Молитвослов

Автор Раб божий Константин, марта 10, 2012, 02:13:14

« назад - далее »

Раб божий Константин

Акафист Малочернетчинскому чудотворному образу Христа Спасителя "Хлеб Жизни", именуемому Кровоточивым.
[spoiler]Кондак 1
Возбранный Воеводо и Господи, призываяй к Себе всех труждающихся и обремененных, дивно образ Свой, Иже именуется Кровоточивым, нам явил еси. Мы же сему неизреченному благоволению Твоему радующеся, с умилением взываем Ти:
Иисусе, Подателю вечной жизни, сподоби и нас в Тебе жити во веки.

Икос 1
Ангели Божии с небесе невидимо окружают Свято-Успенский монастырь, егоже устрои основатель града Сумы военачальник Герасим Кондратьев, да славится во святых стенах его предивное имя Господне. Мы же славословим Тя, милосердный Господи, дивный во святых Своих, пении сими:
Иисусе, Боже предвечный, неизреченно от Девы родивыйся.
Иисусе, нашего ради спасения в плоть человечу вселивыйся.
Иисусе, в вертепе рожденный, пение ангел приявший.
Иисусе, весь мир в свои руки с великой любовию принявший.
Иисусе, в рождестве Своем людем явивший спасение.
Иисусе, нам с Небесным Отцем Ты еси примирение.
Иисусе, паче солнца в сердцах наших присно сияеши.
Иисусе, естество наше дивно Собой обновляеши.
Иисусе, Лица Своего от творения не отвративый.
Иисусе, покаявшимся вся грехи их простивый.
Иисусе, источник любви нам в Себе открываяй.
Иисусе, щедроты и блага нам туне подаваяй.
Иисусе, Подателю вечныя жизни, сподоби и нас в Тебе жити во веки.

Кондак 2
Видевши людие Божии, яко благолепна и зело красна бысть Свято-Успенская обитель, яже имать три дивно украшенных каменных храма – в честь Успения Божией Матери, Архангела Михаила и во имя Всех Святых, со всех стран притекаху к ней, прославляя Творца: Аллилуиа.

Икос 2
Разумом своим постигнути несть возможно, яко по прошествии ста и тридесяти лет, закрыт бысть Свято-Успенский монастырь и вси монаси оставима его, отошедши в Куряж. Ты же, долготерпеливе Господи, не дал еси месту сему святому до конца забвену быти. Сего ради, видя таковое Твое велие попечение о храмех Твоих, дерзаем к Тебе воспевати:
Иисусе, во храмех Своих на Престолех незримо седящий.
Иисусе, в жилище Свое чистых сердцем вводящий.
Иисусе, туне подающий благодеяния Твоя.
Иисусе, совозносяй с Собою избранныя Своя.
Иисусе, до пелен младенческих безропотно смиривыйся.
Иисусе, для крещения под руку Иоаннову склонивыйся.
Иисусе, Своим светом землю дивно озаривый.
Иисусе, учением Евангелия Своего ея просветивый.
Иисусе, Свою милость людем подаеши.
Иисусе, с любовию многою в дольний мир грядеши.
Иисусе, Кровию Своею души наша очищаяй.
Иисусе, Плотию Своею их предивно насыщаяй.
Иисусе, Подателю вечныя жизни, сподоби и нас в Тебе жити во веки.

Кондак 3
Сила Десницы Твоея, Всеблагий Господи, воистину явися, егда велию печаль чад Своих на радость пременил еси. Скрыся бо по упразднении Свято-Успенскаго монастыря монастырский образ Успения Божией Матери и неции из иноков слышаху плач, от иконы тоя исходящий. Людие же, видяще, яко во утешение им Тобою, Спасе наш, бысть явлен образ Твой чудотворный, благодарно взываху Тебе: Аллилуиа.

Икос 3
Имуще явити Образ Свой, Человеколюбче Господи, в сонном видении дал еси узрети рабе Своей Анисии, да обрящет в церковной подклети (подвалех) храма Всехсвятскаго, иже бе в веси Малая Чернетчина, икону Жертвеннаго Твоего заклания и Ты, Господи, исцелиши ю от тяжкия болезни. Такожде слышаху Анисия глаголы Твои, Иисусе Христе: «Приходите семо и веруйте, Аз буду исцеляти вас от всякия болезни». Мы же, видяще неизреченную милость Твою, милосердный Господи, явленную тяжце болящей рабе Твоей, вопием Ти:
Иисусе, предивно рабе Своей в сонном видении представший.
Иисусе, явлением Своим ей ослабу в болезни подавший.
Иисусе, ей чудно глаголы спасения открывый.
Иисусе, от тяжкия болезни ея исцеливый.
Иисусе, к себе всех людей призываяй.
Иисусе, их всех исцелити обещаяй.
Иисусе, во свете лица Твоего нам стопы исправляеши.
Иисусе, на истинный путь присно нас наставляеши.
Иисусе, смерть умертвивый Своим Воскресением.
Иисусе, плоть человечу обоживый Своим Вознесением.
Иисусе, нас, немощных, паче всего возлюбивший.
Иисусе, за нас на Кресте Кровь Свою во спасение изливший.
Иисусе, Подателю вечныя жизни, сподоби и нас в Тебе жити во веки.

Кондак 4
Бурею многомятежнаго жития сего потопляеми, яко к твердой ограде и защите обращахуся к Тебе, Боже, беднии и несчастнии людие, да ослабу в немощех, исцеление от болезней, укрепление в горестех подаси им, Всеблагий Господи. На Тя Единаго надежду полагаху, с верою воспеваем: Аллилуиа.

Икос 4
Слышаша вси людие, окрест живущии, яко в день памяти святаго Апостола Андрея Первозваннаго, обретена бысть в подклети Всехсвятскаго храма в веси Малая Чернетчина Сумскаго уезда чудотворная икона Твоя, Спасе, и зряще дивное обретение сие, вопияху Творцу:
Иисусе, Свой образ нам дивно явивший.
Иисусе, сим Образом милость Свою возвестивший.
Иисусе, Истинный Боже, в славе Божией седящий.
Иисусе, в Тайнах Твоих нас причастными Богу творящий.
Иисусе, отраду и радость всем верным подаеши.
Иисусе, в чертог Свой небесный их присно зовеши.
Иисусе, дающий ослабу болящим.
Иисусе, отрада и помощь скорбящим.
Иисусе, от пророков Своих прореченный.
Иисусе, плотию на небо славно вознесенный.
Иисусе, руце простираяй на создание Твое.
Иисусе, верных призываяй в Царствие Твое.
Иисусе, Подателю вечныя жизни, сподоби и нас в Тебе жити во веки.

Кондак 5
Богосветлою звездою возсия новоявленный Образ Твой, Создателю и Боже наш. Повелением же Харьковскаго святителя Амвросия чудотворный Образ Твой изнесен бысть из ризницы на стену церковную, да видим бысть всем, приходящим к нему. Имеяше его, яко сокровище неоценимое, боголюбивые людие умиленными душами велегласно воспеваху Христу: Аллилуиа.

Икос 5
Видяще велию милость Твою, отче Небесный, юже явил еси нам в пречудном явлении Образа Христа Спасителя, стекахуся чада Твоя к пустынному месту, идеже бе обретен Образ сей, яко не попусти Господь святому месту соделатися «мерзостью запустения». Мы же, душами и ныне слышаще звон колокольный, яже приглашает вся поклонитися чудотворному Образу Твоему, вопием сице:
Иисусе, образ воскресения Собою нам явивший.
Иисусе, смертию Своею смерть на веки умертвивший.
Иисусе, слез течением сердца нам растворяяй.
Иисусе, идольскую лесть Своей десницей разрушаяй.
Иисусе, Тайнами Своими верных обоживый.
Иисусе, на кресте спасение людем сотворивый.
Иисусе, Церковь православную Собою украшающий.
Иисусе, мир, в гресех погрязший, присно воскрешающий.
Иисусе, пришедый к покаянию грешныя призвати.
Иисусе, нам Заступницею давый Свою Мати.
Иисусе, милосердно падшия от гибели спасаеши.
Иисусе, всем в Тебя уверовавшим быти рядом обещаеши.
Иисусе, Подателю вечныя жизни, сподоби и нас в Тебе жити во веки.

Кондак 6
Проповедник дивнаго Образа Твоего, Спасе наш, именуемого Кровоточивым, явися преподобный Нифонт, иже видяше видение в церкви: наставшу дароношению, отверзеся покров церковный, и разверзеся небо и слышашеся велие благоухание: такоже снизхождаху ангелы, поюще: «Слава Христу Богу!» Несяху же Отроча зело красно, еже на дискосе поставльше, сами престол окружили, святителя же, служаща Честным Дарам, два Серафима и два Херувима паряще над главою, покрываху крилы своими. Приспевшу же времени освящения Даров и совершения страшному Таинству, един от Ангел светлейших – приступи, и взем нож, закла Отроча, и Кровь источи в Святую Чашу, Отроча же положив на дискосе, сам ста в чине своем со благоговением паки: таже начася причащение Таинств Божественных, и виде блаженный, яко иным от причащающихся бяху лица светла аки солнце, а иным темна и помраченна аки эфиопом. Предстоящие Ангелы назираху, како кто приступает, достойне убо причащающихся венчаху, недостойных же отвращахуся и гнушахуся. Скончавшуся же служению святому, виде и се паки Отроча цело обретеся на руках ангельских, вознесеся на небо. Сие сам преподобный послежде исповеда ученику своему, иже и писанию предаде на пользу многим, прославляя Бога: Аллилуиа.

Икос 6
Возсиял есть радостию велиею людем Сумскаго края Образ Твой, Господи, ним же многие чудеса творяхуся. Тем же словеса Твоя: «Приидите ко Мне вси труждающиеся и обремененнии, и Аз упокою вы», исполняхуся: труждающиися приимаху успокоение, болящие – исцеление, скорбящие – утешение, угнетенные – защиту. Приими и нас, Господи, приходящих к Тебе и молящихся Ти:
Иисусе, Образом чудным веру в Тебя укрепляеши.
Иисусе, нести коемуждо свой крест помогаеши.
Иисусе, на вольныя страдания безпрекословно шедший.
Иисусе, на Престол Небесный в славе Божьей вшедший.
Иисусе, в Свое Царство первым разбойника ввел еси.
Иисусе, в след за оным многих к покаянию привел еси.
Иисусе, любовию Своей услаждаеши наши страдания.
Иисусе, на Тебе Единаго возлагаем своя упования.
Иисусе, Славу Твою верным дивно открываяй.
Иисусе, Твои тайны ведати им не возбраняяй.
Иисусе, пред Отцем Небесным за Своих чад моливыйся.
Иисусе, на небеса отшествием от нас не удаливыйся.
Иисусе, Подателю вечныя жизни, сподоби и нас в Тебе жити во веки.

Кондак 7
Хотяй достойно возблагодарити Тя, Господи, за Твое неизреченное милосердие и благоволение, людие пред чудотворным Образом Твоим проливаху слезы благодарности и умиления, обращаху пламенныя воздыхания, да приняв чудотворную силу, от Образа Твоего дивно исходящую, воспевают Тебе выну: Аллилуиа.

Икос 7
Дивное и неизреченное чудо явися от Образа Твоего, Иисусе Христе, рабе Твоей Екатерине, егда дщерь свою, яже слепа бе, к Образе Твоему привезла на поклонение. Послежде молебна, иже служахуся пред чудотворным Твоим Образом, прозрела есть отроковица. Якоже оной, сотвори и нам, Милосерде Господи, да и мы прозреем духовно и во след Тебе потечем, воспевая Тебе неустанно:
Иисусе, избранным Твоим блаженныя обители уготовляеши.
Иисусе, блага неизреченныя Своим рабом вручаеши.
Иисусе, ада преисподняго узы разрешивый.
Иисусе, праматернюю клятву навеки упразднивый.
Иисусе, Свете тихий, от Отца Небеснаго сияющий.
Иисусе, Солнце вечное, заката для Себя не знающий.
Иисусе, дивнаго терпения Образ нам явивший.
Иисусе, горечь всех страданий до конца испивший.
Иисусе, посылаяй щедро нам милости Твоя.
Иисусе, на Агнчий брак зовущий избранныя Своя.
Иисусе, от суеты нам очи всегда отвращаяй.
Иисусе, в сердцах наших обитель Себе уготовляй.
Иисусе, Подателю вечныя жизни, сподоби и нас в Тебе жити во веки.

Кондак 8
Страшнаго дне пришествия Твоего, Судие наш, со страхом ожидающе, устрашаемся, яко вся деяния наша обнажатся, о нихже судитися имамы. Кто убо избавит нас от мучений вечных, аще не Ты, Спасе наш? Сего ради взирающе на Образ Твой, именуемый Кровоточивым, егоже милостиво даровал еси нам, взываем Ти: пощади и прости нас на Страшном Суде, вопиющих Тебе: Аллилуиа.

Икос 8
Вся небесная и земная зряще, колико множество чудес источахуся от явленнаго Образа Твоего, Человеколюбче Господи, не преставаху Тебе славословити. Для вящшего прославления Твоего, по указанию Священнаго Синода, открыт бысть постоянный крестный ход с Образом Твоим в церковь, яже бе в веси Великая Чернетчина. Мы же, духовными очесами видя сие торжественное шествие со Образом Твоим, купно с боголюбивыми людиями воспеваем Ти сице:
Иисусе, со Отцем и Духом таинственно в нас обитаяй.
Иисусе, двери Царствия Небеснаго нам щедро отверзаяй.
Иисусе, живот вечный в Тя уверовавшим подающий.
Иисусе, чад Своих за Собою незримо ведущий.
Иисусе, в жертву искупительную Себя за грехи мира принесший.
Иисусе, тридневно от гроба во славе воскресший.
Иисусе, всем толкущим милостивно отверзаеши.
Иисусе, образ совершеннейшего жития Собой являеши.
Иисусе, почтенный славой великой от Херувимов.
Иисусе, присно певаемый от Серафимов.
Иисусе, Судие помышлений и мыслей сердечных.
Иисусе, сподобляющий чад благ Своих безконечных.
Иисусе, Подателю вечныя жизни, сподоби и нас в Тебе жити во веки.

Кондак 9
Всякое естество человеческое удивися неизреченному милосердию Твоему, яко боготочною Кровиею Своею, Спасе наш, примирил еси нас с Отцем Своим Небесным, да жизнь вечную наследуем. Грехи наши взем на рамена Своя, от грехов наших освободил еси нас. Мы же, благодарным сердцем и благодарными усты поем Тебе: Аллилуиа.

Икос 9
Витии премудрии не возмогут по достоянию изглаголати хвалу Тебе, Искупителю наш. Мы же, видяще Тя на иконе святей терновым венцем увенчанным, имущем же язвы на пречистых руцех, нозех и ребрах Своих, по ним же истекаху Твоя животворящая Кровь, и чтуще надпись, иже бе круг венца на главе Твоея: "Аз есмь хлеб животный, иже сшедый с небесе, аще кто снесть от хлеба сего, жив будет во веки", молим Тя, даруй нам, Владыко Господи, да непрестанно памятуем сие. Темже, уповая на неизреченную милость Твою и веруя, яко вкушающим Тя, даси жизнь вечную, благодарно вопием Ти:
Иисусе, Сыне Божий, с Богом Присносущный.
Иисусе, Безконечный, Неизменный, Вездесущий.
Иисусе, с нами неотлучно во вся дни пребываяй.
Иисусе, сладость духовную в наша сердца изливаяй.
Иисусе, на Тя Единаго молитвенно мы взираем.
Иисусе, рабами верными Твоими мы быти чаем.
Иисусе, благоутробия источниче неизсякающий.
Иисусе, мытарю и блуднице грехи отпускающий.
Иисусе, Образе Невидимаго Отца Твоего.
Иисусе, сияние Триипостасное славы Его.
Иисусе, подаяй нам источник, текущий в жизнь вечную.
Иисусе, подаеши в сердца нам любовь безконечную.
Иисусе, Подателю вечныя жизни, сподоби и нас в Тебе жити во веки.

Кондак 10
Спасти хотяй град Сумы от страшныя холеры, Святый Образ Твой по благословению приснопамятнаго Слобожанскаго златоуста архиепископа Амвросия привнесен бысть в оный град, идеже при многолюдном стечении народа и при участии всех причтов церковных совершен бысть молебен с акафистом Иисусу Сладчайшему. Людие же, получив избавление от страшныя болезни, благодарно взываху Тебе: Аллилуиа.

Икос 10
Стена еси и твердое прибежище всем, милосердне Спасе наш, с молитвою к Тебе прибегающим. Буди же и нам, Творче наш, щедрым подателем благ земных и небесных, аще и недостойны есмы, но дерзаем просити Тя сице:
Иисусе, от бездны греховныя ны возстави.
Иисусе, ны от ада преисподняго избави.
Иисусе, на суде Твоем да не осуждены будем.
Иисусе, мрака вечнаго даждь избежати людем.
Иисусе, брака Агнчего да будем не лишенны.
Иисусе, ризою светлою на нем да будем одеянны.
Иисусе, Сам стопы наша к Тебе направи.
Иисусе, со святыми всеми дивно нас прослави.
Иисусе, в Твоем свете вечно дай нам пребывати.
Иисусе, о Твоих щедротах дай не забывати.
Иисусе, даждь не замечати сует мира дольняго.
Иисусе, не отлучи нас от Иерусалима горняго.
Иисусе, Подателю вечныя жизни, сподоби и нас в Тебе жити во веки.

Кондак 11
Пение похвальное приносим Тебе, Врачу душ и телес наших, купно со всеми, имже исцеления благодатию Своею щедро подаеши, прибегающим со слезами за помощью к чудотворному Образу Твоему. С ними же, обновленными душами Тебе возсылаем хвалу: Аллилуиа.

Икос 11
Света подателю и веков Творче, Христе Боже наш, Светом просвещающим буди нам, дивно исходящим от чудотворнаго Образа Твоего. Да во свете заповедей Твоих безпреткновенно пройдем весь путь жития нашего и в веселии сердца узрим Тя в невечернем дни Царствия Твоего. Ныне же, ожидая встречи с Тобою, вдохновенно поем Ти:
Иисусе, от Апостол Своих по всей земли прославленный.
Иисусе, на вершину славы Божией поставленный.
Иисусе, всем прибегающим к Тебе помогающий.
Иисусе, благодатию Своею нас утешающий.
Иисусе, не отнимай от нас щедроты вся Своя.
Иисусе, даждь нам памятовати благости Твоя.
Иисусе, освяти нас светом Твоея благодати.
Иисусе, нам блаженство райское подавай вкушати.
Иисусе, в милостех безмерных к человекам сшедший.
Иисусе, для спасения нашего на Голгофу шедший.
Иисусе, сени смертныя и тли нас удаляяй.
Иисусе, от мучений вечных присно нас спасаяй.
Иисусе, Подателю вечныя жизни, сподоби и нас в Тебе жити во веки.

Кондак 12
Благодать Свою, Господи, немощныя врачующую и недостающая восполняющую, ниспосли нам от предивнаго жилища Своего чрез чудотворный Образ Твой, да щедро ею насыщаемии, воспевати не престанем Тебе: Аллилуиа.

Икос 12
Поюще дивныя чудеса Твоя, Блаже, исповедуем Тя Истиннаго Бога, Создателя и Искупителя нашего, Егоже за неизреченную любовь к созданию Своему возлюбили быша всем сердцем и всею душею своею. Сего ради, преклоняя пред Тобою колени души нашея, с любовию поем Тебе сице:
Иисусе, в нашу плоть от Приснодевы оболкийся.
Иисусе, о достоянии своем денно и нощно пекийся.
Иисусе, от Ангел и святых на небе прославляемый.
Иисусе, от ученик Своих гласом велиим восхваляемый.
Иисусе, верующих в Тя в день судный оправдающий.
Иисусе, молитвами Матери Твоея милости нам посылающий.
Иисусе, очесем духовным нашим свет даеши.
Иисусе, причащатися Себе нам даровавый.
Иисусе, вкушающим Тя жизнь вечную обещавый.
Иисусе, на руках Своих крепких присно нас понесый.
Иисусе, несть от века никтоже подобен Тебе.
Иисусе, николиже и нас не отрини от Себе.
Иисусе, Подателю вечныя жизни, сподоби и нас в Тебе жити во веки.

Кондак 13
О Премилосердный и Преблагий Господи наш Иисусе Христе! Ныне преклоняясь пред чудотворным Образом Твоим, именуемым Кровоточивым, с умилением лобызаем и, и молим Ти ся: исцели души и телеса наша, грехми зело отягощенныя, милостиво отпусти нам вся прегрешения наша, да чистым сердцем возможем приступати ко причащению Божественных Даров Твоих и жити в Тебе будем вечно, воспевающи Ти: Аллилуиа. Аллилуиа. Аллилуиа.
Сей кондак глаголи трижды. Посем икос 1: Ангели Божии... и кондак 1: Воззбранный воеводо и Господи...

Молитва
Пребезначальне и Всесильне Боже наш, Иисусе Христе! Ныне пред чудотворным Образом Твоим стояще, молим Тя, чада Твоя, ихже воссоздал еси, и Кровию Своею, на Кресте излиянною, от грех омыл еси, прости нас всегда согрешающих пред Тобою и каждодневно распинающих Тя непотребными деяниями своими, возстави нас от греховнаго падения, очисти сердца наша, во еже Тебе Единаго любити, Тебе Единому служити и Тебе Единаго прославляти.
Спасе наш, призри Благоутробным оком Своим на народ наш, от бед и нужд житейских изнемогающий, и от сетей вражиих его избави; в вере Православной укрепи, от ересей и расколов защити.
Господи, даруй нам разумети всеблагую волю Твою, совершившуюся в дивном явлении чудотворнаго Образа Твоего, да всегда памятуем, яко Ты еси Хлеб Животный, иже сшедый с небесе и аще кто снесть от Хлеба сего, жив будет во веки. Темже, уповая на неизреченную милость Твою, прославляем Тя со Отцем и Святым Духом, ныне и присно и во веки веков. Аминь.

Тропарь, гл. 4
Единородный Сыне Божий, Иисусе Христе, от Отца Небеснаго безлетно родивыйся и от Приснодевы Марии плоть человеческую приемший, благослови достояние Твое, Церковь Свою и люди Твоя в Православии сохрани, осенением чудотворнаго Образа Твоего.

Кондак
Неизреченное и Пребожественное Таинство даровал нам еси, Господи, в немже Кровию и Плотию Своею обожаеши нас и незримо пребываеши в нас. Чудотворный Образ Твой достойно потщимся видети, душею же и сердцем воспевающе: слава Тебе, Боже, во веки.[/spoiler]

Раб божий Константин

АКАФИСТ
Святым мученикам Хрисанфу и Дарии.
[spoiler]
ТРОПАРЬ
От юности веру Христову возлюбил еси, // блажение Хрисанфе, // вражии прелести презрев, // добротою Божественною наслаждаем // привел еси невесту чисту Дарию ко Христу, // и с нею мучения лютая приял еси // мучениче Богоприятне за ны молися // верою совершающе память вашу //.


СЕДАЛЕН
Краснейшую доброту возжелал еси, и видимыя доброты претекл еси, и привел еси Христу златыми воистинну словесы твоими, Хрисанфе блаженне, Дарию славную страдания претерпевшую и томителя посрамльшую. С нею же вся ны поминай, верою совершающие память вашу.


КОНДАК 1
Избраннии Христови мучениколюбцы Хрисанфе и Дария // венцами славы Божественныя украшеннии // и к жизни немятежней чрез веру и страдания ко Христу пришедшия // приимите моления наша недостойныя // во славу Божию и похвалы вам приносимыя // избавляя нас от искушений и бед всяческих // с любовию и радостию вам поюще:
Радуйтесь, Хрисанфе и Дарие // со всеми мученики за веру Христову пострадавшими //.


ИКОС 1
Ангельскою чистотою облистающии, святии мученицы Христове Хрисанфе и Дарие. Вы бо прелести безбожныя уклонилися есте, наслаждаемии несравненною Божественною добротою, поюще хвалу Владыце всех преблаженнии. Тем же удивляющиеся подвиги вашими, радующиеся взываем вам со умилением сице:
Радуйтесь, дивныя исповедницы, Истину Божественную возлюбившия.
Радуйтесь, вражия прелести и сласти разжения от себя отгнавшии.
Радуйтесь, в вере Христовой добре себе укрепившии.
Радуйтесь, сладости мира сего ни во чтоже вменившия.
Радуйтесь, прелести идольския дерзновенно обличившия.
Радуйтесь, словесы вашими многи неверныя к Богу обратившия.
Радуйтесь, Хрисанфе и Дарие // со всеми мученики за веру Христову пострадавшими //.

КОНДАК 2
Видя вражия прелести и сладости разжения, Хрисанфе достоблаженне, верою вооружися, низложил еси многокозненнаго змия, благоволения разумного исполняяся, и яко невесто краситель всеизряднейший, Дарию, невесту непорочну привел еси ко Христу, воспевая с нею похвальная пения Богу: Аллилуйя.


ИКОС 2
Разумом Истины озарения, Божественнаго благовония исполнилися есте, мученицы всехвальнии. Доблестию Христовой сердца ваша украшаше во исповедании веры Бога Истиннаго. За таковое дерзновение прославляя подвиги ваша примите похвалы сия:
Радуйтесь, Истину веры Божественныя возлюбившии.
Радуйтесь, верныя к православию Бога Истиннаго воздвигающии.
Радуйтесь, заповеди Христови в чистоте вы соблюдшии.
Радуйтесь, Богу целомудренным житием угодившии.
Радуйтесь, любовию Христовою души свои украсившии.
Радуйтесь, прелести мира сего и тщету вы презревшия.
Радуйтесь, Хрисанфе и Дарие // со всеми мученики за веру Христову пострадавшими //.


КОНДАК 3
Сила Божественная осени вас, страдальцы Христови, во мрачнем затворе бывшия. Стоясте бо среди смрада прескверная, сиянием благодати Господней озареннии, страдая за веру Христову, непрестанными гласы поя: Аллилуйя.


ИКОС 3
Имеяше превелие желание украситеся венцами мученичества за Христа, вы святии страстотерпцы Хрисанфе и Дарие, неустанно проповедали веру Божию, обличая безумное шатание вражия идолослужения, укрепляя верныя в вере Бога истиннаго и наставляя на пути спасения. Тем же и мы зряще таковую ревность вашу по Бозе, дерзновенно вопием вам:
Радуйтесь, истиннии исповедницы, не устрашившися грядущих мучений.
Радуйтесь, научающии всех не боятися человеческих прещений.
Радуйтесь, во всем надежды своя и упования на Бога возложившии.
Радуйтесь, всех верующих в Промысл Божий веровати учившии.
Радуйтесь, коварства сатаны безбоязненно пострамившии.
Радуйтесь, все время свое вы в молитвенных подвигах проводившии.
Радуйтесь, Хрисанфе и Дарие // со всеми мученики за веру Христову пострадавшими //.


КОНДАК 4
Буря ярости и лютых напастей гонителей не возможе поколебати веры вашея во Христа, всеблаженнии страдальцы. Вы бо Духа Святаго исполнении мужественно пред всеми Творцу воспевали: Аллилуйя.


ИКОС 4
Слыша слова Священнаго Писания, яко Бог любовь есть, блаженне Хрисанфе, возлюби душа твоя веру в Бога истиннаго. Пресвитером Карпофором наставляем, утвердися в вере и ею же Дарию, жрицу храма Минервы привел еси ко Христу, да прославися добротою несравнительною любовь Царя Небеснаго, в ней же пребывающе и мы, прославим вас воззваниями сими:
Радуйтесь, яко огнь любве к Богу в сердцах ваших до конца жизни вашея в чистоте сохранившии.
Радуйтесь, яко истинным Богословием души своя укрепившии.
Радуйтесь, яко Церкви Христовой защитницы славнии.
Радуйтесь, верных наставницы и заступницы дивнии.
Радуйтесь, и нас исполняти заповеди Божественныя научающии.
Радуйтесь, Хрисанфе и Дарие // со всеми мученики за веру Христову пострадавшими //.


КОНДАК 5
Богоявленныя звезды небесныя явистеся, Хрисанфе и Дарие, егда в добровольнем согласии восхотесте вы жити в безбрачном супружестве. В замене бо жизни временныя и плотския любови, вы украсили души свою Христовой любовию. Божественною благодатию сияеси Владыце Небу и Земли воспевали песнь: Аллилуйя.


ИКОС 5
Видяще житие ваше Богоугодное, украшенное доброхотным согласием Господеви служити, неустанно проповедали веру Христову, призывая вся мужественно от веры Христовой никако отступати, мрак идолослужения обличая, и вся к небесному блаженству направляя. Воспоминая благочестивое ваше житие вопием с любовию сице вам:
Радуйтесь, образ истиннаго супружества Христианского показавшии.
Радуйтесь, Духа Святаго жилища своя наполнившия.
Радуйтесь, правоверия Божия дерзновеннии ревнителя.
Радуйтесь, светильницы светлии любовию Христовой горящии.
Радуйтесь, Славы Божественною неустрашимии проповедницы.
Радуйтесь, муки душевныя вкупе с телесными за Христа претерпевшия.
Радуйтесь, Хрисанфе и Дарие // со всеми мученики за веру Христову пострадавшими //.


КОНДАК 6
Проповедником велегласным бысть глаголы твоя, мучениче Хрисанфе. Призывая верныя отвергати соблазны мира сего, якоже и подобаше ищущим спасения и горняя мыслите. Исполняше сие, блаженне, привел еси и Дарию ко Христу, с нею же укрепляшеся в вере, дерзновенно воспеваше Богу: Аллилуйя.


ИКОС 6
Возсия в сердцах ваших яко солнце, свет Славы Небесныя, истиннии страдальцы Христови. Вси бо зряще благочестие жизни вашея и веру во единаго Бога Отца Вседержителя, прихождаху к вам. Дом бо ваш бысть, яко монастырь святый, в нем же многи верныя обретаху спасение. Удивляшеся таковому житие вашему вернии воспеваше вам:
Радуйтесь, звезды на тверди небесней духовно сияющии.
Радуйтесь, молитвами вашими дверь Царства Христова многим открывшии.
Радуйтесь, честных обителей усердныя устроители.
Радуйтесь, сосуды избраннии благодати Божественней.
Радуйтесь, честнаго супружества небеснии покровители.
Радуйтесь, чистотою душ ваших себе украсившии.
Радуйтесь, Хрисанфе и Дарие // со всеми мученики за веру Христову пострадавшими //.


КОНДАК 7
Хотяше отвратити вас, веры Христовой и мерзким идолам жертвы приносити, градоправитель Калерин веле пытати вас, страстотерпцы святии. Вы же многая претерпеша страдания, со дерзновением и верою мужественно воспевали Богу: Аллилуйя.


ИКОС 7
Новую показа ярость безчеловечный мучитель Калерин, яко не возможе отвратити вас от Истины Христовой. Дивяся убо величеству терпения вашего и веры, мысляще о некоем волшебстве, повеле вас предати тягчайшим пыткам. Но ничтоже успе и не возможе противостати вам, яко ни кия пытки ни ухищрения поколебати веры не можаше. Вернии же видеша страдания ваша взываху вам сице:
Радуйтесь, светильницы Христови, во тьме нечестия сияющии.
Радуйтесь, зловерие идолопоклонников обличающии.
Радуйтесь, веры Христианския небоязненныя защитницы.
Радуйтесь, ранами своими любовь ко Христу усугубившии.
Радуйтесь, поругания и досождения за Христа терпевшие.
Радуйтесь, во исповедании Христове добре пребывшии.
Радуйтесь, Хрисанфе и Дарие // со всеми мученики за веру Христову пострадавшими //.


КОНДАК 8
Странное чудо бысть егда Клавдий трибун позна Истину Божию, видя страдания ваша, мученицы святии, рече бо, яко и чародей не можаше претерпети таковыя мучения, яже вы претерпесте. Повеле прекратити мучения ваша, и нача сам исповедати веру Христову, поя с вами Богу: Аллилуйя.


ИКОС 8
Всем сердцем и любовию Христовою возрадовались вы, святии мученицы Хрисанфе и Дарие, видя обращене к вере Христовой не токмо Клавдия трибуна, но и вся домашния его: Иларию супружницу и чада Иасона и Мавра, и воины мучащия их, прося Крещение Господне прияти. Тии бо уверовавше во Христа, начаше прославляти Бога и с верными в духовном веселии взывати вам:
Радуйтесь, благодати Христовой души ваши преисполненныя.
Радуйтесь, светом божественным многия осиявающия.
Радуйтесь, яко беззаконных мучителей мужеством удивляющии.
Радуйтесь, на подвиги страданий за Христа небоязненно шествовавшии.
Радуйтесь, своими страданиями многия мучители ко Христу призвавшии.
Радуйтесь, яко с терпением и преданностью Крест Христов понесшии.
Радуйтесь, Хрисанфе и Дарие // со всеми мученики за веру Христову пострадавшими //.


КОНДАК 9
Все естество ангельское возрадовася зело, святии мученицы, видя, яко собор страдальцев привели еси вы ко Христу. Божественными словесы наставляя всех и путь спасения указуя, верным безбоязненно терпети мучения, восхваляя Бога, дивнаго во святых Своих, песнею: Аллилуйя.


ИКОС 9
Витийство человеческое не возможе противостати вам, страдальцы Христови Хрисанфе и Дарие. Кто возможе изрещи страдания ваша, или кто изречет подвиги за Христа Бога нашего? Пренебрегши бо славу земную и величия временныя жизни, положиша вы души ваша за веру Божию. Восхваляя толикия деяния ваша, с любовию взываем вам:
Радуйтесь, веры Христовой усердныя насадители.
Радуйтесь, идолам поклонения дерзновенныя противники.
Радуйтесь, верныя из тьмы идолопоклонства в свету Христову ведущи.
Радуйтесь, премногими чудесы мучители удививши.
Радуйтесь, биения лютыя за Христа претерпевшии.
Радуйтесь, страдании вашими мучителя Нумериана посрамившии.
Радуйтесь, Хрисанфе и Дарие // со всеми мученики за веру Христову пострадавшими //.


КОНДАК 10
Спасти хотя души верных, святии мученицы, вы бо премудростию украшены Христовою, обуили немудрых шатания, чистыя сосуды Вседержителя явистеся, призывая вся в безмерной славе Божией пребывати и пети Творцу: Аллилуйя


ИКОС 10
Стены твердее каменныя явися новый мучитель христиан Нумериан, егда в безумии своем веле предати вас иным мучениям. Тя бо, Хрисанфе веле погрузити в клоаку нечистот, и Дарию отдати на поругание в дом публичный. Но сила Божия сохрани вас невредимы, и свет Небесный осия вас. Видя токовое, величати похвалы сицевыми:
Радуйтесь, столпи непоколебимии в вере Христовой твердо стоящии.
Радуйтесь, зловония нечистот за Христа претерпевшия.
Радуйтесь, поругания и страдания без боязни понесши.
Радуйтесь, светом Небесным в мучениях своих озаренныя.
Радуйтесь, ярость Нумериана на во что вменившии.
Радуйтесь, твердее камене в мучениях ваших явившиися.
Радуйтесь, Хрисанфе и Дарие // со всеми мученики за веру Христову пострадавшими //.


КОНДАК 11
Пение благоприятное приносим вам, чуднии мученицы Христови. Вы бо прославили подвиги вашими Подвигоположника Христа, Спасителя нашего, и крепостию веры своея посрамили мучителя ваша. Мы же, благодаря о сем Господа, с благоговением и любовию поем Ему: Аллилуйя.


ИКОС 11
Светозарное Солнце Правды озари сердца верных, егда видеша преславныя чудеса Божии. Чудный свет Божественный осия вас, страстотерпцы святии Хрисанфе и Дарие, егда ведени быша на страдания и смерть за имя Христово. Вы бо вернии супружницы до конца пребывшии в твердей вере противу всяческих искушений вражиих. Благоговейно убо воспоминая подвиги и страдания ваша блажим вас похвалами сими:
Радуйтесь, светильницы Христови, во тьме нечестия сияющии.
Радуйтесь, зловерие идолопоклонников обличающии.
Радуйтесь, веры Христианския небоязненныя защитницы.
Радуйтесь, ранами своими любовь ко Христу усугубившии.
Радуйтесь, поругания и досождения за Христа терпевшие.
Радуйтесь, во исповедании Христове добре пребывшии.
Радуйтесь, Хрисанфе и Дарие // со всеми мученики за веру Христову пострадавшими //.


КОНДАК 12
Благодати преисполненнии от Господа, всехвальнии Хрисанфе и Дарие, в радосте память ваша верными прославляется, и теплыми молитвами к вам, величается. Вы бо страдания тяжкая претерпевшии, за веру Христову смерти приявшии души ваша, сподобилися есте в райских селениях со Ангелы воспевати Богу: Аллилуйя.


ИКОС 12
Поюще славную кончину вашу, мученицы святии, еюже прославили веру Божию Истиннии Страдальцы вы явистеся посреде зверей, якоже агнцы, воплощение Божественное проповедующе, излиявшегося даже и до плоти, и болезньми неболезненную Божественне наследовасте. Сие убо воспоминая, умиленно восклицаем вам:
Радуйтесь, яко за веру Христову заживо в глубоком рове засыпанныя.
Радуйтесь, многими знамениями милости Божией прославленныя.
Радуйтесь, яко память ваша богослужениями и молитвами верных соблюдается.
Радуйтесь, яко во свете неприступном на небесах пред Богом души ваша преставшии.
Радуйтесь, от Триипостаснаго Божества венцами Небеснаго Царствия увенчаннии.
Радуйтесь, Хрисанфе и Дарие // со всеми мученики за веру Христову пострадавшими //.


КОНДАК 13
О, прославнии и многострадальнии мученицы святии, Хрисанфе и Дарие! Примите пение сие похвальное от нас недостойных, со умилением вам молящихся. Вознесите теплыя молитвы ваша, о всех память вашу прославляющих, и ходатайством вашим у Престола Божия, избавите нас от бед, скорбей и болезней и вечнаго мучения, сподобимся в Небесных селениих воспевати Богу: Аллилуйя, Аллилуйя, Аллилуйя.
(Этот кондак читается трижды, затем читается икос 1 и кондак 1.)


МОЛИТВА
О, святии и преблаженнии страстотерпцы, мученицы Христови Хрисанфе и Дарие! К вам у престола Божия предстоящим и молитвенникам нашим теплым, скорым помощникам мы недостойнии прибегаем. Услышите ныне сие моление наше и умолите возлюбленного вами Господа нашего Иисуса Христа, Его же вы исповедали в тяжких мучениях своих пред безумными мучители и гонители святой веры Христовой, о нас недостойных грешных. Вы убо ради веры Христовой многи мучения претерпели и умерщвлены быша, Церковь Христову украсите и венцами безсмертныя Славы увенчании, в неизглаголанней радости с лики ангельскими в небесных селениях водворяетеся. Божественным светом облестаемии. Явити и нам многомощное заступление: веру Христову в чистоте сохранити, в злостраданиях и искушениях мужество проявити, в житейских потребах довольство, в молитвах постоянство и любовь к Богу и ближним всегда имети. Наставите нас, святии мученицы, молитвами вашими на путь спасения, укрепите стопы наша твердо и непоколеблемо ходити путем заповедей Господних, вразумляя заблудшия, даруя недугующим исцеление, бедствующим избавление, в супружестве живущим покровительство, всем же нам вся ко спасению полезная. Яко да вашими молитвами наставляемии и предстательством укрепляемии, прославим Спасителя нашего Господа Иисуса Христа. Ему же подобает всякая слава, честь и поклонение, со безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.[/spoiler]

Раб божий Константин

Акафист Господу Иисусу Христу, Искупителю и Спасителю грешных, Сладчайшему, в нашествии горчайших искушений и страстей.
[spoiler]Кондак 1

Возбранный Воеводо и Господи, нас ради в ад сшедый и Собою вся воскресивый, се ныне, во аде страстей моих весь сгорая, из глубины сердца моего взываю Ти:
Иисусе, ада Победителю, победи ад души моея, воскреси мя, умерщвленнаго страстьми.

Икос 1

Еврейским отроком, в пещь огненную вверженным, и к Тебе, дивному во святых, воззвавшим, Ангела Твоего пославый и тем огнь в росу преложивый, вонми ныне воплю души моея, услыши стенание мое, во искушении бо зельнем болезненно Ти взываю:
Иисусе мой, Христе Многомилостиве, поели ми Ангела мирна, да утишит бурю страстей моих лютых.
Иисусе мой, Подателю просящим, подаждь ми Ангела верна наставника, да наставит мя на путь правый, в конец заблудившагося.
Иисусе мой, Христе Многомилостиве, пристави ми Ангела хранителя души и тела моего, да сохранит мя от конечнаго падения, се бо уже низвергаюся в бездну греховную.
Иисусе мой, Ангелов слава, огради мя ополчением Ангелов Твоих, всего от бесов расхищаемаго.
Иисусе, ада Победителю, победи ад души моея и воскреси мя, умерщвленнаго страстьми.

Кондак 2

Сыне Божий, Сыне Девы, Един Сый Святыя Троицы, спрославляемый Отцу и Святому Духу, помилуй мя, помилуй, помилуй падшее создание Твое, имене ради святаго Твоего, се бо с Давидом в покаянии Тебе зову:
Помилуй мя, Боже, помилуй мя (поклон)
Помилуй мя, Боже, помилуй мя (поклон)
Помилуй мя, Боже, помилуй мя (поклон)

Икос 2
 
От дел моих несть спасения, Спасителю Боже мой, ибо вся дела моя студна, нечиста, мерзка, гнила: вера моя вместо дел да вменится мне. Се верую, яко услышиши мя окаяннаго, и взываю Ти сице:
Иисусе мой, Христе Многомилостиве, терпети не могу уже демонскаго стреляния, ускори избавити мя, Твой есмь аз.
Иисусе мой, искушенный повсячески, помози ми, искушаемому искусителем лукавым, немощен бо есмь аз.
Иисусе мой, Христе Многомилостиве, повелевый апостолом именем Твоим бесы изгоняти, исцели мя, беснующагося неистовством греховным, грехолюбив бо есмь аз.
Иисусе мой, сатану, яко молнию, с небесе спадша видевый, угаси молниеносныя разжженныя стрелы его, всего мя разжигающия, страстен бо есмь аз.
Иисусе, ада Победителю, победи ад души моея и воскреси мя, умерщвленнаго страстьми.

Кондак 3
 
Страстию Твоею, Христе, омрачивый солнце, помрачи предо мною всю призрачную светлость и сладость греха, да узрев мрачную и горькую тьму его, очи сердца моего к Тебе всегда возвожу, Солнцу Праведному, в покаянии взывая:
Помилуй мя, Боже, помилуй мя (поклон)
Помилуй мя, Боже, помилуй мя (поклон)
Помилуй мя, Боже, помилуй мя (поклон)

Икос 3
 
Ей, Господи Царю, из мертвых воскресый и сущим во гробех живот даровавый, призри на мя и услыши мя, вопию аз к Тебе таковая:
Иисусе мой, Христе Многомилостиве, во гробе лежаща отчаяния моего, возбуди мя глаголом силы Твоея к надежде спасения.
Иисусе мой, Жизне вечная, оживи мя, мертвеца, Твоею жизнию.
Иисусе мой, Христе Многомилостиве, возсмердеша раны моя, согниша вся струпы моя, повели, да отвален будет камень грехопадений моих.
Иисусе мой, Лазаря Воскресителю, гласом велиим воззови уму моему, в могиле нечистых помыслов поверженному: «Гряди вон».
Иисусе, ада Победителю, победи ад души моея и воскреси мя, умерщвленнаго страстьми.

Кондак 4
 
Безмерных страстей моих проказа велия порази мя люто, тело осквернися, ум окаляся, сердце острупися, воля развратися, несть во мне места чиста, весь проказихся: всего от верху и до ногу объят язва гноящаяся. И что сотворю, Господи и Избавителю и Заступниче уповающим на Тя, аще не к Тебе паки возвращуся и постеню, и яко прокаженный воззову: «Господи, аще хощеши, можеши мя очистити». Се бо в покаянии Тебе молюся:
Помилуй мя, Боже, помилуй мя (поклон)
Помилуй мя, Боже, помилуй мя (поклон)
Помилуй мя, Боже, помилуй мя (поклон)

Икос 4
 
Яко волны морския возсташа на мя беззакония моя, бездна последняя грехов обыде мя, и се кораблец мой близ потопления есть, Ионе подражая, вопию Ти:
Иисусе мой, Христе Многомилостиве, да будет по глаголу Твоему тишина велия в волнующемся сердце моем.
Иисусе, Кормчий спасения моего, простри ми руку, яко Петрови, и спаси мя, утопающаго.
Иисусе, ада Победителю, победи ад души моея и воскреси мя, умерщвленнаго страстьми.

Кондак 5
 
Во огни пламенном предстоят Тебе, Господи, Серафими и многоочитии Херувими, пламенногорящии, шестокрылатии, и вся Силы Небесныя. Дивны огненных уст хвалы и песни, велелепной Славе Твоей возносимыя. Но, о Боже Саваофе, что Тебе аз принесу от моих бренных нечистых устен, кое возмогу хваление, блудный и прескверный душею и телом, како славословити Тя дерзну? Точию сию песнь Давидову в покаянии Ти воспеваю:
Помилуй мя, Боже, помилуй мя (поклон)
Помилуй мя, Боже, помилуй мя (поклон)
Помилуй мя, Боже, помилуй мя (поклон)

Икос 5
 
Смотряя пророк пришествие Твое, Христе, провозгласи: «Положил еси к нам твердую любовь, Господи: Единороднаго бо Сына, Благий, очищение в мир послал еси». Смотряя и аз милость Твою неизреченную и любовь безмерную ко грешником падшим, не отчаяваюся во спасении своем, окаянный, но сице с надеждою Ти взываю:
Иисусе мой, Христе Многомилостиве, аще и пался есмь аз падением лютым, но памятую глагол Твой: «Аще падеши, возстани и спасешися», се ныне возстаю, поддержи мя, изнемогающаго.
Иисусе, друже мытарей и грешников, от нихже первый есмь аз, приими и мене, кающагося.
Иисусе мой, Христе Многомилостиве, с мытари и грешники ядый и пияй, сподоби мя неосужденно Плоть Твою ясти и Кровь Твою Животворящую пити во оставление всех грехов моих.
Иисусе, Судие Праведнейший, блудницу, слезившую у ног Твоих, не осудивый не осуди и мене, паче блудницы блуднейшаго.
Иисусе, ада Победителю, победи ад души моея и воскреси мя, умерщвленнаго страстьми.

Кондак 6
 
Гряди, душе моя, гряди, не бойся: Господь мимоходит, зовый тя на покаяние, яко некогда Адама всеродна падшаго зовый: «Адаме, где еси?» Возстани, что спиши? Иди, воззови к Отцу твоему: «Отче мой, согреших на небо и пред Тобою, несмь достоин нарещися сын Твой, приими мя возвращающегося, яко единаго от наемник Твоих, в покаянии Ти вопиющаго:
Помилуй мя, Боже, помилуй мя (поклон)
Помилуй мя, Боже, помилуй мя (поклон)
Помилуй мя, Боже, помилуй мя (поклон)

Икос 6
 
Окаянный аз человек, разбойнику по злодейством своим уподобихся. Храм телесный, о немже Апостол Христов глаголет: «Не весте ЛИ, яко храм Божий есте и Дух Божий живет в вас; аще кто растлит храм сей, того покарает Бог», храм сей аз, разбойник, растлих, оскверних, обезчестих, разорих, расхитих, опустоших. И ныне кары Твоея праведныя, Боже правосудный, ожидая со страхом и трепетом, яко преступник, Царю моему вопию:
Иисусе мой, Христе Многомилостиве, пощади, пощади мя, много Тебе согрешившаго.
Иисусе мой, разбойника благоразумнаго во едином часе раеви сподобивый, помяни и мене, разбойника неблагоразумнаго, егда приидеши во Царствии Твоем.
Иисусе мой, Христе Многомилостиве, молитвами рождшия Тя Приснодевы Марии, милостив и благоуветлив буди мне, Суда Твоего праведнаго трепещущему.
Иисусе мой, милости неизследимая пучина, отврати гнев Твой, на главу мою праведно движимый, избави мя от належащаго праведнаго Твоего прещения и помилуй, помилуй, помилуй мя, тяжкаго преступника повелений Твоих.
Иисусе, ада Победителю, победи ад души моея и воскреси мя, умерщвленнаго страстьми.

Кондак 7
 
Разрушил еси смертию Твоею смерть, отверзл еси разбойнику рай, отверзи и мне милосердия Твоего двери, в темнице злых страстей заключенному, разруши твердыни греха, яко крепость обдержащия душу мою. Тебе бо согреших, но от Тебе не отступих, в покаянии моляся:
Помилуй мя, Боже, помилуй мя (поклон)
Помилуй мя, Боже, помилуй мя (поклон)
Помилуй мя, Боже, помилуй мя (поклон)

Икос 7
 
Юность мою всю во гресех иждих, в тине сластей и похотей плоти моея валяяся, омрачихся бо помышлением от младенчества даже и до ныне, никогдаже восхотех сотворити волю Твою святую, весь диаволу последовах всегда, смех и поругание демонов бых. Якоже отсюду, не видя себе спасения, с воплем крепким вопию Ти, Спасителю моему, исповедуя грехи моя:
Иисусе мой, Христе Многомилостиве, кий вид греха не сотворих аз, кое дело демонское не содеях? Кое деяние студное и блудное не с преимуществом и тщанием соверших? Отврати убо лице Твое от грех моих.
Иисусе мой, пленным Освободителю, всякий уд окаянныя моея плоти служити и работати греху аз продах, свободи мя от работы сея вражия.
Иисусе мой, Христе Многомилостиве, кто не возрыдает мене окаяннаго? Кто не восплачет мене осужденнаго? Аз бо един лукавое пред Тобою сотворих, превозшед и препобедив вся от века грешники, несравненно прегрешивый и непрощенно, не отвержи убо мене от лица Твоего и Духа Твоего Святаго не отыми от мене.
Иисусе мой, нагих одеяние, наг и обнажен пред Тобой предстою, одей мя в ризу спасения Твоего.
Иисусе, ада Победителю, победи ад души моея и воскреси мя, умерщвленнаго страстьми.

Кондак 8
 
Аще беззакония назриши, Господи, Господи, кто постоит? Не постою и аз пред Судом Твоим праведным, прежде Суда осужденный моею совестию. Но понеже человеколюбив еси и ожидаеши человеческаго обращения, се, якоже пречистым Твоим ногам касаяся, из глубины души в покаянии Ти взываю:
Помилуй мя, Боже, помилуй мя (поклон)
Помилуй мя, Боже, помилуй мя (поклон)
Помилуй мя, Боже, помилуй мя (поклон)

Икос 8
 
Зрю себе, Господи, близ погибели суща, ибо, яко пчелы сот, обышедше обыдоша мя дуси нечистии, и несть мне ослабления, несть мира, несть покоя, несть отрады от стужений и борений лютых, понеже бо мнози борют мя с высоты, мнози возстают на мя, мнози глаголют души моей: «Несть спасения ему в Бозе его». Темже в борении сем находяся, яко безпомощен, взываю Ти о помощи: «Приими оружие и изостри, и возстани в помощь мою»:
Иисусе мой, Христе Многомилостиве, силою Креста Твоего запрети духу гордости и тщеславия, духу ненависти и злопамятования, духу зависти и лести, возмущающим мя.
Иисусе мой, сила моя, силою Креста Твоего запрети духу нечистому, сластолюбивому, злосмрадному, любодейному, блудному, оскверняющему мя.
Иисусе мой, Христе Многомилостиво, силою Креста Твоего запрети духу уныния, тоски, боязни, духу безнадежия и отчаяния, томящему мя.
Иисусе мой, Христе Многомилостиво, именем Твоим Божественным да угаснет всякое разжжение и движение плоти моея, от диавольскаго действа возбуждаемое.
Иисусе, ада Победителю, победи ад души моея и воскреси мя, умерщвленнаго страстьми.

Кондак 9
 
Помилуй мя, Святый Боже, яко образ есмь неизреченныя Твоея Славы, аще и язвы ношу прегрешений.
Помилуй мя, Святый Крепкий, яко не токмо немощен есмь, но и Твое есмь создание.
Помилуй мя, Святый Безсмертный, яко прах есмь и пепел, земля есмь и по глаголу Твоему в землю пойду, от неяже взят бых.
Темже прежде, нежели возмеши мене отсюду и отыду, и к тому не буду, прежде конца моего устнам моим не возбраню, во еже взывати в покаянии Ти всегда:
Помилуй мя, Боже, помилуй мя (поклон)
Помилуй мя, Боже, помилуй мя (поклон)
Помилуй мя, Боже, помилуй мя (поклон)


(Этот кондак читается трижды)

Икос 1
 
Еврейским отроком, в пещь огненную вверженным, и к Тебе, дивному во святых, воззвавшим, Ангела Твоего пославый и тем огнь в росу преложивый, вонми ныне воплю души моея, услыши стенание мое, во искушении бо зельнем болезненно Ти взываю:
Иисусе мой, Христе Многомилостиве, поели ми Ангела мирна, да утишит бурю страстей моих лютых.
Иисусе мой, Подателю просящим, подаждь ми Ангела верна наставника, да наставит мя на путь правый, в конец заблудившагося.
Иисусе мой, Христе Многомилостиве, пристави ми Ангела хранителя души и тела моего, да сохранит мя от конечнаго падения, се бо уже низвергаюся в бездну греховную.
Иисусе мой, Ангелов слава, огради мя ополчением Ангелов Твоих, всего от бесов расхищаемаго.
Иисусе, ада Победителю, победи ад души моея и воскреси мя, умерщвленнаго страстьми.

Кондак 1
 
Возбранный Воеводо и Господи, нас ради в ад сшедый и Собою вся воскресивый, се ныне, во аде страстей моих весь сгорая, из глубины сердца моего взываю Ти:
Иисусе, ада Победителю, победи ад души моея, воскреси мя, умерщвленнаго страстьми.



Молитва Господу Иисусу Христу Спасителю

Господи, спаси мя, погибаю, се кораблец мой бедствует от искушения волн житейских и близ потопления есть. Но Ты, яко Бог Милосердный и сострадательный немощем нашим, властию убо Твоею всесильною запрети волнению бедствий, хотящих погрузити мя и низвести во глубину зол, и да будет тишина, яко ветры и море послушают Тебе.[/spoiler]

Раб божий Константин

Его Преосвященству Преосвященнейшему Епископу Николаю - дар сыновней любви и искренней преданности в день ангела - 6 декабря 1928 года.
[spoiler]Акафист Господу Иисусу Христу

Кондак 1
Возбранный Воеводо и Господи, Иисусе Христе, / любы истинная и милосердие безконечное/, воспеваем Тя любовию спасеннии Тобою раби Твои/. Ты же яко имеяй всяку власть на небеси и на земли/, сыны света соделай Твоя служители, да зовем Ти:
Иисусе Солнце любве незаходимое, / научи и нас любви Твоей.

Икос 1
Ангели о Рождестве Твоем, Иисусе, радуяся, воспеша: "Слава в вышних Богу и на земли мир, в человецех благоволение". Мы же глубине благоволения Твоего дивящеся, благодарно Тебе зовем:
Иисусе, Сыне Благословеннаго в вышних живый и нас, дольних не завываяй.
Иисусе, Боже Всемилостивый, силою любве Твоея к нам снисшедый.
Иисусе, Милосте безконечная, с высоты блаженства небеснаго нам состраждущий.
Иисусе, пресветлым взором Твоим прозираяй глубину сердца человеческаго.
Иисусе, влекий к себе сердца Божественными Твоими глаголы.
Иисусе, любовь истинная, научи и нас любити Тя.
Иисусе, возжги огнь любве Божественныя в сердцах наших.
Иисусе, образ любве совершенныя нам показующий.
Иисусе, невозбранным желанием последовати Тебе нас вдохновляющий.
Иисусе Солнце любве незаходимое, научи и нас любви Твоей.

Кондак 2
Видя Божественное Твое Милосердие к падшему человечеству, и любовь совершенную, еяже вся злоба мира одолети не возможе, о Иисусе, Царю мой и Боже мой, ученицы Твоя разумеша, яко Ты еси воистину Христос, Сын Бога живаго. Мы же на всяк час, от темнаго духа злобы побеждаеми, к милосердию Твоему прибегающе, со слезами вопием: Аллилуия.

Икос 2
Разум не постигает тайны любве Божественныя, како Сын Божий, Иже ни единаго зла сотвори, смерть восприемлет, да нас смерти свободит, зовущих:
Иисусе, Сыне Ветхаго деньми, образ младенца восприявый.
Иисусе, Матери Твоея Пречистыя Чадо возлюбленное.
Иисусе, сердца Мариина радость неизглаголанная.
Иисусе, краснейший добротою паче всех сынов человеческих.
Иисусе, Апостолов Твоих возлюбленный учителю.
Иисусе, Марии Магдалине, много возлюбившей Тя, многия прегрешения отпустивый.
Иисусе, Старца Симеона благодатное упокоение.
Иисусе, Петра, отвергшагося Тебе, троекратным исповеданием со слезами паки утвердивый.
Иисусе, возлюбленнаго ученика Твоего, яко образ любве, иже к Тебе, нам показавый.
Иисусе Солнце любве незаходимое, научи и нас любви Твоей.

Кондак 3
Силою любве Божественныя озари и ны, Иисусе, и избави нас от всякия злобы, да чистым сердцем возлюбим Тя, Господа Бога Нашего и ближних наших, яко же себе, радостию зовуще: Аллилуия.

Икос 3
Имеяй богатство милосердия неизреченное, о Иисусе, Боже наш, не презри и наша обнищавшая сердца и светом Лица Твоего озари нас молящихся:
Иисусе, любовию ко Отцу Твоему исполненный, научи и нас любити Отца нашего Небеснаго.
Иисусе, всех любовию почитающих Тя от мрака греховнаго спаси.
Иисусе, возлюбленную Матерь Твою в помощь и утешение нам даровавший.
Иисусе, глаголы Божественными "яко милости хощу, но не жертвы", и нас милосердию научивый.
Иисусе, заповедь новую "да любим друг друга" нам даровавый.
Иисусе, любы неизреченная, не отлучи нас любве Твоея.
Иисусе, Свете, Его же тьмя не объимет, озари наша омраченныя сердца.
Иисусе, просвети нас любовию Твоею, вся терпящей и вся побеждающей.
Иисусе, учеником скорбящим на пути в Еммаус явивыйся, сотвори да выну сердца наша горят огнем любве Твоея.
Иисусе Солнце любве незаходимое, научи и нас любви Твоей.

Кондак 4
Бурю волн словом уст Твоих укротивый, Иисусе, Творче мира и стихий Повелителю, утиши бурю страстей в сердцах человек призывающих имя Твое Святое, да пребудут в тишине, единомыслии и любви нерушимей, зовуща: Аллилуия.

Икос 4
Слышаша ученицы Божественныя Твоя и премудрыя глаголы ужасахуся, глаголюще "кто может спасен быти?" Ты же, скорбя о жестокосердии сердца человеческаго, отвещал еси им, яко "вся возможна у Бога суть". Темже и мы вопием Ти:
Иисусе, научи нас творити волю Твою, да пребудем в любви Твоей.
Иисусе, открываяй нам любовь Твою, приобщи нас любви Твоей.
Иисусе, наставляяй нас любити Тя не словом токмо или языком, но делом и истиною, даждь нам к тому не оскорбляти любве Твоея.
Иисусе, запрети духу злобы, иже научает ны ненавидети брата нашего.
Иисусе, всели в сердца наши дух кротости и незлобия.
Иисусе, Свете, паче всякаго света.
Иисусе, радость, паче всякия радости.
Иисусе, упокоение, паче всякаго упокоения.
Иисусе, жизнь вечная и нескончаемая.
Иисусе Солнце любве незаходимое, научи и нас любви Твоей.

Кондак 5
Боготочною кровию Твоею на Кресте проливаемою, Иисусе, избавил еси ны от власти темнаго духа злобы, и смертию Твоею словеса Твоя запечатлел еси, яко воистину несть больше тоя любве, иже аще кто душу свою положит за други своя. Ты же не токмо за други Твоя молился еси ко Отцу, но и за вся верующия в Тя, по глаголу их, и за распинающия Тя. Темже благодарными усты и благодарным сердцем вопием Тебе: Аллилуия.

Икос 5
Видеша ученицы Твое неизреченное милосердие, яко больных исцеляеши, мертвыя воскрешаеши, всяк недуг душевный и телесный врачуеши, познаша Тя, Бога любве и проповедаша Евангелие Твое всей твари. Мы же вопием Ти:
Иисусе, всякий дар любве приемляй, приими и наше недостойное славословие.
Иисусе, умягчи наша жестокая и окамененная сердца.
Иисусе, отжени от нас гнев и памятозлобие.
Иисусе, помози нам не осуждати брата нашего.
Иисусе, научи ны зрети прегрешения наша.
Иисусе, смиривыйся даже до смерти, отдали от нас гордость и высокомерие.
Иисусе, согрей теплотою любве Твоея хладныя души наша.
Иисусе, свободи нас от уныния и печали.
Иисусе, изведи души наша из мрака отчаяния.
Иисусе Солнце любве незаходимое, научи и нас любви Твоей.

Кондак 6
Проповедник Божественныя любве Твоея, о Иисусе, явился возлюбленный Твой ученик и Апостол Иоанн Богослов, иже любовь совершенную стяжав, и нам друг друга любити заповеда, да в единомыслии и любви зовем Ти: Аллилуия.

Икос 6
Возсиял еси вселенней Христе, Свете истинный, просвещающий всякаго человека, грядущаго в мир. Темже и мы, светом лица Твоего просвещеннии, взываем Ти сице:
Иисусе, источниче жизни, отверзи очи сердца нашего, да узрим Тя, истинное солнце правды.
Иисусе, рекий, яко грядущаго ко мне не изжену вон, не отрини нас, приходящих к Тебе.
Иисусе, не остави нас, аще и многажды оставихом Тя.
Иисусе, взыщи нас, яко заблудшее овча.
Иисусе, приведи нас в дом Отца Твоего.
Иисусе, изыди на взыскание наше.
Иисусе, объятия Отча отверзти нам потщися.
Иисусе, в чертог Твой украшенный введи нас.
Иисусе, ризу нам подаждь светлу и одеждою нетления облецы нас.
Иисусе Солнце любве незаходимое, научи и нас любви Твоей.

Кондак 7
Хотя сокровенную тайну от века открыти, миру всему благовестил еси любовь Божию, о Иисусе, да не ктому Бог человеком, яко грозный Судия явится, но яко благий Отец, вся призываяй к Себе. О сем радуяся всяк земнородный с любовию да вопиет: Аллилуия.

Икос 7
Дивную нам показа Господь милосердия своего бездну, егда и за распенших Его на Кресте ко Отцу моляшеся. Приидите убо, людие, поклонимся Его долготерпению и, припадающе, возопиим:
Иисусе, любы истинная, озари и нас светом любве Твоея.
Иисусе, веления Отча исполнивый, научи и нас творити волю Отца нашего Небеснаго.
Иисусе, даждь нам любовь совершенную, в ней же страха несть.
Иисусе, даждь нам полноту радости Твоея.
Иисусе, влекий к Себе сердца, привлецы и нас к любви Божественней.
Иисусе, в знамение любве Твоея Тело и Кровь Твою в снедь верным даровавый, даруй нам непрестанно благодарити Тя.
Иисусе, не осуди нас небрегущих о сем драгоценнем даре любве Твоея.
Иисусе, возбуди в нас желание приимати часть Святынь Твоих во исцеление души и тела и в жизнь вечную.
Иисусе, сподоби нас истее Тебе причащатися в невечернем дни Царствия Твоего.
Иисусе Солнце любве незаходимое, научи и нас любви Твоей.

Кондак 8
Странно Бога любве и милосердия на смерть предана видяще, вся тварь ужасом содрогашеся, недоумевающе: како вместо дани любве и благодарения, клевету и поношение возда Тебе неблагодарнии людие. Мы же поклоняемся неизреченному Твоему благоутробию, зовуще: Аллилуия.

Икос 8
Весь был еси любовь к падшему человечеству, о Иисусе, егда на Кресте кротко дух Твой Отцу предав, снисшел еси в преисподняя земли, умершия вся воскресил еси, и нас радости исполнил еси, еяже никто же возмет от нас. Тем же и мы не таим сия радости, но со Ангелом Твоим всему миру глаголем: рыдания время преста, не плачите, яко Воскресе Христос! Но Сему возопиите:
Иисусе, веселие вечное, отдали от нас рыдание слез.
Иисусе, о Марии Магдалине рыдающей умилосердивыйся, плачущим и рыдающим нам благодатное Твое подаждь утешение.
Иисусе, смертию Твоею смерть умертвивый, оживи души братий и сестр наших скончавшихся.
Иисусе, Агнче Божий, любовию вземляй грехи мира, отпусти им всякая прегрешения, вольная и невольная.
Иисусе, о Лазаре, друге Твоем, слезы пролиявый, отри всяку слезу от очес их.
Иисусе, восшедый во еже уготовати место любящим Тя, всели их во Обители Твоя.
Иисусе, всем усопшим, иже не имут сродников за них молящихся, даруй Молитвенницу неусыпающую - Пречистую Матерь Твою.
Иисусе, рекий, яко веруяй в Тя не умрет, но прейдет от смерти в живот, даруй им жизнь вечную.
Иисусе, Радосте безконечная, сподоби и нас радости соединения с ними во Царствии Твоем.
Иисусе Солнце любве незаходимое, научи и нас любви Твоей.

Кондак 9
Все естество Ангельское, Тобою созданное, непрестанно воспевает силу любве Твоея о Иисусе, земля же и небо, солнце и луна и вся звезды, и свет, холми же и доли, воды и вся дубрави поклоняются Тебе и восхваляют Имя Бога Вышняго, научая и нас воспевати Ти: Аллилуия.

Икос 9
Витии суемудреннии недоумевают како возможно есть нам себе отвергнутися, да Тя приобрящем. Мы же добре вемы со Апостолом, яко аще и весь мир приобрящем, любве же не имамы, никая польза нам есть. Сия ведуще, вопием Ти:
Иисусе, сокровище многоценное, даждь нам обрести Тя, Единаго на потребу.
Иисусе, Свете мира, не отвержи нас аще и ничтоже благое сотворихом пред Тобою.
Иисусе, приими ны, аще и в единодесятый токмо час приходим к Тебе.
Иисусе, благоволи пребыти с нами, да радость наша исполнится.
Иисусе, научи ны не радоватися о неправде, но сорадоватися истине.
Иисусе, даждь нам любовь Твою, яже долготерпит и милосердствует.
Иисусе, даждь нам Твою любовь, яже не превозносится, ниже гордится.
Иисусе, даждь нам Твою любовь, яже вся покрывает, всему веру имет, вся уповает, вся терпит.
Иисусе, даруй нам любовь, яже никогда же упразднится, но пребывает во век.
Иисусе Солнце любве незаходимое, научи и нас любви Твоей.

Кондак 10
Спасти хотяй мир во зле погибающий, о Иисусе, снисшел на землю, всем образ любве совершенныя показуяй. Сего ради Тебе, возлюбленному Господу и Спасителю нашему со умилением вопием: Аллилуия.

Икос 10
Царю Небесный, Иисусе Христе, Боже наш, пришедый свободити ны от клятвы законныя и закон царский нам даровавый, да любим друг друга. Призри и ныне на окаменение сердец наших и помилуй нас, из глубины души Тебе молящихся и вопиющих:
Иисусе, оживотвори нас всех любовию Твоею.
Иисусе, ниспосли нам Духа Твоего Святаго Утешителя.
Иисусе, обрати ны на стези заповедей Твоих, просвети лице Твое на ны, да спасемся.
Иисусе, Ты еси крепость наша и утверждение.
Иисусе, Ты еси Бог наш, Ты еси наше радование.
Иисусе, Ты еси Христос, Сын Бога Живаго.
Иисусе, Ты еси Свет превысший всякаго Света.
Иисусе, Ты еси Пасха спасительная от смерти к жизни нас преводящая.
Иисусе, кто отлучит нас от любви Твоей?
Иисусе Солнце любве незаходимое, научи и нас любви Твоей.

Кондак 11
Пение благодарственное о милосердии Твоем даруй нам принести Тебе, о Иисусе, Спасителю наш, и приими недостойныя наша молитвы. Из глубины души вопием Ти: Господи, Господи не отвержи нас от Твоего лица, зовущих Тебе: Аллилуия.

Икос 11
Яко Солнце любве незаходимое, возсиял еси мирови, Иисусе, просвещаяй сущия во тьме. Неразумнии же иудее не восхотеша приити к Тебе, дондеже бе с ними Свет. Мы же Тебе, истинное Солнце правды исповедающе, вопием:
Иисусе, призри с небесе, и виждь, и посети виноград сей, егоже насади десница Твоя.
Иисусе, обнови дух любви и милосердия в Церкви Твоей Святей.
Иисусе, не лиши ны блаженства любящим уготованнаго.
Иисусе, не предаждь нас без милости, яко не сотворившия милости.
Иисусе, помилуй вся благодеющия нам и любящия нас.
Иисусе, прости вся ненавидящия и обидящия нас.
Иисусе, умягчи сердца злых человек, возстающих на ны.
Иисусе, удали всякое пререкание и раздоры от среды верующих в Тя.
Иисусе, положи нам союз любве нерасторжимый.
Иисусе, сотвори, да все едини будем, яко же Ты во Отце и Отец в Тебе.
Иисусе Солнце любве незаходимое, научи и нас любви Твоей.

Кондак 12
Благодать подаждь и нам, всех благих Подателю, Иисусе, открый нам тайну любве Твоея, избави нас от всякия болезни и скорби в сей временней жизни, не лишены же ны сотвори и небеснаго Твоего Царствия, зовущих Тебе: Аллилуия.

Икос 12
Поюще велие чудюбве Твоея, Иисусе, Боже Всещедрый, поклоняемся Тебе любовию и просим прилежно: поспеши избавити нас от всякия скорби и клеветы человеческия, да не охладеет любовь в нас, смиренно зовущих Тебе:
Иисусе, призываяй к Себе вся труждающияся и обремененная, даруй мир Твой душам нашим.
Иисусе, кроткий и смиренный сердцем, умири наша скорбныя сердца.
Иисусе, распростерый на Кресте руце Твои, приими и ны во объятия Твоя.
Иисусе, обещавый пребыти с любящими Тя, пребуди с нами недостойными.
Иисусе, даждь нам познати, яко иго Твое благо и бремя Твое легко есть.
Иисусе, укрепи ны, да вси, вземши свой крест по Тебе грядем.
Иисусе, любы совершенная, утверди ны в вере и любви к Тебе.
Иисусе, милосте безконечная, помилуй нас.
Иисусе, веси, яко любим Тя, но восполни скудость любве нашея от щедрот Твоих.
Иисусе Солнце любве незаходимое, научи и нас любви Твоей.

Кондак 13
О Иисусе Христе, Свете от Света Отчаго, Ты еси любовь Божественная. Егда приидеши со Ангелы на облацех небесных с силою и славою, тогда пощади ны грешныя и сподоби ны быти наследники новаго небесе и новыя земли, в нихже любовь Твоя вечная живет, зовущих Тебе: Аллилуия.
Сей кондак глаголи трижды: и паки чтется икос 1-й: Ангели о Рождестве, и паки кондак 1-й: Взбранноый Воеводо.

Молитва
Премудрый и всеблагий Господи, Спасителю наш!
Просветивый сиянием пришествия Твоего мира концы и Сопризвавый нас в Церковь Твою святую, с обетованием наследия нетленных и вечных благ!
Призри милостивно на нас, недостойных рабов Твоих, и не помяни беззаконий наших, но по безмерному благосердию Твоему прости нам вся прегрешения наша. Аще бо и преступаем святyю волю Твою, но не отметаемся Тебе, Бога и Спаса нашего: Тебе единому согрешаем, но и Тебе единому служим, в Тя единаго веруем, к Тебе единому прибегаем и Твои точию раби быти хощем. Помяни немощь естества нашего и обдержащия повсюду искушения врага и прелести и соблазны мира, ихже ради без Тебе, якоже рекл еси, не можем творити ничесоже. Сам очисти и спаси нас! Сам просвети умы наша, еже непоколебимо веровати в Тя, единаго Спаса и Избавителя нашего! Сам подвигни сердца наша, еже всецело любити Тя, единаго Бога Творца нашего! Сам направи стопы наша, еже непреткновенно ходити во свете заповедей Твоих! Ей, Господи Спасителю наш! яви нам великую и богатую милость Твою: сотвори, да в преподобии и правде поживем вся дни живота нашего и тако достойни будем во второе славное пришествие Твое услышати от Тебе милостивое призывание в Царствие Небесное, еже получити сподоби нас, грешных и недостойных рабов Твоих, и в наслаждении неизреченных красот его славити Тя вкупе со безначальным Твоим Отцем и присносущным Божественным Духом во веки веков. Аминь.[/spoiler]

Раб божий Константин

Акафист царице-мученице Александре.
[spoiler]
Кондак 1
Избранной от рода державнаго, благоверней царице Александре, яко крепкой заступнице и всеблагой молитвеннице нашей
похвальное принесем пение. Ты же, яко имея ко Всещедрому Богу дерзновение от всяких зол и бед нас свободи, да с любовию
зовем ти: Радуйся, святая новомученице, царице Александро, молитвеннице о душах наших.

Икос 1
Ангелы своя странам и языком предстатели даровавый Бог, послал есть тя, святая наша мати и царице Александро, в страну
Российскую, процвела бо еси в земли сей подвиги твоими, молитвою и кончиною мученическою, и сего ради внити в чертоги
Царя Небеснаго спободилась еси, идеже со ангелы предстоиши престолу Господню и молишися о спасении Руси Святой. Мы же
вся сия славословяще, от сердце наших таковыя похвалы тебе приносим:
Радуйся, всеблаженная последовательнице Христова.
Радуйся, яко заповеди Его вельми возлюбила еси.
Радуйся, яко закон Христов ревностно и неленостно исполнила еси.
Радуйся, аки светило, во тьме нечестия возсиявшая.
Радуйся, Христу Богу человеколюбцу всю себе предавшая.
Радуйся, благочестием, молитвою и подвигом мученическим Творцу нашему угодившая.
Радуйся, душу свою погубившая, во еже спасти ю.
Радуйся, во славе Святой Троице предстоящая и о державе твоей непрестанно молящаяся.
Радуйся, святая новомученице, царице Александро, молитвеннице о душах наших.

Кондак 2
Видя Господь како сердце твое преисполнилось есть любви к царевичу российскому и како ожидание многолетнее с надеждою
велиею претерпела еси, благослови тя и благодатию Своею в таинстве бракосочетания обильно тя одари. Ты, радуяся о
Господе, милостию Своею тя посетившему, воспела еси Ему: Аллилуиа.

Икос 2
Разумом Божественным просвещаема, богомудрая Александро, не убоялась еси оставити отечество свое и в державу российскую
вселитися. Такожде и веру Православную всею душою твоею восприяла еси и народ русский возлюбила еси любовию истинною. Мы
же сему радуяся, ублажаем тя, мати наша и царице, тако:
Радуйся, добраго корне ветве многоплодная.
Радуйся, от родителей семена веры приимшая.
Радуйся, в страсе Божием ими воспитанная.
Радуйся, от юности твоея волю Господню творившая.
Радуйся, в земли российской отчизну новую обретшая.
Радуйся, яко царем Александром III радостно сретаема была еси.
Радуйся, яко сомнения и страси твоя преодолела еси и многоценный бисер веры Православныя восприяла еси.
Радуйся, именем древлей царицы-страстотерпицы нареченная.
Радуйся, яко тоя житию усердно подражала еси.
Радуйся, святая новомученице, царице Александро, молитвеннице о душах наших.

Кондак 3
Сила благодати Божией осени тя, благоверная Александро, егда купно с супругом твоим, святым царем Николаем венчаны быша
на царствие российское. Тоя же сила Божия к милосердию и благочестию осени тя и научи славити Единаго Бога, Отца и Сына
и Святаго Духа, и воспевати Ему: Аллилуиа.

Икос 3
Имея ум и сердце Духом Святым озаренныя, блаженная царица Александро, свято и праведно жительствовала еси в палатех
царстих, паче земной славы о горнем мудрствовала еси, благомудрым пастырем кронштадским и иными духовными наставники
руководимая, ко благу и славе Божией житие твое устрояла еси, милосердие бо преславное к народу российскому явила еси.
Мы же, ублажающе труды и подвизи твоя, вопием ти сице:
Радуйся, Матери Божией чадо верное и возлюбленное.
Радуйся, евангельския мудрости вместилище.
Радуйся, яко паче своея, пользы ближних искала еси.
Радуйся, заповедей Христовых усердная исполнительнице.
Радуйся, за ревность о чистоте сердца в нечистоте жития оклеветанная.
Радуйся, во благочестии жити нас наставляющая.
Радуйся, яко разум наш благодатию Господней просвещаеши и озаряеши.
Радуйся, яко к покаянию всех нас ныне призываеши.
Радуйся, святая новомученице, царице Александро, молитвеннице о душах наших.

Кондак 4
Буря скорбей и напастей, злобою мира сего воздвизаемая не ослаби крепкия любве твоея яже к Богу, святая благоверная
царице Александро, вся бо с верою и надеждою претерпела еси, в Бозе токмо отраду и утешение обретая и поя Ему: Аллилуиа.

Икос 4
Слышавше боголаженная царице Александро, о чудесех и помощи благодатней, яже получаша правоверние христиане по молитвам
старца Серафима, почала еси молитися Саровскому Чудотворцу, да дарует ти и супругу твоему сына-наследника и сотворит мир
державе российской. И егда родися царевич Алексий, возрадовалася еси зело и возблагодарила еси Господа, милость Свою
паки ти давшаго, и воспела еси пение благодарственное старцу Саровскому. Мы же вся поминающе, зовем ти тако:
Радуйся, всероссийскому прославлению преподобнаго Серафима поспособствовавшая.
Радуйся, его молитв ради даров Божиих удостоившаяся.
Радуйся, яко чад твоих и ближних достойно поклонятися святым угодником научила еси.
Радуйся, яко купно с сими святыми от нас славословия ныне приемлеши.
Радуйся, яко купно со Святым Серафимом о спасении нашем присно ходатайствуеши.
Радуйся, Русския Православныя Церкви предивное украшение.
Радуйся, велие к Богу, прославльшему тя за Русь многострадальную дерзновение.
Радуйся, рода христианскаго благомощное заступление.
Радуйся, святая новомученице, царице Александро, молитвеннице о душах наших.

Кондак 5
Божественнаго Духа преисполнена была еси, святая благоверная царица российская Александро, добродетельнаго ради жития
твоего: зане кротка, чиста сердцем, терпелива, непамятозлоблива и вельми милосердна была еси, сего ради и Спаситель во
чудесех преславну тя показа. Мы же, прославляя Бога, тя прославльшаго, благодарственно вопием Ему: Аллилуиа.

Икос 5
Видевше тя верные чада церкви Христовой, яко светило безоблачно сияюща многими дарованьми божественными, возрадовахуся
зело. Ты же, царица благочестивая, имущая сердце милостивое и к людям страждущим удобь преклонное, делами милосердия и
молитвами горячими послужила еси людям державы твоея. Такожде и сугубое попечение о благолепии церковнем имела еси, вся
творяще во славу Божию. Мы же, вся сия поминающе, молим тя, святая мати наша Александро, преклони и к нам, многогрешным,
милосердие Творца и Спаса нашего и приими славословия сия:
Радуйся, душу ко всем милосердну имевшая.
Радуйся, во мнозех благотворениях любовь к людям показавшая.
Радуйся, состраданием скорби бедствующих утолявшая.
Радуйся, нищая питавшая и убогия призиравшая.
Радуйся, сирая и вдовицы заступавшая и всем просящим помощи помогавшая.
радуйся, яко в обстояниях бызысходных отраду и облегчение даруеши.
Радуйся, яко и ныне предстательства и помощи твоея нас не лишаеши.
Радуйся, святая новомученице, царице Александро, молитвеннице о душах наших.

Кондак 6
Проповедуют о богоугодном житии твоем, святая мати наша Александро, в супружестве и царствовании, добродетели твоя:
велие благочестие, смиренномудрие, милосердие, истинная матерняя любы ко всем, поющим о тебе Богу: Аллилуиа.

Икос 6
Возсия свет Христов в чадех твоих, благоверная царице, яже тобою научены быша житию добродетельному и тобою же
укрепляемы путь скорбный благочестно проидоша и тако угодиша Господеви. Мы же, сия поминающе, молим тя, святая
Александро, просвети и наши сердца, мраком житейских попечений омраченныя, озари лучами добродетелей твоих всех, любящих
тя и молитвенно к тебе ныне взывающих:
Радуйся, с государем, супругом твоим во всяком благочестии и чистоте пожившая.
Радуйся, и чада твоя во благочестии воспитавшая.
Радуйся, молитве и смирению их научившая.
Радуйся, к подвигу мученическому их предуютившая.
Радуйся, воздержания и целомудрия наставнице богомудрая.
радуйся, супругам любовь и согласие дарующая.
Радуйся, кротких и благих нравов благоискусная насадительнице.
Радуйся, нечестивых и душетленных обычаев неуклонная искоренительнице.
Радуйся, святая новомученице, царице Александро, молитвеннице о душах наших.

Кондак 7
Хотящим нам славити подвизи и чудеса твоя, святая царица-мученице Александро Новая, помози свыше данною ти благодатию
сердца же наша от греховных промышлений очистити, да достойно и неосужденно прославим тя, о тебе воспевая Христу Богу
нашему: Аллилуиа.

Икос 7
Новую и дивную заступницу даровал есть тя Господь людем российским. Ты бо в добродетели подвизалася еси на земли,
мученически живот свой скончала еси и обрела еси венец нетленный на небесех. Ныне же благодать даруеши всем с верою имя
твое призывающим и подвизаеши евангельски славословити святую память твою:
Радуйся, нищая духом подвижнице, яко твое есть Царствие Небесное.
Радуйся, плакавшая много, яко обильно утешилася еси.
Радуйся, яко духом кротости землю обетования наследовала еси.
Радуйся, алкавшая и жаждавшая правды, яко насытилася еси в селениях небесных.
Радуйся, милостивая, яко не сама точию помилована еси, но и иным милости от Бога ходатайствуеши.
Радуйся, чистая сердцем, яко днесь Бога лицем к Лицу зриши.
Радуйся, яко возненавидена была еси от человек и гонения и клеветы прияла еси Христа ради.
Радуйся и веселися, яко мзда твоя многа есть на небесех.
Радуйся, святая новомученице, царице Александро, молитвеннице о душах наших.

Кондак 8
Странно бысть маловерным людем российстим чудное житие твое, яко не о славе си, но о Бозе помышляла еси и заповеди Его с
любовию творила еси, сего ради и ополчился есть на тя враг рода человеческаго со приспешники своими, кии паче иных на тя
клеветаху, поношаху и злословляху имя твое честное, ты же по заповеди Христовой за злохулителей своих молилася еси
Господеви, песнопоя Ему: Аллилуиа.

Икос 8
Всею душею возлюбила еси народ от Бога ти врученный и во дни испытания военнаго купно со дщери твоими ольгою и Татианою
усердно трудилася еси во врачебнице, воинов раны целяше, не щадила бо еси естества твоего и в немощи телесней силу велию
духовную явила еси, служа всем со смирением и любовию. Тем же и нас, грешных, твоею молитвою исцели и буди нам ко
спасению управительнице, да благодарственно воспоем ти:
Радуйся, ближние твоя искренне возлюбившая.
Радуйся, спасению их душевному и исцелению телесному себя посвятившая.
Радуйся, болезнующих грехми целительнице благоискусная.
Радуйся, недугов телесных врачевательнице богодарованная.
Радуйся, воинам увечным любовию послужившая.
Радуйся, ангелов милосердием твоим возвеселившая.
Радуйся, Бога и ближних любити нас научающая.
Радуйся, страждущим служити нас подвизающая.
Радуйся, святая новомученице, царице Александро, молитвеннице о душах наших.

Кондак 9
Всяческие скорби и болезни со смирением и надеждою на Господа Иисуса Христа претерпела еси, царице Александро, егда
волею злочестивых богоотступников странствие скорбное из Петрограда во град Тобольск совершила еси. Тем же просия
победою вера твоя, яко за все благодарила еси Господа, не оставившаго тя, супруга и чад твоих во дни испытаний и пение
хвалебное возносила еси Вседержителю взывая: Аллилуиа.

Икос 9
Витийския многовещания и риторские хитрости отвергше, искренним точию сердцем в песнех духовных величаем тя, заступницу
нашу, благоверную царицу-мученицу Александру, восхваляем многотрудное житие твое, торжествуем славу твою и, покланяющеся
святому образу твоему, умильно глаголем:
Радуйся, яко тобою славится Бог дивный во святых Своих.
Радуйся, яко тобою посрамляется отец лжи, диавол.
Радуйся, многими добродетельми путь свой к небеси уготовившая.
Радуйся, слезами скорбьми и покаянием стези твоя оросившая.
Радуйся, радости и славы святых достойная сонаследнице.
Радуйся, блаженства райскаго и света невечерняго сопричастнице.
Радуйся, от горних высот славы твоея к земнородным милостиво приникающая.
Радуйся, нас, чад твоих, матерински посещающая.
Радуйся, святая новомученице, царице Александро, молитвеннице о душах наших.

Кондак 10
Спасительнаго подвига ищуще, святая страстотерпице царице Александро, взяла еси крест Христов и Христу последовала еси,
тесноты, лишения, осмеяния и иные злострадания терпела еси, на Бога уповая, веру бо и верность Ему даже до конца явила
еси, песнопоя Господеви ангельскую песнь: Аллилуиа.

Икос 10
Стена крепкая, козньми врага неодоленная, пребыла еси до конца, святая великомученице царице, егда злочестивии
богоотступники купно с супругом, чадами и слуги верными лютой смерти тя предаша. Мы же ублажаем мученическую кончину
твою и почитаем тя, яко молитвенницу и ходатаицу не токмо за страну российскую, но и за весь мир христианский, и любовию
к тебе подвизаемы, таковые похвалы приносим ти:
Радуйся, от рук злочестивых чашу смертную испившая.
Радуйся, устнами верных сего ради присно восхваляемая.
Радуйся, веру, надежду и любовь даже до конца сохранившая.
Радуйся, ум и сердце посреди мучения лютаго ко Господу устремившая.
Радуйся, яко во обителях райских ныне пребываеши.
Радуйся, яко всех с верою имя твое призывающих милостивно утешаеши.
Радуйся, от пагубы и зловерия верных ограждение.
Радуйся, мира христианскаго в вере и благочестии утверждение.
Радуйся, святая новомученице, царице Александро, молитвеннице о душах наших.

Кондак 11
Пение немолчное совершая, предстояще пред образом твоим, царице наша Александро, покаяния молитвы за безумие отцев наших
приносим, слезно глаголя: "Господи, даруй им прощение молитвами венценосных мученик Твоих", и на милосердие Отца
Небеснаго уповая, сокрушенно поем: Аллилуиа.

Икос 11
Светлостию подвигов благоприятных просияла еси, святая мати Александро, и восприяла еси благодать молитися за ны,
вспомоществуя верным в подвизе спасения, яко сосуд избранный благодати Божия. Ныне же купно с преподобномученицею
Елизаветою, сестрою твоею, государем и чадами и всеми новомученики российскими ходатайствуеши о нас пред престолом Царя
царствующих. Мы же вся сия поминающи, таковая похвалы тебе, царице Александро, приносим:
Радуйся, заступнице наша милостивая, богодарованная.
Радуйся, о вечном спасении нашем молящаяся.
Радуйся, временное благоденствие нам дарующая.
Радуйся, к сонму новомучеников сопричтенная.
Радуйся, святых благоверных княгинь земли русския достойная сонаследнице.
Радуйся, святыя Православныя Церкви духовная красото и радование.
Радуйся, радости нам и славы вечная усердная ходатаице.
Радуйся, благих желаний наших скорая исполнительнице.
Радуйся, святая новомученице, царице Александро, молитвеннице о душах наших.

Кондак 12
Благодать и велие дерзновение твое пред Богом ведуще тебе, святая и преславная царице Александро, молим ти ся: молися о
нас ко Господу, да избавит ны от всяких бед и напастей и сохранит и утвердит ны во святей вере, во всяком благочестии и
чистоте, да тихое и безмолвное житие поживем и поем тобою нам благодеющему Богу: Аллилуиа.

Икос 12
Поюще Богу песнь благодарения, радуемся о тебе, святая мати наша, богоблаженая царице Александро, яко вся полезная нам
даруеши, тобою бо пагуба отгоняется, здравие улучшается, мир и благоустроение водворяется; понеже бо на небесех присно
ходатайствуеши о нас, взывающих ти сице:
Радуйся, венценосице добропобедная от Христовой десницы увенчанная.
Радуйся, великая угоднице Божия, величием подвигов твоих ангелов удивишая.
Радуйся, чудотворице преславная, в бедах и скорбех страждущим человеком помогающая.
Радуйся, о мире всего мира ко Господу молитвеннице неусыпная.
Радуйся, о спасении державы российстей пред престолом Божиим выну ходатайствующая.
Радуйся, благочестие и смирение твоими всесильными молитвами нам дарующая.
Радуйся, чтущих память твою пред Богом поминающая.
Радуйся, о прославляющих тя Господа умоляющая.
Радуйся, святая новомученице, царице Александро, молитвеннице о душах наших.

Кондак 13
О преславная страстотерпице, боговенчанная царице Александро, прими благоутробно сие малое моление наше, и твоим сильным
и благоприятным пред Богом ходатайством, избави нас от враг видимых и невидимых, от всякия муки, да сподобимся с тобою,
царем-страстотерпцем и всеми новомученики российскими во веки воспевати Богу Спасителю нашему благодарственную песнь:
Аллилуиа.
(Сей кондак глаголи трижды, после икос 1 и кондак1)

Молитва первая святой Царице-мученице Александре
О преславная страстотерпице, боговенчанная царице Александро Новая, скорая наша помощнице и заступнице и неустанная о нас молитвеннице.
Предстояще пред образом святым твоим и тя, яко живу сущу, зряще, припадающе, молим тя: приими прошения наша и вознеси их ко Престолу милосерднаго Отца Небеснаго, яко велие и преславное дерзновение к Нему имущая; испроси всем, притекающим к тебе, и всем, чтущим святую память твою - вечное спасение и временное благодействие, от всяких бед и скорбей - скорое избавление. Ей, чадолюбивая мати наша и царице, тебе, предстоящей Престолу Божию ведомы нужды наша, духовныя и житейския, призри на нас материнским твоим оком, и твоими молитвами отврати от нас колебания всяким ветром учения, злых и богопротивных обычаев умножение; утверди же во всех веры согласное ведение, взаимную любовь и единомыслие; да всем: словесы, писании и делы славится посреди нас Всесвятое имя Отца, и Сына, и святаго Духа, Единаго Бога, в Троице славимаго и поклоняемаго, Ему же честь и слава во веки веков. Аминь.

Молитва вторя ко святей Царице-мученице Александре новой
О святая царице-мученице Александро Новая, милостивая сирых заступнице, крестоносная мати, щедрою твоею десницею озари и нас, тебе ныне молящихся и испроси у Всещедраго и Премилостиваго Бога, Ему же имя есть Любовь, богатыя милости и буди: во браце сущим - чистоты и любве святая хранительнице; чад малых и юности - мудрая окормительнице; сирых и скорбных - жалостивая утешительнице; грехи обуреваемых сострадательная врачебнице; от врагов искушаемых - крепкая защитнице; и всем твоего заступления просящим - милостивая пред Богом и Царицею Небесною ходатаице; наипаче же умоли, святая мати наша и царице, даровати нам благодать Всесвятаго Духа; да ею в житии сем охраняемы и спасаемы, с тобою сподобимся во веки прославляти Господа и Спаса нашего Иисуса Христа, Емуже слава подобает со Всеблагим Его Отцем и Святым Прещедрым Духом во веки веков. Аминь.

Величание
Величаем тя, святая царице-мученице Александро Новая и чтим честная страдания твоя, яже за Христа претерпела еси.[/spoiler]

Раб божий Константин

Акафист святой новомученице царице Александре
Вторая редакция.
[spoiler]Кондак 1
Избранной от рода державнаго, благоверной царице Александре, яко крепкой заступнице, и всеблагой молитвеннице нашей похвальное принесем пение. Ты же, яко имея ко Всещедрому Богу дерзновение, от всяких зол и бед нас свободи, с любовью зовущих ти:
Радуйся, святая новомученице царице Александро, молитвеннице о душах наших.

Икос 1
Ангелы своя странам и языком предстателие даровавый Бог, посла тя, святая наша мати и царице Александро, в страну Российскую, процвела бо еси в земли сей подвиги твоими, молитвою и кончиною мученическою, и сего ради внити в чертоги Царя Небеснаго сподобилася еси, идеже со ангелы предстоиши престолу Господню и молишися о спасении Руси Святой. Мы же, вся сия славословяще, от сердец наших таковыя похвалы тебе приносим:
Радуйся, последовательнице верная распятаго Учителя.
Радуйся, спошпенице усердная ада Разрушителя.
Радуйся, крест свой любве ради Божия радостно понесшая.
Радуйся, милость в очах Господних преславно обретшая.
Радуйся, за вся благодарити Творца нас наставляющая.
Радуйся, светом Христовым души наша озаряющая.
Радуйся, в добродетели терпения нас утверждающая.
Радуйся, скорби наши в радость претворяющая.
Радуйся, святая новомученице, царице Александро, молитвеннице о душах наших.

Кондак 2
Видя Господь како сердце твое приисполнилось есть любви к царевичу российскому и како ожидание многолетнее с надеждою велиею притерпела еси, благослови тя и благодатию своею в таинстве бракосочетания обильно тя одари. Ты же, радуяся о Господе, милостию Своею тя просветившему, воспела еси Ему: Аллилуиа.

Икос 2
Разумом божественным просвещаема, богомудрая Александро, не убоялася еси оставити отечество свое и в державу российскую вселитися и веру Православную всею душею твоею восприяла еси и народ русский возлюбила еси любовию истинною. Мы, же сему радуяся, ублажаем тя, мати наша и царице, сице:
Радуйся, рода королей выскоименитых отрасле благородная.
Радуйся, лозо вертограда Христова благая и многоплодная.
Радуйся, гласу Божественныя благодати прилежно внимавшая.
Радуйся, издетска к водительству Духа Святаго прилежавшая.
Радуйся, от юности твоея разум твой Божиею премудростью напитавшая.
Радуйся, в земли российской отчизну новую обретшая.
Радуйся, именем страстотерпицы во православии нареченная.
Радуйся, тоя святому житию усердно последовавшая.
Радуйся, святая новомученице, царице Александро, молитвеннице о душах наших.

Кондак 3
Сила благодати Божией осени тя, благоверная Александро, егда купно с супругом твоим, святым царем Николаем, венчана была еси на царствие российское. Тоя же сила Божия, к милосердию и благочестию осени тя и научи славити Единаго Бога Отца и Сына и Святаго Духа и воспевати Ему: Аллилуиа.

Икос 3
Имея ум и сердце Духом Святым озаренныя, богоблаженная царице Алексадро, свято и праведно жительствовала еси в палатех царстих, паче земной славы о горнем мудрствовала еси, богомудрым пастырем кронштадстим, святителем Феофаном Полтавским и иными духоносными наставники руководимая, ко благу и славе Божией житие твое устрояла еси, милосердие бо преславное к народу российскому явила еси. Мы же, ублажающе труды и подвизи твоя, вопием ти сице:
Радуйся, евангельской мудрости вместилище.
Радуйся, Матери Божией чадо верное и возлюбленное.
Радуйся, от сна греховнаго души наши пробуждающая.
Радуйся, ходити в заповедях в Божиих наставляющая.
Радуйся, от похоти себялюбия нас исцеляющая.
Радуйся, к земным богатствам сердцем не прилеплятися научающая.
Радуйся, богатых к милосердию и благотворению подвизающая.
Радуйся, бедным отраду и вспоможение дарующая.
Радуйся, святая новомученице, царице Александро, молитвеннице о душах наших.

Кондак 4
Буря скорбей и напастей, злобою мира сего воздвизаемая не ослаби крепкия любве твоея яже к Богу, святая благоверная царице Александро, вся бо с верою и надеждою претерпела еси, в Бозе токмо отраду и утешение обретая и поя Ему: Аллилуиа.

Икос 4
Слышавше, преславная Александро, о чудесех и помощи благодатней, яже получаша правоверные христиане по молитвам старца Серафима, почала еси молитися Саровскому чудотворцу, да дарует ти и супругу твоему сына-наследника и сотворит мир державе российской. И егда родися царевич Алексий, возрадовалася еси зело и возблагодарила еси Господа, милость свою паки ти давшего, и воспела еси пение благодарственное старцу Саровскому. Мы же, вся сия поминающе, зовем ти тако:
Радуйся, святаго Серафима с любовию почитавшая.
Радуйся, милости Божии по молитвам его получавшая.
Радуйся, мир Божий в сердца наша привносящая.
Радуйся, к небесем умы и сердца наши обращающая.
Радуйся, молитве сердечней нас научающая.
Радуйся, тайно творити добродетели нас наставляющая.
Радуйся, труды наша на пути спасения облегчающая.
Радуйся, милость и утешение всем верным являющая.
Радуйся, святая новомученице, царице Александро, молитвеннице о душах наших.

Кондак 5
Божественнаго Духа преисполнена была еси, святая царице страстотерптице Александро, добродетельнаго ради жития твоего: зане кротка, чиста сердцем, терпелива, непамятозлоблива и вельми милосердна была еси, сего ради и Спаситель во чудесех преславну тя показа. Мы же, прославляя Бога, тя прославльшего, благодарственно вопием Ему: Аллилуиа.

Икос 5
Видевше тя верныя чада церкви Христовой, яко светило безоблачно сияюща многими дарованьми божественными, возрадовахуся зело. Ты же, царице благочестивая, имуще сердце милостивое и к людем страждующим удобь преклонное, делами милосердия и молитвами горячими послужила еси народу державы твоея. Такожде и сугубое попечение о благолепии церковнем имела еси, вся творяще во славу Божию. Мы же, вся сия ныне поминающе, таковыя похвалы приносим ти:
Радуйся, душу ко всем милосердну имевшая.
Радуйся, во мнозех благотворениях любовь к людем показавшая.
Радуйся, состраданием скорби бедствующих утолявшая.
Радуйся, нищая питавшая и убогия призиравшая.
Радуйся, сирыя и вдовицы заступавшая и всем просящим помощи помогавшая.
Радуйся, и ныне предстательства твоего нас не лишающая.
Радуйся, молитвами твоими гнев Божий утоляющая.
Радуйся, святая новомученице, царице Александро, молитвеннице о душах наших.

Кондак 6
Проповедают о богоугодном житии твоем, святая мати наша Александро, в супружестве и царствовании, добродетели твоя: велие благочестие, смиренномудрие, милосердие, истинная матерняя любы ко всем, поющим о тебе Богу: Аллилуиа.

Икос 6
Возсия свет Христов в чадех твоих, благоверная царице, яже тобою научены быша житию добродетельному и тобою же укрепляемы путь скорбный благочестно проидоша, и тако угодиша Господеви. Мы же, сия поминающе, молим тя, святая Александро, просвети наши сердца, мраком житейских попечений омраченныя, озари лучами добродетелей твоих всех, любящих тя и молитвенно к тебе ныне взывающих:
Радуйся, с государем во всяком благочестии и чистоте пожившая.
Радуйся, чад твоих в вере и благочестии воспитавшая.
Радуйся, молитве и смирению их научившая.
Радуйся, к подвигу мученическому их предуготившая.
Радуйся, супругов в любви и единомыслии сохраняющая.
Радуйся, дев и юношей в целомудрии утверждающая.
Радуйся, обычаев душетленных отвращатися нас подвизающая.
Радуйся, нравы добрыя и благочестие в нас насаждающая.
Радуйся, святая новомученице, царице Алексадро, молитвеннице о душах наших.

Кондак 7
Хотящим нам славити подвиги и чудеса твоя, святая царице-мученице Александро Новая, помози свыше данною ти благодатию сердца наша от греховных помышлений очистити, да достойно и неосужденно прославим тя, о тебе воспевая Христу Богу нашему: Аллилуиа.

Икос 7
Новую и дивную заступницу дарова тя Господь всем христианам, ибо ты, преславная чудотворице, благодать великую пряла еси от Бога Вышняго, яко пришедшая от скорби велией и убелившая в крови Агнчей ризы своя. Ныне же отраду и утешение даруеши всем, с верою имя твое призывающим, и подвизаеши нас евангельски славословити святую память твою:
Радуйся, нищетою духовною царствие небесное обретшая.
Радуйся, от плача многого к утешению вечному востекшая.
Радуйся, духом кротости землю обетования наследовавшая.
Радуйся, жажду правды в селениях небесных утолившая.
Радуйся, милостивая, и иным милости от Бога источающая.
Радуйся, чистая сердцем, во славе Творца созерцающая.
Радуйся, гонения и клеветы Христа ради претерпевшая.
Радуйся, мзду многую на небесех от Господа получившая.
Радуйся, святая новомученице, царице Алексадро, молитвеннице о душах наших.

Кондак 8
Странно бысть маловерным людем российстим чудное житие твое, яко не о славе земной, но о Бозе помышляла еси и заповеди Его с любовию творила еси, сего ради и ополчися на тя враг рода человеческого со приспешники своими, кии паче иных на тя клеветаху и поношаху имя твое честное, ты же по заповеди Христовой за злохулителей своих молилася еси Господеви, песнопоя Ему: Аллилуиа.

Икос 8
Всею душею возлюбила еси народ от Бога ти врученный и во дни испытания военного купно со дщери твоими Ольгою и Татианою усердно трудилася еси во врачебнице, воинов раны целяше, не щадила бо еси естества твоего и в немощи телесной силу велию духовную явила еси, служа всем со смирением и любовию. Тем же и нас, грешных, твоею молитвою исцели и буди нам ко спасению управительнице, да благодарственно воспоем ти:
Радуйся, ближния твоя искренне возлюбившая.
Радуйся, спасению их душевному и исцелению телесному себя посвятившая.
Радуйся, воинам увечным любовию послужившая.
Радуйся, болезнующих грехми целительнице благоискусная.
Радуйся, недугов телесных врачевательнице богодарованная.
Радуйся, Бога и ближних любити нас научающая.
Радуйся, милосердие в сердцах наших пробуждающая.
Радуйся, страждущим служити нас подвизающая.
Радуйся, святая новомученице, царице Алексадро, молитвеннице о душах наших.

Кондак 9
Всякие скорби и болезни со смирением и надеждою на Господа Иисуса Христа претерпела еси, царице Алексадро, егда волею злочестивых богоотступников странствие скорбное из града Петрова во град Тобольск совершила еси. Тем же просия победою вера твоя, яко за вся благодарила еси Господа, не оставившего ни тя, ни супруга и чад твоих во дни испытаний ваших, и пение хвалебное возносила еси Вседержителю взывая: Аллилуиа.

Икос 9
Витийския многовещания и риторские хитрости отвергше, искренним точию сердцем в песнех духовных величаем тя, заступницу нашу, благоверную царицу-мученицу Александру, восхваляем многотрудное житие твое, торжествуем славу твою и, поклоняющеся святому образу твоему, умильно глаголем:
Радуйся, многими добродетели путь свой к небеси уготовившая.
Радуйся, слезами, скорбми и покаянием стези твоя оросившая.
Радуйся, радости и славы святых достойная сонаследнице.
Радуйся, блаженства райского и света невечернего сопричастнице.
Радуйся, с высоты славы твоея к нам милостиво приникающая.
Радуйся, нас, чад твоих, матерински посещающая.
Радуйся, о спасении нашем Спасителя умоляющая.
Радуйся, милость Богородицы к нам приклоняющая.
Радуйся, святая новомученице, царице Алексадро, молитвеннице о душах наших.

Кондак 10
Спасительного подвига ищуще, святая страстотерпице царице Алексадро, взяла еси Крест Христов и Христу последовала еси, тесноты, лишения, осмеяния и иные злострадания терпела еси, на Бога уповая, веру бо и верность Ему даже до конца явила еси, песнопоя Господеви ангельскую песнь: Аллилуиа.

Икос 10
Стена крепкая, козньми врага неодоленная, пребыла еси до конца, святая великомученице царице Алексадро, егда нечестивии богоотступники купно с супругом, чадами и слуги верными лютой смерти тя предаша. Мы же ублажаем мученическую кончину твою и почитаем тя, яко молитвенницу и ходатаицу не токмо за страну Российскую, но и за весь мир христианский, и любовию к тебе подвизаемы, таковыя похвалы приносим ти:
Радуйся, от рук злочестивых чашу смертную испившая.
Радуйся, за веру и правду Христову живот свой положившая.
Радуйся, крылами богомыслия сети вражия сокрушившая.
Радуйся, велию верою твоею страх смертный победившая.
Радуйся, верность Спасителю до конца сохранившая.
Радуйся, ум и сердце посреди мучения ко Господу устремившая.
Радуйся, кровию твоею торжество веры Христовой явившая.
Радуйся, в дому Отца Небеснаго обитель себе сотворившая.
Радуйся, святая новомученице, царице Алексадро, молитвеннице о душах наших.

Кондак 11
Пение немолчно совершая, предстояще пред образом твоим, царице Алексадро, покаяния молитвы за безумие отцев наших приносим, слезно глаголя: «Господи, даруй им прощение молитвами венценосных мученик твоих», и на милосердие Отца Небесного уповая, сокрушенно поем: Аллилуиа.

Икос11
Светлостию подвигов Богоприятных просияла еси, святая мати Алексадро, и восприяла еси благодать молитися за ны, вспомоществуя верным в подвизе спасения, яко сосуд избранный благодати Божия. Ныне же купно с преподобномученицею Елизаветою, сестрою твоею, государем и чадами и всеми новомученники российскими ходатайствуеши о нас пред престолом Царя Царствующих. Мы же вся сия поминающи, таковыя похвалы тебе, царице Александро, приносим
Радуйся, к сонму новомученников российских сопричтенная.
Радуйся, благоверных княгинь земли Русская сонаследнице.
Радуйся, яко тобою ум наш в Богомыслии научается.
Радуйся, яко тобою мрак неведения прогоняется.
Радуйся, из пучин отчаяния нас изводящая.
Радуйся, от искушений и соблазнов избавляющая.
Радуйся, любити Бога и творити волю Его нас наставляющая.
Радуйся, милосердие Божие к нам приклоняющая.
Радуйся, святая новомученице, царице Алексадро, молитвеннице о душах наших

Кондак 12
Благодать и велие дерзновение твое пред Богом ведуще тебе, святая и преславная царице Алексадро, молим ти ся: молися о нас ко Господу, да избавит ны от всяких бед и напастей и сохранит и утвердит ны во святей вере Христовой, во всяком благочестии и чистоте, да тихое и безмолвное житие поживем и поем тобою нам благодеющему Богу: Аллилуиа.

Икос 12
Поюще Богу песнь благодарения, радуемся о тебе, святая мати наша, богоблаженная царице Алексадро, яко вся полезная нам даруеши, тобою бо пагуба отгоняется, здравие улучается, мир и благоустроение водворяется; понеже бо на небесех присно ходатайствуеши о нас, взывающих ти сице:
Радуйся, с воинством мученическим Творцу хвалу воспевающая.
Радуйся, о спасении державы российстей Господа умоляющая.
Радуйся, о мире всего мира ко Христу молитвы возносящая.
Радуйся, от заблуждений духовных нас исцеляющая.
Радуйся, от путей погибельных нас удаляющая.
Радуйся, к покаянию всех нас ныне призывающая.
Радуйся, от плевел ненависти сердца наша очищающиая.
Радуйся, светом любви нелицемерныя нас озаряющиая.
Радуйся, святая новомученице, царице Алексадро, молитвеннице о душах наших

Кондак 13
О преславная страстотерпице, боговенчанная царице Алексадро, прими благоутробно сие малое моление наше, и твоим сильным и благоприятным пред Богом ходатайством, избави нас от враг видимых и невидимых, от всякия скорби и напасти, от внезапныя смерти и вечныя муки, да сподобимся с тобою, царем-страстотерпцем и всеми новомученники российскими во веки воспевати Богу Спасителю нашему благодарственную песнь: Аллилуиа. Аллилуиа. Аллилуиа.

Молитва первая святой Царице-мученице Александре
О преславная страстотерпице, боговенчанная царице Александро Новая, скорая наша помощнице и заступнице и неустанная о нас молитвеннице.
Предстояще пред образом святым твоим и тя, яко живу сущу, зряще, припадающе, молим тя: приими прошения наша и вознеси их ко Престолу милосерднаго Отца Небеснаго, яко велие и преславное дерзновение к Нему имущая; испроси всем, притекающим к тебе, и всем, чтущим святую память твою - вечное спасение и временное благодействие, от всяких бед и скорбей - скорое избавление. Ей, чадолюбивая мати наша и царице, тебе, предстоящей Престолу Божию ведомы нужды наша, духовныя и житейския, призри на нас материнским твоим оком, и твоими молитвами отврати от нас колебания всяким ветром учения, злых и богопротивных обычаев умножение; утверди же во всех веры согласное ведение, взаимную любовь и единомыслие; да всем: словесы, писании и делы славится посреди нас Всесвятое имя Отца, и Сына, и святаго Духа, Единаго Бога, в Троице славимаго и поклоняемаго, Ему же честь и слава во веки веков. Аминь.

Молитва вторая ко святей Царице-мученице Александре новой
О святая царице-мученице Александро Новая, милостивая сирых заступнице, крестоносная мати, щедрою твоею десницею озари и нас, тебе ныне молящихся и испроси у Всещедраго и Премилостиваго Бога, Ему же имя есть Любовь, богатыя милости и буди: во браце сущим - чистоты и любве святая хранительнице; чад малых и юности - мудрая окормительнице; сирых и скорбных – благая и мудрая утешительнице; грехи обуреваемых сострадательная врачебнице; от врагов искушаемых - крепкая защитнице; и всем твоего заступления просящим - милостивая пред Богом и Царицею Небесною ходатаице; наипаче же умоли, святая мати наша и царице, даровати нам благодать Всесвятаго Духа; да ею в житии сем охраняемы и спасаемы, с тобою сподобимся во веки прославляти Господа и Спаса нашего Иисуса Христа, Емуже слава подобает со Всеблагим Его Отцем и Святым Прещедрым Духом во веки веков. Аминь.[/spoiler]

Раб божий Константин

Акафист святой великомученице благоверной царице Александре Новой.
[spoiler]Кондак 1
Избранная Помазанником Божиим в царицу и матерь народу своему, аще и недостойнии, похвальная восписуем ти, о страстотерпице, но яко имущи вино и елей и злато любве твоея, обрати нас воистину быти яко дети, да внидем в Царство Небесное:
Радуйся, милосердая царице Александро Новая, страданьми твоими струпы греховныя наши обязующая.

Икос1
Ангелу подобный послан бысть православный царевич рещи тебе: Радуйся! И аще слезы точаста очи твоя доселе, абие престаста, глаголющу ему:
Радуйся, еюже православное благочестие возсияет;
радуйся, еюже лютое нечестие померкнет.
Радуйся, материнства и отцовства издетска обнищавшая;
радуйся, детски Россию во отечество и родину вменившая.
Радуйся, в Дом Пречистой входящая;
радуйся, из рук Ея чада русския приемлющая.
Радуйся, в сиротстве твоем ныне Материю Божиею восприемлемая;
радуйся, Феодоровской Владычице посвященная.
Радуйся, прежде трубы последней новое имя стяжавшая;
радуйся, яко именем твоим людие Христовы защиту обретают.
Радуйся, яко верова Богу в Помазанице Его;
радуйся, яко вменися ти в правду сие.
Радуйся, милосердая царице Александро Новая, страданьми твоими струпы греховныя наши обязующая.

Кондак 2
Видящи святая себе в вере иной, глаголет царевичу исповеднически: не можно есть человека предпочести Богу, како смогу любовь Христову любве ради твоея отринути? Како забуду Бога отец моих? Аще предам Христа, и твоя изгибнет любы. Сей же, узрев веру сию, умиленно взываше: Аллилуиа.

Икос2
Разум недоразумеваемый разумети из тьмы люторства ищущи, плакася горько святая. Но яко един от древних, на них же взирающе во свидетельстве их, людие, звери и камение славляху Христа, глаголет царевич, яко любы его - икона любве Христовой, яко паче взыскует Бог православия ея, неже уневещения, с сим же и мы зовем сице:
Радуйся, исходящи от земли твоея;
радуйся, яко восходиши в дом Отца твоего, Иже на Небесех.
Радуйся, лучою солнечною во отечестве именованная;
радуйся, яко к Солнцу Правды присно обращенныя лучи сия.
Радуйся, любомудрием известная;
радуйся, мудрость любовию о Христе свидетельствовавшая.
Радуйся, Ревеккины десять дний пождания поминавшая;
радуйся, яко новый Исаак сей десять лет не устал есть ждати тебе.
Радуйся, зрящи Иакова четыренадесять лет Рахили работавшаго;
радуйся, яко жених твой десятолетним терпением стяжал есть душу твою.
Радуйся, яко сей, тебе взыскуя, весь мiр прешел есть;
радуйся, яко начавшися тобою странствие сие в тебе кончину имело есть.
Радуйся, милосердая царице Александро Новая, страданьми твоими струпы греховныя наши обязующая.

Кондак 3
Сила Вышняго осени тогда к смирению царицу риторов премудршую, в мужи Бога боятися наущающи, всем же сеющим в смирении жати спасение обещающи. внегда пети сице: Аллилуиа.

Икос 3
Имущи в мире глубоце святая совесть свою, востече ко Елисавети. Сестра же сия большая, матере место заступающи, сице благословляше ю:
Радуйся, дар многоценный царевичев прежде возвратившая;
радуйся, благам царевичевым царевича предпочетшая.
Радуйся, аще и клятву носиши в крови твоей;
радуйся, яко клятва сия кровию о Христе излиянною благословением мiру дадеся.
Радуйся, прежде рождения сына тайну его в смерти брата познавшая;
радуйся, страх клятвенный на любовь в послушании Богу пременившая.
Радуйся, тремя странами присвояемая;
радуйся, всему мiру чужестранная.
Радуйся, на царстве юродою сущая;
радуйся, юродством Царство Небесное стяжавшая.
Радуйся, глаголющая избраннику Божию: буди мне по глаголу твоему;
радуйся, ныне ведящая любовь Божию крепльшую смерти.
Радуйся, милосердая царице Александро Новая, страданьми твоими струпы греховныя наши обязующая.

Кондак 4
Бурю внутрь имеющи помышлений сумнительных, целомудренная смятеся, мучеников веры поминающи, но сретающи взгляд цесаревича, небо узре отверсто, и мир предвечный, и тишину иную, тем же со страхом в молчании взывала есть: Аллилуиа.

Икос 4
Слышавше пастырей российских, глаголящих тя благочестивейшею, не усомнимся в Церкви, иже не имать льсти во устех своих, крепце веруем, яко ты, о царице, воистину благую часть избра, еяже, помолися, не лишитися и нам, да отверзем уста еже пети ти:
Радуйся, разума Христа ради совлекшаяся;
радуйся, в Царство Небесное вшедшая.
Радуйся, плачущая сыном за грехи народа русскаго;
радуйся, матерей русских в скорби утешающая.
Радуйся, кротце народ отрекшийся простившая;
радуйся, землю кротких наследовавшая.
Радуйся, правды Христовой алкавшая;
радуйся, истее причащающаяся в невечернем дни Царствия Христова.
Радуйся, возложением руку твоею на болящих милость царскую подававшая;
радуйся, яко елея милости твоея до полунощи достанет нам.
Радуйся, яко избыток сердца твоего в пяти чистейших чадех твоих;
радуйся, чистейший крин во дворех Бога нашего.
Радуйся, милосердая царице Александро Новая, страданьми твоими струпы греховныя наши обязующая.

Кондак 5
Боготечную звезду во мгле времени последняго зрим тя, святая царице, новаго дне невечерняго зарю предблистающую нам: несть во дни сем ни еллин, ни иудей, но вся и во всех Христос. Тако дивящеся тебе, пришелице сущей, превозшедшей православием Русь Святую, Богу поем: Аллилуиа.

Икос 5
Видяще отроцы Христовы на руку твоею царственнаго страдальца Алексия, и владыку Новой России разумевающе сего, аще и в немощи его слава Божия совершается, сице потщахуся песньми служити тебе:
Радуйся, яко Владычица Державная на тебе указует;
радуйся, яко Предвечный Младенец державу тебе возвращает.
Радуйся, яко аще и Бог Сый, но без Матере не может вочеловечитися;
радуйся, яко сын твой присно державствует во местоблюстительстве твоем.
Радуйся, указующая, яко материнство во Дусе Святе спасает мiр;
радуйся, самодержавне семьи пророчествующая.
Радуйся, семьи во Христе охранительнице;
радуйся, блудныя сватовства разрушающая.
Радуйся, болящих младенцев целительнице;
радуйся, израненных ратников окормительнице.
Радуйся, в ратных трудех чад сохраняющая;
радуйся, неврежденных сих молящимся матерем возвращающая.
Радуйся, милосердая царице Александро Новая, страданьми твоими струпы греховныя наши обязующая.

Кондак 6
Проповедницы Богоноснии бывше десять тем воев русских во тьме и сени смертней сидящим народом востока крайняго, целокупно восприимше сына твоего от купели, о царице, Богу единомысленно восклицаша: Аллилуиа.

Икос 6
Возсиявый России надежду примирения в Бозе, отроча родися нам, сын, и дадеся нам, отца державнаго подвизая ко иночеству, матерь святую призывая явити на свещнице престола добродетель свою, нам же предлагая пети о ней:
Радуйся, десять тем мучеников долга в восприемники сыну зовущая;
радуйся, кровию сына твоего сим сострадавшая.
Радуйся, имение царское увечным ратником разделившая;
радуйся, во врачебнице Христа посетившая.
Радуйся, тьмою дарований Господа обязавшая;
радуйся, руце твоя в смрадныя раны простиравшая.
Радуйся, ангелом подобно, смрадных мытарей отгоняющая;
радуйся, яко одежды твоя страдания облегчаша.
Радуйся, яко Христа во вдовицах нагих и сиротах ратных одевавшая;
радуйся, тайно гробы мучеников долга посещавшая.
Радуйся, умершая для празднеств иродовых;
радуйся, сестрою милосердия народу твоему явленная.
Радуйся, милосердая царице Александро Новая, страданьми твоими струпы греховныя наши обязующая.

Кондак 7
Хотящей старице Марии новгородской от нынешняго века преставитися прелестнаго, крестное пророчество и плод райский от нея прияла еси, о страстотерпице, сия же, небесную лепоту славы твоея мученическия прозревающи, верою и любовию вопияла есть: Аллилуиа.

Икос 7
Новую показа тя мученицу Александру преподобный Серафим, новую общину девичию в дщерех твоих созидая. Мы же видяще тя, о царице, водами источника саровскаго покрываемую, со умилением зовем ти:
Радуйся, древляго благочестия ревнительнице;
радуйся, ветхих святынь почитательнице.
Радуйся, двема старицами на страдания благословенная;
радуйся, купно со святою сестрою два храма Бога Живаго нам являющия.
Радуйся, крещением саровским новое крещение Руси прорицающая;
радуйся, западной тли Русь свобождающая.
Радуйся, Духа Свята молитвами Серафима сподобляющаяся;
радуйся, Духа целомудрия, терпения и любве струи источающая.
Радуйся, мужа лишитися ради Христа готовая;
радуйся, яко тебе сие авраамски вменилося есть.
Радуйся, новая послушница Серафимова;
радуйся, яко тобою спасутся тысящи.
Радуйся, милосердая царице Александро Новая, страданьми твоими струпы греховныя наши обязующая.

Кондак 8
Странное рождество сына твоего видяще, устранимся мiра, ум на небеса преложше: како сие чадо молитвы, благословение Серафимово, неисцельно болящим является? Аще ли не глаголет отцу народа русскаго, яко чада его неисцельно больны суть? Но и в сей скорбней тайне благодарим Бога, поюще: Аллилуиа.

Икос 8
Весь бе в вышних но и нижних никакоже отступи сын твой, о мати, еяже душу во всякое время и на всякий час проходит оружие: како наследник державы великия носим есть рукама меньшаго раба: како во участии народнем повсечасно нужду имел есть: указуя, яко не может без народа царь, указуя, яко не может без царя народ, ты же, утешающи народ сыном твоим, слышиши от всех сице:
Радуйся, яко держай на руку твоею покоился есть;
радуйся, днесь молящи его простити наши грехи.
Радуйся, яко сын твой воистину глава народу своему;
радуйся, яко телесем от главы своея неотъемлемым народ сей зрится.
Радуйся, яко сын твой присно питаем пищею ратников простых;
радуйся, яко народ твой спасется токмо причастием страданий сына твоего.
Радуйся, оправданная кротостию сына твоего;
радуйся, всеми зримая во смирении сына твоего.
Радуйся, яко страдания его лепота души твоея;
радуйся, яко в мучениех его расширяется сердце твое.
Радуйся, аще и дни его мали и исполнены лютых скорбей;
радуйся, яко скорби сия златом, ливаном и смирною Предвечному Младенцу принесены суть.
Радуйся, милосердая царице Александро Новая, страданьми твоими струпы греховныя наши обязующая.

Кондак 9
Всякое естество ангельское удивися великому твоего милосердия делу: неприступную, яко царицу, зряще гнойным, смрадным, в мале живым сущим приступну, яко милосердую сестру, юже епископ некий материю милосердия нарекл есть, славя Создавшаго ю: Аллилуиа.

Икос 9
Ветия многовещанныя, яко льстивыя змии, лжу вливающии во слухи народныя, видим о тебе, страстотерпице. Мы же зрим едину от клеврет твоих, иверскую княжну, иже надолзе умирающи, за все славяше Бога молитвами твоими, о царице. С оною же и мы поем:
Радуйся, вверившая ся токмо Божию попечению;
радуйся, всякое попечение отложши суетное.
Радуйся, в тайне смерти любовь Божию созерцающи;
радуйся, судеб Божиих тайнозрительнице.
Радуйся, сердце твое вертоград Божий содеявающая;
радуйся, яко в сердце твоем Христос главу преклони.
Радуйся, от избытка сердца твоего подающая требующим;
радуйся, яко сердце твое обитель Святыя Троицы есть.
Радуйся, выну возгревавшая дар Божий, живущий в тебе;
радуйся, в новом отечестве твоем истинным даром Божиим явившаяся.
Радуйся, яко царица сущи, явися аки служащая;
радуйся, Умывшему нозе рабом Своим послужившая добре.
Радуйся, милосердая царице Александро Новая, страданьми твоими струпы греховныя наши обязующая.

Кондак 10
Спасти хотящи Рим Третий, якоже собирает кокош птенцы своя под криле, влающийся изменою кораблец русский кормила еси. Людие же твои соглядатаю тя нарекоша, не ведяще, яко истинно соглядатая Царства Небеснаго ты была еси: сошед убо узрю, аще по воплю содомскому грядущему ко мне совершаются: очами твоими соглядал Сый Христос новый Содом, тебе поющей в скорбех: Аллилуиа.

Икос 10
Стена и забрало еси по имени твоему, страстотерпице святая Александро, степень неколеблемый лествицы к Небеси, отнюдуже отверзаются пажити Христовы, мы же, тщащеся утвердитися на степени сей, вопием ти:
Радуйся, защитнице российская;
радуйся, защитнице плененных.
Радуйся, защитнице ратная;
радуйся, защитнице детская.
Радуйся, защитнице девства;
радуйся, защитнице брачная.
Радуйся, защитнице послушествующих;
радуйся, защитнице монашествующих.
Радуйся, защитнице оклеветанных;
радуйся, защитнице долго болящих.
Радуйся, защитнице немощных в старости;
радуйся, защитнице беззащитных.
Радуйся, милосердая царице Александро Новая, страданьми твоими струпы греховныя наши обязующая.

Кондак 11
Пение всякое побеждается, вместити тщащееся скорбь твою, егда на посланиих твоих государю твоему русские люди писаша: "Не вемы, где есть сей". Что убо рцем вси от всея души и от всего покаяния нашего Богу, в долготерпении прославляющу тя, токмо: Аллилуиа.

Икос 11
Светоприемную свещу сущим во тьме болящим чадом твоим зрим тя, о страстотерпице: егда дух праздности обуял Русь Святую, солнце не даде света своего в сокровищницах ваших за ужас отречения от Бога народа русскаго. Мы же, аще и слепорожденнии суть, чаем узрети очами вашими великия и богатыя милости, хвалу устен возносяще:
Радуйся, яко ты свет мiру еси;
радуйся, яко ты прозираеши духовно слепотствующих.
Радуйся, яко ты еси упование безнадежных;
радуйся, яко ты еси покой послушных.
Радуйся, верная России в Бозе даже до смерти;
радуйся, подающая верным венец живота.
Радуйся, научившаяся кротости и смирению сердца;
радуйся, обретшая покой душам нашим.
Радуйся, навыкшая, в них же еси, довольна быти;
радуйся, удовляющая просящих тя.
Радуйся, в неутешных скорбех утешенная;
радуйся, утешающая скорбящих.
Радуйся, милосердая царице Александро Новая, страданьми твоими струпы греховныя наши обязующая.

Кондак 12
Благодать дати восхотевши народу своему, егда вси людие русскии сокрыша таланты, Богом данные, от Божия Помазанника, тогда тьму талант ты, о царице, со царственным супругом твоим иждила еси на ратников увечных, темже самей ти, в заключении сущей, благословися нужду терпети, славящей Христа во обстояниех: Аллилуиа.

Икос 12
Поюще житие твое и страдания твоя, о царице, хвалим тя вси, целомудрия источниче: ни едино от чад твоих потеряно бысть для Царства Небеснаго: како в Содоме новом девства телеснаго и духовнаго дивный цветник насадила еси, его же воня есть Христовым людем в живот вечный, содомляном же в вечное жжение, его же избави нас, да поем ти:
Радуйся, еяже слава вся внутрь и доныне;
радуйся, яко желает Царь доброты твоея.
Радуйся, яко ведутся девы вослед тебе;
радуйся, предстоящая одесную Христа.
Радуйся, Богу выну преклоняющая ухо твое;
радуйся, яко ныне в ризах позлащенных одеяна.
Радуйся, исходящая в сретение Жениху;
радуйся, имущая светильник горящий.
Радуйся, не могущая укрытися верху горы стоящи;
радуйся, имущая елей в пяти сосудех твоих.
Радуйся, яко тобою нощь России преста и день приближися;
радуйся, яко тобою Свет Христов просвещает всех.
Радуйся, милосердая царице Александро Новая, страданьми твоими струпы греховныя наши обязующая.

Кондак 13
О святая мученице царице Александро Новая! Егда народ твой схождаше от Руси Святей в Вавилон, в разбойники впаде, ты, о мати милосердия, елеем благотворений и вином церковных торжеств умащала еси его. Паче же и на рамена отроковиц твоих возложи тяжкия раны греховныя наша подъяти, и все имение семьи твоей иждила еси в тяжкой брани с народом, милосердием твоим гнушающимся. Обаче добрая самаряныня сущи, приведи нас ко кладезю Живота Вечнаго, да не жаждем во век, Богу зовуще: Аллилуиа.
Сей Кондак глаголи трижды. Посем же паки 1-й Икоси 1-й Кондак.

Молитва Великомученице Благоверной Царице Александре Новой
О святая мученице царице Александро, о возлюбившая Господа от всего сердца твоего, и от всея души твоея, и всею крепостию твоею и всем помышлением твоим! Вемы, яко младенца тя сущу страданием венча Христос матери ти умершей: помолися о чадех наших, матерей лишенных, матерьми оставленных, матерьми убиенных. Вемы, яко Жениха ради Небеснаго готова была еси отвергнути жениха царственнаго: помолися об отроковицах и отроцех наших, да не изберут скотскую пищу, ценою души купованную. Вемы, яко возненавидена была еси ближними от венца брачнаго: помолися о юных женах, в домы мужей входящих. Вемы, яко неугодны были суть чада твоя, дондеже наследник не родися: помолися о женах, в долгонедужии сущих. Вемы, яко чадо молитвы, чадо веры твоея, сын и наследник. неисцельно болен явился есть: помолися не быти оставленным болящим младенцем страны твоея. О избранная крестоносице Христова чрез все житие твое, возлюбившая народ твой паче себе: возжелевшая паче умрети, неже оставити страну твою: разделившая мученический венец с Помазанником Божиим: умоли Бога твоего, да не отступим от Него в час посещения нашего, да верны пребудем Христу кийждо на месте своем, да внидем в Царство, идеже ты солнечная луча еси Солнца Правды, Христа Бога нашего, в Троице славимаго. Аминь.[/spoiler]

Раб божий Константин

Акафист святому великомученику благоверному царевичу Алексию.
[spoiler]Кондак 1
Избранный воеводо ополчения, како возможем воззрети на тя, о чистоты источниче, страстьми и злобами нашими погребенны суще, но яко имущий венцы терпения, сострадания и кротости, подаждь нам крепость твою, да поем ти:
Радуйся, царевиче Алексие, защитниче теплый целомудрия.

Икос 1
Ангелом предстателем за землю твою послан был еси ты Серафимом Божиим народу твоему. Оный же столпник саровский провидя житие твое, ужасашеся, царевичу зовый таковая:
Радуйся, имже правда Божия возсияет;
радуйся, имже льствивая прелесть исчезнет.
Радуйся, безнадежно падших воззвание;
радуйся, студных скверн избавление.
Радуйся, высото девства и кротости;
радуйся, глубино умнаго сердца.
Радуйся, на руку носимое Троицы обиталище;
радуйся, Россию имущий в руце твоей.
Радуйся, звездо, являющая Солнце Втораго Пришествия;
радуйся, сосуде домостроения Божия.
Радуйся, имже обновляется Святая Русь;
радуйся, имже живи становимся.
Радуйся, царевиче Алексие, защитниче теплый целомудрия.

Кондак 2
Видяще Новый Израиль себе в блудной нечистоте, глаголет Создателю своему в мрачнем отчаянии: согрешихом на Небо и пред Тобою, и несмы достойни нарещися сыны Твои, обаче зря агнца русскаго, вземлющаго грехи народа, абие вопиет: Аллилуиа.

Икос 2
Разум недоразумеваемый разумети младенец ищай, горце вопияше: почто не можно есть быти ми, якоже и прочим чадом? Кто убо ответит ему? Мы же книгу Исаии разгнувше, слышим пророческое:
Радуйся, яко ты еси пред Богом яко корень в земли жаждущей;
радуйся, яко не имаше вида, ни доброты.
Радуйся, яко в болезни умален паче всех сынов человеческих;
радуйся, яко ты человек в язве сый и ведый терпети болезнь.
Радуйся, яко носиши наша грехи и о нас болезнуеши;
радуйся, яко нами вменен быти в труде и язве от Бога и во озлоблении.
Радуйся, яко язвен бысть за грехи наша;
радуйся, яко язвою твоею мы изцелехом.
Радуйся, иже яко овча на заколение ведеся;
радуйся, иже яко агнец пред стригущим его безгласен.
Радуйся, яко во смирении твоем суд твой взятся;
радуйся, яко вземлется от земли живот твой.
Радуйся, царевиче Алексие, защитниче теплый целомудрия.

Кондак 3
Сила Вышняго осени тогда к самоотречению супруг Богодохновенных царственных: егда видяще сына своего стесняема от пестунов страха ради смертнаго, паче убояхуся душевредия, неже страдания телеснаго, дерзновенно поюще: Аллилуиа.

Икос 3
Имея Богоприятное сердце царевич, страданием многолетним удобренное, востече к венцу мученическому. Отрок же Авраамль, ему же имя Исаак, на лоне отца веселяся о царевичи, играньми, яко песньми вопияше сему:
Радуйся, яко тобою искушаше Бог отца твоего;
радуйся, сыне единородный и паче всех возлюбленный.
Радуйся, яко ты еси всесожжение за грехи народа твоего;
радуйся, яко на руку отца несенный на заколение.
Радуйся, наказание телесное народа твоего отменяяй;
радуйся, наказание телесное на себе понесый.
Радуйся, возлюблен быв Отцем, Иже на Небесех;
радуйся, яко егоже любит Отец, наказует.
Радуйся, четыренадесять лет влекущий дрова, еже во всесожжение;
радуйся, яко хврастие сие грехи народа русскаго суть.
Радуйся, благоволение Божие Новому Сиону;
радуйся, стено плача русскаго.
Радуйся, царевиче Алексие, защитниче теплый целомудрия.

Кондак 4
Бурю внутрь имея помышлений сумнительных о предании царства сыну: достоит ли златницу сию дати князю мiра сего: Дамы или не дамы? - осклабясь вопрошаху иродиане новые: Дадите кесарю кесарево - рече государь: Сей же Божий есть человек, принесется Богови, Ему же поем: Аллилуиа.

Икос 4
Слышавше пастыря православнаго, иже прежде бяше чужестранный учитель твой, непреложность бытия Божия чрез житие твое осязавша, по венце же твоем ангельский образ приявшаго, восхвалим Христа Бога нашего, и камение превращающа пети о царевичи:
Радуйся, агнце и пастыре;
радуйся, кремль молящихся ти.
Радуйся, блудных бесов мучение;
радуйся, дверей Царствия отверзение.
Радуйся, земная наша в Небесная превращаяй;
радуйся, очи наши Небу отверзаяй.
Радуйся, младенцев безсловесных немолчная уста;
радуйся, отроков о чистоте непреклонная дерзосте.
Радуйся, камене, Голиафа мысленнаго поражаяй;
радуйся, адаманте диадимы Христовой.
Радуйся, имже рассыпаются страхования отцев;
радуйся, тишина и покой для матерей.
Радуйся, царевиче Алексие, защитниче теплый целомудрия.

Кондак 5
Боготечною звездою явилося есть житие твое, дние его быша мали и зли: пождан был еси десять лет, пожил же еси вмале более, обаче озарил еси светом утешительным подвиг родителей твоих, иже именоваша тя, якоже матерь прежде, лучем солнечным, Бога благодаряще: Аллилуиа.

Икос 5
Видеша чужестраннии и инославнии на руку пестуна будущаго владыку державы русския, прошибахуся сердца их зрети славу Божию, в немощи совершающуюся, яко и пети сим:
Радуйся, егоже душа в руце Божией;
радуйся, егоже души не прикоснется мука вечная.
Радуйся, непщеванный бысть во очесех безумных умрети;
радуйся, яко вменися во озлобление исход твой.
Радуйся, яко аще и муку приял еси, упование твое безсмертия исполнено есть;
радуйся, вмале наказан быв, великими благодетельствован был еси.
Радуйся, яко Бог искуси тя, и обрете тя достойноа Себе;
радуйся, яко Бог искуси тя, яко злато в горниле.
Радуйся, егоже Бог яко всеплодие жертвенное приял есть;
радуйся, возсиявый во время посещения Твоего.
Радуйся, яко Богосветлою искрою по стеблию лозы Христовой потекл еси;
радуйся, яко в тебе воцарися Господь во веки.
Радуйся, царевиче Алексие, защитниче теплый целомудрия.

Кондак 6
Проповедник благовестный бысть воспитатель твой, Петр неколеблемый, возвратися во отечество, скончав подвиг свой, и проповеда тя по обетованию Царства Христова наследника, всех пети научая сице: Аллилуиа.

Икос 6
Возсиявый в вавилоне новем, прежней Руси Святей, истину Божию власти праведныя, тысящелетния плетения попрал еси: о тебе всякая лесть сия паде: мнози убо, не ведущи о тебе ничесоже, но токмо зряще лик твой, благосердый плач зачинают, поюще:
Радуйся, сыне великомучеников;
радуйся, внуче царя-миротворца.
Радуйся, правнуче царя-освободителя;
радуйся, наследниче крамолы победителя.
Радуйся, благословение старца Феодора;
радуйся, страстотерпца Павла императора преемниче.
Радуйся, твердостию воли праотцу Петру Великому подобящийся;
радуйся, тишайшему царю тезоименный.
Радуйся, материю основателя Дома твоего предреченный;
радуйся, новый царевич углический.
Радуйся, Андрея Боголюбиваго сродниче;
радуйся, Бориса и Глеба рождие.
Радуйся, царевиче Алексие, защитниче теплый целомудрия.

Кондак 7
Хотящу Иоанну, венчающему и затворяющему Град Божий на земли нашей от нынешняго века преставитися прелестнаго, озарил еси сего пренебесным Светом от купели твоея, младенче царевиче, сей же умныма очима восприемля сие: Свет Христов просвещает всех, вопиял есть в сердци своем, в Горний Алтарь вознося Свет твой, поя, вопия, взывая и глаголя: Аллилуиа.

Икос 7
Новую мученицу царицу Александру тобою показа Христос Бог, новаго человека Божия тя являя, Новую Землю и Новое Небо отверзая нам. пети понуждая сице:
Радуйся о Господе, облече бо тя в ризу спасения;
радуйся, яко Бог возложи ти венец и украси тя красотою.
Радуйся, источающий благодать, яко миро на главе, сходящее на браду Аароню;
радуйся, подающий благодать тебе молящимся.
Радуйся, сильне, препоясующий меч твой по бедре твоей;
радуйся, наляцающий, успевающий, царствующий истины ради и кротости и правды.
Радуйся, непорочен бо путь твой, и на высоких поставляет тя Бог;
радуйся, яко Бог прослави тя десницею крепости.
Радуйся, яко десница Божия по молитве к тебе сокрушает враги;
радуйся, прежде рождения, по рождении и по смерти в руце Божией пребываяй.
Радуйся, побеждаяй, наследуяй Божия;
радуйся, сыне Божий по благодати.
Радуйся, царевиче Алексие, защитниче теплый целомудрия.

Кондак 8
Странное чудо о тебе видевше, устранимся мiра, ум на Небеса преложше: како до четвертаго рода по убиении твоем, в песнех, книгах, в мыслех и на сердце народа твоего, по запрещении помнити тя, очи твои, во образе некоего отрока, неотступно рекут нам: кровь твоя, о царевиче, на нас и на чадех наших. О покаяния новаго, помилуй нас пети тобою: Аллилуиа.

Икос 8
Весь бе в Вышних, и нижних никакоже отступи, о капле последняя долготерпения Божия: нарцыте Алексием мя, рекл еси клевретом твоим, аще ли же пестунов узрите, глаголите: Алексий Николаевич, аще же узрите царя, именуйте: Ваше Императорское Высочество. О царевиче мучениче: ты сам веси имя коегождо от нас: помяни нас в молитвах Богу твоему: поющих:
Радуйся, непорочный во всем житии твоем, ходящий в законе Господни;
радуйся, испытающий свидения Его, всем сердцем взыскавый Его.
Радуйся, юнейший, сохранивый словеса Божия, путь свой исправивый;
радуйся, наученный оправданиям Божиим, за вся благодаривый Господа.
Радуйся, яко слово Божие бысть в страх твой;
радуйся, утешенный во смирении твоем словом Божиим, живящим тя.
Радуйся, в нощи страданий твоих помянувый Имя Божие;
радуйся, причастник всем боящимся Господа и хранящим заповеди Его.
Радуйся, смирен быв Господом, яко научися оправданием Его;
радуйся, яко возвеселилися о тебе суть вси боящиися Господа.
Радуйся, яко присно жива душа твоя, и Господа хвалит;
радуйся, взысканный Господом, о нем же радуются легионы ангелов.
Радуйся, царевиче Алексие, защитниче теплый целомудрия.

Кондак 9
Всякое естество ангельское удивися великому твоему смирению: егда извещен был еси об отречении святаго отца твоего, ниже единым словом вопросил еси о порфирородных правах твоих, человече Божий: обаче первое слово твое о России бысть, темже умоли Троицу Святую, Ейже предстоиши ныне, сохранити нам русскость нашу сиречь Православие, поюще Богу: Аллилуиа.

Икос 9
Ветия многовещанныя, яко рыбы безгласныя, видим о тебе, царевиче: хотяще оклеветати тя, якоже отца и матерь твоих, ничтоже успевают: Бог бо сохрани тя неприкосновенна от лести бесовския, темже молим тя сице:
Радуйся, яко аще не станут премудрии, яко ты, не внидут в Царство Небесное;
радуйся, яко не избра Господь премудрии и сильнии, но тя избра.
Радуйся, суемудрыя студа исполняющий;
радуйся, словоблудныя потоки изсушающий.
Радуйся, яко тобою лютые взыскателие посрамляются;
радуйся, смрад новейших баснотворцев проявляющий.
Радуйся, иудейския плетения растерзающий;
радуйся, души наша миром исполняющий.
Радуйся, неведение умное теплотою сердечною превращающий;
радуйся, разум в вере неколеблем утверждающий.
Радуйся, чадо, отцев укрепляющее;
радуйся, блудных сынов за покаяние отцовства сподобляяй.
Радуйся, царевиче Алексие, защитниче теплый целомудрия.

Кондак 10
Спасти хотя мир тысящелетний на земли сей устрояемый, многажды снисходил отец твой блудному народу: последи же тя в свое место предложил есть, да устыдятся сына: ты же в страдании навыкл еси, темже и страждущим и обремененным грехи многими заступник быти вожделел еси, Богу зовый: Аллилуиа.

Икос 10
Стена еси младенцем, отроком и отроковицам ты, о царевиче, гной и смрад мерзостей содомских нетрудно изгоняющий, иго благое и бремя легкое в сердца водворяющий, глас хлада тонка, воню райскую слезоподательную нам туне дарствующий, да благодарим:
Радуйся, ратнаго отечестволюбия образе;
радуйся, воинскаго целомудрия начертание.
Радуйся, детския чистоты благородие являющий;
радуйся, чад увечных царских венцев за терпение сподобляяй.
Радуйся, отроков воинов мучеников новых созидающий;
радуйся, юнейший ратник в войске отца твоего.
Радуйся, архистратиже всех чад убиенных;
радуйся, противу блудных прилогов поборствуяй.
Радуйся, угрожаемых от насилия сохраняяй;
радуйся, тепле кающимся целомудрие возвращаяй.
Радуйся, безвинно девство иждивших невесты претворяяй;
радуйся, глумящихся материнству и девству страданием очищаяй.
Радуйся, царевиче Алексие, защитниче теплый целомудрия.

Кондак 11
Пение всякое побеждается, спростретися тщашеся простерту ти множицею лютою язвою твоею, наконец же простерту ти сущу в подклете дома Ипатиева посреде державы твоея, надолзе закалаему, не могущу абие умрети. О чада сладчайшего! О славы русския! О лепоты неприступныя! Како вдался еси христоненавистником, спростретися тщащийся на Кресте простерту Богу твоему, Емуже поем: Аллилуиа.

Икос 11
Светоприемную свещу сущему во тьме скорби по убиенному сыну воеводе альбионскому зрим тя, царевиче: невещественный бо вжигая огнь, состраждеши сему: не должно ти быти единому в час сей - глаголеши, соседя ему, научая нас пети тебе:
Радуйся, во страдании жизнь свою истощивый;
радуйся, сострадание нам источаяй.
Радуйся, великомучениче в житии твоем;
радуйся, обретший очи зрети страдание ближняго.
Радуйся, царскую порфиру кровию твоею обагряяй;
радуйся, в скиптра место крест приемляй.
Радуйся, кровь твою, яко алавастр мира Христу приносяй;
радуйся, неисцельныя болезни легце исцеляяй.
Радуйся, за царство земное Небесное Царство приемый;
радуйся, вразумляяй земное отечество любити, да Небеснаго сподобимся.
Радуйся, аще и пресечеся тобою род твой;
радуйся, рождая нас в Жизнь Вечную.
Радуйся, царевиче Алексие, защитниче теплый целомудрия.

Кондак 12
Благодать дати восхотев чадом, аще и неверным, Отец Небесный открывает нам сияние крестной славы твоея, да усрамимся новаго сего мученика-царевича, сей же сквозе все житие распинаем быв грехми народа русскаго, присно поет: Аллилуиа.

Икос 12
Поюще твое рождество третие, хвалим тя вси, храме одушевленный воскресения нашего: веселят бо страдания твоя нас ничесоже боятися кроме утраты любве Христовой, научающе в малых скорбех наших пети тебе:
Радуйся, младенческим незлобием мученический венец преукрасивый;
радуйся, загражденными усты обличаяй жестосердие христоненавистников.
Радуйся, яко уверение истинныя веры являешися;
радуйся, потоком крови твоея доныне заграждающий потоки беззакония.
Радуйся, древним седми Маккавеям твердостию души уподобивыйся;
радуйся, мудре на отроковицы Веру, Надежду и Любовь взираяй.
Радуйся, истрезвляющий нас к безстрашному свидетельству Истины;
радуйся, яко нам заступление суть честная страдания твоя.
Радуйся, яко ты еси израильтянин истинный, в нем же льсти несть;
радуйся, яко сего ради убиен бысть за Христа.
Радуйся, долгоумиранием злобу жидовскую истощивый;
радуйся, излиянием крови твоея Церковь благодатию наполняяй.
Радуйся, царевиче Алексие, защитниче теплый целомудрия.

Кондак 13
О страстотерпче четыренадесятолетний царевиче Алексие! Егда ты возсмеявался еси во тьме, самодвижныя картины созерцая, вси сущии окрест тебе обращашася во еже зрети тя: зане в страданий место радость осеняющая тя бысть якоже смех Сарры, якоже радость царицы Елены, егда обрете Честный Крест, и якоже радость матере твоея, егда родитися тебе. Помолися Владыце и Богу твоему не лишитися и нам радости оныя, слезами покаяния даруемой, да будет о нас радость ангелов вящшая неже о девятидесяти и девяти незаблуждших овцах, да и о нас ты возможеши пети Богу: Аллилуиа.
Сек Кондак глаголи трижды. Посем же паки 1-й Икос и 1-й Кондак.

Молитва святому великомученику благоверному Царевичу Алексию
О страстотерпче святый царевиче Алексие! О новый Димитрие царевиче, якоже и сей, Дом свой заключающий! О Гавриилу Белостокскому и прочим младенцем, жидов обличителем, подобящийся! О Артемию отроку, народом пренебрегаему, последующий! Известны мы, яко ополченное войско, окруженное, тобою из топи непроходимыя невозбранно изведено бысть. Сии же изводимии, священнику, дерзновением фесвитятину Илии подобному, запинаху молити тя о спасении, не сущу ти людьми прославленну. Се ныне зриши царство твое, о нем же глаголал еси: Егда аз буду царь, не будет лжи окрест мене - днесь царство отца лжи является, за еже доселе не царствуеши ты в сердцах народа твоего. Сам убо, о царевиче, прииди и стани зде с нами, уцеломудри нас, аще и не волящих: ты еси врач изрядный, ведящий более нас потребная ко спасению нашему. Вемы сострадание твое, вемы кротость твою, вемы любы твою к народу твоему: помози в долгонедужии сущим людем твоим, не попусти любвеоставленней быти прежде Святей Руси, но сам яко веси, приими дерзновение во спасение наше. Аминь.[/spoiler]

Раб божий Константин

Акафист царевне Анастасии.
[spoiler]Кондак 1
Избранная веселити сердца человеков, грозд юнейший рождия седмеричнаго лозы Христовой, источи умиление дряхлым нашим сердцам, да поем ти:
Радуйся, мудрая дево царевно Анастасие, веселие вечное над главами нашими.

Икос 1
Ангеле Анастасия, анафора благодарения нашего, анафемы русския избытие: явися на камени седяща жестосердия моего: несть нам дороги унывати: глаголи ми, да и аз воспою тебе:
Радуйся, радосте воскресная;
радуйся, радосте крестная.
Радуйся, радосте заветная;
радуйся, радосте седмицветная.
Радуйся, мудрая дево царевно Анастасие, веселие вечное над главами нашими.

Кондак 2
Видяще святая злое уныние наше, не по Бозе печаль, иже избыточествует падения, едину от сандалий своих оставляет нам еще в житии сущи: словесы удобопонятным беседуя с нами: аще восхощете, возможете быти цари и боги по благодати, следуя стопами царственных мучеников, воспевая Премудрому Архитектону спасения нашего: Аллилуиа.

Икос 2
Разум недоразумеваемый разумети ищем в житии меньше царевны: обаче не бойся, но токмо веруй: глаголет Истинный Иаиру: вси убо лжеанастасии правду воскресения глаголют: сподобльшаяся век он улучити и воскресение, умрети бо ктому не могут: равни бо суть ангелом и сынове суть Божии, воскресения сынове суще: мы же поем царевне безсмертия:
Радуйся, радосте родителей;
радуйся, радосте твоих служителей.
Радуйся, радосте ангелов;
радуйся, радосте Царя веков.
Радуйся, мудрая дево царевно Анастасие, веселие вечное над главами нашими.

Кондак 3
Сила Вышняго во юностном твоем совершашеся, сосуде немощнейший, царевно Анастасие: егда слышим глас твой в письмах сестрам и отцу, яко тайное благоухание семьи твоей слышим: сокровенное царственных мучеников отверзаеши нам, веселием ангельским упоевая нас, восклицающих: Аллилуиа.

Икос 3
Имуще разслабление некое тайное, разслабленности не терпела отнюд, о царевно: темже мою душу во гресех люте разслабленную осени твоим предстательством, да пою о тебе:
Радуйся, радосте безрадостных;
радуйся, радосте рыдающих.
Радуйся, радосте обуреваемых;
радуйся, радосте искушаемых.
Радуйся, мудрая дево царевно Анастасие, веселие вечное над главами нашими.

Кондак 4
Бурю внутрь имели суть помышлений сумнительных даже сродницы твои, четвертой дщери рождейся ти, не бывшу еще наследнику державы отца твоего: ты же, седмая сущи в семье твоей, яко оконце некое еси в Царство осьмаго дне, иже по субботе есть, отонудаже слышим: Аллилуиа.

Икос 4
Слыша мати твою, оставляющую дети своя во граде Тобольске, глаголющую Ольгу в матери место цесаревичу, Татиану же в марфино служение поставляя, тебе же царевно, веселити всех указует, понеже дар Божий прия ты, Анастасие, подобный велию свету: просвещаеши главное в нихже взираеши, ихже любиши, ихже сокровенная своя совне зрети уставляеши, посупления и дряхлости избавляя сих, поющих:
Радуйся, радосте всеми оставленных;
радуйся, радосте чад безматерних.
Радуйся, радосте непорочная отроков безотчих;
радуйся, радосте целая отроковиц невестных.
Радуйся, мудрая дево царевно Анастасие, веселие вечное над главами нашими.

Кондак 5
Боготечную звезду в седмеричном созвездии, иже яко едина зело велия звезда возшло есть над отечеством нашим, зрим отроковицу Анастасию: идеже преподобноцветен есть отец твой державный, и темнаго пурпура суть ризы матери твоея, цесаревич же, яко Димитрий Углический и Гавриил Белостоцкий, в мученичество оболчен есть, тамже и голубицею Ольга, и в небесных цветах раба Господня Татиана, Мария же златоцветно просвещает ны: ты же, царевно Анастасие, яко пламень огненный: цветом радости, иже на Небесех, истее причащаеши нас, зовущих: Аллилуиа.

Икос 5
Видеша людие еврейстии на всяко лето воду возмущаему на овчей купели: обаче не видели суть ангела Господня. Видим тя на иконах, царевно: слышим глас твой в письмах: тяжелоносные воды жизни нашея милостивным схождением твоим освящаются скочущии быти в Океан Вечныя Жизни, играньми, яко песньми, вопиющи тебе:
Радуйся, радосте, еяже возжада Господь у кладезя Иаковля;
радуйся, радосте, брашно сладкое Господу.
Радуйся, обрадуй нас малым чим обрадовати тебе;
радуйся, радосте всех поющих тебе;
Радуйся, мудрая дево царевно Анастасие, веселие вечное над главами нашими.

Кондак 6
Проповедницы Богоноснии быша вси отражавшии свет твой: Ольга, сестра царева, Татиана, дщи безмездника Евгения, Петр, детоводитель твой: зане слава святых изменяет взирающих нань. О царевно Анастасие! Даждь нам радость сию, да поем: Аллиллуиа.

Икос 6
Возсиявый в сонмище просвещение истины, слышит от безумна учителя: шесть дней приходите целитися, но не в субботу. Ныне глаголют неции, яко не достоит молитися вам коемуждо по единому, но токмо купно всем царственным мучеником. Ты еси седмая в семье твоей, царевно: мы же числ не вемы, исцелеваемы токмо сенью твоею, упоеваемы житием твоим, яко новым вином Царствия, поюще тебе:
Радуйся, радосте, упраздняющая премудрость;
радуйся, радосте, затворяющая книжность.
Радуйся, радосте безпредельная;
радуйся, радосте жизни во Христе.
Радуйся, мудрая дево царевно Анастасие, веселие вечное над главами нашими.

Кондак 7
Хотящу прославлению святых царственных мучеников совершитися от Бога, а не от человек, да убоятся лукавнующии свидетельства, иже о царевне Анастасии: всяк, близ нея сущий, буди готов вопрошен быти о ихже не ждал есть. Аще ли не престанут от лукавствия за еже возмощи пети о царевне: Аллилуиа.

Икос 7
Новую Анастасию Узорешительницу показует тя Господь во узилище мрачнем, доме Поппель: яко наятые работати в клятвеннем месте сем свидетельствуют царственных мучеников веселящихся между отпеванием их и смертию за Христа: аще ли не ты, луча воскресоименная, врата адовы растерзаеши радостию, иже от Господа, и есть дивна во очесех наших, темже ныне поем:
Радуйся, радосте, темный огнь орошающая;
радуйся, радосте, вечный мраз увесняющая.
Радуйся, радосте, субботне впадшия в студенец стражницы извлекающая;
радуйся, радосте, невинно страждущих Пасце причащающая.
Радуйся, мудрая дево царевно Анастасие, веселие вечное над главами нашими.

Кондак 8
Странное в житии твоем видевше, иже в Спале Беловежской: брату твоему умирающу, ты галльское некое смехотворство представляеши гостям дому отца твоего. Что убо веселие сие? Несть убо разрушение целомудрия, обаче воздвижение средостения между миром и семьей: болезнь бо единароднаго цесаревича велия тайна бысть. Что убо послушание сие: аще ли не воскресная тайна, иже вящше есть разрушения телеси, да и в смертии пасхальне зовем: Аллилуиа.

Икос 8
Весь бе в нижних, пришедый не праведныя, но грешныя спасти, и вышних никакоже отступи Неописанное Слово: едину от птиц небесных, юнотку царственную зря в древесных ветвях возлюбльшую укрыватися, глаголет и сей: царевно, потщався. слези: днесь бо в Дому Моем подобает тебе быти. Сия же, оставльши мучилищное древо свое, не остави крестоношения, иже по нам, в раи присно моля Владыку о России, понуждая нас пети сице:
Радуйся, радосте Златопомазаннаго;
радуйся, радосте Воскресшаго.
Радуйся, радосте смерть поправшаго;
радуйся, радосте тебе нам даровавшаго. Радуйся, мудрая дево царевно Анастасие, веселие вечное над главами нашими.

Кондак 9
Всякое естество ангельское ныне с нами невидимо служит святой мученице ради Христа царевне Анастасии, страстотерпцу Черниговскому Игорю сослужащу: аще ли не яко князь-схимник, ты, о чадо, искупаеши грехи сродник твоих, от них же обрящет ли кто единаго, иже не подкопывал крестное древо последняго царствования делом, словом, помышлением: с мучеником древлим, иже в Киеве, поем царевне: Аллилуиа.

Икос 9
Ветия многовещанные аще непщуемся быти, обаче вемы, яко не суть речи, ниже словеса довольны изрещи неизреченныя тайны твоея, царевно: вся глаголемая яко медь звенящи, и яко кимвал звяцаяй вменити можеши, обаче веруем, помози неверию нашему: яко не о себе, но от избытка сердца глаголем тебе:
Радуйся, радосте, сокровенный сердца человек;
радуйся, радосте наедине предстояния Христу.
Радуйся, радосте молчания нашего;
радуйся, радосте безсловесия во Христе. Радуйся, мудрая дево царевно Анастасие, веселие вечное над главами нашими.

Кондак 10
Спасти хотя мир тобою, царевно, поглумитися миру изводит Господь тебе, о чадо, на позорище: вся убо красная мира яко уметы зрим о тебе, даже власов лишенной, ты же другов своих воина-простеца и крестьянское чадо твориши. Оваго убо чести глаголы Жизни Вечная научая, не ведуща грамоты прежде, оваго же вознося на руцех твоих от персти к Небесным, якоже зрим на фотографии твоей: сияеши лепотою неизглаголанною всем поющим о тебе: Аллилуиа.

Икос 10
Стена еси из капель дождевных, о Анастасие, на них же взирая, Свет Истины, Христос Бог, радостию тайною исполняет царственных мучеников глаголати во мрачных удолиях заточения: Обаче никто как Бог. Об узорешительном даре твоем рцем сице:
Радуйся, радосте в пустыни безводней;
радуйся, радосте гедеонова.
Радуйся, радосте нееманова седмеричная;
радуйся, радосте, в нюже внидем покаянием.
Радуйся, мудрая дево царевно Анастасие, веселие вечное над главами нашими.

Кондак 11
Пение всякое побеждается наше, егда взираем на дом Поппель, гроб нов, идеже никтоже положен бысть пятидесятью летом: клятвенныя хулы хохотом сатанинским противооглашают оттуду страну российскую. Ты же, о царевно, слух наш от уз сих разрешая евангельски стихословиши не седмь, но седмижды семь раз прощати врагом своим, слышиши от всех: Аллилуиа.

Икос 11
Светоприемники свещи становимся, недостойнии, свет восприимши стреляний, уязвлений, ссечений, иже о вас мученики царственнии: идеже дважды вопрошает царь: Что? Что? стреляющих не яко не ведый сих всех, но во еже последнее промедление угобзити иродом пред бездной лютой до конца моляся о них, мы же плачем отроковице:
Радуйся, радосте, о нейже не глагола Христос, яко не умрет;
радуйся, радосте, не могущая умрети.
Радуйся, радосте Всехитреца Господа;
радуйся, радосте Богови, в смерти глумящаяся кесарю.
Радуйся, мудрая дево царевно Анастасие, веселие вечное над главами нашими.

Кондак 12
Благодать дати восхотев даже разбойником, аще имут останки благаго разума, гортани лютую язву вымаливает царица емуже стрелял есть во уста ея: да зде наказан быв, менее страждет за гробом: такожде разбойников, ищущих ругатися мощем царственных мучеников, ослепляет Сый Господь сребролюбием, бисером многоценным обретшимся во одеждах детей. Мы же, бояся взирати на оных бисеров царственных, ихже не бе мир весь достоин, покрываемся пением: Аллилуиа.

Икос 12
Поюще тя, царевно Анастасие, хромлющим на обе ноги, разслабленны во гресех, слячены многими узами железными преступлений наших есмы: обаче тобою, яко Давид, скачущии и играющии становимся, глашая сице:
Радуйся, радосте, Мелхолы прощение;
радуйся, радосте, воскресением словущая.
Радуйся, радосте, чадствуяй нам Воду Живу;
радуйся, радосте, манно веселия в пустыни житейской.
Радуйся, мудрая дево царевно Анастасие, веселие вечное над главами нашими.

Кондак 13
О седмая от мучеников царственных царевно Анастасие, благословенная Суббото Воскресоименная! Воспоминая чудеса Христовы субботне творимыя, паче же слово Божие, иже не человек ради субботы, но суббота ради человека, дерзаем пети тебе и просити тебе одождити нам умиление сердечное и покаяние всецелое, да внидем в радость твою, поюще Богу: Аллилуиа.
Сей кондак глаголи трижды, и паки первый Икос и первый Кондак.

Молитва святой мученице царевне Анастасии
О святая мученице царевно Анастасие, главнейшему догмату православной веры тезоименная: ужасаемся зрети тебе на камени гробнем наших сердец: ты же, егда объял есть тебе трепет и ужас заключения твоего, глумилася еси ужасу сему, глаголя ужасную радость, ужасно хорошо, ужасно мило: можеши, аще волиши, отъяти страхования наша, иже не соделывают страха Божия.
О нечаянная радосте всем знаемым твоим в житии, иже непщеваху в твое место быти наследнику: обаче явилася еси велие утешение сродником твоим, наипаче в заточении, солнечному лучу в темнице подобяся: буди Свет Христов и мне в самозданной темнице страстей моих, воскрешая от радостей мира.
О иже отроковица сущи, верою и любовию отверзала еси сокровенная ближних твоих, сокровище тайнаго сердца человека изводя нам, яко свет полудне: отжени прах и пепел от златницы, юже в Крещении даде ми Господь: отверзи мне тайная души моея: аще ли не ужаснулся, аще ли не прибегну к покаянию молитвами твоими, воскресая Христу Богу со Безначальным Его Отцем и Пресвятым и Благим и Животворящим Его Духом. Аминь.[/spoiler]

Раб божий Константин

Акафист святой великомученице благоверной царевне Ольге.
[spoiler]Кондак 1
Избранная отцем благовестити народу любы всепобеждающую, научи нас хлеб наш насущный на рожцы свиний не меняти, похоть очес любовию не нарицати, воли Божией о нас паче гордости нашей внимати, да тя узрим, да услышим тя не мстити призывающую, да воспоем ти:
Радуйся, мудрая дево царевно Ольго, невесто святая Руси Святой.

Икос 1
Ангел предстатель еси новым людем твоим, о царевно, на брезе новыя тьмя языческия паки возсиявая нам благовестие неотмстительное, око души своея за око ослепшее русское Богови принося, темже новые люди поют ти:
Радуйся, еюже прощение сияет;
радуйся, еюже ненавистная рознь исчезнет.
Радуйся, в злобу впадших воззвание;
радуйся, слез неотмщенных избавление.
Радуйся, высото безмолвнаго сострадания;
радуйся, глубино неотступнаго терпения.
Радуйся, во страдании царево прибежище;
радуйся, яко состраждеши состраждущему всем.
Радуйся, звездо на крае тьмы кромешныя;
радуйся, сердце чистое, Дух Правды обновляяй во утробах наших.
Радуйся, еюже обновляется страна Ольги равноапостольныя;
радуйся, похвало о Бозе отцу.
Радуйся, мудрая дево царевно Ольго, невесто святая Руси Святой.

Кондак 2
Видяще святая Троицу Святую в сердца чистоте, глаголет Богу дерзостно о людех своих: сии же, по молитвам царевны святой, абие помощи. исцеления, покаяния сподобляяся, Спасу поют: Аллилуиа.

Икос 2
Разум недоразумеваемый разумети ищущи глаголют неции совопроснически: како сии мученицы нарицаются, аще ни камением побиени быша, претрени быша, избиени быша? Сих ради, аще токмо правды алчут и жаждут, остави ты о царевно, в молитве, тобою списанной и тобою петой, глас твой, глас хлада тонка, да вси поим сице:
Радуйся, просящая Господа не о свободе, но о терпении;
радуйся, посылающая терпение молящимся ти.
Радуйся, в годину буиих мрачных дний дивно процветшая;
радуйся, нас назидая мрака внутрьуду боятися паче окрестнаго.
Радуйся, народное гонение матерски объемлющая;
радуйся, за народ, бесогонимый, предстоящая.
Радуйся, крине, о крепости Бога молящая;
радуйся, тебе молящим крепосте неприступная.
Радуйся, покоя души смиренно в смерти просящая;
радуйся, страх наш смертный на страх Божий пременяющая.
Радуйся, на празе гробнем кротко молящая за убивающих тя;
радуйся, гробы повапленныя душ наших умилением посещающая.
Радуйся, мудрая дево царевно Ольго, невесто святая Руси Святой.

Кондак 3
Сила Вышняго осени тогда сосуд немощнейший, обаче избраннейший, глаголати: Аз русская есмь, и желаю пребыти русскою: сеющи отечестволюбие, нас во Отечество Горнее собирающее, внегда пети сице: Аллилуиа.

Икос 3
Имущи память праматери древнейшей своей, иже отринула есть брак ромейскаго императора, дево юная, Ольго Новая, востече ко воспитателю своему. Сей же, дивяся осьмнадсятилетней премудрости девицы царственныя, свидетельствует о ней:
Радуйся, отрасли ветхия юнейшая розго;
радуйся, мудрости древния новое дерзновение.
Радуйся, делателей делающая Руси Святой;
радуйся, насаждающая любы ко отечеству.
Радуйся, село, иже купующе, идем не от Христа, но ко Христу;
радуйся, русская по имени, нас русскими именующая во Христе.
Радуйся, рай изгибшего отечества нашего;
радуйся, пристанище за отечество изгибшим.
Радуйся, молитвы нашея к Богу ходатаице;
радуйся, России к Богу дерзновение.
Радуйся, Божие к России на милость пременение;
радуйся, за Россию непрестанное моление.
Радуйся, мудрая дево царевно Ольго, невесто святая Руси Святой.

Кондак 4
Бурю внутрь имея помышлений сумнительных, целомудренная царевно смятеся, видя князя царственных кровей, треми денми прежде искренняго семьи ея, сердцу матери рану жестоку наносяща, обаче зряще в родительской заповеди любве истинныя исполнение, рече: Аллилуиа.

Икос 4
Слышавше пастыря и Богоотца, пророка и царя: Вся слава дщери царевы внутрь: глаголюща, зрим некоего простеца-воина, наущающа тя, во врачебнице сему служащую, преступити волю отца, не ведуща, кто есть отец сей, ты же речеши ему: Не можно ми есть, зане вельми люблю отца: послушание любовию, любовь послушанием утверждая, мы же поем ти:
Радуйся, искреннейшая дщи отца твоего;
радуйся, наперснице ума и сердца его.
Радуйся, утешение и покой его;
радуйся, ведущая волю его.
Радуйся, возлюбльшая Бога во страсе омрачити Его;
радуйся, боящаяся огорчити отца огорчением ближних его.
Радуйся, письмами отца, яко невеста, обрадованная;
радуйся, его уста быти удостоенная.
Радуйся, в послушании родительском упование любве Христовой имущая;
радуйся, преступающая волю сердца за еже открыти сердце Христу.
Радуйся, первенице порфирородная;
радуйся, наследнице отечества твоего.
Радуйся, мудрая дево царевно Ольго, невесто святая Руси Святой.

Кондак 5
Боготечную звезду утреннюю зрим святую равноапостольную княгиню Ольгу, Красное Солнышко, равноапостольнаго внука нам уготовляющую, Боготечную звезду зрим вечернюю тя, о царевно, юже яко светильник держаще, имамы ум во аде и не отчаеваемся, зовуще: Аллилуиа.

Икос 5
Видяще отроча крестьянское на руку девицы царственныя, плачем купно со служителем твоим, яко по всей России не обретеся муж тя достоин, обаче вемы, яко многа чада пустыя паче, нежели имущия мужа, якоже и брат твой рече: "Аз есмь Ольгин сын"; темже чада русския поют тебе:
Радуйся, зрящая целомудрие матери твоея;
радуйся, ведущая матернее в девстве своем.
Радуйся, сохраншая заповедь Божию непреложно;
радуйся, возлюбльшая крест девства.
Радуйся, последовавшая Господу всею жизнью своею;
радуйся, до конца последовавшая Христу.
Радуйся, разжегшаяся любовию по Бозе;
радуйся, яко сия любы разжения попаляет.
Радуйся, в девстве мученица ради Христа;
радуйся, волю свою ради отчей любве отвергшая.
Радуйся, яко смирение есть покров девства твоего;
радуйся, пораждаяй смиренныя в Жизнь Вечную.
Радуйся, мудрая дево царевно Ольго, невесто святая Руси Святой.

Кондак 6
Проповедницы Богоноснии бывше святии царственнии мученицы, ангельски на земли поживше, просияли суть даже до конец земли, оных же Иродов новых, второе ругающеся погребших вас, оставиша яко буесловящих, не ведущих пети: Аллилуиа.

Икос 6
Возсияв в веце нашем просвещение Истины, разгнала еси лжи тьму: идоли бо века сего, Содом и маммона, не терпяще славы девства твоего, упраздняются. Сих же чающии избавитися, вопияхом ти:
Радуйся, яко ныне молит отца твоего Новый Израиль, яко Иеффая;
радуйся, яко приемлет отец твой оружие во еже побороти по нам.
Радуйся, яко Дух Господень на новом Иеффаи сем;
радуйся, яко и сей приносит Богу всесожжение.
Радуйся, слышавшая отца рекша о жертве за Россию;
радуйся, яко речет царь: Се аз и дети, яже ми даде Бог, будем жертва сия.
Радуйся, радующаяся воли отчей;
радуйся, аще и плакася со дщерию Иеффая.
Радуйся, утешающая безчадных;
радуйся, веселящая безплодных.
Радуйся, тайное сияние Фаворское;
радуйся, откровение, облеченное в Солнце.
Радуйся, мудрая дево царевно Ольго, невесто святая Руси Святой.

Кондак 7
Хотящу веку сему преставитися прелестному, не терпящу множества злодеяний, прежде неслыханных, в нем содеянных, не прежде Бог заключит сей, дондеже воскликнут о царственных мученицех в нем стоящии: Аллилуиа.

Икос 7
Новую показа тя Ольгу Святую купно с Новым Крестителем русским милостивый Господь. сердца детей отцам отверзая, отцев ускоряя молити за детей, два брега времени русскаго созерцающих ся являя, мы же поем сице:
Радуйся, новая равноапостольная Ольго Богомудрая;
радуйся, прежде брата рождения непщеванная Россию наследовати.
Радуйся, поругание речи русския обличившая;
радуйся, ныне словесы чисты Бога о России молящая.
Радуйся, яко и прежняя Ольга, на реце от поган уловляемая;
радуйся, обрадованная Покровом Божественным.
Радуйся, аще и уничижения от бесных раб претерпела еси;
радуйся, яко поруганному Христу соцарствуеши ныне и присно.
Радуйся, во Христе камень отечестволюбия;
радуйся, еяже пули не можаша ископати отнюд.
Радуйся, царственноручно сткляницы и чванцы омывавшая;
радуйся, от сосуда елея твоего присно подающая молящим тя.
Радуйся, мудрая дево царевно Ольго, невесто святая Руси Святой.

Кондак 8
Странное чудо мироносичное зрим о тебе, о царевно: како едина от клеврет твоих, безпомощная дева сущи, страну, обуявшую пламенем распри междуусобныя, отроком в пещи подобящися, неврежденно преминула еси тебе ради, миро любве своея огнегасительно показующи, Богу поюще: Аллилуиа.

Икос 8
Вся бе в нижних, поносима, иждиваема, всяцем злым глаголом нареченна, но и вышних никакоже отступи, о царевно, волю царственнаго отца благовествуя, Царем Небесным содержима бысть. Тем же слышиши от всех:
Радуйся, смирившаяся до поношения Христова;
радуйся, царствуяй с нищими духом.
Радуйся, плачущая славы русския;
радуйся, утешающая отечестволюбцев.
Радуйся, кротчайшаго царей достойная уста;
радуйся, земли российския наследнице.
Радуйся, токмо Христовой правды алкавшая;
радуйся, юностнаго правдолюбия защитнице.
Радуйся, чистым сердцем мраз адский прелетаяй;
радуйся, в чистоте твоей Образ Божий нам являющая.
Радуйся, служанка раб твоих во врачебнице бывши милостивно;
радуйся, милостивно умиляющихся житию твоему помиловавшая.
Радуйся, мудрая дево царевно Ольго, невесто святая Руси Святой.

Кондак 9
Всякое естество власть имущее удивися русской царевне: порицаша неции болящим служение твое, царственности умаление усмотряющи. Ангели, зряще тя, дивятся, како ты, народом дориносима быти должная, на руку твоею подъемлеши чадо меньших раб твоих: аще ли надеяшися горохищному овчати возопити: Аллилуиа.

Икос 9
Ветия многовещанныя осипша зело видим об отце твоем, о царевно: како сей искупитель есть, егда Един Искупитель Сый Христос? Несте достойны беседы моея, - рече иногда Георгий Победоносец подобным, обаче вящшия ради славы Божия и мы рцем сим: как не искупитель сей, егда все житие его врази многажды ископаша? Сей, иже кровь свою искапал за ны есть: сей, иже купует ны ценою многоценных бисеров, чад своих, мы же царевне речем:
Радуйся, ангельски любы по покаянии нам благовествующая;
радуйся, архангельски недоведомая в нашу меру изобразующая.
Радуйся, начальница невещественная нашего покаяния;
радуйся, власть имущая вязати и решити на народе твоем.
Радуйся, яко силы деются о призываемом имени твоем;
радуйся, госпоже страстей своих, господствуй над нами милостивно.
Радуйся, Престолу Троицы приседящая, благую часть избравшая;
радуйся, тайну Ея благовестившая нам.
Радуйся, пламенеющая по России ревностию;
радуйся, творяй хульники царя немы и немогущи проглаголати.
Радуйся, зовущая нас стати со страхом, добре царю работающе;
радуйся, иззути нозе наша в земли Святой Руси призывающая.
Радуйся, мудрая дево царевно Ольго, невесто святая Руси Святой.

Кондак 10
Спасти хотя, аще возможно, поне останок, не сам глаголет Помазанник нам, но гласом девы, да обратит сия умы и сердца наша во благая помышления, умиления разженныя родители, сице глаголюще: "Отец просит передать всем верным": Имеяй уши слышати поет: Аллилуиа.

Икос 10
Стена еси безпомощным девам, дево Богомудрая царственная: како не возможе мерзейший искони убийца вредити тя беззащитну сущу на кораблеце от Тобольска и в доме Ипатиевом, тщася растлити и ничтоже успевающе: девы же, в защиту зовуще, поют тебе:
Радуйся, яко воистину воскресе Помощник и Покровитель твой;
радуйся, яко дыму подобно исчезли врази Его и твои.
Радуйся, яко смрад сей, аще и властвует, но не вечнует;
радуйся, яко тает от Лица Божия.
Радуйся, яко гибнут грешницы Именем Божиим;
радуйся, яко веселятся праведницы безпомощнии в памяти твоей.
Радуйся, в веселии знаменующаяся Крестным Знамением;
радуйся, радующая нас Креста необоримостию.
Радуйся, Господу во ад последовавшая;
радуйся, ничесомуже адскому приразившаяся.
Радуйся, Крестом посрамляющая сопостата;
радуйся, осененная дев всех Стеной.
Радуйся, мудрая дево царевно Ольго, невесто святая Руси Святой.

Кондак 11
Пение всякое побеждается, зряще сердце родителей твоих, ругаемей ти всесмехливо, не могущих защитити тя: яко же и евангелисти рекут: и ины мнози пакости Господу деяху, не могуще глаголати: кии, устом затворяющимся: Крайнее Снисхождение имя Ему. Христоподражательно царь преходит пределы долготерпения, не себе токмо, но во очию своею всех чад принося на алтарь России спасения. Со страхом зовем: Аллилуиа.

Икос 11
Светоприемную свещу зрим тя, святая дево царевно: воспоминанием святаго древняго, иже моли Бога пред невозженною свещею, крепце уповая возжещися оной, аще простит грехи его Многомилостивец: сице ныне, аще и неключими есмы, уповаем крепце податися и нам невещественному свету твоему, указующу путь, имже ты шествовала еси: помолися не оставити нам стези сия, молящим ти ся:
Радуйся, яко тобою просвещает царь тьму нашу;
радуйся, разлучая между светом и тьмою нашею.
Радуйся, яко житие твое ясному дню подобится;
радуйся, яко ходяще во дни сем, не поткнемся.
Радуйся, во тьме египетстей свет Новому Израилю;
радуйся, свет, приходящий на нощь отца твоего.
Радуйся, свет, нечестивых мраг изводящая;
радуйся, свет на путех наших.
Радуйся, сокровенная наша просвещаяй;
радуйся, еюже жизнь моя свет узрит.
Радуйся Изводящему яко свет правду твою и судьбу твою яко полудне;
радуйся, свет умиления, слезы точай к покаянию.
Радуйся, мудрая дево царевно Ольго, невесто святая Руси Святой.

Кондак 12
Благодать дати восхотев в рождении твоем родителем твоим, якоже и Государь речет третияго ноемврия: Присно памятный для меня день есть сей; благодать воз благодать дати восхотел есть Господь нам в смерти твоей: якоже и древле, не можаху спекуляторы скончати повеленное, пулям возвращающимся, дондеже ти не волися самей: древния времена обновляя нам: "Приближися Царство Небесное", - паки и паки глаголя, понуждая пети нас: Аллилуиа.

Икос 12
Поюще твое житие, славим и после жития странствие твое: яко неции летом мнозем истекшим самозванне нарицаху ся именем твоим, яко Ксения Петербургская ся рекла есть Андреем Феодоровичем, супрузе его умершей: зрим покаяние народное, не могущее смиритися с клятвою страшною, кровь твою, иже на чадех наших, юродством измывающее, темже поем ти:
Радуйся, теплое покаяние матерски приемлющая;
радуйся, люте разслабленный народ вином и елеем царски помазующая.
Радуйся, кров Небесный раскрывающая, да свесиши разслабленнаго ко Христу;
радуйся, ангел, на всякое время и час сходящая в купель покаяния нашего.
Радуйся, рекущая нам: Де не горше ти будут последняя первых;
радуйся, молящая не разслабнути нам во благодарении нашем.
Радуйся, паки милосердствуя сестрински о народе твоем;
радуйся, не гнушаяйся смрадными язвы нашими.
Радуйся, якоже и солнце, скверны наша преходя, не оскверняющаяся;
радуйся, спасающая, аще возможно, останок.
Радуйся, храм души моея оскверненный паки освящающая;
радуйся, благоухание сквернопрогонительное.
Радуйся, мудрая дево царевно Ольго, невесто святая Руси Святой.

Кондак 13
О святая великомученице царевно Ольго! Тобою отец твой земный паки нам волю Отца Небеснаго открывает: долги ваша, глаголет, оставятся вам, аще не мстите. Паки и паки глаголет нам Троицу Святую, Иже есть Любы, мiропобедительную, радость крестную возсиявая нам. Мы же о царевне благодарим: Аллилуиа.
Сей Кондак глаголи трижды. И паки чтется 1-й Икос и 1-й Кондак.

Молитва святой великомученице благоверной царевне Ольге
О святая страстотерпице царственная, великомученице Ольго царевно! Некий слуга твой свидетельствова, яко ты истинная невеста была еси: зане тебе, возрастней сущи, не вестно было есть, о еже како рещи, и како помизати, и иныя искусства привременныя, и бысть ты, отроковица сущи яко же младенец в хитростях сих. Се уже не молим о еже быти тако, но токмо о памятовании бытия таковаго, зане и самая память сия оградительна есть. Оле недетскости нашей, Богу неугодней! Вся превратно ведущим сущим нам помолися поне по времени зрети образ твой, за еже очищенными очесы и ближняго узрим, аще и в пламени адском. Персть во гробе не поет: живи нас молитвами твоими, да не отчаемся, да благодарни пребудем, тобою славяще Бога за все. Аминь.[/spoiler]

Раб божий Константин

АКАФИСТ СВЯТОЙ СТРАСТОТЕРПИЦЕ, БЛАГОВЕРНОЙ ЦАРЕВНЕ РОССИЙСКОЙ ОЛЬГЕ иной.
[spoiler]Кондак 1
Избранная от рода держанаго, угоднице Христова, благоверная царевно российская Ольго, от безбожных даже до смерти пострадавшая и венец нетленный на небесех стяжавшая; приими похвальные пения от любовию чтущих память твою и со сродники твоима, святыми страстотерпцы царственными, моли Христа Бога сохранитися неврежденными нам от враг видимых и невидимых, да со умилением вопием ти:
Радуйся, святая новомученице, царевно Ольго, теплая молитвеннице о спасении нашем!

Икос 1
Ангелов Творец (и всея твари Царь и Господь) воздвиже в стране Российской род царей благочестивых и произрасти от него тя, святая Ольго, дщи перворожденную великомученика и страстнотерпца своего, святаго царя Николая 11. Ты же, благоверная царевно, аки крин благовонный процвела еси в житии добродетельном и, убеливши ризы своя в крови агнчей, востекла еси в чертози Отца Небеснаго, идеже молишися о всех, взывающих ти сице:
Радуйся, корени царственнаго отрасле благородная !
Радуйся, боговенчанных родителей дщи порфирородная!
Радуйся, Иисуса сладчайшего паче всего возлюбившая!
Радуйся, делами милосердия Творцу Нашему угодившая!
Радуйся, достоинство царское со смирением богомудро сочетавшая!
Радуйся, путь страданий Христа ради добровольно избравшая!
Радуйся, в скорбех и муках живот твой скончавшая!
Радуйся, велию благодать молитвы за нас стяжавшая!
Радуйся, святая новомученице, царевно Ольго, теплая молитвеннице о спасении нашем!

Кондак 2
Видевши благоверный император Николай II тя, дщи свою перворожденную, возрадовася зело и на молитве в память о просветительнице рода русскаго Ольгою тя нарече. Ты же, святая царевно, подражающе покровительнице своей в мудрости и благочестии, свято и праведно жительствовала еси в чертозех отца твоего. Ныне же, (венцем небесным увенчанная) купно со святою равноапостольской Ольгою молишися о нас, взывающе Господеви: Аллилуйя!

Икос 2
Разумом божественным свыше просвещаема, всеславная царевно Ольго, начаток и конец жития твоего на камене благом Христе Спасителе положила еси; Ему же последующее вся красная мира сего презрела еси, страдания многообразные и муки душевные Его же ради приявше, мзду многу обрела еси у Царя Царствующих. Мы же, подвиги твоя достославные ныне поминающее, величаем тя сице:
Радуйся, добродетелем царственнаго отца твоего подражавшая!
Радуйся, милосердию и богомыслию матери твоея последовавшая!
Радуйся, родителей твоих с любовию почитавшая!
Радуйся, сестер и брата своею искреннею любовию возлюбившая!
Радуйся, чистоту душевную свято оберегавшая!
Радуйся, дом Духу Святому себе сотворившая!
Радуйся, сердцем (твоим) Единому Христу служити вожделевшая!
Радуйся, Предвечному Отцу Небесному угодившая!
Радуйся, святая новомученице, царевно Ольго, теплая молитвеннице о спасении нашем!

Кондак 3
Сила Всесвятаго Духа воистину осеняюще и храняще тя от дней детства твоего, преславная царевно Ольго, возбуждающе на богомыслие, молитвы и дела милосердия, во еже благоверным и благочестивым прародителям твоим подражали и умиленным сердцем Господеви воспевати: Аллилуйя!

Икос 3
Имея в сердцем твоем огонь любви к Богу и ближнему, святая Ольго, свято и праведно жительствовала еси в дому царственнаго отца твоего, (милосердие к людем страждущим явила еси) и молитвы твоима горячими и нелицемерными делы благочестия прславляла еси Отца Небеснаго. Сего ради мы подвиги твоя духовныя величаем и зовем ти сице:
Радуйся, паче царских почестей нищету Христову возлюбившая!
Радуйся, сердца твоего земным сокровищам не приложившая!
Радуйся, таковыми бо ближним со благоговением послужившая!
Радуйся, к Царствию Небесному духовные взоры твоя обратившая!
Радуйся, высотою ума твоего скорогибнущее мира сего познавшая!
Радуйся, чистотою сердца твоего любовь Христову стяжавшая!
Радуйся, добродетельми твоими на пир Ангца Божия нас призывающая!
Радуйся, молитвы твоима двери Царствия Христова верным отверзающая!
Радуйся, святая новомученице, царевно Ольго, теплая молитвеннице о спасении нашем!

Кондак 4
Буря искушений и устремлений бесовстих и волны соблазнов мирских не возмогоша поколебати храмины твоея душевныя, новомученице Ольга, основана бо бе на твердом камене веры во Христа и хранима трезвением, трудами и молитвы твоима богоприятными; ты бо на Единаго Спасителя уповая, воспевала еси Ему: Аллилуйя!

Икос 4
Слышавше глаголы Спасителя Нашего «Будьте убо мудры, яко змии и чисты, аки голуби», благоверная царевно, сему усердно поревновала еси и мудрость государственную с чистотою сердечною умело сопрягала еси. Мы же, сия поминающи, просим тя: озари и нас лучами добродетелей твоих и приими благоутробно величания сия:
Радуйся, Христу всем житием твоим угодившая!
Радуйся, моления теплые Ему возносившая!
Радуйся, в подвигах благочестия Пречистей Богоматери подражавшая!
Радуйся, любовь выше поста и молитвы почитавшая!
Радуйся, разум свой в послушание веры предавшая!
Радуйся, дары благодати Божия сего ради стяжавшая!
Радуйся, яко тобой ум наш в богомыслии научается!
Радуйся, яко тобою мрак неведения прогоняется!
Радуйся, святая новомученице, царевно Ольго, теплая молитвеннице о спасении нашем!

Кондак 5
Боготочной звезде явилась в житие твоем подобна еси, благоверная царевно Ольго, блистающи славою и добродетельми; ты бо (Христа Бога Нашего от дней детства твоего всей душею и всем помышлением возлюбивше) все заповеди Его добре сохранила еси и подвиги и деяниями твоими достойно прославляла еси Его Святое Имя, (чистым сердцем) воспевая Ему: Аллилуйя!

Икос 5
Видя Премудрый Господь наш благое сердца твоего произволение, усердное заповедей Его исполнение и велию любовь твою к Нему, дивныя показа дела Своя в тебе, пречудная царевно Ольго, ибо все житие ибо все житие твое на земли многими печальми и болезльми исполнено бе от клеветы и досаждения, укорения и иных многих бед и напастей. Ты же, глас хулы и поношения слышавше в Бозе духом твоим пребывала еси николиже возроптала еси. Сего ради таковыя похвалы приносим ти:
Радуйся, царевно премудрая, людей российских ко спасению путеводительнице!
Радуйся, целомудрия хранительница и душевныя и телесныя чистоты ревнительнице!
Радуйся, христианского благочестия богомудрая блюстительнице!
Радуйся, нестроений, раздоров и всякаго нечестия искоренительнице!
Радуйся, кротких и благих нравов благоискусная насадительнице!
Радуйся, нечестивых и душетленных обычаев неуклонная обличительнице!
Радуйся, бодрости и трезвения предобрая учительнице!
Радуйся, нерадения и праздности известная прогонительнице !
Радуйся, святая новомученице, царевно Ольго, теплая молитвеннице о спасении нашем!

Кондак 6
Проповедует днесь Церковь Христова подвизи и труды твоя, святая угоднице Божия Ольго, и величает честная страдания твоя (яже за Христа претерпела еси) и умиленно Богу, дивному во Святых Своих воспевая о тебе: Аллилуйя!

Икос 6
Возсия в боголюбивей души твоей, святая Ольго, свет истиннаго боговедения; ты бо, благодатию Божественною просвещаема, заповеди Христовы о любви к Богу и ближнему со усердием радостно исполняла еси. Мы же, сие ныне поминающе, с любовию и радостию приносим ти величания сия:
Радуйся, служению святых жен – мироносиц Марии и Марфы подражавшая!
Радуйся, людем российским любовь истинную показавшая!
Радуйся, ближнего паче самой себя возлюбившая!
Радуйся, болящия и недужныя посещавшая!
Радуйся, бедных и убогих милостивая попечительнице!
Радуйся, от похоти себялюбия нас исцеляющая!
Радуйся, и нас делами милосердия служити Христу научающая!
Радуйся, светом радости души наша озаряющая!
Радуйся, святая новомученице, царевно Ольго, теплая молитвеннице о спасении нашем!

Кондак 7
Хотяще велениям богопросветленнаго сердца твоего следовати, благоверная царевно, не возжелала еси честным браком с царевичем румынским сочетатися и сего ради не венцем царицы земной, а мученицы Христовой, от Подвигоположника Иисуса увенчалася еси. Тем же просим тя, Ольго святая; сотвори молитву твою о спасении нашем, да сподобимся купно с тобою во веки веков Господеви воспевати: Аллилуйя!

Икос 7
Новыя тяжкие испытания посла ти Господь, егда во дни смут и мятежей народных, неблагодарные подданные отца твоего в палатех царских тя затвориша. Ты же, царевно святая, разумея «яко притерпевый до конца спасен будет», чести царственныя лишение, оскорбления, осмеяния и иные скорби кротце прияла еси. Мы же ныне долготерпение твое хвалим, взывая ти сице:
Радуйся, соблазнами мира сего не прельщенная!
Радуйся, Духом Святым просвещенная!
Радуйся, светом небесным во страданиях озаренная!
Радуйся, поругания и досаждения за Христа претерпевшая!
Радуйся, во исповедании веры Христовой добре пребывшая!
Радуйся, родителей, сестер и брат духовно укрепившая!
Радуйся, чтущих память твою от всяких зол охраняющая!
Радуйся, имя твое призывющим отраду велию подавающая!
Радуйся, святая новомученице, царевно Ольго, теплая молитвеннице о спасении нашем!

Кондак 8
Странствие прескорбное купно с семью твоею и слуги верными из града Петрова в землю Сибирскую совершила еси, благоверная царевно Ольго, все упование твое на Господа Нашего Иисуса Христа возлагая, благодаряще Его, давшего ти не точию в Него веровати, но и по Нем страдати, воспевая Ему пение ангельское: Аллилуйя!

Икос 8
Вся благодатию Божиею озаренная и Духом Святым просвещенная была еси, богомудрая царевно Ольго, егда из заточения твоего возвестила еси людем российским, да простят оные убиение ваше и мщения за вы не имут, ведуще, яко токмо любовию (Христовой) возможно есть смерть победити. Мы же сия ныне поминающе, просим тя, страстотерпице богоблаженная, научи нас Бога и ближних любити и приими величания сия:
Радуйся, волю Божию исполняти нас научающая!
Радуйся, омраченныя умы наши просветляющая!
Радуйся, ожестоточенныя сердца наши умягчающая!
Радуйся, от плевел ненависти их освобождающая!
Радуйся, грешных к покаянию невидимо направляющая!
Радуйся, плоды покаяния верным приносити помогающая!
Радуйся, духом кротости и любве нас наполняющая!
Радуйся, пламень злобный струями любве твоея угосающая!
Радуйся, святая новомученице, царевно Ольго, теплая молитвеннице о спасении нашем!

Кондак 9
Всякия беды, скорби и напасти избавляеши нас, святая страстотерпице, твоими теплыми к Богу молитвы, испроси же и нам вся ко временной и вечной жизни потребная и полезная, да сподобимся (предстательством твоим) Горнего Иерусалима достигнути и купно с тобою и всеми новомученики земли Российския воспевати: Аллилуйя!

Икос 9
Ветии мира сего не возмогут по достоянию восхвалити добродетели и страдания твоя, святая царевно Ольго, тем же и мы, недостойнии, воспети желающе Владыку и Жизнедавца, благодатию своею в годину буйных, тяжких мрачных дней твоих тя укрепившего и по смерти венец нетленный тебе даровавшего, молим тя, страстотерпице царственная, призри на воздыхание сердец наших и неотступна буди помощница наша, вся благая дарующи представительством твоим, воспевающим тя сице:
Радуйся, в дому Отца Небеснаго обитель себе сотворившая!
Радуйся, Христу, Жениху твоему, сопострадавшая!
Радуйся, плоды Духа Святаго стяжати нам помогающая!
Радуйся, мир Божий в сердца наша привносящая!
Радуйся, во страданиях призывати Бога научающая!
Радуйся, чада наша от соблазнов мира соблюдающая!
Радуйся, от греховных навыков сердца наша освобождающая!
Радуйся, огнем молитвы твоея стрелы вражия попаляющая!
Радуйся, святая новомученице, царевно Ольго, теплая молитвеннице о спасении нашем!

Кондак 10
Спасение и славы вечныя достигла еси, святая новомученице, егда верности Христу ради претерпела еси страдания лютыя и смерть мученическую. Мы же, память твою святую благоговейно чтуще, просим тя, благоверная Ольго, исцели недуги наши духовныя и телесныя, да и тобою Благодеющему нам Господу смиренне воспеваем: Аллилуйя!

Икос 10
Царю Небесному верность во страданиях твоих сохранила еси, богомудрая царевно Ольго, во след апостолу помысляюще: «аще бо живем, Господеви живем, аще бо умираем, Господеви умираем» (Рим.14:8) и тако без боязненно пришла еси к венцу жития твоего земнаго. Мы же, воспоминающе о подвигах твоих, восписуем ти хваления сия:
Радуйся, слезами и молитвами к смерти ся предуготовившая!
Радуйся, достойно мученическую кончину приявшая!
Радуйся, пренесением мук лютых тленная на нетленная преминявшая!
Радуйся, терпением твоим верных христиан возвеселившая!
Радуйся, от теплохладия и маловерия нас исцеляющая!
Радуйся, в вере и верности Богу нас утверждающая!
Радуйся, прощати и благословляти ближних нас научающая!
Радуйся, в кротости и смирении нас утверждающая!
Радуйся, святая новомученице, царевно Ольго, теплая молитвеннице о спасении нашем!

Кондак 11
Пение наше молебное не призри, святая Ольго, се бо любовию подвизаемы ко святому образу твоему притекаем и просим тя: сохрани нас в вере христианской, во всяком благочестии и чистоте, да в смертнем успении нашем обрящемся достойни Господеви воспевати : Аллилуйя!

Икос 11
Светоносным сиянием троическим (выну) озаренная, богоблаженная царевно Ольго, просвети и наши сердца, мглою греховною помраченныя: да елеем дел благих возжегше угасшие светильники душ наших, сподобимся брачнаго Христова чертога, идеже ты ныне веселишися со всеми от века Ему угодившими и слышиши от нас благохваления сия:
Радуйся, венценосице добропобедная от Христовой десницы увенчанная!
Радуйся, во свете лица Божия присно пребывающая!
Радуйся, по Бозе вся благая нам взыскущая!
Радуйся, от горных высот на помощь к нам ускоряющая!
Радуйся, от внезапной смерти нас сохраняющая!
Радуйся, о спасении нашем Святую Троицу умоляющая!
Радуйся, милость Богородицы к нам приклоняющая!
Радуйся, царевно преславная, земли Российской покровительнице и заступнице!
Радуйся, святая новомученице, царевно Ольго, теплая молитвеннице о спасении нашем!

Кондак 12
Благодать Божию и милость нам подати, прошение грехов и направление жития ниспослати испроси нам у Милосердного Господа, святая Ольго, и не престай о нас пред лицем Вседержателя Бога моляще, яко стяжавшая к Нему дерзновение многое. О сем же усердно к тебе преподающе, просим и благоумиленно зовем всех Творцу: Аллилуйя!

Икос 12
Поюще твое прославление в лики святых Церкви Российския хвалим, славим и ублажаем тя любовию, святая Ольго, яко заступницу и молитвенницу о нас пред Господом. Ты же дарованною тебе благодатию освяти и просвети омраченные грехом умы и сердца наша, настави нас на путь спасении, утоли скорби наши земные (и радости духовной нас исполни). Ты бо светом благодати твоея нас озаряеши, сердца наша увеселяеши и позвизаеши нас пети ти сице:
Радуйся, со всеми святыми Престолу Божьему предстоящая!
Радуйся, с воинством мученическим Творцу хвалу возносящая!
Радуйся, преподобных и праведных достойная сонаследнице!
Радуйся, сердца наша огнем Божественныя ревности воспламеняющая!
Радуйся, о мире всего мира непрестанно Спасителя умоляющая!
Радуйся, за вся Творца благодарити нас наставляющая!
Радуйся, милость и утешение всем верным являющая!
Радуйся, милосердие Божие к нам приклоняющая!
Радуйся, святая новомученице, царевно Ольго, теплая молитвеннице о спасении нашем!

Кондак 13
О, святая новомученице, благоверная царевно Российская Ольго, приими милостивно похвальное пение сие от нас недостойных (и многогрешных) во умилении сердец тебе приносимое и предстательством твоим у Всемилостиваго Господа Нашего; от враг видимых и невидимых избави нас, ( от всяких болезней душевных и телесных освободи,) и от вечнаго мучения молитвами твоими сохрани, сподобимся купно с тобою и всеми святыми, Пресвятой Троице песнь хвалебную воспевати выну: Аллилуйя!

Молитва *
О, святая новомученице благоверная царевно российская Ольго; ты душею на небесех у Престола Господня предстоиши, на земли же, данною тебе благодатию различные совершаеши исцеления; призри убо милостиво на предстоящие люди и молящиеся пред пречистым образом твоим и помощи твоея просящия; прости ко Господу святые молитвы твоя о нас и испроси нам – оставление согрешений, недужным - исцеление, скорбящим и бедствующим – скорую помощь, умоли Господа, да подаст нам христианскую кончину и добрый ответ на страшном судище своем, да сподобимся и мы купно с тобою и всеми новомученики и страстотерпцы земли нашея, славити Отца и Сына и Святаго Духа, и ныне и присно и во веки веков. Аминь.[/spoiler]

Раб божий Константин

Акафист святой страстотерпице, благоверней царевне российстей Марии Николаевне Романовой.
[spoiler]Кондак 1
Избранней агнице Христовой, благоверней царевне российстей Марии, составим похвалу, яко кротко путем заповедей Христовых за Распятым Учителем последовавшей, и до смерти крестной верность Ему сохраньшей, и венец неизреченныя славы небесныя стяжавшей. Ты же, святая новомученице, сотвори молитву купно с родители и сродники твоими о спасении и благополучии всех, с верою, надеждою и любовию вопиющих ти сице:
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Икос 1
Ангельским житием и чистотою украшенная, радостию о Духе Святе была еси своим родителем, святая царевно Марие, яко от дней детства твоего до кончины мученическия твоея во всем житии твоем образ истиннныя и глубокия любве к Богу и ближним явила еси. Мы же, память твою свято чтуще, просим тя: направи нас на путь жития добродетельнаго и приими с любовию возносимыя ти похвалы сия:
Радуйся, благоверная и богоносная, в законе Господни непорочно ходившая.
Радуйся, житие твое на богоугождение непрестанное посвятившая.
Радуйся, искушения и скорби мужески терпевшая.
Радуйся, до смерти верность Господеви соблюдшая.
Радуйся, изнемогающым унынием утешение посылающая.
Радуйся, мрачныя облаки скорбей и тревог разгоняющая.
Радуйся, благодатная целительнице болезней телесных.
Радуйся, всеблагая ходатаице благ Небесных.
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 2
Видя Господь чистое житие твое, благоверная царевно Марие, с младых лет совершаемое во спасение души твоея, кротость и целомудрие, яви тя яко светлую свещу, указующую путь спасения во тьме неведения пребывающих, подая благодать сугубую всем Богу вопиющим: Аллилуиа.

Икос 2
Разумом богопросвещенным одарены бе боговенчанныя родители твоя государь Николай и царица кроткая Александра, яже добродетели христоугодныя в тебе всадиста и тя в добре и в искренней любви к Богу и ближним воспитаста, в благоговении к Божественным службам и милосердию взрастиша. Сего ради мы со умилением глаголем ти сице:
Радуйся, во крещении святом именем покровительницы династии твоея нареченная;
Радуйся, аки равноапостольная Мария кротко вслед Христу последовавшая;
Радуйся, путь правый в Царствие Небесное обретшая;
Радуйся, сим путем невозвратно шествовавшая;
Радуйся, заповеди Христовы свете стезям твоима имевшая;
Радуйся, во всех оправданиих Владычних неуклонно пребывшая;
Радуйся, всю жизнь твою на богоугождение непрестанное посвятившая;
Радуйся, до смерти верность Господу Иисусу соблюдшая;
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 3
Силою и благодатию свыше озаренная благоверная мати твоя, императрица Александра, и на путь истинныя веры настави тя, святая Марие, научая выну благочестно жити и в правой вере, богомыслии и молитве пребывати, умиленно и радостно Господеви воспевая: Аллилуиа.

Икос 3
Имея помысел чисты и душу непорочну, кротостию и любовию просияла еси, царевно святая, сродницем и всем ближним твоим преславно и пречудно послужила еси; спасения же души ради, мирскую же славу богомудро отложивше, вожделела еси небесную стяжати, кроткая агнице Агнца Божественнаго. Сего ради молим тя: настави ны в благочестивем житии и утверди умы наша в благомыслии христианстем, да зовем ти сице:
Радуйся, от всея души Христа возлюбившая;
Радуйся, Тому и денно и нощно служившая;
Радуйся, молитвою твоею яко огненным столпом нас путеводящая;
Радуйся, сердца охладевающие верою согревающая;
Радуйся, старые и больные любовию врачующая;
Радуйся, отчаявшимся помощь скоро подающая;
Радуйся, и безрассудные кротостью нрава умудряющая;
Радуйся, благие помыслы на сердце полагающая;
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 4
Буря злобы человеческия, в дни лихолетья врагом рода человеческаго в России воздвигнутая, бунты народа супротив венценоснаго родителя твоего, заточение твое купно с материю, сестры и братом в чертозех твоих, иже в Царстем Селе, не возмогоша поколебати верности твоея ко Господу, святая царевно Марие, дщи верная вернаго выну Богу отца твоего, сице молим тя: сотвори нас непоколебимыма быти во уповании нашем к Царю Царствующих, да тобою укреплямы сподобимся во веки Ему воспевати: Аллиллуиа.

Икос 4
Слышавше об отречении венценоснаго родителя твоего от власти самодержавныя, благоверная Марие, не возроптала еси, вспоминающе Спасителя, нози учеником Своим пред Крестным путем на тайней вечери умывшего, в сердце своем помышляюще, яко всякий начальствующий есть слуга ближним своим, сему благомудрию христианскому и нас научи, да зовем ти сице:
Радуйся, бранею праведности облеченная;
Радуйся, светом боговедения просвещенная;
Радуйся, в путь изгнания кротко и незлобиво изшедшая;
Радуйся, блаженство изгнанных правды ради достойно получившая;
Радуйся, на пользу ближним работати нас научающая;
Радуйся, о нуждех духовных ближних промышляти наставляющая;
Радуйся, от маловерия и малодушия всех нас исцеляющая;
Радуйся, во всяком обстоянии сумнительном на Христа уповати подвизающая;
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 5
Боготечней звезде, путь в отечество небесное указующей подобно бе житие твое, благоверная Марие, ты бо плоды блаженств евангельских любве, милосердия и кротости твоея, терпения изгнания и убиения лютаго правды вечней ради стяжала еси; сице молим тя: утверди и наши сердца по Бозе горети, направи стопы наши на путь заповедей Христовых, настави нас и в радости и в печали Господеви воспевати: Аллилуиа.

Икос 5
Видевше скорбь родителей твоих, егда волею большевиков зверонравных понуждены быша оставити сестер и брата твоих в доме губернаторстем, иже во граде Тобольсце, благоверная царевно, купно с ними последовала в пределы Уральския, в пути утешение всяческое им оказывающе. Сего ради просим тя, святая Марие, возпламени в сердцех наших деятельную любы к сродницем и ближним нашим и приими возносимыя тебе похвалы сия:
Радуйся, в испытаниех твоих свет Христов созерцавшая;
Радуйся, во изгнании твоем неправеднем выну Бога славившая;
Радуйся, ропота ко устом твоим не прилагавшая;
Радуйся, иных во скорбных обстояниех утешавшая;
Радуйся, взоры наши на Высшее милосердие обращающая;
Радуйся, в Бозе токмо упокоение обретати нам помагающая;
Радуйся, упования наша на Творца быти непреложными сотворяющая;
Радуйся, согревающима лучами надежды нас преславно озаряющая;
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 6
Проповедницей благой и усердной учения Христова воистину явилася еси, богоблаженная страстотерпице Марие, словом твоим в вере ближних наставляя, житием во благочестии верных утверждая и всех поучая с любовию пети Богу: Аллилуиа.

Икос 6
Возсияла еси, святая благоверная царевно Марие, егда во граде Екатеринбурзе заточена бе, блистанием твоим, яко звезда лучезарная, озаряла еси души верных и разгоняла еси тьму нечестия, ныне плодами терпения насыщаеши вся, мы же с любовию взываем ти сице:
Радуйся, самоотвержение всецело показавшая;
Радуйся, спасение ближних твоих взыскавшая;
Радуйся, Эдема Небесного сопричастнице;
Радуйся, Ангелом собеседнице, святым соучастнице;
Радуйся, яко в Невечернем Свете Райския блаженства принимаеши;
Радуйся, яко изможденных горестями житейскими укрепляеши;
Радуйся, в правоверии стоящих незыблемое утверждение;
Радуйся, во благочестии ходящих крепкое ограждение;
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 7
Хотяще всецело кроткому Спасителю Нашему последовати, мученица святая царевна Мария, образ Божий во стражницех своих прозреваше, якоже и сестры твоея дивляхуся, яко каменносердечие оных иродов подвигашеся, ты же ангелу подобно схождаше на камень гробный сердец их, свет воскресения им явлюще, с надеждою на обращение их к свету истины спасительныя, Господеви воспевала: Аллилуиа.

Икос 7
Новых и преславных показа в вас, царственныя страстотерпцы, чудотворцев и мученик Господь во стране российстей, николиже святыми угодники оскудеваемей, во дни смут и нестроений народных верность Ему среди испытаний сохраньших. Ты бо, царевно Марие, в годину буйных мрачных дней деятельную поддержку родителем твоим явила еси, утешение брату и сестрам твоим сотворила еси. Мы же, сие ныне поминающе, просим тя: воспламени в сердцах наших огнь пламянныя любве к ближним нашим и приими величания сия:
Радуйся, временными скорбьми блаженства вечнаго достигшая;
Радуйся, истиннаго незлобия и братолюбия образ явившая;
Радуйся, чашу поругания, яко врачевство чистительное, испившая;
Радуйся, за ненавидящих тя с любовию Господа молившая;
Радуйся, в ложном поношении и злословии от нечестивых во Христа облекшаяся;
Радуйся, Божественному Промышлению себе конечне вручившая;
Радуйся, в терпении болезней и скорбей Иовлеву крепость стяжавшая;
Радуйся, в кротком терпении гонений Давидово смирение проявившая;
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 8
Странно бысть христианом маловерным и людям с истелевшима сердцами слышати, яко чада царевы, не мстити за низложеннаго отца своего соотечественников молят, яко ангельскима очима своима зрят умножение зла в земли российстей, ибо токмо любовь побеждающую злодеяния всяческия в темнице суще исповедуют и проповедуют. Сего ради просим тя, святая Марие, помози мир и всепрощение в душах наших стяжати и чистым сердцем Господеви воспевати: Аллилуиа.

Икос 8
Всего себе в руце Божия предавше, за правду Христову до конца жития своего ревностно подвизася святый император Николай, ты же, благоверная Марие, со отцем за Спасителя спострадала еси, аще и схождаше в оный мрачный подвал в Ипатиевском доме, никакоже схождаше со камене заповедей Господних. Мы же мученическую кончину твою воспевающе, величаем тя сице:
Радуйся, живот твой всецело Отцу Небесному поручившая;
Радуйся, дух твой Сыну Божию радостно предавшая;
Радуйся, Духа Божия верностию обетом крещения не похулившая;
Радуйся, венец твой царский кровными каплями, яко драгими камнями украсившая;
Радуйся, мученическое течение твое мечною кончиною добре завершившая;
Радуйся, во гласе пения ангельскаго на небо душею твоею воспарившая;
Радуйся, мученический полк на небесех возвеселившая;
Радуйся, святых и блаженных дев лик возрадовавшая;
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 9
Все чины ангельския, преславным архистратигом Михаилом водимыя, и святых соборы во главе со Пречистою Девою радостно среташа в чертозех Отца Небеснаго страстотерпец царственных, Сам Христос венча тя, святая царевно Марие, купно со сродники твоима нетленыма диадимами славы Своея, ты же во славе предстоя престолу Царя царствующих и Господа господствующих, сотвори молитвы о спасении нашем, да с надеждою вопием Иисусу Сладчайшему: Аллилуиа.

Икос 9
Витийство человеческое не довлеет изрещи, коликую мзду восприимут вернии исполнением заповедей Господних. Сам бо Спаситель наш рече: "Аще заповеди Моя соблюдете, пребудете в любви Моей" и апостоли: "яко заповеди Его живот вечный есть и заповеди Его тяжки не суть". Ты же, царевно святая, верность Христу и правде Его в изгнании и заточении сберегла еси, и сего ради венец нетленнный стяжала еси, и благодать молитися за ны от святой Троицы прияла еси, благоверная дщи христолюбаго царя. Сего ради со умилением глаголим ти:
Радуйся, утешения в души своей от Креста Христова приявшая;
Радуйся, дивнии глаголы благодати Божия в душе своей слагавшая;
Радуйся, желанное упокоение в Кресте Христовом обретшая;
Радуйся, яко лампада негасимая пред Лицем Господа горевшая;
Радуйся, всею жизнию следовать за Христом научающая;
Радуйся, чистоту Евангельскую и житие по вере нам усвояющая;
Радуйся, сердца наша добре и милосердне устрояющая;
Радуйся, уста наша благодарением Господу за все исполняющая;
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 10
Спасти хотя мир, Спаситель мира на Кресте пострада за ны, смертию смерть попра и воскресением миру живот новый дарова; ты же, мученица святая, благоверная царевно Марие, купно с семьею и слуги верныма мужески последовала еси Христу Распятому, и венец нетленный приявше от Искупителя Нашего, о спасении и воскресении страны российстей во славе молишися, воспевая : Аллилуиа.

Икос 10
Стене нерушимей и адаманту крепчайшему подобна вера твоя, святая новомученице Марие, яко ты верою одолела еси страсти мира сего, смиренне пренесла еси чести царственныя лишение, надругания и заточение, и самую смерть лютую Христа ради кротце прияла еси; оружием бо веры, по слову Господню, данному иногда благоверному Константину царю, духовне победила еси вражеския легионы. Прославляя же Давшего ти крепость и Венчавшего тя венцем мученическим победным Господа Иисуса Христа, поем тебе, благоверная царевно, похвалы сия:
Радуйся, от земли отчизны твоея во юности отъятая;
Радуйся, на руце Божии в вечней юности пребывати приятая;
Радуйся, сквозе мрак безумия всенароднаго с честию прошедшая;
Радуйся, тихое пристанище и цветение райское у Христа обретшая;
Радуйся, от тли смертныя Победителем смерти Спасом возведенная;
Радуйся, венцем славы неизреченныя от Царя царей венчанная;
Радуйся, человеков с Богом скорое и радостное примирение;
Радуйся, Судии Праведнаго о них умиленномощное умоление;
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 11
Пение всеумиленное приноси ти, страстотерпице Христова, с небесе на мольбы наша благосердно призирающая, и просим тя: внемли гласу хваления и молитв наших, благоверная царевно, и умоли Всемилостиваго Искупителя нашего, да ниспошлет нам грешным животворящую благодать свою, яко да просветятся сердца наша, да озарится ум наш, яко да со всеми исповедающими Триединаго Бога во веки сподобимся воспевати: Аллилуиа.

Икос 11
Светом трисолнечным, горе озаренная, благоверная царевно Марие, озари наша души сиянием Божия благодати и настави ны верно исполняти заповеди Христа Бога: вемы бо, яко много может молитва твоя пред благостию Его, яко верной Его служительнительницы и победоносныя страстотерпицы. Сего ради со упованием благим молитвенно к тебе притекаем и взываем сице:
Радуйся, в добродетелях и почитании старших наставляющая;
Радуйся, страх смерти и болезни в душах наших побеждающая.
Радуйся, благодатную силу исцеления просящим подающая;
Радуйся, очи духовные нам всем отверзающая;
Радуйся, любити всех любовию Христовою научающая.
Радуйся, от бед и невзгод нас всех ограждающая
Радуйся, от обольщений и искушений вражиих защитнице.
Радуйся, помощи скорыя в недузех и скорбях подательнице;
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 12
Благодати Святаго Духа испроси всем, святая страстотерпице царевно Марие, вознося молитвы твоея ко Царю Царствующих купно с родители, сестры и братом твоим, такожде и со слуги верныма, яко да силою благодати укрепит Господь и нас, немощных, да твоими молитвами всякия козни победим, вопием Всеблагому Богу нашему: Аллилуиа.

Икос 12
Поюще Триипостаснаго Бога, в лице мученичестем тя, благоверная царевно Марие, прославившаго, воспевати тя достойно недоумеем мы, но в простоте сердечней к тебе моляся, просим убо тя: любовию нелицемерную твоею наша сердца возгрей и настави ны воспевати присно Богу песнь покаяния и благодарения, и ближнему во благое послужити возможем нелицемерно; тебе же, наставнице и покровительнице нашей, воззовем сице:
Радуйся, молитвою смиренною к Богу душу во страданиях вознесшая;
Радуйся, образ вернаго служения Богу терпением своим показавшая;
Радуйся, душу твою Творцу яко фимиам благоуханный принесшая;
Радуйся, и нас сущих в скорбех лучами надежды осиявающая;
Радуйся, малодушие и безсилие в сердцах наших прогоняющая;
Радуйся, и нам крепкое терпение и ангельскую кротость подающая;
Радуйся, из пучины отчаяния нас пречудно извлекающая;
Радуйся, малодушие и безсилие в сердцах наших прогоняющая;
Радуйся, прекрасная и непорочная невесто Христова, всеблаженная царевно Марие, о спасении душ наших молитвеннице предивная.

Кондак 13
О, преславная страстотерпице Христова, кроткая Его угодница и благоверная российская Марие, всегдашняя о нас ко Царю царствующих молебнице и теплая ко Милосердию Его предстательнице. С верою, надеждою и любовию ко твоему заступничеству за ны пред Спасителем Нашим и Богородицею нас притекающих приими и от всяких болезней, бед и смерти избавити Отца Небеснаго умоли, да с тобою радостно и светло взываем Господу, милующему и спасающему нас: Аллилуиа.
Сей кондак глаголи трижды, посем Икос 1-й и Кондак 1-й.[/spoiler]

Раб божий Константин

АКАФИСТ СВЯТОЙ СТРАСТОТЕРПИЦЕ, БЛАГОВЕРНОЙ ЦАРЕВНЕ РОССИЙСКОЙ ТАТЬЯНЕ.
[spoiler]Кондак 1
Избранная от рода царственнаго /державнаго/ угоднице Христова, страны российския небесная, заступнице и усердная о душах наших молитвеннице, благоверная царевно Татиано, пение похвальное с верою и любовию приносим ти: ты же, яко имуще дерзновение велие ко Прославльшему тя, Гостоду ото всяких бед и скорбей избави нас, да с умилением зовем ти:
Радуйся, святая новомученице царевно Татиано, теплая молитвеннице о спасении нашем!

Икос 1
Ангелов собеседнице и человеков наставнице воистину явилась еси, всехвальная царевно Татиано, добродетельнаго жития твоего и мученическия кончины ради. Мы же (ведущее яко по словеси псалмопевца «дщери царей в чести Божией» (Пс. 44;10) почивают), к представительству твоему прибегаем, с любовию и надеждою взываем ти сице:
Радуйся, яко Царь царей возжела доброты твоея! (Пс. 44:12)
Радуйся, яко Создатель Мира отверзе ти чертоги своя!
Радуйся, радость вечную во светлостех святых стяжавшая!
Радуйся, равноангельскую честь достойне приявшая!
Радуйся, чтущих тя пред Богом поминающая!
Радуйся, о прославляющих тя Господа умоляющая!
Радуйся, от обычаев душетленных сердца наша отвращающая!
Радуйся, нравы добрыя и благочестие в нас насаждающая!
Радуйся, святая новомученице, царевно Татиано, теплая молитвенице о спасении нашем!

Кондак 2
Видевши тя благоверныя родителя твоя ,царь Николай и царица Александра, преуспевающу возрастом и премудростью и всеми добродетельми украшаемую, возрадовашеся о тебе, благодарю поя премудрости наставнику и смысла подателю Бога: Аллилуйя!

Икос 2
Разум небесный тебе даровася, святая царевно Татиано, от дней детства твоего, яко непристанно помышляла еси о Спасителе (и заповеди Его усердно творила еси), богомудрою матерью твоею наставляема, молитву и дела благочестия паче забав мирских (и почестей царских) возлюбила еси. Мы же, сия поминающе, таковыя похвалы приносим ти:
Радуйся, боговенчанных родителей дщи порфирородная!
Радуйся, водительству Духа Святаго издетски прилежавшая!
Радуйся, благим деянием венценосных предков твоих подражавшая!
Радуйся, верою праотцу твоему, патриарху Филарету, поревновавшая!
Радуйся, смирение и боголюбие царей Михаила и Алексия наследовавшая!
Радуйся, твердостию воли Петру Великому уподобившаяся!
Радуйся, мудрость праматери твоея, королевы Виктории (царицы Екатерины) восприявшая!
Радуйся, в милосердии (российской) царице Марии последовавшая!
Радуйся, святая новомученице, царевно Татиано, теплая молитвеннице о спасении нашем!

Кондак 3
Силою Вышняго укрепляема, преславная царевно Татиано, егда в доме царственнаго отца твоего заповедей Христовых усердное хранение и в благочестии преспеяние видевше, навыкла еси от дней детства твоего о спасении душевнем паче всего ревновати и в теплых молитвах Господеви взывати: Аллилуйя!

Икос 3
Имуще благочестивыя родители прилежала еси, всехвальная царевно Татиано, богоугодному житию, благодатию Божиею во всяцем деле блазе подкрепляема суще. Тем же, дивящееся таковому от юности твоея рачению, с умилением зовем ти:
Радуйся, от младых ногтей страх Божий имевшая!
Радуйся, в путех Господних непорочно ходившая!
Радуйся, чтению Божественных писаний навыкшая!
Радуйся, жития святых и поучения их возлюбившая!
Радуйся, всякое дело твое с молитвою сопрягавшая!
Радуйся, с родители твоими благословению и наставлению иереев Господних внимавшая!
Радуйся, со страхом Божиим и усердием храму Божьему и службам церковным прилежавшая!
Радуйся, к Царствию Небесному духовные взоры твоя обратившая!
Радуйся, святая новомученице, царевно Татиано, теплая молитвеннице о спасении нашем!

Кондак 4
Бурю скорбей и напастей, злобою мира сего воздвизагаемую верою твоею, трезвлением сердечным и молитвами горячими, утолила еси до конца, святая царевно Татиано; ныне же убо, причащаяся славы небесныя со всеми новомученники российскими, предстоиши Христу – Царю Славы, воспевая: Аллилуйя!

Икос 4
Слышавше, преславная царевно Татиано, глаголы апостольския, яко подобает убо женам и девам христианским стяжати красоту нетленную «кроткаго и молчаливаго духа, еже есть пред Богом многоценно» (1 Петр., 3;4.). Сему усердно последовала еси. Мы же, сие поминающе, просим тя: укрепи нас в житии благочестивом и добродетельном и приими любовию приносимыя величания сия:
Радуйся, благое иго Христово на себе восприимшая!
Радуйся, в житии твоем угодником Божиим подражавшая!
Радуйся, ближних твоих паче себе самой возлюбившая!
Радуйся, во образ девам христианским свыше предназначенная!
Радуйся, светом Божиим от растления нас охраняющая!
Радуйся , дев и юношей в целомудрии утверждающая!
Радуйся, от глада духовнаго всех нас избавляющая!
Радуйся, любви к Божьему творению всех нас научающая!
Радуйся, святая новомученице царевно Татиано, теплая молитвеннице о спасении нашем!

Кондак 5
Боготечной звездою, спасения путь указующей, явися тебе, благоверная царевно, житие святой мученицы Татианы Римской; ей бо подражающе, в милосердии и служении ближним усердно позвизалася еси; и, яко оная, житие твое мучеснически скончавше, востекла еси в чертози Царя Небеснаго, идеже, купно с нею Господеви воспеваеши: Аллилуйя!

Икос 5
Видим тя, благоверная царевно Татиано, у Престола Божьего предстоящую и за нас грешных молящуюся и обретая твоим заступлением в скорбех – утешение, в недузех – исцеление, в бедах – скорое вспоможение, величаем возвеличившего тя Царя Славы Христа, тебе же, нашей теплой предстательнице, от любве сердечныя вопием:
Радуйся, в неизреченной славе Творца мира созерцающая!
Радуйся, с лики мученическими хвалу Богу воспевающая!
Радуйся, с небесных высот к нам милостиво прикающая!
Радуйся, теплотою Божественныя любве души наша согревающая!
Радуйся, в скорбех и болезнех терпению Христову нас научающая!
Радуйся, недуги телесные и язвы духовныя исцеляющая!
Радуйся, бремя житейское носити нам помогающая!
Радуйся, смирением души верных обогащающая!
Радуйся, святая новомученице царевно Татиано, теплая молитвеннице о спасении нашем!

Кондак 6
Проповедницу добрых дел явила еси себе, блаженная царевно Татиано, егда во дни испытания военнаго купно с матерью- императрицею Александрою и сестрою твоею, царевною Ольгою, во врачебнице усердно потрудилась еси, воинов раны благоискусно целяще. Сего ради, надеющеся на твое милосердное о нас попечения, усердно прибегаем к твоему заступлению, взывающе благодарно Богу: Аллилуйя!

Икос 6
Возсия в боголюбивой души твоей, святая Татиано, свет истиннаго боговедения; ты бо, благодатию Божественною просвещаема, заповеди Христовы о любви к Богу и ближнему со усердием радостно исполняла еси. Мы же, сие ныне поминающе, молим тя, благоверная царевно, озари и нас лучами добродетелей твоих и милостиво приими величания сия:
Радуйся, мудрая евангельская дево во свете веры и дел благих ходившая!
Радуйся, служению святых жен – мироносиц Марии и Марфы подражавшая!
Радуйся, спасению и исцелению ближних себе посвятившая!
Радуйся, от похоти себялюбия нас исцеляющая!
Радуйся, милосердие в сердцах наших пробуждающая!
Радуйся, страждущим служити нас подвизающая!
Радуйся, светом радости души наша озаряющая!
Радуйся, за вся Творца благодарити нас научающая!
Радуйся, святая новомученице, царевно Татиано, теплая молитвеннице о спасении нашем!

Кондак 7
Хотяще невозбранно духом в Горные селения возноситися, пречудная царевно Татиано, в бушующем мире душею надмирно пожила еси, подвигом добрым до конца подвизаясь, труды ко трудам прилагая, неустанно достойно и праведно поя Богу: Аллилуйя!

Икос 7
Дивныя показа дела Своя Господь в тебе, пречудная царевно Татиано, ибо все житие ибо все житие твое на земли многими печальми и болезльми исполнено бе от клеветы и досаждения, укорения и иных многих бед и напастей. Ты же, глас хулы и поношения слышавше, в Бозе духом твоим пребывался еси и николиже в помыслах твоих не смутилася еси. Мы же ныне просим тя: вдохни в сердца наша дух любви к Богу и ближним нашим и приими милостиво величания сия:
Радуйся, в кротости и смирении Христу Богу и Пречистой Его Матери подражавшая!
Радуйся, силою свыше на брань протву сил преисподних препоясанная!
Радуйся, от почестей земных всецело отвратившаяся!
Радуйся, скорби и испытания в богатство духа претворившая!
Радуйся, грешников ко исправлению направляющая!
Радуйся, пламень злобный струями любве твоея угосающая!
Радуйся, молитвами твоима веру нашу укрепляющая!
Радуйся, беды и печали от чтущих тя отгоняющая!
Радуйся, святая новомученице царевно Татиано, теплая молитвеннице о спасении нашем!

Кондак 8
Странно и преславно бысть житие твое, благоверная Татиано, како убо славою царственною почтена суще, нищету духовную, паче богатств и славы мира сего, возлюбивше, в подвигах молитвы и благочестия сокровище нетленное души твоея стяжала еси. Кто убо возможет достойно воспети страдания твоя, яже Христа ради добропобедно претерпела еси. Мы же , вся сия же, поминающее ныне, Богу Нашему, Дивному во святых Своих, умиленно взываем: Аллилуйя!

Икос 8
Все упование, всю надежду возложила еси Господа Нашего Иисуса Христа, премудрая Татиано, егда во дни мятежа народнаго, злочестивыми людьми супротив отца твоего воздвигнутого, в палатех царстих, аки в темнице, заточена была еси; милосердною любовию твоею движимая, утешительница богомудрая и помощница многоусердная, явилась еси матери твоея и ближним твоим. Мы же ныне просим тя, угоднице Божия, укрепи и нас во дни испытаний наших, да зовем ти:
Радуйся, дево святая, веру великую стяжавшая!
Радуйся, славу человеческую ни во что же вменившая!
Радуйся, в женстем естестве мужескую крепость показавшая!
Радуйся, с верою и любовию (понесшая крест твой и )Христу последовавшая!
Радуйся, прелести мира сего ради спасения презревшая!
Радуйся, во дни скорбей твоих николи же не возроптавшая!
Радуйся, раба Бога Вышняго, волю Его сотворившая!
Радуйся, веру Христову до конца сохранившая!
Радуйся, святая новомученице царевно Татиано, теплая молитвеннице о спасении нашем!

Кондак 9
Всякия похвалы достойна еси, благоверная царевно Татиано, ибо ты правды Христовой и верности Спасителю ради лишения и страдания многообразныя претерпела еси, моляще Всеблагаго Господа Иисуса о даровании ти укрепления благодатнаго. Мы же, Всемилостиваго Бога, озарившего тя светом своим , славим и вопием Ему: Аллилуйя!

Икос 9
Витийство человеческое не возможет изрещи вся скорби, унижения, болезни и муки иныя , яже претерпела еси на крестном пути твоем, всехвальная царевно Татиано, токмо в Бозе (в молитве) отраду и утешение обретая. Мы же вся сия ныне поминающе, вере и терпению твоему точию дивящеся и любовию вдохновляемы, со умилением и радостию взываем ти:
Радуйся, мир Божий в сердце твоем стяжавшая!
Радуйся, гонения и притеснения смиренно приявшая!
Радуйся, дивную крепость духа в скорби показавшая;
Радуйся, родителям твоим утешение приносившая;
Радуйся, сестер и брата духовно укрепившая;
Радуйся, и нас в кротости и терпении утверждающая;
Радуйся, волю Божию исполняти нас научающая!
Радуйся, от заблуждений духовных нас исцеляющая!
Радуйся, святая новомученице царевно Татиано, теплая молитвеннице о спасении нашем!

Кондак 10
Спасительнаго подвига твоего вспоминая течение, радуемся и славословим Подвигоподвижника Христа, благодатию своего тя укрепившего; ты бо, премудрая Татиано, древлим мучеником и страстотерпцем подобно (аки на пиршество праздничное) в спокойствии духа на Голгофу твою востекла еси, веруя несомненно, яко двери Царствия Небеснаго отверзаются всем, до конца претерпевшим. Мы же сего ради Господеви взываем: Аллилуйя!

Икос 10
Стене нерушимой и адаманту крепчайшему подобна явилась еси, святая царевно, егда (злочестивыми и) демоноподобными богоотступниками во граде Екатеринбурзе во узах темничных заточена суще, многие муки душевныя с надеждою о Господе претерпела еси; после же купно с семью и слуги верными чашу смертную кротце испила еси. Сего ради, величая твое долготерпение, со смирением зовем ти:
Радуйся, токмо во Христе Распятом отраду обретавшая!
Радуйся, благодать молитвы о врагах твоих стяжавшая!
Радуйся, крылами богомыслия сети вражия сокрушившая!
Радуйся, велию верою твоею страх смертный победившая!
Радуйся, кровию твоея торжество веры Христовой явившая!
Радуйся, ( царския) ризы твоя в крови агнчей убелившая;
Радуйся, в дому Отца Небеснаго обитель себе сотворившая!
Радуйся, нетленный венец славы от Спасителя приявшая!
Радуйся, святая новомученице царевно Татиано, теплая молитвеннице о спасении нашем!

Кондак 11
Пение благодарственное приносим ти, угоднице Божия; ты бо горячими молитвами твоима, всякия скорби и напасти избавлявши нас, святая благоверная царевно Татиано, сего ради молим тя: испроси нам вся ко временной и вечней жизни полезная, да сподобимся Горняго Иерусалима достигнути и купно с тобою выну Господеви воспевати : Аллилуйя!

Икос 11
Света нетварного зрительнице и радости Божественныя сопричастнице явилася еси, святая страстотерпице Татиано. Тем же молим тя: не престани молитися о всех нас, да помилует нас Господь твоего предстательства ради, и сподобит нас немощных новую силу нечестия посрамити и победители злонравия явистися, да ублажаем тя сицевыми похвалы:
Радуйся, се бо ангелы ликуют с тобою на Небеси!
Радуйся, яко человецы восхваляют тя на земли!
Радуйся, с мученики и всеми святыми ликовствующая!
Радуйся, со всеми избранными Божиими присно торжествующая!
Радуйся, струи милостыни Господней верным изливающая!
Радуйся, от плевел ненависти сердца наша очищающая!
Радуйся, светом любви нелицемерныя нас озаряющая!
Радуйся, милосердие Божие к нам приклоняющая!
Радуйся, святая новомученице царевно Татиано, теплая молитвеннице о спасении нашем!

Кондак 12
Благодать, данную ти от Господа Нашего ведуще, с любовию восхваляем тя, всехвальная царевно Татиано, помышляя, яко не возможем по достоянию (изобразити) воспети и восхвалити величие и славу твою (, яже на небесех стяжала еси ,) и просим тя: молись о нас, многогрешных, да милостлив будет Господь и к нам ходатайства твоего ради, вопиющим /о тебе/ Ему: Аллилуйя!

Икос 12
Поюще пение похвальное усты недостойными, уповаем на милость Божию и твое, святая страстотерпице Татиано, заступление и предстательство за нас, многогрешных, и просим тя: не престани молитися за ны купно с благоверными и боговенчанными родителями твоима, братом и сестры и всеми новомученики и страстотерпцы земли нашея, да помилуй нас Господь вашего представительства ради; о сем же воздыхающе, таковые похвалы ти, святая Татиано, приносим:
Радуйся, заповеди Евангельския исполняти нас научающая!
Радуйся, богатых к милосердию и благотворению подвизающая;
Радуйся, бедным отраду и вспоможение дарующая;
Радуйся, труды наша на пути спасения облегчающая!
Радуйся, тайно творити добродетели наставляющая!
Радуйся, к благочестия подвигам нас призывающая!
Радуйся, от искушений и соблазнов избавляющая!
Радуйся, всех нас в час смертный укрепляющая!
Радуйся, святая новомученице царевно Татиано, теплая молитвеннице о спасении нашем!

Кондак 13
О, святая благоверная царевно и преславная мученице Христова Татиано, теплотою любве твоея ко Господу, посети и согрей души наша, и приими убогое сие молитвенное приношение наше(, яко венец похвалы сердечныя,) и (, яко фимиам благовонный,) вознеси молитву твою ко всех Владыце ( и Богу) и испроси земли нашей мира благоденственнаго, Церквам Божьим – единства и благосостояния; нам же всем чистоты сердечныя и любве непорочныя,(нелицемерныя) да спасаемы тобою, хвалебную песнь вопием Господеви: Аллилуйя!

Молитва *
О, святая новомученице благоверная царевно российская Татиано; ты душею на небесех у Престола Господня предстоиши, на земли же, данною тебе благодатию различные совершаеши исцеления; призри убо милостиво на предстоящие люди и молящиеся пред пречистым образом твоим и помощи твоея просящия; прости ко Господу святые молитвы твоя о нас и испроси нам – оставление согрешений, недужным - исцеление, скорбящим и бедствующим – скорую помощь, умоли Господа, да подаст нам христианскую кончину и добрый ответ на страшном судище своем, да сподобимся и мы купно с тобою и всеми новомученики и страстнотерпцы земли нашея, славити Отца и Сына и Святаго Духа, и ныне и присно и во веки веков. Аминь.[/spoiler]

Раб божий Константин

АКАФИCТ СВЯТОМУ
ЦАРЮ-ИСКУПИТЕЛЮ НИКОЛАЮ ВТОРОМУ.
[spoiler]Кондак 1
Избранный от рождения страстотерпче и Христовой любви воплощение, воспеваем ти похвальная, яко паче всего Отечество свое возлюбившему, ты же, яко имеяй дерзновение ко Господу, просвети омраченныя умы и сердца наша, да зовем ти: Николае, Боговенчанный царю и великий страстотерпче!


Икос 1
Ангелов Творец посла тя земле Российстей, яко ангела незлобия и вразумления к народу твоему, тя бо избра по образу Сына Своего Единороднаго в жертву искупления за грех народа Российскаго, мы же, дивящеся таковому о тебе промышлению Вседержителя, с умилением вопием ти:
Радуйся Христу уподобление!
Радуйся, жертве всесожжения!
Радуйся, Российских царей украшение!
Радуйся, незлобия и всепрощения образ подавый!
Радуйся, обидимых неложное упование!
Радуйся, веры нерушимой основание!
Радуйся, Николае, Боговенчанный царю и великий страстотерпче!


Кондак 2
Видящи всеблагая Богоматерь во уделе Своем страну нашу мерзостию растления оскверняемую, избра тя от рождения, яко чистейшаго, Руси бо очищение, да вси надгробное рыдание тебе творим песнь: Аллилуиа.


Икос 2
Разум Предвечный предуведе тя ко спасению и житию твоему преобразование Иова многострадальнаго, рождение твое и память праведника сочетавая. Мы же, грехи и беззакония наша поминающе, с трепетом сердечным и сокрушением душевным вопием ти сице:
Радуйся, хулы и напасти от народа твоего претерпевый!
Радуйся, веру до конца сохранивый Радуйся, образе кротости! Радуйся, светильниче правды! Радуйся, правило смирения! Радуйся, Николае, Боговенчанный царю и великийстрастотерпче!


Кондак 3
Сила Вышняго осени тя, Боговенчанне Николае, лжемудрствующу западу вразумление противоратное соделовавшаго, да мир Богу возопиет: Аллилуиа.


Икос 3
Имея тщание о вразумлении заблудших, поревновал еси благоверный царю: храмов созиданию, мощей святых угодников Божиих прославлению, просвещения христианскагот насаждению и обездоленных от насилия ограждению, да мир христианский вопиет ти таковая:
Радуйся, святителя Николая на земли соимените!
Радуйся, преподобнаго Серафима на небеси сомолитвеиниче!
Радуйся, православия насадителю!
Радуйся, света Христова носителю!
Радуйся, терпения христианскаго учителю!
Радуйся, православным христианом заступниче!
Радуйся, Николае, Боговенчанный царю и великий ,страстетерпче!


Кондак 4
Бури безумия и злоречия не убоялся еси, страстотерпче Николае, егда согласие со враги на пагубу Отечества отвергл еси, злохуления, заточение и умерщвление претерпев, вопия Богу Вседержителю: Аллилуиа.


Икос 4
Слыщаще державы Российския настроение и видяще христиан раззорение, молился еси, не преставая, да спасет Всеблагая Русь православную. Сего ради вопием ти:
Радуйся, молитвы кадило благовонное!
Радуйся лампадо веры неугасимая
Радуйся буйствующих кротостию вразумление!
Радуйся, неутешных в скорбех утешение!
Радуйся, небесных благ любителю!
Радуйся, правды ревнителю!
Радуйся, Николае, Боговенчанный царю и великий страстотерпче!


Кондак 5
Боготочная звездо россияном в разсеянии сущым явился еси, царю Николае, о имени твоем во едино их собирая и путь Христов к возрождению земли Российстей показуя, да поют ангелы песнь о кающихся грешницех: Аллилуиа.


Икос 5
Видя, яко кротость и смирение твое ничтоже успевает, все упование на Пречистую возложил еси и в руце Вседержителя всего себе предал оси, да и безумныя вразумит во еже пети тебе:
Радуйся, гордыни победителю!
Радуйся, венца небеснаго носителю!
Радуйся, немощных стено необоримая!
Радуйся, гордых вразумителю!
Радуйся, к людям своим любовь преизобильная!
Радуйся, за Русскую землю жертва усердная!
Радуйся, Николае, Боговенчанный царю и великий страстотерпче!


Кондак 6
Проповедуют концы вселенныя славу твою, во всю землю изыде слово твое, яко несть тоя жертвы, юже не пренесл бых за благо Отечества моего, научая тем люди твоя благодарственно пети Богу: Аллилуиа.


Икос 6
Возсиял еси паче солнца земле Российстей, царю Николае, православному народу заступление даже до смерти явивый, да вси ко Христу обращаются и к тебе прибегают, сего ради воспеваем ти таковая:
Радуйся, свете от востока исшедый!
Радуйся, образе царем православным!
Радуйся, правды сияние неистощимое!
Радуйся, кротости светило незаходимое!
Радуйся, грешников отчее вразумление?
Радуйся, праведников усердное прославление!
Радуйся, Николае, Боговенчанный царю и великий страстотерпче!


Кондак 7
Хотяй веру православную на земли утвердити, подвигнул еси .все царство твое на заступление обидимыя страны Сербския, да вси вопиют Богу: Аллилуиа.


Икос 7
Новаго тя Ноя, строителя спасения народу Российскому яви Господь, да вся труды твоя поминающе, непрестанно воспеваем ти сицевая:
Радуйся, Российскаго корабля водителю!
Радуйся, славян в бедах утешителю!
Радуйся, Сербстей стране заступление!
Радуйся, россиян окормление!
Радуйся, христианских добродетелей насадителю!
Радуйся, Николае, Бого-венчанный царю и великий страстотерпче!


Кондак 8
Странное чудо видим на тебе, Николае, десницею Всевышняго многажды спасаему, со чады же и сродники мученическим венцем венчаему, да Богу Промыслителю всяческих вопием: Аллилуиа.


Икос 8
Весь еси всем христианом заступник явился еси, Богоизбранне Николае, сугубое заступление народом славянским показу еши, на похвалу подвизая пети тебе:
Радуйся, защите обидимых!
Радуйся, вразумление обидящих!
Радуйся, скорбных прибежище!
Радуйся, гонимых заступниче!
Радуйся, в житии твоем миротворче!
Радуйся, по убиении твоем христианом поборниче!
Радуйся, Николае, Боговенчанный царю и великий страстотерпче!


Кондак 9
Всякими чудесы яви Господь благоволение Свое Российским людем, дондеже преогорчиша Господа зело, но тобою к покаянию призываемы, купно воспоим Богу: Аллилуиа.


Икос 9
Ветия многовещанныя, яко рыбы безгласныя, не возмогут возрещи высоту твоего терпения, мы же глубину падения нашею созерцающе, в сокрушении духа взываем: Радуйся, терпение необоримое! Радуйся, верносте христиан непоколебимая! Радуйся, гордыни сокрушение! Радуйся, безумных умудрение! Радуйся, образ верным в житии и мученической кончине давый!
Радуйся, за грех земли своей пострадавый!
Радуйся, Николае, Боговенчанный царю и великий страстотерпче!


Кондак 10
Спастися хотяй всем человеком, иже на крови мучеников Своих Церковь основавый, сердцеведец Христос Положитя, страстотерпче Николае, во основание новыя храмины державы Российския, да вси в ней сущия вопиют Богу: Аллилуиа.


Икос 10
Стена еси всем к тебе с верою прибегающим и необоримое ограждение миру православному еси, научая вся верныя славити тя сице:
Радуйся, на земли небесных явление!
Радуйся, оскудевающих доб-родетельными восполнение!
Радуйся, заре в земли Российстей возсиявшая!
Радуйся, реко, все пределы ея напитавшая!
Радуйся, смиренномудрия учителю!
Радуйся, веры и любви насадителю!
Радуйся, Николае. Боговенчанный царю и великийстрастотерпче!


Кондак 11
Пение Пресвятей Троице даже до смерти приносяще, течение скончал еси и веру соблюл еси, еюже вся православныя христианы подвизаеши пети: Аллилуиа. .


Икос 11
Светодателем послан быв земле нашей, яко агнец непорочный, полагаешися во искупление греха нашего, да вси непрестанно тя славим:
Радуйся, боголюбезная жертво!
Радуйся, любвеобилие неистощимое!
Радуйся, верности Христовы похвале!
Радуйся, всеяние духа незримое!
Радуйся, зерцало премудрости!
Радуйся, ненадеющихся надеждо!
Радуйся, Николае, Боговенчанный царю и великий страстотерпче!


Кондак 12
Божественная благодать, немощная врачующи, предуведе тя, яко врачевство неистощимое владомым твоим, вопиющим Богу: Аллилуиа.


Икос 12
Поюще страдания твоя, страстотерпче Николае, поклоняемся терпению твоему, яко силе всемощныя Троицы явльшейся на тебе, да вси согласно вопием:
Радуйся, возлюбленное чадо Христово!
Радуйся, непорочная чада твоя и верныя слуги ко Христу приведый!
Радуйся, царице праведною и мученицею быти пособствовавый!
Радуйся, народ твой истине наставивый!Радуйся, Отечества чести не посрамивый!
Радуйся, царство небесное стяжавый!
Радуйся, Николае, Бого-венчанный царю и великий страстотерпче!


Кондак 13
О пречудный и преславный царю-искупителю Николае, призри на царство твое земное и люди твоя всякаго бо ответа о грехе нашем недоумеем, и умоли Вседержителя, да невнидет в суд с нами, .но сподобит ны непрестанно воспевати: Аллилуиа.
Этот кондак читается трижды, затем икос 1 и кондак 1.



Тропарь. Глас 4
Жертве Христовой в подобие,/ яко Агнец непорочный, волею/ полагаешися во искупление/ греха народа Российскаго, царству в себе раздельшемуся/ в себеже даруеши исцеление,/ святый Царю-искупителю Николае,/ страдания твоя смертная славим,/ ими бо царствие воскрешается/ во славу Царя-Бога небеснаго,/ и во спасение душ наших.[/spoiler]

Раб божий Константин

АКАФИСТ РОССИЙСКОМУ НОВОМУЧЕНИКУ СТРАСТОТЕРПЦУ ЦАРЮ НИКОЛАЮ иной.
[spoiler]Кондак 1

    Богоизбранного Царского рода преславное увенчание, святый страстотерпче Царю Николае, сонм новомучеников Российских с Семейством Своим возглавивый, воспеваем Ти похвальная, яко подвигом веры, любви и терпения стяжал еси славу Отцу Небесному, честь Отечеству Православному и святость Семье Своей. Ты же, предстоя ныне со Царицею и Чады Своими пред Престолом Всевышнего Царя, умоли Господа о нас, поющих Ти: Радуйся, Николае, богоизбранный Царю и великий страстотерпче!

Икос 1

    От отрочества возлюбив Христа, святый страстотерпче Царю Николае, о царском венце, как о тяжком кресте помышлял еси, сердцем же стремился ко иноческому житию. Обаче, зная долг Свой Наследника престола и ревнуя о могуществе и процветании Державы Российстей, приял еси царство, яко послушание от Бога данное, и вси Свои силы и чаяния земле родной посвятил еси. Мы же, благодарне сущи за таковое самоотверженное Твое служение, вопием Ти: Радуйся, благочестиваго корене отрасль пречестная; радуйся, добродетелям великих предков подражателю. Радуйся, царского их служения верный преемниче; радуйся, Отечество и народ Свой паче жизни возлюбивый. Радуйся, хозяином земли Русской от Бога поставленный; радуйся, Дома Пресвятыя Богородицы верный хранителю. Радуйся, нищих и обездоленных щедрый попечителю; радуйся, угнетенных и обидимых скорый защитниче. Радуйся, Николае, богоизбранный Царю и великий страстотерпче!

Кондак 2

    Господа Бога одного имея над собою, Ему Единому сердце Свое отдал еси, Царю богоизбранный, и был еси в глазах общества богоотступнического, яко юродивый среди мудрых, посрамляя по слову апостола Павла мудрость века сего. Тем же, следуя строго заповедем Христовым и твердой рукой содержа кормило власти Царской, великое могущество и процветание народу Русскому и всем народам России стяжал еси, Церковь Православную везде укрепляя и уча всех пети Богу: Аллилуия!

Икос 2

    Отечеству Своему горячо любимому и всем народам земли желая мира и благоденствия, великий избранниче Божий Царю Николае, к царям и правителям всех стран во имя Христа обратился еси, да сократят в согласии множество смертоносного вооружения своего, и да поставят крепкий заслон войнам кровопролитным. Правители же безбожные, отвергнув предложение Твое, явили всем нечестие свое, Тя лишь Единого воистину благочестивого Царя и поборника мира показуя. И мы вси, дивяся преславным деяниям Твоим, со умилением вопием Ти: Радуйся, миротворче преславный; радуйся, царям и правителем звездо богосветлая. Радуйся, войн кровопролитных препятие; радуйся, Православного Отечества созидателю. Радуйся, стено всем обидимым; радуйся, всем праведным надежде и упование. Радуйся, любви Христовой проповедниче; радуйся, ум Свой и сердце Богу предавый. Радуйся, Николае, богоизбранный Царю и великий страстотерпче!

Кондак 3

    Истинный христолюбче и Церкви Православной во всем мире заботливый попечитель, богоизбранне Царю Николае, надежное основание положил еси Царству Российскому, на молитвы святых угодников паче ума человеческого полагаясь и высшую мудрость веры Христовой противу слепоты неверного разума являя. От иных же Своих подданных вместо благодарности и верного служения клеветою и оскорблениями уязвляем был еси. Помятуя же слово Божие: «Мне отмщение, Аз воздам», - терпел еси вся благодушно, на суд Божий возлагая злобу их, да раскаются и воспоют благодеевшему им Богу: Аллилуия!

Икос 3

    Завистник человеков и отец всякой лжи диавол, видя славу России и благочестие Твое непоколебимое, рассвирепе на Тя, Царю Николае, ложью, клеветой и коварством богоотступников на борьбу с Православным Царством собирая. Господь же, не хотяй смерти грешным, на малое время беззакониям их попустил еси, да вразумятся. Абие же верных сынов Русских на поражение нечестивых воздвигл еси, и скоро мир и порядок в стране вновь водворился до времени, да вси благочестивыя людии возопиют Ти: Радуйся, дерзостных бунтовщиков скорый победителю; радуйся, беззаконий твердый усмирителю. Радуйся, милосердием злобу угашаяй; радуйся, терпением и любовию зло побеждаяй. Радуйся, прельщенных и обманутых терпеливый вразумителю; радуйся, милосердный Царю, покаявшихся скоро милующий! Радуйся, самодержавия крепкий защитниче; радуйся, о спасении Отечества выну Бога умоляющий! Радуйся, Николае, богоизбранный Царю и великий страстотерпче!

Кондак 4

    Боголюбивую Царицу Александру дарова Ти Бог, державный Николае, яко голубицу чистую, та бо удостойся быти с тобою Едина душа, Едино сердце. Из нея приумножи Бог Царский род Чадами благословенными, Царевнами Ольгою, Татианой, Мариею, Анастасией и Царевичем пречудным, светлым отроком Алексием, да вси в согласии и любви воспевают купно с тобою Вседержителю Богу: Аллилуия!

Икос 4

    Радовася сердце Твое, Царю христолюбиве, чистым веселием, егда с Семейством Своим малое время проводил еси, не ведаша бо тамо ни лицемерия, ни лукавства, коими неверные слуги Тя огорчаша. Буйствующие же подданные Твои истинное благочестие забыша и в слепоте душевной и страстех пребывающе, чернили имя Твое пречестное безумным злословием, неразумевая, яко Божий Помазанниче Ты еси, и взыщет строго с них Господь за неверность. Ты же, любовию вся покрывал еси, и мы дивяся терпению Твоему и милосердию, вопием Ти таковая: Радуйся, образе царственной любви и терпения; радуйся, на Бога вся Своя печали возложивий. Радуйся, кротостию и молчанием клевету одолевый; радуйся, яко любовь Твоя к злословящим Тя не поколебашася. Радуйся, Царице и Чадом Отец любвеобильный; радуйся, в Семействе Своем утешение и ободрение обретаяй. Радуйся, христианского благочестия поборниче; радуйся, любовию Христовою сердца чад Своих просвящаяй. Радуйся, Николае, богоизбранный Царю и великий страстотерпче!

Кондак 5

    Ангелы на небесех возрадовашася о Тебе, Царю боголюбиве, егда твердым указом Твоим нерешительность архиереев преодолеся, и великий угодник Божий преподобный Серафим Саровский волею Божию и Твоим повелением прославися. И бысть сие прославление христианскому роду на велию радость, многими бо чудесы возвеличи Бог угодника Своего, и яви Тя, яко богомудраго Царя, всех научающего пети Богу: Аллилуия!

Икос 5

    Неустанными трудами и терпеливым попечением Твоим, Царю Николае, утвердися Русь Святая в царствование Твое. Многими бо храмы и обители святыми страна наша украсися, и многих угодников Божиих мощи православному народу явишася. Вся сия быша, да уготовится святый народ христолюбивый ко огненному искушению, на Россию грядущему, поспели бо нивы Божий и виноградник Христов к жатве кровавой. Тем и мы, Царю святый, вопием Ти: Радуйся, Царю, угождение Богу превыше всего поставивый; радуйся, разум Свой в послушание веры пленивый! Радуйся, народ Свой в вере добре утвердивый; радуйся, ревностию благоволение Божие к Себе стяжавый. Радуйся, предстательству святых Россию вверивши; радуйся, Православного Отечества утверждение. Радуйся, Царского рода предивное украшение; радуйся, Святой Руси сокровенный светильниче. Радуйся, Николае, богоизбранный Царю и великий страстотерпче!

Кондак 6

    Несокрушимой стеной ста благочестие Твое и вера, Царю Православный, на пути злочестия антихристова. Уведаша же беззаконники, яко сила Царя в верных слугах его, начаша клеветами и всяким коварством царских слуг поражати: оваго бо наветами прельстиша, ового же убиша, оваго убо в безбожие соблазниша. И тако распыхаху неразумных противу Помазанника Божия, да бы не пели на Руси Богу: Аллилуия!

Икос 6

    Испытание велие прииде на Державу Российскую, егда нападе нечестивыя на Царство Сербское, яко да разжется брань воинския в народах. Ты же, Царю святый, имея тщание о защите православных, ополчися на спасение страны Сербстей, и по зову Твоему воста народ Русский на брань противу безбожных супротивников, воспевая Ти таковая: Радуйся, верный защитниче обидимым; радуйся, покровителю народам православным. Радуйся, России славо и украшение; радуйся, врагом Отечества устрашение. Радуйся, закона и правды твердый хранителю; радуйся, антихристу стено неодолимая. Радуйся, грозное наказание буйствующих завоевателей; радуйся, беззаконий их нелицеприятное обличение. Радуйся, Николае, богоизбранный Царю и великий страстотерпче!

Кондак 7

    Чистое сердце Твое не узре коварства, Царю Николае, егда ближайшие други Твоя измену замыслиша. И бысть светла любовь Твоя ко всем, яко исчезоша душа Твоя о спасении народов славянских. Воеводы же Твоя старшие и сановные властители в безбожии обуявшыя, ископаша яму себе, обеты присяги по наущению вражию нарушая и погибель Российстей Державе уготовляя, не ведаша бо пети Богу: Аллилуия!

Икос 7

    Единоначальниче армии и флота Российского, молитвою и верою пламенея и благодатию Божией укрепляем, показался еси Русский Царь всем, яко стратег победоносный, всюду искусно врагов поражаяй и войско Российское на победу вдохновляяй. Изменники же тем временем подняша на Тя пяту свою, смуту в воинах и в народе тайно сея, иудин жребий избирая, ибо забыша, яко подобает пети Ти: Радуйся, Помазанниче Богоизбранный; Радуйся, Царю великодержавный. Радуйся, Российской Державы славо и утверждение; радуйся, всякому злодейству крепкое заграждение. Радуйся, закона и порядка блюстителю; радуйся, благонравия народного ревнителю. Радуйся, Русской армии и флота попечителю; радуйся, Божиих велений исполнителю. Радуйся, Николае, богоизбранный Царю и великий страстотерпче!

Кондак 8

    Исполнение времен прииде на Русь в царствование Твое, святый страстотерпче, оскуде бо вера многих, сердца свои ожесточиша и Света Христова не познаша, посему славные дела царские и милость Божию нивочтоже вмениша, нечестивым же хулителям и слугам антихристовым во всем потакаша. И бысть испытана Русь Святая и народ ея, яко злато в горниле, да отделятся овцы от козлищ, пшеница от плевел, и да явится дело каждого, поющего Богу: Аллилуия!

Икос 8

    Обыдоша Тя изменники и приступиша к Тебе, дело странное и небывалое требуя, - отречения от престола царского. Сим оружие пройде душу Твою, Царю благочестиве, и познав измену их, ста об нощь на молитву, горькую обиду Богу изливая, Отечество же Свое Пресвятей Богородице вверяя. И бысть сие моление Твое, яко гефсиманское, и умудри Тя Господь отступите, яко да заградятся уста нечестивых и накажутся тии нечестием своим. Мы же, познав страдание Твое и подвиг, вопием Ти: Радуйся, яко агнец непорочен прямо стригущего его безгласен; радуйся, смиренно царский венец на терновый сменивый. Радуйся, незлобием злочестие обличивый; радуйся, верность Богу даже до конца сохранивый. Радуйся, кровопролития никакоже пожелавый; радуйся, горькую обиду кротко стерпевый. Радуйся, все врагам простивый; радуйся, не мстити врагом повелевый. Радуйся, Николае, богоизбранный Царю и великий страстотерпче!

Кондак 9

    Видя бедствие народа богоизбранного, умилосердися Матерь Божия о людех Своих, яко издревле Россия Дом Пресвятой Богородицы именуется, и прия Скипетр и Державу Царица Небесная из рук отвергнутого Царя земнаго, новую чудотворную икону Свою «Державную» верным даруя, да поют неустанно Богу: Аллилуия!

Икос 9

    Убийство злодейское Семейства Царского задумаша нечестивцы, да бы покончить с Россией Православной, наложиша узы на Тя и на Царицу со Чады, Царю праведный, и попущением Божиим повлекоша путем голгофским, ибо восхоте Тя Бог возвеличити и Семейство Твое паче снега убелити. От сих явишася любовь Ваша и вера крепче алмаза, и тем возсия праведность Ваша, паче солнца, яко и приставникам Вашим дивитися. И видеша верныя, яко прииде скорби тяжкия на Тя и Семейство Твое, Царю Николае, воспеша Ти: Радуйся, Царю, страданием Бога прославивый; радуйся, огненное испытание доблестно прошедый. Радуйся, чашу горькую с Семейством честно испивый; радуйся, яко мзда Ваша многа на небесах. Радуйся, Семейство Свое уготова, яко цветниче благоуханный; радуйся, России светильниче семисветлый. Радуйся, кротостию Давидовой врагов обличивый;радуйся, Бога о врагах моливый. Радуйся, Николае, богоизбранный Царю и великий страстотерпче!

Кондак 10

    Погубити народ христианский восхоте беззакония властители самозванные, суетной злобой омраченныя, и попустиша им Господь святых победити, Царское Семейство погубити и святыни земли Российкия разорити, ибо прииде яко тать нощию страшный час жатвы Христовой, да яве станет безумие нечестивых и мудрость боголюбцев. Ты же, Царю праведный, умолил Господа, да не до конца прогневается, и да сохранит на Руси выну поющих Богу: Аллилуия!

Икос 10

    О, светло светлая и украсно украшена Русская земля, и многими красотами удивлена еси, церквами златоглавыми, монастырями белокаменными, князями грозными прославлена еси, богатствами несметными исполнена еси. В те дни прииде погибель на христиан, пройде бо огненною бурею Десница Господня, да прославится земля Русская мужеством несокрушимым новомучеников и исповедников преславных во главе с Царем добропобедным, ему же вси со умилением воспоем: Радуйся, Царского рода преславное увенчание; радуйся, сонм Российских новомученников возглавивый. Радуйся, Святой Руси славо и украшение; Радуйся, кровию Своею Россию от совершенной погибели искупивый. Радуйся, венцев небесных с Семейством удостоенный; радуйся, Отечества Небесного светлый жителю. Радуйся, о народе Своем выну Бога молящий; радуйся, многими чудесы верных укрепляющий. Радуйся, Николае, богоизбранный Царю и великий страстотерпче!

Кондак 11

    Древнему Иову подобне житие Твое, богоизбранниче Николае, ибо умножися слава Твоя последи, и яко звезды небесныя явися чудеса Твоя и помощь, верным даруемая по предстательству Твоему. И позна народы боголюбивыя велие дерзновение Твое пред Богом о всех обидимых и во обстоянии сущих, и воспеша благодарно Богу: Аллилуия!

Икос 11

    Остаток верных сохрани Господь в России, безбожникам на обличение и вразумление, да покаются и спасутся. Егда же прииде час помилования Святой Руси, яви всем икону Царя мироточивую, и многими знамениями прослави святое Семейство Царское, да познает народ Русский всемощное предстательство святаго Царя пред Богом о Своем народе возлюбленном, и да поют ему вси радостно: Радуйся, Святой Руси возрождение; радуйся, от плена страстей освобождение. Радуйся, заблудшим чадом ходатаю прощения; радуйся, к покаянию всех призываяй. Радуйся, верным светильниче богосветлый; радуйся, предстателю о нас пред Богом непостыдный. Радуйся, скорый услышателю в беде сущих; радуйся, всем праведным надежде и упование. Радуйся, Николае, богоизбранный Царю и великий страстотерпче!

Кондак 12

    Бога Единаго любити, Ему Единому служити, ради Него вся терпети и вся творити учат нас святыя Царственныя страстотерпцы, да славят христоименитые люди российстии Имя Божие, и да просветятся и исцелятся Светом Христовым от России все народы мира и да воспоют купно Богу: Аллилуия!

Икос 12

    «Несть тоя жертвы, юже не принесл бых за благо Отечества моего», - тако глаголал еси, святый Царю, научая тем и люди Своя о Отечестве Православнем паче жизни радети, яко Держава Российская - богоизбранный сосуд истины во свидетельство народам является. Тако научи и нас о спасении Святой Руси выну помышляти и не Своих си, но яже Божия, всегда искати, воспевая Ти сице: Радуйся, страстотерпче, живот Свой за други Своя положивый; радуйся, Царю, заповедь любви до конца исполнивый. Радуйся, наставниче Христова смирения; радуйся, святый учителю богопочитания. Радуйся, раздоров и нестроений умирение; радуйся, молитвенниче о нас неусыпаемый. Радуйся, славянского рода дерзновенный предстателю; радуйся, России небесный покровителю. Радуйся, Николае, богоизбранный Царю и великий страстотерпче!

Кондак 13

    Единой России и всех народов славянских верный служителю, великий избранниче Божий, страстотерпче Царю Николае, молим Тя, яко предстателя и молитвенника о нас усердного, вознеси о нас горячие молитвы Твои ко Господу сил, да дарует Отечеству нашему мир и процветание, роду славянскому во благочестии христианстем преуспеяние, да вси согласно поем Богу: Аллилуия!

    (Этот кондак читается трижды, затем икос 1 и кондак 1).



МОЛИТВА святому Царю страстотерпцу НИКОЛАЮ

***

    О, святый новомучениче страстотерпче Царю Николае, Помазанника Своего Тя Господь избра во еже милостивно и право судити людем Твоим, и хранителя Царства Православнаго быти: царское служение сие и о душах попечение со страхом Божиим совершал еси. Испытуя же Тя, яко злато в горниле, скорби горькия Господь Ти попусти, яко же Иову многострадальному, последи же престола царскаго лишение и мученическую смерть посла Ти. Вся сия кротко претерпевый, яко истинный раб Христов, наслаждаешися ныне вышния славы у Престола всех Царя купно со святыми мученики. Мы же, аще и недостойни есмы множества грехов наших ради, молим Тя, о славный Царю страстотерпче Николае, умоли Господа о нас, да не отвратится до конца, да не лишит народ наш великаго избранничества Своего, но да подаст нам разум спасения, во еже восстати нам из глубины падения. Имаши бо, Царю Николае, дерзновение велие, Ты бо кровь Свою пролиял еси за народ Свой и душу положил еси не токмо за други, но и за враги Своя, и сего ради предстоиши ныне в невечернем свете Царю Славы, яко верный слуга Его. И тако буди нам ходатай, и заступник, и приклони на милосердие правосудие Божие, да не погубит нас до конца Господь, но да вся простит и милостивно помилует и спасет святую землю Русскую и народ ея свободит от тяжких бед и напастей. О, святый и славный наш Царю страстотерпче Николае, предстательством Твоим и молитвами святаго Семейства Твоего, невинно убиенных Царицы Александры, Царевича Алексия, Царевен Ольги, Татианы, Марии и Анастасии, да подаст нам Господь грехов прощение и на всякую добродетель наставит нас, да стяжем смирение, кротость и любовь, ихже сии мученицы явиша. И да возродится в народе нашем вера и благочестие, да дарует нам Господь Самодержца Российского, во еже восставити престол Царей Православных. И да прославим Бога и послужим Ему верно до скончания века на земли и сподобимся Царствия Его на небеси, идеже мы купно с тобою и всеми Святыми новомученики и исповедники российскими и со всеми святыми воспевати будем Славу Отцу и Сыну и Святому Духу и ныне и присно и во веки веков. Аминь.[/spoiler]