Молитвослов

Автор Раб божий Константин, марта 10, 2012, 02:13:14

« назад - далее »

Раб божий Константин

АКАФИСТ УМИЛИТЕЛЬНЫЙ ГОСПОДУ ИИСУСУ ХРИСТУ.
[spoiler]Кондак 1
Предвечный Царю веков, Творче и Господи, Судие праведнейший и нелицеприятный, множество содеянных мною лютых помышляя, окаянный аз, трепещу страшнаго дне суднаго, но, надеяся на милость неизреченнаго благоутробия Твоего, давидски молю Тя: по велицей Твоей милости прости мя недостойнаго, и не осуди мя по деянием моим, яко да благою совестию очищен, на всяк день и час ангельскую песнь приношу Ти: Свят, Свят, Свят еси Господи Боже Вседержителю, Иже бе и сый и грядый, помилуй мя

Икос 1
Архангельския трубы возглашение, на Суд Господень страшный и последний, живыя и мертвыя от всех конец земли собирающее, уже во ушесех предносится. Душе моя, душе моя, востани, что спиши? Конец приближается и имаше смутитися. Воспряни убо, яко мало есть еще время на покаяние; бодрствуй, молися и трезвися и дела добрая твори, непрестанно вопиющи ко Владыце своему таковая:

Свят еси Господи, Боже наш, и Пресвят, и да святится и в сем грешном и во зле лежащем мире имя Твое, паче всякаго имене.

Свят еси Господи, Боже наш, да приидет Твое славное Царствие.

Свят еси Господи, Боже наш, да будет во всем воля Твоя святая на земли, якоже пребывает и на небеси.

Свят еси Господи, Боже наш, хлеб земный насущный даяй нам, паче же небесный даждь ми на всяк день.

Свят еси Господи, Боже наш, остави ми согрешения моя, якоже и аз оставляю брату своему согрешения его.

Свят еси Господи, Боже наш, не введи мя в напасть, но избави мя от сетей лукаваго миродержителя тьмы века сего, ибо поистине опасно ходим и дние наша лукави суть.

Свят, Свят, Свят еси Господи Боже Вседержителю, Иже бе и сый и грядый, помилуй мя

Кондак 2
Вижду, Господи мой, Господи, яко вся знамения кончины века сего уже исполняются: вера святая в людех оскуде, беззакония умножишася, и любовь охладе; востают бо народ на народ, царство на царство, отец на сына и сын на отца, глады и трусы и пагубы изобилуют по местом, прельстители и предатели явишася, и гонения на верных Твоих воздвигошася, таже и проповедание Евангелия во свидетельство всем языком уже совершается, и скорбь великая посреди верных по вселенней распространяется, и по сих всех, разумея, яко близ есть кончина века сего, со страхом вопию Ти: Аллилуиа.

Икос 2
Разум неуразуменный времени страшнаго и неизглаголаннаго пришествия Твоего открыти верным хотя, всеблагий Господи, дал еси нам в подобие того притчу смоковницы, глаголя: "Егда бо ваия ея будут млади и листвие прозябнут, ведите ,яко близ есть лето. Тако и вы, егда видите сия вся, — бодрствуйте, яко близ есть, при дверех". Тем же и мы, пришед на конец веков, со умилением зовем Ти:

Свят еси Господи, Боже наш, притчами тайноводя нас во Царствие Свое, да всяк имеяй уши духовныя слышати, да слышит, даруй и мне уразумение Твоего Евангельскаго проповедания, да плотския похоти попраше, духовно жительствую и к жатве всемирной уготовляюся.

Свят еси Господи, Боже наш, притчею жерновною поучай нас, яко от двоих, вкупе труждающихся и живущих, в той день един поемлется и един оставляется, — не остави мене тогда со грешники, делающими беззаконие, но очищение даруй и введи во Твое славное Царствие.

Свят еси Господи Боже наш, глаголяй: "Молитеся, да не будет бегство ваше в зиме или в субботу" — о веце кончины мира, яко о зиме гадательствуя; даждь ми, в сие осьмое тысячелетие живущему, стопы моя к бегству великому в сретение Твое уготовати и непрестанно помышляти грядущее помози ми.

Свят еси Господи, Боже наш, рекий: "В чем застану, в том и сужду", — возбуди мя, множицею во грехи впадающа, к частому покаянию, да не обрящеши, пришед, мя неготоваго.

Свят еси Господи, Боже наш, праведный и милостивый, не вниди в суд с рабом Твоим, яко не оправдится пред Тобою всяк живый, — от лица же Твоего судьба моя изыдет.

Свят еси Господи, Боже наш, рекий: "Не всяк глаголяй Ми: "Господи, Господи", внидет в Царство Небесное, но творяй волю Отца Моего", — научи мя творити волю Твою.

Свят, Свят, Свят еси Господи Боже Вседержителю, Иже бе и сый и грядый, помилуй мя

Кондак 3
Силою Божества Твоего, Господи, воздвигл еси из гроба Лазаря, бездыханна четверодневна, и телеса усопших святых в час смерти и крестных страданий Твоих возставил еси; последи же и Сам тридневен воскресл еси от мертвых тою же силою Твоею. Веруем, яко грядет час и ныне уже есть, егда по гласу Твоему воскреснут мертвии, и востанут сущии во гробех, и изыдут сотворшии благая в воскрешение живота, а сотворшии злая в воскресение суда. Не осуди тогда и мя, Владыко, по деянием моим, но помилуй со всеми в вере и надежде жизни вечныя усопшими, и пети не возбрани: Аллилуия.

Икос 3
Имеяй ключи ада и смерти, аще и глаголал еси, Господи, верному рабу Твоему Иоанну тайновидцу, стоявшему посреде седми светильников: "Аз есмь первый и последний, и живый, и бых мертв, и се жив есмь во веки веков, аминь", — повелел же еси ему написати имже подобает быти вскоре. Сия страшная и близкая скончания мира сего быти помышляя, не с суетным любопытством, но со страхом и трепетом взываю Ти:

Свят еси Господи, Боже наш, Свидетелю верный, Первенец из мертвых, и Княже царей земных; любяй ны и омываяй ны от грех наших Кровию Своею, и ключи Царства Небеснаго человеком вручивый, — укрепи мя в вере Твоей, да николиже отрекуся Тебе, но, аще понудитися, до крове постою за имя Святое Твое.

Свят еси Господи, Боже наш, грядый на облацех небесных, да узрят Его всяко око и иже прободоша Его, и плачь сотворят о Нем тогда вся колена земная, — даруй и мне прежде дне того страшнаго плачь за грехи моя.

Свят еси Господи, Боже наш — Альфа и Омега, Начало и Конец, Первый и Последний — скажи ми кончину мою и число дней моих возвести ми.

Свят еси Господи, Боже наш, давый Откровение великому Иоанну, да уразумеем и мы, имже подобает быти вскоре. Того молитвами спаси мя в день великий гнева Твоего, егда ни горы, ни ущелья, ни камение возмогут укрыти грешники, бежащия от лица Твоего.

Свят еси Господи, Боже наш, апостолом Твоим Павлом поучаяй, яко аще имам пророчествия и тайны вся и веру, якоже и горы преставляти, любве же не имам, кая ми польза есть? Даждь ми любовь нелицемерную, да тяготу брата моего, якоже и свою, понесу, и душу мою положу за други своя.

Свят еси Господи, Боже наш, Любы неизреченная, даруй ми возлюбити Тя, якоже иногда возлюбих грех свой, и принеся плоды покаяния, сподоби поработати Тебе, якоже поработах прежде сатане льстивому, да из глубины души воспою:

Свят, Свят, Свят еси Господи Боже Вседержителю, Иже бе и сый, грядый, помилуй мя

Кондак 4
Буря велия, разрушающая горы, предъидяше, трус и мрак, громы и молнии бываху, егда являлся Господь Илии в Хориве и Моисею на Синае; но сей страх малый есть прообраз последняго дне мира, о немже глаголал Господь учеником на горе Елеонстей и Иоанну на Патмосе. Тогда бо вся вселенная сотрясется: огнь, вода и вся стихии смятутся; и свет, и мрак, и кровь, и дым, и трубы Ангельския, и мертвецев востание, и вопль людей соединятся, возвещая второе пришествие и Страшный Суд Его, и час отмщения. О ужаснаго зрелища и испытания Невозможно есть нам и изобразити сие: горе — грешным, и слава — праведным тогда. Милосерде Господи Спаси мя тогда, молюся да пою Тебе: Аллилуиа.

Икос 4
Слышах Тя, Господи, усты Петровы глаголюща: яко нынешняя небеса и нынешняя земля Словом Твоим содержимы и огню блюдомы на день Суда и погибели нечестивых человек, аз содрогаюся, но на неизреченное милосердие Твое дерзая, новаго небеси и новыя земли по неложному Твоему обетованию чаю, в них же вся правда живет. Сия убо желанныя земли жителя мя сотвори тогда, Спасе, зовуща:

Свят еси Господи, Боже наш, Неизследимый и Непременимый вчера и днесь, и во веки Той же еси, и лета Твоя не оскудеют; имеяй небеса и землю, яко ризу ветху свити, в ризу нову и нетленну облецы мя.

Свят еси Господи, Боже наш, стояй у двери и стучаяй, и к слышащему глас Твой, и двери сердца отверзающему — входящий к нему и свечеряющий с ним. Вниди в дом смиренныя и грешныя души моея и свечеряй со мною, якоже с Лукою и Клеопою, ибо преклонился уже есть день жизни моея.

Свят еси Господи, Боже наш, Путь, Истина и Живот мой, настави мя на путь Твой, и пойду во истине Твоей.

Свят еси Господи, Боже наш, рекий древле: "Марфо, Марфо, печешися и молвиши о мнозе, едино же есть на потребу", — даждь и ми ни о едином земном пещися, но и о небесном помышляти.

Свят еси Господи, Боже наш, рекий богатому: "Безумне В сию же нощь душу твою истяжут от Тебе, а еже уготовал еси кому будет?" Помози ми сокровище не земное, а небесное собирати, идеже ни червь, ни тля тлит, ни татия подкапывают и крадут.

Свят еси Господи, Боже наш, освяти мя во всей полноте Своей, да всесовершен дух мой и душа и тело непорочно в пришествие Твое да сохранятся.

Свят, Свят, Свят еси Господи Боже Вседержителю, Иже бе и сый и грядый, помилуй мя

Кондак 5
Боже, Боже мой, пришедый взыскати и спасти погибшаго, — призри на скорбь души моея: век бо мой скончавается, и страшный Твой престол предуготовляется, житие мое мимоидет, Суд же мне предлежит, грозя мне огненною мукою и пламенем неугасимым. Вонми, убо, молитве моей и не отрини слез моих, яко суетных: кто убо прииде к Тебе плача и не абие спасен бысть? Веру мою вместо дел вмени мне, Господи, и не взыщи дел, отнюдь оправдающих мя, яко тщуся творити тыя, но не имам их; но та вера моя да довлеет вместо всех, та да отвещает, та да оправдит, та да покажет мя причастника славы Твоея вечныя в невечернем дни Царствия Твоего, воспевающа: Аллилуия.

Икос 5
Провидя Даниил пророк, муж желаний, древле ясно Божественное Твое второе пришествие, Владыко Господи, глагола: дондеже престолы поставишася, и Ветхий денми седе, одежди Его белы, аки снег, и власы главы Его, аки волна, чисты, и престол Его пламень палящь; река огненная течет исходящи пред Ним; тысяща тысящ служаху Ему, и тмы тем предстояху Ему, на судищи седящему, и книги отверзошася. Пощади убо, пощади, Спасе, тогда Твое создание, слезно вопиющее Ти таковая:

Свят еси Господи, Боже наш, на престоле славы почиваяй, Ему же дадеся власть и честь, и царство, и вси людие; племена и языцы Тому работают; Его же власть — власть вечная, яже не прейдет, и царство Его не разсыплется.

Свят еси Господи, Боже наш, Великий и Страшный, Его же Даниил пророк святый видев, духом вострепета и смутися, — аз же, грешный, како дерзну узрети Тя и отвещати Тебе?

Свят еси Господи, Боже наш, Боже милости и щедрот и человеколюбия, — молитвами пророка Твоего избави мя потока страшнаго реки огненныя, хотящаго поглотити мя за грехи моя.

Свят еси Господи, Боже наш, праведныя любяй и грешныя милуяй, горы мерилом разума поставивый, лик звездам исчитаяй и капли росныя ко ветров дыханию приложивый, — услыши стенание души моея, и вопль сердца моего к Тебе да приидет.

Свят еси Господи, Боже наш, Сердцеведче, Ему же вся, не токмо словеса, но чувствия и помышления содеянныя и несодеянныя наша ведомы суть, — не осуди мя по благости Твоей за всякое слово праздное и помыслы скверныя, яже аз изрекох и помыслих в житии моем.

Свят еси Господи, Боже наш, продолжи ми век к покаянию и на посечение со смоковницею безплодною не осуди мене.

Свят, Свят, Свят еси Господи Боже Вседержителю, Иже бе и сый и грядый, помилуй мя

Кондак 6
Проповедник Твой, Господи, духоносный Иоанн Богослов, видев во Откровении славный престол небесный и под престолом души убиенных за слово Божие, от великия скорби пришедших, иже и возопиша велегласно глаголюще: "Доколе, Владыко Святый и Истинный, не осудиши и не отмстиши за кровь нашу живущим на земли?"; и даны быша коемуждо им ризы белы, и заповедано бысть им пождати еще время мало, дондеже скончаются соратницы их, подобно им имущия избиены быти, яко да восполнится предопределенное число. О великаго и неизреченнаго долготерпения Твоего, Владыко Яко и до сего дне отмщение нечестивым отлагаеши. Но горе миру, егда Судия внезапу приидет и коегождо деяния обнажатся, тогда погибнут грешницы от лица Божия, а праведницы возвеселятся и возрадуются пред Богом во веки зовуще Ему: Аллилуия.

Икос 6
Возсиял еси на Фаворе, Христе Боже наш, и ученицы Твоя, елика вмещаху, славу Твою видеша; но и убояшася, и вострепеташа, и ниц падоша. С тою же неизреченною, но пребольшею всею славою приидеши на облацех в день он судити живым и мертвым, и явиши знамение великое, иже есть Крест Твой честный, от конец земли и до конец небес простираяйся; егоже узревше, восплачут вся колена земная, ибо страх явления Лица Твоего земнородным страшнее по премногу есть всякаго в мире сем разрушения и пременения. Како срету Тя тогда, Боже мой, кий плач и ответ воздам Ти, не могий, бедный, вместити и иоты славы Твоея. Но на Твое несказанное милосердие уповая, всякий грех истинно кающагося побеждающее, дерзаю прежде конца возопити Тебе:

Свят еси Господи, Боже наш, во свете живый неприступнем, — осени мя, грешнаго, светом Лица Твоего, и не опали огнем Божества Твоего, егда приидеши во славе святей Своей.

Свят еси Господи, Боже наш, даяй знамения на небеси и на земли, посылаяй огнь, язву и глад на люди за множество беззаконий их, — сохрани мя от язв будущих и от чаши гнева Твоего проклятия, приключитися имущих в последнии дни мира сего.

Свят еси Господи, Боже наш, Слове необыменный, даруй ми слово благо отвещати на страшнем Суде Твоем.

Свят еси Господи, Боже наш, глаголяй: "Побеждаяй наследит вся, и буду Ему Бог, и той мне будет в сына", — помози мне греха победителем явитися.

Свят еси Господи, Боже наш, рекий: "Яко страшливых и неверных, скверных, убийц и блудодейц, идолослужителей и всех лживых часть в езере, горящем огнем и серою, ожидает", — спаси и избави мя от части тоя.

Свят, Свят, Свят еси Господи Боже Вседержителю, Иже бе и сый и грядый, помилуй мя

Кондак 7
Хотящу Ти, о Преблагословенный Господи Иисусе Христе, Боже наш, в день паки бытия, во второе пришествие, явитися миру на облацех яко Судии и Мздовоздаятелю, — о каковый страшный Суд будет тогда, ангелом во тьмах и тысящах предстоящим, апостолом председящим, человеком во ужасе вводимым, книгам разгибаемым и делом и помыслом истязуемым? Кий суд будет мне, зачатому во гресех? Кто ми пламень, жгущий мя, угасит? Кто ми тьму просветит? Кто мя тогда защитит, аще не Ты, Сам — Любы и Милость безконечная Молитвами Пречистыя Матери Твоея и Ангела-хранителя моего спаси мя тогда, зовуща: Аллилуия.

Икос 7
Новое и последнее торжество явити сатане льстивому в мире попустивый, Владыко мой Господи, егда пред кончиною века сего открыется человек беззакония — сын погибели, сиречь — антихрист, егоже пришествие со всякою силою и знамениями и чудесы ложными будет; иже, число звериное имеяй, совратит многия люди от пути праваго, и печать свою страшную на тыя положит, гонение на верныя великое воздвигнет и мерзость запустения на месте святе поставит, и три лета с половиною владычествовати будет, егоже и последи убиеши Духом уст Своих. О горе мне, грешному, в день той тогда Како спасение обрящу и отцу лжи противостану, когда избранных часть прельстится и праведник едва спасется? Но, о Премилостиве Аще и не понесох тяготы и зноя дневнаго, обаче с наемники единонадесятаго часа сопричти мя и веру крепку во дни искушений во мне утверди, да зову и таковая:

Свят еси Господи, Боже наш, по неизреченному промышлению Твоему попустити имеяй в последнии дни воцаритися сыну гордому и погибельному, да верныя прославятся, неверныя же в конец посрамятся.

Свят еси Господи, Боже наш, два свидетеля тогда с небесе послати имеяй, да избранныя укрепят и антихристу окаяннному противостанут, и истину Твою смертию своею засвидетельствуют.

Свят еси Господи, Боже наш, прежде всех предрекий нам сия, быти подобающая, да зрим и не ужасаемся, и, избранных ради, сократити дни оныя хотяй.

Свят еси Господи, Боже наш, в терпении души нам стяжати заповедавый и до конца сия претерпевшему спасение обещавый, — посли и мне дух кротости и терпения с упованием перенести напасти тыя.

Свят еси Господи, Боже наш, изми мя тогда от сетей лукавого века сего и печати антихристовы избави мя.

Свят еси Господи, Боже наш, сохрани мя в малом стаде Твоем, имже дати Царство благоволил еси.

Свят, Свят, Свят еси Господи Боже Вседержителю, Иже бе и сый и грядый, помилуй мя

Кондак 8
Страннаго и страшнаго втораго Твоего, Господи, пришествия помышляя сретение, трепещу, прещения Твоего боюся и гнева Твоего. Егда приидиши грешныя мучити, праведныя же спасти, — плачу и рыдаю, день оный воспоминая, и молю Тя прежде сего: Спасе мой, спаси мя Да не прииду тогда в землю плача, да не вижду места тьмы, Христе Спасе мой Ниже связан буду рукама и ногама вне чертога Твоего изверженный, одежду нетления имый оскверненную и не могий проглаголати, якоже глаголю Тебе ныне: Аллилуиа.

Икос 8
Весь еси желание и сладость моя, Сладчайший Господи Иисусе, упование всех концев земли. Поучаеши ныне о дне славнаго пришествия Твоего, глаголя: бдите и молитеся, не весте бо дне и часа, воньже Сын Человеческий приидет. Сие же ведите: яко аще ведал бы домовладыка в кую стражу нощи тать приидет — бдел бых убо и не бы дал подкопати храма своего; сего ради и вы будите готови. Внимая убо сему словеси Твоему, благодарне взываю Ти:

Свят еси Господи, Боже наш, на всякое время и на всякий час бдети и ожидати дне великаго пришествия Твоего верным повелевый.

Свят еси Господи, Боже наш, о дне том и часе никому не открывый: ни людем праведным, ниже Ангелом Своим. Но якоже молния исходит от восток и является до запад, тако пришествие Свое, имущее быти яве и внезапу, изобразивый.

Свят еси Господи, Боже наш, обновивый водою во дни Ноя мир, грехами растлевший, егда внезапу потопи люди нечестивыя, ныне же огнем попалити хотяй землю беззаконную с человеки неверными.

Свят еси Господи, Боже наш, правы пути Твоя и словеса Твоя истинны и непреложны и не мимо идут они, аще небо и земля прейдут.

Свят еси Господи, Боже наш, не даждь ми отягчити сердце мое объядением пиянством и печальми житейскими, или иным непотребством, да не внезапу найдет на мя день той.

Свят еси Господи, Боже наш, рекий: яко на Святаго Духа хулившему не оставится ни в сем веце, ни в будущем, — соблюди мя не износити хулу ни словесную, ни мысленную на имя Святое Твое.

Свят, Свят, Свят еси Господи Боже Вседержителю, Иже бе и сый и грядый, помилуй мя

Кондак 9
Все естество земных и преисподних ужасом многим содрогнется, и силы небесныя подвигнутся в той час, егда солнце померкнет, луна не даст света своего и звезды спадут с небес; небеса же с шумом мимо идут земли, пламенем горящей, и человеком, рыдающим и ко Владыце всяческих, к Богу Страшному, со трепетом вопиющим: Аллилуиа.

Икос 9
Витии мира безумствуют, якоже и во дни Давида царя глаголюще: "Несть Бог, не видим Его" О слепии Почто не помышляете, яко неверием окамененнаго сердца своего себе огнь вечный готовите, и богоотступлением и прочими беззакониями кончину мира приближаете? Не слышасте ли из Писаний: яко невидимая Его от создания мира твореньми помышляема, видима суть: и присносущная Сила Его и Божество. Очистите, убо, сердца своя и Бога узрите. Но пощади, Господи, от таковаго ожесточеннаго заблуждения и неверия ум, сердце и душу мою, да с верою, упованием и любовию образ пришествия Твоего всегда себе представляю и зову Ти:

Свят еси Господи, Боже наш, праведным судом Твоим всем нам в землю, от неяже взяты есмы, возвратитися повелевый и паки в день всеобщаго Воскресения из нея востати положивый.

Свят еси Господи, Боже наш, солнцу, луне и звездам некогда померкнути, а земли и всему, яже на ней, огнем преобразитися предопределивый, да вместо их явится небо ново и земля нова, в нихже правда живет.

Свят еси Господи, Боже наш, утаивый день, в онь же предстанут на суд вся племена и языцы, да восприимет кийждо по делом своим.

Свят еси Господи, Боже наш, Пастырю добрый и Судие праведнейший, имеяй сести в день воздаяния Твоего на престоле разсуждения, во еже разлучити же вся народы друг от друга, якоже пастырь разлучает овцы от козлищ; да поставиши овцы одесную себе, а козлища ошуюю, и речеши праведным сладкий глас: "Приидите, благословеннии Отца Моего, и наследуйте Царствие, уготованное вам от сложения мира".

Свят еси Господи, Боже наш, от Него же нераскаянные грешницы услышат тогда со страхом: "Отъидите от Мене, проклятии, во огнь вечный, уготованный диаволу и аггелом Его";

Свят еси Господи, Боже наш, обещавый Церковь Свою до конца мира непоколебиму соблюсти, во еже неодоленней быти ей от всех врат адовых.

Свят, Свят, Свят еси Господи Боже Вседержителю, Иже бе и сый и грядый, помилуй мя

Кондак 10
Спасти хотя древле Лота праведнаго от запаления с содомлянами нечестивыми, Владыко Господи, извел еси Его вон из града и рекл еси рабу Своему Аврааму: "Яко аще бы и десять праведник имел град сей, не бы тогда погибл бысть, но оскудения ради святых в нем и мерзости грешных огню предается". Последи же и учеником Своим в притче плевел сельных глаголал еси, яко плевелы и пшеница обоя купно имут расти до жатвы, да никогда прежде жатвы восторгающе плевелы восторгнется купно с ними и пшеница. От сего убо и назидаемся: яко токмо праведники Твоими мир сей стоит доселе, и ради святых Твоих, в мире живущих, даеши еще время и мне, грешному, покаятися, сего ради, неизследиме Боже, благодарно вопию ти: Аллилуиа.

Икос 10
Царю Царей, Господи Спасе, Агнче непорочный, на престоле славы седяй, яко лев, от колена Иудова и корене Давидова возсиявый и мир победивый. Ты Един достоин еси разгнути Книгу Жизни великую и разрешити печати ея Ты, яко Агнец закланный, достоин еси прияти силу, богатство и премудрость, крепость и честь, и славу, и благоволение — ихже воспевают Ти чины Ангельстии и дуси праведных на небеси. Сподоби убо и мя, недостойнаго, с ними славити Тя в день великий и в сей час звати тако:

Свят еси Господи, Боже наш, Содетелю и Промыслителю наш, сияяй светом солнечным и одождяй на добрыя и злыя; наказуяй и милуяй, нарицаяй не сущая, яко сущая; низводяй даже до ада и паки возводяй.

Свят еси Господи, Боже наш, имеяй праведники просияти, яко солнце во Царствии Своем, — не погуби мя ради святых Твоих, но в Книзе Животней напиши мя и имя Твое начертай на челе моем.

Свят еси Господи, Боже наш, день весь жития моего совершен, свят, мирен и безгрешен даруй ми.

Свят еси Господи, Боже наш, Ангела мирна, верна наставника и хранителя души и тела моего на всяко время неотлучна посли ми.

Свят еси Господи, Боже наш, по благодати Твоей, изобильно на ны излиянной, презри моя прегрешения и подаждь вся добрая и полезная души моей.

Свят еси Господи, Боже наш, прочее время живота моего сподоби мя в мире и покаянии скончати, ожидающу дне славнаго явления Твоего.

Свят, Свят, Свят еси Господи Боже Вседержителю, Иже бе и сый и грядый, помилуй мя

Кондак 11
Пение всеумиленное приношу Ти, Господи, Спасе и Содетелю мой, и молю Тя, егда приидеши судити миру всему на облацех, не постыди мя, студныя дела сотворшаго, и не погуби мя, якоже погубил еси Вавилон — великую блудницу, но, веры ради моея и любве к Тебе, жителя Сиона Горняго соделай мя, идеже есть глас велий народа многаго, яко глас вод многих и яко глас грома крепкаго, глаголющих: Аллилуиа.

Икос 11
Светильник мой угасе, елея же благих дел, во еже возжещи той, несть ми; и где обрящуся окаянный, сном греховным отягченный, егда постигнет мя внезапу полунощь — час кончины моея, или Суд Божий, яко тать найдет на вся живущая на земли? Но да не услышу аз, якоже юродивыя девы, грознаго гласа жениха: не вем Тя. Помози ми, о Господи, наполнити сосуды души моея елеем благих дел, паче же милосердия и смирения, и звати Тебе:

Свят еси Господи, Боже наш, даждь ми послужити меньшей братии Твоей, якоже Самому Тебе: алчущии и жаждущии насытити, странныя приютити, нагия одеяти, больныя и в темницех страждущия посещати, да сподоблюся части десныя стояния на Суде Твоем.

Свят еси Господи, Боже наш, отъими от мене дух гордости, праздности и уныния бесовского и подаждь ми дух смиренномудрия, целомудрия, кротости и радости духовныя.

Свят еси Господи, Боже наш, вложи в мысль мою мудрость сына Сирахова: помнити последняя моя, дабы во веки не согрешити.

Свят еси Господи, Боже наш, Женише, красный добротою паче всех человек, грядый в полунощи, — с мудрыми девами в рай введи мя.

Свят еси Господи, Боже наш, приими мольбу о нас и предстательство всех святых Твоих паче же простирающую к Тебе всегда о нас руце Своя Деву Пречистую, Тебе рождшую.

Свят еси Господи, Боже наш, огради нас святыми Твоими Ангелы и отжени от нас духов злобы поднебесных.

Свят, Свят, Свят еси Господи Боже Вседержителю, Иже бе и сый и грядый, помилуй мя

Кондак 12
Благодать Твою, Господи Боже наш, грешныя милующую, сведуще, аще и недостойное житие явихом; обаче надежду Воскресения и жизни вечныя имуще, христианския кончины живота нашего безболезненны, непостыдны, мирны, божественных Таин причастны, и добраго ответа на Страшнем Судищи Твоем всегда просим, во умилении зовуще: Аллилуиа.

Икос 12
Поюще Твое непостижимое о людех и о мире, Тобою сотворенном, промышление, Вседержителю Отче, Сыне и Душе, Господи наш, славлю Тя, создание и раб Твой, и, яко чадо Церкве Православныя, чаю Воскресения мертвых и жизни будущаго века; в веце же настоящем молю Тя, Блаже: избави мя искушений, от мира, плоти и диавола находящих на мя, и укрепи в вере несумненней и любви к Тебе; да благочестне, чисто и свято прочее время живота поживу и сподоблюся части правыя в день пакибытия, зовуща Ти:

Свят еси Господи, Боже наш, Мздовоздаятелю праведный, судити имеяй на велицем престоле Своем, от Егоже Лица побегнут небо и земля, и место их не обретется.

Свят еси Господи, Боже наш, всем нам явитися пред судище Твое положивый, да воздаши коемуждо яже с телом содела: благая или злая; еже предопределил еси мне прежде дне того скончатися, — даждь ми безбедно прейти мытарства воздушныя бесовския и оправдатися на первом, частном, Суде Твоем.

Свят еси Господи, Боже наш, сатану и аггелы его, зверя и лжепророка во езеро огненное на мучения вечныя Архангелом Твоим Михаилом ввергнути имеяй; того предстательством избави мя муки страшныя, тартара и тьмы кромешныя и геенны огненныя, идеже червь не умирает и огнь не угасает.

Свят еси Господи, Боже наш, всех Твоих ради Святых, изряднее же святых Твоих щедрот и Крове Твоея, за ны пролиянныя, жителя мя сотвори Иерусалима Небеснаго, идеже несть ни смерти, ни плача, ни вопля, ни болезни, ни скверны некия, но жизнь безконечная, и слава Твоя присно осеняет Его.

Свят еси Господи, Боже наш, прежде сих всех помози ми соблюдати словеса Евангельския, творити волю Твою и прилежно внимати пророчеству Апокалипсиса Иоаннова, яко время близ есть.

Свят еси Господи, Боже наш, рекий в конец Богослову: яко, дондеже суд приидет, скверный — да осквернится еще, а святый — да освятится еще. Ей, гряду скоро, и мзда моя со мною есть. Аминь Ей, гряди, Господи Иисусе, молит Тя Церковь Твоя, зовущи:

Свят, Свят, Свят еси Господи Боже Вседержителю, Иже бе и сый и грядый, помилуй мя

Кондак 13
О Великий и Непостижимый Боже Альфа и Омега — Начало и Конец всему сущему, Иже вчера, днесь и во веки Той же, и у Него же несть пременения, Егоже и лета не оскудеют. Приими сие малое акафистное моление мое в память грядущаго и Страшнаго Суда Твоего, всегда мною Тебе приносимое, и, по множеству щедрот Твоих, очисти беззакония моя, и имя мое в Книзе Живота напиши, и в юдоль плача не осуди, егда судити сядеши; и от пресветлаго лица Твоего не отлучи мене. Да егда скончаются дни века сего, и небеса и земля сия мимо идут, и светила, яко воск истаят, тогда, о Всемилостиве, да узрю и аз стены Горняго Иерусалима, и купно со избранными десными Твоими овцами вниду во святый град сей и тамо насыщуся славы Твоея и буду пети Тебе песнь нову во вся веки веков: Аллилуиа.

Сей кондак читается трижды, таже:

Таже прокимен, глас 7-й: Господи, да не яростию Твоею обличиши мене, ниже гневом Твоим накажеши мене.

Стих: Услыши, Боже, глас мой, внегда молити ми ся к Тебе.

Евангелие от Матфея, зачало 106, глава 25, стихи 31–46.

Таже, Слава: Молитвами апостолов...

И ныне: Молитвами Богородицы...

Помилуй мя, Боже... И стихира, глас 6-й:

Возгласят трубы, и истощатся гробы, и воскреснет человеческое все естество трепещущее, добрая содеявшии, в радости радуются, чающе мзду восприяти: согрешившии же трепещут, люте рыдающе, в муку посылаеми, и от избранных разлучаеми. Господи славы, ущедри нас яко благий, и части сподоби возлюбивших Тя. [/spoiler]

Раб божий Константин

Акафист о упокоении всех усопших.
[spoiler]Кондак 1
Непостижимым Промыслом к благу вечному мир уготовляяй, определивый всем время и образ кончины, прости, Господи, согрешения от века умершим, приими их во обители света и радования и объятия Отеческая отверзи им милостиво. Услыши нас, память их совершающих и поющих:
Отче наш, Любовь неизреченная, упокой усопших раб Твоих.

Икос 1
Адама падшаго и весь род наш от гибели вечныя спасая, послал еси, Боже, в мир Сына Твоего, Крестом и воскресением Его возсия нам жизнь вечная. Уповая на милосердие Твое, чая нетленнаго Царствия Славы, просим в нем части усопшим и молимтися:
Отче наш, возвесели души усопших, измученных житейскими бурями.
Отче наш, да забудут они вся скорби и воздыхания земная.
Отче наш, утеши их на лоне Твоем, якоже мать утешает чад своих.
Отче наш, скажи им: прощаются вам грехи ваши.
Отче наш, приими их в Твое блаженное тихое пристанище.
Отче наш, отверзи им чертоги Ангелов и святых.
Отче наш, да возрадуются они о Божественней славе Твоей.
Отче наш, сподоби вечных Твоих благ усопших отец и братий наших.
Отче наш, Любовь неизреченная, упокой усопших раб Твоих.

Кондак 2
Озаренный Всевышним, преподобный Макарий глас слыша от черепа языческаго: "Егда вы молитеся о страждущих во аде, тогда и язычником бывает отрада". О сила молитв христианских! Ими и преисподняя озаряется, с верными и невернии утешение приемлют, егда мы о всем мире поем: Аллилуиа.

Икос 2
Помянух слово Исаака Сирина, глаголюща: "Сердце милующее о людех и о животных, и о вразех, и о всей твари ежечасно со слезами приносит молитву, дабы сохранились и очистились". Посему и мы дерзновенно просим у Господа помощи всем от века умершим, взывая:
Отче наш, пошли нам дар пламенныя молитвы за усопших.
Отче наш, даждь нам ревность Павла и Моисея, готовых лишиться рая ради спасения ближних.
Отче наш, помяни всех заповедавших нам, недостойным, молитися за них.
Отче наш, изглади забытыя ими грехи. Отче наш, согрей наши сердца жалостию и к врагам Истины.
Отче наш, помилуй всех без молитвеннаго напутствования погребенных.
Отче наш, приими в Твоя селения внезапно умерших от горя или радости.
Отче наш, низпосли преставльшимся мир и покой о Дусе Святе.
Отче наш, Любовь неизреченная, упокой усопших раб Твоих.

Кондак 3
Мы повинны в бедствиях мира, в страданиях безсловесныя твари, в мучениях невинных детей, ибо грехопадением людей разрушено блаженство и красота творения. Величайший из неповинных страдальцев, Ты, Господи, един властен простити всем. Прости, Боже, и возврати миру древнее благоденствие, да и мертвии и живии покой обрящут, взывая: Аллилуиа.

Икос 3
Свете Тихий, Искупителю вселенныя, слышахом Твой вопль со Креста о вразех: "Отче, прости им!". И во имя Твоего всепрощения сами дерзаем молитися Отцу о вечном покое Твоих и наших врагов:
Отче наш, прости проливавшим неповинную кровь.
Отче наш, прости осыпавшим тернием скорбей путь наш.
Отче наш, прости строившим свое благополучие на слезах ближняго.
Отче наш, не суди гнавших нас клеветою и злобою.
Отче наш, воздаждь милостию всем обиженным нами.
Отче наш, утеши всех нами по неведению оскорбленных. Отче наш, да будет сия молитва о них таинством примирения.
Отче наш, истреби рукописания грехов почивших отец и братий наших.
Отче наш, Любовь неизреченная, упокой усопших раб Твоих.

Кондак 4
Спаси Господи, скончавшихся в тяжких мучениях, убиенных, заживо погребенных, поглощенных волнами и огнем, растерзанных зверьми, умерших от глада, мраза или падения с высоты, и за скорбь кончины их даруй им вечную радость Твою, да благословят они время страданий своих, яко час искупления, воспевая: Аллилуиа.

Икос 4
Всем, у кого Ты, Господи, взял жизнь в светлой юности, всем, коим дал еси венец терновый страданий, всем, не изведавшим счастия земнаго, Ты воздаждь лучами Твоея загробныя безконечныя любве:
Отче наш, услади их сладостию даров Духа Твоего.
Отче наш, вознагради умерших под тяжким бременем трудов.
Отче наш, приими в чертоги рая усопших отроков и дев.
Отче наш, сподоби их ликования на Вечери Сына Твоего.
Отче наш, умягчи скорбь родителей об утрате детей.
Отче наш, упокой всех одиноких, сирых и нищих, о нихже некому помолитися.
Отче наш, да изсякнут грехи их в лучах Твоего всепрощения.
Отче наш, даждь рабом Твоим, прежде скончавшимся отцем и братиям нашим, одежду белую, победную.
Отче наш, Любовь неизреченная, упокой усопших раб Твоих.

Кондак 5
Яко последнее средство к вразумлению и покаянию рода человеческаго, Ты, Господи, даровал еси смерть. При грозном блистании ея обнажается земная суета, утихают плотские стремления, смиряется непокорный разум, открывается правда вечная. Сего ради и закоренелыя в беззакониях грешники, на смертном одре исповедуя Бытие Твое вечное, к Твоему милосердию взывают: Аллилуиа.

Икос 5
Отче всякого утешения! Ты озаряеши солнцем, Ты услаждаеши плодами, Ты веселиши красотами мира друзей и врагов Твоих. Веруем, яко и за гробом, в вечности не истощается в милости сердце Твое, милующее и отверженных всеми грешников.
Отче наш, скорбим об ожесточенных и беззаконных хулителях святыни.
Отче наш, да будет над ними спасительная воля Твоя.
Отче наш, сжалься над уязвленными гибельным неверием.
Отче наш, не познавый Тя на земли, да возлюбит Тя на небеси.
Отче наш, прости скончавшихся без покаяния.
Отче наш, спаси погубивших себя в омрачении разсудка.
Отче наш, да угаснет пламень нечестия их в море благости Твоея. Отче наш, Победителю ада, избави от осуждения в геенне всех преставльшихся отец и братий наших.
Отче наш, Любовь неизреченная, упокой усопших раб Твоих.

Кондак 6
Страшен есть мрак души, удаленной от Бога, муки совести, скрежет зубов, неугасимый огнь и червь неумирающий. Трепещу и мне таковыя участи, и яко о самом себе, молюся и о страждущих во аде, да снидет к ним росою прохлаждения наша песнь: Аллилуиа.

Икос 6
Где бы возсиял свет Твой, Христе Боже, аще не на сидящих во тме и сени смертней? Темже и поминают Тя сущии во аде души. Сниди паки в преисподняя земли, изведи во отраду разлученных с Тобою грехми, но не отрекшихся от Тебе. Во имя Сына и Святаго Духа помолимся ко Отцу:
Отче наш, чада Твоя страждут, помилуй их.
Отче наш, согрешили они на небо и пред Тобою.
Отче наш, тяжки их грехи, но велика и сильна милость Твоя.
Отче наш, Ты Сына Своего послал еси грешныя спасти.
Отче наш, посети горькую нищету отдаленных от Тебе душ.
Отче наш, помилуй гнавших Истину по неведению.
Отче наш, да будет им любовь Твоя не огнем, но прохладою райскою.
Отче наш, избави от пламени вечнаго отшедших к Тебе отец и братий наших.
Отче наш, Любовь неизреченная, упокой усопших раб Твоих.

Кондак 7
Хотя умершим руку помощи подати, разрешил еси им, Господи, в сониях и видениях к живым являтися и на молитву тех вдохновляти, да поминая с любовию отшедших, творят в память их добрая дела и подвиги веры, взывая с надеждою: Аллилуиа.

Икос 7
Церковь Христова по всей вселенней всякий день возносит молитвы за почивших, и ежечасно по всей земли грехи мира омываются чистительною Кровию Божественнаго Агнца. От смерти к животу и от земли к небеси восходят души усопших силою молитв о них пред Алтарем Господним.
Отче наш, да будет умершим ходатайство Церкви лествицею к небеси.
Отче наш, помилуй их за предстательство Пречистыя Девы и всех святых.
Отче наш, очисти их ради верных, вопиющих к Тебе день и ночь.
Отче наш, ради незлобивых младенцев прости их родителей.
Отче наш, слезами матерей искупи грехи чад их.
Отче наш, за молитвы невинных страдалец, за кровь мучеников пощади грешников.
Отче наш, приими наша милостыни и молитвы в воспоминание их добродетелей.
Отче наш, да будет Кровь Сына Твоего источником жизни для ныне поминаемых отец и братий наших.
Отче наш, Любовь неизреченная, упокой усопших раб Твоих.

Кондак 8
Весь мир - общая священная могила, на всяком месте прах наших братий и отцев, сотворенных по образу Божию и по подобию, единокровных нам по Адаму. Единый, неизменно нас возлюбивший, прости всех, от начала и доныне умерших, да воспоют они безсмертней любви Твоей: Аллилуиа.

Икос 8
Се День грядет, яко пещь горяща, День великий и страшный, День Последняго Суда. Обнажатся тайны человеческия и откроется книга совести. "Примиритеся с Богом! - вопиет Павел,- прежде онаго страшнаго Дня". Помози нам, Господи, и слезами живых восполни недостающее умершим.
Отче наш, да будет им и нам звук трубы архангельской благовестием спасения.
Отче наш, в час Суда сподоби их и нас всерадостнаго помилования.
Отче наш, увенчай славою страдания ближних наших.
Отче наш, покрой благостию Твоею согрешения немощных.
Отче наш, дай истину Твою очищенным грозою бед земных.
Отче наш, ведый всех по имени, помяни в монашеском и мирском чине спасавшихся.
Отче наш, приими пастырей благоговейных с духовными чадами их.
Отче наш, да встретят раби Твои, нами зде поминаемыя, Жениха Христа со светильники горящими.
Отче наш, Любовь неизреченная, упокой усопших раб Твоих.

Кондак 9
Благословляйте, не губите скоротекущее время: каждый час, каждое мгновение приближает нас ко гробу. Новая скорбь, новая седина суть вестники из грядущаго мира, они свидетели тленности земнаго, они возвещают, яко все мимотечет, яко приближается вечное счастие, идеже ни слез, ни воздыхания, но отрадная песнь: Аллилуиа.

Икос 9
Яко древо осенью обнажается от листьев своих, тако и жизнь наша ежечасно клонится к оскудению. Праздник юности увядает, погасает светильник радования, близится отчужденная старость, умирают друзья, отдаляются близкие. Где вы, прежде юныя, радостныя, счастливыя? Безмолвны их гробы и души их в деснице Твоей.
Отче наш, взоры из мира загробнаго зовут нас к молитве.
Отче наш, Солнце светлое, озари и согрей селения усопших.
Отче наш, да минует навсегда горькое время разлуки.
Отче наш, сподоби нас радостнаго свидания на небеси.
Отче наш, сотвори, да вси едино будем с Тобою.
Отче наш, возврати отшедшим детскую чистоту и юное благодушие.
Отче наш, да будет им вечная жизнь праздником светлопасхальным.
Отче наш, умягчи скорбь об умерших надеждою встречи в небесном Сионе.
Отче наш, Любовь неизреченная, упокой усопших раб Твоих.

Кондак 10
Накрапляем слезы, яко тихия капли дождя на могилы сродников наших, молимся с надеждою, взываем с упованием: скажи нам, Господи, что Ты простил еси их, скажи, что приемлеши их в обители радости, даждь таинственное откровение нашему духу, да воспоем: Аллилуиа.

Икос 10
Обращая очи мои вдаль, на пройденный путь жития, вижду множество уже усопших от перваго дне моего и доныне, послуживших мне во благо. О них молюся и, долг отдавая любви, вопию:
Отче наш, помилуй всех доброжелателей и благодетелей моих.
Отче наш, сподоби славы Твоея родителей и ближних моих.
Отче наш, вознагради бодрствовавших над моею детскою колыбелью.
Отче наш, спаси благовестивших мне Слово Твое.
Отче наш, прослави пред Ангелы научивших мя любити Тя.
Отче наш, даждь отраду наставлявшим мя святыми примерами жизни их.
Отче наш, услади сокровенною манною послуживших мне в тяжелые дни.
Отче наш, Царствию Твоему не будет конца, да внидут усопшии в радость Твою.
Отче наш, Любовь неизреченная, упокой усопших раб Твоих.

Кондак 11
Смерть, где твое жало? где твоя победа? где твой прежний и мрак и страх? Ты желанная отныне, ты сочетаеши неразлучно с Богом, ты великий покой, ты таинственное субботство. Апостол взывает: "Желание имам умрети и со Христом быти". Темже взирая на смерть, яко на путеводительницу к жизни, зовем: Аллилуиа.

Икос 11
Воскреснут мертвии и возстанут сущии во гробех, и вси земнороднии возрадуются, ибо проснутся уже телеса духовныя, прославленныя, светлонетленныя. Кости сухия, слышите слово Господне: "Облекайтеся жилами, покрывайтеся кожею, возставайте из седых времен прошлаго. Вы искуплени Кровию Сына Божия, вы оживлены смертию Его, над вами свет Воскресения!".
Отче наш, день от дня Ты открывал еси благость Твою.
Отче наш, ныне открой им всю бездну совершенств Твоих.
Отче наш, Ты веселил еси их теплом и ароматом весны.
Отче наш, яви им и вечную весну нетления.
Отче наш,Ты сиял еси им светом солнечным и тишиною луны.
Отче наш, да узрят они и славу огненных ангельских Ликов.
Отче наш, Ты услаждал еси их красотою восхода и заката солнечнаго, да узрят они и свет вечнаго Твоего Божества.
Отче наш, да просветится каждая душа, яко звезда утренняя, вестница зари.
Отче наш, Любовь неизреченная, упокой усопших раб Твоих.

Кондак 12
Плоть и кровь Царствия Божия не наследуют. Доколе во плоти живем, отлучены есмы от Христа; аще не умрем, не оживем для вечности, подобает бо тленному сему телеси облещися в нетление и мертвенному сему просияти безсмертием, и тако во свете невечерняго дне воспевати: Аллилуиа.

Икос 12
Чаем радостныя встречи с Господом, ждем ясной зари воскресения, ждем пробуждения из гробов близких наших и оживления в благолепней красоте умерших жизней. Торжествуем грядущее преображение всея твари и Возсоздателю нашему вопием:
Отче наш, создавый мир к торжеству радости и добра.
Отче наш, возстави нас из глубины греха к святости.
Отче наш, даждь умершим царствовать посреде обновленнаго бытия.
Отче наш, да возсияют они яко светила на небесех в день славы их.
Отче наш, да будет им Агнец [Божественный] светом неугасимым.
Отче наш, даждь и нам с ними праздновати Пасху нетления.
Отче наш, соедини умерших и живых в нескончаемой радости.
Отче наш, да не разлучаемся с рабами Твоими, зде нами поминаемыми.
Отче наш, Любовь неизреченная, упокой усопших раб Твоих.

Кондак 13
О Премилостивый Отче Безначальный, всем хотяй спасения, Сына к погибающим низпославый и Духа Животворящего изливаяй! Помилуй, прости и спаси близких нам и всех от века усопших, и предстательством их посети. Мы же да вкупе с ними воспоем Тебе, Спасителю Богу, победную песнь: Аллилуиа! Аллилуиа! Аллилуиа!
Сей Кондак глаголи трижды. Затем 1-й Икос и 1-й Кондак.[/spoiler]

Раб божий Константин

Акафист святому священномученику Фаддею, архиепископу Тверскому и Кашинскому.
[spoiler]Кондак 1

Избраннаго от Бога на высоту святительскаго служения, молитвенника изряднаго и чистоты православныя веры ревнителя, Твери града и всея земли Российския небеснаго заступника, новаго чудотворца предивнаго вси воспоим: Радуйся, священномучениче Фаддее, молитвенниче о душах наших!

Икос 1

Ангел пресветлый явился еси на земли, преблаженне Фаддее, тихостию нрава и смирением украшен, издетска Господеви угождати желая, сего ради вопием ти:

Радуйся, иерейскаго корене ветвь пречестная,

Радуйся, от святыя купели славным именем Иоанна Дамаскина нареченный;

Радуйся, благочестивых родителей кроткое утешение,

Радуйся, благоговейное верных удивление;

Радуйся, чадо послушания, в страсе Божием возращенное,

Радуйся, отроча чистое, во храме Господнем воспитанное;

Радуйся, от сродников и знаемых благочестию наученный,

Радуйся, благим нравам, вере и любви оных подражателю;

Радуйся, священномучениче Фаддее, молитвенниче о душах наших.

Кондак 2

Видяще твое по Бозе усердие, удивляхуся вси, како вмале премудрость Божию познавши, возжада душа твоя источника приснотекущаго, от негоже верных сердца благодатию наполняются и немолчно восхваляют Бога: Аллилуиа!

Икос 2

Разум неуразуменный уразумети потщався, востекл еси, блаженне, под кров преподобнаго Сергия, не в суетных и тленных поучатися, но Господа лицем к Лицу узрети желая, сего ради вопием ти:

Радуйся, от пелен архиереем пророчески нареченный,

Радуйся, несумнительно путь служения Господеви избравый;

Радуйся, неуклонное шествие ко Христу от юности в сердце своем положивый,

Радуйся, душу свою невредиму от ветров безбожных учений сохранивый;

Радуйся, в терниих и волчцех пшеницу веры Христовы возрастивый,

Радуйся, плод сторичный Владыце Христу принесый;

Радуйся, ближним поработати пламенне вожделевый,

Радуйся, о души бессмертней присно попечение имевый.

Радуйся, священномучениче Фаддее, молитвенниче о душах наших!

Кондак 3

Силою свыше укрепляем, выну болезнуя о спасении души своея, добрых учителей искал еси, по слову святых отец, яко неудобь спасается без наставника к Богу шествуяй, и обрел еси оных, яко многоценное сокровище. Тех богомудрым поучением прилежно внимал еси, Богу благодарственно поя: Аллилуиа!

Икос 3

Имеяй непрестающую болезнь в сердцы своем, в кий бо час услышиши глас «Се Жених грядет» недоумея, светильник свой присно горящий уготовал еси, елеем благодати преисполнив сего. Мы же, части мудрых дев улучити желая, воспеваем ти сице:

Радуйся, постниче, себе Христа ради утеснивый,

Радуйся, вина от юности никакоже вкусивый;

Радуйся, древним отцем пустынным измлада подражавый;

Радуйся, противу страстей душепагубных подвизавыйся;

Радуйся, любве исполнение стяжавый,

Радуйся, семена греха непрестанно из сердца своего исторгавый;

Радуйся, помысел возношения самоукорением низложивый,

Радуйся, смирением гордую выю помыслов суетных сокрушивый.

Радуйся, священномучениче Фаддее, молитвенниче о душах наших!

Кондак 4

Бури помышлений сумнительных возмущаша душу твою, о доблий воине Христов, егда служити Богу и ближним всем сердцем возжелал еси, о стези же монашестей недоумевая, молился еси Богу со слезами: «Скажи мне, Господи, путь, в онь же пойду, яко к Тебе взях душу мою», — поя Ему с надеждою: Аллилуиа!

Икос 4

Слышавше от праведника Кронштадтскаго, егоже яко ангела земнаго узрел еси, словеса Христовы: «Аще любиши Мя, паси овцы Моя...», уразумел еси волю Божию спасительную. Сим предречена бысть и мученическая кончина твоя, еюже увенча тя Господь, сего ради вопием ти:

Радуйся, в день Успения Пречистыя Владычицы в воинство Ея вчиненный,

Радуйся, дивным смотрением Божиим имя апостола, во младости предреченное, получивый;

Радуйся, небесное ангельское звание паче всех земных возлюбивый,

Радуйся, Бесплотным силам во всем уподобитися возжелавый;

Радуйся, благодатию священства почтенный,

Радуйся, благоговейный Престола Божия предстоятелю;

Радуйся, научение юных аки святое послушание восприявый,

Радуйся, в подвизе любве и попечения о пастве твоей пребывый.

Радуйся, священномучениче Фаддее, молитвенниче о душах наших!

Кондак 5

Яко звезду боготечную, путь верным указующую, воздвиже тя Пастыреначальник на тверди церковней просветити мрак неведения и привести Господеви люди совершенны, да радостно вси воспоют с тобою Богу: Аллилуиа!

Икос 5

Видеша людие талант пастырства добраго, дарованный ти от Господа, егоже не яко бремя тяжкое восприял еси, но яко иго легкое понесл еси, любовию вся покрывая, ничимже смущаяся, на Господа твердое упование имый; мы же, дивящеся, вопием:

Радуйся, Пастыря кроткаго дивный подражателю,

Радуйся, небесному покровителю твоему подобниче;

Радуйся, апостольское дерзновение имевый,

Радуйся, об Отечестве твоем, тьмою неверия покрывающемся, скорбевый;

Радуйся, о рассеянных по путем погибельным присно болезновавый,

Радуйся, на зов твой текущих с любовию приимавый;

Радуйся, яко обида и памятозлобие от тебе далече быша,

Радуйся, яко превыше немощей человеческих пребыл еси.

Радуйся, священномучениче Фаддее, молитвенниче о душах наших!

Кондак 6

Проповедует земля Волынская подвиги и труды твоя, святителю Фаддее, яко истинною смертию для мира и гробом себялюбию архиерейское служение почел еси, неуклонно шествие ко Христу творя и воспевая Ему присно: Аллилуиа!

Икос 6

Воссия свет святительскаго служения твоего, о пастырю неусыпный, снедаше бо тя огнь любве ко Христу. Возжада душа твоя благодати Божией, о Господе хвалитися научающей: «Пшеница Божия есмь», — яко Богоносец восклицая. Мы же, видяще таковое усердие твое, воспеваем сице:

Радуйся, наречение в день священномученика Игнатия приявый,

Радуйся, сему Богоносцу любовию ко Христу уподобивыйся;

Радуйся, славы суетныя на земли не взыскавый,

Радуйся, совершенный образе чистоты и смиренномудрия;

Радуйся, омофор яко крест на рамена своя возложивый;

Радуйся, Архиерею Великому, небеса прошедшему, последовавый,

Радуйся, благочестие свое, яко жезл для овец словесных, имевый,

Радуйся, яко глава твоя увенчана бысть венцем долготерпения.

Радуйся, священномучениче Фаддее, молитвенниче о душах наших!

Кондак 7

Хотя явити всем красоту веры Православныя, неустанно трудился еси, да люди новы Христу приобрящеши, кротостию и тихостию нрава к себе привлекая, выну поя Богу: Аллилуиа!

Икос 7

Новаго тя Златоуста показа Человеколюбец Христос, неусыпно бо вертоград Господень, зноем безбожия иссушаемый, животворною влагою словес твоих напоял еси. Сего ради вопием ти:

Радуйся, от Источника воды живыя верных напояющий,

Радуйся, светильниче светлый, путь спасения нам озаряющий;

Радуйся, плотскаго мудрования до конца отвративыйся,

Радуйся, Писаний Божественных изъяснителю;

Радуйся, о просвещении истиннем радевый,

Радуйся, очи сердечныя отроком учением твоим отверзаяй;

Радуйся, юныя души на путь спасения наставляяй,

Радуйся, добрый соработниче Христов и верный Того учениче.

Радуйся, священномучениче Фаддее, молитвенниче о душах наших!

Кондак 8

Странное чудо является притекающим к тебе, блаженне Фаддее, ибо данною тебе Божиею благодатию во дни печали и скорбных обстояний светлым лицем радость пасхальную всем возвещал еси, воспевая Богу: Аллилуиа!

Икос 8

Весь хвала Богу и жертва живая был еси, святе Фаддее, глаголал бо еси, яко крестный путь спасения благодать Божия радостию преисполняет, юже мир не позна. Сего ради от святителя Тихона святость твоя известися, юже похваляюще, воспеваем ти сицевая:

Радуйся, странствия Владычня возследователю,

Радуйся, бессмертныя трапезы Христовы насладивыйся;

Радуйся, яко во страданиях Господеви уподобился еси,

Радуйся, яко клеветы, осуждение и заточение понесл еси;

Радуйся, яко во узилищи с тобою сущия утешал еси,

Радуйся, яко уныние и скорбь далече от них отревал еси;

Радуйся, дар прозорливости от Господа получивый,

Радуйся, и в темници милостыню творивый.

Радуйся, священномучениче Фаддее, молитвенниче о душах наших!

Кондак 9

Всякия утоляя печали, безмездник предивный явился еси, сирым и нищим вся раздавая, да обет нестяжания совершенне исполниши. О сем же людие земли астраханския зело чудишася, егда вольную нищету твою узрели суть, умиленным сердцем воспевая Богу: Аллилуиа!

Икос 9

Ветия суемудренныя нечестивыя видим твоим житием посрамляемыя, богомудре Фаддее; поправшия бо каноны церковныя и отеческия предания ко Христу привел еси, не словесы грозными заблудшия обличая, но богоподражательными своими нравы. Сего ради вопием ти:

Радуйся, на всяк день у Престола Господня молитвы возносивый,

Радуйся, словом богоносным паству свою неустанно учивый;

Радуйся, вся покрывающую любовь имевый,

Радуйся, светом Христовым заблуждшия просветивый;

Радуйся, отцев Вселенских соборов верный последователю,

Радуйся, еще в житии земном за святость почитаемый;

Радуйся, зерно Божественныя истины возрастивый,

Радуйся, преславное Российския земли заступление.

Радуйся, священномучениче Фаддее, молитвенниче о душах наших!

Кондак 10

Спастися хотя всякому, притекающему к тебе, наставниче добрый, страждущих яко слуга Христов приимал еси, раны греховныя тех исцеляя и волю Божию им открывая, воспевая Богу: Аллилуиа!

Икос 10

Стена еси всем прибегающим к тебе, богопросвещенне Фаддее, во дни бо лютых гонений Тверь град молитвою твоею ограждая, призывал еси люди твоя верными быти Христу даже до смерти, да жительствуют по словеси Евангельскому: «Не убойтеся от убивающих тело, души же не могущих убити». Укрепи же и нас, малодушных и унылых, зовущих ти таковая:

Радуйся, всяческия поношения смиренно претерпевый,

Радуйся, тя бо ни скорбь, ни теснота, ни глад, ни нагота, ни меч не устрашиша;

Радуйся, яко сия вся от любве Христовы тя не отлучиша,

Радуйся, ветве лозы Христовы, сторичный плод принесшая;

Радуйся, душу твою молитвою и любовию окриливый,

Радуйся, в мире многомятежнем, яко в тишей пустыни поживый;

Радуйся, святителей пресветлое украшение,

Радуйся, всем верным прерадостное утешение.

Радуйся, священномучениче Фаддее, молитвенниче о душах наших!

Кондак 11

Пение хвалебное возносим ти, священномучениче Фаддее; течение скончав, веру соблюл еси, тесным путем в житии твоем шествуя, душу твою молитвою и постом предуготовал еси и безкровным самозакланием венец мученический прежде кончины твоея стяжал еси, воспевая Богу: Аллилуиа!

Икос 11

Светом небесныя благодати зримо, святе, просиял еси, заушения и оплевания в темнице претерпевая, егда Владычица Пречистая за тя заступися и мучителей к покаянию приведе. Темже юдоль плача в гору святую претворися, мы же воспеваем ти сицевая:

Радуйся, светом Фаворским пред кончиною своею возблиставый,

Радуйся, всецело себе Богу предавый;

Радуйся, возвеселивый ангелы своими подвиги,

Радуйся, яко скорбь твоя в радость преложися;

Радуйся, ты бо соделал еси душу свою храмом Бога Живаго,

Радуйся, яко венца трегубаго в преподобничестве, святительстве и мученичестве, сподобился еси;

Радуйся наставниче и учителю, душу свою за други своя положивый,

Радуйся, и за враги своя смиренно Господа моливый.

Радуйся, священномучениче Фаддее, молитвенниче о душах наших!

Кондак 12

Благодать свыше ти данную сведуще, восхваляем мученическую кончину твою, преблаженне Фаддее, ты бо прослави Христа на земли жизнию, паче же смертию своею, по кончине же своей славою небесною осиянный, токи исцелений нам присно источаеши. Мы же, прославляя Бога, дивнаго во святых своих, воззовем Ему: Аллилуиа!

Икос 12

Воспеваем тя, чудотворца новаго и преславнаго, достохвальне Фаддее, за Христа бо страданием твоим в радость вечную вшел еси, и ныне во свете неприступнем пребываеши, лицезрения Троицы Присносущныя наслаждаяся и со ангелы и всеми святыми у Престола Божия ликуя, идеже и нас помяни, вопиющих ти таковая:

Радуйся, от мученик древних ничимже умаленный,

Радуйся, святче Божий, возсиявый силою и духом древних отцев;

Радуйся, в сонм новомучеников российских вчиненный,

Радуйся, мощи твоя святыя нам, недостойным, явивый;

Радуйся, яко честныя мощи твоя всем исцеления источают,

Радуйся, яко мощи твоя граду Твери и всей Российстей земли крепкое заступление;

Радуйся, присно радование всем возглашати призывающий,

Радуйся, яко по имени твоему и житие твое бысть.

Радуйся, священномучениче Фаддее, молитвенниче о душах наших!

Кондак 13

О заступниче наш у престола Царя Небеснаго, священномучениче славный Фаддее, веры православныя твердый поборниче и за Отечество наше присный молитвенниче! Нынешнее наше приими приношение, да молитвами твоими вечныя муки избавимся, и Небесныя радости сподобимся, воспевая Богу: Аллилуиа!

Сей кондак читается трижды, затем чтется икос 1 и кондак 1.

Молитва

О великий и преславный угодниче Христов, священномучениче Фаддее! Светильниче пресветлый, на свещнице Церкви Православныя возженный, сосуде чистоты и избранное селение Духа Святаго! Молим убо тя: сохрани под кровом молитвенных крил твоих Православное Отечество наше и паству, юже собрал еси, да не закоснеем в окаменении сердец и нерадении о спасении нашем.

О пастырю добрый и ближний друже Христов! Сподоби и нас, путем покаяния шествуя, возлюбити Бога всем сердцем и помышлением нашим и ближняго яко себе, и тако по неложному слову апостола: приближитесь Господу, и приближится вам, — сподобитися вожделенных селений райских, идеже ты с лики святых пребываеши, прославляя в Троице славимаго Бога, Отца и Сына и Святаго Духа, ныне и присно и во веки веков. Аминь.[/spoiler]

Раб божий Константин

Акафист сестре Господней по плоти, Фамари блаженной, жене мироносице праведной.
[spoiler]Творение святаго священномученика Серафима, епископа Дмитровскаго (†1937)

 

Праведная Фамарь возжигает в сердце любовь к Сладчайшему Господу Иисусу Христу.

 

Кондак 1
Избранной от рода Давидова и званием сестры по плоти Господа Иисуса Христа почтенной, и во след Его с любовию текшей, и от всего сердца Ему послужившей, Фамари блаженней, сице со умилением ныне вопием: Радуйся, праведная жено Фамаре, мироносице и сестро Господня.

 

Икос 1
Ангела, яко молнию, на камени сидяща, видела еси, святая и праведная жено Фамарь, егда с другими женами мироносицами утру глубоку предстала гробу Живодавца, сего ради похвальная вопием ти сице:
Радуйся, видением Ангела обрадованная. 

Радуйся, сладчайшею вестию о Воскресении Христовом утешенная. 

Радуйся, яко утешение сие, яко миро благовонное, апостолом принесшая. 

Радуйся, яко крепко веровати Воскресению Христову всех нас научающая. 

Радуйся, праведная жено Фамаре, мироносице и сестро Господня.

 

Кондак 2
Видя издалече твое жительство, Фамаре блаженная, сестру тя прият Христос, премудрый Провидец, Емуже со ангельскими лики зовеши: Аллилуиа.


Икос 2
Разум изумевает от премножества любве, на тя излиянней, Фамаре праведная: како Бога присносущнаго, братом своим по плоти имела еси, како беседовала Ему, Егоже непрестанно славословят Ангели; како зрела лице Его, на Негоже многоочитии серафими зрети не могут? О судеб! О чудес Божиих! Все сие на тебе видяще, со страхом зовем ти:
Радуйся, Господу Иисусу тепле споследствовавшая. 

Радуйся, глаголы жизни вечныя из уст Его пречистых слышавшая. 

Радуйся, доброту лица Его выну неизреченную созерцавшая. 

Радуйся, от Господа Самаго тайнам Царствия Небеснаго наученная. 

Радуйся, праведная жено Фамаре, мироносице и сестро Господня.

 

Кондак 3
Сила божественная во учении Христовом действоваше, егда иудеи ожесточеннии блажняхуся о Нем, в ослеплении своем сице друг друга вопрошая: «Не сей ли есть тектонов сын? Не Мати ли Его нарицается Мариам, и братия, и сестры Его не вся ли в нас суть: откуду убо Сему сия вся?» Мы же купно с сестрою Господнею Фамарию славною исповедуем Христа, Божию силу и Божию Премудрость, благодарно зовуще Ему: Аллилуиа.

 

Икос 3
Имущи Господа Иисуса Христа братом по плоти своим, ты и Пречистую Пресвятую Деву и Преблагословенную Славную Владычицу нашу Богородицу и Приснодеву Марию материю своею называла еси Фамарь блаженная. Мы же, таковой милости Божией неизреченной, на тебе бывшей, удивляющеся, вопием ти:
Радуйся, от Царицы Небесной дщерью именованная. 

Радуйся, Царицу Небесную материю своею звавшая. 

Радуйся, на объятиях Ея Превечнаго Младенца держимаго видевшая.

Радуйся, Питателя жизни нашея, от Пречистыя Девы питаемаго, сладце созерцавшая. 

Радуйся праведная жено Фамаре, мироносице и сестро Господня.

 

Кондак 4
Буря помышлений сумнительных смушаше некогда отца твоего, целомудреннаго Иосифа, егда узре Деву Пречистую, во чреве имущую, и бракоокрадованную помышляя Ю, уведев же зачатие Ея от Духа Свята, рече: Аллилуиа.

 

Икос 4
«Слыши, Дши, и виждь, приклони ухо Твое, и возжелает Царь доброты Твоея», — тако возопи иногда Давид, праотец твой, Деву Марию предзря. Мы же вопием ти, Фамаре блаженная:
Радуйся, Иосифа Обручника дщи преславная. 

Радуйся, Семейства святаго отрасль пречестная. 

Радуйся, святую Саломию, матерь Иоанна Богослова, сестрою имевшая. 

Радуйся, возлюбленнаго ученика и наперсника Христова сроднице ближайшая. 

Радуйся, праведная жено Фамаре, мироносице и сестро Господня.
 

Кондак 5
Семизвездие святое, семизвездие пречудное, семизвездие пресветлое, узрим вернии на тверди родства Иисусова, четверицу апостолов, братьев Господних по плоти: Иакова, Иосию, Иуду, Симона и троицу святых жен мироносиц, сестер Господних по плоти: Есфирь, Фамарь и Саломию, с ними Христу вопиюще: Аллилуиа.

 

Икос 5
Видевшую Господа нашего Иисуса Христа лицем к лицу, Фамарь блаженную песньми тако почтим:
Радуйся, яко мнози пророцы восхотеша видети, яже ты видела еси, и не видеша. 

Радуйся, яко мнози царие вожделеша слышати, яже ты слышала еси, и не слышаша. 

Радуйся, Солнцем правды осиянная. Радуйся, светом Христовым озаренная. 

Радуйся, праведная жено Фамаре, мироносице и сестро Господня.

 

Кондак 6
Проповедницы богоноснии Воскресения Христова явишася праведнии жены мироносицы, с Фамарию блаженною, апостолом глаголаху: «Христос Воскресе! Пойте Ему: Аллилуиа».

 

Икос 6
«Возсия паки Солнце праведное, зашедшее иногда во Гроб», — в радости вопияла еси с другими женами мироносицами, Фамаре праведная, воскресшаго видевши Господа. Мы же песнь воспеваем ти сицевую:
Радуйся, лик мироносиц, яко сестра Иисусова, собою украсившая. 

Радуйся, на Небесех с ними присно веселящаяся. 

Радуйся, со ангельскими Силами вечно ликующая.

Радуйся, со всеми святыми о нас грешных молящаяся. 

Радуйся, праведная жено Фамаре, мироносице и сестро Господня.

 

Кондак 7
Хотя спасти род человеческий, Господь Иисус Христос, нося Крест Свой, изыде на место, глаголемое Лобное. Ты же, Фамарь блаженная, со иными дщерями Иерусалимскими, со слезами многими, во след Его текла еси. Обращься же Иисус рече: «Дщери Иерусалимския, не плачитеся обо Мне, обаче себе плачите и чад ваших». О! Даруй и нам, твоими молитвами, жено святая, плач покаянный, да плачем себе о гресех наших, да прощение от Господа получивше, вопием Ему: Аллилуиа.

 

Икос 7
Новое чудо и боголепное сподобилася еси зрети, Фамаре мироносице: камень отваленный, Гроб истощенный, тлю, Животом попранную, ад низверженный. Сего ради воспоим ти песнь хвалебную:
Радуйся, чудес Божиих свидетельнице верная. 

Радуйся, премногих исцелений Иисусовых зрительнице блаженная. 

Радуйся, милосердием неизреченным Господа к людям умиленная. 

Радуйся, светлаго Воскресения Христова провозвестнице преславная. 

Радуйся, праведная жено Фамаре, мироносице и сестро Господня.

 

Кондак 8
Странна Бога, плотию страдавша, и погребенна, и воскресшаго в третий день по Писанию, исповедуем, славословим, благодарим, вопиюще Ему с Фамарию песнь ангельскую: Аллилуиа.

 

Икос 8
Весь трепета священнаго и радости неизреченный исполнися отец твой, приснопамятный Иосиф Обручник, егда в Вифлееме таинство славное и преславное виде: небо вертеп, престол херувимский Деву, ясли вместилище, в нихже возлеже невместимый Христос Бог! Таковаго блаженнаго отца имевшая, приими от нас песнь сииевую:
Радуйся, дщи благословенная. 

Радуйся, Богом избранная. 

Радуйся благословение семейства благословеннаго на себе присно имевшая. 

Радуйся, Божие благословение с верою молящимся ти низпосылающая.   

Радуйся, праведная жено Фамаре, мироносице и сестро Господня.

 

Кондак 9
Всякия утоли болезни, печали и скорби наша, Христом Воскресшим, утешенная мироносице праведная, да с тобою зовем Ему: Аллилуиа.

 

Икос 9
Велевшая с иными мироносицами апостолом радоватися о Воскресении Христовом, исполни радости сея и нас всех, воспевающих ти:
Радуйся, пред Престолом Божиим призывающих тя, поминающая.   

Радуйся, дерзновение велие пред Господом Иисусом имущая.   

Радуйся, о наших гресех милосердие Его умоляющая. 
Радуйся, к любви Его сладчайшей всех нас зовушая. 

Радуйся, праведная жено Фамаре, мироносице и сестро Господня.

 

Кондак 10
Спасение нам, в бездне греховней погибающим, испроси у Спасителя Бога, Фамаре праведная, да с тобою вопием Ему: Аллилуиа.

 

Икос 10
Стена твердая, буди нам, жено святая, от враг видимых и невидимых люте напаствуемым, да зовем ти сице:
Радуйся, утешительнице душ скорбящих. 

Радуйся, умирительнице сердец смятенных. 

Радуйся, крепосте малодушных. 

Радуйся, бодросте унылых. 

Радуйся, праведная жено Фамаре, мироносице и сестро Господня.

 

Кондак 11
Пение ангельское в горних высотах на Небесех ныне слышиши, мироносице праведная, еще на земли при Гробе Господнем сподобившаяся видети Ангелов и с ними воспевати Воскресшему Христу: Аллилуиа.

 

Икос 11
Светоприемную свешу, Деву Пречистую, у Креста Сына Своего предстоящую, видела еси, Фамаре блаженная, егда с иными женами мироносицами на Голгофе была еси и из уст Пренепорочной глаголы сия горькия слышала еси: «Увы Мне, Чадо Мое, увы Мне, Свете Мой и Утробо Моя возлюбленная. Симеоном бо предреченное слово днесь сбысться: оружие сердце Мое пройде!» Сего ради во умилении сердечном взываем ти:
Радуйся, Матери Божией в скорби Ея Голгофской спострадавшая. 

Радуйся, от оставленнаго всеми Господа Иисуса Христа никогдаже отступившая. 

Радуйся, словесам Господним, со Креста глаголанным, со слезами внимавшая. 

Радуйся, молитву покаянную разбойника благоразумнаго: «Помяни мя, Господи, егда приидеши во Царствии Твоем», — слышавшая. 

Радуйся, праведная жено Фамаре, мироносице и сестро Господня.

 

Кондак 12
Благодать Господню велию ощути в сердце своем сродник твой Клеопа апостол, егда с другим вкупе апостолом Лукою во Еммаус шествоваху, и Воскресший Господь идяше и беседоваше с ними и посем познан бысть има в преломлении хлеба. Тогда возописта оба друг другу, глаголюше: «Не сердце ли наю горя бе в наю, егда глаголаше нама на пути и егда сказоваше нама писания?» Да ощутит и наше сердце Сладчайшаго Господа Иисуса молитвами твоими, Фамаре славная, да от избытка сердца глаголят и наша уста Ему победную песнь: Аллилуиа!

 

Икос 12
Поюще родство твое по плоти с Господом Иисусом Христом, восхваляем и любовь твою пламенную, еюже миро свое благовонное растворила еси, на Гроб Христа принесши, и взываем ти сице:
Радуйся, с мудрыми девами светильник свой елеем любви возжегшая. 

Радуйся, Христа от Гроба, яко жениха, от чертога исходяща, сретившая. 

Радуйся, сладость пребывания во Христе присно вкушающая. 

Радуйся, праведная жено Фамаре, мироносице и сестро Господня.

 

Кондак 13
О святая и праведная жено Фамаре, мироносице и сестро Господня, миро пламенныя любве своея Христу принесшая! Даруй и нам возлюбити Сладчайшаго Господа Иисуса Христа от всего сердца нашего, да во Христе Иисусе и друг друга возлюбим, в любви и согласии поживем, да едиными усты и единым сердцем славим и воспеваем пречестное и великолепое имя Господне, поюще Ему: Аллилуиа, Аллилуиа, Аллилуиа!
Последний кондак глаголати трижды и паки чтется 1-й икос: «Ангела, яко молнию...» и кондак 1-й: «Избранной...»

Молитва Святой Фамари Блаженной
О святая и праведная жено мироносице Фамаре блаженная: услыши нас, в час сей молящихся ти! Ты сподобилася еси быти сродницею, сестрою Господнею по плоти: даруй и нам твоими молитвами, да и мы духом нашим и сердцем нашим тако сроднимся с Господом Иисусом Христом, яко пребывати Ему в нас присно, и нам в Нем такожде присно пребывати. Да насыщаемся, да исполняемся и преисполняемся непрестанно сладостию Иисусовою, Его благодатию, Его светом, Его миром глубочайшим, Его жизнию вечною, яко розга преисполняется соком от лозы своея. О сроднице Господня избранная, твоими молитвами даруй нам тако сроднитися с Господом Иисусом Христом, тако возлюбити Его, нас ради распятаго, страдавшаго, погребеннаго и воскресшаго, яко да кроме Сладчайшаго Иисуса никоеяже да восхощем сладости, никоеяже возжелаем красоты, никоеяже да ищем утехи, или славы, или чести мира сего. Но вся сия ради Господа Иисуса Христа в сор и прах да вменяются нами, да Его Единаго приобряшем, и ниже самая смерть да возможет нас разлучити от любве Его! Да тако на земли с Господом нашим Иисусом Христом сроднившеся, и на Небесех лицем к лицу Его узрим и воспоем и прославим Его со Безначальным Его Отцем, Пресвятым и Благим и Животворящим Его Духом во веки веков. Аминь.

 

Тропарь
Сестра по плоти Господа Иисуса была еси, Фамаре блаженная; во след Его яко ми-роносица с любовию теплою текла еси. Тем же молим тя: огнем Христовы любве и наша сердца возгрей, да в путь заповедей Господних усердно течем.

 

Величание
Величаем тя, Фамаре блаженная, жено мироносице праведная, и чтим святую память твою, ты бо миро благовонное на гроб Жизнодавца принесла еси.[/spoiler]

Раб божий Константин

Святые благоверные князья Константин и чада его Михаил и Феодор Муромские

(память 21 мая / 3 июня).
[spoiler]Кондак 1

Изрядный воеводо Небеснаго Царя, преславный просветителю страны Муромския, благоверный княже Константине, похвальная восписуем ти с чады твоими, Михаилом и Феодором: яко избавив древле люди Муромския от прелести и скверны идольския, и привед их к свету веры Христовой, и ныне посещаеши их своею милостию и заступлением. Сего ради благодарственно вопием ти: Радуйся, преблаженне княже Константине, скорый помощниче и заступниче наш.

Икос 1

Ангелу непорочному, страстотерпцу святому Глебу поревновав, пожелал еси неверный Муром в княжение себе прияти, да просветиши люди седящия во тьме и сени смертней светом боговедения. Сего ради вопием ти: Радуйся, благочестиваго корене благоцветущая отрасль: Радуйся, с высотою рода и богатство духовных дарований наследивый. Радуйся, тезоименитому тебе царю Константину поревновавый: Радуйся, святому князю Владимиру подражавый. Радуйся, образ непорочнаго Глеба пред очима сердца живописавый: Радуйся, начатое им дело совершити пожелавый. Радуйся, в юности благословением Феодосия осененный: Радуйся, от младых ногтей благочестию наученный. Радуйся, поклонения идолам истребителю: Радуйся, неверия и нечестия низложителю. Радуйся, Евангелия благовестниче: Радуйся, его же ради вера Господня в стране Муромской возсия. Радуйся, преблаженне княже Константине, скорый помощниче и заступниче наш.

Кондак 2

Видя, вражды ради князей, чести и первенства ищущих, многия страны оставленныя без просвещения святою верою, не суетной славы желая, но трудов и подвигов благоверия веры Христовой взыскуя, возжелал еси Константине княжити в Муроме, да научиши люди неверныя воспевати Богу: Аллилуиа.

Икос 2

Разум словес апостольских сердцем уразумев, яко обративый грешника от пути заблуждения спасет душу, и покрыет множество грехов, потщался еси избрати себе жребий служения апостольскаго в стране Муромстей. Сего ради вопием ти: Радуйся, добрый ревнителю подвигов апостольских: Радуйся, любве к ближним преисполненный. Радуйся, свеще, тьму неверия просвещающая: Радуйся, солнце, тину нечестия изсушающее. Радуйся, неверныя люди к Богу приведый: Радуйся, из недостойнаго честное изведый. Радуйся, благодати Божией посредниче: Радуйся, положивый начало новаго бытия стране Муромстей. Радуйся, яко тобою наставляеми поклоняемся Истинному Богу: Радуйся, яко тобою познахом Отца Небеснаго. Радуйся, правителю благий: Радуйся, пастырю добрый. Радуйся, преблаженне княже Константине, скорый помощниче и заступниче наш.

Кондак 3

Силою свыше Апостолы иногда облекий во Иерусалиме седящия, на дело благовестия их уготовляя, чрез благословение святителя и всего освященнаго собора и молитвы верных, облече и тебе, грядуща на дело проповеди Евангельския, силою мужественною, да укрепляемый ею в подвизе служения, вопиеши Богу: Аллилуиа.

Икос 3

Имея велию веру и любовь к Пресвятей Богородице, в знамение Ея покрова и заступления, приял еси чудную икону Ея, яко благую Одигитрию, водительствующую тя в пути. Сего ради вопием ти: Радуйся, благую часть избравый: Радуйся, упование на единаго Бога возложивый. Радуйся, себе вручивый молитвам церковным: Радуйся, благословение свыше чрез них приявый. Радуйся, сильному покрову Богоматере вверивыйся: Радуйся, честный образ Ея в щит себе и ограждение стяжавый. Радуйся, не на воинство, но на помощь Божию надеявыйся: Радуйся, веру Христову с надеждою мудро сочетавый. Радуйся, воине Царя Небеснаго: Радуйся, о умножении Царствия Его пекийся. Радуйся, земныя радости презревый: Радуйся, благ небесных возжелавый. Радуйся, преблаженне княже Константине, скорый помощниче и заступниче наш.

Кондак 4

Бурею помышлений притрепетных смятеся отец твой, блаженне княже Константине, помышляя злонравие людей, к нимже княжити шел еси, но на благодать Божию уповая, благослови тя на подвиг, вопия Богу: Аллилуиа.

Икос 4

Слышав блаженне Константине, яко не хотяху невернии людие прияти тя, послал еси сына твоего, кроткаго агнца Михаила, увещевати непокорныя: они же убиша непорочнаго отрока. Мы же, прославляя тя яко Авраама, в жертву Богу сына произволением приносящаго, вопием ти: Радуйся, кроткий подражателю Христов: Радуйся, добрый исполнителю Его заповедей любви. Радуйся, кротостию злобу побеждаяй: Радуйся, врагом твоим добро творяяй. Радуйся, Богу Отцу подражавый: Радуйся, сына своего не пощадевый для спасения нечестивых. Радуйся, словом любви учение Бога, иже есть любы, насаждаяй: Радуйся, свою душу за спасение ближних положити готовый. Радуйся, возлюбивый Бога и дело Божие паче близких: Радуйся, яко плоть и кровь не яви ти, но Отец Небесный. Радуйся, образ кротости духовныя: Радуйся, незлобия наставниче. Радуйся, преблаженне княже Константине, скорый помощниче и заступниче наш.

Кондак 5

Боготечная звезда явися стране Муромстей князь Михаил, возвещая имеющее возсияти солнце истинныя веры: мученическою бо кровию своею освяти неверную землю, нетлением просия телесе своего, благоуханием его наполни землю, и лики ангел низведе с Небесе, поющих Богу: Аллилуиа.

Икос 5

Видя сына своего Михаила убиена и извержена из града, и злонравныя люди на брань с тобою уготовляющияся, возопил еси к Щедрому Богу, и услышал еси глас: дерзай Константине, и не бойся, яко власть град получил еси. Темже мы взываем ти: Радуйся, верою мужество укрепляяй: Радуйся, молитву оружием содеваяй. Радуйся, яко Давид на Голиафа, на враги во Имя Господа вооруживыйся: Радуйся, яко Константин на Максентия о силе Креста возмогаяй. Радуйся, не смерти злодеев, но спасения их возжелавый: Радуйся, приведения их к Богу искавый. Радуйся, просвещение омраченных: Радуйся, исправление развращенных. Радуйся, умягчение ожесточенных: Радуйся, нечестия искоренителю. Радуйся, истинныя веры утвердителю: Радуйся, благия надежды насадителю. Радуйся, преблаженне княже Константине, скорый помощниче и заступниче наш.

Кондак 6

Проповедник богоносный явился еси, блаженне, граду Мурому, храмы святыя устрояя, служение христианское совершая, веру возвещая, уча и наставляя старыя и юныя, да навыкнут вси воспевати Богу: Аллилуиа.

Икос 6

Возсия граду Мурому просвещение истины, и отгнася лесть бесовская труды, подвиги и молитвами твоими блаженне Константине: прежде бо непокорные людие, сами крещение просиша и идолов сокрушиша. Мы же спасение получивше, вопием ти: Радуйся, исправление неверных: Радуйся, посрамление бесов. Радуйся, прелести державу поправый: Радуйся, идольскую лесть обличивый. Радуйся, Православия проповедниче: Радуйся, благочестия насадителю. Радуйся, храмов Божиих зиждителю: Радуйся, благолепия дому Господня рачителю. Радуйся, священных прав церкви Божией блюстителю: Радуйся, святыни ея верный хранителю. Радуйся, неизнемогающий учителю веры: Радуйся, присный наставниче. Радуйся, преблаженне княже Константине, скорый помощниче и заступниче наш.

Кондак 7

Хотя привести вся люди ко Христу, молился еси Богу, да открыет сердца их к приятию света истины: люди же убеждал еси прияти веру святую, яко залог счастия временнаго и вечнаго. Тем же молися и о нас преблаженне, да вопием вси чистою душею Богу: Аллилуиа.

Икос 7

Дивное показа знамение Господь, егда невернии с оружием и дреколием устремишася на тя, ты же с молитвою пад пред иконою Богоматере, ходатайства у Сына Ея прося, абие услышал еси глас: дерзай Константине, Аз есмь с тобою. Мы же прославляюще таковое о тебе Божие благоволение, радостно зовем: Радуйся, на земли сподобивыйся слышати глас Самаго Бога: Радуйся и дерзай, яко Господь с тобою, иже от не сущих вся приведый. Радуйся, яко с тобою Господь, изведый древле Израиля из работы Египетския: Радуйся, яко с тобою Господь, Амаликову силу в пустыни победивый. Радуйся, яко с тобою Господь, снисхождением своим Небеса преклонивый: Радуйся, яко с тобою Господь, духом силы Своея весь мир просветивый. Радуйся, яко с тобою Господь, сильный в бранех: Радуйся, яко с тобою Господь, всяку гордыню побеждаяй. Радуйся, яко с тобою Господь, силу свою в немощи совершаяй: Радуйся, яко тебе Господь прибежище и сила. Радуйся, яко с тобою Господь, благоволивый просветити страну Муромскую: Радуйся, яко с тобою Господь, новыя люди в Царство призвати изволивый. Радуйся, преблаженне княже Константине, скорый помощниче и заступниче наш.

Кондак 8

Странное чудо является: воины с оружием и дреколием пред безоружным князем, яко щит видяще точию в руках икону Богоматере, ниц повергаются: видевше бо икону сияющю яко солнце, лице князя яко лице ангела, с трепетом просяще крещения, возопиша Богу: Аллилуиа.

Икос 8

Весь был еси в вышних, блаженне княже Константине, духом веселяся с ангелы, радующимися о едином грешнике кающемся, егда банею пакибытия обновляхуся людие Муромстии, и свет Небесный осия новокрещенныя люди. Мы же, радуяся смотрению Божию о тебе и людех, ублажаем тя, зовуще: Радуйся, град сей от работы диаволу свободивый: Радуйся, власть мысленнаго фараона сокрушивый. Радуйся, к земле обетованной спасения приведый: Радуйся, напитавый манною жизни люди твоя. Радуйся, громом славы Божией неверие поразивый: Радуйся, молниею света благодати облиставый мрак заблуждения. Радуйся, упование на Богоматерь возложивый: Радуйся, Ея заступлению и покрову вверившийся. Радуйся, научивый ведети Матерь Спасения: Радуйся, проповедниче Ея милостей. Радуйся, и град свой Ея ходатайству вручивый: Радуйся, Божия благоволения ходатаю. Радуйся, преблаженне княже Константине, скорый помощниче и заступниче наш.

Кондак 9

Всякое место страны твоея освятити хотя, повелел еси ставити церкви во граде и селах, и монастыри мужеския и женския, да всюду воспевают Богу: Аллилуиа.

Икос 9

Ветии многовещанныя не возумеют прославити труды твоя, скорби и подвиги, яже подьял еси ради новокрещенных людей, врагов отражая, вражду умиряя, страну просвещая и устрояя, сирых призирая, неведущих вразумляя. Темже прославляя тя, взываем: Радуйся, сирых защитниче: Радуйся, вдов заступление. Радуйся, нищих питателю: Радуйся, скорбных утешителю. Радуйся, неведущих вразумление: Радуйся, младенцев воспитание. Радуйся, страны Муромския ограждение: Радуйся, града укрепление. Радуйся, враждующих примирителю: Радуйся, терпеливый в обидах. Радуйся, славы Божией точию искавый: Радуйся, вся земная в суету вменивый. Радуйся, преблаженне княже Константине, скорый помощниче и заступниче наш.

Кондак 10

Спасти хотя душу твою, до смерти подвизался еси подвигом добрым, течение скончал еси, веру соблюл еси: темже и уготован ти венец правды от Христа Бога нашего, яко возлюбльшему Его паче всего. Егоже и приял еси пресельшись от сея временныя жизни к жизни вечней, и тамо вопиеши Богу: Аллилуиа.

Икос 10

Стена еси и покров всем к заступлению твоему прибегающим, преблаженне Константине, дар чудодейственныя благодати от Бога приемый. Темже буди и нам стена крепкая, и прибежище и заступление, в нуждах наших к тебе прибегающим, и вопиющим: Радуйся, земное поприще жизни твоея ангельски совершивый: Радуйся, величие сана княжескаго на земли и послушание вернаго раба Царю Небесному мудро совместивый. Радуйся, святых детищь твоих, Михаила и Феодора, измлада Богу сочетавый: Радуйся, сердце свое и их в Руце Божии положивый. Радуйся, винограда Христова делателю добрый: Радуйся, князем похвало и царем славо. Радуйся, яко земная храмина тела твоего покровом нетления одеяся: Радуйся, яко святыя мощи твоя источают чудеса. Радуйся, добрый и верный рабе Христов: Радуйся, достойную мзду по делом твоим приявый. Радуйся, ходатаю наш пред Богом: Радуйся, присный молитвенниче о нас к Богу. Радуйся, преблаженне княже Константине, скорый помощниче и заступниче наш.

Кондак 11

Пение всеумиленное приносим ти, преблаженне Константине, просяще твоея помощи и ходатайства о нас к Богу: исцели наша немощи, якоже исцелил еси старицу Феодосию, четыре лета нему и глуху бывшу. Воздвигни нас от одра болезней, яко воздвигл еси боярскаго сына Иоанна, многая лета болезнию одержима бывша. да спасаеми тобою, вопием Богу: Аллилуиа.

Икос 11

Светоприемную свещу, во граде сем благодатию Божиею возженную, зрим святых мощей твоих: светит бо всем во мраке уныния сущим, озаряет скорбных, путеводит заблуждших, путь ко спасению и врачеванию всех немощей указуя. Темже прославляя Бога, даровавшаго тебе благодать таковую, взываем ти: Радуйся, скорбей сердца нашего успокоение благодатное: Радуйся, горестей в жизни нашей услаждение. Радуйся, кичений ума нашего умирение: Радуйся, сомнений недоуменных разрешение. Радуйся, страстей и желаний суетных обуздателю: Радуйся, чистых намерений и благих начинаний руководителю. Радуйся, совести нашей страже недремлющий: Радуйся, ума нашего светильниче светлый. Радуйся, воли нашея, яже ко благому, спутниче верный: Радуйся, верный руководителю в путях жизни нашея. Радуйся, жизнию своею образ благочестия нам оставивый: Радуйся, верою своею правило веры нам показавый. Радуйся, преблаженне княже Константине, скорый помощниче и заступниче наш.

Кондак 12

Благодать данную тебе от Бога уведев, притече к раце твоей царь Иоанн, заступления и помощи прося от тебе к победе на агаряны: и победив врага, древле и с тобою враждовавшаго, благодарственно припадая к мощем твоим, вопияше к Богу: Аллилуиа.

Икос 12

Поюще велия твоя, преблаженне Константине, подвиги и труды в жизни сей, ублажаем приснопамятное успение твое, торжествуем и о Божественней славе твоей в Небеснем Царствии, и припадающе к раце мощей твоих, взываем: Радуйся, апостолов подражателю: Радуйся, подвига мучеников ревнителю. Радуйся, патриархов добродетели показавый: Радуйся, князей украшение. Радуйся, Церкви похвало: Радуйся, верных утешение. Радуйся, Российския страны украшение: Радуйся, града Мурома ограждение. Радуйся, в скорби и радости наше прибежище: Радуйся, упование наше в ненадеянных. Радуйся, путешествующих добрый хранителю: Радуйся, напаствуемых защито. Радуйся, преблаженне княже Константине, скорый помощниче и заступниче наш.

Кондак 13

О преславнии чудотворцы, святии благовернии князи, Константине, Михаиле и Феодоре! Приимите ныне от нас сие хваление, и испросите нам, своим благоприятным ходатайством у Христа Бога, утверждение в вере и добрых делех, избавление от всех бед и напастей в жизни сей, а в смертном успении нашем благую спасения надежду, да сподобимся в радости вечней воспевати с вами Богу: Аллилуиа, Аллилуиа, Аллилуиа.

(Этот кондак читается трижды, затем икос 1 и кондак 1)



Молитва святым благоверным князем Константину и чадам его Михаилу и Феодору, Муромским Чудотворцем.

О храбрый воине и избранный воеводо Небеснаго Царя Христа! Победивый прелесть идолослужения силою Святаго Духа, и просветивый град Муром святым крещением, святый благоверный княже Константине! Усердно предстояще честней раце многоцелебных мощей твоих, со слезами молим тя, просяще прияти нам твоим к Богу ходатайством грехов оставление. Предстани, святе, яко имеяй дерзновение ко Святей Троице, и подвигни с собою на молитву преудобренныя своя две отрасли, плод честнаго семени твоего, благовернаго князя Михаила послушнаго тебе до смерти, и кровь свою пролиявшаго за град сей, и яко незлобиваго агнца заколена бывша (тщашеся бо тьмы душ обратити ко Господу спасаемых), и благовернаго князя Феодора, ревнителя благочестию. Испроси своими молитвами Богохранимей стране нашей и людем, мира, здравия, долгоденствия и на враги победы и одоления. Еще со слезами смиренно просим: сохраните, блаженнии, невредим град сей, егоже возлюбисте и свободисте от работы демонския. Обитель же сию, и живущия и труждающияся в ней, соблюдите невредимо от всех козней и стрел демонских. Даруйте, святии, царствующим градом, граду сему, всякому граду и стране мирное и немятежное житие и изобилие плодов земных. По морю плавающим и путешествующим, и к раце мощей ваших с верою прибегающим, безбеднии правителие будите: злых свобождение, мирное и радостное в домы их возвращение, молитвами вашими даруйте, да вси с радостию взываем: О благовернии наши заступницы! Соблюдите всех без напастей, да вси, прибегающе с верою к цельбоносней раце мощей ваших исцеление душам и телесем нашим приемлюще, прославляем вас, наша заступники, славяще Отца и Сына и Святаго Духа, ныне и присно, и веки веков. Аминь.



Тропарь, глас 4

Константин днесь весело ликовствует, предстоя Престолу Пресвятыя Троицы, видя Отечествие свое, мастию духовною сияющее: емуже последоваша Михаил и Феодор, сынове его, и молятся вси трие вкупе о душах наших.

Кондак, глас 8

Изрядному воеводе и правоверному князю Константину, с сынома его вкупе, Отечество его, хвалящися вопиет, имеющее его начальника и заступника, яко избавльшееся им от прелести и скверны идодьския: сего ради вопием ему сице: радуйся, княже Константине, преблаженне.

Величание

Величаем вас, святии благовернии князи Константине, Михаиле и Феодоре, и чтем святую память вашу, вы бо молите за нас Христа Бога нашего.[/spoiler]

Раб божий Константин

Преподобный Феодор Острожский, Печерский, князь.
[spoiler]Кондак 1

Избранному и Духа Святаго исполненному угоднику Божиему, преподобному Феодору, князю Острожскому, составим похвалу; яко вся земная Христа ради презревшему; славу же княжения в пещерное затворение преложившему: Ты же Святе, яко имеяй велие дерзновение ко Господу; молитву сотвори Христу Богу; во еже за веру стояти нам безстрашно и о спасении своем попечение имети непрестанно; да в слезном умилении зовем ти: Радуйся, Феодоре, Острожская Похвало и молитвенниче о нас Богу теплейший.

Икос 1

Ангельстии чини возрадовашася, о всецелом пременении души твоея, преподобне, где от подвигов бранных к подвигам духовным пришел еси разсудне, и мечь духовный подъем на враги невидимый, силою Божиею крепко сия побеждаше, темже и нас ангельския ревности исполни похвальная воспевати тебе сицевая: Радуйся, от святаго крещения приявый имя Феодора, яко дар Божий и даяние еже от Отца светов в странах отечествия твоего имевый явитися. Радуйся, яко о тебе свыше являемую Божию силу и заступление небесное познахом. Радуйся, во иночестве Феодосием тя нарекоша, яко в дар Христу Богу самого себя принесл еси всецело. Радуйся, яко из млада услышал еси внутренний глас призвавшаго тя Господа. Радуйся, славу княжения своего презрев, во убогий образ последуя Христу, нас ради обнищавшему, облеклся еси. Радуйся, земли Волынския в православии утверждение и украшение. Радуйся, плоды веры Божественныя и светоносныя от корене равноапостольнаго Владимира в себе показал еси изрядно. Радуйся, из детства во благочестии и смирении от родителей своих наставленный. Радуйся, от юности Христа всем сердцем и всею душею возлюбивый. Радуйся, все житие свое на служение Богу даже до последняго издыхания предавый. Радуйся, Феодоре, Острожская похвало и молитвенниче о нас к Богу теплейший.

Кондак 2

Ведяще, яко не леть есть надеятися на князи и сыны человеческия, и воочию видящи коварство и зависть соратников Твоих в ратоборстве за православную Церковь и единоверныя люди твоя, княже блаженне, отринул еси великодержавное и отечественное себялюбие, и возревновал еси о стяжании ведения духовнаго, немолчно воспевая Богу: Аллилуиа.

Икос 2

Разум совершен и причастие Духа Святаго во иночестве стяжал еси, богоносне Феодоре, и оттоле ограждал еси веру православную и люди своя не ратными уже подвиги, но силою молитв твоих от всякаго вреда и лести лукавыя, сего ради приими от нас хвалебныя пения сия: Радуйся, крепко подвизавыйся молитвенниче наш неусыпный. Радуйся, твердость стояния Твоего чадом Твоим заповедал еси, и сих до четвертаго рода адаманты православныя веры явил еси. Радуйся, и народ чешский теплотою молитв твоих согреваяй. Радуйся, святую лавру Киевскую нетлением святых мощей твоих прославивый. Радуйся, град, твой Острог даром частицы святых мощей твоих освятил еси. Радуйся, и иконою твоею из дальних пещер Киевских град сей благословил еси. Радуйся, дерманскую обитель такожде частицею нетленных мощей твоих усладил еси. Радуйся, всех притекающих к Тебе на брань духовную воздвизаяй. Радуйся, Феодоре, Острожская похвало и молитвенниче о нас к Богу теплейший.

Кондак 3

Силою Вышняго, еже обличен был еси во угодное благодати Божественныя оружие, толикий пламень ревности Божия возже в сердце твоем, яко навыкл еси, по образу евангельскаго жития, воздавати супостатом твоим, за зло добром и являти себя в деяниих кротким и незлобивым: мы же окаяннии бесом други, страстьми своими быхом и о спасении своем небрегохом. Обаче елико грешнейшии явихомся, толико вящшаго сострадания твоего требуем, да во умилении покаяния и чистоте совести поем и мы Богу: Аллилуиа.

Икос 3

Имеяй богатство силы душевныя к восхождению от мира земнаго к духовному, и умножив Божественною благодатию, мрак пещерный озарил еси светом Боговедения, имже и нас просвети, во тьме грехов сущих, да вопием ти радостно: Радуйся, прежде власов пострижения смирением удивляяй люди. Радуйся, во иноческом образе возвеселивый ангелы и прославывый Христа. Радуйся, венец княжения и земное богатство волею, Христа ради отложивый. Радуйся, пещерное затворение в лучший чертог себе вменивый. Радуйся, тайно от взором человеческих многолетне свято подвизавыйся. Радуйся, яко ничимже точию слезами из глубины сердечныя изливающимся, во времена оны питавыйся. Радуйся, вместилище всех сокровищ Господних. Радуйся, раздаятелю комуждо на пользу даров духовных, яже приял еси от Господа. Радуйся, на подражание житию твоему нас наставляяй. Радуйся, Феодоре, Острожская похвало и молитвенниче о нас к Богу теплейший.

Кондак 4

Бурю злых навождений и обстояий укрощая иждивением своим, создал еси во граде Остроге церковь Пречистыя Владычицы, такожде и Сыну своему Василию Красному о построении храмов Божиих завет предал еси. Иже той, исполняя завет сей, воздвиже от усердия своего велелепный храм Богоявления в Остроге и обители святий в Дермани и Дубно, во еже в них славити Господа, неверие же и злые ереси отвращати, воспевая Богу: Аллилуиа.

Икос 4

Слышай и помышляли, яко гора Печерская, яже во граде Киеве, мощи святых покрывающи, честна и свята есть, ты отче Преподобне, исполняя веление сердца своего, дело свое совершил, двор княжий оставил еси, абие и пещерное затворение в лучший чертог себе вменил еси волею. Сего ради текл еси к игумену Печерскому, и молил еси его да тя в свое сожительство приимет и в число иночествующих впишет. Он же провидев в тебе велию силу Божию, повеле неотлагательно на тя иноческий образ возложити, его же ты обоеручно ялся еси и со братиею зде непрестанно труждался еси до конца дней своих, о чесом мы ведуще, тако взываем ти: Радуйся, яко неусыпнаго ради хваления Господа, тихое пристанище иночества и молитвенный подвиг восприял еси. Радуйся, яко сего ради, земное богатство и честь княжения своего в уметы вменил еси. Радуйся, образе ревности духовныя. Радуйся, яко еще на княжении веры был еси. Радуйся, яко в подвизе печернем, князь над страстьми вскоре показался еси. Радуйся, плоды трудов твоих в небесном вертограде ныне пожинавши. Радуйся, яко братия Печерстии непрестанную молитву Иисусову, твоими усты глаголемую, слышаше, умиляхуся. Радуйся, благодатные слезы из очию твоею текущия видяще, на путь правый возвращахуся. Радуйся, Феодоре, Острожская похвало и молитвенниче о нас к Богу теплейший.

Кондак 5

Богоявленной звезде уподобился еси, отче наш Феодоре, лучами бо высокия святыни твоея многих просвещающи, многих на путь боговедения наставляющи, многих ко иночеству приводящи, многих же в добродетельном житий укрепляющи: сие Божие изволение добре в тебе исполнившееся зрящи, ныне тебе, всеблаженне умильно просим: твоея неистощимыя любве луч нам низпосли: гнев Божий, праведно на ны движимый, молитвою твоею от нас отведи, и спасительную благодать его к нам недостойным низведи,- да тако и мы житие свое исправити потщимся, крепость земли нашея паки обновляти начнем, врагов же веры Христовы безбоязненно отражати словом и житием возревнуем, воспевающе велегласно Богу: Аллилуиа.

Икос 5

Видевши тя, княже Феодоре, николиже во бранех побеждаема, всегда же побеждающа иновернии супостаты и агаряне единаго имене твоего устрашахуся: мы же поминающе, исполненное веры мужество твое, сице тя, яко князя и воина ублажаем: Радуйся, яко во бранех не своея славы искал еси, но с еретики за землю отеческую прался еси. Радуйся, праотеческия веры ревнителю и злодеем победоносный отмстителю. Радуйся, о благе народа твоего усердно пекийся. Радуйся, яко ограждал еси люди твоя от зловреднаго с неверными общения. Радуйся, от нападения агарянских полчищ люди своя охранял еси. Радуйся, бусурманских ратей неодолимый победителю, и пленных свободителю. Радуйся, сего ради пламенную любовь от народа своего снискавый. Радуйся, сего ради и светлый венец, от Господа стяжавый. Радуйся, Феодоре, Острожская похвало и молитвенниче о нас к Богу теплейший.

Кондак 6

Якоже проповедник правоверия и стояния за церковь Божию и люди своя на княжении своем пребыл еси, Феодоре блаженне, сице и во иночестве молитвенным подвигом, безмолвием, терпением и тела своего различным умертвением, удивлял еси братию, сего ради стяжал еси сугубый венец от Царя Христа, Емуже предстаеши ныне вопия: Аллилуиа.

Икос 6

Возсия красотою подвигов и добродетелей все житие твое, Преподобне, понеже на княжении вместо предлежащих тебе сладостей сего земнаго жития, претерпел еси крест и лишения: в походех противу врагов веры плоть изнуряяй и живот свой за други полагали, такожде и в монашестве, аки раб братии угождаяй и себе самого смиряяй. Помышляюще сие, сице вопием Ти: Радуйся, яко тобою красоту благочестия познахом. Радуйся, яко тобою суету мирскую в себе попрахом. Радуйся, крест лишенный волею подьяхом. Радуйся, яко крест той носити и нам пособствуяй. Радуйся, Божиих дарований сокровище пребогатое. Радуйся, христиан православных рог богоносный. Радуйся, добродетели и благочестия христианскаго всеизрядная похвало. Радуйся, благий предстателю и молитвенниче о душах наших. Радуйся, Феодоре, Острожская похвало и молитвенниче о нас к Богу теплейший.

Кондак 7

Хотяй княжеских услаждений и богатства тленнаго спешнее отрещися, Божиих же дарований приискренне приобщитися, приял еси, блаженне иноческий образ, в Немже смиренным послушанием и безмолвным житием Царю Небесному благоугодил еси. Темже и стяжал еси сугубый венец от Царя Христа, емуже предстоиши с песнию: Аллилуиа.

Икос 7

Новый труд и новые подвиги в пещерном затворе восприял еси, преподобне, егда во иночестве непрестанные молитвы о тебе, самом и невежествиих народа твоего Владыце Господу приносил еси, да земное житие наше в тишине и благочестии пожившее, славы негибнущия наследницы будем. Темже благодарственно вопием ти: Радуйся, пещернаго подвига трудолюбивый ревнителю. Радуйся, заповедей Божиих усерднейший исполнителю. Радуйся, яко в тесней и темней пещере тайно многолетне свято подвизался еси. Радуйся, яко узкими враты Царствия Небеснаго достигнул еси. Радуйся, молитвы непрестанное кадило. Радуйся, слез умиления неистощимый кладезю. Радуйся, яко тобою дивен Бог во святых своих является. Радуйся, многое множество мужей и жен, юношей и дев твоему подражати житию научивый. Радуйся, дивный образ подвига твоего многие неверные в истинней вере утвердивый. Радуйся, Феодоре, Острожская похвало и молитвенниче о нас к Богу теплейший.

Кондак 8

Странное и вельми подвижническое житие твое не токмо человеков на земли, но и ангелов на небеси удиви: ты бо, преподобне заключивыйся в пещере, аки в темном гробе, всеусердно в теплоте сердца и души Единому Богу тайно работал еси, да та, яже во дни и в нощи Создателю Твоему приносимая служения неведома и незнаема будет мирови, ведома же и знаема Единому токмо Творцу явятся. Сего ради и мы Богу, тако тя научившему и вразумившему, присно поем: Аллилуиа.

Икос 8

Огнь любви Божия в сердце своем возжегши, Угодниче Божий, ты клятвенно обещался еси купно со своими присными, в вере православней отеческой крепко и неизменно стояти, николиже и никакоже о отступлении в иновери не мыслити и от сего народа свой всеусердно отвращати: сего ради и предел свой еще на двести лети вящшие по кончине твоей от сетей еретических оградил еси. Темже от полноты сердечныя таковое приносим ти почитание: Радуйся, ясное зерцало апостольских преданий. Радуйся, живоприимный источниче истинных кафолических правил. Радуйся, еретических баснословии премудрый истребителю. Радуйся, глубины православных догматов искусный измерителю. Радуйся, ты и единокровное нам племя чешское ко православной вере приближати тщался еси. Радуйся, ты от латынскаго нашествия их ограждал еси. Радуйся, веру свою отеческую во искушениих до смерти сохранивый невредиму. Радуйся, и нас среди мрака неверия и нечестия в правоверие утвердивый. Радуйся, Феодоре, Острожская похвало и молитвенниче о нас к Богу теплейший.

Кондак 9

Всею душею возлюбив Бога, ты, отче преподобне, проповедник православныя веры и благочестия чрез все житие твое во стране нашей пребыл еси: сего ради молим тя: язвы душ наших от враг видимых и невидимых наложенные исцели, и от бед и обстояний нас огради, аще и недостойных, но твоему предстательству верующих тепле, да и мы в покаянии согласно вопием Богу: Аллилуиа.

Икос 9

Ветии и провозвестницы славы твоея духовныя явишася по местом, преподобне отче: Святая лавра Киевская, твое нетленное тело показующи верным, Острог град, яже малую часть твоих нетленных мощей прияти сподобивыйся, аки наследие княжения твоего, и святая обитель Дерманская, яже твоими добродетельми тщится украситися. Вси же вкупе, согласно воспевающе терпение твое и веру, взывают ти тако: Радуйся, от присночестнаго рода князей острожских ты един стяжал еси высокое звание чудотворца Печерскаго. Радуйся, во князех ратоборец и во иноцех усердный молитвенник явивыйся. Радуйся, сего ради и лик святых Печерских собою умноживый. Радуйся, град свой Острог святынею своею ознаменовавый. Радуйся, теми зловредное безбожие и отступства явно обличаяй. Радуйся, и нас прощати врагов своих научаяй. Радуйся, и нас в долготерпении утверждаяй. Радуйся, сущих в разсеянии сынов и дщерей наших охранителю. Радуйся, нищих, сирот и вдовиц от междоусобныя брани явившихся утешитель. Радуйся, Феодоре, Острожская похвало и молитвенниче о нас к Богу теплейший.

Кондак 10

Спасения нашего буди ныне присный ходатай, Феодоре преподобне, зане видиши землю нашу от нечестивых учений обуреваему, зриши бо оскудение любве нашея от Христа предреченное и душ человеческих разслабление и правде Божией нерадение: сего ради умильно тя, сущих в пленении, темницах и заточении братии наших, изряднее же в гонениих, от язык безбожных за веру нашу отеческую укрепи, утеши и вскоре избаву им испроси, да в радовании сердец вопием о тебе Богу: Аллилуиа.

Икос 10

Стена и заступление буди нам, преподобне отче, мощным твоим ходатайством, утоляя гнев Божий, праведно на ты движимый, грех ради наших: вемы бо вемы, яко малодушие наше и леность духовная далече от твоея пажити ны отрывает и всякаго омерзения достойны ны соделывает, обаче милосердие твое ко врагом твоим поминяюще, имже паки защитник явился еси, равнаго милосердия твоего и нас сподоби, да умильно вопием тебе сице: Радуйся, злостраждающих от духов злобы скорый помощниче. Радуйся, притекающих к тебе с верою от треволнений, страстей избавителю. Радуйся, во вражде сущих скоро умиротворяяй. Радуйся, чтущим память твою мощную подаваяй. Радуйся, ко Господу дерзновение стяжавый. Радуйся, от того благодать исцелений приявый. Радуйся, ныне пред Престолом Божиим на небеси о церкви предстателю. Радуйся, милосердия Божия к нам ходатаю. Радуйся, слепотствующих в законе Господнем пречудный руководителю. Радуйся, вручающим себе твоему ходатайству в час смерти добрый утешителю. Радуйся, Феодоре, Острожская похвало, и молитвенниче о нас к Богу теплейший.

Кондак 11

Пение наше похвально, от убожества и любве душевныя нами приносимое, несть довольно, угодниче Божий, к похвалению преславных подвигов и трудов твоих, яко истиннаго слуги Божия, но да неблагодарны явимся о твоих благодеяниих на нас бывших, вопием прославлыпему тя, Господу: Аллилуиа.

Икос 11

Светильник православный веры был еси во стране нашей, преподобне отче, словом, житием, верою и чистотою; в них же и нас твоими молитвами укрепи, всякия же отступства и безбожие далече отжени, да вопием ти от полноты сердечныя: Радуйся, Божий избранниче. Радуйся, ангелов собеседниче. Радуйся, ревности о спасении своем нас научаяй. Радуйся, служити спасению ближних научаяй. Радуйся, Творцу Богу твоему во временном житии добре угодивый. Радуйся, и ко исходу от сея жизни добре себе уготовавший. Радуйся, рабе Христов благий и верный. Радуйся, вшедый в радость Господа своего. Радуйся, нетлением мощей твоих образ воскрешения нашего явивый. Радуйся, яко имя твое по всей стране нашей прославляется. Радуйся, страны нашей крепкое ограждение. Радуйся, присное пред Богом наше защищение. Радуйся, Феодоре, Острожская похвало и молитвенниче о нас к Богу теплейший.

Кондак 12

Благодать непрестанныя молитвы и о теле небрежение, радости же духовныя и к ближним состадание в житии твоем обильно стяжал еси отче Феодоре, темже молим тя, и нас ленивых и грешных твоея доброты причастники сотвори твоим всемощным предстательством, да и мы сподобимся купно с тобою воспевати на небесех: Аллилуиа.

Икос 12

Поюще, твоя дивные подвиги и венчавшаго тя Христа прославляюще, покланяемся мощем твоим честным и икону твою облагодатствованную лобызаем, и молим тя, отче блаженне: отврати от нас находящий на ны брани и страхования браней, от лести ересей и неверия, да в радовании избавления от пагубнаго безбожия вопием тебе сице: Радуйся, Волынския земли похвало и благочестия правило. Радуйся, яко отцы наши еще из древле ко твоему заступленню навыкоша притекати. Радуйся, великий наш учителю братолюбия и образе Евангельскаго жития. Радуйся, яко светом дел твоих прославися Отец наш Небесный. Радуйся, яко сего ради в Райских обителях ныне наслаждаешися блаженства. Радуйся, яко тамо божественными лучами трисолнечнаго света осияваешися. Радуйся, и нам прияти сию радость и славу непрестанно ходатайствуешь Радуйся, Феодоре, Острожская похвало и молитвенниче о нас к Богу теплейший.

Кондак 13

О всеблаженне отче Феодоре, православныя веры великий ревнителю: нынешнее наше приимеши пение,- молим тя: братию нашу, отступившую от веры отцев и в нечестие впадшую светом учения Христова просвети и ко святой апостольсей, соборней церкви возврати, да тако вси, в единении сердец, вопием купно с тобою Всеблагому Богу: Аллилуиа, Аллилуиа, Аллилуиа.



(Этот кондак читается трижды, затем икос 1 и кондак 1)



Молитвы преподобному Феодору Острожскому

Молитва первая

Воинствование земное на духовную брань преложивый и о людех своих доброе попечение показавый, блаженне Феодоре преподобне! К тебе в смятении сердец наших прибегаем и твоея помощи стране нашей и душам нашим смиренно просити дерзаем. Вемы, угодниче Божий, яко малодушие наше и леность духовная далече от твоея пажити ны отревает и всякаго омерзения достойны ны соделовает: но милосердие твое ко врагом и предателем своим поминающе, имже паки защитник явился еси, равнаго милосердия твоего и нам недостойным молим. Ты убо угодниче Христов, от агарян раззоренную землю нашу и от иноверных подавляему, жалостию и любовию объемля, паки к бодренному житию верныя призвал еси, елико воинскими победами, толико и молитвою и образом жития своего аки свещник златый блистаяся, ты мирскаго жития суету оставль сам убо о души своей попечению в пещернем уединении предался еси, земли же нашея попечение и исцеление славному роду твоему заповедал еси, и тако предел свой еще на двести лет и вящше по кончине твоей от сетей еретических оградил еси. Ты и далече сущее единокровное нам племя чешское ко православней вере приближати тщался еси и от латинскаго нашествия ограждал еси. Ты и ныне на небесех душею со ангелы водворяяся, нетленным же телом посреде нас почиваяй, наших не отрини гласы скорбныя, но молитвенный плач согрешающих сынов земли нашея услыши. Согрешихом бо неправдовахом и от завет Божиих отступихом, в развращенныя обычаи зле впадохом и еже едино на потребу есть, душ наших спасение в небрежении оставихом, тебе в Бозе правда и слава отче преподобне, нам же стыдение лица. Оба елико грешнейшии явихомся толико вящшаго сострадания твоего требуем и в покаянии зовем ти сице: твоея неистощимыя любве луч нам ниспосли, гнев Божий, праведно на ны движимый, молитвою твоею от нас отведи, спасительную благодать Его к нам недостойным предстательством твоим низведи и от греховныя бездны к высоте покаяния нас возведи, да тако и мы житие свое исправити потщимся, крепость земли нашея паки обновляти начнем, врагов же веры Христовы и злых прелестников безбоязненно отражати словом и житием возревнуем и Спасителя нашего со всеми святыми благодарно воспевати будем, славяще Его со Отцем и Святым Духом, во веки веков. Аминь.

Молитва вторая

О преподобне отче Феодоре, земли Волынския похвало и прибежище, святыя же лавры Печерския славо и украшение! Призри на предстоящыя люди, твоея помощи с верою просящыя и согрешения своя тебе исповедающыя, приими тех усердныя молитвы и от всякия скорби и нужды предстательством твоим избави. Помози нам, угодниче Божий, в мире и покаянии житие наша зде проводите, во благополучии памятование о заповедех Божиих всемирно хранити, в бедах же от ропота и уныния ограждатися, обаче и помыслом лучшим сердца наша исполни, да твоего благоутробия и яже о вере ревности подражатели бывше, оных сподобимся вечных благ, имиже днесь украшаяся, молитвы о спасении нашем возносиши ко Господу, Емуже слава подобает Отцу и Сыну и Святому Духу, ныне и присно и во веки веков. Аминь.





Тропарь преподобному Феодору, князю Острожскому, Печерскому, в Дальних пещерах

Тропарь, глас 7

Преобразил еси земнаго княжения славу во иночества образ смиренный, и вместо врагов видимых на невидимыя ополчился еси, и, обою победитель красен являяся, един от чудотворец Печерских показался еси; темже и нам ревности Божия дар испроси, братолюбием сердца наша просвети и ко спасению вечному стези наша, Феодоре блаженне, направи.



Ин тропарь, глас 4

Княжеских дароношений и всего суетствия мирскаго спешне отвергся, Божиих же дарований, премудре Феодоре, преискренне сподобитися желая, приял еси иноческий образ и, в нем смиренным послушанием и безмолвным житием Царю Небесному благоугождая, получил еси от Него безсмертныя дары, ихже и нам, чтущим тя, получити молися.



Ин тропарь, глас 4

Яко благочестиваго корене пречестная отрасль был еси, блаженне Феодоре, яви бо тя Христос яко воистинну Богодарованное сокровище Волынстей земли, новаго поборника Православия, и народу российскому преславна и благоприятна. Темже ныне, плоды светоносных трудов твоих к стране нашей под сению Святыя Церкве Православныя наслаждающеся, хвалим Господа, даровавшаго тебе силу и крепость на сопротивныя. Егоже моли спасти отечество твое, и державе сродник твоих Богоугодней быти, и сыновом российским спастися.



Кондак, глас 4

Красоты ризныя возгнушавшагося и богатства тленнаго со благодарением отвергшагося, в ризу же безстрастия облекшагося и богатому в щедротах Христу возследовавшаго, приидите, вернии, восхвалим Феодора достославна, яко молящася непрестанно о душах наших.[/spoiler]

Раб божий Константин

Акафист святому праведному воину и флотоводцу Феодору Санаксарскому (Ушакову).
[spoiler]Кондак 1


Избранному флотоводцу земли Русския,/ делами доблестными для славы Отечества нашего православнаго достойне потрудившемуся,/ святому праведному воину Феодору похвальное приносим пение./ Ты же, яко имеяй велие дерзновение ко Господу,/ от всяких нас бед свободи, зовущих:/ Радуйся, праведный флотоводче Феодоре, славный Архистратиже края Херсонскаго.


Икос 1


Ангелы и боголюбивыя люди днесь Христу Богу благодарение и славословие приносят, яви бо тя, праведне воине Феодоре, яко славнаго покровителя и защитителя роду нашему. Мы же, видяще тя предстоящаго у престола Божия и милости нам у Него просящаго, со умилением сердечным воспеваем: Радуйся, рода благочестиваго рождение. Радуйся, земли Ярославския многоплодное прозябение. Радуйся, яко посреди празднования памяти двух воинов-великомучеников Феодора Стратилата и Феодора Тирона преславно родивыйся. Радуйся, яко от младенчества до самыя кончины твоея подражателем подвигов их явивыйся. Радуйся, сердцем своим Единому Господу обручивыйся. Радуйся, молитвами преподобнаго Феодора Санаксарскаго в духовней брани побеждати научивыйся. Радуйся, дух мирен в душе своей стяжавый. Радуйся, силою Креста Господня вся враги побеждавый. Радуйся, любовь Христову в сердце своем носивый. Радуйся, сладкою тою любовию душу свою усладивый. Радуйся, Ангела Хранителя твоего непрестанно возвеселявый. Радуйся, родителей и наставников твоих кротостию и усердием удивлявый. Радуйся, праведный флотоводче Феодоре, славный Архистратиже края Херсонскаго.


Кондак 2


Видя Господь чистоту сердца твоего, преизобильно дарова тебе, Феодоре преславне, благодать Свою, да тою укрепляемый, житие твое поживеши во благочестии и служении Отечеству, прославляя Творца своего песнию: Аллилуиа.


Икос 2


Разум Божественный просвети и укрепи тя, праведне и достохвальне Феодоре, егда учение книжное со усердием познавал еси и велие прилежание к сему имел еси. Егда же чином воинским почтен быв, клятву пред Всемогущим Богом, святым Евангелием Его и Крестом принесл еси: верно и нелицемерно Отечеству Русскому служити. Сего ради приими от нас похвалы сия: Радуйся, паче всего в мире сем Господа возлюбивый. Радуйся, от лет младых чистоту жития сохранивый. Радуйся, к книжной премудрости усердие от юности имевый. Радуйся, праздность и суету мира сего презревый. Радуйся, закон Господний прилежно изучивый. Радуйся, целомудрия сокровище драгое сохранивый. Радуйся, в страсе Божием добре наставление получивый. Радуйся, в житии твоем добродетели высокия возрастивый. Радуйся, душу свою всецело ко Господу устремивый. Радуйся, другом твоим примером прилежания бывый. Радуйся, христианскаго благочестия неустанный блюстителю. Радуйся, милости и помощи нуждающимся подателю. Радуйся, праведный флотоводче Феодоре, славный Архистратиже края Херсонскаго.


Кондак 3


Силою Божиею укрепляемь, все житие твое в праведности проводил еси, славне воине Феодоре, и, не щадя живота своего, Отечество православное от супостат защищал еси, Творцу же своему в ратных делех твоих вспомоществующу ти, воспевал еси благодарно: Аллилуиа.


Икос 3


Имея в сердце своем веру твердую во Христа Иисуса и силою тоя вооруживыйся, на морях Балтийстем и Азовстем служением ратным славу Отечества твоего преумножал еси. Помози и нам во всем подражати тебе, угодниче Божий Феодоре, да не погибнем в пучине беззаконий наших, обаче радостно да зовем тебе: Радуйся, Евангелия Христова добрый хранителю. Радуйся, заповедей Иисусовых усердный исполнителю. Радуйся, Богу житием твоим совершенно угодивый. Радуйся, страсти в душе своей победивый. Радуйся, Духа Святаго жилище, преукрашенное чистотою. Радуйся, Божия благодати приятелище, сияющее добродетелей красотою. Радуйся, Царствия Горняго ревностный искателю. Радуйся, роду христианскому благ небесных ходатаю. Радуйся, Духом Святым насыщенный и просвещенный. Радуйся, соблазнами мира сего суетнаго не прельщенный. Радуйся, измлада Господа своего всею душею возлюбивый. Радуйся, в заповедех Божиих неуклонно ходивый. Радуйся, праведный флотоводче Феодоре, славный Архистратиже края Херсонскаго.


Кондак 4


Бури бед и искушений не устрашился еси, святе Феодоре, егда прибывши в богоспасаемый град Херсон, службу свою совершал еси. Господь же укрепляше тя, да трудами твоими край Херсонский прославиши, воспевая Богу: Аллилуиа.


Икос 4


Слышаще и видяще вси людие града Херсона, яко моровым поветрием град их одержим бысть, на Единаго Господа все упование возложиша. Ты же, праведне Феодоре, свыше Господом вразумленный, вверенныя тебе воины от тяжкия болезни оградил еси. Темже и мы усердно к тебе прибегающе, смиренно молим: управи нас предстательством твоим к тихому и мирному житию, и сподоби наслаждатися нетленныя радости святых, вопиющих тебе: Радуйся, ближним своим благодетелю милостивый. Радуйся, за дивное милосердие твое Господом хранимый. Радуйся, изнемогающих внезапное укрепление. Радуйся, унывающим благодатное ободрение. Радуйся, ближняго своего, яко себе, возлюбивый. Радуйся, меньшей братии твоей, яко Христу, послуживый. Радуйся, скорбящих благий утешителю. Радуйся, благ вечных нам от Господа подателю. Радуйся, ризу душевную чистотою убеливый. Радуйся, ратными подвигами своими всех удививый. Радуйся, милостию и состраданием душу свою наполнивый. Радуйся, служащих с тобою на путь благочестия направлявый. Радуйся, праведный флотоводче Феодоре, славный Архистратиже края Херсонскаго.


Кондак 5


Боготочный источник дарований духовных явился еси, боголюбиве Феодоре, и за великия подвиги твоя чинами воинскими почтен быв, царския милости сподобился еси. Обаче вемы, яко ты более жаждал еси мзды Господа своего, нежели почести человеков, к Нему же благодарно взывал еси: Аллилуиа.


Икос 5


Видевше яко врагами страны Русския мир нарушен бысть, на защиту Отечества своего флот Черноморский направил еси, славне Феодоре. И в дивной победе над нечестивыми, христианское самоотвержение показав, славу воинства православнаго преумножил еси. Мы же, любовию усердною к тебе пламенея, мысленно созерцаем тя, горе за ны молящагося, и возсылаем ти пение сие: Радуйся, в терпении мнозем паче иных преуспевый. Радуйся, заповеди Господни в сердце своем верно хранивый. Радуйся, прилежно во славу Божию подвизавыйся. Радуйся, во благо Отечества своего славно потрудивыйся. Радуйся, к Богу и ближним великия любови горение. Радуйся, Церкви Христовы благодатное удобрение. Радуйся, плоть свою духови всецело покоривый. Радуйся, плоды духовныя миру преизобильно явивый. Радуйся, обетований Иисусовых достойный наследниче. Радуйся, со ангелы и святыми предивный собеседниче. Радуйся, гнев на ближняго своего до конца в себе умертвивый. Радуйся, уста своя от клеветы и неправды заградивый. Радуйся, праведный флотоводче Феодоре, славный Архистратиже края Херсонскаго.


Кондак 6


Проповедник веры Христовы и благочестия христианскаго не словом точию, но и делом явился еси, богомудре Феодоре, яко отец благий бывый вверенным ти людем, образ им жития по заповедем Христовым подавая. Молися убо, да и мы, в житейстем море сущии, к тихому пристанищу, Господу нашему, притецем, во умилении зовуще: Аллилуиа.


Икос 6


Возсия в тебе обильно благодать Божия, праведне Феодоре, егда за усердное служение Отечеству вверено ти бысть управление флотом Черноморским. Таковому о тебе Божию промышлению радующеся, зовем: Радуйся, добродетельми своими небесныя дары получивый. Радуйся, воспоминанием страданий Христовых скорби своя усладивый. Радуйся, терпением своим многим святым угодникам уподобивыйся. Радуйся, пред Ангелы пресветлыми не посрамивыйся. Радуйся, всего себе в волю Божию безропотно предавый. Радуйся, болезньми своими здравие души своей стяжавый. Радуйся, за други своя душу полагавый. Радуйся, со всеми в мире пребывати желавый. Радуйся, добрыми делами Бога прославлявый. Радуйся, Отечество свое от врагов охранявый. Радуйся, дивный образ любви Отца Небеснаго в себе явивый. Радуйся, братолюбием христианским дольний мир удививый. Радуйся, праведный флотоводче Феодоре, славный Архистратиже края Херсонскаго.


Кондак 7


Хотяй Человеколюбец Господь защитити страну нашу православную от ига агарянскаго, вдохнови тя, славне Феодоре, на великия подвиги, коими турецкий флот низложен бысть и людем русским мирное жительство даровася. Даждь убо и нам благое утешение в мирном житии от Господа прияти, Емуже ангельскую песнь приносим: Аллилуиа.


Икос 7


Новыя таланты преумножил еси, святый воине Феодоре, егда несомненным упованием на помощь Божию вся враги побеждал еси. Темже и нас молитвами твоими в горния обители приведи, восхваляющих тя: Радуйся, высотою подвигов твоих Ангелы удививый. Радуйся, крепостию произволения твоего демоны посрамивый. Радуйся, почести царския достойно восприявый. Радуйся, мужество велие во всех творимых бранех показавый. Радуйся, умения своего флотоводческаго не сокрывый. Радуйся, во славу Божию и Отечества нашего сие употребивый. Радуйся, христианскаго рода велие и славное возвышение. Радуйся, горняго мира пресветлое радование и украшение. Радуйся, за враги твоя с любовию моливыйся. Радуйся, у Христа прощати всех научивыйся. Радуйся, образ вернаго служения Богу и Отечеству показавый. Радуйся, дивное отвержение себе, спасения ради ближних, проявивый. Радуйся, праведный флотоводче Феодоре, славный Архистратиже края Херсонскаго.


Кондак 8


Странное и преславное чудо совершися, егда ты, достоблаженне Феодоре, велию святыню – мощи угодника Божия Спиридона Тримифунтскаго, на острове Корфу пребывающия, от зловредных супостат свободил еси и в день Святыя Пасхи со славою многою на раменах своих перенесение их совершил еси. Темже молися за ны, да избавлени будем от враг видимых и невидимых, и да возгорится в сердцах наших огнь любве ко Владыце Христу, поющих Ему: Аллилуиа.


Икос 8


Всего себе воли Божией предав, служение ратное совершал еси, доблесть русскаго воинства всему миру показуя. Мы же, зряще сия, со умилением поем ти: Радуйся, Христа Бога, яко Хлеба Жизни, взалкавый. Радуйся, Тем душу свою неизменно питавый. Радуйся, Пречистыя Крови Его, яко истиннаго пития приобщавыйся. Радуйся, ко преславным праведником приложивыйся. Радуйся, за усердие твое от Богоматери мзду восприявый. Радуйся, Сына Ея на земли житием своим прославлявый. Радуйся, Царя царей, Христа Господа, служителю. Радуйся, чистых сердцем смиренный и мудрый учителю. Радуйся, чин воинский, яко велий дар Божий, приявый. Радуйся, повиноватися воле Господней всех научавый. Радуйся, Отечества нашего неустрашимый защитниче. Радуйся, Православия ревностный проповедниче. Радуйся, праведный флотоводче Феодоре, славный Архистратиже края Херсонскаго.


Кондак 9


Вси людие гречестии, свободу от злокозненных враг от тебе получившия, достославне Феодоре, благодарни тебе за сие быша, отцем своим тя величая. Ты же, за вся сия Бога благодарил еси, яко дарова ти силу и мужество, да послужиши не токмо русскому, но и иным народам православным, да вси поют едиными усты и единым сердцем: Аллилуиа.


Икос 9


Витийство человеческое не довлеет, святе Феодоре, к восхвалению всех предивных трудов и побед твоих, и мужества, с коим переносил еси вся скорби и лишения, клевету и зависть, от врагов твоих исходящия. Темже, величающе вся подвиги, терпение и труды твоя, прославляем тя сице: Радуйся, душу свою с кротостию Господеви вручивый. Радуйся, искренних своих христианскому терпению научивый. Радуйся, радости духовныя боголюбивым душам подателю. Радуйся, новый наш пред Богом молитвенниче и предстателю. Радуйся, яко твоими молитвами Господь оставляет нам прегрешения. Радуйся, помогающий нам претерпевати скорби и поношения. Радуйся, не своея славы, но Божия непрестанно искавый. Радуйся, венец праведника от Царя Небеснаго восприявый. Радуйся, миротворцев и правдолюбцев любвеобильный наставниче. Радуйся, Божия правды предивный проповедниче. Радуйся, живота своего за веру и Отечество николиже щадивый. Радуйся, душу свою за други своя полагавый. Радуйся, праведный флотоводче Феодоре, славный Архистратиже края Херсонскаго.


Кондак 10


Спастися хотящим пример благий житие твое бысть, праведне Феодоре, имже вся ны научаеши искати единаго на потребу, еже есть богоугождение. Помози убо и нам в сем тебе подражати, вдохни в нас мужество душевное, украси нас добродетельми небесными, да с тобою возможем сонаследники Царствия Небеснаго быти и воспевати Создателю нашему: Аллилуиа.


Икос 10


Стеною ограждения в Церкви Православней являешися, славне Феодоре, защищаеши бо люди верныя от враг видимых и невидимых; не сокрыт же бысть и светильник добродетелей твоих, да светом, от него исходящим, прославляеши Отца Небеснаго. Мы же, чтущии память твою, со умилением взирая на образ твой святый, с радостию зовем: Радуйся, лжи и коварства нелицемерный обличителю. Радуйся, веры православныя неустанный насадителю. Радуйся, житием своим Ангелы возвеселивый. Радуйся, праведностию твоею духи тьмы посрамивый. Радуйся, бедствующим добрый предстателю. Радуйся, за обидимых и унижаемых присный ходатаю. Радуйся, кротость Христову в душу свою восприявый. Радуйся, смирению Его притекающия к тебе научавый. Радуйся, заблудших наставниче и скорбящих утешителю. Радуйся, просящих помощи твоея скорый тоя подателю. Радуйся, яко и по преставлении твоем милости творити не преставаеши. Радуйся, яко молящимся у гроба твоего скорую помощь подаваеши. Радуйся, праведный флотоводче Феодоре, славный Архистратиже края Херсонскаго.


Кондак 11


Пение всеумиленное Триединому Богу принесл еси, блаженне Феодоре, в Санаксарстей обители, идеже от ратных подвигов почивая, в молитве пламенней душею своею ко Господу всецело устремился еси. Темже сподоби тя Господь причаститися Святых Своих Таин пред славною кончиною твоею, в празднование Покрова Пресвятыя Богородицы. Ныне же, предстоя у Престола Царя Славы, молися, да и мы души своя нетленному Жениху Христу чистыми принесем со ангельским пением: Аллилуиа.


Икос 11


Светозарное светило, в стране нашей возсиявшее, и по честнем успении твоем зрим тя, праведне воине Феодоре, зане и ныне светиши нам знамении и чудесы от святых мощей твоих истекающими. Темже, благодарственная Богу приносяще о тебе пения, взываем ти сице: Радуйся, во Иисусе Сладчайшем единое утешение обретавый. Радуйся, к бедствующим на помощь стопы своя ускорявый. Радуйся, окамененнаго нечувствия из сердец наших прогонителю. Радуйся, во отчаянии сущим благия надежды подателю. Радуйся, яко тобою вернии истиною Христовою просвещаются. Радуйся, яко тобою покаявшияся от постыдныя смерти избавляются. Радуйся, чудесная исцеления от святых мощей твоих обильно источаяй. Радуйся, николиже во отчаяние впадати нас научаяй. Радуйся, праведною кончиною своею праведность жития твоего запечатлевый. Радуйся, в райских обителех Творца и Спасителя с радостию узревый. Радуйся, яко тобою и доныне Отечество наше от врагов избавляется. Радуйся, яко тобою град Херсон торжествует и прославляется. Радуйся, праведный флотоводче Феодоре, славный Архистратиже края Херсонскаго.


Кондак 2


Благодати и милости испроси нам у Христа, Создателя и Владыки нашего, преславне Феодоре, много бо может молитва праведника пред лицем Его. Мы же, душами своими умиляемся, яко яви нам Господь во утешение святыя мощи твоя, вопиющим Ему: Аллилуиа.


Икос 12


Поюще неисчетныя подвиги предивнаго жития твоего, великий воине и флотоводче Феодоре, хвалим и ублажаем тя, яко небеснаго многомощнаго покровителя богоспасаемаго града нашего. Ты же, данною ти свыше благодатию, подавай нам полезная ко спасению душ наших, да присно тя величаем: Радуйся, святче Божий, свято и праведно жизнь земную совершивый. Радуйся, во благоухании святыни сном блаженным опочивый. Радуйся, великий флотоводче, Богом на укрепление нам дарованный. Радуйся, венцем безсмертныя жизни от Господа увенчанный. Радуйся, Пресветлое Лице Создателя выну созерцаяй. Радуйся, Пресвятей Троице песнь немолчно возглашаяй. Радуйся, Господа ходатайством твоим умилостивляяй. Радуйся, град Херсон покровительством твоим защищаяй. Радуйся, яко имя твое со святыми прославляется. Радуйся, яко молитвами твоим град Херсон утверждается. Радуйся, Престолу Царя Небеснаго во славе предстоящий. Радуйся, о граде, тебе вверенном, Господу молитвы возносящий. Радуйся, праведный флотоводче Феодоре, славный Архистратиже края Херсонскаго.


Кондак 13


О преславный воине и мужественный флотоводче Феодоре, приими от нас сие малое похвальное пение, еже пред иконою твоею ныне воспеваем, и молитвами твоими испроси нам у Христа Бога избавитися от бед, скорбей и напастей, наипаче же от внезапныя смерти и вечныя муки. Буди нам путевождь во блаженныя обители небесныя, да тамо с тобою воспоем Богу: Аллилуиа.


Сей кондак читается трижды. Затем икос 1 и кондак 1.


Молитва


О преславный и достохвальный воине, флотоводче Феодоре, небесный защитниче и покровителю града нашего! В день славнаго прославления твоего, память твою почитая и православно тя величая, смиренно молим тя: вознеси ко Господу Богу теплыя молитвы твоя о нас и испроси у Него оставление всех согрешений наших, коими ежечасно преогорчеваем Его. Умоли Господа даровати нам ко Отечеству нашему любовь нелицемерную, мир и благоденствие Церкви нашей Православней, всем же нам телесное здравие и душевное спасение, христианскую кончину живота нашего и добрый ответ на Страшнем Суде Его. Ей, святче Божий, не посрами упования нашего, еже на тя по Бозе и Богородице возлагаем, но буди нам помощник и покровитель во спасение, да твоими молитвами получивше благодать и милость от Господа, прославим человеколюбие Отца и Сына и Святаго Духа и твое святое заступление ныне и присно, и во веки веков. Аминь.


Тропарь, гл.4


Святый воине флотоводче Феодоре, житием праведным Богу воистину угодил еси, подвигом ратным Отечеству добре послужил еси, Царствие Небесное наследовал еси. Темже, яко новому победоносцу благодарственно вопием: радуйся, Архистратиже непобедимый, Феодоре, земли Таврическия и града Херсона покровителю.


Кондак, гл.2


Святый победоносный воине флотоводче Феодоре, агарянское нашествие от предел Таврических отгнал еси, православных множество от убиения избавил еси, церкви Божия светло украсил еси. Ныне прилежно Господеви молися, сохраняя Отечество наше от глада, болезни, меча и междуусобныя брани, мир мирови даровати и душам нашим велию милость.[/spoiler]

Раб божий Константин

Акафист преподобному и богоносному отцу нашему Феодору Санаксарскому.
[spoiler]Кондак 1
Избранный угодниче и добрый воине Царя Небеснаго, заповедей Евангельских изрядный делателю, всех прибегающих к тебе ко спасению наставниче, смирением велие дерзновение стяжавый ко Господу, выну моли о нас, недостойных чадех твоих, да зовем ти: Радуйся, преподобне Феодоре, стада Христова пастырю богомудрый.

Икос 1
Ангельское житие твое провидя и многих ко спасению привести имущаго, от юности избрав тя Христос в жилище Себе, дары многими тя почти: мы же, прославляюще тя прославльшаго, бренными устнами вопием ти:
Радуйся, в разум истины пришедый;
радуйся, яко врага и вся страсти одолел еси.
Радуйся, яко звание учительства от Господа приял еси;
радуйся, яко научил еси нас спасения пути.
Радуйся, вся злострадания кротко претерпевый;
радуйся, яко данный тебе талант сторицею преумножил еси.
Радуйся, преподобне Феодоре, стада Христова пастырю богомудрый.


Кондак 2
Видев печальный конец плотскаго жития и безчинныя утехи мирския в смертоносный яд вменив, вразумившему тя Господу, взывал еси: Аллилуиа.

Икос 2
Разум божественный желая стяжати, вся земная во уметы вменил еси, да безценный бисер, Христа, приобрящеши. Темже пустынное житие избрал еси, сего ради вопием ти:
Радуйся, человеческая пристрастия отринувый;
радуйся, безстрастия возжелевый.
Радуйся, своеволие оставивый;
радуйся, плотоугодие возненавидевый.
Радуйся, яко немощную плоть духом побеждал еси;
радуйся, яко вместо земнаго веселия небесное стяжал еси.
Радуйся, преподобне Феодоре, стада Христова пастырю богомудрый.

Кондак 3
Силою Божиею укрепляемь, велия подвиги подъял еси: покаяние начало положив, плоть непрестанно озлоблял еси и, все упование на Господа возложив, вопиял еси Ему: Аллилуиа.

Икос 3
Имея нрав незлобивый и сердце милующее, неразумным гонителем твоим вся обиды прощал еси, наипаче умолял еси от возлюбленныя тя пустыни не отлучати. Темже, видяще таковое твое во юности преуспеяние, восхваляем тя:
Радуйся, кроткий пустынножителю;
радуйся, от юности непрелестный подвижниче.
Радуйся, от демонов ненавидимый;
радуйся, за Христа поношения претерпевый.
Радуйся, все упование на Господа возложивый;
радуйся, в вере своей не посрамивыйся.
Радуйся, преподобне Феодоре, стада Христова пастырю богомудрый.

Кондак 4
Буря безбожия и противных ветров воста тогда на Русь святую, и не бе места во обителех истинным рабом Христовым, сего ради и ты странствия и скитания подъял еси, обаче на всяком месте возлюбленному Богу вопиял еси: Аллилуиа.

Икос 4
Слышав повеление Спасителево, не отвратился еси воздати кесарево кесарю и, представ на суд мира сего, вспять не обратился еси, темже ублажаем твердость твою, взывающе:
Радуйся, любовь к миру до конца умертвивый;
радуйся, яко вся земная презрел еси.
Радуйся, вышняго Царя паче земнаго убоявыйся;
радуйся, славы суетныя не восхотевый.
Радуйся, несмущенною твердостию царицу удививый;
радуйся, верою крепкою суд на милость преложивый.
Радуйся, преподобне Феодоре, стада Христова пастырю богомудрый.

Кондак 5
Боготечная звезда возсиял еси в столице северней, темный запад унылаго жития благочестием своим озарив и научая собою Просветителю душ вопити: Аллилуиа.

Икос 5
Видя себе ко ангельскому чину причтена, Бога восхвалял еси, вся благая желания исполняющаго: чада спасения же в тебе истиннаго отца и пастыря обретоша, с нимиже и мы поем таковая:
Радуйся, чистым житием к себе души привлекавый;
радуйся, постничеством всех удивлявый.
Радуйся, яко обеты иноческия строго соблюл еси;
радуйся, яко непрестанную молитву возделал еси.
Радуйся, в разсуждении Златоусту подобник быв;
радуйся, яко свыше дар врачевания душ приял еси.
Радуйся, преподобне Феодоре, стада Христова пастырю богомудрый.

Кондак 6
Проповедника боговещаннаго тя видя и стадо овец Христовых окрест тебе умножающееся, паки воста на тя завистник древний, злобу и клевету во уста недостойная вложив; ты же, провидя козни его, Подателю благосердия пел еси: Аллилуиа.

Икос 6
Возсия свет радости в души твоей, егда, место гневу дав, псаломски в пустыни саровстей водворился еси, обаче и паству твою на тучныя пажити монашескаго жительства привел еси, с неюже ликующе, и мы рцем:
Радуйся, гонителем мщения не давый;
радуйся, смирением их победивый.
Радуйся, яко словопрений удалялся еси;
радуйся, среди житейския молвы пустыннаго духа не угасивый.
Радуйся, шумом мира тяготивыйся;
радуйся, яко горлица пустыннолюбная, из него воспаривый.
Радуйся, преподобне Феодоре, стада Христова пастырю богомудрый.

Кондак 7
Хотя человеколюбец Господь воинство иноков преумножити и чрез тя сие ко спасению привести, из славнаго Сарова в тишину Санаксара пресели тя и тамо, яко светильник горящий и светящий, на свещнице тя постави, со чады поющаго: Аллилуиа.

Икос 7
Новое и дивное явление зрим на месте сем, видяще тя, яко единаго от древних, лучами святости сияющаго, среди дремучих лесов обитель святую, яко град велик, воздвизающаго: темже зело удивляеми, благодарно воспеваем ти:
Радуйся, воли Божия усердный исполнителю;
радуйся, всякое послушание от него радостно приемляй.
Радуйся, великаго труда не убоявыйся;
радуйся, всю надежду на Щедродавца возложивый.
Радуйся, место сие молитвами своими освятивый;
радуйся, потом и слезами сие удобривый.
Радуйся, преподобне Феодоре, стада Христова пастырю богомудрый.

Кондак 8
Странное чудо и боголепное зрится, яко в немногих летех храм велик во славу Пречистыя созидается, и обитель иночествующих, древним подобная, твоими труды укрепляется, в нейже монаси мнози Строителю спасения единым гласом вопиют: Аллилуиа.

Икос 8
Весь закон, еже по Бозе жития, явлен тебе имея, наставник искусный и предивный был еси, вражия коварства и хитрости мглу, яко луч солнечный, разсеял еси, темже по достоянию слышиши:
Радуйся, бесов прогонителю;
радуйся, страстей искоренителю.
Радуйся, иноческаго общежития устроителю;
радуйся, церковнаго благолепия ревнителю.
Радуйся, исцелявый прощением;
радуйся, врачевавый терпением.
Радуйся, преподобне Феодоре, стада Христова пастырю богомудрый.

Кондак 9
Всякую неправость в себе искоренивый, тщался еси и ближнему сие благо доставити, сего ради неустанно трудился еси, наставляя, обличая и запрещая; льстивое же чадо твое, не терпя отеческих прещений, оклевета тя пред сильными мира сего, не ведуще пети: Аллилуиа.

Икос 9
Витийства сугубаго недостанет, во еже сказати терпение твое скорбей многих, егда в заточении многолетнем во обители Соловецтей пребывал еси; мы же ныне, якоже и чада твоя тогда, со слезами взываем:
Радуйся, яко человекоугодие презрел еси;
радуйся, яко безчинных строгостию исправлял еси.
Радуйся, давидски гонения терпевый;
радуйся, скорби в небесный дар вменявый.
Радуйся, выну к Богу духом горевый;
радуйся, яко и Бог с тобою пребысть.
Радуйся, преподобне Феодоре, стада Христова пастырю богомудрый.

Кондак 10
Спасти хотя верных множества, великий началопастырь многими дары обогати тя, егда, яко злато, огнем страданий очищена паки в родную обитель возврати, яже, усретши тя, светом ангелоподобнаго лика твоего озарися и радостно воспевает праведному Воздаятелю: Аллилуиа.

Икос 10
Стена несокрушимая Православным явился еси, пламенными молитвами лукавыя духи попаляя, трезвыми советы от заблуждения ограждая, божественною любовию сердца согревая; всем быв вся, многих спасл еси, сего ради приими хвалы сия:
Радуйся, на крест радостно возшедый;
радуйся, на кресте не роптавый.
Радуйся, распятием сим до конца ветхая в себе умертвивый;
радуйся, яко в страдании ум к Богу возводил еси.
Радуйся, яко непрестанно горе сердце имел еси;
радуйся, земный ангеле и небесный человече.
Радуйся, преподобне Феодоре, стада Христова пастырю богомудрый.

Кондак 11
Пение всякое побеждается, егда восхощет воспети многочисленныя подвиги твоя; всенощная бдения, непрестанная пощения, слез излияния, болезней и теснот благодушное терпение, яже во все время жития твоего, яко дар должный, Всевышнему приносил еси, темже и сподобился еси от Него со ангелы пети: Аллилуиа.

Икос 11
Светозарный светильник старчества благодатнаго явился еси во времена мрачная забвения и благоуханное цветение его провозвестил еси житием своим, да не увянет цвет духовный в Российстей земли; ныне же на небесех живый, от земных приими песнь сию:
Радуйся, умнаго делания подвижниче;
радуйся, любве чистыя приятелище.
Радуйся, Евангельския мудрости вместилище;
радуйся, яко, паче своея, пользы ближних искал еси.
Радуйся, яко добрый виноградарь явился еси;
радуйся, яко ни едину же розгу презрел еси.
Радуйся, преподобне Феодоре, стада Христова пастырю богомудрый.

Кондак 12
Благодать Божия яви нам, недостойным, в последняя времена мощи твоя святыя, имиже обитель твою от конечнаго разорения сохранил еси, наипаче же к новей жизни возродил еси, темже и ныне умоли за ны, чада твоя, да не явимся неблагодарни за толикую милость к нам и нерадению да не предадимся, обаче да усердно воспеваем Богу: Аллилуиа.

Икос 12
Поюще равноангельное и многоскорбное твое житие, восхваляюще благость Божию, до конца нас не оставившую и за грехи не презревшую, зрим убо наше убожество и скудоумие, во еже воспети тя по достоянию, обаче не отвратися пения сего:
Радуйся, оставляяй согрешающему;
радуйся, небрежное житие обличавый.
Радуйся, в Бозе утешение имевый;
радуйся, яко о миролюбцех рыдал еси.
Радуйся, монашества крепосте необоримая;
радуйся, священства украшение.
Радуйся, преподобне Феодоре, стада Христова пастырю богомудрый.

Кондак 13
О священная главо, богоносне отче наш Феодоре, славу преподобных и венец исповедников стяжавый и в незаходимей сияяй славе! Якоже прежде, тако и ныне не забуди стадо твое, но управи е к вечному спасению, зовущее о тебе Богу: Аллилуиа.
Сей кондак читается трижды, затем - икос 1 и кондак 1.

Молитва
О радосте наша! Пастырю наш, преподобне отче Феодоре! Воздыхаем из глубины сердца нашего и со слезами вопием ти: видиши наше неможение, во мраце страстей пребывание, сил душевных разслабление, своеволием обдержание, плотоугодием пленение и всякия добродетели обнищание! Виждь плач и недоумение наше! Вразуми ны и настави на спасения стези, испроси нам у великодаровитаго Бога нищеты нашея познание, слезное покаяние, нелицемерное смирение и в молитве непрестанное терпение, да сими благость Его к себе приклоним ко прощению грехов и сподобимся с тобою вечно пребывати во Царствии Небеснем, поюще и благословяще Всесвятую Троицу: Отца, и Сына, и Святаго Духа, ныне и присно, и во веки веков. Аминь.

Тропарь, глас 4
Ревностию крестителю уподобляяся, от юности Богови угодив, старец благодатный множеству ученик явился еси, с нимиже ликуеши на небесех, Феодоре преподобне отче наш, моли Христа Бога спастися душам нашим.

Кондак, глас 2
Мира суету и вся яже в нем тленная оставив, преподобне, в Санаксарскую обитель вселился еси, идеже ангельски пожив, многим путь был еси ко спасению, сего ради и Христос тебе даром разсуждения и учительства обогати, темже и мы вопием ти: спасай ны, Феодоре, святыми твоими молитвами.[/spoiler]

Раб божий Константин

АКАФИСТ
СВЯТЫМ БЛАГОВЕРНЫМ КНЯЗЬЯМ
ФЕОДОРУ, ДАВИДУ И КОНСТАНТИНУ,
СМОЛЕНСКИМ И ЯРОСЛАВСКИМ
ЧУДОТВОРЦАМ.
[spoiler]Кондак 1

Избраннии чудотворцы и велицыи угодницы Господни, градов Смоленска и Ярославля небеснии заступницы и усерднии о душах наших молитвенницы, святии благовернии князи Феодоре, Давиде и Константине, похвальное пение приносим вам с верою и любовию: вы же, яко имущии дерзновение ко Господу, от всяких нас бед молитвами вашими присно избавите, да с умилением зовем вам:

РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Икос 1

Ангели земнии и человецы небеснии бысте, Феодоре, Давиде и Константине преблаженнии, вся заповеди Господни верно сохраншии и в добродетелех преуспевшии, яко быти вам еще во плоти, подражатели сил безплотных, жития чистотою и святостию. Темже и мы грешнии со благоговением приносим благохваления таковая:
РАДУЙТЕСЯ, СВЕТИЛЬНИЦЫ ТРИСИЯННИИ БОЖИЯ БЛАГОДАТИ.
РАДУЙТЕСЯ, СТОЛПИ КРЕПЦЫИ СВЯТЫЯ ПРАВОСЛАВНЫЯ ЦЕРКВЕ.
РАДУЙТЕСЯ, ВО БЛАГОВЕРИИ УТВЕРЖДЕНИИ.
РАДУЙТЕСЯ, В ДОБРОДЕТЕЛЕХ БЛАГОИСКУСНИИ.
РАДУЙТЕСЯ, ВЕРНИИ ХРИСТОВЫ УГОДНИЦЫ.
РАДУЙТЕСЯ, МНОГОЦЕЛЕБНЫХ НЕЗАВИСТНИИ ПОДАТЕЛИ.
РАДУЙТЕСЯ, НЕТЛЕНИЯ ЦВЕТИ БЛАГОУХАННИИ.
РАДУЙТЕСЯ, РАЯ ИИСУСОВА КРИНИ НЕУВЯДАЕМИИ.
РАДУЙТЕСЯ, КНЯЗЕЙ РОССИЙСКИХ СВЕТЛАЯ ПОХВАЛО.
РАДУЙТЕСЯ, ЛЮБЯЩИХ И ЧТУЩИХ ВАС ПРИСНОЕ РАДОВАНИЕ.
РАДУЙТЕСЯ, ВО БЛАГОУХАНИИ СВЯТОСТИ ПОЧИВАЮЩИИ.
РАДУЙТЕСЯ, НЕДУЖНЫЯ БЕЗМЕЗДНО ИСЦЕЛЯЮЩИИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 2

Видя князь Феодор, яко братия его неправедно восприяша удел княжения его, не восхоте бранию идти на них, но мир любяй, малым княжением можайским удовлися, праведно и свято княжение свое исправляше, храмы Божия созидая, благочестие христианское утверждая, суды правосудны людем своим являя и присно зовый в молитвах усердных к Богу: АЛЛИЛУИА.

Икос 2

Разумом Божественным преисполненнии, святии благовернии князи Феодоре, Давиде и Константине, не прельститеся суетною славою княжения земнаго, но сие мудро сочетаете со всегдашним благоугождением Богу, яко быти вам воистину праведником, достойным похвал сицевых:
РАДУЙТЕСЯ, МОЛИТВЕННИЦЫ УСЕРДНИИ.
РАДУЙТЕСЯ, ПОДВИЖНИЦЫ НЕЛЕНОСТНИИ.
РАДУЙТЕСЯ, ЦЕЛОМУДРИЯ ХРАНИТЕЛИ.
РАДУЙТЕСЯ, ПРАВОСЛАВИЯ ПОБОРНИЦЫ.
РАДУЙТЕСЯ, НЕЗЛОБИВИИ В ОБИДАХ.
РАДУЙТЕСЯ, БЛАГОДУШНИИ ВО ИСКУШЕНИИХ.
РАДУЙТЕСЯ, МИЛОСЕРДИЯ ПРЕИСПОЛНЕННИИ.
РАДУЙТЕСЯ, КРОТОСТИЮ ЗЛОБУ ПОБЕЖДАВШИИ.
РАДУЙТЕСЯ, ДИВНО О ГОСПОДЕ СОЧЕТАННИИ, ОТЕЦ СО ЧАДЫ ВО СВЯТЫХ.
РАДУЙТЕСЯ, ТРОИЦЫ РАВНОЧИСЛЕННИИ ИЗБРАННИЦЫ, СЫНЫ С РОДИТЕЛЕМ В СЕЛЕНИИХ РАЙСКИХ.
РАДУЙТЕСЯ, ОТ ГОРНИХ ВЫСОТ К ЗЕМНОРОДНЫМ МИЛОСТИВНО ПРИНИКАЮЩИЯ.
РАДУЙТЕСЯ, ИСЦЕЛЕНИЯ БЛАГОДАТНЫЯ НЕОСКУДНО ИСТОЧАЮЩИИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 3

Силою Божиею осененный, княже Феодоре, княжение ярославское восприял еси, и в нем благочестно о Христе потрудился еси, яко добрый воин Иисусе Христов, готовый душу твою положити за люди твоя. Темже и к агарянскому хану шествовати не убоялся еси, и пред ним веру Христову ясно исповедал еси, вопия сердцем и усты ко Господу: АЛЛИЛУИА.

Икос 3

Имуще едино попечение в триех телесех, о еже Единому Богу благоугождати, святии благовернии князи Феодоре, Давиде и Константине, образ жития праведнаго в себе нам являете, сим подвизающе нас, в похвалах достодолжных вопити вам сице:
РАДУЙТЕСЯ, БОГОМУДРИЯ ПРЕИСПОЛНЕННИИ.
РАДУЙТЕСЯ, ЛУЧАМИ СВЯТАГО ДУХА ОЗАРЕНИИ.
РАДУЙТЕСЯ, СВЕТИ УМНИИ, НОЩЬ ГРЕХОВ НАШИХ ПРЕСЕКАЮЩИЙ.
РАДУЙТЕСЯ, ЗВЕЗДЫ ПУТЕВОДНЫЯ, КО ХРИСТУ ПУТЬ ВЕРНЫМ ЯСНО УКАЗУЮЩЫЯ.
РАДУЙТЕСЯ, БИСЕРЕ ДРАГОЦЕННИИ, В НЕБЕСНЕЙ СОКРОВИЩНИЦЕ ХРИСТОВОЙ СОХРАНЯЕМИИ.
РАДУЙТЕСЯ, АДАМАНТЫ, СИЯЮЩИИ БОЖЕЮ БЛАГОДАТИЮ.
РАДУЙТЕСЯ, ДИАДИМУ КНЯЖЕНИЯ ЗЕМНАГО С ВЕНЦЕМ ЦАРСТВИЯ НЕБЕСНАГО СОЧЕТАВШИИ.
РАДУЙТЕСЯ, РАЯ ЖИТЕЛИ ПОРФИРОНОСНИИ.
РАДУЙТЕСЯ, В БОЗЕ УПОКОЕНИЕ БЛАЖЕННОЕ ОБРЕТШИИ.
РАДУЙТЕСЯ, ПО ТРУДЕХ И ПОДВИЗЕХ ЗЕМНЫХ СЛАДЦЕ НА ЛОНЕ АВРААМЛИ ОПОЧИВШИИ.
РАДУЙТЕСЯ, ДРЕВНИХ СВЯТЫХ ЦЕРКВЕЙ ВЕРНИИ ПОБОРНИЦЫ.
РАДУЙТЕСЯ, ЦАРЯ ЦАРЕЙ ПРИСНИИ ДРУЗИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 4

Буря искушений приразися к тебе, княже Феодоре, пребывающу ти при дворе хана агарянскаго, иже восхоте имети тя супруга дщери своея: обаче ты союза супружества христианскаго нарушити не восхотев, небоязненно от брака с неверною уклонился еси, дондеже скончася супруга твоя законная: по ея же кончине, дщерь ханскую, во Христа уверовавшую, крещением святым просветив, бракосочетася с нею, зовый ко Господу: АЛЛИЛУИА.

Икос 4

Слышавше людие ярославстии о великих добродетелех ваших, святии благовернии князе Феодоре, Давиде и Константине, зело почитаху вас, яко избранников Божиих: вы же, блажении, милостивно над ними княживше, отцы им по Бозе бысте, учители благочестия и наставницы во всех добрых делех. Сего ради доднесь подвиги ваши незабвенны во градах Смоленске и Ярославле, и воспеваются немолчными гласы сицевыми:
РАДУЙТЕСЯ, БЛАГОДЕТЕЛИ НИЩИХ И УБОГИХ.
РАДУЙТЕСЯ, ПОКРОВИТЕЛИ ВДОВ И СИРОТ.
РАДУЙТЕСЯ, НЕЛИЦЕПРИЯТНАГО СУДА РАЧИТЕЛИ.
РАДУЙТЕСЯ, МИЛОСЕРДИЯ ХРИСТОВА ПОДРАЖАТЕЛИ.
РАДУЙТЕСЯ, СУДЫ ВАША С МИЛОСТИЮ СОЕДИНИВШИИ.
РАДУЙТЕСЯ, ПРАВОСУДИЕ ХРИСТИАНСКОЕ ВОЗЛЮБИВШИИ.
РАДУЙТЕСЯ, ДОБРИИ ОРУЖНИЦЫ ВСЕВЫШНЯГО ЦАРЯ.
РАДУЙТЕСЯ, ВЕРНИИ РАБИ НЕБЕСНАГО ДОМОВЛАДЫКИ.
РАДУЙТЕСЯ, ВЕРОЮ ПРАВОСЛАВНОЮ ВООДУШЕВЛЕННИИ.
РАДУЙТЕСЯ, НАДЕЖДОЮ СПАСЕНИЯ УКРЕПЛЕНИИ.
РАДУЙТЕСЯ, ЛЮБОВИЮ БОЖЕСТВЕННОЮ ПРЕИСПОЛНЕННИИ.
РАДУЙТЕСЯ, БОГОМ И ЛЮДЬМИ ВОЗЛЮБЛЕННИИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 5

Боготечной звезде подобствовав, княже Феодоре, от хана агарянскаго отпущенный, княжити во град Ярославль пришел еси, с супругою твоею и чады Давидом и Константином, яже быша благаго древа благия отрасли, плод много Христе отечествию своему принесший, с нимиже ныне во светлостех святых водворяяся, сладце поеши святых Святейшему Христу Богу: АЛЛИЛУИА.

Икос 5

Видим вас святии благовернии князи Феодоре, Давиде и Константине, яко звезды богосветлыя, во граде Ярославли святостию и чудесы сияющих, и сиянием славы вашея озаряеми, прославляем прославльшаго вас Царя славы Христа, вам же со усердием и любовию вопием таковая:
РАДУЙТЕСЯ, БЛАЖЕННИИ И ТРИБЛАЖЕННИИ, ЦЕЛОМУДРИЕ СОХРАНИВШИИ.
РАДУЙТЕСЯ, БЛАГОВЕРНИИ И БОГОНОСНИИ, В ЗАКОНЕ ГОСПОДНИ НЕПОРОЧНО ХОДИВШИИ.
РАДУЙТЕСЯ, ЗАПОВЕДИ ХРИСТОВЫ СВЕТЕ СТЕЗЯМ ВАШИМ ИМЕВШИИ.
РАДУЙТЕСЯ, ВО ВСЕХ ОПРАВДАНИИХ ВЛАДЫЧНИХ НЕУКЛОННО ПРЕБЫВШИИ.
РАДУЙТЕСЯ, ВСЮ ЖИЗНЬ ВАШУ НА БОГОУГОЖДЕНИЕ НЕПРЕСТАННОЕ ПОСВЯТИВШИИ.
РАДУЙТЕСЯ, ДО СМЕРТИ ВЕРНОСТЬ ГОСПОДЕВИ СОБЛЮДШИИ.
РАДУЙТЕСЯ, ВО ВСЕМ ВОЛЮ БОЖИЮ ТВОРИВШИИ.
РАДУЙТЕСЯ, ИСКУШЕНИЯ И СКОРБИ МУЖЕСКИ ТЕРПЕВШИИ.
РАДУЙТЕСЯ, ВО ИСКУШЕНИИХ ПОБЕДОНОСНИИ.
РАДУЙТЕСЯ, В СКОРБЕХ НЕ УНЫВАВШИИ.
РАДУЙТЕСЯ, НА БОГА ВСЕ УПОВАНИЕ ВАШЕ ВОЗЛОЖИВШИИ.
РАДУЙТЕСЯ, ОТ БОГА В УПОВАНИИ ВАШЕМ НЕПОСРАМЛЕННИИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 6

Проповедник благочестия явился еси княже Феодоре, егда узрев приближение кончины живота твоего, княжение земное оставль, в обитель Преображения Господня удалился еси, и тамо во иночество постриженный, схиму святую на ся возложил еси, со всеми прощаяся, всех благословляя и назидая, в молитве усердной душу твою в руце Божий предал еси, яко истинный угодник Христа Бога, емуже со ангелы поеши ныне: АЛЛИЛУИА.

Икос 6

Возсиясте многими добродетельми вашими во граде Ярославли, и всю страну Российскую благодатно озаристе преславными чудесы вашими,
Феодоре, Давиде и Константине благовернии. Темже память ваша с похвалами от верных почитается, и честная имена ваша молитвенно призываются, от ближних и дальних, к вам вопиющих и глаголющих:
РАДУЙТЕСЯ, МРАК ДУШ НАШИХ ЧУДЕСЫ ВАШИМИ БЛАГОДАТНО ПРОСВЕЩАЮЩИИ.
РАДУЙТЕСЯ, НЕДУЖНЫХ БЕЗМЕЗДНИИ ВРАЧЕВЕ.
РАДУЙТЕСЯ, БОЛЬНЫХ ЦЕЛЬБОПОДАТЕЛЬНИИ ПОСЕТИТЕЛИ.
РАДУЙТЕСЯ, ТУНЕ ПРИЯВШИИ, И ТУНЕ ПОДАЮЩИИ.
РАДУЙТЕСЯ, В МИЛОСТИ К СТРАЖДУЩИМ НИКОГДАЖЕ ОСКУДЕВАЮЩИИ.
РАДУЙТЕСЯ, СОСУДИ ЗЛАТИИ МИРА МНОГОЦЕЛЕБНАГО.
РАДУЙТЕСЯ, СОКРОВИЩНИЦЫ ДРАГИЯ, НА ВСЯК НЕДУГ ВРАЧЕСТВО СОДЕРЖАЩИЯ.
РАДУЙТЕСЯ, РАДОСТИ ПЕЧАЛЬНЫМ ПОДАТЕЛИ.
РАДУЙТЕСЯ, СКОРБЯЩИХ БЛАЗИИ УТЕШИТЕЛИ.
РАДУЙТЕСЯ, БЕДСТВУЮЩИХ СКОРИИ ПОМОЩНИЦЫ.
РАДУЙТЕСЯ, ГРАДОВ СМОЛЕНСКА И ЯРОСЛАВЛЯ НЕБЕСНИИ ПОКРОВИТЕЛИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 7

Хотя во всем подражати отцу твоему преподобному, преблаженне княже Давиде, свято и богоугодно в Ярославли по нем княжил еси, и толико Богу угодил еси, яко миром и благоплодием княжение твое Господь благослови и славна тя в князех российских показа, емуже ты в преподобии и святости добре послужил еси до смерти, взывая к нему: АЛЛИЛУИА.

Икос 7

Новых вас чудотворцев яви Господь в стране российстей, святии благовернии князи Феодоре, Давиде и Константине, чудесы вашими святую православную веру крепко утвердив во граде вашем, иже светло красуется, имея вас небесных заступников и предстателей ко Господу, и с любовию к вам взывает:
РАДУЙТЕСЯ, ХЛАДНУЮ СТРАНУ ТЕПЛОТОЮ ВЕРЫ ВАШЕЯ СОГРЕВШИИ.
РАДУЙТЕСЯ, БЛАГОЧЕСТИЕ ВО ГРАДЕ ВАШЕМ ВОЗРАСТИВШИИ.
РАДУЙТЕСЯ, ДОБРИИ ДЕЛАТЕЛИ ВИНОГРАДА НЕБЕСНАГО.
РАДУЙТЕСЯ, МЗДУ ПРИЕМШИИ ОТ ХРИСТА -ЧУДОТВОРЕНИЯ ДАР.
РАДУЙТЕСЯ, ДАРЫ МИЛОСТИ ВАШЕЯ ВЕРНЫХ ОБОГАЩАЮЩИИ.
РАДУЙТЕСЯ, БОЖИЯ БЛАГОДАТИ СОСУДИ ИЗБРАННИИ.
РАДУЙТЕСЯ, СИЯЮЩИИ, ЯКО СОЛНЦЕ ВО ЦАРСТВИИ НЕБЕСНЕМ.
РАДУЙТЕСЯ, ЯКО ЗВЕЗДЫ ВСЮ РОССИЮ ЧУДЕСЫ ВАШИМИ ОСВЕЩАЮЩИИ.
РАДУЙТЕСЯ, ТРИСИЯННИИ ЛУЧИ ТРОЙЧЕСКИИ НЕСОЗДАННЫЙ СВЕТ НАМ ВОЗСИЯЮЩИИ.
РАДУЙТЕСЯ, ТРИЧИСЛЕННИИ ПОДВИЖНИЦЫ ДОБРОДЕТЕЛЕЙ ХРИСТИАНСКИХ.
РАДУЙТЕСЯ, НА ВРАГИ ВИДИМЫЯ И НЕВИДИМЫЯ НАМ ВСЕГДАШНИИ СПОБОРНИЦЫ.
РАДУЙТЕСЯ, ЦАРЯ НЕБЕСНАГО ХРИСТА ИЗВЕСТНИИ УМИЛОСТИВИТЕЛИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 8

Странника и пришельца в мире сем помышляя себе быти, благоверный княже Константине, от юности твоея девственное житие возлюбил еси, в посте и молитвах пребывая, и благоугождая Богу благоугождением всяческим, во еже быти тебе освященному сосуду Духа Святаго, всельшагося в непорочное сердце твое, и воздыхании неизглаголанными научившаго тя благоприятно пети Пресвятей Троице: АЛЛИЛУИА.

Икос 8

Весь град Ярославль радостию духовною подвижеся, егда святыя и нетленния мощи ваша, благовернии князи Феодоре, Давиде и Константине, чудес благодатию просияша во обители Преображения Господня. Тако бо благоволи Господь, да по летех мнозех, нетление ваших телес святых всем явлено будет, и чудесы многими ознаменуется, во еже всем верным вопити вам сице:
РАДУЙТЕСЯ, ВО УМЕРЩВЛЕННЫХ ТЕЛЕСЕХ ЖИЗНЬ БЛАГОДАТНУЮ ПРОЯВЛЯЮЩИИ.
РАДУЙТЕСЯ, ВО ЛЕТЕХ МНОЗЕХ НЕТЛЕННИИ В СОСТАВЕХ ВАШИХ ПРЕБЫВАЮЩИИ.
РАДУЙТЕСЯ, ВО ЕДИНОМ ГРОБЕ БЛАГОЛЕПНО МИРНО ПОЧИВАЮЩИИ.
РАДУЙТЕСЯ, ВСИ ТРИЕ ВКУПЕ ЧУДОДЕЙСТВУЮЩИИ.
РАДУЙТЕСЯ, ВО УВЕРЕНИИ СВЯТОСТИ ВАШЕЯ ЧУДЕС МНОЖЕСТВО ОТ МОЩЕЙ ВАШИХ СОТВОРИВШИИ.
РАДУЙТЕСЯ, НЕВЕРОВАВШИЕ В СВЯТОСТЬ ВАШУ ГРОЗНО ПОКАРАВШИИ.
РАДУЙТЕСЯ, СЛЕПЫМ ЗРЕНИЕ ДАРОВАВШИИ.
РАДУЙТЕСЯ, ХРОМЫМ ПРАВО ХОДИТИ УСТРОИВШИИ.
РАДУЙТЕСЯ, ГЛУХИМ СЛУХ ОТВЕРЗШИИ.
РАДУЙТЕСЯ, НЕМЫМ ЯЗЫК РАЗРЕШИВШИИ.
РАДУЙТЕСЯ, БЕСНОВАТЫХ ОТ НАСИЛИЯ ДЕМОНСКАГО СВОБОДИВШИИ.
РАДУЙТЕСЯ, РАССЛАБЛЕННЫХ БЛАГОДАТНО УКРЕПИВШИИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 9

Со всеми небожители ныне сликовствуете горе, во славе Царствия Христова, благовернии чудотворцы Феодоре, Давиде и Константине, в нейже пребывающе, помяните и нас смиренных в молитвах ваших к Триипостасному Богу, да при помощи вашей небесной, сподобимся во вся дни, достойно и праведно возглашати Ему: АЛЛИЛУИА.

Икос 9

Витийство человеческое не может восхвалити по достоянию, многая и преславная чудотворения ваша, святии благовернии чудотворцы Феодоре, Давиде и Константине. Обаче мы, любовию к вам подвизаемии, дерзаем благохвалити вас, заступников наших, сими нехитростными, но усердными словесы:
РАДУЙТЕСЯ, ДВЕ ЖЕНЫ СЛЕПЫЯ У МОЩЕЙ ВАШИХ ПРОЗРЕТИ СОТВОРИВШИИ.
РАДУЙТЕСЯ, БЕСНОВАТОГО И СЛЕПАГО МУЖА ТАМОЖДЕ ИСЦЕЛИВШИИ.
РАДУЙТЕСЯ, СЛЕПУЮ ОТРОКОВИЦУ ВИДЕТИ УСТРОИВШИИ.
РАДУЙТЕСЯ, БЕСНОВАТЫХ МУЖА И ЖЕНУ ОТ НАСИЛИЯ ДЕМОНСКАГО ИЗБАВИВШИИ.
РАДУЙТЕСЯ, ЧЕТЫРЕ НЕМОЩНЫЯ ЗЕЛО ЖЕНЫ ЗДРАВЫ ВОЗСТАВИВШИИ.
РАДУЙТЕСЯ, ИНУ ЖЕНУ, ТЕРЗАВШУЮ НЕИСТОВНО ВСЕ ТЕЛО СВОЕ, ОТ НЕДУГА СЕГО СВОБОДИВШИИ.
РАДУЙТЕСЯ, НЕВЕРОВАВШАГО В СВЯТОСТЬ ВАШУ ПРЕСВИТЕРА КОНСТАНТИНА, РАЗСЛАБЛЕНИЕМ ТЕЛА НАКАЗАВШИИ.
РАДУЙТЕСЯ, СВЯТИТЕЛЯ ТРИФОНА В ТОМЖЕ БЛАГОДАТНО ОБЛИЧИВШИИ.
РАДУЙТЕСЯ, ПОКАЯНИЕ ЕГО МИЛОСТИВНО ПРИЕМШИИ.
РАДУЙТЕСЯ, ВО ОБИТЕЛИ ВАШЕЙ ПОЧИТИ ЕМУ О ГОСПОДЕ УДОСТОИВШИИ.
РАДУЙТЕСЯ, БЛАГОВЕРНУЮ ЦАРИЦУ АНАСТАСИЮ В НЕДУЗЕ УВРАЧЕВАВШИИ.
РАДУЙТЕСЯ, БЛИЖНИМ И ДАЛЬНИМ МИЛОСТЬ МНОГОЦЕЛЕБНУЮ ПОКАЗАВШИИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 10

Спастися нам молите милостиваго Бога, чудотворцы святии и благовернии Феодоре, Давиде и Константине: к вам бо по Бозе и Пресвятей Богородице, яко присным нашим предстателем и ходатаем мы грешнии усердно прибегаем и молитвенно просим вас о еже молитися за нас к прославльшему вас Господу, да и мы сподобимся вкупе с вами на земли живых пети Ему: АЛЛИЛУИА.

Икос 10

Царя Небеснаго Христа вернии раби и угодницы, святии благовернии князи Феодоре, Давиде и Константине, покажите на нас недостойных молитв ваших благодатное действо, и якоже многих недужных уврачевали есте, с верою приходящих к святым и многоцелебным мощам вашим, тако и нас, с любовию к ним припадающих, не лишите небеснаго вашего заступления, в жизни, в смерти и по смерти, да зовем вам хвалебно:
РАДУЙТЕСЯ, ОТЕЧЕСТВИЯ ВАШЕГО ЗЕМНАГО НЕОТСТУПНИИ ХРАНИТЕЛИ.
РАДУЙТЕСЯ, К ОТЕЧЕСТВИЮ ГОРНЕМУ ВЕРНИИ НАМ РУКОВОДИТЕЛИ.
РАДУЙТЕСЯ, ИСТОЧНИЦЫ МНОГОВОДНИИ БЛАГОДАТНЫХ ИСЦЕЛЕНИИ.
РАДУЙТЕСЯ, КЛАДЕЗИ НЕИСТОЩИМИИ ВОДЫ ЖИВЫЯ.
РАДУЙТЕСЯ, ВОСКРЕСЕНИЯ ХРИСТОВА СИЛУ В ТЕЛЕСЕХ ВАШИХ НЕТЛЕННЫХ ДИВНО ПРОЯВИВШИИ.
РАДУЙТЕСЯ, ЗАРЮ ОБЩАГО ВОСКРЕСЕНИЯ НАМ ОТ РАКИ ВАШЕЯ ВОЗСИЯВАЮЩИИ.
РАДУЙТЕСЯ, РОСУ БОЖИЯ БЛАГОДАТИ В СЕРДЦА ВЕРНЫХ ОДОЖДЕВАЮЩИИ.
РАДУЙТЕСЯ, БЛАГАЯ ПРОШЕНИЯ НАША ВО БЛАГА ИСПОЛНЯЮЩИИ.
РАДУЙТЕСЯ, С ВЕРОЮ ПРОСЯЩИХ У ВАС ИСЦЕЛЕНИЯ БОЛЬНЫХ СКОРО ВРАЧУЮЩИИ.
РАДУЙТЕСЯ, ЛЮБЯЩИМ И ЧТУЩИМ ВЫ, ЛЮБОВИЮ СУГУБОЮ ВОЗДАЮЩИИ.
РАДУЙТЕСЯ, В ПРОСТОТЕ ДУШЕВНЕИ НА ПОМОЩЬ ПРИЗЫВАЮЩИХ МИЛОСТИВИИ УСЛЫШАТЕЛИ.
РАДУЙТЕСЯ, БЕЗНАДЕЖНЫХ СТРАДАЛЬЦЕВ БОЖЕСТВЕННИИ ЦЕЛИТЕЛИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 11

Пение молебное наше и похвалу сию смиренную благоутробно приимите, святии благовернии князи Феодоре, Давиде и Константине: се бо аще и многогрешнии есмы, но веруем несомненно, яко вы, святии предстатели наши, много можете пред лицем всеблагаго Бога и яко молитвы ваша святыя сильны спасти нас от погибели вечныя. Темже молим вы: не посрамите веры нашея во всесильное пред Богом ходатайство ваше, но сподобите нас молитвами вашими Царствие Небесное улучити, и со святыми возглашати Триединому Богу: АЛЛИЛУИА.

Икос 11

Светоподательнии светильницы и предивнии чудотворцы, святии благовернии князи Феодоре, Давиде и Константине, к вам от лет древних отцы наши верно приходяще, милость многу от вас получаху, их же путем и мы к вам шествуем, и припадающе к святым мощам вашим, молим и просим вы: да якоже отцем нашим, тако и нам убогим милость вашу присно являете, да благодарственно вам всегда вопием:
РАДУЙТЕСЯ, ЧАДА БЛАГОСЛОВЕННАЯ ОТЦА НЕБЕСНАГО.
РАДУЙТЕСЯ, БРАТИЯ ПО БЛАГОДАТИ ХРИСТА СЫНА БОЖИЯ.
РАДУЙТЕСЯ, СВЕТЛЫЯ ОБИТЕЛИ ДУХА СВЯТАГО.
РАДУЙТЕСЯ, ХВАЛЕБНИЦЫ ЧУДОТВОРНИИ ПРЕСВЯТЫЯ ТРОИЦЫ.
РАДУЙТЕСЯ, ВО СВЕТЕ ЛИЦА БОЖИЯ ПРИСНО ПРЕБЫВАЮЩИИ.
РАДУЙТЕСЯ, ПО БОЗЕ ВСЯ ПОТРЕБНАЯ НАМ ВЗЫСКУЮЩИИ.
РАДУЙТЕСЯ, ОТ ГОРНИХ ВЫСОТ НА ПОМОЩЬ К НАМ УСКОРЯЮЩИИ.
РАДУЙТЕСЯ, ГРЕШНИКИ К ПОКАЯНИЮ НЕВИДИМО НАПРАВЛЯЮЩИИ.
РАДУЙТЕСЯ, ОКАМЕНЕННАЯ СЕРДЦА ПРИКОСНОВЕНИЕМ К МОЩЕМ ВАШИМ УМЯГЧАЮЩИИ.
РАДУЙТЕСЯ, ПЛОДЫ ПОКАЯНИЯ ВЕРНЫМ ПРИНОСИТИ ПОМОГАЮЩИИ.
РАДУЙТЕСЯ, О СПАСЕНИИ НАШЕМ УСЕРДНО БОГА УМОЛЯЮЩИИ.
РАДУЙТЕСЯ, ВО ВСЯКОМ ДЕЛЕ БЛАЗЕ НАМ ПО ВЕРЕ НАШЕЙ ПОМОГАЮЩИИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 12

Благодать и милость от Господа испросите нам, святии князи Феодоре преподобне, Давиде и Константине преблаженнии, и в час кончины нашея предстаните в помощь нам, требующим вашего заступления, насилия диавольскаго нас избавляюще, святыми и благомощными молитвами вашими: да при помощи их безбедно прейдем трудный путь мытарств воздушных, и сподобимся в селениих святых пети Создателю нашему: АЛЛИЛУИА.

Икос 12

Поюще многая и преславная ваша чудеса, святии благовернии князи и чудотворцы Феодоре, Давиде и Константине, славим Господа, прославльшаго вас на небеси и на земли, и от любве душевныя совершающе святую и всерадостную память вашу, умильно к вам глаголем:
РАДУЙТЕСЯ, ПРЕСВЯТЫЯ ТРОИЦЫ ВЕРНИИ РАБИ.
РАДУЙТЕСЯ, ПРЕСВЯТЫЯ БОГОРОДИЦЫ ОРГАНЕ ХВАЛЕБНИИ.
РАДУЙТЕСЯ, АНГЕЛЬСКИХ ВОИНСТВ СОБЕСЕДНИЦЫ.
РАДУЙТЕСЯ, ВСЕХ СВЯТЫХ СОЖИТЕЛИ.
РАДУЙТЕСЯ, СТРАНЫ РОССИЙСКИЯ ДУХОВНАЯ ЛЕПОТО.
РАДУЙТЕСЯ, ГРАДА ЯРОСЛАВЛЯ СВЕТЛАЯ КРАСОТО.
РАДУЙТЕСЯ, КНЯЗЕЙ РОССИЙСКИХ К БЛАГОЧЕСТИЮ ПРЕДВОДИТЕЛИ.
РАДУЙТЕСЯ, КНЯЖЕНИЯ ВАШЕГО ЗЕМНАГО НЕУСЫПНИИ БЛЮСТИТЕЛИ.
РАДУЙТЕСЯ, ОБИТЕЛИ ВАШЕЯ СВЯТЫЯ ЗАБРАЛА НЕСОКРУШИМАЯ.
РАДУЙТЕСЯ, ПОДВИЗАЮЩИМСЯ В НЕЙ СПАСЕНИЯ ДУШЕВНАГО ХОДАТАИ.
РАДУЙТЕСЯ, НА ПОКЛОНЕНИЕ К МОЩЕМ ВАШИМ ПРИХОДЯЩИХ ЛЮБВЕОБИЛЬНО ПРИЕМЛЮЩИИ.
РАДУЙТЕСЯ, БЛАГОСЛОВЕНИЕ ВАШЕ СВЯТОЕ ОТ РАКИ ВАШЕЯ ВСЕМ ВЕРНЫМ ПОДАЮЩИИ.
РАДУЙТЕСЯ, СВЯТИИ БЛАГОВЕРНИИ КНЯЗИ ФЕОДОРЕ, ДАВИДЕ И КОНСТАНТИНЕ, ПРЕСЛАВНИИ ЧУДОТВОРЦЫ.

Кондак 13

О святии чудотворцы, тричисленнии Пресвятыя Троицы угодницы, благовернии князи Феодоре, Давиде и Константине, милостивно приимите сие малое моление наше, в похвалу вам приносимое, и умолите триипостаснаго Господа и Владыку нашего, избавити нас мучений вечных, грешником уготованных, и сподобити нас в покаянии Ему благоугодити, и Царствие Небесное наследовати, да с вами вопием ему во веки: АЛЛИЛУИА.

(Этот кондак читается трижды. Затем читается икос 1-й и кондак 1-й ).

МОЛИТВА
СВЯТЫМ БЛАГОВЕРНЫМ КНЯЗЬЯМ ФЕОДОРУ, ДАВИДУ И КОНСТАНТИНУ, СМОЛЕНСКИМ И ЯРОСЛАВСКИМ ЧУДОТВОРЦАМ

О велиции угодницы Божии и чудотворцы, святии и благовернии князи Феодоре, Давиде и Константине, припадающе к святым и многоцелебным мощам вашим, молим вы со смирением, верою и любовию: прострите благоприятные молитвы ваша ко Господу и Создателю нашему, и умолите Его благость, даровати нам вся нужная к житию сему временному, и потребная к вечному спасению нашему: веруем бо несомненно, яко вся возможна вам, яко истинным Его угодникам. Сего ради просим вы: испросите нам у Царя царствующих и Господа господствующих страждущую страну российскую от лютых безбожник и власти их Господь да свободит, верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Испросите престольным градом, граду нашему и всем градом российским благополучие, изобилие и от злых сохранение, всем же правоверным людем, почитающим вас, и на поклонение мощем вашим святым приходящим, милость Божию и благих прошение скорое исполнение. Ей, чудотворцы святии, не посрамите упования нашего, но молитвами вашими сотворите нас наследники быти Царствия Христова: да прославляем человеколюбие в Троице славимаго и поклоняемаго Бога, Отца и Сына, и Святаго Духа, и ваше святое заступление во веки веков. Аминь.

Тропарь, глас 4:

Измлада явистеся святи, богомудре Феодоре и блаженне Давиде с Константином славным, божественнии сосуди, избрании Богови. Ныне же источаете нам многа исцеления от честных мощей ваших, вся ереси потопляюще, и спасающе присно град свой, и всех верных сохраняюще невредимо от видимых и невидимых враг. Темже верою молим вас, святи: молите Христа Бога в мире сохранитися нам и спасти души наша.

Кондак, глас 8:

Богомудренно преселитеся, святи, во град, присно добродетельми цветущий, в жизни сей приносяще Богови плоды благи, преподобие Феодоре и блаженне Давиде с Константином славным, и явистеся, яко многоцветущая райская древеса жизни и яко многосветлыя звезды, в мире сияюще благодатию, в добродетели исправивше жизнь свою, и сего ради получисте живот вечный на Небесах. Темже благодарственно вам зовем: радуйтеся, всемирнии светильницы и градом Смоленску и Ярославлю великое утверждение.[/spoiler]

Раб божий Константин

Акафист святому великомученику Феодору Стратилату.
[spoiler]Кондак 1
Возбраному воеводе и славному во страдальцех воину, / святому великомученику Феодору,/ / приидите песнь хвалебную вкупе воспоим./ / Ты же, великомучениче, яко имея дерзновение ко Господу,/ / от всяких нас бед свободи, да зовем ти:/ /
Радуйся, святый великомучениче Феодоре, Великий Стратилате.

Икос 1
Ангелов Творец и всея твари Создатель яви тя Церкви Своей, яко страдальца доблественна и воина непобедима, да вси по достоянию страдания твоя восхвалят, страстотерпче Феодоре. Сего ради и мы, яко мученика днесь чтуще, восхваляем ти, вопиюще:
Радуйся, идольскаго служения прелесть обличивый.
Радуйся, ярость безумнаго царя языческаго презревый.
Радуйся, сего ради мучения велия и раны смертныя претерпевый.
Радуйся, яко Христос от Пилата, от Ликиния царя плотию на кресте пригвожденный.
Радуйся, от Ангела Господня паки живот и крепость дивно восприявый.
Радуйся, с радостию о Господе главу свою честную под меч преклонивый.
Радуйся, святый великомучениче Феодоре, Великий Стратилате.

Кондак 2
Зряще страдальца доблественна и воина непобедима святаго великомученика Феодора, страданьми венцы победные приявша и со ангелы сочетавшеся и чудес сокровище миру даровавша, вернии единомудренне почтим, воспевающа Богу: Аллилуиа.

Икос 2
Разум божественный стяжав, змия велия и страшна, близ Евхаитска града вогнездившася, крестом и мечем поразил еси, воине Христов, темже и стратилат, еси воевода, возставлен бе на земли. Мы же яко небесному воеводе вопием ти:
Радуйся, силою Христовою от змия того лютаго отечество свое свободивый.
Радуйся, многое народа множество ко Христу обративый.
Радуйся, оружием веры демонов полки победивый.
Радуйся, яко победоносный явился еси на земли страдалец.
Радуйся, чудес множество с верою к тебе прибегающим подаваяй.
Радуйся, Христу Богу молитися за ны милостиво не оскудневаяй.
Радуйся, святый великомучениче Феодоре, Великий Стратилате.

Кондак 3
Силою Божией умерщвлена змия Феодором Стратилатом видевше, Евхаитский град и вси людие окрестние чудяшеся зело и взываху глаголющее: «Велий есть Бог Феодоров, сей есть Бог истинный», - Емуже мы вопием: Аллилуиа.

Икос 3
Имея обычай благий нощию молитися неусыпно, Феодоре святый, видения божественнаго сподобился еси: покрову храмины, яко отверсту явшуся и свету небесному, яко огню велию, осиявшу тя; также и глас слышал еси свыше глаголющ: « Дерзай, Феодоре с тобою бо есмь». Сим познал еси, яко время прииде страдания твоего за Христа, возвеселися духом. Темже вопием ти:
Радуйся, яко славу неизглаголанную Христа Бога узрел еси.
Радуйся, яко и премирных видений зритель был еси.
Радуйся, яко и на земли небесныя собеседники имел еси.
Радуйся, великих бо Таин откровений в земной жизни сподобился еси.
Радуйся, пророческое просвещение.
Радуйся, светильниче мысленный, светом Христовым облистаемый.
Радуйся, святый великомучениче Феодоре, Великий Стратилате.

Кондак 4
Бурю мучений близящуюся разумев, сице молился еси со слезами, блажение Феодоре, Христу Богу : «Господи, Боже, всесильный, буди ми милостив и соблюди мя от прелести вражия, да не порадуются врази мои». Такоже и мы с тобою Богу вопием: Аллилуиа.

Икос 4
Слышав злочестиваго царя прельстительныя глаголы, яко да жертвы и кадилы и ароматы принесоши мерзким богам, Феодоре треблаженне, сокрушил еси я в нощь едину и, раздробив вся идолы златы и сребряны в части малы, разделил еси я сирым и убогим. Сего ради неустрашимому твоему подвигу вельми дивящеся, сице вопием:
Радуйся, премудростию словес твоих бесстуднейшаго царя посрамивый.
Радуйся, славу Бога жива и истинна пред языки проповедавый.
Радуйся, яко воистину Феодор, еже сказуется дар Божий, явился еси.
Радуйся, яко ныне со ангелы и лики мучеников блаженне радуешися.
Радуйся, яко дерзновение имеяй к Богу, от скорбей и страстей нас всех избавляеши.
Радуйся, святый великомучениче Феодоре, Великий Стратилате.

Кондак 5
Богомерзкие идолы егда яко злато и сребро обычно рассек уси рукою человеческою, безумнаго царя нечестиваго поругал еси, великомучениче, глаголя ему: «Ты кланяешися богам мертвым, аз же поклоняюся Богу Живому». Емуже с тобою и мы поклоняемся, взывающе: Аллилуиа.

Икос 5
Видев нечестивый мучитель тело твое честное на мучение предаемо, ругашеся тебе, страстотерпче. Ты же, святый, вся сия мужественно терпя, ничтоже ино глаголал еси точию: «Слава Тебе, Боже мой!» Терпению твоему дивящеся, сице вопием ти:
Радуйся, жилами воловими и прутьями оловянными беспощадно биемый.
Радуйся, многие раны к ранам имже несть числа, от мучителя претерпевый.
Радуйся, яко венцы победные тако от Христа приявый.
Радуйся, твоими ко Христу ходатайствы верные спасаяй.
Радуйся, святый великомучениче Феодоре, Великий Стратилате.

Кондак 6
Проповедник славы Христовой явился, в темницу ввержен был еси, страстотерпче Феодоре, неистовым мучителем руце и нози имеяй связана и ничесоже ядый даже до дний пяти. Ангел же свят пришед разрешити ты связана, да вопиеши Богу: Аллилуиа.

Икос 6
Виссияша почести твоя Феодоре. Якоже бо иногда Христос Господь наш от Пилата, такожде и ты, блаженнее, от Ликиния царя на кресте пропят был еси, руце и нозе имея пригвожденна. Сего ради придем вси верни песненными венцы Феодора Мученика преславного величаем глаголющее:
Радуйся, ко кресту пригвожденный.
Радуйся, стрелы острыми и гвоздием прободенный.
Радуйся, мечем усеченный.
Радуйся, всякими хитростями болезней предупрежденный.
Радуйся, яко в мучениях непреклонен и непобедим явился еси.
Радуйся, святый великомучениче Феодоре, Великий Стратилате.

Кондак 7
Хотя от земных разрешитися и на древо вшед уязвленною плотию, великомученниче Феодоре, сице молился еси ко Господу: «Помяни мя, Господи, претерпевающа крест Тебе ради». Емуже и мы с тобою вопием: Аллилуиа.

Икос 7
Нова по страдании яви Ангел Господень, Феодора мученика, в первую бо стражу нощи висящу тому на кресте сниде с небесе и снят со креста и сотвори всего цела и здрава, якоже и прежде, и лобзая рече ему: «Радуйся и укрепляйся, Феодоре, себо с тобою Господь». Сего ради и мы со безплотными купно воззовем тому глаголюще:
Радуйся, целование ангельское приемый.
Радуйся, спасительную страсть Зиждителя изобразивый.
Радуйся, во всяких нуждах предстательством твоим спасаяй.
Радуйся, всяку душегубительную печаль и обстояние отгоняй.
Радуйся, чудес множество сущим в мире подаваяй.
Радуйся, верным сердца невидимо подаваяй.
Радуйся, святый великомученниче Феодоре, Великий Стратилате.

Кондак 8
Странное о тебе содевается, блаженне Феодоре, мучитель бо злочестивый мня тя распята мертва суща, остави тело твое на кресте висяща, ты же от Ангела цел и здрав быв, начал еси пети Господеви песнь хвалебную: Аллилуиа.

Икос 8
Всего тя истребити хотяще мучитель, сего ради и сотник повеле пояти тело твое со креста и в ковчег оловян вложити и в пучину морскую ввергнути, да никако христиане е возмут и честно погребут. Сотницы же знамения многая и велия от святаго узревше, ко Христу обратившася; сего ради и мы чтуще честную мученика память сице вопием:
Радуйся, Небеснаго Царя воеводо предобрый.
Радуйся, риторе изрядный, паче мудрецов мира мудрейший.
Радуйся, вся мира сего красная ни во что же вменивый.
Радуйся, терпения совершеннейший образ всем показавый.
Радуйся, в Сионе горнем со Ангелы и святыми купно вселивыйся.
Радуйся, ходатай теплый за ны пред Богом явивыйся.
Радуйся, святый великомучениче Феодоре, Великий Стратилате.

Кондак 9
Всякая похвала подобает тебе великомучениче Феодоре, претерпев бо крест и по страдании паки цел и здрав со креста сошед, Ангелом чудесным действием, неверные сотники царския и воины многи прежде нечестивые просветил еси и научил еси веровати Христу Богу и Пети Ему купно с тобою : Аллилуиа.

Икос 9
Ветия, сказуяй славу Божию неизчетными знамении твоими, явился еси миру славо мучеников Феодоре, от тебе бо исцеление неоскудно почерпаем, вси к тебе с верою прибегающии и страсти твои воспевающии сице:
Радуйся, узники многи от уз разрешивый.
Радуйся, двери темничныя словом единым отверзаяй.
Радуйся, недужным исцеление подаваяй.
Радуйся, демоном злым одержимыя свобождаяй.
Радуйся, точию прикасающиеся ко одежде твоей абие исцеляй.
Радуйся, вместо кровных капель исцелений токи одождяяй.
Радуйся, святый великомучениче Феодоре, Великий Стратилате.

Кондак 10
Спасительную веру восприявша вси людие велия знамение твоя зрящии, треблаженне Феодоре, темже идолов мерзких отвергше, Христу прилепишася, глаголюще: «Велий бо есть Бог Феодоров, сей есть Бог истинный», - Емуже присно вопием: Аллилуиа.

Икос 10
Стену необоримую мужества твоего воине Христов, неодолев лютый мучитель, убийством на тя дышуще и крове твоея аки пес алчный жаждал, посла мечем убити тя, ты же помолився и знамением крестным знаменався, волею приклонил еси под меч главу твою. Твое усекновение чтуще сице вопием ти:
Радуйся, мечем смерть меченическую восприявый.
Радуйся, во успении своем знамения многи сотворивый.
Радуйся, веру и любовь Христову даже до смерти сохранивый.
Радуйся, яко в вышних чертозех со ангелы и святыми вселился еси.
Радуйся, яко за грешныя теплый ко Христу предстатель явился еси.
Радуйся, о душах наших непрестанный молитвениче.
Радуйся, святый великомучениче Феодоре, Великий Стратилате.

Кондак 11
Пение надгробное со свещами и кадилы воспеша людие вси, честь тебе воздающе, Феодоре, егда глава твоя честная мечем усечена бысть, темже взяше тело твое святое и в месте нарочите положивша е, последи же и в Евхаитский град принесоша, Христа Бога славяще и поюще Ему песнь: Аллилуиа.

Икос 11
Светом знамения изряднаго поразил еси нечестивыя сарацины на честный храм твой, иже в Корсате, нашедших, егда стрелою устрели образ твой, абие истече кровь в обличение тех омраченных безумием. Темже знамению сему чудящеся, верно вопием ти, чудотворче Феодоре:
Радуйся, яко безумие сарацин посрамил еси.
Радуйся, яко Церковь Божию от поругания оградил еси.
Радуйся, яко образ твой светлый чудотворен явился еси.
Радуйся, яко имя твое и в неверных прославил еси.
Радуйся, паче верные к тебе прибегати в мольбах научил еси.
Радуйся, святый великомучениче Феодоре, Великий Стратилате.

Кондак 12
Благодатным знамением невразумившеся невернии сарацины храм твой святый оскверниша и образу твоему честному поругатися мняху, обаче смерть люту по малех днех прияху, верни же вси икону твою святую, яко чудодейственну вельми чтуще взывают Богу: Аллилуиа.

Икос 12
Поют дивныя подвиги и чудеса твоя вси верни по всей земли христианстей по вся дни в неисчислимых храмах и обитателях во имя твое созданных, собирающеся и песненными венцы тя, великомучениче Феодоре Стратилате, темже и нас, память твою днесь светло празднующих, помяни и защити, да любовию зовем ти вопиюще:
Радуйся, яко мольбы грешных приемлеши.
Радуйся, яко скорби душевныя утоляеши.
Радуйся, яко страстей огонь укрощаеши.
Радуйся, яко от всякия скверны плоти и духа соблюдаеши.
Радуйся, яко от искушений лукаваго избавляеши.
Радуйся, яко молящихся у престола Вседержителя поминаеши.
Радуйся, Святый великомучениче Феодоре, Великий Стратилате.

Кондак 13
О, всехвальный и всеблаженный Стратилате, великомучениче святый Феодоре! Прими сие умиленное моление наше, и ко Престолу Небеснаго Царя Христа скоро вознеси, да предстательством твоим от всяких зол и напастей свободимся, вопиюще Богу присно: Аллилуиа.
Сей Кондак читается трижды, затем Икос 1 и Кондак 1

Молитва
О, преславный и прехвальный великомученниче святый Феодоре, великий Стратилате!
Не отрини грешных сия малыя молитвы и приношения, но яко имея дерзновение ко Всемилостивому Владыке, потщися к нам недостойным скорою твоею помощию и явися ходатай за ны теплый у Христа Бога, да не погибнем вси во грехах наших, но да сотворит с нами по великой милости Своей, да умирит мир и сохранит нас от всякаго злаго обстояния, да даст нам тихое и безмятежное житие пожити в чистоте и благочестии, и по исходе душ наших неосужденно предстати судилищу Его и деснаго стояния сподобитися, да выну поем и славим Его Всесвятое имя со Отцем и Святым Духом во веки веков. Аминь.

Молитва вторая
О святый, славный и всехвальный великомучениче Феодоре Стратилате! Молим тя пред иконою твоею святою: моли с нами и о нас, раб Божиих (имена), умоляемого от Своего благосердия Бога, да милостивно услышит нас, благостыни у Него просящих, вся наша ко спасению и житию нужна прошения да исполнит. Еще же молим тя, святый победоносче Феодоре Стратилате, разруши силы возстающих на ны врагов, видимых и невидимых. Умоли же Господа Бога, всея твари Создателя, избавити нас от вечнаго мучения, да всегда прославляем Отца и Сына и Святаго Духа и твое исповедуем предстательство, ныне и присно и во веки веков. Аминь.

Величаем тя, Святый Великомучениче Феодоре Стратилате, и чтим честная страдания твоя, яже за Христа претерпел еси.

Тропарь Великомученику Феодору Стратилату, Глас 4
Воинствословием истинным, страстотерпче, Небеснаго Царя воевода предобрый был еси, Феодоре, оружиями бо веры ополчился еси мудренно и победил еси демонов полки, и победоносный явился еси страдалец. Темже тя верою присно ублажаем.

Кондак, глас 2:
Мужеством души в веру оболкийся, и глагол Божий аки копие в руку взем, врага победил еси, мучеников превелий Феодоре, с ними Христу Богу моляся не престай о всех нас.[/spoiler]

Раб божий Константин

Праведный старец Феодор Томский



память - 20 января /2 февраля преставление

и 22 июня / 5 июля обретение мощей.
[spoiler]Акафист святому праведному Феодору Томскому

Кондак 1

Избранный чудотворче и предивный угодниче Христов, скорый помощниче и молитвенниче наш, праведне отче Феодоре! Величающе прославльшего тя Господа, похвальная восписуем ти, к раце мощей твоих притекающе. Ты же, яко имеяй дерзновение ко Господу, от всяких нас бед свободи, зовущих: Радуйся, праведне отче наш Феодоре, теплый о нас к Богу молитвенниче.

Икос 1

Ангела во плоти тя ведуще, праведна Феодора, посланна от Бога, да явит тобою в человецех образ истинного благочестия и добрых дел, чудящеся путем Его, во временном житии твоем явленным, и величие благоутробия Его прославляюще, во умилении сердечном взываем ти сице: Радуйся, невидимых врагов мужественный победителю. Радуйся, заповедей Божиих усердный исполнителю. Радуйся, добродетелей чистейшее зерцало. Радуйся, образе глубокаго смирения. Радуйся, ревностный исполнителю Божия хотения. Радуйся, душ немощных исцеление. Радуйся, яко тобою поучахуся непрелестным путем спасения ходити. Радуйся, яко твоим за ны ходатайством надеемся спасения получити. Радуйся, праведне отче наш Феодоре, теплый о нас к Богу молитвенниче.

Кондак 2

Видя Богопромыслитель Господь души твоей доброту, направи помысл твой ко исканию единаго на потребу. Ты же, сего возжелав, навыкл еси непрестанно взывати к Богу: Аллилуия.

Икос 2

Разум богопросвещен имея, уразумел еси, всехвальне, по словеси апостольскому, яко нужнейши всего есть благочестие, имже и потщался еси обогатити душу твою, в молитвах и научении словеси Божию всеусердно пребывая. Того ради людие ублажаху тя сице: Радуйся, сокровище Божественных разумений. Радуйся, научивыйся исполнению Божественных хотений. Радуйся, реко, наводненная водою Божия благодати. Радуйся, разумения Божественных писаний сподобивыйся прияти. Радуйся, вождю по источникам спасения. Радуйся, желающим независтно преподавый воды нетления. Радуйся, победе в мысленной брани научивый. Радуйся, вся козни вражия упразднивый. Радуйся, праведне отче наш Феодоре, теплый о нас к Богу молитвенниче.

Кондак 3

Сила Вышняго в чистое твое непорочное вселишеся сердце, праведне Феодоре, тако всего тебе Божию любовию разжже, яко всех земных и временных удалятися, вечных же и нескончаемых выну искати тебе научи и вразуми. Тем таковое твое о спасении души зряще тщание и усердие, умильно Всевышнему Богу поем: Аллилуия.

Икос 3

Имеяй в себе возносяще тя смиренномудрие, востек еси добродетелей на высоту, благоразумия крилами украшаем; легко прелетел еси вся вражия сети, тем и в Небесный чертог со славою вшел еси, мудре; мы же, дивящеся высоте твоего добродетельнаго жительства, умильно вопием ти сице: Радуйся, истинный подражателю Христова смирения. Радуйся, сим достигнувый вечнаго упокоения. Радуйся, смиренномудрием и благоразумием воскриленный. Радуйся, смирением и любовию в Небесная вознесенный. Радуйся, окружением смирения и щитом терпения себе водруживый. Радуйся, возношаху смиренныя во смирении духа послуживый. Радуйся, смирившемуся нас ради Христу усердно подражавый. Радуйся, кротостию и смирением сокрушивый вражия вся сети. Радуйся, праведне отче наш Феодоре, теплый о нас к Богу молитвенниче.

Кондак 4

Бури жития мира сего, присно внутренними и внешними злострадании волнующияся, праведне отче Феодоре, избавився, пришел еси во пристанище немятежное небесное, на места злачна и прохладна, иде же потоцы сладости неисповедимыя, ища славы Божия нетленныя, песни и гласы празднующих. Тамо почиваеши и веселишися, со всеми Ангельскими силами поя Богу: Аллилуия.

Икос 4

Слышав апостола глаголюща: «наше житие на небесах есть» и, хотя е наследовати, маловременное сие житие не во угождении плоти и работе страстей иждил еси, Феодоре, но во очищении души от скверн греховных, с нимиже никтоже может внити в Царство Небесное. Темже имуще тя во образ богоугодного жития и помощника в сем, взываем сице: Радуйся, Божия заповеди опасно сохранивый. Радуйся, и последующих тебе хранению оных научивый. Радуйся, отеческие спасительныя предания совершивый. Радуйся, научивый нас сим последовати верно. Радуйся, в Небесных селениях с ликом оных сопричтенный. Радуйся, по преставлении твоем дарованием чудес озаренный. Радуйся, яко тобою приемлем телесных болезней исцеление. Радуйся, яко твоим за ны ходатайством уповаем прияти грехов прощение. Радуйся, праведне отче наш Феодоре, теплый о нас к Богу молитвенниче.

Кондак 5

Светозарную тя звезду, в земле Сибирской просиявшую, видяще, радуемся и, тою зарею привлекаеми, стекшеся, усердно твою память совершаем, праведне, светло торжествующе и Богу благодарственно воспевающе: Аллилуия.

Икос 5

Видев праведный Феодоре, яко в мире сем всяческая суета и тлению причастна, потщася вседушно Превечному Богу благоугодити, и воистину не вотще потрудися: премени бо тленная на нетленная, наипаче же предстояния сподобися у страшного Престола Владычня в славе вечней, тем же вопием ти сице: Радуйся, яко идеже Христос в телеси, таможде и ты пребываеши. Радуйся, тамо, яко в зерцале, в Бозе вся ему любезная созерцаеши. Радуйся, яко, созерцая в нем молящихся ти о помощи, молитвою твоею им полезная ходатайствующе. Радуйся, скорый помощниче призывающих тя в бранех православным. Радуйся, немощей телесных и душевных немздоприемный исцелителю. Радуйся, многая чудесы благодати Духа Святаго содеваяй. Радуйся, розго Христа лозы истинныя, мног плод в пособие православным творящая. Радуйся, благий рабе и верный, и бодрый делателю винограда Христова. Радуйся, праведне отче наш Феодоре, теплый о нас к Богу молитвенниче.

Кондак 6

Постом и молитвою плоть твою духови поработил еси и во славу Божию, духовне, пожил еси: сего ради ныне предстоиши Престолу Пресвятыя Троицы, выну воспеваем песнь: Аллилуия.

Икос 6

Возсиял еси, праведне отче Феодоре, яко новый тайновидец, отнележе смирением и молитвою со слезами благодать Святаго Духа паки стяжал еси, от нея же любви неизреченныя исполнися сердце твое. Мы же, имуща тя молитвенника пред Богом неусыпна, с умилением зовем: Радуйся, Богу житием твоим угодивый. Радуйся, сего ради от Него прославление приявый. Радуйся, тщету и прелесть мира сего презревый. Радуйся, мзду Небесную восприявый. Радуйся, яко о мале верен явился еси. Радуйся, яко обилие благодати Божией прияти сподобился еси. Радуйся, чудотворче предивный. Радуйся, притекающим к тебе с верою скорую помощь подаваяй. Радуйся, праведне отче наш Феодоре, теплый о нас к Богу молитвенниче.

Кондак 7

Ходатай пред Господом за всех явился еси, праведне Феодоре. Сего ради и мы прибегаем под кров твой, ищущи спасения, вси бо помощника тебе имамы во всех нуждах и во вся годины бед и искушений. Сего ради благодарственно вопием Богу: Аллилуия.

Икос 7

Новую показа милость рабом Своим Человеколюбец Господь, егда благоволи прославити тя и явити в тебе благодать Свою чудотворящу. Мы же таковому промышлению Божию радующеся, благодарне вопием: Радуйся, чудодействий преславных совершителю. Радуйся, Божия благоволения к людям исполнителю. Радуйся, премудростию свыше одаренный. Радуйся, благодатию Святаго Духа озаренный. Радуйся, яко тебе призывающия быстро предваряеши. Радуйся, яко любящих тя от различных бед и напастей изымаеши. Радуйся, вместилище благодати Божией. Радуйся, сосуде Божий избранный. Радуйся, праведне отче наш Феодоре, теплый о нас к Богу молитвенниче.

Кондак 8

Странное и преславное чудо видяще, Тобою совершаемое отче наш Феодоре пребогате, молим тя: моли тобою чудодействующаго Бога, да и мы устранимся мира суетнаго и прелестнаго, возможем безбедно житейскую преплыти пучину и в тихое пристанище спасения достигнути ходатайством твоим, во веки благодарственно воспевающе: Аллилуия.

Икос 8

Весь был еси любве Божественныя исполнен, о всеблаженне, никакоже отступления к люблению плоти и мира, но, яко безплотен целомудренно и преподобно твою жизнь совершил еси, от Бога творяще преславная чудеса. Приими убо от усердия нашего приносимыя тебе хвалы сия: Радуйся, Божественныя любве пространное вместилище. Радуйся, Святыя Троицы жилище. Радуйся, мысленных врагов крепкий и мужественный победителю. Радуйся, тебе на помощь призывающия к побеждению сих победителю. Радуйся, гражданине пустынный. Радуйся, в терпении крепкий и дивный. Радуйся, яко со всеми святыми наслаждаешися вечнаго веселия. Радуйся, яко с ними радостно наследуеши Небесных селений. Радуйся, праведне отче наш Феодоре, теплый о нас к Богу молитвенниче.

Кондак 9

Всякое естество Ангельское удивися великому свыше тебе дарованию, яко на земли невещественное житие показал еси, и во плоти, аки безплотен, явился еси. Сего ради многих чудес творения от Господа приим чистою и боголюбезною душею твоею, Того благостию к Небесным причтен еси силам, в Небесех ныне поеши всесильному Богу: Аллилуия.

Икос 9

Вития многовещанныя недоумеют достойно славити тя, достойный всякия славы, славне отче Феодоре, ибо пачеестественная многая преславная чудодействия показал еси. мы же, любовию понуждаеми, дерзаем пети тебе сице: Радуйся, земный ангеле и небесный человече. Радуйся, во плоти живый духовно, на земли небесно. Радуйся, в человечестве пребываяй ангельски, в мире премирно. Радуйся, душевными твоими очима выну Господа созерцавый. Радуйся, пред лицем Божиим, яко раб пред Господем ходивый. Радуйся, пред Оным, яко сын пред Отцем, яко ученик пред Учителем шествовавый. Радуйся, во вся дни живота твоего Его искавый и в Нем намерение полагавый. Радуйся, ничесоже на Небеси и на земли, разве Христа Иисуса, видети желавый. Радуйся, праведне отче наш Феодоре, теплый о нас к Богу молитвенниче.

Кондак 10

Спасительного твоего подвига, праведне, достиг скончания, на молитву святую душу твою в руце Божии предал еси, юже Ангели Святии вознесоша Горе ко Престолу Вседержителя, да со всеми святыми предстоиши во славе невечерней, воспевая песнь хвалебную святых Святейшему Слову: Аллилуия.

Икос 10

Стена еси человеком, к заступлению твоему прибегающим, праведне отче Феодоре. Темже и нам к тебе приходящим и милостиваго твоего во всех нуждах заступления у Царя Небеснаго просящим, буди стена крепкая и ограждение непреоборимое, от всяких нас бед и напастей застеняя и ограждая, за еже мы вопием ти таковая: Радуйся, столпе терпения. Радуйся, образе мужественнаго борения. Радуйся, храбрый воин ополчения Христова. Радуйся, гражданин Небеснаго Иерусалима новаго. Радуйся, на земли сеявый умиления слезами. Радуйся, на Небесех питаяся вечнаго утешения плодами. Радуйся, в непрестанных молитвах бодрствовавый. Радуйся, ум горе к Богу вознесен всегда имевый. Радуйся, праведне отче наш Феодоре, теплый о нас к Богу молитвенниче.

Кондак 11

Пение немолчное даже до днесь совершается у святыя раки твоей, угодниче Божий Феодоре: мнози бо, в нуждах сущии, ведят тя помощника благопоспешлива и молитвенника благоветлива. Темже ныне вся Сибирская земля благодарне вопиет прославльшему тя Богу: Аллилуия.

Икос 11

Светильник светозарен был еси в земнем житии твоем, отче наш Феодоре, благодатию озаряя души верных. Просвети убо молитвами твоими очи душевная и нам, в пучине греха погибающих, да благодарно вопием ти: Радуйся, облаче дождеросное, слезные токи изливающее. Радуйся, молниями благодати тя любящих озаряющее. Радуйся, тихообразно во смирении и кротости твою жизнь совершивый. Радуйся, христоподражательныя кротости образ всем бывый. Радуйся, из под спуда пустыннаго ясно светиши зарями чудес. Радуйся, яко глубиною смирения вознеслся еси превыше небес. Радуйся, по преставлении твоем чудесы возсиявий. Радуйся, сим высоту смирения жительства показавый. Радуйся, праведне отче наш Феодоре, теплый о нас к Богу молитвенниче.

Кондак 12

Благодать от Бога ти данную ведяще, ныне прилежно молим тя, праведне Феодоре: пролей теплую о нас молитву ко Господу, да сохранит Церковь Свою Святую неврежденну от ересей и расколов и вся православныя да помилует и спасет, вопиющия Ему: Аллилуия.

Икос 12

Поюще твое Богоугодное житие, отче Феодоре, и на Небеси от Бога прославление, величаем безчисленная чудеса и исцеления твоя, и на неусыпныя молитвы твоя уповающе, взываем ти сицевая: Радуйся, подвигов постнических добре совершивый течение. Радуйся, прерадованное наследивый райское селение. Радуйся, блистанием добродетелей на земли светло сиявый. Радуйся, многим твоим трудом на Небесе возмездие приявый. Радуйся, яко тобою различных искушений избегаем. Радуйся, яко о нас к Богу предстательством твоим в различных бедах скорейшую помощь обретаем. Радуйся, здравия телеснаго подателю. Радуйся, душевнаго спасения ходатаю. Радуйся, праведне отче наш Феодоре, теплый о нас к Богу молитвенниче.

Кондак 13

О праведне отче наш Феодоре, призри на нас, немощных, во многая согрешения во вся дни впадающих, и богоприятным твоим ходатайством избави нас от всякаго искушения противника и страх Божий всели в сердца наша, да в добродетели и во смирении поживше сподобимся и со всеми в радости нескончаемой воспоем: Аллилуия, Аллилуия, Аллилуия.



(Этот кондак читается трижды, затем икос 1 и кондак 1)



Молитва святому праведному Феодору Томскому

О праведне отче наш Феодоре! Приими сию похвальную песнь, тебе с любовию и верою приносимую, и милостивно приклонися с Небесных высот, яко отец чадолюбивый, ходатайствуй верою и любовию тя почитающим грехов прощение, жития исправление, кончину христианскую мирну и ненаветну от духов злобы. И предстани тогда, о отче, прогоняя страх смертный от верных твоих рабов и чтителей твоея священнейшия памяти, безбедно творя разлучение души от тела и лютых мытарств прехождение сильных твоим ко Господу молением и предстательством, благодатию, щедротами и человеколюбием Господа и Бога и Спаса нашего Иисуса Христа и Его Пресвятейшия Матери, и твоим милостивным о нас ходатайством. Надеемся вся сия прощения получити и в день Страшного Суда десного стояния получити со всеми угодившими Богу. Аминь.



Тропарь святому праведному Феодору Томскому, глас 4

Жизни светския праведне Феодоре удалився, в землю сибирскую вольно приити изволив, чудесы и знаменьми Божиими народ Томский удивил еси, и по смерти своей веру чтущих тя укрепляеши. Поминай нас, чтущих память твою, отче наш Феодоре![/spoiler]

Раб божий Константин

Преподобный Феодосий Печерский

Дни памяти - 3 мая , 11 августа, 28 августа, 2 сентября

( по ст. стилю).
[spoiler]Кондак 1

Избранный от Царя Сил Господа Иисуса, и от юности твоея призванный во иночество, общаго в Руси жития первоначальниче, и великий чудотворче, преподобне отче наш Феодосие, умоли Господа Бога, от всяких бед и греховных страстей избавити ны, зовущия ти: Радуйся, Феодосие, иноческаго устава в Руси учредителю.

Икос 1

Ангел земный и человек небесный был еси, преподобне отче Феодосие, и яко звезда утренняя возсиял еси на тверди Русския Церкве, прогоняя всяку тму греховную, светозарным твоим житием и учением, и приводя к свету Христову многия люди. Темже приими от рас благохваления сицевая: Радуйся, града Васильева святое порождение; Радуйся, града Курска доброе воспитание. Радуйся, от младых лет Христа премного возлюбивый; Радуйся, Его ради уже железное на теле твоем в юности носивый. Радуйся, усердно приметавыйся ко храму Господню; Радуйся, служивый Церкви Божией от трудов твоих праведных. Радуйся, сиротствовавый от отца плотскаго, и в сыновство причтенный Отцу Небесному; Радуйся, многия скорби и биения от матере твоея, любве ради Божией претерпевый. Радуйся, мученик самопроизволен бывай; Радуйся, светлость сана временнаго нивочтоже вменивый. Радуйся, рукама твоима хлебы предложения для олтаря Господня уготовлявый; Радуйся, душу твою в хлеб чистый, Пресвятей Троице принесый. Радуйся, Феодосие, иноческаго устава в Руси учредителю.

Кондак 2

Видевши матерь твоя, отче Феодосие, яко презирал еси вся дольная, и о горних выну помышлял еси в юности твоей, гневашеся на тя зело, и тщашася тя от служения Господеви отвратити, ово молением, ово прещением и ранами; обаче ничтоже успе, укрепляющу тя Господу, Егоже ради биения и поношения от матере твоея радостно терпел еси, и Емуже во дни и нощи воспевал еси ангельскую песнь: Аллилуиа.

Икос 2

Разумев добре, яко в суете мира живя, неудобно обрести спасение, преподобне отче Феодосие, во град Иерусалим удалитися возжелал еси, да поклонишися тамо гробу Господню, и подвиги духовными достигнеши Иерусалима небеснаго; обаче воспящен от матери твоея, паки во граде Отечествия твоего обитати принужден был еси. Поминая таковую твою ревность о спасении душевнем, вопием ти: Радуйся, паче родившия тя плотию, Господа возлюбивый; Радуйся, матернею любовию неуловлен пребывый. Радуйся, служити миру отрекийся; Радуйся, работати Единому Богу возжелевый. Радуйся, ризы нищетныя носивый; Радуйся, в просфоропечении неленостно трудивыйся. Радуйся, в храм Божий на молитву усердно приходивый; Радуйся, молитву непрестанную возлюбивый. Радуйся, в мире не любя мирскаго поживый; Радуйся, яко Ангел Божий в дому матере твоея пребывавый. Радуйся, ко Господу очи сердца твоего возводивый; Радуйся, свободити тя плена греховнаго Бога усердно просивый. Радуйся, Феодосие, иноческаго устава в Руси учредителю.

Кондак 3

Сила Божия укрепи тя, отче Феодосие, на подвиги духовныя, и Богу помогаюшу ти изшел еси тайно от дома матере твоея, и притекл еси к доброму пастырю, преподобному Антонию, во граде Киеве в пешере обитавшему, умоляя его, да причтет тя к словесному своему стаду. Тойже провидев душевную твою доброту, прият тя с любовию, и повеле преподобному Никону облещи тя во святый ангельский образ, да поеши с ними Богу: Аллилуиа.

Икос 3

Имея любовь велию ко Христу, преподобне отче, любовию о Христе прилепился еси к преподобному Антонию, и взирая на святое и богоугодное житие его в пещере, тщался еси во всем подражати, и вся словеса его слагал еси в сердце твоем. Сего ради ублажаем тя звании сими: Радуйся, град Отечестия твоего, и дом матере твоея Христа ради оставивый; Радуйся, в путь душеспасительный радостно потекий. Радуйся, во граде Киеве пажить духовную обретый; Радуйся, в пещере преподобнаго Антония пристанище спасения получивый. Радуйся, во ангельский чин руками преподобнаго Никона облеченный; Радуйся, с пострижением власов главы твоея, все плотское мудрование совершенно отложивый. Радуйся, в ризу смирения одеянный; Радуйся, в сандалии послушания обувенный. Радуйся, куколь незлобия на ся возложивый; Радуйся, аналав Божия зашищения восприявый. Радуйся, меч духовный в руце твоей выну имевый; Радуйся, именем Иисусовым враги невидимыя отражавый. Радуйся, Феодосие, иноческаго устава в Руси учредителю.

Кондак 4

Бури житейския избежав, отче преподобне, в благоотишии пещернем богоугодно подвизался еси, преподобным Антонием наставляем на всяку добродетель, матере же твоея плачем не умолен был еси в мир возвратитися, но молитвою твоею ко Господу, и матерь твою ко иночеству привел еси, зовый Богу, умягчившему сердце ея: Аллилуиа.

Икос 4

Слышав поучения душеспасительная преподобнаго Антония, отце Феодосие, благоговейно внимал еси его глаголом и самым делом исполнял еси того словеса, яже ко спасению и благоугождению приведоша тя, и был еси благий ученик благаго учителя, достойный воистинну ублажений таковых: Радуйся, во смирении преуспевый; Радуйся, в молитвах во дни и в нощи пребывавый. Радуйся, послушания зерцало; Радуйся, трудолюбия правило. Радуйся, подвигами духовными плоть твою духу покоривый; Радуйся, нощи без сна провождавый. Радуйся, рукама твоима волну прявый; Радуйся, устами твоими псалмы воспевавый. Радуйся, в Церковь Божию прежде всех на молитву приходивый; Радуйся, неподвижно и благоумиленно в ней стоявый. Радуйся, тыготы братии твоих любвеобильно носивый; Радуйся, труды рукоделий за них исполнявый. Радуйся, Феодосие, иноческаго устава в Руси учредителю.

Кондак 5

Боготечно шествовал еси от силы в силу, преподобне отче, и яко достойный сосуд Божия благодати, во иерея освящен был еси, и игуменом поставлен был еси пещерней братии, избранием тоя, и благословением преподобнаго Антония, с нимже вкупе ревностно подвизался еси о спасении душ человеческих, и ныне сладце поеши в Горних Обителех Триипостасному Богу: Аллилуиа.

Икос 5

Видим тя, преподобне отче наш Феодосие, ревностно трудившагося в созидании обители Печерския, и устав общаго жития в ней утвердившаго богомудренно, иже бысть потом образ всем общаго жития обителем русским; темже киновиарх русский именуешися от верных, зовущих ти: Радуйся, преподобне, богомудрием высоким преисполненный; Радуйся, богоносне, дарами Духа Святаго преукрашенный. Радуйся, царя псалмопевца словеса о купножитии братском возлюбивый; Радуйся, общежительный устав в обители Печерстей учредивый. Радуйся, первый основателю киновий русских; Радуйся, великий ревнителю иноческаго общаго жития. Радуйся, вся обща имети братии законоположивый; Радуйся, общежительная правила сам во всем верно исполнявый. Радуйся, воду носяй и дрова секий в твоем настоятельстве; Радуйся, трудолюбию поучавый примером твоим всю братию. Радуйся, нищия питавый и странники упокоевавый; Радуйся, странноприимницу и больницу в обители твоей устроивый. Радуйся, Феодосие, иноческаго устава в Руси учредителю.

Кондак 6

Проповедник боговещанный был еси, отче Феодосие, не токмо инокам, но и людем мирским, князем и боляром, и всех поучал еси неленостно добродетелем христианским, братолюбию, кротости, воздержанию и чистоте. Молим тя, преподобне, предстательством твоим небесным испроси и нам сии боголюбезныя добродетели, да не поработимся страстем греховным, но благочестно да поем Богу Спасителю нашему: Аллилуиа.

Икос 6

Возсиял еси яко звезда богосветлая в стране русской, преподобне отче, и многия человеки привел еси в ограду небесную учением твоим святым; ты бо не токмо учил еси, но и творил еси всяку добродетель, непогрешительно исполняя вся заповеди Христа Бога. Темже яко сотворившаго, и научившаго, восхваляем тя сице: Радуйся, светлостию жития твоего сиявый миру; Радуйся, ученьми твоими назидавый во спасение многия человеки. Радуйся, пастырю добрый, чуждый лицеприятия; Радуйся, наставниче богомудрый, преисполненный любве ко всем ближним. Радуйся, сильным мира правду Божию небоязненно возвещавый; Радуйся, князем и вельможам ко благочестию советник бывый. Радуйся, неверныя иудеи уверовати во Христа увещававый; Радуйся, милостыню многу нишей братии подававый. Радуйся, с плакавшими плакавый; Радуйся, скорбящия утешавый. Радуйся, вдов и сирот заступниче; Радуйся, обидимых и гонимых защитниче. Радуйся, Феодосие, иноческаго устава в Руси учредителю.

Кондак 7

Хотя Господь явити людем, яко обитель Печерская, тобою управляемая, преподобне отче Феодосие, хранима есть Его благодатию Божественною, свет пречуден в нощи над нею возсия, татем же окрасти церковь в ней хотевшим, церковь ту от земли на воздух вознесенную, дивно показа, и пение ангельское в ней слышано быти сотвори; да вси уведать, яко велик еси угодник Божий, и яко много может молитва твоя Господу, Емуже воспевал еси: Аллилуиа.

Икос 7

Новаго тя Феодосия киновиарха яви Господь в стране Русской, преподобне отче, и тобою Лавру Печерскую, матерь обителей русских, в нейже от лет древних подвижничество иноческое процвете, и мнози преподобнии Богу благоугодиша, посреде киих ты, яко луна полная, светом добродетелей и чудес твоих немерцаемо сияеши, и всех подвзаеши звати тебе: Радуйся, ангелонравный человече; Радуйся, дивный о Господе подвижниче. Радуйся, великий чудотворче; Радуйся, благомощный молитвенниче. Радуйся, злато таинственно от Ангела получивый; Радуйся, тем златом брашно гладной братии твоей купивый. Радуйся, оскудение вина и елея в обители твоей чудесно восполнивый; Радуйся, праздную житницу полну мукою явивый. Радуйся, тощий сосуд меда преизливающимся показавый; Радуйся, чудеса преславна в житии твоем совершивый. Радуйся, Бога прославивый подвиги твоими. Радуйся, Богом прославленный благодатными дары. Радуйся, Феодосие, иноческаго устава в Руси учредителю.

Кондак 8

Странноприимсто Авраамле возлюбил еси, отче Феодосие, в темнице заключенным хлебы посылал еси любвеобильно, поминая словеса Христова, яко в лице странных, и в темнице седящих, сам Христос благотворения приемлет. Научи и нас, угодниче Божий, тебе в сем подражати, и милостынею Богу угождати, да возможем благоприятно пети Ему: Аллилуиа.

Икос 8

Весь на служение Богу и ближним твоим себе вдал еси, Феодосие отче наш, и добре пасл еси Богом врученное тебе словесное стадо, немощныя укрепляя, падшия возставляя, добре стоящия охраняя, и бдя на страже моливенней, да не похитит враг невидимый едину от твоих овец. Осем тя хвалим и зовем: Радуйся, велию власть на духи нечистыя от Господа получивый; Радуйся, храмину стужаемую привидении диавольскими молитвою твоею очистивый. Радуйся, многия бесноватыя, от мучительства демонскаго свободивый; Радуйся, вся привидения и искушения сатанинския победивый. Радуйся, ученики твоя от сетей невидимаго врага молитвою твоею соблюдавый; Радуйся, искушенный на мнозе, искушаемым помогавый. Радуйся, человече Божий, грады и веси исполнивый славою твоих подвигов; Радуйся, нестяжания рачителю, никогдаже помышлявый о потребах грядущаго дне. Радуйся, верою крепкою на Бога уповавый; Радуйся, по вере твой вся нужная от Бога изобильно получивый. Радуйся, благодарение Господеви выну о всех дарех его возносимый; Радуйся, от малодушнаго ропота братию твою бодренно охранявый. Радуйся, Феодосие, иноческаго устава в Руси учредителю.

Кондак 9

Всем требующим помощи твоея усердно благотворил еси, преподобне отче, и зело милосердствовал еси о нищих и убогих, яко быти тебе воистинну оком слепых, ногою хромых, рукою безпомощных, и никтоже отхождаше от лица твоего неутешенным. Призри и на нас, угодниче Божий, благосердием твоим, и от ран греховных исцеление нам подаждь молитвами твоими, да благодарственно поем Богу: Аллилуиа.

Икос 9

Витии суемудренныя посрамишася житием твоим, Феодосие богомудре, глаголющия буйство быти подвижничество духовное; се бо видим тя во плоти небеснопожившаго, и ангельския нравы на земли стяжавшаго. Темже чудяшеся твоей ангелоподобней святости, ублажаем тя благохвалении сими: Радуйся, звездо утренняя, тму нечестия в стране Русской разгнавшая; Радуйся, забрало крепкое от враг видимых и невидимых. Радуйся, столпе утверждения святыя православныя веры; Радуйся, боголепное украшение Христовы Церкве. Радуйся, Отечестия твоего земнаго покровителю небесный; Радуйся, пути спасительнаго указателю нелестный. Радуйся, воеводо изрядный полка воинов духовных; Радуйся, ратоборче доблий, победивый демонския полки. Радуйся, общения удостоивыйся со Ангелы; Радуйся, Христу усердно благоугождавый. Радуйся, милосердия Христова подражателю; Радуйся, даров духовных добрейший подателю. Радуйся, Феодосие, иноческаго устава в Руси учредителю.

Кондак 10

Спасительное пристанище, и храм Господа Славы, Великую небеси подобную церковь Печерскую, по мнозех знамениих и чудесех основал еси, преподобне отче Феодосие, и сам рукама твоима помогал еси каменоздателем ея, выну моляся ко Господу и Пресвятей Богородице: да будет сия церковь изрядное жилище Божия благодати, и да услышит в ней Господь молитвы люде своих, с верою вопиющих Ему: Аллилуиа.

Икос 10

Царя Небеснаго, Христа, верный раб еси, Феодосие богоносне, и Царице Небесный, в видении дивнем во Влахернстей церкви таинственно предстоял еси, вкупе с преподобным Антонием, егда она каменоздатели в Киев посылаше, созидати Великую Печерскую церковь, и Божественную икону Своего Успения им подаде, в благословение всегдашнее твоея обители, в нейже почитаешися звании сими: Радуйся, здателю Великая Печерския церкве; Радуйся, основавый ю на месте, освященнем многими чудесы. Радуйся, слезами молитвенными основание ея оросивый; Радуйся, рукама твоима краеугольныя камни ея положивый. Радуйся, изрядный слуго Божия Матери; Радуйся, дивную икону Ея Успения радостно приявый. Радуйся, икону сию благодатную, с честию великою в обитель твоей поставивый; Радуйся, молитвы усердныя пред нею приносивый. Радуйся, благоволением Богоматере осененный; Радуйся, откровений божественных от Нея удостоенный. Радуйся, избранниче Сына Ея Христа Бога; Радуйся, таинниче Пресвятыя Троицы. Радуйся, Феодосие, иноческаго устава в Руси учредителю.

Кондак 11

Пение немолчное приносил еси в триех Лицах Единому Богу, преподобне отче Феодосие, и до конца жития твоего не преставал еси молитвенно славословити Господа; и тако в молитве усердней предал еси в руце его душу твою, юже Ангелы святии со славою вознесоша в обители горния, идеже воздворился еси со угодники Божиими, и радостно поеши Ангелов и человеков Творцу: Аллилуиа.

Икос 11

Светом небесным озарися лице твое, преподобне отче, блаженно почил еси сном смерти, и со слезами многими провождаем был еси ко гробу от твоих братий и чад, плакавших и рыдавших о твоем с ними разлучении. Мы же аки нагробную песнь, приносим ти благохваления таковая: Радуйся, праведно и богоугодно течение земное совершивый; Радуйся, венец нетленен от руки Христа получивый. Радуйся, яко память твоя с похвалами во святей Церкви почитается; Радуйся, яко успение твое от верных светло торжествуется. Радуйся, смерть вкусивый, но тления не познавый; Радуйся, светлостию лица твоего славу твою небесную проявивый. Радуйся, в пещере со слезами многими от братии твоея погребенный; Радуйся, по осминадесяти летех нетленен токожде обретенный. Радуйся, в Великую Печерскую церковь со славою пренесенный; Радуйся, светом небесным в пренесении мощей твоих дивно возсиявый. Радуйся, три дуги светозарныя, от пещеры к Велицей Печерстей церкви протяженныя показавый; Радуйся, благоухания дивное от мощей твоих испустивый. Радуйся, Феодосие, иноческаго устава в Руси учредителю.

Кондак 12

Благодати Божией причастна показася священная рака мощей твоих, преподобне отче наш Феодосие: исцеления бо недужным источает, и всяку язю в людех врачует, иже с верою и любовию к ней притекают, молитвенно призывая твое святое имя. Темже поклоняемся месту посмертнаго твоего покоя, и лобызая на нем святолепное изображение лица твоего, хвалебно вопием Богу, Дивному во святых Своих: Аллилуиа.

Икос 12

Поюще подвиги и чудеса твоя, преподобне отче Феодосие, молимтися прилежно: молися с нами и о нас к Всемилостивому и Человеколюбцу Богу, да не оскудеет в нас вера святоотеческая, в нейже преуспел еси духовно, но да будем и мы подражатели тебе в правой вере и добрых делах, и тако возможем неосужденно вопити тебе: Радуйся, пречудное украшение святыя великия небеси подобныя Печерския церкве; Радуйся, храм Богоматере удобривый преславными твоими чудесы. Радуйся, гроб твой святый златом и сребром чудотворно украсивый; Радуйся, исцелений множество от него источивый. Радуйся, болящих целителю; Радуйся, скорбящих утешителю. Радуйся, бедствующим на помощь ускоряяй; Радуйся, всем чтущим тя заступление твое даруяй. Радуйся, в час смертный всем нам благонадеждный помощниче; Радуйся, от насилия диавольскаго многомощный нам защитниче. Радуйся, Лавры Печерския крепкое ограждение; Радуйся, по Бозе и Богородице непостыдное наше упование. Радуйся, Феодосие, иноческаго устава в Руси учредителю.

Кондак 13

О великий чудотворче, и в бедах скорый помощниче, преподобне отче наш Феодосие! Услыши милостиво сие малое моление наше, в похвалу тебе приносимое с верою и любовию, и помолися ко Господу Богу, да избавит нас от всех бед и зол, мучений вечных, и сподобит вкупе с тобою во царствии небеснем пети Ему: Аллилуиа, Аллилуиа, Аллилуиа.

(Этот кондак читается трижды, затем икос 1 и кондак 1)



Молита преподобному и богоносному отцу нашему Феодосию, игумену Печерскому чудотворцу

О священная главо, Ангеле земный и человече небесный, преподобне и богоносне отче наш Феодосие, изрядный слуго Пресвятыя Богородицы, во имя Ея святое обитель пречудну на горах Печерских соорудивый, и в ней чудес множеством просиявый! Молим тя со усердием многим: молися за нас ко Господу Богу, и испроси нам от него великая и богатыя милости: веру праву, надежду спасения несомненну, любовь ко всем нелицемерну, благочестие непоколебимое, душ и телес здравие, житейских потреб достатка, и да не во зло обратим благая, даруемая нам от щедродательныя Его десницы, но во славу имени Его святаго, и во спасение наше. Соблюди, преподобне чудотворче, Отечестие твое земное, страну православно-русскую, все грады и веси ея, град твой, и Лавру твою невредимыми от всякаго зла, и вся люди притекающия на поклонение к честному твоему гробу, и пребывающия во святей обители твоей, осени небесным твоим благословением, и от всяких зол и бед милостиво избави. Наипаче же в час кончины нашея покажи нам многомощное твое покровительство: да избавимся, молитвами твоими Господу, власти лютаго миродержца, и сподобимся наследити Царство Небесное. Яви нам, отче благосердие твое, и не остави нас сирых и безпомощных; да выну славословим Дивнаго со святых Своих Бога, Отца, и Сына, и Святаго Духа, и твое святое заступление, во веки веков. Аминь.[/spoiler]

Раб божий Константин

Акафист святому преподобному Феодосию, Тотемскому чудотворцу.
[spoiler]Кондак 1
Возбранный чудотворче, и изрядный угодниче Христов, всем с верою приходящым источаяй многоцелебныя дары, похвальная восписуем ти творящии всечестную память твою: ты же, яко имея дерзновение ко Господу, моли спастися душам нашым, да зовем ти:
Радуйся, Феодосие, великий чудотворче.

Икос 1
Ангельское твое во плоти житие провидев всея твари Создатель, от юности уготова тя в жилище Себе, Его же тя обиталище быти уведевше похвальная восписуем ти:
Радуйся, благочестивых родителей благоприятное испрошение.
Радуйся, от благочестиваго корене отрасле святейшая.
Радуйся, от юности твоея Богу послуживый.
Радуйся, воздержанием ангелов удививый.
Радуйся, в молитвах теплый предстателю.
Радуйся, скорбящих сладкое утешение.
Радуйся, просящым скорый помощниче.
Радуйся, болящым скорый и безмездный врачу.
Радуйся, земный ангеле.
Радуйся, небесный человече.
Радуйся, сосуде избранный Духа Святаго.
Радуйся, телес наших здравия и душ спасения ходатаю.
Радуйся, Феодосие, великий чудотворче.

Кондак 2
Видя тщету мирских попечений, блаженне Феодосие, жизнь твою не мирови, но Богу посвятил еси: сего ради оставил дом родителей твоих, водворился еси с работающими Богу во иноческом житии, во еже непрестанно и благоприятно вопити Ему: Аллилуиа.

Икос 2
Разум плотскому человеку неразуменный от юности твоея стяжавый, преподобне отче Феодосие, горняя мудрствовал еси, а не земная, темже взываем ти:
Радуйся, мудрости небесная жилище.
Радуйся, терпения адаманте.
Радуйся, братолюбия зерцало.
Радуйся, иноков правило.
Радуйся, на скрижали сердца твоего закон Божий написавый.
Радуйся, сам себе и весь живот твой Христу Богу предавый.
Радуйся, ум твой к небеси вперивый.
Радуйся, страх Божий в сердце твоем до конца сохранивый.
Радуйся, вместо тленных нетленная стяжавый.
Радуйся, гордость мирскую поправый.
Радуйся, Духом Святым наученный.
Радуйся, некнижный паче книжных просвещенный.
Радуйся, Феодосие, великий чудотворче.

Кондак 3
Сила Вышняго осени твое сердце, преподобне отче Феодосие, яко тебе, в Спасителевой обители Бога ради неусыпно потрудившася, и к чудотворней раце преподобнаго Димитриа неленостно прибегавша, яви соучастника святыни его, с ним же и ныне водворяешися в горней обители, Дивному во святых Своих Богу всегда вопия: Аллилуиа.

Икос 3
Имуще тя, отче Феодосие, преподобный Димитрий Прилуцкий, паче прочих избранна и любезна, предуготова тя к вящшым подвигом спасительным, егда от междоусобия Российских вельмож, и от казанских татар и черемис, многия скорби, имущыя быти предрече, таже победу над оными и конечное раззорение царства Казанскаго провозвести, да и ты с ним предстаеши ко Господу с теплым своим предстательством. Мы же ведуще вся сбывшаяся, и уразумевше тя крепка молитвенника о душах наших, вопием ти:
Радуйся, во плоти удостоенный собеседования со святым Димитрием.
Радуйся, великий благочестия столпе.
Радуйся, зерцало совершеннаго терпения.
Радуйся, миролюбцев обличителю.
Радуйся, сластолюбцев наказателю.
Радуйся, враждебных исправителю.
Радуйся, малодушных утешителю.
Радуйся, к воздержанию путеводителю.
Радуйся, к трезвенному житию наставниче.
Радуйся, во унынии закосневающих исправителю.
Радуйся, многих ко Господу обративый.
Радуйся, козни лукаваго победивый.
Радуйся, Феодосие, великий чудотворче.

Кондак 4
Буря ярости и зверство безбожных, многих братии твоея зле исторгая жизнь при очесех твоих, велия причини тебе скорби и тесноту: обаче ты, яко доблий воин Христов, мужественно молитвою себе вооружая, под удары злобы не изменился еси, всегда вопия Богу: Аллилуиа.

Икос 4
Слыша игумен от братии твое терпеливодушное в безмолвии житие, преблаженне, по расхищении погаными, аще и нехотяща отлучатися святыя обители, восхоте послати тя во град Тотьму на строение соленаго варения, ты же апостольскими стопами послушания ради шествовав, путь твой добре совершил еси, сего ради сретаем тя приветствии сими:
Радуйся, иго Христово и бремя Его понесый измлада.
Радуйся, не обративыйся вспять в шествии до горняго града.
Радуйся, во умерщвлении страстей добре подвизавыйся.
Радуйся, в духовном мужестве с древними отцами сравненный.
Радуйся, молитвами твоими дивная сотворивый.
Радуйся, господствию духа плоть покоривый.
Радуйся, миром небесным приосененный.
Радуйся, долготерпения искус стяжавый.
Радуйся, земная мудрования презревый.
Радуйся, единаго Господа вседушно поискавый.
Радуйся, сохранивый невредно целомудрие.
Радуйся, яко верный раб пред Господем во вся дни благочестно шествовавый.
Радуйся, Феодосие, великий чудотворче.

Кондак 5
Боготечная звезда явился еси во стране Тотемской, всеблаженне, на путь спасительный к вечному Небесному Отечеству ведущая, егда примером верных душы назирая, научил еси я благодарно пети Богу: Аллилуиа.

Икос 5
Видевый, преподобне отче, в варницах соли огненный жар велий, мысленно представлял еси себе жестокость огня в грядущем веце, на грешников нераскаянных уготованнаго, и внегда пребывал при варении пищныя соли, имея служащыя люди, яко присныя себе чада, всегда внушал еси им страх Божий, растворяя солию слова Божия, сам же на большыя подвиги в добродетели поучался еси, темже вопием ти:
Радуйся, образе кротости духовныя.
Радуйся, умертвивый плоть твою постом и бдением.
Радуйся, умертвивый язык твой на глаголание тщеты.
Радуйся, умертвивый ушы твои на слышание глаголов душевредных.
Радуйся, умертвивый руце на грабление и творение зда.
Радуйся, умертвивый чрево на объядение и пиянство.
Радуйся, трудами мертва соделавый чресла своя на нечистоту.
Радуйся, умертвивый нозе к течению на совет нечестивых.
Радуйся, на камени Христовою верою утвержденный.
Радуйся, Божиим свидетельством возвышенный.
Радуйся, не прением, но верою возмогати научивый.
Радуйся, некнижный, многих книжных посрамивый.
Радуйся, Феодосие, великий чудотворче.

Кондак 6
Проповедник немолчный явился еси всем зрящым тя, преподобне, премудрости евангелския, всегдашния чистоты и мужественнаго терпения, аще и в безмолвии хранил еси в сердце твоем сокровище веры, надежды и любви, и воспевал еси Богу: Аллилуиа.

Икос 6
Возсия богохранимой души твоей истинный боговедения свет, егда начал еси помышляти о создании новыя обители при граде Тотьме, и вселитися ту, знаменую тем Божие людем благословение, а о благоденственной их жизни могущественное к Богу предстательство. Мы же, видевше твое, преподобне, не точию о себе, а паче о спасении ближних попечение, воспеваем тя сице:
Радуйся, сродники по плоти Христа ради оставивый.
Радуйся, всю надежду на Него возложивый.
Радуйся, любве нелицемерныя хранителю.
Радуйся, служителю Божий, о верных Бога умоляяй.
Радуйся, наставниче грешных, к небесным направляяй.
Радуйся, и словом и житием поучаяй.
Радуйся, образе агнцем и пастырем.
Радуйся, блаженныя вечности искателю.
Радуйся, непостижимыя славы святых созерцателю.
Радуйся, струе напаяющая благочестием Церковь.
Радуйся, светильниче, непрестанным богомыслием сияющий.
Радуйся, свещниче, любовию к Богу и к ближнему светящий.
Радуйся, Феодосие, великий чудотворче.

Кондак 7
Хотя обещанное Богу исполнити, приял еси путь ко игумену и братии, они же, и не хотяще разлучитися с тобою, с честию из обители тя проводиша. Шед убо в путь свой радуяся, егда достигл еси места к сооружению обители, назначаемаго на брегу Ковды реки, водрузив крест, Богу с радостными слезами возопил еси: Аллилуиа.

Икос 7
Новыя радости и благодарения Богу излиял еси слезы, преподобне отче, егда прешед реку и возшед на гору, поставил еси кущу и водрузив крест на месте, назначаемом для сооружения храма, с коленоприклонением и со слезами моляся, рекл еси: «Благословен Бог, Иже показа ми место, идеже вселюся в век века». Сего ради вопием ти:
Радуйся, от горы сея возшедый на гору небесную.
Радуйся, древним общежития начальником уподобивыйся.
Радуйся, истинный Богу поклонниче.
Радуйся, великий Ему угодниче.
Радуйся, делателю винограда Христова неленостный.
Радуйся, благий и верный Его рабе.
Радуйся, данный ти талант благочестия возрастивый.
Радуйся, в мале быв верен, над многими ныне поставленный.
Радуйся, горлице пустыннолюбивая.
Радуйся, древо, посреде происходящих вод насажденное.
Радуйся, грядущая яко настоящая предсказавый.
Радуйся, душевныма очима выну Господа созерцаяй.
Радуйся, Феодосие, великий чудотворче.

Кондак 8
Странно бе видети, како убогий старец един обитает в пустыни на горе, презирая видимых и невидимых врагов, возлюбленный же им град обитель тому устроити и святынею обогатитися тщится, мы же очима нашима вся по воли от Бога совершаемая зряще, благодарно Ему вопием: Аллилуиа.

Икос 8
Весь, пречудный Феодосие, душею и телом посвятил еси себе Богу, пребывая в непрестанных трудех, молитвах, постех и бдениих, еже видевше окрестнии людие, кротости и терпению твоему удивляющеся, начаша служити потребными к построению святыя обители: о чесом ходатайствовати трудолюбно потекл еси во град царствующий ко великому князю. Мы же подвиги твоя восхваляем сице:
Радуйся, совершенный в добродетелех человече.
Радуйся, ленивых подвигнувый твоими нравы.
Радуйся, кротости навыкнувый от Агнца вземляющаго грехи мира.
Радуйся, за подвиги получивый вечная благая.
Радуйся, щитом веры стрелы лукаваго разжженныя угасивый.
Радуйся, молитвою и постом главу ему сокрушивый.
Радуйся, предводителю добрый в пути спасения.
Радуйся, преуспевавый добродетельми и труды.
Радуйся, умерщвлением страстей миру умерый.
Радуйся, возделыванием добродетели живый Богови.
Радуйся, сеье самаго, яко юнца в жертву Богу посвятивый.
Радуйся, светильниче, елеем благодати кипящий.
Радуйся, Феодосие, великий чудотворче.

Кондак 9
Всякое естество ангельское удивися твоим подвигом и христоподражательному житию твоему: почитаху бо тя и на земли во время трудов твоих жившии, не яко проста человека, но яко ангела Божия посреде их светящася, и премудростию учения в добродетели всех превосходяща, мы же прославляющемуся чрез тебе Богу взываем: Аллилуиа.

Икос 9
Витийство человеческое твое о Христе мужество, всеблаженне, изрещи не может, яко преуспевая во бдениих и пощениих, веригами тяжкими и власяницею облеклся еси, претерпевая болезни любве ради Божия, плоть твою духови поработил еси. Сего ради вопием ти:
Радуйся, алкая и жаждая правды, ныне насыщаешися.
Радуйся, в послушание Богу Отцу себе вдавый.
Радуйся, нищетою твоею Богу Сыну подражавый.
Радуйся, чистоту твою Богу Духу сохранивый.
Радуйся, во плоти ангельски поживый.
Радуйся, воине Христов непобедимый.
Радуйся, куплями житейскими не обязавыйся, да Воеводе угоден будеши.
Радуйся, не восхотевый двема господинома работати.
Радуйся, от юности на плоть, мир и диавола вооруживыйся.
Радуйся, сих врагов славно победивый.
Радуйся, отец по духу чадолюбивый.
Радуйся, обитель дивну насадивый.
Радуйся, Феодосие, великий чудотворче.

Кондак 10
Спасти хотя душу твою, славы мирския всемерно бегал еси, и егда окрестнии народи начаша тя яко велия о Христе подвижника почитати, ты во граде пред всеми явно сладкими питался еси, и от безумных людей укорения и биения с радостию претерпевал еси, Богу яко в тимпане, во умерщвлении телесе непрестанно вопия: Аллилуиа.

Икос 10
Стена ограждающая от всех прилогов диавольских был еси братии, паче по кончине твоей, в ней же о прославлении обители и заступлении требующих твоих молитв предрекл еси, ныне убо, предречению исполняемая зряще, благодарно вопием ти:
Радуйся, душу свою за человеки положивый.
Радуйся, от обители земныя в небесную преселивыйся.
Радуйся, душею тамо, телом зде пребываяй.
Радуйся, от мощей твоих недугов целения источаяй.
Радуйся, в великих подвизех течение совершивый.
Радуйся, розго мног плод о Христе сотворшая.
Радуйся, грозде винный питаяй и веселяй нас.
Радуйся, омраченныя просветивый.
Радуйся, просвещенныя утвердивый.
Радуйся, отрадо к тебе прибегающым.
Радуйся, России на сопротивныя победу содеваяй.
Радуйся, всем правоверным прошения исполняяй.
Радуйся, Феодосие, великий чудотворче.

Кондак 11
Пение немолчное принося Святей Троице о сохранении и укреплении Всероссийскаго государства, всей державе Российстей от силы в силу приходящей моли спастися, да с радостию вопием Богу: Аллилуиа.

Икос 11
Светозарный светильник явился еси, егда мощей твоих просветился еси нетлением, источая свет благодати Божия целебными дары твоими. Сего ради мы яко чада Церкве Христовы стекающеся, благодарственная приносяще Богу вопием к тебе:
Радуйся, преисполненный всякия благостыни.
Радуйся, милости превеликия сокровище.
Радуйся, промышления о людех приятелище.
Радуйся, миро Христова благоухания.
Радуйся, древо чудоточное рая Иисусова.
Радуйся, чаше, изливающая токи милосердия Божия.
Радуйся, чудес пучино, свыше излиянная.
Радуйся, иноков удобрение.
Радуйся, всея России укрепление.
Радуйся, Тотемская похвало.
Радуйся, всех смиренномудрствующих славо.
Радуйся, Феодосие, великий чудотворче.

Кондак 12
Благодать цельбы стяжавшаго, преподобнаго Феодосиа почтим сердцем и усты, и да вящшую воздадим почесть святым его мощам, потщимся всемерно подражати вере его, всегда вопиюще Прославляющему святых Своих Богу: Аллилуиа.

Икос 12
Поюще твое, святе Феодосие, теплое предстательство, от врагов видимых и невидимых скорое заступление, призывающе тя умильно просим, не возгнушайся нас грешных, но услыши вопиющих к тебе:
Радуйся, всякий недуг телесный и душевный врачующий.
Радуйся, в невечернем дни Царствия Божия приснопочивающий.
Радуйся, злых помыслов прогонителю.
Радуйся, беснуемых скорый целителю.
Радуйся, закосневающих грешников исправление.
Радуйся, немолчный наставниче.
Радуйся, ломотныя и опухольныя болезни уврачевавый.
Радуйся, трясавичныя и огневичныя недуги отгнавый.
Радуйся, слепым прозрение даровавый.
Радуйся, хромым и разслабленным хождение исправляяй.
Радуйся, в Бозе нам потребная созерцающий.
Радуйся, многим прошения предваряющий.
Радуйся, Феодосие, великий чудотворче.

Кондак 13
О великий чудотворче Феодосие! Моление наше прием, умоли Подвигоположника Иисуса, да избавит царствующыя грады и всякий град и срану христианскую от нахождения иноплеменных, от ересей и расколов и от всякия напасти, да с тобою в селении праведных сподобимся пети Триипостасному Богу: Аллилуиа.
Этот Кондак читается трижды, затем Икос 1-й и Кондак 1-й

Молитва святому преподобному Феодосию, Тотемскому чудотворцу
О добрый наш пастырю и богомудрый наставниче, преподобне отче Феодосие! Услыши нас грешных, молящихся тебе, и призывающих в помощь скорое предстательство твое: виждь нас грешных в толицех обстояниих сущих, виждь нас немощных отвсюду уловляемых, всякаго блага лишенных и умом от малодушия помраченных; потщися угодниче Божий, не оставити нас в греховнем плену быти, да не будем в радость врагом нашым, и не умрем в лукавых деяниих наших. Моли о нас недостойных Спаса Господа, Емуже ты со безплотными лики предстоиши. Милостива к нам сотвори Содетеля нашего в нынешнем веце и в будущем, да не воздаст нам по делом нашым, и по нечистоте сердец наших, но по Своей благости воздаст нам: на твое бо ходатайство уповающе, твоим предстательством хвалимся, твое заступление на помощь призываем и к цельбоносному гробу твоему припадающе недостойнии исцеления просим: избави нас, угодниче Христов, от злых находящих на нас, и укроти волны страстей и бед востающих на нас, да ради святых твоих молитв не объимет нас напасть, и не погрязнемв пучине греховней и в тине страстей наших. Моли, преподобне отче Феодосие, Христа Бога нашего: страждущую страну Российскую от лютых безбожник и власти их Господь да свободит, и да возставит престол православных правителей; верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш; да подаст нам мирное жительство, оставление грехов, душам нашым спасение и велию милость. Аминь.[/spoiler]

Раб божий Константин

Акафист иже во святых отцу нашему Феодосию, архиепископу Черниговскому и всея России чудотворцу.
[spoiler]Кондак 1


Избранный чудотворче, великий угодниче Христов, святителю отче Феодосие, нетлением мощей твоих и множеством чудес от Бога прославленный, в песнех радостных ублажаем тя, заступника нашего. Ты же, яко имеяй дерзновение ко Господу, от всяких нас бед свобождай, да зовем ти: Радуйся, угодниче Божий, святителю Феодосие, чудотворче преславный.


Икос 1


Ангел во плоти явился еси, богомудре Феодосие, ангельскими нравы измлада себе украшая; темже и Ангел церкве Черниговския достойне поставлен был еси от Бога, всех наставляя ко спасению и всем являя в себе правило веры и образ кротости, воздержания же и любве. Сего ради, чада твоя суще, любовию вопием ти сице: Радуйся, Ангеле земный и человече небесный; Радуйся, небесных сил собеседниче и сослужителю. Радуйся, в житии твоем безплотным поревновавый; Радуйся, и по смерти с ними водворивыйся. Радуйся, от юности Христа всем сердцем твоим возлюбивый; Радуйся, от утра жизни твоея Тому единому поработавый. Радуйся, вся заповеди Господни верно и непорочно сохранивый; Радуйся, мног плод духовный о Христе сотворивый. Радуйся, усердною молитвою дух твой окриливый Радуйся, чтущих любовию память твою от бед покрывающий. Радуйся, угодниче Божий, святителю Феодосие, чудотворче преславный.


Кондак 2


Видев суету мира сего скорогибнущую, всем сердцем возжелал еси, отче Феодосие, мир сей оставити и во иночестве Богу послужити. Темже иго Христово благое и легкое усердне восприяв, инок святыя обители Киево-Печерския смирен и послушлив был еси, воспевая всех Творцу ангельскую песнь: Аллилуиа.


Икос 2


Разум богопросвещенный твой видев, святитель Киевский Дионисий постави тя, Феодосие, архидиакона соборныя церкве Софии Премудрости Божией, да служиши алтарю Господню при совершении таин Божиих. Мы же, в тебе избранный сосуд Духа Святаго ведуще, со умилением зовем ти сицевая: Радуйся, под кровом чудотворцев Печерских начало подвигов твоих положивый; Радуйся, от юности добродетельми монашескаго жития преизрядно себе украсивый. Радуйся, иноков пресветлая красото; Радуйся, постников преславная похвало. Радуйся, святителей благоговейных любимый собеседниче; Радуйся, послушания нелицемерный рачителю. Радуйся, подвижниче смиренный, на Господа все упование возложивый; Радуйся, уединеннаго жития добрый ревнителю. Радуйся, избранниче Христов преблаженный; Радуйся, Богом данный нам заступниче непреоборимый. Радуйся, угодниче Божий, святителю Фоодосие, чудотворче преславный.


Кондак 3


Сила Божия осени тя, отче Феодосие, егда во иерея посвящен был еси от святителя Дионисия и во игумена обители Корсунския от него поставлен, да пасеши Христово стадо и руководиши иноки ко спасению, воспевая купно с ними хвалебную песнь в Троице славимому Богу: Аллилуиа.


Икос 3


Имея смирение нелицемерное, прах и пепел себе именовал еси, преблаженне Феодосие, и запрещение от архиерея, неповинен сый, безропотно понесл еси; темже и мы, ублажающе таковое, воистину христоподражательное, незлобие твое, воспеваем тебе сице: Радуйся, агнче незлобивый, никомуже зла за зло воздавый; Радуйся, яко запрещение архиерейское нося, послушание великое явил еси. Радуйся, яко тогда и епитрахили коснутися не дерзал еси; Радуйся, смирением и преданием себе в волю Божию врага победивый. Радуйся, иноче боголюбезный, преподобием и кротостию благоукрашенный; Радуйся, постническим житием, яко безкровным мученичеством увенчанный. Радуйся, монашествующим отец и наставник богомудрый; Радуйся, обителей иноческих многоопытный руководителю. Радуйся, Престола Божия верный и благоговейный служителю; Радуйся, пред Богом теплый о нас ходатаю. Радуйся, угодниче Божий, святителю Феодосие, чудотворче преславный.


Кондак 4


Бурю гонений на Церковь Божию во граде Киеве воздвиже мудрование латинское; ты же, богомудре Феодосие, во игумена обители Выдубецкия тогда поставлен быв, сию от лжеучения оградил еси, утверждая братию свою в православней вере непорочно воспевати Богу: Аллилуиа.


Икос 4


Слышав богоугодное житие твое, отче Феодосие, святитель Божий Лазарь, призва тя от Киева в Чернигов и, поставив во архимандрита пречестныя обители Елецкия, сотвори помощника себе во управлении церковном; ты же с любовию сыновнею послужил еси ему и воистину достоин явился еси, да воспеваем ти сицевая: Радуйся, старцу святителю с любовию послуживый; Радуйся, яко сын отцу во всем ему послушен бывый. Радуйся, старость его упокоивый; Радуйся, труды святительския ему облегчивый. Радуйся, благолепия церковнаго усердный рачителю; Радуйся, преданий апостольских верный хранителю. Радуйся, правды ревностный блюстителю; Радуйся, долга пастырскаго непоколебимый исполнителю. Радуйся, алтаря Господня служителю непорочный; Радуйся, пастырем светлый образе. Радуйся, угодниче Божий, святителю Феодосие, чудотворче преславный.


Кондак 5


Боготечную звезду, к горнему Иерусалиму путеводящую и добродетельми светло сияющую, зряще тя, предивный Феодосие, иноцы же и мирстии с любовию последоваху тебе, внимающе твоему учению душеполезному и взирающе на образ чистаго жития твоего, поучахуся взывати с тобою Богу, дивному во святых Своих: Аллилуиа.


Икос 5


Видев себе святитель Лазарь старостию претруждена и в силах телесных изнемогша, возжела имети тя, Феодосие, преемника по себе во святительстве и проси Святейшаго Патриарха Московскаго посвятити тя во архиепископа. Мы же в сем Божие звание, еже на тебе, уразумевающе, любовию прославляем тя сице: Радуйся, архиерею Божий, от Предвечнаго Архиерея видно предъизбранный; Радуйся, апостолов достойный преемниче и усердный ревнителю. Радуйся, святителю Христов, от собора святителей российских освященный; Радуйся, иерарше благий и нищелюбивый. Радуйся, архипастырю, милостивый и сострадательный; Радуйся, святителем Митрофану и Димитрию собеседниче и сопрестольниче. Радуйся, архиереев православных красото; Радуйся, пастырю добрый, душу твою за овцы положити готовый. Радуйся, учителю златословесный; Радуйся, богосветлый светильниче Церкве Христовы, во тьме века сего возсиявший. Радуйся, угодниче Божий, святителю Феодосие, чудотворче преславный.


Кондак 6


Проповедник не словом точию, но и делом явился еси Христова учения, святителю Феодосие, яко пастырь добрый, по образу пастыреначальника Христа всех с любовию наставляя ко спасению, всем образ жития по заповедем Христовым подавая и всех поучая взывати присно Богу: Аллилуиа.


Икос 6


Возсиял еси, яко утро светозарное, стране Черниговстей, святителю Божий Феодосие, и паству, тебе вверенную, светом добродетелей твоих озарил еси, смирением высокая стяжавая и нищету иноческую соблюдая; вся бо, яже имел еси, неимущим усердне раздавал еси. О сем дивящеся, яко нищелюбца совершеннаго ублажаем тя, зовуще: Радуйся, милосердия источниче неисчерпаемый; Радуйся, сирым прибежище благонадежное. Радуйся, вдовицам милостивый покровителю; Радуйся, алчущих неоскудный питателю. Радуйся, обидимым скорый заступниче; Радуйся, скорбящим благонадежный утешителю. Радуйся, сущим в бедах готовый помощниче; Радуйся, младенцем добрый воспитателю. Радуйся, юношам и девам в целомудрии наставниче; Радуйся, старцем и немощным твердое укрепление. Радуйся, угодниче Божий, святителю Феодосие, чудотворче преславный.


Кондак 7


Хотя всем сердцем твоим единому Господу благоугождати, подвигом добрым до конца подвизался еси, Феодосие, труды к трудом во смирении прилагая, постом и бдением с молитвою плоть твою умерщвляя и любовию всех согревая. Темже и сподобился еси еще на земли достойно и праведно воспевати ангельскую песнь Богу: Аллилуиа.


Икос 7


Новаго тя молитвенника и чудотворца предивнаго яви Господь в стране Российстей, святителю отче Феодосие; темже и светло красуется тобою Церковь Православная, яко дерзновение велие ко Христу имаши, Емуже молися, святителю, о нас грешных, любовию тебе вопиющих сицевая: Радуйся, пресветлый светильниче веры православныя; Радуйся, православия страже неусыпающий. Радуйся, благочестия ревностный поборниче; Радуйся, Церкве Божия столпе непоколебимый. Радуйся, храмино добродетелей преукрашенная; Радуйся, безстрастия и чистоты ревнителю преизрядный. Радуйся, молитвы сокровище неистощимое; Радуйся, таин Божиих верный строителю. Радуйся, паству твою в вере и благочестии соблюдаяй; Радуйся, со святыми сликования в Небесном Царствии сподобивыйся. Радуйся, угодниче Божий, святителю Феодосие, чудотворче преславный.


Кондак 8


Странствие земное богоугодне совершив, святителю отче Феодосие, свято и праведно почил еси о Господе сном смерти, яже бысть тебе прохождение от трудов на покой вечный; приял бо еси от Христа Бога венец славы нетленный и водворился еси со святыми воспевати Ему вечно хвалебную песнь: Аллилуиа.


Икос 8


Весь еси любовь неоскудевающая, святителю Божий Феодосие; якоже бо в житии сем, тако и по преставлении к Богу чад твоих не оставляеши; на всех, к тебе верою притекающих, милостивне призираеши, болящим исцеление подавая, скорбящих утешая, от бед избавляя. Сего ради, благодарни суще, воспеваем ти сице: Радуйся, нищету духовную от юности возлюбивый; Радуйся, Христу в меньших братиях его верно послуживый. Радуйся, двери милосердия Божия нам отверзающий; Радуйся, гнев Божий, праведно на ны движимый, на милость прелагающий. Радуйся, по отшествии твоем к Богу с нами пребывающий; Радуйся, умерщвленныя грехами души благодатию Христовою оживляющий. Радуйся, источниче сострадания, к людем приснотекущий; Радуйся, омраченных заблуждениями благостный просветителю. Радуйся, с небесных высот на скорби наши призирающий; Радуйся, всех нас любовию твоею объемлющий. Радуйся, угодниче Божий, святителю Феодосие, чудотворче преславный.


Кондак 9


Вси людие черниговстии прославиша Бога, егда услышаша о преславном явлении твоем, святителю Феодосие, преемнику твоему архиепископу Иоанну, егоже от недуга тяжка исцелил еси, являя дерзновение твое ко Господу. Сего ради и потщася гроб твой благоукрасити и подобие лица твоего над ним поставити, зовый дивному во святых Своих Богу: Аллилуиа.


Икос 9


Витии многовещаннии не возмогут восхвалити тя по достоянию вечныя славы достойнаго, святителю отче Феодосие; и кто может поведати многая и преславная чудеса твоя, яже источил еси от нетленных мощей и икон твоих святых; о сем убо радующеся и Бога, святых Своих прославляющаго, славяще, вопием ти сице: Радуйся, в пресветлых райских чертозех обитающий; Радуйся, нетлением мощей твоих зарю общаго воскресения нам предпоказующий. Радуйся, в видениих во благо верующим являющийся; Радуйся, в сониях на молитву к твоему ходатайству призывающий. Радуйся, слезы и воздыхания скорбящих с любовию утоляющий; Радуйся, прошения труждающихся и обремененных скоро исполняющий. Радуйся, от внезапныя смерти верных избавляющий; Радуйся, данныя Богу обеты исполняти побуждающий. Радуйся, слепым прозрение, глухим слышание подающий; Радуйся, отче чадолюбивый, якоже кокош под криле, духовныя чада твоя у гроба твоего собирающий. Радуйся, угодниче Божий, святителю Феодосие, чудотворче преславный.


Кондак 10


Спасение вечное унаследовал еси, святителю Феодосие, и светло ныне ликуеши со Ангелы и всеми святыми, присно созерцая пресветлое лице Христа Бога нашего, Егоже молити не престай за ны грешныя, да твоим заступлением сподобимся купно с тобою воспевати Ему: Аллилуиа.


Икос 10


Стена ограждения в Церкви Православней являешися, святителю Божий, множеством дивных чудес твоих верныя утверждающая и явлением силы Божией вся еретическая мудрования отражающая; наставников бо раскола нетлением мощей твоих зело удивил еси и исповедати истину православия возбудил еси. Темже со страхом и благоговением вкупе с верными взываху ти сице: Радуйся, прославлением мощей твоих всех нас радости исполнивый; Радуйся, нетлением телесе твоего неверие глаголемых старообрядцев в веру претворивый. Радуйся, ересь штунды чудесы преславными посрамивый; Радуйся, жену от люторовы ересе крестное знамение православне полагати научивый. Радуйся, младенцу слепому у мощей твоих внезапу прозрение даровавый; Радуйся, немотствующий язык помазанием елея от лампады твоея разрешивый. Радуйся, тем же елеем струпы неисцельныя исцеляяй; Радуйся, близ смерти сущих болящих к жизни возвращаяй. Радуйся, яко лишеннии разума у мощей твоих благодатию Христовою исцеляются; Радуйся, яко и пелены от гроба твоего чудодействуют. Радуйся, угодниче Божий, святителю Феодосие, чудотворче преславный.


Кондак 11


Пение молитвенное не умолкаше у мощей твоих, святителю Феодосие, от дне погребения даже до дне прославления твоего со святыми, егда собор святителей Церкве Poccийския со славою из пещеры мощи твоя изнесе и в соборней церкви града Чернигова на общее поклонение честне положи. Приими убо и наше смиренное пение хвалебное и помози нам покаянием очиститися, да во исполнении заповедей Христовых преуспевающе и тобою наставляеми, с тобою благодарственне вопием Богу: Аллилуиа.


Икос 11


Светильник благодатный быв в житии твоем, святителю Феодосие, тихим светом смирения и любве на свещнице Церкве Христовы сияющий, и по преставлении твоем возсиял еси, яко солнце, предивными чудесы мглу раскола и ересей разгоняя и верных сердца к Богу обращая. Темже, с любовию празднующе святую память твою, вопием ти: Радуйся, звездо лучезарная, над землею черниговскою возсиявшая; Радуйся, и всю страну Российскую светом своим озарившая. Радуйся, града Чернигова славо и ограждение; Радуйся, всея земли нашея страже неусыпный и теплый молитвенниче. Радуйся, у Престола Царя царствующих за царя нашего предстательствующий; Радуйся, яко имя твое по всей стране нашей от конца в конец прославляется. Радуйся, яко явлении твоими неверныя в веру православную обращаеши; Радуйся, яко чудесы твоими инославныя к православию наставлявши. Радуйся, яко с небесными силами присно Богу воспеваеши; Радуйся, яко на небесех выну славу Его созерцаеши. Радуйся, угодниче Божий, святителю Феодосие, чудотворче преславный.


Кондак 12


Благодати Божией сосуд избранный был еси, святителю Феодосие; благодать Божию и в помощь немощи нашей испроси у Господа, да сею благодатию спасаеми, присноборющия ны страсти победим, и тою укрепляеми, подателя всех благ Господа Иисуса всегда с тобою прославляем, зовуще Ему: Аллилуиа.


Икос 12


Поюще многая и преславная чудеса твоя и прославляюще великия подвиги твоя, святителю отче наш Феодосие, со умилением сердца славим, хвалим и величаем возвеличившаго тя Господа, в тебе явльшаго нам новое знамение Своего благоволения к Церкви Православней, яко вечному столпу и утверждению истины; тебе же, яко теплому предстателю нашему пред Богом, возглашаем сицевая: Радуйся, в вертограде Господни от утра до вечера жизни твоея добре потрудивыйся; Радуйся, в радость Господа своего, яко раб благий и верный, вшедый. Радуйся, житием твоим путь в обители небесныя нам показавый; Радуйся, венцем безсмертия и славы небесныя увенчанный. Радуйся, неба церковнаго звездо пресветлая; Радуйся, земли Российския похвало пречудная. Радуйся, яко со всеми святыми в горних обитаеши; Радуйся, яко и нас грешных на земли любовию посещаеши. Радуйся, имже Христос прославися; Радуйся, имже сатана посрамися. Радуйся, угодниче Божий, святителю Феодосие, чудотворче преславный.


Кондак 13


О великий угодниче Божий и чудотворче, святителю отче наш Феодосие! Приими сие малое моление наше, в похвалу тебе, аще и недостойне, обаче с любовию сыновнею приносимое, и умоли Господа Бога избавитися нам от всяких бед, скорбей и напастей, от междоусобныя брани и внезапныя смерти, и от мучений вечных в будущем веце, и сподобитися в вечней жизни с тобою воспевати Ему: Аллилуиа.


(Этот кондак читается трижды, затем икос 1 и кондак 1)



Молитва Феодосию, архиепископу Черниговскому и всея России чудотворцу


О священная главо, крепкий наш молитвенниче и заступниче, святителю Феодосие, услыши нас, с верою призывающих тя и усердно припадающих к раце честных и многоцелебных мощей твоих (или: иконе твоей). Поминай нас у Престола Вседержителева и не престай молитися за ны. Вемы, яко грехи наши разлучают нас между нами и тобою, и недостойни есмы толикаго отца и ходатая. Но ты, быв подражатель человеколюбия Божия, не престани вопия о нас ко Господу, испроси предстательством твоим у Всемилостивейшаго Бога нашего мир Церкви Его, на земли воинствующей, пастырем ея силу ревностно подвизатися о спасении людей. Умоли Небеснаго Отца всем нам подати дар, коемуждо благопотребен, веру истинную, надежду твердую и любовь неоскудевающую, градов наших утверждение, мира умирение, от глада и пагубы избавление, от нашествия иноплеменников сохранение, юным и младенцем благое в вере возрастание, старым и немогильным утешение и подкрепление, болящим исцеление, сиротам и вдовицам милость и заступление, заблуждшим исправление, бедствующим благовременную помощь. Не посрами нас в уповании нашем, споспешествуй, яко отец чадолюбивый, и нам понести иго Христово во благодушии и терпении, и всех управи в мире и покаянии непостыдно скончати живот свой и Царствия Божия наследником быти, идеже ты ныне водворяешися со Ангелы и всеми святыми, прославляя Бога, в Троице славимаго, Отца и Сына и Святаго Духа. Аминь.


Тропарь святителю Феодосию Черниговскому


Тропарь, глас 4


Преудобрен во архиереех, святителю Феодосие, был еси светило своему стаду, таже преставился еси в вечныя обители. Умоли у Престола Царя славы, избавитися нам от заходящих на ны зол, и спастися душам нашим, святе, молитвами твоими.


Кондак, глас 4


Пастырей Начальнику Христу трудился еси, святителю Феодосие, на пажити духовней питая словесныя твоя овцы, и приял еси от Христа Спаса целебный дар целити от немощи душевныя и телесныя всякаго с верою приходящаго к целебным твоим мощем. Моли, святе, о призывающих имя твое, от наветов вражиих спастися душам нашим.[/spoiler]

Раб божий Константин

Акафист святителю Феофану Затворнику Вышенскому.
[spoiler]Тропарь, глас 8
Православия наставниче, благочестия учителю и чистоты, Вышенский подвижниче, святителю Феофане богомудре, писаньми твоими Слово Божие изъяснил еси и всем верным путь ко спасению указал еси, моли Христа Бога спастися душам нашим.

Кондак, глас 4
Богоявлению тезоименитый, святителю Феофане, учении твоими многия люди просветил еси, со ангелы ныне предстоя престолу Святыя Троицы, моли непрестанно о всех нас.

Кондак 1
Избранный подвижниче и истинный служителю Христов, поставленый Господом на свещнице Церковной в святительском служении, людей светом веры озарял еси, все силы души своея и великия дарования им отдавая, и в спасительном подвиге затвора своего непрестанною любовию к чадом своим сердца их согревая. И нас просвети светом мудрости своея святителю Христов досточудный, да зовем ти:
Радуйся, святителю отче Феофане затворниче и христианскаго жития златословесный учителю!

Икос 1
Ангельскою кротостию и великою любовию объемлимый к Богу и людем подвиг иноческого смирения и пастырского служения подъял еси, святителю наш предивный. С покорностию воле Божией данный Господом дар мудрости возрастил еси и людем во спасение сим даром самоотверженно послужил еси. Ублажая труды твоя, вопием ти:
Радуйся, от младенчества Господу сердце отдавый; радуйся, паче всего Господа возлюбивый. Радуйся, на Него Единаго все упование возложивый; радуйся, от юности премудростию Божиею свой разум напитавый. Радуйся, Господу всего себе на служение предавый. Радуйся, святителю отче Феофане затворниче и христианскаго жития златословесный учителю!

Кондак 2
Видя душу твою, исполненную Божественною любовию к Создателю своему и Богу, Господь Промыслитель воспламенил еси ю великим стремлением к иноческому житию, и ты, святителю Божий, последуя небесному призыву, еще во дни юности своея, твердо стал на путь великаго смирения и отречения от мира сего, предав себя всецело воле Божией, поя Ему: Аллилуия!

Икос 2
Разумением книжной премудрости щедро от Бога одаренный, ты непрестанно обогащал еси ум свой познанием творений святых отец и подвижников веры и благочестия, почерпая в них великую силу и свет духовный. Мы же, прославляя мудрость твою, со умилением к тебе взываем:
Радуйся, любовию ко Господу пламеневший. Радуйся во смирении великом юность свою проведший. Радуйся, кротостию своею для всех примером послуживый. Радуйся, иноческое житие избравый. Радуйся, всего себя на служение Богу отдавый. Радуйся, святителю отче Феофане затворниче и христианскаго жития златословесный учителю!

Кондак 3
Сила Божия, в тебе пребывающая, еще на ранней стези твоей ярким пламенем Благодати душу твою осветившая и в святительском сане тя благоукрасившая, даровала людем, тя, пастыря добраго, о спасения душ их пламенно радевшаго и Господу неустанно поющаго: Аллилуиа!

Икос 3
Имея в сердце единого Господа, с великою радостию, посвятив жизнь свою на служение делу Христову спасения рода человеческого, ты, угодниче Божий, отдал еси сокровище своего разумения и духовнаго опыта в послушание Богу своему, уча и наставляя всех прибегающих к тебе с верою. И мы, ублажая труды твоя, во спасение душ наших подъятые, вопием ти сице:
Радуйся, велией мудростию Господом напоенный. Радуйся, в трудах подвижничества искушенный; Радуйся, смирения и кротости великий носителю. Радуйся, воле Божией всецело себя предавший. Радуйся, Божие милосердие твореньми своими прославивший.
Радуйся, святителю отче Феофане затворниче и христианскаго жития златословесный учителю!

Кондак 4
Буря смятения исполнила еси сердца чад паствы твоея, внегда позна стремление твое их оставити, дабы подвигу затвора всецело себя посвятити, и в нем пребывая в непрестанном подвижничестве, посте и молитве, невозбранно поя Господу Сил: Аллилуия!

Икос 4
Слыша людие об уходе твоем в пустыню Вышенскую, зело скорбяще о сиротстве своем, почитая тя, пастыря добраго, Богом им данного, с любовию о их душах радевшаго, со слезами приходили к тебе, прося молитв и богодухновенных поучений твоих. Приими и от нас похвалы сия:
Радуйся, во святительстве своем отцем милостивым пастве своея бывый. Радуйся, непрестанно о благе паствы своея попечение имевый; Радуйся, со слезами умиления с ней разлучивыйся. Радуйся, тишину и богомыслие паче всего возлюбил еси. Радуйся, обители Вышенския яркий светильниче. Радуйся, святителю отче Феофане затворниче и христианскаго жития златословесный учителю!

Кондак 5
Боготечною звездою явился еси ты, святителю мудрый, во обители иночестей, души спасения своея ради, безмолвия пустыннаго жития вожделев и в нем непрестанным подвигом подвизаясь и примером добрым всей братии являясь, научая всех непрестанно пети Господу: Аллилуия!

Икос 5
Принося Христу Богу сердце свое, всецело любовию к Нему объятое, ты душу свою предуготовал, стать обиталищем Святаго Духа, в великом смирении и кротости подвиг свой иноческий подъемля, непрестанными трудами являя пример истиннаго подвижническаго жития христолюбивым чадом, на тя взирающим. Почитая в тебе истиннаго служителя Божия и избранника Им возлюбленнаго, и мы вопием ти сицевая:
Радуйся, источниче любве ко Господу неиссякаемый. Радуйся, светильниче пресветлый, в пустыни возсиявший. Радуйся, сердце свое в послушание отдавший; радуйся, воздержания мудрый учителю. Радуйся, о душах людских добрый рачителю. Радуйся, святителю отче Феофане затворниче и христианскаго жития златословесный учителю!
.
Кондак 6
Проповедник неустанный, истин Божиих вещателю, воистину был еси ты на святительском служении, просвещая и наставляя паству свою, ты и в затворе не оставил еси духовным водительством всех, притекающих к свету мудрости твоея богодухновенными словесы своими, всех пети научая: Аллилуиа!

Икос 6
Возсияла еси в пустыне звездою велией мудрость твоя, пречудный угодниче Христов. Из затвора тя сокрывшаго, потекли реки живых словес твоих. Божиим изволением открылся источник благодатных поучений, наполняющий всякаго жаждущаго и с верою к нему притекающаго. Приими и от нас, святителю Божий, похвалы сицевые:
Радуйся, устами своими мудрость Божию вещавый. Радуйся, тояже мудростию всех напоивший. Радуйся, в подвизех иноческого жития пребывавший. Радуйся, грехов людских мудрый искоренителю. Радуйся, в добром преуспеянии неустанный водителю. Радуйся, святителю отче Феофане затворниче и христианскаго жития златословесный учителю!

Кондак 7
Хотяй всем человеком спастися и Царствия Божия достигнути, ты, пастырю добрый, в своем отречении от мира и строгом затворе обрел еси великий источник вдохновения, подражая Пастыреначальнику Христу, дерзновенно и невозбранно служил еси людем, поя Господу: Аллилуия!

Икос 7
Новаго видя в тебе подвижника и угодника Христова, Царствия Божия сердцем своим постигшаго, величайшаго смирения и кротости достигшаго, души людския, больныя и страждущия с надеждою устремили взор свой на пустынь, тебе от очей их скрывшую, в чаянии помощи и велией мудрости твоей благодатной. И мы, возжаждавшия ея, вопием ти тако:
Радуйся, ангельской чистоты на земли достигл еси. Радуйся, кротостию духа своего всех покорил еси. Радуйся, омраченныя умы просветивый. Радуйся, незлобия дивный наставниче. Радуйся, к подвигу милосердия людей призвал еси. Радуйся, святителю отче Феофане затворниче и христианскаго жития златословесный учителю!

Кондак 8
Станный для мноих, но дивный для любящих Господа подвиг твой, святителю благий, полнаго послушания в житии нестяжательном, отданном неустанному труду и непрестанному богомыслию; мы, видя сие, во умилении сердец наших благодарно поем Господу: Аллилуиа!

Икос 8
Весь был еси всем, святителю Божий, пастырем и отцем, учителем и наставником в неумолкаемом благовестии златословесных устен твоих. И мы, чада твоя духовныя, благодарно вопием ти:
Радуйся, росою Духа Божия напоенный. Радуйся, светом благодати Божией осененный. Радуйся, уме богопознания достигший. Радуйся, миром души твоея Господа постигший. Радуйся, благодатностию своею всех умилявший. Радуйся, святителю отче Феофане затворниче и христианскаго жития златословесный учителю!

Кондак 9
Всем был еси примером богомудраго жития о едином на потребу, како душу свою чистою храминой Духу Святому соделати, в великих подвизех преуспевал еси, от силы в силу восходил еси, возгревая сердце свое непрестанною молитвою Иисусовой и воспевая Господу: Аллилуиа!

Икос 9
Витией сладкозвучной глас твой кроткий и мудрый для всех был еси, услаждая слух внимавших тебе с велией верою, ты силою поучений твоих вел еси их непрестанною стезею тесною в самоотречении к подвигу послушания, научая их правде Божией и Царствию Его. Приими от нас, благий учителю, благодарения сицевая:
Радуйся, святителю Божий смиренный и кроткий. Радуйся, пастырю благий и чадолюбивый. Радуйся, в пустыни яко крин сельный процветший. Радуйся, тишину затвора спасительную возлюбивший. Радуйся, благий водителю душ смятенных. Радуйся, святителю отче Феофане затворниче и христианскаго жития златословесный учителю!

Кондак 10
Спасти хотяй род человеческий от греховных тенет, ты, Божий угодниче, просветил еси умы, ищущих правды, путие тайной победы в брани невидимой и венец вожделенный благаго конца показавый людем, поющим с тобою Богу: Аллилуиа!

Икос 10
Стена еси крепкая, ты еси воистину святителю Божий, в творениях своих богодухновенных, для каждой души, черплющей в мудрости твоей великое себе руководство и течение жизни своея, направляющей по стези тобою указанной, по единому пути ко спасению. Возсылая благодарения Богу за неустанное о душах наших твое попечение, тако взываем ти:
Радуйся, ангельского жития на земли достигший. Радуйся, в сослужении ангельстем святую Литургию совершал еси. Радуйся, ангельскою кротостию сиявший. Радуйся, чистоты сосуд благословенный. Радуйся, правды Божией учителю дерзновенный. Радуйся, святителю отче Феофане затворниче и христианскаго жития златословесный учителю!

Кондак 11
Пение всехвальное приносим ти, святителю благий и кроткий Божий угодниче. Восхваляем тя, прославившаго подвигами и житием своим святое Имя Создателя и воспеваем Богу: Аллилуиа!

Икос 11
Светозарное житие твое в затворе протекшее не скрылось от людских сердец, жаждущих правды и Божией истины. Благий конец жития твоего, безмятежный и мирный, велием светом озарил весь пройденный святительский многотрудный путь твой, соделавший тя воистинну сосудом Божией благодати. И мы, с умиленным сердцем, в благодарении глаголем ти:
Радуйся, в кончине твоей святительский сан твой прославивший. Радуйся, до последнего дыхания своего Господу своему послуживший. Радуйся, обители своея дивное украшение. Радуйся, страны Тамбовския и Шацкия мудрый просветителю. Радуйся, паствы Рязанския похвало и радование. Радуйся, святителю отче Феофане затворниче и христианскаго жития златословесный учителю!

Кондак 12
Благодатию Божиею щедро одаренный и ею пастве твоея в земном житии твоем мудро послуживый, ты, дивный и кроткий святителю, не остави и нас, уповающих на предстательство твое пред Господем на небеси, идеже предстоиши в немолчном славословии, взывая Богу: Аллилуиа!

Икос 12
Поюще подвиги твоя, озарившия велиим светом твой жизненный путь отречения любве ради ко Господу своему, мы, святителю Божий, кроткий и милостивый, с упованием взираем на тя, яко на небеснаго покровителя нашего и великаго о нас предстателя пред престолом Господа славы, умиленно взываем ти:
Радуйся, угодниче Божий, пресветлый и милостивый. Радуйся, моление верных тебе николиже отринувший. Радуйся, рабе Христов и любимче Божий. Радуйся, иноков наставниче премудрый. Радуйся, святителю, в скорбех наших быстрый утешителю. Радуйся, святителю отче Феофане затворниче и христианскаго жития златословесный учителю!

Кондак 13
О, всеблагий святителю Феофане, кроткий, богомудрый наш учителю! Приими от нас малое сие приносимое тебе моление и душ наших благодарное восхваление. Не забуди нас грешных в молитвах твоих святых, да уповая на них, непрестанно взываем Господу Сил: Аллилуиа!
Трижды.

Икос 1
Ангельскою кротостию и великою любовию объемлимый к Богу и людем подвиг иноческаго смирения и пастырскаго служения подъял еси, святителю наш предивный. С покорностию воле Божией данный Господом дар мудрости возрастил еси и людем во спасение сим даром самоотверженно послужил еси. Ублажая труды твоя, вопием ти:
Радуйся, от младенчества Господу сердце отдавый. Радуйся, паче всего Господа возлюбивый. Радуйся, на Него Единого все упование возложивый. Радуйся, от юности премудростию Божиею свой разум напитавый. Радуйся, Господу всего себе на служение предавый. Радуйся, святителю отче Феофане затворниче и христианскаго жития златословесный учителю!

Кондак 1
Избранный подвижниче и истинный служителю Христов, поставленый Господом на свещнице Церковней в святительском служении, людей светом веры озарял еси, все силы души своея и великия дарования им отдавая, и в спасительном подвиге затвора своего непрестанною любовию к чадом своим сердца их согревая. И нас просвети светом мудрости своея святителю Христов досточудный, да зовем ти:
Радуйся, святителю отче Феофане затворниче и христианскаго жития златословесный учителю!

Молитва
О, святителю, отче Феофане, земли нашея славо и радование! Приими сия смиренныя и теплыя моления нас грешных, любовию почитающих тя. Зря исполнившийся на тебе глагол Господень: «Прославляющия Мя прославлю», со умилением припадаем ко святым мощем твоим силу целебную имущим, якоже избранника Божественныя Благодати ведуще, взываем ти сице: благослови убо и помилуй, архиерею истиннаго Бога, державу нашу Российскую, воином мужество непоколебимое даруй и вся люди беспечальны сохрани и в покаяние приведи, младенцем воспитание благое даждь, юныя научи, болящим и скорбящим здравие испроси, нам же всем радость о Господе присную подаждь да вси благодарно тя ублажаем, глаголюще тако: Величаем тя, святителю отче Феофане и чтим святую память твою, ты бо молиши о нас Христа Бога нашего. Аминь!

Память святителя Феофана совершается10/23 января.[/spoiler]