Молитвослов

Автор Раб божий Константин, марта 10, 2012, 02:13:14

« назад - далее »

Раб божий Константин

Акафист Собору Екатеринбургских святых.
[spoiler]Кондак 1.
Честнии и славнии святии Екатеринбуржстии, от века Богови благоугодившии, и в Царствии Небеснем днесь ликовствующии, похвальная пения приносим вам мы грешнии, вы же, яко имуще дерзновение ко общему всех Владыце и Господу, от всяких нас бед и напастей свобождайте благоприятными вашими молитвами, да со умилением взываем сице: Радуйтеся, вси святии земли Екатеринбуржския, Церкве Христовы похвало и украшение.
Икос 1.
Троицы Святыя престола страшнаго, яко Ангели предстателие торжествующе явистеся, на веселие всех православных собирающе, мы же верою сердечною от души подвизаеми, и благоговения духом исполняеми, поминаем славныя подвиги ваша, и гласы хвалебными зовем таковая:
Радуйтеся, Святыя Троицы честная и чистая селения;
радуйтеся, с Небесе бо днесь нам возвещаете Тоя веления.
Радуйтеся, Ангелов собеседницы, со Апостолы и Пророки ныне величаемый;
радуйтеся, в селениих праведных со всеми святыми равно ублажаемый.
Радуйтеся, бодрии наши блюстителие от наветов ада прелестных;
радуйтеся, и ленивых подвизающий достизати высот Небесных.
Радуйтеся, славными венцы на Небесех увенчанный;
радуйтеся, теплый ходатаи, от Бога нам дарованнии.
Радуйтеся, всех нас заступающий во всякой нужде и скорби;
радуйтеся, всем нам помогающий в совершении дел благих и добрых.
Радуйтеся, чистоты и целомудрия предивнии хранителие;
радуйтеся, еже о Бозе жительства истиннии любителие.
Радуйтеся, вси святии земли Екатеринбуржския, Церкве Христовы похвало и украшение.
Кондак 2.
Единаго на потребу искати на земли премудренно подвигостеся, святии, еже дарует пресладкое в Царствии Божий на Небеси пребывание, темже труды всяческими подвизастеся, и различныя скорби, искушения, гонения и смерть со благодарением претерпесте; и ныне от жития сего в жизнь вечную прешедше, со Ангелы присно поете: Аллилуйя.
Икос 2.
Церкве Небесныя и земныя украшения явилися есте, святии Екатеринбуржстии, вы бо яко некая прекрасная камения драгоценная просияете, и яко нецыи дивный цвети райстии процветосте пред Господем, темже чтуще многия и преславныя ваша яже о Христе подвиги, умиленным сердцем от души поем вам таковая:
Радуйтеся, серафимски милости Божия огнем выну горящий;
радуйтеся, от зла бесовскаго аки крилы херувимскими верныя заслоняющий.
Радуйтеся, любве Божия веяние благотворное людем излиявшии;
радуйтеся, иже всю силу демонов аки дым разгнавшии.
Радуйтеся, погибшия овцы в райскую вводящий сладость;
радуйтеся, Ангелом Небесным о них приносящий радость.
Радуйтеся, теплии любителие душ, Христовою Кровию искупленных;
радуйтеся, грознии устрашителие миром, плотию и диаволом побежденных.
Радуйтеся, страшнии бесов лукавых прогонителие;
радуйтеся, храбрии злобных наветов их победителие.
Радуйтеся, вся беды и печали от человек удаляющий;
радуйтеся, всем призывающим вас скорую помощь посылающий.
Радуйтеся, вси святии земли Екатеринбуржския, Церкве Христовы похвало и украшение.
Кондак 3.
Аки созвездие прекрасное, украшающее небо Церкве Русския, сияете, святии земли Екатеринбуржския, вы бо свет от присносущнаго Света Божия приимше, вся верныя озаряете честным вашим предстательством, темже в памяти вашей услаждающеся, поим прославлыыему вас Владыце Богу: Аллилуйя.
Икос 3.
Повести славныя о претрудных ваших подвизех слышаще, удивляемся, вы бо силою свыше осенений суще, на всякую злобу врага рода нашего доблественно подвигостеся, темже безпреткновенне вся благая начинания ваша совершивше, крепкаго врага до конца низложили есте, сего ради зовем вам сердцем и усты таковая:
Радуйтеся, земная скорогибнущая блага паче меры не хваливший;
радуйтеся, Небесная вечнопребывающая воздаяния улучивший.
Радуйтеся, моря житейскаго воды горькия добре прешедший;
радуйтеся, веры Божественныя огнь в сердца своя приемшии.
Радуйтеся, всех бо теплотою любве истинныя согреваете;
радуйтеся, росою бо непостыдныя надежды уныние потопляете.
Радуйтеся, веянием благодати Духа Свята верныя услаждающий;
радуйтеся, твердым шествием в Царствие Божие демоны ужасающий.
Радуйтеся, яко тяжкия узы греховныя сокрушисте;
радуйтеся, яко стопами легкими к Богу восход совершисте.
Радуйтеся, пучину зол молитвою вашею изсушающии;
радуйтеся, пламенем ходатайства вашего верных души орошающий.
Радуйтеся, вси святии земли Екатеринбуржския, Церкве Христовы похвало и украшение.
Кондак 4.
Естество на подвиг понудивше, святии Екатеринбуржстии, пачеестественнаго воздаяния от Царя всех сподобистеся, вы бо дерзновение по Бозе Вседержителе ревностне разжещи потщавшеся, яко огнь небесный землю осияли есте, темже преславному блистанию его удивляющеся, песнь хвалебную приносим Богу, Подателю благих: Аллилуйя.
Икос 4.
Тьмы бесовския своим еже о Бозе деланием посрамивше, и треволнений моря житейскаго честно избегаю, ко отишию Небесному во отраду Царствия Божия легкими стопами веры правыя внидосте, и оттуду призираете на пребывание претрудное Церкве Божия в земли сей многомятежней и плачевней; не лишите убо ходатайства своего вам приносящих пения таковая:
Радуйтеся, от древа жизни в рай сладости сподобившийся вкусити;
радуйтеся, устрояющии души наша о Господе плодоносити.
Радуйтеся, терния душепагубных заблуждений растерзающии;
радуйтеся, цветы добродетелей произращати верным помогающий.
Радуйтеся, яко вами шума многомятежнаго мира сего исхищаемся;
радуйтеся, яко выну в тихость света Божественнаго призываемся.
Радуйтеся, благолепием доброты жития вашего Ангелы увеселивший;
радуйтеся, силою подвиг ваших бесом печаль учинивший.
Радуйтеся, высоты ради вашего к Богови устремления на земли почитаемии;
радуйтеся, смиреннаго ради земнаго жительства на Небеси возвышаемии.
Радуйтеся, благоуханием бо ходатайства своего вся верныя достизаете;
радуйтеся, смрада бо греховнаго скорее удалятися научаете.
Радуйтеся, вси святии земли Екатеринбуржския, Церкве Христовы похвало и украшение.
Кондак 5.
Разум богопросвещенный стяжавше, мирскаго пристрастия избегли есте, Христовы угодницы, изряднии воеводы ратоборцев за веру Христову, теплии утешителие всем напаствуемым и обремененным скорбьми многими, от Господа прославлени есте явлением чудес, имиже собрасте нас умиленною душею пети Господеви: Аллилуйя.
Икос 5.
Аще и земни бысте, святии, спасение и блаженство райское подвиги своими унаследовасте, ни в чем же лишени суще, но равную плату с древними велиими святыми от Небеснаго Домовладыки приемше; молите прилежно, во еже и нам немощным и грешным житие сие временное без порока проводити, да зовем вам:
Радуйтеся, посетителие и помощницы в страстех бедствующим;
радуйтеся, посрамителие и наказателие на братию свою наветствующим.
Радуйтеся, незаходимая сияния зари мысленныя;
радуйтеся, безумия бесовскаго помрачителие выспренний.
Радуйтеся, звезды утренния, на востоце сияющия;
радуйтеся, даже и до запад сиянии своими досязающия.
Радуйтеся, молнии, облиставающия севера и моря пределы;
радуйтеся, громи, оглашающий юга и пустыни уделы.
Радуйтеся, ясносветлии бисери, имиже наша земля украшается;
радуйтеся, воды живыя истопницы, имиже вар греховный охлаждается.
Радуйтеся, крини сельнии, мир в злосмрадии неверия влающийся облагоухающии;
радуйтеся, кедри мощнии, под сению своею путники от зноя укрывающий.
Радуйтеся, вси святии земли Екатеринбуржския, Церкве Христовы похвало и украшение.
Кондак 6.
Странницы по слову Апостолову явистеся на земли, Отечествия своего Небеснаго взыскующий, святии Екатеринбуржстии, темже всякое слово риторское не довлеет к достойному песнохвалению вашему, пачеестественне бо подвизавшеся во плоти немощней, Богом прославлени явистеся, чудес богатством вас обогатившаго, мы же теми озаряеми, благодарственно поем Ему: Аллилуйя.
Икос 6.
Твердо о Христе имуще тщание, явисте всем, яко всякий возраст не неудобь бывает благочестию, аще осенит свыше благодать Божия, яже немощная врачующи и оскудевающая восполняющи, темже и вы, угодницы Божий, во всяцем возрасте Богу угодивше, добродетели различныя удобно совершили есте, и ныне поем вам таковая:
Радуйтеся, утро благодати Божественныя житием своим возвещающий;
радуйтеся, Дне Господня и воздаяния делом своим чающий.
Радуйтеся, вечер жития своего со смирением сретавшии;
радуйтеся, нощь нестроений житейских верою освещавший.
Радуйтеся, яко сиянием молитвы мрак отчаяния разгоняете;
радуйтеся, яко веры свет в сердцах желающих ю обрести возжигаете.
Радуйтеся, вами бо сон губительный от наших вежд удаляется;
радуйтеся, вашею бо славою бодрость в души наша вселяется.
Радуйтеся, к пробуждению от мрачнаго сна греховнаго мир зовущий;
радуйтеся, силу к совершению безпреткновенному земнаго шествия подающий.
Радуйтеся, учивший нечувствие к добру аки зло преодолевати;
радуйтеся, заповедавший благих восприятие аки достоинство похваляти.
Радуйтеся, вси святии земли Екатеринбуржския, Церкве Христовы похвало и украшение.
Кондак 7.
Очи сердечныя к Богу устремлени имуще, святии, врагу на подвижники присно ополчающуся, жестоким житием противустасте, плоть духови покоривше,    и    славою    земною    не    уязвистеся,    всею    душею    Богови прилепившеся,  темже  и  чудесы  своими  всю  землю  Русскую  исполняете, благоговейно взывающую чудес Творцу: Аллилуйя.
Икос 7.
Рода нашего удобрение благое бывше, стена твердая явистеся всем человеком, к заступлению вашему притекающим, святии Екатеринбуржстии, темже молитеся разуму податися нам Божественному, вы бо немерцающим сияюще светом, со всеми прочими святыми ныне водворяетеся, и приимите от нас радостныя похвалы сия:
Радуйтеся, свещи, безбожия мрачнаго тьму пргоняющия;
радуйтеся., лампады, мир Небесным веселием просвещающия.
Радуйтеся, истины евангельския вернии ревнителие;
радуйтеся, ересей и расколов всегрознии обличителие.
Радуйтеся, по пути спасения всех верных ведущий;
радуйтеся, пучины греховныя скории изсушителие сущий.
Радуйтеся, гусли дивнии, яко песни Богодухновенныя сладостно возглашаете;
радуйтеся, цевницы духовныя, яко хваление Богу с ликом праведных воспеваете.
Радуйтеся, огнем Духа Святаго кадила возжженная;
радуйтеся, исполнивший благоухания весь круг вселенныя.
Радуйтеся, бодрии Православия поборницы;
радуйтеся, сильнии о нас ко Спасу молитвенницы.
Радуйтеся, вси святии земли Екатеринбуржския, Церкве Христовы похвал о и украшение.
Кондак 8.
Освящения Божественнаго исполнили есте земли вашея концы, едино попечение во многих телесех имуще, о еже благоугодити Господеви, темже образ жития праведнаго в себе нам показасте, сим всех подвизающе в похвалах достодолжных взывати Богу: Аллилуйя.
Икос 8.
Жития богоугоднаго правила явистеся, светоподательнии светильницы и предивнии чудотворцы Екатеринбуржския земли, и от силы в силу восходяще, яко сосуди честнии благодати Божия показастеся, нецыи бо от вас священства даром почтени пред Богом ходиша, инии в мирском звании жительствующе праведни обретошася, темже удивляющеся многому вашему терпению и вере, ублажаем вас звании сими:
Радуйтеся, пречудная в человецех удивления;
радуйтеся, бесов страшная помрачения.
Радуйтеся, добродетельми просиявший;
радуйтеся, яже о Христе любовию пылавший.
Радуйтеся, храмы всечестнии, Богу освященнии;
радуйтеся, Того благодатию присно осененнии.
Радуйтеся, честнии ходатаи ищущим спасения;
радуйтеся, возводящий падших ко исправлению.
Радуйтеся, вернии наставницы богомудрия;
радуйтеся, грознии обличителие суемудрия.
Радуйтеся, ревности о славе Божией исполненнии;
радуйтеся, того ради в Царствие Божие внити удостоеннии.
Радуйтеся, вси святии земли Екатеринбуржския, Церкве Христовы похвало и украшение.
Кондак 9.
Евангелие Христово в души своей вселивше, любовь и милосердие обильно всем являете, многажды прошения наша исполнением их предваряюще, дадеся бо вам от Господа многоразличная благодать, темже днесь плоды ходатайства вашего утешаеми, Богови со умилением поем: Аллилуйя.
Икос 9.
Ныне слышим вы, святии, и по преставлении вашем, яко трубы многогласныя, чудесы вашими благовествующия нам всемощную силу Христову, еюже смерть попрася и жизнь вечная человеком даровася, темже приемлюще заступлением вашим в скорбех утешение, в недузех исцеление, в бедах скорое вспоможение, Господа прославляем, вам же, верным слугам Его, от сердечныя любве воспеваем:
Радуйтеся, веры благия плоды днесь на Небеси вкушающий;
радуйтеся, к вам притекающия верныя теми услаждающий.
Радуйтеся, мужества и терпения наставницы;
радуйтеся, немощей наших милостивии целительницы.
Радуйтеся, ближния, яко себе, возлюбивший;
радуйтеся, во искушениих сердце свое не ожесточивший.
Радуйтеся, богатыя бо милосердию ко убогим и оставленным научаете;
радуйтеся, сирыя бо и вдовицы от напастей и бед защищаете.
Радуйтеся, нравов благих и добрых насадителие;
радуйтеся, злых стремлений и дел искоренителие.
Радуйтеся, обидимых храбрии предстателие;
радуйтеся, обидящих всегрознии наказателие.
Радуйтеся, вси святии земли Екатеринбуржския, Церкве Христовы похвало и украшение.
Кондак 10.
Крест свой благодушие на раму своею восприимше, во вся оружия Божия облекостеся, темже возмогосте противу стати всем кознем диавольским, ныне же и нас, грехми обуреваемых, предстательством вашим свободите, яко да зовем чудес Творцу, общему всех Владыце Христу: Аллилуйя.
Икос 10.
Обильно плоды многоразличныя Богу принесосте, страданьми Христа ради, терпением гонений, делы воздержания и милосердия удобрившеся, сего ради даровася вам благодать Божия, яко и чудеса преславная совершати; мы же сими чудесы научаеми, тщание восприемлем похвалити яже о Христе труды и подвиги ваша, зовуще:
Радуйтеся, златозарнии светильницы, путь к Богу освещающий;
радуйтеся, смирения глубину житием своим являющий.
Радуйтеся, презревший мира дольняго тленную благость;
радуйтеся, ныне вкушающий горе нетленную сладость.
Радуйтеся, безпомощных и отчаянных нежданно яко на руку носящий;
радуйтеся, печальных и унынием объятых дивно веселящий.
Радуйтеся, болезней всяческих безмезднии целителие;
радуйтеся, скорбных и озлобленных сердец блазии посетителие.
Радуйтеся, яко вашими молитвами благочестие доныне соблюдается;
радуйтеся,-яко вами единение в место вражды укореняется.
Радуйтеся, облацы росоноснии, ослабляющий зной страстей наших;
радуйтеся, звезды, яже в нощи скорбей нам с Небесе возблисташа.
Радуйтеся, вси святии земли Екатеринбуржския, Церкве Христовы похвало и украшение.
Кондак 11.
Проповедницы славных деяний ваших, святии Екатеринбуржстии, явишася мнози, богатии и убозии, старцы и юнии, священницы и мирстии, вы бо всем любовь свою излиясте, темже православнии, силою молитв ваших милость Божию обретше, Господеви поют: Аллилуйя.
Икос 11.
Единому Богу благоугодити потщавшеся, Духа Свята дом избран показастеся, святии, вы бо слово Апостольское поминающе, яко подобает Богу повиноватися паче нежели человеком, велением безбожным и душевредным противустали есте, сего ради слышите от всех благохваления таковая:
Радуйтеся, жестокою стезею в Царство Божие торжествующе внидосте;
радуйтеся, яко орли высокопарнии, тамо юность свою обретосте.
Радуйтеся, подвижницы, опасно возшедшии степеньми лествицы;
радуйтеся, Небесныя радости вечныя провозвестницы.
Радуйтеся, яко вами поспешествуеми, суеты приражения отреваем;
радуйтеся, яко вашим заступлением злаго врага хотения низлагаем.
Радуйтеся, орудия силы Божия, изымающия адскаго пламене;
радуйтеся, благодати Христовы суще чудное знамение;
Радуйтеся, злославное отступническое любомудрие разоряющий;
радуйтеся, православное благочестие добре уясняющий.
Радуйтеся, вами бо многоразличная благодеяния свыше посылаются;
радуйтеся, к вам бо возносимая моления предивно исполняются.
Радуйтеся, вси святии земли Екатеринбуржския, Церкве Христовы похвало и украшение.
Кондак 12.
Стена тверда бысть любовь ваша ко Господу, еюже утвердишася сердца ваша, богоноснии Екатеринбуржстии светы, сего ради всем притекающим к вам с верою и любовию, яко утверждение неподвижимое обретаетеся, да всяческая Христу приобрящете, темже вознесите молитву вашу ко Господу, во еже непоколебимей быти Церкви нашей, да славится имя Господне песнию: Аллилуйя.
Икос 12.
Новаго неба и новыя земли по обетованию Христову чающе, крепко подвизастеся о Православии, внутренняго человека на всяко время обновляюще, и труды праведными плоть от работы нетления свобождающе, и тако смертию жизнь вечную улучисте; темже убо молитвою криле душам вашим израстившии, ныне подвигните и нас, во еже славити Бога и взывати:
Радуйтеся, в подвизех о Христе посещения и утешения Божия сподоблыпиися;
радуйтеся, доброту неизреченную славы Его лицезрети удостоившийся.
Радуйтеся, кающихся и паки исправляющихся ходатаи преусерднии;
радуйтеся, борющихся со страстьми и похотьми помощницы преизряднии.
Радуйтеся, обитателие преблаженнии мира горняго;
радуйтеся, заступницы многомощнии мира дольняго.
Радуйтеся, яко соль, житие и веру нашу благодатно осоляющии;
радуйтеся, яко град, верху горы стояй, от греховных помыслов охраняющий.
Радуйтеся, словеса Господня, яко богатство много, в сердцах своих сокрывший;
радуйтеся, заповедей Божиих пути, имиже текосте, всем сердцем возлюбивший.
Радуйтеся, милость бо ваша к страждущим николиже оскудевает;
радуйтеся, грехов бо человеческих множество ваша любы покрывает.
Радуйтеся, вси святии земли Екатеринбуржския, Церкве Христовы похвал о и украшение.
Кондак 13.
О велицыи и славнии святии земли Екатеринбуржския, приимите милостивно сие приношение убогое, и молитвами вашими сохраните нас в жизни сей от недуг душевных и телесных, по преставлении же нашем помозите от вечных мук избавитися, да сподобимся купно с вами во Царствии Небеснем выну пети Богу: Аллилуйя.
(Сей кондак глаголы трижды, посем икос первый и кондак первый).[/spoiler]

Раб божий Константин

Акафист святой великомученице Екатерине.
[spoiler]Кондак 1


Избранную и венчанную деву мученицу, невесту Христову Екатерину, похвальными песньми воспоим, яко преславную мучителя победительницу и премудрую философов наставницу: ты же, великомученице Екатерино, имущи дерзновение ко Господу, приклонися милостивне к благопотребным прошениям зовущих ти: Радуйся, Екатерино, невесто Христова премудрая.


Икос 1


Ангелом равную чистоту имущи, святая дево Екатерино, с Ангелы Божественнаго озарения сподобилася еси, с ними же воспевающи Трисвятую песнь, услыши нас, поющих тебе на земли сия: Радуйся, честное святыни жилище; радуйся, чудесное знамение сбывшагося на тебе Божия Промысла. Радуйся, благоволения Отча сосуде; радуйся, страданий Христовых исполнение. Радуйся, чистое Духа Святаго обиталище; радуйся, светом благочестивыя веры просветившаяся. Радуйся, святою купелию отрожденная; радуйся, измывшая ризы своя в Крови Агнчей на земли. Радуйся, ликующая со священными девами на Небеси. Радуйся, Екатерино, невесто Христова премудрая.


Кондак 2


Видящи Екатерина себе видения сподобльшуюся, тече к святому старцу, икону ей Богоматере прежде того вручившему, и поведа ему, како отвращаше лице Свое ей явивыйся с Пречистою Своею Материею Христос, како безумну и нищу и худородну ю нарек, дондеже не оставит идольскаго нечестия. Преподобный же, слышав сия, настави ю в таинствах веры и крести ю. Она же во обновлении духа благодарно пояше Богу: Аллилуиа.


Икос 2


Разум благий, благородство истинное, богатство негиблющее стяжавши в духовном отрождении святая Екатерина достойна явися Небеснаго Жениха Христа, Иже, паки явився ей, возлюби ю и дарованным перстнем в невесту Себе обручи. Она же, познавши такое к ней благоволение Божие, тако уязвися любовию Его, яко не мудрствоваше более о земных вещах, но о Возлюбленном своем непрестанно мысляше. Таковой благодати сподобльшаяся слыши от нас: Радуйся, зловоние мирское возненавидевшая; радуйся, в воню мира Христова текущая. Радуйся, добрая любительнице Жениха Безсмертнаго; радуйся, сокровище благоволения Вышняго. Радуйся, деннице пресветлая; радуйся, луна совершенная. Радуйся, маслина, в дому Божии насажденная, радуйся, кедр в Ливане высокорасленный. Радуйся, Екатерино, невесто Христова премудрая.


Кондак 3


Сила Вышняго даде тогда святей Екатерине дерзновение, еже нечествующаго царя Максимина о принесении идолом жертв обличити небоязненно, и той пребысть безгласен на мног час, не могий противитися ея глаголам. Она же, благодарящи Бога, воспеваше: Аллилуиа.


Икос 3


Имущи святая Екатерина свыше данную ей премудрость, егда нечестивый царь, постави пред собою, вопрошаше ю о роде ея и сане, она исповеда себе быти дщерь царскую, философския и риторския науки добре изучившую, паче же Христову невесту себе наименова, в явное отвержение идольскаго служения. Радуйся, убо, Екатерине преславная; радуйся, царское священие. Радуйся, пчело, дыма идольскаго отлетевшая; радуйся, голубице, златы крила имущая. Радуйся, кадило Христова благоухания. Радуйся, Екатерино, невесто Христова премудрая.


Кондак 4


Бурею ярости вознеистовився царь на святую деву, рече к ней: "Не глаголи зле о бозех наших". Святая же Екатерина отвеща: "Аще восхощеши отрясти мрак прелести уразумееши богов твоих худость и познаеши истиннаго Бога, Егоже имя токмо глаголемое, или крест, изобразуемый на воздусе, прогоняет боги твоя и погубляет. И аще повелиши, явлю тебе истину, поющи Богу: Аллилуиа".


Икос 4


Слышав нечестивый царь свободный и мудрый ответ твой о вере Христовой, убоявся, да не будет побежден от тебе, собра от пределов державы своея мудрецов, числом пятдесят, на прение. Ты же, Архангелом Михаилом утвержденная и о победе уверенная, возрадовалася еси вступити в прение с ними. Приими убо, дево, от нас похвалу сию: Радуйся, изъявительнице ума Христова; радуйся, херувимское стяжавшая Богопознание. Радуйся, серафимскою воспаленная к Богу любовию; радуйся, мудрых мудрейшая. Радуйся, духовный меч на неверие изострившая; радуйся нечестия прогонительнице. Радуйся верных наставнице. Радуйся, Екатерино, невеста Христова премудрая.


Кондак 5


Боготечной звезде была еси подобна, Екатерино, препревши пятдесят ветий и наставивши их на путь христианский, ведущий к праведному Солнцу, от Девы возсиявшему Христу Богу, своими мудрыми глаголы, иже и осуждени бывше за Христа на сожжение и напутствовани молитвою твоею, с радостию идоша в огнь, поюще: Аллилуиа.


Икос 5


Видев царюющий повеления своя в тебе пренебреженны и увещания презренны, обратися к лукавству, еже ласканием прельстити тя, обещая полцарства тебе дати. Ты же веру сокровищам земным предпочетши и Жениха Христа возлюбивши паче земнаго царства и одежду мученичества паче багряницы, отвергла еси его суесловие. Сего ради восписуем ти сия похвальная: Радуйся, дево, лесть обличившая; радуйся, запинателя змия поправшая. Радуйся, дщерь царева; радуйся, дево, рясны златыми одеянная. Радуйся, всякое вещество превозшедшая; радуйся, на гору боговидения востекшая. Радуйся, светом богопознания просвещенная; радуйся, труба духа, воспевшая глас истиннаго богословия. Радуйся, доброе веры исповедание; радуйся, света евангельскаго сияние. Радуйся, законов вечных хранительнице; радуйся, наша помощнице. Радуйся, Екатерино, невесто Христова премудрая.


Кондак 6


Проповедником богоносным, апостолом поревновавши, дерзновен-но пред лицем мучителя проповедала еси Христа, истиннаго Бога, Емуже в ранах и в темнице пела еси: Аллилуиа.


Икос 6


Возсиявый в сердце твоем свет истиннаго богоразумия отгнал есть мрак скорбей, иже не остави тя алкати, голубицею пищу ти посылая, ниже стужати о болезни, посетил бо Сам тя в темнице, ободряя и многи венцы обещавая. Ты же, терпеливодушная, сим паче укрепилася еси и царицу Августу и воеводу Порфириа, с воины притекших к тебе, обратила еси к свету веры Христовой и научила, пети тебе сия: Радуйся, мироположнице Божественныя любве; радуйся, адаманте крепкий. Радуйся, вина чудес неизреченных; радуйся, врага терпением убившая. Радуйся, язвы Господа на теле своем носившая; радуйся, царице Августе с пришедшими к мученическому подвигу путенаставнице. Радуйся, яко во тьме свет была еси; радуйся, яко Сам Господь, Свет мира, тебе, в темнице бывшей, Себе явил есть. Радуйся, уз греховных скорая решительнице; радуйся, болезнующих скорая целебнице. Радуйся, помощнице нашего спасения. Радуйся, Екатерино, невесто Христова премудрая.


Кондак 7


Хотящу безбожному царю привести тя к мерзкому идолослужению, паки сети подстилает тебе, премудрая, еже уловити тя лестно похвалою красоты твоея; ты же красоту вещь привременну и скоропреходну именовала еси, Христа же исповедала еси Бога жива и истинна и пела ему: Аллилуиа.


Икос 7


Новую показа царь ярость и безчеловечие, повелев епарху колесами растерзати девственное, чистое и святое тело твое, но чудесно рукою Ангела абие разрешена была еси безвредна и колеса на части сокрушены, имиже многи от неверных убиены, яко удивися сам царь и предстоящий народ, иже и взываше: "Велик Бог христианский". Мы же, чудящеся сему, взываем тебе: Радуйся, мученице, Ангелом честная и говейная; радуйся, слава полков страдальческих. Радуйся, светлая на враги победа; радуйся, страх неверных. Радуйся, сосуде множайшия силы Божия; радуйся, радование верных. Радуйся, Екатерино, невесто Христова премудрая.


Кондак 8


Странное славы изменение и за Христа страдание царицы и воеводы с воины видевше, устранимся любве мира и плоти и вперим себе к разумению Бога, Сей бо есть красота, и слава, и венец нам, поющим: Аллилуиа.


Икос 8


Весь сладость, весь желание тебе, святая Екатерино, бысть Иисус: сладце бо Его ради горькия муки терпела еси и скипетр, предлагаемый тебе, попрала еси, предзрящи будущее воздаяние. От нас же приими похвальная сия: Радуйся, чистая, чисте Чистаго возлюбившая; радуйся, горлица, Краснаго Жениха в пустыне дольнаго мира вожделевшая. Радуйся, воню риз Его благоухавшая; радуйся, яко серна на горах ароматских искавшая Рожденнаго прежде холмов вечных. Радуйся, подвиг страдальческий ради любве Христовы совершившая; радуйся, лик мученический Богу приведшая. Радуйся, яко ветии тобою получиша Царство Небесное; радуйся, яко тоеже тобою получити чаем. Радуйся, покров и забрало наше. Радуйся, Екатерино, невесто Христова премудрая.


Кондак 9


Все естество ангельское возрадовася радостию, зря тя, Екатерино, победивши миродержца, шествующую к премирным яко победоносную воеводу, в последовании полка страдальческаго, и воспе победная, взывая: Аллилуиа.


Икос 9


Ветия многовещанныя заустишася: не возмогше бо противовещати богодухновенным словесем твоим, молчанием почитают дарования твоя; мы же, немощнии, како можем отверсти уста на хвалы твоя? Однако дерзаем и молим, сподоби, благая, безбедно принести тебе песнь сию: Радуйся, органе Духа Святаго; радуйся, заре неизреченнаго осияния. Радуйся, догматов Божественных пучина; радуйся, хитросте, препревшая философов. Радуйся, чаше премудрости; радуйся, плетения ветий растерзавшая. Радуйся, пленицы греховныя разрешающая. Радуйся, Екатерино, невесто Христова премудрая.


Кондак 10


Спасти хотящи душу твою, о теле твоем нерадила еси, Екатерино, и на мечное усечение, мучителю давшу на то изречение, ты радостно потекла еси, поющи Святому Безсмертному: Аллилуиа.


Икос 10


Стена тверда и непреодолима явилася еси женам, тебе на место усечения провождаюшим и с рыданием тя жестокосерду к себе и безразсудну быти именующим: яко не пощадила еси сладкаго живота в цвете юности, яко презрела еси земное предлагаемое царство и блаженство. Ты же воспретила еси неполезный плач их и суесловие, текущи скорейше соединитися чрез смерть со своим Возлюбленным, того ради слышиши: Радуйся, радостно за Главу Церкве Христа под меч главу свою приклонившая; радуйся, до конца претерпевшая. Радуйся, течение добре скончавшая; радуйся, яко ни скорбию, ни ранами, ни мечем с пути Христова исповедания не совратилася еси. Радуйся, яко пламень любве в источнице крове неугасим соблюдшая; радуйся, мучеников красото. Радуйся, крепкое христиан прибежище. Радуйся, Екатерино, невесто Христова премудрая.


Кондак 11


Пение похвальное дерзнухом принести тебе, но оскудевает слово наше и недоумевает ум, како глаголати; обаче слово твое премудрое, многих похитившее от невежества и идолонечестия, возставляет нас. Даждь нам слово твое, во еже пети удивльшему на тебе величия Своя Богу: Аллилуиа.


Икос 11


Светоприемную тя свещу, мечным усечением погашенную, но на свещнице Небеснем пред Престолом Святыя Троицы поставленную, видевше святии Ангели, поклонишася Живущему во веки и, получивше от Владыки повеление, девственное тело твое на горе Синайстей погребоша, да не видимо будет, якоже сама хотела еси, врагом Господним. Мы же песнь сию возсылаем ти: Радуйся, солнцеобразная дево, на Небеса духом возшедшая; радуйся, Сиона Горняго достигшая. Радуйся, венче доброты в руце Господни; радуйся, чаше, от обилия дому Божия черплющая радость. Радуйся, к скинии нерукотворенней, вечней приближившаяся; радуйся, на горе законней почивающая телом. Радуйся, яко тамо видена быша шествия Бога Синаина, Бога Иаковля; радуйся, места боговидения Моисеова одержание. Радуйся, ревности Илиины указание; радуйся, купины несгораемой явление. Радуйся, дево, Деве Царице, в ризы позлащенны одеянной, преиспещренной вследствующая; радуйся, яко тобою Сый воспевается посреде дев тимпанниц. Радуйся, яко на тебе велелепота Его; радуйся, Престола Вечнаго предстоятельнице. Радуйся, от храма вселенныя молитвенники к тебе назирающая; радуйся, кадило молитв Вышнему о нас благоприятное. Радуйся, Екатерино, невесто Христова премудрая.


Кондак 12


Благодать дана тебе от Бога руководствовати к познанию истины Его, в тайне сокровенней, и даяти всем яже к пользе прошения. Темже мы, помраченнии, умиленно просим тя, мудрая дево: просвети умныя наши очи и положи нам к Небеси стезю проходну, да поем с тобою ныне и во вся веки Единому Премудрому: Аллилуиа.


Икос 12


Поюще крепкия твоя мученическия подвиги, хвалим тя, яко одушевленный сосуд спасения человеков: твоим бо разумом Бог премудрость премудрых века сего погуби; тобою ветий призва в язык свят, в люди обновления, яко тем страдати за Христа. Просвети и нас, благая дево, помраченных, да зовем ти: Радуйся, зерцало Божия мудрости; радуйся, силою Вышняго одеянная. Радуйся, подвижнице, елеем радования умащенная; радуйся, воеводо, полк Божий к вечному величеству предпославшая. Радуйся, во светлости святыя вшедшая; радуйся, во свете неприступном Живущему в лице пламенных слуг представшая. Радуйся, гром трисвятаго пения гласом своим умножающая; радуйся, неизреченную сладость доброты вкушающая. Радуйся, яко хвала и радование над главою твоею; радуйся, яко вечная слава тебе объемлет. Радуйся, от Триипостаснаго Божества венцем Небеснаго Царствия увенчанная; радуйся, благодати и безконечной славы нам ходатаице. Радуйся, Екатерино, невесто Христова премудрая.


Кондак 13


О святая великомученице Екатерино! Приими сие похвальное пение и избави нас от враг видимых и невидимых и от вечнаго мучения твоим благоприятным ходатайством сохрани, да с тобою присно поем Богу: Аллилуиа.


(Этот кондак читается трижды, затем икос 1 и кондак 1)



Молитвы святой великомученице Екатерине


Молитва первая


О святая Екатерино, дево и мученице истинная Христова невесто! Молим тя чрез особливую благодать, еюже предвари тя Жених твой, Сладчайший Иисус: якоже посрамивши прелести мучителя, мудростию твоею пятдесят ветий победила еси и, напоивши их Небесным учением, к свету истинныя веры наставила еси, тако испроси и нам оную Божию мудрость, да и мы, расторгнувше вся козни адскаго мучителя и презрев мира и плоти соблазны, достойны явимся Божественныя славы и к разширению святыя нашея православныя веры сосуды достойны соделаемся, и с тобою в Небесной скинии Господа и Владыку нашего Иисуса Христа хвалим и прославляем во вся веки. Аминь.


Молитва вторая


О святая дево и мученице Екатерине! Молим тя: призри на бедствия нас, грешных раб Божиих (имена), сотвори нас горняя мудрствовати, а не земная. Поспеши нам молитвами твоими побеждати плотская похотения, к миру пристрастие и козни злых духов, на нас злобно воюющих; да твоим предстательством во дни жития сего свободни явимся от враждебных их нападений и по исходе от воздушных их истязаний. О премудрая дево! Даруй нам вся яже к пользе прошения, можеши бо многая испросити у Возлюбленнаго Жениха твоего, Христа Бога нашего. Мы вемы, яко много может молитва праведнаго, поспешествуемая благостию Милосердаго Бога, Емуже слава, честь и благодарение всегда, ныне и присно и во веки веков.


Молитва третья


О, святая великомученице Екатерино, избранный чистоты сосуде, столпе православия, надежная предстательнице наша, явившая нам сама вину умоляти тя, подвижнице законная, святая на святей горе свято почивающая! Молим тя: приникши свыше, вонми гласу моления нашего, призри на бедствие рабов твоих, просвети омрачение ума нашего, сотвори нас горняя мудрствовати, а не земная. Поспеши нам молитвами твоими побеждати плотская похотения, пристрастия к миру и козни злых духов, на нас злобно воюющих: да твоим предстательством во дни жития сего свободни будем от враждебных их нападений и по исходе от воздушных их истязаний. О, премудрая дево! Даруй нам вся, яже к пользе прошения: можеши бо многая испросити у возлюбленнаго Жениха, Христа Бога нашего. Мы вемы, яко много может молитва праведнаго, поспешествуемая благоутробием милосердаго Бога, Емуже слава, честь и благодарение всегда, ныне и присно и во веки веков. Аминь.



Тропарь великомученице Екатерине


Тропарь, глас 4


Добродетельми, яко лучами солнечными, просветила еси неверныя мудрецы: и якоже пресветлая луна ходящим в нощи, неверия тьму отгнала еси, и царицу уверила еси, вкупе же и мучителя обличила еси, богозванная невесто, блаженная Екатерино: желанием востекла еси в небесный чертог, к прекрасному Жениху Христу, и от Него царским венцем венчалася еси: Емуже со Ангелы предстоящи, за ны молися, творящия пречестную память твою.[/spoiler]

Раб божий Константин

Акафист преподобному Елеазару Анзерскому, Соловецкому Чудотворцу.
[spoiler]Кондак 1

Избранный угодниче Божий, светлостию жития твоего и чудес благодатию просиявый в пустыни севернаго Помория, преподобне отче наш Елеазаре! Хвалебныя песни приносим ти, подвиги твоя воспевающе. Ты же, яко благоприятный молитвенник ко Господу, от всяких нас бед свобождай, да зовем ти: Радуйся, преподобне отче наш Елеазаре.



Икос 1

Ангел житием и путеводитель многим ко спасению был еси, преподобне отче Елеазаре. Темже и мы ныне к твоему предстательству прибегающе, приносим ти хваления сицевая: Радуйся, единаго Господа измлада возлюбивый; радуйся, чистоту душевную от юности сохранивый. Радуйся, равноангельно поживый на земли; радуйся, яко со ангелы ликуеши на небеси. Радуйся, на демоны мужественно ополчивыйся; радуйся, небесных видений сподобивыйся. Радуйся, смирение сердца до конца сохранивый; радуйся, безмолвное житие тепле возлюбивый. Радуйся, преподобне отче наш Елеазаре.



Кондак 2

Видевше благочестивии родители твои усердие твое ко иноческому житию, на сей спасительный путь тя благословити не отрекошася. Ты же, преподобне, из дому отеческаго абие изшед, во обитель Соловецкую устремился еси, еяже достиже, радостно воспел еси Богу: Аллилуиа.



Икос 2

Разум богопросвещенный стяжав, мирскаго пристрастия избегл еси, пречудне Елеазаре, и подвиги плоть умертвив, образ добраго жития иноком преподал еси. Сего ради восхваляем тя сице: Радуйся, отечество и род твой оставивый; радуйся, богатство и славу возненавидевый. Радуйся, суровое житие возлюбивый; радуйся, Христу последовати возжелавый. Радуйся, яко пристанища тихаго достигл еси; радуйся, яко спасению многих послужил еси. Радуйся, грядущая прозираяй; радуйся, далече сущая провидяй. Радуйся, преподобне отче наш Елеазаре.



Кондак 3

Сила Божия укрепляше тя на подвиги, блаженне Елеазаре, егда из обители преподобных Зосимы и Савватия изшед, в пустыню Анзерскаго острова вселился еси, идеже в безмолвии воспевал еси Богу: Аллилуиа.



Икос 3

Имея молитву и крестное знамение яко щит непобедимый, досточудне Елеазаре, мужественно прогонял еси вражия ополчения, страховании многообразными на тя воюющая. Мы же яко воина Христова ублажаем тя сице: Радуйся, темных духов прогонителю; радуйся, злокозненных их сетей разрушителю. Радуйся, именем Иису-совым враги невидимыя отражавый; радуйся, мудрость духовную стяжавый. Радуйся, на невидимую брань верою и молитвою вооруживыйся; радуйся, воин Христов непобедимь явивыйся. Радуйся, полунощныя страны светильниче; радуйся, неусыпный о людех молит-венниче. Радуйся, преподобне отче наш Елеазаре.



Кондак 4

Бурю искушений и бед враг рода человеческаго воздвизая на тя, доброподвижниче Елеазаре, аки от игумена посланный льстивно тебе является. Ты же молитвою Господнею того обличил еси и в бегство обратил еси, воспевая Богу: Аллилуиа.



Икос 4

Слышав христолюбивый царь Михаил слух богоугоднаго твоего жития, преподобне Елеазаре, лице твое видети возжела: ты же, повелению цареву повинуяся, во стольный град притекл еси и о рождении первенца ему прорекл еси. Сего ради глаголем тебе сице: Радуйся, дерзновение ко Господу стяжавый; радуйся, пророческаго дара исполненный. Радуйся, христолюбиваго царя веру умноживый; радуйся, на хвалу Господню того подвигнувый. Радуйся, честию царевою не превозносивыйся; радуйся, о славе единаго Бога возвесе-ливыйся. Радуйся, яко твоею молитвою неплодие царицы прекратися; радуйся, яко плод благословен земли Российстей молитвою твоею даровася. Радуйся, преподобне отче наш Елеазаре.





Кондак 5

Боготечная звезда иноком Соловецким являешися, отче Елеазаре, к небесному отечеству тех путеводящая, такожде и всех притекающих к раце мощей твоих умилением и верою просвещающая, вопиющих к Богу: Аллилуиа.



Икос 5

Видеша ученицы твои, преподобне Елеазаре, царево к тебе благово-ление, и повеление его к построению храма во обители твоей прием-ше, радовахуся. Мы же, Господне на то благословение уведевше и видения чудесная тебе явленная воспоминающе, глаголем: Радуйся, Христовы словесныя овцы ко спасению подвизаяй; радуйся, нерадивыя от сна греховнаго возбуждаяй. Радуйся, ученики твоя неленостно в житии назидавый; радуйся, и по преставлении писаньми твоими тех сердца умиляяй. Радуйся, словеса и учения святоотеческая в сердце твоем запечатлевый; радуйся, теми души ко спасению наставляяй. Радуйся, верный подражатель богоносным учителем бывый; радуйся, искусный иноков наставник явивыйся. Радуйся, преподобне отче наш Елеазаре.



Кондак 6

Провидец и провозвестник будущих и далече отстоящих яко близ сущих был еси, преподобне Елеазаре: темже и преставление духовнаго друга твоего за тридесять поприщ прозрел еси. Сего ради Богу, дивно прославляющему святыя Своя, поим: Аллилуиа.



Икос 6

Возсияваше лице твое небесною радостию и духовным веселием, ангелоподобне Елеазаре, егда сподоблялся еси Божественных открове-ний и видений. Сего ради сице тебе зовем: Радуйся, глас Божественный многажды слышавый; радуйся апостолу Павлу собеседник в видении бывый. Радуйся, Христов лик присно во уме твоем предносивый; радуйся, многострадальнаго о Христе жития благий образ явивый. Радуйся, на демоны воинствующим присный споборник бывый; радуйся, братию твою козни демонския прозирати научивый. Радуйся, правыя веры добрый учителю; радуйся, сомнящихся вере мудрый наказателю. Радуйся, преподобне отче наш Елеазаре.



Кондак 7

Хотяще злии человецы досаду тебе сотворити, и того ради глубокое море преплывше, дерзостно к келлии твоей с прещением приближишася; но Божественною силою во изступление ума впадше, окрест жилища твоего в недоумении блуждаху. Ты же, незлобив сый, молитвою тати оныя от таковаго помрачения исцелил еси и научил еси пети Богу: Аллилуиа.



Икос 7

Дивно от Царицы Небесныя на подвиги наставляемь, преподобне отче, непоколебимь во твоем изволении блазе пребыл еси, и небесную славу улучити сподобился еси. Темже ублажающе тя, глаголем: Радуй-ся, небесных видений достойный зритель бывый; радуйся, сосуде, Божия благодати преисполненный. Радуйся, путь спасения ясно познавый; радуйся, житием твоим путь сей нам указавый. Радуйся, безмолвия и молитвы учителю; радуйся, заповедей Господних верный блюстителю. Радуйся, ангелоподобный человече; радуйся, монашеска-го жития наставниче. Радуйся, преподобне отче наш Елеазаре.



Кондак 8

Странствие досточудно совершил еси, чудотворче Христов Елеазаре, егда море преплывал еси с братиею, ладию твою молитвою от крушения посреде плавающаго леда избавил еси и спасл еси сущия в ней люди, воспевающия Богу песнь: Аллилуиа.



Икос 8

Весь пламенем Божественныя любве объят был еси, преподобне Елеазаре, егда во острове пусте богомыслием непрестанным и плоти умерщвлением подвизался еси, душу убо молитвою питая, тело же веригами удручая. О сем хваляще тя, зовем таковая: Радуйся, ветхаго человека в себе не пощадивый; радуйся, силою креста в подвизех себе утвердивый. Радуйся, пустынное лишение доблественне претерпевый; радуйся, память смертную присно имевый. Радуйся, власяницею и веригами плоть свою смиривый; радуйся, все плотское мудрование духу покоривый. Радуйся, богодухновенных книг списатель бывый; радуйся, мудрость духовную возлюбивый. Радуйся, преподобне отче наш Елеазаре.



Кондак 9

Вси жительствующии в богоспасаемой обители сей к раце честных мощей твоих сошедшеся днесь, приснопамятне Елеазаре, и памятию добродетелей твоих сердца умиляюще, приносим ти хвалебную песнь, ангельски поюще Богу: Аллилуиа.



Икос 9

Витийственных словес плетение не довлеет восхвалити достойно чудотворения твоя, преподобне Елеазаре. Обаче любовию движими, восписуем ти сицевая: Радуйся, вождю духовных воинов; радуйся, беснуемых свободителю. Радуйся, приемый от Господа власть на духи нечистыя; радуйся, и по смерти твоей низлагаяй вражия на нас ополчения. Радуйся, яко мощей твоих духи злобы устрашаются; радуйся, яко предстательством твоим всякия болезни исцеляются. Радуйся, в пучине морстей плавающим помощниче; радуйся, обидимых защитниче. Радуйся, преподобне отче наш Елеазаре.



Кондак 10

Спасения подвигом добре подвизался еси, приснопамятне Елеазаре. Темже от Господа венец нетления тебе сплетеся, егда святую душу твою предал еси в руце Вседержителя, воспевая ангельскую песнь: Аллилуиа.



Икос 10

Царю превечному в Небеснем Царствии предстал еси, святе Елеазаре, отшед от временныя жизни. Мы же, молитвенника тя тепла пред Престолом Господним имуще, зовем сице: Радуйся, от трудов времен-ных к покою вечному славно прешедый; радуйся, и нас труды богоугодныя возлюбити научаяй. Радуйся, на земли Пресвятую Троицу присно славити обыкнувый; радуйся, Святей Троице ныне со ангелы предстояй радостно. Радуйся, дерзновение молитвенное ко Господу стяжавый; радуйся, дар чудотворения свыше восприемый. Радуйся, здравие болящим подаваяй; радуйся, во всякой нужде и беде сущим скоро помогаяй. Радуйся, преподобне отче наш Елеазаре.



Кондак 11

Пения хвалебная угоднику Божию приносяще, о празднолюбцы, всечестную память его духовно торжествуим; подвиги же его и чудесная деяния прославляюще, воспоим Богу песнь: Аллилуиа.



Икос 11

Светозарная звезда явился еси, отче Елеазаре, во мраце страстей нас сущих озаряющая и ко свету спасения приводящая всех вопиющих тебе таковая: Радуйся, обитель твою и по смерти не оставляяй; радуйся, живущия в ней невидимо назираяй. Радуйся, пищею духовною нас удовляяй; радуйся, на потребу телесную вся от Господа нам подаваяй. Радуйся, в житии твоем молитве деннонощней братию научивый; радуйся, и по преставлении твоем в молитве нас укрепляяй. Радуйся, скорбящих тайный утешителю; радуйся, страдальцев незримый посетителю. Радуйся, преподобне отче наш Елеазаре.



Кондак 12

Благодать приял еси от Христа Бога, угодниче Христов Елеазаре, еже за ны, во обители твоей жительствующия, молитися. Темже ныне память твою любезно почитающия благослови и удовли нас ко славословию Бога с песнию: Аллилуиа.



Икос 12

Поюще твоя чудеса и пророческий дар твой благоговейно почитаю-ще, все же богоугодное твое житие и многая исцеления, от раки твоея святыя болящим подаваемая, любовию воспоминающе, молим тя, угодниче Христов Елеазаре, твоего предстательства и нас грешных не отщетити, но прияти от нас хваления сицевая: Радуйся, благодатию Пресвятыя Троицы освященный; радуйся, благодатию Пресвятыя Богородицы осененный. Радуйся, в лице преподобных ублажаемый; радуйся, к великим чудотворцем Соловецким сопричтенный. Радуйся, со всеми святыми прославляемый; радуйся, со ангелы Пресвятей Троице предстояй. Радуйся, еще на земли Господа зрети сподобивыйся; радуйся, ныне Того лицем к лицу созерцаяй. Радуйся, преподобне отче наш Елеазаре.



Кондак 13

О преподобне и богоносне отче наш Елеазаре! Приими ныне прино-симая тебе хваления наша и святыми твоими молитвами в жизни сей нас от всякаго злаго обстояния сохрани, в будущей же вечнаго осуждения избави, да сподобимся купно с тобою и со всеми святыми воспевати в Троице славимому Богу: Аллилуиа.



(Этот кондак читается трижды, затем икос 1 и кондак 1).[/spoiler]

Раб божий Константин

Равноапостольная царица Елена.
[spoiler](память 21 мая по старому стилю)

Акафист святым равноапостольным царем Константину и Елене

Кондак 1
Избраннии предвечным Царем, святии равноапостольнии Константине и Елено, на всемирное воздвижение Животворящаго и Спасительнаго Креста Господня, имже соделася спасение рода человеческаго, искупленнаго кровию пригвожденнаго на нем Агнца Божия, да вси праведнии и грешнии благодарственно взывают вам: Радуйтеся, святии равноапостольнии Константине и Елено, обретшии Крест Господень, оружие спасительное.


Икос 1
Ангельский собор на землю зрети велие чудо — како обретеся Святое Древо, на много лет в недрах земли бездушным камением хранимое, ныне же руками архиерейскими возносимое, людие же видеша сие, ниц на землю падоху, слезно вопия: "Господи помилуй! Господи помилуй! Господи помилуй!" Вас же, святии равноапостольнии Константине и Елено, смиренно величаху:

Радуйся, блаженная мати зело возлюбившая Христа; 

радуйся, боговенчанный сыне, слуго Небеснаго Царя. 

Радуйтеся, земнии Ангели и небеснии человецы; 

радуйтеся, строителие тайн Божиих. 

Радуйтеся, яко вами небо и земля духовно возрадовашася; 

радуйтеся, яко от всех земнородных вкупе прославишася. 

Радуйтеся, достойнии носителие имене Христова; 

радуйтеся, два светила великая во вселенней. 

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 2
Видев славный Константин во время брани с Максентием в полудни Крест на небе, светом сияющий, и письмена "Сим побеждай", повеле
оковати все оружие и шлемы бранные, да до конца победив врага помощию Крестною, воспоют распятому Христу победную песнь: Аллилуиа.


Икос 2
Разум твой, не просвещен еще святым Крещением, царю Константине, просвети Господь во сне нощию, научая победити врага Крестным
знамением, мы же дивяся таковому Промыслу Божию о Тебе, взываем сице: 

Радуйся, двукратным видением Креста свыше озаренный; 

радуйся, паче всех царей земных превознесенный. 

Радуйся, свыше предызбранный на апостольское служение; 

радуйся, победителю врагов видимых и невидимых. 

Радуйся, Крест Господень зело прославивый; 

радуйся, Церкви Христианской вся силы отдавый. 

Радуйся, врага спасения человеческаго посрамивый; 

радуйся, честным Крестом главу его сокрушивый. 

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 3
Силою Креста во брани, ведал еси богомудре Константине: "Аз спасох град сей от врагов, и сердце мое уязвлено любовию распятаго Христа,
Егоже чту, Емуже поклоняюся и не возбраняю любящим Его пети блаженную песнь: Аллилуиа".


Икос 3
Имея в сердцы чувство живыя христианския веры, великий Константин повеле, да сокрушатся идолы и да созиждутся храмы, идеже сонмы
Ангелов и лики праведных выну молят своего Создателя. Мы же недостойнии, просяще о мире мира и добром ответе на страшнем судище
Христове, зовем вам: 

Радуйтеся, первии во христианех царие; 

радуйтеся, милосердием и властию украшеннии. 

Радуйтеся, любовию и правдою одеяннии; 

радуйтеся, от вражиих прелести избавленнии. 

Радуйтеся, уставов церковных хранителие; 

радуйтеся, девства и целомудрия любителие.
Радуйтеся, языческие храмы на земли упразднившии; 

радуйтеся, день Воскресный праздновати установившии. 

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 4
Бурныя потоки христианския крови твоим повелением, святый Константине, прияша конец; сущии в темницех получиша ослабу, крыющиися во пещерах и горах вспять возвращахуся, и чада церкве лобзанием святым во объятии встречаху друг друга, воспевая Богу песнь хвалы: Аллилуиа.


Икос 4
Слышавше мученицы и страдальцы Христовы повеление твое, богоблаженне Константине, да свободно исповедают веру Христову,
возвеселишася и со слезами радости воспеваху ти сице: 

Радуйся, великаго Рима украшение; 

радуйся, узников Христовых свобождение. 

Радуйся, языческаго мира упразднение; 

радуйся, идолов и кумиров сокрушение. 

Радуйся, прав и законов утверждение; 

радуйся, чар волшебных и гаданий карательное запрещение. 

Радуйся, о Церкви пекийся, аки чадолюбивая мати; 

радуйся, воспретивый осужденных на кресты распятие. 

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 5
Воскресение Христово видевше, воспеваху людие: Се Крест, имже прииде радость всему миру. Неведомо бысть миру оружие, имже новый
Давид победи смерть, сокрыто бысть от поклонения верных людий, Ангелы токмо охраняху честный Крест, немолчно воспевая: Аллилуиа.


Икос 5
Видя осмидесятилетняя старица, богомудрая мати Елена, сердце твое, пречудне царю Константине, желанием исполнено к прославлению
Святаго Древа, сама со тщанием приемлет труды, да открывает сокровище на поклонение всем языком, с любовию зовущих вам таковая:

Радуйтеся, святии равноапостольнии Константине и Елено, царие премудрии; 

радуйтеся, двоице святая, Богом возлюбленная. 

Радуйтеся, любовию к Нему аки Серафими пламеневшии; 

радуйтеся, ревностию аки апостолы послужившии. 

Радуйтеся, усердием вашим яко жены с миры пришедшии; 

радуйтеся, за подвиги ваша от всех земнородных славимые. 

Радуйтеся, яко Ангелы с вами ликуют на небеси; 

радуйтеся, яко человецы выну восхваляют вас на земли. 

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 6
Проповедником тайны, идеже бе треблаженное Древо, бысть некий Иуда, иже не хоте указати место сие, сего ради изнурен бысть гладом во
глубине кладенца по повелению святой царицы Елены, ейже Дух Святый откры, да употребит всякое усилие для взыскания Креста Господня на радость православным христианом, поющим Богу: Аллилуиа.


Икос 6
Возсия лучь Божественнаго света в сердцы Иуды, непреклоннаго доселе к прошениям и увещаниям богомудрой царицы Елены, иже отверз уста глаголаше: "Близ Голгофы, в капище Венеры, обрящете Крест вашего Христа". Оттоле начаша искати, многи труды понесоша, не обретше же сокровища, зело изнемогша. Егда же ощутиша велие благоухание из недр земли, усугубиша труды и обретоша три креста, тогда вернии людие прославляху вас со слезами: 

Радуйтеся, треблаженнаго Древа усердные искателие; 

радуйтеся, дела апостольскаго неленостные продолжателие.
Радуйтеся, торжество веры Православныя явившии; 

радуйтеся, люди, чтущии Крест Господень, зело возвеселившии. 

Радуйтеся, воздух животворным знамением освятившии;

радуйтеся, обретением Креста оставившии людем память вечную.

Радуйтеся, принесшии всему миру радость безконечную.

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 7
Хотя тщательно уведети Крест, на немже принесеся Жертва Святая, да не воздадят честь Креста иному, блаженный патриарх Макарий повеле
возложити кресты на болящу и мертва, сии же ожиша и здрави бяху, тогда людие, видевше чудо, падоху ниц до земли, Животворящему Кресту, победителю смерти и ада, поюще: Аллилуиа.


Икос 7
Новый христианский храм созидает мудрая царица Елена на Голгофе для всемирнаго воздвижения Животворящаго Креста Господня,
безчисленное же множество людий молиша блаженнаго патриарха Макария, да сподобятся узрети Господень Крест. Он же, смирения сый
исполнен, с освященным собором высоко подъяша Крест, да видят вси, зряще сие, племена и языцы с благоговением и радостию восклицаху:
Радуйся, Треблаженное Древо, имже спасеся двоица первозданная; 

радуйся, Честное Древо, имже ад испустиша узники. 

Радуйся, Честное Древо, Архангелами и Ангелами хранимое; 

радуйся, Честное Древо, пророками богоглаголивыми предзримое. 

Радуйся, Честное Древо, преподобных и праведных веселие; 

радуйся, Честное Древо, кающихся грешников надеждо и спасение. 

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 8
Странствующему на земли нашего ради спасения, Иже не имеяше где главы подклонити, воздвигоша храмы, богомудрии Константине и Елено, в Вифлееме рождшемуся, на Голгофе, идеже распятся, на горе Елеон, отонюдуже вознесша к безначальному Отцу, и у дуба Мамврийска, идеже Авраам пригласи Его странна, да вси вернии непрестанно поют Серафимскую песнь: Аллилуиа.


Икос 8
Все ваше служение бысть во славу Сладчайшаго Господа и Его Пречистыя Матере, Заступницы мира. Кий язык изречет подъятые вами труды? Кий разум постигнет радость, егда обретеся вами желаемый Крест Господень? Сего ради вси земнороднии благодарно взывают вам: Радуйтеся, Ангельскою чистотою пожившии; 

радуйтеся, всем сердцем Господа возлюбившии. 

Радуйтеся, апостольскою ревностию потрудившиися;
радуйтеся, христианским смирением украсившиися. 

Радуйтеся, вся добродетели в себе совокупившии; 

радуйтеся, блаженство райское унаследовавшии. 

Радуйтеся, яко зрите всегда Творца и Господа; 

радуйтеся, яко мзда ваша многа на небесех. 

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 9
Всякое еретическое учение отвергше, богомудрии отцы и учителие, собравшиися повелением твоим, царю Константине, на первом Вселенстем соборе, Ария отгнаша и его пособников, и яко гром возгремеше во вся концы песнь: Аллилуиа.


Икос 9
Ветии сладковещаннии богоноснии отцы, святители и учители на соборе Никейстем, Николай Мирликийский, Спиридон Тримифунтский,
Пафнутий Фивайдский, Павел Неокесарийский, Афанасий Александрийский и прочие исповедницы Христовы, иже свыше умудрившася,
изложив тамо Символ веры и всей Церкви узакониша пети Троицу Единосущную, принесше песнь благодарения верховному Владыце всех Богу и сослужителю своему взывая: 

Радуйся, достойный сыне матере своея богомудрыя Елены; 

радуйся, подражавый ей во смирении неизреченно.
Радуйся, царю, превосходяй мудрость Соломона; 

радуйся, стяжавый веру праотца Авраама. 

Радуйся, законов и власти высокий архитектоне;
радуйся, новый апостоле великаго града Константинополя. 

Радуйся, милостивый и кроткий повелителю; 

радуйся, перваго Никейскаго собора мудрый председателю. 

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 10
Спастися хотящим в подвизе девства, не возбранял еси, великий Константине, да чистым сердцем возносят молитвы Единому Богу о мире у
всего мира и, отрешении молвы житейския, яко Ангелы поют: Аллилуиа. 


Икос 10
Стена, покров и защита бысть тебе во всем Сама Пречистая Дева, Владычица неба и земли. Ейже вручил еси новый град твой на брегах Босфора, да вси людие, укрепляеми Ея милосердым заступлением, воспоминающе веру и подвиги твоя, прехвальне Константине, благоумиленно взывают:
Радуйся, новую столицу Византии освятивый; 

радуйся, заступлению и покровительству Матере Божией вручивый. 

Радуйся, храм Божий во имя Ея создавый; 

радуйся, горячия молитвы в нем возславый. 

Радуйся, яко раб разумный таланты свои умноживый;

радуйся, волю свою в волю Божию предавый.

Радуйся, храмов святых украшение;

радуйся, пастырей Церкве Христовы вразумление. 

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 11
Пения и усердная молитвы приносяще ныне во храме вашем, святии равноапостольнии царие Константине и Елено, просим со слезами:
воздежите блаженнии ваши руце, имиже приясте Крест Святый, и молите распятаго на нем Господа, да в покаянии непрестанно зовем Ему:
Аллилуиа.


Икос 11
Светла и радостна кончина ваша, святии равноапостольнии Константине и Елено, вы бо победоносное знамение в объятиях своих держаще,
показуете сим, да возмет кийждо Крест свой и, во смирении шествуя путь земнаго странствия, сподобится получить безболезненную кончину и Божественных Тайн причащения, со слезами взывая вам:

Радуйтеся, яко поете Ему со Ангелы Трисвятое пение; 

радуйтеся, с собором апостолов Ему предстоите. 

Радуйтеся, яко вкупе со всеми святыми райская селения зрите; 

радуйтеся бедных и убогих милостивии попечителие. 

Радуйтеся, от уз и пленения скорые свободителие; 

радуйтеся, праздника не почитающих строгие наказателие. 

Радуйтеся, о всех чтущих память вашу пред Господем предстателие.

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 12
Благодать мира, тишину испросите притекающим к вашему заступлению, угодницы Божии, сохраните отечество наше от врагов находящих на ны и междоусобныя брани, да милость Божию улучим вашими молитвами, вопиюще со всеми святыми Владыце Христу: Аллилуиа. 


Икос 12
Поюще и восхваляюще вас, святии равноапостольнии царие Константине и Елено, празднуем святую память вашу и просим: не забудите нас,
грешных, чтущих труды и подвиги ваша, да вси с верою и любовию зовем к Вам: 

Радуйтеся, града и храма сего покровителие; 

радуйтеся, пастырем Церкве богомудрии учителие. 

Радуйтеся, во тьме заблудшим яркие светильницы; 

радуйтеся, за отечество наше теплые пред Богом молитвенники. 

Радуйтеся, яко больных, слепых и глухих исцеляете; 

радуйтеся, яко от нечаянныя смерти избавляете. 

Радуйтеся, еретиков и хульников веры страхом правосудия Божия устрашаете; 

радуйтеся, грешникам кающимся прощения у Престола Божия испрошаете. 

Радуйтеся, святии равноапостольнии Константине и Елено, обретшии Крест Господень, оружие спасительное.


Кондак 13
О двоице премудрая, великие царие Константине и Елено, приимите малое сие моление наше и приносимое вам хваление! Избавите чтущих
святую память вашу от греховных страстей и вечнаго осуждения, да ходатайством вашим возможем до скончания дней своих поклонятися
Животворящему Древу Креста Господня и тамо, идеже сияет свет невечерний, пети во славу Креста: Аллилуиа.
(Этот кондак читается трижды, затем икос 1 и кондак 1)


Молитвы святым равноапостольным Константину и Елене


Молитва первая
О святии равноапостольнии Константине и Елено! Избавите приход сей и храм наш от всякаго навета вражия и не оставите заступлением вашим нас, немощных (имена), умолите благость Христа Бога нашего даровати нам помыслов мир, от пагубных страстей и всякий скверны
воздержание, благочестие же нелицемерное. Испросите нам, угодницы Божии, свыше дух кротости и смиренномудрия, дух терпения и покаяния, да прочее время жития нашего в вере и сокрушении сердечнем поживем, и тако в час скончания нашего благодарно восхвалим прославльшаго вас Господа, Безначальнаго Отца, Единороднаго Его Сына и Единосущнаго Всеблагаго Духа, Троицу Нераздельную, во веки веков.


Молитва вторая
О предивнии и всехвальнии царие, святии равноапостольнии Константине и Елено! К вам, теплым заступником, возносим наши недостойныя молитвы, яко велие имате дерзновение ко Господу. Испросите у Него мир Церкви и всему миру благоденствие, начальником мудрость, пастырем попечение о пастве, пасомым смирение, старцем желанное упокоение, мужем крепость, женам благолепие, девственником чистоту, детям послушание, младенцем христианское воспитание, больным исцеление, враждующим примирение, обидимым терпение, обидящим страх Божий. Приходящим в храм сей и молящимся в нем святое благословение и всем вся по коегождо прошению полезная, да хвалим и поем Благодетеля всех Бога в Троице славимаго Отца, и Сына, и Святаго Духа, ныне и присно и во веки веков. Аминь.


Тропарь святым равноапостольным царям Константину и его матери Елене
Тропарь, глас 8
Креста Твоего образ на небеси видев, и якоже Павел звание не от человек прием, во царех Апостол Твой, Господи, царствующий град в руце
Твоей положи: егоже спасай всегда в мире молитвами Богородицы, единие Человеколюбче.


Кондак, глас 3
Константин днесь, с материю Еленою, крест являют всечестное древо, всех убо Иудеов посрамление суще, оружие же на противныя верных
царей: нас бо ради явися знамение велие и во бранех грозное.


Величание
Величаем вас, святии благовернии и равноапостольнии царие Константине и Елено, и чтим святую память вашу, вы бо святым Крестом всю
вселенную просветили есте.


Первой заслугой царицы Елены было то, что она расположила своего сына Константина к христианской вере в то время, когда другие юноши
благородного вхождения воспитывались в языческом духе и презирали христианство. Второй — воздвижение Креста Господня.
С целью найти Крест Господень царица Елена в 326 г. отправилась в Иерусалим. Ей указали, что Крест Господень зарыт в землю на месте, где язычники воздвигли храм в честь Венеры. Когда по приказанию Елены сломали здание и стали рыть землю, то нашли три креста и около них дощечку с надписью: "Иисус Назарянин, Царь Иудейский". Чтобы узнать, на каком из трех крестов распят Спаситель, стали по очереди возлагать их на умершего. От двух крестов не произошло никакого чуда. Когда же возложили третий крест, то умерший воскрес, таким образом узнали крест Спасителя. Когда люди узнали о чуде, то все захотели увидеть святой Крест. Тогда патриарх Иерусалимский Макарий и царица Елена стали на возвышенном месте и поставили (воздвигли) крест. Народ, видя крест Господень, молился со словами: "Господи помилуй!"
В память этого события Церковь установила праздник Воздвижения Креста Господня. Этот праздник относится к числу великих и празднуется 27 сентября. В этот день святой крест торжественно выносится на середину храма для поклонения. Во время царствования Константина было восстановлено прежнее название города Иерусалима вместо нового, Юлия Капитолина, данного ему при императоре Адриане (117-138 гг.).
Царица Елена построила несколько храмов в Святой Земле: на Голгофе храм Воскресения (и Гроба) Господня, где ежегодно в пасхальную ночь сходит благодатный огонь; на Елеонской горе (где Господь вознесся на Небо); в Вифлееме (где Господь родился по плоти) и в Хевроне у
Мамврийского дуба (где Бог явился Аврааму).[/spoiler]

Раб божий Константин

Акафист преподобной Елене Киево-Флоровской
Память совершается: 23 марта/5 апреля – преставление (1834).
[spoiler]Кондак 1
Избранная заветов отеческих хранительнице, святителя Задонскаго Тихона всеусердная послушнице, преподобная мати наша Елено, пение благодарственное тебе ныне приносим и усердно с любовию взываем:
Радуйся, мати наша Елено, богомудрия священное сокровище.

Икос 1
Ангельское житие стяжавши, ангельским ликом сопричтения сподобилася еси, богомудрая мати Елено, и ныне Престолу Божию предстоящи, моление теплое приносиши Богу и Создателю о всех, похвалами сицевыми тя ублажающих:
Радуйся, ангельскаго жития на земли явление;
Радуйся, ликов иноческих украшение.
Радуйся, постников и подвижников наставнице досточудная;
Радуйся, молитвы учительнице всеблаженная.
Радуйся, града Киева всемощное заступление;
Радуйся, земли нашея всечудное просвещение.
Радуйся, Воронежския страны преславное прозябение;
Радуйся, обители Флоровския богодарованное утешение.
Радуйся, мати наша Елено, богомудрия священное сокровище.

Кондак 2
Видети возжелевши благая Иерусалима, и новаго небеси и земли чающи, в нихже правда живет, отринула еси суету мирскую и покаянием душу омывши, достигла еси Царствия Божия, идеже купно со ангельскими лики песнь приносиши Богу: Аллилуия.

Икос 2
Разум от страстей очистивши, в молитве возсияла еси, преподобная мати Елено, яко свеща пламенеющая и путь ко благочестию и заповедей Христовых исполнению всем освещающая, память твою благочестно совершающим и похвалы сицевыми тя ублажающим:
Радуйся, во тьме нечестия сияющая;
Радуйся, светом Небесным нас просвещающая.
Радуйся, огня геенскаго молитвами твоими нас исхищающая;
Радуйся, от пути греховнаго многих отвращающая.
Радуйся, кадило молитвы, присно благоухающее;
Радуйся, звездо светозарная, верныя озаряющая.
Радуйся, в Небесное Отечество путь нам указующая;
Радуйся, от искушений и соблазнов нас пречудно избавляющая.
Радуйся, мати наша Елено, богомудрия священное сокровище.

Кондак 3
Силою Божественною, яже в немощи человеческой совершается, преоборола еси немощь естества, и страстей течение покаянием уставивши, сподобилася еси покоя достигнути вечнаго и взошла еси к Небесному Жениху твоему, песнь победную возглашающи: Аллилуия.

Икос 3
Имущи в сердце своем желание Господу последовати, отвергла еси ризы кожанныя, яже человеку грех сшиваше, и облеклася еси в светлость чина иноческаго, юже неврежденно соблюла еси, сего ради песньми сицевыми ублажаешися:
Радуйся, иноческаго жития взыскавшая;
Радуйся, искушения всемудренно отвергшая.
Радуйся, в ризу спасения всеславно облеченная;
Радуйся, доброделанием, яко венцем, всеславно украшенная.
Радуйся, вся красная мира сего во уметы вменившая;
Радуйся, добродетельми душу свою просветившая.
Радуйся, тесный путь жития монашескаго избравшая;
Радуйся, молитвою и подвиги своими страсти поправшая.
Радуйся, мати наша Елено, богомудрия священное сокровище.

Кондак 4
Бурею страстей возмущаемое море попечений житейских неврежденно преплывши, мати преблаженная Елено, достигнути сподобилася еси необуреваемаго пристанища Христова, идеже песнь Господеви возсылается присно: Аллилуия.

Икос 4
Слышавши в сердце своем, о мати небомудренная, глас Христов, на подвиг тя призывающий, отринула еси суету мирскую и восприяла еси житие тесное, во обители Горняя ведущее, и сего ради ублажаешися похвалы сими:
Радуйся, благое иго Христово на рамена своя подъявшая;
Радуйся, в заповедех Господних безпорочно ходившая.
Радуйся, богоизбранное Духа Святаго жилище;
Радуйся, благодати Божественныя хранилище.
Радуйся, проповедание подвига монашескаго;
Радуйся, инокинь похвало всерадостная.
Радуйся, добродетельми светло украшенная;
Радуйся, венцем Небесным увязенная.
Радуйся, мати наша Елено, богомудрия священное сокровище.

Кондак 5
Божиим велением последующи, отверглася еси суетныя воли человеческия и взыскала еси заповедей и оправданий Господних, ихже и нас научи творити, да с тобою Бога прославим, поюще: Аллилуия.

Икос 5
Видети возжелевши доброту краснейшаго паче сынов человеческих Жениха Небеснаго, плоть духови покорила еси и на брак Агнчий невозбранно взошла еси, темже пение слышиши от нас похвальное:
Радуйся, путем тесным в радость Господа вшедшая;
Радуйся, житие нестареемое обретшая.
Радуйся, светом Небесным осиянная;
Радуйся, Духом Божиим осененная.
Радуйся, невесто Христова всеблаженная;
Радуйся, наставница наша преподобная.
Радуйся, утешение нам присно низпосылающая;
Радуйся, благодатные дары от Господа подающая.
Радуйся, мати наша Елено, богомудрия священное сокровище.

Кондак 6
Проповедует земля Киевская славу твою и обитель Флоровская возвещает миру всему память подвигов и деяний твоих, Елено богомудрая, ты бо в немощней плоти явила еси величие духа, страсти побеждающи и Господу усердно взывающи: Аллилуия.

Икос 6
Возсия память твоя всечестная, Елено богоблаженная, яко светоносное светило, концы земли нашея светом любомудрия и сиянием святости освещающи и вся побуждающи взывати тебе:
Радуйся, души наша благодатию Божиею просвещающая;
Радуйся, сердца наша питием благочестия напояющая.
Радуйся, Ангельскими лики прославляемая;
Радуйся, иноческими соборами воспеваемая.
Радуйся, подвижниками присно ублажаемая;
Радуйся, людьми православными непрестанно похваляемая.
Радуйся, от адския муки нас изымающая;
Радуйся, молитвами твоими райския врата нам отверзающая.
Радуйся, мати наша Елено, богомудрия священное сокровище.

Кондак 7
Хотение всякое суемудренное побеждается молитвою твоею, мати наша Елено, возносиши бо непрестанно Богу и Спасу ходатайство немолчное о всех, память твою верно чтущих и купно с тобою песнь Троице воспевающих: Аллилуия.

Икос 7
Новая звезда светозарная, молитвою и любовию ко Христу сияющая, явилася еси, мати наша Богоблаженная Елено, сестрам обители Флоровския и всем людем православным, с верою и усердием чудотворным мощем твоим покланяющимся, от нихже благодать подаеши всем, пение сицевое воспевающим:
Радуйся, чудес Христовых всеславное явление;
Радуйся, обители Флоровския похвало и утверждение.
Радуйся, от падений греховных нас ограждающая;
Радуйся, на путь правды нас всемудре наставляющая.
Радуйся, любви Божия откровение;
Радуйся, Промысла Его всечудное совершение.
Радуйся, в молитве к Богу предстоящая;
Радуйся, о нас Христа непрестанно умоляющая.
Радуйся, мати наша Елено, богомудрия священное сокровище.

Кондак 8
Странное чудо и недоуменное зрим о тебе, мати всечестная, благодать бо неоскудную подаеши всем, чудесы и знаменьми от бед заступаеши с любовию тя воспевающих и мощем твоим чудотворным кланяющихся, и Богу песнь хваления приносящих: Аллилуия.

Икос 8
Великих чудес всем еси подательнице, мати всечестная Елено, темже не остави и нас, в скорби, немощи и обстоянии молитвы тебе приносящих, и утешение от Господа подаждь предстательством твоим всем, тако глаголющим:
Радуйся, заступнице наша преславная;
Радуйся, молитвеннице о нас предивная.
Радуйся, чудес источниче неистощимый;
Радуйся, знамений кладезю неисчерпаемый.
Радуйся, сосуде, благодатию преисполненный;
Радуйся, ковчеже, дарами Духа всеукрашенный.
Радуйся, любовию своею всех нас объемлющая;
Радуйся, никогоже скорбящим оставляющая.
Радуйся, мати наша Елено, богомудрия священное сокровище.

Кондак 9
Всякия скорби избави, болезнь душевную и телесную утоли, обстояние далече отжени и услыши нас, взывающих ко всеблагому Богу нашему и купно с тобою Имя Его всепетое прославляющих: Аллилуия.

Икос 9
Витии богопросвещеннаго и пастыря Христова, всеблаженнаго Тихона стопам последствующи и наставление того в сердце выну хранящи, сподобилася еси Небесный чертог унаследовати и купно со святителем Задонским Христу ходатайствовати о всех, тако глаголющих:
Радуйся, святителя Тихона ученице всеблаженная;
Радуйся, послушнице того всеусердная.
Радуйся, благословение его во смирении восприявшая;
Радуйся, наставления святителя добре сохраншая.
Радуйся, во гробе того погребения сподобльшаяся;
Радуйся, Небеснаго Отечества его молитвами достигшая.
Радуйся, купно с ним Престолу Божию предстоящая;
Радуйся, о молитвы тебе приносящих присно ходатайствующая.
Радуйся, мати наша Елено, богомудрия священное сокровище.

Кондак 10
Спасение исходатайствуй всем и грехов прощение, и болезней исцеление, и скорбей ослабу подаждь нам, память твою верою совершающим и о тебе пение Богу благодарственное приносящим: Аллилуия.

Икос 10
Стена необоримая и покров священный граду Киеву явися предстательство твое, мати досточудная Елено. Молитвами бо твоими всякое зло отревается далече, верная же чада церковная во благочестии утверждаются и пение сицевое ти воспевают:
Радуйся, от всякия напасти избавление;
Радуйся, вражеския злобы посрамление.
Радуйся, всесветлое лести попрание;
Радуйся, всемощное ересей посрамление.
Радуйся, неверия грозная обличительнице;
Радуйся, милостей Божиих преславная раздаятельнице.
Радуйся, яко тобою от всякия немощи исцеляемся;
Радуйся, яко тобою благодатныя помощи сподобляемся.
Радуйся, мати наша Елено, богомудрия священное сокровище.

Кондак 11
Пение всеумиленное и похвалы приносяще ти, мати преподобная, от жития твоего, аки от книги священныя, наставление всемудренное приемлем и, подвиги и труды твоя зряще, научаемся присно Богу взывати: Аллилуия.

Икос 11
Света дщерь и сокровище нетленное благодати явилася еси, мати преподобная, вся бо просвещаеши молитвою твоею и предстательством всемощным покрываеши, и ко Христу присно наставляеши нас, вопиющих ти:
Радуйся, трапезою Небесною насыщенная;
Радуйся, питием безсмертия напоенная.
Радуйся, яко предстательством твоим жизнь вечная обретается;
Радуйся, яко молитвами твоими вера истинная познавается.
Радуйся, звездо, всесветло пламенеющая;
Радуйся, к жизни нетленней путь указующая.
Радуйся, яко ходатайством твоим мир с Богом обретаем;
Радуйся, яко путем твоим к Небеси восходим.
Радуйся, мати наша Елено, богомудрия священное сокровище.

Кондак 12
Благодать испроси, мати преподобная Елено, всем, подвиги твоя воспевающим и Богу, дивному во святых Своих, о тебе похвальная восписующим: Аллилуия.

Икос 12
Поюще во псалмех и песнех духовных Господа, похваляем подвиги и чудеса, явленныя тобою, мати наша Елено, и, всерадостно похвалы составляюще, ублажаем тя, небесную заступницу града и земли нашея, чудес источник неоскудеваемый и сосуд благодати божественныя, темже и глаголем:
Радуйся, основание благочестия непоколебимое;
Радуйся, утверждение православия необоримое.
Радуйся, ангельским житием просиявшая;
Радуйся, подвиги своими вся к доброделанию наставляющая.
Радуйся, от внезапныя напасти нас ограждающая;
Радуйся, к покаянию и освящению вся призывающая.
Радуйся, молитвы наша приемлющая;
Радуйся, дары Небесныя нам присно подающая.
Радуйся, мати наша Елено, богомудрия священное сокровище.

Кондак 13
О всеблаженная мати Елено, Престолу Божию присно предстоящая и о обители твоей непрестанно ходатайствующая, пение наше немощное приими, и испроси нам от Господа неоскудевающую благодать, да твоим стопам последствующе, купно с тобою и с лики Небесными песнь Ему воспети возможем: Аллилуия.

Молитва
О преподобная и преблаженная мати Елено, скорая наша помощница и заступница, и неусыпная о нас молитвенница! Предстояще ныне святей иконе твоей (или: святым мощем твоим) и на сию (или: сии) со умилением взирающе, яко живей тебе, сущей с нами молимся усердно: приими славословия и прошения наша и принеси их ко Престолу Божию, яко дерзновение многое к Нему имущая. Испроси притекающим к тебе и всем православным христианом вечное спасение и временное благоденствие, на вся же благая дела и начинания наша щедрое благословение и от всяких болезней, бед и нападений вражиих избавление. Ей, Богомудрая мати наша! Тебе, предстоящей Престолу Божию, ведомы суть нужды наша духовныя и житейския: призри на нас матерним оком и твоими молитвами всякое зло от нас отврати, паче же злых и богопротивных обычаев умножение. Утверди же во всех веры согласное ведение, взаимную любовь и единомыслие, да всем житием нашим славится всесвятое имя Отца и Сына и Святаго Духа, Единаго Бога, в Троице покланяемаго, Емуже честь и слава во веки веков. Аминь.

Тропарь, глас 1
От юности нищету Христову возлюбивши / и крест скорбей и странствий восприимши, / славу и богатство нивочтоже вменила еси, / Богомудрая мати Елено, / моли Христа Бога // спастися душам нашим.

Кондак, глас 4
Наставленьми святителя Тихона просвещена, / лесть мира сего отринула еси, / преподобная мати Елено, / и, якоже некое сокровище, / гроб Задонскаго святителя сохраняла еси, / в немже и по преставлении упокоившися, / жизнь вечную наследовала еси, мати достоблаженная, / и точиши чудеса неоскудно, // память твою почитающим любовию.

Величание
Ублажаем тя, преподобная мати Елено, / и чтим святую память твою, / ты бо молиши о нас // Христа, Бога нашего.

Текст акафиста одобрен Литургико-богослужебной комиссией при Священном Синоду УПЦ 26.02.2010 г. и издан Флоровским монастырем.[/spoiler]

Раб божий Константин

АКАФИСТ В ЧЕСТЬ И ПОХВАЛУ ПРЕПОДОБНОМУЧЕНИЦЫ ВЕЛИКИЯ КНЯГИНИ ЕЛИЗАВЕТЫ И КУПНО С НЕЮ ПОСТРАДАВШИХ СТРАСТОТЕРПЦЕВ АЛАПАЕВСКИХ.
[spoiler]Кондак 1
Избранней угоднице Божией, преподобномученице великой княгине Елизавете, премудрей и всехвальней невесте Христовей, яко избавляемии тобою от искушений и бед, пение благодарственное и хвалебное восписуем ти молитвенницы твои, святая страстотерпице царственная. Ты же, яко имея велие дерзновение ко Всемилосердному Господу нашему, купно с пострадавшими с тобою мученики преславными, вознеси молитвы твоя о всех, величающих вы и взывающих сице:
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Икос 1
Ангелов Творец и всея твари Содетель и Промыслитель во всяцем народе и колене, имеяй верных чад Своих, от всеславнаго рода монаршескаго призва тя, святая мати наша Елизавето, ко служению великому в стране Российстей; ты бо от дний детства твоего навыкла еси исполняти волю Господню, и движимая благодатию Божиею, аки Руфь древняя, оставила еси народ твой, в земли Российстей отчизну новую преславно обретше. Мы же, вся сия ныне славяще, таковыя похвалы приносим:
Радуйтеся, агницы блаженнии, любовию к Богу издетска просвещеннии.
Радуйтеся, благодатными дарами Всесвятаго Духа озареннии.
Радуйтеся, богомудрии князие и мученицы благословеннии.
Радуйтеся, истинным благородством и подлинным богомыслием просиявшии.
Радуйтеся, глубину веры и высоту сострадания всем житием вашим явившии.
Радуйтеся, со Ангелы купно песнь победную Творцу воспевающии.
Радуйтеся, аки звезды многосветлии на небосклоне Небеснем сияющии.
Радуйтеся, и нас лучами добродетелей ваших озаряющии.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 2
Видевше благолепие лица твоего, святая Елизавето, возрадовася зело благоверный князь Константин, и помышляя о красоте добродетелей твоих, воспе гимны хвалебныя Всеблагому Господу, возрастившему тя, аки крин среди терний и благодатию Своею преизобильно тя одарившему. Мы же, сие ныне воспоминающе, просим тя, благоверная княгине, приклони и к нам великое милосердие Всемогущаго Творца нашего, да сподобимся и мы купно с тобою во веки пети Ему: Аллилуиа.

Икос 2
Разумом богопросвещенным свыше одаренная, святая благоверная княгине Елизавето, возжадала еси паче всего о еже волю Господню выну исполняти, и, благодатию небесною укрепляемая, вземши крест свой, с кротостию и смирением понесла еси е, за вся Творца благодаряще. По тяжцем же убиении супруга твоего, егда сердце твое пронзи меч обоюдоострый, евангельски возглашала еси «Отче, прости ему, не ведал бо, что сотворил», посещением твоим убийцу супруга твоего к покаянию подвизая. Мы же, вся сия ныне поминающе, просим тя: сотвори купно с иными страстотерпцы алапаевстими молитвы за ны ко Господу Всемогущему, взывающих сице:
Радуйтеся, образ милосерднаго служения ближнему явившии.
Радуйтеся, Господа паче всего земнаго возлюбившии.
Радуйтеся, образ и подобие Божие в коегождем человеце зрящии.
Радуйтеся, нелицемерно заповеди Христовы исполнявшии.
Радуйтеся, кающимся грешником слезы утешительныя посылающии.
Радуйтеся, в несении скорбей и тягот немощныя укрепляющии.
Радуйтеся, за вся благодарити Христа научающии.
Радуйтеся, милосердие Божие к нам приклоняющии.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 3
Силою благодати Христовыя укрепляемая, святая благоверная княгине Елизавето, по кончине супруга твоего, благовернаго князя Сергия, оставила еси мир сей с тленными благами его, и, отрешся от жития в чертозех царстих, облеклася еси в ризы иноческия, воспевая укрепившему тя Господу: Аллилуиа.

Икос 3
Имуще горячее желание послужити ближнему и восходити к Богу по лествице дел милосердия, вся труды твоя, богоблаженная Елизавето, посвятила еси Всенепорочней Матери Господа нашего, и сего ради пречудный храм Покрова Пресвятыя Богородицы и Приснодевы Марии воздвигла еси в обители твоея. Движимая благодатию Всесвятаго Духа, праведных жен Марфу и Марию, яко святых покровительниц трудолюбия и созерцания избрала еси, в добродетелех своих свято пути их последовавше. Мы же, светло празднующе святую память твою, мати Елизавето, купно с тобою алапаевстих соратников величаем и взываем вам сице:
Радуйтеся, к творению дел добрых всех нас подвизающии.
Радуйтеся, подлинными учениками Христа быти нас научающии.
Радуйтеся, с верою возносимым молитвам радостно внимающии.
Радуйтеся, вся благая прошения наша исполняющии.
Радуйтеся, всего мира христианскаго украшением явившиися.
Радуйтеся, следовати пути Марфы и Марии наставляющии.
Радуйтеся, благодать Святаго Духа хранити и преумножати понуждающии.
Радуйтеся, радостию Христовою души наша наполняющии.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 4
Буря искушений греховных и суеты мирския не возмогла есть поколебати храмины духа твоего, святая мати Елизавето, ты бо, всецело упование на Христа Распятаго возложивше, в трезвении и богомыслии возрастающи, в царственном граде Москве обитель пречудную основала еси, идеже страждущии людие отраду и утешение обреташа. Сице молим тя: покрый и нас покровом молитв твоих, да воспоем о тебе Всемилосердному Богу нашему: Аллилуиа.

Икос 4
Слышавше богомудрыя советы святаго старца Зосимы, княгине Елизавето, в вере, надежде, любви к Богу и ближним укреплялася еси, и вверенному тебе малому стаду явилася еси воистину наставницею богомудрою и материю вселюбящею, научая сестер обители не токмо словом, паче же образом жития твоего служити страждущим и помощи взыскующим. Сего ради, просим тя купно с алапаевстими мучениками, да будите и нам стеною крепкою, прибежищем и заступлением в нуждех наших, к вам прибегающим и взывающим сице:
Радуйтеся, диадимы великокняжеския к стопам Спасителя возложившии.
Радуйтеся, Христа Распятаго паче славы царственныя возлюбившии.
Радуйтеся, Крест, аки скипетр, достойно и праведно носившии.
Радуйтеся, истину Божию и правду Христову обретати помогающии.
Радуйтеся, из глубин отчаяния пречудно вызволяющии.
Радуйтеся, бурю печалей духовною радостию разгоняющии.
Радуйтеся, елеем милосердия вашего раны душ наших заживляющии.
Радуйтеся, сироты и вдовицы, немощныя и обездоленныя под покров свой принимающии.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 5
Богоявленная звезда, на небосклоне Церкви Российстей сияющая, воистину явилася еси, святая преподобномученице Елизавето, яко в подвизех монашеских и делех милосердия усердно подвизалася еси; купно со благоверными великими князьями за веру и Отечество живот твой положила еси и диадемою небесною увенчалася еси. Ныне с новомучениками и исповедниками росстийстими молишися о нас, с любовию пречестную память твою творящих, воспевая Господеви: Аллилуиа.

Икос 5
Видя помощь благодатную, посылаемую по молитвам святых покровителей твоих, преподобнаго и богоноснаго отца нашего Сергия Радонежскаго, златоустаго святителя Петра, митрополита Московскаго, возлюбленных учениц Христовых, преславных мироносиц Марфы и Марии, царственному пути жития добродетельнаго свято и праведно последовала еси, богопросвещенная мати наша Елизавето, делание внутреннее с помощью страждущим умело сопрягая, образ служения истинному Богу и ближним тако показуя и венценосных сродник твоих сему научая. Мы же, вся сия ныне поминающе, величаем вас, страстотерпцы алапаевстие, и взываем вам сице:
Радуйтеся, царственность вашу не в любоначалии, а в служении державе российстей полагавшии.
Радуйтеся, не ради блеска славы земныя, а в стяжании сокровищ Небесных подвизающиися.
Радуйтеся, от пристрастия к земным богатствам больныя души наша врачующии.
Радуйтеся, путие спасительныя нам указующии.
Радуйтеся, в вере истинней нас утверждающии.
Радуйтеся, от дорог погибельных и соблазнов душетленных нас удаляющии.
Радуйтеся, нести людем истину Христову подвизающии.
Радуйтеся, внутренний мрак душ наших Светом Христовым озаряющии.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 6
Проповедницею милосердныя любве к ближнему воистину явилася еси, святая мати Елизавето, ибо обитель твоя бе не токмо тихою пристанию спасения, обаче и оплотом утешения и исцеления душ, от страстей изнемогающих. Твоим бо примером внимая, насельницы обители твоея скорбящия утешаху, больныя врачеваху, заблудшия наставляху, умирающия ко отходу в мир иной преуготовляху. Ты же, благоверная княгине, видя милосердия таковаго торжество, радостно воспевала еси Господеви: Аллилуиа.

Икос 6
Возсияша на Руси Святей многия угодницы Божии, от всякаго рода и чина прозябшии, и теми бо навеки украсися небосклон святыя Церкви: святители богомудри, преподобнии отцы и матери наша, подвиги своими Фиваиду Северную благоукрасившии, праведных мужей и жен сонм благословенный, образ жития богоугоднаго нам оставивших, и мучеников воинство, вкупе с ликом князей благоверных; их же подвигов подражателие и славы достойныя сонаследницы воистину явистеся вы, алапаевстии новомученицы, благоверною княгинею Елизаветою в страданиях укрепленныя. Молитеся ныне купно с благосветлым собором святых земли нашея о всех, вопиющих вам сице:
Радуйтеся, царственным путем во обители Небесныя шествовавшии.
Радуйтеся, к Царице Небесней святыя молитвы ваша возсылавшии.
Радуйтеся, Отца Небеснаго благосердие к нам приклоняющии.
Радуйтеся, велии муки в изгнании, Сына Божия ради, приявшии.
Радуйтеся, стяжати Дары Духа Святаго нас вразумляющии.
Радуйтеся, Святыни земли нашея свято и праведно почитати научающии.
Радуйтеся, уповати на Промысел Божий наставляющии.
Радуйтеся, в уповании таковем преславно нас утверждающии.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 7
Хотяще некия неблагомысленныя людие оклеветати тя, святая страстотерпице царственная, приидоша в обитель твою, обаче зря святость жития твоего, уразумеша неповинность твою пред людьми российстими, иже и доныне, воспоминая подвизи твоя, умиленно о тебе Господеви воспевают: Аллилуиа.

Икос 7
Новая безбожная власть, не возмогла есть понудити тя, святая благоверная княгине Елизавето, оставити служение твое в церкви Российстей и сестер обители твоея. Заповеди Христовей о любви к ближнему последуя, любы ко Предвечному Господу в сердце твоем сохраняла еси и на благодатную помощь Его во обстояниих скорбных свято уповала еси. Вы же, князи благоверныя, такожде на Господа вся возлагавшии, во след святей Елизавете мужественно поидоша. Мы же, веру и верность вашу воспети желая, вопием вам сице:
Радуйтеся, благодатию Божиею во дни скорбныя чудесно утвержденнии.
Радуйтеся, клевету и гонения от врагов страны вашея претерпевшии.
Радуйтеся, за отступивший от Бога и царя народ российский молившиися.
Радуйтеся, об обращении заблудших присно Господа умоляющии.
Радуйтеся, от клеветы и ярости людския нас оберегающии.
Радуйтеся, водою прощения язвы беззаконий наших омывающии.
Радуйтеся, любовию истиною к ближнему сердца наша преображающии.
Радуйтеся, любовию ко Христу души наша наполняющии.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 8
Странное и страшное крушение империи российстей созерцая и видя, яко безумнии людие глумляхуся над боговенчанным государем Николаем и святым семейством его, егда, аки вода потече кровь мученик, за правду лютыя страдания терпящих, вы, святии страстотерпцы, от рода царскаго прозябшии, на Царя Царствующих и Господа Господствующих все упование ваше возложили есте, купно со слуги верными, воспевая Ему: Аллилуиа.

Икос 8
Всяческия похвалы достойнии бысте, мученицы алапаевстии, егда во времена тяжкия, страну российскую в мрак неверия и ненавидения повергшия, честь и достоинство царское сохранили есте, благовернии угодницы Господни. Ты бо, великая княгине Елизавето, токмо верными сестры обители твоея и святителем Тихоном утешаемая, не возроптала еси, обаче пример благий крепкия веры и любви к ближнему явила еси, егда на третий день Святыя Пасхи, людие вероломныя взяша тя и в темницу ввергоша. Вы же, князие святии Сергие, Иоанне, Игоре, Константине и Владимире, кротце чести лишение, осмеяние и изгнание купно с преподобномученицею Елизаветою претерпели есте. Мы же, вся сия ныне поминающе, величаем вас сице:
Радуйтеся, исповедницы и мученицы добропобеднии и преславнии.
Радуйтеся, царственнии служителие Всемогущаго Царя Небеснаго прехвальнии.
Радуйтеся, Царицы Небесныя чада вернии и возлюбленнии.
Радуйтеся, всемощную силу благодати Божией познавшии.
Радуйтеся, путем вероотступничества и вероломства не последовавшии.
Радуйтеся, веру Христу и верность монарху своему ничем не запятнавшии.
Радуйтеся, венцы победныя и радость вечную стяжавшии.
Радуйтеся, благоверных правителей страны Российския достойнии сонаследницы явившиися.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 9
Вси чины Ангельския и святых собори, от века Господеви угодившии, с радостию прияша в лик свой умученных в земли российстей за веру Христову и царя Боговенчаннаго, страстотерпиц добропобедных; купно же с ними и вы, прехвальнии новомученицы алапаевстии: великая княгине Елизавето, князие Сергие, Иоанне, Константине, Игоре и Владимире, со слуги верными Варварою и Феодором, обители сотворшии себе в чертозех Царя Небеснаго, воспевая Ему песнь победную: Аллилуиа.

Икос 9
Вития многовещанныя не возмогут по достоянию воспети подвиги и страдания ваша, святии мученицы алапаевстии, яко вы, муки душевныя и телесныя претерпевши, превзошли есте отроков эфесских, и древним мучеником Христовым равночестнии воистину явистеся; купно с новыми страстотерпцы во славе велией и неизреченней предстоите Царю царствующих и Господу господствующих, и молитеся о всех нас, славящих имена ваша и поющих вам таковая:
Радуйся, святая мати Елизавето, образ истиннаго милосердия и любви ко Христу явившая.
Радуйся, святая Варваро, верность наставнице твоей до конца сохранившая.
Радуйся, святый Сергие, истинныя веры неустрашимый исповедниче, жертву богоугодную сотворивый.
Радуйся, святый Иоанне, благочестием, молитвою и страстотерпчеством Богу угодивый.
Радуйся, святый Константине, ризы твоя в крови агнчей убеливый.
Радуйся, святый Игоре, аки голубь, в обители Отца Небеснаго, добропобедно воспаривый.
Радуйся, святый Владимире, кончину свою предуведя, младость и живот Господеви отдавый.
Радуйся, святый Феодоре, купно с царственными мученики за Христа пострадавый.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 10
Спасения вечнаго и венцев нетленных достигли есте, святии мученицы – братия Иоанне, Константине и Игоре, подобно древним отроком Вавилонским, сквозе пещь страданий, в чертоги Царя Небеснаго возшедшии купно со сродники - великим князем Сергием, иже с верным ему Феодором, аки Михаил Черниговский и болярин его Феодор, муки скорбныя ради Христа претерпевшими и князем Владимиром, верность даже до крови отцу земному и Отцу Небесному сохранившим. Ныне же, во славе Престолу Святыя Троицы купно с царем Николаем и иными страстотерпцы предстоите, воспевая песнь ангельскую: Аллилуиа.

Икос 10
Стене нерушимей и адаманту крепчайшему подобна бе вера ваша, добропобедныя мученицы алапаевстии, яко изгнанныя из царствующих градов в глубь земли российския, богомудрою княгинею Елизаветою наставляемии, пламенными молитвами, постом и трезвением, предуготовляли есте себе к кончине мученичестей. Вы бо, все упование на Христа Распятаго полагая, вослед апостолу помышляли есте, яко аще живете, Господеви живете, аще умираете, со Творцем сочетаетеся. Тако убо, благовернии князие Сергие, Иоанне, Игоре, Константине, Владимире купно с верными Варварою и Феодором смиренномудренно на Голгофу вашу востекли есте. Сего ради, мы таковые похвалы умиленно вам приносим:
Радуйтеся, багряницы царственныя на белыя ризы мученическия сменившии.
Радуйтеся, глубину страданий, от чести лишения безбожницами, претерпевшии.
Радуйтеся, высотою славы и венцами нетленными сего ради Христом увенчаннии.
Радуйтеся, аки звезды многосветлыя на небосклоне Церкви российстей возсиявшии.
Радуйтеся, о мире всего мира Творца неустанно умоляющии.
Радуйтеся, милосердие Божие к нам приклоняющии.
Радуйтеся, о спасении нашем Сына Божия усердно умоляющии.
Радуйтеся, дары Всесвятаго Духа стяжати помагающии.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 11
Пение умиленное возносили есте Творцу всяческих, прехвальнии мученицы царственнии, егда нощию, аки татей, бесонравныя богоборцы, тайно увезоша вы из града Алапаевска и в пустынный кладезь ввергоша. Вы же, муки лютыя претерпевая, не возроптали есте и, подобно орлам небопарным, чистыми душами вашими вознеслися есте в чертози Царя Небеснаго, идеже великою и неизреченною славою увенчаннии воспеваете Всесвятей Троице ангельское пение: Аллилуиа.

Икос 11
Светильницы Божии, благодатию Святаго Духа возжженнии, воистину явилися есте, добропобеднии мученицы алапаевстии, ибо с высоты власти и славы низвергнутии, святою княгинею Елизаветою наученнии, возгласили есте: «Слава Богу за вся!» и на Голгофу свою взошли есте, постом и усердными молитвами к смерти лютой ся предуготовивши. Мы же, видяще добрая дела ваша, прославляем прославльшаго вас Господа, и к вам от всего сердца вопием:
Радуйтеся, светом вашим нашу тьму греховную разгоняющии.
Радуйтеся, теплотою любви вашея сердца наша хладная согревающии.
Радуйтеся, облаком благодати Божией от зноя житейскаго нас покрывающии.
Радуйтеся, палимыя зноем страстей, души наша прохлаждающии.
Радуйтеся, об утверждении в России веры истинныя Творца умоляющии.
Радуйтеся, любити и творити волю Божию нас научающии.
Радуйтеся, недузи телесныя и скорби душевныя исцеляющии.
Радуйтеся, отраду и утешение нам ниспосылающии.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 12
Благодатию в горниле скорбей и тягчайших испытаний очищеннии, богоноснии страстотерпцы алапаевстии, купно со сродники вашими, боговенчанным царем Николаем, царицею Александрою, великими царевнами Ольгою, Татианою, Мариею и Анастасиею, цесаревичем Алексием, благоверными великими князьями Павлом, Димитрием, Георгием, Николаем и со слугами верными, Всемогущаго Бога нашего умоляете, от скорбей, недугов и суеты нас свобождаете, от враг видимых и невидимых исхищаете и подвизаете радостно Творцу о вас воспевати: Аллилуиа.

Икос 12
Воспевая преславное житие ваше, святии и всехвальнии новомученицы алапаевстии, величаем вас, добропобедныя подвизи ваша хвалим, яко дерзновенно Христа пред богоборцы исповедали есте и верность Ему чрез скорби, лишения и страдания пронесли есте, стяжавше благодать молитися за ны, вопиющия вам сице:
Радуйтеся, земли Уральския похвало и утверждение.
Радуйтеся, всея страны Российския драгоценное украшение.
Радуйтеся, всего мира христианскаго добропобедное утверждение.
Радуйтеся, сомневающихся и маловерных благодатное вразумление.
Радуйтеся, купно со всеми новомученики на пиру Агнчем присно торжествующии.
Радуйтеся, купно с древними страстотерпцы Христу гимны хвалебныя воспевающии.
Радуйтеся, купно с благоверными царями и князьями Царя Небеснаго величающии.
Радуйтеся, радостию духовною унылыя сердца наша преображающии.
Радуйтеся, боговенчаннии страстотерпцы алапаевстии, страны Российския похвало и всего мира христианскаго украшение.

Кондак 13
О, всехвальнии и достопочтеннии новомученицы Алапаевстии, смиренно просим вы, приимите милостивно убогия сия похвалы, возносимыя нами благочестиваго жития и мученическия кончины вашея ради и молим вас: умолите убо Превечнаго Бога нашего, во Святей Троице Единаго, да избавимся обстояний тягостных, во уныние нас повергающих и да сподобимся купно с вами и всеми новомученики и исповедники Российстими во веки Всемогущему и Всемилосердному Господу воспевати: Аллилуиа. Аллилуиа. Аллилуиа.[/spoiler]

Раб божий Константин

Акафист святой преподобномученице великой княгине Елизавете.
[spoiler]Кондак 1

Избранная от рода державнаго дщерь Российская, любовию изобильною и милосердием Богу и ближним добре послужившая, за веру во Христа Господа нашего душу свою положившая и венцем славы Христовы украшенная, восхваляем подвиги и страдания твоя, с любовию воспевающе ти сице: Радуйся, святая преподобномученице Елисавето, красото Церкве Российския, невестою Христовою быти удостоенная.

Икос 1

Ангельскою любовию Христа возлюбившая и Тому Единому служити желавшая, измлада материю твоею поучаемая, в трудех, молитвах и милостыни образ добродетелей явила еси. По кончине же матере твоей и ближних сродников крестный путь, Господем заповеданный, уразумела еси. Темже дивящеся таковому от юности твоему избранию, со умилением взываем ти:
Радуйся, от юности Христа возлюбившая;
радуйся, Христова агнице избранная.
Радуйся, от родителей семена веры приимшая;
радуйся, в страсе Божии ими воспитанная.
Радуйся, добродетели матере твоей унаследившая;
радуйся, трудолюбию и милосердию ею наученная.
Радуйся, сердцем в Бозе утвержденная;
радуйся, с верою и упованием понесшая крест твой и Христу последовавшая.
Радуйся, земли отечества твоего цвете благоуханный;
радуйся, чистотою жизни твоея Небеса возвеселившая.
Радуйся, избранная Богом на служение страждущим;
радуйся, молитвеннице наша пред Богом.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 2

Виде Господь благое сердца твоего изволение, яко от юности возжелела еси житие проводити во благочестии и чистоте, к небесней красоте очи сердца твоего устремляющи и огнь любве к Богу в себе воспламеняющи. Молитвами твоими и наша сердца любовию к Богу просвети, да с тобою воспоим Ему: Аллилуиа.

Икос 2

Разумом свыше просвещаема, святая Елисавето, не убоялася еси оставити отечество, род и дом отца твоего и в новое отечество вселитися, егда браком сочеталася еси с российским великим князем Сергием, да с ним Богу послужиши, и вкупе с супругом твоим в целомудрии пожила еси, истинную любовь к людем российским показующи. Мы же с любовию взываем ти сице:
Радуйся, славная от земли Запада пришелице;
радуйся, новую отчизну — землю Российскую обретшая.
Радуйся, благоверная княгине, стране нашей верно послужившая;
радуйся, в добрых делех наших наставнице.
Радуйся, в супружестве в любви и целомудрии пожившая;
радуйся, яко супругу твоему в делех благих помощница была еси мудрая.
Радуйся, супругом благочестивым покровительнице;
радуйся, материнскою любовию нас согревающая.
Радуйся, заповеди Господни исполнити возжелевшая;
радуйся, ревность по Бозе в сердцах наших воспламеняющая.
Радуйся, красотою душевною и телесною всех возрадовавшая;
радуйся, всего мира христианскаго украшение.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 3

Силою Божественныя благодати во спасение умудренная, разумом твоим познала еси веру истинную, княгине милостивая Елисавето, и во Святей Земли пребывающи, утвердилася еси в желании прияти Православие, воспевающи просветившему тя Богу: Аллилуиа.

Икос 3

Имущи сердце, добрей земле подобящееся, веру православную удобь восприяла еси, темже святаго миропомазания и причащения Святых Христовых Тайн в праздник воскрешения праведнаго Лазаря сподобилася еси. Мы же, славяще просвещение твое благодатию Святаго Духа, величаем тя:
Радуйся, в день воскрешения праведнаго Лазаря веру православную приявшая;
радуйся, плоде благословенный Российския земли.
Радуйся, миропомазанием Святаго Духа запечатленная;
радуйся, во православии имя, данное ти от рождения, сохраншая.
Радуйся, святей праведней Елисавете тезоименитая;
радуйся, яко той жити усердно в подвизех подражала еси.
Радуйся, сыновом Запада путь к истинней вере показующая;
радуйся, яко благочестивии людие земли Российския память твою любовию чтут.
Радуйся, милостивая мати, милость у Владыки и Господа обретшая;
радуйся, и о нашем помиловании усердно молящаяся
Радуйся, свет Божественный в сердце своем носившая;
радуйся, тьму жизни нашея светом Христовых заповедей озаряющая.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 4

Буря злобы врага рода человеческаго не поколеба тя, святая, егда благоверный супруг твой мученически смерть претерпе, емуже сострадающи, велие мужество и христианскую любовь явила еси. Ангели же, душу супруга твоего возносяще, пояху: Аллилуиа.

Икос 4

Слышавше российстии людие о убиении благовернаго князя Сергия, моляху Бога, да укрепит тя, святая Елисавето, в несении скорби сея. Ты же, жертвенною любовию укрепляема, в темнице убийцу супруга твоего посетила еси, к покаянию его подвизающи и молитвы возносящи ко Господу о прощении его. Сего ради приими от нас, недостойных, похвалы сия:
Радуйся, заповедь Христову о любви ко врагом исполнившая;
радуйся, убийцу супруга твоего евангельски простившая.
Радуйся, мнози скорби и беды претерпевшая;
радуйся, бремя скорбей и печалей нести нам помогающая.
Радуйся, заблуждших на путь истины и покаяния наставляющая;
радуйся, о спасении грешников теплая ходатаице.
Радуйся, во тьме печалей светом надежды нас озаряющая;
радуйся, путеводная звездо всем чающим спасения.
Радуйся, окамененныя сердца наша во умиление приводящая;
радуйся, во всякой скорби нашей ко Христу за ны теплая молитвеннице.
Радуйся, злобу мира добром побеждавшая;
радуйся, людем российским любовь истинную показавшая.
Радуйся, святая преподобномученице Елисавето, красото Церкве Российский, невестою Христовою быти удостоенная.

Кондак 5

Боготечною звездою возсияла еси в земли Российстей, святая Елисавето, егда богатство и славу яко прах вменивши, в руце Божии жизнь свою предала еси, да послужиши Ему постом и молитвою, и к страждущим явила еси велию любовь и милосердие. Тако и путь жития нашего светом добродетелей твоих озари, да радостно возопиим Богу: Аллилуиа.

Икос 5

Видевше тя людие богоспасаемаго града Москвы дивную устроительницу обители милосердия, возрадовашася, яко мнози жены и девы российския обретоша зде тихое и душеспасительное пристанище, подражающе святым женам мироносицам Марии и Марфе в служении Богу и ближним. Сего ради, прославляюще тя, глаголем сице:
Радуйся, во славе земней суету мирскаго жития уразумевшая;
радуйся, имение свое раздавшая и нищету Христову возлюбившая.
Радуйся, град Москву обителию дивною украсившая;
радуйся, благое иго Христово на себе восприимшая.
Радуйся, многия жены и девы во обитель милосердия приведшая;
радуйся, мудрая управительнице во спасение сестер твоих.
Радуйся, служению святых жен-мироносиц Марфы и Марии подражавшая;
радуйся, обители твоея неусыпная хранительнице.
Радуйся, в подвизе жизни духовныя нас утверждающая;
радуйся, путь от земли на Небо нам показующая.
Радуйся, светило милосердия, над градом Москвою восшедшее;
радуйся, всех отдавших жизнь на служение ближним покровительнице. Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 6

Проповедницею любве Божественныя и милосердия Его и ревнительницею благочестия была еси в земли нашей, святая Елисавето, в сердцах людей российских любовь ко Господу и милосердие к братиям и сестрам нашим, в бедах сущим, возгревающи, да и мы, твоим заветом последующе, воспоим Богу: Аллилуиа.

Икос 6

Возсияла еси светом добродетельнаго жития в стране Российстей, преподобная мати наша Елисавето, во образе иночестем в посте и воздержании, в нощных бдениих и пениих молебных пожила еси, благочестию и смирению сестры обители твоей поучающи, да и мы, тобою на путь тесный подвига духовнаго наставляеми, ублажаем тя:
Радуйся, путь иноческаго равноангельнаго жития избравшая;
радуйся, обетом целомудрия чистоту сердца твоего явившая.
Радуйся, обетом нестяжания высоту духа твоего показавшая;
радуйся, обетом послушания Богу и ближним послужившая.
Радуйся, мудрая княгине и инокине пречестная;
радуйся, во образ женам христианским свыше предназначенная.
Радуйся, постом, бдением и непрестанными молитвами Богу угодившая;
радуйся, от сна греховнаго души наша пробуждающая.
Радуйся, ко исполнению заповеди о любви к Богу и ближним всех наставляющая;
радуйся, молитве сердечней нас научающая.
Радуйся, наставнице инокиням и собеседнице Ангелом;
радуйся, в сонме преподобных жен на Небеси прославленная.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 7

Хотящи волю Господню разумети, святая Елисавето, всецело предала еси себе в послушание старцем Гавриилу Спасо-Елеазаровскому, Алексию Зосимовскому, такожде и другие богомудрыя старцы вопрошала еси, ничтоже без их благословения творящи, волю же свою отсекающи, темже и житие во обители милосердия ко благу устрояла еси, непрестанно взывающи Богу: Аллилуиа.

Икос 7

Новое чудо показа Господь, егда дарова ти, святая Елисавето, благодать и силу болезни врачевати, разслабленныя укрепляти, бедствующим помогати, обидимых заступати. Ты же, облегчение и отраду страждущим содевающи, немощным, всеми оставленным и увечным послужила еси со смирением и любовию. Темже и нас, грешных, твоею молитвою исцели и буди нам ко спасению управительница, да благодарственно воспоем ти:
Радуйся, в послушании духовным отцем и великим старцем пожившая;
радуйся, Великою Матушкою людьми российскими нареченная.
Радуйся, дар немощных души врачевати от Бога стяжавшая;
радуйся, болящия и безнадежныя от одра болезни возставляющая.
Радуйся, вдовиц и сирот благосердая попечительнице;
радуйся, алчущих питательнице и сущим в бедах скорая заступнице.
Радуйся, всеми презренных и отверженных не оставляющая;
радуйся, многия души от тьмы греховныя и погибели спасшая.
Радуйся, унывающим в скорбех и обстояниих мудрая утешительнице;
радуйся, и нас, удрученных болезньми и скорбьми, укрепляющая.
Радуйся, кающимся грешником пред Богом предстательнице;
радуйся, людем российским помощнице милостивая богодарованная.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 8

Странное и страшное видение яви Господь духовнику обители милосердия отцу Митрофанию. Ты же, о святая мати, сие видение изьясняющи, прорекла еси, яко велие и грозное испытание грядет на Церковь Русскую и державу нашу: святынь поругание, брань братоубийственная, смута велия, мученическая кончина царския семьи; но помилует Бог Россию по молитвам святых ея, с нимиже ты ныне воспевавши Богу: Аллилуиа.

Икос 8

Вся благодатию Божественною просвещала, святая Елисавето, мысленныма очима гневное посещение Божие страны нашея зрела еси и пророчески вещала еси, яко мнози мученицы и исповедницы в земли Российстей возсияют. Темже все упование на Божию Матерь возложити люди русския призывала еси, верующи, яко молитвами Ея устроится и благословится земля наша. Мы же, ведуще проречения твоего о судьбе отчизны нашея сбытие, ублажаем тя сице:
Радуйся, храм Покрова Пресвятыя Богородицы во обители милосердия воздвигшая;
радуйся, тем в руце Пречистей Матери Господа обитель твою предавшая.
Радуйся, храмов Божиих устроительнице;
радуйся, к Богородице молитвеннице наша неусыпная.
Радуйся, церквам Божиим благодеявшая;
радуйся, ради жизни вечныя неусыпно потрудившаяся.
Радуйся, житием своим Богу и Пресвятей Деве Богородице верно послужившая;
радуйся, все упование возлагати на Бога нас научающая.
Радуйся, кротость, тишину и мир сердцам нашим подающая;
радуйся, благодатными дары Духа Святаго украшенная.
Радуйся, яко прозорливо предрекла еси великия скорби земли нашея;
радуйся, яко помилова ю Господь.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 9

Вся любовию к Богу пламенеющи, святая Елисавето, не убоялася еси, егда приидоша во обитель, тобою созданную, безумнии людие, хотящии суд неправеден над тобою совершити. Ты же, Господом сохраняема, смерти тогда убегла еси, о вразумлении и просвещении неразумных и заблуждших молящися, Богу же во благодарении воспевающи: Аллилуиа.

Икос 9

Ветий человеческих уста не возмогут достойно восхвалити крепость любве твоея во дни бед и напастей великих, обышедших отечество наше, егда не восхотела еси покинути Россию и обитель, тобою созданную, сестры тоя за веру православную даже до смерти стояти побуждающи. Мы же с любовию восхваляем тя:
Радуйся, землю нашу возлюбившая,
радуйся, от людей российских с любовию прославляемая.
Радуйся, щитом веры во брани с врагом ограждатися нас научающая;
радуйся, решимость Господу последовати крестным путем в нас укрепляющая.
Радуйся, сестры обители милосердия в вере и надежде утвердившая;
радуйся, на подвиг мученичества за Христа их наставльшая.
Радуйся, приобщитися страстем Христовым удостоившаяся;
радуйся, в исповедничестем подвизе люди российския утверждающая.
Радуйся, от рова погибели мнози спасшая;
радуйся, обители твоей и граду Москве помощнице, покрове и защитнице.
Радуйся, любви жертвенней, вечней нас научающая;
радуйся, вшедшая в радость Господа твоего.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 10

Спасительнаго подвига ищущи, святая Елисавето, с радостию благодарила еси Бога, яко сподоби тя понести крест Его. Темже просия победою вера твоя, егда, к Голгофе своей восходящи, непрестанно возглашала еси: «Слава Богу за все!» Умоли, о мати наша, да дарует нам Господь стяжати мудрость и силу за веру правую даже до смерти стояти и воспевати Ему единеми усты и единым сердцем: Аллилуиа.

Икос 10

Стена необоримая и заступление стране Российстей даровася святая икона Божия Матере Державная, юже прияла есть во обители милосердия, святая Елисавето, яко знамение победы над миродержительми тьмы века сего. Сего ради и мы, все упование на Державную Владычицу отчизны нашей возложивше, тебе яко истинную служительницу и послушницу Пречистыя Матере Господа восхваляем:
Радуйся, благодати и силы Божия исполненная;
радуйся, благую часть избравшая, яже не отымется от тебе.
Радуйся, в кротости и смирении Божией Матери подражавшая;
радуйся, мудрая евангельская дево, елей благодати собравшая.
Радуйся, Пресвятыя Девы Богородицы благоговейная почитательнице;
радуйся, у Престола Ея непрестанно за ны молящаяся.
Радуйся, образ самоотвержения нам явившая;
радуйся, друг друга тяготы носити нас научающая.
Радуйся, чрез земныя скорби и страдания в Царство Небесное вшедшая;
радуйся, любви и терпению в страданиих ради Господа всех научающая.
Радуйся, ангельски на земли пожившая;
радуйся, унаследившая на Небеси венец славы.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 11

Пение молебное Божией Матери возносила еси, святая Елисавето, в день празднования Иверския иконы Ея, егда взяша тя нечестивии и в темницу ввергоша. Ты же благодарила еси Христа Бога нашего, давшаго тебе не точию еже в Него веровати, но и по Нем страдати, в узах темничных воспевающи Ему: Аллилуиа.

Икос 11

Свет Божественный осия тя, страстотерпице святая, княгине Елисавето, купно с преподобномученицею Варварою, о Христе сестрою твоею, и с прочими страстотерпцы именитыми, егда в глубокий ров ввержена сущи, тамо раны великаго князя Иоанна обязала еси, страдания умирающих облегчала еси, воспевающи священныя песнопения, за убивающих же тя молилася еси: «Отче, отпусти им, не ведят бо, что творят». Уврачуй и наших душ раны, о мати наша, да с любовию воспоем ти:
Радуйся, мученическую кончину свою предуведевшая;
радуйся, страстотерпице царственная.
Радуйся, в день памяти преподобнаго Сергия страстем Христовым приобщившаяся;
радуйся, силою Божественною в страданиих укрепляемая.
Радуйся, за мучителей своих, Христу подражающи, молившаяся;
радуйся, до самыя кончины твоея песнь Богу воспевавшая.
Радуйся, кровию своею землю нашу оросившая;
радуйся, к сонму новомучеников Российских сопричтенная.
Радуйся, яко лику преподобных и праведных жен приобщилася еси;
радуйся, святых благоверных княгинь земли Русския достойная сонаследнице.
Радуйся, жертво непорочная, благоприятная, Богу принесенная;
радуйся, со всеми святыми земли нашея торжествующая.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 12

Благодати исполненнии сосуди явишася честныя мощи ваша, святыя преподобномученицы Елисавето и Варваро, ихже от поругания и безчестия спасти хотяще, благочестивии людие из России во святый град Иерусалим принесоша и в веси Гефсиманийстей на горе Елеон погребоша, к нимже приходящии ублажают вас, воспевающе Богу, дивному во святых Своих: Аллилуиа.

Икос 12

Света небеснаго и благоухания чуднаго храм святыя мироносицы Марии Магдалини во Иерусалиме исполнися, егда гроб с телом великия княгини Елисаветы открыла. Темже ныне Церкве Православныя чада вси радуются и ликуют о Господе, притекающе к раце мощей твоих, преподобномученице Елисавето, чудеса точащих всем верующим, и благодаряще прославльшаго тя Господа, поют сице:
Радуйся, яко мощи твоя, во святый град Иерусалим принесенныя, процветоша нетлением;
радуйся, мощами твоими Святую Землю с землею Российскою духовно соединившая.
Радуйся, явлением мощей твоих Церковь Русскую возвеселившая;
радуйся, тем находящихся в разсеянии российских людей духовно укрепившая.
Радуйся, у гроба Господня погребенная;
радуйся, во храме святыя жены-мироносицы Марии Магдалини упокоенная.
Радуйся, яко мощи твоя исцеляют всякия скорби и болезни;
радуйся, свидетельнице вечности в жизни временней.
Радуйся, венец добродетелей в себе соединившая;
радуйся, неисповедимыми судьбами Божиими прославленная.
Радуйся, Горняго Иерусалима обитательнице блаженная;
радуйся, ко Иерусалиму Небесному всем нам путеводительнице.
Радуйся, святая преподобномученице Елисавето, красото Церкве Российския, невестою Христовою быти удостоенная.

Кондак 13

О великая страстотерпице, жен российских украшение и радосте наша, княгине милостивая Елисавето, приими воздыхание сердец наших, с любовию тебе приносимое, и твоим предстательством ко Господу дух правыя веры и благочестия в нас укрепи, в добродетели и милосердии нас утверди, помози крест скорбей с терпением и надеждою понести, в любви и согласии народ наш сохрани, да сподобимся в радость Господа внити, со Ангелы и всеми святыми поюще Ему: Аллилуиа.

Этот Кондак читается трижды. Затем читается Икос 1 и Кондак 1.

Молитва святым преподобномученицам великой княгине Елисавете и инокине Варваре

О святыя новомученицы Российския, великая княгине Елисавето и сестро ея крестовая пречестнаая инокине Варваро, купно путь свой во мнозех муках скончавшия, евангельския заповеди делом во обители милосердия совершившия, веры ради православныя подвизающися до смерти в последняя времена сия, и добрый плод в терпении страстей Христу принесшия! Молитеся Ему, яко Победителю смерти, да утвердит Церковь Русскую Православную и Отечество наше, кровию и страданьми новомучеников искупленныя, и не даст в расхищение врагом России достояния нашего. Се бо лукавый враг вооружися на ны, хотя нас погубити в междоусобных бранех, скорбех, нестерпимых печалех, болезнех, нуждах и бедах лютых. Умолите Господа низложити вся немощныя дерзости их; веру в сердцах людей российских укрепите, да егда найдет на ны испытания час, мужества дар восприимем вашими молитвами, отвергшеся себе и вземше крест свой, последуем Христу, распинающе плоть свою со страстьми и похотьми. Сохраните нас от всякаго зла, освятите пути жизни нашея, даруйте покаяние нелицемерное, тишину и мир душам нашим, испросите у Господа всем нам мытарств горьких и вечныя муки избавитися и Небесному Царствию наследники быти со всеми святыми, от века угодившими Богу, Да радующеся воздадим хвалу, честь и поклонение Отцу и Сыну и Святому Духу во веки веков. Аминь.[/spoiler]

Раб божий Константин

Акафист преподобному Елисею Сумскому
(память 14/27 июня).
[spoiler]Кондак 1
Избранный угодниче Христов, преподобне отче Елисее, возсиявый земли Карельстей яко чудный свет; многим воздержанием житие твое
украсивый на земли, сего ради и венцем венчанный на Небеси; прехвальный подвижниче жития строгаго; похвальное воспеваем ти пение: ты же, имеяй велие дерзновение ко Господу, от всяких нас бед свободи, с любовию зовущих ти: Радуйся, преподобне отче Елисее, чудотворче и дивный молитвенниче о душах наших.

Икос 1
Ангелом уподобился еси, богомудре отче Елисее, , непорочным житием твоим на земли: добродетельми украшен, преселился еси на Небо, нам оставльши в подражение житие твое богоугодное. Ты же, предстоя Господу Славы, молися о нас, поющих ти:
Радуйся, земли Карельстей прозябение пречестное и славное,
Радуйся, добродетелей Христовых явление изрядное,
Радуйся, правды и истины паче всего искавый,
Радуйся, Христу Богу в житии своем подражавый,
Радуйся, смирением и послушанием вся удививый,
Радуйся, целомудрием, чистотою души себя украсивый,
Радуйся, благодати Божия преславное селение,
Радуйся, симже уготовано ти чудное нетление,
Радуйся, преподобне отче Елисее, чудотворче и дивный молитвенниче о душах наших.

Кондак 2
Видя образ мира сего преходящ и славу человеческую яко дым исчезающу, от юности возлюбил еси тесный путь ко Господу, постом,
молитвою страсти юношеския умерщвляя, да не поработят сия Духа, присно воспевая Госповеди: Аллилуиа.

Икос 2
Разумом богопросвещенным свыше одаренный, богатство неистощимое стяжал еси, стези к небеснем обителем от юности взыская. Сего ради со умилением воспеваем ти сице:
Радуйся, добродетели высокая в сердце твоем вкоренивый,
Радуйся, в заповедех Господних вся дни живота твоего ходивый,
Радуйся, от юности мудрость старца стяжавый,
Радуйся, чистотою сердца твоего Господа созерцавый,
Радуйся, юность твою непорочностью жития украсивый,
Радуйся, умертвив уды твоя, подражание нам явивый,
Радуйся, душу и тело твое благодатию просветивый,
Радуйся, тело же и по смерти нетленно сохранивый,
Радуйся, преподобне отче Елисее, чудотворче и дивный молитвенниче о душах наших.

Кондак 3
Силы намерения твоего во едино намерение совокупивый, во еже Христу житие твое всецело посвятити, к Нему духом выну возносился еси, богомудре. Светом же богоразумия твоего и нас озари, да вопием купно с тобою: Алллуиа.

Икос 3
Имея всецелое желание иго Христово на себе носити и во след Христу поити, трудное монашеское житие подъял еси. Труды, поты, неистову борьбу с врагом человеческим претерпел еси. Сего ради из глубины сердец вопием ти таковая:
Радуйся, иноческаго жития скорби и тесноту возлюбивый,
Радуйся, непрестанную молитву за вся люди носивый,
Радуйся, многих ищущих спасения духовному деланию научивый,
Радуйся, обетом девства, постничества, нестяжания чистоту сердца явивый,
Радуйся, великим послушанием совершенное служение Единому Богу утвердивый,
Радуйся, житием и подвигом твоим братию всю изумивый,
Радуйся, любовь к Богу любовию к ближним стяжавый,
Радуйся, нетление в знак богоугодия нам показавый,
Радуйся, преподобне отче Елисее, чудотворче и дивный молитвенниче о душах наших.

Кондак 4
Буря скорбей и напастей, воздвизаемая злобою мира сего, не ослаби крепкия любве твоем ко Господу, обаче всего себе Христу Богу предаде, Тому о всех благодарение возсылаяй, зовый: Аллилуиа.

Икос 4
Слышавши глагол Господень: «На кого воззрю, токмо на кроткаго и смиреннаго, трепещущаго словес Моих», потщался еси, святе, оными
добродетельми себе украсити. Того ради ублажаем тя сице:
Радуйся, нищету духа в себе собравый,
Радуйся, уничижением себе гордыню вражескую отгнавый,Радуйся, слезами многими смирение велие в себе укоренивый,
Радуйся, умом входя в ад, душу от прелести греха отвративый,
Радуйся, кротостию души твоея многия исправивый,
Радуйся, на искус долготерпения многия вдохновивый,
Радуйся, токмо сокровища духовныя возлюбивый,
Радуйся, своим нетлением грядущую славу земли Карельстей предвозвестивый.
Радуйся, преподобне отче Елисее, чудотворче и дивный молитвенниче о душах наших.

Кондак 5
Боготечная звезда явился еси, преславне отче Елисее, всей земли Карельстей сияя, аки лучами светозарными, удостоился еси Господней
милости внити к нему. Мы же, прославляя Бога, вопием Ему: Аллилуиа.

Икос 5
Видевше тщету сей привременней жизни, всецело возимел еси желание быти всегда со Христом, зело захотел еси прияти схиму, сиречь
ангельский образ, обаче же почил. Господь, любяй тя, по благомощней молитве преподобнаго Зосимы Соловецкаго сверши чудо: оживе тя, блаженне Елисее, облече во схиму и приемле в свои объятия и сослужение. Сему радуяся, воспеваем ти:
Радуйся, любовь Божию чистым житием твоим стяжавый,
Радуйся, по молитвам преподобнаго Зосимы лучами святости возоблиставый,
Радуйся, сожительство и собеседничество с преподобными избравый,
Радуйся, страдания многия в жизни сей испытавый,
Радуйся, силы тьмы борьбою велию посрамивый,
Радуйся, недеждею жаждущия спасения вдохновивый,
Радуйся, молитвами твоими нас Богу примиривый,
Радуйся, нетления тела твоего для нас заслуживый.
Радуйся, преподобне отче Елисее, чудотворче и дивный молитвенниче о душах наших.

Кондак 6
Проповедника веры православныя и ревнителя благочестия не словом токмо, но и всем житием твоим был еси, прехвальне отче Елисее; темже святая Церковь достойне почитает подвиги и труды твоя во славу Бога Вышняго, воспевая Ему: Аллилуиа.

Икос 6
Возсия душа твоя земли Карельстей, преподобне отче Елисее, яко и по смерти не престаеши озаряти нас, многия чудеса свершающе, от мощей твоих исходяще. Сего ради ублажаем ти сице:
Радуйся, душу твою в храм Божий добре претворивый,
Радуйся, хранителем веры и уставов святыя Церкве себя проявивый,
Радуйся, грешныя на путь спасения направляяй,
Радуйся, скорбящия сладостию словес твоих утешаяй,
Радуйся, юныя в добре наставляяй,
Радуйся, старыя не словом точию, паче житием укрепляяй,
Радуйся, заповеди Божия верно исполняяй,
Радуйся, яко исполнение прошений у рацы мощей твоих получаем,
Радуйся, преподобне отче Елисее, чудотворче и дивный молитвенниче о душах наших.

Кондак 7
Хотяй возноситися духом в горняя селения, весь вдался еси безмерным подвигом и глубине смирения, труды же твоя и молитвы и пощения кое слово изглаголати может, веригами тяжкими и власяницею облеклся еси любве ради Божия, выну вопия Ему: Аллилуиа.

Икос 7
Новаго и дивнаго дарова Господь людем Карельстим заступника, молитвенника и ходатая, призвавый тебе, богоносне отче Елисее,
самоотверженно ити Себе. Ты же, взем тяготу многоболезненных трудов, не посрами себе. Мы же, благодарнии , сердцем и усты, вопием ти:
Радуйся, Господа Бога всем сердцем и душею возлюбивый,
Радуйся, и ближнему тоюже любовию послуживый,
Радуйся, за вся людие, добрыя и злыя, молитву проливаяй,
Радуйся, милости Божия к ним призываяй,
Радуйся, Бога чтить всем сердцем научаяй,
Радуйся, обычаи злыя и суемудрия языческия искореняяй,
Радуйся, злобу добром подеждаяй,
Радуйся, спасения народу своему у Господа испрошаяй,
Радуйся, преподобне отче Елисее, чудотворче и дивный молитвенниче о душах наших.

Кондак 8
Странник в мире сем быв, горняя мудрствовал еси, а не земная, Елисее преподобне, и поминая последняя твоя, николиже согрешиша, воспевая Триединому Богу: Аллилуиа.

Икос 8
Весь еси с верою к тебе притекающим воистину помошниче велий, не точию прибегающим к цельбоносным мощем твоим, но и далече
отстоящим и призывающим всечестное имя твое. Сего ради достойне благохвалим тебе:
Радуйся, душу свою Христу совершенне покоривый,
Радуйся, крепцею верою добродетель сию в себе утвердивый,
Радуйся, отсечением воли своея вся козни диавола победивый,
Радуйся, истинное послушание во Христе Иисусе явивый,
Радуйся, яко верный раб Начальнику жизни Христу послуживый,
Радуйся, яко никтоже с верою к тебе притекавый, тощь не отходивый,
Радуйся, яко милостивый в жизни, и по смерти всем верным благотворивый,
Радуйся, житием земным и небесным людие земли Карельстей удививый,
Радуйся, преподобне отче Елисее, чудотворче и дивный молитвенниче о душах наших.

Кондак 9
Всяких добродетелей исполнен бывши, преподобне отче наш Елисее, с молитвою во устех предал еси дух твой в руце Божии, Иже всели тя в Небесныя обители. Испроси же и нам у Господа мирную христианскую кончину, да предадим души наша в руце Христа Бога нашего, поюще Тому хвалебную песнь: Аллилуиа.

Икос 9
Витии многовещанныя не возмогут достойно изрещи твоих благодеяний множество, преподобне отче Елисее, щедродательная бо десница твоя всюду достиже. Мы же, во удивлении и умилении взвываем ти сице:
Радуйся, земли Карельстей Богом данный покровителю,
Радуйся, края нашего неусыпный хранителю,
Радуйся, яко и по успении твоем нас не оставляши,
Радуйся, яко милосердие Божие о гресех наших умоляеши,
Радуйся, вдовиц сильный защитителю,
Радуйся, сирот милосердый попечителю,
Радуйся, алчущих любвеобильный питателю,
Радуйся, исцелений от рацы мощей твоих подателю,
Радуйся, преподобне отче Елисее, чудотворче и дивный молитвенниче о душах наших.

Кондак 10
Спастися всем хотяй, преблагий Господь яви тя, преподобне отче Елисее, образе жития праведнаго, сердца чистаго, себя отвергши, Христу прилепился еси, непрестанно поя Ему: Аллилуиа.

Икос 10
Стену необориму и забрало крепцее земли Карельстей Господь дарова тя, преподобне отче, блаженне Елисее, верным в скорбех и нуждех
быстрое заступление, да зовем ти:
Радуйся, призывающим тя во благое скорый помощниче,
Радуйся, чистоты душевныя и телесныя сокровище,
Радуйся, телесных и душевных недугов целителю,
Радуйся, верным и безпомощным покровителю,
Радуйся, земли Карельстия утверждение,
Радуйся, Церкве Карельстия украшение,
Радуйся, душам нащим доброе упокоение,
Радуйся, верным же ти – дивное исцеление,
Радуйся, преподобне отче Елисее, чудотворче и дивный молитвенниче о душах наших.

Кондак 11
Пение умиленное приносит ти, блаженне Елисее, вся земля Карельская, почитающи труды и подвиги, имиже Бог прослави тя. Молитвы,
приносимыя тебе, не презри: к тебе бо в скорбех прибегаем и пред рацей святых мощей твоих слезы проливаем, зовуще Богу: Аллилуиа.

Икос 11
Светозарна святильника благодати яви тебе всех Творец, силою бо данною ти свыше, окормляеши нас. Сего ради ублажаем ти сице:
Радуйся, дарами Духа Святаго обогащенный,
Радуйся, сими дарами и молящихся тебе обогащаяй,
Радуйся, силу чудес от Бога приявый,
Радуйся, сие людем несчетно дававый,
Радуйся, за грешныя Господа тепле умоляяй,
Радуйся, дерзновенно помощь людем неправляяй,
Радуйся, яко отец чадолюбивый, чада твоя назираяй,
Радуйся, от мощей твоих исцеление недугов душевных и телесных щедро источаяй,
Радуйся, преподобне отче Елисее, чудотворче и дивный молитвенниче о душах наших.

Кондак 12
Благодателю, данною ти свыше, недуги исцеляеши, жизнь нашу умиряеши и душам нашим полезная подаеши, да благодарственно взываем
Богу: Аллилуиа.

Икос 12
Поюще многая и преславная твоя чудеса, велицый угодниче Божий, преподобне отче Елисее, ублажаем тя, яко теплаго ходатая пред Господем о людех земли Карельстей. И прославляюще Господа всех, вопием сице:
Радуйся, нетлением мощей твоих от Бога славно возвеличенный,
Радуйся, всею земною жизнию твоею добре очищенный,
Радуйся, прежде смерти явивый дивная,
Радуйся, и по успении совершаяй чудная,
Радуйся, яко и по смерти жив пребываеши,
Радуйся, яко вся призывающая тя скоро посещаеши,
Радуйся, яко и живя в селениих райских нас не оставляеши,
Радуйся, от рацы мощей твоих благодеяния многая нам источаеши.

Кондак 13
О преславный угодниче Христов и чудотворче, преподобне отче Елисее, отрадо и утешение всех с верою к тебе прибегающих! Приими от нас, недостойных, сие малое похвальное пение с любовию тебе приносимое, и теплым ходатайством твоим ко Господу испроси людем земли Карельстей прощение прегрешений, умири жизнь нашу и даруй нам покаяние совершенное, избави нас от бед и вечныя муки, да купно с тобою благодарственно вопием: Аллилуиа, Аллилуиа, Аллилуиа!
Этот кондак читается трижды, затем 1-й икос «Ангелом уподобил-ся еси...» и кондак «Избранный угодниче Христов...»

Молитва первая
О священная главо, Преподобне отче, преблаженне авво Елисее! Не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя. Поминай нас недостойных у престола Вседержителева, и не престай моляся о нас ко Христу Богу: ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и честная икона твоя пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у Престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на Небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков. Аминь.

Молитва вторая
О преподобие и богоносне отче Елисее! Услыши ныне нас, к тебе усердно молящихся и припадающих ко всечестному и многоцелебному
твоему гробу, идеже святое и многотрудное твое положися тело. Ты же, духом на небесе Пресвятей Троице предстоя со ангелы и преподобных отец лики, молися о нас, чадех твоих, да избавимся от всяких скорбей, болезней, бед и обстояний, и благочестно поживем в настоящем житии, ходяще в заповедях и оправданиях Господних безпорочно, да и явимся святого твоего живота подражатели. Не забуди убогих твоих до конца, но поминай нас всегда во святых твоих и благоприятных молитвах к Богу, моли за ны, отче священный, за дети твои духовныя, яко имени дерзновение к Небесному Царю, не премолчи за ны ко Господу, и не презри нас, верою и любовию чтущих тя. Поминай нас, недостойных у Престола Вседержителева, и не престай моляся о нас ко Христу; ибо дана тебе бысть благодать за ны молитися, не мним бо тя суще мертва; аще бо и мощей твоих рака пред очима нашими видима есть всегда, но святая твоя душа на небесех достойно веселится. Ведуще убо тя во истину и по смерти жива суща, тебе припадаем и тебе молимся: молися за нас Всевышнему Богу, о пользе душ наших, и испроси нам всем, к тебе притекающим, грехов прощение, телесем здравие, жития исправление и вечное спасение. Не забуди молитвенным предстательством и край Олонецкий, идеже добрым подвигом подвизался ecu, испроси нам грешным время на покаяние, да невозбранно перейдем от земли на Небо, от мытарств же горьких, бесов, воздушных князей и от вечныя муки да избавимся, и Небесного Царствия наследницы да будем со всеми праведными, от века угодившим Господу нашему Иисусу Христу, Емуже подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом ныне и присно и во веки веков. Аминь.[/spoiler]

Раб божий Константин

Акафист преподобной Елисавете Чудотворице.
[spoiler]Кондак 1
Избранная Промышлением Божественным и чудесами великими и славными на земли просиявшая, преподобная мати наша Елисавето, моли Христа Бога всяких искушений, бед и наветов вражеских избегнути нам и наследники Царствия Небесного соделатися, да радостными песньми, с любовию восхваляем тя, небесную предстательницу и заступницу нашу, зовуще:
Радуйся, святая Елисавето, великая и преславная чудотворице!

Икос 1
Ангелов Творец и всея твари Содетель Господь, равноангельное житие твое провидев, прежде рождества твоего избра тя, святая чудотворице, служити Ему в преподобии и правде, последи же многими добродетельми и дары небесными тя украси: демоны прогоняти, недуги врачевати, скорбящия утешати, бедствующим помогати.
Тем же от нас, недостойных, приими хвалу, и молитву сотвори о спасении всех, любовию чтущих святую память твою, да величаем тя сице:
Радуйся, пречестное святыя Троицы селение;
Радуйся, чистотою и святынею ангелом уподобление.
Радуйся, всем сердцем Христа Спаса возлюбившая;
Радуйся, подвигом великих преподобных отец поревновавшая.
Радуйся, велию благодать сего ради стяжавшая;
Радуйся, за вся хвалити и благодарити Творца нас наставляющая.
Радуйся, пламень злобный струями любве твоея угашающая;
Радуйся, милосердие в сердцах наших пробуждающая.
Радуйся, святая Елисавето, великая и преславная чудотворице!

Кондак 2
Видя, Милосердный Господь благочестивое и богоудное житие родителей твоих , святая Елизавето, по мнозех летех бесчадия их благоизволи святей своей страстотерпице Гликерии благовестити има о близьгрядущем рождестве твоем. Мы же, сия поминающе, Творца и Промыслителя всяческих, прежде рождества твоего сугубое попечение Свое о тебе явившего, славословим, вопиюще Ему: Аллилуиа.

Икос 2
Разумом божественным просвещенная и благодатию Христовой еще во чреве матери твоея освященная, всеславная Елисавето, от дней детства твоего явила еси образ жития добродетельнаго; к чтению же Писаний Священных и житий святых угодников Господних, а такожде и молитве усердно прилежала еси. Мы же, сему радующеся, таковыя похвалы тебе, угоднице Христова, приносим :
Радуйся, рода честнаго отрасле прекрасная;
Радуйся, родителей высокоименитых дщи богодарованная.
Радуйся, в рождестве твоем Христову Предтече уподобившаяся;
Радуйся, именем матери его чудесно нареченная.
Радуйся, от рук святителя Божия крещение возприявшая;
Радуйся, от младенчества сердце твое Господеви предавшая.
Радуйся, издетска к водительству Духа Святаго прилежавшая;
Радуйся, от юности твоея разум твой Божиею премудростию напитавшая.
Радуйся, святая Елисавето, великая и преславная чудотворице!

Кондак 3
Сила Христова осени тя, богомудрая Елисавето, и дарова ти крепость мужественне претерпети искушения врага невидимаго, его же стрелы разженныя угасила еси твоими слезными к Богу молитвами; ныне же убо, причащаяся славы небесныя со всеми святыми, предстоиши Царю Славы, воспевая Ему: Аллилуиа.

Икос 3
Имеяй в сердце твоем Единого Господа, ты, всечестная Елисавето, по кончине родителей твоих, раздала еси все имение твое нищим и убозим и с радостию велиею, оставивши град твой Гераклею удалилася еси во град Константинополь, и во обитель идеже игумении бе сродница твоя, вселилася еси. И тамо, красоты мира сего отвергше, облеклася еси во образ ангельский; Мы же любовь твою ко Господу воспевающе, величаем тя тако:
Радуйся, богатство и славу мира сего ни во что же вменившая;
Радуйся, к нетленным сокровищам душу твою Устремившая.
Радуйся, храм Божий в сердце твоем сотворившая;
Радуйся, страстем входы в него затворившая.
Радуйся, путь девства и чистоты избравшая;
Радуйся, всю себя на служение Единому Богу предавшая.
Радуйся, радость послушания ранее соблазнов мира сего познавшая;
Радуйся, трудами иноческими Христа неустанно прославлявшая.
Радуйся, святая Елисавето, великая и преславная чудотворице!

Кондак 4
Бури искушений и соблазнов бесовских мудре бежавши, преславная Елисавето, пророком святым Илии и Моисею, в подвизех досточуднаго жития твоего поревновала еси; ты бо очи сердечныя на небеса имуще, три лета к высоте взора твоего не простерла еси , сугубые труды понесла еси во всем воздержания и покаянием великим угодила еси Подвигоположнику Христу , и приявше благодать бесстрастия ,чистым сердцем воспела еси Господеви: Аллилуиа.

Икос 4
Слышавше глагол Господень, яко Царствие Небесное нудится и токмо нуждницы восхищают е, во бдении и молитве усердно подвизалася еси и плоть свою со страстьми и похотьми распяла еси, премудрая Елисавето, и смирением предивным паче иных угодила еси Господеви. Мы же, вся сия ныне славословяще, таковые похвалы приносим ти:
Радуйся, нелицемерную ревность по Бозе показавшая;
Радуйся, Крестителю Христову в покаянии поревновавшая.
Радуйся, умом к Небесем непрестанно возносившаяся;
Радуйся, всем существом своим в Бозе пребывавшая.
Радуйся, безмолвие всем сердцем возлюбившая;
Радуйся, ради Имени Христова хлад и зной претерпевшая.
Радуйся, постом и непрестанною молитвою Господеви угодившая ;
Радуйся, плоть твою непорочным сосудом благодати Божией явившая.
Радуйся, святая Елисавето, великая и преславная чудотворице!

Кондак 5
Божественнаго Духа преисполнена была еси, святая мати наша Елисавето, добродетельнаго ради жития твоего: зане во граде многолюднем , аки Предтеча в пустыне , свято и надмирно жительствовала еси, сего ради и Спаситель во чудесех преславну тя показа. Мы же, прославляя Бога, дивнаго во святых своих, благодарственне вопием Ему: Аллилуиа.

Икос 5
Видев тя святитель Геннадий добродетелей исполнену и даром рассуждения духовнаго благоукрашену, по кончине сродницы твоея постави тя игумениею богоспасаемой обители Святаго Георгия. Ты же волю святителя Христова , аки волю Божию, исполнила еси и благой и богомудрой наставницею явилася еси не токмо сестрам обители твоея, но и женам мирским, научая их лукавства и злословия удалятися, в любве же христианстей и подвизех молитвы возрастати. Тем же молим тя, мати святая, буди и нам ко спасению руководительницею, да зовем ти:
Радуйся, свеще неугасимая, омраченныя души наша озаряющая;
Радуйся, лампадо златая, елеем милости исполненная.
Радуйся, к земным богатствам сердцем не прилеплятися научающая;
Радуйся, от похоти себялюбия нас отвращающая.
Радуйся, друг друга тяготы носити нас научающая;
Радуйся, любити Бога и творити волю Его нас наставляющая.
Радуйся, от заблуждений духовных нас свобождающая;
Радуйся, от путей погибельных нас удаляющая.
Радуйся, святая Елизавето, великая и преславная чудотворице!

Кондак 6
Проповедница немолчная и евангельских истин вещательница была еси во игуменском служении твоем, всехвальная Елисавето, наставляя ближних твоих в добродетелех христианских: смирении, кротости, воздержании и чистоте. Мы же ныне молим тя, святая мати, предстательством твоим небесным испроси и нам сия боголюбезныя добродетели , да не поработимся страстем греховним, но благочестно воспоем Спасителю Нашему: Аллилуиа.

Икос 6
Возсия царственному граду Константинополю богопросвещенность разума твоего, досточудная Елисавето, даром бо прозрения провидела еси приближение запаления огненнаго и прорекла еси о напасти сей благоверному царю Льву. И купно с преподобным Даниилом Столпником молитву сотворила еси о людех страждущих. Мы же, сия поминающе, молим тя, преподобная Елисавето, не остави и нас грешных и слабых, во дни испытаний наших, укрепи молитвами твоими всех любящих тя и вопиющих ти таковая:
Радуйся, многими даровании духовными от Бога украшенная;
Радуйся, любовию твоею вся покрывавшая.
Радуйся, от пагубы и обнищания многих спасшая;
Радуйся, благовернаго царя в вере и благочестии наставлявшая.
Радуйся, о людех страны э(е)ллинския молитвеннице неусыпная;
Радуйся, помощнице людем Российским богодарованная.
Радуйся, к покаянию всех нас ныне призывающая;
Радуйся, всех молящихся тебе под покров Всевышняго приводящая.
Радуйся, святая Елисавето, великая и преславная чудотворице!

Кондак 7
Хотя Человеколюбец Господь явити в тебе, преподобная Елисавето, свое неизреченное к людем милосердие, показа тя, яко воистину светило многосветлое: скорым твоим ходатайством многая чудеса во дни древния совершила еси, такожде и в наше прескорбное и многосуетное время не оставляеши нас предстательством твоим и подвизаеши Господеви умиленно взывати: Аллилуиа.

Икос 7
Дивная и чудная заступнице и покровительнице явилася еси христианом , святая мати наша Елизавето, твоими бо ходатайствы и молитвами вся полезная нам даруеши ,тобою бо пагуба отгоняется, здравие возвращается , мир и благоденствие водворяются, понеже на Небесех присно ходатайствуеши о нас, взывающих ти сице:
Радуйся, на милость Божию уповати нас наставляющая;
Радуйся, из пучин отчаяния нас изымающая;
Радуйся, от искушений и соблазнов избавляющая.
Радуйся, дев и юношей в целомудрии утверждающая.
Радуйся, супругов в любви и единомыслии сохраняющая;
Радуйся, старцем отраду и утешение посылающая.
Радуйся, кровоточения и язвы кожныя исцеляющая;
Радуйся, скорби духовыя и недузи телесныя от нас удаляющая.
Радуйся, святая Елисавето великая и преславная чудотворице!

Кондак 8
Странныя и преславныя чудеса, силою богодарованною сотворила еси, преподобная мати наша Елисавето, тою же силою змия древнего во образе зримом явившегося победила еси. Мы же к твоему предстательству ныне прибегающе ,молим тя, предивная чудотворице , помози нам страсти наша угасити и настави чистым сердцем Создателю Нашему воспевати ангельскую песнь: Аллилуиа.

Икос 8
Вся в Бозе пребыла еси, богоносная мати наша Елисавето, егда после пения песни Херувимской узрела еси Всесвятаго Духа во образе полотна белейшего снисшедшаго в храм и благодатию Своею вся исполнившаго. Мы же, вся сия ныне поминающе, молим тя, преславная чудотворице, научи нас со страхом Божиим и благоговением чтити святыни Господни и приими величания сия:
Радуйся, в подвизе веры Божия посещения и утешения сподобившаяся;
Радуйся, доброту неизреченныя славы Его лицезрети удостоившаяся.
Радуйся, во Едем Небесный Духом Святым возведенная;
Радуйся, причастнице неизреченныя райския красоты явившаяся.
Радуйся, благодатными дары Пресвятаго Утешителя Духа преизобильно напоенная;
Радуйся, тоя благодати всему роду человеческому пред Богом просящая.
Радуйся, святое причащение Таин Христовых благоговейно приимати нас научающая;
Радуйся, хранити и преумножати благодать Господню нас подвизающая.
Радуйся, святая Елисавето, великая и преславная чудотворице!

Кондак 9
Всякия беды, скорби и напасти избавляеши нас, святая чудотворице, твоими теплыми к Богу молитвами; тем же молим тя: испроси нам вся ко временней и вечней жизни потребная, да сподобимся горнего Иерусалима достигнути и купно с тобою воспевати Богу: Аллилуиа.

Икос 9
Ветийство человеческое не довлеет к достойному прославлению дивнаго жития твоего, святая и преславная Елисавето-Чудотворице; кто бо исповесть вся моления и пощения, болезни и труды твоя? Кто изочтет вся слезы и воздыхания твоя, яже к Богу? Кто же возможет достодолжно восхвалити вся чудеса, тобою во славу Господню сотворенная? Обаче мы, любовию к тебе подвизаемы, дерзаем воспети ти похвалы сия:
Радуйся, в неизреченной славе Творца мира созерцающая;
Радуйся, во благоухании святыни присно почивающая.
Радуйся, яко тобою ум наш в Богомыслии поучается;
Радуйся, яко тобою мрак неведения прогоняется.
Радуйся, от плевел ненависти сердца наша очищающая;
Радуйся, светом любве нелицемерныя нас озаряющая.
Радуйся, заповеди Евангельския исполняти нас наставляющая;
Радуйся, на славословие Божие всех нас созывающая.
Радуйся, Святая Елизавето, великая и преславная чудотворице!

Кондак 10
Спасение вечное улучити чающе, к твоему предстательству, предивная чудотворице, ныне притекаем и молим ти ся: вознеси ко Господу святую твою и всеблагомощную молитву, да ходатайства твоего ради дарует нам Господь мирную кончину живота нашего и сподобит ны в селениях праведных выну воспевати Ему: Аллилуиа.

Икос 10
Стена твердая и заступление несомненное явилася еси всем человеком во обитель твою приходящим и помощи твоея просящим во дни земнаго жития твоего, богоблаженная Елисавето; темже и нас, к тебе ныне притекающих и на предстательство твое ныне велию надежду имущих, от всяких бед и скорбей, напастей и зол заступи и сохрани и приими от нас величания сия:
Радуйся, милосердие Божие к нам приклоняющая;
Радуйся, скорбящих супругов от уз неплодства разрешающая.
Радуйся, младенцев воспитание и благодатное хранение;
Радуйся, монашествующих похвало и утверждение.
Радуйся, людей мирских во благочестии укрепляющая;
Радуйся, силою Божиею козни диавола и аггелов его разрушающая.
Радуйся, полки их низлагающая и безсилие их являющая.
Радуйся , беснующимся здравие и отраду подающая;
Радуйся, святая Елисавето, великая и преславная чудотворице!

Кондак 11
Пение непрестанное вознося ко Господу, была еси вместилище силы и славы Божия. Сего ради милости великой и славной сподобилася еси от Творца и Бога Нашего; святая страстотерпица Христова Гликерия явися ти, во храме молящейся, и прорече ти о близьгрядущем успении твоем. Ты же , в волю Господню себе предавающи, вознесла еси Спасителю Нашему ангельское пение: Аллилуиа.

Икос 11
Светозарный светильник души своея имея выну горящим, мирно и тихо причастившись Пречистых Таин Христовых по свершении праздника обители твоея, святаго великомученика Георгия, отошла еси ко Господу, глаголя: «Ныне отпущаеши рабу Твою, Владыко, по глаголу добропобедныя мученицы Твоея с миром, ибо видеста очи моя спасение Твое». Небесною лепотою просия пресветлый лик твой, и радостно бысть отшествие в чертоги Царя Небесного. Мы же, вся сия ныне славяще, таковыя похвалы возносим ти:
Радуйся, слезами и молитвами себе к смерти предуготовившая;
Радуйся, блаженную кончину от Бога приявшая.
Радуйся, о близости отшествия твоего свыше предуведенная;
Радуйся, житием и исходом твоим нас поучающая.
Радуйся, праведною кончиною святость жития твоего показавшая.
Радуйся, за ангелоподобную чистоту сердца твоего Господа узревшая.
Радуйся, со Христом, Его же возлюбила еси, на веки соединившаяся;
Радуйся, Царствия Небеснаго и славы вечная достойная наследнице.
Радуйся, святая Елисавето, великая и преславная чудотворице!

Кондак 12
Благодать чудотворений от Господа прияла еси, преподобная мати наша Елисавето, и по достоянию чудотворицею наречена была еси ,ибо не токмо при жизни , но и по смерти, величием чудес всех нас удивляеши и ко славословию Промысла Божия подвизаеши , во еже о тебе пети чудес Творцу Богу: Аллилуиа.

Икос 12
Поюще Бога, Дивнаго во святых своих, восхваляем тя, предивная чудотворице, яко невесту Христову, блаженство райское неуклонным заповедей Господних творением стяжавшую и молим тя: не возгнушайся пений наших молебных и низпошли мир и благоустроение обители Святаго Иоанна Крестителя Господня, яже во граде Москве, и все нам, память твою святую радостно празднующим, испроси дары благодати Божией, ко спасению благопотребныя, да зовем ти:
Радуйся, о спасении нашем Спасителя умоляющая;
Радуйся, милость Богородицы к нам приклоняющая.
Радуйся, во всяком обстоянии благодать и вспоможение дарующая;
Радуйся, обители , под покровом твоим сущей, похвало и радование.
Радуйся, предстательнице крепкая на тя уповающих;
Радуйся, заступнице скорая тя призывающих.
Радуйся, кротких и благих нравов благоискусная насадительнице;
Радуйся, нечестивых и душетленных обычаев неуклонная искоренительнице.
Радуйся, святая Елисавето, великая и преславная чудотворице!

Кондак 13
О прехвальная угоднице Божия, преподобная мати наша, Елисавето, Константинопольская Чудотворице, кроткая и теплая заступнице наша! Приими от нас малое сие моление, любовию тебе приносимое и не забуди нас, грешных, во святых молитвах твоих, да, уповающе на тя, сподобимся купно с тобою непрестанно взывати Творцу и Спасителю Нашему: Аллилуиа.
Сей кондак читается трижды, затем икос 1 и кондак 1.[/spoiler]

Раб божий Константин

Акафист святителю и чудотворцу Ермогену, Патриарху Московскому и всея Руси.
[spoiler]Кондак 1


Изрядный воеводо ратоборцев за веру Христову, теплый утешителю всех напаствуемых и обремененных скорбьми многими, непоколебимый столпе православныя веры, еяже ради положил еси душу твою за други своя, и нас свободил еси от козней и сетей вражиих. И ныне от Господа прославлен еси явлением чудес твоих, имиже собрал еси нас умиленною душею пети тебе: Радуйся, святителю Ермогене, добрый пастырю и великий заступниче Российския земли.


Икос 1


Ангела хранителя Российския земли яви тя милосердый Христос в древния дни мятежа и нестроения, да спасет ю от блуждания греховнаго. И ныне яви тя молитвенника тепла и чудотворца, яко знамение жизни нашея; да и ныне грядут по тебе вси блуждающии, яко овцы неимущия пастыря, и обретше тобою спасение, да поют тебе сице: Радуйся, Церкве нашея премудрое возглавление; Радуйся, о чадех Церкве теплое промышление. Радуйся, страны нашея церковное утверждение; Радуйся, сынов царства православное озарение. Радуйся, пастырем и пасомым доброе поучение; Радуйся, царем нашим совете и утешение. Радуйся, святителю Ермогене, добрый пастырю и великий заступниче Российския земли.


Кондак 2


Видя Русь, яко вдовицу, зельне плачущу о разорении дома своего, умилосердився, на рамена своя подъял еси скорби ея и даже до смерти понесл еси я. Сего ради вечно радуешися на небесех, поя Богу: Аллилуиа.


Икос 2


Разумом любве, наказующия и милующия, управлял еси, святителю, Казанскою паствою твоею, яко кораблем, в пучине зол потопляемым, и привел еси его к тихой пристани святыя православныя Церкве, темже благодарственно поем ти: Радуйся, ума Христова вместилище; Радуйся, разума Церкве хранилище. Радуйся, главо, светом истины всех озаряющая; Радуйся, премудросте, немудрыя просвещающая. Радуйся, благовестниче православныя правды; Радуйся, обличителю человеческаго суемудрия и неправды. Радуйся, святителю Ермогене, добрый пастырю и великий заступниче Российския земли.


Кондак 3


Силою веры и разума духовнаго укрепляя во граде Казани новокрещенную паству твою, всеоружием Божия благодати победил еси козни врагов православныя веры Христовы и поучал еси чад твоих непрестанно взывати Богу: Аллилуиа.


Икос 3


Имея благодать священства, добре носиму в благоухающем сосуде души твоея, сподобился еси, отче Ермогене, взяти от земли святую икону Пречистыя Богоматере, во граде Казани чудесно явленную, и прославити ю по достоянию. Темже и подвизаеши нас взывати тебе сице: Радуйся, чудотворныя иконы Казанския первое прославление; Радуйся, чудес от сея иконы неложное извещение. Радуйся, славы Богоматере умиленный песнотворче; Радуйся, пред Нею о пастве твоей теплый молитвенниче. Радуйся, Матерь Божию, яко Заступницу православного царства Российскаго, почитаяй; Радуйся, о утверждении сего царства пред Пречистою слезы проливаяй. Радуйся, святителю Ермогене, добрый пастырю и великий заступниче Российския земли.


Кондак 4


Бурею помышлений сумнительных и стремлений мятежных волнуема и в пучину инославнаго суемудрия погружаема, Русь утопаше. Узрев же тя, святителю Божий, яко "столпа непоколебима и адаманта тверда", возрадовася надеждею и, тобою укрепляема, поет Богу: Аллилуиа.


Икос 4


Слышав беззаконное умышление самозваннаго царя поругатися над верою православною, дерзновенно вещал еси ему, яко не подобает царю православному оженитися еретичкою, и тако обличил еси его неверие и нечестие. Сего ради и воздвиже на тя гонение и из престольнаго града тя, святителю, изверже. Мы же, почитающе сие твое правдолюбие, поем ти, сильному о Господе: Радуйся, крепкий поборниче противу самозваннаго повелителя; Радуйся, дерзновенный заступниче за православную веру. Радуйся, суемудраго инославия праведное обличение; Радуйся, спасительнаго православия немолчное назидание. Радуйся, правды ради изгнанный; Радуйся, от Господа вечною славою на небесех венчанный. Радуйся, святителю Ермогене, добрый пастырю и великий заступниче Российския земли.


Кондак 5


Боготечную зведу показа тя на небесех в сонме священномучеников Господь Вседержитель, зане и на земли был еси звезда светлая, осиявающая царя и царство светом православия и путеводствующая ко угождению единому Богу, во еже воспевати Ему непрестанно: Аллилуиа.


Икос 5


Видеша тя православнии людие, яко светило церковное, безоблачно сияющее в просвещение омраченных страстьми, призваша тя в царствующий град Москву, егда нечестивый самозваный повелитель низвержен бысть, да на свещнице первосвятительскаго служения освещавши путь жизни новому царю и всему Российскому царству. Сего ради и мы, до сего дне озаряемии светом твоим, неустанно взываем ти: Радуйся, почитаяй царя, яко Божие дарование; Радуйся, мняй быти ему благочестиву и поборателю по вере православней. Радуйся, новопоставленна царя Василия твердости учивый; Радуйся, в радости и в горе другом ему бывый. Радуйся, православнаго царя нашего пребывающее благословение; Радуйся, во всех делех небесное ему поможение Радуйся, святителю Ермогене, добрый пастырю и великий заступниче Российския земли.


Кондак 6


Проповедник быв спасительнаго покаяния, егда разгореся новый мятеж на Руси, призвал еси во град Москву древняго и немощнаго старца первосвятителя Иова и купно с ним молился еси в храме Успения Богоматере о чадех твоих, "да отвратит Господь от них праведный гнев Свой, да подаст им мир и любовь, да устроит в царстве древнее единение, да благословит царя победами над враги", и тако да прославится в людех российских Имя Господне песнию: Аллилуиа.


Икос 6


Возсиявый во граде Москве светильник пресветлый был еси, святителю Ермогене, всем блуждающим во тьме греховней, в твоих "богомольных" посланиих путь спасения им показуя и дух уныния и малодушия от сердец их отгоняя. Сего ради и мы грешнии, в дни скорби и блуждания греховнаго, припадаем к тебе, святителю Божий, и слезно взываем: охраняй и ныне отечество наше от шатания умов и сердец, буди в жизни нам вождь добрый и благонадежный, да "не погибнет, по словеси твоему, Русь православная и Богом любимая" и да не престанет величати тя сице: Радуйся, от потопления бурями житейскими российския люди спасаяй; Радуйся, унывающих и мятущихся укрепляяй и от заблуждений отвращаяй. Радуйся, преступающих крестное целование со властию обличаяй; Радуйся, за дом Пречистыя Богородицы и за Московское царство даже до смерти стояти научаяй. Радуйся, зерцало совести нелицеприятныя; Радуйся, добрый кормчий корабля Христова. Радуйся, святителю Ермогене, добрый пастырю и великий заступниче Российския земли.


Кондак 7


Хотя быти пастырь добрый, емуже суть овцы своя, видев волка грядуща, не оставлял еси овцы и не бегал еси, но пред ними ходил еси во всеоружии силы и истины, поя Богу: Аллилуиа.


Икос 7


Новаго человека, по образу Создавшаго его, а не новаго царства инославнаго измышления, возжелел еси, святителю Ермогене. Сего ради ополчился еси на иноземное суемудрие и ратовал еси за царство древлеправославное, еже тщится во всех людех и во всем житии их вообразити Христа Бога. Поем и славим сие православное ратоборство твое и благодарственно вопием ти: Радуйся, волков хищных нещадное изгнание; Радуйся, коварства их мудрое распознание. Радуйся, всех стояти непоколебимо за православную веру Христову учивый; Радуйся, иновернаго царя возсести на престол Российский недопустивый. Радуйся, стада Христова церковное ограждение; Радуйся, царства православнаго верное спасение. Радуйся, святителю Ермогене, добрый пастырю и великий заступниче Российския земли.


Кондак 8


Странно есть маловерным и малодушным зрети, како святитель Ермоген, сей воистину "крепкий воин Христов", дерзновенно обличает измену вере Христовой и, егда устремися нань нечестивый изменник, имый нож в руце, токмо знамением крестным ограждает себе от нападения вражия, и тако побеждает его злобу и безумие, нас же воздвизает к пению: Аллилуиа.


Икос 8


Весь бе исполнен ревностию Илии пророка, святителю Ермогене, егда узрел еси запустение царства и поругание святых храмов Божиих, огнем сея ревности воспламенил еси и сердца верных чад твоих, мужественно стати за веру православную и изгнати из престольнаго града нечестивых ляхов, во спасение Российския земли, поющия ти ныне любовию: Радуйся, святою ревностию о спасении царства Российскаго пламеневый; Радуйся, возжещи сию ревность и в чадех твоих восхотевый. Радуйся, вся угрозы и прещения врагов твоих; презревый; Радуйся, изыти им из града Москвы повелевый. Радуйся, российское воинство на освобождение царствующаго града от нечестивых врагов благословивый; Радуйся, святыни его от поругания тем оградити желавый. Радуйся, святителю Ермогене, добрый пастырю и великий заступниче Российския земли.


Кондак 9


Всякия труды подъял еси, святителю Божий, всякия лишения, обиды и болезни претерпел еси, спасения ради чад твоих; но и в терпении и в труде мнозем неустанно взывал еси Богу: Аллилуиа.


Икос 9


Витии мира сего безмолвствуют, в страсе и трепете видяще разорение царства Российскаго, громозвучный же глас святителя Ермогена, уже в заточении сущаго, не престает проповедати покаяние во отпущение грехов, ихже ради излился на Русь праведный гнев Божий, и молит пасомых "в чистоте души своя хранити и положити я за Пречистыя дом и за чудотворцев, и за веру". И мы веруем, яко слезами покаяния, по глаголу святителя, согрешившая Русь омыся, очистися и обновися, и ныне поет во славу своего по Бозе наставника: Радуйся, грешныя к покаянию призываяй; Радуйся, властию от Бога грехи царства разрешаяй. Радуйся, за грехи чад твоих и в заточении Бога моливый; Радуйся, слезными теченьми землю темницы твоея оросивый. Радуйся, рыданьми покаяния лице царства обновивый; Радуйся, гнев Божий на милость к нам грешным преклонивый. Радуйся, святителю Ермогене, добрый пастырю и великий заступниче Российския земли.


Кондак 10


Спасти хотя Русь от безначалия греховнаго, не к нечестивому западу, но к богобоязненному дому боляр Романовых обратил еси очи твои, святителю Ермогене, да будет он властию от Бога, во утверждение Христова закона, и да поют царие и людие единеми усты и единем сердцем Спасителю Богу: Аллилуиа.


Икос 10


Стопа неодолимая Церкве был еси, отче наш Ермогене, еюже царство наше оградися, в православии утвердися и от врагов спасеся, и ныне со благодарением взывает ти: Радуйся, злыя козни нечестиваго запада отвергнувый; Радуйся, православие в земли нашей утвердивый. Радуйся, святых преданий отеческих хранителю; Радуйся, уставов Церкве Православныя ревнителю. Радуйся, в доме боляр Романовых благочестивую отрасль древняго царственнаго рода узревый; Радуйся, в нем Божиею милостию Царя всея Руси указавый. Радуйся, святителю Ермогене, добрый пастырю и великий заступниче Российския земли.


Кондак 11


Пение исходное и рыдание надгробное творит православная Русь у гроба священномученика Ермогена, положившаго душу свою за други своя. Не плачите, православнии, не плачите, но паче дерзайте верою, праведник бо и по смерти жив будет во веки, поя Богу: Аллилуиа.


Икос 11


Светильник Христов, на верху горы стояй и всей Руси светяй был еси в житии твоем, святителю Ермогене. И се полагаешися под спудом могильным плотию, да возсияеши духом, яко солнце в царствии Отца Небеснаго, нас же да просветиши сице воспевати болезни и труды твоя: Радуйся, с престола патриаршаго беззаконно низверженный; Радуйся, в темное подземелие, яко во гроб, вверженный. Радуйся, травною пищею от врагов питанный; Радуйся, глада мученьми даже до смерти изнуренный. Радуйся, священномучениче, за православие царства пострадавый; Радуйся, страстотерпче, в руце Господу дух свой предавый. Радуйся, святителю Ермогене, добрый пастырю и великий заступниче Российския земли.


Кондак 12


Благодати Божией сокровище явися всечестная рака мощей твоих, святителю отче Ермогене, и источник приснотекущия силы, еюже беси изгоняются, недужнии исцеляются, хромии ходят, глухии слышат, слепии презирают, озлобленнии умиряются, скорбящии утешаются и вси ликуют о Господе и прославляют Бога, дивнаго во святых Своих, поюще Ему: Аллилуиа.


Икос 12


Поюще твое прославление, святителю Ермогене, сия песни приносим ти, чудотворче святый, яко благоухание христианския радости: зрим бо Божию силу, во святых мощех твоих пребывающую. И ныне озаряеши нас светоизлиянием твоея благодати, обвеселяя сердца наша пети ти со умилением: Радуйся, ты бо Сладчайшаго присно созерцаеши; Радуйся, ты бо лицем к лицу Христа воспеваеши. Радуйся, ты бо Божественною силою преображаешися от славы в славу; Радуйся, ты бо, яко солнце новое, украшаеши Господню державу. Радуйся, твоим бо сиянием и мы незримо просветляемся; Радуйся, твоею бо силою и мы чудесно оживотворяемся. Радуйся, святителю Ермогене, добрый пастырю и великий заступниче Российския земли.


Кондак 13


О преславный угодниче Божий, святителю отче наш Ермогене. Приими наше твоей славе сорадование, яко воздыхание души, жаждет бо неотъемлемый радости, и умоли венчавшаго тя славою Господа низпослати и нам от бед, скорбей и болезней, обдержащих ны, скорое избавление, даровати же благодать утешения и радования, да с веселием выну поем Богу: Аллилуиа.


(Этот кондак читается трижды, затем икос 1 и кондак 1)



Молитва святителю и чудотворцу Ермогену, Патриарху Московскому и всея Руси


О великий угодниче Христов, святителю отче наш Ермогене! К тебе, молитвеннику теплому и предстателю пред Богом непостыдному, усердно притекаем, в нуждах и скорбех наших утешения и помощи просяще. В древнюю годину искушений, внегда обышедше обыдоша страну нашу нечестивии врази. Господь яви тя Церкви Своей столпа непоколебима и людем российским пастыря добра, душу свою за овцы положивша и лютыя волки далече отгнавша. Ныне убо призри и на ны, недостойная чада твоя, умиленною душею и сокрушенным сердцем тебе призывающая. Крепость бо наша в нас оскуде, и вражия ловления и сети обыдоша нас. Помози нам, заступниче наш! Утверди нас в вере святей: научи нас всегда творити заповеди Божия и вся предания церковная, от отец нам заповеданная. Пастырем нашим буди архипастырь, воином вождь духовный, болящим врач, печальным утешитель, гонимым заступник, юным наставник, всем же благосердый отец и за вся теплый молитвенник; яко да молитвами твоими ограждяеми, непрестанно воспоем и прославим всесвятое Имя Живоначальныя Троицы, Отца и Сына и Святаго Духа, во веки веков. Аминь.



Тропарь священномученику Ермогену, патриарху Московскому


Тропарь, глас 8


Российския земли первопрестольниче, и неусыпный о ней к Богу молитвенниче! За веру Христову и паству твою душу свою положив, державу нашу утвердил еси и страну нашу от нечестия избавил еси. Темже вопием ти: спасай нас молитвами твоими, священномучениче Ермогене, отче наш.


Тропарь, глас 4 (Прославление)


Приспе день светлаго торжества, град Москва радуется, и с ним Русь Православная ликовствует песньми и пеньми духовными: днесь бо священное торжество в явлении честных и многоцелебных мощей святителя и чудотворца Ермогена, якоже солнце незаходимое возсия светозарными лучами, разгоняя тьму искушений же и бед от вопиющих верно: спасай нас, яко предстатель наш, великий Ермогене.


Кондак, глас 6


Темницею и гладом изнуряем, даже до смерти верен пребыл еси, блаженне Ермогене, малодушие от сердец людей твоих изгоняя и на общий подвиг вся призывая. Темже и нечестивых мятеж низложил еси и державу нашу утвердил еси, да вси зовем ти: радуйся, заступниче Российския земли.[/spoiler]

Раб божий Константин

Акафист святым седми отроком, иже во Ефесе.
[spoiler]Кондак 1

Избраннии от воскресшаго плотию из мертвых Христа Бога, во уверение общаго всех воскресения миру явленнии, предивнии отроцы, иже во Ефесе, прославляюще прославльшагося в вас Господа, похвальная пения возносим вам, глаголюще: Радуйтеся, страстотерпцы Христовы, всемирнаго воскресения мертвых пречуднии проповедницы!

Икос 1

Ангелов Творец, ведый из начала несумненную крепость исповедания вашего, сотвори вас в лютых обстояниих провозвестники быти общаго всех воскресения, яко ангелоподобныя свидетели евангельскаго обетования. Сицевому о нас смотрению Божию дивящеся, во благоговеинстве зовем сице: Радуйтеся, светлыя звезды гряду щаго воскресения; Радуйтеся, преславнии лучи Христа Спаса воскресшаго. Радуйтеся, деннице великаго дне Господня; Радуйтеся, из домов неверных верная Христу чада явившиися. Радуйтеся, в чудный свет и свободу сынов воскресения призваннии; Радуйтеся, Духом Святым в проповедники глаголов живота вечнаго избраннии. Радуйтеся, страстотерпцы Христовы, всемирнаго воскресения мертвых пречуднии проповедницы!

Кондак 2

Видяще вас родители разум добр имущая, потщащася в чин воинский дружины царевы вас устроити; вы же, вся тленная мира презревше, в Сион горний к Царю небесному сердцы своими востекосте, да яко друзи Божии и служителие тайны общаго воскресения вменени будете, поюще Христу: Аллилуиа.

Икос 2

Разум Христов чистыми душами восприяти сподобившеся, дивнии отроцы, посреде греховныя жизни сверстник ваших благодатию Христовою соблюдаеми, друг ко другу любовию и единением духа братие явистеся, и во едино свершени бысте. Сего ради приимите от нас похвалы сия: Радуйтеся, единою банею пакибытия возрожденнии; Радуйтеся, любовию Христовою аки братие соединеннии. Радуйтеся, Церкве Божия чада возлюбленная; Радуйтеся, ангелов Божиих собеседницы. Радуйтеся, паче брашен естественных истинным хлебом жизни себе питавшии; Радуйтеся, сею пищею чрез благодать Святаго Духа от смерти в жизнь процветшии. Радуйтеся, страстотерпцы Христовы, всемирнаго воскресения мертвых пречуднии проповедницы!

Кондак 3

Сила Вышняго, таинники благодати в злостраданиих укрепляющи, сих венцем добропобедным исповедания увенчатися пред человеки и ангелы сподоби, нас же научи пети Богу: Аллилуиа.

Икос 3

Имуще тщание в дом Господень на молитву по вся дни приходити, никакоже сего обычая отвергостеся, святии, гонению Декиеву бывшу; еже уведевше врази веры Христовы, царя о сем известити потщашася, обаче мучителева прещения на прославление вам силою Божиею пременишася. Таковому убо о вас Божию промышлению радующеся, со умилением глаголем вам сице: Радуйтеся, темныя силы князя мира сего благодатию Христовою сокрушившии; Радуйтеся, злобу и коварство слуг его всепобедно посрамившии. Радуйтеся, козней и прещений их не убоявшиися, ниже смутившиися; Радуйтеся, помощию Божиею видимо укрепившиися. Радуйтеся, яко древле Даниил в пещере львове, посреде мучителей сохраненнии; Радуйтеся, силою Владычнею из среды их неврежденно изведеннии. Радуйтеся, страстотерпцы Христовы, всемирнаго воскресения мертвых пречуднии проповедницы!

Кондак 4

Бурею ярости движим, злочестивый Декий царь во гневе святыя вопрошает: почто не бысте с нами в праздник богов, всю вселенную призвавших кпоклонению? Емуже Максимилиан, един от седми, отвещает: имамы единаго Бога и Царя, иже на небеси, Емуже приносим на всяк час жертву хваления, исповедания и моления, поюще Ему: Аллилуиа.

Икос 4

Слышав нечестивый царь, како веру вашу со дерзновением исповедаете, чести воинския лишити вас повеле, и тако испытания ваша Христа ради начашася, Христом скоропослушно в пречудное успение преображенная. Темже и ныне крепость в испытаниих от Бога умолите поющим: Радуйтеся, воеве царя земнаго, к воинству Царя небеснаго сопричтеннии; Радуйтеся, честь земную оставльшии, да славу небесную восприимете. Радуйтеся, земныя чести за Христа лишеннии; Радуйтеся, сего ради венцы нетленными от Него увенчаннии. Радуйтеся, победы Его проповедницы явленнии; Радуйтеся, славы Его вечныя седмочисленное блистание. Радуйтеся, страстотерпцы Христовы, всемирнаго воскресения мертвых пречуднии проповедницы!

Кондак 5

Божественныя любве теплотою грееми, благодатию Христовою от мучителей покровени явилися есте, святии отроцы, Максимилиане, Иамвлише, Мартиниане, Иоанне, Дионисие, Ексакустодиане же и Антонине, в летех юных красоту внутренняго человека с лепотою внешнею сочетавающе и, яко ангели, в пламени исповедания вашего воспевающе Богу: Аллилуиа.

Икос 5

Видев злохитрый царь Декий зело благолепную юность вашу, на неколико дний и ослабу от уз вам дарует, прельстити вас ко отречению от Христа надеяся. Вы же, во свояси отшедще, сребро и злато нищим раздати потщастеся, ко исходу себе уготовляюще. Сего ради восписуем вам похвальная сия: Радуйтеся, закосневшаго во зле мучителя на некое милосердие подвигшии; Радуйтеся, младенческою кротостию вашею коварную злобу его на время угасившии. Радуйтеся, красотою сынов света злообразныя служители греха пленившии; Радуйтеся, Духа Святаго благодатию коварство их победно посрамившии. Радуйтеся, чрез раздаяние земных богатств сокровищем небесным обогатившиися; Радуйтеся, и нас взаим давати Богу научающии, да богатство неоскудеваемое на небесех обрящем. Радуйтеся, страстотерпцы Христовы, всемирнаго воскресения мертвых пречуднии проповедницы!

Кондак 6

Проповедует пещера горы Охлон чудную славу вашу, святии отроцы, дебри бо и вертепы ея молитвою вашею облагоухали есте, отонудуже на тверди церковней, якоже звезды славы небесныя, из мрака гробов чудно возсиявшыя, явистеся и нас Первоначальнику общаго воскресения Христу Богу пети научисте: Аллилуиа.

Икос 6

Возсияти хотя людем свет истины, мглу же заблуждения разгнати, Христос Бог снити вам во мрак могильный соизволи яко да послежде в дивнем востании вашем общее воскресение уверит. Пред таковым Божиим о вас благоволением преклоняющеся, возсылаем вам хваления сия: Радуйтеся, твердости ради исповедания от мук промыслительно избавленнии; Радуйтеся, и нас крепце за правду братися научающии. Радуйтеся, безболезненно подвиг ваш скончавшии; Радуйтеся, чудным сном почившии, во еже востанием от сего сна смерти мглу заблуждения разсеяти. Радуйтеся, в нетлении телес ваших Господем соблюденнии; Радуйтеся, прежде общаго воскресения изволением Божиим воставшии. Радуйтеся, страстотерпцы Христовы, всемирнаго воскресения мертвых пречуднии проповедницы!

Кондак 7

Хотя безбожный царь нуждею к идолослужению святыя привлещи, паки праздник идольский устрояет и тыя нань привести повелевает; не обретшым же тех во граде Ефесе слугом его, родители их казнию устрашити тщится, но от сих извещен бывает, яко святии в пещере сокрышася, воспевающе Богу: Аллилуиа.

Икос 7

Новое устремление злобы мир явил есть, егда родителие место покоища чад своих цареви открыта, и тако любве отчия к ним отрекошася. Сего ради ко избранником Божиим глаголем сице: Радуйтеся, миром отверженнии и небо восприявшии; Радуйтеся, Отца ради небеснаго отцы земными преданнии. Радуйтеся, отческою любовию Его в таинственнем сне чудно сохраненнии; Радуйтеся, нетление улучившии и мир светом воскресения осиявшии. Радуйтеся, путь к сему дивному свету нам указующии; Радуйтеся, час кончины сбытием обетования Божия нам услаждающии. Радуйтеся, страстотерпцы Христовы, всемирнаго воскресения мертвых пречуднии проповедницы!

Кондак 8

Странное и преславное чудо всемогутства Божия на вас, святии отроцы, показася, камением бо по повелению Декиеву в пещере заграждении и печатию запечатленнии, сто и осмьдесят лет даже до дний царя Феодосия тамо спяще пребыли есте, воставше же аки живии, саддукейское мудрование посрамили есте, поюще Христу, вас воскресившему: Аллилуиа.

Икос 8

Весь седмочисленный исповедников лик, во гробе каменнем заключен быв, жизни вечныя никакоже отлучися, но истекшым стом и осмидесятим летом сон от очес их произволением Божиим отрясеся, и тако святии отроцы живии восташа, весь мир о воскресении всех уверяюще и нас пети научающе сице: Радуйтеся, упование общаго воскресения обетованием Божиим утверждающии, Радуйтеся, краеугольнаго ради камене Христа Бога камением во гробе загражденнии. Радуйтеся, Его ради, во гробе запечатленного, печатию запечатленнии; Радуйтеся, Агнцем, вземшим на Себе грех мира, от уз смерти свобожденнии. Радуйтеся, во уверение общаго воскресения, якоже Лазарь четверодневен, из гроба изведеннии; Радуйтеся, числу седми херувим, престолу славы Божия предстоящих, сообразнии. Радуйтеся, страстотерпцы Христовы, всемирного воскресения мертвых пречуднии проповедницы!

Кондак 9

Всякое естество ангельское возрадовася о чуднем по мнозех летех востании вашем и ужасашеся: како вы, преславнаго убо чудесе, о вас бывшаго, не ведуще, обычное целование друг другу подаете и утреннее пение Господу, аки вчера ко сну отшедшии, приносите, поюще: Аллилуиа.

Икос 9

Ветийствующий язык не возможет изрещи чудес Твоих, Господи, вемы бо, како блаженный отрок Иамвлих, многолетняго успения своего не разумея и во град за пищею исшедый, удивися, егда Ефес, Христовою верою издавна просвещенный, увиде, и Господа прослави, нас же глаголати сотвори таковая: Радуйтеся, делателие на ниве Господней, молитвенныя слезы обильно пролившии; Радуйтеся, в скудости и гонении почившии, во славе и богатстве воставшии. Радуйтеся, зрением торжества веры Христовы, во дни ваша гонимыя, по востании обрадованнии; Радуйтеся, победу Христа над миром яве узревшии. Радуйтеся, и нас на сию уповати научающии. Радуйтеся, от уныния нас ограждающии; Радуйтеся, страстотерпцы Христовы, всемирнаго воскресения мертвых пречуднии проповедницы!

Кондак 10

Спасти хотя Бог и в вере утвердити люди, сия о многолетнем успении Иамвлиха чрез древний пенязь, на торжище им принесенный, научает, епископу града сия уразумевшу и Бога прославившу с песнию: Аллилуиа.

Икос 10

Стена и утверждение веры явистеся, святии, человеком, в пещеру вашу пришедшим и ковчежец с хартиею обретшым, на нейже имена ваша и кончины образ написана быша, во еже пети всем: Радуйтеся, седмь избранных сосудов Божиих; Радуйтеся, вкупе со святыми мученики елеем радования помазаннии; Радуйтеся, седмь светильников пред престолом Ходатая Бога и человеков; Радуйтеся, седмь труб благовестия втораго пришествия Сына Человеческого. Радуйтеся, седмь ангел, благовествующих нам славу до конца претерпевших; Радуйтеся, яко седмисвещник златый, церковь Божию украшающии. Радуйтеся, страстотерпцы Христовы, всемирнаго воскресения мертвых пречуднии проповедницы!

Кондак 11

Пение благодарственное Пресвятей Троице вознося, благочестивый царь Феодосий со тщанием во Ефес устремися, во еже святыя отроки видети, и седмь дний тамо пребываше, дондеже сии, главы преклонше, дух свой Господу предаша, купно с ними победную возсылая песнь Христу Богу: Аллилуиа.

Икос 11

Светильницы, тьму ереси разгоняющии, явилися есте, святии отроцы, светом нетления вашего сияющии и блаженным по востании паки успением истину грядущаго живота утверждающии, саддукейское бо мудрование посрамивше, вся раздоры церковныя утишили есте, общее воскресение вкупе с древним Лазарем уверяюще. Темже, благодаряще о сем Господа, со умилением зовем вам: Радуйтеся, скорбное житие наше добрым упованием осиявающии; Радуйтеся, посреде волн жития сего к пристанищу небесному нас направляющии. Радуйтеся, яко звезды, во отишие блаженнаго покоя в чертозе Христове нас путеводящии; Радуйтеся, блаженство вечное, скорбящим уготованное, благовествующии. Радуйтеся, яко недостойны суть страсти нынешняго времене к будущей славе, уверяющии; Радуйтеся, доблии вестницы царства небеснаго бывшии. Радуйтеся, страстотерпцы Христовы, всемирнаго воскресения мертвых пречуднии проповедницы!

Кондак 12

Благодать дадеся вам от Бога, во еже вся любящия и чтущия вы в чудный свет Его руководствовати. Темже и нашея жизни скорбный путь крепкою надеждою воскресения озарите, от греховныя погибели нас соблюдите и в час смертный нам предстаните, да вашим заступлением невечерняго света величествия Божия и мы грешнии достижем, идеже с лики праведных воспоим о вас Богу: Аллилуиа.

Икос 12

Поюще дивное прославление силы Божия в вас, святии отроцы, ублажаем вы, яко заступники и молитвенники наша пред Господем, и с любовию, святей иконе вашей предстояще, возглашаем вам хваления сия: Радуйтеся, в Российстей земли града Старицы похвало и утверждение; Радуйтеся, вся окрестныя веси славою благодатныя помощи вашея исполнившии. Радуйтеся, болящих младенцев прибежище и исцеление; Радуйтеся, скорбей родителей их неложное врачевание. Радуйтеся, всем любящим и чтущим вы покрове и ограждение; Радуйтеся, всего мира христианскаго помоще и заступление. Радуйтеся, страстотерпцы Христовы, всемирнаго воскресения мертвых пречудные проповедницы!

Кондак 13

О чуднии отроцы, светом небесныя славы вашея и уверением нескончаемаго живота скорбный путь жития нашего озаряющии! Приимите малое сие моление наше и не отрините нас, притекающих к вам: молите присно всех Владыку, да и мы райскаго чертога не лишени будем, но вкупе со святыми воспоим тамо Христу Богу: Аллилуиа.

Икос 1

Ангелов Творец, ведый из начала несумненную крепость исповедания вашего, сотвори вас в лютых обстояниих провозвестники быти общаго всех воскресения, яко ангелоподобныя свидетели евангельскаго обетования. Сицевому о нас смотрению Божию дивящеся, во благоговеинстве зовем сице: Радуйтеся, светлыя звезды гряду щаго воскресения; Радуйтеся, преславнии лучи Христа Спаса воскресшаго. Радуйтеся, деннице великаго дне Господня; Радуйтеся, из домов неверных верная Христу чада явившиися. Радуйтеся, в чудный свет и свободу сынов воскресения призваннии; Радуйтеся, Духом Святым в проповедники глаголов живота вечнаго избраннии. Радуйтеся, страстотерпцы Христовы, всемирнаго воскресения мертвых пречуднии проповедницы!

Кондак 1

Избраннии от воскресшаго плотию из мертвых Христа Бога, во уверение общаго всех воскресения миру явленнии, предивнии отроцы, иже во Ефесе, прославляюще прославльшагося в вас Господа, похвальная пения возносим вам, глаголюще: Радуйтеся, страстотерпцы Христовы, всемирнаго воскресения мертвых пречуднии проповедницы!

Молитвы святым седми отрокам Ефесским

Молитва первая

Боже великий, хвальный и непостижимый, и неисповедимый, создавый человека рукою Твоею, персть взем от земли, и образом Твоим почтивый его, Иисусе Христе, прежелаемое имя, со Безначальным Твоим Отцем и с Пресвятым, и Благим, и Животворящим Твоим Духом, явися на рабе Твоем (имярек), и посети его душу и тело, умоляем от преславныя Владычицы нашея Богородицы и Приснодевы Марии, святых Небесных Сил Безплотных, и честнаго славнаго пророка, и Предтечи и Крестителя Иоанна, святых славных и всехвальных апостолов, иже во святых отец наших, и вселенских учителей, Василия Великаго, Григория Богослова, Иоанна Златоустаго, Афанасия и Кирилла, Николая иже в Мирех, Спиридона чудотворца, и всех святых священноначальников, святаго апостола первомученика и архидиакона Стефана, святых славных великомучеников Георгия Победоносца, Димитрия Мироточца, Феодора Стратилата, и всех святых мучеников, преподобных и богоносных отец наших Антония, Евфимия, Саввы Освященнаго, Феодосия общаго жития начальника, Онуфрия, Арсения, Афанасия Афонскаго, и всех преподобных, святых и исцелителей, безсребренников Космы и Дамиана, Кира и Иоанна, Фалалея и Трифона и прочих, святаго праведнаго Иоанна Кронштадтскаго, святаго преподобнаго Иоанна Рыльскаго, святыя блаженныя Ксении Петербуржской и всех Твоих святых. И даждь ему сон упокоения, сон телесный здравия и спасения и живота, и крепость душевную и телесную, якоже посетил еси иногда Авимелеха угодника Твоего во храме Агриппове, и дал еси ему сон утешения, еже не видети падения Иерусалимова, и сего успивый сном питательным, и паки сего воскресивый во едином мгновении времене, в славу Твоея благости. Но и святыя Твоя славныя седмь отроки, исповедники и свидетели Твоего явления показавый, во дни Декия царя и отступника, и сия успивый в вертепе на лет сто и осмьдесят, яко младенцы согреваемыя в ложеснах матере своея, и никакоже претерпевшыя тления, в похвалу и славу человеколюбия Твоего, и в показание, и извещение нашего пакибытия, и воскресения всех. Сам убо человеколюбче Царю, предстани и ныне наитием

Святаго Твоего Духа, и посети раба Твоего (имярек), и даруй ему здравие, крепость, и благомощие, Твоею благостию, яко от Тебе есть всяко даяние благо, и всяк дар свершен. Ты бо еси врач душ и телес наших, и Тебе славу и благодарение и поклонение возсылаем, со Безначальным Твоим Отцем, и с Пресвятым, и Благим, и Животворя-щим Твоим Духом, ныне и присно, и во веки веков. Аминь.


Молитва вторая

О пречуднии святии седмочисленнии отроцы, Ефеса града похвало и всея вселенныя упование! Воззрите с высоты небесныя славы на нас, любовию память вашу чтущих, наипаче же на младенцы христианския, вашему заступлению от родителей своих препорученныя. Низведите на ня благословение Христа Бога, рекшаго: оставите детей приходити ко Мне. Болящия убо в них исцелите, скорбящия утешите; сердца их в чистоте соблюдите, кротостию исполните я, и в земли сердец их зерно исповедания Божия насадите и укрепите, во еже от силы в силу им возрастати. И всех нас, святей иконе вашей предстоящих рабов Божиих ( имярек), и тепле вам молящихся, сподобите Царствие Небесное улучити и немолчными гласы радования тамо прославляти великолепое имя Пресвятыя Троицы, Отца и Сына и Святаго Духа, во веки веков. Аминь.

Тропарь святым семи отрокам, иже во Ефесе

Тропарь, глас 4

Велия веры чудесе, в пещере яко в чертозе царском святии седмь отроцы пребыша, и умроша без тли, и по мнозех временных восташа яко от сна, во уверение воскресения всех человеков: тех молитвами, Христе Боже, помилуй нас.

Кондак, глас 4

Мира сущая тленная презревая и нетленныя дары приемше, умерше кроме тления пребыша: темже востают по многих летех, все погребше лютех неверие: яже во хвалении днесь вернии восхваляюще, Христа воспоим.[/spoiler]

Раб божий Константин

Акафист святому преподобному Ефрему, Новоторжскому чудотворцу.
[spoiler]Кондак 1.
Избранный чудотворче, преславный угодниче Христов, скорый помощниче и теплый молитвенниче о всех, с верою и любовию просящих твоего заступления, восхваляем тя любовию, Ефреме преподобне. Ты же яко имеяй дерзновение ко Господу, со Аркадием блаженным, моли о спасении нас поющих ти: Радуйся, Ефреме чудотворче, преподобне отче наш.

Икос 1.
Ангелов подражатель явился еси, преподобне и богоносне отче наш Ефреме, ангельски поживый на земли, и нам оставивый образ совершенства духовнаго. Сего ради прослави тя нетлением и чудесы Христос Бог, Емуже предстоиши ныне во славе невечерней Царствия Небеснаго, от нас же, чтущих тя, слышиши пение таковое:
Радуйся, яко любве ради Господа твоего, всякое наслаждение земное оставил еси.
Радуйся, яко вся блага мира сего Христа ради презрел еси.
Радуйся, яко богатство нетленное обрел еси.
Радуйся, яко иго Христово благое и легкое возлюбил еси.
Радуйся, яко во плоти аки безплотен пожил еси.
Радуйся, яко честную и боголюбезную чистоту непорочно сохранил еси.
Радуйся, яко узкими враты в пространство Царствия Небеснаго возшел еси.
Радуйся, яко равноангельскую честь достойно приял еси.
Радуйся, яко венец неувядаемый от Господа восприял еси.
Радуйся, яко на небеси и на земли прославлен еси.
Радуйся, Ефреме чудотворче, преподобне отче наш.

Кондак 2.
Видя брата своего Георгия, со благоверным князем Борисом убиенна, главу братню, яко сокровище многоценно восприяв, хранил еси, и взирая на ню, суету благ мира сего, и час свой смерный выну помышлял еси. Темже мир и вся благая его оставив, инок был еси, да единому Богу живеши, поя Ему: Аллилуиа.

Икос 2.
Разумом свыше просвещенным наставлял еси духовная чада твоя к богоугождению истинному, и любезно принимал еси желавшыя подвизатися вкупе с тобою во спасение, преподобне отче Ефреме, спасительнаго пути наставниче предобрый. Приими убо и нас под твой отчий покров, и молитвами твоими помози нам спасение вечное унаследовати, да тебе восхваляем сице:
Радуйся, алчущым и жаждущым правды, глаголов живота вечнаго возвестителю.
Радуйся, ищущым пути спасительнаго указателю.
Радуйся, мудрый к горнему царствию предоводителю.
Радуйся, обуреваемых страстьми добрый кормчию.
Радуйся, во благочестии труждающихся великий помощниче.
Радуйся, немудрых благоискусный учителю.
Радуйся, теплый о всем мире предстоятелю.
Радуйся, усердный и богоприятный о душах наших молитвенниче.
Радуйся, Ефреме чудотворче, преподобне отче наш.

Кондак 3.
Силою Господа, умудряющаго во спасение, просвещенный, гору высоку, яко место богоизбранна селения иноческаго обрел еси; на нейже обитель во славу богопрославленных страстотерпцев Бориса и Глеба создав, ревнующыя о восхождении от веры в веру, и от добродетели к добродетели собрал еси, купно с тобою пети в Троице славимому Богу: Аллилуиа.

Икос 3.
Имуще тя, отче Ефреме, скораго в бедах помощника благовернии людие, в напастех и скорбех тя на помощь молитвенно призывают, и дары благости Божией молитвами твоими от щедродавца Бога обильно приемлюще, тебе от любве теплыя хвалебно вопиют:
Радуйся, верно тебе молящихся скорый послушателю.
Радуйся, многажды прошения наша исполнением их предваряяй.
Радуйся, болящих врачу благоискусный и безмездный.
Радуйся, скорбящих благоприятное утешение.
Радуйся, унывающих благодатное ободрение.
Радуйся, душетленных страстей прогонителю.
Радуйся, бесноватых от насилия демонскаго свободителю.
Радуйся, безпомощных скоропредстательный помощниче.
Радуйся, иноков богомудрый руководителю.
Радуйся, полка духовных воинов воеводо изрядный.
Радуйся, Ефреме чудотворче, преподобне отче наш.

Кондак 4.
Бурею страстей и треволнений многомятежнаго мира непоколебимь, в тихое пристанище спасения душу твою управил еси, преподобне отче; вся бо благая и красная мира презрев, и странника в мире себе помышляя, имение твое нищым раздал еси, и странноприимство возлюбил еси. Темже Аврааму подобник быв, на лоне его во Царствии Небеснем ныне пребываеши, поя Богу: Аллилуиа.

Икос 4.
Слышавше пастырие Христовы Церкве, яко обитель изрядну воздвигл еси, и иноков лик тамо собрал еси, освятиша тя быти архимандритом, достойную почесть трудом твоим воздающе, и тем подвизающе нас благохвалити тя звании сими:
Радуйся, Агнца и Пастыря верный служителю.
Радуйся, олтаря Господня непорочный предстоятелю.
Радуйся, богомудрый иноков начальниче.
Радуйся, истиннаго смирения наставниче.
Радуйся, совершеннаго терпения подвижниче.
Радуйся, слезнаго умиления преисполненный.
Радуйся, даров Святаго Духа честное вместилище.
Радуйся, Пресвятыя Троицы избранное жилище.
Радуйся, благочестия утверждение.
Радуйся, православия похвало.
Радуйся, Ефреме чудотворче, преподобне отче наш.

Кондак 5.
Боготечную звезду узрев тя, преподобне отче Ефреме, ученик твой Аркадий, учением и житием светло сияюща, последова зари светлаго жития твоего, и яко светильника держася тебе, приведеся к неприступному свету, достиже непостижимаго Бога, и возрадовася, вопия Ему купно с тобою: Аллилуиа.

Икос 5.
Видев тя, преподобне отче Ефреме, святый ученик твой Аркадий, яко ангела Божия облеченнаго в преподобие и святыню, в юностных летех поревнова многотрудному твоему житию, и добродетельми достиже в мужа совершенна в подвизех духовных. Темже ныне вкупе с тобою предстоит престолу Вседержителя во славе вечней, с нимже помолися ко Творцу о спасении нас грешных, поющих тебе:
Радуйся, правило веры и благочестия.
Радуйся, образе целомудрия и воздержания.
Радуйся, постническаго лика украшение.
Радуйся, сияющая зевездо в сонме преподобных.
Радуйся, иноков пастырю и учителю.
Радуйся, и в мире живущих заступниче и покровителю.
Радуйся, яко тесный и прискорбный путь паче пространнаго возлюбил еси.
Радуйся, яко и возлюбленнаго ученика твоего Аркадиа, тем путем ко Христу привел еси.
Радуйся, яко жертву непорочну юношу святаго, сладчайшему Иисусу посвятил еси.
Радуйся, яко с ним славу небесную унаследовал еси.
Радуйся, Ефреме чудотворче, преподобне отче наш.

Кондак 6.
Проповедуя слово Божие братии твоей, отче Ефреме, всех поучал еси словом и житием твоим, безмолвию, братолюбию, странноприимству, смирению, посту, молитве, и страху Божию, иже есть начало премудрости небесныя, еюже осененный, до старости маститыя не изменил еси правила своего иноческаго, неленостно подвизаяся в молитвах деннонощных и воспевая укрепляющему тя Богу: Аллилуиа.

Икос 6.
Возсия нам, яко звезда путеводная, воздержное постническое житие твое, преподобне отче; не тужил бо еси о брашне, еже не поставит нас пред Богом, нерадел еси о доброте ризной, предпочитая благоукрашати душу твою добродетельми. Сего ради нетлением и чудесы прославлен еси от подвигоположника Христа, от нас же приемлеши сия песненныя хвалы:
Радуйся, истинный Евангелия Христова последователю.
Радуйся, не брашно делаяй гиблющее, но приводящее в живот вечный.
Радуйся, благодатию Божиею паче, нежели хлебом насыщенный.
Радуйся, от источника жизненнаго слова Божия напоенный.
Радуйся, потоком слез спасительных орошенный.
Радуйся, в ризу спасения облеченный.
Радуйся, одеждею нетления одеянный.
Радуйся, прежде кончины твоея вся страсти воздержанием умертвивый.
Радуйся, прежде умертвия твоего мертв бывый греху.
Радуйся, прежде общаго всех Воскресения, от Господа нетлением прославленный.
Радуйся, Ефреме чудотворче, преподобне отче наш.

Кондак 7.
Хотя верен быти подражатель Агнца Божия, вземшаго грехи мира, кротость и смирение Его себе усвоил еси, отче наш Ефреме, всякия скорби и обиды безропотно терпел еси, ведый, яко скорбьми временными искупуется вечное спасение, и совершеннаго безстрастия достигл еси, во еже пети тебе еще на земли достойно и праведно ангельскую песнь Вседержителю: Аллилуиа.

Икос 7.
Дивный воистинну победоносец показался еси на страсти плотския, преподобне отче Ефреме, вся разжженныя стрелы врага спасения человеческаго постом и слезными молитвами угасил еси, и во плоти ангельское житие без преткновения проходил еси, Божиею благодатию укрепляемый. Темже вопием тебе:
Радуйся, всякое сладострастие в себе искоренивый.
Радуйся, плоть твою духу любомудренно покоривый.
Радуйся, бдении всенощными ополчивыйся противу искушений вражиих.
Радуйся, пощении неослабными всякое нечитое желание обуздавый.
Радуйся, молитвами непрестанными от всякия скверны очистивыйся.
Радуйся, всего себе Богу посвятивый.
Радуйся, за словеса Господня пути жестоки сохранивый.
Радуйся, сеявый слезами, да радость пожнеши присносущную.
Радуйся, трезвением неусыпным совершенство духовное стяжавый.
Радуйся, Ефреме чудотворче, преподобне отче наш.

Кондак 8.
Странника и пришельца помышлял еси себе быти в мире сем не постояннем, преподобне отче, и грядущаго града Иерусалима Небеснаго взыскуя, вся помышления твоя к нему выну возносил еси, ум твой на Божественная возложив, и распинал еси плоть твою со страстьми и похотьми, сладце воспевая, яко в тимпане, во умерщвленнем телеси, победную песнь Христу Богу: Аллилуиа.

Икос 8.
Весь облеклся еси во вся оружия Божия, яко воин Христов, препоясав чресла твоя истиною, оболкся в броня правды, и обув нозе твои во уготование благовествования мира, восприял еси щит веры и шлем спасения и мечь духовный, иже есть глагол Божий, имже и возмогл еси вся наветы лукаваго победити. Помози убо и нам, отче преподобне, твоими молитвами, противитися искушением вражиим, и подражати тебе в побеждении страстей наших, да тебе зовем:
Радуйся, смирением святым гордыню душепагубную поправый.
Радуйся, кротостию совершенною ярости пламень погасивый.
Радуйся, нищым богатство твое расточивый, и сребролюбие возненавидевый.
Радуйся, всякия досаждения и обиды без гнева претерпевый.
Радуйся, яко молитвами непрестанными уныние прогнал еси от себе, и достигл еси о Господе радования.
Радуйся, яко воздержанием и бдением целомудренно душу и тело твое соблюл еси.
Радуйся, яко не леностно всяку добродетель исправил еси.
Радуйся, яко победныя почести от Христа Бога свыше приял еси.
Радуйся, при жизни и по смерти от Господа чудес даром обогащенный.
Радуйся, во благоухании святыни нетленно почиваяй.
Радуйся, Ефреме чудотворче, преподобне отче наш.

Кондак 9.
Всякое наслаждение плотское возненавидел еси, Ефреме преблаженне, и единаго Бога всем сердцем возлюбил еси; темже и Господь тя возлюби, и чудесы прослави, даровав нам тебе молитвенника благоприятнаго пред благостию Его. Смиренно молим тя, егда имамы предстати пред Судиею праведным, умоли Его за нас, да не помянет беззаконий наших, и сподобит нас блаженной участи одесную стоящих и вопиющих Ему: Аллилуиа.

Икос 9.
Ветии многовещаннии не довлеют изглаголати вся подвиги твоя и чудеса, богомудре отче Ефреме; ибо доброта жития твоего воистину превосходит похвалу человеческую. Обаче мы, любовию к тебе побеждаеми, дерзаем смиренномудренно благохвалити тя пением таковым:
Радуйся, святыя Православныя Церкве светильниче немерцаяй.
Радуйся, Российсия страны ограждение несокрушимое.
Радуйся, Тферския области удобрение благотное.
Радуйся, граду Торжку покрове Богом данный.
Радуйся, обители твоея утверждение и похвало.
Радуйся, иночествующих ликов пречудная красото.
Радуйся, христианскому роду присное утешение.
Радуйся, любящым и чтущым тя ходатаю спасения.
Радуйся, приводяй грешных ко исправлению.
Радуйся, известный умилостивителю Царя Небеснаго.
Радуйся, Ефреме чудотворче, преподобне отче наш.

Кондак 10.
Спастися нам от погибели вечныя, умоли всевышняго Творца, угодниче Божий Ефреме, и не лиши нас помощи твоея святыя в час кончины нашея, егда скорби лютыя обимут грешную нашу душу, и дуси нечистии смутят нас привидении своими; тогда явися нам заступник усерден, молитвами твоими избавляя нас от их наветов, и сподобляя лицезрения ангел, и пения с ними Богу: Аллилуиа.

Икос 10.
Стену заступления, и молитвенника благоприятна к Богу обретше тя отче Ефреме, благодарение Отцу Небесному усердно возсылаем за вся благодеяния Его, тобою нам обильно являемыя, тебе же предстателю нашему сицевое приносим пение:
Радуйся, угодниче Господень, предивный в чудесех.
Радуйся, избранниче Христов неутомимый в подвизех.
Радуйся, слуго добропослушливый Всевышняго Домовладыки.
Радуйся, благий и верный рабе Царя царей.
Радуйся, сильный обидимых заступниче.
Радуйся, сирых и убогих благонадежное пристанище.
Радуйся, душевных и телесных недугов благий целителю.
Радуйся, радости нам вечныя известный ходатаю.
Радуйся, грешников кающихся с Богом примирителю.
Радуйся, небесный наш покровителю.
Радуйся, Ефреме чудотворче, преподобне отче наш.

Кондак 11.
Пение хвалебное воспеваем тебе, преподобне отче Ефреме, и с любовию припадаем к раце святых и многоцелебных мощей твоих, прославляюще терпеливое житие твое, безмолвие твое высокое, смирение нелицемерное, молитву непрестанную, воздержание совершенное, и чистоту боголюбезную души и тела; ты же, всеблаженне, помози и нам подражати твоим добродетелем, да возможем богоугодно пети Создателю нашему: Аллилуиа.

Икос 11.
Светильник добрых дел был еси при жизни, отче преподобне, светильник лучезарный Божия благодати явился еси и по смерти, чудесы сияя и исцеления источая от нетленных мощей твоих, яже по пяти сот девятинадесятих летех, яко сокровище драгоценное, из недр земных целы и благоуханны обретены быша. Тебе убо, сице прославленному от Господа, дары песней духовных приносяще, умиленно зовем:
Радуйся, нетления цвете благоуханный и прекрасный.
Радуйся, стопроцветший крине рая Иисусова.
Радуйся, светлостию чудес твоих мрак душ наших озаряяй.
Радуйся, от болезней многоразличных благодатно телеса наша исцеляяй.
Радуйся, ран греховных врачу благоискусный.
Радуйся, скорбящих сердец утешителю радостотворный.
Радуйся, грозный карателю обидящих.
Радуйся, обители твоея страже неусыпный.
Радуйся, жезл настоятельства в ней до ныне невидимо содержащий.
Радуйся, Ефреме чудотворче, преподобне отче наш.

Кондак 12.
Благодать великих чудес от Господа приял еси, преподобне отче Ефреме, и по достоянию чудотворец наречен был еси; ибо не токмо при жизни, но и по смерти, величием твоих чудес всех удивляеши, и к славословию всемогущества Христова подвизаеши, во еже пети за тя верховному чудес Творцу, и святых Святейшему Слову: Аллилуиа.

Икос 12.
Поем доблественныя подвиги твоя, добропобедный воине Христов, отче наш Ефреме, ублажаем блаженную кончину твою, и молитвенно торжествуем святую память твою, тебе усердно воспевающе:
Радуйся, яко свято и праведно на земли пожил еси.
Радуйся, яко воистину ангел земный и человек небесный был еси.
Радуйся, яко память твоя с похвалами, и успение со святыми.
Радуйся, яко отверзошася тебе врата райская, и вшел еси в радость Господа твоего.
Радуйся, яко душу твою жизнодавец Христос прият в небесная селения.
Радуйся, яко и тело твое на земли прославися нетлением и чудесы.
Радуйся, яко со безплотными силами горе трисвятую песнь Богу немолчно поеши.
Радуйся, яко со пророки и ангелы светло торжествуеши.
Радуйся, со святители и мученики прославленный.
Радуйся, со преподобными и праведными безсмертия венцем увенчанный.
Радуйся, Ефреме чудотворче, преподобне отче наш.

Кондак 13.
О преподобне и богоносне отче Ефреме! Тебе молимся, и тебе просим: вонми похвальному пению нашему, тебе от усердия прносимому, и со учеником твоим Аркадием, моли Господа Бога, всея твари создателя, да простит нам согрешения наша вольная и невольная, и сподобит нас Царствия Своего Небеснаго, вопиющих Ему: Аллилуиа.
Кондак сей глаголи трижды, таже икос 1-й, и кондак 1-й.

Молитва
О священная главо, великий и предивный чудотворче, отче наш Ефреме! К тебе скорому помощнику и усердному о нас молитвеннику смиренно прибегаем, и молитвенно просим тя: нас скорбных и обремененных грехи многими, не остави помощию твоею и заступлением благодатным. Не забуди нас чад твоих, отче священнейший, но поминай нас присно в небесных богоприятных молитвах твоих у престола Пресвятыя Троицы, идеже со ангелы и всеми святыми предстоиши, и зриши вся нашя нужды и беды, яко обуреваемся страстьми и не имамы дерзновения ко Творцу, просити Его о помиловании и спасении. Темже тебе предлагаем яко умилостивителя пред Господом, и тобою уповаем милость Божию и прощение грехов наших от Вседержителя получити, и спасение вечное унаследовати, да славим и поем величие, и благодать и человеколюбие Отца и Сына и Святаго Духа, и твое отеческое заступление, ныне и присно, и во веки веков. Аминь.


Икос 2 - 8 херетизмов
Икос 7 и 11 - 9 херетизмов

в остальных по 10.[/spoiler]

Раб божий Константин

Акафист святым и праведным пророку Захарии и Елисавете.
[spoiler]Кондак 1


Избраннии от рода Ааронова, рождшии Иоанна богохвальнаго, Предтечею и Крестителем Господним предуготованным быти, святии и праведнии Захарие и Елисавето! Яко имущии дерзновение ко Господу, предстательством вашим от всяких нас бед свободите, взывающих вам: Радуйтеся, святии и праведнии Захарие и Елисавето, добрый плод для людей возрастившии.


Икос 1


Ангели земнии и человецы небеснии воистину явистеся, святии Захарие и Елисавето, от юности вашея всеми добродетельми украшении и непорочно житие свое вкупе пожившии, ему же чудящеся, зовем вам гласы хвалебными сице: Радуйтеся, рода Аронова славное прозябение. Радуйтеся, благочестивых родителей светлое украшение. Радуйтеся, душевныя и телесныя чистоты рачителие. Радуйтеся, заповедей Божиих ревностнии хранителие. Радуйтеся, супрузи праведнии, Богом предъизбраннии. Радуйтеся, на трапезу небесную Господом призваннии. Радуйтеся, святии и праведнии Захарие и Елисавето, добрый плод для людей возрастившии.


Кондак 2


Видев Отец Небесный с высоты славы Своея, яко житие ваше, святии и праведнии Захарие и Елисавето, благочестиво и свято бысть, благослови от отрасли вашея святыя произрасти честному и славному плоду – Иоанну, во еже быти ему пророком, Предтечею и Крестителем Сыну Своему возлюбленному Иисусу Христу, Ему же хвалу воздаем: Аллилуиа.


Икос 2


Разумом Божественным свыше направленный Архангел Гавриил предсташе тебе, иерее Захарие, вшедшему покадити во святилище и служащему по чину чреды своея. Зрящи же вестника небеснаго, одесную алтаря кадильнаго стоящаго, страх велий объяше тя, обаче посланник Божий рече ти: "Не бойся, Захарие". Мы же, милостию Божиею к семейству твоему умиленные, вопием: Радуйтеся, целомудреннаго жития крепкое охранение. Радуйтеся, грехов и страстей непреложное одоление. Радуйтеся, благодатию Божиею щедро осененнии. Радуйтеся, зрящие на небе тайны сокровенныя. Радуйтеся, яко ангели бесплотнии, на земли пожившии. Радуйтеся, чистоту телесную в житии своем сохранившии. Радуйтеся, святии и праведнии Захарие и Елисавето, добрый плод для людей возрастившии.


Кондак 3


Сила неизреченная милосердия Божия на вас, святии, открыся, ибо видя праведность хождения вашего пред лицем Божиим, посла вам Господь велие утешение в старости, да поете Ему верно: Аллилуиа.


Икос 3


Имеяй повеление от Господа утешити тя, святе Захарие, возвести ти ангел Божий, яко молитва твоя благоприятна есть Богу и внимая ей, милость ти дарует Бог: благословляше бо супружницу твою Елисавету, узы неплодства ея разрешая, да родит сына, соименнаго благодати Иоанна. Тем же приимите от нас песнь сию: Радуйтеся, житием своим Богу угодившии. Радуйтеся, свято пред Ним неизменно ходившии. Радуйтеся, яко в молитвах своих ко Творцу возвышалися есте. Радуйтеся, яко словом Господним всегда утешалися есте. Радуйтеся, вся надежды своя на Творца возлагавшии. Радуйтеся, в своих добрых делах утомления не знавшии. Радуйтеся, святии и праведнии Захарие и Елисавето, добрый плод для людей возрастившии.


Кондак 4


Бурею мирскаго жития не одоленный, сын ваш, святии Захарие и Елисавето, велик пред Господем будет, не токмо телом, но и духом, рече Ангел Господень, ибо своим рождеством той принесет в мир велию радость, яко мнози возрадуются рождению его, восхваляя Творца: Аллилуиа.


Икос 4


Слышаще дивныя глаголы о сыне своем, яко той велиим пророком и постником наречется, и еще от чрева матери своея исполнится Духа Свята и мнози от сыновей Израильских его ради обратятся ко истинному Богу, ибо надлежит ему быти Предтечею Христовым в духе и силе пророка Илии и приуготовити народы ко принятию Спасителя, зело поражен и удивлен бысть Захария, не решаяся реченному Ангелом веровати. Мы же, словесам ангельским внимая, вопием вам сице: Радуйтеся, стяжавшии милость Творца превеликую. Радуйтеся, языкам принесшии радость великую. Радуйтеся, седины свои славою покрывшии. Радуйтеся, наград на небе себя не лишившии. Радуйтеся, милосердному Господу во всем уподоблявшиеся. Радуйтеся, Триединому Богу всегда поклонявшиеся. Радуйтеся, святии и праведнии Захарие и Елисавето, добрый плод для людей возрастившии.


Кондак 5


Бога точию бояйся, рече ангел Господень Захарии: Аз есмь Гавриил, предстояй пред Богом и посланный благовестити тебе все сие, обаче за то, что ты не уверовал еси словесам моим, будеши немым и не промолвиши ни единаго слова дондеже всему реченному мною надлежит исполнитися по воле великаго Бога, Коему славу пою: Аллилуиа.


Икос 5


Видевше людие бывшии в церкви Господней, умедлившу Захария во алтари, зело дивляхуся сему, изшедшу же ему к ним и не могущу глаголати, но токмо помавающу, разумеша вси, яко бысть ему видение во алтари. Мы же, прославляя дивнаго в чудесех Своих Господа, глаголем вам сице: Радуйтеся, яко сила Божия на вас совершися. Радуйтеся, яко воля Божия непреложно на вас сотворися. Радуйтеся, яко милость Творца с преизбытком на вас излияся. Радуйтеся, яко радость велия вам щедро Творцем даровася. Радуйтеся, яко вы возвеличены быша дланию святою. Радуйтеся, яко вы всем пример подаете собою. Радуйтеся, святии и праведнии Захарие и Елисавето, добрый плод для людей возрастившии.


Кондак 6


Словес Господних, ангелом возвещенных, сбытие видяще, возрадовася зело Елисавета, ибо зачне сына своего и таяшеся месяц пять, глаголющи: яко тако сотвори мне Господь во дни, в няже призре отъяти поношение мое в человецех, да пою Ему хвалу: Аллилуиа.


Икос 6


Возсия обильно благодать Божия в Елисавете святей, егда исполнися Духа Свята и возопи гласом велиим Деве Марии: "Благословенна Ты в женах и благословен плод чрева Твоего! И откуду мне сие, яко прииде Мати Господа моего ко мне!". Чадо же ее взыграся во чреве радощами пришествию Матери Божией. Да и на нас сниде благодать Святаго Духа, вопиющих радощами сице: Радуйтеся, Духом Святым позлащеннии. Радуйтеся, благодатию щедро Творцем осененнии. Радуйтеся, чадо великое свято зачавшии. Радуйтеся, радость отцовства и материнства от Бога познавшии. Радуйтеся, Матери Божией сродницы всечестнии. Радуйтеся, воплотившагося Сына Божия раби преблагии. Радуйтеся, святии и праведнии Захарие и Елисавето, добрый плод для людей возрастившии.


Кондак 7


Хотящу людем возвестити от ангела пронареченное имя сына своего Иоанна, святе Захарие, по рождестве его написа е и абие отверзошася язык и уста твоя, и глаголаше паки, благословя Бога и поя Ему: Аллилуиа.


Икос 7


Новую подаяй благодать тебе Господь, праведне Захарие, Духом Святым насыти тя, воеже пророчествовати ти, глаголя: "Благословен Господь Бог Израилев, яко посети и сотвори избавление людем Своим и воздвиже рог спасения нам, в дому Давида отрока Своего, якоже глагола усты святых сущих от века пророк Его и ты, отроча, пророк Вышняго наречешися, предъидеши бо пред лицем Господним, уготовати пути Его". Мы же, пророчеству твоему внимая, чрез вас, праведницы Божии, восхваляем Господа, воспевая вам похвалы сии: Радуйтеся, отроча святое в мир родившии. Радуйтеся, рождеством сим радость миру возвестившии. Радуйтеся, восхвалившии Бога безмерно. Радуйтеся, служившии Господу верно. Радуйтеся, вся Законы Его исполнявшии. Радуйтеся, себя в чистоте сохранявшии. Радуйтеся, святии и праведнии Захарие и Елисавето, добрый плод для людей возрастившии.


Кондак 8


Странное чудо бысть окрест живущим людем, егда слышаху о преславнем и чуднем рождестве чада вашего, святии и праведнии Захарие и Елисавето, и со удивлением глаголаху в себе: "Что убо отроча сие будет?". Мы же, преславному рождеству Предтечи и Крестителя Господня радующеся, Господу взываем: Аллилуиа.


Икос 8


Весь был еси смущением велиим исполнен, пророче Божий Захарие, зря Пресвятую Деву Марию с Богомладенцем ко храму пришедшую и на месте нечистых жен пред дверьми храма ставшую, очищения законнаго просити хотящую. Ведуще бо Ю во Святая Святых тобою, по внушению Божию, введенную и тамо воспитанную и духом уразумев, яко сия Матерь есть Дева Чистая и по рождестве, постави Ю сего ради на месте девиц, идеже женам имущим мужа стояти не подобаше. Мы же, восхваляя с тобою Деву Чистую, с любовию и умилением вопием: Радуйтеся, Матери Божией славу воздавшии. Радуйтеся, купно со всеми Ея восхвалявшии. Радуйтеся, Бога пришествие в мир ожидавшии. Радуйтеся, чистою молитвою Творца ублажавшии. Радуйтеся, Ликом Младенца Христа услажденнии. Радуйтеся, в Царствие Божие Ним возведеннии. Радуйтеся, святии и праведнии Захарие и Елисавето, добрый плод для людей возрастившии.


Кондак 9


Вси Ангели и святых лики радовахуся радостию велиею, егда ты, святе Захарие, на руце свои праведнии, умилися сердцем и со страхом Божиим, приял еси Богомладенца, и яко Творцу и Богу, возвал еси Ему: Аллилуиа.


Икос 9


Витийство человеческое не довлеет к достойному прославлению дивнаго жития вашего, святии и праведнии Захарие и Елисавето, несть бо возможно исповести и исчести вся моления и пощения ваша, вся слезы и воздыхания ваша яже к Богу. Приимите от нас, любовию к вам подвизаемых, малыя похвалы сия: Радуйтеся, Духа Святаго сосуди от века избраннии. Радуйтеся, руце своя простираху к Творцу в уповании. Радуйтеся, Пресвятыя Троицы угодницы вернии. Радуйтеся, к Богу дорогу нашедшии в тернии. Радуйтеся, трудами своими спасение стяжавшии. Радуйтеся, на Господа токмо во всем уповавшии. Радуйтеся, святии и праведнии Захарие и Елисавето, добрый плод для людей возрастившии.


Кондак 10


Спасения чаду своему хотяще, поят мати чадо свое и бежаху с ним в горы от злочестиваго детоубийцы Ирода, той бо посла в Вифлеем воинов, да избиют вся младенцы, приказа умертвити и чадо ваше, блаженнии Захарие и Елисавето. Мы же, Господу, хранящему избранныя Своя от руки нечестиваго, с любовию глаголем: Аллилуиа.


Икос 10


Стеною заступления от настигавших убийц бысть тебе Господь, праведная Елисавето, егда по молению твоему: "Гора Божия, приими мать с сыном!", повеле горе каменней тотчас расступитися и заключити тебе с чадом в себе. Спасению вашему со слезами радуяся, вопием вам сице: Радуйтеся, Господом на всех путях хранимии. Радуйтеся, рукою Божиею по жизни сей водимии. Радуйтеся, любовь к Творцу в себе носившии. Радуйтеся, нетленный плод в раю вкусившии. Радуйтеся, за правду Божию пострадавшии. Радуйтеся, быти с Богом возжелавшии. Радуйтеся, святии и праведнии Захарие и Елисавето, добрый плод для людей возрастившии.


Кондак 11


Пение молебное Господу Богу приносил еси, святый и праведный Захарие, егда воини зверонравнаго Ирода приидоша к тебе с повелением отдати им сына твоего. Ты же отвечал еси им: "Аз служу ныне Господу Богу Израилеву и не вем идеже есть сын мой!", укрепляющему тебя Богу вопияй: Аллилуиа.


Икос 11


Света небеснаго исполнися храм Господень, праведне Захарие, егда вопрошающим тя воином рекл еси: "Тело мое убиете, душу же мою восприимет Господь!" Бывшу же тебе убиту между церковию и алтарем, якоже повеле Ирод, пролиявшаяся кровь твоя святая сгустися на мраморе и отверде во свидетельство и вечное осуждение Иродово. Мы же, мученическую кончину твою прославляя, воспеваем гласами хвалебными: Радуйтеся, души Творцу посвятившии. Радуйтеся, в святости их сохранившии. Радуйтеся, славою небесною от Бога венчаннии. Радуйтеся, в радость Господа своего войти призваннии. Радуйтеся, яко пищу нетленную ныне вкушаете. Радуйтеся, яко Бога за нас присно вы умоляете. Радуйтеся, святии и праведнии Захарие и Елисавето, добрый плод для людей возрастившии.


Кондак 12


Божественная благодать явися на тебе, праведная Елисавето, и неизреченное чудо дивно открыся, егда бо в горе, укрывшей тя со чадом, Божиим повелением устроися пещера, открыся источник водный и над пещерою финикс произрасте, подавая плоды своя во изобилии. Таковому благоволению Божиему радуяся, ты пела еси Ему с чадом своим: Аллилуиа.


Икос 12


Поюще радостную песнь хвалы и благодарения Господу, по истечении сорока дний по убиении праведнаго Захарии, душу свою предаде Творцу своему святая Елисавета и с супругом своим на небеси соединися. Прославляя праведное житие ваше, святии Захарие и Елисавето, усердно молим вас услышати хвалебное пение наше: Радуйтеся, яко в вере святей вы есте утверждение. Радуйтеся, яко наше от бед вы есте ограждение. Радуйтеся, яко нас от скорбей присно вы защищаете. Радуйтеся, яко страсти телесныя в нас укрощаете. Радуйтеся, благочестивым супругом вы есте покровителие мудрии. Радуйтеся, чадом нашим вы есте воспитателие добрии. Радуйтеся, святии и праведнии Захарие и Елисавето, добрый плод для людей возрастившии.


Кондак 13


О, святии и праведнии Захарие и Елисавето! Молим вас со усердием и любовию: испросите нам у Господа нашего в жизни сей в вере и добродетелех утверждение, от скорбей и напастей избавление, прегрешений наших прощение, да сподобимся и мы Царствие Небесное наследовати и вечно воспевати Богу: Аллилуиа. Аллилуиа. Аллилуиа.


Сей кондак читается трижды. Затем икос 1 и кондак 1.


Молитва


О велиции Христовы праведницы, святии Захарие и Елисавето! К вам прибегаем и вам молимся с великим упованием: принесите за нас грешных святыя молитвы ваша ко Господу да пошлет вся благопотребная душам и телесем нашим, веру праву, любовь нелицемерну, в добрых делех преуспеяние, душам и телесем здравие и вечное спасение. Не презрите молитв наших, со умилением вам возносимых, но будите нам предстателие ко Господу да сподобимся помощию вашею спасение вечное получити, Царствие Небесное унаследовати и вкупе с вами и всеми святыми славословити неизреченное человеколюбие Отца и Сына и Святаго Духа, в Троице покланяемаго Бога, во веки веков. Аминь.


Тропарь святому Захарии, гл. 4:


Священства одеждею обложен премудре, по Закону Божию всесожжения приятна священнолепно приносил еси, Захарие, и был еси светильник и зритель тайных, знамения в тебе благодати нося явственно всемудре: и мечем убиен быв в храме Божии, Христов пророче с Предтечею моли, спастися душам нашим.


Кондак святому Захарии, гл. 3


Пророк днесь и священник Вышняго, Захариа предложи, Предтечев родитель, трапезу своея памяти, верныя питая, питие бо правды всем растворив: сего ради скончавается, яко Божественный таинник Божия благодати.


Кондак святей Елисавете, гл. 4:


Яко луна полна, свет правды от мысленного солнца Мессии прияла еси, и во всех заповедех Господних с Захарием ходила еси Боговозлюбленная Елисавето: достойными убо тя песньми ублажающе, всещедраго света просвещающаго всех Господа величаем.


Житие святых праведных пророка Захарии и Елисаветы


День памяти: 18 сентября (н.ст.)


Святой пророк Захария, священник из потомства Ифамара, сына Ааронова, имел жену Елисавету, которая также была из рода Ааронова и доводилась сестрой Анне, матери Пресвятой Богородицы. Святое Евангелие свидетельствует о Захарии и Елисавете, что они были украшены всеми добродетелями, непорочно проходя свое жизненное поприще. Святой Апостол и Евангелист Лука говорит о них: "оба они были праведны пред Богом, поступая по всем заповедям и уставам Господним беспорочно" (Лк.1:6). Что житие их было действительно благочестиво, о сем свидетельствует также и святая их отрасль, честный и славный пророк, Предтеча и Креститель Господень Иоанн. В Писании сказано: "по плодам их узнаете их" (Мф.7:16): плод от доброго дерева действительно не может быть дурным, ибо, как говорит то же Писание: "если корень свят, то и ветви" (Рим.11:16). Посему и святая ветвь – Иоанн могла произойти только от святого корня.


Св. Захария, отец Предтечи, священствовал в Иерусалиме в царствование Ирода 1. Он был из дневной чреды Авиевой, то есть из рода Авии, очередь которого приходилась в восьмую седмицу.


О сих чредах повествуется следующее.


Царь Давид, видя, что род Аарона стал очень многочислен, так что не было никакой возможности всем вместе совершать служение в храме, разделил потомков Аарона на двадцать четыре чреды или лика, чтобы они, один за другим, справляя каждый свою седмицу, совершали службы в храме. Во всякой отдельной чреде царь избрал одного честнейшего мужа и сделал его начальником лика, так что каждая чреда имела своего главного священника, в чреде же было более пяти тысяч священников. Для того чтобы не было между главными священниками спора о том, кому из них с своим ликом служить первую седмицу, кому вторую, кому третью и т.д. до двадцать четвертой, они бросили жребий и по жребию сделали распределение, и такой раз установленной очереди они держались до наступления новой благодати, так что потомки каждого священника соблюдали свою очередь по жребию, который выпал их предку. Восьмой жребий выпал священнику Авии (1Пар.24:10), в числе потомков коего был также и святой Захария; поэтому-то он и отправлял в течение восьмой седмицы службу в храме вместе со всей своей чредой, ибо он был главным над остальными священниками своего ряда.


Однажды Захарии, – когда он, соблюдая очередь свою, служил пред Богом, – по обычаю священников, нужно было войти в храм Господень для каждения; было же в то время на молитве множество народа. Войдя во святилище, Захария заметил ангела Господня, стоящего по правую сторону кадильного алтаря. При виде ангела Захарию объял страх; но посланник Божий успокоил его, сказав: "Не бойся, Захария". И утешил он праведного священника, возвестив, что молитва его благоприятна Богу; внимая ей, Господь дарует ему милость: Он благословил жену его Елисавету, разрешая несмотря на ее престарелый возраст узы ее неплодства, и она родит сына, тезоименитого благодати Иоанна 2, который своим рождением принесет радость не только родителям, но и множеству людей: "Многие, – прибавил ангел, – возрадуются рождению его". Возвестил ангел Захария также и о том, что сын его будет велик пред Господом не телом, но духом; он будет постником и будет вести такую воздержную жизнь, как никто другой; и действительно, таково же о нем было и свидетельство Самого Сына Божия: "ибо пришел Иоанн Креститель: ни хлеба не ест, ни вина не пьет" (Лк.7:33). Ангел предсказал, что еще во чреве матери Иоанн исполнится Духа Святого и многих из сыновей израильских обратит к истинному Господу Богу, что он будет Христовым Предтечей в духе и силе пророка Илии3 и приготовит народ к принятию Господа Спасителя.


Услыша всё сие, Захария был удивлен и поражен, так что не решался верить сказанному; странным казалось ему сие потому, что Елисавета была неплодна, и оба они были уже преклонного возраста. И сказал он ангелу:


– Как мне поверить сему: ведь я уже стар, состарилась также и жена моя, которая никогда не имела детей?


Тогда ангел ответил ему:


– Я – Гавриил, предстоящий пред Богом; я послан сказать и благовестить тебе сие. И за то, что не поверил ты моим словам, ты будешь нем и не скажешь ни одного слова до тех пор, пока всё сие исполнится.


Так как Захария в беседе с ангелом замедлил в алтаре, то народ, бывший в церкви, дивился сему. Выйдя к народу, Захария принужден был знаками показывать, что он стал нем; тогда присутствовавшие поняли, что ему в алтаре было видение.


Окончив свою очередь, Захария возвратился в дом свой, находившийся в горной стране, в Хевроне, городе Иудове. Этот город был одним из тех, которые даны были по жребию потомкам Иуды и предназначены для жительства священникам 4.


Когда исполнилось возвещенное ангелом, и бывшая дотоле неплодной Елисавета родила Иоанна, – имя сие Захария написал на поданной ему дощечке, – отверзлись уста Захарии, язык его разрешился, и он стал говорить, благословляя Бога. Исполнившись Святого Духа, он начал пророчествовать, говоря: "благословен Господь Бог Израилев, что посетил народ Свой и сотворил избавление ему, и воздвиг рог спасения нам в дому Давида, отрока Своего, как возвестил устами бывших от века святых пророков Своих, что спасет нас от врагов наших и от руки всех ненавидящих нас; сотворит милость с отцами нашими и помянет святой завет Свой, клятву, которою клялся Он Аврааму, отцу нашему, дать нам, небоязненно, по избавлении от руки врагов наших, служить Ему в святости и правде пред Ним, во все дни жизни нашей. И ты, младенец, наречешься пророком Всевышнего, ибо предъидешь пред лицем Господа приготовить пути Ему, дать уразуметь народу Его спасение в прощении грехов их, по благоутробному милосердию Бога нашего, которым посетил нас Восток свыше, просветить сидящих во тьме и тени смертной, направить ноги наши на путь мира" (Лк.1:68-79).


Но вот наступило время, когда родился Господь наш Иисус Христос в Вифлееме, и волхвы, пришедшие с востока по видению чудесной звезды, возвестили Ироду о новорожденном Царе. Тогда Ирод, послав в Вифлеем воинов, чтобы они избили всех детей, приказал умертвить и сына Захарии, о коем много слышал. Ироду известно было всё случившееся во время рождения Иоанна; так как все события, коими сопровождалось рождение Иоанново, вызывали страх и изумление среди окрестных жителей. Все иудеи говорили о сих чудесных событиях; молва дошла и до Ирода. Все слушавшие слагали в сердце своем происшедшее и говорили: "что будет младенец сей?" (Лк.1:66). Ирод, вспомнив теперь об Иоанне, подумал: "Не сей ли будет царем иудейским?" Задумав умертвить его, царь отдельно послал в дом Захарии убийц, но посланные не нашли святого Иоанна. Ибо, когда началось безбожное избиение детей в Вифлееме, стоны и вопль были услышаны в Хевроне, городе Иудове, где жили священники, так как он находился на недалеком расстоянии от Вифлеема; скоро узнали в Хевроне конечно и о причине такого вопля. Тогда святая Елисавета, взяв сына своего, отрока Иоанна, коему тогда было уже полтора года – бежала с ним в горы. А святой Захария в то время находился в Иерусалиме, отправляя обычную службу по порядку чреды своей. Скрываясь в горах, Елисавета со слезами молилась Богу, чтобы Он защитил ее и ее сына. Увидав с горы воинов, кои тщательно разыскивали беглецов и уже были недалеко, она в ужасе возопила к ближайшей каменной горе: "Гора Божия, приими мать с сыном!" Гора тотчас расступилась, заключила их в себе, и таким образом они укрылись от настигавших их убийц. Не найдя тех, кого искали, посланные ни с чем возвратились к царю. Тогда Ирод послал к Захарии в храм приказание, чтобы он отдал ему сына своего Иоанна.


– Я служу ныне Господу Богу Израилеву, – отвечал на сие святой Захария, – и не знаю, где теперь находится сын мой.


Разгневанный Ирод вторично послал к нему и приказал убить самого Захарию, если он не отдаст своего сына. Свирепые убийцы устремились как звери, стараясь немедленно исполнить повеление царя, и с яростью закричали священнику Божию:


– Где скрыл ты своего сына? отдай нам его, ибо так повелел царь; если же не дашь сына своего, то сам погибнешь лютою смертью.


На сие святой Захария отвечал:


– Тело мое вы убьете, а душу мою восприимет Господь.


Тогда убийцы бросились на Захарию и между церковью и алтарем убили его, как повелел им царь; пролившаяся же кровь святого сгустилась на мраморе и отвердела как камень во свидетельство и вечное осуждение Ироду; а Елисавета, хранимая Богом, с своим сыном пребывала в расступившейся горе. Божиим повелением устроилась для них там пещера, открылся источник воды, а над пещерою выросла финиковая пальма, на коей явились плоды в изобилии. Когда мать с сыном хотели есть, дерево склонялось, подавая в пищу плоды свои, а затем снова выпрямлялось.


Спустя сорок дней после убиения Захарии, святая Елисавета, мать Предтечи, преставилась в той пещере, а святой Иоанн был питаем ангелом до совершенного возраста и храним в пустынях до дня явления своего к израильтянам.


_________________


1 Ирод, называемый в истории Великим, сын Антипатра, царя иудеев, сначала был правителем Галилеи, но при первом римском императоре Октавие Августе, еще до воцарения его, в 40 г. до Р.Х., получил титул иудейского царя и управлял всей Иудеей, которая тогда была подчинена Римскому государству.


2 Слово "Иоанн" с греч. означает "благодать Божия"; (греч. ф-ма [Иоаннес] евр. имени Иоханан, "Яхве милостив").


3 Т.е. с тою же несокрушимою ревностью и нравственным могуществом, с какими некогда действовал великий ревнитель по Боге пророк Илия.


4 Иис.Нав.21:13; 1Пар.6:65. Хеврон был одним из древнейших городов земли ханаанской. Он существует и доселе и имеет до десяти тысяч жителей, которые занимаются торговлею, хлебопашеством, разведением фруктовых садов и виноделием. город лежит на тысячу футов выше Иерусалима в глубокой и узкой долине, с обеих сторон окруженной горами, в богато возделанной и плодоносной местности. Все окрестности города покрыты масличными, гранатовыми, фиговыми, фисташковыми деревьями; особенно же славится Хеврон большими и превосходными виноградниками.


Акафист благословлен для келейного чтения.[/spoiler]

Раб божий Константин

Преподобномученики Зверинецкие.
[spoiler]Акафист преподобномученикам и отцам пещер Киевских - Зверинецких

Кондак 1

Богоизбранные отцы Киево-Печерския Зверинецкия и Древлекиевские, строгого жития подвижницы и молитвенницы, сие дерзаем Вам принести похвальное пение, Вы же, яко имущие дерзновение ко Святей Троице, молитеся о нас грешных, да избавимся от всех зол и напастей, с верою зовущих: Радуйтеся, преподобные отцы пещер Зверинецких, насельницы и мученицы Древлекиевские.

Икос 1

Ангелы предстатели помогаше Вам в подвигах и трудах Ваших и в житии пещерном, идеже труды тайные и велии подъяли Вы, яко молитвенницы ко Господу нелицемернии, да Отечество Небесное обрящете и зовем Вам таковая: Радуйтеся, исповедникам древлехристианским уподобившиеся; Радуйтеся, жертвы благоприятные. Радуйтеся, обидимым и страждущим неложное упование; Радуйтеся, веры Православныя, яко адамант, твердое основание. Радуйтеся, преславное иноков похваление; Радуйтеся, земли Киевской украшение. Радуйтеся, преподобные отцы пещер Зверинецких, насельницы и мученицы Древлекиевские.

Кондак 2

Видяще труды Ваша, Господь и Бог наш Иисус Христос, яко во имя Его и собрашася, то и посреди Вас обретеся, благословляя Вас на молитву и на подвиги в пещерах темных и тесных, да со смирением и благодатию воспоете Богу песнь: Аллилуиа.

Икос 2

Разум недоразумеваемый имуще и веру в Бога нелицеприятную, да обрящете путь спасения и молитвою подвиги Ваша украсите, и преславно с помощью Христа и Пречистей Матери Его, богоугодное житие свое совершите, да молитвенно взываем Вам сице: Радуйтеся, напасти и страдания от иноплеменных претерпевшия; Радуйтеся, веру православную да конца сохранившия. Радуйтеся, на подвиг мученичества самим Христом благословенные; Радуйтеся, благословение сие до смерти и уз страдания возлюбившие. Радуйтеся, любве ради Господа от страдания на земли не отрекшиеся; Радуйтеся, прелести мира ни во что вменившие. Радуйтеся, преподобные отцы пещер Зверинецких, насельницы и мученицы Древлекиевские.

Кондак 3

Сила Вышняго посети место сие святое, благодатию укрепляя вас, отцы и пещерники Древлекиевские Зверинецкие, половецкого бо нашествия не убояшеся, но за град Киев молящиеся, и мученически житие за други своя скончавшия, поя Богу: Аллилуиа.

Икос 3

Ко имущим веру, а такожде любовь и тщание поработати Церкви Христовой, Господь наш Иисус Христос трижды во времена тяжкие и последние благослови открыти людем своим место спасения вашего, да от сердца чистого и нелицемерного поработают они Богу, славяще житие Ваше и сице, воспевая Вам таковая: Радуйтеся, иго Христово всем сердцем возлюбившие; Радуйтеся, всем сердцем Его приявшие. Радуйтеся, в долготерпении жития нашего учители; Радуйтеся, за христиан православных молитвенницы. Радуйтеся, святых заповедей Христовых исполнители; Радуйтеся, любве ко ближним даже до крове ревнители. Радуйтеся, преподобные отцы пещер Зверинецких, насельницы и мученицы Древлекиевские.

Кондак 4

Бурею нашествия иноплеменник многажды Русь святую посещал Господь, но и миловал ее ради тех, кто за други и соотчизники своя подвизался даже до крове и смерти лютой, не щадя живота своего. Тем же благослови Бог и Ваша имена, да написани будут в книге животней, Ему одному ведомые. Вас же, молитв ради пред Царем Славы за нас грешных, почитаем и поим Богу песнь: Аллилуиа.

Икос 4

Слышаще и видяще земли Киевской разорение и пленение от воев половецких и нестроений Державных, от вельмож сущих, вознесли Вы глас свой мученический за страну нашу Православную. Благодаряще Вас за предстательство о нас пред Богом, взываем Вам таковая: Радуйтеся, кадило молитвы теплой благовонное; Радуйтеся, лампадо веры Православныя неугасимая. Радуйтеся, неутешных в скорбях утешение; Радуйтеся, творящих злое вразумление. Радуйтеся, Правды Христовой ревнители; Радуйтеся, Отечества Небесного любители. Радуйтеся, преподобные отцы пещер Зверинецких, насельницы и мученицы Древлекиевские.

Кондак 5

Боготечные звезды и молитвенницы неустанные, церкви нашей явилися еси от лет древних и молитвенницы за нас и землю нашу во дни годин смутных. Тем же величаем Вас, яко мучеников у Престола Христа Спасителя непостыдных и предстателей за нас нелицемерных, поя Богу: Аллилуиа.

Икос 5

Возсияли есте светом невещественным, Отцы и подвижницы Зверинецкие в Царстве Христа Бога нашего, - имена же Ваша Един Бог веси. Мы же, прославляя Вас и житие Ваше, воспеваем и чтим мученическую кончину Вашу и поем Вам сице: Радуйтеся, венцев небесных мученических стяжатели; Радуйтеся, смерти вечной победители. Радуйтеся, Святыя Церкви похвало и вечное радование; Радуйтеся, подвижников киевских слава и украшение. Радуйтеся, за землю Древлерусскую жертва усердная; Радуйтеся, к ближним своим любы преизобильная. тРадуйтеся, преподобные отцы пещер Зверинецких, насельницы и мученицы Древлекиевские.

Кондак 6

Яко проповедницы жития вечнаго, желая быти люди богоугодныя, в начале века сего подвизалися на месте страданий Ваших, Отцы наши Зверинецкия, труждаясь на раскопках пещер сих и храм во имя Рождества Пресвятыя Богородицы и святителя Иосафа Белгородскаго созидали наземный. Мы же, дивящеся Богоугодному делу сему, на месте мученических страданий Ваших, воспоим песнь Богу: Аллилуиа.

Икос 6

Возсияли еси яко звезды в обители Зверинецкой и на Святой Руси Древлекиевской, Отцы и первомученицы обители первопещерной, и освятили землю нашу благодатиею Божиею и Святый Киев - град. Тем же вам, яко подвижникам, зовем таковая: Радуйтеся, Правды Христовой свет неистощимый; Радуйтеся, кротости и чистоты светила незаходимыя. Радуйтеся, подвигов праведников и молитвенников прославление; Радуйтеся, вразумители благие нас грешных. Радуйтеся, хлебом жизни вечной и блаженной насытители; Радуйтеся, питием воды, текущей в жизнь вечную, напоители. Радуйтеся, преподобные отцы пещер Зверинецких, насельницы и мученицы Древлекиевские.

Кондак 7

Хотяй благочестие и веру Православную в земле нашей утвердити, в пещерах тесных вселитися изволили еси. Когда же пришло время испытаний, тогда душу и тело за люди предали еси, стяжавше венец мученический на небеси, да вси вопием Богу: Аллилуиа.

Икос 7

Новое житие ныне обретаху пещеры Киево-Зверинецкие: церковь подземную люди вновь сооруди и пещеры обнови во времена последния. Тем же иноцы и люди, молящиеся там, прославляют житие Ваше равноангельское, но и скорбят о церкви наземной, врагами веры разрушенной. Мы таковая все ведуще, зовем Вам сице: Радуйтеся, Отцы - преподобномученицы, Господа всею душею возлюбили еси; Радуйтеся, яко сего ради и труды Ваша, и воздаяние от Царя Славы восприяли еси. Радуйтеся, в бедах и скорбех наших помощницы; Радуйтеся, душ смятенных умирители. Радуйтеся, безбожных хулителей веры посрамители; Радуйтеся, славы Божия ревнители. Радуйтеся, преподобные отцы пещер Зверинецких, насельницы и мученицы Древлекиевские.

Кондак 8

Странное чудо видя люди Киева древняго, узрев вновь житие пещер Зверинецких и службы Божии в них братией иноков творимыя. Радуемся сему и мы с Вами, преподобномученицы Киево-Печерския Зверинецкия и поим Богу: Аллилуиа.

Икос 8

Все Вы от рук половецких пострадавшия, мученицы пещер Зверинецких, были во вся времена заступницы града Киева. Мы же, сия разумея, в похвалу Вам поим таковая: Радуйтеся, любящим и чтущим Вас ходатаи Спасения Вечнаго; Радуйтеся, вразумители грешных ко исправлению. Радуйтеся, пламенную любовь ко Господу показавшия; Радуйтеся, огнем молитвы стрелы вражия попаливыя. Радуйтеся, светильники, светящиеся дарованиями; Радуйтеся, свещи неугасимыя, огнем молитвы пламенеющия. Радуйтеся, преподобные отцы пещер Зверинецких, насельницы и мученицы Древлекиевские.

Кондак 9

Всякое мудрование житейское отвергше и житию Вашему дивящеся, мы, грешнии, к покаянию призываеми Вами и вместе с Вами вопием Богу: Аллилуиа.

Икос 9

Витии многовещании, но не Богопросвещеннии, своими языки не возмогут достойно житие ваше, многострадальнии мученицы Зверинецкие, воспевати. Мы же, убозии и грехми обремененные, дерзаем по милости Божией воспевати Вам сице: Радуйтеся, в монастырь пещерный вселивыеся, да добродетели приобрящете; Радуйтеся, да сими добродетельми ближним своим послужите. Радуйтеся, Духа Святаго и благодать Его стяжавшие; Радуйтеся, кротости и смирения исполненные. Радуйтеся, за любовь Вашу святую обителей райских сподобившиеся; Радуйтеся, и там за нас молитвы творите у Престола Божия. Радуйтеся, преподобные отцы пещер Зверинецких, насельницы и мученицы Древлекиевские.

Кондак 10

Спасти хотяй многих из нас грешных, всех обращения и спасения милостивно иский, Христос Бог наш, иже на крови мученической и Церковь Свою основа. Тем же и пещеры Зверинецкие вновь обнови и основание покаяния по молитвам Вашим тем положи, научая вси вернии вместе с Вами воспевати Богу: Аллилуиа.

Икос 10

Стена еси всем к Вам с верою и молитвою прибегающим и помощи просящим. Мы же, грешнии и недостойные дивящеся таковому о нас пред Богом молитвенному Вашему предстательству, от глубины скорбнаго сердца взываем Вам и поим: Радуйтеся, праведною и мученическою кончиною святость жития Вашего показавшия; Радуйтеся, чудес велиих неоскудеваемые помощницы. Радуйтеся, венцом бессмертия от Бога Вседержителя увенчанные; Радуйтеся, любовию своею нас объявшия. Радуйтеся, по молитвам Вашим от Бога благословение нам посылается; Радуйтеся, оскудевающих богатством добродетельми многими восполняющие. Радуйтеся, преподобные отцы пещер Зверинецких, насельницы и мученицы Древлекиевские.

Кондак 11

Пение Пресвятей Троице воспеваете есте и яко мученицы веру соблюли. Мы же, подвиги Ваша таковая почитая, вместе с Вами возглашаем Христу Богу нашему: Аллилуиа.

Икос 11

Светоподатели были есте издревле в земле нашей, яко агнцы непорочнии заклани быша за греси наша во искупление их, да вси мы непрестанно славословим: Радуйтеся, жертвы за люди православнии у Христа Бога благоприятныя; Радуйтеся, любвеобилие к нам неистощимое. Радуйтеся, веры Православныя похвало; Радуйтеся, обилие Духа Святаго незримое. Радуйтеся, ненадеющихся надеждо; Радуйтеся, Церкви нашея похвало. Радуйтеся, преподобные отцы пещер Зверинецких, насельницы и мученицы Древлекиевские.

Кондак 12

Божественная благодать, вся немощная врачующая и оскудевающа восполняющая и в сердцах Ваших пребывающая, да молитвенно предстоите за нас и чад наших у Престола Царя Славы, вопия Богу: Аллилуиа.

Икос 12

Поюще страдания Ваша, святыя страстотерпцы и преподобномученицы, отцы наши Зверинецкия, поклоняемся терпению Вашему, яко силе благодатней, явльшейся в Вас, да вси согласно вопием: Радуйтеся, Церкве нашея Православныя украшение; Радуйтеся, подвига мученичества похвало. Радуйтеся, Силою Божиею многия и велия чудеса содеваете; Радуйтеся, помощь свою просящим ея нелицемерно подаете. Радуйтеся, теплое чаяние на молитвенную помощь Вашу за ны недостойнии; Радуйтеся, да не посрамимся и мы грешнии, надеясь на предстательство Ваше у Царя Славы. Радуйтеся, преподобные отцы пещер Зверинецких, насельницы и мученицы Древлекиевские.

Кондак 13

О, пречудныя и славныя страстотерпцы и отцы наша Зверинецкие! Приимите малое сие моление наше, в славную похвалу возносимое Вам, честным предстателям у Престола Царя Славы, Господа нашего Иисуса Христа. Да обрящем Милость Его по молитвам Ваших в жизни вечной и нескончаемой, поюще Ему: Аллилуиа, Аллилуиа, Аллилуиа.



(Этот кондак читается трижды, затем икос 1 и кондак 1)



Молитва преподобномученикам Зверинецким

О Святии Отцы, преподобномученицы и страстотерпцы Зверинецкие!

Молитеся о нас грешных Всемилосердному Богу о ниспослании нам милости и благодати Духа Святаго и благого во многогрешном житии нашем покровительства Матери Божией и всех святых, от века Богу послуживших в Духе и Истине.

Надеясь на молитвы ваши за нас грешных, да исправим жизнь нашу, и испросим прощение согрешений наших у Царя Славы, и достигнем Небесного Отечества, где пребывают правда, любовь и бесконечное блаженство жизни Вечной.

Да прославим вместе с Вами Отца и Сына и Святаго Духа ныне и присно и во веки веков. Аминь.



Тропать преподобномученикам Зверинецким

Тропарь, глас 2

Егда снидосте во гробы, и самех себе заключисте, тогда страсти умертвивше плотския, спогребостеся Христу, богоноснии, и диавольския в подземных разрушисте ограды, сего ради ангелы венцы с небес вам подают.[/spoiler]

Раб божий Константин

АКАТИСТ КЪМ СВЕТА ВЕЛИКОМЪЧЕНИЦА ЗЛАТА МЪГЛЕНСКА.
[spoiler]КОНДАК 1.

Избранная служительнице Бога воплощеннаго
и чистая хранительнице девства нерастленнаго,
родителей своих Христа ради отрекшуся
и крове исповедницы порфирою облекшуся,
в лик праздненственный нынe тя вси чтущии сошедшеся
любовию поем, о Злато, Церкве позлащение:
но яко непорочная невеста Слова Божия
и велие ко Господу имущи дерзновение
о нас, всеокаянних, молися неотступно,
да, мира многострастнаго океан преплывше,
сподобимся в ден судный благодати свыше,
тебе с благодарением умильно вопиюще:
Радуйся, великомученице Злато,
златая цeломудрия палато!

ИКОС 1.

Ангелов и всех святых небесных удивление,
любовию Христа возлюбльшая презельною
и девства чисте обручившися Тому хранением
Злата достохвальная пребысть неоскверненною;
и вено златотканное — одежду обагренную
Небесному Обручнику с веселием вручи.
Молитвенницу теплую от Бога получивше,
дeвицe богомудреннeй умильно вопием:
Радуйся, источниче небесных утeшений,
радуйся, прекрасное девства прославление.
Радуйся, Царя Христа обручнице нескверная,
радуйся, заступнице всем любящым тя верная,
Радуйся, кадильнице Святейшему лучистая,
радуйся, дeвице благонравная и чистая.
Радуйся, звeздо, во мрацe рабства просиявшая,
радуйся, луно златая, тьму грeха разгнавшая.
Радуйся, великомученице Злато,
златая цeломудрия палато!

КОНДАК 2.

Видящи святая сатанинское неверных,
доблественно муки претерпети положи
в сердцe и молитвою укрепльшися, рече:
"Верую в Христа, Тому Единому служу,
Той бо естьь Жених, Егоже аз не отрекуся
даже аще тмы страданий нынe претерплю."
Сицевое девы богомудрыя рачение
хваляще, поем Христу умильно: аллилуиа!

ИКОС 2.

Разума небеснаго дeвицы невмeщающе
и хотяще сквернии грeхом растлити Злату,
отдаша ю женам своим, да, лстяще и вeщающе,
помутят сердце девы сластолюбием и златом.
Обаче не смутися, ни подвижеся святая,
но паче благодатию мужащися в любви
пребысть на Веры камени, поганиц посрамляющи;
темже и мы златую Злату сице воспeваем:
Радуйся, Христовая избраннице вeнчанная,
радуйся, Болгарии печальнице всехвальная.
Радуйся, Божестьвенныя Веры славословие,
радуйся, смирившая агарян блядословие.
Радуйся, смутившая поганцев боголюбице,
радуйся, любезная другине Богородицы.
Радуйся, пресладостное мучеников пение,
радуйся, от ереси надеждное хранение.
Радуйся, великомученице Злато,
златая цeломудрия палато!

КОНДАК 3.

Силою прельщения сломити невозмогше
Злату благонравную, зловернии призваша
с сестьрами ея, отца и матери — слезами
да деву отвратят от Веры чистыя, хвалами,
да никогда возможет Богу пети: аллилуиа!

ИКОС 3.

Имущи дева чистую к родителем любовь
смутися обольщением и вмалe не подвижеся,
обаче не возможе ухищрение врагов,
и Злата небомудренно родителей отвержеся:
"Глаголющих ми истиннаго Бога отрещися,
отнынe вас не вем. Христос Отец естьь мой,
и Матерь ми отнынe есть Владычица Пречистая,
всех мучеников вои мне суть братия и сестры!"
Мы убо небомудрию дивимся Златы чистыя
и гласы непрестанными ей сице вопием:
Радуйся, славий святыя Церкве богогласный,
радуйся, сосуде девства, светлый и прекрасный,
Радуйся, превечную вeсну достигший цвете,
радуйся, нас озаривый златозарный свете.
Радуйся, блаженство воспeвающих тя вечное,
радуйся, всем чтущым тя радость безконечная.
Радуйся, сокровище благих и исцeлений,
радуйся, свeще пречудна верным озарения.
Радуйся, великомученице Злато,
златая цeломудрия палато!

КОНДАК 4.

Бурею к родителемъ не возмог пристрастия
Злату на нечестие поганское прельстити,
диавол возярися и неверных распаляше
зверское, во еже ю нещадно бити.
Плоть дeвицы чистыя агаряне начаша
резати и пред очима ей вeшати ю,
но паче прежде к Богу возгореся Злата
пламенем любве, Христу в терпении поющи:
аллилуиа!

ИКОС 4.

Отцу ея духовному иерею Тимотею
прилучшуся страданий места близу, Злата
к нему посла, просящи да молитвою своею
поможет ей течение страдальчества скончати.
И, Златою посрамлены, злодеи озвeревше,
повесиша на древe непорочную дeвицу
и резаху ю, дондеже от плоти разрeшися.
Она же нынe духом слышитъ поющия ю сице:
Радуйся, златая Македонии дeвице,
радуйся, крилома нас хранящая орлице.
Радуйся, супружества честнаго ограждение,
радуйся, монашества златое украшение.
Радуйся, всем верным благоверная княгине,
радуйся, всем девствующым верная другине.
Радуйся, святыя Веры лиро златогласная,
радуйся, деннице цeломудрием прекрасная.
Радуйся, великомученице Злато,
златая цeломудрия палато!

КОНДАК 5.

Боготечную звeзду сию, нам верно озарившую
тесный путь спасения в растленнeм вецe сем,
Злату, чашу горькую до дна выпившую
хваляще немолчно, Богу вопием:
аллилуиа!

ИКОС 5.

Видeв дщеры лютое духовныя страдание,
Тимотей святому Никодиму вся поведа;
Никодим же славный благочестным в назидание
всезлатыя Златы написа победу.
Мощи всечестныя девы вземше, благовернии
со благоговением и пеньми погребоша,
с чистым тимиамом к небесем каждением
пение всечуднeй сицевое вознесоша:
Радуйся, садов небесных ластовице белая,
радуйся, поправшая врага дeвице смелая.
Радуйся, нам диавола безсилие явившая,
радуйся, всем силу цeломудрия открывшая.
Радуйся, духовное млeко нам источающая,
радуйся, языков новых нравы обличающая.
Радуйся, всем любящым тя радосте спасения,
радуйся, от скверны мира верным сохранение.
Радуйся, великомученице Злато,
златая цeломудрия палато!

КОНДАК 6.

Проповeдь Евангелия в вецe ересей
присно ухищряется людей поработитель
упразднити лжею в умножении страстей,
яко да никтоже воспоет Спасителю:
аллилуиа!

ИКОС 6.

Возсиявши в мрацe долгих лет порабощения,
Злата златолучное нам солнце показася,
имже тьма разгнася агарянскаго прельщения,
теплe озаряющее страждущий наш род.
Днесь султан духовный вновь обаче воцарися,
люди обольщая Православия предательми;
проповeдь Евангелия паки мрак объят,
темже со слезами от нощи взываем Златe:
Радуйся, прельщенных к свету Истины воззвание,
радуйся, всех кающихся твердое возстание.
Радуйся, иконо всезлатая Православия,
радуйся, бeсов нечистых славное прогнание.
Радуйся, родов славянских грозде чист и сладок,
радуйся, поточе златоструен и пресладок.
Радуйся, дeвице, голубицы чистшая,
радуйся, рeко, струями Церковь позлатившая.
Радуйся, великомученице Злато,
златая цeломудрия палато!

КОНДАК 7.

Хотящия от нынeшняго века заблуждений
и многих ересей ко свету Истины преити,
дeвице чистонравная, избави от тимения,
да вкупe водворимся в храм пресветлый чистоты,
поюще Свободившаго навеки нас от тли:
аллилуия!

ИКОС 7.

Новую тя всех Царя невесту ублажаем,
чтуще тя усердную молитвенницу Злато,
яко в нивe рабства клас прозябший златостеблен,
напоеннeй кровию неведомых страдальцев,
с нимиже о нас молися, славная дeвице,

поющих тебе сице:
Радуйся, воистинну рабо Господня верная,
радуйся, Христа невесто чистая, нескверная.
Радуйся, прекрасный крине нивы цeломудрия,
радуйся, пресладкий соте луга богомудрия.
Радуйся, любве зерцало небоорошенное,
радуйся, Святаго Духа езеро блаженное.
Радуйся, златое добродeтелей сияние,
радуйся, прекрасное Зиждителя ваяние.
Радуйся, великомученице Злато,
златая цeломудрия палато!

КОНДАК 8.

Странное и дивное явила есть терпение
Злата страстотерпица, Болгарии покров —
та бо нам явися дний последних утeшение,
место сокровения от злобы всех врагов.
Темже велегласное о ней возносим пение
к Богу: аллилуиа!

ИКОС 8.

Вся Церков Православная днесь светло торжествует,
в превыспренних всех Ангелов славление звучит
и вкупe земнороднии с небесными ликуют —
вся Златы память светлую земная тварь творит.
Вси в мрацe утомлeннии, грядите, почерпите
прощeние грeхов от вод источника пречистаго,
и вси обремененнии печальми приидите,
да солнцу Православия лучистому поем:
Радуйся, Едема голубице бeлоснежная,
радуйся, любве Христовы высото безбрежная.
Радуйся,  село, плодами щедрое и тучное,
радуйся, раздравый мрака кресте златолучный.
Радуйся, избраннице Царя вeков прекрасная,
радуйся, Святыя Веры гусло доброгласная.
Радуйся, безблазнства изящний аметисте,
радуйся, кристале богорядия пречистый.
Радуйся, великомученице Злато,
златая цeломудрия палато!

КОНДАК 9.

Всякое дыхание и Ангелов сословие
зряще тя, дивляхуся, понеже юна сущи
познала еси тайны несказанно Богословия,
возмогши пред лицем врагов воспети Присносущному:
аллилуиа!

ИКОС 9.

Витийскаго искусства невладеющи, святая
агарян безсловесие премудро обличи,
и девства сохранение на Бога возлагающи,
блаженство несказанное навеки улучи,
егоже и мы, грешнии, молитвами ея
сподобитися чаем и Злату воспeваем:
Радуйся, покрове проповедником Евангелия,
радуйся, обителем святым пречудный Ангеле.
Радуйся, смиренным богословом поспeшение,
радуйся, вeтий лицеприятных обличение.
Радуйся, времен последних ясное свeтило,
радуйся, душ верных кораблей кормило.
Радуйся, Святыя Церкве луче небопарный,
радуйся, смирившая вся козны всековарных.
Радуйся, великомученице Злато,
златая цeломудрия палато!

КОНДАК 10.

Спастися всем хотящым есть предстательница дивная
молитвенница крепкая о всех смиренных Злата,
в страданиих всем сущым утeшение премирное,
и на Суде — поющих ю покров и благодать,
еяже ради Бога велегласно величаем: аллилуиа!

ИКОС 10.

Стeна еси хранящымся от мира адотечнаго
и любящым тя теплe от падений сохранение —
молитвами твоими избавляй от муки вечныя
вся лики православных тя, мученице, чтущыя,
вeнцы тебе словесныя прославленнeй плетущыя:
Радуйся, в океанe бед нам остров неприступный,
радуйся, заступнице, в молитвах неотступная.
Радуйся, нам в мирe любодейнeм твердь пречистая,
радуйся, прощения грeхов купель лучистая.
Радуйся, душам болящым былие цeлебное,
радуйся, сердечным язвам тишино врачебная.
Радуйся, монахом чистым аммо благосердая,
радуйся, живущым в мирe помоще усердная.
Радуйся, великомученице Злато,
златая цeломудрия палато!

КОНДАК 11.

Пением восхвалити Тя, всех Владыко, тщащымся
словеса подаждь — к милостем Твоим
сладостно спростретися, и Тебе молящымся
даруй благодать, да благодарно воззовем:
аллилуиа!

ИКОС 11.

Свeщу златосияйну в мрацe рабскаго страдания,
зрим Злату, наставляющую к свету всех спасения:
та образ нам явися добродетелей Писания
любы от нихже Божия вeнец есть всех вeлений.
Вeнчания сего и мы сподобитися чающе,
грядите, поклонимся Златe, сице воспeвающе:
Радуйся, любве неизглаголанныя море,
радуйся, церквей всех умирение раздора.
Радуйся, пещеро от напастей сокровения,
радуйся, алкательнице правды насыщенная.
Радуйся, божественнаго алавастр ухания,
радуйся, златая ветве Богопочитания.
Радуйся, Болгарии святыя дщи нескверная,
радуйся, тя чтущым воеводо благоверная.
Радуйся, великомученице Злато,
златая цeломудрия палато!

КОНДАК 12.

Благодати чудное яви нам во страдании
Злата вeнцеславимая, да и мы имеем
твердое на Бога еже в скорбех упование,
зверства небоящеся имущаго явитися
сына беззакония, всех в мирe обольстити.
Молитвами ея же нас избави от злодея
Боже милосерде, да поем Ти присно:
аллилуиа!

ИКОС 12.

Поюще тя дeвице и мученице славная,
о всех в недузeх сущих и во обстояниих
сугубое приносим ти и слезное моление:
Радуйся, труждающымся помоще обильная,
радуйся, печальных утeшение пресладкое.
Радуйся, обидимых защитнице всесильная,
радуйся, уязвленных цeлительнице кроткая.
Радуйся, всем плачущым заступнице благая,
радуйся, отчаянным советнице златая.
Радуйся, от мрака мира в светлость нам вселение,
радуйся, в чертог небесный верных водворение.
Радуйся, о нас всегрешних Бога умоление,
радуйся, страстьми растленных дивно удобрение.
Радуйся, дeвице всезлатая и прекрасная,
Церкве Православныя птице богогласная.
Радуйся, великомученице Злато,
златая цeломудрия палато!

КОНДАК 13.

О, Злато досточудная, Болгарии хваление!
Приимши благосердно нынe любящих тя пение,
от всяких нас напастей и грeхом порабощения
молитвами твоими благосердными спаси,
во еже нам сподобитися и на небеси
с тобою непрестанно Христа Бога величати:
аллилуиа! Кондак 13. четем трижди, и после отново:

ИКОС 1.

Ангелов и всех святых небесных удивление,
любовию Христа возлюбльшая презельною
и девства чиста обручившися Тому хранением
Злата достохвальная пребысть неоскверненною;
и вено златотканное — одежду обагренную
Небесному Обручнику с веселием вручи.
Молитвенницу теплую от Бога получивше,
дeвицe богомудреннeй умильно вопием:
Радуйся, источниче небесных утeшений,
радуйся, прекрасное девства прославление.
Радуйся, Царя Христа обручнице нескверная,
радуйся, заступнице всем любящым тя верная,
Радуйся, кадильнице Святейшему лучистая,
радуйся, дeвице благонравная и чистая.
Радуйся, звeздо, во мрацe рабства просиявшая,
радуйся, луно златая, тьму грeха разгнавшая.
Радуйся, великомученице Злато,
златая цeломудрия палато!

КОНДАК 1.

Избранная служительнице Бога воплощеннаго
и чистая хранительнице девства нерастленнаго,
родителей своих Христа ради отрекшуся
и крове исповедницы порфирою облекшуся,
в лик праздненственный нынe тя вси чтущии сошедшеся
любовию поем, о Злато, Церкве позлащение:
но яко непорочная невеста Слова Божия
и велие ко Господу имущи дерзновение
о нас, всеокаянних, молися неотступно,
да, мира многострастнаго океан преплывше,
сподобимся в ден судный благодати свыше,
тебе с благодарением умильно вопиюще:
Радуйся, великомученице Злато,
златая цeломудрия палато!

МОЛИТВА

О, преславное прозябение рода Болгарскаго, солнцезрачная дeвице, багряницею кровей своих украшенная, предобрая мати наша, великомученице Злато! Услыши чад твоих с любовию к тебе нынe прибeгающих и малое сие моление наше приими, и Господу Богу нашему благоприятно сотвори. Согрeшихом бо и беззаконновахом, и недостойны есмы зрети высоту небесную от множества неправд наших — связани есмы узами грeховными и николиже воли Создателя нашего сотворихом, ниже сохранихом повeлений Его; темже преклоняем колена сокрушенна и смиренна сердца нашего ко Творцу и Спасу своему и твоего матерняго заступления к Нему просим. Воздвигни руцe твои, красная дeвомученице, любве Христовы сосуде всезлатый, и вкупe с Пречистою Богородицею и всеми святыми рода нашего Зиждителя всех умоли, да ниспослет милост Свою на многострадальную страну нашу, шатание людей да умирит, горькия соблазны церковныя да утолит, отступившыя от Веры Православныя светом Истины Своея да просвeтит, старыя да умудрит, юныя да наставит, от растления нравов и от сeтей еретических добрe их сохраняя, младенцы млеком благочестия да воспитает, всех же нас банею покаяния да обновит. Умоли, о златонравная мати, красный цвете девства и мучеников удобрение, Господа и Спаса нашего, да подасть нам дух смирения и кротости, дух цeломудрия и послушания, дух любве нелицемерныя, и да управит ум наш, и сердце наше в правой верe да укрeпит, яко да Истиною наставляеми и любовию осияваеми, тихое и мирное зде поживем житие во всяком благочестьии и чистоте. Молися, о великомученице славная, сладчайшая мати наша Злато, Троицe Преблагословеннeй, да избавит ны от всякаго обстояния, и от всякаго навета вражия безбоязненны нас да сохранит, да ни ранами, ниже прещением устрашаеми, до конца верни Христу Жениху нашему пребудем, и тако со благою надеждею и истинным уверением к тамошнему миру пойдем, богоприятное твое заступление призывающе и Пребожестьвенную Троицу — Отца и Сына и Святаго Духа — выну хваляще и благословяще, нынe и присно, и во веки вeков, аминь.[/spoiler]