Молитвослов

Автор Раб божий Константин, марта 10, 2012, 02:13:14

« назад - далее »

Раб божий Константин

Молитва,
сиесть заклинание Великаго Василия,
к страждущим от демонов, и на всякую немощь
[spoiler]Господу помолимся. Господи помилуй.
Боже богов, и Господь господей, огненных чинов Содетелю, и невещественных сил Хитродетелю, небесных и земных Хитрче, Егоже никтоже от человек виде, ниже видети может; Егоже боится и трепещет вся тварь. Иже выю возвысивша иногда архистратига, и свое служение преслушанием отвергша, низвергни на землю, и отступники с ним ангелы, демоны бывшыя, в помрачения глубины тартара предавый: даждь заклинанию сему о страшнем Имени Твоем совершаемому, страху быти сему предводителю лукавствия, и всем полком его с ним снизпадшим от горняго светоношения, и обрати его в бегство, и запрети ему, и демоном его отступити конечно, да ничтоже вредно сопротивознаменанному образу соделает: но да приимут крепость державы сии запечатаннии, во еже ступати на змия и скорпия, и на всю силу вражию. Твое бо поется и величается, и от всякаго дыхания со страхом славится Всесвятое Имя, Отца и Сына, и Святаго Духа, ныне и присно, и во веки веком. Аминь.

Вторая молитва тогожде.
Господу помолимся. Господи помилуй.
Заклинаю тя, злоначальника хульнаго, начальника сопротивнаго востания, и самодетеля лукавства, заклинаю тя низверженнаго от горняго светоношения, и во тму глубины низведеннаго возношения ради. Заклинаю тя и всю низпадшую силу последовательную твоего произволения: заклинаю тя, душе нечистый, Богом Саваофом, и всем воинством ангел Божиих, Адонаи Елои Бога Вседержителя, изыди и разлучися от раба Божия (имярек), заклинаю тя Богом Словом вся создавшим, и Господом нашим Иисусом Христом, Единородным Сыном Его, прежде век неизреченно и безстрастно от Него рожденным, видимую же и невидимую тварь соделавшим, по образу Своему человека создавшим, законом первее естественне сия детоводившим, и ангельским приставлением сохраншим: водою согрешение свыше потопившим, и поднебесныя бездны разустившим, и гиганты нечествовавшыя растлевшим, и столп скверных растрясшим, и землю содомов и гоморров огнем жупельным испепелившим, егоже свидетель дым неугасимый курится; жезлом море раздельшим, и люди ногами немокрыми проведшим, и мучителя фараона, и воинство богоборное, во веки волнами нечестия брань потопившим; в последняя дни от Девы Чистыя Воплотившимся неизреченно, и целы печати чистоты сохраншим, омыти крещением древнюю нашу скверну благоизволившим, еюже мы преступлением осквернихомся. Заклинаю тя Крестившимся во Иордане, и образ нам нетления в воде по благодати Подавшим; Егоже ангели и вся силы небесныя удивишася, воплощенна Бога Смирившагося зряще, егда Безначальный Отец, безначальное Рождество Сыновнее откры, и Святаго Духа схождение, Троическое Единство свидетельствова. Заклинаю тя Оным, ветру Запретившим, и бурю морскую Укротившим, полк демонский Отгнавшим, и зеницы очныя от утробы лишенныя брением слепыя прозрети Соделавшим, и древнее рода нашего создание Обновившим, и немыя еже глаголати Исправившим: струпы проказ Очистившим, и мертвыя от гробов Воскресившим, даже до погребения человеком Беседовавшим, и ад востанием Пленившим, и все человечество необъято смертью Устроившим. Заклинаю тя Богом Вседержителем, Богодухновенным гласом человеки Вдохнувшим, и апостолом Содействовавшим, и всю вселенную благочестия Исполнившим: убойся, бежи, бежи, разлучися демоне нечистый и скверный, преисподний, глубинный, льстивый, безобразный, видимый безстудия ради, невидимый лицемерия ради, идеже аще ecи, или отъидеши, или сам ecи Веельзевул, или сотрясаяй, или змеевидный, или звероличный, или яко пара, или яко птица, или нощеглагольник, или глухий, или немый, или от нашествия устрашаяй, или растерзаяй, или наветуяй, или во сне тяжце, или и недузе, или в язве, или в смесе скоктаяй, или слезы любосластныя творяй, или блудный, или злосмрадный, или похотный, или сластотворный, или отраволюбивый, или любонеистовый, или звездоволхвуяй, или домоволшебник, или безстудный, или любопрительный, или непостоянный, или с месяцем пременяяйся, или временем неким сообращаяйся, или утренний, или полуденный, или полунощный, или безгодия некоего, или блистания, или по случаю сретился еси, или от кого послан еси, или нашел еси внезапу, или в мори, или в реце, или от земли, или из кладязя, или от стремнины, или от рова, или от езера, или от трости, или от вещества, или от верху земли, или от скверны, или от луга, или от леса, или от древа, или от птиц, или от грома, или от покрова баннаго, или от купели водныя, или от гроба идольскаго, или отнюдуже вемы, или не вемы, или от знаемых, или от незнаемых, или от непосещаемаго места, отлучися и пременися, устыдися образа рукою Божиею созданнаго, и воображеннаго: убойся воплощеннаго Бога подобия, и не сокрыйся в рабе Божием (имярек), но жезл железный, и пещь огненная, и тартар, и скрежет зубный, отмщение преслушания тебе ожидает. Убойся, умолкни, бежи, не возвратися, ни сокрыйся со инем лукавством нечистых духов: но отъиди в землю безводную, пустую, неделанную, на нейже человек не обитает: Бог Един призирает связаяй всех уязвляющих, и злосоветующих на образ Его, и веригами мрака, тартару предавый, в долгую нощь и день, тебе всех злых искусителя и изобретателя диавола. Яко велий есть отрок Божий, и велия слава Отца, и Сына, и Святаго Духа, ныне и присно, и во веки веком. Аминь.[/spoiler]

Раб божий Константин

Заклинание запрещение дьяволу Святаго Григория Чудотворца
[spoiler]Запрещает ти Господь диаволе, пришедый в мир, и вселивыйся в человецех, тако да твое низложи мучительство, и человеки от тоя исхити: на древе сопротивныя силы победивый, солнцу померкшу, земле поколебавшейся, и гробом отверзающимся, и телесем святых востающим: разрушивый смертию смерть, и упразднивый державу имущаго смерти, си есть: тебя диавола.

Заклинаю тя Богом показавшим древо живота, и счинившим херувима, и пламенное оружие обращающееся стрещито.Запрещен буди, оним бо ти запрещаю, ходившим тако посуху на плещу морскую, и запретившим бурям ветреным: его же возречение иссушает бездны, и прещение тает горы.______________ повелевает ти нами. Убойся, изыйди,  и устранися  от создания сего, и да не возвратишися, ниже утаишися в нем; ниже срящеши его, или действуеши: ни в нощи, ни в дне, ни в час, ни в полудне: но иди в свой тартар, даже уготованнаго великого дне суднаго. Убойся Бога, сядящаго на херувимах, и призирающаго бездны: его же трепещут ангелы, Архангелы, Престоли, Господствия, Начала, Власти, Силы, Многоочития Херувими, и Шестокрилатии Серафими: его же трепещет небо и земля, море и вся таже в них, изыйди,  и устранися  от Божественнаго создания сего,  и вернаго раба Христа Бога нашего: отним во ти запрещаю, иже ходит на крилу ветреню, и твори Ангелы своя духи. Изыйди,  и устранися  от создания сего, со всею силою и ангелы твоими: тако прославится имя Отца, и Сына, и Святаго Духа, ныне, и присно, и во веки веков. Аминь.[/spoiler]

Раб божий Константин

Молитва запрещальная святого великомученика Киприана
[spoiler]Призываем тя, Владыко Боже Вседержителю, Вышний, неискусимый, мирный Царю: призываем тя, сотворившего небо и землю, от тебе бо произыйде Алфа и Омега, сиесть: Начало и Конец. Предавый  человекам в послушание четвероножная и безсловесныя животныя, ты бо покорил еси тя, Господи, простри руку твою крепкую, и мышцу твою высокую и святую, и присещением твоим святым посети создание твое сие, и низпосли ему Ангела мирна, Ангела державна, души и тела хранителя, тако да запретит и отженет от него всякого лукавого и нечистого демона: ты бо еси Господь един высокий Вседержитель, благословенный во веки веков, Аминь.

Заклинаю тя духом, вдохнувшим человекам живот вечный, его же Имя страшно, и устами человеческими неизгланно. Заклинаю тя грядущим огнем, и жупелом и пеклом и трубою, емуже __________ солнце побежит на запад, и звёзды спадут на земли, и восплачутся вся племена и люди. Заклинаю тя сшедшиму в долняя страны земля, и расторгшим твёрдыя верия, и разрушившим болезни смертныя, и благовестившим патриархам из мертвым воскресением. Заклинаю тя ходившим по морю, и укротившим волны его. Заклинаю тя повелити  хотящим морю, издать вся в нем истопившияся, и земли в ней лежащих мертвых представить живых на Суд Божий. Заклинаю тя повелевшим морю непреступати предела своего, дондеже прийдет Господь судити мир.Заклинаю тя сошедшим на Синайскую гору, и глаголавшим с Моисеем и Аароном, и явльшемуся има в пламени огненном, и в столпе облачном. Заклинаю тя изведшим люди своя от земля Египетския, и давшим им на камене сладкую воду пити, и претворившим воду в кровь. Заклинаю тя казнившим Египта  Моисеем десятию ______. Заклинаю поразившим первенца Египетския. Заклинаю тя попалившим Содому и Гоморру, и пять градов иных от дождениему с небесе огненного града. Заклинаю тя сидящим на престоле славы, пред ним же Огнь течет, и ему же предстоять Тьмами тьму Ангелы, и тыщами тыща Архангелы, и Серафимы вопиющие, Свят, Свят, Свят Господь Саваоф, исполнь небо и и земля Славы воея, ______ еси во веки, Аминь.

И ты, душе лукавый, аще и не хотя воздажд славу  Имени Святому Его, и дежи аще сидиши в удеси тела создания сего: или в главе, или в темени, или в брови, или в очию, или в ушию, или в устах, или в языце, или в выи, или в плещи, или между плещима, или в мышца, или в персех, или в души, или в сердци, или в селезени, или в плюцах, или в чреве, или под чревом, или в точите, или в естественных пределах, или в крепости, или в жилах, или в коленах, или в лыстах, или в голени, или в руку, или в ногу, или в жилицах, или в кровавици, или в костех, или в мозгу, или в крови, или в власах, или в ногтех, или в всем теле, отлучися, устранися и изыйди душе лукавый, и даждь славу  Божию, тако Господь сильный над всеми есть: ибо клястеся идеже аще кто призовет Ися Господне, еще  ищезнути вам.  Заклинаю тя именем Господа Иисуса Христа, распеншагося при Понтийстем Пилате. Заклинаю тя рекшим: небо мне престол есть, земля же подножие ногам моим. Заклинаю тя Архангелами Его, Михаилом и Гавриилом, Уриилом и Рафаилом. Заклинаю тя Великим Именем Сына Божия, отлучитися от создания сего, и ниже с ним ниже сложну быти с ним, но дати славу и службу Имени Святому его. Заклинаю тя всеобразное на злостретение и нападение дневное и полуденное и полуночное, идеже аще еси, отлучися от создания сего, и низведи душу, и разсыпли, не раздроби тело его, но остави его чистаи жива Богу на службу. Заклинаю тя грядущим утвердити престол между небом и землёю, и судити всему роду человеческому, праведным же и грешным. Ты убо душе нечистый, убойся имени Святаго Его, и отыди от создания сего:Убойся огня неугасаемого, убойся родства огненного всепоядающего: Убойся уготовавшего тебе огнь и жупел и пекло губителеви:Убойся  явльшегося Моисееви и ААронови на горе Синайстей: Убойся явльшегося Иоанну на реце Иорданстей, его же видевши река убояся, и отступи, и возвратися вспять:И ты душе лукавый убойся, отступи и устрашися от создания сего. Заклинаю тя отдающимся светом тако ризою, единым имеющим бесмертие: Тому бо подобпает всякая слава, чесь и поклонение Отцу и Сыну, и Святому Духу, ныне и присно, и во веки веков. Аминь.[/spoiler]

Раб божий Константин

МОЛИТВА Священномученика Киприяна
[spoiler]Начинаем глаголати молитву священномученика Киприяна, во дни или в нощи, или в кой час упражняешися, вся силы сопротивнаго от славы Бога Живаго отпадут.

Сей священномученик всею душею моляшеся Богу глаголах:

Господи Боже, Сильный и Святый, Царь царствующим, ныне услыши молитву раба Твоего (имярек). Тебе предстоят тысящи тысящ и тьмы тем Ангел и Архангел, Ты веси тайная сердца раба Твоего. Тако не познати мне Тебе, первыя творях, сия неприязненная держах, облак не одождит, древо садовняго плода не творити, непраздныя жены не раждати и другим не зачати, на ограждение винограда токмо взирати, розга не цвести, тако и клас вертограда не прозябати, и рыбам морским иже не плавати, и птицам возбранях летати, и просто вся чародейства и вси лукавыя бесы работаху мне в сих дарах ради грехов своих многих. Ныне же, Господи Боже мой, Сильный и Великий, благоволивый от недостойнаго достойному быти, и сопричтется святому Твоему стаду и просветительным величеством, милосердствовати о мне, и не восхоте погубити со беззакониями моими, знаемо мне сотвори. Быти связав ми любовию Твоею, непорочной вере не омерзи мене грешнаго и недостойнаго раба Твоего. Припадаю бо и прошу Твое светлое имя о всяком дому и о всех православных християнах, иже имеют чародейство от лукавых человек льстивых или от бесов. Прочтется молитва сия над которою главою, или в дому, да разрешится от удержания, от связания, от зависти, чародейства и ненависти, и злаго устрашения и действеннаго отравления, и от языческаго ядения, от оклеветания и клятвы. Кто убо стяжав молитву сию в своем дому, да будет соблюден от всякаго ухищрения, потвора, отравы, лукавых человек и ближних соседей, да бежат от него бесы, да отступят злые духи. О, Господи, Емуже власть на небеси и на земли, ради имене Твоего святаго и ради славы Твоея несказанныя, благодати Сына, Бога нашего Iсуса Христа, услыши в час сей недостойнаго раба Твоего. Идеже прочтется молитва сия святая да разрешится, яко воск таящий от огня, тако и лукавое ухищение от всякаго рода человеческаго, животнаго и вертограднаго и от всякаго имения их малого и великаго, яко во имя Живоначальныя Троицы просвещение суть, и разве тебе Единаго Бога не знаем, яко Моисеовым сыновом из камене сладкую воду источи, такоже Господи, Боже мой Всесильный, положи руку Твою державную и сильную, полную благодати, благословения дому сему, в нем же молитва сия святая обретается, якоже огонь нисходит повелением Твоим. Четыре реки: Феон, Ефрат, Тигр и Иордан человек не может удержати, тако чародей не может удержати ставленныя дела или мечтания бесовския являтися перед чтением, сей час да разреших разрешаю, прочая вся прогонит противная злая, от злых человек пущенная, и лукавых бесов от раб Божиих (имена тех, над кем читается). Яко умножи лета Езекию царю, и умножи лета имущему молитву сию, службою Ангел, пением Серафимским, Благовещением Пресвятыя Богородицы от Архангела Гавриила, безплотнаго ради зачатия Господа Нашего Iсуса Христа, славнаго Рожества Его, в Вифлееме закланием от Ирода царя четыренадесяти тысящи младенцев, и святаго Крещения восприятием в Иорданской реке, постом и искушением иже от диавола, ужаснейшей Его победы и ужаснейшего суда, ужаснейших чудес, иже в мiре бывших, исцеление и очищение даруя, мертвых оживляя, бесы изгоняя, и в Иерусалим вход Его, осанну Сыну Давыдову младенцев вопиющих Ти, святыя Страсти, распятием и погребением, пением тамо многочисленных Ангел и Архангел, славя восход Его иже одесную Отца. Втораго и страшнаго пришествия власть дал еси святым Своим учеником и Апостолом и рече им: держите и держатся вам, и аще разрешите на земли, да будет разрешено на небеси, силы Твоея великия, заклинаю и прогоняю вся сия духи лукавыя и очи злых человек, ближних и дальних соседей от рабов Божиих (имярек); отгоняю от дому его и от всякаго стяжания его. Яко же умножи богатство Иову праведному, тако, Господи, умножи домашнее житие имущему молитву сию, созданием Адамовым, жертвой Авелевой, благовещанием Иосbифовым, святостью Еноховой, правдою Ноевой, обращением Мелхиседековым, верою Авраамовой, святостью Иакова, пророчеством пророков, святынею патриархов, священномученик, кровью мученическою увенчавшихся, и закланием Петра и Павла, детством Моисеевым, действом Iсуса Навина, святостью Самуиловой, двунадесятью племен Израилевых, молением Елисеовым, постом и видением Данииловым, проданием Иосифа Прекраснаго, премудростью Соломоновой, силою ста шестидесяти Ангелов, молением честнаго славнаго пророка и Крестителя Иоанна и ста пятидесяти Отцев втораго собора, святых споручников и страшнаго, несказаннаго имени Твоего, Всеславнаго Всевидца Бога, Емуже предстоят тысящи тысящ и тьмы тем Ангел и Архангел, ради молитв их прогоняем и одолеваем всякую злобу, лукавство да отдалится от раб Божиих (имярек). Молитву сию даю Единому Богу, яко да подобает всем человеком православным спасение в дому том, в нем же живет святая сия молитва, яже написана на семидесяти двух языках, да разрешится: или в море, или в потоке, или во источнице, или в кладезе, или в стене да разрешится; или в притворе, или в ходу, или в горах, или в пропастях земных, или в корне, или в древе, или в листве да разрешится; или в нивах, в виноградах, или в траве, или в бане, или в коже рыбной, змеиной или плотской, или в глазах, или в головных убрусьях, или в постели, или во обрезании ногтей ручных или ножных, в крови горячей или во очию, или в ушию, или в мозгу, или под мозгом, или в плещу, или между плещами, или в голенях, или в ноге и руке да разрешится; или во чреве, или в кости, или в жилах, или в естественных пределах да разрешится; или в злате, серебре, меди, железе, олове, свинце, воске, или в морских гадах, или в летающих по воздуху, или в хартиях, или в черниле да разрешится. Иже двух язык лукавых Мару-Салахмару и Решихору, аще прогоняю имя тихое Елизиду от рабов Божиих (имярек) силою Честнаго и Животворящаго Креста Господня со всеми Небесными Силами. Пред высоким и страшным Престолом Божиим, творяй слуги Своя пламень огня палящ, Херувимов и Серафимов Властем предстоят и Господствующим Силам, сниде в час, во онь же разбойник вниде в рай. С молитвою помолися Iсус Навин и ста солнце и луна на много час. Ею же помолися Даниил пророк, загради уста львом, трие отроцы Анания, Азария и Мисаил погасаша пламень пещный. Молюся и прошу святаго собора пророческаго Захарию, Осию, Иоиля, Малахия, Иеремию, Иезекииля, Исаию, Даниила, Амоса, Самуила, Илию, Елисея, Наума, молю и прошу четырех евангелистов: Матфея, Марка, Луку и Иоанна Богослова, сына громова, и святых Апостолов: Петра и Павла, и Богоотец Иоакима и Анну, Иосифа Обручника, Иакова, брата Господня по плоти, Сvмеона Богоприимца и Сvмеона сродника Господня, Андрея Христа ради юродиваго, Иоанна Милостиваго, Игнатия Богоносца, священномученика Ананию и Романа Сладкопевца, мученицы Иустинии, Марка Греческаго, Кирила Иеросалимскаго, Ефрема Сирина, Марка Гробокопателя, Василия Новаго, Василия Великаго, Григория Богослова и Иоанна Златоустаго и иже во святых отца нашего Николы архиепископа Мирликийскаго Чюдотворца, святых митрополитов Петра, Алексия, Ионы, Филиппа, Гермогена и Антония, Феодосия и Афанасия Киево-Печерския лавры чюдотворцов, святителей Гурия и Варсонофия Казанских чюдотворцов, преподобнаго Сергия Радонежскаго чюдотворца, Пахомия Великаго, преподобнаго Серафима Саровскаго чюдотворца, преподобнаго Савы Звенигородскаго, Сvмеона и Даниила столпников, Максима Грека, монаха Мелетия Афонския горы, великомученика Киприяна и матери его Иулиты, Алексия Человека Божия и святых преподобных жен Марии Магдалыни, Ефросинии, Ксении, Анастасии и святых великомучениц Варвары, Екатерины, Параскевы, Февронии, Марины и мученика Трифона, проливших кровь свою за Тебя Христа Бога нашего, и всех святых молитвами. За молитв Пречистыя Ти Матери помилуй и спаси рабов Твоих (имярек), да не прикоснется к ним, ни к дому, ни в вечерний час, ни в утренний, ни в день, ни в полунощи, сохрани, Господи, от воздушных, нагорных, тартарных, водяных, лесовых, дворовых бесов.

Иже написана бысть молитва сия святая, святаго священномученика Киприяна, утверждена и ознаменавана бысть от Святыя Троицы на погубление и прогнание всякому делу и злых бесов и от сетей ловящих всюду Седока и Партира.

Словом Господним утвердися небо и земля, молитвами Пречистыя Ти Матере и всех святых небесных Сил безплотных Твоих, Архангел: Михаила, Гавриила, Рафаила, Уриила, Селафила, Иегудиила, Варахиила и Ангела Хранителя и всех святых от века Тебе благоугодивших, иже Ты, Вседержителю Господи, ограждением и силою Честнаго и Животворящаго Креста Господня, да будут свободны рабы Твои (имярек) и да будет посрамлено лукавство всею небесною силой во славу Господа Нашего Iсуса Христа всегда ныне и присно и во веки веком. Аминь.[/spoiler]

Раб божий Константин

Молитва от чародейства
[spoiler]Господи Иисусе Христе, Сыне Божий, огради мя святыми Твоими ангелы, молитвами Всепречистыя Владычицы нашея Богородицы и Приснодевы Марии, силою Честнаго и Животворящаго Креста, святаго архистратига Божия Михаила и прочих Небесных Сил безплотных, святаго пророка, Предотечи и Крестителя Господня Иоанна, святаго апостола и евангелиста Иоанна Богослова, священномученика Киприяна и мученицы Юстины, святителя Николы, архиепископа Мир Ликийских чюдотворца, святителя Льва, епископа Катанскаго, святителя Никиты Новгородскаго, преподобнаго Сергия, игумена Радонежскаго, преподобных Зосимы и Савватия Соловецких, преподобнаго Серафима Саровскаго чюдотворца, святых мучениц Веры, Надежды, Любови и матери их Софии, святаго мученика Трифона, святых и праведных Богоотец Якима и Анны и всех святых Твоих, помози ми, недостойному рабу Твоему (имярек), избави мя от всех навет вражиих, от всякаго зла, колдовства, волшебства, чародейства и от лукавых человек, да не возмогут причинити мне никоего зла. Господи, светом Твоего сияния сохрани мя заутра, и полудне, и вечер, и на сон грядущаго и силою благодати Твоея отврати и удали всякая злая нечестия, действуемая по наущению диаволю. Аще кое зло замыслено или соделано есть, возврати его паки в преисподнюю. Яко Твое есть царство, и сила, и слава, Отца, и Сына, и Святаго Духа, ныне и присно и во веки веком. Аминь.[/spoiler]

Раб божий Константин

ЗАКЛИНАНИЕ
иже во святых отца нашего apxииеpapxa
и чудотворца Григория на духов нечистых
[spoiler]В начале бе Слово и Слово бе у Бога и Бог бе Слово. Сей бе искони у Бога. Вся Тем быша, и без Него ничтоже бысть, еже бысть. В Том живот бе, и живот бе свет человеком. И свет во тьме светится, и тьма его не объят.

На вас, духи нечистыя, духи лукавыя, роде безстыдный, гнусный, корень заблуждения, начало беззакония, древо гpеxa, дрова геенския, пища огня, лукавыя демоны, услаждающияся запахом жертвеннаго дыма, чада диавола, противники создания Божия, летающие нод небесами, летающия на воздусе, летающия в эфире, сущия на земли, в глубине, живущия в горах, покоющияся в лесах, обитающия на кладбищах, пребывающия на стогнах, проникающия в горы, скрывающияся в разселины скал, покоющияся в рощах, скрывающияся в пустынех и подобных местах, укрывающияся под сению дерев, тростника, папируса, кувшинки, сбивающия с путей, сидящия под водами, увлекающия к утесам, плавающия по рекам, блуждающия по пропастям, исходящия от источник водных, ночующия на стогнах, кружащияся в безсветных местах, обитающия в банях и идеже бе приходящия, демоны лукавыи, покоющияся на водах, сохраняемыя на отмщение в пещь вечную, в наказание непрестающее, на мучение огненное, на пытку лютую, в наказание жестокое, – на вас и на род ваш безстыдный, на род ваш разнообразный, на вид ваш странный, не на вид, не на изображение, не на образ, не на создание Божие. Запретит вам Бог вечный, ведущий сокровенная, невидимый, нетленный, неизреченный, неописуемый, неизъяснимый, безначальный, единоначальный, нерожденный, рожденный, вечный, неизменный, безсмертный, Боже, едине имеяй безсмертие, обитаяй неприступно, Егоже никтоже от человек не виде и не може видети. Он повелевает вам — духовом нечистым, царствуюяй Боже, Господь господствующим, Зиждителю всяческим, Творче всего, Создателю человеков, Владыка душам, имеяй власть над животом и смертию, наказуюяй и снова исцелеваяй, низводяй до врат адовых и возводяй, гордым противляяйся, смиренным же даяй благодать, седяй на высоких и на смиренныя призираяй, Творче всех архангелов, царю всех сил, воздвигий небеса и водрузивый твердь, утвердивый луну, зажегий звезды, основавый землю, утвердивый горы и поставивый на весах и на чашах весовых холми, сотворивый источницы и учинивый бездны и древа соделавый плодоносны и различныя древа поставивый, сотворивый звери движущияся и летающыя повелением явивый, измеривый небо пядию и землю горстию, нечестивых истребляяй, гордых погубляяй потопом, праведнаго же Ноя спасый в ковчезе, Адама за преслушание изгнавый, и разбойника за послушание в рай приявый, Авеля приявый и Каина проклявый, Еноха преложивый и падших ангел в узы мрака низвергий во ад, предав я соблюдати на суд наказания ради, Содом и Гоморру попаливый и Ниневию ради покаяния помиловавый, Лота спасый и жену его за неверие обративый в столп, Авраама обогативый и Авимелеха наказавый, Иякова возлюбивый и Исава возненавидевый, Исаака по обетованию в жертву живую приявый, Иосифа сохранивый и египтянку посрамивый, Моисея спасый и фараона поразивый, последи же евреев спасый и египтян потопивый в глубине, Моисея и народ утвердивый и Ваала истребивый, — Им заклинаю вас, духи нечистые, Богом, призирающим на землю и заставляющим ю трястися, прикасающимся к горам и дымятся, — Им заклинаю вас, духи нечистые, безстыдные, Богом, Егоже ради трепещет вся тварь, посылащим молнию, одевающим небо облаки, уготовляющим земли дождь, прозябающим траву скотом и злак на службу человеком, дати пищу им во благо время; давшу Ти им, соберут; отверзшу Ти руку, всяческая исполнятся благости. Тако силою сиею повелеваю вам, духовом нечистым и тем, иже повинуются вам — выйти из человека сего, и не являтися, но удалитися; и не глаголите: мы человеком изгоняемся, духи скверныя и нечистыя. Яко аз, грешный и смиренный, немощен пред Богом моим: аз есмь земля и прах, и бысть изгнанным словом. Тако дарована благодать сыновом человеческим, верующим в Него. Сказавый учеником: духов изгоните, прокаженных очищайте, даром получисте, даром дадите, — Он повелевает вам — духам нечистым удалитися от сего человека, у Бога Сый, Бог Слово Отчее, удалилитися от всякаго члена его: от головы, чела, ушей, очей, бровей, носа, слез, губ, десен, зубов, языка, уст, позвоночника, дыхательных каналов, горла, шеи, ключиц, плечей, спины, мышц, предплечья, рук, пальцев, груди, сосцев, сердца, желудка, печени, селезенки, почек, желчи, ребер, реберных хрящей, чрева, пупа, чресл, крепости, лодыжек, бедер, колен, голеней, икр, ступни, пальцев ножных, ногтей, подошв, от влас главных до влас ножных, от десной страны до шуей, и от внутренних органов до наружных, костей, ребер, мозгов, связей и от всего тела. Заклинаю вас, звездовидныя, глухия, немыя, косноязычныя, безстыдныя, делающия безумными, удерживающия явык, скрежещущия зубы, вызывающия слезы, угрюмыя, схватывающия сердца, делающия разслабленными, производящия убийства, вызывающия привидения, являющияся в призраках, пугающия, болтливыя, производящия оцепенение, наводящия уныние, ввергающия в огнь, влекущия в пустыни, гонящия в могилы. Да не будеть общения с ними ни в пище, ни в питии, ни во сне, ни в бодрствовании, ни в деле, ни в отдыхе, ни в пробуждении, ни во всяком входе и исходе, ни в надевании одежд, ни в раздевании, ни нощию, ни днем, или утром, или в полдень, ни вечером, яко аз не молюся вам в обращении к вам, в фимиамех или в возлиянии или возлиянии вина, или в ладане, или в пролитии крови, но крепкому и живому; живо бо слово Божие и действенно и острейше паче всякаго меча обоюду остра и проходящее даже до разделения души и же и духа, членов же и мозгов, и судително помышлением и мыслем сердечным, и яко несть тварь неявленна пред Ним, но вся обнажена и открыта пред очами Его. К вам слово, иже изгонит вас в огнь вечный, уготованный вам, духам нечистым. Сего ради не противтеся дуси нечистыя, но помяните суд, уготованный вам, и подчинитеся божественному словеси, дабы и в сем не имети вам оправдания, глаголющим: мы не слышали имени Твоего нарицаемаго и удалилися, владыко. Заклинаю вас, духи нечистые Iсусом Христом, Спасителем всех, Сыном Божиим Единородным и Ангелом великаго совета, от отеческаго лона происшедшим преже всех век, Имже все сотворено, видимое же и невидимое, в последния дни пришедшим к нам от девственной утробы и исцелившим всяку болезнь и всяку немощь, сокрушившим вас и погрузившим в море. Изгоняемыя же Им и низвергаемыя в пропасть, вы исповедаете Его, глаголя: о, что нам и Тебе, Сыне Бога живаго? Пришел еси преже времени мучити нас. Им заклинаю вас, духи нечистыя, при Понтие Пилате исповедавшим доброе исповедание, заушенным, биенным, претерпевшим бичевание, распятым и погребенным и в третий день возставшим, совозставившим тела святых, явившим Себя преже всего Марии и Mapфe, последи же Своим учеником, восшедшим на небеса и седшим одесную Отца и паки грядущим со славою судити живым и мертвым, Егоже царствию несть конца, пославшим Своих учеников проповедати слово сие во вся народы и крестити верующих во имя Отца и Сына и Святаго Духа, изгнати вас вскоре от человеческаго рода и заставити вас не имети общения с храмом сим, но чрез произнесенныя им заклинания очиститися ему от всякаго сатанинскаго действа, исцелитися ему чрез возрождение водою и Святым Духом, яко подобает поклонение и слава Отцу и Сыну и Святому Духу. Аминь. [/spoiler]

Раб божий Константин

ЗАКЛИНАНИЕ МОЛИТВА НА ОТГНАНИЕ НЕЧИСТОЙ СИЛЫ
[spoiler]Заклинаю вас вселукавии злоначальници, проклятие бесове, иже аще кто есте, и елико вас есть, иже обавания ми чародействы, и злотворными деянии присвоеннаго вам человека приведении бывшее, человека сего ИМЯ: люто обуреваете, мучите, и озлобляете, тако да от ны с всеми волшебствы и чародействы вашим отбежите от него, и к тому никакоже николиже к нему возвратитеся. Сие убо не своею ми солою, или благочестием ( еже в себе неощущаю), но о Всесильном  Всемогущем и вседержительном имени, единаго Бога в Троици славимаго , Отца, и Сына, и Святаго духа, и в силу честнаго и животворящаго Креста, и смерти Господа Бога и спасшаго Иисуса Христа, еюже вся темная Ваша власть, и лютое над человеки и всеми созданиями Божиими мучительство испразднено и отничтоженно есть. Обратитеся убо вспять, и бежите отуду далече, и дадите место Божией силе, разрушающей злодеяния ваша, своим неисчетным милосердием и благостию, да запретит вам перст Божий Фараоновых волхвов обавания и волшебная мечтания, безделны сотворивый, и той его же силу тогда познаете егда Павла Апостола запрещением силу вашу в Еллим  волхве рабе вашем , его же манием многих повреждаете, посрами и испраздни, и тако же на святую Истину Креста знамением, и на нему распятаго Господа Бога нашего силою огражденную, обавающу, и блаубеждающу Киприану, ничтоже успети возмогосте, со страхом и трепетом отдержими отбегосте, да будет ны на вас ужас и трепет и страх Бога Вседержителя, Отца, и Сына и Святаго духа, хотящаго вас низринути в огнь вечный и безконечно в нем мучити, Аминь.

Священною водою. Кропить очарованного, глаголать:да обегнут и отступят от тебе вся лукавая диавольская обавания, чародеяния, и волшебная действа окроплением воды сея священныя и в ничтоже да обратится и ищезнут, ты же  здрав и целу буди, во имя Отца, и Сына И Святаго духа. Аминь.[/spoiler]

Раб божий Константин

МОЛИТВА ОТ КОЛДОВСТВА И ДЕЙСТВИЙ ЛУКАВОГО
[spoiler]Всесильный и человеколюбивый Господи Иисусе Христе Боже наш, превечнаго Отца собезначальный и соприсносущный сыне и Слове, на последок лет с небесе сошедый, и от Присно Девы чтыя неизреченно воплотивыйся, и непреложно человек бывый, тако да зло деяния бесовская испразниши, и учеником своим властьдавый, еже наступати на змия и скорпия, и на всю силу вражию: Тебе смиренно тако раби человеколюбиваго владыко прилежно молим: призри на раба твоего ( или на рабу твою сию ) ИМЯ: и все злокозние древняго и вселукаваго змия Диавола, тому (или той) наветующее, под ноги рабов твоих сотри, и действо их еже волшебными обавании и чародействы лукавых человек тому себе отдавших, в погибель рабу твоему (или рабе твоей) ИМЯ:  наносит и соделовает: благоутробным си человеколюбием и Божественною силою разруши, и и безделны сотворив в ничтоже обрати. Твое бо еже миловати, и спасати нас Боже наш, и тебе славу возсылаем с безначальным Отцем, и со пресвятым и Благим и животворящим Духом, ныне и присно, и во веки веков. Аминь.[/spoiler]

Раб божий Константин

Цитата: Раб божий Константин от марта 14, 2012, 21:40:42  
Кафисма-20
Псалом-143
[spoiler]Благословен Господь Бог мой, Научаяй руце мои на ополчение, персты моя на брань. Милость моя и Прибежище мое, Заступник мой и Избавитель мой, Защититель мой, и на Него уповах: повинуяй люди моя под мя. Господи, что есть человек, яко познался еси ему? Или сын человечь, яко вменяеши eгo? Человек суете уподобися: дние его яко сень преходят. Господи, приклони небеса, и сниди, коснися горам, и воздымятся. Блесни молнию, и разженеши я, посли стрелы Твоя, и смятеши я. Посли руку Твою с высоты, изми мя и избави мя от вод многих, из руки сынов чуждих, ихже уста глаголаша суету, и десница их - десница неправды. Боже, песнь нову воспою Тебе, во псалтири десятоструннем пою Тебе, дающему спасение царем, избавляюшему Давида, раба Своего, от меча люта. Избави мя, и изми мя из руки сынов чуждих, ихже уста глаголаша суету, и десница их - десница неправды. Ихже сынове их яко новосаждения водруженная в юности своей. Дщери их удобрены, преукрашены, яко подобие храма. Хранилища их исполнена, отрыгающая от сего в сие, овцы их многоплодны, множащыяся во исходищах своих, волове их толсти. Несть падения оплоту, ниже прохода, ниже вопля в стогнах их. Ублажиша люди, имже сия суть. Блажени людие, имже Господь Бог их.[/spoiler]
Псалом-144
[spoiler]Вознесу Тя, Боже мой, Царю мой, и благословлю имя Твое в век и в век века. На всяк день благословлю Тя и восхвалю имя Твое в век и в век века. Велий Господь и хвален зело, и величию Его несть конца. Род и род восхвалят дела Твоя и силу Твою возвестят. Великолепие славы святыни Твоея возглаголют и чудеса Твоя поведят. И силу страшных Твоих рекут и величие Твое поведят. Память множества благости Твоея отрыгнут и правдою Твоею возрадуются. Щедр и Милостив Господь, Долготерпелив и Многомилостив. Благ Господь всяческим, и щедроты Его на всех делех Его. Да исповедятся Тебе, Господи, вся дела Твоя, и преподобнии Твои да благословят Тя. Славу Царствия Твоего рекут, и силу Твою возглаголют, сказати сыновом человеческим силу Твою, и славу великолепия Царствия Твоего. Царство Твое, Царство всех веков, и владычество Твое во всяком роде и роде Верен Господь во всех словесех Своих и Преподобен во всех делех Своих. Утверждает Господь вся низпадающыя и возставляет вся низверженныя. Очи всех на Тя уповают, и Ты даеши им пищу во благовремении. Отверзаеши Ты руку Твою и исполняеши всякое животно благоволения. Праведен Господь во всех путех Своих и Преподобен во всех делех Своих. Близ Господь всем призывающым Его, всем призывающым Его во истине. Волю боящихся Его сотворит и молитву их услышит и спасет я. Хранит Господь вся любящыя Его и вся грешники потребит. Хвалу Господню возглаголют уста моя, и да благословит всяка плоть имя святое Его в век и в век века.

Слава:[/spoiler]
Псалом-145
[spoiler]Хвали, душе моя, Господа. Восхвалю Господа в животе моем, пою Богу моему, дондеже есмь. Не надейтеся на князи, на сыны человеческия, в нихже несть спасения. Изыдет дух его и возвратится в землю свою. В той день погибнут вся помышления его. Блажен, ему же Бог Иаковль Помощник, упование его на Господа Бога своего, сотворшаго небо и землю, море и вся, яже в них, хранящаго истину в век, творящаго суд обидимым, дающаго пищу алчущым. Господь решит окованныя. Господь умудряет слепцы. Господь возводит низверженныя. Господь любит праведники. Господь хранит пришельцы, сира и вдову приимет и путь грешных погубит. Воцарится Господь во век, Бог твой, Сионе, в род и род.[/spoiler]
Псалом-146
[spoiler]Хвалите Господа, яко благ псалом. Богови нашему да усладится хваление. Зиждай Иерусалима Господь, разсеяния Израилева соберет. Исцеляяй сокрушенныя сердцем и обязуяй сокрушения их. Исчитаяй множество звезд и всем им имена нарицаяй. Велий Господь наш, и велия крепость Его, и разума Его несть числа, Приемляй кроткия Господь, смиряяй же грешники до земли. Начните Господеви во исповедании, пойте Богови нашему в гуслех. Одевающему небо облаки, уготовляющему земли дождь, прозябающему на горах траву и злак на службу человеком, дающему скотом пищу их, и птенцем врановым призывающым Его. Не в силе констей восхощет, ниже в лыстех мужеских благоволит. Благоволит Господь в боящихся Его и во уповающих на милость Его.[/spoiler]
Псалом-147
[spoiler]Похвали, Иерусалиме, Господа, хвали Бога твоего, Сионе, яко укрепи вереи врат твоих, благослови сыны твоя в тебе. Полагаяй пределы твоя мир, и тука пшенична насыщаяй тя. Посылаяй слово Свое земли, до скорости течет слово Его, дающаго снег Свой, яко волну, мглу, яко пепел, посыпающаго, метающаго голоть Свой, яко хлебы. Противу лица мраза Его кто постоит? Послет слово Свое, и истает я, дхнет дух Его, и потекут воды. Возвещаяй слово Свое Иакову, оправдания и судьбы Своя Израилеви. Не сотвори тако всякому языку, и судьбы Своя не яви им.

Слава:[/spoiler]
Псалом-148
[spoiler]Хвалите Господа с небес, хвалите Его в вышних. Хвалите Его, вси Ангели Его, хвалите Его, вся силы Его. Хвалите Его, солнце и луна, хвалите Его, вся звезды и свет. Хвалите Его Небеса небес и вода, яже превыше небес. Да восхвалят имя Господне: яко Той рече, и быша, Той повеле, и создашася. Постави я в век и в век века, повеление положи, и не мимо идет. Хвалите Господа от земли, змиеве и вся бездны: огнь, град, снег, голоть, дух бурен, творящая слово Его, горы и вси холми, древа плодоносна и вси кедри, зверие и вси скоти, гади и птицы пернаты. Царие земстии и вси людие, князи и вси судии земстии, юноши и девы, старцы с юнотами да восхвалят имя Господне, яко вознесеся имя Того Единаго, исповедание Его на земли и на небеси. И вознесет рог людей Своих, песнь всем преподобным Его, сыновом Израилевым, людем, приближающымся Ему.[/spoiler]
Псалом-149
[spoiler]Воспойте Господеви песнь нову, хваление Его в церкви преподобных. Да возвеселится Израиль о сотворшем Его, и сынове Сиони возрадуются о Царе своем. Да восхвалят имя Его в лице, в тимпане и псалтири да поют Ему. Яко благоволит Господь в людех Своих, и вознесет кроткия во спасение. Восхвалятся преподобнии во славе и возрадуются на ложах своих. Возношения Божия в гортани их, и мечи обоюду остри в руках их: сотворити отмщение во языцех, обличения в людех, связати цари их путы, и славныя их ручными оковы железными, сотворити в них суд написан. Слава сия будет всем преподобным Его.[/spoiler]
Псалом-150
[spoiler]Хвалите Бога во святых Его, хвалите Его во утвержении силы Его. Хвалите Его на силах Его, хвалите Его по множеству величествия Его. Хвалите Его во гласе трубнем, хвалите Его во псалтири и гуслех. Хвалите Его в тимпане и лице, хвалите Его во струнах и органе. Хвалите Его в кимвалех доброгласных, хвалите Его в кимвалех восклицания. Всякое дыхание да хвалит Господа.

Слава, и ныне: Аллилуиа.[/spoiler]
По 20-й кафисме
[spoiler]Таже тропари, глас 8: Исполнение всех благих Ты еси, Христе мой, исполни радости и веселия душу мою, и спаси мя, яко Един Многомилостив.

Слава: Аще и согреших, Христе Спасе мой, пред Тобою, иного Бога разве Тебе не вем, дерзаю же на Твое благоутробие, обращающагося приими мя, Благоутробне Отче и Сыне Единородне и Душе Святый, яко блуднаго сына, и спаси мя.

И ныне: Иного прибежища и теплого предстательства, разве Тебе, не вем, яко дерзновение имущи ко из Тебе рожденному, Владычице, помози и спаси мя, раба Твоего.

Господи, помилуй (40) и молитва:

Господи Иисусе Христе Боже мой, помилуй мя, грешнаго, и прости ми, недостойному рабу Твоему, елика Ти согреших чрез все живота моего время, и даже до днесь, и аще что яко человек согреших, вольная моя прегрешения и невольная, делом и словом, яже умом и мыслию, яже от совосхищения и невнимания, и многия моея лености и небрежения. Аще же именем Твоим кляхся, аще же лжекляхся, или хулих мыслию, или кого укорих, или оклеветах, или опечалих, или в нечесом прогневах, или окрадох, или блудствовах, или солгах, или тайно ядох, или друг достиже ко мне, и презрех его, или брата оскорбих и преогорчих, или стоящу ми на молитве и псалмопении, ум мой лукавый на лукавая обхождаше, или паче лепаго насладихся, или безумно смеяхся, или кощунно глаголах, или тщеславихся, или гордихся, или доброту суетную видех и от нея прельстихся, или нелепая мне поглумихся. Аще в чесом о молитве моей нерадих, или заповедей духовнаго моего отца не сохраних, или празднослових, или ино что лукавое сотворих, сия бо вся и вящшая сих содеях, ихже ниже помню. Помилуй, Господи, и прости ми вся, да в мире усну и почию, поя, и благословя, и славя Тя, со Безначальным Твоим Отцем и с Пресвятым, и Благим, и Животворящим Твоим Духом, ныне и присно и во веки веков. Аминь.[/spoiler]
Псалом-151
[spoiler]Сей псалом особь писан, Давидов, и вне числа 150 псалмов, внегда единоборствоваше на Голиафа
Мал бех в братии моей и юнший в дому отца моего, пасох. овцы отца моего. Руце мои сотвористе орган, и персты мои составиша псалтирь. И кто возвестит Господеви моему? Сам Господь, Сам услышит. Сам посла Ангела Своего, и взят мя от овец отца моего, и помаза мя елеем помазания своего. Братия моя добри и велицы, и не благоволи в них Господь. Изыдох в сретение иноплеменнику, и проклят мя идолы своими. Аз же, исторгнув меч от него, обезглавих его, и отъях поношение от сынов Израилевых.[/spoiler]

Раб божий Константин


Раб божий Константин

Глава 1. Чин малыя вечерни.
[spoiler]Прежде солнечнаго захождения дне субботнаго, приходит параекклисиарх [сиречь кандиловжигатель] к предстоятелю, и творит поклонение ему, знаменуя пришествием своим время клепания. И взем благословение, изшед клеплет в малый кампан. И собравшимся братиям в притвор, творит священник начало: благословен Бог наш: И учиненный чтец глаголет: Слава тебе Боже наш, слава тебе. Таже, царю небесный: Трисвятое: И по Отче наш: Возглас от священника, и чтет чтец 9-й час по обычаю. Таже, по конце того и по отпусте входим в храм: и станет кийждо на своем месте. Аще же 9-й час глаголется в храме, тогда отпуст 9-го часа не бывает, но абие иерей начинает, глаголя: благословен Бог наш: И чтец глаголет: Приидите поклонимся: трижды, и вечерний псалом: благослови душе моя Господа: тихо и кротким гласом. По псалме же, Слава, и ныне, аллилуиа. трижды. иерей же ектении не глаголет, но чтец глаголет: Господи помилуй, трижды. Слава, и ныне: И абие, Господи воззвах: И ставим стихи 4. И поем стихиры воскресны гласа, три, повторяюще 1. Слава, и ныне, богородичен. Таже, Свете тихий: Прокимен, Господь воцарися: Стих: облечеся Господь в силу и препоясася. И паки, Господь воцарися: Таже, Сподоби Господи в вечер сей: И абие поем стиховны стихиру едину воскресну. И другия стихиры Богородицы, подобны 3, с припевы их. Слава, и ныне, богородичен их. Таже, Ныне отпущаеши: Трисвятое, и по Отче наш: Тропарь воскресн. Слава, и ныне, богородичен его. Посем глаголет иерей ектению малую: Помилуй нас Боже, по велицей милости твоей, молим ти ся услыши и помилуй. Лик: Господи помилуй, трижды. еще молимся о благочестивейшем, самодержавнейшем, великом господре нашем императоре николае александровиче, всея россии: о супруге его благочестивейшей господрне, императрице александре феодоровне: о матери его благочестивейшей господрне императрице марии феодоровне: о наследнике его, благоверном господре, цесаревиче и великом князе, алексии николаевиче, и о всем царствующем доме. Лик: Господи помилуй, трижды. еще молимся о святейшем правительствующем синоде: Лик: Господи помилуй, трижды. еще молимся за всю братию и за вся христианы. Лик: Господи помилуй, трижды. Возглас: яко милостив и человеколюбец Бог еси, и тебе славу возсылаем отцу и сыну, и святому духу, ныне и присно, и во веки веков. Таже, Слава тебе Христе Боже: [Смотри] И отпуст малый, и многолетие. И вшедше в трапезу, глаголем: ядят убозии и насытятся, и восхвалят Господа взыскающии его: жива будут сердца их в век века. Слава, и ныне: Господи помилуй, трижды. благослови. И благословляет священник трапезу. И вкушаем представленная нам полегку. да не отягчимся на бдение. По ядении же, Слава, и ныне: Бысть чрево твое святая трапеза, имущая небеснаго хлеба, Христа бога нашего, от негоже всяк ядый не умирает, якоже рече всех богородительнице питатель. И посем, честнейшую херувим: Таже, Возвеселил ны еси Господи в творениих твоих, и в делех руку твоею возрадуемся: знаменася на нас свет лица твоего Господи, дал еси веселие в сердце моем, от плода пшеницы, вина и елеа своего умножишася. в мире вкупе усну, и почию, яко ты Господи единаго на уповании вселил мя еси. Слава, и ныне: Господи помилуй, трижды. благослови. священник: С нами бог, своею благодатию и человеколюбием, всегда, ныне и присно, и во веки веков, аминь.[/spoiler]
Глава 2. Чин великия вечерни, сиесть бдения всенощнаго, и утрени воскресныя.
[spoiler]По еже заити солнцу мало, отходит кандиловжигатель, и творит поклон предстоятелю. Таже восходя ударяет в великий кампан не скоро, поя непорочны, или глаголя псалом 50, тихо 12-ю. И потом вшед и вжигает лампады, и уготовляет кадильницу. И тако паки изшед клеплет во вся кампаны. И возвращься в церковь, и вжег свещу в насвещнице, поставляет прямо царских врат. Таже творит поклонение иерею, егоже есть чреда. иерей же востав творит поклон предстоятелю: И отшед творит поклоны 3, пред святыми дверьми, и на оба лика: братиям же всем седящим. И вшед во святый олтарь, возлагает на ся епитрахилий, целовав крест верху его и приим кадильницу, и став пред святою трапезою, влагает фимиам: и глаголет молитву кадила тайно. И тако кадит святую трапезу крестовидно окрест, и весь жертвенник: и отворив святыя двери исходит. Кандиловжигатель же прием свещник стоящий среди церкве, возгласит велиим гласом: Востаните! держа свещник в руце со свещею возжженною, всем же воставшим. И изшед священник святыми дверьми, и творит крест кадилом пред святыми дверьми, возводя праве и преки: и идет и кадит поряду святыя иконы, яже на десней стране, таже на левей, посем предстоятеля, и оба лика по чину их: параекклисиарху же предходящу ему со свещником. егда же иерей сотворит крест кадилом, покланяяся мало, покланяется с ним и параекклисиарх. Исходит же и в притвор, и кадит по чину и тамо сущую братию: и паки возвращься в церковь, и став посреди обою лику знаменует кадилом крест, зря к востоком, и возглашает велегласно: Господи благослови. И абие кадит образ спаса Христа, и Богородицы, и предстоятеля на месте его: и вшед во святый олтарь, и став пред святою трапезою, знаменует кадилом крест, трижды. И потом возглашает сице: Слава святей, и единосущней, и животворящей и нераздельней Троице, всегда, ныне и присно, и во веки веков. И начинает предстоятель, или екклисиарх: Аминь. Приидите поклонимся цареви нашему Богу. низким и тихим гласом. Таже второе мало повышше: Приидите поклонимся и припадем христу, цареви нашему Богу. Паки третие вышшим гласом, сице: Приидите поклонимся и припадем самому христу цареви и Богу нашему. Таже особне: Приидите, поклонимся, и припадем ему. И абие начинает вышшим гласом предстоятель, или екклисиарх, на глас осмый: благослови душе моя Господа: не скоро, и со сладкопением, споющей и прочей братии. И припев: благословен еси Господи. Таже вторый певец праваго лика: Господи Боже мой, возвеличился еси зело: благословен еси Господи: легко со гласом соглашающим и прочим братиям с ними. иерей же с параекклисиархом, изшед из святаго олтаря, и сотворше поклоны три пред святыми дверьми, и обращшеся творят поклон предстоятелю: Таже на оба лика по единому: И идут и станут на своих им местех.

В соборных же и приходских храмех действует священник сия в фелоне, диакон же в стихаре.

егда же начнут пети: Вся премудростию сотворил еси: и, Слава ти Господи, сотворившему вся. Тогда иерей приходит пред царския двери во епитрахилии, и откровенною главою стоя, глаголет молитвы светильничныя. Скончавшуся же псалму, глаголет ектению великую: Миром господу помолимся. И по ектении возглас: яко подобает тебе: Таже стихологисуем псалтир на глас 8, первую кафисму: блажен муж, первый антифон: вторый же и третий антифон поем на глас дне. По всяком же антифоне, ектениа малая, и возглас. По первом антифоне, яко твоя держава: По втором, яко благ и человеколюбец: Певаему же третиему антифону, отходит диакон, и положив поклон предстоятелю, входит во святый олтарь, входит же с ним и чредный священник. Взем же диакон стихарий свой и орарий, емлет от священника благословение, и целовав десницу его, облачится в стихарь обычно, и глаголет последнюю ектению, и возглас от священника: яко ты еси Бог наш: По скончании же обычныя стихологии, творит канонарх метание, и возгласит глас октоиха, или минеи. Мы же поем: Господи воззвах в прилучившийся глас октоиха. священник же стоит на обычном месте. егда же начнут пети, Господи воззвах: Тогда кадит иерей или диакон, яко обычай есть, творя поклонение предстоятелю. Мы же ставим стихов десять: от Изведи из темницы душу мою: И поем стихиры воскресны гласа, три: И анатолиевы 4: И минеи святаго, три: Слава, святаго, аще имать. Аще ли ни, Слава, и ныне, богородичен гласа, настоящий. И егда речем стих: яко утвердися милость его на нас: поюще оба лика вкупе. Тогда иерей сотворь поклон предстоятелю: И вшед во святый олтарь, облачится в фелонь, нам же Славу рекшим, И абие творят вход, отверзаемым святым дверем: Предыдущим подсвещником двема со свещами. Диакону же кадильницу держащу, и по нем иерею просту, опущен имущу фелонь. священник же стоит прямо святых дверей: Стоит же и диакон одесную священника мало откосвенно, и приник держя и орарь свой треми персты десныя руки, глаголет тайно, елико токмо слышати священнику: господу помолимся. священник же глаголет тайно молитву: Вечер и утро и полудне: И по молитве восклонився, и глаголет диакон ко священнику, показуя вкупе к востоку со орарем, держя и треми персты десныя руки: благослови владыко святый вход. И священник благословляет к востоку, глаголя: благословен вход святых твоих Господи: Таже диакон отходит и кадит святую икону, сущую на месте предстоятеля, и самаго предстоятеля: и паки стоит на немже месте прежде стояше, ожидаяй исполнения стиха. Исполншуся же стиху входит диакон посреде, и начертав крест с кадильницею, возглашает: Премудрость, прости. И мы поем: Свете тихий святыя славы: Чтецы же вземше лампады, предходят даже до святых дверей: Диакон же вшед внутрь святаго олтаря, кадит святую трапезу. священник же поклонився пред святыми дверьми, и целовав я входит, и затворяются святыя двери. По конце же, Свете тихий: глаголет диакон: Вонмем. иерей, Мир всем. И паки диакон: Премудрость, вонмем. Канонарх же поклонение сотворь к настоятелю, сказует прокимен, и стихи. Клирицы же поют, Прокимен дне, на глас 6-й: Господь воцарися, в лепоту облечеся. Стих: облечеся Господь в силу и препоясася. Стих: Ибо утверди вселенную, юже не подвижится. Стих: Дому твоему подобает святыня Господи, в долготу дний. И паки, Господь воцарися, в лепоту облечеся. Чтец же согбенне руце имея при персех, среди храма стоя, ожидает конца прокимена: и сотворив поклонение, отходит на свое место. Посем изшед глаголет диакон ектению: Рцем вси: И возглас от священника. И по возгласе глаголет настоятель, или учиненный чтец: Сподоби Господи в вечер сей: И паки диакон: Исполним вечернюю молитву нашу господеви. И возглас от иереа: яко благ и человеколюбец: Таже, Мир всем. И диакон: Главы наша господеви приклоним. И глаголет иерей молитву тайно. Таже возглашает: Буди держава царствия твоего: И тако исходит иерей со диаконом, северными дверьми, предыдущим им двема светильникома, диакону же с кадильницею, нам же последующим. И поем стихиру храма, и исходим в притвор. И тамо кадит диакон святыя иконы, и настоятеля, и лики по чину: и станет на своем месте, и по совершении стихир, Слава, и ныне, богородичен. И посем возглашает диакон во услышание всем молитву сию: спаси Боже люди твоя, и благослови достояние твое, посети мир твой милостию и щедротами: Даже до конца. Лик: Господи помилуй, 40. Диакон: еще молимся о благочестивейшем, самодержавнейшем, великом господре нашем, императоре николае александровиче всея россии, о державе, победе, и прочая. еще молимся о супруге его, благочестивейшей господрне, императрице александре феодоровне. еще молимся о матери его благочестивейшей господрне императрице марии феодоровне. еще молимся о наследнике его, благоверном господре, цесаревиче и великом князе алексии николаевиче: и о всем царствующем доме. Лик: Господи помилуй, 30. Диакон: еще молимся о святейшем правительствующем синоде, [таже, о епискпе нашем, имярек, аще есть.] Аще ли обитель, и о архимандрите нашем имярек. Лик: Господи помилуй, 50. еще молимся, о еже сохранитися граду сему, и святей обители сей, и всякому граду, и стране: Лик: Господи помилуй, трижды. еще молимся и о еже услышати господу Богу глас моления нас грешных и помиловати нас. Лик: Господи помилуй, трижды. Посем возглашает иерей: услыши ны Боже спасителю наш: Лик: Аминь. Таже глаголет: Мир всем. Диакон глаголет: Главы наша господеви приклоним. И всем главы приклоньшим, иерей молится велегласно: владыко многомилостиве, Господи Иисусе Христе Боже наш: И по исполнении ея, мы: Аминь. Таже восклоньшеся поем стихиру воскресну. И входим в храм предходящим свещником, поюще и прочия стихиры воскресны, яже суть по алфавиту: Глаголем же припевы сия, 1: Господь воцарися, в лепоту облечеся. 2: Ибо утверди вселенную, яже не подвижится. 3: Дому твоему подобает святыня Господи в долготу дний. Слава, и ныне, богородичен. И свещники убо поставляются от обою страну, предукрасившуся четвероножцу, на немже лежит со пшеницею и пятию хлебы блюдо, еже имамы обычай приносити в церковь. От обою же страну два сосуда исполнена, ов убо вина, ов же елеа. Стоит же вино убо ошуюю, елей же одесную. Таже глаголет настоятель: Ныне отпущаеши: И чтец, Трисвятое: по Отче наш: Возглас: яко твое есть царство: И мы поем отпустительный тропарь Богородицы, глас 4: Богородице Дево радуйся: трижды. Тогда диакон взем благословение от священника, кадит окрест стола. Таже предстоятеля токмо, на месте его, и иереа. И паки хлебы спреди токмо. И глаголет молитву настоятель, или иерей велегласно: Господи Иисусе Христе Боже наш, благословивый пять хлебов, и пять тысящ насытивый: И подъем един хлеб знаменует с ним прочия хлебы: и егда речет, Сам благослови: И указует десницею на хлебы: Хлебы сия: Такожде на пшеницу, и вино и елей, Пшеницу, Вино, и елей: И по скончании молитвы, и по Амине поем: Буди имя господне благословено от ныне и до века, трижды, на глас 4-й. Таже псалом 33, благословлю Господа на всякое время: И глаголем его до Не лишатся всякаго блага. иерей же шед станет пред царскими враты, зря к западом. И по скончании псалма, глаголет: благословение господне на вас: И чтец, аминь. И глаголет начало чтения. И священник: молитвами святых отец наших: И извлачаются священник и диакон священных одежд, и исходят. И тако сядут вси кождо на своих местех. Келарь же взем от хлеб благословенных, и раздробив на блюде, раздает братии, и почерпает по единой чаши вина всем равно, от настоятеля и до последних, иже во обители суть. [Ныне же сей чин весьма в церквах упразднися]. И полагается чтение в деяниих святых апостол.

[Смотри] Ведомо же буди: яко от недели святыя пасхи, даже до недели всех святых, по благословении хлебов, чтутся деяния святых апостол. В прочия же недели всего лета чтутся седмь соборная послания апостольская, и четыренадесять посланий святаго апостола павла, и откровение святаго апостола Иоанна богослова. егда же раздаст келарь братии хлебы, и по единой чаши вина, труда ради бденнаго, якоже из начала прияхом от святых отец, и шед творит обычный поклон, со служившими с ним по два в ряд, пред святыми дверьми, и на оба лика по единому, и исходят. В вечер же, по приятии хлеба и вина по черпании, от того часа, да никтоже уже дерзнет вкусити потом что, причащения ради святых пречистых христовых таин.

Сицево же раздробление хлебов творим, и почерпание.

От перваго дне месяца септемвриа, до 25 дне марта. А яже во бдениих летних, благословенныя хлебы, раздаваем я на трапезе, и прежде вкушения снедаем их.

[Смотри] благословенныя же имут хлебы дарования различна:

Рекше, уставляют огневицу пиющим с водою, и трясавицу отгонят, и всяк недуг и всяку болезнь исцелевают: к сим же и мыши от жит отгонят и ина пакостящая прогоняют.

По чтении же великом деяний святых апостол, исходит параекклисиарх, и клеплет в великий, и в прочия кампаны.

Воставшу же предстоятелю, и всем братиям, начинает: аминь. Слава в вышних Богу, и на земли мир в человецех благоволение, трижды. Таже глаголет: Господи устне мои отверзеши, и уста моя возвестят хвалу твою, дважды. И глаголет шестопсалмие кротким и тихим гласом. По триех же псалмех, Слава, и ныне, аллилуиа, трижды. Господи помилуй, трижды. Слава, и ныне: Господи Боже спасения моего: Тогда иерей во епитрахилии, инде же и в фелони, глаголет молитвы утренния пред святыми дверьми стоя откровен. По скончании же шестопсалмия, по Слава, и ныне: глаголет великую ектению: Миром господу помолимся. И по возгласе отшед стоит на своем месте. учиненный же канонарх, иже прокимены на вечерни сказует, сотворив поклон предстоятелю, и возглашает: Бог господь: со стихи его, в настоящий глас. И поем тропарь воскресный, дважды: Слава, святаго, того дне: И ныне, богородичен, по гласу тропаря святаго, аще имать. Аще ли ни: Слава, и ныне, богородичен настоящаго гласа. И абие лик глаголет: Господи помилуй, трижды. Слава отцу, и сыну, и святому духу. Чтец же, И ныне: И стихологисует кафисму псалтира: Исповемся тебе Господи всем сердцем моим. По исполнении же коеяждо стихологии, отшед священник пред святыя двери, глаголет малую ектению: И возглас, яко обычай. И поем седален воскресн прежде просто. Таже припев: воскресни Господи Боже мой, да вознесется рука твоя, не забуди убогих твоих до конца, и 2 седален: Слава, и ныне, богородичен. И посем полагается чтение во евангелии толковом. Таже кафисма, и седален 2-й. Припев: Исповемся тебе Господи всем сердцем моим, повем вся чудеса твоя. Слава, и ныне, богородичен его. И чтение. и поем поем непорочны, на глас 5: в нихже кадит иерей. Таже тропари, Ангельский собор: впакои гласа и чтение. Таже степенны гласа, в нихже исходит кандиловжигатель, и ударяет в кампаны. иерей же и диакон, вшедше во святилище облачатся по обычаю. И глаголет: Вонмем, премудрость. Канонарх же сказует: Прокимен, псалом давидов, гласа. По совершении же прокимена, диакон: господу помолимся. иерей: яко свят еси Боже наш: Лик: Аминь. И канонарх: Всякое дыхание да хвалит Господа. Стих: Хвалите бога во святых его: хвалите его во утвержении силы его. Диакон же глаголет: И о сподобитися нам слышанию святаго евангелиа, Господа бога молим. Лик: Господи помилуй, трижды. Диакон: Премудрость, прости услышим святаго евангелиа. иерей: Мир всем. Лик: И духови твоему. Посем иерей именует евангелиста, от негоже евангелие. Лик: Слава тебе Господи, слава тебе. Диакон, Вонмем. И чтет иерей евангелие воскресно рядовое. По чтении лик паки: Слава тебе Господи, слава тебе. Посем глаголем: воскресение христово: и псалом 50. Сему же глаголему, исходит священник святыми дверьми со евангелием, держя е при персех своих, предыдущема же его от обою страну двема подсвещникома со свещами: имеяй же и фелонь отпущен долу, стоит посреде храма, держя святое евангелие при персех своих, подсвещники же от обою страну. И приходит предстоятель един, и творит поклоны два, таже целует евангелие, и паки творит поклон един: [не до земли творит поклоны, но малыя, приклоняя главу, дондеже рукою достигнет до земли. В неделю бо и владычний праздник, и в пятьдесятницу всю, колена не приклоняют.] По внегда же поклонится евангелию предстоятель, творит и к левому лику образ поклона, и к десному подобно, отходя на место свое. Таже и братия вси идут два два по чину, творят и тии подобне прежде два поклонения, и целуют святое евангелие: и паки едино поклонение, и к настоятелю поклон. Исполншуся же целованию, и 50-му псалму, Поем, Слава: молитвами апостолов: И ныне, молитвами Богородицы: Таже, Помилуй мя Боже, по велицей милости твоей: Посем стихира воскресна, глас 6: воскрес Иисус от гроба, якоже прорече: По целовании же святаго евангелиа, [осеняет иерей братию со евангелием,] и входит во святый олтарь. Диакон же глаголет на обычном месте молитву: спаси Боже люди твоя: Мы же, Господи помилуй, 12. иерей же возглас: милостию и щедротами: и по амине начинаем ирмос канона воскресна. И поем канон воскресн со ирмосом на 4: и крестовоскресен на 3: и Богородицы на 3: и минеи на 4. К 1-му же тропарю припев: Слава Господи святому воскреснию твоему. Таже припевы песней воскресных, [писаны во ирмологии.] И по иснолнении 3-я песни, диакон глаголет ектению малую: и возглас от священника внутрь олтаря: яко ты еси Бог наш: И изоблачаются священных одежд, изшедше же стоят на обычных местех. Таже кондак, и седален минеи святаго. И чтение. По 6-й же песни священник глаголет ектению малую пред святыми дверьми, и возглас: Ты бо еси царь мира: Таже кондак воскресн: И икос. И чтем пролог.

[Смотри] Ведомо же буди и сие: яко всегда по конце 8-я песни, егда хощем начати 9-ю песнь, творим вси метание единоравно глаголюще: Хвалим, благословим, покланяемся господеви: Таже ирмос 8-я песни, катавасиа. иерей же и диакон облачатся обычно. И по скончании 8-я песни покадив святую трапезу, возглашает диакон: богородицу и матерь света песньми возвеличим. И мы стихословим 9-ю песнь, поюще велегласно: Величит душа моя Господа: и честнейшую херувим. Творим же и поклоны малыя. иерей же, или диакон, кадит святый олтарь, и всю церковь, и братию. По 9-й песни возвращься, и отдав кадило, глаголет ектению малую: И возглас от священника: яко тя хвалят вся силы небесныя: Таже возглашает диакон: свят Господь Бог наш, в настоящий глас. Стих 1: яко свят Господь Бог наш. Стих 2-й: Над всеми людьми Бог наш. священник стоит на обычном месте. И посем светилен воскресн. Таже Слава, святаго, аще имать. И ныне, богородичен воскресн. На хвалитех: Всякое дыхание, на глас дне. Поставим же стихов, 8: и поем стихиры октоиха воскресны, 4: и анатолиевы, 4. На всякое же дыхание, совокупльшимся обоим ликом, припеваем и припевы сия: 1: воскресни Господи Боже мой, да вознесется рука твоя, не забуди убогих твоих до конца. 2: Исповемся тебе Господи всем сердцем моим, повем вся чудеса твоя. Слава, стихира евангельская, ряд. И ныне, богородичен, глас 2: Преблагословенна еси Богородице: Славословие великое. Таже тропарь воскресн, един от обою, гласа 1-го: Днесь спасение миру бысть: Или гласа 2-го: воскрес от гроба: Таже ектению глаголет иерей, или диакон: Помилуй нас Боже: И возглас: яко милостив и человеколюбец: Посем: Исполним утреннюю молитву: Возглас: яко Бог милости и щедрот: иерей: Мир всем. Лик: И духови твоему. Диакон: Главы наша господеви приклоним. иерей молитву тайно. Таже, возглас: Твое бо есть еже миловати: Посем, Премудрость. Лик: благослови. иерей: Сый благословен Христос Бог наш: И лик: Аминь: утверди Боже: Посем иерей: Пресвятая Богородице: Лик, честнейшую: И прочее обычное, и отпуст. И многолетствуем императора. Таже творим исхождение в притвор, поюще стихиру самогласну, яко обычай, и оглашение студитово. По чтении же тропарь святаго феодора, глас 8: Православия наставниче: И час 1. На 1-м часе тропарь воскресн. Слава, святаго, аще имать: аще же ни: И ныне, богородичен часов. По Отче наш: кондак воскресн. И совершенный отпуст. На Литургии: блаженна осмогласника на 8. По входе тропарь воскресн: Таже храма, и святаго дневнаго, аще имать. Кондак воскресн, и храма: Слава, святаго, аще имать: И ныне, храма Богородицы. Аще же ни, И ныне, кондак: Предстательство христиан: Христова же храма тропаря и кондака в неделю На Литургии не глаголем во весь год: понеже предваряет воскресн. Прокимен, апостол, аллилуиа, и евангелие гласа, и святаго, аще имать. Причастен: Хвалите Господа с небес: Таже святаго, аще имать.

[Смотри] На Бдении Всенощнаго Пения. егда бывает полиелей, и поют псалом: Хвалите имя господне: и Исповедайтеся господеви: тогда поставляется аналогий среди церкве, и на нем полагается праздничная икона господскаго дне, или Богородицына, или святаго, и святыя: и облачаются настоятель во святилищи и вси священнослужители в фелони по обычаю, и изшедше из олтаря во отверзенная царская врата, станут по дву странам около аналогиа. И раздает настоятель сослужителем, и стоящему во храме святем народу свещи. По раздаянии же взем кадило, емуже предходит диакон со свещею горящею, кадит первее на аналогии икону окрест, и идет во олтарь, и тамо святую трапезу, и олтарь весь кадит, и во храме святыя местныя иконы вся, таже священнопредстоятелей по обоим странам, и правый лик певцев, и левый. Посем кадит преходя стоящий народ весь, и паки святыя двери, и две точию иконы, христову и Богородицыну, и на аналогии. В тоже время поют величание, со избранными стихи от псалмов давидовых. По сем обычном пении ектениа от диакона малая глаголется, и седальны поются, и входят вси священнослужители во святый олтарь, и изоблачаются священных одежд, точию держай чреду иерей остает во облачении, к прочитанию евангелиа. Но и в неделю на Утрени, егда кроме полиелеа поется кафисма: блажени непорочнии: и по ней тропари: Ангельский собор: и во иныя дни кому поется величание кроме бдения, и тогда иерей с диаконом точию облачатся во священныя одежды, и вземлют, диакон светильник со свещею горящею, иерей же кадило, и покадив окрест святую трапезу и олтарь весь, исходят северными враты, и кадит царския двери, и по странам святыя иконы, и на аналогии, таже настоятеля и лики, и стоящий народ, якоже обычай, и паки входят во врата южныя страны.

Чин о панагии, бываемый во обителех по вся дни.

По отпусте божественныя литургии, исходит настоятель, и братии последующим по нем два, два. и глаголют псалом 144: Вознесу тя Боже мой, царю мой: весь до конца. Достигше же в трапезу, и кончану бывшу псалму, глаголем молитву трапезы: Отче наш: Слава, и ныне: Господи помилуй, трижды. благослови: Настоятель, или священник держай чреду глаголет: Христе Боже, благослови ястие и питие рабом твоим: И часть или просфора имущая возношена быти, влагается в панагиар, и стоит на устроенном месте. И по вкушении творяй служение, глаголет стих: молитвами святых отец наших, Господи Иисусе Христе Боже наш, помилуй нас. И мы: Аминь. И воставше глаголем: благословен Бог милуяй, и питаяй нас от юности нашея: Слава тебе Господи, слава тебе святый, слава тебе царю. Слава, и ныне: Господи помилуй, трижды. благослови. И положив поклон хотяй возвысити пресвятую, глаголет сице: благословите отцы святии, простите ми грешному. И мы: Бог простит ти, и помилует тя. И прием часть крайними персты рук, возвышает ю мало над образом святыя троицы, глаголя велегласно: Велико имя: Настоятель или иерей чредный: святыя троицы. И пренося над образ Богородицы крестовидно знаменует, глаголя: Пресвятая Богородице, помогай нам. И мы: Тоя молитвами Боже помилуй, и спаси нас. И глаголем: блажим тя вси роди Богородице Дево: Таже поем: Достойно есть яко воистинну: И по еже причаститися всем, глаголет настоятель или священник: Во многия молитвы пречистыя владычицы нашея Богородицы, и приснодевы марии. Мы же: Тоя молитвами Боже помилуй, и спаси нас. милостив и щедр господь, пищу даде боящимся его, и правда его пребывает в век века. Таже псалом: Возвеселихся о рекших мне, в дом господень пойдем. Трисвятое, Пресвятая Троице: По Отче наш: благодарим тя Христе Боже наш, яко насытил еси нас земных твоих благ: И аще убо есть владычний праздник, глаголется, Слава и ныне, кондак празднику: аще ни, глаголем сия: Слава, Боже отец наших, творяй присно с нами: И ныне, молитвами Господи всех святых: Господи помилуй, трижды. благослови. священник глаголет: благословен Бог милуяй, и питаяй нас от своих богатых даров, своею благодатию и человеколюбием, всегда, ныне и присно, и во веки веков, аминь.[/spoiler]

Раб божий Константин

Глава 3. О святем имущем бдение, аще прилучится в неделю.
[spoiler]В субботу вечера, На Велицей Вечерни предначинательный псалом, с припевы его. По обычной стихологии, На Господи воззвах, поставим стихов 8: и поем стихиры воскресны гласа, три: и анатолиев един: и святаго 6. Слава, святаго: И ныне, богородичен первый, гласа. Вход, прокимен, и чтения святаго 3. На литии стихира храма, и святаго стихиры: Слава, святаго: И ныне, богородичен, в тойже глас, от стиховных поемых в неделю. На стиховне стихиры воскресны: Слава, святаго: И ныне, богородичен в тойже глас. На благословении хлебов тропарь, Богородице Дево, дважды: И святаго, единожды: и чтение. На Утрени, на Бог господь, тропарь воскресн, дважды. Слава, святаго: И ныне, богородичен первый, по гласу тропаря святаго. По кафисмах, седальны воскресны, с припевы, и богородичны их, настоящаго гласа. И чтение во евангелии. По полиелеи, тропари: Ангельский собор: Таже впакои гласа, и седальны оба святаго. Слава, полиелейный седален: И ныне, богородичен его: И чтение святаго. Степенна гласа, и прокимен: Всякое дыхание: евангелие воскресно. воскресение христово: и псалом 50, и целование евангелиа по обычаю. Слава, молитвами апостол: И ныне, молитвами Богородицы: И стихира воскресна, и прочее. Канон воскресн со ирмосом на 4: и Богородицы на 2: и святаго на 8. Катавасиа, якоже имать устав. По 3-й песни кондак и икос святаго, и седален его дважды: Слава, и ныне богородичен, и чтение. По 6-й песни кондак воскресн, и икос. И чтем пролог. На 9-й песни поем честнейшую: Светилен воскресн: Слава, святаго: И ныне, богородичен воскресн. На хвалитех стихиры воскресны, 4: и святаго, со Славным 4: с припевы их вечерними. Слава, стихира евангельская: И ныне, Преблагословенна еси Богородице Дево: Славословие великое. По трисвятом тропарь воскресн точию, ектении, и отпуст. И исхождение обычное в притвор. И поем стихиру святаго. егда же елеепомазание бывает, глаголется и молитва: владыко многомилостиве: яко предписася на Велицей Вечерни. И оглашение студитово, и час 1-й. На часех тропарь воскресн: Слава, святаго: И ныне, богородичен часов. По Отче наш: кондак святаго. На прочих же пременяюще глаголем. На Литургии, блаженна гласа, на 6: и святаго песнь 3-я, на 4. По входе тропарь воскресн и храма Богородицы, идеже храм ея: и святаго. Кондак воскресн: Слава, святаго: И ныне, Богородицы храма. Аще ли ни: И ныне, Предстательство христиан: [Тропари же и кондаки храмом святых в сия дни не глаголются] Прокимен, апостол, аллилуиа, евангелие и причастен, прежде воскресн, таже святаго.

Чин благословения колива, сиесть кутии или вареныя пшеницы с медом смешенныя, и различными сладкими овощьми украшенныя, в честь и память господских праздников, или святых Божиих в церковь приносимыя.

Принесену бывшу коливу в церковь: Аще на вечерни, по Ныне отпущаеши: Трисвятое. По Отче наш: тропарь. Слава, и ныне, богородичен, по гласу тропаря святаго. Аще же На Литургии, по заамвонней молитве поется тропарь и кондак святаго. Диакон покадив глаголет: господу помолимся. Лик, Господи помилуй. священник став над коливом глаголет молитву сию: Вся совершивый словом твоим Господи: зри в служебнике. Лик, Аминь. И аще на вечерни, диакон: Премудрость. Лик, благослови. священник: Сый благословен: И прочее до отпуста. Аще же На Литургии, поет лик: Буди имя господне, трижды. и псалом: благословлю Господа: Раздав же антидор, творит обычный отпуст литургии.[/spoiler]
Глава 4. О святем имущем полиелей, аще прилучится в неделю.
[spoiler]На Велицей Вечерни, по кафисме, На Господи воззвах стихиры воскресны 3, и анатолиев 1: и святаго, 6: Слава, святаго, И ныне, богородичен 1-й гласа. Вход. Прокимен дне: И чтения святаго, 3. На литии стихира храма, и святаго аще имать. Слава святаго: И ныне, богородичен 1-й, по гласу святаго. На стиховне стихиры воскресны гласа. Слава, святаго: И ныне богородичен, по гласу святаго. На благословении хлебов, тропарь: Богородице Дево: трижды. На Утрени, на Бог господь: тропарь воскресн, дважды. Слава, святаго: И ныне, богородичен воскресн, по гласу тропаря святаго По. кафисмех седальны воскресны, и с богородичны их, и чтение во евангелии толковом. Полиелей святаго, впакои, и седальны святаго, по единожды. Слава, седален святаго полиелейный: И ныне, богородичен, и чтение святаго. Степенна гласа: и прокимен. евангелие воскресно. воскресение христово: псалом 50: стихира воскресна. Канон воскресн со ирмосом на 4: и крестовоскресн на два: и Богородицы на два: и святаго на 6. Аще святаго два канона: оба канона на 8, а крестовоскресн оставляем. По 3-й песни кондак и икос, и седален святаго, дважды: Слава, и ныне, богородичен его, и чтение. По 6-й песни кондак воскресн, и икос: И чтем пролог. На 9-й песни поем честнейшую: Светилен воскресн. Слава, святаго: И ныне, богородичен воскресн гласа. На хвалитех стихиры воскресны гласа, на 4: и святаго на 4, и со Славным, с припевы его вечерними. Слава, стихира евангельская. И ныне, Преблагословенна еси Богородице Дево: Славословие великое. Тропарь воскресн точию. ектении: И отпуст. И исхождение, и оглашение, и час 1 в притворе. На 1-м часе тропарь воскресн: Слава, святаго: И ныне, богородичен часов. По Отче наш, кондак святаго. На прочих же, кондак воскресн, и святаго, пременяюще глаголем. На Литургии блаженна гласа, на 6: И святаго, песнь 3, на 4. По входе тропарь, и кондак, якоже предписася во главе 3: прилагаем же тропарь и кондак, и храма святаго.
[/spoiler]
Глава 5. О святем поемом на 6. Аще будет в неделю, не имеяй полиелеа.
[spoiler]В субботу вечера, на Велицей Вечерни, по кафисме: На Господи воззвах, стихиры воскресны, 3: и анатолиевы, 3: и святаго, 4. Слава, святаго: И ныне, богородичен первый гласа. Вход. Прокимен дне, и ектениа, Рцем вси: На литии стихира храма: Слава, святаго, аще имать. Аще же ни, Слава, и ныне, богородичен. [Аще же имать святый славословие, поем стиховну его в литию.] И обычныя молитвы литии. На стиховне стихиры воскресны. Слава, святаго: И ныне, богородичен воскресн, по гласу святаго. И прочее бдения по обычаю. На Утрени, на Бог господь, тропарь воскресн, дважды. Слава, святаго: И ныне, богородичен первый, по гласу тропаря святаго, и прочее и до канона воскресно. Канон воскресн со ирмосом на 4: и крестовоскресн на два: и Богородицы на два: и святаго на 6. Катавасиа по уставу. По 3-й песни кондак и икос, и седален святаго, дважды, и богородичен его. И чтение святаго. По 6-й песни кондак воскресн, и икос: и чтем пролог. На 9-й песни поем: честнейшую: Светилен воскресн: Слава, святаго: И ныне, богородичен воскресн гласа. На хвалитех стихиры воскресны 4, и святаго со Славным, 4. Аще ли не имать святый на хвалитех стихир, поем стихиры воскресны по обычаю. Слава, стихира евангельская: И ныне, Преблагословенна еси Богородице Дево: Славословие великое, тропарь воскресн точию. ектении обе, и отпуст, и оглашение: и час 1-й в притворе. На 1-м часе тропарь воскресн: Слава, святаго: И ныне, богородичен часов. По трисвятом кондак воскресн, и прочее. [Аще имать святый славословие, по трисвятом кондак святаго: На прочих же часех, кондак воскресн и святаго пременяюще глаголем,] и отпуст. На Литургии блаженна гласа, на 6: и святаго песнь 3-я, на 4. По входе тропарь воскресн, и храма Богородицы, идеже храм ея: таже храма святаго: посем рядоваго святаго. Аще ли есть другий святый, и тропарь ему прилучится, глаголем тропарь и другаго святаго. Таже кондак воскресн и храма: Слава, кондак дневнаго святаго, И ныне, Богородицы храма. Аще ли храма Богородицы несть: Слава, кондак рядоваго святаго: И ныне, Предстательство христиан: Прокимен, апостол, аллилуиа, евангелие, и причастен, прежде воскресн, и потом святаго.

[Смотри] Подобает ведати: яко стихологиа, сиречь кафисма, в неделю вечера никогдаже бывает. Такожде и на господския праздники, и великих святых, или в храме святаго, или святыя: яве яко в нихже бывают бдения. егда же прилучится бдение, кроме субботы вечера, стихологисуем: блажен муж 1-й антифон. В субботу же вечера стихологисуем всю кафисму: блажен муж.[/spoiler]
Глава 6. О бдениих всенощных, бывающих чрез все лето.
[spoiler]Подобает ведати: яко всего лета суть седмиц 52, в нихже творим на куюждо неделю бдение, яко да изочтенным бывшим всем воскресным бдениям всего лета, обретаются 52. Бывают же убо и во владычних праздниках, на кийждо месяц бдения. Вкупе же убо и со инеми бывают всего лета бдений 68. Суть же и ина бдения, яже укажутся по именом, во уставе на ряду своем, где кое писано есть, ихже аще предстоятель произволит, аще зрит своя церковники бодростне о спасениих своих тщащихся. есть же и ино бдение к сим святаго храма, во обители, еже должно есть бывати, и никакоже оставлятися в память его.[/spoiler]
Глава 7. идеже всенощныя не бывают.
[spoiler]Вестно же буди, яко в малых обителех и соборных и приходских храмех, во дни недельныя, идеже всенощныя не бывают, или настоятель не изволит, поется вечерня великая, такожде и утреня во свое время сице:

В субботу вечера, по отпусте 9-го часа, входит в церковь предстоятель и чредный священник, и вси: емляй же священник благословение от предстоятеля, отходит пред царская врата, и творит поклонения три. Взем же и епитрахилий, и благословив и, и целовав верх, идеже есть крест начертан: и возложив на выю свою глаголет: благословен Бог наш: отверзаяй и внутреннюю завесу сущую тафтою, или иным видом устроеную. Предстоятель же глаголет: Приидите поклонимся: и предначинательный псалом. Аще же предстоятеля не случится тамо, глаголет ин от старейших священников: священник же чредный стоит пред царскими вратами, глаголя тайно молитвы светильничныя, стоя непокровен. Глаголет же и ектению, и возглас подобне, и прочее вечерни все поем, якоже предписася во бдении великия вечерни: точию зде по ектении: Исполним вечернюю молитву нашу: поем на стиховне стихиры воскресны, и по исполнении их глаголет предстоятель: Ныне отпущаеши: Чтец глаголет: Трисвятое с прочими. священник, возглас: яко твое есть царство: внутрь святаго олтаря. И чтец, отпустительныя тропари по обычаю. Диакон же, от вне стоя пред образом спаса Христа, возглашает: Премудрость. Лик: благослови. священник, от внутрь глаголет: Сый благословен Христос Бог наш, всегда, ныне и присно, и во веки веков: Лик: Аминь. утверди Боже, благочестивейшаго, самодержавнейшаго, великаго господря нашего императора николая александровича, и святую православную веру: и прочая. И священник глаголет тихим гласом: Пресвятая Богородице, спаси нас. Лик: честнейшую: И паки священник: Слава тебе Христе Боже, упование наше, слава тебе. И глаголет лик: Слава, и ныне: Господи помилуй, трижды. благослови. священник же отверз святыя двери, и опустив фелонь, стоящу диакону от вне одесную, и орарь держащу обычно, глаголет иерей отпуст по дню. [Смотри] Посем многолетие. И по еже вечеряти братиям, емлет паки благословение церковник от предстоятеля, аще есть: аще же ни от чреднаго священника. И клеплет в малый кампан, или в ручное клепало, по обычаю. И собравшимся братиям в притвор, творит начало чредный священник, и поем повечерие, яко обычай с каноном. И по обычном отпусте предстоятель глаголет: молитвами святых отец наших, Господи Иисусе Христе Боже наш, помилуй нас. Братия же исходяще, два, два, по чину, творят поклон пред предстоятелем, и емлют от него благословение и прощение: Таже предстоятель, сотворив образ поклона, просит и сам прощения от них.

Во утрии же: Клеплет параекклисиарх в кампан, яко обычай, и в било, и собираются братия в притворе, творит же священник начало: благословен Бог наш: И абие чтец глаголет: Слава тебе Боже наш, слава тебе. царю небесный: Трисвятое, и по Отче наш: Господи помилуй, 12. Приидите поклонимся: трижды: и псалом 50. Таже поется троичный канон, со благоговением и умилением. По каноне же поют троичное величание, сиесть: Достойно есть яко воистинну, славити тя бога слова: И прочия тропари. Таже трисвятое, и Отче наш: и впакои гласа: Господи помилуй, 40. Слава, и ныне, честнейшую херувим: И возглас от священника: Боже ущедри ны: И молитва глаголется от иереа: Всемогущая и животворящая: И отпуст, и прощение обычное. Таже иерей глаголет ектению: Помолимся о благочестивейшем: Мы же: Господи помилуй, кротким и тихим гласом. И по исполнении тоя глаголет предстоятель: молитвами святых отец наших, Господи Иисусе Христе Боже наш, помилуй нас. И по отпусте входим во храм. священник же вшед во святый олтарь, и возложив епитрахилий и вложив фимиам в кадильницу, предуготовлене ей от церковнаго служителя, глаголет и обычную молитву кадила, стоя пред святою трапезою начертаваяй крест с кадильницею, глаголя: благословен Бог наш всегда, ныне и присно, и во веки веков: отверзаяй прежде и тафтою устроеную завесу, сущую внутрь царских врат. Таже кадит святую трапезу окрест, и весь жертвенник: И исходит северною страною, и кадит святыя иконы, и предстоятеля, и вся яко обычай. Чтец же, по благословен Бог наш, глаголет, Аминь. Приидите поклонимся: и обычныя псалмы: услышит тя господь: и Господи силою твоею: Трисвятое, и Отче наш: [Смотри] Долженствует же внимати чтец и священник, егда имать рещи: яко твое есть царство: быти ему посреде храма.] Таже тропари: спаси Господи люди твоя, и прочая. И священник кадит паки предстоятеля, и святыя иконы: и входит во святый олтарь южною страною, и стоит пред святою трапезою с кадильницею, и глаголет ектению: Помилуй нас Боже, по велицей милости твоей, и прочая. Таже возглас: яко милостив и человеколюбец Бог еси: Певцы, Аминь. Именем господним благослови, отче. Таже священник начертаваяй с кадильницею крест пред святою трапезою, глаголет возгласно: Слава святей, и единосущней, и животворящей, и нераздельней Троице, всегда, ныне и присно, и во веки веков. Предстоятель же глаголет: Слава в вышних богу: И шестопсалмие, яко обычай. священник же полагаяй кадильницу на месте, исходит из олтаря, и стоит на обычном месте своем. По внегда же рещи предстоятелю три псалмы, и начнет: Господи Боже спасения моего: отходит священник пред царския и святыя двери: И поклонився и возложив епитрахилий, глаголет тайно утренния молитвы, и ектению, яко обычай. И прочее утрени, все поем, якоже предписася во бдении утрени, на обороте, даже до конца: и час 1-й, и На Литургии.

[Смотри] Ведомо же буди, яко, Верую во единаго Бога, и Отче наш, в литургии: В вечерне предначинательный псалом. Свете тихий: Сподоби Господи: Ныне отпущаеши: На Утрени, Шестопсалмие: Тебе слава подобает: Слава в вышних Богу, и на земли мир: благо есть исповедатися господеви: небесный царю: Предстоятель глаголет. Трисвятое же и Отче наш, на вечерни, по Ныне отпущаеши, и на Утрени, по благо есть исповедатися господеви, чтец глаголет.

[Смотри] Подобает ведати, яко приходящему господскому празднику, или Богородицы, и оба праздника предтечева, рождество и усекновение, и святых апостол петра и павла, и Иоанна богослова, или аще будет храм: должно есть прочитати апостол, и евангелие рядовое, хотящее быти тогда в самый день праздника, за день напредь прежде праздника, под зачало. На самый же праздника день, чтем праздника единаго, якоже и вся служба.[/spoiler]
Глава 8. О литургиах.
[spoiler]подобает ведати, и о святей божественней службе:

Яко в субботу убо, в начале 4-го часа должно есть начинати: яко да станет трапеза в начале 5-го часа. В неделю же, в начале 3-го часа, должно есть начинати, яко да станет трапеза в начале 4-го часа. Тако же подобает бывати и в господския великия праздники, христовы, и богородичны, и предтечевы, и обоих верховных апостол, петра и павла: и в сих убо купно, яко во дни недельныя должно есть творити. В средния же праздники в начале 5-го часа, яко да станет трапеза в начале 6-го часа. В малыя же праздники, равно прочим всем дневным в начале 5-го, и отдается во свое время на кийждо день. Трапезу же подобает уготовляти во время свое, противу коемуждо дню, или постен есть, или прост: отходит яве кийждо по скончании святыя службы, и во время трапезы паки собираются. Сему же должно есть бывати, егда хотят ясти в 9-й час, или вечер. Сице же убо подобает творити и в малыя четыредесятницы. Сей предел о литургиах и трапезе писася во странах иерусалимских, и лепотственно тако быти везде в равнины весненныя и есенныя. В лете же и зиме в велицей россии зде быти знамению по разсуждению времене, в лете убо долготы ради дне лепотственно продолжити: в зиме же за малость дне упредити, разсуждением настоятеля.[/spoiler]

Раб божий Константин

Глава 9. дней седмичных, и в нихже поем аллилуиа.

[spoiler]о еже како подобает знаменати на всяк день. зде же указание о вечерни, и о утрени дней седмичных, и в нихже поем аллилуиа: и о 1-м часе.

Пред вечером мало, кандиловжигатель взем благословение от настоятеля, знаменует в кампан, и собравшимся братиям в притвор церковный, чредный же священник востав творит начало: благословен Бог наш: И учиненный чтец глаголет: Слава тебе Боже наш: и прочее. И чтет 9-й час с междочасием его, аще и Бог Господь будет, и по конце его знаменает в два, или 4 кампана, по уставу.

[Смотри] Вестно буди, егда 9-й час глаголется в притворе, тогда творит священник 9-го часа отпуст.

По отпусте же вшед во храм, творит начало вечерни по обычаю. [Аще же глаголется 9-й час во храме, отпуст 9-го часа не бывает.] По скончании же клепания востав священник, вшед во храм творит пред царскими враты поклонения три: вземлет же и епитрахилий сущий у царских врат, благословив и, и целовав верх, идеже начертан крест, возложив на выю свою, глаголет: благословен Бог наш: отверзает же и внутреннюю дверь, сиречь завесу, тафтою, или иным видом устроену. Предстоятель же глаголет: Приидите поклонимся, трижды: И предначинательный псалом. аще есть аллилуиа, и творим 3 поклоны, стояще на местех своих рядом, уравняющим поклоны всем вкупе со опасением. [Тако убо поклоняющимся, несмущения ради церковнаго.] Сему же глаголему, чтет священник молитвы светильничныя пред святыми дверьми стоя непокровен, и по исполнении того, Слава и ныне, аллилуиа трижды, и поклоны 3. Таже священник глаголет ектению великую, и возглас. И посем кафисма обычная ряду: и по коейждо Славе, аллилуиа трижды, и поклоны три. священник же положив епитрахилий на месте его, и отшед стоит на обычном месте своем, дондеже стихословится кафисма псалтира: в конец же третияго антифона, отходит пред святыя двери, возложив на ся епитрахилий, глаголет малую ектению и возглас. Таже вшед во олтарь, вложив фимиам в кадильницу, и благословляяй е глаголет и обычную молитву кадила: и кадит по обычаю святилище, и храм весь, настоятеля и лики, и всю братию. И посем: Господи воззвах, поем во глас минеи, стихиры Богородицы: И оставим стихов 6: И поем Богородицы стихиры, подобны 3: и святаго подобны 3: Аще убо имать святый самогласну стихиру, и поем ю на Славу, купно оба лика. Аще ли ни: Слава, и ныне, богородичен: подобный стихирам минеи. Аще среда, или пяток, поем крестобогородичен. Таже, Свете тихий: глаголет предстоятель, и поем прокимен дне. [Смотри] Аще есть неделя: аллилуиа бо в неделю вечера не поется, но прокимен: Се ныне благословите Господа вси раби господни. Глаголет канонарх стих: Стоящии во храме господни: Аще же кроме недели, вместо прокимена аллилуиа, на глас 6. Стихи же глаголет сия: В понедельник вечера: Господи да не яростию твоею обличиши мене: Аллилуиа. Стих: И во веки веков. Мы же высочайшим гласом поем Аллилуиа. [Сице припеваем на всяк день, егда поем Аллилуиа.] Во вторник и в четверток вечера: Возносите Господа бога нашего, и покланяйтеся подножию ногу его, яко свято есть. В среду вечера: Во всю землю изыде вещание их. И тако творит поклон ко святым дверем. и обращься творит братиям един поклон: И отшед станет на месте своем. Таже настоятель, или учиненный чтец глаголет: Сподоби Господи в вечер сей: в немже творим и метания 3. Таже обычной ектении бывшей, и возглашению ея. И совокупльшеся оба лика среди церкве по обычаю, поем на стиховне стихиры во октоихе: Слава, и ныне, богородичен. Аще ли среда, или пяток, крестобогородичен. И сотворше друг другу метание, идем на места своя. Таже предстоятель, или чтец глаголет: Ныне отпущаеши: и трисвятое, и поклоны 3. По Отче наш, возглас: яко твое есть царство: Таже тропарь, глас 4: Богородице Дево радуйся: и поклон един. Слава, крестителю христов: и поклон един. И ныне, Молите за ны: и поклон един. Под твое благоутробие прибегаем: без поклона. Господи помилуй, 40, кротким и тихим гласом, и равно вси. Таже, Слава, и ныне: честнейшую херувим: Именем господним благослови отче: И глаголет иерей: Сый благословен: Мы же: Аминь. И настоятель: небесный царю: И по конце того творим 3 поклоны великия, глаголюще в себе молитву, якоже указася во главе постной: Господи и владыко живота моего: И прочих поклонов 12, глаголюще в себе кийждо: Боже, очисти мя грешнаго. И по сих молитву вышеписанную, глаголем во едино: и поклон един великий. Таже трисвятое, и поклоны 3, и по Отче наш: Господи помилуй, 12. Аще ли в неделю вечера, по молитве, небесный царю: творим 3 поклоны великия. Прочих же поклонов 12 не творим: ниже трисвятое конечное глаголем: Но глаголет иерей: Слава тебе Христе Боже: И отпуст. И обычное исхождение в притвор. И бывает литиа о усопших. И конечный отпуст.

[Смотри] Сице убо творим воследование на вечерни всего лета, егда поем аллилуиа. егда же поется Бог господь: поем прокимен дне. Таже, Сподоби Господи: и стиховна дне. По Ныне отпущаеши: трисвятое, и по Отче наш, тропарь святаго: Слава, и ныне, богородичен, и ектениа от священника: Помилуй нас Боже, по велицей милости твоей: и прочая. И по возгласе, Премудрость. И мы: благослови. священник: Сый благословен Христос Бог наш, всегда, ныне и присно, и во веки веков. И мы: Аминь. утверди Боже, благочестивейшаго, самодержавнейшаго, великаго господря нашего императора николая александровича, и святую православную веру, православных христиан во век века. И отпуст по обычаю. В неделю же вечера, поклоны начинаем, от Сподоби Господи в вечер сей: По отпусте же вечерни входим в трапезу, и ядим представленная. Таже востав параекклисиарх, прием благословение, изшед ударяет в било. И вшед в притвор, поем повечерие по чину. На нем же поем канон молебный пресвятей Богородице, во осмогласнике, и прочая по обычаю. И отпуст. В прочия же дни поем повечерие великое.

[Смотри] Должно есть и сие ведати: По отпущении ея, не подобает монахом творити беседы друг со другом, но с молчанием исходити в келлии своя, и упражнятися на молитву и на чтение, и тако упокоятися: яко да со вниманием на утреннее славословие востанем бодростне. Во утрии же знаменует параекклисиарх в малый кампан, редким ударением, на мног час: и собираемся вси в притвор церковный: И став по чину кийждо на своем месте, сотворше обычныя своя три поклоны, седим мало, за еже утишитися чувством нашим. Таже востав иерей, творит начало: И по амине чтец глаголет: Слава тебе Боже наш, слава тебе. Таже, царю небесный: и трисвятое, и поклоны 3: по Отче наш: Господи помилуй, 12. Слава, и ныне: Приидите, поклонимся: трижды, и поклоны 3. Таже, псалом 50. и непорочны: На нихже, по коейждо Славе, поклоны 3. Таже, Верую во единаго бога: и трисвятое, и поклоны 3. По Отче наш: тропари: Се жених грядет: и прочая. И по честнейшую, поклоны 3 великия с молитвою: Господи и владыко живота моего: и прочих 12. И последи молитву всю вышеписанную: Господи и владыко живота моего: и поклон великий. И посем, владыко Боже отче вседержителю: Таже, Приидите, поклонимся: трижды. и поклоны три. И по псалмех, Слава, и ныне: трисвятое. И поклоны 3: по Отче наш, тропари: Помяни Господи, яко благ: Господи помилуй 12. и молитва: Помяни Господи, в надежди: Посем, Преславная: и упование мое: Таже, иерей: Слава тебе Христе Боже: И отпуст. И приимше прощение обычное, глаголет иерей ектению: Помолимся о благочестивейшем: и прочая. И мы: Господи помилуй, тихо. Кончавшися же сей, глаголет предстоятель: молитвами святых отец наших: [Сице полунощница глаголется по уставу иерусалимских обителей по вся дни, и писася во всех часословехъ]. По скончании же полунощницы, аще поем ю в притворе: вшед во храм, станем кийждо на своем месте, и творит кийждо три поклоны, прямо святаго олтаря, и на оба лика, со благоговением: И седаем вси на местех своих мало молчаще. Параекклисиарх же уготовль кадильницу, и исходит, благословився у предстоятеля: и клеплет в кампаны, ударяет же тяжким ударением редко, елико рещи, псалом 50, весь. иерей, егоже есть чреда, востав творит обычный поклон предстоятелю. Вшед во святый олтарь, и вземлет кадило, глаголя молитву кадила, стоя ожидает конца клепания. И став пред святою трапезою, и сию покадив, глаголет: благословен Бог наш: [отверзаяй прежде, и тафтою завесу сущую устроенную внутрь царских вратъ]. И кадит святую трапезу крестообразно, и весь жертвенник: и исходит северною страною, и кадит святыя иконы и предстоятеля, и вся, яко обычай. Чтец же начинает: Аще есть аллилуиа, глаголет трисвятое без поклонов. Аще же ни, Приидите, поклонимся: трижды. [Или будет аллилуиа, или Бог господь], глаголет псалом 19: услышит тя Господь в день печали: и 20: Господи, силою твоею возвеселится царь: Таже, Слава, и ныне: трисвятое без поклонов, и Отче наш: [Долженствует же внимати чтец и священник, егда имать рещи: яко твое есть царство: быти ему посреди храма] и чтец глаголет тропарь: спаси Господи люди твоя: Слава, кондак: Вознесыйся на крест: И ныне, богородичен: Предстательство страшное: священник же вшед во олтарь южною страною, глаголет ектению малую, с кадилом пред святою трапезою: Помилуй нас Боже, по велицей милости твоей: и прочая. Таже возглас: яко милостив: и певцы: Аминь. Именем господним благослови отче. Таже иерей начертаваяй с кадильницею крест, пред святою трапезою, глаголет возгласно: Слава святей и единосущней, и животворящей, и нераздельней Троице: И абие начинает предстоятель шестопсалмие: Слава в вышних Богу, и на земли мир: трижды. Таже, Господи, устне мои отверзеши и уста моя возвестят хвалу твою, дважды. И по ряду глаголет шестопсалмие тихим гласом и легким, косно, и во услышание всех. священник же отдав кадило исходит из олтаря, и стоит на обычном своем месте. [егда же глаголется шестопсалмие, тогда подобает со вниманием слушанию прилежати: покаяния бо псалмы исполнены суть, и умиления. Глаголем же сия псалмы со благоговением и со страхом божиим, яко самому Богу невидимо беседующе, и молящеся о гресех наших.] По внегда же рещи предстоятелю 3 псалма: Слава, и ныне: аллилуиа, трижды, и Господи помилуй, трижды. Слава, и ныне, без поклонов. И начнет: Господи Боже спасения моего: отходит священник пред царския святыя двери, творя поклон, возложив на ся епитрахилий, глаголет молитвы утренния тайно, стоя непокровен. По скончании же шестопсалмиа, Слава, и ныне, аллилуиа, трижды. И глаголет ектению великую: Миром господу помолимся: Таже канонарх, глаголавый на вечерни прокимен, сотворив обычный поклон предстоятелю, и став прямо святых дверей сказует, Аллилуиа, во глас октоиха, глаголя и стихи сия: Стих 1: от нощи утреннюет дух мой к тебе Боже, зане свет повеления твоя на земли. Стих 2: Правде научитеся живущии на земли. Стих 3: Зависть приимет люди ненаказанныя. Стих 4: Приложи им зла, Господи, приложи зла славным земли. И поем троичны, в настоящий глас октоиха. Аще ли Бог господь: поем Бог господь, во глас тропаря святаго, со стихи его: И глаголем тропарь святаго, дважды. И богородичен по гласу тропаря. священник же положив епитрахилий на месте его, от страны святых дверей, отходит и стоит на своем месте. И посем лик глаголет: Господи помилуй, трижды. Слава, и ныне: И начинаем стихословити кафисмы. По 1-й кафисме поем седален во октоихе, иже на ряду: Слава, и ныне, богородичен. [По 1-м же стихословии кафисмы, и по 2-м, во вся дни ектении не глаголет священник: но токмо во бдения, и святых праздники имущих полиелей, и славословие, тогда глаголет и ектению, на всякую кафисму псалтира: во вся же дни по конце кафисмы, Аллилуиа, яко обычай. Господи помилуй, трижды. и Слава, и ныне, глаголет сам стихословляяй.] и посем чтение. По чтении же глаголют клирицы: Господи помилуй, трижды. Таже, Слава: посем чтец глаголяй 1-ю кафисму, глаголет: И ныне и присно, и во веки веков, аминь. И глаголет 2-ю кафисму. Но скончании же 1-го чтения, покланяется чтый пред святыми дверьми, трижды: посем покланяется предстоятелю: аще же ни, на оба лика. По скончании же 2-я кафисмы, поем 2-й седален во октоихе рядовый. Таже, чтение. И воставше глаголем, Господи помилуй, трижды. Слава, и ныне: псалом 50: емуже кончану бывшу, стихословим песни: господеви поем, и держим стихов, 12, кроме Слава, и ныне: И поем каноны три: Во октоихе два: 1-й со ирмосом на 6: И другий без ирмоса, на 4: И минеи святаго на 4, да будут вси на 14. Сице поем и 3-ю песнь: И последи ирмос 3-я песни минеи. По 3-й песни ектениа малая. И седален минеи: Слава, и ныне, богородичен. Аще ли среда, или пяток, крестобогородичен: и чтение. По 6-й песни ирмос, и ектениа, и кондак святаго: И икос, аще есть: аще ли ни, мученичен во глас октоиха. Таже чтется пролог. И потом поем и прочия две песни: иерей же в конец 8-я песни, входит во святый олтарь, и по внегда клириком рещи: Хвалим, благословим, покланяемся господеви: Поюще ирмос 8-я песни, и покланяются вси. иерей же возложив на ся епитрахилий, кадит святую трапезу возглашая: богородицу, и матерь света: И кадит олтарь весь, и церковь, и всю братию по чину. И мы стихологисуем 9-ю песнь, поюще велегласно: Величит душа моя Господа, и возрадовася дух мой о бозе спасе моем. Припеваем же к сему: честнейшую херувим: с поклоны. И по скончании 9-я песни, поем ирмос минеи. Таже, Достойно есть яко воистинну: оба лика вкупе: И творим поклон вкупе вси до земли. Посем ектениа малая, внутрь святаго олтаря. Таже, светилен дне: Слава, святаго, аще имать. Аще ли ни, Слава, и ныне, богородичен, или крестобогородичен. Аще ли есть аллилуиа, поем светильны троичны гласа, по обычаю. Посем учиненный чтец глаголет псалом: Хвалите Господа: и Воспойте господеви: и Хвалите бога во святых его. [Смотри] И аще имать святый стихиры на хвалитех, тогда глаголем сии 3 псалмы, на лики. По Слава, и ныне, глаголет настоятель: Слава тебе показавшему нам свет.] Аще же ни: По псалмех глаголет настоятель: Тебе слава подобает Господи Боже наш, и тебе славу возсылаем, отцу, и сыну, и святому духу, ныне и присно, и во веки веков, аминь. Слава тебе показавшему нам свет. Слава в вышних Богу, и на земли мир, в человецех благоволение: и поклоны 3. Посем, Господи прибежище был еси нам: и Сподоби Господи в день сей: Таже священник глаголет ектению: Исполним утреннюю молитву: Посем стихиры на стиховне, во октоихе настоящаго гласа, совокупльшимся обоим ликом по обычаю их, поем со обычными припевы их: 1, Исполнихомся заутра милости твоея Господи: до Буди светлость. Глаголем 2, И буди светлость Господа бога нашего на нас: глаголем до конца псалма. Слава и ныне, богородичен, или крестобогородичен. Таже паки настоятель глаголет: благо есть исповедатися господеви: И трисвятое. По Отче наш: священник возглас: яко твое есть царство: [Смотри] Аще несть аллилуиа, глаголем тропарь святаго: Слава, и ныне, богородичен, или крестобогородичен. Посем священник, ектению: Помилуй нас Боже: И возглас: яко милостив: И по возгласе, Лик: Аминь. иерей: Премудрость. Лик: благослови. иерей: Сый благословен: И лик: утверди Боже: Таже час 1-й]. Аще ли есть аллилуиа, то по внегда рещи священнику возглас: яко твое есть царство: И по амине глаголем тропарь: В храме стояще славы твоея: Господи помилуй, 40. Слава, и ныне, честнейшую, и Именем господним благослови отче. священник: Сый благословен Христос Бог наш, всегда, ныне и присно, и во веки веков. И мы, аминь. небесный царю: Таже творим поклоны 3 великия, с молитвою святаго ефрема: Господи и владыко живота моего: И прочия 12, глаголюще в себе кийждо: Боже очисти мя грешнаго. По сих молитву всю вышеписанную глаголем во едино, и поклон един. И посем начинает настоятель: Приидите поклонимся трижды. И поклоны 3. И глаголет чтец 3 псалмы обычныя, 1-го часа. Глаголы моя внуши Господи: и прочее. По скончании же, Слава, и ныне, аллилуиа, трижды. И поклоны три. И посем глаголет священник, или нареченный канонарх прокимен: Заутра услыши глас мой: И мы тойже, по клиросом без пения, просто: Заутра услыши глас мой: священник же, или предреченный канонарх глаголет, Стих 1: Глаголы моя внуши Господи: Лик: Заутра: Стих 2: яко к тебе помолюся Господи: Лик паки, Заутра: И поклоны 3.

Вестно же буди сие: егда канонарх глаголет стих, в то время мы колена преклоняем. егда же певцы глаголют, тогда он колена преклоняет. священник, Слава: И чтец, И ныне, богородичен: Что тя наречем: И поклоны три. Таже, Стопы моя направи: и Трисвятое: и поклоны 3. По Отче наш, священник: яко твое есть царство: И по амине, тропарь. В понедельник убо и во вторник, и четверток, глаголем настоящий богородичен: Преславную божию матерь: В среду же, и пяток, глаголи, Скоро предвари: В субботу: яко начатки естества: Господи помилуй, 40. и молитва: Иже на всякое время: Таже, Господи помилуй, трижды. Слава, и ныне, честнейшую херувим: и Именем господним благослови отче. священник, Боже, ущедри ны: И творим поклоны три великия, с молитвою святаго ефрема: Господи и владыко живота моего: и прочих, 12. Таже глаголем молитву вышеписанную святаго ефрема во едино: и поклон един до земли. [Смотри] Сице же поем 3, 6 и 9 часъ. И посем начинает предстоятель, или екклисиарх последнее трисвятое, И поклоны три. По Отче наш, священник возглас: И мы, Аминь. Господи помилуй, 12. Таже молитва: Христе свете истинный: И отпуст. И бывает обычное исхождение в притвор.

[Смотри] И поем литию о усопших. Взем священник кадильницу, исходит в притвор, предходящема ему лампадома: Мы же последуем, поюще стихиру самогласну святаго, егоже есть храм, исходим в притвор церковный. И священник речет: благословен Бог наш: Мы же, Аминь. Трисвятое. По Отче наш: Возглас: яко твое есть царство: И тропари сия: Со духи праведных: В покоищи твоем Господи: Слава: Ты еси бог: И ныне: едина чистая: Посем священник глаголет ектению: Помилуй нас Боже: еще молимся о упокоении душ усопших рабов Божиих : яко да Господь бог: милости божия, царства небеснаго: господу помолимся. И молитва: Боже духов: Возглас: яко ты еси воскресение: По возгласе священник: Слава тебе Христе Боже: И отпуст: воскресый из мертвых: По отпусте вся братия рекут гласом: Вечная ваша память достоблаженнии отцы, и братия наша присно поминаемии: трижды. Таже рекут помалу и полегку вси: Бог да ублажит и упокоит их, и нас помилует, яко благ и человеколюбец. И конечный отпуст.

Сей устав перваго часа бывает, егда есть аллилуиа.

Аще ли есть Бог господь: По скончании трех псалмов, глаголем на Славе тропарь святаго: И ныне, богородичен, часов: Что тя наречем: И по трисвятом кондак святаго. И прочее вся служба, якоже предуказахом. Поклонов же не творим, ниже конечное трисвятое: но все просто поем. Такожде поем 3-й, 6-й и 9-й час.[/spoiler]
Глава 10. О еже како чтутся евангелиа, и того толкования.
[spoiler]Подобает ведати, яко во святую и великую неделю пасхи начинается еже от Иоанна евангелие, и чтется до пентикостиа. Толкования же того евангелиа златоустова чтутся на утренях, в тыя дни. От недели же пентикостиа, до месяца септемвриа, чтется еже от матфеа евангелие, тогоже толкованиа златоустаго чтутся на утренях. От новаго же лета, сиречь, от недели яже по воздвижении, до недели сырныя, чтется еже от луки святаго евангелие. На утренях же чтется толкование феофилактово, метафраст логофетов, и толкования посланий святаго апостола павла, яже от златоуста. Такожде и маргарит златоустов. От первыя же недели четыредесятницы: В субботах, и неделях, чтется еже от марка евангелие. На утренях же шестодневник златоустов. В прочия же дни 40-цы, на всякую утреню прочитаются четыре чтения, два во святом ефреме, и в лавсаице два. Лествицу же чтем на часех. На трапезе же чтутся чрез все лето жития святых, и патерики.

[Смотри] Ведомо же буди: яко в неделях святаго и великаго поста, и в навечериях господских праздников, рекше, Христова рождества и богоявления: Великаго василиа литургиа поется: такожде и в память его. Преждеосвященная же литургиа поется точию во святей 40-це, в среды, и пятки. в прочия же дни лета всего совершается литургиа златоустаго.[/spoiler]
Глава 11. О канонех всея седмицы
[spoiler]Господа како поются канони октоиха с минеею.

В понедельник на Утрени: Канон покаянен поем со ирмосом на 6: И безплотных на 4: И минеи святаго на 4. Аще ли поется святаго на 6, оставляются во октоихе оба мученична. И поем святаго на 6. Аще ли поется святаго полиелей: тогда не поется октоих: Но поем канон Богородице, или аще предпразднство, или попразднство со ирмосом на 6: ирмос по дважды, тропари на 4: И святаго на 8. Сице убо во всю седмицу поем полиелейнаго святаго канон на 8, якоже в понедельник сей явлено есть. Аще прилучатся два святых, оставляется канон безплотных: И поем канон покаянен, со ирмосом на 6: И святых по 4 стиха.

Во вторник на Утрени: Канон покаянен со ирмосом на 6: и предтечи на 4: и минеи святаго на 4. Аще ли поется святый на 6, оставляются во октоихе оба мученична: и поем святаго на 6. Полиелей же по предписанному. Такожде бывает, аще и два святых, каноны им по четыре стиха.

В среду на Утрени: Канон креста, со ирмосом на 6, и Богородицы на 4: и святаго на 4. Аще ли поется святый на 6, оставляются оба мученична во октоихе, и поется крестный канон со ирмосом на 4, и Богородицы на 4: и святаго на 6. Такожде бывает, аще будет и два святых во един день.

В четверток на Утрени: Поем канон святых апостолов, со ирмосом на 6: и святаго николаа на 4: и минеи святаго на 4. Аще ли поется святый на 6: Поем канон апостолов, со ирмосом, и с богородичным, на 5: и святаго николаа, с богородичны на 3: и минеи на 6. Аще будут два святых, и поем канон апостолов, со ирмосом на 6, и святым на 8.

В пяток поем, якоже и в среду явлено есть неизменно.

В субботу же, всегда предваряет в минеи святых: и поем святаго минеи, со ирмосом на 6. Таже храма святаго, на 4, и во октоихе мученичен канон на 4. Аще ли два святых: в минеи поем единому канон со ирмосом на 6: и другому на 4: и мученичен канон октоиха на 4: Храма же канон оставляется. Аще ли храм христов, или Богородицы: и поем прежде храма канон, со ирмосом на 6. ирмос по дважды, тропари на 4: и святаго на 4: и октоиха мученичен канон на 4. Аще ли святый на 6: И поем храма со ирмосом на 4: и святаго на 6: и октоиха на 4.

[Смотри] Ведомо же буди и сие: В куюлибо субботу славословие прилучится: на Утрени канон храма, аще есть христов или Богородицы, со ирмосом на 6: ирмос по дважды, тропари на 4: и святаго на 8. Аще же храм святаго или святыя: поем канон Богородицы прешедшия недели утренний, со ирмосом на 6: и святаго на 8: Храма же канон оставляется. По 9-й песни светилен святаго дважды. Слава, и ныне, богородичен.[/spoiler]

Раб божий Константин

Глава 12. О службе субботней о вечерни, о утрени и о литургии егда поем Бог господь
[spoiler]В пяток вечера, по обычной стихологии, на Господи воззвах, поем стихиры подобны, святаго минеи, на 6, Слава, самогласен святаго, аще имать: аще ли ни, Слава, и ныне, богородичен 1-й настоящаго гласа. На стиховне стихиры во октоихе мученичны три, гласа. Слава, святаго, аще имать: аще ли ни, Слава, и ныне, богородичен. Таже: Ныне отпущаеши: и трисвятое. по Отче наш, тропарь святаго. Слава, и ныне, богородичен, настоящаго гласа. ектении, и отпуст.

[Смотри] [Подобает ведати, яко аще не прилучится апостола коего память, или от святых великих, или святаго, не имуща тропаря, Бог Господь не поем: но аллилуиа, на глас 2.]

На Утрени по шестопсалмии поем Бог господь: на глас тропаря святаго, и тропарь его дважды. Слава, и ныне, богородичен 1-й по гласу тропаря святаго. Таже стихологисуем кафисму 17: Рече Господь господеви моему: по обычаю. И по стихологии ектениа. И седальны во октоихе мученична два, 1-й и вторый. Слава, и ныне, богородичен 1-й настоящаго гласа: и чтение. Посем стихологисуем непорочны: в нихже кадит священник. По непорочных седальны мученичны два, 3-й, 4-й, и покоин. Слава, и ныне, богородичен. И паки чтение: и псалом 50: Помилуй мя Боже: И поем каноны 3: святаго минеи, со ирмосом на 6: ирмос по дважды, тропари на 4. Сей бо предваряет всегда в субботу: и по нем храма святаго, на 4. Таже во октоихе мученичен на 4: покоин бо канон поется в пяток, на повечерии. К каноном же глаголем песни: Поем господеви: По 3-й песни седален минеи святаго: Слава, и ныне, богородичен. По 6-й песни кондак и икос святаго, аще имать. И чтем пролог. По 9-й песни светилен прежде святаго, аще имать. Таже, Слава, октоиха: И ныне, богородичен. Аще же ни: Светилен октоиха: Иже мертвыми и живыми: Слава, и ныне: Мы о тебе хвалимся: На хвалитех стихиры не поем октоиха, но поем их на стиховне. [Смотри] Аще ли несть святаго стихир на хвалитех, и мы глаголем: Тебе слава подобает: [Смотри] Аще ли поем святаго на хвалитех стихиры, тогда: Тебе слава подобает, не глаголем: но по стихирах глаголем: Слава тебе показавшему нам свет. Слава в вышних богу: и посем ектениа: Исполним утреннюю: Таже на стиховне стихиры поем октоиха, хвалитныя, мученичны три, 1-й, 2-й, 3-й, с припевы обычными: Исполнихомся заутра: 2, И буди светлость: един же оставляем, 4-й покоин, от дамаскиновых. Слава, святаго самогласен, аще имать. Аще ли ни, Слава, и ныне, богородичен их. Стиховна же субботная оставляется: точию на тех утренях поется в субботы поста, в субботу 2-ю, 3-ю и 4-ю, или аще случится аллилуиа: И поется стиховна, со упокойными их припевы. Таже, благо есть исповедатися господеви: И трисвятое: По Отче наш, тропарь святаго: Слава, и ныне, богородичен утрени, во глас тропаря святаго: и ектении. И час 1-й, и отпуст, и многолетно. По скончании же сего обычная литиа в притворе, яко предписася.

На Литургии блаженна октоиха, на 6: аще ли имать святый на Литургии песнь, и святаго песнь 3- я, на 4: и октоиха гласа, на 4. По входе глаголем тропари сице: Прежде тропарь храма, аще христов храм, и Богородицы: Таже тропарь дне: Апостоли, мученцы и пророцы: И потом тропарь святаго рядоваго, и кондак его. Аще ли будет другий святый, имеяй тропарь и кондак, глаголи его. Аще же несть в субботу тропаря или кондака ни единому святому, и мы глаголем после дневнаго тропаря, за упокой: Помяни Господи яко благ: Аще ли где храм святаго, или святыя, и тем храмом в субботу тропарей не глаголем: занеже вси святии именовани суть в дневном тропаре. Слава, кондак: Со святыми упокой: И ныне, яко начатки.

[Смотри] о томже: Аще ли храм святаго, или святыя, и тропари по входе глаголем сице: Прежде дне, Апостоли, мученцы и пророцы: Потом тропарь и кондак святаго на ряду. Аще ли несть: Помяни Господи, яко благ: Слава, Со святыми упокой: И ныне, яко начатки: Аще где и в христове храме и Богородицы, кроме предпразднства, и попразднства: покрываем темже дневным кондаком. И ныне, яко начатки: а не храмовым кондаком. В субботу бо храмовыя кондаки, христовы и Богородицы, оставляются: точию аще прилучится великий святый, тогда, И ныне, кондак храма Христова, или храма Богородицы. А идеже несть храма Христова и Богородицы, глаголем: Предстательство христиан: Прокимен, апостол, аллилуиа, евангелие и причастен, прежде святаго, таже дне: предваряет бо всегда рядоваго апостола и евангелиа, кроме господских праздников сия служба поется в субботах всегда, егда прилучится быти, Бог господь: Аще же прилучится в субботу владычний праздник, поется служба непременно вся праздника.[/spoiler]
Глава 13. Подобает ведати, аще прилучится в субботу пети аллилуиа.
[spoiler]В пяток вечера, стихословим кафисму 18. Таже на Господи воззвах, стихиры минеи святаго, 3. И октоиха мученичны три, 2-й, 3-й, 4-й, а первый оставляется. Слава, и ныне, богородичен воскресн, настоящаго гласа. Таже, Свете тихий: Посем прокимен. Таже, Сподоби Господи в вечер сей: На стиховне мученичен 1: и мертвена два кир Иоанна дамаскина. Слава, и ныне, богородичен. Таже, Ныне отпущаеши: и трисвятое, по Отче наш: тропарь, глас 2: Апостоли, мученцы и пророцы. Слава, Помяни Господи, яко благ, души раб твоих: И ныне, богородичен: мати святая: ектениа, и отпуст. И обычная литиа за упокой в притворе.

На Утрени по обычном начале, и по шестопсалмии: Вместо Бог господь, поем Аллилуиа, на глас 2, глаголем по трижды. Таже, стих 1: блажени яже избрал, и приял еси Господи. Стих 2: Память их в род и род. Стих 3: Души их во благих водворятся. Тропарь, глас 2: Апостоли, мученцы и пророцы: дважды. Слава, Помяни Господи яко благ: И ныне, богородичен: мати святая: Таже, кафисма 17. ектениа обычная, по нейже глаголем два седальны октоиха, мученичны три, 2-й и 3-й: первый оставляется. Таже глаголем стих: Дивен Бог во святых своих: И глаголем мученичен 4-й: а богородичен 1-й оставляется. Таже стих: блажени яже избрал: И глаголем седален покоин, гласа: Слава и ныне, богородичен вторый. И чтение. По немже ничтоже глаголя, поем непорочны, с припевы: благословен еси Господи: на глас 2. Разделяем же ю на двое. На среди по 1-й статии не глаголем, Слава, и ныне, но поем по конце: яко аще бы не закон твой: трижды. И глаголет священник ектению о усопших: Паки и паки: Лик, Господи помилуй, единожды. еще молимся о упокоении душ усопших рабов Божиих , имярек: Лик, Господи помилуй, единожды. яко да Господь Бог учинит души их: Лик, Господи помилуй, единожды. милости божия, царства небеснаго: Лик, Подай Господи. Диакон, господу помолимся. священник, Боже духов, и всякия плоти: Мы же глаголем, Господи помилуй, 40. Возглас, яко ты еси воскресение: Лик, Аминь. Таже поем другую статию: Твой есмь аз: Припев, спасе спаси мя. На конец: Жива будет душа моя: трижды. Таже, благословен еси Господи: И посем тропари за упокой: святых лик обрете источник: и прочия. И по них ектению глаголет священник преждереченную за упокой: и поминает усопших. Мы же глаголем, Господи помилуй, 40. дондеже скончает священник молитву: Боже духов: и по возгласе седален, глас 5: Покой спасе наш с праведными рабы твоя: Слава, и ныне, богородичен: от девы возсиявый миру: И чтение. псалом 50, Помилуй мя Боже: Таже канон прежде минеи, со ирмосом на 6: и храма на 4: и октоиха на 4, первый. По 3 песни ектениа обычная: кондак, и седален минеи: И чтение. По 6-й песни ектениа за упокой: кондак, глас 8: Со святыми упокой: И икос, и пролог. По 9 песни светилен октоиха. На хвалитех стихиры мученичны, 4: Слава, покоин: И ныне, богородичен. На стиховне стихиры подобны, покойны кир феофана. Слава, и ныне, богородичен. Таже, Благо есть: и трисвятое. По Отче наш, тропарь, глас 2: Апостоли, мученцы и пророцы: Слава, Помяни Господи: И ныне, богородичен: мати святая: И ектениа. Таже, священник: Сый благословен Христос Бог наш: И мы, утверди Боже: и час 1-й, и отпуст. На часех тропари: Апостоли, мученцы и пророцы: Слава, Помяни Господи яко благ: И ныне, богородичен часов. И по Отче наш: кондак, Со святыми упокой: И отпуст.

На Литургии блаженна октоиха, на 6. По входе, тропарь: Апостоли, мученцы и пророцы: и Помяни Господи, яко благ: Слава, кондак, Со святыми упокой: И ныне богородичен: Тебе и стену и пристанище: Прокимен, глас 8. Веселитеся о господе: Стих, блажени ихже оставишася беззакония: За упокой, прокимен: Души их во благих водворятся. Апостол субботы ряд: И другий за упокой. Аллилуиа, глас 8: Воззваша праведнии. Стих: блажени яже избрал, и приял еси Господи. евангелие субботы ряд: И другое за упокой. Причастен: Радуйтеся праведнии о господе: Другий за упокой: блажени яже избрал и приял еси Господи, и память их в род и род.[/spoiler]
Глава 14. Подобает ведати, о еже како бывати о усопших воследованию.

[spoiler]В пяток вечера, по отпущении вечерни, облекшуся священнику в фелонь, диакону же в стихарь, и приемшу кадильницу и фимиам, исходит в притвор, предыдущу ему параекклисиарху со свещником, последуем же по них и мы. И егда приити ему в притвор, предуготовлене же бывшей кутии, диакон глаголет: благослови владыко. священник же, благословен Бог наш: кадя над кутиею крестообразно. Мы же глаголем псалом 90: Живый в помощи: [Во ино же время кроме вечерни, или утрени, бывает начало по обычаю, глаголем: Трисвятое, и по Отче наш: иерей возглас: яко твое есть царство: Таже, Господи помилуй, 12: Слава, и ныне: Приидите поклонимся, трижды: и псалом 90.] И по конце его: Слава, и ныне, Аллилуиа трижды. и бывает ектениа покойна: Миром господу помолимся. иерей возглас: яко ты еси воскресение, и живот: Таже, Аллилуиа, трижды, на глас 8. Глаголем же стихи сия, 11: блажени яже избрал, и приял еси Господи. 2, Память их в род и род. 3, души их во благих водворятся. Таже тропарь, глас 8: Глубиною мудрости человеколюбно: дважды. Слава, и ныне, богородичен: Тебе и стену и пристанище имамы: Посем кафисма, блажени непорочнии, поем на глас 2. Припев: Помяни Господи души раб твоих. Другий же лик вторый стих. И по ряду прочия стихи, оба лика. Разделяем же на две статии. По первой же статии не глаголем, Слава, и ныне: но абие сей стих: яко аще бы не закон твой поучение мое был: трижды. Таже иерей или диакон глаголет ектению: Паки и паки миром господу помолимся. Лик, Господи помилуй. И прочая. иерей же молитву втай глаголет: Боже духов, и всякия плоти: Лик: Господи помилуй, 40, тихогласно. Таже начинает вторый лик: Твой есмь аз: Припев, упокой Господи души раб твоих: И по ряду оба лика: И прочия стихи. На конце же глаголем стих: Жива будет душа моя: до конца, трижды. Таже тропари за упокой, поем на глас 5. Припев: благословен еси Господи: святых лик обрете источник жизни, и дверь райскую: и прочая. Посем Аллилуиа, трижды. Таже, ектениа. [Смотри] И поминает священник усопших по ряду. Аще ли же не поем непорочных: по Аллилуии, глаголем тропарь: Глубиною мудрости: и богородичен его. И абие, благословен еси Господи: Посем тропарь, святых лик обрете: И прочая. Таже поминает священник усопших, якоже прежде указася: И глаголем седален покоин, глас 5: Покой спасе наш с праведными рабы твоя: Слава и ныне, богородичен: от девы возсиявый миру Христе Боже: Таже, псалом 50. Канон октоиха усопших, по гласу, на 4. По 3 песни ирмос и ектениа: И поминает прежде усопших по ряду, якоже предречеся, посреди непорочных. Возглас, яко ты еси воскресение и живот: Таже седален, глас 6: Воистинну суета всяческая: Слава и ныне, богородичен: Всесвятая Богородице: По 6 песни ирмос, и ектениа. И поминаются усопшии, якоже прежде указася. Возглас: яко ты еси воскресение и живот: Таже кондак, глас 8: Со святыми упокой: и икос, Сам един еси безсмертный: По 9 песни глаголет иерей: богородицу и матерь света: Людие, Дуси и души праведных восхвалят тя Господи: И поем ирмос 9-я песни. Таже, трисвятое: и по Отче наш, глаголем тропари сия, глас 4: Со духи праведных скончавшихся: и прочая. Таже иерей или диакон глаголет ектению: Помилуй нас Боже: и прочая. иерей, Боже духов: И поминает яже от века умершия отцы и братию нашу, зде лежащия, и повсюду православныя христианы. Таже возглас: яко ты еси воскресение и живот: Глаголет иерей, или диакон: Премудрость. Мы же, честнейшую херувим: иерей: Слава тебе Христе Боже: Мы же, Слава, и ныне: Господи помилуй, трижды. благослови. иерей, отпуст: воскресый из мертвых Христос истинный Бог наш: и прочая. И по отпусте глашает диакон сице: Во блаженном успении вечный покой подаждь Господи, успшим рабом твоим, имярек: и сотвори им вечную память. Певцы же поют: Вечная память, трижды. А идеже несть диакона, поют певцы: Рабом божиим имярек, успшим вечная память.[/spoiler]
Глава 15. О святем имущем полиелей, аще случится в субботу.
[spoiler]В пяток вечера, поем блажен муж, 1-й антифон. На Господи воззвах, стихиры святаго, на 6: Слава, самогласен святаго, И ныне, богородичен 1-й настоящаго гласа.

[Смотри] Аще ли имать святый великий бдение, и восхощет настоятель

На Велицей Вечерни, по предначинательном псалме, поем блажен муж, 1 антифон. На Господи воззвах, стихиры святаго, на 8: Слава, святаго: И ныне, богородичен 1-й, настоящаго гласа. Аще предпразднство: или попразднство, на Господи воззвах, стихиры праздника, 3: и святаго, 5. Слава, святаго: И ныне, богородичен настоящаго гласа. Вход. Прокимен дне: И чтения святаго, 3. На литии стихира храма, и святаго: Слава, святаго: И ныне богородичен, по гласу святаго, или праздника. На стиховне стихиры святаго: Слава, святаго: И ныне, богородичен, во глас святаго, или праздника. На благословении хлебов тропарь святаго, дважды: и Богородице Дево, единожды. Буди имя господне: трижды, с пением, псалом, 33: благословлю Господа на всякое время: до Не лишатся всякаго блага. И чтем от жития святаго.

На Утрени, на Бог господь, тропарь святаго, дважды: Слава, и ныне, богородичен 1-й, настоящаго гласа. Аще ли предпразднство, или попразднство: Тропарь праздника, дважды: Слава, святаго: И ныне, праздника. Таже, кафисма 17: ектениа, и седален святаго, дважды: Слава, и ныне, богородичен. И чтение. И посем кафисма 17, непорочны. На нейже иерей не кадит, но на полиелеи кадит. Таже седален святаго, дважды: Слава, и ныне, богородичен. И чтение. Посем полиелей святаго: и седален, дважды: Слава, и ныне, богородичен. И чтение. Степенна 4-го гласа, антифон 1. Прокимен святаго: и Всякое дыхание: евангелие, и псалом 50. По 50-м псалме, стихира святаго. Таже, спаси Боже люди твоя: Посем иерей, милостию и щедротами: Лик, Аминь. И поем канон Богородицы, со ирмосом на 6: ирмос по дважды: тропари на 4. Аще ли храм христов, или Богородицы, или аще предпразднство, или попразднство, поем подобне канон со ирмосом на 6: И святаго на 8: Катавасиа, по уставу. По 3 песни кондак предпразднства, или праздника. Таже седален святаго, дважды: Слава, и ныне, богородичен, или праздника. По 6-й песни кондак святаго, и икос: И чтем пролог. По 9-й песни светилен святаго, дважды: Слава, и ныне, богородичен, или праздника. На хвалитех стихиры святаго, на 4: Аще ли в попразднство: На хвалитех 6: праздника три, яже суть на стиховне того дне, и святаго 3: Слава, святаго самогласен: И ныне, богородичен, по гласу святаго, или праздника. И славословие великое. Таже тропарь святаго: Слава, и ныне, богородичен воскресн, гласа настоящаго, или праздника. ектении, и отпуст, и час 1-й. На 1-м часе, тропарь святаго. Аще ли предпразднство, или попразднство, тропарь праздника: Слава, святаго: И ныне, богородичен часов. По Отче наш, кондак святаго. Аще ли предпразднство, или попразднство, кондак праздника и святаго, глаголем пременяюще: И совершенный отпуст.

На Литургии блажена святаго, песнь 3-я, и 6-я. Аще ли попразднство, песнь праздника, рядовая, и святаго песнь 6. По входе тропарь храма Христова и Богородицы: Таже, святаго настоящаго, Слава, кондак его: И ныне, храма Богородицы. А идеже несть храма Богородицы, И ныне, Предстательство христиан: А в предпразднства, или попразднства коего праздника: И ныне, кондак глаголем предпразднства, или праздника. Аще ли предпразднства, или попразднства господскаго праздника, а храм христов, и тропаря и кондака храма не глаголем, но предпразднства или праздника тропарь и кондак: Богородицы же храма в предпразднства и попразднства господских праздников, не глаголется. Прокимен святаго: апостол, аллилуиа, евангелие, и причастен святаго, емуже бдение. Аще же полиелей, присовокупляем и дне, прокимен, апостол, евангелие, и причастен.[/spoiler]

Раб божий Константин

Главы 16-24
[spoiler]Глава 16. О светильнах на Утрени.

По 9-й песни, после достойна, како глаголются в седмице, кроме недели.

Светилен октоиха, Слава, и ныне, богородичен его. Аще ли будет в минеи светилен святаго, рцы его на Славу, после дневнаго светильна: И ныне, богородичен его. Аще ли будет в минеи два святых, и светильна два: И глаголем первый октоиха, таже святаго: Слава, другаго святаго. И ныне, богородичен его. Аще ли среда, и пяток. И ныне, крестобогородичен октоиха. В субботу же аще имать рядовый святый, по 9-й песни светилен глаголем святаго прежде минеи: Таже, Слава, октоиха: И ныне, богородичен его. Сице глаголются светильны, егда октоих с минеею поется.



Глава 17. О стихологиах,

како должно есть глаголати во все лето. От недели антипасхи, яже есть фомина, и до отдания воздвижения честнаго и животворящаго креста господня. начинаем стихологисати псалтирь сице: В субботу светлыя недели вечера, глаголем 1-ю кафисму, блажен муж: В неделю на Утрени, кафисма 2-я, 3-я: а 17 кафисмы в сию неделю не глаголем, занеже поется полиелей. В прочия же воскресныя дни, егда не поется полиелей, на Утрени глаголем кафисму 17 с тропари ея. [Смотри] Аще же прилучится в неделю праздник господский, или Богородицы, или празднуемаго святаго, по дву кафисмах, полиелей, и по величании, не певше Слава, и ныне, и аллилуиа, поем тропари, Ангельский собор: И по ектении, седальны праздника, или святаго. В неделю вечера, во весь год никогдаже глаголется псалтирь. Аще же прилучится празднество, тогда поем: блажен муж, первый антифон.

В понедельник на Утрени, кафисма 4-я, 5-я. На вечерни, кафисма 6-я.

Во вторник на Утрени, кафисма 7-я, 8-я. На вечерни, кафисма 9-я.

В среду на Утрени, кафисма 10-я, 11-я. На вечерни, кафисма 12.

В четверток на Утрени, кафисма 13, 14. На вечерни, кафисма 15.

В пяток на Утрени, кафисма 19-я, 20-я. На вечерни кафисма 18.

В субботу на Утрени, кафисма 16, 17.

На полунощнице же в понедельник, во вторник, в среду, в четверток, в пяток, во весь год глаголем кафисму 17: блажени непорочнии: В субботу же на полунощнице, всегда глаголем кафисму 9-ю: Тебе подобает: По отдании же воздвижения честнаго креста, от 22 дне месяца септемвриа, до 20 дне месяца декемвриа, начинаем псалтирь глаголати сице: В субботу на вечерни, кафисма 1-я, блажен муж: В неделю на Утрени, кафисма 2-я, 3-я: Прилагаем же и полиелей, сиречь многомилостиво: псалом 134: Хвалите имя господне: и 135: Исповедайтеся господеви: И абие тропари, Ангельский собор: И впакои гласа. Аще ли будет господский праздник, или Богородицы, или некий святый празднуемый в неделю, тогда по псалмех, Хвалите имя господне: и Исповедайтеся господеви: Праздника величание, и псалом избранный, и тропари, Ангельский собор: и седальны праздника.

В понедельник по воздвижении на Утрени, кафисма 4-я, 5-я, 6-я, а на вечерни во всю седмицу глаголем кафисму, 18.

Во вторник на Утрени, кафисма 6-я, 8-я, 9-я.

В среду на Утрени, кафисма 10-я, 11, 12.

В четверток на Утрени, кафисма 13, 14, 15.

В пяток на Утрени кафисма 19, 20-я.

В субботу на Утрени, кафисма 16, 17.

егда же прилучится в те дни празднество, в нихже глаголется на Утрени по 3 кафисмы, и тогда глаголем на Утрени две кафисмы, а 3-ю рядовую на вечерни. яко во всем общем уставе, от 22-го дне септемвриа месяца, повелевает начинати на Утрени три кафисмы: зде же от недели, яже по воздвижении, еже и мнит ми ся и поприлежнейшее, яко да от недели начало вземлет псалтирь. Аще ли убо прежде 20-го, или по 20-м дни будет неделя, всяко и всегда от понедельника начинаем 3 кафисмы.

от 20-го же дне декемвриа месяца, до 14 ианнуариа месяца, дондеже отдастся праздник святаго богоявления: Стихологисуем паки псалтирь, якоже и в неделю антипасхи, еже есть фомина, по две кафисмы на Утрени: а на вечерни, 3-ю рядовую.

от пятаго же надесять дне ианнуариа месяца, до субботы, еже есть пред неделею о блуднем сыне,

Стихологисуем паки на Утрени, по 3 кафисмы, а на вечерни 18 кафисму: Ко господу внегда скорбети ми: В две же недели в мясопустную и сырную, стихологисуем на Утрени по 2 кафисмы, а на вечерни 3-ю рядовую, малаго ради покоя братии. В неделю же блуднаго, и в мясопустную, и в сырную, на Утрени но псалмех: Хвалите имя господне: и Исповедайтеся господеви: Припеваем и третий псалом, 136: На реках вавилонских: со аллилуиею красною. Таже тропари, Ангельский собор: И впакои гласа.

Подобает ведати: яко от сея сырныя недели, даже до воздвижения честнаго креста, упраждняется полиелей, поется же токмо во бдениих владычних праздников. По отдании же воздвижения честнаго креста господня, и до недели сыропустныя, кроме предпразднства, и попразднства рождества Христова, и богоявления, в соборней велицей церкви, и в прочих соборных церквах, в воскресныя дни на Утрени, поется полиелей, якоже и в великих пречестных обителех.

[Смотри] устав о псалтире, како должно есть глаголати во святый великий пост. В седмицу 1-ю, 2- ю, 3-ю, 4-ю и 6-ю.

В субботу сыропустную, на вечерни кафисма 1-я, блажен муж: В неделю на Утрени кафисма 2-я, 3- я: в прочия же недели глаголем кафисму 17.

В понедельник на Утрени, кафисма 4-я, 5-я, 6- я. На первом часе кафисмы нет. На часех кафисма 7-я, 8-я, 9-я. На вечерни по вся дни в сих пяти днех глаголется кафисма 18: Ко господу внегда скорбети ми: Во вторник на Утрени, кафисма 10-я, 11, 12: На 1-м часе кафисма 13. На часех кафисма 14, 15, 16.

В среду на Утрени, кафисма 19-я, 20-я, 1-я. На 1-м часе кафисма 2-я. На часех кафисма 3-я, 4-я, 5-я.

В четверток на Утрени, кафисма 6-я, 7-я, 8-я. На 1-м часе кафисма 9-я. На часех кафисма 10-я, 11-я, 12-я.

В пяток на Утрени, кафисма 13, 14, 15. На 1-м часе кафисмы несть. На часех кафисма 19-я, 20-я. На 9-м часе кафисмы несть.

В субботу на Утрени, кафисма 16, 17. И тако исполнится устав псалтири.

[Смотри] указ о кафисмах пятыя недели святаго великаго поста, како глаголати.

В субботу на вечерни, кафисма 1-я.

В неделю на Утрени, кафисма 2-я, 3-я, 17-я: а на вечерни кафисмы несть.

В понедельник на Утрени, кафисма 4-я, 5-я, 6- я. На 1-м часе кафисмы несть. На часех кафисма 7-я, 8-я, 9-я. На вечерни кафисма, 10-я.

Во вторник на Утрени кафисма, 11, 12, 13. На 1-м часе кафисма 14. На часех кафисма 15, 16, 18. На вечерни кафисма 19.

В среду на Утрени, кафисма 20-я, 1-я, 2-я. На 1- м часе, кафисма 3-я. На часех кафисма 4-я, 5- я, 6-я. На вечерни кафисма 7-я.

В четверток на Утрени кафисма, 8-я. На 1-м часе кафисмы несть. На часех кафисма 9-я, 10-я, 11-я. На вечерни кафисма 12.

В пяток на Утрени кафисма, 13, 14, 15. На 1-м часе кафисмы несть. На часех кафисма 19, 20. На 9-м часе кафисмы несть. На вечерни кафисма 18.

[Смотри] егда же случится праздник благовещения пресвятыя Богородицы в четверток сея 5 недели, и тогда великий канон прелагается на вторник. псалтирь же глаголется сице: В понедельник на Утрени, кафисма 4-я, 5-я, 6- я. На 1-м часе, кафисма 7-я. На часех кафисма 8- я, 9-я, 10-я. На вечерни, кафисма 11.

Во вторник на Утрени, кафисма 12-я. На часех кафисма 13, 14, 15-я. На вечерни кафисма 16.

В среду на Утрени, кафисма 19-я, 20-я, 1-я. На 1-м часе кафисма 2-я. На часех кафисма 3-я, 4-я, 5-я.

В четверток на Утрени, кафисма 6-я, 7-я, 8-я. На 1-м часе кафисма 9-я. На часех кафисма 10-я, 11-я, 12-я.

В пяток на Утрени, кафисма 13, 14, 15-я. На часех кафисма 19, 20-я. На вечерни кафисма 18- я.

В субботу на Утрени, кафисма 16, 17-я. И тако исполнится устав псалтири.

[Смотри] Подобает ведати, како глаголати псалтирь во святую великую седмицу страстныя недели. Известно же да будет, яко во святую великую седмицу сию единою совершаем псалтирь в церкви. Стихологисуется же сице: В субботу лазареву на вечерни, кафисма 1-я.

В неделю цветную на Утрени, кафисма 2-я, 3- я.

В понедельник на Утрени, кафисма 4-я, 5-я, 6-я. На 1-м часе кафисмы несть. На часех кафисма 7-я, 8-я. На 9-м часе кафисмы несть. На вечерни кафисма 18-я.

Во вторник на Утрени, кафисма 9-я, 10-я, 11- я. На 1-м часе кафисмы несть. На часех кафисма 12, 13-я. На 9-м часе кафисмы несть. На вечерни кафисма 18.

В среду великую на Утрени, кафисма 14, 15, 16. На 1-м часе кафисмы несть. На часех, кафисма 19, 20-я. В туже среду на вечерни, кафисма 18-я, без поклонов. И тако отлагается псалтирь до субботы фомины. Токмо поем в субботу великую на Утрени кафисму 17-ю, с припевы на три статии, писано в триоди.

Глава 18. О еже когда стихословятся песни: Поем господеви: и господеви поем:

Поем господеви: стихословим во вся недели, и во владычни и богородичны праздники, и в предпразднства и попразднства их, и в праздник святаго имущаго полиелей, или славословие великое, и во всю пятьдесятницу. господеви же поем, стихословим аще несть неделя, ниже владычний, ни богородичный праздник, ни предпразднство или попразднство их, или празднуемаго святаго имущаго славословие великое.



Глава 19. О катавасии:

Поемой в господския владычни и богородичны праздники, и в воскресныя дни, и нарочитых святых всего лета: начинающейся от месяца септемвриа с 1-го числа, до тогоже числа. Месяца септемвриа с 1-го, тогоже месяца до 21-го числа, до отдания праздника воздвижения честнаго креста. Катавасиа: крест начертав моисей: от 22-го септемвриа до 20-го ноемвриа: отверзу уста моя: от 21-го ноемвриа, до 31-го декемвриа, до отдания рождества Христова: Христос раждается: от 1-го ианнуариа, до 14 тогоже месяца, до отдания богоявления: Глубины открыл есть дно: от 15 тогоже месяца, до отдания сретения господня: Сушу глубородительную землю: от отдания сретения господня: кроме четыредесятницы недель и пятьдесятницы, августа до 1-го: отверзу уста моя: от 1-го августа до самаго праздника преображения, и на самый праздник: крест начертав моисей: В попразднстве преображения, и до отдания: Лицы израильтестии: от 14 до 23-го, до отдания успения: Преукрашенная божественною славою: от отдания успения, до перваго септемвриа: крест начертав: Четыредесятницы же и пятьдесятницы,

В неделю мытаря и фарисеа: во 2-ю, 4-ю, 5-ю, святых постов: отверзу уста моя: В неделю блуднаго, мясопустную, сыропустную: в 1-ю, 3-ю, святых постов, в неделю ваий, страстную неделю, катавасиа триоди. Аще случится празднуемый святый во всю четыредесятницу в седмичныя дни: отверзу уста моя: от недели святыя пасхи, и до отдания: воскресния день: В день преполовения пятьдесятницы, и на отдание: Море огустил еси: В неделю 6-ю по пасце, и на отдание пасхи: спасителю богу: На самый праздник вознесения: божественным покровен: от вознесения до отдания: спасителю богу: В неделю же 6-ю по пасце святых отец: божественным покровен: В субботу пятьдесятную триоди. От недели пятьдесятныя, и до отдания: божественным покровен: В неделю всех святых: отверзу уста моя: и до 1-го дне августа.

Глава 20. О еже когда поется честнейшую, и когда не поется.

Подобает ведати: яко всегда поется честнейшую: в неделях всего лета и в предпразднствах, и попразднствах, и в седмичныя дни. Не поется же честнейшая во владычних и богородичных праздниках, еже есть, На рождество Богородицы, и на отдание праздника ея. На воздвижение честнаго креста, и на отдание его. На введение Богородицы, и на отдание его. На рождество христово, и на утрие, и на отдание его. На обрезание господне, и в память великаго василиа. На богоявление господне, и на утрие, и на отдание его. В память во святых отец наших, и великих иерархов, василиа великаго, григориа богослова, и Иоанна златоустаго. На сретение господне, и на отдание его. На благовещение. От субботы праведнаго лазаря, до недели фомины, во всех неделях пятьдесятницы, кроме недели святых отец. В преполовение пятьдесятницы, и на отдание его. В среду, пред вознесением. На вознесение, и на отдание его. На сошествие святаго духа, и на Утрени в понедельник, и на отдание его. На преображение, и на отдание его. На успение Богородицы, и на отдание его. Точию аще случится праздник, или отдание праздника коего в неделю: и тогда поется честнейшую.

Глава 21. О еже когда глаголются изобразительная, и когда антифоны.

Изобразительная глаголются во дни воскресныя во весь год, и во владычни и богородичны праздники, в нихже несть антифонов. Такожде в предпразднствах и попразднствах, и во всю пятьдесятницу. Подобне же и святых имущих бдение и полиелей, и выход, и славословие, и емуже указует песнь во уставе на Литургии. [Смотри] Антифоны же глаголются септемвриа в 14 день: Декемвриа в 25 день: ианнуариа в 6 день: Августа в 6 день: В четыредесятнице: В неделю ваий: В пятьдесятнице: В неделю пасхи, и во всю светлую седмицу: В четверток вознесения господня: В неделю 8-ю: собственныя праздников. Во все же лето по вся дни, в нихже не указует святаго на блаженнах песни, глаголются антифоны повседневныя: благо есть: с прочими. Аще же и указует коему святому, прокимен, апостол, евангелие, и причастен, кроме песни, и в те дни глаголются антифоны же вседневныя.

Глава 22. Подобает ведати, когда кадит иерей.

Кадит вечер, на Господи воззвах, в стихирах и в начале утрени, и на 9-й песни. Кадит же и на непорочнах, в субботу и неделю. Кадит же и на праздники господския, в начале великия вечерни. Кадити же иерею, или диакону сице: Первее став пред святою трапезою, и творит крест кадилом. И тако от полуденныя страны став, такожде творит крест. Подобно же и от восточныя и от полунощныя, крестовидно кадит святую трапезу, и весь святый олтарь, и жертвенник: и исходит северными дверьми. И пришед пред царския двери, и тамо творит крест кадилом: И идет и кадит святыя иконы, по южней стране образ спаса Христа, и храма, и прочия тоя страны: подобне и левей, образ пресвятыя Богородицы, и прочих, таже предстоятеля. Аще ли несть настоятеля, кадит образ на месте его. И тако кадит весь правый лик братий, по дважды, воздвизая пред киимждо кадило праве и преки, творя крест. И егда покадит весь лик, и став прямо их посреде: аще поет та страна стих, ожидает дондеже другая страна свой стих начнет. Сему же лику умолчавшу, тогда творит крест кадилом на весь лик, и поклонение творит к ним благочинно, ко всем едино, и они к нему вси такожде творят поклонение: подобне и левый лик, и всю братию стоящую в церкви кадит. И исходит в притвор, и тамо кадит по чину, творит крест кадилом, пред красными враты. Таже кадит на обе страны, святыя иконы, и братию всю по чину их. Последи же возвращься к красным вратом, зря к западу, кадит крестовидно всех. И егда внити во храм из притвора, творит крест кадилом, пред царскими дверьми: и потом кадит икону спаса Христа, и на левой, Богородицы, и на аналогии, и настоятеля. И входит во святый олтарь южными дверьми, и творит крест пред святою трапезою, и отлагает кадило.



Глава 23. О завесе святаго олтаря, когда отверзается, и когда затворяется.

отверзается завеса в начале вечерни, и стоит отверзена даже до отпуста. На Утрени, такожде с начала и до конца. На часех же егда чтутся кроме литургии, отверзается ко чтению апостола, и стоит до отпуста отверзена. По отпусте же затворяется. В начале же литургии отверзается завеса, и стоит отверзена, даже до великаго входа. По входе же паки затворяется, дондеже иерей, или диакон возглаголет: Двери двери, премудростию вонмем. Тогда отверзается, и стоит отверзена до возглашения: святая святым. И тогда паки затворяется. По причащении же паки отверзается, и стоит отверзена до конца святыя литургии. Но отпусте же литургии совершенне затворяется. егда же молебен поется, от начала и до отпуста отверзена бывает. [Смотри] Ведомо буди, яко святыя двери никогдаже отверзаются, токмо в начале великия вечерни, егда бывает бдение, и кадит священник, и во вся входы, сиречь вечерни, и литургии, и святаго евангелиа: такожде отверзаются и от появления святых таин, даже до исполнения божественныя литургии.

Глава 24. О вжигании свещ,

како подобает в церкви вжигати, в неделю, и на праздники христовы, и Богородицы, и святых, и прочия дни.

На велицей же вечерни, прежде каждения иереева, должно есть вжигати свещи якоже указася на малей вечерни, и пред владычним образом в тябле, аще имать святый бдение. И по 1-м антифоне кафисмы, в начале Господи воззвах, вжигати и прочия свещи: угашати же на конечном трисвятом. На Утрени, на Бог господь, подобает вжигати свещи, якоже прежде изъявися. В начале же полиелеа подобает вжигати вся свещи, и оставляти я горети до скончания 3 песни, и тогда паки погашати я. И на 8 песни вжигаем паки вся, и оставляем я горети до конца великаго славословия. На Литургии, прежде начала литургии, во олтаре вжигати свещу на жертвеннице. И егда иерей облачится в ризы, и приспевшу времени звона, прежде вжигати свещу на престоле, таже в церкви, якоже предречеся. В начале же святаго евангелиа, вжигати вся свещи, и оставляти я горети до заамвонныя молитвы.[/spoiler]