Молитвослов

Автор Раб божий Константин, марта 10, 2012, 02:13:14

« назад - далее »

Раб божий Константин

Молитва, если все благополучно
[spoiler]Псалом Давида, 121


Возвеселихся о рекших мне: в дом Господень пойдем. Стояще бяху ноги нашя во дворех Твоих, Иерусалиме. Иерусалим зиждемый яко град, емуже причастие его вкупе. Тамо бо взыдоша колена, колена Господня, свидение Израилево, исповедатися имени Господню, яко тамо седоша престоли на суд, престоли в дому Давидове. Вопросите же яже о мире Иерусалима: и обилие любящым Тя. Буди же мир в силе твоей и обилие в столпостенах твоих. Ради братий моих и ближних моих глаголах убо мир о тебе. Дому ради Господа Бога нашего взысках благая тебе.[/spoiler]

Раб божий Константин

Молитвы, если дела идут плохо
[spoiler]Псалом 37


Господи, да не яростию Твоею обличиши мене, ниже гневом Твоим накажеши мене. Яко стрелы Твоя унзоша во мне, и утвердил еси на мне руку Твою. Несть исцеления в плоти моей от лица гнева Твоего, несть мира в костех моих от лица грех моих. Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего. Пострадах и слякохся до конца, весь день сетуя хождах. Яко лядвия моя наполнишася поруганий и несть исцеления в плоти моей. Озлоблен бых и смирихся до зела, рыках от воздыхания сердца моего. Господи, пред Тобою все желание мое и воздыхание мое от Тебе не утаися. Сердце мое смятеся, остави мя сила моя, и свет очию моею, и той несть со мною. Друзи мои и искреннии мои прямо мне приближишася и сташа, и ближнии мои отдалече мене сташа и нуждахуся ищущии душу мою, и ищущи злая мне глаголаху суетная и льстивным весь день поучахуся. Аз же яко глух не слышах и яко нем не отверзаяй уст своих. И бых яко человек не слышай и не имый во устех своих обличения. Яко на Тя, Господи, уповах, Ты услышиши, Господи Боже мой. Яко рех: да не когда порадуют ми ся врази мои: и внегда подвижатися ногам моим, на мя велеречеваша. Яко аз на раны готов, и болезнь моя предо мною есть выну. Яко беззаконие мое аз возвещу и попекуся о гресе моем. Врази же мои живут и укрепишася паче мене, и умножашася ненавидящия мя без правды. Воздающии ми злая воз благая оболгаху мя, зане гонях благостыню. Не остави мене, Господи Боже мой, зане гонях благостыню. Не остави мене, Господи Боже мой, не отступи от мене. Вонми в помощь мою, Господи спасения моего.[/spoiler]

Раб божий Константин

Молитва, если чувствуешь себя одиноким или боязливым

[spoiler]Псалом 103


Благослови, душе моя, Господа, Господи Боже мой, возвеличился еси зело, во исповедание и в велелепоту облеклся еси. Одеяйся светом яко ризою, простираяй небо яко кожу. Покрываяй водами превыспренняя своя, полагаяй облаки на восхождение свое, ходяй на крилу ветреню. Творяй Ангелы Своя духи, и слуги Своя пламень огненный. Основаяй землю на тверди ея, не преклонится в век века. Бездна яко риза одеяние ея, на горах станут воды, от запрещения Твоего побегнут, от гласа грома Твоего убоятся. Восходят горы, и нисходят поля, в место еже основал еси им. Предел положил еси, егоже не прейдут, ниже обратятся покрыти землю. Посылаяй источники в дебрех, посреде гор пройдут воды. Напаяют вся звери сельныя, ждут онагри в жажду свою. На тых птицы небесныя привитают, от среды камения дадят глас. Напаяяй горы от превыспренних Своих, от плода дел Твоих насытится земля. Прозябаяй траву скотом, и злак на службу человеком, извести хлеб от земли. И вино веселит сердце человека, умастит лице елеем, и хлеб сердце человека укрепит. Насытятся древа Польская, кедри Ливанстии, ихже еси насадил. Тамо птицы возгнездятся, еродиево жилище предводительствует ими. Горы высокие еленем, камень прибежище заяцем. Сотворил есть луну во времена, солнце позна запад свой. Положил еси тму, и бысть нощь, в нейже пройдут вси зверие дубравнии. Скимни рыкающии восхитити, и взыскати от Бога пищу себе. Возсия солнце, и собрашеся, и в ложах своих лягут. Изыдет человек на дело свое, и на делание свое до вечера. Яко возвеличишася дела Твоя, Господи, вся премудростию сотворил еси, исполнися земля твари Твоея. Сие море великое и пространное, тамо гади, ихже несть числа, животная малая с великими, тамо корабли преплавают, змий сей, его создал еси ругатися ему. Вся к Тебе чают, дати пищу им во благо время. Давшу Тебе им, соберут, отверзши Тебе руку, всяческая исполнятся благости, отвращшу же Тебе лице, возмятутся, отьимеши дух их, и исчезнут, и в персть свою возвратятся. Послеши Духа Твоего, и созиждутся, и обновиши лице земли. Буди слава Господня во веки, возвеселится Господь о делех Своих, призираяй на землю, и творяй ю трястися, прикасайяся горам, и дымятся. Воспою Господеви в животе моем, пою Богу моему, дондеже есмь, да усладится ему беседа моя, аз же возвеселюся о Господе. Да исчезнут грешницы от земли, и беззаконицы якоже не быти им. Благослови, душе моя, Господа.[/spoiler]

Раб божий Константин

Молитвы, если одолевает тоска

[spoiler]Враже, приложение твое на главу тою, Божия Матерь, помоги мне.



Песнь Пресвятой Богородице


Богородице Дево, радуйся, Благодатная Марие, Господь с Тобою; благословенна Ты в женах и благословен плод чрева Твоего, яко Спаса родила еси душ наших. (Читать 40 раз).


Псалом 23


Господня земля, и исполнение ея, вселенная и вси живущии на ней. Той на морях основал ю есть, и на реках уготовал ю есть. Кто взыдет на гору Господню? Или кто станет на месте святем Его? Неповинен рукама и чист сердцем, иже не прият всуе душу свою, и не клятся лестию искреннему своему. Сей приимет благословение от Господа, и милостыню от Бога, Спаса своего. Сей род ищущих Господа, ищущих лице Бога Иаковля. Возмите врата князи ваша, и возмитеся врата вечная, и внидет Царь славы. Кто есть сей Царь славы? Господь крепок и силен, Господь силен в брани. Возьмите врата князи ваша, и возмитеся врата вечная, и внидет Царь славы. Кто есть сей Царь славы? Господь сил, Той есть Царь славы.


Псалом 27


К Тебе, Господи, воззову, Боже мой, да не премолчиши от мене, да не когда премолчиши от мене: и уподоблюся низходящым в ров. Услыши, Господи, глас моления моего, внегда молити ми ся к Тебе, внегда воздети ми руце мои к храму святому Твоему. Не привлецы мене со грешники и с делающими неправду не погуби мене, глаголющими мир с ближними своими, злая же в сердцах своих. Даждь им, Господи, по делом их, и по лукавству начинаний их: по делом руку их даждь им: воздаждь воздаяние их им. Яко не разумеша в дела Господня и в дела руку Его: разориши я, и не созиждеши я. Благословен Господь, яко услыша глас моления моего. Господь Помощник мой, и Защититель мой: на Него упова сердце мое, и поможе ми, и процвете плоть моя, и волею моею исповемся Ему. Господь утверждение людей Своих, и Защититель спасений христа Своего есть. Спаси люди Твоя и благослови достояние Твое, и упаси я, и возми я до века.[/spoiler]

Раб божий Константин

Молитвы в гонениях за веру

[spoiler]Молитва за неверующих, гонителей и презрителей веры


Господи, обрати к Тебе сердца врагов наших и если уже невозможно ожесточенным обратиться, то положи преграду зла их и защити от них избранных Твоих.


--------------------------------------------------------------------------------


Молитва свт. Тихона Московского


Милосердный Господи, Боже сил! Из глубины душевныя смиренно вопием Ти: силою Креста Твоего смири дерзость ненавидящих и хулящих имя Твое святое, оскверняющих и разрушающих святыню храмов Твоих и люте гонящих верных чад святыя Церкви Твоея. Всем страждущим и изнемогающим за исповедание веры во имя Твое посли ангелов Твоих святых, да укрепляются верные люди Твои в несении благого ига Твоего ангельским покровом и предстательством Пресвятыя Богородицы и всех святых Твоих. Многомилостивый Господи! Болезненным сердцем, со слезами молимся Тебе: призри на вопль, стенание и умиленные молитвы всех верных людей, от нападения врагов Твоих, Господи, страждущих, святыни храмов Твоих и благодати святых Таинств Твоих лишенных. Умилостивися, Господи, над младенцы, светом святаго крещения неозаренныя и печатию дара Духа Святаго незапечатленныя. Пощади, Господи, отроки, юноши и девы, соблазняемые ненавистниками имени Твоего на всякое неверие, нечестие, богохульство, распутное житие, зависть и злобу к ближнему своему. Умилосердись, Господи, на старцы и болящия, лишенныя в предсмертный час благодатного утешения в елеопомазании и причастии Святых Таин Твоих и нечающия христианскаго погребения. Огради, Господи, монашествующих лик, из святых обителей изгнанных и поношения терпящих. Наипаче же утверди, Господи, крепостию Духа Твоего священники Твоя, дабы небоязненно, даже до смерти, во единении стояли на страже стада Твоею. Всех же, Тебе ради принявших мученическую кончину, сподоби со святыми Твоими в вечной славе Твоей царствовати. На Кресте моливыйся за распинателей Твоих и приемый в последний час разбойничье покаяние, не погуби, о Господи, отступников, хулителей и гонителей святыя веры и святыя Церкви Твоея, но аще возможно сие, даруй и им радость познати Тя, Божественную Любовь и Премудрость, и дни свои в истинном покаянии скончати. На Тя, Господи, уповаем и не постыдимся во век, Ты бо еси Заступниче наш, помощь и победа, победившая мир, Свет паче всякаго света, Радость паче всякий радости, Упование паче всякаго упования, Жизнь истинная и спасение вечное, и Тебе, в Троице покланяемому, славу вси возсылаем, ныне и присно и во веки веков. Аминь.


--------------------------------------------------------------------------------


Псалом 26


Господь просвещение мое и Спаситель мой, кого убоюся? Господь Защититель живота моего, от кого устрашуся? Внегда приближатися на мя злобующым еже снести плоти моя, оскорбляющии мя, и врази мои, тии изнемогоша и падоша. Аще ополчится на мя полк, не убоится сердце мое, аще восстанет на мя брань, на Него аз уповаю. Едино просих от Господа, то взыщу: еже жити ми в дому Господни вся дни живота моего, зрети ми красоту Господню и посещати храм святый Его. Яко скры мя в селении Своем в день зол моих, покры мя в тайне селения Своего, на камень вознесе мя. И ныне се вознеси главу мою, на враги моя: обыдох и пожрох в селении Его жертву хваления и воскликновения, пою и воспою Господеви. Услыши, Господи, глас мой, имже воззвах: помилуй мя и услыши мя. Тебе рече сердце мое, Господа взыщу. Взыска Тебе лице мое, лица Твоего, Господи, взыщу. Не отврати лица Твоего от мене и не уклонися гневом от раба Твоего: помощник мой буди, не отрини мене, и не остави мене, Боже Спасителю мой. Яко отец мой и мати моя остависта мя, Господь же восприят мя. Законоположи ми, Господи, в пути Твоем и настави мя на стезю правую враг моих ради. Не предаждь мене в душы стужающих ми, яко восташа на мя свидетеле неправеднии и солга неправда себе. Верую видети благая Господня на земли живых. Потерпи Господа, мужайся и да крепится сердце Твое, и потерпи Господа.


--------------------------------------------------------------------------------


Псалом 58


Изми мя от враг моих, Боже, и от востающих на мя избави мя. Избави мя от делающих беззаконие и от муж кровей спаси мя. Яко се уловиша душу мою, нападоша на мя крепцыи, ниже беззаконие мое, ниже грех мой, Господи. Без беззакония текох и исправих, востани в сретение мое и виждь. И ты, Господи Боже сил, Боже Израилев, вонми посетити вся языки, да не ущедриши вся делающыя беззаконие. Возвратятся на вечер и взалчут, яко пес, и обыдут град. Се тии отвещают усты своими, и меч во устнах их, яко кто слыша? И Ты, Господи, посмеешися им, уничижиши вся языки. Державу мою к Тебе сохраню, яко Ты, Боже, Заступник мой еси. Бог мой, милость Его предварит мя, Бог мой, явит мне на вразех моих. Не убий их, да не когда забудут закон Твой, расточи я силою Твоею и низведи я, Защитниче мой, Господи. Грех уст их, слово устен их, и яти да будут в гордыни своей, и от клятвы и лжи возвестятся в кончине. Во гневе кончины, и не будут и уведят, яко Бог владычествует Иаковом и концы земли. Возвратятся на вечер, и взалчут, яко пес, и обыдут град. Тии разыдутся ясти. Аще ли же не насытятся, и поропщут. Аз же воспою силу Твою и возрадуюся заутра о милости Твоей, яко был еси Заступник мой и Прибежище мое в день скорби моея. Помощник мой еси, Тебе пою: яко Бог Заступник мой еси, Боже мой, милость моя.[/spoiler]

Раб божий Константин

Молитва к Пресвятой Богородице за духовного отца
[spoiler]О Пресвятая Владычице моя, Дево Богородице, Царице Небесе и земли, вонми вопиющей души моей и приими грешную мольбу мою, Пречистая Матерь Божия, за отца моего духовнаго, скорбящаго раба Твоего (имя). Буди ему всегда спутницей, и на всякое время сопровождай и ограждай его святыми Ангелами. Укрепляй его бодрствующаго, оберегай его спящаго, утешай его плачущаго, ободряй его унывающаго, избавляй от скорбей, освобождай от клеветы, воздвизай немощнаго, побеждай воюющих против него бесов и в смертной опасности помогай ему. Ежедневно являй его страшным для видимых и невидимых врагов, чтобы они знали, что он Твой раб, Богоматерь, родившая Бога и Царя, Которому подобает честь и поклонение во веки веков. Матерь Божия, умягчи сердца злых человек, возстающих на него. Ты видишь труды и скорби отца моего, его скорби Тебе единой известны. Ты ведаешь все тайны души его, воззри милостиво на него с небеси, облегчи его страдания, покрый его покровом Своим, посети его Своею небесною милостию, посли благословение на дела его и дай ему невидимую помощь. И святыми его молитвами дай мне смирение, самоукорение, терпение, кротость, целомудрие, молчание и покрый меня от всех напастей и врагов видимых и невидимых.[/spoiler]

Раб божий Константин

Молитвы за родных и ближних
[spoiler]Молитва за родных


Спаси, Господи, и помилуй родители моя (имена), братию и сестры, и сродники моя по плоти, и вся ближния рода моего, и други, и даруй им мирная Твоя и премирная благая. Родители моя, братию, сестры, жену, чада и вся ближняя рода моего во здравии и долгоденствии соблюди. Избави их от всякой скорби и нужды, даруй им изобилие плодов земных и во всех благих начинаниях помощник им буди. К ним же и мене во время свое благополучна возврати, да радующеся милостем Твоим, всегда благословим всесвятое имя Твое, Отца, и Сына, и Святаго Духа.


--------------------------------------------------------------------------------


Молитвы за ближних


Господи, благослови меня принести молитвы и моления Твоему Благоутробию о моем ничтожестве и о всех моих родных и знаемых как здравствующих, так и почивших, за коих Ты умер на кресте.


--------------------------------------------------------------------------------


МОЛИТВЫ КО ГОСПОДУ



Молитва первая


Господи Боже наш, помяни нас, грешных и непотребных раб Твоих (имена), внегда призывати нам святое имя Твое, и не посрами нас от чаяния милости Твоея, но даруй нам, Господи, вся яже ко спасению прошения, и сподоби нас любити, и боятися Тебе от всего сердца нашего, и творити во всех волю Твою. Яко Благ и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков. Аминь.


Молитва вторая


Владыко Господи! Твой есть день и Твоя есть нощь. Тебе вся тварь работает, и всякое дыхание славит Тя; мы же, окаянныя рабы Твоя (имена), все житие наше скончав блудно, страхом одержимы есмы, яко помянухом дни первыя, и доныне, в няже вся безместная сотворихом злая; и того ради не имамы к Тебе дерзновения, яко беззакония наша велика, и безмерни греси наша, врази же всегда стужают нам. Но, Господи наш, Господи, отверзый устне немому, и наша уста отверзи, да глаголем в молитве угодная Тебе; се бо, души наша яко земля безводная и не могут приносити о себе плода, но даждь нам от Семене Святаго Твоего Духа и напой нас росою благодати Твоея, да принесем Тебе плод покаяния. Господи Иисусе Христе, хотяй всем человеком спастися, услыши молитву нашу, молитвами святых апостол Твоих, яко тии молятся за ны, и теми у Тебе просим прощения, яко тех молитвы присно послушаеши; молением их спаси нас, грешных, исцели болезни сердец наших, уврачуй струпы душ наших, разжзи утробы наша пламенем страха Твоего, да пояст терние грехов наших, и души наша любовию прохлади, к Тебе бо желаем, Истинному Свету и Подателю Света, у Тебе Единаго просим милости, спаси ны: насыти алчущия и напой жаждущия души наша от потока безчисленнаго милосердия Твоего: покрый нас благодатию Твоего человеколюбия от всякаго зла, да Тобою храними, избавимся многих сетей лукаваго, по вся дни на нас пропинаемых, и да не похвалятся врази наши о нас, рабах Твоих, уповающих на Тя. Спаси нас по милости Твоей, да воздадим обеты наша, до последняго издыхания каяйся о своих согрешениих, и прославим пресвятое имя Твое, со Отцем и Святым Духом, ныне и присно и во веки веков. Аминь.


Молитва третья


Господи Иисусе Христе, Единородный Сыне, Сый в недре Отчи Истинный Боже, Источниче жизни и безсмертия, Добрый Пастырю Своих словесных овец, не предаждь нас, грешных рабов Своих (имена), в радость поругания врагом, покаяния праваго пути ищущих. Укрепи ны, Милостиво, сильною Твоею десницею. Без Твоея бо помощи не можем ничтоже о себе творити; спящих нас соблюди, в пути ходящих сохрани, от напасти заступи, от враг спаси, от похотей плотских удали; радости спасения насыти сердца наши, плоть нашу в чистоте соблюди, мысли наши Своим милосердием огради. Ты управи, Господи, и утверди нас, яко истинных Своих угодников, вся дни Тебе работати и хвалитися величеством в Твоей милости, и радоватися нам подаждь. Ты бо еси Бог наш, и мы раби Твои, разве бо Тебе иного Бога не вемы. Яко Милостив еси и Человеколюбец, и Тебе славу возсылаем, со Отцем и Святым Духом, ныне и присно и во веки веков. Аминь.


Молитва четвертая


Не вниди с рабами Твоими (имена) в суд, Христе, вемы бо осуждающыя нас грехи, и Тебе взываем: молитвами Рождшия Тя помилуй нас, смиренных и недостойных, яко разбойника и блудницу, мытаря и блуднаго, Человеколюбче, не бо праведныя пришел спасти, но паче грешныя.


Молитва пятая


Господи! Не остави нас, Тебя оставляющих ежеминутно! Не отрини нас, Тебе изменяющих непрестанно! Помоги нам, рабам Твоим (имена), тьмами грехов и напастей омраченным! Восприими в Твою любовь, милость и попечение!


--------------------------------------------------------------------------------


Молитва к Пресвятой Богородице


О Пресвятая Дево, Мати Господа Вышняго, Всемилостивая Заступнице и Покровительнице всех к Тебе с верою прибегающих! Призри с высоты небесныя славы Своея на рабов Божиих (имена) и на нас, припадающих ко подножию Твоему, услыши смиренную молитву нас, грешных и недостойных рабов Твоих, и принеси ю пред возлюбленнаго Сына Твоего. О, Преблагословенная Богородице! Ты, именуемая Скоропослушнице и всех скорбящих Радосте, услыши и нас, скорбных; Ты, именуемая Утоление печали, утоли и наши душевные болезни и печали; Ты, Купино Неопалимая, сохрани мир и всех нас от вредоносных огненных стрел вражиих; Ты, Взыскание погибших, не попусти нас погибнути в бездне грехов наших; Ты, Целительнице страждущих, исцели и нас, уязвленных от немощей душевных и телесных; Ты, Нечаянная Радосте, радостию спасения Твоего отъемли от нас страх грядущаго мучения; Ты, Споручнице грешных, буди и нам, грешным, Благосердою Споручницею покаяния и спасения нашего. На Тебе по Бозе все наше упование возлагаем, буди нам выну Неусыпная Ходатаица и Всесильная Предстательница пред Сыном Твоим, Господом нашим Иисусом Христом; укрепи в нас веру в Него, утверди в любви Его, научи нас любити и славити и Тебя, Пресвятую Матерь Божию, Преблагословенную Марию; Вседержавному Покрову Твоему, Богородице, вручаем себе на вся веки. Аминь.[/spoiler]

Раб божий Константин

Молитва за чревоугодника
[spoiler]Господи, сладчайшее брашно наше, никогдаже гиблющее, но пребывающее в живот вечный! Очисти раба Твоего (имярек) от скверны чревообъядения, чуждой Духа Твоего, и даруй ему познати сладость Твоего Животворящего духовного брашна, еже есть Плоть и Кровь Твоя и Святое живое и действенное Слово Твое.[/spoiler]

Раб божий Константин

Молитва идущим в лес
[spoiler]Молитва всем святым и бесплотным небесным силам


Боже святый и во святых почиваяй, трисвятым гласом на небеси от Ангел воспеваемый, на земли от человек во святых Своих хвалимый: давый Святым Твоим Духом комуждо благодать по мере дарования Христова, и тою поставивый Церкви Твоей святей овы Апостолы, овы пророки, овы же благовестники, овы пастыри и учители, их же словом проповеди. Тебе Самому действующему вся во всех, мнози совершишася святии в коемждо роде и роде, различными добродетельми благоугодившии Тебе, и к Тебе нам образ добрых подвигов своих оставивше, в радости прешедшии, готови, в нем же сами искушени быша, и нам напаствуемым помогати. Сих святых всех воспоминая и их богоугодное похваляя житие, Тебе Самаго, в них действовавшаго, восхваляю, и онех благотворения Твоя дарования быти веруя, прилежно молю Тя, Святе святых, даждь ми грешному последовати их учению, паче те Твоею вседействующею благодатию, небесныя с ними сподобитися славы, хваляще пресвятое имя Твое, Отца и Сына и Святаго духа во веки. Аминь.[/spoiler]

Раб божий Константин

Молитва "Иже на всякое время"
[spoiler]Иже на всякое время и на всякий час, на небеси и на земли покланяемый и славимый, Христе Боже, долготерпеливе, многомилостиве, многоблагоутробне: иже праведныя любяй и грешныя милуяй иже вся зовый ко спасению обещания ради будущих благ. Сам, Господи, приими и наша в час сей молитвы, и исправи живот наш к заповедем Твоим; души наша освяти, телеса очисти, помышления исправи, мысли очисти; и избави нас от всякия скорби, зол и болезней: огради нас святыми Твоими ангелы, да ополчением их соблюдаеми и наставляеми, достигнем в соединение веры, и в разум непреступныя Твоея славы: яко благословен еси во веки веков. Аминь.[/spoiler]

Раб божий Константин

Молитва от лица кающагося человека
[spoiler]Господи, согрешихом на Небо и пред Тобою! Приими обращение и покаяние наше, приими наше стенание и слезы, приими покаяние нас, грешных, приими рыдание и вопль наш даже до смерти. Приими нас, окаянных, живших безстудно; приими нас, Человеколюбче, зело прогневавших Тя; приими нас, Владыко, проведших всю жизнь в распутстве, во всяком лукавствии и нечистоте; приими нас, Господи Боже, преступивших заповеди Твоя; приими нас, Владыко, недостойных раб Твоих, и не воздай нам по делом рук наших. Исповедаем Тебе, Владыко, яко по грехом нашим несмы достойни даже и жизни; исповедаем, Господи, яко несмы достойни даже воззрети на солнце сие, зане несть таков грех, несть ни едино таково злодеяние, егоже не совершили быхом мы, окаяннии. Но приими нас, Господи, якоже блуднаго сына, приими якоже разбойника, приими якоже блудницу и мытаря. Господи, обрати нас! Господи, вразуми нас, и не прогневайся на нас, но буди милостив ко грехом нашим! Ты еси Бог наш, и разве Тебе иного не знаем. Господи, исторгни нас от враг наших и не вниди в суд с рабы Твоими. Господи, Ты еси Бог, и мы людие Твои. Согрешихом, содеяхом беззаконие и неправду, сотворихом зло, погрешихом во всем, не послушахом Заповедей Твоих, и того ради далече уклонихомся от Тебе. Но помилуй, Господи, дела рук Твоих; помилуй, Владыко, тыя, иже хитростию змия изгнани быша из Рая; помилуй нас и облецы нас в хитон веселия и одежду спасения; помилуй нас, ихже диавол лишил есть помощи Твоея! Милосерде, помилуй тыя, иже оставиша Тя и служаху ему; помилуй заблуждшия; помилуй не сохранивших Заповедей Твоих и последовавших злодеянием демонов; помилуй осквернивших себе грехми; помилуй тыя, иже пребываху под властию диавола; помилуй осквернившихся распутством. Помилуй, Милосерде; помилуй, Блаже; помилуй, Долготерпеливе, зане руки наша совершиша всякое зло, всякое осквернение, любостяжание и неправду. Осквернихом душу, юже создал еси по образу Твоему, осквернихом тело, осквернихом чувство. Язык наш явися якоже меч остр, направлен противу ближняго; очи наши исторгают пламень, руки наша полны крове; ноги наша скоры на совершение зла, уста наша осквернена злословием, и, кратко рещи, осквернихом и землю и воздух. Воистинну неправедная дела наша доидоша даже до Небесе, хищения наша превысиша горы, любостяжание превыси облаки, породы наши достигоша Небесе, греси наши суть непростительни, преступления наша не имут извинения, прегрешения наша суть неисправима, и се земля не может понести наших злодеяний. Темже, Господи, нужду имамы в милосердии Твоем. Ты веси немощь естества нашего; помилуй, Господи, творение рук Твоих. Се взываем к милосердию Твоему: не лиши нас помощи Твоея, низпосли нам, недостойным, милость Твою, даруй нам, грешным, заступление Твое, яви нам лице Твое, и спасемся.[/spoiler]

Раб божий Константин

Молитвы, которыми молились подвижники келейно
[spoiler]Молитва святителю Николаю


Святитель Божий, Угодниче Христов Николае! За нас не промолчи, вопия ко Владыце всех, Ему же предстоиши со всеми святыми.


Молитва преподобного Силуана Афонского


Господи Милостивый, Духом Святым научи нас смирению Твоему. Господи, не дай мне возмечтать о себе, как бы о лучшем кого из людей, но думать, как о худшем всех и никого не осуждать, а судить строго.


Молитва на благословение пищи и пития


Господи Иисусе Христе, Боже наш, благослови нам пищу и питие молитвами Пречистый Твоея Матери и всех святых Твоих, яко благословен еси во веки. Аминь. (Крестить пищу и питие).


Молитва об избавлении от искушений преп. Симеона Нового Богослова


Не попусти на меня, Владыко Господи, искушение, или скорбь, или болезнь свыше силы моей, но избавь от них, или даруй мне крепость перенести их с благодарением.


Молитва за умирающего


Господи, Иисусе Христе, Сыне Божий, заступи, спаси, помилуй и сохрани Боже, Твоею благодатию душу раба Твоего (имя), грехи юности и неведения его не помяни, и даруй ему кончину христианскую, непостыдну и мирну, и да не узрит душа его мрачного взора лукавых демонов, да приимут в Ангели Твои светлии и просветлии, и на Страшном Суде Твоем милостив ему буди, ибо Твое есть единого Господа, еже миловати и спасати нас.


Молитва болящего первая


Господи, сотвори, чтобы болезнь эта была в очищение многия грехов моих.


Молитва болящего вторая


Господи, Ты видишь мою болезнь, Ты знаешь, как я грешен и немощен, помози мне терпеть и благодарить Твою благость.


Молитва за заблудших


Господи! Просвети заблудших (имена), обрати их в святую Церковь Твою и спаси их всесильною Твоею Благодатию! Нас же в Православии и истинной вере соблюди, яко благословен еси во веки веков. Аминь.


Молитва Владычице Богородице


Владычице, приими молитвы раб Твоих за недугующих неверием (имена) и избави их от слепоты душевной, да узрят свет Веры Божественной, да вси обратятся в недра Матери Церкви и избавятся всякия нужды и печали.


Молитва за детей


Владыко Господи Вседержителю, буди милостив к детям моим, приведи их к вере и спасению, сохрани их под кровом Твоим, покрый их от всякого лукавого похотения, отжени от них всякого врага и супостата, отверзни им уши и очи сердечные, даруй умиление и смирение сердцам их.



Молитва, если кто непослушлив, св. преподобного Силуана Афонского


Господи, вразуми раба Своего, Ты любишь его.



Молитва во время искушений


Господи, избави мя от всякого искушения.



Молитва при выходе из дома в путешествие или на работу


Обращая лицо к иконам.

Господи, направи ко благу путь мой.



Молитва при прохождении мимо церкви, часовни, икон и Св. Креста на пути


Господи, Иисусе Христе, Сыне Божий, помилуй мя грешного.


Молитва против помыслов тщеславия и гордости


Господи, Иисусе Христе, Сыне Божий, помилуй мя грешного.


Молитва прежде, чем выйти из дома


"Богородице"... и "Достойно есть"


Молитва за клеветников и обидчиков


Господи, помилуй их, не ведают бо, что творят.


Молитва за гонителей и презрителей веры


Господи! Обрати к Тебе и сердца врагов наших, и, если не возможно уже ожесточенным обратиться, то положи преграду зла их и защити от них избранных Твоих.


Молитва, когда согрешишь или ошибешься


Оскорбил Тебя, Спасителя моего, прости меня.


Молитва об отпущении грехов юности


Помяни щедроты Твоя, Господи, и милости Твоя, яко от века суть. Грех юности моея, и неведения моего не помяни, ради благости Твоея, Господи.


Молитва к Божией Матери от преждевременной смерти


О, Пресвятая Госпоже Владычице, Дево Богородице! Приими недостойную молитву нашу, и сохрани нас от наглыя смерти, и даруй нам прежде конца покаяние.


Молитва Господу об избавлении от внезапной смерти


Помышляю день судный и сокрытый от меня час моего исхождения из тела, плачу о содеянных мною грехах и, взирая на ожидающую меня землю, как из предверия гроба моего, вопию: Ты, Всеблагий Господи Иисусе, в час исхода моего из жизни сей и в последующие за оным часы, о, Иисусе, Сыне Божий, живых и мертвых упование, Иисусе Сладчайший не остави меня, но помилуй меня.

(Полезно произносить на каждом часе).



Молитва о примирении находящихся в ссоре людей


Благодарим Тя, Владыко человеколюбче, Царя веков и Подателю благих, разрушившего вражды средостения, и мир подавшего роду человеческому, даровавшего и ныне мир рабом Твоим (имярек). Вкорени в них страх Твой, и друг к другу любовь утверди. Угаси всякую распрю, отьими вся разногласия, соблазны, яко ты еси Мир наш, и Тебе славу возсылаем Отцу и Сыну и Святому Духу, и ныне и присно и во веки веков. Аминь.


Молитва за злобного


Господи, благосотвори раба Твоего (имярек) благодатию Твоею.[/spoiler]

Раб божий Константин

Молитвы, когда потерял мужество в беде
[spoiler]Псалом 126


Аще не Господь созиждет дом, всуе трудишася зиждущии. Аще не Господь сохранит град всуе бде стрегий. Всуе вам есть утреневати, востанете по седении, ядущии хлеб болезни, егда даст возлюбленным Своим сон. Се достояние Господне сынове, мзда плода чревняго. Яко стрелы в руце сильнаго, тако сынове оттрясеных. Блажен, иже исполнит желание свое от них. Не постыдятся, егда глаголют врагом своим во вратех.


Псалом 139


Изми мя, Господи, от человека лукава, от мужа неправедна избави мя, иже помыслиша неправду в сердце, весь день ополчаху брани, изостриша язык свой, яко змиин яд аспидов под устнами их. Сохрани мя, Господи, из руки грешничи, от человек неправедных изми мя, иже помыслиша запяти стопы моя. Скрыша гордии сеть мне, и уже препяша сеть ногама моима. При стези соблазны положиши ми. Рех Господеви: Бог мой еси Ты, внуши, Господи, глас моления моего! Господи, Господи, сило спасения моего, осенил еси над главою моею в день брани. Не предаждь мене, Господи, от желания моего грешнику: помыслиша на мя, не остави мене, да не когда вознесутся. Глава окружения их, труд устен их покрыет я. Падут на них углия огненная, низложиши я в страстех, и не постоят. Муж язычен не исправится на земли: мужа неправедна злая уловят во истление. Познах, яко сотворит Господь суд нищым и месть убогим. Обаче праведнии исповедятся имени Твоему и вселятся правии с лицем Твоим.[/spoiler]

Раб божий Константин

Молитвы на благословение и освящение пасеки
[spoiler]Молитва на благословение пчельника


Создателю всех Боже, семена благословляяй и умножаяй, и к употреблению нашему сия благопотребна творяй: ходатайством Предтечи и Крестителя Иоанна, милостивно внемля молитвам нашим, пчелы сия благословити и освятити своим благоутробием благоизволи, да обильнее плоды своя приносят, во еже ко храму твоему и святых алтарей твоих лепоте и украшению, купно же и нашему употреблению быти им, о Христе Иисусе Господе нашем, емуже честь и слава, во веки веков. Аминь.


--------------------------------------------------------------------------------


Предтече и Крестителю Господню Иоанну

Предтеча в пустыне питался диким медом.



Молитва первая


Крестителю Христов честный Предтече, крайний пророче, первый мучениче, постников и пустынников наставниче, чистоты учителю и ближний друже Христов! Тя молю, и тебе прибегая не отрини мене от твоего заступления, не остави мя падшего многими грехи; обнови душу мою покаянием, яко вторым крещением; очисти мя, грехи оскверненнаго, и понуди внити, иможе ничтоже скверно входит, в Царствие Небесное. Аминь.


Молитва вторая


Крестителю Христов, проповедниче покаяния, кающагося не презри мене, но совокупляяся с вои Небесными, молися ко Владыце за мене, недостойнаго, унылаго, немощнаго и печальнаго, во многия беды впадшаго, утружденнаго бурными помыслы ума моего. Аз бо есмь вертеп злых дел, отнюдь не имеяй конца греховному обычаю, пригвожден бо есть ум мой земным вещем. Что сотворю? Не вем. И к кому прибегну, да спасена будет душа моя? Токмо к тебе, святый Иоанне, благодати тезоимените, яко тя пред Господем по Богородице вем больша быти рожденных всех, ты бо сподобился еси коснутися верху Царя Христа, вземлющаго грехи мира, Агнца Божия. Егоже моли за грешную мою душу, да поне отныне, в первый надесять час, понесу тяготу благую и прииму мзду с последними. Ей, Крестителю Христов, честный Предтече, крайний Пророче, первый во благодати мучениче, постников и пустынников наставниче, чистоты учителю и ближний друже Христов! Тя молю, к тебе прибегаю: не отрини мене от твоего заступления, но возстави мя, низверженнаго многими грехи. Обнови душу мою покаянием, яко вторым крещением, понеже обоего начальник еси: крещением омываяй прародительный грех, покаянием же очищаяй коегождо дело скверно. Очисти мя, грехами оскверненнаго, и понуди внити, аможе ничтоже скверно входит, в Царствие Небесное. Аминь.[/spoiler]

Раб божий Константин

Молитва на благословение сети, невода

[spoiler]Господи Иисусе Христе Боже наш, от пяти хлебов и двою рыбу, пять тысящ насытивый, и от избытков множество укрухов собрати устроивый: Сам, Владыко всесильный, и предлежащыя мрежи благослови, молитвами преблагословенныя, славныя Владычицы нашея Богородицы и Приснодевы Марии, святаго славнаго и всехвальнаго Апостола и Первоверховнаго апостола Петра: и иже от них причащающыяся рыб, в мире и здравии душевном и телесном сохрани. Яко Ты еси податель всех благих, и Тебе славу возсылаем со безначальным Твоим Отцем, и с Пресвятым, и благим, и животворящим Твоим Духом, ныне и присно, и во веки веков. Аминь.[/spoiler]