О великий Христов угодниче и преславный целебниче, великомучениче Пантелеимоне! Душею на Небеси Престолу Божию предстояй и Триипостасныя Его славы наслаждаяйся, телом же и ликом святым на земли в Божественных храмах почиваяй и данною ти свыше благодатию различные источаяй чудеса. Призри милостивым твоим оком на предстоящия люди и честней твоей иконе умильно молящияся и просящия от тебя целебныя помощи и заступления: простри ко Господу Богу нашему теплые молитвы и испроси душам нашим оставление согрешений. Се бо мы, за беззакония наша не смеюще возвести очес наших к высоте небесней, ниже вознести глас молебный к Его в Божестве неприступней славе, сердцем сокрушенным и духом смиренным тебе ходатая милостива ко Владыце и молитвенника за ны грешныя призываем, яко ты приял еси благодать от Него недуги отгоняти и страсти исцеляти. Тебе убо просим: не презри нас недостойных, молящихся тебе и твоея помощи требующих, буди нам в печалех утешитель, в недузех лютых страждущим врач, напаствуемым скорый покровитель, очесы недугующим прозрения податель, ссущим и младенцем в болезнех готовейший предстатель и исцелитель; исходатайствуй всем вся, яже ко спасению полезная, яко да твоими ко Господу Богу молитвами получивше благодать и милость, прославим всех благих источника и дарователя, Бога, Единого в Троице Святей славимаго, Отца и Сына и Святаго Духа, ныне и присно, и во веки веков. Аминь.
Это какой язык? Вроде и не совсем русский, но все понятно.
Это какой язык? Вроде и не совсем русский, но все понятно.