Молитвослов

Автор Раб божий Константин, марта 10, 2012, 02:13:14

« назад - далее »

Раб божий Константин

акафист Преподобным старцам Оптинским.
[spoiler]Кондак 1

Избранным Богом от суетнаго мира, вам, о преподобнии отцы Оптинстии, крест свой благоговейно подъемши и Христу последовавшим верою, яко дерзновенным предстателем нашим пред Господем ныне усердное моление приносяще, с любовию взываем: Радуйтеся, преподобнии отцы Оптинстии, благодати старчества светильницы.

Икос 1

Ангельскаго иноческаго жития всем сердцем взыскавше, вся мирская пристрастия отвергосте, Богомудрии, и во объятия Отча с любовию в обитель Оптинy притекше, путем тесным и прискорбным до конца дней ваших шествовасте. Сего ради воспеваем сице: Радуйтеся, на зов Господень радостно притекшии; радуйтеся, всем желанием Христу последовавшии. Радуйтеся, крест свой на рамо восприимшии; радуйтеся, паче Господа ничесоже возлюбившии. Радуйтеся, Христа ради всеконечно себя отвергшиися; радуйтеся, Царствия Божия блаженнии наследницы. Радуйтеся, преподобнии отцы Оптинстии, благодати старчества светильницы.

Кондак 2

Видевше сети диаволъския, аки паучина в мире распростертая, и во глубине сердец ваших восчувствовавше, яко от них человецы токмо смирением спасаются, себе самех в теплой молитве пред Господем повергосте, со умилением взывающе: Аллилуиа.

Икос 2

Разумевше сердцем и умом, яко делы своими не оправдится пред Богом всяк живый, и присно содержаще пред очесы вашими согрешения своя, токи слезныя, единому Господу зримыя, источати не престасте, покаяние души Ему приносяще, Егоже образ показасте нам, взывающим: Радуйтеся, грехи своя неприкровенны прозревавшии; радуйтеся, дар умиления и слез от Господа приявшии. Радуйтеся, блаженство плача о гресех познавшии; радуйтеся, неусыпающую скорбь о них стяжавшии. Радуйтеся, на земли покаяния проповедницы; радуйтеся, на небеси ныне Господем утешаемии. Радуйтеся, преподобнии отцы Оптинстии, благодати старчества светильницы.

Кондак 3

Силу искупительных страданий Христовых положисте, святии, яко нерушимую надежду спасения, себе самех хуждшими всех человек и никоеяже милости достойных помышляюще, и сего ради со многим смирением и благодарением присно вопиясте Богу: Аллилуиа.

Икос 3

Имуще в сердцах своих Божественный смиренномудрия дар, истинные ученицы Христа, смирившаго Себе даже до смерти Крестныя, ни во чтоже вменисте вся подвиги и труды ваша. Возрастающим бо подвигом, сугубо возрасташе и смирение, емуже дивящеся, глаголем: Радуйтеся, послушанию и смирению Спасителем наученнии; радуйтеся, за смирение Господем Славы вознесеннии. Радуйтеся, безгневия и кротости смирением достигшии; радуйтеся, смирением и самоукорением покой душам обретшии. Радуйтеся, нищетою духовною обогатившиися избранницы; радуйтеся, ваше бо есть Царствие Небесное, нищим духом уготованное. Радуйтеся, преподобнии отцы Оптинстии, благодати старчества светильницы.

Кондак 4

Бурю страстей, плотию и диаволом воздвизаемую, утоляюще, ум владыку над страстьми пагубными постнически постависте, мужески бо естество понудивше, потщастеся благодатию Божиею хуждшее покорити лучшему и плоть поработити духу, Подвигоположнику Христу пети не престающе: Аллилуиа.

Икос 4

Слышавше глагол Господень, яко Царствие Небесное нудится и токмо нуждницы восхищают е, постом, бдением и молитвою непрестанно подвизастеся и плоть свою со страстьми и похотьми Христови распясте, уставы иноческия нерушимо соблюдше. Темже ублажаем вы: Радуйтеся, благое иго Христово люботрудно noнесшии; радуйтеся, трезвением сердечным духа не угасившии. Радуйтеся, крепкое хранение устом своим полагавшии; радуйтеся, телеса своя нещадно утеснявшии. Радуйтеся, с телесными подвиги умное делание сочетавшии; радуйтеся, в терпении вашем души ваша стяжавшии. Радуйтеся, преподобнии отцы Оптинстии, благодати старчества светильницы.

Кондак 5

Светоносное имя Иисусово, яко оружие непобедимое противу бесовския рати, непрестанно в сердце с верою носяще, приснотекущий источник благодати обретосте, восходяще от силы в силу и огнь ко огню прилагающе, очищенным смыслом воспеваете Богу: Аллилуиа.

Икос 5

Прозревающе всечасно немощь свою и спасительную, благодатную силу молитвы Иисусовой, николиже престасте творити ю, страстей прилоги тою посецающе и вся козни вражия попаляюще, в безмолвии сердца молитвенное собеседование с Господем таинственно обретше, нас научаете взывати вам: Радуйтеся, весь ум свой в молитву погрузившии; радуйтеся, всецело горе сердца своя имевшии. Радуйтеся, на молитве ни о чемже суетнем помышлявшии; радуйтеся, имя Иисусово неусыпно призывавшии. Радуйтеся, молитвы сердечныя изряднии подвижницы; радуйтеся, вся просимая во имя Господне получавшии молитвенницы. Радуйтеся, преподобнии отцы Оптинстии, благодати старчества светильницы.

Кондак 6

Предстояще сердцем в молитве пред Крестом за грехи людския страждущаго Господа, рыданием возрыдаете, преподобнии, скорбию о гресех своих снедаеми и неизглаголанною любовию к Искупителю нашему возгарающеся, до конца жития убо трепетно взывасте Ему: Аллилуиа.

Икос 6

Воссиявшу в сердцах ваших свету любве Божественныя, славу земную и похвалы возненавидесте и омерзисте, безчестие же от человеков и всякия скорби отверстым сердцем радостно приемлюще, поношению Христову усердно приобщистеся. Нам убо образ злострадания и терпения показасте, зовущим: Радуйтеся, язвы Господа Иисуса Христа на теле своем носившии; радуйтеся, поругания, яко врачевство чистительное, усердно пившии. Радуйтеся, от почестей земных всем сердцем отвратившиися; радуйтеся, за ненавидящих вас с любовию молившиися. Радуйтеся, обидящих вас, яко благодетелей, возлюбившии; радуйтеся, благодарити Милосердаго Господа николиже преставшии. Радуйтеся, преподобнии отцы Оптинстии, благодати старчества светильницы.

Кондак 7

Хотяй Господь всем человеком спастися и в разум истины приити, видя ваше благое произволение и труд непрестанный в исполнении заповедей Его, отверзе вам ум разумети пути Своя и оправданием Своим научи вас. Темже сердцем просвещенным выну воспевасте: Аллилуиа.

Икос 7

Дивна дела Твоя, Господи, яко паче книжник вразумляеши рабов Твоих, всем сердцем взыскующих Тя, и открываеши очи их, да уразумеют чудеса от закона Твоего. Блажим убо преподобных Твоих, отцев наших Оптинстих, присно поучавшихся в заповедех Твоих, яже возлюбиша зело, и поем им: Радуйтеся, словеса Божия, яко богатство много, в сердце сокрывшии; радуйтеся, путие заповедей Божиих всем сердцем возлюбившии. Радуйтеся, всяк путь неправды омерзившии; радуйтеся, от пути Господня николиже отступившии. Радуйтеся, в добрем подвизе уготовившиися и не смутившиися; радуйтеся, слово Божие вместивше, мир мног во Христе обретшии. Радуйтеся, преподобнии отцы Оптинстии, благодати старчества светильницы.

Кондак 8

Странников и пришельцев на земли себе помышляюще, ничесоже от тленных вещей мира сего стяжати себе не возжеласте, да не будут сердца ваша к земли влекома, обаче к единому Богу прилепистеся, чисте возносяще Ему песнь: Аллилуиа.

Икос 8

Всякое плотское пристрастие, от любве Господни отлучающее, вседушно отвергосте, единое на потребу взыскующе. Всегда убо при ногу Иисусову неотторженною приседесте любовию, ко благом житейским сердца не прилагающе и все упование свое на Господа возложивше. Темже похваляем вас, святии: Радуйтеся, без пристрастий к миру житие свое скончавшии; радуйтеся, от земных забот свобождшеся, сладость чистыя молитвы познавшии. Радуйтеся, твердою верою попечения житейская отложившии; радуйтеся, нестяжанием и послушанием пагубныя страсти умертвившии. Радуйтеся, иноческий обет нестяжания свято соблюдшии; радуйтеся, волю свою отсекшии Христовы послушницы. Радуйтеся, преподобнии отцы Оптинстии, благодати старчества светильницы.

Кондак 9

Вся молитвы ваша и вся силы ваша подвигосте, преподобнии, во еже стяжати чистоту душевную и телесную, без неяже, по словеси Христову, никтоже узрит Бога; темже убо чистым сердцем сподобистеся в раи Господни достойно воспети чудную праведных песнь, зовуще: Аллилуиа.

Икос 9

Воюющии на душу плотская вожделения постом и молитвою укрощающе, помыслом греховным возобладати вами не попускаете, от Господа Бога, единаго власть имущаго побеждати естества чин, дар чистоты и целомудрия приясте. Приимите убо и от нас хваления таковая: Радуйтеся, благодать Божию в борьбе с плотию смирением привлекшии; радуйтеся, труды и лишения возлюбивше, покой телесный отринувшии. Радуйтеся, постом и всенощными моленьми похоть плоти умертвившии; радуйтеся, естества уставы силою Христовою победившии. Радуйтеся, телеса и души ваша чисты Господеви принесшии; радуйтеся, чистии сердцем, Бога в вечнем блаженстве зрящии. Радуйтеся, преподобнии отцы Оптинстии, благодати старчества светильницы.

Кондак 10

Спасти хотяще души своя для жизни вечныя, вся помышления о земнем и привременнем отринусте и Спасителю нашему, заповедь велику о любви учеником Своим давшему, делом и истиною последовасте. Сего ради ближних ваших теплою любовию тогда возлюбисте, Небесному Отцу всех человеков зовуще: Аллилуиа.

Икос 10

Возлюбивше всею душею ближняго своего, Царствие Божие внутрь себе обретосте, темже сниде в сердца ваша огнь попаляяй любве Божия, еюже необыменно насыщающеся, всецело себе в жертву делом любве принесосте. Ныне же и от нас благоговейное пение сие слышите: Радуйтеся, всех человеков святою любовию возлюбившии; радуйтеся, во еже некия спасти, всем вся бывшии. Радуйтеся, о горестех людских слезно воздыхавшии; радуйтеся, всех притекающих в сердцах своих вмещавшии. Радуйтеся, тща от себе никогоже отпускавшии; радуйтеся, души ваша за ближних полагавшии. Радуйтеся, преподобнии отцы Оптинстии, благодати старчества светильницы.

Кондак 11

Пение молебное приносим вам, преподобнии отцы наши Оптинстии, вашею бо стезею воистину право ходити познахом. Блажени есте, Христу работавшии и вражию посрамившии силу, истинное правило добродетели показастеся всем, Господеви зовущим: Аллилуиа.

Икос 11

Светлыя подвиги ваша похваляюще, преподобнии отцы наши Оптинстии, ублажаем вас, яко славных наставников монахов и чудных собеседников Ангелов ныне на небеси Престолу Божию предстоящих и молящихся о нас, с любовию поющих вам: Радуйтеся, трезвения непрестаннаго усерднии ревнителе; радуйтеся, пламени сердечнаго неусыпнии хранителе. Радуйтеся, непоколебимии столпи послушания, вся претерпевшии; радуйтеся, многими скорбьми в Царствие Божие вшедшии. Радуйтеся, иноческаго жития равноангельнии подвижницы; радуйтеся, добрии раби Божии, блазии и вернии. Радуйтеся, преподобнии отцы Оптинстии, благодати старчества светильницы.

Кондак 12

Благодати дар испросите нам у Господа, вас, о блаженнии, верно хвалящим. Вонмите воздыханием нашим, слез наших не презрите. Умолите Господа утолити лютыя страсти наша, дати нам плач сокрушенный о гресех наших, да чистою душею и неоскверненными устнами купно с вами сподобимся в раи Господни воспевати: Аллилуиа.

Икос 12

Поюще ныне вас, о преподобнии, хвалебными гласы, вемы, яко не пения устен взыскуете, но подвигом вашим последования, смирения сердечнаго и жития исправления. Темже в покаянии помощи вашея просяще, любовию же подвизаеми, глаголем: Радуйтеся, добре жительствующих ограждающии; радуйтеся, немощных и сирых укрепляющии. Радуйтеся, падающим руку помощи простирающии; радуйтеся, кающимся слезы утешительныя низпосылающии. Радуйтеся, всем призывающим вас скории помощницы; радуйтеся, спасения нашего пред Богом теплии ходатаи. Радуйтеся, преподобнии отцы Оптинстии, благодати старчества светильницы.

Кондак 13

О преславнии угодницы Христовы, преподобнии отцы и старцы, Моисее, Антоние, Исаакие, Иларионе, Анатолие, Иосифе и Вторый Исаакие, Льве, Макарие, Амвросие, Варсонофие, Вторый Анатолие, Нектарие и Никоне, яко седмь столпов и седмь светильников в Оптинстей обители просиявшии! Нынешнее наше моление услышите и испросите нам у Господа смирение и память смертную, да избавит нас Господь от всякаго зла и сподобит христианския кончины всех вопиющих Ему: Аллилуиа.

(Этот кондак читается трижды, а затем икос 1 и кондак 1)




Молитва преподобным отцем и старцем, в Оптиной пустыни просиявшим

О велицыи угодницы Божии, столпи и светильницы Земли Российстей, преподобнии и богоноснии отцы наши Оптинстии, Льве, Макарие, Моисее, Антоние, Иларионе, Амвросие, Анатолие, Исаакие и Иосифе, Варсонофие, Анатолие, Нектарие, Никоне и Исаакие, по закону Евангельскому Господа Бога всем сердцем и всею душею и всем разумением возлюбившии и всему народу Божию во спасение бывшии; сего ради под покров Пресвятыя Владычицы нашея Богородицы во обитель Оптину, покаявшимся разбойником основанную, притекшии, путем тесным и прискорбным смирения и самоукорения до конца дней ваших ходившии, темже убо благодатныя дары святаго Духа преизобильно стяжавшии; старых и младых, знатных и препростых, мудрых века сего и худоумных, никогоже от грядущих к вам ижденувшии, николиже тща и неутешна отпустившии, но светом истины Христовы всех просветившии и духовно воскресившии, ближних ваших, яко себе самех, возлюбившии и тех в сердце своем вместившии, по словеси Апостола, пророчествующе и назидающе, увещающе и утешающе. Умолите Милосердаго Господа, во обитель райскую разбойника благоразумнаго с собою вземшаго, даровати нам, недостойным, яко работником единонадесятаго часа, дух сокрушения, сердца очищение, уст хранение, правоту деяний, мудрование смиренное, слезы покаяния, веру непостыдную, любовь нелицемерную, мир душевный и здравие телесное, да предстательством вашим сподобит нас Господь добраго ответа на Страшнем Судищи Своем, вечных мук избавляя, и царствия Небеснаго купно с вами да удостоит во веки веков. Аминь.

Тропарь, глас 6

Православныя веры светильницы, монашества непоколебимии столпи, земли Российския утешителие, преподобнии старцы Оптинстии, любовь Христову стяжавшии и души своя за чада полагавшии, молитеся ко Господу, да утвердит земное Отечество ваше в православии и благочестии и спасет души наша.

Кондак, глас 4

Воистину дивен Бог во святых своих, Пустынь Оптину якоже вертоград старчества явивый, идеже богопросвещеннии отцы, тайная сердца человеческаго ведуще, народа Божия печальницы доблии явишася: сии бо на путь покаяния грехом отягощенныя наставиша, в вере колеблющияся светом Христова учения просветиша и Божией премудрости научиша, страждущим и немощным спострадаша и исцеление дароваша. Ныне же, во славе Божией пребывающе, молятся непрестанно о душах наших.[/spoiler]

Раб божий Константин

Иной акафист старцам Оптинским.
[spoiler]Кондак 1
Избранным служителем Святыя Троицы, Собору преподобных Старцев Оптинстих, наставником добрым и премудрым благодарение и похвалы приносим. Вы же, яко Христовы Церкве украшение, молитеся о нас ко Господу, да воспеваем вам любовию: Радуйтеся, преподобнии Старцы Оптинстии, Богомудрии учители веры и благочестия!

Икос 1
Ангелов Творец прослави вас, отцы и Старцы преподобнии, яко сбытися на вас реченному: свет монахом суть ангели, свет же всем человеком есть монашеское житие. Воистинну убо явилися есте ангели хранители стране нашей Российстей: иноком наставницы, ко спасению путевожди всем верным чадом Церкве, вопиющим:
Радуйся, Богопрославленный соборе;
радуйся, Богозарное благодати сияние.
Радуйся, древо старчества многоплодное;
радуйся, во Христе единство духовное.
Радуйся, полче, исполненный силы Божия;
радуйся, воинство, побеждающее демонов.
Радуйся, венче, Духом Святым благоухающий;
радуйся, Оптины Пустыни славо и похвало.
Радуйся, Христов пречудный винограде;
радуйся, мысленный раю Богонасажденный.
Радуйся, ликостояние певцев Святыя Троицы;
радуйся, созвездие тверди Небесныя.
Радуйтеся, преподобнии Старцы Оптинстии, Богомудрии учители веры и благочестия!

Кондак 2
Видяще суетная и привременная, яже в мире сем, всякое житейское попечение отвергосте, отцы Богомудрии; приидосте в Пустынь Оптину, идеже древний образ общаго жития явисте: союз любве неразрушимый о Христе и ревность первохристианскую Завета Новаго. Невозвратно ко Господу устремилися любовию, ангельскую песнь воспевая: Аллилуиа.

Икос 2
Разум спасения взыскуя, отцы преславнии, богатство, славу и вся земная яко мимотекущая презревше, едино же на потребу избрасте; многими труды, скорбьми и болезньми доброе основание подвигу положисте. Темже Христовы заповеди сотворше и святых Отец советы соблюдше, добродетельми обогатилися есте. Сего ради вопием вам:
Радуйтеся, Христово смирение возлюбившии;
радуйтеся, кротость духа терпением стяжавшии.
Радуйтеся, воле Божией последовавшии;
радуйтеся, свою волю отсекшии.
Радуйтеся, молитвою и постом Богу служившии;
радуйтеся, чистым сердцем Господа зрящии.
Радуйтеся, страсти телесныя воздержанием умертвившии;
радуйтеся, плоти ваша духу покорившии.
Радуйтеся, милость, яко Царский путь избравшии;
радуйтеся, разсуждение верх добродетелей, обретшии.
Радуйтеся, от Бога благия дары приявшии;
радуйтеся, благонравную жизнь показавшии.
Радуйтеся, преподобнии Старцы Оптинстии, Богомудрии учители веры и благочестия!

Кондак 3
Сила Моя в немощи совершается, рече Господь. Темже и вы, преподобнии, ярем скорбей и болезней подъявше, силою Духа обогатистеся: дар разсуждения приясте, и премудрость старчества улучисте, воспевая Подателю всяческих: Аллилуиа.

Икос 3
Имуще о спасении человеков дивное промышление, славимый в Троице Бог наш виноград старчества обильно во Египте возрасти и исполни землю; и отрасль его в последняя лета достиже пустыни Оптинстей. Сия добрыми виноградари отребляема и корения своя питающая водами Святогорскими и Фиваидскими, богатый плод принесе. Сие добре разумевше, воззовем Старцем Оптинстим сице:
Радуйся, Моисее, избранный пустынножителю;
радуйся, старчества Оптинскаго насадителю.
Радуйся, Антоние, богоугодный подвижниче;
радуйся, смирения и кротости наставниче.
Радуйся, отче Льве, по Бозе пламенный ревнителю;
радуйся, старчества Оптинскаго возрастителю.
Радуйся, душу свою за чада положити готовый;
радуйся, во обитель Промыслом Божиим приведенный.
Радуйся, отче Макарие, высото смирения;
радуйся, глубино премудрости старческия.
Радуйся, Исаакие, вертограда старчества хранителю;
радуйся, отеческих заветов верный сотворителю.
Радуйтеся, преподобнии Старцы Оптинстии, Богомудрии учители веры и благочестия!

Кондак 4
Бурное море без кормчаго никтоже возмогает преити; Исраильтяни же, путеводимии Моисеом, яко по суху преидоша е. Сей прообраз старчества приявше, Богоноснии Отцы Оптинстии, якоже оный Моисей, чрез море житейское мнозем ко спасению путеводителие явилися есте, указуя един Путь и единаго Кормчаго Христа Господа, Емуже присно воспеваем: Аллилуиа.

Икос 4
Слушаяй вас, Мене слушает, рече Господь Своим учеником, на проповедь я посылающе. И тако положено бысть святаго старчества основание, да всяк вечныя жизни иский, вопрошает старца своего, да благая познает во спасение. Сие Божественное уставление ведуще вы, святии Льве и Макарие, создаста старчество на твердом камени смирения, темже восхвалим старцев Оптинстих сице:
Радуйтеся, любовию к ближним озареннии;
радуйтеся, благодатию старчества одареннии.
Радуйтеся, к Богу путеводителие вернии;
радуйтеся, многих душ просветителие.
Радуйтеся, смирению Христову научающии;
Радуйтеся, в правде жити нас укрепляющии.
Радуйтеся, ревнители монашескаго жития;
радуйтеся, послушанию добрии учителие.
Радуйтеся, покаяния пути наставляющии;
радуйтеся, к любве Божией всех возвышающии.
Радуйтеся, добрии делателие винограда Христова;
радуйтеся, яко отверзеся вам Царство Небесное.
Радуйтеся, преподобнии Старцы Оптинстии, Богомудрии учители веры и благочестия!

Кондак 5
Богоблаженнии отцы Моисее и Исаакие, ревностию о доме Божием движимии, неленостнии зиждители обители явилися еста, положше во главу угла Камень Краеуголен. Сего ради воздвигоста дивной красоты храмы Божии, идеже мы ныне воспеваем: Аллилуиа.

Икос 5
Видения и созерцания таин Божественных сподобльшеся, явистеся благочиния Церковнаго прилежнии ревнители и благолепия Богослужения рачители, еже жити вам в дому Господнем и зрети красоту Его. Темже и мы ныне, услаждающеся красотою Обители Оптинстия и разумея изрядное попечение ваше о ней, благодарно вам взываем:
Радуйся, Антоние, усердный скита строителю;
радуйся, удела Предтечи Господня попечителю.
Радуйся, Макарие, писаньми многих просветивый;
радуйся, службы церковныя украсивый.
Радуйся, Амвросие, дивно на воздусе молящийся;
радуйся, в молитве Славу Божию созерцающий.
Радуйся, Богомудрый наставниче и учителю,
радуйся, Шамординския обители создателю и окормителю.
Радуйся, Иларионе, заблуждших исправляющий;
радуйся, тех к Таинствам Церковным привлекающий.
Радуйся, Исаакие, обители добрый управителю;
радуйся, иноков верный путеводителю.
Радуйтеся, преподобнии Старцы Оптинстии, Богомудрии учители веры и благочестия!

Кондак 6
Проповедницы Истины явистеся, Богоноснии Старцы Оптинстии, наставляюще вся ближняя и дальняя, яко Столп есть и Утверждение Истины Церковь Православная, еяже вне никтоже может спасение улучити и жизнь вечную наследити. Вами сицему наученнии, ко Господу взываем радостно: Аллилуиа.

Икос 6
Возсиясте светом добродетельнаго жития и свет истиннаго Богопознания уяснисте, изъяснение словес святых Отец нам явивше, к сим же и своя писания оставивше. Сего ради, уподобльшеся человеку домовиту, иже износит от сокровища своего новая и ветхая, умножили есте таланты Владыке Христу и прославлены от Него; мы же тщимся пети вам таковая:
Радуйтеся, Закона Божия ревнителие;
радуйтеся, истиннаго любомудрия рачителие.
Радуйтеся, ключ разумения нам подавающии;
радуйтеся, двери Истины отверзающии.
Радуйтеся, премудрости Божией сокровище;
радуйтеся, словес Божественных источниче.
Радуйтеся, света евангельскаго сияние;
радуйтеся, заповедей Христовых исполнение.
Радуйтеся, писаний отеческих изъяснителие;
радуйтеся, благочестия насадителие.
Радуйтеся, данный вам талант возрастившии;
радуйтеся, в радость Владыки Христа вшедшии.
Радуйтеся, преподобнии Старцы Оптинстии, Богомудрии учители веры и благочестия!

Кондак 7
Хотяще угодити Богови, велений Его явился еси усердный хранитель, преподобие Макарие, соблюдающе Заповедь Господню: аще кто тя ударит в ланиту десную, обрати тому и другую. Силою толикаго смирения исхождаху духове нечистии от одержимых теми. Мы же, образ зряще сей смиренномудрия, славим Бога: Аллилуиа.

Икос 7
Новых видяще избранников Божиих, притекаху к вам людей множества, чающе совета и благословения, утешения же и исцеления. Вы же всем убо вся явилися есте: грешныя на путь покаяния наставльше, маловерныя утвердивше, страждущим спострадавше, немощным исцеления даровавше. Темже и нас укрепляете пети вам:
Радуйся, Макарие, злобу диаволю победивый;
радуйся, того смирением низложивый.
Радуйся, Амвросие, в болезнех долготерпеливый;
радуйся, слезы страждущих изсушивый.
Радуйся, Иосифе, святаго Амвросия преемниче,
радуйся, по добром учителе монахов наставниче.
Радуйся, Царицы Небесныя любимиче блаженный,
радуйся, Ею от одра болезни возставленный.
Радуйся, Варсонофие, славу земную презревый,
радуйся, воинству Царя Небеснаго причтенный.
Радуйся, незримых врагов победителю,
радуйся, прозорливый душ врачевателю.
Радуйтеся, преподобнии Старцы Оптинстии, Богомудрии учители веры и благочестия!

Кондак 8
Странников и пришельцев себе на земли быти помышляя, святый Амвросие со ученики, тесный путь служения ближним избрасте. Сего ради явисте дарования разсуждения, телес исцеления, судеб Божиих тайнозрения, душ изнемогающих врачевания. Сими дары аки мрежами множество душ уловляюще, Святей Троице воспевали песнь: Аллилуиа.

Икос 8
Всем сердцем, душею и мыслию Бога возлюбивше, не токмо утешения требующих николиже оставлясте, полезная на потребу коемуждо подавая, но и все время жития молитве прилежаще, истиннаго Богомыслия сподобилися есте, преподобнии, постом и молитвою, нестяжанием и чистотою, разсуждением и милостию украшеннии, слышите от нас сицевая:
Радуйтеся, всегда пред Господем ходившии;
радуйтеся, от деяния к созерцанию востекшии.
Радуйтеся, тяготы многих понесшии;
радуйтеся, тако исполнили закон Христов.
Радуйтеся, искавшии благая ближнему;
радуйтеся, покрывавшии немощи любовию.
Радуйтеся, силу вражию низложившии;
радуйтеся, козни бесов сокрушившии.
Радуйтеся, люди Божии добре спасающии;
радуйтеся, мысленныя тати от тех отгоняющии.
Радуйтеся, очищающии совесть от грехов;
радуйтеся, облегчающии скорбь сердечную.
Радуйтеся, преподобнии Старцы Оптинстии, Богомудрии учители веры и благочестия!

Кондак 9
Всяк язык, всяк возраст, всяко сословие хвалит вы, соборе досточудный преподобных Старцев: упасли бо стадо Христово усердно и неувядаемыя венцы славы от Пастыреначальника прияли. Темже и нас научаете повиноватися старцем и пастырем, да смиренномудрие стяжавше, благодать обрящем пети Богу: Аллилуиа.

Икос 9
Како Божественныя вашея к человеком любве изглаголем: до крове бо подвизающеся и душы своя за чада полагающе, служения своего никакоже оставили есте. Мы же, предстательством вашим у Царя Царствующих Обители Оптинстия узревше возрождение, чаем и храма души обновление улучити, со умилением вам глаголюще:
Радуйся, Нектарие, блаженный наставниче,
радуйся, грядущих прозорливый провидче.
Радуйся, Исаакие, славный священномучениче,
радуйся, твердый крестоносче.
Радуйся, Анатолие, народа Божия окормление,
радуйся, в годину искушений всех укрепление.
Радуйся, за веру поругания приявший,
радуйся, в мире дух твой Богу предавший.
Радуйся, Никоне, монахов кроткое утешение,
радуйся, исповедниче многострадальный.
Радуйся, множество скорбей претерпевый,
радуйся, сомнящихся в Православии утвердивый.
Радуйтеся, преподобнии Старцы Оптинстии, Богомудрии учители веры и благочестия!

Кондак 10
Спаса мира вернии ученицы явилися Богоблаженнии, благочестно во Христе пожившии: овы убо в трудех зиждительных, овы же в немощех многоболезненных, овы же в гонениих неправедных; проидосте путь притруднаго сего жития и многоплачевнаго, образ нам подавая, како достоит в скорбех пети Господу Сил: Аллилуиа.

Икос 10
Стена есте Церкве Православныя, забрало же нерушимое честнаго иночества: вся бо оружия Божия приявше и оболкшеся в броня правды, и нас верно научаете, како щит веры, шлем спасения и меч духовный, глагол Божий обоюдуострый, восприимати подобает. Поминающе вас яко наставников, усердно молимся, да сподобит Господь подражати вере вашей вопиющих вам:
Радуйтеся, мудрости Божией научающии;
радуйтеся, водами жизни напаяющии.
Радуйтеся, монашествующих укрепление;
радуйтеся, священноиноков вспоможение.
Радуйтеся, во Обители вашей незримо пребывающии;
радуйтеся, чад своих не оставляющии.
Радуйтеся, скорые в скорбех помощницы;
радуйтеся, неусыпнии Обители начальницы.
Радуйтеся, Покровом Всецарицы осененнии;
радуйтеся, Духа Святаго сосуди избраннии.
Радуйтеся, сонаследницы Царствия Христова;
радуйтеся, по благодати сынове Отца Небеснаго.
Радуйтеся, преподобнии Старцы Оптинстии, Богомудрии учители веры и благочестия!

Кондак 11
Пение от сердец наших износимое сподобльшеся приносити вам, отцы преподобнии, пред честными мощами вашими, недоумеваем, како достойно прославити Прославльшаго вас, Дивнаго во Святых Своих Бога нашего. Точию молитвами вашими укрепляеми, немолчно вопием Ему: Аллилуиа.

Икос 11
Светозарные лучи Солнца Правды, столпи благочестия, достизающии Неба, воистинну явилися есте, отцы наши преподобнии! Ныне же во Обителех Небесных наслаждающеся, Престолу Святыя Троицы предстоите, но и нас недостойных не оставляете, дар многоценен нам явивше рацы цельбоносных мощей ваших, к нимже притекающе, зовем:
Радуйтеся, Моисее со Антонием, оплоте старчества;
радуйся, отче Льве, старчества кореню крепкий.
Радуйся, Макарие, образе смиренномудрия;
радуйся, Исаакие, домоправителю Владыки Христа.
Радуйся, Иларионе, душ и телес целебниче;
радуйся, Анатолие, молитвы светильниче.
Радуйся, Амвросие, благоуханный крине старчества;
радуйся, Иосифе, благаго корене отрасле добрая.
Радуйся, Варсонофие, доблий стратилате Христов;
радуйся, Анатолие, утешителю скорбящих.
Радуйся, Нектарие, прозорливче и теплый молитвенниче;
Радуйтеся, Исаакие с Никоном, славнии мученицы и исповедницы.
Радуйтеся, преподобнии Старцы Оптинстии, Богомудрии учители веры и благочестия!

Кондак 12
Благодать Божию приявшии, Старцы преподобнии, течение жития проидоша в подвигах и добродетелех, не имуще зде пребывающаго града, но грядущаго взыскуя, егоже и достигли есте, Горняго онаго прекраснаго Иерусалима, идеже с лики ангелов во светлости неизреченней поете Богу: Аллилуиа.

Икос 12
Поюще и празднующе всесветлую память вашу, отцы преславнии, почитаем труды и лишения, скорби и болезни, гонения и страдания ваша: не точию бо овцы стада Христова укреписте, но и веры Христовы исповедницы бысте. Темже и Блаженств Евангельских причастницы явилися есте, слышите воспеваемая вам сицевая:
Радуйтеся, нищетою духа богатии;
радуйтеся, многаго ради плача утешеннии.
Радуйтеся, наследницы земли кротких;
радуйтеся, обретшии правду Христову.
Радуйтеся, яко помилование улучившии;
радуйтеся, чистым сердцем Бога зрящии.
Радуйтеся, дух мирен стяжавшии;
радуйтеся, множество душ тем спасавшии.
Радуйтеся, претерпевшии гонение за правду Божию;
радуйтеся, возшедшии во Царствие Небесное.
Радуйтеся, гонимии от неверных на земли;
радуйтеся, яко мзда ваша многа на Небесех.
Радуйтеся, преподобнии Старцы Оптинстии, Богомудрии учители веры и благочестия!

Кондак 13
О велицыи угодницы Божии, преподобнии Старцы Оптинстии! Милостивно приимите от нас сие хваление, с любовию вам ныне приносимое, и теплым вашим ходатайством ко Господу испросите нам в вере утверждение, покаяние и воли Божией последование, да избавленнии муки вечныя, купно с вами воспеваем Богу: Аллилуиа.

Молитва
О, Преподобнии и Богоноснии Отцы наши, Старцы Оптинстии, Богомудрии учители веры и благочестия, столпи и светильницы всем взыскующим спасения и жизни вечныя: Амвросие, Моисее, Антоние, Льве, Макарие, Иларионе, Анатолие, Исаакие, Иосифе, Варсонофие, Анатолие, Нектарие, Никоне исповедниче и священномучениче Исаакие, молим вас присно мы, недостойнии, да сохранит Христос Бог предстательством вашим Церковь Свою Святую, страну Российскую, обитель Оптинскую и всякий град и страну, идеже славится и православно исповедуется имя Его Божественное.
О, преподобнии, молите и Матерь Света, Царицу Небесную, Пречистую Богородицу, да отверзет двери милосердия Сына Своего и Бога нашего, да узрим беззакония наша и принесем пред Ним покаяние многослезное, да очистит многие грехи наша и дарует нам времена мирныя и ко спасению благоуспешныя, да укротится суета века сего под крепкую руку Божию, дабы стяжать нам дух мира, кротости, братолюбия и милосердия к страждущим.
О, Преподобнии и вернии угодницы Божии, Старцы Оптинстии, паче же молите Христа Господа да сподобит и нас добраго ответа на Страшном Судищи Своем, вечных мук да избавит и купно с вами удостоит во Царствии Небесном славити и воспевати пречестное и великолепое имя Отца, и Сына, и Святаго Духа во веки веков. Аминь.[/spoiler]

Раб божий Константин

Слава и благодарение кающегося грешника Отцу своему.
[spoiler]Кондак 1
Господи Боже небесный создателю мира и Творче мой святый, Троице Единице преславная, приими моление мое, се верую в Тя и поклоняюся Ти, благодарю Тя и смиренно славлю Тя аз недостойный раб Твой, яко вся премудростию Ты сотворил еси, из небытия бытие дивно привел еси, яко восхоте, еще же и человека сотворил еси по образу и подобию Своему и се глаголю Ти смиренно: Аллилуиа, Аллилуиа, Аллилуиа.

Икос 1
Ангельския воинства воспевают Тя неустанно и славит Тя всякое дыхание. И что прибавит похвала моя к совершенней славе Твоей, Боже, Царю Небесе и земли. О, Единый предвечный, кто бе советником Тебе, егда полагал еси основание мира? Благостию Твоею сотворил еси человека, да наслаждается пребывая в любви Твоей, преступившу же заповедь Твою святую не предал еси того смерти вечней, о, Боже мой, святая Небесная Любы, но в стране изгнания пребывая ныне, по Отечеству Небесному томлюся и скорблю зело, яко не могу зрети Тя, преславнаго Создателя моего, грехми отягчаем, обаче же верою зрю Тя и Тебе Единому, Милостивый Боже мой, приношу хваление сие:
Слава Тебе Боже, Сотворившему вся.
Слава Тебе, яко слава Твоя пребывает превыше небес.
Слава Тебе, Сотворивый сущая из не сущаго.
Слава Тебе, вся воззвавый из небытия в бытие.
Слава Тебе, одеяся светом, яко ризою.
Слава Тебе, яко создал еси человека по образу и подобию Своему.
Слава Тебе, вознесый человека превыше видимаго мира.
Слава Тебе, нарекий тварь Богом.
Пресвятая Троице, Боже наш, слава Тебе.

Кондак 2
Видя грехов моих множество суда Твоего боюся. Душу имый страстьми беззаконьми недугующу, ихже и не помню вся, но прежде нежели осудиши мя, помилуй милосердый Господи. И прежде нежели предстати Тебе, очисти и исцели мя, Спасе. Аз бо на земли еще сый молю Ти ся смиренно, посреде грешников первый есмь аз, не воздай ми по делом на суде Твоем праведнейшем, но оком благоутробным призри на мя, и оправдай и помилуй, и одесную Себе постави мене недостойнаго со избранными Своими, Тебе бо ежечасно взываю: Аллилуиа.

Икос 2
Разум немощный, наш ум, и попеченьми суетными отягченный и не имея благаго окормителя помышлений моих, плачуся к Тебе, Спасе. Разсеянный ум мой собери Господи и омертвевшую душу оживи, яко Петру даяй ми покаяние, яко мытарю воздыхание, и яко блуднице слезы, буди ми Пастырь и яже помыслити, яже глаголати и яже творити настави мя. К Тебе бо Единому прибегох и вопию Ти:
Господи, даруй ми зрение грехов моих
Господи, даждь и мне Страх Твой Святый.
Господи, даруй ми познати, что есть кротость и смирение.
Господи, исцели мя от ран нечистых помышлений.
Господи, посли Благодать Твою в помощь ми грешному.
Господи, просвети и освяти разум мой.
Господи, омый мя слезами святаго Покаяния.
Господи, во одежды чистоты и нетления облецы мя.
Господи, помилуй мя грешнаго по велицей милости Твоей.

Кондак 3
Силою десницы Твоея, о, Троице Пресвятая, нераздельная существом, и неслиянная лицы, содержиши мир, прославляю Тя, и смиренныя благодарения воссылаю Ти, яко человека во гресех живущаго не оставляеши, но присно обращения заблудшаго чаешы, наипаче же Сына Единароднаго, Господа нашего Иисуса Христа, на спасение людей Твоих в мир послал еси. Благодарю Тя, яко кающихся милостивно приемлеши и возлюбенныя чада нарекаеши, сего ради усердно взываю Ти: Аллилуиа.

Икос 3
Имея ко грешником Божия милосердия множество, открыл еси мне во время оно, яко Ты еси Бог и вся твориши благостию Своею. И аз познах в той час и ныне твердо верую, яко Ты еси Любы превечная сотворшая мир. Возрадовашася о сем душа моя и аз смиренно Ти глаголю:
Яко нечаянно и милостивно пришел еси ко мне недостойному, благодарю Тя.
Яко грех моих не помянул еси, благодарю Тя.
Яко ниспослал еси мне грешному Духа Твоего Святаго, благодарю Тя.
Яко приял мя еси милостивно аки младенца на руце, благодарю Тя.
Яко показал ми еси Любы Твою и яко Благ еси, благодарю Тя.
Яко пути спасения научаеши мя, благодарю Тя.
За скорби и болезни Милостиве, благодарю Тя.
За мир и радость ихже ми даеши по милости Твоей, благодарю Тя.
Слава и благодарение, Тебе, Боже за вся.

Кондак 4
Бурею недоумения объят сый ум мой, како возможно сие, яко хощеши показати чистым сердцем Лице Свое. О, Боже, Троице Предивная, Отче, Сыне и Душе Святый, Единица нераздельная. О, Блаже, отверзаяй уста твари, да взывает ко Творцу своему. О, Непостижимый Боже, даровавый созданию, благословити Создателя своего. Но очисти, Боже, молю Тя, очисти сердце мое и душу, хощу бо зело любитиТя, и с Тобою пребывати присно. Спаси мя, Господи, ради милости Твоея премногия имиже веси судьбами и жизни вечныя сподоби, да со ангелы и всеми святыми воспеваю Тебе и аз недостойный: Аллилуиа.

Икос 4
Слышаша вернии во святом благовестии чудное промышление Твое, яко всяко благо обращаеши и спастися всем хощеши. Темже дивяся, глаголю: да святится, Боже, имя Твое Славное, да приидет Царствие Твое Святое, да будет Воля Твоя Благая, яко на Небеси и на земли. Вси дела руку Твоею Боже, и аз на Тя точию уповаю и Имя Твое Святое призываю выну. Помощниче мой и Покровителю буди мне во спасение. Се мой Бог и прославлю Его, Бог предивный и вознесу Его, славно бо прославися:
Слава Тебе, Дивному во святых Своих.
Слава Тебе, яко смиряешичеловеки да воззовут к Тебе.
Слава Тебе, взыскующему сердца чистыя.
Слава Тебе, зело любящему души смиренныя.
Слава Тебе, Едине Великий и Славный.
Слава Тебе, Едине Тихий и Милостивый в непостижимей славе Своей.
Слава Тебе,ЕдинеСвятый и Истинный.
Слава Тебе, ЕдинеБлагий и Совершенный.
Пресвятая Троице, Боже наш, слава Тебе.

Кондак 5
Божиим Словом земная и Небесная создашася, человека же паче всех возлюбив Творец, Образ Свой даде ему и Подобие и Духом Своим освяти. Ныне же непрестанно зовеши ны, Господи: Приидите ко Мне и Аз упокою вы. Вем, яко Путь еси, Истина и Живот вечный, Христе. Но присно от Тебе уклоняюся во своеволии греховнем на страну далече и душа моя, яко пустыня безводная жаждет познати Волю Твою и напоитися Благодатию Твоею и зовет: Аллилуиа.

Икос 5
Видеша, Господи, яко деянии и помыслы греховными погубих аз души красоту и чистоту первозданную, но обнови я, о, Творче мой да славлю Тя, к Тебе бо припадаю, Господи, и молюся Ти, да Милостивным Оком призриши на мя во вся дни живота моего, Тебе бо Единому, взываю неустанно:
Господи, очисти беззакония моя.
Господи, избави мя от помыслов суетных.
Господи, угаси пламень страстей моих душевных и телесных.
Господи, сердце чисто созижди во мне.
Господи, без Благоволения Твоего и Помощи не остави мене.
Господи, Духа Твоего Святаго не отъими от мене недостойнаго.
Господи, пребуди со мною Милостию Твоею ныне и во веки
Господи, Твори со мною по воли Твоей, яже присно есть благословенна
Господи, помилуй мя грешнаго по велицей милости Твоей.

Кондак 6
Проповедницы явишася апостоли святыя, тайну воплощения Твоего, Спасе, открыша миру, но како быти может, яко един от Троицы Святыя человек на земли явися? О, како Бог сый плотию человек, и ко Кресту пригвоздися и стражда. Зрю Господа в саду Гефсиманстем коленопреклоненна и бе пот Его, яко капли крови падающие на землю. Зрю Бога моего на Кресте и руце и нозе Его Святою Кровию Божественною омывахуся. О, кроткий и смиренный Владыко мира, сие сотворил еси любве ради Твоея и послушания Отцу Небесному и рекл еси Тому: Прости им, Отче. Сего ради спасаеши, Милостиве, вся люди Твоя. И мене спаси, грешнаго, вся бо можно Тебе. Страстем Твоим покланяюся, Владыко и Святое Воскресение Твое славлю, и глаголю умиленно: Аллилуиа.

Икос 6
Возсия нам просвещение истины в Церкве Твоей Святей. И ныне зрю в храме Твоем, Сыне Боже, Чашу Святую и верую всею душею моею и помышлением, яко сие есть Самое Пречистое Тело Твое и сия есть Самая Честная Кровь Твоя. Како грешен сый зрю Невидимаго, прикасаюся Неприкосновенному, и уста моя и чрево вмещают Невместимаго Небесами. О, бездна благости Твоея, Боже. О, неисповедимость ЛюбвеТвоея, Человеколюбче, яко даровал еси твари вкушати плоти Бога своего и крови Его Честныя, да Обожится и жива будет. Но дивлюся, како сие быти может, тайна сия велика есть и ея же в той час в человеце вершиши Ты Един ведаеши. Аз же смиренно покланяюся Ти и благодарю тя тако:
Яко в таинстве Крещения чадо Своя нарицаеши мя, благодарю Тя.
Яко Тело и Кровь Твои честныя нам доверяеши, благодарю Тя.
Яко молитвы нас грешных не отвергаеши, благодарю Тя.
Яко по сих незримо ны благословляеши, благодарю Тя.
Яко согрешениям прощение мне Силою Своею даруеши, благодарю Тя.
Яко мене недостойнаго, Тела и Крови Своих причащаеши, благодарю Тя.
Яко Любы еси неизреченная, благодарю Тя.
Яко Свет еси во Откровении языком, благодарю Тя.
Слава и благодарение, Тебе, Боже за вся.

Кондак 7
Хотяй уловити во спасение народы вся, Духа Твоего Святаго апостолы исполнил еси и аз смиренно молюся: Царю Небесный прииди и вселися в ны и от всякия скверны очисти ны и сотвори храмы Твоя святыя и истинныя в нихже Ты пребывати возлюбиши и не отлучайся от нас никогдаже, прошу Тя. И твори Волю Твою Святую во мне и чрез мене недостойнаго, раба Твоего. Да прославится Имя Твое, Боже, на земли, яко не Небесех, и да зовут Тебе вси: Аллилуиа.

Икос 7
Дивна дела Твоя, Небесный Боже и Тебе подобает слава, Тебе подобает пение, Тебе подобает поклонение и честь и паки слава безконечная, славословие великое, Боже мой Премилостивый, Преблагий, Предивный. Мне же падшему созданию Твоему плакати надлежит о гресех моих и недостоинстве моем, но не остави мене Любы Небесная. О, помози мне падшему, Благий Боже, се бо несть жизнь, яже без Тебе, но смерть воистинну. И молюся Ти: по милости Твоей велицей исцели, помилуй и спаси мя грешнаго, о, Боже мой. И живота вечнаго сподоби, идеже веселящихся жилище и безконечная сладость, зрящих Твоего лица доброту неизреченную. Аз же на Тя уповаю зело, и Тебе, Святаго Бога, недостойный раб, восхваляю тако:
Слава Тебе, полагаяй милость Твою на всех делех руку Своею.
Слава Тебе, покрывающему вся благостию.
Слава Тебе, человеком вся беззакония прощающему.
Слава Тебе, толико возлюбившему творение Твое.
Слава Тебе, ведущему сокровенная помышления сердец.
Слава Тебе, яко не желаеши погибели созданием Своим, но еже всех спасти.
Слава Тебе, врагов Своих возлюбивый.
Слава Тебе, заповедавый нам молитися за оскорбляющия ны.
Пресвятая Троице, Боже наш, слава Тебе.

Кондак 8
Странно Троицы Святыя Таинства и умы не познаваема, Тебе в трех лицах Единому Богу моему преславно покланяюся, у Тебе прошу прощения многих моих прегрешений. К тебе плачуся зряще мое велие падение и немощи и яко сам аз не могу исцелитися, ниже восстати, но Ты, Создателю мой, паче мене сие веси, и Ты Един помощи мне можеши, яко несть греха превосходящаго милосердие Твое. Се припадаю к Тебе, Боже милостивый, и из глубины души взываю Ти со слезами: очисти мя Создателю мой Преславный и исцели и освяти мя, и помози мне грешному Тебе Единаго любити всем сердцем моим и помышлением и всею душею моею и никогдаже уклонятися на злая. О, помози мне, Создателю, Тебе бо воспеваю: Аллилуиа.

Икос 8
Ведаеши, Боже, вся моя беззакония и несть греха иже укрыется от Тебе сердцеведче, но и воздыхание мое слышиши и моление приемлеши. Что возмогу сотворити, аще не имам помощи Твоея? Кое благо имам, аще не подаси мне? Како и спастися могу, аще не по милости Твоей и снисхождению ко грешнику кающуся. Нищ и убог есмь от дел благих, нерадения моего ради и лености, и ничтоже имам пред тобою: слез Адамовых не стяжах и покаянию праведных не тщуся подражати. Еще и делы и словесы своими присно огорчаю Тя, но приими убо воздыхание души болезнующия, и дай мне познать любовь Твою и безмерную Благость, к Тебе бо Единому взываю:
Господи, прости ми вся греси моя о нихже сокрушаюся зело.
Господи, помилуй мя и наипаче милуй мя присно.
Господи, настави мя на всяко дело благо.
Господи, востави мя от лености к Твоему славословию.
Господи, созижди во мне сердце чисто.
Творче мой, исцели мя по Своей Велицей Любви.
Господи, даруй ми творити Волю Твою во славу Твою.
Господи, даждь ми Благодать Твою да горит душа моя любовию.
Господи, помилуй мя грешнаго по велицей милости Твоей.

Кондак 9
Вся чины ангельския хвалу приносят Тебе, Боже Преславный, на Небеси. Аз же раб Твой благодарю Тя о всех благодеяниях Твоих на пути земнем мне бывших, всякий день бо ими полнится. Недостоин есмь, Господи, любвеТвоея и благости премногия, но и паки, Спасе, не отвратися от мене сквернаго и никогдаже отъими от мене милости Твоея богатыя. Тебе бо Благодетелю Благий взываю: Аллилуиа.

Икос 9
Витийствовати не может ум мой, яко омрачен есть житейскими страстьми, зову Ти песнию ангельскою: Свят, Свят, Свят, еси Отче, Сыне и Душе Святый, Единице Приснопокланаемая, Боже наш. Аз грешный, создание Твое на земли сей по Тебе томлюся зело, и Тебе Единаго ищу, к Тебе, о, Творче мой со слезами припадаю и молю Тя: Боже мой, помози мне грешному, не любити мира сего, но Тебе Единаго возлюбити Бога моего, возлюбитиТя всем сердцем моим , всем умом моим, всею душею моею, о Тебе Едином помышляти и молитися Тебе непрестанно и подвизатися усердно до последняго моего издыхания. Ты же настави мя присно на деяния благая, соблюдаяй мя от всякаго греха неизреченным Твоим человеколюбием. Ты царствуй во мне, Благий Господи, и всего Твоего мя быти, и по Воле Твоей жити благоволи ми, да зову Тебе:
Яко спасти грешныя милостивно пришел еси, благодарю Тя.
Яко мя заблудшаго нечаянно взыскал еси, благодарю Тя.
Яко греси мне кающуся милостивно прощаеши, благодарю Тя.
Яко благодатию Твоею мя покрываеши, благодарю Тя.
Яко присно ны любовию Твоею назираеши, благодарю Тя.
Яко и от Тебе грехми отпадшия не забываеши, благодарю Тя.
Яко Живота вечнаго надежду имамы в Тебе, благодарю Тя.
Яко и земныя блага подаеши нам на всякий день, благодарю Тя.
Слава и благодарение, Тебе, Боже за вся.

Кондак 10
Спасти хотя создание Свое, на земли явился еси, Свете Тихий, Святыя Славы Небеснаго Отца Своего. Нас ради страдания и Крест претерпел еси, темже и во аде томимыя извел еси, и Матерь Свою нам предстательницу явил еси. Церкви же Твоей Духом Святым разумети Тайны Божественныя подаеши. Сего ради похвала наша Ты еси, помощник и просвещение, темже радуемся вси о Бозе нашем Дивнем, Преблагом и Преславнем и зовем: Аллилуиа.

Икос 10
Царю преславный, Небесе и земли, из земли создавый человека и даровавый ему познать Себе Духом Святым. Разбойника покаявшася, рая сподобивый, и народы во тьме идольской томившиися к Своему славословию призвавый. Призри милостивным оком на люди Своя, и за обращение малое даруй милость великую, утверди нас во благодати Твоей да не погибнем, но в Живот Вечный возродимся и присно поем Ти:
Слава Тебе, Святый Боже, Святый Крепкий, Святый Безсмертный.
Слава Тебе, премного возлюбившему создание Свое.
Слава Тебе, предвижущему не сущая, яко сущая .
Слава Тебе, зрящему тысящу лет, яко день един.
Слава Тебе, Единому Сильному и Крепкому.
Слава Тебе, Всеведущему и Всемогущему.
Слава Тебе, Благому и Милостивому создателю мира.
Слава Тебе, Единому Присноцарствующему.
Пресвятая Троице, Боже наш, слава Тебе.

Кондак 11
Пение всеумиленное приношу Ти, Милостивый Господи, вем аз милосердие Твое в Трех Лицах, Единый Боже, и память Твоя греет душу мою и влечется душа моя возлюбити Тя. И хощу аз, зело хощу любити Тя, но яже хощу я, яко подобает, тако не люблю отнюд. Множество помышлений суетных довлеет во уме моем и аз отпадаю от Тебе непрестанно. Очисти, о, Творче, ум мой и сердце и душу мою освяти, Святый Боже. Да возлюблю Тебе Единаго, Тебе бо в покаянии зову: Аллилуиа.

Икос 11
Свет сый Небесный, пришел еси к сущим во тьме неведения, Владыко мой преблагий, Милостивый Создателю мой. Темже молюся Ти: просвети и мене Светом Твоим, яко не жити мне пред человеками, но пред Тобою Единым. И да не помыляю, аз окаянный, показатися святым пред людьми, но да плачуся к Тебе точию, сердцеведче Благий, слезами покаяния истиннаго. Даждь ми грешному, Боже, зрети грехи моя и недостоинство мое, даждь ми сокрушение сердечное и слезы, да теми омыется душа моя от скверны и во одежде чистей обрящется пред Тобою, Небесный Женише, Тебе бо Единому взываю:
Господи, прости мне вся грехи моя.
Господи, Милостив буди ко мне грешному.
Господи, никогдаже отлучайся мене раба Твоего, но присно по мне почивай.
Господи, от гордости, лицемерия и прочия скверны очисти мя.
Господи, посли Благодать Твою в помощь мне грешному.
Господи, научи мя творити Волю Твою.
Господи, Святый, посети и исцели немощи моя.
Господи, даруй ми, грешному, дух смирения и Святой Любви.
Господи, помилуй мя грешнаго по велицей милости Твоей.

Кондак 12
Благодать подаждь ми и Благоволение Твое на пути жизни моей, Боже, Небесный, Премилостивый Творче и Создателю мира, да возгорится в души моей ленивей и окаянней пламень Твоея Любви, дабы Тебе Единому, Жизнодавче Благий, дыхание мое, упование мое, Любы Святая, Небесная, Благодетелю мой Премилостиве, служити и к Тебе выну зрети и пребывати с Тобою и творити во всем Волю Твою. И никогдаже отъими от мене Святыя милости Твоя, да ими укрепляем, достигну в Славу Твою Невечернюю и тамо воспеваю во веки: Аллилуиа.

Икос 12
Пети непрестанно чудес Твоих и Милости пучину неисследимую, Господи. Ты бо еси Бог мой, Ты мое радование, Ты крепость моя и спасение, аще грехми своими распинаем Тя прощаеши ны и милость Свою подаеши, аще отступаем от Тебе и предаем Тя, но Ты не оставляеши нас, Любовь Твоя присно мир созидает, Благость Твоя содержит вся, Духом Твоим движится видимая и невидимая, даруй же ми присно пети Тебе:
Яко от персти тленныя во блаженство вечное привел мя еси, благодарю Тя.
Яко Свет Истины ми открыл еси, благодарю Тя.
Яко Сладка Любы Твоя, благодарю Тя.
Яко питаеши Небесная и земная Твоею Благостию, благодарю Тя.
Яко вся к созданию пользы строеши, благодарю Тя.
Яко ко спасению человеки уловляеши, благодарю Тя.
Аще хощеши имети мя во свете, благодарю Тя.
Аще хощеши сокрытися от мене да познаю немощь человечу, благодарю Тя.
Слава и благодарение, Тебе, Боже за вся.

Кондак 13
О, пресвятая Троице, Отче, Сыне и Душе Святый. Приими недостойныя молитвы моя и малое хваление яже принесох Ти, и милостив буди к рабом Твоим, ниспосли нам Святое Небесное Благословение Твое, и помощь во всяком деле блазе, и восстави нас на славословие Твое, твори с нами, якоже волиши, и якоже хощеши, и якоже веси, яко да во Царствие Твое достигнем и тамо со всеми святыми Твоими ангелы воспоем ти присно: Аллилуиа.
(Трижды, потом Икос 1 и Кондак 1)

Молитва
Господи Боже, милостивый буди мне грешному, приими моление мое недостойное и руку Твоея помощи простри мне, желает бо душа моя неизменно в сладости любвеТвоея пребывати, но грех, во мне живущий, на недоброе влечет ю, и на всякий день отпадаю от Тебе за помышления гордыя, тщеславныя, блудныя, за братии невозлюбление и неприязнь, ближних осуждение, зависть и к земным вещем пристрастие. Не остави, милосерде Господи, унылаго раба в зле, неволе и страстей болезнях пребывати. Господи, скорблю аз и о людех Твоих. Молю, о, Блаже, да не погибнет хотя един от людей, но да спасеши всех, аще аз грешный и любве не имый, не хощу погибели согрешающих, то како же Ты, Любы Святая, Всесовершенная, печешися о еже всем спастися и в разум истины приити?
Се припадаю к Тебе, Господи Боже Милостивый и молюся: вся возможна Тебе, имиже веси судьбами, спаси вся люди Твоя и благопотребная всем подаждь, болящия посети и исцели, скорбящия утеши, нищия окорми, заблудшия на путь Твой обрати, и веру неимущим, даруй ю. Помози, Благий Боже, всяцей душе в мире живущей, вси бо есть мы в бедах и разве Тебе помощника крепкаго не имамы. Господи, молю Тя, якоже угодник Твой Силуан Преподобный, да познают Тя Духом Святым вси концы земли. Да разумеют како возлюбил еси ны и да забудут горе земли и прилепятся к Тебе любовию. Да живут тии в мире, творя волю Твою во славу Твою, яко не быти войнам, бедам, вражде, но да царствует Любы и Благодать.
И спаси вся ны, и Царствия Твоего сподоби, идеже узрим силы ангельския, восхвалющия Тя, святыя апостолы во славе, отцев, святителей собор иже ны почитати Тя православно научиша, преподобных смиренная множества, блаженных лицы, иже мир презреша и грех победиша, Тебе же подобает слава, честь и поклонение, Отцу и Сыну и Святому Духу, ныне и присно и во веки веков, Аминь.

Глас 3-й:
Тебе Бога хвалим,/ Тебе Господа исповедуем./ Тебе Превечнаго Отца вся земля величает;/ Тебе вси Ангели,/ Тебе небеса и вся Силы./ Тебе Херувими и Серафими непрестанными гла?сы взывают:/ Свят, Свят, Свят, Господь Бог Саваоф,/ по?лны суть небеса и земля величества славыТвоея./ Тебе преславный Апостольский лик,/ Тебе пророческое хвалебное число,/ Тебе хвалит пресветлое мученическое воинство,/ Тебе по всей вселенней исповедует Святая Церковь,/ Отца непостижимаго величества,/ покланяемагоТвоего истиннаго и Единороднаго Сына/ и Святаго Утешителя Духа./ Ты, Царю славы, Христе,/ Ты Отца Присносущный Сын еси./ Ты, ко избавлению приемля человека,/ не возгнушался еси Девическаго чрева./ Ты, одолев смерти жало,/ отверзл еси верующим Царство Небесное./ Ты одесную Бога седи?ши во славе Отчей,/ Судия? приити ?ве?ришися./ Тебе убо просим:/ помози рабом Твоим,/ ихже Честною Кровию искупил еси./ Сподоби со святыми Твоими в вечней славеТвоей царствовати./ Спаси люди Твоя, Господи,/ и благослови достояниеТвое,/ исправи я и вознеси их во веки;/ во вся дни благословим Тебе/ и восхвалим имя Твое во веки и в век века./ Сподоби, Господи, в день сей без греха сохранитися нам./ Помилуй нас, Господи, помилуй нас;/ буди милость Твоя, Господи, на нас,/ я?коже упова?хом на Тя./ На Тя, Господи, уповахом,// да не постыдимся во веки. Аминь.[/spoiler]

Раб божий Константин

Преподобный Павел Обнорский и Комельский, Вологодский чудотворец.
[spoiler]Кондак 1

Избранный и дивный во святых, отче наш Павле, от Христа Бога дар чудес обильно приемый! Похвальная приносим ти ныне любовию чтущии тя: ты же яко имея дерзновение многое ко Святей Троице, моли избавитися от всяких бед верно хвалящим тя: Радуйся, Павле преподобне, пустынный жителю!

Икос 1

Ангела земного и небесного человека яви тебе всех Создатель, и благоплодную душу твою измлада провидев, преподобне Павле, научи всех вопити тебе сице: Радуйся, чистое Святаго Духа приятелище. Радуйся, ангельским ликом собеседниче. Радуйся, любве ради Христовы преименитый град отечества твоего оставивый, и в пустынях со зверьми жити изволивый. Радуйся, древо благосеннолитвенное, при исходящих вод насажденное. Радуйся, яко плод присноцветущь послушания принесл еси. Радуйся, яко терпением твоим вся страсти плотския умертвил еси. Радуйся, яко крестным знамением лукавых духов далече от тебе отгнал еси. Радуйся, столпе житейскими бурями непоколебимый. Радуйся, яко до ныне обильную реку исцелений источаеши. Радуйся, яко о благоденствии земли Российския умоляеши. Радуйся, яко обитель твою и нас рабов твоих в молитвах не оставляеши. Радуйся, яко скорбящим в недугах исцеление подаваеши. Радуйся, Павле преподобне, пустынный жителю!

Кондак 2

Видяще свет добродетелей твоих отче наш Павле, душами и телесы просвещаемся, и дивнаго тя во святых чудотворца почитающе, чудесем твоим, по благодати Божией от тебе бывающим, удивляемся, и во умилении сердца Богу вопием: Аллилуиа.

Икос 2

Разум недоразуменный от юности уразумевая божественными учении, еже бы улучити восход от земных в небесная, сего ради презрев все плотское мудрование, и возжелав весь жити Христу, в непроходимую пустыню вселився, в трудех и бдениих подвизался еси: сего ради глаголем тебе, отче наш Павле, таковая: Радуйся, яко Христово смирение вельми возлюбил еси. Радуйся, яко нищету духовную во всем соблюл еси. Радуйся, яко Крест Христов на раменах твоих без роптания носил еси. Радуйся, яко жестокое житие на земли показал еси. Радуйся, яко и учителя твоего великаго Сергия тем утешил еси. Радуйся, яко братии твоей образ великих добродетелей был еси. Радуйся, яко правым путем выну шествуя вход в Царство Небесное улучил еси. Радуйся, яко тамо со ангелы водворяяся предстоиши Святей Троице во мнозем дерзновении. Радуйся, воздержания и чистоты истинный хранителю. Радуйся, смиренномудрия и кротости присный блюстителю. Радуйся, светоносный светильниче Божия благодати. Радуйся, Храме Бога живаго одушевленный. Радуйся, Павле преподобне, пустынный жителю!

Кондак 3

Силою свыше ти дарованною, всякую слезу от очес зле страждущих отъяти готов сый, богоносне отче Павле, был еси болезнующим исцеления податель, и по смерти твоей великий помощник всем показался еси, вопиющим Богу: Аллилуиа.

Икос 3

Имея поспешенствующую тебе Божию силу, отче наш Павле, добродетельми украсился еси и ангельски пожил еси: темже и мы смиреннии, любовию к тебе понуждаеми, глаголем сице: Радуйся, ангелов собеседниче. Радуйся, преподобных и праведных сопричастниче. Радуйся, чистое и честное жилище святыни. Радуйся, великих добродетелей вместилище. Радуйся, яко ярем Господень на себе восприяти усердно восхотевый. Радуйся, яко от млада возраста в дому Божием пребывати возжелавый. Радуйся, яко и Господь желания твоего не отринул есть. Радуйся, яко и на небесех мзду трудов твоих обрел еси. Радуйся, яко ныне во свете святых пребываеши. Радуйся, яко выну Господа сил созерцаеши. Радуйся, яко со ангельскими чинми трисвятую песнь воспеваеши. Радуйся, невещественным светом трисиянного Божества озаренный. Радуйся, Павле преподобне, пустынный жителю!

Кондак 4

Буря помышлений страстных обдержит ны: но воздержанием и трудами уморивый страсти и волнений множество укротивый, отче наш Павле, моли избавитися от напастей и нам, чтущим тя, да припадая во умилении душ и сердец наших к дивному Богу, прославляемому во святых своих, выну воспеваем: Аллилуиа.

Икос 4

Слышаша ближнии и дальнии величие чудес твоих, авво наш Павле, яко скорый еси в бедах и обстояниих помощник, и яко на крилех повсюду являешися призывающим тя по имени в молитвах своих, и вопиющим в тебе: Радуйся, твердое в печалех утешение. Радуйся, скорбящих недремленное попечение. Радуйся, всяких недугов и болезней безмездный целителю. Радуйся, в напастех и бедах скорый подателю помощи. Радуйся, велия пучина сокровищ богатства душевнаго. Радуйся, скорбных и бедне живущих небесное утешение. Радуйся, неоскудеваемая пища алчущим правды. Радуйся, источниче неисчерпаемый жаждущим жития духовнаго. Радуйся, ненадеждных крепкое надеяние. Радуйся, верный кормчию в мори плавающих. Радуйся, яко молитвами твоими от страстей избавляемся. Радуйся, яко от цельбоносных твоих мощей сладости духовныя исполняемся. Радуйся, Павле преподобне, пустынный жителю!

Кондак 5

Боготечная звезда во странах сих явился еси, преподобне отче Павле, и непроходимую пустыню светом богоугодного жития твоего озарил еси и вся верныя, назидатися к тебе приходящия, всегда поучал еси в Троице Святей славимому Богу пети сице: Аллилуиа.

Икос 5

Видеша корыстолюбивии человецы, татие и хищницы, яко не токмо ко обители твоей святей на расхищение приступити несть возможно, но и стад твоих, вне ограды пасущихся, жезлом твоим, блаженне отче наш Павле, ограждаеши, дезнувших же на сие, слепотою и разслаблением поражая, в раскаяние и ужас приводиши, и тем всех богобоязненных возставляеши глаголати тебе таковая: Радуйся, неусыпный обители твоей хранителю. Радуйся, бодрый пастырю, выну пекущийся о чадех твоих. Радуйся, пустыножителю бодрственный, вся видимая и невидимая злая побеждающий. Радуйся, монашествующих спасения ходатай усерднейший. Радуйся, братии твоей в бедах и обстоянии варварском сущей утешителю скорый. Радуйся, нещастных защитниче предивный. Радуйся, смирения и кротости насадителю. Радуйся, мирских нравов из братии твоей искоренителю. Радуйся, плотския и духовныя нищеты любителю. Радуйся, гордости и великолепия мирского потребителю. Радуйся, целомудрием и кротостию, яко многоценною багряницею, оделся еси. Радуйся, правдою и чистотою, яко светлым венцем венчался еси. Радуйся, Павле преподобне, пустынный жителю!

Кондак 6

Проповедает вся великая Россия о тебе, авво Павле, яко ты еси скорый податель исцеления недугующим, и разслабленныя и ума лишенныя и беснующияся молитвами твоими к Богу, здравы сортворяеши. Буди же и о нас смиренных рабех твоих всегдашний молитвенник ко Иисусу, к немуже воспеваем песнь выну славословимую: Аллилуиа.

Икос 6

Возсиял еси во стране вологодстей, яко солнце пресветлое, преподобне отче наш Павле, уясняя сердца верных добродетельми твоими и яко луча огнесиянная теплотою молитв твоих всех скорбных и больных оживляеши: сего ради мы сошедшеся при гробе твоем, благодарственно вопием ти таковая: Радуйся, светильниче всесветлый, повсюду чудесы твоими осиявающий. Радуйся, свете, освещающий потемненныя лютыми страстьми. Радуйся, цвете сельный, благовонием Духа Святаго напоенней. Радуйся, божественных заповедей усерднейший ревнителю. Радуйся, апостольских и отеческих преданий твердый хранителю. Радуйся, церкви российския великое украшение. Радуйся, яко финик в пустыни сей процвел еси. Радуйся, яко кедр долголетний на горах сих прославился еси. Радуйся, яко присный отец о братии твоей промышлял еси. Радуйся, яко выну в законе господнем поучатися наставлял еси. Радуйся, яко и во успении твоем нас не оставляеши. Радуйся, яко о оставлении грехов наших Господа Бога умоляеши. Радуйся, Павле преподобне, пустынный жителю!

Кондак 7

Хотящу игумену с братиею открыти гроб твой, и видети святые мощи твоя, преподобне отче Павле, в сонном видении представ, со гневом рекл еси им: оставите таковое тщетное дело, да не огнь снидет с небеси и пожжет вы: мы же слышаще таковая, яко непотребнии со страхом и трепетом припадающе к раце цельбоносных мощей твоих, молим тя о милости твоей вопиюще Богу: Аллилуиа.

Икос 7

Новаго тя Илию фесвитянина, новаго тя Иоанна Крестителя, новаго тя Моисея Боговидца познаваем, Священнейший отче наш Павле, всю бо жизнь твою в непрестаннем посте и смиренномудрии, в деннонощных молитвах и коленопреклонениих, в нищите и наготе, в трудах и бдении провел еси: сего ради и Господь управи тя в пустыню сию, яко в обетованную землю, юже множеством последующих тебе в преславный град обратил еси, тем и вопием тебе ныне таковая: Радуйся, пустынный предобрый гражданине. Радуйся, духовный купец, обретший многоценен бисер Христа Иисуса Сладчайшего. Радуйся, мудрый путеводителю, управляющий стадо твое от земли на горняя. Радуйся, известный охранителю бедствующих в пустыни сей греховней. Радуйся, истинный проповедниче покаяния. Радуйся, искусный кормчий плавающих в пучине житейских страстей и попечений. Радуйся, яко крестным знамением, аки мечем обоюду острым, безстудныя помыслы от диавола тебе находящия посекл еси. Радуйся, яко и от человек жезлом твоим бесы во адскую бездну низвергаеши. Радуйся, светило страну сию прежде непроходимую, собою просвещающее. Радуйся, звездо, греховную тьму, таящуюся в нас, светом учения твоего разгоняющая. Радуйся, угодниче Христов, дивный в чудесех и по отшествии твоем от мира сего лукаваго. Радуйся, яко и мы тобою мир с Богом имамы. Радуйся, Павле преподобне, пустынный жителю!

Кондак 8

Странное и велие чудо является притекающим к раце мощей твоих, блаженне отче Павле, пред ними бо и малое моление тебе приносяще, всяких болезней исцеление приемлем и в благоверии утверждающеся, упование на тя возлагаем, выну вопиюще Богу: Аллилуиа.

Икос 8

Всем вся был еси, и ныне являешися, да всяко некия спасеши, по слову тезоименнаго ти апостола, богоносне отче Павле, и никакоже отступил еси от созданныя тобою обители, но поучением и наставлением наказуеши собранныя чада твоя, глаголющия и ныне тебе таковая: Радуйся, спасение и заступление наше у Бога. Радуйся, всем притекающим к раце мощей твоих вернаго исцеления подателю. Радуйся, яко любовь нелицемерную к Богу и ближнему стяжавый. Радуйся, яко тем апостол и пророк законную главизну исполнивый. Радуйся, яко учению тезоименнаго апостола Павла во всем последовал еси. Радуйся, яко от млада возраста Бога познал еси. Радуйся, яко от него словесных овец, извествованный учителем твоим Сергием, пастырь устроен был еси. Радуйся, яко в нищите и бедности от Господа прославленный. Радуйся, яко мраз и храд терпеливо понесл еси. Радуйся, яко вся воздушныя перемены непоколеблемо претерпел еси. Радуйся, яко все внешнее злостарадание без роптания восприял еси. Радуйся, яко дупленым древом, аки лествицею, на небо возшел еси. Радуйся, Павле преподобне, пустынный жителю!

Кондак 9

Весь предался еси Вседержителю, отче наш Павле, егда тя распали божественное желание, и егда в горняя весь ум твой впери: сего ради оставив родителей твоих и все стяжание мирское в ничтоже вменив, последовал еси учению Христову, выну поя священную песнь: Аллилуиа.

Икос 9

Ветии суемудренных богопротивному учению не последовав, преблаженне отче Павле, истинный ученик апостолов был еси, житием твоим в православней вере паче и паче утверждая и чудесы твоими удивляя всех, глаголющих тебе таковая: Радуйся, насадителю благочестия. Радуйся, искоренителю нечестивых и дел их посрамителю. Радуйся, подражателю ликом ангельским в песнопении духовном. Радуйся, богоносных и великих отец подвигом и трудом последователю усерднейший. Радуйся, яко и духовнаго отца твоего бдением и молитвою удивил еси. Радуйся, яко от него в святости жития свидетельствованный. Радуйся, непроходимыя пустыни светильниче пресветлый. Радуйся, пустынножителей лепотное украшение. Радуйся, яко дикии звери пред тобою аки агнцы кротцы бываху. Радуйся, яко хищнии птицы от руки твоея пищу небоязненно приимаху. Радуйся, яко всем вся нужная от тебе требующим подавал еси. Радуйся, яко и ныне притекающии к тебе с молением нетщы отходят. Радуйся, Павле преподобне, пустынный жителю!

Кондак 10

Спасти хотя братию обители твоея, отче наш Павле, от нахождения варвар, представ им в сонном видении укреплял вся страдания сносити терпеливно, обещавая за сие воздаяние небесное: сего ради и мы, твои ученицы, якоже и они, да не постраждем от невидимых враг подобное, молим тебе не оставити нас, и молящеся умильно глаголем Богу: Аллилуиа.

Икос 10

Стена еси тверда и оплот нерушим восхваляющим, блаженне Павле, болезни и труды твоя и всем требующим в бедах и напастех твоего заступления: темже и нас, немоществующих грехи многими и всякаго блага лишенных, заступи молитвами твоими, со усердием тебе вопиющих таковая: Радуйся, указателю пути праваго. Радуйся, вождю и законоположителю пустынножителей. Радуйся, дерзостно правил твоих несоблюдающих наказателю. Радуйся, присный молитвенниче о поминающих чесную память твою. Радуйся, в нуждах и бедах преславный заступниче. Радуйся, в напастех и скорбех скорый защитниче. Радуйся, маслино в дому Божием насажденная. Радуйся, красныя плоды добродетелей произращающая. Радуйся, благопрозябший грозде винограда Христова. Радуйся, сладосте духовная, искапающая вино, сердца верных веселящее. Радуйся, от Безначальнаго Отца, Единородна Слова несозданна и Святаго Духа сиянием просвещенный. Радуйся, яко в дуплене древе на камени божественныя веры сердцем и душею твердо укрепленный. Радуйся, Павле преподобне, пустынный жителю!

Кондак 11

Пение всеумильное принося Пресвятей Троице, богоизбранный отче Павле, храм преславен в честь ея воздвигл еси, в нем же и ныне приносится безкровная жертва, о возвышении и разширении всероссийскаго царства и церкви, о низложении супостатов, и о спасении всех православных христиан, вопиющих Богу: Аллилуиа.

Икос 11

Светозарною звездою в непроходимей сей пустыни сияяй, богоносне Павле, яко многорастительный финик в дому Святыя Троицы процвел, и яко сад живоносен всем притекающим к раце мощей твоих был еси: сего ради и глаголем ти таковая: Радуйся, поборниче православия. Радуйся, храме Триипостаснаго Божества одушевленный. Радуйся, луче, озаряющая сущия во мраце жития плотскаго. Радуйся, светоподательный светильниче сущим во тьме неразумия. Радуйся, деннице пресветлая, возвещающая всем грешным покаяние. Радуйся, цевнице духовная услаждающая чувства сладкопением небесным. Радуйся, источниче приснотекущий жаждущим вечныя жизни. Радуйся, кладезю воды живыя, всем исцеление подавающий. Радуйся, каменю пустынный, источаяй мед и млеко от неверия обращенным. Радуйся, свеще, пламенем божественныя любве возжженная. Радуйся, яко в горах, в пустынях и островех каменных всякое неприязненное искушение доблественно победил еси. Радуйся, яко за сия благорасленными Божественнаго рая цветы украсился еси. Радуйся, Павле преподобне, пустынный жителю!

Кондак 12

Благодатию Божественною осеняем, просиял еси, в животе твоем, богоносне отче Павле, якоже всесветлое солнце в мире, и во успении твоем с верою и любовию к раце мощей твоих притекающия не оставляеши, и глаголющия Богу: Аллилуиа.

Икос 12

Поюще твоя чудеса, преподобне отче Павле, воспеваем прославльшего тя Бога, в Троице Святей покланяемаго, и молим его научити нас, славити и глаголати тебе таковая: Радуйся, истинный и верный поклонниче Бога Вышняго. Радуйся, неложный заповедей Его хранителю. Радуйся, церковный строителю неоскудный. Радуйся, церковное украшение и истины поборниче. Радуйся, неусыпный исполнителю отеческих преданий. Радуйся, верный всего священнаго почитателю и ревнителю неуклонный. Радуйся, яко вся мирския волны страстей теплым желанием безстрастия укротил еси. Радуйся, яко вся губительная демонская коварства всеоружием крестным попрал еси. Радуйся, яко сугубу мзду ради трудов твоих от Бога приял еси. Радуйся, яко пресветел венец ради трудов твоих от руки Господней восприял еси. Радуйся, покланяющихся раце мощей твоих заступление. Радуйся, святей обители твоей утверждение, и нам почитающим тя спасение. Радуйся, Павле преподобне, пустынный жителю!





Кондак 13

О добрый наш пастырю и Учителю! О Великий чудотворче, преподобне отче Павле! Приими сие наше малое хваление, и моли Царя царствующих и Господа господствующих: страждущую страну российскую от лютых безбожник и власти их Господь да свободит, и да возставит престол православных царей: верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш, нам же почитающим тя и всем православным христианом спасение и в болезнех исцеление даруй, и молитвами твоими изми нас будущия муки да выну воспеваем Богу победную песнь: Аллилуиа, Аллилуиа, Аллилуиа.

(Этот кондак читается трижды, затем икос 1 и кондак 1)



Молитва преподобному Павлу Обнорскому и Комельскому, Вологодскому чудотворцу

О добрый наш пастырю и богомудрый наставниче, преподобне отче Павле! Услыши нас грешных, молящихся тебе и призывающих в помощь скорое предстательство твое: виждь нас грешных, в толицех обстояниих сущих, виждь нас немощных, отвсюду уловляемых, всякаго блага лишенных и умом от малодушия помраченных: потщися, угодниче Божий, не оставити нас в греховном плену быти, да не будем в радость врагом нашим и не умрем в лукавых деяниях наших. Моли о нас недостойных Содетеля нашего и Владыку, Емуже ты со безплотными лики предстоиши. Милостива к нам сотвори Бога нашего в нынешнем веце и в будущем, да не воздаст нам по делам нашим и по нечистоте сердец наших, но по своей благости воздаст нам: на твое бо ходатайство уповающе, твоим предстательством хвалимся, твое заступление на помощь призываем и, к цельбоносному гробу твоему припадающе, исцеления просим: избави нас, угодниче Христов, от злых, находящих на нас, и укроти волны страстей и бед, востающих на нас, да ради святых твоих молитв не обымет нас напасть, и не погрязнем в пучине греховней и в тине страстей наших. Моли, преподобне отче Павле, Христа Бога нашего, да подаст нам мирное жительство, оставление грехов, душам нашим спасение и велию милость. Аминь.

Тропарь преподобному Павлу Обнорскому и Комельскому, Вологодскому чудотворцу

Тропарь, глас 1

Божественною любовию от юности распаляем, Павле преподобне, вся, яже в мире, красная возненавидев, Христа единаго возлюбил еси, и сего ради во внутреннюю пустыню вселился еси со зверьми жити весь Христу: отонудуже и всевидящее Око, твоя труды видев, даром чудес и по преставлении обогати тя. Темже вопием ти: моли непрестанно о всех нас, честную память твою присно в песнех почитающих.[/spoiler]

Раб божий Константин

Акафист святителю Павлу исповеднику, архиепископу Цареградскому.
[spoiler]Кондак 1
         
         Возбранный исповедниче Божий и угодниче Христов, миру всему воз-гласивый правыя веры исповедание, восхваляем тя, святителю отче Павле: ты же яко имеяй дерзновение ко Господу, от всяких нас бедственных об-стояний защити зовущих:
         Радуйся, святителю Павле, исповедниче Христов.
         
         Икос 1
         
         Ангелов Творец и всего мира Создатель яви тебе, святителю Павле, до-браго исповедника православныя веры и поборника благочестия. Ты же велии труды подъял еси в прославление Живоначальныя Пресвятыя Троицы. Мы же грешнии, дивящеся таковей твоей ревности в посрамлении арианскаго злочестия, глаголем ти сицевая:
         Радуйся, поборниче благочестия от Бога призванный.
         Радуйся, служением своим Богови всеусердно послуживый.
         Радуйся, разум свой Богови покоривый.
         Радуйся, правды Христовой дивный ревнителю.
         Радуйся, о нас пред Богом усердный молитвенниче и предстателю.
         Радуйся, святителю Павле, исповедниче Христов.
         
         Кондак 2
         
         Видевше вси людие Цареградстии мудрое твое правление Церкви, свя-тителю Павле, и здравое Богословие, призывающее покланятися Триипо-стасному Божеству: Сыну во Отце со Святым Духом, Духу от Отца исходя-щему и в Сыне почивающему, радовахуся зело и благодаряще Бога за ни-спослание таковаго дара людем Своим, согласно воспеваху Троице Свя-тейшей: Аллилуиа.
         Икос 2
         
         Разум Божественным учением обогатил еси, преподобне Павле, со тща-нием приникнул еси во глубину учения непостижимаго Святыя Троицы, отнюдуже и почерпал еси богатство Божественнаго знания: непременно бо богословил еси: Отца нерожденна, и рожденна Сына, и Святаго исходи-тельнаго Божественнаго Духа. Мы же, дивящеся таковому твоему Богосло-вию, тако тя песньми восваляем:
         Радуйся, великий благочестия исповедниче.
         Радуйся, утверждение веры православныя.
         Радуйся, яко воистинну добрый воитель на еретики явился еси.
         Радуйся, сечение Святыя Троицы непотерпевый.
         Радуйся, Тройческим светом осиянный до конца.
         Радуйся, святителю Павле, исповедниче Христов.
         
         Кондак 3
         
         Силы, во еже словом и делом Христу работати, усердно стяжал еси, Павле достославне, темже и быв возненавиден за Божию правду царем, якоже иногда Илия славный от Ахава пребеззаконнаго: такожде и изгнание претерпевый, всего себе предаде Богови, поюще: Аллилуиа.
         
         
         
         Икос 3
         
         Имееше воистину, отче Павле, прославление на небеси, но и наши при-ими похвалы сия от земли, возносимыя в честь и память твоих добродете-лей, яже еси сотворил в житии твоем, начертав нам путь православия к торжеству веры Христовой, поющим тебе:
         Радуйся, образе смирения и преданности воле Господней.
         Радуйся, множество бед от лжебратий претерпевый.
         Радуйся, за всех умильно Богу моливыйся.
         Радуйся, терпеливо понесший крест Христов.
         Радуйся, всем изгнанным за имя Христово путь в Царство небесное указующий.
         Радуйся, за Троицу Единосущную сладце пострадавый.
         Радуйся, святителю Павле, исповедниче Христов.
         
         Кондак 4
         
         Буря велия возшуме на тя, святителю, егда злодей венценосный, от се-мени арианскаго, изгна тя из града престола твоего, ты же, Христу подра-жая, со всяким смирением отшел еси, моляся Создателю Церкви: Аллилу-иа.
         Икос 4
         
         Слышаще и видяще людие о радостном возвращении твоем, святителю Павле, во град свой престольный, радовахуся, Бога благодаряще и тя вели-чаху гимны сия:
         Радуйся, от изгнания возвративыйся, во еже паки семена сеяти веры.
         Радуйся, всемирный светильниче веры православныя.
         Радуйся, святителей удобрение.
         Радуйся, иереев благоговейных похвало.
         Радуйся, всего клира церковнаго украшение.
         Радуйся, святителю Павле, исповедниче Христов.
         
         Кондак 5
         
         Боготечною кровию искупленныя души сохранял еси от всякаго зла, святителю Павле преподобне. Егда же восприял еси великий сан первосвя-тителя Византии, дело благовестника Христова сладце восприим: обличая, запрещая и умоляя со всяким долготерпением, Богу же сладце воспевая: Аллилуиа.
         
         
         Икос 5
         
         Видя велие в церкви нестроение, яко риза Христова раздираемая арианским безбожием и Македониевым вредословием, молитвами и слезами сей пла-мень злобный погашая, люди же наставляя ко исправлению, неверныя к вере оглашая, верныя же таинствами питая и освящая, уча ходити дос-тойно звания христианскаго. Мы же, поставляеми тобою на сей спаситель-ный путь, в радости зовем:
         Радуйся, Святейшия Трапезы предстоятелю умиленный.
         Радуйся, пищею нетления чада твоя добре питавый.
         Радуйся, добрых супружеств о Христе — святительское благословение.
         Радуйся, слова Божия неложный истолкователю.
         Радуйся, путевождь наш к жизни вечней.
         Радуйся, святителю Павле, исповедниче Христов.
         
         Кондак 6
         
         Проповедника истины и Божественных догматов тя, Павле, святителю Христов, вторицею дух злобы от града изгоняет. Людие же, исполнишася скорби и плача, разлучаеми с святым отцем и Патриархом, все упование на Бога возложиша, Тому поя слезяще: Аллилуиа.
         
         Икос 6
         
         Возсия Цареград новою радостию, егда узреша тя, святителю и испо-ведниче Христов Павле, возвращена во своя си от изгнания втораго. Вели-им ликованием объяти быша, сретая и лобызая тя, Христова страдальца, поюще песни духовныя сия:
         Радуйся, радостию небесною осиянный.
         Радуйся, радосте Церкви Христовой.
         Радуйся, исповедникам веры Христовой молитвенно помогаяй.
         Радуйся, столпе православия и истины поборниче.
         Радуйся, святителю Павле, исповедниче Христов.
         
         Кондак 7
         
         Хотя церковь Константинопольскую, аки невесту Христову, добре ук-расити, много потщався, святителю Павле, во благо ея: исторгая ариан-скую ересь, обличая неправомыслие, насаждая же веру истинную, Святей Троице покланяяся, сладце поюще: Аллилуиа.
         
         
         Икос 7
         
         Новое знамение милости Божия яви и нам молитвами твоими, святи-телю Павле, ограждай нас от помраченных людей, несущих раскол и неве-рие, нападающих люте на нас, пребывающих в единении Церкви Христо-вой, вселенстей, взывающих тако тебе:
         Радуйся, звездо, ко Христу приводящая.
         Радуйся, дивный иерарше Церкви Христовой.
         Радуйся, яко кровь твоя, аки кровь Авеля праведнаго, вопиет ко Гос-поду.
         Радуйся, во храме убиенный, аки Захария священнейший.
         Радуйся, аки Климент, мученик великий, в минуты Божественной Ли-тургии течение свое скончавый.
         Радуйся, святителю Павле, исповедниче Христов.
         
         Кондак 8
         
         Странником и пришельцем во всем показавый себе в сей юдоли земной и многомятежной, Христов святителю Павле, добре поработавый себе на ниве Христовой, множество бед, скорбей и гонений претерпевый ради Свя-тыя и Пребожественныя Троицы, Ей же и воспеваем непрестанно: Аллилу-иа.
         Икос 8
         
         Всею душею Христови предался еси, святителю Павле, стоя на свещ-нице аки светильник. Воистину показался еси святитель Христов много-трудный, сими славу стяжав безсмертия, — венец неувядаемый, и наша да-ры словесныя сия приими:
         Радуйся, превеликаго Мирликийскаго святителя Николая соревнова-телю.
         Радуйся, Спиридона святителя подражателю.
         Радуйся, друже Афанасия великаго.
         Радуйся, купно с ним от ариан множество бед и гонений претерпевый.
         Радуйся, аки зеницу ока веру православную соблюдый.
         Радуйся, во Армении жизнь твою мученически скончавый.
         Радуйся, святителю Павле, исповедниче Христов.
         
         Кондак 9
         
         Витии красноречия не возмогут достойно изобразити высоту духа, жи-тия, трудов, страданий и кончины твоея, святителю преславне Павле. Сего ради молим тя усердно: избави нас молитвами твоими от нападений змия древняго, змия великаго — диавола и клевретов его, ненавидящих Церковь Христову и нас, чад ея, победно поющих всегда: Аллилуиа.
         
         Икос 9
         
         Всякое душевредное учение и нестроение разруши в земли нашей, свя-тителю Божий Павле. Молися Пастыреначальнику Христу Богу нашему о умножении благочестия, мира и любви в многобедственней стране нашей. Да дарует Господь Бог пастырям нашим мудрость духовную, здравие с дол-готерпением, тебе величающим:
         Радуйся, светило православия.
         Радуйся, добрый пастырю стада Христова.
         Радуйся, служения Апостольскаго сопричастниче.
         Радуйся, усердный прогонителю душевредных псов от словесных овец.
         Радуйся, попечителю Богоизбраннаго стада Христова.
         Радуйся, омофором своим руками дерзкими ариан умерщвленный.
         Радуйся, святителю Павле, исповедниче Христов.
         
         Кондак 10
         
         Спасение паствы твоея промышляти не преставая, отче Павле; во дни изгнания твоего в Риме пребывавый у святейшаго Юлия, идеже сретил еси подобника себе в скорби, гонении и клевете от злочестивых хулителей Сы-на Божия, святаго великаго Афанасия, идеже укрепился еси духом, и паки ко граду своему пришед, от собора святых отгнал еси лжеименнаго Маке-дония, ублажая память добре пострадавших за чистоту православия едино-нравных мучеников Константинопольских: иподиакона Мартирия и чтеца Маркиана, честных нотариев, Богу поя победную песнь: Аллилуиа.
         
         Икос 10
         
         Стена крепкая явился еси, архипастырю Божественный Павле, всем угнетенным и гонимым за исповедание православныя веры Христовой. Бу-ди и нам, исповедниче Христов, крепким забралом от всякаго зла, тя воспе-вающим тако:
         Радуйся, любовь дивную ко отечеству твоему показавый.
         Радуйся, яко слово писания «любы долготерпит» на тебе оправдася.
         Радуйся, Троицу непременную от Рима до Кукуз проповедавый.
         Радуйся, верныя чада Божии в вере утверждаяй.
         Радуйся, хитросплетенныя сети ересей посекаяй.
         Радуйся, святителю Павле, исповедниче Христов.
         
         Кондак 11
         
         Пение радости чад духовных Цареградския Церкве паки на плачь и скорбь приложися, егда Павел, святый архипастырь, се уже третие изгна-ние, за тую же веру единства Пресвятыя Троицы, терпит. Се воистину явился еси, добрый святителю, яко же Павел великий, апостол Христов, с нимже и поеши согласно: Аллилуиа.
         
         Икос 11
         
         Светозарная свеща явился еси, священнейший пастырю Павле, осве-щая нас Божественным светом веры Христовой. Воспети вся беды, болезни твоя разум подаждь с небесе, сошедшимся зде, в летнем твоем торжестве:
         Радуйся, красная гусль Духа Святаго.
         Радуйся, чаша Божественныя мудрости и знаний.
         Радуйся, реко Божественныя благодати.
         Радуйся, цевнице Христовых учений.
         Радуйся, веру соблюдый.
         Радуйся, надежду сохранивый.
         Радуйся, любовь всем дивно показавый.
         Радуйся, святителю Павле, исповедниче Христов.
         
         Кондак 12
         
         Благодать и милость испроси нам на небеси, предстоя престолу Свя-тыя Нераздельныя Троицы, святителю Павле. Приими наша молитвы и песнопения в честь святыя памяти твоея, святе, та бо источает нам радость и ликование, Богу же с тобою воспевающим: Аллилуиа.
         
         Икос 12
         
         Поюще многострадальное твое житие, ублажаем мученическую кончи-ну, яже приял еси за чистоту веры во Святую и Единосущную Троицу, от злокозненных раздирателей Христова хитона. Помяни нас, ткущих тебе по-хвалы таковая:
         Радуйся, прославленный на небеси и на земли.
         Радуйся, цвете благоуханный рая Иисусова.
         Радуйся, секира посецающая терния безбожных глаголов.
         Радуйся, славный учителю юных богословов.
         Радуйся, бодрый архипастырю пастырей стада Христова.
         Радуйся, святителю Павле, исповедниче Христов.
         
         Кондак 13
         
         О, великий и преславный исповедниче Христов, столпе непоколеби-мый, святителю Павле! Приими сие похвальное пение от нас недостойных тебе приносимое, и твоими богоприятными молитвами у престола Божия испроси нам утверждение в вере православней, и в будущей жизни сподоби-тися внити во славу небесную, купно с тобою поюще всегда: Аллилуиа.
         (Сей кондак чтется трижды;
         посем икос 1 и кондак 1)
         МОЛИТВА
         святителю Павлу исповеднику
         О, святителю Христов, преподобне, блаженне Павле, Архиерею Божий! Предстояй ныне неизреченней славе Святыя Троицы, молися за всех нас, молящихся ныне к тебе, яко к великому молитвеннику за нас грешных пред престолом Вседержителя, о еже избавитися нам от всякаго злаго об-стояния, враг видимых и невидимых. Вознеси молитвы твои святыя за оби-тель, град и страну нашу, и всяку страну, идеже свет сияет Евангельской истины. Да тако совершивше земное течение, внидем в радость неизречен-ныя славы Творца и Промыслителя, и сподобимся купно с тобою прослав-ления Божества Святыя Троицы во веки веков. Аминь.[/spoiler]

Раб божий Константин

Преподобный Паисий Величковский.
[spoiler]Кондак 1

Избранный воеводо воинов духовных, наставниче монашествующих и пастырю предивный, писании отеческими души наша напитавый и святостию жития просиявый, многи обители иноческия обновивый и подвиги твоими Церковь Христову озаривый, преподобне отче Паисие, восхваляем тя с любовию, заступника нашего. Ты же, яко имеяй дерзновение ко Господу, от всяких нас бед свободи молитвами твоими, да зовем ти: Радуйся, преподобне отче Паисие, старче благодатный и наставниче монахов богомудрый.

Икос 1

Ангела земнаго и человека небеснаго воздвиже тя, отче Паисие, десница Божия в пределех страны Российския, да вострубиши трубою добротолюбия в землях Молдовлахии, на Святей Горе Афонстей и во всех странах словенских, и собереши разсеянныя пустыннолюбцы народов христианских, и сим оплот православнаго братства во обителех мнозех утвердиши. Темже мы, любовию к тебе подвизаемии, взываем сице: Радуйся, благочестиваго иерейскаго корене отрасле пречестная; радуйся, любве ради ко Господу дом матере твоей и отечество оставивый. Радуйся, ангельскаго жития подражателю; радуйся, заповедей Божиих усердный хранителю. Радуйся, на жатву духовную Господом посланный; радуйся, в вертограде Божия Матере - Святей Горе Афонстей Богу послуживый. Радуйся, многих на путь иноческаго жития наставивый; радуйся, обителей монашеских добрый строителю. Радуйся, светом боговедения просвещеный; радуйся, плоды богомудрых писаний твоих множество иночествующих напитавый. Радуйся, душеспасительную книгу Добротолюбия народом словенским даровавый; радуйся, к преподобных лику сопричтенный. Радуйся, преподобне отче Паисие, старче благодатный и наставниче монахов богомудрый.

Кондак 2

Ведый Господь велика тя быти светильника Православия и монашеския жизни обновителя, благоволи рождению твоему от благочестивых родителей - священника Иоанна и супруги его Ирины во граде Полтаве. Темже по смерти родителя и старшаго брата иерея преосвященный Киевский Рафаил повеле взяти тя на учение книжное, да обучен будеши к восприятию священнаго сана. Ты же усердие, благонравие и ревность в учении явил еси, воспевая Богу песнь: Аллилуиа.

Икос 2

Разумом Божественным просвещен, блаженне, утвердился еси в непреложнем своем намерении в монашестве пожити и, душею к странствованию разжигаем, оставил еси учение и изшел еси из Киева, якоже нищий и странный, ища духовнаго руководства, и Богом наставляем, пришел еси во обитель святителя Николая, идеже игумен с любовию прият тя в послушание и облече тя в рясофор с именем Платон. Сего ради и мы, взирающе на ревность твою о Господе, со умилением зовем ти: Радуйся, в день памяти святителя Киевскаго Петра родивыйся; радуйся, в крещении именем его нареченный. Радуйся, родителей благочестивых чадо благословенное; радуйся, от юности на служение Богу призванный. Радуйся, измлада в вере истинней воспитанный; радуйся, во учении книжнем прилежание усердное показавый. Радуйся, Господа ради путь тесный и скорбный избравый; радуйся, нищету телесную и духовную возлюбивый. Радуйся, во обитель святителя Николая спасения ради пришедый; радуйся, монашеское житие достойне восприявый. Радуйся, иноческих подвигов ревнителю; радуйся, добрый странниче к Отечеству Небесному. Радуйся, преподобне отче Паисие, старче благодатный и наставниче монахов богомудрый.

Кондак 3

Сила свыше укрепи тя, отче преподобне, егда Божиим попущением наста гонение на веру православную от латинян и бысть великое смущение во обители, яко церковь стояше запечатана врагами Православия. Тогда по Божию смотрению идоша гонимии иноцы в Киев, и ты, отче, достиг еси с ними матере градов русских и жительство восприял еси в лице иноков Киево-Печерския Лавры, благодарно воспевая Христу Богу: Аллилуиа.

Икос 3

Имеяй в сердце своем огнь любве Божественныя, ревностно подвизался еси о спасении души твоея во обители Печерстей, отче богомудре. Мати же твоя неутешно плакаше о сыне, из дому ушедшем, и умысли ни ясти ниже пити, дондеже умрет. Тогда увиде множество бесов мрачных и начат молитися ко Пресвятей Богородице, и посем узре Ангела Божия, иже обличи ю и рече: «Веждь, яко сын твой, благодати Божией споспешествующей, непременно будет монах. Подобает и тебе отрещися от мира и быти монахинею, такова бо есть воля Божия». И абие бесы исчезоша, Ангел же Господень, радуяся, взыде на небо. Послежде мати твоя в монастырь девичий вниде, постригшися с именем Иулиании, и, пребывши в монашестве десять лет, преставися ко Господу. Темже, яко избранника Божия, ублажаем тя песньми сими: Радуйся, суету мира сего оставивый; радуйся, во обитель Киево-Печерскую пришедый. Радуйся, юность твою непорочностию жития украсивый; радуйся, в скорбех и искушениих надежду на промысл Божий хранивый. Радуйся, славу и богатство ни во чтоже вменивый; радуйся, житию нестяжательному во обители научивыйся. Радуйся, во славу Христову потрудивыйся; радуйся, на высоту добродетелей возшедый. Радуйся, града твоего Полтавы крепкий заступниче; радуйся, обители Киево-Печерския усердный молитвенниче. Радуйся, яко матерь градов русских Киев тобою хвалится; радуйся, яко тебе ради и вся Русская земля веселится. Радуйся, преподобне отче Паисие, старче благодатный и наставниче монахов богомудрый.

Кондак 4

Бури житейских волнений в тихом пристанищи обители Печерския избегл еси, отче, и благословением отцев Киево-Печерских стезям подвижников последовал еси. Того ради любовию Божиею распаляем, отечества удалился еси, направив стопы твоя в Молдовлахию, и тамо сретил еси старца Василия, учителя и наставника монашескаго жития, иже многими душеполезными словесы братию свою наставляше. Ты же, блаженне, слышал еси глаголы сия с неизреченною радостию и со слезами прославлял еси Бога, воспевая Ему: Аллилуиа.

Икос 4

Слышав от братий многих и отец-подвижников в скитах Молдовлахии, яко обилие благодати Божия пребывает на Святей Горе Афонстей, просил еси их благословения на путь, хотя пожити в вертограде Божия Матере. Онии же отцы не хотяху сподвижника своего лишитися, удивляющеся о благодати Божией, на тебе почивающей, и юным старцем тя нарицаху, обаче не могуще удержати тя, благословиша и отпустиша с миром. Мы же, любовию подвизаемии, дерзаем воспевати тебе таковая: Радуйся, от земли отечествия твоего в Молдовлахию стопы твоя направивый; радуйся, с посохом странника скиты и обители иноческия тамо обшедый. Радуйся, в неустанней молитве дни и нощи проводивый; радуйся, имя Господа Иисуса Христа неусыпно возносивый. Радуйся, благое иго Христово на себе возложивый; радуйся, талант, врученный ти, умноживый. Радуйся, к подвижническому житию призванный; радуйся, яко с плотию на земли безплотное житие показал еси. Радуйся, постническим подвигом себе укрепивый; радуйся, в юности твоей старческую мудрость явивый. Радуйся, благодатию Святаго Духа просвещенный; радуйся духом премудрости и ведения обогащенный. Радуйся, преподобне отче Паисие, старче благодатный и наставниче монахов богомудрый.

Кондак 5

Боготечней звезде уподобился еси, угодниче Божий, егда пришел еси на Святую Гору Афонскую, благодаря Пречистую Матерь Христа Бога нашего, яко сподоби тя приити в святый Ея Жребий, и вселися тамо един в каливу, обучаяся истинному монашескому безмолвию, внимая же прилежно молитве и чтению отеческих писаний. И тако восходя благодатию Божиею от силы в силу достигл еси в мужа совершенна, украсившагося даровании Святаго Духа. Тогда прииде во Святую Гору старец Василий от Молдовлахии и облече тя в мантию с именем Паисий. Ты же, блаженне, безмолвии келейнем пребывал еси, поя Богу песнь хвалы и благодарения: Аллилуиа.

Икос 5

Видевше братия Святыя Горы и приходящии от мира дивное и подвижническое житие твое, отче преподобне, начаша убеждати тя прияти их в послушание. Ты же многа лета отрицался еси сего, послежде же начал еси приимати братий, упование на Бога возлагая; и собрася дванадесять братий, иже начаша молити тя прияти священство и духовничество. Тогда рекл еси: «Буди воля Божия», и приял еси священство послушания ради, во еже наставляти словесное твое стадо ко спасению. И бысть радость велия всем чадом твоим духовным, благодарне взывающим ти тако: Радуйся, Святыя Афонския Горы Божиим изволением благополучно достигнувый; радуйся, многих тамо любомудрым твоим житием удививый. Радуйся, сладость пустыннаго жительства возлюбивый; радуйся, уединенно в богомыслии и слезах нощи проводивый. Радуйся, великих пустынножителей верный подражателю; радуйся, подвигом богоносных афонских отец последователю. Радуйся, яко тело твое постом и бдением смирил еси; радуйся, яко душу твою молитвою и ума чистотою просветил еси. Радуйся, посещением наставника твоего старца Василия обрадованный; радуйся, благословением и молитвою его освященный. Радуйся, пустынным житием в подвизе иночестем себе утвердивый; радуйся, скорби многи благодушно претерпевый. Радуйся, преподобне отче Паисие, старче благодатный и наставниче монахов богомудрый.

Кондак 6

Проповедник покаяния и подвижническаго жития учитель показался еси, отче Паисие, во Святей Горе Афонстей. Егда же умножися братия, тобою собранная, испроси ветху келию, купно и благословение Святейшаго Патриарха Серафима на преселение в келию сию и создал еси тамо скит во имя святаго пророка Илии. Темже мнози святогорцы, увидевше благочиние в скиту, смирение, тихость, между братиями любовь и сердечный мир, и отсечение своей воли, и к тебе, яко благодатному старцу, благоговение и послушание, прославляху тя, яко руководителя и наставника ко спасению, воспевающе Богу благодарственную песнь: Аллилуиа.

Икос 6
Возсия слава твоя, отче преподобне, между братиями Святыя Горы, иже дивляхуся даровании твоими, яко был еси многим отцем духовник и самому Святейшему Патриарху Серафиму, иже часто приходя в скит, и в сладости о душеспасительных таинствех, подвизех и дарованиих беседовал еси с тобою. Ты же, отче Паисие, пребывал еси в скиту во дни трудяся на послушаниих, в нощи же писал еси книги отеческия, преводя я из греческаго на словенский язык, да вси сынове словенстии, книжнаго учения возжелевше, словом Божиим и учением святых отец просвещают разум и благодатию да утверждают сердца. Сего ради благодарственно вопием ти: Радуйся, в иноческих подвизех и трудех великим старцем Святыя Горы поревновавый; радуйся, древо добродетелей, в вертограде Пресвятыя Богородицы насажденное. Радуйся, Преблагословенныя Игумении Афона верный послушниче; радуйся, на милость и любовь Ея упование свое возложивый. Радуйся, яко в вертограде Божия Матере множество ученик обрел еси во спасение; радуйся, яко с теми прилежно Господеви поработал еси. Радуйся, пустынную келию во обитель иноческую претворивый; радуйся, братиею обители твоея возлюбленный. Радуйся, тобою собраных иноков к свету истиннаго боговедения наставивый; радуйся, всем подвизающимся в иночестве помощниче благодатный. Радуйся, постников и монахов богомудрый учителю; радуйся, вождю благоискусный воинов духовных. Радуйся, преподобне отче Паисие, старче благодатный и наставниче монахов богомудрый.

Кондак 7

Хотяй представите Господу чад твоих в люди избранны, отче Паисие, потщался еси собрати чающих подвига иноческаго от всех концев народов словенских и эллинския страны. Темже яко пчела люботрудная, от стражи утренния до нощи подвизался еси, да сокровищем истинным, светом Евангельския истины, напоиши братий твоих, о всех болезнуя и душею своею объемля, ихже поучал еси присным призыванием имене Иисусова побеждати невидимыя супостаты и сим всемощным оружием низпровергати их коварства, ум к Богу возводя и сердцем к Нему взывая: «Господи Иисусе Христе, Сыне Божий, помилуй мя, грешнаго», купно и воспевая Спасителю и Подвигоположнику нашему ангельскую песнь: Аллилуиа.

Икос 7

Новаго тя Моисея познахом, страстей победителя, якоже бо той древле Амалика победив, люди изведе из рабства, ты же, отче Паисие, множество монашествующих в землю обетованную райскую привел еси. Темже был еси старец дивный и многих чад исцелил еси благими и кроткими словесы, возжигая светильники мудро текущих в сретение Жениху Христу, попаляя терние вселукавых страстей молитвою Иисусовою, насаждая в сердцах чад твоих семена Божественныя любве, да принесут плоды сторичныя, с нимиже и мы вопием тебе сице: Радуйся, чтение Божественных писаний возлюбивый; радуйся, сокровенный их смысл добре и право уразумевый. Радуйся, проповедниче, вещавый глаголы жизни вечныя: радуйся, отче святый, чадом твоим путь ко спасению указавый. Радуйся, молитву Иисусову непрестанно творивый; радуйся, умно-сердечныя молитвы учителю предивный. Радуйся, яко словеса святых писаний в назидание многим собрал еси; радуйся, яко тех советы на скрижалех сердца твоего написал еси. Радуйся, престола Божия верный и благоговейный служителю; радуйся, о вечном спасении братии твоея ко Господу взывавый. Радуйся, Христовы любве и мира небеснаго благовестниче; радуйся, вертограда Афонскаго благодатное украшение. Радуйся, преподобне отче Паисие, старче благодатный и наставниче монахов богомудрый.

Кондак 8

Странника и пришельца на земли себе помышляя, ничесоже от тленных вещей мира сего стяжати не возжелел еси, но воды живыя испив в вертограде Божия Матере, кладезь добротолюбия явился еси, преподобне, и многих жаждущих правды Божия, любовию ко Господу воспламенив, к ревности ангельскаго жития направил еси. Егда же уразумел еси, отче блаженне, яко таковому собору иноков несть удобства во Святей Горе, совет сотвори с братиею, и вси единодушно начаша готовитися изыти в Молдовлахию. И благослови Святейший Патриарх Серафим исход сей, ты же, отче, пал еси на нозе Патриарха и той плакаше и со многим сожалением отпусти тя, Богу же дивному в рабех Своих, воспевая: Аллилуиа.

Икос 8

Весь в Бозе быв, упование крепкое на Бога возложил еси, отче преподобне, и вкупе с братиею пришел еси в Молдовлахию, идеже прият тя митрополит Гавриил и благословением господаря Григория Калимаха дарова тебе в жительство монастырь Святаго Духа, именуемый Драгомирна. Ты же, отче, вселился еси тамо со всею братиею, благодаря Бога о неизреченном Его милосердии. По мале времени прииде во обитель старец Алексий и облече тя в схиму, и бе всему собору братий радость велия. Темже и мы, радующеся и прославляюще тя, взываем сице: Радуйся, седмьнадесять лет во Святей Горе непреткновенно поживый; радуйся, образ и правило жития иноческаго тамо показавый. Радуйся, от Афона в земли Молдовлахии пришедый; радуйся, многих чад Божиих на подвиг иноческий призвавый. Радуйся, монашескаго и постническаго общежительнаго жития законоположителю; радуйся, отеческих богодухновенных преданий верный хранителю. Радуйся, победе в мысленней брани многих научивый; радуйся, проповедниче слова Божия благодатный. Радуйся, древняго благочестия насадителю; радуйся, яко тобою монахов множество в подвизех своих укрепляются. Радуйся, равноангельное житие до конца возлюбивый; радуйся, паки и в схиме Паисий нареченный. Радуйся, преподобне отче Паисие, старче благодатный и наставниче монахов богомудрый.

Кондак 9

Всяких скорбей и искушений житие твое бысть исполнено, преподобне. Тако прииде пагуба, мор и глад во времена воинския брани России и Оттоманския Порты, и мнози пустыннолюбцы за веру православную гонимии, спасахуся во обители, любовию твоею согреваемии. Егда же отдаша монастырь Драгомирну под власть римскаго папы, тогда благослови господарь Григорий дати братии твоей монастырь Усекновения главы святаго Иоанна Предтечи, именуемый Секул. Ты же, пришед в новую обитель, возрадовался еси зело, яко место тихое, безмолвное, ревнителем по Бозе удобное обрел еси, и начал еси житие зде устрояти по чину, якоже бе в Драгомирне, со слезами благодарения воспевая Богу песнь: Аллилуиа.

Икос 9

Витий премудрых превзошел еси благодатным действом словес твоих, отче преподобне, яко собрал еси цветы райския от писаний отеческих и зело прилежал еси к преложению их с греческаго на словенский язык, да вси монаси и мирстии, чающий спасения и подвига духовнаго, паче же из них истиннии по внутреннему человеку подвижницы, не точию православнаго отечества нашего, но и всех словенских народов, чтения их сподобляются. Темже светом Божественным озарив сердце твое, отче Паисие, якоже сокровище духовное оставил еси Церкви Христовой множество писаний твоих, имиже просвещаеши всех чтущих тя и вопиющих тако: Радуйся, во обители Секул радостно и мирно водворивыйся; радуйся, земли Молдовлахии молитвою твоею облагоухавый. Радуйся, единодушие и любовь в братии обителей твоих насадивый; радуйся, немощи немощных братии любвеобильно носивый. Радуйся, книжным научением слова Божия себе напитавый; радуйся, аки богомудрая пчела мед от отеческих писаний собравый. Радуйся, дни и нощи без сна трудов ради книжных проводивый; радуйся, святых отец писания на глаголы словенския преложивый. Радуйся, словесы отеческими жаждущих напоивый; радуйся, звездо, греховную тьму светом учения твоего прогоняющая. Радуйся, яко и во отечество твое иноцы учение сие принесоша; радуйся, многих духоносных отцев и старцев земли Российския духовный наставниче. Радуйся, преподобне отче Паисие, старче благодатный и наставниче монахов богомудрый.

Кондак 10

Спасти хотя души многих людей, благочестивый воевода князь Константин Мурузу повеле тебе, отче наш Паисие, сотворити послушание и преселитися в Нямецкий монастырь, да будет он во образ инем обителем, подвизая на ревность иноческаго жития. Ты же, сотворив крестное знамение, поклонился еси иконе Пречистыя Богоматере и рекл еси: «Буди воля Божия, идем и не хотяще», и дав всем оставшимся братиям благословение, утешил еси их, глаголя: «Да всяк невозбранно во всякой скорби и нужде душевней же и телесней, ко мне да приходит». Пришед же в Нямец, отче преподобне, пред чудотворною иконою Божия Матере молился еси, вручая себе и братию заступлению и хранению Ея, воспевая укрепившему тя Господу: Аллилуиа.

Икос 10

Стена и прибежище спасения был еси братии твоей, отче наш Паисие, наставляя их царским путем житие свое проводити, душу едину, и сердце едино, и мысль едину имети, и вся к достоянию своей жизни имети обща, духом горяще, преуспевающе в совершением смирении и любви друг ко другу с соблюдением святых заповедей Божиих. Темже молимся тебе, отче преподобне, избави нас от всех искушений, бед, скорбей и напастей, да вси тебе, яко человеколюбиваго отца, воспеваем тако: Радуйся, апостольскаго духа исполненный; радуйся, яко во всю землю изыде вещание словес твоих. Радуйся, яко твоими молитвами обитель Нямецкая паки прославися; радуйся, яко о ней весь народ Молдовлахии возвеселися. Радуйся, обителей молдовлахийских освящение; радуйся, вся службы во обителех твоих по чину монастырей афонских уставивый. Радуйся, древо благосеннолиственное, имже обители твоя покрываются; радуйся, твердое ограждение и прибежище усердно в них подвизающихся. Радуйся, обитель Нямецкую дом призрения бедных и нищих учинивый; радуйся, иноков ея радование и утешение. Радуйся, светом добродетелей твоих мир озаривый; радуйся, образ совершенства духовнаго в себе явивый. Радуйся, преподобне отче Паисие, старче благодатный и наставниче монахов богомудрый. .

Кондак 11

Пение всеумиленное приносим ти, преподобне отче Паисие, на месте трудов и упокоения твоего во обители Нямецстей, идеже ты, великим отцем преподобным подобяся, был еси пастырь и наставник всем последующим равноангельному житию твоему. Темже тихо и мирно предал еси душу твою Богу и от земных к небесным возсиял еси, ныне же со Ангелы на Небеси Христу в веселии предстоиши и молитвы о мире принося, поеши Ему: Аллилуиа.

Икос 11

Светильник веры православный и столп благочестия явился еси в Церкви Вселенстей, отче преподобне. Сего ради яко светом Божественным словеса твоя от восток солнца до запад сияют к просвещению людей, ибо Дух Святый содела тя добротолюбия списателя и правил монашескаго жития начертания вложи во уста твоя, да богодухновенных писаний твоих чтением просветятся многии чающии спасения и подвига духовнаго и да воспоют тебе похвалы сия: Радуйся, блаженною кончиною праведное житие твое запечатлевый; радуйся, преселивыйся от земных обителей во обители Небесныя. Радуйся, дух твой с веселием в руце Господа предавый; радуйся, блаженство райское со святыми унаследивый. Радуйся, светильниче, елеем дарований Духа Святаго возжженный; радуйся, вертограда Божия Матере, Святыя Горы Афонския, преславное светило. Радуйся, земли Молдовлахии красото неувядаемая; радуйся, мощи твоя святыя ей в наследие оставивый. Радуйся, светом писаний отеческих народы словенския озаривый; радуйся, Церкве Христовы звездо новая и многосветлая. Радуйся, яко и во успении твоем нас не оставляеши; радуйся, яко о прощении грехов наших Господа умоляеши. Радуйся, преподобне отче Паисие, старче благодатный и наставниче монахов богомудрый.

Кондак 12

Благодатию Божественною осеняем, просиял еси в житии твоем, богоносне отче Паисие, якоже солнце пресветлое, и ныне с верою и любовию к мощем твоим притекающих не оставляеши. Темже молим тя, просвети души наша к разумению спасительных истин веры Христовы и к научению добротолюбивых писаний святых отец, на путь спасения наставляющих всех, да и мы, поминающе тя, яко дивнаго наставника и пастыря, укрепляющего нас на пути подвига духовнаго, в радости сердечней воспеваем Богу благодарственную песнь: Аллилуиа.



Икос 12

Поющи дивное и праведное житие твое, преподобне отче Паисие, веселится ныне обитель Нямецкая, хранящая великое сокровище-святыя мощи твоя, и Драгомирна и Секуло яко учителя своего и духовнаго отца тя почитают. Земля же Полтавская, Киево-Печерская Лавра, такожде и Святая Гора Афонская и вся страна Российская подвигом твоим утешаются, имуще о себе молитвенника предивна. Темже монахов множество наставника тя почитают и вси людие земли нашея имя твое призывающе, радости исполняются, воспевающе тебе похвалы сицевыя: Радуйся, наставниче монахов и собеседниче Ангелов; радуйся, всех святых Божиих сонаследниче. Радуйся, яко со апостолы в райских обителех пребываеши; радуйся, яко с лики преподобных о душах наших ходатайствуеши. Радуйся, яко с Пресвятою Девою Богородицею о мире и благословении всех монашествующих Христа умоляеши; радуйся, яко молитвами твоими ныне мнози монастыри устрояются. Радуйся, обители иноческия, яко благоплодный сад, насадивый; радуйся, многих иноков собравый и к Пастыреначальнику Христу приведый. Радуйся, мощами твоими Российскую землю с землею Молдовы духовно соединивый; радуйся, всем притекающим к ним на поклонение дары целебныя щедро подаваяй. Радуйся, российскаго иночества и старчества насадителю; радуйся, яко имя твое по всей стране нашей прославляется. Радуйся, преподобне отче Паисие, старче благодатный и наставниче монахов богомудрый.

Кондак 13

О, преподобне и богоносне отче наш Паисие, великий подвижниче и угодниче Христов. Приими сие малое приносимое ти хваление и умоли Господа, да избавит нас от всяких бед, скорбей, враг видимых же и невидимых, нечаянныя смерти и вечныя муки, да сподобимся вкупе с тобою радости святых вечно воспевати Спасителю нашему: Аллилуиа, Аллилуиа, Аллилуиа.





(Этот кондак читается трижды, затем икос 1 и кондак 1)







Молитва преподобному старцу Паисию Величковскому

О великий наставниче, ревнителю и учителю премудрый всех чающих спасения и подвига духовнаго, преподобне отче наш Паисие! Услыши нас, грешных, тебе верою и любовию призывающих, и вонми прошением нашим. Ты от юности любве ради Божия оставил еси отечество твое и в иных странах безмолвия ища, во Святей Горе Афонстей и обителех иноческих Молдовлахии небесное богатство стяжал еси. Ты великим воздержанием, в трудех, теснотах и крайнем лишении плоть твою духови покорив, стяжал еси сокрушение сердечное, трезвение, истинное безстрастие, молитву сердечную и сим обновитель древняго иночества и столп Православия показался еси; темже десница Божия учителя, наставника и чадолюбиваго отца возведе тя и благоволи собрати священный вертоград ученик твоих, иже простре отрасли своя во вся концы Российския земли.

Умоли всещедраго Бога, да сохранит святую Церковь Русскую и вся святыя Церкви Православныя в союзе единомыслия веры, мира и братския любве, паче же от расколов пагубных, междоусобных нестроений и сеющих раздоры избавит и в непоколебимем благостоянии утвердит, во спасение всех истинно исповедающих пресвятое имя Его. Испроси, угодниче Божий, отечеству и народу нашему мира и благоденствия, изобилия плодов земных и благоустроения весей и градов наших, обителем же иноческим жития богоугоднаго, да славится в них пресвятое имя Господа и Бога и обретают в них вечное спасение любящия Его.

Помози нам, в суетнем и грешнем мире сем странствующим, отче преподобне, и умоли Господа даровати нам оставление всех прегрешений и во исходе душ наших избавити нас воздушных мытарств и вечнаго мучения, да молитвами твоими, узревше неизреченную славу Христа Бога нашего, возблагодарим тя, заступника и предстателя за всех любящих и чтущих имя твое, и прославим Безначальную Единосущную и Нераздельную Троицу, Отца, и Сына, и Святаго Духа, ныне, и присно, и во веки веков. Аминь.





Тропарь преподобному Паисию Величковскому

Тропарь, глас 2

Странен быв на земли, Небеснаго Отечества достигл еси, / преподобне отче Паисие, / добротолюбия подвижниче, / верных научил еси ум к Богу возводити / и сердцем к Нему взывати: / Господи Иисусе Христе, Сыне Божий, // помилуй мя, грешнаго.



Кондак, глас 6

Избранный иноческаго жития ревнителю, / яко пчела многотрудная, писаньми отеческими души наша снабдил еси, / коегождо наставляя на путь спасения. Сего ради зовем ти// радуйся, Паисие премудре, старчества духовнаго в стране нашей возродителю.[/spoiler]

Раб божий Константин

Преподобный Паисий, Галичский чудотворец.
[spoiler]Кондак 1



Избранный чудотворче, угодниче Христов, к тебе прибегаем и тебе милися деем, услыши нас в час сей, молящихся тебе, и буди нам скорый помощник и заступник, да твоими молитвами избавльшеся от всяких бед, вопием ти: Радуйся, Паисие преподобне.



Икос 1



Ангела во плоти суща тя знаем, отче преподобне, и сего ради призываем тя, предстани нам скоро в помощь и избави нас от всякаго зла, да тобою спасшеся, всегда вопием ти: Радуйся, от утробы матерния освященный; Радуйся, светом боговедения просвещенный. Радуйся, яко мира сего красоту ни во что же вменивый; Радуйся, яко ангельское житие возлюбивый. Радуйся, яко собрал еси инок множество; Радуйся, яко научил еси имети крепкое мужество. Радуйся, яко учением твоим мнози получиша спасение; Радуйся, яко тобою улучиша общее небесное селение. Радуйся, яко чисте зриши Святую Троицу; Радуйся, яко всегда о нас молиши Пресвятую Богородицу. Радуйся, яко вся прошения наша исполняются; Радуйся, Паисие преподобне.



Кондак 2



Видящи телесныма очима от Бога посланный к тебе Пречистыя Богоматере образ, принесенный болярином Иоанном Овином, радости многия наполнився, вскоре повеленное от ангел делом совершил еси, вопия к Богу: Аллилуиа.



Икос 2



Разум твердый во удивлении своем сохраняя, отче преподобне, видев болярина во внезапном изменении, вопросил еси его о приключшихся ему, уведев же бывшая, радовашеся. Сего ради и мы вопием ти: Радуйся, от рук Иоанновых образ Богородичен приемый; Радуйся, яко вся дни живота своего ему послуживый. Радуйся, яко образом тем Владыка Христос обитель твою прослави; Радуйся, яко и тебе обители тоя высочайшаго пастыря постави. Радуйся, яко чудесем, от образа бываемым, самовидец явися; Радуйся, яко того ради во всей России имя твое прославися. Радуйся, яко от всех стран народи во обитель твою притекаху; Радуйся, яко твоими молитвами от образа Богородична вся полезная приимаху. Радуйся, стада Христова словесных овец добрый пастырю; Радуйся, наставниче заблуждших и благий учителю. Радуйся, избавляяй во тме прегрешений блудящих; Радуйся, наставляяй на путь спасения хотящих. Радуйся, Паисие преподобне.



Кондак 3



Силою Вышняго посланнии к тебе два ангела, носяще образ Пречистыя Богородицы, сретоша некоего благоговейна человека именем Иоанна, вручивше его, невидими быша от очию его, он же, образ прием, возопи к Богу: Аллилуиа.



Икос 3



Имущи сомнение в сердцы своем болярин Иоанн о юношах, принесших образ Пречистыя Богородицы, вскоре возвратися в дом свой, хотящи паки видети их, не улучив же видети их, притек во обитель твою, вопияше тебе: Радуйся, отче, образа Богоматере хранителю; Радуйся, Пресвятыя Троицы служителю. Радуйся, недоведомыя тайны зрителю; Радуйся, чудесем, от образа бываемым, блюстителю. Радуйся, преподобных всех известная похвало; Радуйся, постников многословущая славо. Радуйся, монахов божественное правило; Радуйся, всей Галичской стране великое светило. Радуйся, ангелов собеседниче; Радуйся, святым всем сопричастниче. Радуйся, Троицы Святыя чистый служителю; Радуйся, Паисие преподобне.



Кондак 4



Бурю внутрь имеяй многих смущений, аз многогрешный недоумеваюся, како возмогу достойно воспети твоя подвиги, преподобне, ни ктоже бо от человек нынешняго рода может я исчести, аще бы и риторски кто глаголати восхотел. Сего ради Богу, тя прославляющему, дерзающе воспеваем: Аллилуиа.



Икос 4



Слышавша града Галича и окрестных градов народи о принесении ангелы Пречистыя Богородицы образа во обитель твою, преподобне, стекахуся отвсюду, носяще недужныя своя, желающе получити исцеление, еже молитвами и прикосновением же пречуднаго образа получивше, отхождаху в домы своя, радующеся. Мы же, дивящеся, похвальная вопием: Радуйся, о христианстем роде теплый к Богу ходатаю; Радуйся, недужным и скорбным здравия подателю. Радуйся, яко твоими молитвами обитель твоя, яко солнце, просветися; Радуйся, яко о ней народ не точию видевый, но и слышавый возвеселися. Радуйся, яко ученицы твои душами просвещахуся; Радуйся, яко твоими чудесы телесне веселяхуся. Радуйся, яко твоими молитвами от сетей вражиих свобождаемся; Радуйся, яко от раки твоея святыя благоухания насыщаемся. Радуйся, яко прикосновением тоя же раки от болезней исцелевахуся; Радуйся, яко таковый дар от Бога приял еси. Радуйся, яко приходящим к тебе с верою неоскудно исцеление подаваеши; Радуйся, Паисие преподобне.



Кондак 5



Боготечная звезда явился еси, преподобне, Церковь Святую, аки небо, украсил еси, образ, посланный со двема ангелома, в ней поставив, и от всех стран вернии ради моления во обитель твою стекахуся; ты же данною от Христа Бога тебе благодатию тех озарял еси, яко же чудесы, тако и учением наставляя их на путь спасения и повелевая вопити к Богу: Аллилуиа.



Икос 5



Видев ученик твой преподобный Иаков во обители святей созданную тобою и болярином Иоанном церковь возгоревшуся, в ней же принесенный ангелы Пречистыя Богородицы образ стояще, ревностию разжегся, и всю надежду на Самую Богоматерь и на твои молитвы возложив, разбив двери бревном и сквозе пламень в церковь вниде, и образ Богородицын изнесе, пламени же отвсюду окружающу его, образ ни чтоже пострада. Сего ради похвальная приносим ти, вопиюще: Радуйся, твердое веры основание; Радуйся, в таковых крепкое имый упование. Радуйся, такова ученика стяжавый; Радуйся, на твердем краеугольном камени того наздавый. Радуйся, яко учением своим, а не млеком сего воспита; Радуйся, яко в несомненную веру сего наказа. Радуйся, яко оба Господу угодиста; Радуйтеся, яко многи ученики своим учением воздоиста. Радуйтеся, яко многим ко спасению явистася предводители; Радуйтеся, яко и нам от волков адских бысте хранители. Радуйтеся, яко купно предстоите Святей Троице; Радуйтеся, яко Царю небесе и земли о нас молитеся. Радуйся, Паисие преподобне.



Кондак 6



Проповеданную ангелы принесением честнаго образа Пречистыя Богородицы милость, хотящую быти роду христианскому, возобновиша вернии, и на созидание новыю церкве от имений своих подаяху кийждо по силе своей. Ты же, преподобне, оным подаянием новую церковь вскоре воздвигл еси и к содействующему сия Богу возопил еси: Аллилуиа.



Икос 6



Возсия во обители новосозданная церковь, аки второе солнце на небеснем крузе, народи же, видевше сие, радовахуся и, любовию притекающе, от неистощимаго источника целеб образа Пресвятые Богородицы дары приемлюще и восхваляюще тя, сице вопияху: Радуйся, добрый винограда Христова строителю; Радуйся, стада Его хранителю. Радуйся, всем верным во спасение учителю; Радуйся, тем же до Царствия Небеснаго предводителю. Радуйся, незлобивых стада Христова овец во едино совокупителю; Радуйся, злосмрадных козлищ от стада Христова прогонителю. Радуйся, молитвенниче о нас к Богу теплый; Радуйся, ходатаю к Богородице о нас скорый. Радуйся, яко тобою дерзновение в молитве к Богородице имеем; Радуйся, яко тобою вся полезная от Бога приемлем. Радуйся, скорый наш помощниче; Радуйся, готовый наш заступниче. Радуйся, Паисие преподобне.



Кондак 7



Хотящу великому князю Московскому Василию пленити удел князя Георгиа, пришед в страны Галичския настольный дяди своего град Галич, тогда же взя и чудотворный образ, его же принесоша ангели, и отнесе его в свой настольный град Москву, и аки пленницу заключи, преслушав моление твое, преподобне; ты же, надеявся несомненно, яко паки образ к вам во обитель возвратится, пел еси Богу песнь ангельскую: Аллилуиа.



Икос 7



Новое бе чудо и ужаса исполненное тогда, принесену бо бывшу образу Царицы Небесныя в Москву и в церкви заключенну, замки и печатьми утвержденну; и стражами обстоима свободившая Адама и Еву от ада, хранима аки пленница, невидимою же силою Божиею тоя же нощи обретеся к твоей честней обители в церкви; ты же, сию ощутив, радостне похвальная к Богородице возсылаше, сице глаголюще: Радуйся, Адамово исправление и Евино свобождение; Радуйся, пророков оглашение и апостолов удобрение. Радуйся, мучителя безчеловечнаго изметающая от начальства; Радуйся, Сына Своего и Бога крепкую силу показавшая. Радуйся, море, потопившее гордую лютость великаго князя; Радуйся, каменю, напоивый нас жаждущих потоком чудес Твоих. Радуйся, судию, неправеден суд судящаго, обличившая; Радуйся, во тме плачевней нас грешных просветившая. Радуйся, рождшая радость всему миру; Радуйся, отгнавшая от всех верных печалей зиму. Радуйся, яко пришествием Святаго Ти образа и нам радость дарова; Радуйся, яко прежнюю нашу печаль всю отгна. Радуйся, Мати Господня.



Кондак 8



Странное сие и преславное чудо егда уведе великий князь Василий, тогда печали и ужаса сердце свое исполни, зазираше себе, како сия дерзновенно содела, егоже не леть делати, и сего ради со слезами и рыданием моляшеся к Богородице, да явит ему о образе Своем. Егда же от посланных известися, яко во обители твоей, преподобне отче, явися, отнюдуже насилием бысть тогда взята, воспел есть к Богу песнь ангельскую: Аллилуиа.



Икос 8



Весь радости исполнився великий князь и синклит его о обретении чудотворнаго образа Пречистыя Богородицы, дивящеся неизреченной Божией премудрости, како невидимо силою Сына Своего из церкви изыде, замком и печатем целым сущим и стражем бдящим. Мы же, ведуще, яко твоих ради молитв сия содеяся, вопием ти: Радуйся, светлый светильниче; Радуйся, пастырю словесных овец. Радуйся, монахов истинный отец; Радуйся, яко твоими молитвами великаго князя суровое дерзновение обличивый. Радуйся, яко его вся тщетная мысль упразднися; Радуйся, яко ты во смирении своем возвеселися. Радуйся, яко чудотворный образ сподобися зрети; Радуйся, яко пред ним вся дни живота своего изволил еси бдети. Радуйся, яко и по смерти своей Самую Пречистую Богородицу зриши; Радуйся, яко Престолу Сына Ея предстоиши. Радуйся, Паисие преподобне.



Кондак 9



Всякое естество ангельское удивися великому дарованию, свыше от Бога тебе данному, преподобне, яко в немощней своей человечестей плоти сущи, по всему уподобися ангелом, и силою Вышняго укрепляем, во всех добродетелех довольно изобиловал еси, сего ради чистою своею душею причтен ко ангельским силам, поющи всесильному Богу: Аллилуиа.



Икос 9



Витийския и риторския многовещанныя глаголы вся отвергши, истинным своим сердцем и чистою совестию в песнех величаем тя, преподобне, и почитаем богоугодная твоя дела и славу, приглашающе пети тебе таковая: Радуйся, яко Христа ради распятся мирови; Радуйся, яко вся мирская во уметы вменивый. Радуйся, яко плоть свою поработивый духу; Радуйся, яко духом служаше Богови день и нощь. Радуйся, яко телом живяше во юдоли земней; Радуйся, яко душевное еси око пасяше во Иерусалиме горнем. Радуйся, и ныне тамо пребывавши; Радуйся, яко нас, на земли сущих, не оставляеши. Радуйся, яко о нас грешных мольбы к Богу приносиши; Радуйся, яко от Него к нам милость ходатайством своим износиши. Радуйся, яко мы тя за сие благодарим; Радуйся, яко имя твое святое всегда славим. Радуйся, Паисие преподобне.



Кондак 10



Спастися хотящим вождь был еси, преподобне, и ныне нам грешным, спасения желающим, помози святыми своими молитвами; и якоже жив сый, многи ученики своя, Христови угодивших, представив, тако и нас, свободив от прелести греховныя, чистых Христу представи, да зовем Ему: Аллилуиа.



Икос 10



Стена крепкая и необоримая, и покров был еси своим учеником, защищающи их от волков адских, сохраняющи от стреляний бесовских, и ныне нам грешным буди стена и покров, прибегающим к тебе и требующим от тебе помощи, да зовем ти: Радуйся, отцев славо; Радуйся, преподобных похвало. Радуйся, постников украшение; Радуйся, мучеников сопричастниче. Радуйся, пустынножителем сообщниче; Радуйся, истинныя христианския веры ревнителю. Радуйся, противящихся вере святей искоренителю; Радуйся, церковное украшение. Радуйся, обители святей разширение; Радуйся, яко обитель твоя ныне молитвами твоими стоит нерушима. Радуйся, яко и во веки имать стояти невредима; Радуйся, Паисие преподобне.



Кондак 11



Пением всяким Бога и Его Пречистую Богоматерь, живущи на земли, прославлял еси вся дни живота своего, сего ради и мзду трудов своих восприяв, вселился еси в небесных селениих, идеже выну поют ангельстии чинове; с ними же живущи, поеши всегда к Богу песнь сию: Аллилуиа.



Икос 11



Светоприемный свещник на месте высоце, а не под спудом стоящий, во тме греховней сущии зрим тя, преподобне, с невещественными бо в вышних предстоиши Престолу Пресвятыя Троицы, радости превеликия исполнився и божественными лучами трисолнечнаго света осияваем, облистаеши верных, вопиющих тебе таковая: Радуйся, заре, являющая покаянием день спасения; Радуйся, всех грешных покаянием ко Христу приводяй. Радуйся, данным ти от Христа ключем Царствие Небесное отверзаеши; Радуйся, покаянием грешников в него вводиши. Радуйся, кормчий корабля Христова, в нем же спасошася мнози; Радуйся, яко учением своим многотекущую источил еси реку. Радуйся, яко жаждущих твоего учения напоил еси потоком сладости; Радуйся, яко твоего учения рекою доплыхом в землю обетованную. Радуйся, яко пристахом в тихое пристанище; Радуйся, яко наследовахом землю обетованную. Радуйся, яко получихом прежде многих лет обещанное; Радуйся, Паисие преподобне.



Кондак 12



Благодать дадеся тебе от Бога, яко и прочим святым, целити души и телеса с верою притекающим к раце твоей святей. Сего ради молютися, преподобне Паисие, и, к раце твоей святей припадая, вопию: исцели мою душу и болезнь во здравие вскоре премени, да тобою получив здравие, воспою Богови песнь ангельскую: Аллилуиа.



Икос 12



Поюще твоя труды и подвиги, преподобне, восхваляем тя вси, яко от юности своея явился еси храм Святаго Духа; сего ради к раце твоей честней во храм Божия Матере притекающе, вопием ти: Радуйся, врачу душами болезнующих; Радуйся, целителю телесными недуги озлобленных. Радуйся, наказателю сущим во младости; Радуйся, жезле сущим в старости. Радуйся, яко святая твоя душа в небесных скиниях почивает; Радуйся, яко имя твое святое на земли прославляемо бывает. Радуйся, яко призыванием имени твоего святого болезни врачуются; Радуйся, яко твоими молитвами беснующиися от мучительства диаволя свобождаются. Радуйся, яко всякая язва в людех целится; Радуйся, яко вси, притекающии ко гробу твоему с верою, спасаются. Радуйся, Паисие преподобне.



Кондак 13



О всеблаженный и приснопамятный угодниче Божий, преподобне отче Паисие, предстоя Престолу Владыки Христа, не забуди нас грешных и нынешнее наше приими приношение, всегда о нас пребуди моляся, избавитися нам от напастей и всяких болезней, и вечнаго мучения благоприятным твоим ходатайством, да с тобою воспеваем к Богу всегда: Аллилуиа.



(Этот кондак читается трижды, затем икос 1 и кондак 1)





Молитва преподобному Паисию, Галичскому чудотворцу



О священная главо, преподобне отче, преблаженне авво Паисие великий! Не забуди нищих своих до конца, но поминай нас всегда во святых своих и благоприятных молитвах к Богу. Помяни стадо свое, еже сам упасл еси, и не забуди посещати чад своих, моли за ны, отче наш, и ныне за дети своя духовныя, яко имеяй дерзновение к Небесному Царю, не премолчи за ны, вопия ко Господу, и не презри нас, верою и любовию чтущих тя, но поминай нас, недостойных, у Престола Вседержителева, и не престай моляся за нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо и телом преставился еси от нас, но и по смерти убо жив сый пребывавши неотступно от нас духом, сохраняя нас от стрел вражиих и всякия прелести бесовския и козней диавольских. Пастырю наш добрый, аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными силами у Престола Вседержителева предстоящи, достойно веселится. Нам бо ведущим убо тя воистинну и по смерти яко живу ти сущу, тебе припадаем и тебе молимся и тебе мили ся деем, еже молитися о нас всесильному Богу о пользе душ наших и испросити нам время на покаяние, и невозбранно прейти от земли на небо, от мытарств же горьких, бесов и воздушных князей, и от вечныя муки избавитися, и Небесному Царствию наследником быти со всеми, идеже от века угодившими Господу нашему Иисусу Христу, Емуже подобает всякая слава, честь и поклонение со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.





Тропарь преподобному Паисию Галичскому



Тропарь, глас 8

 

Днесь возсия нам память твоя, славне Паисие, яко солнце светозарное, лучами озаряющи весь мир, тако и ты, преподобне, чудесы своими тьму нощи злых духов от нас отгоняя; днесь Небесныя силы, и святых Ангел, и души праведных мысленно торжествуют, радующеся; днесь и мы, грешнии, припадающе честному твоему образу молимся: о, преподобне Паисие, Христа Бога моли непрестанно спасти град и люди, иже тебе почитающия.[/spoiler]

Раб божий Константин

Акафист великомученику Пантелеимону.
[spoiler]Кондак 1


Избранный страстотерпче Христов и врачу благодатный, туне подаяй недугующим исцеления, песньми восхваляем тя, заступника нашего. Ты же, яко имеяй дерзновение ко Господу, от всяких бед и болезней свобождай нас, любовию тебе зовущих: Радуйся, великомучениче и целителю Пантелеимоне.


Икос 1


Ангела земнаго и небеснаго человека вемы тя, славный Пантелеимоне: ангельскою бо непорочностию и мученичеством украшен, преселися еси от земли на Небо, идеже со Ангелы и всеми святыми предстоя Престолу Господа славы, молися о нас, земных, почитающих тя звании сими: Радуйся, светлосте благочестия; радуйся, преславный светильниче Церкви. Радуйся, мучеников пречестных украшение; радуйся, верных в непоколебимом терпении утверждение. Радуйся, юности преизрядная похвало; радуйся, поборниче Христов, в мужестве неодоленный. Радуйся, произрастший в мире, премирен явивыйся; радуйся, ангеле во плоти, превосходяй смертных. Радуйся, небожителю всеблаженный; радуйся, Божественного разума вмести-лище. Радуйся, имже вера возвысися; радуйся, имже прелесть низложися. Радуйся, великомучениче и целителю Пантелеимоне.


Кондак 2


Видя тя Владыка сосуд избран, возлюби души твоея доброту. Ты бо земную всякую сладость и славу презрев, венцем мученическим возжелел еси украситися, уязвлен Божественною любовию, и вдохновенно поя: Аллилуиа.


Икос 2


Разум богодухновен имея, о доблий воителю Пантелеимоне, изумил еси царя Максимиана мужеством души твоея и словесы, имиже дерзновенно проповедал еси Христа. Темже похваляюще дерзновение твое, глаголем ти сице: Радуйся, угрозы Максимиана презревый; радуйся, советом нечестивых непокоривыйся. Радуйся, насаждение истиннаго богопочитания; радуйся, искоренение демонскаго служения. Радуйся, неистовства мучителей изобличителю; радуйся, идольския прелести низложителю. Радуйся, разгнавый нечестивых соборища; радуйся, пременивый тленная на Небесная. Радуйся, собеседниче невещественных Ангелов; радуйся, сликовствователю многострадальных святых. Радуйся, имже сатана посрамися; радуйся, имже Христос прославися. Радуйся, великомучениче и целителю Пантелеимоне.


Кондак 3


Силою Вышняго, дарованную тебе, и крепкие терпением твоим обезсилил еси мучителеву дерзость, мужественный победоносче: огня, зверей, колеса не убоявся и мечем усечен во главу, венец победы приял еси от Христа Бога, взывая Ему Аллилуиа.


Икос 3


Имущи обитель твоя вседрагую главу твою, богомудрый страстотерпче, яко превеликое сокровище, радости исполняется о сем и, любовию воспевающи данную тебе от Бога благодать исцелений, благодарно зовет ти: Радуйся, Никомидии светильниче всесветлый; радуйся, чтущей тя обители страже неусыпный. Радуйся, имже охладе безбожие; радуйся, имже возрасте богопознание. Радуйся, светлая страстотерпцев славо; радуйся, радостное православных слышание. Радуйся, исцелений благодатный источниче; радуйся, дарований великих вместилище. Радуйся, благовонное миро, облагоухающее души; радуйся, яко помогаеши призывающим тя. Радуйся, слепым зрение даровавый; радуйся, хромым благошествие устроивый. Радуйся, великомучениче и целителю Пантелеимоне.


Кондак 4


Бурею помышлений многобожия одержим, нечестивый царь смутися, увидев от завиствовавших тебе врачев, яко всякия неисцельныя недуги целиши ты Именем Христа. Мы же, с веселием славяще дивнаго в тебе Бога, вопием Ему: Аллилуиа.


Икос 4


Слышавше никомидийстии людие о великом сострадании твоем к страждущим и о безмездном врачевании от всяких болезней, устремишася вси к тебе, с верою во врачующую благодать, в тебе сущую, и приемлюще скорая исцеления от всяких болезней, прославляху Бога и тебе величаху, всемилостиваго целителя своего, зовуще ти: Радуйся, помазанный миром благодати; радуйся, храме Бога освященный. Радуйся, великая благочестивых славо; радуйся, твердая озлобляемых стено. Радуйся, мудрых превосходяяй разумом; радуйся, верных осияваяй мысли. Радуйся, Божественных даров приятелище и многообразных нам милостей Господних источниче; радуйся, скорый помощниче страждущим. Радуйся, обуреваемых пристанище; радуйся, заблуждших наставниче. Радуйся, болящих туне врачуяй; радуйся, обильно исцеления источаяй. Радуйся, великомучениче и целителю Пантелеимоне.


Кондак 5


Чудо преславное сотвори с тобою Господь, егда чрез служителя Своего Ермолая призва тя в чудный Свой свет. Ехидною бо велиею угрызенно умершее отроча по молитве твоей ко Христу абие оживе и воста здраво. Познав убо Жизнодавца всех Истиннаго Бога, с твердою верою воззвал еси Ему: Аллилуиа.


Икос 5


Узре свет слепый, емуже с призыванием Имене Христова прикоснулся еси ты, славне. Ермолаем бо пресвитером просвещен, отринув отеческое многобожие, восприял еси матернее благочестие, имже и отца просветил еси. Сего ради тебе, славному угоднику Божию и чудному врачу, взываем: Радуйся, к Богу велие рачение имеяй; радуйся, присногорящий огню Божественныя любве. Радуйся, деятельный послушателю священных поучений Ермолая; радуйся, последовавый советам матере твоея Еввулы. Радуйся, яко вся раздал еси, да Христа приобрящеши; радуйся, любовь к миру любовию Божиею победивый. Радуйся, яко вместо сладких мира за Христа лютая страдания приял еси; радуйся, яко общник сотворился еси Страстем Христовым. Радуйся, восторжествовавый над всеми страстьми; радуйся, украсивыйся благодатным безстрастием. Радуйся, исполняяй радости притекающия к тебе; радуйся, туне исцеляяй всех благодатию Христовою. Радуйся, великомучениче и целителю Пантелеимоне.


Кондак 6


Проповедник истины явися просвещенный тобою телесне и душевне слепец: подобно бо евангельскому слепцу, дерзновенно пред всеми исповеда Света Истиннаго Христа, просвещающа всякаго человека, нечестиваго же царя и боги языческия укорив, чрез мечное усечение взыде к немерцающему свету на Небеси пети Богу: Аллилуиа.


Икос 6


С светлым лицем представ судилищу цареву, дерзновенно взывал еси, преблаженне, во услышание всех: всецелебная сила моя и слава Христос есть Истинный Бог, Владыка всех, мертвыя воскрешаяй и всяк недуг отгоняяй. За таковое исповедание ублажающе тя, глаголем: Радуйся, уста громогласная Божества Христова; радуйся языче медоточный, вещаяй Его домостроительство. Радуйся, ветие превысшаго Богословия; радуйся, сеятелю мудрый благочестия. Радуйся, сладкозвучная веры свирель; радуйся, славный проповедниче Православия. Радуйся, прежде смерти явивый дивная; радуйся, по смерти совершаяй чудная. Радуйся, зрителю славы Христовой; радуйся, послушателю молящихся тебе. Радуйся, подателю милости тоя требующим; радуйся, ходатаю благ почитающим память твою. Радуйся, великомучениче и целителю Пантелеимоне.


Кондак 7


Миро излияся на душу твою, богомудрый целебниче, от Утешителя Духа; темже по смерти честныя останки твоя, благоуханием своим страстей злосмрадие отгоняя, исцеление подают вопиющим верою Богу: Аллилуиа.


Икос 7


Егда узреша идольстии чтители многолетна расслабленна, молитвою твоею, святе, воздвигнута и ходяща, мнози увероваша во Христа; жрецы же бесовстии, завистию снедаеми, подвигоша царя на ярость. Тебе убо нещадно за Христа стружему и опаляему бывшу, со умилением зовем: Радуйся, наслаждения земная презревый; радуйся, благ вещественных превысший. Радуйся, яко вся красная мира сего ни во что же вменил еси; радуйся, яко славу скоротекущую с себе отрясл еси. Радуйся, неуловим пребывый ловления Велиара; радуйся, победивый мучителя коварства. Радуйся, не пощадивый за Христа жизни своея; радуйся, враг явивыйся враждебныя плоти. Радуйся, многобожия широту утеснивый; радуйся, Божественною силою идолы поправый. Радуйся, острейшая стрело, язвящая враги; радуйся, предстателю, заступаяй верующия. Радуйся, великомучениче и целителю Пантелеимоне.


Кондак 8


Страннолепно являшеся тебе Господь, ободряя и соблюдая в мучениях за Имя Его: во образе бо пресвитера Ермолая, клокочущее олово, в неже ввержен был еси, охлади, и в мори отрешив велий камень от выи твоея, изведе неврежденна на землю. Ты же, паки представ пред царя, торжественно пел еси Христу Богу: Аллилуиа.


Икос 8


Весь умне на Небеси водворяяся, и низу на земли сущих не оставляеши, сопребывая с нами всечестною главою твоею, великий страстотерпче Христов, приемля от Господа и подая просвещение и освящение вопиющим тебе таковая: Радуйся, премудросте Божественныя исполненный; радуйся, промышления Божия о нас таинниче. Радуйся, богомудренных умов услаждение; радуйся, боголюбивых душ увеселение. Радуйся, пресветлый Христов бисере; радуйся, освященный душею и телом. Радуйся, во дворех перворожденных на Небеси вселивыйся; радуйся, в присноблаженных обитаяй чертозех. Радуйся, света Троическаго зрителю; радуйся, в молитвах к Богу теплый о нас предстателю. Радуйся, просвещение душам подаваяй; радуйся, скорбящим утешение ниспосылаяй. Радуйся, великомучениче и целителю Пантелеимоне.


Кондак 9


Всякое естество удивися, Пантелеимоне, сиянию в тебе благодати и богатству добродетелей: ангелоподобней чистоте твоей, великому мужеству в лютых страданиях, крепкой любве ко Христу и многому состраданию к людем, в нихже твориши преславная, во еже пети: Аллилуиа.


Икос 9


Ветия многовещанныя не возмогут по достоянию восхвалити борения твоя, славный добропобеднице, како непобедимою силою Божиею юный леты победи древняго и исконнаго врага и посрами идольскую прелесть. Мы же, удивления исполненнии, зовем ти: Радуйся, радостное зрелище Ангелов; радуйся, благоговейное удивление человеков. Радуйся, кровь за Христа излиявый и в смерти млеко источивый; радуйся, тело за Него мученической смерти предавый. Радуйся, исповедничества правило; радуйся, доблий воине Царя царей. Радуйся, тьмы державна победивый; Радуйся, победою твоею Небесных и земных обвеселивый. Радуйся, Горняго мира обитателю блаженный; радуйся, дольняго мира мудрый странниче. Радуйся, древо, украшенное плодами благодатных дарований; радуйся, носяй добропобедныя ветви. Радуйся, великомучениче и целителю Пантелеимоне.


Кондак 10


Сострадания исполнен, яко истинный подражатель Подателя милости Господа, честный страдальче, Пантелеимоном (си есть, всемилостивым) от Него проименован еси, на вся притекающия к тебе милость изливая, юже и нам неоскудно источай, о тебе вопиющим Богу: Аллилуиа.


Икос 10


Стену тя тверду обрет мучитель, никиими же муками победиму, покусися сокрушити крепость твою зубы зверей и остриями мучилищнаго колеса, обаче и в сем ничтоже успе: сила бо Христова лютость зверей укроти, а страшное коло, на немже обращаемо бе тело твое, абие сокрушися. Тебе убо непобедимому страстотерпцу зовем: Радуйся, честное Христово избрание; радуйся, непорочное Богови благоухание. Радуйся, твердый адаманте Церкве; радуйся, непоколебимый столпе, досязаяй до Небесе. Радуйся, звери видимыя укрощаяй; радуйся, драконов невидимых сокрушаяй. Радуйся, обагренный твоею за Христа кровию срастворенною млеком; радуйся, неувядаемыя приемый венцы. Радуйся, радость причинивый Ангелом и человеком; радуйся, прославленный Богом на Небеси и на земли. Радуйся, небожителю, ликовствуяй с мученики; радуйся, насыщаяйся лицезрением Христа пресладким. Радуйся, великомучениче и целителю Пантелеимоне.


Кондак 11


Песнь исходную приносим твоему за Христа заколению священному, в немже вместе с кровию млеко истече от тебе, великомучениче, и масличина, под неюже усечен был еси, исполнися целительных плодов. Темже Христу, дивно прославляющему славящия Его, тепле вопием: Аллилуиа.


Икос 11


Светозарная луча был еси, богомудре, во тьме многобожия седящим, путеводящая к Солнцу Правды Христу Богу, Емуже молися, во свете заповедей Его присно пребывати и нам, сицевая радостная тебе приносящим: Радуйся, пресветлая звездо, на мысленной тверди блистающая; радуйся, луча, христоименитым людем светящая. Радуйся, таинственно облиставаемый от Солнца Христа; радуйся, умне землю обтекаяй. Радуйся, селение красное Пресвятаго Духа; радуйся, сосуде пречестный, изливаяй исцеления. Радуйся, чистоты сокровище; радуйся, милости тезоимените. Радуйся, Царствия Небеснаго наследниче; радуйся, вечныя славы сопричастниче. Радуйся, предстателю бедствующим в мори житейстем; радуйся, безсребренниче, помогаяй призывающим тя с верою. Радуйся, великомучениче и целителю Пантелеимоне.


Кондак 12


Благодати обилие приял еси, треблаженне, по обилию любве твоея ко Христу Богу. Иже и яви тя многоцелебным источником, безмездно врачующим душевныя и телесныя болезни притекающих к тебе с верою и Богу вопиющих: Аллилуиа.


Икос 12


Поюще многострадальныя подвиги твоя за Христа, славный страстотерпче, хвалим долготерпение твое, ублажаем мученическую кончину, почитаем и священную память твою, заступниче наш и целителю, и в похвалу сицевая тебе зовем: Радуйся, благочестия трубо благозвучная; радуйся, мечу, посекаяй нечестие. Радуйся, строганный на древе за Распростершаго руце Свои на древе Крестнем; радуйся, яко опаляемь за Него, прелести пещь погасил еси. Радуйся, язвами твоими враги уязвивый; радуйся, кровию твоею токи идольския крове изсушивый. Радуйся, в кипящее олово вверженный за Христа; радуйся, погруженный за Имя Его в водах морских. Радуйся, промышлением Божиим неврежден в сих пребывый; радуйся, яко чрез огнь и воду мучения вшел еси в покой Небесный. Радуйся, изливаяй неизсякаемыя струи милости верным; радуйся, благосострадательный врачу, исцеления благодать подаваяй. Радуйся, великомучениче и целителю Пантелеимоне.


Кондак 13


О многострадальный и предивный страстотерпче Христов и целителю наш Пантелеимоне! Милостиво прием сие малое от нас приношение, от многообразных недугов исцели ны и предстательством твоим сохрани от враг видимых и невидимых и вечнаго мучения избавитися нам Господа умоли, да во Царствии Его выну воспеваем: Аллилуиа.


(Этот кондак читается трижды, затем икос 1 и кондак 1)



Молитвы великомученику и целителю Пантелеимону


Молитва первая


О великий Христов угодниче и преславный целебниче, великомучениче Пантелеимоне! Душею на Небеси Престолу Божию предстояй и триипостасныя Его славы наслаждаяйся, телом же и ликом святым на земли в Божественных храмех почиваяй и данною ти свыше благодатию различная чудеса источаяй, призри милостивным твоим оком на предстоящия люди, честней твоей иконе умильно молящияся и просящия от тебе целебныя помощи и заступления: простри ко Господу Богу нашему теплыя твоя молитвы и испроси душам нашим оставление согрешений. Се бо мы, за беззакония наша не смеюще возвести очеса наша к высоте небесней, ниже вознести глас молебный к Его в Божестве неприступней славе, сердцем сокрушенным и духом смиренным тебе, ходатая милостива ко Владыце и молитвенника за ны, грешныя, призываем, яко ты приял еси благодать от Него недуги отгоняти и страсти исцеляти. Тебе убо просим: не презри нас, недостойных, молящихся тебе и твоея помощи требующих. Буди нам в печалех утешитель, в недузех лютых страждующим врач, напаствуемым скорый покровитель, очесем недугующим прозрения датель, ссущим и младенцем в скорбех готовейший предстатель и исцелитель: исходатайствуй всем вся, яже ко спасению полезная, яко да твоими ко Господу Богу молитвами получивше благодать и милость, прославим всех благих Источника и Дароподателя Бога, Единаго в Троице Святей славимаго Отца и Сына и Святаго Духа ныне и присно и во веки веков. Аминь.


Молитва вторая


О преславный мучениче и доблий воине Небеснаго Царя, Пантелеимоне всеблаженне, милостиваго Бога преизрядный подражателю, иже Христа на земли дерзновенно исповедав, и многообразныя за Него муки претерпев, неувядаемый приял еси венец на Небеси, идеже вечнаго наслаждаешися блаженства, и со дерзновением Престолу трисолнечнаго Божества предстоиши! К твоему христоподражательному состраданию по Бозе прибегаем вси мы грешнии, и всеусердно молим тя, теплаго заступника и предстателя нашего: не престай призирати на нас, сущих в нуждах и скорбных обстояниях, и твоею молитвенною помощию и цельбоподательною силою избавляй нас присно от лютых зол, всегубительства и всякия иные беды и болезни. Ты бо приял еси, святе, неоскудную благодать исцелений от Спаса нашего Иисуса Христа за твердую твою к Нему веру, при чистом и непорочном житии, запечатленную мученичеством и многопобедною твоею кончиною, в нейже по данней ти благодати и наименован от Христа Пантелеимоном, милости тезоименитым, милующим всех притекающих к тебе в скорбех и болезнех. Сего ради ведуще тя милостиваго во всем помощника и целителя, с верою взываем к тебе: услыши нас и богоприятным ходатайством твоим подавай нам вся благопотребная в житии сем и нужная к вечному спасению. Мученическим же дерзновением твоим умоли милостиваго Бога, да помилует нас грешных и недостойных по велицей милости Своей, да избавит от труса, потопа, огня, меча и всякаго праведнаго гнева и прещения, благовременне подвизая нас к очистительному и умилостивительному во гресех наших покаянию, ради множества щедрот Своих, да подаст всем нам безбедное, тихое и богоугодное житие, православным же на вся враги победу и одоление, и всех нас от враг видимых и невидимых да сохранит благодатию Своею и непобедимым ополчением Ангел Своих, имиже ограждаеми и наставляеми да поживем в веце сем в покаянии, чистоте и в творении богоугодных дел; да сподобимся твоим теплым предстательством христианскую кончину улучити безболезненну, мирну, непостыдну, избавитися от козней воздушных князей тьмы и от вечныя муки, и быти наследниками безконечнаго, всеблаженнаго Царствия. Ей, угодниче Божий! Не престай молитися за ны грешныя, да твоим ходатайством временных и вечных бед избавлени, величаем тебе, заступника нашего и молитвенника, и вечно прославляем общаго Владыку и Господа нашего Иисуса Христа, Емуже подобает всякая слава, честь и поклонение со Безначальным Его Отцем и Пресвятым Духом, ныне и присно и во веки веков. Аминь.


Молитва третья преосвященного Иеремии (Отшельника)


Святый великомучениче и целебниче Пантелеимоне! Моли Бога о нас и не допусти долее оставаться в нас тем болезням, коими болим душею и телом! Исцели те язвы и струпы кои причинены нам страстями нашими. Болим мы леностию и расслаблением — исцели ны. Болим влечением и пристрастием к земным предметам — исцели ны. Болим, о святый Пантелеимоне! Болим забывчивостию: о деле спасения, о наших грехах и немощах, о наших обязанностях — исцели ны. Болим злопомнением, гневливостию, ненавистничеством — исцели, о целебниче Свято-Афонский и всемирный. Болим завистью, гордостью, надменностью, превозношением, при всей скудости и непотребстве — исцели ны. Болим многими и разными припадками плотоугодия: чревоизлишеством, невоздержностию, многоядением, сластолюбием — исцели ны. Болим сонливостью, многословием, празднословием, осудливостью — исцели ны, о святый Пантелеимоне! Болят наши очи греховными воззрениями, болят наши уши слушанием пустословия, злоречия, наветов — исцели ны. Болят руки нерасположением к молитвенному воздеянию и к подаянию милостыни — исцели ны. Болят наши ноги нежеланием поспешно идти в храм Господень и стремлением к хождениям по стогнам и к посещениям домов мирских — исцели ны. Болит, зело болит язык наш, уста наши: пустословием, празднословием, злоречием, отвращаясь от молитвословий и славословий, или произнося их небрежно, рассеянно, без внимания, без понятия — исцели ны, о милостиве! От главы до ног болим мы: болит в нас разум непонятливостию, неразумностию и безумием; болит в нас воля, отвращаясь от святых занятий и стремясь к делам вредным и богопротивным; болит в нас память, забывая наши прегрешения и содержа в себе неутратно согрешения и оскорбления ближних наших; болит в нас воображение, не умея и не желая живо представить нам нашу смерть, вечную муку грешных, блага Царствия Небесного, Божий гнев, крестные страдания Христовы, Его распятие — исцели ны, о святый Пантелеимоне! Все в нас болит. Немощствует и душа наша вся со всеми ее силами и способностями. Немощствует и тело наше все со всеми его членами. Исцели ны, о святый Пантелеимоне, Целебниче безмездный и любвеобильный Врачеватель, слуга Пресвятая Богородицы, и не оставь наше окаянство в толицех недугах и в толицей немощи: да исцелись твоею благодатию, прославлю Пресвятую Троицу, Отца и Сына и Святаго Духа и Пресвятую Богородицу, тебе на служение болящим посылающую, и возблагодарю твою, о святый Пантелеимоне, цельбоносную святыню во веки. Аминь.


Молитва четвертая


О великий угодниче Христов, страстотерпче и врачу многомилостивый, Пантелеимоне! Умилосердися надо мною, грешным рабом, услыши стенание и вопль мой, умилостиви небеснаго, верховнаго Врача душ и телес наших, Христа Бога нашего, да дарует ми исцеление от гнетущаго мя недуга. Приими недостойное моление грешнейшаго паче всех человек. Посети мя благодатным посещением. Не возгнушайся греховных язв моих, помажи елеем милости твоея и исцели мя: да, здрав сый душею и телом, остаток дний моих, благодатию Божиею, возмогу провести в покаянии и угождении Богу и сподоблюся восприяти благий конец живота моего. Ей, угодниче Божий! Умоли Христа Бога, да предстательством твоим дарует ми здравие телу и спасение души моей. Аминь.


Молитва пятая (благодарственная, после исцеления от болезни)


Святый великомучениче, целителю и чудотворче Пантелеимоне, всеизрядный угодниче Божий и молитвенниче присный христиан православных! Достойно наречен еси Пантелеимоном, еже есть всемилостивый, яко, прияв от Бога благодать молитися за ны и болезни целити, ты богатно подаеши всем, к тебе притекающим, различная исцеления и вся к жизни временней и ко спасению потребная: сего ради и мы недостойнии, сподобившеся твоея милости, паки пред святою твоею иконою прибегаем к тебе, и прославляюще тя, яко искренняго угодника Божия, нашего же вернаго молитвенника и исцелителя, усердне благодарим тя и подателя всех благ Господа Бога нашего о великих благодеяниих, от Него тобою нам бывших. Приими убо милостивно малое сие молитвенное благодарение наше, зане не имамы ино что по достоянию воздати тебе, и прочее время живота нашего не лиши нас, немощных и грешных, твоея помощи и молитвеннаго ходатайства у Господа Бога нашего, Емуже подобает всякая слава, благодарение и поклонение, Отцу и Сыну и Святому духу, ныне и присно и во веки веков. Аминь.


Молитва шестая


Святый великомучениче и целителю Пантелеимоне, Бога милостиваго подражателю! Призри благосердием и услыши нас, грешных, пред святою твоей иконою усердне молящихся. Испроси нам у Господа Бога, Ему же со Ангелы предстоиши на небеси, оставление грехов и прегрешений наших. Исцели болезни душевныя же и телесныя рабов Божиих, ныне поминаемых, зде предстоящих и всех христиан православных, к твоему заступлению притекающих. Се бо мы, по грехом нашим люте одержимы есмы многими недуги и не имамы помощи и утешения, к тебе же прибегаем, яко дадеся ти благодать молитися за ны и целити всяк недуг и всяку болезнь. Даруй убо всем нам святыми молитвами твоими здравие и благомощие души и тела, преспеяние веры и благочестия и вся к житию временному и ко спасению потребная. Яко да, сподобившися тобою великих и богатых милостей, прославим тя и подателя всех благ, дивнаго во святых, Бога нашего, Отца, и Сына, и Святаго Духа. Аминь.



Тропарь великомученику и целителю Пантелеимону


Тропарь, глас 3


Страстотерпче святый и целебниче Пантелеимоне, моли Милостивого Бога, да прегрешений оставление подаст душам нашим.


Кондак, глас 5


Подражатель сый Милостиваго, и исцелений благодать от Него прием, страстотерпче и мучениче Христа Бога, молитвами твоими душевныя наша недуги исцели, отгоня присно борца соблазны от вопиющих верно: спаси ны, Господи.


Величание


Величаем тя, страстотерпече святый великомучениче и целебниче Пантелеимоне, и чтим честная страдания твоя, яже за Христа претерпел еси.[/spoiler]

Раб божий Константин

Акафист святой мученице Параскеве.
[spoiler]Кондак 1


Избранной Богом от рода благороднаго, иконийсыкаго града, премудрый и всехвальной невесте Христове, яко избавляемии тобою от искушений и бед, благодарственная пения и хвалебния восписуем ти молитвенницы твои, святая и многострадальная мученице Параскево. Ты же, имея дерзновение ко Господу, от всяких нас бед свободи, да со умилением и радостию зовем ти: Радуйся, Параскево, невесто Христова всехвальная.


Икос 1


Ангелом честную и вселюбезную чистоту твоего сердца, многострадальная Параскево, непорочно сохранши, ангелом собеседица быти сподобилася еси. С нимиже воспевая Трисвятую песнь Богу на небеси, услыши и нас, верою и любовию чтущих тя и вопиющих ти хваления сия на земли: Радуйся, отроковице, Богом Отцем представленная быти сообразной в страдании образу Сына Его; Радуйся, и Сыном Божиим укрепленная на подвиги страдальческия. Радуйся, истинную веру в Животворящую и Единосущную Троицу свято соблюдшая; Радуйся, святое целомудрие и девственную непорочность добре сохраншая. Радуйся, яко радостно уневестилася еси безсмертному Небесному Жениху, Христу; Радуйся, земнаго обручника паче Небеснаго знати не восхотевшая. Радуйся, яко цвет чистоты, в неувядаемой славе цветущая; Радуйся, яко крин, вонями твоих добродетелей нам благоухающая. Радуйся, в Небесном вертограде неизреченною радостию наслаждающаяся; Радуйся, краснейшаго паче сынов человеческих зрением тамо утешающаяся. Радуйся, убелившая ризы твоя в крови Агнчей на земли; Радуйся, в лике девственниц предстоящая Божиему Агнцу на небеси. Радуйся, Параскево, невесто Христова всехвальная.


Кондак 2


Видевше благолепие лица твоего, святая мученице Параскево, людие удивляхуся, взирающе на тя, не уведяще красоты души твоея. Мы же, поминающе светлейшия паче солнца добродетели твоя, поим Господеви, даровавшему тебе благодать Свою: Аллилуиа.


Икос 2


Мудрости вместилище паче ума мирских мудрецев явилася еси, отроковице непорочная, измлада уклонившися от любве к миру и отвергшися всего яже в мире, всею полнотою любве твоея возлюбила еси Небеснаго Жениха Христа, Царя Славы, Емуже, яко верная раба, в житии твоем апостольски послужила еси, живши свято среди неверных и безбоязненно проповедавши им Христа Бога. Таковому твоему разуму дивящеся, сия похвалы тебе восписуем: Радуйся, премудрая Евангельская дево, во свете веры и дел благих ходившая; Радуйся, Христа Господа, Божию силу и Божию премудрость паче всего возлюбившая. Радуйся, паче мудрецев мира сего мудрей мудрейшая; Радуйся, паче старец идолослужительных разумевшая. Радуйся, неверных светом веры просвещающая; Радуйся, чад Церкве Христовы в вере утверждающая. Радуйся, любовию твоею ко Христу ангельская ликостояния возвеселяющая; Радуйся, демонския лукавствия оружием креста Господня отгоняющая. Радуйся, в проповедании веры богоглаголивая уста апостольская; Радуйся, дев христианских украшение. Радуйся, верная ко Христу Богу молитвеннице о нашем спасении; Радуйся, всех скорбящих крепкое заступление и ограждение. Радуйся, Параскево, невесто Христова всехвальная.


Кондак 3


Силою Христовою соблюдаема, всеславная мученице Параскево, о болезнех телесных небрегла еси, подвигом добрым подвизатися хотящи. Мужеским смыслом вооружившися, слабость женскую отвергла еси, упованием же укрепившися, радостно предстала еси на судище, идеже ясно веру в Троицу Божественную проповедала еси, Богу вопиющи: Аллилуиа.


Икос 3


Слышав от тебе, мудрая дщерь, неправедный судия неслыханная словеса о твоем рождении, яко благочестивии родители твои, страсти Христовы почитающе, знаменитаго дне тезоимениту тя нарекоша, Параскевою, в предзнаменование, яко Христовых страстей имаши быти причастницею. Не разуме же сего нечестивый игемон, но вещаше ти безстудная словеса и повеле бити тя суровыми жилами и полумертву тя сущу ввергнути в темницу. Ты же доблественне претерпевши жесточайшия муки, в темнице, аки в чертозе светле ликующи, вопияла еси: "Никогда же отлучуся Тебе, Господи, но посли ми помощь Твою и спаси мя великия ради Твоея милости". Темже, ублажающе тя, вопием ти таковая: Радуйся, незлобивая голубице, от искушений лукаваго врага свободившаяся; Радуйся, словесная агнице, от злаго волка мучителя к доброму пастырю Христу Богу прибегшая. Радуйся, во двор словесных овец, одесную Его стоящих, вшедшая; Радуйся, на брак Агнчий радостно текущая. Радуйся, яко тебе уготовано есть благ вечных сокровище; Радуйся, яко тебе обетовано есть блаженство Царства Небеснаго. Радуйся, премудрая Евангельская дево, светлогорящий светильник имущая; Радуйся, дерзновение велие ко Христу Богу стяжавшая. Радуйся, волею своею благое иго Христово на ся подъявшая; Радуйся, сердце свое от всякий лести душевредныя чисто сохраншая. Радуйся, истинная Христовых страстей причастнице; Радуйся, во страданиях твоих благодатную помощь от Христа Господа получившая. Радуйся, Параскево, невесто Христова всехвальная.


Кондак 4


Бурю тяжких искушений воздвигоша врази противу тебе, многострадальная Параскево; ты же от твоих кровей трудолюбно чашу страданий испила еси, желающи по Христе, Женисе твоем, во след потещи, прехвальная мученице, и яко ластовица доброгласная, песнь воспевала еси Христу Богу: Аллилуиа.


Икос 4


Имея всегда пред очами своими Господа, за исповедание веры палицами немилостивно от мучителей биема, радовалася еси, приснопамятная мученице Параскево, вопиющи: "Ничто же мя разлучит от любве Твоея, Христе", и тако подвизаяся во Славу Божию, угодила еси Господу. Темже, поминающе честная твоя страдания, с умилением зовем ти: Радуйся, агнице вседобляя, пастыреначальнику Христу принесшаяся, яко жертва благоуханная; Радуйся, безсмертному Жениху Христу непорочное мучение твое, яко вено пречестное, представившая. Радуйся, отроковице, чистая, истинное исповедание веры православныя пред неверными явившая. Радуйся, праведная обличительнице, неправду нечестиваго судии яве открывшая. Радуйся, яко тобою посрамися лукавый враг, видящь себе от юной девы побежденна; Радуйся, яко радуются о тебе и силы небесныя, видяще тя немощну и младу сущу, побеждающую лютых мучителей. Радуйся, голубице чистая и непорочная сердцем; Радуйся, смиренная агнице, благоуспешно честней и блаженней страсти Господней уподобльшаяся. Радуйся, яко принеслася еси Зиждителю твоему, яко кадило благовонное; Радуйся, яко зрит на тя пресветлое Солнце правды, тридневно возсиявшее от гроба и укрепившее тя к подвигу страдальческому. Радуйся, яко за преславная твоя страдания сподобилася еси внити в чертог Христа Царя Небеснаго; Радуйся, яко тамо вкупе со святыми наслаждаешися неизреченною радостию. Радуйся, Параскево, невесто Христова всехвальная.


Кондак 5


Благочестною звездою прешла еси в мире, страстотерпице славная Параскево, яко веру во Христа всем проповедающи. Страдания многа и люта мужески претерпевши, мучителя посрамила еси и ко Христу Господу, яко свету незаходимому, радостно востекла еси. Емуже предстоящи с лики праведных, выну вопиеши: Аллилуиа.


Икос 5


Видяще силы небесныя плотию страждущую Параскеву, Его силою крепящуюся, глаголаху: "Се, и левы на земли прославиша Господа!" Человецы же, трепетом одержими, ужасахуся, и удивляющеся, песньми прославляху: "О чудесе! Дева врага победи и молится милостивому Владыке за спасение мира". Сего ради и мы, поминающе исполненное веры мужество твое, преславная мученице, ублажаем тя, глаголюще: Радуйся, доблественная страстотерпице, в защиту веры православныя подвизавшаяся: Радуйся, наветов вражиих мудрая разорительнице. Радуйся, иконийскаго града учительнице; Радуйся, идольския суетныя лести обличительнице. Радуйся, верных смыслы вонями добродетелей твоих благовонствующая; Радуйся, смрад страстный благодатию, свыше ти данною, отгоняющая. Радуйся, еллинския кумиры, яко прах, уничижившая; Радуйся, твоими подвиги, иже к Богу, тьмы начальника низложившая. Радуйся, горняя, паче дольних, вхождения в сердце твоем положити возлюбившая; Радуйся, Христу Господу, Человеколюбцу, всю себе предавшая. Радуйся, подобне первомученице Фекле, мног народ словом Божиим просветившая; Радуйся, неверных к Божественней вере приведшая. Радуйся, Параскево, невесто Христова всехвальная.


Кондак 6


Проповедницу чудес и славы Божия явила еси себе, доблестная мученице Параскево, после преславнаго исцеления в темнице, от Христа Господа тебе дарованнаго. Емуже возсылая благодарственная моления, радостно мы вопием: Аллилуиа.


Икос 6


Возсияла еси, яко светозарная звезда, обагрившися каплями кровными, и Божестенною благодатию отгнала еси безбожия тьму, мученице Параскево, просветивши верныя, чтущия твоя доблественныя подвиги. Темже восхваляюще тя, усердно вопием ти: Радуйся, богомудрая дево, Христовых страстей общнице; Радуйся, в темнице ти сущей, ангельскаго посещения сподобльшаяся. Радуйся, в отраду болезней твоих орудия страстей Христовых созерцавшая; Радуйся, честный крест и терновый венец нетленнаго Жениха твоего, Христа, узревшая. Радуйся, язвы Господа на теле твоем носившая; Радуйся, от всех язв Тем же Господем чрез ангела исцеленная. Радуйся, яко Той же Господь даровал тебе крепость и премудрость, ейже не возмогоша противитися вси противляющиися истине; Радуйся, от кровей твоих светлую себе ризу исткавшая. Радуйся, яко тобою от многих ран грешнии исцеляются; Радуйся, яко тобою от различных болезней с верою тя призывющии здравие приемлют. Радуйся, уз греховных скорая решительнице; Радуйся, о всех христианах пред престолом Божиим верная молитвеннице. Радуйся, Параскево, невесто Христова всехвальная.


Кондак 7


Хотящу безумному мучителю игемону желание свое улучити и паки покушающуся ласкательными словесы тебе, святая мученице Параскево, от истиннаго Бога обратити к поклонению идолом; ты же, яко богомудрая дева. вразумляя его в суетстве идолов, рекла еси ему: "Покажи ми, игемоне, богов, ихже ты мниши исцеливших мя от ран", и по велению мучителя пришедши в храм идольский, помолилася еси единому истинному Богу, от Егоже Святаго имене вси идоли падоша и разсыпашася в прах, во уверение, яко един есть Бог, прославляемый во Святей Троице, Емуже вкупе со святыми ангелами выну вопиеши: Аллилуиа.


Икос 7


Новую показа безчеловечия ярость зверообразный мучитель, егда тебе, святая мученице Параскево, повеле на древе повесити и свещами горящими опаляти твоя девическая ребра. Сие пачеестественное терпение твое благоговейно воспоминающе, похвалами блажим тя сицевыми: Радуйся, многообразныя болезни за Царя Христа Бога претерпевшая; Радуйся, яко пред лицем человеческим аще и муку прияла еси, упование же твое безсмертия исполнено есть. Радуйся, яко повешена была еси на древе Христа ради, на кресте распятаго, да веннем нетления от Него увязешися; Радуйся, яко строгана была еси по ребром, Иисуса ради копием в ребро прободеннаго, да Царствием Его Небесным насладишися. Радуйся, яко огнь любве к Богу в сердце твоем возжгла еси; Радуйся, яко за Того свещами огненными палима была еси. Радуйся, твердейшая адаманта в терпении твоем показавшаяся; Радуйся, в вере во Христа Господа крепчае паче камене, в мужестве непоколебимом пребывшая. Радуйся, яко огнем опаляема, огненною мудростию пламень угасила еси естественный; Радуйся, яко свещу неугасиму душевную соблюдши, вошла еси со Христом Женихом твоим в чертог Небесный. Радуйся яко, чудесными искрами страсти умертвивши, демонския полки страдальчески победила еси; Радуйся, яко страданиями твоими мног народ к познанию истиннаго Бога привела еси. Радуйся, Параскево, невесто Христова всехвальная.


Кондак 8


Странное и страшное святыя мученицы Параскевы страдание видяще, вернии удивляхуся зело: како млада отроковица сущи, в юностнем телеси таковыя мужественно за Христа терпит муки, слезнаго исполнишася умиления; невернии же трепетом одержими и чудесными искрами опаляеми от ангела, бежаху; мы же, прославляюще дивнаго во святых Бога, вопием: Аллилуиа.


Икос 8


Весь Сладчайший Иисус сладость, весь желание тебе бысть, святая мученице Параскево: сладце бо Его ради горькия терпела еси муки, глаголющи к мучителю: "Враже нечестивый игемоне, что неистовствуеши на христианы; ни царства у тебе отъях, ни града твоего разорих, но буими словесы увещати мя помышляеши. Аз плоти моея не щажду за Христа моего, зане Он любит мя: к Нему пойду и Того буду невеста. Той мене спасет о рук враг моих и дарует ми жизнь вечную". Поминающе сицевая твоя словеса и доблественныя подвиги твоего исповедничества, вопием ти: Радуйся, злобы неверных не устрашившаяся; Радуйся, твари паче Создавшаго не послужившая. Радуйся, во еже сопротивлятися врагом Божиим, в духовное всеоружие благодати Божией облекшаяся; Радуйся, идолом немым и глухим в капище идольском не поклонившаяся. Радуйся, именем всесильнаго Господа и твоею к Нему молитвою вся идолы тамо сокрушившая; Радуйся, демонов коварствия божественною силою упразднившая. Радуйся, томления мучителей крестом Господним, яко державным оружием, мужески победившая; Радуйся, огненное опаление и жжение девственнаго телесе твоего в воню мира Христу Богу принесшая. Радуйся, веру, надежду и любовь к Богу сохраншая; Радуйся, победы венец от руки Христа жизнодавца приемшая. Радуйся, реко, исполненная благодати Божия водами; Радуйся, источниче кипящий чудес излиянии. Ридуйся, Параскево, невесто Христова всехвальная.


Кондак 9


Всеми богокрасными лепотами добродетелей украсивши себе, прехвальная мученице Параскево, явилася еси тверда и непоколебима во исповедании веры Христовы. Сего ради ангельское естество велиею возрадовася радостию, узревши мужественную крепость твою и твердое твое упование. И мы слышавше, како посрамися лукавый враг, от девы побеждаем, и како сам Христос Бог достойно венчает тя мученицу, купно с тобою радостно вопием прославляющему тя Господу: Аллилуиа.


Икос 9


Витийствующий язык не возможет возхвалити дела твоя и великия страдальческия твоя подвиги по достоянию, славная мученице Параскево: кто бо повесть страдания твоя и добродетели; на судищи бо исповедавши истиннаго Бога, от безчеловечных мучителей претерпела еси лютая, болезненная страдания; и в сих жестоких болезнех бывши палицами биема, железными ноготьми строгаема и огнем палима, ничтоже ино вешала еси к Создателю твоему, токмо сие: "Спаси мя, Господи, недостойную рабу, не разлучи мене, Христе, от Твоего желания!" Смиренно поминающе сицевая твоя страдания, умиленную песнь приносим ти, глаголюще: Радуйся, кровию страдания твоего Христу Богу уневестившаяся; Радуйся, страстем Христовым подражавшая. Радуйся, любве ради Господни жестокия мучения претерпевшая; Радуйся, от Небеснаго Царя благолепный венец восприявшая. Радуйся, яко всем верным воспоминание твое пресладко; Радуйся, яко всей Церкви Христовой имя твое пречестно. Радуйся, досточудное ангелом и человеком зрелище бывшая; Радуйся, и самых мучителей непобедимым терпением твоим удивившая. Радуйся, яко Сам Господь свыше призре на твоя страдания; Радуйся, яко Сам Той Подвигоположник похвали твоя подвиги. Радуйся, девам доброто и похваление; Радуйя, мучеником красото и верным утешение. Радуйся, Параскево, невесто Христова всехвальная.


Кондак 10


Спасти хотя душу твою, о теле твоем всячески небрегла еси, святая мученице Параскево; егда бо на тя и мечное на смерть осуждение изыде от беззаконнаго мучителя, ты под меч острый, аки под венец красный, радостно потекла еси; и во главу усекновена бывши, душею твоею воспарила еси в чертог Жениха твоего безсмертнаго, Христа Бога, Емуже выну на небесех ныне воспеваеши: Аллилуиа.


Икос 10


Стена была еси крепка и непоколебима во исповедании веры в триединаго Бога: сего ради многоболезненная страдания от мучителя претерпела еси, и добре скончавши течение твое, венец от Христа Бога прияла еси, и ангельских ликостояний на небеси сподобилася еси. Темже поминающе твоя подвиги, ублажаем тя, многострадальная: Радуйся, течение мученическаго пути добре скончавшая; Радуйся, веру безсмертному Жениху Христу до смерти сохраншая. Радуйся, в житии твоем богоугодными делы Господеви послужившая; Радуйся, за любовь ко Христу Богу с нею мирскую суету отвергшая. Радуйся, силою свыше на брань противу сил преисподних препоясанная; Радуйся, победоносною славою в вышних от Христа победителя одеянная. Радуйся, оружием благоволения Божия венчанная на земли; Радуйся, цветом неувядаемым украшенная на небеси. Радуйся, христианом крепкое прибежище; Радуйся, верным твердое заступление. Радуйся, безпомощных защитительнице: Радуйся, сирых покровительнице. Радуйся, Параскево, невесто Христова всехвальная.


Кондак 11


Пение наше всякое побеждается, и многое множество хвалебных песней, восписуемых ти, несть довольно по достоянию восхвали ти тя, прехвальная мученице Параскево: обаче молитвами твоими получающе от Христа Бога неисчетная благодеяния, благодарни суще, поем о тебе Ему: Аллилуиа.


Икос 11


Возсиявши нам, яко светило светозарное, мрак демонский от человек твоими мольбами отгоняеши, святая мученице Параскево, приемши 6о благодать целити недуги, всем верным, притекающим к тебе с молитвою, подаеши исцеление: кровоточивии бо и про-каженнии прикосновением к раце мощей твоих очищаются, глусии слышат, разслабленнии здрави бывают призыванием святаго твоего имене. Мы же, поминающе скорое заступление твое, вопием ти: Радуйся, благовонная смирно, Церковь Христову благоухающая; Радуйся, благонадежная молитвеннице, фимиам молитвы о нас к Богу приносящая. Радуйся, мирополнице исцелений неоскудная; Радуйся, сокровище Божиих даров неиждиваемое. Радуйся, чаше, от обилия дому Божия черплющая радость; Радуйся, сосуде, от исполнения Христова приемлющий всех благ небесных сладость. Радуйся, благодатную росу исцелений всем верным источающая; Радуйся, скорбныя сердца недужных дарованием исцелений ободряющая. Радуйся, яко Христос Бог за доблественная твоя страдания славу и велелепие на тя возложил есть; Радуйся, яко тебе Царь царствующих и Господь господствующих блаженство Царствия Своего даровал есть. Радуйся, Царствия Христова сонаследнице; Радуйся, славы Божией сопричастнице. Радуйся, Параскево, невесто Христова всехвальная.


Кондак 12


Благодать от Бога дана ти есть подавати исцеления всем требующим, яко от источника пребогатаго, хранити же и соблюдати от различных болезней, бед и скорбей всякаго человека, верою, любовию и благоговением честная твоя страдания воспоминающаго и почитающаго. Молитвеннаго твоего о нас предстательства и благодатных дарований не лиши и нас, многострадальная Христова страстотерпице; да и мы, здрави суще телом и духом, в нынешней и будущей жизни о тебе поем Богу: Аллилуиа.


Икос 12


Поем твоя крепкия подвиги, почитаем страдания, хвалим долготерпение, ублажаем святую твою кончину, славим твое в немощнем теле непобедимое мужество, имже на земли и на небеси прославилася еси, святая и добропобедная мученице Параскево; и в честь твоих победоносных подвигов и страданий похвальная восписуем ти сия: Радуйся, от ангельских чинов в сожительство их любезно приятая; Радуйся, от девственных ликов в чертог небесный радостно введенная. Радуйся, от мученических полков под венец славы провождаемая во гласе радования; Радуйся, от небесных жителей приемлющая о Господе целование. Радуйся, яко мзда твоя многа есть на небесех; Радуйся, яко радость твоя вечна есть во светлости святых. Радуйся, в небесном чертозе божественнаго Жениха твоего со ангелы Его веселящаяся; Радуйся, лицезрением Всеблагаго Господа тамо вкупе со святыми наслаждающаяся. Радуйся, душевных и телесных недугов наших целительнице; Радуйся, душеспасительных благ и небесных даров подательнице. Радуйся, яко тобою от нечаянныя смерти сохранитися уповаем; Радуйся, яко твоим заступлением вечную жизнь от Христа Бога улучити благонадежно чаем. Радуйся, Параскево, невесто Христова всехвальная.


Кондак 13


О святая, премудрая и всехвальная мученице, невесто Христова Параскево! От благоговейных сердец приносимую ти, аще и недостойную, хвалебную песнь сию приими от нас, яко усердную жертву сердец, любящих тя и чествующих святую память твою. Охраняй нас молитвами твоими святыми, и вся люди, притекающие к честней иконе твоей и с любовию лобызающия ю, избавляй от всякаго злаго обстояния и скорби; да тихое и безмолвное житие, поживше в нынешнем веце, блаженство вечное наследим и купно с тобою и всеми святыми выну сподобимся воспевати Богу: Аллилуиа.


(Этот кондак читается трижды, затем икос 1 и кондак 1)



Молитвы святой мученице Параскеве Пятнице


Молитва первая


О святая и преблаженная мученице Христова Параскево, красото девическая, мучеников похвало, чистоты образе, великодушных зерцало, премудрых удивление, веры христианския хранительнице, идольския льсти обличительнице, Евангелия Божественнаго поборнице, заповедей Господних ревнительнице, сподобльшаяся приити ко пристанищу вечнаго покоя и в чертозе Жениха твоего Христа Бога светло веселящаяся, сугубым венцем девства и мученичества украшенная! Молим тя, святая мученице, буди о нас печальница ко Христу Богу, Его же преблаженнейшим зрением присно веселитися; моли Всемилостиваго, иже словом очи слепым отверзе, да избавит нас от болезни очес наших, телесных вкупе и душевных; разжени твоими святыми молитвами темный мрак прибывший от грехов наших, испроси у Отца Света свет благодати душевным и телесным очесем нашим; просвети нас, омраченных грехми, светом Божия благодати, да твоих ради святых молитв дастся безочесным сладкое зрение. О великая угодница Божия! О мужественнейшая дево! О крепкая мученице святая Параскево! Святыми твоими молитвами буди нам грешным помощница, ходатайствуй и молися о окаянных и зело нерадивых грешницех, ускори на помощь нам, ибо зело немощны есмы. Моли Господа, чистая девице, моли Милосердаго, святая мученице, моли Жениха твоего, непорочная Христова невесто, да твоими молитвами пособствоваши, мрака же греховнаго избывше, во свете истинныя веры и деяний Божественных внидем во свет вечный дне невечерняго, во град веселия приснаго, в немже ты ныне светло блистаеши славою и веселием безконечным, славословящи и воспевающи со всеми Небесными Силами Трисвятительное Единое Божество, Отца и Сына и Святаго Духа, ныне и присно и во веки веков. Аминь.


Молитва вторая


Святая невесто Христова, многострадальная мученице Параскево! Вемы, яко от юности твоея ты всею душею твоею и всем сердцем твоим возлюбила еси Царя славы, Христа Спасителя и Ему единому уневестилася еси, раздавши имения твоя неимущим и бедным. Ты силою благочестия твоего, твоим целомудрием и праведностию, яко лучами солнечными, просияла еси, живши свято среди неверных и безбоязненно проповедавши им Христа Бога. Ты, от дней юности твоея, наученная твоими родителями, всегда благоговейно чествовала дни искупительных страстей Господа нашего Иисуса Христа, Егоже ради и сама добровольно пострадала еси. Ты, десницею ангела Божия от неисцельных ран дивно исцеленная и восприявшая неизреченную светлость, изумила еси неверных мучителей. Ты, именем Господа нашего Иисуса Христа и силою молитвы твоею в капище языческом всех идолов долу повергши, в прах сокрушила еси я. Ты, опаляемая свещами, единою молитвою твоею ко всесильному Господу угасила еси огнь естественный, и тем же пламенем, чудесне возжженным чрез ангела Божия, попаливши неистовых беззаконников, мног народ привела еси к познанию истиннаго Бога. Ты, во славу Господа приявши мечное главы твоея усечение от мучителей, доблественно скончала еси страдальческий твой подвиг, возшедши душею твоею на небеса, в чертог вожделеннаго твоего Жениха Христа Царя Славы, радостно сретшаго тя сим небесным гласом: "Радуйтеся, праведнии, яко мученица Параскева увенчася!" Темже и мы днесь приветствуем тя, многострадальная, и, взирающе на святую твою икону, с умилением вопием ти: всечестная Параскево! Вемы, яко велие имаши дерзновение ко Господу: умоли убо Его Человеколюбца и о нас с предстоящих и молящихся ти, да подаст Он и нам, якоже тебе, терпение и благодушие в бедах и скорбных обстояниях; да дарует Он, ходатайством твоим и заступлением, радостное, благоденственное и мирное житие, здравие же и спасение, и во всем благое поспешание возлюбленному нашему отечеству, да ниспослет святое Свое благословение и мир, и всем православным христианам да подаст твоими святыми молитвами утверждение в вере, благочестии и святости, преспеяние же в христианской любви и всякой добродетели: да очистит нас грешных от всякий скверны и порока, да оградит нас святыми Своими ангелами, да заступит, сохранит и помилует всех святою Своею благодатию и соделает наследниками и причастниками Небеснаго Своего Царствия. И тако улучивше спасения твоими святыми молитвами, предстательством и заступлением, всеславная невесто Христова Параскево, прославим все пречистое и великолепое имя дивнаго во святых Своих истиннаго Бога, Отца и Сына и Святаго Духа, всегда, ныне и присно и во веки веков. Аминь.



Тропарь мученице Параскеве Пятнице


Тропарь, глас 4


Премудрая и всехвальная Христова мученица Параскева, мужескую крепость приемши, женскую же немощь отвергши, диавола победи, и мучителя посрами, вопиющи и глаголющи: приидите, тело мое мечем ссецыте, и огнем сожгите, аз бо радующися иду ко Христу, Жениху моему. Тоя молитвами, Христе Боже, спаси души наша.


Кондак, глас 3


Всесвятое и непорочное мучение принесши, яко вено пречестное Безсмертному Жениху Христу, ангельское ликостояние возвеселила еси, и победила еси демонския козни: сего ради тя честно верою чтим, мученице Параскево, многострадальная.


Величание


Величаем тя, страстотерпице Христова Параскево, и чтим честное страдание твое, еже за Христа претерпела еси.[/spoiler]

Раб божий Константин

Преподобномученица Параскева Римская.
[spoiler]Кондак 1

Взбранной невесте Христовой, святой преподобномученице Параскеве, с верой и любовию похвальное пение яко благой целительнице приносим: ты же, страстотерпице Христова, милостивно нам преклонися, подвиги и страдания твоя воспевающим, и от всяких бед свобода ны, со умилением зовущий ти: Радуйся, преподобномученице Христова, Параскево всеславная.

Икос 1

Ангел Господень послан бысть возвестити неплодным родителем, твоим, преподобномученице, яко Бог молитву их услыша: родити бо имут дщерь благословенную Царствия Небесного наследницу. Таковому, предивному предвозвещению о рождении твоем дивящеся, яко избранницу Божию, ублажаем тя похвалами сими: Радуйся, ангельским проречением провозвещенная, Радуйся, неплодие родителей своих рождением твоим разрешившая. Радуйся, многими молитвами у Бога испрошенная, Радуйся, всех в молитве не унывати научившая. Радуйся, благаго корене святое прозябление, Радуйся, Христолюбивых отца и матере дщерь боголюбезная. Радуйся, от чрева матерня на служение Христу предизбранная. Радуйся, Жениху нетленному девство свое обручившая, Радуйся, божественнаго к людям милосердия явление, Радуйся, молитвы кадило непрестанное. Радуйся, ленивых обличение, Радуйся, сумняшнхся благое утверждение. Радуйся, преподобномученице Христова. Параскево, всеславная.

Кондак 2

Видевшие мира суету и непостоянство, Параскево богомудрая, от мира удалитися вожделела еси, да возможеши непрестанно благоугождати Христу Богу, и невозбранно иго Его благое понести, в молитвах же присно прилежати, зовуща Ему: Аллилуиа.

Икос 2

Разум небесный стяжавши преподобномученица Параскева, по кончине родителей твоих, вся имения нищым раздала есть, в путь исповедания Христова усердно потекши, того ради восхваляем тя сице: Радуйся, красотою душевною просиявшая, Радуйся, о телесной доброте небрегшая. Радуйся, благодатию Святаго Духа душу твою исполнившая, Радуйся, исповедания имене Его не убоявшаяся. Радуйся, исповеднице Христова непоколебимая, Радуйся, страстотерпице Иисусова многострадальная. Радуйся, благовестнице Евангелия богомудрая, Радуйся, добродетелей многих вместилище. Радуйся, преподобномученице Христова, Параскево, всеславная.

Кондак 3

Силою Божиею свыше укрепляема, святая преподобномученице Параскево, немощь естества женскаго отложила еси, и, в броню исповедания Христова облекшися, со идолослужители крепко ратовала еси, иже аще и лютыми мученьми от любве Христа Бога тя отвратити тщахуся, но терпением твоим побеждени явишася, Ангелом и тебе воспевающим: Аллилуиа.

Икос 3

Имела еси душу мужеством о Христе преисполненную, Параскево богомудрая, мучителей нечестивых крепко посрамила еси, темжо мучительству их посмевающеся, аки в куждем телеси бывши, Христа ради вся претерпела еси, нас же научила еси воспевати ти сицевая: Радуйся, громогласная Божия исповеднице, Радуйся, Сладчайшего Иисуса невесто прекрасная. Радуйся, девство непорочное Ему в дар принесшая, Радуйся, кровь твою за Него пролиявшая. Радуйся, пред судии и мучители имя Его не боязненно исповедавшая, Радуйся, свидетелей мучений твоих к вере приведшая. Радуйся, в молитвах наших теплое прибежище, Радуйся, нашего на Господа упования утверждение. Радуйся, любителем временных наслаждений обличение, Радуйся, горних ищущих ободрение. Радуйся, в борениих сущим помощнице, Радуйся, обидимым благое утешение. Радуйся, преподобномученице Христова, Параскево, всеславная.

Кондак 4

Бурею неверия одержимый царь Антонин удивися, егда тя виде, в котле кипящем невредиму, егда же руце свои от котла исполнивши на лице мучителя повергла еси, той опален вопияше, помилуй мя, рабо истиннаго Бога, и даждь ми свет очей моих, да уверую в Бога, Его же ты проповедуеши и пою Ему купно с тобою. Аллилуиа.

Икос 4

Слышавше многая и лютая страдания твоя. Параскево преславная, и мы грешнии терпению твоему умиленно дивимся, како и железо разженное на главе твоей носила еси. и биения лютая многажды претерпела еси, темже тя ублажающе зовем: Радуйся, язвы Господа Иисуса на теле твоем носившая, Радуйся, Того единаго возлюбившая. Радуйся, о укрепляющем тя господе вся возмогшая, Радуйся, чудеса многия во уверение идолослужителей сотворившая. Радуйся, терпением мучителей твоих препобедившая, Радуйся, неверного царя покаравшая. Радуйся, исцеление тому милостиво подавшая, Радуйся, среди народа римскаго, имя Христово вельми прославившая. Радуйся, всем языком образ долготерпения явившая, Радуйся, всем родом исполнение веры показавшая. Радуйся, восхваляющим подвиги твоя благодатное просвещение дарующая, Радуйся, о грехах их Господа умоляющая. Радуйся, преподобномученице Христова, Параскево, всеславная.

Кондак 5

Боготечной звезде уподобилася еси, святая преподобномученице Параскево, грады и страны многия обходящи и имя Христово проповедающи, за него же многажды даже по крове пострадала еси, тем же днесь томужде Господу предстоиши, непрестанно воспевающи ангельскую песнь: Аллилуиа.

Икос 5

Видевше людие преславнеє чудо твое, преподобномученице, како дракона великаго имени Божия призванием поразила еси, во Христа абие увероваша, глаголюще ти: Радуйся, Господа и Христа твоего страданьми и чудесы прославившая, Радуйся, спасения многих душ человеческих виновнице. Радуйся, добропобедная страстотерпице Христова, Радуйся, многочудесная свидетельнице Иисусова. Радуйся, насадительнице веры истинный, Радуйся, милостивая целительнице недугов человеческих. Радуйся, и грешныя люди любовию твоею не оставившая, Радуйся, о просвещении душ наших возревновавшая. Радуйся, труды многия Евангелия ради подъявшая, Радуйся, сегоради велия в царствии небеснем пронареченная. Радуйся, лика девственниц украшение, Радуйся, полка мученическаго похвало преславная, Радуйся, преподобномученице Христова, Параскево, всеславная.

Кондак 6

Проповедником, Христовым, богоносным Апостолом верно продолжала еси, Параскево многострадальная, и в проповедании Евангелия чрез все житие твое подвизалася еси, человеки во спасение уловляющи. Тем же чудес дарованием от Христа Бога обогатилася еси, о них же и невернии в веру приидоша и воспеша Богу: Аллилуиа.

Икос 6

Возсияла еси, яко звезда на тверди Церкви Христовой, Параскево добропобедная, и всем нам образом жития твоего светиши ясно, темже верою и любовию память твою святую почитающе, вопием ти: Радуйся, подвижнице Божия постом и молитвою воспитанная, Радуйся, голубице непорочная, кротости и незлобия преисполненная. Радуйся, за свои мучители молитвы Господеви приносившая, Радуйся. Христу Спаситетю нашему тем уподобившаяся. Радуйся, злобу врагов добром препобедившая, Радуйся, Стефана первомученнка венцу поревновавшая. Радуйся, евангельских заповедей верная исполнительнице, Радуйся, неверия грозная обличительнице. Радуйся, кающихся прошения от Бога скорая подательнице, Радуйся, верных ко спасению добрая наставнице. Радуйся, сердца наша умиления исполняюща,. Радуйся, помыслы наша к Богу возносящая. Радуйся, преподобномученице Христова, Параскево, всеславная.

Кондак 7

Хотяша душу свою за Христа положити и его ради многая мучения претерпевши, от нечестиваго мучителя Тарасия во главу усечена была еси, но от Христа венец нетленный на главу свою прияла еси, а душею твоею в горния обители райския востекла еси, идеже со Ангелы и всеми святыми сладце поеши Богу: Аллилуиа.

Икос 7

Новый живот вечный прияла еси, богохвальная, егда, мечною кончиною от плоти разрешившися, на брак Небеснаго Жениха возшла еси. Его же молящи не престай за ны грешныя любовию страдания твоя чествующия и глаголющия присно: Радуйся, мученическое течение твое мечною кончиною увенчавшая, Радуйся, тем главу невидимаго змия стершая. Радуйся, во гласе пения ангельского на небо душею твоею воспарившая, Радуйся, мученический лик на небесех возвеселившая. Радуйся, постнический полк возрадовавшая, Радуйся, девственнаго сонма веселящее украшение. Радуйся, постническое житие, мученическую же кончину в себе сочетавшая, Радуйся, и нас о добродетели ревновати подвигающая. Радуйся, свято и непорочно на земле пожившая, Радуйся, идольскую лесть обличившая. Радуйся, демоны посрамившая, Радуйся, мучителю помысл покаяния вложившая. Радуйся, преподобномученице Христова, Параскево, всеславная.

Кондак 8

Странно есть неверным видети, како от единаго молитвеннаго призывания имени твоего святаго, Параскево многострадальная, недужным исцеления подаются и духи нечистий от человек отбегают, нам грешным тебе в помощь призывающим и поющим Богу: Аллилуиа.

Икос 8

Вся Церковь Христова честная страдания твоя, святая и всехвальная преподобномученице, прославляет, исцелений же благодать от тебе приемлет и радостно взывает ти глаголющи: Радуйся, в житии и по смерти многими чудесы прославленная, Радуйся, дары целебныя независтно подающая. Радуйся, любящым и чтущым тя любовию сугубою воздающая, Радуйся, во благих прошения наша скоро исполняющая. Радуйся, в недузех страждущия благодатно посещающая, Радуйся, неисчельныя болезни скоро исцеляющая. Радуйся, болезни терпети хотящим помощь дарствующая, Радуйся, душевныя страсти поборати помогающая. Радуйся, яко на подвиг долготерпения твоего зряще, малодушия нашего устыжаемся, Радуйся, яко мужество твое воспоминающе, воинствовати на плоть подвизаемся. Радуйся, в животе твоем многия люди просветившая, Радуйся, по преставлении твоем множайшия роды во благочестии утвердившая. Радуйся, преподобномученице Христова, Параскево, всеславная.

Кондак 9

Вси Ангели небесний и святых лицы радостно тя, преподобномученице, сретоша, егда во врата Царствия Небеснаго возшла еси, воежде мзду твоим подвигом и страданиям от Господа прияти, убо и нам недостойным наследие вечное со святыми, испроси, молящи да сподобит нас Господь купно с тобою пети Ему во Царствии Небеснем: Аллилуиа.

Икос 9

Витийство человеческое не довлеет воеже по достоянию тя, Параскево всеблаженная прославити, обаче любовию твоею побеждаеми приносим ти хваления сицевая: Радуйся, со Христом вечно царствуюшая и о нас Его умоляющая. Радуйся, дары Его божественная молитвами твоими щедро нам подающая, Радуйся, кающимся снизхождение. Радуйся, подвизающимся благое наставление, Радуйся, от горних высот к земнородным милостиво приникающая, Радуйся, искушения демонская молитвою твоею вземляющая. Радуйся, ветвь победную в шуйцу свою приявшая, Радуйся, ум наш горе возносяща. Радуйся, и всем во спасении труждающымся помощь невидимо подающая. Радуйся, Ангелом прореченная, Радуйся, и собеседнице Ангелов явившаяся. Радуйся, преподобномученице Христова, Параскево, всеславная.

Кондак 10

Спастися молящымся ти пособляющи, святая преподобномученице, с верою приходящым в храм твой святый дары благодатныя присни подавши и всякое во благих прошение наше скоро исполнявши, яко дерзновение велие ко Христу Богу стяжавши. Ему же радостно поеши победную песнь: Аллилуиа.

Икос 10

Стеною молитв твоих, преподобномученице, от всякого искушения диавольскаго нас огради, да не порадуется враг падениям нашим, но тобою крепко да посрамится в нас хвалебно зовущих ти: Радуйся, по Бозе и Богородице крепкое наше упование, Радуйся, непостыдное в бедах предстательство. Радуйся, в сонних видениих верныя посещающая, Радуйся, и неверным дары целебныя милостиво подавающая. Радуйся, звездо Божия благодати, ею же мрак в нас прогоняется, Радуйся, чудес пучино, всех нас неоскудно напояющая. Радуйся, воздержанием древней Иудифи уподобившаяся, Радуйся, мужеством сию превозшедшая. Радуйся, яко Христовы мироносицы Христа возлюбившая, Радуйся, Тому верная в мучениях своих пребывшая. Радуйся, по глаголу Его прославленная, Радуйся, Того выну лицем к лицу созерцающая. Радуйся, преподобномученице Христова, Параскево, всеславная.

Кондак 11

Пение наше хвалебное не довольно есть к прославлению многих и предивных чудотворений твоих, святая преподобномученице, обаче яко благая и милостивая Христова подражательница благосердием твоим на нас грешных воззри, и святыми и благомощными твоими молитвами ко Господу мир душевный нам испроси, воеже взывати Богу: Аллилуиа.

Икос 11

Светлыми лучами чудес немерцаемо сияеши, Параскево богохвальная, вся же благочестно жити хотящия благодатно к незаходимому солнцу правды Христу Богу путеводиши, зовущих ти сице: Радуйся, целомудрия цвете драгий и прекрасный, Радуйся, мировместилище ароматы райскими преисполненное. Радуйся, от исполнения твоего и нам дары благодатныя неискудно источающая, Радуйся, доблестная исповеднице Христова благодатию облеченная. Радуйся, во смирении твоем на небеси и на земли дивно возвеличенная, Радуйся, нищетою временною богатство нетленное стяжавшая, Радуйся, о Царствии Божием плач духовный выну явльшая, Радуйся, в мучениях телеси своего плачу не предавшаяся. Радуйся, кротостию твоего языка Христу унаследовавшаяся, Радуйся, правды Его алкавшая. Радуйся, о пище тленней Его ради забывшая, Радуйся, милость Божию и на неверных молитвою твоею призывавшая. Радуйся, преподобномученице Христова, Параскево, всеславная.

Кондак 12

Благодать Господня молитвами твоими источнику воды от лет древних зде даровася. Темже и Храму Божию со обители дев создатися тамо во имя твое благоволила еси Сию убо выну присещай и не забуди духовных чад твоих в преподобии тебе подражати хотящим и поющим Богу: Аллилуиа.

Икос 12

Поюще твоя подвиги и страдания, и многая чудеса твоя, святая и всехвальная Параскево, молимся ти прилежно, молися о нас к прославлыцему тя Владыце о еще избавитися нам от погибели вечныя, часть же спасаемых улучити благодарно зовущих: Радуйся, венценосице от руки Христовы увенчанная, Радуйся, чистотою сердца Боговидения сподобившаяся. Радуйся, многия люди Христу тобою уверовавшия Богу примирившая, Радуйся, ненависть от человек Христа ради приявшая. Радуйся, страшныя муки Его ради подъявшая, Радуйся, с светлою свещею на брак Жениха Небеснаго пришедшая. Радуйся, свеще Божия ревности, елеем милости исполненная, Радуйся, душы наша мастию Духа Святаго в тебе живущаго умащающая. Радуйся, дщерь благословенная Отца Небеснаго. Радуйся, яко мзда твоя многа на Небеси. Радуйся, яко молитвы твоя действенны на земли, Радуйся, яко силы твоея трепещут преисподнии. Радуйся, преподобномученице Христова, Параскево, всехвальная.

Кондак 13

О, святая и многострадальная преподобномученице Параскево! Приими милостивно моление сие наше, и умоли Святую и присно покланяемую Троицу избавити нас от мучений вечных, и сподобити вкупе с тобою Царствие Небесное улучити, и вечно Создателю нашему пети: Аллилуиа, Аллилуиа, Аллилуиа.



(Этот кондак читается трижды, затем икос 1 и кондак 1)



Молитва святой преподобномученице Параскеве

О, святая и многострадальная преподобномученице Параскево!

К тебе, аки теплей за ны к Богу молитвеннице припадаем и прилежно молимся, умоли Господа и Владыку нашего пробавити милость Свою к нам недостойным рабам Его, даровати же нам душевное и телесное здравие, земли плодоносне, воздуха благорастворение, во благочестии христианстем преуспеяние, к житию временному нужная довольная и вся ко спасению потребная; да мирно и благочестно поживше, сподобимся благую кончину христианскую улучити и Царствие Небесное наследити.

Ей, предстательнице наша благая! Не посрами упования нашего, еже по Бозе и Пресвятей Богородице крепкое на Тя возлагаем, но буди нам ходатаица во спасение, да сподобимся вкупе с тобою и всеми святыми в радости блаженства вечнаго, славити во твоем заступлений великую милость Бога нашего, Отца и Сына и Святаго Духа, ныне и присно и во веки веков. Аминь.



Тропарь, глас 1

Тщание имущи сообразно имени твоему, тезоименитая, равноименную тебе веру в сожительство избрала еси, Параскево победоносная, темже изливаеши исцеления и молишися о душах наших.



Кондак, глас 4

Храм твой, всечестная, яко врачебницу душевную обретше, в нем вси вернии велегласно почитаем тя, преподобномученице Параскево славная.[/spoiler]

Раб божий Константин

АКАТИСТ
преподобней матери нашей Параскеве.
[spoiler]Кондак 1.

Избранная от Господа возсияти на тверди Церкве, преподобная мати Параскево, житием твоим ангелоподобным мiру всему просияла еси яко солнце пресветлое, и духовне и телесне недугующым целительница явилася еси. Сего ради верою зовем ти: радуйся, преподобная мати Параскево, скорбящым утешение!

Икос 1.

Ангельскую показавши ревность, удивления достойную, житие свое на земли добродетельми украсила еси и на небеси со Ангелы жити удостоила ся еси. Темже с ними усердно моли Человеколюбца Бога, да избавит от бед и обстояний вся, вопиющыя ти сице:
      Радуйся, яко вольне прияла еси благое иго Христовых заповедей.
      Радуйся, яко житием твоим суету мiра сего обличила еси.
      Радуйся, яко сердце свое от всех страстей соблюла еси.
      Радуйся, яко творением заповедей любовь Божию снискала еси.
      Радуйся, яко учиши нас креста ношением Христу следовати.
      Радуйся, яко изнемогающым нам всегда помогаеши.
      Радуйся, преподобная мати Параскево, скорбящым утешение!

Кондак 2.

Видящи земных вещей скорое изменение, мiрский мятеж оставила еси и в пустыню вселилася еси, идеже многим пощением и молитвами, аки благодатною пищею, душу свою питала еси, благочестно зовущи: Аллилуиа!

Икос 2.

Разум обретши, правую веру и любовь совершенную, богомудрая мати, воздержанием и смирением украсилася еси, сего ради храм Божий была еси и источник чудес обильный; темже благоговением поем тебе сице:
      Радуйся, образе совершенный евангельскаго отречения себе.
      Радуйся, яко долговременною нищетою богатство вечное и славу снискала еси.
      Радуйся, яко обетом нищеты высоту духовную показала еси.
      Радуйся, светлая высото смирения.
      Радуйся, ибо подвигы твоими душетленную силу погубила еси.
      Радуйся, ибо высотою подвига твоего всех удивила еси.
      Радуйся, преподобная мати Параскево, скорбящым утешение!

Кондак 3.

Силою Духа Святаго укрепляема, мужески подвиг поста носила еси в терпении, преподобная, и слезами твоими гордаго врага победила еси, поющи благодарственне Богу: Аллилуиа!

Икос 3.

Имущи всегда во уме образ грядущаго Суда Христова, и проливающи теплыя слезы, преблаженная, светильник души своея украсила еси, уготовавши его к сретению праведнейшаго Судию. И нас удостой деснаго стояния пред Ним, верою поющих ти сице:
      Радуйся, чертоже одушевленный Пресвятаго Духа.
      Радуйся, ибо вся дни живота твоего непрестанным призыванием имене Божия освящалася еси.
      Радуйся, ибо в молитвеннем стоянии пред Богом уснула еси.
      Радуйся, силою молитвы диавольская искушения победившая.
      Радуйся, памятию смертною от греха себе сохраньшая.
      Радуйся, яко Богу совершенне угодила еси.
      Радуйся, преподобная мати Параскево, скорбящым утешение!

Кондак 4.

Бури живота нынешняго избежалаеси, преподобная, волею нищету Христа ради приимши, великими добродетельми обогатилася еси и многих образом жития твоего к ревности подвигнула еси, научающи их Христу Богу взывати: Аллилуиа!

Икос 4.

Услыша Господь молитвы и воздыхания твоя, в тайне творимая, блаженная мати, и яве на небеси пред Ангелы прослави труды твоя; ныне же в Божиим раи пребывающи, помяни и нас, зовущих ти сице:
      Радуйся, Ангелов собеседнице достохвальная.
      Радуйся, велие удобрение святых.
      Радуйся, совершенная и высокая хвало преподобных.
      Радуйся, украшение праведных и известнейшее правило постником.
      Радуйся, славо и богосветлый венче девственников и монашествующих.
      Радуйся, стено и твердое защищение христиан.
      Радуйся, преподобная мати Параскево, скорбящым утешение!

Кондак 5.

В мире живот свой поживши, блаженная мати Параскево, нестяжанием благих земных украсилася еси и воздержанием просветилася еси, былием питавшися и умилением взывавши Владыце твоему: Аллилуиа!

Икос 5.

Видя чистое житие твое и безмерное смирение твое, Дух Пресвятый показа тя, преблаженная, славну в чудесех. Сего ради, отшедшей ти от жития сего в горнее блаженство, со множеством преподобных предстательствуеши всем, умилением зовущым ти сице:
      Радуйся, пустыни благоуханный цвете.
      Радуйся, пустынное воспитание изряднейшее.
      Радуйся, серпом молитв твоих терние страстей посекшая.
      Радуйся, слез пролиянием огнь греха угасившая.
      Радуйся, всякое вражеское возстание отгнавшая.
      Радуйся, образом добродетельнаго жития твоего ленивая на покаяние воздвизающая.
      Радуйся, преподобная мати Параскево, скорбящым утешение!

Кондак 6.

Правды проповеднику, достодивному Илию, уподобилася еси и покаяния светильнику Предтечи Иоанну, о преподобная мати! Оставила бо еси попечения житейская, во еже безмолвствовати в горах, и всегда поучалася еси в помнении часа смертнаго, в бдениих поющи Богу: Аллилуиа!

Икос 6.

Свет небесный озари тя, на всенощней молитве стоящей ти во мнозем умилении, и Ангел Господень тебе предста, Божие веление возвещая ти: да возвратишися во отечествие твое, яко тамо подобает ти отдати земли тело, духу же твоему преселитися в небесное жилище свое; сего ради поем тебе сице:
      Радуйся, еще в жизни сей Ангела видети удостоившаяся.
      Радуйся, благочестно заповеди Божия исполнившая.
      Радуйся, яко во Влахернстей церкви тепле Матери Божией помолилася еси.
      Радуйся, яко теплым Ея защищением себе предала еси.
      Радуйся, яко пред исходом твоим прилежно о всем мiре молилася еси.
      Радуйся, яко по исходе от телесе живот вечный обрела еси.
      Радуйся, преподобная мати Параскево, скорбящым утешение!

Кондак 7.

Хотящи преставитися от нынешняго века, аки звезда в захождении была еси, прехвальная, и в небесней жизни возсияла еси, яко зарю оставивши нам добродетели и исправления жития твоего, имиже и ныне озаряеши сердца всех, верою зовущих Богу: Аллилуиа!

Икос 7.

Исполнивши закон новыя благодати, возшла еси на небо добродетельми, во еже радоватися вкупе с небесными чинми; темже с ними молися Спасителю Христу за вся, поющия ти сице:
      Радуйся, яко к свету немерцающему преселилася еси.
      Радуйся, яко палаты Христовых доброт удостоилася еси.
      Радуйся, яко от Господа мзду многу за труды твоя восприяла еси.
      Радуйся, яко венец нетленен с высоты стяжала еси.
      Радуйся, яко несредственне Триипостаснаго Бога зриши.
      Радуйся, яко со Ангелы на небеси пребываеши.
      Радуйся, преподобная мати Параскево, скорбящым утешение!

Кондак 8.

Странное и дивное виде христолюбивый Георгий: царицу виде некую, седящую на пресветлем престоле и множество светлых воин окрест ея, и услыша словеса сия к нему реченная: Георгие, потщитеся изъяти мощи моя и положити я на честнем месте, поюще Богу: Аллилуиа!

Икос 8.

Вси людие христианстии, услышавше словеса Георгия, скоро потекоша к мощем Параскевы преподобныя, и вземше я с великим усердием, радующеся яко о некоем сокровищи многоценнем, честно положиша я в церкви, любовию зовуще сице:
      Радуйся, православных радостное слышание.
      Радуйся, светлая звездо веры, Церковь озаряющая.
      Радуйся, несокрушимый ковчеже дарований Божиих.
      Радуйся, боготечный источниче, воды исцелений верным источаяй.
      Радуйся, яко всех верных болезни благодатию Христовою исцеляеши.
      Радуйся, яко в целомудрии и чистоте жити нам помогаеши.
      Радуйся, преподобная мати Параскево, скорбящым утешение!

Кондак 9.

Велие усердие имяше к тебе благоверный Царь болгарский Иоанн Асен, иже приимь вест где лежат чудотворныя и святыя мощи твоя, преподобная Параскево, принести я в град свой Терново повеле и с честию великою положи я в церкви своей, идеже многая исцеления источаху всем верою притекающым и Богу поющым: Аллилуиа!

Икос 9.

Отроча, иже лет девять от рождения своего в немоте бе, верою пришед в храм твой, абие исцеление прият и начат добре глаголати. Сего ради умильно тебе зовем:
      Радуйся, мощная заступнице наша и от бед избавительнице.
      Радуйся, скорая помощнице страждущым от духов злобы.
      Радуйся, молитвами бо твоими слепии прозирают.
      Радуйся, неплодным бо плод благословен от Бога подаеши.
      Радуйся, яко разслабленыя от одра болезни воздвизаеши.
      Радуйся, немолчная молитвеннице верою к тебе притекающих.
      Радуйся, преподобная мати Параскево, скорбящым утешение!

Кондак 10.

Спасла еси от беснования жену, яже обещася заповеди Божия творити, но умедли и не исполняше обет свой: темже скоро наказала еси ю болезнию и смертию, да и инии поучатся не лгати Богу, но в истине пребывающе Богу да поют: Аллилуиа!

Икос 10.

Стена еси и спасительное прибежище православным людем, в рабстве пребывающым, и в бедах своих к целительным и чудоточным мощем твоим притекающым, и всеумиленно тебе зовущым:
      Радуйся, всем верным тихое пристанище.
      Радуйся, теплая заступнице и покровительнице онеправдованным.
      Радуйся, яко порабощенным и бедствующым утешение даруеши.
      Радуйся, яко и агаряны чудесы страшиши и вразумляеши.
      Радуйся, яко тобою Православие возвышается.
      Радуйся, яко тобою неверие и зловерие посрамляются.
      Радуйся, преподобная мати Параскево, скорбящым утешение!

Кондак 11.

Благоверная царица сербская Милица, приносящи песны и молитвы пред ракою мощей твоих чудоносных, с великим усердием пренесе я от царствия зловерных в престольный град свой, в защищении рода сербскаго, зовуща Богу: Аллилуиа!

Икос 11.

Светлая и новоявленная звезда явилася еси Западу, многосветлыми лучами чудотворных мощей твоих сияющи всем верным, наипаче же любящыя тя привлекающи светозарным сиянием подвиг твоих, и избавляющи от бед и напастей нас, вопиющих ти таковая:
      Радуйся, источниче исцелений многовидных.
      Радуйся, люте страждущым помощнице.
      Радуйся, яко мрак скорбей разгоняеши.
      Радуйся, яко человеки от бездны грехов избавляеши.
      Радуйся, яко тобою смеем призывати бездну милосердия Божия.
      Радуйся, яко избавившеся от потопа гнева, тобою мир с Богом обретаем.
      Радуйся, преподобная мати Параскево, скорбящым утешение!

Кондак 12.

Благодатию Христовою болезни и страсти исцеляеши, и духи лукавствия прогоняеши, преславная Параскево, и просвещаеши верныя блистанием чудес твоих; темже благодарственне зовем Богу о тебе: Аллилуиа!

Икос 12.

Поюще прилежно изрядствия твоя, молим ти ся, преподобная наша мати Параскево, молися за Церковь Христову: испроси у Бога крепкостояния Вере Православней и на ереси победы, нам же спасения и мира, да любовию прославляем тя сице:
      Радуйся, светлое украшение Христовы Церкве.
      Радуйся, Веры Православныя поборнице.
      Радуйся, стено и избавительнице отечествия нашего от зловерных.
      Радуйся, покрове обителей и домов благоверных.
      Радуйся, заступнице рода христианскаго.
      Радуйся, скорая помощнице верою требующым защищения твоего.
      Радуйся, преподобная мати Параскево, скорбящым утешение!

Кондак 13.

О, преподобная наша мати Параскево, утешение скорбящым и девам украшение, приими нынешнее песнословие от недостойных уст наших, и умоли Господа избавитися нам вечных мук, да с тобою в небеснем Отечествии нашем поем Ему: Аллилуиа!

Кондак сей глаголем трижды. По сим Икос 1. и Кондак 1.

Молитва преподобней Параскеви
О, преподобная наша мати Параскево, теплая заступнице и всех в напасти сущих скорая помощнице! Помози нам грешным и изнемогающым в житии сем: умоли Господа Бога да дарует нам оставление всех грехов наших, ихже содеяхом во вся дни живота нашего делом, словом, помышлением и всеми чувствы нашими. Во исхождении душ наших помози нам, недостойным, да избавимся от мытарств воздушных и вечных мук, яко да прославляюще милостивое твое ходатайство о нас, всегда восхваляем Бога нашего: Отца, и Сына, и Святаго Духа, ныне и присно, и во веки веков. Амин.[/spoiler]

Раб божий Константин

АКАФИСТ СВЯТОМУ МУЧЕНИКУ ПАРФЕНИЮ.
[spoiler]КОНДАК 1
Избранный страстотерпче и пречудный исповедниче Христов Парфение,/ с сонмом мученик непобедимых Церкви Христовой состроитель явился еси,/ свет Пресвятыя Троицы во мраке идолонечестия возвестив,/ любовь ко Христу кровию своею запечатлев,/ и венцем славы неувядаемыя Страстоположником Голгофским увенчан был еси./ Но яко имеяй дерзновение ко Господу,/ в вере Православней не посрамитися/ и кончины христианския сподобитися нам умоли, да зовем ти:
Радуйся, пречудный мучениче Христов Парфение, молитвенниче о нас ко Господу теплейший.

ИКОС 1
Ангельстии лицы дивляхуся, егда, в немощной плоти сый, ангельски за Христа подвизался еси, Парфение, – девственниче Христов, и Сего Возлюбленнаго пред мучители тако исповедал еси: Христа – Сына Божия, со Отцем и Святым Духом исповедую, Троице Единосущней и Нераздельней покланяюся, боги же идольския нивочтоже вменяю, да со Христом жизнь вечную наследую. Мы же, видяще тя в вере святей сице подвизающася, умильно зовем ти:
Радуйся, друже Христов и наш пред Ним заступниче;
радуйся, Церкве Христовы верный обручниче.
Радуйся, евангельския Истины исповедниче неустрашимый;
радуйся, в подвизе веры непобедимый.
Радуйся, яко грозд зрелый, кровь свою за Христа пролиявый;
радуйся, житием нескверным Церковь Христову украсивый.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 2
Видяй брата своего Калогерия, велением императора Декия, мучители костьми растягаема и прочих мучеников, домостроительство Церкве Христовы мужественно совершающих, не устрашился еси, Парфение богомудре, но яко верный воин Христов, на делание сие дивное, со всеми Христу сраспинавшимися, сораспятися Сему потщился еси, да купно страждуще, воспоеши с ними победную песнь Богу: Аллилуиа.

ИКОС 2
Разум богодухновенный благочестием веры стяжал еси, Парфение премудре, егда дух злобы поднебесныя, со клевреты своими, основание Церкве Христовы разорити устремися. Ты же сего, человекоубийцу искони, страданьми твоими посрамил еси, кровь свою за Христа пролияти и сице Церковь Святую во всей вселенной утвердити, яко на пир дивный спешным явился еси. Подвигом сим и любовию твоею ко Господу умиляющеся, приносим ти сия похвалы:
Радуйся, мучениче Христов непобедимый;
радуйся, строителю Церкве Святыя предивный.
Радуйся, яко невесту преизрядную Церковь Святую возлюбивый;
радуйся, злобу мучителей нечестивых кровию своею потопивый.
Радуйся, яко заря утренняя в Церкви Христовой возсиявый;
Радуйся, терпением твоим добр образ верным показавый.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 3
Силою свыше препоясана быша чресла твоя, мучениче Христов Парфение, егда, яко жертва благовонная, за Христа принеслся еси, и тяжкая мучения, яко пир брачный, прияти возжелев, и тако Христу, за спасение мира на Кресте распяту, подражатель усердный явивыйся, богомудренное благочестие веры лет древних преславно миру свидетельствовал еси, да богатства некрадомаго Церкве Христовой вернии хранителие будем, непрестанно вопиюще Богу: Аллилуиа.

ИКОС 3
Имея твердое веры упование в воскресение живых и мертвых, оправданием Крови Сына Божия, Иже умре и воскресе, и мертвыя и оставльшияся в живых воскресит с Собою, костей сокрушение, кожи содрание и главы раздробление паче ценных ометов и почестей царских предпочел еси, и тако славы безсмертныя достигл еси, Парфение боголюбиве. Ныне же Церковь Святая, юже украсил еси подвигом своим, приносит ти благодарственныя сия похвалы:
Радуйся, страстотерпче земный, небесный венценосче;
радуйся, непостыдный исповедниче Пресвятыя Троицы.
Радуйся, Креста знамение славно воздвигнувый;
радуйся, багряницею спасения к вечней славе одеянный.
Радуйся, яко подвиги твоя земным и небесным присное радование;
радуйся, яко любовь твоя ко Господу верным достойное подражание.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 4
Буря неистовства яростнаго воздвижеся на Церковь Христову, егда кесари римстии возомниша богами нарещися. Киими мученьми и изуверскою смерти страшною не устрашаху и не истребляху последователей Христовых? Онех огнем и кипящим елеем опаляху, инех зверьми растерзаху, прочих крестех смолистых сожигаху, но, Господу Богу содействующу, основания Церкве Святыя не поколебаху. Сему лику исповедник непобедимых с радостию причелся еси, терпеливодушне Парфение, да со всеми святыми и Ангелы небесными во веки вопиеши Богу: Аллилуиа.

ИКОС 4
Слышаще тя, Парфение предивный, пред Декием царем мужественно Христа исповедающа: «Мне бо еже жити Христос, а еже умрети – приобретение, ибо Сей есть воистину Сын Божий, спасаяй род человеческий, в Нем бо не постыдимся во веки», мучители злочестивии злобою распыхахуся, людие же, жаждавшии правды евангельския, инии водою, овии же своею кровию крещахуся, душы своя, грехми оскверненныя, во храм Божий освящаху. О сем, угодниче Божий, приносим ти таковая:
Радуйся, Церкве Христовы похвало пресветлая;
радуйся, девства непорочнаго красото предивная.
Радуйся, светильниче веры – Света неугасимаго;
радуйся, рабе благий и верный Господа непостижимаго.
Радуйся, за род христианский усердный молитвенниче;
радуйся, в земных испытаниих наша отрада и прибежище.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 5
Богопротивное веление Декия суемудреннаго не устраши тя, богомудре Парфение, ниже клеврета его Ливания адская мучения, имиже врага Христова соделати тя помышляху. Ты же, в вере и любви ко Господу укрепляяся, со апостолом Павлом взывал еси: «Ни скорбь, ни теснота, ни нагота, ни мечь, ни смерть, ни настоящая, ни грядущая не возможет разлучити мя от любве Божия, яже о Христе Иисусе Господе нашем», Емуже ангельскую песнь воспевал еси: Аллилуиа.

ИКОС 5
Видя благочестивое твое и служение прилежное нуждам Церкве страждущия, градоправитель Рима Эмилиан, иже христианин бе, умирая, все имение свое и юную дщерь свою Каллисту; яко Самому Господу, тебе и брату твоему Калогерию – еще вне гнева кесарева бывшым – в попечение отда, и о благонравней красоте вашего христианскаго служения посреде мрака греховнаго всей Церкви поведа, да вси ведяще любовь вашу ко Господу и ближним своим от рода в род приносят ти, Парфение, сия похвалы:
Радуйся, христианскаго благочестия преславный поборниче;
радуйся, святаго православия некрадомое сокровище.
Радуйся, достояния Церкве Христовы ревностный хранителю;
радуйся, вдов и сиротствующих усердный защитителю.
Радуйся, языка твоего лестию никогдаже осквернивый;
радуйся, усты твоими волю Божию присно благословивый.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 6
Проповедует и величает ныне Святая Церковь подвиги твоя, друже Христов Парфение, имиже с братом твоим Калогерием, аки два херувима, вертоград Христов, Церковь земную, пламенною любовию возлюбисте и сию от злобы нечестия языческаго мечем веры оградисте, да познает мир, яко Бог наш – Бог любве есть, восполняли есте немощь человеческаго естества силою Своею благодатною, да не постыдимся во веки, поюще песнь победную: Аллилуиа.

ИКОС 6
Возсия свет Евангелия Христова во тьме языческаго зловерия, и всю вселенную просвети, егоже ты, светоносче Парфение, со множеством воин Хри любовию сердец ваших, в пламя неугасимое возжже госте, кровию же своею, яко елеем чистейшим Духом Святым освященным, оживотворяете Имже просветися и утвердися Церковь Христова во веки. Мы же, зряще вас в котлех елея кипящаго и на крестех пламенеющих Рима нощнаго, трепещуще, в вере утверждаемся и со умилением приносим ти таковая:
Радуйся, светильниче Света незаходимаго;
радуйся, светоносче Огня неугасимаго.
Радуйся, священная трубо, истину Христову возвещающая;
радуйся, благословенная стрело, козни диавола поражающая.
Радуйся, хлебодаре, принесый себе Христу в жертву непорочную;
радуйся, виночерпию, послуживый небесному Жениху кровию медоточною.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 7
Хотя Господь посрамити зломудрие Ливания богохульнаго и иже с ним, пред народом и ученики твоими, молитвою теплою издалеча утешавшими тя с братом твоим во страданиих ваших, укрепи тя, многострадальне Парфение, адаманта твердейша. Видя же тя мучитель злочестивый в вере непоколебима, сожжению огненному осуди тя, но не утешися. Десница бо Божия, якоже отроком в пещи вавилонстей, пламя огненное охлади, да не коснется телес ваших, в немже, якоже в чертозе царском, услышася песнь ваша к Богу: Аллилуиа.

ИКОС 7
Новое богатство сокровища некрадомаго украси славою Церковь Христову, егда богоборец Ливаний, видя свое посрамление в свидетельстве истиннаго благочестия веры христианския, юже вы с братом Калогерием мужественно исповедасте, неистовствуя, древом горящим раздроби главу твою, Парфение богомудре, и тако венцем славы неувядаемыя увенча тя. Народ же и ученицы твои, кончину твою непостыдную видевше, прославиша Бога, и тело твое с благоговением погребоша. С ними же и мы приносим ти благохваления сия:
Радуйся, славно покоривый худшее лучшему;
радуйся, богомудренно посвятивши настоящее грядущему.
Радуйся, славою и честию главу твою увенчавый;
радуйся, яко дань верности сию в руце Божий отдавый.
Радуйся, в пламени огненном братию по вере не посрамивый;
радуйся, верность Господу Иисусу кровию своею освятивый.
Радуйся, пречудный мучениче Христов Парфение, молитвенниче о нас ко Господу теплейший!

КОНДАК 8
Странницы и пришельцы есмы на земли, идеже, якоже рече Премудрый: всяческая суета сует – томление духа. Но ты, преславне мучениче Парфение, ревнуя о Господе, тленное сие облекл еси в нетление, и смертное облекл еси в безсмертие, и сице, в меру возраста мужа Христова, идеже поглощена смерть победою, якоже небесный, достигл еси образа небеснаго, да о тебе упование спасения имамы, егда вопием Христу победную песнь: Аллилуиа.

ИКОС 8
Весь еси в вышних, весь еси Христов, весь еси неувядаемое цветение и благоухание Церкве Небесныя, земный и небесный Парфение. О тебе вся небесная веселятся, земная же, видяще тя за мир молящагося, яко миро благовонное, у подножия Христова любовию за мир излиянное, все упование на тя возлагают, и якоже Эмилиан верный имение и дщерь свою, душы своя предстательству твоему пред Господем со упованием вверяют и с любовию тебе вопиют:
Радуйся, ищай Христа, обрел еси жизнь вечную;
радуйся, бояйся Господа – открыл еси любовь Предвечную.
Радуйся, силою любве ко Господу смерть нивочтоже вменивый;
радуйся, молитвою пламенною пламя огня вещественнаго погасивый.
Радуйся, в напастех житейских скорый наш помощниче;
радуйся, в пламени грехолюбия погибающим животворный источниче.
Радуйся, пречудный мучениче Христов Парфение молитвенниче о нас ко Господу теплейший.

КОНДАК 9
Всякое естество небесных и земных радости исполняется, видя оба брата по плоти небесными венцы увенчанных и, яко верных другов Христовых, престолу славы Его предстоящих и Пречистой Матери Его Преблагословенней Деве Марии ангельски служащих и к Ней дерзновение благое имущих. Сию бо, Матерь воплотившегося Сына Божия, пречистый храм Спасов и Духа Святаго жилище, всей вселенней исповедаша. О сем радующеся, дивному во святых Богу вопием: Аллилуиа.

ИКОС 9
Витии многовещаннии не возмогут глаголати по достоянию, како убо в земли Вирменстей родивыйся, со исповедники римскими мученически кровь свою за Христа пролияв, ныне же, славный Парфение, яко сокровище благодати Божией преисполненное, в земли нашей словенстей многоцелебными мощами твоими почиваеши, в нихже утешение духовное, болезней исцеление и благоволение Божие имамы. О сем чудящеся, благодарственно приносим ти сия похвалы:
Радуйся, сынов земли Вирменския достойный наследниче;
радуйся, от восток солнца до запад непоколебимый Христов исповедниче.
Радуйся, златовенчанная главо, земли Галицкия небесное благословение;
радуйся, православнаго народа нашего от зол всяческих избавление.
Радуйся, благий и верный о нас пред Богом ходатаю;
радуйся, о Божием мздовоздаянии неустанный глашатаю.
Радуйся, пречудный мучениче Христов Парфение молитвенниче о нас ко Господу теплейший.

КОНДАК 10
Спасительное утешение уготова Господь земли Галицтей и новаго ходатая воздвиже о народе нашем пред лицем Своим, темже святыя мощи вернаго исповедника Своего, Парфения чуднаго, на радость и духовное укрепление нам дарова, в нихже свет востока православнаго возвещает нам о единстве веры древних церквей Христовых и просвещает всех, единеми усты и единем сердцем, во единомыслии веры, братолюбии и смиренномудрии воспевати Богу: Аллилуиа.

ИКОС 10
Стена и ограждение еси всем, к заступлению твоему прибегающым и твоего предстательства теплаго пред лицем Божиим ищущим, страстотерпче Христов Парфение, яко вемы тя силы и благодати Божия исполнена, в нейже укреплен сый, вся козни лукаваго победив, можеши и нам помощи. Сего ради, всечестным мощем твоим припадающе и вселюбезно память твою празднующе, молим тя прилежно: вознеси молитвы твоя ко Господу и всем, по коегождо потребе, милости Божия и грехов прощения испроси, да зовем ти:
Радуйся, в бурях житейских пристанище утишное;
радуйся, в страстех телесных исправление безболезненное.
Радуйся, в греховном усыпании благодатное пробуждение;
радуйся, в нераскаянном отчаянии спасительное врачевание.
Радуйся, яко престарелых родителей слезы горькия отираеши;
радуйся, яко жестоковыйным чадом их суд Божий возвещаеши.
Радуйся, пречудный мучениче Христов Парфение молитвенниче о нас ко Господу теплейший.

КОНДАК 11
Песнь благохваления приносим ти, Парфение, радосте наша, усердно за истину Христову пострадавшему, Сему Возлюбленному последовавшему, со дивными строители Церкве Святыя сораспявшемуся, и тако созвездие Церкве Вселенския украсившему! Темже, Христу, благоизволившу во укрепление надежды нашего спасения облагодатствовати честными мощами твоими землю Галицкую, яко Богу Спасителю нашему благодарно вопием: Аллилуиа.

ИКОС 11
Светозарное светило, святыя мощи твоя, воздвиже Господь в земли словенстей и, яко Ангела верна и молитвенника прилежна, дарова тя, мучениче Парфение, православным людем земли Галицкия, егда лишени быша святых мощей великомученика Иоанна Новаго Сучавскаго. Ныне же, дар божественный и многоценный приимше, Благодателю нашему Богу всеумиленно покланяемся, тебе же, радосте наша, Парфение, яко молитвеннику и пред Богом за нас ходатаю, вопием:
Радуйся, земли Галицкия Ангеле неусыпный;
радуйся, заступниче наш пред Богом всещедрый.
Радуйся, супружеств христианских от распрей ограждение;
радуйся, прибегающих к тебе щедрое благословение.
Радуйся, ходатаю мира всемирнаго незыблемаго;
радуйся, предводителю верных к торжеству пира ангельскаго.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 12
Благодать Всесвятаго Духа укрепляше тя, мученичe Спасов Парфение, егда посреде пламене огненнаго твердо стоял еси на камени веры исповедания твоего, во еже не посрамитися верным Церкве Христовы во испытаниих лютых. Благодатныя же силы и действа Сего Вездесущаго и вся Исполняющаго и нам испроси, достохвальне Парфение, да не оскудеет вера наша и не умалится на Господа надежда наша, ниже посрамятся деяния отцев наших в исповедании нашем, егда вопием хвалебную песнь: Аллилуиа.

ИКОС 12
Поюще предивная страдания твоя и воспевающе любовь твою ко Господу, всехвальне Парфение, восхваляем вси неизреченное благоволение Божие, на нас свершившееся. Тя бо, возлюбленнаго раба Своего, Всеблагий Господь, во утешение и утверждение веры нам дарова, да уразумеем, яко щедр и милостив Господь, в род и род помощник и защититель нам будет: избавит души наша от смерти, очи от слез, нозе от поползновений лукавых, услышит нас, молитв ради твоих, и будет нам во спасение. О сем радующеся, приносим ти сия похвалы:
Радуйся, Церкве Православныя похвало и утверждение;
Радуйся, земли нашея от огня губительнаго избавление.
Радуйся, воине, щитом мира нас ограждаяй;
радуйся, верных от греховныя смерти сохраняяй.
Радуйся, яко молитвы твоя отрада наша спасительная;
радуйся, яко святыя мощи твоя душ наших прохлада священная.
Радуйся, пречудный мучениче Христов Парфение, молитвенниче о нас ко Господу теплейший.

КОНДАК 13
О пречудный исповедниче и преславный мучениче Христов Парфение, теплотою любве твоея ко Господу, посети и согрей сердца наша, и приими сие приношение наше, яко венец похвалы сердечныя, и, яко фимиам благовонный, вознеси молитву твою всех Владыце, и испроси земли нашей мира благоденственнаго, церквам Божиим единства и благостояния, нам же всем чистоты сердечныя и любви непорочныя, да спасаеми тобою, хвалебную песнь вопием Богу: Аллилуиа.
Сей кондак глаголется трижды. По сем икос 1-й и кондак 1-й.

МОЛИТВА
О преславный и Богом возлюбленный мучениче Христов Парфение! Тебе, облиставшему величие Церкви Христовой мученическою кровию своею, основание Ея утвердившему смертию своею, дивно сплетшему подвиг своего исповедничества со тьмы мученик Христовых, сораспявшихся Искупителю мира в воздвижении Его Святыя Церкви к возвещению евангельския истины во всей вселенной, припадающе молимся: яко покровитель и ходатай о народе нашем пред Богом, Парфение пречудный, вознеси молитвы твоя ко Господу о всех, с верою и любовию к честным мощем твоим припадающих и помощи твоея небесныя просящих.
Сотвори убо, да услышана будет пред Богом молитва матерей скорбящих о чадех своих, и чад благосердых о родителех их. Да не изнеможет пред Господем плач и стенание вдов и сирот, ниже ходатайство супругов верных в нуждах их; да утешится у ног твоих всяк в недузех душевных и телесных страждущий, и от клеветы человеческия напаствуемый, и не отыдет тощ всяк во отчаянии изнемогаяй, в скорбех и нуждах житейских к тебе прибегаяй.
Излей благодать твою, боголюбиве Парфение, и укрепи немощи наша противу сетей духа злобы поднебесныя. Да отлучится от мыслей наших дух нависти и злопомнения, зависти и лести, дух боязни и уныния, дух распрей и расколов, дух гордости и всякия иныя злобы, да не погибнем в суете житейстей, якоже страха Божия неимущии.
Еще испроси, угодниче Божий, мира Божия всей вселенной, во благостояние в братском единомыслии Святых Божиих Церквей и спасение всего рода челоческаго. Народам же нашим благоденствия и во всем благоуспевания умоли, и в вере православней укрепи. Пастырей Церкве Божия и честное иночество в молитвах согрей и поддержи, и воздыхания их о спасении мира благоприятны пред лицем Божиим сотвори. Наипаче же умоли Господа Сил, да не отвратит милость Свою от нас, грех ради наших, но яко Отец чадолюбивый, изольет милость Свою на достояние Свое, да не постыдимся во веки. Емуже честь и поклонение подобает: Отцу, и Сыну, и Святому Духу, во веки веков. Аминь.[/spoiler]

Раб божий Константин

Акафист Пасхальный Воскресению Христову.
[spoiler]Кондак 1

Возбранному Воеводе разрушителю смерти и ада, победную песнь Тебе Христе приносим, яко со славою востал еси тридневен от гроба и вся от века умершия воскресил еси. Мы же страданием Твоим вечныя смерти избавльшися радостно вопием Ти:
Христос Воскресе из мертвых, смертию смерть поправ и сущим во гробех живот даровав.

Икос 1

Ангел престатель с небесе снизшед, камень от гроба Твоего отвали Христе Боже, и мироносицам благовести восстание Твое, они же, вразумленные чудным явлением, зрящее ко гробу с верою и любовию, возглашаху:
Христос Воскресе! Смерть попра, ада пленил есть и из гроба, яко Жених из чертога изыде.
Христос Воскресе! И Адам первозданный в ризу безсметрия облекается.
Христос Воскресе! И Воскресением Своим образ всемирного Воскресения начертавый.
Христос Воскресе! И нас научивый звати Тебе:
Христос Воскресе из мертвых, смертию смерть поправ и сущим во гробех живот даровав.

Кондак 2

Яко прииде на гроб Мария Магдалина и другая Мария, помазати Тело Твое Христе Боже, обретоста Ангела на камени седяща и глаголюща к нима: «Не бойтеся! Вем бо, яко Иисуса ищите распятого, несть зде, но воста, якоже и рече вама!» Сия убо слышавше святыя жены, текшее вспять благовестиша учеником Твоим, да вси, яко Творцу и Воскресшему Владыце воспоют:
Христос Воскресе из мертвых, смертию смерть поправ и сущим во гробех живот даровав.


Икос 2

Бурю внутрь имеяху ученицы Твои не ведуще писания о Воскресении Твоем. Темже Петр, услышав благовестие Мироносиц, тече ко гробу, виде бывшее и с верою возгласи:
Христос Воскресе! И всемироное спасение содеяся.
Христос Воскресе! Беззаконное же сонмище иудейское посрамися.
Христос Воскресе! И ересь саддукеев, глаголющих: «Не быти воскресению», - низложися.
Христос Воскресе! И гроб Твой паче храма Соломона честнейший соделался.
Христос Воскресе! И нас от смертныя тли свободи, взывающих Ти:
Христос Воскресе из мертвых, смертию смерть поправ и сущим во гробех живот даровав.


Кондак 3

Слышаша и видеша стражи гроба Твоего трус велий бывший и камень отвален от гроба, от страха бывша яко мертви, и текше во град возвещаху архиереем и старцем, они же умыслиша утаити чудо, но не возмогоша, ниже задеша верущим Пети Тебе:
Христос Воскресе из мертвых, смертию смерть поправ и сущим во гробех живот даровав.


Икос 3

Иже иногда потаен сый Твой ученик Иосиф, иже от Аримофея, с Никодимом, испроси Тело у Пилата, благоуханием помазав, во гробе нове погребе, уведев же по сих Твое из гроба восстание возгласи:
Христос Воскресе! Не кустодиею, но архангелы и ангелы стрегомый.
Христос Воскресе! Стражи Пилатовы недоумением и ужасом порази.
Христос Воскресе! И печатей гробных невредив, Каиафу богопротивного посрами.
Христос Воскресе! И светлый день всемирного Боговедения наста.
Христос Воскресе! И идолы и кумиры сокруши.
Христос Воскресе! И мы с Никодимом вопием:
Христос Воскресе из мертвых, смертию смерть поправ и сущим во гробех живот даровав.


Кондак 4

Воспоминающее ученицы Твои, яко варяеши их в Галилее, идоша в Галилею, гору и видеша Тя тамо самою вещию плоть нашу носяща, с верою и любовию яко Богу поклонишася зовуще:
Христос Воскресе из мертвых, смертию смерть поправ и сущим во гробех живот даровав.


Икос 4

Разум неразуменный был еси иудеом како печати не рушив, из Гроба изшел еси. Темже научаху кустодию возвестити людем о краже Тела Твоего. Мы же преславному Воскресению дивящеся верно вопием:
Христос Воскресе! И приял еси всяку власть на небеси и на земли.
Христос Воскресе! Да всех приведеши ко Отцу Твоему.
Христос Воскресе! Да во всю землю изыдет апостольское вещание.
Христос Воскресе! И яко во гробе Твоем благодать Воскресшего до днесь почиет.
Христос Воскресе! И мы умилиени бывше тайной Твоего Воскресения радостно поем:
Христос Воскресе из мертвых, смертию смерть поправ и сущим во гробех живот даровав.

Кондак 5

По днех осьмих пришел если ко учеником Твоим Христе, и Фому уверивый о Воскресении. Тем же осязав язвы Твоя и познав Тебе истинного Бога возопи:
Христос Воскресе из мертвых, смертию смерть поправ и сущим во гробех живот даровав.


Икос 5

Вития суемудренные книжники иудейския, якоже рыбы безгласныя видим недоумевающе глаголати о восстании Твоем, мы же совоскресши Тебе верою и любовию с веселием зовем:
Христос Воскресе! И жизнь вечная всем концем земли познася.
Христос Воскресе! И смертию нчальника жизни, смерти жало и держава разрушися
Христос Воскресе! И вси в Тебе залог безсмертия обретают.
Христос Воскресе! И вси гроби издадут своих мертвецов в день судный.
Христос Воскресе! И жизнь христианская утверждется.
Христос Воскресе! и мы любезно Твой гроб лобызающе глаголем:
Христос Воскресе из мертвых, смертию смерть поправ и сущим во гробех живот даровав.


Кондак 6

Егда по Воскресении Твоем явися на море Тивериадстем, повелевая воврещи мрежу, и бысть познан в ловитве рыб, тогда ученик Твой рече Петрови: «Господь есть». На земли же обретоша огнь и хлеб и вкусивше рыбы, познавша в Тебе Учителя и Господа воззваше:
Христос Воскресе из мертвых, смертию смерть поправ и сущим во гробех живот даровав.


Икос 6

Утру сущу глубоку, приидоша жены на гроб, и Тела Твоего не обретоша, недоумением объяти бывше. Ты же Утешителю скорбящих, явлься им посреде вертограда, единем гласом: «Марие». Плачь их на радость преложивый, темже с веселием восклицаху Тебе:
Христос Воскресе! И жены радостию объяты.
Христос Воскресе! И скорбь изчезе.
Христос Воскресе! И велия радость водворися.
Христос Воскресе! И лик апосольский в вере и любви утвердися.
Христос Воскресе! Мироносицам радость возвестивый.
Христос Воскресе! Надежда наша, радостию напои сердца наша вопиющия Ти:
Христос Воскресе из мертвых, смертию смерть поправ и сущим во гробех живот даровав.


Кондак 7

Во страдании Твоем Христе, солнце лучи своя скры, и завеса церковная раздрася и земля потрясеся, яко беззаконных хотя поглотити. Ты же со славою Воскрес еси. Темже достойно и праведно зовем Ти:
Христос Воскресе из мертвых, смертию смерть поправ и сущим во гробех живот даровав.

Икос 7

По преславном восстании Твоем Луце и Клеопе явился еси, яко старнник, уверяя о Воскресении Твоем, на пути в Эммаус, сказоваша им писания, и открыв вся пророчествия, и неверствие их обличив, познался еси има в преломлении хлеба. Темже с радостию возвратистася во Иерусалим и возопиша Тебе:
Христос Воскресе! И предначася торжество Победителя ада и смерти.
Христос Воскресе! Небо же и земля и преисподняя обретоша радость.
Христос Воскресе! И гроб Твой бысть последним виталищем Твоим на земли.
Христос Воскресе! И из гроба яко Иона из чрева китова тридневен произыде.
Христос Воскресе! Воскреси и наши души зовущия Ти:
Христос Воскресе из мертвых, смертию смерть поправ и сущим во гробех живот даровав.


Кондак 8

Все естество ангельское и человеческое удивися великому Твоему о нас смотрению, зрак раба приимша распята же и погребена, но Воскресша в третий день во славе и вознесшася с плотию на Небо. Тем убо яко Спасителю и Владыце воспеваем:
Христос Воскресе из мертвых, смертию смерть поправ и сущим во гробех живот даровав.

Икос 8

Новое и преславное чудо показал еси Воскресением Твоим Христе Боже наш, печати гроба невредив, якоже и Девы в Рождестве Твоем. Темже почитаем вольныя страдания Твоя, славословим Крест и погребение, и преславному Воскресению покланяющеся зовем:
Христос Воскресе! Воскресением же Твоим всезлобный враг рода человеча лютейший удар во главу прият.
Христос Воскресе! И камень отваленный от Тебе, адова врата сокруши и вереи железныя сотре.
Христос Воскресе! Тобою всемирное солнце возсия и мглу разгна.
Христос Воскресе! И Собою весь мир обнови.
Христос Воскресе! И скорбные сердца наша радостию снабди.
Христос Воскресе! И Тобою жизнь наследствуем вопиюще:
Христос Воскресе из мертвых, смертию смерть поправ и сущим во гробех живот даровав.


Кондак 9

Проповедники Воскресения Твоего Богоноснии апостоли, от конец земли проповедаша Тебе истинного Бога, идолы сокрушиша, и языческия обычаи попраша, храмы и жертвенники истинному Богу воздвигоша, и научиша взывати Тебе:
Христос Воскресе из мертвых, смертию смерть поправ и сущим во гробех живот даровав.


Икос 9

По восстании Твоем явися учеником и вкушь от хлеба и сота, не приведении, но истинно их Учителя и Бога бытии уверил еси. Темже избавльшися страха и верни бывше глаголаху:
Христос Воскресе! И вся уснувшия от века возбудил еси.
Христос Воскресе! Плачь и рыдание Адамово преста.
Христос Воскресе! Каменю отпадшу, окаменение сердец наших перста.
Христос Воскресе! И днесь весна благоухает.
Христос Воскресе! И ликуют ангели.
Христос Воскресе! И хвалятся человецы Воскресением Твоим.
Христос Воскресе! Вси же земнороднии возрадовашася зовуще:
Христос Воскресе из мертвых, смертию смерть поправ и сущим во гробех живот даровав.


Кондак 10

Земля убояся и умолче Тебе Творца Своего, ад вострепетав положена во гробе, небеса же восход ко Отцу готовляху. Его же николиже отлучался еси. Мы же искуплении Крестом Твоим зовем:
Христос Воскресе из мертвых, смертию смерть поправ и сущим во гробех живот даровав.


Икос 10

Мария Магдалина яко теплейша к Тебе Христу Богу верою, зело рано пришедши на гроб Твой, сподобися зрети Тебе. Ты же рекл еси: «Не прикасайся Мене, не бо взыдох ко Отцу Моему». Темже яко благовестие носящая научи нас звати сице:
Христос Воскресе! И бысть проповедан тобою.
Христос Воскресе! И Пилат осудися.
Христос Воскресе! Рим же наполнися благовестием Твоим.
Христос Воскресе! Из гроба в Нем же почти яко лев, никимже возбудимый.
Христос Воскресе! И из гроба самовластне воста.
Христос Воскресе! И ад пленися, мы же плена избавльшеся взываем Ти:
Христос Воскресе из мертвых, смертию смерть поправ и сущим во гробех живот даровав.


Кондак 11

По Воскресении Твоем Христе, мир преподал ученикам и власть отпущати грехи. Ниспосли мир и нашим сердцам и отпусти согрешения наша вопиющих Ти:
Христос Воскресе из мертвых, смертию смерть поправ и сущим во гробех живот даровав.


Икос 11

По восстании Твоем Христе, вопросивый апостола Петра: «Любиши ли Мя?» Даждь и нам грешным имети образ любве Его, да последующе Ти зовем радостно:
Христос Воскресе! И любовь царствует.
Христос Воскресе! Неверие попрано бысть.
Христос Воскресе! Тля разорися.
Христос Воскресе! И мир водворися.
Христос Воскресе! И человечество ликует.
Христос Воскресе! Земля торжествует.
Христос Воскресе! И мы в весели и радости Тебе зовем:
Христос Воскресе из мертвых, смертию смерть поправ и сущим во гробех живот даровав.


Кондак 12

Божественное еже о нас смотрение Твое славяще, страсти Твоя почитаем, предивному Воскресению Твоему покланяемся, преславное Вознесение воспеваем. Молимся, Пресвятого Твоего Духа не отыми от нас взывающих Ти:
Христос Воскресе из мертвых, смертию смерть поправ и сущим во гробех живот даровав.


Икос 12

На гору Елеонскую егда восшел еси Блаже, тогда пресветлый облак подъят Тя и вознесеся на Небо. Вознеси и наши сердца горе ко Отцу Твоему, да ликующе во свете неприступнем зовем Ти:
Христос Воскресе! И Воскресе правда учения Твоего.
Христос Воскресе! И мертви от ада свободистася.
Христос Воскресе! Ликуют ангели и человецы.
Христос Воскресе! Поют Тебе море и бездны.
Христос Воскресе! Хвалят Тя солнце и луна.
Христос Воскресе! Воспевает Тя вся земля.
Христос Воскресе! И мы наследие Твое, искуплении Твоим страданием и Воскресением зовем:
Христос Воскресе из мертвых, смертию смерть поправ и сущим во гробех живот даровав.


Кондак 13

О, Всеблагий Господи, Воскресший Иисусе Боже наш, прими ныне малыя похвалы сия от сердца Тебе приносимые, и Воскресением Твоим воскреси наши души и телеса, да благодарственно взываем Ти радостно:
Христос Воскресе из мертвых, смертию смерть поправ и сущим во гробех живот даровав.

Сей кондак читается трижды

И паки чтется Икос 1-й и Кондак 1-й


Молитва ко Господу нашему Иисусу Христу

Премудрый и Всеблагий Гсподи, Спасителю наш! Просветивый сиянием пришествия Твоего мира концы и сопризвавый нас в Церковь Твою Святую, с обетованием наследия нетленных и вечных благ. Призри милостивно на нас недостойных рабов Твоих, и не помяни беззаконий наших, но по безмерному благосердию Твоему прости нам вся прегрешения наша. Аще бо и перступаем святую волю Твою, но не отметаемся Тебе Бога и Спаса нашего, Тебе единому согрешаем, но и Тебе единому служим, в Тя единого веруем, к Тебе единому прибегаем, и Твои точию раби быти хощем. Помяни немощь естества нашего и обдержащия повсюду искушения врага, и прелести и соблазны мира, ихже ради без Тебе якоже рекл еси, не можем творити ничесоже. Сам очисти и спаси нас! Сам просвети умы наша, еже непоколебимо веровати в Тя, единого Спаса и Избавителя нашего. Сам подвигни сердца наша, еже всецело любити Тя единого Бога Творца нашего. Сам направи стопы наша, еже непреткновенно ходити во свете заповедей Твоих. Ей, Гсподи, Спасителю наш, яви нам великую и богатую милость Твою! Сотвори, да в преподобии и правде поживем вся дни живота нашего, и тако достойни будем во второе славное пришествие Твое услышати от Тебе милостивное призывание в Царствие Небесное, еже получити сподоби нас грешных и недостойных рабов Твоих, и в наслаждении неизреченных красот его славити вкупе со Безначальным Твоим Отцем и Присносущным Божественным Духом во веки веков. Аминь.[/spoiler]

Раб божий Константин

Преподобный Пафнутий, игумен Боровский.
[spoiler]Акафист преподобному Пафнутию Боровскому

Кондак 1
Избранный чудотворче, великий угодниче Христов, врачу благодатный, бесов прогонителю, всем любовию притекающим источаяй милости миро, восхваляем тя любовию, отче Пафнутие, ты же, яко имеяй дерзновение ко Господу, от всяких нас бед свободи, да зовем ти: Радуйся, отче Пафнутие, Боровский чудотворче.

Икос 1
Ангелов Творец, провидя тя ангелом подражателя во плоти имуща быти, от юна возраста облече тя во ангельский чин. Ты же отшед от мира и облекся во иноческое одеяние, крест на рамо взем, вседушно потекл еси во след Распеншегося нас ради Господа: скорбь и труд возлюбив, прилепился еси Христу любовию и молитвами. Мы же, благодаряще о сем Бога, похвальная восписуем ти:
Радуйся, послушателю Господа зовуща: возьмите иго мое на себе;
Радуйся подвижниче, подвигом добрым подвизавыйся;
Радуйся, избравый путь тесный, ведущий в живот;
Радуйся, смирением высоких достигший.
Радуйся, кротостью в землю кротких вселивыйся;
Радуйся, вечное радование на небеси обретший.
Радуйся, заступниче наш, и нас поминаяй пред Богом радующихся о тебе;
Радуйся, отче Пафнутие, Боровский чудотворче.

Кондак 2
Видяще ближнии и дальнии дивное о Бозе житие твое, дарование исцелений и сбытие проречений твоих, вельми удивляхуся и славяще Бога вопияху: Аллилуиа.

Икос 2
Разум твой в Божественная вперив и Божиим светом озарився, дары благодатныя являл еси в себе, яко угль горящий огнем Божественным в тебе, сущая возгревая к любви Божией, такожде и сущих с тобою просвещая. Молися убо о нас, покровителю наш, да ревнуя житию твоему спасем души наша и тебе благоприятно поем:
Радуйся, разумением воли Божией и тайн Его озаривыйся;
Радуйся, сотворивый вся повеленная Христом;
Радуйся, в послушаниях монастырских, яко раб неключимый послуживый;
Радуйся, образе Евангельского самоотвержения;
Радуйся, яко храм Божий сердце твое бысть;
Радуйся, яко обитель твою яко рай возделану имел еси;
Радуйся, яко велий во Царствии Божием, яко сотворивый и научивый нареклся еси;
Радуйся, отче Пафнутие, Боровский чудотворче.

Кондак 3
Силою свыше облекий апостолы Господь, облече тя, отче, в ризу спасения, украси тя красотою добродетелей и чудес даром, мы же благодаряще Бога Дивнаго во святых Своих, вопием: Аллилуиа.

Икос 3
Имуще обитель тебе, отче, почивающа зде святыми мощами, радостию исполняется и веселящися умильно тебе вопиет:
Радуйся, избранный сосуде Святаго Духа;
Радуйся, по Бозе и Богородице радосте наша и покрове;
Радуйся, тихое пристанище наше от молвы греховныя;
Радуйся, апостольских учений исполнителю;
Радуйся, святых отец подражателю;
Радуйся, яко ангел, безстрастием просиявый;
Радуйся, облаче, от зноя страстей укрываяй;
Радуйся, отче Пафнутие, Боровский чудотворче.

Кондак 4
Буря недоумения смущает мя, како воспою тя, святе, зане буря страстей и волны грехов потопляют мя; услыши убо вопль и слезы потопляемаго и бедствующему помози, спасай мя, прибежище мое, да воспою благодарно Богу: Аллилуиа.

Икос 4
Слышаще боровские людие, яко тобою грешнии спасаются, недужнии исцеляются, бесы прогоняются, гладнии питаются и скорбящии утешени бывают, потекоша к тебе и ближнии и дальнии, яко к реце, веселящей град Божий и люди. Паче же во время глада устремляхуся вси к тебе с верою в милосердие твое. Ты же и питал еси приходящия ежедневно яко тысящи и множае, дондеже глад преста. И тако прославися тобою Отец Небесный; мы же воспоминающе о сем восхваляем тя усердно сице:
Радуйся, милосердый отче наш;
Радуйся, благодатный врачу душ и телес наших,
Радуйся, отчаянных в милосердии Божием утвердителю;
Радуйся, смущенных умиротворение;
Радуйся, колеблемых утверждение и падших возстановление;
Радуйся, кормчий духовный ко спасению;
Радуйся, гладных питателю, нагих же одеяние и пристанище нищих;
Радуйся, страждущим утешение;
Радуйся, отче Пафнутие, Боровский чудотворче.

Кондак 5
Боготечную звезду уведевше тя, преподобне Пафнутие, ученицы твои: Иосиф Волоколамский, Иннокентий, Илия сродник твой и инии, яко мудрии волсви, ищуще Царя и Спаса миру и тобою испытующе путь, яко светильник держаще тя, достигоша того и радуются ныне с тобою, вопиюще: Аллилуиа.

Икос 5
От многих людей враг творяше пакости тебе и обители твоей, ты же, ученик сый Христов, любил еси враги твоя, добро творя ненавидящим и моляся о них, темже и побеждал еси благими злая. Сего ради Церковь Святая восхваляет тя:
Радуйся, боровская свеще, присногорящая пред Богом;
Радуйся, благодатная луче сияющая от солнца Христа Бога;
Радуйся, непоколебимый терпения столпе;
Радуйся, образе кротости и незлобия;
Радуйся, молитвенниче за враги твоя;
Радуйся, яко уста еси Божия, изводящая от недостойнаго достойное;
Радуйся, миротворче, томужде боголепно и нас научаяй.
Радуйся, отче Пафнутие, Боровский чудотворче.

Кондак 6
Проповедник веры и упования на Бога дивный явился еси, преподобне Пафнутие егда бо скорбяху братия, яко не имеяху рыб ко дню Светлаго Воскресения Христова, глаголал еси о уповании на Бога; в навечерии же Светлаго дне явишася на малом потоце рыбы мнози. Тако упование на Господа не посрами тя, и прославивше Бога, вси вопияху: Аллилуиа.

Икос 6
Возсиял еси, преподобне, свет ангельския чистоты: во плоти яко безплотен, преподобне, ревнителю цемудрия. Сего ради восхваляем тя: Радуйся, похвале Творца всяческих и Приснодевы;
Радуйся, подражавши Иосифу целомудрием;
Радуйся, Моисею Угрину собрате;
Радуйся, Крестителю Господню поревновавый;
Радуйся, соблазны и искушения далече отринувый;
Радуйся, юным покрове и старцем светлосте;
Радуйся, недремлющий блюстителю монахов и постников украшение;
Радуйся, яко светило небесное земным бывый;
Радуйся, сожителю ангелом;
Радуйся, боровская похвало и заступниче наш пред Богом;
Радуйся, отче Пафнутие, Боровский чудотворче.

Кондак 7
Хотяй отгнати от святыя Церкве всякое богомерзкое злосмрадие, явился еси яко благовонное миро житием твоим и словом истины, апостольских же и соборных учений, отче, исполненный сосуд был еси, изгоня из обители глаголющих противная. Тем же святая Церковь ублажает тя и мы спасеннии вопием Богу: Аллилуиа.

Икос 7
Новаго тя Ноя спасенного ковчега обители твоей показа Бог хотящим спастися: наказуя потопом гнева своего преслушающих тя и паки милуя кающихся, мы же благоговейно молим тя: покрый немощи наша, отче, милосердием твоим и смиренною любовию, и сподоби пети:
Радуйся ревностный учениче Христов;
Радуйся, притрепетный служителю Страшных Таин;
Радуйся, блюстителю Православия;
Радуйся, хранителю чудный обетов монашеских;
Радуйся, милостивый заступниче кающимся;
Радуйся, помогаяй и нам соблюдати обеты наши Богу;
Радуйся, отче Пафнутие, Боровский чудотворче.

Кондак 8
Странен и дивен был еси на земли, истый же подражатель небесным житием, словом и молчанием, яко умилитися видящим тя. Приидоша бо от князя слузи буйнии, во злобе хотяще сожещи обитель твою, егда же узреша тя, аки ангела тиха и светла, внезапу применишася на кротость и мнози тако уклонишася от зла и сотвориша благо от слышания и видения твоего, мы же прославляюще о сем Бога, умильно вопием ти: Аллилуиа.

Икос 8
Возведи окрест очи твои, отче, и виждь: се бо многая чада твоя, с разных стран приидоша к тебе дары носяще, паче же с верою и любовию к заступнику и утешителю своему в скорбех и нуждах и припадающе молят тя: простри руку помощи требующим, услыши нас из глубины души взывающих:
Радуйся, ходатаю наш у Бога временных и вечных благ;
Радуйся, сияние нам Божией милости;
Радуйся, дерзновение наше к Богу;
Радуйся, яко милостива его обретаем к нам;
Радуйся, яко тобою от гнева Божия избавляемся;
Радуйся, отче Пафнутие, Боровский чудотворче.

Кондак 9
Всякое естество человеческое удивися ангельскому житию твоему на земли: попрал бо еси бесов, яко прах под ногама, низложив их шатания, разогнав соблазнов тьму и вся стрелы лукаваго на главу его обратив: сораспялся еси Христу и научил еси многих со страхом пети Богу: Аллилуиа.

Икос 9
Витии многовещаннии не возмогут по долгу восхвалити тя, преподобне, точию ангели достойно восхваляют ангельскими пении, от нас же, яко из уст младенец приими хвалу сию:
Радуйся, похвало ангелов, монахов же и всея Святыя Церкве;
Радуйся, вшедый в радость Господа Бога Твоего;
Радуйся, Патриархом в угождении Богу поревновавый;
Радуйся, пророков дара сподобленный;
Радуйся, апостольская уста;
Радуйся, мучеником соучастниче в распятии плоти и в язвах Господних на теле твоем носимых;
Радуйся, миру умерый, Христу же Единому поживый;
Радуйся, не забываяй и нас заблуждших, призывающих тя;
Радуйся, отче, низпосылаяй нам с небесе милость твою;
Радуйся, далече провозгласивый: разумейте языцы, яко с нами Бог;
Радуйся, отче Пафнутие, Боровский чудотворче.

Кондак 10
Спастися хотящии притекаху к тебе, доброму пастырю, указателю путей Господних, сильному о Господе. Ты же яко имеяй дарование прозрения, всех любезно приимал еси, точию, иныя паки отсылая, обаче николиже глаголя о них злая, аще и ведый, мы же благодаряще Бога, дивнаго во святых своих, вопием: Аллилуиа.

Икос 10
Стену тя нерушиму имея и молитвенника тепла, из глубины души тебе, покровителю, глаголем:
Радуйся, промышления Божия о людех исполнителю;
Радуйся, сокровище сокровенное обретый и участники себе многи сотворивый;
Радуйся, Царствия Божия наследниче и иным молитвами твоими двери отверзаяй;
Радуйся, всю жизнь со Христом соображавый и в ничесомже от Него отставый;
Радуйся, делателю в винограде Христовом;
Радуйся, немощных сило о Господе;
Радуйся, искушаемых скорый о Господе покров и заступление;
Радуйся, унывающим ободрение и скорбящим радосте.
Радуйся, отче Пафнутие, Боровский чудотворче.

Кондак 11
Пение ангельское слышашеся во святем преставлении, отче, святыя и богоугодныя души твоея, в небесная селения преславно восходящия, горния бо силы радующеся сретаху тя, поюще Богу: Аллилуиа.

Икос 11
Божием светолитием просвещен быв, отче, яко молния грозная блистал еси, гоня и поражая демоны, якоже и от жены некия отгнал еси их: беси бо являющеся, устрашаху ю, чесо ради смущашеся умом и боляше; овогда видяше являющася старца: низка и согбенна, браду имуща седу и велику, худыми ризами одеянна, со властию отгоняюща демоны, и бываше здрава. Слыша и глас: Пафнутий, иже в Боровске, отгонит от тебе бесы. Нетерпит бо спадый денница и тайные клевреты его не точию присутствия, но и молитв смирения твоего. Мы же, ведуще сия, молим тя: сохраняй и нас от злоб их, да ходим во свете заповедей Божиих, вопиющия ти усердно:
Радуйся, идеже осеняет благодать твоя, отче, оттуду прогонится диаволя сила;
Радуйся, освобождаяй прибегающих под кров твой от злых духов;
Радуйся, неусыпный страже обители твоея;
Радуйся, душ и телес наших благий хранителю;
Радуйся, вторый наш общий ангеле;
Радуйся, в час смертный заступаяй любящих тя пред Богом;
Радуйся, изымаяй от мытарств души их;
Радуйся, недаяй впасти в руце бесом;
Радуйся, воздвизаяй верных к покаянию и с Богом соединяяй;
Радуйся, отче Пафнутие, Боровский чудотворче.

Кондак 12
Благодать велию приял еси от Бога, отче, яко меру потрясну и преливающуся, по множеству любви твоея к Богу и ближним, иже и яви тя реку, изливающу струи многи, благодати требующим, источаеши исцеления: мы же, радующеся, вопием Богу: Аллилуиа.

Икос 12
Поюще светлое о Бозе житие твое, хвалим добродетели твоя, яко Святаго Духа дарования, ублажаем святое успение твое, почитаем священную память твою, зовуще любовию:
Радуйся, в мире яко премирен бывый и мир верою победивый;
Радуйся, плоть твою Христу покоривый;
Радуйся, незлобия и кротости правило;
Радуйся, безстрастия светлый доме и смирения глубино;
Радуйся, Христово благоухание;
Радуйся, заступниче наш на небеси и на земли;
Радуйся, душ и телес наших благий хранителю;
Радуйся, отче Пафнутие, Боровский чудотворче.

Кондак 13
О пресвятый и предивный отче Пафнутие, утешителю скорбящих, приими сие наше малое моление, избави ж нас от всяких бед и вечныя изми муки, богоприятным твоим пред Богом ходатайством, да с тобою во веки воспеваем: Аллилуиа.
(Этот кондак читается трижды, затем икос 1 и кондак 1)

Молитва преподобному Пафнутию Боровскому чудотворцу
О священная главо, земный ангеле, небесный человече, великий чудотворче, преподобне отче наш Пафнутие! К тебе с верою и любовию усердно прибегаем и умиленно просим: яви нам смиренным и грешным святое и многомощное твое заступление. Не дерзаем, грех ради наших, с свободою чад Божиих, просити Господа и Владыку нашего о помиловании и прощении. Но тебе, молитвенника к нему благоприятна, предлагаем и молим, испроси нам у благости его дары благопотребныя и спасительныя душам нашим: веру праву, благочестие крепкое, покаяние истинное, прощение грехов, житие совершенное, исправление решительное, да обратившеся от злых дел к Богоугождению, прочее непрогневляем Господа нарушением святых его заповедей. Умоли, святче Божий, Всевышняго Творца даровати мир и благочестие стране нашей православной. Сохрани, угодниче Христов, святую обитель твою, созданную тобою, и вся живущия и подвизающияся в ней от всякаго зла ненаветны. Призри милостивно на люди, к тебе прибегающия, и вся прошения их во благое исполни. Всем же нам здравие душевное и телесное, земли плодоносие, тихое и благоугодное житие, благую, христианскую кончину и добрый ответ на Страшном Суде у Всемилостиваго Бога исходатайствуй, яко воистину имеяй велие к нему дерзновение. Ей, отче, вемы, яко много может молитва твоя пред лицем Вседержителя Господа и ничтоже невозможно есть ходатайству твоему, аще токмо восхощеши: сего ради крепко на тя уповаем и на твои святыя молитвы вельми надеемся, яко ты приведеши нас предстательством твоим в тихое пристанище спасения и наследники явиши ны светлаго Царствия Христова. Не посрами же упования нашего, чудотворче святый. И сподоби нас вкупе с тобою блаженства райскаго наслаждатися, да славим, хвалим и величаем великую милость к нам Человеколюбца Бога, Отца и Сына и Святаго Духа и твое благое, отеческое заступление во веки веков. Аминь.

Тропарь преподобному Пафнутию Боровскому, глас 4
Жития светлостию просветив твое отечество в молитвах и постех, дарований Божественного Духа исполнился еси; и во временней всей жизни добре подвизався, милости благоутробия всем скорбящим отверзл еси, и нищим был еси заступник. Тем молим тя, отче Пафнутие, моли Христа Бога, да спасет души наши.

Кондак, глас 8
Божиим светолитием просвещен, отче, постническое стяжав жительство, преподобне, монахом предобрый наставниче и постником благое украшение; сего ради Господь труды твоя видев, чудес даром обогати тя: источаеши бо исцеления. Мы же радующеся вопием ти: радуйся, отче Пафнутие.


Во время нашествия татар на Россию дед преподобного был баскаком в городе Боровске. По смерти Батыя, когда многие баскаки были выгнаны из княжений Российских, дед Пафнутия принял христианскую веру, был назван Мартином и поселился в 3 верстах от Боровска, в сельце Кудинове. От сына Мартинова, Иоанна, родился преподобный и при крещении назван Парфением. В 20 лет Парфений тайно ушел от родителей и в 1414 году постригся с именем Пафнутия в Покровском Высоцком монастыре, что на Высоком в Боровске. Много лет подвизался инок Пафнутий в обители. Когда скончался настоятель монастыря, братия избрала его игуменом. Святитель Фотий, митрополит Киевский, рукоположил преподобного в священный сан (ок. 1426 г.). Тридцать лет провел преподобный в Покровской обители, где был и настоятелем, и старцем-духовником.
На 51-м году жизни он тяжело заболел, оставил игуменство и принял великую схиму. После выздоровления он в день святого великомученника Георгия Победоносца, 23 апреля 1444 г, ушел из монастыря и поселился с одним иноком на левом берегу реки Протвы. Вскоре на новое место к нему стала собираться братия, число иноков быстро возростало. Так был основан Пафнутьев-Боровской монастырь. Был построен новый каменный храм, вместо прежнего деревянного, в честь Рождества Пресвятой Богородицы.
Преподобный Пафнутий подавал пример братии, ведя строгую жизнь: келлия его была беднее всех, из пищи брал худшее. В понедельник и пятницу не вкушал совсем, а в среду держался сухоядения. Из общих работ преподобный избирал самые тяжелые: рубил и носил дрова, копал и поливал огород, в то же время первым приходил на церковную службу. Преподобный Пафнутий пользовался глубокой любовью и почитанием не только братии своего монастыря, но и других обителей. Промыслом Божиим в обитель преподобного был направлен 20-летний юноша Иоанн Санин. Испытав пришедшего, преподобный постриг его в иночество с именем Иосиф. Впоследствии преподобный Иосиф Волоцкий, твердо хранивший чистоту православной веры, возглавил борьбу против ереси жидовствующих, осужденной на Соборе 1504 года. На этот подвиг молодого инока благословил преподобный Пафнутий.
За неделю до смерти преподобный предсказал свою кончину. Исполнив последнюю молитву и благословив братию, он отошел к Богу 1 мая 1477 года. Общецерковное его прославление состоялось на Стоглавом соборе в 1547 году, и память его предписано праздновать 1 мая.
Преподобный Пафнутий был одним из особопочитаемых в Московском царстве святых, а на Казенном дворе Московского Кремля, где хранились не вошедшие в Крестовую палату святыни, хранились "башмачки и онучки" преподобного.
Кроме преподобного Иосифа Волоцкого некоторые другие постриженники преподобного Пафнутия местно почитались в Калужском крае: это неканонизированные старец Илия, брат преп. Пафнутия, старцы Иннокентий, Исаия, Евфимий, преподобный Никифор, Боровский чудотворец. Постриженником преподобного Пафнутия был также преподобный Левкий Волоколамский, основатель Успенской пустыни на реке Рузе. Во время его жительства в Боровском монастыре ему преподобным Пафнутием был поручен еще один его постриженник - преподобный Даниил Переяславский . В 1476 году старец и ученик удалились в пределы Волоколамские, где прожили в основанной пустыни два года. После этого преподобный Даниил ушел в Переяславль, в Богородицкий монастырь, где и подвизался 30 лет.
Из других известных постриженников Пафнутьева Боровского монастыря можно упомянуть преподобного Давида Серпуховского, учредившего в 1515 году в 23-х верстах от Серпухова Вознесенскую пустынь, а также свт. Макария, митрополита Московского, который принял пострижение и прошел монашескую школу в Пафнутьевом Боровском монастыре, где "искусил жестокое житие", и откуда был взят на архимандрию в Можайский Лужецкий монастырь.[/spoiler]

Раб божий Константин

Акафист преподобной матери нашей Пелагии.
[spoiler] Кондак 1
         
         Избранной Богом от мрака языческаго и дивными путями призванной к Свету Невечернему в Иерусалим горний прекрасный, всеславной и пре-подобной матери нашей Пелагии похвальная восписуем пения, ты же, все-честная, голубице Христова, яко имущая велие дерзновение ко Господу, от всяких нас бедственных обстояний спасай зовущих:
         Радуйся, Пелагие, голубице Христова предивная.
         
         Икос 1
         
         Ангельских чинов всещедрый Творец, Господь наш, предуведевый благое произволение сердца твоего, всечестная Пелагие, приведе тя чудесне к церкви мученика Своего Иулиана, идеже в той час блаженный Нонн епи-скоп, Божественных словес Христовых антиохийским овцам словесным трапезу предлагаше, тя, голубицу черную, евангельскою мрежею чудным образом улови. Мы же, зряще всеслезное твое моление о крещении, во уми-лении тебе зовем:
         Радуйся, голубице, из мрачной в светлую совершенная Духом Святым.
         Радуйся, голубице Христова, на высоту добродетелей возлетевшая.
         Радуйся, покаяние Христу принесшая всеусердно.
         Радуйся, яко из черной в светлую содела тя Бог покаянием.
         Радуйся, через дольнее покаяние к горней радости возлетевшая.
         Радуйся, Пелагие, голубице Христова предивная.
         
         Кондак 2
         
         Видя себе, Пелагия, глаголами Божественными из уст святителя Хри-стова Нонна побежденною, абие, в себе прийдя, к стопам сего святителя сердечне припаде, аки евангельская жена, горце рыдающе, прося Божест-веннаго просвещения, взываше Богу: Аллилуиа.
         
         Икос 2
         
         Видевше велие благолепие лица твоего, Пелагие, и пребогатые одежды и великую славу рабов твоих — блазняхуся людие. И сего ради епископ Нонн постави тя, украшенную рясно, в укор себе и причту в нерадении к благоукрашению души своея. В нощной молитве всеусердней коснувся сердца твоего, поведе его на покаяние. Мы же, добре ведуще жития твоего деяния, вопием:
         Радуйся, грехи оставившая в купели крещения.
         Радуйся, вшедшая в радость Господа.
         Радуйся, святыми твоими пресветлыми мощами нас освящающая.
         Радуйся, к тебе притекающих усердная молитвеннице.
         Радуйся, голубице, возлетевшая к евангельскому совершенству.
         Радуйся, обрученная краснейшему паче сынов человеческих — Христу.
         Радуйся, Пелагие, голубице Христова предивная.
         
         Кондак 3
         
         Силою Божественныя благодати Крещения безпечально оставила еси вся уметы мира сего грешнаго и развращеннаго, все богатство твое земное, яко сор, среди града пожгла еси, попаляя тем терние своих прегрешений, поя Святых Святейшему Слову: Аллилуиа.
         
         Икос 3
         
         Имущи велию благодать силы Божия, женское свое естество покорила еси мужеской крепости, прикровенно оставила еси Антиохию, взыскуя гра-да вышняго. За таковое величие души твоея, мати, приими от нас похвалы сия:
         Радуйся, яко жилище Духа Святаго была еси.
         Радуйся, темже Духом Божиим на подвиги дивно наученная.
         Радуйся, яко пути гибельнаго всеусердно убегла еси.
         Радуйся, покаяния красото.
         Радуйся, святых радование.
         Радуйся, за нас земных молитвеннице.
         Радуйся, Пелагие, голубице Христова предивная.
         
         Кондак 4
         
         Буря велия бесовской ярости бе воздвижена на тя, славная мати Пела-гие, егда святитель и чудотворец Илиопольския Церкве Нонн и тя, и седмь святителей к трапезе, ради трудов понесенных пригласи: беси начаху слезы проливати. Ты же знамением креста Христова хитрость диавола победила еси, с собором святителей поюще: Аллилуиа.
         
         
         
         
         Икос 4
         
         Слышаша иноцы града Божия Иерусалима, яко дарова Господь в не-кой малей келии новаго подвижника, честнаго инока Пелагия, радовахуся, Бога благодаряще, Божиим же промыслом не ведяху, яко муж сей есть жена Пелагия, яже от Антиохии. Егда же по успении твоем славная тайна сия яв-лена бысть, похвалами ублажаху тя похвалами сими:
         Радуйся, красоту земную презревшая.
         Радуйся, красоту нетленную небесную улучившая.
         Радуйся, яко вседушно поискала еси небеснаго восхождения.
         Радуйся, яко дивный Маргарит — Христа обрела еси.
         Радуйся, яко вся заповеди Того крепчайше возлюбила еси.
         Радуйся, Пелагие, голубице Христова предивная.
         
         Кондак 5
         
         Боготечная звезда, Божиим мановением водима, была еси, от Антиохии до града Иерусалима, голубице Христова Пелагие. Взошла бо еси на гору святую Елеонскую, гору милости Божия, идеже умилостивила еси Господа, три лета подвизаяся в подвизе велицем, денно и нощно поюще Богови: Ал-лилуиа.
         Икос 5
         
         Видевше блаженная Антиохийския церкви диаконисса Романа, яко дщи ея духовная Пелагия тайно удалися, восплакашеся зело, но абие уте-шена бысть прозорливым Нонном, яко та, отыде на гору Елеонскую, спаса-тися конечне. Мы же величаем, мати, твое восхождение на гору добродете-ли, поюще:
         Радуйся, обретшая ключ разумения духовнаго.
         Радуйся, тем отверзшая двери райския.
         Радуйся, со Христом вечно царствующая.
         Радуйся, и нас молитвами своими привлекающая.
         Радуйся, смиренная голубице Христова.
         Радуйся, Пелагие, голубице Христова предивная.
         
         Кондак 6
         
         Проповедник твоего жития и блаженной кончины явися благоговей-ный во диаконех Иаков, егда послан бысть к тебе, мати, с молитвенным це-лованием о Христе от чудотворца равноапостольнаго Нонна. Сего же чест-наго диакона сподоби Бог видети тя, беседовати к тебе и погребение твори-ти святаго тела твоего, с сонмом постников Палестины псаломски поюще: Аллилуиа.
         Икос 6
         
         Вышняго Царствия ищущи, воды страстей и греха прелетела еси, голу-бице Христова Пелагие; научи и нас, любовию тя почитающих и радост-но память твою совершающих, усердно возлюбити образ покаяния, по-ющих с любовию тебе тако:
         Радуйся, кроткая Христова агнице.
         Радуйся, яко усердно возлюбила еси Агнца, вземшаго грехи всего мира.
         Радуйся, Господа на милость к нам преклоняющая.
         Радуйся, в мире подвизающимся поможение.
         Радуйся, Церкве утверждение.
         Радуйся, святителей радование.
         Радуйся, Пелагие, голубице Христова предивная.
         
         Кондак 7
         
         Хотящи до конца дней земнаго жития твоего во единем Христе пребы-ти, место святое избрала еси для подвигов твоих, святая голубице Пелагие, идеже пред Своим страданием за мир Спаситель царски прехождаше с детьми еврейскими, носящими вайи во время оно, поюще Богу: Аллилуиа.
         
         Икос 7
         
         Дивная среди жен святых поистине явилася еси, святая Пелагие, егда, стяжания своя, ради Христовых нищих чрез руце церковнаго эконома отда и рабы своя свободи. Сими бо добрыми делами воистину свободну себе со-твори от бремени тяжкаго лихоимства. Помолися за ны, да сердца наша не прилепляются паче потребнаго к земным вещем, губящим души наша, тебе поющих:
         Радуйся, честных иноков и инокинь присное собеседование.
         Радуйся, чистых дев доброе уневещение.
         Радуйся, честная похвало благоговейных старцев.
         Радуйся, прекрасно вшедшая в горний Иерусалим.
         Радуйся, от козней диавольских нас охраняющая.
         Радуйся, Пелагие, голубице Христова предивная.
         
         Кондак 8
         
         Странность некая, но Богу зело прелюбезная, является: како чадо гре-ха, вспять не озираясь, яко жаждущий елень на водныя источники бегу-щий, спешит честная Пелагия к источнику покаяния, сим научая нас вся красная источники оставити земная, поюще с нею сладце: Аллилуиа.
         
         Икос 8
         
         Весь сладость, весь радость духовная бысть тебе Господь Иисус Хри-стос, честная Пелагие, молящейся ти в затворе и слезы проливающей. Сему душеполезному плачу нас научи, да вечнаго загробнаго избегнем плача, те-бе, нашей молитвеннице, в радости поюще:
         Радуйся, веру в пресладкаго Господа вкусившая.
         Радуйся, радостию небесною почтенная.
         Радуйся, омывшая грехопадения слезами.
         Радуйся, научающая и нас молитися слезно.
         Радуйся, слезами умиления радость вечную получившая.
         Радуйся, Пелагие, голубице Христова предивная.
         
         Кондак 9
         
         Всяк Ангельский чин удивися, како Пелагия-Маргарита гордость на кротость преложи и диавола посрами. Угаси, мати чудная, пламень гордо-сти сердца нашего, да благодарне чистым сердцем поем Богу Спасителю нашему: Аллилуиа.
         Икос 9
         
         Витии человечестии не возмогут достойнаго воспети величания в честь твоего честнаго жития, мати преподобная. Токмо Ангели Божии быша сви-детелие слез твоих и подвигов, святая. Мы же, человецы, со Ангелы ра-дующеся о таковей подвижнице Божией, воспеваем ей:
         Радуйся, течением слез твоих пламень мыслей бесовских угасившая.
         Радуйся, исправления живой образе.
         Радуйся, ныне в веселии живущая на небеси.
         Радуйся, в венце Нонна святителя драгий маргарит.
         Радуйся, Пелагие, голубице Христова предивная.
         
         Кондак 10
         
         Спасти хотя вещь безсмертную — душу, плоть твою духови покорила еси, всехвальная голубице Пелагие; постом, бдением и безпрестанными мо-литвами горняго мира достигла еси, предвкушая неизреченныя сладости райския, по слову небошественнаго Павла, с ним же Богу воспевая: Алли-луиа.
         
         Икос 10
         
         Стена тверда, яко каменная, бысть вера, любовь и надежда твоя, мати преподобная, ко Христу, Его же ради двери затвора твоего камением утвер-див, на камени веры дерзновенно стала еси. И нас в таковей крепкой вере в Бога утверди, величающих тя приветствием сим:
         Радуйся, чудно уловленная мрежею проповеди.
         Радуйся, вечную радость на небеси обретшая.
         Радуйся, цвете благоуханный земли палестинския.
         Радуйся, добре утвержденная в обетах просвещения.
         Радуйся, упованием непосрамленная.
         Радуйся, жемчужина Церкве Христовой.
         Радуйся, Пелагие, голубице Христова предивная.
         
         Кондак 11
         
         Пение всякое побеждается, егда поем песни похвальныя в честь и па-мять твою, преподобная мати Пелагие, како дивно вошла еси в храм свята-го Христова мученика Иулиана, како срете тя добрый пастырь стада Хри-стова, божественный святитель Нонн, како воплем велиим своим раство-рила еси желание крайнее помилованною быти, поюще Богу: Аллилуиа.
         
         Икос 11
         
         Возсияла еси людям боголюбивым новая звезда от святыя горы Елеон-ския, преподобная и всечестная мати Пелагие, на радость и веселие рода христианскаго, приносящаго тебе таковая:
         Радуйся, воспеваемая сонмом иноков.
         Радуйся, прославляемая Церковию Вселенскою.
         Радуйся, радосте скорбящих о гресех и радующихся о спасении.
         Радуйся, демонов рыдание.
         Радуйся, увенчанная десницею Вседержителя.
         Радуйся, Пелагие, голубице Христова предивная.
         
         Кондак 12
         
         Благодать и велию милость испроси нам у Подателя всякия благости Господа, мати наша преподобная, моли милосердие Божие о милости Его к нам в жизни сей временней, и жизнь вечную твоим ходатайством нам ис-проси, тебе ублажающим и Богу вопиющим всегда: Аллилуиа.
         
         
         Икос 12
         
         Поюще святую память твою, воспоминаем дивное обращение твое ко Господу Богу, ублажаем честныя подвиги твоя, воспеваем святое успение твое, прославляем и преселение твое в небесныя обители, дивная невесто Христова Пелагие, сия воспевая тебе:
         Радуйся, благую часть Христову избравшая.
         Радуйся, иго Христово с любовию понесшая.
         Радуйся, в час скорбей и напастей нам помогающая.
         Радуйся, носящих имя твое святое всегда окрыляющая.
         Радуйся, в Христовой радости пребывающая.
         Радуйся, Пелагие, голубице Христова предивная.
         
         Кондак 13
         
         О, святая и преподобная мати наша Пелагие! Приими сие малое наше молитвенно-хвалебное приношение, в честь и память святых подвигов тво-их, от нашея любве тебе приносимыя. Да молитвами твоими души наша убелим белилом покаяния, вводящим в жизнь вечную, Богу поюще: Алли-луиа.
         (Сей кондак чтется трижды;
         посем икос 1 и кондак 1)
         
         МОЛИТВА
         Преподобной матери нашей Пелагии.
         
         О, святая и богомудрая матерь наша преподобная Пелагие! Ты во еди-нем часе возлюбившая Господа Иисуса, все земное оставила еси невозврат-но, устремилася еси к великим и спасительным подвигам, яже и совершила еси евангельски во много крат! О, приснопамятная, ты для иночествую-щих явилася еси красотою духовною, ты добре усвоила еси непорочное жи-тие, ты на земли возлюбила еси жизнь Ангелов и непрестанно в затворе воспевала еси Того, Иже по велицей Своей милости укрепил есть женскую немощь для борьбы с коварным врагом спасения человеческаго. Сего ради днесь, в день твоей светлой памяти, мы ублажающе тя, просим: пролей твою всесильную молитву о нас грешных пред престолом Святыя Троицы о милости Божией к нам еще зде пребывающим в плачевной юдоли земней, о еже достигнути и нам твоими молитвами жизни в селениях праведных, идеже ты пребываеши со всеми святыми во веки веков. Аминь.[/spoiler]