Молитвослов

[Раб божий Константин]

Акафист мученице Зинаиде.
[spoiler]Тропарь, глас 4
Агница Твоя, Иисусе Зинаидо зовет велиим гласом: Тебе, Женише мой, люблю, и Тебе ищущи страдальчествую, и сраспинаюся и спогребаюся крещению Твоему, и стражду Тебе ради, яко да царствую в Тебе и умираю за Тя, да и живу с Тобою: но яко жертву непорочную приими мя с любовию пожершуюся Тебе. Тоя молитвами, яко Милостив, спаси души наша. 

 

Кондак, глас 2
Храм Твой всечестный, яко цельбу душевную обретше вси вернии, велегласно вопием ти дево мученице Зинаидо, Великоименитая! Христа Бога моли непрестанно о всех нас.


Кондак 1
Избранней Невесте Христовой Зинаиде от любве сердечныя исходящее сие акафистное сплетенное пение, яко много могущей своими праведными мученическими к Богу молитвами споспешествовати нашему спасению и от всяких бед избавити к ней притекающих, сего ради согласно зовем вси: Радуйся, святая мученице Зинаидо, молитвеннице о почитающих тя.

Икос 1
Ангелообразно в мире поживши всеблаженная страстотерпице Зинаидо, ангельский лик на небеси восполнила еси. Но воспевая ныне со ангелы и священных дев мучениц ликом песнь Триединому Богу, не забуди и нас земнородных сродних твоих в день страсти твоея воспевающих сице: Радуйся, избранная угоднице Божия; Радуйся, верная раба Господа Твоего; Радуйся, агнице, Агнцу Христу, последовавшая; Радуйся, Невесто Христова прекрасная; Радуйся, чистотою девства просиявшая; Радуйся, мучений кровьми украсившая. Радуйся, святая мученице Зинаидо, молитвеннице о почитающих тя.

Кондак 2
Видяще святая Зинаидо с сестрою твоею Филониллою житие и труды сродника твоего пресветлаго Павла, прежде церковь Божию гонившаго, последи же по премногу великими апостольскими подвиги ю разширившаго и украсившаго и сами восхотесте всею душею Христу работати: тем же от идол бездушных отвращении и вере Христовой святым Павлом научении возопили Богу: Аллилуиа.

Икос 2
Разум Богопросвещен приявши премудрая Зинаидо, уразумела еси суету мира сего и избрала еси едино души твоей потребно еже благоугодити Богу, темже с Филониллою сродницей по плоти и духу себе, стяжаний матере своея отвергшися и апостолом подражающи Христа проповедовала еси. Обращении же тобою к вере истинней, возопиша к тебе таковая: Радуйся, мудрая дева, мира отвергшаяся, да Христа приобрящеши; Радуйся, мудрая дева, родительницу оставльшая да к Богу Отцу Небесному, приближишися. Радуйся великаго Павла ученица пресветлая; Радуйся, духом Евангелия от языков апостола упоенная. Радуйся, от Тарса изшедшая и апостольский путь прошедшая; Радуйся, Царство Небесное людем благовестившая. Радуйся, святая мученице Зинаидо, молитвеннице о почитающих тя.

Кондак 3
Силою благодати Христовы одеявшися преславная Зинаидо, навыкла еси силе и художеству врачебному и Самому Господу, яко верная Его ученица, подобящися проходила еси вси грады проповедающи Евангелие и безсребренно врачующи всякий недуг и всяку язву в людех. Исцели убо и наши недуги душевные и телесные, святая дева, данною тебе благодатию, да выну вопием о тебе Богу: Аллилуиа.

Икос 3
Имуща в сердце и помышлении своем словеса Давида пророка «се что добро или что красно, но еже жити братии в купе». Во граде Деметриадский святии сестренницы Зинаидо и Филонилло достигшаго и в вертеп некий вшедше, тамо житие равноангельское провождаху не престающи ова недуг людей врачевати, ова же в подвизех и чудесех святи, обоя в купе Господа в душах и телесех прославляти и проповедати, таковому убо дивному житию вашему чудящеся зовем: Радуйся, Зинаидо безсребнице предивная; Радуйся, многия и лютыя болезни человеком отгнавшая. Радуйся, с Филониллою долгому бдению и пощению себе вдавшая. Радуйся, чудна знамения совершившая. Радуйтеся, в купе Давидски добро и красно течение скончавши. Радуйтеся, сестры по плоти сестрам по духу себе явивши. Радуйся, святая мученице Зинаидо, молитвеннице о почитающих тя.

Кондак 4
Бурею злобы и зависти бесовския дышуще на вас, блаженные сестры, окрест живущия языцы, яко умалися вами суетное их идолом, паче же бесом поклонение, ради проповеди вашея чудес и знамений, неистовством воспылаша на вас, убити от отца лжи вас поучашеся во мраце скверны своея, не ведуще пети Богу: Аллилуиа.

Икос 4
Слышавше премногую твою добродетель, блаженная Зинаидо, люди благоразумныя отовсюду устремляхуся к тебе, с верою во врачующую благодать в тебе сущую и приемлюще скорая исцеления, прославляху Бога и тебе целительницу и угодницу Его величаху пении сими: Радуйся, помазанная миром благодати; Радуйся, Божественных даров приятелище; Радуйся, милостей Господних источниче; Радуйся, скорая помощнице страждущих; Радуйся, наставнице заблуждающих; Радуйся, благочестивых изрядная славо. Радуйся, озлобляемых твердая стено. Радуйся, святая мученице Зинаидо, молитвеннице о почитающих тя.

Кондак 5
Боготечней звезде была еси подобна, прехвальная, во граде Деметриаде, страны светом дел твоих освящающая, слово благовестия знаменьми утверждающи, всех научающая Истинному Солнцу Правды Христу Богу пети: Аллилуиа.

Икос 5
Видевше твое великое к болящим телом и душею людем сострадание, к тебе притекающим светлейшая Зинаида, озари убо от горних высот светом твоего врачевания и наша недугующая телеса и грехом потемненныя души, да воставше и исправившеся тобою радостно вопием ти: Радуйся, мироварнице на вся недуги врачевания источающая. Радуйся, врачебнице быстрая и милосердная. Радуйся, сострадательнейшая человеком благодетельнице; Радуйся, язв телесных и скорбей душевных наших посетительнице. Радуйся, требующих заступления твоего не отвращающая; Радуйся, выну о нас пред Богом ходатайствующая. Радуйся, святая мученице Зинаидо, молитвеннице о почитающих тя.

Кондак 6
Проповедником духовным апостолом истинно сравнилася еси всехвальная дева и к тебе бо словеса Владычная преложившася, егда рече своим учеником: «Шедше проповедуйте, яко приближися Царствие Божие, болящия исцеляйте, прокаженныя очищайте туне приясте, туне дадите». Вси люди научающе верно Богу пети: Аллилуиа.

Икос 6
Возсия миру свет истины Евангельския и ожесточися и очистися в безсилии своем прогоняемая им тьма прелести бесовския: не терпя бо своего поражения, лукавый змий тела мучеников яростно сокрушает, но тем паче душам их ко Христу скорее прейти возмогает. И зде убо духом злобы научении языцы безумнии приведши нощию, яко сынове тьмы сущии в вертеп святых дев Зинаиды и Филониллы, тела их каменьми до успения смертнаго побиша, их же душ в селения райския среташе, чини ангельстии возопиша сицевая: Радуйтеся, святии мученицы добре страдальчествовавши и ныне венчающиеся. Радуйтеся, лики безплотных и мученик число предопределенное восполняющии. Радуйтеся, Стефану первострадальцу образом кончины подобныя; Радуйтеся, Фекле, жен начальнице нравов жития равныя. Радуйтеся, телесы убиении, души же ваша в руце Божии и муки их не прикосневся; Радуйтеся, сынами тьмы во тме нощней посечении, но светло и ясно память ваша на земли славится вкупе с Филониллою. Радуйся, святая мученице Зинаидо, молитвеннице о почитающих тя.

Кондак 7
Хотящи Господу благоугодити оставила еси дом родительский и в вертеп вселилася еси, в вертепе же ради Рожденнаго: и тамо заповеди Его сотворивши и иных научивши, даже до смерти мученической верна была еси с другинею твоею Ему, страдалице Зинаидо, темже за сие венец правды ныне приявши, поеши Тому вечно на небеси: Аллилуиа.

Икос 7
«Новую заповедь даю вам, да любите друг друга, – рече Господь ко избранным Его – больше бо сея любви никтоже имать, да кто душу свою положит за други своя». Сея заповеди верную исполнительницу видим тя Богоизбранная мученице Зинаидо, любовь велию к Богу и ближнему своему в житии явившую, и душу свою за други, паче же за Христа яко друга и жениха своего положившую. Сего ради и мы с любовию днесь вопием ти: Радуйся, любвеобильная страдалице, милосердием к человеком преисполненная: Радуйся, дивная страстотерпице ближнего своего, яко сама себе возлюбившая. Радуйся верная ученице Христова, заповеди Его прекрасно соблюдшая: Радуйся, за Христа и добрая дела твоя от злодеев каменьми побиенная. Радуйся, сими каменьми, ко краеугольному камню – Христу, любовию приобщившаяся. Радуйся, яко голубице чистая, душею к Чистейшему скоро воспарившая. Радуйся, святая мученице Зинаидо, молитвеннице о почитающих тя.

Кондак 8
Странное и преславное чудо видим на тебе добрая мученице Зинаида, тебе бо от любви Божией, яко же твой сродник Павел – ничтоже разлучити возмогло есть: ни скорбь, ни теснота, ни гонение, ни глад, ни нагота, ни беда, ни меч каменный, никакая тварь, ни живот, ни смерть разлучи. Ты душею к Богу в райския селения возлетевши, паче с Ним соединилася еси, но и от человек по смерти не разлучалася еси, приклоняющи милостиво ухо ко всем тебе верою призывающим и помогающи всем чтущим память твою, Богу же вопиюще: Аллилуиа.

Икос 8
Весь еси делание и желаний краю, весь еси сладость моя – Сладчайший Иисусе – тако взывала еси мученице Зинаидо в молитвах своих ко Господу, всею душею и сердцем к Тому горевшая, егда нечестивии человецы каменьми метаху на тя, и горькое убиение свое сим весьма усладивши и к Богу возшедши – услади и наша скорби, блаженная дево, да сладостно зовем ти: Радуйся, святая горце Сладчайшаго возлюбившая: Радуйся, славная, во Иисусову сладость горесть земную обратившая. Радуйся, язвы Господа твоего на теле твоем понесшая: Радуйся, ангельски тому послужившая: Радуйся, злобы неверных не устрашившаяся: Радуйся, верных сердца возвеселившая. Радуйся, святая мученице Зинаидо, молитвеннице о почитающих тя.

Кондак 9
Всякое естество удивися Зинаидо, сиянию в тебе благодати и богатству добродетелей: ангелоподобной чистоте твоей, мужеству в скорбех и страданиях. В немощнем женском телеси проявленному, крепкой любви ко Христу и многому состраданию к людем, в них творила еси преславная во еже пети: Аллилуиа.

Икос 9
Ветии многовещанные не возмогут по достоянию восписати подвиги твоя, добропобедная мученице, како непобедимою Божиею благодатию, юная дева сущи победила еси древняго исконнаго врага и посрамила еси идольскую прелесть, множество душ ко Христу приведши. Мы же удивления исполнении, в немощи витийства нашего смиренно взываем ти: Радуйся, ангелов радостное зрелище и человеков благоговейное удивление: Радуйся, демонов горькое рыдание и служителей их безсильное ожесточение. Радуйся, кровь за Христа пролившая: Радуйся, тело за Него к мученической кончине предавшая. Радуйся, с великим Павлом твоим течение совершившая и веру соблюдшая. Радуйся, во дворех перворожденных на небеси вселившаяся. Радуйся, святая мученице Зинаидо, молитвеннице о почитающих тя.

Кондак 10
Спаситель и Господь, многажды утешая други своя вещаше Сам пречестными усты своими: «Поминайте слово еже аз рех вам. Несть раб болий Господа своего, аще мене изгнаша и вас ижденут; аще слово Мое соблюдаша и ваша соблюдут». Сия вся сбывшаяся видим на тебе святая Зинаида, тебе бо верную рабу Господню еще и погнаша помнози неверии во образ Господа твоего, но кольми паче мнози от человек твое слово соблюдоша! С ними и мы о тебе вопием Спасу: Аллилуиа.

Икос 10
Царю и Богу своему яко жертва благоприятная принеслася еси, богомудрая страстотерпице, темже со Христом в небесной сени пребывающи, и нас пред престолом Его не забуди, зовущих ти сице: Радуйся, с радостью понесшая за Христа поругание: Радуйся, праведное приявшая по трудех твоих от Него воздаяние. Радуйся, агнице кроткая от лютых воинов телом растерзанная: Радуйся, ластовице быстрая от духов злобы поднебесных на мытарствах душею не удержанная. Радуйся, в радость Господа твоего скоро вшедшая: Радуйся, и наша прошения к нему возносящая. Радуйся, святая мученице Зинаидо, молитвеннице о почитающих тя.

Кондак 11
Пение сие акафистное, вемы яко много не довлеет ко истинному похвалению твоих добродетелей святая мученице, обаче елико мощно может помощи твоя праведная молитва нам недостойным и за сия малыя песнопения аще токмо от чистаго сердца тыя вознесем и с любовию о тебе возопием Богу: Аллилуиа.

Икос 11
Светозарнаго дне всеобщаго мертвых воскресения и страшнаго суда Божия чающе ужасаемся лютых наших деяний и безмерных грехов, имиже ежечасно прогневляем Создателя и Спаса нашего. Но имеюще тебе, блаженная предстательнице за нас пред Господем, яко мудрую Евангельскую Деву, жениха в полунощи светло сретившую, надеемся и нам дверей чертога небеснаго не затворится твоими молитвами зовущих ти таковая: Радуйся, дево, премудрая со светильником горящим полным елея добрых дел ко Христу исшедшая: Радуйся, на брак агнчий со избранными радостно и победоносно во светлой одежде вшедшая. Радуйся, пред престолом Агнца закланнаго с душами убиенных за Слово Его, песнь возносящая: Радуйся, на престоле Славы судити хотящаго, о мире умоляющая. Радуйся, наипаче о множестве тезоименитых твоих на земли живущих, спасения пред Богом споручнице: Радуйся, и в вере усопших тезоименитых своих, грехов прощения и райских дверей отверзения молебнице. Радуйся, святая мученице Зинаидо, молитвеннице о почитающих тя.

Кондак 12
Благодать от Бога дата ти бысть еще в жизни временной, преблаженная, врачевати душевныя и телесныя болезни к тебе притекающих, веруем убо яко в жизни вечной и блаженной у Бога, прославльшаго тя и к себе приблизившаго наипаче сих дарований преисполнена еси, и можеши помощи всякому человеку во всяцей скорби и болезни с верою к тебе прибегающему и Богу православно в теплоте сердца возопившему: Аллилуиа.

Икос 12
Поюще твоя апостолом равныя труды, подвижническое житие и страдальческую кончину, приснославная Зинаидо, молим тя простри твою с небеси помощь на нас, живущих во тьме страстей и искушений и твоим пред Богом дерзновением скоро воздвигни от одра немощи души и тела вопиющих ти: Радуйся, с Мариею, Еленою, Ниною, Ольгою и иными, яко их подвигом по силе твоей уподобившаяся славимая; Радуйся, с мученицами девами Феклою, Варварою, Екатериною, Анастасиею и сестрою Филониллою и прочими во светлом лике торжествующая. Радуйся, с преподобных дев Пелагиею, Феврониею, Мариею и иных чины, яко отшельнице ликовствующая; Радуйся, с Космою, Дамианом и Пантелеимоном и всеми целители, яко безсребнице прославляемая. Радуйся, со Ангелы и всеми святыми в торжестве церкви небесней пребывающая. Радуйся, и нас грешных от единства церкви земныя не отпадающих не забывающая. Радуйся, святая мученице Зинаидо, молитвеннице о почитающих тя.

Кондак 13
О, преславная страстотерпице Христова Зинаидо, кроткая Его угодница и всегдашняя о нас к Нему молебнице. С верою, надеждою и любовию ко твоему предстательству пред Богом по Богородице нас притекающих приими и от всяких болезней, бед и смерти умоли, да с тобою взываем Богу: Аллилуиа.

(Этот кондак читается трижды, затем икос 1 и кондак 1)

Величание, глас 8

Величаем Тя святая мученице Зинаидо, и чтим честная страдания твоя, яже за Христа, претерпела еси.

Молитва святой мученице Зинаиде

О, прехвальная мученице Христова Зинаидо, благонадежная наша пред Господем предстательнице. Тебе припадаем и молимся: даждь нам быть причастником любве твоея к Богу и ближнему – еюже при жизни святая твоя душа преисполнена бысть. Озари нас истинною, просвети ум и сердце светом Божественнаго учения, научи нас тебе подражати верно, Бога и ближнего нашего любити и заповеди Господа совершати непогрешительно, да чада света явимся воистину. Призри благоутробно на всякую душу верных твоих почитателей, милости и помощи твоея ищущих. Буди всем нам в болезнех целительница, в скорбех утешительница, в печалех посетительница, в бедах и нуждах помощница, в час же смертный милостивая покровительница и защитительница и всем вся прошения ко благу исполни. Да при помощи молитв твоих даждь нам спасение вечное получити и Царствие Христово унаследовати, славяще дивнаго во святых своих Бога Отца и Сына и Святаго Духа во веки веков. Аминь.[/spoiler]

[Раб божий Константин]

Акафист святой преподобной Зосиме, Эннатской, Уфимской.
[spoiler]Кондак 1
Избранной праведнице, дивной предстательнице пред Богом, /пресветлому светильнику страны Уфимския и Оренбургския, /Боголюбивой и Боголюбезной мати Зосиме, /благодетельными чудотворениями утешающей и наставляющей поклоняющихся с верою святей раце Твоей, /ты нас омраченных греховными страстьми, просвети /и Твоими молитвами от всех бед избави, да зовем ти:
Радуйся, преподобная мати Зосимо, /теплая о нас к Богу молитвеннице.

Икос 1
Ангельский нрав и душу непорочную имея от святые купели крещения, избегла еси обычных света сего суетств и соблазнов, в тайне чистым сердцем моляся ко Единому и Всеблагому Богу, милостивно взирающему на кротких и смиренных, сего ради вопием ти:
Радуйся, дивное явление святыни;
Радуйся, Отцу Небесному возлюбленная;
Радуйся, Сыну Божию вожделенная;
Радуйся, Святому Духу сосуде другий и чистый;
Радуйся, Царицы Небесныя пламенная почитательнице;
Радуйся, праведником святым всем сликовнице.
Радуйся, Троичного света зрительнице;
Радуйся, в Царство Небесное путеводительнице.
Радуйся, Церкви Христовой украшение;
Радуйся, земных упование.
Радуйся, венец нетления носящая;
Радуйся, надежда наша непостыдная.
Радуйся, преподобная мати Зосимо, теплая о нас к Богу молитвеннице.

Кондак 2
Видищи народ жития твоего образ странный и чудный, преподобная мати Зосимо, вельми удивися; тем же и мы, размышляя о твоих подвигах, поем Богу: Аллилуиа.

Икос 2
Разуму податися нам Божественному помолися, преподобная мати Зосимо, ты бо, Божественным сияющи светом, со ангелы водворяющаяся, приими от нас хваление сицевая:
Радуйся, мирский страстей непреимшая;
Радуйся, от младенчества молитву ко Господу устнами творившая.
Радуйся, родителей твоих почитательнице;
Радуйся, безмолвия любительнице.
Радуйся, страха Божия стяжательнице;
Радуйся, сверстников твоих пример благонравия.
Радуйся, благочестия ревнительнице;
Радуйся, высото послушания.
Радуйся, Небесныя исповеднице;
Радуйся, Божиих дарований исполнение.
Радуйся, в человецех чудное удивление;
Радуйся, Слава Небесная.
Радуйся, преподобная мати Зосимо, теплая о нас к Богу молитвеннице.

Кондак 3
Силою Божественной любви движима, стопы ко Святому граду Иерусалиму направила еси, видя Божественный огнь благодатный на Гробе Господнем в Великую Субботу чудесно возгораемый, и сим огнем освященная, всехвальная мати Зосимо, устремилася совершенно во след Христа Спасителя нашего, тамо блаженный Андрей, на руки тебя поднявши, предсказал подстриг в схиму епископом Андреем Уфимским. Ты же во умилении сердца воспевала Богу: Аллилуиа.

Икос 3
Имея помысл чист, вооружившися крепкою верою в Бога, пути спасительного держастася, преподобная мати Зосимо, его совершиста преславно; народ же земли Уфимския и Оренбургския нача благоговейно тебе почитати, и мы, удивлением объяты, возносим к тебе хвалебные песни:
Радуйся, пламень любве к Богу имевшая;
Радуйся, не единожды в Иерусалим ходившая.
Радуйся, на гору Елеонскую восходившая;
Радуйся, воду из Иордана приносившая.
Радуйся, водою тою ножки младенца Михаила исцелившая;
Радуйся, монашеский путь ему предсказавшая.
Радуйся, в отрочестве Его крестом из Иерусалима благословившая;
Радуйся, пред Гробом Господним молитвеннице предивная.
Радуйся, о всех верных ходатаице неусыпная;
Радуйся, постников благодатное удобрение.
Радуйся, преподобная мати Зосимо, теплая о нас к Богу молитвеннице.

Кондак 4
Бурю страстей многомятежного мира возненавидевшая, преподобная мати Зосимо, устранилася еси сует, ныне же к Богу предстоише с Небесными силами и поеши купно с ними: Аллилуиа.

Икос 4
Слышаще люди вернии о твоем святом житии, о мати Зосимо, просят тя: просвети и вразуми наши сердца, мы же с благоговением вопием ти сице:
Радуйся, тесный путь спасения возлюбившая;
Радуйся, младенческое незлобие имевшая.
Радуйся, благодатию нас озарившая;
Радуйся, имя Иисуса в сердце своем присно носившая.
Радуйся, ярем Господень на выю возложившая;
Радуйся, крест Христов радостно понесшая.
Радуйся, славу Божию умножающая;
Радуйся, Ангельскую чистоту являющая.
Радуйся, монашеского послушания красото;
Радуйся, Уфимския и Оренбургския страны священное доброто.
Радуйся, всех благочестиво жити хотящих наставнице;
Радуйся, делательнице благая.
Радуйся, преподобная мати Зосимо, теплая о нас к Богу молитвеннице.

Кондак 5
Божественным лучезарным светом явилася преподобная мати наша Зосимо всем притекающим к тебе. Всякие претерпела болезни, скорби, лишения, гонения; своей жизнию показуеши пример благочестия, взывая к Богу: Аллилуиа.

Икос 5
Видя ревность твою, Господь призва Тя упасти овцы своя в годину гонений от безбожной власти; избранница Божия в земли Уфимской и Оренбургской явилася еси. Сего ради и мы, ликующе, воспоем ти:
Радуйся, строгой иноческой жизни держалася еси;
Радуйся, за твои молитвы грады и веси сохраняются.
Радуйся, истинная Божия угоднице;
Радуйся, Ангелом собеседнице.
Радуйся, долголетием от Бога одаренная;
Радуйся, Богом укрепленная.
Радуйся, об изгнании из обители предсказавшая;
Радуйся, сокровищ себе на земле не стяжавшая.
Радуйся, вражию лесть не боятися нас научающая;
Радуйся, за землю русскую, попираемую, воительнице.
Радуйся, мудрая сестрам советнице;
Радуйся, Покрово- Еннатския обители хранительнице.
Радуйся, преподобная мати Зосимо, теплая о нас к Богу молитвеннице.

Кондак 6
Проповеднице смирения и покаяния была еси мати; примером жития твоего незлобие и всепрощение показуя, яко же свеще неугасимая тьму неведения и уныния от приходящих к тебе отгоняла еси и всех увещевала плоть покоряти и чистым сердцем пети Богу: Аллилуиа.

Икос 6
Возсияла еси на горах Уральских, яко столп утверждения верных, святая мати Зосимо, во мраке бытия сего светивший людям. Приемшая от Господа благодать разумения о Святей Троице во Иерусалиме, преподобная мати Зосимо, избавила еси скоро население градов Уфы, Стерлитамака, дальних стран и весей от вражиих наветов и просветила еси сиянием благодетельных чудес твоих. И ныне никто же умолчит вопити тебе:
Радуйся, стране твоей Уральской слава и утверждение;
Радуйся, веры православныя среди неверных проповеднице.
Радуйся, дары Духа Святаго в сердце твое приимшая;
Радуйся, благодати Божией чистая струя.
Радуйся, именем Иисуса враги невидимыя отражавшая;
Радуйся, чистая птица, в гнезда небесныя приятая.
Радуйся, яблоко благовонное, верных души благоухающее;
Радуйся, прекрасная лилие, верных сердца услаждающая.
Радуйся, райского древа ветвь младая;
Радуйся, дивный елей милости Божией нам источающая.
Радуйся, меч духовный подъявшая;
Радуйся, молитися за ны ко Господу дерзновение обретшая.
Радуйся, преподобная мати Зосимо, теплая о нас к Богу молитвеннице.

Кондак 7
Хотя человеколюбец Господь явити в тебе, преподобная, свое неизреченное к людям милосердие, показа тя яко воистину светило Богосветлое: скорым твоим ходотайством чудеса многия преславно совершаются. Ты же, старице богомудрая, и при жизни достигла посещения небесных служителей, благодарне прославляя Всвевышняго Бога: Аллилуиа.

Икос 7
Новую видяще тя подвижницу и чудотворицу в земли Уфимския и Оренбургския, издалече притекаху к тебе вернии в скорбех и болезнех, егда источник близ обители ископала ты еси, старице Зосимо, и благодать на воду сию у Святей Троицы испросила еси исцеляти телесныя и душевныя недуги. Сего ради взываем ти:
Радуйся, старице, раба Господня;
Радуйся, яко при жизни заботы Царицы Небесной сподобившаяся.
Радуйся, яко благословением и советами людям верующим помогающая;
Радуйся, яко из уст твоих верных благодатно напояющая.
Радуйся, прекрасный грозде, на трапезе Царевой положенная;
Радуйся, от Господа Бога даром исцеления и прозорливости прославленная.
Радуйся, и святыми небожителями неоставленная;
Радуйся, яко тело постом умертвила еси.
Радуйся, яко душу бденными молитвами оживила еси;
Радуйся, на мысленныя враги пост и молитву употребившая.
Радуйся, духовною пищею алчущия питающая;
Радуйся, святою водою из источника твоего жажду утоляющая.
Радуйся, преподобная мати Зосимо, теплая о нас к Богу молитвеннице.

Кондак 8
Странное и преславное чудо даровал ти Господь, мати Зосимо: болящих исцеляти и от ада спасати, от напасти охраняти. Исцеленные же тобою пели Богу: Аллилуиа.

Икос 8
Вся была в вышних и горе оком твоея души взирала еси непрестанно. И ныне заступаеши всех вопиющих сицевая:
Радуйся, провидице дивная;
Радуйся, Христу угодившая.
Радуйся, персте Божий, горняя нам указующий;
Радуйся, глас небесный, на подвиги всех зовущий.
Радуйся, чистая голубице, ветвь райскую имущая;
Радуйся, прегрешения сокровенныя прозорливо обличаеши.
Радуйся, яко благодати всем просиши;
Радуйся, яко молитву о всех приносиши.
Радуйся, яко равноангельно пожившая;
Радуйся, свидетельнице нем жизни безсмертныя.
Радуйся, грешников к исправлению приводящая;
Радуйся, на путь спасения наставляющая.
Радуйся, преподобная мати Зосимо, теплая о нас к Богу молитвеннице.

Кондак 9
Всю силу ангельскую, данную ти свыше, прияла еси, преподобная мати Зосимо, изгоняти силу вражию, и того ради, с кротостью и смирением врачевала одержимых бесом, да сие чудо видяще, вси людие, прославиша Бога, воспевают хвалу Ему: Аллилуиа.

Икос 9
Витии моговещаннии не могут разумети, како ты обличала безумие мира. Имуще тя, изрядная угоднице Христова Зосимо, воительницу противу силы бесовския, теплую молитвенницу и предстательницу пред Господом о нас недостойных, любовию твоею побеждаемии взываем ти сице:
Радуйся, плотския похоти умертвившая;
Радуйся, добродетель укрепившая.
Радуйся, Святых Духом селение;
Радуйся, скорбящим утешение.
Радуйся, силу чудес от Бога явившая;
Радуйся, одержимых бесом исцеляющая.
Радуйся, бесовские силы прогоняющая;
Радуйся, козни диавольские побеждающая.
Радуйся, болящих здравие и врачевание;
Радуйся, бедствующих защитительнице.
Радуйся, ко спасению предводительнице;
Радуйся, Небесного Царя избраннице предивная.
Радуйся, преподобная мати Зосимо, теплая о нас к Богу молитвеннице.

Кондак 10
Спастися всем хотяй преблагий Господь, яви тя, мати Зосимо помощницу православным людям во время богоборных гонений. Видя твое безмерное ко всем благосердие, кто не умилится, поя Богу: Аллилуиа.

Икос 10
Стена еси и твердое прибежище нам, на земли Уральской живущим и к заступлению твоему прибегающим, чудотворице Зосимо. Тем же в бедах, скорбех, обстояниих и лишениих многие пребывающие, радуяся твоему о них заступлению, благодарне возглашают ти:
Радуйся, мира и всех его прелестей презрительнице;
Радуйся, труждающихся помоще.
Радуйся, унылых бодросте;
Радуйся, немощных укрепление.
Радуйся, молчаливых и кротких радосте;
Радуйся, образ Богу преданности.
Радуйся, наставников наших от пагубы охранительнице;
Радуйся, Божиих повелений исполнительнице.
Радуйся, броня правды врагов отражающая;
Радуйся, на врагов стрелы страха испускающая.
Радуйся, щите твердый паче медяного;
Радуйся, защитнице наша неусыпная.
Радуйся, преподобная мати Зосимо, теплая о нас к Богу молитвеннице.

Кондак 11
Пение хвалебное приносим ти, мати Зосимо, по смерти возсшедшая в Горний Иерусалим. Егда приспе время разлучитися от телеси, о дивная мати, с благодарностью возопила еси Богу: Аллилуиа.

Икос 11
Светило была земли Уфимской и Оренбургской и всех окрест лежащих земель, ты бо, мати наша Зосимо, присельшися на небо душею своею, показуеши путь истинному спасению. Сего ради, прославляющи Тя, глаголем:
Радуйся, день смерти своей провидевшая;
Радуйся, всех близких к себе собравшая.
Радуйся, погрести себя не велевшая, пока не услышат ангельского пения;
Радуйся, наслаждающаяся Небесного веселия.
Радуйся, благоуханием и светом невещественным по смерти озаренная;
Радуйся, нетленною диадимою Царствия Христова украшенная.
Радуйся, яко кончину твою колокола чудесно известили еси;
Радуйся, гроб твой Ангелами сопровождался еси.
Радуйся, Херувимской песнею твое успение ангелы воспеша;
Радуйся, яко на могиле твоей столп огненный многим явился еси.
Радуйся, яко от гроба твоего вернии получают исцеление;
Радуйся, телес наших здравие и душ спасение.
Радуйся, преподобная мати Зосимо, теплая о нас к Богу молитвеннице.

Кондак 12
Благодать Божественную испроси нам, святая угоднице Божия, да научит ны подражати тебе в чистоте ангельстей и незлобии, да направит сердца наша к смирению, покаянию и неослабному исполнению заповедей Христовых: да дарует нам христианскую кончину и безбедно проведет нас через воздушные мытарства, да сподобимся тамо узрети Великого Бога и вечно пети Ему: Аллилуиа.

Икос 12
Поюще твое житие, восхваляем подвиги твои: пост, молитвы, всенощные бдения, плоти умершвление, духа сокрушение, смирение, кротость, безмолвие. Ты нам, мати преподобная, на пути правом луч еси указующий. Сего ради приими пение похвальное:
Радуйся, безропотно путь земной совершившая;
Радуйся, по кончине обитель Покрово-Еннатскую пришествием своим благословившая.
Радуйся, взором невидимо в ней прибывающая;
Радуйся, яко в ней ныне мощами твоими почивающая.
Радуйся, яко подвизающимся инокам благодать подающая;
Радуйся, души наши к стопам Господа повергающая.
Радуйся, страны Уральския новый щит и ограждение;
Радуйся, людям ея от искушений вражиих схимнице непреступная.
Радуйся, твоими чудотворениями Имя Господа прославляется;
Радуйся, яко имя твое во всех пределах земли воспевается.
Радуйся, Церковь Святую от раскола и неверия сохраняющая;
Радуйся, похвало обителеи монахов и всея страны нашея.
Радуйся, преподобная мати Зосимо, теплая о нас к Богу молитвеннице.

Кондак 13
О, всехвальная и предивная преподобная мати Зосимо, молимся и вопием ти всеусердно: приими малое сие от нас моление, умоли Милостивого Бога, да избавит нас от всяких бед и будущих мук, вопиющих: Аллилуиа, Аллилуиа, Аллилуиа.
Этот Кондак читается трижды. Затем Икос 1: Ангельский нрав... и Кондак 1: Избранной праведнице...

МОЛИТВА ПРЕПОДОБНОЙ МАТИ ЗОСИМЕ
Молитва 1
О, великая угоднице и преславная чудотворице, преподобная мати Зосимо, душею на небеси Престолу всех Царя предстоящая, телом же во святей обители сей почивающая. Различные чудеса повсюду твоими молитвами совершаются. Призри милостивно на предстоящия и твоего ко Господу Богу ходатайства в обдержащих нуждах люди просящия: вси бо мы, по множеству грехов наших, не точию смеем принести когда молебный глас, но ниже возвести очес своих на небо; ты же, яко стяжавшая дерзновение, принеси за всех к честней раце твоей притекающих, теплые молитвы ко Господу, еже избавитися нам от глада, потопа, труса, огня и брани, от людей и диавола бывающая, и от всякия душевная и телесная болезни; да избавльшихся сих и работая Господу, ему же предстоише, внидем в некочаемый покой и прославим тамо с тобою всех благих подателя Бога, всегда, ныне и присно, и во веки веков, аминь.

Молитва 2
О, преизящная и великая угоднице Господня, преподобная мати Зосимо, похваляем твоя славная чудотворения, прославляем житие твое святое; никтоже возможет исчести терпение и подвиги твои святыя. Не единожды ходила ты на святую Иерусалимскую землю ко гробу Господню и там совершала усердные моления за земля Российскую, за Церковь Православную и за народ русский. Егда же постигло Русь Святую лихолетие безбожия, не оставила обитель Покрово-Еннатскую, разделяя горе и страдания народа своего и Церкви нашей Святой, как монахиня даже до выдворения. Вера твоя, кротость, смирение, терпение умиляли сердца с тобою пребывающих в обители. В годы брани ты, мати, спасала многих, от горя, уныния и отчаяния жизнь свою самовольно покончить хотевших. Ты знаешь нужды и печали наши, преподобная мати Зосимо, знаешь и желание наше со Христом быти. Вспомни о нас, старице Божия, у престола Господня, ибо ты обещала помогать всем, кто обратится к тебе. Память на земле Уфимской и Оренбургской о тебе, о мати Зосимо, не оскудеет и поныне. С верою и упованием притекают православные люди к месту твоего упокоения. Просим же тя, святая праведнице, помози нам в трудный час жизни, в минуту скорбей и страданий, умоли начальника Мира, Господа, да умягчит он злые и огрубевшие сердца человеческие, и умирит народы. Да разорит нечистивые советы раскольников и еретиков, восстающих на Церковь Русскую Святую. Твоими молитвами, святая избранница Божия, да простит нам Господь всякие прегрешения, дам минуют нас стрелы вражия и козни диавольские. Испроси у Творца и Промыслителя жизни нашея Господа время на покаяние, от пагубы – избавление, болящим – здравие, падшим – восстание, отшедшим – упокоение и Небесного Царствия наследование. Буди, мати Зосимо, покровительницейи помощницей всем верным земли Уфимской и Оренбургской. Да укрепится и умножится на ней и всей Руси Великой Святое Православие. Мы же, укрепляемые святыми твоими молитвами, прославим живоначальную Троицу и твое, освященное Богом имя, ныне и присно и во веки веков, аминь.

Тропарь, глас 8.
Вышняя красоты желающе, нижния страсти далече от себя отринула еси, и нестяжание паче сует мира возлюбивши, ангельское житие избрала еси, преподобная мати Зосимо, моли Христа Бога спастися душам нашим.

Кондак, глас 3.
Веселися, Земле Уральская, великое сокровище стяжав; мощи твои, Святая преподобная мати Зосимо, благодать исцеления подают всем с верою и любовию приходящим к ним. И ныне, предстоя с ликами Святых Жен русских пред Престолом Святыя Троицы, молися оставление грехов даровати чтущим святую память твою.

Величание
Величаем, величаем тя, преподобная мати Зосимо, и чтим святую память твою, ты бо молиши о нас Христа Бога нашего.[/spoiler]

[Раб божий Константин]

Акафист преподобномученицам Зосимовой пустыни.
[spoiler]Кондак 1
Избранныя святыя и угодницы Господни, преподобныя матери Афанасие и Евдокие, Магдалино и Марие, присныя о душах наших молитвенницы, благодарственныя песнопения приносим вам, величающе прославльшаго вы Господа воспеваем вам песнопения похвальныя. Вы же предстательством вашим от всяких бед нас свободите и наследницы Царствия Божия нас сотворите, да величаем вас сице:
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Икос 1
Ангельскою любовию Христа возлюбившия, преподобныя мученицы Афанасие и Евдокие, Магдалино и Марие, от юности вашей чистую совесть к Богу стяжавшия, крест изгнаний, страданий и лишений добровольно прияли есте, вечной истины Христовой ради; в богообщении, благости и чистоте пожившия, житие ваше благоугодное с неземною радостью в образ подражания нам оставившия, и ныне во славе пред престолом Агнца Божественнаго предстоите и молитеся о нас, с верою, надеждою и любовью воспевающих вам сице:
Радуйтеся, очи духовныя нам всем отверзающия;
Радуйтеся, любить всех любовию Христовою научающия;
Радуйтеся, от бед и невзгод нас всех ограждающия;
Радуйтеся, страх смерти и болезни в душах наших побеждающия;
Радуйтеся, благодатную силу исцеления просящим подающия;
Радуйтеся, от проказы греховныя нас избавляющия;
Радуйтеся, утешение благое в сердца низпосылающия;
Радуйтеся, упование на милосердие Божие благодатно вселяющия;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 2
Видя, богоносная мати, во святом крещении Александрою нареченная, теплую любовь твою ко Господу и служению истинному Богу, во обители, благочестивыма и премудрыма прародители и сродниками твоима благоустроенней и благоукрашенной, пострижение с именем Афанасия прияла еси и усердно подвизалася еси в посте и преусерднем делании молитвенном, и сего ради благодать в очах Божиих обрела еси, воспевая укрепившему тя Христу: Аллилуйя!

Икос 2
Разумом духовным и ведением Всеблагий Господь просвети вас, всехвальныя Афанасие и Евдокие, Магдалино и Марие, яко еще во дни младости вашея узкий спасительный путь избрали есте, и святых жен житию поревновали есте, совершающе Единаго Учителя Божественныя заповеди. Ныне же во славе вместе со ангелы и всем ликом преподобных жен предстоя престолу Троицы Всесвятыя, молите даровати нам разум и силу зрети и побеждати страсти душевныя всем нам, взывающим вам сице:
Радуйтеся, неложному и благоговейному почитанию Бога научающия;
Радуйтеся, всех жаждущих спасения во Иисусе Христе укрепляющия;
Радуйтеся, теплотою любви Божественныя сердца наша оживотворяющия;
Радуйтеся, ум и сердце к горнему возводящия;
Радуйтеся, созерцати Бога Всевышнего нас просвещающия;
Радуйтеся, растления душевнаго и совести лукавства нас избавляющия;
Радуйтеся, воспевати величие Божие нас научающия;
Радуйтеся, духовне бодрствовати и трезвитися нас сподобляющия;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 3
Сила благодати Божией обильно снизошла на тя, богоносная мати наша Афанасие, яко ты во дни гонений, богоборцами возвигнутых, игуменство над преславною обителию Зосимовскою прияла еси и попечение премудрое о многочисленных насельницех и добрых христианех, окрест живущих, явила еси, скорбную и тесную шествовавше стезею, высотою добродетелей душу твою Христу уневестила еси, со Христом пострадавше с Ним воскреснув для жизни вечной. Сице молим тя: избави нас от отчаяния и малодушия, укрепи в преданности воле Благой мольбами твоими ко Господу Иисусу, да возможем и мы купно с тобою взывати Ему: Аллилуйя!

Икос З
Имеющи любовь Божественную в сердцах ваших, прехвальные Афанасие и Евдокие, в молитвеннем делании, усердных трудех, терпении неудобств житейских и просвещении народа окрест сущего, пребывали есте, бодренным оком ума вашего невидимого Бога созерцали есте, богоблаженныя матери наши. Его же лицезрением ныне наслаждающиеся, молите Иисуса Сладчайшего укрепити всех нас в верности Ему и Святей Церкви Его и примите похвалы сия:
Радуйтеся, к свету истины прельщенных обращающия;
Радуйтеся, страх Божий в сердца вселяющия;
Радуйтеся, благоговети пред святыней научающия;
Радуйтеся, ревностию ко спасению воодушевляющия;
Радуйтеся, духовное нечувствие в нас подавляющия;
Радуйтеся, храмы Божий почитати внушающия;
Радуйтеся, в них отраду находити вдохновляющия;
Радуйтеся, жажду Святого Причащения в нас возбуждающия;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 4
Бурю злых напастей, нестроений и искушений кротостию, молитвою и незлобием утишали есте, богомудрыя матери Афанасие и Евдокие, Магдалино и Марие, добродетельми христианскими, аки щитом, от стрел лукаваго защищали есте и советом святых отцев внимали есте, тем же прошедше весь путь многотруднаго иноческаго жития, подвигом мученичества той завершили есте е, и в обители небесныя вселилися есте, идеже купно со святыми и ангелы воспеваете Господеви: Аллилуйя!

Икос 4
Слышавше и видевше богоугодное житие ваше, премногую любовь вашу к Богу и ревностное благочестивое иноческое житие, преподобномученицы святые, многие ближние и дальние приходиша к вам, поучалися есте наставлениями вашими к покаянию и исправлению жительства своего устремившеся, от грехов и страстей отвращающеся, в разум истинный прихождаху, отчаяния и скорби своя верою и надеждою на Милосердие Божие досточудно побеждаху; с ними же и мы, восхваляем вас, умиленно зовем:
Радуйтеся, любы нелицемерную в нас воспламеняющия;
Радуйтеся, кротость и смирение в себе нам показующия;
Радуйтеся, терпением и мужеством души наши украшающия;
Радуйтеся, нас, алчущих и жаждущих правды, насыщающия;
Радуйтеся, сердца наши благодатью Божиею, вам данною, очищающия;
Радуйтеся, очи наши духовные к зрению Бога изощряющия;.
Радуйтеся, вражды и ссоры наши умиротворяющия;
Радуйтеся, всякий мрак заблуждения от нас прогоняющия;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 5
Боготечною звездою в обители Зосимовстей, а послеже и в веси Алабинской, просияла еси, преподобная мати Афанасие, яко процвела еси чистым и непорочным твоим житием, трудами иконописания и милосердия ко ближним твоим, во инокинех же совершенными подвигами твоима, за Христа пострадавше, и взошла еси во Иерусалим Небесный, радующеся и веселящися, яко добре совершивше течение твое в пределех степей Казахстанских, и ныне вопиеши Господеви: Аллилуйя!

Икос 5
Видяще вас, всехвальныя матери Афанасие и Евдокие, Магдалино и Марие, со мученики Христовыми сочетаемых и с ликами преподобных вчиняемых, с девственники ликующих, с постники и пустынники ублажаемых, яко с ним купно ныне непрестанно песнь хвалебную Троице Всесвятей возсылаете и молитеся о нас, вас пениями сими прославляющих:
Радуйтеся, ревнительницы веры и благочестия;
Радуйтеся, показавшия путь верного ко Христу восхождения;
Радуйтеся, благодать Святаго Духа во спасение стяжавшия;
Радуйтеся, радость молитвеннаго богообщения познавшия;
Радуйтеся, благие мысли и чувства в недоумении нам сущим внушающия;
Радуйтеся, к терпению бед, лишений и скорбей нас воодушевляющия;
Радуйтеся, святые желания и намерения ко спасению нашему в сердца нам влагающия;
Радуйтеся, добрыми плоды веры, надежды и любве души наша исполняющия;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 6
Проповедница истинного благочестия и жития святого, преподобная мати Евдокие, и девства чистый сосуд елеем молитвы и любви наполнивше, любовию к игумении твоей движимая и долженствование монашеское исполнити до конца желая, пребыла с наставницею твоею до конца, претерпевши лютыя тяготы изгнания из земли Московския в переделы Казахстанския, тако бо неугасимый светильник в сердце своем возжгла еси, с ним же бодренно в сретение Небесного Жениха изшедше, взошла еси. Ныне водворяяся с сонмом Ангелов и святых, молисья Христу Богу, части дев юродивых избавитися нам, да сподобимся вместе с тобою во веки веков Спасителю воспевати Алиилуйя!

Икос 6
Воссияли святостью подвигов ваших, матери досточудные, егда в годину гонений на святую Церковь от безбожной власти воздвигнутых, огнем веры крепкой, надежды несомненной и любве истинней, преподобные Афанасие и Евдокие, Магдалино и Марие, прослави убо вас Господь, яко сбышася на вас словеса апостольския «сила Божия в немощи совершается», вы бо благодать Духа Всесвятаго восприяли есте и Его дарами ближним твоим с любовию послужили есте, в вере, надежде и любви богомудро их утверждая. И самих себе Агнцу Божию Христу Иисусу, в жертву всесожжения, самих себя принесли есте. Мы же, благодарно вопием вам:
Радуйтеся, с высоты небесной милостиво на нас, недостойных, призирающия;
Радуйтеся, похвалы наши, благосердне приемлющия;
Радуйтеся, молитвам нашим, с любовью внемлющия;
Радуйтеся, от всея души и сердца возносимая к вам прошения наша исполняющия;
Радуйтеся, во всех нуждах, бедах и обстояниех нам помогающия;
Радуйтеся, безвестныя и тайныя премудрости Божия нам открывающия;
Радуйтеся, светом вашим нашу тьму греховную разгоняющия;
Радуйтеся, теплотою любви вашей наша хладная сердца согревающия;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 7
Желая воспевать Подвигоположника Христа, славно венчавшего вас, преподобномученицы, и достойно прославить подвиги исповедничества и труды благочестия, подъятые вами, всеблаженые Афанасие и Евдокие, Магдалино и Марие, любве ради Божественные, помозите нам свыше данною вам благодатью Духа Всевятаго Утешителя, сердца наша от греховныя тьмы очистити, дабы возмогли и мы купно с вами во веки Господеви воспевати: Аллилуйя!

Икос 7
Новый подвиг подъяли, прехвальные матери наши, егда в во время нашествия безбожников верность Христу сохраняти призывали есте людей окрест вас сущих, в годину скорбную смут и невзгод людей российских духовно укрепляли есте и милосердныма делы вашима вспомоществовали есте и утверждали в хранении истины Христовой, в ней же и нас твердыми пребывати наставите, сего ради во узах суще, от гонителей веры Христовой оскорбления, надругания, заушение и лютыя биения незлобливе прияли есте, молящее Всеблагаго Спасителя о даровании вам в муках терпения и во страдания – укрепления. Мы же зовем вам сице:
Радуйтеся, безбоязненныя веры Христовой проповедницы;
Радуйтеся, мужественныя истинного учения исповедницы;
Радуйтеся, за проповедание веры и жизни своей не пощадившия;
Радуйтеся, души своя за имя Христово положившия;
Радуйтеся, благодать предстательства за нас обретшия;
Радуйтеся, теплотою своея любве ко Господу нас согревающия;
Радуйтеся, радости нам вечныя благоприятные ходатаицы;
Радуйтеся, о мире всего мира непрестанно Господа умоляющия;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 8
Странствие скорбное из благословенной земли Московския в степи казахстанския кротко претерпели есте, богоблаженныя матери наши, яко не вняли есте сладостным речениям лжепророков рая земнаго, и обаче верность заповедям Евангельским, грядущаго града Иерусалима Небеснаго взыскуя, вся помышления твоя к небеси непрестанно возносили есте, верность Спасителю в час гонений сохранили есте, и на Крест Господень взирая воспевали с надеждою, воспевая Победившему смерть: Аллилуйя!

Икос 8
Всем естеством вашим, о богоносные преподобномученицы, Христа Спасителя возлюбили есте, подвигом добрым подвизавшиеся, веру бодро соблюдшие и течение свое добре скончавшие, за страдания вами мужественно претерпенныя, обрели от Подвигоположника Нашего - Господа Иисуса Христа - венцы правды. Тем же усердно поучающеся в ваших деяниях, с любовью поминаем вас – наставниц и заступниц наших, и желая подражати вере вашей, смиренно вопием вам сице:
Радуйтеся, Божией благодатю силу устоять в истине обретшия;
Радуйтеся, во святых молитвах ваших Бога узревшия;
Радуйтеся, зло мира сего добром победившия;
Радуйтеся, смертью вашею мир умудрившия;
Радуйтеся, жизнь земную свято и праведно скончавшия;
Радуйтеся, пришедшие от скорбей многих на покой вечный;
Радуйтеся, восприятие со славою во обитель святых;
Радуйтеся, увенчанныя от Христа венцами нетленной славы;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 9
Все ангелы Божии, спасенных и святых Божиих собрания неисчетные на небе торжествуют, избраннице Божия Афанасие, яко ты подвижническую жизнь вела еси, подвигами твоими труды инокинь многоих превосходя, непрестанную молитву пищею для души твоей имея, изгнание, лишения в дальнем краю с небесной кротостью претерпела еси и востекла еси в чертози Царя Небеснаго. Мы же, прославляя Господа, Дивного во святых Своих, со слезами благодарности о тебе вопием Ему: Аллилуиа!

Икос 9
Вития многовещанные не возмогут достойне и справедливе воспети подвиг жития и служения вашего, богоблаженныя матери Афанасие и Евдокие, Магдалино и Марие, яко вы возлюбили есте Христа, последовали есте за Ним путем крестным, претерпевая всяческия пренебрежения и надругательства в заточении темничнем и пути скорбном изгнаний и лишений, яко смерть лютую в бескрайних степех евразийстиих притерпели есте и венчание нетленныма диадимами славы вечныя от Подвигоположника Христа прияли есте. Сего ради и мы взываем к вам с надеждою на заступление ваше пред воскресшим Господом:
Радуйтеся, в вере Божественной нас укрепляющия;
Радуйтеся, надежду спасения верным утверждающия;
Радуйтеся, любовию Божиею нас согревающия;
Радуйтеся, сомнения наша, яко прах, развевающия;
Радуйтеся, во уныние падших нас ободряющия;
Радуйтеся, доверие и любовь к Богу воспламеняющия;
Радуйтеся, сердца злых людей, враждующих против нас, смягчающия;
Радуйтеся, советы лукавыя и коварство их разоряющия;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 10
Спасительный подвиг твой, и высокия добродетели терпения и трудолюбия, прехвальная преподобномученице Марие, убиение Христа ради претерпевшая, прославляя ныне же с верою и любовью, молим тя усердно: молися за ны ко Господу Богу, да дух благочестия и веры твоея, благости и милости не оскудевает и в нас немощных и грешных: да будем чада твоя не по имени только, но делы благима и всем житием нашим. Ты же, предстоя престолу Пресвятыя Троицы, не престай моляся о нас, ублажающих тя, купно со всеми новомучениками российскими, да сподобимся небеснаго селения достигнути и гласом радования воспети Богу ангельскую песнь: Аллилуиа!

Икос 10
Стене нерушимей и крепости неприступней подобно заступление ваше, святые Афанасие и Евдокие, Магдалино и Марие, яко вы страждущим духовное утешение, верным о Христе радость и умиление в житии земнем явили есте, яко труды велиеми, попечением о ближних, изгнания тепрением, исповедничеством, и мученичеством всепобедным прославили Распятаго за ны Спасителя. Ныне просим вас: озарите наша души сиянием Божия благодати и наставите нас верно исполнять заповеди Христа Бога, ибо ведаем, яко много может молитва ваша пред благостью Его. Сего ради со упованием молитвенно к притекаем и взываем:
Радуйтеся, веру нашу во спасение со Христом укрепляющия;
Радуйтеся, светильницы, мрак душ наших благодатно озаряющия;
Радуйтеся, пути наши заступничеством вашим исправляющия;
Радуйтеся, братолюбием и милосердием нас ущедряющия.
Радуйтеся, мир о Дусе Святе в сердце вселяющия.
Радуйтеся, зависть, клевету, ревность и злопамятство истребляющия.
Радуйтеся, к долготерпению в скорбях и недугах нас приклоняющия;
Радуйтеся, во всяких нам нуждах и обстояниях помогающия;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 11
Пение молебное приносим ти, богоносная преподобномученице Магдалино, благочестивая и богомудрая старице, в пречуднем житии твоем образ благочестия, смирения и благодатнаго богообщения нам даровавшая. Сего ради с несомненною надеждою к тебе, притекаем; почерпающе же от тя воду живую, утоляющую нашу жажду духовную, все наша нечистоты омывающую и наши горести житейские услаждающую, Богу, нас спасающему с любовью вопием: Аллилуиа!

Икос 11
Светоподательныя светильницы, святые матери наши, во мраце страстей мира просиявшия благодатию Святаго Духа возженныя, не под спудом, но на свещнице небесном поставленныя, и так присно пред престолем Божиим горящия, всему же миру и нам, грешным, на земли сущим, светящия, да видяще добрая дела ваша, прославляем прославившего вас Господа славы, и к вам от всего сердца вопием:
Радуйтеся, с Пречистою Девою Богородицею у Престола Сына Божия предстоящия;
Радуйтеся, со святыма Зосимою и Василиском вкупе присно торжествующия;
Радуйтеся, со святителем патриархом Тихоном хвалу Иисусу воспевающия;
Радуйтеся, о мире и благословении страны российския умоляющия;
Радуйтеся, со всеми новомучениками Агнца Божия воспевающия;
Радуйтеся, проповедников евангельской истины благодатное вдохновение;
Радуйтеся, иерархов Церкви Христовы правило веры и от скорбей избавление;
Радуйтеся, храмов Божиих усердных строителей и верных в них служителей любовию Христовою обогащение;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 12
Благодать свыше вам дарованную, святыя матери наши, на притекающих к вам в скорбях обильно с любовью источающия помощь благодатную, ибо вы и по успению своем не оставляли есте всех притекающих к вам, сего ради просим вас: не престаните умоляти Христа Бога, яко ныне с Господем во обителех Его почивaете, призирaя на нaс с высоты небеcныя, и приклоняя к нaм вышнее милоcердие, да Всемилосердный Создатель свободит державу нашу от тлетворных обычаев, от безбожия и нищеты, да спасение тем улучивше, воспоем вами благодеющему нам Богу: Аллилуйя!

Икос 12
Поюще преславное житие ваше, богоносныя Афанасие и Евдокие, Магдалино и Марие, нелицемерныя любве к Богу и ближним преисполненныя, мученическую кончину и славу на небеси и прилежно молим вас: не оставите нас в скорбный час; вымолите пред Богом благодатный дар покаяния и отымите от нас грешных в Вере спасительней колебания. Вам же от усердия нашего таковые похвалы приносим:
Радуйтеся, лучами благодати Божия осиянныя;
Радуйтеся, благоухания духовного преисполненныя;
Радуйтеся, Церкви небесной и земней украшение;
Радуйтеся, непорочнаго девства честный покров и ограждение;
Радуйтеся, упование на вас возлагающих дивные помощницы;
Радуйтеся, о душах наших усердные ко Господу молитвенницы;
Радуйтеся, отчаящихся и падающих умиротворение;
Радуйтеся, о погибающих скорое попечение;
Радуйтеся, святыя и прехвальныя преподобномученицы Зосимовския, в вере и благочестии возрастати нам помогающия!

Кондак 13
О богоблаженные матери наши Афанасие и Евдокие, Магдалино и Марие. Воспеваем вам пение похвальное и всеусердно молим вас: испросите у Сладчайшаго Иисуса нам необходимое к житию земному и благочестию, избавите нас от бедственных падений, бесовских искушений, болезненней печали и Царствия Небеснаго наследницы всех сотворите, да сподобимся вместе с вами и преподобным Зосимою во веки воспевать Всесвятей Единосущней и Нераздельней Троице: Аллилуиа.
(Этот Кондак читается трижды. Затем читаются Икос 1 и Кондак 1).

Молитва святым преподобномученицам Зосимовой пустыни
О, преподобные матери наши Афанасие и Евдокие, Марие и Магдалино, пустыни Зосмовския похвало и верных Христиан утверждение, пребегая к заступничеству вашему пред Триипостасным Господом Нашим, молим и просим вас всеусердно: принесите к престолу Его наши моления о скорбях, нуждах и напастях наших; не оставьте вашею помощью.
О святые преподобномученицы, всеблагомощным предстательством вашим, яже ко Иисусу Христу, Господу и Спасителю Нашему, укрепите нас шествовати по стезем заповедей Его спасительных, и безропотно нести крест свой до конца. Молитвами вашими сохраните нас от враг видимых и невидимых и даруйте нам, чтущим святую память вашу, добрую, тайн Божиих причастную, христианскую кончину и на страшном суде Христовом явитесь нашими заступницами и ходатаицами. Да вашими молитвами соблюдаемы и сохраняемы пребудем, и сподобимся вместе с вами славословить во веки веков Отца и Сына и Святого Духа. Аминь.

Молитва вторая
О святые преподобномученицы Афанасие, Евдокие Магдалино и Марие, недужных и скорбных скорая утешительницы и целительницы! Приимите ныне моление недостойных чад ваших и донесите сей малый плод сердец и устен наших ко престолу Божию, да предстательством вашим низпослет нам Милосердный Господь щедроты Своя: подаст благоденствие Отечеству нашему: избавит от труса, огня, меча, нашествия иноплеменник и междоусобныя брани: недужным дарует исцеление, скорбящим утешение: гордых смирит, нерадивых к покаянию обратит, монашествуюших дух в горении к Богу укрепит: всем Христианом подаст, яже ко спасению потребная: наипаче же явит нам милость на Страшнем судище Своем и вселит в обители Небесныя со всеми святыми: Емуже подобает хвала и слава, честь и держава, Отцу и Сыну и Святому Духу, ныне и присно и во веки веков. Аминь.

Молитвы ко преподобномученицам Афанасии и Евдокии
О досточудныя богоносныя матери наши Афанасие и Евдокие! Многими трудами, милосердием, смирением, боголюбием обрели вы с Богом духовное единение. Предстояще Небесному Престолу Всесвятой Троице и великое дерзновение к Ней имущии, просим вас: принесите за нас грешных святые молитвы ваша ко Господу Богу и испросите нам, чтущим святую память вашу: веру непостыдную, к ближнему любовь нелицемерную, благочестие непоколебимое, теплую молитву в богообщении смиренном, покаяние глубокое, в добрых делех преуспеяние, душам и телесам здравие и верное спасение. Молитесь пред Божественным Искупителем Нашим о мире и благословении для Церкви Христовой и для истерзанной отчизны нашей.
О блаженные Афанасие и Евдокие, не презрите молитв наших, со умилением вам возносимых, но будите о нас присные заступницы пред Господом и сподобите нас помощию вашею благодать спасения стяжать и Царствие Небесное с вами унаследовать, да славословим неизреченное человеколюбие Отца и Сына и Святого Духа в Троице поклоняемого Бога, во веки веков. Аминь.[/spoiler]

[Раб божий Константин]

Акафист святому апостолу Иакову, брату Господню по плоти.
[spoiler]Кондак 1
Апостолу Христову, иерарху преславному, столпу необориму Церкви Христовой и мученику, Иакову премудрому, брату Божию блаженному похвальная восписуем, яко ходатаю и скорому помощнику нашему. Ты же, предстояй престолу Пресвятыя Троицы, не престай молитися о нас и твоими молитвами сохраняй нас от всяких бед и зол, верою празднующих память твою и зовущих:
Радуйся, Иакове, первый иерарше Церкви Иерусалимстей и славный священномучениче!

Икос 1
Ангелов Творец и всея твари Содетель, яви тя, Иакове, яко звезду многосветлую, возсиявшую на тверди Церковней, тьму лжеверия прогоняющей, подвигом света мир просвещающую. Мы же, прибегающе к заступлению твоему, сицевая радостно тебе приносим:
Радуйся, яко Богом избран для объявления тайн спасения;
Радуйся, яко по плоти Господень брат показался еси, ученик и самовидец неизреченных тайн Его;
Радуйся, славо Церкви Вселенския;
Радуйся, яко без страха и велегласно словеса Божии среди ярых иудеев людям приносивший;
Радуйся, церкви истинный управителю;
Радуйся, богомудрый учителю непостижимых тайн Божиих;
Радуйся, иерарше Иерусалима дольняго, ныне пребывающий во Иерусалиме горнем;
Радуйся, яко жертву чисту принесл еси Царю и Творцу, егоже пред мучители исповедал, священномучениче;
Радуйся, Иакове, первый иерарше церкви Иерусалимстей и славный священномучениче!

Кондак 2
Издалече прозря твое жительство, отче Иакове, брата тя прия Христос Человеколюбец, яко старший сын в семействе праведнаго Иосифа Обручника был еси. С малых лет, яко назорей, Богу посвящен был, имея жизнь воздержанную. Нравов твоих благостию и ума чистотою, Христов показался еси ученик искренний, сподобился у престола Владыки вечно воспевати: Аллилуиа.

Икос 2
Егда же, Ирод царь, иска Отроча Иисуса, дабы погубити Его, се Ангел Господень во сне явися Иосифу глаголя: «Восстав, поими Отроча и Матерь Его и бежи во Египет». Ты же, Иакове, яко сродник по плоти Иисусов был еси, пребывал со Иосифом и Матерью Его, бегаяй с ними во Египет. Яко друг Христов ближнейший от младенства, прими от нас, Иакове, усердные похвалы:
Радуйся, яко сын был ходящих по пути Господню;
Радуйся, яко лицем к лицу Бога чрез Христа узрел еси;
Радуйся, яко благодать многу приял еси от Христа;
Радуйся, яко Христовым светолитием прсвещен еси;
Радуйся, яко началопастыря Христа брат был еси и приемник во апостолах;
Радуйся, яко сугубы почести от Христа сподобился;
Радуйся, яко Христом Небеснаго Отца обретый;
Радуйся, яко и ныне зриши Христа во свете неизреченнем;
Радуйся, Иакове, первый иерарше Церкви Иерусалимстей и славный священномучениче!

Кондак 3
По вознесении же, Спасителя, лик апостольский, не состязавшись о славе, избра тя Иакове Праведный, священнодействовати Христу в Сионе святем. Особо явися ти, Господь по посвящении тебе на престол церкви Иерусалимстей, показуя тем благоволение Свое к тебе. Мы же дивляшеся такому о тебе Божию благоволению, поем Вседержителю: Аллилуиа.

Икос 3
Служение апостольское трудное, приял еси посреде самых коварных и ярых врагов веры христианския. Тридесять лет неустанно провещал и утверждал еси веру спасительную во граде Святем и земле Палестинстей. Темже, благодаря Творца и Спаса нашего, славословим тя великаго избранника Божия:
Радуйся, яко Иерусалим на проповедывание Слова Божия, Промыслом Господним указался тебе;
Радуйся, яко велику власть от Бога приял еси;
Радуйся, благовестниче Агнца Божия, вземлющаго грехи мира;
Радуйся, крестяй народ иудейский во имя Отца, и Сына, и Святаго Духа;
Радуйся, пастырю добрый и учителю светлый, яко тобою Бог украси церковь свою;
Радуйся, кладезе из него же воды живой напояемся;
Радуйся, яко приемши крест апостольский неутомимо стопам Спасителевым последовал еси;
Радуйся, яко Божественнаго Духа светозарением, тьму лжеверия разрушал и верных сердца просвещал еси;
Радуйся, Иакове, первый иерарше Церкви Иерусалимстей и славный священномучениче!

Кондак 4
Много народа иудейскаго к Церкви Христовой обратил еси, отче праведный, по великому доверию к слову твоему. Праведным житием своим, обретал еси любовь и почитание и иудеев необращенных. Сего ради восхваляюще неустанные труды твоя, усердно зовем Богу: Аллилуиа.

Икос 4
Не взирая на ненависть к христианом синедриона и первосвященников иудейских, оклеветавающих христиан, яко врагов закона Моисеова, ты отче Иакове, мудродеюще свидетельствовал: обращающийся к вере Христовой – не отпадает от истинной веры отеческой. Мы же, видя премногую твою добродетель, пастыря неутомимаго Церкви Христовой, благодарно зовем ти:
Радуйся, яко житием твоим праведным злославные враги укроти и посрами;
Радуйся, яко пути вся вражия стесняеши широтою Божественнаго разума;
Радуйся, яко благодатию, изливающейся от уст твоих, научал овцы словесныя веровати в Троицу Единосущную;
Радуйся, столпе благочестия непоколебимый и стена Церкви необоримая;
Радуйся, яко возсиял еси сущим во тьме неразумия, всех созывающе к высоте благочестия;
Радуйся, яко собрав проповеданием высокаго жития твоего, стадо твое, сие от волков лютых избавил еси;
Радуйся, яко Брат Божий, Сына Бога Вышняго доблественне исповедал на земли;
Радуйся, яко мудростию обложен, благодатию озарен, мирною красотою украшен, апостоле святе.
Радуйся, Иакове, первый иерарше церкви Иерусалимстей и славный священномучениче!

Кондак 5
Служение иерарше в Церкви Иерусалимстей совершал еси с велиим благоразумием, воздавая должное и истинней вере отцев. Ревнители же закона ветхозаветнаго, видеша в тебе, отче Иакове, яко образ первосвященника израильскаго. Мы же, даровавшему тебе премудрость велию, Богу немолчно воспеваем: Аллилуиа.

Икос 5
Проводя путь свой земный свято от чрева матери своея, сподобился входити во Святая храма Иерусалимскаго. Усердно молился еси об отпущении грехов народа. Ожестели колени твои, отче Иакове, от беспрестанных преклонений в молитвах. Сего ради и мы восхваляем тя по достоянию, яко молитвенника нашего пред Богом:
Радуйся, яко житием твоим добродетельным, люди своя просвещал, яко светозарное солнце;
Радуйся, яко дея учил презирати плоть, прилежати же душе безсмертней;
Радуйся, делатель вертограда Христова усердный;
Радуйся, яко Божественнаго Духа благодать прием, попалил еси тьму лжеверия;
Радуйся, яко плоть духу совершенно поработивый;
Радуйся, молитвенниче к Богу неустанный;
Радуйся, яко союзом любви спряг стадо твое;
Радуйся, яко благодати исполнен, свет мира и соль вселенныя был еси;
Радуйся, Иакове, первый иерарше Церкви Иерусалимстей и славный священномучениче!

Кондак 6
Духом Святым просвещаем был еси, отче Иакове, егда чин Божественныя литургии мудре устроил еси. Уподобился сеятелю добраго семени, стократный плод приносящаго. И ныне с небес на ны милостиво призираеши и преизобильно всем нам благодать подаеши от щедраго Христа Бога, ему же со ангелы в небесех поеши: Аллилуиа.

Икос 6
Служению Божественныя литургии от самого Христа научен был еси. Закон жизни Церкви Христовой положил еси, отче Иакове, жизнодательным духом законополагая и вещая неизреченные тайны Божии. Паству свою таинствы церковными освящая и тайнам веры уча. Мы же тебе, Троицы Святыя верному служителю воспеваем таковая:
Радуйся, чина церковнаго благоукрасителю;
Радуйся, яко мир просветил, блаженне, ученьми твоими.
Радуйся, яко Духом Святым чрез тебе свет Богопознания излияшася в мир;
Радуйся, яко чрез тебе начертаны тайны неба и земли;
Радуйся, яко в тайны Божии духом вознесыйся;
Радуйся, яко Божественными зарями проповедания твоего, возсиял седящим во тьме прелести, свет благодатный;
Радуйся, яко умом чистым и святыми устами Богодохновенне спасение всем верным предложил еси;
Радуйся, яко Бог Слово богатно просвети тя блистании Божественныя благодати;
Радуйся, Иакове, первый иерарше церкви Иерусалимстей и славный священномучениче!

Кондак 7
Бывша посреде благовествующих народом языческим слово Христово, распря и состязание о законе Моисеове. Собран бысть сего ради собор апостольский во граде Иерусалиме, под предстательством твоим, отче Иакове. Слово твое весомое о спасении души в Церкви христианской, не сохраняя весь обряд закона Моисеова, собор ендинодушно приял еси и чрез апостолов церквам возвестил еси. Мы же ублажаем тя, научившу яко право разумети учение Христово и пети Тому: Аллилуиа.

Икос 7
Мудре вразумлял, отче Иакове, на соборе о скончании времени Завета Ветхаго и паки о Промысле Божием о обращении и спасении народов языческих. Предстательством же на соборе апостольском сем, иерарха церкви Иерусалимстей – матери Церквей, низлагается ересь латинских пап о Богоустановленности первенства престола Римскаго. Мы же, яко великому во иерарсех Христовых, взываем ти:
Радуйся, истолкователь воли Божией, ему же без ропота покорилась вся церковь иудеев-христиан;
Радуйся, яко научаеши о спасении благодатиею Христовой не только иудеев, но и язычников;
Радуйся, яко свидетельствуеши о согласии слова Христова с учением пророков и преданий отеческих;
Радуйся, яко седящим во тьме, законы спасительные предлагал и к свету благоверия приводил;
Радуйся, разумнаго света заре, церковное светило, святительская красото;
Радуйся, глубокий кладезе истиннаго Боговедения;
Радуйся, яко реки источаеши Богоглаголиваго твоего чрева;
Радуйся, яко премудрости чаша явился еси, добродетели исполненна;
Радуйся, Иакове, первый иерарше церкви Иерусалимстей и славный священномучениче!

Кондак 8
Явился еси ты ,отче Иакове, яко мудрый христианин, миротворец и истолкователь Закона и Истины в слове – послании «ко двунадесяти коленам в рассеянии», кои пребывали в немалом брожении и недоумении о учении Христовом. Просвещал еси и вразумлял, яко воля Божия есть воля Бога Израилева, Бога Авраама, Исаака, Иакова. Тем же и нас научи пети от всего сердца Творцу и Зиждителю: Аллилуиа.

Икос 8
Проповедь же апостольская доносилась и к сущим далече от града Святаго коленам израилевым. Смущение бысть у праведных иудеев: явление Христово – чаяние народа Божия или низложение закона Моисеова. Воистину Богоразумно окормлял ты , отче Иакове, Церковь Иерусалимскую, не оставляя обряда Моисеова – укреплял обращенных в благодати Христовой. Рекл ты Павлу апостолу: «Сколько тысяч уверовавших иудеев, и все ревнители Закона суть». Мы же восхваляям тя, горнюю премудрость стяжавшаго:
Радуйся, яко словом Богоразумия люди от неведения избавлял и ко Христу приводил еси;
Радуйся, яко Божественный разум стяжал еси;
Радуйся, яко труды своими к воде спасительной овцы словесныя приводил еси;
Радуйся, яко праведно дадеся ти жребий пастырскаго о душах попечения;
Радуйся. яко притяжал еси паствы сердца и любве к тебе исполненная;
Радуйся, якоже солнца заря возсиял еси миру учении твоими, Богогласе;
Радуйся, искусный ловитель душ людских;
Радуйся, Божественной благодати светило;
Радуйся, Иакове, первый иерарше церкви Иерусалимстей и славный священномучениче!

Кондак 9
Ветия многовещанные не смеют витийствовати о твоей, отче Иакове, мудрости. Егда же роптание бысть у иудеев-новообращенных о учении Христовом, слышавше, яко спасается человек токмо верою, полагавше ложно, яко в угоду «языком» обращаемым, упразднялись дела закона Моисеова. Тогда ты , отче Иакове, в послании твоем вразумляеши, яко не в едином книжном научении и внешнем исповедании есть вера спасительная, а в вере поспешествуемой любовию и делами во имя Христово. Ему же, милосердному Человеколюбцу непрестанно взываем: Аллилуиа.

Икос 9
Ведал ты, отче Иакове, како извращена бысть жертвенная вера Авраамля, в веру лицемерную и мертвую вождей иудейских. Верно обличаеши «учителей мудрости» и наставляеши народ в вере христианской – терпеливой во испытаниях, уповающей на Бога, несущей тягости во смирении. Мы же, тебе яко Богомудрому наставнику, благодарно воспеваем:
Радуйся, яко возвещаеши: тело без духа мертво есть, тако и вера без дел мертва есть;
Радуйся, яко научаеши: радость имейте, егда во искушения впадаете различна;
Радуйся, яко просвещаеши: блажен муж иже претерпит искушения, зане приимет венец жизни;
Радуйся, яко глаголаши: искушения вашея веры соделывает терпение;
Радуйся, яко умудряеши: ведущему убо добро творити, и не творящему грех есть;
Радуйся, яко вразумляеши: любы мiра сего – вражда Богу есть;
Радуйся, яко призываеши: молитеся друг за друга, много бо может молитва праведнаго поспешествуема;
Радуйся, яко взываеши: обративый грешника от заблуждения пути его, спасает душу от смерти.
Радуйся, Иакове, первый иерарше Церкви Иерусалимстей и славный священномучениче!

Кондак 10
Укреплял еси, отче Иакове, обращенных в вере и к страданиям прегутовлял предстоящим. Призывал к истинному единению с пророками, терпению и упованию молитвенному на Бога, всех и вся Содержащему в деснице Своей. И нас, недостойных, сподоби молитвами твоими, разумно пети Богу: Аллилуиа.

Икос 10
Тако научал еси, люди твоя, вере Христовой, спасительной: «Вера бо чиста и нескверна пред Богом есть, еже посещати сирых и вдовиц в скорбех их и нескверна блюсти себе от мiра» и еще «Милость есть жизнь души». Мы же, отче Иакове, тебе молящемуся о обновлении окамененных и изсохших сердец наших неустанно взываем:
Радуйся, яко речеши: суд без милости не сотворшему милости.
Радуйся, яко вразумляеши: гнев бо мужа, правды Божия не соделывает.
Радуйся, яко просвещаеши: плод правды в мире сеется творящими мир.
Радуйся, яко глаголеши: Господь гордым противится, а смиренным дает благодать.
Радуйся, яко взываеши: смиритеся пред Господем и вознесет вы.
Радуйся, путеводителю наш на небеси.
Радуйся, слова Божия неложный истолкователю.
Радуйся, нас на подвиг деятельные любви подвигающий.
Радуйся, Иакове, первый иерарше Церкви Иерусалимстей и славный священномучениче!

Кондак 11
Отпавшие от благодати вожди иудейские, видеша, яко множество мужей и жен к Церкви Христовой прилагается, доверия ради апостола всеславнаго. Зломыслили, лжеучители, конец положити сему. Нестерпим бо был синедриону праведник истинный, служащий Господу беспорочно.Нас же, отче Иакове, благослови, укрепи и настави возрастати в вере спасительной, поюще Богу: Аллилуиа.

Икос 11
Во днех празднования Пасхи, собрашася вся колена иудейския и множество язычников во град Иерусалимский. Ты же, отче Иакове, неустанно проповедовал глаголы жизни вечныя. Ведавше об отъезде, во днех сих, прокурора Феста, начальницы иудейские совет положиша убити тя, пастыря града Святаго. Мы же тебе, яко мужественному воину Христову усердно вопием:
Радуйся, яко истину Христову пред вожди небоязненно вещавый.
Радуйся, православия светило.
Радуйся, правил церковных нелицеприятный блюстителю.
Радуйся, яко тобою Церковь Христова дивно красуется.
Радуйся, яко Богомудрыми ученьми умы верных к небеси возводиши.
Радуйся, яко крепостию проповеди зиму прелести разрушил еси.
Радуйся, всемудрый ловче, святый иерарше и проповедниче.
Радуйся, яко луч Солнца Правды испусти тя Христос, просветившаго всю землю.
Радуйся, Иакове, первый иерарше Церкви Иерусалимстей и славный священномучениче!

Кондак 12
Первосвященник, же иудейский, саддукей Анан, повелел пред храмом Иерусалимским созвати собрание народа великое. Лестию же, отче Иакове, завлещен был еси на криле храма Святаго, где нечестивыми вопрошен был пред собором людским: «Реки нам, о Распятом». Ты же, силою, от Бога тебе дарованною облеклся еси, готовый мучения всякия претерпети Христа ради. Мы же, Богу, в мученичестем подвизе тебя укрепившем гласом велим воспеваем: Аллилуиа.

Икос 12
Исполнився же, Духа Святаго, ты отче Богоносче, изрек пред народом: «Он сидит на небесех, одесную Силы Всевышней и грядет на облацех небесных». Слышавше сия нечестивии, скрежетаху зубы своими и единодушно устремились нань. Низвержен был долу апостоле святе, с криле храма Святаго. Востав же на колени, Творцу молился о помиловании убивающих тя. Камением до смерти побиваем был при стене храма Святаго. Там же паствою твоею погребен бысть. Мы же, ти, представшему пред престолом Святыя Троицы радостно зовем:
Радуйся, яко от иудей свержен был, небесных чертогов сподобился еси.
Радуйся, яко подражатель страсти Господней был убиваем.
Радуйся, горняго Иерусалима апостольское основание.
Радуйся, яко жертву чисту принесл еси Царю и Творцу.
Радуйся, яко в Церковь Небесную священно вшел еси, обливаем , блаженне, кровию.
Радуйся, яко тя заступника крепкаго пред Богом имеем.
Радуйся, яко престолу Святыя Троицы предстоиши венценосче праведный, нетленных наслаждаешися честей.
Радуйся, священномучениче непобедимый, иерарше прехвальный и светильниче всемирный.
Радуйся , Иакове, первый иерарше Церкви Иерусалимстей и славный священномучениче!

Кондак 13
О, преславный апостоле Иакове, брате Господень, Церкви Христовой светильниче многосветлый. Прими от благоговейных сердец с любовию приносимое хваление тебе. Испроси нам у Христа Бога утверждение в вере, оставление прегрешений и избавления от вечнаго осуждения и да удостоимся в Небеснем Царствии, купно с тобою, во веки пети Богу: Аллилуиа.
Сей Кондак читается трижды. Затем 1-й Икос "Ангелов Творец...» и 1-й Кондак «Апостолу Христову...».

Молитва
О, великий угодниче Божий, богоизбранный и богопрославленный апостоле Иакове, брате Господень! Ты еси великий архиерей града Святаго, теплый наш заступниче и ходатай, предстоящий Престолу Пресвятыя Троицы.
Не отрини нас от твоего заступления, но воздвигни нас низверженных многими грехи.
Яко священномученик, имеяй власть решати и вязати, разреши зол наших соузы и любви Божией причти нас и Царствия Небеснаго причастники, блаженне соделай молитвами твоими.
Моли Христа Спаса, да сподобит непреткновенно совершати наше земное странствие, да вечныя и блаженныя жизни на небеси сподобимся и тамо, с тобою вкупе, выну восхваляти Троицу Нераздельную, воспевати Едино Божество Отца, и Сына, и Духа Всесвятаго, во веки веков. Аминь.[/spoiler]

[Раб божий Константин]

АКАФИСТ праведному Иакову, Боровичскому чудотворцу.
[spoiler]Кондак 1
     Избранный от Царя Сил Господа Иисуса, дивно прославленный от Него святых мощей твоих явлением и множеством чудотворений, угодниче Божий Иакове праведный, о твоих источаемых нам благодеяниих благодарни суще, похвальное восписуем ти пение, и молимтися о еже от всяких бед свободитися нам твоими молитвами, радостно и умиленно тебе зовущым:
     Радуйся, Иакове праведный, чудотворче Христов предивный.


Икос 1
     Ангелоподобное житие твое на земли являеши нам по смерти, богомудре Иакове, святых мощей твоих преславным прославлением, от нихже токи исцелений благодатных источаеши недужным. Темже Российская страна тобою красуется, стяжавши тя, богодарованного целебника, мы же с любовию ти зовем:
     Радуйся, великий угодниче Божий, утаивый от нас Отечествие твое земное, да увериши, яко от Бога к нам послан еси.
     Радуйся, равноангельный человече, облиставый нас божественною зареюпреславных твоих чудес.
     Радуйся, небожителю, горе со ангелы обитаяй.
     Радуйся, от небесных высот благосердием твоим к земнородным приникаяй.
     Радуйся, в тайне Господеви поработавый в преподобии и правде.
     Радуйся, явно и преславно от Господа прославленный нетлением и чудесы.
     Радуйся, Иакове праведный, чудотворче Христов предивный.


Кондак 2
     Видя льдину, манием Божиим противу быстрин водных плывущую, и от нея дым кадильный горе возносящийся, недоумеваху людие веси Боровичския о необычнем сем явлении. Приставшей же льдине ко брегу речному, обретоша на ней на кладе древесней лежащыя, нетлением процветшыя святыя мощи твоя, смиренномудре Иакове. Темже и нас подвизаеши Прославльшему тя Господу пети: Аллилуиа.


Икос 2
     Разум божественныя тайны неразумевающе, убояшася людие Боровичстии прияти тя незнаема и непогребенна, и вспять отринуша льдину с мощами твоими в быстрину речную. Оней же паки к ним трижды возвращшейся, представ святый Иаков в соннем видении старейшинам Боровичским, обличил еси их сице глаголя: «Что гоните мя христианина верна, именем тезоименита святому апостолу Иакову брату Божию суща»; о сем радующеся благодарим и зовем ти таковая:
     Радуйся, незлобием твоим Христу Господу, от иудей гониму, подражавый.
     Радуйся, простоту и неразумие отринувших тя не наказавый.
     Радуйся, неведение их явлением твоим вразумивый.
     Радуйся, веру твою во Христа ясно исповедавый.
     Радуйся, имя твое святое от нас не скрывый.
     Радуйся, благодать тебе от Господа дарованную чудесы преславными проявивый.
     Радуйся, Иакове праведный, чудотворче Христов предивный.


Кондак 3
     Сила Божия славно прославися во святых мощех твоих, Иакове святе, к нимже притекающе, недужнии исцеление, слепии прозрение, немии ясноглаголание получаху, и здрави возвращахуся, прославляюще тя чудотворца милостиваго. Темже молим тя и нас, немощствующих грехи многими, посети благоутробне и умоли за нас Человеколюбца Бога, Емуже воспеваем: Аллилуиа.


Икос 3
     Имеюще помышления сумнительная о чуднем явлении мощей твоих святых, людие Боровичстии на брезе речнем положиша их на кладе древесней: обаче и время довольно лежавшым им тамо, неистлени явишася и чудесы о твоей святыни удостовериша, святче Божий, прославляемый от верных богомольцев пении сими:
     Радуйся, юности преизящная похвало.
     Радуйся, свято процветшая розго небеснаго вертограда Иисусова.
     Радуйся, цвете нетления, облагоухавый Российскую страну вонею благоухания Христова.
     Радуйся, крине чистоты, пренесенный от земли в рай превышний.
     Радуйся, многоцелебный сосуде безмезднаго врачевания недугов человеческих.
     Радуйся, чудес источниче, оросивый нас к плодоносию духовному.
     Радуйся, Иакове праведный, чудотворче Христов предивный.


Кондак 4
     Буря недоумения смути святителя Новоградскаго Феодосиа о преславнем явлении мощей твоих, святе Иакове: темже возвестити о сем первосвятителю Московскому Макарию и благоверному царю Иоанну вскоре потщася. Тии же весть благую приемше, верою познаша тя чудотворца богодарованнаго, и со благодарным чувствием Прославльшему тя Христу Богу возгласиша: Аллилуиа.


Икос 4
     Слышавше ближнии и дальнии неисцельно болящии, яко источник целеб точит священная рака твоя, угодниче Божий Иакове, со тщанием устремишася к тебе и по вере своей приимаху исцеления своим недугом, немолчными усты возглашающе тебе сия песненная словеса:
     Радуйся, скорый помощниче скорбящих и озлобленных.
     Радуйся, добрый целебниче болезнми обремененных.
     Радуйся, благий посетителю неисцельно страждущих.
     Радуйся, скоропредстательный врачу отчаянно недугующих.
     Радуйся, укрепление немощных и разслабленных.
     Радуйся, утешение унывающих и безнадежных.
     Радуйся, Иакове праведный, чудотворче Христов предивный.


Кондак 5
     Богосветлая лампада, елеем милости Божия исполненная и преизливающаяся являешися, святче Божий Иакове в посмертных деяниих твоих, многим бо с верою притекающих к мощем твоим, благодетельствовал еси чудесно, и безчисленных недужных уврачевал еси милостивно, подвизая нас гласы немолчными воспевати тобою благодеющему нам Богу: Аллилуиа.


Икос 5
     Видевше велию благодать целебную, от Господа тебе дарованную посланнии от святителя Новоградскаго Феодосиа благоговейнии священницы принесоша цельбоподательныя мощи твоя в храм Божий, Иакове досточудне, да не сокрыт будет толикий светильник чудес, но на свещнице святолепнем Церкве Боровичския да светит всем, верою чтущым тя благохвалении сими:
     Радуйся, добродетели твоя во глубине смирения твоего от нас сокрывый.
     Радуйся, и мощем твоим святым вне храма Божия на долзе пребывати попустивый.
     Радуйся, от брега речнаго, яко бисер многоценен в церковь Господню принесенный.
     Радуйся, яко сокровище дражайшее, тамо пложенный.
     Радуйся, смирение совершенное и нищету неложную по смерти засвидетельствовавый.
     Радуйся, убожеством риз твоих нестяжание твое обличивый.
     Радуйся, Иакове праведный, чудотворче Христов предивный.


Кондак 6
     Проповедник немолчный твоих чудес явися святейший патриарх Никон, иже устроив обитель преславну Богоматери, тамо святыя мощи твоя с благолепною честию священства принести потщася, идеже и ныне, яко крин благоуханен пребывают источающа исцеления благодатныя всем требующым, Богу же вопиющым: Аллилуиа.


Икос 6
     Возсиял еси яко звезда путеводная, зарею чудес твоих, всех путеводящая к Небесному Отечествию, Иакове всеблаженне. Кто бо не умилится, видя, яко в юнем возрасте старцев добродетелию превозшел еси, и велий дар чудотворений праведно от Бога восприял еси; о сем дивимся и зовем ти во умилении душ и сердец:
     Радуйся, избранниче Божий, непорочное житие на земли препроводивый.
     Радуйся, любимиче Христов, кротостию и тихостию твоею блаженство кротких унаследовавый.
     Радуйся, в мире скончавыйся и к премирным обителем райским возшедый.
     Радуйся, со ангелы и всеми святыми тамо на веки водворивыйся.
     Радуйся, гражданине всесветлаго града Иерусалима Горняго.
     Радуйся, ангеле земный и человече небесный.
     Радуйся, Иакове праведный, чудотворче Христов предивный.


Кондак 7
     Хотя Человеколюбец Господь явити истину Православия святыя Восточныя Церкве благодатным нетлением мощей святых Своих угодников, и чудесы от них истекающими, сию свидетельствует, во обличение иноверных и неверных, и во утверждение православных. Сие дивное смотрение Божие в преславнем явлении мощей твоих, Иакове праведный, разумеюще верою, приносим Царю Небесе и земли благодарственную песнь: Аллилуиа.


Икос 7
     Новое знамение благоволения Божия в стране Российстей видим в многочудеснем явлении святых мощей твоих, Иакове праведный, и с любовию притекающе к твоему молитвенному заступлению, яко богодарованному заступнику нашему, приносим ти сия похвалы:
     Радуйся, чудесы твоими истины святыя православныя веры удостоверивый.
     Радуйся, присущей святей Восточней Церкви благодати Святаго Духа проповедниче.
     Радуйся, грядущаго воскресения мертвых светлый прообразе.
     Радуйся, немерцающаго трисолнечнаго сияния светлейшее отображение.
     Радуйся, вечныя безсмертныя о Христе жизни цельбоносныя проявление.
     Радуйся, райскаго нескончаемаго блаженства всежелательный нам ходатаю.
     Радуйся, Иакове праведный, чудотворче Христов предивный.


Кондак 8
     Странники и пришельцы суще в мире сем прелестнем, к тебе прибегаем Иакове святе: управи нас влающихся окормлением твоим к тихому пристанищу спасения, настави твоими молитвами на стезю покаяния, и заступи от всякаго диавольскаго искушения, да тобою вспомоществуеми, сподобимся улучити блаженство вечное, и со ангелы и всеми святыми Создателю нашему пети: Аллилуиа.


Икос 8
     Весь бе в нижних, обаче и вышних духом не отступил еси, святе Иакове, егда живяше на земли. Ныне же пребываеши в вышних, предстоя со ангелы Престолу Господа Славы: обаче и нижних не отступаеши, молитвами благоспоспешествуя нам и чудесы посещая нас, поющих тебе таковая:
     Радуйся, неленостный воли Божией исполнителю.
     Радуйся, буйство Христово паче премудрости мирския вменивый.
     Радуйся, во смирении глубоцем безвестно жизнь праведную скончавый.
     Радуйся, ангелы от земли к обителем небесным на лоно Авраамле пренесенный.
     Радуйся, лику святых Божиих Престолу предстоящих горе сопричтенный.
     Радуйся, благоволением Божиим и долу на земли нетлением и чудесы прославленный.
     Радуйся, Иакове праведный, чудотворче Христов предивный.


Кондак 9
     Всяк возраст не неудобен благочестию бывает, аще осенит свыше благодать Божия, немощная врачующи и оскудевающая восполняющи: темже и тебе угодниче Божий, в юностнем возрасте толико укрепи, яко вся добродетели удобно совершил еси, и безплотным непорочностию и чистотою уподобился еси, и еще на земли в бреннем телеси, небесным нравом украшенный, сподобился еси достойно пети Богу ангельскую песнь: Аллилуиа.


Икос 9
     Витийство мудрых мира сего недоумеет изъяснити тайну чуднаго нетления мощей святых Божиих: мы же, испытания чужди, верою несумненною залог безсмертия в сем видяще, с любовию припадаем ко святым и многоцелебным мощем твоим, святе Иакове, и яко вернаго раба Христова и чудотворца славнаго, венчаем тя благохвалении сими:
     Радуйся, молитв благовонное кадило, благоухающее горе у Престола Божия.
     Радуйся, крине благовонный, Церковь Российскую ароматы райскими усладивый.
     Радуйся, бисере пресветлый, озаривший нас сиянием преславных чудес.
     Радуйся, заре безсмертия, возсиявшая нам от гроба, являющаго нетленную жизнь.
     Радуйся, мироположнице благодати, на всяк недуг душевный врачевание источающая.
     Радуйся, подателю радования и утешения всяцей души скорбящей, с упованием и верою к тебе притекающей.
     Радуйся, Иакове праведный, чудотворче Христов предивный.


Кондак 10
     Спасение и блаженство райское житием праведным унаследовав, святче Божий, ни в чемже лишен еси, но равный динарий с древними великими святыми от небеснаго Домовладыки прияв, моли прилежно о еже и нам немощным и грешным житие сие временное без порока прейти, и блаженство вечное улучити, и во Царствии Небеснем радостно пети Богу Спасителю грешных: Аллилуиа.


Икос 10
     Стеною молитв твоих, угодниче Христов, огради нас от всякаго душевреднаго искушения диавольскаго, яко тебе дарова нам Преблагий Бог покров и защиту душам и телесем нашым. Тебе убо прославляем и просим: помози нам во всяцей скорби и обстоянии, сице тебе вопиющым:
     Радуйся, Церкве торжествующия на небеси изрядное украшение.
     Радуйся, Церкве воинствующия на земли крепкое вспоможение.
     Радуйся, целомудрия и чистоты зерцало светлейшее.
     Радуйся, кротости и нищеты духовныя образе совершеннейший.
     Радуйся, смирения любителю.
     Радуйся, в жизни и по смерти образ смиренномудрия показавый.
     Радуйся, Иакове праведный, чудотворче Христов предивный.


Кондак 11
     Пение умиленное, от любве и усердия в похвалу тебе от нас возносимое, приими благоутробне, святче Божий Иакове, воззри не на нас недостойных, но на усердное произволение наше, и подражая милосердию Христа Спасителя нашего, приклонися к нам милостивно, и в покаянии преуспети сподоби, да твоими молитвами всегда поем Богу: Аллилуиа.


Икос 11
     Светлую память твою, яко торжество веры и благочестия светле совершает святая Христова Церковь, угодниче Божий и чудотворче Иакове, созывающи верныя чада своя на похвалу праведнаго жития твоего и прславных чудес твоих. Приими убо, ублажаемый избранниче Христов, гласы хвалебныя, тебе радостно от нас возносимыя сице:
     Радуйся, ангелов подобниче и человеков заступниче.
     Радуйся, святых сожителю присный Богу.
     Радуйся, яко предстоиши Божию Престолу во свете немерцающия славы.
     Радуйся, венценосче, увенчанный от руки Вседержителя.
     Радуйся, ризою нетления облеченный и даром чудес обогащенный.
     Радуйся, молитвенниче неусыпаяй и предстателю богоприятный.
     Радуйся, Иакове праведный, чудотворче Христов предивный.


Кондак 12
     Благодать целебную приял еси от Всещедраго Бога, Иакове святе, еюже недуги и язи человеческия врачуеши преславно, не мзды от нас ко уврачеванию требуя, но веры несумненныя ожидая. Темже, ведуще тя врача благоискусна и целебника немздоприимна, к тебе прибегаем и по прошению дарованная благодеяния приемлем, поюще Богу: Аллилуиа.


Икос 12
     Поюще многочудесное прославление святых мощей твоих, исповедуем неисчетная твоя благодеяния, явленная и присноявляемая тобою всем с верою и любовию к тебе притекающым, Иакове досточудне, ихже и нас не лиши смиренных, упование на тя возложивших, и тако к тебе от глубины души впиющих:
     Радуйся, Святыя Живоначальныя Троицы благоволением горе осененный.
     Радуйся, ангельским светозарным силам сопричтенный.
     Радуйся, вечнаго ликования святых, во гласе радования блаженный сопричастниче.
     Радуйся, блаженства неизглаголаннаго, праведным от века уготованнаго сонаследниче.
     Радуйся, Духа Святаго обителе, чистотою благоукрашенная.
     Радуйся, душ и телес наших целебниче премилостивый.
     Радуйся, Иакове праведный, чудотворче Христов предивный.


Кондак 13
     О чудотворче предивный и премилостивый, Иакове преблаженне! Малое сие моление наше милостивно приим, данною ти от Господа благодатию уврачуй немощи душ и телес наших: молитвами же твоими изми нас геенския муки, и сподоби с тобою и всеми святыми в райских селениих, пети Богу Спасителю нашему: Аллилуиа.

Этот кондак читается трижды, затем икос 1-й и кондак 1-й

Молитва праведному Иакову, Боровичскому чудотворцу
     О святый великий праведниче и преславный чудотворче, богоблаженный угодниче Христов Иакове, дивно прославленный на Небеси и на земли данный нам от Господа целебниче и заступниче, к тебе припадаем с верою, любовию и благоговением и молимся от глубины души: помози нам, зело прогневавшим Господа и Создателя нашего, и испроси нам вся яже к житию временному и спасению вечному потребная; земли плодоносие, воздухов благорастворение, душ и телес здравие, в покаянии и благочестии преспеяние, веры православныя укрепление, суеверия посрамление, неверия искоренение, и всякаго благаго прошения нашего ко Господу исполнение. Испроси у Господа: страждущую страну Российскую от лютых безбожник и власти их да свободит, и да возставит престол православных правителей; верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш. Услыши, угодниче Божий, всяку душу христианскую, в скорби и обстоянии тя молитвенно призывающую, ускори на помощь, облегчи скорби, уврачуй недуги и явися скорый предстатель требующих твоего заступления. Наипаче же в час кончины нашея не закосни приити на помощь нам и умоли Господа даровати нам кончину живота нашего мирну, безмятежну, святых Христовых Таин причастну и упования исполнену да с надеждою спасения безбедно прейдем страшный путь воздушных мытарств, и непреткновенно достигнем вожделеннаго онаго Царствия, еже уготовал Господь любящым Его. Ей, святче Божий! Услыши нас и не презри моления нашего, но сотвори нас соучастники быти блаженства вечнаго, да вкупе с тобою спасеннии милосердием Христа Спасителя нашего воспоем и прославим Его со Отцем и Святым Духом, во веки веков. Аминь.


Тропарь святому праведному Иакову, Христа ради юродивому, Боровицкому чудотворцу
Тропарь, глас 1:
     Божественною благодатию просветився, и по смерти даруеши исцеление притекающым к раце мощей твоих, премудре Иакове: темже и мы ныне чтим честных мощей твоих пренесение, веселяще вкупе души и телеса. Тем вси вопием: слава Давшему ти крепость, слава Венчавшему тя, слава Действующему тобою всем исцеления.


Кондак, глас 8:
     Верою и любовию твое честное пренесение празднующих, блаженне, сохрани и соблюди от всякая злобы, и соблазна змиина: имаши бо дерзновение ко Владыце всех Христу Богу. Егоже моли спасти императора православнаго, и люди молящыя тя, да вси вопием ти: радуйся отче Иакове, всея Российския земли удобрение.


Величание
     Ублажаем тя, святый праведный Иакове, и чтим святую память твою, ты бо молиши за нас Христа Бога нашего.


Память 23 октября/5 ноября и 22 мая/4 июня.[/spoiler]

[Раб божий Константин]

АКАФИСТ ПРЕПОДОБНОМУ ИАКОВУ ЖЕЛЕЗНОБОРОВСКОМУ.
[spoiler]Кондак 1
Избранный чудотворче, и предивный угодниче Христов Иакове, источаяй неоскудно исцеления приходящих к тебе с верою, с любовию похвальная восписуем ти, преподобне; ты же, яко имеяй дерзновение ко Святей Троице, от всяких нас бед твоими молитвами избави, и вся полезная испроси зовущим ти:
Радуйся, Иакове, богомудре отче наш.

Икос 1
Ангел земный и небесный человек явился еси, преподобне отче наш Иакове; аще бо и человек естеством быв, но яко безплотен на земли пожил еси, всякое житейское отложив попечение, да Единому благоугодиши Богу; темже тя, яко угодника Христова и приснаго собеседника Ангелов любовию почитающе, похвальными песньми ублажаем сице:
Радуйся, Костромских пределов славное прозябение.
Радуйся, отца благочестиваго отрасль;
Радуйся, матере благоговейной плод.
Радуйся, Христа Бога от юности паче всего возлюбивый;
Радуйся, стезем Того последовати всеусердно возжелевый.
Радуйся, вся красная мира сего во уметы вменивый;
Радуйся, заповедь Евангелия, еже ни о чесом же от сущих в мире пещися, с любовию исполнивый.
Радуйся, велиим воздержанием измлада тело твое изнуривый;
Радуйся, плоть твою духови покоривый.
Радуйся, благий рабе и верный, данный тебе талант сугубо возрастивый;
Радуйся, слуго Господень, преблагую волю Владыки своего сотворивый.
Радуйся, от утра до вечера твоея жизни в винограде Христове потрудивыйся.
Радуйся, ИАКОВЕ, БОГОМУДРЕ ОТЧЕ НАШ.

Кондак 2
Видя суету земных попечений, мирскаго мятежа избегнути потщался еси, богомудре Иакове, возлюбив же тишину и безмолвие, в пустыни вселитися восхотел еси, да един Единому Богу работаеши, присно воспевая: Аллилуиа.

Икос 2
Разум недоразуменный имамы, како восхвалити по достоянию подвиги и труды твоя, преподобне отче Иакове; сего ради молим тя, моли, угодниче Христов, подати нам свыше разум, да возможем по долгу воспети богоугодное житие твое; благоговейне совершающе святую память твою, вопием ти сице:
Радуйся, яко блага земная еще юн сый, презрел еси.
Радуйся, яко вся имения твоя, от родителей оставшаяся, нищим раздал еси;
Радуйся, яко ни к чемуже от сущих в мире сердцем твоим прилепился еси.
Радуйся, яко Духом Святым от сует земных воззван был еси, во еже работати Господеви;
Радуйся, яко в воинство слуг Христовых вписатися преискренне восхотел еси.
Радуйся, яко куплями житейскими не обязался еси, да Небесному Воеводе угоден будеши;
Радуйся, яко иноческое житие зело возлюбил еси.
Радуйся, яко богомудраго наставника на путь спасения взыскал еси;
Радуйся, яко преподобному и богоносному Сергию всеусердно в послушание себе предал еси.
Радуйся, яко к богособранному стаду духовных чад его причтен был еси;
Радуйся, яко благий ярем иноческаго жития от преподобных рук его с радостию восприял еси.
Радуйся, яко труды, скорби и тесноты иноческаго жития ради Господа Иисуса понесл еси до конца.
Радуйся, ИАКОВЕ, БОГОМУДРЕ ОТЧЕ НАШ.

Кондак 3
Сила Божественныя любве, еюже измлада исполнено бысть сердце твое, толико укрепи тя в подвизех, яко возложь руку твою на рало, никакоже вспять обратился еси, радостно воспевая Богу: Аллилуиа.

Икос 3
Зряще равноангельное твое житие, како кто возможет поведати глубину твоего смирения, высоту самоотречения и широту твоея любве, яже к Богу; по силе же нашей, хвалебными песньми ублажающе, зовем ти:
Радуйся, мужу желаний Господних.
Радуйся, Царства Небеснаго искренний искателю;
Радуйся, столпе благочестия непоколебимый.
Радуйся, верный исполнителю Уставов Святыя Церкве;
Радуйся, многосуетнаго мира любве ради Божия отрекийся.
Радуйся, благое иго Христово на себе восприявый;
Радуйся, вечное спасение души твоея паче всего взыскавый.
Радуйся, в богомыслии и памятовании смерти всю жизнь препроводивый;
Радуйся, горняя мудрствовати, а не земная, от ранняго возраста научивыйся.
Радуйся, водительству Небесныя Мудрости всего себе вручивый;
Радуйся, всякое плотское мудрование далече от себе отринувый.
Радуйся, не имевый зде пребывающаго града, но грядущаго взыскавый.
Радуйся, ИАКОВЕ, БОГОМУДРЕ ОТЧЕ НАШ.

Кондак 4
Бурею уныния и туги сердечныя, яже воздвиже на тя ненавидяй всякаго добра диавол, никакоже сокрушити возможе крепкаго твоего произволения, еже работати Господеви, ни воспретити от благаго твоего начинания; надеждею бо на помощь укрепився, Спасающему тя от малодушия и от бури, взывал еси Богу: Аллилуиа.

Икос 4
Слышав во Евангелии глас Господа, глаголющий: иже хощет по мне ити, да отвержется себе, и возмет крест свой и по мне грядет, ни единоже исполнил еси плотских похотений твоих, но всеусердно взем на рамена своя крест свой, последовал еси во всем Господу Иисусу Христу; сего ради достойно есть величати тя сице:
Радуйся, яко в законе Господни день и нощь поучался еси.
Радуйся, яко заповеди Божии поставил еси аки светильник ногама твоима, и свет стезем твоим;
Радуйся, яко оправдания Господня безпорочна сохранил еси.
Радуйся, яко Пресвятей Троице всеусердно послужил еси;
Радуйся, яко любовию твоею к Богу Отцу приближался еси.
Радуйся, яко послушанием твоим Богу Сыну последовал еси;
Радуйся, яко чистотою твоею Богу Духу Святому во обитель себе уготовал еси.
Радуйся, яко утвердил еси мышцы твоя на труды иноческаго послушания;
Радуйся, яко связал еси руце твоя для всякаго дела, Богу неугоднаго.
Радуйся, яко нозе твои скоры соделал еси к течению на всякия добродетели;
Радуйся, яко стопы твоя уклонил еси от шествия по пути грешных.
Радуйся, яко уста твоя отверзал еси точию на славословие Божие и молитву.
Радуйся, ИАКОВЕ, БОГОМУДРЕ ОТЧЕ НАШ.

Кондак 5
Боготечная звезда явился еси, преподобне Иакове, руководящая многих ко спасительному пути; постом бо, молитвами, и всенощными бдении очистив душу твою, возшел еси на высоту добродетелей, воспевая Богу: Аллилуиа.

Икос 5
Видев, смиренномудре отче Иакове, многих во обители преподобнаго Сергия безмолвию прилежащих, потщался еси подражатель сих быти, и устом твоим положил еси хранение, в молчании выну пребывая; удивляющеся убо таковому подвигу твоему, ублажаем тя сице:
Радуйся, житию богоноснаго наставника твоего Сергия поревновавый.
Радуйся, в посте и воздержании древних великих отцев подражавый;
Радуйся, в бдениих неутомима себе явивый.
Радуйся, дни и нощи в молитвах препроводивый;
Радуйся, всякий вид добродетелей исправити вожделевый.
Радуйся, образ нестяжания всем бывый;
Радуйся, вольную нищету возлюбивый.
Радуйся, тою богатство вечное стяжавый;
Радуйся, чистоту душевную, вкупе и телесную сохранивый.
Радуйся, подвиг молчания с любовию понесый;
Радуйся, незлобием и братолюбием душу твою украсивый.
Радуйся, всякое телесное озлобление с радостию претерпевый.
Радуйся, ИАКОВЕ, БОГОМУДРЕ ОТЧЕ НАШ.

Кондак 6
Проповедник немолчный истиннаго смирения всем был еси, блаженне Иакове, и с сокрушенным сердцем непрестанно взывал еси Богу: Аллилуиа.

Икос 6
Возсиял еси, яко звезда пресветлая посреде богособраннаго сонма иноков во обители великаго во отцех Сергия, светолепным житием твоим, Преподобне Иакове; труды бо к трудам прилагал еси, нощи провождая во бдениих и коленопреклонениих, на правило же церковное и на всякое обительное послушание первый являяся. Воспоминающе сия, любовию вопием ти сице:
Радуйся, яко на камени Православныя веры себе утвердил еси.
Радуйся, яко страх Божий в сердце твоем от юности насадил еси;
Радуйся, яко любовию крепко, аки смерть, ко Христу Богу прилепился еси.
Радуйся, яко надежду во всем на Единаго Бога возложил еси;
Радуйся, яко гордость житейскую далече от себе отринул еси.
Радуйся, яко воздержанием страсти плотския умертвил еси;
Радуйся, яко от мира дольняго в Горний мир ум и сердце твое вперил еси.
Радуйся, яко вместо тленных благ нетленная и вечная возлюбил еси;
Радуйся, яко всяку Евангельскую добродетель на сердце твоем изобразил еси.
Радуйся, яко всеми благими делы Господеви всеусердно послужил еси;
Радуйся, яко в нощи бдел еси, пребывая в молитвах и молениих к Богу.
Радуйся, яко во плоти сый, безплотных житию поревновал еси.
Радуйся, ИАКОВЕ, БОГОМУДРЕ ОТЧЕ НАШ.

Кондак 7
Хотя преискренне к вящим подвигом устремитися, умолил еси богомудраго наставника твоего Сергия отпустити тя в пустыню на одинокое пребывание. Благословение убо прием, и молитву многу сотворив Живоначальней Троице, отшел, преподобне Иакове, в путь свой, Господу Богу со умилением взывая: Аллилуиа.

Икос 7
Велия радости исполнися сердце твое, достоблаженне Иакове, егда пришед в Железный Борок рекомый, обрел еси место, идеже сподобился еси видети пресветлое сияние; отонудуже уразумев, яко благоугодно есть место сие Господеви, и Крест ту водрузив, малую келлию устроил еси; послежде и обитель твоими молитвами, поты же и труды, возградися, на спасение приходящих с тобою. Мы убо, духовная чада твоя, святую память твою совершающе, сия тебе любовию восписуем:
Радуйся, удалитися в пустыню совершеннаго ради безмолвия вожделевый.
Радуйся, в сокровеннем от человек месте работати Господеви изволивый;
Радуйся, яко пустыннолюбивая горлица уединеннаго обиталища взыскавый.
Радуйся, градов и населенных весей удаливыйся;
Радуйся, славу и похвалу от человек возненавидевый.
Радуйся, в пределех отеческаго града Костромы вселитися восхотевый;
Радуйся, весь Железноборовскую своим пришествием просветивый.
Радуйся, сподобивыйся тамо Божественнаго видения;
Радуйся, помощию Божиею, твоими молитвами и труды обитель устроивый.
Радуйся, лик иноков в ней собравый;
Радуйся, пречестный храм во имя Великаго во пророцех Крестителя Иоанна соорудивый.
Радуйся, добрый пастырю и благий наставниче ищущим спасения.
Радуйся, ИАКОВЕ, БОГОМУДРЕ ОТЧЕ НАШ.

Кондак 8
Странен был еси всякаго мирскаго пристрастия, приснопамятне отче наш Иакове; память бо смертную во уме и сердце непрестанно имел еси, и душевныма очима Господа Славы, на Престоле Седящаго, выну созерцал еси, воспевая Ему: Аллилуиа.

Икос 8
Вся дни и нощи в трудех препроводил еси, Преподобне отче наш Иакове, образ был еси терпения и кротости; сего ради достоин явился еси почести вышняго звания, и наследовал еси Царствие Небесное, идеже водворяяся, поминай нас, похвальная вопиющих ти:
Радуйся, яко бодренно и неусыпно стоял еси на страже души твоея.
Радуйся, яко положил еси хранение устом твоим, еже не глаголати тщеты, и всякия неправды;
Радуйся, яко заградил еси ушеса твоя от празднословия душевреднаго.
Радуйся, яко слух твой изощрил еси точию на слышание песнопений Божественных;
Радуйся, яко и в глубоцей старости обычных ти подвигов не оставил еси.
Радуйся, яко в ископании водных хранилищь сам, паче иных потрудился еси;
Радуйся, яко братии твоей образ трудолюбия был еси.
Радуйся, яко мудрыми словесы, паче же благим житием твоим, на путь спасения наставил еси;
Радуйся, яко и безмолвием твоим паче слова многих поучил еси.
Радуйся, яко многая чудеса, еще жив сый, сотворил еси;
Радуйся, яко множество гладных людей во обители твоей пропитал еси.
Радуйся, яко николиже оскудети ей обещал еси.
Радуйся, ИАКОВЕ, БОГОМУДРЕ ОТЧЕ НАШ.

Кондак 9
Всякия собрал еси в души твоей плоды духовнаго делания, и сих ради честное обиталище Пресвятаго Духа был еси, во смирении сердца присно воспевая: Аллилуиа.

Икос 9
Витийствующий язык не может изрещи, коликия напасти и искушения претерпел еси, Богоблаженне Иакове, непрестанную имый брань противу тьмы предстателя; обаче помощию Божиею, твоим же смирением и умиленными ко Господу молитвами до конца того низложил еси. Темже тя величаем сими:
Радуйся, противу князя тьмы мужественно ратоборствовавый.
Радуйся, мудростию твоего рассуждения лестныя помыслы, от врага наносимыя, изобличивый;
Радуйся, бесовския страхования аки призрак вменивый.
Радуйся, силою Крестною полчища демонская далече от себе прогнавый;
Радуйся, твоими молитвами, аки мечем, всю силу вражию поразивый.
Радуйся, будущая предведети благодать приемый;
Радуйся, прозираяй будущая, аки настоящая.
Радуйся, благоверному князю Василию о рождении сына прорекий;
Радуйся, благоверней княгине Софии скорое и легкое от бремене разрешение у Господа испросивый.
Радуйся, источниче благодатных утешений князем и всем, с верою притекающим к тебе;
Радуйся, сподобивыйся сана игуменскаго чрез блаженнаго Святителя Иону.
Радуйся, яко последовал еси того учению и житию.
Радуйся, ИАКОВЕ, БОГОМУДРЕ ОТЧЕ НАШ.

Кондак 10
Спасти хотя душу твою, присноблаженне Иакове, всего себе Господу Богу предал еси, сущу ти зде, на земли, и в райских селениих со всеми святыми воспеваеши Ему: Аллилуиа.

Икос 10
Стена еси незыблема, и град убежища необоримый всем, с верою притекающим к заступлению твоему, и во всех нуждах в помощь тя призывающим. Сего ради тебе, Преподобне отче наш Иакове, яко присному к Богу молитвеннику вопием:
Радуйся, яко о всех просящих у тебе помощи и заступления ходатайствуеши пред Богом.
Радуйся, яко вся полезная и ко спасению потребная у Господа просиши;
Радуйся, яко немощным и недужным подаеши исцеления.
Радуйся, яко нечистыя духи от страждущих человек отгоняеши;
Радуйся, яко от всех бед и напастей нас избавляеши.
Радуйся, яко скорбящим и унывающим утешение подаеши;
Радуйся, яко вдовицам и сирым покровитель являешися.
Радуйся, яко обидимых и невинно гонимых защищаеши;
Радуйся, яко обитель твою своими молитвами ограждаеши и сохраняеши.
Радуйся, яко духовная чада своя присно посещаеши;
Радуйся, яко и окрестныя веси твоим предстательством от находящих зол невредимы сохраняются.
Радуйся, твоим бо ходатайством от губительных болезней избавляются.
Радуйся, ИАКОВЕ, БОГОМУДРЕ ОТЧЕ НАШ.

Кондак 11
Светозарный светильник явился еси, Преподобне Иакове, не точию в Костромских пределех, но и всей Российстей земли; лучи бо чудес от цельбоноснаго образа твоего истекающии, достигают и дольних пределов. Темже прославляюще Прославльшаго тя Господа Бога, воспеваем Ему: Аллилуиа.

Икос 11
Предстоя Престолу Царя Славы вкупе с лики Ангельскими и всеми святыми, не презри присно, отче, моления нашего, и не забуди нас, вопющих ти сицевая:
Радуйся, в теплейшей к Богу любве земное поприще твое скончавый.
Радуйся, в час кончины твоея Пресвятаго Тела и Пречестныя Крове приобщивыйся;
Радуйся, в мире дух твой в руце Бога Отца предавый.
Радуйся, от земныя юдоли в Небесное Царствие преселивыйся;
Радуйся, с лики Ангельскими на Небеси торжествуяй.
Радуйся, сонму Преподобных отец и постников сопричтенный;
Радуйся, со всеми святыми неизреченнаго веселия наслаждаяйся.
Радуйся, от Ангелов с торжеством в радость Господа твоего введенный;
Радуйся, венец Царствия от Христа, Царя Славы, по достоянию подвигов твоих приемый.
Радуйся, яко царствуеши на Небеси со Христом, Емуже сраспинался еси на земли;
Радуйся, ублажаемый на земли.
Радуйся, прославляемый на Небеси.
Радуйся, ИАКОВЕ, БОГОМУДРЕ ОТЧЕ НАШ.

Кондак 12
Благодать Божия и доныне изливается от целебнаго образа твоего на всех, с верою и любовию приступающих к нему, и молитвенно в скорбех, в болезнех же и злых обстояниих тя призывающих, Богу же вопиющих: Аллилуиа.

Икос 12
Поем твоя подвиги, ублажаем равноангельное житие твое, почитаем память твою, дивный угодниче Христов Иакове; от избытка сердца вопием ти сице:
Радуйся, постников похвало и утверждение.
Радуйся, монашествующих добрый пастырю и наставниче;
Радуйся, Костромских пределов украшение.
Радуйся, теплый и присный о нас ко Христу Богу молитвенниче;
Радуйся, сея страны светильниче пресветлый.
Радуйся, Божия благодати нам ходатаю;
Радуйся, немощных врачу и недужных целителю.
Радуйся, телес наших здравия хранителю;
Радуйся, душ наших на стезех спасения руководителю.
Радуйся, всем православным христианом во всех нуждах помощниче.
Радуйся, ИАКОВЕ, БОГОМУДРЕ ОТЧЕ НАШ.

Кондак 13
О, Преблаженне и Богомудре отче наш Иакове, нынешнее наше приемши приношение, умоли Господа Бога, о еже избавитися нам от всякия скорби, бед и напастей, и смертоносных болезней, паче же вечных мук; Царствие же небесное со всеми святыми наследовати, да сподобимся выну с тобою воспевати: Аллилуиа. (Этот Кондак читается трижды.Затем Икос 1: «Ангел земный...»,и Кондак 1: «Избранный чудотворче...»). Молитва Преподобному и Богоносному ИАКОВУ,игумену Железноборовскому чудотворцу

О, Преподобне и Богомудре отче наш Иакове!
Вемы, яко с лики Ангельскими и всеми святыми предстоиши присно Престолу Господа Вседержителя, и велие имаши к Нему дерзновение молитися о всех, с верою и умиленными слезами в помощь тя призывающих. Не премолчи убо, вопия за ны, недостойныя, ко Господу Богу, да отвратит гнев свой, праведно за беззакония наша на ны движимый, и да избавимся всяких скорбей, бед же и напастей, и злых обстояний, и благочестно поживем в будущем веце, ходяще в заповедех и оправданиих Господних непорочно. О, Преблаженне и Боголюбезне отче наш Иакове! Умоли Господа, да не оскудеют во обители твоей истинные ревнители иноческаго жития и подражатели святому и богоугодному житию твоему; сохрани предстательством твоим к Богу обитель и страну сию от огня, глада, меча, нашествия иноплеменных и от всякаго зла, и всем, с верою и любовию притекающим во твою обитель испроси у Господа Бога грехов прощение, телесем здравие, исправление греховнаго жития и вечное спасение; да с тобою и всеми святыми сподобимся прославляти в Троице Славимаго Бога, Отца, и Сына и Святаго Духа, во веки веков. Аминь.

Молитва иная
Преподобне и богоносне отче наш Иакове! Приими ныне нас тебе усердно молящихся и припадающих ко всечестному и многоцелебному твоему гробу, идеже святое твое и многотрудное покоится тело, духом же на небесех предстоя Святей Троице со ангелы и преподобных отец лики; молися о чадех твоих, отче, да избавимся от всяких скорбей, болезней и обстояний, и благочестно поживем в настоящем житии, ходяще в заповедех и оправданиих Господних безпорочно, и да явимся последователи святому и равноангельному житию твоему. Ей, Преподобне отче, молим тя, испроси нам же и всем, верою к тебе притекающим грехов прощение, телесем здравие, исправление жития и вечное спасение. Яко да твоим предстательством спасеннии, славу возсылати сподобимся в Троице славимому Богу, Отцу и Сыну и Святому Духу, ныне и присно и во веки веков. Аминь.

ТРОПАРЬ И Кондак ПРЕПОДОБНОМУ ИАКОВУ
Тропарь, глас 4
Небеснаго желая, земная возненавидел еси, и взем крест свой, последовал еси Христу, и от Него прием дарования чудес, исцеляти недужныя; но яко имея дерзновение ко Святей Троице, испроси нам здравие и спасение, на враги же победу, и не забуди, посещая чад своих, припадающих к целебному гробу твоему, Иакове, Преподобне отче наш.

Кондак, глас 8
Сердечныя очи, досточудне, ко Господу вперив, и телесныя страсти из корене исторгая, неболезненную жизнь в болезнех восприял еси, Преподобне; болезнем же лютым даеши исцеление просящим с верою у тебе; темже молим тя, досточудне, исцели наша болезни душевныя и телесная, да зовем ти:
Радуйся, Иакове, богомудре отче наш.

Величание
Ублажаем тя, Преподобне отче наш Иакове, и чтим святую память твою, наставниче монахов, и собеседниче ангелов.[/spoiler]

[Раб божий Константин]

Акафист святому великомученику Иакову Персянину.
[spoiler]Кондак 1
         
         Избранный страстотерпче и предивный угодниче Христов, добропо-бедный великомучениче Иакове, восхваляем тя, венчаннаго венцем нетле-ния, ты же ныне предстоя престолу Вседержителя, моли за град, обитель и люди, совершающия святую память твою, в радости зовущия:
         Радуйся, Иакове, преславный страстотерпче.
         
         
         
         Икос 1
         
         Ангели Божии радуются, приемля в горния обители души праведных, наипаче же веселятся веселием, егда во вратех райских сретают души свя-тых мучеников. Сего ради и мы, в юдоли сей плачевней, на земли пребы-вающии, в честь честных подвигов твоих возглашаем сице:
         Радуйся, Ангелов веселие.
         Радуйся, демонов рыдание.
         Радуйся, мучеников радование.
         Радуйся, язычников обличение.
         Радуйся, Церкви красото.
         Радуйся, спасающихся полков ликование.
         Радуйся, Иакове, преславный страстотерпче.
         
         Кондак 2
         
         Сила Вышняго вразуми и укрепи тя, славне Иакове, егда зело прещаше ти, царь-мучитель смертию тяжкою и протяженною хотяше тя убити. Ты же сия ни во что вменил еси, словеса безумныя осмеял еси, и отдался еси, яко древо, сечению, посекая сим древняго мучителя — диавола, Богу же воспевая песнь немолчно: Аллилуиа.
         
         Икос 2
         
         Имея зловерием помраченныя души, огнепоклонницы Персидстии не восхотеша разумом своим проникнути во Свет Троическаго Божества, но на мучение тя устремишася, да косно и протяженно тя истязуют по глаголу неправеднаго судии. Мы же, сих ради твоих великих страданий, умильно зовем:
         Радуйся, древо, принесшее плоды веры.
         Радуйся, верою твоею Христа всеискренне возлюбивый.
         Радуйся, ласкания и угрозы презревый.
         Радуйся, проповедниче всеобщаго воскресения.
         Радуйся, наследниче райскаго жилища.
         Радуйся, сладкий грозде веры Христовой.
         Радуйся, Иакове, преславный страстотерпче.
         
         Кондак 3
         
         Бурею злобы дышущия врази Креста Христова совет беззаконный со-творша, да киими бы лютейшими ранами уязвити тя, Иакове, ты же добле-ственно испил еси чашу мучений, воспевая благодарственныя гимны Спа-сителю Богу: Аллилуиа.
         Икос 3
         
         Слышаша мучителие твои словеса, мучениче Иакове, преисполненныя хвалы и любви ко Господу, распыхахуся омраченным сердцем своим на тя. Ты же всеусерднейше помолився о даровании свыше ти помощи тако: «Господи Боже мой, услыши мя раба Твоего, призри с высоты небесныя и даждь ми крепость и силу в час сей». Мы же, прославляя таковую любовь твою ко Господу, тако поем тебе:
         Радуйся, мужественно и терпеливо кровь твою пролиявый.
         Радуйся, венца нетленнаго наследниче.
         Радуйся, яко и нам, певцем твоим, венцы правды ходатайствуеши.
         Радуйся, адаманте веры Христовой.
         Радуйся, шипок, облагоухавший Церковь святую.
         Радуйся, Иакове, преславный страстотерпче.
         
         Кондак 4
         
         Богомудренно сродников своих послушатель быв добрый, егда сии по-сланием тя увещаваше стояти всеусердно в надежде, вере и любви. Не усумнился еси, ниже убоялся еси, егда тебе первый перст десницы твоея врази отсекоша. Но воспел еси гимн первый благодарственный Богу: «Гос-поди Боже, Ты отгоняеши единым перстом Своим бесы, приими, яко ветвь от древа, моея десницы первый перст и милостив ко мне рабу Твоему буди, и возрасти мя, яко лозу плодовиту, в вертограде Твоея славы поющаго: Ал-лилуиа».
         Икос 4
         
         Мученическому лику сопричтен был еси, Иакове, по совершении стра-дания твоего. Да молитвами твоими сопричтемся и мы к лику святых не-божителей, с любовию ныне воспевающих память твою песньми духовны-ми тако:
         Радуйся, быстре возревновавый о Господе.
         Радуйся, воине Христов прекрасный.
         Радуйся, и нам во брани с духом лукавым помогаяй.
         Радуйся, святыми мощами твоими нас освящаяй и сохраняяй.
         Радуйся, защитниче от бесовских наваждений.
         Радуйся, Иакове, преславный страстотерпче.
         
         
         
         Кондак 5
         
         Проповедникам Христовой истины поревновал еси, страстотерпче Иа-кове, к Богу паки и невозвратно прибегл еси, стрижен был еси, незлобиве, яко овча, но не волну мягкую отдал еси, а персты на отсечение десницы и шуй-цы твоея. В сей страшный час твоих страданий Бога благословил еси, поя: «На десятоструннем псалтири воспеваю Тя, Боже, и благодарение приношу Тебе поя: Аллилуиа».
         Икос 5
         
         Светлым лицем, возвышенным умом и радостным сердцем предстоял еси пред неразумными мучителями, Иакове святе. Ты же молитвами свои-ми молися ко Господу, да просветит и нас светом Своея благодати, и изба-вит от злых и неразумных людей, к тебе прибегающих тако:
         Радуйся, скорый целителю болящих, притекающих к тебе.
         Радуйся, во страданиях своих седмины жизни твоея скончавый.
         Радуйся, и осьмый день жизнь вечную получивый.
         Радуйся, на водах покоя почиваяй.
         Радуйся, пламенне Христа возлюбивый.
         Радуйся, зрелый винограде райскаго прозябения.
         Радуйся, Иакове, преславный страстотерпче.
         
         Кондак 6
         
         Хотяще всячески сердце твое уловити, исконный тать душ человече-ских — диавол, устами слуг своих паки и паки ища тя уловити и отвратити, Иакове, от источника света — Христа. Ты же, Боголюбче, уразумев сие ловление коварнаго врага, с Давидом царственным воспел еси: «О, Бозе, спасение мое, о, Бозе, слава моя!» За таковое твое исповедание Бога Выш-няго поем песнь Ангельскую: Аллилуиа.
         
         Икос 6
         
         Новаго тя мученика и страстотерпца Божия Церковь Христова усердно прославляет, наипаче же в день святыя памяти твоея имея тя молитвенни-ка пред Богом за люди, почитающия тя похвалами сими:
         Радуйся, звездо, от Персиды возсиявый.
         Радуйся, святых обителей и храмов Божиих украшение.
         Радуйся, носящих имя твое святое освящение.
         Радуйся, почитающих и украшающих святыя мощи твоя благослове-ние.
         Радуйся, и нас даром сим высоким святых мощей твоих обогативый.
         Радуйся, Иакове, преславный страстотерпче.
         
         Кондак 7
         
         Странность непонятная является страдание твое, мучениче Иакове, неверующим. Глаголют бо: како возможно человеку презреть богатство, здравие и честь и шествовать путем Христа распята? Мы же грешнии ве-мы, колико есть пресладко Евангелие Христово, вемы, яково Бог уготова Царствие любящим Его. Вемы и твою любовь к нам, Иакове достославне, поющим Богу: Аллилуиа.
         Икос 7
         
         Всесладчайшаго Господа Иисуса сладце возлюбил еси, Иакове, любви Его последовал еси. Во страданиях твоих благодарил еси вседушнаго Бога. Мы же, поучающеся таковей любви твоей святей, усердно тебе вопием от земли:
         Радуйся, верховному Апостолу в любви и покаянии поревновавый.
         Радуйся, научаяй нас ждати Христова судища Страшнаго.
         Радуйся, друзей льстивых отвративыйся.
         Радуйся, яко тобою избавляемся льстивых друзей мудрования.
         Радуйся, яко память святая твоя в день образа Знамения Мати Божия — Новгородския.
         Радуйся, грозде виноградная, плод духовный обильно принесшая.
         Радуйся, Иакове, преславный страстотерпче.
         
         Кондак 8
         
         Вси Ангели Божии возрадовашеся и Господа восхвалиша, даровавшаго тебе таковое терпение, Иакове премудре, яко и во страданиях твоих не пре-ставал еси хвалу и благодарение Богу приносити, ибо Бог прославляющих Его прославляет. Таковому Божию милосердию радующеся, победную песнь Богу поем: Аллилуиа.
         Икос 8
         
         Суемудренно изрекает неплодящая языческая церковь. Премудренно витийствует Христова Церковь православная в прославлении святых и мученический Христовый полк — от нихже днесь святый Иаков прослав-ляемь тако:
         Радуйся, лозо отребленная мучением.
         Радуйся, яко от крове твоея истече вино райскаго аромата.
         Радуйся, уста церковныя славы.
         Радуйся, дивное долготерпение показавый.
         Радуйся, непрестанно в страданиях гимны Богу возсылавый.
         Радуйся, Иакове, преславный страстотерпче.
         
         Кондак 9
         
         Спастися душам нашим потщися, великомучениче преславный Иако-ве. Воистинну вемы, яко много может молитва праведнаго, наипаче же му-ченика моление, яко речет Церковь нам. Сего ради тя усердно молим: ох-раняй нас предстательством твоим от душевных и телесных болезней, да во вся дни до кончины живота нашего Богу усердно поем: Аллилуиа.
         
         Икос 9
         
         Стена любви ко Господу твердая явился еси, Иакове, и по разрушении храма — тела твоего, аще и пострадал еси ужасне яко человек, обаче духом ликовал еси во цветнице, Бога благодаряще, Бога воспевающе — сечен, яко древо. Таковей красоте твоея души радуяся, тебе похвальная поем:
         Радуйся, и руце и нозе принесший в жертву Господеви.
         Радуйся, преестественными страданиями вшедший в радость вечную.
         Радуйся, лозы Христовой честная розго.
         Радуйся, молитвами твоими вводящий нас в покой вечнаго с Богом пребывания.
         Радуйся, страдавый от заутра даже до девятаго часа.
         Радуйся, Иакове, преславный страстотерпче.
         
         Кондак 10
         
         Песнь исходную приими от нас, Иакове, страдальче премудрый, со-вершающих днесь память святаго твоего торжества: сердец наших любо-вию горение, фимиама, свещей и цветов от земли приношение, паче же Богу поющих псалом: Аллилуиа.
         Икос 10
         
         Светоносным и живительным Троическим светом за страдания твоя осиянный, Иакове, мучениче преизрядный, да светиши нам грешным, во мраце седящим, светом Христовым с горних высот небеснаго Царствия, идеже ты ныне наслаждаешися неизреченных Божиих красот, да от земли тебе вопием:
         Радуйся, мир и благословение нам с небесе посылающий.
         Радуйся, и нас к небеси привлекающий.
         Радуйся, яко за вся персты твоя усеченныя Бог тя маслиной плодови-той показа.
         Радуйся, наслаждающийся духом мира, веселия и любве во Христе.
         Радуйся, хладную любовь нашу согревающий.
         Радуйся, огнем веры нас воспламеняющий.
         Радуйся, Иакове, преславный страстотерпче.
         
         Кондак 11
         
         «Страданием смертнаго тела моего совлекаюся ветхаго, тлеющаго во мне, человека. Смертию же моею облекаюся в безсмертия ризу. Сего ради, мучителие, что стоите? Исторгайте персты, руце и нозе мои, — творите се-чение древа! Аз бо иду ко Христу моему, Царю и Богу, да во Царствии Его безконечном с ликом горних умов воспою: Аллилуиа».
         
         Икос 11
         
         Пение Святей Троице воспел еси, Иакове, принося благодарение за вся, яже дарова ти Господь: дар покаяния, терпение, любовь и надежду. За та-ковое твое признание воли небесней приими и от нас, малых и грешных по Бозе собратии твоей во Христе, припевы сия:
         Радуйся, вся земная оставивый, да Христа приобрящеши.
         Радуйся, в час страданий твоих Христу Богу горевый, аки свеща.
         Радуйся, стебель страдальчества и плод благодатный.
         Радуйся, яко персты своя усеченныя в жертву Богу принесл еси.
         Радуйся, доброе семя Христово, в Персиде посеянное, прозябшее же во Вселенстей Церкви.
         Радуйся, Иакове, преславный страстотерпче.
         
         Кондак 12
         
         Благодатных даров небесных ниспосли нам от святых мощей твоих, достославне великомучениче Иакове. Приими наше сие песнопение в честь и память страданий твоих приносимое. Да молитвами твоими оградиши нас от враг видимых и невидимых. Да тихое и безмолвное житие совер-шивше, внидем в чертоги небесныя славы, Богу поюще во веки веков: Ал-лилуиа.
         Икос 12
         
         Поюще страдальческую твою кончину, воспеваем Господа Бога Хри-ста, дивнаго во святых Своих, прославляем святыя страдания твоя, Иакове — лозо добродетельная вертограда Христова, и приносим ти малую молит-ву сию:
         Радуйся, вшедший в вечную Божию радость.
         Радуйся, торжествующим нам святую память твою помогаяй.
         Радуйся, сохраняющий нас от бед и напастей.
         Радуйся, тайный наш посетителю.
         Радуйся, яко в святей малей части мощей твоих благодатных духом пребываеши с нами.
         Радуйся, наша небесная радость.
         Радуйся, Иакове, преславный страстотерпче.
         
         Кондак 13
         
         О, предивный и многострадальный великомучениче Иакове, сеченный, яко древо! Приими от нас сие малое молитвенное песнопение, тебе прино-симое в день святыя памяти твоея. Избавляй нас молитвами твоими от всякаго зла, да благодарно Богу поем: Аллилуиа.
         (Сей кондак чтется трижды;
         посем икос 1 и кондак 1.)
         МОЛИТВА
         великомученику Иакову Персянину
         О, святый славный и добропобедный великий мучениче Христов Иа-кове, предстоя ныне по святей мученической кончине твоей престолу Гос-пода славы и наслаждаяся неизреченной красоты небеснаго чертога Бо-жия, не забуди и нас тамо в богоприятных молитвах твоих, зде на земли мо-лящихся тебе. Моли благость Божию, еже ущедрити храм сей (или обитель сию), град и всю страну нашу православную; исходатайствуй у престола Господа Вседержителя паче же всего душам нашим спасение. Да тако святыми молитвами твоими спасение улучим, и сподобимся причастницами быти небесных селений, купнаго с тобою пребывания, прославляя Божест-венное имя Отца, Единороднаго Его Сына и Утешителя Святаго Духа, во веки веков. Аминь.[/spoiler]

[Раб божий Константин]

Акафист святителю Иакову Ростовскому.
[spoiler]Кондак 1

Избранный угодниче Христов и чудотворче, пресветлый Ростова светильниче и вся Российския страны теплый заступниче, похвальное пение приносим ти: ты же, яко имеяй дернзновение ко Господу, от всяких нас бед сохраняй, да любовию зовем тебе:

Радуйся, святителю Иакове, преславный чудотворче.

Икос 1

Ангелов Творец земнаго тя ангела и человека небеснаго показа нам воистинну, отче Иакове: темже тебе, от рождения Богу освященнаго и дивным видением во архиерея граду Ростову предвозвещеннаго, ублажаем похвалами сими:

Радуйся, благословенная отрасле родителей благочестивых; радуйся, Отца Небеснаго чадо превожделенное.
Радуйся от юности твоея благодати Божия преисполненный; радуйся, рабе Божий, благий и верный.
Радуйся, града Ростова архиерею Богоизбранный; радуйся, всем верным пастырю предобрый.
Радуйся, на небеси пребываяй у Господа во обителех Его; радуйся, благодатною помощию не оставляяй и нас на земли живущих.
Радуйся, благодати Святаго Духа сосуде благоуханный; радуйся, милосердия Божия к людем чаше неистощимая.
Радуйся, селение славы Божия, душу твою паче Моисеевы исполнившия; радуйся, промышления Божия сокровище пречудное.
Радуйся, святителю Иакове, преславный чудотворче.

Кондак 2

Видя Господь Бог непорочную душу твою, отче Иакове, предустави тебе быти архипастырю церкве Ростовския, и яко невесту добру тебе ю вручи избраннику своему, да пасеши богомудренно на пажитех живоносных и будеши образ благочестия твоему стаду, научая всяк возраст верных воспевати: Аллилуия

Икос 2

Разум Богопросвещен свыше тебе даровася, святителю Божий, имже зловерие еретика Маркиана уразумел еси, лжеучением иконоборным тишину Церкве ростовския смутити дерзнувша. Темже сего ухещренное лжесловесие мечем Божия слова отразил еси и паству твою от губителя оградил еси, тебе благочестно зовущую:

Радуйся православия поборниче; радуйся, зловерия обличителю.
Радуйся, благочестия учителю; радуйся, злочестия искоренителю.
Радуйся, достоподражательных икон святых почитателю; радуйся, ереси иконоборныя отгнателю.
Радуйся, правоверующих присное утверждение и утешение; радуйся, благочестно живущих бодрость и укрепление.
Радуся, крепосте Господня, от враг Креста Христова неодоленная; радуйся обуреваемых убежище благоутишное.
Радуйся, фараона адскаго посрамителю; радуйся в Горний Иерусалим наш путеводителю.
Радуйся, святителю Иакове, преславный чудотворче.

Кондак 3

Сила Божия укрепляше тя в служении твоем, всесвщенный отче, многия бо скорби и труды подъял еси, и вся, любве ради возлюльшаго тя, претерпел еси, благодарственно воспевая Церкве Зиждителю: Аллилуия

Икос 3

Имый во уме и сердцы твоем словеса Христовы, не осуждати без милости согрешающия, о жене грешнице, на смерть осужденней и к твоему заступлению притекшей, милосердовал еси и на покаяние наставил еси, Владыце Христу, блудницу помиловавшему, подражая. Темже вопием ти умиленно:

Радуйся, Евангелия Христова истинный последователю; радуйся милосердия Иисусова к кающимся верный подражателю.
Радуйся, яко суд человеческий на милость преложил еси; радуйся, яко грешницу, на смерть осужденную, на покаяние соблюл еси.
Радуйся, заступниче безпомощных; радуйся, покровителю напатствуемых.
Радуйся, не осудивый, и не осужденный по заповеди Господней; радуйся, милостивый, и помилованный, по обетованию Христову.
Радуйся, отеческою любовию немощи наша покрываяй; радуйся, под криле защищения твоего прибегающия охраняяй.
Радуйся, яко и праведный гнев Божий ходатайством твоим от нас отвратити силен еси; радуйся, яко и душу твою положити за нас истинно готов был еси.
Радуйся, святителю Иакове, преславный чудотворче.

Кондак 4

Буря клеветы напрасныя и негодования сатанинского возшуме на тя, святителю Христов, егда жену грешную помиловал еси исуд княжий святительским твоим словом на милость пременил еси: человецы же плотстии, лишенни разума духовнаго, яко сообщника беззаконию ея тя оклеветаша, но ты, от тех поношаем, в кротости пел еси сердцеведцу Богу: Аллилуия

Икос 4

Слышавше людие ростовстии клевету на тя злобную, глаголом неподобным веру яша, и якоже древле иудее на Христа, на тя пастыря своего руце возложиша, и от престола святительского изгнаша, не постыдевшеся святыни сана твоего, ни седин твоих старческих. Мы же, безвинное твое изгнание поминающе, яко страдальца истинны тя ублажаем изовем:

Радуйся, поношения и клеветы человеческия мужественно претерпевый; радуйся, блаженство гонимых правды ради унаследивый.
Радуйся, иго скорбей терпеливодушно понесый; Радуйся, чистоту безстрастия сохранивый неврежденну.
Радуйся, благоуханный крине непорочного девства; радуйся, неувядаемый цвете ангельския чистоты.
Радуйся, защитниче неправедно оклеветуемых; радуйся, грозное вразумление неразумно клевещущих.
Радуйся, в горниле скорбей паче злата очищенный; радуйся, терпением напастей Иову многострадальному подобный.
Радуйся, истинный последователю распятого Учителя; радуйся, Креста Его мужественный и усердный носителю.
Радуйся, святителю Иакове, преславный чудотворче.

Кондак 5

Боготечное шествие твое по водам Нера-езера на мантии святитетельстей видевше людие ростовстии, непорочность твою абие уразумеша: темже о своем согрешении сокрушашеся, вслед тебе по водам идущаго потекоша, о прощении и разрешении своея вины слезно вопиюще. Ты же, незлобиве отче, прощение тем даровал еси и поучал еси тыя ко осуждению ближняго нескорым быти, но грехи своя памятующе, смиренно пети Спасителю грешных: Аллилуия

Икос 5

Видев суету мира сего, благоутишие пустыни и житие безмолвное паче престола святительскаго, отче, возлюбил еси: сего ради кущу малу себе воздвиг, постом и молитвою в ней Христу благоугождал еси и обитель иноческую создал еси, в нейже тебе зовем сице:

Радуйся, преподобных удобрение; радуйся, постников похвало.
Радуйся, безмолвия рачителю; радуйся, молитв благоуханных фимиам.
Радуйся, слезы молитвенныя обильно источивый; радйся, плачем временным блаженство вечное улучивый.
Радуйся обители твоея славо и украшение; радуйся, монашествующих в ней тихая отрадо и утешение.
Радуйся, сокровище нетленное, от молитв наших некрыющееся; радуйся, кладязю милостей Господних, от нас не утаивыйся.
Радуйся, светильниче Господень, Церковь Христову озаряяй; радуйся, теплото любве божественныя, верных сердца согревающая.
Радуйся, святителю Иакове, преславный чудотворче.

Кондак 6

Проповеднику покаяния, великому святителю златоусту, воистину подобен еси, святителю досточудне, якоже учением твоим сладковещанным, тако и изгнанием безвинным, в немже незлобия твоего высоту показал еси и богомудрия глубину открыл еси: изменив бо светлыя одежды святительския на убогия рубы иноческия, крепко подвизался еси в бдениих и пощениих деннонощных, в преподобии и святыни немолчно воспевая Богу: Аллилуия

Икос 6

Возсиял еси, яко светило богосветлое, пастве твоей сиянием высоких добродетелей, отче Иакове, молитвенниче о нас неусыпный по долгу воспевающих тя сице:

Радуйся, великий угодниче Божий, многими даровании благодатными украшенный; радуйся, преславными чудесы от Бога прославленный.
Радуйся, светом святыни вышняго озаренный; радуйся, красотою жизни небесныя осиянный.
Радуйся, прерадостное верных чад церкве утешение; радуйся, темным силам адским нестерпимое слышание и видение.
Радуйся, блаженство чистых сердцем унаследивый; радуйся, лицезрения Божия присно наслаждаяйся.
Радуйся, душу твою во обитель Пресвятыя Троицы устроивый; радуйся, яко всем житием твоим Господа славно прославил еси.
Радуйся, града Ростова хранителю и заступниче; радуйся, всея Российския страны предстателю и молитвенниче.
Радуйся, святителю Иакове, преславный чудотворче.

Кондак 7

Хотяй устроити во обители твоей храм Пресвятыя Богоматере, Иакове Богомудре, в строении церковнем сам труждался еси, и в нем молитвы теплыя ко Христу Богу и Его Пречистей Батери возносил еси, до конца дней твоих поя: Аллилуия

Икос 7

Новаго тя Ноя начальника ковчега мысленнаго, сланыя воды моря житейского невредно прешедшаго, верою познаваем, отче наш Иакове. Помози убо и нам спасение улучити и тихаго пристанища от житейских плаваний достигнути, тебе зовущим:

Радуйся, кораблецем силы и хранения Божия естество водное немокренно прешедый; радуйся, от бурь житейских прибежище всем даруяй.
Радуйся, вертограде мысленный, плодов Духа обильно исполненный; радуйся, саде духовный, цветы добродетелей присно благоухаяй.
Радуйся, свеще, в молитвах Богу за нас неугасимо горящая; радуйся, миро драгое, церковь Христову облагоухавшее.
Радуйся, маслино благоплодная, елей милосердия Божия обильно источающая; радуйся, источниче неизсякаемый чудес благодати.
Радуйся, скорбящих присно готовый утешителю; радуйся, болящих безмездный целителю.
Радуйся, во всех бедах наших и напастех верное прибежище; радуйся, всех милостей Божиих нам присный ходатаю.
Радуйся, святителю Иакове, преславный чудотворче.

Кондак 8
Странно бе видети, како во плоти ангельское воистиннужите пожил еси, Иакове Богоблаженне: от юности бо твоея Христа тепле возлюбив, тому до старости маститыя, яко добр делатель, неленостно пработал еси; темже с возженным светильником души твоея сподобился еси внити в чертог Небесного Домувладыки, идеже со всеми святыми присно поеши Ему: Аллилуия

Икос 8

Весь освящен благодатию Духа Святаго Богоносец показался еси святительским служением и равноангельным житием твоим, еже ублажающе, воспеваем ти сице:

Радуйся, добрый ангеле Церкве Ростовския; радуйся, наш апостоле, в трудех и болезнех Христа благовествовавый.
Радуйся, исповедниче веры, неправедное гонение претерпевый; радуйся, любвь Божию на муки себе преданием запечатлевый.
Радуйся, постниче и молитвенниче предивный; радуйся, пастырю и учителю предобрый.
Радуйся, слезный сеятелю радости небесныя; радуйся, заповедй Христовых верный исполнителю.
Радуйся, трудолюбивый деятелю винограда Христова; радуйся, неусыпный молитвенниче о твоем стаде.
Радуйся, благодатный укрепителю немощствующих; радуйся, благословенное утверждение подвигом добрым подвизающихся.
Радуйся, святителю Иакове, преславный чудотворче.

Кондак 9

Всякия беды и скорби и нужды избави обитель твою и град твой, святителю отче Иакове, и не помяни неправд наших, и не премолчи, вопия за ны ко Господу, да сподобит и нас вкупе с тобою воспети Ему: Аллилуия

Икос 9

Вития Церкве Российския, великий святитель Димитрий, пришед во обитель твою, отче наш Иакове, покой свой вечный в ней духом предрече, глаголя: «се покой мой, зде вселюся во век века». С тем убо престолу Царя славы предстоя, молися выну о нас зовущих ти:

Радуйся, чаше неистощимая милостей к нам Господних; радуйся, умиления реко благотекущая.
Радуся, друже Христов, до конца верен Ему пребывая; радуйся, сожителю святых, присный к Богу.
Радуйся, яко смерть твоя честна и память твоя с похвалами; радуйся, яко мзда твоя на небеси велика и венец твой нетленен.
Радуйся, со святителем Димитрием крепкий о нас молитвенниче; Радуйся, со всеми святыми о всех верных боголюбезный ходатаю.
Радуйся, покрове и заступление притекающих под кров обители твоея; Радуйся, помоще скорая и утешение всем призывающим тя.
Радуйся, радосте страны Ростовския; Радуйся, славо всея державы Российския.
Радуйся, святителю Иакове, преславный чудотворче.

Кондак 10

Спастися хотящим и к Богу с покаянием притекающим, помощник усерден являешися, отче наш Иакове; аще бо и преставился еси от нас смертию временною, но духом твоим неотступен от нас пребываеши, помощь благодатную неоскудно нам источая. Сего ради благодарственно воспеваем дивному во святых своих Богу: Аллилуия

Икос 10

Стену ограждения обители твоей исповедуем тя, святителю Христов: юже бо при жизни твоей трудолюбно устроил еси, сию и доныне нерушиму, славну и благолепну храниши, и в ней, яко сокровище многоценно, многоцелебныя мощи твоя сокрыл еси нам, восхваляющим тя сице:

Радуйся, благодарованный наш заступниче; радуйся, милосердый душ и телес наших целебниче.
Радуйся, в сониях и видениих верныя посещаяй; радуйся, в бедах и скорбех сущим утешение низпосылаяй.
Радуйся, болезни неисцельныя скоро врачуяй; радуйся, в напастех и гонениих страждущия заступаяй.
Радуйся, богатство утешения, туне всем подаемое; радуйся, сокровищнице благ вечных, всем отверстая.
Радуйся, обители твоея покрове и ограждение; радуйся, иночествующих в ней благоскорбящих радование.
Радуйся, избавителю наш от всякия нужды и печали; радуйся, хранителю наш от всякаго озлобления вражия.
Радуйся, святителю Иакове, преславный чудотворче.

Кондак 11

Пение молебное во умилении сердечнем приносим ти, чудотворче предивный, и к месту покоища твоего с любовию теплою припадающе, благодарим Христа Бога, даровавшаго нам таковаго заступника и отца благосердаго, вопиющим ему: Аллилуия

Икос 11

Светоносныя лучи божественных милостей сокровенно нам изливаеши, святителю Божий, сего ради прославися имя твое во всей стране нашей православней, яко чудотворца преславна и предстателя многомощна ко Господу тя почитающей; темже и мы, заступления твоего просящее, вопием ти из глубины сердечныя:

Радуйся, ангеле земный и человече небесный; радуйся, горняго Иерусалима жителю всеблаженный.
Радуйся, сопричастниче радости Господа твоего; радуйся, созерцателю непреступныя славы Триипостасного Божества.
Радуйся, славою нетленною украшенный на земли; радуйся, венцем безсмертия увенчанный на небеси.
Радуйся, вожделенное отечество небесное унаследивый; радуйся, и земное отечество твое в молитвах не забываяй.
Радуйся, от земных к небесным дух наш возвышаяй; радуйся, к совровищу нашему, сладчайшему Иисусу, сердца наша обращаяй.
Радуйся, заре Божия света; радуйся, тихое сияние Божией благодати.
Радуйся, святителю Иакове, преславный чудотворче.

Кондак 12

Благодать данную ти от Бога и велие сострадание твое к страждущим, святителю Иакове, ведяще, светло празднуем святую память твою, и тебе, покровителю нашему, молебныя похвалы возносяще, поем всещедрому Богу: Аллилуия

Икос 12

Поюще подвиги твоя и чудеса, святителю достоблаженне, честное успение твое славим, и яко пастыря и заступника нашего величаем тя звании сими:

Радуйся, Пресвятыя Троицы верный поклонниче; радуйся, Пресвятыя Богородицы истинный избранниче.
Радуйся, архангелов и ангелов собеседниче; радуйся, Предтечи Господня и всех святых блаженный сожителю.
Радуйся, Церкве Небесныя и земныя украшение; радуйся, о пастве твоей земней молитвенниче неусыпный.
Радуйся, яко присно со Христом царствуеши; радуйся, яко непрестающия радости Его сподобился еси.
Радуйся, угодниче Божий премилосердый; радуйся, пастырю наш прекроткий.
Радуйся, праведных веселие; радуйся, грешных упование.
Радуйся, святителю Иакове, преславный чудотворче.

Кондак 13


О, преславный чудотворче и святителю Христов Иакове! К тебе усердно грешнии прибегаем, и яко истиннаго отца и пастыря нашего прилежно молим: пролей теплую молитву о нас грешных ко Господу, да зде от всякия напасти нас избавит и будущия да измет муки вся вопиющия Ему: Аллилуия.


Этот кондак читается трижды, затем икос 1-й и кондак 1-й

Молитва

О пречудне и преблаженне отче, святителю Христов Иакове! С верою и любовию к тебе припадающе, молим тя: огради нас святыми твоими молитвами от всякия беды, скорби и болезни и от всякого гнева Божия, праведно на ны движимаго. Испроси нам тихое и безмятежное житие во всяком благочестии и чистоте и помози нам спасение улучити и Царствия Небеснаго достигнути. Ей, угодниче Божий и заступниче наш! Не презри усерднаго моления сего нашего, но призри на ны милостивно и умоли о нас Всещедраго Человеколюбца Бога, да не погибнем люте в беззаконниих наших, но да сподобимся с тобою и всеми святыми славити и воспевати всесвятое имя Его, Отца и Сына и Святаго Духа, ныне и присно и во веки веков. Аминь.


Тропарь, глас 4-й

Избран от юности Богови быв, / святителю Иакове, / сего ради архиерейства саном почтен, / упасл еси люди, яже тебе Богом врученныя. / Темже и по преставлении чудес дарования от Бога приял еси / исцеляти различные недуги. / Моли о нас, совершающих честную память твою, // да тебе непрестанно величаем.



Кондак, глас 8

Яко архиереев сопрестольник / и святителем изрядный поборник был еси, святителю Иакове, / непрестанно сохраняй отечество твое, град же и люди, / тебе верою почитающия и честным мощем твоим покланяющияся, / да велегласно тебе вопием: // радуйся, Иакове Богомудре.


Величание

Величаем Тя, / Святителю, отче наш Иакове, / и чтим святую память твою / ты бо молиши за нас // Христа Бога нашего.[/spoiler]

[Раб божий Константин]

Акафист Собору Ивановских святых.
[spoiler]Кондак 1
Избраннии от Бога святии сродницы наши, в мире пожившии, обаче от мира не сущии, яко в предстательствах ваших надежду имуще спасения, благодарственная приносим пения и хваления, недостойнии соотечественницы ваши, вы же яко стяжавшии отечество вечное, от всяких нас бед свободите, зовущих:
Радуйтеся, вси святии земли Ивановския, приснии о нас к Богу молитвенницы.

Икос 1
Ангелом соревнителие и человеком наставницы в мире явистеся, святии сродницы наши, от древних родов даже до дней последних многоразличными подвиги Бога прославившии. Мы же пресветлый собор ваш купно и коегождо по имени хваляще, сице зовем:
Радуйся, Тихоне преподобне, Лухскую пустыню нищетою твоею обогативый.
Радуйся, мощи твоя, яко сокровище некрадомо под спудом сокровенное, обители твоей оставивый.
Радуйтеся, Фаддее и Герасиме, ученицы и спостницы Тихоновы.
Радуйтеся, смиренномудрия и трудолюбия его подражателие.
Радуйся, Макарие пустыннолюбне, на реце Лусе уединенно подвизавыйся.
Радуйся, зде первую твою обитель основавый.
Радуйся, Иоакиме, наставнику твоему Иринарху Ростовскому в подвизех поревновавый.
Радуйся, затворниче и иконописче благодатный, Николо-шартомский монастырь возродивый.
Радуйтеся, вси святии земли Ивановския, приснии о нас к Богу молитвенницы.

Кондак 2
Видя сердцеведец Господь залог смирения вашего, и веру со упованием, и труд любве, и ревность о славе Его, благодатию Духа Святаго неизреченно обогати вас, в том же Дусе и нас земнородных молитвы приемлете, любовию поющих о вас: Аллилуиа.

Икос 2
Разум кичливый и мудрование плоти отвергше, святителие богомудрии, Духа елей в сосудех сердца стяжали есте, яко да просветится свет ваш пред человеки, темже и мы, недостойная чада вашя, с веселием вопием:
Радуйся, Митрофане, святителю Воронежский, земли нашея благое прозябение.
Радуйся, пастырю трудолюбный, начаток иноческаго жития зде положивый.
Радуйся, Августине, первый архипастырю града Иванова, святым патриархом поставленный.
Радуйся, народом божиим возлюбленный и жертво Богу благоуханная.
Радуйся, Василие, похвало Кинешемская и русския церкве украшение.
Радуйся, исповедниче, безбожная уста заградивый златоплетением словес твоих.
Радуйся, Борисе, чрез едино токмо лето в чине епископстем послуживый.
Радуйся, яко иерарх и яко мученик сугубую благодать приемый молитися о пастве твоей.
Радуйтеся, вси святии земли Ивановския, приснии о нас к Богу молитвенницы.

Кондак 3
Силою свыше облекостеся светло, святии, овому бо дар пророчества, овому же исцеления, иному слово мудрости, иному же дерзновение мученическое тем же Духом дадеся, да во всех прославляется Бог един, в Троице воспеваемый: Аллилуиа.

Икос 3
Имуще дерзновение много, яко утверждени на камени веры, мученицы крепкодушнии, иже со святителем Августином сопричтены быти сподобльшиися, некрепкаго врага победили есте силою крестною, приимите от нас похвалы сицевыя:
Радуйся, Борисе, верный диаконе, во изгнании архиерею твоему послуживый.
Радуйся, нуждею от пастыря разлученный и в заключении гладом скончавыйся.
Радуйтеся, Иоанникие и Нифонте, пощением страсти первее умертвившии, страдальчески второе смерть приимшии.
Радуйся, мучениче Александре благородне, свободу духа во Христе стяжавый.
Радуйся, Иоанне протопресвитере, честную старость твою мученическим венцем увенчавый.
Радуйтеся, Алексие и Николае, на небеси со ангелы славящии Бога.
Радуйтеся, Апполоне и Михаиле, во храме славы нерукотвореннем вселившиися.
Радуйтеся, Феоктисто, Анно и Ольго, в женстем естестве мужескую твердость показавшыя.
Радуйтеся, вси святии земли Ивановския, приснии о нас к Богу молитвенницы.

Кондак 4
Бурею злобы богоборцы смущаеми бывше, тщахуся паки распяти Христа, пастырей церкве и верных в темницы влекуще и убивающе. Вы же, страдальцы святии, свидетельство миру явистеся, яко воскресе Христос, поюще Ему: Аллилуиа.

Икос 4
Слышавше жителие града Шуи о разорении храмов божиих, предсташа заутра окрест церкве соборныя, во еже не предати святыни на проугание, аще и увещаеми быша от пастыря злу не противитися. Мы же сих страдалец безвинных похвалами венчаем, глаголюще:
Радуйся, отче Павле, от юности Христу послуживый.
Радуйся, яко и умрети за Христа не отреклся еси.
Радуйся, отче Иоанне, веси Палехския украшение.
Радуйтеся, священницы Божии, яко молитвою себе предуготовлясте к преселению горнему.
Радуйся, Петре, храма Божия любителю, за негоже и пострадати изволил еси.
Радуйся, яко смерти горькия избыти лестию не восхотел еси.
Радуйтеся, Николае, Авксентие, Сергие и Анастасие дево, от безбожных избиеннии.
Радуйтеся, яко первомученицы земли нашея явистеся.
Радуйтеся, вси святии земли Ивановския, приснии о нас к Богу молитвенницы.

Кондак 5
Боготечныя звезды во тьме безбожия сущым явистеся, священнострадальцы святии, образ бо бысте верным словом и житием, любовию, духом, верою и чистотою, к мысленному солнцу правды Христу приводяще зовущих Ему: Аллилуиа.

Икос 5
Видевше пастырие церкве Христовы стадо свое расхищаемо от волка душегубителя, потщашася душы своя положити за овцы, глаголом Божиим и молитвою на зверя льстиваго устремишася, и того до конца поправше, кровию своею в чертог небесный внидоша. Обаче не оставите сирых и нас, вопиющих:
Радуйся, отче Зосимо, града Иванова звездо пресветлая.
Радуйся, чина церковнаго и отеческих преданий ревнителю.
Радуйся, лжеучения и расккола обличителю дерзновенный.
Радуйся, священниче Божиий и жертво Богу священная.
Радуйся, отче Григорие, подвижниче бодренный и молитвенниче неленостный.
Радуйся, нищих питателю и скорбящих утешителю благодатный.
Радуйся, во страну сибирскую изгнанный и тамо смертию осужденный.
Радуйся, свободою духа и светлостию души твоея мучителей удививый.
Радуйтеся, вси святии земли Ивановския, приснии о нас к Богу молитвенницы.

Кондак 6
Проповедует церковь российская узы и скорби вашя, святии, вы бо от ближних и чад разлучаеми, в темницех многажды затворяеми, оклеветаеми и гоними, работы тяжкими изнуряеми, многообразне умерщвляеми веры ради, любве Христовы никакоже разлучистеся, присно поюще Ему: Аллилуиа.

Икос 6
Возсияша в российстей земли, яко заря невечерняго дне, страдальцы честнии, вами бо тьма безбожныя злобы отгнася, и клятва за грех отступления от рода нашего ныне отъемлется, мы же ко свету богоразумия вами наставлени, сице глаголем:
Радуйся, Константине, кинешемския обители Успения пастырю усерднейший.
Радуйся, яко в туюжде обитель разоренную во узах приведен был еси.
Радуйся, прещений мучительских не убоявыйся.
Радуйся, мученическую кончину во изгнании восприемый.
Радуйся, Иоанне, в решемстем монастыри Богу послуживый.
Радуйся, яко злато в горниле страданий искушенно явивыйся.
Радуйтеся, Елисавето и Анно, на изгнание неправедно осужденнии.
Радуйтеся, мученицы терпеливодушнии и достолавнии.
Радуйтеся, вси святии земли Ивановския, приснии о нас к Богу молитвенницы.

Кондак 7
Хотя человеколюбец Господь помиловати люди согрешившия, яви в российстей земли сонм исповедников новых, да тех призывающе в помощь, и в покаяния ризу облекшеся, благонадежне зовем: Аллилуиа.

Икос 7
Дивное чудо является всем, любовию вас призывающым, новомученицы святии, вы бо недузи от душ и телес отгоняете, скорбь и печаль потребляете, веру в маловерных сердцах утверждаете, мы же по Бозе на вас уповающе, сице взываем:
Радуйся, отче Леониде, от юности изволивый приметатися в дому Божии.
Радуйся, от святаго партиарха рукоположение приемый.
Радуйся, яко за веру Христову седмижды в темницу заключен был еси.
Радуйся, едино слово во устех имевый: служу Богу моему дондеже есмь.
Радуйся, отче Феодоре, шуйских церквей благочинне и пастырю добронравный.
Радуйся, яко три дни и три нощы неправедно испытуемый, никакоже поколебался еси.
Радуйся, совесть пастырскую лжесвидетельством осквернити не преклонивыйся.
Радуйся, за верность Христу от мучителей зверонравных немилостивно убиенный.
Радуйтеся, вси святии земли Ивановския, приснии о нас к Богу молитвенницы.

Кондак 8
Странное слышание и видение неудобопостижное! Како кровию вашею, славнии, освятисте землю российскую! Како же мощи вашя, в земли сокровенныя, быша яко пшеница чистая в сеятву, тучный клас приплодившая всем хотящим жати спасение, Богу поющым о вас: Аллилуиа.

Икос 8
Весь ум и желание сердца к Богу вперивше, старец честных седмочичленных лик, от паствы и чад разлучени, во единый час судищу предсташа, обаче прещений мучительских не убоявшеся, вернии даже до смерти пребыша. Ихже пресветлую память достойно восхвалим, глаголюще:
Радуйтеся, Петре, Иакове и Иоанне, трием апостолом тезоименитии.
Радуйтеся, на Голгофу земную возшедшии и небеснаго Фавора достигшии.
Радуйся, Николае, словом Божиим паче хлеба чувственнаго в темнице препитавыйся.
Радуйся, за сие слово неправедно осужденный.
Радуйтеся, и друзии три Иоанна, благодати Божия исполненнии.
Радуйтеся, пастырие единомудреннии и единонравнии.
Радуйтеся, седины вашя мученическим венцем увенчавшии.
Радуйтеся, вси святии земли Ивановския, приснии о нас к Богу молитвенницы.

Кондак 9
Всякое естество ангельское удивися подвигом вашым, святии, како во плоти суще и в мире живуще, безплотнаго врага победили есте? Мы же таковыя ходатаи и помощницы в немощи нашей имуще, благодарно Богу поем: Аллилуиа.

Икос 9
Ветия многовещаннии и богомудрии многими песньми по достоянию вас восхвалиша, святии, мы же, аще и недостойнии и немудрии, обаче любовию понуждаеми, дерзаем сице вас величати:
Радуйся, отче Леонтие, от юности монашеское житие возлюбивый.
Радуйся, по вся дни о службе церковней поревновавый.
Радуйся, исповедниче, скорбьми многими веру запечатлевый.
Радуйся, старче и молитвенниче о людех богоприятный.
Радуйся, мати Арсение, шуйския обители Успения игумение преподобная.
Радуйся, смирение, любовь и молитву паче всех добродетелей возлюбившая.
Радуйся, стаду твоему образ терпения в скорбех показавшая.
Радуйся, от затвора темничнаго к небеси возлетевшая и ангелы провождаемая.
Радуйтеся, вси святии земли Ивановския, приснии о нас к Богу молитвенницы.

Кондак 10
Спастися хотяй всем человеком промыслитель Господь, мнозей греховней тьме належащей, в мир посылает святыя своя, да тех любовию согреваеми и верою озаряеми, уныния хладность отринем и к деланию устремимся, Христово имя всегда призывающе, поюще Ему: Аллилуиа.

Икос 10
Царя превечнаго воини добропобеднии, единый с нами имуще образ и естество, потоки слезными пламень страстей угасили есте, и всяку Христову заповедь верно сотворше, достойно ныне приемлете славы венцы, услышите убо и нас, вопиющих:
Радуйся, отче Стефане, веси Шустова пастырю добрый.
Радуйся, от утра даже до вечера жития твоего Богу волею поработавый.
Радуйся, яко в старости твоей инии тя связаша и ведоша, аможе не хощеши.
Радуйся, в работе тяжце смерть приемый и с лики мученик сочетавыйся.
Радуйся, отче Евфимие, на служение Церкви гонимей волею изшедый.
Радуйся, во храме пусте о людских гресех моления и жертву приносивый.
Радуйся, священниче законный, яко данный ти залог до конца непорочно соблюл еси.
Радуйся, яко Христа поругана и распята даже до смерти не отверглся еси.
Радуйтеся, вси святии земли Ивановския, приснии о нас к Богу молитвенницы.

Кондак 11
Пение всеумиленное приимите от нас недостойных, Сиона горняго граждане, вы бо премудрость, богатство и славу мира сего нивочтоже вменивше, юроди себе нарекосте, сего ради избраннии, возлюбленнии и святии от Бога нарекшеся, многу мзду восприяли есте, поете со ангелы вечную песнь: Аллилуиа.

Икос 11
Светлоявленнаго дне зарю в своем сердце имуще и богосветлый разум стяжавше, блаженнии, прозреваете ясно грядущая и тайная душ обличаете, к вечному свету всех приводяще, усердно вам воспевающих:
Радуйся, Симоне, на реце Елнати начало подвигу юродства положивый.
Радуйся, во граде Юрьевце претрудное житие скончавый.
Радуйся, блаженне Алексие, Симону в терпении поревновавый.
Радуйся, безбожных обличителю безмолвынй и страдальче кротчайший.
Радуйся, Киприане, при реце Уводи в дебри уединенно подвизавыйся.
Радуйся, честныя твоя мощи многими чудесы прославивый.
Радуйся, Максиме, странниче юроде, разум суетен блаженным безстрастием пременивый.
Радуйся, чистоты ради сердца твоего пророчества даром украшенный.
Радуйтеся, вси святии земли Ивановския, приснии о нас к Богу молитвенницы.

Кондак 12
Благодати Святаго Духа сосуди честнии, многия подвиги вашя кий язык от земных изречет? Мы же дивному во святых своих Богу присно поем: Аллилуиа.

Икос 12
Поюще подвиги вашя, святии, дивимся зело добродетелей светлости, устрашаемся оныя славы блистания, уязвляемся сладце любовию вашею и духом ревности исполняемся, да вам по силе последующе, и радости вашия общницы будем, зовущии:
Радуйтеся, святителие богомудрии, словом Божиим землю нашу озарившии.
Радуйтеся, священномученицы, проповедь Евангельскую кровию запечатлевшии.
Радуйтеся, мученицы всехвальнии, яко вами Церковь Христова утвердися.
Радуйтеся, исповедницы крепцыи, яко вами всякая лесть низложися.
Радуйтеся, отцы преподобнии, яко истину глагол Божиих в житии своем показасте.
Радуйтеся, жены преблаженныя, яко в немощи плоти вашея Божию силу явисте.
Радуйтеся, Христа ради юродивии, чистым сердцем Бога узревшии.
Радуйтеся, праведнии, в мире яко светильницы просиявшии.
Радуйтеся, вси святии земли Ивановския, приснии о нас к Богу молитвенницы.

Кондак 13
О святии сродницы наши, многообразне угодившии Богу, недостойная моления нашя приемше, милостиваго Бога молите, из глубины греховныя ны воздвигнути и вечных мук свободити о вас вопиющих: Аллилуиа.

Молитва всем святым земли Ивановския
О прехвальные угодницы Божии, святии вси в земли Ивановстей просиявшии и яко цвети богосажденнии землю нашу облагоухавшии, многая вашя имена и большая дарования, вашим бо непорочным житием от древних родов до ныне свет Христов просвещается и имя Божие прославляется. Мы же, недостойная чада вашя, последних веков дошедше и исполнение чаемых вами видевше: веры православныя возрождение, храмов и обителей обновление, святых угодников прославление, поем Отца, Сына и Святаго Духа Бога, и к вам, избранным Его, со умилением и верою припадающе молим: не оставите отечества вашего земнаго, молите всеблагаго Господа даровати нам покаяние всецелое и сердце люботрудное во взыскание Его, заблуждшыя и безчувственныя светом веры озарити и на путь правый наставити, властей предержащих сердца просветити, еже от церкви благая глаголати, нищыя и сироты препитати, плененныя от уз свободити и во отечество возвратити, вся во обстоянии и скорби сущыя скоро избавити, и всякую душу людей своих благодатию Духа Святаго во благое наставити, да тем призываеми, очищаеми и просвещаеми, Царствия Небеснаго с вами сподобимся и прославим в Троице славимаго Бога во веки веков. Аминь.[/spoiler]

[Раб божий Константин]

Акафист священномученику Игнатию Богоносцу.
[spoiler]Кондак 1

Избранный страстотерпче и избранниче Христов, святителю Игнатие, похвальная приносим ти пения. Ты же, предстояй со ангелы у Престола Всевышняго, не престай молитися о нас, усердно вопиюших ти: Радуйся, Богоносный Игнатие, великий и преславный страстотерпче.

Икос 1

Ангелом уподобился еси, егда Господь, прием тя на Свои пречистыя руце, постави тя посреде ученик Своих, и возложь руку Свою на твою главу, рече им: «Аще не обратитеся и будите яко дети, не внидите в Царствие Божие». Сего ради, преклоньше колена, вопием ти: Радуйся, Богом носимый. Радуйся, яко Бога выну в сердце своем имел еси. Радуйся, рабе благий и верный. Радуйся, мужу желаний. Радуйся, яко от юности Христа всем сердцем возлюбил еси. Радуйся, яко всецело Ему предался еси. Радуйся, Богоносный Игнатие, великий и преславный страстотерпче.


Кондак 2

Видяще благочестное житие святаго Иоанна Богослова, учителя твоего, желанием возжелал еси вкупе с ним послужити Господу, проповедуя святое Евангелие людем, седящим во тьме и сени смертней, и научая их пети Единому истинному Богу: Аллилуиа.


Икос 2

Разумев духом, яко ангели на небеси славят Бога во Святей Троице, Творца неба и земли, друг ко другу взывающе: Свят, Свят, Свят Господь Саваоф, ты и в земной Церкви уставил еси такожде пети. Сего ради, со умилением взываем ти: Радуйся, Церкви Божией столпе и утверждение. Радуйся, светильниче православия. Радуйся, яко был еси епископом Церкви, идеже первее имя христиан наречеся. Радуйся, яко от апостолов первоверховных рукоположение прияти сподобился еси. Радуйся, яко удостоился еси зрети святыя Ангелы, славящия Бога. Радуйся, яко ныне и сам со Ангелы славиши Господа. Радуйся, Богоносный Игнатие, великий и преславный страстотерпче.


Кондак 3

Сила Вышняго укрепи тя, святый Игнатие, егда представ Траяну, не убоялся еси прещения царева, но мужественно исповедал еси Христа Бога быти истинна, и нечестие языческое посрамил еси, верныя же научил еси Богу воспевати: Аллилуиа.


Икос 3

Имея благодать от Господа просвещати люди Божия, ты наставлял еси я к разуму Божественному словом, паче же житием, образ быв любовию, духом, верою, чистотою и смирением. Сего ради воспеваем ти: Радуйся, яко имя Божие пронесл еси пред цари и языки. Радуйся, яко добре упасл еси паству твою. Радуйся, смирением стяжавый высокая. Радуйся, нищетою приобретый богатая. Радуйся, апостольских преданий хранителю. Радуйся, Церкви Божией верный страже и мудрый строителю. Радуйся, Богоносный Игнатие, великий и преславный страстотерпче.


Кондак 4

Бурю злобы имея в сердце своем Траян, призвав тя, с гневом вопроси: «Ты ли еси Богоносец? Почто люди моя развращаеши?» Ты же отвещал еси: «Аз есмь Богоносец, но люди твоя не развращаю, а спасаю». Кто не ублажит сие твое исповедание веры? Мы же, величающе тя, Богу воспеваем: Аллилуиа.


Икос 4

Слышавше людие вернии твое исповедание, славяху Бога, Траян же, скрежеща зубы своими, паки вопроси тя: «Почто зовешися Богоносец?» Ты же рекл еси: «Яко Бога моего в сердце своем ношу». Сего ради воспеваем тя сице: Радуйся, верный воине Царя Небеснаго. Радуйся, поборниче веры непобедимый. Радуйся, пастырю добрый. Радуйся, молитвенниче о душах наших. Радуйся, яко Божественным Духом просвещен, свирепство мучителя пастырским дерзновением посрамил еси. Радуйся, яко наставляя стадо Христово, многих светом Богоразумия просветил еси. Радуйся, Богоносный Игнатие, великий и преславный страстотерпче.


Кондак 5

Вся красная мира в уметы вменяя, да Христа приобрящеши, «Кто ны разлучит от любве Божия», - вопиял еси, Игнатие, - «Сладка мне скорбь, любезны узы за Желаемаго, гонения ми сладша паче отечества, болезни - паче здравия телеснаго». Мы же, славную память твою чтуще, поем Богу: Аллилуиа.


Икос 5

Видя тя исповедника веры Христовы непобедима, осуди тя безбожный Траян на смерть: ты же, радуяся, возопил еси: «Сладка мне смерть, мне еже жити- - Христос, и еже умрети - приобретение есть: к Нему иду, Того люблю, Того получити надеюся». Сего ради ублажаем тя, святый Игнатие, сице: Радуйся, желание имевый разрешитися и со Христом быти. Радуйся, жертва Богу чиста. Радуйся, подражателю Христовых страстей. Радуйся, яко Христови сораспялся еси. Радуйся, яко кровь за Христа излиял еси. Радуйся, яко кровию своею святительскую одежду украсил еси. Радуйся, Богоносный Игнатие, великий и преславный страстотерпче.


Кондак 6

Проповедник терпения, Богоносный Игнатие, явился еси, егда с радостию услышал еси осуждение свое на растерзание лютыми зверьми. Ублажая твое твердое и неустрашимое исповедание веры, и дивяшеся велией благодати, в тебе пребывающей, поем Богу ангельскую песнь: Аллилуиа.


Икос 6

Возсиял еси яко солнце, угодниче Божий, красотою души твоея, егда воины возлагаху на тя узы, ты же, яко ризу спасения и одежду веселия приял еси сие новое мучение, и на страдание в Рим, аки на брачный пир шествовал еси. Сего ради воспеваем ти: Радуйся, Церкви Антиохийския славо. Радуйся, Богомудрых отцев красото и удобрение. Радуйся, цевнице Духа Святаго. Радуйся, воине Христов непобедимый. Радуйся, яко гордость Траянову низложил еси. Радуйся, яко диавола посрамил еси.  Радуйся, Богоносный Игнатие, великий и преславный страстотерпче.


Кондак 7

Хотя, святителю Христов, изыти от Антиохи, прилежно молил еси Господа не оставити паствы твоея. Людие же плакаху и рыдаху, зряще тя на смерть ведома; ты же, благословляя их, воспевал еси Богу: Аллилуиа.


Икос 7

Дивный во святых Бог утеши тя, святый Игнатие, егда на пути в Рим, ведома тя десятию воинами, срете вы в Смирне святый Поликарп, муж праведный. Ты же, беседуя с ним, радовался еси о Бозе спасе твоем. Сего ради ублажаем тя: Радуйся, яко веру во Христа сохранил еси. Радуйся, яко надежду несумненну имел еси. Радуйся, яко имя Христово во всей вселенней прославил еси. Радуйся, яко уготовася тебе венец правды. Радуйся, верный служителю Господень. Радуйся, светильниче Божий, горяй и светяй. Радуйся, Богоносный Игнатие, великий и преславный страстотерпче.


Кондак 8

Странно и чудно бе шествие твое в Рим на место мучения: воини яко преступника ведяху тя, людие же Божии со епископы и пресвитеры яко ангела Божия сретаху тя, и, сладостно послушая словес твоих, воспеваху Богу: Аллилуиа.


Икос 8

Желание имый разрешитися и со Христом быти, ты, шествуя в Рим на страдания, радостно воспевал еси: «Пшеница Божия есмь: да буду зубы зверей сотрен и чист хлеб Богу явлюся». Сего ради дивящеся терпению твоему и славяще Божие о тебе смотрение, воспеваем сице: Радуйся, образе мужества и терпения. Радуйся, непоколебимое правило веры и благочестия. Радуйся, непобедимый исповедниче Христов. Радуйся, яко не убоялся еси ни огня, ни меча, ниже зубов рыкающих львов. Радуйся, яко терпением своим ангелов Божиих возвеселил еси. Радуйся, яко мужеством своим имя христиан прославил еси. Радуйся, Богоносный Игнатие, великий и преславный страстотерпче.


Кондак 9

Всего себя предав Богу, ты страшился еси, да не терпящии зрети твоих страданий воспретят тебе восприяти их. Сего ради писанием умолял еси: «О, возлюбленнии! Помозите ми сораспястися Христу, пострадати и умрети за него, да и царствую, и живу с Ним во веки, воспевая Богу: Аллилуиа.»


Икос 9

Вития многовещанныя не могут по достоянию воспети твоя страдания: сего ради и нам удобее любити молчание, но побеждаеми любовию твоею, от избытка сердца вопием ти: Радуйся, яко многих ко Христу привел еси. Радуйся, яко писаниями своими путь ко спасению уяснил еси. Радуйся, яко жаждущия спасения напоил еси благочестия водами. Радуйся, яко душевными очима ослепленных светом Богоразумия просветил еси. Радуйся, яко грехом разслабленных воздвигл еси на путь спасения. Радуйся, яко скорбящия и плачущия утешил еси. Радуйся, Богоносный Игнатие, великий и преславный страстотерпче.


Кондак 10

Спасти хотя душу свою, ты, святый Игнатие, пламенел еси серафимскою любовию к Богу: «О, братия!», - молил еси христианы, - «желайте мне смерти: она приведет мя ко Христу: звери мне радостни, огнь - роса мне, тщуся умрети, да живу со Христом». Темже вселился еси в небесныя обители, идеже со Ангелы Богу воспеваеши: Аллилуиа.


Икос 10

Царь Небесный, Утешитель Благий, Дух истины постави тя пасти Церковь Христову, право правити слово истины, верныя люди поучати, противящияся обличати. Сего ради зовем ти: Радуйся, учителю благочестия. Радуйся, обличителю нечестия. Радуйся, душу свою положивый за овцы своя. Радуйся, стяжавый венец мученичества. Радуйся, непрестанно в жизни моливыйся за христианы. Радуйся, и по смерти за ны моляйся. Радуйся, Богоносный Игнатие, великий и преславный страстотерпче.


Кондак 11

Воспевая Господа и непрестанно моляся Ему, ты, святый Игнатие, поучал еси и вверенныя тебе люди творити такожде: «Молитеся непрестанно, кротость ваша да будет известна всем. В братолюбии пребывайте, да не будут в вас распри. Подражайте за ны Распятому, веруйте в Него, Он есть живот вечный: веруяй в него, аще и умрет - оживет». Мы же, прославляя Бога, даровавшаго нам таковаго наставника, вопием Ему: Аллилуиа.


Икос 11

Яко солнце доблестно обтекл еси землю от восток до запад, и зашед незаходимо от земли ко Христу, просвещая мир своим учением. Сего ради взываем ти: Радуйся, угодниче Христов. Радуйся, мучениче и пастырю. Радуйся, скорый в бедах помощниче. Радуйся, гонимых за правду защитниче. Радуйся, немощных врачу. Радуйся, покров и заступление притекающих к тебе с верою. Радуйся, Богоносный Игнатие, великий и преславный страстотерпче.


Кондак 12

Благодать велию и богатую милость приял еси от Христа Бога нашего молитися за всех, с верою призывающих тя. Темже молим тя: помози нам предстательством твоим у Господа сохранити в сердце своем веру несумненну, упование непреложно, любовь к Богу и ближнему нелицемерну, подвигом добрым подвизатися, воспевая Спасителю нашему: Аллилуиа.


Икос 12

Поюще подвиги твоя, почитаем страдания твоя, восхваляем мужество твое, ублажаем святую кончину твою, и прилежно молим тя: услыши ны, взывающия ти: Радуйся, течение жизни славно скончавый. Радуйся, кровию своею истину Христова учения запечатлевый. Радуйся, получивый от Христа венец правды, уготованный всем возлюбившим явление Его. Радуйся, во светлостех святых вселивыйся. Радуйся, яко со Архангелы ликовствуеши. Радуйся, яко лицезрением Божиим наслаждаешися. Радуйся, Богоносный Игнатие, великий и преславный страстотерпче.


Кондак 13

О многострадальный и предивный мучениче, Богоносный Игнатие! Приими от нас недостойных сие малое хвалебное пение и умоли Бога, да сохранит ны и защищит Своею благодатию от всякаго зла в сей жизни, и во время кончины нашея не оставит нас, и по кончине сподобит Царствие Небесное наследовати и вечно воспевати Ему: Аллилуиа.


(Сей кондак читается трижды, затем Икос 1 и Кондак 1)


Молитва

О великий святителю, Богоносный Игнатие! К тебе припадаем и молим тя: призри на ны, грешныя, прибегающия к твоему заступлению, и умоли Господа, да простит нам вся согрешения наша. Ты мученически душу твою за веру положил еси, даруй и нам мужество во всем подражати тебе. Ничесо в жизни не возмогло отлучити тя от любви ко Господу: ни лестная обещания, ни прещения, ни угрозы, ниже самыя муки. Ты с радостию предстал еси пред зверьми на смерть лютую, и яко Ангел возлетел еси во оибтели Отца нашего Небеснаго. Сего ради и молитва твоя много может пред Господем. Буди же, святый угодниче, предстателем за ны пред Спасителем нашим. Помогай всем православным христианом святыми твоими молитвами ко всемогущему Богу, да избавит ны от глада, труса, града, бездождия и смертоносных болезней, и да дарует нам здравие и спасение. Буди же нам помощник скорый во всякой скорби, наипаче же в час кончины нашея явися нам светлым защитником и ходатаем, и умоли Господа сподобитися всем нам, тебе ныне тепле молящимся, получити по христианстей кончине Небесное Царствие, идеже вси святии вкупе с тобою славят Отца и Сына и Святаго Духа. Аминь.


Тропарь, гл. 4

Апостольских нравов подражателю и престола их снаследниче, архиереев удобрение и мучеников славо, Богодухновенне, на огнь, и меч, и звери дерзнул еси веры ради и, слово истины исправляя, до крове пострадал еси, священномучениче Игнатие, моли Христа Бога спастися душам нашим.


Кондак, гл. 3

Светлых подвиг твоих светоносный день предпроповедует всем в вертепе Рожденнаго: Сего бо жаждая от любве насладитися, потщался еси от зверей снеден быти, сего ради и Богоносец нареклся еси, Игнатие всемудре.


ЖИТИЕ

Дни памяти:

2 января, 11 февраля (н.ст.)

Святой Игнатий Богоносец имеет особое значение для нас, потому что он близко общался с апостолами, непосредственно от них слышал христианское учение и был свидетелем распространения и развития первых христианских общин. В своих семи письмах он запечатлел для нас апостольскую эпоху.

Святой Игнатий родился в Сирии в последние годы жизни Спасителя. Его жизнеописание повествует, что он был тем отроком, которого Господь взял на руки и сказал: "Если не обратитесь и не будете как дети, не войдете в Царство Небесное" (Мф. 18, 3). Богоносцем он назван потому, что, крепко любя Господа, он как бы носил Его в своем сердце. Он был учеником апостола и евангелиста Иоанна Богослова. Из послания святого Игнатия к смирнянам видно, что он был особенно близок к апостолу Петру и сопровождал его в некоторых его апостольских путешествиях. Незадолго до разрушения Иерусалима в 72 году скончался Евод, один из семидесяти учеников Христовых, и его преемником на Антиохийской кафедре (в столице Сирии) стал Игнатий.

Святой Игнатий управлял Антиохийской церковью в течение 40 лет (67-107 гг..) В особом видении он удостоился увидеть небесное богослужение и услышать ангельское пение. По образцу ангельского мира он ввел на богослужениях антифонное пение, в котором два хора чередуются и как бы перекликаются. Это пение из Сирии быстро распространилось в ранней Церкви.

В 107 году во время похода против армян император Траян проходил через Антиохию. Ему доложили, что святитель Игнатий исповедует Христа, учит презирать богатство, хранить девство и не приносить жертву римским богам. Император вызвал святителя и потребовал, чтобы он прекратил свою проповедь о Христе. Старец отказался. Тогда его в оковах послали в Рим, где на потеху народа он был отдан на растерзание зверям в Колизее. По пути в Рим он написал семь посланий, которые сохранились до наших дней. В своих посланиях святой Игнатий просит христиан не пытаться спасти его от смерти: "Умоляю вас, не оказывайте мне неблаговременной любви. Оставьте меня быть пищею зверей, чтобы посредством их достигнуть Бога. Я - пшеница Божия. Пусть измелют меня зубы зверей, да сделаюсь чистым хлебом Христовым". Услышав о мужестве святителя, Траян прекратил гонения на христиан. Мощи его были перенесены в Антиохию, а впоследствии возвращены в Рим и положены в церкви во имя священномученика Климента, папы Римского.

В своем послании к Ефесянам святой Игнатий писал: "Храните веру и любовь и на деле показывайте себя христианами. Вера и любовь суть начало и конец жизни. Вера - начало, а любовь - конец, обе же в соединении суть дело Божие. Все прочее относящееся к добродетели от них происходит. Никто исповедующий веру не грешит, и никто стяжавший любовь не ненавидит".


По благословению

Архиепископа Херсонского и Таврического Иоанна.[/spoiler]

[Раб божий Константин]

Акафист святителю Игнатию Брянчанинову.
[spoiler]Кондак 1


Избранный Небесным Царем и от Него прославленный, святителю отче Игнатие, ныне всечестную твою память празднующе, молим тя усердно: путеводствуй нас на пути спасения, избави от врагов видимых и невидимых, от скорбей и болезней с любовию зовущих ти: Радуйся, святителю Игнатие, покаяния и молитвы делателю и учителю преизрядный.


Икос 1


Архангели и Ангели удивляхуся житию твоему, святителю отче Игнатие, како ты от лет малых к Богу велие рачение имел еси и по заповедей Его житие твое неуклонно проводил еси. Дивящеся таковому благоразумию твоему, со умилением взываем ти: Радуйся, скорбящих безчадных родителей твоих рождением своим утешивый; Радуйся, рода честнаго отрасль прекрасная. Радуйся, Ангела хранителя твоего непрестанное веселие; Радуйся, родителей и наставников твоих своею кротостию и покорностию удививый. Радуйся, от лет младенческих ко иноческому послушанию себе приуготовивый; Радуйся, душу свою младенческую к Богу устремивый. Радуйся, в молитве и богомыслии отроческия своя досуги проводивый; Радуйся, для меньших братии и сестер твоих пример молитвы и послушания бывый. Радуйся, святителю Игнатие, покаяния и молитвы делателю и учителю преизрядный!


Кондак 2


Видяще родители твои великая твоя дарования, направиша тя в царствующий град, да обучен будеши к восприятию воинскаго звания. Ты же, избранниче Божий, юн сый леты, стар же разумом, вся сия яко тленна и скоропреходяща почиташе, к Единей же Красоте и Сладости неизреченной — Господу Иисусу Христу умом и сердцем устремлялся еси, поя Ему: Аллилуиа!


Икос 2


Разум божественный от возлюбленнаго тобою Спаса Христа приял еси, Игнатие досточудне, егда, еще отрок сый, во всех видимых образех мира сего руку Небеснаго Творца и Промыслителя проразумевал еси. Темже прославляя тя, вопием ти сице: Радуйся, в видимых явлениях природы Невидимого Бога созерцавый; Радуйся, тишину и уединение лесное возлюбивый. Радуйся, от лет отроческих к Богу велие рачение имевый; Радуйся, вся красная и сладкая мира сего презревый. Радуйся, мзду небесную от Господа восприявый; Радуйся, молитву Иисусову усты непрестанно творивый и во уме содержавый. Радуйся, совершенную любовь ко Господу показавый; Радуйся, возлюбленнаго тобою Иисуса выну в сердце твоем носивый. Радуйся, святителю Игнатие, покаяния и молитвы делателю и учителю преизрядный!


Кондак 3


Силою Вышняго осенен был еси, отче преблаженне, егда вся, яже в мире сем за блага почитаются, отвергл еси и по заповеди Христа Спасителя, взем крест, невозвратно Ему последовал еси, непрестанно поя в сердце твоем: Аллилуиа!


Икос 3


Имея в души своей пламенное желание мир оставити и Христу последовати, не убоялся еси ни гнева царева, ни прещений отеческих и, еще в мире живый, иноческим житием себе украсил еси. Темже, почитая мужество твое и любовь к Сладчайшему Господу Иисусу, блажим тя сице: Радуйся, во младости твоей адамантову твердость духа проявивый; Радуйся, еженедельнаго приобщения Святых Христовых Тайн, яко величайшаго сокровища, желавый. Радуйся, на небесех ныне Христа приобщаяйся, якоже вожделел еси, еще сый на земли; Радуйся, яко семя Божие, всеянное в добрую землю сердца твоего, обильными слезами орошал еси. Радуйся, яко посреде мирских плевел, сторичный плод добродетелей Господу принесл еси; Радуйся, чистоты душевныя и телесныя усердный хранителю. Радуйся, целомудрия дивное украшение; Радуйся, яко благолепие лика твоего о душевней красоте твоей свидетельствоваше. Радуйся, святителю Игнатие, покаяния и молитвы делателю и учителю преизрядный!


Кондак 4


Буря помышлений сумнительных не поколеба Тя, Игнатие блаженне, егда гнева царева не убоявся, чин воинский оставил еси и, подъяв на ся иго Христово и мир с соблазнами его презрев, в пустыню вселился еси и тамо, желанный покой души своей стяжав, немолчно пел еси Богу: Аллилуиа!


Икос 4


Егда слышано бысть во Отечестве твоем, яко ты, юн сый леты, лепотою и дарованьми украшен, славу мира сего и сладости его возненавидев, в пустыню удалился еси, вси сродницы твои вельми удивляхуся, Ангели же на небеси возрадовашася зело и прославиша Бога, восхитившаго тя от суетнаго пути мирскаго и поставившаго на тесный путь иноческий, ведущий в Царство Небесное. Мы же, похваляюще святую ревность твою о Господе, зовем ти: Радуйся, званию воина царя земнаго звание воина Царя Небеснаго предпочтый; Радуйся, на искушения от мира, плоти и диавола находящая крепко ополчивыйся. Радуйся, оружием Божиим, Крестом Христовым, вся козни вражия победивый; Радуйся, бронею праведности облеченный. Радуйся, шлем спасения стяжавый; Радуйся, меч духовный, еже есть глагол Божий, паче всякаго человеческаго оружия возлюбивый. Радуйся, щитом веры от стрел лукаваго себе оградивый; Радуйся, чина ангельскаго блаженство неизреченное в чертозе небеснем получивый. Радуйся, святителю Игнатие, покаяния и молитвы делателю и учителю преизрядный!


Кондак 5


Боготечней звезде подобен был еси, Игнатие преподобне, егда предстал еси пред игуменом обители дальния и скудныя, прося прияти тя в число братии. Игумен же, испытав тя, ничтоже вопреки глаголаше, благослови тя на начало иноческаго пути твоего. Ты же, улучив чаяний твоих заветных сбытие, благодарне воспевал еси во умилении благодеющему тебе Богу: Аллилуиа!


Икос 5


Вся братия обители удивляшеся, зрящи великое тщание твое во исполнение послушаний, имиже испытоваше твое смирение духовный отец твой. Мы же, почитающе подвиги и труды твоя, во младых летех волею Христа ради подъятыя, умиленно вопием ти: Радуйся, крест свой на рамена подъявый и Христу последовавый; Радуйся, узкий и прискорбный путь жития монашескаго волею избравый. Радуйся, вспять николиже обративыйся; Радуйся, смирением своим духа гордыни низложивый. Радуйся, талант свой в земли не сокрывый; Радуйся, во славу Божию и на спасение душ человеческих его употребивый. Радуйся, богомудрыми писаньми твоими многия души, во гресех погрязшия, ожививый; Радуйся, сладкий глас Небеснаго Домовладыки: "Рабе благий и верный, вниди в радость Господа Твоего" услышавый. Радуйся, святителю Игнатие, покаяния и молитвы делателю и учителю преизрядный!


Кондак 6


Смирением, постом, наипаче же непрестанною молитвою на страсти плотския крепко ополчился еси, святителю, дондеже плоть твою духови поработил еси и сего ради ныне предстоиши с лики Ангел Престолу Пресвятыя Троицы, выну воспевая: Аллилуиа!


Икос 6


Возсия в тебе обильно благодать Божия, егда ты, чин ангельский восприяв, вскоре саном священства почтен был еси. Дух же твой, приятый во объятия Отча, тебе отверстая, блаженство неизреченное вкуси. Егда же избра тя Господь во игумена обители Пельшемския, ты о словесных овцах твоих, тебе Богом врученных, денно и нощно пеклся еси, да ни едина от них погибнет нерадения ради твоего. Таковому Божию о тебе промышлению радующеся, зовем ти: Радуйся, в приятии ангельскаго чина завершение чаяний твоих узревый; Радуйся, небесному покровителю своему, священномученику Игнатию Богоносцу, подражавый. Радуйся, якоже и он, Господа Иисуса Христа в сердце твоем выну носивый; Радуйся, сан священства, яко великий дар Божий, приявый. Радуйся, огню тезоименитый, огнем веры и любве к Богу и ближним пламеневый; Радуйся, с благоговением великим и страхом безкровную жертву приносивый. Радуйся, Пренепорочную Матерь Христа Бога нашего, яко чистейшую святыню и сокровище Славы Божия, благоговейно почитавый; Радуйся, храм благоукрашенный во имя Милостивыя Вратарницы во обители воздвигнувый. Радуйся, святителю Игнатие, покаяния и молитвы делателю и учителю преизрядный!


Кондак 7


Хотя, человеколюбец Господь, да не сокрыт будет светильник добродетелей твоих, но да светит всем, да прославят Отца Небеснаго вси человецы, видящии тя, изведе тя из обители пустыни на многотрудная послушания. Сему Божию промышлению дивящеся, со умилением зовем: Аллилуиа!


Икос 7


Новей обители преподобнаго Сергия близ царствующаго града дарова тя Господь, яко предстоятеля и добраго пастыря, неусыпно о словеснем стаде своем пекущагося и о благолепии обители ревнующаго. Сего ради и славяше тя братия твоя, взывающи: Радуйся, небесному покровителю обители твоея преподобному Сергию, игумену Радонежскому, подражавый; Радуйся, дивными храмы и строеньми сию украсивый. Радуйся, яко отец чадолюбивый, чад своих по пути спасения в Царствие Небесное ведый; Радуйся, жаждавших вступити на путь иноческий с любовию во обитель приимавый. Радуйся, провинившихся иноков увещеваньми своими к слезному раскаянию приводивый; Радуйся, яко пастырь добрый, житием своим и нравом всем братиям пример подвига иноческаго подававый. Радуйся, за спасение их душу свою положити готовый; Радуйся, монашествующих славо и похвало. Радуйся, святителю Игнатие, покаяния и молитвы делателю и учителю преизрядный!


Кондак 8


Странник и пришлец на земли был еси, святителю, якоже прочии человецы. Обаче Господь от лет младенческих избра тя, яко угодника Своего, житием бо и богодухновенными писаньми твоими Господу усердно послужил еси. Мы же, хвалу возсылающе ко Благодеющему тебе Богу, вопием Ему: Аллилуиа!


Икос 8


Весь добродетелей исполненный, воистину был еси во плоти Ангел, святителю Игнатие, всех притекавших к тебе с любовию приимая, скорби их утешая, на путь покаяния наставляя, непрестанней молитве и плачу сердечному научая. Сего ради богатии и беднии, знатнии и убогии людие, духовная чада твоя, взываху ти: Радуйся, новый Златоусте, огненными словесы твоими многия заблудшия путем покаяния к Богу приведый; Радуйся, писаньми твоими души и сердца всех чтущих тя просветивый. Радуйся, за враги своя молитися наставлявый; Радуйся, и сам за враги твоя с теплою любовию моливыйся. Радуйся, во враждующих на нас оружие Божие ко исправлению нашему разумети учивый; Радуйся, Езекиины слезы и Манассиины воздыхания духовным очесем кающихся представлявый. Радуйся, подвиги и труды подвижников древних в богомудрых творениях твоих изобразивый; Радуйся, в житии твоем всецело им подражавый. Радуйся, святителю Игнатие, покаяния и молитвы делателю и учителю преизрядный.


Кондак 9


Все воинство ангельское и святителей лик удивишася, зря тебе, новаго угодника Божия великими труды и подвиги просиявшаго. Мы же, ублажая тя, прославльшему тя Богу вопием: Аллилуиа!


Икос 9


На новое многотрудное послушание в дальний край Отечества нашего отшел еси, святителю Игнатие, егда жезл архиерейский от Предвечнаго Архиерея Господа нашего Иисуса Христа вручи тебе архипастырь царствующаго града в Казанском соборе Царицы Небесныя. Разумеюще в сем волю Божию, да и в чуждей стране проповестся тобою Евангелие Царствия Божия, смиренно зовем ти: Радуйся, в хиротонии обильно благодать божественную восприявый; Радуйся, апостольскаго учения исполненный и вся верныя спасительными струями его напаяяй. Радуйся, верный делателю винограда Христова; Радуйся, цевнице духовная, Духа Святаго исполненная. Радуйся, архиереев богодухновенное украшение; Радуйся, яко устами твоими провещаваше возлюбленный тобою Господь. Радуйся, духовных братий и чад твоих во обители преподобнаго Сергия, аще и телом оставивый, обаче в молитвах своих их николиже забывый; Радуйся, всем верным и неверным, призывающим тя на помощь, милостивый заступниче. Радуйся, святителю Игнатие, покаяния и молитвы делателю и учителю преизрядный!


Кондак 10


Немощию телесною и подвигами жития утружденный, во обитель святаго Николая на реце Волге удалился еси, святителю Игнатие, хотя душу свою ко отшествию от мира сего уготовати, идеже в богомыслии и молитве уединенней дни своя скончавая, пел еси немолчно Богови: Аллилуиа!


Икос 10


Скорый помощник и утешитель был еси, святителю Игнатие, не токмо к тебе приходящим, но и далече сущим, писаньми твоими их утешая, дух их ободряя и вразумляя. Сего ради и возглашают ти вси чтущии богомудрая творения твоя: Радуйся, пастырю наш добрый; Радуйся, приходящих к тебе николиже отвращаяйся. Радуйся, просящих твоея помощи ближних и дальних любовию своею объемляй; Радуйся, чтущих со тщанием писания твоя в теснейшее единение с душею твоею приемляй. Радуйся, чад своих духовных христианскому терпению учивый; Радуйся, в страданиях наших промышление Божие о спасении нашем видети наставляяй. Радуйся, всецело предатися промыслу Божию чада своя научивый; Радуйся, совершения над нами воли Его, яко милости великой, просити у Господа заповедавый. Радуйся, святителю Игнатие, покаяния и молитвы делателю и учителю преизрядный!


Кондак 11


Пение всеумиленное приносил еси Пресвятой Троице во вся дни земнаго жития твоего, Игнатие всехвальне. Ныне же предстоя Престолу Царя Славы, молися о нас, чтущих святую память твою, да молитвою и покаянием очистившеся, с тобою купно во веки веков воспоем Богу: Аллилуиа.


Икос 11


Светильник великий Святыя Православныя Церкве в житии своем был еси, святителю Игнатие, и сего ради дарова тебе Вседержитель Господь кончину чудну и прослави тя на небесех. Просим тя, святителю милостивый, испроси и нам грешным, твоея помощи и предстательства умоляющим, кончину жития нашего мирну и безболезненну, добрый ответ на Страшнем Судищи Христове и Царства Небеснаго наследие, да зовем ти радостно: Радуйся, праведною кончиною праведность жития твоего запечатлевый; Радуйся, близость отшествия твоего предуведевый. Радуйся, со светильником горящим Небеснаго Жениха души своея сретивый; Радуйся, в день кончины твоея с женами мироносицами воскресшаго Спасителя узревый. Радуйся, чтущих тя и по смерти николиже своего предстательства лишаяй; Радуйся, всех усердно тебе молящихся благодатию и попечением своим покрываяй. Радуйся, твердо держатися единыя истинныя святыя православныя веры чада своя учивый; Радуйся, вся прельщения еретическая приимати и увещаниям их лукавым внимати строго запретивый. Радуйся, святителю Игнатие, покаяния и молитвы делателю и учителю преизрядный!


Кондак 12


Благодать дадеся ти от Бога, святителю Христов Игнатие, молитися за ны и путеводствовати нас на пути спасения, да покаянием очищеннии, в чертог Спасов преукрашенный внидем и тамо с тобою и со всеми угодившими Богу радостно воспоем Ему: Аллилуиа!


Икос 12


Поюще Бога, дивнаго во святых Своих, хвалим тя, Игнатие блаженне, яко друга Христова, блаженство райское неуклонным творением заповедей Господних стяжавшаго. Моли о нас грешных, да и мы общники с тобою вечери Господней будем, умиленно зовуще ти: Радуйся, глубочайшим смирением твоим, нищетою духовною Царство Небесное обретый; Радуйся, добродетель сию во основание всех подвигов иноческих полагати заповедавши. Радуйся, во плаче о гресех своих Самим Господом утешенный; Радуйся, за кротость души твоея наследие жизни вечныя получивый. Радуйся, в земном житии правды Xpистовой, а на брашна тленнаго искавый, ныне же на небесех ею обильно насыщаяйся; Радуйся, за милосердие твое к ближним от Бога Щедродавца помилованный. Радуйся, за ангелоподобную чистоту сердца твоего Бога узревый; Радуйся, вся клеветы и поношения ненавидящим тя Господа ради прощавый и за сие, яко миротворец, великаго сокровища — усыновления Богу — сподобивыйся. Радуйся, святителю Игнатие, покаяния и молитвы делателю и учителю преизрядный!


Кондак 13


О предивный угодниче Христов, святителю отче Игнатие! Приими сие малое, обаче от любящих и чтущих тя сердец, приносимое ти моление и избави нас твоим всемощным предстательством от всякия скорби, болезни и печали, согрей охладевшия души наша огнем веры и любве к Богу, даруй нам прежде конца покаяние, буди нам к Царствию Небесному путевождь, да тамо с тобою и со всеми угодившими Богу во веки веков поем Ему: Аллилуиа, Аллилуиа, Аллилуиа!


(Этот кондак читается трижды и затем икос 1 и кондак 1)



Молитва святителю Игнатию Брянчанинову


О великий и пречудный угодниче Христов, святителю отче Игнатие! Милостиво приими молитвы наша, с любовию и благодарением тебе приносимыя! Услыши нас сирых и безпомощных, к тебе с верою и любовию припадающих и твоего теплаго предстательства о нас пред Престолом Господа Славы просящих. Вемы, яко много может молитва праведника, Владыку умилостивляющая. Ты от лет младенческих Господа пламенно возлюбил еси и Ему Единому служити восхотев, вся красная мира сего ни во чтоже вменил еси. Ты отвергся себе и взем крест твой, Христу последовал еси. Ты путь узкий и прискорбный жития иноческаго волею себе избрал еси и на сем пути добродетели великия стяжал еси. Ты писаньми твоими сердца человеков глубочайшаго благоговения и покорности пред Всемогущим Творцом исполнял еси, грешников же падших мудрыми словесы твоими в сознании своего ничтожества и своея греховности, в покаянии и смирении прибегати к Богу наставлял еси, ободряя их упованием на Его милосердие. Ты николиже притекавших к тебе отвергал еси, но всем отец чадолюбивый и пастырь добрый был еси. И ныне не остави нас, усердно тебе молящихся и твоея помощи и предстательства просящих. Испроси нам у человеколюбиваго Господа нашего здравие душевное и телесное, утверди веру нашу, укрепи силы наша, изнемогающия во искушениих и скорбех века сего, согрей огнем молитвы охладевшая сердца наша, помоги нам, покаянием очистившимся, христианскую кончину живота сего получити и в чертог Спасов преукрашенный внити со всеми избранными и тамо купно с тобою покланятися Отцу и Сыну и Святому Духу во веки веков. Аминь.



Тропарь святителю Игнатию Брянчанинову, епископу Кавказскому и Черноморскому


Тропарь, глас 8


Православия поборниче, покаяния и молитвы делателю и учителю изрядный, архиереев богодухновенное украшение, монашествующих славо и похвало: писании твоими вся ны уцеломудрил еси. Цевнице духовная, Игнатие Богомудре, моли Слова Христа Бога, Егоже носил еси в сердце твоем, даровати нам прежде конца покаяние.


Кондак, глас 8


Аще и совершал еси стезю жития земнаго, святителю Игнатие, обаче непрестанно зрел еси законы бытия вечнаго, сему поучая ученики словесы многими, имже последовати и нам, святче помолися.[/spoiler]

[Раб божий Константин]

АКАФИСТ Святителю Игнатию Мариупольскому, митрополиту Готфейскому и Каффайскому.
[spoiler]Тропарь
Добродетеля и молитвенника Приазовския земли, // и града Мариуполя основателя, // святителя Игнатия честне прославим, // той бо, яко крин благовонный от вертограда Христова // учении своими веру Правослвную насади // благочестие и смирение показа // всем ищущим спасения о Господе, // ему же от юности поработал еси, // отче Игнатие // моли Христа Бога // спастися душам нашим //.


КОНДАК
Основателю града Мариуполя, и яко дивный молитвенник Христа Бога // явился ты еси всем ущущим спасения о Господе //, апостолов сопрестольниче и веры Христовой ревнителю, // приими молитвы всех чтущих тя, // отче наш Игнатие преславный //.


КОНДАК 1
Избранный пастырю и дивный святителю Христов Игнатие, // молитвенниче всея земли Приазовския и града Мариуполя основателю, // похвальное пение приносим мы недостойнии, // ты же, яко имеяй дерзновение предстояти Престолу Царя Славы, // о нас молися многогрешных, // от всяких скорбей и бед избавляя, // с любовию и верою тя прославляя, // и со умилением тебе поющия:
Радуйся, святителю Игнатие, // молитвенниче наш усердный пред Господом всехвальный.


ИКОС 1
Ангельски на земли восхотевши жити, еще во младенчестве душа твоя возлюби Господа, яко от юности монахом возжелаше быти, достохвальне Игнатие. Непорочно бо бысть житие твое, яко и удиви избранника Божия, похвальная пения приносим тебе со умилением зовуще:
Радуйся, яко рождением своим родители твоя возвеселивый.
Радуйся, Господа Бога еще во младенчестве своем возлюбивый.
Радуйся, во отрочестве твоем благочестие и любовь Божию имевый.
Радуйся, на путь монашеский благословение родителей своих получивый.
Радуйся, во учении Божественнем преуспевавый.
Радуйся, душу свою Христовым учением всегда питавый.
Радуйся, святителю Игнатие, // молитвенниче наш усердный пред Господом всехвальный.


КОНДАК 2
Видя Господь желание твое и веру истинную, яко ты презрел еси всякое мирское богатство и славу человеческую, возлюбив небесную, призва тя на великое служение и светом познания Своего просвети. Ты же, отче, любовию горяще приведеши многия ко Христу и научивши вся с тобою воспевати Богу: Аллилуйя.


ИКОС 2
Разум твой просвещенный утвердися в Богомыслии непрестанном, егда быти тебе иноком на святей горе Афонской, проходя ступени духовнаго совершенства. Возлюби бо душа твоя Господа, и Тому Единому работати восхотел еси до скончания земныя жизни твоея. Восприяв Божественную благодать священнослужения, ты ревностно подвизался еси о спасении словесных овец твоих. С ними же мы днесь радостно прославим тя гласы сицевыми:
Радуйся, на Гору Афонскую от мирской суеты себе уединивый.
Радуйся, ангельский постриг монашества там же принявый.
Радуйся, благодатию Божественную сердце свое украсивый.
Радуйся, правилам Церкви Христовой всегда подражавый.
Радуйся, уста своя от всяких клеветы заградивый.
Радуйся, безмолвию древних отец возлюбивый.
Радуйся, святителю Игнатие, // молитвенниче наш усердный пред Господом всехвальный.


КОНДАК 3
Силою Всевышняго укрепленный в духовных трудах и послушании отцев святей горы Афонстей, досточудне Игнатие, промыслом Божиим избраше тя вернии быти пастырем стада Христова. Зело просия душа твоя молитвами и целомудрием, труждаяся вся дни жития своего, в радости воспевая единому в Троице славимому Богу похвальное пение: Аллилуйя.


ИКОС 3
Имейя ревность неизреченную и богатство милосердия, святителю Игнатие, приял еси порученное ти свыше стадо Христово и добре в спасении его пребыл еси. Милосердием бо Божиим укрепляше вся прибегающия к тебе и словесы Божественными наставляя верныя ко спасению. Тем же и мы прославляя труды твоя со умилением взываем ти тако:
Радуйся, промыслом Божиим избранный служителю Церкви Христовой.
Радуйся, добрый ревнителю жизни духовныя.
Радуйся, пастырь незлобивый стада Христова.
Радуйся, дивный строителю вертограда Божественнаго.
Радуйся, светлый светильниче во тьме пребывающих.
Радуйся, всех ко спасению нас призывающий.
Радуйся, святителю Игнатие, // молитвенниче наш усердный пред Господом всехвальный.


КОНДАК 4
Бури искушений и напастей претерпе душа твоя, святче Игнатие, и всякия скорби и обиды безропотно неся, ради спасения паствы твоея. В терпении и трудех, много пребывая, во смирении сердечнем непрестанно воспевал еси песнь Богу: Аллилуйя.


ИКОС 4
Слыша скорби и страдания людей греческих в ханстве Крымском живущия, возжела душа твоя тамо быти во спасение и избавление их от ига татарского. С верою и молитвою испросил еси ты патриарха Константинограда благословения, еже служити тамо, и восприяв сей жребий служения, яко скорый помощник и покровитель явися тамо страждущим. Тем же величая твое благочестие, прославим тя гласы сицевыми:
Радуйся, крепкое упование на спасение страждущих имевый.
Радуйся, помощь Божественную на сие спасение свыше получивый.
Радуйся, яко готов душу свою положити за други своя.
Радуйся, бедствующих многомощный помощниче.
Радуйся, оскорбляемых скорый заступниче.
Радуйся, благий утешителю в бедах сущих.
Радуйся, святителю Игнатие, // молитвенниче наш усердный пред Господом всехвальный.


КОНДАК 5
Боготечная звезда явися в земле Крымской служение твое Господу. Всем бо образ бысть чистота молитвенная и житие твое, святителю Игнатие, яко многи спасал еси от погибели, вразумляя и наставляя жити во Христе, и воспевати Ему: Аллилуйя.


ИКОС 5
Видевши страдания и многи скорби людей греческих в земле Крымской отче Игнатие, ты добре трудился еси о избавлении верных от пленения ханского и мрака греховнаго. Кто изочтет подвиги и страдания твоя, егда преселял еси их в земли Приазовския? Увещая и наставляя паству свою веровати в заступление Божие. Сего ради ублажаем тя, звании сими:
Радуйся, иго благое Христово на рамо свое вземый.
Радуйся, во трудех и подвигах всегда Богу служивый.
Радуйся, ближния паче себе возлюбивый.
Радуйся, веру Христову в пастве своей укрепивый.
Радуйся, наставниче добрый и благий всем учителю.
Радуйся, Божиих велений усердный исполнителю.
Радуйся, святителю Игнатие, // молитвенниче наш усердный пред Господом всехвальный.


КОНДАК 6
Проповедник делом, а не словом явился еси ты, славне Игнатие, пред Господом, и яко пастырь добрый, всех поучая любве Божественней и житию христианскому. Сего ради прослави тя Христос пред паствою твоею. Ты же дерзновение велие имеяй у Престола Божия с небесными силами поеши со умилением песнь Богу: Аллилуйя.


ИКОС 6
Возсия во всех концах земли Приазовския жизнь твоя, отче Игнатие, и яко светило светозарное, просвещающее паству твою учении твоими. Наставлял еси вся верныя Божественными словесы, созидая церкви Божии по градам и весям. Труды бо твоими основася град святый Мариуполь, в негоже принесеся велия святыня / икона Божией Матери Одигитрия, юже почитаху и моляше вси вернии. Предстательством Пречистыя Богородицы, поминай и нас, отче, тебе похвалы приносящии:
Радуйся, молитвенниче наш Духом Божиим озаренный.
Радуйся, богомудрыми словесы твоими многия заблудшия на путь истины наставивый.
Радуйся, от корысти неправедныя притекающии к тебе избавляяй.
Радуйся, истину Христову небоязненно всем вещавый.
Радуйся, града Мариуполя Архиерею первый.
Радуйся, молитвенниче всея земли Приазовския дивный.
Радуйся, святителю Игнатие, // молитвенниче наш усердный пред Господом всехвальный.


КОНДАК 7
Хотя Преблагий Бог люди греческия спасти и в жительство нове града Мариуполя укрепити, постави тя, святителю Игнатие, яко втораго Моисея, да во всех концех земли Приазовския вернии слышаша поучения твоя, веру истинную во Христа сохранят и Богоугодно жительство свое созидают, в непрестанном пении Богу: Аллилуйя.


ИКОС 7
Новаго Моисея тя узре вся земля Приазовская и град святый Мариуполь в спасении верных, егда ко брегам града преплыша из ханства Крымского полчища татарския, да силою своею хотяще пленити люди греческия. Ты же, яко пастырь добрый, призваша вся верныя молитвы совершати, Пречистую Заступницу рода христианского призывати, да сохранит от погибели и плена Татарского, верныя и вскоре получиша свыше защищение. Мы же воспоминающие сие избавление, в радости, благодарными усты прославим тя сице:
Радуйся, пастырю добрый, душу свою за овцы своя положити готовый.
Радуйся, усердный хранителю стада Христова.
Радуйся, в бедах и теснотах на Господа всегда уповавый.
Радуйся, всецело себе Промыслу Божию предавый.
Радуйся, в сердце твоем образ Христа носивый.
Радуйся, мир Божий в сердца верных молитвою твоею приносимый.
Радуйся, святителю Игнатие, // молитвенниче наш усердный пред Господом всехвальный.


КОНДАК 8
Странствующим людем греческим в земли Приазовския был еси ты путевождь, святе Игнатие, и молитвенниче дивный. По пути преселения некая тяжкая болезнь нападе на люди и умираше многия. Ты же умиленною молитвою ко Господу и ко священномученику Харлампию молящеся избави страждущия от беды, призывая вся верныя пети Богу умиленно: Аллилуйя.


ИКОС 8
Весь исполнися любве Божественныя, не оставляеши с верою к тебе прибегающия и помощи просящия. Скорбящия утешая, заблудшия на путь истины наставляя, болящия исцеляя и от избавляя. Предстательством твоим у Господа помогай и всем нам, благий и миллостивый Архипастырю, благочестно в мире житие проводити и козней вражиих избегати, тебе же, молитвенника нашего прославляти гласы сицевыми:
Радуйся, соблюдший в чистоте до конца веру Христову.
Радуйся, предстательством твоим к Богу многия спасающий.
Радуйся, в скорбех и нуждах просящим помогащий.
Радуйся, терпением и смирением диавольския напасти разрушивый.
Радуйся, силою молитв твоих к Богу враги посрамивый.
Радуйся, единаго Христа паче всех возлюбивый.
Радуйся, святителю Игнатие, // молитвенниче наш усердный пред Господом всехвальный.


КОНДАК 9
Всякия скорби и труды твоя во спасение паствы твоея до конца претерпел еси, отче Игнатие, являя дерзновение пред Господем о спасении верных. Темже и был еси, яко древо посажденное при исходищах вод, града Мариуполя и всея земли Приазовския, поя за вся дивному во святых Своих Богу: Аллилуйя.


ИКОС 9
Ветии многовещании не возмогут изглаголати подвиги и труды твои, отче Игнатие, како в дальнии края земли Приазовския пришел еси, да спасеши страждающия и скорбящия людие. Божественными учении и словесы твоими избавлял еси их от нападений вражиих и погибели вечныя, и смирением своим вразумлял высокоумие заблуждающих. Мы же таковыми подвиги твоими дивящеся, дерзаеи воспевати тебе похвалы сия:
Радуйся, яко во смирении своем зело преуспевавый.
Радуйся, яко светом добродетелей твоих град Мариуполь озаривый.
Радуйся, дарами благодатными преисполненный.
Радуйся, в бедах и напастех пребывающих скорый помощниче.
Радуйся, ближним и дальним помощь свою подаваяй.
Радуйся, спасения многих душ человеческих виновниче.
Радуйся, святителю Игнатие, // молитвенниче наш усердный пред Господом всехвальный.


КОНДАК 10
Спасти хотя верныя паствы твоея, неленостно поучал еси многия истине Евангельстей и чистому богоугодному житию. Обходя грады и веси земли Приазовския и храмы Божии воздвизая, сея в них семени Божественныя, да плоды сторичныя на спасение душ человеческих, принесут со смирением призывая вся в простоте сердец пети Богу: Аллилуйя


ИКОС 10
Стена еси, покров и прибежище, был еси, святе Игнатие, всем притекающим, являя дерзновение твое ко Господу. Буди и нам, отче, пастырем добрым, с теплою верою и любовию молитвенно тя призывающим. Не отрини нас, бедами отягощенных, но предстательствуй в молитвах своих пред Господом, даруя всем нам утешение и твое заступление. Мы же благодаряще Бога восхвалим тя сице:
Радуйся, путь ко спасению всем указавый.
Радуйся, гласу Божественному прилежно внимавый.
Радуйся, храмов святых создателю в земле Приазовския.
Радуйся, дивный проповедник православныя веры.
Радуйся, защитник необоримый от враг видимых и невидимых.
Радуйся, светлый светильниче земли Приазовския.
Радуйся, святителю Игнатие, // молитвенниче наш усердный пред Господом всехвальный.


КОНДАК 11
Пение молитвенное и похвалы приносим ти, мы недостойнии, святителю Игнатие, яко дарова тя Господь во утешение и отраду всем людям земли Приазовския и граду Мариуполю, тобою основанного. Не затвори щедроты, но яко молитвенник наш пред Господм, умоли о всех чтущих тя имя твое святое призывающих, избавитися накм козней вражиих, бед и болезней, приводя ко спасению всех, воспевая в радости Богу: Аллилуйя.


ИКОС 11
Светозарное светило возсия во граде Мариуполе и во всех пределах земли Приазовския, просвещающее сердца верных и многия к разуму Божественному направляющее. Ты бо, святителю дивный, наставлял еси верныя во свете заповедей Христовых всегда нам пребывати и светом Божественным наши души озаряти, во еже славити Бога и тя прославляти, глаголюще тако:
Радуйся, сосуде, исполненный благодати Божественней обильно.
Радуйся, в неведанной ти стране взыскавый спасения верных.
Радуйся, иго благое Господне на рамо твое с любовию вземый.
Радуйся, пламенную любовь ко Христу всегда ты имевый.
Радуйся, посетителю скорый в бедах и напастех живущих.
Радуйся, святынею твоею град наш охраняющий.
Радуйся, святителю Игнатие, // молитвенниче наш усердный пред Господом всехвальный.


КОНДАК 12
Благодать и милость Божию с небесе испроси нам, святителю Христов Игнатие, с любовию и благоговением воспоминающим честное твое успение воМариуполе. Ты бо до конца земныя жизни твоея смирен и тих пребывал еси и ни какиеже славы не восхотел прияти, токмо с Господом быти, поучая вся, яко истинный путь ко спасению в мире сем / вся благодушно терпети Христа ради, и Ему всегда с любовию пети: Аллилуйя.


ИКОС 12
Поюще тя, молитвенника дивнаго града Мариуполя и всея земли Приазовския, величаем подвиги и труды твоя, отче Игнатие, почитаем священную память и славим незлобие и смирение твое. Кто изчтет скорби и болезни твоя о пастве твоей, егда быти в ней распрям и самочиниям. Ради мира и любви, ты, отче, оставил еси на время некое кафедру и дом свой живя в землянке убогой, и в ней же со слезами молитвы творя, о мире паствы твоея, призывая вся ко исправлению жизни греховныя. Твоими бо теплыми молитвами да избавимся и мы, отче достославне, и со умилением сердец наших приносим ти пения сия:
Радуйся, Небесного Владыки рабе благий и верный.
Радуйся, во славу Христову ближним трудивыйся.
Радуйся, призывающим тя скорый помощниче.
Радуйся, на богоугодное житие всех наставляющий.
Радуйся, делы благими светло сияеши.
Радуйся, славо и радование всея земли Приазовския.
Радуйся, святителю Игнатие, // молитвенниче наш усердный пред Господом всехвальный.


КОНДАК 13
О, дивный святителю Божий, отче Игнатие! Прими моление от недостойных рабов твоих, с любовию тебе приносимое, и испроси у Христа Бога нашего уз наших греховных избавление и всех болезней исцеление, да благодатию Своею соделает нас Господь тверды и непоколебимы, ревностны и благочестивы в соблюдении заповедей Его, и да сподобимся вместе с тобою и со всеми святыми в небесном Отечестве пети Богу хвалебное пение: Аллилуйя, Аллилуйя, Аллилуйя.
(Этот кондак читается трижды, затем читается икос 1 и кондак 1.)


МОЛИТВА
О,священная главо, молитвенниче всея земли Приазовския и града Мариуполя основателю - отче наш святителю Игнатие! Приими сие моление наше, с любовию тебе приносимое. Ты бо имел еси попечение о еже спасти паству свою от погибели, и яко вторый Моисей, вывел еси люди греческия из рабства агарянского из области Крымския в землю сию. Изведи, святителю Божий, и наши души из темницы греховныя, да не погибнем люте со беззаконии нашими. Т, яко отец чадолюбивый, полагавый душу свою за други своя, являя неизреченное твое милосердие, требующим твоея помощи и заступления, буди и нам пастырем добрым, избавляянас от вражеских нападков и смятений народных. Ты от юности Христа возлюбил еси, и Тому единому до скончания земныя жизни твоея с любовию послужил еси, согрей и нас Божественною любовию хранити веру Православную в чистоте сердец наших и исполнением заповедей Господних. Ей, святче Божий, милостиво призри на нас многогрешных, и молитвами твоими избави от соблазнов мира сего и козней диавольских. Вемы бо и усты исповедуем, яко воистину тыявляешися теплый наш ходатаю и заступниче пред Господем во спасение нас грешных. Испроси нам от Господа, святыми твоими молитвами, вся яже на пользу душам и телесам нашим дар, коемуждо благопотребен:- веру истинную, надежду твердую и любовь неоскудевающую, грехов наших истребление, мир, умирение, от глада и пагубы избавление. Подаждь нам, святителю Игнатие, свое святое архипастырьское благословение и наставление. Архиереям и пастырем нашим подаждь премудрость, чистоту и праведное житие, якоже и сам сими украшался еси, юным даждь воспитание благое, болящим и скорбящим здравие и утешение, сущим во трудех помощь и укрепление, богатым смиренномудрие и ко ближним милосердие даруй. Всем же нам споспеши иго Христово понести во благодушии, терпении и радости духовной, да сподобимся и мы вкупе с тобою наследницами Царствия Небеснаго Быти и тамо со всеми святыми воспевати Единаго в Троице покланяемого Бога во веки веков. Аминь[/spoiler]

[Раб божий Константин]

Акафист преподобному Игнатию Прилуцкому Вологодскому Чудотворцу.
[spoiler]Кондак 1
Избранному Господом от Благоверного княжеского рода и неповинне страдавшему угоднику Христову Игнатию возносим похвалы, яко великого терпения наставнику и нашему пред Богом заступнику, ты же, преподобне, услыши нас зовущих ти:
Радуйся Игнатие, скорый в бедах помощниче и преславный чудотворче.

Икос 1
Ангелов Творец и Господь Сил в Троице Бог прославляемый, предуготовляя тя в сосуд своея благодати, благоволи просветити тя святым крещением от руку преподобнаго Паисия Угличскаго, иже провидя имущую явитися на тебе благодать Божию, нарече тя именем Иоанн. Тебе убо от младенства предуготованному быти вместилищем тоя благодати, приносим похвалы сицевыя:
Радуйся от руку великаго угодника крещенный;
Радуйся измлада благодатию Божиею приосененный.
Радуйся от юности Богови душею прилипивыйся;
Радуйся, Слово Божие паче меда и млека возлюбивый.
Радуйся смирением и кротостию родители твоя удививый;
Радуйся, и среди самыя мирския суеты совершенное безмолвие снискавый.
Радуйся отроческая играния и юношеская глумления презревый;
Радуйся, плоть свою постом и подвиги духови покоривый.
Радуйся Игнатие, скорый в бедах помощниче и преславный чудотворче.

Кондак 2
Видев княжества разоряема и царства земная погибающа, аще и мал сый возрастом, исполнился еси совершеннейшаго разума: от земных бо и тленных ум свой возложил еси к неизменному Вышнему Царствию, духом провидя, яко егда восприимеши Его, неизреченныя радости исполнився, воспоеши: Аллилуйя.

Икос 2
Разумно уразумев премудрость и славу Всемогущаго Бога и Творца всяческих, Игнатие премудре, от младенства преискренне возжелел еси, елико мощно человеку постигнути, совершеннейшую премудрость, юже егда обрел еси, абие вся преходящая мира сего, буйство быти вменил еси. Сея Божественныя премудрости и мы грешнии, страстьми и похотьми обьюродевшии, твоими молитвами сподобитися просяще, взываем ти:
Радуйся ко Слову Божию, яко ко источнику воды жизни устремивыйся;
Радуйся сим юношеский ум твой просветивый.
Радуйся, в творении, аки в зерцале, премудрость и благодать Божию узревый.
Радуйся, разумным созерцанием мира видимаго премирная постигнувый.
Радуйся, суетная научения и ветийства лжемудрых презревый.
Радуйся, Христу, Божией Силе и Премудрости себе всеконечне предавый.
Радуйся, отроча, паче мудрецов, мудрейшее.
Радуйся, юноше, паче старец, целомудрейший.
Радуйся Игнатие, скорый в бедах помощниче и преславный чудотворче.

Кондак 3
Силы телесныя оскудевши, блаженная княгиня Елена, твоя, преподобне Игнатие, мати, и спасительное напутие Пречистых Христовых Таин приявши, прейде от привременных к Горнему Царствию. О ея же упокоении со святыми моляся, в надгробном рыдании воспевал еси Всесильному Победителю смерти Господу: Аллилуйя.

Икос 3
Имея свыше Божественное прозрение и тайно грядущая провидя духом, проразумел еси, яко земнаго царствия князь никогда же будеши, небесное же, яко никим же отъемлемое, восприяти предзря, начал еси едино по друзем вся чуствия твоя преогорчевати, и тело постом и молитвами удручати, поучения Божественного и псалмопения никогда же оставляя, сия подвиги твоя мы грешнии ублажающе, зовем ти:
Радуйся, тленное и преходящее княжество изменивый на вечнующее и неразоримое.
Радуйся, Царствие обретый, его же Царь пребывает неизменен.
Радуйся, пощению Крестителя подражавый.
Радуйся, безмолвию Антониеву обучивыйся.
Радуйся, лествицу Иоаннову возлюбивый;
Радуйся тою вся дни живота твоего восходивый.
Радуйся, с Павлом непрестанно моливыйся.
Радуйся, с Давидом в заповедях Господних поучавыйся день и нощь.
Радуйся Игнатие, скорый в бедах помощниче и преславный чудотворче.

Кондак 4
Бури и треволнения страны нашея сильным твоим ко Господу предстательством укроти, преподобне чудотворче Игнатие, шатания еретическая низложи, о благостоянии Святыя Православныя Церкве, дерзновение яко имеяй, не престани моляся, и нас недостойных памяти твоей собравшихся восхвалити твоя труды и терпение, небесным своим благословением благословив, освяти, яко да достойни будем взывати ко Господу: Аллилуйя.

Икос 4
Слышав, яко родитель твой всажден есть в темницу, и разумев, яко и тя с братом твоим Димитрием сродницы, завистию движими, имут заточити, не восскорбел еси духом, паче же возрадовался еси. Ведом же в темницу, яко в чертог царский, шествовал еси, ликуя и радуяся, яко тою избудеши страшныя темницы во он век. Дивимся твоему великому терпению, и славяще укрепившаго тя Христа Господа, хвалебно зовем ти:
Радуйся, Христову терпению обучивыйся.
Радуйся , Иовлево лишение подъемый.
Радуйся, напастьми непреодоленный;
Радуйся скорбьми не низложенный.
Радуйся темницу яко лествицу во Царствие Небесное стяжавый.
Радуйся, смрад и гной темничный неослабно претерпевый.
Радуйся, никогда же о сем пороптавый.
Радуйся, озлоблявшия тя благословивый.
Радуйся Игнатие, скорый в бедах помощниче и преславный чудотворче.

Кондак 5
Боготечную тя, яко видев звезду, сущих в темнице и приходящих в ню осиявающую, человеконенавистник сый искони, диавол, восхоте погасити ю: вооружи бо на тя сердце великого князя, иже от Углича и Белоозера до града Вологды доведе тя, затвори во внутреннейшей смрадной темнице, узы железными тяжкими обложив. Ты же преподобне посрамил еси вся коварствия вражия, никакоже когда проглаголав стропотная, но, молитву усугубив, взывал еси: Аллилуйя.

Икос 5
Видев, преподобне Игнатие, себе всеми оставленна и забвенна, не восскорбел, ниже возроптал еси, уведев же от Священнаго Евангелия, яко иже слышат Слово Божие и творят Е, братия и сродницы Христовы суть, потщался еси ниже йоту едину от законных оставити неисполнену, разумея, яко, егда сотвориши вся сия, постигнеши любовь и радость неизреченную, ея же око не виде и ухо не слыша, ниже на сердце когда кому взыде. Ублажающе таковая твоя исправления, зовем ти:
Радуйся Святаго и Освященнаго Евангелия изучителю теплейший.
Радуйся, писанных в нем исполнителю усерднейший.
Радуйся, сродники своя, святыя Божия положивый.
Радуйся, друже Божий и угодниче Христов.
Радуйся, вся заповеди Божия возлюбивый;
Радуйся куюждо их исполнивый.
Радуйся, любовь к Любящему тя возложивый;
Радуйся, сего ради неизреченная благая постигнувый.
Радуйся Игнатие, скорый в бедах помощниче и преславный чудотворче.

Кондак 6
Проповедником Христова терпения явился еси пред скорбящим братом твоим Димитрием, преподобне страдальче Игнатие, утешая и вразумляя его, яко страсти нынешняго века недостойни суть к хотящей явитися в нас славе во он век. Паче же страдания самого Искупителя мира пред ним изобразуя. И тако неослабно от силы в силу возводил еси его, вопия: Аллилуйя.

Икос 6
Возсия тебе, в темных внутреннейших темницы пребывающу, свет незаходимый Христос Господь, своими на кресте искупительными страданьями: Его же егда в сердце начертал на древе висяща, абие уразумел еси, яко вся в житии сем бываемая лютая ходатайствуют нам вечная благая. Их же мы, воспевающии тя, твоими молитвами сподобитися чающе, взываем ти:
Радуйся, Христа распятаго выну пред собою предзревый;
Радуйся, страданием Его сприобщивыйся.
Радуйся, в обстояниих знамением крестным себе укреплявый;
Радуйся, и брата твоего семуже научивый.
Радуйся, тому во озлоблении ангел утешитель бывый;
Радуйся, сему мрак и тяготу темничную разгнавый.
Радуйся, и нам любящим и чтущим тя помогаяй;
Радуйся прошения наша предваряяй.
Радуйся Игнатие, скорый в бедах помощниче и преславный чудотворче.

Кондак 7
Хотящих нас грешных и малодушных уведети, откуду бе тебе преподобне Игнатие, толико твердая сила Божественная во озлоблении, таинственне возводиши пред образ Владычицы Богородицы всех скорбящих радости, духом сказуя, яко Та есть наша утешительница и помощница в напастех и скорбех, от всякого лица всякую слезу отъемлющая. И научаеши купно прославляти рождшагося от Нея Спаса нашего Бога, взывая ему: Аллилуйя.

Икос 7
Новая дивная знамения показа на тебе Господь, святе Игнатие, вся бо спасительная тридесять три лета, яко виде тя страданьми неослабне совершивша, абие благоволи душу твою извести из земныя темницы, и неизреченная небесная благая тебе даровати, возболел бо еси телом, духом же возжелел еси зело на последок дний своих сподобитися восприять великий ангельский образ. Воспевающе таковое твое великое терпение, глаголем:
Радуйся, память смертную выну имевый.
Радуйся, постом, молитвами и слезами темницу освятивый.
Радуйся, соузники твоя, лютыя разбойники и тати, умиливый.
Радуйся, тыя к обращению приведый.
Радуйся покаянию истинному их научивый.
Радуйся, богоразумием их озаривый.
Радуйся, желания Божественнаго исполненный.
Радуйся, Божиею благодатию осененный.
Радуйся Игнатие, скорый в бедах помощниче и преславный чудотворче.

Кондак 8
Странную всех земных вещей, Божественную одежду священныя схимы, игумен обители Прилуцкия Мисаил возложив на тя, предивне, и Игнатием нарек, возгласи Всесовершенному Человеколюбцу Господу: Аллилуйя.

Икос 8
Весь исполнился еси неизреченныя радости, егда восприял еси вся спасительная оружия Божия, противу лютых, по исходе души от тела путедержателей, и Пречистых Христовых Таин, напутие спасительное прияв, брата же своего, до конечного издыхания претерпети приключшаяся увещав, и молитися за него и за вся люди обещавая, предал еси святую душу твою в руце Божии. Таковыя христианския кончины твоими молитвами сподоби и нас грешных, святче Божий, да зовем ти:
Радуйся, яко свято и праведно на земли, пожил еси.
Радуйся, яко вся приключшаяся тебе злая до конца претерпел еси.
Радуйся, яко кончину праведную улучил еси.
Радуйся, яко память твоя с похвалами и успение со святыми.
Радуйся, яко отверзошася тебе врата райская, и вшел еси в радость Господа своего.
Радуйся, яко силы небесныя сретоша тя воспевающе радостная.
Радуйся, яко душу твою Жизнодавец Христос прият в небесная селения.
Радуйся, яко и тело твое на земли прославися нетлением и чудесы.
Радуйся Игнатие, скорый в бедах помощниче и преславный чудотворче.

Кондак 9
Вси иноцы обители Прилуцкия, и от града Вологды со иереи вкупе христолюбивии людие, и окрестных весей обитателей множество много зело со светильники и свещами, стечеся вознести твое, преподобне, многострадальное тело от темницы к месту упокоения вечнаго. Еже и принесше во храм обители Святаго Спаса, иже на Прилуцех, положиша у ногу мощей чудотворца Димитрия, вопиюще: Аллилуйя.

Икос 9
Витии суемудрыя, безумни суще, объюродевшими умы своими никогдаже возмогут постигнути, како тело твое, преподобне Игнатие, естеством своим смертно сущее, не точию не причастно тлению устроися, но чудеса преславная источает! Еще бо несену сущу ему к месту погребения, одержимый болезнию смертною и расслабленная, точию егда коснушася ему, абие исцелеша. Мы же, не точию сия добре исповедающе, но и видяще в сих знамение всех воскресения, в последний страшный день быти имущаго, ублажающе тя таковаго чудотворца, взываем:
Радуйся, блаженне и предивне, яко источаеши нам чудеса преславная.
Радуйся, яко расслабленную возставивый.
Радуйся, болезнию смертною одержимаго спасый.
Радуйся, око болящее уврачевавый.
Радуйся, слепоту телесную вкупе и душевную отгнавый.
Радуйся, руки слячение исправивый.
Радуйся, инока Гурия исцеливый.
Радуйся, и доныне чудодействуяй предивне.
Радуйся Игнатие, скорый в бедах помощниче и преславный чудотворче.

Кондак 10
Спасение вечное унаследити от всея души и помышления желающе, тебе, преподобне отче Игнатие, молимся: укрепи нас прочее время живота нашего в покаянии скончати и молися сподобитися нам благия христианския кончины, и по смерти услышати поющих: Аллилуйя.

Икос 10
Стены надгробия твоего неблагоговейно созидая, Давид каменодел, утруждься, возседе на честней раце твоей. Ты же, преподобне, не терпя сего, и почитати Божию силу, во святых твоих мощех обитающую, научая, поразил еси его лютою болезнию. Егда же той, уведев свое прегрешение, принесе покаяние истинное, Милостивому Владыце Христу подобяся, абие исцелил еси его. Дивящеся о сих, взываем тебе таковая:
Радуйся, буих наказателю.
Радуйся, немудрых умудрителю:
Радуйся, неверия и кощунства искоренителю.
Радуйся, милости источниче:
Радуйся, всепрощения образе.
Радуйся, терпения правило:
Радуйся, смирения законоположниче.
Радуйся Игнатие, скорый в бедах помощниче и преславный чудотворче.

Кондак 11
Пение наше хвалебное сие, тебе, преподобне отче Игнатие, приносимое, не презри, но прием е, вознеси ко Всемилостивому Владыце, и молися Ему о благостоянии Святыя Православныя Церкве, и о спасении всех христиан, верою поющих: Аллилуйя.

Икос 11
Светозарною зарею, мрак и тяготу темничную разгоняющую, явился еси и по преставлении твоем, угодниче Божий, страдальче неповинне Игнатие, брата бо твоего Димитрия, всеми оставленна и забвенна, ты Божественною твоею лучшею и совершеннейшею паче земныя, небесною любовию присещая, никакоже оставил еси его, дондеже и той предав свою душу в руце Божии, вкупе с тобою водворися в светлейших и пространнейших скиниих райских, взывая тебе:
Радуйся, радости неизреченныя наслаждаяйся:
Радуйся, благости Божия преестественныя сподобивыйся.
Радуйся, во обителех нерукотворенных водворивыйся:
Радуйся и во храмех неразоримых ликовствуяй.
Радуйся, трисвятаго со ангелы пения общниче:
Радуйся, Триипостасное Божество лицем откровенным созерцавый.
Радуйся, и к земным прошениям приникаяй:
Радуйся, верою чтущия тя в сониих и видениих посещаяй.
Радуйся Игнатие, скорый в бедах помощниче и преславный чудотворче.

Кондак 12
Благодать Божественная свыше тебе, преподобне Игнатие, даровася, еже неповинно в темнице страждущия избавляти, наипаче же Церкви ради Христовы и веры Православныя, в изгнаниих и заточениих сущия утешати. Тем же и мы недремлющею и лютою бесовских полчищ стражею обстоими и крепчайшею, паче каменныя, страстей и похотей своих темницею отвсюду одержимии, вериги же тяжкими небрежения и лености связаннии, и во мраце отчаяния сущии, и ни откуду же помощи улучити надеющеся, взываем ти: от сих всех свободив, подаждь нам непреткновенне воспевати: Аллилуйя.

Икос 12
Поюще многая твоя злострадания и чудеса, преподобне отче Игнатие, смиренно просим тя: в час последний и страшный, егда убогия наши души имут от тела распрягатися, явлься тогда, разгони темная и грозная бесовская полчища. На воздушных же мытарствах буди спутьствуяй и защищаяй нас. Наипаче же в день Страшнаго Суда Божия яви нам многомощное твое заступление, да зовем ти:
Радуйся, многострадальче, наша страдания утоляяй:
Радуйся, безкровный мучениче, от мучительства страстей нас изымаяй.
Радуйся, благоверный княже, от прелести князя тьмы нас свобождаяй:
Радуйся, постниче, глад душевный наш насыщаяй.
Радуйся, утешителю, печали наша в радость пременяяй:
Радуйся, затворниче, путь ко спасению нам указавый.
Радуйся, подвижниче, смирению и кротости нас научаяй:
Радуйся, девственниче, от пороков и страстей нас охраняяй.
Радуйся Игнатие, скорый в бедах помощниче и преславный чудотворче.

Кондак 13
О, предивный и многострадальный угодниче Божий и чудотворче, преподобне отче наш Игнатие, утешителю всех скорбящих и страждущих! Приими сие от нас ныне приносимое тебе пение, и молися Всемилостивому Владыце и Господу, да ниспослет Всеблагий Человеколюбец Церкви Православней тишину, стране Российстей благостроение и мирное благоправление, наипаче же отступившия от святыя Православныя веры, да обратит на путь истинный, да и тии с нами вопиют: Аллилуйа.

МОЛИТВА ПРЕПОДОБНОМУ ИГНАТИЮ ПРИЛУЦКОМУ ВОЛОГОДСКОМУ ЧУДОТВОРЦУ
О богомудрый пастырю и наставниче наш, преподобне отче Игнатие! услыши нас грешных, молящихся тебе и призывающих на помощь скорое предстательство твое. Виждь нас немощных, в толицех обстояниих сущих, отвсюду уловляемых, всякаго блага лишенных и умом от малодушия помраченных; потщися, угодниче Божий, не оставити нас в греховном плену быти, да не будем в радость врагом нашим и не умрем в лукавых деяниях наших. Моли Всемилостиваго Владыку, Господа Бога и Спаса нашего Иисуса Христа, Ему же ты со бесплотными лики предстоиши, да благословит и сохранит град наш и святую обитель сию в мире и тишине, нам же всем да подаст благодатию своею грехов оставление, жития исправление, недугов исцеление, от бед избавление, от искушений избытие и освобождение, в скорбех утешение, в нуждах благовременную помощь; наипаче же в вере прспеяние, в надежде утверждение, в любви возрастание, душ наших спасение, яко и во временем сем житии и в вечном Его царствии выну приносим Ему славу, честь и поклонение со Безначальным Его Отцем и Пресвятым и Благим и Животворящим Его Духом, во веки веков. Аминь.

Тропарь, гл. 2
В житии своем многи скорби претерпел еси блаженне/ и терпения ради венец от Бога приял еси/ и по смерти своей чудотворец показался еси/ того ради память твою песньми почитаем/ преподобне отче наш Игнатие/ молися предстояй Святей Троице/ Державе сродник твоих богоугодней быти/ и сыновом Российским спастися.

Кондак гл. 8
Изрядная отрасле благочестиваго корене/ дивный благородный цвете/ избранный от пелен благодатию Христовою/ возлюбленный от юности Духом Святым./ Девственное процветение, Игнатие блаженне./ Днесь сошедшеся вернии в память твою/ похвальными венцы честную твою главу венчающе зовем/
Радуйся преподобне, сосуде Святаго Духа всея Российской земли удобрение.[/spoiler]

[Раб божий Константин]

АКАФИСТ СВЯТОМУ БЛАГОВЕРНОМУ КНЯЗЮ ИГОРЮ ЧЕРНИГОВСКОМУ И КИЕВСКОМУ.
[spoiler]Тропарь, глас 4:
Наста днесь всечестная память страстотерпца благовернаго князя Игоря, созывающая люди в пречестный храм Спасов, идеже радостно сошедшеся благочестивых множество молитвенно празднуют святую память твою, и с верою взывают ти: молися, святе, стране Российстей, граду Чернигову и всем православным христианом в мире и благоденствии спастися.

Ин тропарь, глас 4:
Просветився Божественным крещением Духа Святаго светлостьми озаряем, Евангелие Христово в сердце твое восприял еси делом слово Сына Божия исполняя, благоверный княже Игоре, моли Всеблагаго Спасителя нашего даровати нам мир и милость и спасение душ наших, чтущих честную память твою.

Кондак, глас 6:
Изменил еси земнаго княжения славу во иночества образ смиренный, и страдальчески земное житие скончав, ныне на Небесех радуешися, усердно моляся о чтущих тя, Игоре, страдальцев похвало.

Ин кондак, Глас 8:
Княжескую диадиму обагрил еси кровию твоею, Богомудре страстотерпче Игоре, за скиптр крест в руку приим, явился еси победоносец и жертву непорочну Владыце принесл еси себе. Яко бо агнец незлобив от раб убиен был еси, и ныне радуяся предстоиши Святей Троице, молися спастися душам нашим.

Кондак 1
Избранный страстотерпче Христов, благоверный княже Игоре, возсиявый людем твоим, яко звезда пресветлая! Ты бо славу земнаго княжения оставил еси и во иночестве Господеви работати вожделел еси, страдальчески земное житие скончав, и ныне, радуяся, предстоиши престолу Святыя Троицы. Молитвами твоими от всяких зол и напастей охраняй нас, да благодарственно со умилением зовем ти:
Радуйся, святый благоверный княже Игоре, во смирении за истину терпящим, скорый помощниче.

Икос 1
Ангельски поживши на земли, от юности возлюбил еси Божественное учение и сему последовав добрым житием, немолчно прославлял еси имя Господне чтением книг священных и пением церковным. Сего ради тебе, на небеси и на земли прославленному, вопием сице:
Радуйся, от рождения твоего Богом избранный.
Радуйся, семя слова Божия от юности восприявый.
Радуйся, великий угодниче Божий, благочестивую жизнь на земли возлюбивый.
Радуйся, путем трудным и тесным житие земное прошедый.
Радуйся, правды ради душу твою положивый.
Радуйся, от Царя Небеснаго, венец мученический приемый.
Радуйся, святый благоверный княже Игоре, во смирении за истину терпящим, скорый помощниче.

Кондак 2
Видя Господь чистоту сердца твоего, блаженне княже Игоре, избра тя зрети славу небесную, ты бо паче всего возлюбил еси чистоту душевную и телесную, и ради страданий временных, уповая избежати мучений вечных, великий угодник Божий был еси, и лицем к лицу зрети Господа удостоился еси. Темже притекающе к тихому пристанищу молитв твоих, вопием Христу Богу: Аллилуиа.


Икос 2
Разум озаренный благодатию Божиею из млада имел еси, княже Игоре, от юности бо хранил еси в сердце твоем закон Христов, великим угодником Божиим, прошедшим тернистым путем во Царствие Небесное, подражая. Темже и мы, уповая на твое предстательство, молимся: буди нам скорый помощник и покровитель в земном житии нашем, да благодарно вопием ти:
Радуйся, избранный и верный рабе Христов.
Радуйся, от юности чистоту жития возлюбивый.
Радуйся, из млада единому Христу угождавый.
Радуйся, Иисуса ради вся напасти безропотно претерпевый
Радуйся, Тому единому всею душею прилепивыйся.
Радуйся, всего себе на страдания правды ради предавый.
Радуйся, святый благоверный княже Игоре, во смирении за истину терпящим, скорый помощниче.

Кондак 3
Силою Вышняго, дарованною тебе, и долготерпением твоим укреплен был еси, блаженне, егда враг рода человеческаго наведе на тя люди злы, во еже лишити тя славы княжеския. Темже, дивящеся богатству терпения твоего, воспеваем укрепившему тя Господу песнь: Аллилуиа.

Икос 3
Имея желание в души своей вся красная и сладкая мира сего оставити и Христу последовати, еще млад сый, избрал еси себе путь служения Господеви. Мы же, подражая житию твоему и почитающе честная страдания твоя, правды ради претерпенная, величаем тя сице:
Радуйся, в души своей имевый желание мир оставити и Господеви послужити.
Радуйся, вся красная и сладкая мира сего презревый.
Радуйся, совершенную любовь ко Господу стяжавый.
Радуйся, за кротость души твоея наследие жизни вечныя получивый.
Радуйся, ум твой, сердце и волю в Бозе утвердивый.
Радуйся, дивную кротость духа в скорби показавый.
Радуйся, святый благоверный княже Игоре, во смирении за истину терпящим, скорый помощниче.

Кондак 4
Бури житейских бед и напастей не возмогоша поколебати крепости души твоея, благоверный княже Игоре, основана бо бе на твердем веры Христовы камени. Мы же, дивящеся великому терпению твоему, со умилением взываем Богу: Аллилуиа.

Икос 4
Слыша и видя, княже блаженне, распри и раздоры, врагом рода человеческаго воздвизаемыя, егда вступи на престол Киевский, абие восхотел еси вразумити люди своя и привести их к миру и благоразумию. Сего ради с любовию взываем ти:
Радуйся, яко тобою всякая вражда и злоба побеждаются.
Радуйся, чистоты веры и незлобия дивное воплощение.
Радуйся, образе кротости и терпения.
Радуйся, зерцало совершеннаго незлобия.
Радуйся, многими скорбьми в радость Господа твоего вшедый.
Радуйся, помогаяй и нам терпети скорби и поношения.
Радуйся, святый благоверный княже Игоре, во смирении за истину терпящим, скорый помощниче.

Кондак 5
Боготечную звезду зрим тя, угодниче Божий, тя бо, восприимшаго великия страдания, прослави Господь, яко вернаго раба Своего, невинно убиеннаго злыми человеки по наущению диавольскому. Мы же, взирающе с любовию на честный образ твой, приклоняем колена, со умилением поя: Аллилуиа.

Икос 5
Видевше великий князь Киевский Всеволод, яко преклонился есть к вечеру день жития его, призва тя, Игоре блаженне, и завеща ти престол княжеский. Ты же воли брата твоего, яко воли Божией повинуяся, все упование на Господа возложил еси. Мы же, похваляя таковое смирение твое, воспеваем ти:
Радуйся, яко до конца крест жития твоего безропотно понесл еси.
Радуйся, благочестием Богови и людем послуживый.
Радуйся, велению брата своего покоривыйся.
Радуйся, в народоправлении велию добродетель показавый.
Радуйся, всем братолюбцем присное ободрение.
Радуйся, от людей своих велию любовь стяжавый.
Радуйся, святый благоверный княже Игоре, во смирении за истину терпящим, скорый помощниче.

Кондак 6
Проповедником добродетелей христианских был еси, княже Игоре, поучая любити братию и народ свой. Мы же ублажаем тя, яко добраго и истиннаго последователя Христова, живот свой за люди твоя положившаго, воспевая Господеви песнь: Аллилуиа.

Икос 6
Возсиял еси богоугодным житием твоим, благоверный княже Игоре, все упование свое на Господа, вся во благо устрояющаго, возлагая. Мы же, восхваляя подвиги твоя, глаголем сице:
Радуйся, яко в житии твоем добродетельми просиявый.
Радуйся, чистотою сердца твоего Господа созерцавый.
Радуйся, в несении трудов великаго княжения помощь от Господа получивый.
Радуйся, яко вместо княжеских почестей - мучения и скорби мужественно претерпевый.
Радуйся, иго Христово, благое и легкое, на рамена своя восприявый.
Радуйся, терпению Христову верно подражавый.
Радуйся, святый благоверный княже Игоре, во смирении за истину терпящим, скорый помощниче.

Кондак 7
Хотящу ти, блаженне, воли Божией покоритися, не воспротивился еси воином князя Изяслава, егда тии тя, еле жива суща, в хладном порубе заключиша, идеже ты, подобно Даниилу пророку, заточенному в рове львином, непрестанно взывал еси Богу: Аллилуиа.

Икос 7
Новаго видим тя избранника Божия, благоверный княже Игоре, егда пременил еси княжения славу во иночества образ смиренный. Ты бо, вся благая презрев, желанием восхотел еси единому Богу поработати. Темже, таковому твоему смирению и кротости дивящеся, вопием ти:
Радуйся, страдания лютая невинно претерпевый.
Радуйся, образ любве и незлобия нам показавый.
Радуйся, вся благая мира сего ни во что же вменивый.
Радуйся, злобу и коварство диавола смирением победивый.
Радуйся, послушанию иноческому всецело предавыйся.
Радуйся, усердным молитвенником за люди твоя явивыйся.
Радуйся, святый благоверный княже Игоре, во смирении за истину терпящим, скорый помощниче.

Кондак 8
Странник и пришлец, по апостолу, явился еси на земли, боголюбезне княже, дольняя бо вся презрев, горняя взыскал еси, все помышление твое ко Господу имеяй. Темже помози и нам, молитвами твоими, добродетельное житие возлюбити, да купно с тобою вопием Богу: Аллилуиа.

Икос 8
Всею душею от юности Богу послуживый, блаженне княже Игоре, сего ради Господь прослави тя, Своего угодника, кротости ради и смирения твоего. Мы же, сим добродетелем последовати тщащиися, вопием ти радостно:
Радуйся, от юности Господа всею душею возлюбивый.
Радуйся, делы благими Христу благоугодивый.
Радуйся, всем житием твоим Бога прославивый.
Радуйся, тесный путь спасения от юности избравый.
Радуйся, благодать Божию в сердце своем стяжавый.
Радуйся, житие свое иночеством украсивый.
Радуйся, святый благоверный княже Игоре, во смирении за истину терпящим, скорый помощниче.

Кондак 9
Всего себе покорил еси воли Господни, яко раб благий и верный, егда пострижение иноческое восприим, во обитель святаго Феодора вселился еси, идеже всецело посту и молитве предался еси. Сего ради сподобился внити в радость Господа своего, Емуже предстоиши ныне со Ангелы, поя: Аллилуиа.

Икос 9
Витии многовещанныя не возмогут по достоянию восхвалити страдания твоя, страстотерпче Христов княже Игоре, ниже уразумети глубины упования твоего, приимши бо весть о убиении твоем, потщался еси в церковь Господню, со слезами пред образом Царицы Небесныя моляся. Убийцы же твои, яко звери дивии, емше тя молящагося, бив, повлекоша тя из храма. Ты же, благодатию Божиею укрепляемь, страдания кротко претерпел еси, за убивающих тя Господа умоляя. Сего ради величаем тя сице:
Радуйся, все упование на Господа и Его Пречистую Матерь возложивый.
Радуйся, на мучение безропотно предавыйся.
Радуйся, благодатию Божиею укрепляемь, страдания мужественно претерпевый.
Радуйся, яко сего ради венцем мученическим украшенный.
Радуйся, за убивающих тя кротко моливыйся.
Радуйся, душу свою в руце Божии радостно предавый.
Радуйся, святый благоверный княже Игоре, во смирении за истину терпящим, скорый помощниче.

Кондак 10
Спасти хотя душу свою, вся земная и временная во уметы вменил еси, неуклонно стопам Спасителевым последствовав. И ныне с лики ангельскими веселяся, немолчно вопиеши Прославльшему тя Господеви: Аллилуиа.

Икос 10
Стеною терпения оградився, верный раб Царя Небеснаго был еси. Вражиих бо устрашений не убоявся, всего себе в руце Божии предал еси и страдания мужественне претерпел еси. Мы же, чтуще святую память твою, ублажаем тя, вопиюще:
Радуйся, великий княже Игоре, престолу Небеснаго Владыки предстояй.
Радуйся, венец твой княжеский кровными каплями, яко драгими камнями украсил еси.
Радуйся, образ вернаго служения Богу терпением своим показавый.
Радуйся, житие свое тесною стезею мучений и страданий прошедый.
Радуйся, яко пред великим мужеством твоим, вернии преклоняются.
Радуйся, яко и ныне не престаеши благодеяти призывающим тя.
Радуйся, святый благоверный княже Игоре, во смирении за истину терпящим, скорый помощниче.

Кондак 11
Пение хвалебное приносим дивному во святых Своих Богу нашему, даровавшаго Церкви Своей и стране нашей дивнаго чудотворца и усерднаго молитвенника, благовернаго князя Игоря, иже и поныне не престает молитися за ны и научая пети всех: Аллилуиа.

Икос 11
Свет славы небесныя осия святое и многострадальное тело твое, страстотерпче Христов, егда оное положено бысть в церкви святаго Михаила. Людие же, окрест гроба твоего стоящии, и возжегаемыя невидимою рукою свещи и лампады зряще, приидоша в трепет и ужас, познавая, яко тако прослави Бог угодника Своего; тебе же, богомудре княже, воспеша тако:
Радуйся, усердный наш пред Богом молитвенниче и предстателю.
Радуйся, яко Господь прослави тя знаменьми и чудесы.
Радуйся, сиянием небеснаго света озаренный.
Радуйся, непорочную душу твою в руце Божии предавый.
Радуйся, нетленное тело твое в помощь нам оставивый.
Радуйся, яко за смиренномудрие твое венцем славы от Бога увенчанный.
Радуйся, святый благоверный княже Игоре, во смирении за истину терпящим, скорый помощниче.

Кондак 12
Благодать единения и братолюбия испроси нам у Всещедраго Бога, угодниче Христов, да вси людие возлюбят друг друга и единодушно исповедят веру Православную, воспевая Спасителю нашему: Аллилуиа.

Икос 12
Поюще добродетельное житие твое, ублажаем мученическую кончину твою, восхваляем и пренесение честных и многоцелебных мощей твоих из стольнаго града Киева во град Чернигов, воспеваем славу твою, иже на небесех, и усердно молим тя, страстотерпче княже Игоре: не возгнушайся нас, грешных и недостойных, зовущих ти:
Радуйся, яко великия благодати от Бога сподобивыйся.
Радуйся, яко теплый молитвенник и заступник от Бога нам дарованный.
Радуйся, яко всем призывающим тя скорый помощник бываеши.
Радуйся, духовнаго веселия сердца наша исполняющий.
Радуйся, в лице Русских святых славою многою от Бога превознесенный.
Радуйся, яко благочестивых множества любовию празднуют святую память твою.
Радуйся, святый благоверный княже Игоре, во смирении за истину терпящим, скорый помощниче.

Кондак 13
О, многострадальный страстотерпче Христов, благоверный великий княже Игоре! Приими сие малое, обаче от любящих сердец приносимое тебе сие моление наше, защити всех нас, за истину обиды и поношения терпящих, уврачуй душевныя и телесныя недуги, и от всех бед и скорбей избави ны да, благодарни суще, вопием Богу: Аллилуиа.

МОЛИТВА
О святый угодниче Божий, страстотерпче благоверный, княже Игоре! Ты из млада Бога возлюбил еси, мудрования плотская, честь и славу княжескую ни во что же вменил еси и монашескаго образа, еще юный леты, достигл еси, к Богу единому всею душею твоею прилепился еси, и благое иго Христово на ся взем, путем спасительным неуклонно шествовал еси даже до смерти мученическия. Сего ради венча тя Господь, блаженне Игоре, венцем славы и прият в Своя Небесная селения, идеже ты ныне, неизреченныя славы и радости наслаждающеся в невечернем дни Царствия Христова, с лики святых страстотерпцев и всех святых Бога о нас умоляеши. Молимся тебе, святче Божий, припадая к честному образу твоему: молися о нас грешных и непотребных, испроси молитвами твоими мира державе нашей, граду сему (и святому храму сему) благодати и милости. Церковь святую огради молитвами твоими от ересей и расколов, пастырем ея испроси ревность и благочестие, всем же нам любовь нелицемерную и терпение даруй, грехов наших прощение, болезней и всяких недугов исцеление. Покрый и сохрани всех нас от всяких бед, скорбей и напастей, да, благодаряще, прославим Святую Живоначальную Троицу, Отца и Сына и Святаго Духа, во веки веков. Аминь.[/spoiler]

[Раб божий Константин]

Акафист святому преподобному и богоносному отцу нашему Иерониму.
[spoiler]Кондак 1
Избранный служителю Воплотившегося Слова, преславный угодниче Христа Вседержителя, воеводо воинов духовных, наставниче богомудрый, отче наш Иерониме преподобне, священныя писания на наречие латинское переложивый, подвизавыйся в пустынех преусердно и стяжавый ко Господу Иисусу дерзновение велие, от всяких нас бед, скорбей и страстей свободи благоприятными твоими молитвами, да славяще тя, заступника нашего, с надеждою и любовию воспеваем ти сице:
Радуйся, преподобне отче наш Иерониме, любовию ко Господу Иисусу сердца наши наполняющий!

Икос 1
Ангелом небесным нравом подобен был еси на земли, отче наш Иерониме, яко от младости пренебрегши земная блага, Небесныя богатства собрал еси, ум в Небесная вперяя, слыша Всещедраго Бога глас: "Ищите же прежде Царствия Божия и правды Его, и сия вся приложатся вам", темже в тя вселися Пресвятый Дух, Его же тя обиталищем быти уведевши, со умилением взываем ти сице:
Радуйся, яко твоим предстательством жизни вечныя нас сподобляй.
Радуйся, Светом Христовым просвещенный;
Радуйся, премудростию Божией умудренный.
Радуйся, за вся людие, добрыя и злыя, молитву проливаяй,
Радуйся, милости Божия к ним призываяй,
Радуйся, благодарити Творца ны научаяй;
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 2
Видяще взором духовным, яко век, иже на земли, преходящ есть, век же он, яко непреходящий возлюбил еси; сего ради еще юн сый телом, прехвальный Иерониме, и млад летами, обаче велик и силен пред Богом и человеки был еси, яко яко в преподобии и правде подвизался еси, Иисусу Сладчайшему воспевая умилено: Аллилуйя!

Икос 2
Разум недоразумеваемый о несозданном Божестве постигл еси, святый Иерониме, и положил еси в сердце твоем обратитися ко Христу и последовати Ему, разум же твой премудростию книжною, риторским искуством и учениями святоотеческими во граде преславнем Риме пребывая напитал еси, да всеми дары духовныма твоима послужиши Спасителю возлюбленному Твоему.Темже мы, чудящеся о скором твоем на лучшая преложению, дерзаем восхваляти тя таковыми гласы:
Радуйся, добрая отрасле родителей благочестивых;
Радуйся, в юности еще сад Христу в сердце своем насадивый.
Радуйся, земле благая, приявшая семя небеснаго учения;
Радуйся, свыше удостоивыйся Божественнаго просвещения
Радуйся, молитвами твоими нас ограждающий.
Радуйся, свете, плавающих в житейстем мори освещаяй;
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 3
Сила Божественныя любве, еюже измлада исполнено бысть сердце твое, богомудрый Иерониме, толико укрепи тя в подвизех, яко возложь руку твою на рало, никакоже вспять обратился еси, желая во еже Христу житие твое всецело посвятити, к Нему, изучая Писания и молитвы неустанное творя, духом выну возносился еси, отче святый. Светом же богоразумия твоего и нас озари, да вопием купно с тобою Иисусу Сладчайшему: Алллуиа!

Икос 3
Имея всецелое желание иго Христово на себе носити и во след Иисусу Сладчайшему следовати, трудное монашеское житие подъял еси, благоразумия крилами украшаем; легко прелетел еси вся вражия сети, тем и в Небесный чертог со славою вшел еси, богомудре Иерониме; мы же, дивящеся высоте твоего добродетельнаго жительства, умильно вопием ти сице.
Радуйся, ангельскаго жития подражателю.
Радуйся, древних отец жития последователю.
Радуйся, невидимых врагов мужественный победителю.
Радуйся, заповедей Божиих усердный исполнителю.
Радуйся, реко, наводненная водою Божия благодати.
Радуйся, разумение Божественных писаний сподобивыйся прияти.
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 4
Буря страстей и треволнений житейских не возможе поколебати тя, преблаженне отче Иерониме, обаче научи благоискусно искати пристанище спасения твердое: темже сугубо возсия в души твоей нетленная красота безстрастия, угодная вседетелю Богу, Ему же воспевал еси: Алилуиа!

Икос 4
Слышавше, яко христиане многие желают в вере спасительней возрастати, труды велия подьял еси, богоносне Иерониме, яко переложил еси книзи Ветхаго и Новаго Заветов на наречие латинское, да ведают вси об учении и заповедех Господних и свято исполняют вся, яже завеща нам Спаситель. Любовию же к Иисусу Сладчайшему движимый и своими словеси, проповеди и книзи богомудрыми просветил еси людие многия, писания бо твоя во всех градех и весех до ныне вопиют немолчным благовестием. Сего ради мы, чада твоя духовныя, с любовию глаголем ти:
Радуйся, к регулярному чтению Библии нас призывающий;
Радуйся, светом Слова Божия разум наш просвещающий;
Радуйся, глаголы святыя в сердце хранити научающий;
Радуйся, заповеди Спасовы в житии воплощати ны сподвигающий;
Радуйся, заботитися о духовнем блазе ближних призывающий;
Радуйся, отче благосерде, милость всем безмездно творящий;
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 5
Боготечный, аки древле звезда, ко Христови приведением мудрецы от Восток просветившая, ко святыням Иерусалима земнаго устремился еси, дабы в любве ко Иисусу Сладчайшему возрасти, отче наш Иерониме. Мы же ныне просим тя: сподоби и ны в сокровенных храмех сердец воздвигнути духовныя престолы Спасителю, муки и смерть за ны претепевшему, и да сподобимся с тобою купно Милосердному Господу во веки воспевати: Аллилуйя!

Икос 5
Видя тя пастыреначальник Христос служения же истинно христианскаго усердна исполнителя, постави Тя яко светильника светла на свещнице церковней, аки богомудраго советчика архипастыря изрядна церкви Римския, яко да пасеши словесныя овцы на пажитех злачных и от ересей пагубных их избавляеши. Сего ради мы, многогрешные, просим тя: помози нам волю Божию, благую и совершенную раузумети и и за вся Творца настави благодарити, да зовем ти сице:
Радуйся, боголюбче, еще на земли созерцавый Свет Небесный;
Радуйся, ради онаго избравый путь тяжкий и тесный;
Радуйся, почитающим святую память твою Небесный покровителю;
Радуйся, в горния обители нам путеводителю;
Радуйся, вестниче любве Божия, к примирению с Господом всех призываяй;
Радуйся, подвигом веры в любви к Нему нас укрепляяй;
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 6
Проповедника учения Христова чтим тя, отче Иерониме, яко Преподобнаго постника и священна учителя, благочестия поборника теплейшаго, писаний изъяснителя вдохновеннаго, исповедника же паче адаманта твердейша и любве Божественныя таинника известна, присно молящего пред престолм Святыя Троицы за ны грешные, вопиющия о тебе Господеви : Аллилуйя!

Икос 6
Возсиял еси, святый отче Иерониме, не токмо велиею мудростию твоею, паче скорбей и тягот терпением, яже стяжал еси, взирающе на Начальника веры Господа Иисуса. Темже и святая Церковь достойно почитает подвиги твоя, имиже трудися, подражающе терпению и любви Матере Господа, призывающе всех на благоугождение Богу и на делание духовное со усердием, да вси последующии зовем тебе сице:
Радуйся, нищету духа и телесе возлюбивый.
Радуйся, воздержание чудное явивый.
Радуйся, боголепнаго самоуничижения н самоукорения взыскавый.
Радуйся, невозмущаемое безмолвие стяжавый.
Радуйся, чувств простую пятерицу богомыслием просветивый.
Радуйся, селение Духа, а не ктому селение греха себе показавый
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 7
Хотение имел еси, преподобне отче наш Иерониме, в безмолвии ненарушимом работати Спасителю: сего ради удалился еси в пустыню на, на место безмолвное и удаленное от жилищ человеческих, идеже в подвизех отшельнических добре подвизался еси, Обаче, отче любвеобильне, содержа во уме слово Господне: грядущаго ко мне не изжену вон, никогоже отринул еси, от приходивших к тебе, за вся благодаря Христа и воспевая Ему: Аллилуйя!

Икос 7
Новаго тя наставника монашествующих и мирян благоговейных богопросвещенного наставника разумеем тя, отче святый Иерониме: пройде бо о тебе слава повсюду, и мнози прихождаху к тебе благословения ради и молитвы, и слышания ради душеспасительных словес, инии же и сожительствовати с тобою желающе: ты же всех приимал еси с любовию, и поучал еси их от Божественнаго Писания, еже творити заповеди Господни, хранити чистоту телесную и имети любовь нелицемерную друг ко другу. Темже благодарственно вопием ти:
Радуйся, непостижимую действующую в тебе силу Божию явивый;
Радуйся, Христов лик присно во уме твоем предносивый;
Радуйся, многострадальнаго о Христе жития благий образ явивый;
Радуйся, ученики твоя неленостно в житии назидавый;
Радуйся, Христовы словесныя овцы ко спасению подвизаяй;
Радуйся, нерадивыя от сна греховнаго возбуждаяй;
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 8
Странствия земная совершая, многих в преподобнеческом житии утвердил еси, преподобне отче наш Иерониме, духовных чад твоих назидая во христоугодных добродетелех возрастати. Сему же и нас настави, да возлюбим и мы, паче всего земнаго Иисуса Сладчайшаго и возможем Ему с тобою купно во веки воспевати : Аллилуйя!

Икос 8
Все упование возложив на промысл Божий и, пустынниче святый, Предтече Христову подобяся, яко птица небесная попечением малым о телесе твоем тщался еси, паче же воздержанием многим дух твой укрепив, красоту исправлений твоих верным уяснил еси, темже приими от нас сицевая:
Радуйся, узок путь во Царствие небесное избравый;
Радуйся, пустынничества крест волею подъявый.
Радуйся, Христа Бога в сердце твоем вместивый;
Радуйся, имя Его спасительное в уме всегда носивый.
Радуйся, молитвенную сладость сердцем твоим познавый;
Радуйся, слез благодатных поток умилительный источивый.
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 9
Всякое естество Ангельское удивися великому свыше тебе дарованию, богоблаженне Иерониме, ты бо на земли невещественное житие показал еси, и во плоти, аки безплотен, явился еси. Сего ради многих чудес творения от Господа приим чистою и боголюбезною душею твоею, Того благостию к Небесным причтен еси силам, в Небесех ныне поеши всесильному Богу: Аллилуия!

Икос 9
Вития многовещанныя недоумеют како возможно восславити тя, достойный всякия славы, пречудне отче наш Иерониме, яко потщался еси вседушно Превечному Богу благоугодити, и воистину не вотще потрудися: премени бо тленная на нетленная, наипаче же предстояния сподобился у небеснаго Престола Премилосерднаго Спасителя Нашего, тем же вопием ти сице:
Радуйся, на земли Пресвятую Троицу присно славити обыкнувый;
Радуйся, в послушание Богу Отцу себе вдавый.
Радуйся, нищетою твоею Богу Сыну подражавый.
Радуйся, чистоту твою Богу Духу сохранивый.
Радуйся, Святей Троице ныне со ангелы радостно предстояй.
Радуйся, о спасениии нашем присно Святую Троицу умоляяй;
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 10
Спасения ради добре подвизался еси, приснопамятне Иерониме, яко стремясь достичь совершенства, многи подвиги совершил еси, богоблаженне, пост, непрестанну молитву, бдение, слезы, поклоны, изнурение тела, яже привлече на тя благодать Божию. Темже от Господа венец нетления тебе сплетеся, егда святую душу твою предал еси в руце Вседержителя, воспевая ангельскую песнь: Аллилуиа!

Икос 10
Стеною молитв твоих, преподобне отче, от всякаго искушения диавольскаго нас огради, да не порадуется враг падениям нашим, от скорбей земных, недуг телесных и тягот житейских свободи ны, помози всем подвизающимся во славу Божию, архипастырей и пресвитеров укрепи в служении их, миряном помози во благочестии возрасти, учащимся и наставником мудрость, преуспеяние и усердие даруй, переводчиком и наречия древния, славянския, паче же иноземныя изучающим,вспоможение ниспошли, и прими возносимыя ти с надеждою похвалы сия:
Радуйся, древних знаменосных отец усердный ревнителю.
Радуйся, в Небесных селениих ликом оных сопричтенный.
Радуйся, благодати тихое веяние.
Радуйся, прибегавших к тебе помощниче.
Радуйся, наше непостыдное в трудех и служении предстательство.
Радуйся, духовнаго просвещения светильниче небосветлый;
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 11
Пение благоговейное Богу достойно приносил, преподобне отче наш, с радостию шел ко Христу в послушание, ведая яко жизнь зде во плоти дана для благоугождения Господу и Всещедрый Владыка духовное преспеяние дарова ти. О сем благодарным сердцем в веселии пел еси Создателю своему: Аллилуиа!

Икос 11
Светоподательный светильник Божией благодати являешися нам, отче преподобне, Иерониме преславне, во мнозех и предивных твоих чудесех, яже удостоверяют нас в твоей святости и близости ко Господу, Емуже помолися за ны грешныя, усердием сице тебе зовущыя:
Радуйся, утешение в скорбех, унывающия ободряяй.
Радуйся, своею отеческою любовию вся объемляй.
Радуйся, медоточная уста, горесть скорбей услаждающая;
Радуйся, живительная росо, в сердцах веру оживляющая.
Радуйся, распри скоро искореняяй.
Радуйся, скорби и болезни безропотно нести научающий.
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 12
Благодать Божия дала ти, богославне отче наш Иерониме, силы высочишия любве к Богу, пробуждая в душе чувство непрестаннаго стремления к Нему. Господь рече: «Аз любящия мя люблю, ищущия же Мене обрящут благодать». И тоя ради любви ты, достославне, претерпел великия скорби, сокрушение духа, многия слезы, препобедив себе самого. О сем умиляяся славословие приносим о тебе Творцу: Аллилуиа!

Икос 12
Поюще твоя преславная чудеса и исцеления, и до днесь тобою являемии всем с верою и любовию к тебе притекающим и ищущим твоего многомощнаго предстательства заступления, хвалим тя вси, яко сосуд благодати, неоскудно точащий любовь и милосердие ко всем христианом, чтущим тя. Ты бо, богоносне отче наш Иерониме, твердую руку помощи твоея подаеши и грехми присно погружаемых от смертоносных глубин изводиши. Сице просим тя: прочее жития время в покаянии истиннем скончати нам помози, с надежою и любовию вопиющим ти ныне:
Радуйся, алавастре многоцелебный на всяк недуг врачевство содержащий.
Радуйся, маслино благоплодная, елей Божией благодати обильно нам источающая.
Радуйся, воздвизаемых от мира, плоти и диавола искушений ходатайством твоим свобождающий.
Радуйся, нераскаянных грешников к совершенному покаянию побуждающий;
Радуйся, духов лукавых прогонителю и полчищ бесовских победителю.
Радуйся, ран греховных и недуг душевных всеблагий целителю;
Радуйся, преподобне отче наш Иерониме, любовию ко Господу Иисусу сердца наши наполняющий!

Кондак 13
О преподобне и богоносне отче наш Иерониме, приими сие малое, от любящих тя сердец приносимое хваление. Яко имеяй велие ко Господеви дерзновение, молися за ны, и богоприятным твоим ходатайством избави нас от всякаго искушения противника и благоговение ко Слову Божию всели в сердца наша, да в добродетели и во смирении поживше сподобимся выну пети Ему со безплотными песнь великую: Аллилуиа!

Житие
Святой Иероним Стидонекий (полное имя Евсевий Иероним Софроний) родился в Стридоне (на границе Далмации и Паннонии) примерно в 340 году (документально это не подтверждено).
Отец Иеронима, Евсевий, был довольно богат и дал сыну хорошее образование, которое тот завершил в Риме у грамматика Доната. Его литературное наследие ярко свидетельствует о том, насколько хорошо он изучал риторику. Рим с его легкомысленными нравами того времени подверг испытанию Иеронима, однако твердые нравственные принципы, усвоенные им в семье, помогли ему устоять перед многими соблазнами. В то время он стал посещать церкви, в особенности катакомбы в Риме, и уже в 360 году проникся идеей аскетизма.
Около 366 года Иероним принял крещение. Вместе с друзьями-единомышленниками он отправился в путешествие с научными целями и в Аквилее организовал общину. К этому времени относятся первые литературные труды Иеронима. Около 372 года блаженный Иероним вернулся в родной город, но родителей в живых уже не застал. На него легли заботы о воспитании младших сестры и брата Павлиниана. В это время Иероним стал ревностно изучать Священное Писание. В 373 году он отправился на Восток, желая поклониться Гробу Господню. В Антиохии Иероним лишился двух своих друзей (они заболели и умерли), а сам он тяжело заболел. Он удалился в Халкидскую пустыню, где отшельником провел пять лет (374 - 379), предаваясь подвигам аскетизма. Здесь он погрузился в изучение еврейского языка, чтобы читать Священное Писание на его оригинальном языке.
В 380 году Иероним приехал в Константинополь; здесь он испытал сильное влияние крупнейших богословов - Григория Богослова и Григория Нисского. Именно в Константинополе Иероним начал работу по переводу Библии. Профессиональный перевод был продолжен в 382-385 гг. в Риме, и, затем, в 386 г. в Вифлееме. При переводе он использовал еврейские тексты и греческий перевод Библии.
В 382 году Иероним обосновался в Риме, где провел три года (до 385 года). Здесь его приблизил к себе папа Дамас I (366 - 384) и сделал его своим ближайшим советником. В церковных кругах Иероним считался главным преемником папы. Но к времени смерти папы Иероним нажил себе столько врагов, что, в конце концов, ему пришлось покинуть Рим. Вместе со своим братом Павлинианом и друзьями блаженный Иероним отправился в Святую Землю и больше в Рим не вернулся. Однако этого истового (хотя и непродолжительного) служения при папе оказалось достаточно, чтобы впоследствии о нем стали говорить как о кардинале.
В 386 году Иероним поселился в Вифлееме в пещере, поблизости от пещеры Рождества Христова где и провел последние тридцать три года своей жизни. Это был период расцвета его творческой деятельности. Выдающийся ученый и переводчик своего времени, владеющий латынью, греческим, еврейским и халдейским языками, блаженный Иероним оставил Церкви богатое письменное наследие: сочинения догматико-полемические, нравственно-аскетические, труды по истолкованию Священного Писания, труды исторические. По поручению папы Дамаса св. Иероним перевел Библию (Новый и Ветхий Завет) на латинский язык.
Святой Иероним закончил свою жизнь в той же Вифлеемской пещере 30 сентября 420 года. Мощи его были перенесены из Вифлеема в Рим.[/spoiler]