Молитвослов

Автор Раб божий Константин, марта 10, 2012, 02:13:14

« назад - далее »

Раб божий Константин

Акафист святителю Василию, епископу Рязанскому, чудотворцу.
[spoiler]Кондак 1


Избранному от Небеснаго Пастыреначальника и от святаго Духа поставленному в пасты страны Рязанския и Муромския, прославльшему святым житием и чудесы, похвальная пения приносим ти, святителю Христов Василие. Ты же, яко имеяй дерзновение ко Господу, от всяких нас зол и обстояний свобождай, да с радостию и благодарением всегда тебе зовем: Радуйся, Василие, Первосвятителю Рязанский и предивный чудотворче!


Икос 1


Ангелу Божию подобен был еси, святителю Христов, светлостию ума твоего, чистотою сердца и незлобием, пожив на земли, аки безплотен: сего ради прослави тя Всевышний Господь нетлением честных мощей твоих и дивными чудесы. Темже с любовию благоговейно зовем ти: Радуйся, прежде рождения твоего на служение спасению людей свыше предизбранный; радуйся, от пелен младенческих Господу Богу посвященный. Радуйся, от юности твоея всем сердцем Господа возлюбивый; радуйся, вся благая и красная мира сего Господа ради презревый. Радуйся, в повелениях Господних всегда усердно ходивый; радуйся, всякими боголюбезными добродетельми душу твою украсивый. Радуйся, ум твой весь ко Господу устремивый; радуйся, высокий образ иноческих подвигов в житии твоем явивый. Радуйся, Василие, Первосвятителю Рязанский предивный чудотворче!


Кондак 2


Видя благоверный князь муромский Георгий светлость ума твоего и святое житие твое, избра тя, яко мужа мудра, праведна и свята, во епископа града своего Мурома, да просветиши неведущия Божественныя Истины, исправиши беззаконныя, утешиши скорбящия и научиши вся достойно пети Богу: Аллилуиа.


Икос 2


Разум просвещен книжным учением и Богомыслием, паче же благодатию Божиею озарен имея, преславне отче Василие, восхотел еси тьму нечестия и заблуждений в пастве твоей разгнати, просветити же ю светом истиннаго Боговедения и благочестия. Сего ради, восхваляюще тя, глаголем: Радуйся, истинныя премудрости исполненный; радуйся, благодатию Святаго Духа озаренный. Радуйся, Божественныя Истины усердный проповедниче; радуйся велений Господних немолчный провозвестниче. Радуйся, правыя веры и добродетелей ревностный насадителю; радуйся, суеверий и пороков мужественный искоренителю. Радуйся, яко словесное стадо твое мудре упасл еси; радуйся, яко премногия души вечному спасению наставил еси. Радуйся, Василие, Первосвятителю Рязанский и предивный чудотворче!


Кондак 3


Силою проповеди твоея, богомудре святителю, благодатию Божиею споспешествуемыя, купно же образом святаго жития твоего, мнози, омраченнии тьмою неразумия и заблуждений, Божественную истину уведеша, мнози нечестивии беззакония и развращения оставиша и на стези спасения обратишася, в покаянии и умилении сердца поюще Богу: Аллилуиа.


Икос 3


Имея непрестанное попечение о разоренней от злочестивых супостат пастве муромстей, яко мудрый пастырь и чадолюбивый отец, во благоустроении сея неусыпно трудился еси, всем духовным чадом твоим, потребную коемуждо помощь подавая. Темже достоин еси прославлятися звании сими: Радуйся, сирых и вдовиц предстателю; радуйся, не имущих крова теплый крове и алчущих питателю. Радуйся, скорбящих и унывающих скорый утешителю; радуйся, во вражде сущих примирителю. Радуйся, ищущих спасения благонадежный к небеси руководителю; радуйся, сомнящихся в вере мудрый просветителю. Радуйся, сострадательных и милостивых мощный споспешниче; радуйся, нищих духом и чистых сердцем благий наставниче. Радуйся, Василие, Первосвятителю Рязанский и предивный чудотворче!


Кондак 4


Бурею исконныя злобы волнуем всезлобный диавол, не терпя непорочности жития твоего и благопоспешнаго пастырского служения, святе Василие, воздвиже на тя бурю мятежа буиих и неистовых жителей града Мурома, иже, лукавым мечтанием вражиим прельстившеся, возмнеша тя, аки нецеломудрена и неблагочестна; темже и восхотеша, во ослеплении своем, не точию изгнати тя из града, но и умертвити. Ты же, архиерею Божий, все упование твое на Всеблагаго и Всесильнаго Господа и Пречистую Богородицу возложив, воспевал еси ангельскую песнь: Аллилуиа.


Икос 4


Слышавшие враждовавшии на тя людие града Мурома зело кроткия глаголы твоя, святителю Христов, имиже просил еси дати тебе мало времене до утрия до третияго часа, укротиша ярость свою и отыдоша в домы своя; ты же, угодниче Божий, по всенощней слезней молитве твоей к Богу Спасителю и Пречистей Богородице во храме святых страстотерпец Бориса и Глеба, приим на руки твоя честную икону Богоматере, отшел еси к реце Оце, хотяй оставити град Муром и по волнам плыти. Воспоминающе убо сие отшествие твое, возглашаем ти сицевая: Радуйся, высокий образе предивнаго смирения; радуйся, светлое зерцало твердыя веры и непоколебимыя надежды на Бога Вышняго. Радуйся, столпе терпения, злобою человеческою непоколебимый; радуйся, адаманте, прилоги вражиими несокрушимый. Радуйся, агнче незлобиве, кротостию твоею гонители твоя аки дивия звери укротивый; радуйся, смирением твоим козни диавола преславно посрамивый. Радуйся, блаженне миротворче, от мирскаго волнения и мятежа избежавый; радуйся, волнам речным с верою и упованием Господа себе предавый. Радуйся, Василие, Первосвятителю Рязанский и предивный чудотворче!


Кондак 5


Боготечней звезде уподобился еси, преславне Василие, егда по струям водным, противу течения речнаго, на мантии твоей, аки на легцей ладии, со образом Пречистыя Богоматере, силою Божиею веден был еси из града Мурома ко граду Рязани, поя во умилении сердца чудодеюшему и благодеюшему ти Богу: Аллилуиа.


Икос 5


Видевше тя, отче Василие, людие града Мурома пречудне силою Божиею по волнам, аки безплотна несима, уразумеша свое козньми вражиими прельщение, твою же чистоту и непорочность. Темже, в покаянии и сокрушении сердца, возопиша вслед тебе: прости ны грешныя рабы твоя; согрешихом пред тобою, отче святый; Владыко, не забуди нас раб твоих! Мы же, дивящеся толикому благоволению к тебе Божию, в преславнем чудеси явленному, со благоговением вопием ти: Радуйся, благоуханный сосуде чистоты и целомудрия; радуйся, пресветлый доме Пребожественныя Троице. Радуйся, верный слуго Царя Небеснаго; радуйся, возлюбленный рабе Пресвятыя Богородицы. Радуйся, постом и бдением тело твое изнуривый; радуйся, молитвою и богомыслием ветхаго человека в себе умертвивый. Радуйся, плаванием твоим по волнам речным струи волныя освятивый; радуйся, тем плаванием жители града Мурома вразумивый и к покаянию обративый. Радуйся, Василие, Первосвятителю Рязанский и предивный чудотворче!


Кондак 6


Провозвестник дивнаго твоего по водам шествия ко граду Рязани явися устроением Божиим благоговейный диакон града того, егда, хотяй начати вечернее богослужение, не можаше изрещи обычнаго возглашения: благослови, Владыко! Но возопи велегласно: Владыка грядет, сретайте его! И абие весь освященный собор и людие со князем изыдоша с честными иконами во сретение тебе, святителю Божий, и узревше тя предивне волнами речными несима, в радовании сердца, благочестно приветствоваша тя грядуща, чудодеюшему же Богу вопияху: Аллилуиа.


Икос 6

Возсия свет благодати и милости Божия, пришедшу тебе, прехвальне отче, в пределы земли Рязанския, юже просветил еси светом Божественнаго учения и непорочнаго жития твоего. Сего ради возглашаем ти сицевая: Радуйся, великий избранниче Архиереа Вечнаго, Господа Иисуса; радуйся, чистый, сосуде Божественныя благодати. Радуйся, Божиих велений вернейший исполнителю; радуйся, Христовых заповедей неуклонный хранителю. Радуйся, светильниче, на высоте церковней поставленный; радуйся, премудрый управителю корабля духовнаго. Радуйся, богогласная трубо евангельскаго учения; радуйся, твердый поборниче церкве Христовы. Радуйся, Василие, Первосвятителю Рязанский и предивный чудотворче!


Кондак 7


Хотя привести паству твою рязанскую ко истинному богопознанию и спасению, еще же успокоити и укрепити ю, прежде разорену бывшую от безбожных иноплеменников, подъял еси великия труды и подвиги, преблагий пастырю, непрестанно поучая, утешая и назидая словесныя овцы твоя, споспешествующему же тебе и укрепляющему тя во трудех Господу Богу поя: Аллилуиа.


Икос 7


Новое место святительских трудов твоих, паки разорену бывшу и конечно опустошену граду Рязани от лютых варвар и храмом Божиим в нем сожженным, указа тебе Благопромыслитель Господь град Переславль Рязанский, аможе чудне преселился еси и был еси первый архиерей граду сему, идеже вельми прослави тя Господь Бог, научая нас взывати к тебе: Радуйся, высокая похвало и украшение Переславлю Рязанскому; радуйся, святительскаго престола в нем Богоизбранный основателю. Радуйся, великия труды и подвиги во благоустроении новыя паствы твоея подъемый; радуйся, отеческое попечение о спасении духовных чад твоих всегда имевый. Радуйся, благодатных даров неоскудный раздаятелю; радуйся, Божественных Таин благочестный стрителю. Радуйся, апостольских преданий усердный ревнителю; радуйся, уставов Православныя Церкве верный хранителю. Радуйся, Василие, Первосвятителю Рязанский и предивный чудотворче!


Кондак 8


Странно бе и дивно твое дальнее шествие по водам из града Мурома во град Рязань, паки же странно и преславно бысть твое второе плавание противу стремления воднаго, егда преселялся еси из древняго града Рязани во град Переславль Рязанский по тойжде реце Оце, паки нося с собою чудную икону Богоматере, яко непоколебимое ограждение и утверждение новому граду, Богу же, Помощнику твоему, поя: Аллилуиа.


Икос 8


Всем быти вся восхотев по образу Верховнаго от апостолов, являл еси, любвеобильне отче, духовным чадом твоим благопотребную коемуждо помощь, быв, яко же Иов, око слепым, нога хромым, неусыпно труждаяся в научении, утешении и укреплении паствы твоея. Темже прославляюще тя зовем: Радуйся, премудрый устроителю града Переславля Рязанского; радуйся, немолчный наставниче веры и благочестия. Радуйся, крине сада Божественнаго, посреде терния процветый; радуйся, плодоносное древо, питающее алчущих жизни вечныя. Радуйся, растленных обычаев искоренителю, благих же нравов насадителю; радуйся, лютых болезней и недугов скорый целителю. Радуйся, архиереев паствы рязанския во благоустроении ея присный пособниче; радуйся, благих начальников и градоправителей в ней незримый советниче. Радуйся, Василие, Первосвятителю Рязанский и предивный чудотворче!


Кондак 9


Возшед на высоту Богоподобныя святости, сияя светом веры пред человеки в добрых делех, образ был еси пастве твоей словом, житием, учением, верою и чистотою, научая всех разумно пети Богу: Аллилуиа.


Икос 9


Ветии многовещаннии не могут по достоянию восхвалити тя, Богомудре Василие, и воспети святость жития твоего и молитвенныя подвиги, деннонощные труды и попечения, спасения ради пасомых подъятыя, неправедное и лютое озлобление от буиих жителей града Мурома, кротость и незлобие твое, паче же двукратное твое чудное по водам плавание. Мы же со удивлением благочестно зовем ти сицевая: Радуйся, богомудрых святителей высокая похвало; радуйся, преподобных и праведных пречестная славо. Радуйся, мучеников и исповедников сопричастниче; радуйся, апостолов единонравниче и сопрестольниче. Радуйся, пастырей церкве образе достоподражательный; радуйся, монашествующих наставниче и руководителю. Радуйся, яко тесным и жестоким путем всегда ходил еси; радуйся, яко тем вечныя славы достигл еси. Радуйся, Василие, Первосвятителю Рязанский и предивный чудотворче!


Кондак 10


Спасти хотя, просветити же и утешити люди страны рязанския, Всеблагий Господь избра тя, предчудне святителю, во исполнителя Его Всеблагия Воли и велия милости, да укрепиши немощныя, утешиши печальныя, исправиши порочныя, научая всех благочестно пети Богу: Аллилуиа.


Икос 10


Стена и утверждение, отец и заступник древния паствы рязанския, прехвальне Василие, был еси. Буди и нам, новым чадом твоим, щит и ограждение от враг видимых и невидимых, помощник в бедах и скорбех и искушениих, да с любовию блатодарственно зовем ти: Радуйся, чистоты и целомудрия твердый охранителю; радуйся, одержимых студными помыслы верный помощниче. Радуйся, неправедно злословимых и оклеветаемых надежный защитниче; радуйся, злословящих и оклеветающих ближния своя сильный обличителю. Радуйся, плавающих по водам и путешествующих благий путеводителю; радуйся, обуреваемых волнами морскими тихое пристанище. Радуйся, усердно труждающихся во благих делех звания своего присный споспешниче; радуйся, тепле молящихся и с верою под кров твой прибегающих скорый предстателю. Радуйся, Василие, Первосвятителю Рязанский и предивный чудотворче!


Кондак 11


Пение смиренное и усердное приими от нас, преблаженне отче Василие, не отрини нас, грешных и недостойных, к помощи твоей прибегающих, но услыши благосердно моления наша, да с радостию поем о тебе Богу: Аллилуиа.


Икос 11


Светозарная свеща, светло горевшая и светившая на триех высоких светильницех Божия Церкве, во триех градех страны рязанския, достославне отче, был еси, блистая и озаряя всех светом Боговедения и спасения. Озари и нас, святе, омраченных мглою страстей и суемудрия, да со умилением тебе зовем: Радуйся, проповедников Божественныя Истины споспешниче, радуйся, хулителей православныя веры и врагов Христовы Церкве противоборниче. Радуйся, напаствуемых и невинно гонимых защито и утешение; радуйся, девственников и постников твердое укрепление. Радуйся кротких и смиренных вернейший покровителю; радуйся, заблуждших на путь правый наставниче. Радуйся, яко ухищрения демонская разрушаеши и стужаемыя от бесов свобождаеши; радуйся, яко волнения водная и свирепыя бури укрощаеши. Радуйся, Василие, Первосвятителю Рязанский и предивный чудотворче!


Кондак 12


Благодать имеяй от возлюбившаго тя Господа, святе Василие, исполняти вся благая прошения наша, испроси Богоприятными твоими молитвами вся благая и полезная душам и телесем нашим, паче же оставление согрешений наших, да со умилением сердца благодарно поем Богу: Аллилуиа.


Икос 12


Поюще твое равноангельское святое житие, многотрудное и многоплодное служение твое Церкви Божией, еще же велия и дивная чудеса, тебе ради явленная возлюбившим тя Господем, восхваляем тя, угодниче Христов Василие. Обаче не могуще достойно изобразити величие и славу твою, со благоговением и радостию зовем ти: Радуйся, богомудре и богоизбранне первопастырю града Перяславля Рязанского, паче всех пастырей его превознесенный; радуйся, венцем славы от Архиереа Вечнаго, Сына Божия, увенчанный. Радуйся, яко бурное житейское море со славою преплыл еси и в тихое небесное пристанище достигл еси; радуйся, яко течение служения твоего добре совершил еси и веру твою непорочну соблюл еси. Радуйся, яко со апостолы и святители водворяешися; радуйся, яко с сонмом мучеников, преподобных и всех праведных веселишися. Радуйся, яко пред лицем Господа ныне предстоиши и с лики ангельскими его славословиши; радуйся, яко паству рязанскую непрестанно назираеши и вся благая ей у Царя Царей ходатайствуеши. Радуйся, Василие, Первосвятителю Рязанский и предивный чудотворче!


Икос 13


О преславный отче наш Василие, святителю Христов и чудотворче! Приими сие малое моление наше, и действенным твоим пред Богом ходатайством избави нас от козней вражиих и всякого зла, да в мире и покаянии прочее время жития нашего скончаем и достигнем блаженного упокоения в вечных обителех, идеже купно с тобою и всеми святыми гласом радования во веки воспоем Богу: Аллилуиа.


(Этот кондак читается трижды, затем икос 1 и кондак 1)

Молитвы святителю Василию, епископу Рязанскому


Молитва первая


Богоизбранне первосвятителю наш и угодниче Христов Василие, просиявый святостию жития твоего, чудным плаванием по водам и нетлением мощей твоих, предстояй престолу Вседержителя и имеяй велие дерзновение ко Христу Богу нашему! Смиренно молим тя, во умилении сердца, моли Господа, да пробавит милость Свою к нам, грешным и недостойным рабом своим, пастырем Церкви да подаст человеколюбие и ревность о спасении пасомых: градоначальником и судиям страх Божий, правоту и безкорыстие, воином терпение, мужество и одоление на враги: супругом взаимную любовь, верность, единомыслие и домостроительность, куплю деющим честность и праводушие, земледельцем трудолюбие и трезвенность, сирым призрение, болящим исцеление, обидимым заступление, оклеветаваемым оправдание, и всем людем паствы твоея вся ко временней и вечней жизни потребная. Паче же моли Господа, молитвенниче наш, да простит нам всякое согрешение вольное и невольное, и очистит от всякия скверны плоти и духа: да избавит от козней исконнаго врага, ненавистника и человекоубийцы, и сохранить от клеветы человеческия, да утвердит в истинной спасительной вере и нелицемерном благочестии: да соблюдет от суемудрия и душетленных учений духов лестчих, действующих в веце сем в сынех противления, да охранит сердца наша от красных мира сего, и да научит огребатися плотских похотей и страстей, горняя мудрствовати, а не земная. Моли, отче наш, Всесвятаго и Божественнаго Духа, да возсияет свет благодати Его братиям нашим по плоти, во тьме лжеверия сидящим, и да познают Христа, Бога истиннаго, единаго Спасителя всех человек: да возсияет свет сей и блуждающим на распутиях раскола, да вразумятся и приидут во ограду православныя Церкве, в нейже единей несомненно содевается вечное спасение верных. О, святителю Христов, молитвенниче наш! Моли Христа Бога и пречистую Матерь Его, да упразднит вражды и нестроения, соединит же всех нас братнею богоподобною любовию, да в мире и единомыслии, желанием спасения горяще, Господеви работающе, друг друга тяготы носяще, добрым подвигом подвизаемся, течение скончаем и достигнем в тихое пристанище Небеснаго царствия, и славим неизреченное человеколюбие и милосердие Спасителя нашего, Иисуса Христа, Сына Божия, со Безначальным Его Отцем и Пресвятым Духом во веки веков. Аминь.

Молитва вторая

Святителю Отче Василие! Умоли Господа Бога, да простит нам всякое согрешение, вольное и невольное, и очистит нас от всякия скверны плоти и духа: да избавит нас от козней исконнаго врага нашего, и сохранит от клеветы человеческия: да утвердит нас в истинной спасительной вере и нелицемерном благочестии: да соблюдет от суемудрия и душетленных учений века сего: да охранит сердца наша от соблазнов мира, и да научит огребатися от плотских страстей и похотей, горняя мудрствовати, а не земная. Аминь.



Тропарь святителю Василию, епископу Рязанскому


Тропарь, глас 4


Первее в Муроме святительством почтен был еси, из негоже неправедно изгоняем, на мантию, яко на легкий корабль возшел еси, на нейже паче естества яко безплотен по водам шествие творя, промышлением Вышняго и заступлением Богоматере управляем, Богоспасаемаго града Рязани достигл еси, и в нем архиерейства престол восприим, Богоданную паству Рязанскую добре упасл еси, святителю отче наш Василие, моли Христа Бога, спастися душам нашим.


Кондак, глас 8


Яко многосветлая звезда от Мурома возсиял еси, святителю Василие, по водам же дошед до града нашего Рязани, церковь Божию добре упасл еси, просвещая люди учением и житием твоим. Поминай и ныне чада твоя, молим тя, наставниче наш добрый, и за ны Христу Богу и Пречистей Его Матери молися, да благодарною душею зовем ти: радуйся, угодниче Христов и теплый к Богу о нас молитвенниче.


Величание


Величаем тя, святителю отче наш Василие, и чтим святую память твою, ты бо молиши о нас Христа Бога нашего.[/spoiler]

Раб божий Константин

АКАФИСТ СВ. МУЧЕНИКУ ВАСИЛИСКУ (КОМАНСКОМУ)
(3/16 МАРТА, 22 МАЯ / 4 ИЮНЯ)
[spoiler]Кондак 1
Избранного от Царя Небесного, / доброго Христова страстотерпца и чудотворца / Василиска, / похвальными песньми почтим, яко христиан заступника, / целомудрия блюстителя, страждущих утешителя. / Той же, предстоя Престолу Святыя Троицы, / молитвами своими от всяких болезней и напастей да сохранит нас, верою и любовию зовущих ему сице: / Радуйся, Василиске, / святый мучениче и чудотворче предивный.

Икос 1
Архангели и ангели с любовию взираху на равноангельское житие твое, мучениче Василиске, ты бо пекийся о Господних, како угодити Господеви, постом и молитвою умерщвляя плоть свою день и нощь, сохранил еси тело свое в целомудрии. Мы же таковому житию твоему дивящеся, со умилением взываем тебе сице:
Радуйся, чистоту сердца и тела до конца сохранивый;
радуйся, душу свою за Христа положивый.
Радуйся, девственников похвало и упокоение;
радуйся, обличитель нарушителей целомудрия.
Радуйся, в бедах, и скорбных обстояниих скорый помощниче;
радуйся, в болезнех и страданиях утешителю.
Радуйся, мучеников пречестных украшение;
радуйся, верных в скорбех укрепление.
Радуйся, светильниче благочестия;
радуйся, Церкве Христовой утверждение.
Радуйся, теплый ходатаю за нас у Царя Небеснаго;
радуйся, добрый наш к Богу молитвенниче.
Радуйся, Василиске, святый мучениче и чудотворче предивный.

Кондак 2
Видяще, яко христиане гоними суть, не убоястеся, святии мученицы Евтропие, Клеонике и Василиске, прещения нечестиваго гонителя, но в темнице,силою свыше укрепляемие, реша друг ко другу: «Мужайтеся, укрепляйтеся в вере, да сподобимся всегда воспевати в чертозех небесных Христу Богу: Аллилуйя».

Икос 2
Имея в сердце своем твердую веру во Христа бога, не убоялся еси, мучениче Васелиске, гнева нечестиваго гонителя, но, презрев славу мира сего, исповедал еси себе христианина быти Сего ради от него побои претерпев, яко злодей, в темницу всажден был еси. Таковому твоему дерзновению и мужеству дивящеся, глаголем ти сице:
Радуйся, исповедниче Христов преизрядный;
радуйся, Христа паче мира возлюбивый.
Радуйся, в заточении глад и наготу мужественно претерпевый;
радуйся, узы и темницу за Христа радостно приявый.
Радуйся, язвы Господа своего на теле своем носивый;
радуйся, душу свою за Него положивый.
Радуйся, яко от юности своея Бога возлюбил еси;
радуйся, яко в юном телеси мужескую крепость явил еси.
Радуйся, скорый помощниче всем за веру гонимым;
радуйся скорбных обстояний скорый прогнителю.
Радуйся, Церкве Христовы защитниче;
радуйся, всех православных заступниче.
Радуйся, Василиске, святый мучениче и чудотворрче предивный.

Кондак 3
Бурею помышлений сумнительных не поколебастеся святии мученицы Евтропие, Клеонике и Василиске, егда узнали есте повеление нечестиваго гонителя, хотяща отвратити вас от Христа. «Аще отречемся от Христа и к бездушным идолом обратимся - на вечныя муки осуждени будем Господом и явимся радование бесом», глаголали есте ему со дерзновением. Обаче, страхом Божиим водими и силою с выше укрепляеми, веру Христову в сердцах своих сохранили есте даже до злостраданий и уз темничных, вопиюще Христу Богу: Аллилуйя.

Икос 3
Боготечней звезде подобен был еси, святый мучениче Василиске, егда люилие вси, видя твое твердое исповедание Христа и данную тебе от Бога крепость терпети мучения, вслед тебе поидоша и сами Христа исповедаша. Ты же, благодатию Божией укрепляемый, мужественно велия страдания претерпел еси и от веры во Христа никакоже отступил еси. Сего ради величаем тя сице:
Радуйся, исповедниче веры Христовой неустрашимый;
радуйся, воин Христов непобедимый.
Радуйся, искушений и соблазнов диавола избегнувый;
радуйся его немощную терпением своим низложивый.
Радуйся, кровь свою за Христа пролияти желавый;
радуйся, душу свою за Христа положивый.
Радуйся адаманте веры Христовой;
радуйся, столпе Церкве Божия.
Радуйся, верных наставниче;
радуйся, языческого нечестия низложителю.
Радуйся, радование верных;
радуйся, посрамление нечестивых.
Радуйся, Василиске, святый мучениче и чудотворче предивный.

Кондак 4
Бурею ярости вознегодова мучитель ваш, святии мученицы Евтропие, Клеонике и Василиске, егда не возможе вас отвратити от веры во Христа, и повеле вас нагих привязати к древу и возливати на вас кипящую смолу. Вы же, силою Божиею отвязавше руки своя, взявше сосуды со смолою у воинов, сами возливасте ю друг на друга. Смола же кипящая, аки вода, стекаше с телес ваших, достигаше мучителей и опаляше их смертельно. Мы же, дивящеся чудеси таковому, воспеваем благодарственную песнь Богу: Аллилуйя.

Икос 4
Ветия многовещании не возмогут по достоянию восхвалити подвиги и страдания твоя, всехвальный мучениче Василиске. Сам Господь, призрев на страдания твоя, с сонмом святых Ангелов и со святым сродником твоим Феодором Тироном явися ти. Мы же, со страхом дивящеся сему явлению, во умилении приносим ти похвалы сия:
Радуйся, похвале христиан доброзрачная;
радуйся, веру, надежду и любовь до конца сохранивый.
Радуйся, яко тобою имя Христово прославляется;
радуйся, яко дивен Бог во святых своих тобою является.
Радуйся, яко Сам Господь призре на страдания твоя;
радуйся, яко Сам Христос со Ангелы Своими явися ти.
Радуйся, нетления венец восприявый;
радуйся, крест Христов с терпением понесший.
Радуйся, Ангелов сожителю;
радуйся Серафимов собеседниче.
Радуйся, страстотерпче, адаманта твердейший;
радуйся, щите веры Христовой железа крепльший.
Радуйся, Василиске, святый мучениче и чудотворче предивный.

Кондак 5
Безумный же мучитель не уразуме Бога чудодеющаго, повеле иным воином строгати телеса ваша железными когтьми и возливати на раны ваша горчицу и, соль, со оцтом смешанныя. Вы же с радостию приясте и сие мучение, восклицающе: «Кто нас разлучит от любве Божиея: скорбь или теснота, или гонение, или глад, или нагота, или беда или меч? Ни смерть, ни жизнь, ни иная какая тварь не может отлучити нас от любве Божиея во Христе Иисусе, Господе нашем!». Ему же всегда немолчными усты поем: Аллилуйя.

Икос 5
Имеяй выну пред очесы своими Христа, невинно страдавшего, биенного, поруганнаго, распятаго и кровь Свою святую за нас грешных пролиявшего, ты, святый мучениче Василиске, подражая ему своими страданьми, радостию велиею радовался, еси, вопия: «Тебе ради, Господи умервщляют мя всякий день, вменихся бо яко овча на заколение». За таковое твое мужественное терпение, непоколебимую веру и неугасающую любовь ко Господу, мы, немощнии и грешнии, дерзаем недостойными усты своими глаголати ти сицевая:
Радуйся, мучениче, в терпении непоколебимый бывый;
радуйся, вольным Христовым страстем подражатель явльшийся.
Радуйся, яко за Христа многообразный смерти готов был еси;
радуйся, яко в жертву самаго себе Богу принесл еси.
Радуйся, яко во страданиих своих, яко агнец незлобив был еси;
радуйся яко голубь кроткий за творивших ти напасти моливый.
Радуйся, воине Христов непобедимый;
радуйся Единосущныя Троицы служителю.
Радуйся, мучеников удобрение;
радуйся, праведных украшение.
Радуйся, благовоние Духа Святаго;
радуйся, мироварнице благоуханная.
Радуйся, Василиске, святый мучениче и чудотворче предивный.

Кондак 6
Возсиявше подвигом своим всем -, людем Амасийским, святии Евтропие и Клеонике, претерпели есте крестная страдания. «Что добро, или что красно, но еже жити братии в купе». - восклицал еси ты, мучениче Василиске, егда уведел еси, яко мучитель разлучает тя от друзей твоих. Ты же умолял еси его, да, и тя умертвит вкупе с ними, да неразлучно в триедином союзе предстанете пред престолом Святыя Троицы. Обаче злонравный епарх не исполни твоея воли, ты же, покоряяся промыслу Божию, со смирением рекл еси: «Не моя воля, а Твоя, Господи, да будет». И в темнице, аки в чертозе краснем, ликуя, пел еси хвалебную песнь Богу: Аллилуйя.

Икос 6
Хотяй от матери своея получити благословение на страдания ради Христа, ты, мучениче Василиске, упросил еси стража темничнаго, да отпустит тя на некия дни в дом отца твоего. Злонравный же епарх, егда уведе сие, повеле воином связати тя железными узами, а нозе твои обути в сапоги медныя со вбитыми в них гвоздьми. Ты же, укрепляемый силою Божиею, истекая кровию, тридневен путь от дома своего мужественно протекл еси. Мы же, дивящеся твоему пачеестественному терпению, восхваляюще подвиги твоя, великий мучениче Василиске, зовем тебе сице:
Радуйся, яко шествием своим уподобился еси Христу, шедшему на гору Голгофскую;
радуйся, яко, связанный узами железными претерпел еси поругание Христово.
Радуйся, яко, нося тяжесть сапог медных, уподобился еси Христу, несшему Крест Свой;
радуйся, яко, пролияв кровь свою, подобен был еси Христу, кровию Своею обагрившему стогны Иерусалима.
Радуйся, яко сия страдания терпел ради Христа, за нас пострадавшего;
радуйся, яко терпением своим победил еси диавола.
Радуйся, христианскаго рода украшение;
радуйся, всех христиан упование.
Радуйся, заступниче сирых;
радуйся, плачущих утешителю.
Радуйся в бедах сущих заступниче;
радуйся в болезнех сущих целителю.
Радуйся, Василиске, святый мучениче и чудотворче предивный.

Кондак 7
Хотяще усугубити тволя страдания, воини привязаша тя, мучениче Василиске, к дубу, да зной и жажду терпиши. Ты же воозвал еси к Богу тако: «Господи, посети мя, яко посетил еси Иосифа в темнице, и Даниила в рове со львы, и триех отроков в пещи Вавилонстей». И услыша Господь молитву твою. И бысть глас с небесе и велие земли тясение. Воини же в страсе бежаша из дому и увидеша, яко сапоги твои медныя Божиим велением распадошася, и нозе твои исцелеша, и источник воды из камене явися, и сухое древо израсти листвие свое, им же от зноя покры тя Господь. Вси же зрящии чудо сие устрашишася зело и прославиша Бога чудодеющаго, поюще Ему: Аллилуйя.

Икос 7
Дивное терпение твое в страданиих и непоколебимую веру видя Господь и услышав твою мольбу, дарова тебе, мучениче Василиске, исцеление, ибо Сам рече, яко вся, елико просите во имя Мое, то сотворю вам». И яви Господь силу свою и сотвори чудо тебе ради, дабы видящие прославили Отца Небесного. Мы же, дивящеся таковому твоему дерзновению ко Господу, глаголем ти сицевая:
Радуйся терпением своим милость Господа улучивый;
радуйся, яко, привязанный ко древу подражал еси Христу, от воин привязаннаго к столпу бичевания.
Радуйся, яко Господь, услышав молитву твою, призре на страдания твоя и исцели раны твоя;
радуйся, яко Он, любя праведники Своя, повеле сухому древу произрастити листвие свое.
Радуйся, яко за любовь твою к Нему источи воду из камене, еже утолити жажду твою;
радуйся, яко Его повелением исцелеша раны твоя.
Радуйся, смиренномудрием своим врага низложивый;
радуйся, терпением своим диавола победивый.
Радуйся, Царствие Небесное стяжавый;
радуйся, в дому Отца Небеснаго обитель себе сотворивый.
Радуйся, Духа Святаго сотаинниче;
радуйся Святыя Троицы проповедниче.
Радуйся, Василиске, святый мучениче и чудотворче предивный.

Кондак 8
Видеша сия велия чудеса, тебе ради Богом явленная по молитве твоей, предивный мучениче Васислиске, людие команстии просиша тя, да научиши их познанию Бога истиннаго. Ты же, отверз уста своя, поучал еси их веровати в Троицу Единосущную и Нераздельную, да купно с тобою воспоют и они чудодеющему Богу хвалебную песнь: Аллилуйя.

Икос 8
Уверовавше в Бога истиннаго по словеси твоему, святый мучениче Василиске, вси людие команстии, просиша тя крестити их во имя Святыя Троицы. Воини же со старейшиною своим, раскаявшеся в жестокости своей, просиша у тебе прощения. Ты же, подражая незлобию своего Учителя, всем вся простил еси. Мы же, дивяся незлобию твоему, со умилением зовем ти:
Радуйся, яко твоими молитвами, мнози люди обратишася к вере во Христа;
радуйся, яко проповедию своею уподобился еси святым апостолом.
Радуйся, яко просветил еси мужеством своим люди заблудшия;
радуйся, яко, ревностию своею о славе Божией всех научаеши возвещати имя Христово.
Радуйся, яко незлобием своим увещаеши нас прощати врагов своих;
радуйся, яко безропотным терпением своим наставляеши нас терпети вся страдания наша.
Радуйся, светильниче благочестия;
радуйся, обличитель нечестия.
Радуйся, наставниче истиннаго богопочитания;
радуйся, идольския прелести низложителю.
Радуйся, гонителей вразумителю.
Радуйся, поборниче веры во Христа неустрашимый.
Радуйся, Василиске, святый мучениче и чудотворче предивный.

Кондак 9
Всякое дыхание хвалит Творца своего, и ты, благодаря Господа за Его великую милость к тебе, святый мучениче Василиске, рекл еси усты своими: «Господи Иисусе! Киими словесы воспою Тя аз многогрешный»? И не токмо людие, но и скоти безсловеснии благоговеюще пред твоим смирением, славный мучениче Василиске, падоша на колена своя пред тобою, прославляюще сим тя, великаго угодника Божия, неустанно поющаго Богу: Аллилуйя.

Икос 9
Благодать творити чудеса приял еси от Бога, славный мучениче Василиске, тебе бо рече Сам Господь: «Не бойся, Аз есмь с тобою во вся веки». Ты же, надеяся на всемогущую силу Божию, многия сотворил еси чудеса людем команстим. И ныне повсюду молитвами твоими хромии ходят, слепии прозирают, глусии слышат, беснии исцелевают. Мы же тебе яко дивному чудотворцу зовем сицевая:
Радуйся, яко тебе дадеся власть от Бога целити недуги душевныя и телесныя;
радуйся, яко именем твоим беси исчезают.
Радуйся, яко молитвами твоими расслабленнии восстают;
радуйся, яко, памятию твоею прокаженнии очищаются.
Радуйся, яко молитвою твоею всякия неисцельныя болезни исцелевают;
радуйся, яко и ныне в водах источника твоего мнози, с верою в нем омывающиися, приемлют исцеления.
Радуйся, исцелений благодатных источниче;
радуйся, врачу душ и телес.
Радуйся, о нас к Богу непрестанный молитвенниче;
радуйся, скорый заступниче наш и наставниче.
Радуйся, Духа Святаго священное жилище;
радуйся, благодати Христовой славное вместилище.
Радуйся, Василиске, святый мучениче и чудотворче предивный.

Кондак 10
Спасти хотяй от идолослужения людей команских, ослепленных неведением, егда богопротивный правитель Агриппа повеле привести тя в идольское капище, да жертву тамо принесеши, силою Божиею идолов сокрушил еси и идольское капище молитвою твоею попалил еси. Видя же чудо сие, нечестивый гонитель разъярися зело и повеле усекнути мечем твою святую главу. Ты же, прияв весть сию, радостно воспел еси Богу: Аллилуйя.

Икос 10
Страшное видение видеша людие, бывший на месте усечения главы твоея, славный мучениче Василиске, яко небеса отверзошася и множество святых Ангел явишася прияти душу твою. И егда она несена бысть ангелы на небо, Сам Господь наш Иисус Христос явися срести тя тамо приветствии сими: «Приди, добрый и верный рабе мой Василиске, вниди в Царствие Мое, идеже пребывают вси раби Мои, пострадавший Мене ради». Мы же, радостно совершающе память твою, вопием сице:
Радуйся, подвигом своим Богу угодивый;
радуйся, сего ради от Него прославленный.
Радуйся, жизнь свою за Христа положивый;
радуйся, кровь свою за Христа пролиявый.
Радуйся, мечем за Христа усеченный;
радуйся, венцем мученическим от Него украшенный.
Радуйся, верным рабом от Христа именованный;
радуйся, яко сего ради предстоиши у престола Святыя Троицы.
Радуйся, исповедниче веры во Христа неустрашимый;
радуйся, воин Христов непобедимый.
Радуйся, яко молитвами твоими спасение улучити чаем;
радуйся, яко молишися о всех чтущих память твою.
Радуйся, Василиске, святый мучениче и чудотворче предивный.

Кондак 11
Пением возвеличаша память твою, мучениче Василиске, людие команстии и упросиша воина, да отдаст он им тело твое за мзду великую. В нощи же тя погребающе, возжелаша утолити жажду свою, и не бе оксрест воды им испити, но по молитве твоей, из камене яви им Господь источник воды чудодейственный. Ныне же вси приемлющие с верою воду сию, улучающе исцеления, Богу поют: Аллилуйя.

Икос 11
Новую показа благодать человеколюбец Господь, егда благоволи прославити тя, мучениче Василиске, чудесы на месте, идеже бе погребено тело твое. Земля, идеже бяху сокрыты мощи твоя, во едину нощь израсти злаки хлебныя. Мучитель же твой Агриппа, пораженный лютою болезнию, к твоему заступлению обратився, приложи землю, кровию твоею орошенную, и прият исцеление своим неисцельным ранам. Его повелением обретено бысть тело твое, и над гробом твоим храм воздвигнут во имя твое. Мы же таковому о имени твоем промышлению Божию радующеся, вопием ти сице:
Радуйся, вместилище благодати Божия;
радуйся, чудотворче предивный.
Радуйся, притекающим к тебе скорую помощь подающий;
радуйся, душевных и телесных недугов целителю.
Радуйся, в скорбех и напастех пребывающим скорый заступниче;
радуйся, заблудших на путь истинный приводящий.
Радуйся, правило веры и кротости;
радуйся, учителю благочестия.
Радуйся, мучеников украшение;
радуйся, страстотерпцев велия славо.
Радуйся, избранниче Божий;
радуйся, Духа Святаго собеседниче.
Радуйся, Василиске, святый мучениче и чудотворче предивный.

Кондак 12
Егда нечестивии агаряне землю команскую покориша, храм во имя твое разориша и мощи твоя забвению предаша, человеколюбец Господь благоволи паки прославити тя, святый мучениче Василиске. Свещею, горящею в нощи верху горы показа Он место, идеже бе сокрыто тело твое. Обаче егда раскопаша то место, оттуду паки и паки изыде облако, яко пламень горящий. И познаша вси людие команстии, яко Господь не благоволит, да тело твое паки на поругание богопротивным обретено будет. Мы же, дивящеся таковому благоволению Божию к тебе, святый мучениче Василиске, со умилением поем Богу: Аллилуйя.

Икос 12
Пение похвальное приносим ти, святый мучениче Христов Василиске, ты бо еси стена и прибежище непоколебимое всем с верою к тебе прибегающим. Во храме твоем обрете тихое пристанище великий святитель Христов Иоанн Златоуст. Егда в дивном видении Ты бо явился еси ему возвещая, яко вскоре на Небеси имать с тобою вкупе предстояти у Престола Святыя Троицы. Имуще убо таковаго пред Богом ходатая: и заступника, радующеся, ублажаем тя похвалами сими:
Радуйся, скорый помощниче всем чтущим память твою;
радуйся, яко на месте, идеже тело твое пребывает, многая и дивная чудеса нам являеши.
Радуйся, о нас пред Богом ходатай всесильный;
радуйся, утешителю скорбящих.
Радуйся, молитвенниче пред Богом о нас всехвальный;
радуйся, Святыя Троицы о нас умилостивителю.
Радуйся, Единаго Истиннаго Бога проповедниче;
радуйся, Пресвятыя Троицы верный служителю.
Радуйся, дивный недугов целителю;
радуйся, душ наших верный хранителю.
Радуйся, гордых смирителю;
радуйся, кротких веселие.
Радуйся, Василиске, святый мучениче и чудотворче предивный.

Кондак 13
О, святии угодницы Христовы, мученицы Евтропие, Клеонике и Василиске. Приимите сие хвалебное пение, вам приносимое, и благоприятным вашим ходатайством к Богу избавите нас от всяких зол и болезней, злых обстояний и вечных мучений и Небеснаго Владыку умолите, да и мы сподобимся в небесных селениих купно с вами воспевати всесильному Богу: Аллилуйя. (сей кондак – трижды, затем 1-й икос и кондак).

Молитва
О, преславный мучениче и великий целебниче Василиске. Телом на горе в Команех почивая, душею же предстоя престолу Святыя Троицы и в Ея обителех пребываяй, призри на люди, к тебе прибегающия и твоея помощи просящия. Испроси душам нашим оставление согрешений наших, вознеси глас молебный ко Христу Богу о нас, многогрешных, яко да ходатая тя милостива ко Владыце имеем. Просим и молим тя, святый мучениче Христов Василиске, не презри нас, недостойных, молящихся тебе. Буди нам в печалех утешитель, в недузех страждущим врач, в напастех скорый покровитель, всем Христианом предстатель и исцелитель. Испроси всем вся, яже ко спасению полезная, твоими благоприятными к Богу молитвами, да прославим всех благих подателя Бога, Единаго в Троице Святей славимого и поклоняемого, Отца и Сына и Святаго Духа, Ему же подобает слава, честь и поклонение всегда, ныне и присно и во веки веков. Аминь.


Краткое житие
Святые мученики Евтропий и Клеоник – родные братья, а св. Василиск – племянник святого мученика Феодора Тирона. Их мучили всех вместе в городе Амасии Понтийской области в Малой Азии (теперь Турция). Святого Феодора Тирона сожгли на костре, святых Евтропия и Клеоника распяли на крестах 3 марта 308 года (по новому стилю 16-го), а святого Василиска заточили в темницу. Но в том же 308 году весной он отпросился посетить родительский дом и получить от своей матери благословение на страдания ради Христа. По приказу епарха за ним был послан воинский отряд. Его сковали цепями, обули в медные сапоги с набитыми внутри гвоздями и повели по горным тропам под палящим зноем. В городе Команы (около Сухуми) 22 мая ему отрубили голову. Его тело выкупили благочестивые христиане и погребли на вспаханном поле. После совершения чудес и знамений над его могилой было обретено его нетленное тело, и построен в честь его имени храм, в котором в 407 году скончался изгнанный за правду Константинопольский патриарх – великий святитель Христов Иоанн Златоуст.

ТРОПАРЬ
Мученик Твой, Господи, Василиск / во страдании своем венец прият нетленный / от Тебе, Бога нашего; имеяй бо крепость Твою, / мучителей низложи, сокруши и демонов немощныя дерзости. / Того молитвами Христе Боже, спаси души наша.

КОНДАК
Во страдании крепок и мужествен явился еси, / и в чудесех предивен, / яствено имя Христово преднося, мучителей посрамил еси. / Тем же тя почитаем, святый Васисилиске, присно зовуще, всечестне: / Радуйся, мучеников светлая доброто.

ВЕЛИЧАНИЕ
Величаем тя, святый мучениче Василиске, и чтим честная страдания твоя, яже за Христа претерпел еси.[/spoiler]

Раб божий Константин

Акафист преподобному Василиску Сибирскому.
[spoiler]
Кондак 1
Избрал еси, Господи, угодника Твоего Василиска, / из млада сердце чисто созиждя в нем, / и, дары духовными изрядно его украсив, / явил еси земли Сибирстей подвижника дивнаго, / иже, пустыни тяжкая волею претерпевая, / молитвы чистыя благодать воистинну стяжа, / темже подвигни и нас, Христе Боже, горняя помышляти, / предстательством блаженнаго отца нашего, да поем тому: / Радуйся, преподобне отче Василисче, умнаго безмолвия велий рачителю.

Икос 1
Ангелов крилами к Богу воспаряющих, образы святыя издетска с любовию зрел еси, отче Василисче, темже, возрастом еще младенствуя, к Вышнему вознестися помыслил еси, во еже телесныма очима славу Божию видети, отонудуже крилы духовныя Господь тебе дарова, имиже в Небесныя обители воистинну вознеслся еси. Мы же, сим поучаеми, приносим ти таковая:
Радуйся, издетска в служение Богу избранный;
радуйся, светом божественнаго разума осиянный.
Радуйся, от млада познавый нищету телесную;
радуйся, воистинну стяжавый нищету духовную.
Радуйся, кротостию и незлобием ангелом подобниче;
радуйся, истиннаго смирения верным наставниче.
Радуйся, монахом и мирским красоту восхождения явивый;
радуйся, богоугодными делы страну Сибирскую просветивый.
Радуйся, преподобне отче Василисче, умнаго безмолвия велий рачителю.

Кондак 2
Видя желание твое, токмо единому Богови работати, и нрав послушливый, Господь Всеведец умягчи жены твоея сердце, юже родитель твой избра тебе, и тако три леты воздержанием себе испытующа, супружества соуз согласно расторгли еста; ты же, отче, душу твою Христу уневестив, радостне воспел еси Богу: Аллилуия.

Икос 2
Разумея волю Божию и закону Христову кротко повинуяся, блаженне, тяготы брата твоего, подвижника тайнаго, с любовию понесл еси, в немощах его служа ему усердно; наипаче же вкупе в молитвах прилежаща, вашим изрядным в Боге радением многия нерадивыя к исправлению призвали еста. Мы же, братолюбие христианское твое зряще, сице тебе взываем:
Радуйся, Бога паче всего земнаго возлюбивый;
радуйся, Того Единаго в животе твоем взыскавый.
Радуйся, яко любовь божественную мирстей любви предпочел еси;
радуйся, яко житейскую радость на тяготы пустынныя пременил еси.
Радуйся, образе смиренномудрия и послушания;
радуйся, правило постническаго воздержания.
Радуйся, помысла чистотою просиявый;
радуйся, яко Мария, благую часть избравый.
Радуйся, преподобне отче Василисче, умнаго безмолвия велий рачителю.

Кондак 3
Силою любве ко Господу мира красная отвергл еси, отче Василисче, отшельническое житие избрав, идеже ревностно подвизаяся, к вящшему постничеству приступил еси, и тако тело твое поклоны и бдении зело утруждая, страсти плотския воздержанием крайним уставил еси, вопия в смирении Богу: Аллилуия.

Икос 3
Имущу велие стремление богоугодно жити, Подвигоположник Господь показа тебе ума самочиннаго пагубу, и в леса брянския стопы твоя направи, идеже старцу пустынному Адриану в послушание себе вдал еси, отче, и, яко лоза благораслена, в трудех пустынных зело преспев, иноческим одеянием достойно украсился еси. Мы же взываем ти тако:
Радуйся, в пустыню, яко в цветник, с радостию вшедый;
радуйся, подвиги твоими, яко крин сельный, процветый.
Радуйся, нестяжанием зело обогативыйся;
радуйся, воздержанием крепким украсивыйся.
Радуйся, обет пустынничества при постриге твоем давый;
радуйся, егоже в подвизе добром до конца исполнивый.
Радуйся, псалмы и молитвы Господу присно возлиявый;
радуйся, поклоны земными от сна себе воставлявый.
Радуйся, преподобне отче Василисче, умнаго безмолвия велий рачителю.

Кондак 4
Буря искушений и бесов наветы обступиша тя, хотяще унынием душу твою поборити, ты же, отче Василисче, болезньми воздержания силу вражию посрамил еси, на камени смирения терпением велием веру твою утвердив, и тако немощь естества о Господе укреплял еси, денно и нощно возывая к Тому: Аллилуия.

Икос 4
Слышавше людие о твоем, отче Василисче, благочестном житии пустынном, стекахуся к тебе, желающе с тобою купно жительствовати и во спасении тобою наставлятися, ты же, святе, смирения истиннаго исполненный, невежду себе пред всеми почел еси, во еже в безмолвии един с Единым всегда пребывати. Мы же, богомудре, глаголем тебе тако:
Радуйся, сердце твое мирови затворивый;
радуйся, воле Божией всего себе покоривый.
Радуйся, благоуветия и благочестия смиренный учителю;
радуйся, словесным и безсловесным кроткий благодетелю.
Радуйся, с усердием на врага спасения противоставый;
радуйся, постом и молитвою демоны отгнавый.
Радуйся, духа нищету паче славы человеческия возлюбивый;
радуйся, не в многословии твоем глубину мудрости показавый.
Радуйся, преподобне отче Василисче, умнаго безмолвия велий рачителю.

Кондак 5
Боготочный источник духовныя благодати зря в тебе юный Зосима, тепле моляше тя, да ученик тебе прилежен будет, ты же, отче, духовными очами промысл Божий в сем прозрев, яко друга искренняго любовию того приял еси; темже словесы и делы на путь иночества тобою наставляемый Зосима радостне воспе Богу: Аллилуия.

Икос 5
Видя помышление духовника твоего, хотяща во обитель Коневскую тебе, отче, преселити, тепле моля просил еси того, да в отшельстве своем недвижимо пребудеши; обаче послушания ради, яко воли Божией повинуяся, с Зосимою вкупе, егоже возлюби душа твоя, за старцем своим последовал еси. Мы же, кротость твою ублажающе, взываем ти сице:
Радуйся, Авраамле послушание познавый;
радуйся, Иовлю терпению поревновавый.
Радуйся, иноче, в смирении и кротости совершенный;
радуйся, в безстрастия ризу оболченный.
Радуйся, скудною пищею тело твое изнуривый;
радуйся, хлебом Живота вечнаго душу твою насытивый.
Радуйся, простоты жития монашескаго наставниче;
радуйся, чистоты души христианския хранителю.
Радуйся, преподобне отче Василисче, умнаго безмолвия велий рачителю.

Кондак 6
Проповедуемым словесем Христовым, яко кроток есмь и смирен сердцем, воистинну поучился еси, труженниче пустынный, темже и Господь тя зело утеши, благоволив чрез Зосиму открыти ти сокровище молитвы сердечныя учения; ты же, преподобне Василисче, благодарен сый воспел еси Богу о сем: Аллилуия.

Икос 6
Возсиял еси на острови Коневстем высотою жития твоего, отче досточудне, идеже в молитвы делании вельми возрастая, ум твой священным безмолвием просветил еси, и сладость молитвенную о имени Иисусове, рекою из сердца обильно изливаему, вкусил еси, богоблаженне. Мы же, толикое дарование в тебе зряще, смиренно взываем ти:
Радуйся, словес евангельских послушателю благодатный;
радуйся, ига Христова благаго носителю благодарный.
Радуйся, добродетель благую, трезвение, стяжавый;
радуйся, ума хранением сердце твое очистивый.
Радуйся, благодати Божией хранилище преисполненное;
радуйся, Духа Святаго жилище достойное.
Радуйся, высоты Христова разумения достигнувый;
радуйся, ум твой с сердцем в молитве срастворивый.
Радуйся, преподобне отче Василисче, умнаго безмолвия велий рачителю.

Кондак 7
Хотя, преподобне, в Бозе Единем всегда пребывати, ум твой памятованием Христовым от всякия страсти очистил еси, и Духа Святаго благодатию молитву самодвижиму в сердце твоем стяжал еси, темже непрестанно Господеви в любви предстоя, в умилении чистом вопиял еси Ему: Аллилуия.

Икос 7
Новую лествицу восхождения чтим тя, богомудре, ты бо любве ради благоволил еси, молитвенных твоих деяний рукописание, егоже сподвижник твой и сотаинник Зосима прилежный списатель бысть, по преставлении твоем на полезное мирови явити. Мы же, отче Василисче, молитвенно светильник сей приемлюще, в спасительной ревности взываем ти:
Радуйся, Христа Бога в сердце твоем вместивый;
радуйся, имя Его спасительное в уме всегда носивый.
Радуйся, молитвенную сладость сердцем твоим познавый;
радуйся, слез благодатных поток умилительный источивый.
Радуйся, к Богу пламеневый любовию великою;
радуйся, яко действом ея сердце твое взыграся.
Радуйся, молитвы чистыя священнодейства стяжателю;
радуйся, сокровенных Божиих предивный тайнозрителю.
Радуйся, преподобне отче Василисче, умнаго безмолвия велий рачителю.

Кондак 8
Странен быв всякия славы человеческия, единыя славы Божия иский, блаженне, в пустыню внутреннюю с Зосимою верным удалитися возжелал еси, Василисче, темже, старцем твоим благословенный, предел Сибирских достигл еси, идеже лишения многа претерпевая, Богу в надежде воспевал еси: Аллилуия.

Икос 8
Все упование возложив на промысл Божий и к Пречистей в молитвах всегда прибегая, пустынниче святый, яко птица небесная попечением малым о телесе твоем тщался еси, паче же воздержанием многим дух твой укрепив, красоту исправлений твоих верным уяснил еси, темже приими от нас сицевая:
Радуйся, узок путь во Царствие небесное избравый;
радуйся, пустынничества крест волею подъявый.
Радуйся, страны мразныя не убоявыйся;
радуйся, ветра хладнаго не устрашивыйся.
Радуйся, скорби и болезни мужественно понесый;
радуйся, Заступницею усердною всегда хранимый.
Радуйся, молитвы храм в сердце твоем воздвигнувый;
радуйся, труд, терпение и усердие в основание того положивый.
Радуйся, преподобне отче Василисче, умнаго безмолвия велий рачителю.

Кондак 9
Всего себе Господу освятив, отче Василисче, в болезнях жестоких Христу сраспялся еси воистинну, и в пустыни, яко во гробе, Тому спогреблся еси, блаженне, и Того ради многая злострадания претерпел еси, но любве Божия никако же отпал еси, присно поя Ему: Аллилуия.

Икос 9
Витии многоречивии умолкают, зряще твоего, отче Василисче, жития безмолвнаго подвиг, ибо яко пламя прилежит свещи, тако ты, блаженне, умом и сердцем твоим воистинну Христу в молитве срастворился еси. Мы же, таковое действо в тебе зряще, любовию взываем ти:
Радуйся, Богу в любви непрестанно предстоявый;
радуйся, благодать Богообщения стяжавый.
Радуйся, великих дарований небесных приятелю;
радуйся, духов поднебесных велий устрашителю.
Радуйся, на высоту добродетелей восшедый;
радуйся, Царствие Божие внутрь себе имый.
Радуйся, Владыки вышняго верный служителю;
радуйся, истинныя радости о Боге благий стяжателю.
Радуйся, преподобне отче Василисче, умнаго безмолвия велий рачителю.

Кондак 10
Спасения ради души твоея, отче Василисче, многая лета в пустыне неисходно подвизался еси, и тамо старости честныя достигнув, высоту добродетели стяжал еси, темже Господь на ину стезю направи тя, во еже ближних спасению послужити, отонудуже малую братию собрав, воспел еси Богу: Аллилуия.

Икос 10
Стена крепкая в молитве братии пустынней был еси, святый Василисче, духом сокрушенным, яко мечем, научал еси тех коварства вражии посекати, и нас ныне от сна лености житием твоим богозарным пробуждая, явился еси утешения духовнаго податель. Мы же, подвиги твоя ублажающе, воспеваем тя сице:
Радуйся, в горении духа ангелом уподобивыйся;
радуйся, в доброделании душею обновивыйся.
Радуйся, чистою молитвою изрядно благоукрашенный;
радуйся, во брани невидемей воине совершенный.
Радуйся, правды Божией всегда алкавый;
радуйся, рая сладости еще на земли вкусивый.
Радуйся, блаженнаго смирения доброту стяжавый;
радуйся, Иерусалим небесный воистинну наследивый.
Радуйся, преподобне отче Василисче, умнаго безмолвия велий рачителю.

Кондак 11
Пение умиленное тебе приносим, блаженне отче, и успению твоему с трепетом внимаем, ибо всельшагося в тя Святаго Духа действо благодатию обильно сердце твое напита, якоже и по изшествии души твоея ко Господу молитвы чистыя двизанием сердце твое исполненно бе. Мы же, сему дивящеся, вопием Богу о тебе: Аллилуия.

Икос 11
Светом божественным просвещенный, отче Василисче, внутренняго делания высоты молитвы непрестанныя достигл еси, отонудуже умными очами сердечными Свет присносущный воистинну сподобился еси зрети, имже вельми озаренный сам световиден верным показался еси, темже приими от нас таковая:
Радуйся, главо, о Господе присно любомудрствующая;
радуйся, заре, от нощи к Богу утреннюющая.
Радуйся, яко руце твоя в молитве многажды простирал еси;
радуйся, яко нозе твоя во бдениих зело претрудил еси.
Радуйся, заповеди Евангельския до конца совершивый;
радуйся, обетования Евангельския вправду восприемый.
Радуйся, яко житием твоим ко благочестию нас пробуждаеши;
радуйся, яко деянии твоими на путь спасения нас наставляеши.
Радуйся, преподобне отче Василисче, умнаго безмолвия велий рачителю.

Кондак 12
Блажен воистинну еси, отче Василисче, ибо в клеть сердца твоего вшед, собеседник любезен Господеви был еси, и яко Серафими любовию к Нему горел еси, и якоже Херувими всегда умно Его зрел еси; ныне же в нескончаемой радости пребывая, и нас научаеши славословити Бога: Аллилуия.

Икос 12
Поюще честную память твою, отче Василисче, благодарная приносим ти, и молитв благоухание от мощей твоих приемлюще, веселия духовнаго исполняемся, и твоя, пустыннолюбче, труды и болезни, Христа ради подъятыя, ублажающе, достойно величаем тя словесы таковыми:
Радуйся, звездо, спасения путь ко вратом небесным нам указующая;
радуйся, сокровищнице, пребезценный камень, Христа, в себе имущая.
Радуйся, кладезю, духовною влагою обильно нас напаяяй;
радуйся, столпе, несокрушимую силу молитвы во брани являяй.
Радуйся, стамно, чудесы доныне богатно преизливаемая;
радуйся, реко, деянии твоими души верных орошающая.
Радуйся, в скорбех пребывающим скорый и благий поспешниче;
радуйся, тебе чтущих теплый и верный к Богу молитвенниче.
Радуйся, преподобне отче Василисче, умнаго безмолвия велий рачителю.

Кондак 13
О, пустынниче дивный, преподобне отче Василисче, к тебе в смирении припадаем, яко стяжавшему велию Духа Святаго благодать: призри с высоты райския на нас, дольними обуреваемых, и подаждь душам нашим молитвами твоими возрастание духовное, во еже чистым умом и сердцем достойно пети Христу Богу нашему: Аллилуия, аллилуия, аллилуия.

Сей кондак чтется трижды, затем Икос 1 и Кондак 1.
Молитва
О, преподобне и богоблаженне отче наш Василисче, безмолвия доблий рачителю и пустынножителю ревностный, умнаго делания смиренный наставниче и послушания предивный образе! Ты мира сладости бегая, пустыни непроходныя достигл еси, в нейже многая лета, богомыслием озаряем, в трудех пустынных подвизался еси, смиренномудрия глубину ископав; сего ради, яко сокровище пребогатое, сердечныя молитвы сладость утешительную Господь тебе дарова, еяже действием великих дарований исполнился еси. Темже молим тя, отче Василисче, воззри на ны, унылыя и немощныя, и возгрей в сердцах наших истинную ревность о Христе Иисусе Господе нашем, Иже есть един источник спасения нашего. Буди нам поспешник к высоты духовныя восхождению: ум наш в трезвении бодренном укрепи и дух сокрушен в сердца наша вкорени; наипаче вразуми, научи и усердие неослабное в молитве непрестанней подаждь нам, во еже освятити уста, умы и сердца Христу Богу нашему, Егоже именем отбежит от нас всякая неправда и уныние, диавольским действом составляемыя, и да просветятся души наша светом любве Божественныя ко исправлению жития нашего, да не погибнем в огне аки плевелы, но, яко пшеницу чистую, соберет ны Господь в житницу Свою небесную, идеже вси любящии Его в радости нескончаемей пребывают, славяще Отца, и Сына, и Святаго Духа, во веки веков. Аминь.[/spoiler]

Раб божий Константин

Акафист святей преподобней Вассе Псково-Печерстей.
[spoiler]Кондак 1.
Избранней от мирскаго жития на подвиг иноческий спасительный, утешению и радости верных, преподобней Вассе похвальная восписуем пения. Ты же внемли недостойным мольбам нашым, донеси прилежне до Царя славы и Господа, да со умилением зовем ти сице: Радуйся, преподобная мати Вассо, помощнице наша прерадостная.

Икос 1.
Ангельстии лицы возрадовашася ти, егда родилася еси в мир сей, ведяще тя предъизбранную к подвигом и добродетелем. Мы же, обретше тя добродетельную помощницу и молитвенницу, взываем ти сице:
Радуйся, возрадовавшая рождением родителей твоих.
Радуйся, ангельския усладившая очеса.
Радуйся, красотою души измлада богатая.
Радуйся, детский трепет души посвятившая Богу.
Радуйся, Духа Святаго в крещении приявшая.
Радуйся, печатию дара Духа Святаго назнаменованная.
Радуйся, отрекшаяся сатаны и всех дел его.
Радуйся, истинную веру устами восприемника исповедавшая.
Радуйся, ризою светлою одеявшаяся.
Радуйся, с пострижением власов нечистоту греха отчуждившая.
Радуйся, преподобная мати Вассо, помощнице наша прерадостная.

Кондак 2.
Видяще родители, яко дщи родися преславная, возблагодариша Бога, даровавшаго таковую милость верным, и воспеша от всея души: Аллилуиа.

Икос 2.
Разум даровася тебе от Бога, егда еще отроковица младая сущи, благочестию и молитве научена была еси. Ты же, яко пчела, мед добродетелей собирала еси, сего ради приими от нас пения сия:
Радуйся, от юности в благочестии воспитанная.
Радуйся, возлюбившая Бога всем сердцем своим.
Радуйся, в любви к ближнему совершенствовавшаяся.
Радуйся, родителей своих почитавшая.
Радуйся, послушанием приносившая им радость.
Радуйся, очеса твоя кротостию украшахуся.
Радуйся, яко руце твои на добродетели простирахуся.
Радуйся, нозе бо твои шествоваху незаблудным путем.
Радуйся, и нас научающая сим добродетелем.
Радуйся, в скорбех отрадо наша.
Радуйся, в молитвах прибежище верных.
Радуйся, преподобная мати Вассо, помощнице наша прерадостная.

Кондак 3.
Сила Господня осени тя, егда подвизалася еси на добродетели, вразуми бо тя Господь, да украсиши житие твое, аки каменьми драгоценными, милосердием, братолюбием и кротостию, и воззвеши Богу: Аллилуиа.

Икос 3.
Имущи богатство неисчислимое в сердце своем, сложенное от юности, востекла еси к супружнику твоему Иоанну, привлекши его сим богатством, да восприемлет тя на брак честен. Сего ради зовем ти:
Радуйся, с чистотою тела и чистоту души соблюдшая.
Радуйся, с добродетельным Иоанном в брак честен вступившая.
Радуйся, добродетельной супружницей явившаяся.
Радуйся, в таинстве брака благодать получившая.
Радуйся, с сею благодатию преславне пожившая.
Радуйся, славою и честию венчавшаяся.
Радуйся, к сему житию путеводящая.
Радуйся, помощнице брак честен соблюдающым.
Радуйся, наказательнице неверных жен и мужей.
Радуйся, верных Христови обручающая.
Радуйся, неверных от своея помощи отревающая.
Радуйся, преподобная мати Вассо, помощнице наша прерадостная.

Кондак 4.
Бурею естества человеческаго преклоняемая ко греху, яко адамант тверд была еси, с сокрушением в покаянии очищала еси себе от зол мира сего и добродетельми блистала еси, яко заря солнечная ликующи, вопиющи Богу: Аллилуиа.

Икос 4.
Слышаша людие о тебе, преподобная, яко вельми добродетельми украшена, стекахуся к тебе, да почерпают от сего источника благодати. Егда же утешение получаху, согласно взываху к тебе:
Радуйся, луно, светящая в нощи греховней сущым.
Радуйся, звездо, ведущая к добродетели.
Радуйся, напитавшая алчущаго.
Радуйся, напоившая жаждущаго.
Радуйся, приявшая страннаго в своя обители.
Радуйся, согревшая во мразе сущих.
Радуйся, заповедем Божиим сопричастнице.
Радуйся, добродетели всякия правило.
Радуйся, смирением облеченная.
Радуйся, кротостию украшенная.
Радуйся, сладкоуханная цевнице.
Радуйся, преподобная мати Вассо, помощнице наша прерадостная.
Кондак 5.
Боготечная звезда была еси, сияющи супружнику твоему Иоанну, егда сан иерейский прият; разделяла бо еси житием твоим вся красоты и скорби пастырскаго его подвига, непрестанно вопиющи: Аллилуиа.

Икос 5.
Видеша ближний и дальний честную двоицу добродетельную во спасении и трудех жительствующую, вознесоша благодарный глас свой к Богу и воспеша тебе сия:
Радуйся, благая печальнице иереа Божия.
Радуйся, блистающая светом отчим.
Радуйся, труды пастырства разделявшая житием своим.
Радуйся, светильниче, освещая путь скорбный.
Радуйся, премудростию венчанная.
Радуйся, иерею Божию сопутствовавшая.
Радуйся, сладость службы Божественныя приимавшая духом.
Радуйся, благоговейно внимавшая глаголом живота.
Радуйся, сердце свое жилищем Бога соделавшая.
Радуйся, в Бозе и ради Бога жившая.
Радуйся, светом веры и нас озаряющая.
Радуйся, преподобная мати Вассо, помощнице наша прерадостная.

Кондак 6.
Проповедницы людие быша, егда о подвизех преподобнаго Марка рекоша и на стогны града Пскова молву донесше, возвестиша о добродетельном житии его и подвизех. Мы же ведуще сия, велегласно зовем: Аллилуиа.

Икос 6.
Возсия житие преподобнаго Марка в земли Псковствей, и стекахуся в пустыню печерскую тщащиися жития иноческаго. Тако и ты, преподобная, с супругом твоим востекла еси в леса и дебри печерстии, бегающи мира лукавствия. Сего ради приими от нас похвалы сия:
Радуйся, прелесть мирскую оставившая.
Радуйся, к иноческому деланию прибегшая.
Радуйся, преподобным Марком умудренная.
Радуйся, его наставлением внимавшая.
Радуйся, подвиги его лицезревшая.
Радуйся, мира тленнаго не возжелавшая.
Радуйся, твоему супругу подражавшая.
Радуйся, дебрьми и лесом не устрашенная.
Радуйся, злокозненныя наветы диавола победившая.
Радуйся, ангелов теми возвеселившая.
Радуйся, со ангелы во славе небесней ныне ликуеши.
Радуйся, преподобная мати Вассо, помощнице наша прерадостная.

Кондак 7.
Хотящи оставити мир сей, востече честная двоица к преподобному Марку, и ту водворися на подвиги. Облагоухашася молитвами преподобных дебри, яже при потоце Каменце, в пещерах же Богом зданных учредишася церковь, в нейже иноцы согласно пояху: Аллилуиа.

Икос 7.
Новую и преславную силу изведа двоица честная, приобщившися чину иноческому и пострижение приимши, подвиги бо усугубиша в лесех и пропастех земных. Мы же ведуще сия глаголем:
Радуйтеся, иноческаго жития ревнителие.
Радуйтеся, пострига монашескаго возжелавшии.
Радуйтеся, в постризе Богу себе всецело предавшии.
Радуйся, плоть свою трудами томившии.
Радуйся, Иоанне Ионой нареченный.
Радуйся, житию пророка Ионы подражавый.
Радуйся, в пещерах яко во чреве китове пребывавый.
Радуйся, яко чрево земли бысть тебе отрадою.
Радуйся, и супружницу твою Христу обручивый.
Радуйся, Вассо блаженная, подражательнице супругови своему.
Радуйся, подобно ему, в недрех земли молившаяся.
Радуйся, всех благ земных Христа ради лишившася.
Радуйся, преподобная мати Вассо, помощнице наша прерадостная.

Кондак 8.
Странное и преславное чудо слышаша зверолови, пришедше на святую гору, и гласы пений иноческих уловивше из земли, страхом объяты бывше, поведаша о сем и возопиша Богу: Аллилуиа.

Икос 8.
Вся к небесным взята бывши преподобная, но и на земли усердно подвизалася в делании иночестем упраждняющися. Сего ради приими от нас похвалы сия:
Радуйся, правила монашеская возлюбившая.
Радуйся, молитвою к Богу всегда пламенеющая.
Радуйся, обеты иноческия Богу принесшая.
Радуйся, послушание паче укрепившая.
Радуйся, сему дару и нас научающая.
Радуйся, нестяжание приобретшая.
Радуйся, от корысти и скверноприбытчества нас ограждающая.
Радуйся, сладость молитвы познавшая.
Радуйся, сею пищею и нас питающая.
Радуйся, пустынное житие предпочетшая.
Радуйся, в двери рая с преподобным Ионою возшедшая.
Радуйся, преподобная мати Вассо, помощнице наша прерадостная.

Кондак 9.
Всяких сил небесных ныне являешися сопричастница, святая и преподобная Вассо, предстоиши бо у Престола Божия и непрестанно молишися за ны, вопиющыя Богу: Аллилуиа.

Икос 9.
Витии многоглаголивии не могут изрещи подвиги и труды твоя, яко женское естество отвергши, к суровому пустынническому житию востекла еси. Мы же, ведуще силу Господню, воскликнем ти:
Радуйся, Господня избраннице.
Радуйся, небесных селений достигшая.
Радуйся, любовь твою обильно на нас проливающая.
Радуйся, весь печерскую освятившая своим пребыванием.
Радуйся, подвиги твоими и нас вдохновляющая.
Радуйся, ведущая нас на небо.
Радуйся, всем прибегающым к тебе скоро помогающая.
Радуйся, заблудших незримо вразумляющая.
Радуйся, утешение наше присное.
Радуйся, пустыни тезоименитая.
Радуйся, пустынное житие являющая.
Радуйся, преподобная мати Вассо, помощнице наша прерадостная.

Кондак 10.
Спасти хотя род человечь человеколюбец Господь, дарова нам помощницу в бедах и обстояниих, скорбех и печалех, о преподобная Вассо, да всяк возраст утешен будет и в радости воскликнет: Аллилуиа.

Икос 10.
Стена еси верным и сладкая отрада. Сего ради присно зряще на образ твой, радуемся грешнии и со дерзновением восклицаем:
Радуйся, радосте наша любезная.
Радуйся, мати всем крова лишенным.
Радуйся, одеждею нас снабдевающая.
Радуйся, всегда Бога о нас умоляющая.
Радуйся, иноком присная помоще.
Радуйся, в подвизех иноческих утверждающая.
Радуйся, страстей и наветов плоти отгонительнице.
Радуйся, в крестоношении нам помогающая.
Радуйся, молитве незримо научающая.
Радуйся, в сладость молитву нам претворяющая.
Радуйся, в подвизе поста укрепляющая.
Радуйся, преподобная мати Вассо, помощнице наша прерадостная.

Кондак 11.
Пение хвалебное приими от нас, преподобная мати, внемли молением нашым, защити нас от всякаго зла, сохрани град сей и обитель, да будет верным утешение и прибежище, идеже возможем пети: Аллилуиа.

Икос 11.
Светоприемная свеща бысть житие твое, преподобная; сего ради Господь нетлением тя прослави, мы же ныне пречестную раку мощей твоих зряще, тебе восклицаем:
Радуйся, нетлением почтенная.
Радуйся, Царства Небеснаго наследнице.
Радуйся, во врата узкая вшедшая.
Радуйся, ныне с Богом беседующая.
Радуйся, Христу сраспинавшаяся.
Радуйся, слезами покаяния себе омывшая.
Радуйся, яко слезы молитв твоих обратишася в радость.
Радуйся, вельми чадолюбивая ко грешным.
Радуйся, о гресех за сих чад усердно умоляющая.
Радуйся, сердце коегождо зрящая.
Радуйся, доброе намерение целующая.
Радуйся, преподобная мати Вассо, помощнице наша прерадостная.

Кондак 12.
Благодать ти дана от Бога милостию посещати чад обители твоея, на месте, идеже ты житие монашеское провождала еси. Мы же ведуще сие и радующеся прилежне, во умилении восклицаем Богу: Аллилуиа.

Икос 12.
Поюще тя, преподобная мати Вассо, не возможем песне достойных составити ко прославнию имене твоего честнаго, токмо на любовь твою надежду возложим, да восхвалим тя пении сими:
Радуйся, житием своим Бога воспевшая.
Радуйся, питающая нас хлебом небесным.
Радуйся, девства страже неусыпный.
Радуйся, иноков вельми возлюбившая.
Радуйся, места сего оградо необоримая.
Радуйся, града Печер оплоте верный.
Радуйся, Псково-Печерския обители украшение.
Радуйся, яко рака твоя ныне зрима есть.
Радуйся, фимиаме молитв усердный.
Радуйся, ты бо вся прошения наша слышиши.
Радуйся, яко николиже нас оставляеши.
Радуйся, преподобная мати Вассо, помощнице наша прерадостная.

Кондак 13.
О преподобная и всехвальная мати Вассо, обители Псково-Печерския инокине! Внемли милостивно молением нашым и вся прошения наша исполни, да восхвалим Бога песнию: Аллилуиа.
Кондак сей глаголи трижды, таже икос 1-й и кондак 1-й.

Молитва
О всехвальная и преподобная мати наша Вассо! Сосуде Богом избранный, и аки каменьми драгоценными добродетельми украшенный! Обители Псково-Печерския красото и славо; жития иноческаго утверждение и правило. К Тебе ныне припадаем, и со слезами колена сердца нашего пред ракою мощей твоих преклоняем, мощи твоя любезно чествуем и вельми радуемся, зряще благоуханное и праведное тело твое, никогдаже покидающее ны, но на всяк день и час в честней раце пребывающее, во граде и обители сей на радость верным. Темже из глубины души к тебе взываем: внемли недостойным молением нашым: услыши глас сирых раб твоих, в горких прошениих к тебе приникших, исполни их скоро. Буди любящая мати к скорбящым чадом и прошения наша скоро вознеси в Небесное Царство, к подножию ног Господа и Спасителя нашего. Ты в благочестии и вере воспитанная, даруй нам, да и мы твердо держим веру нашу православную и благочестием украшаемся. Ты супружницею благоговенаго Иоанна ставшая и во браце спасение почерпшая, егда же супруг твой пресвитером соделася добре стадо свое управляя, тогда ты в пастырских трудех ему усердно помогаше житием твоим праведным, яко звезда сияющи в нощи греховней сущым, и скорби и радости его непрестанно разделяющи; сего ради и всем сущым в брачнем житии, помози спасение улучити, в мире и единомыслии житие проводити, брак честен и ложе нескверно блюсти. Ты брачному житию монашеское предпочетшая, на склоне лет твоих вместе с супружником твоим стопы в весь Печерскую к водам потока Каменца направившая, да тамо вкупе с преподобным подвижником Марком в делании иночестем подвизаетеся; помози и нам нозе наши к добродетели направляти и всегда от прелести мира сего на спасительное делание тщатися, да омыют и наша беззакония и грехи спасительныя воды молитв и подвигов. Ты с супружником твоим вкупе чин монашеский приявшая и скорби жития иноческаго понесшая, даже до смерти твоея, тщаливо Богу работающи, да стяжеши венцы небесныя; умоли Бога, да и мы в подвизех иноческаго делания укрепимся и свя скорби и тяготы на радость преложим, да наследим и мы венцы небесныя твоею помощию и молитвами о нас, чадех твоих, восхваляюще всеблагаго Бога, даровавшаго таковую заступницу верным, ныне и в безконечныя веки. Аминь.[/spoiler]

Раб божий Константин

АКАФИСТ преподобному отцу нашему Венедикту, Нурсийскому чудотворцу.
[spoiler]Кондак 1.

Возбранный отче преподобне, тобою бо Христос яко светом неугасимым мир просвети и расточи тмы вражия. Таковому о тебе смотрению дивящеся, хвалим тя, яко заступника от всяких бед, благодарственно зовуще: Радуйся Венедикте, Нурсийский Чудотворче.



Икос 1.

Ангельский образ жития возлюбивый от юности, в место пусто бежал еси суетнаго мира, поправый вся прелести его и вперивый к горнему ум твой, силам безплотным собеседник явивыйся; с ними же и мы воспоем ти: Радуйся, Христу распеньшемуся последовавый; радуйся, умертвивыйся миру, Богу единому жити восхотевый. Радуйся, слез теченьми пустыню оросивый; радуйся, восхождением сердца победивый лукавыя. Радуйся, славу мира сего возненавидевый; радуйся, пощением, яко ангел показавыйся. Радуйся, целомудрия венцем от юности увязанный; радуйся, яко крин чистоты прозябший. Радуйся, на камени дом свой поставивый; радуйся, бисер многоценный Царствия обретший. Радуйся, смирение Христово восприявый; радуйся, древо жития райскаго явивыйся. Радуйся Венедикте, Нурсийский Чудотворче.



Кондак 2.

Видев тя, яко столпа богоразумия, древний змий покусися сокрушити тя, но ты многими подвиги плоть умертвивый, наказал еси ны пети с упованием: Аллилуйя.



Икос 2.

Разума горняго преисполнен и благодатию, аки ризою одеявся в немощи, собрал еси множество пети Господа. С ними же и мы, яко звезду всемирну возсиявшу на Церковной тверди, восхвалим тя, поюще: Радуйся, нечестия державу разоривый; радуйся, смрадную лесть бесовскую прогнавый. Радуйся, даров духовных исполненный от младости; радуйся, миро божественных вещаний источивый. Радуйся, крест Христов восприемый; радуйся, крепостью Его опоясанный. Радуйся, стадо твое от волков мысленных спасающий; радуйся, поющих Господа наставниче премудрый. Радуйся, кротости кладезе глубокий; радуйся, немощным помощниче предобрый. Радуйся, Царствия Божия делателю верный; радуйся, недужных целителю независтный. Радуйся, Венедикте, Нурсийский Чудотворче.



Кондак 3.

Силою вышнею, аки древле Илия дождь с небес низвел еси и елей людем твоим умножил еси, показуя милосердие Божие простерто на ны и наставляя светло звати: Аллилуйя.



Икос 3.

Имущаго силу духи темныя отгоняти, како достойно восхвалим тя, Венедикте, яко и одержимый от бесов свободил еси и мертвыя воздвигнул еси. Тем же мы тя ублажаем, поюще: Радуйся, идольския лести корнесекателю; радуйся, святаго благочестия насадителю. Радуйся, мрак неведения отгнавый; радуйся, яко звезда златозарная просиявый. Радуйся, многотерпения сосуде избранный; радуйся, милостию Божией украшенный. Радуйся, всякия суеты отметавыйся; радуйся, Богу весь соединивыйся. Радуйся, нищелюбием украсивыйся; радуйся, недуги изцеляющий. Радуйся, в печалех скорый помощниче; радуйся, в скорбех верный заступниче. Радуйся, Венедикте, Нурсийский Чудотворче.



Кондак 4.

Буря мракобесия хотящая низвергнути тя, досточудне, яко на горе жития святаго стояща, не возмогши противитися силе твоей — сокрушися; мы же чудящеся таковой крепости, хвалим тя, поюще: Аллилуйя.



Икос 4.

Слышаще како высотою праведности уподобился еси горним силам, отче, умножишася паки спасаемые окрест тя, тем же процвете аки крин пустыня. С ними же и мы дерзаем воспевати ти умиленно: Радуйся, в светлую ризу безстрастия оболкийся; радуйся, на земли ангельское житие поживый. Радуйся, пречудне, пути спасения верно наказавый; радуйся, сильне, идолобесие поправый. Радуйся, меда сладчайши устом правило начертавый; радуйся, сердце твое, аки зерцало богомыслия явивый. Радуйся, обитель Троице твой дух сотворивый; радуйся, в похвалу Господню ограду великую создавый. Радуйся, провидче, проразумением украшенный; радуйся, Преподобие, по воздуху в бедах сущих предваривый. Радуйся, богомудре, тобою бо научаются вернии; радуйся, богоблаженне, тобою бо спасаются мнози. Радуйся, Венедикте, Нурсийский Чудотворче.



Кондак 5.

Богоприемный сосуде, Христовой любве всю душу твою привязавый, направил еси ума твоего шествие к небесем и аки Моисей воду живу из земли безводней изведый; како не воспоим Христа толику благодать ти даровавшаго, зовуще со страхом: Аллилуйя.


Икос 5.

Видяще тя, яко садителя чистоты, из суемудрия изведшаго тмы спасаемых, чтуще любовию святую память твою, вопием ти сице: Радуйся, паучины хитрословесныя растерзаяй; радуйся, страху Божию наставляяй. Радуйся, Ангелов на небеси удививый; радуйся, бесов в преисподней устрашивый. Радуйся, яко тобою мысленно плененные свобождаются; радуйся, яко тобою сынове света услаждаются. Радуйся, водою умиления напаяющий; радуйся, хлебы благодати подавающий. Радуйся, столпе световиден благонравия; радуйся, Духа обиталище светозарное. Радуйся, вертограде цветов благоуханных; радуйся, раю плодов живоподательных. Радуйся, Венедикте, Нурсийский Чудотворче.


Кондак 6.

Проповедание Христа распеншагося твоим житием утвердивый, явился еси молитвенник дерзновенный о душах наших, тем же благочестно тя славим поюще Богу: Аллилуйя.



Икос 6.

Возсиявый в Церкви яко светило незаходимое, сокрушил еси, отче, идолобесие всеусердно, виноград же мысленный Христу возделал еси. Никако разуму сотворенному достигнути величия жития твоего, токмо любовию дерзаем воспевати ти смиренно: Радуйся, тмы сокрушителю сильный; радуйся, света явителю верный. Радуйся, отцев мысленная красото; радуйся, преподобных велие удобрение. Радуйся, уз скорый разрешителю; радуйся, плачущих быстрый утешителю. Радуйся, в бурных морях утишие; радуйся, плавающих звездо пресветлая. Радуйся, древо на истоках водных прозябшее; радуйся, корене молитвы благодатный. Радуйся, имени Христова благовоние; радуйся, велений Его исполнение. Радуйся, Венедикте, Нурсийский Чудотворче.



Кондак 7.

Хотяще нечестивии паки погубити тя, богоприятне, брашно предложиша ти ядоносное. Ты же врану подал еси бросити его далече; видяще твоего прозрения силу, со страхом поем Богу: Аллилуйя.


Икос 7.

Новая тварь в тебе, отче, тайновидно показася, плоти превыше быв и яко Ангел на земли поживый девства пречуднаго прозябением, благочестивых тако пети возставляеши: Радуйся, тмы предстателя ярость низложивый; радуйся, Тотилу царя премудро научивый. Радуйся, в пощении просиявый; радуйся, плоти мудрование умертвивый. Радуйся, елей во чванце умноживый; радуйся, целений благодать стяжавый. Радуйся, к животу горнему наставниче; радуйся, великия обители столпе. Радуйся, миру умерший и со Христом спогребыйся; радуйся, ризу спасения дивно исткавый. Радуйся, воздержания и кротости мерило; радуйся, чистоты евангельския образе. Радуйся, Венедикте, Нурсийский Чудотворче.



Кондак 8.

Странен мирови показался еси, славу его, аки прах вменивый, Ангелом собеседник был еси, Венедикте, и тако лику святых сочетаешися, поющих: Аллилуйя.



Икос 8.

Всему бо мирови молитвенник явился еси изряден и нищих заступник, реки чудес источивый. Тако песньми потщимся ублажати тя, преподобне: Радуйся, яко усередно за ны Бога молиши; радуйся, яко из тмы неразумия изимаеши. Радуйся, сосуде непреложныя правды; радуйся, свитче благости Христовыя. Радуйся, доброе миру благоухание; радуйся, пречудное молитвы кадило. Радуйся, винограде райскаго насаждения; радуйся, класе обильный нивы Божией. Радуйся, луче, тму разсекающий; радуйся, лампада любве неугасимыя. Радуйся, яко тобою узы уныния духовнаго спадают; радуйся, яко тобою богомудрии веселятся. Радуйся, Венедикте, Нурсийский Чудотворче.



Кондак 9.

Всякую тварь узрел еси, в лучи единем сияющу во изступлении быв, и душу сестры твоея преподобныя Схоластики в виде голубине восходящу горе и поющу: Аллилуйя.



Икос 9.

Ветия многообразныя како изчислити можно суемудренным помыслом, отче, твоего преставления, яко уснул еси пребогатый — успением блаженным, предстоя во храме Господу твоему. Сему чудящеся, дерзаем пети ти сице: Радуйся, яко Господа твоего узрел еси; радуйся, яко чудес Его исполнился еси. Радуйся, яко путь показуеши в горняя; радуйся, яко милости подавши, щедре. Радуйся, яко лестница показался еси неуклонная; радуйся, яко кладязь еси мудрости небесныя. Радуйся, яко цевница еси Духа Свята; радуйся, яко благодати стамна еси златая. Радуйся, в смирение Христово оболкийся; радуйся, славою Его увенчавыйся. Радуйся, яко тобою благость Спаса нашего восприемлем; радуйся, яко тобою терпением Его увязуемся. Радуйся, Венедикте, Нурсийский Чудотворче.



Кондак 10.

Спасения врази многажды приидоша на тя и на братию твою, скрежетанием зубным и лаянием ярость показуюше; ты же яко дым без вести сих сотворил еси, не ведущих пети: Аллилуйя.



Икос 10.

Стена заступления еси стаду твоему, хвалящему день и нощь Господа, посреде мощи твоя имущему, источающие богатно чудес реки, отче, и просветящие сих непрестанно стопы, поющих сице: Радуйся, всеблаженне, аки Ангел на земли явивыйся; радуйся, предивне, монахов множество, яко птиц небесных собравый. Радуйся, кипарисе мироуханный на земли возросший; радуйся, озлобления от многих приявший. Радуйся, яко елень палимый на источники к Богу потекий; радуйся, силою Христовою дивен явивыйся. Радуйся, разум непрелестен стяжавый; радуйся, милосердия реку источивый.
Радуйся, нищету духовную возлюбивый; радуйся, богатство непреходящее на небеси собравый. Радуйся, на высоту востекий добродетелей; радуйся, имеяй выну милости свещу возженную. Радуйся, Венедикте, Нурсийский Чудотворче.



Кондак 11.

Поющим ти благодати силу показавый, словесныя зари нам облистая, Троицы дом явивыйся, немудрыя умудряяй, вопиющия со смирением: Аллилуйя.



Икос 11.

Светоявлением богатства горняго исполнен, преставился еси к вышнему граду, богомудре отче Венедикте, и ныне предстоиши Христу радуяся; темже и мы недостойнии, песньми память твою хвалим зовуще: Радуйся, человече Божий, муже желаний райских; радуйся, яко тобою почерпаем источника благодатнаго. Радуйся, ветхия мудрования отложивый; радуйся, Духа Святаго утешение подающий. Радуйся, ничтоже паче любве Христовы изволивый; радуйся, яко во плоти ходя видел еси горняя. Радуйся, хранение выну устом твоим положивый; радуйся, поющих тя к любве Божией возводящий. Радуйся, слезами пустыню оросивый; радуйся, ю вельми процветшую узревший. Радуйся, в пучине озлобления сущих изымающий; радуйся, по стезям правды водителю верный. Радуйся, Венедикте, Нурсийский Чудотворче.



Кондак 12.

Благости Божией, яко сот пчельный меда исполнен, праведности предуготовал еси обитель, приемля с любовию монахов чины, поющих верно: Аллилуйя.


Икос 12.

Пение всеумиленное, яко малое приношение приими, отче пречудне Венедикте, от уст грешных: ничесоже бо достойнаго сотворихом, но уповающе на Спаса, дающаго ти благодать милосердно воздвигати недостойныя, зовем ти: Радуйся, огнем печали твоей на земли, радость небесную стяжавый; радуйся, водою слез твоих преобильный дар целений обретший. Радуйся, яко в смирении твоем сила Божия совершися; радуйся, яко пламенем чистоты твоея пламень греховный побеждается. Радуйся, яко свеща светом мудрости горней просиявый; радуйся, ум твой в пучину смирения погрузивый. Радуйся, подвижниче, безмолвие возлюбивый; радуйся, отче, пшеницею словесною чада твоя напитавый. Радуйся, Царствия Божия полноту стяжавый; радуйся, утешение богатное скорбящим подающий. Радуйся, на камени любве Христовыя житие твое утвердивый; радуйся, в вертограде Церкве цветы благоуханныя возрастивый. Радуйся, Венедикте, Нурсийский Чудотворче.



Кондак 13.

О преблаженне oтче Венедикте, ничтоже на земли восхотел еси паче любве Христовыя; темже и в вышния обители вселивыйся, яко со дерзновением ныне предстоиши Богу, за ны недостойныя молися, да любовию горе вперяемы с тобою вкупе поем: Аллилуйя.
(Сей кондак поем трижды, затем икос 1-ый: «Ангельский образ» и кондак 1-ый: «Возбранный oтче»).


Молитва преподобному Венедикту, Нурсийскому Чудотворцу

О преблаженне авво Венедикте! Подвигом добрым подвизaвся на земли, восприял еси на небесех венeц прaвды, егоже уготовал есть Господь всем любящим Его. Темже взирaюще на святый твой образ, рaдуемся о преслaвнем скончaнии жительства твоего и чтeм святую пaмять твою. Ты же, предстоя престолу Божию, приими сию похвальную песнь, тебе любовию и верою приносимую, и милостивно приклонься с небесных высот, яко отец чадолюбивейший, ходатайствуй верою и любовию тя почитающим грехов прощение, жития исправление, кончину христианскую, мирну и ненаветну от духов злобы. И предстани тогда, о отче, прогоняя страх смертный от верных твоих рабов, безбедно творя разлучение души от тела, да невозбрaнно прeйдем от земли на небо, от мытaрств же горьких и от вечныя мyки да избaвимся, и небеcнаго царствия наследницы да бyдем со всеми прaведными, от века угодившими Господу нaшему Иисусу Христу: Емyже подобaет всякая слaва, чeсть и поклонeние, со безначaльным Его Отцeм, и с пресвятым и благим и животворящим Его Духом, ныне и присно и во веки веков.



Тропарь, глас 8:

В тебе, отче, известно спасеся еже по образу: / приим бо крест, последовал еси Христу, / и дея учил еси презирати убо плоть, преходит бо, / прилежати же о души, вещи безсмертней. / Темже и со ангелы срадуется, преподобне Венедикте, / дух твой.



Кондак, глас 6.

Благодатию Божиею обогатился еси, / делы же известил еси звание, / и явился еси, Венедикте, угодниче Христа Бога / в молитвах и постех, дарований Божия Духа исполнен; / и был еси недужным исцелитель, и прогонитель врагом, / и заступник скорый душам нашим.



Величание:

Ублажаем тя, / преподобне отче Венедикте, / и чтим святую память твою, / наставниче монахов / и собеседниче ангелов.[/spoiler]

Раб божий Константин

Акафист священномученику Вениамину, митрополиту Петроградскому и Гдовскому.
день памяти 13 августа по нов.стилю..
[spoiler]Тропарь, глас 3
Божественным светом от юности озаряем,/мученичества возжелал еси/и по достоинству был еси Христовы Церкве архипастырь,/Петроградскую паству пасый./
На судищи безбожных лесть обличил,/столп незыблемый, светильник неугасимый явился еси,/священномучениче Вениамине,/Христа Бога моли даровати нам велию милость.

Кондак, глас 2
Яко мученик, яко верен святитель/и поборник Православия/ гордыню безбожных посекл еситы духовным мечем,/ священномучениче Вениамине,/песнословим души твоея крепкое терпение/и доблесть подвигов твоих.

Величание
Величаем тя,/ священномучениче Вениамине,/и чтим святую память твою:/ты бо молиши за нас/Христа Бога нашего.

Кондак 1
Избранный Христом Господом на служение Ему, с юных лет воспламенивший в сердце отрока Василия искру горения пострадать за веру православно-исповедающих Его-Христа- Спасителя мира. Самым делом послежде исполнил еси желаемое,исповедуя пред неверными и свидельствуя: "Я - за Христа". Почитая твое мужество и терпение, воспеваем ти:
Радуйся, священномучениче Вениамине, архипастырю Церкве Христовы.


Икос 1
Ангел Церкви был еси во граде святаго Петра и в севернем крае страны нашея. Христос Господь постави тя свещнице высоты служения Ему митрополии Петроградския, да спасеши стадо избранных овец Его, укрепляя их в православии, наставляя в благочестии и доброделании. Сего ради и мы, душепопечением, воспеваем тебе:
Радуйся, отрок сый Богоизбранный, мученичества возжелавый;
Радуйся, юноше Богобоязненный, путем побеждения страстей шедый.
Радуйся, в мужа возраставый, в меру возраста Христова пришедый и в добродетелех преуспевый;
Радуйся, подвигом добрым подвизавыйся, священное служение приявый.
Радуйся, апостольского служения приемниче, в сане епископа добре потрудивыйся;
Радуйся, паству твою Петроградскую от раскола обновленческаго охраняяй.
Радуйся, мужество и терпение явивый пред безбожными гонителями веры;
Радуйся, священномучениче Вениамине, архипастырю Церкве Христовы.


Кондак 2
Видя Господь в будущем тя воеводу ратоборцев за веру Христову, посла ти духа ревности по Бозе и желание в сердце твоем Богоугодное проводити житие и мученическим исповеданием веру православную соблюсти, да со страдальцы вопиеши вечно Богу: Аллилуиа.


Икос 2
Разумом свыше просвещенный и Духом Святым одаренный, сердцем же во благочестии от младости воспитан сый, радость и утешение всем был еси. Тем же приносим тебе хвалы сицевые:
Радуйся, светом благочестия от Бога озаренный;
Радуйся, учением благочестия издетства напоенный.
Радуйся, отрасле благоухающая корене духовнаго;
Радуйся, девственную чистоту от юности возлюбивый.
Радуйся, иерея Божия и благочестия родительскаго наследниче преизрядный;
Радуйся, душу свою всецело Господу посвятивый.
Радуйся, молитвою и Богомыслием ум свой в горняя вперивый;
Радуйся, священномучениче Вениамине, архипастырю Церкве Христовы.


Кондак 3
Силою Божиею укрепляемый, ангельский образ приял еси и в монашестве Вениамином- сыном десницы - наречен был еси, труды великия подъял, постом страсти плотския умертвив, и яко воин, противу князя власти воздушныя, во всеоружия Божия облеклся еси, досточудне. Светом богоразумия твоего и нас озари, да вопием купно с тобою Богу: Аллилуиа.


Икос 3
Имея благодать священства дело благовестника и инспектора добре сотворил еси в стенах Холмския семинарии со всяким долготерпением и учением наставляя, иных же ко исправлению жития словесы и делы твоим влекл еси. Почитая сия труды твоя, единодушно, едиными усты с митрополитом Евлогием, восхвалявшего тя и мы тебе вопием:
Радуйся, монашеский подвиг и иерейское служение в житии своем добре сочетавый;
Радуйся, юные души наставивый и ко Христу приведый.
Радуйся, преемниче рода священнаго;
Радуйся, искавшия спасения правым учением оглашавый.
Радуйся, житием своим сего учения не посрамивый;
Радуйся, яко праведно дадеся ти жребий пастырскаго о душах попечения.
Радуйся, неутомимый священнослужителю Господень и вся часы суток готовый пребывати в храме Божия;
Радуйся, священномучениче Вениамине, архипастырю Церкве Христовы.


Кондак 4
Бури греховныя избежав и нападения вражия бодрственным житием своим утишая, к небесным благим устремился, боголюбче Вениамине, единую же Премудрость Ипостасную взыскав, тайны богословия от Нея восприял, сего ради от архиерея Божия во архимандрита возведен, ректором духовныя Петроградския семинарии поставлен, да со всеми учащими и учащимися поеши Богу: Аллилуиа.


Икос 4
Слышаша иерархи Церкве Российския о трудех твоих неустанных, яко ангела, знамение благодати небесныя носяща, реки богомудрых словес источающа. Тем же и мы, дивяся чудному промышлению Божию, поставившему тя ректором семинарии, достохвально взываем:
Радуйся, Слова Божия богомудрый истолкователю;
Радуйся, многия и словесы и делы наставивый: "Вся возможно совершить со Христом и во имя Христово".
Радуйся, талант свой в земле не сокрывый;
Радуйся, во славу Божию и на спасение душ человеческих его употребивый.
Радуйся, смирением своим духа гордыни низложивый;
Радуйся, ратоборче доблий, полки невидимых врагов победивый.
Радуйся, терпению житием своим вся научивый;
Радуйся, священномучениче Вениамине, архипастырю Церкве Христовы.


Кондак 5
Боготечную звезду показа тя на небесех в сонме священномучеников Господь Вседержитель, зане и на земли был еси звезда светлая, Боготочною Кровию от вечныя смерти искупленныя соблюдая, егда сан епископа, викария Гдовского, приял еси, темже и ныне на небесех сияеши славою вечною и купно с лики праведных воспеваеши хвалебную песнь: Аллилуиа.


Икос 5
Видеша тя православнии людие, яко светило церковное, сияющее в просвещение народа Божия на свещнице святительского, окормлявшего Петроградскую паству, и не леностно трудившегося на спасение душ человеческих, темже и слышиши таковые тебе похвалы:
Радуйся, во епископа нареченный митрополитом Владимиром-священномучеником;
Радуйся, хиротонисанный во святительство будущим патриархом Тихоном.
Радуйся, яко притяжал еси сердца людския любве к тебе исполненныя;
Радуйся, архипастырю, "батюшкой Вениамином" с любовию в народе именуемый.
Радуйся, иго Христово благое и легкое носивый;
Радуйся, неусыпный делателю винограда небеснаго.
Радуйся, пастырский долг и апостольскую проповедь восприял во епископском служении;
Радуйся, священномучениче Вениамине, архипастырю Церкве Христовы.


Кондак 6
Проповедник учения Христова воистину явился еси, священномучениче Вениамине, егда Петроградскую митрополию вручил ти Господь, словом твоим в вере наставляя, житием во благочестии верных утверждая и всех поучая с любовию пети Богу: Аллилуиа.


Икос 6
Возсияв светом Богоразумия твоего в северном крае страны нашея, святителю Вениамине, людие бо видевше тя наставника добра Божественных учений радовахуся зело и единодушне избраша тя кормчим кафедры Петроградския. Приими и от нас, угодниче Божий, похвалы сия:
Радуйся, любимиче паствы твоея-народа Божия;
Радуйся, в хижины бедных мира сего смиренне шел еси.
Радуйся, и в святительском сане вся требы верным исполняяй;
Радуйся, в нищите их прибывающих посещавый.
Радуйся, архипастырю добрый, самоличне святым крещением многа чада Церкве породивый;
Радуйся, Божественныя Литургии предстоятелю умиленный.
Радуйся, заблудших в раскаяние приведый;
Радуйся, священномучениче Вениамине, архипастырю Церкве Христовы.


Кондак 7
Хотя Человеколюбец Господь явити в тебе истиннаго пастыря, показа тя образ стаду словесному во трудех твоих, в чистоте и кротости светлой души твоей, делы бо и словесы своими всех приводил еси ко благочестию. Сего ради и мы тебе усердно величаем и прославльшему тя Христу вопием: Аллилуиа.


Икос 7
Новаго тя ревнителя по благочестию видевше и безграничную преданность Церкве Христовы, паства Петроградская внимаше ти смиренному, простому и кроткому архипастырю верующих душ, в великом множестве наполняша храмы, идеже совершашася твои митрополичьи богослужения. Ведая близость твою ко Христу Богу, Ему же молитися не престай и о нас грешных, вопиющих ти хвалебно:
Радуйся, избранниче народа, поставленный на кафедру Петроградскую;
Радуйся, труды велия положивый ко спасению падших.
Радуйся, наставниче добрый, сущим в бедах сострадавый.
Радуйся, яко коемуждо в горестех, аки утешитель являлся еси;
Радуйся, евангельской простотой и сердечностью сияяй;
Радуйся, правил церковных нелицеприятный блюстителю.
Радуйся, по словеси апостола Петра стадо Божие пасый.
Радуйся, священномучениче Вениамине, архипастырю Церкве Христовы.


Кондак 8
Странно быша неверным и нечестивым зрети, како святитель Вениамин, сей воистину воин Христов, мужественно облекшись в броню правды и преподобие истины, внегда огненным испытанием посети Господь страну Российскую, яви досточудное терпение
и высокое благородство при изъятии безбожными церковных ценностей. Тем же и нас, рабов Божиих, соблюди от всех враг видимых и невидимых, воспевающих Богу: Аллилуиа.


Икос 8
Весь бе исполнен ревностию Илии пророка, святе Вениамине, егда узрел в келии своей обновленца Александра Введенского, аки второго Иуду с вои безбожных пришедша и лицемерно благословения просяща, благословения не дал еси, но рекл ему: "Мы не в Гефсиманском саду". Живоцерковников сборище обличи, отлучив от Церкви. Поминая твое непоколебимое стояние, воспеваем ти:
Радуйся, добрый пастырю стада Христова- паствы Петроградския;
Радуйся, святою ревностию о спасении чад Божиих пламеневый.
Радуйся, милосердствуя о голодающих добровольно, без принуждения, церковное имущество даяти предлагаяй;
Радуйся, болезнуя душею о кощунниках и святотатцах, верныя от обновленцев защищаяй.
Радуйся, единомысленный святому исповеднику патриарху Тихону и сподвижником его бывый;
Радуйся, Православия светило.
Радуйся, всякия неправды нелицеприятный обличителю;
Радуйся, священномучениче Вениамине, архипастырю Церкве Христовы.


Кондак 9
Всякие беды понесл еси, святителю Вениамине, всякие лишения, обиды и страдания претерпев, егда преемники Ирода на тя руки наложиша, и задержав, ввергли в темницу, в ней же яко и в дому Божию взывал Христу-Спасителю: Аллилуиа.


Икос 9
Витии многовещанныя не возмогут изрещи вся болезни и раны, яже ты, яко служитель Божий явил "в великом терпении, в бедствиях, в нуждах, в тесных обстоятельствах, под ударами в темнице" и ничто из сего "не возможе разлучити тя от любве Божия во Христе Иисусе". И ныне и всегда верныя чада, поем во славу наставника своего:
Радуйся, в темницу со смирением безропотно шедый;
Радуйся, любовию паствы утешенный.
Радуйся, яко море волнующееся, паства преданная ти, многотысячным собранием у суда ожидаше тя;
Радуйся, ближняя своя паче себе возлюбивый.
Радуйся, страдальцы с тобою судимыя укрепивый;
Радуйся, мучеников похвало.
Радуйся, святителей славо;
Радуйся, священномучениче Вениамине, архипастырю Церкве Христовы.


Кондак 10
Спасти хотя всякаго человека Господь Серцеведец, зря твою ревность: в юности бо ты лобызал пламенеющим сердцем первых мучеников и скорбел, яко не можеши приобщиться их славному подвигу, по исполнении времени посла ти желаемое, да и ты спостраждеши о имени Его- Христа Бога и со страдальцы воспоеши: Аллилуиа.


Икос 10
Стена невинно гонимым пастырем и миряном был еси, священномучениче Вениамине, с тобою судимыя ограждая от ложных наветов, самаго себя ставя ответственным за вся. Враги не возмогоша противостати мудрости и духу, вещающему твоими устами, егда ты изобличал их клеветы и явил радостное желание умереть за Христа. Мы же, премудрости и мужеству твоему дивящеся, со умилением взываем ти:
Радуйся, исполненный веры и силы первосвятителю града святаго Петра;
Радуйся, кроткий и дезновенный, первомученику Стефану уподобивыйся.
Радуйся, цевнице духовная, Духа Святаго исполненная;
Радуйся, архиереев богодухновенное украшение.
Радуйся, ополчатися за тя верным воспретивый;
Радуйся, до конца вспять не отвративыйся.
Радуйся, яко мученицы на небесех о терпении твоем ликоваху;
Радуйся, священномучениче Вениамине, архипастырю Церкве Христовы.


Кондак 11
Пение благодарственное и хвалебное приносим ти, сященномучениче, положившаго душу свою за други своя. Дерзновенною верою православнии исповедуем яко праведник и по смерти жив будет во веки, поя Богу: Аллилуиа.


Икос 11
Светлосиянного светильника почитаем тя, страдальче Христов, последнее слово твое с высокой мученической кафедры беззаконного суда назидает всех и потрясает своим величием. Сия твоя, священномучениче, последняя проповедь: "не знаю, что вы мне объявите в вашем приговоре: жизнь или смерть, но чтобы вы в нем не провозгласили, я с одинаковым благоговением обращу свои очи горе, возложу на себя крестное знамение и скажу: "Слава Тебе, Господи Боже, за все!". Мы же с умилением тебе воспеваем:
Радуйся, узы и темницу за Христа приявший;
Радуйся, единою святою просфорою вся темничные дни питавыйся.
Радуйся, последнее святительское благословение в темнице соузникам архимандритам
Гурию и Иннокентию давый;
Радуйся, яко во временней жизни сей, любве ради ко Господу, до конца во спасение души твоея подвизавыйся.
Радуйся, яко в нощи воскресного дня убиенный в знамение всеобщаго воскресения;
Радуйся, яко чрез страдания сподобился причастником быти вечныя славы.
Радуйся, яко во имя твое храмы Божия воздвизаются;
Радуйся, священномучениче Вениамине, архипастырю Церкве Христовы.


Кондак 12
Благодать, свыше ти данную, познавши, благоговейно лобызаем светолепное всечестнаго лица твоего изображение и умиленно вопием Христу Богу нашему: Аллилуиа.


Икос 12
Поюще твое славное и непреоборимое стояние за веру истинную, ублажаем мученическое страдание твое и приемлюще последнее писание тобою с темницы, подобно великому апостолу языков Павлу посланное учеником и сопастырем, внимаем ему, яко завещанию твоему и взываем ти:
Радуйся, яко открылась тебе возможность терпеть Христа ради;
Радуйся, яко при великих скорбех избыточествовало тебе утешение от Бога.
Радуйся, исполненный среди самых тяжких страданиях радости и внутреннего покоя;
Радуйся, за Христа претерпевший вся - темницу, суд, общественное заплевание, обречение и приговор- "повинен смерти".
Радуйся, во Христе обретший жизнь, свет и покой;
Радуйся, себе не жалевший для Церкви и забывший свой ум, ученость и давший место благодати Божией.
Радуйся, судьбу Церкви вручивый силе веры и заповедавый всем: "веры надо больше, больше надо иметь нам веры";
Радуйся, священномучениче Вениамине, архипастырю Церкве Христовы.


Кондак 13
О великий и преславный исповедниче Православия и страдальче, священномучениче Вениамине! Приими сие похвальное пение от нас, недостойных, любовию чтущих тя и твоя за Христа и Церковь Его святую страдания. Умоли венчавшего тя славою Господа ниспослати нам от бед, скорбей и болезней, обдержащих ны, скорое избавление. Буди неослабный молитвенник нам пред Престолом Всевышняго да в вечней жизни сподобимся с тобою и со всеми святыми пети Ему во веки: Аллилуиа.Аллилуиа.Аллилуиа.
(Кондак сей глаголи трижды. И паки: Икос1 и Кондак1)

Молитва
О, предивный святителю, богомудрый и всесвятый отче наш священномучениче Вениамине!
К тебе ныне прибегаем верою и любовию чтущии тя, похвалы сия приносяще от всего сердца и помышления. Молим тя прилежно, страстотерпче святый, не забуди ны к тебе усердно притекающих: утверди нас в вере святей православней, научи нас всегда творити заповеди
Божия, исцели болезни душевныя и телесныя, буди нам покровителем и прибежищем в скорбех и напастех, заступи ны от враг видимых и невидимых, да и мы богоугодне прешедше поприще сея жизни, твоим предстательством и богоприятными молитвами будем наследницы
Царствия Божия и сподобимся с тобою предстояти Престолу Царя Славы,поклоняяся Ему и воспевая во веки веков.Аминь.

Написание акафиста сего связано с тем трепетным и благоговейным чувством, которое воспитали в юности моей повествования современников и очевидцев - Митрополита Гурия (Егорова, 1965г.) и Льва Николаевича Парийского (1892-1972) - о жизни и страданиях святителя и мученика Митрополита Петроградского Вениамина (Казанского).

В годы лихолетья, будучи архимандритом Александро-Невской лавры г.Петербурга, отец Гурий выполнял многие поручения Святителя Вениамина, был близок ему по духу. Вместе с архимандритом Иннокентием (после епископом и священномучеником) и своим родным братом
- архимандритом Львом (тоже убиенным) учредили братство трезвости. Многие подробности из жизни священномученика Вениамина, его тюремного заключения, нечестивого суда, рассказывал митрополит Гурий, как очивидец, и соузник, будучи арестованным, он содержался в той же тюрьме.
Друг Владыки Гурия - Лев Николаевич Парийский, инспектор Петербургской духовной академии, а при Мирополите Вениамине бывший его личным секретарем, многое поведал из жизни и страданий священномученика Вениамина, не по протокольным записям, а сам будучи судимым на том же безбожном суде.

Эти многие их свидетельства, как сопричастников тех страшных событий, во многом дополнили скудные сведения о страданиях святителя Божия и священномученика - митрополита Вениамина при написании ему акфиста.
г.Симферополь, январь 2007года.[/spoiler]

Раб божий Константин

Акафист святым мученицам Вере, Надежде и Любови, и матери их Софии.
[spoiler]Кондак 1


Избранным рабам Господа Вседержителя, Вере, Надежде и Любви, и мудрей матери Софии, похвальная вам пения умиленно возносим. Вы же, яко дерзновение ко Христу Богу имуще, молитеся за ны, во еже избавитися нам грехов и скорбей, да благодарственно вопием вам: Радуйтеся, Веро, Надеждо и Любы, купно с Софиею, материю вашею премудрою!


Икос 1


Ангелы на Небеси радовахуся, добродетельное житие ваше зряще, еже провождасте в чтении Писаний Божественных, в трудех, посте, молитве и милостыни, материю вашею непрестанно суща поучаеми, да явитеся образи живии триех богословских добродетелей, ихже именами наречены бысте. Мы же, таковей мудрости матере вашея и совершенному благоразумию вашему дивящеся, благоговейно рцем вам: Радуйтеся, единомысленныя сестры, трием добродетелем тезоименитыя; радуйтеся, в повиновении богомудрей матери вашей на степени совершенствования вшедшия. Радуйся, аки три райския ветви, в зловернем Риме возрасшия; радуйся, Софие, дщерем твоим имена добродетелей нарекшая, яже вещию исполняти научила еси. Радуйся, Веро, верою невидимое, яко видимое, зрети нам помогающая; радуйся, в нетление облеченная. Радуйся, Надеждо, надеждою страдания наша во юдоли скорби ослабляющая и в горняя десницею указующая; радуйся, Царствие Небесное унаследовавшая. Радуйся, Любы, любовию Божественною блаженство безсмертныя жизни нам открывающая; радуйся, благодатию Духа Святаго осиянная. Радуйся, Софие, си есть премудрость, премудре дщери твоя воспитавшая; радуйся, в добродетелех веры, надежды и любве нас утверждающая. Радуйтеся, Веро, Надеждо и Любы, купно с Софиею, материю вашею премудрою!


Кондак 2


Видящи мудрая София слуги, пришедша звати ю со дщерьми ко царю Адриану, и познавши вину призвания своего, ста со чады своими на молитву, помощи Бога просящи: по молитве же, емшеся за руче, якоже венец уплетенный, идяху вкупе, поюще Христу Богу: Аллилуиа.


Икос 2


Разум несумненный имели есте, святыя, егда бо в палаты царския введены бысте, цареви Адриану предстасте с лицем светлым, очесы веселыми и сердцем мужественным. Царь же, зря честная лица ваша неустрашенна и мудрость Софии уведев, отложи на ино время суд свой и отсла вы к некоей благородней жене, у неяже пребысте три дни, матери вашей премудрей Богодухновенными словесы день и нощь вас поучающей. Темже ублажающе вас, взываем сице: Радуйтеся, три непорочныя агницы Христовы, венец добродетелей в себе совокупившия; радуйтеся, три добродетельныя сестры, твердую веру, несумненную надежду и нелицемерную любовь ко Господу Богу явившия. Радуйтеся, не пощадевшия красоты и младости вашея, Краснейшаго ради добротою паче сынов человеческих; радуйся, Софие, чада твоя возлюбленная на подвиг мученическ за Христа наставлявшая. Радуйся, Веро, мучением за Христа веру твою исповедавшая; радуйся, сестры твоя крепкою верою воздвизавшая. Радуйся, Надеждо, твердое надеяние на Христа возлагавшая; радуйся, сестры твоя неослабною надеждою укреплявшая. Радуйся, Любы, муками за Христа любовь твою действенную показавшая; радуйся, сестры твоя огнем любве ограждавшая. Радуйся, Софие, сладкая чада твоя увещававшая презрети славу и богатство и всю сладость мира сего тленнаго; радуйся, добрыя дщери твоя до крове стати за Господа и умрети за Него усердно учившая. Радуйтеся, Веро, Надеждо и Любы, купно с Софиею, материю вашею премудрою!


Кондак 3


Силою Божественною осенени бяху мученицы, яже добродетели имен своих явиша делом в подвизех мученических, воспевающе Богу: Аллилуиа.


Икос 3


Имуще в себе святыя мученицы столп веры, криле надежды и огнь любве, в сладость послушающия от словес матеpe своея, едина другую в долготерпении утверждаху и радостно идяху, желающе честнаго мученичества, еже за Христа. Тому покланяющеся, яко Богy нашему, сицевыми вас воззваньми почитаем: Радуйтеся, ни мало не поскорбевшия о лишении временнаго сего живота вечныя ради жизни; радуйтеся, чести ради Христовы плоть на муки предавшии. Радуйтеся, три многоценныя сосуды веры, надежды и любве Богу в дар принесшия; радуйся, Софие, яко, любве ради презельныя ко дщери твоим, всем сердцем возжелела еси, да Царствие Божие наследуют. Радуйся, Веро, души наша верою озаряющая; радуйся, к тихому пристанищу нас возносящая. Радуйся, Надеждо, сердца наша сладостию надежды оживляющая; радуйся, из пучины отчаяния нас извлекающая. Радуйся, Любы, страдания и скорби наша в радость прелагающая; радуйся, окамененная сердца наша во умиление преводящая. Радуйся, Софие, мудростию на благое нас наставляющая; радуйся, потемненное око душ наших просвещающая. Радуйтеся, Веро, Надеждо и Любы, купно с Софиею, материю вашею премудрою!


Кондак 4


Буря ярости мучителевы нападе на тя, святая Веро, но нe поколеба тя: кто бо возможет веру неодолимую подвигнути, адаманта крепчайшую, яже верных научила есть пети с тобою Богу: Аллилуиа.


Икос 4


Слышащи мудрая мати дщери своя пред царем небоязненно Христа исповедающия, и глаголющия, яко тою единаго желают, еже бы страдати и терпети горкия муки Сладкаго ради Иисуса Христа, радовашеся вельми и моляще Бога, да укрепит я в предлежащих муках. Сие убо изволение похваляюще, первейшей дщери мудрыя матере тако воспоем: Радуйся, Веро, немилосердая биения Сладчайшаго ради Иисуса сладце приемшая; радуйся, урезанная сосца твоя, аки два крина чистоты, в жертву Господу принесшая. Радуйся, яко от язвы твоея вместо крове млеко истече; радуйся, яко на раскаленное железо положена была ecи. Радуйся, яко в коноб кипящ ввержена сущи, ни мало не опалилася еси, ниже вредилася еси; радуйся, страстей наших небесною прохладою утишающая. Радуйся, огнь мучений наших в болезнех угашающая; радуйся, знамением веры посреде напастей нас знаменующая. Радуйся, щитом веры во брани со врагом нас покрывающая; радуйся, честную главу твою за Главу Церкве, Христа Бога, под меч радостно преклоншая. Радуйся, яко обагрением крове твоея, аки червленицею, одеяна, явилася еси очесем Безсмертнаго Жениха твоего: радуйся, к желанному краю пришедшая и любимаго Спаса и Господа узревшая.


Кондак 5


Богоданным звездам уподобилися есте, Веpo, Надеждо и Любы, всем бо сердцем прилепившася ко единому вечному животу и красоте неизреченней, Иисусу Христу, скоро шествовасте, во еже умрети за Него и насладитися Божественнаго Его видения, поюще Ему: Аллилуиа.


Икос 5


Видевше добропобедныя сестры святую Веру радостно за Христа пострадавшу, и сами хотяху души своя за Него положити: царь же Надежду святую начат испытовати, и видев ю с сестрою единомысленну сущу, на муки вдаде ю, обачс ничтоже успе. Мы же, Надежду святую о сицевом ея мудровании ублажающе, воспоим и прославим ю: Радуйся, Надеждо, жестоко биенная, обаче пресветлую надежду на Господа нe потерявшая; радуйся, муки твоя безропотно в молчании терпевшая. Радуйся, и нам крепкое терпение подающая; радуйся, яко в разжженней пещи неопаляема бывши, хвалу Богу возсылала еси. Радуйся, яко и нас во страданиих хвалити Бога научаеши; радуйся, яко ноггьми железными строгана была еси. Радуйся, нас, сущих в скорбех, лучами надежды осиявающая; радуйся, яко чудное некое благоухание от язв твоих исхождаше. Радуйся, непоколебимое упование на Господа Иисуса неизменно сохраншая; радуйся, безнадежность и безсилие в сердцах наших истребляющая. Радуйся, мечное посечение за Христа радостно приимшая; радуйся, ясная деннице, нам, печальми земными угнетенным, мир вечный раскрывающая. Радуйтеся, Веро, Надеждо и Любы, купно с Софиею, материю вашею премудрою!


Кондак 6


Проповедником и Апостолом Богоносным подобны бысте, богомудрыя сестры: добродетельми бо вашими проповедасте всем верным веру, надежду и любовь ко Господу, Владыце всех, Тому поюще: Аллилуиа.


Икос 6


Возсияла еси, аки солнце, Любы святая, кто бо сице за возлюбленнаго Господа своего можаше стати, якоже Любы, понеже писано есть: крепка яко смерть любы, вода многа не может угасити любве, и реки не потопят ея. Молим ти ся ныне, Любы святая, серафимским пламенем любве ко Господу горящая, обнови окамененная и изсохшая сердца наша, возжги в нас, оскудевших любовию, свет любве, да возлюбльше Господа и вся ближняя наша, тебе яко молитвенницу нашу, восхвалим сице: Радуйся, Любы, яко любве твоея ко Христу води многи прелестей мирских не угасиша; радуйся, яко вся ласкания и дары царевы отвергши, душу твою за Господа положила еси. Радуйся, яко любве твоея реки бед и страданий не потопиша; радуйся, за Господа Иисуса на колеси протягнутая, жезлием биенная, свердлами прободенная и в пещь огненную вверженная. Радуйся, яко в лютых муках твоих силою Божиею укрепляема была еси; радуйся, кровию твоею, любве ради Безсмертному Жениху твоему Христу излиянною, в хладных сердцах наших любовь возбуждающая. Радуйся, яве показавшая нам, яко любве ради вся мучения сладце претерпеваются; радуйся, явившая нам, яко любы Божественная приводит к животу вечному. Радуйся, самою вещию уверившая, яко любы Божественная откровение есть безсмертия; радуйся, яко никояже мучительства возмогоша разлучити Любовь от любве Христовы. Радуйся, в муках апостольски вещавшая, яко не разлучит тя от любве Божия ни скорбь, ни теснота, ни гонение, ни глад, ни нагота, ни беда, ни меч; радуйся, любве ради Христовы мечем во главу усеченная. Радуйтеся, Веро, Надеждо и Любы, купно с Софиею, материю вашею премудрою!


Кондак 7


Хотяще скорее от тела разлучитися и со Христом быти святыя девы, егда на мечное посечение идяху, едина другую и матерь свою Софию объемлюще лобызахуся, дружескому нас люблению поучающе, да вси купно поем Богу: Аллилуиа.


Икос 7


Новое чудо показа Господь, егда помощь свою посла страдавшим за исповедание имене Его толико юным девам: верою бо, надеждою и любовию укрепляеми и возносими бывше, доблественне подвиги своя скончаша. Мы же в единомыслии и единодушии до конца живота пребывших молим вас, да и нам низпослете единомыслие в совершении добрых дел, умиленно величающим вас: Радуйтеся, Веро, Надеждо и Любы, единем путем мучений до врат небесных шедшия; радуйтеся, в пресветлый чертог прелюбезнаго Жениха вашего во гласе радования вшедшия. Радуйтеся, яко Иисус Христос просвети, якоже звезды на небеси, раны на телесех ваших; радуйся, Софие, доблественне на муки чад твоих взиравшая. Радуйтеся, яко небесною красотою, еяже око не виде, украси Господь доброту вашу, муками отъятую; радуйтеся, венцы воздаяния приемшия. Радуйтеся, аки три звезды, Солнцем правды озаренныя; радуйся, Софие, в мужественнем исповедании дщерьми твоими имене Христова утешение велие oбpeтшая. Радуйтеся, мглу сомнений наших разсеявающия; радуйтеся, нас удрученных страданьми душевными и телесными, подкрепляющия. Радуйтеся, красотою любве сердца наша украшающия; радуйся, Софие, крепосте и утешение изнемогающих в бедах и нуждах. Радуйтеся, Веро, Надеждо и Любы, купно с Софиею, материю вашею премудрою!


Кондак 8


Странное и непонятное нам немощным, в мирских сластех погрязнувшим, зрим дело, яко София святая возлюбленных чад своих видящи лютыя и горькия муки и смерти, ни мало не поскорбе, но возрадовася зело духом, поющи Богу: Аллилуиа.


Икос 8


Вся бе в вышних мудрая София, егда дщери своя сладкими словесы и мудрыми увещаньми на мучения подвизаше. Аще же от естества к слезам преклоняшеся абие, от любве Христовы прелагашеся на радость, печаль бо сердечную болезнь о чадех матернюю победи в ней любы Божия. Велиею убо любовию дщери своя любящи, паче всею тем Царствия Небеснаго желаше. Сею ради, чудящеся мудрости и велицей любви твоей ко дщерем и славяще тя, взываем: Радуйся, Софие, яко возвеселися душа твоя о блаженней кончине дщерей твоих, святое имя Господа дерзновенно исповедавших; радуйся, в мученичестем венчании чад твоих честь и славу приявшая. Радуйся, участия мученическаго и спребывания со дщерьми в небесней славе Христа Бога сподобльшаяся; радуйся, честная телеса дщерей твоих с радостными слезами погребшая. Радуйся, три дни гробу их приседевшая и сном смерти о Господе почившая; радуйся, аще и не плотию, обаче сердцем за Христа страдавшая. Радуйся, яко три добродетельныя дщери, сими веру, надежду, любовь к Богу явивши, в дар Пресвятой Троице принесла еси; радуйся, яко чадородия ради спаслася еси. Радуйся, дивная мати, благия памяти достойная; радуйся, дщери твоя, да кровь твою за Христа пролиют, молившая. Радуйся, умудряющая ны, да блюдем непреложно добродетели веры, надежды и любве; радуйся, Животворящей Троице за ны молящаяся. Радуйтеся, Веро, Надеждо и Любы, купно с Софиею, материю вашею премудрою!


Кондак 9


Вси Ангели дивляхуся о страданиих ваших, святыя мученицы, и победу вашу над диаволом торжествующе, души же ваша к небеси провождающе, воспеваху Христу Богy: Аллилуиа.


Икос 9


Витии велеречивии вся страдания ваша за Христа не возмогyт изрещи, дивящеся же толиким подвигом, во младых летех подъятым, немотствуют. Мы же о честней кончине вашей Бога прославляюще, величаем вас сице: Радуйся, Веро, Надеждо и Любы, поющия xвалу Богу, на небо небесе возшедшему; радуйтеся, щите веры, броне надежды и светильниче любве. Радуйтеся, зрением пресветлаго лица Божия наслаждающияся; радуйся, Софие, блaгoчecтивыя матери на мудрое воспитание чад их наставляющая. Радуйтеся, поучающии ны, да взыщем Господа, и жива будет душа наша; радуйтеся, с верою, надеждою и любовию прибегающих к вам теплыя молитвенницы. Радуйтеся, вразумляющия ны, яко вся сладость и прелесть мира сего яко дым изчезает, яко прах от ветра paзметается и в персть обращается; радуйся, Софие, по сердцем Господа Бога возлюбльшая. Радуйтеся, аки трие светлии ключи, ко единому источнику жизни притекшии; радуйтеся, аки трие благовоннии цвети, на единей благоплодней ветви прозябшии. Радуйтеся, аки три зерцала, безпредельную красоту Божию в себе отражающая; радуйся, Софие, аки маслина, три ветви, отягченныя изобильными плоды даров Божиих, произрастшая. Радуйтеся, Веро, Надеждо и Любы, купно с Софиею, материю вашею премудрою!


Кондак 10


Спасти хотяще души своя святыя мученицы, любве ради Христовы ласкания царева и богатства мира сего тленнаго презреша и радостно кончину мученическую за Христа прияша, поюще Ему: Аллилуиа.


Икос 10


Стенами веры, надежды и любве являются святыя мученицы всем, прибегающим к ним с теплою и усердною молитвою, и сице в печалех и напастех к ним взывающим: Радуйтеся, язв греховных добрыя целительницы; радуйтеся, во тме печали нашея светом упования ны озаряющия. Радуйтеся, посреде напастей и скорбей дивный покой нам посылающия; радуйся, Софие, о нас, в злостраданиях поверженных, мудрое попечение являющая. Радуйся, Веро, крест спасения пред нами воздвизающая, радуйся, немощи наша по молитвам к тебе исцеляющая. Радуйся, Надеждо, якорь избавления нам подающая; радуйся, уныние сердец наших благостно отьемлющая. Радуйся, Любы, твоим ко Господу ходатайством в злей напасти от нечаянныя смерти ны ограждающая; радуйся, изнемогающия силы наша на бодрость возставляющая. Радуйся, Софие, прилежная о нас к Богу молитвеннице; радуйся, в добрых делех наших мудрая наставнице. Радуйтеся, Веро, Надеждо и Любы, купно с Софиею, материю вашею премудрою!


Кондак 11


Пение сие похвальное, аще бы и тмочисленное приношахом вам святыя мученицы, не бы довлело ко прославлению добродетелей и подвигов ваших: обаче хвалу Богу возсылающе за вся, яже во святых Своих нам являет, Тому поем: Аллилуиа.


Икос 11


Светом небесным пред Господем горящим свещам подобны Вера, Надежда и Любы, купно с материею их Софиею, к нимже припадаем, моляще, да просветят ны, омраченныя печальми и из глубины сердец зовущия: Радуйтеся, ризы ваша в крови Агнчи на земли убелившия; радуйтеся, живота вечнаго нам ходатаицы. Радуйтеся, душ, ищущих покоя в милосердии Божии, утверждение и хранение; радуйся, Софие, от суеты мирския ны ограждающая. Радуйся, Веро, доброценная кадильнице, фимиам хвалы Богу возносящая; радуйся, нас грешных верою просвещающая. Радуйся, Надеждо, в скорби утешение и прибежище наше; радуйся, в печалех наших лучезарная вестнице избавления. Радуйся, Любы, незлобие и кротость в сердца наша вливающая; радуйся, таинственная звездо, от тесноты земныя горе ны возносящая. Радуйся, Софие, мудрая и пречестная детоводительнице; радуйся, богомудраго жития молящимся ти устроительнице. Радуйтеся, Веро, Надеждо и Любы, купно с Софиею, материю вашею премудрою!


Кондак 12


Благодать Божию прияти сподобившияся молите о нас, святыя мученицы, Пречистаго Владыку Христа, да милостив будет к нам грешным, с верою, надеждою и любовию к Нему Единому, Господу и Спасу нашему, смиренно поющим: Аллилуиа.


Икос 12


Поем ваша крепкия подвиги, верою, надеждою и любовию проникновенныя, почитаем страдания ваша презельная, хвалим дивное терпение ваше, ублажаем кончину, за Христа вами радостно подъятую, величаем необоримое мужество ваше, святые мученицы Веро, Надеждо и Любы, и мудрая мати Софие, и прославляюще вас, взываем сице: Радуйтеся, аки три струи молниины, от восток даже до запад добродетельми своими просиявшия; радуйтеся, фиали веры, надежды и любве, животворным питием души наша напаяющии. Радуйтеся, трие светозарнии путие, ко престолу славы Господни нас ведущии; радуйся, Софие, чад ради твоих от лика святых похваленная. Радуйся, Веро, цвете веры, паче снега белейший; радуйся, услаждение страждущих. Радуйся, Надеждо, угнетенных сердец возношение; радуйся, аки поток цельбоносный, жажду скорбящих утоляющая. Радуйся, Любы, венче из мира, радования и благости соплетенный; радуйся, умная зарнице вечности. Радуйся, Софие, жезле силы, кротце и мудре чада нaказуяй; радуйся, Боговедения пресветлая луче, душам нашим возсиявающая. Радуйтеся, Веро, Надеждо и Любы, купно с Софиею, материю вашею премудрою!


Кондак 13


О святыя и достохвальныя мученицы, Веро, Надеждо и Любы, и мудрая мати Софие, ныне приемше малое сие моление наше, от всяких ны бед, болезней и скорбей молитвами вашими избавите, да сподобившеся во Царствии Небесном зрети безсмертнаго Господа Иисуса, с вами вкупе воспоем Ему: Аллилуиа.


(Этот кондак читается трижды, затем икос 1 и кондак 1)



Молитвы святым мученицам Вере, Надежде и Любови, и матери их Софии


Молитва первая


О святыя и достохвальныя мученицы Веро, Надеждо и Любы, и доблестных дщерей мудрая мати Софие, к вам ныне притецем со усердною молитвою; что бо паче возможет продстательствовати за ны пред Господем, аще не вера, надежда и любы, три сия краеугольныя добродетели, в нихже образ нареченныя, самою вещию тыя явисте! Умолите Господа, да в скорбех и напастех неизреченною благодатию Своею покрыет ны, спасет и сохранит, яко благ есть и Человеколюбец. Того славу, яко солнце незаходимое, ныне зряще светолепну, споспешествуйте, нам во смиренных молениях наших, да простит Господь Бог грехи и беззакония наша, и да помилует нас грешных и недостойных щедрот Его. Молите убо о нас, святыя мученицы, Господа нашего Иисуса Христа, Емуже славу воссылаем, со Безначальным Его Отцем и Пресвятым и Благим и Животворящим Его Духом, ныне, присно и во веки веков. Аминь.


Молитва вторая


О святыя мученицы Веро, Надеждо и Любы, и мудрая мати Софие! К вам ныне со усердною молитвою притекаем. Умолите убо Господа, да в скорбех и напастех неизреченною благодатию Своею покрыет ны, раб Своих (имена), и сохранит, и Того славу, яко солнце незаходимое, зрети да сподобит. Споспешествуйте нам во смиренных молениих наших, да простит Господь Бог грехи и беззакония наша, и да помилует нас, грешных, и щедрот Своих да сподобит нас Христос Бог, Емуже славу возсылаем, со Безначальным Его Отцем, и Пресвятым и Благим и Животворящим Его Духом, ныне и присно и во веки веков.


Молитва третья


Вас, святыя мученицы, Веро, Надеждо и Любы, славим, величаем и ублажаем, купно с мудрою материю Софиею, ейже покланяемся, яко образ богомудраго попечения являющей. Умоли, святая Веро, Творца видимых и невидимых, да веру крепку, неблазненну и нерушиму подаст нам. Ходатайствуй, святая Надеждо, пред Господом Иисусом за нас грешных, да упование на благая Своя не отженет от нас, и от всякия скорби и нужды да избавит ны. Исповеждь, святая Любы, Духу истины, Утешителю, напасти и печали наша, да Той свыше сладость небесную низпослет душам нашим. Помозите убо в бедах наших, святыя мученицы, и, купно с мудрою материю вашею Софиею, молите Господа Бога, да сохранит под покровом Своим Церковь Свою Святую. Такожде и о всех нас вашего теплаго предстательства пред Богом усердно молим, да купно с вами и со всеми святыми превознесем и препославим пресвятое и великое имя Отца и Сына и Святаго Духа Бога, предвечнаго Владыки и благих Содетеля, ныне и присно и во веки веков. Аминь.



Тропарь святым мученицам Вере, Надежде, Любови и матери их Софии


Тропарь, глас 4


Торжествует Церковь первородных, и свеселится приемля матерь о чадех веселящуюся, яже яко мудрости тезоименитая, тройственным богословским добродетелем равночисленныя породи. Тыя с мудрыми девами зрит уневестившияся Жениху Богу Слову. С нею и мы духовне в памяти их свеселимся, глаголюще: Троицы поборницы, Веро, Любве и Надеждо, в вере, любви и надежде утверждайте нас.


Кондак, глас 1


Софии честныя священнейшия ветви, Вера и Надежда и Любовь, показавшеся, мудрость обуиша еллинскую благодатию, и пострадавше, и победоносицы явившеся, венцем нетленным от всех Владыки Христа увязошася.


Величание


Величаем вас, страстотерпицы святыя, и чтим честная страдания ваша, яже за Христа претерпели есте.[/spoiler]

Раб божий Константин

Акафист святому мученику Виктору.
[spoiler]Кондак 1

Избраннаго воина Христа Бога нашего, святаго мученика Виктора песньми почтим, яко ходатая нашего и молитвенника; ты же, страстотерпче, яко имеяй дерзновение ко Господу, от всяких нас бед свободи, да зовем ти: Радуйся, Викторе, мучениче преславный.

Икос 1

Ангел земный и человек небесный явился еси, святый мучениче, егда озарившеся светом истиннаго богопознания, радостно потекл еси на страдальческий подвиг. Темже, поминающе страдания твоя, за Христа претерпенная, вопием ти сице: Радуйся, Творца всяческих всем сердцем возлюбивый. Радуйся, за имя Его тяжкая страдания приемый. Радуйся, идольское нечестие обличивый. Радуйся, любве ради твоея ко Христу живота своего не пощадивый. Радуйся, славу мира сего ни во что же вменивый. Радуйся, сладости райския вкусивый. Радуйся, Викторе, мучениче преславный.

Кондак 2

Видя гонения нечестивых на христианы, не убоялся еси прещения и мучительства их, но яко доблий воин Христов, пред нечестивым воеводою Севастианом предстал еси, и веру свою во единаго истиннаго Бога исповедал еси, поя велегласно: Аллилуиа.

Икос 2

Разум богодухновен имея, святый мучениче Викторе, изумил еси мучителя мужеством души твоея и словесы, имиже дерзновенно проповедал еси Христа - истиннаго Бога. Темже, похваляюще исповедание твое, вопием ти таковая: Радуйся, единаго истиннаго Бога проповедниче. Радуйся, Пресвятыя Троицы верный поклонниче. Радуйся, идольскаго служения искоренителю. Радуйся, христианского благочестия насадителю. Радуйся, Царствия Небесного наследниче. Радуйся, славы вечныя сопричастниче. Радуйся, Викторе, мучениче преславный.

Кондак 3

Силою Вышняго укреплен, дерзновенно пред мучителем стал еси, мужественный исповедниче Христов, темже угрозы и ласкательства онаго презрев, на подвиг мученический потекл еси, поя Богу: Аллилуиа.

Икос 3

Имея крепкую надежду на Небеснаго Владыку и Господа, и помняще слово апостольское, яко подобает повиноватися Богу паче, нежели человеком, ты, святый мучениче, не повинуяся велению мучителя, но исповедав себе воином Царя Небеснаго быти, отринул еси языческое нечестие и в руце мучителей предался еси. Мы же, поминающе мужество твое, вопием ти сице: Радуйся, доблий воине Царя Небеснаго. Радуйся, верный рабе своего Домовладыки. Радуйся, угрозы нечестивых презревый. Радуйся, прелесть идольскую обличивый. Радуйся, подвиг мученический добре совершивый. Радуйся, веру свою во Христа кровию засвидетельствовавый. Радуйся, Викторе, мучениче преславный.

Кондак 4

Бурею ярости одержим, безумный мучитель повеле тяжко мучити тя и в пещь огненную воврещи. Ты же, все упование свое на Бога возложивый, во огнь, якоже иногда три отроцы, безбоязненно вшел еси, поя победную песнь: Аллилуиа.

Икос 4

Слышав нечестивый воевода, яко по триех днех пребывания во огненней пещи ты, славный мучениче, невредим обрелся еси, и еще большия ярости исполняяся, призва чародея и повеле ему умертвити тя. Ты же, смертоносную пищу приим, паки неврежден пребыл еси, подвизая вопити тебе таковая: Радуйся, поборниче веры непоколебимый. Радуйся, страстотерпче, адаманта твердейший. Радуйся, огня неубоявыйся. Радуйся, росою молитв твоих пламень огненный угасивый. Радуйся, смертоносныя снеди вкусив, невредим пребывый. Радуйся, пищи райския ныне наслаждаяйся. Радуйся, Викторе, мучениче преславный.

Кондак 5

Боготечней звезде подобен был еси, мучениче Христов, указующей путь спасения: чародея бо, умертвити тя хотящаго, веровати во Христа подвигл еси, научая воспевати купно с тобою: Аллилуиа.

Икос 5

Видевше душевныма очима своима Бога, яве чудодействующа тобою, святый Викторе, волхв нечестивый умилися сердцем и уверова во Христа, тобою проповедуемаго. Мы же, воспевая величия Божия, на тебе явленная, глаголем: Радуйся, спасительным словом тьму неверия разгнавый. Радуйся, мученическим веры исповеданием неверныя ко Христу обративый. Радуйся, вся козни диавола разрушивый. Радуйся, силу демонскую верою Христовою низложивый. Радуйся, верных ко прославлению Бога воздвизающий. Радуйся, в бедах и скорбех сущих прибегати к Нему наставляющий. Радуйся, Викторе, мучениче преславный.

Кондак 6

Проповедником истинныя веры во Христа явился еси пред мучители твоими, страстотерпче славне, никия бо раны тебе содеянныя не возмогоша повредити тебе: кипящий бо елей, аки источник воды прохладныя тебе показася, и оцет, аки сладкий сот тебе бысть. Мы же, терпению твоему удивляяся, вопием Богу, дивному во святых Своих: Аллилуиа.

Икос 6

Возсия свет слепотствующим очесем мучителей твоих, егда ты, святый мучениче, имя Господа Иисуса призвал еси. Сего ради тебе, славному угоднику Божию и чудотворцу, взываем: Радуйся, скорый наш пред Богом заступниче и ходатаю. Радуйся, о душах наших теплый предстателю. Радуйся, недужных молитвою своею исцеляяй. Радуйся, раны душевныя и телесныя врачуяй. Радуйся, веру нашу укрепляяй. Радуйся, надежду нашу утверждаяй. Радуйся, Викторе, мучениче преславный.

Кондак 7

Хотяще прославити Бога, укрепляющаго избранныя Своя, жена некая, именем Стефанида, пришедши на место мучения твоего и велию терпению твоему удивляяся, виде венцы нетленныя с небесе сходящия. Сие убо благоговейно зряще и Бога в сердце своем славяще, возопи: Аллилуиа.

Икос 7

Новую показа безчеловечия ярость злобный мучитель, егда юную Стефаниду, похваляющую страдания твоя, мучениче Христов Викторе, повеле, приклонив ветви древес, привязавши, разсещи. Мы же, подвиг святыя мученицы славяще, ублажаем купно с нею страдания твоя, страстотерпче, вопиюще: Радуйся, жертвою благоприятною, якоже Авелево приношение, Богу бывый. Радуйся, праведности и благих дел, якоже Ной, исполненный. Радуйся, в вере Аврааму подражаяй. Радуйся, Иову в терпении последствуяй. Радуйся, якоже Давид, все упование свое на Господа возложивый. Радуйся, лик мученический восполнивый. Радуйся, Викторе, мучениче преславный.

Кондак 8

Странно бе видети и слышати языком, неведущим Божией силы, како в слабом человечестем телеси возможно таковыя претерпевати за Христа муки. Мы же, славяще Бога, даровавшаго святым мучеником таковую крепость, с любовию взываем: Аллилуиа.

Икос 8

Весь радости божественныя исполнился еси, святый мучениче, егда повеление мучителя на мечное твое усечение услышал еси. Мы же, страдания твоя воспоминающе, и велие терпение твое похваляюще, глаголем: Радуйся, веру, надежду и любовь до конца сохранивый. Радуйся, венец мученический от руки Вседержителя приемый. Радуйся, в невечернем дни Царствия Христова водворивыйся. Радуйся, во обителех райских на Небеси вселивыйся. Радуйся, усердно у престола Божия о нас молящийся. Радуйся, о призывающих тя напрестанно пекущийся. Радуйся, Викторе, мучениче преславный.

Кондак 9

Всякия беды и напасти избави нас молитвами твоими, страстотерпче святый Викторе, велие бо имаши дерзновение пред Господем, за Него же и душу свою положил еси, взывая непрестанно: Аллилуиа.

Икос 9

Витий многовещаннии не возмогут изрещи тебе достойныя хвалы мучениче славный, многих ради подвигов и страданий, ихже за Христа подъял еси волею. Сего ради мы, недоумевая восхваляти тя по достоянию, воспеваем сице: Радуйся, веры христианския исповедниче неустрашимый. Радуйся, воине Христов непобедимый. Радуйся, благонадежный помощниче всем за истину терпящим. Радуйся, скорый утешителю в беде сущих. Радуйся, Церкве Христовы защитниче. Радуйся, всех православных заступниче. Радуйся, Викторе, мучениче преславный.

Кондак 10

Спасения и вечныя радости достигше по мнозех страданиях Христа ради, ты, святый мучениче, научаеши и нас вся, ради Бога, благодушно претерпевати и на Него единаго все упование свое возлагати, воспевая песнь: Аллилуиа.

Икос 10

Стена и прибежище к тебе притекающим ты еси, угодниче Божий, молитися бо непрестанно Христу Богу нашему за всех почитающих страдания твоя. Прийми убо, мучениче многострадальне, и от нас грешных сия убогая похвалы: Радуйся, яко возлюбил еси живот вечный паче временнаго. Радуйся, яко Царствие Небесное предпочел еси славе человечестей. Радуйся, яко страдании твоими снискал еси нескончаемую радость. Радуйся, яко вкусивши смерть мученическую, прешел еси к блаженному безсмертию. Радуйся, горняго Сиона наследниче. Радуйся, Христовы Церкви велие удобрение. Радуйся, Викторе, мучениче преславный.

Кондак 11

Пение Пресвятей Троице воздал еси, святый мучениче Викторе, не словом точию, но живым всего себе в жертву принесением: Творца бо своего паче всего возлюбил еси и Ему единому добре послужил еси, поя со умилением: Аллилуиа.

Икос 11

Светоприемный светильник истиннаго света сущим на земли являвшися, богоизбранне Викторе, просвещаеши бо сердца верных и к разуму Божественному наставляеши вопиющих ти с любовию таковая: Радуйся, Подвигоположнику Христу последователю. Радуйся, жития непорочнаго рачителю. Радуйся, кротости и смирения образе. Радуйся, послушания и терпения учителю. Радуйся, светило благочестия немерцающее. Радуйся, звездо, ко спасению путь верный показующая. Радуйся, Викторе, мучениче преславный.

Кондак 12

Благодать божественнную испроси нам, мучениче Христов, много бо может молитва праведнаго ко благосердию Владыки, не возгнушайся нашея греховныя нечистоты, но буди нам во всем помощник и к покаянию благий наставник, научая милующему нас Богу воспевати: Аллилуиа.

Икос 12

Поюще многострадальныя подвиги твоя, славный страстотерпче, хвалим долготерпение твое, ублажаем мученическую кончину, и почитаем священную память твою, и в похвалу сицевая тебе зовем: Радуйся, во страдании своем доблесть чудную явивый. Радуйся, язвы Господа Иисуса Христа на теле твоем носивый. Радуйся, наследие Царствия Христова стяжавый. Радуйся, в дому Отца Небеснаго обитель себе сотворивый. Радуйся, яко тобою Бог прославляется. Радуйся, яко тобою демоны посрамляются. Радуйся, Викторе, мучениче преславный.

Кондак 13

О всеблаженный святый мучениче Викторе, приими сие наше хвалебное пение, от умиленнаго сердца тебе приносимое, и избави нас от всякаго зла твоим теплым к Богу ходатайством, да с тобою и всеми святыми воспеваем победную песнь: Аллилуиа, Аллилуиа, Аллилуиа.



(Этот кондак читается трижды, затем икос 1 и кондак 1)



Молитва святому мученику Виктору

О святый угодниче Божий, славный мучениче Викторе! Подвигом добрым подвизався на земли, восприял еси на небесех венец правды, егоже уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтим святую память твою. Ты же, предстоя престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед, напастей, и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще единаго во святых Своих славимаго Бога, Отца и Сына, и Святаго Духа, ныне и во веки веков. Аминь.



Тропарь святому мученику Виктору

Мученик Твой Господи Виктор, во страданиях своих венец прияша нетленный от Тебе Бога нашего: имуще бо крепость Твою, мучителей низложи, сокруши и демонов немощныя дерзости. Того молитвами спаси души наша.[/spoiler]

Раб божий Константин

Акафист священноисповеднику Виктору Глазовскому.
[spoiler]Кондак 1
Избранный от Господа святителю, преславный исповедниче, отче наш Викторе, подвигом крепкаго стояния за веру Православную озаривый землю Вятскую, и Церковь русскую святую, яко имеяй велие дерзновение ко Господу, от всяких нас бед и скорбей избавлей, да зовем ти: Радуйся, святителю Викторе, правды Божия поборниче и расколов обличителю.

Икос 1
Ангельския силы на небеси радовахуся чистому и святому житию твоему, святителю отче наш Викторе, яко от младенства возлюбил еси церковь святую, с любовию неленостно помогал еси родителю твоему во храме Божием, мы же грешнии на земли, прославляя Святую Троицу, тако благоволившую о тебе, вопием сице:
Радуйся, из млада возраста Господа всем сердцем возлюбивый;
Радуйся, избранный сосуд Святаго Духа бывый;
Радуйся, с малых лет на путь духовнаго научения вступивый;
Радуйся, вся благая и красная мира сего Господа ради презревый;
Радуйся, от отрочества чистым житием Господеви угодивый;
Радуйся, научением слова Божия и усердною молитвою от юности себе питавый;
Радуйся, службы Божия всегда усердно посещавый;
Радуйся, весь ум ко Господу устремивый;
Радуйся, святителю Викторе, правды Божия поборниче и расколов обличителю.

Кондак 2
Видя суету мира сего, ты, святителю отче наш Викторе, Ангельский чин восприяти пламенно восхотел еси, вопия возлюбленному тобою Господу: Аллилуиа.

Икос 2
Разум имея озарен благодатию Божиею, преславне отче Викторе, восхотел еси тьму нечестия и заблуждення в пастве саратовстей искоренити, и просветити ю светом истиннаго Боговедения и благочестия, сего ради глаголем ти:
Радуйся, истинныя премудрости исполненный;
Радуйся, обитель Святыя Троицы добре устроивый;
Радуйся, Божественныя истины проповедниче;
Радуйся, чувашей в Православии ревностный наставниче;
Радуйся, лукавых учений века сего мудрый обличителю;
Радуйся, суеверий и пороков мужественный искоренителю;
Радуйся, сомневающихся в вере добрый просветителю;
Радуйся, правыя веры и добродетелей насадителю;
Радуйся, святителю Викторе, правды Божия поборниче и расколов обличителю.

Кондак 3
Во Святую Землю силою Божией предивно ведомый, святителю отче наш Викторе, в земнем Иерусалиме подъял еси труды, Господа ради, о укреплении и очищении веры Православныя и тамо у Гроба Господня во умилении сердца воспевал еси ангельскую песнь: Аллилуиа.

Икос 3
Имея непрестанное попечение о укреплении веры Православныя на Святей земле Израилевей, обличал еси, всемудрый святителю, учения безбожныя, яко змеи коварно в Палестину проникшия и ядом своим народ ея губившия, и ко единству Вселенския Православныя церкви чад ея призывал еси, усердно в соборе Святыя Троицы во граде Иерусалиме о том моляся. Мы же воспевая святую ревность твою, глаголем сице:
Радуйся, во святем граде Иерусалиме усердно служивый;
Радуйся, у Гроба Господня о чистоте Православия молитвы возносивый;
Радуйся, всюду о русских людях тамо слезно Господа моливый;
Радуйся, лукавство учителей безбожных неленостно обличивый;
Радуйся, к покаянию свою паству призывавый;
Радуйся, о родной России каждодневно скорбевый;
Радуйся, послужити народу русскому пламенно желавый;
Радуйся, и на Святей Земле о сем труды своя прилагавый;
Радуйся, святителю Викторе, правды Божия поборниче и расколов обличителю.

Кондак 4
Бурею помышлений сумнительных и стремлений мятежных волнуема, Русь якоже ладия прободенная колебашеся, ты же святителю, яко столп непоколебимый и адамант твердейший, хранити верность Православней вере паству свою призывал еси, поя непрестанно Христу Богу: Аллилуиа.

Икос 4
Возлюбив пустынное житие Зеленецкия обители, восходя от силы в силу, украсися ту многими добродетельми. Отсюду же взятся во управление Александро-Невския Лавры, жития твоего ради, сице и мы похвально вопием ти:
Радуйся, Пресвятей Троице неленостный служителю;
Радуйся, монашествующих добрый окормителю;
Радуйся, воли Божией смиренный послушниче;
Радуйся, раскольников грозный посрамителю;
Радуйся, преподобнаго Мартирия кроткий почитателю;
Радуйся, добродетелем святых усердный последователю;
Радуйся, суемудрия и нечестия прогонителю;
Радуйся, о душах христианских мудрый попечителю;
Радуйся, святителю Викторе, правды Божия поборниче и расколов обличителю.

Кондак 5
Егда тяжкое искушение найде на Церковь русскую, воздвиже тя Господь, яко исповедника Своего, супротив гонителей безбожных и достойно омофор священный нося, путем скорбным неустрашимо устремился еси, верою пламенея и на всяк час живот твой за Христа положити уготовися, поя Ему: Аллилуиа.

Икос 5
Видеша тя, святителю Викторе, яко яркий светильник во мраке безбожия светящаго и безчинства безбожныя власти обличающаго, народ вятский возлюби тя, и мужественному твоему исповеданию последуя, взывал к тебе сице:
Радуйся, пастырю наш мужественный и твердый;
Радуйся, отче наш любвеобильный;
Радуйся, к правде Божией нас ведущий;
Радуйся, не боятися бесовския злобы нас научающий;
Радуйся, до конца стояти за веру Христову нас призывающий;
Радуйся, в скорбех и испытаниях не унывающий;
Радуйся, мужеством святителю Ермогену уподобивыйся;
Радуйся, темничнаго заточення Христа ради не убоявыйся;
Радуйся, святителю Викторе, правды Божия поборниче и расколов обличителю.

Кондак 6
Проповедником правыя веры и благочестия в годину лютых гонений на церковь Православную был еси, прехвальне святителю Викторе, безбоязненно обличая пагубную обновленческую ересь и призывая паству свою не следовати самозванным раскольником и не уподоблятися сим льстецам, но мужественно держатися веры Православныя, воспевая возлюбленному Господу: Аллилуиа.

Икос 6
Возсиявый на Вятстей земле яко светильник пресветлый, во дни кроваваго мяте?жа, богомудре святителю Викторе, всем унывающим и во отчаянии пребывающим людем путь спасения показуеши и из сетей обновленчества их выводиши, призывая остерегатися лжепастырей, извращающих святую истину и учение Православное в угоду прелестем лукаваго мира сего. Темже поклоняющеся мужеству твоему взываем ти сице:
Радуйся, крестный путь с паствою твоею прошедый;
Радуйся, тесным путем скорбей и страданий пасомых ко Христу приведый;
Радуйся, лести обновленческия отвращатися призывавый;
радуйся, коварство и властолюбие лжепастырей обличавый;
Радуйся, льстивое красноречие слушати не велевый;
Радуйся, к Царствию Божию взоры своя устремляти учивый;
Радуйся, паству твою в Православии укрепивый;
Радуйся, клевету и гонения от лжебратий мужественно претерпевый;
Радуйся, святителю Викторе, правды Божия поборниче и расколов обличителю.

Кондак 7
Хотя быти пастырь добрый, любя овцы своя, не убоялся еси беззаконных мучителей и ревностно обличал еси ересь обновленческую, темже стяжал еси велию благодать у Господа, поя Ему радостно: Аллилуиа.

Икос 7
Новаго и дивнаго поборника чистоты Православия видим тя, святителю Викторе, яко биений и темничнаго заточения не устрашился еси и мужественно взывал еси словами апостола: Молю же вы братие, остерегайтеся производящих разделения и распри, вопреки учению, емуже вы научилися. Восхваляюще Православное ратоборство твое, благодарственно вопием ти:
Радуйся, волков хищных обновленческих грозно обличавый;
Радуйся, поношения и злооклеветания претерпевый;
Радуйся, ненависть и козни их простивый;
Радуйся, претерпевый за истину суровое злточение;
Радуйся, яко народом вятским горько оплаканный;
Радуйся, паству свою на подвиг исповедания веры благословивый;
Радуйся, над всеми бесовскими кознями восторжествовавый;
Радуйся, горячие молитвы о многоскорбной России непрестанно возносивый;
Радуйся, святителю Викторе, правды Божия поборниче и расколов обличителю.

Кондак 8
Странно есть маловерным и малодушным слышати како святитель Виктор во дни гонений, егда кровь Православная реками напитала землю русскую, дерзновенно обличает отринувших православную веру и призывает: Лучше пострадати истинныя веры ради, нежели диаволу поклонитися. Темже почитая святое исповедание твое, поем укрепившему тя Богу: Аллилуиа.

Икос 8
Весь предан был еси Иисусу Сладчайшему, святителю отче наш Викторе, егда изгнание, и заточение претерпел еси, непрестанно со усердием моляся о земле Русской и о людех ея. Темже мы, почитая твое мужество сице вопием ти:
Радуйся, гонения и поругания Христа ради стойко претерпевый;
Радуйся, любовь ко Господу и во изгнании преумноживый;
Радуйся, и в заточении паству твою с любовию ободрял есн;
Радуйся, в глубине Соловецкаго леса Троицу Святую прославлял еси;
Радуйся, яко вся тебе присылаемая страждущим и болящим раздавал еси;
Радуйся, яко велию благодать от Господа стяжал еси;
Радуйся, ненавидящих тя от всего сердца прощал еси;
Радуйся, образ Божий в своем сердце неизменно носил еси;
Радуйся, святителю Викторе, правды Божия поборниче и расколов обличителю.

Кондак 9
Всякия скорби безропотно претерпел еси, всякия лишения, обиды, Болезни, поругания с любовию и кротостию принимал еси, святителю отче наш Викторе, неустанно взывая ко Господу Богу: Аллилуиа.

Икос 9
Ветии многовещанныя не возмогут по достоянию воспети подвиги твоя, святителю отче Викторе, яже претерпел еси от безбожных властей и предателей обновленческих за веру правую святую. Мы же почитая прискорбный путь твой во исповедание веры Православныя из глубины души глаголем ти:
Радуйся, яко во мраке безбожия правую веру утверждавый;
Радуйся, мучителя своего кротко простивый и от беснования его исцеливый;
Радуйся, пощады от безбожных властей не просивый;
Радуйся, оклеветания и поношения стойко терпевый;
Радуйся, страну северную всем сердцем возлюбивый;
Радуйся, молитвы о поруганной Руси в чаще лесной возносивый;
Радуйся, отроком помощник добрый был еси;
Радуйся, болящее дитя молитвою исцеливый;
Радуйся, святителю Викторе, правды Божия поборниче и расколов обличителю.

Кондак 10
Спасти хотя паству твою и Русь любимую от кроваваго мятежа и раскола церковнаго пламенно взывал еси ко Господу, святителю наш предивный, и слезно умолял еси Его да укрепит Он церковь Святую Православную и очистит ю от язвы обновленческия, дабы не коснулась душ наших богомерзкая еретическая скверна и да возмогли бы мы чистым сердцем воспевати вкупе со всеми святыми песнь Господеви: Аллилуиа.

Икос 10
Стена, ограждающая русских людей от нечести еретическия, раскольническия, явился еси в Церкви Православней, святителю отче Викторе, показуя собою образ мужественнаго стояния за Истину Святую, темже и мы ныне со благодарением взываем ти:
Радуйся, лесть и лукавство всем сердцем возненавидевый;
Радуйся, страдания за Христа и церковь Его радостно претерпевый;
Радуйся, страданием исповедание веры совершивый;
Радуйся, в веси северной Нерице упокоение от Господа приявый;
Радуйся, яко Господь чудным образом гроб твой сохранивый;
Радуйся, святыми мощами своими землю Вятскую освятивый;
Радуйся, вкупе с новомученицы и исповедницы Российскими землю Русскую прославивый;
Радуйся, преданностию Православию любовь всея Руси стяжавый;
Радуйся, святителю Викторе, правды Божия поборниче и расколов обличителю.

Кондак 11
Пение смиренное и усердное принесл еси Пресвятей Троице, священноисповедниче Викторе, не точию умом, словом и духом, но всего себе в жертву отдал еси. Темже поклоняяся нетленным и благоуханным мощем твоим, радостно поем дивному во святых Своих Богу: Аллилуиа.

Икос 11
Светозарный светильник на верху горы стоящий и всей России путь ко спасению освещающий являешися, пречудный святителю Викторе, ибо и в наши мятежныя времена призываеши паству Русскую отвращатися от льстивых учений обновленческих и твердо хранити заветы Православия. Мы же припадающе к раце мощей твоих и иконе твоей поклоняющеся, из глубины души взываем ти сице:
Радуйся, звездо светозарная, в земле Русской сияющая;
Радуйся, всегдашняя молитва, о нас к Богу неумолкающая;
Радуйся, за отечество твое пред Господом милостивый печальниче;
Радуйся, всем Богу служити хотящим мудрый наставниче;
Радуйся, Русския земли радование;
Радуйся, светлое зерцало правды церковныя;
Радуйся, козней безбожныя власти не убоявыйся;
Радуйся, Истину Божию паче славы земныя возлюбивый;
Радуйся, святителю Викторе, правды Божия поборниче и расколов обличителю.

Кондак 12
Благодать данную ти от Бога ведуще, радостно имя твое вспоминаем, святителю отче Викторе, и с теплым молением ко всечестному образу твоему притекающе, прилежно молим тя: укрепи нас маловерных и малодушных, настави нас на путь истиннаго покаяния, в Православной вере сердца и души наша утверди, да обрящем у Господа спасение и воспоим Ему из глубины сердечныя: Аллилуиа.

Икос 12
Поюще дивное и праведное житие твое, воспевающе терпение и исповедническия подвиги твоя, прославляя скорбную кончину твою во изгнании, приносим ти умиленныя глаголы сия:
Радуйся, теплый пред Господем о нас молитвенниче;
Радуйся, противу врагов церкви Христовыя пламенный противоборниче;
Радуйся, проповедником Божественныя истины дивный споспешниче;
Радуйся, о земле и народе вятстем милостивый пред Господем ходатаю;
Радуйся, яко предивным Благоуханием святых мощей твоих ревностный о истине глашатаю;
Радуйся, Царя Небеснаго скорый умилостивителю;
Радуйся, благосердый помощник всем совершающим святую память твою;
Радуйся, целитель душ и телес.
Радуйся, святителю Викторе, правды Божия поборниче и расколов обличителю.

Кондак 13
О преславный пастырю, и исповедниче святителю отче наш Викторе, приими ныне от нас грешных сие похвальное пение, и твоими святыми молитвами поющих тя в Православии укрепи, от пагубных ересей и расколов защити, от волков коварных, расхищающих стадо Христово, жезлом молитв твоих далече отжени, крепкое стояние за церковь Православную и законы ея в сердцах наших утверди, да неленостно совершивши путь своего спасения, сподобимся в Царствие Небесное внити и вкупе с тобою воспевати Христу Богу: Аллилуиа. (Трижды)

Затем читается 1-й икос и 1-й кондак.
Молитва
О, священная главо, святителю Божий отче наш Викторе! К тебе, предстателю святый, прибегаем, яко не имамы дерзновения ко Господу за премногия грехи наша. Ты же, отче святый, в земном житии твоем столп веры православныя быв и исповедник доблий, укрепи нашу веру, да возможем противустати всем кознем лукаваго, испроси нам у Всемилостиваго Бога вся благопотребная душам и телесем нашим. Церковь Русскую от ересей и расколов сохрани, да пребудет до скончания века чистая и непорочная Невеста Христова, заблуждающих обрати, недугующих исцели, юныя просвети, да уведят благочестия доброту и греха безобразие, даждь нам утешение в печалех, пробуди в сердцах наших покаяние, возжги в сердцах наших пламень Божественныя любве и всем вся даруй, яже ко спасению, и подаждь нам твое святительское благословение, да тем осеняеми избавимся от всякия беды и напасти, и да будем благоуспешны в трудех наших. Услыши моления наша, всеблаженне отче наш Викторе, к раце мощей твоих с верою и любовию припадающих, яви нам многомощное твое заступление, соблюди град твой Вятку, его же возлюбил еси, и вся грады и веси русския от напастей ненаветны, да славим дивнаго во святых Своих Бога, Отца и Сына и Святаго Духа, ныне и присно и во веки веков. Аминь.


Тропарь, глас 4:
Правды Божия поборниче / и расколов обличителю, / исповедниче Христов святителю Викторе, / яко пресветлое светило добродетельми просиявый / и изгнание претерпевый, / упасл еси паству твою в Православии и благочестии. / Радуется днесь земля Вятская, / в нюже восхотел еси возратитися / цельбоносными мощми твоими, / празднующи любовию святую память твою. / Моли о нас Бога, // с верою к предстательству твоему прибегающих.

Кондак, глас 8:
Победе тезоименитый, / святителю преславне Викторе, / победил еси гонителей твоих немощную ярость. / Разум имея богопросвещенный, / хитросплетенная ложная обличал еси, / овец твоих в ограде церковной соблюдая. / Темже увенчался еси от Бога венцем драгоценным. // Не престай моляся спастися душам нашим.[/spoiler]

Раб божий Константин

Акафист святым мученикам Виленским: Антонию, Иоанну, Евстафию.
[spoiler]Кондак 1


Избраннии Богом для свидетельства православныя веры, мужески попрасте, святии мученицы, языческое нечестие, и за ваша страдания нетленными венцы от Христа Бога увенчастеся; темже мы, ублажающе вашу память, всеумиленно взываем к вам: Радуйтеся, святии мученицы, Антоние, Иоанне и Евстафие.


Икос 1


Ангели земнии и человецы небеснии явистеся, святии мученицы, егда озарившеся светом истиннаго богопознания, радостно потекосте на страдальческий подвиг. Приимите убо от нас хвалебное пение сие: Радуйтеся, богоблаженнии исповедницы православныя веры, издревле насажденныя в земли Российско-Литовской; Радуйтеся, неумолкающии глашатаи истиннаго благочестия. Радуйтеся, велии подвижницы, ни во чтоже вменившии славу мира сего, да Христа приобрящете; Радуйтеся, возлюбившии Христа Бога всем вашим сердцем и всею душею. Радуйтеся, кровию вашею запечатлевшии любовь вашу к Господу Иисусу; Радуйтеся, святии мученицы, Антоние, Иоанне и Евстафие.


Кондак 2


Видяще, яко нетленныя мощи ваша даруют всем, притекающим с верою, исцеление от болезней душевных и телесных, благодарим милосердаго Бога, прославившаго вас, святии мученицы, такою благодатию, и вопием Христу Спасителю: Аллилуиа.


Икос 2


Разумныя очеса ваша вперивше в познание истинныя веры, вы, святии братия Антоние и Иоанне, мужемудренно отвергостеся языческаго прельщения, и за исповедание единаго истиннаго Бога радостно приясте узы, темничное заключение, раны и лютую смерть. Таковому подвигу вашему поревновав, и юный Евстафий, небоязненно исповедал себе христианина быти, и сподобился таких же лютых за Христа мучений и смерти. За таковое ваше, еже за Христа, святое дерзновение взываем к вам сице: Радуйтеся, блаженная троице честных страстотерпцев, прославивших истиннаго Бога, во Святей Троице покланяемаго, Отца, Сына и Святаго Духа; Радуйтеся, доблии воины Христовы, сохранившии верность ко Владыце до смерти. Радуйтеся, не убоявшиися претерпети за Христа никиих мук; Радуйтеся, яко ни теснота, ни узы, ни страдания, ни самая смерть не могли разлучити вас от любве Христовой. Радуйтеся, изгнаннии, поруганнии и убиеннии правды ради, яко мзда ваша многа на небеси; Радуйтеся, святии мученицы, Антоние, Иоанне и Евстафие.


Кондак 3


Силою Вышняго укрепляеми, небрегосте, святии мученицы, тяжкаго страдания ваших телес, преданных мукам, и на мучения, аки на брачный пир, радостно текосте; мы же благодарственно взываем укрепившему вас Христу Богу: Аллилуиа.


Икос 3


Имуще крепкую надежду на Небеснаго Царя и Бога и помняще апостольское слово, яко подобает повиноватися Богу паче, нежели человеком, вы, святии мученицы, не повинустеся велению вашего мучителя, еже возвратитися к прежнему языческому нечестию: Радуйтеся, убо исповедавший Христа пред человеки и от Него исповеданнии пред Отцем Небесным; Радуйтеся, вернии слузи Христовы, за верность свою наследовавшии Царствие Небесное. Радуйтеся, сожителие ангелом и приснии всем святым; Радуйтеся, водвореннии в невечернем дни Царствия Божия. Радуйтеся, призирающии с небеси на земную братию вашу и молящиися о всех, призывающих вас на помощь; Радуйтеся, святии мученицы, Антоние, Иоанне и Евстафие.


Кондак 4


Буря ярости ваших мучителей не поколебала крепкой вашей веры, надежды и любве к Спасителю Богу, и вы, святии мученицы, ревностно упреждасте друг друга в тяжких страданиях, воспевая Богу в сердцах ваших: Аллилуиа.


Икос 4


Слышана бысть по всей православной земли радостная весть, яко вы, святии мученицы, подвигом добрым подвизастеся, течение ваше добре скончасте и веру до конца соблюдосте. Сего ради мы со всею Православною Церковию ублажаем вас: Радуйтеся, исполнившии слово Христово, еже претерпевый до конца, той спасен будет; Радуйтеся, вашим терпением удивившии мучителей ваших. Радуйтеся, примером вашей жизни и смерти обратившии многих ко Господу; Радуйтеся, яко и ныне чудесами, истекающими от святых ваших мощей, вы укрепляете православную веру в людех. Радуйтеся, яко за терпение ваше соблюдеся вам венец правды на небеси; Радуйтеся, святии мученицы, Антоние, Иоанне и Евстафие.


Кондак 5


Боготечными звездами православныя веры бысте вы, святии мученицы, для ваших земных соотчичей, указуя для них в Православной Церкви единый надежный путь ко спасению, да вси единым сердцем и едиными усты взывают спасающему Богу: Аллилуиа.


Икос 5


Видено бысть чудное знамение Божией благости, егда честное место ваших страданий озарил свыше облачный столп, указующий вам путь к небеси, яко же древле израильтяном из Египта в землю обетованную. Сего ради воспеваем к вам: Радуйтеся, чада новаго Израиля, достигшии горняго Небеснаго Иерусалима; Радуйтеся, добре прошедшии многотрудное странствие ваше в пустыни сея жизни и вселившиися в стране обетованной вечной. Радуйтеся, яко не Моисей, но Сам Христос Бог бысть для вас вождем к Небесному Отечествию; Радуйтеся, победившии всех ваших супостатов и противников на пути к Царствию Небесному. Радуйтеся, блаженнии небожители, вкушающии вечная блага, ихже око не виде, и ухо не слыша, и яже на ум человеку не взыдоша. Радуйтеся, святии мученицы, Антоние, Иоанне и Евстафие.


Кондак 6


Проповедуют святыя мощи ваша паче всякаго красноречия несомненную надежду всеобщаго воскресения, егда Бог, не дающий и ныне преподобным Своим видети истление, воззовет к пакибытию весь род человеческий, и вси сподобльшиися стати одесную Престола Господня воспоют Ему: Аллилуиа.


Икос 6


Возсия новый свет для всея Российския земли, егда милосердый Бог явил величие Своих чудес над вашими нетленными мощами, яже страха ради иноверческаго вторицею сокрыты быша в недрах земли под спудом храма, и оттоле источаху обильныя исцеления всем, с теплою молитвою прибегавшим к вашей честной иконе. Приимите же от нас, святии мученицы, сие усердное славословие: Радуйтеся, светозарныя светила Христовой Церкви, не могущия сокрытися под спудом; Радуйтеся, скории врачи душ и телес наших. Радуйтеся, защитники наши от зловредных иноверческих мудрований; Радуйтеся, светлии вожди наши к истинному богопознанию и богопочтению. Радуйтеся, усердные молитвенницы наши пред Господом; Радуйтеся, святии мученицы, Антоние, Иоанне и Евстафие.


Кондак 7


Хотяще прославити Господа Бога, дивнаго во святых Своих, не обретаем довольных слов еже благохвалити Его по достоянию; но вас, святии мученицы, призываем на помощь, молитеся за ны прилежно, да неосужденно дерзаем воспевати Господу: Аллилуиа.


Икос 7


Новоявленными мучениками нарекла вас Православная Церковь, яко матерь, веселящаяся о чадех своих; и якоже древнии мученицы по всей вселенней своими страданиями утвердиша Божественную веру, подобие им и вы, новоявленнии мученицы, тако утвердисте святую веру в месте земнаго отечествия вашего, яко никия козни иноверия не могут поколебати ея, и мы, благодаряще, взываем к вам: Радуйтеся, твердии столпы православия, ими же красуется и укрепляется Святая Церковь; Радуйтеся, искуснии кормчии, благонадежно ведущии нас среди временных волнений к пристанищу вечныя жизни. Радуйтеся, споспешницы нашего оправдания; Радуйтеся, яко молитвами вашими мы избавляемся от всякаго лукаваго прельщения, ищущаго уловити души наша. Радуйтеся, благодетели наши, указующии нам, путь ко спасению. Радуйтеся, святии мученицы, Антоние, Иоанне и Евстафие.


Кондак 8


Странное и для ума человеческаго непостижное, обаче явнозримое нами чудо всемогущества Божия является в нетлении святых ваших мощей, яже больше полутысящи лет пребывают невредимы от разрушительных стихий и от времене всепоядающаго, воздвизая нас со умилением пети Господу: Аллилуиа.


Икос 8


Вся радости века сего, всю честь вашего звания и всю крепость ваших сил принесосте, святии мученицы, в жертву Спасителю Богу, и сподобистеся от Него мздовоздаяния на небеси, идеже ни червь, ни тля тлит, ни татие не подкапывают и не могут похитити дарованнаго вам наследия: Радуйтеся, убо, мудрии искатели Царствия Божия, подобнии евангельскому мужу, иже обрет на селе сокровище сокровенно, вся продает, елика имать, и купует то село драгоценное; Радуйтеся, обретшии един многоценен бисер, иже есть Царствие Божие, и за него отдавшии вся блага мира сего. Радуйтеся, паче мудрых века сего уразумевшии цену бытия земнаго; Радуйтеся, святии проповедницы, возвещающии нам из вашего гроба, яко недостойны суть страсти нынешняго времени к хотящей явитися славе грядущаго Царствия. Радуйтеся, граждане небеснии и сонаследницы всем святым; Радуйтеся, святии мученицы, Антоние, Иоанне и Евстафие.


Кондак 9


Всякия скорби, болезни и прилоги наша вы утоляете, святии мученицы, и темныя зраки лукавых бесов далече от нас отгоняете, да тако вашею помощию, благодатию же Божиею спасаеми, благодарным и радостным гласом воспеваем Богу: Аллилуиа.


Икос 9


Витийство человеческое немотствует, тщащееся восхвалити вас, святии мученицы, за ваша страдания, яже претерпесте Христа ради, и за вашу мученическую смерть. Обаче любовию вашею побеждаеми, елико можем, ублажаем вас: Радуйтеся, возвеселившии весь ангельский лик вашим за Христа терпением и страданием; Радуйтеся, дружелюбно принятыи на небеси от всего сонма праведников и угодников Божиих. Радуйтеся, яко представше Престолу Господню, сподобилися есте поклонитися Ему и получити от Него вечную награду; Радуйтеся, обитающии во светлостех святых, идеже несть болезнь, ни печаль, ни воздыхание. Радуйтеся, утешители всех гонимых и терпящих за Христову веру; Радуйтеся, святии мученицы, Антоние, Иоанне и Евстафие.


Кондак 10


Спасения и вечнаго покоя достигше после многоскорбныя земныя жизни, вы и нас, святии мученицы, поучаете, яко един есть истинный путь ко спасению в сем мире злом и лукавом, еже вся благодушно терпети Христа ради, воспевающе Ему усердно: Аллилуиа.


Икос 10


Стены пещернаго храма, идеже нетленно почивают ваша цельбоносная телеса, просвещаются, аки небесный чертог, и вси жаждущии спасения прибегают к вам, святии мученицы, с мольбами, с благодарением и с славословием: Радуйтеся, помощницы наши в скорбех, болезнех и печалех; Радуйтеся, ходатаи наши пред Престолом Небеснаго Судии живых и мертвых. Радуйтеся, яко никто же прибегаяй к вам помощи ради отходит от вас тощ; Радуйтеся, щедрии подателие нам Божией милости. Радуйтеся, обрадованнии на небеси и нас на земли укрепляющии в радостной надежде вечнаго спасения; Радуйтеся, святии мученицы, Антоние, Иоанне и Евстафие.


Кондак 11


Пению ангельскаго лика на небеси совокупльше ваши преподобныя гласы, вы, святии мученицы, купно с небесными чины непрестанно славите Господа Бога; и мы, недостойнии, уповающе на милосердие Божие, дерзаем на земли бренными устами и благодарным сердцем воспевати Ему: Аллилуиа.


Икос 11


Светозарнаго дне всеобщаго воскресения и страшнаго суда Божия чающе, ужасаемся лютых наших деяний и безмерных грехов, ими же ежечасно прогневляем Создателя и Спасителя нашего; но имея вас, святии мученицы, предстательствующих за ны пред Господом, благодарственно взываем к вам: Радуйтеся, яко мы по Бозе и по Пречистой Приснодеве Богородице все наше упование на нас возлагаем; Радуйтеся, яко вы не посрамите нас от чаяния нашего. Радуйтеся, яко молитвами вашими мы уповаем получити отпущение грехов и жизнь вечную; Радуйтеся, благословеннии Отца Небеснаго, наследовавшии уготованное вам Царствие от сложения мира. Радуйтеся, яко и мы вашим заступлением чаем избежати участи стоящих ошуюю Престола Судии; Радуйтеся, святии мученицы, Антоние, Иоанне и Евстафие.


Кондак 12


Благодать чудесных исцелений и скораго продстательства за нас пред Господом имуще, не преставайте, святии мученицы, выну помогати нам, славящим о вас Христа Бога и вопиющим Ему: Аллилуиа.


Икос 12


Поюще ваше светлое прославление на небеси и на земли, благодарим Всемилостиваго Спаса и Бога нашего, яко содержай в Своей руце времена и лета, благоволил прославити и явити нам вас, святии мученицы, в благопотребное для нашего спасения время, да не погрязнем в тимении пагубных страстей и неразумных стремлений; сего ради возсылаем к вам наше усердное благохваление: Радуйтеся, неусыпнии стражи нашего спасения, берегущии нас от всякаго навета неприязненнаго; Радуйтеся. хранителие наши, удаляющии от нас всякое вредное искушение. Радуйтеся, искуснии наставницы наши в непоколебимом и твердом исповедании православныя веры; Радуйтеся, громогласнии органы благодати Божией, наполняющей Православную Церковь. Радуйтеся, великии соотчичи наши, всем нам желающии и помогающии спастися; Радуйтеся, святии мученицы, Антоние, Иоанне и Евстафие.


Кондак 13


О преславнии и святии мученицы: Антоние, Иоанне и Евстафие! Приимите сие малое, но усердное моление наше, и ходатайством нашим у Христа Бога избавьте нас от всех болезней душевных и телесных, и от всякаго прилога вражия, и от всякия беды и напасти, да выну, благодаряще о вас Господа Бога, радостно воспеваем Ему: Аллилуиа.


(Этот кондак читается трижды, затем икос 1 и кондак 1)


Молитва святым мученикам Антонию, Иоанну и Евстафию Виленским


Святии мученицы Антоние, Иоанне и Евстафие! Призрите с небеснаго чертога на требующих вашей помощи и не отвергните прошений наших; но яко приснии благодетели и ходатаи наши, молите Христа Бога, да человеколюбив и многомилостив сый, сохранит нас от всякаго лютаго обстояния: от труса, потопа, огня, меча, нашествия иноплеменников и междоусобныя брани. Да не осудит нас грешных по беззакониям нашим, и да не во зло обратим благая, даруемая нам от всещедраго Бога, но во славу святаго Имени Его и в прославление крепкаго вашего заступления. Да молитвами вашими даст нам Господь мир помыслов, воздержание от пагубных страстей и от всякия скверны; и да укрепит во всем мире Свою едину Святую, Соборную и Апостольскую Церковь, юже стяжал есть честною Своею кровию. Молитеся прилежно, святии мученицы, да утвердит Христос Бог во Святей Своей Православной Церкви живый дух правыя веры и благочестия; да вси члены ея, чистии от суемудрия и суеверия, духом и истиною покланяются Ему и усердно пекутся о соблюдении Его заповедей; да мы вси в мире и благочестии поживем в настоящем веце и достигнем блаженныя вечныя жизни на небеси, благодатию Господа нашего Иисуса Христа, Ему же подобает всякая слава, честь и держава со Отцем и Святым Духом, ныне и присно и во веки веков. Аминь.



Тропарь мученикам Антонию, Евстафию и Иоанну Виленским (Литовским)


Тропарь 1, глас 4


Иже земных чести и славы отвергшеся, доблии и честнии, страдальцы, веры ради крепко и мужественно муки претерпесте, на смерть себе давше за живот всех Владыку: тем же и Христос преславно столпом облачным с небесе вас озари и почестьми и венцы от престола славы венча: со Ангелы Тому предстояще, молите спастися душам нашим.


Тропарь 2, глас 4


От корене неплодна, преблаженнии, возрастивше православныя веры ветви, первомучеником тезоименитии явистеся: злаго бо и нечестиваго князя ярости не убоястеся, повелевающа Христа отрещися, сего ради мученическия венцы приемше и со Ангелы престолу Владычню предстояще, о нас молитеся, преблаженнии, православно чтущих святую память вашу.


Величание


Величаем вас, страстотерпцы святии Антоние, Иоанне и Евстафие, и чтем честная страдания ваша, яже за Христа претерпели есте.
/spoiler]

Раб божий Константин

Акафист святому равноапостольному князю Владимиру.
[spoiler]Кондак 1
Избраннаго светильника, тьму идолослужения в державе Российстей разгнавшаго и светом Божественныя веры ю просветившаго, восхваляем тя, святый равноапостольный княже Владимире: ты же яко выну со дерзновением предстояй Царю царствующих, не престай моляся о достоянии твоем и твоими молитвами сохраняй нас от всяких бед и зол, да со умилением благодарственно зовем ти:
Радуйся, Владимире, державы Российския просветителю.

Икос 1
Ангелом и человеком Творец, времена и лета во Своей власти положивый и судьбы государств и народов устрояяй, егда благоизволи призвати род российский от тьмы идолослужения ко свету истины и правды вечныя, постави тя, благоверный княже, благовестителя и совершителя сея всеблагия воли Своея. Темже, благодаряще Творца и Спаса нашего, славословим тя, яко великаго избранника Божия нашего ради спасения, с веселием зовуще:
Радуйся, равноапостоле, ко просвещению народа русскаго премудрым промыслом предызбранный;
Радуйся, от первозваннаго апостола на горах Киевских прореченный.
Радуйся, преславный сосуде Божественныя благодати, державе твоей дарованный;
Радуйся, пречудный кореню, из негоже на земли нашей произрасте велие древо правоверия.
Радуйся, яко тобою имя Господне во всех пределех страны твоей прославляется;
Радуйся, яко и твое преславное имя от всех родов российских с любовию воспевается.
Радуйся, Владимире, державы Российския просветителю.

Кондак 2
Видя суету бездушных идолов и прелесть диавола, еюже уловляет темныя люди в сети беззакония, купно же слыша святых первомученик русских за Христа Феодора и юнаго Иоанна, глаголющих безбожным мучителем: «Бози ваши не суть бози, но древо, еже днесь пребывает, утро сгнило есть, Един же есть Бог истинный, Иже сотвори небо и землю»; тогда возгорелся еси сердцем, во еже взыскати и уведети Сего Единаго истиннаго Бога, Емуже покланяется всяко колено небесных, земных и преисподних, немолчно воспевая: Аллилуйя.

Икос 2
Разум всевышний приосени тя, егда предсташа ти проповедницы разновернии и потщался еси, да не уловлен будеши в сети лжеучения, но да обрящеши веру истинную и спасительную. Темже ублажаем тя:
Радуйся, премудрый просветителю народа русскаго;
Радуйся, разум богопросвещенный стяжавый.
Радуйся, яко ухищрения и суесловия лжеучителей посрамил еси;
Радуйся, яко глаголы жизни вечныя в словесех Мудреца истиннаго мудре уразумел еси.
Радуйся, лучу Божественнаго света посреде тьмы лжеверия;
Радуйся, стено нерушимая посреде бури страстей языческих.
Радуйся, Владимире, державы Российския просветителю.

Кондак 3
Силою свыше умудрен, послал еси мужи избранныя во страны иныя, да видят и испытают, како инии народи служат Богу и како веру свою от дел своих показуют; тии же, вся добре испытавше, достигоша Царяграда, идеже видяще благолепное совершение Божественнаго священнодействия, мнеша себе не на земли, но на Небеси стояти, и со умилением сердца воздаша хвалу Господеви, зовуще: Аллилуйя.

Икос 3
Имуще в сердцах своих твердое уверение, яко вера грековосточная воистинну есть православная и яко священнодействия ея паче всех иных велелепна, посланнии тобою мужие, возвратившеся во Отечествие свое, исповедаша сия пред лицем твоим и пред старейшины твоими, рекоша же: «Никтоже, вкусив сладкаго, восхощет горькаго, тако и мы не можем паки остати зде и служити кумиром». Таковое извещение прием, возгорелся еси ревностию по вере истинней. Сего ради величаем тя:
Радуйся, гласу Божественныя благодати прилежно внимавый;
Радуйся водительству Святаго Духа усердно последствовавый.
Радуйся, яко советники твоя умудрил еси;
Радуйся, яко вся люди твоя советы твоими ко истинней вере привлекл еси.
Радуйся, яко со тщанием поискал еси добраго бисера Христа;
Радуйся, пчело трудолюбивая, мудре взыскавшая цветы, в них же сладкий мед истины и спасения.
Радуйся, Владимире, державы Российския просветителю.

Кондак 4
Бурею сумнений и недоумений не поколебался еси, повнегда уведети тебе веру истинную, православную, но абие восхотел еси прияти святое Крещение со всею державою твоею, да купно с нею, яко отец со чады своими, достойно воспоеши Богу: Аллилуйя.

Икос 4
Слышавше боляре и старейшины яже о вере истинней, помянуша праматерь твою святую княгиню Ольгу, яже прият святое Крещение в Цариграде, и рекоша: «Аще не бы блага бысть вера сия, не бы прияла ю сия мудрейшая в женах». Темже и мы, присно поминающе премудрую Ольгу, благодарственно зовем ти:
Радуйся, яко соблюл еси Божественное семя, еже всея в сердце твое блаженная праматерь твоя;
Радуйся, яко святым заветом тоя последовал еси.
Радуйся, яко провидел еси в ней зарю спасения народа твоего;
Радуйся, солнце, возшедшее по заре той.
Радуйся, свете, старейшины твоя просветивый;
Радуйся, вся люди твоя ко Христу приведый.
Радуйся, Владимире, державы Российския просветителю.

Кондак 5
Боготканную одежду Святаго Крещения восхотев получити, помыслил еси, откуду и како имети имаши толик сонм пастырей и учителей, да просветят вся люди твоя с тобою, и како пояти себе жену, в вере святей испытанну, дому твоему благую строительницу, чадом твоим матерь во Христе, советницу же всем во благочестии, и о сем всем поревновав, дух твой приведе тя ко стране Гречестей, идеже вернии от лет древних благочестно воспевают Богу: Аллилуйя.

Икос 5
Видевше царие гречестии всю страну твою во тьме идолослужения коснящу, небрегоша тя, яко кумиром служаща, обаче побеждени бывше от тебе, и уведевше крепкое произволение твое прияти святое Крещение и вся люди твоя ко Христу привести, исполнишася радости и вдаша ти сестру свою Анну на брак, пастыри же и учители народу твоему. Темже и мы, присно радующеся святому сему союзу твоему, воспеваем тя:
Радуйся, яко посетил есть тя Восток свыше;
Радуйся, яко звезда Всевышняго приведе тя к Востоку, идеже Премудрость созда себе дом и утверди столпов седмь, седмь Соборов Вселенских, иже утвердиша веру Христову по вселенней.
Радуйся, яко сия есть вера апостольская, сия вера вселенную всю утверди;
Радуйся, яко от чистаго источника чистое учение Христово приял еси.
Радуйся, дому твоего и чад твоих добрый рачителю;
Радуйся, всего народа твоего премудрый наставниче.
Радуйся, Владимире, державы Российския просветителю.

Кондак 6
Пастырие и учители, ихже приял еси, прехвальне княже, от царей греческих, яко да напаяют всю страну Российскую ученьми Божественными, со тщанием течаху на делание свое, благодарственно поюще призвавшему народ твой ко спасению Господу Богу: Аллилуйя.

Икос 6
Возсия пречудне чувственный свет в помраченною недугом слепоты очию твоею, в душе твоей свету благодати возсиявшу, егда, просветився Божественным Крещением, изшел еси от святыя купели, еже ощутив, радостно воскликнул еси: «Ныне познах Бога истиннаго». Темже ублажаем тя:
Радуйся, светильниче, огнем Божественныя благодати во тьме язычества возжженный;
Радуйся, благовестителю света Христова, омраченная очеса и сердца народа твоего отверзаяй.
Радуйся, яко умныма очима твоима провидел еси Божие смотрение о державе твоей;
Радуйся, яко до конца потщался еси, да и вси людие твои просветятся в нем.
Радуйся, богосветлая главе князей российских;
Радуйся, славнейшее украшение и похвало Церкве Христовы.
Радуйся, Владимире, державы Российския просветителю.

Кондак 7
Хотя просветити Божественным Крещением народ русский, первее повелел еси креститися сыновом и вельможам твоим, да вси людие, последующе стопам их, со благим произволением приступят ко святому Крещению, благочестно зовуще Богу: Аллилуйя.

Икос 7
Ново творение во Христе яви тя, по святем крещении, образ жития твоего: ревнитель бо первее быв идолослужения, последи выну по вере Христовой ревновал еси: возлюбил же еси кротость и милосердие, воздержание и целомудрие и все житие по заповедем Господним. Чудящеся убо благому пременению сему, благочестно зовем ти:
Радуйся, яко росою Святаго Духа пламень страстей в себе угасил еси;
Радуйся, яко огнем Божественныя благодати вся помышления и вся чувствия твоя согрел еси.
Радуйся, селения Господня, церкви святыя, паче всех селений земных возлюбивый;
Радуйся, Божественныя службы и Христова учения паче всех деяний и учений взыскавый.
Радуйся, образ новаго жития всем людем твоим в себе показавый;
Радуйся, сирых и убогих благий кормителю и попечителю.
Радуйся, Владимире, державы Российския просветителю.

Кондак 8
Странное бе, купно же и радостотворное видение, егда тмочисленный сонм мужей и жен, юнош и дев, таже незлобивых младенец с радостию течаху к реце Днепру, якоже ко Иордану, идеже крещахуся во имя Отца и Сына и Святаго Духа, иереом на брезе возносящим тайнодейственныя молитвы и воспевающим Господу песнь: Аллилуйя.

Икос 8
Весь был еси объят неизреченною радостию, достоблаженне княже, зря крещаемыя люди твоя, и во умилении сердца, воздав хвалу Спасителю Богу, усердно молил еси Его, да призрит на новопросвещенныя люди Своя, да утвердит их в вере и благочестии и да прославит имя Свое в странах русских. Воспоминающе убо преславное и прерадостное сих сбытие, приносим ти благодарственныя и похвальныя песни сия:
Радуйся, виновниче спасения безчисленных душ в земли Русстей;
Радуйся, неоскудеваемый источниче благословений и милостей Божиих к народу твоему.
Радуйся, благий вертоградарю, сад Божественныя веры в царстве твоем насадивый;
Радуйся, поточе сладости, напоивый водою благочестия люди русския.
Радуйся, яко Божественную веру прославил еси, прелесть же идольскую посрамил еси;
Радуйся, яко Царь царей дарова тебе мудрость Соломонову, кротость Давидову, ревность Илиину, правоверие апостольское.
Радуйся, Владимире, державы Российския просветителю.

Кондак 9
Все естество Ангелов, хранителей рода человеческаго, прослави тя, благоверный княже, егда повелел еси отцем и матерем вдаяти дети своя в учение книжное, да разумеют, яже веруют, и да познают, како житие свое добре по вере провождати. Темже и ныне призри на дети, учащияся Божественным писанием, и на отцев и матерей их, пастырей же и учителей, споспешествующих им во учении, благослови, укрепи и настави я во трудех их, да возрастают в вере истинней и в добром житии, поюще Богу: Аллилуйя.

Икос 9
Ветии многовещаннии не могут достойно изобразити величие благодеяний, дарованных тобою, княже, земли твоей: водворив бо в ней Божественную веру, избавил еси ю от мрака языческаго и вечныя погибели, открыл еси ей путь ко истинному просвещению, ко спасению и земному благоденствию. Сего ради со благодарением благочестно зовем ти:
Радуйся, могущества и славы державы Российския основателю;
Радуйся, истиннаго просвещения и благочестия в ней насадителю.
Радуйся, в народе твоем языческих суеверий и злых обычаев искоренителю;
Радуйся, идольских требищ и кумиров потребителю.
Радуйся, святых храмов создателю;
Радуйся, равноапостольному царю Константину равночестный подобниче.
Радуйся, Владимире, державы Российския просветителю.

Кондак 10
Спасти хотя от вечныя погибели царство твое, в бездне идолослужения гибнувшее, подъял еси велия труды и попечения, обходя грады и веси земли твоея и посылая повсюду пастыри духовныя, во еже Божественною верою и святым Крещением люди твоя просветити, и научити их Единому истинному Богу пети: Аллилуйя.

Икос 10
Стена твердая был еси земли твоей во вся дни живота твоего противу врагов тоя и виновник благоденствия и славы ея; буди и ныне защитник необоримый от враг видимых и невидимых и помощник в нуждех и скорбех нам, с любовию вопиющим тебе:
Радуйся, благопопечительнейший пастырю народа русскаго;
Радуйся, благострадательнейший отче сирых и страждущих.
Радуйся, готовый споспешниче ищущих вечнаго спасения и истиннаго просвещения;
Радуйся, слава и радование державы Российския.
Радуйся, присный помощниче в многотруднем деле народоправления;
Радуйся, мощный споборниче в брани воинства российскаго и вождей его.
Радуйся, Владимире, державы Российския просветителю.

Кондак 11
Пение умиленное приими от нас, угодниче Божий, сокруши твоими молитвами вся враги наша, насади православную веру среди язык страны русския, не ведущих истиннаго Бога, искорени в ней вся ереси и расколы, да вси сынове российстии едиными усты и единым сердцем славят Бога, поюще Ему: Аллилуйя.

Икос 11
Светозарное светило, просвещающее сиянием своим всю страну Российскую ты еси, достохвальне княже Владимире, разгоняя мрак идолослужения и показуя путь к истинному просвещению и небесному блаженству. Сего ради, прославляюще тя, глаголем:
Радуйся, звездо, просвещенная от незаходимаго Солнца правды;
Радуйся, путеводителю, правую стезю к вечному спасению нам открывый.
Радуйся, мощный споспешниче и укрепление проповедников православныя веры;
Радуйся, присный покровителю благих наставников юношества и всех благотрудящихся на пользу общую.
Радуйся, скорый помощниче всех, к помощи твоей прибегающих;
Радуйся, яко всем усердно тя чтущим благотворныя советы подаеши.
Радуйся, Владимире, державы Российския просветителю.

Кондак 12
Благодать Пресвятаго Духа испроси нам, преблагий пастырю наш, от всещедраго Бога и Спаса нашего, вразумляющую и укрепляющую нас в деле спасения, да не безплодна будет в нас насажденная тобою святая вера, но да уклоняющеся от путей нечестия и заблуждений, ходим во свете заповедей Божиих и достигнем вечнаго блаженства, воспевающе Богу: Аллилуйя.

Икос 12
Поюще твоя премногая и преславная благодеяния, явленная державе нашей в просвещении тоя светом Божественныя веры, купно же велия твоя труды и подвиги, во благоустроение ея подъятыя, усердно благодарим и восхваляем тя, с любовию зовуще:
Радуйся, богоизбранне и богопрославленне самодержче земли Русския;
Радуйся, несокрушимое ограждение ея, покрове и защищение.
Радуйся, райское древо, произрастившее две пречудныя отрасли, святых страстотерпцев Бориса и Глеба;
Радуйся, первостоятелю святых Российския Церкве.
Радуйся, апостолов сопрестольниче и сликовствователю;
Радуйся, яко на землю Русскую выну призираеши и благ временных и вечных ей у Господа ходатайствуеши.
Радуйся, Владимире, державы Российския просветителю.

Кондак 13
О прехвальный и предивный равноапостоле, великий княже Владимире, приими милостивно от нас благодарение сие о всех, яже тобою воздаде Господь нам, отцем и праотцем нашим и всей державе Российстей, начен от дне Крещения даже до сего часа, и моли всеблагаго Бога пробавити милость Свою на ны и на роды родов наших, утвердити ны в правоверии и благочестии, хранити же от г всех бед и зол, да сподобимся с тобою, якоже чада со отцем, во веки воспевати Богу: Аллилуйя.
Этот Кондак читается трижды.

Икос 1
Ангелом и человеком Творец, времена и лета во Своей власти положивый и судьбы государств и народов устрояяй, егда благоизволи призвати род российский от тьмы идолослужения ко свету истины и правды вечныя, постави тя, благоверный княже, благовестителя и совершителя сея всеблагия воли Своея. Темже, благодаряще Творца и Спаса нашего, славословим тя, яко великаго избранника Божия нашего ради спасения, с веселием зовуще:
Радуйся, равноапостоле, ко просвещению народа русскаго премудрым промыслом предызбранный;
Радуйся, от первозваннаго апостола на горах Киевских прореченный.
Радуйся, преславный сосуде Божественныя благодати, державе твоей дарованный;
Радуйся, пречудный кореню, из негоже на земли нашей произрасте велие древо правоверия.
Радуйся, яко тобою имя Господне во всех пределех страны твоей прославляется;
Радуйся, яко и твое преславное имя от всех родов российских с любовию воспевается.
Радуйся, Владимире, державы Российския просветителю.

Кондак 1
Избраннаго светильника, тьму идолослужения в державе Российстей разгнавшаго и светом Божественныя веры ю просветившаго, восхваляем тя, святый равноапостольный княже Владимире: ты же яко выну со дерзновением предстояй Царю царствующих, не престай моляся о достоянии твоем и твоими молитвами сохраняй нас от всяких бед и зол, да со умилением благодарственно зовем ти:
Радуйся, Владимире, державы Российския просветителю.

МОЛИТВА СВЯТОМУ РАВНОАПОСТОЛЬНОМУ КНЯЗЮ ВЛАДИМИРУ
О великий угодниче Божий, богоизбранный и богопрославленный, равноапостольный княже Владимире! Ты отринул еси зловерие и нечестие языческое, уверовал еси во Единаго истиннаго Триипостаснаго Бога и, восприяв святое Крещение, просветил еси светом Божественныя веры и благочестия всю страну Русскую.
Славяще убо и благодаряще премилосердаго Творца и Спасителя нашего, славим, благодарим и тя, просветителю наш и отче, яко тобою познахом спасительную веру Христову и крестихомся во имя Пресвятыя и Пребожественныя Троицы: тою верою избавихомся от праведнаго осуждения Божия, вечнаго рабства диаволя и адова мучительства; тою верою восприяхом благодать всыновления Богу и надежду наследования небеснаго блаженства.
Ты еси первый вождь наш к Начальнику и Совершителю нашего вечнаго спасения Господу Иисусу Христу; ты еси теплый молитвенник и ходатай о стране Российстей, о воинстве и о всех людех. Не может язык наш изобразити величие и высоту благодеяний, тобою излиянных на землю нашу, отцев и праотцев наших и на нас, недостойных.
О всеблагий отче и просветителю наш! Призри на немощи наша и умоли премилосердаго Царя Небеснаго, да не прогневается на ны зело, яко по немощем нашим по вся дни согрешаем, да не погубит нас со беззаконьми нашими, но да помилует и спасет нас, по милости Своей, да всадит в сердце наше спасительный страх Свой, да просветит Своею благодатию ум наш, во еже разумети нам пути Господни, оставити стези нечестия и заблуждений, тщатися же во стезях спасения и истины, неуклоннаго исполнения заповедей Божиих и уставов Святыя Церкве.
Моли, благосерде, Человеколюбца Господа, да пробавит нам великую милость Свою, да избавит нас от нашествия иноплеменных, от внутренних нестроений, мятежей и раздоров, от глада, смертоносных болезней и от всякаго зла; да подаст нам благорастворение воздуха и плодоносие земли; да сохранит и спасет благочестивейший народ наш от всех козней и наветов вражиих; да дарует ему победу на враги, да исполнит вся благая желания его; да оградит державу его мудрыми и верными слуги, да соблюдет в судиях и правителех правду и милость; да даст пастырем ревность о спасении пасомых, всем же людем споспешение о еже усердно службы своя исправляти, любовь между собою и единомыслие имети, на благо же Отечества и Святыя Церкве верне подвизатися, да возсияет свет спасительныя веры в стране нашей во всех концех ея, да обратятся к вере неверующий, да упразднятся вся ереси и расколы; да тако поживше в мире на земли, сподобимся с тобою вечнаго блаженства, хваляще и превозносяще Бога во веки веков. Аминь.[/spoiler]

Раб божий Константин

Акафист преподобному Владимиру, игумену Белопесоцкому.
[spoiler]Кондак 1
Избранный чудотворче и воине Христов, устроителю обители предивныя, наставниче монахов и собеседниче ангелов! Похвальное пение приносим ти, преподобне отче наш Владимире, ты же, предстоя Престолу Господа славы, моли о нас, прославляющих тя с любовию и умиленно вопиющих:
Радуйся, Владимире, Белопесоцкий чудотворче.

Икос 1
Ангел земный и человек небесный воистинну был еси, преподобне отче наш Владимире, издетска бо страху Божию родители твоими наученный, в преподобии и правде во вся дни живота твоея неленостно Господеви поработал еси. Мы же, удивляющеся равноангельному житию твоему, прославляем тя сице:
Радуйся, земли Тверския прозябение святое;
Радуйся, града Ржева отрасль пречестная.
Радуйся, славных родителей плод боголюбезный;
Радуйся, лучами Трисолнечнаго света озаренный.
Радуйся, любовь к добродетели от младенчества явивый;
Радуйся, на служение Христово сердце твое устремивый.
Радуйся, писаньми божественными душу твою напитавый;
Радуйся, вся благая мира сего ни во что же вменивый.
Радуйся, Владимире, Белопесоцкий чудотворче.

Кондак 2
Видев, преподобне, яко образ мира сего преходит и всякая житейская сладость причастна печали в нем бывает, восхотел еси Христу Богу послужити и Тому единому последовати. Сего ради и во обитель Хутынскую стопы твоя направил еси, идеже, усердно в молитве подвизаяся, Богу взывал еси: Аллилуиа.

Икос 2
Разум, зарями Духа Святаго просвещаемь, стяжал еси, богомудре, и евангельски Бога, в Триех Ипостасех певаемаго, всем сердцем возлюбил еси, темже, очи твои к Свету горнему и вечному вперив, яко верный раб, пред Господем ходил еси. Помози убо нам добрым подвигом подвизатися, тя прославляющим и сице вопиющим:
Радуйся, евангельскаго учения истинный последователю;
Радуйся, закона Божия усердный исполнителю.
Радуйся, рабе верный и незлобивый;
Радуйся, пастырю добрый и чадолюбивый.
Радуйся, сосуде Божия благодати избранный;
Радуйся, многими добродетельми украшенный.
Радуйся, древних отцев добрый ревнителю;
Радуйся, обители святыя мудрый устроителю.
Радуйся, Владимире, Белопесоцкий чудотворче.

Кондак 3
Сила Вышняго, немощная врачующи и оскудевающая восполняющи, укрепи тя, преподобне Владимире, егда восприял еси монашеский образ и основание крепкое лествицы добродетелей поставил еси. Мы же, зряще таковое тщание и усердие о спасении души твоея, Всесильному Богу со умилением поем: Аллилуиа.

Икос 3
Имуще тя, преподобне Владимире, теплаго молитвенника и скораго в бедах помощника, благовернии людие, иноки и инокини в скорбех и напастех тя в молитве призывают и, помощь вскоре улучивше, благодарне тебе вопиют:
Радуйся, в скорбех наших утешение предивное;
Радуйся, обители твоея заступление незримое.
Радуйся, иноков, добре подвизающихся, учителю;
Радуйся, общаго жития их устроителю.
Радуйся, Христа всем сердцем возлюбивый;
Радуйся, жизнь твою за Него отдати готовый.
Радуйся, болящих врачу скорый и безмездный;
Радуйся, наставниче премудрый и прозорливый.
Радуйся, Владимире, Белопесоцкий чудотворче.

Кондак 4
Бурю злых напастей усердною молитвою укрощая, на высоту добродетелей восшед, возсиял еси, отче Владимире, яко светильник на свещнице поставленный. Темже и сана священства удостоился еси и послушания ради игуменство восприял еси, со смирением взывая к Богу: Аллилуиа.

Икос 4
Видевше людие ангелоподобное твое житие, отче Владимире, разумеша тя истиннаго постника и правило известнейшее добродетели, сего ради и прихождаху, послушати сладкогласная твоя словеса. Мы же, чада твоя, почитающе память твою, дерзаем глаголати сице:
Радуйся, воине Христов непобедимый;
Радуйся, рабе Его благий и верный.
Радуйся, молитву, яко щит, стяжавый;
Радуйся, демонския прилоги тою отражавый.
Радуйся, призывающим тя скорый послушателю;
Радуйся, молитв их скорый исполнителю.
Радуйся, алтаря Господня усердный служителю;
Радуйся, иноков добрый пастырю и мудрый учителю.
Радуйся, Владимире, Белопесоцкий чудотворче.

Кондак 5
Боготечная звезда, в нощи жития сего присно светящая, явися обитель твоя, преподобне Владимире, юже ты в пределех земли Московския в похвалу Пресвятыя Троицы создал еси, в нейже мнозии иноцы, добрым подвигом подвизавшеся, Богу хвалу приношаху, поюще песнь: Аллилуиа.

Икос 5
Видев, преподобне, яко вера в земли Русстей угасает и Праведный Судия грехов ради беды и скорби попускает, глаголал еси: Покайтеся, да не прогневается до конца Господь, не хощет бо смерти грешника, но еже обратитися и живу быти ему. Сия глаголы разумевше, мнози на путь правый возвратишася, темже и воспеваху тебе:
Радуйся, покаяния и жизни по Бозе проповедниче;
Радуйся, бедствующим скорый помощниче.
Радуйся, ходатаю нашего спасения;
Радуйся, богомудрый учителю терпения.
Радуйся, скорбящих приятное утешение;
Радуйся, немудрых скорое вразумление.
Радуйся, грехов и страстей смиренный обличителю;
Радуйся, Евангелия Христова усердный благовестителю.
Радуйся, Владимире, Белопесоцкий чудотворче.

Кондак 6
Проповедует обитель Белопесоцкая труды и подвиги твоя, преподобне, спасения ради души твоея подъятыя. Воистинну, древним отцем подражая, пустыни прозябение многоплодное явился еси, дарами Духа Святаго украшенный, Егоже действием многая и преславная чудеса совершил еси, подвизая верных воспевати Богу: Аллилуиа.

Икос 6
Возсиял еси, яко светильник пресветлый, во обители твоей, богомудре отче Владимире, многия иноки на стезю спасения наставляя и всех приходящих к тебе с любовию утешая, яви бо тя Христос мудраго наставника и учителя пустыннолюбнаго. Сего ради приносим ти похвалы сия:
Радуйся, пустынниче, мирскую честь презревый;
Радуйся, подвижниче, древним отцем подражавый.
Радуйся, православия и благочестия предобрый учителю;
Радуйся, жития иноческаго мудрый устроителю.
Радуйся, трудолюбия усердный наставниче,
Радуйся, недугов телесных и душевных целебниче.
Радуйся, Пречистыя Богородицы верный служителю,
Радуйся, теплый о нас пред Богом предстателю.
Радуйся, Владимире, Белопесоцкий чудотворче.

Кондак 7
Хотя спасти душу твою, преподобне Владимире, сам себе в жертву приятну Господеви принесл еси, имея дух сокрушен и сердце смиренно. Темже и Бог тя прослави и дарова часть со святыми в Царствии Небеснем, идеже с ними, радостно ликуя, поеши песнь: Аллилуиа.

Икос 7
Новаго тя ходатая, святе Владимире, пред Престолом Божиим стяжахом, ты бо в житии твоем Пресвятей Троице усердно послужил еси и в Еяже честь обитель чудную устроил еси, идеже ныне боголюбивыя инокини усердно подвизаются. Сего ради прославляем тя сице:
Радуйся, земли Московския похвало и утверждение,
Радуйся, обители Пресвятыя Троицы присное заступление.
Радуйся, подвизающимся в ней благодатное вспоможение.
Радуйся, сущим в скорбех и печалех скорое утешение.
Радуйся, Бога в Триех Ипостасех всем сердцем возлюбивый,
Радуйся, Отца Небеснаго в житии твоем прославивый,
Радуйся, Сына Божия благочестно исповедавый,
Радуйся, Духу Святому верно поклонивыйся.
Радуйся, Владимире, Белопесоцкий чудотворче.

Кондак 8
Странное и преславное знамение благоволения Божия зряще, прославляем тя, преподобне отче наш Владимире. Се бо днесь, яко же древле, притекающим к тебе с верою утешение в скорбех подаеши, от бед избавляеши, от напастей сохраняеши и всякое прошение во благо исполняеши, подвизая Богу воспевати песнь: Аллилуиа.

Икос 8
Все плотское желание духу покорив, телесныя страсти мужественне победил еси, преподобне отче Владимире, и, яко безплотен на земли пожив, в Небесных селениих со ангелы водворился еси. Темже, удивляющеся таковому житию твоему, прославляем тя сице:
Радуйся, страстей душевредных искоренителю;
Радуйся, послушания смиренный любителю.
Радуйся, умерщвлением страстей миру умерый;
Радуйся, себе самаго в жертву Богу принесый.
Радуйся, ангелов собеседниче и преподобных сопричастниче,
Радуйся, Небеснаго Царствия достойный наследниче.
Радуйся, тленная и скорогибнущая презирати поучаяй;
Радуйся, горняя, а не земная, мудрствовати наставляяй.
Радуйся, Владимире, Белопесоцкий чудотворче.

Кондак 9
Всякое тщание прилагал еси в житии твоем, богомудре Владимире, еже возгражденную тобою обитель, яко благоплодный вертоград, соделати, да вси, хотящии в ней усердно подвизатися, плоды трудов твоих наслаждаются, воспевающе Богу: Аллилуиа.

Икос 9
Ветии многовещаннии века сего не могут постигнути жизни сокровенныя во Христе, еже мир презирати и плоть свою умерщвляти. Ты же, преподобне, невозвратным помыслом течение жизни твоея совершил еси и блаженства вечнаго достигл еси. Помози убо и нам искати прежде Царствия Небеснаго и правды его, прославляющим тя сице:
Радуйся, Христа ради плоть твою умертвивый;
Радуйся, премудрых века сего посрамивый.
Радуйся, любомудрия духовнаго подателю;
Радуйся, чистоты сердечныя усердный хранителю.
Радуйся, во бранех духовных пособниче;
Радуйся, во искушениих скорый помощниче.
Радуйся, грешником пути ко спасению указателю;
Радуйся, за мир грешный пред Богом предстателю.
Радуйся, Владимире, Белопесоцкий чудотворче.

Кондак 10
Спасти хотя люди, притекающия к тебе, прехвальне отче Владимире, поучал еси, еже веру Православную чисте соблюдати, Бога всею крепостию любити и безпорочно житие провождати. Ныне же, Престолу Божию предстоя, еже в земли Российстей Православию утвердитися, отечеству нашему в мире и благоденствии пребывати, обители твоей сохранитися и всем нам спастися, да со всеми святыми воспеваем хвалебную песнь: Аллилуиа.

Икос 10
Стена спасительная в древняя времена бысть обитель твоя, преподобне, от мрака греховнаго и языческаго суеверия люди отвращающи и пределы Московския от иноверных защищающи. В последняя же лета попущением Божиим поруганию от безбожных предадеся, но паки возродися, идеже боголюбивыя сестры, обеты иноческия исполняюща, тя прославляют сице:
Радуйся, источниче святый, духовную нашу жажду утоляяй;
Радуйся, елею божественный, сердца наша умягчаяй.
Радуйся, искро, огонь любве в душах возжигающая;
Радуйся, ниво, благодатным хлебом нас питающая.
Радуйся, целомудрия и чистоты рачителю;
Радуйся, гордости и неверия искоренителю.
Радуйся, в недоумении мысль благу на сердце полагаяй.
Радуйся, трезвению и непрестанней молитве нас научаяй;
Радуйся, Владимире, Белопесоцкий чудотворче.

Кондак 11
Пение хвалебное, в похвалу тебе составленное, не презри, преподобне Владимире. Днесь бо, иконе твоей предстояще, с верою и любовию ублажаем тя, яко заступника нашего и предстателя. Темже и молимся: не остави нас сиры и безутешны, но помози, еще в странствии сущим, безбедне море жития сего преплыти и Вышняго града, Иерусалима Небеснаго, достигнути, идеже вкупе с тобою сподобимся воспевати песнь: Аллилуиа.

Икос 11
Светоносным Троическим сиянием свыше озаренный, святе Владимире, просвети и наша сердца, тьмою греховною омраченная, да елеем благих дел возжегше угасшая наша светильники, яко мудрыя девы, сподобимся брачнаго Христова чертога, идеже ты со всеми святыми пребываеши. Темже и вопием ти:
Радуйся, свеще, огнем Божественныя благодати возжженная;
Радуйся, чаше, токи милосердия Божия нам изливающая.
Радуйся, искушаемым от мира, плоти и диавола поможение;
Радуйся, телес наших здравие и душ спасение.
Радуйся, великаго князя, апостолом равнаго, имя носивый;
Радуйся, игумену земли Русския в подвизе подражавый.
Радуйся, Небеснаго Сиона достойный жителю;
Радуйся, пред Престолом Божиим наш теплый предстателю.
Радуйся, Владимире, Белопесоцкий чудотворче.

Кондак 12
Благодати Божия сосуд избранный быв, преподобне Владимире, благодать Пресвятаго Духа и нам испроси, да присно покрыет нас от врагов видимых и невидимых. Научи, святче, подражати тебе в чистоте и незлобии, да сподобимся узрети славу Триипостаснаго Божества, воспевающе победную песнь: Аллилуиа.

Икос 12
Поюще многия милости и преславная чудеса твоя, богоблаженне Владимире, хвалим, благодарим и величаем прославльшаго тя Господа, дивнаго во святых Своих. Тебе же, верному и благому рабу Его, от любве сердечныя вопием тако:
Радуйся, течение постническое добре скончавый;
Радуйся, путем правым непреткновенно шествовавый.
Радуйся, не словом точию, но паче житием поучавый;
Радуйся, иноком путь истинный ко спасению указавый.
Радуйся, уныние молитвою и бдением врачевати научаяй;
Радуйся, лукавыя козни вражия распознавати нам помогаяй.
Радуйся, по преставлении твоем присно с нами пребываяй;
Радуйся, во славе Небесней Престолу Пресвятыя Троицы предстояй.
Радуйся, Владимире, Белопесоцкий чудотворче.

Кондак 13
О, предивный угодниче Христов, богомудре отче наш Владимире! Приими малое сие и недостойное моление, от усердия тебе приносимое, и умоли Господа сил, да милостив будет неправдам нашим и будущих избавит мучений нас, в покаянии зовущих: Аллилуиа. (Трижды).

Молитва
О, преславный угодниче Христов, преподобне отче Владимире, премудрый наш наставниче, обители Белопесоцкия начальниче и земли Ступинския покровителю!
Яко имеяй дерзновение ко Владыце Христу и Пречистей Его Матери, буди молитвенник теплый о нас, недостойных, подвизающихся во святей обители твоей, и всех, с верою притекающих на место сие, идеже многолетне телом почиваеши.
Испроси, богомудре, пастырем ревность и попечение о пасомых, монашествующим споспешествуй в ангелоподобном житии, утешая их в скорбех и печалех и милостивно подкрепляя в болезнех, заступи от всех бед и напастей верная чада твоя, сохраняя от враг видимых и невидимых.
Наипаче помолися, святче Божий, Достопоклоняемей Троице, Ейже ты усердно во временней жизни послужил еси, в земли Российстей Православию утвердитися и отечеству нашему в мире и благоденствии пребывати.
Нас же всех, почитающих святую память твою, настави в земнем странствии на путь спасения и управи к Царствию Небесному, да тамо вкупе с тобою и всеми святыми прославим Отца, и Сына, и Святаго Духа, ныне и присно и во веки веков. Аминь.

Тропарь, глас 5:
Вышним благословением укрепляемь,/ в пустыню вселился еси,/ идеже, ангельски пожив,/ плотское мудрование духу покорил еси./ Видя Господь подвиги твоя,/ вождя дружины духовныя постави тя,/ земли же Московстей в защиту и ограждение./ Ныне, предстоя престолу Пресвятыя Троицы,/ богомудре отче Владимире,/ моли спастися душам нашим.

Кондак, глас 2:

Мирския суеты отрешився,/ в постнических подвизех добре потрудился еси/ и, яко крин, в пустыни процвел еси,/ идеже обитель Живоначальныя Троицы воздвигл еси,/ отче преподобне Владимире,/ земли Московския похвало и украшение. [/spoiler]

Раб божий Константин

Акафист священномученику Владимиру, Митрополиту Киевскому и Галицкому.
[spoiler]Кондак 1
Избранный пастырю Христова стада и сосуде достойный Божия благодати, веры Православной поборниче, от безбожников даже до смерти пострадавый, песньми велегласно восхваляем тя, светозарный отче наш Владимире, ты же, дерзновение ко Господу имый, на стезю спасения настави нас, благочестною любовию поющих ти: Радуйся, Владимире, негасимый Православия светильниче.

Икос 1
Ангельскою любовию ко Господу горевый и измлада нрав твой долготерпелив и кроток показавый, миру Православному христианин всесовершен явился еси, исповедниче Христов Владимире. Днесь же Трисвятую песнь на Небесех со Ангельскими чинми воспеваяй, недостойных нас услыши на земли, со слезами умиления взывающих: Радуйся, благочестивых родителей преславное рождение; радуйся, благое и богодуховенное тех воспитание. Радуйся, от юности Христу служити возжелавый; радуйся, нелицемерную по Бозе ревность показавый. Радуйся, благоутробия Христова подражателю; радуйся, Евангельскаго слова благовествователю. Радуйся, блистание Божественнаго света; радуйся, сияние Небесныя благодати. Радуйся, души верных просвещаяй; радуйся, сердца ищущих правды Божией озаряяй. Радуйся, человече Небесный; радуйся, Ангеле земный.
Радуйся, Владимире, негасимый Православия светильниче. 

Кондак 2 
Видя и разумевая во всяцей скорби и напасти ко спасению душ наших наставление, не уны и не отчаяся, святый Владимире, егда лишился еси сына отрока и любезныя твоея супруги. Но терпеливно скорбь сию подъял еси и утешение в монашестве обрел еси, стопы своя к единому служению Христову направляяй. Сподоби же и нас во всех бедах Благоподателя святую волю разумети, не противлятися спасительному Промыслу Его, но присно славити за вся Творца и Бога: Аллилуиа.

Икос 2 
Разум Всевышний приосени тя, пастырю всехвальный наш Владимире, егда избра тебе Господь во Епископа Святыя Церкве Православныя, во еже день и нощь пещися ти о агнцех Божиих, да ни един убо от них погибнет. Ты же, яко послушник трудолюбный, пастырское делание смиренномудренно творил еси. Тако и ныне, во обителех Небесных пребываяй, наставник неусыпный буди нам, на тя надеющимся и глаголющим из глубины сердечныя: Радуйся, вся красная и сладкая мира сего презревый; радуйся, от тленных на нетленная очи духовныя обративый. Радуйся, епископство яко великий дар Господень восприявый; радуйся, обильно в хиротонии благословение Небесное стяжавый. Радуйся, надежный ко спасению путеводителю; радуйся, заблуждших неустанный вразумителю. Радуйся, мудрых века сего мудрейший; радуйся, рабе Христов добрейший. Радуйся, Иерарше славный, со святыми почиваяй; радуйся, молитв твоих покровом паству присно соблюдаяй. Радуйся, неусыпаемый в бедах помощниче; радуйся, благий о нас печальниче. Радуйся, Владимире, негасимый Православия светильниче.

Кондак 3
Силою Всевышняго незримо укрепляемь, истинное мужество явил еси, преблаженне пастырю Владимире, егда спасал еси от глада и от мора твоя страдающая чада. Зря окрест, яко мнози уморяхуся, и не смутися, но Крестом Животворящим и Честным вооружився, прехождаше посреде людей самарских, помощь подая, печали утоляя. Такоже и нам, духовным гладом истощаемым и недугом маловерия одержимым, помози предстательством твоим ко Господу, прославляемому присно: Аллилуиа.

Икос 3
Имеяй выну попечение о чадех Божиих, сия отечески к богоугодней жизни направлял еси, постом, молитвою и праведными делы предивный подвиг в подражание святым Христовым показавый. Твоя же пастырския добродетели хваляще, тя ублажаем, Боголюбче, сице: Радуйся, благоутробия великаго сокровище; радуйся, Божественнаго Промышления о нас приятелище. Радуйся, Святыя Церкве Православныя украшение; радуйся, о чадех твоих теплое моление. Радуйся, о мире паствы твоея рачителю; радуйся, от всяких бед усердный наш хранителю. Радуйся, покрове, на пути спасения нас осеняяй; радуйся, столпе огневидный, во тьме неведения нас просвещаяй. Радуйся, яко корение смущений трудолюбно исторгал еси; радуйся, яко терние неверия глаголом попалял еси. Радуйся, Архиерею Божий, Пастыреначальником Христом прославленный; радуйся, Иерарше Христов, дары Духа Святаго преисполненный. Радуйся, Владимире, негасимый Православия светильниче.

Кондак 4
Бурю велию прещений вражиих отврати от нас молитвами твоими, всеусердный Господа служителю Владимире, и буди нам и ограждение необоримое, яко в животе твоем защититель безмездный был еси всем, Царю Небесному поющим: Аллилуиа.

Икос 4
Слыша и видя множество напастей мира сего, сам болезнь и тяготы терпя, николиже ближния и други забывал еси, отче милосердне наш Владимире, но отеческими попечении всем помогая, ни едино же прошение нуждающихся презрел еси. Научи и нас друг друга тяготы носити, воспевающия тя и прославляющия сице: Радуйся, любовию Божественною горяй; радуйся, за други своя душу не щадяй. Радуйся, яко многи скорби и труды подъял еси; радуйся, яко вся ради Возлюбльшаго тя претерпел еси. Радуйся, вдовиц и сирых щедрейший питателю; радуйся, гонимых и обидимых предстателю. Радуйся, скорбящих сострадателю; радуйся, просящим милости подателю. Радуйся, чаше, елей милости Божия к нам содержащая; радуйся, горо, тучи гнева Господня от нас отводящая. Радуйся, и по преставлении твоем с нами пребываеши; радуйся, яко в селениих Небесных почивая, нас не оставляеши. Радуйся, Владимире, негасимый Православия светильниче.

Кондак 5
Боготечная звезда явился еси миру и светильник теплый людем Православным, всероссийский Архипастырю Владимире, иже пастыреначальник в триех стольных градех русских бывый, и наипаче же о обличении расколов порадевый, во еже нераздран хитон Христов нешвенный сохранити. Таковому о тебе произволению Господню радующеся, воспеваем Ему: Аллилуиа.

Икос 5
Видя тя в селениих Небесных, зело радуется святый равноапостольный Владимир, имже возсия нам свет Христовы Истины, зане и ты Божественною волею в богохранимем граде Киеве прославился еси, страдальчествуя за Христа во дни великих испытаний. Тако и мы, блаженне, ликовствуем о тебе: Радуйся, крестителя Руси достойный соименниче; радуйся, того неленостный споспешниче. Радуйся, в стране Российстей боголучно возсиявый; радуйся, паству всероссийскую духовно удобрявый. Радуйся, богоугодно на земли поживый; радуйся, любовию Божественною страх смертный победивый. Радуйся, священномучениче, за Христову веру пострадавый; радуйся, страдальче, дух твой в руце Господу предавый. Радуйся, смерть вкусивый, тления не знаяй; радуйся, с Печерскими отцы во святых пещерах почиваяй. Радуйся, обители преславней украшение; радуйся, монашествующих в ней утешение. Радуйся, Владимире, негасимый Православия светильниче.

Кондак 6
Проповедниче усердный слова Божия, Владимире, многомудрыми вещании твоими лжеучения безбожных обличал еси, от прельщений душепагубных Христова чада сохраняя. Темже удостоился еси непрестанных славословий на земли, воспеваяй в Вышних Богу: Аллилуиа.

Икос 6
Возсиял еси в отечестве своем, исповедниче Христов Владимире, яко новое светило на небесней тверди, сиянием подвигов твоих тьму нечестия разгоняяй и мир Православный ублажати тя сице подвизаяй: Радуйся, крепкая вайе древа Правоверия; радуйся, богоизбранный посрамителю неверия. Радуйся, Евангельское слово, яко меч духовный, возлюбивый; радуйся, от стрел лукаваго щитом веры ся оградивый. Радуйся, усты многомудрыми Божественныя истины вещаяй; радуйся, пред Богом заступление нам крепкое являяй. Радуйся, свеще, молитвенным огнем за нас горящая; радуйся, драгое миро, в храме Божием благоухающее. Радуйся, даров Небесных неоскудное вместилище; радуйся, Божественныя мудрости хранилище. Радуйся, крепкое падающих возведение; радуйся, стоящих право утверждение. Радуйся, Владимире, негасимый Православия светильниче.

Кондак 7
Хотяй прославити тя верою необоримою, даде узрети ти Владыка наш Господь, како безбожницы в обители Печерстей, яко во аде бесы, бесновашася, безстудие творяще и древния святыни оскверняюще. Но сих прещений вражиих не убоявся, богоизбранный отче наш Владимире, Заступнику Единому от всяких зол усердная моления вознесл еси, взывая неослабне Богу: Аллилуиа.

Икос 7
Новый образ милосердия явися нам, мучениче и Святителю Владимире, егда пред кончиною благословил еси мучители твоя. Таковому твоему незлобию дивящеся и в тебе неизреченну славу Человеколюбца зряще, славословим тя и восхваляем сице: Радуйся, милосердия Небеснаго зерцало; радуйся, Христовы Церкве твердое забрало. Радуйся, прерадостное наше утешение; радуйся, лукавым силам устрашение. Радуйся, молитися за недруги учивый; радуйся, и сам мучители своя простивый. Радуйся, яко тобою безумнии глумителие посрамляются; радуйся, яко тобою сила Божия является. Радуйся, иже всечестно почитаемь на земли; радуйся, иже венцем нетленным украшен на Небеси. Радуйся, яко с преподобными отцы во веки пребываеши; радуйся, яко отечество наше купно с теми защищавши. Радуйся, Владимире, негасимый Православия светильниче.

Кондак 8
Страннолепен и великоименит, исповедниче Христов Владимире, яко радетель неусыпный о Господнем Доме был еси, молитвы и труды твоя на благоустроение храмов направляя. О чиннем же богослужении и доброгласнем пении ревнуя, награду велию у Господа снискал еси, в Небесных вертоградех Ангелы пет быти. Мы убо зряще ныне храмов разорение и лепоты церковныя оскудение, к тебе взываем: помози воздвигнути святыя храмы в душах наших и добродетельми их украшати, с тобою купно воспевающе Благоподателю и Жизнодавцу: Аллилуиа.

Икос 8
Всея земли Российския Архипастырю, иже из новомучеников первый пострада во время лютое гонений на Православных христиан, зовем тя, благодать стяжавшаго молитися за мир: не премолчи о нас, к священней твоей раце припадающих и во умилении поющих песнь тебе: Радуйся, крест свой на рамена, яко Христос, подъявый; радуйся, стезю страданий за Него избравый. Радуйся, мудрейший странниче, иский отечества Небеснаго; радуйся, угодниче Христов, презревый вся земная. Радуйся, Дому Божию надежный стражу и хранителю; радуйся, иереев юных добрый попечителю. Радуйся, кающихся с Богом примирителю; радуйся, Спасителя возлюбльших покровителю. Радуйся, достойный Ангелов собеседниче; Радуйся, Апостолом Христовым сопрестольниче. Радуйся, благоприятную ко Господу молитву возсылаяй; радуйся, теплою молитвою твоею державу нашу согреваяй. Радуйся, Владимире, негасимый Православия светильниче.

Кондак 9
Вси чини Ангельстии и Святителей лик удивишася, зряще тя, Владимире, новаго мученика, в пострадавшей и поруганней земли Российстей просиявшаго. Мы же ныне прославляюще подвиг твой, ко Господу и Спасу нашему взываем: Аллилуиа.

Икос 9
Ветия богомудрый Церкве Православныя и доблий воин Христов был еси, священномучениче препрославленный Владимире. Имеяй сердце мягко, аки воск, но волю тверду, аки адамант, не гнулся еси семо и овамо ниже пред властию людскою, ниже пред обстоянии мирскими, и сего ради поношения приял еси. Верность же Господу Единому хранивый выну, услыши ныне песнь победную сию: Радуйся, воине Христов непобедимый; радуйся, в терпении твердейший адаманте невредимый. Радуйся, яко неблагомыслящих наветы претерпел еси; радуйся, яко от яростивых поношения приял еси. Радуйся, сердец смятенных умирителю; радуйся, от озлобления на нас враждующих хранителю. Радуйся, духовных совершенств высоте; радуйся, смирения Христианскаго глубине. Радуйся, российских мучеников удобрение; радуйся, Архиереев Православных похваление. Радуйся, яко от неверия избавляеши; радуйся, яко от малодушия исцеляеши. Радуйся, Владимире, негасимый Православия светильниче.

Кондак 10
Спасительнаго Промысла о нас сияние явися нам, егда страдальческую смерть приял еси, священнопроповедниче Владимире, ты бо искупительная жертва был еси во очищение людей Православных, отступлением от веры согрешивших. Мы же ныне сокрушенным сердцем со слезами о спасении страны Российския моляще, к Судии Благоутробному взываем: Аллилуиа.

Икос 10
Стено и ограждение державы нашея, Святителю Владимире, радетель неустанный о уставех Православных был еси. Сохрани и ныне нас от пагубныя ереси, огради от раздирания Церквей, упаси от соблазнения лжеученьми, да пребудем в лоне Церкве Истинныя. Твоего же ради заступления неустанно вопием ти сице: Радуйся, Православия неблазненный ревнителю; радуйся, шатания Церквей искоренителю. Радуйся, церковных Таинств благочестный совершителю; радуйся, в Небесный Иерусалим путеводителю. Радуйся, мечу, раскол и ересь посецаяй; радуйся, небесный громе, гордых устрашаяй. Радуйся, Евангельскаго света чудное блистание; радуйся, за правду поносимых упование. Радуйся, Господню волю сотворивый; радуйся, Христовы заповеди сохранивый. Радуйся, яко честную кровь за веру пролиял еси; радуйся, яко блаженство неотъятное стяжал еси. Радуйся, Владимире, негасимый Православия светильниче.

Кондак 11
Пение похвальное, еже приносим ти, богоблагодатный пастырю Владимире, несть довольно восхвалити яко подобает тя, благочестное вместилище Святаго Духа, но всехвальных ради добродетелей твоих вопием ти: моли Господа о нас, студными грехми окалявшихся, да низпослет чудеса неизреченныя Своея милости на нас, с тобою вкупе днесь поющих Ему: Аллилуиа.

Икос 11
Светодательная свеща явился еси нам, исповедниче Христов и пастырю святый Владимире, разгоняяй нощь нечестия и освещали путь во тьме ходящих. Ныне убо умоляти не престай Христа Спаса и Владыку нашего, да не даст нам уклонитися стези, ко спасению нас грешных приводящия, но сподобит нас во Царствии Своем тя со Ангелы святыми воспевати: Радуйся, несокрушенный щите, защищаяй благочестие; радуйся, мечу победный, посецаяй злочестие. Радуйся, блуждающих в духовном мраце окормителю; радуйся, честнейший преподобия хранителю. Радуйся, светильниче Господень, Церковь озаряяй; радуйся, молящихся ти души умиряяй. Радуйся, яко недугующих исцеляеши; радуйся, яко окамененных сердцем оживляеши. Радуйся, печальниче болящим и безпомощным; радуйся, заступниче убогим и обидимым. Радуйся, яко помраченных просвещаеши; радуйся, яко просвещенных утверждаеши. Радуйся, Владимире, негасимый Православия светильниче.

Кондак 12
Благодать дадеся ти от Бога, отче приснославимый Владимире, во еже быти нерушиму каменю Христовы Церкве. Твоему же образу желающе всем сердцем подражати, умоляем тя, блаженне, непрестанно: заступи, да не прельстят нас чудеса, силою лукаваго творимая, ниже лжепророцы соблазнят. Но в единомыслии и Правоверии вся Христианы сохрани, прославляющия Бога Истиннаго: Аллилуиа.

Икос 12
Поем праведное житие твое, восхваляем пречестное твое имя, почитаем за Христа страдания твоя, удивляемся духовней твоей крепости, радуемся славному обретению мощей твоих, новомучениче пресвятый Владимире, и любовию воспоминающе о подвизех твоих, восписуем ти хваления сия: Радуйся, победоносною светлостию облеченный; радуйся, Святительскому лику сопричтенный. Радуйся, поспешниче усердный ада Разрушителя; радуйся, последователю верный распятаго Учителя. Радуйся, за веру и отечество живот свой положивый; радуйся, Архиерею добрый, Богу Человеколюбцу угодивый. Радуйся, яко живот твой непорочен сохранивый; радуйся, яко до смерти верен Господу пребывый. Радуйся, венцем победным паче звезд на небеси блистаяй; радуйся, тимпане сладкозвучный, славу Божию бряцаяй. Радуйся, во отечестве Небеснем ныне пребываяй; радуйся, и о земнем отечестве твоем не забываяй. Радуйся, Владимире, негасимый Православия светильниче.

Кондак 13
О страдальче многосветлый и Святителю Христов Владимире! Приими малое хваление сие, в простоте сердечней возносимое. Вонми гласу недостойному молящихся тебе и твоими скорыми ко Господу прошении умоли Его пробавити благоутробие Свое на ны, да сподобимся в блаженней радости воспевати Ему славу: Аллилуиа. Аллилуиа. Аллилуиа.
Сей кондак чтется трижды, посем 1-й икос и 1-й кондак.

Молитва священномученику Владимиру, Митрополиту Киевскому и Галицкому

О священномучениче и исповедниче Христов Владимире! Услыши слезныя молитвы чад твоих и воздыхания, сердцем сокрушенным и смиренным приносимыя. Се бо беззаконии омрачихомся и того ради бедами, яко тучами, обложихомся. Но ты, святе Владимире, понеси яко сильный немощи наша, не отлучайся от нас духом, да не разлучимся в конец от любве Божия. Призри милостивно на предстоящия и молящияся пред святою иконою твоею и вся прошения их во благое исполни. Веруем бо, яко твоих страданий ради за отечество и люди российския велие дерзновение ко Господу имаши. Егоже умоли, да укрепит ны в Православии и единомыслии и непоколебимом даже до смерти исповедании веры Христовы, страну нашу да спасет от междоусобныя брани, пастырем нашим да подаст духовное трезвение и ревность о спасении пасомых, правителем же суд и правду, обидимым заступление, недугующим душ и телес исцеление. Мы же, грешнии, твоим предстательством укрепляеми, восхвалим Господа Иисуса Христа, Емуже слава подобает, честь и поклонение, со Безначальным Его Отцем и Пресвятым Духом, ныне и присно и во веки веков. Аминь.[/spoiler]

Раб божий Константин

Богоблаженному князю Владимиру Палей (для келейного пользования).
[spoiler]Кондак 1

Избранному страстотерпцу, скорому помощнику, защитнику и утешителю нашему, святому благоверному князю Владимиру, составим похвальное, правды ради, яко Авель, от врагов Божиих пострадавшему, предивному удобронию земли Российския. Ты же, яко имеяй дерзновение ко Господу, от всяких бед и зол нас освободи, да зовем ти:
Радуйся, богоблаженне княже Владимире, страстотерпче, добропобедный и молитвенниче о душах наших!

Икос 1

Ангелов собеседник и человеков наставник, ко Отечеству Небесному пути указующий благоволением Всемилосерднаго Бога Нашего воистину явился еси, благоверный княже Владимире; ты бо на земли во всяком благочестие и чистоте подвизался еси и мученически живот свой, купно с великою княгинею Елизаветой, скончавше, востекл еси, в чертоги Отца Небеснаго, идеже молишися о всех нас, взывающих ти сице:
Радуйся, от корене царственнаго произрастший!
Радуйся, на древе рода твоего плодоносящего ветвию возросший!
Радуйся, во благочестии и праведности воспитанный!
Радуйся, чести и славы родителей твоих не умаливый!
Радуйся, словом Божиим наставленный и просвещенный!
Радуйся, благодатию Всесвятаго Духа в подвизех твоих укрепленный!
Радуйся, адаманте крепкий, козньми вражими непоколебимый!
Радуйся, воине Христов, Единому Богу послуживый!
Радуйся, богоблаженне княже Владимире, страстотерпче, добропобедный и молитвенниче о душах наших!

Кондак 2

Видя Господь чистую душу твою, восхоте быти тебе освященному сосуду Духа Святаго, всельшагося в непорочное сердце твое и воздыхании неизглаголанными научавшего тя благоприятно пети Пресвятой Троице: Аллилуйя!

Икос 2

Разум твой учением Христовым умудривый, сердцем же твоим от дней детства твоего во благочестии благоверными родителями воспитанный, радость и утешение, ближним твоим приносил еси, всехвальный угодниче Господень; и к Богу Всевышнему обратил еси взоры души твоей. Сего ради таковые похвалы тебе приносим :
Радуйся, издетски всем Христа сердцем твоим возлюбивый;
Радуйся, от утра жизни твоей Ему Единому поработавый;
Радуйся, от малых лет радость молитвы вкусивый;
Радуйся, нелицемерную ревность по Бозе показавый;
Радуйся, научение книжное зело возлюбивый;
Радуйся, дар Слова наитием Духа Святаго получивый;
Радуйся, псалмопением Творца неустанно прославлявый;
Радуйся, благоволения пред лицем Его стяжавый;
Радуйся, богоблаженне княже Владимире, страстотерпче
добропобедный и молитвенниче о душах наших!

Кондак 3

Сила Христова осени тя, преславне Владимире, и дарова ти крепость мужественнее претерпети искушения врага невидимаго, его же стрелы разженные угасил еси твоими слезными к Богу молитвами; сего ради, яко победитель, воспеваеши с безплотными силами песнь победную Христу Богу: Аллилуйя!

Икос 3

Имея ревность велию о Господе и любовь к людям нелицемерную на камене благом Христе Спасителе начатом и конец жития твоем положил еси, святый княже Владимире, талант же богодарованный в землю не зарыл еси и Господа Всемогущего песньми твоими, подобно Давиду, прославил еси; боголюбче блаженне; и чистотою сердечною просиял еси, аки святый князь Глеб. Мы же житие твое благочестивое и богоугодное ныне поминающе, таковые похвалы приносим ти:
Радуйся, нищету духовную от юности возлюбивый!
Радуйся, Христу в меньших братьях Его верно послуживый!
Радуйся, славу человеческую ни во что же вменивый!
Радуйся, образ вернаго служения Богу и Отечеству показавый!
Радуйся, евангелия Христова верный последователю!
Радуйся, заповедей Иисусовых ревностный исполнителю!
Радуйся, чистоты и целомудрия усердный хранителю!
Радуйся, псалмопении немолчными Бога славивый!
Радуйся, богоблаженне княже Владимире, страстотерпче, добропобедный и молитвенниче о душах наших!

Кондак 4

Буря мятежа и треволнения народнаго людьми злочестивыми супротив боговенчаннаго благовернаго царя Николая II, воздвигнутаго потреся всю землю российскую, но не возможе поколебати веры твоея, богоблаженне Владимире, во Всеблагаго Творца и Спаса Нашего; ты бо на Христа Единаго все упование твое возложивше, воспел еси Ему ангельское пение: Аллилуйя!

Икос 4

Слышавше о тебе, благоверный княже, власти богоборные, повелеша ти от отца твоего, великаго князя Павла, отрещися. Ты же, о заповеди Господней «Чти отца и матерь свою» помышляя, отвергл еси тех глаголы и сего ради, аки сродник монарха боговенчаннаго, претерпел еси лишения, оскорбления и иные злострадания. Мы же, верность твою ко Господу воспевая, таковые похвалы приносим ти:
Радуйся, многие скорби от врагов страны твоея претерпевый!
Радуйся, во скорбех сих, яко злато в горниле очистивыйся!
Радуйся, от тягот изгнания в уныние не впавый!
Радуйся, во изгнании крепость духа сохранявый!
Радуйся, во Христе распятом отраду и утешение обретавый!
Радуйся, дух любви ко врагом стяжавый!
Радуйся, унывающих и скорбящих всерадостно утешающий!
Радуйся, светом надежды Христовой нас озаряющий!
Радуйся, богоблаженне княже Владимире, страстотерпче, добропобедный и молитвенниче о душах наших!

Кондак 5

Божественным духом просветися сердце твое, боголюбиве Владимире, яко во всем и везде созерцал еси присутствие Господа и Творца Нашего, и во свете ласковых звезд, и в аромате цветов дольних, и в радости духовней и в самом страдании человеческой души, надеждою на Милосердие Его окрыляемь, умиленно воспевал еси Ему ангельское пение: Аллилуйя!

Икос 5

Видевше тя, благословенный Владимире, очами веры пред престолом Царя царствующих купно со святыми сродники твоима: благоверным царем Николаем II, преподобномученицею Елизаветою, отцем твоим, великим князем Павлом, и иными страстотерпцы царственными предстояща и за ны молящихся, просим тя: сотвори молитву о спасении и благоденствии нашем и милостивно приими величания сия:
Радуйся, лучу Солнца Правды, теплотою Божественныя любви нас согреваяй!
Радуйся, свеща многосветлая, светом истиннаго богопознания нас озаряяй!
Радуйся, бисере честный, сердца наша увеселяяй!
Радуйся, от заблуждений духовных нас избавляяй!
Радуйся, от пристрастий греховных нас исцеляяй!
Радуйся, недуги телесныя и скорби душевныя от нас удаляяй!
Радуйся, нравы добрыя и благочестие в нас насаждаяй!
Радуйся, от обычаев душевредных сердца наша отвращаяй!
Радуйся, богоблаженне княже Владимире, страстотерпче добропобедный и молитвенниче о душах наших!

Кондак 6

Проповедница богоносная и наставница богомудрая явилася еси святая благоверная княгиня Елизавета сродником своим, в заточении пребывающим; ты же, всеславне Владимире, благим советам ея всею душею и всем сердцем твоим боголюбивым внимал еси и купно с нею воспевал еси укрепляющему вас Подвигоположнику Христу: Аллилуйя!

Икос 6

Возсия, аки солнце, свет добродетельнаго жития твоего на земли, богомудре княже Владимире, в тебе бо зрим вся елика честна, елика праведна, елика пречиста. Сих ради славяще Святаго Духа, виновника благих, от силы в силу священнотайне ведшаго тя, зовем ти:
Радуйся, добродетелей евангельских пребогатое сокровище!
Радуйся, кротости и смирения боголепное жилище!
Радуйся, незлобия Христова венценосный подражателю!
Радуйся, кающимся грешником теплый сострадателю!
Радуйся, отраду и утешение нам низпосылающий!
Радуйся, от глада духовнаго всех нас избавляющий!
Радуйся, любовь к Божьему творению в нас пробуждающий!
Радуйся, радостью духовной души наши наполняющий!
Радуйся, богоблаженне княже Владимире, страстотерпче добропобедный и молитвенниче о душах наших!

Кондак 7

Хотяще верность Христу даже до смерти сохранити, всеславне княже Владимире, купно со святою сродницею твоею княгинею Елизаветою неустанно молил еси Его даровати ти и иным с тобою во узах сущих крепость врага невидимого одолети; и силою благодати божественней укрепляемь путь страданий доброчестно прошел еси, Господеви поя: Аллилуйя!

Икос 7

Новое испытание кротце претерпел еси, всехвальне Владимире, егде от богоборцев в Алапаевске заточен был еси; ты бо, незлобием и кротостию Спасителю подражая, смиренне тесноты, лишения, оскорбления и надругания приял еси, о Христе Распятом выну помышляя. Мы же, сие ныне поминающе, просим тя, благоверный княже, научи и нас Христа паче всего земнаго любити милостиво приими величания сия:
Радуйся, диадему княжескую с венцем мученическим сочетавший!
Радуйся, бисере драгоценный в небесной сокровищнице Христове сохраненный!
Радуйся, неповинный страдальце!
Радуйся, жертво беззаконнаго властолюбия!
Радуйся, княже, Христа в невинней души твоей вселивый!
Радуйся, в вере и благочестии нас утверждающий!
Радуйся, от уныния и отчаяния нас исцеляющий!
Радуйся, светом надежды Христовой нас озаряющий!
Радуйся, богоблаженне княже Владимире, страстотерпче добропобедный и молитвенниче о душах наших!

Кондак 8

Странной и страшной смерти бесоподобные богоборцы предаша тя, княже Владимире, егда купно с преподобномученицею Елизаветою и иными сродники твоима в кладцеподобный ров тя ввергаша; ты же, страстотерпче святый, до самой кончины твоея воспевал еси Господеви псаломские песнопения. Ангелы же Божии душу твою на небеса возносяще, воспеваша Вседержителеви: Аллилуйя!

Икос 8

Всего себе предал еси Творцу своему, богославне княже Владимире, мученически живот свой скончавше и возсиял еси на тверди небесней, приял бо еси от Господа нетленный венец за страдания твоя. И с лики святых, предстояще ныне во славе у Престола Вседержителя немолчное пение приносиши о всех чтущих тя, с верою тебе молящихся и прославляющих тя тако:
Радуйся, всем житием своим Богу угодивый!
Радуйся, вси заповеди Господни в чистоте сохранивый!
Радуйся, злонамерения богомерзких мучителей истребивый!
Радуйся, к небесам умы и сердца наши обращающий!
Радуйся, от вражды друг к другу христиан исцеляющий!
Радуйся, всем молящимся тебе усердно помогающий!
Радуйся, чаше, елей милости Божия к нам содержащая!
Радуйся, горо, тучи гнева Господия от нас отводящая!
Радуйся, богоблаженне княже Владимире, страстотерпче добропобедный и молитвенниче о душах наших!

Кондак 9

Вси чини Ангельстии и праведных соборы возрадовашася, зряще тя, святый княже Владимире, новаго мученика в пострадавшей и поруганней земле Российстей возсиявшаго. Мы же ныне прославляюще подвиг твой, ко Господу и Спасу нашему взываем: Аллилуйя!

Икос 9

Витии многовещанныя не возмогут благохвалити крепость твою мученическую, терпение твое и велию любовь ко Господу, благоверный княже Владимире. Мы же ныне, надеждою на предстательство твое окрыляемы, с любовию и умилением приносим ти похвалы сия:
Радуйся, жителю Божественнаго селения!
Радуйся, достигший вечнаго упокоения!
Радуйся, со Ангелы присно ликующий!
Радуйся, трисвятую песнь немолчно поющий!
Радуйся, с праведными ублажаемый!
Радуйся, с мучениками увенчанный!
Радуйся, радостию вечною преисполняемый!
Радуйся, любовию Божественною преуслаждаемый!
Радуйся, богоблаженне княже Владимире, страстотерпче добропобедный и молитвенниче о душах наших!

Кондак 10

Спасения нашего ходатай буди и ныне, святый новомучениче Владимире, зане многия расстленныя обычаи нечестивые людие введоша в стране нашей и теми крепость наша оскуде, но в сокрушении сердец наших к твоему предстательству припадаем и на твое заступление уповающе, вопием Богу: Аллилуиа.

Икос 10

Стена тверда и крепкая ограда буди нам, страстотерпче святый княже Владимире, с теплой верою и любовию к тебе ныне прибегающим; ограждаемы бо тобою от враг видимых и невидимых и избавлены тобою, прославляем тя тако:
Радуйся, мучеников пречестных неувядаемое украшение;
Радуйся, верных в терпении непоколебимое утверждение;
Радуйся, новый светильник веры, в наши дни верный путь Богууказующий;
Радуйся, дух милосердия в сердцах наших воскресающий;
Радуйся, печальниче болящим и безпомощным;
Радуйся, заступниче убогим и обидимым;
Радуйся, яко тобою прощение грехов улучаем;
Радуйся, яко тобою от бед спасаеми, мир с Богом обретаем;
Радуйся, богоблаженне княже Владимире, страстотерпчедобропобедный и молитвенниче о душах наших!

Кондак 11

Пение наше всякое побеждается, и многое множество хвалебных песен, восписуемых ти, несть довольно, дабы по достоянию восхвалити тя, всеславный мучениче Владимире; обаче молитвами твоими получающе от Христа Бога благодеяния многообразныя, благодарни суще, поем о тебе Ему: Аллилуиа.

Икос 11

Светозарная свеща, у Престола Божия предстоящая, просвещающая души верныя еси, новомучениче Владимире, сего ради молим тя, угодниче Божий, умоли Господа Сил о всех кающихся грешниках, и всех нас укрепи на твердом камени веры Христовой святыми молитвы твоими, да зовем ти:
Радуйся, от заблуждений и кривотолков умы нашиочищающий;
Радуйся, от теплохладия сердца наши благодатно исцеляющий;
Радуйся, внутренний мрак душ наших светом Христовымозаряющий;
Радуйся, друг друга тяготы носить нас наставляющий;
Радуйся, подлинной любви христианской всех научающий;
Радуйся, предстательством твоим к Богу путь намустрояющий;
Радуйся, в Царство Божие стопы наша направляющий;
Радуйся, богоблаженне княже Владимире, страстотерпчедобропобедный и молитвенниче о душах наших!

Кондак 12.

Благодать великая дана есть ти от Бога Вышняго, пречудный страстотерпче, яко пришедшему от скорби велия и убелившему в крови Агнчей ризы своя; сего ради со всеми святыми Престолу Божию предстоиши, выну зовуще: Аллилуиа.

Икос 12.

Поюще Бога Дивнаго во святых Своих, ублажаем тя, преславный новомучениче Владимире, почитаем страдания твоя, славим долготерпение и мужество твое непоколебимое, хвалим мученическую кончину твою, торжествуем небесную твою славу и таковые похвалы приносим ти:
Радуйся, выну уповати на Творца нас наставляющий;
Радуйся, от сетей вражиих чтущих тя избавляющий;
Радуйся, от закваски фарисейской нас ограждающий;
Радуйся, к искреннему покаянию нас призывающий;
Радуйся, от праздности и слабости духа исцеляющий;
Радуйся, скорби наша в радость претворяющий;
Радуйся, за вся Христа благодарити нас научающий;
Радуйся, милосердие Божие к нам приклоняющий;
Радуйся, богоблаженне княже Владимире, страстотерпчедобропобедный и молитвенниче о душах наших!

Кондак 13

О предивный и преславный страстотерпче Христов, благоверный княже Владимире, приими малое сие моление наше, от любве душевныя тебе приносимое и умоли Всеблагаго и Всемилостиваго Господа Нашего Иисуса Христа избавитися нам всех зол и напасти, да благочестне в веце сем поживем и блаженство вечное молитвами твоими обрящем, с тобою же благодарственно воспевая Господеви: Аллилуиа.

Автор сего акафиста Евгений Владимирович Храповицкий

Родился Владимир Палей 28 декабря 1896 года: его родители — Великий Князь Павел Александрович (дядя Императора Николая II) и Ольга Валерьяновна Пистолькорс. Это был второй, морганатический брак Вел. Кн. Павла Александровича, заключенный вопреки воле императора, они были вынуждены выехать во Францию, где и родился сын Владимир, в 1903 г. — дочь Ирина, в 1905 — Наталья.
Это была удивительно счастливая семья. Любовь и радость сияли вокруг Владимира. Недаром в своих стихах он передает те чувства, которые царили в семье Великого князя. Любимый и любящий сын, находящийся со своими родителями в удивительной духовной близости; заботой и трогательной нежностью проникнуты все его письма в родительский дом. Вот отрывок из письма от 12.09.1912 г.: «Вот таким образом мамочка, дорогая, и живу себе спокойно, окруженный общей лаской и вашим благословением. Но, Боже мой! Как меня по временам, особенно к вечеру, тянет к вам. Как мне хочется обнять тебя, мамочка, а папино чтение послушать; Как мне девочек по временам не хватает. Дай Бог, отпустят на денек раньше 17-го, и мне удастся целых две недели с вами побыть». В 1914 году семье было позволено вернуться в Россию, а в 1915 году Ольге Валерьяновне и её детям от брака с Великим Князем Павлом Александровичем было пожаловано княжеское достоинство и фамилия Палей. Владимир Палей поступает учиться в военное элитное учебное заведение в Пажеский Его Величества корпус. В«Записках кирасира» Владимир Трубецкой писал :«...Это кастовое военно-учебное заведение накладывало на своих питомцев совсем особую печать утонченного благоприятия и хорошего тона. В Пажеском корпусе специальным наукам отводилось должное место, и надо сознаться, что именно из пажей выходили, пожалуй, наиболее культурные офицеры русской армии.» В 1915 году Владимир был произведен в корнеты лейб-гвардии Гусарского Его Величества полка. Талант поэта перевешивает в нем, но военную службу оставить Владимир не помышляет, тем более, во время войны, он уходит на фронт.
1915 год Гусарский полк участвовал в оборонительных операциях Северо-Западного фронта и только после тяжелых потерь отошел в резерв. За участие в боевых операциях Владимир получил чин подпоручика и Анненское оружие за храбрость.
Князь Владимир Палей пишет много, пробует себя в различных жанрах. Он особенно сблизился со своим двоюродным дядей — Великим Князем Константином Константиновичем (поэтом К. Р.), влияние которого ощущается в поэзии племянника. В начале 1915 года он перевел на французский язык пьесу Великого Князя «Царь Иудейский» и прочитал ее автору, после чего тот обнял юношу со словами: «Володя, я чувствую, что больше писать не буду... Тебе я передаю свою лиру...» Не случись революционных потрясений, как знать, возможно, Россия обрела бы еще одного талантливого поэта. В 1916 году вышедший первый сборник В. Палея получил много отзывов. Автор одного — Федор Батюшков писал: «Трудно предугадать дальнейшее развитие таланта, которому пока еще чужды многие устремления духа и глубины души, но задатки есть, как свежие почки на молодой неокрепшей еще ветке. Они могут развернуться и окутать зеленью окрепший ствол». В. Палей был знаком с О. Мандельштамом и посещал Николая Гумилева.
Князь Владимир Палей принадлежал к поколению «золотой молодежи» начала 20 века блестящий, обаятельный, образованный молодой человек с безукоризненными манерами. Судьба дала ему все: ум, красоту, талант, богатство и всеобщую любовь, но самый щедрый дар — трепетная душа поэта. В его душе постоянно присутствует Бог.
Господь во всем. Господь везде:
Не только в ласковой звезде,
Не только в сладостных цветах,
Не только в радостных мечтах,
Но и во мраке нищеты,
В слепом испуге суеты,
Во всем, что больно и темно,
Что на страданье нам дано...
С приходом к власти большевиков в октябре 1917 года кровавый маховик был раскручен, и не только его отцу Великому Князю Павлу Александровичу не суждено было вернуться домой.
В 1917 году Владимир ведет дневник - бесценное свидетельство тех страшных дней, которое поражает зоркостью наблюдений и точностью предвидения. «Неужели наши потомки увидят в событиях 1917 года одну лишь удручающую картину? Одну лишь кучку людей, вырывающих друг у друга право на катание на моторах, и то время как страна голодает, а армия целуется с врагом. Неужели те, кто бескорыстно создал революцию, кто следовательно таил в душе блаженные и светлые идеалы, надеясь на возможность осуществления этих идеалов, неужели эти русские люди не чувствуют, сколько страшен и ужасен переживаемый Россией кризис? Творимое вырвалось из рук творителей... Всей России грозит позор и проклятие. Пора, пора опомниться, если мы не хотим дать миру плевать нам в лицо».
Глава Петроградского ЧК М. С. Урицкий, проводя перепись членов дома Романовых, вызвал и князя Владимира Палея. Он предложил Владимиру подписать отречение от отца: так как Князь Палей носил титул и фамилию матери, он мог избежать черного списка. Владимир был возмущен и счел бесчестным такой поступок, хотя и понимал чем это грозит ему. Весной 1918 года Князь Владимир Палей, Великий князь Сергей Михайлович и три сына Великого Князя Константина Романова были высланы сначала в Вятку, потом к Екатеринбург и, наконец, в Алапаевск последнее место заточения. Из Екатеринбурга он писал: «Я весь дрожал, а когда после Крестного хода раздалось все более и более громкое ,,Христос воскресе!" и я невольно вспоминал заутрени в Париже и в Царском, стало так тяжело, как-будто ангел, отваливший камень от Гроба Господня, свалил его на меня». А в Вятке из-под его пера появились трагические строки:
Немая ночь жутка. Мгновения ползут.
Не спится узнику... Душа полна страданья;
Далеких, милых прожитых минут
Нахлынули в нее воспоминанья.
Мысль узника в мольбе уносит высоко —
То, что растет кругом — так мрачно и так низко.
Родные, близкие так страшно далеко,

А недруги так жутко близко.
Известно, что в ссылке Князь — поэт много и плодотворно работал. По специальному разрешению комиссара юстиции Алапаевска, ему было разрешено посетить местную городскую библиотеку, он вел дневниковые записи, но на сегодняшний день произведения Алапаевского периода не известны.
Князь Владимир Палей разделил судьбу других Романовых — алапаевских мучеников и погиб сброшенный в шахту 18 июля 1918 года. Тело Князя Палея было вывезено в Китай в апреле 1920 года упокоено в склепе при храме Святого Серафима Саровского в Пекине. Русская православная церковь за рубежом канонизировала Князя Палея 1 ноября 1981 года в сонме Новомучеников Российских.
[/spoiler]

Раб божий Константин

Акафист священномученику Власию, епископу Севастийскому.
[spoiler]Кондак 1

Избранный угодниче Христов, скорый предстателю и теплый о нас к Богу молитвениче, священномучениче Власие, призывающих тя во всяких молениях услышати обещавый, яко имеяй дерзновение ко Господу, не престай моляся о чтущих святую память твою, хвалебная пения о тебе Богу приносящих и с любовию тебе зовущих:

Радуйся, молитвениче наш, скорый помощниче, священномучениче Власие.

Икос 1

Ангела хранителя пастве твоей даде тебя Господь и Бог наш: зряще во благочестии процветшее кроткое и безпорочное твое житие, людие севастийстии потщашася, да будеши во епископа им поставлен. И воистину стадо Христово добре упасл еси. Мы же, видяще о тебе таковое Божие благоволение, взываем сице:

Радуйся истинный и добрый пастырю стада Христова; радуйся за любовь Христову душу свою положивый.

Радуйся, любви Христовой образ нам в себе явивый; радуйся, како пасти стадо Христово служением своим пастырем показавый.

Радуйся, овцы словесныя како жити, житием научивый; радуйся, не себе ради, но Христа и стада твоего поживый.

Радуйся, молитвениче наш, скорый помощниче, священномучениче Власие.
Кондак 2

Видя на христиан гонение лютое от безбожного мучителя Диоклетиана яко мнози благочестивии людие страха ради мук и темниц от града бежавше, в лесах и горах, в вертепах и пропастех земных скрывахуся. Ты, блаженне Власие, не имея воли Господни на подвиг мученический прежде времени себе вдаяти, таковым людем споследовал еси и в горе пустынней вселися, житие твое тамо в постничестве и безмолвии с молитвою непрестанною провождал еси, поя Богу: Аллилуия.

Икос 2

Разумев, яко человек образ Божий есть и к Первообразу должен себе управити, богомудре Власие, ум и сердце к небесным вперив, в богомыслии и благочестии преуспеваше, и тако сокровищем нетленным обогатися, темже ангела суща на земли тя почитаем, званиями ублажаем сими:

Радуйся, не земли, яко на небеси поживый; радуйся, ангеле земный, хранителю пастве твоей бывый.

Радуйся, словесных овец твоих учений Божественных словес питавый; радуйся, дарования небесная от Господа приемый.

Радуйся, врачу телесный во врача душ от Господа возращенный; радуйся, и по кончине твоей всякая исцеления обильно всем источаяй.

Радуйся, молитвениче наш, скорый помощниче, священномучениче Власие.
Кондак 3

Силою Божиею влекомый, к Евстратию мученику, в темнице томимому нощию пришел еси, святителю Христов Власие, и пад ниц, в дивнем подвизе исповедания Христова его укреплял еси. Видя же его терпение твердое и мужество, прославил дивного во святых Своих Бога, поя Ему: Аллилуия.
Икос 3

Имамы тя сосуд благодати исполненный многих дарований Христовых. Яко звери лютии исцеление от тебе получают, мы же неоскудных милостей и чудес тобою от Господа сподобляеми, священномучениче Власие, исплетше венец похвалы, благодарно вопием ти:

Радуйся, благодатный дарований небесных носителю; радуйся скорый земных кормителю и целителю.

Радуйся, пастырю добрый, даров Христовых раздаятелю; радуйся паствы твоей истинный наставниче и питателю.

Радуйся, яко звери лютии молитве твоей внимают; радуйся, яко притекающии к тебе людие в бедах избавление обретают.

Радуйся, молитвениче наш, скорый помощниче, священномучениче Власие.
Кондак 4

Буря житейских гонений от злочестивого мучителя, юже воздвиже на тя, мучениче Христов Власие, во еже поколебати святую веру твою, но ничимже возмогла есть смутити тя, егда послании приидоша к тебе в пещере обитающу, безумное веление того исполнити. Ты же нерадив о муках и временней почести, волю же Господню узрев, страдальчески мужеством вооружился еси, в радости поя Богу: Аллилуия.

Икос 4

Слышавше, яко знамения многая и чудеса деются о имени прославляемого от тебе Христа Бога нашего, и яко мнози от еллин вероваша в Него, егда шествовал еси, богоносе Власие, на страдания твоя, жена некая приступльше паде ниц к ногама твоима, со слезами моляше тя помощи сыну ея, ибо кость ста в гортани его и бысть яко мертв. Ты же, добрый пастырю, с верою воззвал еси Спасителю всех, да исцелеет отрок ея, и тако моляся, просил еси Господа, аще от человек или скотов кая-либо беда имать кому бысть, и той помянет имя твое, помощи всякому, да прославится Имя Его Пресвятое. И виде жена, яко исцеле отрок ея, прослави Бога, хвалу тебе воздая. С нею же и мы усердно вопием ти:

Радуйся, крепкою верою твоею и чудесы, ко Христу неверныя обративый; радуйся, на страдания за Христа доблестно шествовавый.

Радуйся, в призывании святаго имени Христова твердую любовь и несомненную надежду в себе показавый; радуйся, силою молитвы твоея, отроку исцеление от Господа даровавый.

Радуйся, не точию человеком, но и скотом врачевание подававый; радуйся, и нас во всяких бедах и нуждах дерзновенно призывати тебе подвигнувый.

Радуйся, молитвениче наш, скорый помощниче, священномучениче Власие.
Кондак 5

Боготечную звезду, во мраце неверия, яко в нощи сияющую и просвещающую души всех, хотящих спастися, видев тя, Агриколай игемон, не восхоте разумети, на страдания за Христа предаде тя и палицами много и немилосердно бити повеле. Ты же, священномучениче Власие, ярость мучителя усрамляя, воспевал еси Богу: Аллилуия.
Икос 5

Видя мучитель непреложную веру твою, за ню же муки всякия терпети готов был еси, страстотерпче Христов Власие, паче же смутися словесы твоими, зане рекл еси: Твори, еже хощеши, да никако отвратиши мене от исповедания Божия, – в темницу повеле всадити тя. Мы же дивящеся таковому твердому твоея веры Христовы исповеданию, от всея души воспеваем ти таковая:

Радуйся, исповедниче Божий избранный; радуйся мучениче Христов прославленный.

Радуйся, нечестие игемона на судищи посрамивый; радуйся, уловлению его льстивому внимати себе отвративый.

Радуйся, ризу твою священную кровми страданий твоих украсивый; радуйся, исповедания Христова образ нам в себе явивый.

Радуйся, молитвениче наш, скорый помощниче, священномучениче Власие.
Кондак 6

Проповедует тя, блаженне Власие, Церковь Христова яко истинна добра пастыря, по отшествии твоем в жизнь вечную не оставляющаго верныя, но яко же обещался еси, во всяких прошениях присно нас предваряюща и соблюдающа во всяких скорбех, бедах и нуждах всех, благодарно зовущих о тебе Богу: Аллилуия.
Икос 6

Возсиял еси, блаженне Власие, яко финикс процветший в меру возраста совершения Христова, от Него же прием небесныя дарования, купно с лики святых во славе на небеси ныне пребываеши, и нас молитвами твоими во дворы Господни вселитися готовиши, прилежно вопиющих ти таковая:

Радуйся, яко пред престолом Царя небесного в веселии вечнем ныне пребываеши; радуйся, яко с лики ангел и святых Творцу всех славу воспеваеши.

Радуйся, пред Всевышним ходатаю наш усердный; радуйся, наших к нему молитв возносителю прилежный.

Радуйся, от бед защитниче наш небесный; радуйся, попечителю наш верный.

Радуйся, молитвениче наш, скорый помощниче, священномучениче Власие.
Кондак 7

Хотяше почтити тя, страстотерпче Христов Власие, вдовица некая нища яство уготова, в темницу тебе принесе, и падше к ногама твоима, моляше, да бы ял еси. Ты же, отче святый, благословив вдовицу, заповедал еси ей, глаголя: Жено, твори такожде память мою, и ничто же оскудеет в дому твоем, и аще ин кто подобен ти будет и память мою сотворит, даров Божиих исполнится и благословен будет во вся дни живота своего. И виде жена последи, яко благослови ю Бог довольством многим, поведаша всюду яже глаголал еси к ней, поющи Богу: Аллилуия.
Икос 7

Новыя муки, горшия первых, ища вселукавый мучитель, егда из темницы паки на судище возва тя, славне мучениче, хотя испытати, принесеши ли жертву богам, или хощеши зле погибнути. Нечестия сия ты отринул еси и силою Божественною укрепился еси, темже ни биения, ни раны, ниже на древе повешание и строгание телесе твоего, ими же мучим был еси, никако же возмогоша победити славное твое терпение. Ты же рекл еси мучителю: бози, иже небеси и земли не сотвориша, да погибнут. Не боюся твоих временных мук, ибо взираю на будущия благая, любящим Бога уготованная. Сего ради тебе, доблестному воину Христову, воспеваем таковая:

Радуйся, многими ранами и страшными муками за Христа страдавый; радуйся, повешение на древе и орудии железными строгание Его же ради терпевый.

Радуйся, богоборства неверных обличителю; радуйся, веры Христовой защитниче и хранителю.

Радуйся немощную нищету идолов суетных проповедавый; радуйся, веру в жизнь вечную и блага будущия исповедавый.

Радуйся, молитвениче наш, скорый помощниче, священномучениче Власие.
Кондак 8

Странен и недомыслим образ страдания твоего мучителю показался еси, нечестивого бо того веления тебе небрегшу, подверже тя, священномучениче Власие, мучениям тяжким. Жены же седмь благочестивыя, страдания твоя видевше, не убояшася, но кровь Твою страдальческую с земли собираху, исповедницы Христовы себе являху, Богу же воспеваху: Аллилуия.
Икос 8

Всем сердцем и всею душею Христа возлюбил еси, к нему же богомудрыя жены, яко пастырь добрый, твоим подвигом страдальческим привлекл еси, темже, блаженне Власие, похваляюще страдания твоя, с любовию зовем тебе:

Радуйся, страдальче Христов предивный; радуйся, честным страдание твоим мучителя удививый.

Радуйся, сострадавшия тебе жены на исповедание Христа подвигнувый; радуйся, светильницы света Христова тех соделавый.

Радуйся, будущих ради благ страдания твоя ни во что же вменивый; радуйся, твердым веры исповеданием истинно веровати нас научивый.

Радуйся, молитвениче наш, скорый помощниче, священномучениче Власие.

Кондак 9

Всякия лести безбожных отвергше, тебе же, блаженне Власие, последоваша жены богомудрыя, идольскую прелесть посрамити тщашеся, боги дати им игемона спросиша, яко бо жертвы жрети тем хотяху, и ко езеру устремишася. Воини, стрегущии их, мняху, яко прежде омовение по обычаю хотят совершити, оне же кумиры тыя во глубину езера ввергоша и так боги их поругаша. Богу же Истинному воспеша: Аллилуия.
Икос 9

Витийство многовещанных пений, ими же достойно воспети тя дерзаем, не довлеют ти , прехвальне Власие. Ни кая бо земная похвала славе небесней равна быти может. Ты же, предстояй ныне во славе Христовой, призри на нас, тебе молящихся и с любовию зовущих:

Радуйся, всем сердцем и душею Христа возлюбивый и себе всецело Ему предавый; радуйся, земная вся презревый и небесная селения унаследовавый.

Радуйся, во славу Божию на земле поживый и небесною славою увенчанный; радуйся, венец мученический от Христа приемый и к сонму святых мучеников сопричтенный.

Радуйся, на небесех от ангел и святых проставляемый; радуйся, на земли от чтущих святую память твою хвалимый и воспеваемый.

Радуйся, молитвениче наш, скорый помощниче, священномучениче Власие.
Кондак 10

Спасти хотя души своя, последствующия тебе жены, богоблаженне Власие, егда на место мучения приведени быша, молитву о них прияти о тебе Бога молиша, зане на путь истины привел еси их, темже убо на усечение мечем честныя своя главы предаша, и к мучеником Христовым тако приобщишася, на небесех с лики святых поюще: Аллилуия.
Икос 10

Стена мучеником, слава христианом, столп и утверждение веры и благочестия был еси, священномучениче Власие. Буди и нам грешным, к тебе прибегающим, управитель изряден, веры хранитель, в скорбех и болезнех утешитель и целитель, бедах и напастех избавитель и покровитель и во всяких нуждах усердный перед Богом предстатель сицевое пение тебе приносящим и с любовию зовущим:

Радуйся, яко тобою вера Христова прославляется; радуйся, яко тебе ради неверие посрамляется.

Радуйся, яко тебе ради благочестие укрепляется; радуйся, яко тобою богохульницы смиряются.

Радуйся, яко мы грешнии упование на тебе возлагаем; радуйся, яко мы недостойнии спасение тобою от Бога получаем.

Радуйся, молитвениче наш, скорый помощниче, священномучениче Власие.
Кондак 11

Песнь хвалебную приносим ти, священномучениче Власие, о мужестве твоем и вере крепкой, юже явил еси, Христа исповедуя, егда виде мучитель твой, яко ни во что же вменяеши ни лести его лукавыя, ни мучения тяжкия, ими же от Христа отвратити тебе желаше, вопроси тя: Аще во езеро ввергну тя, помилует ли тя Христос твой. Ему же, достохвальне отче, не обинуяся рекл еси: Аз чту Бога истинного живаго и во веки спасен буду, и на водах узриши силу Бога моего. И егда во езеро ввержен был еси, назнаменовав воду крестом, яко по суху, шел еси, посем же кончину мученическую за Христа во главу усечен мечем, приял еси, хвалу Богу воспевая: Аллилуия.
Икос 11

Светодатель Христос Господь, видя душу твою, чистотою блещащуюся, не даде тебе быти под спудом, священномучениче Власие, но постави тя на свещнице архиерейства. Сего ради, не токмо в житии, но и по смерти светел светильник Христов показался еси, яко великий пастырь добре упасл еси паству твою, юже попеченьми своими и при кончине не оставил еси, не о себе точию, но о всем мире, наипаче же о тех, иже восхотят память твою сотворити, молитву усердную Богу принесл еси и блаженный глас Владыки Христа: Вся прошения твоя исполню, услышати сподобился еси. Темже молися о нас ко Господу, да просветит нас светом Своего Богоразумия и избавит от церковных нестроений, ересей и расколов и благочестие утвердит в нас, поющих тебе таковая:

Радуйся, светильниче света Христова; радуйся, украсителю церковный.

Радуйся, архиерею Богом избранный; радуйся, хранителю веры православныя.

Радуйся вражды церковныя упразднителю; радуйся спасения нашего управителю.

Радуйся, молитвениче наш, скорый помощниче, священномучениче Власие.
Кондак 12

Благодать Божия, яже в тебе, священномучениче Власие, прежде усечения главы твоея, честное лице твое светом Христовым озари, послежде от гроба твоего многоразличные исцеления источи, к похвалению тебе всех понуждая, Богу же научая пети: Аллилуия.
Икос 12

Поем твоя дивныя подвиги и страдания, священномучениче Власие, ими же память твою светло украсил еси. Темже, благодаряще Бога, дивнаго во святых своих, хвалебная пения воспеваем тебе таковая:

Радуйся, Церкви Христовой богоизбранный светильниче; радуйся, веры православныя преславный поборниче.

Радуйся, светило великое, нечестия мрак разгоняющее; радуйся, столпе церковный, благочестие утверждающий.

Радуйся, пастырей Церкви преславное украшение; радуйся, благочестием твоим верныя возвеселяяй.

Радуйся, молитвениче наш, скорый помощниче, священномучениче Власие.
Кондак 13

О, многострадальный и всехвальный отче, священномучениче Власие, нынешнее наше приими приношение. Избави нас от всяких болезней душевных и телесных, защити нас от враг видимых и невидимых и от всякого мучения сохрани нас теплым твоим ходатайством пред престолом Всевышняго, да с тобою воспеваем Богу: Аллилуия.

Сей кондак чти трижды, затем икос 1 и кондак 1. [/spoiler]