Молитвослов

[Раб божий Константин]

Акафист покаянный Преблагословенней Богородице о избавлении от плотских похотей.
[spoiler]Кондак 1
Взбранной Воеводе, Царице Небесней Богородице, яко избавльшеся от всякия бесовския напасти молитвами Ея, благодарственная восписуем Ти раби Твои, Пречистая Дево: но яко имущая державу непобедимую, и целомудрием Твоим всякую тварь превозшедшая, от всякия скверны плоти и духа нас очисти, да зовем Ти: Радуйся, Дево Всепречистая, целомудрия сладкий источниче!

Икос 1
Архангел и Ангел чистшая Дево, нескверное вместилище Сына и Слова Божия, припадаю пред Тобою с сокрушенною душею и со слезами к Тебе, Надеждо моя, вопию: не возгнушайся моего недостойнаго хваления, от скверных устен Тебе приносимаго, но виждь души моея рачение, и сие приими, яко Благая, да радостно воспою Тя сице:
Радуйся, Приснодево и Мати Божия,
Радуйся, ангельских ликов Царице.
Радуйся, нескверная Агнице, Бога Слова рождшая,
Радуйся, неблазная Девице, небес превышшая.
Радуйся, Любве, всякое желание земное побеждающая,
Радуйся, Росо, пламень греховный угашающая.
Радуйся, Огню, волчцы похотей и сластей попаляющий,
Радуйся, Море, всякую нечистоту потопляющее.
Радуйся, Надеждо истлевших сластьми,
Радуйся, ничтоже скверное когда помыслившая.
Радуйся, Отроковице, бесовския лести отгнавшая,
Радуйся, струпе нечистых духов.
Радуйся, Дево Всепречистая, целомудрия сладкий источниче!

Кондак 2
Вижу икону Твою, Премилостивая Заступнице, и рыдаю своего омерзения, зрю благодатный Твой образ и плачу образа Божия во мне помрачения, и томлюся многими помыслы скверными. Вем, Всепречистая, яко аще не поможеши ми, никогдаже очищуся и вечныя смерти наследник буду, окаянный: обаче благостию Твоею от гибельнаго рова страстей изведи мя, вопиющаго о Тебе Богу: Аллилуиа!

Икос 2
Разум мой многими сластьми оскверних, очи мысленныя всяко омрачих, скверня и внутренняя, и внешняя моя. Темже весь непотребен, гнусен и мерзостен сый, к Тебе, последняя моя Надеждо, глубино неудобозримая целомудрия, прибегаю всем сердцем и молю Тя, Благословенная: даждь ми руку помощи и сокруши под ногама моима всякую похоть плотскую, похоть очес и гордость житейскую, и исторгни мя от всякаго общения бесовскаго, да не имать князь мира сего во мне ничесоже, ибо верою Тебе, Благодатней, пою:
Радуйся, девственная похвало,
Радуйся, солнца светлейшая.
Радуйся, Звездо, спасения стезю озаряющая,
Радуйся, любящих Тя от всякия страсти избавляющая.
Радуйся, огнем нечистоты греховныя мучимым отрадо,
Радуйся, очи мысленныя моя просвещающая лампадо.
Радуйся, исправление окамененныя души моея,
Радуйся, рукописание многих грехов моих растерзающая.
Радуйся, верующих в Тя ризою чистоты одевающая,
Радуйся, любящих Тя целомудрием украшающая.
Радуйся, мучителя безчеловечнаго изметающая от начальства,
Радуйся, врагов спасения человеческаго устрашающая.
Радуйся, Дево Всепречистая, целомудрия сладкий источниче!

Кондак 3
Силу мне подаждь, Дево всеблагая, да не утомлюся Богови служа и Тебе, Всепетая, поя: да не дам убо сон очима моима, ни веждома моима дремания, ниже покой скраниама моима, дондеже обрящу в сердце моем место Господеви, идеже выну буду пети Ему: Аллилуиа!

Икос 3
Имея Тя скорую и всемощную Заступницу, верую, Дево Преблагословенная, яко услышиши мя и враги моя смириши, и от страстей скверных плоти моея очистиши сердце мое: сице и умоляю Тя, Пренепорочная: даруй мне неугасительную любовь к девству, да Тобою умудряемь и просвещаемь, поперу всякую похоть житейскую, устрели же сердце мое рачением божественным, да с веселием восхвалю Тя:
Радуйся, возлюбленная Мати Бога моего,
Радуйся, сило моя несокрушимая.
Радуйся, оскверненную душу мою очищающая,
Радуйся, помыслы моя любовию ко Христу освящающая.
Радуйся, девственную чистоту мне возвращающая,
Радуйся, ветхость ума моего обновляющая.
Радуйся, твердое добродететей основание,
Радуйся, ненавистнаго греха блуда гнушатися научающая.
Радуйся, Солнце пречистое девства,
Радуйся, Чаше, черплющая благодать Тебе припадающим.
Радуйся, девства начало и освящение,
Радуйся, искушаемым сластьми помощнице верная.
Радуйся, Дево Всепречистая, целомудрия сладкий источниче!

Кондак 4
Буря помышлений в сердце моем восстает, еюже демон сладострастия присно соблазняет мя и ум мой пленяет, от Создателя моего и от Тебе, Мати всеблагая, отводя мя и в бездну грехов вторицею тщится воврещи мя. Обаче, о Пренепорочная, зрящи немощь мою одолети того, молю Тя, Дево: исторгни мя от гнуса сего и утверди мя на камени целомудрия, да зову Сыну Твоему и Богу: Аллилуиа!

Икос 4
Услыши, Дево, молитву мою, и вопль мой к Тебе да приидет, приими стенание души моея, не презри души, исповедующияся Тебе: Ты бо ми еси по Бозе вся надежда, и чаяния инаго разве Тебе, Всеблагая, не имам. Всяко не хощу на себе уповати, но всю душу мою тебе вверяю и зову: плотию Бога Рождшая, уцеломудри плоть мою и сердце мое научи непрестанно взывати Тебе сице:
Радуйся, любящим Тя благодать чистоты сердечныя дарующая,
Радуйся, радоватися Тебе глаголющим вечную радость ходатайствующая.
Радуйся, обнищавших Тебе ради целомудрием обогащающая,
Радуйся, смиряющимся о имени Твоем райския двери отверзающая.
Радуйся, скверных бесов рождеством Твоим обезсилившая,
Радуйся, вся стрелы их молитвою о нас угашающая.
Радуйся, покаянию нас научающая,
Радуйся, медом целомудрия душы тебе припадающих услаждающая.
Радуйся, елеем молитв Твоих сердца наша врачующая,
Радуйся, коварство демона гнуснаго упраждняющая.
Радуйся, лаятеля похотнаго низводящая во ад,
Радуйся, пещь неистовления ложнаго угашающая.
Радуйся, Дево Всепречистая, целомудрия сладкий источниче!

Кондак 5
Божественную радость подаждь на Тя уповающему, Дево всепетая, да возвеличу словом и делом красоту девства Твоего пресветлаго во вся дни живота моего, да не когда умолчу от похвалы Твоея, Радосте моя и Надеждо, но егда разрешуся от уз плоти, да узрю Тя, Заступницу мою и Матерь Спаса моего, и радостно о Тебе воспою Богу: Аллилуиа!

Икос 5
Виждь, Царице Небесная, яко мир сей аки море беснуется и на всяк день душу мою тщится потопити! Еда бысть когда сицевое нравов растление, якоже ныне? Еда прилежаху людие греху и словес Евангельских когда гнушахуся, яко ныне? Темже не остави мене погибнути в сей юдоли тления, но окорми мя ко благоотишному пристанищу целомудрия, да похвалу сию Тебе воспою:
Радуйся, святости зерцало пречистое,
Радуйся, Ангелов чистотою девства Своего удивившая.
Радуйся, небесных немолчная похвало,
Радуйся, земных непрестающее удивление.
Радуйся, от лести мира сего нас избавляющая,
Радуйся, уныние и отчаяние отгоняющая.
Радуйся, сония и мечтания скверная истребляющая,
Радуйся, свирепства душеубийцы демона низлагающая.
Радуйся, Дево, христиан сокровище вечное,
Радуйся, Пречистая Мати, любящим Тя стено необоримая.
Радуйся, в покаянии изнемогающим Крепосте неослабная,
Радуйся, Неблазная Невесто, украшение Церкве.
Радуйся, Дево Всепречистая, целомудрия сладкий источниче!

Кондак 6
Проповедницы славы Твоея, о Пренепорочная Мати, зрим девственники и монашествующии, ихже от гнуснаго служения вавилонскаго избавила еси, и проведши сквозе огнь и воду скорбей, извела еси в покой безстрастия. Сего ради и нам ревность неугасительную даруй, да по силе своей Христа ради потрудимся и, покаяния плод принесше, воспоем Господеви: Аллилуиа!

Икос 6
Возсияй в сердце моем, о дивная Владычня Палато, благодать покаяния и слезнаго Бога умоления, да выну усердствую в томлении томящаго мя. Даруй ми, молю Тя, Пречудная Мати, ненависть непримиримую ко греху, и любовь ненасытимую к добродетелем, да чистым сердцем восхвалю Тя сице:
Радуйся, сиянием Твоим мрак ума моего прогоняющая,
Радуйся, слезами умиления видения скверныя от очию сердца моего очищающая.
Радуйся, желание Богови токмо работати в душу мою возжигающая,
Радуйся, малодушие мое ревностию, еже Богу служити, творящая.
Радуйся, плоти моея Христа ради не щадити увещающая,
Радуйся, сораспятися Спасу моему возлюбленному силу мне дарующая.
Радуйся, яко от отчаяния гибельнаго спасаеши Тебе молящихся,
Радуйся, сладостнейшую любовь к Сыну Твоему в души моей распаляющая.
Радуйся, презирати тленную плоть научающая мя,
Радуйся, люботрудному житию наставляющая мя.
Радуйся, торжество небесных умов,
Радуйся, упование всем христианом.
Радуйся, Дево Всепречистая, целомудрия сладкий источниче!

Кондак 7
Хотением хощу Тебе, Дево Богородице, до конца верно служити, и на Тя надеюся, молитвеннице о души моей всегрешней, да избавиши мя огня неугасимаго, блудником, мне подобным уготованнаго. Темже не престаю хвалити Бога, Тебе ради, взывая Ему: Аллилуиа.

Икос 7
Нова сотвори мя, обетшавшаго нечувственными, Пренепорочная, согрешении и матерним Твоим заступлением сохрани мя, во еже не отступити ми от Бога в час искушения, но даруй мне мужески противитися страстем и похотем, даждь ми крепость не повинутися греху и покрый мя от всякаго зла честным Твоим омофором, да с веселием зову Ти:
Радуйся, благоуханное селение Слова Божия,
Радуйся, Царице, неприступною славою облеченная.
Радуйся, помыслы целомудренныя в сердца наша влагающая,
Радуйся, Сене Небесная, от зноя страстей нас сохраняющая.
Радуйся, Купель живоприемная, от всякия скверны нас омывающая,
Радуйся, жажду небесную утоляющая быстрая Реко.
Радуйся, в землю обетованную чистоты нас скоро приводящая,
Радуйся, крины добродетелей в саду сердец наших возращающая.
Радуйся, непрестанней молитве нас научающая,
Радуйся, яко нещадением плоти радость духовную твориши.
Радуйся, яко скорбьми и болезньми борения сего славу вечную нам готовиши,
Радуйся, яко паче снега души любящих Тя убеляеши.
Радуйся, Дево Всепречистая, целомудрия сладкий источниче!

Кондак 8
Странное и велие чудо милосердия Твоего нам показала еси, егда блудницу Марию из Египта извела еси в пустыню, и преподобием душу и тело ея украсила еси, проводящи ю сквозе многое множество скорбей и страданий. Сице и мене, Пренепорочная Отроковице, изведи от мрачнаго Египта страстей и в скорбей пустыни присно мя укрепляй, яко да воззову Сыну Твоему, яко отроцы в пещи: Аллилуиа!

Икос 8
Весь погрузихся в нижняя и греху всею душею поработихся. Обаче Ты, якоже иногда преподобную Марию в пустыни от уз сквернаго рабства свободила еси, сице и мене в пустыню покаяния направи, Дево Пречистая, и не остави мя возвратитися, якоже свиния, к блуду юности, но на спасения стези настави мя, да восхвалю Тя сице:
Радуйся, силою Твоею укрепляющая немощную и худую руку мою,
Радуйся, память смертную в душу мою милостивно влагающая.
Радуйся, Радосте всех радостей, греховную печаль потребляющая.
Радуйся, тихое прибежище всем кающимся грешником.
Радуйся, прилози срамныя попаляющая Духом,
Радуйся, труждающихся Тебе ради упокояющая.
Радуйся, восхваляющих Тя чистотою венчающая,
Радуйся, девство Твое воспевающих от падения греховнаго ограждающая.
Радуйся, рождеством Твоим тление обезтленившая,
Радуйся, девством Твоим естество человеческое облагоухавшая.
Радуйся, преподобным веселие вечное,
Радуйся, целомудренных сладостное вселение в Раи.
Радуйся, Дево Всепречистая, целомудрия сладкий источниче!

Кондак 9
Всякия похвалы Тебе, Всенепорочная Мати, хощу на всяк час приносити: не возгнушайся мене, всякаго гнушения достойнаго, но очисти мя от скверны сладострастия и блуднаго рачения, имиже веси судьбами, и удостой мя быти певцем совершенств Твоих, яко да не погибну, но да спасуся Тобою, Мати Всеблагая, непрестанно хваля Бога: Аллилуиа!

Икос 9
Ветии лукавыя века сего мир прельстиша в работу похоти плотския, свободу всем обещавающе: не могут бо разумети высоту неудобовосходимую девства Твоего, Дево Пренепорочная: темже и вся скверная умом своим творяще, душу мою на грех прельстиша. Ты же, яко Неблазная, огради молящагося Тебе от всепоядающаго пламене соблазн мирских, к нетлению приводящи всех поющих Ти:
Радуйся, корень греха от сердца моего исторгающая,
Радуйся, Еюже растлитель мира попран бысть.
Радуйся, Еяже трепещут темныя полки бесовския,
Радуйся, из глубины падения вопиющих к Тебе извлачающая.
Радуйся, притекающих к Тебе верою спасающая,
Радуйся, бури душевныя чтущих Тя укрощающая.
Радуйся, на смертнем одре любящих Тя утешающая,
Радуйся, по исходе смертнем души их благосердно сретающая.
Радуйся, Еюже благодать спасительную с небеси прияхом,
Радуйся, Еюже солнце умное томящимся во мраце возсия.
Радуйся, Еюже лютыя смерти избавихомся,
Радуйся, Еюже жизнь вечную получихом.
Радуйся, Дево Всепречистая, целомудрия сладкий источниче!

Кондак 10
Спасение души моея всегрешныя по Бозе Ты еси, Дево Пречистая: аще и в бездну сладострастия впадох, не имам отчаятися, имея таковую Заступницу: вем бо, яко любящим Тя скоро помогаеши и не оставляеши на Тя надеющихся посрамлены: темже очисти мя и приведи мя к Сыну Твоему и Богу, да светлою душею воспою Ему победную песнь: Аллилуиа!

Икос 10
Стена еси кающимся, Богородице Дево, и всем сердцем целомудрие стяжати хотящим, тихое Пристанище всем в мире сем страждущим и к Тебе прибегающим, ибо Ангелов еси Царица и Мати Божия воистинну. Темже и душу мою помилуй, Благая, благодатию Твоею, да спасуся и во вся веки пою Тебе песнь сию:
Радуйся, Столпе девства,
Радуйся, целомудрия Бездно.
Радуйся, Чистая Дево,
Радуйся, Невесто Неневестная.
Радуйся, Благодатная, Господь с Тобою,
Радуйся, Мати Творца моего и Бога.
Радуйся, всех радостей Радосте,
Радуйся, Купино неопалимая.
Радуйся, паче солнца светлейшая,
Радуйся, Раю словесный.
Радуйся, Древо животное,
Радуйся, Двере непроходимая.
Радуйся, Дево Всепречистая, целомудрия сладкий источниче!

Кондак 11
Пение всякое не довлеет воспети добродетелей Твоих совершенство, о Мати Слова Божия. Киими усты нечистый аз дерзаю, ум имея связан сластьми и похотьми, славу Твою воспевати? Обаче любовию к Тебе уязвлен, со страхом и трепетом прославляю Твою благость и не хощу до века умолчати от пения сего: Аллилуиа!

Икос 11
Свет целомудрия возсияй ми, Дево Пресветлая, во мраце зол погруженному, и утверди мя на камени смиренномудрия, и научи мя мужественно восставати на вся похоти земныя всегда, прилоги же духов злобы омерзением отражати; даруй ми терпение, да злостраданием очищуся и умиленно воспою Тя:
Радуйся, Дево, истерзанныя души моея утешение,
Радуйся, последняя Надеждо во глубине зол углебшему.
Радуйся, в скорбех моих светлая радосте,
Радуйся, Еяже ради всякия муки готов есмь претерпети.
Радуйся, сило моя непобедимая,
Радуйся, страждущия души моея Приятелище благое.
Радуйся, Еяже ради и в напастех веселюся,
Радуйся, Избавительнице моя от вечных мук.
Радуйся, несказанную милость Твою на мне удивившая,
Радуйся, раба неключимаго Сыну Твоему послужити удостоившая.
Радуйся, от сетей мира развращеннаго свободившая душу мою,
Радуйся, плачущих о гресех своих Утешительнице отраднейшая.
Радуйся, Дево Всепречистая, целомудрия сладкий источниче!

Кондак 12
Благодать целомудрия испроси дароватися несомненною верою Тебе припадающему, и благоговением, и страхом Божиим исполни мя, Дево Богоблагодатная и Пречистая, да всегда Богови предстоя и молитвенно Тебе служа, никогдаже воззрю вспять, но задняя забывая, в небесная же простираяся, улучу вечное спасение, поя: Аллилуиа!

Икос 12
Воспеваю Тя, Богородице Дево, и воистинну Агнице нескверная, Агнца искупльшаго нас Рождшая: не презри мене, со страхом молящагося Тебе и помози ми, многажды грехми своими Сына Твоего распинавшаго, плод покаяния Тому принести, и даже до кончины дней моих Тебе предстояти и умильно взывати:
Радуйся, Стамно всезлатая Невместимаго вместившая,
Радуйся, подвизающихся спасения ради укрепляющая.
Радуйся, мудрость духовную молящимся Тебе подающая,
Радуйся, благочестно служащим Ти вся потребная дарующая.
Радуйся, неутолимую жажду добродетелей в нас влагающая,
Радуйся, ревность по Бозе в сердцах наших распаляющая.
Радуйся, приводящая души наша от земли на небо,
Радуйся, Еюже от всякаго греха и зла избавляемся.
Радуйся, Дево, славословящих Тя добродетельми украшающая,
Радуйся, душы наша от терний страстей очищающая.
Радуйся, Мати, чад Твоих никогдаже оставляющая,
Радуйся, Отроковице, Еюже всяких врагов побеждаем.
Радуйся, Дево Всепречистая, целомудрия сладкий источниче!

Кондак 13
О, Всепетая Дево, христианом Помощнице, добродетелей всепречистое Сокровище, нынешнее приемши молитвенное стенание мое, изведи из темницы страстей душу мою и милосердно озари ю чистыми лучами целомудрия, яко да Тобою избавлюся будущих мук, вопия: Аллилуиа, аллилуиа, аллилуиа!

(Сей кондак глаголется трижды, затем Икос 1 и Кондак 1.)

Молитва
Нескверная, Неблазная, Пречистая, Пресвятая Дево! Приими покаянное пение сие, от скверных устен Тебе, Пренепорочней, возносимое, и не возгнушайся нечистоты сердца моего, на Тя бо надеюся: очисти и освяти е, да никогдаже скверными помыслы обладаемо будет. Ныне сокрушенным же и смиренным сердцем молю Тя, Всеблагая Мати: даруй ми зрети всегда нищету мою, научи мя никогдаже возноситися, сподоби мя отрещися у подножия Креста Сына Твоего всех порочных пристрастий к миру и ко мне самому. Виждь како мучит мя блудный бес, на всяку нечистоту прельщая душу мою. Даруй ми убо твердость ума, истинную любовь ко Христу Иисусу, Богу моему и к Тебе, Мати Божия, научи мя гнушатися и ненавидети всякий грех, источи от очию моею слезы сокрушения, исправи развращенную волю мою, исторгни жало смерти от глубины души моея, и воскреси ю прежде онаго ужаснаго дне, егда вторая смерть поглотит всех непокаявшихся истинно. Буди и мне, грешному, якоже древле Египтяныни Марии, наставница покаяния, научи мя трезвению, сокрушению, любви к ближнему, неосуждению, кротости, безмолвию, послушанию, насади в сердце моем всегдашнее благоговение и Богови предстояние, даруй ми непрестанную память вечности блаженства и мук, и возведи ум мой к светлому чертогу Царя Христа, да не ктому земная помышляти буду, но да веселюся токмо о Бозе Спасе моем, всем сердцем взывая Тебе, Матери Его: Радуйся, Дево Всепречистая, избавляющая душу мою от вечных мук. Аминь.[/spoiler]

[Раб божий Константин]

АКАФИСТ ПОКАЯНИЯ или песни, приводящия человека к сознанию своей греховности.
[spoiler]Кондак 1
     Аз есмь пучина греха и блато всякия нечистоты, аз есмь хранилище всех злых и безместных деяний: увы мне, увы мне, Боже мой, увы мне, Творче и Создателю мой, увы мне, Свете души моея! Что возглаголю Ти, удаливший себе от лица Твоего, или что реку Ти, отвергший себе от очию света Твоего? Преступих бо заповедь Твою, якоже и Адам исперва, и николиже принесох Ти жертвы покаяния; ныне же, познав падение свое, из глубины души моея в покаянии зову Ти, Милостиве:
     Помилуй мя, Господи Боже мой, и к покаянию призови мя, падшаго.


Икос 1
     Бог мой еси Ты, Творец и Создатель мой, Хранитель живота моего и Заступник мой; аз же есмь создание Твое и дело руку Твоею. Но увы мне! Прародительный грех царствует во мне, и злая воля моя господствует надо мною, и аз, яко раб, выну работаю греху и тем прогневляю Тебе, Владыку и Бога моего; но, припадая Твоей благости, смиренно молю Тя, Щедре:
     Помилуй мя, Творче мой преславный;
     Помилуй мя, Создателю мой предивный.
     Помилуй мя, Боже мой Предвечный;
     Помилуй мя, Господи мой пребезсмертный.
     Помилуй мя, Владыко мой премилостивый;
     Помилуй мя, Царю мой прекрепкий.
     Помилуй мя, воззвавый мя от небытия в бытие;
     Помилуй мя, вдохнувый в тело мое дух безсмертия.
     Помилуй мя, почтый мя Своим образом и подобием;
     Помилуй мя, вознесый мя превыше всех видимых.
     Помилуй мя, даруяй мне ведение познавати Тя и любити Тя;
     Помилуй мя, животворяй мя Своею благодатию.
     Помилуй мя, Господи Боже мой, и к покаянию призови мя, падшаго.


Кондак 2
     Владыко мой и Господи, како приступлю к Тебе аз, погруженный грехми многими, коима очима воззрю на Тя, пресветлаго Творца моего, кое принесу Ти покаяние? Аще бо восплачуся, оскверню токмо землю слезами моими, аще воздохну, яко мытарь, непщую отягчити1 небеса. Обаче же покаянием очисти мя от всякия скверны и душу мою уясни светом милостиваго лица Твоего, да радостно зову Ти: Аллилуиа.


Икос 2
     Глаголы уст Твоих выну презревах, во след бо писаний Твоих николиже ходих, но со тщанием соблюдах волю диаволю, и в след злыя похоти моея усердно ходих; ныне же, горце познавый падение свое, со слезами ищу Тебе, незаходимаго Света моего, в покаянии зовя:
     Помилуй мя, в беззакониих зачатаго;
     Помилуй мя, во гресех рожденнаго.
     Помилуй мя, блудно жизнь иждившаго;
     Помилуй мя, не радившаго о спасении своем.
     Помилуй мя, не тщащагося благоугождати Тебе;
     Помилуй мя, творящаго выну волю свою, паче же диаволю.
     Помилуй мя, удалившагося от Тебе, присносущнаго Света моего;
     Помилуй мя, заблуждшаго в пустыни страстей моих.
     Помилуй мя, отчуждившагося Твоея благодати;
     Помилуй мя, предавшего душу свою во тьму греховную.
     Помилуй мя, преступника закона Твоего;
     Помилуй мя, нарушителя заповедей Твоих.
     Помилуй мя, Господи Боже мой, и к покаянию призови мя, падшаго.


Кондак 3
     Добро и праведно есть еже не удалитися от Тебе, Источника света, но тьма греховная, юже аз привлекох на себе злыми деянии моими, находит на мя, якоже нощь, и помрачающи душу мою, отводит мя от Тебе, Бога моего: но молю Тя, Создателю мой, блесни молниею и разжени мрак моих страстей, да во свете Твоем узрю свет, благодарственно поя: Аллилуиа.


Икос 3
     Естество закона преидох, окаянный, согреших бо аз грехми, ихже нелеть2 и глаголати; но Ты, Боже, яко Сердцеведец и провидяй вся, не объяви моя тайная пред Ангелы Твоими, ниже вверзи мене в дебрь огненную, но, пощадив, прости ми вся злая сия, мною содеянная, вопиющему Ти:
     Помилуй мя, оскверненнаго грехи многими;
     Помилуй мя, вселившагося во ад вместо рая.
     Помилуй мя, возлюбльшаго паче тму, неже свет;
     Помилуй мя, ввергшагося во огненную пещь страстей.
     Помилуй мя, оскорбившаго Тя неподобными глаголы;
     Помилуй мя, преслушавшаго Твоя повеления.
     Помилуй мя, осудившаго ближняго моего;
     Помилуй мя, оклеветавшего брата моего.
     Помилуй мя, не воздавшаго Тебе обетов моих;
     Помилуй мя, не сохраншаго заповедей духовнаго моего отца.
     Помилуй мя, призывавшаго имя Твое всуе;
     Помилуй мя, ничтоже благо пред Тобою сотворшаго.
     Помилуй мя, Господи Боже мой, и к покаянию призови мя, падшаго.


Кондак 4
     Жизнь сущи и Источник жизни, Живоначальная Троице, Нераздельное и Неслитное Божество, Отче, Сыне и Душе Святый, призри на мя, сотвореннаго по образу и по подобию Твоему, обнови мой разум, слово исправи и дух мой освяти, да во обновленнем трехчастном моем существе разумно пою: Аллилуиа.


Икос 4
     Земля есмь аз и в землю отыду, от неяже взят есмь, якоже Сам глаголал еси, Создателю мой преславный, но прежде неже найдет смерть на мя, прежде неже вниду во гроб, взирая на беззаконную жизнь мою, со слезами зову Ти, Творцу моему:
     Помилуй мя, помраченнаго страстьми;
     Помилуй мя, заблуждающаго в путех моих.
     Помилуй мя, побеждающагося скупостию;
     Помилуй мя, снедаемаго завистию.
     Помилуй мя, согрешившаго Ти объядением без сытости;
     Помилуй мя, прогневавшаго Тя опивством чрезмерным.
     Помилуй мя, не напитавшаго алчущаго;
     Помилуй мя, не напоившаго жаждущаго.
     Помилуй мя, не любящаго брата моего;
     Помилуй мя, не почитавшаго некогда родителей своих.
     Помилуй мя, согрешившаго Ти делом, словом и помышлением;
     Помилуй мя, прогневавшаго Тя вольными и невольными злыми деянии моими.
     Помилуй мя, Господи Боже мой, и к покаянию призови мя, падшаго.


Кондак 5
     Идеже Ты хощеши, Всемогущий Боже, побеждается естества чин: естество мое выну влечет мя ко греху и порабощает мя, но Ты, яко Создатель естества, угаси греховная стремления его, обновив е росою благодати Твоея, да невозбранно пою Тебе: Аллилуиа.


Икос 5
     Кто согреши когда, якоже согреших аз, окаянный? Коего греха не сотворих? Коего беззакония не содеях? Коего зла не вообразих в души моей? О люте мне, люте мне, что буду и где обрящуся аз? Но прежде онаго праведнаго воздаяния Твоего, смиренно молю Тя, Милостивый Боже, якоже отца блудный сын:
     Помилуй мя, окаяннаго;
     Помилуй мя, немилосерднаго.
     Помилуй мя, жестокаго;
     Помилуй мя, гневливаго.
     Помилуй мя, тщеславнаго;
     Помилуй мя, гордаго.
     Помилуй мя, сквернаго;
     Помилуй мя, блуднаго.
     Помилуй мя, коварнаго;
     Помилуй мя, памятозлобнаго.
     Помилуй мя, окамененнаго сердцем;
     Помилуй мя, сожженнаго совестию.
     Помилуй мя, Господи Боже мой, и к покаянию призови мя, падшаго.


Кондак 6
     Лучи благодати Твоея не скрый от мене, Творче и Создателю мой, но облистай мя ими, просвети милостивое лице Твое на мя, раба Твоего, и научи мя творити волю Твою, да во благих делех моих радостно пою Тебе, Небесному Отцу моему: Аллилуиа.


Икос 6
     Мрачная и безлунная нощь греховнаго моего жития содела во мне многая множества прегрешений, иже отчуждиша мя от Тебе, Присносущнаго Света моего, и приблизиша мя ко аду преисподнейшему, егоже жжение и мрак ужасают мя и ныне. Райская же жилища Твоя, уготованная праведным, и блаженство в них живущих исполняют душу мою скорбию, яко удален есмь от сей присносущныя жизни. Но доколе жив есмь и дух мой во мне, не лишен есмь светлыя сия надежды, пламенея бо к Тебе любовию, от сердца зову Ти:
     Помилуй мя, лениваго;
     Помилуй мя, неблагодарнаго.
     Помилуй мя, празднословца;
     Помилуй мя, сквернословца.
     Помилуй мя, смехотворца;
     Помилуй мя, сребролюбца.
     Помилуй мя, клятвопреступника;
     Помилуй мя, пияницу.
     Помилуй мя, прекословнаго;
     Помилуй мя, непокориваго.
     Помилуй мя, лживаго;
     Помилуй мя, льстиваго.
     Помилуй мя, Господи Боже мой, и к покаянию призови мя, падшаго.


Кондак 7
     На небо очи мои возвожу и духом весь предстою Ти, Отче Небесный, но естество брения влечет мя долу, и грехи мнози влекут душу в преисподнюю. Ты же, Творче и Создателю мой, яко Всемогущий и Милосердый, обнови мя, да воспаряю выну горе, якоже орел, победно взывая Ти песнь: Аллилуиа.


Икос 7
     Око имам выну лукаво, мерзости и всякия нечистоты преисполнено, Боже мой и Творче: смотрях выну неподобная, прелестною красотою мира сего восхищахся и вдаях душу мою во всяку нечистоту. На доброту же вещей мира сего, от них же поучался бых познавати и любити Тя, николиже очима моима взирах, ныне же, егда померкнуша душевнеи мои очи, в слепоте духовней сый, зову Тебе, Свету моему:
     Помилуй мя, покаянно Тебе взывающаго;
     Помилуй мя, сокрушенным сердцем к Тебе припадающаго.
     Помилуй мя, верою Тебе покланяющагося;
     Помилуй мя, любовию Тебе молящагося.
     Помилуй мя, приносящаго Ти, яко слезы, глаголы моя;
     Помилуй мя и не отвержи мене от лица Твоего.
     Помилуй мя и подаждь ми источник слез, да плачуся дел моих горько;
     Помилуй мя и изведи душу мою из темницы страстей.
     Помилуй мя и дух прав обнови во утробе моей;
     Помилуй мя и возстави во мне образ Твой.
     Помилуй мя, Свете мой, и просвети душевнеи мои очи;
     Помилуй мя и сотвори мя храмом Твоего обитания.
     Помилуй мя, Господи Боже мой, и к покаянию призови мя, падшаго.


Кондак 8
     Пламень любве моея к Тебе, Создателю мой, не до конца еще угасе во мне, но дух мой выну пламенеет к Тебе, Первообразу моему: слезы умиления и радости о Тебе не изсохша еще во мне до конца, но, яко облако дождевное в засуху инде находят на мя и орошают мя; лукавство же, гнездящееся во мне, и суетность мира сего, окружающая мя, поглощают сия:; обаче же, аще колиждо найдет на мя минута благодати, выну воспеваю Тебе, Источниче живота моего: Аллилуиа.


Икос 8
     Разумом моим николиже достойная разумех, Разуме неуразуменный, выну же заблуждах в беспутиих жизни моея и предавах себе в руце разбойников, иже обнажиша мя одежды нетления, юже дал ми еси при крещении моем, и ныне предстою Ти нагий и отпадший дружбы Твоея; обаче же, дерзая, покаянно Тебе взываю:
     Помилуй мя и исправи путь мой пред Тобою;
     Помилуй мя и не вниди в суд с рабом Твоим.
     Помилуй мя и не презри мя, обнищавшаго благими делы;
     Помилуй мя и не воздаждь ми по делом моим в День Судный.
     Помилуй мя и очисти мя от всякаго действа диавола;
     Помилуй мя и остави ми множество грехов моих.
     Помилуй мя и свободи мя мучительства царствующих во мне страстей;
     Помилуй мя и настави мя на путь покаяния.
     Помилуй мя и подаждь ми разум творити волю Твою;
     Помилуй мя и взыщи мя, заблуждшее Твое овча.
     Помилуй мя и сопричти мя овцам избраннаго Твоего стада;
     Помилуй мя, Господи Боже мой, и к покаянию призови мя, падшаго.


Кондак 9
     Слово не довлеет ми, пречудный Царю и Господи, подаждь ми слезы покаяния и по сих слезы умиления, яко да ими омыю скверну души моея, юже аз оскверних злыми и безместными деянии моими, да в чистоте души моея радостно пою Тебе, Богу моему: Аллилуиа.


Икос 9
     Тело мое питаю пространно, дух же мой истаявает гладом, о Господи мой, Господи! Даждь ми разумети мое беззаконие, даждь ми тщание насыщати дух мой благими делы, даждь ми поне отныне положити начало своего спасения, зовущему Ти во гладе своего духа:
     Помилуй мя, Мудросте недомыслимая;
     Помилуй мя, Божество неописанное.
     Помилуй мя, Сило непобедимая;
     Помилуй мя, Славо превознесенная.
     Помилуй мя, Красото пресветлая;
     Помилуй мя, Совершенство неизследимое.
     Помилуй мя, Высото недостижимая;
     Помилуй мя, Милосте безконечная.
     Помилуй мя, всемогущий Властителю;
     Помилуй мя, небесных чинов державный Повелителю.
     Помилуй мя, Трисолнечный и Трисиянный Свете;
     Помилуй мя, Отче, Сыне и Душе Святый.
     Помилуй мя, Господи Боже мой, и к покаянию призови мя, падшаго.


Кондак 10
     Утроба моя распаляется к Тебе любовию, Творче небесе и земли, и дух мой возносится к Тебе в превыспренняя, но увы мне, увы! О окаянства моего и несовершенства! Вся сия погубляю во едином часе, преступив заповеди Твоя; обаче, аще и ратую греху, но пою Тебе: Аллилуиа.


Икос 10
     Хищением и неправдою богат есмь аз, коварством и студодеянием порабощен, лжа и лесть не оскудеша от мене, завистию снедаюся и скупостию побеждаюся, и всем беззаконием, яко раб, усердно служу. Но Ты, Милостивый Создателю мой, отжени вся злая сия от мене, с любовию и трепетом в покаянии Тебе зовущаго:
     Помилуй мя, веселие мое и радование;
     Помилуй мя, надеждо моя преславная.
     Помилуй мя, сокровище мое нетленное;
     Помилуй мя, богатство мое неистощимое.
     Помилуй мя, просвещение ума моего и сердца;
     Помилуй мя, здравие души моея и телесе.
     Помилуй мя, Наставниче мой предобрый;
     Помилуй мя, Хранителю мой преблагий.
     Помилуй мя, истинное радование плачущих;
     Помилуй мя, прибежище наше и упование.
     Помилуй мя, изглаждаяй неподобная наша деяния;
     Помилуй мя, ограждаяй нас святыми Твоими Ангелы.
     Помилуй мя, Господи Боже мой, и к покаянию призови мя, падшаго.


Кондак 11
     Целомудрие нарушив аз, окаянный, от начала дней юности моей, оттоле есмь смиренный раб сего греха. Кий вид его не сотворих, коего от сих беззаконий не содеях? Всякое чувство души моея и всякий уд телесе моего оскверних, растлих и непотребен сотворих; но молю Тя, незлобиве Господи, избави мя блудных страстей плоти моея, зовущаго Ти: Аллилуиа.


Икос 11
     Чистоты душевныя не стяжах и душу мою во тму греховную предах: о люте мне, люте мне! Разбойник есмь аз души моея, израних бо ю до конца, и несть места цела в ней; совлекох ю одежды Боготканныя и облекох ю в ризу раздранную и оскверненную от окаянства моего! Что возглаголю Ти, Отче Щедрый, или что реку Ти во оправдание мое, Судие Праведнейший? Обаче же, яко навыкох, прошу у Тебе помилования, горце зовущи:
     Помилуй мя, пламенногорящая Любы;
     Помилуй мя, выну светящая Премудросте.
     Помилуй мя, Сокровище благих;
     Помилуй мя, жизни Подателю.
     Помилуй мя, везде Сый и вся исполняяй;
     Помилуй мя, творяй дивная чудеса.
     Помилуй мя, предведый не сущая яко сущая;
     Помилуй мя, не оставляяй нас посреде греха и смерти.
     Помилуй мя, оживляяй мертвыя духом;
     Помилуй мя, очищаяй оскверненныя совестию.
     Помилуй мя, призираяй на воздыхания наша к Тебе;
     Помилуй мя, полагаяй милость Свою на всех делех руку Твоею.
     Помилуй мя, Господи Боже мой, и к покаянию призови мя, падшаго.


Кондак 12
     Широтою благодати Твоея, Триипостасный Боже, покрый моя согрешения, якоже покрыл еси древле согрешения богоотца Давида, и приими мое покаяние, якоже приял еси покаяние Манассии царя, и призови мя, заблуждающаго в путех своих, якоже призвал еси гонителя Павла, и даждь ми с любовию выну воспевати Тебе: Аллилуиа.


Икос 12
     Юность моя пройде в неразумии и начало живота моего в лености к добродетели. Не насадих бо тогда в сердце моем семена хлеба духовнаго, питающаго в жизнь вечную, Боже мой и Господи, семена же терния и репия прилежно в себе посевах. Ныне же, егда прозябоша во мне вся злая сия, пронзают душу мою и ураняют сердце мое, и все естество мое исполняют болезнию. Умилосердися, о Боже мой, и попали огнем Божества Твоего вся греховная терния во мне, взывающем Ти болезненно:
     Помилуй мя, Отче Безначальне, Сыне Предвечне и Душе Присносущне;
     Помилуй мя, Троице Единосущная и Нераздельная.
     Помилуй мя, Триипостасная Державо;
     Помилуй мя, Нераздельное и Неслитное Божество.
     Помилуй мя, едино Царство и Господство;
     Помилуй мя, едина воля и хотение.
     Помилуй мя, Егоже боятся и трясутся Херувими;
     Помилуй мя, пред Нимже закрывают лица своя страшнии Серафими.
     Помилуй мя, Егоже боится солнце и трепещет луна;
     Помилуй мя, пред Нимже дымятся горы и бегут вспять реки.
     Помилуй мя, пред Ним же всяко колено небесных, земных и преисподних преклоняется
     Помилуй мя, Егоже вся тварь на небеси и на земли выну славословит.
     Помилуй мя, Господи Боже мой, и к покаянию призови мя, падшаго.


Кондак 13
     Яко Творец Всемогущий и Владыко незлобивый, не помяни моих беззаконий, имиже Тебе прогневах, делом, словом и помышлением, ведением и неведением, вся мне, яко Бог Милостив, прости и разреши от них, излей на мя, яко капли дождевныя, благодать Твою, да поне от ныне начну благоугождати Тебе, Создателю моему, выну воспевая: Аллилуиа, Аллилуиа, Аллилуиа.

Этот кондак читается трижды, затем икос 1 и кондак 1

Молитва ко Пресвятей Троице
     К Тебе, Владыко Многомилостиве, Триипостасный Боже, возвожу очи ума моего и сердца и, припадая Твоей благости, смиренно исповедую грехи моя, яже сотворих во вся дни живота моего. Согреших бо, Господи, согреших аз, окаянный, преступих спасительныя заповеди Твоя, яже даровал ми еси, во еже ими восходити к Тебе, якоже некиим незаблудным путем. Аз же, окаянный, вместо еже шествовати путем сим, путем Божественныя Твоея правды и истины, удалихся в распутия и устранихся с истиннаго пути, и тамо самовольне вдахся в руце мысленных разбойников, страстей души моея, иже совлекоша мя одежды нетления, ураниша всего мя ранами, уязвиша душу мою язвами и всего мя оскверниша, и ныне, якоже зриши, предстою Ти наг, уязвлен, осквернен, и того ради отпадый любве Твоея.
     Господи мой, Господи, что возглаголю Ти, или что реку Ти; несть ни единаго мне оправдания, ниже извинения: еда не познах закона Твоего, еда не ведех заповедей Твоих? Вся сия разумех от юности моея, но небрежения моего ради, уныния и нерадения, ничтоже благо пред Тобою сотворих, выну же содевах лукавое и злое, выну плоти моея и злым вожделением моим, яко раб, работах прилежно, но Тебе, Создателю моему, николиже ничимже достойно послужих.
     Ныне же, приступая к Тебе, щедродательному Отцу, яко блудный сын, вопию Ти: согреших, Отче, на небо и пред Тобою и уже несмь достоин нарещися сын Твой. Вем же, яко приял еси блуднаго сына, тако приимеши и мене, он бо бе образ мне, и сей блудный сын есмь аз сам. Кто бо когда удалихся от Тебе тако далече, якоже удалихся аз, или кто сотворих толико беззаконий, якоже сотворих аз? Но молю Тя, Милосерде, не вниди в суд с рабом Твоим и не помяни моих беззаконий, ниже да соблюдеши злая дела моя на день праведнаго Твоего воздаяния, егда воздаси комуждо по делом его; но отныне да покрыет мя рука Твоя, да буду Тебе единому благоугождати, Тебе единому служите, Твоего страха страшитися, Твоя повеления исполняти, Твоя заповеди соблюдати и в законе Твоем поучатися непрестанно, день и нощь. Даждь ми, всемогущий Владыко, отчуждатися от зол мира сего; даждь ми ненавидети вся злая в мире сем, отчуждающая мя от Тебе, присносущного живота моего, дыхания и радования моего; даждь ми Тебе единаго любити, даждь ми к Тебе единому, пламенногорящей Любве, пламенети выну любовию и возноситися непрестанно к Тебе духом. Ты бо еси моя жизнь и радование, и веселие, Ты Источник света, светящаго во мне, ныне же грехов моих ради угасающаго во мне до конца. О Свете незаходимый, вящше уясни Твоею благодатию сей свет во мне, да при свете Твоем узрю путь истинный, имже и достигну вожделеннаго ми небеснаго отечества, идеже и буду выну прославляти всесвятое и преблагословенное имя Твое, Отца и Сына и Святаго Духа. Аминь.


Иная молитва ко Пресвятей Троице
     Пресвятая Троице, Единосущная Державо, всех благих Вино, что воздадим Тебе за вся, яже воздала еси нам, грешным и недостойным, прежде, неже на свет произыдохом, за вся, яже воздаеши коемуждо от нас по вся дни и яже уготовала еси всем нам в веце грядущем? Подобаше бо за толикия благодеяния и щедроты благодарити Тя не словесы точию, но паче делы, храняще и исполняюще заповеди Твоя: мы же, страстем нашим и злым обычаем внемше, в безчисленныя от юности низвергохомся грехи и беззакония. Сего ради, яко нечистии и оскверненнии, не точию пред трисветлое Лице Твое безстудно явитися, но ниже имене Твоего Пресвятаго изрещи довольни быхом, аще бы не Ты Сама благоизволи, во отраду нашу, возвестити, яко чистыя и праведныя любиши, грешники кающиися милуеши и благоутробне приемлеши. Призри убо, о Пребожественная Троице, с высоты святыя славы Твоея на нас, многогрешных, и благое произволение наше, вместо благих дел, приими, и подаждь нам духа истиннаго покаяния, да возненавидевше всякий грех, в чистоте и правде, до конца дней наших поживем, творяще пресвятую волю Твою и славяще чистыми помыслы и благими деяньми сладчайшее и великолепое имя Твое. Аминь.
     Прим.
1 боюсь отягчить.
2 нельзя, невозможно.[/spoiler]

[Раб божий Константин]

Акафист покаянный, составлен на основании Великого канона Андрея Критского.
[spoiler]Кондак 1
Взбранной Воеводо и Господи, радосте кающихся рабов Твоих, к Тебе аз, грешный, прибегаю. Приими мя, Отче, каюшагося, не отрини слез моих и воздыханий сердечных и не презри во умилении Тебе зовущаго:
Милостиве, помилуй мя, падшаго.

Икос 1
Адаму первозданному поревновав аз в преступлении, наруших заповеди Бога моего, душу бо и тело оскверних деяньями лютыми. И с чего начну оплакивать свое скверное житие? Какое же положу начало нынешнему рыданию? Но прииди, окаянная моя душе, с плотию своею, исповедайся Создатедю всех и возопий Ему со слезами:
Милостиве, воззри на мя оком твoим благоутробным и приими мое теплoe пoкаяниe.
Милостиве, согреших аз паче всех человек, един аз согреших пред Тобою, но Ты яко Бог помилуй создание Твое.
Милостиве, яко блудница, проливаю и я слезы, помилуй мя по благоснисхождению Твоему.
Милостиве, осквернив аз ризу плоти моея и очерних в себе созданное по образу Твоему и подобию.
Милостиве, помрачих аз душу свою страстными удовольствиями и весь ум соделах прахом.
Милостиве, наг аз лежу от добродетелей и стыждуся.
Милостиве, помилуй мя, падшаго.

Кондак 2
Виждь, душе моя, яко конец приближается близ при дверех Судия есть. Пробудись, размысли о делах своих, яже ты содеяла еси, представь их пред очи твои и пролей капли слез твоих; поведай со дерзновением дела и помышления твоя Христу и во умилении сердца возопий Ему: Аллилуиа.

Икос 2
Разумех аз, Спасителю мой, яко несть в жизни ни греха, ни деяния, ни зла, в коим аз не согреших бы умом, словом и произволеним более всех человек. Совесть обличает мя, совесть осуждает мя в злых делах моих. Но Судие, Избавителю мой и Ведче, пощади, избави и спаси мя, раба Твоего, Тебе вопиющаго:
Милостиве, согреших, согреших, продав душу свою греховным навыкам, якоже братья Иосифа.
Милостиве, яко Каин, и аз принесох Ти жертву порочную: деяния скверная и житие непотребное, темже и осудихся.
Милостиве, от юности заповеди Твоя преступих, унынно житие преидох, спаси мя милостию Твоею.
Милостиве, яко блудный сын, расточих и аз богатство свое в блуде и гладом душевным истаяваю темже и вопию Ти: Щедрый, напитай мою душу благодатию Твоею.
Милостиве, весь аз уязвихся помышленьями моими, весь исполнихся ран, яко впадший в разбойники, но Ты пришед исцели мя.
Милостиве, внемли стенаниям души моея, приими слезы очей моих и очисти мя, кающагося.
Милостиве, помилуй мя, падшаго.

Кондак 3
Силою Твоею, Спасе, изгнан бысть достойно Адам из Едема, яко не сохранивый едину Твою заповедь; и сей сидяше прямо рая и свою наготу горько рыдая, вопияше: Увы, мне, раю, раю мой прекрасный! Аз же что постражду, Господь мой и Боже, отметая всегда живoтвoрныя Твоя словеса? Но даждь ми время, да плачуся дел моих горько, и Тебе воспою: Аллилуиа.

Икос З
Имеяй во уме множество содеянных мною лютых, трепещу окаянный. И что убо сотворю, егда приидет Господь со тьмами Ангел судити вселенней? Увы мне, увы! Боже отцев, прежде даже не затворит ми дверь Твоего милосердия, к Тебе прибегаю, Щедре, и вкупе с Давидом вопию:
Милостиве, во гресех рожден аз и приложих к язвам своим иные раны, но помилуй мя, отцев Боже.
Милостиве, яко Давид, согреших Тебе и аз: ураних бо душу свою стрелою прелюбодейства, но, якоже и он, вопию Ти: помилуй мя по милости Твоей.
Милостиве, возбуди ум мой ко обращению, приими мя, кающагося, умилосердися к взывающему: согреших Ти, спаси.
Милостиве, ни странника, ни путника, не ввел аз под кров свой, отринув благое произволение Сонамитянки, темже и рыдаю: не лиши мя Твоего чертога.
Милостиве, сребролюбием одержим есмь аз, темже яко Гиезия и осуждаюсь.
Милостиве, произволением бых убийца совести душевней, вооружась на ню лукавыми моими деяньми.
Милостиве, помилуй мя, падшаго.

Кондак 4
Буря грехов обыде мя, и кто прострет ми руку помощи, аще не Ты, возсиявый от Девы Иисусе. Спаси мя, вопию Ти, спаси, яко спасл еси Петра утопавшаго; да не потопит мене буря страстей. Приведи мя к пристанищу безмятежному, да с любовию воспою Ти: Аллилуиа.

Икос 4
Слыша, яко одождив иногда Господь огнь, попали землю Содомскую, увы! Вопию. Душе, возстани! Да не опалит тебя огнь геенский. Бежи от запаления, бежи от Божественнаго пламени, на горе спасайся, якоже Лот, взывая к Богу:
Милостиве, аще и согрeших, но вем, яко Человеколюбец еси, наказуеши милостивно и милосердствуеши тепле и поспешаеши, яко отец, призывая блуднаго.
Милостиве, ризу скверную сотка ми грех во обличение моих самовольных страстей, обнажив мя первыя боготканныя одежды.
Милостиве, прилепихся аз к вещам земным и тяжким бременем обложен есмь.
Милостиве, украсих аз кумир плоти моея одеянием скверных помыслов, презрев внутреннюю богообразную скинию.
Милостиве, погребох страстьми первого образа красоту, юже, яко некогда драхму, взыскав, обрящи.
Милостиве, согреших, взываю Ти, яко блудница: един аз согреших пред Тобою, но приими яко оныя и моя слезы.
Милостиве, помилуй мя, падшаго.

Кондак 5
Боготочную кровь Ты, Спасе, излих еси на кресте, да омыеши мя; дух предах еси, да мя приведеши Твоему Родителю; Едем затворенный отверзеся, вся тварь и вси языцы, спасени поклоняются Тебе и воспевают присно: Аллилуиа.

Икос 5
Видите, видите, яко Аз есмь Бог: внемли, душе моя, Господа вопиюща, удались прежняго греха и убойся Господи, яко праведнаго Судию и Бога. Обратися, покайся, открый сокровенныя, припади к Нему, яко блудный сын, со слезами и, бия в перси, глаголи Богу вся ведущему: Милостиво, изранен и изъязвлен аз: се стрела врага npoнзоша душу и тело, темже и прибегох к Тебе со слезами.
Милостиве, яко мытарь, вопию Ти: очисти, очисти мя, никтоже бо сущих из Адама, якоже аз согреших Тебе.
Милостиве, сними тяжкое бремя грехов моих и оставь ми прегрешения.
Милостиве, вольная моя и невольная согрешения, явныя и тайныя, ведомыя и неведомыя простив, спаси мя.
Милостиве, буря страстей потопляет мя, и несть ми спасения, но простри и мене Твою руку, яко Петрови.
Милостиве, не затвори двери милосердия Твоего в день судный, но отверзи я, кающемуся тебе горьце.
Милостиве, помилуй мя, падшаго.

Кондак 6
Пустынелюбная горлица, глас вопиющаго, Xpистов светильник Предтеча всем вoзгласих людем: покайтеся и предочиститеся: и Иудея вся и Самария, слышавше, течаху и исповдаху грехи своя. Тецы убо и ты, душе моя, к источнику жизни, да не увязнеши в беззаконныя сети, облобызай убо покаяние и воспой Христу: Аллилуиа.

Икос 6
Вонми небо, и возглаголю: земле внушай глас, кающийся к Богу. Кто бо от человек corpeши тако, якоже аз: ум изранен, болезнует тело, немоществует дух, умножашася струпы. Врачу Благодатный, прежде даже до конца не погибну, спаси мя, тако Тебе вопиющаго:
Милостиве, Ты Бог, испытуяй сердца, истязуяй намерения и изобличаяй дела, попали терние грехов моих и яви мя чиста пред Собою.
Милостиве, Ты еси Пастырь добрый, взыщи мене, яко овцу, в тернии грехов погибающаго.
Милостиве, Ты еси мой Создатель, Тобою, Спасе, оправдаюсь.
Милостиве, Ты еси жизни источник, источи душе моея жизнь, оживотвори ю, дондеже не постиже мя кончина.
Милостиве, подобник бых иже при Ное грехи сотвориша, темже, якоже оныя, погружаюся в водах потопа.
Милостиве, не прикрых аз ближняго срамоты, совесть осквернив наглым языковещанием, уподобихся сим Хаму отцеубийце.
Милостиве, помилуй мя, падшаго.

Кондак 7
Хотяй всем спастися и в разум истины приити, Ты, Сыне Божий, снизшел еси на землю, вочеловечися и, призвав к покаянию разбойники и блудницы, отверзе двери Царствия всем кающимся, покаяния отверзи и мне двери, Жизнодавче, к Teбe бо утреннюю и Тебе вопию: Аллилуиа.

Икос 7
Дивное покаяние Богу принесоша Ниневитяне, егда Иона пророк возгласих им о погибели их, сии бо облекошася во вретища и пеплом главы своя посыпоша и плач велий сотвориша, глаголюще: Да отвратит Господь гнев Свой праведный. Восплачь убо и ты, душе моя, возстени к Богу, яко Ниневитяне, и тако глаголи:
Милостиве, Измаил изгнан бых яко порождение рабыни, да не постигнет мя сие за любострастие.
Милостиве, волею раболепствовах аз греху и якоже Агарь породих нового Измаила - дерзость.
Милостиве, не отрини моления воспевающих Тя и просящим с верою прощение даруй.
Милостиве, помилуй, вопию Ти, помилуй, егда приидеши со Ангелами воздати комуждо по достоянию деяний.
Милостиве, не презри создания Своего, аще и согреших паче всех человек. Ты — Господь вселенныя, аз же персть, и в Твоей власти отпустити грехи мои.
Милостиве, аще и осквернив душу и тело, но Ты, Спасителю мой, очисти, омой, соделай мя белее снега.
Милостиве, помилуй мя, падшаго.

Кондак 8
Странна себя сотвори пред Тобою, Иисусе, предпочел бо кладези хананейских помыслов паче камене Твоего с источником премудрости и свиная мяса паче пищи небесныя. Темже, яко блудный сын, гладом истаяваю, не разумея пети: Аллилуиа.

Икос 8
Весь аз уязвихся помышленьми моими и исполнихся ран, яко впадший в разбойники и, видя мя, священник мимоиде и левит такожде, узрев лежаща в беде, презре. Но Ты Сам, Христе, возлей на мя масло и вино, тако Тебе вопиющаго:
Милостиве, да Будет ми купелью очищения Кровь Твоя, и вода, истекшая из ребр Твоих, питием отрады, животвори мя собою.
Милостиве, яко фарисей, горжуся и, якоже он, дерзость пред тобой сотворяю, но убей во мне грех и сердце смиренно ми даруй.
Милостиве, вем яко согреших пред Тобой, но каюся аз — приими мя, сознаюся — возстави, да не буду стяжанием и снедию врага, Сам умилосердися надо мною.
Милостиве, не слушах аз гласа Твоего, ни писанию Твоему покоряхся, темже и наг предстою пред Тобою.
Милостиве, нощь греха бысть ми тьмою и глубоким мраком, но ты, Спасителю, сыном дня мя соделай.
Милостиве, увы мне, яко ум оскверних нечистотою, но молю благость Твою, омый мя в купели слез моих и, яко снег, убели одежду плоти моея.
Милостиве, помилуй мя, падшаго.

Кондак 9
Ветхаго Завета вся привожду ти, душе моя, к подобию: подражай праведных боголюбивая деяния избегни же паки лукавых грехов, да пощадит тя Христос в день судный и да сподобишиси воспети Ему со всеми святыми: Аллилуиа.

Икос 9
Витии многовещанныя недоумевают, киими словесы пробуждати мя к покаянию: ожесточе бо сердце во мне и не имам аз ниже слез, ниже плача.
Милостиве, Щедре, коснися сердца моего благостию Своею и Духом Владычным утверди мя, тучу слез пошли ми, рабу Твоему, Тебе молящемуся:
Милостиве, яко кровоточивая прибегох к Тебе, касаяся воскрилий риз Твоих, глаголи и мене, якоже оной: Вера твоя спасе тя. Мнлостиве, источи ми струи живительныя из пречистых жил Твоих, напой мя, яко Самарянку, да не вжаждуся вовек.
Милостиве, да будут Силоамом слезы мои мене, да омою ими зеницы души моея и умом узрю свет Твой присносущный.
Милостиве, приношу Тебе слезы очей моих и глубокие вздохи, сердце вопиет во мне: Боже, согреших пред Тобою; умилосердися, прости.
Милостиве, яко Дафан и Авирон, удалилася Тебя душа моя, темже и зову Ти: пощади, да не поглотит мя земля, якоже оных.
Милостиве, волны грехов моих покрыли мя, якоже всадники Египетския Чермное море, но воззови мя из ада преисподняго и избавь от тления живот мой.
Милостиве, помилуй мя, падшаго.

Кондак 10
Спастися хотяй Божественнаго пламени, бежа Лот из Содома, якоже повеле ему Господь. Душе моя, аще н ты хощеши спастися, праведному подражай, бежи от пламени греха, бежи от пожара, вожделением безумным возженнаго, не буди столп сланый, возвратившися вспять. Образ да устрашит тя содомский, Богу воспой: Аллилуиа.

Икос 10
Царю Святый, время жития моего мало и исполнено болезней и лукавства, но в покаянии мя приими и в разум призови, да не буду стяжанием, ни брашно чуждему, Сам умилосердися над вопиющим:
Милостиве, Ты пристанище необуреваемое ускори и изъми мя из глубины греха, да не отчаяния поглотит мя огнь.
Милостиве, аз есмь драхма погибшая, взыщи мя, возжи Свой свет и обрящи Свой образ.
Милостиве, Давид убо сугубо согреши, обаче плакася горько, аз же паче сего зло содеях, плоды не принесох Ти покаяния.
Милостиве, Соломон, иногда премудрый, возлюби распутных жен, от Бога отступи, сему же аз подражах в мыслях постыдным сладострастием.
Милостиве, увы мне! В мерзостях сравнихся с Ахаавом, душу бо содеяв свою виталищем плотских нечистот и сосудом гнусных страстей.
Милостиве, очернися вся красота во мне, и от страстей светильник угасе, но умилосердись и возврати ми, якоже поет Давид, веселие.
Милостиве, помилуй мя, падшаго.

Кондак 11
Песнь чудную преднаписа Ти иногда Давид, егоже деяние обличает, еже содея, да ты, душе моя, покаешися и возстанеши, оставиши злыя дела своя и, якоже он, возгласиши: Помилуй мя, Тебе бо Единому согреших всех Богу: Сам очисти мя по милости Твоей, — и да воз-можеши чистым сердцем пети Ему: Аллилуиа.

Икос 11
Светодавче Господи, низпосли свет Твой и просвети сердце мое, душу мою от всякаго греха очисти, к Тебе бо, яко Иона вопию сице, глаголя:
Милостиве, исчезают дни мои, яко сон, темже и плачу, яко Езекия, на ложе, продли мою жизнь, да омыю своя согрешения.
Милостиве, яко разбойник, вопию: помяни мя! Яко Петр, плачуся горько, яко мытарь, взываю: прости мя, Спасителю.
Милостиве, яко блудница, проливаю слезы, приими мое рыдание, якоже некогда жены Хананейской.
Милостиве, Ты еси един Врач, уврачуй язвы души моея, возложи на ню пластырь, возлей масло и вино и даруй ми умиление и слезы. Милостиво, яко кровоточивая, прикасаюся к краю риз Твоих и плачуся, яко Марфа и Мария над Лазарем.
Милостиве, изливаю слезы мои Тебе, яко cocуд мира на главу, приношу моление и прошу прошение ми даровати.
Милостиве, помилуй мя, падшаго.

Кондак 12
Благодать Твою не отъими от мене, Благий Иисусе, аще бо и согреших паче всех человек, Ты еси Бог милосердный, не хощеши смерти грешника, прощаеши кающихся и призываеши заблудших. Освяти мя благодатию Своею и Дух правый обнови во утробе моея. Тебе бо в покаянии зову: Аллилуиа.

Икос 12
Плачу и рыдаю, Господи, о содеянных мною злых и благость Твою молю: плодов, достойных покаяния, не истяжи, ибо крепость моя во мне оскуде: сердце мне даруй присно сокрушенное, нищету же духовную да сия Тебе принесу, яко приятную жертву. Спаси мя, Тебе вопиющаго:
Милостиве, виждь страх мой, виждь сокрушение души моея и прощение ми даруй.
Милостиве, Ты Судия мой и Бог, да внемлет сему душа моя и да отступит от всякаго греха, якоже Ты повелеваеши.
Милостиве, не вниди со мною в суд, не истязуй моя деяния; но презри, яко Щедр, моя злодеяния и спаси мя, Всесильне.
Милостиве, Тебе припадаю, согреших Ти, очисти, возьми бремя от мене тяжкое греховное и, яко благоутробен, даждь ми слезы умиления.
Милостиве, поведах Ти грехи, яже содеях, и души, и тела моего язвы, яже внутри убийственны помыслы разбойнически на мя возложиша.
Милостиве, повержена мя пред враты Твоими поне на старость не изрини мене во ад, яко непротребнаго, но прежде конца даждь ми оставление прегрешений.
Милостиве, помилуй мя, падшаго.

Кондак 13
О Преблагий и Всещедрый Иисусе, вся тайная сердца моего и вся яже содеях от юности моея даже до дне сего исповедах Ти, Судии моему, виждь страдание мое, виждь скорбь мою и вонми суду моему ныне, и Сам мя помилуй, яко Благоутробен, Тебе вопиющаго: Аллилуиа, аллилуиа, аллилуиа.
Этот Кондак читается трижды, затем Икос1 и Кондак 1.[/spoiler]

[Раб божий Константин]

Акафист Премудрости Слова Божия.
[spoiler]По благословению Святейшаго Патриарха Московскаго и всея Руси Алексия II

Акафист Премудрости Слова Божия или песнь в благодарственно прославление Божественнаго смотрения о спасении мира Единородым Сыном Божиим Иисусом Христом

Тропари
Помилуй нас Господи, помилуй нас: всякаго бо ответа недоумеюще, сию Ти молитву яко Владыце грешнии приносим: помилуй нас.

Слава:
Господи, помилуй нас, на Тя бо уповахом; не прогневайся на ны зело, ниже помяни беззаконий наших, но призри и ныне яко благоутробен, и избави ны от враг наших; Ты бо еси Бог наш, и мы людие Твои, вси дела руку Твоею, и имя Твое призываем.

И ныне:
Милосердия двери отверзи нам, благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианскаго.

Кондак 1
Избранному прежде век соделать спасение мира великаго совета Ангелу, Сыну Божию Иисусу Христу, приидите вернии поклонимся и припадем Ему, славяще неизреченное о нас Божественное смотрение, и яко избавлении от вечныя смерти вознесем Ему, Спасителю нашему и Богу, благодарственную песнь, душами чистыми и нескверными устнами взывающе:
Слава Тебе Господи, слава Тебе!

Икос 1
Ангелов и всех небесных сил ликостоянию подражающе, превышнему престолу Вседержителя Бога предстоящих, и трисвятым гласом немолчно славословящих всечестное и великолепое имя Его, искупленнии раби Твои, Христе Царю, дерзаем аще и недостойно восхвалити Тя Спаса и Избавителя нашего Бога: Ты же яко всеблагий и милосердый, обычным Твоим призрев на нас благоутробием, приими от нас возносимую Тебе хвалу, боголепно и всечестно Тебе вопиющих:
Слава Тебе Господи, Сыне Божий Единородный;
Слава Тебе Господи, всемогущая творческая Сило.
Слава Тебе Господи, великоименитая Ипостасная Премудросте;
Слава Тебе Господи, всесвятейшая Божественная Правдо.
Слава Тебе Господи, Сыне нетленно рожденный от Отца прежде всех век;
Слава Тебе Господи, Сияние славы Отчей и образе ипостаси Его.
Слава Тебе Господи, Единый Свете от трисолнечнаго Света;
Слава Тебе Господи, истинный Боже от истиннаго Бога.
Слава Тебе Господи, безначальному Отцу и присносущному Духу собезначальный и соприсносущный;
Слава Тебе Господи, во едином со Отцем и Духом Божестве, царстве, силе и власти исповедуемый.
Слава Тебе Господи, единою со Отцем и Духом Божественною славою от всех небесных сил воспеваемый и превозносимый;
Слава Тебе Господи, от всех земнородных, яко единый от Троицы, Боголепно покланяемый и славимый.
Слава Тебе Господи, слава Тебе.

Кондак 2
Видящи вся умная тварь дела рук Твоих, небеса поведающия славу Твою, и землю исполненную милости и щедрот Твоих, Богогласно прославляет Тя Христе, Содетеля и Творца всяческих, темже и мы, зряще в творении неисповедимое величие Твое и богатство премудрости и благости Твоея, славословим Тя, небесе и земли Творца, и яко общницы Божественных даров Твоих благодарными гласы взываем к Тебе: Аллилуиа.

Икос 2
Разум земнородных изнемогает тщащися уразумети премудрость и силу, имиже устроися мир, и познати сокровенныя законы и тайны естества: мы же ведуще Тя Творца и Зиждителя всех, и верод разумевающе Твое непостижимое о всякой твари промышление, благоговейно зовем:
Слава Тебе Господи, содетельная и содержительная всех Божия Мудросте и Сило;
Слава Тебе Господи, вся премудростию сотворивый и всяческая глаголом силы Твоея носяй.
Слава Тебе Господи, небесе и земли Зиждителю, видимых же всех и невидимых;
Слава Тебе Господи, Архангелов, Ангелов и всех небесных сил Творче и Владыко.
Слава Тебе Господи, в начале небеса словом Твоим утвердивый и сияющими светилами вселенную просветивый;
Слава Тебе Господи, землю на тверди ея непоколебимо основавый, и сушу и море на ней разделивый.
Слава Тебе Господи, древеса и плоды произрастивый, и землю живущих тварей исполнивый;
Слава Тебе Господи, из персти человека создавый, и образом Твоим Божественным украсивый.
Слава Тебе Господи, яко владыку его над делы рук Твоих поставивый и вся нод нозе его покоривый;
Слава Тебе Господи, Божественное благословение Твое роду человеческому даровавый, и всю землю им наполнивый.
Слава Тебе Господи, яко устроение, чин и красоту мира неизменно и нерушимо сохраняеши;
Слава Тебе Господи, яко вся, яже требуем, подаеши нам, дожди благовременны и времена плодоносна с небесе посылая, и пищею и веселием сердца наша исполняя.
Слава Тебе Господи, слава Тебе.

Кондак 3
Силою вседержавныя десницы Твоея создавый человека, и образом Твоим Божественным почтый, ввел еси его в рай сладости, безсмертие и наслаждение благих Твоих обещав ему, и падшаго и согрешившаго Тебе не погубил еси, но человеколюбно помиловал еси, провозвестив ему грядущее спасение, еже и прият с верою, в покаянии возопи: Аллилуиа.

Икос 3
Имея твердую любовь к падшему созданию Твоему, и не хотяй смерти грешника, но еже обратитися и живу быти ему, благоизволил еси спасти человека: сего ради ходатай Богу и человеком быв, вшел еси, Первородне, во вселенную, и пред лицем всех людей уготовал еси спасение Твое. Темже благодаряще славословим Тя, и во умилении души взываем Ти сице:
Слава Тебе Господи, Агнче Божий, за спасение мира прежде сложение мира закланный;
Слава Тебе Господи, Божественный Ходатаю, давый Себе избавление за всех.
Слава Тебе Господи, обетованием спасения падших праотцев возвеселивый;
Слава Тебе Господи, тайну смотрения Твоего роду грядущему открывый.
Слава Тебе Господи, мужа по сердцу Твоему Авраама избравый, и отца верующих его сотворивый;
Слава Тебе Господи, семя его благословивый и, возрастив в язык велий, в наследие Себе избравый.
Слава Тебе Господи, рабом Твоим Моисеом закон давый, и волю Твою людем Израилевым возвестивый;
Слава Тебе Господи, знамения и чудеса на землю пославый, и в людех силу Твою и славу Твою сказавый.
Слава Тебе Господи, грядущее спасение миру тайно предобразивый, и законную сень светом благодати спасительныя всем человеком предосиявый;
Слава Тебе Господи, верою праотцы оправдавый, и теми Церковь от язык предобручивый.
Слава Тебе Господи, многочастне и многообразне во пророцех глаголавый, и дни избавления нашего предвозвестивый;
Слава Тебе Господи, в последок дний и Сам явлейся на земли Царствие Божие проповедавый, и спасительно дело Небеснаго Бога Отца совершивый.
Слава Тебе Господи, слава Тебе.

Кондак 4
Буря злых обдержит нас, Владыко Христе, яко в беззакониих зачахомся, и во гресех родихомся. Но Ты, пришедый грешныя спасти, и от Безневестныя и Пречистыя Девы Марии воплотивыйся, спаси нас от всяких бед предстательством Матере Твоея, да выну милосердие Твое славяще, зовем, Аллилуиа.

Икос 4
Слыша и возвеселися Сион, и возрадовася судеб ради Твоих, Господи, егда возсия звезда от Иакова, ведущи, яко прииде избавляяй, Святый Израилев, тем и вопияше с веселием: днесь спасени миру бысть. Сего ради и мы, чада новаго Израиля, чтуще Твое, Пребожественный Иисусе, во плоти к нам пришествие и рождество от Пренепорочныя и Пречистыя Девы, с верою и любовию зовем:
Слава Тебе Господи, спасения нашего ради от Отчих и Божественных недр истощивый Себе, и с небесе от Превышняго Престола Славы на землю сшедый;
Слава Тебе Господи, во утробу Девы Марии вселивыйся, и от Нея пречистую плоть восприяв, непреложно вочеловечивыйся.
Слава Тебе Господи, смирения ради крайняго зрак раба приемый, и во яслех вифлеемских, яко агнец возлегий;
Слава Тебе Господи, Ангельским гласом велию благочестия тайну пастырем проповедавый, и тыя зрети Тя, яко младенца, сподобивый.
Слава Тебе Господи, спасительное пришествие Твое явлением звезды миру возвестивый, и волхвы с честными дары на поклонение Тебе призвавый;
Слава Тебе Господи, закона сый Творец, яко подзаконный, закон исполнивый, и плотию обрезание восприемый.
Слава Тебе Господи, безначальное Слово, яко младенец четыредесятодневен, Материю Своею в храм принесенный, и от праведнаго Симеона и пророчицы Анны яко избавитель мiра проповеданный;
Слава Тебе Господи, на земли во двою естеству яко Бог и человек нераздельно и неслитно явивыйся и с человеки поживый.
Слава Тебе Господи, обетованное спасение мiру пришествием Твоим совершивый;
Слава Тебе Господи, сень законную Божественным явлением Твоим упразднивый и светом благодати вселенную просветивый.
Слава Тебе Господи, речи пророков и гадания, воплощение Твое проявившия исполнивый;
Слава Тебе Господи, милость, мир и прощение грехов человеком от Небеснаго Бога Отца даровавый;
Слава Тебе Господи, слава Тебе.

Кондак 5
Боготечную струю спасительных учений излиял еси, Христе, Премудросте Божия, егда явился еси вселенней, благовествуя волю пославшаго Тя Небеснаго Бога Отца, и проповедуя грешником покаяние. Отнюдуже духоноснии Апостоли Твои и вси людие, познавше Тя истиннаго быти Сына Божия, и веровавше во Евангелие, боголепно возопиша: Аллилуиа.

Икос 5
Видев Тя Иоанн грядуща на крещение, глагола людем: се Агнец Божий, вземляй грехи мира; иже и крещшася и свыше свидетельствована Тя исповеда, яко един еси от Троицы, освящаяй воды и крестяй Духом Святым; темже и мы, яко причастницы Божественнаго Крещения и Даров Святаго Духа, благодарными гласы взываем к Тебе:
Слава Тебе Господи, на Иордан яко человек пришедый, и Крещение безгрешный прияти изволивый;
Слава Тебе Господи, выю Твою под руку раба, Господь сый всех и Владыка, преклонивый;
Слава Тебе Господи, Духом Святым, яко податель духа благодати, извествованный;
Слава Тебе Господи, гласом Небеснаго Бога Отца Сын Его возлюбленный свидетельствованный.
Слава Тебе Господи, водами человеческий грех потопивый, и Крещением падшее естество наше обновивый;
Слава Тебе Господи, банею пакибытия верующия в Тя возродивый, и невидимым явлением Святаго Духа освятивый.
Слава Тебе Господи, врага искусителя в пустыни посрамивый, и пагубныя козни его победоносно разрушивый;
Слава Тебе Господи, смиренныя ученики Себе избравый, и божественныя Твоя Апостолы нарекий.
Слава Тебе Господи, Евангелие Царствия миру проповедавый, и волю Небеснаго Бога Отца Божественным словом Твоим возвестивый;
Слава Тебе Господи, путь спасения людем показавый, и светом Богоразумия мир озаривый.
Слава Тебе Господи, суемудрие фарисеев и книжников посрамивый, и мытарей и блудниц покаянием и верою оправдавый;
Слава Тебе Господи, избавление человеческому роду и мир проповедавый, и яко Ты еси воистину Спас миру Христос, Божественным Твоим учением и властию засвидетельствовавый;
Слава Тебе Господи, слава Тебе.

Кондак 6
Проповедник славы Божия явился еси на земли, Единородный Сыне Отчий, возвещая всюду, яко приближися Царствие Небесное: темже и обтекл еси пречистыми ног Твоих стопами вся грады и веси Израилевы, проявляя Свою Божественную власть и силу, и исцеляя всяк недуг и всяку язю, еже видевше людие, хвалу воздаша в вышних Богу, творящему дивная и преславная чудеса, вопиюще: Аллилуиа.

Икос 6
Возсиявый прежде век от Отца, и в последняя лета от Девы Матере, изшел еси во спасение людей Твоих, Иисусе, благовествуя нищим, исцеляя сокрушенныя сердцем, проповедуя плененным отпущение и слепым прозрение: отнюду же вси видевше Твоя чудеса, славляху Бога глаголюще, яко пророк велий воста, и яко посети Бог людей Своих. Мы же ведуще Тя Бога предвечнаго, Ему же вся повинуются, яко Творцу и Господу, и прославляя безмерное милосердие Твое, почитаем Тя сими благохваленьми:
Слава Тебе Господи, всемогущее Слово и вседержавная Божественная Сило;
Слава Тебе Господи, неистощимое благости богатство и человеколюбия неизследимая бездно.
Слава Тебе Господи, небесе и земли Владыко, Его же манием побеждается естества чин, иже и твориши, елика хощеши;
Слава Тебе Господи, дивная чудеса сотворивый, и преславная знамения миру показавый.
Слава Тебе Господи, болящия исцеливый, разслабленныя с одра возставивый, прокаженныя очистивый;
Слава Тебе Господи, слепыя просветивый, бесы от человек всесильным словом Твоим отгнавый.
Слава Тебе Господи, дщерь Иаирову умершую воскресивый и сына вдовича из гроба воздвигнувый;
Слава Тебе Господи, в пустыни пятию хлебы пять тысящь и седмию четыре тысящи мужей насытивый.
Слава Тебе Господи, по водам аки по суху ходивый, и утопавшему Петру простер руку Твою Божественную, спасение подавый;
Слава Тебе Господи, ветру единым словом Твоим запретивый, и волны морския утишивый.
Слава Тебе Господи, на Фаворе избранным учеником Твоим славу Божества Твоего показавый, и в вере их, яко Ты еси воистину Отчее сияние, утвердивый;
Слава Тебе Господи, Лазаря четверодневна повелением Твоим из гроба воздвигнувый, и тем тридневное воскресение Твое преславно и Богосветло предобразивый.
Слава Тебе Господи, слава Тебе.

Кондак 7
Хотя сокровенную от века тайну открыти и глаголы пророк предвозвестившия Твое Божественное смотрение исполнити пришел еси во Иерусалим, возседя, яко Царь кроток и спасаяй, на жребяти осли, и предав Себе на вольное заколение, яко жертва Богу Отцу принеслся еси, Агнче Божий, спасая всех, с верою взывающих к Тебе, соделавшему спасение посреде земли: Аллилуиа.

Икос 7
Новаго Израиля ходатай и лучшаго завета испоручник Иисус, егда возлеже на вечери со обеманадесяте Апостолы, тайно, за яже хотяше умрети, Себе предпожре, претворяя хлеб и вино в Свое Божественно Тело и Кровь, и глаголя Апостолом: ядите Тело Мое, и пийте Кровь Мою во оставление грехов. К Нему же и мы, яко причастницы жизни вечныя, верою утвердившеся, возопиим:
Слава Тебе Господи, спасительную тайну Новаго Завета на вечери совершивый, и Твое Божественное Тело и Пречистую Кровь в снедь верным даровавый;
Слава Тебе Господи, ноги учеником Твоим преклонься умывый, и путь добрейший смирения миру показавый.
Слава Тебе Господи, в вертограде гефсиманстем троекратно с воплем крепким и со слезами молитву Единосущному Отцу Твоему принесший, и явлением Ангела в подвизе Твоем укрепленный;
Слава Тебе Господи, лукавым учеником Твоим преданный, и яко агнец незлобивый, не отверзая уст на заколение веденный;
Слава Тебе Господи, в совете архиереев и старцев людских неправедно осужденный, оплеванный, заушенный и биенный;
Слава Тебе Господи, в претории Пилата от воинов поруганный, и яко злодей, на смерть осужденный.
Слава Тебе Господи, страшныя страсти и крест за спасение мира претерпевый, и Божественною кровию Твоею грехи наша очистивый;
Слава Тебе Господи, покаяние благоразумнаго разбойника, познавшаго Тя Бога, приемый, и вход иже в рай ему путесотворивый.
Слава Тебе Господи, на Кресте смерть плотию вкусивый, и многа телеса успоших святых из гроб возставивый;
Слава Тебе Господи, страшныя знамения миру в смерти Твоей показавый, и сотника истиннаго Тя Сына Божия исповедати научивый.
Слава Тебе Господи, во гробе плотию лежа, душею во ад сшедый, и имущаго державу смерти упразднивый;
Слава Тебе Господи, за спасение мира яко человек пострадавый, и живот вечный нам, яко Бог, даровавый.
Слава Тебе Господи, слава Тебе.

Кондак 8
Странное и преславное таинство видевше на земли удивишася Ангельстии чини, егда на лобнем месте за ны пожрен бысть Христос: Крестом бо Его разрушися клятва, умертвися смерть, разорися ад, в немже от века содержимии юзницы, праотцы, пророцы и вси свидетельствованнии в вере сошедша к ним Избавителя и Бога преклоншеся сретоша, и безмерное Его благоутробие величающе, с веселием возопиша: Аллилуиа.

Икос 8
Вся исполняяй неописанный, во гробе плотски был еси Христе, во аде же с душею яко Бог, в раи же с разбойником и на Престоле со Отцем и Духом, воскрес же из мертвых, яко всесилен, державу смерти разрушил еси, и живот и нетление миру даровал еси: сего ради покланяется Тебе всяко колено небесных и земных и преисподних, исповедуя, яко Ты еси един Господь Иисус Христос в славу Бога Отца. Темже и мы, чтуще Твою спасительную страсть и еже из мертвых Твое воскресение, с верою и любовию приносим Тебе, Спасителю нашему, благодарственную песнь:
Слава Тебе Господи, яко человек плотию умерый, и яко Бог тридневен из мертвых воскресый;
Слава Тебе Господи, запечатанный камень от дверий гроба Твоего сшедшим с небесе Ангелом отваливый, и стрегущия Тя воины светом славы его устрашивый.
Слава Тебе Господи, мироносицам женам Воскресение Твое от Ангела проповедавый, и Апостолом Твоим возвестити е повелевый;
Слава Тебе Господи, по Воскресении Твоем самого Себе им яко Живаго Бога показавый, и радости неизреченныя сердца их исполнивый.
Слава Тебе Господи, отвергшагося Тебе Петра явлением Твоим утешивый, и плач его на радость преложивый;
Слава Тебе Господи, двум, шедшим в Еммаус, учеником Твоим тайну Креста и смерти Твоея Божественными словесы от закона и пророк уяснивый, и в преломлении хлеба познана Себе сотворивый.
Слава Тебе Господи, собранным учеником Твоим явлься, мир им подавый, и пречистыя руце и нозе Твои и прободенное ребро показавый;
Слава Тебе Господи, во осмый день востания Твоего вкупе бывшим учеником паки явлься, Фому неверовавшаго Воскресению Твоему уверивый, и всех не видевших, но веровавших блаженными нарекий.
Слава Тебе Господи, на мори Тивериадствем в ловитве рыб Апостолом Твоим Себе Учителя их и Господа показавый, и покаявшагося Петра паки к лику Апостольскому причтый;
Слава Тебе Господи, на горе Галилейстей из мертвых Воскресение Твое паки явлением Своим утвердивый, и власть Твою на небеси и на земли восприятую от Отца проповедавый.
Слава Тебе Господи, яко ученики Твоя соделалеси Апостолы и проповедники Царствия Божия, и послал еси я на проповедь, мир Твой теми подая вселенней;
Слава Тебе Господи, яко повелел еси проповедати покаяние и отпущение грехов во всех языцех, и обещал еси спасение приемлющим Крещение и верующим в Тя, Спаса нашего и Бога.
Слава Тебе Господи, слава Тебе.

Кондак 9
Весь лик Божественных Апостол Твоих, восходящу Ти, Спасе, на Елеон, последова Тебе, яко Владыце и Господу, внимая глаголом Твоим, яже о Царствии Божии: узревше же новое и преславное чудо, егда возносился еси на небо, со страхом и верою поклонишася Тебе, восходящему к Отцу Твоему и Богу, и от Ангелов приемше весть о втором славном пришествии Твоем, возвратишася во Иерусалим, радующеся и поюще Богу: Аллилуиа.

Икос 9
Витийственный язык не может исповедати тайны чудес Твоих, Христе, како самовластно из мертвых воскресл еси, и с плотию вознеслся еси на небо, идеже Ангели со всеми горними силами зряще Тя Бога и Творца во образе человека восшедша на Престол Божества, и седша одесную Бога Отца, с трепетом возопиша: свят, свят, свят еси Господи Сил и Царю Славы. Приими убо и от нас дольних недостойное наше хваление Тебе, Творцу и Искупителю нашему, благодарно взывающих:
Слава Тебе Господи, все Отеческое смотрение преславно исполнивый, и земная с небесными совокупивый;
Слава Тебе Господи, пострадавый за нас и воскресый, и на небеса к безначальному Отцу Твоему восшедый.
Слава Тебе Господи, на Престоле Божества одесную Отца седый, и единое с Ним царство и силу и славу восприемый;
Слава Тебе Господи, естество человеческое обоживый, и превыше Херувимов и Серафимов в Твоем Божественном лице превознесый.
Слава Тебе Господи, Небеснаго Отца Твоего, яко ходатай Бога и человеков, умоливый, и учеников Твоих на земли сирых не оставивый;
Слава Тебе Господи, Духа Святаго Апостолом Твоим ниспославый, и светом боговедения умы их озаривый.
Слава Тебе Господи, некнижныя ученики Твоя духом истины умудривый и учители и пастыри стада Твоего соделавый;
Слава Тебе Господи, Евангелие Царствия теми всему миру проповедавый, и духоносными вещании их вселенную просветивый.
Слава Тебе Господи, идольскую лесть обличивый и упразднивый, и заблудшия люди во истинней вере наставивый;
Слава Тебе Господи, к Светоначальнику Отцу Твоему от тьмы неведения нас приведый, и достойно покланятися и служити Ему научивый.
Слава Тебе Господи, помышленьми и делы долу преклоншихся нас возставивый, и горняя мудрствовати, а не земная повелевый;
Слава Тебе Господи, неизреченныя блага любящим Тя обещавый, и житие на небесех, отонудуже и Тя Спасителя нашего ждем, предопределивый.
Слава Тебе Господи, слава Тебе.

Кондак 10
Спасти хотя люди, яже стяжал еси честною Твоею кровию от искушений и бед, во еже непорочно служити Тебе Богу живу и истинну, излиял еси богатно Божественную благодать Пресвятаго Духа, и Сам яко Владыка и Господь обещался еси невидимо и неотступно пребывати с верными, якоже Апостолом рекл еси: се Аз с вами есмь во вся дни до скончания века. Егоже гласа Твоего и мы утверждение надежди имуще, радуяся вопием: Аллилуиа.

Икос 10
Стена неодолимая и враты адовы показася Церковь Твоя, Христе, ея же силою побеждаются вси врази, и низлагается всяко взимающееся на разум Божий возношение человек, растленных умом и неискусных вере, вернии же обретают спасение душам во всяком деле блазе плодоносяще и возрастающе в разуме Божии. Темже и мы, сущии чада святыя Твоея Церкве, утвердившеся на камени веры, и держащеся добраго исповедания восхваляем Тя, согласно зовуще:
Слава Тебе Господи, на земли Церковь Твою, яже есть столп и утверждение истины, основавый;
Слава Тебе Господи, всесильною Твоею благодатию разширивый ю и удобривый.
Слава Тебе Господи, Божественным промыслом Твоим неразрушиму сохраняяй ю и соблюдаяй;
Слава Тебе Господи, краегугольный каменю, на немже Церковь Твоя неподвижно утверждается.
Слава Тебе Господи, пренебесная Главо, еюже таинственное тело Церкве управляется и освящается;
Слава Тебе Господи, великий Архиерею и Пастырю добрый, положивый душу Твою за овцы, и единем приношением совершивый во веки освящаемых.
Слава Тебе Господи, источники Божественных даров Твоих, тайны святыя в Церкви Твоей устроивый и теми спасительную благодать на верныя люди Твоя изливаяй;
Слава Тебе Господи, пастыри и учители в созидание тела Церкве Твоея поставивый, и власть, еже вязати и решити грехи людей, тем по непреложному слову Твоему даровавый.
Слава Тебе Господи, яко призвал еси в Церковь Твою Святую и нас недостойных рабов Твоих;
Слава Тебе Господи, яко возродил еси нас банею пакибытия и обновления Духа Святаго.
Слава Тебе Господи, яко питаеши нас Божественным словом Твоим и насыщаеши от безсмертныя трапезы Пречистаго Тела и Крове Твоея;
Слава Тебе Господи, яко очищаеши грехи наша покаянием, и спасаеши нас, Царствия небеснаго наследники соделовая;
Слава Тебе Господи, слава Тебе.

Кондак 11
Пение горних умных сил не довлеет величеству Твоему, седяй в славе на Престоле Божества, Иисусе Сыне Божий, аще и немолчными гласы славословят Тя, яко Творца своего и Бога, мы же грешнии кое достойное благодарение и кую честь принесем тебе за вся, яже воздал еси нам благая; обаче ведуще тя милостива и благосерда, иже и страдати о нас изволившаго, молим Тя, Человеколюбче, услыши и нас, верующих в Тя, и во умилении сердца величающих безмерное милосердие Твое, поюще ангельскую песнь: Аллилуиа.

Икос 11
Светозарное Солнце из гроба возсиявшее, и на небеса восшедшее просвещати ангельския чины и духи праведных, Христос Бог наш, уставил есть великий и просвещенный день, в он же имать паки приити на землю во славе, яко же молния исходит от восток и является до запад, и суд праведный сотворити живущим на лицы всея земли. Чающе убо втораго славнаго пришествия Его, возведем очи свои на небо и речем: помяни и нас Господи, егда приидеши во Царствии Твоем, сицевая тебе вопиющих:
Слава Тебе Господи, кончину века словом Твоим предвозвестивый;
Слава Тебе Господи, готовым быти нам и ждати Тебе, Судию праведнаго, повелевый.
Слава Тебе Господи, знамения пришествия Твоего во Святом Евангелии показавый;
Слава Тебе Господи, яко хощеши приити на землю во славе Отца Своего со Ангелы святыми.
Слава Тебе Господи, яко имаши в пришествие Твое обновити лице земли;
Слава Тебе Господи, яко благоволиши смертным нетление и безсмертие даровати.
Слава Тебе Господи, яко обещаеши от века умерших всесильным словом Твоим воздвигнути;
Слава Тебе Господи, яко хощеши праведный Суд сотворити, и коемуждо по делом его воздати.
Слава Тебе Господи, яко надежду и упование на Тя Спасителя нашего возлагаем;
Слава Тебе Господи, яко милость и прощение на суде Твоем получити чаем.
Слава Тебе Господи, яко жизнь нашу, по милосердию Твоему продолжаеши, и время на покаяние нам даруеши;
Слава Тебе Господи, яко исправления нашего милостивно ожидаеши, и еже избежати нам вечнаго осуждения, яко благий и Человеколюбец, хощеши.
Слава Тебе Господи, слава Тебе.

Кондак 12
Благодать Небеснаго Бога Отца провозвестив миру, соприсносущное Слово и Сын Божий заповеда верным Своим жити целомудренно и праведно и благочестно в нынешнем веце, отвергшеся нечестия и мирских похотей, яко да изгнаннии из рая преслушания ради, оправдившеся верою наследят грядущее Царство Небесное, еже во Свя времена явит блаженный и един сильный Царь царствующих и Господь господствующих ждущим блаженнаго упования и явления славы Его, и глаголющим: Аллилуиа.

Икос 12
Поюще и превозносяще неисповедимое человеколюбие Твое, Спасе наш, иже за милосердие безприкладныя милости Твоея пришед соделал еси спасение наше Крестом и Воскресением Твоим, и паки грядый имаши явити славу Царствия Твоего, приносим Ти, превозносимому Отцев Господу, раби Твои, чающии жизни будущаго века и причастия наследия святых во свете, благодарную и хвалебную молитву, просяще у Тебе мира и спасения зовущим:
Слава Тебе Господи, во свете живый неприступнем, и царствуяй в славе величества Твоего непостижимей;
Слава Тебе Господи, Егоже Царство есть царство всех веков и владычество во всяком роде и роде.
Слава Тебе Господи, множества небесных сил Божественною славою Твоею облиставаяй, и зрением велелепныя красоты Царства Твоего умныя очи их насыщаяй;
Слава Тебе Господи, от сложения мира царство в наследие человеком уготовавый, и многи обители в дому Отца Твоего избранным Твоим сотворивый.
Слава Тебе Господи, яко предуставил еси по втором пришествии Твоем, разлучити добрых от злых, якоже овец от козлищ;
Слава Тебе Господи, яко определил еси по праведном суде Твоем, врага нашего диавола с клевреты его осудити, и вечному мучению предати.
Слава Тебе Господи, яко имаши благословенныя Отца Твоего в Царство Небесное призвати, и в сожительстве с безплотными Ангелы я вселити;
Слава Тебе Господи, яко хощеши любящия Тя вечныя славы и блаженныя жизни наслаждения во свете лица Твоего сподобити.
Слава Тебе Господи, яко славе Царствия Твоего и радости избранных Твоих не будет предела;
Слава Тебе Господи, яко наслаждениям рая и блаженству праведных у Тебе, источника живота, не будет конца.
Слава Тебе Господи, яко и нам грешным дверь славнаго Царствия Твоего покаянием и верою отверзаеши;
Слава Тебе Господи, яко и мы недостойнии, аще будем ходити во свете заповедей Твоих в чертог Божественныя славы Твоея, идеже есть всех веселящихся жилище, совнити уповаем.
Слава Тебе Господи, слава Тебе.

Кондак 13
О великоименитая Ипостасная Премудросте Божия, пресвятый и премилосердый Господи Иисусе Христе, Спасителю наш, приклонивый небеса неизреченным Твоим схождением, приклонися благоутробно на молитву нас недостойных рабов Твоих, верою и любовию приносящих Тебе благодарственную сию хвалу, и ниспосли нам Божественную благодать, да избавльшеся от бед и скорбей, паче же греховных страстей, поживем Тебе нашему владыце и благодетелю, и тако сподобимся и на небеси, якоже на земли, вкупе со Ангелами и всеми святыми пети Тебе: Аллилуиа.
Сей Кондак читается трижды, затем Икос 1 и Кондак 1.

Молитва Спасителю нашему Иисусу Христу
Владыко многомилостиве Господи Иисусе Христе, безначальнаго Отца собезначальный и соприсносущный Сыне, непостижимая Мудросте, неприступный Свете, вседетельная и всесодержительная Сило, всемогущим словом Твоим от не сущих во еже быти приведый всяческая, и вседержавною волею Твоею управляяй и устрояяй всем благопотребная и полезная!
Благодарно исповедуем Твое Божественное о нас промышление, величаем непостижимую тайну Твоего смотрения, и с верою приемлем спасительную благодать Твою. Ты бо, неизглаголанная благостыня, не по беззакониям нашим творяй нам, но по безмерному благоутробию Твоему милуяй и спасаяй нас, благоизволил еси, исполняя совет и изволение Отчее, истощив Себе снити на землю, и немощное естество человеческое восприяти, в немже пострадав волею заклался еси на кресте яко агнец непорочный за грехи мира, и сим страшным и спасительным священно действием преклонив правду Божественную на милость ходатай Богу и человеком явился еси, и падшее и растленное естество наше возставил еси, и обновил и освятил еси, яко быти верующим в Тя и Небеснаго Бога Отца святым и непорочным в наследие нетленно и неувядаемо соблюдено на небесех. Темже молимся Тебе, Спасителю наш, призри милостивно на нас, и приими наше исповедание, хвалу и благодарение за вся яже воздал и уготовал еси нам, верующим в Тя и исповедующим всесвятое имя Твое. Спаси Господи люди Твоя, и благослови достояние Твое. Помяни в щедротах Твоих Церковь Твою Святую, юже стяжал честною Твоею Кровию, утверди, умири, разшири и сохрани ю непребориму и непоколебиму и адовыми враты, но да сокрушатся пред нею и изчезнут вся сопротивныя силы, и да расточатся вси врази, видимо и невидимо ополчающиися, еже озлобити достояние Твое и разорити завет святый Твой. Осени Божественным благословением Твоим державу Российскую и вся люди Твоя, сохраняя их в мире, благоденствии и тишине, победу же и одоление на супостаты им даруя. Отжени от правовернаго отечества нашего всякаго духа лестча, вносящаго к нам плевелы ложных учений, и силящагося водворить у нас нравы и обычаи противныя святым заповедем Твоим: утверди нас в православном исповедании веры, и соделай нас ревнителями отеческих преданий и всяких добрых христианских дел, да выну сияет в отечестве нашем свет истинный, и славится в род и род пречестное и пребожественное имя Твое. Спаси Господи и помилуй град сей, в немже живем, и вся грады и веси, всех православно верующих в Тя в мире, тишине и благоденствии соблюди, Церкви Святей и всякому началу и власти послушных и благопокорных соделай, и всеми христианскими добродетелями украси; отпадшия же и противящихся к единению со Святою Православною Церковию спасительною Твоею благодатию призови, Божественным словом Твоим просвети и обрати, яко благий и Человеколюбец.
Премудрый и всеблагий Господи Спасителю наш! Просветивый сиянием пришествия Твоего мира концы, и сопризвавый нас в Церковь Твою Святую с обетованием наследия нетленных и вечных благ, призри милостивно и на нас недостойных рабов Твоих и не помяни беззаконий наших, но по безмерному благоутробию Твоему ослаби, остави, прости нам вся прегрешения наша. Аще бо и преступаем святцю волю Твою, но не отметаемся Тебе Бога и Спаса нашего: Тебе единому согрешаем, но и Тебе единому служим, в Тя единаго веруем, к Тебе единому прибегаем и Твои точию раби быти хощем. Помяни немощь естества нашего и обдержащия нас повсюду искушения врага и прелести и соблазны мира, ихже ради без Тебе, якоже рекл еси, не можем творити ничесоже, и Сам очисти и спаси нас, Сам просвети умы наша, еже непоколебимо веровати в Тя, единаго Спаса и Избавителя нашего, Сам подвигни сердца наша еже всецело любити Тя, единаго Бога и Творца нашего, Сам направи стопы наша, еже непреткновенно ходити во свете заповедей Твоих. Ей, Господи Спасителю наш, яви нам великую и богатую милость Твою, иже по неизглаголанной любви Твоей и страдати за нас изволил еси и всесильною Божественною Твоею благодатию, предстательством же Пречистыя и Пренепорочныя святыя Матери Твоея Марии, Еяже честное и блаженное успение и к Тебе сыну и Богу пренебесное возшествие ныне празднуем, и молитвами угодников Твоих, страну нашу честными телесы освящающих и выну пред Тобою за нас ходатайствующих, сотвори, да в преподобии и правде поживем вся дни живота нашего, и тако достойни будем во второе славное пришествие Твое услышати от Тебе милостивое призывание в Царствие Небесное, еже получити сподоби нас грешных и недостойных рабов Твоих, и в наслаждении неизреченных красот его славити Тя вкупе с безначальным Твоим Отцем и присносущным Божественным Духом во веки веков. Аминь.[/spoiler]

[Раб божий Константин]

Акафист Преображению Господню.
[spoiler]Кондак 1


Возбранный Воеводо и Царю славы, Тебе небеси и земли Создателя, зрящи на горе Фаворстей преобразившася со славою, вся тварь удивися, небес вострепеташа, и вси земнороднии возрадовашася, мы же недостойнии Твоему нас ради Преображению благодарственно поклонение приносяще, с Петром от души вопием Ти: Иисусе, Превечный Боже, добро нам всегда быти под кровом благодати Твоея.


Икос 1


Ангелом недоведомое и человеком неприступное Твое, Светодавче Христе, Божество, незаходительными молниями и лучами Невечерняго Света Твоего, явил еси на горе Фаворстей начальнейшим учеником Твоим, тии же Божественным изменишася ужасом, облаком осиявшеся светлым и глас Отечь слышавше, разумеша Твоего вочеловечения таинство, вопиюще Тебе таковая: Иисусе, Сыне Божий Безсмертный, просвети нас светом Лица Твоего осияннаго. Иисусе, Благий Боже Всесильный, возбуди нас спящих из глубины тьмы сна греховнаго. Иисусе, во свете живый неприступнем, из области темныя изведи нас. Иисусе, Славою Твоею исполнивый весь мир, во обители райския введи нас. Иисусе, Свете мира, от мира лукавого свободи нас во тьме седящих. Иисусе, Солнце Правды, силою и правдою облеки нас, в сени смертней спящих. Иисусе, Превечный Боже, добро нам всегда быти под кровом благодати Твоея.


Кондак 2


Видя, яко ученицы Твои, Человеколюбче Господи, непросвещенни еще суще, не разумеют, яко подобает Тебе идти во Иерусалим и тамо много пострадати и убиену быти, Ты оттоле начал еси сказовати им, яко вся сия належит Тебе волею претерпети нашего ради спасения. Обаче тии не возмогоша еще мыслити, яже суть Божия, но яже суть человеческая, сего ради по днех шестих поял еси Петра, Иакова и Иоанна и возвел еси я на гору Фаворскую показати им прежде Креста Божественную Славу Твою, да и во время страданий Твоих разумно воспоют Тебе: Аллилуиа.


Икос 2


Разума неуразуменна вольнаго Твоего страдания не разумеша ученицы Твои, Господи. Сего ради прежде Креста Твоего нощию глубокою возвел еси на гору высоку лучшия ученики Твоя, да видят чудо страшнаго Преображения Твоего и нестерпимое Божественного пришествия Твоего издалеча присносущное благолепие, да егда Тя узрят распинаема, страдание убо Твое, да уразумеют вольное. Сего ради вопием Тебе сице: Иисусе, от удолий на гору высоку возведый Твоя ученики, возведи и нас горе, да горних научимся искати наслаждений. Иисусе, от житейских попечений и множества народнаго отлучивый Петра и Заведеовых, отлучи наш ум от благ земных, да дольных навыкнем избегати пристрастий. Иисусе, многими труды на превелию высоту вознесый други своя, и нас многими труды и поты научи по вся дни подвизатися. Иисусе, в молчании ночныя молитвы Преображение Твое учеником показавый, и ныне верным Твоим сподоби сладостию словес Твоих в нощи просвещатися. Иисусе, трех точию свидетелей славы Твоея в тишине Фаворстей явивый, и ныне безмолвным и пустынным даждь славу Твою всегда созерцати. Иисусе, Фавор и Ермон о Имени Твоем возвеселивый, даждь нам призыванием сладчайшаго Имени Твоего восход горе совершати. Иисусе, Превечный Боже, добро нам всегда быти под кровом благодати Твоея.


Кондак 3


Силою свыше избранныя Твоя Апостолы облекий, Иисусе, на Фавор возвел еси я, да навыкнут вышних искати и горняя мудрствовати, а не земная, облецы и нас, долу поникших и немощию плоти всегда побеждаемых, силою и славою Твоею, да сила Твоя в немощи нашей совершится, чесо ради с любовию воспоем Тебе: Аллилуиа.


Икос 3


Имеяй прежде Креста и вольнаго страдания Твоего явити учеником отчасти Божества Славу Твою, Христе Спасе наш, Ты трех точию от живущих на земли избираеши, да зрителие Божественныя Твоея славы будут, ибо тии три пред очима Твоима лучши бяху паче всех народов и язык: Петр, яко паче иных Тебе возлюбивый, и яко первый от всех Сына Божия Тебе исповедавый, Иаков, яко первый во Апостолех надежды ради будущих благ под меч главу свою преклонивый и тако начало мучеником Твоим положивый, Иоанн же, яко девственник и паче всех чистоту плоти и духа целомудренно сохранивый и сего ради благодать особную паче иных получивый к зрению неизреченных откровений и Божественныя Славы Твоея. С нимиже приими и от нас похвалы Тебе сицевыя: Иисусе, от Петра прежде Преображения Твоего исповедание веры приемый, приими и мое теплое исповедание. Иисусе, тому же Петру на Фаворе дерзновение даровавый глаголати с Тобою, возглаголи благая и мирная в сердце моем. Иисусе, сынов Заведеевых за пламень любви их сынами громовыми нарекий, громом гнева Твоего не порази мя. Иисусе, тем же учеником огнь с небесе на Самарян низвести не попустивый, огнь страстей угаси во мне. Иисусе, с девственным Иоанном в чистоте плоти и духа на Фавор горний возведи мя. Иисусе, с мужественным Иаковом, первее чащу Твою испившим, врай введи мя. Иисусе, Превечный Боже, добро нам всегда быти под кровом благодати Твоея.


Кондак 4


Буря Богоявления Твоего на горе Синайстей бысть, егда во громех и молниях даровал еси закон угоднику Твоему Моисеови, такожде и на горе Хориве бысть дух крепок, разоряяй горы, трус и огнь, егда Илия пророк хотяше зрети Тя, обаче не в вихре бурне, не в трусе и не во огне Господь, но во гласе хлада тонка Ты показал еси им Лице Свое и славу Божества Своего, егда на горе Фаворстей Ты предстал еси им, с радостию вопиющим Тебе: Аллилуиа.


Икос 4


Слышавше Моисей и Илия на Фаворе глаголы Твоя о исходе Твоем, егоже хотяше скончати во Иерусалиме, быша всему миру свидетелие Твои, Господи, яко Ты еси воистину Сын Божий на спасение людей от Бога Отца посланный и гласом с небесе Тем показанный. Моисей убо от мертвых призван бысть да свидетельствует во аде держимым Твое в мир пришествие. Илия же от рая призван бысть, да скажет Еноху Славу Твою в Преображении пречистыя Плоти Твоея виденную. Мы же, чудящеся тайне пророк Твоих на Фаворе явления, со умилением зовем Тебе: Иисусе, Боговидцу Моисею, Лице Твое узрети восхотевшему, на Фаворе Лицем к лицу явивыйся, яви нам в грядущем веце Лица Твоего сладость превожделенную. Иисусе, в боговидении задних Твоих древле Моисею сияние Славы Твоея Показавый, покажи нам во Царствии Твоем лицем к Лицу Зрака Твоего доброту неизреченную. Иисусе, в тишине и гласе хлада тонка Илию откровением Своим наставивый, настави мя чудно в тишине безстрастия божественнаго. Иисусе, на огненней колеснице неопальнаго небошественника Твоего Илию в рай возведый, возведи мя дивно на высоту жития совершеннейшаго. Иисусе, древле с пророки многообразно глаголавый, и на Фаворе исход Свой им возвестивый, глаголами живота вечнаго напитай алчущую душу мою. Иисусе, при устех двою свидетелей Тайну Преображения учеником Твоим открывый, воздыханьми неизглаголанными Святаго Духа воспламени хладную веру мою. Иисусе, Превечный Боже, добро нам всегда быти под кровом благодати Твоея.


Кондак 5


Боготечней звезде в нощи возсиявшей, уподобися, Светодавче Господи, неизреченное осияние пречистыя Плоти Твоея, егда учеником спящим и нощи, уже ко утру приближающейся, Ты возносил еси Отцу Твоему на высоте горы премирную молитву Свою. Тогда просветися Лице Твое, яко солнце, и ризы Твоя быша блещащяся, белы зело, яко снег. Апостоли же от нашедшия Божественный силы убудившеся, увидеша Славу Твою, яко Единороднаго от Отца, исполнь благодати и истины, и стояху трепетни, поюще Тебе: Аллилуиа.


Икос 5


Видевше Апостоли Тя на Фаворе во образе человечестем сущаго, славою же Божественною Преобразившася и с Моисеом и Илиею о исходе Твоем беседующа, разумеша присносущную силу Твою и Божество под покровом плоти сокрываемо, и ужасни быша, послушающе глаголемых и наслаждающеся зрения Твоея Божественныя славы, юже толико видеша, елика телесных очес зрение их вместити можаше. С нимиже и мы поем Тебе таковая: Иисусе, возсиявый учеником Твоим неизреченную и Богосиянную Славу Твою, возсияй в душах наших Свет Твой присносущный. Иисусе, причастивый первостоятели закона и благодати премирнаго Света Твоего, причащением Того собери ум наш приснозаблудший. Иисусе, сокровенную во плоти молнию Божества Твоего на Фаворе мало обнаживый, обнажи сокровенныя грехопадения в убогой совести моей Иисусе, несозданнаго Света Твоего лучами из Плоти Твоея Святую гору озаривый, озари свет заповедей Твоих во мрачней души моей. Иисусе, Преображением причистыя Плоти Твоея просветивый мира концы, просвети и украси нас помраченных. Иисусе, блистанием Фаворскаго Света Твоего очистивый, яко снег, твоя ученики, очисти и обнови нас потемненных. Иисусе, Превечный Боже, добро нам всегда быти под кровом благодати Твоея.


Кондак 6


Видевше преблагостное и спасительное собеседование Твое, Христе Боже наш, со Моисеом и Илиею на горе Фаворстей, возрадовашеся зело ученицы Твоя: Петр, Иаков и Иоанн. Петр же гласом любве божественней исполненным рече: "Господи, добро сеть нам зде быти: аще хощеши, сотворим зде три сени, Тебе едину, и Моисеови едину, и едину Илии". Мы же недостойнии, не дерзаем прямо Тебе вопрошати, обаче смиренно о помиловании молим Тя и гласом трепетним вопием Ти: Аллилуиа.


Икос 6


Возсия на Фаворе во знамение всей вселенней облак светел, Петру о сенях вопрошающу, откровение гласа Отеческаго возвещающ и Духа Святаго пришествие, и егда осени Апостолы, верх горы окружающе, тии паче убояшася и во облак со страхом вступивше, ощутиша Твое неприступное Божество, и со дерзновением многим возопиша к Тебе таковая: Иисусе, Израиля древле столпом облачным в пустыне путеводивый, Сам и ныне путь во Царствие Твое нам укажи. Иисусе, Апостолы Твоя во облаце светле на Фаворе осенивый, росою Духа Твоего Святаго нас осени. Иисусе, во Храме нерукотвореннем Живый на небеси, храм световиден и сень пречистую покажи ми Твоего Божества. Иисусе, скиний рукотворенных не восхотевый на земли, внутреннюю благообразную скинию Духа Твоего сотвори мя, во еже взыти на небеса. Иисусе, одеяйся светом, яко ризою, облеки мя обнаженнаго в боготканныя ризы целомудрия и чистоты. Иисусе, простираяй небо, яко кожу, одени мя острупленнаго в снегосветлыя одежды Твоея небесныя красоты. Иисусе, Превечный Боже, добро нам всегда быти под кровом благодати Твоея.


Кондак 7


Хотя открыти сокровенную от века тайну Твоего, Христе, Божества, Отец Твой Небесный паки якоже прежде на Иордане во время Крещения Твоего, Богосыновство Твое возвести и тако гласом из облака бывшим свидетельствова, глаголя: "Сей есть Сын Мой Возлюбленный, Того послушайте". Апостоли же от великаго ужаса крепости своея лишившися, падоша ниц на землю, вопиюще Тебе: Аллилуиа.


Икос 7


Новая видевше и преславная на Фаворе бывшая, Словесе Твоего, Владыко Господи, самовидцы и слуги, и глас Отеческий и шум из облака слышавше, ужасни быша и новым светолитием внезапу освещахуся, друг друга зряху, удивляющеся и к земли падше ниц, Тебе Владыце всяческих поклонишася, похвалы Тебе возсылая таковыя: Иисусе, Образе Пресветлыя Ипостаси Отчия, преобрази мрачное и нечистое житие мое. Иисусе, Славы Отчия Сияние, просвети падшую и во тьму воглубльшуюся душу мою. Иисусе дивный и страшный во славе Божественнаго зрака Твоего, тлением растленный душевный наш зрак обнови. Иисусе тихий, любви полный, неизреченною светлостию Плоти Твоея всю нечистоту плоти моея паче снега убели. Иисусе, Свете Безначальный, во свете Твоем, на Фаворе явленном, Свет покажи нам Отца. Иисусе, Свете неизменный, в незримом Свете Царства Твоего, Свет покажи нам и Духа. Иисусе, Превечный Боже, добро нам всегда быти под кровом благодати Твоея.


Кондак 8


Дивно и странно явистася Тебе Моисей и Илия на Фаворе, Владыко Господи, начертание Божественныя Ипостаси видевше, и глаголаста о вольном страдании Твоем, священнолепно предстояще Тебе. Осенившу же их облаку светлу и гласу с небесе бывшу, взятся Слава Господня от видения ученик Твоих, взяшася же и пророцы во своя места, поюще Тебе: Аллилуиа.


Икос 8


Весь был еси от вышних, Неисчетный Слове Божий, егда пречистая Плоть Твоя преображашася на Фаворе, но и от нижних никакоже отступил еси, егда отшедшим пророком и видению уже скончавшуся, Ты приступил еси к лежащим страха ради на земли Твоим учеником, и рукою коснувся их, глаголал еси им: "востаните, не бойтеся". Ученицы же, возведше очи свои и никогоже видевше, точию Тебе Единаго с ними сущаго, возрадовахуся зело и возблагодариша Бога, поюще Тебе таковая: Иисусе, имеяй глаголы Живота вечнаго, всегда пребуди с нами во странствии земном. Иисусе, насытивый нас зраком Твоего Божества, не остави нас сирых на служении Твоем. Иисусе, прежде Креста Твоего Тайну вольнаго страдания уяснивый, подаждь нам всегда памятовати Твое нас ради истощание. Иисусе, прежде еже умрети, нам славу Твою Показавый, подаждь нам всегда да разумети Твоея Плоти обожение. Иисусе, образе непременный Сущаго, обнови в души моей вожделеннаго зрака Твоего образ и подобие. Иисусе, печате равнообразная Отца, запечатлей во плоти моей неизреченныя доброты Твоея благообразие. Иисусе, Превечный Боже, добро нам всегда быти под кровом благодати Твоея.


Кондак 9


Все естество смятеся, зря Твое преславное на Фаворе Преображение, Христе Спасе: Ангели, незримо предстояще, со страхом и трепетом служаху Тебе, небеса убояшася, подвижеся и трепетна бысть вся земля, видящи славу Господа, "гора Фавор, прежде мрачна и дымна", светлым облаком покрывашеся, "на нейже" пречистии "нозе Твои стоясте", ученицы же Твои, Господи, не терпяще зрети нестерпимаго зрака Твоего, повергоша себе долу на землю, лица покрывающе, дондеже Ты Сам, видению скончавшуся, воздвигл еси я, Тебе вопиющих: Аллилуиа.


Икос 9


Витии суемудреннии, благодатиею непросвещеннии, не могут разумети Твоего преславнаго Преображения таинства, Господи. Сего ради, егда со ученики сходил еси с горы, дню возсиявати начинающу, Ты заповедал еси другом Твоим, да никомуже поведят видения бывшаго, дондеже по приятии страдания и смерти воскреснеши в третий день от гроба. И тии умолчаша, и никомуже возвестиша в тыя дни ничесоже от тех, яже видеша и слышаша, обаче точию в сердце своем вопияху Тебе сице: Иисусе, во всего Адама оболкийся, очерневшее древле естество человече просвети. Иисусе, во облаце, огни и мраце носимый, Твоею светлостию весь мрак душевный в нас потреби. Иисусе, сиянием Божественного шума Апостолы Твоя усладивый, услаждай нас всегда глаголами Божественного Твоего откровения. Иисусе, росодательным облаком ученики Твои Просветивый, просвещай нас всегда зарями преславнаго Твоего Преображения. Иисусе, пречистыми ногами Твоими гору Фаворскую освятивый, направи нозе наша на присное служение Тебе. Иисусе, с неповинными руками на гору Твою восходити повелевый, возбуди руце наши на молитвенное воздеяние горе. Иисусе, Превечный Боже, добро нам всегда быти под кровом благодати Твоея.


Кондак 10


Спасти хотяй мир, на Фаворе преобразился еси нас ради, Господи, да сотвориши ны достойны уготованныя избранным Твоим небесныя славы и да преобразиши тело смирения нашего, яко быти ему сообразну телу Славы Твоея во общее всех воскресение и в безконечном Твоем Царствии, еже уготовал еси от сложения мира любящим Тя, в немже да сподобиши и нас, яко Моисея и Илию на Фаворе лицем к лицу лицезрети Тя и со всеми святыми воспевати Тебе вечную песнь: Аллилуиа.


Икос 10


Царю Превечный! Вся твориши нашего ради спасения. Мене ради восприял еси плоть пречистую от Пресвятыя Девы Марии и в зраце раба пришел еси в мир сей. Такожде и преобразился еси на святей горе, не Себе угождая, не требует бо Свет просвещения, но нас ради осужденных, да нашу просветиши тьму и нас, во тьме седящих и среди сени смертныя, от сынов гнева в возлюбленныя чада Твоя да преобразиши. Сего ради благодарственно вопием Тебе таковая: Иисусе, зрак рабий на Фаворе преобразивый, да нас из рабов греха чада Божия сотвориши. Иисусе, даже до плоти Себе истощивый, да наше падшее естество с Собою преобразиши. Иисусе, неизреченное благолепие Царства Твоего на Фаворе явивый, радость, мир и правду о Дусе Святе в нас утверди. Иисусе, Божественным блистанием плоти Твоея всю тварь обоживый, обожением плоти во Втором пришествии Твоем нас обнови. Иисусе, огнь Божества Твоего на Фаворе явивый, огнем невещественным грехи моя попали. Иисусе, сладчайшею беседою Твоею тамо ученики Своя напитавый, Святыми Тайнами Твоими гладную душу мою освяти. Иисусе, Превечный Боже, добро нам всегда быти под кровом благодати Твоея.


Кондак 11


Пение всеумиленное приношу Ти недостойный, Твоего Преображения совершая светлое торжество и вопию Тебе: высоту небеснаго жития и славы присносущныя Божественное сияние даруй ныне рабом Твоим, сердцем же чистым сподоби нас мысленно взыти на гору святую Твою, видети разумными очесы преславное Преображение Твое, да светло воспоем Тебе: Аллилуиа.


Икос 11


Свет Сый Неприступен и Света Податель, Иисусе, Безначальный и Присносущный Свете, Свет Твой в мир принесл еси, егда с пречистою плотию Твоею вшел еси на гору Фаворскую и тамо Несозданный и Божественный Свет явил еси учеником Твоим, Славы Отчия показуя образ. Сего Света Твоего преестественнаго причастники быти желающе, из глубины души вопием Тебе таковая: Иисусе Христе Свете Истинный, помыслы добрыми душу мою живи во вся дни земнаго странствия моего. Иисусе Царю, Свете Безначальный, угасший светильник души моея паки возжги до дне скончания моего. Иисусе, Свете тихий, живот даяй, свет и живот низпосли души моей в час ужасный смерти моея. Иисусе, Свете Святый, светяй и горяй, из огня неугасимаго и тьмы кромешныя изхити мя тогда. Иисусе, Сладчайший и Святейший Свете, к свету небеснаго чертога Твоего среди горьких мытарств воздушных проведи мя. Иисусе, солнца всякого Светлейший Свете, во светлостях святых Твоих в невечернем дни Царствия Твоего просвети мя. Иисусе, Превечный Боже, добро нам всегда быти под кровом благодати Твоея.


Кондак 12


Благодать Твою подаждь мне, Иисусе Боже мой, юже на Фаворе даровал еси избранным учеником Твоим Петру, Иоанну и Иакову, и приими нас, якоже оных, да облеченнии силою Твоею свыше и Духом Святым просвещеннии, сердце же чисто имущи и дух обновлен, взыдем на мысленный Фавор, восходяще от силы в силу, наипаче же в посте и молитве подвизающеся, в целомудрии же и в чистоте пребывающе, и тамо да воспоем Тебе: Аллилуиа.


Икос 12


Поюще пречистыя Плоти Твоея преславное Преображение, прославляем Божественную Славу Твою на Фаворе явленную, поклоняемся присносущней Силе Твоей и Божеству, Егоже зарю малую тамо обнажил еси, Христе, и веруем с Петром, яко Ты еси воистину Христос, Сын Бога Живаго, пришедый в мир грешныя спасти, тем же и вопием с ним из глубины души: добро нам зде быти с Тобою. Сего ради не посрами нас в Тя право верующих, обаче немощных и плотию обложенных и покрый нас Светом Богосиянныя Плоти Твоея, с любовию зовущих Тебе сице: Иисусе, Солнце Незаходимое, на Фаворе возшедшее. Твоим Божественным сиянием осияй мя, Иисусе, Свете несокрываемый в Преображении явленный, Твоея благодати причащением согрей мя. Иисусе, Храме Предвечный Небеснаго Иерусалима, в скинию Божию с человеки всели мя. Иисусе, Цвете Благовонный Рая Всесвятаго, небесными ароматами святыни и чистоты облагоухай мя. Иисусе, Огню чистительный, небо и землю от всякия скверны очистити хотяй, от скверны плоти и духа очисти мя. Иисусе, Каменю вседрагий, Горний Сион вместо солнца красотою Божественною освещати имеяй, от зрения иныя красоты паче Тебе избави мя. Иисусе, Превечный Боже, добро нам всегда быти под кровом благодати Твоея.


Кондак 13


О, Пресладкий и Всещедрый Иисусе, на Фаворе Божественною славою просиявый! Приими ныне малое моление сие наше, и якоже приял еси от ученик Твоих на святей горе поклонение, тако и нас сподоби преславному Преображению Твоему поклонитися, во свете добрых дел сияюще, да просветится Тобою тьма греховная в нас живущая, и да явимся достойны быти наследники безконечнаго Царствия Твоего на небеси, идеже со всеми святыми сподоби и нам воспевати Тебе: Аллилуиа. (Трижды).


(Этот кондак читается трижды, затем икос 1 и кондак 1)




Молитва Преображению Господню


Господи Иисусе Христе, Боже наш, во Свете живый неприступнем, Сияние сый Славы Отчия и Образ Ипостаси Его! Егда прииде исполнение времен, Ты за милосердие неизреченное к падшему роду человеческому Себе умалил еси, зрак раба приял еси, смирил еси Себе, послушлив бысть даже до смерти. Обаче прежде Креста и вольныя страсти Твоея на горе Фаворстей преобразился еси в Божественней Славе Своей пред святыми Твоими ученики и Апостолы, мало скрыв плоти восприятие, да егда Тя узрят распинаема, и смерти предаваема, уразумеют убо страдание Твое вольное и Божество. Даруй же и нам всем, пречистыя Плоти Твоея Преображение празднующим, чистым сердцем и нескверными умы взыти на Святую гору Твою, в селения святыя славы Твоея, идеже глас чист празднующих, глас несказаннаго радования, да тамо купно с ними лицем к лицу узрим Славу Твою в невечернем дни Царствия Твоего, и со всеми святыми, от века Тебе благоугодившими прославим Всесвятое имя Твое со Безначальным Твоим Отцем и Пресвятым и Благим и Животворящим Твоим Духом ныне и присно и во веки веков.



Тропарь Преображению Господню


Тропарь, глас 4 (Предпразднству)


Христово преображение предусрящем, светло торжествующе предпразднственная, вернии, и возопиим: приспе день Божественнаго веселия: восходит на гору Фаворскую Владыка, Божества Своего облистати красоту.


Тропарь, глас 7


Преобразился еси на горе, Христе Боже, показавый учеником Твоим славу Твою, якоже можаху; да возсияет и нам грешным свет Твой присносущный, молитвами, Богородицы, Светодавче, слава Тебе.


Кондак, глас 7


На горе преобразился еси, и якоже вмещаху ученицы Твои славу Твою, Христе Боже, видеша: да егда Тя узрят распинаема, страдание убо уразумеют вольное, мирове же проповедят яко Ты еси воистину Отчее сияние.


Величание


Величаем Тя, Жизнодавче Христе, и почитаем пречистыя плоти Твоея преславное преображение.[/spoiler]

[Раб божий Константин]

Акафист во славу Светоноснаго Преображения Христа Спасителя.
[spoiler]Кондак 1
Возбранный и Единый Бога и человеков Ходатаю, истинный Еммануиле Христе Иисусе: избранным свидетелем, Тебе на Фаворе представшим, явил еси в Тебе всельшееся исполнение Божества телесне, блистание Воскресения Твоего предваряя, и еже на престоле славы в вышних седение прежде Крестнаго поругания извествуя: купно же и светлость первую показуя естества человеча, во Адаме омраченнаго и умерщвленнаго, в Тебе же паки светозаримаго и животворимаго. Темже кланяющеся славе Твоего всесветлаго преображения, хвалебное пение приносим моляще:
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Икос 1
Ангели светозарнии, необоримым кругом обстоящии равночестный свет трисияннаго Божества, гласом велиим зело, восхвалиша Содетеля, егда сотворены быша звезды, в них же свет Божества невещественный, вещественными возоблиста лучами: тойжде убо свет Божества и мы ныне зряще, во плоти лица Твоего, Христе, и во одежде риз Твоих вещественне нам сияющ, гласом хваления вопием Ти:
Христе Иисусе, в Божественнем естестве Твоем свете истинный, в нем же тьмы несть ни единыя;
Христе, Свете ипостасный, в сиянии Единосущныя Троицы нераздельный и неслиянный;
Христе, Свете несозданный, от присносущнаго Отца Светов, яко Бог истинный от Бога истиннаго возсиявый.
Христе, Света Создателю, и в сотворении мира, яко некое основание, свет Твой положивый;
Христе, Свете омраченных, в мир сей пришедый и во плоти человечестей просиявый.
Христе, Свете истинный, просвещаяй Собою и всякаго человека грядущаго в мир: да знаменуется и на нас свет лица Твоего пребожественный.
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 2
Видяще чудо преславное светоноснаго Твоего, Христе, Преображения: лице Твое, аки солнце лучи испущающее, и одеяние Твое бело блистающееся, закона же и пророков начальники Тебе, яко Господу небесе и земли, раболепно предстоящия, апостолов же верховныя пред Тобою ниц падшия, воистинну Тя Бога явльшагося во плоти познаваем и благоговейно Тебе вопием: Аллилуия.

Икос 2
Разум отверзая возлюбленным, Христе, учеником Твоим, вопрошал еси я: "Кого Мя глаголют онии быти"? И слышав от уст блаженнаго Симона, яко истиннаго Тя Христа, Сына Божия исповедают, сие исповедание, яко от Отца Небеснаго откровенное свидетельствовал еси: по днех же шести не словесы точию уверяя, но и вещию показуя, явил еси Божественное естество Твое и спасительное в мир пришествие, гласу Отца с небес свидетельствующу, яко Сын еси Того возлюбленный. Сию убо в Тя веру исповедающе, величаем Тя сице:
Христе Иисусе, Иже от начала Сущий, яко Сам о Себе рекл еси.
Христе, Сыне Давидов, и сыне Авраамль: обаче прежде Авраама бывый, и от Давида в Дусе Господом пронареченный.
Христе Иисусе, от Девы в последняя зачатый: обаче Адама древнейший и от Безначальнаго прежде всея твари рожденный.
Христе, Сыне Бога живаго, пришедый в мир грешныя спасти.
Христе, образе Бога невидимаго, Того видима в Себе явивый.
Христе Иисусе, отверзи нам ум, разумети Тя не яко пророка, ниже точию учителя, но яко Истиннаго Сына Божия и миру Спасителя.
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 3
Силу и пришествие Христово спасительное сказаху Богоглаголивые апостоли не ухищренным баснем последовавше, но самовидцы бывше, величествия онаго на горе святе с Ним суще, гласу пришедшу к Нему от велелепныя Славы: и яже слышаша и еже видеша: и мы убо свидетельству онех веровавше и яко Божию силу и Божию премудрость - Христа от них проповедана исповедающе, яко равночестному со Отцем и Святым Духом вопием Ему: Аллилуия.

Икос 3
Имеяй в Себе живот вечный, воистинну живота Начальник явился еси, Христе, от небытия в бытие естество всякое приведый и тое сохраняяй: сего ради и на Фаворе, посреди живых и престальшихся поставил еси Себе Источника жизни и безсмертиия Тя показуя. Темже Тя яко Творца и Вседержителя ведуще, воспеваем:
Христе, Слово животное и зиждительное, в Божественном естестве Твоем исперва бывшее.
Христе, Премудросте ипостасная, вся премудрости Твоея на всякой твари начертавый.
Христе, древо жизни райское, первозданному человеку живот вечный в Себе плодноносившее.
Христе, хлебе истинный животный, и отпадшему от жизни райския Самаго Себе вдаяй в пищу и питие Небесное.
Христе, Жизнодавче, причастием плоти и крови Твоих животворящих к жизни, воистинну Божественней, приобщи ны и безсмертие нам даруй.
Христе, *** (в оригинале пропущен хейретизм)
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 4
Бурею Богопротивления приснодышущий и тою первее себе с небесе низринувший, иже искони человекоубийца, хотя и земнороднаго от рая изринути, лукавнующи увери сего богосоделатися воли Божией преслушанием, и тако умертви его. Ты же, Христе хотяй воистинну земнороднаго обожити, и умерша того в Себе воскресити, прежде даже Воскресения Твоего сие уверил еси, плотию возсияв боголепно на Фаворе; да от спасаемых Тобою выну слышиши: Аллилуия.

Икос 4
Слышаху самовидцы Твоего, Христе, Богосветлаго на горе изменения, глас Отечь с небесе извествующь, яко воистинну Сын еси Божий возлюбленный, Ему же подобает послушание, яко присно в воли Отца пребывающему, и тако непослушания ради погибающия спасающему. Сему убо гласу Божию последующе, и юже в нем силу спасения разумеюще взываем Ти:
Христе, Сыне Божий, николиже воли иныя имевый, разве воли Отчия, яко искони во Отце пребываяй.
Христе, Боже истинный, закон воли Твоея Божественныя, в закон бытия всякия твари положивый.
Христе, Промыслителю благий и Царю всякия земныя твари, закон воли Твоея святый в сохранение вечныя жизни райския уставивый.
Христе, Спасителю мира, и ко искуплению приемля падшаго, тойжде закон воли Божия соблюдый и в послушание тому Себе представивый.
Христе Иисусе, даже до смерти крестныя в волю Отчую Себе предавый, и всем послушающим Тебе, виновен спасения бывый.
Христе, мира управителю, Его же и ветер и море послушают и дуси: управи волю нашу пленяти всяк разум в Твое послушание.
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 5
Богосиянныя плоти Твоея пречудныя видение и облака светла осенение и горняго мира жителей с Тобою собеседование, гласа же Божия с небесе слышание, аки рай истинный яви Собою на Фаворе в часе временне. И сим воистинну показал еси, Христе, первое естества благородие, и второе онаго содетельство и обновление, да Тебе, яко перваго и втораго мира Создателю, в рабии зраце пришедшему в Боголепней же славе ныне явльшемуся, гласы райскими вопием: Аллилуия.

Икос 5
Видев всея твари Перворожденный во главу тварей земных поставленнаго, волею с высоты спадша и люте страждуща и всеми образы смотряя, еже паки спасти оскудевшее от падежа онаго, воли Божия преслушанием бывшаго, входит в мир сей и Свою волю представляет в послушание. Обаче иский, да не нуждею будет спасение, якоже и перваго рая блаженство, но благим произволением спасаемаго, прежде даже пришествия Своего о Себе возвещает и яко Спасителю мира веровати Себе зовет. Сего ради и в днешний день спасения, пред очию богозванных свидетелей плотию преображается, да купно со смирение Его видяше и славу Его, вси жаждущии оправдания, своего Искупителя в Нем познают, и сице его исповедают:
Христе, Спасителю мира, образ Твой в себе растлившаго, паки к Боговидному жительству возвращаяй и от работы истления освобождаяй.
Христе Иисусе, даяй свободу истинную, и сего ради не нуждею, но волею в райское жительство отпадшия призываяй.
Христе Иисусе, сего ради вольнаго к Тебе прихождения свет превечный в спасение мира прежде исполнения времен спасаемым открываяй.
Христе, Боже премудрый и всемогущий, образ спасения в восприятии естества падших паче разума изъискавый.
Христе Иисусе, многими образы и пророчествы годину пришествия Твоего и вольную страсть и спасительное Воскресение в приуготовление рода человеческаго предвозвестивый.,
Христе, с небесе сшедый, нашего ради спасения, даждь нам познати в Тебе истиннаго Спасителя нашего.
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 6
Проповедники Твоего спасительнаго в мир пришествия уготовлял еси, Христе, во вся роды, древле убо благоугодившия Тебе патриархи, таже пророки, последи же ученики и апостолы. Темже и на Фаворе вкупе предсташа Ти: ученицы убо яко от живущих на земли, Моисей же яко от умерших, и Илия Фесвитянин яко от небесных: да небо и земля и преисподняя проповедание о Тебе согласно услышат, и яко единому и томужде Божественному Спасителю всех вкупе взывают: Аллилуия.

Икос 6
Возсияв паче лучей солнечных Божественною Твоею во плоти славою, Христе, и омрачив славу боговидца Моисея и славу Илии небошественника, яве показал еси, яко неси мнимый от людей пророк, но Господь еси пророков, Сам раздаяй славу тем, и во плоти пришедый да светом Твоего пришествия на земли озарившеся, яко солнце возсияют в Царствии Отца Небеснаго вси земнороднии, елицы славити тя навыкоша сице:
Христе Иисусе, солнце правды истинное, прежде всех век во Отце Светов сиявшее.
Христе, премудросте ипостасная, свет Божественнаго разума Твоего на всякую тварь излиявшая.
Христе, свете миру, во откровение всех языков на землю пришедый и телесне Себе явивый.
Христе, свете воплощенный, все естество Адамово очерневшее, преображся облистати паки сотворивый, и в Твоего Божества славу же и светлость е претворивый.
Христе Иисусе, разделивый между светом и между тьмою и из тьмы нас призвавый в Твой чудный свет.
Христе Иисусе, возсиявый в сердцах наших Твоего богоразумия нетленный свет, да яко во дни благообразно ходяще путем заповедей Твоих, достигнем в жизни вечную.
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 7
Хотяй скончати спасение рода человеческаго вольною страстию в Иерусалиме, многажды предвозвещал еси ближним учеником Твоим, о предлежащих Тебе поруганиях и смерти крестней, вкупе же и о всеславном Твоем воскресении: и днесь глаголеши с небожители спасительный исход Твой, да не соблазнятся о Тебе самовидцы величия Твоего, егда Тя узрят распинаема, но в свете Твоего Преображения да видят очима веры и славу Воскресения, да и на кресте висящу яко Богу Тебе, всех спасающему воспевати не престанут: Аллилуия.

Икос 7
Новое небо и новую землю пришедый устроити, чудная и изрядная паче первых содеваеши: не словом бо от не сущих во еже быти вся приводиши, но перстное и растленное в Себе приемлеши, и преобразив - обожаеши: просветив же и самыя ризы Твоя, показуеши, якое вещество бренное на лучшее возводиши. Сего ради душами и телесы прославляюще Тя: яко вся обновившему вопием Ти:
Христе Иисусе, мира Зиждителю, ветхаго человека в новую тварь созидаяй и сего паки яко царя твари в Себе поставляяй.
Христе Иисусе, истлевшее естество рода нашего в Себе обновивый и началообразную доброту онаго показавый.
Христе, Человече Небесный, в человека перстнаго оболкийся, да якоже облекохомся во образ перстнаго, облечемся и во образ небеснаго.
Христе Иисусе, преобразивый в Себе тело смирения нашего, яко быти сему сообразну телу славы Твоея.
Христе Иисусе, изменением естества человеча, вещество всякия твари обновляя и тем новое небо и новую землю в жилище новаго человека уготовляяй.
Христе, обновляяй всяческая: даждь нам облещися в новаго человека, по Богу созданнаго, да во обновлении жизни ходити начнем, и да люди обновления воистинну будем.
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 8
Странное и непостижимое ныне зрится видение: умаленный паче всех сынов человеческих, светом Божества во плоти Своей сияет и Сын Божий возлюбленный от Отца светов именуется: Моисей и Илия, в небесней славе явльшиеся, яко раби Тому предстоят: о поругании и смерти крестней с Ним собеседуют, вкупе же и Воскресение славят, егоже зарею предвозоблиста и всесветлое Преображение, и от сего в Сыне Человечестем Сына Божия яве познавающе, вопием Ему: Аллилуия.

Икос 8
Весь землен был еси, Бог - Слово сый, сему Божеству, смесив человечество во ипостаси Своей, юже во двою существу Моисей же и Илия видеша на Фаворе и во всего Адама облекся, Христе, очерневшее просветил еси естество, и весь по нам обнищав, перстнаго от самаго единения и общения богосоделал еси. Сего ради Бога и человека Тя познавающе и радостию исполняеми вопием Ти:
Христе, Сыне Отца Небеснаго, от Него на землю посланный и от Девы неизреченно рождаемый.
Христе, Еммануиле истинный, Бога и человека в единой ипостаси Своей совокупивый.
Христе, Боже истинный, на земли во плоти явивыйся и с человеки поживый.
Христе Иисусе, в Нем же всякое исполнение Божества обита телесне.
Христе Иисусе, Делателя - отца Твоего Лозо истинная, во Твое общение естество наше восприявый.
Христе, Сыне Божий, с человеки соединивыйся и от Бога не разлучивыйся: даждь нас с Тобою и в Тебе со Отцем Твоим едино быти.
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 9
Всякая тварь, откровения сынов Божиих чаящая, яко свободитися имущая от работы истления в свободу чад Божиих, светло днесь просиявает во плоти Спасителя мира. Восприим бо плоть человечу, от персти созданную и в тление впадшую, воистинну и самое перстное возводит к начальней и нетленней доброте, вся нова тварь, яко истинное слово творческое и Зиждитель Бог, Ему же вся тварь, служаще и ликовствующе присно вопиет: Аллилуия.

Икос 9
Витийство человек душевных, яже Духа Божия не приемлющих, Твоего величества и премудрости не возможет вещати: яко бо держай живот и смертию владый, представляеши на Фаворе Моисея и Илию, свидетельтвующия Твое Божество, вкупе же и зрак раба приемлеши и смиряеши Себе даже до смерти крестныя. Мы же яко духовнии и вся возстязующии, Божию силу и Божию премудрость Тя, Христе, проповедующе исповедуем:
Христе Иисусе, Имже небо и земля совокупишася: во единой бо ипостаси Твоей Бог на землю сниде и человек на небеса взыде.
Христе Иисусе, о Нем же всяческая, яже на небесех и яже на земли, возславление приемлют.
Христе Иисусе, весь мир в Себе Богови примиряяй во едином теле плотию и Креста Твоего кровию.
Христе Иисусе, Агнче Божий, непорочный и Пречистый, вкупе же и Архиерею истинный и превыше небес превознесенный.
Христе Иисусе, Сам жертву приемляй, Сам и жертва раздаваемая сый, приносяй же вкупе и приносимый.
Христе, Сыне Божий вочеловечивыйся и человеки в Себе обоживый: да будет воистинну Тобою Сам Бог действуяй в нас, еже хотети и еже деяти.
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 10
Спастися хотяй всем человкеком, не словесы токмо, Божественный путь спасения показуеши, но в самой вещи недуги наша на Себе приемлеши и изглаждаеши: и сего ради Самую пречистую Плоть Твою в снедь подаеши и честную Кровь Твою в питие неисчерпаемое проливаеши, да ядущий Твою Плоть и пиющий Твою Кровь в Тебе преискреннее пребывает, яко да воистинну плоть от плоти Твоея и кость от костей Твоих будут, и тако Божественнаго естества причастившеся, всякия тли свободятся, и яко солнце возсияют в царствии Отца Небеснаго, Его же образ показал еси в Плоти Твоей на Фаворе, и просветившеся в славе вечнаго жития воспевати Тебе непрестанно: Аллилуия.

Икос 10
Царство Твое, Христе Боже, царство всех веков и владычество Твое во всяком роде и роде. На небеси и на земли, дадеся всяка власть Тебе, ключи ада и смерти имаши: сего ради о имени Твоем всяко колено поклонится небесных и земных и преисподних, якоже явил еси на горе Фаворстей, идеже предсташа Ти, от земли убо апостоли, яко с небесе же Илия, Моисей же от мертвых. Сия убо исповедающе, Тебе яко вселенныя Царю, на колену припадающе умиленно величаем Тя:
Христе, Царю мира, Твоею всемощною десницею в бытие приведеннаго и законом воли Твоея во едино Царство Божие связуемаго.
Христе, Царю Небесный, за человеколюбие на земли явивыйся, вкупе же и небес не отлучивыйся.
Христе Иисусе, в плотстем пришествии Твоем, яко истинный Царь вселенныя стихиями мира и естества уставами и духами невидимыми повелевавый.
Христе Иисусе, и самою Твоею смертию, яко истинный живота и смерти Владыка, вечную смерть поправый и имущаго державу смерти упразднивый.
Христе Иисусе, не от мира сего сущее царство Твое, царством мира сего соделавый и на веки в нем воцаритися грядый.
Христе Иисусе, и зде нас сподоби видети царство Твое пришедшее в силе и во веки, на земли живых, с Тобою воцаритися достойны сотвори ны.
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 11
Пению и песни новой во обновлении царства Твоего никтоже можаше навыкнути, токмо разве искуплени от земли и к Тебе яко Агницу Божию, последовати хотящии: обаче и мы грешнии, аще и недостойнии, но водою и духом к пакибытию порожденнии и в новую тварь о Тебе соделавшиеся, видяше в преображении плоти Твоея славу Царствия Твоего грядущаго, яко онии народи мнози, иже зряху славу воцарения Твоего, гласом велиим дерзаем прилежно славити Тя песнию: Аллилуия.

Икос 11
Светоноснаго преображения Твоего славу видеша избраннии Твои на горе святей: и вси людие в плотстем пришествии Твоем видеша славу Твою яко единороднаго от Отца. Сию убо славу и мы по словеси Твоему видети чающе, яко Господа Славы величаем Тя сице:
Христе Иисусе, присносущныя Славы Отчия, соприсносущное и ипостасное сияние прежде бытия мира славу премирную у Отца Твоего имевый.
Христе Иисусе, Егоже плотию оболкшеся, Ангели небесныя воспеша, и вси людие в Бозе прославиша.
Христе Иисусе, в светозарном преображении плоти Твоея - Славу Божества Твоего явивый, и тою в преславном воскресении Твоем изряднее возоблиставый.
Христе Иисусе, на небеса вознесением и одесную Отца седением равночестную Тому славу во плоти приемый.
Христе Иисусе, с силою и славою многою паки имый приити, и на престоле Славы Царствия Твоего сести имый на веки.
Христе Иисусе, сподоби и нас видети славу Твою, якоже о сем молился еси в час смертный.
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 12
Благодать воистинну явися Божия спасительная всем человеком, егда Бог - Слово плоть бысть и вселися в ны, исполнь благодати и истины, яко да и мы от исполнения Его приемлем все благодать воз благодать. Тем же, Христос, не ученьми токмо род человеческий просвети, но самаго Божества Своего вселением, в храмину естества человеческаго, из тления в нетлени претвори и воистинну обожи е: Сего ради и плотию на Фаворе сияет божественне, яко истинный Совершитель спасения, Емуже единому достоит от спасаемых воспеватися: Аллилуия.

Икос 12
Поюще Богосветлое Твое, Христе, преображение, вкупе и нашего естества земнороднаго пренебесную торжествуем славу: в Тебе бо возсияет Боголепно на Фаворе во образ будущия незаходимыя Славы, юже очима веры и надежды зряще и сердцем о нем услаждающеся, яко Начальника славы нашея восхваляем Тя сице:
Христе Иисусе, в Нем же избрани быхом прежде сложения мира и в вечную славу призвани быхом.
Христе Иисусе, при создании мира образом Божиим почтый земнороднаго и яко царя твари в раи сладости того поставивый.
Христе Иисусе, и по омрачении образа Божия в естестве земнородный в той же образ преобразуяй от славы в славу.
Христе Иисусе, еще в житии сем и в немощней плоти сущих, равноангельною святостию прославляяй и многоразличных Божественныя благодати Твоея дарований сподобляяй.
Христе Иисусе, даже и по смерти самыя кости праведных нетлением сохраняяй, и силою Воскресения Твоего всеславнаго в них пребываяй и чудодействуяй.
Христе Иисусе, в Тебе сораспявшихся и спогребшихся с Тобою, совозстави нас и спрослави, Спасе, во царствии Твоем.
Христе, Свете истинный, Сыне Отца Светов возлюбленный, сыны Света покажи и нас в Тебе преображением.

Кондак 13
О Тихий Свете святыя славы безсмертнаго Отца Небеснаго, Иисусе Христе! Истинный Сыне Божий и истинный Сыне Человеческий, приискренним Божественнаго естества Твоего соединением, очистивый и освятивый естество земнородных, и светом Божества Твоего преобразивый е и обоживый, таже в таинстве Тела и Крови Твоих, всего Себе вдаяй в залог вечныя и блаженныя жизни. Сподоби нас истинною верою и благою волею, восприяти вся яже ко спасению, дарованная от Тебе, да просветившеся и обновившеся в жизни сей с Тобою соединением, истее Тебе причастимся, в Невечернем дни Царствия Твоего, идеже во свете лица Твоего и в славе вечней непрестанными гласы со Ангелы и всеми святыми воспевати в Троице славимому Богу имамы: Аллилуия, Аллилуия, Аллилуия.
Этот Кондак читается трижды. Затем Икос 1 и Кондак 1.

Молитва ко Господу и Спасителю Мира Иисусу Христу, Преславнаго Ради Его Преображения

Премирный, Пребезначальный и Незаходимый Свете от Самосущнаго и присносущнаго Отца светов, безлетное и богоестественное имый бытие, яко Бог истинный от Бога истиннаго, в сиянии Единосущныя Троицы, неслиянный и нераздельный, единый всякаго в мире сущаго света источниче, во устроении всея твари зримый изряднохудожниче, паче же тварь умную и словесную образом Твоим запечатлевый, в последняя же времена возображения ради сего образа Твоего помраченнаго, долу с небесе сшедый и самый образ перстнаго приемый, да ипостасным соединением в Тебе сугубаго естества омраченное просветиши, тленное - очистиши и преобразиши, смертию ятое паки в Тебе рождением в бытие вечное новосотвориши, великодаровитый, премудрый и Всемогущий Спасителю наш, Господи Иисусе Христе!
Сего ради и плотию возоблиста еси на Фаворе пред Богозванными Твоими свидетели, да вкупе покажеши: и Боголепное Твое вочеловечение, аще и в рабии зраце бывшее: и всемощное Твое и животворящее Воскресение, аще и поруганием смертным предваряемое: таже и преславное Твое в мир Горний с плотию Вознесение, отонудуже имать быти и велелепнейшее Твое паки пришествие: сим же паки и светлость первую и Богоподобную естества нашего смиреннаго показуеши, и благодатное онаго в Тебе нас ради преображением, яко предначатие и залог нетленныя нам немерцающия славы в веце грядущем, во Царствии Отца Небеснаго, еже пришел еси дати, паче же рещи во еже жити нам и в неже не нуждею и силою привлачаеши, но благою волею и светлым разумением призываеши, якоже и в первом раи сладости сия быша. Вся убо сия верою приемлюще, и усты исповедающе, молим Тя и просим пред лицем Славы Твоея, нас ради преобразивыйся, Спасителю наш; во еже не тщетным быти в нас всем твоим спасительным дарованиям, просвети ум наш светом разума святаго Твоего Евангелия, да преобразуемся обновлением ума нашего, дондеже конечно вселится в нас ум Твой - Христов, яко же к тому не мыслити нам яже человеческая, но яже Божеская.
Сердце чисто созижди в нас, да узрим явственнее Тебе, истиннаго Бога нашего, и Животворящим светом лица Твоего, привлецы нашу богоборствующую волю, якоже цветы земныя по закону воли Твоея, к животворному свету солнечному обращение имут. Сам бо живяй и действуяй в нас да отложивше ветхаго человека и в Тебе яко в новаго человека облекшеся, во обновлении жизни ходити начнем, и тако по вся дни обновляющеся по внутреннему человеку и Славу Твою откровенным лицем взирающе, в той же образ преобразуемся, от славы в славу, дондеже достигнем вси и кийждо от нас един в мужа совершенна, в меру возраста исполнения Твоего Христова.
И понеже благоизволил еси от души словесныя и тела благолепнаго устроити человека, яко да тело служит словесней души, преобрази нас и самое тело смирения нашего, яко же быти сему сообразну Твоему Телу Славы: исцели е от страстей и недугов, укрепи его силы естественныя, огради от пагубнаго действа стихий; паче же преискренним с Тобою соединением во Святей Евхаристии претвори е из земнаго в небесное, из душевнаго - в духовное, да будем воистинну плоть от плоти Твоея и кость от костей Твоих, и тако прославиши Бога, согласно в телесех наших и в душах наших на земли сей, купно душами и телесы прославимся в животе вечном. Всех нас совокупно от единаго Хлеба и Чаши причащающихся, сотвори мыслити о себе, яко уды единаго тела Церкви Твоея, Юже положил еси на земли яко зерно горушное к возрастанию в велие ветвистое древо Царствия Божия, дондеже покрывает всю вселенную. Соедини всех нас единомыслием исповедания спасительныя веры Твоея и друг ко другу о Тебе любовию.
Помози нам благодатию возделовати и хранити Церковь Твою, яко превозданный рай, егоже вдал еси сего ради человеку, и да не одолею Ю врата адова, дондеже покориши вся враги Царствия Твоего под ногами Твоима и возсядеши на престоле Славы Царствия Твоего, в нем же и мы с Тобою возсияти подобно солнцу имамы, зде просветившися предначинательно в Тебе преображением. О, Господи Христе, Царю Небесный! Да будет царствие Твое, не от мира сего сущее, воистинну всего мира царством, и да узрим сие Царствие Твое, пришедшее в силе, зело вскоре. Ей, гряди, Господи Иисусе, и пребуди с нами, якоже обещался еси, до скончания века, и в безконечныя веки веков. Аминь.[/spoiler]

[Раб божий Константин]

Акафист ко святому причащению.
[spoiler]Кондак 1


Избранный Женише душ и сердец, вочеловечением Своим и смертью на Кресте, обручивый Себе на веки весь род человечь, и давый нам в залог Вечныя Жизни Самое Пречистое Тело и Кровь Свою, се по гласу Твоему и аз, недостойный, дерзая прихожду к Божественней Трапезе Твоей и, поражен величием ея, вопию: Иисусе, Боже сердца моего, прииди и соедини мя с Тобою на веки.


Икос 1


Ангела Твоего к провидцу Исаии со углем горящим от Алтаря Небеснаго послал еси, во еже очистити тем устне его, егда видев Тя, седяща на Престоле, о нечистоте своей сокрушашеся: аз же, оскверненный душею и телом, како дерзну приступити ко причащению Божественных Твоих Таин, аще не Ты Сам очистиши мя свыше? Темже из глубины души вопию Ти: Иисусе Всеблагий, коснися огнем благодати Твоея и моих нечистых устен; Иисусе, попали терние моих многих прегрешений. Иисусе, созижди во мне сердце чисто, и обнови во утробе моей дух правый; Иисусе, изведи из темницы страстей бедную душу мою. Иисусе, потреби во мне нечистыя помыслы и злая похотения; Иисусе, направи слабыя стопы моя на путь заповедей Твоих. Иисусе, Боже сердца моего, прииди и соедини мя с Тобою на веки.


Кондак 2


Желанием возжелавый ясти со ученики последнюю пред страданием Твоим Пасху, да преподаси им, среди ея, последний и наибольший залог любви Твоея, прежде двою дню предпослал еси два от них во Иерусалим, да шедше уготовают ю. Поучался отсюду, како и нам подобает благовремение уготовляти себе к снедению нашея Божественныя Пасхи, сиречь Тела и Крови Твоея, благодарственно зову Ти: Аллилуиа.


Икос 2


Иззуй сапоги от ногу твоею, земля бо, на нейже стоиши, свята есть», — рекл еси Моисею из купины горевшия и несгоравшия, от невидимаго во оной присутствия Твоего. Сосуд с Божественным Телом и Кровию Твоею воистину более и святее неопалимыя купины есть: аз же перстен, нечист, продан под грех. Темже со смирением и верою вопию Ти: Иисусе, Всемогущий, совлецы мя ветхаго человека с деньми его; Иисусе, умертви семя тли, во мне гнездящееся. Иисусе, расторгни узы греха, имиже связа мя враг; Иисусе подаждь мне сердце смиренно и дух сокрушен. Иисусе, отжени от мене искушения и соблазны; Иисусе, утверди мя в вере и любви к Тебе. Иисусе, Боже сердца моего, прииди и соедини мя с Тобою на веки.



Кондак 3


Отцы наша ядоша манну в пустыни и умроша; Аз есмь Хлеб, сходяй с Небесе, да аще кто яст от Него, жив будет во веки; и Хлеб, егоже Аз дам, Плоть Моя есть, юже Аз дам за живот мира, — рекл еси иудеом, искавшим видети от Тебе знамение с Небесе, подобное манне Моисеевой. Его же мы слышаще и сбытие предреченнаго видяще, со страхом зовем: Аллилуиа.



Икос 3


Возстав с вечери, якоже повествует святый Иоанн, и препоясався лентием, умыл еси ноги учеником, научая сим, да не приступаем к Божественней трапезе Твоей, неомытии слезами покаяния, во гресех наших. Ощущая превельную нужду сего таинственнаго омовения и скудость слез ожесточеннаго сердца моего, с Петром вопию Ти: Иисусе Преблагий, Сам ми умый не нозе токмо, но и руце и главу; Иисусе, обнажи предо мною бездну душевнаго моего растления. Иисусе, разверзи во мне источник сокрушения сердечнаго; Иисусе, ороси мя каплями Твоего милосердия. Иисусе, обвей мя страхом Суда и мук вечных; Иисусе, возбуди совесть, спящую во мне, и укрепи глас ея. Иисусе, Боже сердца моего, прииди и соедини мя с Тобою на веки.


Кондак 4


Не сей ли есть Иисус, сын Иосифов, Егоже мы знаем отца и Матерь? Како убо глаголет Сей, яко с Небесе снидох? И како может дати нам Плоть Свою ясти, — глаголаху между собою жидове, услышавше о преславном обещании Твоем датися в снедь верным. Не ведуще, по окаменению сердец своих, со смирением веровати и взывати к Тебе: Аллилуиа.


Икос 4


Аще не снесте Плоти Сына Человеческаго и не пиете Крове Его, живота не имате в себе, — провещал еси косным во еже веровати иудеом, еже слово жестоко к слышанию показася и неким от ученик Твоих, неведущим еще Таин Царствия Божия. Мы же, озареннии светом Евангелия и откровенным лицем Божественную славу Твою зряще, с верою и любовию зовем Ти: Иисусе, вся могий величеством силы и державы Твоея; Иисусе, творяй и совершаяй паче, неже можем разумети и помыслити. Иисусе, манну с Неба некогда, в знамение настоящаго Таинства, одождивый; Иисусе, ко преобразованию тогожде, воду из камене источивый. Иисусе, облак крастелей в напитание алчущим в пустыне иудеом пославый; Иисусе, пред очию самих сумнящихся иудеов, пятию хлебы пять тысящ народа насытивый. Иисусе, Боже сердца моего, прииди и соедини мя с Тобою на веки.


Кондак 5


Ядущим на вечери учеником, прием хлеб, благословив и преломив, подал еси им, рек: «Приимите, ядите, сие есть Тело Мое, за вы ломимое, во оставление грехов». Сему божественному и пресладкому гласу внемлюще, со благодарением зовем: Аллилуиа.


Икос 5


Ядый Мою Плоть и пияй Мою Кровь во Мне пребывает и Аз в нем: той имать Живот Вечный и Аз воскрешу его в последний день, сие есть в воскресение живота и блаженства. Сего убо вожделеннаго воскресения в живот ища сподобитися, из глубины души вопию Ти: Иисусе, приблизися ко ищущему соединения с Тобою; Иисусе, вниди во утробу, во вся составы и вся кости моя. Иисусе, буди светом моего помраченнаго ума; Иисусе, наполни Собою ненасытимую всем миром бездну моего сердца. Иисусе, вещай гласом моей совести; Иисусе, движи и управляй моею волею. Иисусе, Боже сердца моего, прииди и соедини мя с Тобою на веки.


Кондак 6


Аминь, аминь, глаголю вам: един от вас предаст Мя, — рекл еси в скорби духа учеником Твоим на вечери. Они же, аще и чисти от замысла предания, егда аз есмь, вопрошаху Тя кийждо, показующе сим глубину своего смиренномудрия. Аз же, что реку Ти, седмижды на день падаяй и изменяяй Тебе? Обаче Ты Сам соблюди мя, да не отпаду в конец, взывая Ти благодарне: Аллилуиа.


Икос 6


Якоже розга не может плода творити о себе, аще не будет на лозе, тако и вы, аще во Мне не пребудете; а иже будет во Мне и Аз в нем, той сотворит плод мног, — сице, тайнодействуя, поучал еси возлюбленныя ученики Твоя на пути в Гефсиманию. Сему убо наставлению внемля, и ведый немощь естества моего без благодати Твоея, прилежно вопию Ти: Иисусе, пренебесный Делателю, Сам мя всади в живоносный вертоград Твой; Иисусе, Лоза истинная, прикрепи мя к Тебе, яко лозу дикую. Иисусе, Кореню неизсыхающий, исполни мя соком Жизни Вечныя; Иисусе, Победителю всякия мертвенности, отреби еже изсохло есть во мне от зноя страстей. Иисусе, красный добротою, украси мя цветами благих чувств и помышлений; Иисусе, богатый в милости, ущедри мя плодами истиннаго покаяния и правды. Иисусе, Боже сердца моего, прииди и соедини мя с Тобою на веки.


Кондак 7


И кто есть предаяй Тя, — вопросившу ученику, иже возлеже на вечери на персех Твоих. Той есть, — отвещал еси, — емуже Аз, омочив в солило, хлеб подам. И омочь хлеб, подал еси Иуде Симонову Искариотскому, подвизая его на покаяние. Он же, ожесточен сый духом злобы, не восхоте разумети гласа любве своего Учителя и Господа. Таковаго жестокосердия да буду избавлен благодатию Твоею, зовя Тя выну: Аллилуиа.


Икос 7


Щадя немощь естества нашего, отвращающагося вкушения плоти человеческия, не яве, но под видом хлеба и вина благоволил еси преподати нам Пречистое Тело и Кровь Твою: премудре и человеколюбие строяй все дело спасения нашего, Иисусе, самая спасительная таинства Твоя приспособляяй к немощи нашего разумения и чувств. Чудяся о таковом снисхождении премудрости Твоя к немощи естества нашего, благодарне славословлю Тя сице: Иисусе, во уверение сумнящихся на святей трапезе многажды вместо хлеба и вина, Самое Тело и Кровь Твою проявивый; Иисусе, достойным служителям алтаря Духа Пресвятаго на освящение Даров сходяща, показавый. Иисусе, вместо недостойных служителей алтаря Ангелов Твоих невидимо, для совершения Божественнаго Таинства, посылаяй; Иисусе, явлением чудес на Святей Трапезе многая из самых зловерных к вере обративый. Иисусе, Боже сердца моего, прииди и соедини мя с Тобою на веки.


Кондак 8


И по хлебе, сиречь по вкушении от поданнаго Тобою хлеба предателю, якоже повествует Святой Иоанн, вниде в онь сатана. Оле, страшныя казни за неверие! Оле, злополучнаго жребия предателя! Еже во спасение долженствоваше быти, в смерть и погибель ему обретеся. Пред таковым убо судом правды Твоея благоговея, со страхом и трепетом зову Ти: Аллилуиа.


Икос 8


Сие творити в Мое воспоминание, рекл еси учеником на вечери, преподав им под видом вина Кровь Свою. Темже убо елижды от Хлеба ядим и чаши пием, смерть Твою возвещаем, по слову святаго Павла. Воспоминая убо ныне страдания Твоя, со умилением зову Ти: Иисусе, в руце врагов Твоих для спасения мира Себе произвольно предавый; Иисусе, легионов Ангелов в защиту Твою явитися не попустивый. Иисусе, невернаго ученика воззрением на него и гласом алектора к покаянию обративый; Иисусе, Каиафе и Пилату, неразумно вопросившим Тя, ответа не давый. Иисусе, со креста распеншим Тя у Отца отпущение грехов просивый; Иисусе, Матери Твоей возлюбленнаго ученика премилосердне усыновивый. Иисусе, Боже сердца моего, прииди и соедини мя с Тобою на веки.


Кондак 9


Иудо, лобзанием ли Сына Человеческаго предаеши? — воззвал еси горце к ученику неверному, егда он прииде со спирою в вертоград Гефсиманский, ища предати Тя лобзанием. Обаче и сей преострый глагол не порази раскаянием души, во зле ожесточенный. Ведый убо непостоянство и моея воли страшуся, да не дам Ти когда и аз, неблагодарный, лобзания Иудина. Ты Сам убо укрепи мя благодатию Твоею, да со благоразумным разбойником выну зову: Аллилуиа.


Икос 9


Отче, да вси едино будут: якоже Ты во Мне и Аз в Тебе, да и тии в Нас едино будут, да и мир веру имет, яко Аз от Тебе изыдох, — тако возгласил еси в последней велицей молитве ко Отцу. Сему пресладкому гласу Твоему последуя и о силе молитвы Твоея дерзая, с верою возглашаю Ти: Иисусе, вся совокупляяй воедино — возсоедини всех нас неразлучне с Тобою и Отцем Твоим; Иисусе, вся примиряяй, даждь да будем все единомысленни в вере и любви к Тебе. Иисусе, не терпяй вражды и разделения, потреби злочестивыя ереси и расколы; Иисусе, всех любяй и милуяй, собери во едино стадо вся заблудшия овцы. Иисусе, мир всем подаваяй, утоли зависть и пререкания между призывающим имя Твое; Иисусе, причащаяй мя Самого Тела и Крови Твоея, да буду воистину плоть от плоти Твоея и кость от костей Твоих. Иисусе, Боже сердца моего, прииди и соедини мя с Тобою на веки.


Кондак 10


На вечери в Кане Галилейстей, воду в вино претворив, первое сим знамение Божественныя силы Твоея показал еси. Отходя же на крест, яко Жених душ, последнее чудо любви верующим в Тя явил еси, претворив хлеб в Тело Твое и вино в Кровь Твою, имже насыщаяся и аз в Живот Вечный, благодарне зову Ти: Аллилуиа.


Икос 10


В день Воскресения Твоего, двема от ученик Твоих спутешествуя во образе странника во Еммаус, поучал еси их о тайне страданий Твоих: онемаже держастеся очи, да Тя не познаста, аще и сердце их горя бе в них от сладости словес Твоих. Егда же преклонився на моление их, вшел еси с ними облещи, и благословив хлеб, подал еси им: абие отверзостеся има очи, да Тя познаста. Подобяся сим учеником, дерзая и аз со смирением вознести к Тебе сицевый глас: Иисусе, долготерпеливый, не остави и мене единаго на пути жизни за скудость веры моея; Иисусе, научи мя, якоже и онех, разумети пророчествия о Тебе и тайну благодатнаго соединения с Тобою. Иисусе, согрей и воспламени, якоже и онех учеников, и мое хладное сердце; Иисусе преблагий, облязи и со мною, яко уже преклонился есть к вечеру день моея жизни. Иисусе, даждь ми познати Тя воистину в настоящем преломлении таинственнаго Хлеба и в питии от Чаши; Иисусе, сотвори, да и аз, познав силу любве Твоея, буду провозвестником оныя для братий моих. Иисусе, Боже сердца моего, прииди и соедини мя с Тобою на веки.


Кондак 11


Побеждающему обещал еси дати ясти от Древа Животнаго, еже есть посреди Рая Божия, и от манны сокровенныя. К сему вкушению на Небеси, да будет ми приуготовлением на земли причащение Тела и Крови Твоея, к немуже аз, недостойный, ныне приступая, зову: Аллилуиа.


Икос 11


Ядый и пияй недостойно суд себе яст и пиет, не разсуждая Тела и Крове Господни, — вразумляет приступающих ко причащению небошественный Павел. Темже и аз страшуся и трепещу своего недостоинства, но да не надолзе удалялся Твоего общения, от мысленнаго волка звероуловлен буду, прихожду к Тебе со гласом таковым: Иисусе, приими мя, якоже приял еси мытаря, блудницу и разбойника; Иисусе, не возгнушайся внити под кров души моея, аще и весь пуст и пался есть. Иисусе, разверзи и моя душевныя очи, якоже разверзл еси слепоту от рождения; Иисусе, прорцы и мне, якоже и оному разслабленному: возстани и ходи. Иисусе, устави ток нечистых пожеланий души моея, якоже уставил еси токи жены кровоточивыя; Иисусе, уврачуй проказу души и совести моея. Иисусе, Боже сердца моего, прииди и соедини мя с Тобою на веки.


Кондак 12


Завистью диавола, усты змия глаголавшаго, весь род человеческий вкушением от плода запрещеннаго. Рай погуби и смерти предадеся. Вкушением же от Пречистаго Тела и Крове Твоея, вси земнороднии, паки Вечныя сподобляются Жизни и восходят на первое достояние. Врачество бо от яда змеина и семя безсмертия есть причащение животворящих Тайн Твоих. Темже благодарственне зову Ти: Аллилуиа.


Икос 12


Се пред сосудом с Божественными Таинами Твоими предстою, злых же помышлений моих не отступаю: едина всемогущая благодать Твоя ободряет и привлекает мя. Темже, повергая себя в бездну милосердия Твоего, вопию: Иисусе, призываяй к покою в Тебе всех труждающихся и обремененных, приими и мене, утружденнаго суетою мира; Иисусе, пришедший призвати не праведныя, но грешныя на покаяние, разреши и мя от грехов и страстей моих. Иисусе, исцеляяй всякий недуг и всякую язву, уврачуй раны и гноение души моея; Иисусе, насыщаяй алчущия, насыти мя Телом и Кровию Твоею. Иисусе, воскрешаяй мертвыя, оживи мя, умершаго грехами; Иисусе, Победителю ада, извлецы мя из челюстей духа злобы. Иисусе, Боже сердца моего, прииди и соедини мя с Тобою на веки.


Кондак 13


О Пресладкий и Всещедрый Иисусе! Выну сходяй, яко манна с Небеси, для питания душ и телес наших, в Таинстве Пречистаго Тела и Крови Твоея, сподоби мя неосужденно причаститися Божественных Тайн Твоих, да исцелен, насыщен, освящен и обожен Тобою на веки, благодарне зову: Аллилуиа.


(Этот кондак читается трижды, затем икос 1 и кондак 1)


Молитва благодарственная, приносимая после Божественной Литургии


Благодарю Тя, пренебесный Царю, и всем телом и душею молю, хвалю, славлю, почитаю и превозношу Тя, яко сподобил еси мене, грешнаго, в день сей в Божественном сем Храме Божественную Твою и благоприятную, безкровную и словесную, Твоими священнослужительми о наших согрешениях Тебе принесенную и пожертую видети жертву, в воспоминание пречистых Страстей, преславнаго Воскресения, на небеса Восшествия и страшнаго паки Пришествия Господа нашего Иисуса Христа ихже ради молю Тя: вся моя согрешения омый, очисти и прости, и даждь ми во вся дни живота моего поминати Твоя благодеяния и в чистой совести благодарения и мольбы Тебе приносити, Безначальному Отцу со Единородным Твоим Сыном и Всесвятым Благим и Животворящим Твоим Духом, ныне и присно, и во веки веков. Аминь.[/spoiler]

[Раб божий Константин]

АКАФИСТ благодарственный по причащении Святых Таин.
[spoiler]Кондак 1
      Взбранный Воеводо и Господи, Святыми Тайнами Твоими Ты ад в душе моей победил еси ныне! Святыми Тайнами Твоими Ты тяготу греховную с совести моея непостижне ныне снял еси. И аз, причастник Таин сих недостойный, похвальная восписую Ти тако:
      Иисусе, Хлебе Живый, Хлебе Небесный, Хлебе Сладчайший, благодарю Тя за Тайны святыя Твоя.


Икос 1
      Ангели Божии — Серафими шестокрилатии, Херувими многоочитии, Престоли огнезрачнии, Господствия, Силы, Власти Божественнии, Начала, Архангели, Ангели вси! Вы лица ваша закрываете пред Христовыми страшными Тайнами, на Чашу с Боготворящею Кровию взираете со страхом великим и трепетом. Аз же, смрадный и грешный, к чаше сей како дерзнух приступити, вами, огненнии служители Божии, невидимою силою не отринутый? Сего ради и немолчным песнопениям вашим подражая, Божественному снисхождению удивляяся, Господу моему долготерпеливому вопию:
      Иисусе, Серафимами, яко Любы пламенно горящая, таинственно зримый, благодарю Тя, яко мне недостойному Любве Твоей черезмерныя насладитися преизобильно в Пречистых Тайнах ныне даровал еси.
      Иисусе, Херувимами, яко Премудрость выну светящаяся, созерцаемый, благодарю Тя, яко Пречистыми Твоими Тайнами ум мой ко лицезрению неизследимыя бездны судеб Твоих подвигл еси.
      Иисусе, на Престолех огнезрачных странно почиваяй, благодарю Тя, яко во мне непотребнем Святыми Твоими Тайнами, яко на престоле Твоем неизреченно почиваеши.
      Иисусе, горними Чинми невидимо дориносимый, благодарю Тя, яко мне, дольнему, носити Тя во мне самом ныне благоволил еси.
      Иисусе, всех Воинств Небесных непрестающее удивление, благодарю Тя, яко милости Твоя неисчетныя на мне ныне удивил еси.
      Иисусе, Хлебе Живый, Хлебе Небесный, Хлебе сладчайший, благодарю Тя за Тайны Святыя Твоя.


Кондак 2
      Вижу аз ныне, яко Святыми Тайнами Твоими исцелен есмь от проказы души моея, сего ради, прокаженному самарянину подобяся, падаю ниц при ногу Твоею, Иисусе, Целителю мой, гласом велиим хвалу Тебе вознося: Аллилуия.


Икос 2
      Разум никийже, ни горний, ни дольний, постигнути может, како Невместимый всем небом, Святыми Тайнами Своими вместися весь в мя. Сего таинства несказаннаго и аз не постигая, точию Тебе, Господа моего, в себе ныне ощущая, со трепетом взываю Тебе сицевая:
      Иисусе, в Вифании в дом Марфы и Марии вшедый, благодарю Тя, яко и в дом души моея падшей ныне премилостивне восшел еси.
      Иисусе, с Мариею о единем на потребу беседовавый, благодарю Тя, яко и со мною ныне сладце беседуеши, и сею сладкою беседою мене, унылаго, тепле утешаеши.
      Иисусе, лозо истинная, благодарю Тя, яко мене, розгу дикую, от Тебе отпадшую, паки к Себе привил еси.
      Иисусе, источниче безсмертный, благодарю Тя, яко мене, жаждою греховною истомленнаго, Кровию Твоею Честною напоил еси.
      Иисусе, от блудницы лобзанный, благодарю Тя, яко мене, блудному, в Святых Тайнах Твоих дал еси Тя целовати не точию устами, но и душею и сердцем, и всею мыслию.
      Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.


Кондак 3
      Силою крепкою всего мя исполнил еси слабаго, малодушнаго причастием Таин Пречистых Твоих, сими тако на враги моя видимая и невидимая укрепленный, победно пою Тебе:Аллилуия.


Икос 3
      Имея неизследимую милосердия бездну, с мытари и грешники ял и пил еси, и аз ныне, подобный им, Трапезы Твоея Тайныя странно насыщенный, Тебе, моему благодетелю, со умилением восклицаю:
      Иисусе, Друже мытарей и грешников, благодарю Тя, яко грешнаго, на Вечери Твоей Тайной, яко друга Твоего с Собою спосадил еси.
      Иисусе, у Закхея мытаря милостивне витавый, благодарю Тя, яко и во мне, окаяннем, ныне предивно витаеши и ко исправлению мя тем наставляеши.
      Иисусе, тельца упитаннаго, отцем блудному сыну закланнаго, в притче изобразивый, благодарю Тя, яко мне блудному, Себе Самаго в пищу ныне заклал еси.
      Иисусе, в Евангелии Твоем рекий: Не требуют здравии врача, но больнии, благодарю Тя, яко мене всего боляща и язвами греховными изъязвленна, ныне Тайнами Твоими чудесно исцелил еси.
      Иисусе, Пастырю добрый,благодарю Тя, яко мене, овча заблуждшее ныне на рамена Твоя пречистеи милостивне подъял еси и рукама Твоима тепле объял мя еси.
      Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.


Кондак 4
      Буря страстей мою душу смущаше, Ты же, Господи, во Святых Твоих Тайнах вшед в мя, яко некогда морю волнящуся, буре сей душевней запретил еси, глаголя: Молчи, престани! — и се ныне тишина во мне велия, се ныне мир Твой во мне, всякий ум превосходящий; темже душею умиренною Тебе воспеваю: Аллилуия!


Икос 4
      Слышу аз, Господи, ныне Пречистыя Тайны приявый, глас Твой сладчайший в сердце моем безгласне гласящий всяку истину, всяку правду. Сего ради дерзаю и аз Тебе тако возглашати:
      Иисусе, Учителю Благий, благодарю Тя, яко Тайнами Твоими Пречистыми учиши мя ныне смирению, кротости, любви, состраданию.
      Иисусе, плоть Твою, ко Кресту пригвожденную, странно в пищу мне давый, благодарю Тя, яко сею пищею плоть мою со страстьми и похотьми распинати мя укрепляеши.
      Иисусе, со Крестом Твоим на Голгофу исшедый, благодарю Тя, яко мене Святыми Твоими Тайнами крест мой терпеливо нести ободряеши.
      Иисусе, со Креста за врагов, Твоих моливыйся, благодарю Тя, яко и мене, причастника Таин Твоих, за моих врагов молитися призываеши.
      Иисусе, Тело Твое и Кровь Твою подавый мне во оставление грехов благодарю Тя, яко сими заповедаеши ми ныне оставляти вся прегрешения, вся обиды ненавидящим и обидящим мя.
      Иисуее, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.


Кондак 5
      Боготворящую Кровь Твою Иоанн, ученик Твой возлюбленный, видев из прободеннаго ребра Твоего истекшую, свидетельствует о сем яве во Евангелии. И аз, ныне видев сей Источник безсмертия, во все существо мое истекший, свидетельствую о сем благодарственною песнию: Аллилуия!


Икос 5
      Видевше Тя Боговидцы Божественнии Моисей и Илия, ов убо каменем, ов же милотию со страхом и трепетом себе покрываху, аз же, окаянный, в себе ныне Тя созерцая, чим покрыюся, разве токмо безмерною милостию Твоею, тако взывая:
      Иисусе, пророками издалече предвиденный, благодарю Тя, яко зрети Тя близ сподобил еси мя в Святых Твоих Тайнах.
      Иисусе, апостолами проповеданный, благодарю Тя, яко за Литургиею Божественною слух мой огласил еси сею безсмертною Твоею проповедию: «Приимите, ядите, сие есть Тело Мое, еже за вы ломимое во оставление грехов», и «Пийте от нея вси, сия есть Кровь Моя Новаго Завета, яже за вы и за многия изливаемая во оставление грехов».
      Иисусе, мучениками исповеданный, благодарю Тя, яко и мене перед чашею Твоею сице удостоил еси исповедати: «Верую, Господи, и исповедую, яко Ты еси воистинну Христос, Сын Бога Живаго».
      Иисусе, преподобными в молитвах присно призываемый, благодарю Тя, яко во мне ныне, о чесом молитися неведущему, Сам молишися воздыхании неизглаголанными, взывая: «Авва Отче».
      Иисусе, святителями и иереями на алтарях святых в Жертве Безкровней приносимый, благодарю Тя, яко мене самаго алтарем Твоим страннолепно ныне соделал еси.
      Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.


Кондак 6
      Проповедаю, Господи, Твою благодать, исповедаю милость, не таю благодеяния, ихже обильно излиял еси на мя во Святых Твоих Тайнах, пою и вопию Тебе: Аллилуия!


Икос 6
      Возсия во мраце души моея солнце пресветлое от приятия ныне Пречистых Таин Твоих. Сим светом небесным озаренный, взываю:
      Иисусе, Свете Тихий, благодарю Тя, яко во тьме моей светло светиши и тьма моя Тя не объят;
      Иисусе, сияние славы Отчия, благодарю Тя, яко во свете Твоем зрю свет — Отца, свет — Духа Святаго.
      Иисусе, прострый небо яко кожу, благодарю Тя, яко во мне самом небо таинственно ныне простерл еси.
      Иисусе, Егоже поет Солнце, Егоже славит Луна, Емуже молятся звезды, благодарю Тя, яко Святыми Твоими Тайнами всего мя подвигл еси пети, славити Тя, молитися Тебе.
      Иисусе, Женише Краснейший, в полунощи мудрыми девами со светильники горящими сретаемый, благодарю Тя, яко светильник сердца моего погасший паки ныне возжегл еси.
      Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.


Кондак 7
      Хощу аз, Господи, во Святых Твоих Тайнах Тя ощутивый, николиже уже от Тебе разлучатися, всегда в Тебе пребывати, всегда благодарне Тебе воспевати: Аллилуия!


Икос 7
      Дивны, чудны, непостижны Тайны Твоя Пречистыя, Господи! Мертв бых душею, ныне же сих причастився, живу аз всем существом моим! Тебе же, Воскресителю моему, с велиим благодарением вопию:
      Иисусе, Лазаря четверодневнаго из гроба воззвавый, благодарю Тя, яко и мене, грехом возсмердевшаго из гроба моего смраднаго ныне воззвал еси.
      Иисусе, Источниче приснотекущий вечныя жизни, благодарю Тя, яко мене, нерадением от Источника сего бедне отторгшагося, ныне паки с Ним чудне возсоединил еси.
      Иисусе, поток сый неизъяснимыя сладости, благодарю Тя, яко сладостию сею вся внутренняя моя ныне наполнил еси.
      Иисусе, Небесных Чинов присное радование, благодарю Тя, яко Святыми Тайнами Твоими всего мя, печалию подавленнаго, радости духовныя и веселия Божественнаго исполнил еси, и тако согбеннаго подъял мя еси.
      Иисусе, скорбящих Утешение, благодарю Тя, яко мене, скорбию всего соугнетеннаго и стесненнаго, на простор Твой широкий благодатный ныне извел еси.
      Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.


Кондак 8
      Странно ныне, Христе, по глаголу Твоему, Ты во мне пребываеши и аз пребываю в Тебе. Странно, якоже Симеон праведный, ныне держу Тя! О, Господи мой, Господи! Что есмь аз, яко тако помниши мя! Что есмь аз, яко тако посещаеши мя! Таковою славою и честию от Тебя венчанный, благодарне Тебе восклицаю; Аллилуия!


Икос 8
      Весь, яко железо раскаленное, огнем проникаюся, ныне проникнут, наполнен, насыщен Тобою, Господи Боже! Ныне познах, яко воистину Твой есмь аз! И сего ради воспеваю:
      Иисусе, Имже благодать и истина бысть, благодарю Тя, яко от исполнения Твоего и аз ныне приях благодать возблагодать.
      Иисусе, Уме предвечный, благодарю Тя, яко Святыми Тайнами Твоими ум мой горняя мудрствовати возбудил еси.
      Иисусе Прекрепкий, благодарю Тя, яко волю мою, грехом разслабленную, дивно ныне укрепил еси.
      Иисусе, Обновителю душ наших, благодарю Тя, яко мене, безместными деяньми обветшавшаго, чудне ныне обновил еси.
      Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.


Кондак 9
      Все естество мое, Господи Иисусе Христе, от посещения Твоего милостивнаго ныне ликует, празднует, веселится, величает Тя и поет тебе песнь победную: Аллилуия!


Икос 9
      Витийствовати не могут язык ни человеческий, ни ангельский величия Таин Пречистых Твоих, Господи, како под видом хлеба Телом Твоим Пречистым напитал мя еси! Како под видом вина Кровь Твою боготворящую подал мне пити! О, Господи; Живый, со трепетом Тебе вопию:
      Иисусе, творяй чудеса Един, благодарю Тя, яко во мне самом чудо ныне превелие сотворил еси.
      Иисусе, исполняющих волю Твою сродниками Твоими именовавый, благодарю Тя, яко мене приятием Таин Твоих сокровным и сотелесным Тебе ныне соделал еси.
      Иисусе, Боже Непостижимый, благодарю Тя, яко мне даровал еси быти ныне общником Божественнаго естества.
      Иисусе, со апостолами Твоими в горнице Сионской вечерявый, благодарю Тя, яко в души моей убогой горницу Себе ныне устроил еси.
      Иисусе, нозе учеником на вечери умывый, благодарю Тя, яко Тайнами Твоими всего мене от скверны плоти и духа омыл еси.
      Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.


Кондак 10
      Спасителю Богу, Тайны Своя Пречистыя в пищу мне даровавшему и сими мя обожившему, пою: Аллилуия!


Икос 10
      Царю Небесный, смиривыйся смирению моему, хвалебную песнь Тебе, недостойный аз, приношу:
      Иисусе, Егоже царство — царство всех веков и владычество во вся роды и роды, благодарю Тя, яко царствие Твое ныне внутрь мене устроил еси;
      Иисусе великодаровитый, благодарю Тя, яко правду, мир и радость царствия Твоего восчувствовати сердцем моим ныне даровал еси.
      Иисусе Всещедрый, благодарю Тя, яко щедроты Твоя, яко дождь благодатный, обильный, на мя ныне в Тайнах Пречистых излиял еси.
      Иисусе, сокровище на Небеси искати повелевый, благодарю Тя, яко сокровище истиннейшее — Святыя Тайны Твоя прияти ныне мене сподобил еси.
      Иисусе, от волхвов поклонение и дары приявый, благодарю Тя, яко мне дал еси ныне поклонитися Тебе во Святых Твоих Тайнах.
      Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.


Кондак 11
      Пение таинственное, сокровенное, сладкое, Ангельское слышу аз ныне в души моей, Господи! Поет душа моя, Тобою исцеленная; поет душа моя, Тобою вознесенная; поет душа моя, Тебя приявшая! Поет Тебе песнь: Аллилуия!


Икос 11
      Света подателю и веков Творче, Господи, во свет Твой мя ныне призвал еси, сыном Света страннолепно мя ныне соделал еси! Тебе, Свету мира, светло вопию аз:
      Иисусе, одеяйся светом яко ризою благодарю Тя, яко ризу Твою светлую мне, помраченному, ныне подал еси.
      Иисусе, на горе Фаворстей во свете преобразивыйся, благодарю Тя, яко всего мя ныне чудно преобразил еси.
      Иисусе, с Моисеем и Илиею на Фаворе беседовавый, благодарю Тя, яко со мною, недостойным, сладце и пресладце ныне беседуеши.
      Иисусе, облаком пресветлым народ свой древле водивый, благодарю Тя яко мене Тайнами Твоими привел еси ныне в покой Твой желанный.
      Иисусе, праведныя Твоя просвещаяй яко солнце, благодарю Тя, яко мене просветил еси ныне ко зрению всего убожества и ничтожества моего пред величеством непрестанныя славы Твоея.
      Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя.


Кондак 12
      Благодати Пресвятаго Духа великой, пречудной, преславной, непостижимой, от Даров Святых исходящей грех моих ради не возбранил еси посетити мя! О Боже мой, благодать сию туне мне давый, приими от мене песнь сию: Аллилуия!


Икос 12
      Поюще любовь Твою неизмеримую, в Святых Тайнах мне ныне явленную, благодарною мыслию, благодарным же сердцем, благодарными удесы моими души и тела моего покланяюся, величаю и сице славословлю Тя, Боже мой:
      Иисусе, учеником Твоим по воскресении явивыйся, благодарю Тя, яко и мне, окаянному, во Святых Тайнах Твоих ныне явился еси.
      Иисусе, апостолам мир преподавый, благодарю Тя, яко всю душу мою миром неизреченным ныне исполнил еси.
      Иисусе, Лукою и Клеопою в преломлении хлеба познанный, благодарю Тя, яко и мне, недостойному, в Святых Твоих Тайнах дал еси познати сладость Твою, милость Твою, снисхождение Твое странне.
      Иисусе, Фомою осязанный, благодарю Тя, яко мне, маловерному, дал еси ныне осязати Тя во Святых Твоих Тайнах, осязати ребра Твоя, нозе Твои, руце Твои.
      Иисусе, Фомою Господом и Богом исповеданный, благодарю Тя, яко вся душа моя, все сердце мое, вся чувства моя, все существо мое, Тобою ныне объятое, с верою несумненною Тебе восклицает: Господь мой и Бог мой!      Иисусе, Хлебе Живый, Хлебе Небесный, Хлебе Сладчайший, благодарю Тя за Тайны Святыя Твоя!


Кондак 13
      О, Иисусе мой, Хлебе Живый, Хлебе Небесный, Хлебе Сладчайший, Хлебе превожделенне, Тобою питаются Ангели на Небесех преизобильно! Благодарю Тя, яко и аз, странник и пришлец на земли сей, насытихся ныне Тобою!
      О, Пище моя крепкая, Питие неисчерпаемое, Источниче безсмертия и жизни Подателю!
      О, Пасха Таинственная, Пасха всечестная! Пасха непорочная, Пасха великая, подавай мне истее Тебе причащатися в невечернем дни Царствия Твоего. Подавай мне пети Тебе во веки неисчетныя песнь великую, в вышних трегубо песно-словимую: Аллилуия!


Этот кондак читается трижды, затем икос 1-й; "Ангели Божии..." и кондак 1-й: «Взбранный Воеводо...»


Молитва благодарственная, приносимая после Божественной Литургии
      Благодарю Тя, пренебесный Царю, и всем телом и душею молю, хвалю, славлю, почитаю и превозношу Тя, яко сподобил еси мене, грешнаго, в день сей в Божественнем сем храме Божественную Твою и благоприятную, безкровную и словесную, Твоими священнослужительми о наших согрешениих Тебе принесенную и пожертую видети Жертву, в воспоминание пречистых страстей, преславнаго воскресения, на небеса восшествия и страшнаго паки Пришествия Господа нашего Иисуса Христа, ихже ради молю Тя: вся моя согрешения омый, очисти и прости, и даждь ми во вся дни живота моего поминати Твоя благодеяния и в чистой совести благодарения и мольбы Тебе приносити, Безначальному Отцу со Единородным Твоим Сыном, и Всесвятым, Благим и Животворящим Твоим Духом, ныне и присно, и во веки веков. Аминь.[/spoiler]

[Раб божий Константин]

Акафист святому блаженному Прокопию, Христа ради юродивому, Вятскому чудотворцу.
[spoiler]Кондак 1
Избранному чудотворцу, дивному предстателю пред Богом, блаженному Прокопию, пресветлому светильнику страны Вятския, многими чудотвореньми утешающему с верою чтущих святую память его, умильно взываем:
Радуйся, блаженне Прокопие, скорый помощниче, Вятский чудотворче.

Икос 1
Ангела на земли яви тя милосердный Творец Небеси и земли: вся бо земная во уметы вменил еси, блаженне Прокопие, да Христа приобрящеши. Темже вси многотрудное житие и блаженную кончину твою зряще, радостно тебе вопием:
Радуйся, издетства в жилище Духа Святаго чистое и непорочное предуготованный.
Радуйся, от лютаго недуга чудесне исцеленный.
Радуйся, на подвиг юродства, Христа ради, свыше призванный.
Радуйся, от преподобнаго Трифона на путь спасения наставленный и благословенный.
Радуйся, благодати сосуде избранный.
Радуйся, благословение преподобнаго Трифона, яко легкое иго Христово понесый.
Радуйся, блаженне Прокопие, скорый помощниче, Вятский чудотворче.

Кондак 2
Видя тя Господь угодна Себе быти, блаженне Прокопие, егда млад сый громом поражен бысть, по слезней же молитве родителей твоих к Богу, исцеле. Вси же людие, окрест живущии, со страхом и удивлением вопияху Богу: Аллилуиа.

Икос 2
От юности подвиг юродства стяжевая, сердце к небесней чистоте устремил еси, блаженне Прокопие, сего ради вопием ти:
Радуйся, родителей твоих похвало и украшение.
Радуйся, труды их молитвою выну услаждавый.
Радуйся, к деланию духовному предуказанный.
Радуйся, послушания сыновняго наставниче.
Радуйся, молитв ради родителей, от недуга тяжкаго Господем исцеленный.
Радуйся, молитвами преподобнаго Трифона от всякаго страхования прият исцеления.
Радуйся, блаженне Прокопие, скорый помощниче, Вятский чудотворче.

Кондак 3
Сущу бо ти недужну, блаженне Прокопие, родителие принесоша тя во град Хлынов во обитель Пресвятыя Богородицы к преподобному Трифону. Силою молитв его от лютыя смерти избавлен бысть, поя Богу: Аллилуиа.

Икос 3
Имеяй богатство милосердия неизреченное, скоро руку помощи своея простре ти Господь, блаженне Прокопие: зане с верою к Тому притекл еси, на Него Единаго все упование свое возложив. Темже мы, видяще веру твою и дивное ея оправдание, умиленно вопием ти:
Радуйся, по исцелении от недуга единому Богу поработати возжелавый.
Радуйся, любве ради Божией, дом отеческий оставивый.
Радуйся, во одежде убозей странника во град Слободский, душевнаго ради спасения, пришедый.
Радуйся, в храме великомученицы Екатерины, верно и усердно служивый.
Радуйся, у пресвитера Илариона приют телеси своему обретый.
Радуйся, к пресвитеру оному всецело в послушание предавыйся.
Радуйся, блаженне Прокопие, скорый помощниче, Вятский чудотворче.

Кондак 4
Бури многих бед и соблазнов житейских в мире сем бегая, тайно от дома отеческаго ушед, и жестокому пути спасения юродству, Христа ради, умыслил еси подражати поя Богу: Аллилуиа.

Икос 4
Провидя преподобный Трифон, благодати сосуд избранный явитися стране Вятской, благослови тя на подвиг юродства. Мы же, проразумение того сбывшееся зряще, вопием ти, блаженне Прокопие:
Радуйся, в Дом Пресвятыя Богородицы на спасение от родителей принесенный.
Радуйся, от преподобнаго Трифона любезне приятый.
Радуйся, отечествие свое ради пользы душевныя оставивый.
Радуйся, труды ко трудом, посты ко постом прилагавый.
Радуйся, с усердием и любовию к Дому Божию во граде Слободстем Богови работавый.
Радуйся, добрый подвижниче благочестия в стране Вятской.
Радуйся, блаженне Прокопие, скорый помощниче, Вятский чудотворче.

Кондак 5
Боготечную Кровь Христа за ны пролиянную духовныма очима выну созерцая, блаженне Прокопие, прилепился еси совершенною к Тому любовию. Темже преселился еси из града Слободскаго во град Хлынов, да славы людския убежав, поеши Христу Богу: Аллилуиа.

Икос 5
Врагу, присно на подвижники ополчающуся, жестоким житием противустал еси, блаженне Прокопие, плоть духови твоему поработив воздержанием. Темже мы, подвигом твоим чудящеся, зовем ти:
Радуйся, во град Хлынов удаливыйся славы и молвы людския уклоняяся.
Радуйся, безплотному ангелу житием зде уподобивыйся.
Радуйся, ту ветхаго человека в себе умертвивый, смиренно досаждения от людей безумных терпя.
Радуйся, хлад страны Вятския не превозможе пламенныя веры твоея.
Радуйся, днем на на торжищих и стогнах людей града Хлынова обличаяй и на путь спасения направляяй.
Радуйся, нощи в пламенней молитве к Богу в притворах храмов пребываяй.
Радуйся, блаженне Прокопие, скорый помощниче, Вятский чудотворче.

Кондак 6
Проповедует подвиги твоя, блаженне Прокопие, страна Вятская многотрудному житию твоему чудящеся. Воздвиже бо на тя брань лютую враг спасения нашего: ты же постом и молитвою таковая соодолел еси, благодарственне воспев Богу: Аллилуиа.

Икос 6
Возсия благодать в подвизе многотруднаго жития твоего, блаженне Прокопие. Не точию бо на тя бывшая искушения мужественне отразил еси, но и всем во искушениих мудрый споборник являешися, да с радостию тебе вопием:
Радуйся, святаго ради жития от Бога зело возлюбленный.
Радуйся, безстрастия проявителю.
Радуйся, воздержания образе.
Радуйся, сластолюбцев посрамление.
Радуйся, в бедах и тесноте на Бога упователю.
Радуйся, в покров себе имевый пречудный омофор Приснодевы.
Радуйся, блаженне Прокопие, скорый помощниче, Вятский чудотворче.

Кондак 7
Хотя Владыка Господь явити тя, блаженне Прокопие, мужа во всем совершенна, попусти врагу спасения нашего пакости ти делати. Ты же смирением искушения посрамив, победне воспел еси Богу: Аллилуиа.

Икос 7
Новая купель Силоамская явися ти, блаженне, обитель Пресвятыя Богородицы, в ней же от болезни душевныя и телесныя исцелился еси, и яко муж в меру возраста Христова Богови предстал еси. Мы же вопием ти:
Радуйся, истиннаго трезвения учителю.
Радуйся, бодрственнаго к себе внимания стяжателю.
Радуйся, блаженных Прокопиа и Иоанна Устюжских единонравниче.
Радуйся, яко с теми Христу ныне молишися, да низложится сила диаволя.
Радуйся, еще в житии на земли яко чудотворец дивен явился еси.
Радуйся, Церкве Православныя славо и украшение.
Радуйся, блаженне Прокопие, скорый помощниче, Вятский чудотворче.

Кондак 8
Странники сущыя на земли сей, враг присно искушает ны, и многи поставляет преграды, да не достигнем Отечествия Небеснаго, но ты яко сокрушивый того ухищрения, помози нам, блаженне Прокопие. Дадеся бо ти благодать недуги целити, будущая провидети и выну быти со призывающими тя и верно поющими Богу: Аллилуиа.

Икос 8
Все житие наше на земли, печали и скорби полно есть, искушения же и падения предлежит нам претерпети, но ты помози нам, блаженне Прокопие, да благодарственне зовем ти:
Радуйся, помышления сердец провидевый.
Радуйся, сердец скорбных уврачевателю.
Радуйся, коегождо от мудрости жития твоего наставлял еси.
Радуйся, нищ сый плотию, богатство многоценное дарований духовных имевый.
Радуйся, аки крин благоуханный во граде Хлынове явивыйся.
Радуйся, болярину Михаилу Татищеву скорое свобождение от темничных уз предуказавый.
Радуйся, блаженне Прокопие, скорый помощниче, Вятский чудотворче.

Кондак 9
Всею душею прилепивыйся Богови, славою земною не уязвился еси, блаженне Прокопие, дары и приношения, от людей даваемыя, со смирением приимал еси, ношаше на малое время, глаголя в себе, довлеет ми покрова неба и ложа земли. Темже и нас добродетели нестяжания научи, во еже чистыми усты и сердцем пети Богу: Аллилуиа.

Икос 9
Вси людие града Хлынова высоту подвигов твоих всюду возвестиша, блаженне Прокопие. Мы же добродетели твоя воспевающе, в похвалу тебе сия вопием:
Радуйся, яко солнце пресветлое земли Вятской возсиявый.
Радуйся, в трудех многих покой телеси своему обретый.
Радуйся, подвиг свой усугубляяй тайным доброделанием.
Радуйся, лютость людей неразумных града Хлынова благостию своею укротивый.
Радуйся, ведети грядущее от Владыки Христа сподобивыйся.
Радуйся, ангелом земным быти удостоенный.
Радуйся, блаженне Прокопие, скорый помощниче, Вятский чудотворче.

Кондак 10
Спастися хотя и со Христом быти, о сем Господа молил еси, блаженне Прокопие. Человеколюбец же Господь приим моление твое, откры кончину твою и со избранными причастие поведа ти, с нимиже ныне воспеваеши Ему: Аллилуиа.

Икос 10
Стена ти бысть крепка, блаженне Прокопие, Пресвятая Богородица, в Еяже обители прежде благословение от преподобнаго Трифона на подвиг юродства получил еси. Матерним Ея покровом осеняемь, течение жизни скончав на земли, небесную весть слышати сподобился еси. Темже ныне радостно вопием ти:
Радуйся, в молитве скоро от Бога услышанный.
Радуйся, Пресвятою Богородицею соблюденный в подвизе юродства Христа ради.
Радуйся, благословение преподобнаго Трифона, яко путеводную звезду пред взором духовным имел еси.
Радуйся, наготу и лишения терпяше, даже до скончания жития своего.
Радуйся, от Бога извещенный о часе скончания твоего.
Радуйся, скорое сопричтение ко ангелом увидевый.
Радуйся, блаженне Прокопие, скорый помощниче, Вятский чудотворче.

Кондак 11
Пение немолчное принесоша Богу людие града Хлынова, блаженне Прокопие, зряще блаженную кончину твою. Обретоша бо тогда лице твое, яко лице ангела, и свет от святаго телесе твоего исходящ, с благоговением воспеша Богу: Аллилуиа.

Икос 11
Яко светоприемная свеща, благодатию Божиею возжженная, озарил еси, блаженне Прокопие, чудесы твоими страну Вятскую. Темже радостно вопием ти:
Радуйся, добрый воине, от Христа венцем славы украшенный.
Радуйся, благоухания дивнаго источниче.
Радуйся, пред кончиною своею за град Хлынов молитву к Богу вознесый.
Радуйся, за люди творящыя ти досады и утеснения, яко за творящих добродетели Богу моливыйся.
Радуйся, тело свое к погребению на овразе засоре приготовивый.
Радуйся, дом Симеона Павлова принесением мощей своих благословивый.
Радуйся, блаженне Прокопие, скорый помощниче, Вятский чудотворче.

Кондак 12
Благодати великия носителя и будущаго всех воскресения уверителя людем Вятским дарова тя Господь, блаженне Прокопие. Вси бо с верою к тебе притекающии, молитв исполнение и надежду общаго воскресения улучают, благодарственне поюще Богу: Аллилуиа.

Икос 12
Поем твоя милости и чудеса, блаженне Прокопие: выну бо и по отшествии твоем с нами пребываеши, Христу за нас моляся. Темже от благодарных устен в похвалу тебе приносим сицевая:
Радуйся, молитвенниче наш усердный.
Радуйся, помощниче наш скорый.
Радуйся, от наваждения духов злобы спасаяй.
Радуйся, вериги твоя, тобою носимыя, источник исцелений явишася.
Радуйся, всех недугов душевных и телесных врачу скорый.
Радуйся, о спасении всех христиан теплый молитвенниче.
Радуйся, блаженне Прокопие, скорый помощниче, Вятский чудотворче.

Кондак 13
О блаженне Прокопие, скорый помощниче и Вятский чудотворче! Приими сие малое со умилением приносимое тебе моление, и со Пресвятою Богородицею, и преподобным Трифоном, и всеми святыми молися Господу Иисусу Христу, да избавит нас от всяких бед и скорбей, от враг видимых и невидимых, от напрасныя смерти и будущих мук и сподобит нас со избранными своими воспевати Ему: Аллилуиа.
Этот Кондак читается трижды, затем Икос 1-й и Кондак 1-й

Молитва святому блаженному Прокопию, Христа ради юродивому, Вятскому чудотворцу
О блаженне Прокопие! Велие имея дерзновение к Богу, молися выну о всех нас, зане буря многих бед и скорбей обдержит ны: недузи телесныя, болезни душевныя, приражения вражия обуревают ны. Ходит бо враг наш, иский кого поглотити, и ежечасно от того уловляемся: о спасении же своем нерадяще, несмы достойни воззрети на высоту небесную. Но ты буди нам помощник скорый и избавитель. Яко сам досаждаемь быв от врага, победив же сего добльственне, вразуми ны, да разумеем того коварства.
Подаждь нам память смертную, слезы покаяния и надежду спасения: да не во отчаяние впадем, ниже дерзостным на милосердие Божие упованием, во гресех же пребыванием в конец себе погубим, но да будет нам память грехов наших во источник теплых слез и сокрушения сердечнаго, милосердие же Божие и благодать Его, молитвами твоими в спасение наше, ныне и присно и во веки веков. Аминь.[/spoiler]

[Раб божий Константин]

Акафист священномученику Прокопию, Архиепископу Херсонскому.
[spoiler]Кондак 1




Избранному на жертвенное служение Богу, ныне у Престола Вседержителя предстоящему священномученику Прокопию благодарственное приносим пение. Ты же, яко имеяй велие дерзновение ко Господу, ограждай нас от всяких зол и обстояний молитвами твоими, да зовем ти: Радуйся, священномучениче Прокопие, Херсонскаго края светильниче неугасимый.



Икос 1




Ангели на небеси возрадовашася зело рождшемуся тебе, святителю Прокопие, в праздник Рождества Христова: ты бо младенческим гласом восхвалив Богомладенца Иисуса, верно послужил еси Ему ангельским житием своим. Мы же, видяще тя, яко избран сосуд благодати Божественныя, вопием ти:




Радуйся, в день Рождества Иисусова преславно рожденный.

Радуйся, со ангельскими чинми Христа восхваляяй.

Радуйся, Духа Святаго честное вместилище.

Радуйся, законов Божиих благое хранилище.

Радуйся, правде Христовой усердно послуживый.

Радуйся, службою своею Христа ублаживый.

Радуйся, житием своим ангелом подражавый.

Радуйся, во Царствии Божии награду стяжавый.

Радуйся, священномучениче Прокопие, Херсонскаго края светильниче неугасимый.   




Кондак 2



Видя велие усердие к познанию богословия, дарова тебе Господь, отче Прокопие, разумети Писания Божественныя. Ты же в сердце своем словеса Христа нося: "Иже сотворит и научит, сей велий наречется в Царствии Небеснем", потщался еси поученьми твоими и примером добрым люди в вере Христовой утвердити, научая непрестанно пети: Аллилуиа.


Икос 2





Разумом, данным тебе от Бога, уразумел еси добре, блаженне Прокопие, яко в мире неудобь обрящеши спасение. Сего ради брака уклонился еси, единому Господеви благоугождати хотя. Мы же, умиляяся иноческим подвигом твоим, яко ангелу поем ти:




Радуйся, явивыйся ангельским силам светлое уподобление.

Радуйся, пребывати во святости имевый велие произволение.

Радуйся, душу свою от соблазнов усердно хранивый.

Радуйся, в сердце своем Иисуса с любовию носивый.

Радуйся, чистоту в житии твоем многоскорбнем всегда соблюдавый.

Радуйся, помыслы суетныя и неполезныя далече от себе отгнавый.

Радуйся, верность Христу присно сохранявый.

Радуйся, душу свою от пристрастий земных удалявый.

Радуйся, священномучениче Прокопие, Херсонскаго края светильниче неугасимый.   




Кондак 3



Силу Вышний дарова тебе на служение Церкви, священномучениче Прокопие, ты бо добре потрудился еси в земли Томстей и Иркутстей, и многия подвиги тамо подъял еси, непрестанно помощи у Господа прося, и воспевая Ему: Аллилуиа.


Икос 3




Имущи душу твою присно к Богу любовию пламенеющую, сан священства приял еси, святе Прокопие, и помощию Божиею вспомоществуемый, усердно служил еси алтарю Господню. Мы же, прославляюще подвиги твоя, похвальная восписуем ти:




Радуйся, пред алтарем Господним Богу обрученный.

Радуйся, во священстве благодатию дивно почтенный.

Радуйся, священством твоим Христу славно угодивый.

Радуйся, вся службы со страхом и благоговением совершавый.

Радуйся, пред всеми Христа исповедавый.

Радуйся, Царствие Небесное от Него унаследовавый.

Радуйся, о душах наших молитвенниче усердный.

Радуйся, на суде Господнем защитниче наш верный.

Радуйся, священномучениче Прокопие, Херсонскаго края светильниче неугасимый.   




Кондак 4



Буря ярости воздвижеся на Церковь Христову, егда безбожницы восхотеша разрушити ю. Ты же, святителю Христов, Архиепископом в земли Херсонстей от Господа поставлен был еси, да пасеши словесное стадо, от хищных волков сохраняя е, с ним же благодарственно взывал еси укрепляющему тя Христу Богу: Аллилуиа.


Икос 4




Слышаще и видяще православнии людие равноангельное житие твое, священномучениче Прокопие, притекаху к тебе послушати словеса твоя, да водимии тобою, праведнаго жития достигнут. Мы же, видяще тя украшена смиренномудрием и кротостию Христовою, с радостию зовем ти:




Радуйся, Апостолом на небеси сопричастниче.

Радуйся, Христовым святителем сопрестольниче.

Радуйся, благодетелю наш, предстательством твоим Царствия Небеснаго нас сподобляющий.

Радуйся, молитвами твоими от ада преисподняго души наша спасающий.

Радуйся, молящийся о всех, в помощь тя призывающих.

Радуйся, слышащий всех, к тебе с надеждою взывающих.

Радуйся, паству Херсонскую, в гонениях сущую, верною Христу сохранивый.

Радуйся, стаду своему словесному рассеятися не попустивый.

Радуйся, священномучениче Прокопие, Херсонскаго края светильниче неугасимый.   




Кондак 5



Боготечную звезду яви тя Господь граду Херсону, святителю Прокопие, ты бо поучении своими паству твою наставлял еси, да вси единым сердцем и едиными усты взывают Спасителю Богу: Аллилуиа.


Икос 5




Видя, священномучениче Христов, како врази Церкви Православныя на агнцы твоя ополчахуся, вся силы своя полагал еси да ни един не отпадет от стада твоего. Сего ради и пострадал еси, яко добрый пастырь, душу свою за словесныя овцы полагая. Сего ради приими от нас сие усердное славословие:




Радуйся, всех противников на пути к Царствию Небесному победивый.

Радуйся, блаженный небожителю, вечных благ наслаждаяйся.

Радуйся, Самаго Христа Бога вождем к Небесному Отечеству имевый.

Радуйся, светильниче пресветлый, на церковней свещнице поставленный.

Радуйся, твердый столпе Православия, имже Святая Церковь красуется и укрепляется.

Радуйся, тобою бо слово Христово: "Претерпевый до конца, той спасен будет" - исполняется.

Радуйся, за терпение твое нетленный венец на небеси прияти сподобивыйся.

Радуйся, благами небесными за скорби земныя утешающийся.

Радуйся, священномучениче Прокопие, Херсонскаго края светильниче неугасимый.   




Кондак 6



Проповедником воли Божией был еси, священномучениче Прокопие, егда вместо смерти тебе предстоящия на Соловки сослан был еси. Ты же, яко агнец кроткий, страдания вся за Христа беззлобно претерпевал еси, воспевая усердно Богу: Аллилуиа.


Икос 6




Возсиял еси, яко лучезарное светило, горением любве твоея ко Господу, архиерею Божий, тако и чада твоя духовная любити Господа и уповати на Него научал еси. Приими же и от наших любящих сердец похвалы сия:




Радуйся, праведному Иову усердный подражателю.

Радуйся, о нас пред Богом верный предстателю.

Радуйся, терпением своим мучителей удививый.

Радуйся, праведным житием твоим многих ко Господу обративый.

Радуйся, пред всеми небоязненно Христа исповедавый.

Радуйся, Царствие Небесное верностию Христу унаследовавый.

Радуйся, ныне на небеси Бога о нас умоляющий.

Радуйся, яко искусный кормчий, к вечному блаженству нас приводящий.

Радуйся, священномучениче Прокопие, Херсонскаго края светильниче неугасимый.   





Кондак 7 



Хотяще вечное спасение получити, всеблаженне Прокопие, Господу нашему во всем подражал еси, скорбным путем к Царствию Небесному шествуя: взем бо иго Христово на себе и смирению и кротости научивыйся у Него, обрел еси покой души своей, присно зовущей Творцу: Аллилуиа.



Икос 7




Новое гонение воздвиже на тя, священномучениче славне, враг рода человеческаго, егда паки гонители Церкви удалиша тя от паствы твоея на Соловки и по сем на Урал. Ты же, многия скорби перенося в краях дальних, присно в молитвах благодарил еси за вся Благодетеля Бога. Мы же, похваляя страдания твоя, взываем ти:




Радуйся, вся искушения в житии твоем добре претерпевый.

Радуйся, купно со Христом на Голгофу свою твердо шедый.

Радуйся, голод, и мраз, и иныя страдания до конца мужественно претерпевый.

Радуйся, присно пребывати со Христом восхотевый.

Радуйся, светлою свещею во мраце греховнем светящий.

Радуйся, яко светильник в Церкви Православней горящий.

Радуйся, терпению нас научающий.

Радуйся, всех от погибели адския молитвами твоими спасающий.

Радуйся, священномучениче Прокопие, Херсонскаго края светильниче неугасимый.   




Кондак 8



Странником и пришельцем в мире сем был еси, святе Прокопие. Господь же, любящия Его любяй, тако устрои, яко да и в заточении Службу совершати возможеши, и сим многих утешиши, вразумиши и наставиши, благодаря за вся благодеяния Христа Бога, и воспевая Ему усердно: Аллилуиа.



Икос 8




Всем сердцем своим и душею возносивыйся ко Господу, егда в заточении службы церковныя совершал еси, святителю Прокопие. Мы же, за таковое твое твердое исповедание Православныя веры ублажая тя, возсылаем ти усердное хваление:




Радуйся, добрый пастырю ищущих спасения.

Радуйся, образе кротости, смиренномудрия и терпения.

Радуйся, гонящим тя вся прощавый.

Радуйся, паству Херсонскую в тяжких лишениях не оставивый.

Радуйся, и ныне со усердием ей помогаяй.

Радуйся, преодолевати вся препоны вражия ю научаяй.

Радуйся, верный о нас пред Богом заступниче.

Радуйся, теплый о нас пред Спасителем нашим молитвенниче.

Радуйся, священномучениче Прокопие, Херсонскаго края светильниче неугасимый.   




Кондак 9



Всякое естество удивися твоему, священномучениче Прокопие, славному подвигу: ты бо, плоть распяв со страстьми и похотьми, молитвою неустанно отгонял еси вся напасти и искушения, от духов лукавых исходящия. Мы же, тобою научаеми стойко претерпевати вся лишения Христа ради, с тобою купно взываем Ему: Аллилуиа.


Икос 9




Витийства человек, не ведавших истины веры Православныя, словом Божиим отметал еси, досточудне, увещавая паству свою твердо стояти во Православии, не внимая словесем восстающих на Церковь Божию. Сего ради, хвалим тя за таковое твое попечение о спасении душ наших пении сими:




Радуйся, Церкви Христовой светило светозарное.

Радуйся, пастве твоей заступление предивное.

Радуйся, возвеселивый ангельский чин твоим за Христа страданием.

Радуйся, по Бозе и Богородице все наше упование.

Радуйся, тесным путем к Дому Божию шедый.

Радуйся, благословение Отца Небеснаго наследивый.

Радуйся, Божия милости нам щедрый подателю.

Радуйся, пред Господем наш верный предстателю.

Радуйся, священномучениче Прокопие, Херсонскаго края светильниче неугасимый.   




Кондак 10



Спастися хотящим и Небеснаго Царства взыскующим вспомоществовал еси, отче предивный, верныя чада твоя присно утешая. Ты бо Херсонскою паствою мудро управлял еси и в заточении далече сущи, и даже до мученическия кончины твоея не оставил еси ю, присно наставляя всех на путь спасения и научая пети: Аллилуиа.


Икос 10




Стена и прибежище был еси чадом твоим, святителю Прокопие, ограждая их молитвами своими от всех наветов вражиих. Ныне же, прославляя святую память твою, усердно молим тя: предстоя Престолу Творца всяческих, защищай присно и нас от всякия скорби и напасти, да умиленно поем ти:




Радуйся, един многоценный бисер, иже есть Христос, стяжавый.

Радуйся, Его ради вся блага мира сего презревый.

Радуйся, представши Престолу Господню, поклонитися Ему сподобивыйся.

Радуйся, на Небесех с радостию вселивыйся.

Радуйся, Ангелом и всем святым во Царствии Божии сожителю.

Радуйся, града Херсона небесный хранителю.

Радуйся, пред Отцем Небесным Христом исповеданный.

Радуйся, на небеси надеждою вечнаго спасения обрадованный.

Радуйся, священномучениче Прокопие, Херсонскаго края светильниче неугасимый.   




Кондак 11



Пение ангельское всеумиленно принося в души твоей, священномучениче Прокопие, мужественно на смерть со Иоанном пресвитером шествовал еси. Мы же, взирая на подвиг и мученическую кончину вашу, взываем ко Господу: Аллилуиа.


Икос 11




Свет небесный осия души ваша, священномученицы святии Прокопие и Иоанне, егда сия вознесени быша святыми Ангелы ко Престолу Господню. Сего ради, немощный глас наш ко ангельскому пению совокупив, восхваляем мученическую кончину вашу и взываем:




Радуйтеся, в невечернем дни Царствия Божия водвореннии.

Радуйтеся, славою Божиею на небесех осененнии.

Радуйтеся, пред Христом Иисусом приснии наши заступницы.

Радуйтеся, веры Православныя неустрашимии исповедницы.

Радуйтеся, во Царствии Небеснем нетленную часть улучившии.

Радуйтеся, от Искупителя вечную мзду приимшии.

Радуйтеся, с небеси на нас присно взирающии.

Радуйтеся, на спасения стезю нас наставляющии.

Радуйся, священномучениче Прокопие, Херсонскаго края светильниче неугасимый.   




Кондак 12



Благодатию от Бога почтенный, святителю отче Прокопие, сердце твое сокрушенно и смиренно соблюл еси. Сего ради молим тя, Архипастырю наш, научи и нас, чад твоих, смиренным сердцем и сокрушенною душею купно с тобою славити Бога песнию: Аллилуиа.


Икос 12




Поюще твое ангелоподобное житие и восхваляя мученическую кончину твою, Прокопие всеблаженне, благодарим щедраго и милостиваго Бога, иже дал есть нам таковаго крепкаго покровителя и защитника граду нашему. Сего ради, уповая на велию помощь твою, с надеждою взываем ти:




Радуйся, града Херсона милостивый покровителю.

Радуйся, паствы Херсонския мудрый святителю.

Радуйся, верныя люди от врагов защищаяй.

Радуйся, всех от болезней и скорбей присно избавляяй.

Радуйся, краю Херсонскому присный предстателю.

Радуйся, благ вечных и временных нам от Бога подателю.

Радуйся, словесному стаду твоему добрый пастырю.

Радуйся, добрый и благий наш Архипастырю.

Радуйся, священномучениче Прокопие, Херсонскаго края светильниче неугасимый.   




Кондак 13




О преславный угодниче Божий, священномучениче Прокопие, светлый светильниче земли Херсонския! Ныне, восхваляя святую память твою, молим тя: приими от нас малое сие моление наше и умоли Господа, да милостив будет к немощем нашим и, простив нам всякое прегрешение вольное же и невольное, сподобит нас на Страшнем Суде одесную Его стати и купно с тобою и со всеми святыми в радости нескончаемей воспевати: Аллилуиа.

(Этот кондак читается трижды, затем икос 1 и кондак 1)



Молитва

О, преславный священномучениче Прокопие, страстотерпче непреодоленный, Архиерею Божий и о Церкви Херсонстей ходатаю! Призри на моление нас, почитающих святую память твою и испроси нам у Христа Бога прощения грехов наших, да не до конца прогневается на нас Господь: согрешихом бо и недостойнии явихомся милосердия Божия. Моли о нас Господа, да ниспослет мир на грады и веси наша, да избавит нас от нашествия иноплеменников, междоусобныя брани и всяких раздоров, и нестроений. Утверди, священномучениче всеблаженне, веру и благочестие во всех нас, и да избавит нас Господь от ересей, расколов и всякаго суеверия. О милостивый наш предстателю! Молися за ны ко Господу, да сохранит нас от глада и всяких болезней, и да подаст вся на потребу человеком полезная. Наипаче же да сподобимся молитвами твоими Небеснаго Царствия Христа Бога нашего, Емуже честь и поклонение подобает со Безначальным Его Отцем и Пресвятым Духом, ныне и присно и во веки веков. Аминь.

Тропарь, гл. 1

Светильник всесветлый во граде Херсоне явился еси, пастырю добрый, священномучениче Прокопие. Любовь и милосердие в сердцах верных насаждая, твердо стояти во исповедании веры Православныя призывал еси. Темже со пресвитером Иоанном за Христа пострадал еси, и ныне купно с ним на небеси престолу Божию предстоя, моли Милостиваго Бога отечество наше в Православии и благочестии утвердити, мир Церкви даровати и душам нашим велию милость.

Кондак, гл. 4

Во святителех благочестно пожив, и мучения путь прошед, безбожия силу побеждая, поборник быв Херсонстей пастве, богомудре. Темже тя почитающе, тако вопием: от бед избави нас присно твоими мольбами, отче священномучениче Прокопие.[/spoiler]

[Раб божий Константин]

Собору Святых Псково-Печерских.
[spoiler]Кондак 1

Избранныи Христовы подвижницы и крепции к Богу молитвенницы, во святей горе усердно подвизавшиися и при потоце Каменце Богоматернюю обитель основавшии, преподобнии отцы наши Марко, Ионо, Корнилие и мати Вассо, восхваляем вы любовию смиренно; вы же, яко имущии дерзновенное предстательство ко Господу, поминайте ны, во скорбех и печалех сущих, да зовем вам: Радуйтеся, преподобнии отцы наши, обители Богоматерния преславнии устроителие.

Икос 1

Ангелоподобное житие возлюбившии и суету мира отвергшии, направилися есте в дебри лесные при потоце Каменце, идеже во святей горе при триех каменех вознесоша своя молитвы к Богу, да дарует Он вечное житие в небесных обителех. Сего ради зовем вам: Радуйтеся, неложнии молитвенницы пред Богом; радуйтеся, лесные дебри молитвой облагоухавшии. Радуйтеся, о прощении грехов слезы проливавшии; радуйтеся, подвигами вашими струи потока Каменца удивившии. Радуйтеся, и всех верных ими возвеселившии; радуйтеся, не убоявшиися страха нощнаго. Радуйтеся, в нощи греха и от нас страх изымающии; радуйтеся, молитвенницы наши пречуднии. Радуйтеся, ходатаи наши предобрии; радуйтеся, воздух молитвою вашею освятившии. Радуйтеся, сердца наша благоуханием веры напоившии. Радуйтеся, преподобнии отцы наши, обители Богоматерния преславнии устроителие.

Кондак 2

Видя Богоматернюю обитель, яко звезду сияющую и небесным сиянием освещающую путь земнаго жития нашего, прославляем труды и моления ваша преславнии первоначальницы и старцы, в обители Псково-Печерстей потрудившиися, и Богу вопием: Аллилуиа.

Икос 2

Разумевше козни, от врага спасения нашего диавола содеваемые, терпение, пощение и молитву Богу противупоставили есте, и яко нищи телом и духом, в дебри лесныя сокрылися, дондеже зверолови пришедшии разгласиша людем о тайне подвигов ваших. Сего ради умиляющеся зовем: Радуйтеся, в терпении и смирении своем Христу Богу подражавшии; радуйтеся, у триех камней молитвы возносившии. Радуйтеся, греховное окаменение сердец молитвой удаляющии; радуйтеся, подобно Петру камнем веры ставшии. Радуйтеся, звероловами из тайн подвигов ваших изведенныя; радуйтеся, в сети добродетелей многая уловившии. Радуйтеся, теми и Христа возвеселившии; радуйтеся, устроителие тихой пристани спасения. Радуйтеся, нашего спасения непрестаннии ходатаи; радуйтеся, подвиги ваша Ангелом ликование. Радуйтеся, житие ваше грешным оплот. Радуйтеся, преподобнии отцы наши, обители Богоматерния преславнии устроителие.

Кондак 3

Силою Божиею к пустынническому житию призванный, пустынножитель старец Марк подвизашеся и сонм подвижников в святей горе собраша, и тою силою спасошася, тайной подвигов твоих Богу угождше, да потрудившеся тайно, воздаст ти Господь яве, сего ради зовем Ему: Аллилуиа.

Икос 3

Имея помысл чист и душу непорочну, блаженный отче Марко, уразумел еси суетность мира сего и непостоянство, и вечных благ вожделев, отрекся еси от мира и иноческое житие восприим. Сего ради и восхваляем тя, славяще еже о тебе изволение Божие: Радуйся, яко земное отринув, умом твоим в небесное воспарил еси; радуйся, путь твой в небо подвигом украсил еси. Радуйся, смирения теплый стяжателю; радуйся, молитвы кадило благоприятное. Радуйся, слез покаянных неоскудный источниче; радуйся, благое иго Христово на себе возложивый. Радуйся, всего себе Богу предавый; радуйся, красоту селения Божия возлюбивый. Радуйся, приметатися в дому Божию изволивый; радуйся, яко странник и пришелец быв на земли. Радуйся, и нас не оставляяй твоею помощию. Радуйтеся, преподобнии отцы наши, обители Богоматерния преславнии устроителие.

Кондак 4

Бурею искушения и бед веры ради православныя и жития чистаго от латинян претерпевый и единаго точию на потребу ища, еже како Богу угодити, покинул еси град Дерпт, идеже ты пастырствовал еси, блаженне Ионо, и достигл еси Псковские страны, при потоце Каменце обитель Богородицы учредив, в нейже с лики иночествующих немолчно вопиял еси Богу: Аллилуиа.

Икос 4

Слышавше христоименитии людие града Пскова и веси, яко основание обители иноческия положил еси, преподобне Ионо, возрадовашеся радостию велиею, и яко Ангела Божия тя почитаху, служаще от имений своих к устроению оныя обители и вопияху тебе сице: Радуйся, веления Божия послушателю; радуйся, пастырю добрый Христова стада. Радуйся, злобою латинян за веру искушенный; радуйся, со скорбию паству свою дерптскую покинувый. Радуйся, славный сподвижниче блаженнаго пресвитера Исидора; радуйся, в страну Псковскую стопы своя направивый. Радуйся, о пещерех, Богом зданных, от изборян услышавый; радуйся, Богоматерию возлюбленный и призванный. Радуйся, в горе церковь Успения ископавый; радуйся, две келлии на столбах противу церкве устроивый. Радуйся, устроителю обители богомудрый. Радуйтеся, преподобнии отцы наши, обители Богоматериния преславнии устроителие.

Кондак 5

Богоприятная жизнь источается от тебе, о преподобне Ионо! Тую бо обретше, яко некое сокровище, супружница твоя и чада, и яко бисер многоценный слагающе в себе, на высоту добродетелей восшедше, восхвалиша Бога песнию: Аллилуиа.

Икос 5

Видя преславное житие и терпение мужа своего, не устрашилася еси трудов и подвигов, преподобная мати Вассо, и подражая житию его, поселилася еси близ обители, основанной у потока Каменца, и тамо пострижение иноческое и болезни тела приняла еси, сочетавшеся Христу, сего ради восхваляем тя похвалами сими: Радуйся, преславная сподвижнице супруга твоего; радуйся, последовавшая за ним к пещере, Богом зданней. Радуйся, первая постриженице Богородичной обители; радуйся, чада твоя благочестию научившая. Радуйся, скорби пастырския и гонения от латинян в Дерпте с супругом твоим разделившая; радуйся, в волнении духа веры не угасившая. Радуйся, пожелавшая со Христом сочетатися; радуйся, Богоматернюю обитель возлюбившая. Радуйся, погребение прияти в ней возжелавшая; радуйся, первая чудотворице обители при Каменце. Радуйся, молитвами твоими в болезнех помогаеши. Радуйтеся, преподобнии отцы наши, обители богоматерния преславнии устроителие.

Кондак 6

Проповедуя слово Божие, преподобне отче Корнилие, в стране Чудстей, многия неверным ко Христу привел еси. Ревностию Божиею распаляем, храмы многи для чуди построил еси и, пресвитеры им даровав, указал еси им путь ко спасению, поя Богу: Аллилуиа.

Икос 6

Возсиял еси, яко звезда богосветлая, во обители Псково-Печерстей и стране Чудстей, преподобне блаженно Корнилие! От юности бо Христа возлюбив, и еще млад летами, но тверд разумом, поставлен был еси игуменом обители сея, идеже четыредесят и осьмь лет пастырствовал еси, храмы боголепны устрояя и обитель вельми украшая, сего ради зовем ти: Радуйся, юность свою Господеви предавый; радуйся, совершенство духовное во обители получивый. Радуйся, игуменом от братии достойно избранный; радуйся, жизнь святую и постническую проводивый. Радуйся, ревности ко благу обители и славе имени Христова неусыпный носителю бывый; радуйся, твердостию во искушении и непреклонностию в терпении даже и до смерти обогативыйся. Радуйся, многими храмы обитель украсивый; радуйся, крепки стены каменны воздвигий. Радуйся, и нам непрестанно помогающий воздвигати храм своея души; радуйся, ограждаяй нас, яко стеною, от греха и соблазна. Радуйся, великий о иноцех попечителю. Радуйтеся, преподобнии отцы наши, обители Богоматерния преславнии устроителие.

Кондак 7

Хотя пречестный игумен Дорофей зрети тайну пещеры погребальныя, увиде, яко гроб, идеже лежаше мощи преподобнаго первоначальника Марка, истлеша и разсыпашася, но глава и кости невреждены бывша и токмо обвиты, яко власяницей, корением древесным, в радости восклицаше Богу: Аллилуиа.

Икос 7

Дивно и непостижимо есть! Древо гроба тлению предадеся, кости же и глава, и куколь, и одежды преподобнаго старца Марка сохранишася. Нетление бо силу Божию проповедаша и праведность жития потвердиша, сего ради и мы, суще во умилении, глаголем: Радуйся, преподобне Марко, великий наш подвижниче; радуйся, нетлением костей твоих возсиявый. Радуйся, и риз твоих бренных нетления удостоивыйся; радуйся, греховное тление молитвами твоими в нас устраняяй. Радуйся, почитати тя нас наставляяй; радуйся, благословением архиереа Псковскаго Иннокентиа по временех в новы ризы облеченный. Радуйся, тояжде в нове гробе положенный; радуйся, добродетельное благоухание иночествующих. Радуйся, и доныне к обители любовию пламенея, охраняеши ю; радуйся, всяк бо, приходящий к тебе с верою, исцеления дары приемлет. Радуйся, неисцельныя язвы молитвою твоею исцеляющий. Радуйтеся, преподобнии отцы наши, обители Богоматерния преславнии устроителие.

Кондак 8

Странствие земное скончавшу ти, Ионо приснопамятно, иноцы обители уготовляху тя ко погребению и на теле твоем обретоша тайно носимыя тобою вериги; водрузиша их на стене противу гроба твоего, да видевшии их узрят и подвизи твои, спасения ради восприятия на ся, и благодарне Богу воззовут: Аллилуиа.

Икос 8

Вся братия обители твоея, преблаженне Ионо, со священным собором и люди со слезами и пении надгробными изнесосте, всечестне, тело твое ко гробу и погребоша тя в пещере, Богом зданней, близ храма Пресвятыя Богородицы Успения, тобою и горе ископанному и ходатайствы и труды твоими освященному, от псковских пресвитер, Живоначалъныя Троицы. Мы же у раки с останками твоими честными вопием ти таковая: Радуйся, во благоухании святыни сном смертным опочивый; радуйся, смерть вкусивый, тления же не познавый. Радуйся, в ризу нетления благодатию Божиею облеченный; радуйся, честная рака твоя бысть врачебница всем болящим. Радуйся, яко всяк, с верою к тебе приходящий, утешение получает; радуйся, разслабленных духом крепосте и твердыня. Радуйся, христианския семьи молитвой охраняющий; радуйся, иночествующим помощниче скорый. Радуйся, купно с Марком труды обители восприявый на ся; радуйся, купно с ним же в пещере почиваяй. Радуйся, твоим духом и нас не оставляяй. Радуйтеся, преподобнии отцы наши, обители Богоматерния преславнии устроителие.

Кондак 9

Ангелии небеснии радостно прияша честную душу твою, преподобная мати Вассо! И вознесоша ю во обители небесныя, идеже Царь славы Христос Господь венча тя венцем праведничим, егоже уготова всем возлюбльшим Его, и дарова нам тебе, заступницу и молитвенницу благую, да благодарно вопием Ему: Аллилуиа.

Икос 9

Витии многовещаннии не возмогут по достоянию воспети славу, от Господа уготованную святым Его во Царствии Небеснем, еяже наследницею сподобилася еси быти, преподобная мати Вассо! Сея славы сопричастницы и нас сподоби быти святыми твоими молитвами, да воспоем ти радостно: Радуйся, ликуй в чертоге Небеснаго Домовладыки; радуйся, с небесных высот и к нам милостивно приникаяй. Радуйся, иночествующим обители молитвою помогаяй; радуйся, в сониих и видениих верным являяйся. Радуйся, кощунную руку, дерзостно коснувшуюся раки мощей твоих, отмстившая скоро; радуйся, огнем, от гроба изшедшим, того устрашившая. Радуйся, в огне добродетелей нас очищающая; радуйся, отцем и матерем нашим в старости сило. Радуйся, чадам нашим благодатная помощь; радуйся, всем, притекающим к тебе, скорое услышание. Радуйтеся, преподобнии отцы наши, обители Богоматерния преславнии устроителие.

Кондак 10

Спасти хотя иночествующих от мира, обитель твою оградою каменною с башнями и вратами железными обнесл еси, преподобно отче Корнилие, чрез ограду от греха врата в Царствие Небесное открыл еси, идеже со Ангелы ныне ликуеши и песнопоеши Бога песнею: Аллилуиа.

Икос 10

Царю Небесному себе уготовивый еще на земли, смерть от руки царя земнаго мужественне приял еси. Бысть предпослан им от жития земнаго в Царствие Небесное. Сего ради удивляющеся твоим страданием за правду и мужественней кончине, со слезами зовем: Радуйся, священномучениче преславный; радуйся, клеветы ради невинно погубленный. Радуйся, молитвою твоею от клеветы нас защищаеши; радуйся, попечением твоим от злых недругов нас охранявши. Радуйся, обитель твою присно зряй с небесных селений; радуйся, защищаяй ю непрестанно от бед и напастей. Радуйся, честною кровию твоею путь от врат обители до храма Богородичнаго Успения освятивый; радуйся, грознаго царя к покаянию обративый. Радуйся, многими дарами от него почтенный; радуйся, благодатных даров церковных и нас сподобляеши. Радуйтеся, преподобнии отцы наши, обители Богоматерния преславнии устроителие.

Кондак 11

Пение всеумиленное приносим вам, преподобнии отцы наши: Марко, Ионо, преподобномучениче Корнилие и преподобная мати Вассо! Перед ракой мощей и святым образом вашим предстояще и молящеся прилежно, яко сподобилися есте небесных обителей, тако и нас доведите вашими молитвами Царствия Небеснаго, да воспоем Богу: Аллилуиа.

Икос 11

Светоприимны светильники вас вемы, Престолу Божию предстоящи и мрак страстей и грехов наших лучами молитв разгоняющи. Озарите убо от горних высот и наша сердца, да достойно вопием вам сице: Радуйтеся, Света Троическаго зрителие; радуйтеся, мира горняго блаженнии обитателие. Радуйтеся, земныя обители звезды небесныя; радуйся, Марко, блаженный старче и первоначальниче. Радуйся, Ионо, первый обители устроителю; радуйся, и доныне храм, тобою ископанный, красуется. Радуйся, Корнилие блаженный, игумен обители сея и славный преподобномучениче; радуйся, даже до смерти мучения возлюбивый обитель свою. Радуйся, и ныне посещаеши ю твоим духом праведным; радуйся, Вассо, достойная сподвижнице супруга твоего и по смерти. Радуйся, при погребении твоем гроб твой с останками в земли оставите невосхотевшая, но на поверхность земли их дважды возносившая; радуйся, теми указавшая оставити мощи твоя на поверхности земли в пещере, Богом зданней. Радуйтеся, преподобнии отцы наши, обители Богоматерния преславнии устроителие.

Кондак 12

Благодать и милость испросите нам у Бога, преподобнии, молитвами вашими, да утвердившеся в заповедех Его, получим спасение вечное и, присно величающе вы хвалами благодарными, воспоим Богу: Аллилуиа.

Икос 12

Поюще подвиги предивнаго жития вашего и славяще чудеса, ублажаем вас, преподобнии, яко многомощных молитвенников о нас пред Господем. Вы же принесите моление теплое о нас ко Владыце, да сподобит нас Небесного Царствия Своего, вопиющих вам с любовию таковая: Радуйтеся, благодатию Пресвятого Духа приосененнии; радуйтеся, Пресвятыя Троицы служителие вернии. Радуйтеся, Ангелом собеседницы предивнии; радуйтеся, воспевающий вкупе со Архангелы и Ангелы Бога. Радуйся, Марко, жития нашего наставниче; радуйся, Ионо, пастырю преискренний. Радуйся, Корнилие, блаженный на небеси ходатаю; радуйся, Вассо, училище благочестия, добродетельми сияющее. Радуйтеся, преславнии отцы наши, в обители Псково-Печерстей просиявшии; радуйтеся, немеркнующим светом души наша озаряющии. Радуйтеся, преподобнии отцы наши, обители Богоматерния преславнии устроителие.

Кондак 13

О преподобнии угодницы и преславнии чудотворцы: Корнилие, Марко, Ионо и Вассо! Милостивно приимите от нас сие малое моление наше, в похвалу вам возносимое, и предстоя Престолу Царя славы, умолите Его, да сохранит нас от враг видимых и невидимых, от смертоносных ран и недугов, от всяческой скорби и печали житейской, и вечнаго мучения избавит ны, вопиющих Ему усердно: Аллилуиа.

(Этот кондак читается трижды, затем икос 1 и кондак 1)



Молитва Псково-Печерским святым

О, преподобнии отцы наши и великие чудотворцы: Корнилие, Марко, Ионо, Вассиане, Дорофее, Лазаре, Симеоне, Александре и мати Вассо!

Смиренно припадающе к вам и коленопреклонше молящеся пред ракою мощей и пречистым образом вашим, просим: не отвратите лица вашего от молящихся с сердцем сокрушенным и смиренным, умолите Господа сил, да сохранит мирну страну нашу, обитель же сию да укрепит и всем, подвизающимся в ней, дарует спасение вечное.

Помозите нам, угодницы Божии, создати храм благолепен в сердцах наших и украсити сей храм добродетельми, да жительствует в нем едино Господь! Оградите нас стеною молитв ваших от греховных стрел и искушений, да богоугодне зде на земли поживем и вечное Царство унаследим, хваляще Отца и Сына и Святаго Духа, ныне и в бсзконечныя веки. Аминь.[/spoiler]

[Раб божий Константин]

АКАФИСТ на Сошествие Святаго Духа.
[spoiler]Кондак 1
     Возбранный Параклите, Царю неба и земли, Животворящий, Спасительный и Всесвятый Душе, выну от Отца исходяяй и в Сыне почиваяй, сошествием же в виде огненных языков Апостолы просветивый, снизойди и ныне с горних высот на ны недостойныя рабы Твоя, и породи нас к новой благодатной жизни, да воспоем Тебе:
     Прииди, Утешитель Благий, вселися в ны, и спаси души наша.


Икос 1
     Ангелов Творец и Господь Сил с небесе сошед и плотское восприем естество наше, прииде на землю, да спасет Крестом и Воскресением Своим падший древле род человечь, и паки восшед на небо, седе одесную Бога и Отца, да совознесет и обожит естество наше, и да созиждет на земли Царство правды и мира о Дусе Святе, егоже никтоже может видети, аще кто не родится свыше Темже Духом. Сего ради Господь наш, ко Отцу отходя, не остави нас сирых, но обетова грешником своим, глаголюще: Аз умолю Отца и инаго Утешителя даст вам, да будет с вами во век, Дух Истины, Егоже мир не может прияти, ниже знает Его, иже от Отца исходит, Той свидетельствует о Мне. Утешитель, Дух Святый, Той вы научит всему и воспомянет, яже рек вам. Сему обетованию внемлюще, апостоли моляху Тебе, Святый Утешителю, да скоро снидеши, вопиюще Тебе сице:
     Прииди, Утешителю Благий, выну от Отца исходяяй.
     Прииди, Небесной Параклите, присно в Сыне почиваяй.
     Прииди, Подателю жизни, приклони небеса и сниди.
     Прииди, Небесный Царю, прикоснися горам и воздымятся.
     Прииди, Всесвятый Душе, и настави нас светом истины Твоея.
     Прииди, кристаловидный Животе, и просвети мир огнем благодати Твоея.
     Прииди, Утешителю Благий, вселися в ны, и спаси души наша.


Кондак 2
     Видев Господь по Воскресении Своем ученики Своя еще плотская мудрствующих и земное царство чающих, явися, им дверем затворенным, дуну и преподаде им Духа Святаго благодать просвещающую помышления их и уготовляющую их к приятию существенному таинства Божественнаго, глаголюще: Приимите Дух Свят, Имже отпустите грехи, отпустятся им, и имже держите, держатся. Темже, приемше таковую власть духовную, укрепишася духом, вопиюще Богу: Аллилуиа.


Икос 2
     Разум Божественный о грядущем Царствии Божии открывая, Господь наш собра ученики Своя вся вкупе на горе Елеонстей, и повеле им по Вознесении Его на небо от Иерусалима не отлучатися, но ждати обетования Отча, дондеже облекутся силою свыше, яко не по мнозех днех имут креститися Духом Святым. И тако заповедав, рече им: нашедшу Святому Духу на вы, приимите силу и будете Ми свидетели во Иерусалиме и во всей Иудеи и Самарии и даже до последних земли. И сия рек, вознесеся на небо. Ученицы же, возвратившеся во Иерусалим, взыдоша в горницу и бяху вси терпяще единодушно в молитве и молении и пощении с женамии Мариею Материю Иисусовою и с братиею Его, чающе сошествие Утешителя и поюще Ему сице:
     Прииди, Душе Господствуяй и Животворяяй, Отцу Собезначальный и Соприсносущный.
     Прииди, Душе Истинный и Всеблагий, с Сыном Купносущный и Равночестный.
     Прииди, Душе Владычный, от Отеческаго состава и от Божественных и Безначальных уст Его несказанно Исходяяй.
     Прииди, Душе Христов, Соипостасное Дыхание и Премудрости Сило, в Сыне нераздельно пребываяй.
     Прииди, Непостижимый Просветителю, откровение тайны Пресвятыя Троицы людем даровати восхотевый.
     Прииди, Премудрый Всепосетителю, весь мир благодатными дарованиями исполнити возжелавый.
     Прииди, Утешителю Благий, вселися в ны, и спаси души наша.


Кондак 3
     Силою Божественною облечен Святый Петр, востав посреди ученик, рече к ним: Мужие братие, преклоньше колена, сердца же горе возведше, помолимся ко Господу нашему, обетовавшему Утешителя инаго, да созиждет чисты сердца наша и да обновит дух прав во утробах наших и да сотворит горницу сию Церковь Божию и скоро да ниспошлет нам Духа Всеблагаго Своего, Емуже вси да воспоим едиными усты и единым сердцем: Алиллуиа.


Икос 3
     Имуще страх велий, Апостоли в смущении быша, како немощным им сущим, якоже агнцам без Пастыря, проповедати Евангелие всей твари, сего ради, егда скончавахуся дние Пятьдесятницы, быша вси вкупе на молитве и вознесоша тепле моление ко Пастырю Своему, глаголюще: Царю Ангелов, управляяй всеми на земли и на мори! Раби Твои вопиют к Тебе: скоро посли нам Всесвятаго Духа Твоего. Господь же их плотию на небесех Отцу соседяй, услышав моление сие рече: Самовластный Утешителю, снизойди, чают бо Тя ученицы Мои, ихже собрах к Тебе и ко Отцу, тепле бо вопиют к Тебе, глаголюще:
     Прииди, Душе Благий и настави нас на землю праву.
     Прииди, Свете Святый, и направи стопы наши на стезю мирну.
     Прииди, Владыко Непостижиме, всем хотящим спастися несумненное упование.
     Прииди, Неизследимый Царю, всем жаждущим правды благодатное насыщение.
     Прииди, Душе Живый и Животворяй, Твоею бо благодатию живем и движемся и есмы.
     Прииди, Свете Святый и Светоносяй, Твоею бо чистотою возвышаемся, светлеемся и хранимы.
     Прииди, Утешителю Благий, вселися в ны, и спаси души наша.


Кондак 4
     Бурное дыхание велие внезапу пронесеся, учеником в Сионе собранным и в горнице об часе третьем дне молящимся, и бысть шум, яко гром с небесе, тишине велией окрест сущей, и исполни весь дом, идеже бяху седяще. И колебашеся храмина, яко лодия, и убояшеся апостоли мняще, яко от дыхания бурна падется горница, и вси в страсе возопиша: О, Владыко, утиши колебание и посли Всесвятаго Духа Твоего, Емуже согласно да воспоем: Аллилуиа.


Икос 4
     Слышаще шум с небесе и колебание воздушное видяще, боголюбивии Апостоли и вси сущии с ними исполнишася ужаса, зане в дыхании бурне сошествие Утешителево уразумеша и в шуме небеснем глас Господень ощутиша, в себе помысливше: се глас Господень возгреме в крепости. Се глас Господа Источающаго пламень огня, якоже Давид предрече. Се буря от Господа, якоже Иеремия возвести. В сие время Господь наш восхоте послати Утешителя инаго и даровати Закон нов, якоже древле на Синаи. Тамо от гласа Его колебашеся гора, здесь же от дыхания Утешителева потрясеся горница, тамо быша громи и молния, здесь же пронесеся шум с небесе. Обаче приступихом не к горе осязаемой и огнем пылающей, но к Сионстей горе, к Иерусалиму Небесному, к Ходатаю Завета Новаго, да приимем Царство Непоколебимо, и да восприимем благодать Духа, ею же послужим благоугодно, вопиюще Ему сице:
     Прииди, Душе Страха Божия, не во огне и буре, но во гласе хлада тонка, да нас от духа боязни рабския свободиши.
     Прииди, Душе Сыноположения, апостолы во едино стадо совокупивый, да и нас чада Божия сотвориши.
     Прииди, Душе Премудрости и Откровения, да воспомянеши нам вся словеса Христовы в познание Его.
     Прииди, Душе ведения и благочестия, да просветиши очи сердечный светом заповедей Его.
     Прииди, Душе Божия Святыни, да облечеши нас силою свыше от Своих небесных высот.
     Прииди, Душе всякия благостыни, да окропиши нас росою благодати по множеству Своих щедрот.
     Прииди, Утешителю Благий, вселися в ны, и спаси души наша.


Кондак 5
     Богоноснии Апостоли еще паче исполнишася страха, егда по гласе шума се бысть им видение новое паче перваго и явишася огненнии языцы, разделяющияся сюду и сюду, и седоша по единому на коемждо от них над главами их, да исполнится Давида праотца предречение: Бог яве приидет и не умолчит, огнь пред Ним возгорится и окрест Его буря зельна. Сим духоносным огнем Утешителя просвещаемии, апостоли со страхом и с радостию возопиша, сретающе пришествие Его: Аллилуиа.


Икос 5
     Видевше сошествие Утешителя в виде огненных язык, Апостоли удивишася, како дыхание бурно с пламенем совокупися, и како с ветры видены быша светильницы, с росою же искры. Наипаче же объяша их страх Божественный, егда огненнии языцы, седше над главами их, не опалиша власы, но паче просвещаху мысли их, и тако огнедохновенным озарением Святаго Духа просвещаеми, уразумеша проречение Давидово: Огнь от Лица Его воспламенится: углие возгореся от него. И приклони небеса и сниде. И прославиша Бога, яко прииде обетованный Утешитель, да огненное крещение восприявше от Него, благодарственно возопиют ему сице:
     Прииди, Огненосный Душе, да огненным крещением весь мир просветиши.
     Прииди, огнь подаяй, Боже, да терние наших прегрешений попалиши.
     Прииди, огнь Божественный на землю низводяй, Господи, да угасшия светильницы душ наших паки возжеши.
     Прииди, огненныя реки апостолом орошаяй, Владыко, да теми весь мир огнем благодати Твоея обновиши.
     Прииди, во огненных языцех всему миру на молитве возглаголавый Душе, воздыхании неизглаголанными научи нас о чесом молитися Небесному Отцу.
     Прииди, во огне и буре Божество Пресвятыя Троицы Открывый, Царю, огнедохновенным дыханием воспламени огнь Божественныя любве и в наши хладныя сердца.
     Прииди, Утешителю Благий, вселися в ны, и спаси души наша.


Кондак 6
     Проповедник дивный, божественный Петр, видев, яко огненное видение исполни страха ученики, возопи: не бойтеся, огнь сей нежегомый есть, якоже древле неопалимая купина, или якоже пламень Вавилонския пещи, иже не опали три отроки. Сего ради кийждо от нас да отринет страх из души, и да не убоится неопальнаго пламени, огнь бо сей да разумеем, якоже рози, яко цвети на главах наших, имиже увенча, украси и озари нас Всесвятый Дух, Емуже вси с радостию да воспоим: Аллилуиа.


Икос 6
     Возсия велие просвещение благодати Божией всей Церкви Христовой в великий сей Пятидесятный день, егда во огненных языцех Ты Сам существенно снисшел еси на апостолы и на вся верующия, Святый Животворящий и Всесильный Душе, Един Сый от Пресвятыя Троицы, и богатно излил еси не некия Отчии дары, якоже прежде, но от всея полноты Божества излил еси от Духа Твоего на всяку плоть, не в меру бо подаст Бог Духа, и потекоша реки воды живыя благодати Твоея от Иерусалима во всю вселенную, и тако завершишася телесныя дела Христовы и прияша начало дела Твоя, Душе, да созиждется Царствие Твое в человецех и да преобразится Тобою мертвенная плотская жизнь наша на живую и духовную. Сего ради вси водимии Тобою да воспоем Тебе сице:
     Прииди, Утешительный Душе, с небесных высот сошедый, да безкнижныя ученики Христовы неботаинники сотвориши.
     Прииди, Небесный Царю, везде сый и вся исполняяй, да во Христа верующия духовныя жизни сопричтеши.
     Прииди, неумаляемое Сокровище благодати, да приобщиши нас даров Твоих, и райскою радостию возвеселимся.
     Прииди, Неувядаемый Цвете чистоты, да окропиши нас иссопом Твоим и паче снега убелимся.
     Прииди, Зиждителю всея Твари, да царствуеши и господствуеши над всеми силами души моея.
     Прииди, Владыко Неба и Земли, да властвуеши и управляеши над всеми движениями сердца моего.
     Прииди, Утешителю Благий, вселися в ны, и спаси души наша.


Кондак 7
     Хотя спасти вся языки, Господи, даровал еси учеником Твоим во огненных языцех Духа Твоего, да по обетованию Твоему возглаголют новыми языки, и вси исполнишася Духа Свята и начаша глаголати иными языки, якоже Дух даяше им провещевати, да вси народи от всех язык на праздник пришедшия, услышат их проповедующия своими их языки. В Вавилоне иногда размесишася языцы дерзости ради столпотворения, да разделятся языки, ныне же боговедения ради умудришася языцы, в соединение бо всех призва Вышний, да согласно славят всесвятаго Духа, поюще Ему едиными усты и единем сердцем: Аллилуиа.


Икос 7
     Новое чудо Твое, Утешителю, бысть во знамение всем, и исполни ужаса языков собрания на праздник пришедших: видяху бо учеников Спасовых огненными языки глаголющих и кийждо от них свою беседу слышаше. И дивляхуся вси, друг другу глаголюще: не вси ли сии глаголющии галилеяне суть, и како мы слышим кийждо свой язык, в немже родихомся? Како сотворишася соотечественницы всем языком? Видел ли есть Петр Египет? Живяше ли когда Андрей в Месопотамии? Видеша ли когда Памфилию сыны Заведеовы? Како явишася сии Римляном, яко не варвари, Парфяном, яко им подобнии, Мидяном же, яко свои. Обаче елицы благоговейнии быша, тии прославиша Бога, вопиюще Утешителю сице:
     Прииди, во пророцех глаголавый Божественный Душе, возглаголи мирная и благая в сердцах наших.
     Прииди, во Апостолех проповедавый огненными языки Безсмертный Царю, возсияй молниями Божества в душах наших.
     Прииди, Животе Безначальный, разделенныя языки в соединение призвавый, и в нас дух вражия разделения всеконечно потреби.
     Прииди, Любы Безконечная, Апостолы на вечери союзом любве связавый, и в нас дух братския любве навеки насади.
     Прииди, с небесе снисшедый Утешителю наш, да на стези небесныя наставиши нас, Тебе поющих.
     Прииди, от земных горе возвышаяй Боже наш да от сладости мирских красот избавиши нас Тебе вопиющих.
     Прииди, Утешителю Благий, вселися в ны, и спаси души наша.


Кондак 8
     Странными глаголы вещающе, возглаголаша святии Апостоли странныя учения и странныя веления Святыя Троицы, от Духа Святаго просвещаеми. Высокоглаголивыми же проповедующе языки, не человеком глаголаху первее, но Богу, тайны вещающе духом, якоже божественный Павел глаголет, быша бо в восторзе духовном, неизглаголанными воздыхании Святаго Духа наставляеми. Неверующим же от язык сие Духа действо пьянство непщевашеся быти. Обаче мнози благоговейни бывше, ужасахуся, и недоумевающеся, друг друга вопрошаху: что убо хощет сие быти? И с верою прославиша Бога, поюще Ему: Аллилуиа.


Икос 8
     Весь исполнен быв огненосныя благодати Духа Божия, святый Петр, востав с единонадесятьми, воздвиже глас свой и нача проповедовати собранным от язык величия Божия и страшное Твое, Святый Утешителю, во огненных языцех схождение, еже пророк Иоиль древле предрече, глаголя о сем великом и просвещенном дне Господнем: «Изолью от Духа Моего на всяку плоть, на рабы Моя и на рабыни Моя, и прорекут сынове ваши и дщери ваши и юноши ваши видения узрят». Сим Святым Духом исполненнии бывше, Апостоли не вином упишася, но упоением Духа, новаго винограда рождения Божественнаго веселия приобщившеся, вопиюще и глаголюще сице:
     Прииди, Божественный Утешителю, во Иордане на Спаса нашего в виде голубине снисшедый, даруй нам криле голубине кротости и чистоты, да полетим и почием.
     Прииди, Сладчайший Душепосетителю, в Сионе ко апостолом во огненных языцех пришедый, ороси нас огнем благодати Твоея, да верою и любовию воспламенеем.
     Прииди, Святый Живоначальный Душе, древле в человецех плоть сущих пребывати не восхотевый, свободи нас законом духа от закона плоти, да паки живеши в нас.
     Прииди, Великий Непостижимый Боже, в последок дний сих от Духа Твоего на всяку плоть изливый, сподоби нам не по плоти жити, но по духу, да всегда пребудеши в нас.
     Прииди, Душе всякия чистоты, помози нам, да плоть не похотствует на дух наш, и да Тобою водими будем.
     Прииди, Присный наш Животе, спобори нам, да не сеем в плоть и тление, но в дух, да от Духа Твоего жизнь вечную пожнем.
     Прииди, Утешителю Благий, вселися в ны, и спаси души наша.


Кондак 9
     Всякое естество человеческое возвеселися днесь о сошествии Твоем, Утешителю Благий, зане в ветхую Пятидесятницу при Синае бывшую, вси людие издалече стояху в страхе и в ужасе, всей горе дымящейся и во огне бывшей, един бо точию Моисей взыде на верх ея во мрак, идеже бяше Бог. Ныне же, вси слышавшии Петра умилишася сердцем, увероваша и крестишася, и приложися в день той душ, яко три тысящи, и тако в сей великий день Пятидесятницы положися начало Церкви Христовой на земли и вси исполнишася Духа Святаго и духом взыдоша на гору Господню благодати Божия, вси очами веры Господа узреша и с радостию возопиша Ему: Аллилуиа.


Икос 9
     Витии Божественныя святии Апостоли, прежде безкнижнии рыбарие, ныне же мудрии богословцы явишася, прежде починяху мрежи своя, ныне же облеченнии силою свыше от Духа Святаго, начаша проповедь Слова Божия, прежде точию рыб уловляху, ныне же сотворишася ловцы человеков и люди безчисленнии из глубокия тьмы начаху изымати. Прежде боящиися, ныне же дерзновение приявшии и радости исполненнии от Тебе, Святый Утешителю, тии уразумеша, яко нова тварь ныне суть и каковый велий дар получиша по обетованию Господню, сего ради ныне отбеже от них страх и дух немощи и тии ощутиша, яко уже имут силу по повелению Господню пройти даже до конец вселенныя, учаще вся языки и крестяще их во имя Отца и Сына и Святаго Духа. Сего ради в веселии духа возопиша сице:
     Прииди, Свете Живоначальный, да вся языки светом боговедения просветиши.
     Прииди, Животе Безначальный, да вся человеки к новой жизни во Христе приобщиши.
     Прииди, Теплото Живительная, да духом любве Твоея хладныя сердца неверных языков воспламениши.
     Прииди, Сладосте Неизреченная, да благодатию Твоею всех вкусивших ю паче меда и сота усладиши.
     Прииди, Радование наше непрестанное, да нас скорбных и печальных очищением совести возвеселиши.
     Прииди, Сокровище наше превожделенное, да нас нищих и убогих множеством дарований духовных обогатиши.
     Прииди, Утешителю Благий, вселися в ны, и спаси души наша.


Кондак 10
     Спасения день - сей великий Пятидесятницы праздник, в оньже, Утешителю Благий, Церковь Христову до скончания века облагодатил еси и всю тварь Твоим Живоносным дыханием обновил еси, Везде сый и вся исполняяй, Ты идеже хощеши дышиши, вся живиши и повсюду в мире разливаеши свою живоначальную силу: Тебе поет солнце, Тебе славит луна, Тебе служит свет, Тебе работают источницы, Тобою един дождь напояет землю и бывает бел в кринех, и красен в розах, багрян же в фиалках, тако многообразна благодать Твоя: единому убо даеши слово премудрости, другому - дар пророчества, иному - сказание Божественных Писаний: единаго укрепляеши на целомудрие, другаго учиши поститися и подвизатися, оваго же уготовляеши на мученичество. Вся же сия действуеши Ты, единый Душе, разделяя коемуждо хощеши, да всякое дыхание поет Тебе: Аллилуиа.


Икос 10
     Царю Небесный и жизни Подателю! Царство Твое — Царство всех веков и Владычество Твое во всяком роде и роде. Сошед же на апостолы, Ты явил еси ими Царство не от мира сего — Церковь Христову, юже исполнил еси безчисленными дары благодати Твоея, имиже, яко финикс процвете и яко кедр, иже в Ливане умножися. И тако Твоею благодатию напояема, Церковь процвете многочисленными сонмы девственник, учителей, мучеников, исповедников, преподобных, пустынников, да исполнится Осии пророка предречение: процветет, яко цвет и прострет корение, яко дубрава и яко маслина плодовита будет. Зряще убо сии сонмы духоносных отцев, Тобою, Святый Душе, возращенных, воззовем Тебе таковая:
     Прииди, Источниче Божественных сокровищ, вдохни нам светоносныя Твоя дарования.
     Прииди, Подателю и Совершителю нашего освящения, освяти ум, сердце и вся наша помышления.
     Прииди, благости и милосердия Неизнуряемое Хранилище, сохрани в нас жизнь духовную под кровом Твоея благости.
     Прииди, настоящих и грядущих благ Нескончаемое Сокровище, соблюди нас в чистоте совести в предначатие вечныя радости.
     Прииди, падших Всенадежное Востание, Тобою бо источаются благодатныя струи напояющия всяку тварь ко оживлению.
     Прииди, мертвых духом и телом Благое Воздвижение, Тобою бо подаются вся силы к животу и благочестию, воздвизающия всяку плоть к Воскрешению.
     Прииди, Утешителю Благий, вселися в ны, и спаси души наша.


Кондак 11
     Пение духовное воспоем Тебе, Святый Утешителю, Твое во огненных языцех на Апостолы Сошествие празднующе и сим Павловым глаголом последующе: «помолюся духом, помолюся и умом, воспою духом, воспою и умом». И тако духом на молитве и в служении пламенеюще, да не угасим плотоугодием Духа Твоего, во святом крещении восприятаго, но присно да взираем на уверовавших в день Сошествия Твоего: тии бо внимающе слову Петрову: «спасайтеся от рода сего развращеннаго», выну бяху в учении апостол, в общении и преломлении Хлеба Жизни и в молитвах, и бысть на всякой душе страх Божий, и бяху вси вкупе единодушно, имуще вся обща, и с радостию в простоте сердца воспеваху Богу: Аллилуиа.


Икос 11
     Света солнечнаго светлее явися благодать Твоя, Светоносный Душе, вся бо просветляеши, очищаеши и освещаеши Твоим огненосным осиянием. Ты бо сошел на Пресвятую Деву Марию, соделал еси Ю Пресветлый храм девства и Пречистый дом Божества Сыну Божию. В явлении же Твоем во Иордане при Крещении Господнем в виде голубине Ты отверзл еси небеса грехопадением Адамовым заключенная и обожил еси Пречистую плоть Христову. В Сошествии же Твоем на Апостолы исполнил еси Божественнаго присутствия Своего всю Церковь, Невесту Христову, да будет непорочна и свята. Сего ради точиши в Ней пророчествия, и священники совершаеши, собираеши весь собор церковный, и сходиши, яко огнь с небесе в Божественную Литургию и во всех таинствах, и тако вся Церковь одевается светом благодати Твоея, яко ризою, да во Свете Твоем узрим Свет, и да воспоем Тебе сице:
     Прииди, чистотою Сияющий Душе, Святую Деву Чисту в рождестве сохранивый, да и нам благодать девства и чистоты преподаси.
     Прииди, небеса разверзший Небесный Царю, на Спаса Христа при Крещении низшедый, да и всем верующим в Него путь на небо отверзеши.
     Прииди, Солнце Незаходимое и Несокрываемое, да свет возсияши праведным и правым сердцем веселие.
     Прииди, Сияние Присносияющее и Немерцающее, да внутрь нас возсияеши Церковь Божия Духа в Твое Божественное посещение.
     Прииди, Свете Святый и Животворяй, просвети мир Твоим Божественным осиянием.
     Прииди, огню от огня Происходяй и Боготворяй, озари нас Твоим огненосным вдохновением.
     Прииди, Утешителю Благий, вселися в ны и спаси души наша.


Кондак 12
     Благодать духоносную даровал еси, Утешителю Святый, всей Церкви Христовой в великий день Святыя Пятидесятницы, якоже и прежде выну спребывал еси Владыке Христу во днех Его плоти, яко же великий в богословех святый Григорий витийствует: «Рождается Христос и Дух предворяет. Крещается Христос и Дух свидетельствует. Искушается Христос и Дух возводит (в пустыню). Совершает силы Христос и Дух сопутствует. Возносится Христос и Дух преемствует». Сего ради и начатки Божества подаеши ныне, Святый Душе, естеству перстному, да паки возведеши е к первому райскому благородию и да обожиши е во образ Вознесеннаго на небеса естества Христова. Мы же исчести не могуще многочисленная паче песка морскаго благодеяния дарований Твоих, вопием Тебе: Аллилуиа.


Икос 12
     Поюще, Божественный Душе, Твою Живоначальную благодать, обновляющую лице земли дохновением Твоим, поклоняемся Твоему во огненных языцех на Апостолы сошествию, и веруем, яко по обетованию Христову выну Твоя благодать во Святей Церкви пребудет, дондеже паки приидеши в последний день во общее Воскресение во еже воздвигнути вся от века умершия, яко же святый Иезекииль предрече глаголя: «от четырех ветров прииде, Душе, и вдуни в мертвыя кости сия и да оживут. И вниде в них Дух Жизни и ожиша и сташа на ногах своих собор мног зело». Тогда не посрами нас вопиющих Тебе сице:
     Прииди, Утешение и Радосте моя, услыши мя в день скорби и печали моея.
     Прииди, Дыхание и Жизнь моя, буди ми един дух со мною до самыя смерти моея.
     Прииди, Блестящееся одеяние души моея, покрый внутреннюю наготу и безобразие грехопадения моего.
     Прииди, Теплейшее очищение совести моея, отмый скверну души и тела моего чистыми слезами пришествия Твоего.
     Прииди, Пище Неизреченная и Нетленная, напитай алчущий дух мой в жизнь вечную безсмертия плодами.
     Прииди, Питие Божественное и превожделенное, напой жаждущую душу мою благочестия водами.
     Прииди, Утешителю Благий, вселися в ны и спаси души наша.


Кондак 13
     О, Небесный Параклите и Душе Всесвятый, от Отца Исходяй и Сыном Пришедый! Приими малое сие от всея души приносимое Тебе благодарение. Прииди к нам и пребуди выну в Церкви, да не угаснет в нас Божественный пламень Тобою возженный. И сподоби нам духом пламенети и плотоугодия не творити в похотех, да никогдаже угаснет дух наш и да выну прославляти будем Тя в душах и телесех наших, и тако возрожденнии Тобою, чистым духом и чистыми усты воспоем Единому Богу во Святей Троице: Аллилуиа.


Этот кондак читается трижды, затем икос 1-й и кондак 1-й

Молитва на Сошествие Святаго Духа
     О, Небесный Царю, Утешителю Святый, Душе Истины, везде сый и вся исполняяй, никогдаже начинаемый, ниже престаяй, но со Отцем и Сыном присно Сущий, первее во Ангельских Воинствах действовавый, священие даруя; и при миробытии в начале верху воды носивыйся, яко жизни Податель, в рай же первозданныя люди дыханием жизни воодушевивый и сладким общением Божественным утешавый я, по грехопадении же прародителей наших не восхотевый с падшими сынами человеческими пребывати, зане плоть быша, но точию во избраннех патриарсех и пророцех древле отцем глаголавый, в последок же дней сих, восхотев излити от Духа Своего на всяку плоть, первее на Честнейшую Горних Сил Пресвятую Деву Марию низшедый и велие таинство Воплощения Сына Божия Тою неизреченно совершивый, и паки на Том же Сыне Божием, во плоти на Иордан пришедшем, в виде голубине почивый, по сем же в великий день Пятидесятницы существенно в видении огненных язык на Апостолы сошедый и сими всю вселенную просветивый и Святую Церковь до скончания века Своею Божественною благодатию изобильно исполнивый, во еже падшее естество наше обожити и паки к райскому блаженству возвратити! Призри убо в сей великий, совершенный и конечный Пятидесятный праздник на моления рабов Твоих коленопреклоненно Тебе возносимый, и очисти нас священным наитием Твоим от множества согрешений наших во всем житии нами содеянных. Едине Чистый и Пресвятый Душе, очисти нас от многия нечистоты нашея, да не паки оставиши нас, аще по плоти жити будем, яко не имать обитати Дух Твой в человецех плоть сущих, зане плоть и кровь Царствия Божия наследити не могут. Сего ради молим Тя: угаси живоносным дыханием Твоим весь пламень страстей наших, да не творим плотоугодия в похотех, но водимии Тобою, да будем прославляти Тя в душах и телесех наших. И избави нас от духа праздности, уныния, печали и гордости и даруй нам дух кротости и чистоты, дух смирения и целомудрия, дух терпения и любве, да приидеши во внутреннюю храмину душ наших и воцаришися тамо над страстями нашими, во еже сеяти нам ктому уже не в плоть и тление, но в дух, да от Духа Твоего пожнем живот вечный в последнее Воскресение и прославим Тя с лики святых со Отцем и Сыном во веки веков. Аминь.


Тропарь Пятидесятнице
Тропарь, глас 8:
     Благословен еси, Христе Боже наш, Иже премудры ловцы явлей, ниспослав им Духа Святаго, и теми уловлей вселенную, Человеколюбче, слава Тебе.


Кондак, глас 8:
     Егда снизшед языки слия, разделяше языки Вышний; егда же огненныя языки раздаяше, в соединение вся призва; и согласно славим всесвятаго Духа.


Величание
     Величаем Тя, Живодавче Христе и чтем Всесвятаго Духа Твоего, Егоже от Отца, послал еси божественным учеником Твоим.[/spoiler]

[Раб божий Константин]

Акафист преподобным отцем, новомучеником Раифским.
[spoiler]Кондак 1

Преподобнии отцы, новомученицы Раифстии, во обитель по воли Божией пришедшии не ктому человеческим похотем, но по воли Божией прочее во плоти жити время и правды ради души своя положити. Песньми восхваляем вас, смерть Христа Бога нашего ради приявшии и тем силу веры христианския показавшии. Любовию поем вам: Радуйтеся, преподобнии отцы, новомученицы Раифстии.

Икос 1

Ангелоподобное житие возлюбивше, преподобнии, в обитель Раифскую вселистеся. Мира бегающе и вся красная его оставивше, труды иноческия на себе возложисте и, в самое сие тщание все привнесше, тем прилежание ко Христу показасте. Сего ради, вас прославляюще, поем: Радуйтеся, преподобнии, домы и вся стяжания своя оставившии; Радуйтеся, Единаго Бога возлюбившии. Радуйтеся, яко красная мира сего ни во что же вменившии; Радуйтеся, в тиши лесной спасение искавшии. Радуйтеся, в чистоте души своя сохранившии; Радуйтеся, всякия правды исполнению послужившии. Радуйтеся, себе Богу всесовершенно предавшии; Радуйтеся, не двема господинома, Богу и мамоне, но Богу точию работати восхотевшии. Радуйтеся, преподобнии отцы, новомученицы Раифстии.

Кондак 2

Разумением Божия изволения во обитель Раифскую вселилися есте, лесами густыми сокрытую, но посреде иных обителей Российских славную чрез икону чудотворную Божия Матери, «Грузинская» именуемую. Мнози бо болящии и немощнии во обитель приходяще, по молитве пред образом Пречистыя Девы исцеляхуся. Иноцы, пение умильное пред иконою сею возносяще, в вере православной укрепляхуся, Богу пение благодарственное приносяще: Аллилуиа.

Икос 2

Видяще мира суету, преподобнии отцы, домы и имения своя остависте и в обитель иноческую вселистеся. Многая тамо духовная и благая сокровища стяжавше, с велиею радостию заповеди Божия исполняли есте. Чудотворный образ Пресвятыя Богородицы почитающе, молебное пение Ей возносили есте. Мы же, радующеся о сем, поем: Радуйтеся, ко Иисусу Христу с любовию притекавшии и образ Его Раифский «Спас Нерукотворный» лобызавшии; Радуйтеся, в делании заповедей Спасителя пребывавшии. Радуйтеся, чудотворному образу Пресвятыя Богородицы «Грузинския» поклонявшиися; Радуйтеся, моления ко сему образу с верою непостыдною приносившии. Радуйтеся, дивнии подражателие совершенства Отца нашего Небеснаго; Радуйтеся, труды и молитвы выну творившии. Радуйтеся, кротость, смирение и бдение имевшии. Радуйтеся, сущии в Дусе, присно духовная мудрствующии. Радуйтеся, преподобнии отцы, новомученицы Раифстии.

Кондак 3

Силою Вышняго, отцы преподобнии, во обители обеты иноческия исполняюще, труды телесными и душевными Господу послужисте, наипаче же Слово Божие изучисте и паломники во обители сей глаголом Божественным научисте. На всякое лето чудотворную икону Пресвятыя Богородицы в град Свияжск крестным ходом приношасте, благодарственно воспевающе: Аллилуиа.

Икос З

Имуще, преподобнии отцы, велию любовь Божию, телеса ваша яко жертву живу, благоугодную Богу представисте, служения словеснаго ради. Людие же, дела ваша добрая видевше, Бога, Иже на небеси, восхваляху. Мы же, о сем ликовствующе, поем: Радуйтеся, Христову веру в стране нашей утверждавшии; Радуйтеся, таинству спасения людий российских послужившии. Радуйтеся, во Пресвятей Богородице к небесному отечеству добре нас Направляющую видевшии; Радуйтеся, яко преблазии и добрии наставницы человеков бесте. Радуйтеся, обитель Раифскую труды вашими преукрасившии; Радуйтеся, христоподражательными нравы вашими ленивыя подвигнувшии. Радуйтеся, устнами православными хвалу Богови совершавшии; Радуйтеся, чистоты душевныя и телесныя усерднии хранителие; Радуйтеся, преподобнии отцы, новомученицы Раифстии.

Кондак 4

Бурею зла и нечестия, яко наказанием, от Бога исходящим, по наущению вражию страна Российская во мрак греховный низвержена бысть. Мнози бо людие российстии обеты крещения пренебрегоша и, заповеди Божии оставивше, на имя Господне хулу рекоша, храмы же Божии и обители иноческия разоряху, священники же и иноки оскорбляху и изгоняху, иныя же убиваху. Стадо же малое верных, ко Господу вся упование возложив, пояше Ему: Аллилуиа.

Икос 4

Слышавшее людие российстии безбожников лыцения лютая, сумнении поколебашася и веру истинную оставиша. Врази же православия, алчностию и завистию движимии, храмы Божия грабляху и оскверняху. Христолюбцев из домов изгоняюще, во узилища ввергаху мучений лютых ради. Мы же, память страстотерпцев почитающе, поем: Радуйтеся, Пресвятыя Богородицы заступлением печаль свою в радость претворившии; Радуйтеся, мысленная очеса ваша к горним обителем направлявшии. Радуйтеся, вся похоти плотския Бога ради умертвившии; Радуйтеся, козни лукаваго силою Божиею победившии. Радуйтеся, тленная на нетленная пременившии; Радуйтеся, сокровенным хлебом небесным питавшиися. Радуйтеся, мирския суеты отрешившиися; Радуйтеся, небеснаго отечества пламенно возжелавшии. Радуйтеся, преподобнии отцы, новомученицы Раифстии.

Кондак 5

Божиим попущением, яко хищницы лютии, слуги власти безбожныя во обитель Раифскую приидоша и по храмам растекошася, злата и сребра алчуще, иконы святыя разоряху, сосуды же священныя изымаху, иноки же из келлий изгоняху. Скорбь велия наста во обители, вси бо разумеша, яко прииде конец ея. Нечестивии безбожницы, храмы Божия затворивше, точию един от них на потребу инок оставиша. Братия же, шедше во оный, пояху: Аллилуиа.

Икос 5

Видим, преблаженнии и богоноснии отцы, яко все ваше тщание и попечение о том бысть, еже Творца в душах и телесех ваших прославити. И в сем благом изволении, и в подвизе поношения от безбожных, и в страданиях ваших, силою свыше укрепленнии, толико преуспесте; яко вся возмогосте о укрепляющем вас Бозе, чесо ради таковое вам похваление воздаем ныне: Радуйтеся, Единаго Господа возлюбившии и к Нему очеса своя выну имевшии; Радуйтеся, во вся дни живота своего упование свое в Нем утверждавшии. Радуйтеся, человеков спасения ради всем благовестие Христово приносившии; Радуйтеся, друг другу работавшии. Радуйтеся, кротости и смирения преисполненнии; Радуйтеся, притекающим к вам в словесех любве ободрение и утешение подававшии. Радуйтеся, житием своим любомудрым образ поста и молитвы явившии; Радуйтеся, яко в иночество многих делом и словом привлекли есте. Радуйтеся, преподобнии отцы, новомученицы Раифстии.

Кондак 6

Проповедницы богоноснии бывше, иноци раифстии, из обители изгнаннии, в веси окрестныя вселишася. Тамо пропитания ради скудости и хлада болезньми страдаху, обаче, волю Божию на то разумеюще, никакоже роптаху. Всем себе поработивше, всем беша вся, да всяко спасутся неции, словом Божиим люди в весех и на путех просвещающе. Преподобнии отцы за крест, им низпосланный, Богу благодарственное пение пояху: Аллилуиа.

Икос 6

Возсиявше во тьме гонения, иноци, безбожниками изгнаннии, попечения о людех российских не оставиша. И даде Господь рабом Своим силу со всяким дерзновением глаголати слово Свое. Отцы яко заповедь глаголы Господни прияша: «Шедше научите вся языки, учаще их блюсти вся, елика заповедах вам». Мы же, усердие велие ваше славяще, поем: Радуйтеся, люди заповедем Божиим научавшии и на путь истины наставлявшии; Радуйтеся, блазии раби и добрии делателие винограда Христова. Радуйтеся, алчущия и убогия на Господа печаль возлагати призывавшии; Радуйтеся, устнами иноческими хвалу Богови певшии. Радуйтеся, искушений и соблазнов от диавола избегнувшии; Радуйтеся, христианского рода украшение. Радуйтеся, образе истиннаго смирения; Радуйтеся, зерцало совершеннаго терпения. Радуйтеся, преподобнии отцы, новомученицы Раифстии.

Кондак 7

Хотяще в таине смирения соблюстися, яко светильницы под спудом, иноцы раифстии купно со иноки иных обителей затворенных, людем свет разумения заповедей Божиих и глаголов Церкви православныя приношаху, то же потщашася благовестити, идеже не именовася Христос. Сами же образом нищеты и смирения бяху. Поучение же Евангелия: «Тако да просветится свет ваш пред человеки, яко да видят ваша добрая дела, и прославят Отца вашего, Иже на небесех», исполняюще, пояху Всевышнему: Аллилуиа.

Икос 7

Новое показасте дело, преподобнии отцы Раифстии, во изгнании сущий, моляще непрестанно о низпослании стране Российстей от бесовскаго наваждения спасения и о низпослании благодати Божией в послушание веры во всех языцех о имени Его, смиренномудрием же друг друга болына себе творяще. Благоприятное ваше произволение разсмотряюще, синевое вам приносим пение: Радуйтеся, пред лицем Божиим яко раби пред Господем ходившии; Радуйтеся, совершеннаго послушания исполненнии. Радуйтеся, споспешницы ищущих вечнаго спасения и истиннаго просвещения готовии; Радуйтеся, Божественнаго света лучи, посреде тьмы зловерия сиявшии. Радуйтеся, благое иго Христово на себе восприемшии; Радуйтеся, исповедницы веры во Христа неустрашимии. Радуйтеся, прошения ваша молитвою и молением со благодарением сказующии; Радуйтеся, кротостию вашею вся люди умиротворявшии. Радуйтеся, преподобнии отцы, новомученицы Раифстии.

Кондак 8

День поминовения преподобных отцев, в Синае и Раифе избиенных, наступи, воньже множество инок и священник из обителей и храмов, властьми затворенных, притекше, Литургию и поминовение убиенных сотвориша купно. Еще же им служащим, се народ и стражницы приступиша ко священником, хотяще взяти я. Они же отвещаша: "Яко на разбойники ли изыдосте на ны со оружием?" Стражницы же, емше я, ведоша во град, идеже в темнице затвориша. Плененнии никако сопротивляхуся, воспевающе Богу: Аллилуиа.

Икос 8

Всем преподобным отцем, в Синае и Раифе избиенным, вечную память поюще, иноцы и множество людии православных в малом храме Раифской обители собрашася, Господа моляще о мире и спасении душ христианских. И се народ, силою безбожною ведомый, прииде и разори богослужение, священники же плениша и в темницу отведоша. Смирение ваше, отцы преподобнии, почитающе, поем: Радуйтеся, житие и страдания преподобных отцев, в Синае и Раифе избиенных, наследовавшии; Радуйтеся, почитание оных отцев до последняго часа хранившии. Радуйтеся, преподобным отцем, в Синае и Раифе избиенным, молебное служение сотворившии; Радуйтеся, память убиенных отцев почитающии. Радуйтеся, не о своих си кииждо, но о пользе ближних пекшиися; Радуйтеся, яже во Христе Иисусе выну мудрствовавшии. Радуйтеся, вся без роптания и размышления творящии; Радуйтеся, яко светила посреде рода строптива и развращенна в мире явившиися. Радуйтеся, преподобнии отцы, новомученицы Раифстии.

Кондак 9

Преподобнии отцы во узилище ввержени быша, упованием радующеся, скорби терпяще, в молитвах пребывающе. Стражницы же нечестивии биша я и истязаша. Судия же вопрошаще: «Кто господин и наставник вам есть?» Непреклонно отвещаша ему: «Иисуса Христа Единаго Господина и Наставника имамы». Судия же зело озлоблен бысть и повеле невинныя со тщанием истязати. Преподобнии же отцы, волю Господню во всем разумеюще, пояху Ему: Аллилуиа.

Икос 9

Ветия многовещанныя не возмогут по достоянию воспети страдания ваша за Христа, преподобнии. В темнице заключеннии преподобнии отцы никако роптаху, поминающе глаголы Господни: «Блажени есте, егда поносят вам, и ижденут, и рекут всяк зол глагол, на вы лжуще Мене ради, радуйтеся и веселитеся, яко мзда ваша многа на небесех». Мы же, сии глаголы почитающе, поем: Радуйтеся, яко Христу сострадавшии; Радуйтеся, за Христа узы и темницу приявшии. Радуйтеся, яко в житии сем ближния своя самоотверженно возлюбили есте; Радуйтеся, яко правилом веры благочестивыя явилися есте. Радуйтеся, Христу Богу в кротости и смирении подражавшии; Радуйтеся, враги ваша незлобием простившии. Радуйтеся, яко день и нощь в заповедех Иисуса Христа поучалися есте;  Радуйтеся, яко единодушно в молитве и молении претерпели есте. Радуйтеся, преподобнии отцы, новомученицы Раифстии.

Кондак 10

Дню судилища безбожнаго пришедшy, судия жестоковыйный, ни единаго же свидетеля обрет, ничтоже сумняся рече: «Смерти предани да будут», и никто же возможе защитити я. Преподобныя отцы пояша и паки в с темницу отведоша, зане праведных мучениими нечестивии не насытишася. Преподобнии же отцы, казнь яко крест Господень восприемше, пояху Ему: Аллилуиа.

Икос 10

Преподобнии отцы Раифстии, судилищем неправедным обвиненнии, все упование ваше на Господа возложисте, почитающе смерть яко страстем Господним следование, благодаристе Его, сподобившаго вас чашу Его пити, Иисуса же Христа молисте: «Помяни нас, Господи, во Царствии Своем». Ко Господу прилежание ваше восхваляюще, поем: Радуйтеся, венцы исповедников Христовых стяжавшии; Радуйтеся, за Христианы души своя положившии. Радуйтеся, вольная страдания за имя Христово претерпевшии; Радуйтеся, себе отвергшиися, волю же свою воли Божией покорившии. Радуйтеся, душами в Сион Горний востекшии; Радуйтеся, яко тамо предстоите, о всех нас к Богу тепло ходатайствующии. Радуйтеся, душам вашим спасения на праведном судищи Божиим ожидающии; Радуйтеся, веления нечестивых презревшии. Радуйтеся, преподобнии отцы, новомученицы Раифстии.

Кондак 11

Днем пятнадесяти прошедшим, преподобныя мученики на казнь поведоша. Тии же, благодать от Господа получивше, к часу смертному пришли суть, Господа моляще о приятии душ их с миром. Тако отцы преподобнии в месте уединением казнени быша, в смертный свой час молитву Господню устнама глаголюще. Не вемы мы, грешнии, идеже гробы ваша суть. Вы же, селения Господня ожидающе, взывали есте: Аллилуиа.

Икос 11

Светоподательныя свещи бесте во страданиих ваших, святии мученицы, озаряюще светом сердца нечестивая, яко да обрящут Единаго Господа. Сего ради умильно восклицаем вам: Радуйтеся, гонения и смерть от нечестивых претерпевшии; Радуйтеся, от обители земныя во обитель небесную прешедшии. Радуйтеся, молитвою к Богу укрепившиися и благословение вечное от Него восприемшии; Радуйтеся, веры Христовой непобедимии исповедницы. Радуйтеся, подвижницы веры, угождение Богу от юности предызбравшии; Радуйтеся, путеводителие, правую стезю к вечному спасению нам показавшии. Радуйтеся, смертный свой час без страха и скорби приявшии; Радуйтеся, Бога до последняго часа за вся благодарившии. Радуйтеся, преподобнии отцы, новомученицы Раифстии.

Кондак 12

Благодать дати восхотев, внят Господь молитвам рабов Своих и крепость веры православных людий испытав, вразуми правителей российских еже на христиан гонения прекратити. Тако трудами наместника и братии ея обитель Раифская паки восста. Крест же Господень над обителию возсия и образ Пресвятыя Богородицы «Грузинския» чудотворный в удел свой возвратися. В день сей трудников Христовых благодаряще, воспеваем Спасителю нашему: Аллилуиа.

Икос 12

Поем, преподобнии отцы, страдания ваша, яко кровь, из ран ваших истекшая, принесе плоды пречудныя, имиже обитель Раифская освящается и людий множества многа, в обитель Раифскую приходящая, светом Христовым просвещаются. Мы же, сие о людех попечение зряще, вопием: Радуйтеся, в сонме мученик благочестно восприятии, яко много Христа ради претерпевшии; Радуйтеся, со всеми святыми добре Богу угодившии и наследие нетленное обретшии. Радуйтеся, обители Раифския похвало и украшение; Радуйтеся, наставницы иноков многомудрии. Радуйтеся, яко наследницы ваши Раифскую обитель из руин подъята; Радуйтеся, яко обитель Раифская паче прежняго возвеличися. Радуйтеся, нас, сынов и дщерей Российских, подвигом своим на путь истины наставляющии; Радуйтеся, образ самоотвержения нам показавшии. Радуйтеся, преподобнии отцы, новомученицы Раифстии.

Кондак 12

О новомученицы Раифстии, в чертозех небесных водворившиися, приимите сие малое от любви нашея почитание и благохваление, вам приносимое. Молитвами вашими пред престолом Вседержителя испросите обители Раифской, подвигами вашими прославленной, процветание. Нас же, грешных, свободите от духа гордости и праздности, от бед и немощей, да сподобимся купно с вами во веки пети: Аллилуиа.

Кондак сей глаголи трижды. Паки Икос 1 «Ангелоподобное житие возлюбивше..» и такоже Кондак 1 «Преподобнии отцы, новомученицы Раифстии, песньми восхваляем вас».

Молитва ко преподобным отцем, новомучеником Раифским

О преподобнии и богоноснии отцы наши, в Раифской обители мученически пострадавшии, к вам мы, грешнии, труды ваша почитающе, со умилением прибегаем, молитв ваших пред Господем о возрождении и укреплении православия в стране нашей просяще.

Вы во обитель Раифскую со смирением вселилися есте, вся красная мира благорассудно оставивше, души и сердца ваша Создателю и Богу нашему принесше. В трудех и покаянии дни и нощи провождасте, молебное пение Пресвятой Богородице Приснодеве Марии ради иконы Ея «Грузинския» совершающе. Попущением же Божиим силы бесовския, в людех велию смуту сотворше, законы божеския и земныя попраша. Сострадаем вам, преподобнии отцы, яко напасти и обиды от бесами искушенных людий претерпесте и из обители изгнани бысте. Вы же глаголы Спасителевы: «Блажени изгнани правды ради, яко тех есть Царствие Небесное», поминающе, благодарственное пение Ему возношасте. Судии же нечестивыя, диавольскою силою разжженныя, смерти вас, преподобнии иеромонаси Иосифе, Сергие, Варлааме, Иове, Антоние и послушниче Петре, предаша и отай погребоша.

Страдания ваша почитающе и яко милостивыя ходатаи за ны вас разумеюще, молим вас прощения грехов наших и грехов родителей наших у Господа испросити, такоже укрепления в исполнении заповедей Божиих, да, исполненнии Духа Святаго, победим козни лукаваго, духа гордости и зла насылающаго на ны. Молите Всевышняго о укреплении страны нашея Российския, благословении на добрая дела властителей ея, мире же и благоденствии всем людем. Аминь.[/spoiler]

[Раб божий Константин]

Архангел Божий Рафаил.
[spoiler]Кондак 1

Избранный Богом из воинства небеснаго и посланный на землю в служение роду человеческому, Архангеле Божий Рафаиле, целебниче недугов наших и молитвеннече о нас пред Богом. Помози нам избавитися от бед, скорбей и болезней. Мы же с верою и любовию в похвалу тебе зовем: Радуйся, архангеле Божий Рафаиле, целителю недугов наших и молитвениче о нас пред Богом.

Икос 1

Архангели и ангели и вся воинства небесныя, предстояще у престола святыя Троицы непрестанно славословят Творца неба и земли. С ними же и ты, славный Рафаиле, воспевавши хвалебные гимны Вседержителю. Прийми от нас земнородных похвальное пение тебе сицевая: Радуйся, яко ты всегда предстоиши у престола Святыя Троицы. Радуйся, яко со всеми небесными силами воспевавши трисвятую песнь Богови. Радуйся, яко Господь посылает тя на служение людям. Радуйся, яко ты с радостию исполнявши волю Божию. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 2

Видяще очесами веры силу и величие молниеноснаго вида твоего, архангеле Божий Рафаиле, мы, земнороднии, аще убо и грешнии и недостойнии, обаче с любовию и благодарением ко пресвятей Троице зовем вкупе с тобою и со всеми святыми ангелами: Аллилуйя.

Икос 2

Видя человеколюбивый Господь страдания людей, по неизреченной милости Своей посылает на землю святых Ангелов для исцеления недугующих и утешения скорбящих. За твое служение роду человеческому прийми, архангеле Божий, от нас благодарение сие: Радуйся, яко ты со всем воинством небесным предстоиши у престола святыя Троицы. Радуйся, безплотный воине Царя небесного. Радуйся, слуго Господень, творящий волю своего Владыки. Радуйся, приемый от Бога повеление и власть человеком помагати. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 3

Разум чист и свободен от страстей испроси нам у Господа, архангеле Божий Рафаиле, и не остави нас всесильною помощию в борьбе с грехом и соблазнами мира сего, да беспреткновенно в радости духовней воззовем триединому Богу благодарственную песнь. Аллилуйя.

Икос 3

Имуща тя великаго помощника и крепкаго поборника на сопротивныя силы, молим тя, архангеле Рафаиле: буди нам покровитель на всех путях жизни нашей да со благодарением взываем ти сице: Радуйся, споспешествующий нам во благочестивом провождении временнаго жития нашего. Радуйся, яко ты наставлявши стопы наша на путь спасения. Радуйся; и заповеди Господни исполняти нас научающий. Радуйся, яко от зла и греха нас сохраняющий. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 4

Бури, искушений и бед избави нас, путеводителю наш Богом данный. Не остави нас беспомощных в скорбные дни житейских испытаний и болезней за беззаконное житие нам посланные. Мы же, благодаряще тя, воззовем Богу, благодетелю нашему. Аллилуйя.

Икос 4

Видяще твое предстояние пред престолом Божиим, вси злобний дуси поднебесные не смеют деяти пакости всем чтущим тя, заступнице наш Рафаиле. Сего ради мы, аще и не достойний, обаче смиренно просим твоей помощи и заступления, глаголющее тебе сицевая: Радуйся, предстателю наш пред Богом и молитвенниче. Радуйся, со Архангелами: Михаилом, Гавриилом, Уриилом, Селафилом, Иегудиилом, Варахиилом непрестанно прославлявши святую Троицу. Радуйся, милостивый ходатаю за нас пред Богом. Радуйся, скорый целителю недугов и болезней. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 5

Путеводною звездою был еси отроку Товии, егда отец посла его к сроднику своему в страну далече. И не токмо спутник добрый был еси ему, но и врачеватель искусный явися, егда повелел ему в реце рыбу изловити и изъяти из нея сердце, печень и желч, дабы демона-убийцу каждением сим от девицы отгнати и отца слепаго желчию уврачевати. За таковую милость к ним они воспеша Богу благодарственную песнь: Аллилуйя.

Икос 5

Буди и нам спутник, якоже Товии, в жизни нашей многострадальней, сохраняя нас от греха и всякаго злаго обстояния врагов видимых и невидимых, дабы нам в здравии, мире и благоденствии славити Отца небеснаго и тебе, Рафаиле архангеле, величати сице: Радуйся путешествовати хотящим добрый спутниче и руководителю. Радуйся, яко отроку Товии путь его безмятежен сотворивый. Радуйся, мудрый и добрый советодатель ему бывый. Радуйся, яко по твоему слову воскурением сердца и печени в жилище девицы демона - убийцу изгнаша. Радуйся, яко и отца своего помазанием очес его желчью рыбы от слепоты исцеливый. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 6

Проповедует весь мир Христианский служение твое роду человеческому, яко имут тя провозвестника судеб Божиих и молитвенника. За таковое служение твое людям, мы благодарным сердцем и усты поем Богу, благоизволившему послати нам ангелы своя: Аллилуйя.

Икос 6

Возвестив волю Божию Товиту, ты представ пред ним аки юноша добронравный и предложив себя в спутники сыну его Товии в путь дальний, безбедно достигли желаннаго. И егда совершив волю Божию и возвратив отрока здрава и благополучна, отлетел еси в небесныя обители к Пославшему тя. А тобою облагодетельствованнии возопиша тебе с любовию сице: Радуйся, провознестниче судеб Божиих и добрый путеводителю. Радуйся, яко всегда ходатайствуеши пред Богом о нас больных и страждущих. Радуйся, яко возносиши молитвы наша ко Престолу Святыя Троицы. Радуйся, яко праведный гнев Божий на нас движимый своим предстательством отвращавши. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 7

Хотяй всем спастися и в разум истинный прийти, сердцеведец Господь посылает ангелы Своя на служение человеком, дая коемуждо свое послушание. Тебе же, славный архангеле, даде Бог власть и силу врачевати болезни очес и быти спутником для путешествующих. Мы же, за таковое твое служение нам грешным, благодарным сердцем и усты славим Милосердаго Бога ангельскою песнию: Аллилуйя.

Икос 7

Хотяй Господь показати, яко жизнь человеческая не самослучайна суть, но в деснице Его всегда содержится, новыя чудеса показа нам чрез Архистратига Михаила, егда Храм во имя его в Хонех от потопления водами речными дивно спасен бысть. Сие видев блаженный Архип с духовными чады своими благодарне возопи: Радуйся, Храмов Божиих несокрушимая оградо. Радуйся, врагом веры Христовой необоримая преграда. Радуйся, верным радость от Престола Вседержителя износящий. Радуйся, неверных на стезю правды и истины приводящий. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 8

Странное и страшное чудо совершишася, егда архангел Гавриил, избраный от всех чинов ангельских, слетевший с небесных кругов в Назарет, провозгласи Пресвятей Деве Марии: "Радуйся!", извещая о воплощении от Нея Сына Божия. Мы же, радующеся о явлении в мир Спасителя, вопием: Аллилуйя.

Икос 8

Всем убо хощеши спасения, добрый наш ходатаю, святый Архангеле Гаврииле. Помози нам, заступниче наш, на жизненном пути нашем и спаси всех, вопиющих тебе сице: Радуйся, тихую радость на сердце полагай всем, любящим Господа. Радуйся, добрый и верный начальниче и руководителю в нашем земном странствии. Радуйся, верный хранителю Божиих Церквей. Радуйся, великий Архангеле Гаврииле, принесший нам с небес великую радость. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 9

Вси иноцы и православний христиане, удостоившиеся носити твое славное имя, Рафаиле, благоговеют от радости, яко соименника имут таковаго молитвенника и предстателя у престола святы я Троицы, ид еже ты, о, Архангеле Божий, непрестанно поеши трисвятую песнь: Аллилуйя.

Икос 9

Витиствующий язык не может изрещи всю славу твою на небеси, святый Архангеле Рафаиле, яко с огненными ликами небесных сил ты предстоиши у Страшнаго Престола Царя царствующих и Господа господствующих, умоляя Его благость и милосердие, о чтущих тя людех, взывающих ти сице: Радуйся, верный слуго Господень, возвещающий людям волю Божию. Радуйся, ангелов начальниче и человеков наставниче и заступниче. Радуйся, ум наш просвещали твоими молитвами. Радуйся, яко любящих тя и почитающих тя, избавляеши от бед и напастей. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 10

Спастися хотящим нам, буди помощник тверд, Архангеле Рафаиле, избавляяй нас и храняя от всяких бед и напастей, наипаче же от грехопадений наших, лишающих нас благодати Божией. Сего ради от сетей бесовских тобою избавляеми, благодарным сердцем и усты зовем Спасителю нашему: Аллилуйя.

Икос 10

Стена еси крепка и ограждение являвшися всем, пребегающим к твоему заступленню и помощи: сохраняй нас от коварства врагов видимых и невидимых кровом крыл твоих. Вси же исцеленнии и в пути шествующий, тобою охраняемии с благодарностию взывают тебе сице: Радуйся, яко дана тебе власть и сила отражати демонския на нас нападения. Радуйся, яко от всяких козней диавольских нас защищавши и спасавши. Радуйся, молитвы наша, яко кадило, к Богу возносиши. Радуйся, немощи наша душевные и телесные милостивно врачуеши. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 11

Пение пресвятей Троице на небесех непрестанно воспевают вси девять чинов ангельских со страхом глаголюще: "Свят, Свят, Свят Господь Саваоф, исполнь небо и земля славы Твоея". С ними же и ты, наш светозарный Архангеле Рафаиле, пребывавши в славословии. Сподоби же и нас на земли чистым сердцем и усты такожде воспевати триединому Богу трисвятую песнь: Аллилуйя.

Икос 11

Светильник мой угасе, елея же добрых, дел во мне несть; сном греховным отягченный трепещу, бояся услышати в полунощи глас: "Се жених грядет!" Помози мне, Архангеле Божий, воспрянути от сна греховнаго и наполнити сосуды души моея елеем благих дел. Аз же, за твое снисхождение ко мне, приношу ти пение сие: Радуйся, немощных духом, силою благодати Божией исполняли. Радуйся, изнемогающих от уныния и скорбей, всеоружием веры и надежды облекаяй. Радуйся, твоими молитвами чтущия Тя, оставление грехов приемлют. Радуйся, сирот, больных и беспомощных благий утешителю. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 12

Благодать велию приял еси от Бога целити всякий недуг и всяку язву в людех, о великий Архангеле Рафаиле. Подаждь убо и нашим душам и телесем исцеление от недугов нас гнетущих, да Богу, даровавшему нам таковаго помощника и врачевателя, благодарив воспоем : Алиллуия.

Икос 12

Поюще многообразная твоя чудеса во спасение наше содеянная, хвалим тя вси вернии раби твои, святый покровителю и теплый предстателю о нас пред Богом. Не остави же нас зде, в нашем земном странствии и тамо, в день Страшнаго Суда Божия, буди нам крепкий заступник, дабы безпреткновенно прейти нам мытарства злых духов и Царствие небесное унаследовати: Радуйся, архангеле Рафаиле, теплым предстательством твоим исходатайствуй мне христианскую кончину. Радуйся, в час кончины моея явися мне и избави душу мою от злых демонов и защити мя. Радуйся, яко на Страшнем Суде Христовом ходатайством твоим одесную страну стати сподоблюся. Радуйся, яко по Господе Бозе и Пресвятей Богородице ты еси крепкое упование мое. Радуйся, архангеле Божий Рафаиле, целителю недугов наших и молитвенниче о нас пред Богом.

Кондак 13

О, преславный архангеле Божий Рафаиле! За предивное служение твое роду человеческому прийми от нас грешных и недостойных сие малое тебе хваление и благодарение, и просим тя: покрый нас крылома твоима от всех враг видимых и невидимых, и умоли Христа Бога сподобитися нам христианския мирныя кончины, избавитися вечных мук и вселитися во обитєлех Отца небеснаго, дабы вместе с тобою и со всеми святыми радостно воспевати Царю славы: Аллилуиа, Аллилуиа, Аллилуиа.



(Этот кондак читается трижды, затем икос 1 и кондак 1)



Молитва Архангелу Божию Рафаилу

О, святый, славный архангеле Божий Рафаиле! Скорый помощниче и теплый пред Богом о нас заступнице и молитвениче. Предстоя у престола святыя Троицы, испроси нам у Господа прощение согрешений наших: да преложит Он на милость гнев Свой праведный, грехов ради наших движимый на нас. Не остави же, о, архангеле Божий, нас и ты помощию и заступлением твоим, днесь прославляющих имя твое святое. Аще и многогрешнии есмы, обаче не хощем в беззакониях наших погибнути. Укрепи благодатию Господнею слабую волю нашу на дела благия. Буди и нам, якоже отроку Товии, путеводитель и советодатель в нашем многоскорбнем житии. Помози нам избавитися от гнетущих нас болезней, якоже ты избавил Товита от его многолетней слепоты. Егда же приблизится час скончания нашего, не остави нас, архангеле Божий, беззащитных на воздушных мытарствах против духов злобы, преграждающих восход в горняя. Да охраняеми тобою достигнем обителей Отца нашего небеснаго и купно с тобою и со всеми святыми прославим Отца и Сына и Святаго Духа во веки веков. Аминь.







Тропарь глас 4

Небесных воинств Архангеле Рафаиле / молим тя мы недостоинии / да твоими молитвами оградиши нас от бед и напастей, / сохраняя нас припадающих прилежно и вопиющих / от недугов и всяких болезней избави нас, / яко чиноначальник выших сил.



Кондак глас 8

Пресветлыя и страшныя Святыя Троицы / ты еси Архангеле Рафаиле славный служителю и молитвенниче / ныне молися о нас непрестанно / да избавимся от всяких бед, болезней и вечных мук тебе вопиющих: / Радуйся молитвенниче и целебниче наш милостивый.[/spoiler]

[Раб божий Константин]

Акафист Архангелу Божию Рафаилу.
[spoiler]Кондак 1
Избранный Богом от воинства небеснаго на служение роду человеческому, Архангеле Божий Рафаиле, и чудесами великими и славными на земли возсиявый, моли Христа Бога всяких искушений, бед и наветов вражеских избегнути нам и наследники Царствия Небесного соделатися, да радостными песньми, с любовию восхваляем тя, небеснаго предстателя и заступника нашего, зовуще:
Радуйся, святый архангеле Рафаиле, целителю недугов наших и молитвениче о нас пред Богом.

Икос 1
Архангели и ангели и вся воинства небесныя, предстояще у престола святыя Троицы непрестанно славословят Творца неба и земли. С ними же и ты, всеславный Рафаиле, воспеваеши гимны хвалебные Вседержителю. Приими же и от нас земнородных с любовию и надеждою приносимые ти величания сия:
Радуйся, венцем победным паче звезд на небеси блистаяй;
Радуйся, тимпане сладкозвучный, славу Божию бряцаяй.
Радуйся, лютых и неисцельных недугов телесных врачевателю;
Радуйся, немощей и страстей душевных целителю.
Радуйся, всем приходящим к тебя благ преизобильный подателю;
Радуйся, от теплохладия и маловерия нас преславный избавителю;
Радуйся, неверующих в Промысел Божий в вере утверждаяй.
Радуйся, от сна греховнаго души наши пробуждаяй.
Радуйся, святый архангеле Рафаиле, целителю недугов наших и молитвенниче о нас пред Богом.

Кондак 2
Видяще очесами веры силу и величие молниеноснаго вида твоего, архангеле Божий Рафаиле, мы, земнороднии, аще убо и грешнии и недостойнии, обаче с любовию и благодарением ко пресвятей Троице зовем вкупе с тобою и со всеми силы небесными: Аллилуйя.

Икос 2
Разум человеческий не возможет постигнути всех таинств Премудрости и Милосердия Творца Нашего, ибо человеколюбивый Господь, видя страдания людей, по неизреченной милости Своей посылает на землю святых ангелов Своих для исцеления недугующих и утешения скорбящих. За твое служение роду человеческому приими, архангеле Божий, от нас в смирении и благоговении приносимое ти благодарение сие:
Радуйся, слуго Господень, присно волю своего Владыки творяй;
Радуйся, от райских обителей в юдоль плачевную нисходяй.
Радуйся, от Бога повеление и власть человеком помагати приемляй;
Радуйся, молитвы наша к стопам Вседержителя и Богородицы возносяй.
Радуйся, сердца жестокия благодатно преображаяй;
Радуйся, огнь веры истинныя и любве нелицимерныя возгреваяй.
Радуйся, яко тобою бездну милосердия Божиего призываем;
Радуйся, яко тобою спасение вечное улучити чаем.
Радуйся, святый архангеле Рафаиле, целителю недугов наших и молитвенниче о нас пред Богом.

Кондак 3
Силою благодати Божией своей приял еси власть, недуги исцеляти и бесы изгоняти, святый архангеле Божий Рафаиле, яко прослави тя всемогущий Бог многими чудотворении, мы же, на сие взирая, усердно притекаем к предстательству твоему для исцеления от недугов телесных, паче же душевных, и усердно просим тя: не остави нас всесильною помощию в борьбе с грехом и соблазнами мира сего, да беспреткновенно путь наш земной проидем и в радости духовней купно с тобою возпоим Триединому Богу благодарственную песнь: Аллилуйя.

Икос 3
Имуща тя великаго помощника и крепкаго поборника на сопротивныя силы, молим тя, архангеле Рафаиле, буди нам покровитель на всех путях жизни нашей да со благодарением взываем ти сице:
Радуйся, прежде всего о Бозе мыслити наставляяй;
Радуйся, волю Его любити и творити подвизаяй.
Радуйся, заповедь о любви к ближнему исполняти нас научаяй.
Радуйся, миром и кротостию души наши наполняяй;
Радуйся, дух милосердия в сердцах наших воскресай.
Радуйся, от плевел ненависти их очищаяй;
Радуйся, от всякага зла и греха нас сохраняяй.
Радуйся, в добродетели терпения нас утверждаяй.
Радуйся, святый архангеле Рафаиле, целителю недугов наших и молитвенниче о нас пред Богом.

Кондак 4
Бури, искушений и бед избави нас, путеводителю наш Богом данный и не остави нас беспомощных в скорбные дни житейских испытаний и болезней, яко от Бога премудраго тя кормчаго жизни нашея стяжавше, егда волны мирских попеченей, страх и трепет смерти объемлят нас, не вемы бо, где обрящем тихое пристанище спасения? Сего ради на тя по Бозе надежду возлагаем всерадостно, благодарственно поя о тебе Вседержителю: Аллилуиа.
Икос 4
Слышавше Всемилосердный Господь Наш слезные горячие молитвы верных слуг своих праведнаго Товита и страждущей от насилия демонскаго девы Сарры, благоизволи послати к ним тя, всеславный Рафаиле, да вся потребная им даруеши и в вере, благочестии и милосердии к ближним их утвердиши. Мы же, ныне вся сия поминающее, просим тя, архистратиже Божий, твоею молитвою исцели и нас, грешных, да благодарственнее зовем ти:
Радуйся, в явлениех твоих образ Милосердия Божия явивый.
Радуйся, вестниче Божий, дивная величия Господне верным открывый;
Радуйся, источниче Божий, жажду духовную многих утоливый.
Радуйся, всех, к тебе прибегающих, милостию своею покрываяй;
Радуйся, от домашния вражды единокровныя миром ограждаяй.
Радуйся, друга друга тяготы носити нас научаяй;
Радуйся, страждущим усердно служити нас подвизаяй.
Радуйся, на вся благая и душеполезная нас наставляй;
Радуйся, святый архангеле Рафаиле, целителю недугов наших и молитвенниче о нас пред Богом.

Кондак 5
Богоявленною звездою путеводною был еси отроку Товии, егда отец посла его к сроднику своему на страну далече. И не токмо спутник добрый был еси ему, но и врачеватель искусный явися, егда повелел еси ему в реце рыбу изловити и изъяти из нея сердце, печень и желчь, дабы асмодея, демона- губителя каждением сим от благочесивей девы Сарры отгнати и слепаго Товита желчию уврачевати. За таковую убо же милость Божию к ним они воспеша Господеви благодарственную песнь: Аллилуйя.

Икос 5
Видим убо тя взорем духовным, всехвальный архангеле Рафаиле, у Престола Божьего в велицей славе предстоящаго и за нас грешных молящегося и прсим тя: буди и нам спутник, якоже Товии, в жизни нашей многострадальней, сохраняя нас от греха и всякаго злаго обстояния, врагов видимых и невидимых, дабы возмогли и мы в здравии, мире и благоденствии славити Отца небеснаго и тебе, святый наш покровителю, величати сице:
Радуйся, отроку Товии путь безмятежен сотворивый.
Радуйся, мудрый и добрый советодатель ему бывый;
Радуйся, путешествовати хотящим добрый спутниче и руководителю.
Радуйся, путей покаяния и спасения мудрый сказателю;
Радуйся, от похоти себялюбия нас благодатно исцеляяй.
Радуйся, к земным богатствам сердцем не прилеплятися научаяй;
Радуйся, сокровища нетленныя искати нас побуждаяй.
Радуйся, светом радости души наша озаряяй;
Радуйся, за вся Творца благодарити нас наставляй.
Радуйся, святый архангеле Рафаиле, целителю недугов наших и молитвенниче о нас пред Богом.

Кондак 6
Проповедует весь мир Христианский служение твое роду человеческому, яко провозвестника судеб Божиих и всеблагомощнаго молитвенника за ны ко Господу . За таковое служение твое всему роду человеческому, мы благодарным сердцем и усты поем Богу, благоизволившему послати нам ангелы своя: Аллилуйя.

Икос 6
Возсиял еси, светоносный архангеле, яко светильник лучезарный и богоносный, егда возвестил еси праведному Товиту, яко ты еси "един от седми святых ангелов, иже приносят молитвы святых входят пред славу" ( Товит; гл. 12) Милосерднаго Бога Нашего и заповеда всем верным , яко подобает спасения ради добро милостыню творити, Господеви молитися усердно и славословити Всесвятое имя Его; и тако совершив волю Божию, восшел еси во обители небесныя к Пославшему тя. Сего ради и мы, смиренне покланяяся Творцу Нашему, в радости духовней приносим тебе славословия сия:
Радуйся, выну пред Господем за всех больных и страждущих ходатайствуяй;
Радуйся, светом Божественным умы и сердца наша озаряй.
Радуйся, яко тобою истина Христова присно утверждается;
Радуйся, яко тобою лицеприятие и человекоугодие посрамляется.
Радуйся, врачей премудростию и человеколюбием обогащаяй;
Радуйся, богатых в милосердии и благотворении утверждаяй.
Радуйся, бедных отраду и вспоможение всемилостиво даруяй;
Радуйся, к творению дел благих всех нас усердно подвизаяй.
Радуйся, святый архангеле Рафаиле, целителю недугов наших и молитвенниче о нас пред Богом.

Кондак 7
Хотя Человеколюбец Господь явити в тебе, преславный Рафаиле, свое неизреченное к людем милосердие, показа тя, яко воистину светило многосветлое: скорым твоим ходатайством многая чудеса во дни Ветхаго Завета совершил еси, такожде и в наше прескорбное и многосуетное время не оставляеши нас предстательством твоим и подвизаеши Господеви умиленно взывати: Аллилуйя.

Икос 7
Новое чудо сотворил еси, светозарный Рафаиле, егда, явившись преподобному Макарию Римлянину, указал еси ему место благословенное, идеже надлежало ему совершити подвизи своя, и во дни старости посетил еси угодника сего, избавление от искушения тяжкого ему даровав. Мы же, ныне вся сия поминающее, просим тя, архангеле святый, утверди и нас в вере во всемогущество и милосердие Творца нашего и прими милостиво приносимые ти с верою и любовию величания сия:
Радуйся, (надежный) покров от браней и упокоение;
Радуйся, преподобных Христовых утешение.
Радуйся, кротцых нравом, святое благословение;
Радуйся, молитвами твоими нас преображаяй.
Радуйся, от глада духовного всех нас избавляяй;
Радуйся, любви к Божьему творению нас научаяй.
Радуйся, образ Божий в ближнем зрети наставляяй;
Радуйся, нрав гневливый, на кроткий пременяй;
Радуйся, святый архангеле Рафаиле, целителю недугов наших и молитвенниче о нас пред Богом.

Кондак 8
Странно и неудоприятельно суетному миру слышати, како молитвами твоими, богоносный архангеле, богатство милосердия Божиего изливается на всех, с верою притекающих к твоему небесному покровительству. Мы же, славяще Троицу святую, давшую ти благодать сию, умиленно Творцу нашему поем: Аллилуйя.

Икос 8
Всем убо хощеши спасения, всеблагий наш покровителю, святый Архангеле Рафаиле, твоими бо ходатайствы и молитвами вся полезная нам даруеши: тобою бо пагуба отгоняется, здравие возвращается , мир и благоденствие водворяются на земли, понеже на Небесех присно предстательствуеши о нас. Сего ради просим тя: помози нам, заступниче наш, на жизненном пути нашем и молися Господеви о всех, вопиющих тебе сице:
Радуйся, слепых зрячими сотворяяй;
Радуйся, глухих слух и немым язык отверзаяй.
Радуйся, хребты сокрушенные укрепляяй;
Радуйся, кости поврежденные исправляяй.
Радуйся, хромым радость хождения возвраяй;
Радуйся, сухие руки и ноги токов жизни исполняяй.
Радуйся, раны огненыя и смрадные струпы телесные исцеляяй;
Радуйся, разума лишившимся молитвами твоими ум подаваяяй.
Радуйся, святый архангеле Рафаиле, целителю недугов наших и молитвенниче о нас пред Богом.

Кондак 9
Всякия беды, скорби и напасти избавляяй нас, святый Архангеле, твоими к Богу теплыми молитвами, потщися в претрудном земном житии спасения вечнаго достигнути, да с тобою купно в селении праведных воспоим Господеви: Аллилуиа.

Икос 9
Ветиствующий язык не может изрещи всю славу твою на небеси, святый Архангеле Рафаиле, яко с огненными ликами небесных сил ты предстоиши у Престола Царя царствующих и Господа господствующих, умоляя Его благость и милосердие, о чтущих тя людех, взывающих ти сице:
Радуйся, ангелов начальниче и человеков наставниче и заступниче;
Радуйся, дары Духа Святаго стяжати нам помогаяй.
Радуйся, свято и праведно Богородицу почитати научаяй;
Радуйся, всем, любящим Господа тихую радость на сердце полагаяй;
Радуйся, дружбу и любовь меж христианами укрепляяй;
Радуйся, о благостоянии святых Божиих Церквей Христа умоляй.
Радуйся, монашествующих похвало и утверждение;
Радуйся, мирян в благочестивом житии укрепление.
Радуйся, святый архангеле Рафаиле, целителю недугов наших и молитвенниче о нас пред Богом.

Кондак 10
Спастися хотящим нам, буди помощник тверд, Архангеле Рафаиле, избавляяй нас и храняя от всяких бед и напастей, наипаче же от грехопадений наших, лишающих нас благодати Божией. Сего ради от сетей бесовских тобою избавляеми, благодарным сердцем и усты зовем Спасителю нашему: Аллилуйя.

Икос 10
Стена еси крепкая и ограждение непреодолимое являвшися всем, пребегающим к твоему заступленню и помощи, архистратиже Божий Рафаиле, сего ради молим тя : сохраняй нас от коварства врагов видимых и невидимых кровом крыл твоих. Вси же исцеленнии и в пути шествующии, тобою охраняемии с благодарностию взывают тебе сице:
Радуйся, силою Божиею козни диавола и аггелов его разрушаяй;
Радуйся, полки их низлагающий и безсилие их являяй.
Радуйся, от греховных навыков сердца наши освобождаяй;
Радуйся, всякую печаль от чтущих тя удаляяй;
Радуйся, в вере и благочестии нас утверждаяй.
Радуйся, светом любве нелицемерныя нас озаряяй.
Радуйся, заповеди Евангельския исполняти нас наставляяй;
Радуйся, на славословие Божие всех нас созываяй.
Радуйся, святый архангеле Божий, целителю недугов наших и молитвенниче о нас пред Богом!

Кондак 11
Пение пресвятей Троице на небесех непрестанно воспевают всеславныя архангели и вси девять чинов ангельских со страхом глаголюще: "Свят, Свят, Свят Господь Саваоф, исполнь небо и земля славы Твоея". С ними же и ты, светозарный Архангеле Рафаиле, пребывавши в славословии. Мы же, вся сия ныне поминающее, просим тя: сподоби же и нас на земли чистым сердцем и усты такожде воспевати триединому Богу трисвятую песнь: Аллилуйя.

Икос 11
Светоприемный проповедник истиннаго света являешися, святый Архангеле Божий, просвещаеши сердца верных и к разуму Божественному вся наставляеши и путие спасительные нам отверзаеши; сего же ради молим тя: помози нам, воспрянути от сна греховнаго и наполнити сосуды души наших елеем дел благих, исполни нас духа Премудрости Божией, сердца наша в любви ко Христу и ближним нашим утверди и приими милостивно похвалы сия:
Радуйся, немощных духом, силою благодати Божией исполняй.
Радуйся, изнемогающих от уныния и скорбей, всеоружием веры и надежды облекаяй;
Радуйся, на милость Божию уповати нас преславно наставляяй.
Радуйся, младенцев воспитание и благодатное хранение;
Радуйся, отроков во благочестии преславное укрепление
Радуйся, дев и юношей в целомудрии утверждение;
Радуйся, супругов в любви и единомыслии сохраняй;
Радуйся, старцем отраду и утешение посылаяй.
Радуйся, святый архангеле Рафаиле, целителю недугов наших и молитвенниче о нас пред Богом.

Кондак 12
Благодать велию приял еси от Бога целити всякий недуг и всяку язву в людех, о великий Архангеле Рафаиле. Подаждь убо и нашим душам и телесем исцеление от недугов нас гнетущих, да Богу, даровавшему нам таковаго помощника и врачевателя, благодарив воспоем: Алиллуия.

Икос 12
Поюще многообразная твоя чудеса во спасение наше содеянная, хвалим тя, святый покровителю и теплый предстателю о нас пред Богом, и проим тя: не остави же нас зде, в нашем земном странствии и тамо, в день Страшнаго Суда Божия, буди нам крепкий заступник, дабы безпреткновенно прейти нам мытарства злых духов и Царствие небесное унаследовати и приими милостивно величания сия :
Радуйся, всех приходящих к тебе благодатию озаряяй;
Радуйся, теплотою любве твоея нас согреваяй.
Радуйся, молитвами твоими от вечной погибели нас избавляяй;
Радуйся, от внезапныя смерти и кончины лютыя нас изымаяй.
Радуйся, в смертный час всем нам благонадежный помощниче;
Радуйся, от насилия демонского многомощный наш защитниче.
Радуйся, от обычаев душетленных сердца наша отвращаяй;
Радуйся, нравы добрыя и благочестие в нас насаждаяй.
Радуйся, святый архангеле Рафаиле, целителю недугов наших и молитвенниче о нас пред Богом.

Кондак 13
О, преславный архангеле Божий Рафаиле! За предивное служение твое роду человеческому прийми от нас грешных и недостойных сие малое тебе хваление и благодарение, и просим тя: покрый нас крылома твоима от всех враг видимых и невидимых, и умоли Христа Бога сподобитися нам христианския мирныя кончины, избавитися вечных мук и вселитися во обитєлех Отца небеснаго, дабы вместе с тобою и со всеми святыми радостно воспевати Царю славы: Аллилуиа, Аллилуиа, Аллилуиа.
Этот Кондак читается трижды, затем Икос 1 и Кондак 1

Молитва Архангелу Божию Рафаилу
О, святый, славный архангеле Божий Рафаиле! Скорый помощниче и теплый пред Богом о нас заступнице и молитвениче. Предстоя у престола святыя Троицы, испроси нам у Господа прощение согрешений наших: да преложит Он на милость гнев Свой праведный, грехов ради наших движимый на нас. Не остави же, о, архангеле Божий, нас и ты помощию и заступлением твоим, днесь прославляющих имя твое святое. Аще и многогрешнии есмы, обаче не хощем в беззакониях наших погибнути. Укрепи благодатию Господнею слабую волю нашу на дела благия. Буди и нам, якоже отроку Товии, путеводитель и советодатель в нашем многоскорбнем житии. Помози нам избавитися от гнетущих нас болезней, якоже ты избавил Товита от его многолетней слепоты. Егда же приблизится час скончания нашего, не остави нас, архангеле Божий, беззащитных на воздушных мытарствах против духов злобы, преграждающих восход в горняя. Да охраняеми тобою достигнем обителей Отца нашего небеснаго и купно с тобою и со всеми святыми прославим Отца и Сына и Святаго Духа во веки веков. Аминь.

Тропарь глас 4
Небесных воинств Архангеле Рафаиле / молим тя мы недостоинии / да твоими молитвами оградиши нас от бед и напастей, / сохраняя нас припадающих прилежно и вопиющих / от недугов и всяких болезней избави нас, / яко чиноначальник выших сил.

Кондак глас 8
Пресветлыя и страшныя Святыя Троицы / ты еси Архангеле Рафаиле славный служителю и молитвенниче / ныне молися о нас непрестанно / да избавимся от всяких бед, болезней и вечных мук тебе вопиющих: /
Радуйся молитвенниче и целебниче наш милостивый.[/spoiler]