Молитвослов

[Раб божий Константин]

Пресладкому имени Иисуса.
[spoiler]Дивное имя твое, Иисусе спасе наш, недостойными усты воспоминающе, славим тя еже ест более всякого имени. О имени убо Иисусове всяко колено поклонится небесных и земных и преисподних и всяк язык исповесть, яко Господь Иисус Христос во славе бога отца. Тем же вси вернии поем тебе аллилуйа.

Ест превелико имя твое, Иисусе, на небеси от ангел почитаемо седящу ти одесную бога отца, ест пресладко от человек на земли воспоминаемо спасшему ти нас от смерти вечныя, ест престрашно соборищу бесовскому во бездне сокрушившу ти всю силу их. Мы же, от них избавльшеся, поем тебе, Иисусе, аллилуйа.

Лепо ест нам, всем хрестианом, веселитися о имени твоем, Иисусе пресладкий, о нем же ангел, благовестуя пречистой девици, рече: не бойся, мария, нашла убо есть благодать от бога, се заченши во чреве и родиши сына и наречеши имя ему "Иисус". Тому и мы вси вернии поем аллилуйа.

Слава.

Авакум, пророкуя о имени твоем, Иисусе, сыне божий, сице глаголаше: аз же, о господи, возрадуюся и возвеселюся о бозе Иисусе моем - бог Господь крепость моя. Тем же и мы, славяще пресвятое имя твое, поем аллилуиа.

И ныне.

Лекарю души и тела, Иисусе предрагий, уздрави немощи телесные, исцели недуги душные, избави муки огненыя, подай отдохновение вечное всем хвалящим пресвятое имя твое и поющим аллилуйа.

Кондак первый.

Дай нам, Иисусе, сыне божий, разум и отверзи уста наша, да возможем возвестити хвалу имени твоего, яко же дал еси слух и молву глухому и гугнивому, глаголя: еффета, еже есть "разверзися!", и абие разверзостася слуха его и разрешися юза языка его и глаголаше право аллилуиа.

Икос первый

Очи наше сердечные просвети, Иисусе, светом божественаго твоего сиания, яко же просветил еси сына тимеова, вартимея слепого, к тобе вопиющего: сыне давыдов, Иисусе, помилуй мя! Тем же и мы вопием к тебе: Иисусе, боже превечный, Иисусе, царю пресилный. Иисусе, владыко долготерпеливе, Иисусе, спасе многомилостиве. Иисусе, просвети очи мое, да не усну в смерьти, Иисусе, отверзи устне мое, да возмогу тя прославити. Иисусе, вся безакония моя очисти, Иисусе, вся грехи моя отпусти. Иисусе, надежда моя, не остави мене, Иисусе, сотворителю мой, не погуби мене. Иисусе, беднаго споможи мене, Иисусе, кающегося приими мене. Иисусе, велико человеколюбче, отверзи уста моя.

Кондак вторый.

К тобе прибегаем, Иисусе, спаси нас, исцели немощи наша, яко же сотворил еси в земли генисаритьской, в ней же принесоша к тобе вся болящая и моляху тя, да толико прикоснутся воскрилию риз твоих. И елико их прикоснушеся спасени быша и возопиша к тобе богу аллилуйа.

Икос вторы.

Тещу петрову, огнем жгому, возложением руки своея, Иисусе, сыне божий, уздравил есть. Тобе ся молим: уздрави нас от похотенией огня телеснаго и запали нас в милости своей, да возлюбим тя, поюще: Иисусе, сладости сердечная, Иисусе, светлости душная. Иисусе, надежо извесная, Иисусе, памети превечная. Иисусе, славо моя, превозносяй главу мою, Иисусе, хвало моя, утвержая силу мою. Иисусе, просвети душу мою светлостию вечною, Иисусе, очисти серце мое ласкою своею. Иисусе, боже истинны от бога истиннаго, Иисусе, просвещая всякого человека в мир гредущего. Иисусе, не отверзи мене от лица твоего, Иисусе, не отыими от мене духа святого своего. Иисусе, велико человеколюбче, услыши молитву мою.

Кондак третий.

Очисти, Иисусе, прокажение души моея и отпусти грехи моя, яко же очистил еси, изшед з горы, прокаженнаго, кланяющегося тобе и глаголющего: господи, аще хощеши, можеши мя очистити. Ты же, спасе, простер руку и доткнулся его, глаголя: хощу очистити. И абие очистися и пояше аллилуйа.

Икос третий.

Руку имущему суху уздравил еси, Иисусе, во суботу, глаголя: кольми паче лучши есть человек овчати, тем же достоить в суботу добре творити. Мы теже, владыко царю, припадаем к тобе, спасе, зовуще: уздрави руце наше от злого имания, да воспоем, славяще имя твое: Иисусе, сило непобедимая, Иисусе, милости безконечьная. Иисусе, красо преутешеная, Иисусе, любви неизреченная. Иисусе, сыну бога живаго, Иисусе, нароженый з живота пречистаго. Иисусе, помилуй мя грешнаго, Иисусе, услыши во безаконии зачатого. Иисусе, навчи мя и буду навчен, Иисусе, освети мя и буду освящен. Иисусе, благослави мя и буду благославен, Иисусе, спаси мя и буду спасен. Иисусе, велико человеколюбче, очисти грешную душу мою.

Кондак четвертый.

Совет сотвориша фарисеи изшедшеся на тя, Иисусе, погубити хотяще. Ты же, спасе, разумев их помышления отшол оттоле, и за тобою идоша народи мнози, исцелил есть всех. Мы теже вопием к тобе, Иисусе: исцели все недуги наше духовные и телесные, да здрави суще поем тобе, богу нашему, аллилуйа.

Икос четвертый.

Князь некый, пришед, кланяшеся тобе, Иисусе, глаголя, яко дщи моя ныне умираеть, но пришед возложи на ню руку свою и оживеть, и мы, царю Иисусе, припадаем тобе: оживи нас милосердием своим, да возвеличим тя, поюще: Иисусе, вышних создателю, Иисусе, нижних откупителю. Иисусе, преисподьних победителю, Иисусе, всего створения украсителю. Иисусе пресладкий, души моея втешение, Иисусе предрагый, ума моего просвещение. Иисусе предобрый, серца моего веселие, Иисусе пресилный, тела моего здравие. Иисусе, спаси и помилуй мя, Иисусе, светом вечным просвети мя. Иисусе, муки всякое избави мя, Иисусе, во царство небесное возведи мя. Иисусе, велико человеколюбче, прости безаконную душу мою.

Кондак пятый.

О прещедры, Иисусе, накормивый до сытости пятма хлебы пять тысещей мужев и взяша избытки укрух дванадесет кошей полных, молимы ся тобе, спасе, насыти нас, алчущих хлебом небесным, пренасветейшим словом своим, да воспоем тобе, богу, аллилуйа.

Икос пятый.

Радующеся воспеваху, Иисусе, пресвятое имя твое множество оученик твоих о всех силах, яже видеша, глаголюще: благославен грядый царь во имя Господьне, мир на небеси и слава во вышних. Мы же видяще превеликая и неизреченная дела твоя, спасе, поем, славяще тя: Иисусе, царю преславны, Иисусе, агнче непорочный. Иисусе, пастырю предивны, Иисусе, питателю прегойный. Иисусе, хранителю во младости моей, Иисусе, кормителю во юности моей. Иисусе, похвало во старости моей, Иисусе, надежо при смерти моей. Иисусе, створителю всякого сотворения, Иисусе, откупителю хрестиянского поколения. Иисусе, не воспоминай нашего прегрешения, Иисусе, отпусти наша безакония. Иисусе, велико человеколюбче, спаси отчаянную душу мою.

Кондак шестый.

И бысть яко вхожал еси, Иисусе, во град наин и яко приближашеся ко вратом - и се, изношаху единороднаго сына матери своея и та бе вдова, ты же, спасе, видев ю, милосерствова о ней и рече: не плачи, и приступив, доткнулся одра. Носящий же сташа, и рекл есть юноше: тобе глаголю, востани. И сяде мертвый и начат глаголати, и дал есть его матери своей. Мы же, Иисусе боже, греховною смертию умертвлены, тобе ся молим: избави душе наше от смерти вечное, да поем аллилуиа.

Икос шестый.

Некоему сотнику раб боляше зле, и той слыша о тобе, Иисусе, во капернауме и посла старца їудейския, моляй тя, да пришед спасешь раба его и паки послал к тобе другия, глаголя: господи, не движися, несм убо достоин, да под кров мой вниидеши, но рци слово - исцелееть отрок мой. Мы же, недостойнии, тобе ся молим: рци слово твое, и спасена будеть душа наша и возможем достойне пеши, имя твое святое глаголюще: Иисусе, свете небесны, превышая вси светлости, Иисусе, спасе исьтинны, преходяй вси жадости. Иисусе, царю преславный, премогая вси крепости, Иисусе, боже превечны, пребывая в милости. Иисусе, хлебе животный, насыти мя алчнаго, Иисусе, источнику обилный, напои мя жаждущего. Иисусе, одежо нагих, приодей мя тленнаго, Иисусе, покрове странных, приими мя недостойнаго. Иисусе, подателю просящим, подай плачь за грехи моя, Иисусе, обретение ищущим, обрети серце мое. Иисусе, отверзителю толкущим, отверзи уста мое, Иисусе, откупителю грешным, очисти безаконие мое. Иисусе, велико человеколюбче, ущедри живот мой.

Кондак седмый.

Иже от века неслыхано бысть, бог Иисус на земли явися и со человеки невместимый поживе, труды и болезни наша той понесе и ранами его спасени быхом, яко овца пред стрыгущими онеме и яко агнець на заколение веде ся, и яко бог из мертвых воскресе и, нам живот вечны даровав, на небеса ся вознесе. Тем же и поем ему вернии аллилуйа.

Икос седмый.

Человеческий род дивится твоему, Иисусе, безсеменному воплощению, яко солнце убо ськло, тако девственую утробу в рожестве прошел еси и, яко видение проходить воздух, тако из гроба, печатей не вредив, тридневно востал еси и апостолом, дверем затворенным, во плоти явился есть. Сего ради вси чудящеся поем тобе: Иисусе, слово божие и создателю всякого сотворения, Иисусе, свете непостижимый и направителю адамова падения. Иисусе, сыну мариин и избавителю людьского поколения, Иисусе, премудрости вечная и исказителю адова владения. Иисусе, сподоби мя спасеных частей твоих, Иисусе, не воспоминай на множество грехов моих. Иисусе, не отдали от мене превеликих щедрот своих, Иисусе, напиши мя во книги святых твоих. Иисусе, спасе мой, спаси мя, Иисусе, царю мой, заступи мя. Иисусе, владыко мої, прости мя, Иисусе, врачу мой, исцели мя. Иисусе, велико человеколюбче, не отверзи мене.

Кондак осмый.

Филипп, апостол твой, Иисусе, вопрошаше тя, глаголя: господи, покажи нам отца и довлееть нам. Ты же, спасе, отвещал, глаголя: толико время с вами есм и не познасте мене, филиппе. Видяй мене видить и отца, и како ты глаголеши: покажи нам отца, не веруеши ли, яко аз во отци и отець во мне есть. Тем же и мы, дивящеся живоначалной троици, поем вси аллилуйа.

Икос осмый.

Руку свою святую простер еси, Иисусе, петру утопающу и глагола ему: маловере, почто усумнеся? И влезшу ти в корабль преста ветр. Сущии же в корабли, приступивше, поклонишеся тобе, глаголюще: воистинну сын божий еси. Мы же, владыко, вопием к тобе: подай нам пресвятую руку свою и вывлечи нас с тименией греховных и усмири ветреные помыслы наше, да восхвалим тя, поюще: Иисусе прес[вя]тый, ангелом удивление, Иисусе пресилный, первородителем избавление. Иисусе пресладкий, патриархом величанїе, Иисусе прещедрый, царем укрепление. Иисусе прелюбый, пророком жадости, Иисусе преславный, апостолом радости. Иисусе предобрый, мучеником крепости, Иисусе претихий, иноком сладкости. Иисусе превечный, постником воздержание, Иисусе пречистый, девствеником укрепление. Иисусе предивный, всем верным веселие, Иисусе милосердный, всем грешным спасение. Иисусе, велико человеколюбче, помилуй мя.

Кондак девятый.

Ангели, архангели, начала, силы, власти, Господьствия, шестокрилатые и многоочитые херувим и серафим безпрестанно твое имя, Иисусе, славять, на небеси вопиюще: свят, свят, свят Господь Иисус Христос во славе бога отца. Мы же грешнии на земли скверными усты поем аллилуиа.

Икос девятый.

Недостойные, Иисусе, молитвы приносим, приими нас, кающихся, якоже принял еси мытаря и фарисея, и блудницу, умывающу ти нозе слезами своими и втирающи власы своими, да избавившися грехов воспоем тобе: Иисусе, царю царствующих, Иисусе, господи господьствующих. Иисусе, владыко владеющих, Иисусе, судье живых и мертвых. Иисусе, отжени от нас темности душные, Иисусе, просвети мысли сердечные. Иисусе, очисти жадости умные, Иисусе, возведи очи телесные. Иисусе, всех грешных любителю, Иисусе, всех праведных оукрепителю. Иисусе, всех народов спасителю, Иисусе, всех хрестиян втешителю. Иисусе, велико человеколюбче, возри на мя.

Кондак десятый.

Царю превечный, Иисусе, втешителю души истинный, очисти нас ото всякое скверны, якоже очистил еси десеть мужей прокаженных, они же сташа здалече и вознесоша глас свой, глаголюще: Иисусе, наставниче, помилуй нас. И, видев их, рекл есть им, спасе: шедше покажитеся священником. И бысть идущим им очистишеся и пояху аллилуйа.

Икос десятый.

Исусе спасе, видевы закхея на ягодычине, рекл еси к нему, закхею: подщався, слези, днесть убо в дому твоем подобаеть ми быти и сребролюбимую душу мытареву сцелив владыко, поведел всем, яко днесть спасение дому сему бысть. Тем же и мы безпрестани вопием: внииди в дом серца нашего и сотвори спасение, отжени жадость сребролюбия, да поем имени твоему: Иисусе, сокровище нетленное, Иисусе, богатество неизчерпаемое. Иисусе, напитая всякое створение, Иисусе, подаяй царство небесное. Иисусе, вдовам заступниче, Иисусе, сиротам защитниче. Иисусе, по морю плывающим кормниче, Иисусе, всем неимеющим кормильче. Иисусе, царю небеси, дай ми за грехи плакание, Иисусе, царю земли, дай ми сердечное покаяние. Иисусе, царю бездны, дай ми в добром стривание, Иисусе, царю славы, яви ми свое обличие. Иисусе, велико человеколюбче, споможи мя ныне.

Кондак одиннадесятый.

Слово божие, Иисусе, спасе наш, словом небо и земля сотворена суть, словом душа наша оживлена есть, словом лазоря четверодневнаго воскресил есть, христе, глаголя: отче, хвалу тобе воздаю, яко услыша мя. Аз же ведех, яко всегда мя послушаеши, но народа ради, стояща окрест, рех, да веру имуть, яко ты мя послал. И сия рек, гласом великим возва: лазаре, греди вон! Изыде умерлый! Тем же и мы молим ся тобе: изведи нас от смерти вечное, да поем ти вовеки аллилуйа.

Икос одиннадесятый.

К тобе прибегаем, христе Иисусе, нас ради волею на кресте пострадавый и смертию своею нашу смерть умертвивый и воскресением живот нам нетленный даровавый и вознесением путь на небеса показавый. Тем же и поем, славяще имя твое верне: Иисусе, царю крепкий и безсмертный, Иисусе, ты сам добрый, сам милосердный. Иисусе, господи святый и прещедры, Иисусе, ты сам славный и пресилный. Иисусе, аз есм создание руку твоею, Иисусе, услыши недостойную молитву мою. Иисусе, подаи ми десницу святую свою, Иисусе, возми к собе грешную душу мою. Иисусе, прийми мя, яко же принял еси на кресте розбойника, Иисусе, помилуй мя, яко же помиловал еси явного грешника. Иисусе, врачу души и телу, уздрави мя злонедужника, Иисусе, спасе мой, споможи мя отходящего сего века. Иисусе, велико человеколюбче, прости мя.

Кондак дванадесятый.

Услыши, Иисусе, глас плачу моего, вопль мой к тобе да приидет. Воспомяни, спасе, на дело рук моих и не погуби мене для безаконией моих, царю мой и боже мой, поспеши помиловати мя, яко же помиловал есть петра, отвергшегося многократы - аз отвергохся тебе нечистыми делы своими, и яко же принял еси павла, гонившего тя, тако приими мя, свете, недостойнаго, и яко возвал есть матфея от мытарей и вчинил его евангелистом, тако допусти мя прославити имя твое пресвятое, Иисусе, и пети тобе в животе и по смерти с ними вовеки аллилуйа.

Икос дванадесятый.

Сотворителю мой, Иисусе, верую с фомою, яко ты еси Господь мой и бог мой, верую, яко седиши на небесех одесную отца, верую, яко оттоле приидеши судити живых и мертвых, тобе ся молю, спасе, сподоби мя стати со избранными твоими и слышети глас твой, глаголющ: поидите, благославении, в дом отца моего. Да воспоем имени твоему: Иисусе, царю превечный, Иисусе, балсаме пресладки. Иисусе, цвете превонный, Иисусе, бисере прелюбый. Иисусе, явивый нам свет лица своего, Иисусе, показавый нам путь спасения нашего. Иисусе, избавивый нас от злого всякого, Иисусе, изорвавый нас от огня вечного. Иисусе, серца моего веселие, Иисусе, тела моего здравие. Иисусе, души моея спасение, Иисусе, воведи мя во царство свое. Иисусе, велико человеколюбче, да прославлю имя твое вовеки веком. Аминь.

Молитва

Владыко, господи, Иисусе христе, царю сотворителю и боже наш, имя твое святое призываем и тобе ся молим: Иисусе, сыну пречистое девици марие, Иисусе, единое и превечное слово бога отца, Иисусе, совокупление и любов святаго духа, Иисусе, создателю ангелского естества, Иисусе, спасителю роду человеческаго, Иисусе, прогонителю бесовства всякого, Иисусе, помилуй мя по велицей милости твоей, Иисусе, очисти безаконие мое по премножеству щедрот твоих, Иисусе, отпусти вся грехи моя, Иисусе, приими от мене молитвы сие. О пресладкий Иисусе, о прелюбый Иисусе, о претихий Иисусе, тобе славу возсылаем со отцем и пресвятым духом вовеки веком. Аминь.[/spoiler]

[Раб божий Константин]

Акафист ко Господу Иисусу Христу Грядущему.
[spoiler]Кондак 1
Возбранный Воеводо и Господи, мира Создателю, с верою и любовию припадающе к Тебе Грядущему, вопию Ти:
Иисусе, Господи Грядущий, вниди в дом души моея.

Икос 1
Ангелов лики со страхом и трепетом взирали на Тя, Господи, егда волею нас ради распялся еси; мы же грешнии что возможем
глаголати? Но дерзаем по слову Твоему молитися Тебе:
Иисусе, Радосте наша, яви нам милость Твою;
Иисусе, любы неизреченная, даруй нам возлюбити Тя всем сердцем и всем помышлением.
Иисусе, желание наше, не отрини нас, ищущих Тя;
Иисусе, Свете Тихий, осияй нас светом благодати Твоея;
Иисусе, надеждо наша, не остави нас заблуждающихся.
Иисусе, вопрошающий нас: что творите вы на земли? - даруй нам творити Твоя повеления.
Иисусе, не возбранивый имети образ Твой, даруй нам выну именти образ Тя Грядущаго.
Иисусе, входящий в домы людей Твоих, вниди в мя и преобрази мя всего.
Иисусе, даруй ми разумети, что есть благая воля Твоя;
Иисусе многомилостивый, не отступи от меня за нерадение мое.
Иисусе, Господи Грядущий, вниди в дом души моея.

Кондак 2
Вем, яко велие утешение имам в последовании Тебе, Господи, даруй ми николиже отступати повелений Твоих, да спасаемый
Тобою зову: Аллилуиа.

Икос 2
Обещавый вечеряти с приемлющими Тя, соделай мя причастника вечери Твоея тайныя.
Иисусе, стоящий и толкущий у двери сердца моего, даруй ми уразумети зов Твой;
Иисусе, призывающий нас ко очищению, даруй ми познати нечистоту мою.
Иисусе, Свете истинный, просвети мя, да возлюблю заповеди Твоя;
Иисусе, ищущий призвати грешных, отверзи слух мой ко услышанию глагола Твоего.
иисусе, утружденный на пути Своем, не имеющий где главу преклонити, не возгнушайся внити в дом мой.
Иисусе, вем, яко наг есмь, нищ и убог, но благодатию Твоею покрый мя.
Иисусе, милосте безконечная, не остави мене;
Иисусе, Огнь попаляющий, попали моя злые помыслы.
Иисусе, врачу, исцели язвы страстей моих.
Иисусе, вся могий, коснися очес моих, во еже не видети мне суеты;
Иисусе премилостивый, очисти мя всего и спаси.
Иисусе, Господи Грядущий, вниди в дом души моея.

Кондак 3
Глаголавый пречистыми устами Твоими: ей, гряду скоро, аминь! Даруй мне со возлюбленным учеником Твоим взывати: ей,
гряди, Господи Иисусе! Сего ради в трепете ожидая пришествия Твоего зову Ти: Аллилуиа.

Икос 3
Призвавый апостолов от сетей рыбарских на служение Истине Твоей, призови и мя от суеты житейской, да последую Тебе, с
веселием и любовию глаголя:
Иисусе, простивый ученику Своему трикратное отречение, даруй ми его покаяние;
Иисусе, совесть моя, даруй ми горько плакатися о гресех моих.
Иисусе, ни единым словом, но воззрением токмо на ученика Своего приведый его к Себе, даждь и мне слезы покаяния, коснися
души моея, да раскаюся о неправде моей.
Иисусе, рекий апостолу Петру: гряди ко Мне! Повели и мне Тебе последовати;
Иисусе, глаголавый: блажен еси, Симоне, вар Иона, яко исповеда Мя Сыном Божиим, - даруй и мне его исповедание истинное.
Иисусе, разрешивый сему ученику идти по водам во сретение Твое, даруй и мне силу благодатную не убоятися волн житейских;
Иисусе, простерший руку к Петру утопающему, простри и мне руку помощи;
Иисусе, рекий: кто не со Мною, тот против Меня, - даруй ми пребыти с Тобою.
Иисусе, Господи Грядущий, вниди в дом души моея.

Кондак 4
Возлюбивый, Господи, весь род человеческий, научи и мя возлюбити ближних моих, да просветлен и обожен Тобою, выну зову
Ти: Аллилуиа.

Икос 4
Призываяй всех труждающихся и обремененных ко упокоению, даруй ми потрудитися ради имени Твоего святаго, не убоявшись
зноя полуденнаго: не ведаю бо егда день мой к вечеру преклонится; и да вопию Ти:
Иисусе, Свете святый, освяти повседневный труд мой;
Иисусе, Утешителю, даруй ми николиже возскорбети о тягости труда сего.
Иисусе, Радование мое, даруй ми понести всяку скорбь ради имени Твоего.
Иисусе, даруй ми познати Царствие Божие внутри себя.
Иисусе, Господи Грядущий, вниди в дом души моея.

Кондак 5
Се, прихожду к Безсмертному Царю и Богу моему, вопия: Аллилуиа.

Икос 5
Вем, Господи, яко скорбями, недугами и различными печалями болезни душ наших врачуеши.
Со слезами вопию Ти:
Иисусе, Господи, Ты Сам гонимый из храмов Твоих, даждь нам силу терпети скорби за имя Твое;
Иисусе, Странником в мире являющийся, помози нам во изгнании и странствии нашем.
Иисусе, Агнче Божий, вземляй грехи мира, возьми бремя грехов наших;
Иисусе, пречудный, страдания за мир претерпевый, утоли наши многоразличныя скорби.
Иисусе, Странниче в мире утомленный, даруй покой утомленной душе моей.
Иисусе, учеников призвавый, даруй и мне небоязненно тещи за Тобою.
Иисусе, Господи Предвечный, благослови всех к Тебе стремящихся.
Иисусе, вся ведущий, Ты веси, яко люблю Тя;
Иисусе, вся могий, помози ми и прости мя.
Иисусе, Господи Грядущий, вниди в дом души моея.

Кондак 6
Вем, Господи, яко тесными вратами, многими скорбями подобает внити в Царствие Небесное, укрепи стопы наша, да не
возвратимся вспять миром побеждаемии, но да зовем Ти: Аллилуиа.

Икос 6
На вечери в дому Симона Покаженного не отринул еси грешницу, пришедшую с миром многоценным помазати нози Твоя, но рекл
еси: отпущаются греси ея мнози, яко возлюбила много.
Иисусе благий, реки и о моих гресех такожде;
Иисусе, Пастырю Добрый, призови мя яко заблудшую овцу;
Иисусе, Судие Праведный, судом Твоим вразуми мя;
Иисусе, ими же веси судьбами спаси мя.
Иисусе, постивыйся в пустыне и напоследок взалкавый, даруй ми истинное алкание правды Твоея;
Иисусе, быв искушен всячески, помози ми во искушениях моих.
Иисусе, рекий: не может человек творити ничесоже, аще не будет дано ему свыше, - пошли ми помощь Твою с небеси;
Иисусе, не уклони сердце мое в словеса лукавствия;
Иисусе, Помоще моя, Заступниче мой, Радование мое, спаси мя.
Иисусе, Господи Грядущий, вниди в дом души моея.

Кондак 7
Повелел еси, Господи, быть мудрыми, искупующе время, яко дние лукави суть и время сокращенно; вразуми мя, да спасаемый
Тобою, вопию благодарне: Аллилуиа.

Икос 7
Слыша тайновидец апостол Иоанн глас с небеси глаголющий: напиши: блаженни мертвии, умирающие о Господе отныне. Ей,
глаголет Дух, да почиют от трудов своих: дела бо их ходят вслед за ними. Слыша сии слова и аз ужасаюся - не имам бо дел
ко оправданию и ничто же благое сотворих. Сего ради от сердца вопию Ти:
Иисусе, Судие Праведный, не осуди мя по делам моим.
Иисусе премилостивый, виждь нерадение мое и зло, соделанное мною, но помилуй мя.
Иисусе, не возгнушайся внити в оскверненный храм души моея;
Иисусе, Наставниче, научи мя.
Иисусе, Сыне Божий, даждь ми нищему Твое богатство неиждиваемое;
Иисусе, соделай мя рабом Твоим.
Иисусе пусте иждих время многоценное, данное ми для спасения;
Иисусе, приими мя, яко в единонадесятый час пришедшаго, и научи мя оправданиям Твоим.
Иисусе, Господи Грядущий, вниди в дом души моея.

Кондак 8
Зриши, Господи, яко велию скорбию сердца человеческия исполняются о зле неверия во дни наши сущаго; сего ради даруеши
благодатное обновление икон святых в знамение обновления духа нашего; познав в сем всеблагое промышление Твое,
благодарственно вопием Ти: Аллилуиа.

Икос 8
Дано бысть видение возлюбленному ученику Твоему, яко под олтарем избиенных за Слово Божие и за свидетельство еже имеяху,
возопиша гласом велиим, глаголюще: доколе, Владыко Святый и Истинный, не судиши и не мстиши крови нашея от живущих на
земли. И даны быша коемуждо их ризы белы, и речено бысть им да почиют еще время мало, дондеже скончаются и братия, их
имущии избиены быти, яко же и тии. Слышав сие, возношу Ти скорбный глас мой:
Иисусе Святый, утоли на земли нашей скорби великия;
Иисусе Праведный, укрепи исповедников святыя веры, ныне люте страждущих.
Иисусе, по всей земли Российстей проходящий, очисти ю Своими стопами;
Иисусе, утомленный на пути Твоем, укрепи народ, от глада и болезни погибающий.
Иисусе, Сам в нищете сый, укрой от хлада и нищеты братию нашу;
Иисусе, услыши вопль и плач народа русскаго.
Иисусе, приими фимиам молитв святых, в тайне Тебе подвизающихся;
Иисусе, ради сих праведных, помилуй нас.
Иисусе, вем, яко видиши всякую каплю слез на очах наших;
Иисусе, даруй нам в терпении понести крест наш.
Иисусе, вем, яко слышиши каждое воздыхание скорби нашей, приими ю во очищение душ наших;
Иисусе, вем, яко вместо разрушенных храмов на земли Российстей созидаеши храмы нерукотворенныя душ человеческих, ими же
да украсится Царствие Божие.
Иисусе, Господи Грядущий, вниди в дом души моея.

Кондак 9
Жажду просвещения Твоего, Господи, даруй ми, жадущему каплю благодати Твоея, да вопию Ти: Аллилуиа.

Икос 9
Ангельския силы, серафимы и херувимы и вся воинства небесныя со страхом и благоговением взирают на великое смирение
Твое; Ты бо, Господи Сил, Царь царствующих, Господь господствующих, смирив Себя и зрак рабий приим, по земли нашей
скорбной шествуеши из града в град, из веси в весь, всех созывая Сам на вечерю, Тобою уготованную:
Иисусе Благословенный, благослови всех призывающих тя;
Иисусе Благий, ко грешным пришедый, призови не ищущих Твоея помощи.
Иисусе, Свете незаходимый, просвети сердце народа нашего во тьме неверия сущаго;
Иисусе, Свете истинный, осияй страну русскую;
Иисусе, не возбранивый детям приходити к Тебе, просвети детей невинных, в безверии воспитанных;
Иисусе, в тайном подвизе на всяком месте, в лесах и весях Тебе подвизающихся сохрани.
Иисусе, Великий Архиерею, иереев верных мученическую кончину Тебе ради приемлющих укрепи;
Иисусе, светом благодати Твоея возсияй в сердцах гонителей, да познают Тя, Бога Истиннаго.
Иисусе, к великому всенародному покаянию нас призови;
Иисусе, состраждущий нам, горе народное, глад, нужду, тьму духовную развей невечерним светом Твоим.
ИИсусе, призови и мя, убогаго, не дерзающаго приступити к Чертогу Твоему;
Иисусе, просвети одеяние души моея, да вниду в онь.
Иисусе, Господи Грядущий, вниди в дом души моея.

Кондак 10
Ты рекл еси, Господи: Побеждающему дам сести со Мною на престоле Моем, яко претерпевый до конца, той спасен будет.
Приемля сей глагол Твой в сердце мое, в радости духовной благодарственно вопию Ти: Аллилуиа.

Икос 10
Виде апостол Иоанн народ мног, егоже исчести никто не может от всякаго языка, стоящ пред Престолом Божиим, и людей
облеченных в ризы белы и слыша глас глаголющий: сии суть, иже приидоша от скорби великия и исправиша ризы своя и убелиша
их в крови Агнца.
Иисусе, Веселие Истинное, возвесели душу мою;
Иисусе, сподоби и мя послужити Тебе, якоже сии искупленнии от земли служат Ти день и ночь в Церкви Твоей.
Иисусе, Творче мой, сотвори, да будет ми весь мир храмом Твоим;
Иисусе, научи мя, да будет сердце мое престолом Тебе, и таинство жизни Твоея да совершается в нем.
Иисусе Спасителю, приими от мене немощное славословие сие, яко "жертву хваления";
Иисусе, во святом причащении Тела и Крови Твоея освяти мя;
Иисусе, Радосте моя, даруй ми, да в сердце моем благодарственно поклонюся Тебе.
Иисусе, Господи Грядущий, вниди в дом души моея.

Кондак 11
В немощи человечей сила Божия совершается: аз немощен и духом и телом; но укрепи мя и ободри мя благодатию Своею, да
познав милость Твою, радостно воспою: Аллилуиа.

Икос 11
Рекл еси учеником Своим и всем верующим: в мире скорбни будете, но скорбь ваша в радость будет. Вем бо, Господи, Тобою
реченное и вопию Ти:
Иисусе, мир Твой даруй душе моей.
Иисусе, помози ми, да оставлю все ради Тебе;
Иисусе, даруй ми узкими вратами приити к Тебе.
Иисусе, Свете Тихий, уготовь сердце мое на вечерю Твою;
Иисусе, даждь ми все дни жизни моея послужити Тебе.
Иисусе Благий, научи мя кротости и смирению, научи мя разумети нужду ближняго;
Иисусе, не хотению своему, но благой воле Твоей да последую.
Иисусе, скорби мира сего ко спасению да послужат ми.
Иисусе, Господи Грядущий, вниди в дом души моея.

Кондак 12
Умиленным сердцем и духом, радостию о Тебе исполненным, предстою пред Ликом Твоим, поклоняюся милосердию Твоему и вопию:
Аллилуиа.

Икос 12
В горнице Сионской на тайной вечери глаголал еси учеником Своим: мир оставляю вам, мир Мой даю вам. Да не смущается
сердце ваше, не устрашается. Слышав сие реченное Тобою, вопию Ти:
Иисусе, укрепи мя на брань не с кровию и плотию, но с началами и с миродержителями тьмы века сего.
Иисусе, научи мя прияти вся оружия Божия, да возмогу противитися в день лют;
Иисусе, пропояшь чресла моя истиною и облеки мя в броню правды;
Иисусе, обуй нози моя во уготование благовествования мира;
Иисусе, научи мя восприяти щит веры и шлем спасения.
Иисусе, помози ми молитися молением на всяко время духом;
Иисусе, умудри мя пребывати бдящим во всяком терпении;
Иисусе, помози ми не угасити светильника души моея;
Иисусе, даруй ми со светильником возженным внити в сретение Твое.
Иисусе, Господи Грядущий, вниди в дом души моея.

Кондак 13
О, Иисусе Христе, Свете Тихий, осияй мя Истиной твоею, да услышав зов Твой, со светильником горящим выйду во сретение
Тебе, грядущему внити в дом души моея, поя Ти: Аллилуиа.
(Трижды; и паки: икос 1 и кондак 1)

Молитва ко Господу Иисусу Христу Грядущему
Господи Иисусе Христе, Сыне Божий, - покланяемся Образу Твоему, Любви Твоей и Промыслу Твоему о нас грешных и
недостойных рабех Твоих; услыши молитву нашу, с верою Тебе приносимую, прииди к нам, благодатию Духа Твоего Святаго
научи, умудри пребывати в Тебе, якоже Ты пребываеши в нас; научи нас, Благий, молитве, добру и терпению; даруй нам дух
сокрушения, дух покаяния; отыми от нас дух праздности, дух уныния и неведения.
О, Иисусе Христе, Многомилостивый, Грядущий к нам, помилуй нас и спаси, молитвами Пречистыя Твоея Матери, ангелов и
апостолов и всех святых Твоих, от века Тебе угодивших. Аминь.

Молитва ко Господу Иисусу Христу в нашествии печали
Господи, спаси мя погибающаго! Се, кораблец мой бедствует от искушения волн житейских и близ потопления есть; но Ты, яко
Бог милосердный и сострадательный немощем нашим, властию Твоею всесильно запрети волнению бедствия, хотящаго погрузити
мя и низвести во глубину зол; и да будет тишина, яко ветры и море послушают Тебе. Аминь.

Спаси мя, Спасе мой, по милости Твоей, не по делом моим. Ты хощеши мя спасти. Ты веси, коим образом спасти мя. Спаси убо
мене, якоже хощеши, якоже можеши, якоже веси. Имиже веси судьбами, спаси мя. Аз на Тя, Господа моего, надеюся, и Твоей
воли святой себе вручаю. Твори со мною, еже хощеши: аще хощеши мя имети во свете, буди благословен: аще хощеши мя имети
во тьме, буди паки благословен. Аще отверзеши ми милосердия Твоего двери, добро убо и благо; аще затвориши ми двери
милосердия Твоего, благословен еси, Господи, затворивый ми по правде. Аще не погубиши мя со беззаконьми моими, слава
безмерному милосердию Твоему; аще поубиши мя со беззаконьми моими, слава праведному суду Твоему: якоже хощеши, устрой о
мне вещь. Аминь.[/spoiler]

[Раб божий Константин]

Акафист во славу Милосерднаго Господа нашего Иисуса Христа.
[spoiler]Кондак 1
Избранный Женише душ и сердец, Образ соприсносущный славы Отчия, любовию снисшел еси к нам, вочеловечением Своим и смертью на Кресте, обручивый Себе на веки весь род человечь, и давый нам в залог Вечныя Жизни Самое Пречистое Тело и Кровь Свою, Слове Божий, за нас быв человек, и положив о нас душу Твою возставил еси в нас образ Божий. Темже благодарно поем Ти:
Милосердный Иисусе, паки и паки молим Тя, помилуй ны.

Икос 1
Ангелов и всего Сущего Творче, искупление рода человеческаго промышляя, уготовль Богоносное Твое Тело на жертву Голгофскую за грехи наша, глаголя ко Отцу Твоему небесному: жертвы и приношения не восхотел еси, тело же совершил Ми еси. Тогда рех: се иду. Сего ради почивающу Тебе, яко Агнцу непорочному, взявшему грехи мира, глаголем сице:
Милосердный Иисусе, паче Ангел нас возлюбивший.
Милосердный Иисусе, беззакония наша себе присвоивый.
Милосердный Иисусе, любве святыя воню на ны разливающий.
Милосердный Иисусе, Радосте наша, яви нам милость Твою.
Милосердный Иисусе, любы неизреченная, даруй нам возлюбити Тя всем сердцем и всем помышлением.
Милосердный Иисусе, желание наше, не отрини нас, ищущих Тя.
Милосердный Иисусе, паки и паки молим Тя, помилуй ны.

Кондак 2
Видя взором духовным, Тебе, о Сладчайший Иисусе, обручившагося естеству нашему во чреве Пречистыя Твоея Матере, со светильники, исполненыма елеем Твоея благодати, сретаем радостно Тебе, Небесному Жениху всех душ наших, надчертожную песнь: Аллилуиа.

Икос 2
Разумом человеческим постигнути невозможно, яко лиси норы имут, и птицы небесныя гнезда. Ты же, содержай всяческая яко Бог, и исполняяй всяко животно благоволение, не имел еси где главы подклонити, и любве ради нашея отвержен от обители, родился еси в вертепе, и положился еси в яслех между скоты, и первый плачь восприял еси, да слезами Твоими измыеши беззакония наша и отъимеши от нас плачь вечный, и пеленами обвился еси, да нас разрешиши от уз греховных. Темже богатству любве Твоея дивящеся поем:
Милосердный Иисусе, Свете Тихий, осияй нас светом благодати Твоея.
Милосердный Иисусе, даруй ми со светильником возженным внити в сретение Твое.
Милосердный Иисусе, Странником в мире являющийся, помози нам во изгнании и странствии нашем.
Милосердный Иисусе, Агнче Божий, вземляй грехи мира, возьми бремя грехов наших.
Милосердный Иисусе, пречудный, страдания за мир претерпевый, утоли наши многоразличныя скорби.
Милосердный Иисусе, Странниче в мире утомленный, даруй покой утомленным душам нашим.
Милосердный Иисусе, паки и паки молим Тя, помилуй ны.

Кондак 3
Силою благодати и Премудрости Твоея наставляеми царие Волсви, поклонишася Тебе, нас ради лежащему в вертепе вифлеемстем, Иисусе, и приносоша Ти злато и кадило и смирну во исповедание Твоего Царства, и Божества, и смертнаго нас ради человечества, поюще в сердце своем Ангельскую песнь: Аллилуиа.

Икос 3
Имея безмерное благоутробие, снисшедый с небеси и воплотивыйся паче ума, снизшел еси к нам, Спасе, тайно якоже иногда дождь на руно, и первая тридесять лета пожития Твоего с человеки нас ради превел еси в скрытии, в смирении, в нищите, в трудех, повинуяся во всем родителям Твоим, прилежа же древоделию, да выну имаши пред очима Твоима древо крестное, имже восхотел еси искупити ны, поработившихся сатане. Темже неизмеримей пучине любве Твоея поем:
Милосердный Иисусе, смиренная мудрствовати нас воздвизающий.
Милосердный Иисусе, к трудолюбию нас ободряющий.
Милосердный Иисусе, о благоволении Отца Твоего Небеснаго в человецех наслаждающийся.
Милосердный Иисусе, Утешителю, даруй нам николиже возскорбети о тягости труда сего.
Милосердный Иисусе, Господи Предвечный, благослови всех к Тебе стремящихся.
Милосердный Иисусе, даруй ми познати Царствие Божие внутри себя.
Милосердный Иисусе, паки и паки молим Тя, помилуй ны.

Кондак 4
Бурю лукавых помышлений, от мира, плоти и диавола находящую, надеждою на Милосердие всесильное побеждается, Ты бо сидиши на престоле высоце, и приемлеши трисвятое пение от шестокрылатых Серафимов, и нашим молениям внемлеши, яко мы от сердец наших воспеваем Тебе : Аллилуиа.

Икос 4
Слышавше сказания евангелистов, яко ты, Иисусе Сладчайший, разрешал еси грешники, ял и пиял еси с мытари, да исцелиши недуги их душевныя; злобным грозил еси, да покаются и не погибнут, вся собирая, якоже кокошь птенцы своя под крыле своя. Мы же, поминающе сию непостижимую любовь Твою к нам, восклицаем, поюще:
Милосердный Иисусе, всепобеждающия любве огнезрачный престоле.
Милосердный Иисусе, жертво непрестаннаго снизхождения к слабостем нашим.
Милосердный Иисусе, научи ны, да будут сердца наши престолами Тебе, и таинство жизни Твоея да совершается в них.
Милосердный Иисусе, Спасителю, приими от нас немощное славословие сие.
Милосердный Иисусе, во святом причащении Тела и Крови Твоея освяти нас.
Милосердный Иисусе, Радосте наша, даруй нам, да в сердцех благодарственно поклоняемся Тебе.
Милосердный Иисусе, паки и паки молим Тя, помилуй ны.

Кондак 5
Божественным наставлением Твоим, Спасе, внимая, яко рекл еси пречистыма усты твоима: «Научитеся от мене, яко кроток есмь и смирен Сердцем, и обрящете покой душам вашим», просим Тя, Иисусе премилостиве, подаждь нам благодать подражати Тебе боголепно, кротости же и смиренности Сердца Твоего достойно пети: Аллилуиа.

Икос 5
Видящее, Иисусе, возлюбленнаго Ти друга Лазаря, четверодневна во гробе, сжалися человеколюбивое Твое Сердце, и прослезился еси, якоже глаголати Иудеом: виждь, яко любляше его, воскресил же его от мертвых, преложил еси плачь Марии и Марфы в радость. Темже и мы дивящеся неисповедимей любви Твоей к нам, с восхищением восклицаем и благодарно поем:
Милосердный Иисусе, безконечно любящий и безконечно любимый.
Милосердный Иисусе, о нашей смерти глубоко смущающийся.
Милосердный Иисусе, утружденный на пути Своем, не имеющий где главу преклонити, не возгнушайся внити в дом мой.
Милосердный Иисусе, помози нам молитися молением на всяко время духом.
Милосердный Иисусе, умудри нас пребывати бдящим во всяком терпении.
Милосердный Иисусе, помози нам не угасити светильника душ наших.
Милосердный Иисусе, паки и паки молим Тя, помилуй ны.

Кондак 6
Проповедуя учеником твоим, Спасе, грядущее сбытие искупления рода человеческаго, возжелал еси ясти с нами последнюю Пасху законную, да нас лучшия Пасхи сподобиши во Царствии Отца Твоего, неизреченней любви Твоей, поющих Ти: Аллилуиа.

Икос 6
Возсия Христос из гроба, явися прежде женам, яко теплую любовь явиша Ему у Креста. Видев же Петра, в скорби ко гробу пришедша, явися Ему, яко милосерд, прежде других ученик. Отходя ко Отцу Твоему Небесному, не стерпел еси отлучитися от нас, но оставил еси нам Тебе самаго яко хлеб и вино, жертву всегдашнюю и манну небесную в напутие к земли обетования горней. Темже радующеся о крайнем нисхождении Твоем к нам, поем сице:
Милосердный Иисусе, во Святем Причастии в живот вечный нас питающий.
Милосердный Иисусе, во святых Тайнах до скончания века на земли пребывающий.
Милосердный Иисусе, стоящий и толкущий у дверей сердец, даруй нам уразумети зов Твой.
Милосердный Иисусе, призывающий нас ко очищению, даруй познати бессилие наше.
Милосердный Иисусе, Свете истинный, просвети нас, да возлюбим заповеди Твоя.
Милосердный Иисусе, ищущий призвати грешных, отверзи слух наш ко услышанию глагола Твоего.
Милосердный Иисусе, паки и паки молим Тя, помилуй ны.

Кондак 7
Хотя исправити гордыню первозданнаго человека, смирил еси Себе Самаго, Слове Божий, до яслей и смерти крестныя, нам образ дая, да вси обращающии сердца свои к Тебе, облекутся в царское одеяние благодати Твоея, яко сопребывая с нами в таинствах Вселенския церкви Твоея, Пастырю добрый, питаеши нас пречистою Твоею Плотию и напаяеши честнейшею Твоею Кровию. Царь славы сый, входиши со двором Твоим небесным под наша кровы и утешаеши и подкрепляеши нас, подвизая воспевати Ти: Аллилуиа.

Икос 7
Якоже иногда Праотец Твой Давид, обольщен ближайшим своим советником, и гоним своим сыном, прохождаше с верною дружиною Кедрон, и тужя и плачяся, восхождаше на гору масличну, сице и Ты, Спасе, предан от злочестиваго Иуды, прешел еси со верными Ти Апостолы тойже поток, и скорбел еси ко Отцу Твоему Небесному, да мимонесет от Тебе чашу страстей, волею претерпел еси на горе масличней подвиг кровный, да помажеши нас елеем Твоея благодати, и сотвориши нас борцы подвизающияся за неувядаемый венец славы. Темже торжеству непостижимей Твоей любви поем:
Милосердный Иисусе, нас ради даже до пота кровнаго подвизавшийся.
Милосердный Иисусе, подвига нашего сило необоримая и чаши нашея услаждение.
Милосердный Иисусе, даруй нам узкими вратами приити к Тебе.
Милосердный Иисусе, Свете Тихий, уготови сердца наша на вечерю Твою.
Милосердный Иисусе, даждь нам вся дни живота нашего послужити Тебе.
Милосердный Иисусе, научи ны кротости и смирению, дабы разумети нужду ближняго.
Милосердный Иисусе, паки и паки молим Тя, помилуй ны.

Кондак 8
Странно бысть людем видети житие земное твое, Спасе, яко заушения, заплевания, укоризны, раны, страшная биения и терновый венец восприял еси, Господи и Боже наш, да нас исхитиши мук вечных, и сподобиши почестей и венцев небесных, поющих ныне во славу всемилосердныя любве Твоея: Аллилуиа.

Икос 8
Всей непостижимей бездне любве Твоея к нам, Сыне Божий, земля да ужаснется, ибо нас ради между разбойники на кресте наг висиши, язв гвоздинных непрестанно неисповедимую болезнь терпиши. В жажде Твоей оцтом и желчию напаяешися: болезнию Преблагословенныя Твоея Матере паче уязвляешися: ктому же и от Отца Твоего без утешения оставляешися. Обаче в мори болезни и горести за враги Своя молился еси ко Отцу Твоему Небесному, глаголя: «Отче отпусти им, не ведят бо, что творят». Разбойнику кающемуся рай даровал еси, глаголя: «Днесь со Мною будеши в раи». Темже недоумевающеся о неизмеримей любви Твоей зовем:
Милосердный Иисусе, страдания ужаснаго жертво самоизволимая.
Милосердный Иисусе, кротости и долготерпения бездно непостижимая.
Милосердный Иисусе, олтарю огня любве неугасимыя.
Милосердный Иисусе, укрепи ны на брань не с кровию и плотию, но с началами и с миродержителями тьмы века сего.
Милосердный Иисусе, обуй нози наша во уготование благовествования мира.
Милосердный Иисусе, научи ны восприяти щит веры и шлем спасения.
Милосердный Иисусе, паки и паки молим Тя, помилуй ны.

Кондак 9
Все богатство любве Твоея излиял еси на ны, Иисусе Всецарю, егда Себе Самаго миру во очищение даровал еси, был еси за нас проклятие, пригвоздився на древе, и искупил ны еси от клятвы древния. Сего ради выну благословяще Тя, неизреченней любве Твоея поем: Аллилуиа.

Икос 9
Вития многовещанныя не довлеют по достоянию воспети величие и тайну любве твоея к падшему роду человеческому, Спасе Всеблагословенный, ибо и за праведнаго едва кто дерзает умрети. Ты же составил еси любовь Твою к нам, яко за нас нечестивых и врагов Тебе, умерл еси. Плотию же уснув на кресте, от ребра купно же и Сердца Твоего прободеннаго источил еси кровь и воду. Сего ради Тебе поем:
Милосердный Иисусе, любовию Твоею даже до смерти истаявающий.
Милосердный Иисусе, непостижимо нас возлюбивший.
Милосердный Иисусе, благословляяй всех к Тебе стремящихся.
Милосердный Иисусе, вся ведущий, Ты веси, яко любим Тя.
Милосердный Иисусе, вся могий, помози нам и прости нас.
Милосердный Иисусе, не уклони сердца наша в словеса лукавствия.
Милосердный Иисусе, паки и паки молим Тя, помилуй ны.

Кондак 10
Спасти хотяй всяческая, с нами неложно обещался еси быти до скончания века сего, небесный наш Обручниче, Иисусе, полагаем Тя, яко печать на сердце нашем, поюще безконечней любви Твоей: Аллилуиа.

Икос 10
Царю Небесный, Христе Иисусе, Деву Всенепорочную, стоящую под крестом Твоим дал еси в матерь нам, Спасе наш, и уязвил еси ю нас ради болезнию непостижимою. Та бо приемши на обятия Своя пречистое Тело Твое низложенное со креста, и плакашеся горько, якоже иногда Иаков о Иосифе, и не хотяше утешитися, но желаше до ада снити за Тобою. Сего ради толикую любовь Твою к нам ублажающе, зовем:
Милосердный Иисусе, Матере своея сладчайшим попечением нас почтивый.
Милосердный Иисусе, Себе и вся за ны пожертвовавый.
Милосердный Иисусе, вемы, яко видиши всякую каплю слез на очах наших.
Милосердный Иисусе, даруй нам в терпении понести крест наш.
Милосердный Иисусе, вемы, яко слышиши каждое воздыхание скорби нашей, приими ю во очищение душ наших.
Милосердный Иисусе Спасителю, приими от нас немощное славословие сие, яко "жертву хваления".
Милосердный Иисусе, паки и паки молим Тя, помилуй ны.

Кондак 11
Пение наше всякое побеждается, и многое множество хвалебных песен, воспеваемых ти, несть довольно, дабы по достоянию восхвалити тя, Иисусе, снята со креста мертва и неизчетными ранами нас ради уязвленна, во гробе же положена. И неизследованную Твою любовь вспоминающе, поем Ти надгробное пение: Аллилуиа.

Икос 11
Светом Божественным всю вселенную просвещаеши, Пастырю премилостиве, Иисусе, яко не отреклся еси овец Твоего любимаго стада, но аще и оставиша Тя во время страсти, паки во кротости Твоей собрал еси я, известив нам быти с нами до скончания века, вознеслся еси на небо, да тамо показуя язвы Твоя Отцу Твоему небесному, ходатайствуеши о нас. Сего ради ублажаем неисповедимую любовь Твою, поюще:
Милосердный Иисусе, вся могий, коснися очес наших, во еже не зрети суеты.
Милосердный Иисусе премилостивый, очисти все естество наше и спаси ны.
Милосердный Иисусе, крепосте в наших бранех и сладосте в наших печалех.
Милосердный Иисусе, веселие истинное, возвесели души и сердца наши.
Милосердный Иисусе, сподоби ны послужити Тебе, якоже сии искупленнии от земли служат Ти день и ночь в Церкви Твоей.
Милосердный Иисусе, Творче наш, сотвори, да будет весь мир храмом Твоим.
Милосердный Иисусе, паки и паки молим Тя, помилуй ны.

Кондак 12
Благодатию и щедротами Твоими, Премилосердный Владыко, не оставляеши христиан, имя Твое свято чтущих, но сам Бог истинный сошел еси на спасение наше, Христе, и поразив жезлом крестным мысленнаго Фараона, исправил еси нас к земли обетования небесней, поющих любви Твоей победную песнь: Аллилуиа.

Икос 12
Поющи преславныя добропобедныя страдания твоя, восхваляем неизреченное милосердие Твое, яко облаком просвещаеши нас в нощи неведения, и охлаждаеши ны в дни зноя всяких тяжестий. Сего ради превозносяще безконечную любовь Твою к нам, с любовию поем:
Милосердный Иисусе, от смертоноснаго яда змия ветхаго нас исцеляющий.
Милосердный Иисусе, в бранех наших за нас одолевающий.
Милосердный Иисусе, даруй нам, да в сердцех наших благодарственно поклонимся Тебе.
Милосердный Иисусе, научи ны, да будет сердца наша престолом Тебе, и таинство жизни Твоея да совершается в них.
Милосердный Иисусе, Огнь попаляющий, попали злыя помыслы наша.
Милосердный Иисусе, врачу, исцели язвы страстей наших.
Милосердный Иисусе, паки и паки молим Тя, помилуй ны.

Кондак 13
О неизследимая и неизглаголанная Бездно Любве и Щедрот, Сладчайший Иисусе. В тебе плод жизни вечныя, в Тебе источник вод живых. Отверзи нам недро Твое труждающимся и обременненым, да в нем упокоимся и поем ти: Аллилуиа.

Молитва
Владыко многомилостиве Господи Иисусе Христе, Боже наш, что Ти воздадем за толикую любовь Твою, еюже венчал еси нас? Исповедуем, яко вси мы стяжаннии от Тебе неизглаголанными труды и подвиги, в конец и многоценною Твоею Кровию, должни есмы благочестием жития нашего воздаяти Тебе любовь за любовь.
Молитвами Пренепорочныя Твоея Матере, претвори студенность нашего сердца в горящую любовь, якоже иногда в Кане Галилейстей воду в державно вино; сокруши Духом Твоим Святым сердца наша, даруй нам слезы покаяния и умиления, и простив беззакония наша, подаждь нам исправление жития, яко да сподобимся со святыми Твоими славити Тя в безконечныя веки веков. Аминь.[/spoiler]

[Раб божий Константин]

Акафист Господу Иисусу Христу Терноносному и Крестоносному
(написан епископом Серафимом в Бутырской тюрьме).
[spoiler]Кондак 1
 
Возбранный Воеводо и Господи Иисусе Христе, Сыне Бога Живаго, мене, грехом умерщвленнаго, мене, тьмою страстей помраченнаго, просветити и оживити хотя, приклонив небеса, снизшел еси ко мне даже до смерти, смерти же крестныя. Пред сим неисповедимым величием любви Твоея Божественныя преклоняяся, пред Крестом Твоим Честным, потоками Животочныя Крови Твоея изобильно напоенном, ниц распростираяся, со благодарением многим, со умилением теплым, с молением слезным, с сердцем горящим, вопию Ти песнь сицевую, мольбу Ти приношу таковую:

Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.


Икос 1
 
Ангелов Творче и Господи Сил, Ангел предста Ти, в саду Гефсиманстем, укрепляя и утешая Тя, егда бремя тяжкое грехов моих толико отяготе на рамех Твоих, яко скорбети Ти зело и ужасатися. В сию скорбь Твою гефсиманскую со благоговением, со страхом и трепетом великим проникая, от души взываю Ти сице:

Господи мой, Господи, учеником Твоим в скорби рекий: « Молитеся, да не внидите в напасть », — се найде на мя напасть велия, се постиже мя скорбь лютая, молитвою неотступною удержи мя, молю, от отчаяния, молитвою слезною удержи мя, прошу, от роптания.

Иисусе мой, Сладчайший Иисусе, Петра и обоих сынов Зеведеевых, Иакова и Иоанна, в глубь Гефсимании взявый с Собою, да будут свидетелями вопля Твоего крепкаго, воздыханий неизглаголанных, слез молитвенных, возьми и мя, люто страждуща ныне, с Собою и соделай созерцателем честных страданий Твоих, да своя страдания с терпением перенесу аз малодушный.

Христе мой, Пресладкий Христе, в Гефсиманстей веси скорбевший, ужасавшийся и туживший, призри на мя, яко скорблю, яко ужасаюся, яко тужу; скоро услыши мя, вонми души моей и избави ю от туги сея горчайшия.

Сыне Божий Единородный, носяй всяческая глаголом силы Своея, в молитве за грехи моя падый лицем Своим Пречистым на самую землю, подыми мя падшаго, воззови долу поникшаго.

Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.


Кондак 2
 
Вижду Тя, Господи Боже мой, в вертоград Гефсиманский вшедшаго, на вержение камня от апостол отошедшаго, вижду, о Спасителю мой, колена преклоньшаго, молящагося, и со удивлением благоговейным вопию Ти: Аллилуиа.


Икос 2
 
Разум изумевает пред глубиною богатства премудрости и разума Твоего, Боже Спасителю мой: воистину неиспытаны суды Твои и неизследованы пути Твои в деле спасения падшаго человека. Темже взываю Ти, Благодетелю моему, гласом мольбы сицевыя:

Господи мой, Господи, в молитве Отцу Твоему сице воззвавый: « Отче Мой, мимо неси от Мене чашу сию », — се, припадая Ти, молюся аз, во искушении тяжцем сый: умилосердися надо мною, мимо неси от мене чашу испытаний моих, да вера моя не оскудеет во мне.

Иисусе мой, сладчайший Иисусе, в молитве Гефсиманстей волю Свою в волю Отца всецело предавый, тако моливыйся: « Не якоже Аз хощу, но якоже Ты, обаче не Моя воля, но Твоя да будет », — услыши мя, слабаго и непостояннаго, в час испытания моего и невзгод моих, сице молящагося Ти: «Боже мой и Господи мой, аще угодно сие есть пред Тобою, да скорби, нужды и искушения обдержат мя отовсюду; аз грешный, всякия казни достойный, не смею противовещати Ти, но смиряюся под крепкую руку Твою: буди воля Твоя; не якоже аз хощу, но якоже Ты, да будет воля Твоя, благословен еси, Господи!

Христе мой, Пресладкий Христе, от туги тяжкия гефсиманския весь изнемогающий в молитве, но николиже ослабевающий, но неотступно прилежно в подвизе молитвенном пребывающий, даже до пота, каплями крове каплющаго на землю, Ты вдохни в мя, нерешительнаго, молюся, решимость подвигом добрым даже до смерти подвизатися, да не ктому себе живу, но Ты, Жизнь Безконечная, да живеши во мне, да и аз Тебе.

Сыне Божий Единородный, от молитвы ко учеником Своим возвративыйся и обретый их спящими от печали, бяху бо очи их отяготели, се и аз отяготех от печали моея, страх и трепет прииде на мя, и покрыла мя есть чуждая тьма, окаяннаго; возбуди мя спящаго, воодушеви мертваго, помози безпомощному.

Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.


Кондак 3
 
Сила моя во мне оскуде, Господи, Всемогущий Господи, се утрудихся зовый, изсше гортань мой, истомилися суть очи мои от ожидания Тебе, Христе мой, Христе мой! Се поношения поносящих Тя нападоша на мя: аз заключен и не могу выйти, изнеможе крепость моя, се жду соскорбящаго и — несть, и утешающих и—не обретаю, нищ и боляй есмь аз... Услыши мя, Иисусе, услыши, мене ради обнищавший, укрепи мя, мене ради изнемогший, спасение Твое, Боже, да приимет мя, да от души исцеленныя вопию Ти: Аллилуиа.


Икос 3
 
Имея пред очима моима, Иисусе, Спасе мой, преднаписанный Божественными Евангелистами образ Тебе, страждущаго, всего уязвленнаго, се прихожду к Тебе аз, страждущий, с неисцельными гноящимися язвами сердца моего страстнаго и, веруя несомненно, яко язвы Твоя — исцеление мое и болезни Твоя — здравие мое есть, сице вопию Ти:

Господи, мой Господи, от беззаконных уст оплеваемый, безчествуемый, унижаемый, умилосердися, воззри на мя: страсть греховная душу мою безсмертную — дыхание уст Твоих — безчестит, унижает: исхитити мя от плена страсти сея потщися, погибаю.

Иисусе мой, Сладчайший Иисусе, венчаяй землю цветами, тернием острым увенчанный, виждь, колико острых терний, нелепых помышлений, неподобных мечтаний терзает главу мою: исторгни их, молю, и цветами благих мыслей, святых чувствований украси мя.

Христе мой, Пресладкий Христе, одеяйся светом яко ризою, в ложную багряницу от области темныя облаченный, ризу мне подаждь светлу, яко лежу наг пред враты Твоими и срамляюся, стыждуся плоти своея.

Сыне Божий Единородный, на небесех от Ангел с трепетом священным и любовию огнепламенною присно окружаемый, на земли же страха ради всеми оставленный, исполни всего мя дерзновения и мужества, да никоего же убоюся страха человеческаго, никия муки, самыя лютейшия, да дерзновенно Тя исповедаю, Твое величие проповедуя:

Господи Христе, Сыне Божий, в несении креста спасительного, десницею Твоею мне низпосланнаго, укрепи мя, в конец изнемогающаго!


Кондак 4
 
Буря страстей в сердце моем возшуме, се внидоша воды до души моея, углебох, приидох во глубины морския... се сниде дождь и приидоша реки, и возвеяша ветры греховнии, и нападоша ныне на храмину мою! Спасителю мой, бурь Утишителю, рцы бури моей, повели волнению моему: «Молчи, престани», — и по глаголу Твоему буди тишина велия, да в тишине сей благодарно зову Ти: Аллилуиа.


Икос 4
 
Слыша Петр, отвергийся Тебе, обличительный глас алектора и, изшед вон, плакася горько. Плачу ныне и аз горце, зря себе удаленным от Тебе, Источника всякия радости, Света, Утешения, и в плаче моем сице восклицаю Ти:

Господи мой, Господи, от законник о учении Твоем истязуемый, не истязуй совесть мою о содеянных мною злых, яко безответен есмь; аще беззакония назриши, кто постоит?

Иисусе мой, Сладчайший Иисусе, от Каиафы лжесвидетельствуемый, оклеветаемый, како аз воззрю на Тя, егда возводимыя на мя клеветы и напраслины терпети не могу, смущаюся, раздражаюся. Твоим долготерпением мое нетерпение покрый, Долготерпеливе.

Христе мой, Пресладкий Христе, от Ирода поругаемый и уничижаемый, что реку Ти и что возглаголю, егда на кийждо час зрю себе превозносящася, гордящася? Уничижением Твоим, смирением Твоим, победи, молю, ничим не победимую гордыню мою.

Сыне Божий Единородный, от Пилата неправедно судимый и зле осуждаемый, кий ответ Тебе дам, яко бревно, еже во очесе моем, не чую, сучец же, сущий во оце брата моего, всегда вижду себе не сужду, иных же всегда осуждаю. О Судие мой, научи мя всею душею, всею жизнию исполняти великую заповедь Твою: не судите, да не судимы будете!

Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго!


Кондак 5
 
Боготочную Кровь Твою, на Кресте излиянную, в Божественней литургии дал еси мне, Агнче Божий, яко утешение превеликое во всех скорбех моих, яко сладость пресладкую во всех горестех моих, яко силу непобедимую во всех немощех моих, яко источник безсмертия в смертности моей. За сию милость Твою неизреченную, за сей дар безценный, за сию любовь Твою неизмеримую от всея души благодарный вопию Ти: Аллилуиа.


Икос 5
 
Видев Пилат величие Твое в уничижении Твоем и невинность Твою в противу Тя обвинениях, Боже Спасителю мой, восхоте отпустити Тя, ко жестоковыйному народу глаголя: «Кого хощете от обою отпущу вам: Варавву ли или Иисуса, глаголемаго Христа?» Аз же, повинный весь, припадая Ти, Судии моему и Творцу моему, взываю Ти тако:

Господи мой, Господи, от народа неблагодарнаго, Тобою облагодетельствованнаго, слышавший глас неблагодарный, на вопрошение Пилатово ответствовавший: «Не сего, но Варавву». Колико много и аз неблагодарный забывах благодеяния Твоя, на мне недостойном, яко дождь благодатный изобильно излиянный, и сего ради тако много унывах. О, научи мя, Учителю Благий, присно памятовати прежния милости Твоя, да памятованием сим ободренный, николиже унываю в злостраданиях моих.

Иисусе мой, Сладчайший Иисусе! К распятию крестному криком беззаконных: «Распни, распни Его!» влекомый, распни волю мою мятежную, злую, яко несть мне мира от нея, несть покоя, несть отрады, но да будет во мне присно воля Твоя благая, совершенная, мир, покой и радость всей жизни моей дающая.

Христе мой, Пресладкий Христе! Носяй терновый венец и багряну ризу, Пилатом народу тако изведенный, даруй мне с радостию, и веселием, и благодарением носити поно¬шение Твое, уничижение за Тебе.

Сыне Божий Единородный, Пилатом нареченный «Се Человек», оком благосердным воззри на мя, се аз яко человек согреших, Ты же, яко Бог щедр, помилуй мя, видя немощь души моея.

Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающего.


Кондак 6
 
Проповедуют мне громогласно славу Твою небеса Твоя звездоокая, Создателю мой, творения же руку Твоею возвещает твердь. О любви Твоей безсмертной язвы Твоя пречистыя всегда со Креста вещают. Славлю славу Твою, величаю дивная творения Твоя, воспеваю любовь Твою, за мене распятую, поя Ти: Аллилуиа


Икос 6
 
Возсияй, Свет сый Христе, от присносущнаго Света Твоего душе моей, страстьми оскверненней, горестию омраченней, да во свете Твоем узрю свет избавления, спасения и возстания моего, и возмогу пети и молитися сице:

Господи мой, Господи, на суде ответа судии неправедному не давый, яко агнец кроткий молчавый, се молчу, благоговею, ныне безмолвствую пред непостижимыми судьбами Твоими, скорбями, яко путем верным ко спасению мя ведущими.

Иисусе мой Сладчайший, Иисусе, Пилату рекий: «Не имаши власти ни единыя на Мне, аще не бы ти дано свыше», научи мя в каждом шаге, в каждом слове жизни моея познавати вышнюю волю Твою, да под крепкую руку Твою всегда аз смиряюся.

Христе мой, Пресладкий Христе, егда бе пяток Пасце, час же яко шестый, от Пилата народу иудейскому провозглашенный: «Се Царь ваш», молю Тя, Царю Небесный, царствуй в уме моем дольнем, да мудрствует всегда горняя; царствуй в сердце моем хладном, да Тобою, Огнем поядающим, в любви Божественной воспламеняется; царствуй в воле моей непостоянной и слабой, да будет крепкой и постоянной в хождении пред Тобою.

Сыне Божий Единородный, народом Своим пред Пилатом с криком безумным: «Не имамы царя, токмо кесаря» отверженный, се аз, аще и изменяю Ти на всякий час, но Царем моим признаю Тя, Господом и Богом моим исповедую Тя, темже и дерзаю просити Тя в скорби моей, в туге моей тяжцей: «Не отвержи мене, не остави до зела, яко отец мой и мати моя остависта мя. Ты же восприими мя».

Господи Иисусе Христе, Сыне Божий, в несении креста спасительнаго, десницею Твоею мне низпосланнаго, укрепи мя, в конец изнемогающаго.[/spoiler]

[Раб божий Константин]

Акафист преподобному Илариону Псковоезерскому Гдовскому.
[spoiler]Тропарь, глас 4
В молитвах бодрствуя, / пресветлый храм Духа Святаго был еси /, тем же и чудотворец предивный явился еси /, преподобне отче наш Иларионе /, о нас моли Христа Бога / светом Божественнаго познания просветити ны / и спаси души наши.

Величание
Ублажаем тя /, преподобне отче наш Иларионе /, и чтим святую память твою /, наставниче монахов / и собеседниче ангелов.

Кондак 1
Возбранному подвижнику от Господа Сил вечною славою достойно увенчаннаго, яко препобедившему в житии своем суетную мира сего прелесть и стяжавшему преизобильную Духа Святаго благодать, похвальное пение приносим ти, чтуще твою память, блаженне Иларионе, ты же яко имеяй дерзновение ко Господу, от всяких бед свобождай нас, зовущих ти:
Радуйся, преподобне Иларионе, отче наш милостивый.

Икос 1
Ангелом, непрестанно на Небеси славящим Творца и Владыку всех Бога, уподобился еси на земли, блаженне Иларионе, тину бо страстей плотских отряс и в ризу чистоты светлейшую облеклся, был еси воистину во плоти ангел. Тем же и ныне, в небесных чертозех со ангелы и всеми святыми ликовствуя, радуешися нетленною радостию и веселишися светло. Мы же, яко дивнаго угодника Божия тя почитающе, зовем ти:
Радуйся, ангелов невещественнаго пребывания ревнителю,
Радуйся, благий и верный Царя Славы Господа служителю,
Радуйся, ангелов достойный собеседниче,
Радуйся, славы святых сонаследниче,
Радуйся, праведных сподвижниче,
Радуйся, мучеников сопричастниче,
Радуйся, яко Царю Небесному предстоя, о всех нас тепле к Нему ходатайствуеши,
Радуйся, яко благоутробие Его о всех чтущих память твою умилостивляеши,
Радуйся, преподобне Иларионе, отче наш милостивый.

Кондак 2
Видя преходящаго и тленнаго мира сего суету, причастником быти нестареющия и вечныя жизни вожделел еси, сего ради дом твой и отечество оставил, во обитель дивнаго Евфросина притекл еси, поя присносущному Богу: Аллилуиа.

Икос 2
Разум горний разумети ища, плотский разум отвергл еси: постом и молитвою страсти плотския умертвив, дух твой к приятию божественныя истины уготовал еси, тем же божественнаго разума огнем душу просветив, во всем подражатель Христу был еси. В том же убо разуме настави и нас, зовущих ти:
Радуйся, мир и все его прелести оставивый,
Радуйся, горнее отечество обретый,
Радуйся, к Богу разум твой превозносивый,
Радуйся, горнее любомудрие возлюбивый,
Радуйся, телесныя любви удаливыйся,
Радуйся, Богу Всещедрому присвоивыйся,
Радуйся, яко во благочестии жити нас возбуждаеши,
Радуйся, яко на путь спасения нас наставляеши,
Радуйся, преподобне Иларионе, отче наш милостивый.

Кондак 3
Силою свыше укрепляем, демонские козни сокрушил еси, блаженне, крестом бо вооружився, его же образ в сердце твоем всадил еси, мрачныя силы вражия силою того дерзостно сокрушил еси, поя укрепляющему тя Богу: Аллилуия.

Икос 3
Имея ревность многу о Господе во еже Ему Единому послужити, всякаго мирскаго пристрастия чужд был еси, отвергся бо себе и взем крест твой последовал еси Христу; душу же твою Христа ради и Евангелия отщетив, тем убо спасал еси ю. Сего ради ублажающе тя вопием:
Радуйся, Господеви поработати пламенне вожделевый,
Радуйся, Христа паче всех возлюбивый,
Радуйся, от юности Христу последовавый,
Радуйся, благое иго Христово на рамена твоя вземый,
Радуйся, крепость невидимых врагов сокрушивый,
Радуйся, крепости божественныя исполненна себе явивый,
Радуйся, яко от козней вражиих нас защищаеши,
Радуйся, яко Христу последовати нас научаеши,
Радуйся, преподобне Иларионе, отче наш милостивый.

Кондак 4
Бурею помышлений сумнительных ни единою смущаем был еси, преподобне, егда вся красная мира сего оставив, тесным и многотрудным путем к Царствию Небесному шествовати обет дал еси, но верою мужественно сея бури ярость укрощал еси, паки и паки вопия Богу: Аллилуия.

Икос 4
Слыша глас Господа глаголюща: «Бодрствуйте и молитеся, да не внидите в напасть: дух бо бодр, плоть же немощна есть», во бдениях и молитвах непрестанно пребывал еси, всяку напасть теми отгоняя и немощь естества человеческаго побеждая.
Тем же молимся ти: твоими молитвами от всяких напастей избави и нас зовущих ти:
Радуйся, восстания телесная поправый,
Радуйся, на высоту добродетелей возшедый,
Радуйся, воздержанием житие твое украсивый,
Радуйся, блаженную жизнь обретый,
Радуйся, плотския желания постом увядивый,
Радуйся, божественному безстрастию поревновавый,
Радуйся, яко подвигом добрым подвизался еси,
Радуйся, яко веру непоколебимую соблюл еси,
Радуйся, преподобне Иларионе, отче наш милостивый.

Кондак 5
Светозарною звездою предносящимся мысленному твоему взору, образом Царствия Божия водим, обитель преподобнаго Евфросина оставил еси и в пустынней дебри при реце Желче вселился еси, пустынное безмолвие огласив пением: Аллилуия.

Икос 5
Видя мысленныма очима Начальника веры и Совершителя Иисуса, Иже вместо предлежащия Ему радости претерпе Крест, всего себе принесл еси Богу жертву живую, чистую и угодную. Мы же, помышляюще подвиги твоя и труды, имиже Господеви хотя угодити, трудился еси, прославляем тя тако:
Радуйся, Царствие Божие внутрь себе восхитивый,
Радуйся, в бреннем телеси райскую сладость предвкусивый,
Радуйся, плоти мудрование умертвивый,
Радуйся, духом премудро поживый,
Радуйся, воине Христов добропобедный,
Радуйся, Небеснаго Владыки рабе благий и верный,
Радуйся, яко в радость Господа Твоего вшел еси,
Радуйся, яко венец нетленный от Него приял еси,
Радуйся, преподобне Иларионе, отче наш милостивый.

Кондак 6
Проповедник богоносный евангельския истины показался еси, преподобне Иларионе, не точию бо словом, паче же самым делом дивнаго жития твоего проповедал еси людем, како подобает Господеви служити: в воздержании, в чистоте, в молитвах сердечных и пети Ему: Аллилуиа.

Икос 6
Возсиял еси премудростию, яко многосветлое светило, от истиннаго солнца правды Христа озаряем. Темже мрак неразумия и нерадения, находящий на ны, отжени от нас, зовущих ти:
Радуйся, светом Божественным просвещенный,
Радуйся, добротою вседельнаго и Святаго Духа украшенный,
Радуйся, заповедей Господних верный исполнителю,
Радуйся, чистоты душевныя и телесныя строгий блюстителю,
Радуйся, право веры и благочестия,
Радуйся, яко труждающимся еси предивное поможение,
Радуйся, яко скорбящим еси претихое утешение,
Радуйся, Озерския веси священное украшение,
Радуйся, преподобне Иларионе, отче наш милостивый.

Кондак 7
Хотя плотких уз свободитися и духом пожити, подвигом добрым подвизался еси, богоносне: в терпении, в трудех, в пощении, в бдении непрестанно пребывая. Сего ради, видя добрая твоя дела, прославляем Отца, Иже есть на Небесех, поюще Ему: Аллилуия.

Икос 7
Новаго подвижника благочестия видевши тя мнози христолюбцы, яко же и ты, горняго града взыскующе, к тебе прихождаху, да под твоим водительством поживут благоугодно. Сего ради обитель и храм Покрова Пресвятыя Богородицы создал еси и был еси наставник иноком премудрый и игумен добрый. Темже к высоте небесней возведи и нас, поющих ти:
Радуйся, образ терпения еже по Бозе и молитвы непрестанныя показующий,
Радуйся, на Небеси, а не на земли сокровище наше искати нас научающий,
Радуйся, крине райскаго прозябения, в пустыне преславно процветший,
Радуйся, цвете божественнаго саждения, весь Озерскую собою украсивший,
Радуйся, сосуде божественный воздержания,
Радуйся, богатство некрадомое благочестия,
Радуйся, яко притекающим к тебе спасения еси ходатай,
Радуйся, яко прибегающим к тебе увеселение еси и отрада,
Радуйся, преподобне Иларионе, отче наш милостивый.

Кондак 8
Дивное житие пожил еси, преподобне, от юности твоея шествуя трудолюбно по стопам заповедей Господних, и тако старости честныя и седины маститыя достигл еси, всяческими добродетельми украшен, Богу на всяк день воспевая: Аллилуиа.

Икос 8
Весь Богу освятился еси и еже со Христом быти паче всех вожделел еси. Темже и при скончании жития твоего страха смертнаго чужд был еси, егда же разлучашася душа твоя блаженная от телесе, тогда светел лицем был еси и тако радуяся, преставился еси ко Господу, да всегда пребудеши с Ним. Сего ради ублажаем тя званиими сими:
Радуйся, нощь жития сего всемудро прошедый,
Радуйся, невечерний день Царствия Небеснаго постигнувый,
Радуйся, светом вечныя жизни достойно оболкийся,
Радуйся, во блаженных обителех божественныя трапезы сподобивыйся,
Радуйся, Духа Святаго святилище благолепнейшее,
Радуйся, благодати божественныя сосуде чистейший,
Радуйся, яко Господним видением ныне наслаждаешися,
Радуйся, яко Того светлостию невозбранно насыщаешися,
Радуйся, преподобне Иларионе, отче наш милостивый.

Кондак 9
Всякое естество ангельское радовашеся о тебе, зря, яко невещественное житие на земли показал еси и во плоти яко безплотен явился еси, сего ради небесным силам сопричастен, престолу Господа Царя Славы ныне предстоиши, со ангельскими лики воспевая Ему: Аллилуиа.

Икос 9
Витии многовещанныя не возмогут изрещи, яже уготова Бог любящим Его, их же око не виде и ухо не слыша и яже на сердце человеку не взыдоша. Ты же, блаженне отче, ныне наслаждаяся сих изобильно, не забуди твоею любовию и нас, зовущих ти:
Радуйся, нетленных благ небесный наследниче,
Радуйся, вечныя жизни причастниче,
Радуйся, неизреченную Божию Славу всегда созерцающий,
Радуйся, во свете невещественнем непрестанно пребывающий,
Радуйся, райскаго наслаждения умнаго сподобивыйся,
Радуйся, нетленныя и божественныя славы удостоивыйся,
Радуйся, благодатию Божиею, недужным исцеление подаеши,
Радуйся, яко силою Вышняго всем нуждающимся вспомоществуеши,
Радуйся, преподобне Иларионе, отче наш милостивый.

Кондак 10
Спасати хотя от отчаяния и пагубы верою к тебе притекающия и помощи твоея просящия, приклонял еси им милосердие Всеблагаго Владыки, сего ради издревле отцы наша научашася, яко заступника в бедах и напастех и чудотворца предивнаго тя почитати, Богу же чрез тебе чудодеющему воспевати: Аллилуиа.

Икос 10
Стена еси и ограждение всем, к заступлению твоему прибегающим. Тем же буди стена крепкая и ограждение непреоборимое и нам милостиваго твоего заступления просящим и почитающим тя звании сими:
Радуйся, немощей наших безмездный целителю,
Радуйся, в скорби и печали сущим скорый утешителю,
Радуйся, преславный в бедах заступниче,
Радуйся, превеликий в напастех защитниче,
Радуйся, предстателю о нас пред Богом непостыдный,
Радуйся, чудесы от Господа прославленный,
Радуйся, яко по успении твоем нас, сущих на земли, не оставляеши,
Радуйся, путеводителю, яко всех к Небеси направляеши,
Радуйся, преподобне Иларионе, отче наш милостивый.

Кондак 11
Пение дивное слышаша иногда людие и свещи горящия видеша в храме, идеже честныя мощи твоя почивают, в обители, юже создал еси, запустевшей, идеже служба божественная в храме преста. Сими же знаменьми возбуждаеши, да христоименитии людие потщатся храм святый возсоздати и службы Божия в нем уставити, да верных соборища дивному во святых Богу со умилением вопиют: Аллилуиа.

Икос 11
Светоносная память твоя, божественне Иларионе, возсия нам пресветлыя лучи исправлений твоих, страстей убо наших отгоняюще облак и к свету благочестия наставляюще нас. Юже совершающе верою тя и любовию блажим, взывающе:
Радуйся, светильниче, огнем божественным возженный,
Радуйся, благодатию Божиею просвещенный,
Радуйся, заре, верным путь жизни освещающая,
Радуйся, звездо, в нощи греховней заблудшим сияющая,
Радуйся, благодатных исцелений неоскудевающий источниче,
Радуйся, люте страждущим милостивый помощниче,
Радуйся, яко во светлостех святых пребываеши,
Радуйся, яко со избранными Божиими купно торжествуеши,
Радуйся, преподобне Иларионе, отче наш милостивый.

Кондак 12
Благодать Пресвятаго Духа испроси нам, преподобне Иларионе, от Всещедраго Бога и Спаса нашего вразумляющую и укрепляющую нас во спасение, да уклоншеся от путей нечестия и заблуждений, ходим во свете заповедей Божиих и тако вечнаго блаженства в Царствии Небесном достигнем, воспевающе Богу: Аллилуиа.

Икос 12
Поюще славное житие твоего, подвиги же дивные и чудотворения от тебе являемые, ублажаем тя, отче Иларионе, яко угодника Божия преподобнаго и чудотворца предивнаго. Ты же, Богу предстоя, присно поминай нас, любовию совершающих память священную твою и всечестную и во смирении зовущих ти таковая:
Радуйся, по достоянию от Господа возвеличенный,
Радуйся, за смиренномудрие от Него превознесенный,
Радуйся, благочестия столпе непоколебимый,
Радуйся, в бедах и напастех сущим поборниче крепкий,
Радуйся, чтущих тя наставниче благодатный,
Радуйся, притекающих к тебе покровителю благонадежный,
Радуйся, яко блаженную жизнь наследовал еси,
Радуйся, яко дар чудотворений от Господа приял еси,
Радуйся, преподобне Иларионе, отче наш милостивый.

Кондак 13
О, преславный угодниче Христов, преподобне отче наш Иларионе, песенное наше приими приношение и молитвами твоими испроси нам у Господа прощение и оставление грехов и прегрешений наших и велию Его милость, да всяких зол избегше в сей жизни, и гибели горькия избавимся в будущем веке, Царствие же Небесное улучим, со дерзновением воспевающе: Аллилуиа.
Трижды.

Икос 1
Ангелом, непрестанно на Небеси славящим Творца и Владыку всех Бога, уподобился еси на земли, блаженне Иларионе, тину бо страстей плотских отряс и в ризу чистоты светлейшую облеклся, был еси воистину во плоти ангел. Тем же и ныне, в небесных чертозех со ангелы и всеми святыми ликовствуя, радуешися нетленною радостию и веселишися светло. Мы же, яко дивнаго угодника Божия тя почитающе, зовем ти:
Радуйся, ангелов невещественнаго пребывания ревнителю,
Радуйся, благий и верный Царя Славы Господа служителю,
Радуйся, ангелов достойный собеседниче,
Радуйся, славы святых сонаследниче,
Радуйся, праведных сподвижниче,
Радуйся, мучеников сопричастниче,
Радуйся, яко Царю Небесному предстоя, о всех нас тепле к Нему ходатайствуеши,
Радуйся, яко благоутробие Его о всех чтущих память твою умилостивляеши,
Радуйся, преподобне Иларионе, отче наш милостивый.

Кондак 1
Возбранному подвижнику от Господа Сил вечною славою достойно увенчаннаго, яко препобедившему в житии своем суетную мира сего прелесть и стяжавшему преизобильную Духа Святаго благодать, похвальное пение приносим ти, чтуще твою память, блаженне Иларионе, ты же яко имеяй дерзновение ко Господу, от всяких бед свобождай нас, зовущих ти:
Радуйся, преподобне Иларионе, отче наш милостивый.

Молитва
О, священная главо, преподобне отче, преблаженне авво Иларионе! Не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к небесному Царю: не премолчи за ны ко Господу и не презри нас, верою и любовию чтущих тя. Поминай нас, недостойных у престола Вседержителева, и не престань молитися о нас ко Христу Богу: ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у престола Вседержителева престоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов, воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу: Емуже подобает всякая слава, честь и поклонение, со безначальным Его Отцем, и с Пресвятым и Благим и Животворящим Его Духом, ныне и присно и во веки веков. Аминь.

По благословению Высокопреосвященейшаго Евсевия Архиепископа Псковского и Великолукского.[/spoiler]

[Раб божий Константин]

Блаженный Иларион, затворник Троекуровский.
[spoiler]Акафист преподобному Илариону, затворнику Троекуровскому

Кондак 1

Избранный угодниче Христов Иларионе, / достославне затворниче, старче и чудотворче, / величающе прославльшаго тя Господа, / умиленное сие пение тебе приносим, / свобождения от бед и напастей о тебе испрошающи, / верою и любовию восхваляем тя, зовуще: Радуйся, преподобне Иларионе, Троекуровский чудотворче.

Икос 1

Ангелом уподобился еси, преподобне, плотию еще на земли пожив; духом бо выну горе воспаряя, безстрастия безплотных достигл и дарами Святаго Духа преисполнился еси. Житию же твоему богоугодному подражати хотяще, во умилении вопием ти: Радуйся, в житии точию Бога взыскавый; Радуйся, невозвратно Христу последовавый. Радуйся, Святаго Духа сосуде избранный; Радуйся, Святыя Троицы слуго неукорный. Радуйся, святильниче веры и благочестия; Радуйся, образе кротости и воздержания. Радуйся, безстрастия высото; Радуйся, смиренномудрия глубино. Радуйся, ангеле земный и человече небесный; Радуйся, к Богородице наш теплый ходатаю. Радуйся, Царя Славы рабе благий и верный; Радуйся, вшедший в радость Господа твоего. Радуйся, преподобне Иларионе, Троекуровский чудотворче.

Кондак 2

Видящи в тебе будущаго славы Божия ревнителя, еще отроком изведе тя Господь из дому отчаго к престарелому сроднику твоему, у негоже в послушании духом возрастая, велие усердие к посту, молитве и храму Божию показа, чистыми детскими усты славя Богу: Аллилуия.

Икос 2

Разумом в горнем пребывая, святый отче, повинующися родителема в супружество вступи, обаче в нем, Алексию Человеку Божию подражая, девство безпорочное и чистоту душевную явил еси, имаже удивляющеся воспеваем ти похвальная: Радуйся, Бога единаго возлюбивый; Радуйся, все упование Нань возложивый. Радуйся, от утра жизни Ему поработавший; Радуйся, измлада себе для страстей распявший. Радуйся, чистоты усердный хранителю; Радуйся, девственниче душею и телом. Радуйся, вся красная мира презревый; Радуйся, похоть плоти и очес умертвивый. Радуйся, яко и жену к девственной жизни склонял еси; Радуйся, яко в том не успев, дом твой оставил еси. Радуйся, житию в чистоте поспешниче; Радуйся, в плотских бранех споборниче. Радуйся, преподобне Иларионе, Троекуровский чудотворче.

Кондак 3

Силою свыше оболкийся, крепость яви противу искушений от мира, плоти и диавола, сильне на тя воюющих, поколебати же не могущих. Всего же себе в руце Божии вверяя, во граде Киеве от угодников Печерских в монастырь ити благословение приял еси, желая тамо до конца сея временныя жизни пети Богу: Аллилуия.

Икос 3

Имущи богатство терпения, горнило искушений прошел еси, преподобне: убо чрез жену твою и братию монашескую, твоему высокому жительству завидящих и ложно тя оклеветавших, попусти Всеблагий Господь изгнание тебе из обители, егоже с незлобою претерпев, слышиши похвалы сия: Радуйся, терпением Ангелов удививый; Радуйся, блаженство кротцых стяжавый. Радуйся, яко лжу и изгнания подъял еси; Радуйся, яко мзда твоя многа на Небесех. Радуйся, клевету и глумления простивый; Радуйся, молящийся за гонителей твоих. Радуйся, в изгнании не имый, где главы подклонити; Радуйся, в скитаниих укрепляемый Духом Святым. Радуйся, непрестанней молитве время посвятивый; Радуйся, в хладных пещерах райскую сладость вкусивый. Радуйся, многими скорбьми в Царствие Божие шедший; Радуйся, в терпении научаяй стяжати души наша. Радуйся, преподобне Иларионе, Троекуровский чудотворче.

Кондак 4

Бурю новых гонений воздвиже на тя злобный ратник, древний завистник, и паки со всяким смирением ты убо, Иларионе блаженне, с места на место преселялся еси, удаляющися от гонителей и паки водворяяся в пустыни, Богу же непрестанную хвалу воздая, поющи: Аллилуия.

Икос 4

Слышаще святое житие твое, достославне Иларионе, и видяще, яко о мнозих дивных подвизех поревновал еси, искушения за сие претерпевая жестокая, удивляхуся людие тебе, славяще Бога, дивнаго во святых Своих. Такожде и мы любовию восхваляем тя, отче, и вопием ти сице: Радуйся, в искушениих непоколебиме столпе; Радуйся, в бедствиих великодушия хранителю. Радуйся, тверду веру в Промысл Божий питающий; Радуйся, благодеющу руку Божию во всем зрящий. Радуйся, в посте и бдении подвижниче неослабный; Радуйся, в трудех и подвизех течение совершивый. Радуйся, пустынножительство возлюбивый; Радуйся, во плоти аки безплотен явльшийся. Радуйся, воине Христов непобедимый; Радуйся, сокрушителю козней демонских. Радуйся, паче снега скорьбми убеливыйся; Радуйся, яснее злата искушена сияющий. Радуйся, преподобне Иларионе, Троекуровский чудотворче.

Кондак 5

Божественная дарования многоразлична улучив, смирение глубокое наипаче возлюби, блаженне отче; памятуя же немощь человеческаго естества и Петрово отречение поминая, алектора в пещере твоей держа, по крику его на нощную молитву вставаше, радостне взывати Богу: Аллилуия.

Икос 5

Видев преподобный житие сие яко сень мимоходящее и якоже соние востающаго исчезающее, точию о жизни будущаго века прилежа. Темже с радостию и благодарением неисчетныя скорби и болезни понесе, мысленне страсти Христовы созерцая. Мы же, безстрастию его дивящеся, хвалебное пение приносим: Радуйся, Христа распятого выну пред собою предзревый; Радуйся, сораспявыйся Ему со страстьми и похотьми. Радуйся, яко взем крест, Христа последовал еси; Радуйся, яко на высоту добродетелей возшел еси. Радуйся, о всем Творца благодаривый; Радуйся, многими венцы преукрашенный. Радуйся, болезней ярем с радостию понесший; Радуйся, духовную силу в немощех явивый. Радуйся, смирением душу одеявый; Радуйся, препоясавшийся долготерпением. Радуйся, орле, в молитве небопарний; Радуйся, голубе, мир душевный стяжавый. Радуйся, преподобне Иларионе, Троекуровский чудотворче.

Кондак 6

Проповедник воистину благочестия явился еси, угодниче Христов, яко на всяк день Божественную Литургию посеща, духовныя силы частым приобщением Святых Христовых Таин укрепляя, по причащении же светился еси, славяще распеншагося за ны Христа: Аллилуия.

Икос 6

Возсия в тебе дивный чудотворец, егда затворнице Мелании Елецкой, тя видети хотящей, яве на Пасху явился еси, в тоежде время у супруг боголюбивых быти не престая, яковому чуду о тебе бывшему дивящеся, тии вси воспеша тебе таковая: Радуйся, доме, на камени основанный; Радуйся, храмино, украшенная добродетельми. Радуйся, столпе благочестия непоколебимый; Радуйся, источниче чудес неистощаемый. Радуйся, церковного богослужения любителю; Радуйся, благолепия храмов рачителю. Радуйся, яко видения Богоматери сподобился еси; Радуйся, яко елеем от Ея иконы изцелял еси. Радуйся, на сусе месте студенец изведый; Радуйся, целительну в том воду явивый. Радуйся, заповедей Господних блюстителю верный; Радуйся, достойный сосуде Божия благодати. Радуйся, преподобне Иларионе, Троекуровский чудотворче.

Кондак 7

Хотяй безмолвие молитвенное улучити, не имяше покоя и на малое время от множества людей, к тебе приходящих, преподобне, яко и на древе для умного делания принужден бе скрыватися, идеже дние и нощи в молитве и посте пребываше, аки райская птица поя Богу: Аллилуия.

Икос 7

Новаго видевше тя избранника Божия, благодатныя дары изобильно стяжавшаго во еже души и телеса изцеляти, дуси нечистии изгоняти и коемуждо благая ко спасению подавати, издалече притекаху к тебе людие и взываху ти благодарне таковая: Радуйся, врачу скоромилостивый; Радуйся, сострадателю в скорбех. Радуйся, изцеление в болезнех; Радуйся, утешение в печалех. Радуйся, советниче прозорливый; Радуйся, ходатаю наш ко спасению. Радуйся, воли Божия возвещение; Радуйся, помощи Божия источниче. Радуйся, желаемых благих насадителю: Радуйся, злобных духов прогонителю. Радуйся, яко ослабевшия духом укрепляеши; Радуйся, яко веру оскудевающую восполняеши. Радуйся, преподобне Иларионе, Троекуровский чудотворче.

Кондак 8

Странник и пришлец быв на земли, преподобне, тесным и тернистым путем в Небесное Отечество шествова и другим сей путь освеща отеческим наставлением и руководством спасительным, всем к тебе прибегающим, научая их Бога славити всем сердцем: Аллилуия.

Икос 8

Весь в горнем умом пребыва, преподобне, и нас, суетою омраченных, не оставляше любовию своею. Извещение же от Господа получивше, вселился еси в Троекурово, идеже до конца своих дней бе служа Богу и ближним. Сего ради приими от нас благохваления сия: Радуйся, затворниче, благодатию осиянный; Радуйся, мудре старче, верныя окормляяй. Радуйся, немощей милосердый целителю; Радуйся, сущим в бедах помощниче. Радуйся, вдовиц и сирых питателю; Радуйся, скудным земледельцем вспоможение. Радуйся, яко дожди молитвою низводил еси; Радуйся, яко богатии урожаи тем даровал еси. Радуйся, скорбных ободрение, странных питателю; Радуйся, в темницах сущих посетителю. Радуйся, гражданине Горняго Иерусалима; Радуйся, благословенный Отца Небеснаго. Радуйся, преподобне Иларионе, Троекуровский чудотворче.

Кондак 9

Всех вопрошающих тя любовию назидал еси, добрый путь ко спасению указющи, темже и преподобного Амвросия, еще безвестна мирянина суща, в Оптину пустынь направил еси, пророчески великаго в нем старца провидя, благословяща Бога: Аллилуия.

Икос 9

Ветии красноречивыя видим посрамленныя о благодати словес твоих, богомудре Иларионе, яко коемуждо из притекающих за советом к тебе полезная ко спасению подавал еси, волю Божию о человеке возвещая. Разсуждение же твое богомудрое похваляя, тако вопием ти: Радуйся, право стоящим утверждение; Радуйся, заблуждшим кроткое исправление. Радуйся, словесы благодати верных питаяй; Радуйся, дальняя яко ближняя созерцаяй. Радуйся, грядущая яко настоящая провидевый; Радуйся, тайных дел обличителю прозорливый. Радуйся, страждущим утешение; Радуйся, в испытаниих вспоможение. Радуйся, яко затворника от искушения охранил еси; Радуйся, яко паучину, сети вражия разорил еси. Радуйся, луче вечнаго Солнца правды; Радуйся, свеще, святою любовию горящая. Радуйся, преподобне Иларионе, Троекуровский чудотворче.

Кондак 10

Спасительное в тебе прибежище обретоша собравшиися окрест тебе сестры боголюбивыя, в монашестве подвизатися хотящия, имже ты, преподобне Иларионе, предрекл еси на месте сем святей обители быти, выну боголюбицам отеческую любовь и заботу являше, подвизая всех пети Богу: Аллилуия.

Икос 10

Стена ограждения явился еси агницам избраннаго стада Христова не точию при жизни, но и по блаженней кончине твоей, яко и воздвигнутое на них от властей гонение небесным твоим предстательством угасил еси, и община вскоре утвердися. Выну помощь и заступление твое приемлющи, сице тя славяху духовная чада твоя: Радуйся, Агнца Божия дивный избранниче; Радуйся, Пастыреначальника верный помощниче. Радуйся, словесных овец окормление; Радуйся, мысленных волков отгнание. Радуйся, в страсе Божием жити научающий; Радуйся, малодушныя и немощныя укрепляющий. Радуйся, многопопечительность искореняяй; Радуйся, прилоги к тщеславию посецаяй. Радуйся, чистых душ Христу невестителю; Радуйся, добрый пестуне на пути ко спасению. Радуйся, сопричастниче мудрым девам; Радуйся, светильниче, елеем изобилуяй. Радуйся, преподобне Иларионе, Троекуровский чудотворче.

Кондак 11

Пение непрестанное Господу Иисусу вознося, достигл еси жития твоего скончания, преподобне; духом бодр бяше, плотию же паче и паче изнемога, яко не возмощи тебе в храм Божий ходити, ни приходящих к тебе приимати, чрез келейника сим отвещавая, да не без утешения отыдут. Знамение же видимое приближения кончины твоея от Бога улучив, воспе Ему: Аллилуия.

Икос 11

Светоподательный светильник быв в житии, и по преставлении твоем не оставляеши нас, преподобне: обитель устрояя, просящим помогая, неверующих в святость твою в сониих кротко вразумляя. Безбожну же лихолетию скончавшуся, и обитель твоя возродися, и яви нам Господь мощи твоя благоуханныя, к нимже вернии притекающе, с любовию взывают ти сице: Радуйся, светлыми ризами украшенный; Радуйся, в Царский чертог вошедший. Радуйся, славы присносущныя причастниче; Радуйся, света неизреченнаго зрителю. Радуйся, яко душею в Небесныя обители вселился еси; Радуйся, яко мощи многоцелебныя нам оставил еси. Радуйся, упование наше непостыдное; Радуйся, надежды нашея утверждение. Радуйся, яко мнозим и по смерти являлся еси; Радуйся, яко изображение твое пожар угасило есть. Радуйся, крине пустыннаго прозябения; Радуйся, класе стократ плод принесший. Радуйся, преподобне Иларионе, Троекуровский чудотворче.

Кондак 12

Благодатнаго тя пред Богом предстателя сведуще, прилежно молим ти ся, отче святый: не престай молящи Христа Бога, да свободит державу нашу от нашествия духовнаго иноплеменников, от тлетворных иноземных обычаев, от безбожия и нищеты, да спасение тем улучивше, поем тобою благодеющему нам Богу: Аллилуия.

Икос 12

Поющи с радостию и любовию твое прославление, преподобне Иларионе, восхваляем тя, яко многомощнаго молитвенника о нас пред Богом, скораго помощника всем с верою у тебе просящим, ограждение же необоримое от всяких бед и напастей, и верно взываем ти: Радуйся, Престола Всевышняго предстоятелю; Радуйся, о мире всего мира молитвенниче. Радуйся, врагов Отечества одоление; Радуйся, войску русскому вспоможение. Радуйся, тяжце недугующих изцелителю; Радуйся, одержимых бесы врачевателю. Радуйся, имже житейския нужды разрешаются; Радуйся, имже благодатная помощь подается. Радуйся, всяко благополезно прошение исполняющий; Радуйся, яко всем чтущим тя поспешествуеши. Радуйся, Царствия Божия достойный сонаследниче; Радуйся, яко подвизатися того ради и нас научаеши. Радуйся, преподобне Иларионе, Троекуровский чудотворче.

Кондак 13

О, пречудный угодниче Божий, преподобне отче Иларионе! Приими моление сие малое, от усердия тебе приносимое, и умоли Господа Славы, да не осудит нас Праведный Судия во огнь геенский, но Своего Царствия вечнаго да сподобит, в жизни грядущей пети Ему: Аллилуия, Аллилуия, Аллилуия.



(Этот кондак читается трижды, затем икос 1 и кондак 1)



Молитвы преподобному Илариону, затворнику Троекуровскому

Молитва первая

О священная главо, преблаженне отче Иларионе! Не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли, отче священный, за ны, дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя. Поминай нас недостойных у Престола Вседержителя, и не престай моляся о нас ко Христу Богу: яко дана тебе благодать молитися за ны. Не мним бо тя мертва суща: аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския, и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со Ангельскими воинствы, со безплотными лики, достойно веселится. Ведущи убо тя и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да явимся со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым, и Благим, и Животворящим Его Духом, ныне и присно, и во веки веков. Аминь.

Молитва вторая

О, предивный угодниче Божий, преподобне и Богоносне отче наш Иларионе, Троекуровский затворниче и чудотворче, земли Липецкия славо и похвало! Чрез все житие твое неуклонно Богу последовав, любве ради к Нему мнози подвизи, скорби и болезни понесл еси и еще на земли храм честен Святаго Духа чистотою души твоея соделался еси. Темже дар рассуждения и совета, дар прозорливости, дар изцеления и чудотворения еще в земной твоей жизни в изобилии от Господа приял еси. Ведуще велие твое пред Богом дерзновение, с верою и любовию к тебе притекаем и усердно молим тя: испроси у Господа Вседержителя миру умирение, жития христианскаго на Руси утверждение, от глада и пагубы избавление, душам же нашим спасение. Умоли Всещедраго Владыку, да угасит пламень страстей наших и низпослет росу благодати Своея на иссохшия сердца наша, да и мы молитвами твоими плод духовный принесем и сподобимся странствие земное непостыдно скончати и в Отечестве Небеснем часть со святыми улучити, да славим и поем Всесвятое имя Отца, и Сына, и Святаго Духа, во веки веков. Аминь.



Тропарь, глас 5:

Нищету Христову возлюбивши, / дом и сродники твоя оставил еси, преподобне отче наш Иларионе, / тем же приял еси мзду трудов твоих на небесех, / идеже ликуя со ангелы, / моли спастися душам нашим.



Кондак, глас 8:

Днесь светло ликует обитель Троекуровская, яко множество скорбящих обретает утешение, на твоя молитвы надеющееся, преподобне Иларионе всеблаженне, ты бо еси земли Липецкой похвало и утверждение.



Величание

Ублажаем тя, преподобне отче наш Иларионе, и чтим святую память твою, наставниче монахов и собеседниче Ангелов.[/spoiler]

[Раб божий Константин]

Акафист Святому пророку Божию Илии.
[spoiler]При бездождии или засухе, а также для охранения от голода и преследований

Тропарь, глас 4-й
Во плоти Ангел, пророков основание, вторый
Предтеча пришествия Христова, Илия славный, свыше пославый Елисееви благодать недуги
отгоняти и
прокаженныя очищати, темже и почитающим его
точит исцеления.

Кондак 1
Избранный Богом на обращение Израиля от прелести Вааловы, грозный обличителю царей
законопреступных, просиявый пламенною ревностию по
Бозе Вседержителе, святостию жизни и чудесы, восхищенный с плотию твоею на Небеса: и
предъити
имеяй Второму пришествию Христову, похвальная
восписуем ти, пророче Божий Илие; ты же яко имеяй велие дерзновение ко Господу, от всяких
нас зол
и обстояний молитвами твоими свобождай, благочестно тебе вопиющих:

Радуйся, Илие, великий пророче, Втораго пришествия Христова славный предтече.

Икос 1
Ангел ревностию по Бозе и чистым житием твоим,
сый во плоти, пророче, был еси: еще бо младенцу ти
бывшу, отец твой Совах виде светлыя Ангелы, беседующия с тобою, огнем тя повивающия и
пламенем питающия, еже прознаменоваше пламенную ревность твою
по Бозе, силу словес твоих и житие, яко свет, непорочное. Сего ради со удивлением зовем ти
таковая:

Радуйся, от вечности предызбранный в служение спасению сынов Израилевых; радуйся, от чрева
матерня предуготованный в провозвестника Божественныя истины и благочестия. Радуйся,
преславным, бывшим на тебе, видением родителя твоего удививый; радуйся, девственную чистоту
и безмолвие
от юности возлюбивый. Радуйся, суету мира сего и
вся блага его презревый, душу же твою всецело Господу посвятивый; радуйся, светом
премудрости от
Бога озаренный и учением благочестия издетства напоенный. Радуйся, Илие, великий пророче,
Втораго
пришествия Христова славный предтече.

Кондак 2
Видя нечестие и развращение во Израили, преславный пророче, зело духом твоим скорбел еси и
ревностию по славе Божией воспламенялся еси; яко
сынове Израилевы мерзким идолом поклонишася,
от Бога же Истиннаго отступиша, Емуже вся Небесная воинства со страхом вопиют: Аллилуиа.

Икос 2
Разум свой злою волею омрачив, беззаконный
царь Израильский Ахаав, остави Истиннаго Бога Вседержителя и покланяшеся мерзкому идолу
Ваалу,
купно же и в царстве своем умножи идолопоклонение и нечестие. Ты же, пророче, исполнен сый
велия
ревности по Бозе, дерзновенно обличил еси царя, возвестив ему, яко в наказание ему и
царства его три
лета и месяц шесть не будет дождь, ни роса, и глад
велий будет по всей земли. Дивящеся убо толицей
ревности твоей по Бозе и велию дерзновению, с любовию зовем ти:

Радуйся, небоязненный проповедниче истины и
крепкий поборниче благочестия; радуйся, ревностный нечестия обличителю. Радуйся, к
наказанию
некающихся грешников долготерпеливаго Бога преклонивый; радуйся, словом твоим небо
заключивый
и плодоносную землю неплодну сотворивый. Радуйся, трилетный глад за нечестие людий от
Господа
испросивый; радуйся, яко Всевышний Господь дарова тебе в Бога Ахааву, якоже древле Моисеа
Фараону. Радуйся, Илие, великий пророче, Втораго пришествия Христова славный предтече.

Кондак 3
Силою молитвы твоея, предивный пророче, воистину заключися небо и не одожди три лета и
месяц
шесть, и бысть глад велий по всей земли: да поне
зноем и гладом томими, нечестивии людие покаются и обратятся ко Господу, со умилением
зовуще
Ему: Аллилуиа.

Икос 3
Имея велие благоволение к тебе, пророче, Господь восхоте отлучити тя от беззаконных сынов
Израиля, да не с ними терпиши глад и жажду, и
повеле тебе ити к потоку Хорафову, идеже вранове
питаху тя, приносяще хлеб и мясо. Темже приносим тебе похвальная сия:

Радуйся, постом и бдением вся земная и суетная помышления истребивый; радуйся, молитвою и
Богомыслием ум твой в горняя вперивый. Радуйся,
патриархов величание и пророков красото; радуйся,
девственников похвало и преподобных славо. Радуйся, святителей наставниче и мучеников
крепосте;
радуйся, яко нечестием и неверием ослепленных
сынов Израилевых на путь истины обратил еси. Радуйся, Илие, великий пророче, Втораго
пришествия
Христова славный предтече.

Кондак 4
Буря велия, разрушающая горы, предыдяще, егда
приближашеся к тебе, пророче, в Хориве Господь,
таже явися трус, и не в трусе Господь, и по трусе
огнь, и не во огни Господь, а по огни бысть глас
хлада тонка, и ту явися тебе Господь: Егоже присутствие ощутив, покрыл еси лице твое
милотию, со
страхом и радостию зовый Ему: Аллилуиа.

Икос 4
Слышав нечестивый царь Ахаав повеление
твое, о еже собрати вся колена Израилева на гору
Кармнльскую, и привести на ту студныя пророки Вааловы, абие послав, собра вся, и сам
прииде тамо. Ты же, ревнителю славы Божия, хотя конечне посрамити мерзкия идолы и
прославити Истиннаго Бога, повелел еси уготовати две жертве, огня же на тыя не возгнещати,
рек: и будет Бог, иже послушает огнем, Той есть Бог. То слышавше вси людие, реша: добр
глагол
Илиин, да будет тако. Мы же, величающе тя. зовем:

Радуйся, великий посланииче Царя Небеснаго и
провозвестниче святых велений Его; радуйся, адаманте,
неодолимый в ревности и непоколебимый столпе благочестия. Радуйся, сильный защитниче
истины и твердый противоборниче врагов Божиих; радуйся, нечестия искоренителю и насадителю
благочестия. Радуйся, пламенный ревнителю Божественныя Славы;
радуйся, яко и в последния дни мира имашы проповедывати Истиннаго Бога и обличати
окаяннаго антихриста. Радуйся, Илие, великий нророче, Втораго
пришествия Христова славный предтече.

Кондак 5
Боготечную тя звезду погасити мняше беззаконная царица Иезавель: исполнившися бо на тя
ярости за погубление студных ея пророков, хотяше убити тя. Ожесточися бо сердце ея и не
хотяше веровати чудесем твоим, пророче, и познати Истиннаго Бога,
поющи Ему: Аллилуиа.

Икос 5
Бидевше вси людие Израилевы, по молитве твоей, огнь от Господа с Небесе сшедый на жертву
твою, всехвальне пророче, и всю ю пожегший, дрова же, и камень, и персть, и воду
потребивый,  падоша на лица своя, взывающе: воистину Господь Бог, Той есть бог. И вероваша
людие Богови, студныя же пророки ты заклал еси. Славяще убо Всесильнаго, чудодеющаго Бога,
тебе, угоднику Его, глаголем сице:

Радуйся, превелие дерзновение ко Владыце всяческих стяжавый; радуйся, знамении и чудесы
Божественную Истину утвердивый. Радуся, прелесть демонскую посрамивый, истинную же веру
прославивый. Радуйся, неверныя истинным боговедением просветивый. Радуйся, трикратным
лиянием на жертвенник воды тайну Пресвятыя Троицы явивый; радуйся, яко все естество сущих
тебе повиновася, огнь же и вода тебе служаху. Радуйся, Илие, великий нророче, Втораго
пришествия Христова славный предтече.

Кондак 6
Проповедник истиннаго боговедения и благочестия явился еси, пророче, не токмо во Израили,
но и в
стране язычестей, послан быв от Господа в Сарепту
Сидонскую к жене вдовице препитатися, паче же да
саму ту пропитаеши в гладе: имея бо велию чудотворения благодать, умножил еси муку и елей
в дому ея
неоскудно, дондеже прейде гладное время, и трикратным дуновением, по молитве твоей,
воскресил еси умершаго сына ея, поя чудодеющему Богу: Аллилуиа.

Икос 6
Возсияв велиею ревностию по Бозе Вседержителе, зело скорбел еси, пророче, яко оставиша
завет
Его сынове Израилевы, олтари Его раскопаша и пророки избиша. Господь же во утешение твое
возвести
тебе, яко не весь Израиль отступи от Него, но имать
седмь тысящ сокровенных рабов Своих, иже не преклониша колена своя Ваалу. Темже,
воспоминающе ревность твою по Бозе, поем ти с благоговением
сицевая:

Радуйся, верный служителю и ближний друже Господень; радуйся, образе и похвале
благочестивых пастырей. Радуйся, наставниче спасения
и просвещение во тме седящих; радуйся, защитником истины мужество внушаяй, в подвизех же
и страданиих за правду их укрепляяй. Радуйся,
яко серафимскою пламенною любовию к Богу горел еси; радуйся, яко и Господь во всем
послушаше тебе и по прошению твоему вся творяше. Радуйся, Илие, великий пророче, Втораго
пришествия
Христова славный предтече.

Кондак 7
Хотя Человеколюбец Господь явити милосердие
Свое кающимся грешником, по прошествии прореченнаго гладнаго времене, низпосла по молитве
твоей,
пророче, и глаголом уст твоих, на жаждущую землю
обильный и мирный дождь: сынове же Израилевы,
сподобльшиися толикия милости, во умилении сердца благодарственно возопиша Богу: Аллилуиа.

Икос 7
Новое нечестивый царь Ахаав к беззаконием своим приложи злодеяние, егда повеле убити
неповиннаго Навуфея и восхити виноград его. Сего ради,
обличая законопреступнаго царя, прорекл еси ему,
пророче, яко идеже умерщвлен бысть Навуфей, тамо
и его кровь свинии и пси полижут, и жену его Иезавель снедят пси, и весь дом его
истребится. Ведуще
убо мы сбывшееся страшное сие проречение, ужасаемся, зовуще:

Радуйся, обидящих и жестокосердных грозный
отмстителю; радуйся, сирых и напаствуемых крепкий заступниче. Радуйся, непочитающих святых
праздников Православныя Церкве карателю; радуйся, продерзивых хульников Имене Божия
низложителю. Радуйся, словом обличения, яко громом, беззаконныя поражаяй, радуйся, будущая,
яко настоящая, ведый и дальняя, яко близ сущая, прорицаяй.
Радуйся, Илие, великий пророче, Втораго пришествия Христова славный предтече.

Кондак 8
Странное и преестественное показа Господь о тебе,
пророче, промышление, егда повеле алчным и нечадолюбивым враном питати тя в гладе при
потоце
Хорафове, идеже непрестанно пребывая в молитве и
богомыслии, воспевал еси Богу: Аллилуиа.

Икос 8
Весь был еси смирением велиим украшен, пророче Божий, сего ради с гордостию пришедших к
тебе двух пятьдесятоначальников с воины, да приведут тебе к беззаконному царю Охозии,
огнем попалил еси, со смирением же пришедшаго к тебе
Авдиа, иже питаше ученики пророческия, помиловал
еси. Сего ради приносим ти похвальныя песни сия:

Радуйся, гордых смирителю и карателю, смиренных же покрове и заступниче; радуйся,
мздоимных судей наказателю, право же судящим помощниче. Радуйся, правоверному воинству во
бранех споборниче, нечестивых же супостат низложителю;
радуйся, премудростию, яко бронею, облеченный и
правдою, яко щитом, огражденный. Радуйся, ревностию по Бозе, яко мечем, вооруженный и
постом,
яко крилами, окриленный; радуйся, верою, яко шлемом спасения, покровенный и любовию, яко
венцем
пресветлым, венчанный. Радуйся, Илие, великий
пророче, Втораго пришествия Христова славный
предтече.

Кондак 9
Всякое человеческое естество зело удивляется,
како ты, пречудный пророче, шел еси четыредесять
дний, ни ядый, ни пияй, до горы Хорива, идеже сподобился еси преславнаго явления и
пресладкия беседы Господа Вседержителя, поя Ему: Аллилуиа.

Икос 9
Вития многовещанныя недоумеют довольно разумети и изъяснити, како ты, великоимените Илие,
во плоти сый человечестей и подобострастен нам быв,
восхищен еси с телом твоим на небо, явльшейся тебе
колесницей огненней с кони огненными. Славяще
убо прославльшаго тя Господа и дивящеся восхищению твоему, благоговейно зовем ти:

Радуйся, пречудным воздержанием ветхаго человека в себе умертвивый; радуйся, огнем
Божественныя ревности всякое вещественное помышление в
себе попаливый. Радуйся, преложением твоим на
Небо род человеческий возвеселивый и Жизнь Вечную уверивши; радуйся, честию и славою
преестественною от Бога почтенный и паче всех древних
пророков прославленный. Радуйся, от Ангельских
ликов в селениих Небесных радостно сретенный;
радуйся, яко имя твое во всем мире почитается, и
ревность твоя по Бозе зело прославляется. Радуйся,
Илие, великий пророче, Втораго пришествия Христова славный предтече.

Кондак 10
Спасти хотя Всеблагий Бог люди Израилевы от
прелести Вааловы, избра тя, великий пророче, во орудие воли Своея и облече тя Божественною
властию
и силою, да обратиши неверныя, исправиши беззаконныя, просветиши омраченныя и научиши всех
вопити Богу: Аллилуиа.

Икос 10
Стена и заступление буди нам, пресвяте пророче, мощным твоим ходатайством утоляя праведный
гнев Божий, поражающий нас, грешных и непотребных, бездождием и гладом, еще же тлетворными
ветры и болезньми, да избавльшеся от бед, благодарственно поем ти:

Радуйся, молитвами твоими небо заключаяй и отверзаяй, плодоносие земли и неплодие от Бога
посылаяй; радуйся, предстательством твоим пред Богом
дожди мирны и росу животворную на земная прозябения низводяй. Радуйся, свирепыя волны
морския
и страшныя бури утишаяй и громами и молниями
по воле Божией управляяй; радуйся, тлетворныя ветры и смертоносныя язвы, поражающие
человеки же
и скоты, укрощаяй. Радуйся, сирых и вдовиц питателю и щедродательных людий покровителю;
радуйся,
яко нечестивых хульников и гонителей правыя веры
поражаеши и духов злобы от рабов Божиих прогоняеши. Радуйся, Илие, великий пророче,
Втораго пришествия Христова славный предтече.

Кондак 11
Пение умиленное приими от нас, пророче Божий Илие, якоже приял еси прошение Елисеево, егда
проси от тебе, да будет дух, иже в тебе, сугуб в нем,
и егда, восхищаяся на Небо, низпустил еси ему милоть твою, юже он взем, раздели, якоже и
ты прежде, Иорданския воды, и бысть наследник действовавшия в тебе Божия благодати: сице и
нас покрый
милотию твоея милости от всяких бед и обстояний,
да со благодарением зовем Богу: Аллилуиа.

Икос 11
Светозарное светило во Израили, всехвальне пророче, был еси, сияя равноангельным житием
твоим
и мудростию, еще же необычною ревностию по Бозе
и чудесы преславными, просвещая люди истинным
боговедением и разгоняя мрак идолосдужения, Темже восписуем ти похвальная, поюще:

  Радуйся, лучезарная звездо, сиянием своим озарившая всю вселенную; радуйся, светоносная
свеще, непрестанно горящая и во тме седящих просвещающая. Радуйся, духом премудрости и
разума озаренный, духом совета и крепости исполненный;
радуйся, духом ведения и благочестия просвещенный и духом страха Божия напоенный. Радуйся,
высокими добродетельми и преславными чудесы преукрашенный; радуйся, яко суды Божия на земли
исполнял еси, пророки же и цари помазывал еси.
Радуйся, Илие, великий пророче, Втораго пришествия Христова славный предтече.

Кондак 12
Благодать велия дана ти бысть от Бога, прехвальне пророче, яко в земней жизни твоей
пророчествовал и совершал еси дивная чудеса, таже преестественно восхищен был еси с плотию
твоею на небо: по восхищении же твоем дивно предстал еси на
Фаворе Преобразившемуся Господу и с Ним беседовал еси, и до днесь не престаеши
чудодействовати и
источати милости и исцеления усердно почитающим
тя, Богу же верно вопиющим: Аллилуиа.

Икос 12
Поюще твою пламенную ревность по Бозе и равноангельное житие, дивная же твоя и преславная
чудеса и превелие благоволение к тебе Господа, восхваляем тя, великоимените пророче Илие:
обаче не
могуще достойно изобразити величие и славу твою,
со умилением зовем ти сицевая:

Радуйся, ковчеже Божественныя Славы и всечестный храме Пресвятыя Троицы; радуйся,
светильниче невечерний Церкве и благовонный цвете рая
Божественнаго. Радуйся, благочестивых пустынников руководителю, девственников же
наставниче и
укрепление; радуйся, яко грешников к покаянию возбуждаеши и всему роду христианскому Жизнь
Вечную ходатайствуеши. Радуйся, яко во светлостех
святых неизреченныя славы наслаждаешися и
непрестанно Господа славословиши; радуйся, яко в
конце времен велия знамения и чудеса на утверждение имаши совершити людий во истинней вере
на обличение антихриста. Радуйся, Илие, великий
пророче, Втораго пришествия Христова славный
предтече.

Кондак 13
О предивный и преславный пророче Божий
Илие, превелий ревнителю по Бозе, дожди и бездождие, плодоносие на землю и неплодие от Бога
посылаяй! Услыши сие малое, благоговейно приносимое тебе нами моление и твоим теплым ко
Господу предстательством сохрани нас от бездождия,
глада и смертоносных болезней, подаждь же нам
благорастворение воздуха и плодоносие, и дух правыя веры и благочестия, да избавльшеся от
вечных
мук, сподобимся райскаго блаженства, поюще Богу: Аллилуиа.

Этот кондак читается трижды,
затем икос 1 и кондак 1.


При бездождии или засухе обращаемся мы к святому пророку Божию Илии, одному из величайших
пророков и первому девственнику Ветхого Завета. Он родился
в Фесвии Галаадской в колене Левиином за 900 лет до
Рождества Христова и был призван на пророческое служение в царствование царя Ахава —
идолопоклонника,
который поклонялся Ваалу (солнцу) и заставлял народ
еврейский делать то же. Господь послал Илию к Ахаву и повелел предсказать ему, что если он
и его народ не обратятся к Истинному Богу, то его царство постигнет голод. Через скорби и
чудеса, сотворенные пророком Илией, своей молитвой небо разрешившего и обильный дождь
на землю испросившего, израильтяне вновь обратились
к Истинному Богу.

За свою пламенную ревность о Славе Божией пророк Илия был взят на небо живым в огненной
колеснице.
Свидетелем этого чудного восхождения был пророк Елисей. Затем, в Преображении Господнем,
пророк Илия
явился вместе с пророком Моисеем и предстал пред
Иисусом Христом, беседуя с ним на горе Фавор. По преданию Святой Церкви, пророк Илия будет
Предтечею
Страшного Второго Пришествия Христа на землю; во время проповеди он примет телесную смерть.

Память святого пророка Божия Илии празднуется
20 июля/2 августа.[/spoiler]

[Раб божий Константин]

Илия Муромец, Киево - Печерский чудотворец.
[spoiler]Акафист Святому преподобному Илии Муромцу, Киево - Печерскому чудотворцу.

Кондак 1

Воеводе сил земли Русския, воину Царя Христа и заступнику Руси Святой, славному во бранех и неодолимому в ратех, дивному богатырю Илии Муромцу песнь хвалебную воспоем, да заступит и ныне нас, зовущих: Радуйся, преподобне отче Илие, земли Русския славный заступниче.

Икос 1

Ангелов Творец, егда во рабии зраце на землю снисшел, до тридесятьлетняго возраста не являл еси себя миру, тако и тя, святе Илие, сподоби до тогожде возрасту никому неведомым быти и недвижимым телесне, да послежде послужиши Господу и людем Его со всем усердием и ревностию, еже мы восхваляем: Радуйся, промышлением Божиим тридесять лет премудро хранимый; Радуйся, от рождения избранный, да являтся на тебе дела Господня. Радуйся, чрез недуг свой соблазнов юности многих избегнувый; Радуйся, душу чисту чрез страдания соблюдый. Радуйся, сими на приятие благодати ю уготовавый; Радуйся, болезни, яко дар Божий, с покорностью терпевый, Радуйся, преподобне отче Илие, земли Русския славный заступниче.

Кондак 2

Виде внезапу святый Илие явльшихся ему триех мужей-странников, просящих у него воды испити, отвещая им: Яко напоил бы вас, да не имам хождения нагама моима, и накормил бы такоже, да рукама моима не имам владения, тем же старцы трищи повелеша ему на нозе стати и послужити има, скочив же тогда Илие на нозе свои, возопил Богу: Аллилуиа.

Икос 2

Разумев Илие, яко исцеле внезапу от недуга своего, первее крест по-писанному на себе положи, потом же странников напои, они же такожде даша ему чашу пития медвяна, рекоша испити до дна ю, той же повинуся има, сотвори сие, мы же, грешнии, дивящеся зовем: Радуйся, яко во образе триех странников Господь прииде посетити тя; Радуйся, яко Троица Святая явися ти. Радуйся, исцелевый по словеси Господню; Радуйся, от одра воздвигнутый волею Божиею. Радуйся, Чашу от руки Спасителевы испивый; Радуйся, наполенный благодатию Христовою. Радуйся, преподобне отче Илие, земли Русския славный заступниче.

Кондак 3

Силу великую почуяв в себе, Илие, испив чашу чудодейственную, яко мощи ти горы преставляти и древа дубравная из земли исторгати, рече о сем странником, вопрошающим о явлении силы твоея, и в радости воспел Спасителю: Аллилуиа.

Икос 3

Имееши ныне силушку богатырскую, та и живи. Илие, да будеши воином, и в боях смерть ти не буде писана, - рекоша странницы и , благословивше тя, исчезоша абие, якоже и явишася, мы же, познавше на тебе руку Господню, поем: Радуйся, хождение приемый ногама, да идеши на стези правыя; Радуйся, владение приемый рукама, да твориши дела богоугодныя. Радуйся, здравие приемый, да потрудишися Богу в поте лица твоего; Радуйся, исцеление приемый, да поработаеши, Исцелившему тя. Радуйся,благословение приемый, да соблюдеши душу свою во благочестии; Радуйся, силу велию приемый, да прославиши ею имя Всесильнаго. Радуйся, преподобне отче Илие, земли Русския славный заступниче.

Кондак 4

Бурею недоумения объяшася родителя твоя и ужасом велиим дивишася зело, видяща тя пришедша, и ногама, и рукама исцелевша, возопиша радующеся: Слава, слава Господу, Всевышнему хвала: Аллилуиа.

Икос 4

Слышав благословение Господне, не можаше долее дома оставатися, яко приспе час подвиг твоих, испроси у отца - матери дозволение отъити в землю дальнюю, отец же рече ти: Я на добрыя дела тебе благословение дам, на худыя же дела благословенния несть ти, ты же поклонься земно, исшед в путь, еже мы воспеваем: Радуйся, словеса Христовы жизнию исполнивый; Радуйся, Бога и ближних паче отца и матери возлюбивый. Радуйся, любовь Божию любви родительстей предпочетший; Радуйся, дом отчий оставивый, да всему Отечествию службу сослужиши. Радуйся, богатырь святорусский, возращенный духом Христовым; Радуйся, церкви и Руси охранителем от Него поставленный. Радуйся, преподобне отче Илие, земли Русския славный заступниче.

Кондак 5

Боготечно бысть странствие твое ко граду Киеву. Яко первее тамо хотел еси в церквах Божиих Господу помолитися и Богоматери Печерстей в Лавре Успестей поклонитися, за исцеление благодарне хвалу воспети ему песнию: Аллилуиа.

Икос 5

Видя скорби велия, постигшия землю Киевскую от нахождения поганых, начало положи подвигом своим, град Чернигов и стезю ко граду Киеву свобождая и врагов веры христианския истребляя, да людие, тобою свобожденнии, вопиют: Радуйся, щит спасения, еже есть глагол Божий, восприявый; Радуйся, копием веры нечестивых прободивый. Радуйся, палицею благочестия неверных одолевый; Радуйся, шеломом целомудрия ся от стрел вражиих сохранивый. Радуйся, доспехами добродетелей ся преодевый; Радуйся, во всеоружии духовнем врагом ратоборствовавый. Радуйся, преподобне отче Илие, земли Русския славный заступниче.

Кондак 6

Проповедник могущества Бога Христианскаго явился еси, Илие, рати иноплеменныя вся возмогий побеждати о укрепляющем тя Иисусе, христиане же, своьождении тобою, не преставаху звати: Аллилуиа.

Икос 6

Возсия тогда звезда светозарная во граде Киеве - ясный молодец богатырь Илия Муромец, на устрашение нечестивых, жестокосердых на попрание, земли Русской на прославление Богом данный, идеже сродницы твои доселе тя величают: Радуйся, войска русскаго предводителю; Радуйся, сиротам и вдовицам охранителю. Радуйся, князю стольному верное вспоможение; Радуйся, градовом и весем надежное средостение. Радуйся, силы вражия благодатное одоление: Радуйся, народа православнаго возвышение. Радуйся, преподобне отче Илие, земли Русския славный заступниче.

Кондак 7

Хотяще от всея души и сердца Богу поработати и Руси Святой, помысл тщеславный отверг, егда тя нецыи тщахуся воеводой града Чернигова поставити, со смирением на службу ко князю киевскому поступил еси, да не такмо единому некому граду, но всему народу службу сослужиши, яко невозбранно пети Богу ему: Аллилуиа.

Икос 7

Новым Сампсоном на земли объявивыйся, новому Израилю - Отечествию Русскому Православному послуживый верою и правдою, Илие приснопамятне, соратуй и ныне сродницем твоим, зовущим: Радуйся, яко Давид во имя Господа Саваофа сражавыйся; Радуйся, яко Галиафа той, тако и ты великана иноземнаго поразивый. Радуйся, яко Сампсон, силою превеликою от Бога наделенный; Радуйся, ревностию о Бозе пророку Илии тезоименный. Радуйся, яко Даниил зияния львов - неверных чужеземцев заградивый; Радуйся, Ангел - хранитель пределам княжества русскаго бывый. Радуйся, преподобне отче Илие, земли Русския славный заступниче.

Кондак 8

Странствуя по стороне киевстей и оберегая ю от лихих разбойник, богатства и чести не искал еси себе, но аз иду служити за веру христианскую, и за землю Русскую, да и за стольный Киев - град, - отвещал еси человеком, славы от них не ищуше, Богу же славу поя: Аллилуиа.

Икос 8

Весь закон Евангельский тщався на себе исполнити, душу свою ежечасно за ближняя своя полагавый, помышляя, яко Господь мне помощник и аз воззрю на враги моя, рубежи Отечествия оборонял еси, русские же людие не преставаху звати ти тако: Радуйся, зов Господень всем сердцем своим услышавый; Радуйся, за ближния своя живота не щадивый. Радуйся, верою правою неверныя побеждавый; Радуйся, русским духом иноплеменники изгонявый. Радуйся, на поле брани Господа на вспоможение призывавый; Радуйся, купно с Небесными силами тьму вражию посекавый. Радуйся, преподобне отче Илие, земли Русския славный заступниче.

Кондак 9

Всякое естество человеков и Ангелов дивишася зело, егда ты сына единароднаго, Отечеству Русскому изменившаго, пощады не дая, копием заклал еси, да не чинит зла людем православным, мы же трепещуще силы веры твоея и упования твоего на Бога, поем: Аллилуиа.

Икос 9

Ветии множеством словес подвиги твоя восхвалиша, но кто возможет все промышление Божие над тобою изрещи, яко во имени твоем вся мощь и сила духа русскаго богатырскаго воплотившися, вся препоны вражия сокруши, за тое потомки твои доселе тя величают: Радуйся, храбрый воине Церкви воинствующия; Радуйся, достославный победителю в Церкви торжествующия. Радуйся, безбоязненный одолетелю всех враг видимых и невидимых; Радуйся, любимиче, Господом и людьми Его возлюбленный. Радуйся, праведный человече, не скрывый таланта Господина своего; Радуйся, преподобный отче, преумноживый славу Бога нашего. Радуйся, преподобне отче Илие, земли Русския славный заступниче.

Кондак 10

Спасти хотя сторону родимую не токмо от враг иноземных, но и от неведимых, еще же и душу свою, злато и сребро от князей дарованное, неимущим расточив и на созидание храмов употребив, во обитель иноческую удалился еси, тамо из глубины сердечныя Богу поя: Аллилуиа..

Икос 10

Стены обители сятыя укрыша тя, преподобне отче Илие, идеже в затворе печерстем слезьми непрестанными и моленьми всенощными, за грехи своя и кровь людскую, вольне и невольне пролитую, умилостивлял еси Бога, Той же , видя смирение и сокрушение твое, вскоре благодать пребольшую ти подаде, яко дивитися братии всей, зовущей: Радуйся, от воина телеснаго в воина духовнаго преобразивыйся; Радуйся, меч и копие вещественныя отложив, духовным мечем вооруживыйся. Радуйся, оружие тленное оставивый, молитвою непрестанною врага посекавый; Радуйся, и во брани духовней победитель явивыйся. Радуйся, дара прозорливости прежде конца сподобивыйся; Радуйся, благодать чудотворений такожде восприявый. Радуйся, преподобне отче Илие, земли Русския славный заступниче.

Кондак 11

Пение приими скудных словес и помолися за убогия сродницы твоя, и ходатай нам буди у Бога, и вызволитель на земли, якоже и прежде, и не престай, молим тя, молити Бога за Русь Святую песнию: Аллилуиа.

Икос 11

Светильник от елеа благодати возженный, отче Илие, освети ныне нас, во тьме и мраке прозябающих, и воеводой войску русскому буди, от полона нечестия Отечествие свобождая и воинов в ратех укрепляя, и разум им и благочестие от Бога испроси, да зовем ти: Радуйся, безмятежне упокоивыйся со всеми от века праведными; Радуйся, мирне отошедший к Владыце живота и смерти. Радуйся, возъимевый у Него дерзновение многое; Радуйся, за соплеменников своих непрестанне ходатайствующий. Радуйся, стерегий доселе землю Русскую от нахождения лютых; Радуйся, преподобне отче Илие, земли Русския славный заступниче.

Кондак 12

Благодатию взращая державу Русскую, Господь при начале сего посла тя, Илие, своего ратоборца, народ нов - Божие стяжание - людие русския от клеврет сатанинских ненаветны соблюсти, яко навыкнути православным, на Бога уповая, пети: Аллилуиа.

Икос 12

Поюще деяния жития твоего, воздаем хваление Вседержителю Богу, премудре мир устрояющему, яко Той Сам Триедин, тако и Русь Триедину сотвори, народ же православный, сие разумевая, триех богатырей образ во охранители себе избра, яко тии Триединстство Божие прообразуют, воеводу же их, Илию Муромца, славяще вернии, вопиют: Радуйся, Троицы служителю в житии и по преставлении твоем явивыйся; Радуйся, яко трие персты руки твоея, для знамения крестнаго сложенныя тако доселе пребывают. Радуйся, яко сим дивом невиданным мнози сумнящиися веру правую обретают; Радуйся, и по представлении своем чудеса творити не престающий. Радуйся, и по кончине, в смертем телеси, Господа прославляющий; Радуйся, в нетлении мощей доселе почивающий. Радуйся, преподобне отче Илие, земли Русския славный заступниче.

Кондак 13

О святый отче Илие, воине и монаше, богатырю духовный и телесный, ратниче на враги видимыя и невидимыя, защити ныне Отечествие наше - Русь Святую, еже есть подножие Престолу Господня, и Церковь Русскую Православную заступи, да поют людие память твою, и Господу, даровавшему Руси заступника сицеваго, славословие приносят песнию: Аллилуиа, Аллилуиа, Аллилуиа.

(Этот кондак читается трижды, затем икос 1 и кондак 1)



Молитва святому преподобному Илии Муромцу

О святый преподобный отче Илие! Руси Святой заступниче, могучий ратоборче, воине духовный и телесный ей явивыйся, в житии своем благу народа Русскаго и прославлению Бога Христианскаго верно послуживый, и по преставлении своем престательства своего о нас не оставивый, испроси, святе, у Всемилостиваго Господа Отечеству нашему царя, мир и благоденствие, церкви благоустроение, людем православным от нечестивых избавление, воином русским в ратех победу и на врагов, замышляющих злая Церкви и Отечеству православному, одоление, всех же нас заступи, и еще просим тя, святче Божий, разум нам от Бога ниспосли, да познаем согрешения наша, и силу духовную, да покаемся во грехах наших, и крепость телесную, да возмощи нам житие исправити и Русь Святую возродити, и в Царствие Небесное из нея прейти, да тамо с тобою и всеми святыми сподобитися непрестанне восхваляти в Троице славимаго Бога Отца и Сына и Святаго Духа во веки веков. Аминь.

Тропарь, глас 3

Ликовствует днесь земля Русская, воина и чудотворца своего Илию Муромца прославляюще, яко той в Церкви торжествующей пребывая, соратует сродницем своим и Церкви воинствующей, на враги видимыя и невидимыя Руси Святой испрошая у Господа вспоможение, да невозбранно славят и чтут людие русские Христа Бога.

Тропарь, глас 8

Постом душу Твою просветил еси, молитвами непрестанными сердце Твое сосуд Духа Святаго соделал еси, преподобне отче наш Илие. Темже вся вражия ополчения крепко посрамил еси, и яко победоносец истинный воздаяния получил еси от Христа Бога. Тому помолися о душах наших.



Преподобный Отче Илия, моли Бога о нас![/spoiler]

[Раб божий Константин]

преподобному Илии Муромцу иной.
[spoiler]Кондак 1
     Избранный воеводо ратоборцев за веру Христову и преславный угодниче Божий, крепкий победителю врагов державы Российския и чудотворче предивный, преподобне отче Илие, прославляюще Господа Славы, давшаго тя всем православным заступника и молитвенника, похвальная восписуем ти пение. Ты же, предстоя Престолу Святыя Троицы, от всяких зол и напастей сохраняй с верою и любовию зовущих ти:
     Радуйся, преподобне отче Илие, святый воине и великий заступниче Российския земли.


Икос 1
     Ангелов и человеков Творец призва тя, угодниче Божий Илие, да будеши всем людем Российским образ мужества и верности во бранех лютых со враги Отечества нашего. Мы же, прославляюще чудный подвиг земных трудов твоих, благоговейно зовем ти:
     Радуйся, от рождения твоего Богом избранный.
     Pадуйся, в безвестности начало жизни своея сохранивый.
     Радуйся, при крещении имя великаго пророка Божия Илии получивый.
     Радуйся, благодатию Христовою от недуга тяжкаго исцеленный.
     Радуйся, на воинское служение Господем призванный.
     Радуйся, избрание твое подвиги многими оправдавый.
     Радуйся, пророку Илии в ревности по Бозе и спасении людей подражавый.
     Радуйся, любовь нелицемерную от народа своего снискавый.
     Радуйся, обеты иночества житие свое увенчавый.
     Радуйся, в сонме преподобных отцев Киево-Печерских прославленный.
     Радуйся, душу свою за друга полагавый.
     Радуйся, к воинству Небесному сопричтенный.
     Радуйся, преподобне отче Илие, святый воине и великий заступниче Российския земли.


Кондак 2
     Видевше родители тебе, преподобне, тридесять лет в разслаблении суща, недоумеваху, обаче с верою и надеждою моляху Единаго и Истиннаго Бога, подающаго страждущим исцеление, и вкупе с тобою воспеваху ему: Аллилуиа.


Икос 2
     Разум небесный свыше даровася тебе, егда глас посланников Божиих услышал еси и по слову их, востав со одра твоего, аки николиже болевый, в радости неизглаголанней благодарил еси безмезднаго Врача твоего, Христа. Мы же, дивящеся таковому о тебе Божию промышлению, со умилением вопием ти:
     Радуйся, благочестивых родителей твоих чадо возлюбленное.
     Радуйся, надеждо и утешение сердец их боголюбивых.
     Радуйся, радости родителей твоих исполнение.
     Радуйся, благоверия предков твоих наследниче.
     Радуйся, от рождения благодатию Божиею покровенный.
     Радуйся, от юности Господа возлюбивый.
     Радуйся, града Мурома духовное украшение.
     Радуйся, Российския страны благодатное озарение.
     Радуйся, крепости Божией тезоимените.
     Радуйся, яко по имени твоему и житие твое блаженно бысть.
     Радуйся, яко о тебе радуются ангели на небеси.
     Радуйся, яко о тебе Бога славят человецы на земли.
     Радуйся, преподобне отче Илие, святый воине и великий заступниче Российския земли.


Кондак 3
     Силою свыше укрепився, услышал еси, блаженне, глас мужей, Богом посланных: «Будеши ты, Илие, богатырь великий, и смерть тебе во бранех не писана есть». Ты же, восприяв силу богатырскую, направил еси стопы своя на работу крестьянскую, яко Бог укрепляше тя, поспешествуя в трудех твоих. Темже молися Богу, подающему нам времена плодоносна, и укрепи всех труждающихся на земли и поющих Ему: Аллилуиа.


Икос 3
     Имея помышление в сердце своем, послужити Христу, даровавшему тебе исцеление и силу великую, изшел еси из дому родителей твоих и меч в руце восприим, направился еси на брань противу сил вражиих за веру православную и за землю Русскую. Темже и мы, ублажающе благое твое изволение, с любовию восхваляем тя сице:
     Радуйся, яко смотрением Божиим тридесять лет в болезни неисцельней пребывал еси.
     Радуйся, удостоивыйся от Господа благодатнаго посещения.
     Радуйся, чудесное исцеление милостию Божиею получивый.
     Радуйся, исцелением от болезни родителей твоих возвеселивый.
     Радуйся, от странников Божиих весть о служении твоем приемый.
     Радуйся, пророческое их проречение исполнивый.
     Радуйся, здравие приемый, да послужиши Исцелившему тя.
     Радуйся, утвердивый мышцы своя на труды и работу крестьянскую.
     Радуйся, на службу Господу яко воин призванный.
     Радуйся, дом родительский служения ради Богу и Отчизне своей оставивый.
     Радуйся, совершенную покорность воле Божией показавый.
     Радуйся, дивный образ богатыря святорусскаго в себе явивый.
     Радуйся, преподобне отче Илие, святый воине и великий заступниче Российския земли.


Кондак 4
     Бурю злых напастей побеждая, прошел еси весь путь, тебе преднареченный, нося тяготы воинскаго служения, и тако благодатию Божиею хранитель Отечества своего и непобедимый воевода нашему воинству явился еси, ратоборствовал бо еси, не земному князю угождая, но желанием и ревностию по Богу полки иноплеменных побеждая. Темже благодарственно воспевал еси песнь хвалебную Господу: Аллилуиа.


Икос 4
     Видевше разбойницы, с мечем ожидавшии тя на пути к матере градов русских, Киеву, небоязненное твое мужество и крепость воинскую, убояшася, ты же презрел еси их дерзости и победил еси зломысливших на тя. Темже молим ти ся: разбойники пощадивый и к покаянию тех обративый, направи и наша души к покаянию и спаси молитвами твоими поющих тако:
     Радуйся, на подвиги воинския и духовныя от родителей твоих благословенный.
     Радуйся, благословение сие яко святыню до смерти соблюдый.
     Радуйся, разбойников прещение ни во что же вменивый.
     Радуйся, милосердием врагов, тобою побежденных, удививый.
     Радуйся, вшедый в стольний град Киев яко богатырь святорусский.
     Радуйся, от князей земли Русския достойно почтенный.
     Радуйся, Российския державы защитниче.
     Радуйся, правителем ея благоверным помощниче крепкий.
     Радуйся, на подвиг брани воинския и духовныя вдохновителю.
     Радуйся, обидящих и жестокосердых грозный вразумителю.
     Радуйся, Небеснаго ради Отечества земному отечеству послуживый.
     Радуйся, Богом возлюбленный и российскими людьми воспеваемый.
     Радуйся, преподобне отче Илие, святый воине и великий заступниче Российския земли.


Кондак 5
     Боготечною звездою востекл еси, славный Илие, ко святому граду Киеву, ревностию воспламеняемь о защите земли Русския, сопротивных побеждая и вражеския полки прогоняя. И ныне наставляеши на путь служения отчизне, к вечному Небесному Отечеству ведущий всех верных, поющих Богу: Аллилуиа.


Икос 5
     Видевше тя, блаженне Илие, николиже во бранех побеждаема, невернии единаго имене твоего устрашахуся. Ты же, яко доблий воине Христов, на страже пребывал еси непоколебим и мечем посекал еси нечестивых в битвах. Сего ради, поминающе исполненное веры мужество твое, прославляем тя сице:
     Радуйся, воине Христов, еще в земнем житии от Него славою венчанный.
     Радуйся, и во славе своей дух смиренномудрия соблюдый.
     Радуйся, мечем богатырским вооруженный.
     Радуйся, множество врагов в битвах победивый.
     Радуйся, силою Креста во бранех укрепленный.
     Радуйся, рукою Всевышняго во всех битвах дивно охраняемый.
     Радуйся, врагов России грозное устрашение.
     Радуйся, воинства христианскаго прославление.
     Радуйся, злобу и коварство врагов отчизны твоея посрамивый.
     Радуйся, Российския земли защитниче верный.
     Радуйся, любящия Отечество воины на победу умудряяй.
     Радуйся, яко заступлением твоим и ныне держава Российская ограждается.
     Радуйся, преподобне отче Илие, святый воине и великий заступниче Российския земли.


Кондак 6
     Проповедует вся великая Россия о тебе, Илие славне, ты бо яко крепкий щит ограждаеши Отечество наше непобедимым оружием, Божественною благодатию дарованным ти свыше. Не лиши и нас, грешных, твоея помощи, тебе бо сами себе и друг друга вверяем и во умилении сердец воспеваем прославльшему тя Христу Богу: Аллилуиа.


Икос 6
     Возсия слава подвигов твоих не токмо в преславнем граде Киеве, но и по всем градом и весем страны нашея. Темже людие Российстии доныне славу и благодарение Богу приносят и тебе, заступника своего, похвалами воспевают тако:
     Радуйся, воинства Российскаго крепосте несокрушимая.
     Радуйся, победителю враг видимых и невидимых.
     Радуйся, благочестивых воинов в битвах укрепляяй.
     Радуйся, покровом молитв твоих в день брани тех осеняяй.
     Радуйся, от нашествия иноплеменных наше ограждение.
     Радуйся, от междоусобныя брани охранение.
     Радуйся, яко великому мужеству твоему всяк возраст покланяется.
     Радуйся, яко и в землях Запада прославлено бысть имя твое.
     Радуйся, людей Российских любовию Христовою возлюбивый.
     Радуйся, веру свою и любовь к Богу делы явивый.
     Радуйся, образ верности в служении Богу и Отечеству показавый.
     Радуйся, святою ревностию о спасении державы Русския пламеневый.
     Радуйся, преподобне отче Илие, святый воине и великий заступниче Российския земли.


Кондак 7
     Хотя Человеколюбец Господь явити в житии твоем, богомудре Илие, образ не токмо воином христолюбивым, но и ликом иноческим, внуши тебе оставите славу земную и восприяти пострижение во обители Киево-Печерстей, в нейже подвизался еси добре постом, бдением и молитвою, воспевая непрестанно Богу ангельскую песнь: Аллилуиа.


Икос 7
     Новую благодать во иночестем образе прием, преподобне Илие, новым подвигом украсил еси житие твое, подражая во всех добродетелех преподобным отцем Антонию и Феодосию и прочим чудотворцем Печерским. Темже славим тя по достоянию и глаголем:
     Радуйся, во ограду обители Киево-Печерския пришедый.
     Радуйся, постом, бдением и молитвами Христу Богу добре угодивый.
     Радуйся, в ангельский образ достойно облеченный.
     Радуйся, паки и во иноцех Илия нареченный.
     Радуйся, доспехи воинския на власяницу иноческую пременивый.
     Радуйся, плоть свою духу покоривый.
     Радуйся, яко в житии твоем Антонию дивному подражал еси.
     Радуйся, яко в подвизех твоих Феодосию чудному ревновал еси.
     Радуйся, подвигов иноческих ревнителю.
     Радуйся, чистоты и воздержания хранителю.
     Радуйся, в ризу смирения одеянный.
     Радуйся, иноческия обеты до смерти соблюдый.
     Радуйся, преподобне отче Илие, святый воине и великий заступниче Российския земли.


Кондак 8
     Странника и пришельца в мире сем помышлял еси себе быти, преподобне отче Илие, темже о благих земных всякое попечение отложил еси и грядущаго града Иерусалима Небеснаго взыскуя, приносил еси Господеви житие преподобное, яко быти тебе во плоти ангелу и небесному человеку и невозбранно пети ангельскую песнь Богу: Аллилуиа.


Икос 8
     Весь облеклся еси во вся оружия Божия, яко воин Христов, препоясав чресла твоя истиною, оболкся бронею правды, восприял еси щит веры и шлем спасения и меч духовный, имиже и возмогл еси вся наветы лукаваго победити. Помози убо твоими молитвами всем нам противитися искушением вражиим и подражати тебе в подвизех, воспевающе ти хвалы сия:
     Радуйся, во обители Киево-Печерстей пристанище спасения стяжавый.
     Радуйся, под кровом Киевских чудотворцев подвиг иноческий совершивый.
     Радуйся, преподобных Печерских духовный учениче.
     Радуйся, добродетелей их преемниче.
     Радуйся, иноков Киево-Печерския Лавры украшение.
     Радуйся, подвизающихся в ней благонадежное заступление.
     Радуйся, приходящих в ню на поклонение благий предстателю.
     Радуйся, обители твоея неотступный хранителю.
     Радуйся, града Киева светлое радование.
     Радуйся, Российских иноков славо.
     Радуйся, горняго мира жителю.
     Радуйся, дольняго мира мудрый странниче.
     Радуйся, преподобне отче Илие, святый воине и великий заступниче Российския земли.


Кондак 9
     Все естество ангельское удивися преславней кончине твоей, отче преподобне, еюже житие твое достойно венчал еси. Такожде и Церковь Русская Православная, купно со всеми чудотворцы Печерскими в молитвенники тя приемши, благодарне о тебе вопиет Богу: Аллилуиа.


Икос 9
     Ветии многовещаннии недоумеют достойно восхвалити и прославити подвиги твоя, преподобне Илие, яже творил еси на земли, но и по преставлении твоем в вечное царство славы не оставляеши нас, грешных, и в пещерах Киевских нетленными твоими мощами пребываеши, в шуйце имый оружия язву, десницу же троеперстно сложенную. Темже, яко живу сущу с нами, от всего сердца глас хвалы приносим ти:
     Радуйся, праведно и богоугодно течение земное совершивый.
     Радуйся, дух твой с веселием в руце Господни предавый.
     Радуйся, пред кончиною своею персты десницы троеперстно во имя Святыя Троицы сложивый.
     Радуйся, к Трисолнечному Свету восшедый.
     Радуйся, телом смертным во обители Печерстей погребенный.
     Радуйся, душею же безсмертною к Сиону горнему воспаривый.
     Радуйся, от обители земныя во обителех Небесных водворивыйся.
     Радуйся, честныя и многоцелебныя мощи твоя святыя нам оставивый.
     Радуйся, в сонме преподобных Печерских звездо сияющая.
     Радуйся, Лавры Печерския славо и радование.
     Радуйся, всех преподобных Российских сподвижниче.
     Радуйся, к Богородице молитвенниче наш неусыпный.
     Радуйся, преподобне отче Илие, святый воине и великий заступниче Российския земли.


Кондак 10
     Спасти хотя землю Русскую от нашествий вражиих, Моисею и Давиду и прочим вождем людей Божиих подражая, мужественно во бранех подвизался еси, отче преподобне. Темже и на Небеси с ними, яко победитель, торжествуеши, моляся о воинствующих за правду и благодарственно вопиющих Богу: Аллилуиа.


Икос 10
     Стена еси и ограждение от врагов видимых и невидимых земли Русския, в нейже, отче Илие, жительствовал еси, и ныне пребываеши нетленным телесем твоим. Сего ради и мы, грешнии, во дни смуты и нестроений в стране нашей припадаем к тебе, отче святый, и слезно взываем: охраняй и ныне Отечество наше от нашествий иноплеменных, от раздоров и междоусобныя брани, да не погибнет Русь Православная и Богом любимая и да не престанет величати тя сице:
     Радуйся, дивную любовь ко Отечеству земному показавый.
     Радуйся, по всей Российстей земли Богом прославленный.
     Радуйся, Росийския страны ограждение.
     Радуйся, Православия в ней утверждение.
     Радуйся, враждующих на землю нашу укротителю.
     Радуйся, о мире державы Российския пред Господем предстателю.
     Радуйся, за Дом Пресвятыя Богородицы, страну Российскую, даже до смерти стояти научаяй.
     Радуйся, в подвизех и страданиих за правду верных укрепляяй.
     Радуйся, нетлением мощей твоих славно от Бога возвеличенный.
     Радуйся, всем с верою приходящим к ним исцеления подаваяй.
     Радуйся, о всех градех и весех Российских молитвенниче.
     Радуйся, яко молитвами твоими людие расточеннии любовию собираются.
     Радуйся, преподобне отче Илие, святый воине и великий заступниче Российския земли.


Кондак 11
     Пение молебное, с любовию приносимое днесь в память твою милостивно услыши, преподобне Илие, и буди во вся дни благий наш предстатель и присный за ны ко Господу молитвенник, да о тебе радующеся, вси сынове Русстии едиными усты и единем сердцем прославят Бога, поюще Ему: Аллилуиа.


Икос 11
     Светлое празднество твое, преподобне Илие, яко торжество веры и правды совершает святая Церковь Христова, созывающи на духовную трапезу верная чада своя. Приими убо гласы хваления тебе, небесному заступнику нашему, с любовию от нас возносимыя:
     Радуйся, Церкве Российския светильниче.
     Радуйся, ангеле земный и человече небесный.
     Радуйся, яко с горящим светильником вшел еси в радость Христа.
     Радуйся, яко и нас благодатным светом просвещаеши.
     Радуйся, светом жития твоего страну нашу озаривый.
     Радуйся, яко, видяще подвиги твоя, человецы Отца Небеснаго прославляют.
     Радуйся, храмы Божия, во имя твое освященныя, благоволением твоим осенивый.
     Радуйся, яко молитвою пред иконою твоею душевное утешение приемлем.
     Радуйся, блаженства святых удостоенный.
     Радуйся, сострадания к людем преисполненный.
     Радуйся, яко с преподобными и праведными веселишися.
     Радуйся, яко со всеми святыми присно торжествуеши.
     Радуйся, преподобне отче Илие, святый воине и великий заступниче Российския земли.


Кондак 12
     Благодать мира и единения народом словенским, благоденствие державе Российстей и земли нашей тишину испроси у Бога, преподобне, яко да и мы, от всех расколов и разделений свобождшеся, в мире воспоим прославльшему тя Единому Миротворцу всех Господу: Аллилуиа.


Икос 12
     Поюще равноангельное житие твое, преподобне, хвалим, славим и величаем укрепившаго тя Господа, даровавшаго нам в тебе богатыря духовнаго святорусския земли яко образ достоподражательный до скончания века. Приими убо, угодниче Христов, от нас, смиренных, с любовию тя почитающих, похвалы сия:
     Радуйся, народом словенским заступниче.
     Радуйся, Отечеству нашему печальниче нелицемерный.
     Радуйся, яко твоим предстательством от распрей и междоусобий свобождаемся.
     Радуйся, яко в почитании твоем во едино братство соединяемся.
     Радуйся, могущества и славы державы Российския утвердителю.
     Радуйся, воинскаго и богатырскаго духа в ней насадителю.
     Радуйся, врагов иноплеменных смиряяй.
     Радуйся, скорбь нашу в радость претворяяй.
     Радуйся, яко во успении своем нас не оставляеши.
     Радуйся, яко о прощении грехов наших Господа Бога умоляеши.
     Радуйся, яко тобою милосердие Божие призываем.
     Радуйся, яко тобою спасение вечное получити уповаем.
     Радуйся, преподобне отче Илие, святый воине и великий заступниче Российския земли.


Кондак 13
     О предивный угодниче Христов, преподобне отче Илие, заступниче и воине земли Российския, приими от нас, недостойных, сие малое моление, с любовию тебе приносимое, и умоли Всеблагаго Господа силу свыше православному воинству подати, сохрани град твой, обитель твою и вся люди страны нашея от всякаго зла. Благоприятным твоим ходатайством испроси нам у Христа Бога прощения прегрешений наших, да с тобою и всеми святыми в Царствии Небеснем сподобимся пети Спасителю нашему: Аллилуиа.

Этот кондак читается трижды, затем икос 1 -й: «Ангелов и человек...» и кондак 1-й: «Избранный воеводо...»

Молитва преподобному Илии Муромцу
     О великий подвижниче и угодниче Христов, преподобне отче Илие Ты в воинстем чине за имя Христово крепко подвизался еси и наследие державы Российския ограждал еси. Ты, оставив славу земную, избрал еси безмолвное житие в монастыре Киево-Печерстем и явился еси граду Киеву и обители твоей заступник крепок. О, храбрый в ратех, врагом прогонителю и обидимым заступниче, буди нам поборник на вся видимыя и невидимыя враги наша, помози и нам пребыти твердым, непоколебимым в испытаниях, да твоею помощию и крепким предстательством посрамятся вси являющии нам злая. Отче святый, ускори ныне на помощь, утверждая мир и тишину в земли нашей, и умоли Господа всех нас сохранити от глада, губительства, труса и потопа, от огня и меча, от нахождения иноплеменных и междоусобныя брани, и от тлетворных ветр, и от смертоносныя язвы, и от всякаго зла избавити, распри и раздоры, посреде единоверных братий возникающия, умирити, отпадших паки в единомыслие привести и всех нас единением духа и любве во Единей Святей Соборней и Апостольстей Церкви соединити.
     Не забуди, святче Божий, милостиво присещати град твой и обитель твою и вся грады и веси страны нашея православныя, сохраняя их молитвами твоими от всякаго зла. Помяни всех веру и любовь к тебе имущих, имя твое молитвенно призывающих и на поклонение мощем твоим святым приходящих, и вся во благих прошения их милостиво исполни, и сподоби нас помощию твоею спасение вечное получити и Царствие Небесное наследовати, да славословим непрестанно Отца, и Сына, и Святаго Духа во веки веков. Аминь.


Молитва иная
     О преподобне и богоносне отче наш Илие, града Мурома и всея земли Российския украшение, храбрый во бранех, врагом прогонителю и обидимым заступниче! Собраннии в храме твоем и пред иконою твоею покланяющиися людие, молим тя, умоли милосерднаго Бога, да милостивно услышит нас и дарует стране нашей победу на сопротивныя; и паки, припадающе, молим тя: укрепи данною тебе благодатию во бранех воинство православное, разруши силы возстающих на ны врагов, да постыдятся и посрамятся, и дерзость их да сокрушится, и да уведят и уразумеют, яко Господь есть Защитник наш, по нам поборствуяй. О скорый наш помощниче и заступниче, укрепи молитвами твоими слабую волю нашу, во еже обрести нам мужество духовное и сокрушение о гресех наших; молися о Церкви Русстей, граде твоем и обители Печерстей, в нейже нетленныя мощи твоя святыя почивают, и о всем Отечестве нашем. Ей, отче святый, не забуди нас, всегда молящихся тебе о помощи, и сподоби нас, грешных, получити от Бога неизреченная благая, яже уготова любящим Его, яко да с тобою и со всеми святыми прославим Отца, и Сына, и Святаго Духа, ныне и присно и во веки веков. Аминь.


Тропарь преподобному Илии Муромцу
Тропарь, глас 4-й:
     Приидите, вси вернии, песньми духовными почтим преподобнаго отца нашего Илию Муромскаго, светильника обители Печерския и всея России великаго заступника, образ подвига воинскаго и духовнаго нам показавшаго, чудес благодатию ныне сияюща. Темже притекающе к раце мощей его, любовию целуем и вопием: моли Христа Бога сохранити Отечество наше и даровати нам велию милость.


Кондак, глас 8-й:
     Яко светило великое Российския земли, Небеснаго Царя воевода непобедим был еси, и монашествующих богодухновенное украшение. Ныне же со ангелы Престолу Божию предстоя, Владыку Христа, всех Творца, моли избавитися от всяких бед и скорбей чтущым святую память твою, да зовем ти: Радуйся, Илие, преподобне отче наш.


Память 19 декабря/1 января

Преподобный Илия Муромец.[/spoiler]

[Раб божий Константин]

Акафист, иже во святых отцу нашему Иннокентию, митрополиту Московскому апостолу Америки и Аляски.
[spoiler]Кондак 1
Возбранный Святителю и добрый пастырю Богоданных словесных овец. Посвятивый всю жизнь твою, горение сердца и душу Христу. В полунощных странах неустанно трудивыйся, Святыя ради Церкви и спасения всех, не помышляя земныя награды. Мы же наследницы велия благодати твоея, воспеваем ти похвальныя песни сия. Ты бо предстоиши пред престолом Бога Славы, и ходатайствуеши о земле нашей и людех ея. Сия совокупльше воедино, Святая Церковь с нею же и мы благодарственная воспеваем ти тако:
Радуйся, святителю Московский Иннокентие, Апостолам равный и Аляски просветителю.

Икос 1
Ангелов сожителю бывый святый Иннокентие, яко новый апостол возсиял от малыя веси сибирския до стран дальневосточных и мира западнаго. Из млада избра тя Господь, да прославиши светом православия древния языческая народы аляскинския и азиатския, да вкупе с нами прославят тя песненными похвалы сицевыми:
Радуйся, великий подражателю Христов и приемников его, Апостолов:
Радуйся, благовестителю арктических народов.
Радуйся, учителю Богомудрый алеутов и колошей:
Радуйся, светильниче пресветлый эскимосов и коряков.
Радуйся, смиренне подвижниче, стопы бо твоя от Бога исправляли бо ся:
Радуйся, устроителю церкви православныя Американския.
Радуйся, проповедати Евангелие вожделевый:
Радуйся, к неведающим спасения жалости исполненный.
Радуйся, святителю Московский Иннокентие, Апостолам равный и Аляски просветителю.

Кондак 2
Видяще отличныя от иных отрок добрыя познания в учении Божественнем, многия стремления и таланты твоя, такожде и велию радость в служении Богу и Церкви святей его, сродник твой от младых лет наставляя тя на путь веры и благочестия, во еже воспевати Богу: Аллилуиа.

Икос 2
Разум духовный от юности твоея Богом ти даровася, во еже служити Ему вся дни живота твоего и премудрости мира сего познавати. Мы же поминая святость жития твоего, празднуем с веселием память твою:
Радуйся, наставницы и учители твоя мудростию своею поразивый.
Радуйся, смирения и кротости исполненный:
Радуйся, твердое православия укрепление:
Радуйся, честное Пресвятыя Троицы носило и похваление.
Радуйся, подвиги твоими всех удививый:
Радуйся, ересь идольскую искоренивый.
Радуйся, употребивый таланты твоя на служение Вышнему.
Радуйся, нас вдохновивый на служение Богу и ближнему:
Радуйся, святителю Московский Иннокентие, Апостолам равный и Аляски просветителю.

Кондак 3
Сила вышняго вразуми тя к приятию Божественныя воли на служение Апостольское во Аляске, егда завершися учение твое во Иркутске. Идеже ты вместе с супружницею твоею возлюбленною Екатериною и чадом малым, отправися во апостольское путьшествие ко Российстей Америке воспевая Богу: Аллилуиа.

Икос 3
Имеяше воистину, отче Иннокентие, с небесе благодать тебе дана быти, а не от земли: како бо кто от человек возможет твоея ревности по Бозе познати? Ты бо не возбоялся еси расстояния дальнего и пути длительного, ради Евангелия Христова, по тундре замороженной и бурным морям путьшесвовавый. Тем же и мы, вдохновляемии подвиги твоими, вопием ти сице:
Радуйся, Апостолом бывый Америце:
Радуйся, основателю Церкви Православныя в мире западнем.
Радуйся, славный подражателю Апостола Павла:
Радуйся, храбро путьшествовавый по бурным морям северным.
Радуйся, Духом Святым укрепляемый:
Радуйся, Ангелы Господни носимый и охраняемый.
Радуйся, столпе православия непоколебимый:
Радуйся, пастырю Христов небоязненный.
Радуйся, святителю Московский Иннокентие, Апостолам равный и Аляски просветителю.

Кондак 4
Бурю внутрь имея помышлений сумнительных, како достойно есть пети и познати чудеса Твоя подвиги и терпение, блаженне Иннокентие? Никтоже бо может я исчести, ты же достигнув благополучно островов Уналашкинских, Ангелы хранимый в море бурнем, на брегу воспел хвалебную ангельскую песнь Богу: Аллилуиа.

Икос 4
Слышаша, Богомудре Иннокентие, ближнии и дальнии величие чудес твоих, яко уподобися ты в труде своем святым Кириллу и Мефодию, дал еси азбуку Алеутом Колошам и прочим северным народом, во еже могли бы Бога Истиннаго познати, и славити Его непрестанно, много потрудился на поприще сем, переводя писание Божественное на наречия северныя, мы же прославляем Бога, даровавшего нам светильника таковаго, вопием тебе с радостию:
Радуйся, просветителю древних северных народов:
Радуйся, Триединаго Божества благовеститель в штате Аляска.
Радуйся, устроивый Церковь Христову на камени твердом:
Радуйся, мудро сеявый благое и истинное на ниве благоплодной.
Радуйся, рабе усердный не скрывый таланта Божественнаго:
Радуйся, малое стадо Христово собравый воедино.
Радуйся, закона Христова скрижали, Богом писанныя:
Радуйся, яко истину Христову неведущии имут тя учителя.
Радуйся, святителю Московский Иннокентие, Апостолам равный и Аляски просветителю.

Кондак 5
Боготечная звезда явися тебе святаго Иннокентия Иркутскаго подвиг. Ты же примеру его подражая, наставляя вере православней язычники, путьшествоваше всюду, собирая рассеянное свое стадо, крестя их во имя Отца и Сына и Святаго Духа, верныя же научая, спасающему тобою Богу взывати: Аллилуиа.

Икос 5
Видеша людие язычестии подвиги и труды твоя, притекаху к тебе аки доброму пастырю, внимаху всякому слову из уст твоих исходящему, ты же имея радение о них, открываше школы повсюду во еже учити отроки истине, сего ради слышиши от всех сице:
Радуйся, наблюдателю проницательный чудес Зиждителевых:
Радуйся, преподавателю терпеливый истин простых и мудрых.
Радуйся, богатство неисчерпаемое в неверии живущим:
Радуйся, просветителю темноты невежества.
Радуйся, промышления о людех приятелище:
Радуйся, чистоты веры усердный хранителю.
Радуйся, всего мира во Христе утверждение:
Радуйся, наставниче добрый ко спасению.
Радуйся, святителю Московский Иннокентие, Апостолам равный и Аляски просветителю.

Кондак 6
Проповедника велия Богоносна чтит тя, преблаженне Иннокентие, Сибирь вся, Америка и Аляска, ты бо проповеда Евангелие на языках северных научая всех взывати Богу: Аллилуиа.

Икос 6
Возсиял еси свет животный, идяше просветити новокрещенныя люди земли полунощныя Христовым учением. Тии же, узревше Тя, яко ангела светла, спасение благовестити грядуща, яко пастыря добра, душу свою за овцы полагающа, восприяша реку Амур новым Иорданом в ней крестишася, с нимиже и мы вкупе воспеваем тебе сице:
Радуйся, в миру живый, но мирскаго не искавый:
Радуйся, Христа славити всеми языки завещавый.
Радуйся, просветителю великий племен всех северных:
Радуйся, подателю света Христова даже до последних времен.
Радуйся, делателю славный винограда Христова:
Радуйся, пастырю добрый и милостивый стада Иисусова.
Радуйся, слова Божия верный толкователю:
Радуйся, мира Христова всюду насадителю.
Радуйся, святителю Московский Иннокентие, Апостолам равный и Аляски просветителю.

Кондак 7
Хотя веру православную укоренити во стране полунощней повеле строити храм соборный, сам же таланты Богом ти данныя и приумноженныя, употребляя на дело благое сие, самостоятельно назираше строительство его, да в нем вернии воспоют Богу: Аллилуиа.

Икос 7
Новаго тя Павла, проповедника ревнастнаго разумеем, отче святый Иннокентие, давый не токмо грамоту новопросвещенным северным людем, целя их недуги не токмо душевныя, но и телесныя, порази всех знанием медицины таже и Богословия, мы же с познавшими чрез тя Христа воспеваем ти тако:
Радуйся, просветителю Тунгусов и Индейцев:
Радуйся, благовестителю эвенком и якутом.
Радуйся, таланты своими всех удививый:
Радуйся, Господеви, а не человеком угождати учивый.
Радуйся, врачу душевный вкупе же и телесный:
Радуйся, архитриклине пира церковнаго чудесный.
Радуйся, чрез все житие на ниве Господней потрудивыйся:
Радуйся, и по смерти от паствы своея любовию не отлучивыйся.
Радуйся, святителю Московский Иннокентие, Апостолам равный и Аляски просветителю.

Кондак 8
Странно бысть кругосветное путешествие твое, егда тя призваша предстати пред Святейшим Синодом, да представиши велия труды твоя и переводы, ради духовного одобрения, ты же достигше града Святаго Петра верно возопи Богу: Аллилуиа.

Икос 8
Весь еси предан быв душею же и телом заветам Христовым, мужественно прият весть о блаженной кончине супружницы твоея, посети святыни Киевския и Сергиевския, моляся усердно Господу о даровании ти благодати велия и помощи в трудех, с благодарением прият от руки святителя Филарета чин ангельский и сан архиерейский. Мы же поминающии сие дерзаем вопити к тебе сице:
Радуйся, Иоанну Крестителю в крещении людей поревновавый:
Радуйся, Кириллу и Мефодию в просвещении равный.
Радуйся, Герману Аляскинскому сомолитвенниче истинный:
Радуйся, Николая Японскаго наставниче славный.
Радуйся, Иннокентия Иркутскаго в проповедании подражателю:
Радуйся, Филарета Московскаго дел великий последователю.
Радуйся, венцем терпения на земли венчанный:
Радуйся, светом вечным на небеси осиянный.
Радуйся, святителю Московский Иннокентие, Апостолам равный и Аляски просветителю.

Кондак 9
Всякое древо по плоду познавается, плод же трудов твоих велий есть пред Господем. Возвратяся в сане епископа в новую епархию полунощной страны, усугуби труды во устроении и укреплении церкви Христовы. Сам устрои часы в колокольне новаго соборнаго храма, и повеле открытии семинарию на Ситхе обучения ради духовенства местного, да вси взывают Господу Сил: Аллилуиа.

Икос 9
Ветии многовещанныя подвигом твоим удивляются, ангели с тобою ликовствуют. Велика бо бысть епархия твоя, насеянная многими народы языческими, ты же посылаше проповедницы во вся удаленныя страны Сибири Восточной и на Аляску, да вси языцы познают веру истинную. Сего ради вопием ти сице,
Радуйся, Апостоле великий Арктический:
Радуйся, первый иерарше Американский.
Радуйся, истинный образе архипастыря православнаго:
Радуйся, не древле, а ныне подвизавыйся.
Радуйся, истинныя веры исповедниче:
Радуйся, Царствия Божия наследниче.
Радуйся, триязычную ересь поправый:
Радуйся, туземцам двери Царствия Небеснаго отверзый.
Радуйся, святителю Московский Иннокентие, Апостолам равный и Аляски просветителю.

Кондак 10
Спасти хотя всех притекающих к тебе, Богом водимый и ангелы укрепляемый, святителю Христов Иннокентие, посети народы Амурския долины Сибири, изучая нравы и обычаи, язык и традиции тоя страны, примером к подражанию им явился еси, непрестанно научая взывати Богу: Аллилуиа.

Икос 10
Стена еси всем, о православии трудящимся, и заступление к тебе с верою притекающим, святче Божий Иннокентие, пример достойный подражанию явивый, да продолжатся труды твоя в просвещении неведущих Христовой истины, мы же воспоминающее подвиги и труды твоя взываем ти сице:
Радуйся, добродетельми, яко виссоном, украшенный:
Радуйся, в премудрости с Соломоном сравненный.
Радуйся, подобно Иоанну Богослову Господа возлюбивый:
Радуйся, такожде и малыя чада твоя наставивый.
Радуйся, Евангелие переведый на языки туземныя:
Радуйся, основавый школы для изучения истины Божественныя.
Радуйся, семена Истины насадивый на почве Американстей:
Радуйся, трубо громогласная Евангельскаго благовестия.
Радуйся, святителю Московский Иннокентие, Апостолам равный и Аляски просветителю.

Кондак 11
Пение Всемогущему Богу паче иных принесл еси, святе Иннокентие, жизнь свою посвятивый просвещению иноверных, свет Евангельский донесый даже до конец земли, стопами обошед всю вселенную, на склоне лет своих быв призван на служения святительское, ты же восприяв сие со смирением Богу воспевая: Аллилуиа.

Икос 11
Светозарнаго светильника обретше в тебе, святителю Иннокентие, земля Русская, уподобися бо ты вселенским учителям, паству Российскую добре упасл еси, не забывая малая чада тобою оставленныя, поревноваше о них даже до смерти, мы же с ними согласно вопием ти таковая:
Радуйся, свете миру и соль земли бывый:
Радуйся, яко светильник, горяй во тьме, языком светивый.
Радуйся, ко Владыце всех нас покаянныя молитвы приносящий:
Радуйся, и сам о нас к Нему выну всегда молящийся.
Радуйся, светлое Православия проповедание:
Радуйся, златозрачное света Евангельскаго сияние.
Радуйся, сего ради велиим во Царствии Божием нареченный:
Радуйся, на земли в Церкви Господней прославленный.
Радуйся, святителю Московский Иннокентие, Апостолам равный и Аляски просветителю.

Кондак 12
Благодать просвещения и мира испроси нам, Святителю Христов Иннокентие, мира во всем мире, любви друг ко другу. Евангелие Христово до конца жития своего благовестивый, завещавый не плакати а радоватися о преставлении твоем, речей надгробных не глаголати но токмо проповедь назидательную и поучительную, мирно отшел еси в вышняя селения приявше Христовы тайны, мы же дивящееся таковому смирению вопием Богу: Аллилуиа.

Икос 12
Поюще труды твоя и подвиги, дивное житие на земли, прославляем тя, равноапостоле Христов Иннокентие: в тебе бо Бог в Троице прославляемый, дивно прославися, смиренно молим тя, силу свыше на укрепление православия ниспошли нам, на враги видимыя и невидимыя победу даруй, да вси народи приведенныя тобою ко Христу, вкупе же и мы воспеваем ти похвалы сия:
Радуйся, поминающих тя поминаяй:
Радуйся, нестроения наша исправляяй.
Радуйся, людем верным поможение:
Радуйся, рода христианскаго возвышение.
Радуйся, православия твердое ограждение:
Радуйся, неверия живое обличение.
Радуйся, Троицу Святую Богомудре исповедавый:
Радуйся, службу Божию совершати коемуждо своими языки завещавый.
Радуйся, святителю Московский Иннокентие, Апостолам равный и Аляски просветителю.

Кондак 13
О, преблагословенне отче Иннокентие, просвещение всех Христа чающих, нынешнее приемше малое приношение сие наше, вся народы православныя от находящих им зол и бед свободи, в мире любви и единении соблюди. И в царствие небесное предстательством твоим приведи всех нас, Богоприятным твоим ходатайством, да с тобою воспеваем: Аллилуиа.
Сей Кондак глаголи трижды. А по сем читается Икос 1 и Кондак 1.

Молитва святителю Иннокентию
О пастырю добрый и учителю премудрый, образе благонравия всем, благочестно жити хотящим, святителю отче наш Иннокентие! К тебе, яко чада ко отцу, прибегаем и молимся, поминая твою любовь к людем: буди щит несокрушим Святей Церкви Православней и отечеству нашему, архиереи благолепием святительства и премудростию украси, пастырем в служении ревность даруй, монашествующия к подвигом добраго течения в послушании утверди, православным христианом веру святую непорочну соблюсти умоли, мир весь предстательством твоим умири.
Теплый наш молитвенниче, всероссийский светильниче, просветителю Сибири и Америки, осени горним благословением нас, в скорбех сущих, и подаждь утешение и избавление от болезней душевных и телесных; испроси нам свыше дух кротости, целомудрия, смиренномудрия, терпения и любве, да прочее время жития нашего в вере и покаянии поживем и в жизни вечней благодарне восхвалим прославльшаго тя Господа - Отца, и Сына, и Святаго Духа, Троицу Единосущную и Нераздельную, ныне и присно и во веки веков. Аминь.

Молитва иная святителю Иннокентию Московскому
О святителю Христов Иннокентие, новоявленный угодниче! К тебе припадаем, раби Божии (имена), и молимся: всели в сердца наша любовь твою, еюже к Богу и ближним твоим в житии твоем преисполнен был еси.
Моли Христа Бога, да отпустятся нам согрешения наша вольная и невольная, да избавимся от всех враг видимых и невидимых, от всяких бед и скорбей и всяких недугов. Моли, да милостив будет нам Господь и зде, и в будущем веце и преставльшияся от нас отцы и братию, матери и сестры, и чада наша, в лики святых вчинив, в месте светле упокоит: да предстояще и поклоняющеся иконе твоей, имамы тя неусыпающаго молитвенника и предстоятеля о нас ко Господу, и благодарно с любовию величаем прославльшаго и послушающаго тя, в Троице славимаго Бога, Отца и Сына и Святаго Духа, ныне и присно, и во веки веков.

Тропарь святителю Иннокентию, митрополиту Московскому, апостолу Сибири и Америки
Тропарь, глас 1
Во вся страны полунощныя изыде вещание твое, яко приемшая слово твое, ихже боголепно научил еси, неведущия Христа светом Евангелия просветил еси, человеческия обычаи украсил еси, Российская похвало, святителю отче наш Иннокентие, моли Христа Бога спастися душам нашим.

Кондак, глас 4
Истинный и неложный учитель был еси: заповеданная бо Господем сам сотворив, имже учил еси и наказал еси ко благочестию приходящия чада, неверныя вразумлял еси познати веру истинную, просвещая их святым Крещением. Сего ради со апостолы радуешися, приемля почесть благовестника Христова.[/spoiler]

[Раб божий Константин]

Акафист святителю Иннокентию, чудотворцу Иркутскому.
[spoiler]Кондак 1


Возбранный чудотворче и скорый в скорбех помощниче, святителю отче Иннокентие, яко имея велие дерзновение пред Господем, от всяких нас бед свобождай, да с радостию зовем ти: Радуйся, Иннокентие, молитвенниче о душах наших.


Икос 1


Ангельскому жительству на небесех поревновал еси, отче: по имени бо и житие твое непорочно бысть на земли, сего ради и возвысился еси до лицезрения Творца Ангелов. Отнюдуже призирая выну на град сей и люди, услыши нас, похвальная восписующих ти сия: Радуйся, невинностию Агнца непорочнаго подражатель бывый; Радуйся, воздержанием твоим ангельское во плоти житие явивый. Радуйся, яко ангел, Сибирския церкве Божия дела возвещаяй; Радуйся, яко архистратиг силы небесныя, всех прибегающих к тебе от бед сохраняяй. Радуйся, непорочности и невинности соименный учителю; Радуйся, незлобия и чистоты усердный хранителю. Радуйся, убеленный невинностию крине райскаго прозябения; Радуйся, умащенная чистотою маслина небеснаго благословения. Радуйся, уме небесных неизреченных благ наслаждаяйся; Радуйся, пастырю, с мудрыми в радость Пастыреначальника своего вшедый. Радуйся, яко свет лица Божия ясно на небеси смотряеши; Радуйся, яко тем же светом осиянный, притекающих к тебе неизреченно возвеселяеши. Радуйся, Иннокентие, молитвенниче о душах наших.


Кондак 2


Ведый Господь велика тя быти светильника во стране языков, благоволи сокрыти род и отечество твое, да явишися в земли Хинстей, якоже Мелхиседек в Ханаанстей, и увериши, яко не от человек пришел еси к нам, но от Бога, Ему же поем: Аллилуиа.


Икос 2


Разум просвещенный хотя имети, богомудре отче, от юности избрал еси в место образования своего матерь градов православныя веры нашея и подвижничества, да живя среди земных ангелов и взирая на скончание жительства их, подражатель явишися вере их; темже и сам соделался еси небесным человеком. Сего ради слышиши от нас сия: Радуйся, винограде многоплодный, в благораствореннем юзе возрасший; Радуйся, цвете благовонный, в Малей России процветший. Радуйся, славо и удобрение града Киева; Радуйся, красото и утешение отцев Печерския лавры. Радуйся, яко измлада мудрости прилежа, Божественное писание ясне извыкл еси; Радуйся, яко отложив вся мирския сласти, Христов ярем носити изволил еси. Радуйся, в юности посвятивый в жертву приятну Господу себе самаго; Радуйся, сохранивый невредно целомудрие девства драгаго. Радуйся, яко в земнем училищи небесныя премудрости учивый; Радуйся, яко щитом веры вся разжженныя лукаваго стрелы угасивый. Радуйся, яко издетска Бога возлюбивый; Радуйся, яко заповедий Его неложный хранитель бывый. Радуйся, Иннокентие, молитвенниче о душах наших.


Кондак 3


Силою свыше позна тогда благоверный царь непорочное и святое жительство твое, отче Божий, иже и избра тя во апостольское служение и предпосла, яко первенца духовнаго сыноположения, насаждати святую веру в земли языков чуждих, неведущих пети Богу: Аллилуиа.


Икос 3


Имеет тебе, святителю отче Иннокентие, вся страна Сибирская велика учителя и дивна в вере наставника; сего ради, яко добляго поборника верным и скораго молитвенника тя чтуще, с веселием и радостию дары тебе приносим таковыя: Рaдyйcя, священная главо, разума водами напояема; Радуйся, плод благоуханен житием твоим от юности являяй. Радуйся, искоренителю терновнаго служения идольскаго; Радуйся, насадителю лозы православныя веры. Радуйся, новый апостоле, облагоухавый верою последния концы России; Радуйся, добрый пастырю, утвердивый красныя ноги своя на востоце царства Сибири. Радуйся, мрачныя страны просветителю; Радуйся, душевныя темноты озарителю. Радуйся, врагов веры Христовы разрушителю; Радуйся, прельстителей душ христианских разителю. Радуйся, идолослужительных старец мудрость посрамивый; Радуйся, мудрых века сего мудрейший. Радуйся, Иннокентие, молитвенниче о душах наших.


Кондак 4


Буря злобы древляго змия обуя царство хинов, егда не можаху отверзти ушеса ко глаголом Царствия Христова, тобою, новый апостоле, возвещаемым, и не хотяху прияти тя, вторицею на пределех их явльшася, да умудриши я воспевати единому Богу: Аллилуиа.


Икос 4


Слышаще и ведуще тя премудра учителя и истиннаго сказателя таин Божиих, прихождаху к тебе не точию старцы, но и юнии, в нихже разум напечатлевал еси древния истины Евангельския, сего ради яко пастыря, просветителя и отца нашего ублажающе, зовем ти: Радуйся, рабе благий и делателю добрый; Радуйся, искоренителю злых и прогонителю нечестия бодрый. Радуйся, яко сугубу мзду небесную сугуба ради путешествия к хином приял еси; Радуйся, яко сподобился еси восприяти чудес дар и славы венец пресветел. Радуйся, апостолу Павлу в подвизех служения своего подражавый; Радуйся, терпению его в научении безкнижных юношей последовавый. Радуйся, яко на пажити веры правыя и при источнице воды живыя люди твоя паствил еси; Радуйся, яко на злаце красне пребыти твоему стаду мудре наставил еси. Радуйся, светильниче всесветлый и вселюбимый: Радуйся, паче звезд яснейший и вожделеннейший. Радуйся, винограда животнаго святопрозябший грозд, вино искапающий; Радуйся, святопомазанная главо, честный наш учителю. Радуйся, Иннокентие, молитвенниче о душах наших.


Кондак 5


Боготочный источник превеликих чудес явился еси в земли нашей, достославно отче, приял бо еси, еще на земли ти жившу, власть недуги изцеляти, по смерти же наипаче прослави тя Бог многими чудотвореньми, да вси чудодействующему тобою Богу вопием: Аллилуиа.


Икос 5


Видевше жителие Иркутстии святую церковь, в нейже почиваше нетленное и цельбоносное тело твое, угодниче Божий, яко вторую купину в пламени сущу, силою же твоих молитв невредно сохраненную, прославиша Бога; темже и мы, видяще оную доныне целу, благолепну и яве поведающую знамения и чудеса твоя, воспеваем тебе сице: Радуйся, всю страну Сибирскую удививый чудесы, имиже обитель твоя освятися; Радуйся, оруженосец духовный, имже всяка злая страсть и болезнь от верных прогонится. Радуйся, яко излиянием чудес от Бога обогатился еси; Радуйся, яко неоскудный источник изцелений явился еси. Радуйся, яко стаду твоему помощь и заступление даваеши; Радуйся, яко чудес сиянии паству твою просвещаеши. Радуйся, невредимо от огня сохранивый церковь, в нейже, жив сый, воздевал еси о спасении людий преподобныя руце свои; Радуйся, яко стаду твоему помощь и заступление дававши; Радуйся, яко чудес сиянии паству твою просвещаеши. Радуйся, невредимо от огня сохранивый церковь, в нейже, жив сый, воздевал еси о спасении людий преподобныя руце свои; Радуйся, явственно тем свидетельствовавый, яко свято бысть почивавшее в ней нетленное тело твое. Радуйся, всем безпомощным приятное попечение; Радуйся, коеяждо немощи скорый и безмездный врачу. Радуйся, яко и всяк благопотребен дар от Господа просящим подаваеши; Радуйся, яко прославляяй тя чудесы Бог тобою всех к Себе призывает. Радуйся, Иннокентие, молитвенниче о душах наших.


Кондак 6


Словеса апостольская, еже молитися о спасении паствы твоея, яко иерарх во ушию своею прием, не точию в жизни, но и по преставлении являешися священнодействитель Божественных тайн, уверяя верующих в непрестаннем ходатайстве о требующих твоея помощи и воспевающих Богу: Аллилуиа.


Икос 6


Возсиял еси пречудно, архиерею Божий, егда вторицею явивыйся зельне страждущему, ударив в пол жезлом, язвою на древе того места уврачевал еси душевную язву омраченнаго неверием; абие бо позна тя быти благодатнаго врача и славя тя, вопияше: Радуйся, иерарше благий и верный; Радуйся, делателю неутомимый винограда Христова. Радуйся, служителю Господень, о верных умоляяй; Радуйся, наставниче, грешных к небеси направляяй. Радуйся, таин Божиих истинный строителю; Радуйся, молитвенных рук непрестанный воздевателю. Радуйся, яко избавляеши от неверия; Радуйся, яко изцеляеши от малодушия. Радуйся, укрепление мудростию блaгoдyшия; Радуйся, просвещение светлостию благочестия. Радуйся, премудрый проповедателю; Радуйся, пресладкий обличителю. Радуйся, Иннокентие, молитвенниче о душах наших.


Кондак 7


Хотяще некогда сановитии града сего в неподобное время видети и любопытною десницею осязати нетлением уже процветавшия святыя мощи твоя, святителю Христов, потщашася прикрыти дерзновение свое благословением архипастыря: но ты, чистоты любителю и веры рачителю, не восхотел еси явити себе им, научая тем не высокомудрствовати, но в смиренномудрии пети Богу: Аллилуиа.


Икос 7


Новое и преславное чудо показа нам тобою на земли всех чудес Творец и Владыка, егда тебе ради пременишася естества уставы; среди бо лета и зноя мраз и иней явистася при цельбоноснем гробе твоем, еже знамением бысть, яко аще и умерл еси на земли плотию, но душою в вышнем селении всегда жив сый, теплым своим ходатайством пособствуеши вопиющим тебе: Радуйся, смиренномудрия столпе необоримый; Радуйся, презренную гордость низлагаяй. Радуйся, любящия чистоту душ соблюдаяй; Радуйся, грешных к покаянию воззываяй. Радуйся, делателю чудес многославных; Радуйся, ходатаю и подателю дарований многоразличных. Радуйся, заблуждших и ослепленных наставниче; Радуйся, любопытных и маловерных обличителю. Радуйся, яко славу земную в уметы вменил еси; Радуйся, яко честь Бога Вышняго всем сердцем взыскал еси. Радуйся, имже о силе Божией естества уставы пременяются; Радуйся, имже помыслы злобнии прогоняются. Радуйся, Иннокентие, молитвенниче о душах наших.


Кондак 8


Странно бе видети, како три по естеству мощная животная, силою, данною ти свыше, обезсилеша, яко не можаху довлещи до обители твоея единаго путника из жителей града сего, вразумляюща тем, якоже древле осля Валаама, да не идет в дальнюю страну, не прияв от тебе путеваго напутствия, абие же, воспомянув отложенный обет свой, позна тя скорого помощника и возопи: Аллилуиа.


Икос 8


Весь всего себе исполнив любве нелицемерныя к пастве своей, был еси скорый помощник призывающим тя в помощь, святителю отче Иннокентие: не точию бо близ притекающих к раце мощей твоих, но и далече отстоящих и призывающих имя твое изцеляеши от всякия болезни. За таковое убо врачевание приими от нас похвалы сия: Радуйся, цельбы исполнь явивыйся алавастре, яко люди Христовы ароматствуеши твоими изцелении; Радуйся, ароматный фиале, чудесы удивляя, нарда пистика многоценный. Радуйся, источниче, благодать изцелений изливающий нам от всечестныя раки твоея независтно. Радуйся, яко тело твое трудолюбное вместо мастей нам во гробе оставил еси истощати изцеления. Радуйся, яко твоими молитвами слепии прозреша. Радуйся, яко твоим ходатайством хромии и безногии ходити начаша. Радуйся, яко твоим заступлением разслабленнии изцелеша; Радуйся, яко твоим предстательством от неизцельныя огневичныя болезни здрави быша. Радуйся, покрытых струпами, яко прокаженных, уврачевавый; Радуйся, впадших в лихорадочныя и трясавичныя язи возставивый. Радуйся, яко лишенных смысла здравым умом снабдеваеши; Радуйся, яко от страха и мечтаний томимых свобождаеши. Радуйся, Иннокентие, молитвенниче о душах наших.


Кондак 9


Всякия скорби и горькая испытания терпеливно подъял еси, отче, яко добр воин Христов, ово терпя наветы от клеветников злых, ово же препирался с полчищем неверных и суеверных и ово искушаем от древляго змия, уязвлявшаго тя за жертвы своя, из челюстей его тобою исхищаемыя, но вся сия побеждая за возлюбившаго тя Христа, немолчно воспевал еси Ему: Аллилуиа.


Икос 9


Витийство человеческое изнемогает изрещи вся скорби, лишения, уничижения, болезни и страдания, яже ради спасения паствы твоея, святе Иннокентие, подъял еси. Темже терпению твоему точию дивящеся и любовию побеждаеми, с благодарным чувствием вопием: Радуйся, воине Христов непобедимый; Радуйся, твердейший адаманте, в терпении невредимый. Радуйся, яко ярость неблагомыслящих, гневающихся неправедне, претерпел еси; Радуйся, яко превозносящияся злочестивым шатанием паки люте сокрушаемы видел еси. Радуйся, жестоких и злокозненных владык укрощение; Радуйся, угнетенных и страждущих рабов скорое заступление. Радуйся, яко корения заблуждений и терние неверия трудолюбне исторгал еси; Радуйся, яко Божественных повелений насаждения в сердцах верных многими труды возделовал еси. Радуйся, смирением своим диавола победивый; Радуйся, молитвою и бденным стоянием плоть свою умертвивый. Радуйся, яко красныя твои нозе добльственне к борению со врагами простерл еси; Радуйся, яко добре течение совершив, ко Христу восхождение обрел еси. Радуйся, Иннокентие, молитвенниче о душах наших.


Кондак 10


Спасения ради от ослепления старцу, очима тяжко видящу, получити же зрение хотящу и с верою о сем у тебе помощи просящу, скоро притекл еси, святче, в храмину того, идеже егда прикоснулся еси болезненней главе его, абие ощути он свет во очию своею и прозре, хваля тя и вопия Богу: Аллилуиа.


Икос 10


Стену крепкую и ограждение необоримое от всех скорбей и зол имеет тя, пастырю благий, страна сия: твоим бо сильным заступлением и предстательством доныне град сей и обитель твоя сохраняются в мире и благоденствии. И мы убо, спасаемии тобою, благодарственно вопием ти: Радуйся, чаша, елей милости к нам Божия содержащая; Радуйся, горо, Божественнаго на нас гнева тучи отводящая. Радуйся, яко потоки мира к нам приводиши; Радуйся, яко обилие благ ходатайствуеши. Радуйся, милости превеликия и скорбным сострадания сокровище; Радуйся, пространное Божияго о пастве твоей промышления приятелище. Радуйся, в печалех сущим увеселение; Радуйся, удрученных попечении житейскими утешение. Радуйся, в деторождении матерем скорый помощниче: Радуйся, в час кончины молитвенный наш предстателю. Радуйся, о милости и мире паствы твоея известный рачителю; Радуйся, отче честный, от всякаго зла и бедствия усердный наш хранителю. Радуйся, Иннокентие, молитвенниче о душах наших.


Кондак 11


Пение всеумиленное и моление теплое пред нетленными мощами твоими, единым от боляр приносимое тебе, не презрел еси, отче, но скоро услышав и во сне явлься, облегчил еси болезни и страдания его, сице и наших молениий и пений гласы услыши, иерарше Христов, вере же и любви людий твоих вонми и свыше покров твой даруй хвалящим тя и поющим Богу: Аллилуиа.


Икос 11


Светосиятельна тя светильника, чрез седмьдесят и три лета сокрываема в земли не восхоте Господь оставити под спудом, еже исполнитися речению Его, аки светильник на свещник поставляют, да входящии видят свет. Темже и мы во храме сем и всюду, яко тя зряще и тобою просвещаеми, дерзаем глаголати сия: Радуйся, светлое на тверди церковной светило и Сибирския страны славо; Радуйся, церквей строителю и обогатителю чудесы тех нескудный. Радуйся, пресветлая красото святыя обители сея; Радуйся, блестящая заре избраннаго тобою града сего. Радуйся, свещниче всезлатый и многоценный; Радуйся, бисере предрагий небесный. Радуйся, облакообразный покрове, на теснем пути спасения нас осеняющий; Радуйся, огневидный столпе, в нощи неведения и заблуждений нас просвещающий. Радуйся, яко святынею твоею всех требующих помощи твоея освящаеши; Радуйся, яко блистанием чудес твоих во вся концы страны сея сияеши. Радуйся, яко и по преставлении твоем с нами пребываеши; Радуйся, яко, и живя в селениих райских, нас не оставляеши. Радуйся, Иннокентие, молитвенниче о душах наших.


Кондак 12


Благодать свыше с небесе подаждь, преблаженне отче, с верою и благоговением воспоминающим честное твое успение и пресветлое пренесение святых мощей твоих празднующим; имаши бо дарованную ти от Бога силу и власть подавати требующим вся, яже ко спасению прошения, и ныне предстоя Престолу Божественному, моли о тебе воспевающих: Аллилуиа.


Икос 12


Поюще твое ходатайство и сильное заступление просящим твоея скорыя помощи, восхваляем подателя всех благих Бога, даровавшаго в последняя времена стране сей тебе, отца нашего чудотворца, молитвенника и заступника, ты же не возгнушайся нас, грешных и недостойных рабов Его, но услыши хвалебными гласы вопиющих тебе: Радуйся, суетства привременнаго к буияго воистинну обличителю; Радуйся, апостолом равноревностный Евангельским научением. Радуйся, мучеников сострадальче и красото; Радуйся, первопастырю и учителю христоименитых людий земли сея. Радуйся, церковное украшение; Радуйся, архиереев доброто, священников и иноков похвало. Радуйся, яко приял еси трудов твоих воздаяние; Радуйся, крестоносному народу нашему похвало и утверждение. Радуйся, телес наших неусыпное хранение; Радуйся, и душ наших к Царствию Небесному возведение. Радуйся, Богу совершенне и всецеле угодивый; Радуйся, венец безсмертия навеки получивый. Радуйся, Иннокентие, молитвенниче о душах наших.


Кондак 13


О предивный чудотворче и преславный угодниче Христов Иннокентие! Вонми гласу молений наших, от сокрушеннаго сердца к тебе возносимому, и богоприятным твоим ходатайством испроси нам от Христа Бога нашего прощение прегрешений наших, ослабу и избавление от врагов видимых и невидимых, и от всякия скорби, беды и напастей, да с тобою и со всеми святыми в селении праведных сподобимся пети Ему: Аллилуиа.


(Этот кондак читается трижды, затем икос 1 и кондак 1)



Молитвы святителю Иннокентию, чудотворцу Иркутскому


Молитва первая


К тебе, святче Божий, яко к скорому помощнику и молитвеннику о спасении моем, аз недостойный и грешный припадая молюся: не презри мене унылаго, немощнаго, во многая беззакония впадшаго, и по вся дни и часы согрешающаго, но вонми души моей, яко скорблю, и умоли Господа Бога всея твари Содетеля, Емуже ныне предстоиши в радости святых и с лики ангелов, помиловати мя и извести из темницы греховныя душу мою, прежде даже не отъиду отсюду и ктому не уготов явлюся на суд Его. Ей, отче! не посрами мене, к тебе с верою притекающаго, аще бо и недостоин есмь твоего ходатайства и заступления, но ты, быв подражатель человеколюбия Божия, сотвори мя достойна чрез обращение от злых дел к благому житию, да тако душею и телом здрав быв, славлю и пою дивнаго во святых Своих Бога нашего и твое теплое заступление, всегда, ныне и присно, и во веки веков. Аминь.


Молитва вторая


Святителю, отче Иннокентие! Призри на нас, раб Божиих (имена), и на приход (дом) сей; моли Христа Бога, да низпослет нам Духа Своего Святаго дар, во еже умудрити нас ходити пред Ним во всяком благочестии и чистоте. Мы присно заблуждаем от пути спасения: руководи нас, милостивый наш наставниче. Мы немощни есмы в вере: утверди нас, правоверия учителю. Мы зело убози сотворихомся добрых дел: обогати нас, благосердия сокровище. Мы присно наветуеми есмы от враг, видимых и невидимых, и озлобляеми: помози нам, безпомощных заступниче; да славословяще имя Божие во дни и в нощи, сподобимся быти наследницы и жизни вечныя, и прославим Отца и Сына и Святаго Духа, ныне и присно, и во веки веков.


Молитва третья


Святче Божий, пастырю добрый, делателю верный винограда Христова, святителю отче Иннокентие! Призри на град сей и на люди сия! Моли Христа Бога, да сохранит паству твою от волков, губящих ю; да ниспослет Духа Своего Святаго во еже умудрити нас ходити пред Ним во всяком благочестии и чистоте во вся дни живота нашего, да славословяще Имя Его Всесвятое во дни и в нощи, сподобимся быти наследницы жизни вечныя, и прославим Отца, и Сына, и Святаго Духа, ныне и присно и во веки веков. Аминь.



Тропарь святителю Иннокентию Иркутскому


Тропарь, глас 3


Светильниче Церкве пресветлый, озаривый лучами доброт твоих страну сию и исцеленьми многими притекающих к тебе с верою Бога прославивый, молим тя, святителю отче Иннокентие, ограждай молитвами твоими град сей от всех бед и печали.


Кондак, глас 4


Непорочности соименнаго пастыря, проповедника веры в языцех Монгольских, славу и украшение Иркутския паствы, любовию восхвалим, вси вернии: той бо есть хранитель Страны Сибирския и молитвенник о душах наших.[/spoiler]

[Раб божий Константин]

АКАФИСТ святителю Иннокентию, епископу Иркутскому, чудотворцу (иной).
[spoiler]Кондак 1
     Равноапостольный христианския веры благовестниче, языческаго зловерия искоренителю, скорый в бедах и скорбех заступниче, благоутробия неистощимое сокровище, святителю отче Иннокентие! Великаго тя пред Господем ходатая и чудес множеством свидетельствованна помощника имуще, к тебе во обстоянии от всяких нужд и зол с верою и любовию притекаем, и тако ти зовем:
     Радуйся, Иннокентие, святый угодниче Спаса Христа.


Икос 1
     Ангелом уподобился еси непорочным житием, святителю отче Иннокентие, и сего ради ангелов сопричастия сподобился еси в немолчнем славословии Господа Славы. Приими убо и от наших недостойных устен приносимое тебе хваление:
     Радуйся, по имени твоему, непорочность знаменующему, явивый житие твое.
     Радуйся, непорочности сохранением, ангелов житию подражатель бывый.
     Радуйся, верный Христова Евангелиа служителю.
     Радуйся, архиереев удобрение.
     Радуйся, Церкве, невесты Христовы, драгое украшение.
     Радуйся, святости жития и непорочности нравов учителю.
     Радуйся, Иннокентие, святый угодниче Спаса Христа.


Кондак 2
     Видя Господь Бог благопотребен тя сосуд ко приятию даров благодати, обильно излия в твое сердце духа премудрости и разума, во еже просвещати языки, во тме и сени смертней седящыя, духа совета и крепости, во еже превозмогати над враги спасения видимыми и невидимыми, духа ведения и благочестия, во еже Христово стадо пасти учением и житием. Мы же, тя на спасение людий тако приуготованна уразумевше, со умилением Подателю всех благ Богу зовем: Аллилуиа.


Икос 2
     Разум благопотребен к деланию приятых от Бога талантов стяжати хотя, еще юн сый, водворился еси в вертограде духовныя мудрости преславнаго града Киева: совершен же в житии хотя быти, сожительство восприял еси в лице иноков Святопечерския лавры, идеже достигл еси в мужа совершенна, в меру возраста исполнения Христова. Мы же, твое звание и избрание разсмотряюще, с любовию зовем ти:
     Радуйся, розго винограда, плодов духа исполненная, да их обилием страны Сибири обогатиши.
     Радуйся, сладкоуханный крине Господень, на Юзе процветый, да тем страны Севера облагоухаеши и украсиши.
     Радуйся, в земнем училищи небесней мудрости навыкший, да ею языки на путь спасения наставиши.
     Радуйся, яко на высоту добродетелей, аки светильник на свещнице, поставлен был еси, да мглу неподобнаго жития во изгнании сущих разгониши.
     Радуйся, верный учениче Спаса нашего, во апостола языков предъизбранный.
     Радуйся, чадо послушливое Церкве Православныя, в первосвятителя Иркутския паствы пронареченный.
     Радуйся, Иннокентие, святый угодниче Спаса Христа.


Кондак 3
     Силою свыше тя облеченна уразумевше благоверный царь и святый Собор избраша тя во апостольское служение, проповедати Евангелие Царства Христова в земли языков, неведущих пети во Святей Троице единому Богу: Аллилуиа.


Икос 3
     Имея ревность апостольскую о спасении душ человеческих, подвиглся еси на вся труды и беды шествия в дальныя страны царства хинов: но воспящен быв в пределы его внити, во граде Селенгинстем препокоение обрел еси, идеже тя малое стадо присных ти по вере приветствии срете сими:
     Радуйся, новый апостоле, на просвещение языков многие страны претекший.
     Радуйся, в шествиих путных, якоже и Павел, языков апостол, беды Христа ради и Евангелиа бодре сретивый.
     Радуйся, лучезарное Церкве Христовы светило, на просвещение востока возшедшее.
     Радуйся, божественнаго огня носило, теплоту любве Христовы во страны мраза принесшее.
     Радуйся, духом ревности апостольския движимый, ко языком Монгольским поспешивый.
     Радуйся, во изгнании страждущым покой душам в следовании благому игу Христову указавый.
     Радуйся, Иннокентие, святый угодниче Спаса Христа.


Кондак 4
     Бурю зависти древний человеческих душ прельститель воздвиже в сердцах хинов сопротив тебе, во страну их грядущаго, благовестника мира Христова, и возстави на тя лжебратию, во еже в пределы хинов твое возбранити вхождение, да не навыкнут хинове, вкупе с православными, изведшему люди из тмы во свет свой чудный Христу Богу пети: Аллилуиа.


Икос 4
     Услышав ухищренныя хинов глаголы, яко не подобает ти, иерарху великому Господа, быти прияту в их царство, обратился еси паки со Евангелием ко языком инородным во стране Сибирстей, иже с велию радостию тя приемше, возопиша ти таковая:
     Радуйся, хинами во их царство не приятый, ко приятию же самеми ангелы в Небесное Царство достойный.
     Радуйся, не роду чуждему хинов, но своего царства языком Монгольским во апостола уготованный.
     Радуйся, яко возбранением тебе благовестия языком царства чуждаго велие благо языком Россиийскаго царства устроися.
     Радуйся, яко проповедию Евангелиа языком Монгольским злоухищрение врага душ человеческих жестоко посрамися.
     Радуйся, яко твоим посреде нас вселением неведущии Бога в познание истины приведошася, противляющиися же истине обличишася.
     Радуйся, яко на житие твое взирающе, грешнии покаяшася, беззаконнии же уцеломудришася.
     Радуйся, Иннокентие, святый угодниче Спаса Христа.


Кондак 5
     Боготочный премудрости источник от обилия присущия ти благодати проторжеся в пустыни Монгольстей, егда неразумнии хинове заградиша токи ея в пределы их омраченнаго царства: ревностию бо апостольскою движимь и во служении пастырстем труждаяся, ово просвещал еси светом Евангелиа Христова неверующыя языки Могольски, ово утверждал еси верующыя в послушании Правосланыя Церкве уставом; и тако научил еси и сих и онех вкупе воспевати Единому всех человеков Спасителю Богу: Аллилуиа.


Икос 5
     Видя Вседержитель, вся на пользу строяй, яко не приспе время, да просветятся светом Евангелиа людие царства хинскаго, дарова тя в первосвятителя Иркутския Церкве и учителя языков Сибири, еже мы ныне радостно воспоминаще, сице зовем ти:
     Радуйся, первопрестольниче Иркутския Церкве, благовестием Сибирскую область Российскаго царства огласивый.
     Радуйся, святое начало святителей Иркутския паствы, прочым пременяемым, единый ея несменный блюстителю.
     Радуйся, отче, святых отец в насаждении благочестия и искоренении нечестия подражателю.
     Радуйся, пастырскому служению уготовляемых трудолюбивый учителю.
     Радуйся, пастырю добрый, готовый душу твою положити за овцы твоя.
     Радуйся, неусыпный страже, вверенныя ти душы, бденным молением и путным обхождением, добре сохранивый.
     Радуйся, Иннокентие, святый угодниче Спаса Христа.


Кондак 6
     Богопроповедников Христовых апостолов труды на ся подъем, оных наследовал еси подвиги и лишения, скорби и озлобления: но вся ради Христа и Евангелиа доблественно понесл еси, и вся ны, не точию благодушствующыя, но и скорбящыя, научил еси пети Богу: Аллилуиа.


Икос 6
     Возсияла есть паче солнца, во огни искушений и скорбей очищенная, душа твоя, доблественный подвижниче Христов: аще бо в немощех и болезнех претруждено бяше тело твое, но духом присно сый бодр, выну побеждал еси враги Христовы Церкве. Сего ради и мы, тобою в скорбех утешаеми, победная ти сице вопием:
     Радуйся, воине Христов, во всеоружии Божии противу начал и властей и миродержителей тмы века сего подвизавыйся.
     Радуйся, истиною аки поясом препоясанный, языков шатания разрушивый.
     Радуйся, правдою аки в броня оболченный, вся наветник клеветы недейственны сотворивый
     Радуйся, нозе во благовествование мира обувенне имевый, главу древняго змия поправый.
     Радуйся, верою аки щитом покровенный, вся разжженныя лукаваго стрелы угасивый.
     Радуйся, шлем спасения и меч духовный восприявый, и вся враги, аки воевода возбранный, низложивый.
     Радуйся, Иннокентие, святый угодниче Спаса Христа.


Кондак 7
     Хотяй милосердый Господь не точию пастве Иркутстей, но и всякому ближнему же и дальнему тя даровати в скорбех утешителя, в бедах скораго помощника и от болезней целителя, ускори тя разрешити от уз сея бренныя плоти, да по всем градом и весем чудесы и исцеленьми Бога прославиши и вся Ему воздвигнеши пети: Аллилуиа.


Икос 7
     К новому и нестареющемуся на небесех жительству уготовляя твой восход, писанием со одра болезни всесмиренно просил еси иереи града Иркутска со христианы православными, да воспоют во храмех Богородице параклисис: мы же, зряще тя по преставлении прославлена Богом, к тебе самому сице взываем:
     Радуйся, ратоборче Христов, подвигом добрым подвизавыйся.
     Радуйся, быстротекущий орле, течение твое в превыспренних селениих скончавый.
     Радуйся, воине Царя Небеснаго, вся обеты Христу Царю и Богу нашему верно соблюдый.
     Радуйся, яко прочее уже венец правды тебе соблюдеся.
     Радуйся, по преселении во обители Отца Небеснаго не оставляяй посещати наш град и обитель сию.
     Радуйся, теплый о на молитвенниче, не престающь о нас у Престола Царя Небеснаго ходатайствовати.
     Радуйся, Иннокентие, святый угодниче Спаса Христа.


Кондак 8
     Странное всем чудо показася, егда древяная церковь, под еяже олтарем почивал еси от трудов сего временнаго жития, посреде всея обители запаления, яко древняя купина, огнем опаляема не сгараше. Чтущии же память твою, яве уразумевше, яко твоих ради мощей совершается сие чудо, со страхом и радостию, хранящему тя Богу, множицею взываху: Аллилуиа.


Икос 8
     Вси людие, притекшии во обитель твою и церковь, в нейже почиваху мощи твоя, огнем опаляему видяще, приступивше ко архипастырю, тепле его моляху, да изнесут раку святых мощей твоих: он же, духом веры исполнь, надеждею сохранения от огня не точию мощей твоих, но и всея церкве, всех ободряше. Людие же, сбытие словес архипастыря абие узревше, благодарными ти гласы, чудотворче, воззваша:
     Радуйся, светильниче Церкве, из-под спуда паче блистания огненнаго возсиявый.
     Радуйся, несгаранием хранилища мощей твоих, о нетлении их преславно провозвестивый.
     Радуйся, таковым знамением о твоем с нами сопребывании удостоверивый.
     Радуйся, церкве сохранением, в тебе от бед заступника нам открывый.
     Радуйся, и града нашего, посреде запалений огненных, многажды удоборазумеваемый хранителю.
     Радуйся, наипаче о избавлении нас от огня геенскаго присный наш пред Господем ходатаю.
     Радуйся, Иннокентие, святый угодниче Спаса Христа.


Кондак 9
     Вси лицы ангелов даша славу, честь и благодарение Седящему на Престоле, живущему во веки веков Богу и Агнцу, егда, убеленная светлостию непорочности, душа твоя, святителю Христов Иннокентие, вознесеся на небо, в сожительство ангелов. Мы же, прославлением на земли святых мощей твоих уверившеся о твоей на небесех славе, с веселием прославльшему тя Богу присно взываем песнь: Аллилуиа.


Икос 9
     Ветиям любомудрым на сердце не взыдоша, яже ти, Христов угодниче, уготова Госпоь во обителех небесных. Мы же, празднующе твое на небеси прославление, сице тя на земли ублажающе зовем:
     Радуйся, многу на небесех, многообразнаго ради на земли служения, мзду восприемый.
     Радуйся, девственниче, в первенцы Богу и Агнцу вписаный.
     Радуйся, страдальче, вкупе со пришедшими от скорби велия, в ризах белых пред престолом спасение и славу воспеваяй.
     Радуйся, апостоле языков, престолом апоcтольским на небеси почтенный.
     Радуйся, пастырю научивый и сотворивый, и сего ради велиим во Царствии Небеснем от Христа нареченный.
     Радуйся, воеводо возбранный, соседения Победителю ада и смерти на престоле сподобивыйся.
     Радуйся, Иннокентие, святый угодниче Спаса Христа.


Кондак 10
     Спасения посреде земли соделавый, Человеколюбец Господь посети страну Сибирскую своею милостию и щедротами: в раце бо мощей твоих, великий угодниче Христов, открыл есть нам знамение твоего теплаго о нас на небеси ходатайства, егоже сподобляеми вси благовернии людие страны Сибирския, единеми усты и сердцем поют Богу: Аллилуиа.


Икос 10
     Стена еси необоримая, заступниче наш, граду и стране сей от нахождений всяких зол и скорбей: явлением бо чудес твоих уверихомся, яко велие стяжал еси дерзновение у Господа. Сего ради сице зовем ти:
     Радуйся, страны Сибирския богодарованный хранителю и заступниче, ходатаю и помощниче.
     Радуйся, яко вкупе со ангелы послан еси во служение за хотящих наследовати спасение, и всем страждущым неоскудное подаеши утешение.
     Радуйся, драгоценное нам в раце мощей твоих наследие оставивый.
     Радуйся, яко во обители Вознесенстей всех притекающих к тебе сретаеши с любовию.
     Радуйся, и на всяком месте тя с верою призывающым скорый помощник являяйся.
     Радуйся, и не ищущым тя, ниже ведущым, яко добрый наставник, врач же и покровитель многажды познаваемый.
     Радуйся, Иннокентие, святый угодниче Спаса Христа.


Кондак 11
     Пение всякое не довлеет к прославлению чудес твоих, чудотворче предивный, имиже не точию верныя, но и неверныя удивляеши: веруем же и надеемся, яко твоими молитвами и во мраце идолослужения сущии из тмы и сени смертныя изыдут и с нами купно прославльшему тя Богу воззовут: Аллилуиа.


Икос 11
     Светильник не поставляется под спудом, но на свещник возлагается, да входящии видят свет: сего ради и твоя святыя мощи изведе из-под спуда Господь, яко да входящии во обитель твою, от сего чуднаго света верою просвещаеми и исцеления от тебе приемлюще, взываем к тебе сице:
     Радуйся, наставниче премудрый, мысли благи и хотения свята на сердце полагаяй.
     Радуйся, вождю благонадежный, на путь спасения направляяй.
     Радуйся, пред Престолом Царя Небеснаго о спасении душ наших ходатайствуяй.
     Радуйся, скорый помощниче, от нахождения зол и скорбей сохраняяй.
     Радуйся, врачу сострадательный, от болезней душевных же и телесных свобождаяй.
     Радуйся, оставленных врачми от одра смерти воздвизаяй.
     Радуйся, Иннокентие, святый угониче Спаса Христа.


Кондак 12
     Благодатиею Божиею исполнена тя познавше не точию близ сущии, но и во странах дальних обитающии, с верою притекают к раце мощей твоих: ты же, внемля их молением, не престани напутствовати всех дары исцелений и чудес твоих, да от восток солнца до запад вси воспоют чудодействующему Богу: Аллилуиа.


Икос 12
     Поюще чудеса твоя, имиже по преставлении, паче же по обретении святых мощей твоих, Бога прославил еси, благодарно тебе сице зовем:
     Радуйся, жилами разслабленныя со одра болезни возставивый.
     Радуйся, сокрушением ног и рук страждущыя, аки николиже страдавшыя устроивый.
     Радуйся, струпами покрытыя и ранами уязвленныя целы и здравы соделавый.
     Радуйся, зрение слепым возвративый и изумленныя на здравый смысл наставивый.
     Радуйся, во отчаянии живота к смерти уготовляемыя к жизни паки возвративый.
     Радуйся, ни единей же болезни ко исцелению тебе быти неудобней, чудес множеством засвидетельствовавый.
     Радуйся, Иннокентие, святый угодниче Спаса Христа.


Кондак 13
     О великий Христов угодниче, милостивый наш наставниче, благоутробия сокровище, правоверия учителю, архиереев похвало, безпомощных заступниче, отче наш Иннокентие! Моли Христа Бога, да сподобит нас земное поприще без порока прейти и егда, яко Праведный Судия, со ангелы своими во славе приидет судити живых и мертвых, да не отлучит нас от сонма спасаемых, но да сотворит нас причастники Царства Небеснаго, во еже тамо вкупе с тобою, отцем нашим, выну славити его и воспевати Ему со Отцем и Святым Духом во веки веков: Аллилуиа.

Этот кондак читается трижды, затем икос 1-й и кондак 1-й

Молитва святителю Иннокентию, Иркутскому чудотворцу
     О велиий Христов угодниче, святителю отче Иннокентие! Услыши нас, тебе молящихся. Ты веси наша скорби и недуги, слышиши воздыхания множества к тебе притекающих; сего ради к тебе, яко отцу нашему, скорому помощнику и теплому молитвеннику, зовем: не остави нас твоим у Бога ходатайством. Мы присно заблуждаемся от пути спасения — руководи нас, милостивый наш наставниче. Мы немощнии в вере — утверди нас, правоверия учителю. Мы зело убози сотворихомся добрых дел — обогати нас, благоутробия сокровище. Мы присно наветуеми есмы от враг видимых и невидимых и озлобляеми — помози нам, безпомощных заступниче. Гнев Божий, праведно движимый на ны за беззакония наша, отврати от нас твоим ходатайством у Престола Судии Бога, Емуже ты предстоиши на небеси, отче иерарше, архиереев похвало. Услыши, молим тя, великий Христов угодниче, и зде с молением тебе предстоящыя, и вся, на всяком месте тебе с верою призывающыя: и испроси молитвами твоими у Отца Небеснаго всем нам прощение грехов наших и от бед избавление. Ты бо еси свидетельствованный безчисленными чудесы помощник, заступник и молитвенник, и о тебе славу возсылаем Отцу и Сыну и Святому Духу, и ныне и присно, и во веки веков. Аминь.


Молитва иная
     Святче Божий, пастырю добрый, делателю верный винограда Христова, святителю отче Иннокентие! Призри на град сей и на люди сия! Моли Христа Бога, да сохранит паству твою от волков, губящих ю; да ниспослет Духа Своего Святаго во еже умудрити нас ходити пред Ним во всяком благочестии и чистоте во вся дни живота нашего, да славословяще Имя Его Всесвятое во дни и в нощи, сподобимся быти наследницы жизни вечныя, и прославим Отца, и Сына, и Святаго Духа, ныне и присно и во веки веков. Аминь.


Тропарь святителю Иннокентию Иркутскому
Тропарь, глас 3:
     Светильниче Церкве пресветлый, озаривый лучами доброт твоих страну сию и исцеленьми многими притекающих к тебе с верою Бога прославивый, молим тя, святителю отче Иннокентие, ограждай молитвами твоими град сей от всех бед и печали.


Кондак, глас 4:
     Непорочности соименнаго пастыря, проповедника веры в языцех Монгольских, славу и украшение Иркутския паствы, любовию восхвалим вси вернии: той бо есть хранитель Страны Сибирския и молитвенник о душах нашых.


Величание
     Величаем тя, святителю отче Иннокентие и чтим святую память твою, ты бо молиши о нас Христа Бога нашего.


Память 26 ноября/9 декабря, 9/22 февраля, 10/23 июня (Собор Сибирских святых), 10/23 октября (Собор Волынских святых.)[/spoiler]

[Раб божий Константин]

Акафист иже во святых отцу нашему Иннокентию, епископу Пензенскому и Саратовскому, чудотворцу.
[spoiler]Кондак 1

Избранный угодниче Христов и дивный благочестия подвижниче, святителю отче Иннокентие, восхваляем тя яко Православия поборника и пагубных обычаев искоренителя. Ты же, имеяй дерзновение ко прославльшему тя Господу, даровавшему нам в тебе новаго великаго молитвенника и скораго в бедах помощника, моли о пастве твоей, зовущей: Радуйся, святителю отче Иннокентие, теплый молитвенниче о душах наших.

Икос 1

Ангельским смирением украсив житие свое, человеков богомудренный наставник был еси, святителю отче Иннокентие, от юности возлюбил еси Божественную Премудрость, Ей же храм преукрашенный явился еси. Духом Святым освящен, всех учения лучами просвещая, сего ради тебе, на небеси и на земли прославленному, благодарне во умилении вопием сице:

Радуйся, смирением на гору добродетелей возведенный;

радуйся, оным ко Ангельским ликом на Небеси причтенный.

Радуйся, Церкви Православныя пастырю предобрый;

радуйся, пастве своей от волков губительных защитниче неустрашимый.

Радуйся, целомудрия ревнителю изящный;

радуйся, образе кротости драгоценный.

Радуйся, проповедниче велеречивый;

радуйся, Архиерею Божий незлобивый.

Радуйся, пензенския паствы удобрение;

радуйся, града Саратова утверждение.

Радуйся, святителю отче Иннокентие, теплый молитвенниче о душах наших.

Кондак 2

Видев, святителю отче Иннокентие, яко Вера Православная во Отечестве нашем попирается от лжеучителей инославных, потщался еси вседушно Христу послужити и веру истинную от ересей оградити, паству же от волков, расхищающих ю, защитити. Мы же, дивящеся таковому твоему дерзновению, вопием укрепльшему тя Господу: Аллилуиа.

Икос 2

Разум Божественный имея, весь измлада Христу послужил еси, временныя сласти во уметы вменяя, того ради благодатию Архиерейства увенча тя Господь. Таковое убо изволение твое воспевающе, вопием ти сице:

Радуйся, путь правый избравший;

радуйся, им же неотступно шествовал еси.

Радуйся, вся красная мира презревший;

радуйся, душу свою добродетельми просветивший.

Радуйся, сердце твое Христу отверсто имевый;

радуйся, страстем входы его затворивый.

Радуйся, иноче, послушания вся неленостно прошедый;

радуйся, священниче, со страхом Божиим Жертву Безкровную приносивый.

Радуйся, монахом правило изящнейшее;

радуйся, священником образе благоговейнейший.

Радуйся, всем подвизающимся добрый наставниче;

радуйся, всех нас ко спасению направляяй.

Радуйся, святителю отче Иннокентие, теплый молитвенниче о душах наших.

Кондак 3

Силою свыше облече тя Господь, ты же, святителю отче Иннокентие, взем крест свой, невозвратно Ему последовал еси, и уведев, яко иго Христово благо и бремя Его легко есть, воспел Милосердному Богу: Аллилуиа.

Икос 3

Гласу Апостола Павла внимая, истинным служителем Алтаря Господня явился еси, егоже слова на скрижалех сердца твоего начертал еси, и нас послушанию научи, вопиющих ти таковая:

Радуйся, учениче истинный Христов;

радуйся, яко чистотою Ангелом уподобился еси.

Радуйся, в благовестии Апостолом подобный;

радуйся, яко во учении древлим отцем подражал еси.

Радуйся, даром прозрения почтенный;

радуйся, исповедниче неустрашимый.

Радуйся, подвижниче, великим преподобным равный;

радуйся, яко непрестанно Господу в молитвах воздыхал еси.

Радуйся, яко милостыню творити николиже преставал еси;

радуйся, яко на каждый час жития своего память смертную имел еси.

Радуйся, благолепия храмов Божиих ревнителю;

радуйся, яко сам храм Господу явился еси.

Радуйся, святителю отче Иннокентие, теплый молитвенниче о душах наших.

Кондак 4

Великому святителю Ростовскому Димитрию не токмо ликом подобен был еси, но и делами равен сему явился еси: просвещая маловерных, верных же укрепляя, нас же всех поучая вопити Милосердному Богу: Аллилуиа.

Икос 4

«Се Жених грядет в полунощи», тако воспел еси, благодать Архиерейства прияв, блаженне не рабе, но друже Христов Иннокентие, и Господа сретил душею, любовию горящею, и нас в любви Божественней укрепи, зовущих ти таковая:

Радуйся, яко Сила Божия совершися в немощнем телеси твоем;

радуйся, яко вси недузи со смирением переносил еси.

Радуйся, клеветы и осуждения яко младенец незлобивый принимавший;

радуйся, яко во обличении нечестия на лица не взиравший.

Радуйся, нищих и сирых питателю изобильный;

радуйся, обиженных защитниче любвеобильный.

Радуйся, обидящих многомудренное обличение;

радуйся, учителю, паству ти вверенную, ко спасению наставляяй.

Радуйся, уныние силою упования на Милосердие Божие победивый;

радуйся, с кротостью и смирением и от простых поучения принимавый.

Радуйся, вся козни вражия силою Божиею поправый;

радуйся, Богу славно угодивый.

Радуйся, святителю отче Иннокентие, теплый молитвенниче о душах наших.

Кондак 5

«Возвеличим Господа со мною и вознесем Имя Его вкупе», тако паству Саратовскую в проповеди призывал еси, ныне же мы с тобою вкупе вопием Живодавцу Богу: Аллилуиа.

Икос 5

Непрестанно в келлии колена преклоняя, «Боже, милостив буди мне грешному», взывал еси, и нам милостива сотвори Владыку Небеси и земли, тебе вопиющим таковая:

Радуйся, Имя Господа нашего яко пламенное оружие противу козней диавольских имевый;

радуйся, Онаго силу, яко драгоценный бисер, вся земная оставив, купивый.

Радуйся, силою молитв твоих вся наветы вражия разрушивый;

радуйся, благочестия столпе, на камене спасительныя веры возведенный.

Радуйся, подвигом своим терпеливо научивый чад своих;

радуйся, всего себе в руки Божии предавый.

Радуйся, все желание ко Христу имевый;

радуйся, в Бозе нашем намерение свое полагавый.

Радуйся, яко Христу сораспялся еси;

радуйся, яко сладость, лицем к лицу зрети Его, ныне вкушаеши.

Радуйся, молитвенниче наш неусыпный;

радуйся, светильниче веры неугасимый.

Радуйся, святителю отче Иннокентие, теплый молитвенниче о душах наших.

Кондак 6

Дивным видением укрепи тя Господь при кончине суща земнаго жития твоего: Ангели Божии прияша тя с собою и в небесныя обители вознесоша, идеже ты поеши ныне: Аллилуиа.

Икос 6

Дух свой Богу предал еси при словах Псалмопевца: «Аз же, Господи, уповаю на Тя», и нас во уповании сем светлем укрепи, поющих ти таковая:

Радуйся, Ангелы на Небо вознесенный;

радуйся, небесныя радости еще на земли вкусивший.

Радуйся, яко пред тобою Небеса отверзошася;

радуйся, яко Господь в Небесныя обители всели тя.

Радуйся, до кончины жития твоего о пастве твоей попечение имевый;

радуйся, яко и немощи телесныя твоему чадолюбию не возбраниша.

Радуйся, яко Духом Святым, возходя от силы в силу, Небеснаго Царствия достигл еси;

радуйся, яко тамо ныне со святыми ликовствуеши.

Радуйся, яко и нас грешных на земли не оставляеши;

радуйся, яко духом нам соприсутствуеши.

Радуйся, молитвами нам помогающий;

радуйся, яко любы твоя никакоже оскуде на нас.

Радуйся, святителю отче Иннокентие, теплый молитвенниче о душах наших.

Кондак 7

Хотя просветити всех ведением неизреченных Судеб Божиих, дивный списатель дел минувших был еси, в них же премудрый Промысел Создателя, вся племена и языки ко спасению ведущий, всем указал еси. Тем же и мы Щедрому Богу покланяемся и вопием: Аллилуиа.

Икос 7

Новаго тя чудотворца и молитвенника во времена последняя дарова нам Человеколюбец Господь, егда за умножение беззакония оскуде во многих любовь. Твоего предстательства, аще и недостойни, но на всепокрывающую любовь твою надеющеся, о нас просим: не остави нас в годину лютых испытаний, укрепляя молитвами твоими вопиющих ти таковая:

Радуйся, яко молитвами твоими землю нашу облагоухал еси;

радуйся, яко подвиги твоими край наш освятил еси.

Радуйся, о пастве твоей предстателю неусыпный;

радуйся, помощниче наш во всяких бедах и напастех.

Радуйся, списателю Судеб Божиих пречудный;

радуйся, ими вся ны наставивый.

Радуйся, проповедниче велегласный;

радуйся, делателю вертограда Христова премудрый.

Радуйся, верный и благий воине Царя Небеснаго;

радуйся, цевнице духовная, Славу Божию бряцающая.

Радуйся, Архиереев Богодохновенное украшение;

радуйся, благочестия твердое ограждение.

Радуйся, святителю отче Иннокентие, теплый молитвенниче о душах наших.

Кондак 8

Странное и преславное чудо является всем, егда честныя и многоцелебныя мощи твоя, аще и от безбожников поругани беша, обретеся паки, к сим припадаем и Богу вопием: Аллилуиа.

Икос 8

Весь еси в вышних, но и нас, долу поверженных, не оставляеши, святителю отче Иннокентие, моления наша слышиши и скоро исполняеши и всегда неотступен пребуди нам, вопиющих ти таковая:

Радуйся, яко всех прибегающих к тебе заступаеши;

радуйся, яко мощи твоя врачевания источают.

Радуйся, яко моления наша слышиши;

радуйся, яко во благо их исполняеши.

Радуйся, яко нетлением мощей твоих Ангелов возвеселил еси;

радуйся, яко мощей твоих беси трепещут.

Радуйся, яко нас, грехми омраченных, просветил еси;

радуйся, яко смрад страстей наших отгнал еси.

Радуйся, яко талант, данный тебе Богом, умножил еси;

радуйся, яко в радость Господа твоего вшел еси.

Радуйся, яко нас пред Престолом Божиим непрестанно поминаеши;

радуйся, яко в благодатных сониях и видениях нас посещаеши.

Радуйся, святителю отче Иннокентие, теплый молитвенниче о душах наших.

Кондак 9

Вси православнии возрадовахуся, егда на Соборе святительстем в лето двухтысящное от Рождества Христова в лице святых Церковь Православная прослави тя. Мы же, имуще таковаго молитвенника, вопием возвеличившему тя Богу: Аллилуиа.

Икос 9

Витии суемудренные, тобою посрамленные, недоумеют что глаголати. Ты же, силою Божиею укрепляемь, всех дерзновенно обличил еси. Мы же, взирающе на праведное житие твое и на твердое Веры Православныя исповедание, вопием ти таковая:

Радуйся, Христом Богом возлюбленный;

радуйся, силою свыше облеченный.

Радуйся, научение книжное возлюбивый;

радуйся, тому усердно прилежавый.

Радуйся, разум Божественный стяжавый;

радуйся, яко Слово Божие умудри тя.

Радуйся, преданий Апостольских верный блюстителю;

радуйся, Правды Божией ревностный хранителю.

Радуйся, просвещенный благодатию;

радуйся, учителю златословесный.

Радуйся, изгнанный правды Христовой ради;

радуйся, яко твое есть Царствие Небесное.

Радуйся, святителю отче Иннокентие, теплый молитвенниче о душах наших.

Кондак 10

Спасти хотя паству твою от ересей и соблазнов, скверная учения беззаконных обличил еси, преславне отче Иннокентие, Православие кротостию премудрых словес твоих утвердил еси и научил еси стадо твое Богоугодно воспевати: Аллилуиа.

Икос 10

Стена твердая и ограда необоримая бысть сила молитв твоих, Богоносе отче Иннокентие, сего ради и мы, паства твоя, к тебе с верою прибегаем и усердно молим: буди нам ограждение крепкое и оружие враги прогоняющее, да не возрадуются хотящии нам злая. Мы же, имея таковаго Богодарованнаго помощника и заступника, в веселии вопием ти таковая:

Радуйся, добрый паствы твоея первосвятителю;

радуйся, сомневающихся крепкое в вере утверждение.

Радуйся, злобу власть придержащих кротко претерпевый;

радуйся, истину небоязненно им вещавый.

Радуйся, гонения и притеснения правды ради смиренно приявый;

радуйся, у благочестивых чад своих пристанище имевый.

Радуйся, яко тобою от всех зол избавляемся;

радуйся, яко твоими молитвами ревности в Православней Вере исполняемся.

Радуйся, яко тобою истина утверждается;

радуйся, яко тобою лицеприятие и человекоугодничество посрамляется.

Радуйся, яко пресекл еси злочестивых волнение;

радуйся, людем пензенским и саратовским похваление.

Радуйся, святителю отче Иннокентие, теплый молитвенниче о душах наших.

Кондак 11

Пение похвальное приносим тебе, святителю отче Иннокентие, и смиренно тя молим: моли о нас Человеколюбца Бога, да не отвратит Лица Своего от нас, присно согрешающих и благость Его на всяк час преогорчевающих, но да твоим заступлением избавит нас от грехов и прегрешений наших, наипаче же сподобит в час кончины нашея покаяния и Божественных Таин причастия, да таковых приобщившеся, сподобимся с тобою в Небесных обителех воспети Богу: Аллилуиа.

Икос 11

Светильник, во тме неверия седящих просвещающий, был еси в земнем житии твоем, отче наш Иннокентие. Просвети убо молитвами твоими и нас, в пучине греха погибающих, да благодарне вопием тебе сице:

Радуйся, смирения и терпения нам наставниче премудрый;

радуйся, в молитвах и бдениях наш учителю предобрый.

Радуйся, яко ты от суесловия и суемудрия нас отвращаеши;

радуйся, яко ты в добродетели нас наставляеши.

Радуйся, яко ты в суете мирстей и попечениях житейских погрязшим путь к Горним указуеши;

радуйся, яко ты нас, обремененных грехми и скорбьми многими, никогдаже оставляеши.

Радуйся, истинный учениче Христов, нас сирых возлюбивший;

радуйся, гордых и жестоковыйных смиривший.

Радуйся, яко всех почитающих тя от напастей и зол сохраняеши;

радуйся, яко ты всех скорбящих и болезнующих, к заступлению твоему притекающих, утешаеши.

Радуйся, светильниче, нас потемненных грехми с любовию освещающий;

радуйся, миро, нас оскверненных беззакониями смрадными облагоухающее.

Радуйся, святителю отче Иннокентие, теплый молитвенниче о душах наших.

Кондак 12

Благодати сосуд избранный был еси, святителю отче Иннокентие, возхваляюще тя усердно, молим: пролей теплую молитву ко Всевышнему за Православное Отечество наше, да избавимся от нашествия иноплеменных и междоусобных браней и да изриновены будут лжеучителие и еретицы инославнии, по грехам нашим умножившияся ныне и ищущие како православных уловити. Мы же в мире и тишине воспоем Христу Богу: Аллилуиа.

Икос 12

Поюще славное твое к Небесным обителем возхождение, святителю отче Иннокентие, прославляем равноангельное житие твое и во умилении сердца славим, хвалим и величаем возвеличившаго тя Господа, даровавшаго нам новаго молитвенника и предстателя, Егоже умоли спастися всех, поющих ти таковая:

Радуйся, житием своим Ангелов удививый;

радуйся, подвигами своими человеков наставивый.

Радуйся, нищетою духовною сокровище Царствия Божия обретый;

радуйся, плачем и скорбьми временными утешения вечнаго сподобивыйся.

Радуйся, кротостию своею землю правых наследивший;

радуйся, правды на земли алкавший, на Небесах же Правдою Божиею насыщенный.

Радуйся, милостию и нищелюбием милость велию от Господа стяжавший;

радуйся, очистивший очи сердца своего от скверны греха и Бога узревший.

Радуйся, миротворения ради сыном Божиим нареченный;

радуйся, изгнанный правды ради и в Небесныя обители со славою приятый.

Радуйся, поношения и неправедныя гонения Христа ради претерпевый и многу мзду на Небесех получивый;

радуйся, яко мощей твоих рака бывает нам источник исцелений и утешений, обильно преизливающийся.

Радуйся, святителю отче Иннокентие, теплый молитвенниче о душах наших.

Кондак 13

О преславный святителю Христов Иннокентие! Приими от нас сие малое моление, в похвалу тебе приносимое, и избави нас предстательством твоим от многих бед и скорбей, да в житии сем временнем сетей вражиих и прелести бесовския избавльшеся, воздушныя мытарства непреткновенно минуя, в Небесный Иерусалим вселитися сподобимся, и тамо с тобою Всеблагому Богу нашему воспоем: Аллилуиа, аллилуиа, аллилуиа.

Сей Кондак глаголи трижды, и паки Икос 1: Ангельским смирением: и Кондак 1: Избранный угодниче Христов:

Молитва Спасителю

Боже великий и сильный, Боже Святый и во святых почиваяй! Се ныне мы раби недостойнии, колена сердец наших в страсе и умилении приклоньше подножию величествия Твоего, припадаем и не дерзая воззрети на высоту Небесную, смиренно милости Твоея безмерныя чаем. Веси, Господи, яко недостойни есмы, но на молитву к Тебе ныне воздвизаем дивнаго угодника Твоего Иннокентия, чудотворца новоявленнаго, иже воистину бе муж по сердцу Твоему. Ты рекл еси, Господи, пречистыми устне Твоими, яко ради и десятих праведных не погубиши града нечестивых. Умилосердися, Владыко Святый, и ниневитяном, согрешшим Тебе, спасения иский, и ныне на нас, непотребных и премного согрешших рабех Твоих, и приими в умилостивление молитвы сего пречуднаго святителя Твоего, с ним же и всех святых Твоих, прославленных в двухтысящное лето преславнаго Воплощения Твоего, ходатайствуют бо сии пред Тобою о нас, чадех и сродницех их, многа бо любовь их, многое и дерзновение пред Лицем Твоим. Многими грехми помрачися естество наше, осквернихом души и телеса своя по действу исконнаго человекоубийцы и противника Твоего, но тем паче припадаем благости Твоей, на милосердие Твое токмо надеющися. Усердно же просим и великаго ходатая нашего и теплаго в бедах нам предстателя Иннокентия, неповиннаго воистину в очах Твоих, да пролиет и свою многомощную молитву пред Тобою, Отцем Светов. Не взирай убо на грехи наша, Боже Превечный, но призри на веру и надеяние наши и предстательство угодника Твоего Иннокентия, и очисти ны от скверн наших. Яко да слезами покаяния и действом благодати Твоея очищени, возможем внити в светлый оный и прекрасный чертог, егоже уготовал еси любящим Тя, и тамо купно со святителем Иннокентием возможем воспевати Пречестное и Великолепое Имя Твое, Отца и Сына и Святаго Духа, в безконечныя веки веков. Аминь.[/spoiler]

[Раб божий Константин]

Акафист святым и праведным Богоотцем Иоакиму и Анне.
[spoiler]Кондак 1

Избраннии от человеческаго рода прародителие Христовы, рождшии Преблагословенную Богоотроковицу, из Неяже по плоти сын Божий родися, святии и праведнии Богоотцы Иоакиме и Анно! Яко имущии дерзновение велие ко Христу Богу, и выну предстоящии престолу Его небесному, Тому прилежно молитеся от бед нам избавитися, да выну зовем вам: Радуйтеся, святии и праведнии Богоотцы Иоакиме и Анно.

Икос 1

Ангел предстатель послан бысть к вам от Бога, святии и праведнии Богоотцы Иоакиме и Анно, егда о безплодии своем ов убо в пустыни, ова же в саду своем сетовасте, к Богу молитву возносяще; и тако благовестие радостное принесе безплотный, яко родити имате Дщерь Преблагословенную, о Нейже возблагословится весь род человеческий, с ним же и мы вам радостное приносим хваление: Радуйтеся, корене Давидова святопроцветшия розги винограда животнаго; Радуйтеся, рождшии Дщерь, от всех родов преблагословенную. Радуйтеся, воплощшагося Сына Божия прародителие всечестнии; Радуйтеся, таинства от века утаеннаго проявителие всеизряднии; Радуйтеся, Утехи Израилевы ближайшии по плоти сродницы; Радуйтеся, обетованнаго миру Спасителя единокровнии южицы. Радуйтеся, святии и праведнии Богоотцы Иоакиме и Анно.

Кондак 2

Видев себе святый Иоаким, во храме Иерусалимстем безплодия ради от архиерея уничиженна, зело опечалися, и в горести души своея в пустыню к своим стадом удалися, и тамо со многими слезами тепле ко Господу моляшеся, да сподобит его отцем своему чаду нарещися, и тако к молитве же пост прилагаше, и в сокрушении сердца Вседержителю Богу взываше: Аллилуиа.

Икос 2

Силу горести мужа своего святая Анна уведевши, в дому своем седящи, горце плакася и моляшеся ко Господу, да поношение безплодия от нея отъимет. Мы же, толикое терпение праведных поминающе, воззовем: Радуйтеся, Богоизбранная двоице, Единому от Троицы Матерь по плоти породившая. Радуйтеся, Зиждителю вашемy Родительницу непорочную произведшии. Радуйтеся, супрузи благословеннии, Преблагословенную в женах Дщерь. воспитавшии; Радуйтеся, в безплодии вашем от Господа услышаннии. Радуйтеся, яко слезныя молитвы ваша проникоша небо и во ушию Бога Израилева достигоша; Радуйтеся, яко поношение ваше временное во славу вечную на небеси и на земли изменися. Радуйтеся, святии и праведнии Богоотцы Иоакиме и Анно.

Кондак 3

Силою Божиею преисполнен, явися ангел Господень святому Иоакиму в пустыни и рече ему: услыша Бог молитву твою и изволи дати тебе благодать Свою, се бо жена твоя Анна зачнет, и породит тебе Дщерь, о Нейже всему миру будет радость: сия рек безплотный, повеле ему ко храму Иерусалимскому паки отъидти, идеже он супругу свою молящуся обрящет, с нею же вкупе да воспоет тамо хвалебную пecнь Богу израилеву: Аллилуиа.

Икос 3

Имущи скорбь велию в сердце своем, Анна святая, и в вертоград дома своего вшедши, виде гнездо птичье на древе сооружено, птенцы малыя в нем лежащыя, абие моления к молениям прилагати потщася, да сподобит ю Господь матерь чаду быти. И се явися ей ангел Господень глаголя: услышана есть молитва твоя и воздыхания твоя проидоша облаки, слезы же твоя пред Бога внидоша: се зачнеши и родиши Дщерь Преблагословенную, о Нейже возблагословятся вся колена земная, и Тою дастся спасение всему миру, наречется же имя Ей Мария; таковое ангельское всерадостное благовещение поминающе, воспоим Богоотцем таковая: Радуйтеся, супрузи праведнии, от Бога свыше предизбраннии; Радуйтеся, во всех заповедех Господних без порока ходившии. Радуйтеся, в скорби вашей временней утешение вечное получившии; Радуйтеся, паче чаяния вашего десницею Божиею превознесеннии. Радуйтеся, яко во смирении вашем и скорби, помяну вы Господь; Радуйтеся, яко сподобистеся прародителие Сыну Божию быти. Радуйтеся, святии и праведнии Богоотцы Иоакиме и Анно.

Кондак 4

Бурею сомнения Иоаким праведный содержим и о благовестии ему ангела недоумевая, абие во град Иерусалим отъиде, идеже пред враты храма святую Анну обрете, Господа вельми славословящую и радость ангельскаго явления и о чаде проречения ему возвещающу, тем же и о своем видении супружнице благовестив, вкупе с нею возопи ко Господу: Аллилуиа.

Икос 4

Слышавше сродницы и знаемии о преславном святыя Анны зачатии, Бога Израилева славляху, Анна же богомудрая, плод чрева своего на служение Богу обрече, теплое благодарение Господеви возношаше, мы же светло всеславное зачатие Богоотроковицы Марии воспевающе, Тоя святым родителем глаголем сице: Радуйтеся, радостнии нам грядущаго в мир Искупителя провозвестницы; Радуйтеся, присно поминаемии чаемаго Спасителя праотцы. Радуйтеся, чрез Дщерь вашу благословенную, Слову Божию плоть взаимодавшии; Радуйтеся, Бога воплощенна внука себе нарицающии. Радуйтеся, велией благочестия тайны достойнии служителие; Радуйтеся, Божия к человеком снисхождения всеизряднии посредницы. Радуйтеся, святии и праведнии Богоотцы Иоакиме и Анно.

Кондак 5

Богосветлую звезду явльшую солнце правды Христа Бога, Пресвятую Богородицу, плотию родити сподобистеся, и вожделенное имя Богоотцев приясте, Иоакиме и Анно всеблаженнии, о Еяже рождестве святем небо и земля возрадовашася, и весь род человеческий освятися, вопия дивному во святых Своих Богу Израилеву: Аллилуиа.

Икос 5

Видевше родители от них рождшуюся Богоотроковицу Марию, Зиждителеву же Матерь, яко кивоту Божию, благоговейно Той послужиша, темже и нас, к вам молитвенно припадающих, не отвратитесь, глаголющих: Радуйтеся, в рождестве Богоотроковицы Марии светло возликовавшии; Радуйтеся, видением Богоотроковицы услажденнии. Радуйтеся, слышанием Ея умиленнии; Радуйтеся, по сих от архиерея Божия благословеннии и ублаженнии. Радуйтеся, Агницу непорочную в дому своем добре упасшии; Радуйтеся, Агнца и Пастыря Матерь во Дщерь себе приемшии. Радуйтеся, святии и праведнии Богоотцы Иоакиме и Анно.

Кондак 6

Проповедницы чудес Божиих явистеся святии, егда обет свой Богови совершисте и трилетнюю Богоотроковицу Марию в храм Божий со славою введосте, да обитает тамо во Святая святых, о сих убо радостно Богу отец ваших славословия песнь воспевати потщастеся: Аллилуиа.

Икос 6

Возсия Богоотроковица яко луна полная в честнем Своем в храм Господень вхождении, Еяже чистоте ангелы удивляхуся, и архиерей Божий Захария прием Ю от рук ваших, святии Иоакиме и Анно, во внутренняя Святая святых с честию введе, яко воистину одушевленный Божий Кивот, вас же по достоянию ублажи хваленьми таковыми: Радуйтеся, радость всемирную роду человеческому породившии; Радуйтеся, виновницу человеческаго обновления воспитавшии. Радуйтеся, в храм Господень Кивот одушевленный Божий приведшии; Радуйтеся, Дщерь вашу святую, во Святая святых вместившии. Радуйтеся, Богу воплотитися хотящему сродницы являющиися; Радуйтеся, ангелом собеседницы бывшии. Радуйтеся, святии и праведнии Богоотцы Иоакиме и Анно.

Кондак 7

Желание души твоея исполнив, и обет твой Богови воздав, Иоакиме преблаженне, в старости добрей свято и праведно жизнь земную о Господе скончал еси. Темже ныне Тому и о нас сотвори молитву, да благую, мирную и непостыдную кончину получити сподобимся, зовуще Ему: Аллилуиа.

Икос 7

Новое и богоугодное житие во вдовстве твоем Анно святая, провождала еси, у храма Божия приметающися и Святей и Преблагословенней Дщери твоей сослужащи, темже яко истинную и богоугодную вдовицу, Христову же прабабу тя восхваляем, вкупе же и мужа твоего, богоотца Иоакима, усердно чествуем и с любовию песни таковыя вам приносим: Радуйтеся, праведницы, ихже правда яко солнце сияет во веки; Радуйтеся, ангелом друзи, сожителие святым и приснии Богу. Радуйтеся, ближнии небеснаго престола предстоятелие; Радуйтеся, дерзновение велие ко Христу Богу имущии. Радуйтеся, Церкве на небеси торжествующия украшение; Радуйтеся, Церкве воинствующия на земли доброе заступление. Радуйтеся, святии и праведнии Богоотцы Иоакиме и Анно.

Кондак 8

Странствие земное совершив, святая и праведная Анно, на руках пребожественныя твоея Дщери, Богородицы Марии, сном смертным почила еси и к Богу со упованием преставилася еси, темже святое успение твое славяще, молим тя, о богопраматерь всечестная, да егда и мы сном смертным усыпати начнем, умоли Спаса Христа, кротко душу нашу от тела отделити и бесовския власти ю избавити, спасения же вечнаго нас удостоити, да зовем Ему в радости святых: Аллилуиа.

Икос 8

Весь мир христианский блажит вас по достоянию, святии и праведнии Богоотцы Иоакиме и Анно, и молитвенно ваша честная имена прославляет, Церковь же Христова светло память вашу празднует и песни хвалебныя вам приносит сице: Радуйтеся, светильницы, мрак душ наших благодатно озаряющии; Радуйтеся, от горних высот славы вашея к земнородным милостиво проницающии. Радуйтеся, Богородице Марии сомолитвенницы всегдашнии; Радуйтеся, Христа Бога умилостивителие многомощнии. Радуйтеся, любовь и веру к вам имущих от всяких бед спасающии; Радуйтеся, молитвенно на помощь вас призывающих от напрасныя и наглыя смерти избавляющии. Радуйтеся, святии и праведнии Богоотцы Иоакиме и Анно.

Кондак 9

Вси ангели Божии и лицы святых Божиих на небеси вас, святии и праведнии богоотцы Иоакиме и Анно, целуют, роди же человечестии на земли молитвенными песньми вас похваляют и о предстательстве вашем благодарно вопиют Богу: Аллилуиа.

Икос 9

Ветийства наша не довлеют к достойной вам похвале, святии прародителие Христовы: обаче вы, милостивы суще, и наша убогая хваления не отвратите, но будите о нас теплии предстатели и молитвенницы ко Господу, вашими святыми молитвами скудость душ наших восполняюще, да благодарственне вам зовем: Радуйтеся, радости и славы вечныя вожделении нам ходатаи; Радуйтеся, благ временных и вечных усерднии нам пред Господем ходатаи. Радуйтеся, от смертоносныя язвы предстательством вашим верныя сохраняющии; Радуйтеся, тлетворныя ветры молитвами вашими разгоняющии. Радуйтеся, трясение земли и бури зельныя ходатайством вашим установляющии и в тишину прелагающии; Радуйтеся, во всяких бедах и злоключениих на помощь к нам ускоряющии. Радуйтеся, святии и праведнии Богоотцы Иоакиме и Анно.

Кондак 10

Спасения душевнаго желающым и о сем усердно подвизающымся помощницы блазии, святии и праведнии Богоотцы Иоакиме и Анно явистеся, ов убо иноком, ова же инокинем хранители именуетеся, общее моление за всех верных Богу приносяще, да вси благодарственно зовут прославльшему вас во вселенней, Царю Славы Христу: Аллилуиа.

Икос 10

Стеною молитв ваших небесных, святии и праведнии Богоотцы Иоакиме и Анно, сохраняйте и ограждайте нас от искушений врага диавола, ищущаго душевней погибели нашей: вемы бо, вемы, яко много может молитва ваша пред лицем Христа Бога нашего, вашего же по плоти внука. Его же умоляти не престайте о всех, с любовию вас почитающих и вопиющих: Радуйтеся, маслина благоплодная, елей милости Божией обильно нам источающая; Радуйтеся, кипариси двое благосеннолиственнии, зной страстей наших в покой безстрастия приводящии. Радуйтеся, виссоне и багряницо, из нихже скиния Божия селения соорудися; Радуйтеся, горлицы единосупружнии, голубицу непорочную произведшии. Радуйтеся, со Дщерию вашею, всех Царицею вечно царствующии; Радуйтеся, в Сионе горнем в обители Ея небесней светло торжествующии. Радуйтеся, святии и праведнии Богоотцы Иоакиме и Анно.

Кондак 11

Пение наше хвалебное милостивно приимите, и щедрот ваших молитвенных нас не лишите, о святии прародителие Христовы Иоакиме и Анно, аще и недостойнии есмы грехов ради наших, вашего святаго заступления: обаче яко блази и всещедри суще, сие нам подадите, и помозите нам покаянием очиститися от скверны греховныя, да в чистоте сердец воспоем Создателю нашему хвалебную песнь: Аллилуиа.

Икос 11

Светоподательныя два светильника, всемирную свещу возжегшии, познаим святых Богоотец Иоакима и Анну, о братие, и сиянием тех небесныя славы озаряеми, воспоим им таковая: Радуйтеся, славнейшую без сравнения серафим воспитати удостоившиися; Радуйтеся, лучами благодати Божия осияннии. Радуйтеся, благоухания дуxoвнагo преисполненнии; Радуйтеся, фимиам молитв ваших о всем мире христианстем Богу приносящии. Радуйтеся, с Богородицею Мариею и Предтечею Иоанном у престола Христова выну предстоящии. Радуйтеся, святии и праведнии Богоотцы Иоакиме и Анно.

Кондак 12

Благодать Божию и милость нам подати, прощение же грехов и исправления жития ниспослати просите нам у Господа, святии Богоотцы Иоакиме и Анно, и непрестайте о нас пред лицем Вседержителя Бога моляще, яко стяжавшии к нему дерзновение многое. О сем усердно к вам припадающе, яко присных предстателей и заступников наших, просим и благоумиленно зовем всех Творцу: Аллилуиа.

Икос 12

Поюще многомощное предстательство ваше к Богу, Иоакиме и Анно праведнии, величаем возвеличившаго вас Христа Господа, воспеваем и рожденную от вас пренепорочную Его Матерь, вам же от усердия нашего сия достодолжныя похвалы приносим: Радуйтеся, от востока и до запада препрославленнии; Радуйтеся, стражие божественнии, неусыпно бдящии в молитвах к Богу о всех верных. Радуйтеся, помощь вашу благодатную всяцей душе христианстей подающии; Радуйтеся, во благих моления и прошения благочестивых исполняющии. Радуйтеся, душевных и телесных недугов преизряднии и безмезднии целители; Радуйтеся, благ временных и вечных всеусерднии и благоприятнии нам ходатаи. Радуйтеся, святии и праведнии Богоотцы Иоакиме и Анно.

Кондак 13

О святии и праведнии Богоотцы Иоакиме и Анно! Молим вас со усердием и любовию, к подножию ног ваших припадающе: умолите Господа Бога, избавити нас от погибели вечныя, грешником уготованныя, да милосердием Бога нашего спасаеми, и вашими святыми молитвами поспешествуеми, благодарственно воспоим Ему ангельскую песнь: Аллилуиа.

Икос 1

Ангел предстатель послан бысть к вам от Бога, святии и праведнии Богоотцы Иоакиме и Анно, егда о безплодии своем ов убо в пустыни, ова же в саду своем сетовасте, к Богу молитву возносяще; и тако благовестие радостное принесе безплотный, яко родити имате Дщерь Преблагословенную, о Нейже возблагословится весь род человеческий, с ним же и мы вам радостное приносим хваление: Радуйтеся, корене Давидова святопроцветшия розги винограда животнаго; Радуйтеся, рождшии Дщерь, от всех родов преблагословенную. Радуйтеся, воплощшагося Сына Божия прародителие всечестнии; Радуйтеся, таинства от века утаеннаго проявителие всеизряднии; Радуйтеся, Утехи Израилевы ближайшии по плоти сродницы; Радуйтеся, обетованнаго миру Спасителя единокровнии южицы. Радуйтеся, святии и праведнии Богоотцы Иоакиме и Анно.

Кондак 1

Избраннии от человеческаго рода прародителие Христовы, рождшии Преблагословенную Богоотроковицу, из Неяже по плоти сын Божий родися, святии и праведнии Богоотцы Иоакиме и Анно! Яко имущии дерзновение велие ко Христу Богу, и выну предстоящии престолу Его небесному, Тому прилежно молитеся от бед нам избавитися, да выну зовем вам: Радуйтеся, святии и праведнии Богоотцы Иоакиме и Анно.

Молитвы святым праведным Богоотцем Иоакиму и Анне

Молитва первая

О святии праведницы, Богоотцы Иоакиме и Анно! Молите Милосердаго Господа, яко да отвратит от нас гнев Свой, по делом нашим праведно на ны движимый, и да безчисленная прегрешения наша презрев, обратит нас, раб Божиих (имена), на путь покаяния, и на стези заповедей Своих да утвердит нас. Таже молитвами вашими в мире жизнь нашу сохраните, и во всех благих благое поспешение испросите, вся к животу и благочестию потребная нам от Бога дарующе, от всяких напастей и бед и внезапныя смерти предстательством вашим нас избавляюще и от всех враг видимых и невидимых защищающе, и тако в мире временное сие житие прешедше. в вечный достигнем покой, идеже вашим святым умолением да сподобимся Небеснаго Царствия Христа Бога нашего, Емуже со Отцем и Пресвятым Духом подобает всякая слава, честь и поклонение во веки веков.

Молитва вторая

О приснославнии Христовы праведницы, святии Богоотцы Иоакиме и Анно, предстоящии небесному престолу Великаго Царя и велие дерзновение к Нему имущии, яко от Преблагословенныя Дщери вашея, Пречистыя Богородицы и Приснодевы Марии, воплотитися изволившему, к вам, яко многомощным предстателем и усердным о нас молитвенникам, прибегаем мы грешнии и недостойнии. Молите благость Его, яко да отвратит от нас гнев Свой, по делом нашым праведно на ны движимый, и да безчисленныя прегрешения наша презрев, обратит нас на путь покаяния и на стезе заповедей Своих да утвердит нас. Таже молитвами вашими в мире живот наш сохраните и во всех благих благое поспешение испросите, вся яже к животу и благочестию потребная нам от Бога дарующе, от всяких напастей и бед и напрасныя смерти, предстательством вашим нас избавляюще, и от всех враг видимых и невидимых защищающе, яко да тихое и безмолвное житие поживем во всяком благочестии и чистоте, и тако в мире временное сие житие прешедше, в вечный достигнем покой, идеже вашим святым умолением, да сподобимся Небеснаго Царствия Христа Бога нашего, Емуже со Отцем и Пресвятым Духом подобает всякая слава, честь и поклонение во веки веков. Аминь.

Тропарь праведным Иоакиму и Анне, Богоотцам

Тропарь, глас 1

Иже в законней благодати праведни бывше, Младенца богоданнаго породиша нам, Иоаким и Анна. Темже днесь светло торжествует, весело празднующи божественная Церковь, честную вашу память, славящи Бога, воздвигшаго рог спасения нам в дому Давидове.[/spoiler]

[Раб божий Константин]

Акафист святому Апостолу и Евангелисту Иоанну Богослову.
[spoiler]Кондак 1

Избранный от мрежей рыбарских на проповедь Евангелия, и от ловли рыб на уловление человеков во свет истиннаго боговедения, о великий Апостоле, учениче, друже и наперсниче Христов, моли единаго истиннаго Человеколюбца, Егоже ты серафимскою любовию возлюбил еси, да помилует нас, ищущих твоего к Нему предстательства и зовущих ти: Радуйся, Иоанне Апостоле, наперсниче Христов и Богослове.

Икос 1

Ангельских сил и всякия твари Творца, Владыку и Господа, восприемшаго плоть нашу и явльшагося на земли спасения нашего ради, узрев ходящаго при мори Галилейстем и взывающаго тя со братом твоим, Иоанне блаженне, в звание апостольства, оставль мрежи рыбарския и отца твоего в корабли, неуклонно оттоле последовал еси стопам Спасителевым. Сего ради вопием ти сице: Радуйся, любве ради Христовы отца по плоти оставивый. Радуйся, Христом Небеснаго Отца обретый. Радуйся, мир и вся его прелести презревый. Радуйся, небесная благая в возмездие получивый. Радуйся, плоть духу совершенно поработивый. Радуйся, дух твой Сладчайшему твоему Учителю Иисусу покоривый. Радуйся, Иоанне Апостоле, наперсниче Христов и Богослове.

Кондак 2

Видя Христос Господь непорочную чистоту твоего сердца, плотскими сластьми не омраченную, суди тебе достойна быти зрения таинственных откровений, имиже проникая во глубину богословия, возможеши проповедати оное во услышание всего мира. Сего ради нарече тя «сыном громовым», вопиюща Ему: Аллилуиа.

Икос 2

Разумом истиннаго богопознания озаряя твою душу, шествовал еси по Благом Учителе твоем, учася из уст Его исходящия премудрости и, ради совершеннаго твоего незлобия и девственнаго целомудрия, был еси возлюблен Христом Господем твоим. Услыши убо нас, воспевающих ти сице: Радуйся, незлобия рачителю. Радуйся, девства и чистоты хранителю. Радуйся, любве богословския учителю. Радуйся, добрых нравов наставниче. Радуйся, смиренномудрия зерцало. Радуйся, Божественныя благодати светило. Радуйся, Иоанне Апостоле, наперсниче Христов и Богослове.

Кондак 3

Силу Божества Христова, сокрытую под облаком немощнаго человеческаго естества, познал еси явно, егда воскрешаяй дщерь Иаирову, и потом преображаяйся на Фаворе, сподоби тя со инеми двема учениками быти свидетелем таковых преславных чудес. Познав же Христа быти Бога истиннго, из глубины сердца твоего воззвал еси Ему: Аллилуиа.

Икос 3

Имея велие дерзновение к возлюбившему тя Христу Сыну Божию, возлегл еси на персех Его при совершении Тайныя Вечери, и егда прорекаше Господь о предатели Своем, тогда един ты дерзнул вопросити о имени его. Сего ради вопием ти: Радуйся, возлюбленный Христов учениче. Радуйся, присный Его друже. Радуйся, невозбранно на персех Господних почивый. Радуйся, дерзновенно о тайне предательства вопросивый. Радуйся, паче иных учеников ко Христу ближайший. Радуйся, яко тебе множае пред другими Апостолы Христос Божественныя тайны открываше. Радуйся, Иоанне Апостоле, наперсниче Христов и Богослове.

Кондак 4

Буря ярости и зверскаго неистовства жестокосердых и неблагодарных иудеев, егда воста на Христа Сына Божия, тогда вси ученицы Его, страхом объяти бывше, бежаша; но ты, питая к Нему любовь множайшую паче иных, на вся муки Христовы смотря, даже и до Креста пребыл еси неотступно, сердечно состраждущи Деве Матери Божией, плачущей и рыдающей, и удивляяся крайнему милосердию и долготерпению Божию, взывал еси Пострадавшему за род человеческий: Аллилуиа.

Икос 4

Вися на Кресте пригвожденный за грехи наши Спас мира и видев тебе и Матерь Свою, ту предстоящих, усынови тебе Преблагословенней Деве Богородице, глаголя Ей: «Жено, се сын Твой, — и тебе потом: — Се Мати твоя». Мы же, достойно почитая таковую честь, на тебе показанную, воспеваем сице: Радуйся, усыновления Божия Матере сподобивыйся. Радуйся, тем наипаче ко Христу, яко некиим духовным родством, присвоивыйся. Радуйся, Матери Божией достойно послуживый. Радуйся, во все время на земли пребывания Ея препитавый Ю. Радуйся, и во Успении ко гробу честное и святое Ея тело проводивый. Радуйся, с блистающимся вравием, Архангелом Гавриилом принесенным, одру Ея предшедый. Радуйся, Иоанне Апостоле, наперсниче Христов и Богослове.

Кондак 5

Боготечная звезда явился еси во Асии, отшед в ню на проповедание слова Божия, по жребию тебе падшему, но прежде попусти Господь быти тебе поглощену в мори, благодать же Божия, всегда с тобою пребывающая, сохрани тебе во глубинах морских жива и по четыредесятих днех, повеле волне морской воспенившися извергнути тебе на брег, еже егда узре ученик твой Пpoхор, уже оплакиваяй твою кончину, велиим гласом воззва чудодействующему Богу: Аллилуиа.

Икос 5

Видевше ефесстие жителие преславное чудо, тобою сотворенное, воскресением отрока Домна, умерщвленнаго от беса, в бани пребывающаго, воспеша велегласно силу Бога, тобою им проповеданнаго, и избавльшеся от гнуснаго идолослужения, взываху тебе сице: Радуйся, истиннаго Бога служителю. Радуйся, бесов прогонителю. Радуйся, мертвецев силою Христовою оживляяй. Радуйся, тоюже жизнь и здравие возвращаяй. Радуйся, помраченныя умом к Свету Истины призываяй. Радуйся, правыя веры просвещением к добродетели наставляяй. Радуйся, Иоанне Апостоле, наперсниче Христов и Богослове.

Кондак 6

Проповедник богоносный слова Божия быв во Ефесе, и усердствуя о распространении благодати Евангельския, подкреплял еси твое учение знаменьми страшными и неудобь постигаемыми: единою бо молитвою опровергл еси капище Артемидино, да зряще сие идолопоклонницы, познают Единаго Бога, Емуже мы вопием: Аллилуиа.

Икос 6

Возсия уже полным сиянием во Ефесе свет веры Христовы, тобою проповеданныя, егда злочестивый Домитиан воздвиже гонение на христианы, тогда и тебе, яко усерднаго исповедника имени Христова, посла епарх в Рим связана, идеже и претерпел еси страшная мучения, ихже ради сретаем тя приветствиями сими: Радуйся, Христова ради исповедания биенный. Радуйся, чашу смертоноснаго яда невредно испивый. Радуйся, в конобе елея кипящаго не сваривыйся. Радуйся, силою Христовою в лютых мучениях цел сохранивыйся. Радуйся, кесаря, мучащаго тя, пачеестественною безвредностию устрашивый. Радуйся, тоюже народ о величестве Бога, христианами почитаемаго, уверивый. Радуйся, Иоанне Апостоле, наперсниче Христов и Богослове.

Кондак 7

Егда узре мучитель, яко и самолютейшия муки, им изобретенныя, не возмогоша умертвити тебе, тогда возмнев тя безсмертна быти, на остров Патмос во изгнание осуждает. Ты же, повинуяся Промыслу Божию, тако благоволившему, с благодарностию воспевал еси Богу, все во благая устрояющему: Аллилуиа.

Икос 7

Новая показал еси чудеса идолопоклонником, ища обратити их к спасительной вере Христовой, егда пловущу ти во изгнание твое, повелением твоим отрока утопшаго море на корабль жива изверже, буря укротися, вода сланая в сладкую претворися, воин от чревныя язвы исцелися, и по пришествии твоем в Патмос, бес пытливый из Аполлонида изгнася. Тогда вси зрящии таковая непостижимая события, прихождаху к познанию Триипостаснаго Бога. Мы же тя ублажаем тако: Радуйся, морю и буре повелеваяй. Радуйся, сатанинских духов от человек изгоняяй. Радуйся, болезни единым словом исцеляяй. Радуйся, всем в нуждах помощь подаваяй. Радуйся, отрока от потопления морскаго избавивый. Радуйся, неверных во истинной вере утвердивый. Радуйся, Иоанне Апостоле, наперсниче Христов и Богослове.

Кондак 8

Странно бе видети жрецам Аполлонова храма, яко дом того, егоже они, безумнии, яко бога почитаху, ты единым словом на землю испровергл еси; чудящеся купно и ярящеся на таковое твое дерзновение, идоша к волхву Кинопсу, усердному предстателю бесов, да отмстит безчестие их бога. Он же, слеп сый душею, не ведая силы, в тебе обитающия, покушашеся мечтании и разными привидении тебе устрашити и на тя народ подвигнути: но потом сам, окаянный, надеяся на волхвования своя, погрузися в море, и тамо погрязе, безсильным бывшим бесом спасти его, воспрещенным от тебе именем Иисуса Христа Сына Божия, Егоже прослави народ, сего чудесе свидетель, воспев: Аллилуиа.

Икос 8

Весь и всего себе исполнив любве Божественныя, был еси вместилищем даров Святаго Духа: будущая прорицая, отстоящая яко близ сущая сказовая, недужныя исцеляя, жене Анфипатовой, в болезни рождения страждущей, едва на праг дому вступил еси, облегчение даровавый. Приими убо от нас, грешных, похвалы сицевыя: Радуйся, благодати Божия вместилище. Радуйся, Духа Святаго обиталище. Радуйся, реко, чудоточная цельбоносныя болезнем силы. Радуйся, громе, поражающий древняго змия и его ангелов. Радуйся, коварства лукаваго сатаны озобличаяй. Радуйся, верных от козней его защищаяй. Радуйся, Иоанне Апостоле, наперсниче Христов и Богослове.

Кондак 9

Всякое беззаконие истребляя ревностно от среды людей, к нимже послан был еси, низпровергл единым словом капище Бахусово, Нукиана волхва чудесы препрев, из волка соделал еси кроткаго агнца, и привел ко Христовой вере, и мать, неистовным разжжением блуднаго греха к сыну, обличив, обратил еси к покаянию; оныя же, от греха обратившеся ко спасению, немолчно взываху Богу: Аллилуиа.

Икос 9

Витийство любомудрия человеческаго не возможет изрещи, ниже ум плотскаго человека постигнути, еже ты возвестил еси нам о безначальном бытии Триипостаснаго Бога: подобно бо Моисею во громех и блистаниих на горе приял еси от Бога тайну богословия и возгласил еси миру, еже в начале бе Слово, Отцу искони неразлучное и всему существующему виновное, имущее Свет животный, егоже тьма не может объяти. Озаряеми таковым облистанием света Божественныя Истины, почитаем тя яко таинника Безначальныя Троицы и воспеваем тя яко совершеннейшаго Богослова: Радуйся, орле, воспаривый до самаго огнеобразнаго Престола Божия. Радуйся, трубо, возгласившая миру Предвечнаго и Безначальнаго Бога. Радуйся, недоведомыя тайны Божия нам открываяй. Радуйся, человечество и Божество Христово нам изъясняяй. Радуйся, любве к Богу и ближним нас научаяй. Радуйся, за сию любовь присущность Божию нам обещаваяй. Радуйся, Иоанне Апостоле, наперсниче Христов и Богослове.

Кондак 10

Спасти хотя души человеческия, всяко поучал еси люди веровати во Христа Сына Божия, имети совесть незазорну, и любити друг друга, во еже не токмо зде, но и в селениих праведных воспети лепотно Всемогущему Богу: Аллилуиа.

Икос 10

Стены Горняго Иерусалима узрев во откровении, преподал еси нам проречение того, еже уже есть и имать быти до скончания мира, сказуя нам сие иносказательными словесы, и предоставляя разумети имущим ума Божественнаго. Удивляяся таковой премудрости, тебе от Бога дарованней, воспеваем тя сице: Радуйся, познанием Альфы и Омеги превозшедый естество человеческое. Радуйся, вместилище таинств, неудобьвмещаемых человеческим умом, бывый. Радуйся, неизреченная Божия откровения узревый. Радуйся, оныя верным преподавый. Радуйся, радости святых еще в жизни сей познавый. Радуйся, оными ныне в преизбыточествии наслаждаяйся невозбранно. Радуйся, Иоанне Апостоле, наперсниче Христов и Богослове.

Кондак 11

Пения жертву благодарну принесе тебе, святый Апостоле Иоанне, оный христианин, иже в нищету пришед и не имый чим воздати долги своим заимодавцем, впаде в отчаяние и искаше сам себе насильственною умертвити смертию: но ты, яко человеколюбив сый, желая избавити того и временныя, и вечныя смерти, крестным знамением сено во злато претворив, вручил еси оному убогому, да тем златом и долги отдаст заимодавцем, и дом свой препитает, Богу же, чрез тебе его облагодетельствовавшему, да поет: Аллилуиа.

Икос 11

Светозарная душа твоя, достигнув в меру возраста и в мужа совершенна, позна приближение времени нужнаго человеку изменения, во еже тленному наследити обещанное нетление, и смертному обещанное безсмертие. Тогда повелел еси учеником твоим погребсти себе жива, наутрие же пришедше ко гробу твоему, и откопавше, ничтоже в нем обретоша. Познавше убо, яко изменение твое сотворися не обыкновенным человеческим смертным успением, воспеша тебе тако: Радуйся, орле, обновивый твою юность безпрепятственным возлетением к Солнцу Славы Божия. Радуйся, таковым изменением превозшедый вся уставы естества человеческаго. Радуйся, по обещанию Благаго Учителя твоего возседый на единем от дванадесяти престолов. Радуйся, творяй на оном суд и правду посреде людей Божиих Израиля. Радуйся, наслаждаяся лицезрением Того Сладчайшаго Иисуса, к Немуже на перси прежде Его страсти и Воскресения возлегл еси. Радуйся, от Его благоутробия ходатайствуяй нам вся благая. Радуйся, Иоанне Апостоле, наперсниче Христов и Богослове.

Кондак 12

Благодать дана есть от Бога месту тому, идеже тело твое земли предано бяше, да испускает в день погребения твоего тонкий прах на исцеление болящим, показуя сим чудом, како прославляет Бог любящия Его, да вси, зряще сие, непрестанно сердцем и душею во дни и в нощи вопием Ему: Аллилуиа.

Икос 12

Поюще труды твоя во апостольстве и чудеса и исцеления, яже источал еси и источаеши благодатию Духа Святаго, в тебе обитающаго, восхваляем Бога, даровавшаго нам таковаго путеводителя, наставляющаго нас на путь спасения и милосердствующаго о бедности  нашей. Приими убо от нас, святый Апостоле, похвалы сицевыя: Радуйся, учениче Христов изящнейший. Радуйся, учителю Церкве Христовы изряднейший. Радуйся, богословов начало и основание. Радуйся, Божественных Таин откровение. Радуйся, девствующих пример и поощрение к целомудрию. Радуйся, всех верных, к твоему заступлению прибегающих, скорая помоще и покровительство. Радуйся, Иоанне Апостоле, наперсниче Христов и Богослове.

Кондак 13

О преславный и всехвальный Апостоле и Евангелисте, наперсниче Христов, возлюбленный Иоанне! Твоим всесильным ходатайством ко Всеблагому твоему Учителю и нашему Владыце и Господу испроси нам вся благая временная и вечная и христианскую кончину живота нашего, да с тобою в селениих праведных и со Ангельскими лики воспоем Триипостасному Богу: Аллилуиа.

(Этот кондак читается трижды, затем икос 1 и кондак 1)

Молитва

О великий Апостоле, Евангелисте громогласный, Богослове изящнейший, тайновидче неизреченных откровений, девственниче и возлюбленный наперсниче Христов Иоанне! Приими с свойственным тебе милосердием нас, грешных, прибегающих под твое сильное заступление и покровительство. Испроси у Всещедраго Человеколюбца Христа и Бога нашего, Иже пред очесы твоими излиял есть кровь Свою дражайшую за нас, непотребных рабов Своих, да не помянет беззаконий наших, но да помилует нас и сотворит с нами по милости Своей: да дарует нам здравие душевное и телесное, всякое благоденствие и изобилие, научая нас обращати оныя во славу Его, Творца, Спасителя и Бога нашего. По кончине же временныя жизни нашея, да избегнем мы, святый Апостоле, немилосердых истязаний, на воздушных мытарствах нас ожидающих, но да достигнем твоим руководством и покровительством Горняго онаго Иерусалима, егоже славу во откровении ты зрел еси, а ныне наслаждаешися оныя радости, обещанныя избранным Божиим. О великий Иоанне, сохрани вся грады и страны христианския, храм сей (посвященный святому твоему имени), служащих и молящихся в нем, от глада, губительства, труса и потопа, огня, меча, нашествия иноплеменных и междоусобныя брани; избави нас от всякия беды и напасти, и молитвами твоими отврати от нас праведный гнев Божий и испроси нам Его милосердие.

О великий и непостижимый Боже! Се на умоление к Тебе предлагаем святаго Иоанна, егоже Ты сподобил еси познати Тебе, неисповедимаго Бога, в неизреченнем откровении. Приими его о нас к Тебе ходатайство, даруй нам исполнение прошений наших во славу Твою, паче же соверши нас духовным совершенством к наслаждению жизни нескончаемыя в Небесных Твоих обителех. О Небесный Отче, создавый вся Владыко, Всесильный Царю! Коснися благодатию сердец наших, да растаявше яко воск, пролиются пред Тобою, и бренная тварь духовна сотворится в честь и славу Твою, Отца и Сына и Святаго Духа. Аминь.

Тропарь, глас 2

Апостоле, Христу Богу возлюбленне, ускори избавити люди безответны: приемлет тя припадающа Иже падша на перси приемый, Егоже моли, Богослове, и належащую мглу языков разгнати, прося нам мира и велия милости.

Кондак, глас 2
Величия твоя, девственниче, кто повесть? Точиши бо чудеса, и изливаеши исцеления, и молишися о душах наших, яко Богослов и друг Христов.

ЖИТИЕ

Дни памяти: 21 мая (н. ст.), 9 октября (н. ст.)

Святой Апостол и Евангелист Иоанн Богослов был сыном Зеведея и Саломии - дочери святого Иосифа Обручника. Одновременно со своим старшим братом Иаковом он был призван Господом нашим Иисусом Христом в число Своих учеников на Геннисаретском озере. Оставив своего отца, оба брата последовали за Господом.

Апостол Иоанн был особенно любим Спасителем за жертвенную любовь и девственную чистоту. После своего призвания Апостол не расставался с Господом и был одним из трех учеников, которых Он особенно приблизил к Себе. Святой Иоанн Богослов присутствовал при воскрешении Господом дочери Иаира и был свидетелем Преображения Господня на Фаворе. Во время Тайной Вечери он возлежал рядом с Господом и по знаку Апостола Петра, приникнув к груди Спасителя, спросил об имени предателя. Апостол Иоанн следовал за Господом, когда Его, связанного, вели из Гефсиманского сада на суд беззаконных первосвященников Анны и Каиафы, он же находился во дворе архиерейском при допросах своего Божественного Учителя и неотступно следовал за Ним по Крестному пути, скорбя всем сердцем. У подножия Креста он плакал вместе с Божией Матерью и услышал обращенные к Ней с высоты Креста слова Распятого Господа: «Жено, се сын Твой» и к нему: «Се Мати твоя» (Ин. 19, 26, 27). С этого времени Апостол Иоанн, как любящий сын, заботился о Пресвятой Деве Марии и служил Ей до Ее Успения.

После Успения Божией Матери Апостол Иоанн, по выпавшему ему жребию, направился в Ефес и другие Малоазийские города для проповеди Евангелия, взяв с собой своего ученика Прохора. Они отправились в путь на корабле, который потонул во время сильной бури. Все путешественники были выброшены на сушу, только Апостол Иоанн остался в морской пучине. Прохор горько рыдал, лишившись своего духовного отца и наставника, и пошел в Ефес один. На четырнадцатый день пути он стоял на берегу моря и увидел, что волна выбросила на берег человека. Подойдя к нему, он узнал Апостола Иоанна, которого Господь сохранял живым четырнадцать дней в морской глубине. Учитель и ученик отправились в Ефес, где Апостол Иоанн непрестанно проповедовал язычникам о Христе. Его проповедь сопровождалась многочисленными и великими чудесами, так что число уверовавших увеличивалось с каждым днем. В это время началось гонение на христиан императора Нерона (56-68). Апостола Иоанна отвели на суд в Рим. За исповедание веры в Господа Иисуса Христа Апостол Иоанн был приговорен к смерти, но Господь сохранил Своего избранника. Апостол выпил предложенную ему чашу со смертельным ядом и остался живым, затем вышел невредимым из котла с кипящим маслом, в который был брошен по приказанию мучителя. После этого Апостола Иоанна сослали в заточение на остров Патмос, где он прожил много лет. По пути следования к месту ссылки Апостол Иоанн совершил много чудес. На острове Патмос проповедь, сопровождавшаяся чудесами, привлекла к нему всех жителей острова, которых Апостол Иоанн просветил светом Евангелия. Он изгнал многочисленных бесов из идольских капищ и исцелил великое множество больных. Волхвы различными бесовскими наваждениями оказывали большое сопротивление проповеди святого Апостола. Особенно устрашал всех надменный волхв Кинопс, похвалявшийся тем, что доведет до гибели Апостола. Но великий Иоанн - Сын Громов, как именовал его Сам Господь, силой действующей через него благодати Божией разрушил все ухищрения бесовские, на которые надеялся Кинопс, и гордый волхв бесславно погиб в морской пучине.

Апостол Иоанн удалился со своим учеником Прохором на пустынную гору, где наложил на себя трехдневный пост. Во время молитвы Апостола гора заколебалась, загремел гром. Прохор в страхе упал на землю. Апостол Иоанн поднял его и приказал записывать то, что он будет говорить. «Аз есмь Альфа и Омега, начаток и конец, глаголет Господь, Сый и Иже бе и Грядый, Вседержитель» (Откр. 1, , - возвещал Дух Божий через святого Апостола. Так около 67 года была написана Книга Откровения (Апокалипсис) святого Апостола Иоанна Богослова. В этой книге раскрыты тайны судеб Церкви и конца мира.

После длительной ссылки Апостол Иоанн получил свободу и вернулся в Ефес, где продолжал свою деятельность, поучая христиан остерегаться лжеучителей и их лжеучений. Около 95 года Апостол Иоанн написал в Ефесе Евангелие. Он призывал всех христиан любить Господа и друг друга и этим исполнить заповеди Христовы. Апостолом любви именует Церковь святого Иоанна, ибо он постоянно учил, что без любви человек не может приблизиться к Богу. В трех Посланиях, написанных Апостолом Иоанном, говорится о значении любви к Богу и ближним. Уже в глубокой старости, узнав о юноше, совратившемся с пути истинного и сделавшемся предводителем шайки разбойников, Апостол Иоанн пошел искать его в пустыню. Увидев святого старца, виновный стал скрываться, но Апостол побежал за ним и умолял его остановиться, обещая грех юноши взять на себя, лишь бы тот покаялся и не губил своей души. Тронутый теплотой любви святого старца, юноша действительно покаялся и исправил свою жизнь.

Святой Апостол Иоанн скончался в возрасте ста с лишним лет. Он намного пережил всех остальных очевидцев Господа, долго оставаясь единственным живым свидетелем земных путей Спасителя.

Каждый год из могилы святого Апостола Иоанна 8-го мая выступал тонкий прах, который верующие собирали и исцелялись им от болезней. Поэтому Церковь празднует память святого Апостола Иоанна Богослова еще и 8 мая.

Господь дал своему любимому ученику Иоанну и его брату имя «сынов грома» - вестника устрашающего в своей очистительной силе небесного огня. Этим самым Спаситель указывал на пламенный, огненный, жертвенный характер христианской любви, проповедником которой был Апостол Иоанн Богослов. Орел - символ высокого парения Богословской мысли - иконографический знак Евангелиста Иоанна Богослова. Наименование Богослова Святая Церковь дала из учеников Христовых только святому Иоанну, тайнозрителю Судеб Божиих.



По благословенню

Архиепископа Херсонского и Таврического Иоанна.[/spoiler]