Акафист Одигитрия Диксиократусса

[вячеславВерующий]

                          Акафист Одигитрии Дексиократуса
                                    (Hodigitria dexiocratusa
                                             Синай, XIII в.)


                                           Кондак 1

Взбранной воеводе надежде всех христиан, благодарственную песнь приносим, Деве Богородице: Радуйся Одигитрие Дексиократуса, обители  Синайстей похвало и украшение.

                                          [spoiler]  Икос 1


Света Невечерняго, Мати Бога Христа во Твоей бо вселився утробе содержаяй вся рукою Господь, от Тебе бо нерукосечный Камень отсечеся, Христос Бог наш, Его же в Свои всесвятые руце прияла еси и млеком питала еси. Низхождение сие Божественное зряще, Херувимы и Серафимы, воинства бесплотныя велехвально вопияху Ти:
Радуйся Невесто Неневестная; радуйся Дево браконеискусная. Радуйся, Царево седалище; радуйся, престоле Носящаго вся. Радуйся, превысшая высото; радуйся, неудобозримая глубино. Радуйся, совета неизреченнаго Таиннице; радуйся, совета Предвечнаго Исполнение. Радуйся, Лозо Винограда истиннаго; радуйся Плода безсмертнаго стяжание. Радуйся, утробо Божественнаго воплощения; радуйся, лествице небеснаго восхождения:
Радуйся Одигитрия Дексиократуса, обители  Синайстей похвало и украшение.

                                        Кондак 2

Предвечнаго Бога рождшая, Пресвятая Дево, услыши глас непотребных  раб Твоих, шествующих на вершину добродетелей стезею покаяния, яко же Моисей покаянно за народ шествовал на верх горы Синайския, услыши стенания, от сердца приносимыя Ти непрестанно, усердствуй, Владычице, молебную службу нашу приими, и Богу благоутробному принеси, вопиющих Ти: Аллилуйя.
                     
                                         Икос 2

Свитки грехов наших попаляющая, Пресвятая Дево, врата  покаяния на горе Синайстей утвердила еси. В восхождении сем умиление кающихся христиан на вершине горы Моисеевой предвещая, прощение грехов всем христаном  даровала еси, непрестанно вопиющим Ти:
Радуйся, Свет неизреченно родившая;  радуйся, Звездо, Спасителя  нам явившая. Радуйся, всесветлый источниче увеселения; радуйся, Чаше, черплющая радость. Радуйся, ада и смерти попрание; радуйся, наше упование. Радуйся, благодати снисхождение; радуйся Сына Божия познание. Радуйся, тмы демонскаго служения избавляющая; радуйся, демонские полки поражающая. Радуйся, светоч покаяния; радуйся луче умиления: Радуйся Одигитрие Дексиократуса, обители  Синайстей похвало и украшение.

                                       Кондак 3

Даролюбезная Владычице, Синайския горы украшение, хранительнице и упование земли Египетския, Приснодево Марие, Христа безволненно в вертепе родившая и в земли Египетстей с Ним до срока пребывшая,  приими усердные молитвы наша, утиши волнение грехов наших,  не остави нас, на Тя уповающих, но Сама благоотишно заступи и помилуй нас, Тебе вопиющих: Аллилуйя.

                                         Икос 3

Возсиявый во Египте образ Твой, Одигитрие Диксиократуса, отгнал есть тьму многобожия и полцы демонов расточишася, сих же избавльшиися Твоими молитвами, Пресвятая Дево, пустыннолюбивыя молчальники и вси христиане вопияху Ти таковая:
Радуйся, просящих веро; радуйся, премудрых превосходящая разум. Радуйся, верных озаряющая смыслы; радуйся наставнице целомудрия. Радуйся, приятное молитвы кадило; радуйся алавстр молитв многоценный. Радуйся, пустыножителей немолчная уста; радуйся, монахов хваление. Радуйся, демонскаго избавляющая служения; радуйся бесов многоплачевный струпе. Радуйся, пламень страстей угашающая; радуйся, страстныя сердца добре изменяющая. Радуйся Одигитрие Дексиократуса, обители  Синайстей похвало и украшение.


                                      Кондак 4

Обители Синайстей возсиял в божественной славе Лик Твой, Дево Богоотроковице. Младенца предвечнаго Господа Иисуса Христа, на десной руке Твой держащи, яко Матерь вся содержащаго в деснице Своей Владыки, воззри  на нас милостивно и молитвами Своими избави нас огня вечнующаго,  червия  злаго и  тартара, да нас не явиши бесом радование, неустанно вопиющих Ти: Аллилуиа.



                                        Икос 4

Ветия многовещанныя недоумевают к прославлению многих чудес Твоих, Богородице Дексиократуса, яже от  иконы Твоея явлены быша, ими же православным людем Божией покров и заступление в образе сем благословне явила еси, в мире сем утвердила Свое заступление, покров и утишение, неустанно вопиющим Ти:
Радуйся, грешным верное упование; радуйся, кающимся невозбранное увеселение. Радуйся, благовосходная молитва покаяния;  радуйся богославная Надеждо спасения. Радуйся, Сило Непобедимая; радуйся, Царице всепрощающая. Радуйся, душ умиление; радуйся, сердец утишение. Радуйся, красото пресветлая; радуйся, любы неизреченная. Радуйся, предвечным Отцем прежде век избранная Дево; радуйся, яко исполнь небо и земля славы Сына Твоего. Радуйся Одигитрие Дексиократуса, обители  Синайстей похвало и украшение.

                                      Кондак 5

Яко одержаша нас злая, Пресвятая Богородице, постигоша нас беззакония наша, и не возмогохом мы терпети демонскаго студа и поношения. Но молитвою Твоею да посрамятся и расточатся хотящии нам злая, да возрадуются и возвеселятся вси чтущие всесвятый образ Твой, да возвеличит Господь всех любящих Тя и всеусердно вопиющих Тебе: Аллилуйя.

                                        Икос 5

Иисуса рождшая, Отроковице Богородительнице, Того моли спасти вся христианы и геены избавити всех почитающих Твой всесветлый образ, со умиленем сердца молящихся Тебе: согрешихом, беззаконовахом, Владычице, ослаби, остави нам прегрешения наша и не погуби нас со беззаконьими нашими, но молитвами Твоими да не осудит нас Господь Бог наш в преисподняя земли, являеши всю благость Твою, всем воспевающим Ти:
Радуйся богорадованная Отроковице; радуйся богоявленная Дево. Радуйся, пророческих глагол исполнение; радуйся, Духа Святаго прекрасное селение. Радуйся, Сына Божия родившая; радуйся, прародительское клятву разрешившая. Радуйся, в Вечные кровы возводящая; радуйся, райския двери отверзающая. Радуйся, Агнца Божия пречистое жилище; радуйся, Божественный Храм, даров Духа Святаго вместилище. Радуйся, Сына Божия Мати; радуйся, Кивоте Божественной благодати.  Радуйся Одигитрие Дексиократуса, обители  Синайстей похвало и украшение.

                                       Кондак 6

Спасти хотя Зиждитель истлевшее грехом естество человеческое, сниде во чрево Девичье яко роса на руно, и тем, о Мати Дево Неопалимую Купину иногда таинственно пронареченную, Сын Твой, миру явил есть. Богоросным же образом Одигитрии Дексиократусы, обители Синайской и всем с верою к нему притекающим мир и утишение Христос даровал еси, от негоже дары благодатныя улучая, Ты Богородице Дево, недужныя врачуеши, скорбящия утешаеши и всем вся благая и душеполезная низпосылаеши, вопиющих Ти: Аллилуйя.

                                       Икос 6

Владычице, в помощь нашу вонми, Пресвятая Дево, помощи нам потщися, да возрадуются и возвеселятся о образе Твоем вси уповающии на Тя, Одигитрия Дексиократуса, помоще безпомощных, надеждо ненадеемых, заступление рода христианскаго, воспевающаго Ти:
Радуйся доброточный источниче покаяния; радуйся, добронравное море радования. Радуйся, узы демонския сокрушающая; радуйся наветы их яко, дым расточающая. Радуйся, фимиам молитв наших Духу Святому; радуйся, стезя наша к Предвечному Богу. Радуйся,  Мати, взоры наши к небесному вперяющая; радуйся, Дево, молитвы наши к Сыну возводящая. Радуйся, утробо благоприятная; радуйся, сило непобедимая. Радуйся, цевнице благочестия; радуйся, крине райскаго прозябения. Радуйся Одигитрие Дексиократуса, обители  Синайстей похвало и украшение.

                                     Кондак 7

Яко от дождя злачна возсия нам во Египте живосозданный лик Твой, Пресвятая Дево, росу одождившая нам схождение Безлетнаго Сына, рождшая Свет невечерний, души наши ослепшия просвети, молебную службу нашу приими и Сыну благоутробному принеси.  О, богозданная Владычня палато, дом Духа Божественна нас сотвори, да нас не явиши многи грехов повинны, но егда час  смертный постигнет нас, не остави нас, но сама заступи и помилуй нас, Богородице, вопиющих Ти: Аллилуйя.




                                      Икос 7

Из Тебе явися нетленная, безмужная Мати Дево, Бог, создавый веки, и соедени Себе человеческое естество. Ты еси слава Единородного Сына Божия и рождаеши и девствуеши, и пребываеши Дева: Бог идеже хочет, побеждает естества чин: творит бо, елика хощет, Егоже, яко создателя всех, моли Богородице Дево, да молитвами Твоими оправдимся, Тебе вопиющи:
Радуйся, мудрости языческия низложение; радуйся, истины Христовой благоухание. Радуйся, жизни нашея Услаждение; радуйся, жажды по Бозе Утоление. Радуйся, духовнаго глада полнота; радуйся, раскаяния нашего Звезда. Радуйся, луче умнаго Солнца; радуйся, светило Незаходимое. Радуйся, покаяния нашего  утверждение; радуйся, студных дел наших разрушение. Радуйся, мглы греховныя разсеяние; радуйся, вина духовнаго умиления: Радуйся Одигитрие Дексиократуса, обители  Синайстей похвало и украшение.


                                        Кондак 8

Превысшая Небесных Сил, Пресвятая Богородице, чудотворный образ Своего лика в горе Синайской явила еси нам, якоже покровительница Синайския горы и ветхопещернаго сонма монашествующих, Пречистая рачительнице, мощами угодников божиих, яко верными Своими поборниками и стражами, столпы синайскаго монастыря утвердила еси, да послужат молитвы их опорой всего рода христианскаго. Мы же, вкупе с обителестолпным воинством Твоим,  поем Ти: Аллилуйя.   

                                          Икос 8

Воинства Небесных Сил непрестанно воспевают Тя, о  Всецарице, Жених Церкви Своей и всякой души христианской, Христос Бог наш, в Пречистом Твоем образе благость Свою и долготерпение роду человеческому явил есть. Ты же, яко Владычица и Хранительница монашескаго чина, сие воинство Египта уловив во всесвятые руце Свои, нетленный свет Девства и Рождества всей вселенней и монашескому лику в горе Синайстей явила еси, вопиющаго Ти:
Радуйся, любящих Тя неуклонно утишающая; радуйся, монашеское житие от демонскаго дручения свобождающая. Радуйся,  на помощь единствующим скоро поспешаеши; радуйся, вои монашествующих николиже оставляеши. Радуйся, ветхопещерников славная похвало и наследие; радуйся пыстынолюбцев верное надеждо и упование. Радуйся, пустыннограждан крепкое ограждение; радуйся, пустыннопеснопевцев истинное наслаждение. Радуйся, жестокожитийствующих в подвизех роса прохлаждающая; радуйся, живожертвеннаго воинства, струя Духа Святаго неиссякаемая. Радуйся, правоживущих отшельников удобрение; радуйся ликов правомудрствующих  славословие:
Радуйся Одигитрие Дексиократуса, обители  Синайстей похвало и украшение.

                                      Кондак 9

Яко Боготечная звезда, икона Твоя, Богомати Владычице, благоволением Твоим земли Египетстей и горе Синайстей  в наследие благодатное даровася. Ты же, яко Владыцица воинства небеснаго, веру и усердие наши приими; веси бо  любовь пламенную к Тебе Престолов, Херувимов и Серафимов, видиши поклонение Ти Властей, Господств и Сил, знаеши и любовь нашу к Тебе, еюже сердца наша к Пречистому Твоему образу пламенеют, Твоими молитвами, да сподобимся и мы, грешныя, вкупе с Небесными силами непрестанно пети Тебе: Аллилуиа.

                                        Икос 9

Безначальный Отец, Сын собезначальный, Утешитель благий избра Тя, Пресвятая Дево, живу, праву и истинну Христа Бога нашего чисту и непорочну палату. Ты же, Богородительнице, человеческое естество нам явила еси, из шуии в десную руку Сына Своего в первообразе иконы Одигитрии Дексиократусы приимши. Твое человеческое естество ублажая  и дивяся,  како млеком доящи, Матерь бываеши Христу, сотворшему Небо и землю, к Тебе, Заступнице небесная, во умилении сердечнем вопием:
Радуйся, колеснице пресвятая Сущаго на Херувимех; радуйся, селение преславное Сущаго на Серафимех. Радуйся, Пресущественней Троицы, Похвало; радуйся, родительнице Агнца Божия. Радуйся, потопляющая тристаты демонския; радуйся, в помощь творящая вои ангельския. Радуйся, немощь падших врачуящая; радуйся, души в небеса возводящая. Радуйся, светильниче свещеносный; радуйся, престоле огнезрачный. Радуйся,  поле благоцветное; радуйся, древо благосеннолиственное. Радуйся, Одигитрие Дексиократуса, обители  Синайстей похвало и украшение.

                                           Кондак 10

Вси вернии с радостию и утешением поклоняются образу Твоему святому во обители Синайской пребывающему, на немже умиленно взираеши на Богомладенца Христа  на десной руце  Твой воседшаго,  сего ради молим Тя, Всеблагая, яко Матерь вся содержащаго в деснице Своей Владыки: обитель Синайскую сохраняй, Богородительнице Пречистая, в Тебе бо она в земли египетстей верно царствует, в Тебе утверждается и Тобою побеждаяй, низлагает демонския искушения, верно вопия Ти: Аллилуйя.

 
                                        Икос 10

От Отца безлетна Сына в лето, Богородительнице, неискусомужно родила еси, яко же Матерь вся содержащаго в деснице Своей Владыки, славим Тя во вся веки. Сподоби нас чистым сердцем воспевати Троицу Простую, Несозданную, Безначальное Естество, Нераздельную Существом, в вышних песнословимую, идеже Ты безлетно пребываеши и молиши о всех нас, Тебе вопиющих:
Радуйся, яко безлетна Сына во спасение нам неискусомужно родила еси; радуйся, Милостиваго  Создателя и Сына Твоего нам даровала еси. Радуйся, яко Твоими молитвами Нераздельная Единица кающихся нас приемлет; радуйся, яко Твоим предстательством Святая Троица согрешивших нас от огня вечнаго спасает. Радуйся, яко Твоими молитвами от бед сохраняемся; радуйся, яко Твоим заступлением укрепляемся. Радуйся, Пречистая Дево, Надеждо к Тебе притекающих и пристанище в бури сущих; радуйся, Богородице, Спасение Тебе поющих. Радуйся, яко Твои есми рабы, не презри нас, грешных; радуйся,  Воеводо Небесных сил помилуй нас грехми обремененных. Радуйся, Одигитрие, яко в покаянии лобызающим лик Твой подаеши умиление, радуйся, Владычице,  яко в сокрушении покланяющимся лику Твоему даруеши спасение. Радуйся Одигитрие Дексиократуса, обители  Синайстей похвало и украшение.

                                         Кондак 11

Витийство наше песненное не довлеет к прославлению многих Твоих чудес, Богородице, ихже от святыя иконы Твоея в земле Египетской явила еси и присно являеши верным христианом. Троическому Единству Божества, Единоцарственному и Сопрестольному и Нераздельному, вопием песнь великую, прославляем Отца и Сына и Божественнаго Духа, яко в горе Синайстей  явися  земле Египтской единовластный образ Одигитрии Дексиократусы, спасение и утешение всех христиан, вопиющих ему: Аллилуйя.

                                         Икос 11

Отче Вседетелю, Сыне и Божественный Душе, Светове и Свет, и Свята Три, и Едино Свято, Тя поем и славим, всех Бога, даровашаго нам, грешным, образ святыя иконы Богоматере. Хвалим Тя, благословим Тя, покланяемся Ти, Богородительнице, яко родила еси Единаго Христа Бога и Сама отверзла нам Врата Небесная, вопиющим Ти:
Радуйся, Отроковице, вместившая Пребезначальнаго; радуйся, Чистая Дево, питавшая вся Животворящаго. Радуйся, в Тебе бо Единаго Бога  поем; радуйся, якоже Тобою Безначальнаго Сына рождество славим. Радуйся, рожденнаго Тобою  Христа Бога нашего восхваляем; радуйся, страдавшаго спасения нашего ради Сына Твоего прославляем. Радуйся, якоже Единопрестольное Богоначалие прослави Тя во вся веки; радуйся, якоже и мы величаем  Тя по вся дни. Радуйся, Тобою преестественному Рождеству Сына Твоего покланяемся; радуйся,  ликом Твоим чудотворным услаждаемся. Радуйся, яко Ты еси испытающая сердца народов и властей; радуйся, яко Ты вразумляеши на благая деяния князей. Радуйся Одигитрие Дексиократуса, обители  Синайстей похвало и украшение.

                                          Кондак 12

Видя доброзрачный лик Твой, Одигитрие Дексиократуса, емуже поклоняяся, Отца прославим, Сына превознесем, Божественному Духу верно поклонимся, Троицу Нераздельную, Единицу по Существу, Свет и Светы, Животворящую и Просвещающую концы прославим, в Ней бо и царствуем, в Ней же побеждаем всякия напасти и чудотворною иконою Твоею пленяя демонские ратники проходим искушение юдоли сея земныя, вопия Ти: Аллилуйя.


                                           Икос 12

Безсеменнаго зачатия Рождество несказанное, Купина Неопалимая явила нетленен Плод, Божие бо Рождение обновляет естества чин. Яко Богоневестную Матерь и Приснодеву Тя ублажаем, Богородице, Иисуса Христа рождшая, Пречистая Дево, едина нескверная, молитв Твоих ради, невещественный бо вжигающе огнь душ наших, настави нас к разуму божественному и от всякия скверны очисти всех нас, Тебе вопиющих:
Радуйся, всей вселенней и земли Египетстей спасение; радуйся, дома Господня в горах Синая во веки веков утверждение. Радуйся, огня монашеских искушений прохлада; радуйся, иноческих подвигов услада. Радуйся, Благодатная, непрестанно о нас Христа молящая; радуйся, радость рождества Христова нам всем принесшая. Радуйся, Тобою бо утешение в будущем веке обретем; радуйся, Тобою бо  сердца наши в порфиру заповедей Господних облечем. Радуйся, к смертным  вечное благоволение, радуйся, душ наших к Богу дерзновение. Радуйся, ада и смерти попрание; радуйся, жизни райския дарование. Радуйся Одигитрие Дексиократуса, обители  Синайстей похвало и украшение.



                                         Кондак 13

Наслаждающеся Пречистая Твоих дарований от чудотворной иконы твоей в земле Египетстей источающихся, о, Всепетая Мати, Богородице Дево, благодарственное воспеваем Ти пение, ведуще Тя, спасительницу душ наших, Одигитрия Дексиократуса, ныне же приими убогое наше приношение молитв наших пред иконою Твоею приносмых, и от всякия напасти избави всех, и будущия изми муки нас о Тебе вопиющих: Аллилуиа, аллилуиа, аллилуиа.




                                           Молитва

О, всепетая Мати, Одигитрия Дисксиократуса! Милосердия двери отверзи нам, благословенная Богородице, помози  нам милосердная, потщися, погибаем от множества прегрешений наших. Матерь Тя Божию свемы вси, Деву воистину и по рождестве явльшуюся, любовию прибегающии к иконе Твоей: Тебе бо имамы, грешнии предстательство, Тобою стяжахом надежду спасения душ наших, едина всенепорочная. О, Пресвятая Госпоже Владычице Одигитрия Диксиократуса! Помошнице обидимых, убогих заступнице, печальных утешение, алчуших кормительнице, нагих одеяние, больных исцеление, христиан всех поможение и заступление! Милостию Твоею спаси и помилуй род христианский, и умоли, Госпоже, из Тебе воплотившегося Бога и Спаса душ наших, Ииуса Христа, да избавит нас от глада и потопа, от огня, меча, нападения вражия  и  напрасныя смерти.
О, Всемилостивая Богородице Владычице, Одигитрия Диксиократуса, просвети наш ум и очи сердечныя, еже ко вразумлению и спасению!  Сподоби вся ны, мирския и монашествующия, молитвами Твоими в Царствие Святыя Троицы внити, во веки веков зрети Тя и Сына Твоего иногдаже на десной руце Твоей возлежавшаго, яко держава Его благословена и препрославлена и нераздельна со Безначальным Его Отцем и с Пресвятым и Благим и Животворящим Его Духом ныне и присно, и во веки веков. Аминь.

[/spoiler]