Молитвослов

Автор Раб божий Константин, марта 10, 2012, 02:13:14

« назад - далее »

Раб божий Константин

Акафист святителю Феофану, Затворнику Вышенскому иной.
[spoiler]Тропарь, глас 8

Православия наставниче, благочестия учителю и чистоты, Вышенский подвижниче, святителю Феофане богомудре, писаньми твоими слово Божие изъяснил еси и всем верным путь ко спасению указал еси, моли Христа Бога спастися душам нашим.

 

Кондак, глас 5

Богоявлению тезоименитый, святителю Феофане, ученьми твоими многи люди просветил еси, со ангелы ныне предстоя Престолу Святыя Троицы, моли непрестанно о всех нас.

 

Кондак 1

Избранный Господем Церкве Русския светильниче, изрядный подвижниче и истинный служителю Христов, богомудре святителю Феофане! Восхваляем тя любовию и чтим подвиги и труды твоя, имиже верным людем добре послужил еси, и в затворе пребывая, благодатными ученьми путь спасения начертал еси. Ныне же, престолу Божию предстоя, о нас молися, зовущих ти:

Радуйся, святителю Феофане, премудрый учителю и христианскаго жития наставниче.

 

Икос 1

Ангельския чистоты взыскуя и велию любовь ко Господу имея, подвиг иноческаго жития подъял еси, святителю предивный. Мудрости же дар, от Господа ти данный, сторицею умножив, людем во спасение послужил еси. Сего ради и мы с любовию вопием ти:

Радуйся, паче всего земнаго Господа возлюбивый;

Радуйся, на Него единаго все упование возложивый.

Радуйся, от младенчества сердце свое Господеви предавый;

Радуйся, от юности разум свой Божиею премудростию напитавый.

Радуйся, ангельскаго жития ревнителю;

Радуйся, Духа Святаго стяжателю.

Радуйся, на ловитву человеков Богом предъизбранный;

Радуйся, яко лучезарный светильник, Господем возженный.

Радуйся, святителю Феофане, премудрый учителю и христианскаго жития наставниче.

 

Кондак 2

Видев, яко всякая житейская сладость бывает печали причастна, святче Феофане, суету сует возненавидел еси и красная мира сего отвергл еси, вседушно Богу себе предав, поя Ему: Аллилуиа.

 

Икос 2

Разумением книжныя премудрости обильно от Бога измлада одаренный, ум свой чтением святых писаний питал еси, обретая в них силу велию и свет духовный. Мы же, ведуще сие, со умилением к тебе взываем:

Радуйся, благочестивых родителей отроча богоизбранное;

Радуйся, сокровище целомудрия, благодатию свыше исполненное.

Радуйся, издетска к Богу любовию пламеневый;

Радуйся, от юности к послушанию прилежавый.

Радуйся, кротостию и незлобием Господу подражавый;

Радуйся, путь девства и чистоты избравый.

Радуйся, иноческаго жития всем сердцем возжелавый;

Радуйся, всего себе на служение Господеви предавый.

Радуйся, святителю Феофане, премудрый учителю и христианскаго жития наставниче.

 

Кондак 3

Сила Божия тя, святителю Феофане, немощный сосуд человеческий, источник премудрости содела и пастыря добраго людем дарова, о спасении их душу полагающаго и Господу непрестанно вопиющаго: Аллилуия.

 

Икос 3

Имеяй в сердце твоем единаго Господа, ты угодниче Божий, с радостию велиею вся сокровища души твоея и разума на служение Церкви святей отдал еси, уча и наставляя вся прибегающия к тебе. Мы же, ублажающе труды твоя, вопием ти сице:

Радуйся, велиею мудростию Господем напоенный;

Радуйся, в трудех подвижничества испытанный.

Радуйся, архиерею, Богом избранный;

Радуйся, молитвенниче о нас ко Господу неустанный.

Радуйся, святительскаго сана смиренный носителю;

Радуйся, богомудрия верный учителю.

Радуйся, душевредных расколов искоренителю;

Радуйся, веры православныя ревнителю.

Радуйся, святителю Феофане, премудрый учителю и христианскаго жития наставниче.

 

Кондак 4

Бурею смятения исполнишася чада паствы твоея, хотящу ти, святителю Феофане, подвигу затвора себе посвятити, последи же возрадовахуся, видяще тя наипаче о спасении их пекущася, и воспеша Богу: Аллилуия.

 

Икос 4

Слышавше людие о вселении твоем в пустынь Вышенскую стекахуся к тебе и, почитающе тя пастыря добраго, просиша молитися о них и ко спасению наставити. Мы же, видяще сие, приносим ти похвалы сицевыя:

Радуйся, яко отец чадолюбивый пастве твоей бывый;

Радуйся, непрестанно о ней попечение имевый.

Радуйся, пастырю, душу твою за овцы полагавый;

Радуйся, неустанно спасению их содействовавый.

Радуйся, тишину и богомыслие наипаче возлюбивый;

Радуйся, благою волею себе от мира затворивый.

Радуйся, иноков любвеобильный наставниче;

Радуйся, обители Вышенския неугасимый светильниче.

Радуйся, святителю Феофане, премудрый учителю и христианскаго жития наставниче.

 

Кондак 5

Боготечная звезда явился еси, святителю досточудне, во обители бо Вышенстей в подвизех телесных и духовных пребывая, образ добрый был еси христолюбивой братии, на тя взирающей, научая всех немолчно пети Господу: Аллилуия.

 

Икос 5

Видевше братия тя, во смирении и кротости подвиг иноческий совершающа, прихождаху к тебе и назидахуся. Такожде и мы, почитающе тя истиннаго избранника Божия, вопием сицевая:

Радуйся, источниче любве ко Господу неизсякаемый;

Радуйся, кладезю смирения и кротости, жаждущих напаяющий.

Радуйся, житнице, пищею духовною всех насыщающая;

Радуйся, свеще, светом веры озаряющая.

Радуйся, воздержания добрый рачителю;

Радуйся, спасения душ усердный попечителю.

Радуйся, Православия проповедниче неустанный;

Радуйся, крине райский, в пустыне процветший.

Радуйся, святителю Феофане, премудрый учителю и христианскаго жития наставниче.

 

Кондак 6

Проповедник немолчный и вещатель истин Божиих был еси во святительстем служении, просвещая и наставляя паству твою, досточудне Феофане, и, в затворе сый, не оставил еси благодатными словесы твоими всех, притекающих к тебе, подвизая пети Богу: Аллилуиа.

 

Икос 6

Возсия, яко звезда пресветлая, мудрость твоя, дивный служителю Христов: Божиим бо изволением из затвора, тя сокрывшаго, явишася потоцы живых словес твоих и открыся цельбоносный источник благодатных учений, утоляяй всякаго жаждущаго и с верою к нему припадающаго. Мы же взываем ти сице:

Радуйся, устнами твоими мудрость Божию вещавый;

Радуйся, еюже жаждущия напоивый.

Радуйся, в подвизех иноческаго жития неутомимый;

Радуйся, столпе православия непоколебимый.

Радуйся, обычаев греховных мудрый искоренителю;

Радуйся, к добродетели неустанный водителю.

Радуйся, душ наших целителю;

Радуйся, благочестия нашего окормителю.

Радуйся, святителю Феофане, премудрый учителю и христианскаго жития наставниче.

 

Кондак 7

Хотя Царствия Божия достигнути, ты, святый отче, отреклся еси мира, и обрел еси благодать Духа Святаго, и с любовию служил еси людем, подражая Пастыреначальнику Христу и поя Тому: Аллилуия.

 

Икос 7

Новаго подвижника и угодника Христова, смирения и кротости исполненнаго, видяще тя людие, с надеждею устремишася в пустынь Вышенскую, чающе твоея благодатныя помощи. Такожде и мы, помощи от тебе просяще, вопием таковая:

Радуйся, кротостию духа твоего многия к Богу обративый;

Радуйся, умы помраченныя просветивый.

Радуйся, чистоту ангельскую на земли стяжавый;

Радуйся, страждущия твоею любовию уврачевавый.

Радуйся, незлобия дивный наставниче;

Радуйся, благочестия всесветлый светильниче.

Радуйся, к покаянию всех призываяй;

Радуйся, помощи твоея просящих не оставляяй.

Радуйся, святителю Феофане, премудрый учителю и христианскаго жития наставниче.

 

Кондак 8

Странный и дивный подвиг явил еси, святителю, в житии твоем: в трудех и непрестаннем богомыслии пребываяй, разума духовнаго сокровище стяжал еси и писаньми твоими Церкви усердно послужил еси. Мы же, видяще сие, во умилении сердец наших благодарно поем Богу: Аллилуиа.

 

Икос 8

Всем вся являешися, святителю Божий: пастырь и отец, учитель и наставник и истинный проповедник, писания бо твоя во всех градех и весех до ныне вопиют немолчным благовестием. Сего ради мы, чада твоя духовныя, с любовию глаголем ти:

Радуйся, росою Духа Святаго напоенный;

Радуйся, светом благодати Божия осененный.

Радуйся, сокровище нетленное стяжавый;

Радуйся, деянием апостольским поревновавый.

Радуйся, к богопознанию путь указующий;

Радуйся, мудрость благодатную взыскующий.

Радуйся, Церкве Русския процветение;

Радуйся, святых отец украшение.

Радуйся, святителю Феофане, премудрый учителю и христианскаго жития наставниче.

 

Кондак 9

Всяк час привременнаго жития твоего, святителю, единому на потребу работал еси, и душу твою храмину чисту Духа Святаго соделал еси, возгревая сердце твое непрестанною молитвою Иисусовою и воспевая Господу: Аллилуиа.

 

Икос 9

Вития златовещанный, кроткий и мудрый явился еси всем, внимавшим тебе с верою, и силою словес твоих научал еси правде Божией. Сего ради приими от нас, блаженне отче, восхваления сицевая:

Радуйся, святителю Божий, смиренный и кроткий;

Радуйся, пастырю благий и чадолюбивый.

Радуйся, земли Российския Златоусте;

Радуйся, богоявлению тезоимените.

Радуйся, душ заблудших истинный путеводителю;

Радуйся, печальных скорый утешителю.

Радуйся, немощным в вере непоколебимое утверждение;

Радуйся, унывающим в трудех мнозех ободрение.

Радуйся, святителю Феофане, премудрый учителю и христианскаго жития наставниче.

 

Кондак 10

Спасения путь от греховных тенет чадом Божиим начертал еси, угодниче Христов, сказуя о тайнах брани невидимыя, и венец вожделенный жаждущим спасения показал еси, призывая благодарно пети Богу: Аллилуиа.

 

Икос 10

Стена и защищение стада Христова от волков, губящих е, явишася богомудрая писания твоя, святителю Божий, имиже ограждаеши верных на пути ко спасению. Мы же, просвещаемии ученьми твоими, благоговейно взываем ти сице:

Радуйся, правило веры;

Радуйся, наставниче премудрый.

Радуйся, учителю благочестия;

Радуйся, искоренителю нечестия.

Радуйся, светильниче пресветлый;

Радуйся, проповедниче дерзновенный.

Радуйся, яко сеятель добрый ниву Христову возделавый;

Радуйся, яко кокош, чада твоя охраняющий.

Радуйся, святителю Феофане, премудрый учителю и христианскаго жития наставниче.

 

Кондак 11

Пение всехвальное приносим ти, святителю и ублажаем тя, прославившаго житием и подвиги твоими святое имя Творца и Бога нашего. Сподоби и нас молитвами твоими благонравное житие препроводити, да вкупе с тобою воспоим Тому: Аллилуиа.

 

Икос 11

Светозарное житие твое, предивный Затворниче, не скрыся от ищущих правды Божией. Благий же конец твой безмятежный и мирный показа тя истинный сосуд Божией благодати. Мы же едиными усты со умилением глаголем ти:

Радуйся, чистоты душевныя и телесныя сосуде благословенный;

Радуйся, до конца Господу послуживый.

Радуйся, по кончине твоей блаженства вечнаго удостоивыйся;

Радуйся, Царствие Божие наследовавый.

Радуйся, обители Вышенския дивное украшение;

Радуйся, земли Тамбовския и Шацкия просвещение.

Радуйся, паствы рязанския похвало и радование;

Радуйся, душ наших попечение.

Радуйся, святителю Феофане, премудрый учителю и христианскаго жития наставниче.

 

Кондак 12

Благодатию Божиею преизрядно озаренный и пастве твоей мудре и предобре послуживый, дивный и кроткий святителю, не престани о нас ходатайствовати пред Господом на Небеси, идеже предстоиши в немолчнем славословии, со ангелы взывая Тому: Аллилуиа.

 

Икос 12

Поюще подвиги твоя, со упованием припадаем к честным мощем твоим (или иконе твоей) святителю Божий, и молим тя, небеснаго покровителя нашего и великаго о нас предстателя пред Престолом Господа Славы, умиленно взывающе:

Радуйся, угодниче Божий преизрядный;

Радуйся, подвижниче Христов предивный.

Радуйся, предстателю крепкий на тя уповающих;

Радуйся, заступниче скорый тя призывающих.

Радуйся, друже Христов и любимиче Божий;

Радуйся, ходатаю теплый спасения душ наших.

Радуйся, целомудренных усердный хранителю;

Радуйся, в скорбех наших утешителю.

Радуйся, святителю Феофане, премудрый учителю и христианскаго жития наставниче.

 

Кондак 13

О, богомудрый учителю, земли Русския похвало и украшение, святителю отче Феофане, кроткий и теплый наш заступниче! Приими от нас малое сие моление, тебе приносимое, и душ наших благодарное восхваление. Не забуди нас, грешных, в молитвах твоих, да уповающе на тя, непрестанно взываем Господу Сил: Аллилуиа.

Трижды.

 

Икос 1

Ангельския чистоты взыскуя и велию любовь ко Господу имея, подвиг иноческаго жития подъял еси, святителю предивный. Мудрости же дар, от Господа ти данный, сторицею умножив, людем во спасение послужил еси. Сего ради и мы с любовию вопием ти:

Радуйся, паче всего земнаго Господа возлюбивый;

Радуйся, на Него единаго все упование возложивый.

Радуйся, от младенчества сердце свое Господеви предавый;

Радуйся, от юности разум свой Божиею премудростию напитавый.

Радуйся, ангельскаго жития ревнителю;

Радуйся, Духа Святаго стяжателю.

Радуйся, на ловитву человеков Богом предъизбранный;

Радуйся, яко лучезарный светильник, Господем возженный.

Радуйся, святителю Феофане, премудрый учителю и христианскаго жития наставниче.

 

Кондак 1

Избранный Господем Церкве Русския светильниче, изрядный подвижниче и истинный служителю Христов, богомудре святителю Феофане! Восхваляем тя любовию и чтим подвиги и труды твоя, имиже верным людем добре послужил еси, и в затворе пребывая, благодатными ученьми путь спасения начертал еси. Ныне же, престолу Божию предстоя, о нас молися, зовущих ти:

Радуйся, святителю Феофане, премудрый учителю и христианскаго жития наставниче.

 

Молитва

О, святителю отче Феофане, архиерею преславный и предивный затворниче, Божий избранниче и Тайн Христовых служителю, богомудрый учителю и апостольских словес изрядный изъяснителю, отеческих добротолюбных сказаний списателю, христианскаго благочестия изящный проповедниче и жизни духовныя искусный наставниче, подвигов монашеских усердный ревнителю и всем людем благодати ходатаю! Ныне к тебе, на Небесех Богу предстоящему и о нас молящемуся припадаем и сице взываем: испроси у Всещедраго Бога Церкви Российстей и стране нашей мир и благостояние, святителем Христовым – истины Божественныя достойное охранение, паствы доброе окормление, лжеучителей и еретиков изрядное посрамление, подвизающимся – смирение, страх Божий и чистоту душевную и телесную, учителем – боговедение и мудрость, учащимся – ревность и помощь Божию. И всем православным – утверждение на пути ко спасению, да вкупе с тобою прославим Божию Силу и Премудрость Господа нашего Иисуса Христа, со Безначальным Его Отцем, с Пресвятым, Благим и Животворящим Его Духом ныне и присно, и во веки веков. Аминь.[/spoiler]

Раб божий Константин

АКАФИСТ

ПРЕПОДОБНОМУ ОТЦУ НАШЕМУ ФЕОФАНУ (РЫХЛОВСКОМУ)
[spoiler]Кондак 1

Избранному верному рабу Христову и пастырю доброму, старцу смиренному и милосердному, преподобному отцу нашему Феофану, подвиг многотруднаго жития богоугодно совершившему, и в обители Отца Небеснаго достойно вшедшему, умиленное с похвалами радостное приносим пение: ты же, яко имеяй велие дерзновение ко Господу, поминай нас, недостойных чад твоих, любовию зовущих:

Радуйся, преподобне отче Феофане, молитвенниче наш любвеобильный.



Икос 1

Ангельскому житию от юности ревнуя, отче Феофане, во обитель Рыхловскую святителя Николая вселился еси, идеже страх Божий стяжав, в подвизех иноческаго послушания усердно подвизаяся, ангел во плоти явился еси. Сего ради вопием ти:

Радуйся, Бога Отца рабе верный и смиренный;

радуйся, Сына Божия воине добропобедный.

Радуйся, Духа Святаго сосуде избранный;

радуйся, непорочность и чистоту стяжавый.

Радуйся, Святителя Николая любимиче;

радуйся, обители его достойный насельниче.

Радуйся, райскаго блаженства наследниче;

радуйся, ангельских ликов собеседниче.

Радуйся, преподобне отче Феофане, молитвенниче наш любвеобильный.



Кондак 2

Видев усердие твое, святе Феофане, в подвизех иноческих, Господь избра тя, яко вернаго раба Своего, и, ради укрепления в вере и благочестии, болезнями посеща тя, подавая послежде исцеления, да возрастаеши в мужа совершенна, поя Богу: Аллилуиа.



Икос 2

Разум богопросвещен стяжав и в трудех добродетельных преуспевая, сподобился еси слышати таинственный глас, во иноки тя призывающий. Мы же богоугодному житию твоему дивящеся и последовати ему тщащеся, со умилением зовем:

Радуйся, веру, надежду и любовь стяжавый;

радуйся, Христа паче всех благ возлюбивый.

Радуйся, братии монастырской с любовию послуживый;

радуйся, благое иго Христово усердно понесый.

Радуйся, в болезнех воле Божией себе вручавый;

радуйся, исцеления верою от Господа получавый.

Радуйся, образе кротости и смирения;

радуйся, учителю целомудрия и терпения.

Радуйся, преподобне отче Феофане, молитвенниче наш любвеобильный.



Кондак 3

Сила благодатная Нерукотвореннаго Образа Христа Спасителя многажды спасаше и исцеляше тя, старче Феофане, сего ради в годину лютую Образ сей спасл еси, пред ним же до конца дней твоих усердно воспевал еси Христу Богу: Аллилуиа.



Икос 3

Имея любовь велию к Матери Господа, богомудре Феофане, чистоте, смирению и терпению Ея подражая, посещения Царицы Небесныя сподобился еси, за еже ублажаем тя тако:

Радуйся, по Христе Спасе Матерь Его возлюбивый;

радуйся, житием преподобным Ей угодивый.

Радуйся, все упование на Заступницу усердную возлагавый;

радуйся, в молитвах прилежно пред Ней предстоявый.

Радуйся, посещения Матери Света удостоивыйся;

радуйся, многажды Ея заступления сподобивыйся.

Радуйся, Еяже лицезрения ныне наслаждаешися;

радуйся, Еяже покровом и мы покаяния ради сохраняемся.

Радуйся, преподобне отче Феофане, молитвенниче наш любвеобильный.



Кондак 4

Буря неистовых гонений постиже корабль Церкви Христовы, обитель Рыхловская поруганию предадеся, иноцы изгнани быша; тогда и ты, отче преподобне, со инеми в зимний мраз гоним был еси, воспевая Подвигоположнику Христу: Аллилуиа.



Икос 4

Слышав глагол Христов, яко в мире скорбни будете, и яко возложат на вы руки и ижденут, и будете ненавидими от всех имене Моего ради, ты в руце Божии себе предал еси, терпением спасая душу свою. Сего ради умильно зовем ти:

Радуйся, изгнание Христа ради претерпевый;

радуйся, поношения смиренно подъявый.

Радуйся, за Истину люто гонимый;

радуйся, всяк зол глагол кротце сносивый.

Радуйся, веры Христовы твердый исповедниче;

радуйся, терпения в скорбех проповедниче.

Радуйся, от любве Христовы не разлучивыйся;

радуйся, блаженства райскаго причастивыйся.

Радуйся, преподобне отче Феофане, молитвенниче наш любвеобильный.



Кондак 5

Боготечная звезда – Христов Святитель Николай во сне явися тебе, всеблаженне Феофане, со Святителем Феодосием и преподобным Серафимом, пред Царем Господем в беседе возлюбленным своим нарече тя и в храме во имя свое восхоте имети тя, да тамо поеши Богу: Аллилуиа.



Икос 5

Видя новыя скорби в закрытии святых храмов, ты, отче Феофане, по весям странствуя, ближним трудами служил еси, тайно чад своих духовных окормляя. Таже четырежды яко узник увозим был еси, и в реце зимою потопляем, от всех бед чудесно Господем спасаем был еси. Мы же на сих путех припадающе к тебе, зовем:

Радуйся, Святителем Николаем возлюбленный;

радуйся, Святителем Феодосием возжеленный.

Радуйся, преподобному Серафиму уподобивыйся;

радуйся, с преподобным преподобен явивыйся.

Радуйся, чрез огнь скорбей и воду бед прошедый;

радуйся, в покой вечный радостно вшедый.

Радуйся, Господем неврежден в напастех пребывый;

радуйся, мучениче безкровный и долготерпеливый.

Радуйся, преподобне отче Феофане, молитвенниче наш любвеобильный.



Кондак 6

Проповедник Истины словом и житием явился еси, преподобне Феофане, егда бо храмы Божии открывахуся, тогда службы Господеви совершая, верных ко спасению наставлял еси, даром прозорливости и благодатныя помощи приходящих утешая и непрестанно поя Богови: Аллилуиа.



Икос 6

Возсиял еси на свещнице церковнем богоугодным житием, пастырю наш добрый, постом, молитвами, воздержанием плоть свою умерщвляя и духови покоряя, образ верным в слове, в любви, в вере, во всем житии твоем был еси. Сего ради приими от нас похвалы сия:

Радуйся, блаженне, яко непорочен пред Богом ходил еси;

радуйся, яко многи плоды духовныя в себе возрастил еси.

Радуйся, олтаря Господня верный служителю;

радуйся, Божественныя литургии благоговейный совершителю.

Радуйся, преподобным Лаврентием ангелом нареченный;

радуйся, во Царствии Небеснем ему сопричтенный.

Радуйся, скорби и радости с ним разделявый;

радуйся, Свет невечерний в себе стяжавый.

Радуйся, преподобне отче Феофане, молитвенниче наш любвеобильный.



Кондак 7

Хотя Владыка Христос образ смирения и терпения нам тобою явити, отче преподобне, попусти скорбями многими тя испытати, да яко злато в горниле очистишися, и нас терпением и смирением научиши побеждати вся искушения и благодарно воспевати Победителю Христу: Аллилуиа.



Икос 7

Новое чудо яви Господь чрез Архистратига Михаила, иже весною на дивней колеснице везе тя, достохвальне Феофане, верху воды и леда на иный брег Десны. Сему дивящеся, воспеваем ти тако:

Радуйся, Архистратига воинств небесных лицезревый;

радуйся, со безплотным яко ангел беседовавый.

Радуйся, Начальником вышних сил на колеснице возимый;

радуйся, служения ангельскаго достоин бывый.

Радуйся, святость еще в житии стяжавый;

радуйся, преподобием в подвиге просиявый.

Радуйся, на вечери Христовой друже избранный;

радуйся, помощниче крепкий, Богом нам данный.

Радуйся, преподобне отче Феофане, молитвенниче наш любвеобильный.



Кондак 8

Странствие земное богоугодно совершив, старче преподобне Феофане, изгнания, лишения, беды и скорби многи претерпевал еси, Подвигоположнику Христу подражая и язвы Господа на теле своем нося, выну воспевал еси Ему: Аллилуиа.



Икос 8

Весь был еси любовь неоскудевающая, отче преподобне, всем радость даровал еси, скорбящих утешая, недужных врачуя, от бед избавляя, паству свою в вере православней сохраняя. О сем духовная чада твоя с любовию возглашают:

Радуйся, в беде сущим скорый помощниче;

радуйся, скорбящих и обидимых заступниче.

Радуйся, недугов душевных и телесных целителю;

радуйся, пред Богом теплый наш предстателю.

Радуйся, ближних возлюбивый и всем вся бывый;

радуйся, столпе Православия непоколебимый.

Радуйся, стадо словесное от волков сохраняяй;

радуйся, любовию своею присно нас согреваяй.

Радуйся, преподобне отче Феофане, молитвенниче наш любвеобильный.



Кондак 9

Всех мучеников на небеси посетил еси пред блаженною кончиною твоею, дивный отче Феофане, достигнув старости глубокия, с ними же в обители Отца Небеснаго вселился еси, прешед от смерти в живот вечный, идеже со всеми святыми поеши Богу: Аллилуиа.



Икос 9

Ветия многовещанныя дивных дел твоих, отче всеблаженне, якоже в житии, тако и по отшествии твоем, явишася вси приходящии к тебе с верою, имже, яко отец чадолюбивый, помощь подаеши. Сего ради благодарни суще, радостная зовем ти:

Радуйся, благочестно течение жизни твоея скончавый;

радуйся, дух твой в руце Господа предавый.

Радуйся, по отшествии твоем нас не оставляющий;

радуйся, мощами святыми с нами пребывающий.

Радуйся, прошения наша с любовию приемлющий;

радуйся, пред Господем о нас ходатайствующий.

Радуйся, пастырем образе благодатный;

радуйся, пасомым утешителю всехвальный.

Радуйся, преподобне отче Феофане, молитвенниче наш любвеобильный.



Кондак 10

Спасение вечное унаследовал еси, блаженне Феофане, и о спасении нашем Господа умоляеши, да в покаянии и в житии по вере житейское море преплывше, достигнем тихаго пристанища, идеже несть болезнь, ни печаль, ни воздыхание, но вечная песнь: Аллилуиа.



Икос 10

Стена и покров еси всем с верою притекающим к тебе, отче чадолюбивый, сего ради молим тя: стеною молитв твоих и покровом любви твоея сохраняй нас от всех бед и напастей, от враг видимых и невидимых, да зовем ти усердно:

Радуйся, Пасхи священнейшей на небеси причащающийся;

радуйся, славы присносущныя наслаждающийся.

Радуйся, пастырю добрый Христова стада;

радуйся, в бедах сущим стена и ограда.

Радуйся, вдовиц и сирот отец чадолюбивый;

радуйся, скорый заступниче обидимых и гонимых.

Радуйся, яко предстательством твоим от бед сохраняемся;

радуйся, яко молитвами твоими жизни вечныя сподобляемся.

Радуйся, преподобне отче Феофане, молитвенниче наш любвеобильный.



Кондак 11

Пение молитвенное умом, сердцем и всем житием твоим, яко фимиам благовонный, Господеви возносил еси, дивный отче Феофане, сего ради пения ангельскаго во славе вечней сподобился еси, воспевая с мудрыми девами Жениху душ наших: Аллилуиа.



Икос 11

Светильник неугасимый во мраце жития сущим был еси, святе Феофане, светом веры Христовы всех просвещая и на путь спасительный наставляя. Ныне же яко солнце просветился еси в невечернем дни Царствия Небеснаго, к Солнцу правды призывая и нас, взывающих ти:

Радуйся, свеще присногорящая Христова света;

радуйся, благовестниче нескончаемаго лета.

Радуйся, смирением на высоту небесную возвысивыйся;

радуйся, терпеним и кротостию украсивыйся.

Радуйся, яко любити ближних в делах милосердия научаеши;

радуйся, яко молитися за обидящих и ненавидящих наставляеши.

Радуйся, на земли николиже никогоже осудивый;

радуйся, истинный образ жития по вере явивый.

Радуйся, преподобне отче Феофане, молитвенниче наш любвеобильный.



Кондак 12

Благодати Божия сосуд избран был еси, благоухая богоугодным житием твоим, отче наш вселюбимый, дара сея благодати и мы получити от Господа молитвами твоими чаем, да еюже спасаеми, умиленно с тобою поем Богу: Аллилуиа.



Икос 12

Поюще Бога, дивнаго во Святых Своих, ублажаем тя, достохвальне отче Феофане, тобою бо Господь прославляется, вера православная утверждается, вернии надеждою на спасение окриляются, любовь к Богу и ближним возгревается, сего ради поем тебе:

Радуйся, Бога вездесущаго пред собою выну предзревый;

радуйся, любовь крепкую к Нему имевый.

Радуйся, Христу в скорбех сораспявыйся;

радуйся, всем сердцем к Нему прилепивыйся.

Радуйся, Духом Святым в жизни водимый;

радуйся, Его избранным сосудом бывый.

Радуйся, земли нашея славо и украшение;

радуйся, верным сокровище и ограждение.

Радуйся, преподобне отче Феофане, молитвенниче наш любвеобильный.



Кондак 13

О богоблаженне отче наш Феофане, приими сие малое моление наше, и умоли милосердаго Господа избавитися нам бед временных и мучений вечных, да идеже ты ныне, пастырю наш добрый, тамо и мы, чада твоя суще, сподобимся воспевати Царю Славы: Аллилуиа.

(Сей кондак глаголется трижды. И паки икос 1-й и кондак 1-й).



МОЛИТВА.

О преподобне отче наш Феофане, пастырю добрый, старче премудрый, молитвенниче теплый, прозорливче предивный, исповедниче непоколебимый, безкровный мучениче и помощниче скорый! Вемы, яко много может молитва праведнаго пред Богом, и яко ты обещался любити чад твоих по отшествии твоем: сего ради умильно просим твоея молитвенныя помощи и ходатайства о нас, многогрешных. Да пробавит Господь к нам Свою милость и долготерпение, подвизая к спасительному покаянию, да сохранит нас в мире и благоденствии, наипаче да укрепит в нас веру православную, сохраняя от ересей и раскола; да дарует нам любовь к ближним в делах милосердия и сострадания, да избавит от глада, всяких нестроений, вражды, злобы, бед и болезней; да поживем богоугодне в страсе Божии, взыскуя едино на потребу – Царствие Божие и правду Его, дабы идеже ты ныне наслаждаешися вечнаго блаженства, тамо и нам удостоитися с тобою и со всеми святыми славити Отца и Сына и Святаго Духа. Аминь.



ТРОПАРЬ, гл.4

Божественною любовию от юности распаляем, Богу и ближним усердно послужил еси, подвигом добрым подвизаяся, любовию и милосердием всех согревая, и по скорбех мнозех вшел еси в радость Господа своего, Егоже моли, преподобне отче Феофане, о спасении душ наших.



КОНДАК, гл.4

Подвиг многотрудныя жизни богоугодне совершив, храм Духа Святаго в себе воздвигл еси, и яко пастырь добрый стадо словесных овец упасл еси, приходящих с любовию утешая и врачуя, темже в обители горния достойне вселился еси, идеже поминай нас, почитающих тя, Феофане преподобне отче наш.[/spoiler]

Раб божий Константин

Акафист преподобному отцу Феофилу (подвижнику Китаевой пустыни).
[spoiler]Тропарь,глас 4
От юности Христа возлюбил еси, блаженне Феофиле/, и тому единому работати пламенне возжелел/, непрестанною молитвою и юродством в пустыни Китаевой подвизался еси/, угодником печерским подражая./ Сего ради вопием ти: спасай нас молитвами твоими, преподобне отче наш.



Ин тропарь, глас 8
Постом душу твою просветил еси, молитвами непрестанными сердце твое сосуд Духа Святаго соделал еси, преподобне отче наш Феофиле, тем же вся вражия ополчения крепко посрамил еси и яко победоносец истинный воздаяние получил еси от Христа Бога. Тому помолися о душах наших.


КОНДАК, глас 4
От мира суетнаго изшел еси/ и в дебрех Китаева вселился еси,/ преподобне отче наш Феофиле./ Непрестанным псалмопением и юродством своим многих на путь спасения наставил еси./ Сего ради вопием ти:/ моли Христа Бога, да спасет души наша.


КОНДАК 1
Избранный Богом от чрева матери своея на подвиг юродства прнзван был еси, силою Божией от воднаго потопления многажды хранимый, подвигом поста и молитвы врага рода человеческаго посрамивый. Сего ради, совершая память твою, молим тя, предивный отче Феофиле, избави нас от враг видимых и невидимых, с любовию зовущих ти: Радуйся, преподобне отче наш Феофиле, подвигом юродства твоего на путь спасения нас наставляющий.


ИКОС 1
Ангели небеснии и человецы земнии богоизбранному житию твоему удивляшеся, отче Феофиле, како ти младенцу сущу от млека матери своея лице свое отвращал еси, принимая пищу токмо постную. Сим знамением Господь показа людем, яко ты еси избранник Божий, не от мира сего бысть. Дивящеся таковому постническому воздержанию твоему, со умилением зовем ти сице:
Радуйся, избранниче Божий от чрева матери;
Радуйся, пречестная отрасль иерея Божия.
Радуйся, постническим подвигом твоим Крестителю Господню уподобивыйся.
Радуйся, воздержанием таковым родителей и сродников своих удививый.
Радуйся, измлада Бога возлюбивый.
Радуйся, заповеди Его верно сохранивый.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 2
Видяще тя сосуд Духа Святаго, Богом избранный, враг рода человеческаго не могий терпети тя, возжеле погубити тя, младенче святый, подвигнувый на сие детоубийство матерь твою. Бог же, хранящий младенцы Своя, не попусти злодеянию сему совершитися. За таковую милость Его к тебе, поем Ему: АЛЛИЛУИА.


ИКОС 2
Разум матери твоея по наущению диавольскому помрачися, и возненавидяше тя, непорочна младенца. Сего ради повеле служащей в доме девице утопити тя в реце. Ангел же Божий сохрани тя невредима. Мы же, дивящеся чуду сему, с радостию вопием ти:
Радуйся, сосуде, Богом избранный и Им же хранимый.
Радуйся, младенче святый, диавола устрашивый.
Радуйся, от пелен младенческих гонение от матери своея претерпевый.
Радуйся, от потопления силою Божией сохраненный.
Радуйся, от чрева матери на служение Богу предызбранный.
Радуйся, Промыслом Божиим в жизни твоей всегда водимый.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 3
Чудо преславное тобою сотвори Господь, егда ты бысть вверженый в реце, силою Божией держимый на версе воды невредимый и, аки в колыбели мягцей, на волнах безмятежно спал еси. Девица же, ввергшая тя, исполнися страха и умиления, возопи дивному Богу: АЛЛИЛУИА.


ИКОС З
Боящеся принести тя в дом к жестокой матери твоей, девица со слезами жалости к тебе, осени тя крестным знамением и паки вверже тя спящаго в воду. И паки чудо произыде: волны речныя аки крыла ангельския понесоша тя к брегу земли. И девица, аки Моисея, взя из воды тя и понесе в дом твой, трепеща и ужасашеся. Мы же, дивящеся таковому промышлению Божию о тебе, глаголем:
Радуйся, яко тобою дивен Бог во святых Своих прославляется.
Радуйся, яко ангел твой хранитель пестуном бысть тебе.
Радуйся, яко ты Моисею, волнами речными носимому, уподобивыйся.
Радуйся, яко и тебе, аки Ноя, от потопления Бог сохранивый.
Радуйся, сим чудом в страх и трепет окрест живущих приведый.
Радуйся, яко тобою и мы уповати на Бога научаемся.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 4
Бурю ярости и злобы воздвиже на тя мати твоя, егда видя тя жива и здрава после потопления, и сама своима рукама возжеле погубити тя, святый младенче; побеже, окаянная, к реце и вверже тя в воду под самое колесо мельничное. Обаче и на сей раз Господь дивно сохрани тя жива, дабы вси, видящие чудо сие, воспевали Ему благодарственно-хвалебную песнь: АЛЛИЛУИА.


ИКОС 4
Рече псалмопевец, яко "Господь сохранит тя от всякого зла. Господь сохранит вхождение твое и исхождение от ныне и до века", и "не убоюся, что сотворит мне человек" - сии словеса сбышася воочию на тебе, предивный отче Феофиле. Силою Божией колесо водное остановися, а вода воспенишася. Мельник же в изумлении побеже и, видя тя лежаща под колесом, взяша тя, аки драгоценный дар Божий, взывая к тебе тако:
Радуйся, сокровище многоценное, мне Богом данное.
Радуйся, Богом хранимый младенче святый.
Радуйся, яко сила Божия тобою нам является.
Радуйся, яко имя Божие тобою прославляется.
Радуйся, сосуде избранный, во еже служити Богови и наставляти люди ко спасению нам дарованный.
Радуйся, яко крест долготерпения и злострадания уготовася тебе.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 5
Страх и трепет объят всех окрест живущих, видящих дивное чудо сие. Мати же твоя, не уразуме силу Божию, на тебе являемую, паче озлобися лютостию зело великою и даде клятву погубити тя. Тогда отец твой, иерей Божий, дабы сохранити тя жива, скры тя у сродников своих. Мы же дивящеся коварству матери-убийцы, и, славя премудрость Божию, поем: АЛЛИЛУИА.


ИКОС 5
"Не приидет к тебе зло и рана не приближится телеси твоему, яко ангелом Своим заповесть о тебе, сохранити тя на всех путех твоих". Сии словеса из Псалтири, с нею же ты не разлучавыйся во вся дни жития твоего, преславно сбышася на тебе, о предивный отче Феофиле. И в память трикратнаго спасения от смерти ты железный обруч с иконою Богоявления на теле своем всегда носивый. Мы же, радующеся таковому о тебе Божию промышлению, со умилением зовем тебе:
Радуйся, яко от потопления воднаго трижды силою Божиею сохраненный.
Радуйся, яко сим чудом Божию Премудрость нам явивый и коварство диавола посрамивый.
Радуйся, трикратным погружением в воду Святую Троицу прославивый.
Радуйся, яко и ныне со всеми святыми предстоиши у Престола Святыя Троицы.
Радуйся, яко непрестанным чтением Псалтири ты душу свою услаждавый и людем образец молитвы показавый.
Радуйся, отче Феофиле, предивный чудотворче и молитвенниче о душах наших.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 6
Чуждый мира и всего яже в нем, ты всегда презираемый бысть сверстники твоими. Глумления над тобою и жестокия биения от них претерпевая, ты безропотно тяжкий крест жития своего понесый. С воплем и обильными слезами, убегая в дебри лесныя, ты младенческими усты своими безгрешно, яки ангел Божий, взывал к Отцу Небесному: АЛЛИЛУИА.


ИКОС 6
Странником и пришельцем явился еси на земли сей, многострадальне отче Феофиле. Еще живу быти родителем твоим, ты был изгнан из дома отеческаго. А родившая тя еще подъя и руце своя, дабы секирою умертвити тя. Добрый же ктитор, объя тя окровавленнаго, спасе тя от матери-убийцы. И ты, не имея где главы преклонити и чем препитатися, водимый Духом Святым, устремился еси во храм Божий, идеже излиял Богу скорбь младенческия души твоея. За таковое страдальческое житие твое мы ублажаем тя сице:
Радуйся, яко и ныне Господь сохрани тя от рук матери-убийцы.
Радуйся и ты, яко Борис и Глеб, неповинно пролиявый кровь свою святую от сродников своих.
Радуйся, яко npискорбным житием своим ты Христу, странствующему на земли, уподобивыйся.
Радуйся, яко с Ним и во обителех Отца Небеснаго вселивыйся.
Радуйся, яко во вся дни живота твоего гонения, заушения и всякое злострадание претерпевый.
Радуйся, яко никомуже злом за зло воздавый и, по глаголу Христову, за врагов своих моливыйся.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 7
Хотяй человеколюбец Господь явити тя страждущим людем новаго молитвенника и обличителя их пороков, приведе тя в Киево-Братский монастырь, дабы в молитвенных подвизех уготовати душу твою для приятия Божественный благодати. Ты же, аки елень на потоки водныя, устремися изучати Божественное Писание в духовнем училище, там бывшем. Исполняя послушание звонаря, ты зело рано, взыйдя на колокольню, созерцая с высоты творение Божие, предавался тамо богомыслию и тайной молитве, в ликовании духовнем воспевая Создателю всея видимая и невидимая твари: АЛЛИЛУИА.


ИКОС 7
Новое житие твое во обители святей бысть в сладость сердцу твоему. Аки после бури житейскаго моря ты притекл еси к тихому пристанищу, с черноризцами проводя Богоугодное житие твое в послушании, бдении, коленопреклонении и чтении Псалтири. Чиноначалие же обители, видя твое усердное рвение к духовным подвигом, удостои тя иноческаго пострига и сана иеродиакона. Предстоя у Святаго Престола, ты с вящим рвением устремися подобитися равноангельскому житию. Мы же, ублажая твои подвиги и любовь к Сладчайшему Иисусу, глаголем сице:
Радуйся, яко Господь умилосердися над тобою и призва тя во обитель святую.
Радуйся, яко ты старцем-подвижникам в послушании и молитвенных подвизех подражавый.
Радуйся, душу твою соблюдый страстьми непорабощенну.
Радуйся, прельщения юнаго возраста победивый.
Радуйся, образ терпения и послушания нам показавый.
Радуйся, Христу работати и искренне ему служити всех людей научавый.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 8
Не хотяй смерти грешников, Господь и матерь твою призва к покаянию. Пораженная неисцельною болезнию, уведе на себе гнев Божий за жестокое на тя гонение, раскаяся в своем злодеянии и с воплем велиим и рыданиями взывала к Богу о прощении. Ты же, незлобив сый, простив ей вся бывшая и погребше тело ея, возвратися в обитель свою, в радости духовней поя Промыслителю Богу: АЛЛИЛУИА.


ИКОС 8
Весь добродетелей и незлобия исполненный, воистину был еси во плоти Ангел, досточудне Феофиле, являя для братии образ кротости и послушания, смирения и целомудрия. Служа у Престола Божия в священном сане, ты, аки преподобные Сергий Радонежский и Серафим Саровский, сподобивыйся видети Ангелов небесных, сослужащих тебе в Божественной литургии и благодать Божию, сходящую на Святые Дары. Благоговея пред твоею святостию, со страхом и умилением вопием ти:
Радуйся, человече небесный и ангеле земный.
Радуйся, сосуде, Божией благодати исполненный.
Радуйся, в сердце твоем образ Христа непрестанно носивый.
Радуйся, Его же ради плоть свою распявый со страстьми и похотьми.
Радуйся, усердный молитвенниче о всех, притекающнх к тебе.
Радуйся, скорый помощниче всем страждущим и заблудшим.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 9
Все житие твое бысть исполненно скорбей и печалей, досаждений и укорений. Ты же во имя любви к Богу приял ecu на себя подвиг юродства Христа ради. И бысть многими гонимый, оскорбляемый и презираемый, ты, смиренный сердцем и кроткий духом, аки Христос на Кресте, моливыйся за врагов своих и хулителей, глаголя: "Господи, прости им, не ведят бо, что творят", и в веселии сердца всегда пел Богу: АЛЛИЛУИА.


ИКОС 9
Видя Господь подвиги твоя, любовь и милосердие твое к страждущим людем, даде тебе дар прозорливости и врачевания. И ты, обличая их тайныя и явныя грехопадения, наставлял еси на путь спасения, врачуя и душевныя, и телесныя их язвы. Сам же, ycугубляя подвиги своя, денно н нощно в дебрех лесных, аки преподобный Серафим, молился коленопреклоненно на пне древа. За таковыя подвиги твоя приими от нас похвалы сия:
Радуйся, яко своими подвигами ты преподобным отцем Киево-Печерским уподобивыйся.
Радуйся, чистоты душевныя и телесныя усердный хранителю.
Радуйся, своими подвигами искушения от плоти, мира и диавола победивый.
Радуйся, яко за твою ревность и любовь ко Христу, дар прозорливости и чудотворения от Нero приявый.
Радуйся, яко душевныя и телесныя недуги ты единым словом врачевавый.
Радуйся, обидимым и сущим в напастех скорый помощниче.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 10
Помощник скорый и утешитель был еси, отче Феофиле, не токмо к тебе приходящим, но и сам, с чтением Псалтири, ездяй на тельце по граду Киеву, утешал еси скорбящих и обидимых; одевая и питая нищих, грозно обличая виновных и, предсказуя грядущее яко настоящее, многих обратил еси на путь покаяния. Мы же, дивящеся твоему таковому милосердию и человеколюбию к людем, поем Всемилостивому Богу: АЛЛИЛУИА.


ИКОС 10
Царем тварей бысть Адам в раю до грехопадения, вси бо зверие ему повиновахуся. И тебе, безгрешному и освященному Духом Святым, такожде повиновахуся и скоти, и рыбы, и птицы. По твоему речению безсловесныя животныя послушно исполняли волю твою. На удивление всем твой телец, управляемый силою Божией, привозих тя, идеже душа твоя святая возжелала помолитися или сотворити помощь нуждающимся. Дивящеся таковому о тебе Божию промышлению, со умилением глаголем сицевая:
Радуйся, обличителю тайных и явных грехолюбцев.
Радуйся, заблудших наставниче и скорбящих утешителю.
Радуйся, просящих твоея помощи скорый исполнителю.
Радуйся, повиноватися воле Божией всех научавый.
Радуйся, яко и скоти злонравнии по словеси твоему послушни бысть, аки овцы.
Радуйся, яко и ладья чрез Днепр по слову твоему сама по воде движима бысть.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 11
Пение всеумиленное триединому Богу приносил еси во вся дни страдальческаго жития твоего, достохвальне отче Феофиле. Днем и нощию, в келии и в дебрех лесных творя умную молитву, не оставлял еси без утешения и исцеления всех к тебе приходящих, назидая их словом Божиим и своим юродством. Ныне же предстоя у Престола Царя Славы, молися о нас, чтущих святую память твою, да и мы с тобою купно во веки поем Богу: АЛЛИЛУИА.


ИКОС 11
Провидя будущее яко настоящее, ты многим людем, предсказуя внезапную смерть или болезни, приводил их от греховныя жизни к покаянию. Ищущим монашескаго жития ты иногда благословлял супружество, а жаждущим мирскаго жития - монашество, дабы житие их было богоугодным и спасительным для души. И царю Николаю, лежа в муравейнике окровавленным, предрекл еси печальный исход на поле брани в Крыму и его смерть от печали. За таковое твое о людех попечение глаголем тебе благодарными усты сицевая:
Радуйся, тайнозрителю судеб человеческих.
Радуйся, яко ты предуказал на Глубочице место для устроения монастыря Покровскаго.
Радуйся, яко ты указавый место в лесу, идеже имать быти устроена пустынь Преображенская.
Радуйся, яко и крест тамо водрузивый, аки апостол Андрей на горах Киевских.
Радуйся, яко и для монастыря Ионовскаго на горах Зверинецких своим трикратным благословением место освятивый.
Радуйся, яко ты митрополиту Филарету великое огненное запаление в Киево-Печерстей Лавре предрекл еси.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 12
Благодать от Бога дадеся тебе, угодниче Божий, творити чудеса для прославления Всемогущаго Творца неба и земли. Подобно Христу, чудесно напитавшему в пустыне люди алчущия, ты утружденных путников, грядущих на поклонение угодником Печерским, напитал еси чудодейственною кашею, сваренною в лесу из камушков и травы, зажегши древеса огнем, низведшим с неба молитвою твоею. И отроковицу умирающую молитвою своею, во утешение плачущей вдовицы, оживил еси. Мы же со страхом и трепетом, благодарными усты вопием дивному во святых Своих Богу: АЛЛИЛУИА.


ИКОС 12
Блаженныя кончины своея день и час предуказавый и тело свое для погребения сам предуготовивый, о предивный чудотворче Феофиле. Келию же свою свещами и ладаном для сретения Ангела облагоухал еси и послушника своего послал еси ударяти в звон колокольный, дабы известити братию обители, яко Феофил к Богу преселяется. И рыдаху людие вси, егда погребаше пречестное тело твое, яко лишаются утешителя своего и наставника. По ста сорока летех же, яви нам Господь во утешение мощи твоя. Чтущии же память твою, списаху для раки твоея лик твой. И мы, со умилением взирая на образ твой, с радостию зовем ти:
Радуйся, великий чудотворче, Богом на утешение нам дарованный.
Радуйся, скорбящих утешителю, вдов и сирот защитниче, болящих и страждущих целителю.
Радуйся, яко и по преставлении твоем чудеса творити не преставый.
Радуйся, яко молящимся у гроба твоего скорую помощь подававый.
Радуйся, яко отныне имя твое со святыми прославляется.
Радуйся, града Киева украшение и Китаевой пустыни славо.
Радуйся, преподобне отче наш Феофиле, подвигом юродства твоего на путь спасения нас наставляющий.


КОНДАК 13
О, преславный угодниче Христов и предивный чудотворче, отче наш Феофиле! Приими сие малое моление наше, в похвалу тебе приносимое от нас, недостойных и грешных, обаче с любовию чтущих тя. Умоли Господа Бога избавитися нам от всяких бед, скорбей и напастей, наипаче же от грехопадений и внезапныя смерти и вечных мук. Не попусти нам без покаяния умрети. Буди нам путеводитель в Царствие Небесное, да тамо, с тобою вкупе, во веки поем Богу: АЛЛИЛУИА, АЛЛИЛУИА, АЛЛИЛУИА.


МОЛИТВА
О, предивный угодниче Христов, крепкий молитвенниче и заступниче, отче наш Феофиле! Ты от чрева матери избранный Богом на служение ему и дивно им хранимый от всякаго зла. За твоя подвиги юродства Господь дарова тебе дар пророчества и чудотворений. По заповеди пастыреначальника Христа ты душу свою полагавый за овцы стада Христова. Ты грешников тайных и явных грозно обличавый и своими мудрыми словесы к покаянию и исправлению их приводивый. Ты приходящих к тебе больных и скорбных не отвергал еси. Ты был всем яко отец чадолюбивый и пастырь добрый. И ныне услыши нас, с верою призывающих тя и усердно припадающих к раце мощей твоих, отче наш Феофиле. Испроси у Всемилостиваго Бога мир Церкви нашей православней во отечествии твоем. Вразуми и обрати еретиков и раскольников в лоно Матери-Церкви. Пастырям нашим ревность о спасении людей, людем же послушание Святей Церкви и ревность защищати веру православную испроси. Умоли Небеснаго Отца всем нам подати коемуждо по прошению его: юным в православней вepe возрастание, старым и немощным подкрепление и утешение, болящим исцеление, сиротам и безпомощным заступление и нечаянную радость, заблудшим и согрешающим исправление. И всем нам испроси телесное здравие и душевное спасение. Согрей огнем Божественной любви охладевшие сердца наша. Помози нам исправити жизнь нашу греховную, дабы безбедно прейти мытарства демонов лютых и водворитися во обителех Отца Небеснаго, дабы вкупе с тобою и со всеми святыми воспевати всесвятое и великолепое имя Пресвятыя Троицы: Отца и Сына и Святаго Духа во веки веков. Аминь.

Краткое житие ХРИСТА РАДИ ЮРОДИВОГО Ф Е О Ф И Л А, подвижника-прозорливца.

Родился в 1788г. в семье священника. Крещен Фомой. Младенец не принимал материнского молока. Чтобы спасти ребенка от голодной смерти, изумленная мать кормила его картофельной жижей, разваренной репой и морковью.
Суеверные соседки наговаривали матери, что этот ребенок урод. Мать ожесточилась против ребенка и приказала служанке утопить его в речке. Та дважды бросала его в воду, но хранимое Богом дитя вынырнуло из воды и безмятежно спало, словно в мягкой колыбели. Служанка в испуге расплакалась и вернула младенца домой.
Ожесточенная мать выхватила дитя и побежала топить сама. Она бросила его под мельничное колесо, но колесо остановилось. Выбежал мельник и достал дитя из воды. Наблюдавшая служанка рассказала отцу и он прятал сына у добрых соседей. А когда умер отец, Фому отвезли на воспитаниe в Братский монастырь на Подоле. Здесь он учился грамоте и принял монашеский чин. Жил в Киево-Печерской Лавре и Китаевой пустыни.
Заботясь о чистоте души, он нисколько не заботился о чистоте тела. Одежда его была ветхая с заплатами, пришитыми белыми нитками и вся выпачкана тестом и маслом. На одной ноге истрепанный сапог, а на другой - валенок или лапоть. Голова всегда повязана была грязным полотенцем. На теле носил железный пояс с иконкой Богоявления в память трикратного спасения от утопления. Получая пищу, он смешивал ее в одной посуде: и горькое и сладкое.
По Киеву ездил всегда на бычке без упряжи и вожжей и приезжал именно туда, куда хотел блаженный - без возгласов и понуканий. Сидя на возку спиной к бычку, он всегда читал на коленях Псалтирь.
Обличал тайные и явные грехи приходящих к нему в Китаево паломников, отчего одни плакали в раскаянии, а у других от страха и стыда волосы дыбом поднимались.
Одной барыне он вылил в подол на новое шелковое платье целую миску борща (так обличил ее в прелюбодеянии).
Однажды митрополит Филарет спешил в Китаево и не дочитал свое монашеское правило. В лесу он увидел Феофила, сидящего на самой верхушке дерева с молитвословом в руках. На вопрос митрополита: "Что ты там делаешь?" - он ответил, что дочитывает правило...
А для голодных странников распалил небесным огнем костер без спичек (помолясь на небо) и сварил им кашу из травы и камушков. А когда разливали в миски, то каша не уменьшалась, пока всех не накормил.
Император Николай Павлович, начиная войну с Турцией, хотел узнать у прозорливца будущее России и поехал в Китаевскую пустынь. Феофил, выйдя навстречу царю, исцарапал себе до крови руки и лицо, разгреб муравейник и улегся в середину его на спину. Царь и Митрополит долго просили его подняться, но он лежал не шевелясь, с закрытыми глазами, скрестя руки на груди, как покойник. По всему телу его копошились целые полчища муравьев. И предсказание сбылось. Многочисленная армия турок (как муравьи) набросилась на Севастополь. Погибли храбрые адмиралы: Корнилов, Нахимов, Истомин и другие, а царь, истерзанный заботами и печалью о России, скончался в 1855 году.
В день своей кончины Феофил приказал очистить его келью от мусора, зажечь лампаду и свечи, покадить ладаном. На вопрос келейника, зачем все это, он ответил, что сегодня за ним явится Ангел смерти и его надо принять по-христиански. Потом лег на скамью, взял в руки крест и послал к начальнику пустыни сказать, чтобы ударили в колокола, так как Феофил скончался. Начальник побежал в келью, так как не поверил сказанному, но увидел, что Феофил уже лежал бездыханным, а вокруг изливался чудный аромат...
Скончался 28 сентября ст.ст. 1853 года на 65 году жизни. Погребен у северной стены Свято-Троицкой церкви в Китаевской пустыни, рядом с могилою Киево-печерского затворника Досифея.
И после его кончины, так же как и при его жизни, подается не менее скорая помощь в болезнях и скорбях всем, с верой призывающим его имя, совершающим у его могилки панихиды.
14/27 июля 1993г. Собор Украинской Православной Церкви под председательством Блаженнейшего Владимира, Митрополита Киевского и всея Украины, канонизировал Христа ради юродивого иеросхимонаха ФЕОФИЛА, причислив его имя к лику святых. А нетленные его останки перенесены в храм Святой Троицы и покоятся в новой гробнице.
Дни памяти:
28 октября/10 ноября – день кончины (1853г.)
14/17 июля – день прославления и обретения мощей (1993г.)[/spoiler]

Раб божий Константин

Акафист преподобному Феофилу Китаевскому иной.
[spoiler]Кондак 1
Избранный от возраста млада сосудом быти Премудрости Божией и Силы, угодниче Христов Феофиле. Изрядным жития твоего подвигом, престающую века сего лепоту обнажением срамным обличил еси, да Царства Вечнаго красоту покаяния слезами узрят людие. О нас же воззови ко Господу, молитвы трубо громогласная, да зовем ти радостно: Радуйся, oтче наш Феофиле, предивный чудотворче и oбители Китаевския украшение.

Икос 1
Ангелы измлада охраняем был еси, блаженне,от злобы мира сего, люте на тя воставшаго от чрева матери твоея и погубити тя тщащагося. Мы же, промышление о тебе Божие видяще, со удивлением зовем:
радуйся,от лет младых благословением небеcным осененный;
радуйся, постничества благодатию утвержденный;
радуйся, от млека матерня воздержание явивый;
радуйся, сим действом окрест живущих удививый;
радуйся, воздержанию благокрасному многих научивый;
радуйся, добродетель сию царицею духа твоего утвердивый;
радуйся, oтче наш Феофиле, предивный чудотворче и oбители Китаевския украшение.

Кондак 2
Видя мати твоя благонравие младенческо, изумления достойно, не узре в тебе Духа Святаго действие изрядное, святе Феофиле, о немже благодарити Бога паче подобает. Но князем тмы наваждена, злобою к тебе распыхашеся, во еже не вкусил еси млека ея матерня, не вразумися благодарне возопити Богу: Аллилуиа.

Икос 2
Разумение возъиме oтроковица, при дому служащая, об охранении души твоея силами небеcным и от погибели лютыя, ужасеся зело: поведа же oтцу твоему пресвитеру цековному об озлоблении противочаднем госпожи своея. Сего ради в стране далече вне дома oтча воздоен был еси, святе, благодатию Христовою, мы же тебе вопием:
радуйся, рабе Христов благий и верный;
радуйся, воли Его святыя исполнителю усердный;
радуйся, Евангелия светом духа стези осветивый;
радуйся, во главу угла закон Бога Вышняго положивый;
радуйся, гонений лютых иго Христа ради радостно носивый;
радуйся, волю Божию о тебе всем сердцем лобызавый;
радуйся, радуйся, oтче наш Феофиле, предивный чудотворче и oбители Китаевския украшение.

Кондак 3
Силою храним был еси свыше, блаженне, егда мати твоя, гневом безумия одержима бяше, восхоте погубити тя по наущению сатанину. Мы же, чудеса спасения твоего зряще, умильно зовем Хранящему тя: Аллилуиа.

Икос 3
Имея врачевство болезней скорбных, еже есть молитва к Богу теплая, прибегл еси ко утешению сему вселюбезно, святе, человеков бегая и Христу единому свое сердце принося. Темже терпения твоего добротами обогащаемии, вопием ти сице:
радуйся, терпения краеуголен камень во главу браней духовных положивый;
радуйся, Христова Креста знамение на горе высоцей духа водрузивый;
радуйся, сердце свое к Богу oгнем любве воспламенивый;
радуйся, козни вражия oружием смирения сокрушивый;
радуйся, мира ложнаго уставы житием твоим разоривый;
радуйся, родившую тя к покаянию и примирению с тобою приведый;
радуйся, oтче наш Феофиле, предивный чудотворче и oбители Китаевския украшение.

Кондак 4
Бури житейския волнами восхоте погубити тя враг спаения человеча и погрузити ум твой в попечения суетная, егда был еси в научении между oтроками. Но яко oрел высокопарный парил еси, oтче, в высоте богоoбщения тобою возлюбленнаго конечне, и взывал еси Держащему вся дланию: Аллилуиа.

Икос 4
Слухом слыша учения училищныя, ушеса же сердца твоего не простирал еси в них, взыскуя на потребу единаго токмо. Сего ради оставив вся суетная, прибегл еси к воде упокоения душевнаго во oбитель Киево-братскую, веселяся духом. Темже приими и наша пения:
радуйся, верный рабе Христов, волю Божию выну исполнявый;
радуйся, благочестия столпе, полки бесовския жития твоего святостию устрашивый;

радуйся, земли благия ниво, слезами орошенная и обилен плод принесшая;
радуйся, твердыя веры семя, в древо великое послушания возрастшее;
радуйся, молитвы сердечныя сладость измлада вкусивый;

радуйся, теплоту духа сего до смерти соблюдый;
радуйся, oтче наш Феофиле, предивный чудотворче и oбители Китаевския украшение.

Кондак 5
Богокрасное видение зрим, о празднолюбцы: юношу млада летами, но духа возрастом древняго видяще, разумом богопросвещенным скоротечность века сего познавшаго и Христа ради в послушание игумену себе предавшаго, свободу духа сим бо улучая. Темже вопием ему: сердца наша уврачуй, святе, страстьми изможденныя, да вопием с тобою Исцеляющему вся: Аллилуиа.

Икос 5
Видевше мироздания красоту Божеcтвенную, oтче: потщался еси к сей приобщитися духом, возлюбленным местом молитвы колокольню монастырскую имея: идеже богопознания мыслию парил еси над миром, тело вкупе к сему приобщая. Нас же, память твою чтущих, приведи к высоте сей, да зовем ти:
радуйся, земный ангеле и человече небcный;
радуйся, молитвы умныя делателю усердный;
радуйся, смиренномудрия крине благоуханный;
радуйся, таин Божеcтвенных созерцателю блаженный;
радуйся, своеволия сень темную во гробе послушания заключивый;
радуйся, из гроба сего в безмятежную жизнь воскресый;

радуйся, oтче наш Феофиле, предивный чудотворче и oбители Китаевския украшение.

Кондак 6
Проповедь Креста Господня житие твое бысть, блаженне, распялся бо еси миру апоcтольски, душу твою за Христа положити желая. Сего ради безумия зрак на себе возложил еси: да с людьми пребывая, яко в пустыни жительствуеши, поношения пищею питаяся, в разуме же богопросвещенне Господеви поя: Аллилуиа.

Икос 6
Возсиял еси яко солнце мысленное, oтче, молитвы теплотою чада твоя согревая и чудесы изрядными во благочеcтии их соблюдая. К тем сопричти и нас, блаженне, вопиющих ти сице:
радуйся, светильниче веры, под спудом юродства себе сокрывающий;
радуйся, сим подвигом мудрования безстудных людей обнажающий;
радуйся, нищеты душевныя усердный стяжателю;
радуйся, сия плодами приходящих к тебе питателю;
радуйся, проповедниче покаяния неблазненный;
радуйся, о чадех твоих воздыхателю преболезненный;
радуйся, oтче наш Феофиле, предивный чудотворче и oбители Китаевския украшение.

Кондак 7
Хотением божеcтвенным восхотел еси, Спасе, от погибели человеки избавити: даровал бо еси нам святыя Твоя молитвенники, яко кадило благовонное Тебе приятныя. Темже и мы благодарни суще недостойнии, Господи, Феофила блаженнаго за грехи нашя ходатая имуще, со слезами вопием: Аллилуиа.

Икос 7
Новый предтеча явился еси, oтче блаженнейший, на покаяния стези верныя наставляя, еже есть крещение второе, омывает бо грехи слезами, дерзновение пред Господем даруя. К сему же и нашя души привлецы приобщением спасительным, да глада безпечности избавльшеся, взываем ти:
радуйся, свеще пламенногорящая и в молитве за люди истаявающая;
радуйся, добродетелей сокровищнице, печатию смиренномудрия затворенная;
радуйся, людей безпечных обличение непререкаемое;
радуйся, кающихся грешников отрадо всеблагоговейная;
радуйся, любве Христовыя вино, отчаянных сердца увеселяющее;
радуйся, премудрости Божией кладезю, память твою чтущих обильно напаяющий;
радуйся, oтче наш Феофиле, предивный чудотворче и oбители Китаевския украшение.

Кондак 8
Странное чудо воoчию всех бываемо видяще, дивимся сему, како телец разума лишенный, яко человек старцу Феофилу служаше, желания его предусретающе; темже, о вернии, Христа прославим, святыя Своя славою венчающаго, поюще Ему: Аллилуиа.

Икос 8
Весь еси был всем воистину oтец чадолюбивый, душу свою за люди готов был еси положити, Феофиле oтче наш. Обличал бо еси, запрещал еси и умолял с долготерпением всяким и учением, да погибель всяко не исхитит никогоже. Сего ради приими от нас похвалы сия:

радуйся, врачу искуснейший, молитвы зелием души исцеляяй;
радуйся, подвижниче прозорливый,от путей погибельных предостерегаяй;
радуйся, служителю Христов нелицемерный;
радуйся, благочcтия радетелю усердный;
радуйся, благословением твоим супружества честныя охраняющий;
радуйся, во иночестве подвизающихся участием молитвенным укрепляющий;
радуйся, oтче наш Феофиле, предивный чудотворче и oбители Китаевския украшение.

Кондак 9
Всякое зверей естество и гад земных человеческим укрощается естеством: но силен есть, рече апоcтол, иже язык свой укротити может. Славим же тя, святе, не язык токмо, но и все тело покорением духу стеснившаго, чресла своя обручем железным препоясав, богоявления изображением в память трикратнаго от вод спасения запечатлев. Темже Увенчавшему тя славою зовем: Аллилуиа.

Икос 9
Витийствовати язык наш благокрасно не может, чудная дела твоя зряще, Феофиле oтче наш. Обаче лепо есть молчания печать недоуменнаго на уста своя возложити, горения духа созерцая твоего, и сердечне тебе возопити:
радуйся, Отечества Небеcнаго пламенне возжелевый;
радуйся, яко пришлец житие твое на земли проводивый;
радуйся, слез умиления потоки в землю сердца твоего изливый;
радуйся, добродетелей произращение обильное явивый;
радуйся, начальствующих притеснения великодушно терпевый;
радуйся, об их спасении Бога незлобиво моливый;
радуйся, oтче наш Феофиле, предивный чудотворче и oбители Китаевския украшение.

Кондак 10
Спасти хотя душу, отвергл еси вся препятствия греховныя, на поста и молитвы крилех в горняя возшел еси, памяти смертныя щитом козни вражия отражая. С Давидом, скажи ми, Господи, кончину мою, вкупе вопиял еси, песнь возсылая Богу: Аллилуиа.

Икос 10
Стена духовом злобы поднебесным неприступна был еси, oтче священный. Темже и души нашя от тех насилия свободи и от погибели лютыя избави, да зовем ти сице:
радуйся, сердец сокрушенных претихое утешение;
радуйся, горделивых умов всегрозное обличение;
радуйся, смирения Христова благий носителю;
радуйся, премудрости Божия верный тайнозрителю;
радуйся, врачу искуснейший недугующих;
радуйся, oтрадо вселюбезная примирения с Богом чающих;
радуйся, oтче наш Феофиле, предивный чудотворче и oбители Китаевския украшение.

Кондак 11
Пения многая умиления исполненная возсылал еси выну Творцу всяческих, блаженне, в клети сердца твоего, иже в тайне. Сего ради яве от него прославляешися яко верный раб Христов светло. Мы же вкупе со свяыми вопием дивному во святых своих Богу: Аллилуиа.

Икос 11
Светозарную пророчества благодать от Бога приял еси, oтче, во еже чада остерегати твоя от зол находящих. Сего ради любовь народа христианскаго стяжал еси, вопиющаго ти со умилением тако:
радуйся, oснование oбители в честь Покрова Богородицы на Глубочице предсказавый;
радуйся, сие место землею святою прозорливо наименовавый;
радуйся, совет от тебе ищущим прияти волю Божию о них вещавый;
радуйся, ума лукаваго пытливость в неких грозно обличавый;
радуйся, горделивых величание тайнодействий их постыдных изъявлением прозорливым низлагавый;
радуйся, от мира сего презираемым утешением велиим бывый;
радуйся, oтче наш Феофиле, предивный чудотворче и oбители Китаевския украшение.

Кондак 12
Благодать тебе от Бога данную, яко талант умножил еси: был еси смирения и терпения Христова oбраз непререкаемый, веры и благочcтия правило известное, целомудрия и чистоты благоуханный крин. Сего ради вшел еси, oтче, в радость Господа твоего, идеже царствует вечная песнь: Аллилуиа.

Икос 12
Поюще житие твое добродетельми славное, oтче наш Феофиле, дивимся терпению твоему и сердца твоего незлобию младенствующу. Нам же сих добродетелей носителями быти помози, умиленно ти поющим:
радуйся, правды Божия искателю всеусердный;
радуйся, неправды обличителю нелицемерный;
радуйся, наставниче Христова стада доблемудрый;
радуйся, во обстоянии сущим утешителю сердобольный;
радуйся, веры православныя светило;
радуйся, благоуханий добродетельных богоприятное кадило;

радуйся, oтче наш Феофиле, предивный чудотворче и oбители Китаевския украшение.

Кондак 13
О преблаженне и всечcтне oтче наш Феофиле, покаяния спасительнаго глашатаю неутомимый! Похвальная наша пения любезно приими и от мрака греховнаго нашя души свободи, да свет небеcный восприемши, Солнцу правды богоприятную воспоим песнь: Аллилуиа.
Сей кондак глаголи трижды.

Икос 1
Ангелы измлада охраняем был еси, блаженне,от злобы мира сего, люте на тя воставшаго от чрева матери твоея и погубити тя тщащагося. Мы же, промышление о тебе Божие видяще, со удивлением зовем:
радуйся,от лет младых благословением небеcным осененный;
радуйся, постничества благодатию утвержденный;
радуйся, от млека матерня воздержание явивый;
радуйся, сим действом окрест живущих удививый;
радуйся, воздержанию благокрасному многих научивый;
радуйся, добродетель сию царицею духа твоего утвердивый;
радуйся, oтче наш Феофиле, предивный чудотворче и oбители Китаевския украшение.

Кондак 1
Избранный от возраста млада сосудом быти Премудрости Божией и Силы, угодниче Христов Феофиле. Изрядным жития твоего подвигом, престающую века сего лепоту обнажением срамным обличил еси, да Царства вечнаго красоту покаяния слезами узрят людие. О нас же воззови ко Господу, молитвы трубо громогласная, да зовем ти радостно: Радуйся, oтче наш Феофиле, предивный чудотворче и oбители Китаевския украшение.

Молитва
О пречудне и прехвальне богомудре oтче наш Феофиле, ангелов достойный собеседниче и покаяния человеков неумолкаемая проповедь, иноческаго делания правило и мирян благочеcтивых похвало!
Скудосердечия нашего, святе, не презри и приими по силе нашей тебе приносимое пение. Ходатайства бо твоего пред Господем просим и чадолюбие твое к снизхождению усердно призываем.
Вемы бо воистину, вемы, яко умы нашя к тебе простирающе, подвизаем тя грехи нашя обличати и лице твое от беззаконий наших отвращати. Но такожде, oтче священнейший, вемы, яко обличение чадолюбное ко стези покаяния спасительнаго влечет и к участию Божеcтвенному прилагает.
Сего ради слезно молим тя и в сокрушении колена сердец наших приклоняюще, умильно просим: немощь нашу укрепи и препоны вражия молитвенным участием твоим сокруши: да молитвами твоими укрепляеми, врагу злокозненному противостанем, в броню благодати Христовы облекшася. И тако ратоборствующе, дерзнем с тобою вкупе славити всесвятое имя Пресвятыя Троицы, Отца, и Сына, и Святаго Духа, ныне и присно и во веки веков, аминь.

Конец и Богу слава![/spoiler]

Раб божий Константин

Акафист преподобному Ферапонту Можайскому, Лужецкому чудотворцу.
[spoiler]Кондак 1
Возбранному Воеводе и Господу Иисусу последствуя, молитвою, постом и труды плотския страсти победил еси: темже, яко добр воин, увенчался еси от Царя Христа, Егоже непрестай тепле молити о нас, рабех твоих, преподобне, да тобою избавльшеся от бед, присно поем ти:
Радуйся, Ферапонте, угодниче Христов и чудотворче.

Икос 1
От младенчества твоего и даже до престарения, телом и душею работал еси Господу Иисусу Христу и Пречистей Его Матери, и се ныне душа твоя ликовствует в Его небесных обителех, тело же твое зде почивая, сияет чудесы. Сего ради вопием ти радостно:
Радуйся, во след Христа неуклонно шедый.
Радуйся, слово Его соблюдавый твердо.
Радуйся, во славу Христа Бога подвизавыйся.
Радуйся, Пречистую Христа Матерь неумолчно славивый.
Радуйся, от Христа и Матери Его прославленный.
Радуйся, имый дерзновение велие ко Христу.
Радуйся, защитниче обители Лужецкия.
Радуйся, хранителю страны Можайския.
Радуйся, поборниче крепкий за державу Российскую.
Радуйся, добропобедный воине Православныя Церкве.
Радуйся, всем призывающым тя подающий скорую помощь от Христа Бога.
Радуйся, Ферапонте, угодниче Христов и чудотворче.

Кондак 2
Пребывая в житейстей молве, не усладился еси благими, ниже опечалился еси злыми мира сего, но взирая к почести вышняго звания, под бременем мирских сует памятствовал еси всегда пети Богу: Аллилуиа.

Икос 2
Усердно делая дела мирскаго служения твоего, преподобне, едино точию имел еси в сердце твоем: да не осужден предстанеши на страшнем Судищи Господа Славы, и ныне благочестно к тому себе предъуготовав, слышиши от всех:
Радуйся, ум твой вперивый в горняя.
Радуйся, от мира тленнаго к нетленному очи возведый.
Радуйся, паче земных благ возлюбивый нищету духовную.
Радуйся, в печали о гресех снискавый себе утешение.
Радуйся, кротостию благоукрасивыйся.
Радуйся, взалкавый праведности пред Богом.
Радуйся, согрешающым благоснисходительный.
Радуйся, страждущым сострадавый тепле.
Радуйся, ко всем благоприветливый.
Радуйся, всем ведущым тя прелюбезный.
Радуйся, милостыни подававый щедро.
Радуйся, Ферапонте, угодниче Христов и чудотворче.

Кондак 3
Да не злоба изменит твоего благаго разума, тайно от присных твоих отшел еси во святую обитель блаженнаго Феодора, да тамо свободь мирских сует, поспоеши Богу: Аллилуиа.

Икос 3
От Бога наученный о тебе блаженный Феодор уразуме тя, уже искушенна в посте и молитве, радостно прият тя во обитель свою, и в день пришествия твоего к нему облече тя в чин иноческий, со всеми сподвижники своими вопия тебе:
Радуйся, вся красная мира презревый.
Радуйся, от мира льстиваго излетевый, яко птица от сети.
Радуйся, паче Богу, нежели человеком, работати избравый.
Радуйся, иночество ради добраго Богу делания приявый.
Радуйся, яко уже в мире инок искусен уготовался еси.
Радуйся, всего ся Христу, яко чистую жертву, принесый.
Радуйся, ради Христа отвергийся себе самаго.
Радуйся, Христов Крест подъявый истинно.
Радуйся, со Христом быти присно возжелавый.
Радуйся, Христа Бога всею душею возлюбивый.
Радуйся, Христу Богу возлюбленный.
Радуйся, Ферапонте, угодниче Христов и чудотворче.

Кондак 4
Старцу, емуже вручен был еси, яко отцу работал еси, исповедая же ему на всяк день грехи твоя, прогонял еси от себе лукавыя помыслы, сего ради с ним чистым сердцем вопиял еси Богу: Аллилуиа.

Икос 4
Подвигом иночества добре подвизаяся, не мнил еси тя доброе что сотворша, но мнил тя непотребна быти, и припадая стопам спостников твоих, слезно молил еси их, умолити Пречистую Богородицу, да спасет тя от геенны огненныя. Сие ведяще, вопием ти:
Радуйся, слезами покаяния очистивый душу свою.
Радуйся, низложивый в себе духа гордыни.
Радуйся, научивыйся зрети твоя точию согрешения.
Радуйся, не осуждавый ни единаго от согрешавших.
Радуйся, братолюбием утишавый прекословия.
Радуйся, ко всем в послушании вдавый тя неуклонно.
Радуйся, молитвами братии подкрепленный.
Радуйся, не на тебе самаго, а на Пречистую Богородицу уповавый.
Радуйся, во всех трудех твоих благословенный от Пречистыя Богородицы.
Радуйся, заступницу себе стяжавый Благословенную Матерь Христа Бога.
Радуйся, Ею от вечныя муки свобожденный.
Радуйся, Ферапонте, угодниче Христов и чудотворче.

Кондак 5
В той же обители блаженнаго Феодора имел еси равнолетна тебе друга, спостника и сомолитвенника, преподобнаго Кирилла, с ним же, от преподобнаго Сергиа наученный, единем сердцем и единеми усты, непрестанно пел Богу: Аллилуиа.

Икос 5
Спостницы твои, видевше тя, зело преспевающа в добром иноческом житии, в смирении и послушании, в целомудрии и братолюбии, славиша Бога и Пречистую, давших ти таковую благодать, мы же, уведевше о сем, вопием ти:
Радуйся, иноче, иноков похвало.
Радуйся, спостниче преподобнаго Кирилла.
Радуйся, верный учениче преподобнаго Сергиа.
Радуйся, целомудрия образ явивый собою истинный.
Радуйся, пощением укрепивый сердце твое.
Радуйся, бдением окриливый душу твою.
Радуйся, молитвами твоими благоухающий Богу.
Радуйся, ангельския чистоты рачителю.
Радуйся, херувимскаго богомыслия подражателю.
Радуйся, серафимския к Богу любве ревнителю.
Радуйся, Ферапонте, угодниче Христов и чудотворче.

Кондак 6
Обходя страну Белоезерскую, обрел еси многая места красная и удобная, во еже тамо в конечнем безмолвии пребывати. И возжаждал еси сего безмолвия, да в нем втайне Богу зовеши: Аллилуиа.

Икос 6
По гласу Пречистыя пришед в страну Белоезерскую со другом твоим, преподобным Кириллом, создал еси не далече от него в дебрех безмолвную келлию, да в ней втайне усугубиши труды твоя пред Богом. Мы же, уведевше я, вопием ти:
Радуйся, ради Бога возжаждавый тишайшаго безмолвия.
Радуйся, устроением Пречистыя приведенный в пустыню со другом твоим.
Радуйся, со единем точию другом твоим разделявый безмолвие пустыни.
Радуйся, и от сего друга разлучивыйся, да с единем Христом будеши.
Радуйся, пустынною келлиею паче чертога веселивыйся.
Радуйся, в ней дни в трудех, нощи же в бдениих проводивый.
Радуйся, ради Христа от тяжких к тяжчайшым трудом устремлявыйся.
Радуйся, тайнаго делания пред Отцем Небесным достигнувый.
Радуйся, гласом твоим молитвенным огласивый дебри пустынныя.
Радуйся, немолчно твоими усты славивый имя Христово.
Радуйся, в уме и сердце имевый Иисуса Сладчайшаго.
Радуйся, Ферапонте, угодниче Христов и чудотворче.

Кондак 7
Разбойников ярость нищетою и терпением посрамил еси, нощных птиц клики и зверей шатание победил еси верою во Христа, труды же неусыпными до конца сокрушил еси похоти и немощи плотския, немолчно вопия Богу: Аллилуиа.

Икос 7
Далече зело слышано бысть богоугодное житие твое, преподобне. И от конец земли Русския притекоша к тебе любящии безмолвие. Ты же сих приемляй с любовию, яко отец о обращении заблуждших чад радовался еси. Темже и мы вопием ти:
Радуйся, древних отцев пустынножителей подражателю.
Радуйся, зной, хлад и глад в пустыни с терпением понесый.
Радуйся, тяготу дневную и страх нощный любовию ко Христу победивый.
Радуйся, не устрашивыйся ни зверей дивиих, ни злых человеков.
Радуйся, доблий низложителю искушений диавольских.
Радуйся, за тайныя твоя подвиги в пустыни для Бога прославленный от Бога яве.
Радуйся, яко и в пустыни Господь содела тя вождя ищущым спасения.
Радуйся, благоукрасивый пустыню обителию иночествующих.
Радуйся, неискусных иноков добрый вождю ко Христу.
Радуйся, освятивый пустыню устроением храма Божия.
Радуйся, в храме со ученики твоими воспевавый Богу радостно.
Радуйся, Ферапонте, угодниче Христов и чудотворче.

Кондак 8
Слышав о тебе и о сподвижницех твоих, преподобне, благоверный князь Андрей всем сердцем вознесе хвалу Богу, благословившему отчину его таковыми обитательми, и воспе радостно Богу: Аллилуиа.

Икос 8
Возжела благоверный князь Андрей прияти благословение от святыни твоея, преподобне, и пригласи тя во свой град, ты же, молению его и братии повинуяся, лета старости и труд далечайшаго пути презрев, скоро ко князю притекл еси слышай от него:
Радуйся, леты, наипаче же благомудрием украшенный.
Радуйся, подвижниче Христов неизменный.
Радуйся, Духа Святаго преисполненный.
Радуйся, Материю Бога возлюбленный.
Радуйся, имени Ея обитель иноков создавый.
Радуйся, стаду твоему образ истинный.
Радуйся, чадолюбивый отче иноков.
Радуйся, иноки твоими любимый, яко отец чадолюбивейший.
Радуйся, всех притекающих к тебе исполняяй радости.
Радуйся, всем подаяй скорое утешение.
Радуйся, любве и мира насадителю.
Радуйся, Ферапонте, угодниче Христов и чудотворче.

Кондак 9
Радостию возрадовася благоверный князь Андрей, видев твое к нему пришествие и, да не разлучится с тобою, молением умоли тя, близ него создати новую обитель иноков, в нейже бы выну пети Богу: Аллилуиа.

Икос 9
Аще бо зело отрицался еси, обаче, не князю точию, но Самому Богу повинуяся, на месте краснем близ града Можайска создал еси храм Пречистыя и новую обитель иноков, имже сам в наставника был еси до конца дней твоих, темже слышиши от всех:
Радуйся, благое желание князя благовернаго совершивый мудре.
Радуйся, вторыя своея обители иноков во имя Богоматери учредителю.
Радуйся, в сию обитель собравый множество спасающихся.
Радуйся, насадителю в ней добраго жития.
Радуйся, напоивый ю твоими наставлении.
Радуйся, возрастивый ю многими слезами твоими.
Радуйся, яко многими труды и благими подвиги твоими благоукрасил еси ю.
Радуйся, яко молитвами твоими твориши ю чисту невесту Христову.
Радуйся, радостно предавый в ней Христу душу твою чистую.
Радуйся, телом твоим пребываяй присно в сей обители твоей.
Радуйся, из нея сияяй мирови чудесы.
Радуйся, Ферапонте, угодниче Христов и чудотворче.

Кондак 10
Чистая душа твоя, преподобне, многими подвиги и скорбьми усугубившая своя таланты, принесе к Давшему я Богу, и вниде в радость Господа своего, ныне вопиющи Ему радостно: Аллилуиа.

Икос 10
Аще и до конца дней твоих не преставал еси желати возвращения твоего в первую твою обитель, Белоезерскую, но притекл же к первейшей и вожделеннейшей обители небесней, оставил еси в покров и защиту вторыя обители твоея, Лужецкия, святое тело твое, имже хранимии зовем ти:
Радуйся, на земли поживый равноангельно.
Радуйся, на небеси ликующий со ангелы.
Радуйся, на небеси вчиненный со всеми святыми.
Радуйся, на земли чудесы прославленный.
Радуйся, верный хранителю обители, в нейже почивает тело твое.
Радуйся, избавляяй обитель сию от разрушения.
Радуйся, смиряяй в ней врагов иноплеменных.
Радуйся, низлагаяй всех ея видимых и невидимых враг.
Радуйся, всякия напасти от нея прогоняяй.
Радуйся, подаяй нам молитвами твоими вся благопотребная к вечней жизни.
Радуйся, разрушителю вражды и насадителю братолюбия.
Радуйся, Ферапонте, угодниче Христов и чудотворче.

Кондак 11
Образ был еси стаду твоему во всем и явился еси всем, грядущым с тобою ко Христу по тесному пути, вождь к вечней славе, в нейже ныне со всеми святыми вопиеши Богу: Аллилуиа.

Икос 11
Пение наше тебе побеждается обилием и величием подвигов и всяких добродетелей и чудес твоих. Обаче любовию к тебе горящии, молчати не могуще, молим: приими от нас сицевыя, аще и вельми скудныя, похвалы:
Радуйся, образе смирения, кротости и послушания.
Радуйся, похвало девствующым.
Радуйся, в душевных подвизех и в телесных трудех помощниче наш.
Радуйся, исцеляяй нас от страстей.
Радуйся, врачу скорый в недузех и болезнех.
Радуйся, заступниче сирых и всех обидимых.
Радуйся, утешителю наш в скорбех и бедах и всяких напастех.
Радуйся, от огня и от потопления избавляяй нас.
Радуйся, питателю наш во дни глада и скудости.
Радуйся, подаяй нам обилие плодов и благорастворение воздухов.
Радуйся, яко Бога твориши ко всем нам милостива твоими ходатайствы к Нему.
Радуйся, Ферапонте, угодниче Христов и чудотворче.

Кондак 12
Поюще твое по Бозе житие, твой иночествующым образ, и всем твою, преподобне, помощь благодаряще, славим прославльших тя, Бога и пречистую Богородицу, и вопием Им с тобою: Аллилуиа.

Икос 12
Проповедник Православия явился еси, преподобне, граду твоему и окрестней стране, и далече от них молитвами твоими упраздняеши всякая учения лживая льстивых и лукавых человеков, мы же с тобою в правой вере утверждаемии вопием ти:
Радуйся, правило веры Христовы.
Радуйся, образе истинный любве к Богу.
Радуйся, неусыпный пастырю стада Христова.
Радуйся, нечестия обличителю.
Радуйся, низложителю зловерных.
Радуйся, утверждение верных.
Радуйся, всем православным охранителю.
Радуйся, всем заблуждающым подаяй скорое исправление.
Радуйся, тму неверия разгоняяй.
Радуйся, всех приводяй ко Христу Богу.
Радуйся, Ферапонте, угодниче Христов и чудотворче.

Кондак 13
О преблаженне и досточудне отче наш Ферапонте! Всех нас, ныне тебе усердно молящихся, от бед и вечных мук избави, приятными Богу твоими молитвами, да поем с тобою Богу: Аллилуиа.
Этот Кондак читается трижды, затем Икос 1-й и Кондак 1-й

Молитва преподобному Ферапонту Можайскому, Лужецкому чудотворцу
О всечестный и преблаженный отче наш, Ферапонте! Тебе дадеся благодать молитися о нас, и вемы, яко предстоя Престолу Господа, присно являеши любовь твою к нам непрестанными о нас твоими ходатайствы. Но понеже мы ежечасно умножающе грехи наша, крайняго твоего отвращения достойни сотворихомся, сего ради в покаянии, со слезами припадающе, молим тя: не премени твоея милости к нам на гнев за нечестия и скверны наша, яви убо нам милость твою до конца и согрешающих нас очисти твоими молитвами, возведи к покаянию, укрепи на дела благая, сохрани в православии и во всякой святыни. Даруй нам пребывати в мире, тишине и братолюбии, испроси нам времена безмятежна и изобилие плодов земных, избави от огня и от потопления и от лютых болезней и от смертоносныя язвы. Посли труждающымся благий успех, путешествующым путь безпреткновенный, в мори плавающым пристанище тихое, плененным ослабу и освобождение, сирым помощь и заступление. Умоли Бога: страждущую страну Российскую от лютых безбожник и власти их Господь да свободит, и да возставит престол православных правителей; верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш; да любовию твоею огражденнии, благодарственная всегда поем, прославившему тя, Господу Иисусу Христу, Емуже подобает всякая слава и честь, со Безначальным Его Отцем и с Пресвятым и Животворящим Его Духом во веки веков. Аминь.[/spoiler]

Раб божий Константин

АКАФИСТ
преподобному и богосному отцу нашему Филарету,
игумену и чудотворцу Глинскому.
[spoiler]Кондак 1
Избранниче возлюбленный Божия Матери, дивный и преславный украсителю обители Глинския, преподобне и богоносне отче наш Филарете, пение сие немощное ныне приими и от всяких бед избави нас, вопиющих: Радуйся преподобне отче Филарете, славо и украшение обители Глинския.

Икос 1
Ангельски житие провождаше, сподобился еси ликом ангельским причтения, отче преподобне Филарете, и ныне со безплотными ликующе, молитву приносиши всех Творцу и Богу о всех, славословие сицевое ти возглашающих:
Радуйся, ангелов собеседниче;
Радуйся, человеком наставниче.
Радуйся, всех святых сомолитвениче;
Радуйся, христианом помошниче.
Радуйся, сопричастниче вечныя радости;
Радуйся, приятилище божественныя сладосте.
Радуйся, чудес Христовых всеславное явление;
Радуйся, страны нашея похвало и утвержение.
Радуйся, преподобне отче Филарете, славо и украшение обители Глинския.

Кондак 2
Ведуще, яко много может молитва праведнаго, к тебе, отче, прибегаем и тя усердно молим: милости от Господа испроси всем, верою воспевающим Того славу и величество и зовущим: Аллилуиа.

Икос 2
Разум имущь благодатию Божиею просвещен, стяжал еси духовная дарования и явился еси провозвестник вечнаго Евангелия, чадом твоим истину выну проповедуя и путь ко спасению указующе всем, взывающим ти сице:
Радуйся, пастырю наш добрый;
Радуйся, отче наш благодатный.
Радуйся, присное заблуждающих вразумление;
Радуйся, веры преславныя утверждение.
Радуйся, милостей Божиих провозвестниче;
Радуйся, правды Божией светильниче.
Радуйся, проповедниче богопросвещенный;
Радуйся, в добродетели преславно утвержденный.
Радуйся, преподобне отче Филарете, славо и украшение обители Глинския.

Кондак 3
Сила Вышняго от юности храняше тя, отче достославне, и на путь спасения наставляше, егда восхотел еси стезею шествовати теснаго жития иноческаго, Господу усердно работая и непрестанно вопия: Аллилуиа.

Икос 3
Имея желание всеусердное Господу Своему поработати, восприял еси образ монашескаго равноангельнаго жития и вся искушения и соблазны врага вселукаваго преоборол еси, сего ради похвалы сицевыми ублажаешися:
Радуйся, лику иноческому сопричтенный;
Радуйся, житием добротетельным светло украшенный.
Радуйся, в ризу правду облекшийся;
Радуйся, благодатных дарований сподобльшийся.
Радуйся, отцем древним всеусердно подражавый;
Радуйся, чистоту тех и смирение стяжавый.
Радуйся, мира суету и страстей течение отринувый;
Радуйся, чистоту и богомыслие паче всяческих возлюбивый.
Радуйся, преподобне отче Филарете, славо и украшение обители Глинския.

Кондак 4
Бурное море житейское не возмогоша потопити спасительную ладию молитвенную, на нейже подвиг свой безпрепятственно совершил еси, отче наш Филарете, и достигл еси необуреваемаго пристанища Христова, идеже песнь воспевается: Аллилуиа.

Икос 4
Слышаше в сердце своем призыв Христов, на подвиг тя призывающий, мужественно Господу последовал еси, со апостолом вопия: вся могу о укрепляющем мя Иисусе, темже и мы пение ти приносим, глаголюще:
Радуйся, крест служения Господу приявый;
Радуйся, всему миру образ благочестия явивый.
Радуйся, благодатию Божией укрепляемый;
Радуйся, светом лица Божия выну озаряемый.
Радуйся, сладость молитвы в житии своем вкусивый;
Радуйся, обеты иноческия неврежеднно сохранивый.
Радуйся, от падений греховных нас ограждающий;
Радуйся, на путь правды нас премудре наставляющий.
Радуйся, преподобне отче Филарете, славо и украшение обители Глинския.

Кондак 5
Божиим светом Всеблагим разум твой просвещен бысть, сего ради многая и преславная дела совершил еси во славу Божию и во прославление Пречистыя Матери Его, храмы благоукращающе и Господу воспевающе: Аллилуиа.

Икос 5
Видяще благодати Божией обильное излияние на тебе, богомудре отче, явленное, епископ Евгений призва тя к игуменскому служению и на свещник высокий воздвиже тя, да светом любви осияеши братию обители Глинския и ко Христу неврежденно приведеши паству твою, пение сицевое ти приносящую:
Радуйся, жезл наказаний игуменский восприявый;
Радуйся, паству твою тем добре управивый.
Радуйся, любви отеческия откровение;
Радуйся, промысла Божия всечудное совершение.
Радуйся, в молитве к Богу предстоятелю;
Радуйся, Небесных благ всеславный раздаятелю.
Радуйся, ко благочестию нас ученьми своими наставляющий;
Радуйся, от всякия напасти нас избавляющий.
Радуйся, преподобне отче Филарете, славо и украшение обители Глинския.

Кондак 6
Проповедует обитель Глинская славу деяний твоих, досточудне отче Филарете, храмами Божиими красующеся и собором святых похваляющееся, и, поминающе наставления твоя, Богу непрестанно хвалу возносит, вопиюще: Аллилуиа.

Икос 6
Возсия слава Божия и явися спасительное промышление Господне, еже о Церкви Святей. Тобою бо, отче достославне Филарете, обитель Владычицы Богородицы благоукрасися и житие иноческое в той благообразне исправися, темже чада твоя духовная пение пение ти приношаху сицевое:
Радуйся, храмов Божиих украсителю;
Радуйся, веры и благочестия хранителю.
Радуйся, иноческих обетов блюстителю;
Радуйся, нечестивых обычаев искоренителю.
Радуйся, Пречистой Владычице чисте послуживый;
Радуйся, благословение Ея во смирении восприявый.
Радуйся, волю Господню всецело исполнивый;
Радуйся, Небеснаго Отечества достигнувый.
Радуйся, преподобне отче Филарете, славо и украшение обители Глинския.

Кондак 7
Хотяще всем сердцем прославити Пресвятую Владычицу Богородицу, украсил всеславно обитель, во славу Имени Ея Преславнаго воздвигнутую, темже прославление от Нея прияти сподобился еси и душа твоя, отче треблаженне Филарете, обитель благоукрашенная явися, идеже Господь выну прославляется и хвала Ему присно возсылается: Аллилуиа.

Икос 7
Нового Моисея, путеводящя к Небеси стадо свое, зрим тя, преподобне отче наш Филарете, ученьми бо своими наставляеши к добродетели и подвигу вся, пеньми сицевыми тя ублажающия:
Радуйся, наставниче наш благодатный;
Радуйся, отче милостивый и кроткий.
Радуйся, трапезою Небесною насыщенный;
Радуйся, питием безсмертия напоенный.
Радуйся, словесы своими всех просвещающий;
Радуйся, ученьми своими всех утешающий.
Радуйся, светильниче, огнем добродетели возженный;
Радуйся, благодатию Христовою преукрашенный.
Радуйся, преподобне отче Филарете, славо и украшение обители Глинския.

Кондак 8
Странну всякаго зла и порока соблюл еси душу твою, преподобне отче наш Филарете, и добродетели вместилище всеславное явился еси, Господу присно работая и всем житием песнь Ему составляюще похвальную: Аллилуиа.

Икос 8
Весь благодатию Божией облеклся еси, яко светлою ризою и боготканною, отче наш преподобне, темже и вшел еси непрепятственно во святилище Божие, идеже мольбы и моления присно приносищи всех благих Подателю о чадех твоих, песньми тя сицевыми похваляющих:
Радуйся, непрестанно о всех молитвы приносящий;
Радуйся, о чадех твоих духовных присно ходатайствующий.
Радуйся, молитвы кадило благоуханное;
Радуйся, стено ограждения нерушимая.
Радуйся, звездо всесветло пламенеющая;
Радуйся, к жизни нетленней путь указующий.
Радуйся, яко предстательством твоим мир с Богом обретаем;
Радуйся, яко путем твоим к Небеси восходим.
Радуйся, преподобне отче Филарете, славо и украшение обители Глинския.

Кондак 9
Всякия избави нас напасти и скорби, отче наш богомудре Филарете, ты бо в молитве присно предстоиши престолу Божию и молишися о душах наших, яко истинный друг Христов и чудотворец всемилостивый, непрестанно Богу взывающе: Аллилуиа.

Икос 9
Извитийствовал еси всемудренно уставы и правила жития иноческаго, отче преславне Филарете, пекущеся о соборе монашестующих и о дружине святей, от Бога попечению твоему врученней, яже похвалы и пение ти возсылают сице:
Радуйся, спасения нашего споспешниче;
Радуйся, от лукавства духов злобы всемощный помощниче.
Радуйся, Православия утверждение;
Радуйся, злобы адския обличение.
Радуйся, Путем Господним присно ходивый;
Радуйся, многих от путей погибельных отвративый.
Радуйся, черноризцев похвало всерадостная;
Радуйся, православных песнь всеславная.
Радуйся, преподобне отче Филарете, славо и украшение обители Глинския.

Кондак 10
Спасение многих взыскал еси, отче богомудре, и сам для всех был еси всем, глаголу первоверховнаго апостола последствуя, да приобрящеши вся Христу Богу и к невечернему Царствию приведеши, идеже песнь Творцу всяческих приносится: Аллилуиа.

Икос 10
Стена молитв присно защищает обитель Глинскую и покров твой выну заступает всех, подвиг свой зде совершающих со упованием твердым на всемилостивую Владычицу и твое отеческое предстательство, темже лицы иночестии похвалу ти составляют, взывающе:
Радуйся, крепкое ограждение от находящих на ны искушений;
Радуйся, нетрудное отгнание напастей и скорбей.
Радуйся, мечу, злочестие посецающий;
Радуйся, щите, верных защищающий.
Радуйся, росо, еюже огнь безбожия угашается;
Радуйся, море, имже зловерие потопляется.
Радуйся, Царствия Христова наследниче;
Радуйся, вечныя Пасхи причастниче.
Радуйся, преподобне отче Филарете, славо и украшение обители Глинския.

Кондак 11
Пение паче иных принесл еси Престолу Вседержителя и труды множайшими стяжал еси милость Божию. Темже, яко раб благий и верный, талант сторично преумноживший, вшел еси в радость Господа своего и водворился еси во дворех правды, идеже песнь присно воспевается: Аллилуиа.

Икос 11
Светом немеркнущим озарена бысть душа твоя во время исхода твоего, егда шествовала еси ко Владыце и Пастыреначальнику, крест яко победы знамение носяще, Господа благодаряще и молитву возносяще Ему о всех, похвалы сицевыми тя славящих:
Радуйся, селений небесных преславно достигнувый:
Радуйся, в чертозех пресветлых водворивыйся.
Радуйся, на брак Агнчий всерадостно возшедый;
Радуйся, венцем безсмертия увенчанный.
Радуйся, Светом Невечерним озаренный;
Радуйся, Славою Божиею просвещенный.
Радуйся, крепкое падающих возведение;
Радуйся, право стоящим утверждение.
Радуйся, преподобне отче Филарете, славо и украшение обители Глинския.

Кондак 12
Благодати Божией источник неоскудеваемый явишася всем верным мощи твоя честныя, излевают бо токи исцелений и помощь Небесную всем, с верою к тебе прибегающим и тобою Господу молитву приносящим: Аллилуиа.

Икос 12
Поюще и восхваляюще подвиги и труды твоя, поминаем наставления твоя, отче наш всеславне Филарете, чтим память твою всерадостно и мощем твоим поклоняемся достолепно, молитвы и моления возсылающе:
Радуйся, сосуде, благодатию преисполненный;
Радуйся, ковчеже, дарами Духа всеукрашенный.
Радуйся, чудес источниче неистощимый;
Радуйся, исцелений кладезе неисчерпаемый.
Радуйся, вселукавых духов прогонителю;
Радуйся, козней диавольских победителю.
Радуйся, яко тобою от напастей избавляемся;
Радуйся, яко тобою благодати сподобляемся.
Радуйся, преподобне отче Филарете, славо и украшение обители Глинския.

Кондак 13
О, всеславне и досточудне отче наш Филарете, пустыни Глинския преславный возродителю и о всем мире ходатае теплейший, от обителей славы Горняя призри на чада твоя и молитвами твоими от всяких бед сохрани, купно с тобою песнь Господу приносящих: Аллилуиа.[/spoiler]

Раб божий Константин

Акафист
святителю Филарету, митрополиту Московскому и Коломенскому.
[spoiler]КОНДАК 1
Избранного Богом на служение Церкве Российския и преемника святителей Московских, яко архипастыря Христова, поборника истины и ревнителя благочестия, достойно чтуще тя, Филарете, благодарственное пение восписуем о тебе Господу. Ты же, ходатайственно предстояй Престолу Божию, о нас присно молися, да с любовию зовем ти:

Радуйся, святителю Филарете, веры Православныя богомудрый учителю.

ИКОС 1
Ангел паствы Российския явился еси в житии твоем, святителю Филарете, охраняя и защищая ю и болезнуя сердцем о Отечестве твоем. Ныне же, с лики Небесными совокуплен, наипаче молишися за ны, усердно прославляющих тя и зовущих:

Радуйся, святителей Московских преемниче и в благодати им наследниче; радуйся, яко Петр град Москву возлюбивый.

Радуйся, яко Алексий о нем усердно моливыйся; радуйся, яко Иона бодрственне град стрегий.

Радуйся, яко Макарий русских святых ревностно почитавый; радуйся, Филипповым подвигом утверждавыйся.

Радуйся, Иовлеву благочестию подражавый; радуйся, Ермогеновою любовию ко Отечеству распалаемый.

Радуйся, святителю Филарете, веры Православныя богомудрый учителю.

КОНДАК 2
Видяще Божия благодати обильное излияние, разумеем тя, святителю, яко сосуд, исполненный премудрости и разума, страха Божия и благочестия. Темже благодарственно вопием Подателю всех благ: Аллилуиа.

ИКОС 2
Разумея промышление Божие о себе, святителю Филарете, во вся дни живота твоего тщался еси присно воли Божией покарятися и на Господа единаго все упование возлагати. Темже мы прославляем тя сице:

Радуйся, от утробы матерни Господем избранный; радуйся, от пелен твоих Его возлюбивый.

Радуйся, от юности твоея Бога взыскавый; радуйся, до конца Ему верен бывый.

Радуйся, во вся дни Богу неленостно трудивыйся; радуйся, и в нощи Ему бодренно моливыйся.

Радуйся, выну пред Господем ходивый; радуйся, в сердце твоем присно Его носивый.

Радуйся, святителю Филарете, веры Православныя богомудрый учителю.

КОНДАК 3
Сила Вышняго умножи ревность твою ко благочестию, святителю Филарете, егда восприял еси монашеский чин и основание крепкое лествицы добродетелей поставил еси. Сего ради, прославляюще подвиги твоя, вопием хвалебную песнь Богу: Аллилуиа.

ИКОС 3
Имея разум богоприятный, востекл еси, святителю, к познанию истины Христовы. Мы же, словесы твоими в вере утвердившеся, похвалы, яко кадило умное и благовонное, приносим ти, взывающе сице:

Радуйся, Богом Словом наученный; радуйся, Духом Святым вразумленный.

Радуйся, богодухновенныя книги изъяснивый; радуйся, многия писания святых отец верным преподавый.

Радуйся, исповедание веры уяснивый; радуйся, глад духовный словом Божиим утоливый.

Радуйся, свобождение угнетенным возвестивый; радуйся, деяньми своими паству российскую духовно обогативый.

Радуйся, святителю Филарете, веры Православныя богомудрый учителю.

КОНДАК 4
Бурю внутрь имея помышлений сумнительных о житии своем, пиит российский в уныние прииде. Богомудрый же глагол твой услышав, святителю Филарете, яко не всуе жизнь от Бога нам дадеся, благодарне вразумися. Мы же, назидающеся сим, со умилением Богу вопием: Аллилуиа.

ИКОС 4
Слышавше пастыри Христовы по всей России славное имя твое, святителю Филарете, к тебе, яко премудрому архипастырю, притекаху, ищуще совета, наставления и защищения. Такожде и мы, от тебе наставление приемлюще, радостно взываем сице:

Радуйся, архиерейством от Бога почтенный; радуйся, крест сего служения смиренно понесый.

Радуйся, тайн Божиих премудрый строителю; радуйся, вечери Господней благоговейный совершителю.

Радуйся, апостолов и святителей преемниче; радуйся, благодати их достойный наследниче.

Радуйся, лика святых сопричастниче; радуйся, Царствия Небеснаго присный жителю.

Радуйся, святителю Филарете, веры Православныя богомудрый учителю.

КОНДАК 5
Боготечная звезда на небе церковнем возсиял еси, святителю Филарете, мрак греховный озаряя и тьму неверия просвещая. Темже явился еси всем ищущим спасения яко светильник путеводный, научая воспевати Христу Богу: Аллилуиа.

ИКОС 5
Видяще людие российстии, святителю Филарете, усердное твое служение во дни бедствий народных и сугубое попечение о сущих во узах, возблагодариша Господа, даровавшаго тя, столпа Церкви нашея. Мы же, прославляюще и тайная благая деяния твоя, ныне Промыслом Божиим явленная, воспеваем сице:

Радуйся, Коломны благое прозябение; радуйся, Лавры Сергиевы благоуханный цвете.

Радуйся, града Петрова преизящный столпе; радуйся, Твери преименитое укращение.

Радуйся, Ярославля преславное величание; радуйся, первопрестольныя Москвы похвало.

Радуйся, Руси святыя ликование; радуйся, всем притекающим к тебе радование.

Радуйся, святителю Филарете, веры Православныя богомудрый учителю.

КОНДАК 6
Проповедника златоустаго вемы тя, святителю Филарете, словом Истины нравы благия утверждая, заблуждшыя исправляя, грешныя обличая. Сего ради, восхваляюще тя, песнь Богу воздаем: Аллилуиа.

ИКОС 6
Возсиял еси евангельски на свещнице церковнем яко светильник, верху горы стояй, святителю Филарете, образ верным показав словом, житием, любовию, верою и чистотою. Сего ради вопием ти:

Радуйся, Христа ради во уметы вся вменивый; радуйся, подвигом добрым подвизавыйся.

Радуйся, от юности себе воли Божией предавый; радуйся, молитву всем сердцем возлюбивый.

Радуйся, слову Божию наученный; радуйся, послушанию навыкнувый.

Радуйся, в терпении душу твою спасый; радуйся, в смирении Богом превознесенный.

Радуйся, святителю Филарете, веры Православныя богомудрый учителю.

КОНДАК 7
Хотя в монашестве смиренно житие проводити, потщался еси, святе, суеты мира сего избегнути. Промысл же Божий, вящшее о тебе промышляя, постави тя священноархимандрита обители Сергиевы и святителя Церкве Российския. Мы же, дивящеся сему, поем Богу: Аллилуиа.

ИКОС 7
Новый показася рачитель и устроитель скитов и обителей, святителю Филарете, да вси, хотящий шествовати узким путем, спасительную жизнь в них обрящут. Темже вопием ти:

Радуйся, соблазнами мира не прельстивыйся; радуйся, обеты монашества исполнивый.

Радуйся, преподобнаго Сергия от юности возлюбивый; радуйся, посещением его утешенный.

Радуйся, преподобнаго Антония, яко духовнаго отца и собеседника имевый; радуйся, преподобнаго Серафима усердно почитавый.

Радуйся, пустынное житие в сердце носивый; радуйся, яко сего ради скиты в Лавре Троицстей насадивый.

Радуйся, святителю Филарете, веры Православныя богомудрый учителю.

КОНДАК 8
Странное и дивное чудо являет днесь храм Христа Спасителя, тобою, святителю Филарете, в воспоминание победы христолюбиваго российскаго воинства основанный, в годину же безбожия до основания разрушенный и ныне милостию Божиею возрожденный. Мы же, о сем благодаряще Бога, вопием: Аллилуиа.

ИКОС 8
Весь был еси всем, святителю Филарете, яко архипастырь милостивый и отец добрый чадолюбивый и всякое дело с разсуждением во благо Церкве Божия творяй. Темже зовем ти:

Радуйся, храма Христа Спасителя основателю; радуйся, благолепия церковнаго ревнителю.

Радуйся, священства богомудрый архипастырю; радуйся, монашествующих наставниче.

Радуйся, церковных уставов хранителю; радуйся, лжемудрствований искоренителю.

Радуйся, во благих делех помощниче; радуйся, в добрых намерениих поспешниче.

Радуйся, святителю Филарете, веры Православныя богомудрый учителю.

КОНДАК 9
Всяк возраст и чин человеческий удивишася обилию благодати Божией, в тебе действующей, еюже, немощь телесную духом препобеждая, многая труды подъял еси, Богу взывая: Аллилуиа.

ИКОС 9
Ветии многовещаннии и мудрецы века сего умолкаху при гласе богомудрых словес твоих, святителю. Мы же, дивящеся Духу благодати премудрости и разума, обильно действующу в тебе, верно вопием:

Радуйся, философе велемудрый; радуйся, проповедниче преизящный.

Радуйся, благовестниче златоустый; радуйся, наставниче предобрый.

Радуйся, заблуждших исправление; радуйся, безбожных вразумление.

Радуйся, суемудрых посрамителю; радуйся, боголюбцев покровителю.

Радуйся, святителю Филарете, веры Православныя богомудрый учителю.

КОНДАК 10
Спасти хотя душу твою, святителю Филарете, крест Христов яко благое иго на рамо подъял еси и с любовию за Господем последовал еси, поя Ему: Аллилуиа.

ИКОС 10
Стена крепкая был еси, святителю Филарете, Церкви и пастве твоей Российстей, защищая и ограждая от нападающих и гонящих ю. Темже мы, прославляюще тя яко поборника веры и благочестия, зовем:

Радуйся, о пастве твоей присно сердцем болезновавый; радуйся, о благостоянии отечества твоего слезно моливыйся.

Радуйся, грядущая России, яко темный облак, предведевый; радуйся, во искушениих к терпению паству твою призывавый.

Радуйся, ересей мужественный посрамителю; радуйся, раскола ревностный врачевателю.

Радуйся, заблуждших кроткий вразумителю; радуйся, отеческих обычаев твердый блюстителю.

Радуйся, святителю Филарете, веры Православныя богомудрый учителю.

КОНДАК 11
Пение всякое подобает воздати ти, святителю Филарете, ты бо смирением приобрел еси высокая, послушанием воли Божией стяжал еси благодать Святаго Духа. Сего ради прославльшему тя Богу вопием: Аллилуиа.

ИКОС 11
Яко светоприемное зерцало Христа, Солнца умнаго, начертал еси, святителю Филарете, в сердце твоем зраки Горних вещей, к разуму Божественному наставляя зовущия ти:

Радуйся, светильниче, миру Богом данный; радуйся, к святительству Господем призванный.

Радуйся, под иго Христово выю преклонивый; радуйся, бремя Его кротко подъемый.

Радуйся, искушения мужественне претерпевый; радуйся, язвы Господа Христа в сердце твоем носивый.

Радуйся, любовию Христовою осиянный; радуйся, светом ея просвещенный.

Радуйся, святителю Филарете, веры Православныя богомудрый учителю.

КОНДАК 12
Благодать святительства дарова Господь ти, богомудре Филарете, да грешныя обличиши, немощныя укрепиши, кающияся возставиши и всем вся будеши, да всяко некия спасеши. Сего ради благодарственно Богу поем: Аллилуиа.

ИКОС 12
Поюще честное преставление твое, святителю Филарете, в немже Господу с радостию предстал еси, прославляем тя, яко воистину умножившаго во сто крат данный ти талант, и с любовию вопием:

Радуйся, христианския кончины сподобивыйся; радуйся, от родителя твоего усопшаго кончину предузнавый.

Радуйся, яко в день преставления твоего Божественную литургию совершил еси; радуйся, яко на Небеси со святыми водворился еси.

Радуйся, во обители преподобнаго Сергия погребенный; радуйся, от безбожных по смерти телесное поругание претерпевый.

Радуйся, яко мощи твоя во время благоприятно обретошася; радуйся, яко

в стольный град мощами святыми твоими возвратился еси.

Радуйся, святителю Филарете, веры Православныя богомудрый учителю.

КОНДАК 13
О богомудре святителю Христов Филарете, учителю премудрый и златоусте Российский! Приими молебное сие пение и умоли Господа нашего Иисуса Христа сохранити в чистоте и святости Церковь Русскую, отечеству нашему благостояние даровати, нам же, ученьми и писаньми твоими наученным, Царствие Небесное улучити, идеже вкупе с тобою радостно будем воспевати Ему: Аллилуиа.

Сей кондак читается трижды, затем икос 1 и кондак 1.

МОЛИТВА
О преславне и богомудре святителю Христов Филарете, Российския Церкве светильниче, земли нашея похвало и граду Москве украшение! Ты житием и служением твоим трием вселенским святителем был еси подобник:

Василию Великому – яко бытие сущих изъяснил еси, Церкве Божия и Таин Христовых строитель добрый явился еси, иноческих уставов быв ревностный исполнитель и покровитель;

Григорию Богослову – яко неботаинственных созерцаний о Святей Троице и о Бозе Слове сподобился еси и сих искусный провозвестник явился еси;

Иоанну Златоустому – яко неустанный проповедник и учитель покаяния народа Божия был еси.

И ныне, вкупе с ними предстоя во славе Престолу Божию и ходатайствуя о нас, моли Церкви Российстей на камени исповедания Православныя веры утвержденней быти, стране нашей мир и единение даровати, пастырем слово Божественныя Истины право правити, град Москву и паству твою от всяких напастей сохранити.

Призри с Небесе, святителю, на ны, чада твоя, и даруй нам теплым твоим ходатайством ко Господу в заповедех Его преспевати, веру тверду, любовь нелицемерну и благочестие до последняго часа смертнаго сохранити, да непостыдно предстанем Спасителю нашему Господу Иисусу Христу, Емуже со Отцем и Святым Духом подобает слава, честь и поклонение ныне, и присно, и во веки веков. Аминь.[/spoiler]

Раб божий Константин

Акафист блаженному Филарету, Ичалковския земли подвижнику.
[spoiler]Кондак 1
Избранный угодниче Христов, скорый помощниче и молитвенниче о душах наших, оставив мир и яже в мире и Господеви благоугодив, яко звезда светлая просиял еси добродетельным своим житием и чудотворением. Ныне же, имея дерзновение, молися за ны ко Спасу Христу; мы же, ведущие тя яко заступника приснаго, ублажаем тя и согласно вопием: Радуйся, блаженне отче наш Филарете, Ичалковския земли радосте и утешение.

 

Икос 1
Ангелоподобную чистоту от юности своея возлюбил еси, блаженне отче Филарете, и яко заря утренняя возсиял еси в подвизех поста и молитвы в пределех земли Ичалковския, благонравным своим житием разгоняя всякую тьму греховную и приводя многия люди к свету Божию. И ныне мы, благодаряще Господа, давшаго нам толикаго Своего угодника, приносим ти благохваления сицевая:
Радуйся, родителей богобоязненных чадо богодарованное.
Радуйся, благочестию и любви к Богу материею своею наученный.
Радуйся, многия добродетели ея унаследовавый.
Радуйся, всякое благонравие от отца своего восприявый.
Радуйся, от юности своея всем сердцем и разумением своим Господа возлюбивый.
Радуйся, вся красная и скоропреходящая мира сего ни во что же вменивый.
Радуйся, мужу желаний духовных.
Радуйся, примеру братьев своих много подражавый.
Радуйся, житию их по Бозе усердно поревновавый.
Радуйся, вся намерения своя, како благоугодити Господеви, искренне полагавый.
Радуйся, како обрести в земном своем житии желаний край всяко искавый.
Радуйся, Ичалковския веси украшение.
Радуйся, блаженне отче наш Филарете, Ичалковския земли радосте и утешение.

 

Кондак 2
Видя Господь желания и стремления души твоея, блаженне отче Филарете, в подобие братии своей отрешитися от всякия мирския суеты, обаче родителие твоя презираша твоя горняя помышления и тщашася отвратити тя от служения Богу во иночестем чине, но ничтоже успеша, укрепляющу тя Богу, Емуже непрестанно взывал еси: Аллилуиа.

 

Икос 2
Разумел еси добре, блаженне отче Филарете, яко живя в мире , неудобь обрящеши спасение. Торжеству же брачному приспевшу, никакоже прекословил еси воле родителей твоих, иже предложиша ти прияти брачный соуз. Ты же предпочел еси в девственней чистоте Господу благоугодити, и тако, по обоюдному единомышлению с нареченною твоею, оставил еси дом отеческий, удалившись во излюбленное тебе пустынное место. О сем убо мы удивляющеся, приносим тебе хвалы сия:
Радуйся, Божий избранниче, искушеньми мира сего никакоже прельстивыйся.
Радуйся, вольную нищету Христа ради паче богатства возлюбивый.
Радуйся, чистоту души и тела твоего Христу Богу непорочно соблюдый.
Радуйся , послушание Воли Божией паче послушания родителем своим показавый.
Радуйся, и нареченную свою Анастасию на путь пустынножительства наставивый.
Радуйся, яко и тая молитвами твоими до конца живота своего девство честно соблюла еси.
Радуйся, в храм Божий на молитву усердно приходивший.
Радуйся, к Святым Христовым Тайнам в глубоком благоговении приступавший.
Радуйся, молитву непрестанную возлюбивый.
Радуйся, к мірскому не прилепляяся в море поживый.
Радуйся, ко Господу очи сердца твоего возводивый.
Радуйся, блаженне отче наш Филарете, Ичалковския земли радосте и утешение.

 

Кондак 3
Силою Духа Божия водимый и укрепляемый, блаженне отче наш, удалился еси в пусто место во един из приалатырских косогоров, яко един из отшельников, взыскующих Господа, полагая зде начало отшельническия жизни своея в нищете и во всяких лишениих, возлагая упование свое на помощь от Господа Сил, молитвы вознося к Сотворшему небо и землю, и невозбранно поя Ему: Аллилуиа.

 

Икос 3
Имея велию ревность по Бозе и велие тщание к жизни подвижничестей, угодниче Божий, с любовию воспринимал еси вся тяготы и лишения, да не возобладает плоть над духом. О сем убо умиляющеся, глаголем тебе таковая:
Радуйся, Царя Небеснаго воине добропобедный.
Радуйся, от млада возраста всего себе вдавый на служение Господу.
Радуйся, наставниче дел добрых.
Радуйся, бесовских сил прогнание.
Радуйся, правило веры истинныя.
Радуйся, образе нищеты духовныя.
Радуйся, в души твоей добродетели высокия возрастивый.
Радуйся, любителю добродетели тезоименитый.
Радуйся, подвигов ради временнаго жития в покое вечнем обитающий.
Радуйся, яко упованием Ною уподобился еси.
Радуйся, Илии и Елисею подобящеся, воды алатырския яко по суху преходивый.
Радуйся, в добродетелех благоискусен подвижник бывый.
Радуйся, блаженне отче наш Филарете, Ичалковския земли радосте и утешение.

 

Кондак 4
Бурю страстей юношеских воздержанием всяко укрощая и постом приобретая благодатное безстрастие, блаженне отче Филарете, силою Божиею укрепляем на подвиги духовныя и Бога имея помогающа ти, направил еси стопы своя в Саровскую обитель и тамо сопричтен был еси к стаду словесных овец, и наречен бе не Филипп, но Филарет, во еже непреткновенно возходити по стезям добродетелей к совершенству духовному в меру возраста Христова, воспевая Богу песнь: Аллилуиа.

 

Икос 4
Слышаша мнози о богоугоднем житии твоем, богомудре отче наш Филарете, и прихождаху к тебе: овии послушати словеса твоя, овии исцеления от недуг своих прияти, ты же, вся отечески приемля, руководил еси ко спасению, отгоняя и исцеляя всяк недуг и всяку немощь. Мы же, благоговейно внимая всем твоим глаголам, восписуем тебе благохваления сицевая:
Радуйся, девственниче душею и телом.
Радуйся, трудолюбче нелицемерный.
Радуйся, презревый славу и человеческую суету.
Радуйся, сокрушивый сети тщеславия и гордыни.
Радуйся, с пострижением власов главы твоея все плотское мудрование совершенно отложивый.
Радуйся, в ризу смирения одеянный.
Радуйся, в сандалии послушания обувенный.
Радуйся, куколь незлобия на ся возложивый.
Радуйся, меч духовный в руце твоей выну имевый.
Радуйся, монашескаго жития правило известнейшее.
Радуйся, Царствия Горняго ревностный искателю.
Радуйся, лествице духовнаго восхождения.
Радуйся, блаженне отче наш Филарете, Ичалковския земли радосте и утешение.

 

Кондак 5
Боготечной звездой явился еси ичалковстем людем, дивный угодниче Божий старче Филарете, егда оставив дом и вся блага его, избрал еси себе сокровенное удолие земное еже жительствовати, идеже и сооруди себе малую келлию, идеже в тишине потщался еси совершати своя подвиги и пети Богу: Аллилуиа.

 

Икос 5
Боголюбивии людие зряху дивное твое, отче наш Филарете, уединенное житие, и видев многия твоя труды и многия твоя моления, умиляхуся, и жаждуще святых молитв твоих, начаша прихождати к тебе и никтоже отыде от тебе тощь и неутешен. Сего ради и взываем тебе сице:
Радуйся, велие мужество в житии своем проявивый.
Радуйся, трудолюбие свое во славу Божию неленостное показавый.
Радуйся, молитвенниче наш пред Богом неусыпный.
Радуйся, подвиги своими горяй и светяй.
Радуйся, светильниче пустынный, осветивый Ичалковстии пределы.
Радуйся, яко многих приходящих к тебе в разум истины приводил еси.
Радуйся, яко лжемудрием объюродивших изобличал еси.
Радуйся, яко многих мысли неправые провидев, тех исправлял еси.
Радуйся , яко приносимыя тебе некими человеки дары не принимал еси.
Радуйся, яко предваряя исходил еси из келлии в сретение неких рабов Божих, о пришествии их свыше извещенный.
Радуйся, укоризны не малые претерпевый и раны и болезни от татей и разбойников, яже нападоша на тя в келлии, приявый.
Радуйся, ради Христа простивый тем обидчиком вся обиды и злоключения твоя.
Радуйся, блаженне отче наш Филарете, Ичалковския земли радосте и утешение.

 

Кондак 6
Проповедует ныне пустынька приалатырская подвиги и отшельническое житие твое, блаженне отче наш Филарете, зрим бо, како на всяк день благочестивии людие притекают к месту земнаго обитания твоего, почитающе тя и в радости вопиюще Богу богокрасную песнь: Аллилуиа.

 

Икос 6
Возсиял еси в Ичалковстей веси светом добродетельнаго твоего жития и был еси светильник многим, преподобне отче наш, указующий путь к Свету Божию, к познанию Вечныя Истины, и тако сущу ти во Свете присносущнем, благоговейно взываем ти:
Радуйся, отче святый, светом добродетелей твоих нас озаривый.
Радуйся, молитвенниче о чтущих святую память твою.
Радуйся, душам немощным живоносный источниче исцелений.
Радуйся, пустынниче, мирскую честь и богатство возненавидевый.
Радуйся, светлостию жития твоего сиявый миру.
Радуйся, поучении твоими назидавый многия во спасение.
Радуйся, огнь любве Христовой в себе носивый.
Радуйся, не приложивый сердца своего к земным наслаждением.
Радуйся, покоя вечнаго достигнувый.
Радуйся, Православия светлый светильниче.
Радуйся, за православныя люди моления возносивый.
Радуйся, твоими подвиги от обленения нас возставляяй.
Радуйся, блаженне отче наш Филарете, Ичалковския земли радосте и утешение.

 

Кондак 7
Едино хотение имея, человече Божий, и едино желание, едино просих от Господа и то взыскал еси, еже жити ти в Дому Господни во вся дни живота своего. Пренебрегл еси отчее наследие и, возненавидев любовь плотскую, отреклся еси себе самаго, на многия лишения вдавши себе, прося у Господа, да не лишит тя Царствия Своего Небеснаго, идеже вечно воспеваеши Триединому Богу: Аллилуиа.

 

Икос 7
Чудо превелие показася нам в житии твоем, отче, дивный наш старче, хотя бо волю родителей твоих исполнити, ко брачному венцу пришел еси, обаче благодати Божией свету в сердце твоем возсиявшу, изведен был еси на пути иныя, Алексию человеку Божию в подобие. И тако восприял еси в души своей боговедения дар совершен во спасение всех нас, поющих сицевая:
Радуйся, чистотою девства своего превосшедый человеческое свое естество.
Радуйся, добровольным своим подвигом ангелы удививый.
Радуйся, и в бреннем телеси твоем, якоже и в души твоей Бога прославивый.
Радуйся, образе благочестия бывый всем приходящим к тебе.
Радуйся, во плоти поживший духовне, на земли небесно.
Радуйся, восходяяй к Богу от силы в силу.
Радуйся, всякую добродетель делами своими изображавый.
Радуйся, Храма Божия неленостный посетителю.
Радуйся, на молитву церковную прежде всех приходивый.
Радуйся , путем дивным и неудобопостигаемым храма Божия в велие разлитие речное достизавый.
Радуйся, в храме Божием присно на молитве с велиим благоговением и страхом Божиим предстоявый.
Радуйся, любовию ко храму Божию горевый и попечение многое выну о нем имевый.
Радуйся, блаженне отче наш Филарете, Ичалковския земли радосте и утешение.

 

Кондак 8
Странен сый, яко пришлец во Ичалковстей веси, блаженне старче, был еси, преселившись во знаемей ныне высоцей горе, взыскуя Господа, и сединами старости украшен, духовной мудростию укреплен, многим совета ищущим был еси наставник, указуя всякому вопрошающему тя путь ко спасению, и пети наставляя немолчно Богу: Аллилуиа.

 

Икос 8
Все житие твое, достоблаженне старче, богоугодно бысть и деяния вся твоя быша во славу Божию. Егда же постиже тя болезнь некая, неустанно Господа благодарил еси, Творца своего за вся прославляя. Егда же предлагаша ти вдатися ко врачем и тем сотворити болезни тыя облегчение, исполнен сый всякия благодати, отвергл еси сие, отвещавая громце: «Сия есть крины райския, Господем насажденныя, и не лепо ми есть уничтожати я». Мы же, дивящеся глубоцей вере твоей, еже к Богу, глаголем тебе таковая:
Радуйся , делы любве твоея веру твою чудотворящу показавый.
Радуйся, болезньми своими здравие души стяжавый.
Радуйся, болящия здрави возставивый.
Радуйся, тайная согрешения человеческая обличавый.
Радуйся, любовь велию к Богу показавый.
Радуйся, житием отцев пустынных плененный.
Радуйся, в подвизех своих неутомимый.
Радуйся, во благочестии неохладимый.
Радуйся, благодатию Божией обогащенный.
Радуйся, благими помыслы и делы своими многоплодный.
Радуйся, путь истины к жизни вечней обретый.
Радуйся, очистительнаго покаяния токи слез источивый.
Радуйся, блаженне отче наш Филарете, Ичалковския земли радосте и утешение.

 

Кондак 9
Всякое естество ангельское удивися высоте добродетельнаго твоего пустыннаго жития, досточудне отче наш Филарете, сего ради Церковь Божия благоукрашается, почитая святое твое преставление, прославляя тя яко причастника Божественныя благодати, темже велегласно зовем вси Дивному во святых Своих Богу: Аллилуиа.

 

Икос 9
Витийства риторския не могут изрещи, блаженне отче, подвиги и вся борения твоя, подъятые в пустыннем твоем житии, но мы любовию твоею побеждаеми, возглашаем тебе хваления сицевая:
Радуйся, милосердия Христова подражателю.
Радуйся, Христа всем сердцем возлюбивый.
Радуйся, богоугодным житием твоим веру утвердивый.
Радуйся, блаженство райское со святыми унаследивый.
Радуйся, слезами сеявый, ныне же радостию пожинаяй.
Радуйся, праведно и богоугодно течение земное совершивый.
Радуйся, <яко> благ неизреченных наслаждаешися.
Радуйся, жителю Божественнаго селения.
Радуйся, всемощный наш заступниче.
Радуйся, венец нетления от руки Христовы получивый.
Радуйся, прибежище наше во всех напастех.
Радуйся, на невидимыя враги наша сильный поборниче.
Радуйся, блаженне отче наш Филарете, Ичалковския земли радосте и утешение.

 

Кондак 10
Спасения ищуще, блаженне старче, в приалатырском косогоре вселился еси, и деяньми благими украшен, в мире премирно пожил еси, Господу непрестанно вопия богокрасную песнь: Аллилуиа.

 

Икос 10
Стена еси ты и покров всем прибегающим к твоему заступлению, отче наш преблагий Филарете, темже мы, верующие в твое о нас молитвенное предстательство, молимся и просим тя, буди нам стена и ограждение необоримое от всяких зол и напастей, да зовем тебе сице:
Радуйся, преславный наш заступниче.
Радуйся, благих в добре утверждающий.
Радуйся, боголепное украшение Христовой Церкви.
Радуйся, земнаго твоего отечествия небесный покровителю.
Радуйся, явлением мощей твоих в Православии нас утверждающий.
Радуйся, пред гробом твоим нас предстоящих умиления исполняющий.
Радуйся, и по смерти аки живый многим являяйся.
Радуйся, яко к желанию спасения нас поучаеши.
Радуйся, богатым мира сего доброе вразумление.
Радуйся, учителю наш кроткий и милостивый.
Радуйся, яко упованию на милость Божию нас научаеши.
Радуйся, чудотворче наш новый и великий.
Радуйся, блаженне отче наш Филарете, Ичалковския земли радосте и утешение.

 

Кондак 11
Песни надгробныя со славою тебе принесе духовный твой отец Флавий и мнози священницы и диакони. Множество же великое людей Божиих, ведущих твое доброе богоугодное житие и твое к ним благосердие, провождаху гроб твой к месту погребения твоего ко храму Божию, о коем попечение велие имел еси и идеже непрестанно воспевается умилостивительная песнь Господеви: Аллилуиа.

 

Икос 11
Светильника добродетелей, Ичалковстей веси явленнаго, ведяше тебе, отче наш блаженнейший, боголюбивии людие, на твое светлое погребение во множестве стекшияся, проводити хотяще тебе в путь всея земли, и плакаху и рыдаху о твоем разлучении. Дуси же нечистии, не могущие терпети величия пустынных твоих подвигов, усты одержимых ими издаваху вопли своя. Мы же, зряще вся сия, из глубины души взываем ти:
Радуйся, Божий избранниче.
Радуйся, ангелом собеседниче.
Радуйся , и от нас любовию твоею не отступивый.
Радуйся, и нам от дарованных ти низпосылаяй.
Радуйся, Всесветлаго Царствия Христова наследниче.
Радуйся, по трудех временный жизни покой вечный получивый.
Радуйся, с преподобными ублажаемый.
Радуйся , не токмо духом нам спребываяй, но и мощи твоя, яко утешение некое, нам явивый.
Радуйся, яко молящимся у мощей твоих исцеления всяких скорбей и болезней подаются.
Радуйся, яко благодать Божия, чрез мощи твоя действующая, коемуждо в печалех подает утешение.
Радуйся, <яко> всякое прошение всех прибегающих к тебе исполняется.
Радуйся, яко предстательством твоим безконечныя жизни сподобляемся.
Радуйся, блаженне отче наш Филарете, Ичалковския земли радосте и утешение.

 

Кондак 12
Благодатию Божиею уведевше время от жития сего отшествия, испросил еси у отца своего духовнаго благословения напутствовати тя Святых Христовых Таин, и тако приуготовив себя ко исходу во ин мир до конца земнаго жития своего, из глубины сердечныя взывал еси ко Владыце живота: Аллилуиа.

 

Икос 12
Воспеваем подвиги и труды твоего равноангельного жития, имиже Христос Господь прослави тя в земли Ичалковстей, темже и нас грешных сотвори причастники Божественныя тоя благодати, да в радости сердца зовем ти:
Радуйся, пустыннических подвигов ревнителю.
Радуйся, нищеты духовныя образе благий.
Радуйся, Царствия Божия наследниче.
Радуйся, благий рабе и верный, вшедый в радость Господа своего.
Радуйся, сердца всех любовию твоею к себе привлекаяй.
Радуйся, во искушениях нам присный помощниче.
Радуйся, скорбных утешителю.
Радуйся, вражиих наветов отразителю.
Радуйся, от жития сего отходящим заступление твое приносящий.
Радуйся, радости духовныя боголюбивым душам подателю.
Радуйся, у престола Божия теплый о нас предстателю.
Радуйся, всякую добродетель делы своими изобразивый.
Радуйся, блаженне отче наш Филарете, Ичалковския земли радосте и утешение.

 

Кондак 13
О преблаженне старче, отче наш Филарете, скорый наш помощниче и молитвенниче о душах наших, воззри ныне благосердием своим на ны грешныя, просящия у тебе помощи и заступления. Буди спасения нашего ходатаю теплый, да сподобимся с тобою и всеми святыми воспевати Богу во веки: Аллилуиа, Аллилуиа, Аллилуиа.
Сей кондак глаголется трижды. И таже: Икос 1 и Кондак 1.

 

Молитва преподобному отцу нашему Филарету, Ичалковския земли подвижнику.

О преблаженне старче, отче наш Филарете, богомудрый наставниче и советодателю всем вопрошающим тебе, неутомимый трудолюбче и усердный молитвенниче за люди своя, присно поминающих тя, велий ревнителю и благопопечителю о Церкви Божией, Ичалковския земли украшение! Призри ныне оком благосердия своего на нас, светло празднующих и почитающих святую память твою, вознеси за нас молитвы своя ко Господу Сил, да дух ревности твоея о славе Божией и Церкви Его святей николиже оскудеет в нас.
Пролей в сердце всякаго, с верою молитвенно обращающагося к тебе, дух совета и разума, всем находящимся в немощи и долгонедужии врачевство свое духовное подаждь и не отрини всех нас от своего заступления.
И ныне мы, вспоминая богосветлый образ жития твоего, живо зрим отеческое твое к нам благоволение. Да тако, в дусе радости и смирении глубоцем, прославляем Отца нашего Небеснаго, Дивнаго во святых Своих. Аминь.

 

Житие преподобного Филарета
http://www.ordis.saransk.net/filaret.htm

Праведный Филарет, Ичалковский чудотворец, родился в 1835 году в селении Ичалки, тогда Нижегородской губернии, и при святом крещении наречён Филиппом. Будучи третьим сыном в зажиточной семье Симеона и Акилины Кулаковых, он получил добрую науку благочестивой жизни. Старшие братья Филиппа стали монахами, и подвизались в Свято-Толгском монастыре Ярославской губернии.
Желая с младенческих лет монашеского жития, Филипп в день своей свадьбы, по договору с невестой, оставил родительский дом и удалился за 6 вёрст от села на правое побережье реки Алатырь.
Вскоре труды подвижника были прерваны основанием неподалёку от его келии поселка Крутая Гора, и Филипп удалился в Саровскую пустынь, где принял монашество с именем Филарет.
После возвращения из Сарова, монах Филарет вновь поселился на пустынном берегу реки Алатырь и предался монашеским трудам и молитвам.
Не может укрыться светильник, стоящий на верху горы. Вскоре люди, стремящиеся к духовному руководству, стали приходить к Филарету и спрашивать его духовного совета. Очевидцы вспоминают мудрость и простоту советов старца, его прозорливость и нелицеприятие.
Во все воскресные и праздничные дни монаха Филарета видели в храме, на богослужении. Однажды старец пришел в храм с другого берега реки в Благовещение, приходившийся в самый разлив воды неведомым образом: моста через реку Алатырь ещё не было.
Когда в 1894 году пожар полностью уничтожил старый сельский храм, и жители решились воздвигнуть в 1902 году новый, стоящий поныне Михаило-Архангельский храм, старец Филарет был настоятелю верным и усердным помощником.
Под конец жизни старца его постигла некая болезнь в виде крупной опухоли на губе. Ему была предложена операция, но Филарет отказался, говоря: "Это райские цветы, и мне ли их уничтожать".
На 78-м году жизни — 8 (21) августа 1913 года старец мирно почил о Господе и был похоронен в ограде любимого им при жизни Ичалковского храма.
Канонизация святого Филарета Ичалковского прошла в Михаило-Архангельском храме с. Ичалки 21 августа 1999 года при большом стечении духовенства и народа. Богослужения возглавил Преосвященнейший Варсонофий, епископ Саранский и Мордовский.[/spoiler]

Раб божий Константин

Акафист святому праведному Филарету Милостивому.
[spoiler]Кондак 1.
Избранный милосердным Господом, отче Филарете, добродетельми украшенный, терпением Иову подражая, нищим сокровище богатства раздав, нетленно благих богатство на небесех прием и с лики праведных водворися, тем же тя почитаем священными песньми и благочестно вси славим зовуще:
Радуйся, милостиве Филарете, праведный угодниче Христов.

Икос 1.
Ангелом небесным нравом подобен был еси на земли, отче Филарете, от младости пренебрегши земная богатства, на Небеси богатство собрал еси, ум в Небесная вперяя, слыша Всещедраго Бога глас: "Ищите же прежде Царствия Божия и правды Его, и сия вся приложатся вам" , тем же в тя вселися Пресвятый Дух, Его же тя обиталищем быти уведевши, со умилением взываем ти сице:
Радуйся, благочестивых родителей твоих Георгия и Анны радость;
Радуйся, добродетельми и страхом Божиим стяжавший святость.
Радуйся, всякую добродетель по имени своему возлюбивый;
Радуйся, из источника веселия Небеснаго жаждущия напоивый.
Радуйся,.паче солнца житием твоим миру возсиявый;
Радуйся, Бога всеконечно и ближняго, яко себе самаго, возлюбивый.
Радуйся, от Писаний Священных наученный;
Радуйся, от Духа Свята благодатию осененный.
Радуйся, милостиве Филарете, праведный угодниче Христов.

Кондак 2.
Видящи тя Господь из млада, родительми твоими, благочестивыми Георгием и Анною, в любви к Богу наставленному, в страхе Божием и в строгом благочестии христианском воспитаннаго, преисполни тя Духа Свята, Его же Светом просветися и нам испроси у Христа Бога да купно с тобою воспоим Ему:
Аллилуия.
Икос 2.
Разум божественный свыше от Христа Спаса тебе дадеся и велие богатство зело умножено, но вся земная и благая мира сего уметы вменивше, и в непрестанном служении ближним со щедростию и веселием раздаял еси в простоте, Филарете Милостиве, от нас благодарне взывание слышиши:
Радуйся, тя чтущия твоими молитвами спасаяй;
Радуйся, яко твоим предстательством жизни вечныя нас сподобляй.
Радуйся, Светом Христовым просвещенный;
Радуйся, премудростию Божией умудренный.
Радуйся, блаженне, добродетели в сердце своем начертавый;
Радуйся, имя свое достойно приявый.
Радуйся, яко Божественного блаженства праведно сподобился;
Радуйся, яко тобою Вышний на Небеси и на земли славится.
Радуйся, милостиве Филарете, праведный угодниче Христов.

Кондак 3.
Сила милосердия Божия осени тя и подвиже немощным и страждущим послужити богатством твоим, щедро пособие раздая нищим, дая всем помощь и утешение, никтоже тощь отыде, но вси вопием с тобою милосердию Божию:
Аллилуия.
Икос 3.
Имущи попечение неусыпное о несчастных и нищих, дал еси убогим, расточая богатство твое, милостиве Филарете, сего ради пребывает правда твоя, якоже Давид глаголет, не видевше праведника оставленнаго. Днесь убо всечестную память твою любовию празднующе, достойно чтим тя сице:
Радуйся, яко благотворениями твоими Богу угодивый;
Радуйся, яко безмерным смирением всех удививый.
Радуйся, яко хлеб твой требующим расточивый щедро;
Радуйся, яко в деяниях своих обрел еси лествицу восхождения на Небо.
Радуйся, силою милостыни в Царство Небесное введомый с велиим дерзновением;
Радуйся, ближнему послуживый со всяким смирением.
Радуйся, от милосердия жаждущия напояющий;
Радуйся, от щедрости алчущия накормляющий.
Радуйся, милостиве Филарете, праведный угодниче Христов.

Кондак 4.
Бурю злых напастей претерпел еси, милостиве Филарете, егда нападе на страну Пафлагонскую лютое воинство измаильтянское и разграби ю, и опустоши ю, и пламенем выжже ю. Ты же, Иову в терпении подражая, радовался о лишении твоем, за бедность, яко прежде за богатство, благодаря Бога, вопиял Ему:
Аллилуйя.
Икос 4.
Слышаша премногую твою добродетель: яко новый Иов показуешися, не точию в изобили праведен, но и в терпении непорочен. Внезапу бо, яко же он, всего имения лишився, ниже усты противу Господа согрешил еси, терпеливейший, сего ради глаголем ти сице:
Радуйся, отче Филарете, нищеты радостно приявый до зела смирение;
Радуйся, и в бедности скорый быв на раздаяние и милование.
Радуйся, благочестно, во испытании упования на Господа не отложивый;
Радуйся, даже от своей семьи укоры и обиды потерпевый.
Радуйся, яко Господа за вся славил и благодарил еси;
Радуйся, паче земнаго богатства Христа возлюбил еси.
Радуйся, терпящий лишения и уничижения во всем;
Радуйся, стяжавый мзду твою в терпении твоем.
Радуйся, милостиве Филарете, праведный угодниче Христов.

Кондак 5.
Боготечную звезду ведим тя, праведне Филарете, ко Христу путь неприпенаемый нам показавый. Богатства лишение понеся, и последняя имения своя нищим раздая сам бо добро творяше и страждуще терпиши, сим же Богу угодив, ныне со ангелы ликуеши:
Аллилуйя.
Икос 5.
Видеша беднаго соседа скорбяща, отпряг от супруг вола своего, милостиве Филарете, и дал ему. От жены же своея Феозвы поношение, брань и упрекания потерпел еси кроток, благосострадателен, незлобиве. Иному пришедшему отдал хлеб свой и мед, иному одежду с себя совлекл еси, сам в одежды нетленныя на пир Царя Небеснаго облеклся. Мы же ныне благодарственно славим тя сице:
Радуйся, всехвальне Филарете, внезапной бедности твоей возрадовавшийся;
Радуйся, блаженне Филарете, в бедности нечаянной не отчаявшийся.
Радуйся, богомудре Филарете, в добрых делех нас наставляющий;
Радуйся, щедродательне Филарете, и последнее свое раздающий.
Радуйся, досточудне Филарете, ближняго ради насущнаго хлеба себя лишающий;
Радуйся, всеславне Филарете, сего ради Хлеб Небесный вечно вкушающий.
Радуйся, Христоподражательне Филарете, венцем терпения увенчанный;
Радуйся, всечестне Филарете, алчущия питавый, сам от Бога благодатию напитанный.
Радуйся, милостиве Филарете, праведный угодниче Христов.

Кондак 6.
Проповедницы благовестия, Христовы апостоли, радуются, зрящее смирение твое, отче Филарете, ты бо видяще семью свою тайно от тебя трапезу вкушающу, смиренно рек: Чада мои, приимите ми, не яко отца вашего, но яко странника и гостя. Мы же, недостойнии, смирению твоему скудно подражая, поем Богу нашему:
Аллилуйя.
Икос 6.
Возсиявый в земле Пафлагонской светильник благочестия, достоублажаеме Филарете, и по всей земли, Христа - Свет миру прославил еси терпением и милостию, и в Господе мзду приял, и попечение у Вышняго, и венец доброты от руки Его, зане десницею покрыл праведника и мьннцею Своею защитил его, нам же благословил ублажать тя сице:
Радуйся, яко заповедей Господних делатель непостыдный;
Радуйся, добрый источник подаяния.
Радуйся, идола сребролюбия сокрушивый;
Радуйся, к богатству Небесному взор умный устремивый.
Радуйся, пременивый тленная в Небесная;
Радуйся, сеятелю добрый благочестия.
Радуйся, милости кладязю неисчерпаемый;
Радуйся, яко вся раздая, да Христа приобящеши.
Радуйся, милостиве Филарете, праведный угодниче Христов.

Кондак 7.
Хотящу императору Константину Порфирородному обрести жену, мать его Ирина направила еси во вся концы страны послы, дабы привести достойнейших девиц, из коих надлежит выбрать невесту. Послы же в дом Филаретов внидя и обретя внуку его, Марию, кротку и благолепну, представили еси ю пред царя. Узрев же кою, зело возлюбил еси ю царь и обручил еси себе, благодаря Бога за милость Его и восклицая Ему:
Аллилуйя.
Икос 7.
Новую показа стезю подвига твоего, Господь, явив милость внуке твоей Марии, тебе же вновь даровал еси богатство и славу. Но славу Небесную возжелав вместо земной, повелел еси семье своей сотворить пир велий для царя и вельмож его. На пир же в дом свой собрал еси множество нищих, больных и убогих. Сам выйдя навстречу им, приял еси радушно, с семейством своим служа Царю Небесному рекшему: Понеже сотвористе единому сих братий моих менших, мне сотвористе. Убогия гости твои, видя смирение твое, умиленно пели ти:
Радуйся, елей милости изливающий;
Радуйся, на трапезу, Царя Небесного призывающий.
Радуйся, идолу благополучия земнаго не поклонивыйся;
Радуйся, Царя Христа со слугами Его, нищими и убогими, приявый.
Радуйся, яко предрекл еси от Бога воздаяние благотворения твоего;
Радуйся, покрове милосердия убогим.
Радуйся, блаженство милостию стяжавый;
Радуйся, Христу смиренно послуживый.
Радуйся, милостиве Филарете, праведный угодниче Христов.

Кондак 8.
Странно твое возвышение неведущим милосердие Господа, ты же глаголы мудрости, отче святый, приял еси во глубину души твоея, Соломону рекшему: "праведникам воздается добром" и "венец мудрых богатство их", тем же восприял еси благая в животе твоем, быв сродник царев славный и богатый, сего ради от благаго сокровища сердца твоего благия плоды изнесл еси, нам, предстательством твоим пред Господом, благодать подаеши Ему же поя:
Аллилуйя.
Икос 8.
Весь бе в служении подвизался, страждущим и нуждающимся подая требуемое. Делы всяческими показал еси, яко истинную к Богу и ближнему стяжал еси любовь, наипаче же явил еси сие милость подавая нищим. Но и лжива богача, в рубище рядившагося для преумножения богатства своего,наказуя смирял. Впредь же ларцы три изготовить повелев, вложил еси туда медь, сребро и злато, дабы подавая каждому потребное, чрез руку свою, творити лишь Волю Божию. Все же, дивяшеся мудрости твоей, воспеша ти:
Радуйся, яко милостию милость стяжал еси;
Радуйся, яко сребролюбивого лжеца укорил еси.
Радуйся, скорый помошниче призывающим тя в нужде православным;
Радуйся, яко сокровище доброе есть убогим.
Радуйся, нищих скорое услышание;
Радуйся, яко был во утешение душ о нищих промышление.
Радуйся, милость подражая Бога любощедраго;
Радуйся, блаженством Евангельским, яко багряницею одеявся.
Радуйся, милостиве Филарете, праведный угодниче Христов.

Кондак 9.
Всякое подая даяние, не от человек ища славы и светлости превременного достоинства. Но в тебе, праведне Филарете, воистину Христос прославися, враг же искушая тебя постыдеся. Сего ради и Божественнаго блаженства праведно сподобися, ибо: блажени милостивии, - глаголет милостивый Избавитель, Ему же пение подобает:
Аллилуйя.
Икос 9.
Ветия недоуменным языком и устнами хвалу приносят твоему, Филарете, житию Богоподражательному, егда благосострадателен явился нищим и нуждающимся, сего ради звание, деянию сродное, у всех носиши верно чтущих тя. Тем же и Податель всех благ велиею милостию и славно прослави тя и дарова ти сердце чисто непрестанно славящее неизреченныя
милости Божия. Мы же усты и сердцем поем ти:
Радуйся, отягощенным нищетою утешитель явивыйся;
Радуйся, страннолюбием Аврааму уподобивыйся.
Радуйся, голодных питателю;
Радуйся, бездомных сирот благодетелю.
Радуйся, светлая милостивых славо;
Радуйся, неизбывных милостей Господних источниче.
Радуйся, покровителю благотруждающихся;
Радуйся, утешение всех требующих твоея помощи.
Радуйся, милостиве Филарете, праведный угодниче Христов.

Кондак 10.
Спасти хотя падшаго человека, взыде Спаситель на Крест, дабы смертию Своею умертвить смерть. Ты же, праведный отче, всегда житием своим Христу подражая, уподобися Ему и по смерти, ибо мира не оставил еси милостию своею, но на Небеси у престола Царя Небесного - Христа Бога нашего предстоиши молящеся за вся православныя христианы, а мы на земли воспеваем Его:
Аллилуйя.

Икос 10.
Стена еси и прибежище Господь, творящим Волю святую Его, призрел еси на тя, честный отче, яко на кроткаго, смиреннаго, слушавшаго словес Его и извести тя о близкой кончине твоей. Ты же смиренно и радостно уготовася отойти к Царю Небесному, благословив чада и внуки твоя. Почившаго тя, не безобразила смерть, но яко отблеск Небеснаго блаженства сияла еси в чертах лика неизъяснимая лепота, в нас вселяющая упование и подвизающая пети ти сицевая:
Радуйся, извествование о близкой кончине твоей от Господа получивый;
Радуйся, во отечествие Небесное со славою восшедый.
Радуйся, у престола Царя Небеснаго о нас предстоящий;
Радуйся, во отшествии твоем нас не оставляющий.
Радуйся, яко ныне в Небесных кровех водворяешися;
Радуйся, во успении честном, радости вечныя сподобляешися.
Радуйся, яко прелестию мира сего не уязвился;
Радуйся, яко сокровиществовал сокровище некрадомое.
Радуйся, милостиве Филарете, праведный угодниче Христов.

Кондак 11.
Пение всеумиленное потрясе весь Константинград. Отложив житейскую суету, яко мравия стекахуся народи во обитель иде же сам, еще жив сый, избра себе место погребения. Множество не токмо богатых и сильных прииде ко гробу твоему, но и убогих и нищих храмлюще и ползающе, до небес слезный вопль и рыдание испущаху, почившаго земнаго благодетеля потерявше. Мы же, Небеснаго обретше, благодарим Бога:
Аллилуйя.
Икос 11.
Светозарный луч еси, отче Филарете, от Солнца правды – Христа Бога источаемый, сам многия чудесы и исцеления ныне подаеши требующим твоея помощи, яко прежде щедрою рукою раздавал милостыню. Источник чудес всем, притекающим к тебе с верою, рака священная, идее же лежат святыя твоя мощи подающия одержимым – от бесов свобождение, слепым – прозрение, нагим – одеяние, нищим – подаяние, скорбящим – утешение, кающимся – милование, унывающим – упование, страждущим – терпение и всякому его потребное. Мы же тя благодаряще, радостно призываем:
Радуйся, слепых просветителю;
Радуйся, бесов прогонителю.
Радуйся, всем чтущим тя, благих подателю;
Радуйся, теплый о нас пред Богом предстателю.
Радуйся, яко нищеты мрачный облак разгоняеши;
Радуйся, яко честно призывающим тя помогаеши.
Радуйся, яко по преставлении честном исцеления немощным даруеши;
Радуйся, яко благ временных и вечных усердно ходатайствуеши.
Радуйся, милостиве Филарете, праведный угодниче Христов.

Кондак 12.
Благодать Свою и силу яви Господь чрез святыя мощи твоя, чудесы прославляя кончину твою: прикосновением бо гробу твоему прогоняется демон, стужаяй от рождения нищему Кавококосу, всегда тобою милуемому, сострадательне, он же стрясеся, ста и бысть человек здрав, славя Бога:
Аллилуйя.
Икос 12.
Поюще твое невозбранное восшествие в Царствие Небесное, выну предстоиши Седящему на высоких, моля спастися от всякого зла совершающим и любовию чтущим святую память твою. Ангел же Господень свидетельство о тебе приносит, иже премногою своею к нищим любовию и милостынею, честным же и чистым своим житием, бысть вторый Авраам, и в раи водворяешися в сонме нищих и убогих белообразных сущих и тии друг друга угнетаху, хотяще кийждо ближе к тебе приступити, и пояху:
Радуйся, горняго мира обитателю блаженный;
Радуйся, Небесных благ стяжавый.
Радуйся, яко щедротами и дарми от Господа обогативыйся;
Радуйся, тем же нищету нашу ущедривый.
Радуйся, яко о молящихся ти, тепло молишися.
Радуйся, славне, яко воздаянием жития твоего наслаждаешися.
Радуйся, Духа Святаго жилище святое;
Радуйся, ангельских сил Небесных собеседниче.
Радуйся, милостиве Филарете, праведный угодниче Христов.

Кондак 13 (трижды).
О, блаженне отче Филарете, приими от нас, яко достойную, сию песнь малобденную и моли по многому твоему к Богу дерзновению, долгов оставление, согрешением разрешение, избавление мрака страстей и всяких напастей жития и улучити с тобою радости нескончаемыя пети Богу:
Аллилуйя, аллилуйя, аллилуйя.

Икос 1.
Ангелом небесным нравом подобен был еси на земли, отче Филарете, от младости пренебрегши земная богатства, на Небеси богатство собрал еси, ум в Небесная вперяя, слыша Всещедраго Бога глас: Ищите же прежде Царствия Божия и правды Его, и сия вся приложатся вам , тем же в тя вселися Пресвятый Дух, Его же тя обиталищем быти уведевши, со умилением взываем ти сице:
Радуйся, благочестивых родителей твоих Георгия и Анны радость;
Радуйся, добродетельми и страхом Божиим стяжавший святость.
Радуйся, всякую добродетель по имени своему возлюбивый;
Радуйся, из источника веселия Небеснаго жаждущия напоивый.
Радуйся, паче солнца житием твоим миру возсиявый;
Радуйся, Бога всеконечно и ближняго, яко себе самаго, возлюбивый.
Радуйся, от Писаний Священных наученный;
Радуйся, от Духа Свята благодатию осененный.
Радуйся, милостиве Филарете, праведный угодниче Христов.

Кондак 1.
Избранный милосердным Господом, отче Филарете, добродетельми украшенный, терпением Иову подражая, нищим сокровище богатства раздав, нетленно благих богатство на небесех прием и с лики праведных водворися, тем же тя почитаем священными песньми и благочестно вси славим зовуще:
Радуйся, милостиве Филарете, праведный угодниче Христов.

Молитва ко святому праведному Филарету Милостивому, Пафлагонскому.
О, святый праведниче Филарете, милостию своею милостивому Господу угодивый!
Еще в земном житии твоем всяк приходящь к тебе, никтоже тощь отыде, но всякому по прошению его подававый, ныне нас милостию твоею не оставляеши. К тебе, припадая молимся, теплым предстательством умолити в Троице славимаго Бога, ниспослати нам богатыя Своя милости и даровати нам вся яже к пользе и спасению прошения. И подати печальным утешение, недугующим исцеление, нагим одеяние, голодным пропитание, нищим подаяние, труждающимся воздаяние, а паче сих всем нам ко благому наставление, грехов отпущение и по смерти нашей на Небеса непреткновенное восхождение. Дабы тамо купно с тобою возносить всяческую славу, честь и поклонение Отцу и Сыну и Святому Духу всегда, ныне и присно и во веки веков. Аминь.[/spoiler]

Раб божий Константин

Акафист святителю Филиппу, митрополиту Московскому и всея России, чудотворцу.
[spoiler]Кондак 1


Избранный от Господа Российских первопрестольников преемниче, подвигом славным исповедничества твоего озаривый православную Церковь Христову, темже и от Бога нетлением мощей твоих прославленный, отче наш святителю Филиппе! Похваляем дивнаго во святых своих Господа, и тя величаем, яко усердного пред Христом Богом молитвенника, великого пастыря и чуднаго мученика, и от всего сердца вопием ти: радуйся, святителю Христов Филиппе, исповедниче преславный.


Икос 1


Ангельския силы радовахуся на небеси чистому и святому житию святителю отче наш Филиппе, видяще, яко ты еще юн сый леты, кротость дивную и святое благочестие явил еси, и прославляху Господа тако благоволившего о тебе. Мы же с ними сликовствуя, восхваляем тя, зовуще сице: Радуйся, благочестивых родителей плод благословенный; радуйся, от рождения благодатию Божией покровенный. Радуйся, Господа от юности своей возлюбивый; радуйся, избранный сосуд Того от младости бывый. Радуйся, от отрочества чистым житием Господеви угодивый; радуйся, книжным научением слова Божия себе питавый. Радуйся, службы Божии неленостно посещавый; радуйся, играм детским нимало же внимавый. Радуйся, благочестивых родителей твоих радость и утешение; радуйся, знавших тя похвало и удивление. Радуйся, яко о тебе ангельския силы радуются; радуйся, яко тебе темнообразнии демони ужасаются. Радуйся, святителю Христов Филиппе, исповедниче преславный.


Кондак 2


Видел еси, блаженне Филиппе, во граде Москве храмов Божиих благолепие, обителей иноческих украшение, святых мощей и икон почитание, умилялся еси сердцем твоим и купно с материю твоею службы церковныя посещая, храмы Божии зело возлюбил еси. И тако во благочестии возрастая, тщался еси Отечествия Небеснаго достигнути, идеже Господь во славе пребывает, идеже непрестанно ангельская песнь: Аллилуиа.


Икос 2


Разум твой молитвою и словом Божиим умудряя, Филиппе премудре, отрок кроток и благонравен был еси. Сего ради возлюби тя царь Иоанн, яко отрасль высокородную, в послужение престолу своему приблизи и яко друга своего, почте тя. Ты же славу мира сего ни во чтоже вменяя, единаго, еже на потребу душевную искал еси, темже и сицевых ублажений достоин явился еси: Радуйся, от детства твоего добрый и благочестивый рабе Христов. Радуйся, от юности твоея воспитанный в хранении постов. Радуйся, мира сего душетленныя радости отринувый; радуйся, к взысканию добродетелей себе подвигнувый. Радуйся, не возносивыйся к тебе дружеством; радуйся, душевредную гордость отгнавый духовным мужеством. Радуйся, евангельских добродетелей вместилище; радуйся, благодати Божия чистое приятелище. Радуйся, мудрость евангельскую стяжавый; радуйся, старших себе всегда почитавый. Радуйся, нищих и убогих зело возлюбивый; радуйся, чистоту и целомудрие в други своя вменивый. Радуйся, святителю Христов Филиппе, исповедниче преславный.


Кондак 3


Силою Божия благодати влекомь, сердцем твоим познал еси, угодниче Божий, мира сего суету, любовь царскую к себе видяй и со избранными того слугами общение имея, услады душевныя в сих прелестех не обрел еси, но сердцем твоим о иночестем житии помышляя, благодатныя помощи от Господа просил еси, и тою укрепляемь, взывал еси благодателю Богу: Аллилуиа.


Икос 3


Имеяй возраст совершен, блаженне Филиппе, во храме Божием глас Евангелия Господня услышал еси: не можете Богу работати и мамоне, абие Божию призыву повинуяся, во уметы вся вменивый, служение царское, дом отчий и свое высокородие оставил еси и в нищетнеобразе с молитвою на устех ко обители чудотворцев Соловецких устремился еси; таковому твоему послушанию Господеви удивляющеся, восхваляем тя сице: Радуйся, яко узким путем за Христом последовал еси; радуйся, яко Отечествия Горняго достигнути возжелал еси. Радуйся, руце твои на рало Господне возложивый; радуйся, вспять лица твоего николиже обративый. Радуйся, кротость и смирение Господни сопутниками себе имевый; радуйся, богатство и славу мира сего презревый. Радуйся, Христовой нищете смиренно себе покоривый; радуйся, Господа, Спасителя своего, паче дома и родителей твоих возлюбивый. Радуйся, царя земнаго и сладостей житейских свободивыйся; радуйся, Царя Небеснаго законом и заповедьми оградивыйся. Радуйся, добрый странниче ко Отечествию Небесному; радуйся, безбоязненный путниче ко отоку Соловецкому. Радуйся, святителю Христов Филиппе, исповедниче преславный.


Кондак 4


Буря помышлений сумнительных найдя на тя, святителю Филиппе, егда Господь, сердца любящих его испытуяй, не допусти тя доити до обители Соловецкия, к нейже стопы твоя направил еси. Ты же унынию не вдався, но единому от жителей земли Новгородския пасти овцы его прилепивыйся и радостно вся терпевый Господа ради, в веселии сердца Христу, всемирному Пастырю, ангельскую воспел еси песнь: Аллилуиа.


Икос 4


Слышал еси на езере Онежстем о подвизех иноков обители Соловецкия и желанием зело загоревся, отче святителю Филиппе, потрудитися во обители сей, устремился еси ко отоку Соловецкому, егоже достигнувый с радостию сердечною, смиренныя ради мольбы твоея, прият был еси во обители игуменом и братиею, идеже в радости и смирении послушание проходил еси и своея воли до конца отреклся еси. Сего ради глаголем тебе похвалы сицевыя: Радуйся, суету мира сего оставивый; радуйся, обители Соловецкия достигнувый. Радуйся, яко высокородие твое сокрыл еси; радуйся, яко во обители игуменом и братиею любовне прият был еси. Радуйся, яко кроткаго тя послушника име Соловецкая обитель; радуйся, яко в поте лица твоего, трудов был еси любитель. Радуйся, сечением дров смиренномудрие стяжавый; радуйся, копанием земли и ношением камения плоть твою смирявый. Радуйся, скаредная места со усердием очищавый; радуйся, послушанием братии кротость ангельскую стяжавый. Радуйся, Христовых заповедей добрый исполнителю; радуйся, церковных заветов усердный хранителю. Радуйся, святителю Христов Филиппе, исповедниче преславный.


Кондак 5


Богомыслие пустынное к послушанию твоему приложил еси, отче наш Филиппе, сего ради сочисли тя игумен ко избранному стаду иноков Соловецких. Ты же, со страхом обеты иноческия изрекая, о содействии Божия благодати молился еси и со слезами умиления ко Господу взывал еси: Аллилуиа.


Икос 5


Видеша тя игумен и братия, яко воистинну сосуд избранный Божия благодати, егда чин ангельский восприяв, подвигов твоих не оставил еси, отче преподобне, но многообразными деяньми плоть твою усмиряя, в молитвах и трудех преуспевал еси. Егда же иноцы начаша восхваляти тя, ты же, людския славы не любяй, удалился еси в пусто место и тамо в молитвах, посте и богомыслии пребывал еси. Мы же таковым подвигом твоим дивящеся, не престанем славити тя: Радуйся, монашеского жития истинный ревнителю; радуйся, иноческих обетов пламенный исполнителю. Радуйся, деннонощными подвиги плоть твою духу покоривый; радуйся, молитве Иисусовой зело прилежавый. Радуйся, к богомыслию твоему деяния приложивый; радуйся, терпению иноческаго жития всех научивый. Радуйся, древним подвижником усердный подражателю; радуйся, небрегущих о спасении душевнем строгий обличителю. Радуйся, на Господа все упование свое возлагавый; радуйся, сладостным общением молитв к Нему дух твой питавый. Радуйся, Божия Матере любимиче; радуйся, ангелов собеседниче. Радуйся, святителю Христов Филиппе, исповедниче преславный.


Кондак 6


Проповедник словом и делом жития монашескаго был еси, отче святителю Филиппе, сего ради престарелый игумен Алексий с братиею умолиша тя сан священный и начальство над обителию прияти, да тобою святая обитель пресветло славится в Православной Руси, яко да иноцы и мирстии людие в ней молящеся духовне возрастают и от силы в силу преходяще, воспевают Христу Богу: Аллилуиа.


Икос 6


Возсиял еси яко светило многосветлое во обители Соловецстей, егда начальство во оной восприял еси, святителю наш Филиппе, не устрашился бо еси великаго бремене правления, но во всем образ добрыя жизни подавая, наставял еси братию подвигом иноческим. Сего ради восписуем ти похвалу сицевую: Радуйся, обители Соловецкия мудрый управителю; радуйся, братиям твоим духовным кроткий и смиренный учителю. Радуйся, стадо Христово иноков от волков хищных ограждавый; радуйся, скорби и радости их в сердце вмещавый. Радуйся, о вечном спасении братии ко Господу взывавый; радуйся, к житию по законам евангельским выну их понуждавый. Радуйся, пастырю добрый, тяготы ближних своих смиренно носивый; радуйся, уставы отеческия во обители твоей сохранивый. Радуйся, иноков добрых искусный водителю; радуйся, строптивых и непокоривых строгий смирителю. Радуйся, Христовы любве и мира небеснаго благовестниче; радуйся, Христовы правды твердый поборниче. Радуйся, святителю Христов Филиппе, исповедниче преславный.


Кондак 7


Хотящих восхвалити подвигов трудов твоих и чудная деяния, вразуми нас, святителю Христов Филиппе, недоумеем бо изрещи достойныя тебе хвалы. Обаче во всех трудех и подвизех благодать Божию в тебе видяще, воспеваем о тебе Христу Богу: Аллилуиа.


Икос 7


Новаго Зосиму име тя братия Соловецкия, отче преподобне, душею бо присно в Господе живый, в молитвах всегда пребывал еси, обаче строительства монастырскаго не небрегл еси, святителю Филиппе, новыя храмы устрояя и благоукрашая, скиты и здания для иноков, безмолвия ищущих, созидая и вся, яже на потребу, добре устрояя. Такому неусыпному доброделанию дивящеся, велегласно восхваляем тя сице: Радуйся, Савватию преподобному пустыннолюбием и духовным преуспеянием подобный; радуйся, великому Зосиме игуменством и устроением обители равный. Радуйся, преподобному Герману в вере и твердом уповании на Господа подражавый; радуйся, всех подвижников Соловецких добродетели стяжаый. Радуйся, храм устроивый Богоматере, честнаго Ея Успения; радуйся, собор воздвигнувый Спасова Преображения. Радуйся, пустыни имене Иисусова и скитскаго жития на островех основателю; радуйся, радуйся, старцем безмолвия ищущим, добрый и верный управителю. Радуйся, Таин Божиих дивный совершителю; радуйся, чад твоих духовных благодатный учителю. Радуйся, яко явления Пресвятыя Богородицы сподобился еси; радуйся, яко видением Спасителя в венце терновнем и ризах червленых о предлежащем тебе подвизе извещен был еси. Радуйся, святителю Христов Филиппе, исповедниче преславный.


Кондак 8


Странник безвестен у врат обители Соловецкия явился еси, Филиппе блаженне, обаче славно имя твое содеяся: град Москва и вся земля Российская позна в тебе добродетелей духовных сокровище. Сего ради вождь духовный был еси всея Руси Православныя и всем спасения ищущим, во еже взывати с тобою вкупе Триединому Богу: Аллилуиа.


Икос 8


Всем сердцем твоим и святою любовию твоею послужил еси обители преподобных Зосимы и Савватия, отче досточудне, о нуждах ея зело прилежал еси и о сих царя Иоанна извещаше, он же, ведая о подвизех твоих и юношеския дружбы вспоминая, обитель твою одари. Жителие же града Москвы усердно обители служаху, притекающе к молитвенному заступлению твоему, и восхваляюще тя сице: Радуйся, от царских чертогов до иноческия нищеты себе смиривый; радуйся, земную честь и славу на богатство неоскудеваемое пременивый. Радуйся, житием твоим терпения образ иноком явивый; радуйся, подвиги твоими к Небесному Отечествию их руководивый. Радуйся, Божественныя Литургии благоговейный служителю; радуйся, слова Божия усердный изъяснителю. Радуйся, родительницу твою иноческими подвиги возвеселивый; радуйся, к иноческому житию советом твоим вскоре ю склонивый. Радуйся, столпе православия непоколебимый; радуйся, истины поборниче непреодолимый. Радуйся, утешение скорбящих и крепкая оградо обидимым; радуйся, защищение твердое и отрадо всем ненавидимым. Радуйся, святителю Христов Филиппе, исповедниче преславный.


Кондак 9


Всяк возраст и чин града Москвы зело возрадовася, егда услышано бысть о приятии тобой сана первосвятителя Российския Церкви, всем бо людем ведомо бысть прежнее твое к царю приближение и от него почитание. Сего ради упования и радости великия исполнишася, яко новый святитель усердный заступник обидимых и правды ради гонимых пред грозным царем будет, Всемилостивому Богу благодарственную песнь возгласиша: Аллилуиа.


Икос 9


Ветий многовещанных гласы не возмогут достойно изрещи труды и скорби твоя, первосвятителю Христов Филиппе, грозный бо царь во дни тыя возмути державу свою злою опричниною и сердца зело устраши. Ты же неправду цареву видев и насилием людем творимое слышав, дерзновенно глас свой возвысил еси, кротко царя вразумляя убиения неповинных прекратити. Людие же, видяще твое дерзновенное пред грозным заступление, радостно от сердец своих к любви твоей вопияху сице: Радуйся, яко истинный архиерей был еси Христа Бога; радуйся, яко новый Моисей, понесе бремя тяжкое русскаго народа. Радуйся, пастве твоей словеса закона Христова усердно изъяснявый; радуйся, о овцах словеснаго стада твоего пастырское попечение явивый. Радуйся, российский Златоусте, суда Христова и правды его провозвестниче; радуйся, царя и людей русских богомудрый наставниче. Радуйся, непокоряющихся закону Господню запретителю; радуйся, грознаго царя искренний нелицемерный друже и учителю. Радуйся, злыя опричины безбоязненный обличителю; радуйся, обидимых и скорбящих защитниче и утешителю. Радуйся, яко Российския страны оружие духовное был еси; радуйся, яко любовию твоею ко Христу Богу народную любовь к себе стяжал еси. Радуйся, святителю Христов Филиппе, исповедниче преславный.


Кондак 10


Спасти восхотев словесное стадо твое от свирепства царскаго, святителю Христов Филиппе, яко истинный пастырь положити душу за овцы своя присно готовый, царскую ярость всенародно в кротость преложити тщался еси, гнев же его неукротимый к тебе и к пастве твоей видев, к подвигу мученическому преуготовлял еси себе, умиленным сердцем и чистыми усты Господу победную песнь воспевая: Аллилуиа.


Икос 10


Стеною крепкою терпения и мужества твоего ограждаемь был еси, святителю отче Филиппе, ибо грозный царь возгневася на тя зело во храме честнаго Успения Богоматери, егда ты новое беззаконие царское обличил еси, и опричника глумлящася укорил еси. Тогда лукавыми опричники сана святительскаго лишен был еси, биение, поругание приял еси и во изгнании в темнице монастыря Отроча заключен был еси, духовныя же чада твоя в поругании и злострадании тя видяще, жалостными слезами возглашаху тебе: Радуйся, Российския страны крепкое оружие духовное; радуйся, светлое зерцало правды церковныя. Радуйся, неправедную ярость царскаго гнева кротостию утишивый; радуйся, пламенем гнева Господня враги твоя опаливый. Радуйся, страха ради человеча, двери правды николиже затворивый; радуйся, пастырю наш, вся любяй и всеми любимый. Радуйся, яко пророку Илии и Предтечи Господню во обличении царя уподобился еси; радуйся, яко он обличения твоего на время устыдился еси. Радуйся, святителю Амвросию во обличении единонравный; радуйся, Златоустому Иоанну в безчестии и изгнании равный. Радуйся, благий наш и великий российский святителю; радуйся, благоглаголивый наш и благодатный учителю. Радуйся, святителю Христов Филиппе, исповедниче преславный.


Кондак 11


Пение хвалебное приносим ти от смиренных сердец наших мученическия ради кончины твоея, дивный наш исповедниче и первосвятителю Филиппе, весть бо о смерти твоей во Отрочи монастыре от задушения лукавым опричником царским дойде до града Москвы и обители Соловецстей, а с нею же и до всей Руси Православной. Тогда вси со многими слезами страдальческую кончину твою прославляху, премудрому Господу сладчайшую ангельскую песнь воспевающе: Аллилуиа.


Икос 11


Светозарное небо прият по страдании дух твой, великий святителю Филиппе, честныя же мощи твоя благодатным светом исцелений и чудотворений возсияша. Первие бо обитель Соловецкая насладися обилием чудес твоих, послежде град Москва, егда многоцелебныя мощи твоя вонь пренесошася, и тамо до ныне с верою притекающим к ним многоразличная исцеления обильно источают. К ним же мы грешнии припадающе, молимся тебе: просвети и научи нас в похвалу тебе глаголющих сице: Радуйся, мощей твоих пренесением из Отроча монастыря братию обители Соловецкия утешивый; радуйся, возвращением твоих мощей во град Москву благодать Божию умноживый. Радуйся, прославлением святых мощей твоих все отечество наше возвеселивый; радуйся, чудесы и нетлением мощей твоих веру и благочестие в стране нашей укрепивый. Радуйся, Христовым святителем Петру, Алексию и Ионе единонравный; радуйся, подвигом твоим священномученику Ермогену равный. Радуйся, по скорбных трудех твоих обретый небесныя радости; радуйся, чистою твоею душею вселивыйся в райския сладости. Радуйся, звездо светозарнаго солнца Христа, земли Русстей сияющая; радуйся, молитво о нас ко Господу неумолкающая. Радуйся, за отечество твое пред Господем милостивый печальниче; радуйся, Христоподражательнаго жития на земли наставниче. Радуйся, святителю Христов Филиппе, исповедниче преславный.


Кондак 12


Благодать неистощимую и знамение непререкаемое яви нам Христос Бог в нетлении мощей твоих, угодниче Божий, святителю Филиппе, пред нимиже мы грешнии припадающе, молимся тебе: подаждь благодатную тишину Церкви Христовой и пастырем ея, да возмогут вверенное им стадо в православии наставляти и учити, житие свое во благочестии проводити, на благом пути спасения всегда пребывати, и дивнаго во святых своих Христа Бога славити, и ангельски Ему воспевати: Аллилуиа.


Икос 12


Поюще дивное и праведное житие твое, труды и иноческия подвиги твоя во обители Соловецкой, прославляем дерзновение твое и ревность святительскую, восхваляем, почитаем исповедничество твое, ублажаем и мученическую кончину твою, отче святителю Филиппе, просим и молимся тебе, помози нам, отче святейший, во многоразличныя искушения, борения и напасти впадающим. Наипаче же укрепи и научи нас, да возможем святому твоему житию подражатели быти и благодарственно восхвалим тя сице: Радуйся, чистый и благовонный сосуд Святаго Духа бывый; радуйся, небесныя радости приобщивыйся и нас в печали сущих не забывый. Радуйся, в напастех и скорбех бедствующим нечаянное вспоможение; радуйся, разслабленным благодатное укрепление. Радуйся, яко молитвами твоими хромии хождаху; радуйся, яко тобою слепии зрение получаху. Радуйся, болезней многоразличных и недугов телесных исцеление; радуйся, правоверным пастырем в борьбе с неверием скорое защищение. Радуйся, земли Российския защитниче верный; радуйся, православия поборниче нелицемерный. Радуйся, яко святая обитель Соловецкая тобою славится; радуйся, яко град Москва и вся Русь православная тобою украшается. Радуйся, святителю Христов Филиппе, исповедниче преславный.


Кондак 13


О преславный пастырю и чудотворче, святителю Христов Филиппе! Приими ныне от нас грешных похвальное пение сие, и твоими святыми молитвами поющих тя в мире сохрани, в православии утверди, от бед и напастей избави, скорбь пути многобедственнаго жития нашего в радость претвори, волков сверепеющих на стадо Христово молитв твоих палицею отжени, крепкое стояние за Церковь и законы ея в нас обнови, да тако совершивше поприще своего спасения, сподобимся Христу Богу предстати и вкупе с тобою в селениих райских воспевати: Аллилуиа.


(Этот кондак читается трижды, затем икос 1 и кондак 1)



Молитвы святителю Филиппу Московскому и всея Руси Чудотворцу


Молитва первая


О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Филиппе, предстоя у Престола всех Царя и наслаждаяся света единосущныя Троицы и херувимски со ангелы возглашая песнь трисвятую, великое же и неизследованное дерзновение имея ко всемилостивому Владыце, моли спастися паствы Христовы людем, благостояние святых церквей утверди: архиереи благолепием святительства украси, монашествующыя к подвигом добраго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, пленных возврати, немощствующыя и молящияся тебе от всех напастей и бед ходатайством твоим свободи: моли о нас Всещедраго и Человеколюбиваго Христа Бога нашего, да и в день Страшнаго Пришествия Его от шуияго стояния избавит нас, и радости святых причастники сотворит со всеми святыми во веки веков. Аминь.


Молитва вторая


О великий угодниче Христов святителю отче наш Филиппе, скорый помощниче и дивный чудотворче! Призри милостивно на ны многогрешныя, вемы бо, сердцем и усты и со благоразумным разбойником исповедуем, яко по делом нашим беды постигшия нас приемлем, сими бо временными скорбьми избежим по милосердию Господа вечныя муки, грешником уготованныя: сеяхом бо семена своевольнаго жития, пожинаем же терния скорбей. Обаче немощни есмы, и в покаяние теплое пришедше, молимся, да преложит Господь гнев Свой на милость и тебе, святителю Христов, усердно просим: пролей теплую молитву твою ко Христу Господу нашему, Емуже присно предстоиши и молишися о почитающих тя с любовию и уповающих на твое предстательство. Умоли праведнаго Судию, да защитит святую обитель сию, место, в нейже ты духовно породился еси, и путевождь иноком святаго места сего был еси. Упаси якоже добрый пастырь жезлом благости твоея разсеянныя овцы стада Христова и во дворы Господни всели я. Огради нас от соблазна ересей и расколов в православной Церкви нашей. Научи нас, во странствии сущих, горняя мудрствовати, а не земная, просвети разсеянный ум наш и на путь истины направи, охладевшее сердце наше любовию ко Господу и к ближним нашим согрей. Вдохни в нас ревность ко исполнению велений Божиих. Ослабленную грехами и нерадением волю нашу оживотвори благодатию Духа Всесвятаго. Православие укрепи, нападения лукавнуюших и беззаконных человек на Церковь Божию далече отжени. Отпадшия ветви от лозы Христовы с тою паки соедини, испроси у Христа Бога душам и телесем нашим здравие и крепость, болящим исцеление даруй, страждущих утеши, скорбящим мир и отраду покажи, плачущия радоватися сотвори, печальныя ликовствовати соделай, враждующих умиротвори, завистливыя милостивны покажи, всякия в нас неправды исправи. Изжени всякую крамолу и лукавыя советы нечестивых разруши, обаче тех в покаяние приведи. Архиереем и духовным пастырем, поставленным пасти стадо Христово Российския Православныя церкви, подаждь премудрость и праведное житие, якоже и сам сими добродетельми украшался еси, старыя поддержи, юныя научи и уцеломудри, и даруй им молитвами твоими трудолюбие, послушание и мирное жительство. Нам же всем радость присную о Господе подаждь, да терпением течем на предлежащий нам подвиг жития сего временнаго, взирающе на Начальника веры и Подвигоположника Господа нашего Иисуса Христа, Емуже буди слава, благодарение и поклонение, со безначальным Его Отцем, и с Пресвятым и Благим и Животворящим Его Духом, ныне, и присно, и во веки веков. Аминь.



Тропарь святителю Филиппу, митрополиту Московскому и всея России чудотворцу


Тропарь, глас 8


Первопрестольников преемниче, столпе православия, истины поборниче, новый исповедниче, святителю Филиппе, положивый душу за паству твою. Темже яко имея дерзновение ко Христу, моли за православныя люди чтущия достойно святую память твою.


Тропарь, глас 5 (Перенесение мощей)


Радостный возсия день светлаго торжества: днесь церковная расширяются недра, приемлюще духовных даров неоскудеемо боготворное сокровище, струю благодатей неисчерпаемую, источника чудесем обильна, чудотворивыя и священныя мощи твоя, святителю Филиппе. Темже моли прославившаго тя Дародателя Христа Бога о воспевающих тя и кланяющихся священным мощем твоим.


Кондак, глас 3


Православия наставника и истины провозвестника, Златоустаго ревнителя, Филиппа премудраго восхвалим, пищею словес своих разумно чада своя питающа, той бо языком хваления пояше, устнама же пение вещаше, яко таинник Божия благодати.[/spoiler]

Раб божий Константин

Акафист святым мученикам Флору и Лавру.
[spoiler]Кондак 1


Избранную двоицу пресветлую, Христу спострадавшую даже до крове, Флора преблаженнаго и Лавра всечестнаго, в песнех, вернии, почтим духовных и, яко молитвами сих от бед избавляеми, благодарственно вопием, зовуще: Радуйтеся, Флоре и Лавре, рая Христова цвети прекраснии.


Икос 1


Ангельстии чини яко сликовники прияша вы, блаженнии мученицы, егда по страдании своем Престолу Господню предстасте, во еже со всеми, кровию Агнца Божия запечатленными, взывати "Осанна!" Седящему на Престоле. Мы же, бреннии, на земли, о таковой славе вашей дивящеся, восхваляем вы сице: Радуйтеся, Христу последовавшии верою; радуйтеся, крест Его, яко ярем, вземшии. Радуйтеся, кровию Агнца Божия искупленнии; радуйтеся, и своея крове Христа ради не пощадевшии. Радуйтеся, смертию красною Христови спогребшиися; радуйтеся, жизни источник обретшии. Радуйтеся, путь узкий, прискорбный прошедшии; радуйтеся, яко отверзошася вам райския двери. Радуйтеся, Флоре и Лавре, рая Христова цвети прекраснии.


Кондак 2


Видяще, яко многа мзда на небесех дана святым страстотерпцем, потщимся, вернии, тех житие земное прилежно разсмотревше, от сего научитися, колико может вера, деяньми споспешествуема, како воздвизает от земных к небесным и како научает взывати Богу: Аллилуиа.


Икос 2


Разум Божественный озари вы, Флоре и Лавре, егда благочестия хранители Прокл и Максим не токмо каменосечней хитрости вы научиша, но и на камени веры Христовой добре утвердиша, на немже несокрушими даже до конца пребысте, трудолюбно Господеви работающе, сего ради ублажаем вы, зовуще: Радуйтеся, в трудех от юности воспитаннии; радуйтеся, Христу себе поработившии. Радуйтеся, леность далече отгнавшии; радуйтеся, данный вам талант много усугубившии. Радуйтеся, рабства плоти избегшии; радуйтеся, духом Господеви работавшии. Радуйтеся, трудолюбцев удобрение; радуйтеся, ленивых укорение. Радуйтеся, Флоре и Лавре, рая Христова цвети прекраснии.


Кондак 3


Сила Вышняго подвиже правителя страны некия призвати делателей святых ко устроению храма идольскаго, капищу бо сему сооружаему бывшу, иный храм нерукотворенный созидашеся; людие страны тоя, Флора и Лавра проповедию наученнии, Истиннаго Бога познаша и Тому Единому пети навыкоша: Аллилуиа.


Икос 3


Имуще твердую веру в сердцах своих, небоязненно отыдоша богоноснии братия во ину страну на делание чуждое, и, по мале времени, в труд апостолов обратися делание их; людие, во тме и сени смертней седящии, светом Евангелия озаришася, еже каменосечцы богомудрии с собою принесоша, сего ради воспоем сих, зовуще: Радуйтеся, языков просветители; радуйтеся, апостолов подражатели. Радуйтеся, Евангелия Христова провозвестницы; радуйтеся, на ниве неоранней Господни работницы. Радуйтеся, в людех тяжцех Господа восхвалившии; радуйтеся, во языцех славу Его возвестившии. Радуйтеся, Церкве прекрасное прозябение; радуйтеся, небесных садов леторасленное украшение. Радуйтеся, Флоре и Лавре, рая Христова цвети прекраснии.


Кондак 4


Бурю злобы неистовыя воздвиже на вы Мемертин, идольский жрец, егда сыну его, на делание ваше неопасно взиравшу, око каменцем, внезапу отторгшимся, избодеся, и хулы многи отрыгаху на вы, делателие незлобивии, уста еще не ведевшаго пети: Аллилуиа.


Икос 4


Слышавше хуления многа и пристрашия свирепа Мемертина озлобленнаго, без страха прияша сия кротце Флор же и Лавр и, сострадания исполнени бывше, велие дерзновение веры проявиша, егда отрока уранена цела и здрава отцу предпоставити обещаша; мы же, таковей вере, кротости и упованию святых дивящеся, воспоем им тако: Радуйтеся, равноангельныя кротости воплощение; радуйтеся, велия веры исправление. Радуйтеся, злословящаго вы благословившии; радуйтеся, кленящему вас благотворившии. Радуйтеся, на Бога, Помощника и Защитника, уповавшии; радуйтеся, прибежище и утверждение в Бозе полагавшии. Радуйтеся, в незлобии пред Господем ходившии; радуйтеся, во уповании на Него николиже изнемогшии. Радуйтеся, Флоре и Лавре, рая Христова цвети прекраснии.


Кондак 5


Боготечныя звезды явистеся, святии, юноше тому, емуже уломком камене око плотское избодено бысть; вас бо держайся, не токмо от раны исцеле, но и очесы духовными прозре, проповеданием вашим научен, Истиннаго Бога позна и Тому в радости возопи: Аллилуиа.


Икос 5


Видя чудо велие, в сыне явленное, и отец его Мемертин ему споследова, идольскую прелесть отверг, Бога Истинна, яко же и сын, позна и по исповедании добрем двоице преславных мученик спострада, юже и мы ныне воспеваем, зовуще: Радуйтеся, чудотворцы предивнии; радуйтеся, врачеве духовнии. Радуйтеся, идольскую прелесть чудесы ниспровергшии; радуйтеся, неразумных души светом веры озарившии. Радуйтеся, идольскаго жреца от идолобесия отвратившии и Христу сочетавшии; радуйтеся, и сына его из вражеских сетей извлекшии. Радуйтеся, демонов огорчение; радуйтеся, Ангелов радование. Радуйтеся, Флоре и Лавре, рая Христова цвети прекраснии.


Кондак 6


Проповедницы любве истинныя явишася святии мученицы, егда при делании своем цену, за труд вземлемую, нищим раздаваху и, алчущих довольно питающе, сами в посте и лишении не сетующе пребываху, бодрственне воспевающе Богу: Аллилуиа.


Икос 6


Возсия свет неизреченныя славы небесныя и озари храм, руками Флора и Лавра созданный, и не яко идолов вместилище, но во славу Имени Иисуса Христа освященный, людие же, свет той видевше, вся кумиры идольския, для храма того уготованныя, сокрушше, храмоздателем взываху сице: Радуйтеся, светом богоразумия нас озарившии; радуйтеся, мрак идолослужения разсеявшии. Радуйтеся, от обдержащия прелести ны свободившии; радуйтеся, путь жизни истинныя нам показавшии. Радуйтеся, яко благоухания честнаго Церковь исполнисте; радуйтеся, яко злосмрадие вражие далече отгнасте. Радуйтеся, бесов дерзновенное поражение; радуйтеся, Богу красное присвоение. Радуйтеся, Флоре и Лавре, рая Христова цвети прекраснии.


Кондак 7


Хотящим братиям святым по скончании делания, на неже звани быша, мирно во своя отыти, возбрани им работодавец жестокий; связав бо их и бив, яко злодеи к правителю Ликиону отведе, зане Христа яко Бога исповедаху и люди научиша взывати Ему: Аллилуиа.


Икос 7


Новая и лютая мучения уготова вам, страстотерпцы святии, правитель, егда возвратистеся связаннии и раны за Христа приимшии во страну свою, твердости же веры вашея отнюд не поколеба, мы же, терпение ваше ублажающе, взываем к вам сице: Радуйтеся, Христови спотерпевшии; радуйтеся, с Ним и воцарившиися. Радуйтеся, в терпении души ваша стяжавшии; радуйтеся, обетование, еже на небесех, приимшии. Радуйтеся, на Начальника веры и Совершителя, Господа Иисуса взиравшии; радуйтеся, на предлежавший вам подвиг добре востекшии. Радуйтеся, малодушных ободрение; радуйтеся, страждущих утешение. Радуйтеся, Флоре и Лавре, рая Христова цвети прекраснии.


Кондак 8


Странную и ужасную смерть изобрете людское жестокосердие кротчайшим братиям Флору и Лавру: в кладенец бо безводный ввержени и землею в нем посыпани быша; тако мняху нечестивии заглушити святых глас, к Богу вопиющих: Аллилуиа.


Икос 8


Весь мир не бе достоин вас, мученицы святии: вы бо, на земли себе места не обретше, в небесная преселившеся и яко истиннии граждане тамо отечествие снискавше, непрестанными благохвалениями Царю своему и Господу служите, восхвалим убо и мы сих богохвалящих похвалении сицевыми: Радуйтеся, о земных небрегшии; радуйтеся, на небесная ум свой вперившии. Радуйтеся, нощь жития земнаго добре прешедшии; радуйтеся, дне невечерняго — Царства Христова достигшии. Радуйтеся, яко злато, в горниле мучений искушеннии; радуйтеся, яко всеплодие жертвенное Богом приятии. Радуйтеся, пред лицем человеческим муки приявшии; радуйтеся, яко упование ваше безсмертия исполнено. Радуйтеся, Флоре и Лавре, рая Христова цвети прекраснии.


Кондак 9


"Всяк, иже исповесть Мя пред человеки, исповем его и Аз пред Отцем Моим", — рече Господь; по Господню сему словеси и вы, страстотерпцы Флоре и Лавре, яко доблии Христови исповедницы, пред Отцем Небесным прославлени есте и со всеми святыми выну зовете Святей Троице: Аллилуиа.


Икос 9


Витийство мира сего не может изрещи величие подвига страстотерпцев святых, яко же и премудрость века сего слова крестнаго вместити никакоже может; мы же, смиреннии, буйством проповеди о Распятом спасаеми, Флора и Лавра, яко себе самех отвергшихся и души своя Христа ради отщетивших, несумненно прославляем, зовуще к ним тако: Радуйтеся, Христа пред человеки исповедавшии; радуйтеся, яко и Сам Господь исповесть вы пред Ангелы Божии. Радуйтеся, страсти Господа Иисуса Христа не устыдевшиися; радуйтеся, ради благовестия Христова пострадавшии. Радуйтеся, яко подвиг крепок подаде вам Господь; радуйтеся, яко и разум свят дадеся вам от Вышняго. Радуйтеся, яко искры по стеблию на небо востекшии; радуйтеся, во время посещения вашего добре возсиявшии. Радуйтеся, Флоре и Лавре, рая Христова цвети прекраснии.


Кондак 10


Спасению нашему ходатаи молим вас быти, святии мученицы, добре страдавшии и венчавшиеся, и того ради благодать приимшии; о нас молитеся, да, избавльшеся от суетныя работы вражия, благодарственно вопием Богу: Аллилуиа.


Икос 10


Стен каменных здатели иногда бывше, веры же твердостию, многоразличных мук и лютыя смерти за Христа претерпением велие дерзновение у Него снискавше, молятся ныне о чтущих память их верно, и в бедах многоразличных и напастех осеняют надежно поющих им сице: Радуйтеся, Церкве Христовы столпи непоколебимии; радуйтеся, веры христианския ограждение твердое. Радуйтеся, в вере колеблемым утверждение крепкое; радуйтеся, в мори напастей гибнущим пристанище надежное. Радуйтеся, фиали златии, фимиама молитв исполненнии; радуйтеся, смрадные страсти далече от нас прогоняющии. Радуйтеся, теплии к Богу молитвенницы; радуйтеся, преистиннии ходатаи. Радуйтеся, Флоре и Лавре, рая Христова цвети прекраснии.


Кондак 11


Пение неумолчно и лики светлы исполниша Царский град, егда по обретении принесени и честно положени в нем быша многоцелебнии мощи ваша, святии мученицы Флоре и Лавре, от них же мнози цельбу чудну приимше, благодарно пояху Богу: Аллилуиа.


Икос 11


Светом невещественным облистаеми, в селениях святых водворяеми и радости неизреченныя исполняеми, ликуете ныне со Ангелы светло, мученицы Господни, осветите и нас, мраком суетствий покрываемых, злобою мира сего озлобляемых и едину токмо отраду имущих, еже к вам прибегати и сице вы воспевати: Радуйтеся, мглу прелести разгнавшии; радуйтеся, безбожия нощь осветившии. Радуйтеся, ненавидением неправедным возненавиденнии на земли; радуйтеся, в радость Господа вшедшии на небеси. Радуйтеся, скорбьми многими живот вечный наследствовавшии; радуйтеся, в скорбех и теснотах сущим утешение от Духа Свята просящии. Радуйтеся, звезды, блистания терпения испущающия; радуйтеся, светила, верных души просвещающия. Радуйтеся, Флоре и Лавре, рая Христова цвети прекраснии.


Кондак 12


Благодать велика дана есть от Вышняго вам, доблии страдальцы, яко пришедшим от скорби великия и окропившим в крови Агнчей ризы своя; сего ради со всеми святыми Престолу Божию предстоите, выну зовуще: Аллилуиа.


Икос 12


Поюще вы во храме вашем, хвалим вас, Флоре и Лавре, яко благочестия мученики, в трудех от юности пребывшия, веру в Троицу Нераздельную соблюдшия и ко Христу победно отшедшия, Ему же ныне предстояще, не забудите зовущих к вам сице: Радуйтеся, Царя Небеснаго воини изряднии; радуйтеся, венцы победными добре венчаннии. Радуйтеся, камение многоценное в сокровищах Владыки Небеснаго; радуйтеся, богатство неиждиваемое Церкве, на земли воинствующия. Радуйтеся, зодчии, храм Духа Божественнаго в себе самех явившии; радуйтеся, здатели, на недвижимем камени веры души многих утвердившии. Радуйтеся, блистанием небесным ныне осияваемии; радуйтеся, сумрак мыслей тяжких от нас прогоняющии. Радуйтеся, Флоре и Лавре, рая Христова цвети прекраснии.


Кондак 13


О преславная мученик двоице Флоре и Лавре, самобратное единение, Троице Святей честное похваление! Нынешнее приимши наше пение, молите Господа за ны, да избавит нас от всяких бед и скорбей, даровав же нам до конца пребывание во Святей Церкви Своей, да сподобит по кончине и последнем Суде с вами и со всеми святыми воспевати Богу: Аллилуиа, Аллилуиа, Аллилуиа.


(Этот кондак читается трижды, затем икос 1 и кондак 1)



Молитва святым мученикам Флору и Лавру


Прехвальнии мученицы Флоре и Лавре, вас не земля потаила есть, но небо прият вы, во еже быти вам молитвенники и предстатели о чтущих с любовию честную память вашу. Молитеся же за ны, трудолюбцы незлобивии, да подвигнет Господь и нас, в трудех и утеснении сущих, к деланию заповедей Его, да не токмо о пищи и питии, но и о еже како угодити Господеви попечемся; споболите печалем и воздыханием нашим, и да не озлобятся до конца души наша, но да возгорятся любовию друг ко другу, да пребудем в мире и единомыслии, якоже и вы, самобратнии блаженнии. Наипаче же утвердите ны в вере святей и правей, юже имуще в сердцам наших, не устрашимся в поношении и унижении и всяких обстояниих, имиже одержими есмы, но, яко испытание силы веры нашея с благодарением сие приимше, доброе исповедание соблюдем, в немже и прейдем от юдоли сей в вечное Царствие Господа нашего, Емуже слава и держава во веки веков. Аминь.



Тропарь мученикам Флору и Лавру


Тропарь, глас 4


Преудобренную и богомудрую двоицу пресветлую восхвалим вернии по достоянию, Флора преблаженного и Лавра всечестнаго, иже усердно Троицу Несозданную ясно проповедаста всем. Темже пострадавше до крове, и венцы пресветлыми увязостеся: молитеся Христу Богу, да спасет души наша.


Кондак, глас 8


Яко благочестия мученики, и страдальцы Христовы богомудренны, вселенная преславно почитает Флора и Лавра днесь: яко да улучим благодать и милость молитвами их, и избавимся бед и напастей, гнева же и скорби в день судный.[/spoiler]

Раб божий Константин

Акафист святому апостолу Фоме.
(Для келейного чтения).
[spoiler]Кондак 1
Избранный самовидче Слова и свидетелю Его славный, / даже до последних земли благовестивый веру твою: / Егоже раны аз осязах, Сей есть Господь и Бог; / обаче, яко и ныне созерцаяй нам незримая, / за взыскующия веры молися, да зовем ти: / радуйся, апостоле Фомо, неверованием добрым веру утвердивый.



Икос 1
Ангелом неведомое таинство познал еси, Плоть Бога жива дерзновенною десницею осязая, темже, ужасающеся и дивящеся, зовем ти:
Радуйся, яко дерзновение твое Бог предуведе, радуйся, яко на служение Свое тя предустави;
Радуйся, яко неверие твое не осуди; радуйся, яко веру твою утверди;
Радуйся, яко в лик апостольский тя избра; радуйся, яко стопы твоя во след Себе направи;
Радуйся, яко веща ти уста ко устом; радуйся, яко смирися пред любопытным перстом;
Радуйся, апостоле Фомо, неверованием добрым веру утвердивый.

 

Кондак 2
Словеса ваша о явлении Воскресшаго неудобоприятельна ми являются, вопияше Фома иным учеником, аще не вижу на руку Его язвы гвоздинныя, и не вложу перста моего в язвы гвоздинные, и вложу руку мою в ребра Его, не дерзну взывати Сему: Аллилуиа.

 

Икос 2
Разум недоразумеваемый догматов веры разумети ищуще, вопрошает в смятении: во двою естеству едино Лицо како Церковь мудрствует и воспевает? Обаче неверием твоим уверяеми в сем, взываем:
Радуйся, яко Христос един хлеб с тобою вкуси; радуйся, яко едино солнце над вами возсия;
Радуйся, яко хлебом истины многи насытил еси; радуйся, яко Солнце правды возлюбил еси;
Радуйся, яко един источник вы напои; радуйся, яко едина смоковница вама сень даде;
Радуйся, яко реки благодати источил еси; радуйся, яко не безплодная смоковница показался еси;
Радуйся, апостоле Фомо, неверованием добрым веру утвердивый. 

 

Кондак 3
Силе Вышняго вся возможна суть, вопияше Фома, может бо и умершия воскрешати, обаче како смерти приобщися Сей, Емуже подобает воспевати: Аллилуиа.

 

Икос 3
Богоприятну Деву прозре младенец, во чреве Елисаветином сый, мы же, очи имуще, не зрим благая дела Господня, обаче слово Христово, апостолу реченное: блажени не видевшии и веровавшии, поминаем с надеждой, и тако сему взываем:
Радуйся, яко спасения возжелавый; радуйся, яко пророки чаянная узрел еси;
Радуйся, яко Адамом утраченная взыскавый; радуйся, яко Спасителя обрел еси;
Радуйся, Светом мира просвещенный; радуйся, яко Небо отверзеся ти;
Радуйся, яко Словом Отчим умудренный; радуйся, яко тайны Царствия открышася ти;
Радуйся, апостоле Фомо, неверованием добрым веру утвердивый. 

 

Кондак 4
Бурю внутрь имею помышлений сумнительных, вопияше Фома, како бо во гроб положен бысть по водам Ходивый и Лазаря Воскресивый, Емуже аз желаю воспети : Аллилуиа. 

 

Икос 4
Слышаше пастырие Ангелов, поющих Младенца Спаса, и, шедше убо, поклонишася Ему; мы же, уши имуще, не внемлем гласу Господню, обаче на твое предстательство, апостоле, уповаем и зовем ти:
Радуйся, в корабли со Христом ходивый; радуйся, по волнам Ходящу поклонивыйся;
Радуйся, мрежею Христовою уловленный; радуйся, на ковчег спасения ступивый;
Радуйся, яко воды неверствия не поглотиша ти; радуйся, яко буря сомнений тя не потопи;
Радуйся, яко Христос над бездною тя удержа; радуйся, яко десницу с язвою ти простре;
Радуйся, апостоле Фомо, неверованием добрым веру утвердивый. 

 

Кондак 5
Боготечной звезде последоваша волсви, вопияше Фома, тако и аз вожделею следовати Тебе, Господи и Боже мой, даждь ми токмо прикоснутися Ти, да и аз воспою: Аллилуиа.

 

Икос 5
Принесоша отроцы халдейстии дары седящу на руку Девичу Создателю твари, мы же, руце имуще праздны от дел благих, како приступим к Сему, веры просяще, разве токмо апостола Фому поминающе и тако ему зовуще:
Радуйся, яко Господин жатвы призва тя; радуйся, яко в вертограде Того добре потрудился еси;
Радуйся, яко делатель и нива явился еси; радуйся, яко плод сторицею принесл еси;
Радуйся, яко со Владыкою дней утреневал еси; радуйся, яко чашу Христову испил еси;
Радуйся, яко и нощь просвещение ти бысть; радуйся, яко Господу Славы спрославился еси;
Радуйся, апостоле Фомо, неверованием добрым веру утвердивый. 

 

Кондак 6
Проповедницы богоноснии бывше волсви, вопияше Фома, исповедаша Тя, Христе, яко Спаса всех; аще убо не уверую в Воскресение Твое, не явлюся ли убо и аз яко Ирод, не ведый пети: Аллилуиа.

 

Икос 6
Возсиявый во Египте Свет истины да разсеет, яко дым, вся сомнения наша: веруем бо, Господи, помози неверию нашему; ты же, апостоле, укрепи свидетельством твоим зовущия ти:
Радуйся, в сладость Христа послушавый; радуйся, во славу Его поживый;
Радуйся, с терпением Тому послуживый; радуйся, с веселием за Него умерый;
Радуйся, рану Прободеннаго осязавый; радуйся, Кровию Христовою искупленный;
Радуйся, копием мучительским прободенный; радуйся, кровь за Христа пролиявый;
Радуйся, апостоле Фомо, неверованием добрым веру утвердивый. 

 

Кондак 7
Хотящу Симеону праведному умрети, вопияше Фома, вдался еси яко Младенец тому, но познался еси ему и Бог совершенный; сотвори убо, Господи, и мне тако, да абие воззову Ти: Аллилуиа.

 

Икос 7
Новое показа Творец снизхождение нам, на безсмертнем Теле смертныя язвы явити изволивый апостолу Своему, емуже с любовию взываем:
Радуйся, от Премудрости мудрость приявый; радуйся, от Любве любви научивыйся;
Радуйся, у Смирения смирению навыкший; радуйся, Благом во блазе утвержденный;
Радуйся, Терпением в терпении наставленный; радуйся, Кротости в кротости подражавый;
Радуйся, Послушанием к послушанию приведенный; радуйся, Сыном Отцу усыновленный;
Радуйся, апостоле Фомо, неверованием добрым веру утвердивый. 

 

Кондак 8
Странное чудо вижу, вопияше Фома: дверем затворенным, яко дух, входит Христос, осязаю обаче раны и язвы Его, и что убо реку, токмо: Господь мой и Бог мой; что убо воспою, токмо: Аллилуиа. 

 

Икос 8
Вси есмы в нижних и вышних никакоже достигаем, обаче веруем, яко оба соедини в Себе Господь, якоже яви сие апостолу Своему, от нас воспеваему сице:
Радуйся, с четверодневным Лазарем вечерявый; радуйся, любовию к неверию подвигнутый;
Радуйся, "осанна в вышних" вопиявый; радуйся, любовию уверение получивый;
Радуйся, воплощение Слова уведевый; радуйся, миром гонимый;
Радуйся, безсловесная плоти поправый; радуйся, мир от Христа приемый;
Радуйся, апостоле Фомо, неверованием добрым веру утвердивый. 

 

Кондак 9
Всякое естество тварное вместити Божественное никакоже возмогает, вопияше Фома, Ты Единый оба неслитно и нераздельно в Себе сочетал еси, Тебе пою: Аллилуиа. 

 

Икос 9
Ветии многовещаннии ничесоже приложити дерзают, апостоле, доброму исповеданию твоему: Господь мой и Бог мой; за сие и от нас приими сицевая:
Радуйся, яко нозе ко умовению Христу простерл еси; радуйся, яко дома на земли не имел еси;
Радуйся, яко нозе на путь мирен направил еси; радуйся, яко обитель в дому Отчи снискал еси;
Радуйся, яко строитель царский нареклся еси; радуйся, яко архитектон премудрый обрелся еси;
Радуйся, яко злато нищим раздал еси; радуйся, яко чертог Небесный царю воздвиг еси;
Радуйся, апостоле Фомо, неверованием добрым веру утвердивый. 

 

Кондак 10
Спасти хотя мир, вопияше Фома, животворящею Кровию из прободенных ребр, Господи Боже мой, напоил еси вся, яже осязав, Тебе пою: Аллилуиа.

 

Икос10
Стены Иерусалима Небеснаго на дванадесяти основаниих утвердишася, якоже едино от сих тя почитаем, апостоле славне, и тако ти восписуем:
Радуйся, яко язык огнен на тебе почи; радуйся, яко слава Христова тя осия;
Радуйся, яко языки многи просветил еси; радуйся, яко имя Христово прославил еси;
Радуйся, яко недужных исцелял еси; радуйся, яко мертвых восставлял еси;
Радуйся, яко и дуси повинувахуся ти; радуйся, яко имя твое написася на Небеси;
Радуйся, апостоле Фомо, неверованием добрым веру утвердивый. 

 

Кондак 11
Пение всякое побеждается, вопияше Фома, тщащееся воспети славу Воскресения Твоего, Господи, обаче сие возвещу до последних земли, да всяк язык Истинному Богу зовет: Аллилуиа. 

 

Икос 11
Светоприемную свещу зрим тя, апостоле славный, прикосновением к обоженной Плоти возжженную, темже приносим ти сицевая:
Радуйся, бисере ризы церковныя; радуйся, вертоградарю Истины;
Радуйся, кореню богословия; радуйся, цвете благочестия;
Радуйся, рождие лозы божественныя; радуйся, благоухание, приятно Богови;
Радуйся, златице, огнем очищенная; радуйся, весно целомудрия;
Радуйся, апостоле Фомо, неверованием добрым веру утвердивый. 

 

Кондак 12
Благодать и жизнь пришедый дати всякой плоти, вопияше Фома иным учеником, не воздаст ли сия Подавшей Ему плоть? Обаче укажите мне гроб Ея, да со слезами воззову Богови: Аллилуиа. 

 

Икос 12
Поюще Успение Богородицы, апостоли проводиша тя ко гробу Ея, и, вшед и обрет сей пуст, воздал еси хвалу Господу; темже зовем ти:
Радуйся, Божиею Материею возлюбленный; радуйся, ко прощанию Тою призванный;
Радуйся, яко матерь, Ю возлюбивый; радуйся, Божиим Промыслом удержанный;
Радуйся, на гроб Ея плакати пришедый; радуйся, камень от него отваливый;
Радуйся, радость велию людем открывый; радуйся, восстание Пречистой возвестивый;
Радуйся, апостоле Фомо, неверованием добрым веру утвердивый. 

 

Кондак 13
О преславный апостоле Христов Фомо, малое сие приими от нас приношение и умоли за ны Господа Славы, да утвердившеся помощию твоею, обрящем и мы веры плоды благия, Творцу всяческих поюще: Аллилуиа.
Сей кондак глаголи трижды. Посем икос 1: Ангелом неведомое...и кондак 1: Избранный самовидче...

 

Молитва
О благознаменитый и славный апостоле Христов Фомо! Егда на конец веков к человеком пришедый Бог избра тя в ученики Своя и даде ти власть болящия исцеляти, прокаженныя очищати, мертвыя воскрешати, бесы изгоняти, ты не сих ради, наипаче любовию прилепился еси ко Христу, желанием вожделев даже до смерти следовати по Нем. Сего ради, аще попущением Божественным и не зрел еси со иными ученики воскресшаго Спаса, аще и отреклся еси веровати сему, дондеже вложиши перст свой в язвы гвоздинныя и вложиши руку свою в ребра Его, обаче исполни Господь прошение сердца твоего и непреложно паки веру твою утверди. Темже молим тя: отверзи нам очи веры, да плотским невидимая явятся нам; подаждь нам надежду на снизхождение Божие, да отчаяние греховное не пожрет ны; открый нам блаженство любве, яже крепка есть, яко смерть, и едина возмогает над тою, да поработавше Христу на земли, воздвигнем и мы себе кровы Небесныя и с тобою и всеми святыми прославим пречестное и великолепое имя Отца и Сына и Святаго Духа. Аминь.[/spoiler]

Раб божий Константин

Акафист священномученику Харалампию.
[spoiler]Кондак 1


Избранному страстотерпцу и угоднику Божию, оросившему землю честною своею кровию и плодородие земли от Бога испросившему, похвальная из глубины души возглашаем пения. Ты же, яко имеяй велие дерзновение ко Господу, от всяких нас бед свободи, зовущих: Радуйся, священномучениче Харалампие, милосердый наш пред Богом заступниче и предивный чудотворче.


Икос 1


Ангели на небеси радовахуся непорочному житию твоему, священномучениче Харалампио, ты бо последовал еси святым пророком и апостолом, наставляя люди на путь спасения. Сего ради вопием ти: Радуйся, великий светильниче Церкве; Радуйся, проповедниче правды. Радуйся, словес жизни вечныя учителю; Радуйся, идолослужения обличителю. Радуйся, имже сатана посрамляется; Радуйся, имже вера Христова прославляется. Радуйся, яко Именем Христовым вражию силу низложил еси; Радуйся, яко силою Божиею козни бесовския разрушил еси. Радуйся, Харалампие, милосердый наш пред Богом заступниче и предивный чудотворче.


Кондак 2


Видяще житие твое, благочестия и чистоты исполненное, и слышаще пламенную проповедь твою, служителие Господа Иисуса Христа, укреплени бывше в вере и благочестии, возрадовашася, поюще всех Творцу: Аллилуиа.


Икос 2


Разумом, просвещенным от Господа, исполнен быв и долголетия мудростию украшен, не восхотел еси послушати совета Лукиана игемона еже приступити с жертвами к богом бездушным, и велиих мучений не убоялся еси. Темже вопием ти: Радуйся, угрозы Лукиана презревый; Радуйся, постом и молитвою долголетие стяжавый. Радуйся, благ невидимых взыскателю; Радуйся, креста Христова победный носителю. Радуйся, мучители твоя возлюбивый; Радуйся, сердца их ко Христу обративый. Радуйся, имже истинная вера утвердися; Радуйся, имже прелесть бесовская посрамися. Радуйся, Харалампие, милосердый наш пред Богом заступниче и предивный чудотворче.


Кондак 3


Силою Вышняго укреплен быв, победил еси велия мучения, и стружем ногтьми железными, молился еси ко Господу, исцеляя болезни твоих мучителей и воспевая Богу песнь: Аллилуиа.


Икос 3


Имеяй велию милость Господню, удостоился еси, священномучениче Харалампие, гласа Божия, от облака исходяща, Емуже внемлюще, благоговейно рцем: Радуйся, светильниче земный; Радуйся, в небесныя обители преселивыйся. Радуйся, собеседниче ангелом; Радуйся, сожителю пророком. Радуйся, апостолом сопрестольниче; Радуйся, совоинственниче мучеником. Радуйся, беседы Господни удостоивыйся; Радуйся, яко услыша Господь молитвы твоя. Радуйся, Харалампие, милосердый наш пред Богом заступниче и предивный чудотворче.


Кондак 4


Буря велия грады, веси и всяк злак сельный разрушает; горшия бури житейския злобы, неверия и злодеяний человеческих души наша смущают и житие наше мраком покрывают. Но помози нам, преславный священномучениче, почитающим подвиги и страдания твоя и поющим о тебе дивному во святых Своих Богу: Аллилуиа.


Икос 4


Слышав нечестивый царь римский Севир, яко в мучениих неодолен явился еси, исполнися гнева; ты же, долготерпеливо, егда острое железное гвоздие вбито бысть в честное тело твое, ничтоже глаголя вопреки мучителем твоим, вся сия в веселии и радости претерпел еси. Сего ради ублажаем долготерпение твое звании сими: Радуйся, образе кротости духовныя; Радуйся, долготерпением Господу Иисусу Христу подражавый. Радуйся, яко и безсловесная тварь предивному терпению твоему ужасашеся; Радуйся, яко Господь Бог с тобою в мучениих твоих пребыл есть. Радуйся, множество людей долготерпением твоим приведый ко Господу; Радуйся, от Господа прославленный. Радуйся, исцелений источниче; Радуйся, человеком помощниче. Радуйся, Харалампие, милосердый наш пред Богом заступниче и предивный чудотворче.


Кондак 5


Боготечная звезда был еси жене некоей, яже, видящи страдания твоя и умилившися сердцем, велегласно возгласи: человече Божий, честна есть старость твоя, и Бог с тобою есть, в Негоже веровати имам, поюще Ему: Аллилуиа.


Икос 5


Видя царь Севир во исцелении некоего человека, бесом одержима, чудодейственную силу Христову, в тебе, досточудный священномучениче, обитающую, зело удивися и рече: воистину велик есть Бог христианский! Сего ради и мы, восхваляюще страдания и чудеса твоя, преславный исповедниче Христов, взываем ти радостно: Радуйся, чудотворче предивный; Радуйся, веры поборниче победоносный. Радуйся, от огненнаго жжения невредим пребывый; Радуйся, чудесы твоими неверующия люди светом Богопознания озаривый. Радуйся, житием твоим Имя Божие прославивый; Радуйся, егоже, яко добраго воина Христова, диавол трепещет. Радуйся, егоже молитвою недузи врачуются; Радуйся, егоже предстательством вернии жизнь вечную наследствуют. Радуйся, Харалампие, милосердый наш пред Богом заступниче и предивный чудотворче.


Кондак 6


Проповедник мужественный был еси, всехвальный Харалампие, егда глаголал еси цареви: много мя пользуют муки; елико бо тело мое ранами раздробляется, толико радуется во мне дух мой. Внемлюще словесем сим, многое множество людей исповедаху Господа Иисуса Христа и венец мученический прияша, поюще Богу: Аллилуиа.


Икос 6


Возсия Божие всемогущество и явися страшное Божие прещение, егда нечестивии твои мучителие хулы на Христа Господа глаголаша безстудно: земля, яко лист, колебашеся, и слышахуся свыше от облак страшнии гласи, и бяху блистания и громи; молитву же тебе сотворшу, преста Божие страшное прещение. Темже вопием ти: Радуйся, гордых обличителю; Радуйся, нищеты духовныя учителю. Радуйся, хульников Имене Господня низложителю; Радуйся, от гнева Господня человеки избавляяй. Радуйся, блистания и громы небесныя молитвою утишаяй; Радуйся, омертвевшия от страха человеки воскресивый. Радуйся, велие незлобие к мучителем твоим явивый; Радуйся, егоже ради Господь Бог возгреме во облацех воздушных. Радуйся, Харалампие, милосердый наш пред Богом заступниче и предивный чудотворче.


Кондак 7


Хотя спасти чистую душу дщере царевы Галины, той яви тя Господь, о Харалампие, яко ангела светла, мудра учителя и апостола веры Христовы. И внемлющи словесем твоим, блаженная Галина умилися сердцем и Богу возгласи: Аллилуиа.


Икос 7


Новаго тя Иосифа показа Господь Бог, егда вразуми тя известити, премудре, сказание бывшаго блаженней Галине соннаго видения. Виде бо множество водное, еже есть дарование Духа Святаго, виде сад велик при водах многих, рай Господень, и в нем виде виноград красен, праведных водворение, и стража места того, Христа Бога, вземлюща овцу на рамена Своя. Темже зовем ти: Радуйся, старцев украшение; Радуйся, приятелище даров Духа Святаго. Радуйся, яко с лики ангельскими славословиши Господа; Радуйся, яко рай Господень и жизнь вечную стяжал еси. Радуйся, Пастыреначальника Христа Бога нашего служителю; Радуйся, добрый стада Христова пастырю и всего мира молитвенниче. Радуйся, винограда Господня украшение; Радуйся, Церкве Христовы утверждение. Радуйся, Харалампие, милосердый наш пред Богом заступниче и предивный чудотворче.


Кондак 8


Странствия земнаго течение совершая, не восхотел еси волю нечестивых идолослужителей сотворити и от веры истинныя отступити, но вразумляяй мучители твоя богомудрыми словесы твоими, страдания за Христа восприял еси лютая, поя Господу Богу песнь победную: Аллилуиа.


Икос 8


Все сердце свое яростию исполнив, вдаде тя царь нечестивый некоей жене вдовице на поругание. Ты же, святе Харалампие, входя в дом ея, восклонился еси на некий при храмине столп, и абие сухий той столп прозябе; тогда жена тая, зело ужаснувшися, к Богу обратися. Мы же во умилении сердца взываем ти: Радуйся, Харалампие, светильниче всесветлый; Радуйся, угодниче Христов, благодатию преисполненный. Радуйся, яко и самое имя твое чудным житием твоим оправдися; Радуйся, вдовиц предстательство и заступление. Радуйся, учением твоим многия ко Христу приведый; Радуйся, сирых надеждо и укрепление. Радуйся, мучеников красото; Радуйся, человеколюбия зерцало. Радуйся, Харалампие, милосердый наш пред Богом заступниче и предивный чудотворче.


Кондак 9


Все богатство ума твоего, вся благодатныя дары, яже приял еси от Господа Бога, вдал еси, святе Харалампие, на служение человеком, научая всех вере и благочестию, и в час кончины твоея святыя не о себе самем молился еси, но о спасении и благоденствии всех, почитающих святую память твою, да наслаждаются дарований Господа Бога, поюще Ему: Аллилуиа.


Икос 9


Витии многовещаннии не возмогоша воспети достойно величие души твоея и неизреченное твое милосердие, имже дивящеся, мы, недостойнии, в простоте сердца зовем: Радуйся, светильниче, мрак греховный от людей светом веры отгоняяй; Радуйся, венцем мученическим паче звезд небесных блистаяй. Радуйся, молитвами твоими прозябения хлебов у Христа Бога испрошаяй; Радуйся, яко кровь твою честную на землю пролиял еси. Радуйся, яко тою кровию щедроты Господни нам грешным стяжал еси; Радуйся, яко Господь рекл есть тебе: буди глагол твой исцеление болящим. Радуйся, яко приято бысть Богом моление устен твоих; Радуйся, скорбящих благодатное утешение. Радуйся, Харалампие, милосердый наш пред Богом заступниче и предивный чудотворче.


Кондак 10


Спасти хотя душу твою, ни во чтоже тело твое вменил еси, святый мучениче, и мечному на тя осуждению радовался еси, поя благодеющему Господу Богу: Аллилуиа.


Икос 10


Стена и прибежище бысть ти, великий Харалампие, Господь Бог, явивыйся ти во славе Своей в час блаженныя кончины твоея. Темже зовем ти: Радуйся, друже Господень; Радуйся, яко Господь дает ти, яже просиши. Радуйся, страшную славу Господню видевый; Радуйся, защитниче людей от глада и мора. Радуйся, тлетворнаго воздуха, погубляющаго плоды земныя, силою Божиею отгонителю; Радуйся, трудолюбия учителю. Радуйся, яко о здравии телес и душ спасении ходатайствуеши; Радуйся, яко и о скотех, созданных на потребу человеков, печешися. Радуйся, Харалампие, милосердый наш пред Богом заступниче и предивный чудотворче.


Кондак 11


Пение умиленное аще и премногое приносим ти, чудотворче, ничтоже творим равно чудесем твоим и многому твоему к нам грешным милосердию, имже дивящеся, Господеви зовем: Аллилуиа.


Икос 11


Светильник путеводителен буди нам, Харалампие, во тьме греховней ходящим, и молися ко Господу, еже отъяти от нас всякое суеверие, просветити наш ум светом Евангелиа и учений, полезных ко труду земледельца и во всякой вещи, да просветлени умом, во умилении сердца зовем ти: Радуйся, неизсякаемое миро, на труд человеч излиянное; Радуйся, весно Господня благоуханная. Радуйся, рая Господня древо прекрасное; Радуйся, молитву, яко кадило благовонное, Господеви возсылаяй. Радуйся, дыханием молитвы твоей святыя землю согреваяй; Радуйся, предстательством твоим пред Господем росою плоды земныя орошаяй. Радуйся, земледельцев покровителю; Радуйся, жизни их строителю. Радуйся, Харалампие, милосердый наш пред Богом заступниче и предивный чудотворче.


Кондак 12


Благодать, обещанную ти Господем Богом, еже исполнитися всякому прошению твоему, ведая, — "Молю Тя, Господи, — рекл еси, — даждь славу Имени Твоему: идеже положены будут моя мощи, да не будет на месте том глад и мор, или тлетворный воздух, погубляяй плоды, но мир в человецех и телесем здравие, и душам спасение, и плодов земных изобилие да будут". О Господи Боже наш! Излий благодать Твою сию и на всех нас, поющих Ти: Аллилуиа.


Икос 12


Поюще твоя чудеса, преславне Харалампие, славим долготерпение, страдания и дивную кончину твою, и чудящеся милосердию твоему, сице зовем ти: Радуйся, о дождех благовременных пред Господем ходатайствуяй; Радуйся, молитвами твоими от бури и града нас сохраняяй. Радуйся, ты бо просил еси плодородие месту, идеже пострадал еси; Радуйся, ты бо молился еси ко Господу, да низпослет Он, Милосердый, на труд земледельца Свое благословение. Радуйся, страдальче непобедимый и непреодоленный; Радуйся, священниче Божий, о всем мире ходатайствуяй. Радуйся, надеждо всех молящихся тебе; Радуйся, земледельцев радость светлая. Радуйся, Харалампие, милосердый наш пред Богом заступниче и предивный чудотворче.


Кондак 13


О предивный Харалампие, заступниче наш премилосердый! Вонми гласу недостойныя молитвы нашея и молися за ны ко Господу, еже сохранити нас от глада и мора и междоусобныя брани, и на всяк мирный труд человеч низпослати Божие благословение, да во веки воспеваем Ему: Аллилуиа, Аллилуиа, Аллилуиа.


(Этот кондак читается трижды, затем икос 1 и кондак 1)



Молитвы священномученику Харалампию


Молитва первая


О священная и многострадальная главо, пастырю добрый словесных овец Христовых, священномучениче Христов Харалампие. Магнисийская похвало и славо вселенныя, всемирный светильниче и великий наш заступниче и помощниче в скорбех, бедах и всяких нуждах! Услыши нас грешных, к тебе прибегающих и молящихся, и избави нас от всякаго злаго обстояния. Ты бо приял еси от Господа благодать и силу велику за многия и нужныя страдания твоя и терпение, еже всюду и во всем нам помогати, и наипаче идеже память твоя почитаема будет бдением, пением и усердным молением. Сицевая благодать дадеся ти, священномучениче Христов, от явльшагося ти Господа Царя славы по твоему испрошению. Егда на мечное тя усечение осудиша, услышал еси превожделенный и сладчайший оный глас, глаголющий тебе: "Прииди, Харалампие, друже Мой, многия муки имене ради Моего претерпевый, и проси у Мене, еже хощеши, и Аз дам ти". Ты же, великий светильниче, рекл еси Христу Господу усты своими: "Господи мой, велико убо мне есть от Тебе, Света невечерняго, дарование сие. Аще угодно есть величеству Твоему, молю Тя, благоволи даровати мя сицевую милость Свою: да идиже положены будут мощи моя и почитаема будет память страдания моего, не будет на месте том ни глада, ни мора, или тлетворного воздуха, погубляющего плоды, но да будет паче на месте оном мир, здравие телесем и душам спасение, изобилие пшеницы, вина, и елеа и умножение скотов, яже на потребу человеком". Ты же паки, угодниче Христов Харалампие многострадальниче, глас Господен услышал еси, вещающий тебе: "буди по прошению твоему, преславный Мой воине". И абие, по глаголании сем Господнем предал еси душу свою без мечнаго посечения, и пойде во след Христа Господа со славою многою, Ангелом убо сретающим и провождающим ю до престола Господня с радостию великою. И тако приял еси венец славы от Божественныя руки Его с лики святых, вечно славящих пресвятое имя Господа. И тамо, во славе небесней пребывая, призри, угодниче Божий, и на нас грешных, молящихся тебе, и воспомяни нас пред Господем, еже даровати нам на потребу велия Его милости в безконечныя веки. Аминь.


Молитва вторая


О пречудный священномучениче Харалампие, страстотерпче непреодоленный, священниче Божий, о всем мире ходатайствуяй! Призри на моление нас почитающих святую память твою. Испроси нам у Господа Бога прощение грехов наших, да не до конца прогневается на нас Господь: согрешихом бо и недостойни явихомся милосердия Божия. Моли о нас Господа Бога, да низпослет мир на грады и веси наша, да избавит нас от нашествия иноплеменников, междуусобныя брани и всяких раздоров и нестроений! Утверди, священномучениче, веру и благочестие во всех чадах православныя христианския церкви, и да избавит нас Господь Бог от ересей, расколов и всякаго суеверия. О милосердный мучениче! Молися за ны ко Господу, да сохранит нас от глада и всяких болезней, и да подаст нам изобилие плодов земных, скотов умножение на потребу человеком и вся нам полезная: наипаче же да сподобимся, молитвами твоими, небеснаго царствия Христа Бога нашего, Ему же честь и поклонение подобает, со безначальным его Отцем и Пресвятым Духом, ныне и присно, и во веки веков. Аминь.


Молитва третья


О священнейшая главо, пастырю добрый словесных овец Христовых, священномученниче Христов Харалампие, великий о нас заступниче в скорбех и бедах и во всех нуждах! Услыши нас, грешных и недостойных раб твоих (имена), молящихся тебе, да твоими всесильными молитвами Всеблагий Господь избавит ны от всякаго злаго обстояния, простит вся согрешения, вольная и невольная, сподобит ны прочая лета жизни нашея скончати в соблюдении заповедей Его и покаянии. Испроси, угодниче Божий, да пребудет благословение Царя Небеснаго над благословенною Им Россиею, да будет на месте сем мир, телесам здравие и душам спасение. На твоя моления, на тя, священномучениче Христов Харалампие, уповаем, получити велию милость от Господа в безконечный век. Аминь.



Тропарь священномученику Харалампию


Тропарь, глас 4


Яко столп избранный Церкве Христовой и светильник присносветлый всея вселенныя, премудре показася, Харалампие, возсия в мире мучением, разруши идольское мракобесие, блаженне, сего ради явися предстатель Христу, молися спастися нам.[/spoiler]

Раб божий Константин

Акафист преподобному Харитону Исповеднику.
[spoiler]Кондак 1


Избранный угодниче Божий и чудотворче, пресветлый Фаранския пустыни светильниче, величая прославльшаго тя Господа, благодарственное пение приносим ти, чтуще святую память твою. Ты же, яко имеяй велие дерзновение ко Святей Троице, от всяких нас бед свободи, зовущих: Радуйся, преподобне отче Харитоне, монашествующих похвало и утверждение.


Икос 1


Ангел во плоти явился еси, преподобне Харитоне, да явиши собою образ истиннаго благочестия и добрых дел. Мы же, чудящеся неизследимым путем Господним, на тебе явленным, и прославляя велие благоутробие Божие, во умилении сердечнем воспеваем ти: Радуйся, Господеви поработати пламенне вожделевый. Радуйся, Его единаго паче всего возлюбивый. Радуйся, благое иго Христово на рамена своя вземый. Радуйся, семя слова Божия в сердце своем всеявый. Радуйся, веры Православныя и благочестия ревнителю. Радуйся, молитвы, поста и воздержания хранителю. Радуйся, преподобне отче Харитоне, монашествующих похвало и утверждение.


Кондак 2


Видя Господа пред собою выну и на милость Его уповая, во благочестии преуспел еси, отче Харитоне, добродетельми христианскими душу свою обогащая и истинным исповедником имени Христова себе являя, непрестанно вопия: Аллилуиа.


Икос 2


Разумом истиннаго богопознания свыше руководимый, отче преподобне, положил еси в сердце твоем за Христом неуклонно следовати и во всем исполняти волю Его. Темже, усердие твое похваляюще, взываем сице: Радуйся, плоти мудрование умертвивый. Радуйся, терпением твоим злобу мира сего победивый. Радуйся, воине Христов добропобедный. Радуйся, Небеснаго Владыки рабе благий и верный. Радуйся, яко в радость Господа твоего вшел еси. Радуйся, яко со святыми мучениками и преподобными водворился еси. Радуйся, преподобне отче Харитоне, монашествующих похвало и утверждение.


Кондак 3


Сила Божественныя любве, еюже от юности исполнено бысть сердце твое, богомудре Харитоне, тако укрепи тя во благочестии, яко веру истинную пред всеми исповедуя и мучения жестокая претерпевая, николиже вспять обратился еси, радостно воспевая Богу: Аллилуиа.


Икос 3


Имея в сердце своем твердую веру во Христа Бога, не убоялся еси, святе Харитоне, гнева нечестиваго Аврелиана, обаче, презрев славу мира сего, исповедал еси себе христианина быти; сего ради от него биения претерпев, яко злодей, в темницу всажден был еси. Таковому твоему дерзновению и мужеству дивящеся, глаголем ти сице: Радуйся, исповедниче Христов неустрашимый. Радуйся, столпе правоверия несокрушимый. Радуйся, за имя Христово нещадно биенный. Радуйся, за Господа твоего в темнице заключенный. Радуйся, Его ради муки жесточайшия претерпевый. Радуйся, венец победный от Него приявый. Радуйся, преподобне отче Харитоне, монашествующих похвало и утверждение.


Кондак 4


Буря страданий лютых не поколеба тя, отче Харитоне, егда игемон новыя прещения на тя воздвиже; ты же, на камени веры Христовы твердо стоя, со дерзновением глаголал еси: «Аз во Истиннаго Бога верую и Ему токмо служу и покланяюся, яко Той есть Создатель всего, Спас мира, пребывающий во веки, Емуже Ангели на Небеси вопиют: Аллилуиа».


Икос 4


Слышаще твердое исповедание твое, страстотерпче Христов, и видяще ран твоих исцеление, яряшеся мучитель и предаде тя на жесточайшия муки, повелевая тело твое свещами опаляти; ты же тверд яко адамант пребывая, Господа, во страданиях тя укрепляющаго, славословил еси. Сие твое пачеестественное терпение благоговейно воспоминающе, взываем сице: Радуйся, Господем чудесно от ран исцеленный. Радуйся, к лику святых исповедников сопричтенный. Радуйся, Христовых страстей истинный причастниче. Радуйся, Пресвятыя Троицы пламенный исповедниче. Радуйся, благодатию Тоя яко бронею защищенный. Радуйся, огнем страданий яко злато очищенный. Радуйся, преподобне отче Харитоне, монашествующих похвало и утверждение.


Кондак 5


Боготечною стезею к тихому пристанищу спасения устремився, преподобне, егда из темничнаго заключения изведен был еси и стопы твоя во Святый Град Иерусалим направил еси, воспевая Пострадавшему за род человеческий: Аллилуиа.


Икос 5


Видеша тя разбойницы лютии, отче Харитоне, во Святый Град путь совершающа, умыслиша смерти предати тя: сего ради, связавше тя, в пещере затвориша, но по мале времени сами от яда змиина погибоша. Ты же, Господу за чудное спасение твое хвалу воздав, пещеру разбойничу в храм Божий претворил еси и с братиею, пришедшею вслед тебе, Создателя всяческих в нем славословил еси. Сего ради воспеваем ти: Радуйся, себе и весь живот твой Господеви предавый. Радуйся, все упование свое на Бога полагавый. Радуйся, покорным себе воле Божией сотворивый. Радуйся, горнее любомудрие возлюбивый. Радуйся, яко вся любезная и красная мира сего презрел еси. Радуйся, яко небесных и нетленных желанием вожделел еси. Радуйся, преподобне отче Харитоне, монашествующих похвало и утверждение.


Кондак 6


Проповедником нищелюбия явился еси, отче преподобне, егда все богатство, егоже разбойницы неправедно стяжаша, на пользу общую обратил еси, нищия и алчущия питая и обитель иноческую в пустыни Фаранстей созидая. Темже поминающе подвиги и труды твоя, во славу Бога Вышняго подъятыя, воспеваем Ему: Аллилуиа.


Икос 6


Возсиял еси яко солнце пресветлое в пустыни Фаранстей, отче Харитоне, и сиянием подвигов твоих привлекл еси во обитель твою многи ревнители богоугождения истиннаго, иже стекахуся к тебе отвсюду, да руководствуеши их ко спасению. Темже убо и мы, тобою наставляеми, ублажаем тя и зовем: Радуйся, авво богомудрый, иноков множество собравый. Радуйся, послушание братии твоей законоположивый. Радуйся, селение Духа Святаго в себе показавый. Радуйся, пост и воздержание яко сладчайшую снедь возлюбивый. Радуйся, милосердие и братолюбие чудное явивый. Радуйся, примером богоугоднаго жития твоего всех поучавый. Радуйся, преподобне отче Харитоне, монашествующих похвало и утверждение.


Кондак 7


Хотение имел еси, преподобне, в безмолвии пребывати: сего ради удалился еси в место безлюдное, идеже в подвизех пустынножительства добре подвизался еси. Обаче, содержа во уме слово Господне: «Грядущаго ко Мне не изжену вон», никогоже отринул еси от приходящих к тебе, но всех отечески наставлял еси, за вся благодаря Христа и воспевая Ему: Аллилуиа.


Икос 7


Новаго тя наставника иночествующих разумеем, отче Харитоне: мнози бо прихождаху к тебе, благословения ради и добродетельнаго жития; ты же всех с любовию приимал еси, поучая от Божественнаго Писания, еже творити заповеди Господни, хранити чистоту телесную и имети любовь нелицемерную друг ко другу. Темже благодарственно вопием ти: Радуйся, в законе Господни непорочно ходивый. Радуйся, в трезвении умнем все житие твое проводивый. Радуйся, страхом Господним вся пути своя ограждавый. Радуйся, ученики твоя неленостно во благочестии назидавый. Радуйся, Христовы словесныя овцы ко спасению подвизаяй. Радуйся, нерадивыя от сна греховнаго возбуждаяй. Радуйся, преподобне отче Харитоне, монашествующих похвало и утверждение.


Кондак 8


Странника и пришельца в мире сем помышляя себе быти, преподобне, о часе смертнем непрестанно памятовал еси; темже обители Иерихонскую и Сукийскую хотящим спастися устроив, в пещеру, безмолвия ради, вселился еси, идеже дни и нощи в молитве и подвизех пребывая, воспевал еси Сладчайшему Иисусу: Аллилуиа.


Икос 8


Весь в Бозе быв, отче Харитоне, о Бозе и благоугождении Ему со ученики твоими беседовал еси, со слезами умоляя их вся заповеди Христовы верно хранити. Темже, яко возшедый на высоту совершенства духовнаго, наставляй и нас по пути спасения, да и мы тебе поем: Радуйся, узок путь в Царствие Небесное избравый. Радуйся, пустынничества подвиг волею подъявый. Радуйся, Христа Бога в сердце твоем вместивый. Радуйся, имя Его спасительное во уме своем носивый. Радуйся, молитвенную сладость сердцем твоим познавый. Радуйся, слез благодатных поток умилительный источавый. Радуйся, преподобне отче Харитоне, монашествующих похвало и утверждение.


Кондак 9


Всякое естество Ангельское удивися великому свыше тебе дарованию, богоблаженне Харитоне, ты бо на земли невещественное житие показал еси, и во плоти, аки безплотен, явился еси и дар чудотворения от Господа приял еси. Ныне же, Того благостию к Небесным причтен еси Силам, в Небесех поеши Всесильному Богу: Аллилуиа.


Икос 9


Витии многовещаннии не довлеют изглаголати вся подвиги и страдания твоя, отче Харитоне, ибо доброта жития твоего воистину превосходит похвалу человеческую. Обаче мы, любовию к тебе побеждаеми, дерзаем смиренномудренно благохвалити тя пением таковым: Радуйся, яко Святей Троице ныне радостно предстоиши. Радуйся, яко о спасениии нашем Бога умоляеши. Радуйся, христианскому роду присное утешение. Радуйся, любящим и чтущим тя ходатаю спасения. Радуйся, приводяй грешных ко исправлению. Радуйся, теплый о всем мире предстателю. Радуйся, преподобне отче Харитоне, монашествующих похвало и утверждение.


Кондак 10


Спасения подвиг добре совершивши, жития же временнаго отрешаяся и отходя к животу вечному и блаженному, Харитоне преподобне, утешал еси ученики твоя, глаголя: «Пецытеся о спасении своем, яко да избегнув сетей вражиих, сподобитеся по кончине своей Господа усрести и милость от Него получити, воспевая со избранными: Аллилуиа».


Икос 10


Стеною молитв твоих, угодниче Христов, огради нас от всякаго душевреднаго искушения диавольскаго, яко тебе дарова нам Преблагий Бог в помощь и защиту душам и телесем нашим. Тебе убо просим: помози нам во всякой скорби и обстоянии, сице тебе вопиющим: Радуйся, яко свято и праведно на земли пожил еси. Радуйся, яко воистину ангел земный и человек небесный был еси. Радуйся, яко отверзошася тебе врата райския. Радуйся, яко душу твою Господь прият в Небесныя обители. Радуйся, дерзновение молитвенное ко Господу стяжавый. Радуйся, по кончине твоей чад твоих не оставивый. Радуйся, преподобне отче Харитоне, монашествующих похвало и утверждение.


Кондак 11


Пение всеумиленное приношаху тебе духовная чада твоя по чуднем твоем, отче, к Богу отшествии, с плачем велиим провождающе тя на место упокоения в первую обитель твою: слезы многия о разлучении твоем проливаху, со воздыханием вопиюще псаломскую песнь: Аллилуиа.


Икос 11


Светозарная звезда явился еси, богоносе Харитоне, небо церковное украшающая и мрак демонский далече отгоняющая; темже и наша сердца, омраченная грехми, просвети и к свету покаяния возведи, да зовем ти: Радуйся, свеще, Божественным огнем пламенеющая. Радуйся, деннице, верных души и сердца просвещающая. Радуйся, благочестию прибегающих к тебе научаяй. Радуйся, уз греховных молящихся тебе свобождаяй. Радуйся, смиренномудрия искусный наставниче. Радуйся, иноком в брани духовней помощниче. Радуйся, преподобне отче Харитоне, монашествующих похвало и утверждение.


Кондак 12


Благодать Пресвятаго Духа испроси нам, преподобне Харитоне, у Всещедраго Бога, вразумляющую и укрепляющую ны во спасение, да уклоняющеся от путей нечестия и заблуждений, ходим во свете заповедей Божиих, воспевающе ангельскую песнь: Аллилуиа.


Икос 12


Поюще славное житие твое, страдания и подвиги, ублажаем тя, отче Харитоне, яко угодника Божия преподобнаго и исповедника преславнаго. Ты же, Богу предстоя, присно поминай нас, любовию совершающих память твою и во смирении зовущих ти таковая: Радуйся, чтущих тя наставниче благодатный. Радуйся, притекающих к тебе покровителю благонадежный. Радуйся, яко воздвизаемых от мира, плоти и диавола искушений ходатайством твоим нас свобождаеши. Радуйся, яко нераскаянных грешников к совершенному покаянию побуждаеши. Радуйся, духов лукавых прогонителю и полчищ бесовских победителю. Радуйся, ран греховных и недугов душевных всеблагий целителю. Радуйся, преподобне отче Харитоне, монашествующих похвало и утверждение.


Кондак 13


О преподобне и богоносне отче Харитоне, приими сие малое, от любящих сердец приносимое тебе хваление и, яко имеяй велие дерзновение ко Господу, молися за ны, да благоприятным твоим ходатайством избавлени будем от всякаго искушения противнаго и, богоугодне зде на земли поживше, сподобимся выну на Небеси воспевати со бесплотными песнь Богу: Аллилуиа.


Этот кондак читается трижды, затем икос 1 и кондак 1


Молитва


О священная главо, преподобне отче, преблаженне авво Харитоне! Не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю, не премолчи за ны ко Господу, и не презри нас, недостойных, верою и любовию чтущих тя. Поминай нас у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва, аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих, и всякия прелести бесовския, и козней диавольских, пастырю наш добрый. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших и испроси нам время на покаяние, да невозбранно прейдем от земли на небо, от мытарств же горьких, бесов, воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно, и во веки веков. Аминь.


Тропарь, глас 8


Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенныя, сияя чудесы, Харитоне, отче наш; моли Христа Бога спастися душам нашим.


Кондак, глас 2


Насладився, богомудре, воздержания и плоти твоея вожделения обуздав, явился еси верою возращаем и, яко жизни древо посреде рая, процвел еси, Харитоне всеблаженне священнейший.[/spoiler]

Раб божий Константин

Священномученики Агафодор, Василий, Ефрем, Евгений, Елпидий, Еферий и Капитон Херсонесские



память 7 / 20 марта.
[spoiler]Кондак 1

Избраннии угодницы Божии, святителие и мученицы Христовы - Василие, Ефреме, Евгение, Елпидие, Агафодоре, Еферие и Капитоне, в Херсоне епископствовавшии, всю страну нашу ученьми своими просветившии и землю нашу кровьми вашими освятившии, яко имущии дерзновение ко Господу предстательством и молитвами вашими у Престола Божия, от всяких нас бед свободите и пети вам научите: Радуйтеся, Священнии Отцы, за Христа кровь свою излиявшии!

Икос 1

Ангели земнии и человецы небеснии, священномученицы седмочисленнии, Престолу Небеснаго Царя и Владыки вселенныя предстоящии, и нас, грешных, на земли сущих, наставляющии, услышите молитвы наша с похвалами, от всея души к вам возносимыя: Радуйтеся, заступницы наши и предстателие у Господа Бога предобрии; Радуйтеся, первозванному Апостолу Андрею ревностнии подражателие. Радуйтеся, по стопам его, освятившим область нашу, шедшии; Радуйтеся, и венцы мученическия, якоже он, стяжавшии. Радуйтеся, безбоязненнии веры Христовой проповедницы; Радуйтеся, мужественнии истиннаго учения исповедницы. Радуйтеся, за проповедание веры и жизни своей не пощадившии; Радуйтеся, души своя за имя Христово положившии. Радуйтеся, во глубины сатанинския дерзновенно прийти возревновавшии; Радуйтеся, мрак языческаго многобожия в земли нашей разсеявшии. Радуйтеся, от Солнца правды лучами вся концы ея озарившии; Радуйтеся, и ныне нам благодатным светом своим светящии. Радуйтеся, Священнии Отцы, за Христа кровь свою излиявшии!

Кондак 2

Видяще многобожное мучительство идолопоклонства в земли нашей, души человеческия, по Образу Божию бывшия, во образ демонский претворявшее, возревновали есте, отцы святии, о спасении люте погибавших, и вся красная мира отвергше, бодренно приидосте научити их единому истинному Богу пети: Аллилуиа!

Икос 2

Разум совершен стяжавше, идеже возсия мирови свет разума, наченше от Иерусалима, по слову Христову, изыдосте, богомудрии учителие наши, с вещанием и глаголами жизни вечныя во всю землю, да просветите во тьме и сени смертней седящих, и пети всех похвальныя песни вам научите: Радуйтеся, велицыи таинники благодатнаго учения небеснаго; Радуйтеся, сосуди избраннии, в нихже хранятся глаголы живота вечнаго. Радуйтеся, умы, светом евангельским просвещеннии; Радуйтеся, и сердца ваша истинным ведением исполнившии. Радуйтеся, совершеннии человецы Божии, на всякое дело благое уготованнии; Радуйтеся, великая дела Христовы в земли нашей богомудро совершившии. Радуйтеся, Святии Отцы Церкви Христовой, словом и делом сиявшии; Радуйтеся, столпи Божественныя Церкве и Православия непоколебимии. Радуйтеся, зверообразных мучителей ваших неустрашившиися; Радуйтеся, безчисленныя раны и поношения с терпением от них приявшии. Радуйтеся, яко души своя, не за други токмо, но и за враги своя положили есте; Радуйтеся, яко веру Христову в воздаяние мучителем своим даровали есте. Радуйтеся, Священнии Отцы, за Христа кровь свою излиявшии!

Кондак 3

Сила Вышняго осени вас, богомудрии святителие и мученицы Христовы, и благоплодное делание ваше во мраке идолослужения ходящим, яко село сладкое, озаренное Солнцем правды, показала есть, да вси хотящии на ниве, вами возделанной жати спасение, радостно воспевают Богу, Спасителю нашему: Аллилуиа!

Икос 3

Имуще в душах и сердцах своих святую ревность о славе Божией, двоица от седмочисленных святителей - Василий богомудрый и Ефрем славный - первее вкупе трудистася, возвещающе многобожником Единаго Истиннаго Бога; таже Ефрем многоплодный иде с проповедию Евангелия ко скифам, жившим по Дунаю, идеже, многи обратив ко Христу, усечен бысть мечем. Василий же, царское священие, возвещая учение Христово херсонитом и обличая заблуждения неверных, возбуди противу себе гнев неверных, верных же научи воспевати таковая: Радуйтеся, неустрашимии воини Христовы, враги Божии победившии; Радуйтеся, яко в броню правды одеявшеся, пребысте непобедими. Радуйтеся, обувшии нозе свои во благовествовании мира и вспять невозвратившиися; Радуйтеся, шлем спасения восприявшии и всех жаждущих спасения от него напоившии. Радуйтеся, глаголом Божиим, аки мечем духовным, плевелы лжи посекшии; Радуйтеся, яко вещания ваша, богомудрии, не осташася тщетными. Радуйтеся, святителие Божии - истиннии, душ своих за овцы словесныя не пощадившии; Радуйтеся, мученицы Божии, венцы нетленныя, уготованныя вам, приимшии. Радуйтеся, подвигом добрым подвизавшиися до скончания жительства вашего; Радуйтеся, и нам, грешным, образ подражания в себе явившии. Радуйтеся, научающии нас последовати вашей вере, терпению и страданию; Радуйтеся, явившиися в земли нашей, да засвидетельствуете Божественную истину кровию вашею. Радуйтеся, Священнии Отцы, за Христа кровь свою излиявшии!

Кондак 4

Бурю ярости гнева воздвигоша на блаженнаго Василия жители Херсонеса Таврическаго; претерпев же биения, мучения и изгнание из града их, святитель Божий водворися в пещере близ лежащей горы Парфенон, идеже радуяся, яко прият за Христа биения и раны, и , сетуя о мучителях, со слезами молися о обращении к Богу, да поют Ему: Аллилуиа!

Икос 4

Слышавше людие, изгнавшие просветителя своего из града, яко молитвами его воскресил есть Бог умершаго сына единаго от них некоего знаменита, объяти быша ужасом и радостию, исповедаша Бога истиннаго и введоша святаго Василия паки во град свой с велиею честию, нас же научиша воспевати угодником Божиим похвалы сицевыя: Радуйтеся, в терпении мнозем стяжавшии души ваша; Радуйтеся, яко претерпевающе до конца, и сами спасостеся и послушающих вас введосте во спасение. Радуйтеся, правду, мир и радость о Дусе Святе стяжавшии; Радуйтеся, милосердием и любовию к ближним свом исполненнии. Радуйтеся, нищету духовную, терпение скорбей и лишений богатно имевшии; Радуйтеся, яко незлобивии агнцы, Божественному Агнцу - Христу подражавшии. Радуйтеся, приемшии от Бога благодать скорби и болезни в радость претворяти; Радуйтеся, любовию вашею самых жестоких и зверонравных врагов в кротких агнцев обращавшии. Радуйтеся, плач пред Богом и умиление блаженное обретшии; Радуйтеся, кротостию и смирением Христу Спасителю уподобившиися. Радуйтеся, смирением своим высокая, нищетою же богатая явившии; Радуйтеся, дела ваша христоподражательная всем зрящим показавшии. Радуйтеся, Священнии Отцы, за Христа кровь свою излиявшии!

Кондак 5

Боготечной звезде яве уподобися богомудрый Василий, егда чудом воскрешения отрока озари град Херсонес и окрестная его, и тамо живших ко Христу приведе. Аще же по сем нечестивии, по наущению злых жидовин, извлекше его из дома, связанного влачиша по стогнам град, биша и мучиша: обаче святый, и под жестокими ударами их молися о них, и тако предаде душу свою Богови, с похвальною песнию: Аллилуиа!

Икос 5

Видяще мученическую кончину славнаго Ефрема и всехвальнаго Василия, пострадавших за проповедь Евангельскую в стране Тавроменийстей, святителие Христовы - Евгений божественный, Елпидий мудрый и Агафодор богомудрый, в опасении, да не разорится тамо дело святаго Василия злоумышлением жидовским, не убояшася из страны Геллеспонтския идти в землю нашу, продолжения ради благовестия Христова. Жителие Херсонеса с радостию прияша новых просветителей страны их, поучающе их с любовию взывати к ним: Радуйтеся, вернии слуги Христовы и искреннии друзи Божии; Радуйтеся, ревнителие Православия усерднии и идольскаго мракобесия искоренители премудрии. Радуйтеся, за истинную веру Христову живота своего не щадившии; Радуйтеся, любовию к Богу и ближним предивно воспламененнии. Радуйтеся, апостольское великое служение подвигами своими восполнявшии; Радуйтеся, стадо Христово, кровию Его искупленное, умножившии. Радуйтеся, радостно на смерть за Христово учение шедшии; Радуйтеся, бесовское гнездо безбоязненно силою Христова имени разорявшии. Радуйтеся, кумирницы демонския и мнимыя их чтилища нещадно сокрушавшии; Радуйтеся, самаго исконнаго врага Божия и человеческаго горце уязвлявшии. Радуйтеся, христиан правоверных сладостное утешение; Радуйтеся, ожесточенных гонителей веры Христовой грозное устрашение. Радуйтеся, Священнии Отцы, за Христа кровь свою излиявшии!

Кондак 6

Проповедницы богоноснии, подвигом добрым подвизавшиися, веру бодре соблюдшии и течение свое добре скончавшии, за страдания вами мужественно претерпенныя, соблюдеся вам от Подвигоположника Нашего - Господа Иисуса Христа - венец правды. Темже усердно поучающеся в ваших деяниих, с любовию поминаем вас - наставников наших, и тщащеся подражати вере вашей, смиренно вопием Богу: Аллилуиа!

Икос 6

Возсия свет веры Христовой в стране нашей, яко полудне, егда пяточисленнии святителие наши души своя положиша за свидетельство в ней истины Евангельской, возсия нам и новый светильник Божий от Сиона - Еферий священнейший, егда воцарися великий Константин, покровительством христианству стяжавый себе имя равноапостольнаго. Видевше же людие, яко новый святитель бе равночестен, пред ним возопиша к ним: Радуйтеся, святители Божии, Апостолом единонравнии; Радуйтеся, отцы наши богомудрии. Радуйтеся, учителие Церкви всечестнии; Радуйтеся, вселенским учителем сопрестольнии. Радуйтеся, свещенномученики преславнии; Радуйтеся, пастырие наши предобрии. Радуйтеся, милосерднии наши просветители; Радуйтеся, любвеобильнии наши наставницы. Радуйтеся, изгнание правды ради претерпевшии; Радуйтеся, раны, муки и болезни за спасение наше на себе понесшии. Радуйтеся, неверие и суеверие наше победившии; Радуйтеся, адскую силу и мрак греховный от нас отгнавшии. Радуйтеся, Священнии Отцы, за Христа кровь свою излиявшии!

Кондак 7

Хотяй мирно пасти овцы Церкви Херсонския и право правити в ней слово истины, святый Еферий двукраты хождаше в Царьград к царю Константину: первее испросити помощи на разорение твердыням языческим и заступление христиан от гонения, второе же - благодати царя за явленный покров к устроению паствы херсонския. Егда же возвращашеся от Царьграда к пастве своей, разболеся к смерти, приста к малому острову Алосу, идеже и предаде святую душу свою в руце Божии, с песнию: Аллилуиа!

Икос 7

Новаго святителя дарова Церковь Восточная Церкви Херсонстей - Капитона всеславнаго, егоже великою радостию прияша неточию людие правовернии, но и невернии; наипаче же, егда пред всеми сотвори чудо велие, невредимо пребыв во огни и на ризе своей изнес из пламени углие горящее, но не сожигающее. Известившеся о сем чудеси, царь и святии отцы Перваго Собора Вселенскаго прославиша Бога и великое дарование епископа Капитона, людие же, видевшии его, возопиша к своим святителем: Радуйтеся, велицыи наши и преславнии чудотворцы; Радуйтеся, имущии веру, ничимже непоколебиму. Радуйтеся, дерзновенным исповеданием веры Христовой всех удивившии; Радуйтеся, мужественным страданием за веру Христову всех неверных посрамившии. Радуйтеся, догматы веры православныя уяснившии; Радуйтеся, правило веры и образ кротости стаду вашему показавшии. Радуйтеся, отцы наши всечестнии и личе богокрасный; Радуйтеся, слово спасения нам возвестившии. Радуйтеся, на путь правый всех нас наставившии; Радуйтеся, к любви горней души наша уязвившии. Радуйтеся, яко вами направляемии, получаем от Христа Бога велию милость; Радуйтеся, яко вами покрываемии в вечныя кровы вводимся. Радуйтеся, Священнии Отцы, за Христа кровь свою излиявшии!

Кондак 8

Странно бе видети, егда корабль, на немже Капитон святый идяше по нуждам Церкви своей в Царьград, от Херсонеса Таврическаго, схвачен бяше бурею велиею и принесен ко устиям Днепра - к нынешнему Херсону, идеже невернии людие корабль разграбивше, всех бывших на нем умертвиша, а епископа в водах утопиша, вернии же со слезами и рыданием Богу вопияху: Аллилуиа!

Икос 8

Вси вы, святителие Христовы, ныне в вышних пребываете, но и нас, низших, не оставляете вашими молитвами и предстательством у Царя славы и Господа Бога нашего. Сего ради, недоумеюще благохвалити вас по достоянию, со умилением сердца, из глубины души, взываем к вам: Радуйтеся, вере правой нас научающии; Радуйтеся, надежду известную нам подавающии. Радуйтеся, любовь нелицемерную в нас воспламеняющии; Радуйтеся, кротость и смирение в себе нам показующии. Радуйтеся, терпением и мужеством души наша украшающии; Радуйтеся, нас, алчущих и жаждущих правды, насыщающии. Радуйтеся, сердца наша благодатию Божиею, вам данною, очищающии; Радуйтеся, очи наши духовныя к зрению Бога изощряющии. Радуйтеся, вражды и ссоры наша умиротворяющии; Радуйтеся, всякий мрак заблуждения от нас прогоняющии. Радуйтеся, к терпению бед, лишений и скорбей нас воодушевляющии; Радуйтеся, в пренесении испытаний и гонений нас укрепляющии. Радуйтеся, Священнии Отцы, за Христа кровь свою излиявшии!

Кондак 9

Все лицы Ангельстии, зряще подвиги ваша, святии священномученицы, по вере Христовой подъятыя, радостию велиею радовахуся, вы же по страдании своем на земли, вошедше в славу Божию на небеси, и сами исполнилися есте радостию неизглаголанною. Темже, водворившеся в небесных обителях, вкупе со Архангелы и Ангелы, присно воспеваете Богу: Аллилуиа!

Икос 9

Витии многовещаннии, аще бы и многи языки имели и глаголати восхотели, не возмогут исчести ваших трудов и воздыханий, скорбей и лишений, гонений и страданий, яже имели есте, учаще и проповедующе, настояще благовременне и безвременне, умоляюще и запрещающе, обличающе и увещавающе люди непокоривыя, за добро злом воздающия. Мы же, дивящеся подвигом вашим, умиленно взываем к вам: Радуйтеся, трудами вашими нас, ленивых, к доброделанию возбуждающии; Радуйтеся, воздыханиями вашими нас, унылых, к молитве окрыляющии. Радуйтеся, скорбями вашими нас, малодушных, в пренесении скорбей утверждающии; Радуйтеся, гонениями, вами претерпенными, нас, слабых, укрепляющии. Радуйтеся, лишениями вашими нас, нетерпеливых, к воздержанию подвизающии; Радуйтеся, страданиями вашими нас, боязливых, ободряющии. Радуйтеся, учением и проповедию вашею нас, темных, просвещающии; Радуйтеся, наставлением вашим благовременным и безвременным нас, нерадивых, ко стыду приводящии. Радуйтеся, умолением вашим по Христе нас, безпечных, безответными творящии; Радуйтеся, прещением вашим нас, безстрашных, устрашающии. Радуйтеся, обличением вашим нас, непослушных, посрамляющии; Радуйтеся, увещанием вашим нас, противляющихся, к Богу приводящии. Радуйтеся, Священнии Отцы, за Христа кровь свою излиявшии!

Кондак 10

Спасти хотяй страну нашу, иже всем хотящий спастися и в разум истины приити, всемилостивый Господь и Бог наш, избра и посла вас к нам, святителие Христовы, да ясно укажете всем зде живущим и хотящим спастися пути спасения, и всех научите пети Богу: Аллилуиа!

Икос 10

Стена крепка и непоколебима есте, угодницы Божии, нам, влающимся и обуреваемым в мори житейстем, да выну зря море сие, воздвизаемое напастей бурею, к тихому пристанищу, ходатайству и заступлению вашему, грешнии, прибегаем и из глубины души с любовию вопием к вам: Радуйтеся, поборницы веры Христовой непоколебимии; Радуйтеся, покровители наши, некрыющиися от нашего притекания. Радуйтеся, светильницы, во тьме греховней нам, блудящим, светящии; Радуйтеся, кормчии святии, по водам плавающих управляющии. Радуйтеся, от потопления в водах зельных нас спасающии; Радуйтеся, ко пристани благонадежной всегда нас приводящии. Радуйтеся, обуреваемых и бедствующих в мори надеждою обвеселяющии; Радуйтеся, в плавании страждущих морскою болезнию оздравляющии. Радуйтеся, сланое море страстей наших изсушающии; Радуйтеся, гнездящиися в нас гади малии и велицыи убивающии. Радуйтеся, от грехопадений наших, имже несть числа, избавляющии; Радуйтеся, миром и любовию к добру души наша снабдевающии. Радуйтеся, Священнии Отцы, за Христа кровь свою излиявшии!

Кондак 11

Пение всеумиленное приносим вам, святителие Христовы, с небесе на мольбы наша благосердно призирающии, всем нам, усердно вас призывающим, помогающии, и всех почитающих вы по достоянию спасающии. Темже молим вас - великих и усердных благопоспешников - научите нас, немощных, воспевати присто Богу: Аллилуиа!

Икос 11

Светильницы Божии, благодатию Святаго Духа возженнии, не под спудом и одром положеннии, но на свещнице небесном поставленнии, и так присно пред престолом Божиим горящии, всему же миру и нам, грешным, на земли сущим, светящии, да видяще добрая дела ваша, прославляем прославльшаго вас Господа славы, и к вам от всего сердца вопием: Радуйтеся, светом вашим нашу тьму греховную разгоняющии; Радуйтеся, теплотою любви вашей наша хладная сердца согревающии. Радуйтеся, облаком благодати Божией, данныя вам, от зноя житейскаго нас покрывающии; Радуйтеся, палимыя зноем страстей души наша прохлаждающии. Радуйтеся, молитвами вашими на нивы наша дожди благовременныя посылающии; Радуйтеся, вся насаждения наша, во утешение и наслаждение наше, орошающии. Радуйтеся, плодами земными, веселящими нас, души наша оплодотворяющии; Радуйтеся, зверей и птиц, вреждающих полям и вертоградом нашим, отгоняющии. Радуйтеся, трудолюбивых земледельцев плодами земными награждающии; Радуйтеся, трудящихся во спасение дарами небесными исполняющии. Радуйтеся, в поте лица хлеб свой снедающих тайно увеселяющии; Радуйтеся, аще ядущих, аще пиющих, аще ли ино что творящих во славу Божию всех явно утешающии. Радуйтеся, Священнии Отцы, за Христа кровь свою излиявшии!

Кондак 12

Благодать от Бога данная вам, угодницы Божии и страстотерпцы Христовы, веруем, яко неистощима есть и николиже иждиваема. Сего ради, с несумненною надеждою к вам, яко приснотекущим и независтным источником, притекаем; почерпающе же от вас воду живую, утоляющую нашу жажду духовную, вся наша нечистоты омывающую и наши горести житейския услаждающую, Богу, спасающему нас вами, с любовию вопием: Аллилуиа!

Икос 12

Поюще ваши подвиги и страдания, блаженную кончину и водворение со святыми в небесных обителех, восхваляем ваша добрая дела, имиже угодили есте Господу Богу, имже и нас научите, молимся, да прославляем Отца нашего Небеснаго купно с вами, да видят доброе житие наше заблуждающиися братия наши, от нас изшедшии, но не бывшии от нас, и вразумляются, яко ходим во свете, они же в обольстительной лжи пребывают, да негли купно с нами возопиют когда к вам: Радуйтеся, за Христа на земли страдавшии и со Христом на небеси царствующии; Радуйтеся, с высоты небесныя милостивно на нас, недостойных, призирающии. Радуйтеся, похвалы наша, аще и недостойнии вас, благосердно приемлющии; Радуйтеся, молитвам нашим, аще и немощным, с любовию внемлющии. Радуйтеся, от всея души и сердца возносимая к вам прошения наша исполняющии; Радуйтеся, во всех нуждах, бедах и обстояниих нам помогающии. Радуйтеся, безвестная и тайная премудрости Божия нам открывающии; Радуйтеся, благия мысли и чувства в недоумении нам сущим внушающии. Радуйтеся, святыя желания и намерения ко спасению нашему в сердца нам влагающии; Радуйтеся, добрыми плодами веры, надежды и любви души наша исполняющии. Радуйтеся, в час кончины вас на помощь призывающим предстательствующии; Радуйтеся, по кончине нашей, с любовию души наша в свое общение пред Богом приемлющии. Радуйтеся, Священнии Отцы, за Христа кровь свою излиявшии!

Кондак 13

О всеблаженнии угодницы Божии, святителие Христовы и страстотерпцы Василие, Ефреме, Евгение, Елпидие, Агафодоре, Еферие и Капитоне, услышите моления наша и благохваления, к вам возносимыя, призрите на вся наша нужды - душевныя и телесныя, помогите нам, странствующим в мори житейстем и далече отстоящим от вас, возвышайте наша мысли, чувства, желания и намерения от земнаго к небесному, да безбедно прешедще сланое страстей море и минувше без боязни тени смертныя, преселимся радостно во страну живых, идеже представше пред лице Бога вечнаго, выну поем с вами: Аллилуиа! Аллилуиа! Аллилуиа!



(Этот кондак читается трижды, затем икос 1 и кондак 1)



**Настоящий акафист составлен преосвященным Димитрием в первое управление Херсонскою епархиею. В честь сих священномучеников есть придел в Одесском кафедральном соборе и немало храмов в Таврической и Херсонской епархиях. На отпустах они поминаются во всех церквах Херсонской епархии наряду с равноапостольным Владимиром. В 1851 г. по указанию Преосвященнаго Иннокентия (Борисова) Херсонскою Консисториею сделано распоряжение о повсеместном в Херсонской епархии праздновании дня памяти ( 7 марта ) Херсонских священномучеников по примеру дней праздничных: именно, чтобы накануне отправляемо было всенощное бдение, а самый день - литургия по уставу о храмовых главах.[/spoiler]