ради, тая подаждь. Да вси прославим Бога, дивнаго во святых Своих, и твое милостивное предстательство, во веки веков. Аминь.[/spoiler]

Раб божий Константин

Акафист блаженной Ксении страннице Петербургской третий.
[spoiler]Кондак 1
Избранная угодница и Христа ради юродивая, святая блаженная мати Ксения, избравшая подвиг терпения и злострадания, хвалебное пение приносим ти, чтущия святую память твою. Ты же заступи нас от враг видимых и невидимых, да зовем ти:
Радуйся, Ксения блаженная, молитвенница о душах наших.

Икос 1
Равноангельского жития взыскала еси, блаженная мати, по успении мужа твоего отвергла еси мира сего красоту и вся, яже в нем: похоть очес, похоть плоти и гордость житейскую, юродством разум Христов стяжала еси. Того ради услыши от нас похвалы, тебе возносимые:
Радуйся, житием твоим Андрею, Христа ради юродивому равная;
Радуйся, имени своего отрекшаяся, себе же умершей именовавшая.
Радуйся, в юродстве имя мужа твоего Андрея приявшая;
Радуйся, именем мужеским назвавшись, немощи женской отрешившаяся.
Радуйся, все имение твое добрым людям и нищим раздавшая;
Радуйся, нищету добровольную Христа ради приявшая.
Радуйся, века сего суемудрия юродством твоим отвергатися нас научившая;
Радуйся, благая утешительнице всех, в молитве к тебе прибегающих.
Радуйся, Ксения блаженная, молитвенница о душах наших.

Кондак 2
Видя странное твое житие, яко ты презрела еси дом свой и всякое мирское богатство, родные по плоти безумной тя полагаху, людие же града Петрова, видя смирение твое, нестяжание и вольную нищету, воспели Богу: Аллилуиа.

Икос 2
Разум, от Бога тебе данный, ты, Ксения блаженная, в мнимом безумии скрыла еси; в суете града великого аки пустынница жила еси, молитвы Богу свои вознося непрестанно. Мы же, дивящеся таковому житию твоему, взываем тебе хвалебно:
Радуйся, крест тяжкий юродства, от Бога тебе данный, на рамо свое принявшая;
Радуйся, мнимым безумием сияние благодати скрывавшая.
Радуйся, дар прозорливости смирением крайним и подвигом молитвы стяжавшая;
Радуйся, дар сей на пользу и спасение страждущих являвшая.
Радуйся, страдания людския прозорливо в дали необозримей зревшая;
Радуйся, жене доброй о рождении сына прорекшая.
Радуйся, яко жене той у Бога чадо испросившая;
Радуйся, всех к Богу в молитве прибегати научившая.
Радуйся, Ксения блаженная, молитвенница о душах наших.

Кондак 3
Силою свыше, от Бога тебе дарованной, зной и люту стужу мужественно претерпевала еси, распиная плоть свою со страстьми и похотьми. Тем же Духом Святым просвещаемая, взывала непрестанно Богу: Аллилуиа.

Икос 3
Имея, о блаженная, небо покровом себе, землю же ложем своим, отвергла еси плотоугодие Царства Божия ради. Мы же, зряще таковое твое житие, со умилением зовем ти:
Радуйся, жилище свое земное людям отдавшая;
Радуйся, небесного крова взыскавшая и получившая.
Радуйся, ничто же земное имущая, а всех духовно богатящая;
Радуйся, житием своим терпению нас научающая.
Радуйся, любовь Божию людям показующая;
Радуйся, плодами благочестия украшенная.
Радуйся, терпение и незлобие миру явившая;
Радуйся, теплая предстательница наша пред престолом Всевышнего.
Радуйся, Ксения блаженная, молитвенница о душах наших.

Кондак 4
Бурю житейскую, во граде Петрове мятущуюся, кротостию и незлобием преодолела еси, блаженная мати, бесстрастие же к тленному миру стяжала еси. Тем же и поеши Богу: Аллилуиа.

Икос 4
Слыша о тебе, яко ты, злостражда Христа ради, скорбных утешаеши, немощных укрепляеши, заблудших на путь правый наставляеши, людие страждущия к помощи твоей прибегаху, воспевающе тебе:
Радуйся, путь Христов всем сердцем возлюбившая;
Радуйся, крест Христов радостно понесшая.
Радуйся, всякое поношение от мира, плоти и диавола претерпевшая;
Радуйся, даров Божиих преисполненная.
Радуйся, любовь к ближним явившая;
Радуйся, страждущим людям утешение подававшая.
Радуйся, слезу плачущих отиравшая;
Радуйся, благодатию Духа Святаго чудесно согреваемая.
Радуйся, Ксения блаженная, молитвенница о душах наших.

Кондак 5
Боготечной звездой явилася святость твоя, Ксения блаженная, осветившая небосклон града Петрова. Уже бо людем, гибнущим в безумии греха, ты явила путь спасения, всех к покаянию призывая, во еже вопити Богу: Аллилуиа.

Икос 5
Видя подвиги твоя в молитве, терпении хлада и зноя, благочестивые люди пытахуся умалити страдания твоя, одежду тебе и пищу приносяще. Ты же вся сия нищим раздавала еси, желая в тайне подвиг свой сохранити. Мы же, дивяся вольней нищете твоей, взываем ти сице:
Радуйся, зной и стужу Христа ради добровольно терпевшая;
Радуйся, в молитве непрестанно пребывавшая.
Радуйся, град Петров всенощным бдением от бед ограждавшая;
Радуйся, гнев Божий многажды от него отвращавшая.
Радуйся, во все дни года ночами в поле молившаяся;
Радуйся, сладость райскую в нищете духовной вкусившая.
Радуйся, яко в сладости сей вся земная оставившая;
Радуйся, яко вся в Боге пребывавшая.
Радуйся, Ксения блаженная, молитвенница о душах наших.

Кондак 6
Проповедуют святость жития твоего, богоблаженная, вси избавленнии тобой от многоразличных болезней, бед и скорбей, богатии и убозии, старцы и юныя. Тем же и мы, прославляюще тя, Богу вопием: Аллилуиа.

Икос 6
Воссияла слава подвигов твоих, блаженная мати, егда ты нощию строителям церкви Смоленской камни тайно носила еси, облегчая делателей церковных. Сия ведуще, и мы грешнии зовем ти таковая:
Радуйся, тайно творити добродетели нас научающая;
Радуйся, к подвигам благочестия всех призывающая.
Радуйся, строителям храмов Божиих помогающая;
Радуйся, святость церковную возлюбившая.
Радуйся, труды наши на пути спасения облегчающая;
Радуйся, к тебе прибегающих скорая помощница.
Радуйся, всем скорбящим благая утешительница;
Радуйся, града Петрова небесная заступница.
Радуйся, Ксения блаженная, молитвенница о душах наших.

Кондак 7
Хотя избавити от скорби плачущаго врача, жену хоронившего, ты повелела некоей девице на Охту бежати и тамо мужа себе обрести и утешити. И совершишася тако, якоже ты рекла еси. Они же в радости воспеша Богу: Аллилуиа.

Икос 7
Новое чудо в молитве своей показала еси ты, блаженная мати, егда рекла еси жене благочестивой: «Возьми пятак, потухнет». Сим прорекла ей о пожаре дома ея. И по молитве твоей пламень огня угасе. Мы же, ведяще сия, вопием ти похвальная:
Радуйся, скорби людские угашающая;
Радуйся, дерзновение пред Богом за страждущих явившая.
Радуйся, свеча неугасимая, в молитвах к Богу ярко горящая;
Радуйся, предстательница наша в бедах и напастях.
Радуйся, страстьми одержимых от гибели спасающая;
Радуйся, благочестивых дев от брака неверного отвращающая.
Радуйся, клеветою уязвленных от отчаяния избавляющая;
Радуйся, на суде неправедном скорая защитница.
Радуйся, Ксения блаженная, молитвенница о душах наших.

Кондак 8
Странницей бездомной прошла еси путь жизни твоей в стольном граде отечества нашего, в велицем терпении скорби и поношения неся. Ныне же в горнем Иерусалиме пребывая, в радости поеши Богу: Аллилуиа.

Икос 8
Всем вся была еси, Ксения блаженная: скорбящим утешение, немощным покров и защищение, печальным радование, нищим одеяние, болящим исцеление. Сего ради и вопием тебе:
Радуйся, в горних обителях пребывающая;
Радуйся, о нас грешных тамо молящаяся.
Радуйся, благий образ служения Богу явившая;
Радуйся, униженных и гонимых покровительница.
Радуйся, православный люд молитвами твоими заступающая;
Радуйся, обидимых и молящихся тебе защищающая.
Радуйся, обидящих вразумляющая;
Радуйся, неверных и глумителей посрамляющая.
Радуйся, Ксения блаженная, молитвенница о душах наших.

Кондак 9
Всякия претерпела еси болезни, блаженная мати, нищету телесную, глад и жажду, еще же и поношение от людей беззаконных, иже мняху тя безумной быти. Ты же, Господу моляся, выну взывала Ему: Аллилуиа.

Икос 9
Вития многовещанныя не могут разумети, како ты безумием своим безумие мира сего обличила еси и немощию своею посрамила еси крепкия и мудрыя. Не ведают бо в тебе Божией силы и Божией премудрости. Мы же, помощь твою получившия, поем ти таковая:
Радуйся, Божественного Духа носительница;
Радуйся, со апостолом Павлом немощию своею хвалившаяся.
Радуйся, мнимым безумием своим мир обличившая;
Радуйся, красоту века своего спасения ради отвергшая.
Радуйся, небесная блага всем сердцем возлюбившая;
Радуйся, на путь спасения нас призывающая.
Радуйся, во грехе пьянства грозная обличительница;
Радуйся, безмездным врачом и милостивым всем бывшая.
Радуйся, Ксения блаженная, молитвенница о душах наших.

Кондак 10
Хотя спасти душу, ты плоть свою со страстьми и похотьми распяла еси и, невозвратно себя отвергши, крест свой на рама своя возложила еси и Христу всем сердцем последовала еси, поя Ему: Аллилуиа.

Икос 10
Стена еси твердая и прибежище необоримое явилась молящимся тебе, мати Ксения. Тем же заступай и нас от враг видимых и невидимых молитвами твоими, да зовем ти:
Радуйся, на труд духовный нас воздвигающая;
Радуйся, от сетей вражиих нас избавляющая.
Радуйся, фимиам кадильный, Богу приносимый;
Радуйся, мир Божий в сердца людей приносящая.
Радуйся, дух злобы в сердцах озлобленных угашающая;
Радуйся, детям благим благословение подающая.
Радуйся, тайною молитвою их от болезней исцеляющая;
Радуйся, миру озлобленному мудрость Божию явившая.
Радуйся, Ксения блаженная, молитвенница о душах наших.

Кондак 11
Пение хвалебное приносят ти, Ксения блаженная, спасшиеся твоими молитвами от бед и скорбей, и всяких напастей, и купно с тобою радостно поют Богу: Аллилуиа.

Икос 11
Светозарным светом явилось житие твое, святая мати, во мраке жития сего освещающим люди. Ты бо падших из тины греха избавила еси и к свету Христову направила еси путь их. Тем же и зовем ти:
Радуйся, православных людей Божиим светом просвещающая:
Радуйся, Христова угодница, в мире надмирно пожившая.
Радуйся, труды многими великую благодать стяжавшая;
Радуйся, во тьме греха благодатию Божиею сиявшая.
Радуйся, отчаявшимся на пути спасения руку помощи подающая;
Радуйся, немощных в вере укрепляющая.
Радуйся, духов злобы посрамляющая;
Радуйся, житием своим ангелов удивившая.
Радуйся, Ксения блаженная, молитвенница о душах наших.

Кондак 12
Благодать обильно источаеши, Ксения блаженная, на чтущих память твою и прибегающих к покрову твоему. Тем же и нам, тебе молящимся, источи от Бога струи исцеления, да зовем Ему: Аллилуиа.

Икос 12
Поюще многая чудеса твоя, блаженная мати, восхваляем тя и всеусердно молим, не остави нас грешных в скорбных обстояниях, но умоли Господа сил, да не отпадем от веры нашея православныя, в Нем же тобою утверждаеми зовем ти:
Радуйся, сострадати страждущим нас научающая;
Радуйся, немощи наша всеусердно врачующая.
Радуйся, распинати плоть со страстьми и похотьми научающая;
Радуйся, о чтущих память твою ходатаице и покровительнице.
Радуйся, скорбный путь прошедшая;
Радуйся, спасение вечное сим улучившая.
Радуйся, ко гробу твоему притекающим отраду подающая;
Радуйся, о спасении Отечества нашего присно ходатайствующая.
Радуйся, Ксения блаженная, молитвенница о душах наших.

Кондак 13
О святая блаженная мати Ксение, в житии твоем крест тяжкий понесшая. Приими от нас, грешных, моление сие, к тебе приносимое. Огради нас молитвами твоими от наветов духов тьмы и всех, мыслящих нам злая. Умоли всещедрого Бога подати нам силу и крепость, да кийждо от нас возьмет крест свой и во след Христу грядет, поя Ему с тобою: Аллилуиа.
Этот Кондак читается трижды, затем Икос 1 и Кондак 1

Молитва к блаженной Ксении Петербургской
О святая всеблаженная мати Ксение! Под покровом Всевышняго жившая, ведомая и укрепляемая Богоматерью, голод и жажду, холод и зной, поношения и гонения претерпевшая, дар прозорливости и чудотворения от Бога получила еси и под сенью Всемогущего покоишися. Ныне святая Церковь, яко благоуханный цвет, прославляет тя. Предстояще на месте твоего погребения, пред образом твоим святым, яко живей ти, сущей с нами, молимся ти: приими прошения наша и принеси их ко престолу милосерднаго Отца Небеснаго, яко дерзновение к Нему имущая, испроси притекающим к тебе вечное спасение, на благая дела и начинания наша щедрое благословение, от всяких бед и скорбей избавление. Предстани святыми твоими молитвами пред Всемилостивым Спасителем нашим о нас, недостойных и грешных. Помози, святая блаженная мати Ксение, младенцы светом святого крещения озарити и печатию дара Духа Святаго запечатлети, отроки и отроковицы в вере, честности, богобоязненности воспитати и успехи в учении им даровати; болящия и недугующия исцели, семейным любовь и согласие ниспосли, монашествующих подвигом добрым подвизатися удостой и от поношений огради, пастыри в крепости Духа Святаго утверди, народ и страну нашу в мире и безмятежии сохрани, о лишенных в предсмертный час причащения Святых Христовых Тайн умоли. Ты наша надежда и упование, скорое услышание и избавление, тебе благодарение воссылаем и с тобою славим Отца и Сына и Святаго Духа, ныне и присно, и во веки веков. Аминь.

Молитва иная
О препростая образом жития своего, бездомная на земли, наследнице же обителей Отца Небеснаго, блаженная страннице Ксение! Якоже прежде к надгробию твоему недужнии и скорбнии припадавшии и абие утешениями исполняемии, сице ныне и мы (имена), обуреваемии тлетворными обстоянии, тебе прибегающе, с надеждою просим: помолися, благая небошественнице, дабы исправилися стопы наша по словеси Господню к деланию заповедей Его, и да упразднится богоборное безбожие, пленившее град твой и страну твою, повергающее нас, многогрешных, в смертное братоненавидение, гордое самовозбешение и хульное отчаяние. О, блаженнейшая Христа ради, посрамившая суемудрость века сего, испроси у Творца и Подателя всяческих благ даровати нам смирения, кротости и любве в сокровище сердца нашего, веры в укрепление молитвы, надежды в покаянии, крепости в многотрудном житии, милосерднаго исцеления души и тела нашего, целомудрия в супружестве и благопопечения о ближних и искренних своих, всего жития нашего обновление в чистительней бане покаяния, яко да всехвально воспевающе память твою, прославим в тебе чудодействующаго, Отца и Сына и Святаго Духа, Троицу Единосущную и Нераздельную во веки веков. Аминь.

Молитва третья
О преславная святая блаженная мати наша Ксение, теплая о нас пред Богом молитвеннице! Якоже прежде к надгробию твоему припадавшии, сице ныне и мы по прославлении твоем к мощем твоим прибегающе, просим: помолися Господу, да освятит наши души и телеса, да просветит ум, очистит совесть от всякия скверны, нечистых помыслов, лукавых и хульных умышлений и от всякаго превозношения, гордости же и кичения, высокоумия же и дерзости, от всякаго фарисейскаго лицемерия, и от всякаго студнаго и лукаваго обычия нашего; да дарует нам искреннее покаяние, сокрушение сердец наших, смиренномудрие, кротость же и тихость, благоговение, разум же духовный со всяким благоразумием и благодарением. Утаившая себе от мудрых века сего, но Богу знаемая, испроси же стране нашей Российстей от бед лютых избавление, всего нашего жития обновление и исправление, соблюди нас во всяком благочестивом православном исповедании веры христианския, яко да ублажающе тя сподобимся во вся дни воспевати, благодарити и славити Отца и Сына и Святаго Духа, Троицу Единосущную, Животворящую и Нераздельную во веки веков. Аминь.

Молитва четвертая
О святая угодница Божия блаженная Ксения! Призри милостиво твоим оком на нас, раб Божиих (имена), честной твоей иконе умильно молящиеся и просящие у тебе помощи и заступления. Простри ко Господу Богу нашему теплыя твоя молитвы и испроси душам нашим оставление прегрешений. Се бо мы сердцем сокрушенным, и духом смиренным тебе ходатаицу милостивую ко Владыце и молитвенницу за ны, грешныя, призываем, яко ты прияла еси от Него благодать молитися за ны и от бед избавляти. Тебе убо просим, не презри нас недостойных, молящихся тебе и твоей помощи требующих, и исходатайствуй всем вся ко спасению полезная, яко да твоими ко Господу Богу молитвами получивши благодать и милость прославим всех благих Источника и Дароподателя и Бога Единаго, в Троице Святей славимаго. Отца и Сына и Святаго Духа, ныне и присно и во веки веков.

Тропарь к святой блаженной Ксении Петербургской, глас 7:
Нищету Христову возлюбивши, безсмертныя трапезы ныне наслаждаешися, безумием мнимым безумие мира обличивши, смирением крестным силу Божию восприяла еси. Сего ради дар чудодейственныя помощи стяжавшая, Ксение блаженная, моли Христа Бога избавитися нам от всякаго зла покаянием.

Кондак, глас 3:
Днесь светло ликует град святаго Петра, яко множество скорбящих обретает утешение, на твоя молитвы надеющеся, Ксение всеблаженная, ты бо еси граду сему похвало и утверждение.

Величание
Величаем тя, святая блаженная мати наша Ксение, и чтим святую память твою, ты бо молиши за ны Христа Бога нашего.

Память 24 января/6 февраля.[/spoiler]

Раб божий Константин

Акафист преподобному Кукше, Одесскому чудотворцу.
[spoiler]Кондак 1


Избранный чудотворче и преславный угодниче Христов, предивный исповедниче н неусыпный о нас молитвенниче, преподобне отче Кукшо, прославляюще прославльшаго тя Господа, хвалебное пение восписуем ти, недостойнии. Ты же, яко имеяй велие дерзновение ко Господу, от всяких нас искушений и бед свободи, зовущих ти: Радуйся, преподобне отче наш Кукшо, чудотворче и исповедниче Христов.


Икос 1


Ангела во плоти, распеншася миру лукавому зрим тя, блаженне отче. Святым бо преподобномученикам подражал еси, иже верою содеяша правду, угасиша силу огненную, заградиша уста львов, обратиша в бегство полки чуждих. Темже со благоговением вопием ти таковая: Радуйся, избранный быти светильником Отечества нашего. Радуйся, своими подвиги и чудесы утвердивый в нем веру православную. Радуйся, сию исповедавый даже до крове и уз. Радуйся, благий подражателю жития великих угодников святой Руси. Радуйся, в смутное время богоборческаго шатания аки адамант непоколебимый явивыйся. Радуйся, неизреченных дарований сподобивыйся. Радуйся, благодатный иноков путевождю и наставниче. Радуйся, всех притекающих к тебе богомудрый духовниче и прозорливый учителю добротолюбия. Радуйся, преподобне отче наш Кукшо, чудотворче и исповедниче Христов.


Кондак 2


Видящи мати твоя небесное избранничество, измлада на тебе почившее, радовашеся сердцем и прославляше дивнаго во святых Своих Бога. Благословив же тя образом Казанския Пресвятыя Богородицы на прохождение теснаго и многотруднаго монашескаго жития, принесе тя плод благоуханен Господу. С сим же образом николиже расставался еси, пронеся благословение матерне чрез все поприще земное, со умилением вопия Богу: Аллилуиа.


Икос 2


Разум стяжав богопросвещенный от всемилостиваго Спаса, вся красная мира от юности твоея презрел еси, взем крест и последуя Христу. Притек же на поклонение во святый град Иерусалим и лобызая место, идеже страдаше Господь, благий обет добровольнаго крестоношения, иже во иночестем чине, принесл еси. Тем таковое произволение твое хваляще, вопием ти: Радуйся, благословение святаго града приемый. Радуйся, к Небесному Иерусалиму душею прилепивыйся. Радуйся, небесных предзнаменований в паломничестве сем сподобивыйся. Радуйся, иже банею пакибытия бысть тебе купель Силоамская, в нейже чудесно первым омовение приял еси. Радуйся, яко тая знамением твоего духовнаго благоплодия и многочадия явилася еси. Рaдyйcя, на Гробе Господнем елей от лампады на тя внезапу излиялся еси. Радуйся, яко от елея сего мнозии людие, к тебе прикасающеся, помазание прияху. Радуйся, яко чудо сие знамением бысть неиссякаемыя Божественныя благодати, чрез тебя верным подаваемыя. Радуйся, преподобне отче наш Кукшо, чудотворче и исповедниче Христов.


Кондак 3


Сила Вышняго осени тя, преблаженне, егда во удел Богоматери, святую гору Афонскую вселился еси, да истинный послушник Пресвятыя Богородицы, всечестныя Игумении всех иноческих обителей будеши, поучаяся в равноангельном подвизе и восходя горе по лествице аскетическаго доброделания, непрестанно взывая Подвигоположнику Христу: Аллилуиа.


Икос 3


Имеяше воистину попечение о спасении души, отвергся разумения своего и во всецелое послушание старцам святогорским вдался еси, да ум Христов приобрящеши. Сего ради посла тебе Бог авву преискусна и наставника нелестна, пустынножителя Мелхиседека, под его же старческим водительством от силы в силу возрастал еси, сподобльшеся пострижения монашескаго. Сего ради толикому усердию твоему дивящеся, умильно восклицаем: Радуйся, похвало святыя Афонския горы. Радуйся, любимиче вседержавныя Игумении иноческих обителей. Радуйся, преподобных отцев Афонских послушниче и последователю. Радуйся, подвигов их усердный рачителю. Радуйся, подъемый невидимую брань к духовом злобы поднебесныя. Радуйся, приемый дар умныя молитвы Иисусовы. Радуйся, первоначальнику Российскаго монашества преподобному Антонию Киево-Печерскому уподобивыйся. Радуйся, благословение богоспасаемыя горы в матерь градов Русских принесый. Радуйся, преподобне отче наш Кукшо, чудотворче и исповедниче Христов.


Кондак 4


Бурю воздвигше лютых искушений, враг рода человеча смуту всеяти на Святей Горе потщался еси, да изженет тя из пределов Афонских. Ты же, преподобне, со смирением сие гонение претерпел еси, и пришед в богоизбранный град Киев в пещерной лавре святых Антония и Феодосия вселился еси, да купно с преподобными отцами, зде мощами своими нетленно почивающими, поеши песнь Пресвятей Троице: Аллилуиа.


Икос 4


Слышаша, отче достохвальне, братия лавры Киево-Печерския о богоугодном житии твоем и видяще твердое во благочестии стояние, дивляхуся толикому к совершенству стремлению твоему, во всем следовати тебе хотяще. Егда же пагубныя обновленческия плевелы диавол на ниве церковней всеял еси, непоколебимый столп чистоты Православия показался еси, отче, еже и братию в сем утвердив, присно слышиши сия: Радуйся, светило веры Православныя. Радуйся, рачителю отеческих преданий. Радуйся, столпе огненный, среди мглы безбожия путь спасения показующий. Радуйся, в пагубное время еретических поползновений твоими молитвами братию утвердивый. Радуйся, всем людем пример истиннаго богопочитания показавый. Радуйся, зельне разженную пещь богоборчества росою исповедания твоего угасивый. Радуйся, преподобному Кукше, исповеднику и мученику Киево-Печерскому уподобивыйся. Радуйся, вся подвиги угодников Киево-Печерских унаследовавый. Радуйся, преподобне отче наш Кукшо, чудотворче и исповедниче Христов.


Кондак 5


Боготечная звезда сущим во мраце греховнем явился еси, святе, осиявая град и люди велии чудес светлостьми. Тако и пророческого обетования от святителя Серафима Полтавскаго сподобился еси, егда старец сей богопросвещенный, благословение архипастырское подая ти, прорек: "В сих пещерах место тебе уготовано!", дая разумети, яко Господь прославит тя обретением нетленных мощей. Зряще же ныне исполнение дивнаго сего проречения, со благоговением лобызаем святыя мощи твоя, поюще: Аллилуиа.


Икос 5


Видев тя подвижника веры и благочестия поборника, задумаша нечестивии погубити тя, вдавша на муки и в темницу заключиша. Ты же, яко мученик тверд, ни во что же вменил еси вражия уметы, взирая на Божественнаго Страстотерпца и следуя Его долготерпению. Сего ради ублажаем тя сице: Радуйся, шествовавый за Господом даже до Голгофских мук. Радуйся, исповедничеством просиявый. Радуйся, многоразличныя страдания от богоборцев приемый. Радуйся, тии яко к татем и разбойником, аки овцу к лютым волкам, ввергоша тя. Радуйся, сих яко зверей дивиих смирением твоим укротил еси. Радуйся, мраз нестерпимый и жестокое изнурение в сибирстей тайге мужественно претерпел еси. Радуйся, утешение ти Господь яко Илии чрез врана небеснаго подавый и гладом мучима напитавый. Радуйся, от лютыя болезни, от неяже имеяше умрети, тя чудесно избавивый. Радуйся, преподобне отче наш Кукшо, чудотворче и исповедниче Христов.


Кондак 6


Проповедник богоносный Божия благодати явился еси, пастырю благий, егда от епископа Киевскаго Антония Божественныя Дары приял еси, тайно во узилище посланныя, и не токмо сам благоговейно сих приобщивыйся, но и таинство исповеди устроив, содержимых во узах иночествующих братий и сестер причастники Животворящих Таин сотвори. Бысть же сия Святая Трапеза яко Вечеря Тайная учеников Христа Бога, яко Пасха светлая среди юдоли скорбныя, яко Пятидесятница, излиявшая нань струи огневиднаго Духа. Получившии же таковую милость, возсылаху теплое благодарение Богу и угоднику Его, поюще: Аллилуиа.


Икос 6


Возсия тебе свет милости Своея Христос Избавитель, егда в день церковныя памяти великомученика Георгия Победоносца из мрачныя темницы изведен бысть, страдальче, никакоже побежден от врага, хотяща низложити тя. Обаче нов подвиг предстояще ти, отче праведный, яко сослан бысть далече на поселение, и претерпеваше тамо нужду велию, не имый где главы подклонити. Сего ради вопием ти: Радуйся, библейским праведникам подражавый. Радуйся, яко тех, иже проидоша в милотех и козиих кожах, житию поревновавый. Радуйся, в лишениих, озлоблениих и скорбех течение твое безропотно совершал еси. Радуйся, подобно тем, ихже не бе достоин весь мир, скитание по пустыням, вертепам и пропастем земным подъял еси. Радуйся, якоже и онем, иже послушествовани бывше верою, тебе обетование даровася. Радуйся, дар неизреченных чудотворений в награду ти от Господа низпослася. Радуйся, яко Бог утешаше тя, и добрых людей, якоже Илии вдовицу, тебе ниспосылаше. Радуйся, якоже чрез Илию, велие благословение чрез тя на домы, тебе приявшая, нисхождаше. Радуйся, преподобне отче наш Кукшо, чудотворче и исповедниче Христов.


Кондак 7


Хотя Всевидец Господь явити тя светильника державы нашея, и не под спудом, а на свещнице высоком поставити, паки в лавру Киево-Печерскую возврати, да явлен будеши мирови. Людие же православнии аки бисер многоценный обретшии тя, радовахуся неизреченно и возсылаху благодарственное пение Богу: Аллилуиа.


Икос 7


Новая чудеса показа нам тобою, преподобне, всех чудес Творец и Владыка, отовсюду бо притекающия к тебе от недугов душевных и телесных врачевал еси, бесныя от злых духов свобождал еси, грядущая яко настоящая прорицал еси, греховныя язвы обличал еси, всем подавая потребная ко спасению. Людие же, от толиких бед избавленнии тобою, с веселием взываху ти: Радуйся, яко предивна чудотворца Церковь святая в тебе обрела еси. Радуйся, яко славо чудес твоих всю землю нашу осияваше. Радуйся, врачу душ и телес благодатный. Радуйся, покаяния учителю духоносный. Радуйся, схимниче прозорливый и святый. Радуйся, старче благостный и кроткий. Радуйся, духов злобы прогонителю дерзновенный. Радуйся, яко бесы, не терпяще светлости зрака твоего, далече от тебе отбегаху. Радуйся, преподобне отче наш Кукшо, чудотворче и исповедниче Христов.


Кондак 8


Странник многоскорбный явился еси, отче блаженне, исполнив на себе слова апостола, яко вси, хотящии жити благочестно, гоними будут. Власть бо имущия богоборцы изгнаша тя из лавры пещерныя, и в Почаев изведоша. Обаче Божиим произволением исход твой из Киевския обители в Почаевскую совершися, да и тамо просияеши житием твоим, поя Богу: Аллилуиа.


Икос 8


Вси иноцы святыя горы Почаевския в радостный трепет приидоша, видящи, какова пречестна отца обретают, добродетельми монашескими презельне украшена и увязена венцы мученическими. Сего ради почитаху тя сими словесы: Радуйся, яко Сама Пречистая Богомати, чудотворною иконою зде пребывающая и след стопы Своея на горе сей оставившая, во обитель прият тя. Радуйся, яко гора сия для тебя вторый Афон бяше. Радуйся, святому игумену лавры Иову Почаевскому во всем уподобивыйся. Радуйся, невидимаго сослужения с преподобным Иовом многажды сподобивыйся. Радуйся, якоже и он, богопротивным течениям униатским и раскольническим твердо противостоял еси. Радуйся, ослепленных погибельными ересьми в лоно Единыя Истинныя Святыя Соборныя и Апостольския церкве направлял еси. Радуйся, на Божественной Евхаристии ангелоподобно в сиянии светлом Богу предстоял еси. Радуйся, и чадам твоим духовным благодать молитвеннаго общения с Богом даровал еси. Радуйся, по слезным молитвам чад твоих духовных от тяжкаго недуга и преждевременныя кончины избавлен был еси. Радуйся, преподобне отче наш Кукшо, чудотворче и исповедниче Христов.


Кондак 9


Всякое естество человеческое удивися превеликому на тебе Божию благоволению, молитвенниче блаженне, неприступнаго бо Господа Славы, Егоже и ангели зрети не могут, непрестанно зрел еси внутренними духовными очесы, вперяя ум к горняя и выну поя Создателю своему: Аллилуиа.


Икос 9


Витийствовати не искусен был еси, старче смиренный, обаче якоже Марию Египетскую Бог Духом Своим просвещаше тя, Евангелие бo и псалмы Давидовы изустно вся ведый, службу церковную никогда же претыкаяся на память совершил еси, и не имеяше богословскаго познания, Писание якоже богодухновенный богослов изрядно толковал еси, открывая священныя глубины таин Божиих. Сему дивящеся, вопием ти: радуйся, мудростию свыше озаренный. Радуйся, Духом Святым осененный. Радуйся, яко в немощи твоей сила Божия всемощно совершися. Радуйся, яко от богатства словес твоих нищии духом обогащаются. Радуйся, яко от отеческих наставлений твоих алчущии и жаждущии правды насыщаются. Радуйся, дея учивый презирати убо плоть, преходит бо. Радуйся, примером своим многих подвигнувый прилежати души, вещи безсмертней. Радуйся, темже со ангелы срадуется, преподобне, дух твой. Радуйся, преподобне отче наш Кукшо, чудотворче и исповедниче Христов.


Кондак 10


Спасение и от вечныя погибели избавление всем, с верою и надеждею приходящим к тебе был еси, отче священне, изымая от рова греховных страстей и пагубных вожделений, и возводя к Небесному Царствию, идеже ты ныне с лики святых предстоиши престолу Господа Сил, моляся о нас, чадех твоих, и Богу воспевая: Аллилуиа.


Икос 10


Весь был еси в вышних, авво досточудне, совлекийся ветхаго человека с деяньми его и облeкийся во Христа, Его же всем сердцем возлюбил еси. Темже даровася тебе благодать велия от Господа, да вси молитвенно взывают ти: Радуйся, делателю неусыпный, мног плод сотворивый. Радуйся, древних отцев монашества Антония, Пахомия и Макария учениче и наследниче. Радуйся, якоже преподобный Сергий Радонежский, всеусердный служитель Пресвятыя Троицы бывый. Радуйся, подобне Серафиму Саровскому, пасхальним приветствием "Христос воскресе!" каждаго приходящаго к тебе лобызавый. Радуйся, преподобному Амвросию Оптинскому уподобляяся, всех детьми своими нарицавый. Радуйся, преподобному Силуану Афонскому в созерцании и богомыслии следовавый. Радуйся, яко стяжал еси дух мирен, и окрест тебе тысячи спасение обретоша. Радуйся, тобою бо Господь показа, яко не оскуде преподобныя в Руси Православней. Радуйся, преподобне отче наш Кукшо, чудотворче и исповедниче Христов.


Кондак 11


Пение всеумиленное приношаху ти жителие богоспасаемаго града Одессы, преподобне Кукшо, имже Господь яко злато неветшающее, в горниле бед искушенное и очищенное седмерицею, дарова тя, да будеши месту сему всемогущный заступник и покровитель, сохраняя его от стихийных бед и многоразличных обстояний. Темже и обитель Успения Пресвятыя Богородицы, в ней же ныне мощи твоя святыя почивают, именем твоим красуяся, Богу приносит песнь хвалебно-благодарственную: Аллилуиа.


Икос 11


Светозарная лампада, елей цельбоносныя благодати источающая, явишася честныя мощи твоя, преподобне, от них бо токи чудес изливаются, недуги отгоняя, от одра смертнаго возставляя, души возвеселяя, козни диавольския побеждая. Темже отцы и братия Свято-Успенския обители, каждодневно молебен пред ракою мощей твоих совершающе, с любовию возглашают ти: Радуйся, храмино преукрашенная Духа всесвятаго. Радуйся, кадильница благовонная, фимиам благих дел воскуряющая. Радуйся, честный ковчеже сокровищ неоскудеваемых. Радуйся, сосуде драгоценный даров неисчерпаемых. Радуйся, нетлением мощей зело от Бога прославленный. Радуйся, излиянием чудес от Господа возвеличенный. Радуйся, яко ни един тощ или неуслышан от мощей твоих исходит. Радуйся, яко многоцелебныя твоя мощи града сего бысть всемощное защищение и обители нашея благолепное украшение. Радуйся, преподобне отче наш Кукшо, чудотворче и исповедниче Христов.


Кондак 12


Благодать подаждь нам, авво богомудре, и помощь Божию испроси, да возможем, поучаяся твоим исправлениям, творити волю Спасителя благую, благоугодную и совершенную, и поживше в преподобии и правде, сподобимся с тобою в веце грядущем пети Создателю песнь нескончаемую: Аллилуиа.


Икос 12


Поюще твое богобоязненное и чистое житие, похваляем многоболезныя исповедническия труды твоя, почитаем схимническия подвиги, превозносим в молитве пламенное горение и к Богу дерзновение, чтим многопопечительное верных окормление и пастырское вразумление, славим плоти умерщвление и безропотное скорбей понесение, яже любве ради Божия благодушне подъял еси, отче святый и превеликий. Явился бо еси нам, в последняя лета живущим, светильник горяй и согреваяй, да мало порадуемся при свете его. Не остави же сирыми чад твоих, сподоби отеческаго попечения твоего, да ведомии тобою к духовному совершенству, выну тебе воспеваем и зовем: Радуйся, к лику святых и преподобных сопричтенный. Радуйся, в горний Иерусалим досточестне приятый. Радуйся, в книзе жизни златыми буквами начертанный. Радуйся, со всеми, Богу угодившими, на брак Агнчий возшедый. Радуйся, ризу твою брачную паче снега убеливый. Радуйся, яко побеждающий венец правды унаследовавый. Радуйся, престолу Владыки предстояй, тепле о нас ходатайствуеши. Радуйся, о всех, имя твое святое призывающих, дерзновенно предстательствуеши. Радуйся, преподобне отче наш Кукшо, чудотворче и исповедниче Христов.


Кондак 13


О преподобне и богоносне отче наш Кукшо, превеликий угодниче и предивный чудотворче! Призри на нас, во обстоянии греховнем сущих и во тьме неведения претыкающихся, и богоприятным твоим ходатайством страх Божий всели в сердца наша, плотское мудрование умертви, от искушений сохрани, православие утверди, да во благочестии и правоверии иждивем малое число дний наших, и избавльшеся от вечных мук адских, сподобимся в бесконечном веце совокупно с тобою славословити Бога, в Троице покланяемаго, воспевая Ему: Аллилуиа, аллилуиа, аллилуиа.


(Этот кондак читается трижды, затем икос 1 и кондак 1)



Молитва преподобному Кукше Одесскому


О преподобне и богоносне отче наш Кукшо, обители Успения Божией Матери похвало, богоспасаемаго града Одессы неувядаемый цвете, кроткий пастырю Христов и великий за нас молитвенниче. Усердно к тебе прибегаем и с сокрушенным сердцем просим: не отыми покров твой от обители нашей, в нейже подвигом добрым подвизался еси. Буди помощник благий всем благочестно живущим и добре труждающимся в ней. О добрый наш пастырю и богомудрый наставниче, преподобне отче Кукшо, призри милостивно на предстоящия люди, умиленно молящиеся и просящие от тебе помощи и заступления. Помяни всех, веру и любовь к тебе имущих, имя твое молитвенно призывающих и на поклонение мощем твоим святым приходящих, и вся во благих прошения их милостивно исполни, осеняя их святоотеческим твоим благословением. Избави, святый отче, от всякаго навета вражия Церковь нашу святую, град сей, обитель и землю нашу, и не остави заступлением твоим нас немощных, грехами и скорбями многими обремененных. Озари, преблаженне, ум наш светом лица Божия, укрепи благодатию Господней жизнь нашу, да в законе Христове утвердившеся, неленостно по пути заповедей святых потечем. Осени твоим благословением нас, и всех в скорбех сущих, болезньми душевными и телесными одержимых, исцеление, утешение и избавление даруя. Над всеми же сими испроси нам свыше дух кротости и смиренномудрия, дух терпения и покаяния, отступившим от православныя веры и погибельными ересьми и расколами ослепленным вразумление, во тьме неверия блуждающим светом истиннаго богопознания просвещение, раздоров и нестроений утоление. Умоли Господа Бога и Пресвятую Богородицу даровати нам тихое н безгрешное житие. Поминай нас недостойных у престола Вседержителя, и испроси мирную христианскую кончину, и сподоби нас помощию твоею спасение вечное улучити и Царствие Небесное унаследовати, да славословим велия щедроты и неизреченныя милости Отца и Сына и Святаго Духа, в Троице поклоняемаго Бога, и твое отеческое заступление во веки веков. Аминь.



Тропарь преподобному Кукше Одесскому


Тропарь, глас 4


От юности мир суемудренный и лукавый оставил еси, Божественною свыше просветився благодатию, преподобне, многим терпением во временней жизни подвиг совершил еси, темже источаеши чудес благодать всем с верою приходящим к раце мощей твоих, Кукшо, преблаженне отче наш.


Кондак, глас 8


Подвижника благочестия искусна, новаго исповедника веры отеческия преподобнаго Кукшу верно вси ублажим, яко пастыря истиннаго, старца благостнаго, иноков наставника, утешителя малодушных, целителя недужных, и по кончине показующаго светлость жития своего. И днесь в память его притекше, радостно возопием: яко имея дерзновение к Богу, многообразных нас избави обстояний, да зовем ти: радуйся, утверждение людем православным.[/spoiler]

Раб божий Константин

Акафист святому преподобному Кукше-исповеднику
Саратовское отделение Международного фонда
славянской письменности
Саратов, 1994.
[spoiler]КОНДАК 1
Избранный чудотворче и предивный угодниче Христа Бога нашего, в скорбех утешитель и в бедах скорый помощниче и молитвенниче, преподобный Отче Кукша, прославляем Господа Иисуса Христа и Пречистую Его Матерь, даровавших тя миру, пречудный Отче, на спасение душ и врачевание телес наших.
Ты же, имеяй дерзновение ко Господу и Пренепорочней Деве Марии, от всяких нас бед и печалей избави, зовущих:
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


ИКОС 1
Ангел во плоти воистину явился еси на земли, Отче Кукша, со младенческих лет желая узрети Царя Небеси и земли, и вся дни живота своего Тому с любовию верно послуживый. Сего ради и по кончине твоей сподобился видети Бога Славы и возносити хвалу Ему со Ангелы и со всеми святыми. Мы же в радостном умилении глаголем ти таковая:
Радуйся, солнце, воссиявшее в смутное время гонения на православную церковь и служителей Ея;
Радуйся, луче светлый, благодатию Божией осиявший множество душ, тмою греховную объятый;
Радуйся, свеще, возжигающая пламень покаяния и умиления в сердцах окамененных;
Радуйся, огнем молитвы твоей грехи исповедающихся пожигающий;
Радуйся, любящий искренне кающихся Богу;
Радуйся, правило монашеского жития нам преподавый;
Радуйся, смиренномудрию, терпению и любви нас научаяй;
Радуйся, пример кротости, послушания и нищеты духовный показавши;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 2
Видя пламенную юношескую любовь твою к иноческому житию, Отче Кукша, мати твоя — благочестивая Харитина, умоли Царицу Небесную, да смягчит сердце родителя твоего, не хотевшего отпустити тя на Святую Гору Афон. Но волею Владычицы Богородицы благослови отец на радость всем сродникам путь твой новый и спасительный; мать же благослови тя образом древним Казанския Божия Матери, его же ты до конца дней своих сохранил еси и полгода на гробе Господнем возложену ему быти потщился еси, егда послан бысть на послушание во святый Храм Иерусалимский игуменом с горы Афона послужити на месте, идеже некогда лежаше пречистое тело Господа нашего Иисуса Христа, Ему же мы со благоговением поем: АЛЛИЛУИА.


ИКОС 2
Разум свыше тебе даровася, Отче Святый, с отроческих лет помышляли, яко пресельники мы есть на земли и пришельцы, красоту временную мира сего возненавидел еси и иноческое житие возлюбил еси, боготечней звезде уподобился еси, Отче, Царствия ради Божия дом отеческий оставивый, во святую обитель с радостию востекши, сего ради поем ти:
Радуйся, лозо, Богом благословенная;
Радуйся, чадо, Божией Материю избранное;
Радуйся, благочестивой матерью земной Небесней Матери врученный;
Радуйся, яко от юности до самыя кончины твоея под Святым покровом Ея хранимый;
Радуйся, чудотворным образом Божией Матери родительницей благословенный;
Радуйся, яко сей святый образ тобою до гроба сохраненный;
Радуйся, Царствия ради Божия дом родителей оставивый;
Радуйся, все блага земные ни во что же вменивый;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 3
Сила Вышняго на тебе показася, Отче преподобне, егда с благочестивой материю своей сподобился еси посетити вся святыя места Палестинская, идеже в купель Силоамскую чудесне первый погрузися в пещере же Вифлеемстей, поганым турком охраняемой и не хотевше ему дати православным паломником елеа от святыя лампады, на месте том возжигаемой, странно та лампада невидимо Ангелом опрокинута бысть на тя, избранный угодниче Христов. Люди же Божий, припадаху к тебе, Блаже, собирая той святый елей с риз твоих, умащающеся им и славяще рожденного Христа, в радости воспевающе Ему: АЛЛИЛУИА.


ИКОС 3
Имеяй велию любовь к Истинному Богу и Пречистей Его Матери, посетил еси землю Израильскую, поклоняяся и лобызая святые места, идеже пребываше Господь наш Иисус Христос и Пречистая Дево Мария. Мы же, удивляющеся таковому благому подвигу твоему, вопием ти:
Радуйся, Бога — Отца Небесного паче земнаго отца возлюбивый;
Радуйся, Матерь Божию — Пречистую Деву Марию — и твою Матерь быти возжелавый;
Радуйся, во чреве матере твоея чрез частое ея причащение Тела и Крови Господней Богом благословенный;
Радуйся, Пречистою Богородицею Девою — игуменией всех монашест-вующих — паче многих иноков возлюбленный;
Радуйся, яко благодать Божия от ранней юности на тебе почила есть;
Радуйся, яко та благодать до конца дней твоих на тебе пребывала есть;
Радуйся, омовением в купели Силоамстей, образ порождения тобою множество чад духовных ознаменовася;
Радуйся, возлиянием на тя елея от святыя лампады Вифлеемстей сила благодати Божией, от тебя исходя щия, показася;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 4
Бурю ярости врагов видимых и невидимых отражая великим смирением и ангельским терпением, возлюбил еси путь средний, царский: послушания, молитвы и труда, и тако восшел еси сим средним путем во славе велией в Горний Иерусалим, итамо со всеми святыми и Ангелы ликуеши и радуешися неизреченно, воспевая Богу: АЛЛИЛУИА.


ИКОС 4
Слышахом о подвизех твоих на святей горе Афоне, идеже тяжкая послушания, яко легкое бремя Христово понесл еси, братии монастырстей и паломником православным послужити сподобился еси, яко раб верный и смиренный, поучался иноческому житию у Богоугодного пустынножителя Афонского Мелхиседека. Мы же, дивящеся таковому твоему усердию, восхваляем тя, служителю Христов, поюще сице:
Радуйся, истинный воин Христов;
Радуйся, низложивый невидимых врагов;
Радуйся, паче всего возлюбивый иноческое житие;
Радуйся, возлюбленный за то Игуменией, святыя горы Афона и всех православных обителей;
Радуйся, всего себя Богу в жертву принесенный;
Радуйся, яко кадило благовонное, пред Богом душею и телом благоухавый;
Радуйся, истинный послушанием волю свою отсечь потщился еси;
Радуйся, яко умную молитву Иисусову стяжати сподобился еси;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 5
Боготечней звезде уподобился еси, Отче, егда по воле Божией со Старого Афона во святую Киево-Печерскую Лавру преселился еси, идеже в смутное время обновленчества непоколебимым столпом чистоты православныя веры показался еси; вси же братия Лавры последовавше таковому примеру твоему, яко истинныя воины Христовы, отразиша еретическое нашествие, славяще Бога и поюще Ему: АЛЛИЛУИА.


ИКОС 5
Видевше чистое житие твое и непрестанную молитву Иисусову, с трудами телесными соединяемую, вручиша тебе послушание святыя мощи Угодников Божиих, в Пещерах почивающих, хранити и облачати. Ты же, Отче святый с великим усердием, служа Угодником Божиим, бегая сна и телесного упокоения, Ангелу во плоти уподобился еси. Тем же мы вси, таковому труду твоему дивящеся, вопием ти:
Радуйся, древним Киево-Печерским Угодником послужити сподобивыйся;
Радуйся, яко и сам тем Угодником уподобивыйся;
Радуйся, сосуде, благодатными дарами Божиими исполненный;
Радуйся, Отче Богодухновенный, прозорливый;
Радуйся, яко еще и живый благоухание от тела источал еси;
Радуйся, всех приходивших к тебе духовно утешал еси;
Радуйся, истаявающих гладом душевным и телесным питателю;
Радуйся, безвозмездный заимодателю и пречудный нестяжателю;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 6
Исповедник славы Божией воистину явился еси, Отче наш Кукше, егда велия брань воздвигнута бысть на Церковь Христову и святыя обители. Ты же, претерпевая злыя напасти врагов видимых и невидимых, яко добрый пастырь, словесныя овцы пасый, не давал еси погибнути душам православным в треволнениях житейского моря, молитвами же своими утишая бури в сердцах маловерных, многих людей тогда ко Христу привел еси, поя с ними Богу: АЛЛИЛУИА.


ИКОС 6
Воссиял еси камени драгого светлейши, угодниче Богоносне, егда тя за Господа потерпети в темницу к разбойником и татем ввергли еси. Тии же злии людие кротостию и смирением твоим поражены быша, не смеюще тебе уязвити, но со благоговением взирающе на тя, святый Отче. Мы же вси видяще, яко воистину врага духом кротости и смирения победил еси, воспеваем ти сицевая:
Радуйся, тихий Ангел Господень, злых разбойников видом твоим укротивый;
Радуйся, образ кроткаго послушания и в темнице явивый;
Радуйся, яко тамо за Господа болезни и труды тяжкие, яко Крест свой подъявый;
Радуйся, велий глад и мраз претерпевая, в лесных дебрех труждатася принуждаемый;
Радуйся, яко волею Божией в заключении чудесне тебе Святыя Дары ниспосланы быша;
Радуйся, яко многих монашествующих, в темнице томимых, теми Дары причастил еси;
Радуйся, яко в день Святыя Пасхи, истаявая от глада телеснаго, у врана летящаго пищи просил еси;
Радуйся, аки древнему бо Илии вран той по молитве тебе снедь принесе;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 7
Хотя Бог наш Иисус Христос явити народу тя, святый Отче, егда по пяти летех заточения темничного, устрой тебе послану быти в землю Вятскую, идеже ты, яко светило воссиял еси, показуя пример благочестия, веры и велией любви к ближнему. Тем же воистину пастырь добрый явился еси людем, благодарне пощим Богу: АЛЛИЛУИА.


ИКОС 7
Новое показа человеколюбие Господь, егда возвратил тя, Отче, во обитель Печерскую во святый град Киев, идеже встречаху тя братия со славою многою; мирстии же людие притекаху к Тебе издалече, святый Отче, и ищуще утешения в скорбех и облегчения в болезнех твоими святыми молитвами ко Господу и Пречистей Деве Марии. Мы же, умиляяся силе молитв твоих, славим тя сице:
Радуйся, исповедниче великий и предивный;
Радуйся, провидец душ и сердец прозорливый;
Радуйся, сокровенных грехов обличителю;
Радуйся, всех в скорбех к тебе притекающих утешителю;
Радуйся, по воле возлюбившего тя Христа ежедневно Тому приобщавыйся;
Радуйся, Воскресшаго Господа в сердце твоем всегда имети сподобивыйся;
Радуйся, яко сила Божия от тебя исхождаше;
Радуйся, яко велия благодать Божия на тебе пребываше;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 8
Странное видим, егда исконный завистник — враг рода человеческаго, не терпя твоих Богоугодных дел, Отче пречудный, воздвигл есть на брань власть имущих, повелевших тебе преселитися во иную обитель. Ты же, яко истинный послушник, пришел еси в Свято-Успенскую Почаевскую Лавру, вдав себя в покров и заступление Почаевския Божия Матере, не имея на земле иныя помощи и защиты, Богу же поя: АЛЛИЛУИА.


ИКОС 8
Весь сладость, весь желание тебе бысть сладчайший Иисус, егда ты телом предстоял пред святым престолом в Храме Господнем, душею же на Небеси, лицезрел Владыку Неба и земли, подобен был еси Ангелу во плоти. Людие же, видевше силу молитв, от тебе исходящих, с трепетом и любовию тебе воспеваху:
Радуйся, Господа Бога пречудный служителю;
Радуйся, великий о людех пред Богом ходатаю;
Радуйся, Иисуса Сладчайшаго в сердце твоем носивый;
Радуйся, весь и всюду в Господе Боге ходивый;
Радуйся, яко Храм Божий, аки рай небесный возлюбил еси;
Радуйся, яко ангельски на земли пожил еси;
Радуйся, молитвенниче наш усердный;
Радуйся, ходатаю пред Богом о нас крепкий;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 9
Все естество ангельское вельми возрадовахуся, видя тя, игумена славнаго, во ангельский образ облекавшаго жаждущих жития монашескаго, и молящегося ко Господу, да укрепит их на пути сем узком и тернистом и спасет души их, в миру рассеянных и обуреваемых волнами житейскаго моря. Вси же чада твоя духовная благодарственная о тебе со слезами умиления поют Богу: АЛЛИЛУИА.


ИКОС 9
Ветии многовещаннии не возмогут изрещи множество чудодеяний твоих, блаженне Отче: всех бо любовию своею объемля — тако и мати родная не может любити — утешителю пречудный, лютыя скорби молитвами своими прогонял еси, унывающия же души неизреченно радуя, гордыню к кротости низводя, в неверующих возжигал еси огнь пламенный веры в Бога истиннаго и жизнь вечную, сего ради глаголем сицевая:
Радуйся, по Бозе Спасителю душ наших;
Радуйся, исцелителю болящих;
Радуйся, любовию твоею закоренелую злобу прогоняли;
Радуйся, кротостию гордыню низлагаяй;
Радуйся, всех приходящих к тебе дивный утешителю;
Радуйся, заблудших душ в Божий мрежи ловителю;
Радуйся, и в сонных видениях нас посещали;
Радуйся, теми же нас вразумляли;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 10
Спасти хотя Бог наш Иисус Христос души, в беззакониях погибающий, промыслом Своим пресели тя во обитель Святаго Иоанна Богослова, близ Молдавии бывшую, идеже три лета старчества твоего многия тысящи людей к тебе притекавших, направлял еси, по пути к Царствию Божию. Видя же шествующих право, в неизреченной радости воспевал еси: АЛЛИЛУИА.


ИКОС 10
Стена был еси, и ограждение всем монашествующим, в миру спасающимся, мудрый наставник во святых обителях жительствующим, всем же иночествующим — Игумен преславный. Тем же и мы, спасаемии тобою, вопием:
Радуйся, паче иных всех — монашествующих возлюбивый;
Радуйся, велие попечение о душах их явивый;
Радуйся, истинный пастырь словесного стада Христова;
Радуйся, за всех иночествующих молящий Всевышняго Бога;
Радуйся, яко тысяща чад духовных у тебя обретеся;
Радуйся, яко вси сии в миру рассеяни быша, но по молитвам твоим от мира сего отвергошася;
Радуйся, строгий наставниче целомудрия;
Радуйся, твердый ревнителю благочестия;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 11
Пение благодарственное Пресвятей Троице воспеваху братия Свято-Успенския Одесский обители Патриаршия, егда встречаху приход твой, Отче достохвальный, великаго чтуще в тебе Угодника Божия, воссиявшаго аки светило Богосветлое во мраце неверия и заблуждения. И мы, видяще таковое о тебе благодарение, поем Богу: АЛЛИЛУИА.


ИКОС 11
Светоприемный светильник был еси, преподобне, егда в древних летех предстоял язвами прободенными ногами во святая святых по вся дни, приносяща Богу жертву безкровную за души всех живущих и почивших, попаляя грехи их твоими огнеподобными молитвами. Мы же вси дивящеся таковому о тебе произволению Царицы Небесный, воспеваем сице:
Радуйся, жилище Духа Святаго;
Радуйся, молитвенниче, благодатию Божией исполненный;
Радуйся, града Одессы сокровище многоценное;
Радуйся, христианам во истинней вере утверждение;
Радуйся, отступники к Богу возвращали;
Радуйся, врагом прощати научаяй;
Радуйся, пример детскаго незлобия нам показавый;
Радуйся, образе Иовля терпения собою явивый;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 12
Благодатию Божией осияваяй всех приходящих к тебе и чающих получили твое благословение, Отче великий, до девятидесяти лет пожити сподобился еси, при конце земнаго пути своего Господа Бога во славе на Престоле сидящаго зрети удостоен был еси, и с того часа до кончины своея, телом находяся на земли, духовныма очима созерцал небесныя обители: Горний Иерусалим и Новый Афон. И тако мирно ко Господу вскоре отшел еси. Мы же, видя твое святое житие и блаженную кончину, воспеваем прославляемому тобою Богу: АЛЛИЛУИА.


ИКОС 12
Поем твое пречудное на земли житие, ублажаем святое успение твое, Отче наш преподобный. Ты же молися ко Господу, яко и обещался еси не оставити требующих твоея помощи и заступления. Надеющися на твое о нас перед Богом ходатайство, воспеваем сия:
Радуйся, Отче новый и великий;
Радуйся, насельник Горния обители;
Радуйся, дерзновение перед Господом стяжавый;
Радуйся, славу Божию видети сподобивыйся;
Радуйся, яко со Ангелы на Небеси Бога прославляеши;
Радуйся, яко Царицу Небеси и земли купно с ними тамо величаеши;
Радуйся, земных ради трудов венцем славы увенчанный;
Радуйся, чистоты ради душевной и телесной в белоснежную ризу облаченный;
РАДУЙСЯ, ПРЕПОДОБНЫЙ ОТЧЕ НАШ КУКШЕ, ВЕЛИКИЙ ИСПОВЕДНИЧЕ ХРИСТОВ.


КОНДАК 13
О, преславный и пречудный Отче наш Кукше! Приими сие малое моление, от всего сердца тебе нами приносимое, и умоли Господа Бога дати нам оставление грехов, исцеления в болезнех, утешения в скорбех, терпения во искушениях. Да тако твоими молитвами сподобимся «в мире сем пожити, Богу угодити и наследовати Царство Небесное», со всеми святыми поюще Царю славы: АЛЛИЛУИА.

(сей кондак глаголи трижды, затем читай 1-й икос и 1-й кондак)


МОЛИТВА
О, предивный угодниче Христов, преподобне и богоносне Отче наш Кукше! Ты яко солнце богосветлое воссиял еси в земли Российстей в годы безбожнаго правления и гонения на православие и Святую Церковь Христову, и яко столп великий восстал еси от земли до неба и от востока до запада, славу Божию показуя и всем, к тебе притекающим, грехи отпуская и утешая, изливая благодать и неизреченную любовь к людям. Тем же и Господь Бог прослави тя в дни земнаго жития твоего даром исцеления, чудотворения, прозрения грядущаго, яко настоящего. Ты же, Отче святый, предстоя у Престола Царя Славы, молися о нас грешных и немощных, да поможет Господь Бог нам чистоту православия твердо хранити, нападения еретическая мужественно отражати, в вере христианской благочестно пребывати, да укрепит наша душевныя и телесныя силы для покаяния истиннаго, исправления совершеннаго и неленостнаго творения добрых дел, я сподобит нас стяжать благодать Духа Святого, Его же мы всем сердцем и всею душею славим и величаем со Отцем и Единородным Его Сыном всегда, ныне и присно, и во веки веков. АМИНЬ.[/spoiler]

Раб божий Константин

Акафист святому мученику архидиакону Лаврентию.
[spoiler]Кондак 1
Избранный страстотерпче и угодниче Христов Лаврентие, архидиаконе и непобедимый во страданиих великомучениче, песньми похвальными величаем тя нашего в бедах заступника, выну предстоящаго златозарному престолу Царя славы; Ты же, яко огнем мучений вшедый в покой небесный, от огня страстей и скорби всякия свобождаяй нас, во уповании тебе взывающих:
Радуйся, непобедимый великомучениче архидиаконе Лаврентие.

Икос 1
Архангелов и Ангелов чины, Серафимов и Херувимов собори, и всех горних безплотных сил сонмы вельми удивишася толикому мужеству твоему, великомучениче Лаврентие, яко в немощнем телеси человечестем безплотных сил явил еси образ, огнем бо на железнем одре жегомый и испекаемый, всесожжение живыя жертвы Христу был еси. Сие пачеестественное и страшное для единаго помысла человеческаго терпение точию воспоминающе, содрагаемся, и от всего сердца воспеваем тако:
Радуйся, великомучениче, огнем и железом к небесному покою пришедый;
Радуйся, во архидиаконстем чине служащий совершению Безкровныя Жертвы, и сам всего себе в жертву Христови принесший.
Радуйся, адаманте, ничим же одолеемый и не побежденный.
Радуйся, каменю веры, на недвижимем основании заповедей Господних утвержденный.
Радуйся, егоже подвигом дивящеся горния силы;
Радуйся, егоже дивному терпению содрогаются человеческая множества.
Радуйся, непобедимый великомучениче архидиаконе Лаврентие.

Кондак 2
Видя святейший первосвятитель Римския церкви богомудрый Сикст, твое велие дерзновение о Господе, святый великомучениче Лаврентие, возлюби тя, архидиакона своего, и прославляя Господа воздвизающаго на тя попечение о дому Божием, о нищих и убогих чадах Божиих, о всех скорбящих и озлобленных, милости Божия и помощи требующих и имея тя добраго делателя во храме святыни Господней, радовашеся духом, научая и нас воспевати о тебе благодателю нашему Богу: Аллилуиа.

Икос 2
Разум Богопросвещен имея, о доблий исповедниче Христов Лавренитие, и мира сего сладости презрев, устремился еси во след страждущаго учителя своего святаго Сикста и к нему от всея любящия души твоея взывал еси: «камо, отче, без сына грядый? Камо, о архиерею святый, спешиши без архидиакона твоего? Ты никогдаже без мене приносил еси жертву, что во мне неугодно явися отеческой твоей милости? Еда ли не искусил мя еси, угодна быти тебе служителя? И аще общник бых тебе в действии Божественных таин Христовых, почто и во излиянии за Христа крове не общаюся тебе? Поими мя, отче, с тобою, сына твоего, поими, учителю, ученика твоего и даждь мя пред тобою в жертву Богу, якоже Авраам сына Исаака и яко верховный Апостол Петр перваго Архидиакона Стефана, и узрев мя совершившася мученичеством, сам послежде к венцу потщишися». Таковой любви твоей, великомучениче Христов, дивящеся, умиленно вопием ти похвальная:
Радуйся, любовь к миру любовию Божиею в себе победивый;
Радуйся, крепчайшую паче огня оную любовь явивый.
Радуйся, возлюбивый всем сердцем, всею душею, всею мыслию, всем разумом Христа – небеснаго учителя и пастыреначальника.
Радуйся, такожде возлюбивый и земнаго пастыря – отца, первосвятителя твоего и наставника.
Радуйся, яко святая душа твоя серафимскою любовию пламенеющая, по апостолу: вся любит, всему веру емлет, вся уповает, вся терпит.
Радуйся, таяжде апостольския глаголы в себе вместивый, яко любы николиже отпадает.
Радуйся, непобедимый великомучениче архидиаконе Лаврентие.

Кондак 3
Силою Всевышняго укрепляеми, святии мученицы, дерзновенно проповедаху Света истиннаго Христа, Имже просвещаемии, ко славе небесней устремишася; глаголаше бо Сикст святый диаконом и соузником своим Феликиссиму и Агапиту: «братия и своенственники мои: не убойтеся мук временных; весте кая мучения претерпеша прежде нас святии, да получат венец вечныя жизни. Сам Христос Бог наш оставил нам образ, не убойтеся убо пострадати за Христа да с ним воцаритеся». Сему убо исповеданию внемля и ты, великий страдальче Лаврентие, к достижению небесных чертогов устремился еси, воспевая сам, и нас воздвизая пети, вся промышляющему о нас Богу: Аллилуиа.

Икос 3
Имеет весь мир христианский молитвенницы о себе святии мученицы, радостию просвещается о сем, и тебе, великий страдальче Христов Лаврентие, прославляя, воздвизает храмы имени твоему, покланяется иконам лика твоего, ведяще тя, яко усерднаго печальника и заступника и в похвалу сицевая тебе вопиет:
Радуйся, земный ангеле и небесный человече;
Радуйся, мужу деланий святых.
Радуйся, великий во страданиих, крепкий в терпении, мужественный в скорбех.
Радуйся, мощный силою десницы Господней, дивный в подвизех, славный в родех родов.
Радуйся, имже красуется доблественный мученический полк;
Радуйся, егоже непобедимому терпению дивятся Ангельския горния силы.
Радуйся, непобедимый великомучениче архидиаконе Лаврентие.

Кондак 4
Бурею ярости на имя Христово дышуще невернии людие, устремишася на христианы, во еже предавати их мукам лютейшим, растерзанию зверьми, усечению мечному и огню. Ты же, великомучениче, паче оных лютейшую смерть приял еси, испечен быв огнем, аки брашно печеное, на снедь кровожадным людем, зверское существо имущим, обаче сила вражия ничтоже успе, любовию бо ко Христу пламенея, взывал еси со Апостолом: «кто ны разлучит от любве Божия, скорбь ли, или теснота, или гонение, или глад, или нагота, или беда, или меч, якоже есть писано: яко Тебе ради умерщвляеми есмы весь день, вменихомся, яко овцы заколения, но во всех сих препобеждаеми за Возлюбльшаго ны», сию убо велию любовь имети испроси и нам, угодниче Божий, научая воспевати Подвигоположнику: Аллилуиа.

Икос 4
Слышавши Сикст святый, твоя любовию понуждаемыя глаголы, и духом провидя будущая, сице отвещаше тебе: «не оставляю тя, о чадо, но на множайшия муки блюду тя, предлежат бо тебе большия подвиги за веру Христову. Аз, яко стар, на легчайшее исхожду борение, тебе же подобает славнейшее показати над мучителем одоление и торжество; не плачи убо, но веждь, яко по триех днех скончания нашего, пойдеши, левите, за своим священником, не потребно есть тебе присутствия моего, аки бы каковыя помощи: Илия остави Елисея, но не отъя ему чудодейственныя силы. Иди тем временем и церковная сокровища раздаждь нищим и требующим - по твоему разсмотрению». Сие обетование и волю Архиерея своего слышавши ты, яко послушлив архидиакон того, велиим тщанием устремися да сотвориши сия, поучая нас взывати тебе:
Радуйся, любве и веры ради за Господа и послушания Архипастырю к мучениям устремивыйся;
Радуйся, в путь узкий шедый, и прискорбный, и крест, яко ярем, вземший и Христу последовавый.
Радуйся, надеждою вечнаго покоя водимый, к борению мужественно притекший;
Радуйся, славы вечныя осияния, паче земных сластей вожделевший.
Радуйся, обещание лютейших мук, яко райския утехи сладость из уст учителя твоего услышавый;
Радуйся, яко обетованием тем утешивыйся и возвеселивыйся.
Радуйся, непобедимый великомучениче архидиаконе Лаврентие.

Кондак 5
Чудо великое помощию силы Божия действующия в тебе, по крепцей любви твоей ко Христу, сотворил еси, славный страстотерпче Христов, егда по скончании словес архипастыря твоего и учителя ты, святый Лаврентие, якоже повествует житие твое, «вся церковная утвари и сокровища взем, искаше по всему граду крыющихся клириков и убогих христиан, и еликих обреташе, даяше им на нужныя потребы» и тамо, исцеляя вся недужныя очима и главою, чудотворец явился еси дивный во славнем житии твоем; темже и по кончине святыми мощами своими и дивными чудотворящими иконами целиши всякия недуги, ко твоему заступлению вседушно притекающих, Богу же, Подателю всякия милости, поющих: Аллилуиа.

Икос 5
Узре свет слепый Крискентион, емуже ты, помолившеся, рекл еси: «Господь наш Иисус Христос, отверзый очи слепорожденному, Той да просветит тя» и сотворив, якоже глаголет житие твое, «крестное знамение на очесех слепаго, и абие той прозре, и виде лице Лаврентиево, и возрадовася». Сие бяше в дому Наркисса христианина; пре сим же, абие по речении Сикста святаго, пришедый в дом вдовы Кириакии, к горе Хелион нарицаемой, идеже мнози христианы собрашася, исцелил еси тую от болезни главы, чрез возложение рук твоих и речение: «во имя Господа нашего Иисуса Христа буди здрава», учредив убо довольны христианы тамо, такожде и в дому Наркисса сущия, пришел еси в пещеры Непотиановы, несый крыющимся тамо христианом «яже на пищу и иныя потребы», идеже бо собрани быша душ яко седмьдесят и три, с ними же обрет и пресвитера Иустина. Мыслию убо и любовию, сретая тя на сем пути твоем, возглашаем тако:
Радуйся, страннолюбче, нищим и убогим богатства церковная истощивый.
Радуйся, церковная имения спасая от неверных хищения, Церкви живой – убогим вручивый.
Радуйся, сокровищами земными небесное сокровище – славу святых приобретый.
Радуйся, нищих и убогих, в беде сущих, теми сокровищами препитавый.
Радуйся, руками убогих богатство тленное в приобретение нетленных сокровищ предпославый;
Радуйся, за страннолюбие и страдания венец нетления стяжавый.
Радуйся, непобедимый великомучениче архидиаконе Лаврентие.

Кондак 6
Проповедницы истины, богоноснии мученицы святии, сквозь огнь и воду внидоша к небесному покою, о нихже глаголати подобает словесы апостольскими, яко сии страстотерпцы велиими и неисчислимыми муками умучени «камением побиени быша, претрени быша, искушени быша, убийством меча умроша, ихже не бе достоин весь мир». Темже убо и мы, по сему глаголу апостолову, «толик имуще облежащ нас облак свидетелей, бремя всякое отложше и удобь обстоятельный грех, терпением да течем на предлежащий нам подвиг, взирающе на Начальника веры и совершителя Иисуса», Емуже с веселием, от всего сердца нашего, возопием: Аллилуиа.

Икос 6
С светлым лицем представ судилищу Декиеву, святе Лаврентие, радовался еси грядущему венцу мученическому, паче венца мирския славы и вопрошаемь от него быв «где суть сокровища церковная», ничтоже отвещал еси безумному, подобяся Подвигоположнику Христу Богу, Иже не даде ответа вопрошавшему Его Ироду. Разгневася убо Декий, вдаде тя Валериану епарху, тойже в темницу заключи тя, идеже ты слепыя многия исцелив, подвизаеши всех верных взывати тако:
Радуйся, врачу телесных немощей;
Радуйся, ходатаю горних чертогов.
Радуйся, слепоту телесную именем Христовым исцеляяй;
Радуйся, слепоту душевную познанием истиннаго Бога отгнавый.
Радуйся, истины Христова учения среди мглы неверия и безбожия прекрасный проповедателю:
Радуйся, света Евангельскаго во тьме и сени смертней безбожия седящим великий показателю.
Радуйся, непобедимый великомучениче архидиаконе Лаврентие.

Кондак 7
Мира дольняго красоту, богатство и славу земную оставил еси, непобедимый воине Христов великомучениче архидиаконе Лаврентие, и к небесным горним селениям лютою стезею мучений мужественне востекл еси, идеже предстоя престолу Господа славы с лики ангельскими, поеши Ему победную песнь: Аллилуиа.

Икос 7
Егда узре Ипполит, начальник темницы, исцеленнаго тобою слепаго узника Лукиллия, егоже и крещением просветил еси, и иныя многия слепцы приходившия к тебе, яко ты, по словеси жития твоего, «призывая имя Иисус Христово и руку с знамением крестным на очеса их возлагая, творяше их прозрети», сим убо дивяся, обаче не оставляя и заблуждения неверных, испытовше тя: «покажи мне сокровища церковная»; к нему же ты, великомучениче, рекл еси: «О Ипполите, аще веровати будеши в Бога Отца всесильнаго и в Сына Его Господа Иисуса Христа, показано тебе будет сокровище и жизнь вечная дастся ти». Посем убо, изведен быв из темницы в дом Ипполитов и, огласив его, крести; просвещен же быв Ипполит крещением, рече: «видех души неповинныя в велицей радости», якоже повествует житие, – «то бяху сокровища, о нихже Лаврентий ему извествоваше, яко будут откровенна, в час бо крещения показа ему Господь дивным видением небесная радования»; сим обрадован Ипполит быв, приведе ко Христу весь дом свой; от негоже похваляемый, великомучениче, такожде и от нас приими сия:
Радуйся, великий мучениче, Апостоле и проповедниче.
Радуйся, скорый врачу, крестителю и исповедниче.
Радуйся, в мучениих сущий, проповеди Христовы не оставивый;
Радуйся, с венцем мученика звание Апостола вместивый.
Радуйся, устремляяйся к мукам, дела проповедания не оставивый.
Радуйся, и самыя мучения в живую проповедь славы Христовы обративый.
Радуйся, непобедимый великомучениче архидиаконе Лаврентие.   

Кондак 8
Сокровищем земным прилежа, Валериан мучитель истязаше тя, святый Лаврентие, емуже ты и обещал еси показати сокровища: «даждь ми время на два или три дни и аз покажу ти сокровища». Отпущену же бывшу ти из темницы и извещенну бывшу о сем Декию Царю, ты, великомучениче, собрал еси многое множество нищих, и вдовиц, и сирот, и слепых, и хромых, и немощных в дом Ипполитов, по триех же днех, приведши оных пред лице Декия и Валериана, воззва к ним: «се имате сокровища вечная в тех, ихже зрите сосудех вложенная, и кто имения своя в тыя сосуды влагает - приемлет оныя с лихвою в Небеснем Царствии». Даждь убо и нам молитвами твоими, святый великомучениче, сокровища наша земная, тленная, без сожаления влагати в таяжде честныя сосуды, чающе небеснаго воздаяния и поя Богу песнь хвалы: Аллилуиа.

Икос 8
Видяще царь Декий и Валериан епарх себе постыжденных, разгневашася зело и уже не о сокровищах тебе, святый великомучениче, истязоваху, но к поклонению идолом привлекаху, биему убо нещадно и устрашаему разновидными орудии мучений тебе бывшу, взывал еси Декию: «о, окаянне, всех сих аз давно желах, аки пиршества, то бо вам видятся быти мучения, нам же слава»; повелевающу мучителю, да приведеши на пиршество сие вся христианы, глаголаше: «не достойна суть скверная очеса ваша видети тех, ихже имена написана суть на небесех». Биему же паки, и опаляему, и молящуся ти уже о исходе души твоея, слышашеся глас с небесе: «еще множае страдати имаши», егоже аще слышаху невернии, но не можаху уразумети откуду есть, и паки лютейшия муки приложиша, ихже мы воспоминая, благоговейно тебе вопием:
Радуйся, биение за Христа, нас ради биеннаго и страдавшаго, приемый;
Радуйся, душу твою положивый за Господа и вечную жизнь обретый.
Радуйся, узким путем страданий вшедый в покой небесный;
Радуйся, опаляемый огнем, угасивый вечный огнь геенский.
Радуйся, яко непрестанно в муках моливыйся, тем подражая в Гефсимании и на Кресте молившемуся Господу.
Радуйся, непрестанно в молитве и любви пламеневый, даждь и нам сей дар молитвы ко Творцу всея твари.
Радуйся, непобедимый великомучениче архидиаконе Лаврентие.

Кондак 9
Всею душею твоею возлюбив Господа, Егоже и посреде лютых мучений, яко среди веселия, великий в мученицех Лаврентие, непрестанно прославлял еси; темже и Христос знамение силы Своея являше на тебе, посылая ангела Своего, егоже виде един от воин, именем Роман, возопи: «святый Лаврентие, вижду юношу пресветла при тебе стояща и лентием отирающа язвы и все тело твое. Заклинаю убо тя Христом Господем, пославшим тебе ангела Своего, не остави мене». Сему дивному знамению мучители не восхотеша внимати, волшебством оное разумея, и заключиша тя паки в темницу, идеже ты крестив Романа, уготови его на подвиг мучения, он же, приклонив выю свою под меч острый, взываше якоже и ты, радостно Господу песнь хвалы: Аллилуиа.

Икос 9
Вития многовещаннии не возмогут изобразити и уразумети лютейшия муки, егда, якоже глаголет житие твое, великий Лаврентие, «принесен бысть одр железный, и на том положиша мученика нага пред Декием и Валерианом, и углие огненное подложиша, железными же вилами слуги сверху пригнетаху на одре том тело мучениково и поджигаху пекуще, аки снедное мясо». Сие страдание твое точию воспоминая, содрагаемся, и прилежно приносим ти похвальная песни сия:
Радуйся, на огни испекаемый и жегомый, огнь страстей палящий ны утоли молитвами твоими;
Радуйся, на одре железном возлегий, от одра лености предстательством твоим возстави нас.
Радуйся, лютыя страсти терпевый великодушно, от страстей облежащих ны исхити;
Радуйся, страданиями небрегий да вечную славу приобрящеши, тоя же славы улучити и нам умоли.
Радуйся, телесными скорбями вшедый в горняя обители, и нам помози оных достигнути.
Радуйся, высоту терпения показавый, узкий и прискорбный путь терпения в житии сем нам облегчи.
Радуйся, непобедимый великомучениче архидиаконе Лаврентие.

Кондак 10
Спасти хотя душу твою, о телеси твоем небрегл еси, принося себе в жертву Господу, якоже и глаголал еси мучителем твоим: «аз принесох мене самаго жертву Богу моему в воню благоухания в дусе сокрушенном» и, егда мучителие разжигаху вельми одр, паки рекл еси царю: «виждь, окаянне, яко углие то огненное мне прохладу готовит, тебе же – вечныя муки, весть бо Господь мой, яко о святем имени Его оклеветанный - не отвергохся, вопрошенный - исповедах Его, ныне жегомый - благодарю Ему». Сицевому благодушию в лютых страданиих научи и нас, доблестный великомучениче, да достигши обетованных благих, воспоем с тобою песнь победную Христу Богу: Аллилуиа.

Икос 10
Стены безчувственныя твердее показася безбожный мучитель, повествует бо житие твое, Лаврентие славне, яко «вси тамо предстоявшии удивляхуся цареву мучительству таковому, яко жива человека испещи повеле». Ты же, великомучениче, глаголал еси молитвенно: «Благодарю тя, Господи Иисусе Христе, яко укрепил мя еси», и обращся к мучителем рекл еси: «се, о окаяннии, испекосте едину тела моего страну, обратите на другую и ядите испеченное мясо мое», и паки ко Господу: «Благодарю тя, Господи Иисусе Христе, яко сподобил мя еси внити во врата Твоя» и сия рек, испусти дух. Поклоняяся таковей славней кончине твоей, умиленно вопием ти:
Радуйся, кончиною своею посрамивый зело мучителей твоих;
Радуйся, устыдивый вельми беззаконнующих.
Радуйся, кротким терпением твоим удививый все естество человеческое.
Радуйся, в терпении сем явивый себе, яко безтелесна, подобна горним силам.
Радуйся, благодарственно вся терпевый, живота вечнаго явился еси славный наследник.
Радуйся, подвигом добрым подвизавыйся, показался еси вечныя славы сопричастник.
Радуйся, непобедимый великомучениче архидиаконе Лаврентие.

Кондак 11
Песнь исходную первее принесе тебе, страдальче Лаврентие, Ипполит темничник, крещенный тобою, иже похити в ту нощь тело твое и плащаницею со ароматы обви е и со Иустином пресвитером принесе в дом Кириакии вдовицы, пребыв в той день в пощении со слезами, в вечер же глубок, якоже повествует житие твое, «мощи твоя несоша в пещеру, яже на селе вдовы тоя. Собравшимся же многим христианом, и плачущим много, сотворивше тамо всенощная моления, погребоша честно мученика, а святый Иустин пресвитер и вси прочии быша причастницы пречистых Таин Тела и Крови Христовых». Воспоминающе сие и мы, вместо мира - слезы молитвы принесем тебе и песнем исходным воздыханьми подражая, воспоем о тебе Богу: Аллилуиа.

Икос 11
Свет Христов, просвещаяй и освящаяй всяческая, озари душу твою, богомудрый великомучениче, темже и по кончине твоей честныя мощи и иконныя подобия лика твоего неоскудно источают исцеления, утешение и радость всем болящим, скорбящим и унылым, подвизая оных подражати тебе во исповедании, терпении, мужестве и крепцей любви ко Христу, еюже пламенея, дивный образ терпения в злостраданиих явил еси и нас научаеши воспевати тебе тако:
Радуйся, велию любовь и веру ко Христу до последняго издыхания сохранивый.
Радуйся, в любви сохранивый веру, верою стяжавый мужество и теми козни вражия победивый.
Радуйся, путем тесным в горняя восшедый;
Радуйся, праведным житием обители вечныя достигший.
Радуйся, в мире живый, надмирную красоту очами духовными созерцавый;
Радуйся, Рима великаго и мира всего славо и украшение.
Радуйся, непобедимый великомучениче архидиаконе Лаврентие.

Кондак 12
Благодать данную ти от Господа в земнем житии твоем, святый великомучениче, во еже исцеляти недужныя почитая, веруем, яко и по смерти ты целиши с верою приходящих ко всечестным мощем твоим и прославленным Божественною благодатию иконам; уповаем же, угодниче Божий, яко исцеляя телесныя очи прибегающих к тебе недужных, вкупе просвещаеши и душевныя очеса и ныне, якоже и древле, научая просвещенныя тобою воспевати Творцу всяческих: Аллилуиа.

Икос 12
Поюще твоя великая страдания, Лаврентие, великий Христов угодниче, хвалим твое непостижимое нам немощным долготерпение, ублажаем твердое исповедание Христово и, почитая священную и славную память твою, заступниче наш и целителю, ведаем, яко по слову псалмопевца, «в память вечную будет праведник». Темже любовию прославляя тя, от чистаго сердца и благоговейныя души, устнами, аще и грешными, но усердными, вопием со умилением сице:
Радуйся, даров великих Божиих присный нам ходатаю;
Радуйся, преизящный угодниче и непобедимый в мучениих страстотерпче.
Радуйся, крепким терпением стяжавый душу твою, оным терпением и нам явивый образ спасения вечнаго;
Радуйся, тем же терпением мучителеву дерзость победивый, научая оным и нас побеждати дерзость исконнаго врага нашего.
Радуйся, в том же терпении себе равнаго серафимам безплотным явивый;
Радуйся, сим величайшим терпением звание непобедимаго от всех родов христианских получивый.
Радуйся, непобедимый великомучениче архидиаконе Лаврентие.

Кондак 13
О великий, всехвальный, непобедимый во страданиих великомучениче и архидиаконе Лаврентие, приими от всея души нашея сия похвалы тебе возносимыя, и нас, чающих милости Божия, помощи и спасения, от всяких бед, болезней и зол соблюди; воздыханий наших в болезнех и скорбех не презри, слезы наши собери и престолу Утешителя Господа принеси, в час же кончины нашея предстани нам и престолу Господа славы нас представи воспети Ему в горних селениих песнь Ангельскую: Аллилуиа.
Сей Кондак глаголи трижды, посем Икос 1 и Кондак 1

МОЛИТВА
О всесвятый и предивный Страстотерпче Христов, архидиаконе Лаврентие!
Восхваляя веру и страдания твоя, почитаем победу и венценосное прехождение твое чрез горящее углие от тьмы века сего ко свету невечернему престола величества Божия. Тем убо молим тя: якоже утвердил еси миром и чудесы притекающих с верою к покрову твоему в бедах и напастех, Ангел сый во плоти, тако да приимеши и нас под кров твой в болезнех и печалех наших, и якоже исцелил еси Крискениона приложением рук от слепоты телесных очес его и множайшими чудесы удивил еси прибегающих к тебе, тако да исцелиши предстательством ныне у престола Божия и нашу душевную слепоту; призри на всякое разслабление наше телесное и укрепи нас бодренностью противу врагов наших видимых и невидимых, удручающих нас выну бедами и напастьми, да путь маловременной жизни сей прешед неискушенны от бед, скорбей и всякаго лютаго обстояния, достигнем тобою и мы неприступныя славы величества Божия, идеже предстоиши, моля со дерзновением за люди прибегающия с верою к тебе, воспевая дивнаго во святых Своих Бога во веки веков. Аминь.

ТРОПАРЬ, глас 8:
(из Часослова Киево-Печерския Лавры изд.1742г.)
Серафим во плоти явился еси Лаврентие, огнем бо Божественныя любве распаляем, ярящийся огнь мучителя ни во что же вменил еси и угасил еси того ревность безбожную, темже и венец победоносен о имени и страдании твоем от Христа приял еси мужественно, сего ради победительно взываем тебе: Радуйся, мучениче непобедимый Лаврентие.

Кондак, глас 2:
(во всех часословах и минее)
Огнем бежественным распалив сердце твое, огнь страстей до конца испепелил еси, страдальцев утверждение, богоносе мучениче Лаврентие, и в страданиих вопиял еси верно: ничтоже мя разлучит любве Христовы.[/spoiler]

Раб божий Константин

Акафист святому праведному Лаврентию, Христа ради юродивому, Калужскому чудотворцу.
[spoiler]Кондак 1


Избранный от Царя сил, Господа Иисуса, предивный в житии и чудесах, угодниче Христов Лаврентие! Восхваляем тя с любовию, милостиваго предстателя нашего; ты же, блаженне, яко имеяй дерзновение ко Господу, молитвами твоими от всяких нас бед и скорбей свобождай, да зовем ти: Радуйся, блаженне Лаврентие, Калужский чудотворче.


Икос 1


Ангел земный и человек небесный был еси, блаженне Лаврентие, от юности твоей юродство Христа ради себе усвоивый, да в жизни временней от всех оскорбляем и поругаем будеши, во блаженней вечности мзду небесную да обрящеши. Темже яко истинный угодник Божий от верных слышиши благохваления таковая: Радуйся, от благочестивых родителей рожденный; Радуйся, от юности на служение Богу предъизбранный. Радуйся, миру и всем прелестем его поругавыйся; Радуйся, страстем греховным неповинувыйся. Радуйся, мудрый странниче, единаго Христа любовию усердно взыскавый; Радуйся, истинный нищелюбче, во единей раздранней ризе ходивый. Радуйся, яко поругания и биения сладце Христа ради претерпевый; Радуйся, яко буйством о Христе совершенство духовное стяжал еси. Радуйся, алкавый и жаждавый на земли; Радуйся, достойно насытивыйся брашна нетленного на небеси. Радуйся, праведниче, сияяй яко солнце во Царствии Небеснем; Радуйся, угодниче Божий, прославленный многими дарами благодатными. Радуйся, блаженне Лаврентие, Калужский чудотворче.


Кондак 2


Видев непостоянство мира сего, Лаврентие блаженне, юродственное Христа ради житие возлюбил еси, и среди мира пребывая, чужд мирских страстей явился еси, и яко добрый воин Христов победоносно противу врагов спасения человеческаго ратовал еси, немолчно воспевая Подвигоположнику Господу Иисусу: Аллилуиа.


Икос 2


Разумел еси добре, Лаврентие блаженне, вся козни врага диавола, имиже от злых человек поруганьми и биеньми доброе твое произволение сокрушити хотяще. Темже тому крепце противустал еси и за досадителя твоя молился еси, и нас вопити тебе научил еси: Радуйся, терпения столпе непоколебимый; Радуйся, незлобия образе предивный. Радуйся, истинный Христов последователю; Радуйся, биения благодушно претерпевый. Радуйся, о укорениях и осмеяниях небрегий; Радуйся, любовию святою злобу человеческую победивый. Радуйся, в мире премирно поживый; Радуйся, во плоти ангелам подражателю. Радуйся, буйством о Христе премудрости небесныя стяжателю; Радуйся, смирением высокая приявший. Радуйся, яко подвиги твоими миру светильник явился еси; Радуйся, яко страннообразным твоим житием Бога прославил еси. Радуйся, блаженне Лаврентие, Калужский чудотворче.


Кондак 3


Сила Божия осени тя, святе Лаврентие, и ратоборца крепкаго христианам противу полчищ агарянских яви тебе, егда благовернаго князя Симеона от погибели смертныя явлением твоим избавил еси, секирою супостаты поражающа и в бегство неверныя обращающа, верныя же побуждающа победную песнь Христу Богу возносити: Аллилуиа.


Икос 3


Имел еси огнь любве Божественныя в сердце твоем, Лаврентие богоблаженне, и яко некий пламеннообразный Серафим, непрестанно в молитве умной пребывал еси, сердцем и душею твоею выну ко Господу Иисусу Христу возношаяся. Темже и Господь дивными дарами духовными тя обогати, да вси тебе вопиют радостно: Радуйся, воине Христов, необязываяйся куплями житейскими; Радуйся, прозорливче дивный, будущее, яко настоящее, созерцавый. Радуйся, яко любимаго ти князя Симеона от посечения смертнаго избавил еси; Радуйся, яко от псов словесных того защитил еси. Радуйся, яко явлением твоим агарян неверных устрашивый и в бегство обративый; Радуйся, силою Господа сил победу верным даровавый. Радуйся, отечества твоего земнаго Богом данный заступниче; Радуйся, православному воинству добрый соратаю. Радуйся, воеводо победоносный людем христоименитым; Радуйся, врагов Церкве Христовы грозный карателю. Радуйся, смиренным и благочестивым тихое пристанище; Радуйся, подвизающимся добрый помощниче. Радуйся, блаженне Лаврентие, Калужский чудотворче.


Кондак 4


Буря агарянскаго нашествия на град Калугу тобою, святе Лаврентие, умирися, и нечестивые полцы агарян зловерных от стада Христова тобою со студом отгнани быша; тако бо дарова тя Господь заступника изряднаго отечествию твоему, в нем же до ныне славится имя твое, и подвиги твои благодарственным чествуются пением Богу: Аллилуиа.


Икос 4


Слышим многая и чудная исправления твоя, о праведниче, како уединенное о Бозе житие твое при храме Рождества Христова проходил еси, пещерную стезю от келлии твоея к тому ископав, да незримый человеки Богу молитвы твои совершаеши. Сему убо смиренномудрию и нас научи, преподобне, да зовем тебе хвалебно: Радуйся, уединения любителю; Радуйся, многослезный молитвенниче. Радуйся, всякую гордыню от сердца своего отгнавый; Радуйся, христоподражательное смирение искренно возлюбивый. Радуйся, подвиги твоя молитвенные от человек утаивый; Радуйся, юродством Христа ради сия благоискусно сокрывый. Радуйся, таинниче Пресвятыя Троицы; Радуйся, созерцателю Ангельских сил. Радуйся, пещерною стезею во храм Божий ходивый; Радуйся, путем тесным пространство Царствия Христова стяжавый. Радуйся, яко дни в юродстве, а нощи в молитве препровождал еси; Радуйся, яко постом и бдением душу свою просветил еси. Радуйся, блаженне Лаврентие, Калужский чудотворче.


Кондак 5


Боготечное светило быв, согражданы твоя благочестию христианскому поучал еси, Лаврентие всеблаженне, образ равноангельного жития тем показуя. Кто убо, о твоем великом терпении слыша, не умилится и совершенное смирение твое воспоминая, како обидящим, по заповеди Христа Бога, вся прощал еси и Тому во умилении глубоцем воспевал еси: Аллилуиа.


Икос 5


Видим был еси от человек, яко юрод и безумен, по стогнам града в раздранней одежде ходяй, от всех поругаем, Лаврентие праведне, обаче мудр о Христе пребыл еси и сие чудесы многими проявил еси. Темже от людей благочестивых, яко истинный угодник Божий почитаем, слышал еси похвалы таковые: Радуйся, словес Апостола Павла, еже о Христе юродства, добрый последователю; Радуйся, евангельских Христовых заповедей верный исполнителю; Радуйся, хлад и зной любве ради Божия претерпевый; Радуйся, всякое упокоение плотское возненавидевый, да покой вечный наследиши. Радуйся, в мире страннообразно поживый, да отечествие горнее приобрящеши; Радуйся, биения телу твоему радостно приявый, да безсмертныя славы сподобишися. Радуйся, мужу желаний духовных; Радуйся, делателю благий винограда небеснаго. Радуйся, плоды сладкие делания твоего Христу принесый; Радуйся, временными лишеньми богатство небесное стяжавый. Радуйся, изрядный праведнаго жития рачителю; Радуйся, преподобия и чистоты ревнителю. Радуйся, блаженне Лаврентие, Калужский чудотворче.


Кондак 6


Проповедник был еси покаяния грешником и обличитель прозорливый беззаконий человеческих, Лаврентие преблаженне; слово бо твое многих ко спасению приведе и на путь исправления настави, их же с любовию обличал еси и к покаянию истинному призывал еси, Богу же учил еси воспевати: Аллилуиа.


Икос 6


Возсиял еси, яко звезда пресветлая, во граде Калуге, угодниче Божий, и чудес благодатию согражданы твоя просветил еси и многия болящия преславно молитвами твоими исцелил еси, и вся верныя подвизал еси звати тебе: Радуйся, верующим врачу безмездный; Радуйся, молитвенниче всесильный ко Господу Богу. Радуйся, руце твои святыя цельбоподательно на недужныя полагавый; Радуйся, единым прикосновением к одежде твоей больным здравие подававый. Радуйся, яко чудотворения твоя юродством сокрыти тщался еси; Радуйся, яко тем искушения демонския победоносно отгнал еси. Радуйся, сострадательный и милостивый страждущим помощниче; Радуйся, любвеобильный и благосердный скорбящих утешителю. Радуйся, Богу всей душею твоею прилепивыйся; Радуйся, ближняя твоя зело возлюбивый. Радуйся, присно о обидящих тя молитвы возносивый; Радуйся, кротость совершенную себе усвоивый. Радуйся, блаженне Лаврентие, Калужский чудотворче.


Кондак 7


Хотение присное имел еси, святе Лаврентие, да богоугодное и праведное житие твое от человек утаится. Темже всяко тщался еси от людей юродством сие сокрыти и радовался еси безчестиям и биениям, тебе наносимым, яко даром великим, присно зовый во смирении духа песнь Богу: Аллилуиа.


Икос 7


Новаго тя Андрея Цареградскаго познаем, Лаврентие блаженне, град Калугу дивным юродственным житием твоим просветившаго: дадеся бо тебе благодать от Бога помыслы человеческие познавати и согрешения тайные обличати, согражданом же твоим духовно светити и на стези покаяния и спасения тех приводити. О сем тебе восхваляюще, поем: Радуйся, яко правда твоя в мире возсия немерцаемым Божия благодати светом; Радуйся, яко тайнии подвизи твои от Бога явно чудесы прославишася. Радуйся, древним пророкам подражавый; Радуйся, прозорливец воистину неложный явивыйся. Радуйся, приявый власть на духи нечистыя; Радуйся, смирением твоим вся козни их разрушивый. Радуйся, постом и молитвою сильно на диавола вооруживыйся; Радуйся, нищетою и уничижением всю гордыню его поправый. Радуйся, на земли небесный гражданине; Радуйся, среди молвы народныя безмолвия добный хранителю. Радуйся, землю одром упокоения имевый; Радуйся, безчестие в честь вменивый. Радуйся, блаженне Лаврентие, Калужский чудотворче.


Кондак 8


Страннообразное юродственное житие твое, Лаврентие праведне, святою кончиною завершил еси, яко истинный угодник Божий, о Господе почив, душею же твоею в небесныя скинии Царствия Христова восшел еси, и тамо со святыми Пресвятой Троице сподобился еси воспевати приснохвалебную песнь: Аллилуиа.


Икос 8


Весь град Калуга благоухания духовнаго в час скончания твоего исполнился, Лаврентие блаженне, и келия твоя, идеже о Господе почил еси, мироположница благоухания Христова явися, емуже благовернии людие радующеся, тебе похвальныя сия словеса воспевати научишася: Радуйся, величием чудес в житии и по смерти просиявый; Радуйся, праведно и свято житие твое совершивый. Радуйся, яко кончину твою благоуханием чудным ознаменовал еси; Радуйся, яко ароматы райскими святость души твоея показал еси. Радуйся, в сладкую воню Христову радостно востекий; Радуйся, нетленное тело твое, аки масть духовную, верным оставивый. Радуйся, град Калугу святыми мощами твоими освятивый; Радуйся, радости многим подателю. Радуйся, недугов душевных и телесных целителю; Радуйся, ближним и дальним дары целебныя подаваяй. Радуйся, чтущих тя прошения исполняяй; Радуйся, блаженне Лаврентие, Калужский чудотворче.


Кондак 9


Всем людем во утешение и освящение явися святое место уединения твоего, идеже во храме Рождества Христова гроб твой честный чудеса многа и предивна силою Христовою совершает и вся верныя научает твоя богоугодный подвиги чествовати. Богу же, прославльшему тя, пети: Аллилуиа.


Икос 9


Витийство мирское недовлеет к прославлению чудес, по молитве блаженнаго Лаврентия совершаемых и разумение человеческое превосходящих, о нихже мы, смиреннии, благохвалити угодника по достоянию недоумеем, но от усердия нашего приносим ему малыя нехитростныя похвалы сия: Радуйся, угодниче Божий, со святыми почиваяй; Радуйся, избранниче Христов, земнородным милосердие твое являяй. Радуйся, расслабленныя телом здравы возставляяй; Радуйся, бесныя от насилия диавольскаго свобождаяй. Радуйся, глухим слухи отверзаяй; Радуйся, немым уста разрешаяй. Радуйся, хромым право ходити устрояяй; Радуйся, бедствующих скоропредстательный помощниче. Радуйся, скорбящих благодатный утешителю; Радуйся, града Калуги небесный покровителю. Радуйся, святыя обители твоея неустанный хранителю; Радуйся, всея земли нашея заступниче. Радуйся, блаженне Лаврентие, Калужский чудотворче.


Кондак 10


Спасительную Божию благодать подаеши всем, святе Лаврентие, с недугами человеческими и с верою крепкою молитвенно притекающим к цельбоносному твоему образу. Темже и мы, припадающе, молим тя недуги наша исцелити, грехом же нашим отпущение испросити, да зовем дивному во святых Своих Богу: Аллилуиа.


Икос 10


Царя Небеснаго Христа Бога истинный раб и угодник был еси, Лаврентие блаженне, и от Него чудесы прославленный, отечествию твоему земному благотворения многая являеши, больныя исцеляя, расслабленныя укрепляя, слепыя просвещая. О немже радующеся, приносим ти сия радостныя пения: Радуйся, звездо немерцающая, чудес зарею верныя озаряющая; Радуйся, правды солнца Христа луче пресветлая. Радуйся, милосердия Спасова подражателю; Радуйся, милость твою болящим человеком являяй. Радуйся, верныя души благодатью посещаяй; Радуйся, в сониих и видениих земнородныя зраком лица твоего просвещаяй. Радуйся, от горних высот к ищущим заступления твоего милостивно принимаяй; Радуйся, от очес страждущих слезы отираяй. Радуйся, области Калужския духовная красото; Радуйся, Церкви Христовы светлая похвало. Радуйся, на небеси со ангелы и святыми славою нетленною украшенный; Радуйся, на земли от правоверных по долгу ублажаемый. Радуйся, блаженне Лаврентие, Калужский чудотворче.


Кондак 11


Пение молебное у гроба твоего с верою некий разслабленный приношаше, руце и нозе недвижими и язык немый имеяй, но егда к целебней раце мощей твоих прикоснулся, абие здрав соделася, руце свои простре и ногами ходити нача и языком своим ясно проглагола; темже велию твою к нему милость прославляше и благодарственно взываше ко Господу: Аллилуиа.


Икос 11


Светлостью чудес твоих, угодниче Божий Лаврентие праведне, помраченныя грехми души наша озаряеши и вся ны от сна лености возбуждаеши, да плоды покаяния принесем Христу, тебе в подвизех богоугождения подражающе, яко да возможем неосужденно благохвалити тя, предстателя нашего, сими песненными глаголы: Радуйся, лампадо, светом Христовым всех просвещающая; Радуйся, елеем милости твоего сердца болезненная умащаяй. Радуйся, руце согбенная и недвижимая целы и действенны устроивый; Радуйся, нозе неходящия к скорому и правому течению претворивый. Радуйся, язык, немотою связанный, благодатно разрешивый; Радуйся, разслабленнаго всеми уды крепка и здрава возставивый. Радуйся, алавастре целебный, на всякия недуги врачевство содержаяй; Радуйся, болящим милость сострадания твоего являяй. Радуйся, по Бозе и Пресвятей Богородице упование на тя возлагающих не посрамляяй; Радуйся, любящим тя и чествующим память твою предстательством небесным воздаваяй. Радуйся, молитвенно призывающим святое имя твое на помощь ускоряяй; Радуйся, поклоняющимся с верою честным мощем твоим дары целебные независтно подаваяй. Радуйся, блаженне Лаврентие, Калужский чудотворче.


Кондак 12


Благодать Божию многоцелебную, от гроба твоего источаемую, некий муж уведев, сына своего, ногами болезновавша и отнюдь ходити не могуща, на плещах своих к целебной раце твоей, святе Лаврентие, принесе и со слезами о его исцелении к тебе моляшеся; и се молитве еще сущей во устех его, больной на нозе свои ста и ходити нача, скача и благодаря Бога, в тебе славно прославльшагося, благодарными усты взывая к Нему: Аллилуиа.


Икос 12


Поюще подвиги твоя предивные и чудеса твоя преславная, Лаврентие праведне, молим тя, заступника нашего: приклонися милостивно к нашим молитвам смиренным и вознеси о нас ко Господу твоя благоприятныя молитвы, прося нам от благости Его дары благопотребныя душевному спасению нашему, да возможем и мы грешнии не токмо подвиги твоя прославляти, но и добродетелем твоим подражати, зовуще и глаголюще: Радуйся, светлый образе богоугождения в мире жительствующим; Радуйся, предивный наставниче в иночестве подвизающимся. Радуйся, девствующим подражания образе; Радуйся, нищелюбцем преуспеяния правило. Радуйся, мудрости суетныя мирския посрамителю; Радуйся, буйства о Христе благодатнаго проявителю. Радуйся, евангельских обетований наследниче; Радуйся, апостольских целебных даров преемниче. Радуйся, ангельских воинств собеседниче; Радуйся, всех святых сожителю. Радуйся, телеса наша безмездно врачуяй; Радуйся, о душах наших Господа умоляяй. Радуйся, блаженне Лаврентие, Калужский чудотворче.


Кондак 13


О предивный чудотворче и заступниче всем нам премилостивый, святе блаженне Лаврентие! Приими с любовию сие малое, в похвалу тебе приносимое моление наше и помолися ко Господу Богу о еже избавится нам геенны огненныя и мучений вечных, Царствие же Небесное вкупе с тобою унаследовати, да в радости святых воспоем и мы, грешнии, Богу Спасителю нашему: Аллилуиа.


(Этот кондак читается трижды, затем икос 1 и кондак 1)



Молитва святому праведному Лаврентию, Христа ради юродивому, Калужскому чудотворцу


О святый и богопрославленный праведниче и чудотворче Лаврентие, скорый помощниче и усердный заступниче всех, с верою и любовию молитвенно к тебе прибегающих! Се и мы, смиреннии и грешнии, обремененнии игом тяжким многих беззаконий наших, во умилении глубоцем к тебе прибегаем, и припадающе к многоцелебной раце святых мощей твоих, молим тя: помолися за нас ко Господу Богу, да не погубит нас со беззаконии нашими, но обратит нас на стезю покаяния и спасения. Вемы бо, вемы, яко много может пред Ним молитва праведнаго. Тебе же воистину праведника суща на умоление к Нему предлагаем со упованием крепким, яко твоего ради небеснаго предстательства пред Ним и мы недостойнии помиловани будем. Испроси нам у Создателя нашего великия и богатыя дары благости Его: земли плодоносие, воздуха благорастворение, дожди благовременны, мир во днех наших, благочестия умножение, болящим здравие, скорбящим утешение, унывающим ободрение, сиротствующим призрение, убогим снабдение, подвизающимся преуспеяние, умирающим благую христианскую кончину и всем правоверующим вечное спасение. Богохранимую же землю Российскую молитвами твоими невредиму от всякаго зла сохрани, град же твой соблюди в мире и благоустроении, яко страж и хранитель их неотступный. Ей, угодниче Божий! Не посрами упования нашего, но яви нам святое твое заступление: да величаем тя немолчно, яко великаго предстателя нашего, и прославляем неизреченное человеколюбие дивнаго во святых Своих Триединаго Бога, Отца и Сына и Святаго Духа во веки веков. Аминь.



Тропарь блаженному Лаврентию, Христа ради юродивому, Калужскому


Тропарь, глас 4


Просветився божественною благодатию, Богомудре, и весь разум и сердце от суетнаго мира сего к Зиждителю неуклонно возложив, целомудрием и многим терпением во временней жизни течение добре скончал еси и веру соблюл еси непорочну. Темже и по смерти явися светлость жития твоего, источаеши бо чудесем источник неисчерпаемый верою притекающим ко святому твоему гробу, Лаврентие всеблаженне, моли Христа Бога, да спасет души наша.[/spoiler]

Раб божий Константин

Акафист преподобному Лаврентию Черниговскому, чудотворцу.
[spoiler]Кондак 1


Избранный угодниче Божий, преподобне отче Лаврентие, приемый благословение от Божия Матери и пришедый во святый град Чернигов, еже вселитися в обитель Пресвятыя Троицы, идеже изыде на тя Дух Святый: изгнание претерпевый и множество словесных овец себе собравый, пищею слова Божия их напитавый и ко Христу приведый: яко имея дерзновение ко Святей Троице, не преставай моляся избавити нас от всяких бед и скорбей, да со умилением зовем ти: Радуйся, преподобне отче наш Лаврентие, скорый помощниче и молитвенниче к тебе притекающих.


Икос 1


Ангела дивна стране Черниговстей яви тя Господь, всея твари Содетель, яко показа Духа Святаго в тя всельшагося, даром прозрения и исцеления обогати тя. Мы же, зряще тя, сосуде избранный Пресвятыя Богородицы, благодаряще Бога, прославляем тя, яко светильника и молитвенника нашего, и прилежно зовем ти сицевая: Радуйся, пречудный избранниче Божия Матере; Радуйся, сосуде благодати преизрядный. Радуйся, преподобных и святителей похвало и собеседниче. Радуйся, преподобному старцу Серафиму поревновавый. Радуйся, и по смерти с преподобными вселивыйся. Радуйся, яко тобою помыслы нечистыя обличаются. Радуйся, яко дела благая и полезная тобою благословляются. Радуйся, преподобне отче наш Лаврентие, скорый помощниче и молитвенниче к тебе притекающих.


Кондак 2


Видяще исполнение божественнаго о людех смотрения Отца Небеснаго, избравшаго от народа мужей праведных ко спасительному служению, ради нашего поддержания духовнаго, и Божественным даром прозрения тя наградившаго, вопием Богу в Троице: Аллилуиа.


Икос 2


Разум Божественный вразуми тя, отче Лаврентие, егда отреклся еси от жизни временныя и притекл к жизни вечней, от юности Христа прославляя всем сердцем твоим и Тому Единому паче всех работая; притекл еси в Рыхловский монастырь, тамо подвизаяся в пении и чтении. Мы же, видяще в тебе сосуд Духа Святаго, со умилением зовем ти сице: Радуйся, яко от юности пламенне житие монашеское возлюбил еси; Радуйся, яко от мира сего отреклся еси. Радуйся, старость матери упокоивый; Радуйся, по смерти тоя в обители Святителя Николая вселивыйся. Радуйся, яко в менших братии тамо послуживый. Радуйся, яко в пении Бога в Троице прославивый. Радуйся, яко тем Пресвятей Богородице угодивый. Радуйся, разумом Божественным людей удививый. Радуйся, преподобне отче наш Лаврентие, скорый помощниче и молитвенниче к тебе притекающих.


Кондак 3


Егда услыша о тебе, отче Лаврентие, архиепископ Антоний, повеле прибыти во град Чернигов, в монастырь Пресвятыя Троицы; ты же, внемля его прошению, усилил молитвы. Тогда Сама Царица Небесная благослови тя. Мы же грешнии, дивящеся сему чудеси, зовем ко Господу: Аллилуиа.


Икос 3


Пришел еси во святую обитель Пресвятыя Троицы и, узрев образ Богоматери Троице-Ильинския, поклонился ему, яко уведе в нем Явльшуюся тебе и Повелевшую идти в дом Ея Сына и тамо прославити Его. Тогда преклонився пред Нею, просил еси у Нея благословения и покрова. Мы же, видяще твое предание воле Божией, вопием таковая: Радуйся, яко послушание велие Божией Матери явил еси; Радуйся, яко избра тя служити Ей во граде Чернигове. Радуйся, дивным пением Ея прославивый; Радуйся, всего себе руководству Тоя предавый. Радуйся, и до конца жизни твоей Ей добре послуживый; Радуйся, в чистоте девство твое сохранивый; Радуйся, сердцем и устами Ея прославивый; Радуйся, образ смирения нам оставивый. Радуйся, преподобне отче наш Лаврентие, скорый помощниче и молитвенниче к тебе притекающих.


Кондак 4


Звезда лучезарная, озарившая путь тебе, приведе тя во святый град Иерусалим, да поклонишися Гробу Господню и прославиши Бога, терпевшаго страдания за грехи наша, поюще Ему: Аллилуиа.


Икос 4


Видя благодать и дар Святаго Духа в тебе, возлюбиша тя братия святыя обители Черниговския и избраша яко искуснаго руководителя и жизнию Богу угождающа. Мы же, благодаряще тя, вопием тебе: Радуйся, Роману сладкопевцу уподобивыйся. Радуйся, яко с ним в Сионе Горнем песнь Богу воспеваеши. Радуйся, Царя Славы прославивый; Радуйся, на путь спасения нас наставивый. Радуйся, яко со Ангелы славу Его воспеваеши; Радуйся, пением своим небо и землю соединивый. Радуйся, всех достойно Бога славящих в бедах не оставляеши; Радуйся, яко за них пред Господем и Богородицею ходатайствуеши. Радуйся, преподобне отче наш Лаврентие, скорый помощниче и молитвенниче к тебе притекающих.


Кондак 5


Время наста, егда попрана бысть святыня, ты же яко пастырь добрый, душу свою за овцы положити готовый, не оставил еси града Чернигова и обители Троице-Ильинския, но молитвами святых, под покровом Божией Матери в горах Болдиных вселился еси, да тамо хвалебную песнь воспеваеши Богу в Троице единому славимому: Аллилуиа.


Икос 5


Прииде час и сбудется реченное тобою: обновися Дом Святыя Троицы, в нем же собрашася вся чада твоя духовная. Ты же в дом Духа Святаго вшел еси, боголепно его украсив, и мудро стадом словесных овец до кончины твоея руководил еси, имя Божие призывати в радостех и печалех всех поучая, и многим святым в трудех твоих поревновал еси. Возвращение мощей Святителя Феодосия провидев, место славно ему уготовил. Мы же, хваляще Бога, давшаго тебе дух прозрения и разум мудрый, воспеваем песнь таковую: Радуйся, уставов церковных строгий блюстителю. Радуйся, обители многоопытный руководителю; Радуйся, рачителю благолепия церковнаго; Радуйся, Православия столпе непоколебимый. Радуйся, яко мощи блаженнаго Филарета нетленными почитал еси; Радуйся, пришествие Святителя Феодосия песньми прославивый. Радуйся, пред взором нашим седмь небес начертавый; Радуйся, яко и по смерти на небесах в райских обителех вселивыйся. Радуйся, преподобне отче наш Лаврентие, скорый помощниче и молитвенниче к тебе притекающих.


Кондак 6


Бурю многих бед и скорбей житейских претерпевая, помогал еси всем к тебе приходящим; тако и по смерти не оставил еси нас грешных, заповедав нам призывати тя в скорбех и печалех. Уповая на молитвенную помощь твою пред Господем, вопием Ему: Аллилуиа.


Икос 6


Провидев кончину свою скорую, отче Лаврентие, предрекл еси ю трикратно. Мы же молим тя, да не оставиши нас грешных по отшествии своем, но с нами пребудеши во вся дни, во еже с радостию ублажати тя: Радуйся, кончину свою предуведевый; Радуйся, о ней же многим возвестивый. Радуйся, яко вечныя жизни сподобивыйся. Радуйся, безболезненным исходом душу свою Богу предавый. Радуйся, яко и бесы в той час вострепеташа; Радуйся, сладость небесную на земли вкусивый. Радуйся, яко на небеси тою наслаждаешися; Радуйся, яко мощи твоя нетленныя нам оставил еси. Радуйся, преподобне отче наш Лаврентие, скорый помощниче и молитвенниче к тебе притекающих.


Кондак 7


Пение и рыдание надгробное чада твоя духовная приношаху ти у гроба, отче Лаврентие, егда преставился еси ко Господу душею: нас же не оставил еси телом нетленным, праведнии бо и по смерти живы будут, поя Богу: Аллилуиа.


Икос 7


Четыредесят дний не смолкаше рыдание и пение у гроба твоего, блаженне Лаврентие; ты бо четыредесят дний ожидал еси, егда чада твоя уготовят ти место погребения. Пребывая с нами телом во храме, душею же молился еси за ны грешныя пред Господом. Сим пребыванием чудо велие явил еси: нетленныя бо мощи твоя, благовония исполненнии, показуют святость твою. Дивящеся сему чудеси, восхваляем тя тако: Радуйся, благодать Божию стяжавый; Радуйся, лозо винограда Христова. Радуйся, четыредесятидневным стоянием телесе твоего нас утешивый; Радуйся, яко множество чудес сотворивый. Радуйся, благоуханием от гроба твоего всю обитель наполнивый; Радуйся, яко по окончании четыредесяти дний тело твое с честию в гробницу положися. Радуйся, яко и до ныне нетленно Богом сохранися; Радуйся, яко и по смерти нас не оставивый. Радуйся, преподобне отче наш Лаврентие, скорый помощниче и молитвенниче к тебе притекающих.


Кондак 8


Проповедником истины Христовой явился еси, отче Лаврентие: непрестанным служением Богу и ближним пророком древним уподобился еси. Службы Божия в храме совершая, в молитве келейной неустанно подвизался еси. Тем же и по преставлении твоем хвалебную песнь о тебе воспеваем Богу: Аллилуиа.


Икос 8


Просвети землю Российскую лучезарным светом велиим преподобный Серафим Саровский чудотворец. По нем лучи трисолнечнаго сияния изыдоша от праведнаго Иоанна, чудотворца Кронштадтскаго. Ты же, святе Лаврентие, новый светильник по сих явился еси, просвещая и утверждая всех в вере непоколебимей. Сего ради ти яко светильнику земли Черниговския возглашаем тако: Радуйся, преподобне Лаврентие, миру новый светильниче; Радуйся, пред Богом наш новый молитвенниче. Радуйся, сосуде златый, от чрева матери Богом избранный; Радуйся, и Богородицею прославленный. Радуйся, служителю Христов преизрядный; Радуйся, яко во иереех Тому послуживый. Радуйся, яко о имени твоем бесы падоша; Радуйся, яко имя твое Ангелы на небеси прославиша. Радуйся, преподобне отче наш Лаврентие, скорый помощниче и молитвенниче к тебе притекающих.


Кондак 9


Всякое слово и плоть довлеют к похвале твоей, отче Лаврентие: ты бо движимый Духом Святым, от юности и до конца дний твоих славил еси имя Всесвятаго Творца неба и земли, Его Пречистую Матерь и всех святых. И по смерти с ними водворился еси в райских чертозех, да и тамо со всеми святыми воспеваеши Богу хвалебную песнь: Аллилуиа.


Икос 9


Витию богоугодна в тебе показа Господь, яко многа чада духовныя к тебе идоша. Вернии же Богу да возвеселятся с тобою во второе пришествие Спасителя. Мы же с кротостию и смирением приемлем наставления твоя и, подражая твоему человеколюбию, с любовию воспеваем тебе: Радуйся, гусли духа сладкозвучныя; Радуйся, кимвале восклицания. Радуйся, цевннце боговещанная; Радуйся, Ангелов собеседниче. Радуйся, о Бозе живе наше подражание; Радуйся, яко наставления твоя с радостию приемлем. Радуйся, яко теми муки вечныя избавляемся; Радуйся, поучение от Бога нам преподал еси. Радуйся, преподобне отче наш Лаврентие, скорый помощниче и молитвениче к тебе притекающих.


Кондак 10


Хотя спасти душу свою, всю полноту добродетелей Евангельских в себе совокупил еси богоблаженне Лаврентие: апостольское проповедание, мученическое терпение, преподобных воздержание, нестяжание, смирение и нищету духовную. Тем же ныне на небеси, восхваляюще Христа Бога, давшаго ти крепость, поминай нас, чтущих светлую память твою, и поющих Богу: Аллилуиа.


Икос 10


Познал еси, богомудре отче Лаврентие, разум Божественных Писаний, непрестанно подвизаяся в молитвах, и почерпнул еси воду живу, юже и нам преподал еси; сего ради вопиим ти сице: Радуйся, яко жаждущих от источника Святыя Троицы напаяеши; Радуйся, теми же водами души исцеляеши. Радуйся, вместо пищи водами словес твоих нас и ныне утешаеши; Радуйся, пламенем словес твоих терние грехов наших попаляеши. Радуйся, яко словеса твоя паче меда сладчайша; Радуйся, яко сладостию словес твоих скорбящим радость даруеши. Радуйся, яко прореченныя тобою словеса и ныне исполняются; Радуйся, яко в них мы славу твою уразумеваем. Радуйся, преподобне отче наш Лаврентие, скорый помощниче и молитвенниче к тебе притекающих.


Кондак 11


Множество чудес совершил еси, отче Лаврентие: бесы изгнал и прокаженныя исцелил еси, падшим духовно руку помощи твоея простерл еси. Посети и нас в бедах сущих, да умиленное пение тебе приносяще, вопием дивному во святых Своих Богу: Аллилуиа.


Икос 11

Светильник света Божественнаго, ты прозорливо провидя грехи наша, гнев Божий, праведно на ны движимый, предрекл еси. Мы же молим тя, отче Лаврентие, яко имуща дерзновение пред Господем: испроси нам недостойным милость у Бога, да яко молитвенника тепла, ублажаем тя, зовуще: Радуйся, пророком последовавый и им же уподобивыйся; Радуйся, пророчествами твоими мир наполнивый. Радуйся, яко многим напутствие давый; Радуйся, будущая в их жизни, предсказавый. Радуйся, яко монастырь по предсказанию твоему устроился; Радуйся, словесных овец пастырю. Радуйся, гнева Божия на грешники возвестителю; Радуйся, покаяния проповедниче и грешников исправителю. Радуйся, преподобне отче наш Лаврентие, скорый помощниче и молитвенниче к тебе притекающих.


Кондак 12


Благодать велию восхоте подати тебе Господь Вседержитель, прослави тя в житии твоем, дар прозрения дарова тебе и множеством чудес обогати. Научи и нас воспевати с тобою благодарственную песнь Богу: Аллилуиа.


Икос 12


Поем тя, угодниче Христов Лаврентие, яко низу пребывая на земли, удостоился еси возвыситися до высоты небесныя и тамо возсияти духом, яко солнце, да посетиши нас с высот небесных воспевающих ти сицевая: Радуйся, светильниче лучезарный; Радуйся, свете, мрак бесовский разгоняющий. Радуйся, столпе огненный и каменю непоколебимый; Радуйся, святителей любимый собеседниче. Радуйся, апостолов преизрядный ревнителю; Радуйся, мучеников и преподобных славо превознесенная. Радуйся, благоверных похвало усердная; Радуйся, чтущих память твою покрове и защищение. Радуйся, преподобне отче наш Лаврентие, скорый помощниче и молитвенниче к тебе притекающих.


Кондак 13


О пречудный угодниче Божий, отче наш Лаврентие! Приими сие хвалебное пение, в похвалу тебе приносимое, и твоим богоприятным ходатайством избави нас от всех враг видимых и невидимых, от всякия напасти и скорби, от напрасныя смерти и будущия муки, да сподобимся с тобою и со всеми святыми воспевати Богу: Аллилуиа.


(Этот кондак читается трижды, затем икос 1 и кондак 1)



Молитва преподобному Лаврентию Черниговскому, чудотворцу


О всехвальный отче Лаврентие, приими сие малое моление, от нас грешных тебе приносимое, и призри милостивно с высот небесных на нас, просящих твоего ходатайства у Престола Пресвятыя Троицы, да подаст твоими молитвами мир и благоденствие стране нашей, пастырем силу в молитве, иноком подкрепление на пути совершенства в подвизех смирения и послушания, вдовицам и сиротам заступление, немощным подкрепление, недугующим духом и душею от бесов избавление, больным исцеление, путешествующим Ангела Хранителя. Всем чтущим с любовию память твою, веру искреннюю и непоколебимую. И по преставлении в жизнь вечную приведи нас ко Христу твоими молитвами, да с тобою прославляем Святую Троицу: Отца и Сына и Святаго Духа, всегда, ныне и присно, и во веки веков. Аминь.



Тропарь преподобному Лаврентию Черниговскому, чудотворцу


Тропарь, глас 4


От юности Христа возлюбил еси, и Тому тесным путем последуя, сосуд избран Духа Святаго быв, дар чудотворения и прозрения восприим: сего ради в невечернем свете Пресвятыя Троицы присно радуяся, поминай чад твоих, Лаврентие преподобне, отче наш.


Ин тропарь, глас 8


Днесь светло красуется град Чернигов, и торжествует обитель Пресвятыя Троицы, в ней бо молитвою и постом пребывая, иночествующим и верным людям велий наставниче и скорый помощниче, и избранник пречудный Царицы Небесныя явился еси, яко звезда лучезарная в стране Российстей, преподобне отче наш Лаврентие, моли Человеколюбца Бога спасти души наша.


Кондак, глас 4


Мир оставив, чистоту ангельскую стяжав и мирови любовию послужив, отче наш Лаврентие, помощь благодатную с верою приходящим обильно являя: темже и в премирная селения достойно вселився, телом нетленным с нами пребываеши, утверждая нас в православной вере отцев наших, душею светозарною Подателю мира молишися даровати нам мир и велию милость.


Ин кондак, глас 4


Возсиял еси, яко светильник лучезарный услыша глас Царицы Небесныя, и последовав невозвратно зову Ея. Пришел в обитель Пресвятыя Троицы, идеже Владычицы Богородицы чудотворная икона, целомудренно собрав стадо словесных овец. Не забуди и нас, последовавших ти, и да избавит Господь геенны вечныя, совершающих святую память твою, преподобне отче наш Лаврентие.
[/spoiler]