Молитвослов

Автор Раб божий Константин, марта 10, 2012, 02:13:14

« назад - далее »

Раб божий Константин

АКАФИСТ святителем Феодору и Иоанну, епископом Суждальским, чудотворцем.
[spoiler]Кондак 1
Избраннии угодницы Господни и пастырие предобрии Церкве Христовы, града Суждаля заступницы и теплии о душах наших молитвенницы Феодоре и Иоанне, отцы богоноснии, пение похвальное вам от усердия приносяще, молим вы и просим: яко имущии дерзновение ко Пресвятей Троице, предстательством вашим от всяких бед нас свободите, и наследники Царствия Небеснаго нас соделайте, да благодарственно вам вопием:
Радуйтеся, святителие Феодоре и Иоанне, предивнии чудотворцы.

Икос 1
Ангелов подражатели и человеков наставницы святителие божественнии, вы, яко ангели благии хранители, Отечество ваше земное свыше отечески назираете, богоприятными молитвами вашими, вся благая и душеполезная нам у Господа ходатайствуете, нетлением мощей ваших и чудесы преславными уверяюще нас, яко и по смерти живы суще, вся можете о укрепляющем вас Христе. Темже и зовем к вам с любовию теплою:
Радуйтеся, православия насадители.
Радуйтеся, благочестия подвижницы.
Радуйтеся, апостолов достойнии преемницы.
Радуйтеся, Евангелиа Христова неутомимии благовестницы.
Радуйтеся, первопастырие святыя Суждальския Церкве.
Радуйтеся, столпи непоколебимии непорочныя веры.
Радуйтеся, вдов и сирот питателие и заступницы.
Радуйтеся, безпомощных скории помощницы.
Радуйтеся, болящих врачеве благодатнии.
Радуйтеся, о любящих и чтущих вас предстателие.
Радуйтеся, светильницы богосветлии, душы наша озаряющии.
Радуйтеся, отцы премилостивии, дары спасительныя обильно нам низпосылающии.
Радуйтеся, святителие Феодоре и Иоанне, предивнии чудотворцы.

Кондак 2
Видя Господь всю пагубу душ человеческих, идолослужением языческим омраченных, по неизреченному человеколюбию Своему, восхоте призвати я к свету истинныя веры, и тебе, отче Феодоре, избрав в сие великое служение, да благовестиши людем Суждальским Евангелие Христово, и будеши пастырь добрый новопросвещенным и словесным овцам, словом и примером наставляя их богоугодно пети всех Творцу: Аллилуиа.

Икос 2
Разум благодатный воистину являете отцы богоноснии, делы и словесы вашими, все бо житие ваше земное бысть исполнено всяких добродетелей. Темже и Христос, видя ваша добрая дела, чудесы преславными обогати вас при жизни и по смерти, и сподоби вечнаго предстояния у Престола Своего Божественнаго, идеже созерцающе величество славы Его, и наслаждающеся блаженства райскаго, помяните ны чтущыя вас звании сими:
Радуйтеся, нищету духовную возлюбившии.
Радуйтеся, непорочное сердце стяжавшии.
Радуйтеся, милости и сострадания преисполненнии.
Радуйтеся, сотворившии и научившии, и велии нареченнии во Царствии Небеснем.
Радуйтеся, Духа Святаго сосуди избраннии.
Радуйтеся, друзи Христови возлюбленнии.
Радуйтеся, терпения и кротости образы преизящнии.
Радуйтеся, святителям похвало и иноком наставницы.
Радуйтеся, христоименитым людем ко спасению руководителие.
Радуйтеся, скории о душах наших предстателие.
Радуйтеся, безмезднии телес наших целебницы.
Радуйтеся, святителие Феодоре и Иоанне, предивнии чудотворцы.

Кондак 3
Сила Божия осени тя, святителю отче наш Иоанне, егда напрасное изгнание от престола твоего святительскаго незлобиво претерпел еси, подражая Агнцу Божию, вземшему грехи мира и от иудей пострадавшему даже до смерти на Кресте, Егоже Крест и страдания поминая, нивочтоже вменил еси поругания и изгнание, зовый скорбьми испытывающему тя Подвигоположнику Иисусу: Аллилуиа.

Икос 3
Имея вас святителие Христови, светильники чудесы присно сияющыя, Церковь Суждальская светло о вас красуется, яко невеста преукрашенная ваших подвигов красотою, и благодаряще Церкве Зиждителя, вам, Его избранным угодником, сия песненныя дары приносит, глаголюще:
Радуйтеся, иерарси богомудрии, тьму языческую разгнавшии.
Радуйтеся, архипастырие ревностнии, ко Христу приведшии многия душы человеческия.
Радуйтеся, яко мзда ваша многа на небесех есть.
Радуйтеся, яко восприясте почести вышняго звания.
Радуйтеся, наследницы славы невечерния.
Радуйтеся, сопричастницы радости нетленныя всех святых.
Радуйтеся, пищи райския обильно наслаждающиися в селениих праведных.
Радуйтеся, обретшии вечное всесветлое место упокоения.
Радуйтеся, благодатию Божиею ведущии вся наша скорби и нужды.
Радуйтеся, не оставляющии нас своею любовию и отеческим состраданием.
Радуйтеся, присно просящии нам у Господа дары благости Его.
Радуйтеся, никогдаже забывающии нас в молитвах ваших благоприятных у Престола Христова.
Радуйтеся, святителие Феодоре и Иоанне, предивнии чудотворцы.

Кондак 4
Буря злобы языческия возшуме на тя, святителю Феодоре, егда пастырски подвизался еси о просвещении верою Христовой людей Суждальских: обаче ты, яко воин добрый Царя Небеснаго, кротостию злобу побеждал еси, старцы и юныя умоляя с долготерпением многим и любовию отеческою, оставити суетное служение идолом, и познати истиннаго Бога, в Троице славимаго и покланяемаго, Емуже присно пел еси: Аллилуиа.

Икос 4
Слышим вы, отцы богоноснии, и по смерти, яко трубами многогласными, чудесы вашими блговествующыя нам всемощную Силу Христову, Еюже смерть попрася и живот вечный даровася человеком, Еюже и ваша телеса нетленна пребывают, подвизающе на чада ваша чествовати вас похвалами сими:
Радуйтеся, нетления благоухающии цветы.
Радуйтеся, безсмертия богосветлии и немерцающии лучи.
Радуйтеся, смирением высокая стяжавшии.
Радуйтеся, нищетою временною богатство вечное улучившии.
Радуйтеся, яко память ваша с похвалами до днесь во Святей Церкви.
Радуйтеся, яко имена ваша честна и благословенна в пастве вашей.
Радуйтеся, Российския страны благодатное удобрение.
Радуйтеся, града Суждаля сокровища пребогатая.
Радуйтеся, соборнаго храма Богоматере первейшая украшения.
Радуйтеся, подателие неоскуднии исцелений.
Радуйтеся, источницы неистощимии чудес.
Радуйтеся, молитвами вашими спасающии нас от всяких бед.
Радуйтеся, святителие Феодоре и Иоанне, предивнии чудотворцы.

Кондак 5
Боготечней звезде подобен был еси, святителю Иоанне, сиянием кротости твоея, мрак злобы и клеветы разогнавый. Егда бо клеветницы лукавии на тя возсташа, и на изгнание поносное тя осудиша, ты молитву усердную о них ко Господу принесл еси, и став пред всеми людьми Суждальскими руце твои преподобныя горе воздвигл еси: и абие клеветницы твои слепотою объяти быша, и вину свою пред всеми исповедаша, людие же вси, заблуждение свое познавше, прощения у тебе просиша и на престол святительский с честью тя возвратиша. Ты же и врагов твоих ослепших помиловал еси, и исцеление им подал еси, зовущым в покаянии глубоцем: Аллилуиа.

Икос 5
Видим вы, святителие Христови, очами веры у Престола Божия предстоящыя и за нас грешных молящыяся, и вашим заступлением обретающе в скорбех утешение, в недузех исцеление, в бедах скорое вспоможение, величаем возвеличившаго вас Царя Славы Христа, вам же, теплым предстателем нашым, от любве сердечныя вопием:
Радуйтеся, ангелов сожителие.
Радуйтеся, святых всех приснии друзи.
Радуйтеся, Божия благодати таинницы.
Радуйтеся, во благоухании святыни почивающии.
Радуйтеся, вся благая прошения наша исполняющии.
Радуйтеся, скории утешители скорбных сердец.
Радуйтеся, скоропослушливии предстатели сущих в бедах.
Радуйтеся, старых в изнеможении укрепление.
Радуйтеся, юных к благочестию утверждение.
Радуйтеся, младенцев милостивии наказателие.
Радуйтеся, грешных к покаянию наставницы.
Радуйтеся, святителие Феодоре и Иоанне, предивнии чудотворцы.

Кондак 6
Проповедника богопросвещенна и апостолом Христовым единонравна, вемы тя святителю Феодоре: благодать бо Господня излияся во устех твоих, преподобне, и дар Божий спасительный, по имени твоему, воистину был еси людем Суждальским, словом и примером равноангельскаго жития твоего приводя их к познанию Христову, и поучая сердцем и усты воспевати Спасителю мира: Аллилуиа.

Икос 6
Возсиясте отцы всеблаженнии, в стране Суждальстей, светом добродетельнаго жития вашего, яко светила богосветлая, и просветисте нощь глубокую идолослужения, лучами познания Христова: но и ныне, аще вратами смерти и во гробы снидосте, не престаете озаряти наша темныя душы благодатными лучами, да вас немолчно ублажаем благохвалении сицевыми:
Радуйтеся, милость и сострадание ко всем являющии.
Радуйтеся, тяжкия грешники от рова погибельнаго исхищающии.
Радуйтеся, пастырие добрии, присно готовии спасати от бед словесную вашу паству.
Радуйтеся, волку душегубительному не попускающии расхитити Богом врученное вам стадо.
Радуйтеся, звезды непрелестнии, путь ко спасению нам верно указующии в житейстем плавании.
Радуйтеся, облацы росоноснии, зной страстей наших прогоняющии.
Радуйтеся, фимиам молитв за нас Богу приносящии.
Радуйтеся, сладкою вонею благоухания Христова, сердца наша услаждающии.
Радуйтеся, венцами рукою Вседержителя украшеннии.
Радуйтеся, на Небеси Престолу Владычню покланяющиися.
Радуйтеся, собеседницы пресветлых горних сил.
Радуйтеся, заступницы усерднии земнородных.
Радуйтеся, святителие Феодоре и Иоанне, предивнии чудотворцы.

Кондак 7
Хотя Господь явити житие твое ангелоподобное, отче Иоанне, благоволи послати сослужебника тебе во время совершения Божественныя Литургии, ангела святаго, егоже видети сподобився благоверный князь Суждальский Борис, позна тя избранника Божия и великаго иерарха Христова, достойнаго еще во плоти сослужения ангельскаго, и о сем благодарственно возгласи ангелов и человеков Создателю: Аллилуиа.

Икос 7
Новопросвещеннии люди Суждальстии вас обретоша святителие Божии, пестуны искусныя и попечители ревностныя, на спасения стезю их наставляющыя, и всяку тьму нечестия сиянием учений ваших разгоняющыя. Темже яко проповедников благословенных, мы чада суще оных, ихже вы ученьми своими ко Христу приведосте, ваши труды и подвиги усердно поминаем, и зовем:
Радуйтеся, Троицы Живоначальныя священнотаинницы честнии.
Радуйтеся, таинств божественных совершители непорочнии.
Радуйтеся, немудрых наказателие благоискуснии.
Радуйтеся, языческаго нечестия крепцыи искоренители.
Радуйтеся, сеятели благочестия христианскаго предобрии.
Радуйтеся, нивы Господней делателие трудолюбивии.
Радуйтеся, вернии раби Небеснаго Домовладыки.
Радуйтеся, Учителя Христа ученицы добропослушливии.
Радуйтеся, смирения Его нелицемернии подражатели.
Радуйтеся, кротости Его вернии последователи.
Радуйтеся, любовию Его преисполненнии.
Радуйтеся, милосердие Его себе стяжавшии.
Радуйтеся, святителие Феодоре и Иоанне, предивнии чудотворцы.

Кондак 8
Странник и пришлец в земли Суждальстей был еси, святителю отче Феодоре, вышняго града Иерусалима Небеснаго взыскуя злострадании многими, и сия мужески претерпевая любве ради Христовы, ово от потемненных злобою идолослужителей, ово же от исконнаго врага спасения человеческаго, егоже всю силу терпением крепким и молитвами непрестанными до конца победил еси, и ныне со ангелы и мученики песнь победную поеши Подвигоположнику Христу: Аллилуиа.

Икос 8
Всем к вам молитвенно прибегающым, чудотворцы святии, любовь и благосердие ваше обильно являете, и многажды самая прошения наша исполнением предваряете: ибо дадеся вам велия благодать от Господа, болезни исцеляти, духи нечистыя изгоняти, разслабленныя возставляти, яко воистинну преемником апостольским и верным последователем Евангелиа Христова, Егоже обетования неложная туне подаете всем требующым дары целебныя, и за сие слышите пение таковое:
Радуйтеся, маслины благоплодныя, елей милости Божия нам источающии.
Радуйтеся, кедри благосеннолиственнии, в зной страстей нас покрывающии.
Радуйтеся, крини благовоннии небеснаго прозябения.
Радуйтеся, чудная древеса рая Иисусова.
Радуйтеся, плод сторичный принесшии на пажити Святыя Церкви.
Радуйтеся, вертоград Церкве Святыя труды вашими благовозделавшии.
Радуйтеся, новосаждения спасительная в нем возрастившии.
Радуйтеся, благословия органи изряднии.
Радуйтеся, евангельския проповеди трубы доброгласныя.
Радуйтеся, истиннии хранителие апостольских преданий.
Радуйтеся, Суждальския церкве украшение неотъемлемое.
Радуйтеся, святителие Феодоре и Иоанне, предивнии чудотворцы.

Кондак 9
Всею душею возлюбив избранника Божия Евфимиа, ты отче Иоанне, был еси ему помощник усерден в устроении обители его святыя, и друг присный во вся дни живота твоего. Темже ныне, в обителех горних вкупе обретше вечное блаженное упокоение, неразлучно в Бозе пребываете, и поете святых святейшему Слову: Аллилуиа.

Икос 9
Витии многовещаннии и доброгласнии не возмогут воистинну изрещи все обилие чудес ваших, угодницы Божии, имиже при жизни и по смерти прославистеся от Господа, и прослависте имя Его Святое в стране Суждальстей, еяже просветители и хранители соделастеся благоволением всех Творца, подвизающаго нас вопити к вам хвалебно:
Радуйтеся, рукою крепкою люди Суждальския ко спасению путеводившии.
Радуйтеся, к спасительному познанию Христову тех приведшии.
Радуйтеся, яко Петр и Павел мрежею проповеди евангельския душы человеческия уловившии.
Радуйтеся, апостольски страну Суждальскую светом богопознания просветившии.
Радуйтеся, чудесы преславными проповеданнаго вами учения истину засвидетельствовавшии.
Радуйтеся, всякое нечестие языческое истребившии.
Радуйтеся, православия святые догматы незыбленно утвердившии.
Радуйтеся, яко вашим предстательством и до ныне град ваш в православии нерушимо пребывает.
Радуйтеся, орли небеснии, крилами молитв ваших от бед нас покрывающии.
Радуйтеся, теплотою любве вашея нас согревающии.
Радуйтеся, пищею нетленною слова Божия нас напитавшии.
Радуйтеся, святителие Феодоре и Иоанне, предивнии чудотворцы.

Кондак 10
Спасительнаго учения Христова великопроповедник и чудотворец показался еси, святителю Феодоре, и свято пожил еси на земли в подвизех и трудех непрестанных, возращая посеянная тобою в стране Суждальстей семена благочестия Христианскаго, во еже принести им плод сторичный твоим благопопечением. И тако совершив подвиг свыше тебе назначенный, в старости маститей прешел еси к обителем небесным, со ангелы пети Триипостасному Богу: Аллилуиа.

Икос 10
Царя Небеснаго Христа служителие изряднии и воини добропобеднии, святителие божественнии Феодоре и Иоанне, темную силу душегубителя диавола крепко поправшии, и венцы победными свыше увенчаннии, подвизаете чудесы вашими верных соборы прославляти песньми духовными, подвиги святаго жития вашего, имже чудящеся, от любве сердечныя восклицаем вам радостно:
Радуйтеся, земнии ангели и небеснии человецы.
Радуйтеся, на небеси и на земли от Господа прославленнии.
Радуйтеся, блага нетленная унаследовавшии.
Радуйтеся, дары благодатныя щедро раздающии.
Радуйтеся, душевных и телесных недугов добрии целебницы.
Радуйтеся, милостивии страны Суждальския покровителие.
Радуйтеся, скорое вспоможение в бедах сущым являющии.
Радуйтеся, присно готовии на умоление прогневаннаго грехми нашими Творца.
Радуйтеся, со дерзновением многим предстательствующии за нас пред Престолом Вседержителя.
Радуйтеся, умилостивители известнии Небеснаго Отца.
Радуйтеся, непрестанно ходатайствующии пред благостию Его о мире всего мира.
Радуйтеся, праведно движимый на нас гнев Его молитвами вашими утоляющии.
Радуйтеся, святителие Феодоре и Иоанне, предивнии чудотворцы.

Кондак 11
Пение Пресвятей Троице в безмолвии ненарушимем возносити возжелев, святителю отче Иоанне, оставил еси престол твой святительский, и заключился еси в обители иночестей, да един Единому возлюбленному ти Иисусу послужиши в безмолвии и молитвах непрестанных, богомыслием восходя к совершенству духовному, и приуготовляяся к исходу радостному от земных к небесным, егоже улучив, со безплотными лики воспеваеши ныне вечнорадостную песнь Богу: Аллилуиа.

Икос 11
Светоподательным светильником подобны честныя раки, содержащыя в себе святыя и цельбоносныя мощи ваша иерарси Христови Феодоре и Иоанне: ибо свет невечерний возсияваете от них чудесы вашими, имже душы наша просвещаются познанием силы Христовой, еюже ваша тлению не причастная телеса, дивная и преславная знамения содевают, и вся приглашают песнословити к вам сице:
Радуйтеся, смертию временною пришедшии к жизни вечней.
Радуйтеся, облеченнии в светлую одежду чудотворнаго нетления.
Радуйтеся, от гробов ваших исцеления неоскудно источающии.
Радуйтеся, и самим призыванием честных имен ваших недуги врачующии.
Радуйтеся, слепых просветители.
Радуйтеся, разслабленных укрепители.
Радуйтеся, хромым правохождение подающии.
Радуйтеся, немым дар слова низпосылающии.
Радуйтеся, глухим слух отверзающии.
Радуйтеся, бесноватых от насилия демонскаго освобождающии.
Радуйтеся, многообразных немощей исцелители.
Радуйтеся, всем нам в час смерти усерднии защитницы.
Радуйтеся, святителие Феодоре и Иоанне, предивнии чудотворцы.

Кондак 12
Благодатных даров щедрии податели и милостивии отцы наши Феодоре и Иоанне, святителие всеблаженнии, Богу угодившии, и мзду небесную от Него восприявшии, и до ныне паству вашу отечески молитвенно назирающии и хранящии, молим вас, соделайте ны грешныя и недостойныя чада ваша, достойны последователи святаго жития вашего, и научите нас творити волю Божию, да покаянием очищени пред Господем, сподобимся вкупе с вами воспевати Ему на земли живых: Аллилуиа.

Икос 12
Поюще многая и преславная чудотворения ваша, угодницы Божии, поминаем велию любовь вашу к пастве вашей земной, юже при жизни и по смерти показасте, и покланяемся с любовию нетленным и многоцелебным мощем вашым, пред ними же яко живым вам сущым с нами, от усердия к вам вопием:
Радуйтеся, благодетели наши, блага временная и вечная нам свыше подающии.
Радуйтеся, покровители наши, покровом молитв ваших, от всякаго зла нас соблюдающии.
Радуйтеся, руководители наши к горнему Иерусалиму нас путеводящии.
Радуйтеся, предстатели наши, от враг видимых и невидимых нас избавляющии.
Радуйтеся, сокровища нетленная, богатством милости вашея нас обогащающии.
Радуйтеся, одушевленнии храмы Святаго Духа, дарами Его светло блистающии.
Радуйтеся, Пресвятыя Троицы вернии служители и угодницы.
Радуйтеся, Пресвятыя Богородицы избраннии раби и угодницы.
Радуйтеся, архангелов и ангелов достойнии собеседницы.
Радуйтеся, пророков и апостолов истиннии подражатели.
Радуйтеся, великих учителей и святителей честнии последователи.
Радуйтеся, преподобных и праведных блаженнии сонаследницы.
Радуйтеся, святителие Феодоре и Иоанне, предивнии чудотворцы.

Кондак 13
О чудотворцы предивнии и врачеве благодатнии, святителие Христови Феодоре и Иоанне! Зрите наша скорби и беды, наша болезни и озлобления, и благоутробно вонмите малому сему молению нашему и песнословию смиренному, еже милостивно приемше умолите всех Творца и Господа, избавити нас скорбей и болезней временных и вечных, и сподобити нас недостойных со ангелы и всеми святыми во Царствии Небеснем, пети Богу: Аллилуиа.
Этот Кондак читается трижды, затем Икос 1-й и Кондак 1-й

Молитва святителем Феодору и Иоанну, епископом Суждальским, чудотворцем
О велицыи угодницы Христови и чудотворцы, святителие Феодоре и Иоанне! Се мы недостойнии и грешнии скорбьми многими угнетаемии, к вам усердно прибегаем, и с упованием крепким молимся: отцы богомилостивии и благопослушливии, милостивно услышите ныне глас наш молебный, и потщитеся на помощь нашу, и яко при жизни вашей всем скорбящым и озлобленным помощницы и утешителие бысте, тако и ныне любовь вашу к нам явите, благодатным действом благоприятных молитв ваших, претворяюще скорбь нашу в радость, печаль же на утешение: вся бо можете о укрепляющем вас Христе, Егоже вернии служители бысте; от Негоже приявше вся обетования благая, низпошлите и нам великую и богатую милость Господню, да воспоем и прославим дивнаго во святых Своих Бога, Отца и Сына и Святаго Духа, ныне и присно и во веки веков. Аминь.[/spoiler]

Раб божий Константин

АКАФИСТ ИЖЕ ВО СВЯТЫХ ОТЦУ НАШЕМУ ИОАННУ МИТРОПОЛИТУ ТОБОЛЬСКОМУ И ВСЕЯ СИБИРИ ЧУДОТВОРЦУ.
[spoiler]Кондак 1
Избранный святителю Христов Иоанне, богопроповедниче преславный, доброгласный органе Духа Святаго, звездо, пресветлая, от Киевския Лавры возсиявшая, и страну Сибирскую осветившая, похвальными пении величаем тя, ходатая за нас пред Господем усердна. Ты же угодниче Божий, услыши моление всех нас вопиющих ти: Радуйся, святителю Иоанне, Тобольский и Всея Сибири чудотворче.

Икос 1
Ангелов Творец, и всея твари Создатель, избра тя от юности твоея на служение Церкви Своей Святей. Ты же блаженне, в малых летех сый, восприял ангельский образ, и добре подвизался еси в обителех иноческих, был, еси святитель Христов преславен, и данный ти от Бога талант, множицею уплодоносил еси, темже мы зряще, похвальныя труды твоя, воспеваем сице:
Радуйся, честная отрасле родителей благоверных.
Радуйся, Церкве православныя чадо пречестное.
Радуйся, яко прилагал еси сердце твое к познанию закона Божия.
Радуйся, приобщивыйся равноангельскому житию.
Радуйся, вместилище дарований Божиих.
Радуйся, отечества твоего Божественное украшение.
Радуйся, архиерею Божий и учителю премудрый.
Радуйся, светлыми подвиги твоими к Свету невечернему вшедший;
Радуйся, святителю Иоанне, Тобольский и всея Сибири чудотворче.

Кондак 2
Видяще тя отрока благонравна и ко благому учению усердна, родители, твои вдаша тя, книжнаго ради научения, во святую обитель Киевопечерскую, идеже ты, прилежно учився, воспевал еси Богу: Аллилуиа !

Икос 2
Разум твой в послушание веры пленив, ум к Богу вперил еси, сего ради, Бог дарова ти обильно благодать разумети писания духовныя, да будеши во время потребно наставник добр и руководитель на пути спасения. Мы же, великому в юном возрасте разуму твоему дивящеся, взываем:
Радуйся, благому учению прилежавый;
Радуйся, разум Богопросвещенный стяжавый;
Радуйся, в духовном риторстве преуспевый;
Радуйся, земле благая семя Слова Божия восприявшая;
Радуйся, алкавый и жаждавый единыя, точию Божия правды;
Радуйся, яко писания святых отец познати тщался еси;
Радуйся, яко уразумел еси глаголы жизни вечныя;
Радуйся, от млада возраста храм Божий возлюбивый;
Радуйся, святителю Иоанне, Тобольский и всея Сибири чудотворче.

Кондак 3
Силою Вышняго утверждаяся, святе, во благом желании твоем быти иноком обители Киевопечерския, поучался еси день и нощь в законе Господни, присно на молитве иноков пребывая и купно с ними поя в Троице славимому Богу: Аллилуиа !

Икос 3
Имея велию любовь к Богу, ты пламенне возжелел еси восприяти образ, его же и сподобился еси во обители Киевопечерстей, идеже, яко чадо послушания, пребывал еси. Мы же дерзаем ублажати тя за таковое произволение пении сими:
Радуйся, яко ярем Христов на рамо вземший;
Радуйся, возревновавый житию преподобных отец;
Радуйся, благоуханный крине девства;
Радуйся, яко мирскою лепотою не уязвился еси;
Радуйся, ни во что же вменивый суетная удовольствия мира сего;
Радуйся, благимы делы, яко бисером драгоценным, Себе украсивый;
Радуйся, яко тленная мира презрел еси, Богу же Единородному работати возжелел еси;
Радуйся, тщету мирских попечений отринувый, иго же Христово паче всего возлюбивый;
Радуйся, святителю Иоанне, Тобольский и всея Сибири чудотворче.

КОНДАК 4
Бури, яже в мире, бегая во обитель Киевопечерскую вселился, еси отче Иоанне, идеже за многия подвиги в степень пресвитера возведен, неустанно по вся дни проповедуя Слово Божие, поучал еси люди закону Христову, призывая вся благоугождати Богу, взывая Ему: Аллилуиа !

ИКОС 4
Слышаша людие многое вещание Богоглаголивых уст твоих, святче Божий, и видяще иноческое житие и многотрудныя подвиги твоя умиляхуся сердцем. Мы же дивяся таковому дарованию и восхваляя святое житие твое, вопием:
Радуйся, вместилище Божия премудрости;
Радуйся, провозвестниче православия во обители Печернестей;
Радуйся, благодатными вещании сердца верных услаждавый;
Радуйся, мудрый вразумителю неправомыслящих;
Радуйся, взыскателю и верный указателю к небеси пути теснаго;
Радуйся, всех неослабно благочестию поучавый;
Радуйся, славу Божию житием и словом твоим проповедавый;
Радуйся, святителю Иоанне, Тобольский и всея Сибири чудотворче.

КОНДАК 5
Боготечная звезда явился еси ты, отче Иоанне, в делании духовнем преуспевая, в назидание же и утешение верным, к писанию душеполезных книг зело прилежа. Сего ради поставлен бысть во архимандрита Свенския обители, в пределах Брянских сущей, и тамо воспе Богу: Аллилуиа !

ИКОС 5
Видяще ревностное служение и святое житие твое, архиепископ черниговския церкви святый Феодосий, восхотев имети тя в помощника себе, воззва тя в настоятеля Елецкия обители, идеже ты добре наказуя и поучая братию, всем вся был еси. Сего ради мы тебе, яко делателю верну в вертограде Господни, приносим хваления сия:
Радуйся, мудрый учителю благочестия;
Радуйся, монастырских уставов ревностный блюстителю;
Радуйся, добре подвизающихся сорадователю;
Радуйся, благий подкрепителю слабых;
Радуйся, присный вразумителю нерадивых;
Радуйся, иноческаго жития образ показавый;
Радуйся, в постничестве, преподобии и правде Богу послуживый;
Радуйся, Божественныя законы соблюдый, яко добрый кормчий;
Радуйся, святителю Иоанне, Тобольский и всея Сибири чудотворче.

КОНДАК 6
Проповедник и наставник преславен, архимандрит предивен был еси, яко светильник на свещнице горяй и светяй, вернии же людие, наученнии тобою истинам веры христианския, согласно пояху песнь хвалебную Христу Богу: Аллилуиа !

ИКОС 6
Возсиял еси, яко звезда на тверди Церковней направляя всех к высоте благочестия, темже, по преставлении святителя Феодосия, избран был еси во архиерея церкви черниговския. Мы же, радуяся такому изволению Божию и тебе, восклицаем сице:
Радуйся, чистый сосуде, в оньже излияся архиерейства благодать;
Радуйся, словом, житием и писании Своими ко Христу приводяй;
Радуйся, яко тщался еси на всякий день в храме Божием службу совершати;
Радуйся, яко в уединении келейном всенощныя молитвы творил еси;
Радуйся, милостивый питателю сирых и безпомощных;
Радуйся, людям русским победу над свеи предрекий;
Радуйся, архиерею святый, дара прозрения от Бога сподобивывайся;
Радуйся, благий делателю винограда Христова;
Радуйся, святителю Иоанне, Тобольский и всея Сибири чудотворче.

КОНДАК 7
Хотя явити тя служителя Божия веры и Богу угодна святый святитель Феодосий Углицкий в видении чудном явился ти болящу, рекий: «"Не скорби, брате: Господь услыша молитвы твоя, да будеши здрав, возстани с одра болезни, приуготови себе литургию Богу совершити"», и исцели тя, вопиюща Создателю всех: Аллилуиа!

ИКОС 7
Дивное показа знамение Господь, егда лежащу ти на одре болезни, явися тебе, по Божию изволению, святитель Феодосий, проразумев в сем явлении милость Господню к тебе и скорое исцеление от недуга, ты повелел еси вся потребная к служению твоему в храме уготовати. Зело изумевашеся и дивляшеся пресвитер храма того рек: «Како приидет, не могий ходити?"» Но ты, святителю Божий, от одра своего абие воспрянув, в храм Божий пришел и реченное служение совершил еси. Мы же таковому явлению Божией милости к тебе дивящеся, во умилении зовем ти:
Радуйся, в тяжцей болезни николиже возроптавый
Радуйся, непостыдну надежду на Бога имевый
Радуйся, яко на одре болезни Богу пламенне молился еси;
Радуйся, от болезни чудесне исцеленный;
Радуйся, святителем Феодосием, по Божию изволению, дивно посещенный;
Радуйся, образ честен святителя Феодосия с благодарными письмены устроивый;
Радуйся, о Святости святителя Феодосия прорекий и над гробием его почтый;
Радуйся, Святостию жития твоего просиявый;
Радуйся, святителю Иоанне, Тобольский и всея Сибири чудотворче.

КОНДАК 8
Странно бо зрети, егда ты, святителю Иоанне, ярем служения апостольскаго несый подъял еси труд дальняго пути во страну Сибирскую, да научиши и тамо люди воспевати Триединому Богу: Аллилуиа !

ИКОС 8
Весь был еси, святителю, преполнен любве к Богу и послушания, неисповедимой воле Его. Сего ради егда поставлен был еси в митрополита хладныя Сибири, шестидесяти лет сый, бодренне последовал еси в кафедральный град твой Тобольск, вернии же людие Сибирстии с радостию сретаху тя приветствии сими:
Радуйся, смренномудрый исполнителю неисповедимых Божиих судеб;
Радуйся Аврааму патриарху подобне, во страну безвестную и дальную, послушания ради, пришедый;
Радуйся, крест свой на рамо подъявый и тем амалика мысленнаго силу низложивый;
Радуйся, неустанный проповедниче православия;
Радуйся, пресветлая звездо ко Христу приводящая;
Радуйся, святую икону Пречистыя Богородицы путеводительницею себе имевый;
Радуйся, во град Тобольск на праздник Успения Божия Матери прибывый и, лета некая пожив, в граде сем блаженно почивый;
Радуйся, за труды и подвиги твоя от Бога зде прославленный;
Радуйся, святителю Иоанне, Тобольский и всея Сибири чудотворче.

КОНДАК 9
Всякия труды подъял еси яко архипастырь добр Сибирския митрополии и отец любвеобилен, вверенныя ти люди мудре упасл еси, сам непрестанно поучая, побуждаша же иереев Слово Божие проповедати, да научат и неведущих пети Богу: Аллилуиа !

ИКОС 9
Витийство человеческое не довлеет по достоянию, восхвалити подвиги твоя, труды и многия благодеяния, яве и тайне. Мы же, воспоминая святое житие твое и велие милосердие, величаем тя глаголюще:
Радуйся, молитвинниче и постниче, всего Себе Богу просвятивый;
Радуйся, струя Божией премудрости приснотекущая напаяющая верных;
Радуйся, яко пресветлый лик твой озаряеши радость духовная, яже сообщашеся серцам людей благочестивых;
Радуйся, помощниче бедне живущих и в скорбех сущих;
Радуйся, зело потрудивыйся на ниве Христовой;
Радуйся, Пречистыя Богородицы икону, юже в пути имел еси, в келлии своей честне поставивый;
Радуйся, пред сею иконою за паству свою и весь мир православный неустанно моливыйся;
Радуйся, предстателю о нас пред Господем непостыдный;
Радуйся, святителю Иоанне, Тобольский и всея Сибири чудотворче.

КОНДАК 10
Спасение роду человеческому устрояяй, Господь яви тя, угодниче Христов, просветителя Сибирския страны, многое бо множество людей от языка остятскаго, самоедскаго и вогульскаго потщался еси привести в познание истины, да уразумевше Евангелие правды и соединившеся Святей Православней Церкви, купно с нами вопиют Христу Спасителю: Аллилуиа!

ИКОС 10
Стена тверда был еси, святителю пастве твоей , охраняя ю от ересей и раскола, поставляя для сего от гор Уральских, даже до вод Великаго океана, по градом избранныя священноиноки, да наблюдают повсюду чин церковный. Таковая Твоя деяния и неустанныя труды воспоминающе, зовем ти:
Радуйся, града Тобольска и всея Сибири похвало;
Радуйся, ко спасению добрый путеводителю;
Радуйся, велие светило церковное, яко светлая луна в нощи, мрак раскола и идолослужения разгоняющее;
Радуйся, ревнителю подвигов апостольских;
Радуйся, в сих подвизех друга себе схимитрополита Феодора имевый;
Радуйся, ревностный рачителю благовестия Евангельскаго разноплеменным языкам Сибири;
Радуйся, столпе непоколебимый православныя веры;
Радуйся, яко святая душа твоя обитель бысть Богу;
Радуйся, святителю Иоанне, Тобольский и всея Сибири чудотворче.

КОНДАК 11
Пение всеумиленное Богу приносим егда помянем блаженную кончину твою, пред образом бо Пречистая Богородицы с Предвечным Младенцем в келлии своей. Колена преклонив, ты, святителю, на молитве Богу душу предал еси, мощи, же твоя, якоже ты заповедал еси, в соборнем храме во алтаре преподобных Антония и Феодосия Печерских погребоша, воспевая Богу: Аллилуиа!

ИКОС 11
Света невечерняго зрителю, ты от Господа сугубо прославлен еси, иже и святым мощем твоим неоскудно благодать исцелений дарова, еже по всей стране Российстей известися, и бысть торжество дивно во граде Тобольстем, егда из недр земных святыя мощи твоя, святителю Иоанне явлены быша людем православным. Собрашася тогда вкупе архиереи мнози, клир церковный и велие множество людей боголюбивых окрест храма и на стогнах града, вси ликоваху и умильно славословяху тя; приими и от нас пение сие:
Радуйся, исшествие твое от земнаго жития предведевый;
Радуйся, в день преставления своего, литургию Божественную велелепно совершивый;
Радуйся, в день он, по литургии трапезу у себе людем духовным и нищим уготовавый и им при трапезе сам послуживый;
Радуйся, многотрудныя подвиги твоя святолепно в теплей к Богу молитве скончавый;
Радуйся, святую икону Пречистыя Богородицы в благословение людем православным во граде Тобольстем оставивый;
Радуйся, яко безплотными трисвятую песнь Богу немолчно воспеваеши;
Радуйся, наследовавый селения небесная, идеже вечнаго веселия наслаждаешися;
Радуйся, из мира Горняго многажды явлением своим людем страждущим чудесне помощь явивый;
Радуйся, святителю Иоаннее, Тобольский и всея Сибири чудотворче.

КОНДАК 12
Благодати Божией тезоименит сый и оноя преисполненный, огнезрачному Божества престолу ныне предстоя святитею Иоанне, с Пречистою Богородицею Христу о нас молишися, со святыми Тому поклоняешися, с преподобными ликуеши и со ангельскими чинми радостно поеши: Аллилуиа !
ИКОС 12
Поюще дивная и преславная жития твоего труды, подвиги, блаженную кончину и чудеса, светло празднуем святую память и прославление мощей твоих, святителю Христов Иоанне, умильно просим тя, не забуди нас сице величающих тя:
Радуйся, Сибирския митрополии велия звездо;
Радуйся, от Господа по достоянию, прославленный на небесех и на земли;
Радуйся, молитвенниче к Богу непостыдный;
Радуйся, преславный угодниче Христов;
Радуйся, яко от святых мощей твоих людем верующим дарова Господь исцеления многая;
Радуйся, врачу предобрый недугов душевных и телесных;
Радуйся, града Тобольска и всея Сибири небесный покровителю;
Радуйся, присный наш наставниче, славою небесною украшенный;
Радуйся, святителю Иоанне, Тобольский и всея Сибири чудотворче.

КОНДАК 13
О, предивный святителю Христов Иоанне, в вышних селениях со святыми пребываеши, не остави нас, в мире сем сущих, буди присный наш заступник пред престолом Господа Вседержителя. Молися выну о всех нас, да сохранит нас от всяких бед и напастей, наипаче же от искушений, на ны находящих, и от напрасныя смерти. Да поможет нам Господь на пути странствия земнаго, веру свою православную невредиму соблюсти, тихо и безмятежно в благочестии пожити, и тако , в жизни христианстей преспевающе, мирныя кончины зде и жизни райстия на небеси сподобитися и воспевати благодарственно песнь всех Создателю Богу: Аллилуиа!
Трижды.

ИКОС 1
Ангелов Творец, и всея твари Создатель, избра тя от юности твоея на служение Церкви Своей Святей. Ты же блаженне, в малых летех сый, восприял ангельский образ, и добре подвизался еси в обителех иноческих, был, еси святитель Христов преславен, и данный ти от Бога талант, множицею уплодоносил еси, темже мы зряще, похвальныя труды твоя, воспеваем сице:
Радуйся, честная отрасле родителей благоверных.
Радуйся, церкве православныя чадо пречестное.
Радуйся, яко прилагал еси сердце твое к познанию закона Божия.
Радуйся, приобщивыйся равноангельскому житию.
Радуйся, вместилище дарований Божиих.
Радуйся, отечества твоего Божественное украшение.
Радуйся, архиерею Божий и учителю премудрый.
Радуйся, светлыми подвиги твоими к Свету невечернему вшедший;
Радуйся, святителю Иоанне, Тобольский и всея Сибири чудотворче.

Кондак 1
Избранный святителю Христов Иоанне, Богопроповедниче преславный, доброгласный органе Духа Святаго, звеждо, пресветлая, от Киевския Лавры возсиявшая, и страну Сибирскую осветившая, Похвальными пении величаем тя, ходатая за нас пред Господем усердна. Ты же угодниче Божий, услыши моление всех нас вопиющих ти: Радуйся, святителю Иоаннее, Тобольский и Всея Сибири чудотворче.

Молитва.
О, святителю Христов Иоанне, Божию престолу со Святыми предстояй. Ты еси отец наш любвеобильный, и молитвенник наш теплый.
Умоли Господа Бога, да подаст нам коегождо потребе полезная: скорбящим утешение, немощным здравие, заблуждшия да наставит и обратит на путь покаяния, распри и раздоры умирит, неведующие Христа люди на путь спасения да обратит, и всех нас единением духа и любви в единей Святей Своей Церкви соединит. Да сохранит нас от глада, града, труса, потопа, огня, меча, междоусобныя брани и напрасныя смерти, наипаче же от искушений, облежащих нас в жизни сей, да дарует нам мирное пожити зде житие и веру Свою православную невредиму соблюсти.
О святый угодниче Христов, архипастырю предобрый, молитвенниче наш неусыпный!
От юности всего себе Богу посвятив, равноангельное житие стяжал еси, исполнен бе радости духовныя, яже озаряше светлость лика твоего и сердца верных утешаше: по истине бе светильник горяй и светяй, святолепно пожив, от Господа сподоблен бе дара прозрения, время кончины своея предуведа. Моляся пред образом Пречистыя Богородицы, коленопреклоненне преставися. Ныне проси Ю о нас, да будет нам покровительница в сей многотрудней жизни и в час кончины нашея да умолит Всеблагаго Господа сподобитися нам в лике благоугодивших предстати Престолу Его и восхвалити в Троице славимаго Бога, Отца и Сына, и Святаго Духа во веки веков. Аминь.[/spoiler]

Раб божий Константин

Акафист блаженному Иоанну, Устюжскому чудотворцу.
[spoiler]Память 29 мая/11 июня

Кондак 1
Избранный угодниче Христов и предстателю наш у Святыя Троицы, Иоанне всеблаженне, похвальными песньми от любве душевныя ублажаем тя заступника и покровителя нашего. Ты же, яко имеяй дерзновение ко Господу, от всяких бед и напастей свободи нас, да зовем ти:
Радуйся, Иоанне, преславный чудотворче.

Икос 1
Ангели радовахуся житию твоему, святче Божий Иоанне: вся бо земная во уметы вменил еси, нищету же вольную от юности до гроба претерпевая, Христа ради юрод был еси. Темже ублажаем тя:
Радуйся, совершенный нестяжателю, едино точию рубище раздранное имевый о чреслех твоих.
Радуйся, постниче, во дни среды и пятка ничтоже вкушавый.
Радуйся, воине Христов, благодатию Его мир, плоть и диавола победивый.
Радуйся, молитвенниче, руце ко Господу о творящих неправду воздевавый.
Радуйся, святаго Прокопиа, Христа ради юродиваго, истинный подражателю.
Радуйся, святость жития твоего буйством юрода мудре сокрывавый.
Радуйся, Иоанне, преславный чудотворче.

Кондак 2
Видя суетою мира сего ослепленных, досаждающих и оскорбляющих тя неповинно, не гневался еси на гонителей и обидящих тя, блаженне Иоанне, но молился еси о таковых в сокрушении духа глаголя Богу: Аллилуиа.

Икос 2
Разум богопросвещен имея, преблаженне Иоанне, бегал еси славы человеческия: юродствуя же присно по стогнам града Устюга, многа досаждения и скорби претерпел еси Христа ради. Темже достоит ти звати:
Радуйся, самопроизвольный мучениче, биения, оплевания и поношения от неразумных человек претерпевый.
Радуйся, за оскорбителей и гонителей твоих непамятозлобивый милоственниче.
Радуйся, страсти плоти твоея гладом и жаждею умертвивый.
Радуйся, чистотою душевною и телесною благолепно преукрашенный.
Радуйся, нищетою обогативыйся.
Радуйся, нищету сию паче сокровищ всего мира возлюбивый.
Радуйся, Иоанне, преславный чудотворче.

Кондак 3
Сила Честнаго и Животворящаго Креста Господня росодательну пещь содела ти, якоже иногда ангел преподобным отроком, о Иоанне блаженне: оградився бо крестным знамением, возлегл еси на горящем углии в пещи соборныя Успенския церкве, всех подвизая вопити о сем Творцу чудес Богу: Аллилуиа.

Икос 3
Имый благое помышление о богоугодном житии твоем, Успенскаго собора иерей Григорий по вечернем богослужении утаися за дверию храма, да увесть, что твориши, един пребывая. Ты же, о Иоанне богоблаженне, сотворив молитву за глаголющих лесть и творящих неправду, оградився крестным знамением, возлегл еси в пещь на горящее углие. Егда же иерей, ужасом объят быв сицеваго ради видения, вниде, ты убо, абие исторгся из пещи, рекл еси: «Еже сам узрел еси, да никомуже поведаеши до кончины моея». Сего ради рцем вси:
Радуйся, силою Честнаго и Животворящаго Креста Господня на горящем углии без вреда сохраненный.
Радуйся, росою Духа Пресвятаго орошенный.
Радуйся, пламенем любве яже к Богу и ближнему пламень пещный устудивый.
Радуйся, теплый молитвенниче, при храме Богоматере по вся нощи приметатися изволивый.
Радуйся, христианских добродетелей под личиною безумия подвижниче.
Радуйся, буйством твоим премудрыя посрамивый.
Радуйся, Иоанне, преславный чудотворче.

Кондак 4
Бурею напастей присно волнуемое житейское море благодатию Божиею немокренно прошед, Блаженне Иоанне, достигл еси вечноблаженнаго пристанища, идеже несть болезнь, ни печаль, ни воздыхание. Тамо убо почивая со ангелы и всеми святыми, поеши Богу: Аллилуиа.

Икос 4
Слышащи болящая Мария, Устюжскаго наместника Феодора жена, яко имаши обилие благодати Божия, посла слугу своего, да просить молитв твоих о исцелении ея. Ты же, угодниче Божий Иоанне, аки в безумии возопил еси слузе: Здравствуй, добрый княже со княгинею. Обаче егда слуга возвратися в дом госпожи своея, узре ю исцелевшу от жестокаго недуга. Сего ради глаголем ти:
Радуйся, единем словом тяжкия недуги исцеливый.
Радуйся, болящую Марию и разслабленную Аполлинарию молитвою уврачевавый.
Радуйся, бесноватую Евфросинию от мучительства диавола избавивый.
Радуйся, яко и ныне молитв твоих беси зело трепещут.
Радуйся, града Устюга радосте неотъемлемая.
Радуйся, всех притекающих к тебе утешение пресладкое.
Радуйся, Иоанне, преславный чудотворче.

Кондак 5
Боготечней звезде подобен был еси, блаженне Иоанне: шествуя бо по стогнам града Устюга, восходил еси благодатию Божиею от силы в силу, и безумствуя пред человеки, божественныя премудрости исполнен был еси от Бога, непрестанно воспевая Тому единому: Аллилуиа.

Икос 5
Видя, яко в мире сем, во зле лежащем, несть житейския сладости печали непричастны, многоскорбное житие от юности восприял еси, блаженне Иоанне. Мы же грешнии, ублажающе терпение твое, зовем ти таковая:
Радуйся, ныне на небеси, занеже преплавая пучину житейскаго моря на земли плакал еси.
Радуйся, блаженне, многа бо мзда твоя на небеси.
Радуйся, сопричастниче небесных благ, ихже око не виде, и ухо не слыша, и на сердце человеку не взыдоша.
Радуйся, сонаследниче достояния, еже уготова Бог любящым Его.
Радуйся, града Устюга заступниче.
Радуйся, верою к тебе притекающих покровителю.
Радуйся, Иоанне, преславный чудотворче.

Кондак 6
Проповедание евангельское, еже не скрывати себе сокровища на земли, совершенно соблюдая, не стяжал еси ни злата, ни сребра, но точию едино рубище раздранное, в немже зиму и лето необувен пребывая воспевал еси Христу Богу: Аллилуиа.

Икос 6
Возсияй нам светом твоего благорозумия, блаженне Иоанне: безумствуя бо присно пред человеки, ты уразумел еси глубину божественныя премудрости, яко не мудрых мира сего, но буих о Христе избра Бог в жилище благодати Своея. Еяже обильно преисполнен сый, приими от нас сицевая:
Радуйся, от утешителя Духа Истины обрадованный.
Радуйся, на земли и на небеси прославленный.
Радуйся, узкими враты и тесным путем все житие шествовавый.
Радуйся, Царствия Божия усердный взыскателю.
Радуйся, нищеты самопроизвольныя образе.
Радуйся, смирения Христова подражателю.
Радуйся, Иоанне, преславный чудотворче.

Кондак 7
Хотя от взора человеча святое житие и дивныя подвиги твоя сокрыти, блаженне Иоанне, юродствовал еси пред человеки по вся дни, в нощи же пребывая в непрестанной молитве, из глубины души взывал еси о всем Богу: Аллилуиа.

Икос 7
Новаго и дивнаго жития явися первоначальник в земли Российстей блаженный Прокопий Христа ради юродивый, егоже истинный подражатель показался еси, блаженне Иоанне. Темже величаем тя:
Радуйся, добре уразумевый глагол Божий: кая польза человеку, аще мир весь приобрящет и отщетит душу свою.
Радуйся, сих ради словес Господних многоскорбное и многоплачевное житие восприемый.
Радуйся, радостию неотъемлемою во веки.
Радуйся, прославленный Богом и человеки.
Радуйся, духовными подвиги в тайне подвизавыйся.
Радуйся, Царствие Небесное сими стяжавый.
Радуйся, Иоанне, преславный чудотворче.

Кондак 8
Странно и чудно житие твое, Иоанне всехвальне: бегая бо по стогнам града Устюга, алчбу и жажду претерпевал еси, ничтоже от кого взимая, и тако юную плоть твою духу покоряя, всегда воспевал еси Триединому Богу: Аллилуиа.

Икос 8
Весь мир православный молитвенно призывает тя яко великаго угодника Христова, достоблаженне Иоанне, и сия зовет ти в похвалу:
Радуйся, обетований Христовых наследниче.
Радуйся, временною скорбию вечнаго утешения сподобивыйся.
Радуйся, алчбою и жаждою плоть твою духу покоривый.
Радуйся, ангелов и всех святых собеседниче.
Радуйся, о всем мире православном молитвенниче.
Радуйся, земли Российския теплый пред Богом заступниче.
Радуйся, Иоанне, преславный чудотворче.

Кондак 9
Всякаго греха бегал еси аки яда смертоносна, угодниче Христов Иоанне, и сего ради сподобился еси Царствия Христова. Темже молимтися, помяни и нас многогрешных, ко Святей Троице во умилении зовущих: Аллилуиа.

Икос 9
Витийство наше скудное не довлеет к похвале имене твоего, угодниче Христов Иоанне. Обаче молимтися, не отрини от любве душевныя зовущих ти таковая:
Радуйся, божественных даров носителю.
Радуйся, молящымся тебе скорый помощниче.
Радуйся, почитающым священную память твою вечных благ ходатаю.
Радуйся, скорбящих скорый утешителю.
Радуйся, добрый сеятелю благочестия.
Радуйся, обличителю всякаго нечестия.
Радуйся, Иоанне, преславный чудотворче.

Кондак 10
Спасая душу твою, блаженне Иоанне, не восхотел еси работати Богу и мамоне, но Единому Богу точию. Темже ныне яко верный раб Владыце своему предстоиши на Небесех, поя Ему хвалебную песнь: Аллилуиа.

Икос 10
Стена еси непоколебима, блаженне Иоанне, всем с верою прибегающым к молитвенному предстательству твоему. Темже припадающе молимтися яко имущему велие дерзновение у Христа Бога, молися о нас грешных, почитающих тя звании сими:
Радуйся, православных христиан твердое ограждение.
Радуйся, Святыя Церкве благолепное украшение.
Радуйся, многоскорбное твое течение благочестно скончавый.
Радуйся, по скончании онаго в пресветлых райских обителех вселивыйся.
Радуйся, все житие твое во угождение Богу посвятивый.
Радуйся, во плоти яко ангел безплотен поживый.
Радуйся, Иоанне, преславный чудотворче.

Кондак 11
Пение благодарственное Единосущней Троице от всея души возсылал еси, преподобне Иоанне, ведая кончину земнаго подвига твоего, еяже с радостию чая, благодарил еси Бога, зовый: Аллилуиа.

Икос 11
Светло сияющее лице твое, аки ангела Божия, и тело твое аки снег бело обретеся, егда преставился еси ко Господу, блаженне Иоанне: многоскорбнаго бо ради претруднаго подвига твоего, дарова ти Господь кончину христианскую. Еяже молитвами твоими сподоби и нас грешных, да зовем ти таковая:
Радуйся, в горний Сион Царя Небеснаго душею востекий.
Радуйся, яко тамо, предстоя Ему, о всех нас тепле ходатайствуеши.
Радуйся, во время нощнаго подвига течение твое скончавый.
Радуйся, христианскую кончину безболезненну, непостыдну и мирну от Господа восприемый.
Радуйся, глубокаго смирения стяжателю.
Радуйся, кротости и терпения Христова предивный подражателю.
Радуйся, Иоанне, преславный чудотворче.

Кондак 12
Благодать данную ти от Бога ведяще, благоговейно покланяемся святым мощем твоим, лобызаем святолепное изображение лика твоего, угодниче Божий Иоанне, и молимтися, не остави нас твоим молитвенным предстательством ко Христу Богу, Емуже благодарне поем: Аллилуиа.

Икос 12
Поюще твое житие, восхваляем мирную кончину твою, блаженне Иоанне, и молимтися, буди нам во всем ко благу скорый помощниче, зовущым ти таковая:
Радуйся, яко одежды греховныя совлеклся еси.
Радуйся, яко в ризу чистоты и непорочности облеклся еси.
Радуйся, града Устюга добрый и неусыпный блюстителю.
Радуйся, яко о всех с верою молящихся тебе присно ко Господу ходатайствуеши.
Радуйся, терпения и злострадания дивный образе.
Радуйся, всех добродетелей зерцало пресветлое.
Радуйся, Иоанне, преславный чудотворче.

Кондак 13
О всеблаженный святый праведный Иоанне! Приими сие малое хвалебное пение наше, и избави нас от всякаго злаго обстояния, от напрасныя смерти и вечныя муки, и сподоби нас твоим предстательством к Богу, да с тобою и всеми святыми поем Ему во веки: Аллилуиа. Этот Кондак читается трижды, затем Икос 1-й и Кондак 1-й

Молитва блаженному Иоанну, Христа ради юродивому, Устюжскому
О святый блаженный Иоанне! Припадающе смиренно молимтися, приими наше малое моление, и умоли Всемилостиваго Господа Бога нашего, да пробавит милость Свою нам грешным и да дарует нам вся яже к животу и ко спасению благопотребная.
О угодниче Христов! Аще и зело недостойни есмы, обаче духом сокрушенным и сердцем смиренным паки припадающе молимтися: предстательством твоим ко Господу, благопоспеши; страждущую страну Российскую, Господь от лютых безбожник и власти их да свободит, и да возставит престол православных правителей; верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш. Град твой Устюг и вся грады и веси Российския соблюди от всякаго зла и всякия напасти, губительства, глада, труса, потопа, огня, меча, нашествия иноплеменников и междоусобныя брани, от всякия болезни и от всякаго обстояния, да всегда поем и величаем Всесвятое и Великолепое имя Божие, и твое милостивое о нас предстательство во веки веков. Аминь.

Тропарь блаженному Иоанну, Христа ради юродивому, Устюжскому
Тропарь, глас 5:
Наготою телесною и терпением обнажил еси вражия коварствия, обличая неподобное его деяние, зельне стражда солнечный вар и нуждныя великия студени мраза, и огня не чул еси, Божиею помощию покрываемь, Иоанне премудре, моли Бога о верою творящих память твою, честно и усердно притекающых к раце мощей твоих, избавитися от бед и падения избежати.

Кондак, глас 8:
Вышния красоты желая, нижния сладости, телесное ядение тщательно оставил еси, нестяжанием суетнаго мира, возлюбил еси ангельское житие, преходя скончався, Иоанне блаженне; с нимиже моли Христа Бога непрестанно о всех нас.

Ин Кондак, глас 1:
Иоанне премудре, земныя славы не возлюбив, того ради яко неистовся творя, желая Царство Небесное наследовати, ударения и укорения приемля, наготу и зной терпя, тем ныне со ангелы ликуеши, моли Христа Бога о душах наших.

Величание
Ублажаем тя, святый праведный Иоанне, и чтим святую память твою, ты бо молиши за нас Христа Бога нашего.[/spoiler]

Раб божий Константин

Акафист святому новомученику и Страстотерпцу Иоанну Харитонову, верному служителю Царственных мучеников.
[spoiler]Кондак 1
Избранный воине Христов, достоблаженный новомучениче Иоанне, венцем славы небесныя украшенный, похвальное пение тебе приносим, ты же яко дерзновение имея ко Господу, моли Всеблагаго и Всемилосерднаго Творца Нашего даровати милость почитающим святую память твою и теплым сердцем поющим:
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Икос 1
Ангелов Творец, создавый небо и землю, светлейшими звездами новомучеников российское церковное небо украсил есть. К сонму всепобедному сопричти и тя, достославне Иоанне, верность и веру Христу, Царю Предвечному, свято соблюдшего, заповеди о любви к Богу и ближним исполнившего в служении твоем монарху земному. Ты бо славу Владычню миру безбожному терпением мук явил еси и воссел купно с мученики царственными одесную Бога Отца Всемогущего. Днесь прославляем тя, воспевая ти сице:
Радуйся, отцу верных праведному Аврааму подражавый;
Радуйся, Иову многострадальному в слезах и терпении уподобивыйся;
Радуйся, елеем благочестия и благотворения душу твою помазавый.
Радуйся, веру истинную, надежду несумненную и любовь нелицемерную стяжавый;
Радуйся, любовь твою к Богу любовию к Государю показавый;
Радуйся, со святыми на небеси вечно царствуяй.
Радуйся, от горних высот райских к нам милостивно приникаяй;
Радуйся, благодеяния преславныя нам присно источаяй.
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 2
Видел еси, благий Иоанне, во царственнем граде Петрове храмов Божиих благолепие, обителей иноческих украшение, святых икон почитание, умилялся еси сердцем твоим, службы церковныя на преславнем подвории Леушинстем посещая, богослужение церковное возлюбил еси зело. И тако во благочестии возрастая, тщался еси Отечествия Небеснаго достигнути, идеже Господь во славе пребывает, идеже непрестанно ангельская песнь: Аллилуиа.

Икос 2
Разум твой в благочестии утвердил еси, святый Иоанне, от юности бо хранил еси в сердце твоем закон Божий, в вере Христовой пастырем Кронштадтским и иными благими учителями наставляемый юноша кроткий и благонравный был еси. Сего ради призва тя святый благоверный царь Николай, в послужение престолу своему и, яко вернаго служителя, а послеже саном гражданства почетнаго почте тя. Тем сицевыя похвалы приносим ти:
Радуйся, града Петрова доброплодное прозябение;
Радуйся, рода честнаго отрасле прекрасная;
Радуйся, цвете благоуханный добраго воспитания;
Радуйся, сосуде Божественнаго избрания.
Радуйся, в разуме Богом просвещенный;
Радуйся, сердцем во Христе утвержденный.
Радуйся, образе супружества непорочнаго и нелестнаго;
Радуйся, вседушевне взыскавый царствия небеснаго.
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 3
Силою благодати Божия укрепляеми, крестным путем евангельским в житии вашем шестовал еси, благий Иоанне. Темже и нас молитвами твоима от всех козней лукаваго диавола укрепи, да непреткновенно возможем проити путем заповедей Божиих и выну воспевати: Аллилуиа.

Икос 3
Имуще тя, новомучениче Христов, скораго в бедах помощника благовернии людие, в напастех и скорбех тя на помощь молитвенно призывают, и милость небесную молитвами твоими от щедродавца Бога обильно приемлюще, тебе от любве теплыя хвалебно вопиют:
Радуйся, адаманте, крепость в терпении нам показавый;
Радуйся, каменю, образ твердости в вере нам явивый;
Радуйся, служителю царев, облаченный в порфиру нетления.
Радуйся, угодниче Христов, багряницу страданием стяжавый.
Радуйся, страстотерпче Божий, со святыми почиваяй;
Радуйся, избранниче Господень, милосердие твое нам являяй.
Радуйся, радости нам вечныя известный ходатаю.
Радуйся, грешников кающихся с Богом примирителю.
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 4
Бури житейских бед и напастей не возмогоша поколебати крепости души твоея, всеблаженне Иоанне, яко основана бо бе на твердем веры Христовы камени, на немже всегда предстоя, искусно избегал еси многообразных козней лукаваго, поюще Спасителю своему: Аллилуиа.

Икос 4
Слышавше словеса апостольския «Бога боитесь, царя чтите» ( 1 Петра 2, 17), угодниче Христов, благочестно и ревностно послужил помазанику Божию, не корыстию и тщеславием влекомый, обаче любовию к Царю Небесному и благоверному государю Николаю. Мы же сие ныне поминающе, просим тя: утверди и нас в житии богоугоднем и прими милостиво величания сия:
Радуйся, трисвятую песнь херувимски со Ангелы и всеми святыми воспевающий;
Радуйся, зарями огненными благодати Божия сияющий;
Радуйся, яко светило светозарное в небеснем Царстве блистающий;
Радуйся, светом благодати твоея всех чтущих память твою просвещающий;
Радуйся, твердою верою и крепкою верностию нас обогащающий;
Радуйся, доверие к Богу Предвечному в сердцах пробуждающий;
Радуйся, от суетнаго славолюбия и суеты мирския отвращаюший;
Радуйся, к истинам вечным духовныя взоры наша обращающий;
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 5
Боготечную звезду зрим тя, угодниче Божий, тя бо, восприимшаго страдания истины Христовой, любви к ближним, верности Государю всероссийскому ради, прослави Господь. Ныне же подаеши всем обильные милости, святый новомучениче Иоанне. Мы же, взирающе с любовию на честный образ твой, приклоняем колена, со умилением поя о тебе Христу: Аллилуиа.

Икос 5
Видев тя, преславный Иоанне, благоверный царь – мученик Николай, честно служаща себе, почти благоволением своим, и в круг ближних своих прия тя, ты же трапезу августейшей семье ежедневно приготовлял еси и в страстствиях радостных и скорбных Государю сопутник верный был еси, с монархом же твоим за Христа Распятаго купно пострадавше, обрел еси у Вседержителя нетленный венец славы, и ныне просим тя: створи моливу вместе с Царственными мучениками и слуги верными Всемогущему Господу Нашему, да дарует нам вся, к животу временному и вечному полезная и потребная. Сего же ради вопием ти сице:
Радуйся, изгнанником венценосным паки всеусердно послуживый;
Радуйся, в трудех твоих при поварне дары благодатныя явивый;
Радуйся, житием твоим Солнце Правды, Христа проповедавый;
Радуйся, заповеди Господни творити научающий;
Радуйся, окамененная сердца во источницы милования обращающий;
Радуйся, милование Христово к немощным и грешным проповедавый;
Радуйся, алчущия и жаждущия души Хлебом Небесным питаяй;
Радуйся, скорбящия и обремененныя упованием на Матерь Божию укрепляяй.
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 6
Проповедует днесь Церковь Российская вашу славу твою, всехвальный Иоанне, яко веру несумненную, надежду крепкую в Иисуса Христа ты сподобился еси стяжати, жизнь свою положивше за слово Владыки Христа, страстотерпче преславне. Сице молим тя: помяни нас, недостойных у Престола Господня, тамо Ему вопиюще: Аллилуиа.

Икос 6
Возсиял еси светом истины в многострадальной стране Россиистей, святый новомучениче Иоанне, любовию твоею к благочестивому государю и ближним твоим образ Христа являеши, яко в годину буйных мрачных дней, егда многия люди страха и малодушия ради оставиша Божия помазанника, ты в изгание купно со иными други и слуги верными последовал еси, и тако долженствование твое благое исполнил еси. Сего ради воспеваем ти таковая:
Радуйся, прещений нечестивыя власти не убоявыйся;
Радуйся, в роде сем Господа исповедати не постыдивыйся.
Радуйся, иго Христово на рамена своя вземый
Радуйся, вслед Господа тесными враты ходивый.
Радуйся, вместо сладости земныя терния избравый;
Радуйся, ныне же нетленным венцем от Бога украсивыйся.
Радуйся, имя твое святое усердно призывающым помогаяй.
Радуйся, от всяких напастей и обстояний избавляяй.
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 7
Хотя верен быти подражатель Агнца Божия, кротость и смирение Его себе усвоив, от завистных человек всякия обиды и скорби безропотно претерпел еси, егда из града Петорва в Сибирь с государем последовал еси; но вeдый, яко скорбьми временными подается вечное спасение, взывал еси Спасу всех: Аллилуиа.

Икос 7
Новый и немеркнущий светильник явился еси, благий и верный угодниче Божий Иоанне, ты бо за правду Христову чести лишения, изгнания, заточения купно с Государем во граде Тобольске, а послеже и в Екатеринбурзе биение, осмеяние, заушения и иные злострадания кротце претерпел еси прежде кончины мученичестей. Мы же, сие ныне поминающе, величаем тя сице:
Радуйся, смиренномудрием всяку распрю погасивый.
Радуйся, кротостию злобу победивый.
Радуйся, любовию вражду отмстивый.
Радуйся, спутники твоя в терпении укрепивый.
Радуйся, в неправеднем изгнании, входы Царства Небеснаго обретый.
Радуйся, питателю наш, сладостьми небесными насыщаяйся.
Радуйся, покровителю наш, во кровех небесных водворивыйся.
Радуйся, предстателю наш пред Богом, ангельская зряй утешения.
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 8
Странно бысть злочестивым богоотступницем зрети житие твое, новомучениче Иоанне, яко не о о мимотекущих и преходящих благах земных помышлял еси; егда нечестивых советы, о еже оставити ти Царя Николая во граде Екатеринбурзе отвергл еси. Мы же, благочестие и мудрость воспевающее, Всеблагого Господа Нашего, умудрившего тако тя, славим вопиюще Ему о тебе: Аллилуйя.

Икос 8
Всего себе в руце Господни предал еси, страстотерпче святый, егда в доме Ипатиевском купно с августейшею семьею пребывал еси, труды твоими и любовию Государю, императрице и царевнам утешение являя и в несении креста тяжкаго мучеников царственных укрепляя. Мы же, воспоминающее сие, восписуем ти:
Радуйся, Царя Небеснаго добрый воителю;
Радуйся, царя земнаго верный служителю;
Радуйся, всех к тебе прибегающих скорый услышателю;
Радуйся, о всех тебе с верою молящихся прилежный попечителю;
Радуйся, обремененных и озлобленных скорый поборниче;
Радуйся, яко молитвою твоею от клеветы нас защищаеши;
Радуйся, яко попечением твоим от злых недругов нас охраняеши
Радуйся, о любви Христовой житием твоим вещающий.
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 9
Всякия скорби, болезни и труды в заточении от богоборцев непоколебимо претерпел еси, в сердце твоем Единаго Господа имеяй, всехвальный Иоанне, тем же мученически странствие земное совершил еси и в Горния обители вселился еси, вознося песнь Богу: Аллилуиа.

Икос 9
Витийство человеческое не довлеет во еже по достоянию тя, богоблаженный страстотерпче Христов Иоанне, прославити, обаче любовию к тебе, покровителю наш святый, движимы приносим ти хваления сицевая:
Радуйся, нищетою духовною блаженства Царства Небеснаго унаследовавый;
Радуйся, плачем о грехах утешение Христово приявый.
Радуйся, алчбою и жаждою правды Божия нетленныя пищи небесныя насытивыйся;
Радуйся, милостию сострадания к ближним милость Божию восприявый.
Радуйся, во умиротворении озлобленных, яко сын Божий нареченный.
Радуйся, во изгнании правды ради блаженства Царства Небеснаго приобщивыйся;
Радуйся, в ложном поношении и злословии от нечестивых во Христа облекийся.
Радуйся, Божественному Промышлению себе конечне вручивый;
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 10
Спасти хотя душу свою, вся земная и временная во уметы вменил еси, неуклонно стопам Спасителевым последствовав. И ныне с лики ангельскими веселяся, немолчно вопиеши Прославльшему тя Господеви: Аллилуиа.

Икос 10
Стеною терпения оградився, верный служителю царя земнаго и благий последователю Иисуса Христа, Царя Небеснаго, за нас Распятаго, воистину явился еси. Вражиих бо устрашений не убоявся, всего себе в руце Божии предал еси и кончину мученическую купно с Государем, августейшею семьею и слузи верными приял еси. Мы же, чтуще святую память твою, ублажаем тя, вопиюще:
Радуйся, от лет ранних Бога всем сердцем возлюбивый;
Радуйся, верен Тому до конца дний твоих пребывый;
Радуйся, жизнию твоею безраздельно Господеви послуживый;
Радуйся, темже Отчизну Нетленную себе унаследовавый;
Радуйся, в Небесный чертог Царский вошедший.
Радуйся, светлыми ризами украшенный;
Радуйся, славы присносущныя причастниче;
Радуйся, света неизреченнаго зрителю.
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 11
Пение тебе приносим, досточудне Иоанне, аще и не зрим многоценных мощей твоих, обаче вемы Тя, яко молитвенника преславнаго за ны у престола Божия, идеже со всеми святыми воспеваеши Ему: Аллилуия.

Икос 11
Светильника тя добрых дел, новомучениче Иоанне, исповедуем быти, теплыми бо молитвами ко Христу Богу и Пречистой Его Матери, укрепляеши и утверждаеши всех чтущих святую память твою в делании заповедей о любви к Богу и ближним нашим, яко и ныне пред Ними ходатайствуеши и светом Божественныя любве согреваеши души и сердца приходящим к тебе и поющим тебе сице:
Радуйся, немощныя и страждущия благостию твоею покрываяй;
Радуйся, всем требующим твоея помощи милостивно сию подаваяй.
Радуйся, за вся людие, добрыя и злыя, молитву проливаяй,
Радуйся, милости Божия к ним призываяй,
Радуйся, яко ослабевшия духом укрепляеши;
Радуйся, яко веру оскудевающую восполняеши.
Радуйся, в благоговении пред Богем жити научающий;
Радуйся, малодушныя и немощныя укрепляющий.
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 12
Благодать и дар братолюбия испроси у Всесвятаго Господа Иисуса, новомучениче Иоанне, да возлюбим друг друга истинною любовию евангельскою, иже заповеда Спаситель Наш хранити и преумножати, да тобою наставлемы научимся убо друг друга тяготы носити, избегая похоти себелюбия и неблагомыслия, да сподобимся с надеждою и верою в исцеляющую благодать Божию воспевати Триипостасному Творцу Нашему песнь: Аллилуиа.

Икос 12
Воспевая терпение и верность твою, яко подвиги за Христа, преславне тобою подъятыя, добропобедный страстотерпче Иоанне, хвалим веру и надежду твою, яже к Богу, величаем любовь твою к ближним твоим и ублажаем мученическую кончину, почитаем и священную память твою, покровителю наш и заступниче, и в похвалу тебе поем сицевая:
Радуйся, в невечернем дни Царствия Божия почивающий;
Радуйся, страдания в радость обращающий;
Радуйся, малодушия и страхов нас избавляющий;
Радуйся, в благочестии нас утверждающий;
Радуйся, в правоверии стоящих незыблемое утверждение;
Радуйся, во благочестии ходящих крепкое ограждение;
Радуйся, унывающим благодатное ободрение;
Радуйся, изнемогающим внезапное укрепление;
Радуйся, всехвальный страстотерпче Христов Иоанне, купно с царем Николаем в чертозех Отца Небеснаго присно торжествующий!

Кондак 13
О прехвальный новомучениче Иоанне, приими ныне наше моление сие малое, в похвалу тебе возносимое, и благоприятными молитвами твоими умоли Господа нашего Иисуса Христа, по велицей Его милости сподобити Царствия Небеснаго, да вси радостно вопием Милосердному Богу Нашему: Аллилуиа, Аллилуиа, Аллилуиа.

Молитва
О, всехвальный страстотерпче Христов Иоанне, царю земному верно и благочестно послуживый и Царю Небесному подвиги жития твоего и кончиною мученическою угодивый!
Призри ныне от горния славы на нас смиренных и немощных, обремененных грехи многими, твоея помощи и утешения умильно просящих. Темже молим тя, святый новомучениче, испроси и нам у Бога благоприятное и спасительное время на покаяние. Да отпустит Всемилостивый Господь народу нашему грехи за предание и убиение Царя, Помазанника Божия, за осквернение и разорение храмов и за поругание всякия святыни земли Русския.
Вемы яко осуетихомся умом и сердцем предахомся непотребным и лютым страстем, благочестие презрехом, паче же бесовское нечестие возлюбихом. Веруем, всехвальный Иоанне, яко аще Христовою любовию возлюбил еси благовернаго Царя Николая, сице просим тя: умоли, святый страстотерпче Христов Иоанне, купно с Царственными Страстотерпцы и со всеми Мученики и Исповедники Российскими, Господа Бога Царя Сил, да подаст и нам грехов прощение, да процветет в России вера Христова и водворится паки ликование праведных, и да возстанет из забвения престол законных и христолюбивых царей.
Не презри убо молений наших, изливаемых ныне пред тобою, и вознеси я ко всещедрому Богу, яко кадило благовонное, да твоими ходатайствы почиет благодать Его во граде нашем, идеже почитаются преславное имя и многоцелебные мощи твои. Темже сохраняеми твоим предстательством, мирно и благочестно да поживем в веце сем, да никтоже во уповании своем на тя посрамлен будет, и да обрящем благодать и милость Господа нашего, Емуже подобает всякая слава, честь и поклонение ныне и присно и во веки веков. Аминь.

Кондак, глас 6
Подвиги веры и верности украшенный / святое житие оставил еси нам в память. / Мы же с любовию верно чтущие Тя / молим, покрывай нас от всех бед и напастей / святою своею любовию, /богоносный страстотерпче Христов Иоанне.

Величание
Величаем тя, страстотерпче святый Иоанне, и чтим святую память твою, ты бо молиши за нас Христа Бога нашего.[/spoiler]

Раб божий Константин

АКАФИСТ ИЖЕ ВО СВЯТЫХ ОТЦУ НАШЕМУ СВЯТИТЕЛЮ ИОАННУ ШАНХАЙСКОМУ, АРХИЕПИСКОПУ САН-ФРАНЦИССКОМУ, ЧУДОТВОРЦУ († 19 июня 1966).
[spoiler]Творение грешнаго Максима


Кондак 1
Избраннаго во архиереях Божиих / и сосуда Духа Святаго, / величаем тя, блаженне отче Иоанне, / ты же, яко имуще велие дерзновение пред Владыкой всех, / от всяких бед нас свободи, да зовем ти: /
Радуйся, Иоанне архиепископе, великий чудотворче.

Икос 1
Ангели Божии удивляшеся, како ты, блаженне, подвиги свои великия на земли проходил еси, постник быв, бденник и милостивец. Мы же, зрящи на таковое твое житие, вопием ти:
Радуйся, в иночестве имя святаго сродника твоего приявый;
Радуйся, в подвигах святым подражавый;
Радуйся, яко ревностию к Православию еще в юности объят был еси;
Радуйся, яко таковую ревность во всей жизни твоей показал еси;
Радуйся, на служение Церкви в юности вступивый;
Радуйся, верность Ей до конца жизни сохранивый;
Радуйся, Иоанне архиепископе, великий чудотворче.

Кондак 2
Видев жизнь твою Богоугодную, святитель Христов Антоний в чин иноческий и в сан священный возвел тя, богоносне отче Иоанне, ты же, Господу служа благочестно, нас научал пети: Аллилуиа.

Икос 2
Разумев тя, Богоносне отче, сосуд Духа Святаго, в сан архиерейства Антоний блаженный возведе тя, ведая, яко ты подражатель Отцам древлим явишься еси. Мы же, дивящеся сему, зовем ти:
Радуйся, пастырей Церкви достойне воспитавый;
Радуйся, образ подвижничества им явивый;
Радуйся, по смирению сана епископскаго не хотевый;
Радуйся, смирение истинное в сердце имевый;
Радуйся, в сан архиерейства возведенный;
Радуйся, за послушание его приемый;
Радуйся, Иоанне архиепископе, великий чудотворче.

Кондак 3
Силою свыше укрепляемь, богоносе, истинный Ангел Церкви своея был еси, и не токмо православная паства твоя, но иновернии, зная тя, яко велика святителя и чудотворца, возопиша Богу: Аллилуиа.

Икос 3
Веру твердую имуще в сердце твоем, святе Иоанне, дерзновение велие стяжал еси у Владыки всех, Пастыреначальника Христа, по слову бо твоему и молитве дуси нечистии людей оставлясте. Ведая же сие, вопием ти:
Радуйся, на кафедру Шанхайскую в день Введения во храм Пресвятыя Богородицы возшедый;
Радуйся, попечение о пастве своей смятенней приемый;
Радуйся, град Шанхай от разрушения сохранивый;
Радуйся, вселенским иерархом от инославнаго исповеданный;
Радуйся, духа зла от отрока отгнавый;
Радуйся, тем ему здравие духа и тела подавый;
Радуйся, Иоанне архиепископе, великий чудотворче.

Кондак 4
Уведев бурю и гонение, на православных в Китае готовящимся воздвиженным быти, яко Моисей вторый, извел еси чад своих в страны христианския, да спасено будет стадо Христово. Спасеннии же тобою Богу возопиша: Аллилуиа.

Икос 4
Страха Божия исполнен быв, святе отче, и того ради слыша молитвы твоя Господь, иже праведныя любяй и грешныя милуяй. Ты же, болезнуя духом о пастве своей, нощию со крестом коленопреклоненно о ней молился еси. Зная же о сем, похвальныя пения воспеваем ти:
Радуйся, молитвенниче, молитвою своею ветрам запрещавый;
Радуйся, иерарше Бога Вышняго, душу свою за паству полагавый;
Радуйся, оберегавый люди своя обхождением нощным;
Радуйся, святый человече, Крестом Господним и молитвою соделавый диавола немощным;
Радуйся, остров, иде же бысть шесть тысящ овец стада Доброго Пастыря, два лета от бурь хранивый;
Радуйся, тем люди своя сохранивый;
Радуйся, Иоанне архиепископе, великий чудотворче.

Кондак 5
Боготечною звездой явился еси, святе, всем чтущим тя: точиши бо чудесы, исцеляя души и телеса прибегающих к заступничеству твоему, и о сем радуяся, Богу вопием: Аллилуиа.

Икос 5
Видев, владыко святый, яко мнози святии Божии, на Западе просиявшия, без достодолжнаго почитания пребывают, быв архиереем Запада, таковым славу воздавал еси, и мы, видяще таковую твою о угодниках Божиих ревность, зовем ти:
Радуйся, Апостолом Запада нареченный;
Радуйся, чудотворцем великим явленный;
Радуйся, со всеми прославленными тобою Бога молящий о всех нас;
Радуйся, на высоты молитвы восходивше, над землей молящимся видимый быв;
Радуйся, о убиенном крале Сербстем панихиду служивший;
Радуйся, православным Франции и Голландии епископов давший;
Радуйся, Иоанне архиепископе, великий чудотворче.

Кондак 6
Апостолом Запада нареченный, ты не токмо словом, но и самою жизнию своею Православие Святое проповедал еси, и сие видевше, иерей Церкви Римския яко святаго исповеда тя, да вси, во Христа верующии, Богу вопиют: Аллилуиа.

Икос 6
Видеша архиереи православнии, яко ты еси, блаженне, велий светильник, пред Богом горящий, не под спуд, но на свещник — кафедру во град святаго Франциска постави тя. Мы же, зряще пастырское служение твое, зовем ти:
Радуйся, архиерею, воистину по любви Божией сие служение принявший и чести мирския отнюдь не искавший;
Радуйся, награду нетленную за то на небесех стяжавший;
Радуйся, ревнителю о храмех Божиих;
Радуйся, за то во храме почивати мощами своими удостоившийся;
Радуйся, праведниче Божий, аки свеща великая пастве светивший;
Радуйся, светильниче, елеем благодати Божией наполненный и от огня любве Божией возженный;
Радуйся, Иоанне архиепископе, великий чудотворче.

Кондак 7
Хотя вселити в сердца пасомых тобой благочестие нелицемерное, ты, блаженне отче, яко Тихон Задонский, обличил еси паству твою, иже бесовское игрище устроиша и пренебрегоша храмом Божиим и в ничто вмениша память праведника Кронштадтскаго. Ведяще же тя, яко ревнителя Православия и посекателя ересей, Богу зовем: Аллилуиа.

Икос 7
Незлобие свое и кротость христианскую показал еси, блаженне отче, егда в суд мирский принуди неции людие явитися тя, понося тя и вменяя ти в вину яже не сотворих ты. Ты же не осудил никого из гнавших тя, чадам же духовным глаголал еси: первопричина суда и гонений — диавол. Ублажая же смирение твое, зовем ти:
Радуйся, яко фарисеем новым живой укор был еси;
Радуйся, яко подвиги твоими истинное благочестие стяжал еси;
Радуйся, поношения и гонения от наущаемых диаволом приявый;
Радуйся, смиренно сие гонение претерпевый;
Радуйся, яко иерарси Савва, Леонтий и Нектарий, иереи Спиридон, Митрофан, Николай и Леонид, Ариадна игумения и Евгений чтец до конца с тобою пребыли есте;
Радуйся, сотрудниками и сподвижниками твоими в беде и обстоянии не оставленный;
Радуйся, Иоанне архиепископе, великий чудотворче.

Кондак 8
Странник и пришелец был еси на земли в жизни сей временной, богоносне отче, по глаголу Апостола, и тленных сокровищ не взыскуя, обрел еси богатство нетленное, и сего ради дерзновение стяжал еси у Христа Царя, Его же престолу ныне предстоя, с Херувимы поеши: Аллилуиа.

Икос 8
Всем вся был еси, по речению Павлову, отче наш Иоанне святителю: болящим — целитель, немощным — помощник, заблудшим — наставитель и вразумитель, унылым — утешитель. И ныне, радуясь о чудесех, яже творятся по всей земле молитвами твоими, взываем ти:
Радуйся, избранниче Божий, путем узким во всю жизнь свою шедший;
Радуйся, путем тем в Горний Иерусалим возшедший;
Радуйся, яко чудотворения дар Бог дарова ти;
Радуйся, яко дар сей во спасение душ и телес прибегавших к тебе употребил еси;
Радуйся, еретичствующих и суемудрствующих обличителю;
Радуйся, уклоняющихся с пути истины вразумителю;
Радуйся, Иоанне архиепископе, великий чудотворче.

Кондак 9
Всякое естество Ангельское удивишася, зря тя, отче святый: ты бо, еще на земли живый, духом в мире горнем пребывал еси, имея очи твои горе, и зрел еси неплотскима очима Сущаго во вся веки, Емуже выну взывал еси: Аллилуиа.

Икос 9
Ветии многовещанныя како возмогут достойно описать прешествие твое, святче Божий, из жизни временныя в вечную, идеже воистину живый есть, якоже и глагола дщери духовней твоей в видении соннем: рцы людем: аще и умер, живый аз есть. И о сем радующеся, вопием ти:
Радуйся, кончину свою предуведевый;
Радуйся, достойне к ней приготовивыйся;
Радуйся, на молитве, якоже и Ангел твой, святитель Тобольский, в вечность прешедый;
Радуйся, Заступницу Усердную во иконе Ея Курстей Свидетельницей кончины своея имевый;
Радуйся, христианския кончины живота своего, безболезнены, непостыдны, мирны сподобивыйся;
Радуйся, праведности ради твоея нетления от Бога удостоивыйся;
Радуйся, Иоанне архиепископе, великий чудотворче.

Кондак 10
Спасти желая христианина некоего инославнаго и к Православию привести его, явился еси ему нощию и повеле крестное знамение творити, яко же учит Церковь Православная. Сей же восстав от сна, крест творя, вопрошаем быв от язычника о крестном знамении его, отвещая тому, молюся, рек. Ликовствуя же о сем, с тобой купно, предстательствующем о нас ко Архиерею Великому, поем Ему: Аллилуиа.

Икос 10
Якоже при жизни, тако и по смерти твоей, святителю Божий, стена еси ты верным и защищение надежное, велие бо дерзновение ко Христу имущему, дадеся тебе власть над стихиями воздушными мира сего. Зряща же тя, таковаго о нас ходатая, зовем ти:
Радуйся, на Филипинстех островех молитвою некогда ветрам запретивый;
Радуйся, тем паству Христову от уничтожения сохранивый;
Радуйся, иерарше праведне, ветер остановивый и тем семью некую от огненнаго запаления сохранивый;
Радуйся, яко умоляемый о заступлении во всяких обстояниях, предстателем надежным и скоропослушником явился еси;
Радуйся, моления людския в засухе велицей услышавый;
Радуйся, яко Илия древле, дождь молитвою своею на землю изведый;
Радуйся, Иоанне архиепископе, великий чудотворче.

Кондак 11
Пение благодарственное приносим ныне Богу о прославлении твоем, угодниче Божий Иоанне! Ты бо, еще на земли живый, яко святый Божий почитаем был еси, по преставлении же твоем чудотворения, по всей земле творящиеся, святость твою непреложно утверди. И ныне, вместе с тобою, в день памяти успения твоего к лику святых причтенным, взываем радостно Богу: Аллилуиа.

Икос 11
Светильник велий, огнем Святаго Духа горящий, показался еси нам, отче святый Иоанне, ты бо не токмо светом благовестия Христова миру сиял еси, но и, светом нетварным осияваемый, благодать Светодавца миру источил еси. Ныне же, яко Фаворского света приснозрителю, вопием ти:
Радуйся, еще при жизни зрения света нетварнаго сподобивыйся;
Радуйся, огнем, якоже древле Сергий святый, в соборе Шанхайстем причастивыйся;
Радуйся, в свете нетварнем по успении твоем диакону своему явившийся;
Радуйся, Христу причащавшийся и Тому Преобразившемуся уподобивыйся;
Радуйся, Иверстей иконе моление в свете нетварнем совершивший;
Радуйся, над Шанхайским собором вознесенный, "Христос воскресе!" возгласивший;
Радуйся, Иоанне архиепископе, великий чудотворче.

Кондак 12
Благодати источник явился еси нам, святителю Божий Иоанне, молишися бо за ны усердно, и по вере прибегающих к заступлению твоему подаются дары Божии обильно. И кто исчислит вся чудеса твоя? Кто измерит величие святости твоея? Но внимая ныне повествованием о чудесех твоих, ихже благоволи открыти Бог, радостне поем Ему: Аллилуиа.

Икос 12
Пение хвалебное приносим ти, чудотворче и угодниче Божий Иоанне, ликовствуя о токах чудес, ихже точиши всем, с верою взыскующим предстательства и ходатайства твоего ко Творцу всяческих, Емуже ты выну взывал еси: отцев наших Господь и Бог, благословен еси. Ныне же, предстояще образу твоему честному [или честным мощем твоим], яко велицему избраннику Божию, вопием ти:
Радуйся, еще в отрочестве инославную в Православие обративый;
Радуйся, после в трудех миссионерских во все время служения твоего Церкви пребывый;
Радуйся, в юности чудо святаго Мелетия Харьковскаго записавый;
Радуйся, сам токи чудес обильны и при жизни, и по смерти источивый;
Радуйся, святым всем честь великую при жизни своей воздававший;
Радуйся, сам к лику оных по успении своем причтенный;
Радуйся, Иоанне архиепископе, великий чудотворче.

Кондак 13
О великий чудотворче и предивный угодниче Христов, святителю отче Иоанне! Приими сие малое тебе хваление наше и моли прославившего тя чудесами и нетлением Господа сил, да помилует неключимых рабов Своих и да дарует нам милость, мир, здравие, спасение, прощение и благое поспешение, да вси мы, славя Бога, дивнаго во святых Своих, воспоем Ему: Аллилуиа.
Сей Кондак глаголи трижды, и паки Икос 1: Ангели Божии удивляшеся: и Кондак 1: Избраннаго во архиереех Божиих:

МОЛИТВА БЛАЖЕННОМУ СВЯТИТЕЛЮ ИОАННУ (МАКСИМОВИЧУ)
О святе блаженне Иоанне, великий архиерее, теплый наш заступниче, избранниче Христов и великий чудотворче! Призри убо от славы твоея горния и приими молитвы нас, грешных и недостойных рабов твоих, зде пред образом твоим честным [или святыми мощами твоими] припадающих и тепле умоляющих тя, и принеси я ко Престолу вся содержащаго в руце Своей Бога, Емуже ты добре послужил еси во дни земныя жизни твоея.
О святителю пречудне Иоанне! Мал бе телесне ты и гугнив, яко же и святый пророк Моисей, но и даров Божиих обилие ты подобно сему прияти сподобился еси. Темже ныне усердно молим тя: молитвою многомощною своею испроси у Господа нам елика благопотребна есть в житии сем временнем и ко спасению вечному нуждная, грехов наших превеликия пучины потребление, здравие телесное, аще полезно сие суть душам нашим, дух мирен в общении с ближними нашими и послушание Церкви Православней Святей.
Прежде убо, о святителю, ты чад своих духовных извел еси в страны христианския от гонения хинов безбожных, да не истреблено будет стадо Христово. Ныне же смиренно молим тя: Отечеству нашему и народу страждущему избавление испроси от власти безбожныя и клеврет ея, Церкви Российстей мир и благостояние посреде бурь и треволнений мiра сего, и да возставит Господь Престол Православных Царей, иже да будут мужи по сердцу Господню в духе и силе святаго страстотерпца Николая, егоже ты почитати всех людий православных призывал еси.
Умоли Великаго и Всещедраго Господа сил, да истребятся разделения и нестроения в Церкви Божией и народе православнем, яко да возстанем от тины греховныя и противостанем духу безбожия и льсти.
Испроси нам, о святый наш заступниче и молитвенниче, многоценный от Господа молитвы дар, егоже ты преизобильно стяжал еси, яко да возможем купно с тобою воспевати Пречестное и Великолепое Имя Всесвятыя Троицы, Отца и Сына и Святаго Духа, ныне и присно и во веки веков. Аминь.

Святителю отче Иоанне, моли Бога о нас![/spoiler]

Раб божий Константин

Акафист Святителю Иоасафу Белгородскому.
[spoiler]Кондак 1
Взбранных воинов мужества наследниче и Христова стада пастырю предобрый, светильниче веры, на свещнице Белграда возсиявый, нищих питателю и о людех ко Христу Богу молитвенниче, похвальная восписуем ти раби Господа твоего, от сердец наших к любви твоей вопиюще:
Радуйся, святителю Христов Иоасафе, чудотворче предивный.

Икос 1
Ангел Божий послан бысть от Богородицы прообразовательное действие совершити и отрока тя суща мантиею святительскою покрыти, Иоасафе. Сие родитель твой зрети в видении сподобився, слышаше и глас Царицы Небесныя глаголющь ти: довлеет Ми молитва твоя. Таковому сладостному гласу внемлюще, и мы, грешнии, любовию вопием ти:
Радуйся, от матере твоея в день Рождества Пречистыя рожденный;
Радуйся, покровом Богородицы от рождения твоего покровенный;
Радуйся, сосуде, от детства твоего Богом избранный;
Радуйся, под сению обители Троицы Святыя Господеви воспитанный;
Радуйся, родителей благочестивых возлюбленный сыне;
Радуйся, паче присных твоих возлюбивый пустыню;
Радуйся, во Киеве граде разумом научение книжное стяжавый;
Радуйся, чистое сердце твое Господеви отдавый;
Радуйся, дом родителей твоих Господа ради оставивый;
Радуйся, тайно в Межигорскую обитель стопы твоя направивый;
Радуйся, юный молитвенниче пещеры тесныя;
Радуйся, презревый земная, возлюбивый небесныя;
Радуйся, святителю Христов Иоасафе, чудотворче предивный.

Кондак 2
Видя образ мира сего преходящь и славу человеческую якоже дым исчезающу, от юности монашеское житие возлюбил еси и, отроча сый, молитве и службе Божией зело прилежал еси, Иоасафе, ангельскую песнь присно воспевая Господеви: Аллилуиа.

Икос 2
Разум твой, научением книжным в Богоявленстем братстве просвещаемый, богомыслию предал еси, Иоасафе, сокровища премудрости не себе собирая, паче же сими в Бога богатея, молитвою же и пощением во служение Христу себе уготовляя. Темже и во юности твоей сицевых ублажений достоин явился еси:
Радуйся, образе чистоты и целомудрия;
Радуйся, рачителю благий смиренномудрия;
Радуйся, отринувый, якоже сор, мира сего душетленныя сладости;
Радуйся, омывый душу твою слезами чистыми младости;
Радуйся, девство твое нерастленно Господеви сохранивый;
Радуйся, прельщения возраста юнаго победивый;
Радуйся, весно, лучами благодати осиянная;
Радуйся, утро, добродетельми облагоуханное;
Радуйся, яко Христу путем узким последовал еси;
Радуйся, яко горняго отечествия достигнути возжелел еси;
Радуйся, на рало Господне руце твои возложивый;
Радуйся, лица твоего николиже вспять обративый;
Радуйся, святителю Христов Иоасафе, чудотворче предивный.

Кондак 3
Силы духа твоего во едино намерение совокупивый, во еже Христу житие твое безраздельне предати, ангельский образ во юности ранней восприял еси, Иоасафе, и со старцы вкупе воспел еси Триединому Богу: Аллилуиа.

Икос 3
Имея оружие непобедимое крест, на сердце твоем верою начертанный, противу страстей и грехов смертных, возстающих на ны, крепко ополчился еси, и, Господу победы на тыя враги даровавшу, сложил еси песнь честным добродетелем, ейже внимающе, и мы благодарными усты сице ти воспеваем:
Радуйся, смирения образе, имже гордыня низлагается;
Радуйся, благосердия правило, имже всяческая злоба побеждается;
Радуйся, целомудрия носителю и нечистых помыслов отражение;
Радуйся, любве крепкия рачителю и ненависти истребление;
Радуйся, поста оружием от плена страстей свободивыйся;
Радуйся, кротости силою от гнева неправеднаго оградивыйся;
Радуйся, страже благочестия, от сна греховнаго душу твою охраняяй;
Радуйся, добродетелей содружеством от смертныя тли тую избавляяй;
Радуйся, угодниче Божий, сими добродетельми в памяти христиан преукрашенный;
Радуйся, светильниче веры, от Солнца правды во Царствии Небеснем возжженный;
Радуйся, источниче, в жизнь вечную текий;
Радуйся, на диавола крепце возмогий;
Радуйся, святителю Христов Иоасафе, чудотворче предивный.

Кондак 4
Бурю искушений и нападений вражиих бодрственным житием твоим утишая, от архиереа Божия на степень священства возведен был еси, и со всяким смиренномудрием на раме твои бремя служения церковнаго во честнем Киеве подъял еси, ко святыням града сего присно припадая, идеже и доднесь иноцы и православнии людие вопиют Богу: Аллилуиа.

Икос 4
Слышаху ближнии и дальнии о трудех твоих неустанных, Иоасафе, како первее во граде Лубнах обитель тобою благоукрашаемая благословляше тебе, игумена своего, по сих же лавра Сергиева тобою обновися, елико строением домовным, тако и жития иноческаго исправлением. Того ради глас народный восхваляше тя сими:
Радуйся, храмов святых искусный устроителю;
Радуйся, честных обителей усердный украсителю;
Радуйся, ревнителю благолепия церковнаго;
Радуйся, паче сих рачителю делания духовнаго;
Радуйся, в сердце твоем образ Христа носивый;
Радуйся, Спасителя твоего до конца возлюбивый;
Радуйся, проповедниче, егоже послушаше в сладость Российская царица;
Радуйся, истины глашатаю, не взираяй на лица;
Радуйся, богомыслию деяние приложивый;
Радуйся, терпению житием твоим вся научивый;
Радуйся, яко в поте лица твоего Бога ради трудился еси;
Радуйся, яко в подвизе добре дух твой усовершил еси;
Радуйся, святителю Христов Иоасафе, чудотворче предивный.

Кондак 5
Боготечней звезде послушания, аки Вифлеемстей, мысленно последовав, обрел еси Христа, во храмине души твоея явльшася, отче преподобне, и Тому волю твою подклонил еси. Темже и Господь, в борении твоем тя укрепляя, в видении повелевает Афанасию, святителю Мгарскому, на главу твою руце возложити и тем грядущая твоя возвестити, да со дерзновением вопиеши Царю Небесному: Аллилуиа.

Икос 5
Видевше тя людие Белоградстии наставника добра Божественных учений на престоле святительстем явльшася и отеческих преданий хранителя верна себе показующа, судию же нелицеприятна и пастыря неусыпна бывающа, радовахуся зело и единодушне восхваляху тя, глаголюще:
Радуйся, учителю истиннаго богопознания;
Радуйся, гонителю волшебства и гадания;
Радуйся, обличителю злочестиваго неверия;
Радуйся, искоренителю раскола и суеверия;
Радуйся, вельможу невоздержнаго святому посту научивый;
Радуйся, уставы отеческия во обителех крепко водворивый;
Радуйся, православныя истины насадителю;
Радуйся, училищ благочестия покровителю;
Радуйся, имже латинстии обычаи изгоняются;
Радуйся, имже семена правды Христовы посеяваются;
Радуйся, ищущым научения отверстая врата;
Радуйся, славы Божия немолчная уста;
Радуйся, святителю Христов Иоасафе, чудотворче предивный.

Кондак 6
Проповедник сый православия догматов, заповеди Господни не усты токмо, но и всем житием твоим изъяснил еси, Иоасафе. Тако бо просветися свет твой пред человеки, яко, видевше добрая дела твоя, вси прославляху Отца Небеснаго, Емуже всякое дыхание поет хвалу: Аллилуиа.

Икос 6
Возсиявшу Солнцу правды горе пред очима твоима, нощь греха на земли низу не страшна бысть тебе, Иоасафе святителю, от Господа якоже на корабли кормчий поставленный и рукою крепкою кормило его приемый. Темже достойно славим тя, и не умолчим, вопиюще:
Радуйся, пастырю, не себе угождаяй;
Радуйся, стадо Христово от волков хищных верно ограждаяй;
Радуйся, жезлом правды нечестие сокрушивый;
Радуйся, небрегущыя о святыни от Церкве Божия отлучивый;
Радуйся, оградо крепкая неправедно обидимым;
Радуйся, защищение твердое правды ради ненавидимым;
Радуйся, чтеца смиреннаго от княжеских слуг защитивый;
Радуйся, презрители уставов церковных низложивый;
Радуйся, надменных праведный обличителю;
Радуйся, непокорных строгий смирителю;
Радуйся, меча духовнаго в ножны не вложивый;
Радуйся, венец правды от Господа получивый;
Радуйся, святителю Христов Иоасафе, чудотворче предивный.

Кондак 7
Хотя быти пастырь истинен, иже своя овцы глашает по имени, многочастне веси и грады паствы твоея обходил еси не нуждею, но по Бозе, ниже неправедными прибытки, но усердно, образ стаду подая во трудех твоих и шествиих и болезнех, непрестанно поучая и обличая и вся человеки призывая служити Богу и пети Тому: Аллилуиа.

Икос 7
Новаго неба и новыя земли по обетованию Христову чая и сих ради внутренняго человека на всяк день обновляя, постом плоть твою от работы истления свободил еси, Иоасафе премудре, и молитвою криле духу твоему возрастил еси, имже и нас грешных духовне воздвизаеши, во еже славити тя и воспевати:
Радуйся, во трудех и болезнех обретый небесныя радости;
Радуйся, в пощениих и бдениих вкусивый духовныя сладости;
Радуйся, во страданиих твоих плоть смиривый;
Радуйся, образ терпения людем явивый;
Радуйся, сосуде немощный, силы духовныя хранилище;
Радуйся, стамно скудельная, благодати вместилище;
Радуйся, кадило благовонных Богу курений;
Радуйся, храмино святых песнопений;
Радуйся, таин Божиих дивный строителю;
Радуйся, чад Церкве благодатный учителю;
Радуйся, яко тебе Ангели незримо сослужаху;
Радуйся, яко от тебе демони далече отступаху;
Радуйся, святителю Христов Иоасафе, чудотворче предивный.

Кондак 8
Странник в мире сем быв, горняя мудрствовал еси, а не земная, Иоасафе преподобне, и, поминая последняя твоя, молился еси Христу Богу, глаголя: в час смерти моея приими дух раба Твоего, во странствии суща, да со всеми святыми воспою Ти: Аллилуиа.

Икос 8
Всем сердцем твоим и святою лобовию твоею меньшей братии послужил еси, святителю Иоасафе, алчущыя питая, домы сирых и убогих согревая, своима рукама дрова вдовицам уготовляя, милостыни же твоя творя в тайне. Но Господу изволившу, явишася мирови благая дела твоя, яже славяще, взываем ти сице:
Радуйся, древо благодатное, от егоже плодов питаются алчущии;
Радуйся, источниче утешений, от негоже напояются жаждущии;
Радуйся, яко шуйца твоя не веде, яже творяше десница;
Радуйся, яко трапеза твоя бысть утешение сущым в темницах;
Радуйся, пищею твоею воеводу опальнаго питавый;
Радуйся, яко воспретити сие тебе не возможе правитель лукавый;
Радуйся, разбойники, нападшыя на тя, словом твоим устыдивый;
Радуйся, единаго от них к покаянию конечному обративый;
Радуйся, матерей млеком питающих благое защищение;
Радуйся, о отрочатех малых мудрое попечение;
Радуйся, яко милость и суд во едино совокупил еси;
Радуйся, яко любовию твоею народную любовь себе стяжал еси:
Радуйся, святителю Христов Иоасафе, чудотворче предивный.

Кондак 9
Всякую тайну души человеческия прозреваше духовное око твое. Темже открыся тебе и грех иереа онаго, леты убо согбеннаго, клятвою же Ангела Божия на земли сей связаннаго, егоже к покаянию привед и Богу примирив, по литургии Божественней от греховнаго плена и уз привременнаго жития избавил еси, поя Всемилостивому Спасу: Аллилуиа.

Икос 9
Ветий многовещанных паче, глас народный немолчно славит тя, Иоасафе блаженне. Темже и ныне приими похвалы сия от всех нас, во умилении сердец к тебе зовущих:
Радуйся, яко молитвы твоя всенощныя благодать Божию на землю низвождаху;
Радуйся, яко дние твои многотруднии благо Церкви и людем приношаху;
Радуйся, о овцах словесных стада твоего пастырское попечение присно являяй;
Радуйся, чин церковный благолепно исправляяй;
Радуйся, брани и свары прещением твоим укротивый;
Радуйся, мирному житию пресвитеры и диаконы научивый;
Радуйся, яко в тебе новый сосуд благодати открыся;
Радуйся, яко тобой Пещанский образ Богоматере явися;
Радуйся, таин сердечных явное возвещение;
Радуйся, грядущих дивное прозрение;
Радуйся, завета Евангельскаго верный хранителю;
Радуйся, заповедей церковных нелицемерный блюстителю;
Радуйся, святителю Христов Иоасафе, чудотворче предивный.

Кондак 10
Спасти от расхищения овцы твоя хотя, волки лютыя жезлом святительским далече отгнал еси от ограды церковныя, словом же истины, якоже мечем обоюдуострым, нападения оных отразил еси, Иоасафе, победную песнь воспевая Господеви: Аллилуиа.

Икос 10
Стеною крепкою оградил еси люди твоя, блаженне, на основании веры сию положив, от камений же надежды и любве тую воздвигнув и памятию подвигов твоих на веки укрепив. Сих ради песнь слагаем тебе, взывающе:
Радуйся, обычаев злых гонителю, добрых же защитителю;
Радуйся, области твоея премудрый управителю;
Радуйся, Российския страны оружие духовное;
Радуйся, зерцало светлое правды церковныя;
Радуйся, человекоугодия ради никогоже пощадивый;
Радуйся, мздоприимство яве обличивый;
Радуйся, страха ради человеча двери правды николиже затворивый;
Радуйся, единому страху Божию сердце твое покоривый;
Радуйся, пламенем гнева Господня враги веры опаляяй;
Радуйся, ярость гнева неправеднаго кротостию утишаяй;
Радуйся, воеводо Христов неустрашимый;
Радуйся, пастырю вся любяй и от всех любимый;
Радуйся, святителю Христов Иоасафе, чудотворче предивный.

Кондак 11
Пение хвалебное приносим ти от смиренных сердец наших, Иоасафе блаженне. Сие убо любовию твоею прияти не отвратися, аще и сладчайшыя гласы Ангелов ныне слышиши, на небеси Богу поющих: Аллилуиа.

Икос 11
Светозарному небеси уготовав дух твой и скорый конец жития земнаго проразумев, к погребению же телесе твоего храмину уготовити повелев, посетил еси отеческий град и родители твоя, по заповеди Божией тема честь воздавая и с любовию сыновнею душы их в вере и уповании усовершая, имиже и нас просвети, Иоасафе блаженне, зовущих:
Радуйся, старость родителей посещением твоим озаривый;
Радуйся, села отеческая пред кончиною твоею благословивый;
Радуйся, яко недузи твои дух якоже злато очищаху;
Радуйся, яко добродетели твоя якоже камение драгое сияху;
Радуйся, кораблю, напастьми бурь житейских неодоленный;
Радуйся, славно свершивый путь, от Христа повеленный;
Радуйся, яко тебе пристань благоутишная пресветлое небо явися;
Радуйся, яко тебе дверь царствия Христова открыся;
Радуйся, яко вселился еси духом твоим в горняя селения;
Радуйся, яко и на земли оставил еси нетленен залог воскресения;
Радуйся, звездо, на тверди духовней сияющая;
Радуйся, молитво о нас к Богу не умолкающая;
Радуйся, святителю Христов Иоасафе, чудотворче предивный.

Кондак 12
Благодати неистощимыя знамение непререкаемое яви нам Христос в нетлении мощей твоих, Иоасафе премудре, пред нимиже людие вернии молящеся, от видимых к невидимым духовне восходити научаются, Бога же, дивнаго во святых Своих, славити и ангельски Ему воспевати: Аллилуиа.

Икос 12
Поюще праведное житие твое, Иоасафе блаженне, славяще труды твоя и восхождения от славы в славу, зрим и исповедуем, яко кончина твоя рождение бысть в жизнь приснотекущую, еяже струями благодатными и нас земных окропляеши, и от болезней душевных и телесных, Господу изволяющу, свобождаеши, недугующим и прискорбным многочастне в видении являяся и утешение принося, наипаче же молящымся пред гробницею твоею невидимо внемлеши и видимо помощь подаеши.Темже, благодарственно воспевающе тя, глаголем:
Радуйся, радости приобщивыйся, в печали же сущих не забывый;
Радуйся, ухо твое ко юдоли скорбей приклонивый;
Радуйся, якоже Илиа Фесвитянин, огнем ревности по Бозе горяй;
Радуйся, стопами чудотворца Мир Ликийских в хижины бедных входяй;
Радуйся, отчаянным нечаянное вспоможение;
Радуйся, разслабленным благодатное укрепление;
Радуйся, яко твоими молитвами хромии хождаху;
Радуйся, яко тобою слепии зрение получаху;
Радуйся, от многообразных недугов исцеляяй;
Радуйся, воины православныя на брани охраняяй;
Радуйся, земли Российския защитниче верный;
Радуйся, православия поборниче нелицемерный;
Радуйся, святителю Христов Иоасафе, чудотворче предивный.

Кондак 13
О, преславный пастырю Белоградский, святителю Иоасафе! Приими малое сие хваление наше, и моли Христа Бога, да избавит землю Российскую и вся страны христианския от смертоноснаго неверия язвы, от всякия вражды и нестроений, от враг видимых и невидимых, Церковь же святую да возрастит и укрепит, и вся верныя ко Христу всемирному Пастырю приведет, поющыя Ему: Аллилуиа, Аллилуиа, Аллилуиа.
Сей Кондак глаголи трижды, и паки - Икос 1 и Кондак 1

Молитва Святителю Иоасафу
О святителю Христов Иоасафе, чудотворче Белоградский! Веруем грешнии и недостойнии, яко очи Господни на праведных и уши Его на молитву их, и того ради к молитвам твоим прибегаем и ходатайства твоего за нас просим, по глаголу апостольскому уповающе, яко любы твоя николиже отпадает. Во гресех и болезнех наших льну курящемуся и трости сокрушенней уподобихомся, и, аще живем, милостию Бога живем и за молитвы праведник Его. Приклони убо и ты, отче праведне, сердце твое к молению нашему, и предстательством твоим даждь роду христианскому от Господа мир и благословение. Православие укрепи, нападения же лукавнующих и беззаконных на Церковь Божию отжени. Умоли Отца Небеснаго избавитися нам от нашествия вражескаго, от междоусобий же и смятений народных, от губительных поветрий и смертоносныя язвы, от глада, огня, потопа и иных бед и обстояний. Испроси у Христа Бога душам нашым крепость и телесем нашым потребное здравие, болезнем же исцеление: хромым хождение, слепым прозрение, разслабленным утверждение, печальным утешение и от всех скорбей избавление. Отпадшыя же лозы Христовы ветви паки с тою соедини, еяже и сам причастник быти сподобился еси, да тако прославится тобою пречестное и великолепое имя Бога нашего, Отца и Сына и Святаго Духа, ныне и присно и во веки веков. Аминь.

Молитва о недугующих и страждущих
О великий угодниче Христов, святителю отче наш Иоасафе, скорый помощниче и дивный чудотворче! Призри милостивно на ны недугующия. Вемы, угодниче Христов, вемы, и усты и сердцем исповедуем, яко по делом нашым беды постигоша нас. С разбойником благоразумным исповедуем Господеви, яко достойная по делом нашым восприемлем и злая сия якоже раби неключимии терпим. Сими бо временными мученьми Господь милосердый сокрушает гордыню и жестоковыйное сердце наше, да вечныя избежим казни, грешником уготованныя: сеяхом бо семена жития своевольнаго, и жнем терния скорбей. Обаче, немощни суще, но в покаяние теплое пришедше, о сем молитися дерзаем, да гнев Господень на милость к нам преложится, и тебе, святителю Божий и чудотворче, усердно просим: пролий теплую молитву твою ко Христу Господу нашему, Емуже днесь предстоиши и молишися о почитающих тя с любовию и смиренным на твое предстательство упованием. Се бо в житии твоем, святителю Христов, ни единаго же скорбяща и милости твоея просяща, грехи же своя исповедающа, николиже презрел еси. Умоли Праведнаго Судию, да преложит гнев правды Своея на милование наше. Благодатию Его тебе данною, святителю милосердый, уврачуй нашя немощи, болезней лютых течения устави, смерти отъити повели, и на покаяние силу нам даруй. Старость поддержи, младенцы воспитай, юность уцеломудри, супружества в чистоте и смирении утверди, нам же всем послушание трудолюбное и мирное жительство молитвою твоею даруй, да терпением течем на предлежащий нам подвиг жития сего временнаго, взирающе на Начальника веры и Совершителя Господа Иисуса, Емуже слава во веки веков. Аминь.

Тропарь, глас 3-й
Святителю Христу Богу возлюбленне,/ правило веры и образ милосердия людем был еси,/ бдением же, постом и молитвою яко светильник пресветлый просиял еси,/ и прославлен от Бога явился еси:/ телом убо в нетлении почивая, духом же престолу Божию предстоя,/ чудеса преславная источаеши./ Моли Христа Бога, да утвердит нас в православии и благочестии и спасет души наша.

Тропарь, глас 2-й
Молитвенниче издетства преизрядный,/ Богу избранный святителю Христов Иоасафе, правило веры и образ милосердия благочестным житием всем являеши/ и с верою к тебе притекающим обильно исцеления источаеши,/ моли Христа Бога, да утвердит правоверие, мир и благочестие и спасет души наша.[/spoiler]

Раб божий Константин

Святой праведный Иов Многострадальный.
[spoiler]Кондак 1

Избранному Господем великому Ветхаго Завета праведнику, пятому от Авраама Исавовых сынов сынови, Иову Многострадальному похвальное воспоем пение: яко своими дивными добродетельми и всем своим житием учителем всей вселенней явившемуся. Ты же, праведный Иове, приими сию похвалу, с любовию тебе приносимую, согрей наша сердца желанием подражати твоим подвигом, да единодушно зовем ти: Радуйся, Иове Многострадальный, всему миру учителю предивный.

Икос 1

Ангели Божии в день некий предсташа Господеви, хвалу Ему возносяще. С ними же и диавол прииде. Сей последний, вопрошенный Господем об Иове, начат клеветати на праведника, яко той чтит Господа земных ради благ, имиже Бог его награди. Мы же, злую диавольскую клевету на великаго праведника с горечию воспоминающе, тако Иова восхваляем: Радуйся, Иове, яко сам Господь наименова тя человека непорочна и благочестива. Радуйся, от Господа вся блага земная приемый. Радуйся, множество слуг имевый и стада своя тысящами исчитывавый. Радуйся, Господем дарованных тебе сынов и дщерей в великом благочестии воспитавый. Радуйся, яко о чадех своих великое попечение являл еси. Радуйся, яко ни к чему же от земных благ сердцем не прилеплялся еси. Радуйся, яко мудростию своею над всеми высоко стоял еси. Радуйся, яко царь посреде храбрых был еси. Радуйся, яко был еси благороднейший сущих от восток солнца. Радуйся, всеславне, Божий угодниче истинный. Радуйся, великая дела благая совершивый. Радуйся, в терпении своем мир просветивый. Радуйся, Иове Многострадальный, всему миру учителю предивный.

Кондак 2

Ведая веру несокрушимую и велию преданость воли Божии раба своего, даде Господь власть диаволу вся блага земная у Иова отъяти и чад его погубити. Мы же, сему особому изволению Божию дивящеся, вопием Премудрому Богу: Аллилуиа!

Икос 2

Разумом своим злым зело обрадовася диавол, таковое изволение Божие получивый. Во един день, егда вся чада Иовля единодушно в доме старейшаго брата своего трапезою наслаждахуся, посла диавол исполнители злые воли своея, и все имущество Иовле погуби, и десятерицу чад его смерти предаде. Буря нечаянных искушений на поколеба сего дивнаго столпа, и из уст его изыдоша сицевая мудрая словеса: Наг изыдох аз от чрева матере моея, наг и отъиду тамо: Господь даде, Господь отъят: яко Господеви изволися, тако бысть. Буди Имя Господне благословено во веки! Чтуще таковую преданность воли Божии праведника, мы в похвалу Иова сице глаголем: Радуйся, Иове, ничимже пред Господем согрешивый. Радуйся, Многострадальне, и устнама своима безумия Богу не давый. Радуйся, яко двери дома твоего выну отверсты бяху всякому мимошедшему. Радуйся, яко странник вне дома твоего не оставашеся. Радуйся, яко ты вдовича слезнаго ока не презрел еси. Радуйся, яко слепым, нога же хромых был еси. Радуйся, яко хлеб свой николиже един вкушал, сирым же обильно давал еси. Радуйся, яко вси немощнии, чесого требующии, вся от тебе радостно получали суть. Радуйся, яко о всяком немощнем ты плакал еси. Радуйся, яко видя мужа в скорбех, тяжко вздыхал еси. Радуйся, во всякой нужде и печали скорый помощниче. Радуйся, ищущым предстательства твоего неусыпный заступниче. Радуйся, Иове Многострадальный, всему миру учителю предивный.

Кондак 3

На силу свою полагаяся, сатана паки клевещет на Иова и Богу глаголет: Посли руку Твою и коснися костем его и плоти его, аще не в лице Тя благословит? И паки Господь предает дивнаго Иова в руце беззаконника. Сеятель же зла, вышед от лица Господня, злорадно порази Иова гноем лютым от ногу даже до главы его. И седяше праведник вне града на гноищи, взем чрепок, да острогает гной свой. Мы же, благословяще Бога, допустивша навести проказу лютую на Иова непорочнаго, прославления ради раба Своего, вопием Господу: Аллилуиа!

Икос 3

Воистинну терпение паче человеческаго имяше Многострадальный Иов. Болезнь в прокаженнем телеси умножашеся. Жена же праведника, зрящи страдания мужа своего и сатаною научаема, даде совет Иову: Рцы глагол некий ко Господу и умри. Он же, воззрев, рече к ней: Вскую яко едина от безумных жен возглаголала еси? Аще благая прияхом руки Господни, злых ли не стерпим? Во всех сих приключившихся ему, ничимже согреши Иов устнама пред Богом и не даде безумия Богу. Откуду кто возможет обрести глаголы, прославляющыя праведника новолепне? Обаче мы, любовию к Иову побеждаеми, Иовлими же словесы прославляем Многострадальнаго сице: Радуйся, яко кости твоя нощию смятошася и жилы твоя в разслабление приидоша. Радуйся, яко кожа твоя вельми помрачися. Радуйся, яко и составы телесе твоего от гноя сгореша. Радуйся, яко исполнен был еси болезнию от вечера до утра. Радуйся, яко тело твое в гнои червей пребываше. Радуйся, яко брашна твоя смрадом преисполнена быша. Радуйся, яко гнушахуся тебе и воставаху на тя видевший тя. Радуйся, Иове, всеми прилоги лукаваго непреклоненный. Радуйся, и до смерти Господу преданный. Радуйся, безумная словеса жены своея обличивый. Радуйся, столпе добльственный, в тяжких болезнех своих никакоже унынию предавыйся. Радуйся, в скорбех своих Бога благословивый. Радуйся, Иове Многострадальный, всему миру учителю предивный.

Кондак 4

Множество великих смущений найде на праведника, егда приидоша к нему три друзи его. Сии издалеча на прокаженнаго воззревше, не познаша его, и возопивше гласом велиим, восплакашася, разтерзавше ризы своя и посыпавше перстию главы своя: седяху при нем седмь дний и седмь нощей, и никтоже от них возгагола к нему словесе утешения. Зря таковыя други своя, всем сердцем устремися невинный страдалец к Богу, на Него Единого уповая и взывая Ему: Аллилуиа!

Икос 4

Слыша глас велий и вопль другов своих, уразумел еси, Многострадальне, яко тии не дадут тебе утешения. В горести же душевней, пред лицем Господа, отверзл еси уста своя, Иове, начен глаголати, яко лучше тебе не родитися, нежели жити кроме близости к Богу. Сострадающе праведнику в неизреченном его горе, в похвалу великия его преданности Господу, глаголем Иову сицевая: Радуйся, велий Ветхозаветный праведниче, все блаженство свое в близости к Богу полагавый. Радуйся, страх от Бога отверженну тебе быти в низпосланных искушениих испытавый. Радуйся, смерть предпочитавый, нежели жити тебе оставленну от Бога. Радуйся, чаянием утешения Божия скорби своя твердо претерпевый. Радуйся, яко о безконечной загробной жизни вещал еси. Радуйся, яко в смерти вечный покой полагал еси. Радуйся, скорби земныя яко предуготовление к жизни будущей разумевый. Радуйся, вечныя радости прозорливый провидче. Радуйся, о безсмертнем блаженстве ко Господу взывавый. Радуйся, в земных благах токмо с Господем благо видевый. Радуйся, яко красоты зримаго неба без Бога за ничтоже почитал еси. Радуйся, яко новаго неба и новыя земли всею душею ожидал еси. Радуйся, Иове Многострадальный, всему миру учителю предивный.

Кондак 5

Всецелыя Господу преданности праведника три друзи его в словесех Иовлих не разумеваху, токмо же ропот его на Бога видяху: сего ради внушаху Иову к Богу обратитися с молитвою и покаянием о гресех своих. Невинный же страдалец о единем моляше Бога, да даст ему Господь силу невинных страданий своих уразумети. К Богу, источнику премудрости и разума, от сердца своего сокрушеннаго праведник вопияше: Аллилуиа!

Икос 5

Хотя указати на неисповедимыя пути Господни, об уразумении киих и должно есть человеку Бога умоляти, ты други своя, Иове, жити в воли Божии наставлял еси. Мы же, мудрыя речи страждущаго праведника чтуще, приносим ему сия похвалы: Радуйся, яко неправды на Бога уста твоя не изрекоша. Радуйся, ложь другов своих мудро обличивый. Радуйся, о непостижимости промысла Божия смиренномудро вещавый. Радуйся, жизнь праведников в Ветсем Завете уяснити возжелавый. Радуйся, погруженна себе от природы во всякую скверну видевый. Радуйся, нужду в ходатаи между Богом и людьми своим благочестивым сердцем прозревавый. Радуйся, любве Отчи от Бога возжадавый. Радуйся, яко слезно умолял еси Господа, да не удалит Он от тебе страх Свой. Радуйся, яко искушения своя от Бога посланная почитал еси. Радуйся, яко грядущую смерть избавительницу себе от земных скорбей полагал еси. Радуйся, мудрый изъяснителю путей Божественных. Радуйся, благий руководителю к Царствию Небесному. Радуйся, Иове Многострадальный, всему миру учителю предивный.

Кондак 6

Проповедник непостижимости глубин Божиих, Божия премудрости и разума явился еси, Многострадальне, егда обличал еси своя лицемерствующыя други, мнящыя себе пути премудрости Божия разумеющя. Смиренно видя себе немощна промысл Божий ведети, возжелаше праведник на суд пред Богом стати и у Того особыя милости просити, дабы Господь грозную руку Свою отъял и страхом Своим его не ужасал. Нося в сердце своем смиренную мольбу ко Господу, со умилением Иов к Единому Судии и Богу взываше: Аллилуиа!

Икос 6

Возсия в души твоей, праведне, благодатный луч Божественный, егда в велицей горести своей приближение к смерти ожидал еси, и к невозвратному шествию в неведомую страну мрака и тьмы вечныя готовился еси. Всею бо душею любя Господа, по призыву Божию в загробный мир ити готов был еси, Иове, обаче надежды жизни новыя в близости к Богу в сердце своем не отривал еси. Радующеся таковому светлому чаянию страждущаго праведника, с любовию поем ему: Радуйся, смиренный, Богомудрый, невинный страдальче. Радуйся, о близости смертней непрестанно помышлявый. Радуйся, день и час кончины человека в премудрой воли Божии полагавый. Радуйся, рабе Христов нелицемерный. Радуйся, яко чистым сердцем своим Бога узрети возжелал еси. Радуйся, яко в своей глубокой Господу преданности дерзновенно Того вопрошал еси. Радуйся, яко от правды своея никакоже отступил еси. Радуйся, яко у Бога истинныя премудрости искал еси. Радуйся, други своя врачы неправедныя именовавый. Радуйся, в словесех их лесть пред Богом видевый. Радуйся, душу свою чисту и непорочну сохранивый. Радуйся, безбоязненно пред Господем на суде стояти восхотевый. Радуйся, Иове Многострадальный, всему миру учителю предивный.

Кондак 7

Хотящым истинную мудрость в сдовесех твоих уразумети, помози нам, угодниче Божий. Ложныя други своя обличая, указал еси им, Иове, яко блага земная и горести людския суть в руках Божиих. Господь раздает их премудро: отнюдуже и праведный люте страждает и нечестивый благоденствует. Тайны мироправления Божия человек перстный ведети не может, за вся же должен есть благодарити Господа и, восхлавляя Его, пети Ему: Аллилуиа!

Икос 7

Дивныя речи слышим мы из уст Ветхозаветнаго праведника. Лицемерсвующии же друзи его утешения Иову не даваху, наипаче же новыя скорби сердцу его причиняху. Праведник же токмо ко Господу мысль свою устремляше, на Единаго Заступника и Нелицепрятнаго Судию Бога уповаше, от Него Единаго утешения чая. Видяще таковое превыспренное устремление Многострадальнаго, величаем его сице: Радуйся, лицемерия мудрый обличителю. Радуйся, други своя злыя утешители именовавый. Радуйся, видевый други, покивающих главами над великими страданьми друга своего. Радуйся, токмо от Господа сердцу своему облегчения искавый. Радуйся, токмо на небесех Истиннаго Заступника себе видевый. Радуйся, яко ужасы пред Богом преисполняшеся сердце твое. Радуйся, яко чистою молитвою своею к Богу приближался еси. Радуйся, яко на правду свою крепко уповал еси. Радуйся, в смирении своем, беседовати с Богом недостойна себе почитавый. Радуйся, токмо умоляти Бога Судию своего желавый. Радуйся, невиновность свою пред всем миром свидетельствуяй. Радуйся, яко око твое благодатными слезами преисполнено бе. Радуйся, Иове Многострадальный, всему миру учителю предивный.

Кондак 8

Странно есть нам, сыном Завета Новаго, кровию Сына Божия искупленным и Евангелие Христово имущым, дерзновенная словеса Ветхозаветнаго праведника слышати. Великия тайны загробнаго мира Многострадальному не ведомы бяху, своим же преданным Богу сердцем Иов моляшеся, да озарит его Сущий на небеси Свидетель и заступник таковых таин ведением. Ко Господу слезит око Многострадальнаго и с умилением поет праведник Богу: Аллилуиа!

Икос 8

Чая приближения кончины своея, терпя на земли страдания тяжкая, в благодатных озарениих своих глаголаше праведник, яко аще в скорбех на земли несть облегчения, да скрыет его Господь в преисподних до времени. Егда же престанет гнев Божий, греси и беззакония людская покрыются, тогда Господь по милости своей даст праведнику близким к Нему быти. Мы же, таковое светлое упование страждущаго зряще, в особую ему похвалу глаголем сице: Радуйся, прозорливче Богомудрый и просвещенный. Радуйся, святый и великий страдальче. Радуйся, плотию постарадавый и греха свободивыйся. Радуйся, любовию ко Господу дух уныния препобедивый. Радуйся, яко светлыя надежды жизни будущия преисполнен был еси. Радуйся, яко всею душею в любовь безконечную Божию веровал еси. Радуйся, тайны загробнаго мира уведети возжадавый. Радуйся, в мрачных удолиих адовых милости Божия ожидавый. Радуйся, упование на светлую жизнь за гробом Давиду, Исаии, Иезекиилю и иным пророком равный. Радуйся, яко сим упование стал еси на единый путь с великими Ветхозаветными праведники. Радуйся, всем праведником радость светлаго бытия за гробом проповедавый. Радуйся, Евангельских Христовых истин прозорливый исповедниче. Радуйся, Иове Многострадальный, всему миру учителю предивный.

Кондак 9

Всякими великими искушеньми и скорбьми духовно возрастал еси, Иове. Господь же особыми откровении услаждаше душу твою, Многострадальне. Благодатно озаренный Богом, ты, избранниче Божий, вещал еси: Вем, яко жив Искупитель мой, Иже в день последний распадающуюся кожу мою сию из праха воскресит, аз же во плоти моей узрю Бога. Воспринимающе сердцами нашими сию веру в воскрешение плотию, мы, таковыми откровении праведника вразумляеми, вопием Богу: Аллилуиа!

Икос 9

Ветия воистинну неправедныя явишася многоречивии друзи твои, Иове. Ложнии сии утешителие возжелаша тя, страждущаго друга своего, укоряти, глаголюще, яко ты алчущих не питал еси, нищих не одевал еси, вдовиц и сирых обижал еси, и жажду ближних не утолял еси. О великое долготерпение великого страдальца! Восхваляюще таковое долготерпение и чистое добродетельное Иовле житие, воспеваем ему сицевая: Радуйся, яко поношения от другов своих смиренно претерпевал еси. Радуйся, яко и посмеяния малых детей благодушно приимал еси. Радуйся, яко и раби твои любовь твою к ним забыша. Радуйся, яко и жена твоя лукавому совету неразумно внимаше. Радуйся, яко злый сатана, разтерзав столп телесе, сокровища духа твоего не украде. Радуйся, велий борче, вся козни вражыя препобедивый. Радуйся, яко Единаго Бога и Господа на земли зрети хотел еси. Радуйся, яко своею преданностию Господу прославился еси. Радуйся, высотою подвигов своих всех удививый. Радуйся, просвещения духовнаго указателю. Радуйся, всех людей великое утешение. Радуйся, яко многим в мире сем тобою спасение явися. Радуйся, Иове Многострадальный, всему миру учителю предивный.

Кондак 10

Спасения себе токмо от Господа чая, и светлую надежду на обновленную жизнь за гробом имея, Многострадальный Иов, иже праведник Ветхаго Завета быв, утвердитися в озарениих своих не дерзаше, в мыслех же и чувствиих своих сумняшеся и горесть некую в души претерпеваше. Мы же, праведнику в сей горести сострадающе и Святей воли Божии преклоняющеся, возопиим Любвеобильному и Премудрому Богу: Аллилуиа!

Икос 10

Стена крепкая в преданности Господу всему миру явился еси, Многострадальне, егда твердо о непорочности своей и лицемерии другов своих вещал еси. Имуще сердца, исполненная состраданием к невинно страждущему праведнику, едиными усты нашими со умиленнем зовем ему тако: Радуйся, великий праведниче, в страшных искушениих всецело преданность Господу сохранивый. Радуйся, ни от когоже от людей добраго утешения видевый. Радуйся, о лишении чад и пропавшем богатстве унынию никакоже предавыйся. Радуйся, яко всех нас побеждати искушения сребролюбия наставляеши. Радуйся, яко изменения в небесных светилех мудро разумел еси. Радуйся, яко ни единыя же приснопребывающия радости к мире сем видел еси. Радуйся, токмо во Единем Бозе радость и истину выну созерцавый. Радуйся, великая истинная откровения от Бога прияти сподобивыйся. Радуйся, яко ложь другов и укорения ближних крепостию духа своего превозмогал еси. Радуйся, яко всякая безсловесная похотения чистотою сердца своего препобеждал еси. Радуйся, во всех своих светлых упованиих никакоже посрамивыйся. Радуйся, яко в тайны загробнаго мира углублялся еси веянием Духа Святаго. Радуйся, Иове Многострадальный, всему миру учителю предивный.

Кондак 11

Пение всеумиленное воспоем Многострадальному, невиновность свою видевшему и неискупленную греховность людскую ведавшему. Зря на себе десницу Божественныя воли, в промысл Божий о человеце вероваше праведный, добраго чая конца. Разделяюще несокрушимую светлую веру его и упование на Бога, могущаго тяжкую Иовлю скорбь облегчити, мы купно с ним вопием Всеблагому Господу: Аллилуиа!

Икос 11

Светла озарения Многострадальнаго, светла и упования его. Времени же минувшу умолча Иов словесы. Умолчаша же и три друзи его ктому пререковати Иову, бе бо Иов праведен пред ними. Глаголет к нему новый собеседник Елиус, егоже речи благожелательней внемлет праведный. Не могущу же Иову уразумети вся словеса сия новая, се Господь Сам явися рабу Своему и глаголаше к Иову сквозе бурю и бурныя облаки, обличая, и наставляя, и исцеляя его. Той же с трепетом благоговейным, внемля словесем Божиим, безмолвне множицею себе укоряше, наипаче же познаваше, яко ничтоже есть пред лицем Божиим: и абие исполнися душа праведнича смирения благодатнаго. Видяще таковое глубокое пред Господем смирение, радостно поем Иову сицевая: Радуйся, великий в чистоте речей своих пред Господем. Радуйся, великий в безмернем пред Господем смирении. Радуйся, ничтожество свое познавый, на уста же своя руку положивый. Радуйся, подобно Аврааму, земля и пепел себе именовавый. Радуйся, велемудре, судьбы человека в мире до Христа на себе испытавый. Радуйся, верный слуго Господень, о своей мудрости глаголати не дерзавый. Радуйся, ни единым же словесем о речех другов своих обмолвивыйся. Радуйся, яко благоговейно выслушал еси Господа о дивных делех всемогущества Божия. Радуйся, в недомыслии пред Богом сокрушенно себе обличивый. Радуйся, пред премудростию Единаго Бога всею душею преклонивыйся. Радуйся, в смирении своем, обличавшему тя Господу радостно внимавый. Радуйся, всех смелых речей своих пред Господем отрекийся и в прахе и пепле раскаявыйся. Радуйся, Иове Многострадальный, всему миру учителю предивный.

Кондак 12

Благодатная велия радость в сердце твое, Многострадальне, сниде. Ты в бури и облаце Господа своего видел еси. Ты обличающее тебе слово Господа, и гневное слово Его к неверным другом твоим слышал еси. Проказа страшная сойде с тебе, Иове, и ты всякая блага земная в сугубом числе от Господа приял еси. В награду за скорби своя долголетие, по милости Божии, стяжал еси, и новую десятерицу чад своих радостно созерцал еси. Воскресение со всеми избранными своими Господь, тебе обетова. Презирая вся скорби своя, праведник и мы купно с ним всем сердцем радостно вопием Господу: Аллилуиа!

Икос 12

Безмерныя скорби претерпев и всецелую преданность всесвятей воли Божии показав, живый прообраз скорбей Господа, крестными страдании диавола победившаго, явился еси, Иове. Поюще твое чудное житие, восхваляюще безмерное долготерпение твое, Многострадальне, словесы Самого Господа, Его пророков и апостолов, и церковными словесы восхваляем тебе сице: Радуйся, праведниче, усты Божиими на всю вселенную хвалимый. Радуйся, истину в словесех о Бозе, не якоже твои лжеречивии друзи, явивый. Радуйся, яко Господь показа тя едина молитвенника за други своя. Радуйся, яко грехи таковыми Господь отпусти за молитвы твоя. Радуйся, Самем Господем не единажды истинный раб Божий нареченный. Радуйся, великий Ветхозаветный молитвенниче в ряду с Ноем и Даниилом. Радуйся, яко брат Господень наименова тя образ злострадания и долготерпения. Радуйся, яко той же апостол Иаков восхвали в твоем житии славную кончину Господню. Радуйся, яко Церковь Христова святую книгу твою повеле прочитывати во дни страстныя седмицы. Радуйся, прообразе страстей безгрешнаго Господа. Радуйся, яко Святый Златоуст призва нас образом страданий твоих к подражанию твоим подвигом. Радуйся, яко в Церкви Святей имя твое славно, досточестно и препрославлено. Радуйся, Иове Многострадальный, всему миру учителю предивный.

Кондак 13

О великий праведниче Ветхаго Завета, Иове Многострадальне, приими наше посильное хваление твоих безмерных во славу Бога подвигов. Твоими сильными у престола Божия молитвами подаждь помощь нам, преклоняющим колена наша пред твоими многолетними тяжкими страданьми, твердыми в искушениих и злостраданиих быти, в вечную загробную жизнь несокрушимо веровати, на получение, по милости Божии, венцев праведных на страшнем суде Христове, твердо надеятися, да и мы в обновленней плоти нашей, с тобою и со всеми святыми, сподобимся Искупителя и Господа нашего зрети и вечно ему воспевати: Аллилуиа! Аллилуиа! Аллилуиа!



(Этот кондак читается трижды, затем икос 1 и кондак 1)



Молитвы святому и праведному Иову Многострадальному

Молитва первая

О великий праведниче, Иове Многострадальне, чистым житием своим и святою близостию к Богу просиявый. Ты до Моисеа и Христа на земли пожил еси, вся же заповеди Божия, нося их в сердце своем, исполнял еси. Явленныя миру чрез Христа и Его Святых апостолов тайны, глубокими своими откровении уразумев, причастник веяний Духа Свята быти сподобился еси. Всякия козни диавольския, в посланных тебе от Господа особых искушениих, истинным смирением своим препобедив, образ злострадания и долготерпения всей вселенней явился еси. Любовь велию к Богу и ко всем людем в безмерных своих скорбех сохранив, чистым сердцем за гробом единения с Господем радостно ожидал еси. Ныне же в селениих праведных пребываеши и Престолу Божию предстоиши. Услыши нас грешных и непотребных, пред святою иконою твоею предстоящих и усердно к ходатайству твоему прибегающих. Моли Человеколюбца Бога, да к вере крепцей, непорочней и нерушимей нас утвердит, от всякаго зла враг видимых и невидимых защитит, в скорбех и искушениих нам крепость подаст, в сердцах наших память смертную присно сохранит, в долготерпении и братолюбии укрепит, и сподобит нас на страшнем суде Христове добрый ответ дати и в воскрешенней плоти нашей Триединаго Бога созерцати и славу Ему со всеми святыми воспевати во веки веков. Аминь.



Молитва вторая

О святый угодниче Божий, праведне Иове! Подвигом добрым подвизався на земли, восприял еси на Небесех венец правды, егоже уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтем святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа. Аминь.



Тропарь праведному Иову Многострадальному

Тропарь, глас 1

Богатство видев добродетелей Иовлих, украсти кознствоваше праведных враг, и растерзав столп телесе, сокровища не украде духа, обрете бо вооруженну непорочнаго душу, мене же и обнажив, плени: предварив убо мя прежде конца, избави мя льстиваго, Спасе, и спаси мя.



Кондак, глас 8

Яко истинен и праведен, благочестив и непорочен, освящен же явлься, всеславне, Божий угодниче истинный, просветил еси мир в терпении Твоем, терпеливейший и доблейший. темже вси, богомудре, память твою воспеваем.[/spoiler]

Раб божий Константин

Акафист Преподобному Иову Почаевскому.
[spoiler]Кондак 1
Избранный чудотворче и земли нашея добрый учителю, всея же вселенныя усердный молитвенниче, преподобне отче Иове, чистым твоим житием просвещаема обитель твоя и вси православнии людие благодарственная о тебе Святей Троице возносят хваления. Ты же яко имеяй дерзновение ко Господу, предстатель буди о душах наших неусыпный и на страсти воинствующим скорый помощник, да в радости сердца зовем ти: Радуйся, Иове, преславный угодниче Божий, и обители Почаевския украшение.

Икос 1
Ангел благовестник воистинну явился еси нашим людем от врагов Церкви обуреваемым отче наш Иове, елико писанми твоими и книг священных печатанием, толико и богоугодным житием и славным еже к Богу отшествием, ныне же и всей вселенней предстатель теплый являешися у Престола Владычня; сего ради зовем ти:
Радуйся, истинныя Церкви добрый воине;
радуйся, православия светлый светильниче.
Радуйся, отцы наша от ереси оградивый;
радуйся, чада их во благочестии утвердивый.
Радуйся, спасения ради дом родителей издетска оставивый;
радуйся, о души твоей попечение паче всех показавый.
Радуйся, яко твоим отроческим подвигом старцы удивишася;
радуйся, яко от юности во Ангельском образе к тем сопричтен был еси.
Радуйся, обитель Угорницкую твоим житием просветивый;
радуйся, множайшими труды монастырь Дубенский прославивый.
Радуйся, немощных в вере утверждение;
радуйся, неведущих вразумление.
Радуйся, Иове, преславный угодниче Божий, и обители Почаевския украшение.

Кондак 2
Видяще иноцы Угорництии ревностное твое в духовном житии преспеяние, схимонаха и пресвитера тебе быти устроиша, обаче Волынская земля на вящшия труды тя подвизающи, устрои тебе игумена быти во граде Дубенстем ко отражению еретических поползновений, православным же людем ко окормлению духовному и к неленостному Господеви воспеванию: Аллилуиа.

Икос 2
Разум совершен воистинну отче показал еси, егда душевнаго ради устроения на гору Почаевскую уклонился еси и вместо начальствования послушанию паки предался еси, обаче в лучший того подвиг Господь тебе вменяше вторицею приятое зде игуменство, братие же Почаевстии взываху ти с веселием:
Радуйся, наш отче новый и предивный;
радуйся, благочестия образе.
Радуйся, начальство, яко служение, приявший;
радуйся, Богу и ближним волею поработивыйся.
Радуйся, яко в начальстве твоем Христова смирения подобие является;
радуйся, яко того ради покой душам нашим обретается.
Радуйся, о людех доброе моление возносивый;
радуйся, на демоны мужественно ополчивыйся.
Радуйся, Ангельскаго ликостояния приобщивыйся;
радуйся, добрый путевождь ко спасению нам явивыйся.
Радуйся, спасающимся ободрение;
радуйся, ленящимся обличение.
Радуйся, Иове, преславный угодниче Божий, и обители Почаевския украшение.

Кондак 3
Сила Духа Божественнаго обогати тя Иове премудре, егда татя монастырския пшеницы обличив, абие прощение тому даровал еси и утаенное паки ему возвратил еси покаяния его ради и алчущаго телесе насыщения, сие бо сотворив, окамененную умягчил еси душу и научил еси пети: Аллилуиа.

Икос 3
Имеяй присное попечение о душе твоей отче преподобне, возлюбил еси пещерное затворение, идеже дни и нощи в молитве провождая, единому Богу беседовал еси, темже и свет благодати его темную пещеру яко Фаворскую гору облиставаше и научаше всех взывати тебе:
Радуйся, молитвы непрестанное кадило;
радуйся, слез неистощимый кладезю.
Радуйся, древним Киево-Печерским затворником уподобивыйся;
радуйся, тех благодатныя дарования стяжавый.
Радуйся, яко молитвами твоими братия в терпении укрепляшеся;
радуйся, яко воздыханьми твоими демони от твоея обители отгнашася.
Радуйся, в темную пещеру небесный свет призвавший;
радуйся, и в наша страстныя души благодать от Господа приносящий.
Радуйся, скалы Почаевския твердейший адаманте;
радуйся, всея страны нашея преславный светильниче.
Радуйся, вселенския Церкве преславный столпе;
радуйся, всех молящихся прибежище.
Радуйся, Иове, преславный угодниче Божий, и обители Почаевския украшение.

Кондак 4
Бурю еретических нахождений отгнати желая, был еси в богоспасаемом граде Киеве со освященным Собором Православных, идеже неврежденную веру дерзновенно исповедал еси и к томужде вся люди увещевал еси, тем же и священныя книги тиснением предавати во обители Почаевстей не преставал еси, яко всем чтущим сия истинную веру содержати и православно пети Богу: Аллилуиа.

Икос 4
Слышаша иноцы Почаевстии непрестанную молитву Иисусову, твоими усты глаголемую, отче Иове, слезы же из очию твоею текущия видеша и твоею учительною беседою назидающеся, образом же жития твоего умиляющеся, глаголаху:
Радуйся, молитвенниче наш предобрый;
радуйся, учителю наш кроткий.
Радуйся, благодатныя слезы источаяй;
радуйся, и наша сердца умиляяй.
Радуйся, яко духовную жертву непрестанно ко Господу возносиши;
радуйся, яко райская утешения во уме твоем присно предносиши.
Радуйся, Крестителя в воздержании подражателю;
радуйся, многострадальнаго в долготерпении соревнователю.
Радуйся, тою обою дарований приобщивыйся;
радуйся, Ангельскаго сослужения сподобивыйся.
Радуйся, нищих питателю;
радуйся, скорбящих утешителю.
Радуйся, Иове, преславный угодниче Божий, и обители Почаевския украшение.

Кондак 5
Боготечней звезде уподобился еси преподобне, обходя землю Галицкую и Волынскую, светом же православия вся просвещая, ревнителем веры сугубую ревность внушая, добрых сердца в православии утверждая, ленивых же присно воздвизая к пению Богу: Аллилуиа.

Икос 5
Видеша монаси и простии людие игумена Почаевския обители земли копанием и древес саждением и гноя собиранием себе смиряюща, яко другому Дамаскину дивляхуся, и всяку гордыню еретическую возненавидеша, в православии же души своя утверждаху, глаголюще:
Радуйся, добраго подвига вождю;
радуйся, истинныя веры утверждение.
Радуйся, злочестивую гордыню еретиков обличаяй;
радуйся, православное смиренномудрие возношаяй.
Радуйся, яко тобою красоту благочестия познахом;
радуйся, яко тобою суету мирскую в себе попрахом.
Радуйся, богатым мира сего доброе вразумление;
радуйся, нищим и трудником благое утешение.
Радуйся, крест лишений волею подъявый;
радуйся, той крест нам носити пособствуяй.
Радуйся, Павла скинотворца последователю;
радуйся, Христа Бога рабе благий.
Радуйся, Иове, преславный угодниче Божий, и обители Почаевския украшение.

Кондак 6
Проповедник православныя веры и благочестия чрез все житие твое быв, Иове преподобне, сие святою кончиною твоею запечатлел еси, уже за седмицу предрек, безболезненно по причащении Святых Таин, прияти сподобился еси, никакоже о мире сем жалея, но разрешитися хотя и со Христом быти, во еже непрестанно воспевати Серафимскую песнь: Аллилуиа.

Икос 6
Возсия благолепною красотою мертвенное тело твое преподобне, еже бо в житии твоем постом и трудами сокрушал еси, тоежде Господь по успении твоем нетлением и благоуханием прослави, нас же пети тебе научи:
Радуйся, небес пресельниче;
радуйся, и земли молитвенниче.
Радуйся, исхождение твое от земных предуведевый;
радуйся, о том тепле возвеселивыйся.
Радуйся, яко и нас в бесстрашии ко смерти утверждаеши;
радуйся, яко упованию на милость Божию нас научаеши.
Радуйся, любителей временнаго живота обличителю;
радуйся, будущаго воскресения нетленный плотию свидетелю.
Радуйся, плоть свою в житии распинати поревновавый;
радуйся, туюжде по смерти благоуханну явивый.
Радуйся, неверующих явное обличение;
радуйся, надеющихся доброе утверждение.
Радуйся, Иове, преславный угодниче Божий, и обители Почаевския украшение.

Кондак 7
Хотя Бог о нетлении мощей преподобнаго Иова известити Церковь, трищи в сонном видении того являет митрополиту Дионисию, аки жива и волю Господню извествующа, ему же веровав Дионисий прослави Вседержителя и угодника Его с песнию: Аллилуиа.

Икос 7
Новаго тя о вселенней предстателя и чудотворца уведе освященный собор, монаси же и вси людие, егда пришедшу Дионисию на гору Почаевскую и житие твое уведевшу, честное твое тело из недр земли изнесеся нетленно и благоухания исполнено, чудеса же исцелений точаще, во еже вопити всем:
Радуйся, чудотворче новый и великий;
радуйся, всех святых сопричастниче.
Радуйся, землю Волынскую погребением твоим освятивый;
радуйся, явлением мощей твоих в православии нас утвердивый.
Радуйся, яко тобою исцеления хромии и слепии приемлют;
радуйся, яко твоего нетленнаго телесе демони трепещут.
Радуйся, и нас, пред гробом твоим стоящих умиления исполняяй;
радуйся, к желанию спасения нас подвизаяй.
Радуйся, аки живый, по смерти многим явивыйся;
радуйся, небесным силам духом твоим приобщивыйся.
Радуйся, чудес источниче;
радуйся, на демоны нам крепкий помощниче.
Радуйся, Иове, преславный угодниче Божий, и обители Почаевския украшение.

Кондак 8
Странное и дивное чудо показал еси преподобне, Иове, егда вскоре по прославлении твоем явился еси посреде двою Ангелу моляся в Церкви Почаевстей и плат миром исполненный девице некоей дал еси возложения ради на раны болящему игумену Досифею, той же исцеление прием абие к твоему гробу здрав припадаше, поя Богу: Аллилуиа.

Икос 8
Весь еси воистинну обители твоея покров и заступление Иове преславне, сие бо православнии людие разумеша, егда тя на небеси узреша Богородице молящася о спасении святыя Лавры, монахов же и мирских челевек, от агарян зело осаждаемиих, но от того часа в радости тебе поющих:
Радуйся, всемощный наш заступниче;
радуйся, святыя обители стено необоримая.
Радуйся, нападения агарянская отражаяй;
радуйся, стрелы на главы их возвращаяй.
Радуйся, яко умолил еси Ангельским Силам явитися к тех поражению;
радуйся, яко многие агаряне ко Христу тогда привел еси.
Радуйся, ратники на обитель воюющия в послушники Ея претворивый;
радуйся, непокоривыя беглецы сотворивый.
Радуйся, дерзости богоборныя посрамление;
радуйся, терпения христианского увенчание.
Радуйся, упования еже на тя не посрамивый;
радуйся, молитвенники твоя спасый и прославивый.
Радуйся, Иове, преславный угодниче Божий, и обители Почаевския украшение.

Кондак 9
Всякия отступства и колебания в вере народом и обителию твоею претерпенная, отпустив преподобный Иов, молитвами своими землю Волынскую ко православию возврати и в ней святыню Почаевскую твердейший оплот истинныя веры ныне являет, приходящим к ней тьмочисленным людем, святыя же мощи его усты и сердцем целующим и поющим Богу: Аллилуиа.

Икос 9
Витии славы твоея явишася православнии архиереи и весь освященный собор, егда мощи твоя, от отступник православия сокровенная, паки изнесоша во святую Церковь поклоняющимся христианом и в веселии глаголющим:
Радуйся, православныя Волыни солнце;
радуйся, истинныя Церкве звездо.
Радуйся, заре правды нощи прешедшей возсиявшая;
радуйся, луче, тьму ереси разгнавший.
Радуйся, в нове твоих мощей явлений паки чудеса источаяй;
радуйся, тем отступление от православия в конец обличаяй.
Радуйся, яко моления верных исполняти не престал еси;
радуйся, яко согрешения отец наших не помянул еси.
Радуйся, и нас врагом прощати научаяй;
радуйся, и нас в долготерпении утверждаяй.
Радуйся, малодушных обличение;
радуйся, кающихся прощение.
Радуйся, Иове, преславный угодниче Божий, и обители Почаевския украшение.

Кондак 10
Спасения нашего буди и ныне ходатай Иове преподобне, зане многия растленныя обычаи нечестивии людие введоша во страну нашу и теми крепость наша оскуде, но в сокрушении сердец наших к твоему заступлению припадаем, на твое же предстательство уповающе, вопием Богу: Аллилуиа.

Икос 10
Стена твердая православной веры в земле Волынстей и Галицстей чрез все житие твое был еси отче преподобне, но и по преставлении твоем явленьми и исцеленьми за истину побораеши, еще же и невидимо душам чад твоих беседуеши, да вси вопием ти:
Радуйся, спасения нашего поборниче;
радуйся, искушений злых отгнателю.
Радуйся, ко Господу дерзновение о нас стяжавый;
радуйся, от Того благодать исцелений приявый.
Радуйся, яко со Ангелы в раи днесь водворяешися;
радуйся, яко со Апостолы и мученики тамо ликуеши.
Радуйся, купно с ними о Церкви предстателю;
радуйся, милосердия Божия к нам ходатаю.
Радуйся, кающияся еще в житии твоем возлюбивый;
радуйся, ныне тех молитвы, яко фимиам к небесному Престолу возносяй.
Радуйся, и всех молящихся скорый слышателю;
радуйся, смиренных сердцем покровителю.
Радуйся, Иове, преславный угодниче Божий, и обители Почаевския украшение.

Кондак 11
Пение наше благодарное, от любве чистыя приносимое, приими угодниче Божий, яко же вдовицине лепте зане духовное имение наше нищетно пред тобою, благими же делы подражати тебе не возможем, но сокрушенная воздыхания о гресех наших приносяще, твоих добродетелей славою утешаемся, поюще Богу: Аллилуиа.

Икос 11
Светильник православныя веры и столп благочестия был еси отче наш Иове, словом, житием, любовию, верою, чистотою, в них же и нас твоими молитвами укрепи, всякия же ереси и развращенныя обычаи от нас далече отжени, да благодарственное сотворим ти пение:
Радуйся, Божий избранниче;
радуйся, Ангелов собеседниче.
Радуйся, и от нас духом любве твоея не отступивый;
радуйся, и нам от духа твоего дарования разделяяй.
Радуйся, яко зрящии нетленное тело твое на страсти телесная ополчаются;
радуйся, яко чтущии о святем житии твоем, душу свою очистити тщатся.
Радуйся, ревновати о своем спасении нас научаяй;
радуйся, и ближних спасению служити нас подвизаяй.
Радуйся, ревностию о православии сердца наша распаляяй;
радуйся, покаянием о гресех души наша сокрушаяй.
Радуйся, духовнаго сна разгнателю;
радуйся, духовныя бодрости подателю.
Радуйся, Иове, преславный угодниче Божий, и обители Почаевския украшение.

Кондак 12
Благодать непрестанныя молитвы и о теле небрежения, радости же духовныя и к ближним сострастия обильно стяжал еси отче Иове, тем же и нас ленивых и грешных, тоя причастники сотвори твоими всемощными молитвами, да мучительства страстей избавльшеся, воспоим Богу: Аллилуиа.

Икос 12
Поюще твое дивное житие на земли и на небеси прославление, молим тя Иове преподобне: утверди молитвами твоими православную веру во стране тебе присной, всю же Христову Церковь на земли противу неверия и ереси защити и укрепи, наша же не отвергни хваления сицевая:
Радуйся, Апостольскаго служения сопричастниче;
радуйся, пустыннических подвигов ревнителю.
Радуйся, нищеты духовныя благий образе;
радуйся, плача духовнаго богатный стяжателю.
Радуйся, яко кротостию твоею души татий и злодеев, аки наследие доброе Господеви привел еси;
радуйся, яко со всеми алкавшими и жаждавшими правды ныне во дворех Божиих насыщаешися.
Радуйся, от Бога со всеми милостивыми помилованный и прославленный;
радуйся, со всеми чистыми сердцем лицем к лицу ныне Того созерцаяй.
Радуйся, и нас от небесных с любовию назираяй;
радуйся, всем о православии трудящимся помощь от Господа подаваяй.
Радуйся, обитель твою от всякаго обстояния сохраняяй;
радуйся, и о всей вселенней молитвы Господеви возносяяй.
Радуйся, Иове, преславный угодниче Божий, и обители Почаевския украшение.

Кондак 13
О всеблаженне преподобне Иове, православныя веры великий ревнителю и ереси твердый обличителю! Малаго сего моления от убогих сердец наших к тебе возносимаго не отвержи, но буди нам присный в вере и покаянии наставник, в подвизех благий помощник и пред Господом о спасении нашем неустанный молитвенник, о тебе вопиющих Богу: Аллилуиа.
(Этот кондак читается трижды, затем икос 1 и кондак 1)

Молитвы Преподобному Иову Почаевскому

Молитва первая
О преподобне отче Иове, иноков трудолюбнаго жития богомудрый наставниче, кротости и воздержания, чистоты и целомудрия, братолюбия и нищелюбия, терпения и бдения от ранней юности до поздней старости неутомимый подвижниче, веры православныя великий ревнителю и непреоборимый поборниче, земли Волынския и Галицкия светило богосветлое и святыя Почаевския обители непобедимый защитниче! Призри оком благоутробия твоего на нас недостойных чад твоих, к тебе усердно по вся дни прибегающих и на боголюбивыя люди сия, пред твоими духоносными и многоцелебными мощами собравшияся и благоговейно к тем припадающия, и испроси предстательством твоим ко Всевышнему Владыце им и нам вся, яже к животу и благочестию, полезная и благопотребная: болящия исцели, малодушныя ободри, скорбящия утеши, обидимыя заступи, немощныя подкрепи и поверженныя долу возстави, всем вся, благодатию тебе от Бога данною, даруй по коегождо нужде и потребе, во спасение души и во здравие телу. Вознеси, угодниче Божий, всемощную молитву твою, да будет в стране нашей выну мир и тишина, благочестие и благоденствие, в судах правда и милость, в советех мудрость и благое преспеяние, да утверждается же во благих человецех верность, в злых же страх и боязнь, во еже престати им от зла и творити добрая, да тако в стране нашей Царство Христово растет и множится и да прославится в нем Бог, дивный во Святых Своих: Ему же единому подобает всякая слава, честь и поклонение Отцу, и Сыну, и Святому Духу, ныне и присно, и во веки веков. Аминь.

Тропарь Преподобному Иову Почаевскому

Тропарь, глас 4
Многострадальнаго праотца долготерпение стяжав, Крестителеву воздержанию уподобляяся, Божественныя же ревности обою приобщаяся, тех имена достойно прияти сподобился еси, и истинныя веры был еси проповедник безбоязнен, тем же монахов множество ко Христу привел еси, и вся люди в православии утвердил еси, Иове, преподобне отче наш, моли спастися душам нашим.

Кондак Преподобному Иову Почаевскому

Кондак, глас 4
Явился еси истинныя веры столп, Евангельских же заповедей ревнитель, гордыни обличение, смиренным же предстатель и научение, тем же и ублажающим тя, грехов отпущение испроси, и обитель твою невредиму сохрани Иове, отче наш, многострадальному подобный.
[/spoiler]

Раб божий Константин

Преподобный Иов Угольский.
[spoiler]Кондак 1

Избранный подвижниче карпаторусский и истинный пастырю Церкве Христовы, твердый столпе Православныя веры, блаженне отче наш Иове! Почитаем тя любовию и похвальная восписуем ти: яко в земном житии твоем верен пребывал еси Христу, в гонениях, тесноте и скорбех благодаривый Бога. Не престай моляся о нас, поющих ти: Радуйся, преподобне отче наш Иове, земли Карпатския похвало и молитвенниче о нас предивный.

Икос 1

Ангельского образа и постнического жития от отроческого возраста со старшим братом возжелал еси, крестным целованием сие показал еси, Господеви послужити желая, да приобрящеши богатство неиждиваемое. Сего ради благоговейно взываем ти: Радуйся, родителей благочестивих чадо богоизбранное; Радуйся, из млада ангельскими нравы украшенный. Радуйся, чистое житие от юности возлюбивый; Радуйся, в богомыслии отрочество твое проводивый. Радуйся, от лет юных сердце твое к подвижничеству склонивый; Радуйся, из детска к молитве и послушанию прилежавый. Радуйся, еще во отрочестве к иноческому житию устремивыйся; Радуйся, волю свою воли Божией покоривый. Радуйся, преподобне отче наш Иове, земли Карпатския похвало и молитвенниче о нас предивный.

Кондак 2

Видя Церковь Православную гонимую и раздираемую, яко ризу Христову, от врагов еретических и свирепствующих, с домашними твоими скрывати в доме вашем истинного пастыря Церкве Христовы, иеромонаха Амфилохия не убоялся еси, отче Иове, с благодарностью взывая Богу: Аллилуия.

Икос 2

Разум богопросвещенный от отроческих лет имея, о спасении души своея помышляя, сердце твое вперил еси в небесная и стал еси на стезю многотрудного и скорбного монашеского жительства. Мы же, дивящеся толикому твоему стремлению в горняя, вопием ти сицевая: Радуйся, на Промысл Божий все упование возложивый; Радуйся, святой воле Его всего себе покоривый. Радуйся, яко заступления Христова взыскал еси; Радуйся, от юности навыкший богоугождению. Радуйся, увеселения мирская возненавидевый; Радуйся, сверстником твоим пример благонравия подававый. Радуйся, усердный к Богу и Матери Божией молитвенниче; Радуйся, чистотою душевною и телесною к Богу возвысивылся еси. Радуйся, преподобне отче наш Иове, земли Карпатския похвало и молитвенниче о нас предивный.

Кондак 3

Силою Вышняго, даровано тебе преподобие, преукрашен был еси долготерпением, возжелал еси с юности твоея Богу послужити. Сего ради в Православную Сербию направился еси, дабы во святых обителях Богу воспевати: Аллилуиа.

Икос 3

Имуще богоприятное желание подвизатися во едином из древних монастырей Сербских, путь дальний и многотрудный предприял еси. Но препону в деле сем испытал еси и вспять насильственно возвратитися понужден был еси. Темже ублажающе изволение твое вопием ти сице: Радуйся, равноангельскаго подвига возжелавый; Радуйся, яко сего ради достигнути Православныя Сербии восхотел еси. Радуйся, в жертву благоприятную всего себе Богу принесый; Радуйся, образе нищеты духовныя. Радуйся, житию и подвигом древних отец поревновавый; Радуйся, начатки мыслей и чувств душевных Богу посвятивый. Радуйся, Закон Бога на скрижалех сердца твоего имевый; Радуйся, иго Христово, благое и легкое, на рамо твое восприяти возжелевый. Радуйся, преподобне отче наш Иове, земли Карпатския похвало и молитвенниче о нас предивный.

Кондак 4

Буря испытаний не поколеба упования твоего на премудрый Промысл Божий, егда предприял еси многотрудное путешествие в удел Божией Матери - святую гору Афон, дабы в горении духа воспевати Богу: Аллилуиа.

Икос 4

Слыша о великих подвигах веры и благочестия Богомудрых отцев и подвижников святыя горы Афон, потщался еси вдатися их водительству, но волею Божиею возвращен был еси в землю Карпатскую. Мы же восхваляюще стремление твое, во еже угодити Господеви, приносим ти хвалебную песнь: Радуйся, тленная мира сего ни во что же вменивый; Радуйся, душу твою в горняя обители устремивый. Радуйся, истиннаго монашескаго делания ревнителю; Радуйся, внутреннего человека в себе на всяк день обновляяй. Радуйся, яко сего ради многи скорби и труды подъял еси; Радуйся, яко вся, ради Возлюбившаго тя, претерпел еси. Радуйся, подвигов угодников Божиих подражателю; Радуйся, чистоты сердечныя изрядный хранителю. Радуйся, преподобне отче наш Иове, земли Карпатския похвало и молитвенниче о нас предивный.

Кондак 5

Боготканную одежду в святом пострижении в Троицкой Пустыни прияв, Иове всехвальне, горячую молитву излиял еси к Богу, да укрепит тя в монашеском делании, со всеми иночествующими воспевая Богу: Аллилуиа.

Икос 5

Видяще иноцы Свято-Троицкия Городиловския обители твое достойное житие, радовахуся таковаго имея подвижника и молитвенника о всем мире, Господа благодаряще, темже и мы тебе вопием сице: Радуйся, всем сердцем Бога возлюбивый; Радуйся, всею душею Ему послуживый. Радуйся, постничество чудное явивый; Радуйся, невозмущаемое безмолвие стяжавый. Радуйся, древним пустынножителем добре подражавый; Радуйся, яко непрестанным бдением безплотным уподобивыйся. Радуйся, яко свет добрых дел твоих немерцаемо сияет; Радуйся, святаго смирення преисполненный. Радуйся, преподобне отче наш Иове, земли Карпатския похвало и молитвенниче о нас предивный.

Кондак 6

Проповедию веры Православныя бысть житие твое достохвальне Иове, смирением, постом, наипаче же непрестанною молитвою Богу угождал еси, преподобне, благодарственно поя ангельскую песнь: Аллилуиа.

Икос 6

Возсиял еси Божиею благодатию, преподобне отче, за всецелое отречение воли своея, темже и прослави тя Господь дарами Святаго Духа, имиже во славу Господню потрудился еси. Таковому о тебе промышлению Божию радующеся, зовем ти: Радуйся, небесному покровителю своему, Иову многострадальному, подражавый; Радуйся, якоже и он, Бога в сердце своем выну носивый. Радуйся, православнаго народа усердный заступниче; Радуйся, к Богу и Богородице непрестанный о нас молитвенниче. Радуйся, щедротами Святаго Духа боголепно украшенный; Радуйся, всем спастися, и в разум истины приити желавый. Радуйся, подражателю преподобных в совершенном терпении; Радуйся, подвигов иноческих ревностный совершителю. Радуйся, преподобне отче наш Иове, земли Карпатския похвало и молитвенниче о нас предивный.

Кондак 7

Велие сокровище любви стяжал еси к ближним пребодобне отче Иове, егда приходящие к тебе народы ежедневно на молитву, утешение духовное и пропитание телесное приимаху, с благодарностию возвращахуся во своя си, Богу же поя: Аллилуиа.

Икос 7

Новаго тя Иоанна Кронштадского зрим, о угодниче Христов, якоже бо той явися великий молитвенник земли Российския, сице и тебе Господь яви в земли Карпаторусской изрядного молитвенника и чудотворца, дабы укрепились сердца людей в Православии. Темже и прославляя дивного во святых своих Бога, взываем ти сице: Радуйся, в монашеском житии усердно подвизавыйся; Радуйся, на ниве Христовой изрядно потрудивыйся. Радуйся, единое на потребу всегда искавый; Радуйся, очи ума и сердца своего на высоту небесную вперивый. Радуйся, отче чадолюбивый, о плененных моливыйся; Радуйся, о ближних твоих прилежно пекийся. Радуйся, винограда Христова делателю; Радуйся, и за ны пред Богом усердный ходатаю. Радуйся, преподобне отче наш Иове, земли Карпатския похвало и молитвенниче о нас предивный.

Кондак 8

Егда из заточения в свое отечество возвратился еси, блаженне, обитель твоя с радостию велиею прият тя, и вся братия единогласно избра тя в настоятеля себе и духовнаго руководителя, дабы единеми усты и единем сердцем Святей Троице Богу воспевати: Аллилуиа.

Икос 8

Всего себе Христу и братии Троицкия Пустыни предал еси, блаженне Иове, являя им образ кротости, смирения и целомудрия. Благочестивии же людие, видяще в тебе добраго пастыря и учителя, с радостию притекаху к тебеи велие утешение и ослабу в скорбех своих, твоих ради молитв к Богу, приимаху.Сего ради, восхваляюще любовь твою ко Господу и ближним, вопием ти сице: Радуйся, огнем Божественныя любве,ветхаго человека в себе умертвивый; Радуйся, во плоти, аки безплотен на земли поживый. Радуйся, человече небесный и ангеле земный; Радуйся, сосуде, благодати Божией исполненный. Радуйся, мудрый к Богу путеводителю; Радуйся, заповедей Господних верный исполнителю. Радуйся, благодатный источниче исцелений; Радуйся, реки воды живыя источаяй. Радуйся, преподобне отче наш Иове, земли Карпатския похвало и молитвенниче о нас предивный.

Кондак 9

Новыя испытания и скорби в жизни твоей претерпел еси, всечесный отче, егда святая обитель твоя гонима бяше и закрываема и братия разсееваема бе. Видяще сие, со скорбию возносил еси песнь Богу: Аллилуиа.

Икос 9

Никиих человеческих похвал не довлеет святому житию твоему, преподобне отче Иове. Кто бо может достойно восхвалити тя, за скорби, гонения, заточения и скитания твоя, еже претерпел еси Господа ради в научение и спасение ближних, да достойно в вере Христовой укрепятся. Сего ради благодарни суще, благодеющему тобою Богу, вопием ти сице: Радуйся, непостижимые судьбы Божии предвидевший; Радуйся, благую волю Божию верным, открывавый. Радуйся, непременно исполняти ю побуждавый; Радуйся, благодатным учителем для братии бывый. Радуйся, молитвенных бдений неусыпный ревнителю; Радуйся, внутренняго безмолвия и тишины ума хранителю. Радуйся, яко своими подвигами, древним преподобным отцем уподобивыйся; Радуйся, своим смирением, терпением и кротостию вся искушения победивый. Радуйся, преподобне отче наш Иове, земли Карпатския похвало и молитвенниче о нас предивный.

Кондак 10

Спасительный подвиг земнаго жития твоего совершая, возжелал еси, блаженне, избрати себе тихую пристань - храм святаго великомученика Димитрия на месте подвигов древних отцев, в селении Малая Уголька, дабы по примеру их подвизатися и чистым сердцем воспевати выну Богу: Аллилуиа.

Икос 10

Стены каменныя крепльше бе любовь твоя к Богу и ближнему своему: до последних дний жития твоего, в течении многих лет ежедневно совершал еси Божественную Литургию, превозмогая немощь телесную. Приими же, угодниче Христов, от наших любящих тя сердец пения сицевая: Радуйся, яко имя Божие тобою до последняго вздоха призывашеся; Радуйся, до конца в послушании Церкви поживый. Радуйся, яко верным людем добре послуживый; Радуйся, за служение сие венец нетленный от Господа получивый. Радуйся, блаженство вечное со святими унаследовавый; Радуйся, со Ангелы небесными Престолу Божию предстояй. Радуйся, о нас грешных непрестанно молитву пред Ним возносяй; Радуйся, о всех верных притекающих к тебе, пред Богом предстательствуяй. Радуйся, преподобне отче наш Иове, земли Карпатския похвало и молитвенниче о нас предивный.

Кондак 11

Пение всеумиленное приносим Всемилостивому Богу за Его неизреченния блага, яко дарова нам тебе, благодатнаго авву и духовника богомудраго, ибо по благословению твоему, великое множество благочестивых мужей сан пресвитерский прияша, дабы у Святаго Престола воспевати песнь Богови: Аллилуиа.

Икос 11

Светоприемна светильника яви тя Господь Бог, преподобне Иове, яко не угасл еси, а преселился еси от жизни временныя в Царствие Небесное, в день памяти святаго равноапостольного князя Владимира, да с ним светом немеркнущим сияеши и радость горнюю разделяеши.Темже радующеся твоему небесному предстательству о нас, воспеваем ти таковая: Радуйся, угодниче Божий предивный. Радуйся, яко праведною кончиною скончался еси; Радуйся, яко и по смерти на небеси живеши; Радуйся, усердный слуго, сотворивый волю Господина своего. Радуйся, терпением правды ради, в Царствие Небесное водворивыйся; Радуйся, горния славы приобщивыйся. Радуйся, наследниче жизни вечныя; Радуйся, блаженство вечное со святыми унаследовал еси. Радуйся, преподобне отче наш Иове, земли Карпатския похвало и молитвенниче о нас предивный.

Кондак 12

Благодать и милость излияся от тебе, преподобне отче Иове, в день обретения честных мощей твоих, велиим благоуханием наполнишася холмы и горы обители Угольския. Мы же, исполнени радости о сем, дивному во святых Своих Господу, из глубины души вопием: : Аллилуиа.



Икос 12

Поюще Бога, дивнаго во святых Своих, прославльшаго тя в лике преподобных, ублажаем болезни и труды твоя, яже во славу Божию понесл еси, восхваляем скорби и подвиги твоя, яже за Христа претерпел еси, почитаем пастырскую кротость и смирение твое, и воспеваем тя похвалами сицевыми: Радуйся, служителю Христов и избранниче Божий; Радуйся, пастырю добрый, смиренный и кроткий. Радуйся, к лику преподобных сопричтенный; Радуйся, твоим прославлением радости духовныя нас исполняяй. Радуйся, наставниче предивный, духовныя чада богомудро наставлявый; Радуйся, яко отныне имя твое со святыми прославляется. Радуйся, пресветлый лик Господа видети сподобивыйся; Радуйся, яко во светлостех святых Его ныне пребываеши. Радуйся, преподобне отче наш Иове, земли Карпатския похвало и молитвенниче о нас предивный.

Кондак 13

О преславний и предивный угодниче Христов, преподобне и богоносне отче наш Иове! Приими ныне малое сие моление наше, с любовию тебе приносимое, и теплым предстательством твоим испроси нам у Христа Бога избавление от всех бед и напастей, и наследники Царствия Небеснаго быти сотвори, да с тобою немолчно воспеваем Богу: Аллилуиа, Аллилуиа, Аллилуиа.





(Этот кондак читается трижды, затем икос 1 и кондак 1)







Молитва преподобному и богоносному отцу нашему Иову Угольскому



О, преподобне и богоносне отче наш Иове, изрядный угодниче Христов и великий Карпатския земли молитвенниче и чудотворче! Святыя обители Городиловския во славу Живоночальныя Троицы первый основателю и устроителю! Во дни земнаго жития твоего многия на путь правый наставивый и в Царствие Небесное мудре руководивый, скорбныя утешивый, падающим подавый руку помощи, и ко всем добр, милостив и сострадателен отец бывый. Ты ныне, в небесней пребывая светлости, нетлением же святых мощей твоих обитель Угольскую в ней же и прославился еси, возродивый, умножи любовь твою к нам немощным, в море житейстем различне бедствующим, и искушаемым духом злобы и страстьми своими, воюющими на дух наш. Сего ради смиренно молим тя, ангеле земный и небесный человече, святый отче: буди всем нам помощник скорый во всякой скорби и обстоянии. Наипаче в час кончины нашея явися нам заступник благосердый, да не преданы будем на мытарствах воздушных власти злобнаго миродержца, но да сподобимся безпреткновенного восхода в Царствие Небесное.

Ей, отче, молитвенниче страны нашея и всех к тебе с умилением и любовию взывающих: не посрами упования нашего, но призри на смиренныя моления наша, и предстательствуй за нас, пред Престолом Живоначальныя Троицы, Ей же верно послужил еси в земном житии твоем, да сподобимся и мы, купно с тобою и со всеми святыми, в селениих райских славити Единого в Троице Бога, Отца и Сына и Святого Духа во веки веков. Аминь. 



Тропарь святого, глас 8

Весь был еси, отче, в дольнем житии своем правило веры и образ кротости. Троицкия пустыни начальниче и основателю, жития монашеского на горах угольских возродителю. В молитвах, бдении и в трудех монашеских для братии зерцало подражания. В бедах и гонениях терпеливий сносителю, и всем приходящим к тебе помощь и утешение. Не престай моляся о всех, чтущих твою память, Иове,преподобне отче наш, Карпатския страны похвало.





Кондак, глас 3

Преподобне отче Иове преславне, ты весь пламенем аки свеча горел еси пред Богом. В неусыпном бдении предстоя моляся о мире, и ныне ликуеши в чертозе небеснем, поминай нас чад твоих притекающих и вопиющих тебе: радуйся Иове, преподобне отче наш.





Величание

Ублажаем тя, преподобне отче наш Иове, и чтим святую память твою, наставниче монахов и собеседниче ангелов.[/spoiler]

Раб божий Константин

Акафист преподобным Ионе и Нектарию Казанским.
[spoiler]Кондак 1


Избраннии чудотворцы и угодницы Христовы, / святителя Гурия чуднии помощницы и града Казани предивное украшение! / Приимите от нас, недостойных, подобающую вам похвалу,/ и яко имеюще дерзновение ко Господу, от всяких бед и скорбей свободите зовущих: / Радуйтеся, преподобнии Ионо и Нектарие, / святителя Гурия чуднии помощницы и чудотворцы преславнии.


Икос 1

Ангелов Творец и всея твари Содетель, предуведевый яко царю Иоанну быти на вы во гневе неправедном, отъял вас повелением царевым от мирскаго прозябения, яко быти сосланныма вам на труды тяжкия в новопросвещенный град Казань, и показал есть миру истинных ревнителей о вере Православней и апостолом сослужителей. Нас же научи вопити сице вам:

Радуйтеся, силою Свыше на труд крестоношения облеченнии;
Радуйтеся, смирением на высоту вознесеннии.
Радуйтеся, кротости приснии рачители;
Радуйтеся, всех добродетелей неленостнии исполнители.
Радуйтеся, воле Божией себе предавшии,
Радуйтеся, Отечество новое восприявшии.
Радуйтеся, разум свой в послушание веры пленившии;
Радуйтеся, чрез все житие свое Богу послужившии.
Радуйтеся, преподобнии Ионо и Нектарие, святителя Гурия чуднии помощницы и чудотворцы преславнии.

Кондак 2

Видевше себе невинно оклеветанныма и в царевом повелении Божественное попущение помышлявше, вы, блажении, оставивше Бежецкия имения, последоваста на служение Первосвятителю страны Казанския, не с унынием сердечным, но с велию радостию поюще Богу за сие: Аллилуиа!


Икос 2

Разум Божественный имея, увиде святитель Гурий в вас подражателей Христовых, яко тяготившихся праздности болярской, пребывали есте в трудех и нищете духовней не похвалы ради, но страха Божия. Ему же самому явистася опорой в делех апостольских; сего ради приимите от нас сицевая:

Радуйтеся, пастыреначальников усерднии служители;
Радуйтеся, богопоставленным властем подобающего почитания учители.
Радуйтеся, уважения святительскаго снискавшии;
Радуйтеся, к нему любовь народа притяжавшии.
Радуйтеся, яко возлюбили есте Христово смирение;
Радуйтеся, яко Крест Его понесли с преданностию и терпением.
Радуйтеся, друг друга тяготы носити нас научившии;
Радуйтеся, житие свое добродетельми благоукрасившии.
Радуйтеся, преподобнии Ионо и Нектарие, святителя Гурия чуднии помощницы и чудотворцы преславнии.

Кондак 3


Силою Вышняго укрепляеми и наставлениями первосвятительскими направляеми, вы, преподобнии, послужили есте граду новопросвещенному. И ныне о нем молите Христа Бога нашего. Мы же поем Ему: Аллилуиа!


Икос 3

Имея помыслы чисты и души непорочныя, кротостию и любовию отгоняюще тьму языческаго нечестия, вкупе со святыми наставники привлекали есте к вере Христовой люди Казанския, добродетельми своими и благочестием. Сего ради зовем вам:

Радуйтеся, в заповедех Господних право ходившии;

Радуйтеся, всяку добродетель в себе изобразившии.

Радуйтеся, лучи святительскаго сияния;

Радуйтеся, трубы апостольскаго вещания.

Радуйтеся, скорби жития своего добре претерпевшии;

Радуйтеся, тяготы дневныя до конца неослабно понесшии.

Радуйтеся, дольняя оставляти и духом взлетати к горним нас увещевающии;

Радуйтеся, во всем волю Божию зрети нам помогающии.

Радуйтеся, преподобнии Ионо и Нектарие, святителя Гурия чуднии помощницы и чудотворцы преславнии.


Кондак 4

Буря помышлений сумнительных непоколеба вас, егда царева гнева не убоялися, и токмо в страсе пребывавше пред Царем Небесным, взывали есте к Нему: Аллилуиа!

Икос 4

Слышавше о вас отцы добронравнии, людие христианстии и агарянстии дивляхуся житию вашему, яко телом в болярских ризах пребывали есте, душею же во смиренных иноцех ходяща и бегающа от славы человеческия и искавша токмо славы Единого Бога. Сего ради ублажаем вас сице:

Радуйтеся, града Казани похвало и украшение;

Радуйтеся, делатели добрии, пастырем опора и вспоможение.

Радуйтеся, яко во Христа облекшиися;

Радуйтеся, яко Им от напастей оградившиися.

Радуйтеся, очи свои всегда на Небо возводившии;

Радуйтеся, славу небесную паче земной возлюбившии.

Радуйтеся, себя и весь живот Господеви предавшии;

Радуйтеся, высоту любве истинныя словом и делом нам показавшии.

Радуйтеся, преподобнии Ионо н Нектарие, святителя Гурия чуднии помощницы и чудотворцы преславнии.

Кондак 5

Боготечною звездою возсия над новопросвещенной страною святитель Гурий, вы же, яко луч добродетельнаго сияния его явились есте, и ныне с ним вкупе у Престола Божия воспеваете Христу: Аллилуиа!

Икос 5

Имевше веру ко святителю Гурию даже по смерти его, воздвигли есте над гробом каменну храмину во обители Боголепнаго Спасова Преображения, и со многими почестьми погребли есте. Тем же дивлящеся преданности вашей, вопием сице:

Радуйтеся, образи содружества непорочнаго и нелестнаго;

Радуйтеся, светильницы всесветлии, горящие любовию Божественною.

Радуйтеся, яко Гурия Богоноснаго подражатели;

Радуйтеся, яко Варсонофия Богомудраго последователи.

Радуйтеся, гроба святительскаго устроители;

Радуйтеся, прославления, иже во святых, святителей предвозвестители.

Радуйтеся, вкупе со святыми пожившии, и по смерти неразлучившиися;

Радуйтеся, яко от обители земныя во обитель Небесную водворившиися.

Радуйтеся, преподобнии Ионо и Нектарие, святителя Гурия чуднии помощницы и чудотворцы преславнии.

.

Кондак 6


Проповедник Богоносный избран бе для Казанской земли - Гурий чудный святитель. Посреди же сотрудник его и ты, преподобный Ионо, последовал еси в новое Отечество, царскому повелению ничтоже противовещая, яко виде в нем волю Божию, поя Ему за сие: Аллилуиа!

Икос 6

Возсиявый во граде Казани Cвет Истины, Христос Царь Славы, чрез царя земнаго избра тя, преподобне Ионо, в перваго зде болярина архиепископскаго, яко в Дому Пречистыя Богородицы честнаго Ея Благовещения был еси опорою апостолу Казанския Церкви. Сего ради ублажаем тя сице:

Радуйся, незлобием своим духа злобы победивый;

Радуйся, отче краснодушный и чадолюбивый.

Радуйся, наследника своего добрый учителю;

Радуйся, о храмах Божиих рачителю.

Радуйся, чистоты душевныя сокровище;

Радуйся, любве и кротости вместилище.

Радуйся, правды и истины паче всего искавый;

Радуйся, мзду вечную добродетельми стяжавый.

Радуйтеся, преподобнии Ионо и Нектарие, святителя Гурия чуднии помощницы и чудотворцы преславнии.

Кондак 7


Хотяй Всевидец Господь прославити тя, блаженне Ионо, постави во смирение людем Своим, и изведе из веси Застолбской в новопросвещенный град. Сему Божию промышлению дивящеся, со умилением зовем Ему: Аллилуиа!

Икос 7

Новопросвещении людие дивляхуся о тебе, отче, яко и после смерти начальника твоего не оставил ecи любви к нему, и соградил еси над гробом храмину, в коей и сам положися по времени, и после тебе погребошася людие святии. За сей труд славный поем ти:

Радуйся, славы человеков избегавый;

Радуйся, Небесною славою душу твою осиявый.

Радуйся, яко дела твоя свыше благословишася;

Радуйся, яко труды твоя святым наставником освятишася.

Радуйся, заповедей Божиих верный исполнителю;

Радуйся, добродетели твердый ревнителю.

Радуйся, храмины чудной создателю;

Радуйся, святым земнаго пристанища основателю.

Радуйтеся, преподобнии Ионо н Нектарие, святителя Гурия чуднии помощницы и чудотворцы преславнии.

Кондак 8


Страннолепная храмина не токмо святители вместила есть, но и прежде отроча твое, отче, преподобнаго Нектария. Ты же, схорони сына рядом с Гурием святителем, рек: верую бо, молитвами святаго, якоже обещамися, да умолит и о нас Христа; и благодари Бога о скорбех своих, слезами умываяся и зовя к Нему: Аллилуиа!

Икос 8

Весь добродетелий исполненный, воистину во плоти бе Ангел, преподобне Ионо, яко дом твой добрым пристанищем ста, идеже приходящих к тебе с любовию принимал еси, скорби их утешая. Сам же печали не сносив, презре мир, и во обитель вселися у гроба милых тебе человек, свой дух Богу предаде. За сие вопием ти:

Радуйся, всего себе воле Божией предавый;

Радуйся, веру в делех жития своего показавый.

Радуйся, яко отец чадолюбивый чадо свое назидавый;

Радуйся, яко за ним во обитель вселися и имения своя раздавый.

Радуйся, истиннаго послушания учителю;

Радуйся, человеком земным небесный предстателю.

Радуйся, последняя твоя Богови отдавый;

Радуйся, добрым расточением богатая собравый.

Радуйтеся, преподобнии Ионо и Нектарие, святителя Гурия чуднии помощницы и чудотворцы преславнии.

Кондак 9


Вся удиви Господь, яко волею по стези благочестия наставлен бе от юности твоея, и яко воистину возлюбивша Духа, и отверзи уста твоя вкупе со святыми наставницы пети Ему: Аллилуиа!

Икос 9

Витий человеческая уста не возмогут изрещи чуднаго жития твоего, угодниче Божий, яко за отцем изшед в неведомыя земли, явися миру в одеждах болярских, но прежде монашества монахом познася, и о богатстве мира не радел еси. Мы же поем ти:

Радуйся, издетска страх Господень стяжавый;

Радуйся, семя слова Божия от юности восприявый.

Радуйся, верою и любовию измлада украшенный;

Радуйся, многими слезами и воздыхании очищенный.

Радуйся, добродетели высокия в сердцы вкоренивый;

Радуйся, в заповедех Господних вся дни живота своего ходивый.

Радуйся, добродетели отца наследниче;

Радуйся, за всех и за вся теплейший молитвенниче.

Радуйтеся, преподобнии Ионо и Нектарие, святителя Гурия чуднии помощницы и чудотворцы преславнии.


Кондак 10


Спасти хотя душу свою, о теле всячески не радел еси, преподобне, и под богатыми ризами отай власяницу жестоку нося, изнуряя бо плоть немощную, показа крепость духа, и пребывая в слезах и сокрушениих, с радостию едино токмо Богу воспевал еси: Аллилуиа!

Икос 10

Стеною обители Спасовой решив оградити себе от жития мира сего, блаженне Нектарие, и премени бо тленная на нетленная, получив родительское благословение, в монашеское облачися. Мы же зовем ти:

Радуйся, тесный путь спасения от юности возлюбивый;

Радуйся, вся плотския похоти Бога ради умертвивый.

Радуйся, измлада смирения хранителю;

Радуйся, отцу твоему воздержания учителю.

Радуйся, Бога яко истиннаго Отца нашего, познавый;

Радуйся, яко чистотою сердца Его созерцавый.

Радуйся, яко прежде монашества иноком ся соделавый;

Радуйся, яко в слабом телеси велию силу душевную явивый.

Радуйтеся, преподобнии Ионо и Нектарие, святителя Гурия чуднии помощницы и чудотворцы преславнии.

Кондак 11

Пение приносим ти, блаженне Нектарие, яко вси людие, взирающе на смиренное твое житие, дивляхуся, яко отринул еси богатство родительское и нищетою духовною облеклся еси, в посте и молитве пребывая, к чистому житию всех возбуждал еси, поя Богу: Аллилуиа!

Икос 11

Светоприемна светильника яви тя Господь Бог, яко тело твое постом и бдением удрученное, по времени обретеся святителем Ермогеном, и како Гурия чуднаго, Варсонофия мудраго и отца твоего Иону, одари нетлением. Мы же, прославляя Господа всех, вопием ти сице:

Радуйся, светильниче пресветлый благодатнаго сияния;

Радуйся, цвете благоуханный добраго воспитания.

Радуйся, хлебы трапезу украшавый;

Радуйся, яко от богомудрых отец взамен пищу нетленную получавый.

Радуйся, родители и наставники твоя кротостию удививый;

Радуйся, Господа Бога паче всех возлюбивый.

Радуйся, нищетою духа от богатства тленнаго оградивыйся;

Радуйся, яко прежде отца со святым Гурием в небесныя чертоги вселивыйся.

Радуйтеся, преподобнии Ионо и Нектарие, святителя Гурия чуднии помощницы и чудотворцы преславнии.

Кондак 12


Благодати исполненнии сосуди показашася честныя ваша мощи, преподобнии Ионо и Нектарие, яко же не токмо нетлением одари их Господь, но и силою чудес награди. Мы же дивному во святых Своих Богу за сие вопием: Аллилуиа!

Икос 12

Поюще хвалебную песнь, восхваляем святую память вашу, отцы досточуднии, яко послужили есте в мире верно земли Казанстей апостолу, и ныне с ним предстоите Престолу Божию, и молитеся о нас недостойных. Мы же радостно зовем вам:

Радуйтеся, душевною благодатию от Бога телеса просветившии;

Радуйтеся, яко оные и по смерти нетленно сохранившии.

Радуйтеся, житие свое земное благочестно скончавшии;

Радуйтеся, по смерти силу чудес от Бога приявшии.

Радуйтеся, всех Небесных сил сожители;

Радуйтеся, жизни богоугодныя учители.

Радуйтеся, чтущим память вашу спасение и утешение низпосылающии;

Радуйтеся, со всеми святыми в райских обителех ныне пребывающии.

Радуйтеся, преподобнии Ионо и Иектарие , святителя Гурия чуднии помощницы н чудотворцы преславнии.



Кондак 13


О преславнии чудотворцы и угодницы Христовы, преподобнии отцы наши Ионо н Нектарие! Приимите от нас, недостойных, сие малое молитвенное приношение. И со Пресвятой Владычицею Богородицею и всеми святыми Казанскими принесите молитву к Богу; да избавит нас от всех скорбей и бед, оградит град наш и умирит жизнь нашу, и не лишит Небеснаго Своего Царствия, идеже вси угодившии Богу со ангелы немолчно вопиют: Аллилуиа!

Этот Кондак трижды. Затем читается Икос 1 , Кондак 1.

И молитва:


Молитва преподобным Ионе и Нектарию, Казанским чудотворцам.

О преподобнии отцы наши Ионо н Нектарие! Услышите ныне нас, вам усердно молящихся и припадающих зде, на земли, к раце честных мощей ваших. Вы же духом на Небесех Пресвятей Троице предстояще со святителем Гурием, молитеся о нас грешных, да избавимся от всяких болезней и обстояний, и благочестно поживем в настоящем житии, и да явимся святаго вашего жития подражатели. Умолите Христа Бога даровати нам оставление грехов, елико согрешихом от юности нашея делом, словом, помышлением; да Своею благодатию водворит Господь среди нас единодушие и любовь. Оградите всех навет вражеских неусыпными молитвами вашими град Казань, в нем же добродетельно поживше, Богу угодили есте, а вся люди в нем живущия от бед и скорбей: яко да не восстанут чада на родители своя и не погубят их междоусобныя распри, и да не оскудеют в богохранимом граде сем ревнители иноческаго благочестия. Испросите же нам у Господа вечнаго спасения, яко да вашим теплым предстательством спасаеми, славу возсылати сподобимся в Троице славимому Богу нашему - Отцу и Сыну, и Святому Духу, ныне н присно, и во веки веков. Аминь.


Тропарь, глас 4

Подвигшася к Богy добре, блаженнии, земная остависта и небесная восприяста. Монаха два, един единаго родивый, в граде новопросвещеннем пастырю дивному верно послужиста. И по смерти его веру к нему держаста не сумненну, храмину каменну над гробом соградиста: в той же и сами близ него погребошася, и многим нетлением от Бога почтени бывше. Преподобнии Иoнo и Нектарие со святителем Гурием, молите Христа Жизнодавца, да спасет души наша.

Кондак, глас 2


Преподобных отец двоица единонравная, богомудренно преселистася во град Казань, и яко луча возсияста в новом Отечестве, зарями сияя солнца, блаженнии, пречуднаго Гурия, земли Казанския просветителя, тем же вы почитаем, Иoнo и Нектарие, чудотворцы преславнии и преподобных украшение.[/spoiler]

Раб божий Константин

Акафист преподобному Ионе, Киевскому чудотворцу.
[spoiler]Кондак 1

Избранный угодниче Христов и Чудотворче, преподобне отче Ионо, возсиявый мирови, яко звезда богосветлая, жития твоего добротою и множеством чудотворений, восхваляем тя любовию в песнех духовных: ты же, яко имеяй дерзновение ко Господу, молитвами твоими от всяких нас бед свободи, да зовем ти; Радуйся, преподобне отче наш Ионо, града Киева похвало и украшение!

Икос 1

Ангельский нрав имел еси, отче преподобне, и яко бесплотный, непорочно житие совершил еси на земли, дивный образ совершенства духовнаго нам оставив, да подражаем добродетелем твоим, и зовем ти сице: Радуйся, цвете благоуханный добраго воспитания: Радуйся, сосуде Божественнаго избрания; Радуйся, яко любезная и красная мира сего презрел еси: Радуйся, яко Небесных и нетленных, желанием вожделел еси; Радуйся, волею твердою воли своея отрекийся: Радуйся, отсечением страстей угодивый Богу и спасыйся; Радуйся, преподобне отче наш Ионо, града Киева похвало и украшение!

Кондак 2

Видя Господь душу твою, яко ниву благовозделанную к плодоносию духовному, от юности к исканию единаго на потребу, направи твой помысл, преподобне, темже любве ради Христовы, родителей твоих и дом отеческий оставил еси, и всякаго пристрастия суетнаго свободився, притекл еси в пустынь Саровскую под криле Серафима преподобнаго, на подвиги иноческия, зовый спасающему тя Богу: Аллилуйя.

Икос 2

Разумом богопросвещенным постигл еси суету мира сего и непостоянство, в нем же радость сменяется скорбию, благополучие наветуется нечаянными бедами. Темже вечных нетленных благ возжелел еси, отче преподобне, и сия взыскати потщался еси отречением мирских благ, и вольною нищетою, подвигая нас звати тебе: Радуйся, тесный путь спасения от юности возлюбивый: Радуйся, ярем Господень на выю свою возложивый; Радуйся, священными обеты волю свою связавый: Радуйся, себе и весь живот свой Господеви предавый; Радуйся, коемуждо во благо усердный служителю: Радуйся, болящих и немощных успокоителю; Радуйся, преподобне отче наш Ионо, града Киева похвало и украшение!

Кондак 3

Силою Всевышняго осененный и укрепляемый, в иночестем пострижении власов главы твоея, все плотское мудрование отложил еси, преподобне, и яко воин благоискусный, одежду иноческую в броню спасения стяжав, и непобедимым оружием Креста Христова вооружився, крепко ратовал еси противу врага невидимаго диавола, смирением глубоким побеждая его вознесенную гордыню, и выну вопия ко Господу: Аллилуйя.

Икос 3

Имея слез источник изобильный, угодниче Божий, и умиления велию благодать, хлеб твой слезами орошал еси, и питие плачем растворял, от преизбытка желания божественнаго и любве ко Господу. Темже и мы ублажаем тя звании сими: Радуйся, помыслы плотския силою молитвы прогоняяй: Радуйся, сомнящихся в вере словом Божиим утверждаяй; Радуйся, лишении телесными многа блага духовная собравый: Радуйся, нищетою дарования небесная стяжавый; Радуйся, молчания изрядный хранителю: Радуйся, строгий уставов иноческих блюститею; Радуйся, преподобне отче наш Ионо, града Киева похвало и украшение!

Кондак 4

Буря искушений и устремлений диавольских не возможе поколебати храмины твоея душевныя, преподобне отче, основана бо бе на твердом камени веры во Христа, и хранима трезвением и молитвами непрестанными, ими же выну противоборствовал еси врагу спасения человеческаго, и непреткновенно восходил еси по стезям добродетелей к совершенству духовному в меру возраста Христова, воспевая Богу: Аллилуйя.

Икос 4

Слышаша преподобне отче Ионо, ближнии и дальнии ангелоподобное твое житие, и благодати чудес струю выну текущую, яко молитвою твоею прокаженнии очищаются, слепии прозирают, хромии ходят и разнообразных недуг с верою притекающии, аще и иноверцы есть, здравие улучают, сих избавльшеся вопияху к тебе таковая: Радуйся, болящим, яко братии Христовой, служителю: Радуйся, высоких подвигов жития христианскаго ревнителю; Радуйся, новоначальных искусный руководителю: Радуйся, неизменное правило поста и смирения; Радуйся, умирающия возставляяй на покаяние: Радуйся, всем внушаяй Жизни Вечныя взыскание; Радуйся, преподобне отче наш Ионо, града Киева похвало и украшение!

Кондак 5

Боготечная пресветлая звезда явился еси, преподобне отче наш Ионо, небо церковное украшаяй и всех блудящих по морю страстнаго жития сего данною тебе от Солнца Правды Христа Иисуса, истиннаго Бога, благодатию озаряяй, мрак печалей и мглу всяких недуг и скорбей прогоняяй, наставляеши всех к тебе с верою притекающих на путь спасенный, к вечному Небесному Отечествию ведущий, поющих Богу: Аллилуйя.

Икос 5

Видевше ангельстии чинове равноангельное житие твое отче богоблаженне, смирения твоего глубину, молитвы неотступность, воздержания твердость и велию ревность духа твоего о чистоте, удивишася и прославиша Человеколюбца Бога, укрепляющаго немощное естество человеческое. Мы же ублажаем тя и зовем: Радуйся, мирским наставниче жизни богоугодныя: Радуйся, основателю обители благоплодныя; Радуйся, яко благая начинания твоя Христос благослови: Радуйся, яко сотрудника тебе в лице державнаго яви; Радуйся, общее житие монашествующих основавый: Радуйся, тем всеоружие благочестия им подавый; Радуйся, преподобне отче наш Ионо, града Киева похвало и украшение!

Кондак 6

Проповедует мир весь православный тебе, преподобне отче наш Ионо, демонов прогонителя, болезней исцелителя и иных многих чудес совершителя. Мы же, Бога о тебе прославляюще, вопием Ему: Аллилуйя.

Икос 6

Возсиял еси на горах Зверинецких богосветлое светило, и на спасения стезю наставил еси многи души человеческия: яви бо тя Христос наставника и учителя иноком пустыннолюбивым, иже стекахуся к тебе, яко овцы к пастырю, могущу упасти их на пажити живоносней. Темже, яко сотворившаго и научившаго, чествуем тя сими похвальными словесы: Радуйся, общими труды праздных помыслов шатания упразднивый: Радуйся, теми яко бронею, страстей разжженныя стрелы отразивый; Радуйся, вселивый во обители дух общаго воздержания: Радуйся, потребивый в ней плевелы любостяжания; Радуйся, бодрствованию духовному многи иноки научивый: Радуйся, до конца жития первый в труждающихся бывый; Радуйся, преподобне отче наш Ионо, града Киева похвало и украшение!

Кондак 7

Хотя Человеколюбец Господь прославити место сие, яко виноград подвигов твоих, отче, посла Пресвятую Владычицу нашу Богородицу благовестити тебе, яко будет в стольном граде Киеве обитель иноком во спасение, украшенная храмом во имя Святыя Троицы. Ты же явлением Пречистыя просвещен, с радостым трепетом внимал еси благовестию небесному, зовый во смирении духа Владыце Ангелов и человеков: Аллилуйя.

Икос 7

Новое знамение благоволения Божия даровася тебе, преподобне, егда безмолвствующу ти в Выдубицком монастыре, в нощи свет велий облиста ведомую ти келлию, и Сама Пречистая с сонмом Святых предста пред тобою, мир тебе даруя и повелевая, да устроиши тамо обитель иноческую, и ней храм во имя Святыя Троицы. Дивяся убо сему пречудному трикратному Богоматернему троическому явлению, зовем ти: Радуйся, мудре предначертавый обитель нову: Радуйся, поревновавый нищетолюбному житию Христову; Радуйся, святыя храмы во обители создавый: Радуйся, мног собор монашествующих собравы; Радуйся, яко труд твой Свыше благословися: Радуйся, яко святое желание сердца твоего совершися; Радуйся, преподобне отче наш Ионо, града Киева похвало и украшение!

Кондак 8

Страннолепно явися ти на воздусе Матерь Божия со апостолы и мученики и преподобными и прочими святыми, указуяй место, на немже храм во имя Живоначальныя Троицы и обитель нову имел еси воздвигнути на горе Зверинецтей, преподобне отче, егоже Божиим поспешением совершив и освятив, со ученики твоими немолчныя хвалы возсылал еси в нем Господеви, зовый:  Аллилуйя.

Икос 8

Весь еси любовь неоскудевающая и подвига зерцало нетускнеющее был еси, преподобне Ионо. Видяще же ревностное по Бозе и жестокое житие твое и братии, непрестанно в трудех и пощении подвизающихся и ходящих в рубищных и худых одеждах, нецыи от инок и всякаго чина мирских людей и князей людских не точию сих не отвращахуся, но паче ревностию духовною горяще и во обители купно с ними подвизатися желающе, приношаху ту имения своя на пользу общую; темже здателю тоя возглашаем тако: Радуйся, яко во обители твоей мнози души своя спасоша: Радуйся, яко из нея пастыреначальницы изыдоша; Радуйся, благочестивых отрадо и утешение: Радуйся, колеблющихся в вере твердое ограждение; Радуйся, отчаявающихся утверждаяй во уповании: Радуйся, просветивый многих Святыми писании; Радуйся, преподобне отче наш Ионо, града Киева похвало и украшение!

Кондак 9

Всякое естество ангельское и подвижников множество удивишася смирению и человеколюбию твоему, отче наш Ионо, егда, архимандритства Межигорскаго послушание восприяв, Феодосию игумену Печерскому, яко житий общих на Руси учредителю уподобился еси. И о братии святыя обители сея, яко о чадех Божиих, попечение не оставивый. Богу, любящему всякое Свое создание, о тех взывал еси: Господи, посли Духа Святаго Твоего и утеши скорбныя души рабов Твоих сих. Тако бо во всяком послушании смиренномудрия красоту показуя, непрестанно взывал еси Богу: Аллилуйя.

Икос 9

Витийство человеческое не довлеет изрещи обилие радости духовныя, еюже преисполнялся еси, отче богоносне, егда во время молитвы твоея нощныя, являшеся ти Пресвятая Богородица с ликами чинов подвижнических, и обетовании непреложными душу твою возвесели, яко присная Заступница обители твоея будет, снабдевающи и покрывающи ю по вся дни. Темже и мы сия радостная тебе приносим глаголы: Радуйся, шествовавый путем трудным и тесным: Радуйся, возводяй других к Обителем Небесным; Радуйся, надеждо светлая в нужде и обстоянии сущих: Радуйся, покровителю сирых и крова неимущих; Радуйся, гладом погибающих питателю: Радуйся, желаемых благ пришедшим к тебе подателю; Радуйся, преподобне отче наш Ионо, града Киева похвало и украшение!

Кондак 10

Спасти хотя души ученик твоих, отечески назидал еси их, богомудре, оваго действенным словом, оваго примером жития твоего, с любовию обличая и увещавая их преуспевати во благочестии и чистоте: наипаче же пред кончиною твоею, вся ко спасению душевному благопотребная заповедал еси им, и научил еси их в молитвах бодрствовати, и немолчно пети Богу: Аллилуйя.

Икос 10

Стена заступления быша молитвы твоя, чудотворче святый, всем с верою к тебе притекающим во всякой скорби, ибо чистоты ради твоея сердечныя, сила духовная от Бога тебе даровася болящих исцеляти, бедствующим помогати, будущая прорицати, яко славити ближним и дальним величия Божия, в тебе явленная, и звати тебе сице: Радуйся, милости источниче неистощимый: Радуйся, скорбящих утешителю незримый; Радуйся, последняя твоя взаим Богови давый: Радуйся, добрым рачением и расточением сущим богатая собравый; Радуйся, досточудный образе терпения: Радуйся, наставниче нелестнаго благоговения; Радуйся, преподобне отче наш Ионо, града Киева похвало и украшение!

Кондак 11

Пение всеумиленное принесл еси Пресвятей Троице во время кончины твоея, преподобне, и молитве сущей на устех твоих. предал еси святую душу твою в руце Живаго Бога, Егоже от юности возлюбил еси, и емуже до старости маститыя работал еси нелицемерно, темже со упованием благим радостно прешел еси к обителем небесным, со Ангельскими лики пети Триипостасному Богу: Аллилуйя.

Икос 11

Мирную кончину твою видевше твои ученицы, великий угодниче Божий, скорбь разлучения с тобою утешением благодатным раствориша. в уповании всесильнаго предстательства твоего горе у престола Божия, идеже слышиши с любовию тебе зовущих: Радуйся, благопотребне во отечестии твоем возсиявый: Радуйся, веру в делех жития твоего показавый; Радуйся, разумных и препростых благоискусный учителю: Радуйся, чистоты душевныя и телесныя усердный хранителю; Радуйся, внутреннею Креста Христова красотою восхищенный: Радуйся, силою свыше на труд Крестоношения облеченный; Радуйся, преподобне отче наш Ионо, града Киева похвало и украшение!

Кондак 12

Благодати причастна явися священная рака, тобою самим сооруженная, содержащая многоцелебныя мощи твоя, чудотворче святый, ихже по летех мнозих яви Господь во склепе церковнем нетленными, и паки по надруганию безбожник сокры, и паки яви в недрех земли невредимы, исцеления неоскудно источающия, и всяк недуг врачующия силою Бога, дивнаго во святых Своих, дивно же прославльшаго тя на небеси и на земли, Емуже воспеваем: : Аллилуйя.

Икос 12

Поющие радостную песнь хвалы и благодарения Человеколюбцу Богу, прославльшему тя в земли Русстей чудотворца дивнаго и милостиваго, молим тя, преподобне отче наш Ионо: буди ходатай к Нему, и молитвенник присный о нас, зовущих ти: Радуйся, стрелами вражиих навет неуязвимый: Радуйся, спасаемых вождю непобедимый; Радуйся, и по отшествии обитель твою соблюдаяй: Радуйся, молящимся благопотребная подаваяй; Радуйся, от Господа венец правды восприявый: Радуйся, славою чудотворений просиявый; ; Радуйся, преподобне отче наш Ионо, града Киева похвало и украшение!

Кондак 13

О великий и преславный чудотворче, преподобне отче наш Ионо! Милостиво прияв сие малое моление наше, молитвами твоими сохрани нас от недугов душевных и телесных в жизни сей, и от грядущих мучений вечных избави, и сподоби нас вкупе с тобою во Царствии Небеснем выну пети Богу: Аллилуйя, Аллилуйя, Аллилуйя.

(Этот кондак читается трижды, затем икос 1 и кондак 1)



Молитва преподобному и богоносному отцу нашему Ионе архимандриту и чудотворцу святыя обители Живоначальныя Троицы, что на Зверинце в Киеве

О священная главо, ангеле земный и человече небесный, преподобне и богоносне отче наш Ионо, изрядный угодниче Пресвятыя и Единосущныя Троицы, являющий многия милости живущим во святей обители твоей, и всем, с верою и любовию притекающим к тебе. Испроси нам вся благопотребная к житию сему временному, и нужная к вечному спасению нашему. Пособствуй предстательством твоим, угодниче Божий, всем нам, к мощем твоим святым припадающим, на враги видимыя и невидимыя одоление, да в мире глубоце пребудет Святая Православная Церковь Христова, и в благоустроении зиждется обитель, юже ты основа, во всяком благочестии нерушимо. Буди всем нам, чудотворче святый, помощник скорый во всякой скорби и обстоянии. Наипаче же в час кончины нашея явися нам заступник благосердный, да не предани будем на мытарствах воздушных власти злобнаго миродержца, но да сподобимся непреткновеннаго восхода в Царствие Небесное. Ей, отче, молитвенниче наш присный! Не посрами упования нашего, не презри смиренная моления наша, и предстательствуй за нас пред престолом Живоначальныя Троицы, да сподобимся вкупе с тобою и со всеми святыми, мы недостойнии, в селениих райских славити величие, благодать и милость Единаго в Троице Бога, Отца и Сына и Святаго Духа, во веки веков. Аминь.



Тропарь преподобному Ионе,  глас 4:

Яко лучезарное солнце от конец земли возсиявшее, явился еси днесь напоследок дний, тезоименитому пророку подобяся во еже воздвигнути люди к покаянию. Темже и сама Пречистая с сонмом святых тебе многажды явишася, Еяже повелением создана бысть обитель во имя Живоначальныя Троицы. К Нейже имея дерзновение, моли, преподобне отче наш Ионо, подати нам милость и оставление грехов в день судный.

Кондак, глас 2:

Чистотою душевною божественно вооружився, и непрестанныя молитвы яко копие вручив крепко, пробол еси бесовская ополчения Ионо отче наш. Моли непрестанно о всех нас.

Тропарь перенесению мощей преподобнаго Ионы, глас 4 :

Днесь пресветло красуется стольный град Киев, яко светоучными зарями, молниями чудес твоих осияемь, всю вселенную созывает похвалити тя, Богомудре Ионо; пречестная же славная обитель твоя, юже во Имя Святыя Троицы многими труды твоими создал еси, отче, имущи в себе стада ученик твоих, веселия и радости исполняется. Мы же, празднующе преславное обретение честных мощей твоих, в земли сокровенных, яко цвет благоуханен и кадило благовонно, любезно я лобызающе, различная исцеления приемлем и твоими моливами грехов прощения сподобляемся, отче преподобне Ионо, моли Святую Троицу спасти души наша.

Кондак, глас 8.

Наследник отцев был еси, преподобне, тех последуя житию и учению, обычаю и  воздержанию, милитве же и предстоянию. С нимиже, имея дерзновение ко Господу, прощение согрешений и спасение испроси вопиющим ти: радуйся, отче Ионо.[/spoiler]

Раб божий Константин

Акафист митрополиту Ионе Новгородскому.
[spoiler]Кондак 1
Избранный угодниче Христов и дивный благочестия подвижниче, веры Православныя поборниче, от Всемогущего Творца венцем нетленным и даром чудотворения увенчанный, святителю отче Ионе, многих ко Христу и правде Его приведый, обрати и наша сердца ко Господу Иисусу, песньми духовными велегласно восхваляем тя. Ты же, яко имеяй дерзновение ко Прославльшему тя Господу, даровавшему в тебе нам великаго молитвенника и скораго в бедах помощника, молися о нас Всемилостливому Спасу, да зовем ти:
Радуйся, святителю Ионо, теплый молитвенниче, о душах наших!

Икос 1
Ангелов собеседниче и человеков наставниче воистину явился еси, святителю Ионо, благоволением всех Творца Христа Бога нашего, Ему же усердно послужил еси от начала жития твоего, яко чистоту души и тела возлюбив и Христу любовию усердно последовав, совершенства духовнаго достигл еси. Ныне же престолу Вседержителя со всеми святыми предстоиши, отраду и вспоможение даруеши всем , с верою и любовию вопиющим Ти сице:
Радуйся, во благоухании святыни присно почивающий;
Радуйся, в неизреченной славе Творца мира созерцающий;
Радуйся, всех приходящих к тебе благодатию озаряющий;
Радуйся, от заблуждений духовных нас исцеляющий;
Радуйся, любити Бога и волю Его творити нас научающий;
Радуйся, в добродетели терпения нас утверждающий;
Радуйся, огнем молитвы твоея стрелы вражия попаляющий;
Радуйся, беды и печали от чтущих тя отгоняющий;
Радуйся, святителю Ионо, теплый молитвенниче о душах наших!

Кондак 2
Видевшее благочестивая вдовица Наталия, иже по кончине родителей твоих, на воспитание прия тя, угодниче Божий, яко ты, святче Божий, от Господа Всемогущего мудростию и широкими познаниями с детства одарен был еси и любовью к церкви Христовой озарен еси, в радости велией воспе о тебе Богу: Аллилуйя!

Икос 2
Разумом Божественным свыше просвещен бе святый блаженный Михаил Клопский, иже видя тя, прорече и святительство во граде сем, ты же, угодниче Христов, от юности житие богоугодное возлюбил еси и благочестивым наставником твоима внимающе, во страсе Божии, молитве возрастал еси; ко учению книжному усердно прилежал еси; и тако во трудех твоих, образ будущего жития твоего явил еси. Мы же, дивящееся таковому от юности твоея усердию, вопием ти сице:
Радуйся, ангелонравный человече;
Радуйся, подвигов источниче неоскудный;
Радуйся, светильниче во тьме сияющий;
Радуйся, лампадо Божественнаго света;
Радуйся, водительству Духа Святаго издетска прилежавый;
Радуйся, веру твою делами любви утвердивый;
Радуйся, яко Самому Христу всякому человеку послуживый;
Радуйся, подвиги твоими Отцу Небесному угодивый;
Радуйся, святителю Ионо, теплый мелитвенниче о душах наших!

Кондак 3
Силою и благодатию Духа Святаго движимый, хранимый и озаряемый, прехвальный Ионо, в духе Евангельских заповедей воспитав свою душу, от юности явился еси делателем неленостным на ниве Христовой, все упование на Единаго Бога возложив, от силы в силу восходил еси , богмудре по лествице добродетелей христоугодных. Тем же просим тя : благомощным предстательством твоим нас от козней лукаваго сохрани, да непреткновенно возможем проити путь жития нашего, в исполнении заповедей Божиих и сподобимся купно с тобою выну, Господеви воспевати: Аллилуйя!

Икос 3
Имуще в сердце твоем веру твердую, надежду несумненную, любовь истинную к Распятому за ны Христу Богу нашему, разумея, яко «прилеплятися Богови благо есть» потщился еси всех видимых благ отрицатися, во еже совершенным учеником Господа нарицатися, удалился еси жития мирского и суеты земной и пострижение монашеское прияти сподобился еси. Тем же и мы, зрящее духовное восхождение твое от силы в силу, тако с благоговением взываем ти:
Радуйся, вся красная мира сего презревый;
Радуйся, всецело попечению Божию ся предавый;
Радуйся, мир и чистоту в сердце твоем водворивый;
Радуйся, обетом девства чистоту сердца твоего явивый;
Радуйся, обетом нестяжания высоту духа твоего показавый;
Радуйся, обетом послушания Богу и ближним добре послуживый;
Радуйся, в вере и благочестии нас утверждающий;
Радуйся, всех нас к подвигу духовному призывающий;
Радуйся, святителю Ионо, теплый молитвенниче о душах наших!

Кондак 4
Буря скорбей и напастей злобою мира сего воздвизаемая, не ослаби крепкия любви твоея, яже к Богу, отче праведный, вся бо с верою и надеждою претерпел еси, в Бозе токмо отраду и утешение обретая. Мы же ныне просим тя: сподоби и ны в сокровенных храмех сердец вознигнути духовныя престолы Спасителю, муки и смерть за ны претепевшему, и да сподобимся с тобою купно Милоседному Господу во веки воспевати: Аллилуйя!

Икос 4
Слышавше ближния и дальняя о тебе, всеблаженне Ионо, яко добротою души твоея к людем просиял еси, всего себе на служение христианом православным отдал еси. Благочестивии же людие, видяще в тебе добраго пастыря и учителя, с радостию притекаху к тебе и велие утешение и ослабу в скорбех своих по молитве твоей приимаху. Мы же, прославляя Господа, давшаго ти таковую благодать, приносим тебе сицевая:
Радуйся, прежде всего царствия Небесного искавый;
Радуйся, благодатную силу смирения познавый;
Радуйся, яко талант, данный тебе Богом, умножил еси;
Радуйся, яко в радость Господа Твоего вшел еси;
Радуйся, мир Христов наитием Духа Святого получивый;
Радуйся, сан священства, яко дар Божий, приявый;
Радуйся, жертву бескровную со страхом и трепетом совершавый;
Радуйся, словом мудрым всех приходивших к тебе питавый;
Радуйся, святителю Ионе, теплый молитвенниче о душах наших!

Кондак 5
Боготечной звезде яве уподобися богомудре Ионо, яко трудов твоих ради многих, воздаяние от Господа приим, угодниче: благодатных дарований прозорливости и источник чудес явился еси, недуги душевныя и телесныя отгоняти. Не лиши и нас твоея молитвенныя помощи, любовию тя почитающих и воспевающих Дивному во святых Господу: Аллилуиа.

Икос 5
Видеша тя братия, святый Ионо, яко воистинну сосуд избранный Божия благодати, егда чин ангельский восприяв, подвигов твоих не оставил еси, отче преподобне, но многообразными деяньми плоть твою усмиряя, в молитвах и трудех преуспевал еси. Уразумеша сия убо насельницы Отней обители умолиша тя начальство над нима восприятии. Ты бо не устрашился еси великаго бремене правления, но во всем образ добрыя жизни подавая, наставял еси братию подвигом иноческим. Сего ради восписуем ти похвалу сицевую:
Радуйся, древним подвижником усердный подражателю;
Радуйся, небрегущих о спасении душевнем строгий обличителю;
Радуйся, хотящим твоему непорочному житию последовати укрепителю;
Радуйся, благодатными дарами изобильно преисполненный;
Радуйся, всесветлым храмом благодати Божия себе показавый.
Радуйся, орле небопарный, крилами Богомыслия возлетевый зрети немерцающую светлость Солнца Правды, Иисуса Христа;
Радуйся, молитвам нашим, аще и немощным, с любовию внемлющий;
Радуйся, во всяких нуждах призывающим тя скорый помощниче;
Радуйся, святителю Ионе, теплый молитвенниче о душах наших!

Кондак 6
Проповедниче православныя веры и истиннаго жития во Христе Иисусе явился, преславный отче Ионо, Церковь на земли созидающи. В ней бо древо Жизни святый Жертвенник примирения, жизнь верным источает. Церковь бо суть духовная лечебница, радость радующихся, утешение унывающих. Темже многих обратил еси ко Христу Жизнодавцу, поя благодарственно Ему: Аллилуиа.

Икос 6
Возсиял яко "свеща на свещнице", созидая тело Христово, строго соблюдая, дабы "едино тело, един дух" чрез Таинства Церкви в храмах были вси. Храм бо возведение дольнего в горняя, земная в небесная. Сему ревнуя, всехвальне, не токмо храмы внешния, но паче храмы внутренния, храмы душ Богу уготовлял еси. Сему радуяся, воспеваем ти, сицевая:
Радуйся, приемший от Бога благодать скорби и болезни в радость претворяти;
Радуйся, любовию жестоких врагов в кротких агнцев обращавший;
Радуйся, плач пред Богом и умиление блаженное обретший;
Радуйся, кротостию и смирением Христу Спасителю уподобившийся;
Радуйся, смирением своим высокая, нищетою же богатая явивший;
Радуйся, дела твоя христоподражательная всем зрящим показавший;
Радуйся, от грехопадений наших, имже несть числа, избавляющий;
Радуйся, миром и любовию к добру души наша снабдевающий;
Радуйся, святителю Ионе, теплый молитвенниче о душах наших!

Кондак 7
Хотя отечества небеснаго достигнути, перстною плотию обложен, дух твой молитвою воскрилял еси, к Богу умом твоим восходя, горния доброты зрел еси славу, со всеми ангельскими силами поя Богу: Аллилуиа!

Икос 7
Новым трудом и подвигом усердно прилежал еси, всеславне Ионе, егда волю Творца и Бога нашего призван был еси на многотрудное служение архипастырское. Ты же, аки послушник трудолюбивый, пастве твоей смиренномудренно послужил еси. Тако, и ныне, во обителех Небесных пребываяй, наставник неусыпный буди нам, на тя надеющимся и глаголящим из глубины сердечныя:
Радуйся, апостолов и святителей достойный приемниче;
Радуйся, обильно в хиротонии благословение небесное стяжавый;
Радуйся, путей покаяния и спасения мудрый сказателю!
Радуйся, усыпленных совестей возбудителю!
Радуйся, благих помыслов насадителю!
Радуйся, сердца наша огнем Божественныя ревности воспламеняющий;
Радуйся, молитве сердечней нас научающий!
Радуйся, на славославие Божие всех созывающий;
Радуйся, святителю Ионо, теплый молитвенниче о душах наших!

Кондак 8
Странствие благоуспешное из Новгорода во град первопрестольный Москву совершил еси, прехвальне Ионо, егда великаго князя Василия убедил еси кроткима словесы твоима супротив отчизны твоея не ратоборствовати, сице евангельское обетование о миротворцех приял от Всемилосерднаго Бога, и в лице сынов Его вчинен был еси, сего ради просим тя, святый Ионо, миром и благостию наполни души наша, да исполнившися благодати Божия, язвы греховныя врачующия, купно с тобою воспоим Отцу Небесному: Аллилуйя!

Икос 8
Весь светом небесной любве пламенел еси, преславне святителю; словеса бо твоя беша, яко молния, ереси пополяющая, души верных пламенем веры и любве просвещающая; даждь убо и нам, отче молитвами твоима, искру хотя малую твоя любве имети, зовущим сицевая:
Радуйся, блаженство милостивых по обетованию Божию получивый;
Радуйся, милосердие в сердцах наших пробуждающий;
Радуйся, сострадати страждущим нас научающий;
Радуйся, друг друга тяготы носити нас подвизающий;
Радуйся, страстьми одержимых от гибели спасающий;
Радуйся, труды наша на пути спасения облегчающий;
Радуйся, вражды и ссоры наша умиротворяющий;
Радуйся, всякий мрак заблуждения от нас прогоняющий;
Радуйся, святителю Ионо, теплый молитвенниче о душах наших!

Кондак 9
Всякия беды, скорби и напасти избавляеши нас, пречудный святителю Ионо, твоими теплыми к Богу молитвами; сего же ради, мы грешныя, к представительству твоему прибегая, молим тя, отче святый, испроси нам вся ко временной и вечной жизни полезная, да сподобимся Горняго Иерусалима достигнути и купно с тобою Господеви воспевати: Аллилуйя!

Икос 9
Вития многовещанныя не возмогут по достоянию восхвалити тя, святителю Ионе, и воспети святость жития твоего и молитвенные подвиги, деннонощныя труды и попечения, спасения ради, пасомых подъятыя, кротость и незлобие твое, верный служителю Христов, ты бо просвещал еси светом истины Евангельския людие земли Росийския и наставлял еси я их на путь спасения; темже молим тя: не остави нас в суете мира сего погибающих, просвети омраченныя грехом сердца наша и к жизни Небесней направи и прими сия малыя и нехитростныя похвалы:
Радуйся, богомудрых святителей высокая похвало;
Радуйся, преподобных и праведных всечестная славо;
Радуйся, монашествующих похвало и утверждение;
Радуйся, мирян в благочестивом житии укрепление;
Радуйся, нечестивых и душетленных обычаев неуклонный искоренителю;
Радуйся, кротких и благих нравов благоискусный насадителю;
Радуйся, сердец смятенных умирителю;
Радуйся, от озлобления на нас враждующих хранителю;
Радуйся, святителю Ионе, теплый молитвенниче о душах наших!

Кондак 10
Спасения всех желая, святителю отче Ионе, во вся дни многотруднаго и прискорбнаго жития твоего многих людей, мирскими делы обремененных, утешал и укреплял еси, отраду своим попечением подавая и тяготы трудов облечая. Сие убо поминающее просим тя, чудотворче святый, моли о нас, чадах твоих духовных, да милостив будет Господь и к нам, грешным, да облагодатит и нас ходатайством твоим, вопиющих Ему о тебе: Аллилуиа!

Икос 10
Стену несокрушимую и утверждение непреоборимое обретоша тя, богоносне святителю Ионо, яко ты по кончине твоей праведней востекл еси в чертоги Отца Нашего Небеснаго, идеже во славе невечерней предстоиши Ему купно со всеми святыма в земли российстей просиявшима и милость Его преклоняеши ко всем, с верою и любовию вопиющих, ти сице:
Радуйся, житие твое земное благочестно скончавый;
Радуйся, от небеснаго Царя венец славы получивый;
Радуйся, озаривый вселенную светом добродетелей твоих;
Радуйся, яко видя добрыя дела твоя, человецы Отца небеснаго прославляют;
Радуйся, яко тобою от всех зол избавляемся;
Радуйся, яко твоими молитвами ревности в вере исполняемся;
Радуйся, яко тобою истина утверждается;
Радуйся, яко тобою лицеприятие и человекоугодие посрамляется;
Радуйся, святителю Ионо, теплый молитвенниче о душах наших!

Кондак 11
Пение благодарственное Пресвятей Троице принесоша людие новгородския, егда обретоша честные и многоцелебные мощи твои, святителю Ионо, аки спасительный источник, дивные чудеса содевающий, и поставишя их в церкви соборней, поя богу: Аллилуиа!

Икос 11
Светозарное светило, зарями немерцающаго света Пресвятыя Троицы сияющее, всей Российстей стране явился еси, отче наш Ионо, ты бо, яко облак светел и росоносен явился еси, пламень праведно движимаго на ны за грехи наша гнева небеснаго утишаеши и зной страстей душевных и телесных охлаждаеши, иссохшия сердца наша оживляеши и плоды добродетелей приносити помогаеши всем воспевающим ти таковая:
Радуйся, радости духовныя, тишины же и мира источниче неисчерпаемый;
Радуйся, светлый облаче, зной страстей греховных утоляющий;
Радуйся, росо благодатная, сердца верных орошающая и веселящая;
Радуйся, светом добродетелей в нощи мира сего нам присно сияющий;
Радуйся, благодатно от Духа Всесвятаго питающий нас и веселящий;
Радуйся, грешников к совершенному покаянию побуждающий;
Радуйся, ран греховных врачу благоискуснейший;
Радуйся, сиянием благодати Божия души наша озаряющий.
Радуйся, святителю Ионо, теплый молитвенниче о душах наших!

Кондак 12
Благодать Духа Всесвятаго стяжал еси в житии твоем за любовь к Отцу Небесному и ближним своим; веруем, яко и по смерти благодать сия пребывает с тобою, чудотворче святый Ионо прехвальне; сего ради и молим тя: испроси у Господа Сии, да сохранит Церковь Православную от неверия и расколов, избавит от всяких бед и напастей, вопиющих Ему: Аллилуйя!

Икос 12
Поющее твое прославление в лице святых Церкви Православныя хвалим, славим и ублажаем тя любовию, пречудный святителю Ионе, яко заступника и молитвенника о нас пред Господом. Ты же дарованною ти благодатью, просвети омраченныя грехом умы и сердца наша, настави нас на путь спасения, утоли скорби наши земныя и радости духовной нас исполни. Ты бо светом благодати твоея нас озаряеши, сердца наша увеселяеши нас пети ти сице:
Радуйся, яко тобою ум наш в богомыслии научается;
Радуйся, яко тобою мрак неведения прогоняется;
Радуйся, из пучин отчаяния нас извлекающий;
Радуйся, светом надежды нас озаряющий;
Радуйся, от плевел ненависти сердца наша очищающий;
Радуйся, заповеди Евангельския исполняти нас научающий;
Радуйся, от путей погибельных нас удаляющий;
Радуйся, милосердие Божие к нам приклоняющий;
Радуйся, святителю Ионо, теплый молитвенниче о душах наших!

Кондак 13
О преславный святителю, отче наш Ионо, теплотою любве твоея ко Господу, посети и согрей души наша и прими убогое сие приношение наше, яко венец похвалы сердечныя и, яко, фимиам благовонный, вознеси молитву твою Отцу всех и Владыце и испроси земли нашей – мира благодейственнаго; Церквам Божиим – единства и благосостояния; нам же всем – чистоты сердечныя и любве непорочныя, да тобою охраняемы и спасаемы, Господеви вопием: Аллилуйя!
Сей Кондак читается трижды; затем паки Икос 1 и Кондак 1.[/spoiler]

Раб божий Константин

Акафист праведному Ионе, Одесскому чудотворцу.
[spoiler]Кондак 1

Избранный светильнике земли нашея, преизрядный молитвенниче и чудотворче, православныя веры ревнителю и бесов прогонителю, благоговейно почитающе память твою, радостно восхваляем тя, праведный отче Ионо! Ты же, яко стяжавый велие дерзновение ко Пресвятой Троице, моли избавитися нам от скорбей и напастей, да зовем ти: радуйся, праведный Ионо, Одесский чудотворче.

Икос 1

Ангеле земный и человеке небесный, праведный отче Ионо, в земнем твоем странствовании был еси. Ангелоподобне бо пожив среди юдоли тления и греха, никакоже в себе огня духовного угасил еси, светло горя и облиставая всех, вопиющих ти: Радуйся, столпе огненный, всем путь ко спасению указующий. Радуйся, росо благодатная в знои искушений сущим. Радуйся, веры отеческия великий ревнителю. Радуйся, врагов Православия дерзновенный обличителю. Радуйся, Царя Христа рабе благий и верный. Радуйся, пастырю светлый и вселюбимый. Радуйся, врачевателю душ и телес преизрядный. Радуйся, чудотворче предивный. Радуйся, праведный Ионо, Одесский чудотворче.

Кондак 2

Видящи образ суетнаго мира сего, яко прелестен и скоропреходящ, отче святый Ионо, николиже пристрастием к нему омрачился еси. Горе очи сердца своего непрестанно возводил еси, единаго на потребу - вечнаго спасения взыскуя. Дух бо сокрушен и сердце смиренно в дар Богу принеся, добился еси в вышних селениях воспевати Ему: Аллилуиа.

Икос 2

Разум озаренный благодатию Божиею измлада имея, при храме святем, идеже отец твой Моисей в диаконстем сане служаще, воспитан был еси. Сего ради, видя благий плод отеческого наставления, зовем тебе таковая: Радуйся, сосуде благодатный, еще от утробы матерния предизбранный. Радуйся, пищею духовною изобильно напитанный. Радуйся, млеком учения евангельскаго напитанный. Радуйся, светом веры Христовой озаренный. Радуйся, пречудное добронравие явивый. Радуйся, кротостию, смирением и разумом всех удививый. Радуйся, еще от младых лет неизреченную сладость молитвы вкусивый. Радуйся, господа Иисуса Христа всем сердцем возлюбивый. Радуйся, праведный Ионо, Одесский чудотворце.

Кондак 3

Силою свыше в храме Божием укрепляем был еси праведне Ионо, егда тяжции скорби сиротства постигоша тя. Добронравия бо родительница твоя отдаде тя в Церковь Господню, да служитель Божий будеши. Хотяще же по стопам отчим управити путь твой, при кончине жития своего благослови тя словесы сими: «Хощу, дабы ты был пастырем добрым». Ты же, блаженне, благословение родительское свято исполнив, воистину добрый пастырь нам был еси, воспевая непрестанно Богу: Аллилуиа.

Икос 3

Имеяй богатство неоскудеваемое - Христа в сердце своем, аще и нищету велию претерпевал еси отрок богобоязненный, обаче дивное терпение показал еси, и посреде толиких лишений и озлоблений безропотно спасение свое совершал еси. Сего ради чествуем тя похвалы сими: Радуйся, скорбным и притрудным житием праведникам уподобился еси. Радуйся, и сам венцем праведности от Господа увенчался еси. Радуйся, не имый где главы подклонити, Спасителю своему подражал еси. Радуйся, яко от нищеты в прекрасный чертог Вседержителя внити сподобился еси. Радуйся, яко молитва усопшия матере твоея незримо тя в сиротстве заступаше. Радуйся, яко от бед, напастей и внезапныя смерти многажды тя избавляше. Радуйся, еще от юности твоея крестоношением Богу угодити потщался еси. Радуйся, яко в незлобии, терпении и благодарении Богу поучался еси. Радуйся, праведный Ионо, Одесский чудотворче.

Кондак 4

Бурею ярости лютыя возмутися диавол, егда духовно укрепившеся и утвердившеся, во диакона посвящен был еси, праведниче Ионо, а послежде за благочестие и доброе житие священническаго сана от святителя Никанора удостоился еси. Оный бо святитель о тебе тако пророчествова: «Се будущий добрый пастырь. Видех бо на нем сугубую благодать. Душа его горит священным пламенем». Уразуме бо диавол, губитель душ человеческих, яко крепкаго противоборца в тебе обрел есть. Ты же мечем пламенныя молитвы, чистым и непорочным житием силу вражию попрал еси. Сего ради, толикому дерзновению твоему дивящеся, вопием дивному во святых Своих Богу: Аллилуиа.

Икос 4

Слышаше, избранниче Христов, ближнии и дальнии величие духовнаго подвига твоего, радовахуся, ибо добраго пастыря в тебе обретоша, неусыпно бдящего над стадом своим, да не расхитит волк хищный словесныя твоя овцы, вопиющия ти: Радуйся, на пажити церковней чад твоих духовных упасл еси. Радуйся, мудрым водительством к вечному спасению управил еси. Радуйся, Пречистым Телом и Честною Кровию Господа нашего Иисуса Христа от Трапезы Божественныя напитал еси. Радуйся, наставление в вере, надежде и любви премудре преподал еси. Радуйся, чрез Таинства Святыя Церкве во ограду Отчу заблудшия овцы ввел еси. Радуйся, росою молитв твоих от зноя страстей тыя избавил еси. Радуйся, Архиерея Вечнаго, прошедшего небеса, слуго усерднейший. Радуйся, исполнителю заповедей Христовых преизряднейший. Радуйся, праведный Ионо, Одесский чудотворче.

Кондак 5

Боготечную звезду яви тя миру Солнце Правды Христос, возженную на тверди небесней неизреченными подвиги богоугождения. Ты бо ради ближняго себе, дом свой и домашних своих забывал еси, в бдениих, коленопреклонениих и пощениих плоть свою изнурял еси, здравие душевное и телесное страждущим подавал еси, да вси, от тебе помощь и избавление от недугов приявшии, согласно Богу взывают: Аллилуиа.

Икос 5

Видяще тя, иерее Божий Ионо, нищии и убозии яко страждущих благодетеля, плачущих утешителя и алчущих питателя, отовсюду притекла к тебе, заступление и прибежище от тебе получити хотяще. Сподобившеся же великих милостей и щедрот от тебе, вопияху со умилением таковая: Радуйся, пастырю милостивый. Радуйся, отче премилосердный. Радуйся, бессребренниче всехвальный. Радуйся, исцелителю безмездный. Радуйся, покровителю убогих прелюбезный. Радуйся, источниче дарований духовных неоскудный. Радуйся, всех притекающих пристанище спасительное. Радуйся, богатство бедных неиждиваемое. Радуйся, праведный Ионо, Одесский чудотворче.

Кондак 6

Проповедник силы и славы Божия явился еси, служителю Христов Ионо. Дивными бо чудесы землю нашу озарил еси, и слухом исцелений, от молитвы твоея содевающихся, вся окрестныя грады и веси исполнил еси. Издалеча бо страждущия, болящия и бесныя к тебе притекаху, и предстательством твоим здравие духовное и телесное обретаху, вопиюще Подателю всех благих Богу: Аллилуиа.

Икос 6

Возсиял еси праведностию жития твоего, святе Ионо, дела бо плотския, яже суть нечистота, непотребство, распри, бесчинство и подобная сим, отринул еси, плод же духовный, еже есть любы, радость, мир, долготерпение, кротость, воздержание, в себе со тщанием взрастил еси. Сего ради прославляем тя песнословии таковыми: Радуйся, вертоград души твоея обильным плодоношением украсивый. Радуйся, цветы добродетелей на ниве сердечней насадивый. Радуйся, росою молитв своих оросивый. Радуйся, дождем слезным сильно напоивый. Радуйся; делателю, паче иных потрудивыйся. Радуйся, сеятелю, мзду велию приявый. Радуйся, плод сторичный пожавый. Радуйся, хлевом небесным от жатвы сея чад твоих духовных напитавый. Радуйся, праведный Ионо, Одесский чудотворче.

Кондак 7

Хотя богохульное еретическое отгнати злосмрадие, непоколебимый исповедник православныя веры воистину явился еси, отче святый Ионо, твердо противостав богопротивному расколу обновленческому. Ревностне бо пагубу его обличал еси, и верных во истинней вере наставлял еси, да право славят Господа, поюще: Аллилуиа.

Икос 7

Новаго тя пророка, иже прозорливыми очесы грядущая провидел еси, зрим, отче праведный Ионо. Ты бо тайну беззакония, юже Откровение Иоанново предглаголет, верным предвозвестил еси и мерзость запустения, стоящую идеже не должно, нам, в последняя лета живущим христианам, предрекл еси. Сего ради, сбытие сих проречений ныне зряще, глаголем ти сице: Радуйся, людей православных примером жития своего во исповедничестве укрепляяй. Радуйся, лютаго безбожнаго гонения не страшитися научаяй. Радуйся, тьмочисленным ересем, отовсюду Отечество наше православное борющим, противостояти наставляяй. Радуйся, нечестивыя заблуждения тьмы века сего обличаяй. Радуйся, к венцем исповедническим истинных рабов Божиих предуготовляяй. Радуйся, своими молитвами ратовати на враги помогаяй. Радуйся, твердо блюсти святоотеческое предание призываяй. Радуйся, к неотступному исполнению святых канонов Церкве путеводствуяй. Радуйся, праведный Ионо, Одесский чудотворче.

Кондак 8

Странное чудо является притекающим к тебе, блаженне Ионо, священная твоя церковь. Зде бо молящеся, не на земли, а на небеси стояти мним. В ней же и малое моление пред ракою твоих мощей приносяще, велиих недугов приемлем исце­ление, аще токмо по Бозе упование на тя возложим, верно вопиюще: Аллилуиа.

Икос 8

Весь бе в вышних, богомудре Ионо, к нижним никакоже прилепляяйся, и уметы злобнаго борителя, иже на тя чрез богоборческую власть со всею силою восста, ни во что же вменяяй. Многими бо напастьми богоборцы ратоваху на тя, и в темницу мрачную ввергоша. Обаче изволением Божиим и молитвами чад твоих духовных от бед избавлен был еси, и вся козни вражия попрал еси, да зовем ти с любовию таковая: Радуйся, воине Христов, во вся оружия Божия облекийся. Радуйся, духи злобы поднебесныя победивый. Радуйся, вся стрелы разженния лукаваго угасивый. Радуйся, щитом веры вооруживыйся. Радуйся, в броню правды одеявыйся. Радуйся, чресла истиною препоясавый. Радуйся, шлем спасения на главу свою возложивый. Радуйся, меч духовный, еже есть глагол Божий, восприемый. Радуйся, праведный Ионо, Одесский чудотворче.

Кондак 9

Всякия утоли скорби, обстояния и болезни, благодатный наш заступниче, отче Ионо! К тебе бо с верою и упованием ныне прибегаем, и в сердцах наших умиленные молитвы тебе воссылаем, да подаси всем просящим у тебе в болезнех скорое врачевание, в бедах благоприятное утешение и от искушений присное избавление, вопиющим к Богу со благодарением и радостию: Аллилуиа.

Икос 9

Ветия боговещанныя не возмогут изрещи великаго твоего к Богу дерзновения, досточудне Ионо. Егда бо к пламенногорящему светильнику Отечества нашего, праведному Иоанну Кронштадтскому и всея России чудотворцу жителие Одессы приходяху, сей паки их отсылаше ко твоей святыне, глаголя: «Своего имате чудотворца, блаженнаго Иону, пастыря Свято-Николаевския церкве». Сему дивному глаголу о тебе всероссийскаго угодника внемлюще, взываем ти со благоговением таковая: Радуйся, Духа Божия вместилище. Радуйся, добродетелей жилище. Радуйся, лампадо Духа присногорящая. Радуйся, свеще благостыни светозарная. Радуйся, града Одессы похвало и ограждение. Радуйся, благочестия нерушимое утверждение. Радуйся, молитвенниче к Богу неустанный. Радуйся, Господом свыше призванный и оправданный. Радуйся, праведный Ионо, Одесский чудотворче.

Кондак 10

Спасти хотя души чад твоих духовных, от Бога вверенных твоему попечению, всечестный пастырю Ионо, бдел еси непрестанно над стадом своим, да ни едина от овец, в горах заблудши, в пропасть погибели впадет, и добыча диаволу обретется. Темже и мы, на предстательство твое у Престола Вседержителя уповающе, и на молитвы твоя надежду непреложну имуще, вопием прославльшему тя Господу: Аллилуиа.

Икос 10

Стена еси необоримая и твердый якорь спасения всем, в морстей пучине плавающим и в опасностех от морские треволнений сущим был еси, отче достоблаженне Ионо, денно и нощно об их избавлении моления воссылая и прошения о здравии и благоденствии Господу принося. Темже и ныне вси, в море уходящии, к раце мощей твоих прибегают и умиленные мольбы тебе возносят, зовуще таковая: Радуйся, стихии грозныя укрощаяй. Радуйся, бурю страстей греховных разгоняяй. Радуйся, обуреваемым спасительное пристанище подаваяй. Радуйся, тишину Божественную приносяй. Радуйся, блуждающих во мраце грехов добрый кормчий. Радуйся, от пути истины сократившихся наставниче. Радуйся, многих от власти диавола исхитивый. Радуйся, бесчисленных неврежденно сохранивый и спасый. Радуйся, праведный Ионо, Одесский чудотворче.

Кондак 11

Пение Богу и Пресвятей Богородице непрестанно в сердце твоем принося, добродетельных высот духа достигл еси, пребогате. Темже и дадеся тебе благодать не токмо в житии твоем, но и по блаженном преставлении ходатайствовати за ны, спасая и просвещая души всех, усердно взывающих к Богу: Аллилуиа.

Икос 11

Свет во тьме сущим и слепым прозрение был еси, приснопамятне отче Ионо. Силою бо, яже ти от Бога даровася, велие чудо исцеления слепорожденнаго отрока сотворил еси, и яже не возмогоша врачеве телеснии, молитвою своею совершити возмогл еси. Сему чудотворению презельне дивящеся, воздаем ти славословия сицевая: Радуйся, лютых и неисцельных недугов всемощный врачевателю. Радуйся, радости превеликия подателю. Радуйся, омраченных нечестием благое просвещение. Радуйся, слепотствующих светоподательное озарение. Радуйся, молитвы златая кадильнице. Радуйся, Духа Божественнаго всечестный ковчеже. Радуйся, Света Невечерняго присное сияние. Радуйся, непрестанное верных утешение и радование. Радуйся, праведный Ионо, Одесский чудотворце.

Кондак 12

Благодать, мир, жития исправление и грехов прощение испроси нам, великоимените пастырю Ионо, беспрестанне согрешающим и всеблагаго господа студными деянии прогневляющим. И не попусти ходатайством твоим миродержителю тьмы века сего обладати нами насильством тленнаго сего телесе. Настави же нас на путь спасения и от искушений неврежденных сохрани, да очистив совесть от всякия скверны, вопием в чистоте душевней Богу: Аллилуиа.

Икос 12

Поюще преславная твоя подвиги и чудеса, имиже Христос возвеличи тя, вернаго служителя своего, праведный отче Ионо, колена сердца нашего пред благостию Бога, таковаго угодника нам даровавшаго, преклоняем, и лобызающе всечестныя твоя мощи, усердныя моления о спасении душ наших воссылаем, зовуще ти со благоговением и любовию таковая: Радуйся, пастырем нашим образе трезвеннаго и достойнаго Богу предстояния. Радуйся, носителем благодати священства наставниче безпорочнаго служения. Радуйся, служителем алтаря правило веры и дерзновения. Радуйся, дражайшего сокровища нашего - веры Православныя вернейшее ограждение. Радуйся, Слова Божия богодохновенный учителю. Радуйся, святоотеческих преданий и церковных канонов неленостный блюстителю. Радуйся, всем верным истиннаго христианскаго жития присное наставление. Радуйся, всех святых небесный сотаинниче и сопричастниче. Радуйся, праведный Ионо, Одесский чудотворче.

Кондак 13

О, священне и достоблаженне отче Ионо, чудотворче пресвятый и пастырю предивный! Се, предстояще пред ракою честных мощей твоих, со слезами и умилением сердечным молим твою благостыню, да николиже оскудеет ходатайство твое пред Богом о нас грешных и недостойных, да богоприятными мольбами твоими пробавит Всевышний Господь милость Свою над боголюбивым градом и православным Отечеством нашим, да укрепит веру святоотеческую, да научит ны примером праведнаго твоего жития единому точию на потребу служити и угождати, и да подаст нам вечное спасение, во еже с тобою в селениих праведных воспевати непрестанно: Аллилуиа, Аллилуиа, Аллилуиа.

(Этот кондак читается трижды, а затем икос 1 и кондак 1)


Молитва праведному Ионе Одесскому

О предивный и преславный отче наш Ионо, пастырю праведный и человече Божий! К тебе, яко к великому молитвеннику и истинному наставнику, одержимых злыми духами разрешителю, православной веры поборнику, в нужде находящихся помощнику, немощных целителю, сирот и вдов покровителю, и всех с верою и любовию призывающих тя в молитвах, мы, чада твоя, прибегаем и усердно просим: не забуди нас смиренных и грешных, яви нам твое отеческое заступление, испроси нам у Господа богатые милости Его: земли плодоносие, воздухов благорастворение, дожди благовременны, покоя и тишины во днех наших, благочестия умножение, болящим здравие, скорбящим утешение, унывающим ободрение, сирым призрение, убогим снабдение, подвизающимся преспеяние и всем нам вечное спасение.

Ей, угодниче Божий! Умоли Всемилостиваго Бога даровати нам чудесную помощь и яко по молитвам твоим Господь воскресил дщерь твою и исцелил отрока слепаго, тако испроси у Господа исцеление немощей наших и душ спасение. Да твоим ходатайством вси спасаеми, едиными усты и единым сердцем прославим бога в Троице славимаго, Отца и Сына и Святаго Духа, и Его благодать, данную тебе во веки веков. Аминь.[/spoiler]

Раб божий Константин

Акафист святому преподобному Ионе Яшезерскому чудотворцу.
[spoiler]Тропарь
Вертоградаре Христов, насадивший веру словом истины, благовестием же яко ниву обильно орошающий, прозябение тем дивное Богу
принесший. Восхвалаяем Тя любовью, поминающе память Твою. Яко многое дерзновение имущий молися преподобне отче Ионо во еже
спастися душам нашим.

Кондак
Подвижника изрядна и угодника Божия днесь церковь Христова память честно празднует, достойно поминающе премногия труды его и
ублажающе о нем Богу вопиет дивный во святых твоих Господи слава Тебе.

Кондак 1
Возбранный служителю Бога Живаго, преподобне и богоносне отче наш Ионо. Ныне предстоя светлейшему престолу Владыки всех,
приемлеши молитвы всех с верою притекающих к ходатайству твоему и усердно зовущих:
Радуйся, преподобне отче наш Ионо, в молитвах твоих нас не оставляющий.

Икос 1
Равноангельному житию древних отцев поревновав, суету мира сего отверг еси, Христу усердно последуя, путеводящему тебя стезей
иночества ко спасению. Темже и мы предизбравшему тя Богу славы вопием о тебе же таковая:
Радуйся, души своея Христу уневестителю;
Радуйся, призвания Божия исполнителю;
Радуйся, от чрева матере твоея избранный;
Радуйся, благодатию Всевышняго нам данный;
Радуйся, от младенчества богомудрием украшенный;
Радуйся, в смирение и кротость яко в ризу обличенный;
Радуйся, ангелов собеседниче и человеков наставниче;
Радуйся, притекающих к тебе на путь спасения путеводящий;
Радуйся, и злых в кротость агнцев приводящий;
Радуйся, преподобне отче наш Ионо, в молитвах твоих нас не оставляющий.

Кондак 2
Добраго и светлаго нрава был еси, всеблаженный отче наш Ионо, апостолов повеление тем скоро исполняя, да людие зря богоугодное
житие твое, прославляют Бога поя Тому: Аллилуиа.

Икос 2
Егда прииде в возраст совершен, не праздностью уязвися, но ревностью о дарах духовных и к большим из них поревновав от всех
слышиши таковая:
Радуйся, от всея души Христа возлюбивший;
Радуйся, Тому и денно и нощно служивший;
Радуйся, молитвою твоею яко огненным столпом нас путеводящий;
Радуйся, сердца охладевающие верою согревающий;
Радуйся, старые и больные любовию врачующий;
Радуйся, отчаявшимся помощь скоро подающий;
Радуйся, и безрассудные кротостью нрава умудряющий;
Радуйся, благие помыслы на сердце полагающий;
Радуйся, от горестей и бед нас изводящий;
Радуйся, преподобне отче наш Ионо, в молитвах твоих нас не оставляющий.

Кондак 3
Всевышняго повелением наставляем, притекл еси к брегам реки Свирской ко Александру преподобному. И от того мудрости духовной
обучаяся Богу воспевал неустанно: Аллилуиа.

Икос 3
Провидя духом в тебе блаженне отче велию благодать Божию, Александр преподобный с радостью приял еси тя во обитель святыя Троицы
и в благоплодную душу твою семена добродетелей щедро воссадил еси; тем дивному прозябению их дивящися и мы с радостью вопием
тебе сице:
Радуйся, соблазны мира сего в ничто вменивый;
Радуйся, Отечество и ближняя твоя оставивый;
Радуйся, путь свой ко обители Свирской устремивый;
Радуйся, в той обители примерно поживый;
Радуйся, Аввы твоего похвало и радование;
Радуйся, и братии всей примере предивный;
Радуйся, людям мирским отец чадолюбивый;
Радуйся, преподобне отче наш Ионо, в молитвах твоих нас не оставляющий.

Кондак 4
Еще от младенчества раннего предизбра тя Бог. И яко сосуд честен, исполни благодати и по исполнению времен, востави к Честней Трапезе
Своей благодати священства исполнив. Таковому о тебе Божию смотрению вернии зовут: Аллилуиа.

Икос 4
Неблазнено пожив, восприял еси обеты иночества и благодать священства. Яркий светильник явился еси, освящая в нощи греховней
блуждающих и всех приводя ко спасению тебе зовущих:
Радуйся, на тверди церковней звезда блистающая;
Радуйся, лучами осиявающий заблуждающияся;
Радуйся, изрядное в постех показавший воздержание;
Радуйся, с трепетом и любовию престолу Вышняго предстоящий;
Радуйся, ум свой к горе возведший;
Радуйся, очи свои долу низводивший;
Радуйся, устнами, умом, и сердцем, молитву непрестанно творивший;
Радуйся, волю свою воле Божией всецело покоривший;
Радуйся, преподобне отче наш Ионо, в молитвах твоих нас не оставляющий.

Кондак 5
Честных трудов твоих изчести мы не могущие, ты же к большим тщяшеся прияв благословение к пустынному житию возшел еси и ангелов
и человеков подвизая воспевати о тебе Творцу: Аллилуиа.

Икос 5
Собору пустынножителей и древних отцев сопричастниче, подъял еси тяготы жития пустыннаго и совершеннаго безмолвия. Молитвою и
псалмопением дебри и леса облагоухал еси и нас воздвигаеши тебе достойно песнь приносити:
Радуйся, путь свой в пустыни управивый;
Радуйся, земное отечество свое для дела иноческаго избравший;
Радуйся, пустыня Яшезера в подвиг тебе от Бога предуготовися;
Радуйся, посреде блат и езер животворящий крест яко знамя победы воздвигший;
Радуйся, пред крестом денно и нощно со слезами в молитвах предстоявший;
Радуйся, прозябениями леса токмо насыщающийся;
Радуйся, глад и мраз во мнозе претерпевший;
Радуйся, бесовския находы молитвою отогнавший;
Радуйся, и дикия звери кротостию нрава твоего приручивший;
Радуйся, преподобне отче наш Ионо, в молитвах твоих нас не оставляющий.

Кондак 6
Советы пустыннаго жития Аввы твоего Александра восприял еси и тем премудро жизнь свою устроив, отгонял еси прилоги бесов и
находы страстей. Плоть духу всемудро покоряя помыслы враждебныя посрамляя и нас подвигаеши пети: Аллилуиа.

Икос 6
Яко торжество истины и веры правая победителю, вселился еси на капище языческом. Торжествуя силою Христовой, разорил гнездилище
нечестивое, нас в православии утвердил еси поющих тебе таковая:
Радуйся, страстные помыслы от сердца отгнавший;
Радуйся, страху Владычню плоть свою распявший;
Радуйся, миродержавца века сего посрамивший;
Радуйся, искушениям и козням дьявола твердо противоставший;
Радуйся, собою идолов низвергший;
Радуйся, тем восстание не давший;
Радуйся, Живому Богу токмо служивший;
Радуйся, Тому Единому служити нас научивший;
Радуйся, благодатию Творца нас спасающий;
Радуйся, преподобне отче наш Ионо, в молитвах твоих нас не оставляющий.

Кондак 7
Слыша люди в градах и весях всеблаженне отче наш Ионо достохвальные подвиги твоя во мнозе притекали к тебе врачевания духовнаго
исправшивая. Ты же с любовию страждущих раны обязуя научен был еси взывати Господу Творцу: Аллилуиа.

Икос 7
Воистину чадолюбивый отец явился еси, отче наш Ионо. Не отверг слез притекающих к тебе и пастырскаго наставления просящих, но тем
вся благопотребная на пользу преподав от всех слышиши таковая:
Радуйся, ангел пустыни светлейший;
Радуйся, притекающих к тебе не отвергший;
Радуйся, многия советы на пользу преподавший;
Радуйся, истину Божию вещающий;
Радуйся, люди мирския сей истиною спасающий;
Радуйся, многия на ратныя подвиги иночества вдохновляющий;
Радуйся, недужливые и больныя, молитвою твоей исцеляющий;
Радуйся, от немощи духовной нас врачующий;
Радуйся, уныние бесовское прогоняющий;
Радуйся, преподобне отче наш Ионо, в молитвах твоих нас не оставляющий.

Кондак 8
Новое послушание восприял и с кротостию тому покорися, яко воистину воле Божией, устроением обители для братии к тебе пришедшей
озаботися, и древеса и камения к устройству ея сам износя, воспевал еси в Троице славивому Богу: Аллилуиа.

Икос 8
Чудная обитель Благовещения Матери Божией, на брегах Яшезера устроися, труды и молитвами твоими. В основании оной благочестие
возложив, воздвиг нерукотворенный храм духа, неветшающий и светло красующийся. Его сиянием и мы поныне освящаемии, благодарне
тебе вопием:
Радуйся, ярем Христов вземший;
Радуйся, иго Божие на себя приявший;
Радуйся, обитель Матери Божией на земли создавший;
Радуйся, в любви и мире пребывати в ней заповедавший;
Радуйся, долготерпение, кротость и воздержание стяжавший;
Радуйся, от напастей, прилогов и бед нас спасающий;
Радуйся, заре откровения к тебе притекающим;
Радуйся, смуты душевные уставляющий;
Радуйся, мир и спокойствие в души водворяющий;
Радуйся, в пучине езер добрый кормчий;
Радуйся, преподобне отче наш Ионо, в молитвах твоих нас не оставляющий.

Кондак 9
Мудросте высочайшая, почтенный Духом Святым, вещанием привлек еси многия души ко спасению и светлым житием твоим, озарил еси
тьму языческую, благочестию православныя веры наставляя всех, подвигая Богу воспевати: Аллилуиа.

Икос 9
Ни сна очима, ни веждома дремания и в лета преклонныя не дозволял еси, совершенство духа тем предпоказуя. Отрясл еси ветхость
естества, свободися от плена страстей и на высочайшее восшел еси, от мучительства их и нас избави тебе приносящих таковая:
Радуйся, Евангелие в селах и весях благовестивший;
Радуйся, апостольское служение у народа вепсов Богу достойно принесший;
Радуйся, братии обители твоей, повсюду проповедати повелевший;
Радуйся, язычество и суеверие словом истины поправший;
Радуйся, правую веру, яко семена в души людей обильно сеющий;
Радуйся, неустанно в поту трудов ю возращяющий;
Радуйся, краснейший сад душ воссадивший;
Радуйся, дивные плоды в нем собравший;
Радуйся, сим прозябением Богу премного угодивший;
Радуйся, преподобне отче наш Ионо, в молитвах твоих нас не оставляющий.

Кондак 10
Видевше братия обители твоей, досточудную благодать в тебе пребывающую, юже стяжал еси премногими труды, ихже исчести мы не
могуще. Ты же еще к большим тщашеся, восприял еси образ великия схимы и обитель твою оставив, в хладной пещере затворился еси,
воспевая Богу: Аллилуиа.

Икос 10
Егда откры тебе Бог время блаженной кончины твоея, усугубил еси подвиги и при жизни в пещеру яко во гроб вселился еси, оставив и
последния попечения о временной жизни. Тем же и мы умиляющиеся сердцем, отче досточудный, смиренно приносим тебе таковая:
Радуйся, духовное стадо твое не оставляющий;
Радуйся, житием твоим нам правый путь являющий;
Радуйся, подвиги своими от лености нас возставляющий;
Радуйся, молитвою твоею полки врагов пронзающий;
Радуйся, предстательством твоим, яко щитом крепким нас заграждающий;
Радуйся, края Вепсскаго преславный проповедниче;
Радуйся, страны Карельской и всея России сияние;
Радуйся, яко фимиам, пред Престолом Творца, молитвою благоухающий;
Радуйся, яко адамант на порфире сияющий;
Радуйся, преподобне отче наш Ионо, в молитвах твоих нас не оставляющий.

Кондак 11
Пение всеумиленное принесе ти братия, отче всеблаженне Ионо, егда узре тя в пещере почивша от трудов праведных и со слезами одр твой
вознесе во обитель свою и тамо во храме поставив о тебе Богу воспевая: Аллилуиа.

Икос 11
Светоподательна светильника, ярко горяща на свещнице церковней узре тя вси. Земное странствие скончавша, исполнил еси вся яко
заповеда тебе Богом и духом приселился во обители небеснаго Царя. Нас же помощию твоею не остави, тебе поющих таковая:
Радуйся, многообразие трудов в мире принесший;
Радуйся, усердно Господу служивший;
Радуйся, рачением Богу много угодивший;
Радуйся, от Вседержителя венцем славы украшенный;
Радуйся, со ангелы и лики святых в Небесном Царствии торжествующий;
Радуйся, обитель твою и братию и по отшествии твоем не оставляющий;
Радуйся, вся нужды обители твоей, чудно восполяющий;
Радуйся, за жертвующих и благотворящих всегда ходатайствующий;
Радуйся, милующих и питающих, много награждающий;
Радуйся, преподобне отче наш Ионо, в молитвах твоих нас не оставляющий.

Кондак 12
Многими словесы и песньми, не можаше достойному прославлению жития твоего отче преподобне. но сия возверзаем яко жертву малую,
юже прияв за ны принеси Царю всех, да твоею милостию заграждаеми от различных зол и бед Богу вопием: Аллилуиа.

Икос 12
Молебное пение наше приими блаженне. Виждь яко с верою и любовию припадающия к честному образу твоему, веруем убо яко и по
отшествии твоем зде с нами невидимо пребываеши, имущий попечение о всех людех к тебе зовущих:
Радуйся, Яшезерской обители украшение;
Радуйся, видимыя и невидимыя враги одоление;
Радуйся, честныя мощи твоя, яко сосуд благодати нам оставивый;
Радуйся, многим цельбоносностью мощей твоих здравие возвративый;
Радуйся, душевныя и телесныя язвы исцеляющий;
Радуйся, в Небесное Отечество вошедый;
Радуйся, от рова погибели нас отводящий;
Радуйся, вся блага на пользу подающий;
Радуйся, во тьме печали, светом надежды нас озаряющий;
Радуйся, преподобне отче наш Ионо, в молитвах твоих нас не оставляющий.

Кондак 13
О дивный угодниче Христов преподобне отче наш Ионо, в молитвах стражи неусыпающий. Приими от нас малое моление сие наше и
испроси у Творца всех вся благопотребная ко спасению. Да твоим предстательством сподобимся благую часть спасаемых от Бога получити
и Христа во славе узрети, воспевая Тому со всеми избранными: Аллилуиа.
Сей кондак читается трижды. Затем поется икос 1-й и кондак 1-й.

Молитва Ионе Яшезерскому
О, преподобне и богоносне отче наш Ионо! Ты поработати Господеви желая, зде вселился еси, неленостно во трудех, во бдениих, в
молитвах и постех подвизался еси, и был еси наставник монашествующим. Всем же людям учитель ревностный. Ныне убо, по отшествии
твоем от земных, Небесному Царю предстоя, моли благость Его, еже ущедрити место селения нашего. Святой храм сей, идеже духом любви
твоея неотступно пребываеши. Всем людям твоим, с верою к тебе припадающим во благая прошения их исполнити. Испроси Милостиваго
Господа нашего, да низпослет нам обилие благ земных, паче же яже на пользу душ наших да дарует нам, и скончати житие сие
привременное в покаянии до сподобит, в День же Судный деснаго предстояния и наслаждения во Царствии Своем да удостоит во веки
веков. Аминь.

Молитва ко преподобному и богоносному отцу нашему Ионе Яшезерскому чудотворцу
О, преподобне и богоносне отче наш Ионо. За ангелонравное житие твое на земли престолу Божию ныне предстоиши на небеси. Но и
духом любви от нас не отступая яко теплый заступник, скорый помощник и известный предстатель. Имея тя дивнаго ходатая у Бога
прибегаем к твоему покрову и заступлению и чтим святую память твою, с верою и любовию припадая к честному образу твоему, зря тя яко
живаго сущя с нами. Прими ныне моление нас недостойных, избави нас твоим предстательством от всех скорбных обстояний, душевных и
телесных недугов, тлетворных и лукавых искушений. Ниспосли Отечеству нашему от Великодаровитаго Бога мир, тишину и благоденствие.
Буди непреложный покровитель земли Вепсской и святыя обители твоим именем украшенной, в нейже трудолюбно в преуспевании
подвизался еси и угодил в Троице славимому Богу нашему. Ему же подобает всякая слава, честь и поклонение, Отцу и Сыну и Святому
Духу, ныне и присно и во веки веков. Аминь.[/spoiler]

Раб божий Константин

Акафист священномученику Иосифу, первому митрополиту Астраханскому и Терскому.
[spoiler]Кондак 1


Избранный святителю и предивный угодниче Христов, Господа и люди своя всем сердцем возлюбивый, душу свою за овцы своя положивый, за мучители своя Господу моливыйся, священномучениче Иосифе, крепкое града Астрахани ограждение. Похвальная восписуем ти, к раце мощей твоих притекающе, ты же, яко имеяй дерзновение ко Господу, от всяких бед нас свободи зовущих: Радуйся, священномучениче Иосифе, верный Астраханския земли страже.


Икос 1


Ангелов Творец и Господь во дни великих бед и напастей, обышедших отечество наше, восхотев людем страждущим утешение даровати, яви тя, святителю Иосифе, человеком наставника, от юности и до мученической смерти возлюбившаго божественное учение. Сего ради тебе, на небеси и на земли прославленному, вопием сице: Радуйся, яко Бога истиннаго Отца нашего из детска познавый; Радуйся, от юности путь мирскаго жития оставивый. Радуйся, чистоту сердца твоего до конца сохранивый; Радуйся, осмилетним от мятежных людей во главу ударенный. Радуйся, от удара того, даже до смерти, главою своею трясенный; Радуйся, рассуждения даром почтенный. Радуйся, образом жития твоего и нам путь к небеси показавый; Радуйся, всю жизнь свою Господеви предавый. Радуйся, коемуждо во благо усердно служивый. Радуйся, священномучениче Иосифе, верный Астраханския земли страже.


Кондак 2


Видя Благопромыслитель Господь души твоея доброту, направи твой помысл ко исканию единаго на потребу. Ты же, сего возжелав, еще от юности навыкл взывати Богу: Аллилуиа.


Икос 2


Разум Божественный имый, всю суету привременныя жизни презрел еси, святителю Иосифе; тем же оставив мир и вся яже в нем, измлада приял еси образ ангельский, всего себе отдав на служение Господу и ближним твоим, даже до смерти. Таковое убо изволение твое восхваляюще, глаголем ти сицевая: Радуйся, яко путь правый в Царствие Небесное обрел еси; Радуйся, яко сим путем невозвратно шел еси. Радуйся, мучение и смерть мужественно приявый; Радуйся, душу свою положивый за овцы своя. Радуйся, молитвенниче ко Господу наш непрестанный; Радуйся, волею своею от беззаконных в жертву принесенный. Радуйся, града Астрахани и отечества нашего святый покровителю; Радуйся, от творящих беззаконие и зло уклонивыйся. Радуйся, путь незлобия спасительнаго взыскавый; Радуйся, священномучениче Иосифе, верный Астраханския земли страже.


Кондак 3


Силою Божиею укрепляем, священномучениче Иосифе, вся послушания добре проходил еси во обители Троицкия и святительскаго сана достигнув, от беззаконных мучителей свержения со стены града претерпел еси, жизнь свою страданьми за правду увенчав, преселился еси в небесныя обители, идеже предстоя Престолу Святыя Троицы, поеши: Аллилуиа.


Икос 3


Имея помысл чист и душу непорочну, священства благодать достойно восприял еси, святителю Иосифе; темже во игумена обители избран е был и саном архимандрита почтен, ревностно подвизался о спасении Богом врученного тебе словеснаго стада. Сего ради вопием ти: Радуйся, яко вся послушания иноческая неленостно прошел еси; Радуйся, яко сим на высоту добродетелей возшел еси. Радуйся, иночествующих мудрый наставниче; Радуйся, всех благочестному житию научающий. Радуйся, отечество земное молитвами своими не оставляющий; Радуйся, и по смерти твоей всем, с верою к тебе притекающим, благодать источающий. Радуйся, и святыми мощами твоими с нами пребывающий; Радуйся, от святых мощей твоих исцеления подавающий. Радуйся, путь из тьмы греховной к невечернему свету освещающий; Радуйся, священномучениче Иосифе, верный Астраханския земли страже.


Кондак 4


Бури злословия и людскаго мятежа не убоялся еси, святителю Иосифе, егда укры в доме своем люди беззащитныя, увещая бо беззаконных престати от зла, не проливати крови, но в покаянии обратитися ко Господу, взывая Ему: Аллилуиа.


Икос 4


Слыша и видя премногую твою добродетель, блаженный Никон патриарх святителя тя нарече и паству Астраханскую смотрению твоему вручи. Мы же, о сем веселящеся, глаголем ти сицевая: Радуйся, вся степени иноческаго звания с честию и славою прошедый; Радуйся, на престоле святительстем достойно возседый. Радуйся, страже Церкви Христовы неустрашимый; Радуйся, делателю винограда Христова неутомимый. Радуйся, о невежествиих людских печальниче; Радуйся, благовременне и безвременне паству твою поучавый. Радуйся, овцы заблудшия ко Христу призвавый; Радуйся, люди во тьме сидящия светом Христовым озаривый. Радуйся, сим от погибели их сохранивый; Радуйся, священномучениче Иосифе, верный Астраханския земли страже.


Кондак 5


Бурями житейскими искушаем, не убоялся еси, святителю, стати противу беззаконных, чашу бо страданий за правду испив, со стены града низвержен был еси и, кровию своею землю обагрив, непрестанно взывал Богу: Аллилуиа.


Икос 5


Видя нестроения во граде Астрахани и скорбию о сем объят, покоя не познал еси, святителю Иосифе, Господь же даде знамение с небеси о мученической кончине твоей, еяже не убоявся, священномученик был еси, и с благочестием к тебе прибегающим помощник в бедах и болезнех явился еси, вопиющим с любовию тебе таковая: Радуйся, непрестанными молитвами сердце твое освятивый; Радуйся, очеса твоя к небу всегда, возводивый. Радуйся, славу небесную паче всего возлюбивый; Радуйся, во единем Бозе сладость жития полагати всегда вразумляяй. Радуйся, добрый воине Христов и проповедниче спасения; Радуйся, сердца наша в единомыслии и любве ко отечеству нашему направляяй. Радуйся, устами твоими премудрость глаголивый; Радуйся, светильниче Церкви Христовы, во тьме века сего возсиявый. Радуйся, люди добродетели всегда научаяй; Радуйся, священномучениче Иосифе, верный Астраханския земли страже.


Кондак 6


Проповедник смирения и ревнитель благочестия словом и житием твоим был еси, святителю Иосифе, возлюбив бо Христа, не устрашился еси мучений и, хулы прияв за мирныя люди, яже в доме твоем укры, воспел еси Господеви песнь победную: Аллилуиа.


Икос 6


Возсиял еси во стране Астраханстей и Терстей светом Христова учения и ревностию твоею о славе Божией, святителю богоблаженне, ты бо красоту Господню возлюбив, о устроении храмов святых и благочинии церковнем всеусердно прилежал еси. Сего ради вопием ти сице: Радуйся, славы Христовы ревнителю; Радуйся, храмов святых строителю. Радуйся, благочиния церковнаго строгий охранителю; Радуйся, тобою бо церковь Астраханская благоукрасися. Радуйся, яко в ней вера Христова утвердися; Радуйся, града Астрахани славо и украшение. Радуйся, всем нам защита и ограждение; Радуйся, Господа и люди своя до конца возлюбивый. Радуйся, душу за други своя положивый; Радуйся, священномучениче Иосифе, верный Астраханския земли страже.


Кондак 7


Хотя на путь правый покаянием люди наставити, возстающим на тя дерзновенно глаголал еси: "Престаните убо от зол ваших и милость и прощение обрящите", — они же глуси быша словеси твоему, распыхахуся на тя и Мирона Богобоязненна, глаголюща им о святости сана твоего, умертвиша, ты же, святе Иосифе, все упование на Бога возлагая, воспевал: Аллилуиа.

Икос 7

Новаго тя молитвенника и чудотворца предивна яви Господь стране Российстей и граду Астрахани, святителю Иосифе убиенне. Взем бо меч духовный — слово Божие, беззаконныя от Божественнаго писания увещал еси правый путь покаяния обрести в истинном от грехов отвращении. Сего ради усердно зовем ти: Радуйся, рабе Господень верный; Радуйся, угодниче Его нелицемерный. Радуйся, на камени заповедей Господних утвержденный; Радуйся, беззаконными на муки огнем вещественным осужденный. Радуйся, руками беззаконных заушенный; Радуйся, связанный по рукама и ногама, на огни опаленный. Радуйся, от злых людей убиенный; Радуйся, душею на небо восхищенный. Радуйся, об отечестве нашем печальниче нелицемерный; Радуйся, священномучениче Иосифе, верный Астраханский земли страже.


Кондак 8


Странно бе видети страже нощней небо отверсто и огнь, на град ниспадающий. Ты же, святе Иосифе, слыша о сем, горько плакася в келии своей глаголя: "Излияся с небеси фиал гнева Божия". Таковаго гнева избави нас, Господи, молитвами священномученика Иосифа, Богу воспевающих: Аллилуиа.


Икос 8


Весь исполнь любве Христовы, душу твою за овцы твоя положити готов был еси, священномучениче, не иский своя, подвигом добрым подвизался еси, блаженне, обидимых защищая, печальных утешая, невинно убиенных благословляя, продерзных и злых с кротостию обличая и вразумляя. Ныне же светло радуешися, идеже правда и мир, и радость о Господе нашем. Сего ради чтим святую память твою и усердно вопием ти: Радуйся, святителю благосердный, о спасении многих поревновавый; Радуйся, не своих си, но ближняго искавый. Радуйся, страже неусыпный, от волков хищных овцы твоя охранявый; Радуйся, сирых защитниче и обидимых предстателю. Радуйся, яко и ныне во всяких нуждах скоро нам помогаеши; Радуйся, заступниче наш неусыпный. Радуйся, и к раце мощей твоих с верою притекающих милостивно утешаеши; Радуйся, яко в райских обителех ныне пребываеши. Радуйся, града Астрахани святый покровителю; Радуйся, священномучениче Иосифе, верный Астраханския земли страже.


Кондак 9


Вся помыслы к Богу возводил еси, святителю Иосифе, егда огнем бо жегом был еси и на смерть ведомый, очи твоя горе имел еси, моляся, яко первомученик Христов Стефан: "Господи, не помяни им греха сего". Мы же, воспоминающе сия, вопием Богу: Аллилуиа.


Икос 9


Витийство человеческое не может по достоянию восхвалити тя, вечныя славы достойнаго, священномучениче Иосифе; в ризах бо святительских вшел еси в нечестивых соборище и дерзновенно, яко пророк Божий, глаголал еси: "Почто звасте мене? Оставите упорство ваше и злобу!" Они же, яко звери дивии, жаждуще крови твоея, скрежетаху на тя зубы своими, предати смерти хотя. Мы же в похвалу тебе сице глаголем: Радуйся, священномучениче, яко в тебе вселися сила Христова; Радуйся, яко и власяница твоя честная, на недужныя полагаемая, дарует им исцеление. Радуйся, яко и гроб твой святый с верою приходящим явися неоскудной врачебницей; Радуйся, силою Христовою чудеса содевающий. Радуйся, милостию Божиею немым уста отверзающий; Радуйся, в сонии и видении помощь твою являющий. Радуйся, расслабленным даровавый укрепление; Радуйся, бесноватых от насилия диавольскаго освобождение. Радуйся, врачу безмездный, туне врачевание всем подающий; Радуйся, священномучениче Иосифе, верный Астраханския земли страже.


Кондак 10


Спасение вечное унаследовал еси, святителю Иосифе, яко звезда пресветлая, возсиял еси во граде Астрахани, идеже родился еси, и за верность Богу мученическую смерть приял еси. Мы же, чтуще страдания твоя, зовем ти: "Святителю Иосифе убиенне, моли Христа Бога, да избавит нас вечныя муки, вопиющих Ему: Аллилуиа".


Икос 10


Царя Небеснаго, Господа Иисуса, кротости подражая, добрыми делы зло побеждал еси, богоблаженне Иосифе. Сам бо ризы своя совлекл еси пред беззаконными и, во власянице (суконной одежде) пред ними представ, на мучения веден был еси. Таковое незлобие твое зряще, сице тебе вопием: Радуйся, священномучениче, огнем на земли опаленный, пламени вечнаго избавленный; Радуйся, ум и сердце твое посреде огненнаго мучения ко Господу устремивший. Радуйся, подобно отроком Вавилонским, во огни палимый, взывал еси: "Боже, благословен еси"; Радуйся, со онеми отроки и всеми святыми ликовствуеши ныне во Царствии Небеснем. Радуйся, кроткому Иисусу поревновавый; Радуйся, Того благодатию незлобие стяжавый. Радуйся, землю бо кротких наследовавый; Радуйся, смирения ради Самим Господом возвеличенный. Радуйся, незлобию и любви нас научающий; Радуйся, священномучениче Иосифе, верный Астраханския земли страже.


Кондак 11


Пение немолчное совершая у святей раце мощей твоих, святителю Иосифе, покаяния молитвы за безумие отцов наших приносим, слезно глаголя: "Господи, даруй им прощение молитвами священномученика Твоего", да всегда прославляюще милосердие Божие, поют: Аллилуиа.


Икос 11


Свет невещественный видеша люди на месте, идеже от падения со стены града смерть от беззаконных приял еси, святителю Иосифе, просвети убо молитвами твоими и нас, в пучине греха погибающих, да благодарно вопием ти: Радуйся, веру, надежду и любовь даже до конца сохранивый; Радуйся, светильниче многосветлый, светом истиннаго богопознания нас озаривый. Радуйся, луче солнца правды, теплотою Божественныя любве души наша согревающий; Радуйся, бисере честный, сиянием небесныя славы сердца наша увеселивый. Радуйся, каменю драгий, страну поволжскую украсивый; Радуйся, бездну милосердия Божия нам призывающий. Радуйся, священномучениче, люди земли поволжстей не забывающий; Радуйся, в молитвах с нами всегда пребывающий. Радуйся, за Господа распятаго опаленный, изъязвленный и убиенный; Радуйся, священномучениче Иосифе, верный Астраханския земли страже.


Кондак 12


Благодатию от Бога почтенный болящия исцеляти и демонов прогоняти священномучениче Иосифе, тем же и нас, добродетели лишенных и молитвы не стяжавших, паче же фарисея возносящихся, твоею молитвою исцели, да в сокрушении поживши, купно с тобою Господеви воспоем: Аллилуиа.


Икос 12


Поюще твое богоугодное житие, святителю Иосифе, и на небеси от Бога прославленное, величаем бесчисленныя чудеса и исцеления, у гроба твоего бывшая, и на неусыпныя молитвы твоя уповающе взываем ти сице: Радуйся, посреде крамолы, волнений и бедствий все земное житие твое проведший; Радуйся, житие сие благочестне скончавый. Радуйся, от Царя Небеснаго венец славы приемый; Радуйся, не оставивый паствы своей во времена напасти. Радуйся, многая лишения правды ради претерпевый; Радуйся, сердце твое сосуд благодати соделавый. Радуйся, по убиении гробом твоим три лета во храме стоявший; Радуйся, гробом сим покаяние людей принимавший. Радуйся, града Астрахани и Церкви святей похвало; Радуйся, священномучениче Иосифе, верный Астраханския земли страже.


Кондак 13


О преславный угодниче Божий, священномучениче Иосифе! Приими сие от любве нашея приносимое тебе благохваление и твоим благоприятным ходатайством избави нас от всяких бед и зол. Умоли Господа Бога оставление прегрешений нам даровати, да сподобимся купно с тобою во веки пети: Аллилуиа.


(Этот кондак читается трижды, затем икос 1 и кондак 1)



Молитва священномученику Иосифу, первому митрополиту Астраханскому и Терскому


О священная главо, преславный чудотворче, первопастырю святыя Астраханския церкви, святителю отче Иосифе! К тебе припадаем и молимся мы, смиреннии и грешнии, и яко отца чадолюбиваго просим: всели в сердца наша любовь, еюже к Богу и ближним твоим при жизни земней преисполнен был еси, яко и душу твою положил еси, мученически пострадав. Научи нас, отче, подражати тебе верно, Бога и ближних наших любити искренне и заповеди Господни совершати непогрешительно, да будем и мы с тобою чада Божия, не по имени токмо, но и самим делом и всем житием нашим. Призри благоутробно на всякую душу христианскую, милости и помощи от тебе ищущую. Буди всем нам в болезнех целитель, в скорбех утешитель, в печалех избавитель, бедах помощник, в час смертный покровитель, да помощию молитв твоих святых сподобимся и мы грешнии спасение вечное получити и Царство Небесное унаследовати. Ей, святителю Христов, не посрами упования нашего, еже по Бозе и Пресвятей Богородице на тя крепко возлагаем, но яви нам многомощное заступление, да хвалим, славим и величаем человеколюбие дивнаго во святых Своих Бога, Отца и Сына и Святаго Духа, во веки веков. Аминь.



Тропарь священномученику Иосифу Астраханскому, митрополиту


Тропарь, глас 6


Подвигом добрым подвизався, жизнь твою страданиями за правду увенчав, преселился еси в Небесныя обители, идеже предстоя Престолу Святыя Троицы, моли, святителю Иосифе, граду Астрахани и отечеству нашему в мире спастися.[/spoiler]