Молитвослов

Автор Раб божий Константин, марта 10, 2012, 02:13:14

« назад - далее »

Раб божий Константин

АКАФИСТ
святым царственным мучеником
Царю Николаю, Царице Александре, Царевичу Алексию и Царевнам Ольге, Татиане, Марии и Анастасии.
[spoiler]Кондак 1. Глас 8.

Державнейшии заступницы яже на земли Церкве Христовы, яко избавльшеся от злых предстательством вашим, похвальная восписуем вам. Вы же, яко имущии неусыпное о любящих вас попечение, и за всех православных милосердое заступление, от всяких нас бед свободите, да всепраздненственне зовем вам: Радуйтеся, многострадальнии мученицы царственнии, державнии рода христианскаго покровителие.
Икос 1.

Ангели предстатели земли русстей, и всей Церкви Христове абие по смерти явистеся, рода Романова страстотерпцы чудодетельнии: скончавшу бо ся земных страданий тяжкому времени, изгнания и уничижений горькое в радость вечную вам претворися: о, несказанныя славы вашея на небесех! Обаче не оставите нас, отцев законопреступных строптивых чад, но умилосердите Бога о поющих вам пение сицевое:
Радуйтеся, порфироноснии страдальцы.
Радуйтеся, царей благоверных удобрение.
Радуйтеся, Царя Небеснаго вернии раби.
Радуйтеся, о верних рабех Царю Царей молящиися.
Радуйтеся, на небеси царствующии вечно.
Радуйтеся, на земли чтущих вас пред престолом страшнаго Царя поминающии.
Радуйтеся, багряное грехов кровьми убелившии.
Радуйтеся, смирением и уничижением Царство вечное купившии.
Радуйтеся, славою несказанною сияющии.
Радуйтеся, Ангелы досточестно ублажаемии.
Радуйтеся, светлостию немерцаемою просвещаемии.
Радуйтеся, красотою божественною наслаждающиися.
Радуйтеся, многострадальнии мученицы царственнии, державнии рода христианскаго покровителие.

Кондак 2.

Видя Царь самодержавный шатания языков и тщетныя людей Своих умышления, возскорбе зело печалию Своею. Обаче уведев, яко прииде Ему час преити к Небесному Царю царей, до конца возлюби чада Своя, распинающыя Его, и моляшеся о прощении им вся, зовый Богу: Аллилуиа.
Икос 2.

Разумев Царствия Твоего земнаго скончание, не погубил еси упование Твое на Бога, О! многоскорбнейший Царю Николае, даже до конца веруя в любовь простых людей к Тебе. Ныне же мы, таковаго благочестивейшаго Государя, всем православным христианом в мiре покровителя и Отца милостивейшаго лишившеся, уразумехом кольми Бога нашего преогорчихом. О! прегрешения нашего бездны! Но не отрини нас, со слезами покаяния восписующих Ти сия:
Радуйся, державнейший Православныя Церкве на земли покровителю.
Радуйся, предъизящнейший Царю, всем по глаголу Христову служивый.
Радуйся, боготайный на земли Царя царей образе.
Радуйся, кротости и правды рачителю.
Радуйся, благочестивых российских царей украшение.
Радуйся, радуйся, благоверия прекрепкий блюстителю.
Радуйся, христолюбиваго воинства Твоего вселюбимый воеводо.
Радуйся, и последнейших людей Царствия Твоего милосердый печальниче.
Радуйся, милостивейший сирых и вдов защитителю.
Радуйся, матерей и детей всещедрый покровителю.
Радуйся, милостыни и помощи независтный подателю.
Радуйся, многих церквей и обителей святых строителю..
Радуйся, Царю наш сладчайший Николае, великий страстотерпче!

Кондак 3.

Сила искушений и скорбей не возможе ослабити любве Твоея к Богу и народу русскому, о, великоименитая Царице Александро! Паче бо изволила еси страдати с людьми Божиими, нежели обрести на земли чуждей временный покой: верою же не прияла еси избавление руками иноплеменник, да лучшее улучиши воскресение, поющи Богу: Аллилуиа.
Икос 3.

Любве Христовы образ предлагаеши нам, о, Царице Александро многострадальная! Дивно Твое Бога истиннаго возлюбление, дивно Промыслу Божию послушание, дивно терпение тихое и кроткое страдальчество! Темже процвела еси яко белоснежный крин, в муках сладчайшее свое благовоние испустивый, и в скорбех изряднейшее доброты своея благозрачие показавый: о, богомудрия души Твоея! О, целомудрия красоты и нравов благородствия! Приими и от нас, недостойных хваление сицевое:
Радуйся, новая Девворо, матернее заступление о роде христианстем имущая.
Радуйся, новая Руф, яко людие русстии — людие Твои, и Бог православных — Бог Твой.
Радуйся, новая Иудиф, прибегающих к покрову молитв Твоих защищающая.
Радуйся, новая Есфирь, исполнение Церкве ходатайствы Твоими от пагубы сохраняющая.
Радуйся, добродетельми прекрасными сияющая.
Радуйся, яко светлый облак нас от бед покрывающая.
Радуйся, Царице наша, и по смерти нас не оставляющая.
Радуйся, мати наша, паче прежде о чадех Твоих пекущаяся.
Радуйся, лозо, сладкий плод нам возрастившая.
Радуйся, пять мучеников царственных нам в заступление родившая.
Радуйся, Софие новая, смертию от возлюбленных Супруга и чад Твоих неразлученная.
Радуйся, Александре древней крепкомудренно уподобившаяся.
Радуйся, Александро многострадальная, честнейшая Царице земли русския!

Кондак 4.

Бурею страданий и скорбей не подвижеся сердце Твое, кротчайший Царевичу Алексие: от матерних бо пелен страданию обрученный, даже до последняго дне земнаго жития Твоего ярем Христов всеблагодушно носил еси, безропотно Промыслу Божию повинуяся, и всех нас, волнами страданий обуреваемых, во уповании и смирении Богу пети научая: Аллилуиа!
Икос 4.

Слухи мятежными и страшных мук приближением не возмутися тихое Твое на Бога упование, Отроче царственный, ибо сладчайшаго Спаса Иисуса любы сердце Твое озаряше: свеща горящая житие Твое на земли бысть, юже и лютейшая страдания угасити не возмогоша: сего ради добродетелей Твоих озареньми освещаемся и пети Тебе подвизаемся благоговением сицевая:
Радуйся, прекрасная любве Христовы свеще.
Радуйся, непорочныя девства доброты хранение.
Радуйся, за враги кротко молитися нас научаяй.
Радуйся, христианских добродетелей сияние нам излучаяй.
Радуйся, от пелен болезни плоти безропотно терпевый.
Радуйся, тем болезни нашя и недуги исцеляти благодать приемый.
Радуйся, целомудренною чистотою издетска просиявый.
Радуйся, и нас от скверны мiра сего сохраняяй.
Радуйся, милосердия Божия нам испрошаяй.
Радуйся, святыню девства любити научаяй.
Радуйся, Исааком древле прообразованному Христу сообразне.
Радуйся, Царевичу Угличьскому Димитрию смертию подобне.
Радуйся, многострадальне Царевичу Алексие, отроком покровителю и страждущым утешителю!

Кондак 5.

Богожренныя агницы дщери царевы явишася, от безбожных гонителей Церкве Христовы жертву благовонну Цареви царей принесшеся, и светильники своя елеем девства, милосердия, кротости и боголюбия до конца светящыяся соблюдше, свету невечернему Солнцу Христу во веки радуются и поют Ему песнь богокрасную: Аллилуиа!
Икос 5.

Видящи, о, святая Царевно Ольго, страдания родителей царственных Твоих и разорение зрящи любимаго Отечествия Твоего, не восхотела еси посягнути за князя иноплеменна, нетерпящи разлучения от возлюбленнаго дому Твоего, паче же хотящи сораспятися Христу, яко невеста непорочная Небеснаго Жениха. О, любве непреложныя сердца Твоего! Темже и нас не разлучайся предстательствующи присно о поющих Ти сице:
Радуйся, голубице, белостию девства блистающая.
Радуйся, Царевно, багряницею кровей красующаяся.
Радуйся, свеще благонравия богатносветлая.
Радуйся, невесто Христа светлопозлащенная.
Радуйся, равноапостольныя Ольги целомудрию поревновавшая.
Радуйся, богославных княгинь рода христианскаго благочестию подражавшая.
Радуйся, святым царицам христианским равноревностне пожившая.
Радуйся, кротостию и чистотою Богоматере другиня бывшая.
Радуйся, в ризу страданий за Христа позлащенную одеянная.
Радуйся, к Богу и Царице Небесней колесницею мучительныя смерти приведенная.
Радуйся, скорое Твое нам заступление в бедах подавающая.
Радуйся, за страждущее Отечество наше в молитвах с Богородицею неусыпающая.
Радуйся, всехвальная мученице Царевно Ольго, агнице Христова многострадальная!

Кондак 6.

Проповедницы преизряднии любве Христовы, о, девицы царственнии, явистеся, долготерпением и прекрепким вашым в скорбех упованием на Бога: сего ради величаем добродетели и исправления, имиже яко сребро седмерицею очищенно блистаетеся, и покланяющеся вам, радостно поем Богу: Аллилуиа!
Икос 6.

Возсияла еси в земли российстей яко пресветлая звезда, о, доброхвальная Татиано! Милосердым бо и смиренным Твоим служением больным, плененным, страждущым и в язвах лютых умирающым Христу Богу угодила еси: о, сострадания Твоего! Темже даруй и нам недостойным добродетели сими обогатитися, да поем Тебе таковая:
Радуйся, страждущым светлая радосте.
Радуйся, больным безсребренная целительнице.
Радуйся, плачущым тихое прибежище.
Радуйся, умирающым милосердия Божия ходатаице.
Радуйся, белостию добрых дел блистающая.
Радуйся, кротостию добрых нравов сияющая.
Радуйся, красотою девства Ангелы веселящая.
Радуйся, чистотою сердца Бога зрящая.
Радуйся, досадительства неверных людей долготерпевшая.
Радуйся, смертию за Христа добродетелей богатство запечатлевшая.
Радуйся, скоротлимаго рубища земнаго жития совлекшая.
Радуйся, в златопорфирныя ризы небеснаго жития облекшаяся.
Радуйся, доброхвальная мученице Царевно Татиано, тихое пристанище скорбящым!

Кондак 7.

Хотении божественными просвещаемы, вся скорби и лишения смиренно претерпели есте, девомученицы царственнии, юную плоть духу порабощающе, желания вся земная любовию ко Христу умерщвляюще, Егоже ныне невестолепно песнословите: Аллилуиа!
Икос 7.

Новыя жизни чающе, лучши нынешныя прелестныя, боголюбезнии царевны Марие и Анастасие, во изгнании и уничижении утесняеми, яко сребро искушено седмерицею озарястеся Духа утешеньми, и всею душею к Богу устремлястеся, молитвами многими, благоговейным в храмах Царю Небесному предстоянием и недвижным на Спасителя Христа упованием. Обновите убо и сердца поющих вам песнь похвальную сице:
Радуйтеся, диадимою безсмертия от Царя славы венчаннии.
Радуйтеся, красотою несказанною от Христа на небесех почтеннии.
Радуйтеся, чистотою девства Духу Божественному уневестившиися.
Радуйтеся, добротою душевною в Царствии Христове сияющии.
Радуйтеся, царственною лепотою вашею Церковь Христову украшающии.
Радуйтеся, голубицы белыя, в олтари Господни на крилу мук возлетевшии.
Радуйтеся, незлобием детским лукавствие темных умов посрамившии.
Радуйтеся, терпением крепким сети невидимых враг разтерзавшии.
Радуйтеся, смирением желчь супостатов ваших в сладость духовную преложившии.
Радуйтеся, простотою оцет злобы нектар жизни вечныя соделавшии.
Радуйтеся, крестом уничижений Царство славы приобретшии.
Радуйтеся, смертию мучительною жизнь прерадостную снискавшии.
Радуйтеся, царевни многострадальнии Марие и Анастасие, чистии невесты Христовы!

Кондак 8.

Странни во Отечестве вашем, еже на земли, изгнаны правды ради, слугами сатанины ненавидимы, во узилищи томимы, оскорбляеми и онеправдованы зрим вас, о, краснодушнии мученицы царственнии! Но аще и слезами чистыми о людех прельщенных плакасте, и о погибели страны российския горьце сетовасте, обаче веровасте до конца, яко приидет светоносный день, воньже вся отечествия православных единеми усты и единем сердцем воспоют о вас песнь Богу: Аллилуиа!
Икос 8.

Вся вселенная да ликовствует в нарочитый день праздника вашего, о, краснолепнейший личе царственных страстотерпец! Вся земля да приклонит колена пред несказанном величии страдания вашего, вси храмы православнии да возвышают сладкогласными трезвоны седмосветлое просияние славы вашея, вси вернии да поют вам во умилении хваления таковая:
Радуйтеся, земли русския всевожделеннии предстателие.
Радуйтеся, всем православным всещедрии заступницы.
Радуйтеся, святыя Церкве нашея всесветлая радосте.
Радуйтеся, всех любящих вас всечуднии покровителие.
Радуйтеся, всем уничиженным утешение.
Радуйтеся, всем озлобленным пристанище.
Радуйтеся, всем смятенным умирение.
Радуйтеся, всем колеблемым утверждение.
Радуйтеся, всем смиренным радование.
Радуйтеся, всем боголюбным празднование.
Радуйтеся, всем кротким озарение.
Радуйтеся, всем любобезмолвным умиление.
Радуйтеся, многострадальнии мученицы царственнии, державнии рода христианскаго покровителие!

Кондак 9.

Вся страдания ваша недостойны к славе, явленней в вас на небесех: за оставление — богоприятие, за поругания — прославление, за желчь и оцет — сладость вечную, за крест — венец, за муки — рай, от Бога праведне прияли есте, о превозлюбленнии! Мы же, тепле на заступление ваше надеющеся в веце сем и по смерти нашея, немолчно поем о вас Богу: Аллилуиа!
Икос 9.

Ветии суемудреннии николиже уразумеют величие славы и светлость праздника вашего! Царя бо православнаго своего отвергшеся, и суету мiра сего возлюбльше, иссохнут яко ветви безплодныя, лишены крепостнаго заступления вашего: мы же паче возлюбим вас и к вашему многомощному ходатайству прибегающе, возхвалим вы сице:
Радуйтеся, агнцы ради Агнца Христа убиеннии.
Радуйтеся, ангели, крилома молений чтущыя вас осеняющии.
Радуйтеся, незлобия и всепрощения образ нам явившии.
Радуйтеся, любве к Богу, Отечествию и дому своему всем правило бывшии.
Радуйтеся, глумления народа вашего с кротостию претерпевшии.
Радуйтеся, смирением углие злобы враг ваших угасившии.
Радуйтеся, непамятозлобия вашего ради Христу всыновившиися.
Радуйтеся, за враги молившеся, невидимаго супостата посрамившии.
Радуйтеся, добротворцев удобрение.
Радуйтеся, милосердия светлая зерцала.
Радуйтеся, благочестивых царей и цариц красование.
Радуйтеся, многострадальнаго рода нашего упование.
Радуйтеся, многострадальнии мученицы царственнии, державнии рода христианскаго покровителие!

Кондак 10.

Спастися всем к вам прибегающым Творца и Зиждителя и Бога нашего умоляйте, яко не в силе Господь, но в правде: вы бо есте сокровище наше истинное, со всеми святыми Церкве нашея, вы есте радост наша и утешение, и немолчное Троице Святей пение о вас возсылаем, зовуще: Аллилуиа!
Икос 10.

Стена нерушимая и оплот Церкве истинныя бысть иногда самодержавнейший Царь православный: но отъяся от среды держай и беззаконие покры удел Пречистыя Богоматере, и пролияся кровь яко вода по всей стране российстей: но избави ны, Господи, и очисти грехи нашя, молитв ради всех страстотерпец новых, наипаче же Царственных мученик дома Романова, слышащих благоуветливо от нас пения сия:
Радуйтеся, купнодушнии страдальцы, вседомовне душы вашя за Христа положшии.
Радуйтеся, светильницы всесветлии земли российския.
Радуйтеся, правдою божественною сияющии.
Радуйтеся, добродетельми изрядными блистающии.
Радуйтеся, Православия благоревностнии на земли хранителие.
Радуйтеся, Церкве Христовы державнии покровителие.
Радуйтеся, благолепие дому Божия возлюбившии.
Радуйтеся, тем в место селения славы Божия водворившиися.
Радуйтеся, образ истинный супружества христианскаго явившии.
Радуйтеся, любовию божественною в конец солнцезрачно озарившиися.
Радуйтеся, на подвиг страданий небоязненно шествовавшии.
Радуйтеся, в мире душевнем даже до убиения вашего Господа терпевшии.
Радуйтеся, многострадальнии мученицы царственнии, державнии рода христианскаго покровителие!

Кондак 11.

Пения благодарственная Богу во вся дни заточения вашего приносили есте от сердец кротких и смиренных: Ты же, Царице богохвальная Александро, непрестанное о научении детей своих Закону Божию попечение имела еси, и паче инех Бога за вся благодарила еси, верующи, яко по нощи мятежней паки возсияет солнце правды и озарится земля светом истины: мы же, вере вашей дивящеся, в покаянии зовем Богу: Аллилуиа!
Икос 11.

Звезд светлейшии и солнца яснейшии светила земли российстей явистеся, и всех православных возлюбленнейший Царь и Царица, дражайшии по Бозе и Богородице заступницы, вседомовне просиявшии и седморичным светолитием сердца веселящии поющих вам радощами таковая:
Радуйтеся, рая прекраснаго жителие светозарнии.
Радуйтеся, Небеснаго Царствия украшения царственнии.
Радуйтеся, земнаго Отечествия вашего сокровище дражайшее.
Радуйтеся, во мраце влающымся нам озарение светлейшее.
Радуйтеся, сердец наших утешение теплое.
Радуйтеся, умов наших просвещение ясное.
Радуйтеся, душ наших умирение пресладкое.
Радуйтеся, и телес наших покровение многонадеждное.
Радуйся, Царю Николае, и по смерти отеческое о нас имеяй попечение.
Радуйся, Царице Александро, матернее за дети нашя с Богородицею являющая заступление.
Радуйся, Царевичу Алексие, от болезни и пагубы младенцы и отроки соблюдаяй.
Радуйтеся, царевни Ольго, Татиано, Марие и Анастасие, от душетленных зол юныя сохраняющии.
Радуйтеся, многострадальнии мученицы царственнии, державнии рода христианскаго покровителие!

Кондак 12.

Благодать чудодейственную от Бога приемше, даже прежде прославления вашего на земли многая верным чудеса явисте, верою и любовию к вам прибегающым. Сего ради тщанием усердным к вам припадаем, и иконе вашей, яко самым вам сущым любовию кланяемся, чающе заступления вашего и в сем, и в будущем веце, ибо что вожделеннейше нам, паче еже вкупе с Царем благочестивейшем и Царицею вселюбимою Небесному пети Царю во вся веки благодарно: Аллилуиа!
Икос 12.

Поюще многая чудеса и заступления вашя, не вемы како возможем по достоянию изрещи вся нам дарованная вашим предстательством, о, богославнии и царственнии нам заступницы! Обаче приимите и от нас приносимыя вам венцы хвалений сия:
Радуйтеся, сущым в бедах скорыи избавителие.
Радуйтеся, сущым в скорбех радости подателие.
Радуйтеся, страждущым православным странам заступницы.
Радуйтеся, гонимых Христа ради известнии хранителие.
Радуйтеся, к вам прибегающым покрове, ширший облака.
Радуйтеся, любовию чтущих вас многосветлое веселие.
Радуйтеся, земли русския сокровище неотъятное.
Радуйтеся, Церкве Православныя красото священнолепная.
Радуйтеся, небосветлии звезды, светом заступлений нас облиставающии.
Радуйтеся, неботочнии реки, водою благодати нас напояющии.
Радуйтеся, нелюбовных нас любви научающии.
Радуйтеся, малодушных нас упованием на Бога обогащающии.
Радуйтеся, иссохшая сердца наша умилением умащающии.
Радуйтеся, омраченныя очи душевныя верою просвещающии.
Радуйтеся, многострадальнии мученицы царственнии, державнии рода христианскаго покровителие!

Кондак 13.

О, всеизряднии мученицы царственнии, радосте, упование и славо наша! Приимите малое хваление сие, всем сердцем от нас недостойных вам приносимое, и испросите всем верою и любовию вас чтущым милости и покровения от всех бед и зол, избавления от глада, потопа, труса, меча, междоусобныя брани и напрасныя смерти, и будущих мук избавитися нам Господа умолите, да во вся веки с вами поем Творцу и Богу нашему: Аллилуиа, аллилуиа, аллилуиа!

Кондак сей глаголем 3-жды, и паки Икос 1. И поем Кондак 1: Державнейшии заступницы.

Молитва:
О, Богославнии великомученицы царственнии, державнейшии заступницы Православныя Церкве: се ныне Церковь Христова прославляет подвиг страстоношения вашего, се ныне духовным светолитием вселенная просвещается свыше, и небо веселие в сердца любящих вас таинственно кропит: обаче аще и светлым облаком ходатайства вашего осеняема, земля наша беззаконьми содрогается и лютым растлением трепещет. Сего ради к вашему заступлению со слезами покаяния прибегаем, исповедующе, яко вельми согрешихом и Бога преблагаго преогорчихом грехи многими, отступихом от Небеснаго Царя, множицею щедрившаго народ наш, возвышавшаго рог благоверных князей и благочестивых царей наших, избавлявшаго нас от толиких бед и упования нашего николиже посрамлявшаго. Обаче и к Тебе подобает нам припасти, о, сладчайший и многострадальнейший Царю русский Николае! Се бо зриши плач и стенание наше: умоли Бога да простит неверность нашу закону Его, и приимет люди согрешившыя во объятия Своя. Ты бо еси отец и утешитель нам и по смерти, слава наша, и крепость, и надежда! Припадаем и Тебе, Царице и мати страждущым всем, великоименитая Александро: простри Твои руце к Богоматери, единей Радости скорбящих, и с Нею моли Царя царей о помиловании нашем. О, Царевичу Алексие! Кротчайший агнче царственный! Не смеем воззрети на лик Твой блудныма очима нашима, токмо простираем мысленне руце к Тебе, просяще небеснаго твоего заступления: сохрани всех нас от страшныя пагубы, мiр сей объявшыя, остеняя прибегающих к Тебе от навет сопротивныя злобы и козней видимых и невидимых врагов наших. О, треблаженнии девомученицы рода царскаго! Озареньми небесными просветите сердца наша, да не ослепит нас век сей прелестный к погибели вечней. О, преславнии страстотерпцы царственнии! Даруйте всем любовию теплою к вам прибегающии смирение, целомудрие и любовь к Богу и человеком, обогащайте нас терпением и на Бога упованием крепким в скорбех и бедах; в страданиих же умащайте сердца наша кроткою надеждею и тишиною вашего покровения, яко да ничтоже нас устрашит, ниже смутит, но да поведуем и чадам нашым славу вашу, юже от Бога достойно восприяли есте. Испросите нам у Бога дух покаяния и сокрушения о гресех наших, просветите ослепшыя сродники наша, от Веры праотеческия отступившыя, соблюдите нас и чада наша от суеты и злых обычаев мiра сего, от растлителей душ и телес, от заблуждений и ересей, от болезней и нечаянныя смерти. Предстаните нам, недостойным, в час кончины нашея, и избавите нас от лютых приражений темных демонов, и приведите к Страшному Судию в светлей одежде добре покаявшихся грешников, в надежде о помиловании и вечном спасении, яко да ничтоже разлучит ны от Христа Бога и от вас во веки веков. Аминь![/spoiler]

Раб божий Константин

Акафист святым царственным страстотерпцем.
[spoiler]Кондак 1
Избраннии царственнии страстотерпцы,/ едина домашняя церковь Христова,/ Николае, Александро, Алексие,/ Ольго, Татиано, Марие и Анастасие,/ вы, союзом любве связуеми,/ яко агнцы, Христу Богу верою последовали есте/ и, в страданиих смерть претерпевше,/ Царствия Небеснаго наследницы явилися есте./ Ныне же, дерзновение ко Господу имуще,/ молитеся о земнем отечестве вашем, да прославляем вас сице:
Радуйтеся, царственнии страстотерпцы,/ земли Российския хранителие и молитвенницы.

Икос 1
Ангельскими силами укрепляеми во истиннем пути, седмочисленнии страстотерпцы, о житии праведнем и богоугоднем ревновали есте, да явите народу русскому образ благочестивых царей. Сего ради прославляем вас сице:
Радуйтеся, страх Божий в сердце, яко основание, положившии;
Радуйтеся, премудрость Божию истинне возлюбившии.
Радуйтеся, все упование на Бога возложившии;
Радуйтеся, отечеству вашему верно послужившии.
Радуйтеся, христианскаго благочестия твердое правило;
Радуйтеся, царственнаго рода Российскаго похвало.
Радуйтеся, Православныя веры крепкое исповедание;
Радуйтеся, страждущаго народа нашего утешение.
Радуйтеся, царственнии страстотерпцы, земли Российския хранителие и молитвенницы.

Кондак 2
Видя Господь покаяние народа нашего, егда смутная времена насташа, умилосердися и яви милость Свою во избрании Михаила царя, егоже иконою Пречистыя Богородицы, Феодоровская именуемою, чрез родительницу благослови, да будет икона сия покров и защищение ему и всему новоизбранному царскому роду и во утверждение державы Российския. Сего ради благодарне вопием Богу: Аллилуиа.

Икос 2
Разумеша людие Российстии, яко избранием на царство новаго рода благочестиваго, утиши Господь нестроения и смуты в Земли нашей, принесоша обет вернаго служения роду сему. Мы же, любви и ревности тех подражающе, к вам, царственнии страстотерпцы, яко наследником сего избрания со умилением вопием:
Радуйтеся, венец и похвало рода царскаго и священнаго;
Радуйтеся, корене благочестиваго преславныя отрасли.
Радуйтеся, Патриарха Российскаго Филарета святое прозябение;
Радуйтеся, попечению его о Церкви и отечестве подражавшии.
Радуйтеся, великия старицы инокини Марфы благословенное наследие;
Радуйтеся, покорность воли Божией от нея восприимшии.
Радуйтеся, пред иконою Божия Матере Феодоровския молитвы присно возносившии;
Радуйтеся, все упование на помощь Богородицы с верою возлагавшии.
Радуйтеся, царственнии страстотерпцы, земли Российския хранителие и молитвенницы.

Кондак 3
Сила Божия и промышление Всевышняго явися в рождении твоем, царственный страстотерпче Николае, великаго бо святителя имя восприем, заступник Российския Земли показался еси. Многия же скорби и болезни, подобне Иову праведному, в житии претерпев, ныне с лики страстотерпцев наслаждаешися райскаго блаженства, воспевая Богу: Аллилуиа.

Икос 3
Имея сугубыя заступники и покровители в рождении твоем Иова многострадальнаго и Николая чудотворца, державный страстотерпче, добродетелем тех последовал еси. Мы же, дивящеся промышлению Творца, во святых сих образ благочестия указавшаго ти, благоговейне воспеваем сице: Радуйся, в молитвах святителя Мир Ликийских присно призываяй; радуйся, помощию того Российскую Державу праведно окормляяй. Радуйся, образом кротости тому уподобивыйся; радуйся, милосердие многое, якоже оный, явивый. Радуйся, терпение Иовле в сердце твоем имевый. радуйся, верность Богу в житии твоем до конца сохранивый. Радуйся, в тяжких бедах, якоже оный, благодарение Богу приносивый; радуйся, вся находящая на тя со смирением приемый.
Радуйтеся, царственнии страстотерпцы, земли Российския хранителие и молитвенницы.

Кондак 4
Бурю смущения, воздвизаемую от человек безбожных в стране нашей, видя, страстотерпче Николае, не смутился еси в сердце твоем и, все упование на Бога возложив, не возроптал еси, егда отвергоша тя люди твоя; обаче с верою воспел еси Богу: Аллилуиа.

Икос 4
Слыша о мятежех, болезнех и междоусобных бранех, нашедших на землю Русскую, во узах сый, страстотерпче царю Николае, моление о людех ея непрестанне приносил еси, милосердие Божие к ним призывая. Сего ради мы воспеваем тебе тако: Радуйся, от юности отечество и народ твой возлюбивый; радуйся, яко и во отвержении любовь сию сохранивый. Радуйся, помазание на царство с благоговением приемый; радуйся, образ благочестиваго царя миру явивый. Радуйся, царский венец со смирением на ся возложивый; радуйся, венца страданий от Господа удостоенный. Радуйся, царское служение, яко послушание Богу, разумевый; радуйся, поношения, яко крест, вземый и с терпением понесый.
Радуйтеся, царственнии страстотерпцы, земли Российския хранителие и молитвенницы.

Кондак 5
Богосветлый светильник во мраце скорбей благоверней супружнице твоей явился еси, царственный страстотерпче Николае, указуя и возглавляя путь ея, якоже повеле Господь. Мы же, прославляюще ваш благословенный союз во Христе, хвалу Богу воздаем, поюще: Аллилуиа.

Икос 5
Видя царственный страстотерпец юницу Александру, яко голубицу чисту, избра ю себе в благоверную супружницу, православную царицу и матерь народа Российскаго. Мы же, ведуще усердное служение ея, воспеваем сице: Радуйся, именитаго рода благочестивое прозябение; радуйся, от лютерския веры к Православию образе спасительнаго прехождения. Радуйся, всем сердцем молитву возлюбившая; радуйся, о службе Божией сердечно ревновавшая. Радуйся, словом Божиим и писанием святых отец себе наздавшая; радуйся, уставы церковныя благоговейно соблюдавшая. Радуйся, русское благочестие достойне восприемшая; радуйся, истинныя жизни во Христе приобщившаяся.
Радуйтеся, царственнии страстотерпцы, земли Российския хранителие и молитвенницы.

Кондак 6
Проповедует житие ваше брака святаго чистоту, благовернии Николае и Александро. Вы бо, благодать сего великаго таинства достойно восприемше, даже до мученическия кончины верность Христу и любовь друг ко другу сохранили есте, присно воспевающе Богу: Аллилуиа.

Икос 6
Возсия в стране Российстей, яко прекрасная светила, благоверная царственная чета Николай и Александра, супрузи, союзом любве Христовы связуемии. Мы же, прославляюще образ их целомудреннаго и добронравнаго жития в мире сем, со благоговением воспеваем сице:
Радуйтеся, всем сердцем Бога взыскавшии;
Радуйтеся, в путех Господних непорочно ходившии.
Радуйтеся, двоице честная, свыше избранная;
Радуйтеся, двоице святая, славою и честию от Бога венчанная.
Радуйтеся, целомудрие супружеское многочадием прославившии;
Радуйтеся, чада ваша, яко новосаждения масличная, окрест трапезы Небесныя собравшии.
Радуйтеся, супруги во благочестии и любви жити научающии;
Радуйтеся, мир Христов оным милостивно низпосылающии.
Радуйтеся, царственнии страстотерпцы, земли Российския хранителие и молитвенницы.

Кондак 7
Хотяще ваш дом благочестно устроити, любовь, яко основание, положили есте и брак честен добре соблюли есте, благовернии супрузи Николае и Александро. Темже, и дщери ваша, яко мудрыя евангельския девы, воспитавше, в невесты Христу уготовали есте. С нимиже ныне вкупе воспеваете Богу: Аллилуиа.

Икос 7
Новую милость дарова Господь народу русскому, целомудренныя дщери царственныя четы Ольгу, Татиану, Марию и Анастасию. Тыя бо, женам мироносицам подражающыя, елеем милосердия болящим и страждущим послужиша и, смерть за Христа приемшя, ныне Престолу Божию предстоят. Сего ради прославляем их сице:
Радуйтеся, дщери царевы, обетований Божиих сподобльшыяся;
Радуйтеся, заповедь Божию о почитании родителей соблюдшыя.
Радуйтеся, достоинство царственное свято соблюдшыя;
Радуйтеся, стихиями мира сего не порабощенныя.
Радуйтеся, людем, сущым в бедах и скорбех, яко Христу, послужившыя;
Радуйтеся, за врагов своих усердно молившыяся.
Радуйтеся, агницы непорочныя, в жертву Богу себе принесшыя;
Радуйтеся, невесты Христовы, в чертозех Жениха Небеснаго пребывающыя.
Радуйтеся, царственнии страстотерпцы, земли Российския хранителие и молитвенницы.

Кондак 8
Странно и чудно бысть рождение твое, святый царевичу Алексие. Плод бо благославен молитв Саровскаго чудотворца и чаемый наследник царственных родителей быв, слава, надежда и упование явился еси всем концем Земли нашея. Сего ради людие российстии с радостию благодарственно воспеша Богу: Аллилуиа.

Икос 8
К вышним душею чистою устремляяся, святый царевичу Алексие, измлада болезнь, яко крест от Господа данный, безропотно понесл еси, последи же, яко агнец незлобивый, руками злочестивых убиен, молитвенник пред Богом явился еси. Сего ради воспеваем ти сице: Радуйся, отроча, от утробы матере Богом предъизбранное; радуйся, чадо, молитвами Саровскаго чудотворца России дарованное. Радуйся, страдальче, измлада скорби и недуги безропотно понесый; радуйся, царевичу, в болезнех сострадание к людем обретый. Радуйся, наследниче, лишение царства земнаго со смирением приемый; радуйся, страстотерпче, Царствия Небеснаго от Бога удостоенный. Радуйся, агнче незлобиве, от безбожных закланный; радуйся, царственный отроче, венцем нетленным от Царя царствующих увенчанный.
Радуйтеся, царственнии страстотерпцы, земли Российския хранителие и молитвенницы.

Кондак 9
Всяк ум человеческий смутися, егда в земли нашей беззаконие умножися, истина помрачися и мерзость запустения на месте святем ста. Ты же, царю Николае, изгнание, поругание и темничное заточение мужественне претерпев, сын верный Святыя Церкве и страстотерпец Христов явился еси. Сего ради Церковь Русская, прославляющи тя, Богу вопиет: Аллилуиа.

Икос 9
Ветии зломудреннии тщашася оболгати тя клеветою, помазанниче Божий Николае, ты же, евангельски вся терпя, о благочестии народа православнаго попечение сугубое прилагал еси. Сего ради, память твою светло празднующе, воспеваем ти сице: Радуйся, прославления угодников Божиих добрый рачителю; радуйся, пастыря Кронштадтскаго благоговейный почитателю. Радуйся, Саровских торжеств державный возглавителю; радуйся, иноческих обителей благочестивый покровителю. Радуйся, духовных вертоградов усердный попечителю; радуйся, православных храмов боголюбивый здателю. Радуйся, Святыя Земли и Афонския Горы щедрый благотворителю; радуйся, устроения Церкве Русския мудрый ревнителю.
Радуйтеся, царственнии страстотерпцы, земли Российския хранителие и молитвенницы.

Кондак 10
Спасти хотя люди Российския от розни братоубийственныя, царю Николае, престол земный оставил еси, обаче, на милость Божию уповая, непоколебимь в вере и благочестии пребыл еси, воспевая: Аллилуиа.

Икос 10
Стена и ограждение бысть Господь тебе, царю Николае, Ему же тепле молился еси, да сохранит державу Российскую от нашествия иноплеменник и братоубийственныя брани, наипаче же люди православныя во благочестии да укрепит. Сего ради благодарне воспеваем ти сице: Радуйся, полков Российских мудрый предводителю; радуйся, ратных людей христолюбивый попечителю. Радуйся, отечества нашего державный хранителю; радуйся, словенских народов ревностный защитителю. Радуйся, мечи на орала перековати народы призвавый; радуйся, мир имети со всеми языки преискренне желавый. Радуйся, благоверным князем в благочестии подражавый; радуйся, образ царя православнаго во смирении миру явивый.
Радуйтеся, царственнии страстотерпцы, земли Российския хранителие и молитвенницы.

Кондак 11
Пения всякаго достойна память ваша, святии царственнии страстотерпцы. Вы бо, образ исповедничества и ревности по Бозе верным людем показавше, заповедасте не мстити злодеющим, паче же прощати гонящим и молитву творити за них, поюще Богу: Аллилуиа.

Икос 11
Светоносный светильник седмочисленный вемы вас, святии царственнии страстотерпцы, царским бо путем шествующе, уготовасте себе за Христа пострадати. Темже, просветите омраченная сердца наша и евангельским путем шествовати научите нас, прославляющих вас сице:
Радуйтеся, агнцы незлобивии, Агнцу Божию в кротости подражавшии;
Радуйтеся, образ терпения в злостраданиих верным показавшии.
Радуйтеся, во всем житии совесть чисту хранившии;
Радуйтеся, убиение беззаконное смиренно восприемшии.
Радуйтеся, седмочисленнии страстотерпцы, во едином дусе Богу представшии;
Радуйтеся, кровию мученическою землю нашу обагрившии.
Радуйтеся, лик благоверных царей и князей восполнившии;
Радуйтеся, собор святых земли Российския украсившии.
Радуйтеся, царственнии страстотерпцы, земли Российския хранителие и молитвенницы.

Кондак 12
Благодать изрядну Бог дарова Церкви Российстей, прославив вас на Небеси, царственнии страстотерпцы, хранителие и покровителие страны нашея. Сего ради и мы на земли почитаем вас, Богу вопиюще: Аллилуиа.

Икос 12
Воспевающе подвиги ваша, царственнии страстотерпцы, прославляем Триединаго Бога. Вы бо соизволением Отца Безначальнаго, совершением Сына Единороднаго и содействием Святаго Духа Божия причастницы Царствия Небеснаго соделастеся и заступницы отечества нашего явистеся. Сего ради дерзаем взывати вам сице:
Радуйтеся, яко прославлению вашему Церковь радуется;
Радуйтеся, яко чудесы вашими вера укрепляется.
Радуйтеся, яко образы ваши мироточением прославляются;
Радуйтеся, яко в честь вашу храмы созидаются.
Радуйтеся, яко житием вашим люди благочестию научаются.
Радуйтеся, яко терпением вашим во страданиих вернии назидаются;
Радуйтеся, яко евангельския заветы исполняти нас наставляете;
Радуйтеся, яко беды и скорби мужественне нести нам помогаете.
Радуйтеся, царственнии страстотерпцы, земли Российския хранителие и молитвенницы.

Кондак 13
О, святии царственнии страстотерпцы! Приимите от нас похвальное сие пение и милостивым вашим ходатайством умолите Царя Славы мир стране нашей даровати, Церковь в Православии и единстве сохранити, нас же во благочестии утвердити, да вопием Богу: Аллилуиа.
Трижды. Таже Икос 1 и Кондак 1.

Молитва
О, святая седмерице, царственнии страстотерпцы, Николае, Александро, Алексие, Марие, Ольго, Татиано и Анастасие!
Вы, союзом любве Христовы связуеми, дом ваш, яко малую церковь, благочестно устроили есте и смирением себе посреде земнаго величия украсили есте. В годину же братоубийственныя брани и гонений безбожных во отечестве нашем, все упование на Бога возложивше, образ терпения и страдания всей земли Российстей явили есте и, молящеся о мучителех, клевету, узы и изгнание, глумление, насмеяние и оболгание, убиение и телес поругание мужественне претерпели есте. Сего ради от земнаго царствия к Небесному прешли есте и теплии ходатаи о нас явилися есте.
О, святии угодницы Божии! Молитеся о нас Богу, да Церковь в единомыслии и твердей вере соблюдет, страну нашу миром и благоденствием оградит и от междоусобныя брани и разделения избавит, власть предержащую умудрит, воинство мужеством украсит, народ от разорения сохранит, супруги христианския в верности и любви укрепит, чада в благочестии и послушании возрастит, и вся ны купно с вами сподобит воспевати Пречестное и Великолепое имя Живоначальныя Троицы Отца и Сына и Святаго Духа ныне и присно и во веки веков. Аминь.

Ина молитва страстотерпцу царю Николаю
О, святый страстотерпче царю мучениче Николае! Господь тя избра помазанника Своего, во еже милостивно и право судити людем твоим и хранителем Церкве Православныя быти. Сего ради со страхом Божиим царское служение и о душах попечение совершал еси. Господь же, испытуя тя, яко Иова Многострадальнаго, попусти ти поношения, скорби горькия, измену, предательство, ближних отчуждение и в душевных муках земнаго царства оставление. Вся сия ради блага России, яко верный сын ея, претерпев, и, яко истинный раб Христов, мученическую кончину приемь, Небеснаго Царства достигл еси, идеже наслаждаешися Вышния славы у Престола всех Царя, купно со святою супружницею твоею царицею Александрою и царственными чады Алексием, Ольгою, Татианою, Мариею и Анастасиею. Ныне, имея дерзновение велие у Христа Царя, моли, да простит Господь грех отступления народа нашего и подаст грехов прощение и на всякую добродетель наставит нас, да стяжим смирение, кротость и любовь и сподобимся Небеснаго Царствия, идеже купно с тобою и всеми святыми новомученики и исповедники Российскими прославим Отца и Сына и Святаго Духа, ныне и присно и во веки веков. Аминь.[/spoiler]

Раб божий Константин

АКАФИСТ СВЯТЫМ ЦАРСТВЕННЫМ СТРАСТОТЕРПЦАМ второй.
[spoiler]Кондак 1

    Избрании царственнии страстотерпцы седмочисленнии, Христу Богу, яко агнцы непорочнии, в жертву принесшиися. Земли Российския хранитилие и молитвенницы, яко стяжавшии от Царя царствующих и Господа господствующих благодать молитися за ны, от всяких нас бед и напастей свободите, да благодарственно восхваляем вас: Радуйтеся, царственнии страстотерпцы, Руси Святыя похвало и украшение.

Икос 1

    Ангели Божий, хранителие душ и телес ваших, наставляху и укрепляху вас, святии, не токмо во страданиих, но присно утверждаху во истиннем пути, да будет житие ваше праведным к увенчанию мученическому, темже прославляем вас сице: Радуйтеся, страх Божий в сердце, яко основание, положившии; радуйтеся, премудрость Божию издетска возлюбившии. Радуйтеся, не яко наемницы, но сыны Божии Господу угодившии; радуйтеся, яко и звания друзей Божиих удостоившиися. Радуйтеся, христианскаго благочестия твердое правило; радуйтеся, Православныя веры крепкое исповедание. Радуйтеся, царствующаго рода Российскаго утверждение; радуйтеся, страждущаго народа нашего утешение. Радуйтеся, царственнии страстотерпцы, Руси Святыя похвало и украшение.

Кондак 2

    Видящи Пресвятая Дева скорбь, стенание и плач народа нашего, егда смутная времена насташа, умилосердися и яви милость Свою чрез икону, именуемую Феодоровская, во избрании законнаго от Бога Михаила царя, да будет икона та покров и защита ему и всему новоизбранному царскому роду и во утверждение державы Российския. Сего ради мы благодарственно вопием Богу: Аллилуиа!

Икос 2

    Разумеша людие Российстии, яко Господь избранием на царство Российское новаго рода от благочестиваго корене утиши нестроения, смуты, мятежи в Земли нашей и мир и благостояние Церкви Своей дарова. Мы же, к вам, царственнии страстотерпцы, яко рождием от ветви сея благословенныя, со умилением вопием: Радуйтеся, венец и похвало рода царскаго и священнаго; радуйтеся, корене благочестиваго преславныя отрасли. Радуйтеся, Российскаго Патриарха Филарета и великия старицы инокини Марфы святое наследие; радуйтеся, благочестия двоицы сея преславное исполнение. Радуйтеся, священнаго праотца вашего любовь и ревность о Православном отечестве наследовавшии; радуйтеся, преподобныя праматере смирение и упование на помощь Божию восприемшии. Радуйтеся, прадеднаго благословения Божия Матере удостоившиися; радуйтеся, благословение сие, яко залог, даже до смерти мученическия соблюдшии. Радуйтеся, царственнии страстотерпцы, Руси Святыя похвало и украшение.

Кондак 3

    Сила Божия и промышление Всевышняго явися в рождении твоем, царственный страстотерпче Николае, великому бо чудотворцу Мир Ликийскому уподобився, новый заступник Российския Земли показался еси, многия же скорби и болезни, яко праведный Иов, в житии претерпев, ныне с лики мученическими наслаждаешися райскаго блаженства, воспевая Богу: Аллилуиа!

Икос 3

    Имея сугубыя заступники и покровители, Иова праведнаго и Николая святителя, в рождении твоем, державный страстотерпче, добродетели тех в сердце стяжал еси. Мы же, благодаряще Бога и дивящеся Его всесильному промышлению о тебе, благоговейне воспеваем сице: Радуйся, в молитвах святителя Мир Ликийских присно призываяй; радуйся, того помощию Российскую Державу праведно окормляяй. Радуйся, сердечным попечением о людех тому уподобивыйся; радуйся, милосердие во всех делех, якоже оный, явивый. Радуйся, истину и верность во всем житии твоем, яко Иов, сохранивый; радуйся, кротость и незлобие того в сердце твоем стяжавый. Радуйся, в тяжких бедах, якоже многострадальный праведник, устнама пред Богом ничимже согрешивый; радуйся, вся приключшаяся тебе благодарно со смирением терпевый. Радуйтеся, царственнии страстотерпцы, Руси Святыя похвало и украшение.

Кондак 4

    Бурю смущения, воздвизаемую от человек злочестивых в стране нашей, твой державный родитель рукою крепкою укроти и царство Российское цело и нерушимо тебе в наследие даде. Обаче завистию диаволею Земля наша в вящее искушение ввержена бысть и тя, угодниче Божий, отверже. Ты же, святче, провидя сие попущение Божие за грехи людския, усердно Богу воспевал еси: Аллилуиа!

Икос 4

    Cлыша наставления державных родителей твоих и праведнаго Иоанна Кронштадтскаго, како подобает православному государю быти, положил еси в сердце, царственный страстотерпче Николае, Православие, державу и народ Российский во единстве блюсти. Сего ради мы воспеваем тебе тако: Радуйся, благочестивых родителей отрадо и утешение; радуйся, мудрых наставлений исполнение. Радуйся, издетска вере и благочестию наученный, радуйся, в любви к Богу и Церкви укорененный; Радуйся, в верности ко отечеству и народу своему воспитанный; радуйся, душу свою за него положити готовый. Радуйся, царский венец от Бога с благоговением восприемый; радуйся, дара Духа Святаго на царское служение в помазании миром удостоенный. Радуйтеся, царственнии страстотерпцы, Руси Святыя похвало и украшение.

Кондак 5

    Богосветлая звезда во мраце скорбей благоверней супружнице твоей явился еси, царственный страстотерпче Николае, указуя и возглавляя путь ея, якоже повеле Господь. Мы же, прославляюще ваш благословенный святый брачный союз во Христе, хвалу Богу воздаем, поюще: Аллилуиа!

Икос 5

    Видя царственный страстотерпец, яко зарю солнечную, яко Ангела светла, юницу Александру, избра ю себе в благоверную супружницу, православную царицу и матерь народа Российскаго. Мы же, ведуще усердное служение ея, воспеваем сице: Радуйся, именитаго рода благочестивое прозябение; радуйся, от лютерския веры к Православию образе спасительнаго прехождения. Радуйся, всем сердцем молитву возлюбившая; радуйся, о службе Божией сердечно ревновавшая. Радуйся, словом Божиим и писанием святых отец себе назидавшая; радуйся, посты церковныя благоговейно соблюдавшая. Радуйся, русское благочестие достойне восприемшая; радуйся, истиныя жизни во Христе приобщившаяся. Радуйтеся, царственнии страстотерпцы, Руси Святыя похвало и украшение.

Кондак 6

    Проповедницы чистоты святаго брака во образ единства Христа и Церкве явилися есте, благовернии Николае и Александро. Вы бо, благодать сего великаго таинства достойно восприемше, даже до мученическия кончины Христу и друг другу верность сохранили есте, присно воспевающе Богу: Аллилуиа!

Икос 6

    Возсия в стране Российстей, яко прекрасная светила, благоверная царственная чета Николай и Александра, истинная домашняя церковь, супрузи, связуемии союзом любве о Господе. Мы же, прославляюще образ их супружескаго целомудрия и добронравнаго жития в мире сем развращеннем и грешнем, со благоговением воспеваем сице: Радуйтеся, всем сердцем Бога взыскавшии; радуйтеся, в путех Господних непорочно ходившии. Радуйтеся, чето честная, свыше избранная; радуйтеся, двоице святая, славою и честию от Бога увенчанная. Радуйтеся, целомудрие супружеское многочадием прославившии; радуйтеся, чада своя, яко новосаждения масличная, окрест трапезы Небесныя собравшии. Радуйтеся, в супружестве благочестно жити научающии; радуйтеся, мир Христов оным милостивно низпосылающии. Радуйтеся, царственнии страстотерпцы, Руси Святыя похвало и украшение.

Кондак 7

    Хотяще свой дом благочестно устроити, заповеди Господни и брак честен добре соблюли есте, благовернии супрузи Николае и Александро. Темже, многочадием свою домашнюю церковь украсивше и дщери своя, яко мудрыя евангельския девы, воспитавше, в невесты Христу уготовали есте. С нимиже ныне вкупе воспеваете Богу: Аллилуиа!

Икос 7

    Новую милость яви Господь народу русскому, добронравныя и целомудренныя дщери благочестивыя царственныя четы: Ольгу, Татиану, Марию и Анастасию. Тыя бо, женам мироносицам подражающыя и елей милосердия в душах хранящыя, болящим и страждущим усердно послужиша и мученическую смерть за Христа прияша. Сего ради прославляем их сице: Радуйтеся, дщери царевы, обетований Божиих сподобльшияся; радуйтеся, заповедь Божию о почитании родителей соблюдшия. Радуйтеся, царскаго достоинства не посрамившия; радуйтеся, стихиями мира сего не порабощенныя. Радуйтеся, людем, сущым в бедах и скорбех, помогающия; радуйтеся, за врагов своих усердно молящияся. Радуйтеся, агницы непорочныя, в жертву Богу себе принесшия; радуйтеся, невесты Христовы, в чертозех Жениха Небеснаго пребывающия. Радуйтеся, царственнии страстотерпцы, Руси Святыя похвало и украшение.

Кондак 8

    Странно и чудно бысть рождение твое, святый царевичу Алексие. Плод бо благославен молитв Саровскаго чудотворца и чаемый царственный наследник родителей быв, слава, надежда и упование явился еси всем концем Земли нашея. Сего ради людие Российстии с радостию благодарственно воспеша Богу: Аллилуиа!

Икос 8

    К вышним душею детскою, яко Ангел, устремляяся, святый царевичу Алексие, родители, сестры, сродники и ближняя искренне возлюбил еси и, яко агнец незлобивый, руками злочестивых убиен, новый отрок страстотерпец явился еси. Сего ради восхваляем тя сице: Радуйся, отроча, от утробы матерния Богом предъизбранное; радуйся, чадо, усердными родительскими молитвами к чудотворцу Саровскому России дарованное. Радуйся, царевичу добролюбезный и кроткий, милосердие в сердце стяжавый; радуйся, страдальче, многия скорби и недуги измлада безропотно терпевый. Радуйся, наследниче Российскаго престола, от беззаконных убиенный; радуйся, наследником Царствия Небеснаго от Бога явленный. Радуйся, агнче непорочный, яко праведный Авель, умерщвленный; радуйся, страстотерпче, к лику святых отроков, яко Димитрий царевич, причтенный. Радуйтеся, царственнии страстотерпцы, Руси Святыя похвало и украшение.

Кондак 9

    Всяк благочестивый удивляется о тебе, царю Николае, како ты во времена, егда в земли нашей истина умалися и подавляшеся неправдою, пребыл еси сын верный Святыя Церкве, защитник и хранитель Православныя веры, таже исповедник и мученик Христов. Сего ради Церковь Русская, ликующи, Богу вопиет: Аллилуиа!

Икос 9

    Ветии зловещаннии тщашася оболгати тя лжою и лестию, и истребити память о тебе, царственный помазанниче Божий Николае, кровавым тя нарицающе, обаче погибе память тех с шумом. К тебе же, воистину кровь свою за Христа пролиявшему, Российский народ с покаянием вопиет: Радуйся, прославления праведников и угодников Божиих добрый рачителю; радуйся, Кронштадтскаго пастыря и Саровскаго чудотворца усердный почитателю. Радуйся, православных храмов боголюбивый созидателю; радуйся, иноческих обителей и монашества благочестивый покровителю. Радуйся, Святыя Земли и Горы Афонския щедрый благотворителю; радуйся, духовных вертоградов мудрый попечителю. Радуйся, возрождения соборнаго начала Церкве Русския устроителю; радуйся, восстановления всероссийскаго патриаршаго престола ревнителю. Радуйтеся, царственнии страстотерпцы, Руси Святыя похвало и украшение.

Кондак 10

    Спасти и сохранити хотя православное царство Российское цело и нерушимо, святый благоверный царю Николае и, видя ослепление народа твоего, отрекшагося от Царя Небеснаго, такожде и земнаго, в душевных муках, оставил еси престол земный. Темже, уповая на милость Господа и себе в руце Божии предав, непоколебим в вере и благочестии пребыл еси, воспевая: Аллилуиа!

Икос 10

    Стена и ограждение был еси всем православным людем Российским, святый благоверный царю Николае, избавляя их от нашествия иноплеменников и братоубийственныя брани и мир, елико возможно, тщался еси имети со всеми. Мы же, ведуще сие, благодарне тебе воспеваем: Радуйся, пророчески призвавый народы мечи на орала перековати; радуйся, евангельски сподобивыйся блаженства миротворцев стяжати. Радуйся, стран словенских надежный защитителю; радуйся, народов державы Российския сугубый попечителю. Радуйся, державы Российския мудрый правителю; радуйся, во бранех искусный и доблий воителю. Радуйся, дерзостных дел служителей беззакония тайнаго губителю; радуйся, восставших на Бога и на тя, яко помазанника Его, посрамителю. Радуйтеся, царственнии страстотерпцы, Руси Святыя похвало и украшение.

Кондак 11

    Пения всякаго достойна память ваша, святии царственнии страстотерпцы. Вы бо, образ исповедничества и ревности по Бозе верным людем показавше, заповедаете не мстити злодеющим, яко любы токмо победит зло, паче же прощати гонящим и молитву творити за них, благодарственно поюще Богу: Аллилуиа!

Икос 11

    Светоносный светильник седмочисленный вемы вас, святии царственнии мученицы, царским бо путем шествующе, в жертву благоугодную Агнцу Божию уготоваете себе и невинно смерть приясте. Темже просвещение нам даруйте, озаряюще омраченная сердца наша, и верным путем шествовати научите, прославляющим вас сице: Радуйтеся, агнцы непорочнии, Христу Пастырю последовавшии; радуйтеся, образ исповедничества, верным людем показавшии. Радуйтеся, от юности совесть чисту соблюдшии; радуйтеся, жизни конец достойно восприемшии. Радуйтеся, седмочисленнии страстотерпцы, во едином дусе Богу представшии; радуйтеся, кровию мученическою Церковь Христову украсившии. Радуйтеся, новомученицы, за Русь Святую от безбожных пострадавшии; радуйтеся, лик страстотерпцев Российских добле восполнившии. Радуйтеся, царственнии страстотерпцы, Руси Святыя похвало и украшение.

Кондак 12

    Благодать изрядну Бог дарова Церкви Российстей, прославив на Небеси святыя царственныя страстотерпцы. Сего ради и мы на земли прославляем вас, яко истинныя хранители и покровители страны нашея, и Богу вопием: Аллилуиа!

Икос 12

    Поюще промышление Божие, подвигшее сердца людей Российских прославити вас, царственнии страстотерпцы, на земли евангельски пожившия и за Христа от безбожных пострадавшия и чудесы по смерти прославльшиеяся, дерзаем воспевати сице: Радуйтеся, яко прославлению вашему многия люди возрадовашася; радуйтеся, яко чудесы вашими сердца верных укрепишася. Радуйтеся, народ Российский к покаянию призывающии; радуйтеся, отеческия заветы исполняти нас наставляющии. Радуйтеся, молитвами вашими от междоусобия нас избавляющии; радуйтеся, в мире и любви со всеми жити нам помогающии. Радуйтеся, яко образы ваши мироточением прославляются; радуйтеся, яко в честь вашу храмы созидаются. Радуйтеся, царственнии страстотерпцы, Руси Святыя похвало и украшение.

Кондак 13

    О единодушная великоименитая седмерице, царственнии страстотерпцы, многия скорби, поругания, страдания душевная и смерть телесную за Христа приемшии и венцы небесными от Него увенчаннии! Приимите ныне от нас похвальное прославление и сердечное покаяние и милостивным вашим ходатайством умолите Царя Славы мир Церкви нашей даровати, страну в Православии, благочестии и единстве сохранити, нам же ожесточения сердечнаго и ослепления избавитися, да сыновне Богу вопием: Аллилуиа!

    (Этот кондак читается трижды, затем икос 1 и кондак 1).



МОЛИТВА

***

    О, святый страстотерпче царю мучениче Николае! Господь тя избра помазанника Своего, во еже милостивно и право судити людем твоим и хранителем Церкве Православныя быти. Сего ради со страхом Божиим царское служение и о душах попечение совершал еси. Господь же, испытуя тя, яко Иова Многострадальнаго, попусти ти поношения, скорби горькия, измену, предательство, ближних отчуждение и в душевных муках земнаго царства оставление. Вся сия ради блага России, яко верный сын ея, претерпев, и, яко истинный раб Христов, мученическую кончину прием, Небеснаго Царства достигл еси, идеже наслаждаешися Вышния славы у Престола всех Царя, купно со святою супружницею твоею царицею Александрою и царственными чады Алексием, Ольгою, Татианою, Мариею и Анастасиею. Ныне, имея дерзновение велие у Христа Царя, моли, да простит Господь грех отступления народа нашего и подаст грехов прощение и на всякую добродетель наставит нас, да стяжим смирение, кротость и любовь и сподобимся Небеснаго Царствия, идеже купно с тобою и всеми святыми новомученики и исповедники Российскими прославим Отца и Сына и Святаго Духа, ныне и присно и во веки веков. Аминь.[/spoiler]

Раб божий Константин

Молитвослов

Акафист святым Царственным страстотерпцам царю Николаю, царице Александре, цесаревичу Алексию, царевнам Ольге, Татиане, Марии и Анастасии иной.
[spoiler]Кондак 1.
     Избраннии покровителие земли Российския, похвальная пения восписуем вам, благочестие и чистоту жития вашего прославляюще и страдальческий подвиг ваш почитающе. Вы же, имуще велие дерзновение ко Господу, молите о земном отечестве вашем и о всех с верою и упованием прибегающих к вам и взывающих: Радуйтеся, святии Царственнии страстотерпцы, земли Российския заступницы.

     Икос 1.
     Ангел Божий, предстояй алтарю Господню, прият молитвы ваша и возложи на кадильницу злату, вкупе с молитвами всех святых; и изыде дым кадильный от руки Ангела пред Бога. Мы же, почитающе достославное житие ваше, глаголем вам: «Веселитеся о Господе и радуйтеся, праведнии» и зовем таковая:
      Радуйтеся, предстоящии Престолу Агнца, облечены в ризы белы; Радуйтеся, вкушающии ныне от манны сокровенныя.
      Радуйтеся, на высоту добродетелей Христовых восшедшии; Радуйтеся, благая дела, аки фимиам благовонный, Господу принесшии.
      Радуйтеся, благодарящии Господа на всякое время; Радуйтеся, гусли седмиструнныя, присно Господа восхваляющия.
      Радуйтеся, власть царскую яко служение, Богом данное, почитавшии; Радуйтеся, креста сего бремя достойно понесшии.
      Радуйтеся, отечество ваше паче жизни временныя возлюбившии; Радуйтеся, страдальческий подвиг за него подъемшии.
      Радуйтеся, вы бо есте красота Церкве Христовы; Радуйтеся, Святыя Руси похвало и нетленная славо.
      Радуйтеся, святии Царственнии страстотерпцы, земли Российския заступницы.

     Кондак 2.
     Видя Всеблагий Господь чистоту сердца твоего, страстотерпче царю Николае, избра тя от рождения на служение Себе. Ты же, быв даже до смерти верен Богу и отечеству твоему, воспевал еси на всяк день хвалу Господу: Аллилуия.

     Икос 2.
     Разум духовный даровася вам, святый царю Николае, святая царице Александро вкупе со царственными чады вашими, от юности бо познасте истину словес Писания: «Приступите ко Господу и просветитеся, и лица ваша не постыдятся». Темже Христос Бог в добродетелех и жертвеннем служении вашем укрепляше вас. Сего ради приимите от нас похвалы сия:
      Радуйтеся, благородныя лозы грозды благословеннии; Радуйтеся, благочестивых русских государей достойнии преемницы.
      Радуйтеся, о прославлении угодников Божиих ревновавшии; Радуйтеся, святых храмов и обителей созидателие.
      Радуйтеся, обидимых благосердии заступницы; Радуйтеся, милость народу вашему и по сей день являющии.
      Радуйтеся, яко елени на источники водныя ко Господу души устремившии; Радуйтеся, от младых лет сердца возвышена к Богу имевшии.
      Радуйтеся, со Христом сочетавшиися; Радуйтеся, благочестия светильницы.
     Радуйтеся, блистающии радугою седмицветною даров Духа Божия; Радуйтеся, завет России с Богом утверждавшии.
      Радуйтеся, святии Царственнии страстотерпцы, земли Российския заступницы.

     Кондак 3.
     Сила любве Божественныя коснуся сердца твоего, святая царице Александро, и познала еси истину веры Православныя. Такожде русскою духом соделалася еси и народу твоему матерь явилася еси, древним царицам русским уподобившися. Мнози же человецы, врагом рода христианскаго возбуждаеми, оклеветоваху и хуляху тя. Ты же евангельски вся со смирением терпела еси, воспевающи благодарственно Господеви: Аллилуия.

     Икос 3.
     Имуще ревность о богоугождении, святии Царственнии страстотерпцы, провождасте дни своя в молитве и благотворении, еще же о умирении языков и племен попечение имели есте, заступницы земель словенских суще. Мы же, множество благих деяний ваших воспоминающе, с любовию вопием вам сице:
      Радуйтеся, святыя Александро, Ольго и Татиано, милосердия сестры; Радуйтеся, болезни ранами уязвленных облегчавшия.
      Радуйтеся, разжже бо Господь сердца ваша огнем любве Своея; Радуйтеся, и нас сего дара сподобляющии.
      Радуйтеся, клевету и поношение кротко претерпевшии; Радуйтеся, бысте бо искушени, да соделаетеся искусни пред Богом.
      Радуйтеся, образ смиренномудрия нам показующии; Радуйтеся, сладкоуханнии сосуди благодати.
      Радуйтейся, бысть бо светильник ногам вашим закон Господень и свет стезям вашим; Радуйтеся, чистая зерцала Божественныя премудрости.
      Радуйтеся, источницы приснотекущии, реки воды животныя источающии; Радуйтеся, сердца верных напояющии благодатию.
      Радуйтеся, святии Царственнии страстотерпцы, земли Российския заступницы.

     Кондак 4.
     Бурю бед и скорбей разделили есте с родительми своими, любовию неизреченною соединеннии, святый цесаревиче Алексие с сестрами Ольгою, Татианою, Мариею и Анастасиею. Измлада имевшии веру нелицемерную и благую совесть, узким путем евангельским море жития земнаго, аки по суху, прешли есте, выну Господу воспевающе: Аллилуия.

     Икос 4.
     Слышаще и видяще ангелонравное житие ваше, о святая царственная чада, и мучителие ваши сердцами умягчахуся. Вы бо, аки крини благоуханнии, процвели есте в земли Российской, украсивше вертоград святых Церкве Христовы. Сего ради приимите от нас песни сия:
      Радуйтеся, древа благокоренная, плодоносием добродетелей достолепно украсившаяся; Радуйтеся, радоватися с радующимися и плакати с плачущими навыкнувшии.
      Радуйтеся, к любви и попечению о родителех наставляющии; Радуйтеся, юныя ко благу руководствующии.
      Радуйтеся, страданиям издетска причастнии; Радуйтеся, мужеству и терпению нас научающии.
      Радуйтеся, услаждавшии уста и души словом Божиим; Радуйтеся, побеждающии благим злое.
      Радуйтеся, новая Ольго богомудрая, державнаго отца сотаиннице, и Татиано добропобедная; Радуйтеся, Марие, милости исполненная, и Анастасие светолучная.
      Радуйтеся, чада царственная, юныя ластовицы небесныя; Радуйтеся, простоты во Христе образ нам подающии.
      Радуйтеся, святии Царственнии страстотерпцы, земли Российския заступницы.

     Кондак 5.
     Божественный свет осия лица ваша, яко не о внешнем попечение иместе, но много паче внутренняго человека добродетельми украсити тщастеся. Бысть же знамение чудное, егда схимницы богочестивии затвор свой оставиша, да поклонятся ти, боговенчанный страстотерпче Николае, и благословят тя, воспевающа Господеви: Аллилуия.

     Икос 5.
     Видевше, святии страстотерпцы Царственнии, яко вся в мире сем тленна и преходяща, сокровище свое в Бозе положили есте, о исполнении заповедей евангельских нелицемерное прилежание явивше, да в немощи вашей сила Божия совершается, отечество же ваше ко благоденствию ведясте. Мы же, дивящеся преславному житию вашему, воспеваем сице:
      Радуйтеся, супругом добрии наставницы; Радуйтеся, родителем в воспитании чад мудрии учителие.
      Радуйтеся, монашествующих покровителие; Радуйтеся, о Церкви Божией попечение имевшии.
      Радуйтеся, в житиях святых поучатися возлюбившии; Радуйтеся, подражателие наследствующих обетования верою и долготерпением.
      Радуйтеся, бремена ближних носившии; Радуйтеся, о исполнении воли Божия выну ревновавшии.
      Радуйтеся, умы и сердца горе обращавшии; Радуйтеся, терпеливомудрым нравом украшеннии.
      Радуйтеся, вы бо, ветхаго отложивше человека, плотское мудрование отринули есте; Радуйтеся, от лампады небесныя светильники сердечныя возжегшии.
      Радуйтеся, святии Царственнии страстотерпцы, земли Российския заступницы.

     Кондак 6.
     Проповедует вся страна Российская, любовию к вам исполненная, богоразумие и высоту жития и кончины вашея. О святый царю Николае, ты достойно несл еси бремя правления державою, яко послушание, Господом данное, со тщанием, любовию и страхом Божиим, ведая, яко един Господь управляет стезями человеческими, и воспевая хвалебную песнь Творцу: Аллилуия.

     Икос 6.
     Возсияша, яко звезды путеводныя царству Российскому, седмочисленнии мученицы, Небеснаго Иерусалима украшение, к горнему путь указующия. Мы же, взирающе на образ ваш, с радостию возносим вам песни таковыя:
      Радуйтеся, яспис веры в основание храмины сердечныя положившии; Радуйтеся, из сардоникса смирения дом душевный устроившии.
      Радуйтеся, сапфиром целомудрия увенчаннии; Радуйтеся, аки халкидон, в нетленной чистоте прекраснии;
      Радуйтеся, смарагдами богословия ум и сердце питавшии; Радуйтеся, горящии духом пред Богом, аки сардий.
      Радуйтеся, блистающии, яко хрисолиф, преподобием; Радуйтеся, сияющии, яко хрисопрас, правдою.
      Радуйтеся, вирилл сокрушения сердечнаго обретшии; Радуйтеся, благотворением, аки топазием, венец украсившии.
      Радуйтеся, быша бо капли кровей ваших аки иакинфы; Радуйтеся, амефист небесный улучившии терпением.
      Радуйтеся, святии Царственнии страстотерпцы, земли Российския заступницы.

     Кондак 7.
     Хотя Человеколюбец Господь всем людем спастися и в разум истины приити, яви вселенней святаго царя Николая, иже просия, аки луча благодатная, посреде нечестия и богоотступления, являя благий пример жития христианского. Последи же мученическую кончину прият Государь, да присно молит Бога о стране своей, поя Ему: Аллилуия.

     Икос 7.
     Новаго Иова Многострадальнаго возрасти Церковь Русская, святаго царя страстотерпца Николая, в день праведнаго Иова на свет Божий рождшагося. Ты бо, святый мучениче Николае, всех простил еси, повелевая не мстити за тя, и рекл еси, яко зло погибнет, едина же любы победит. Благодаряще убо Господа за вся, вкупе с царицею и чады душевная и телесная страдания претерпел еси. Темже и мы, дивящеся крепости духа вашего, о святии страстотерпцы Царственнии, вопием вам сице:
      Радуйтеся, крест, Христом Богом благословленный, на рамена вземшии; Радуйтеся, в жертву за люди своя принести себе готовии.
      Радуйтеся, присными оставленни, благодатию же укрепляеми; Радуйтеся, яко ничтоже возможе отлучити вас от любве Христовы.
      Радуйтеся, вы бо, на Христа взирающе, по водам страданий ко Господу прешли есте; Радуйтеся, молитвою ко Иисусу Сладчайшему горечь заточения услаждавшии.
      Радуйтеся, представившии уды ваша в оружия правды Богови; Радуйтеся, Христови сораспеншиися.
      Радуйтеся, кротостию ненависть истреблявшии; Радуйтеся, ни единому же злая за зло воздававшии.
      Радуйтеся, овчата белорунная, на пажити Христовой упасшаяся; Радуйтеся, Господу пастыреначальнику до конца последовавшии.
      Радуйтеся, святии Царственнии страстотерпцы, земли Российския заступницы.

     Кондак 8.
     Странное и преславное чудо явися в стране Российстей, дом Пресвятыя Богородицы нареченней. Бысть бо, егда отступиша людие от веры, внемлюще учением бесовским, сотвориша беззаконие и неправду и отрекошася от Царя – Помазанника Божия, тогда Царица Небесная Сама скипетр и державу прият в Пречистыя руце Свои. Ты же, о святый царю Николае, за неверная и стропотная чада твоя умоляя, выну пред Престолом Божиим воспеваеши: Аллилуия.

     Икос 8.
     Весь исполнен злобы, враг рода человеча воздвиже в стране нашей гонение лютое от людей безбожных и зверонравных, и потекоша реки крове христианския. Вы же, все упование на Бога и Пречистую Богородицу возложивше, ничесоже убоялися есте, на подвиги древлих мучеников взирающе, духом же прозревающе, яко чрез страдания и скорби сия приведет Господь Россию к велицей славе. И мы, покланяющеся подвигом вашим, вопием вам сице:
      Радуйтеся, Господа не отвергшиися пред человеки; Радуйтеся, держасте бо исповедание упования неуклонное.
      Радуйтеся, мучителей своих простившии; Радуйтеся, за врагов с любовию молившиися.
      Радуйтеся, воини Христовы, явльшии мужество необоримое; Радуйтеся, оружием Креста видимыя и невидимыя враги победившии.
      Радуйтеся, бисери духовнии, нить многоценную составившии; Радуйтеся, союзом любве соединеннии.
      Радуйтеся, утешение в Божественной литургии обретавшии; Радуйтеся, друг друга любовию укреплявшии.
      Радуйтеся, слезами своими огнь праведнаго гнева Божия угашающии; Радуйтеся, молитвами вашими покров небесный народу своему исткавшии.
      Радуйтеся, святии Царственнии страстотерпцы, земли Российския заступницы.

     Кондак 9.
     Все естество ангельское удивися, зряще, како посреде лета воспеша Государь и вси людие Российстии Пасху, прославляюще Саровскаго угодника Божия досточуднаго Серафима. Темже и преподобный, по обетованию своему, прослави тя, богоблаженный царю Николае. Мы же славословим Господа, дивнаго во святых Своих: Аллилуия.

     Икос 9.
     Ветия многовещанныя не возмогут изрещи по достоянию полноту попечения вашего о стране Российстей и людех ея. Вы бо, аки делатели усердни, вся благая соделасте вертограду вашему, чающе, да принесут людие плоды добрыя, сотвориша же тии терние. Обаче вы, народ свой простивше, молили есте Бога о вразумлении онаго и о спасении. Мы же, недостойная чада ваша, воспеваем вам:
      Радуйтеся, блаженнии, званнии на вечерю брака Агнча; Радуйтеся, яко белыя горлицы к небу возлетевшии.
      Радуйтеся, яко седмисвещник святый у Престола Божия горящии; Радуйтеся, в радость Господа своего вшедшии.
      Радуйтеся, Ангелов веселие и ликование; Радуйтеся, прибежище наше в скорбех и обстояниих.
      Радуйтеся, маслины многоцелебныя, недуги наша исцеляющии; Радуйтеся, в земных нуждах благовременно нам помогающии.
      Радуйтеся, благоуханием мира, от икон ваших истекающим, всю Россию исполнившии; Радуйтеся, российских царей достолепное украшение.
      Радуйтеся, бысте бо общницы мудрым девам; Радуйтеся, в чертозех светлых вселившиися.
      Радуйтеся, святии Царственнии страстотерпцы, земли Российския заступницы.

     Кондак 10.
     Спасти хотяще люди русския, святии царственнии страстоносцы, не оставили есте народа своего, но присно с нами духом пребываете. Подвигом добрым подвизастеся, течение скончасте, веру соблюдосте, темже уготова вам Господь венцы правды. И мы, благодаряще вас и во святых вас прославляюще, непрестанно Богу вопием: Аллилуия.

     Икос 10.
     Стена и ограждение стране Российской явился еси, святый царю самодержавный, мудро управляя царством, от Бога тебе врученным, и ко благу вся руководяй. Ты бо, аки мнози от князей древлих, яко солнце пресветлое явился еси Отечеству твоему и, святым Борису и Глебу подобно, страстотерпческим подвигом праведное житие увенчал еси. Мы же, о святии страдальцы державнии, благодарне глаголем вам сицевая:
      Радуйтеся, чадам Церкве возлюблении; Радуйтеся, духом радования нас исполняющии.
      Радуйтеся, приводящии заблуждших к свету истины; Радуйтеся, Православие своею жизнию утверждающии.
      Радуйтеся, воинства российскаго покровителие; Радуйтеся, защитницы наши и скории помощницы.
      Радуйтеся, предстательством вашим исцеление и очищение душам нашим приносящии; Радуйтеся, свобождающии нас от пленения страстьми.
      Радуйтеся, от клеветы нас избавляющии; Радуйтеся, злых и лукавых людей вразумляющии.
      Радуйтеся, благоухание небеснаго сада; Радуйтеся, богокраснии цвети райстии.
      Радуйтеся, святии Царственнии страстотерпцы, земли Российския заступницы.

     Кондак 11.
     Пение умиленное приносим вам, всехвальнии, яко праведным благоверным царем и страстотерпцем Христовым. Ныне же молим вы усердно: умолите милостиваго Владыку, да простит нам беззакония наша и да сподобимся купно с вами воспевати Создателю: Аллилуия.

     Икос 11.
     Светоподательная свеща бысть всей вселенней житие ваше, озаряюще, просвещающе и согревающе сердца человеков. Темже Твоим светом озари, Христе, и помышления наша, молитвами святых страстотерпец Твоих, ихже с любовию ублажаем похвалами таковыми:
      Радуйтеся, вкупе со Ангелы хвалу Господу воспевающии; Радуйтеся аки лучи солнечныя мрак греховный разгоняющии.
      Радуйтеся, страданьми к великой славе прешедшии; Радуйтеся, соделавшиися световидны храмы Божества.
      Радуйтеся, яко души ваша желаху и скончавахуся во дворы Господни; Радуйтеся, яко сердца ваша возрадовашася о Бозе живе.
      Радуйтеся, всею Россиею прославленнии; Радуйтеся, во всем мире Православнем почитаемии.
      Радуйтеся, небесною прохладою в знои скорбей нас орошающии; Радуйтеся, утешение и отраду нам подающии.
      Радуйтеся, зари невечерния златое сияние; Радуйтеся, света неземнаго причастницы.
      Радуйтеся, святии Царственнии страстотерпцы, земли Российския заступницы.

     Кондак 12.
     Благодать Господня опочи на вас, осеняющи над главою в день брани. Слышаще же словеса Господня: «Претерпевый до конца, той спасен будет», достойно шествие земное скончали есте, в скорбех воспевающе Богу: Аллилуия.

     Икос 12.
     Поюще ваше прославление, радуемся радостию неизреченною: вы бо, якоже вавилонстии отроцы богочестивии, во огни страданий росою Духа Святаго осенени бысте. Темже молим вас: и нас огня будущаго молитвами вашими избавите, да воспеваем вам:
      Радуйтеся, семена Божественнаго Слова в сердца приемшии; Радуйтеся, плоды добрыя сотворшии.
      Радуйтеся, нищетою духовною богатящиися; Радуйтеся, из горушична зерна смирения возрастившии райское древо спасения.
      Радуйтеся, кротостию Господу подражавши; Радуйтеся, насыщаемии правдою Божиею.
      Радуйтеся, многоценный бисер любве стяжавшии; Радуйтеся, пшенице чистая на ниве Христовой.
      Радуйтеся, миротворцы, мира духовнаго исполнении; Радуйтеся, неправедно гонимии.
      Радуйтеся, молитвы щитом от соблазнов мира огражденнии; Радуйтеся, сокровенное жительство о Бозе аки маргарит обретшии.
      Радуйтеся, святии Царственнии страстотерпцы, земли Российския заступницы.

      Кондак 13.
     О всеславнии и великоименитии Христовы угодницы, страстотерпцы царю Николае, царице Александро, цесаревиче Алексие, царевны Ольго, Татиано, Марие и Анастасие, венец златый державы Российския составльшии! Приимите милостивно нынешнее малое моление наше, от любящих сердец благоговейно вам приносимое. Яко велие имуще дерзновение ко Господу, молитеся о всех нас и о земном отечестве нашем, да обрящем милость в день судный и сподобимся в Царствие Небесное внити, воспевающе непрестанно Богу: Аллилуия.
      (Сей кондак глаголи трижды. А по сем чтется Икос 1 и Кондак 1).

     Молитва
     Что вы наречем, о святии страстотерпцы Царствении, Царю Николае, Царице Александро, Цесаревиче Алексие, Царевны Ольго, Татиано, Марие и Анастасие! Славы ангельския сподоби вас Христос Господь и нетленных венцев во Царствии Своем, наш же ум и язык недоумеет, како восхвалити вас по достоянию.
      Молим вас с верою и любовию, помозите нам с терпением, благодарением, кротостию и смирением нести крест свой, надежду на Господа возлагающе и вся в руце Божии предающе. Научите нас чистоте и целомудрию сердечному, да, по глаголу апостола, всегда радуемся, непрестанно молимся, о всем благодарим. Согрейте сердца наша теплотою любве христианския. Болящия уврачуйте, юныя наставите, родители умудрите, скорбящим даруйте отраду, утешение и надежду, заблуждшия к вере и покаянию обратите. Защитите нас от козней лукаваго духа и от всякия клеветы, напасти и злобы.
      Не оставите нас, заступления вашего просящих. Умолите Всемилостиваго Владыку и Пречистую Деву Богородицу Марию за державу Российскую! Да предстательством вашим укрепит Господь страну нашу, да ниспослет нам вся благопотребная к жизни сей и сподобит Царствия Небеснаго, идеже вкупе с вами и со всеми святыми земли Российския прославим Отца и Сына и Святаго Духа, ныне и присно и во веки веков. Аминь.[/spoiler]

Раб божий Константин

Акафист святому благоверному царю Феодору Московскому
Память его совершается 7 (20) января.
[spoiler]Кондак 1
Избранному угоднику, дивному предстателю, державы российския покровителю, святому царю Феодору принесем похвалы, яко присному душ наших заступнику и теплому нашему молитвенику: ты же, о звездо богосветлая, осиявая нас неоскудно, да избавившиеся от бед и скорбей, со умилением вопием ти:
Радуйся, всехвальный угодниче Божий, благоверный царю Феодоре, Руси Святыя похвало и украшение.

Икос 1
Ангелов Творец посла тя, святче Божий, Церкви Православной в укрепление, жаждущим ведения истины во благое вразумление, благочестивым житием твоим в назидательное окормление. Мы же, дивящеся таковому о тебе Промышлению Вседержителя, с радостию вопием ти:
Радуйся, Церкви Христовой бесценное украшение.
Радуйся, в печалех и скорбех несумненное утешение.
Радуйся, грады и веси в них же имя твое почитается, покрывающий.
Радуйся, скорби наша, миром духовным растворяющий.
Радуйся, от соблазнов греховных нас ограждающий;
Радуйся, токами чудес твоих правоверныя напаяющий;
Радуйся, язвы душ наших, елеем молитв твоих умащающий.
Радуйся, прошения наша во благо ко спасению исполняющий.
Радуйся, всехвальный угодниче Божий, благоверный царю Феодоре, Руси Святыя похвало и украшение.

Кондак 2
Видев чудную благодать веры Христовой и чудеса, по милости Творца происходяшия, издетска возлюбил еси молитву, жития святых угодник и святых отец писания, прехвальный Феодоре. И святынею церковною воспитанный, Предвечному Богу, венчающему и благословляющему царей земных, умиленно взывал еси: Аллилуиа.

Икос 2
Разум твой божественными учении просветил еси, богомудре Феодоре, отвергнув всякое мудрование, с разумом же и волю повинул еси Господеви: подражая добродетелем благоверных великих князей московских, преславных прародителей твоих, нелестно послужил еси Господу Богу. Тем же, аки звезда путеводная светиши всем, вопиющим ти сице:
Радуйся, Пречистую Матерь Его зело возлюбивший!
Радуйся, молитвы твоея к Ней неустанно возносивый!
Радуйся, честь и похвалу святым угодникам праведно воздававый!
Радуйся, горячею любовию к Царю Славы пламеневый.
Радуйся, Ему поревновати во всем восхотевый.
Радуйся, на милосердие Бога-Отца упование твое возложивый
Радуйся, лепестками роз души своея путь Христу в сердце твое устеливый.
Радуйся, дары Духа Святаго в сердце своем сохранявый.
Радуйся, всехвальный угодниче Божий, благоверный царю Феодоре, Руси Святыя похвало и украшение.

Кондак 3
Сила Вышняго от юности осени тя, Богомудре, и показа селение и дом Духа Всесвятаго, емуже и о нас помолися, богоблаженный царю, тя ублажающих, Богу же зовущих: Аллилуиа.

Икос 3
Имуще велика тя, о святый царю, заступника и скораго в напастех помощника, молебно тебе призываем и с веселием к памяти твоей воспеваем:
Радуйся, Пресвятую Троицу с чинами ангельскими воспевающий.
Радуйся, Царицею Небесною на небесах матерински благословляемый.
Радуйся, Церковию Христовою ублажаемая и восхваляемый.
Радуйся, от потопления бурями житейскими правоверных спасаяй;
Радуйся, унывающих и мятущихся укрепляяй и от заблуждения отреваяй.
Радуйся, от внезапныя смерти верныя избавляющий;
Радуйся, недужных милостивейший целителю.
Радуйся, совершенства Христианскаго изящнейший учителю.
Радуйся, всехвальный угодниче Божий, благоверный царю Феодоре, Руси Святыя похвало и украшение.

Кондак 4
Буря искушений и устремлений диавольских не возможе поколебати храмины твоея душевныя, святый Феодоре, основана бо бе на твердом камени веры во Христа, и хранима трезвением и молитвами непрестанными, ими же выну противоборствовал еси врагу спасения человеческаго, и непреткновенно восходил еси по стезям добродетелей к совершенству духовному в меру возраста Христова, воспевая Богу: Аллилуйя.

Икос 4
Слышавши о святем житии твоем, коим ты землю Русскую освятил и народ просветил, дивимся ревности твоей и любви ко Христу, Пре милосердному Господу, яко верний подражателю, осени и нас молитвами твоими и на стезю спасения настави, да усердно вопием ти:
Радуйся, отцу земному доброчестно послуживый.
Радуйся, от дней детства твоего Царю небесному угодивый.
Радуйся, благим супружеством своим и нам образ брака честнаго явивый;
Радуйся, в супружнице твоей добраго помощника на пути Христовом обретый;
Радуйся, о чадех наших ко Господу теплое моление.
Радуйся, родителей и наставников в благочестии утверждение
Радуйся, подобие Божие в ближних зрети увещевающий.
Радуйся, Судию праведнаго за грешныя люди умоляющий.
Радуйся, всехвальный угодниче Божий, благоверный царю Феодоре, Руси Святыя похвало и украшение.

Кондак 5
Божественную благодать прияти сподобился еси, егда собором архипастырей в Успенстем храме града Москвы венчан был еси на царствие российское. Тою же благодатию просвещаемь и укрепляемь мудро управлял еси народом твоим, за вся Творца и Спаса Нашего благодаряще, выну в сердце твоем пел еси Ему: Аллилуйя.

Икос 5
Видевше тя российстии людие боговенчанного монарха на прародительстий престол грядущаго, возрадовашася зело. Ты же, святый царю, мнозие труды положил еси, яко не устрашился еси великаго бремене правления, но во всем образ добрыя жизни подавая, наставлял еси поданных твоих ко всяческому благочестию, заботу о благосостоянии народа российскаго всячески являя. Сего ради восписуем ти похвалу сицевую:
Радуйся, волков хищных от страны твоея отгнал еси;
Радуйся, яко коварство их мудро распознал еси ;
Радуйся, не мечем, но милосердием врагов твоих покрявый;
Радуйся, пленников ляшских в отчизну их без выкупа отпускавый;
Радуйся, нищих питателю благодатный;
Радуйся, вдов и сирот заступлениче непостыдный.
Радуйся, строптивых и непокоривых строгий смирителю.
Радуйся, обидимых и скорбящих защитниче и утешителю.
Радуйся, всехвальный угодниче Божий, благоверный царю Феодоре, Руси Святыя похвало и украшение.

Кондак 6
Проповедника добрых дел явил еси себе, богоблаженне царю, ты бо украшал еси храмы и обители, страждующим христианом был еси покровитель, алчущим питатель и угнетенным защитник; сего ради надеющися на милосердное твое о нас попечение, усердно прибегаем к твоему заступлению, взывающе благодарственно Богу Дивному во святых Своих: Аллилуйя.

Икос 6
Воссиял еси светло в земли Российстей, блаженне, егда правлением твоим справедливым и милосердным водворил еси благоденствие, установил еси мир на границех царствия твоего, и землю Сибирскую присовокупил еси к державе твоея, грады новыя основал еси и пред иными государи честь и славу твоея страны утвердил еси. Сего ради глаголем тебе похвалы сицевыя:
Радуйся, аки святые Владимир и Ярослав Мудрый, благоискусно веру насаждавый;
Радуйся, аки Даниил Московский, в Бозе державу твою устоявый;
Радуйся, святый Иоанн Калита, милосердием и благотворением просиявый;
Радуйся, аки Димитрий Донской, от агарян народ твой защитивый;
Радуйся, подобно Иоанну Третьему, славу России пред иными народы явивый;
Радуйся, честь и преемство от кесарей ромейских чрез праматерь твою Софию Палеолог восприявый;
Радуйся, Скипетр отца твоего достойно и праведно носивый;
Радуйся, добродетели матери твоея и всего рода романовского преумноживый;
Радуйся, всехвальный угодниче Божий, благоверный царю Феодоре, Руси Святыя похвало и украшение.

Кондак 7
Хотящих восхвалити подвигов трудов твоих и чудная деяния, вразуми нас, святый царю Феодоре, недоумеем бо изрещи достойныя тебе хвалы. Обаче во всех трудех и подвизех благодать Божию в тебе видяще, воспеваем о тебе Христу Богу: Аллилуиа.

Икос 7
Новую благодать излия Господь на Церковь Российскую, егда благоволи установити в ней престол патриаршеский, ты же, благочестивым царю, велению Божьему внимая, купно со святителем Иовом и сродником твоим болярином Борисом Годуновым велия труды подъял еси, да благоукрасится град Москва первосвятительством, послеже истинным хранителем и попечителем уставов святоотеческих и обычаев церковных явился еси, и тако обрел еси милость пред очима Божиими.Мы же, молитвеннаго предстательства твоего сподобитися желающе, взываем тебе сице:
Радуйся, миром духовным, души наша услаждающий;
Радуйся, нищету нашу верою обогащающий;
Радуйся, светом смирения и кротости сердца наша просвещающий;
Радуйся, заповедей Божиих исполнению научающий.
Радуйся, правоверным, благочестия христианскаго образ являй;
Радуйся, злыя и богохульныя помыслы наши отгнаняй;
Радуйся, сребролюбивых сердец исправление;
Радуйся, неправедно страждущих утешениие;
Радуйся, всехвальный угодниче Божий, благоверный царю Феодоре, Руси Святыя похвало и украшение.

Кондак 8
Странник и пришлец, по апостолу, явился еси на земли, боголюбезный царю, дольняя бо вся презрев, горняя взыскал еси, все помышление твое ко Господу имеяй. Темже помози и нам, молитвами твоими, добродетельное житие возлюбити, да купно с тобою вопием Богу: Аллилуиа.

Икос 8
Весь облеклся еси во вся оружия Божия, яко воин Христов, блаженный царю Феодоре, яко светозарный светильник души твоея имея выну горящим, мирно и тихо причастившись святых таинств Христовых, отошел еси ко Господу. Небесным блаженством просиял по смерти светолепный лик твой. Множество народа с любовию и слезами провожало в последний путь тя, преславного помазаника Божьего. Мы же, вся сия ныне поминающее, просим тя, святый Феодоре, умоли Господа и нам блаженную кончину даровати и прими величания сия:
Радуйся, слезами и молитвами себе к смерти приготовивый;
Радуйся, блаженную кончину от Бога приявший;
Радуйся, житием и исходом твоим нас поучающий;
Радуйся, праведною кончиною святость жития твоего показывающий;
Радуйся, от внезапной смерти нас избавляющий;
Радуйся, к покаянию во грехах наших нас призывающий;
Радуйся, в смертный час всем нам благонадежный помощниче;
Радуйся, от насилия демонского многомощный наш защитниче
Радуйся, всехвальный угодниче Божий, благоверный царю Феодоре, Руси Святыя похвало и украшение.

Кондак 9
Всякие труды подъял еси, святый царю Феодоре, яко Единаго Бога всем сердцем возлюбил еси; темже и Господь тя возлюби и чудесы прослави, даровав нам тебе молитвенника благоприятнаго пред благостию Его: смиренно молим тя, егда имамы предстати пред Судиею Праведным, умоли Его за нас, да не помянет беззаконий наших, и сподобит нас блаженной участи одесную стоящих и вопиющих Ему: Аллилуиа.

Икос 9
Вития многовещанныя, не довлеют изглаголати вся подвиги твоя и чудеса, богомудре царю Феодоре, яко доброта жития твоего воистину превосходит похвалу человеческую, обаче мы, любовию к тебе побеждаеми, дерзаем смиренно благохвалити тя пением таковым:
Радуйся, святыя православныя Церкви светильниче немерцаяй;
Радуйся, Божию Силу и Божию Премудрость людем проповедаяй;
Радуйся, духовнаго любомудрия ревнителю;
Радуйся, пищи духовныя и телесныя подателю;
Радуйся, отступивших от веры на путь спасения возвращающий;
Радуйся, блуждающих по морю жития сего мудре окормляющий;
Радуйся, всем тебе призывающим скорую помощь подаваяй;
Радуйся, от честных икон исцеление неоскудно источаяй;
Радуйся, всехвальный угодниче Божий, благоверный царю Феодоре, Руси Святыя похвало и украшение

Кондак 10
Спасения вечнаго достигл еси, святый Феодоре, ныне бо небо церковное украшаеши и всех блудящих по морю страстнаго жития сего данною тебе от Солнца Правды Христа Иисуса, истиннаго Бога, благодатию озаряеши, мрак печалей и мглу всяких недуг и скорбей прогоняеши, наставляеши всех к тебе с верою притекающих на путь спасенный, к вечному Небесному Отечествию ведущий, поющих Богу: Аллилуйя.

Икос 10
Стена необоримая и покров ты еси, отче, всем человеком с верою к тебе прибегающим, темже и нам, просящим твоего заступления, буди, монарше благословенный, ограждение крепкое, да в тебе утверждающеся всегда вопием:
Радуйся, друже Божий, бремя Христово доблестне носивый.
Радуйся, любимаго Господа лик пресветлый видети сподобивыйся;
Радуйся, усердно у престола Божия о нас молящийся
Радуйся, милостивое предстательство твое верным являющий.
Радуйся, украшением храмов и очищением душ верных ко спасению препровождаеши;
Радуйся, народ российский святыми молитвами вразумляеши
Радуйся, крепосте и ограждение благочестивых.
Радуйся, богомудрый вразумителю нечестивых.
Радуйся, всехвальный угодниче Божий, благоверный царю Феодоре, Руси Святыя похвало и украшение.

Кондак 11
Пение приносим тебе, святый благоверный Феодоре, к прославлению подвигов и трудов твоих, мы же зряще Божие произволение, приносим тебе малое сие наше моление от всяких грех и скверн твоими молитвами очисти, да на всяк день и час чистым сердцем поем Богу: Аллилуия.

Икос 11
Яко светлосияннаго светильника почитаем тя, святый царю Феодоре, ибо свет добрых твоих дел, имиже Отец Небесный славится, во веки не померкнет. И ныне пред Его Престолом святым во славе предстоя, от нас сии похвалы приими:
Радуйся, Христовы любве и мира небеснаго благовестниче;
Радуйся, правых сердцем присный споспешниче;
Радуйся, о чтущих имя твое к Богу дерзновенно ходатайствуяй;
Радуйся, благих начинаний исполнению пречудно помогаяй.
Радуйся, любовь нелицемерную и надежду известную в нас воспламеняющий;
Радуйся, напасти житейския, молением твоим разрушающий;
Радуйся, правдивому и честному житию научающий;
Радуйся, от соблазнов греховных нас ограждающий;
Радуйся, всехвальный угодниче Божий, благоверный царю Феодоре, Руси Святыя похвало и украшение.

Кондак 12
Благодать и милость испроси нам у Христа Владыки нашего, благоверне царю, окорми предстательством твоим, отжени от нас всякого врага и противника, научи подражати тебе, да избавльшеся искушений, прелести и бед, прославляем тя по достоянию, воспевая песнь благодарения Господу: Аллилуиа.

Икос 12
Поюще подвиги дивнаго жития твоего и честное прославление твое угодниче Божий, чтим память твою вси, яко небесного предстателя и помощника, от Господа нам дарованного. Ты же и по представлении державу твою не оставляющий, посети милостию приносящих ти похвалы сицевая:
Радуйся, во славе от земли на небо преселивыйся.
Радуйся, лику избранных тамо приобщивыйся.
Радуйся, похвалы наша, аще и недостойнии тя, благосердно приемлющий;
Радуйся, молитвам нашим, аще и немощным, с любовию внемлющий.
Радуйся, от всея души и сердца возносимая к вам прошения наша исполняющий;
Радуйся, во всех нуждах, бедах и обстояниих нам помогающий.
Радуйся, вражды и ссоры наша умиротворяющий;
Радуйся, всякий мрак заблуждения от нас прогоняющий.
Радуйся, всехвальный угодниче Божий, благоверный царю Феодоре, Руси Святыя похвало и украшение.

Кондак 13
О, святый благоверный царю Феодоре, акафистное пение сие наше милостивно приими. В нем бо красоту добродетелей твоих воспевающе, молим тя: испроси у Господа и Бога и Спаса нашего Иисуса Христа дати согрешениям нашим прощение и радование вечное, воспевающим Ему: Аллилуиа. Аллилуиа. Аллилуиа.

Молитва
О, святый благоверный царю Феодоре; Подвигом добрым подвизавшися на земли, восприял еси на небесех венец правды, егоже уготовал есть Господь всем любящим Его. Темже радуемся о преславнем скончании жительства твоего и чтем святую память твою. Ты же, предстоящи Престолу Божию, приими моления наша и ко всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще единаго во святых Своих славимаго Бога, Отца и Сына и Святаго Духа, ныне и присно и во веки веков.

Автор сего акафиста Евгений Владимирович Храповицкий

Святой царь Феодор I Иоаннович родился в Москве 11 мая 1557 года.
Он был младшим сыном Иоанна IV Грозного от Анастасии Романовны. Незадолго до смерти Иоанна, 19 ноября 1582 года, старший брат святого Феодора, Иоанн, был убит своим отцом, и с этого времени Феодор стал считаться наследником царского престола.
Святой Феодор вступил на царство после смерти 18 марта 1584 года своего отца. Его воцарение сопровождалось смутой, затеянной приверженцами самого младшего сына Грозного (от Марии Нагой), Димитрия. Смута эта была укрощена благодаря энергии Бориса Годунова, на сестре которого, Ирине Феодоровне, был женат святой Феодор.
Венчание на Царство над царем Феодором I было совершено 31 мая 1584 года. Дважды (в 1573 и 1587 годах) его кандидатура выдвигалась на престол Речи Посполитой.
Царь Феодор Иоаннович много жертвовал монастырям и храмам по всей Руси. Так, в 1593 году над двухпролетными Святыми монастырскими воротами Богородице-Успенского Тихвинского мужского монастыря по его приказу был выстроен каменный надвратный храм Вознесения Господня с приделом Святого великомученика Феодора Стратилата — его Небесного покровителя.
Во время его царствования был поставлен первый Святейший Патриарх всея Руси - Иов Московский.
В царствование Царя Феодора I Россия укрепилась на Балтике, победив Швецию в войне 1590-1595 годов. По Тявзинскому мирному договору 1595 года Швеция вернула России города и районы Новгородской земли, захваченные во время Ливонской войны: Ивангород, Корелу, Копорье и Ям. В первые годы царствования блаженного Государя продолжилось масштабное освоение Сибири, были основаны города: Белый город, Обдорск (Салехард), Сургут и Тары на реке Иртыш. В 1586 году основан острог Тюмень на месте татарского города Чимги-Тура, взятого Ермаком в 1581 году. В 1587 году отряд казаков под командованием Данилы Чулакова основал город Тобольск. В 1586 году у южных рубежей страны были заложены сторожевые крепости Самара и Воронеж. В 1589 году на Волге был основан острог Царицын. В июне 1591 года была отбита у стен Данилова монастыря последняя в истории России атака ордынского войска (хана Казы-Гирея) на Москву.
В 1586 году грузинский царь Александр обратился к царю Феодору Иоанновичу с тем, чтобы он принял Иверию под свое покровительство. Спустя два года митрополит Иов отвечал царю Александру, что русский царь «землю твою Иверскую взял в свое царское достояние под свою руку». Договор с Грузией, по которому последняя признала подданство русскому царю, был заключен, по всей видимости, в 1587 году. Царь и Патриарх неоднократно посылали в Грузию материальную помощь и духовные послания.
Летом 1590 года, исполняя именной указ святого Феодора, самарский воевода князь Григорий Осипович Засекин и служилый человек Федор Михайлович Туров совершили закладку города-крепости Саратова. Острог был основан «на память положения пояса Пречистыя Богородицы», то есть 2 июля 7098 (1590) года. Князь Григорий Засекин стал и первым саратовским воеводой. Как свидетельствуют исторические источники, первоначально святой Феодор предполагал поставить новый острог на месте бывшей монгольской столицы Увека (ныне на территории Заводского района Саратова), однако воевода выстроил острог чуть ниже нынешнего села Пристанное, против впадения в Волгу речки Саратовки. Административно новый острог подчинялся астраханскому наместнику, а в церковном отношении, как и вся Нижняя Волга, был отнесен к Казанской митрополии. Первым правящим архиереем, окормлявшим Саратов, стал, таким образом, митрополит Казанский и Астраханский святой Ермоген (†1612).
В период правления святого Феодора хозяйственная жизнь страны постепенным пошла на подъём, удалось преодолеть тяжелые последствия экономического кризиса 1570–80-х годов и неудачной Ливонской войны (1558 – 1583). Однако последние годы его царствования были омрачены трагедией: 15 мая 1591 года в Угличе подосланными убийцами, Осипом Волховым, Данилой Битяговским и Никитой Качаловым, был зарезан младший брат Государя, святой царевич Димитрий, единственный наследник русского трона после бездетного Феодора. По факту гибели царевича было назначено следствие, представившее официальную версию происшедшего. Согласно этой версии, во время игры ножичком с царевичем случился припадок падучей болезни, и он упал на нож. Царственный страдалец-отрок в 1606 году был причислен Церковью к лику страстотерпцев. Народная молва обвняла в подготовке убийства царского шурина Бориса Годунова, ходили слухи, что сам царевич спасся, а вместо него погиб другой ребенок. Все эти последствия угличской трагедии, наложившиеся на крайне тяжелые экономические условия, в которых оказалась страна к концу правления Царя Бориса Феодоровича Годунова, привели в начале XVII века к многолетней Смуте в России.
Святой Феодор отошел ко Господу 7 января 1598 года. По свидетельству святого Патриарха Иова, в предсмертном томлении царь беседовал с кем-то незримым для других, именуя его великим Святителем, а в час кончины его ощущалось благоухание в палатах Кремлевских. Сам Патриарх совершил таинство елеосвящения и причастил умирающего Царя Святых Христовых Таин. Феодор Иоаннович умер, не оставив потомства, и с его смертью прекратилась династия Рюриковичей на царском престоле в Москве. Погребен он был в Архангельском соборе Московского Кремля.
Почитание блаженного Царя началось вскоре после его кончины: святой Патриарх Иов (†1607) составил «Повесть о честном житии царя Федора Иоанновича», уже с начала XVII века известны иконные изображения святого Феодора в нимбе. В «Книге глаголемой описание о Российских святых» (1-я половина XVII века) Царь Феодор поставлен в лике Московских чудотворцев. В некоторых рукописных святцах в числе Московских святых указана и его супруга, царица Ирина, во иночестве Александра (†1603). Память святого Феодора совершается в день его преставления 7 (20) января и в Неделю перед 26 августа (8 сентября) в Соборе Московских святых.

Тропарь собору Московских святых, глас 4:
Днесь пророчество святителя Петра / пред очами нашими сбывается, / сердце бо России град Москва / свыше славу велию приемлет, / украшаем, яко бисером честным, / многим сонмом Божиих угодников; / к нимже мы любовию возопиим: / о, пречуднии святителие, / исповедницы и мученицы новии, / благовернии князие, преподобнии отцы, / и премудрии юродивии, / и вси святии, знаемии и незнаемии, / яко благочестия столпи, / молите Христа Бога // стране нашей в мире спастися.

Кондак собору Московских святых, глас 3:
Возвеличися ныне, граде Москво, / велиих даров духовных сподобляющися, / яко сокровищница пречестная / святыням и мощем угодник Божиих / и отечество возлюбленное многим святым, / к их же помощи усердно прибегаем: / о святых Московских дивный сонме, / вашими ученьми и деяньми / вкупе и страданьми за Христа, / души наша просветите // и спасения нам присно будите ходатаи.[/spoiler]

Раб божий Константин

Акафист святым целителям, бессребренникам и чудотворцам.
[spoiler]Кондак 1
Избраннии помощницы страждущих, врачеве недугующих и чудотворцы предивнии, святии безмезднии целители милостивии, похвальная восписуем вам, заступником нашим и в скорбех утешителем. Вы же, яко имущии дерзновение ко Всемилостивому Спасу нашему, избавите от страстей и болезней всех верою и любовию воспевающих вам:
Радуйтеся, святии Богоблаженнии врачеве, целители душ и телес наших.

Икос 1
Ангелов и человеков Творец избра вас, врачей, целителей и чудотворцев святое сословие, яко любовию и состраданием ко всем людем горящих, и дарова вам сугубую благодать, да будете избавляти от бед, скорбей, болезней и всяких лютых искушений всех чтущих святую память вашу и с любовию восхваляющих вас тако:
Радуйся, святый Пророче, Предтече и Крестителю Господень Иоанне, души наша покаянием обновляяй.
Радуйся, святый праведный Симеоне, Богомладенца Христа на руце свои приемляй и ныне всех младенцев Богодарованный хранителю.
Радуйся, святый Апостоле и Евангелисте Иоанне Богослове, возлюбленный Христов учениче, любящим и чтущим тя любовию воздаваяй.
Радуйся, мучениче Лонгине, от капли крове Господа очи свои исцеливый и благодать обретый духовное прозрение людем даровати.
Радуйтеся, святи мученицы Зинаидо и Филонилло, сродницы апостола Павла, сугубо болящим послужившия.
Радуйтеся, священномучениче Киприане и мученице Иустино, от бесов и злых человек волхвования крепцыи заступницы.
Радуйся, великомучениче Димитрие Солунский, миро благовонное всем болящим на исцеление источаяй.
Радуйся, Кесарие Назианзине, царей благочестивых врачу, от многих тяжких недугов богомудрый целителю.
Радуйся, великомученице Варваро, агнице всеблаженная, от внезапныя смерти верных избавляющая.
Радуйся, великомученице Екатерино, дево премудрая, избранный сосуде чистоты, омрачением ума нашего просвещающая.
Радуйся, великомученице Анастасие, недуги заключенных в темницех врачевавшая и от многих скорбей нас избавляющая.
Радуйся, мученице Фомаидо, целомудрия ради душу свою положившая и плотския страсти побеждати людем помогающая.
Радуйтеся, святии Богоблаженнии врачеве, целители душ и телес наших.

Кондак 2
Видев Тя, Мати Всепречистая, на Кресте пригвожденный Сын Твой и Бог, у Креста предстоящу и болезненно Ему состраждущу, возлюбленному ученику Своему апостолу Иоанну Тя в матерь нарече и сим весь род человеческий Тебе усынови, да будеши воистину Матерь всем скорбящим, страждущим, недугующим, в бедах и тяжких обстояниих сущим, Сына Твоего Христа Бога призывающим и поющим Ему: Аллилуиа.

Икос 2
Разум человеческий не может постигнути великаго Твоего милосердия, Пресвятая Владычице Богородице, Ты бо еси необоримая ограда, охраняющая ны от всяких болезней душевных и телесных и заступающая всех прибегающих к Тебе с молитвою, печальным утешение, скорбящим радование, обидимым Заступнице, бедствующим помоше, больных Целительнице, грешных Споручнице. Темже имущи Матернее о всех попечение, благоизволила еси ускорити на помощь избранником Божиим, врачем и целителем, ихже память празднующе, воспеваем сице:
Радуйтеся, Пресвятыя Владычицы Богородицы избраннии служители.
Радуйтеся, чада Ея вернии и возлюбленнии.
Радуйтеся, Заступницы Усердныя рода христианскаго благоговейнии почитатели.
Радуйтеся, воли Тоя святыя исполнители.
Радуйтеся, все упование на Матерь Божию возложившии.
Радуйтеся, небесную помощь от Нея восприимшии.
Радуйтеся, милостивое заступление Божия Матере ко всем болящим и страждущим людем приклоняющии.
Радуйтеся, велие дерзновение к Ней стяжавшии.
Радуйтеся, яко Преблагословенную Матерь Господа ходатайстовати о нас умоляете.
Радуйтеся, яко благословением Ея здравие и крепость неисцельно болящим доныне возвращаете.
Радуйтеся, во дни и нощи молитвы к Царице Небесе и земли со слезами возносившии.
Радуйтеся, яко с Нею о спасении всех людей православных ко Христу руце воздеваете.
Радуйтеся, святии Богоблаженнии врачеве, целители душ и телес наших.

Кондак 3
Силою Всевышняго укрепляем, святый пророче Божий Илие, послан быв от Господа в Сарепту Сидонскую к жене вдовице препитатися во гладе, обаче имея чудотворения благодать, умножил еси муку и елей в дому ея до скончания гладнаго времене и молитвою твоею воскресил еси умершаго ея сына, поя Богу благодарственную песнь: Аллилуиа.

Икос 3
Имуще едино попечение, еже Отцу Небесному благоугождати и верно Ему служити, и великия ревности по Бозе исполненнии святии пророцы Божии по слову апостола «верою победиша царствия, содеяша правду, получиша обетования, заградиша уста львов, угасиша силу огненную, избегоша острея меча, возмогоша от немощи, обратиша в бегство полки чуждих»; ныне же, во Царствии Небеснем пребывающе, врачуют язвы неисцельныя и всякий недуг всем нам, скорбьми и болезньми отягченным, с верою и надеждою вопиющим вам сице:
Радуйтеся, разум свой воли Божией покорившии.
Радуйтеся, светом премудрости от Бога озареннии.
Радуйтеся, посланцы Отца Небеснаго и провозвестницы святых Его велений.
Радуйтеся, знамении и чудесы Божественную истину утверждавшии.
Радуйтеся, будущая, яко настоящая провидевшии.
Радуйтеся, яко врачи благоискуснии, люди от всякия болезни исцеляющии.
Радуйтеся, во время глада верных питатели.
Радуйтеся, недугующим и разслабленным скории помощницы.
Радуйтеся, отчаянным надежду на спасение подающии.
Радуйтеся, миро целебное благодати нам источающии.
Радуйтеся, благодатию Божиею мертвых воскрешавшии.
Радуйтеся, Судию Праведнаго за грешныя люди умоляющии.
Радуйтеся, святии Богоблаженнии врачеве, целители душ и телес наших.

Кондак 4
Буря скорбей и напастей, воздвизаемая злобою мира сего, не ослаби веры и любве твоея ко Господу, апостоле святый Иакове, первый Иерусалимский архиерею и учителю. Ты бо Божественным Духом просветився, Бога Слова проповедал еси и восприял еси благодать елеем святым целити всех язвы же и недуги, глаголя в послании своем, яко молитва веры спасет болящаго и воздвигнет его Господь, много бо может молитва праведнаго поспешествуема. Темже и ныне исцеления источаеши всем к твоему заступлению притекающим и о тебе Богу вопиющим: Аллилуиа.

Икос 4
Слышавше вернии велию вашу к страждущим любовь и чудесное врачевание ваше, апостоли святии, от всех концев земли устремляхуся к вам с верою в целебную благодать Божию, в вас действующую, ибо Сам Господь по слову апостола даде вам власть на духи нечистыя, яко да изгоните их и заповеда целити всяк недуг и всяку болезнь, глаголя: «Болящия исцеляйте, прокаженныя очищайте, мертвыя воскрешайте, бесы изгоняйте, туне приясте, туне дадите». Сего ради от любве сердечныя приносим вам со смирением и верою похвалы сия:
Радуйтеся, благовестия Евангельскаго трубы.
Радуйтеся, вся концы вселенныя просветившии.
Радуйтеся, серафимскою пламенною любовию ко Господу горевшии.
Радуйтеся, Церкви Христовы славо и утверждение.
Радуйтеся, Пресвятей Владычице Богородице верно послужившии.
Радуйтеся, покровом Ея осененнии.
Радуйтеся, от Самаго Господа Иисуса Христа благодать и силу целити недужных приявшии.
Радуйтеся, на стезю покаяния нас наставляющии.
Радуйтеся, даров духовных всегдашнии податели.
Радуйтеся, болезней душевных и телесных целители благодатнии.
Радуйтеся, немощи немощных на себе носившии.
Радуйтеся, спасению многих душ человеческих послужившии.
Радуйтеся, святии Богоблаженнии врачеве, целители душ и телес наших.

Кондак 5
Боготочный источник дивных чудес явился еси, святителю отче Николае, приял бо еси от Господа дар недуги душевныя и телесныя врачевати, бесы изгоняти и всех сущих в бедах скоро от тех избавляти. Темже прибегаем к тебе, яко пленных свободителю, нищих заступнику и благодетелю, врачу благодатному и милостивому, да спасаеми святым предстательством твоим, воспеваем о тебе Христу Богу хвалебную песнь: Аллилуиа.

Икос 5
Видевше людие вас, отцы богоноснии, святители Христовы, не токмо учителей духовных и к жизни вечней путеводителей, но и целителей от всяких телесных и душевных недугов, хвалу Господу воздаваша. Мы же за многая и неисчетная исцеления ваша, на ны изливаемая, ублажаем вас, милостивых предстателей и чудотворцев, похвалами сими:
Радуйтеся, Единому Богу, в Троице славимому, верно послужившии.
Радуйтеся, многоразличными дарованьми Духа Святаго укрепленнии.
Радуйтеся, веры истинныя дерзновеннии проповедницы. br>Радуйтеся, апостольских преданий хранители.
Радуйтеся, архиереи Божии, добре упасшии словесное стадо ваше.
Радуйтеся, от ересей и расколов ограждение.
Радуйтеся, заблудших на путь правый наставляющии.
Радуйтеся, бесов именем Христовым изгоняющии.
Радуйтеся, любовию вашею всех покрывающии.
Радуйтеся, благодатную росу исцелений верным источающии.
Радуйтеся, болезньми тяжкими одержимых премудрии врачеватели.
Радуйтеся, о всем мире печальницы и молитвенницы.
Радуйтеся, святии Богоблаженнии врачеве, целители душ и телес наших.

Кондак 6
Проповедует весь мир христианский велие чудо, тобою сотворенное, священномучениче Власие, егда жена некая, имущая сына своего близ смерти лежаща, положи его при ногу твоею, плачущи и вопиющи о исцелении его. Ты же, отче, именем Спасителя исцелил еси его, глаголя: «Аще в человецех и в скотах что таковое случится, и помянет кто имя мое, тому Ты, Господи, ускори на помощь». Темже молим тя, не лиши тоя благодати и нас, да и мы здравы суще телом и душею, поем Богу благодарственную песнь: Аллилуиа.

Икос 6
Возсия в сердцах ваших свет Божественныя любве и благодати, святители Христовы и страстотерпцы, кровию священную одежду свою украсившии. Темже прослави вас Господь, видя ваше безмерное ко всем сострадание, яко соблюдаете от всякия болезни не точию человеки, но и скоты, и домы верных всяких благ исполняете; не отрините убо и нас, грешных, скорбьми, болезньми и многими печальми обуреваемых, и помозите всем вопиющим вам таковая:
Радуйтеся, души своя за веру Православную положившии.
Радуйтеся, служители Божия себе быти пред мучители исповедавшии.
Радуйтеся, страстем Христовым мужественнии подражатели.
Радуйтеся, священную одежду вашу кровьми страданий обагрившии.
Радуйтеся, яко вами от многих ран грешнии избавляются.
Радуйтеся, яко вами от всяких болезней вернии свобождаются.
Радуйтеся, неисчерпаемии источницы исцелений.
Радуйтеся, яко возложением рук ваших и звери от болезней исцеляются.
Радуйтеся, нетлением мощей ваших славно от Бога возвеличеннии.
Радуйтеся, многими чудесы от них верных возвеселившии.
Радуйтеся, исцеления во славу Божию совершающии.
Радуйтеся, теми нас к прославлению Бога призывающии.
Радуйтеся, святии Богоблаженнии врачеве, целители душ и телес наших.

Кондак 7
Хотя Человеколюбец Господь явити милосердие Свое людем, дарова нам тя, великомучениче Пантелеимоне, великаго целителя болезней душевных и телесных, прогонителя духов злобы поднебесных. Ты бо милости Божия подобяся, от Самаго Вседержителя Спаса по достоянию именование всемилостиваго прием, яко сострадателен был еси, и имуеши всех, сугубо подая исцеления, словом благодати врачуя и к разуму Божественному наставляя верных, подвизая их пети Подателю всех благ Богу песнь: Аллилуиа.

Икос 7
Новую показа милость рабом Своим Человеколюбец Господь, егда благоволи явити сонм святых мучеников, молитвенников, целителей душ и телес наших и ходатаев спасения вечнаго. Вы бо, святии мученицы, имеюще веру во Христа, адаманта твердейшу, мужественно претерпели есте от гонителей темничныя узы и страдания, смерть же лютую приявше, жертвою благоприятною Богу явистеся. И ныне, Небесному Престолу всех Владыки предстояще, неоскудно исцеления источаете всем с верою прибегающим к вам и зовущим тако:
Радуйтеся, пресветлому мученическому лику сопричтеннии.
Радуйтеся, яко мучения ваша зряще, множество людей ко Христу обратишася.
Радуйтеся, Господу своему даже до смерти послужившии.
Радуйтеся, чудотворцы преславнии, на утешение нам дарованнии.
Радуйтеся, святии врачеве, болезни наша исцеляющии.
Радуйтеся, светом добродетелей ваших и нас духовно просвещающии.
Радуйтеся, в сониих и видениих страждущих посещавшии.
Радуйтеся, в бедах и напастех помощь нам подающии.
Радуйтеся, болящих младенцев и отроков прибежище и исцеление.
Радуйтеся, скорбей родителей их врачевание.
Радуйтеся, на мытарствах воздушных помощь являющии.
Радуйтеся, о спасении нашем Господа умоляющии.
Радуйтеся, святии Богоблаженнии врачеве, целители душ и телес наших.

Кондак 8
Странники и пришельцы на земли себе помышляюще, святии братия, врачеве-бессребреницы Космо и Дамиане, ничесоже от тленных вещей мира сего стяжати себе не возжелали есте, всегда имуще Христа, действующа в вас, и силою Того болящих исцеляете, ибо врачевство ваше источник есть неисчерпаемый на всяк день умножаемый. Не оставите убо и нас благодатною вашею помощию, да вси с верою и любовию воззовем Богу: Аллилуиа.

Икос 8
Все житие ваше на земли любовию к Богу и ближним исполнено бысть, святии врачеве-бессребреницы, миро благоуханное исцелений источающии, от бед и скорбей избавляющии, печали утоляющии всех почитающих вас. Благодарим и величаем прославившаго вас Господа, даровавшаго нам дивный богосветлый собор молитвенников, целителей и чудотворцев, Егоже, святии бессребреницы, умолите спастися всем поющим вам таковая:
Радуйся, святый апостоле Луко, истинный врачу духовный, Евангелие всей твари проповедавый.
Радуйся, святителю Спиридоне Тримифунтский, великий чудотворче, всяку болезнь и язву исцеляяй и мертвых преславно воскрешаяй.
Радуйся, священномучениче Антипо Пергамский, диавольскую силу поправый и всем христианом благодатная исцеления даруяй.
Радуйся, святителю Модесте, похвало святаго града Иерусалима, источниче милости неизсякаемый и чудотворче.
Радуйся, великомучениче Артемие, мучителя злочестиваго царя победителю, страстей разжжение угашаяй и духи нечистыя прогоняяй.
Радуйся, священномучениче Ермолае, пастырю добрый Христова стада и святаго Пантелеимона целителя истинный учителю.
Радуйтеся, три одноименныя и единонравныя двоицы братий Космо и Дамиане богомудрии, врачеве-бессребренницы, болящих страсти туне исцеляющии.
Радуйтеся, мученицы Кире и Иоанне, Божественнии врачеве, яко чудодействуете непрестанно, вся недуги наша исцеляюще.
Радуйся, мучениче Диомиде, врачу душ и телес, истинный и непобедимый страстотерпче, даров Божественных исполненный.
Радуйтеся, Фотие славный и богомудрый Аникито, двоице страдальцев, огнь и муки прошедшии и венец победный приявшии.
Радуйся, мучениче Фалалее, врачу изрядный, тя бо даде Владыка Христос на исцеление всем верным.
Радуйся, мучениче Трифоне, дар Божественных исцелений приявый, от козней диавола нас охраняяй.
Радуйтеся, святии Богоблаженнии врачеве, целители душ и телес наших.

Кондак 9
Всякое естество ангельское и человеческое удивися делу милосердия Господня, яко дарова нам, грешным, в помощь и заступление тя, преподобне отче Сампсоне, врача преизряднаго и милостиваго, благодать исцелений подающаго, единым пр

Икосновением руки своея царя исцелившаго; молитвенника благоприятна, алчущих и нищих питателя и сущих в нуждех поборника велика. Темже вси верни ведуще тя, яко служителя Христова и преподобным отцем причастника, вопиют о тебе благодарственную песнь: Аллилуиа.

Икос 9
Ветии многовещаннии не возмогут по достоянию восхвалити вас, преподобнии и богоноснии отцы наши, яко наставников монахов и Ангелов собеседников, и прославити подвиги и дела, ихже творили есте на земли. Обаче и по преставлении многая и преславная чудеса и исцеления творити не престаете, честныя бо мощи ваша подобны Силоаму, идеже хромии, недужнии, разслабленнии и одержимии духами злобы здравие улучают. Ибо ради подвигов ваших приясте от Господа власть целити болезни неисцельныя, утоляти страсти наша, возбуждати в людех плач о гресех, да чистою совестию и сокрушенным сердцем воспеваем вам похвалы сия:
Радуйтеся, житию бесплотных поревновавшии.
Радуйтеся, во всем христианстем мире яко великия целители прославлениии.
Радуйтеся, образ жития праведнаго нам показующии.
Радуйтеся, побеждати мир, плоть и диавола нам помогающии.
Радуйтеся, многая чудеса и знамения от мощей ваших являющии.
Радуйся, яко мощей ваших демони трепещут.
Радуйтеся, от Господа власть на духи нечистыя приимшии.
Радуйтеся, силою Божиею их прогоняющии.
Радуйтеся, бездетным родителем чадородие дарующии.
Радуйтеся, омраченных умом просветители богомудрии.
Радуйтеся, сосуди, елей милосердия Божия источающии.
Радуйтеся, живоносныя источницы, струи исцелений нам изливающии.
Радуйтеся, святии Богоблаженнии врачеве, целители душ и телес наших.

Кондак 10
Спасти хотя души людей недугом пианства одержимых, Всемилостивый Господь дарова помощников и целителей от злыя страсти сея: святаго мученика Вонифатия, преподобнаго Моисея Мурина, преподобнаго Варлаама Серпуховскаго и иных многих угодников Своих и подвижников. Мы же, преклоньше колена и руки своя простерше к вам, святии отцы и матери, молим вас: умолите Господа даровати исцеление погибающим от пианства братиям и сестрам нашим, жития трезвеннаго и целомудреннаго начало положити всех нас сподобите, да возможем победити борющий нас грех и непрестанно славити Бога, поюще Ему: Аллилуиа.

Икос 10
Стена бысть и заступление всем страждущим людем чудный образ Богоматере, пред нимже некий крестьянин, исполняя повеление преподобнаго Варлаама Серпуховскаго, отслужи молебен и от страсти винопития исцелися. Та бо икона, Неупиваемою Чашею именуемая, исцеления дарует отчаявшимся и погибающим, наипаче же болезнующим пианством. Темже молим Тя, Пречистая Владычице, исцели нас, страждущих от страстей греховных молитвами святых целителей и чудотворцев, помощников наших Богодарованных, к нимже благодарственно взываем сице:
Радуйтеся, от мучительнаго недуга пианства страждущих избавляющии.
Радуйтеся, к искреннему покаянию и исправлению их приводящии.
Радуйтеся, глубину милосердия Богоматере страждущим показующии.
Радуйтеся, яко благодатию Ея многия от страсти пианства исцеляются.
Радуйтеся, отчаянным надежду на помощь подающии.
Радуйтеся, от рова погибельнаго безнадежныя спасающии.
Радуйтеся, к подвигу воздержания всех призывающии.
Радуйтеся, от смертоноснаго зелия нас ограждающии.
Радуйтеся, от страстей, яко от сна погибельнаго, нас пробуждающии.
Радуйтеся, всем борющимся с грехми покровители Богодарованнии.
Радуйтеся, к новому, праведному и трезвенному житию нас направляющии.
Радуйтеся, яко молитвами вашими духовную нашу жажду утоляете.
Радуйтеся, святии Богоблаженнии врачеве, целители душ и телес наших.

Кондак 11
Пение благодарственное Пресвятей Троице людие земли Русския приносят, прославляюще тя, преподобне отче Сергие, яко великаго заступника, целителя и утешителя православным христианом в державе нашей и по всему лику земли обитающим, ибо данною тебе Божиею благодатию слепыя просвещаеши, от телесных и душевных болезней исцеляеши, от демонскаго насилия свобождаеши, от напастей ограждаеши и вся наша прошения во благо исполняеши, вопия возлюбленному тобою Христу Богу: Аллилуиа.

Икос 11
Светильницы светоприемнии от истиннаго Света озаряемии явистеся, святии земли Русския: иерарси и преподобнии, священномученицы и мученицы, Христа ради юродивии и святых дев и жен сословие, с нимиже собор новомучеников и исповедников Русских, вкупе именуемии и неименуемии, ведомии нами и неведомии. Людие же русстии, обремененнии грехами, болезньми и скорбьми многими, обретоша вас заступников и целителей, подаете бо во вся дни бытия народа нашего врачевание страстем неисцельным, слепым прозрение, глухим слышание, разслабленным здравие, страждущим раковыми язвами исцеление и всем благодать изливаете, радостию озаряюще сердца верных, чтущих вас и воспевающих с любовию таковая:
Радуйся, преподобне Агапите, первый врачу безмездный в земли Русстей и великий чудотворче.
Радуйся, святителю Алексие Московский, пастырю и учителю премудрый земли нашея, исцеления струи верным источаяй.
Радуйся, преподобне Серафиме Саровский чудотворче, врачу скорый и благодатный.
Радуйся, святый праведный Иоанне Кронштадский, страны Русския молитвенниче и чудотворче предивный.
Радуйтеся, святии царственнии страстотерпцы царю Николае, царице Александро, царевиче Алексие, царевны Ольго, Татиано, Марие и Анастасие, за землю Русскую пред Богом молитвенницы и преславнии чудотворцы.
Радуйся, святителю Крымский и исповедниче Луко, врачу благий и милостивый.
Радуйся, преподобне отче Серафиме Вырицкий, житием и подвиги древних отец подражателю, дар чудодейственныя благодати приемый.
Радуйся, преподобне отче Амфилохие Почаевский, врачу безмездный, силою Божиею неисчетныя чудеса и исцеления совершивый.
Радуйся, преподобная Евфросиние, Великая княгине Московская, Богу угодившая и дар исцелений от Него прияти сподобившаяся.
Радуйся, святая блаженная Ксение Петербургская, безумием мнимым безумие мира обличившая и дар чудодейственныя помощи от Христа стяжавшая.
Радуйся, преподобномученице Великая княгине Елисавето, духовною и телесною красотою возсиявшая и людем русским истинную любовь и милосердие показавшая.
Радуйтеся, святии Богоблаженнии врачеве, целители душ и телес наших.

Кондак 12
Благодать, юже даде вам Господь Бог, целити вся недуги душевныя и телесныя, днесь нас собра, да почтим святую память вашу, святии врачеве, целители и чудотворцы. Темже убо, благоговейне взирающе на честную икону вашу, угодницы Божии, и со умилением сердец к ней припадающе, молим вас: не токмо от недугов и болезней нас исцелите, но чудным светом Божиим нашу жизнь озарите, благословите нас миром и любовию, подайте нам твердую веру, чистоту жизни и страх Божий, от греховныя погибели нас соблюдите, да вашим заступлением достигнем Небеснаго отечества, идеже с вами воспоим Богу ангельскую песнь: Аллилуиа.

Икос 12
Поюще Господа, дивнаго во святых Своих, хвалим и прославляем ныне святый и великий собор целителей и чудотворцев, с нимже Сама Пречистая Дева Богородица, Архангели и Ангели, Божественнии Апостоли, пророцы и святители, мученицы и преподобнии, блаженнии и вси праведницы ликовствуют. Славим и величаем прославльшаго вас Христа Бога нашего, излившаго на вас обилие Своих даров благодатных, вас же, святых помощников и предстателей наших, благодарным сердцем и усты ублажаем песньми таковыми:
Радуйся, святый Архистратиже Божий Рафаиле, всех душевных и телесных недугов благодатный целителю.
Радуйтеся, святии праведнии Богоотцы Иоакиме и Анно, неплодство супругов благодатию Божиею разрешающии.
Радуйся, великомучениче и победоносче Георгие, непобедимый воине Христа Бога нашего, немощствующих скорый врачу и всем в скорбех и бедах сущим заступниче.
Радуйся, священномучениче Иулиане, святаго апостола Петра учениче, младенцы от болезней и смерти благодатно сохраняяй.
Радуйся, преподобне отче Паисие Великий, молитвою душу послушника своего из ада изведый, и нас от муки вечныя молитвами твоими избавляяй.
Радуйтеся, святии мученицы Флоре и Лавре, Богомудрая двоице пресветлая, трудолюбцы незлобивии и недугов наших целители.
Радуйтеся, преподобный царю Симеоне Мироточивый и святителю Савво, сербская похвало, многими чудесы и даром исцелений от всяких болезней Богом прославленнии.
Радуйся, преподобне отче Иоанне Рыльский, лечебную силу от Бога приявый и всем с верою приходящим здравие подаваяй.
Радуйся, преподобная мати Марие Египетская, страсти плотския мечем воздержания посекати нас научающая.
Радуйся, страстотерпице Христова Параскево, свет благодатный душевным и телесным очам нашим открывающая.
Радуйся, мученице Агриппино, прокаженныя от неисцельныя сея болезни свобождающая.
Радуйся, великомученице Марино, силою Креста главу диавола сокрушившая и многих недугов лютых прогонительнице.
Радуйтеся, святии Богоблаженнии врачеве, целители душ и телес наших.

Кондак 13
О предивнии и преславнии угодницы Божии, святии врачеве-бессребреницы и чудотворцы, скории помощницы всем с верою к вам прибегающим, приимите сие хваление наше и мольбы слезныя вам приносимыя: исцелите многообразныя недуги душ и телес наших и теплым предстательством вашим испросите нам у Христа Бога избавление от всех бед и напастей, прощение прегрешений наших и благую надежду вечнаго спасения, да сподобимся с вами и со всеми святыми воспевати во веки Спасителю нашему: Аллилуиа.
Сей Кондак читается трижды, затем Икос 1 и Кондак 1

Молитва
О чудотворцы славнии, врачеве безмезднии, земнии Ангели и небеснии человецы, скоропослушливии помощницы всем к вам прибегающим! Вы бо, угодницы Божии, безчисленными чудесы весь мир наполняете и те токмо телесныя недуги исцеляете, но и верою Христовою души просвещаете, в терпении болезней укрепляете, в тяжких недузех сущих о исправлении жития вразумляете, ко Христу покаянием направляете и силою Всемогущаго Бога обильныя дары благодатныя помощи источаете. Сего ради к вам, яко благодатным врачем, мы, недостойнии и грешнии, с благоговейною любовию припадаем и молимся: услышите воздыхания множества страждущих людей, умолите небеснаго Врача душ и телес наших и Его Пречистую Матерь даровати нам исцеление от недугов наших, сохраните нас от лютых и неисцельных болезней, от расслабления тела, от исступления ума и смертоносныя язвы, от внезапныя смерти, от всякия беды и скорби и от всякаго зла; помозите всем в немощи отчаявшимся, к вам же с надеждою прибегающим; утешение и отраду подайте всем в тяжких работах, в заточении и темницех унывающим и теплым ходатайством вашим к Богу соблюдите в вере Православней, в богомыслии, в молитвах к Богу прилежных; умолите Господа, да подаст всем нам христианскую кончину безболезненну, непостыдну, мирну, Божественных Таин причастну, и добрый ответ на Страшнем Суде Своем, да с надеждою спасения достигнем Царствия, егоже уготова Господь любящим Его, и сподобимся купно с вами, угодницы Божии, славити Отца и Сына и Святаго Духа во веки веков. Аминь.

Тропарь, гл. 8
Святии бессребреницы и чудотворцы, посетите немощи наша: туне приясте, туне дадите нам.

Кондак, гл. 2
Благодать приимше исцелений, простираете здравие сущим в нуждах, врачеве, чудотворцы преславнии; но вашим посещением ратников дерзости низложите, мир исцеляюще чудесы.[/spoiler]

Раб божий Константин

Акафист святым новомученикам и исповедникам Шатурским.
[spoiler]Кондак 1
Избраннии новомученицы и исповедницы Христовы, небесных жителей пресветлая дружино, от земли Шатурския возсиявшии и в Небеснем отечестве венцы славы приемшии! Прославляюще прославльшаго вас Господа, песньми духовными восхваляем вас, заступники наша. Вы же, яко имущии дерзновение ко Святей Троице, от всяких нас бед свободите, зовущих:
Радуйтеся, новомученицы и исповедницы Шатурстии, житием и подвиги светло просиявшии.

Икос 1
Ангелов Творец и Создатель человеческаго рода во дни грознаго испытания земли нашея яви вас, страстотерпцы Шатурстии, людем страждущим образ твердаго стояния в вере и дарова вам благодать мужественне подвизатися и даже до крове пострадати. Сего ради, поминающе подвиги ваша, благодарно вопием вам сице:
Радуйтеся, святии, на страдания Богом призваннии;
Радуйтеся, страстотерпцы, подвиг добре совершившии.
Радуйтеся, новых мучеников и исповедников священное сословие;
Радуйтеся, горних небожителей преславная дружино.
Радуйтеся, новозакланнии агнцы, жизнь свою за веру положившии;
Радуйтеся, в лице мучеников Христу, Агнцу Божию, на Небеси предстоящии.
Радуйтеся, новомученицы и исповедницы Шатурстии, житием и подвиги светло просиявшии.

Кондак 2
Видя свирепство зверонравных гонителей, святитель всероссийский Тихон призва верная чада стати на защиту святыя матере Церкве и, аще послет Господь испытания гонений, уз и мучений, и самыя смерти, претерпети вся, на подвиг взирающе древних мучеников. Вы же, святии, последующе гласу сему, мучения добре претерпели есте, воспевающе Богу: Аллилуиа.

Икос 2
Разумом не разумевающе, сердцем зело болезновали есте, страстотерпцы, како земля Русская, удел избранный, мраком безбожия помрачися и грехом Каинова братоубийства осквернися. Темже, о разорении любезнаго отечества зело скорбяще, взывали есте: Воскресни, Господи, помози нам и избави нас имене Твоего ради. Мы же, исполнение молитв ваших зряще, ублажаем вас сице:
Радуйтеся, сонма страдальцев земли Русския украшение;
Радуйтеся, подвига мученическаго новое сияние.
Радуйтеся, за Русь Православную изряднии молитвенницы;
Радуйтеся, к Богу о ней приснии печальницы.
Радуйтеся, светильницы света, в весех Шатурских светло возсиявшии;
Радуйтеся, страдальцы святии, подвигом мученичества Христа прославившии.
Радуйтеся, новомученицы и исповедницы Шатурстии, житием и подвиги светло просиявшии.

Кондак 3
Силою Вышняго укрепляеми, пастырие доблии, стадо Христово, от беззаконных терзаемое, в любви и единомыслии соблюдали есте и, противу гонителей мятежных подвигом веры добре подвизающеся, козни их нивочтоже вменяли есте, глаголюще: страха вашего не убоимся, ниже смутимся, яко с нами Бог! Мы же, подвиг ваш мученический восхваляюще, Богу вопием: Аллилуиа.

Икос 3
Имуще разум злочестием потемненный, восхотеша пребеззаконнии гонителие единство церковное разорити руками скверных вероотступник и лжепастырей. Обаче ничтоже успеша, яко не воздремаша очи страстотерпцев на стражи веры Православныя, ниже умолкоша уста их, во еже всяк совет нечестивых разорити и верных во истине укрепити. Мы же, дивящеся подвигу их, взываем сице:
Радуйтеся, учений апостольских изряднии ревнителие;
Радуйтеся, веры отеческия твердии хранителие.
Радуйтеся, суемудрие нечестивых дерзновенно обличившии;
Радуйтеся, злохитрость и коварство их низложившии.
Радуйтеся, в нощи безбожия светом истины возсиявшии;
Радуйтеся, за веру Православную добре подвизавшиися.
Радуйтеся, новомученицы и исповедницы Шатурстии, житием и подвиги светло просиявшии.

Кондак 4
Бурею злобы противу Церкве дышуще, нечестивии безбожницы храмы и обители святыя разориша, вас же, святии страстотерпцы, крова и пристанища лишиша. Обаче, благодатию Божиею укрепляеми, вся благодушно претерпели есте и, о мучителех с любовию молящеся, Богу взывали есте: Аллилуиа.

Икос 4
Слышавше безбожнии гонителие твердое ваше исповедание, злобою распаляхуся на вы, страстотерпцы, и, многоразличными муки терзающе, от места на место изгоняху, в темницы и на горькия работы заключаху, гладом и хладом изнуряху. Вы же, святии, терпение стяжавше, рекли есте: кто ны разлучит от любве Божия? Сего ради, дивящеся мужеству вашему, со умилением взываем вам сице:
Радуйтеся, древним мучеником житием и подвиги подражавшии;
Радуйтеся, мученицы новоявленнии, добродетельми светло просиявшии.
Радуйтеся, в броню правды облеченнии;
Радуйтеся, щитом веры огражденнии.
Радуйтеся, Церкве Русския благодатное прозябение;
Радуйтеся, земли Московския похвало и украшение.
Радуйтеся, новомученицы и исповедницы Шатурстии, житием и подвиги светло просиявшии.

Кондак 5
Богосветлии звезды, ко Христу путеводящии, явистеся, новомученицы святии, в нощи гонения безбожнаго сияюще. Вас бо прещения мучителей не устрашиша, ниже темницы мрачнии потаиша, но свет ваш просветися пред человеки. Мы же, видяще ваше доброе исповедание, прославляем Отца Небеснаго, взывающе: Аллилуиа.

Икос 5
Видевше, яко властителие беззаконнии многия верныя в темницы заключаху и на мучение и смерть осуждаху, вы, святии, разуместе, яко приспе время и вам подъяти страдания за веру Христову. Темже тепле молили есте Господа, да укрепит вас в подвизе страданий и прославит Имя Свое. Мы же, воспевающе исповедание ваше, вопием сице:
Радуйтеся, жребия мученическаго не уклонившиися;
Радуйтеся, в руце Божии себе всецело предавшии.
Радуйтеся, путем Христовым добле шествовавшии;
Радуйтеся, мучения многообразная безропотно терпевшии.
Радуйтеся, Царствия Небеснаго победно достигшии;
Радуйтеся, сладости райския богатно вкусившии.
Радуйтеся, новомученицы и исповедницы Шатурстии, житием и подвиги светло просиявшии.

Кондак 6
Проповедницы всеобщаго Воскресения и жизни вечныя явистеся, новомученицы святии, земная бо вся отвергше и живота не пощадивше, веровасте, яко телеса ваша, аще и предани будут поруганию и тлению, обаче в нетлении и славе востанут. Ныне же в Небеснем Иерусалиме и Церкви торжествующих вкупе со ангелы и всеми святыми воспеваете Судии всех Богу победную песнь: Аллилуиа.

Икос 6
Возсияша светозарно добродетели ваша, всехвальнии мученицы Христовы, вы бо в точиле лютых гонений, яко гроздия Истинныя Лозы, кровь свою источили есте, еюже Церковь Святая украсися, яко багряницею и виссом. Сего ради прославляем вас сице:
Радуйтеся, винограда Христова гроздие многоплодное;
Радуйтеся, вертограда Небеснаго цвети прекраснии.
Радуйтеся, покровом Божия Матере осененнии;
Радуйтеся, щитом благодати Ея огражденнии.
Радуйтеся, в Небесных чертозех радостию наслаждающиися;
Радуйтеся, зрением Сладчайшаго Иисуса утешающиися.
Радуйтеся, новомученицы и исповедницы Шатурстии, житием и подвиги светло просиявшии.

Кондак 7
Хотяще богоборцы суемудреннии веру Православную во Отечестве нашем искоренити, совет сотвориша, еже вся пастыри верныя избити и овцы стада Христова разсеяти. Сего ради руки на вас, святии мученицы, возложиша, беззаконному суду предаша и на смерть осудиша. Вы же, чашу страданий испивше, Христу последовали есте, воспевающе: Аллилуиа.

Икос 7
Новая Голгофа явися в земли Московстей на месте, нарицаемем Бутово, идеже новии мучители, древним в лютости подобящеся, поведоша вы, страстотерпцы всехвальнии, яко агнцев на заклание и люте умучиша. Аще же и предаша святая телеса ваша безчестию и поруганию, обаче Господь вас прослави пред ангелы и человеки. Мы же, дивящеся долготерпению вашему, сице вопием:
Радуйтеся, веры Православныя славнии провозвестницы;
Радуйтеся, любве Христовы истиннии причастницы.
Радуйтеся, надежды несумненныя приемницы;
Радуйтеся, премудрости Божия поборницы.
Радуйтеся, кротости и незлобия стяжателие;
Радуйтеся, воздержания истиннаго учителие.
Радуйтеся, новомученицы и исповедницы Шатурстии, житием и подвиги светло просиявшии.

Кондак 8
Странно и чудно есть разумети, како святыя жены, естеством немощни, мужески за Христа пострадаша? Видевше бо честныя отцы и братию, на муки и смерть осужденныя, подвигом оных подражаху и Христа небоязненно проповедаху, воспевающе Ему: Аллилуиа.

Икос 8
Весь еси желание, весь сладость, Сладчайший Иисусе, - сице взывали есте, преподобныя жены, и на мучение, яко к венцу брачному, с радостию потекли есте. Егда же смерть от рук беззаконных приясте, душами чистыми, яко голубицы белокрилыя, в Чертог Жениха Христа воспарили есте. Сего ради приимите от нас похвалы сицевыя:
Радуйтеся, агницы пречистыя, Христу с любовию пожершыяся;
Радуйтеся, страстотерпицы пречудныя, Небесному Жениху сочетавшыяся.
Радуйтеся, мудрости евангельских дев подражавшыя;
Радуйтеся, во свете веры чисте пред Богом ходившыя.
Радуйтеся, обеты иноческия даже до смерти непорочно соблюдшыя;
Радуйтеся, мужески страдания и смерть претерпевшыя.
Радуйтеся, новомученицы и исповедницы Шатурстии, житием и подвиги светло просиявшии.

Кондак 9
Вси святии Церкви торжествующия с радостию сретоша вы, новомученицы Шатурстии, яко победители, присныя други Христовы и достойная чада Царствия Его. Темже, почесть Горняго звания приимше, с благодарностию взываете Богу, Победителю смерти, хвалебную песнь: Аллилуиа.

Икос 9
Витийство человеческое не может по достоянию прославити подвиги и страдания мучеников и исповедников Христовых. Мы же, зряще вас, страдальцы земли Шатурския, славою и честию от Бога увенчанных, подвиги вашими назидаемся и, помощи улучити чающе, дерзаем с любовию воспевати вам сице:
Радуйтеся, стопам древних мучеников небоязненно последовавшии;
Радуйтеся, лютое неистовство беззаконных мужественно обличившии.
Радуйтеся, воини добропобеднии, добле за Христа подвизавшиися;
Радуйтеся, страстотерпцы славнии, кровию мученическою землю Русскую обагрившии.
Радуйтеся, страданьми и исповеданием в Небесная селения вшедшии;
Радуйтеся, в белых ризах Агнцу Божию во славе Небесней предстоящии.
Радуйтеся, новомученицы и исповедницы Шатурстии, житием и подвиги светло просиявшии.

Кондак 10
Спасения нашего усерднии ходатаи есте, новомученицы всехвальнии, сего ради молим: испросите нам у Господа утверждение в вере и благочестии, да, не падше и обленившеся, но бодрствующе и трезвящеся, все время живота нашего потщимся в смирении, целомудрии и братолюбии пребывати и за вся Бога благодарити, взывающе Ему: Аллилуиа.

Икос 10
Стена необоримая явися безбожным гонителем твердость ваша, святии новомученицы. Вы бо, звероподобнаго нрава тех не убоявшеся, на судищах, в заточениих, горьких работах и всяких скорбных обстояниих образ терпения и непостыднаго упования на Бога мужественне явили есте. Сего ради прославляем вас сице:
Радуйтеся, добропобедницы, подвиги вашими Православие утвердившии;
Радуйтеся, крепцыи поборницы, гонения безбожных нивочтоже вменившии.
Радуйтеся, прехвальнии исповедницы, богопротивную власть дерзновенно обличившии;
Радуйтеся, агнцы незлобивии, жизнь свою за Христа положившии.
Радуйтеся, христолюбцы, веру истинную дерзновенно исповедавшии;
Радуйтеся, друзи Божии, сладости райския присно вкушающии.
Радуйтеся, новомученицы и исповедницы Шатурстии, житием и подвиги светло просиявшии.

Кондак 11
Пение хвалебное усердно приносим вам, новомученицы Шатурстии, и чтим честная страдания ваша, вы бо, любве ради Божия, вся земная нивочтоже вменивше, души своя за Христа положили есте. Ныне же, в Небесных обителех пребывающе, вопиете Богу: Аллилуиа.

Икос 11
Светом трисиянным осияваеми, новомученицы Шатурстии, со всеми святыми предстоите ныне Небесному Царю и, яко светила светозарная, присно просвещаете души притекающих к вам с верою и любовию. Мы же, благодаряще Бога, дивнаго во святых Своих, прославляем вас сице:
Радуйтеся, тесным евангельским путем шествовавшии;
Радуйтеся, узкими враты Небеснаго Царствия достигшии.
Радуйтеся, вся прелести мира и славу его нивочтоже вменившии;
Радуйтеся, благодать врачевания душ и телес от Бога получившии.
Радуйтеся, достойнии Небеснаго Царствия наследницы;
Радуйтеся, усерднии о нас пред Богом молитвенницы.
Радуйтеся, новомученицы и исповедницы Шатурстии, житием и подвиги светло просиявшии.

Кондак 12
Благодать, данную вам от Бога, ведуще, память вашу с любовию совершаем, страстоперпцы Шатурстии. Паче же умиляемся, како вы в годину всеобщаго отступления, до конца вся претерпевше, всем сердцем Господа Бога возлюбисте и ближняго, яко сами себе. Помозите убо и нам сия заповеди исполнити и крест свой безропотно понести, со благодарением взывающе Богу: Аллилуиа.

Икос 12
Поюще славныя подвиги ваша и твердое стояние в вере, крепцыи воини Христови, величаем долготерпение и ублажаем святую кончину вашу. Вы бо, лютых мучений не убоявшеся, телеса ваша, яко жертву непорочную, Триединому Богу принесли есте и от Него, почесть Горняго звания приемше, ликостояния со всеми святыми в ризах белых достойни явилися есте. Темже приимите от нас похвалы сия:
Радуйтеся, любве Христовы истиннии проповедницы;
Радуйтеся, Царствия Небеснаго достойнии наследницы.
Радуйтеся, беззаконных мучителей смирением победившии;
Радуйтеся, любовь евангельскую страданием запечатлевшии.
Радуйтеся, незлобию Христову добре подражавшии;
Радуйтеся, образ веры и благочестия нам явившии.
Радуйтеся, новомученицы и исповедницы Шатурстии, житием и подвиги светло просиявшии.

Кондак 13
О, святии новомученицы и исповедницы Христовы, земли Шатурския похвало и славо! Приимите сие малое моление наше, с благодарностию вам приносимое, и предстательством вашим ко Господу испросите Отечеству нашему мир и благоденствие. Нам же, всем, даруйте веру непостыдну и любовь нелицемерну, да, в покаянии поживше, Царствия Небеснаго сподобимся, идеже купно с вами и всеми святыми воспоем Богу хвалебную песнь: Аллилуиа.
Сей Кондак глаголи трижды. Посем Икос 1 и Кондак 1.

Молитва
О, святии сродницы наши, новомученицы и исповедницы Шатурстии, житием и подвиги светло просиявшии! Вы, Промыслом Божиим на подвиг страдальческий предызбраннии во свидетельство веры Христовы, в годину лютых испытаний Церкве Русския живота вашего не пощадили есте, изволивше муки многия претерпети и самую смерть прияти. Темже, кровьми, яко порфирою, души ваша украсивше, в Горний Сион на крылех страданий возлетели есте и тамо, полк божественный и велий новомучеников и исповедников Российских восполнивше, победныя почести от руки Спасителя прияли есте.
Сего ради ныне, совершающе с любовию память вашу, со умилением взываем: молите Господа и Совершителя спасения нашего Иисуса Христа, яко имущии к Нему дерзновение велие, Церкви Российстей даровати благостояние и крепость, Отечеству нашему мир и благоденствие, паче же оградите нас от ересей и расколов, междоусобных распрей и нестроений.
Ей, угодницы Божии! Милостивно посетите нас, недостойных чад ваших, суетою мира рассеянных, верою оскудевших и добродетельми обнищавших, подвизающе к истинному покаянию и христианскому жительству. Да вами, присно соблюдаеми и наставляеми, достигнем вожделеннаго Царства Небеснаго, идеже вкупе сподобимся прославляти и воспевати всесвятое Имя Отца и Сына и Святаго Духа. Аминь.[/spoiler]

Раб божий Константин

Акафист святому благоверному князю Ярославу Мудрому.
[spoiler]Акафист святому благоверному великому князю Ярославу Мудрому, во Св. Крещении Георгию, составлен Евгением Храповицким и Валентиной Бершадской. Текст воспроизводится по изданию: Акафист святому благоверному великому князю Ярославу Мудрому. Херсон, 2010 (акафист на стр. 3 – 30); в «Уставных заметках» публикуется по просьбе авторов.


Февраля в 20-й день
Тропарь, глас 4:
Яко благочестиваго корене пречестная отрасль был еси, благоверне княже Ярославе, добре во благочестии пожив, веру непорочну соблюл еси, и храм пречуден Премудрости Божия в стольном граде Киеве устроив, ныне на Небесех предстоиши Престолу Святыя Троицы, молися ниспослати нам велию и богатую милость.

Кондак, глас 4:
Измлада явился еси, богомудре Ярославе, Божественный сосуд избран Богови, во благочестии жительствовавши, многия святыя церкви устроил еси; темже похваляем тя, княже наш, яко народу твоему ты еси удобрение, Киеву — слава и всей Русстей земли — утверждение.


Акафист святому благоверному князю Ярославу Мудрому
Кондак 1
Избранный от Предвечнаго Царя Небеснаго и Церкви Зиждителя, данный стране нашей ходатаю изрядный и заступниче пречудный, святый княже Ярославе, приими похвальная пения любовию чтущих святую память твою и моли Христа Бога сохранитися неврежденным нам от враг видимых и невидимых, да со умилением вопием ти: Радyйся, святый благовеpный великий княже Ярославе.

Икос 1
Ангельское житие возлюбив от юности и ко исканию единаго на потребу направив помыслы твоя, княже Ярославе, дивный образ был еси добродетелей христианских и совершенства духовнаго; темже и возвеличен был еси на земли пред братиею твоею и на небеси прославлен еси от Господа. Мы же, благодаряще Творца и Спаса нашего, славословим тя, яко великаго избранника Божия, со умилением зовуще:
Радуйся, земли Русския княже богоизбранный.
Радуйся, пречестная отрасль равноапостольнаго князя Владимира.
Радуйся, благовеpия пpедков наследниче.
Радуйся, мудрости Соломоновы подражателю.
Радyйся, всем житием своим Богy послyживый.
Радуйся, всех концев земли Русския покpовителю.
Радуйся, заповедей Хpистовых веpный исполнителю.
Радyйся, дивный хранителю, от Бога всем нам дарованный.
Радуйся, святый благоверный великий княже Ярославе.

Кондак 2
Видевше еще отрок сый, прехвальне Ярославе, отца твоего от злых дел к благим деяниям изшедшаго и Светом Христовым озареннаго, купно с братиями твоими святое крещение восприял еси и сердцем твоим богопросвещенным благодарственно воспел еси Господеви: Аллилуиа.

Икос 2
Разум твой, угодниче Христов, духовным ведением Милосердный Господь озари, яко ты, житие богоугодное возлюбив и благочестивым родителем твоим внимающе, в страсе Божии, молитве и добродетелех возрастал еси. Сего ради, Господь, видя верность твою в малом, над многими тя постави; мы же с любовию взываем ти сице:
Радуйся, в истинах христианских измлада наставленный.
Радуйся, от юности Господа всем сердцем возлюбивый.
Радуйся, во испытаниих многих Богом дивно хранимый.
Радуйся, подвиги мужества, яко добрый воин, во брани явивый.
Радуйся, водительству Духа Святаго выну прилежавый.
Радуйся, добродетелем преславных предков твоих подражавый.
Радуйся, благодатныя дары Всесвятаго Утешителя Духа стяжавый.
Радуйся, и нас даром мудрости обогащающий.
Радyйся, святый благовеpный великий княже Ярославе.

Кондак 3
Силою Вышняго укрепляемый, блаженне Ярославе, в кротости и в смирении души твоея возрастал еси, уготовляя себе на служение княжеское, и о помощи небесней молился еси, взывая Богу: Аллилуиа.

Икос 3
Имея страх Божий в сердце твоем, благоверный княже Ярославе, послушание явил еси отцу твоему Владимиру и, по воли его, от великаго Киева в пределы земли Ростовския княжити прешел еси, идеже жителей в вере в Бога истиннаго утвердил еси и храм великаго пророка Илии тамо воздвигл еси, сим показуяй велию любовь твою ко Господу и святым Его, и подвизаяй нас хвалебно взывати тебе:
Радуйся, лампадо веры Православныя неугасимая.
Радуйся, к ближним своим любы преизобильная.
Радуйся, неутешных в скорбех утешение.
Радуйся, блаженный храмоздателю.
Радуйся, благолепия церковнаго любителю.
Радуйся, зло творящих вразумление.
Радуйся, Правды Христовы ревнителю.
Радуйся, Отечества Небеснаго любителю.
Радyйся, святый благовеpный великий княже Ярославе.

Кондак 4
Буря вражды братоубийственныя сотрясе землю Русскую, егда Святополк Окаянный, властолюбием ослепленный, повеле убити братий твоих возлюбленных Бориса и Глеба; ты же, блаженне Ярославе, скорбя о смерти их, на Господа упование и надежду возложил еси и Его силою правду на Руси утвердил еси, воспевая выну: Аллилуиа.

Икос 4
Слышавше о премногих скорбех, претерпенных тобою, святый благоверный княже Ярославе, от Святополка Окаяннаго, величаем выну укрепившаго тя Господа, сохраньшаго тя, егда понужден быв пределы Киевския оставити и преселитися в пределы Новгородския, из нихже с вои своими паки в землю отеческую пришедши, правду Божию утвердил еси. Мы же, вере и мужеству твоему подражая, взываем сице:
Радуйся, пресельник в земли твоей бывый.
Радуйся, горняго града выну усердно взыскавый.
Радуйся, мудрый странниче, на путь спасения стопы твоя направивый.
Радуйся, Божий избранниче, скорби многия претерпевый.
Радуйся, кротко и мирно в Великий Новград княжити возвративыйся.
Радуйся, богоугодно и праведно тамо княживый.
Радуйся, иго Христово всем сердцем возлюбивый.
Радуйся, всем сердцем его приявый.
Радyйся, святый благовеpный великий княже Ярославе.

Кондак 5
Боготечною звездою возсиял еси делы твоими богоугодными, княже Ярославе, и ныне предстоиши престолу Вседержителя; сего ради молим тя: купно со святыми сродники твоими сотвори молитву Царю царствующих да, вашего ради соборнаго предстательства, пробавит милосердие Свое народам словенским и утвердит ны в вере Православней, вопиющих Ему ныне: Аллилуиа.

Икос 6
Возсиял еси в стране нашей светом добрых дел твоих, святый Ярославе, и на свещнице Церкве Православныя поставлен был еси, да светиши Отечеству твоему земному и приводиши к Солнцу Правды люди русския, со упованием таковыя похвалы тебе возносящия:
Радуйся, верный Христов последователю.
Радуйся, Отечествия Небеснаго усердный взыскателю.
Радуйся, руце твои на рало Господне возложивый.
Радуйся, вспять лица твоего николиже обративый.
Радуйся, Евангелия Царствия Божия проповедниче благогласный.
Радуйся, богомудрыми твоими словесы многи в разуме просвещаяй.
Радуйся, любящим и чтущим тя ходатаю вечнаго спасения.
Радуйся, вразумителю грешных ко исправлению.
Радyйся, святый благовеpный великий княже Ярославе.

Кондак 7
Хотяй прославити Божественнаго Искупителя нашего и Его Пречистую Матерь, повелел еси, всемудре Ярославе, воздвигнути в стольном граде Киеве Врата Златыя, ихже венчал еси храмом Благовещения Пресвятыя Богородицы, да всякий пребывающий во граде сем, под благодатным Покровом Царицы Небесе и земли пребывает и радости духовныя о сем да исполняется, непрестанно воспевая: Аллилуиа.

Икос 7
Новый Иустиниан великий воистину явился еси, богомудре княже Ярославе, яко храм великий и преславный в честь Святыя Софии — Ипостасныя Премудрости Божия создал еси, и законам справедливым и судам милосердным основание в державе твоей положил еси, благочестие христианское и научение книжное насаждая. Сего ради молим тя: настави всех нас, чтущих святую память твою, быти наследниками дел благих твоих и добродетелем твоим богоугодным последовати, воспевающих ти похвалы сия:
Радуйся, душеполезных знаний преизобильное излияние.
Радуйся, душевреднаго мрака светлое озарение.
Радуйся, неверных смыслов милостивое просвещение.
Радуйся, неправо мудрствующих внезапное низвержение.
Радуйся, верных незыблемое уверение.
Радуйся, отъемлющий духовное помрачение.
Радуйся, миром и любовию души наша наполняющий.
Радуйся, наветов вpажиих мyдpый pазоpителю.
Радyйся, святый благовеpный великий княже Ярославе.

Кондак 8
Странника и пришельца себе на земли быти помышляя, блаженне Ярославе, не ведал еси покоя в трудех твоих, люди твоя во благочестии утверждая и державу твою миром ограждая; сего ради, ныне в лике святых благоверных князей пребываеши, веселяся купно с ними и поя Богу: Аллилуиа.

Икос 8
Всею душею Господеви послуживши и всем житием своим Ему благоугодив, прославился еси благочестием, великий княже, и, ко блаженному успению достигши, в мире дух свой Богу предал еси. Мы же, поминающе праведное житие твое и блаженное упокоение, вопием ти:
Радуйся, храмы Божиими грады многия украсивый.
Радуйся, величию земли Русския тем послуживый.
Радуйся, во всем житии твоем вере Христовой поревновавый.
Радуйся, крепость державы твоея тем созидавый.
Радуйся, в народоправлении велию мудрость проявивый.
Радуйся, о благе народа своего усердно пекийся.
Радуйся, общаго мира в пределех страны твоея устроителю.
Радуйся, людем твоим помощниче богодарованный.
Радyйся, святый благовеpный великий княже Ярославе.

Кондак 9
Весь еси в вышних, богоблаженне княже Ярославе, во обителех райских водворившися, обаче и нас, тебе тепле почитающих, не оставляеши, наставляя к разуму Божественному и деланию усердному заповедей Христовых, и всякия благополезныя прошения наша исполняеши, подвизая нас Отцу Небесному благодарственно воспевати: Аллилуиа.

Икос 9
Ветия многовещанныя и риторы искусныя не возмогут по достоянию воспети подвиги твоя, недоумеют бо изрещи достойныя тебе похвалы, княже праведный. Мы же, во всех трудех и подвизех благодать Божию в тебе видяще и, на предстательство твое уповая, взываем ти сице:
Радуйся, лучу светозарнаго солнца Христа, земли Русстей сияющий.
Радуйся, в молитвах о нас ко Гос поду неумолкающий.
Радуйся, за отечество твое пред Господем милостивый печальниче.
Радуйся, христоподражательнаго жития на земли наставниче.
Радуйся, столпе правоверия Божия непоколебимый.
Радуйся, истины поборниче непреодолимый.
Радуйся, утешение скорбящих и крепкая оградо обидимым.
Радуйся, защищение твердое и отрадо всем ненавидимым.
Радyйся, святый благовеpный великий княже Ярославе.

Кондак 10
Спасительная наставления сыновом и народу твоему оставил еси, богомудрый княже, глаголя: «Любите друг друга; аще будете жити в любви между собою, то Бог пребудет с вами и покорит вам враги ваша». Сия убо поминающе, просим тя: моли тобою чудодействующаго Бога, да и мы возможем в любви со всеми пребывати и спасения вечнаго достигнути ходатайством твоим, во веки благодарственно воспевающе: Аллилуиа.

Икос 10
Царя Небеснаго верный раб и изрядный угодник был еси, благоверный великий княже Ярославе; сего ради благоразумия крилами украшаем, легко прелетел еси вся сети вражия. Мы же, дивящеся высоте твоего добродетельнаго жительства, с любовию и усердием сице тебе поем:
Радуйся, великий угодниче Божий, жизнь земную свято и праведно скончавый.
Радуйся, пришедый от скорбей многих в покой вечный.
Радуйся, увенчанный от Христа венцем нетленныя славы.
Радуйся, и по смерти заступлением твоим нас не оставляяй.
Радуйся, заповеди Господни творити нас научаяй.
Радуйся, окамененныя сердца во источницы милования обращаяй.
Радуйся, отступивших от правыя веры на путь спасения возвращаяй.
Радуйся, блуждающих по морю жития сего мудре окормляяй.
Радyйся, святый благовеpный великий княже Ярославе.

Кондак 11
Пение молебное приими от нас, святый благоверный княже Ярославе, и молитву твою вознеси о чтущих святую память твою, ко Престолу Вседержителя, да радующеся о твоем прославлении на небеси и на земли, и о твоем всегдашнем предстательстве, благодарственно вопием святых Святейшему Отцу Небесному: Аллилуиа.

Икос 11
Светозарное светило, лучами христианских добродетелей сияющее, явился еси, небо церковное украшая, богомудре Ярославе, и всем, блуждающим во тьме неверия, сомнения, маловерия и нечестия, луч надежды на спасение подаваяй и к Солнцу Правды Христу Иисусу путеводяй, да во свете заповедей Его со всеми верными шествуя, радостно тебе воспоют:
Радуйся, душевными твоими очима выну Господа созерцавый.
Радуйся, пред Оным, яко сын пред Отцем, яко ученик пред Учителем шествовавый.
Радуйся, во вся дни живота твоего Его искавый и в Нем намерение полагавый.
Радуйся, блистанием добродетелей на земли светло сиявый.
Радуйся, от Господа на небеси венец нетленный приявый.
Радуйся, яко тобою различных искушений избегаем.
Радуйся, яко предстательством твоим благодатную помощь обретаем.
Радуйся, яко тебе призывающия скоро предваряеши.
Радуйся, яко любящих тя от различных бед и напастей изымаеши.
Радyйся, святый благовеpный великий княже Ярославе.

Кондак 12
Благодатию Божиею в непрестанном творении заповедей Христовых обогативыйся, по отшествии же твоем от земных наипаче к трисолнечному престолу Пресвятыя Троицы приближися, но и от народа твоего духом любве твоея не отступивый; сего ради молим тя: пролей теплую твою молитву ко Господу, да сохранит Церковь Свою Святую неврежденну от ересей и расколов и вся чада ея да помилует и спасет, вопиющия Ему: Аллилуиа.

Икос 12
Поюще добpодетели и чyдеса твоя, благоверный княже, купно же велия твоя труды и подвиги, во благоустроение державы нашея тобою подъятыя, усердно благодарим и восхваляем тя, с любовию зовуще:
Радуйся, великий княже Ярославе, Престолу Царя Небеснаго предстояй.
Радуйся, хвалу немолчную Пресвятей Троице возносяй.
Радуйся, жизнь вечную в Царствии Небеснем получивый.
Радуйся, яко дивный образ любве Отца Небеснаго в себе явивый.
Радуйся, безпомощным скорый помощниче.
Радуйся, о спасении грешных теплый молитвенниче.
Радуйся, яко молитвам твоим Господь благоутробно внемлет.
Радyйся, yгодников Божиих сонаследниче.
Радyйся, святый благовеpный великий княже Ярославе.

Кондак 13
О преславный угодниче Христов, великий княже Ярославе, вонми гласу моления нашего и ходатайством твоим испроси нам от Господа в жизни сей в вере и добродетелех утверждение, от ересей и расколов сохранение, от скорбей и напастей избавление, прегрешений наших прощение и в час смертный твердое спасения упование, да сподобимся Царствие Небесное наследовати и вечно воспевати Богу: Аллилуиа.

Сей Кондак читается трижды, затем Икос 1 и Кондак 1.
Молитва
О святый благоверный великий княже Ярославе, всех с любовию чтущих тя благодатный заступниче и покровителю! Вознеси сие малое моление недостойных раб твоих Владыце Христу, да утвердит во Святей Своей Церкви живый дух Православныя веры, любовь, благочестие, в добрых делех преуспеяние; да дарует пастырям ревность попечения о спасении людей, яко неверующия просветити, заблудшия наставити и отпадшия обратити; изряднее же, да вся чада Церкви Православныя чисты сохранит от мирских искушений, суемудрия, суеверий и наваждений вражиих. Ей, угодниче Божий, не презри нас, молящихся тебе, но помози нам скорым предстательством твоим, да всяких бед, напастей и скорбей в сей жизни временней избежавше, кончину непостыдну обретем и, тако благоугодно на земли поживше, жизни райския на небеси сподобимся, идеже вкупе с тобою прославим человеколюбие и щедроты в Троице славимаго Бога, Отца и Сына и Святаго Духа, во веки веков. Аминь.[/spoiler]

Раб божий Константин

Житие священномученика протоиерея Ярослава Савицкого, Ямского
память 25 ноября / 8 декабря.
[spoiler]Кондак 1
Избраннаго Богом от рода служителей Церкве Христовы и приявшаго мученический венец за исповедание веры православныя, Белыя и Великия Руси светильника, священномученика Ярослава похвальными песньми почтим; ты же, яко имеяй дерзновение ко Господу, от всяких нас бед сохраняй, да любовию зовем ти:
Радуйся, священномучениче Ярославе, земли нашея новое светило и украшение.

Икос 1
Ангелов множество славят Собор новомучеников и исповед- ников Российских, с нимиже и ты, отче Ярославе, ныне престолу Господа Славы предстоя и ликовствуя непрестанно, .славословия возсылаеши и прошениям нас грешных внемлеши . Днесь собраннии и память твою празднующии, тебе, отче милостивый, моления возносим и с любовию глаголем:
Радуйся, от юности всем сердцем своим Бога возлюбивый;
Радуйся, благодатию Божиею просвещенный.
Радуйся, самоотвержение дивное в служении Богу и ближним явивый;
Радуйся, заповеди Евангельския делом исполнивый.
Радуйся, пастырю, во обители Рождества Пресвятыя Бородицы Богу послуживый;
Радуйся, в вере и благочестии сестер ея укрепивый.
Радуйся, земли Московския духовное сокровище;
Радуйся, веси Ямския небесный покровителю.
Радуйся, за правду гонения и скорби претерпевый;
Радуйся, любовь ко Христу кровию своею запечатлевый.
Радуйся, веру истинную даже до смерти сохранивый;
Радуйся, наследие жизни вечныя получивый.
Радуйся, священномучениче Ярославе, земли нашея новое светило и украшение.

Кондак 2
Видя Господь благое сердца твоего изволение, призва тя по стези благочестия последовати. Ты же веру истинную от малых лет восприял еси и воспитан был еси при храме святем, идеже родитель твой диакон Исаакий служаше, поучаяся от него непрестанно воспевати Богу песнь: Аллилуиа.

Икос 2
Разум имея Богом просвещенный, отче Ярославе, направил еси стопы своя на учение духовное, уготовляяся к служению пастыря Христова стада, и, закону Божию усердно поучаяся, душеполезное книжное сокровище восприял еси. Мы же, воспоминающе добродетельное житие твое, воспеваем ти сице:
Радуйся, родителей благочестивых достойный сыне;
Радуйся, радосте их и утешение.
Радуйся, от юности всего себе Богу предавый;
Радуйся, заповеди Его верно сохранивый.
Радуйся, от малых лет Богом возлюбленный;
Радуйся, сосуде Божий избранный.
Радуйся, добродетели христианския стяжавый;
Радуйся, цвете благоуханный добраго воспитания.
Радуйся, церковному служению от детства наученный;
Радуйся, прилежныя молитвы Богу приносивый.
Радуйся, книжную мудрость возлюбивый;
Радуйся, плоды Христова учения вкусивый.
Радуйся, священномучениче Ярославе, земли нашея новое светило и украшение.

Кондак 3
Сила Божественныя благодати осия тя, истинный пастырю душ христианских, егда диаконскаго и иерейскаго сана удостоился еси и Промыслом Божиим направлен был еси в Рождество-Богородицкий Красностокский монастырь, идеже труды к. трудом прилагая и веру Христову людем Гродненския земли проповедуя, научал еси их пети Богу: Аллилуиа.

Икос 3
Имея неусыпное попечение о спасении душ сестер обители Красностокския, отче Ярославе, наставлял еси их на путь подвига духовнаго и миссионерскаго служения посреде раскольников, инославных и неверных. Сего ради тя, яко проповедника Христова ублажаем, со умилением зовуще:
Радуйся, пасти стадо Христово избранный;
Радуйся, Пастыреначальнику Христу подражавый.
Радуйся, олтаря Господня благоговейный служителю;
Радуйся, Безкровныя Жертвы достойный совершителю.
Радуйся, веры православныя проповедниче;
Радуйся, пастырю милостивый и благодатный.
Радуйся, в любви и благочестии с супругою своею поживый;
Радуйся, в вере чад своих воспитавый.
Радуйся, мирских людей учителю богомудрый;
Радуйся, боголюбивых инокинь красностокских радосте.
Радуйся, под покровом чудотворнаго Красностокскаго образа Божия Матере послуживый;
Радуйся, к Богоматери молитвенниче наш неусыпный.
Радуйся, священномучениче Ярославе, земли нашея новое светило и украшение.

Кондак 4
Бурею искушений и бед обуреваемыя во времена брани всемирныя, сестры обители Красностокския преселишася в Свято-Екатерининскую пустынь земли Московския. Ты же, отче Ярославе, яко пастырь добрый, не оставил еси словесное стадо свое, поучая его шествовати путем Христовых заповедей, сердцем же и усты непрестанно воспевая Богу победную песнь: Аллилуиа.

Икос 4
Слышавше и видевше, святе Ярославе, души твоея доброту и верность в исповедании веры православныя во дни лютых скорбей и гонений на Церковь Божию, святейший отец и исповедник Патриарх всея России Тихон благослови наградити тя палицею за верную службу. Темже радующеся сему, из глубины сердец вопием ти:
Радуйся, благое иго Христово на себе восприявый;
Радуйся, отеческих преданий неложный защитниче.
Радуйся, во обители Свято-Екатерининстей радостно Богу послуживый;
Радуйся, сестер ея в стоянии за веру укрепивый.
Радуйся, о обители и сестрах ея неусыпный попечителю;
Радуйся, устава церковнаго ревнителю.
Радуйся, гонения за веру не устрашивыйся;
Радуйся, во славу Христову потрудивыйся.
Радуйся, усердный ко спасению наш наставниче;
Радуйся, призывающим тя скорый помощниче.
Радуйся, проповедниче покаяния;
Радуйся, рабе Божий, благий и верный.
Радуйся, священномучениче Ярославе, земли нашея новое светило и украшение.

Кондак 5
Боготечней звезде подобен был еси, отче Ярославе, егда враг рода человеческаго веру Христову восхоте истребити в земли Российстей. Ты бо инокиням обители и всем к тебе приходящим был еси пастырь добрый, в вере их укрепляя, в скорбех утешая и путь к Горнему Иерусалиму показуя. Темже и ныне на Небесех сияеши славою неизреченною и купно с лики страдальцев и мучеников Свято-Екатерининския пустыни воспеваеши Богу хвалебную песнь: Аллилуиа.

Икос 5
Видев враг спасения рода человеческаго богоугодное житие сестер Свято-Екатерининския обители, гонение воздвиже на всех труждающихся и подвизающихся в ней. Приидоша бо во обитель нечестивии людие, храмы разориша и Богом врученное тебе, отче Ярославе, стадо разгнаша. Темже призва тя Господь на новое служение во храме святых мучеников Флора и Лавра веси Ямския. Сего ради с любовию возглашаем ти таковая:
Радуйся, звездо, тьму нечестия просвещающая;
Радуйся, света Христова носителю.
Радуйся, ревностию по Бозе чад своих духовных воспламенивый;
Радуйся, отечество свое любити их научивый.
Радуйся, поборниче веры непоколебимый;
Радуйся, правды служителю нелицеприятный.
Радуйся, на подвиг стояния за веру вдохновителю;
Радуйся, гонимых правды ради утешителю.
Радуйся, малодушных твердый ободрителю;
Радуйся, мира и незлобия учителю.
Радуйся, служением своим многих страждущих чад Божиих утешивый;
Радуйся, к подвигу духовному всех верных призывавый.
Радуйся, священномучениче Ярославе, земли нашея новое светило и украшение.

Кондак 6
Проповедник учения Христова воистину явился еси, отче Ярославе, якоже бо древле во времена гонений на христианы, веру православную в сердцах верных укреплял еси, да вси единем сердцем и едиными усты воспевают Подвигоположнику нашему и Спасителю победную песнь: Аллилуиа.

Икос 6
Возсиял еси в душах многих людей православных свет благодатнаго утешения, егда обретоша в тебе, священномучениче Ярославе, богомудраго и добраго отца всем страждущим, уничиженным и гонимым от безбожных. Сего ради благодарственно воспеваем тебе таковая:
Радуйся, возвещати истину пред гонителями веры не убоявыйся;
Радуйся, в годы лихолетия молитвы верных к Богу приносивый.
Радуйся, страже неусыпный, от волков хищных стадо свое словесное охранявый;
Радуйся, в житии твоем многими богоугодными делы Богу послуживый.
Радуйся, чад Церкве Христовы в вере утвердивый;
Радуйся, в скорбех и бедах долготерпению их научивый.
Радуйся, скорый помощниче всем за веру истинную гонимым;
Радуйся, любве и сострадания к людем преисполненный.
Радуйся, пастырю, благовествуяй нам глаголы жизни;
Радуйся, яко к вере истинней многих направил еси.
Радуйся, чадом твоим духовным благий советник бывый;
Радуйся, к венцем исповедническим их приуготовивый.
Радуйся, священномучениче Ярославе, земли нашея новое светило и украшение.

Кондак 7
Хотяй всем человеком спастися, премилосердый Господь, посла во храм святых мучеников Флора и Лавра пастыря добраго, душу свою за паству полагающаго, да вси с верою молящиися и приходящии в храм сей, приимут помощь крепкую и радостно из глубины сердец сокрушенных воспоют благих Подателю Богу: Аллилуиа.

Икос 7
Новаго тя молитвенника, заступника и помощника в бедах стяжаша людие веси Ямския: ты бо во многи домы верных: приходил еси, болящих ободряя, всех в скорбех и печалех сущих утешая, усопших в жизнь вечную провожая. Сего ради и мы, прибегая к твоему заступлению, усердно молим тя и воспеваем сице:
Радуйся веси Ямския Богом данный покровителю;
Радуйся, земли Московския благословение.
Радуйся, в храме святых мучеников Флора и Лавра Богу и людем послуживый;
Радуйся, всем служащим в храме сем помощниче благодатный.
Радуйся, души верных благодатию напитавый;
Радуйся, мзды и воздаяний за труды своя от человек не искавый.
Радуйся, яко нам грешным образ добродетелей житием своим явивый;
Радуйся, Господу своему до конца послуживый.
Радуйся, пред чудотворною Иерусалимскою иконою Божия Матере о чадех своих духовных моления возносивый;
Радуйся, столпе Православия непоколебимый.
Радуйся, нищих защитителю и обидимых предстателю;
Радуйся, яко и ныне всех с верою к тебе приходящих милостивый утешителю.
Радуйся, священномучениче Ярославе, земли нашея новое светило и украшение.

Кондак 8
Странника и пришельца в мире сем себе помышляя, отче священномучениче Ярославе, во дни гонений на Церковь Божию яве без страха проповедовал еси Христа, силою любве твоея и словом мудрости многих в вере истинней укрепляя и наставляя ко спасению, да вси чада твоя духовная видяще ревность твою о славе Божией вопиют Ему: Аллилуиа.

Икос 8
Весь исполнь любве к Богу и к людем, страстотерпче Христов, раздавал еси достояние свое нищим, сирым, вдовицам и всем в нужде сущим, непрестанно памятуя, яко расточив богатство земное, собереши на Небеси богатство нетленное. Мы же, научаемии тобою такожде творити, вопием ти сице:
Радуйся, ближних своих любовию Христовою возлюбивый;
Радуйся, и нас любити ближних наставляяй.
Радуйся, к неимущим и вдовам сострадание имевый;
Радуйся, заповедь Господню о милосердии исполнивый.
Радуйся, требующим помощи добрый попечителю;
Радуйся, сердец скорбящих утешителю.
Радуйся, отче благосердый, о спасении многих ревновавый;
Радуйся, и нас ревновати о своем спасении призываяй.
Радуйся, милостыни подателю предивный;
Радуйся, безсребрениче всехвальный.
Радуйся, образ жития праведнаго нам показавый;
Радуйся, и нас исполняти заповеди Господни научаяй.
Радуйся, священномучениче Ярославе, земли нашея новое светило и украшение.

Кондак 9
Всякое естество ангельское удивися, зряще мужество твое, кротость и упование на силу Божию, егда приведоша тя на судилище нечестивии слуги миродержителя тьмы века сего. Ты же, отче Ярославе, не убоялся еси мучений и на совете их неправеднем веру истинную исповедал еси и смерть за Христа приобретением почитая, взывал еси укрепившему тя Богу: Аллилуиа.

Икос 9
Ветия многовещанныя не возмогут изрещи тебе достойныя хвалы, отче Ярославе, ты бо жизнь свою за Христа и Церковь Божию отдал еси. Егда бо на смерть осудиша тя беззаконнии мучители, с радостию предал еси душу твою Богу и воспарил еси во обители Небесныя. Темже поминающе подвиг веры твоея, ублажаем тя, страстотерпче Божий, тако:
Радуйся, темничное заточение Христа ради претерпевый;
Радуйся, Сыном Божиим на подвиг страдальческий укрепленный.
Радуйся, неправедному судищу дерзновенно представый;
Радуйся, служителем Христа Бога себе исповедавый.
Радуйся, угроз мучителей не устрашивыйся;
Радуйся, советом нечестивых не покоривыйся.
Радуйся, пред враги веры Христовы мужество истинное показавый;
Радуйся, яко вся обвинения мучителей отвергл еси.
Радуйся, кровию своею торжество веры православныя утвердивый;
Радуйся, в руце Господа душу свою праведную предавый.
Радуйся, яко тобою сатана посрамися;
Радуйся, яко тобою Христос Бог прославися.
Радуйся, священномучениче Ярославе, земли нашея новое светило и украшение.

Кондак 10
Спасти хотяй людей российских от погибели, дарова Человеколюбец Господь нам земным в помощь, покров и защиту сонм новомучеников и исповедников Российских, к немуже Промыслом Божиим и ты, отче Ярославе, причислен был еси. Темже ублажающе святую память твою, поем Богу, прославляющему святых Своих: Аллилуиа.

Икос 10
Стена твердая был еси православным людем российским противу врагов веры Христовы видимых и невидимых. И ныне, угодниче Божий Ярославе, молитвами твоими противящихся истине обрати к покаянию, волны неверия и лжеучений отврати от нас, весь Ямскую и всю землю нашу сохрани от всяких бед и напастей, да зовем ти сице:
Радуйся, веру, надежду и любовь до конца сохранивый;
Радуйся, подвигом твоим христиан в вере утвердивый.
Радуйся, яко Ангелы тя радостно сретоша;
Радуйся, венец правды от руки Господа приявый.
Радуйся, яко тобою лик мученический приумножися;
Радуйся яко во всей Церкви Русстей имя твое ныне прославляется.
Радуйся, яко о тебе вси вернии прославиша Отца Небеснаго;
Радуйся, яко и нас хладных подвигом любве твоея возгреваеши.
Радуйся, призывающим тя скорый помощниче;
Радуйся, и по смерти чад твоих духовных не оставивый.
Радуйся, пред Престолом Господним неусыпный наш молитвенниче;
Радуйся, в день судный крепкий наш защитниче.
Радуйся, священномучениче Ярославе, земли нашея новое светило и украшение.

Кондак 11
Пение молебное пред иконою твоею приносимое милостивно услыши, священномучениче Христов Ярославе, и буди присный за ны ко Господу молитвенник, возбуди нас от сна греховнаго и направи к покаянию, да о тебе радующеся и Бога славяще воспоем Ему песнь: Аллилуиа.

Икос 11
Светильника добродетелей видеша тя вси вернии, милостиве отче наш Ярославе, яко исполнил еси заповедь Господню: «Больши сея любве никтоже имать, да кто душу свою положит за други своя», и преселился еси в Царствие Небесное. Темже и мы колена сердец наших преклоняем и усердная моления о просвещении и спасении душ наших возсылаем, зовуще ти с любовию таковая:
Радуйся, звездо пресветлая в лице новомучеников и исповедников Российских;
Радуйся, неувядаемый цвете земли нашея.
Радуйся, светильниче, любовию к ближним горящий;
Радуйся, светом вечности на Небеси осиянный.
Радуйся, терпящим поношение и муки за Христа сострадателю;
Радуйся, вшедый в радость Господа своего.
Радуйся, с мученики и всеми святыми ликовствуяй;
Радуйся, яко память твою вся Церковь светло торжествует.
Радуйся, яко молитвою пред иконою твоею приемлем душевное утешение;
Радуйся, яко сердца наша исполняются благодатнаго сокрушения.
Радуйся, сосуде Божия благодати;
Радуйся, светлым покровом молитвы твоея и ныне нас озаряяй;
Радуйся, священномучениче Ярославе, земли нашея новое светило и украшение

Кондак 12
Благодать Божию приял еси, преславне отче Ярославе, яко при жизни твоей помощник и утешитель был еси приходящим к тебе чадом Божиим, тако и по кончине своей страдальчестей возсиял еси. яко страстотерпец и молитвенник наш пред Богом, да вси живущии в земли нашей взывают о тебе благодарно Богу: Аллилуиа.

Икос 12
Поюще твое славное стояние за веру истинную, ублажаем мученическую твою кончину, отче священномучениче Ярославе, еюже на земли и на Небеси прославился еси. Веруем, яко и нас грешных ныне не оставляеши и духом с нами пребываеши. Темже от сердец умиленных приносим ти похвалы сия:
Радуйся, обители Рождество-Богородицкия Гродненския святый покровителю;
Радуйся, о сестрах ея усердный молитвенниче.
Радуйся, Свято-Екатерининския пустыни верный заступниче;
Радуйся, в ней обитающих хранителю.
Радуйся, яко обители сия, от безбожных разоренныя, молитвами твоими возродишася;
Радуйся, яко всем почитающим в них святую память твою полезная даруеши.
Радуйся, весь Ямскую молитвами твоими освятивый;
Радуйся, яко молитвами твоими храм во имя святых мучеников Флора и Лавра в ней обновляется.
Радуйся, яко в прославлении твоем народи Белыя и Великия Руси духовно соединяются;
Радуйся, яко вспоминая подвиг твой вся земля Русская веселится.
Радуйся, любящих и почитающих тя пред Богом ходатаю;
Радуйся, покрове всех песнословящих тя.
Радуйся, священномучениче Ярославе, земли нашея новое светило и украшение.

Кондак 13
О предивный угодниче Христов, священномучениче Ярославе, услыши нас, грешных чад твоих; приими сие малое приношение наше и молитвами твоими испроси у Всемилостиваго Бога, да избавит нас от всяких бед и напастей, от враг видимых и невидимых, от напрасныя смерти и от будущих мук, и сподобит Своего Небеснаго Царствия, идеже вси святии воспевают Богу радостную песнь: Аллилуиа, Аллилуиа, Аллилуиа.
Этот Кондак читается трижды, затем Икос 1 и Кондак 1

Молитва священномученику Ярославу Ямскому (Савицкому)
О святый страстотерпче священномучениче Ярославе, ты от юности Христа возлюбил еси и по благодати Его священство восприяв, яко светильник веры и благочестия просиял еси! В годину искушений, внегда обышедше обыдоша страну нашу врази веры Христовы, яви тя Господь пастыря добраго, душу свою за чад Божиих положивша. Ныне убо призри на ны, приими от нас усердныя молитвы и вознеси я ко престолу Святыя Троицы, идеже ты в лице святых новомучеников и исповедников Российских предстоиши, яко да твоим ходатайством утвердит Господь страну нашу, да укрепит дух веры и благочестия в людех православных, в пастырех Церкви да утвердит ревность в служении Богу и ближним и да призрит милостивым оком на нас, предстоящих и прибегающих к твоей помощи. Испроси убо у Всемилостиваго Господа мира умирение, земли плодоносие, от глада и пагубы избавление, скорбящим утешение, недугующим исцеление, падшим возставление, заблуждающимся на путь истины возвращение, подвизающимся в делех благих укрепление, сирым, неимущим, убогим и бездомным помощь и заступление.
Споспешествуй, священномучениче Ярославе, святыми твоими молитвами настоятелю и братии святаго храма, идеже ты совершал еси служение свое во времена лютых гонений на веру православную, просвети умы и сердца наша светом Божественнаго учения, научи во еже Бога и ближняго нашего любити и заповеди Господни соблюдати, да не по имени токмо, но всем житием нашим чада Божия явимся. Не забуди, отче Ярославе, обители святыя Гродненскую Рождество-Богородицкую и Свято-Екатерининскую, но соблюди от всякаго зла всех живущих и подвизающихся в них и на поклонение в них приходящих. Осени всех нас небесным твоим благословением и в скорбех, болезнех утешение, избавление и исцеление нам подаждь, да возблагодарим прославившаго тя Господа нашего Иисуса Христа, Емуже подобает всякая слава, честь и поклонение со Безначальным Отцем и Пресвятым Духом во веки веков. Аминь.

Тропарь священномученику Ярославу Ямскому (Савицкому), глас 4
Приспе день светлаго торжества, / весь Ямская радуется, / и вси чада вернии Церкве Христовы духовно торжествуют, / восхваляюще заступника и молитвенника нашего пред Богом / священномученика Ярослава, / пастыря добраго, душу свою за веру Христову положившаго. / Темже молим тя, / от всяких бед и зол избави нас // чтущих святую память твою.

Кондак, глас 2
Яко страстотерпца и служителя Христова, / Церковь Русская преславно почитает тя, отче Ярославе, / ты бо жизнь твою страданьми за веру истинную увенчав, / преселился еси в Небесныя обители , / идеже предстоя Троице Святей, / не престай молитися о чадех своих, / сохраняй нас любовию тебе поющих: //
Радуйся, заступниче и молитвенниче земли нашея.[/spoiler]