Молитвослов

[Раб божий Константин]

Акафист святой преподобномученице Рафаиле, чудотворице Чигиринской.
[spoiler]Кондак 1
Избранная угоднице и невесто Христова, града Чигирина и всего мира христианскаго похвало и утверждение, преподобная и богоносная мати Рафаило, подвигом добрым подвизившаяся, исповедничеством и мученичеством всепобедным просиявшая, ныне о спасении нашем усердно предстательствуеши пред Престолом Троицы Всесвятыя. Мы же в похвалу тебе зовем сице:
Радуйся, святая преподобная мати наша Рафаило, мученице Христова и чудотворице достославная!

Икос 1
Ангелов сонмы и вся силы Небесныя славословят выну Творца миров дольняго и горняго, с ними же купно ликуеши присно, святая богоносная и присноблаженная мати наша Рафаило, к лику жен преподобных и новомученик преславных Господом сопричтенная. Мы же, торжествуя на земли славу твою небесную, вопием ти сице:
Радуйся, с горними чинами Христа присно величающая;
Радуйся, со всеми святыми славу Царя Небеснаго созерцающая;
Радуйся, Церковью Христовою прославляемая и величаемая;
Радуйся, от земнородных с радостию почитаемая;
Радуйся, спасения вечнаго нашего всеблагая путеводительнице;
Радуйся, благополучия земнаго предобрая попечительнице;
Радуйся, блага духовныя нам ниспосылающая;
Радуйся, отраду и утешение верным христианом дарующая;
Радуйся, святая преподобная мати наша Рафаило, мученице Христова и чудотворице достославная!

Кондак 2
Видя Всеблагий и Премудрый Господь чистоту сердца твоего и любы теплую ко всему творению Своему и велие желание жития иноческого благоволи призвати тя на служение Себе и чадом Своим во святую чигиринскую Свято-Троицкую обитель, идеже ты, святая ангелоподобная мати, в посте и молитве неленостно подвизалася еси и жития воистину равноангельского достигла еси, в пострижении же имя милосерднаго архистратига Рафаила прияти сподобилася еси, с ним же ныне моли Христа Спасителя помиловати и благословити всех нас, вопиющих ныне Господеви: Аллилуйя!

Икос 2
Разумом божественным от дней детства твоего просвещаема, всеблаженная невесто Христова, и благодатию Господнею согреваемая и движимая, возлюбила еси паче благ земных Иисуса Сладчайшего, и Ему Единому служити желая, оставила еси мир и имения родителей твоих и в преславную Свято-Троицкую Чигиринскую обитель удалилася еси, идеже обеты священные Господеви принесла еси. Сего ради таковыя похвалы приносим ти:
Радуйся, рода именитаго отрасле благородная;
Радуйся, лозо вертограда Христова богатоплодная;
Радуйся, края чигиринского похвало и утверждение;
Радуйся, сословия дворянского преизрядное украшение;
Радуйся, добрая и усердная последоваетльнице евангельского учения;
Радуйся, благочестия предков твоих прехвальная сонаследнице;
Радуйся, от младых лет Иисуса Сладчайшего возлюбившая;
Радуйся, во дни юности твоея всю себе Ему Единому посвятившая;
Радуйся, святая преподобная мати наша Рафаило, мученице Христова и чудотворице достославная!

Кондак 3
Силою и благодатию Духа Святаго движимая, хранимая и озаряемая, святая Рафаило, лепоту мира дольнего, сотвореннаго Всеблагим Господем, со умилением созерцала еси, благодарящее Бога за Премудрость Его, явленную во творении, воспевая на земли Царю Небесному пение ангельское: Аллилуйя!

Икос 3
Имуще в душе твоей, пречудная Рафаило, любы ко Господу и творению Его, с радостию сердечною цветы взращала еси в обители Чигиринской, дабы в лепоте сей явити образ славы Божия; такожде и ко иным послушаниям ревность благую явила еси, советом стариц опытных внимая, от силы в силу восходя, да прославится в тебе Иисус Сладчайший, Его же ради усердно подвизалася еси. Приклони к нам милосердие Небесного Жениха Твоего вопиющим ти сице:
Радуйся, кротость и смирение Христово возлюбившая;
Радуйся, отраду небесную еще на земли обретшая;
Радуйся, непреложное упование и всецелое доверие к Богу стяжавшая;
Радуйся, тихую радость и мир непрестанно нам дарующая;
Радуйся, милосердием к себе и ближним сердца наша преображающая;
Радуйся, материнскою любовию твоею всех согревающая;
Радуйся, все прошения наша во благо исполняющая;
Радуйся, творити нелицемерно дела добрыя нас подвизающая;
Радуйся, святая преподобная мати наша Рафаило, мученице Христова и чудотворице достославная!

Кондак 4
Бурю злых напастей, нестроений и искушений верою, кротостию, молитвами горячима твоима и незлобием рассеяла еси, преподобная мати, ибо добродетельми христианскими, аки щитом, от стрел и духов лукавых обороняла еси себя и ближних своих, советом святых отец внимала еси, темже в святости и чистоте прошла еси все житие твое иноческое и мученичество увенчала еси е; ныне же во славе предстоиши Творцу Нашему и молишися, да утвердится любы святая в сердцех христианских. Тем же и нас, грешных, святая Рафаило, сподвигаеши нелицемерне Господеви служити и с сыновьей любовию воспевати Ему: «Аллилуйя!»

Икос 4
Слышавши смуты и войны и военные слухи, ничтоже убояся мудрая мати Рафаило, разумеюще, яко вси путие народов и царств в деснице Всемудраго Бога выну пребывают, в годину тяжкую смут и невзгод На Него Единого упование твое возложила еси. Просим тя, мати святая: настави и нас твердо на Господа уповати, да тебе подражающее, благодарне воззвовем сице:
Радуйся, благосердие Отца Небеснаго к нам приклоняющая;
Радуйся, Сына Божиего паче всего земнаго любити научающая;
Радуйся, о дарех духовных Всеблагаго Утешителя умоляющая;
Радуйся, о благосостоянии Церкви Христовой присное моление;
Радуйся, от блудныя страсти и винопития исцеляющая;
Радуйся, в деятельной любве и сострадании верных утверждение;
Радуйся, от сна духовнаго теплохладных пробуждение;
Радуйся, омраченных умов и очерствелых сердец просветление и преображение;
Радуйся, святая преподобная мати наша Рафаило, мученице Христова и чудотворице достославная!

Кондак 5
Боготечною звездою просияла, от силы в силу восходяще благодатию Спасовою, и воистину свет миру явилася еси. Настави и нас от тьмы греховныя ко свету Божественному присно шествовати, вопиюще Христу : Аллилуйя!

Икос 5
Видевше сестры обители дивную Рафаилу, имущую дар рассуждения и молитвы и дивищеся премудрости ея, изволиша ю игумению бытии; та же воли Божией покорися, тем же в годину испытаний сестер мудрее спасе. Тем же припадаем ко святей матери нашей, да будет и нам наставницею доброю, слышаще от нас сицевая:
Радуйся, разумети благую волю Божию о нас научающая;
Радуйся, от суеты сует к благам вечным взоры наша направляющая;
Радуйся, от заблуждений и прельщений духовных чтущих тя оберегающая;
Радуйся, в ношении тягот друг друга нам всем помогающая;
Радуйся, инокинем вспоможение и укрепление посылающая;
Радуйся, мирян в благочестии и молитвенном делании утверждающая;
Радуйся добрых друзей и помощников верных Христианом посылающая;
Радуйся, в земнем странствии добре путеводствующая;
Радуйся, святая преподобная мати наша Рафаило, мученице Христова и чудотворице достославная!

Кондак 6
Проповедница любви Христовой воистину была еси, блаженная Рафаило, сирот бо во обители прияла еси, от них же досаждения и укоризны претерпела еси, обаче болезновала еси об их обращении ко Господу, да с тобою воспоют Творцу Своему:Аллилуйя!

Икос 6
Возвияла слава добродетелей твоих твоих, мати любвеобильная, наипаче в годину смут и нестроений: многим бо милость сотворила еси, утешение и ободрение даровала еси; и сестрам обители твоея была еси наставницею благою. Мы веруя, яко ты ныне во славе неизреченной пребываеши, милосердием твоим не оскудела еси к нам, славословим тя сице:
Радуйся, от многообразных недуг страждущих свобождение;
Радуйся, боли многообразныя пречудное утоление;
Радуйся, ран и язв телесных исцеление;
Радуйся, душевных пороков искорение;
Радуйся, плоть, огнем опаленную, преславно обновляющая;
Радуйся, души, от недуг греховных томимых, врачующая;
Радуйся, путешествующих пречудная помощнице;
Радуйся, во тьме неверия блуждающих благодатная вразумительнице;
Радуйся, святая преподобная мати наша Рафаило, мученице Христова и чудотворице достославная!

Кондак 7
Хотяще верною Господеви быти и выну с Ним токмо пребывати, разумела еси, велехвальная Рафаило, яко ничто не возможе разлучити тя от любве Его: ни глад, ни изгнание, ни чести гражданския лишение, ни утеснения от властей богоборных, ни сами страдания и муки лютейшия. Ты бо все сие претерпела еси, в глубине сердца твоего воспевая Жениху Небесному ангельское пение: Аллилуйя!

Икос 7
Новое и тяжкое испытание с верою претерпела еси, богомудрая мати Рафаило, егда приидоша в дом твой богоборцы, от сестер отлучиша, и страшным мукам предаша. Обаче опаление и иссечение тела твоего и иных мук множество прияла с верою несомненною, тем же и от нас слышииши сицевая:
Радуйся, древним страстотерпцем равночестная и новым мученикам равнославная;
Радуйся, за безбоязненное веры исповедание от богоборец пострадавшая;
Радуйся, за Бога, в Троице Святей славимаго, муки лютыя приявшая;
Радуйся, опаление огнем, надругание и тела иссечение кротце претерпевшая;
Радуйся, биения, заушения, истязания лютыя приявшая;
Радуйся, в мучениях жестоких долготерпение и упование на Христа сохраньшая;
Радуйся, яко Горни силы душу твою с радостию среташа;
Радуйся, мучеников страданием твоим возвеселившая;
Радуйся, святая преподобная мати наша Рафаило, мученице Христова и чудотворице достославная!

Кондак 8
Странствие земное в муках за Христа завершила еси, святая мати Рафило, и обитель себе в чертозех Отца Небеснаго обрела еси, прияла от Господа велию благодать чудотворения, тем же всем с верою к тебе притекающим дары благодатная всещедро подаеши от мощей твоих святых, недужных врачуеши единем пр

Икосновением к честному твоему гробу. Сего ради славим прославльшего Тя Господа и благодарно вопием Ему: Аллилуиа

Икос 8
Всем любящим тя и святую память твою праведно чтущим отраду и утешение милостивно подаеши, благая заступнице и утешительнице наша; сего ради мы, заботами и печальми обремененныя, к твоему предстательству за ны пред Триипостасным и Всеблагим Господем Нашим усердно прибегаем и с надеждою приносим тебе, святая мати наша Рафаило, от благодарных сердец наших похвалы сия:
Радуйся, яко чтущих тя не оставляеши;
Радуйся, яко любящих тя присно радуеши;
Радуйся, благим намерениям нашим быстро способствующая;
Радуйся, от всякаго вреда и скорби нас избавляющая;
Радуйся, добрый кров и пристанище обрести помогающая;
Радуйся, труд земледельцев с небес благословляющая;
Радуйся, нивы и поля обилием плодов наполняющая;
Радуйся, благами земныма страждущих насыщати научающая;
Радуйся, святая преподобная мати наша Рафаило, мученице Христова и чудотворице достославная!

Кондак 9
Всякия болезни, скорби и мученическую кончину кротко претерпела еси, мати Рафаило, яко жертву принесши житие твое Христу Богу, Спасителю нашему, и ныне, с Невещественными ликами в вышних предстоящи Престолу Троицы Пресвятыя, молишися о нас, вопиющи Богу: Аллилуйя.

Икос 9
Вития многовещанныя и преискусныя восхвалити тя по достоянию не возмогут, о святая преподобная мученице и чудотворице Рафаило, ибо кто в силех есть воспети достойно и справедливо благочестивое житие твое, кто воздаст славу преподобничеству, богомудрию и исповедничеству твоему, мати пречудная, кто восхвалит велия муки душевныя и страдания лютыя, яже за Христа претерпела еси? Кто славословие сложит по достоянию чудесем и помощи твоей благодатней? Мы же, веруя, яко ты еси милостива к нам, со смирением и надеждою приносим ти похвалы сия:
Радуйся, злочестивых богоборцев и рая земнаго поборников богомудрая обличительнице;
Радуйся, богопротивнаго нечестия и обычаев душетленных неутомимая искоренительнице;
Радуйся, добрых нравов и благочестия преславная насадительница;
Радуйся, истиннаго богопознания и благаго трезвления всехвальная возвестительнице;
Радуйся, яко тобою от страстей телесных скоро избавляемся;
Радуйся, яко тобою отрады и сладости духовныя исполняемся;
Радуйся, заре благодатная, мрак скорбей людских разгоняющая;
Радуйся, светило богоявленное, тьму безбожия и зловерия просвещающее;
Радуйся, святая преподобная мати наша Рафаило, мученице Христова и чудотворице достославная!

Кондак 10
Спасения нашего буди наставницею и ходатаицею, богоносная мати Рафаило, яко предстательством твоим страсти душетленныя из корени исторгаются, добродетели же богоугодныя вкореняются в душах наших; сего ради просим тя: сподоби ны Господеви благия плоды покаяния принести , поющее Богу: Аллилуйя!

Икос 10
Стена еси необоримая всем Христианом, к скорому твоему заступлению и предстательству притекающим, всепобедная страстотерпице Рафаило! Ты бо многажды самая прошения наша исполнением пречудно предваряеши и преславная чудеса творити нам не престаеши; ибо дадеся ти велия благодать от Подвигоположника Иисуса Христа, сугубо величающего мученики Своя: болезни исцеляти, во обстояниих скорбных помогати всем, требующим и просящим помощи твоея и с надеждою на исцеление духовное взывающим ти сице:
Радуйся, страх пред неизвестностию в душах наших разрушающая;
Радуйся, доверием ко Иисусу Сладчайшему сердца наша наполняющая;
Радуйся, любити всех любовию Христовою ны научающая;
Радуйся, плевелы ненависти и злобы в нас испепеляющая;
Радуйся, прощати и благословляти обидящих ны сподвигающая;
Радуйся, злыя сердца в добрыя преславно преображающая;
Радуйся, благия плоды надежды взращати нам помогающая;
Радуйся, великое и неизреченное милосердие Божие к нам выну приклоняющая;
Радуйся, святая преподобная мати наша Рафаило, мученице Христова и чудотворице достославная!

Кондак 11
Пение похвальное во умилении сердец наших приносим ти, о добрая попечительнице и заступнице наша, яко тобою от сумрака скорбей удаляемся, яко тобою николиже гладны не пребываем, и вся потребная к житию земному; и с тобою купно воспеваем Всемилосердному Господу, Подателю всех благ: Аллилуйя!

Икос 11
Свет нетварный купно со ангелы и архангелы созерцаеши ныне, богоблаженная мати наша Рафаило, яко великия чести предстояти пред Троном Троицы Всесвятыя сподобилася еси, и нас грешных, на земли величающих благую память твою не забываеши в молитвах твоих, чудотворице святая, и вся полезная к житию земному и спасению милостивно посылаеши нам, с любовию и радостию взывающим ти сице:
Радуйся, в пути и странствии сущим благодатное вспоможение;
Радуйся, по воздуху плавающим преславное пути завершение;
Радуйся, паломников стяжати благословение Христово научающая;
Радуйся, всех нас от суеты и треволнений житейских свобождающая;
Радуйся, земныя должности наша честно исправляти помогающая;
Радуйся, вси путие жизни нашей к Иерусалиму Небесному направляющая;
Радуйся, милость Всенепорочныя Матери Божия нам приклоняющая;
Радуйся, кающихся грешников любовию Христовою ободряющая;
Радуйся, святая преподобная мати наша Рафаило, мученице Христова и чудотворице достославная!

Кондак 12
Благодати животворящия причастна явися священная рака, содержащая многоцелебныя мощи твоя, чудотворице прехвальная Рафаило, яко ты неоскудно исцеления источаеши и всяк недуг врачуеши силою Бога, дивнаго во святых Своих; Ему же и мы о тебе с благодарностию и радостию сердечной о тебе воспеваем: Аллилуйя!

Икос 12
Поющее житие преславное твое и добропобедныя страдания твоя, святая мати наша и чудотворице Рафаило, величаем велию ревность и любы твоя, яже ко Господу и Спасителю нашему, торжествуем небесную славу твою, яко ты в сонме жен преподобных и мучениц велехвальных днесь предстоиши пред Престолом Агнца Божия, славословим предстательство за ны пред Всемогущим и Милосердным Творцом нашим и с надеждою взываем ти сице:
Радуйся, отроков и юношей в целомудрии и добронравии сохраняти себе научающия;
Радуйся, девиц в кротости, чистоте и благости утверждатися помогающая;
Радуйся, мати святая, сердца чад ко родителем возвращающая;
Радуйся, отцев и матерей истинней любви к чадом наставляющая;
Радуйся, супругом любы и согласие дарующая;
Радуйся, раздоры семейныя на мир благий пременяющая;
Радуйся, старцем и старицем силы и радость, пред закатом жития их дарующая;
Радуйся, прикровенно радости небесней еще на земли сподобляющая;
Радуйся, святая преподобная мати наша Рафаило, мученице Христова и чудотворице достославная!

Кондак 13
О святая агнице Христова, преславная мати Рафаило, преподобномученице и чудотворице, заступнице и покровительнице наша многомилостивая! Нынешнее приносимое тебе от сердец наших моление приимше, и всеблагомощным ходатайством твоим у Всесвятыя и Нераздельныя Троицы сохрани ны враг видимых и невидимых, от всяких бед, болезней и скорбей и испроси всем, призывающим тя, прочее время живота нашего в мире, благополучии и истиннем покаянии скончати, да сподобимся купно с тобою во веки Господеви воспевати: Аллилуйя!

Молитва ко святей преподобной и богоносной матери нашей Рафаиле, чудотворице Чигиринской
О святая преподобная и богоносная мати наша Рафаило, преславнаго града Чигирина и всех, с любовию на всяцем месте и во всякой стране христианской чтущих тя благоадатная заступнице и покровительнице!
Молим тя, угоднице Божия, испроси у Спасителя нашего прощения прегрешений прегрешений, яже от юности до настоящего дня и часа согрешихом, и настави всех ко христианскому житию,в твердой вере, надежде известной, и любве теплой. Исходатайствуй крепким твом предстательством у Господа спасения всем, к рацее мощей твоих (иконе твоей святой) приходящим, и ихже кийждо в помышлении имать удостой твоего заступления и помощи.
Прибегая ныне к заступничеству твоему усердно просим тя: сохрани град сей и вся люди, в нем верою живущия, от глада, хлада, болезней и междоусобныя брани.
О святая мати Рафаило, сотвори молитвы твоя за всех страждущих, за лишенных крова, работы, за сущих во обстояниях тяжких, за пребывающих в отчаянии и тревоге о днях грядущих.
К предстательству и заступничеству твоему прибегая, угоднице Христова, усердно просим тя: приклони Милосердие Божие, к нашей Святей Церкви, к архипастырям, пресвитером, монашествующим и миряном, яко ты еси всеблагая заступнице наша пред Престолом Всесвятыя и Нераздельныя Троицы.
Ей, святая мати наша Рафаило, ниспошли благословение Божие всем в радости сущим, упроси Творца нашего даровати помощь благодатную семьям нашим, чадом, старцем и старицам, да сподобит всех нас Милосердный наш Господь во всяк день и час жития нашего в мире и славословии Божием пребывати.
Вознеси молитвы твоя, о святая мати, за всех умерших в надежде всеобщего воскресения, да простит им Господь вся согрешения их, вольная и невольная.
Умоли Господа нашего исполнити вся просьбы наша и молитвами твоими сподоби ны славословити купно с тобою Всесвятаго Господа и Бога нашего, Отца и Сына и Святаго Духа и ныне и присно и во веки веков. Аминь.[/spoiler]

[Раб божий Константин]

Преподобная Рахиль, Бородинская.
[spoiler]Кондак 1

Избранная дщи Царя Небеснаго,/ истинная служительнице Пресвятыя Богородицы,/ новая чудотворице и предивная православным помощнице,/ преподобная мати Рахиле,/ прославляюще прославльшаго тя Господа,/ воспеваем ти похвальная,/ ты же имущи дерзновение ко Святей Троице,/ от всяких нас бед свободи, да зовем ти:/ Радуйся, Рахиле, сокровище Бородинское, земли Московския похвало и радование.

Икос 1

Ангелов Творец и славы Сый Господь, дарова тя, Рахиле, яко многоценное сокровище, людем российским, во дни великия смуты и мятежа, да видяще равноангельное житие твое и благодати струю выну текущую, не погибнут до конца во гресех своих и обратятся в покаянии к Создателю своему, тебе же благодарственно воспоют похвальную песнь сице: Радуйся, звездо, во мраце безбожия светло возсиявшая: Радуйся, житием твоим Солнце Правды, Христа проповедавшая. Радуйся, во времена гонений лютых за правую веру брань мужески подъявшая: Радуйся, новомучеников российских сопричастнице. Радуйся, на земли совершенствам Отца Небеснаго подражавшая: Радуйся, венец нетленный от Него приявшая. Радуйся, добродетелей лествицею к Небесем востекшая: Радуйся, во плоти ангельски пожившая. Радуйся, пречудное и быстрое падших востание: Радуйся, скорбящих от слез избавление. Радуйся, о рати православней молитвеннице теплая: Радуйся, за Русь Святую предстательнице непостыдная. Радуйся, Рахиле, сокровище Бородинское, земли Московския похвало и радование.

Кондак 2

Видя Господь благое сердца твоего изволение, яко издетска послужити Ему восхотела еси, призва тя на тесный и прискорбный путь жития иноческаго, к Царствию Небесному ведущий: Ты же всем сердцем, всею душею и всею крепостию твоею Бога возлюбивши непрестанно взывала еси: Аллилуиа.

Икос 2

Разум старческий в юных летех стяжала еси, преподобная, отвращалася бо еси суетных утех мира сего, душу твою Божественными писании веселящи. Темже мы, дивящеся таковому о тебе Божию промышлению зовем: Радуйся, храм Божий и молитву от юности возлюбившая: Радуйся, безмолвию и богомыслию прилежавшая. Радуйся, начало подвигов твоих во младости положившая: Радуйся, главу твою под благое иго Христово подклонившая. Радуйся, благочестивых родителей отрасль пречестная: Радуйся, Христа ради дом родительский оставившая. Радуйся, нрав боголюбив стяжавшая: Радуйся, верою ум твой просветившая. Радуйся, яко издетска сирым и убогим милосердия токи излияла еси: Радуйся, яко ризы и брашна нищей братии Христовой подавала еси. Радуйся, отроковице добрая, Божественныя благодати преисполненная: Радуйся, вышней премудрости наученная. Радуйся, Рахиле, сокровище Бородинское, земли Московския похвало и радование.

Кондак 3

Силою Вышняго и неисповедимым Промыслом ведома, притекла еси во град Киев, поклонения ради честным мощем преподобнаго Феодосия, егоже измлада возлюбила еси: святую же Лавру Печерскую узревши, воспела еси благих Подателю Богу: Аллилуиа.

Икос 3

Имущи желание равноангельнаго иноческаго жития, пред ракою святых мощей Божественнаго Феодосия, яко живу сущу ему, просила еси, отроковице Боголюбивая, волю Божию о тебе известну сотворити: мы же видяще толикое твое тщание и веру несумненну, вопием таковая: Радуйся, начальника монашества Российскаго усердно чествовавшая: Радуйся, к святым мощем его с верою притекшая. Радуйся, невидимою силою прямо раки поставленная: Радуйся, к подножию ея со слезами приклонившаяся. Радуйся, явления самаго преподобнаго сподобившаяся: Радуйся, усты ко устом с ним глаголавшая. Радуйся, от первоигумена Лавры Печерския благословение приимшая: Радуйся, на путь монашеский им управленная. Радуйся, преподобным Феодосием чрез все житие твое, яко отцем, руководимая: Радуйся, с нимже ныне в Царствии Небеснем прославленная. Радуйся, розго младая, к лозе монашества Российскаго привитая: Радуйся, плод сторичный в пособие православным возрастившая. Радуйся, Рахиле, сокровище Бородинское, земли Московския похвало и радование.

Кондак 4

Бурю внутрь имеяй помышлений сумнительных, благочестивый родитель твой смятеся, помышляя в замужество вдати тя, преподобная Рахиле, ты же Единому Жениху паче всех человек краснейшу душею уневестившися, земнаго супружества отвращалася еси, поющи Богу: Аллилуиа.

Икос 4

Слышавши родителя грозныя увещания, голубице чистая, убоялася еси, жениху смертному отдана быти, сего ради во град Смоленск востекла еси к чудотворней иконе Одигитрии, да управит путь твой к Безсмертному Жениху Христу, темже вопием ти: Радуйся, на Богоматерь упование возложившая: Радуйся, козни вражия всесильною помощию Ея победившая. Радуйся, яко Пречистая упования твоего не посрамила еси: Радуйся, яко во обитель Вознесения Господня путь твой управила еси. Радуйся, земным раем святую обитель почитавшая: Радуйся, тамо сердцем и усты немолчно Творца прославлявшая. Радуйся, яко птица тенет мирскаго жития избавльшаяся: Радуйся, дивным цветом во дворех Господа процветшая. Радуйся, чистая дево, к Пречистей Агнице слезно взывавшая: Радуйся, и сама агницей кроткой наименованная. Радуйся, голубице, под кровом Всевышняго вогнездившаяся: Радуйся, с мудрыми девами в брачный чертог радостно возшедшая. Радуйся, Рахиле, сокровище Бородинское, земли Московския похвало и радование.

Кондак 5

Боготечную и путеводную звезду имущи, Рахиле, пречуднаго Феодосия, житию его святому и подвигом безпорочно поревновала еси, братии служением неленостным, пощением, бдением, еще же и плоти твоем, умерщвлением: мы же видяще толикия труды твоя, спасения ради подъятыя, поем укрепльшему тя Христу: Аллилуиа.

Икос 5

Видящи, преподобная, яко родитель не остави тя попечением, аще и в монастырь вселилася еси, потщалася еси зельными подвиги удручити плоть твою и милостыню творити, наипаче же обитель святую оставльши вдатися в подвиг странничества. Мы же, видяще толикое твое о добродетели рачение, глаголем: Радуйся, заповедей евангельских хранительнице усердная: Радуйся, совершеннаго нестяжания исполненная. Радуйся, любве родительския любве ради Христовы отвратившаяся: Радуйся, красных мира сего до конца отвергшаяся. Радуйся, яко в нищетне образе неведомая миру странница явилася еси: Радуйся, яко нищетою вольною подражати Владыце Христу потщалася еси. Радуйся, поношения и поругания от людей приявшая: Радуйся, сего ради Христа и Пречистую Матерь Его сопутниками имевшая. Радуйся, мраз и глад мужески претерпевшая: Радуйся, злострадания телесная паче плотскаго упокоения возлюбившая. Радуйся, яко пищи безсмерныя ныне причащаешися: Радуйся, яко упокоением Небеснаго Царствия ныне наслаждаешися. Радуйся, Рахиле, сокровище Бородинское, земли Московския похвало и радование.

Кондак 6

Проповедует земля Смоленская совершенство богоподобных твоих добродетелей, Рахиле преславная, яко еще в новоначалии сущи брашна и хлебы во обители твоей помощию Богородицы умножила еси, и тако множество людей напитавши, коварство наветниц твоих посрамила еси, не ведущих пети: Аллилуиа.

Икос 6

Осияния Небеснаго сподобилася еси, мати честная, Приснодеву Богородицу в чудном видении узревши, и Сию яко Младопитательницу добрую и Стену девства нерушимую обретши, в веселии спасительный путь твой проходила еси, сего ради венчаем тя сими песенными цветы: Радуйся, целомудрие, яко многоценный бисер, соблюдшая: Радуйся, хранительницю девства твоего Богоматерь имевшая. Радуйся, ничесоже на небеси и на земли разве Христа видети желавшая: Радуйся, любовию Божественною душу и тело твое согревавшая. Радуйся, риз лепоту и доброту телесную презревшая: Радуйся, одеяние чертога небеснаго и память смертную паче возлюбившая. Радуйся, мучительства страстей мудре избежавшая: Радуйся, единому Богу служити восхотевшая. Радуйся, постнического жития истинное правило: Радуйся, в подвизех древним отцам и женам поревновавшая. Радуйся, яко в невестнике Христовом присно живеши: Радуйся, яко и нас предстательством твоим не оставляеши. Радуйся, Рахиле, сокровище Бородинское, земли Московския похвало и радование.

Кондак 7

Хотя человеколюбец Господь явити тя, богоблаженная мати Рахиле, людем Своим, путь твой во Святыя Горы управи, идеже преподобный Иоанн Затворник подвизашеся, иже многия дивныя тайны поведа ти и паки во обитель святую возвратитися и страждущим тамо служити повеле, егоже богомудрых, словес, яко Самаго Господа, в сладость послушавши, вопияла еси: Аллилуиа.

Икос 7

Новосоделала еси, Рахиле пречудная, многими труды и борении душу твою, темже явилася еси Духу Святому приятелище достойное: обаче послушанию монастырскому вдавшися, христоподражательным смирением твоим уязвила еси прегордаго велиара, сего ради зовем ти: Радуйся, Владычицу Пречистую путеводительницею имевшая: Радуйся, во обитель Владычнюю Ею управленная. Радуйся, братству монастырскому паки всеусердно послужившая: Радуйся, в послушании при поварне дары благодатныя явившая. Радуйся, дом добродетели на камени заповедей утвердившая: Радуйся, фараона мысленнаго в море смирения потопившая. Радуйся, противу мира, плоти и диавола брань мужески подъявшая: Радуйся, венец победы от Подвигоположника приимшая. Радуйся, Господа серафимскою любовию возлюбившая: Радуйся, чести безплотных на небеси сподобльшаяся. Радуйся, идеже Христос в телеси, тамо и ты пребываеши: Радуйся, яко милость Его богатую на нас призываеши. Радуйся, Рахиле, сокровище Бородинское, земли Московския похвало и радование.

Кондак 8

Странствия подвиг совершивши, преподобная мати, присно странницею себе почитала еси, Отечества Небеснаго взыскующи, сего ради сподоби тя Господь послужити Пресвятому имени Своему во обители Всемилостиваго Спаса, на крови воинов стоящей, идеже многими даровании и чудесы просияла еси, поющи Богу: Аллилуиа.

Икос 8

Всю себе в жертву Господеви принесши, Рахиле предивная, благоухание приятное непорочным житием Владыце твоему явилася еси: приходящим к тебе с верою вспоможение безмездно подающи и немощи немощных носящи и тако Закон Христов исполнила еси, темже вопием ти: Радуйся, яко во обители Нерукотворнаго Образа Христова потрудилася еси: Радуйся, яко нерукотворный храм души твоея благолепием добродетелей украсила еси. Радуйся, Духа Святаго благодать стяжавшая: Радуйся, образ Божий в себе обновившая. Радуйся, мати наша чадолюбивая: Радуйся, тайных прегрешений обличительнице прозорливая. Радуйся, яко доилица, чада твоя духовная любовию согревавшая: Радуйся, словесным и чистым млеком души их воспитавшая. Радуйся, заповеди Господни творити научающая: Радуйся, окамененная сердца во источницы милования обращающая. Радуйся, болящим и скорбным скорая помощнице: Радуйся, заблуждшим мудрая наставнице. Радуйся, Рахиле, сокровище Бородинское, земли Московския похвало и радование.

Кондак 9

Всяк разум удивляется бывшему на тебе, Рахиле блаженная, Божию благоволению, яко служащи в алтаре Господнем, зрительница видений чудесных явилася еси, темже радования духовнаго исполнившися, вопияла еси Богу: Аллилуиа.

Икос 9

Ветия многовещаннии не возмогут изрещи теплоту Божественныя твоея любве, преподобная, юже на люди православныя обильно излияла еси, аще и в немощи телесной сущи, обаче силою Божиею целительница и чудотворица великая показалася еси. Сего ради восхваляем тя сице: Радуйся, Божию Силу и Божию Премудрость людем проповедавшая: Радуйся, немощных в вере укрепившая. Радуйся, духовнаго любомудрия ревнительнице: Радуйся, пищи духовныя и телесныя подательнице. Радуйся, оставленных врачами со одра болезни воздвизающая: Радуйся, отступивших от правыя веры на путь спасения возвращающая. Радуйся, блуждающих по морю жития сего мудре окормляющая: Радуйся, юныя благочестию научающая. Радуйся, пророчества дара исполненная: Радуйся, будущая, яко настоящая провидевшая. Радуйся, от внезапныя смерти избавляющая: Радуйся, от погибели душевныя спасающая. Радуйся, Рахиле, сокровище Бородинское, земли Московския похвало и радование.

Кондак 10

Спасти хотя чад заблуждших милосердный Господь, посла тя, Рахиле, яко агницу посреде волков, во свидетельство истины Христовой, да соберутся овцы расточенныя во ограду церковную, да возсияет паки во Отечестве нашем свет веры Православныя, подвизая всех пети Богу: Аллилуиа.

Икос 10

Стена благочестия явилася еси непоколеблема, богомудрая мати Рахиле, ограждающи притекающих к тебе от душепагубных учений, укрепляющи малодушных, предстательствующи в молитвах, еще же и лютыя беды грядущия на страну нашу предвозвестила еси. Мы же чудящеся таковому о нас грешных Божию промышлению умильно глаголем: Радуйся, православия стено нерушимая: Радуйся, молитвы за мир лампадо негасимая. Радуйся, любве пучино Богом излиянная: Радуйся, светильниче на свещнице высоцем поставленный. Радуйся, злобы бесовския мрак отгоняющая: Радуйся, человеки от бед и скорбей избавляющая. Радуйся, многих сынов Российских из бездны греховныя восхитившая: Радуйся, тех на путь покаяния наставльшая. Радуйся, не токмо верных, но и неверных любовию объявшая: Радуйся, милование Христово к немощным и грешным проповедавшая. Радуйся, неимущих вдов и сирот снабдевающая: Радуйся, алчущих и жаждущих насыщающая. Радуйся, Рахиле, сокровище Бородинское, земли Московския похвало и радование.

Кондак 11

Пение всякое не возможет изрещи богатство духовных дарований твоих Рахиле прехвальная, яко не токмо постническим житием просияла еси, но и ближнему безмездно послужила еси, и веру Христову пред лицем власти богоборныя исповедала еси: темже мы, славяще Бога, дивнаго во святых своих поем: Аллилуиа.

Икос 11

Светоприимную свещу сущим во тьме неразумия людем русским, Богом явленную, зрим тя, всеблаженная мати наша Рахиле, возсияла бо еси светом добродетельнаго жития твоего, егда оскуде на Руси преподобный, и наставила еси к разуму истинному, вся зарею словес Божиих ум просвещающи, звании же почитаемая сими: Радуйся, Солнца Правды луче пресветлая: Радуйся, Света Невечерняго заре немерцающая. Радуйся, яко молния, словесы твоими души просвещающая: Радуйся, яко гром, враги Церкве Христовы устрашающая. Радуйся, чистых дев ко Христу невестоводительнице: Радуйся, целомудрия любителей наставнице. Радуйся, чад твоих на подвиг исповедничества благословившая: Радуйся, молитвами твоими их укрепившая. Радуйся, духовнаго просвещения светильниче небосветлый: Радуйся, молитвами твоими их укрепившая. Радуйся, духовнаго просвещения светильниче небосветлый: Радуйся, милосердия и милостыни источниче неисчерпаемый. Радуйся, нас грешных к покаянию призывающая: Радуйся, ближняго любити научающая. Радуйся, Рахиле, сокровище Бородинское, земли Московския похвало и радование.

Кондак 12

Благодать древнюю дати восхотев, Человеколюбец Господь яви тя, Рахиле преславная, во дни гонений на Церковь Христову новую Свою угодницу и за Русь молитвенницу неусыпающую, сего ради благодаряще Бога вопием: Аллилуиа.

Икос 12

Поюще честное твое преставление, преподобная мати Рахиле, ублажаем тя вси, тобою бо препрославленный наш Господь славно прославися, и всех воспевати тебе научи: Радуйся, святая, со всеми святыми на небесех торжествующая: Радуйся, с ними песнь победную Богу воспевающая. Радуйся, в ризы светлыя неветшающия ныне облеченная: Радуйся, добротою девства преиспещренная. Радуйся, от Христа венец достойный приявшая: Радуйся, и нам в Царствие Небесное путь показавшая. Радуйся, целительнице безмездная: Радуйся, предстательнице о нас пред Богом непостыдная. Радуйся, Церкве Христовы оружнице непобедимая: Радуйся, иноком в брани духовней наставнице богомудрая. Радуйся, вертограда Бородинскаго маслина плодовитая: Радуйся, Российскаго луга духовнаго крине благовонный. Радуйся, Рахиле, сокровище Бородинское, земли Московския похвало и радование.

Кондак 13

О преблаженная и богомудрая мати наша Рахиле, не забуди убогих твоих до конца, приими сие малое моление наше и принеси е ко Престолу Вседержителя: умоли Христа Всецаря силу свыше православным христианом на сопротивныя подати и на Судищи Страшнем грехов наших не помянути, наипаче же Царствия Небеснаго достигнути, вопиющим Ему: Аллилуиа, Аллилуиа, Аллилуиа.



(Этот кондак читается трижды, затем икос 1 и кондак 1)



Молитвы к преподобной Рахиле Бородинской



Молитва первая

О незлобивая и кроткая, праведная старице, преподобная мати Рахиле, новая чудотворице и молитвеннице за род христианский! Се мы, грехми и треволненьми житейскаго моря обуреваеми, от глубины сердечныя взываем ти: не остави нас, немощных, печальных и унылых призрением милостивнаго твоего заступления!

Во дни земнаго жития твоего явилася еси болящим безмездная целительница, алчущим милостивая кормительница, заблуждшим наставница, скорбящим и обидимым утешительница милосердная и всем притекающим к тебе скорая помощница и чадолюбивая мати. И ныне вемы, яко дана тебе от Господа и Пречистой Богородицы благодать молитися за ны.

О верная слуго Христова, сторицею возрастившая данный тебе талант, уврачуй страсти душ и телес наших, укрепи в добродетели и настави на путь покаяния: умягчи наша злая и хладная сердца, да паче всего возлюбим Христа, в Немже и ближняго своего. Умоли Господа сил низпослати милость Свою многострадальному Отечеству нашему и святей обители сей, в ней же подвизалася еси, да тихое и безмолвное житие поживем во всяком благочестии и чистоте: и тако достигнем в немятежное пристанище Небеснаго Царствия, идеже ты в незаходимей сияеши славе, воспевая со всеми святыми хвалебную песнь Отцу и Сыну и Святому Духу, ныне и присно и во веки веков. Аминь.



Молитва вторая

О достоблаженная старице наша, преподобная мати Рахиле, недужных и скорбных скорая утешительнице и целительнице! Приими ныне моление недостойных чад твоих и донеси сей малый плод сердец и устен наших ко престолу Божию, да предстательством твоим низпослет нам Милосердный Господь щедроты Своя: подаст благоденствие Отечеству нашему и обители сей: избавит от труса, огня, меча, нашествия иноплеменник и междоусобныя брани: недужным дарует исцеление, скорбящим утешение: гордых смирит, нерадивых к покаянию обратит, монашествуюших дух в горении к Богу укрепит: всем православным Христианом подаст, яже ко спасению потребная: наипаче же явит нам милость на Страшнем судище Своем и вселит в обители Небесныя со всеми святыми: Емуже подобает хвала и слава, честь и держава, Отцу и Сыну и Святому Духу, ныне и присно и во веки веков. Аминь.



Тропарь, глас 5

Яко маслина плодовита возросла еси во обители Бородинстей,/ и процветши даровании исцелений и чудес,/ преподобная мати Рахиле,/ плод сторичный принесла еси,/ повелением Богородицы всеусердно ближнему послуживши,/ кротостию и любовию многих на путь спасения наставляющи/ и добродетели научающи,/ темже светлым тя венцем увенча подвигоположник Христос Бог наш,// Егоже моли спасти и просветити души наша.



Кондак, глас 2

Заповеди Господни исполнивши,/ старчества благодать восприяла еси,/ немощи немощных носящи,/ священна жертва принеслася еси,/ агнице кроткой тезоименита,/ исцелений реки и ныне источаеши,/ темже мы, чада твоя, любовию притекающи вопием:/ преподобная мати Рахиле,/ моли Владыку Христа и Пречистую Матерь Его// спастися душам нашим.



Величание

Ублажаем тя, преподобная мати Рахиле,/ и чтим святую память твою,/ ты бо молиши о нас// Христа Бога нашего.[/spoiler]

[Раб божий Константин]

Акафист Рождеству Пресвятой Богородицы.
[spoiler]Кондак 1

Избранней от человеческого рода и рождшейся от неплодове, Пречистей Деве Марии составим похвалу, яко рождеством Ея начало спасения нашего бысть и пришествие в мир Избавителя возвестися. Темже радостно Ей возопиим: Радуйся, Пречистая Дево, Материю Спасителя мира от века предъизбранная.



Икос 1

Ангел небесный предстояй пред Богом, послан бысть к праведным Иоакиму и Анне возвестити им радость велию, яко по неплодствии своем имут родити Дщерь Преблагословенную, от Неяже всему миру радость произыдет. Темже и мы, радости сея причастницы, похвальная песни Деве воспоем: Радуйся, в Троичном Совете Материю Сына Божия от века предъизбранная; радуйся, древними пророками с патриархи многообразне в образех и сенех прообразованная. Радуйся, вящшие пяти тысящ лет от создания мира верными Божиими рабы, яко Матерь Избавителя ожиданная; радуйся, лествицею Иаковом виденною, Божие к человеком снизшествие прообразовавшаго предуказанная. Радуйся, неопалимою купиною в пустыни Синайстей Моисеом виденною, предвозвещенная; радуйся, Чермным морем Израилю сух путь давшему, фараона же потопившему, образне преднаписанная. Радуйся, написатися нам в книзе Живота Вечнаго пособствующая; радуйся, Царствия Небеснаго невозбранный вход нам ходатайствующая. Радуйся, Пречистая Дево, Материю Спасителя мира от века предъизбранная.

Кондак 2

Видяще праведнии Иоаким и Анна явльшагося им Ангела, возвещающа рождество Твое, Пресвятая Дево, возблагодариша Бога, призревшаго отъяти поношение безчадия их, и всем сердцем тепле возопиша: Аллилуиа.

Икос 2

Разум Божественнаго строительства и на землю снизшествия Своего Всеблагий Господь исполнити начиная, посланием Ангела Своего возвестити Иоакиму и Анне о рождестве Твоем, Пресвятая Дево. Темже вопием Ти хвалебно: Радуйся, разума Божественнаго прояв-ление; радуйся, дивнаго смотрения Его исполнение. Радуйся, древле предуставленная послужити воплощению Сына Божия; радуйся, от всех родов в жилище всех Царя предъизбранная. Радуйся, еще в рай изречением искусителю змию о положении вражды между тем и Женою и Семенем Ея предуказанная; радуйся, по исполнении времен от неплодове изволением Божиим славне произшедшая. Радуйся, род человеческий рождеством Своим возвеселившая; радуйся, сетование чаявших утехи Израилевы преложившая. Радуйся, Пречистая Дево, Материю Спасителя мира от века предъизбранная.



Кондак 3

Сила Вышняго разреши неплодство заматоревшия во днех своих праведныя Анны: зачат бо Тя, Пречистая, и, чая Твоего рождения, радостно пояше Богу Израилеву хвалебную песнь: Аллилуиа.



Икос 3

Имущая безмужно родити Спасителя душ и телес наших, Ты и Сама, яко чудо пред велиим и непостижимым чудесем, от неплодных родителей славно родися, Пресвятая Дево. Темже воспеваем Ти сице: Радуйся, от корене Иессеова и Давидова произшедшая; радуйся, от неплодных ложесн праведныя Анны дивно прозябшая. Радуйся, пророчеством Исаии прежде лет древних Дева-Матерь проявленная; радуйся, по обетованию Ангела рожденная. Радуйся, скиниею свидения и Ковчегом завета прообразованная; радуйся, процветшим жезлом Аароновым образне прознаменованная. Радуйся, прежде рождества Твоего в Матерь Богу-Слову освященная и предуготованная. Радуйся, Пречистая Дево, Материю Спасителя мира от века предъизбранная.



Кондак 4

Бури поношений человеческих о неплодствии своем избавльшеся в зачатии Твоем, Пресвятая Дево, праведнии родителие Твои радовахуся, и в честь рождества Твоего учреждение велие творяху сродником и знаемым, и тии срадовахуся им, вопиюща Богу, сотворшему милость Свою, хвалебную песнь: Аллилуиа.



Икос 4

Слышавше окрестные людие, яко дщи Иоакима и Анны наречена бысть Мария, сиесть Госпожа, проразумеваху, Пречистая, велику и славну Тя быти не токмо в людех, но и у Бога. Мы же сбытие сего добре ведуще, величаем Тя сице: Радуйся, Пресвятая Дево, не от человека, но от Ангела имя Себе еще прежде зачатия приявшая; радуйся, по имени сему Госпожею всея твари быти сподобльшаяся. Радуйся, яко праведнии родителие Твои воздающе Богу благодарение за рождение Твое, великия дары в жертву Тому принесоша; радуйся, яко сродником и знаемым, купно же и убогим вечерю любве сотвориша. Радуйся, яко от священников, в дом родителей Твоих на торжество позванных, благословена еси; радуйся, яко от всех на веселие оно собравшихся, похвалена и прославлена была еси. Радуйся, выше всякия чести и похвалы явльшаяся; радуйся, Материю Бога-Слова быти сподобльшаяся. Радуйся, Пречистая Дево, Материю Спасителя мира от века предъизбранная.



Кондак 5

Боготечная звезда, возвещающая пришествие Солнца Правды, Христа Бога нашего, в рождестве Твоем явися, о, Пресвятая Дево; тем-же людие Божии, пришествия Избавителя верою чаявшии, видяще Тя чудно от неплодове рождшуюся, таинственно возвеселишася и возопиша: Аллилуиа.



Икос 5

Видевши праведнии Иоаким и Анна рождшуюся от них Богоотроковицу Марию, о Нейже Ангел Божий некая чудная и дивная тем провозвести, яко кивоту Божию, Той послужиша, воспитавающе и храняще Ю, якоже зеницу ока. Темже и мы похваляюще Богоотцев, сподобившихся родительми быти таковыя Дщери, Деве Марии радостно воспеваем: Радуйся, Пречистая Дево, яко по рождестве Твоем родителие Твои вельми возликоваху; радуйся, яко в явлении Твоем в мир Ангели и человецы согласно возрадовахуся. Радуйся, яко о Тебе вси пророцы многообразне предглаголаху; радуйся, яко един от них Вратами затворенными, ин же Горою приосененною Тя именоваху. Радуйся, яко вся преславная древле таинственно о Тебе предглаголано быша; радуйся, яко Градом и Селением Божиим псаломническая уста Тя наименоваша. Радуйся, седмосвещным светильником, яко седмию дарами Святаго Духа исполнена быти имевшая, предуказанная; радуйся, позлащенною трапезою с хлебами предложения, яко Хлеб Жизни, Христа, родити имевшая, предуказанная. Радуйся, Пречистая Дево, Материю Спасителя мира от века предъизбранная.



Кондак 6

Проповедник богоносных вещания и глаголы исполняя, изволением Зиждителя твари на земли явилася еси, Пресвятая Дево, естества нашего цвете, Адама же и Евы воззвание и на первую доброту возведение. Темже вси вернии в рождестве Твоем радость обретши, духовно торжествующим, поюще дивному в Совете Своем Богу нашему: Аллилуиа.







Икос 6

Возсия в рождестве Твоем, Пречистая, заря спасения нашего, во исполнение Божественнаго смотрения, имже едина Ты от всех родов достойна явилася еси плоть заимодати Зиждителю Твоему, пришедшему спасти род наш от древния праотеческия клятвы. Сего ради взываем Ти сице: Радуйся, Адама и Евы воззвание; радуйся, древния клятвы разрешение. Радуйся, сеновнаго закона конец и новыя благодати начало; радуйся, промышления Божественнаго Таинница и на делания благая нас присно наставляющая. Радуйся, едина во всех родех достойно обретшаяся быти Материю Бога-Слова; радуйся, и нам новым во Христе людем духовная Мати явльшаяся. Радуйся, Матерним Твоим попечением николиже нас оставляющая; радуйся, в сыны и дщери Сыну Твоему достойны и благоугодны нас приуготовляющая. Радуйся, Пречистая Дево, Материю Спасителя мира от века предъиз-бранная.



Кондак 7

Хотяще обеты своя Господеви воздати, праведнии родителие Твои, Пресвятая Дево, трилетствующую Тя отроковицу приведоша в храм Господень со славою и радостию многою, первосвященник же (Захария), Духом Божиим объятый, введе Тя во Святая Святых, яже прообразом токмо быша Твоея Святыни. Ты бо вместила в Себе не кивот Завета, но святых Святейшаго Сына Божия, во утробе Твоей девственней плоть восприявшаго. Емуже Ты с лики девическими выну воспевала еси: Аллилуиа.



Икос 7

Новое и преславное промышление Божественное бысть о Тебе, Дево Марие. В храме бо Божием жительствующи пищу от рук Ангельских принимала еси, Пресвятая. Темже молим Тя: напитай нас пищею благодатною, да возрастем духовно в мужа совершенна и Тебе, Всецарице, похвальная возопием: Радуйся, преукрашенная добродетельми, Отроковице, в храме Божием жити и Ангелом Собеседнице быти сподобльшаяся; радуйся, посылавшуюся Тебе Богом пищу от Ангелов во Святая Святых принимавшая. Радуйся, небесным хлебом во храме чудесно воспитанная; радуйся, к великому таинству воплощения Сына Божия тамо предуготованная. Радуйся, яко повелением Божиим Ангели на земли Тебе усердно служаху; радуйся, яко тии ныне на Небесех, яко Царице, благоговейно Тебе служат. Радуйся, яко и мы недостойнии песньми хвалебными присно Тя величаем; радуйся, яко и рождших Тя Богоотцев всегда ублажаем и в молитвах их призываем. Радуйся, Пречистая Дево, Материю Спасителя мира от века предъизбранная.

Кондак 8

Странное рождество Пречистыя Девы видевше, устранимся суетнаго мира, ум на Небеса преложше, идеже Богоматерь во славе предстоит Сыну Своему и Богу, ходатайствующи пред Ним о всех верных, всеславное рождество Ея (и в храм введение) любовию празднующих и вопиющих Богу: Аллилуиа.



Икос 8

Вся тварь в рождестве Твоем, Пречистая, обрете радость, печаль праотеческую потребляющую: произшедшим бо от Тебе Христом Богом, падшее во грех преслушания естество наше от падения воста и паки любезно Зиждителю сотворися. Темже умильно Ты взываем: Радуйся, всемирныя радости предвозвещение; радуйся, таинство от века сокровеннаго явление. Радуйся, Еюже падения востахом; радуйся, Еюже прежде отриновенное естество наше истее Богу присвоися. Радуйся, Еюже Иоаким и Анна поношения безчадия свободившася; радуйся, Еюже безплодие сердец наших в благоплодие применися. Радуйся, Еюже обилие благ вечных верным от Господа подается. Радуйся, Пречистая Дево, Материю Спасителя мира от века предъизбранная.



Кондак 9

Вси Ангели Божии не ведевшии тайны Боговочеловечения в Совете Триипостаснаго Божества от века сокровенныя и напоследок Девою Мариею явленныя, вельми удивлены быша, зряще, како Дщи Иоакима и Анны необычно естеству женскому, во Святая Святых введеся. Темже недоумением объяти бывше, благоговейно вопияху: Аллилуиа.



Икос 9

Ветия древнейший, всемудрый в царех Израилевых Соломон, провидя рождество Твое, Пречистая, в Песнех Песней со удивлением возглашаша: "Кто Сия, проницающая, аки утро, добра, яко луна, избранна, яко солнце". Темже Церковь ликовствующи в празднице Твоем, весело Тебе вопиет: Радуйся, невечерняго дне Боговедения утро светлейшее, в законней сени, яко во мраце, возсиявшее; радуйся, солнцеобразная Дево, истинное Солнце — Христа, девственным воплощением в мир введшая и тем вся просветившая. Радуйся, световидная стихия, существенно приявшая Бога, живущаго во свете неприступнем; радуйся, Своим малым чревом объявшая Безпредель-наго, вся концы вселенныя объемлющаго. Радуйся, полная луно, свет божественный непосредственно восприемлющая и нас тем озаряющая; радуйся, чистейшее зерцало, в немже многая совершенства Божия чудно и верно изображаются. Радуйся, совершенством Твоих добродетелей и нас к тому же подвизающая; радуйся, немощныя наши силы к творению добрых дел подкрепляющая. Радуйся, Пречистая Дево, Материю Спасителя мира от века предъизбранная.



Кондак 10

Спасти хотя род человеческий от первородныя клятвы, дивное смотрения Своего таинство сотвори Господь: избра бо Тя, Пречистая, от рода Авраамля и Давидова, и от Тебе безсеменно воплотитися благоизволи, прешед уставы естества, но и тя произведе от за-маторевша и неплодна корене Иоакима и Анны праведников. Темже рождество Твое (и в храм вхождение) днесь празднующи и рождших Тя песньми восхваляющи, вопием Богу: Аллилуиа.



Икос 10

Царю Небесный, спасения нашего ради хотя на земли явитися и с человеки пожити, чертог свят воплощения Своего, Тя, Пречистая, предуготова, подав плод безчадной Анне, слезно с супружником Своим, молившимся о разрешении своего неплодства. Темже молим Тя, Богомати: разреши неплодие душ наших, да возможем принести Богу плод благих дел добродетели, взывающе Ти сице: Радуйся, пресветлый Чертоже безсеменнаго Божия воплощения; радуйся, одушевленная Палато, в жилище всех Царя предуготованная. Радуйся, светлейший облаче, имже Седящий на престоле Божества к нам сниде; радуйся, Посреднице закона и благодати, запечатление Ветхаго и Новаго Заветов. Радуйся, неувядаемая Лозо, прекрасный цвет — Спасителя мира, произрастившая; радуйся, благовонное яблоко, от неплодове произрастшее и Христу благоугодно явльшееся. Радуйся, и нас, певцев Твоих, благоугодны Христу представити тщащаяся; радуйся, яко и нас, безплодны сущих делы благими, не лишаеши духовнаго утешения. Радуйся, Пречистая Дево, Материю Спасителя мира от века предъизбранная.



Кондак 11

Песнь хвалебную рождеству Твоему (и в храм введению) приносящих не отрини, Владычице Благая, но рождших Тя ради, бла-гоцветлива нам буди, молящи о нас Сына Твоего и Бога нашего, да подаст грехов прощение и жития исправление, еже в покаянии слезном выну благодарно воспеваем Ему: Аллилуиа.



Икос 11

Светоприемная и премирная Божественнаго света Свеща, единородная Дщерь Иоакима и Анны, предъизбранная в Матерь Единородному Сыну Божию, днесь от неплодове преславно произыде, и просвещает всех рождество Ея (и в храм вхождение) верно празднующих и благоговейно взывающих: Радуйся, светозарная Свеще, Божественным пламенем возжженная; радуйся, и нас тем благодатно просвещающая и согревающая. Радуйся, таинственная Клеще, Угль Божественный Христа Господа во утробе и на руках Твоих носившая; радуйся, и нас в Таинстве Причащения приимати Того сподобляющая. Радуйся, живый и преукрашенный Храм Господень, о Немже поет Давид: "Свят Храм Твой, дивен в правде"; радуйся, Кадильнице Святая, не фимиам, в воздухе разливающийся, но Христа, вечное благовоние в Себе вместившая, и всю тварь тем облагоухавшая. Радуйся, Престоле, превознесенный со славою, одушевленное седалище Великаго Царя, нашего же Спасителя и Господа; радуйся, Царице Небесе и земли, с Сыном Твоим и Богом вечно царствующая и нас, убогих, не забывающая. Радуйся, Пречистая Дево, Материю Спасителя мира от века предъизбранная.



Кондак 12

Благодати паче, неже естества действо проявися в рождестве Твоем, Пречистая; молитву бо безчадных родителей Твоих, Господь услышав, подаде Тя им в утешение, якоже Аврааму и Сарре Исаака, восхотев вкупе и Своего смотрения таинство на Тебе совершити и уготовати Тя в Матерь Единородному Сыну Своему, обетованному нашему Искупителю. Емуже благодарно поем: Аллилуиа.



Икос 12

Поюще славное Твое от неплодове рождение (и в храм Господень введение), хвалим Тя Пречистая, яко Таинницу Божия о нас спа-сительнаго смотрения, воплощением от Тебе Бога-Слова явленнаго, и вопием Ти сице: Радуйся, чистая Ноева Голубице, рождеством Твоим престатие потока смертнаго возвестившая; радуйся, ветвь благовестия Христа Спасителя погибавшему грехом роду человеческому принесшая. Радуйся, едина блаженная в женах, послушанием Твоим Богу преслушание праматери Евы исправившая; радуйся, печаль Адама и прочих праотцев, (истомившихся ожиданием пришествия Избавителя) рождеством Твоим в радость преложившая. Радуйся, яко рождество Твое радость возвести всей вселенной; радуйся, яко в рождестве Твоем матери радуются и неплоды веселятся (ведуще, яко и

Ты от неплодове произошла еси). Радуйся, яко и всех рождество Твое (и в храм вхождение) верно и благочестно празднующих сподобляеши благодатнаго веселия; радуйся, с Сыном Твоим, одесную Отца во славе Его, спосадити нас, Его много умоляющая. Радуйся, Пречистая Дево, Материю Спасителя мира от века предъизбранная.



Кондак 13

О, Всепетая и Пречистая Мати Дево, приими сие наше хвалебное пение в честь преславнаго рождества Твоего (и в храм введения) приносимое, и возроди в нас желание благ вечных, вкупе же и избави нас, Церковь Твою Святую, Отечество наше и обители иноческия от всяких бед и напастей, от врагов видимых и невидимых, и будущия изми муки и Небеснаго Царствия нас сподоби, да во веки веков о Тебе вопием: Аллилуиа.[/spoiler]

[Раб божий Константин]

Акафист Рождеству Христову.
[spoiler]Кондак 1


Избравый от всех родов пречистейшую Ангел Деву, и от нея родивыйся плотию Христе Боже наш; благодарственная приносим ти раби Твои Владыко. Ты же яко имеяй милосердие неизреченное, от всяких нас бед свободи, зовущих: Иисусе, Сыне Божий, воплотивыйся нас ради, слава Тебе.


Икос 1


Ангел множество собрася во Вифлееме, видети непостижное Рождество; и видевше своего Творца, во яслех яко младенца лежаша, удивишася! И страхом благоговеюще, Рождшагося и Рождшую боголепне почитаху, поюще таковая: Слава Тебе, Сыне Божий, прежде век от Отца рожденный. Слава Тебе, со Отцем и Духом вся сотворивый. Слава Тебе, спасти погибшия пришедый. Слава Тебе, даже до рабия зрака снизшедый. Слава Тебе, Взыскателю заблудших. Слава Тебе, Спасителю погибших. Слава Тебе, средостение вражды разрушившу. Слава Тебе, рай, преслушанием затворенный, паки отверзшу. Слава Тебе, род человеческий неизреченно возлюбившу. Слава Тебе, на земли вертеп Небо явившу. Слава Тебе, рождшую Тя Деву, Престол херувимский показавшу. Иисусе, Сыне Божий, воплотивыйся нас ради, слава Тебе.


Кондак 2


Видяще бесплотнии Ангели своего Владыку, от Чистыя Девы плоть приемша, ужасошася! И друг ко другу реша: преславое сие Таинство непостижимо нам является быти: обаче дивяшеся неизреченному того снисхождению, со страхом пояху: Аллилуиа.


Икос 2


Разумная вся тварь ужасаюшися и благодарящи поет Твоего Рождества Владыко таинство! Силы небесныя радуются поюще: слава в вышних Богу, и земля с человеки веселится, мы же непрестанно вопием: Слава Тебе, в вышних славимому Богу. Слава Тебе, мир на земли сотворившему. Слава Тебе, нас Тебе примирившему. Слава Тебе, на земли нам явившемуся. Слава Тебе, от Девы неизреченно воплотившемуся. Слава Тебе, звезду возсиявый. Слава Тебе, тою волхвы на поклонение Тебе признавши. Слава Тебе, дары от них милостивно приявшему. Слава Тебе, всю тварь Тебе служити научившему. Слава Тебе, и нас Тебе пети вразумившему. Слава Тебе, Себе нам соединившему. Слава Тебе, нас Собою спасшему. Иисусе, Сыне Божий, воплотивыйся нас ради, слава Тебе.


Кондак 3


Сильный в крепости, Бог мира, и Отец щедрот, прииде на землю, спасти мир погибающий: Ныне в Вифлееме яко младенец раждается от Девы: Юже Матерь и Ходатаицу спасения показа, всем Того воплощение славящим и поющим: Аллилуиа.


Икос 3


Имуще, Тебе пречисто рождшую, о нас непрестанно молящуюся: радующеся поем Твоего вочеловечения Владыко Таинство! И Рождество от Девы Богоприятныя славословяще вопием: Слава Тебе, Сыне Божий, Слава Тебе, Сыне Девы, от Девы несказанно родивыйся. Слава Тебе, человеколюбия бездну на нас показавшему. Слава Тебе, нас неизреченно возлюбившему. Слава Тебе, заблудшее овча взыскавшему. Слава Тебе, о обретении тоя, срадоватися Ангелом рекшему. Слава Тебе, на рамо сию восприемшему. Слава Тебе, ко Отцу приведшему. Слава Тебе, человеки со Ангелы во едино стадо совокупившему. Слава Тебе, мир от прелести избавльшему. Слава Тебе, великую и неизреченную милость нам явившему. Слава Тебе, нас паче всех тварей возлюбившему. Иисусе, Сыне Божий, воплотивыйся нас ради, слава Тебе.


Кондак 4


Бурю внутрь помышлений сумнительных прежде имевый целомудренный Иосиф ныне внутрь Божественнаго вертепа видит преславныя. Аще бо и яко человека видяше от Девы рождаемаго, но разумеваше от вещей Бога быти истиннаго: тем и боголепне поклонився, радостно пояше: Аллилуиа.


Икос 4


Слышаша пастырие Ангела, возвещающа им рождшагося Спаса миру, во граде Давидове: и скоро текше, видят Сего яко агнца непорочна, во чреве Девыя упасшася во яслех лежаща, и Рождшую благоговейно служащу и Иосифа со страхом предстояща; сказаша о глаголанных к ним, и поклонившеся Рождшемуся, реша: Слава Тебе, Агнче Божий Спасе мира. Слава Тебе, Сыне Божий, неизреченое чудо нам показавый. Слава Тебе, ангельских пении слышатели нас быти явивый. Слава Тебе, с ними и нас славословити Тя научивый. Слава Тебе, Ангелы и человеки пети Тя вразумивый. Слава Тебе, на земли и на небеси радость сотворивый. Слава Тебе, яко о Тебе небесная земным срадуются. Слава Тебе, яко Тобою земная небесным совокупляются. Слава Тебе, крепость диаволю немощну показавшему. Слава Тебе, от того мучительства нас избавльшему. Слава Тебе, в Тя верующим неизреченная радосте. Слава Тебе, любящим Тя неизглаголанная сладосте. Иисусе, Сыне Божий, воплотивыйся нас ради, слава Тебе.


Кондак 5


Боготечную звезду, Христово Рождество предъявляющую, узревше звездоблюсте ли волсви; и тоя вождением, Непостижимаго достигоша и Невидимого видеша: возрадовашася Тому вопиюще: Аллилуиа.


Икос 5


Видяще царие перситстии, на руку Девичу, Царя царствующих, яко на престоле херувимстем седяща, и Владыку того разумевающе, аще рабий прият зрак, потщашася дары Ему принести: злато, яко Царю всех; ливан же яко Богу; смирну, яко Безсмертному, и поклонившеся пояху: Слава Тебе, Свет всем возсиявый. Слава Тебе, нас звездою на поклонение Тебе призвавый. Слава Тебе, злобу лютого Ирода обличившему. Слава Тебе, суетно того умышление показавшему. Слава Тебе, нас от того прелести избавльшему. Слава Тебе, Тебе, Солнцуправды, покланятися научившему. Слава Тебе, вся светом разума просветившему. Слава Тебе, Твоим Рождеством многобожия прелесть упразднившему. Слава Тебе, вражие владычество до конца низложившему. Слава Тебе, со Отцем и Духом Тебе поклонятися нас научившему. Слава Тебе, нас прельстившаго змия главу сокрушившему. Слава Тебе, от вечныя смерти нас избавльшему. Иисусе, Сыне Божий, воплотивыйся нас ради, слава тебе.


Кондак 6


Проповедник богоносных вещания яже от Тебе исполняя, на земли явил еси Себе, Спасе, во убозем ныне вертепе рождся от Чистыя Девы: и богат сый, нас ради обнищал еси волею, да человеки обогатиши, верою Тебе поющия: Аллилуиа.


Икос 6


Воссиял еси от Девы, и неискусомужныя Твоея Матере, Иисусе, яко солнце просвещая и прогоняя лжи тьму: демони бо, Спасе, нетерпяще Твоея крепости, вси вострепеташа, и ад, видев чудо, убояся: мы же благодаряще вопием Ти: Слава Тебе, человек Спасителю. Слава Тебе, бесов Потребителю. Слава Тебе, прелести начальника Твоим Рождеством устрашившему. Слава Тебе, идольскую прелесть упразднившему. Слава Тебе, светом Богопознания вся осиявшему. Слава Тебе, тьму неведения прогнавшему. Слава Тебе, Каменю, воду спасения всем источивый. Слава Тебе, жажду Адамову и Давидову утоливый. Слава Тебе, яко солнцем, Твоим Рождеством вся просветившему. Слава Тебе, лучи благодати вселенней облиставшему. Слава Тебе, землю обетования нам показавшему. Слава Тебе, от всеродныя клятвы нас Избавльшему. Иисусе, Сыне Божий, воплотивыйся нас ради, слава тебе.


Кондак 7


Хотя от века сокровенную тайну нам явити, от всея твари служители таинству показал еси, Спасе. От Ангел Гавриила, от человек Деву, от небес звезду, от земли вертеп, в немже родитися благоволил еси: темже дивящеся твоей неизреченной премудрости, зовем: Аллилуиа.


Икос 7


Новую показал еси тварь, явлься плотию всех Зиждитель, из безсеменныя прозяб утробы, и сохранив ю, яко же бе нетленну, и Ходатаицу спасения показал еси поющим: Слава Тебе, Сыне Божий, Тя рождшую Матерь милосердия показавый. Слава Тебе, Тую и по Рождестве Деву сохранивый. Слава Тебе, спасти Адама пришедшему. Слава Тебе, Евины слезы утолившему. Слава Тебе, вся спасти пришедый. Слава тебе, Воскресения образ облиставый. Слава Тебе, грехов наших рукописание раздравый. Слава тебе, Собою смирения образ нам показавый. Слава Тебе, нас ради обнищавшему. Слава Тебе, Твоею нищетою нас обогатившему. Слава Тебе, одеждою спасения нас одеявшему. Слава Тебе, Твоею любовию нас усладившему. Иисусе, Сыне Божий, воплотивыйся нас ради, слава Тебе.


Кондак 8


Странное и преславное Рождество Твое видевше, в вертепе совершаемое, устранимся сует паче мира, ум на Божественная земли явися смиренный человек, да на Небеса возведет, Тому вопиющия: Аллилуиа.


Икос 8


Весь еси желание, весь сладость любящим Тя, Христе Боже, и Твое Божественное снисхождение славящим: от Девы бо Чистыя рождшся на земли, нас на Небеса возводиши, поющих: Слава Тебе, Сыне Божий, на земли родивыйся. Слава Тебе, от Девы неизреченно воплотивыйся. Слава Тебе, Себе нам показавшу. Слава Тебе, нас от Тебе далече сущих призвавшу. Слава Тебе, нам неизреченная радосте. Слава Тебе, сердец наших сладосте. Слава Тебе, в Рождестве Твоем свет спасения возсиявый. Слава Тебе, слезы в наше спасение пролиявый. Слава Тебе, теми пламень страстей наших угасивый. Слава Тебе, нас от скверны греховныя омывый. Слава Тебе, преступление разрушившему. Слава Тебе, от тления нас избавльшему. Иисусе, Сыне Божий, воплотивыйся нас ради, слава Тебе.


Кондак 9


Всякое разумение и всяк ум ангельский и человеческий не постигает Твоего непостижного Рождества, Владыко, Таинства разумети; обаче, Владыко Благий, нашу любовь и веру приими; и спаси нас, Тебе поющих: Аллилуиа.


Икос 9


Вития многовещанныя, яко рыбы безгласныя, видим о Твоем воплощении Владыко, недоумеют бо глаголати, како Бог сый совершен, человек совершенный явися, и от Девы неискусобрачныя како родися; мы же Тайны неиспытующе, верою единою славим, вопиюще: Слава Тебе, Ипостасная Божия Премудросте. Слава Тебе, неизглаголанная всем Радосте. Слава Тебе, любомудры немудрыя явивый. Слава Тебе, о Тебе испытующих посрамивый. Слава Тебе, вся баснотворная плетения растерзавый. Слава Тебе, свет Боговедения всем возсиявый. Слава Тебе, мудрость во Твоих делех пролиявый. Слава Тебе, многим разумы просветившему. Слава Тебе, путь спасения нам показавшему. Слава Тебе, неизчетная бездна милосердия. Слава Тебе, пучино щедрот и человеколюбия. Иисусе, Сыне Божий, воплотивыйся нас ради, слава Тебе.


Кондак 10


Спасти восхотев мир погибающий, иже всех украситель, от Девы, яко младенец раждается и во яслех пеленами повивается, разрешаяй многоплетенныя пленицы прегрешений: И Сын сый Божий, Девыя Сын бывает! И вся мудре устрояет да спасет Тому поющия: Аллилуиа.


Икос 10


Стена и столп злобы богопротивныя и род пребеззаконный показася, жизнь всем подающаго убити богоборец тщашеся, и незлобивыя младенцы, яко класы незрелы мечи пожинахуся: тем же и мы злобу всякую от сердец наших отринувше, нас спасти пришедшаго прославим вопиюще: Слава Тебе, иродово умышление тщетно показавый. Слава Тебе, от того избиеныя младенцы со ангелы сопричтавый. Слава Тебе, злобы потребителю. Слава Тебе, смирения Наставниче и смертных Любителю. Слава Тебе, рог гордости сломившу. Слава Тебе, свет правды всем воссиявшу. Слава Тебе, кротости и смирению всех собою научившу. Слава Тебе, вся в Твое познание приведшу. Слава Тебе, Тя родшия утробу, Твоим Рождеством освятивый. Слава Тебе, от пастырей чудо и от волхвов дары приявый. Слава Тебе, и безсловесныя Тебе сдужити научивый. Слава Тебе, всю тварь освятивый. Иисусе, Сыне Божий, воплотивыйся нас ради, слава Тебе.


Кондак 11


Пение всякое побеждается, Твоему еже нас ради воплощению, достойно принести хотящих: и удобие есть молчание. Аще и равночисленныя песка морскаго песни приносим Ти, Царю Пресвятый, но ничтоже совершаем достойно: тем же со страхом поем: Аллилуиа.


Икос 11


Свет Тя незаходимый, сущии во тьме и сени смертней селящии, Спасе наш, узревши от Девы воссиявша: просветишася огнем Твоего Божества; и Тебе Премудрости и смысла Подателю пояху, сицевая вопиюще: Слава Тебе, Сыне Божий, Свете неизреченный. Слава Тебе, Солнце правды, Твоим Рождеством вся просветивый. Слава Тебе, многосветлое просвещение возсиявшему. Слава Тебе, многотекущую благодати реку нам источившему. Слава Тебе, жаждущих водою спасения богатно напоившему. Слава Тебе, любящим Тя иго благо и бремя Твое легко показавшему. Слава Тебе, от бремене греховнаго нас облегчившему. Слава Тебе, нас от работы вражия избавльшему. Слава Тебе, Твоим на земли явлением вся возвеселивый. Слава Тебе, нас утешатися пакибытием сотворивый. Слава Тебе, нам желаний наших край Себе явивый. Слава Тебе, нас врагов сущих ко Отцу примиривый. Иисусе, Сыне Божий, воплотивыйся нас ради, слава Тебе.


Кондак 12


Благодать всем подати и долги человеков разрешити пришедый, Спасе наш, Твоим Воплощением: тем и наша долги разреши и грехов рукописание раздери: Твое несказанное Рождество славящим и непрестанно поющим: Аллилуиа.


Икос 12


Поюще Твое вочеловечение, хвалим, благословим и покланяемся Тебе, Спасе наш; и веруем, яко Господь и Бог еси, спасаяй всех на Тя уповающих и Твое еже от Девы неизреченное Рождество славословящих и поющих таковая: Слава Тебе, Сыне Божий, в вышних со Отцем и Духом покланяемый. Слава Тебе, от всех колен небесных и земных славимый. Слава Тебе, сокровенное от века таинство открывый. Слава Тебе, Твою к нам неизреченную любовь явивый. Слава Тебе, всея твари Украсителю. Слава Тебе, нам всемилостивый Спасителю. Слава Тебе, благочестно царствующих на земли скипетры утверждаяй. Слава Тебе, святители благоговейныя и иереи премудростию и благолепием украшаяй. Слава Тебе, Церкве основание и утверждение. Слава Тебе, всем верным спасение и украшение. Слава Тебе, телес наших Врачу и Исцеление. Слава Тебе, душ наших Украсителю и Спасителю. Иисусе, Сыне Божий, воплотивыйся нас ради, слава Тебе.


Кондак 13


О, Пресладкий и Всещедрый Иисусе, Спасителю наш, Творче и Владыко! Приими ныне малое сие молебное благодарение и славословие наше, якожс приял еси от волхвов поклонение и дары; и сохрани нас, Твоих рабов, от всякия напасти: и грехов прощение даруй; и вечныя муки избави верно славящих Твое, от чистыя Девы, Рождество и вопиющих Ти: Аллилуиа.


(Этот кондак читается трижды, затем икос 1 и кондак 1)


Тропари Рождеству Христову


Тропарь, глас 4 (Предпразднеству)


Готовися, Вифлееме, отверзися всем, Едеме, красуйся, Евфрафо, яко древо живота в вертепе процвете от Девы: рай бо Оноя чрево явися мысленный, в немже Божественный сад, от негоже ядше, живи будем, не якоже Адам умрем. Христос раждается прежде падший возставити образ.


Тропарь, глас 4 (Предпразднеству, навечерие)


Написовашеся иногда со старцем Иосифом, яко от семене Давидова, в Вифлееме Мариам, чревоносящи безсеменное Рождение. Наста же время рождества, и место ни единоже бе обиталищу, но, якоже красная палата, вертеп Царице показашеся. Христос раждается прежде падший воскресити образ.


Тропарь, глас 4


Рождество Твое, Христе Боже наш, возсия мирови свет разума, в нем бо звездам служащии звездой учахуся Тебе кланятися Солнцу правды и Тебе ведети с высоты Востока, Господи, слава Тебе!


Кондак, глас 3


Дева днесь Пресущественнаго рождает, и земля вертеп Неприступному приносит; Ангели с пастырьми славословят, волсви же со звездою путешествуют: нас бо ради родися Отроча младо, превечный Бог.


Величание


Величаем Тя, Жизнодавче Христе, нас ради ныне плотию рождшагося от Безневестныя и Пречистыя Девы Марии.[/spoiler]

[Раб божий Константин]

Акафист Рождеству Христову иной.
[spoiler]Кондак 1
Избраннии от всех племен и народов в язык свят, царское священие, сыны Света и наследники Царствия, приидите возрадуемся Господеви и Спасителю Богу, в Вифлееме нас ради пеленами повиваемому, с волхвы и пастыри поклонимся, ангельскую вси в веселии поюще песнь:
Слава в вышних Богу, и на земли мир, в человецех благоволение.

Икос 1
Ангелом неведомую, преславную тайну Твоего смотрения на конец веков открывая, Христе яко Младенец во убозем вертепе и безсловесных яслех миру являешися, Слове Божий, безначальне. Оле, страшного таинства! Оле, Божия снисхождения! Тем убо со страхом и радостию взирающе на неисповедимое истощание Твое, сице Тебе зовем:
Слава Тебе, Свете Тихий, от Девы миру возсиявый.
Слава Тебе, ангелов Радосте, в страну изгнания нашего пришедый,
Слава Тебе, Начальниче мира, спасение и мир погибельной земле благовестивый.
Слава Тебе, Сыне Божий, Себе Самаго в залог прощение от Бога миру даровавый.
Слава Тебе, Сияние Отчия славы, от смерти в живот и от тьмы в чудный Твой свет человеки призвавый.
Слава Тебе, Иисусе, снизшедый на землю и восход на небо всем земнородным устроивый.
Слава в вышних Богу, и на земли мир, в человецех благоволение!

Кондак 2
Видев нищету и погибель рода человеческаго, всемогущее Слово Твое, Господи, тихому молчанию содержащу вся и нощи, в своем течении преполовляющейся, с небеси, от престолов Царских, в средину погибельной земли сниде, во спасение поющих Ему: Аллилуиа.

Икос 2
Разумев духом пророк Аввакум пришествие Твое, ужасеся вопияше: Господи! Услышах слух Твой и убояхся, разумех дела Твоя и ужасохся. Мы же сбытие тайны сия зряще, поклоняемся яслем и пеленам Твоим, зовуще:
Слава Тебе, Божия Премудросте и Сило, мглою повиваяй землю и облаками небо, нас ради пеленами повиваемый.
Слава Тебе, одеваяй красотою крины сельныя и небо украсивый звездами, обнаженный ныне, да нашу наготу одеждою нетления и славы облечеши.
Слава Тебе, рубищем пеленаемый, разрешити осуждение первозданнаго и рубы грехов моих Грядый.
Слава Тебе, ходяй на крилу ветреню и содержай рукою всея земли концы, пеленами связуемый, да свяжеши моя греховныя вожделения.
Слава Тебе, зрак раба приемый, да нас от рабства страстей и диавола свободиши.
Слава Тебе, невместимый небесы, в яслех безсловесных повиваемый, да нас безсловесия избавиши.
Слава в вышних Богу, н на земли мир, в человецех благоволение!

Кондак 3
Силы небесных велиим гласом восхвалиша Тя, Светлое Солнце Славы, восходящее от девственнаго облака и просвещающее мир за милосердие безмерное, и в веселии воспеша: Аллилуиа.

Икос 3
Имеяй престол небо и подножие - землю, места же ни едина обретавши во обители, рожденный на земли: Чистая Дева, Мати Твоя, сокрывает Тя от мраза нощнаго в худем вертепе и во яслех скотиих полагает Тя, Сокровище горняго мира и Зиждителя всяческих. Тем убо дивящеся милосердию Твоему, сице Тебе зовем:
Слава Тебе, по нам обнищавый, да нас обогатиши неизреченною благодатию Твоею.
Слава Тебе, немощь нашу на Ся восприявый, да нас силою Твоею облечеши.
Слава Тебе, мраз нощный претерпевый, да мир весь согрееши теплотою Твоея любве.
Слава Тебе, преклонивый небеса схождением Твоим, на земли не имевый, где главы подклонити.
Слава Тебе, труды и болезни наша понести благоизволивый, да человека в небесных селениях упокоиши.
Слава в вышних Богу, и на земли мир, в человецех благоволение!

Кондак 4
Бурею сумнительных помышлений мятется Ирод и весь Иерусалим с ним; царие же восточнии Тебе, Царю царей, дары избранные приносят. С ними же и нас сподоби Тебе кланятися духом и истиною, и приносити Тебе: веру, яко злато; чистое житие, яко ливан; любовь же, яко смирну, зовуще: Аллилуиа.

Икос 4
Слышав Адам первозданный глас Тебе, Господа славы, ходящаго в раи, страхом скрыся, убоявся лица Твоего. Ныне же Ты, Спасе, сокрываешн страшную славу Твоего Божества и нисходиши на землю, зрак Адамов нося, взыскати погибшаго, вопиюща Тебе:
Слава Тебе, Сыне Бога живаго, Сыном человеческим за милосердие быти благоволивый,
Слава Тебе, долу низшедый, да человека горе вознесеши.
Слава Тебе, наказание мое на Ся восприявый и язвою Твоею мя исцеливый.
Слава Тебе, приобщивыйся моея плоти, да ми образ Божий возвратиши.
Слава Тебе, студную наготу первозданнаго ризою Твоея славы покрывый.
Слава Тебе, вочеловечивыйся нас ради и существо земнородных обоживый.
Слава в вышних Богу, и на земли мир, в человецех благоволение!

Кондак 5
Боготечная звезда с высоты показует звездословцем Тя, издавна предвозвещенную мысленную Звезду, от Иакова возсиявшую. Сподоби и нас узрети чистыми очесы души нашея разумеваемую во убозем вертепе паче звезд и солнца Просиявшую славу Твоего Божества и воспети Тебе: Аллилуиа.

Икос 5
Провидев издалеча день Твой, Христе, праотец Твой Авраам возрадовася духом; мы же видяще Тя, Света невечерняго, на объятиях Девы, Матери Твоея, яко на престоле почивающа, радостно сретаем Тя пении сими:
Слава Тебе, носяй всяческая силою Твоею, рукама Девы-Отроковицы носимый.
Слава Тебе, млеком питаемый, манием питаяй всякое дыхание и тварь.
Слава Тебе, Сыне Девы - Еммануиле, Отроча младо, Бог Превечный, Отец будущаго века сый,
Слава Тебе, на плещу херувимов носимый, нас ради на руку Девичу почиваяй.
Слава Тебе, младенствуяй на земли, да нас чады Божии соделаеши.
Слава Тебе, безмерно себе умаливый, яко да мя паче слова возвеличиши истощанием Твоим.
Слава в вышних Богу, и на земли мир, в человецех благоволение!

Кондак 6
Проповедует миру милостивое Твое пришествие пророк Илия фесвитянин, тому бо на Хоривстей горе явил еси тихое сияние Твоея славы; не бо в бури, огни и трусе, но во гласе хлада тонка сошел еси на землю, Господи, просвещая и спасая вся зовущия: Аллилуиа.

Икос 6
Возсия иногда свет Небесный пастырем вифлеемским, совершающим стражу нощную о стаде своем, тем убо в нощи сего жития лености сон отрясем, в молитве бдяще, да с пастырьми зрителие славы Спаса рождшагося явимся и тако Ему воззовем:
Слава Тебе, Хлебе животний, всех души питаяй и глада смертнаго мир избавляяй.
Слава Тебе, Грозде Божественный, вино новое источаяй и жажды греховныя мир изъимаяй.
Слава Тебе, Источниче безсмертия, грядый даровати миру воду животную, от нея же вси пиющии не вжаждутся во веки.
Слава Тебе, светлое Солнце правды, светом Истины и теплотою Духа оляденевшую землю согреваяй.
Слава Тебе, Небесный Дождю, орошаяй лице земли и весну благодати даруяй естеству человеческому.
Слава Тебе, девственный Цвете от корене Иессеова, землю цветами украсивый и мир весь облагоухавый прозябением Твоим.
Слава в вышних Богу, и на земли мир, в человецех благоволение!

Кондак 7
Хотя исправити гордыню первозданнаго человека, смирил еси Себе Самаго, Слове Божий, до яслей и смерти крестныя, нам образ дая, да вси обращающии сердца свои к Тебе, облекутся в царское одеяние смирения Твоего и воцарятся над страстъми и демонами, Тебе, Победителю всяческих, зовуще: Аллилуиа.

Икос 7
Дивную тайну Божественнаго воплощения Христа смирившагося воспевающе днесь, приидите, возвысимся от земных страстей, чистою мыслию приступим и прикоснемся Младенцу, в яслех лежащему, во умилении зовуще:
Слава Тебе, рождейся на земли и Рождеством Твоим Божественное возрождение миру даровавый.
Слава Тебе, написавыйся повелением кесаревым с рабы, да наши имена в Книзе живота напишеши на небеси.
Слава Тебе, Содетелю всея твари, емуже горе служат тысящи и тьмы ангел, послужити пришедый всеродному Адаму.
Слава Тебе, небо с землею и Бога с человеком примиривый Рождеством Твоим.
Слава Тебе, радость вечную и всякий дар свыше от Отца светов в сию юдоль плача с Собою принесый.
Слава Тебе, пеленами Твоими человека в любви с Богом неразлучно связавый.
Слава в вышних Богу, и на земли мир, в человецех благоволение!

Кондак 8
Странна и пришельца нас ради - Бога видяще на земли, устранимся суетнаго мира и Небесного нашего Отечества взыщем, славу вечнующую, веселие нетленное, свет невечерний и вся, яже дарова Сын Божий пришельствующим на земли и любовию поющим Ему: Аллилуиа.

Икос 8
Весь был еси горе - на Престоле и долу в яслех, непостижиме Господи, егда ангели воспеваху Тя яко Превечнаго Бога, человецы же зряху Младенца повита, Ему же, яко миро, приносим слезы умиления, сице глаголюще:
Слава Тебе, недр Отеческих не отступивый и с дольними человеки неизреченно поживый.
Слава Тебе, неприступную славу Твоего Божества сокрывый, да грешным приступен будеши.
Слава Тебе, Источниче чистоты и святыни, пред Ним же нечисты светлейшие звезды небесныя, с мытари и грешники вечерявый.
Слава Тебе, блудницу и разбойника не отринувый и света Твоего причастники оных показавый.
Слава Тебе, вся от покаяния к Тебе пришедшия в лик другов Твоих вчинивый.
Слава в вышних Богу, и на земли мир, в человецех благоволение!

Кондак 9
Все богатство любве Твоея излиял еси на ны, Иисусе Всецарю, егда Себе Самаго яко Младенца грешному миру во очищение даровал еси. Сего ради роды родов, спасеннии явлением Твоим, во веки благодарственне зовут Ти: Аллилуиа.

Икос 9
Ветия многовещанныя недоумеют воспети недомыслимое и неизреченное Рождество Твое: кий бо язык, ангельский и человеческий, возглаголет сию бездну милости Твоея, Спасе? Приими убо благодарный плач земнородных, искупленных Твоею Кровию, Тебе припадающих и вопиющих:
Слава Тебе, изобретый всяк путь художества и с человеки соединивыйся.
Слава Тебе, стpанно во Своя пpишедый, yстpанившиися от Бога на небо пpизываяй.
Слава Тебе, вертеп обителию Себе сотворивый, да ми Небесныя обители уготовиши.
Слава Тебе, в вертеп вселивыйся, да мя, вертеп разбойников бывша, храм Твой покажеши.
Слава Тебе, грех мира вземляй и немощи человеческия исцеляяй.
Слава Тебе, труждающияся и обремененныя к себе призываяй и упокоеваяй.
Слава в вышних Богу, и на земли мир, в человецех благоволение!

Кондак 10
Спасение соделал еси миру странным истощанием Твоим и врата милосердия Божия и вышняго Царствия отверзл еси сошествием Твоим: отныне бо сынове человечестии общники ангелом бывают и радуяся легкоходною стезею в небеса восходят, немолчно зовуще: Аллилуиа.

Икос 10
Царю Небесный, рождейся на земли человека ради, Христе Боже! Покажи ны достойны Твоего осияния, даждь нам во вся дни живота нашего поминати Твоя благодеяния и чистым сердцем воспевати Тебе сицевая:
Слава Тебе, Царю веков, вышнее Царство верным отверзаяй и в них царствуяй.
Слава Тебе, Пастырю добрый, заблудших овец от пустынных холмов на пажить цветоносную призываяй.
Слава Тебе, Ключу Давидов, Едема врата, преслушанием заключенная, всем нам отверзый.
Слава Тебе, Ключу Божественный, едине ведый отверзати сердца человеческия к приятию благодати.
Слава Тебе, Манно Небесная, в пустыни жития сего странствующих питающая.
Слава Тебе, Иисусе Боже, Новый Израиль в землю обетованную вводяй.
Слава в вышних Богу, и на земли мир, в человецех благоволение!

Кондак 11
Песнь благодарения прими от нас, Слове Божий, и сподоби нас, дольних, срести чистыми деяньми и подъяти духом Тя, Христа, плотию младенствующа; Христа, волею обнищавша; Христа, нас ради на землю низшедша, Егоже горе поют непрестанно ангели Божии, зовуще: Аллилуиа.

Икос 11
Светом одеяйся, яко ризою, безславен и наг в мир сей входит, и Божие Слово, носящее вся глаголом силы Своея, немотствующим Младенцем зрится на земли. Ему же покланяющеся вси глаголем:
Слава Тебе, немотствуяй на земли, да нас молчанию и хранению дара слова научиши.
Слава Тебе, Животе, повитый пелены, пленицы смертныя разрешити грядый.
Слава Тебе, Агнче Божий, на заклание в мир пришедый и смертию Твоею живот нам даровавый,
Слава Тебе, благовестити нищим пришедый, исцели сокрушенные сердцем.
Слава Тебе, проповедуяй слепым прозрение, пленным свободу, отпускаяй сокрушенныя во отраду.
Слава Тебе, суетную славу и красная мира сего презирати научаяй и от любви земныя к любви Божией всех возводяй.
Слава в вышних Богу, и на земли мир, в человецех благоволение!

Кондак 12
Благодать спасительная всем человеком явися и всех избавление приспе: славы бо Господь нисходит на землю милости ради. Горы и холми, поля и дебри, человецы и ангели, всякое дыхание и тварь, веселия Божественнаго исполняеми, воскликните в сретение Тому: Аллилуиа.

Икос 12
Поюще велие таинство Твоего вочеловечения, Господи, молим Тя, раби Твои, егда приидеши паки на землю с силою и славою многою, помилуй и спаси всех, чтущих Твое, еже от Девы неизреченное Рождество, и любовию зовущих Ти:
Слава Тебе, до земли и до глубин адовых снизшедый во взыскание падшаго человека.
Слава Тебе, сокровища благодати Твоея нам открываяй и удобен путь к небеси показуяй.
Слава Тебе, милостивне объятия Свои отверзаяй кающимся, аще и тьмами тем пред Тобою согрешаем.
Слава Тебе, водами крещения естество человеческое убеливый и Божественными тайнами сие обоживый.
Слава Тебе, по исходе от временнаго жития Царство Твое, славу и веселие Иерусалима горняго в безконечныя веки в наследие человеком обещавый.
Слава в вышних Богу, и на земли мир, в человецех благоволение!

Кондак 13
О неизследимая и неизглаголанная Бездно Любве и Щедрот, младенствуяй плотию Иисусе! Приими приносимое Тебе убогое сие моление и не возгнушайся внити и возлещи в яслех безсловесныя моея души. О, Свете мира незаходимый! Просвети мя сиянием Твоим, прииди и обитель у мене сотвори, да во веки пою Ти: Аллилуиа.
Сей Кондак читается трижды, затем Икос 1 и Кондак 1

Молитва
О, Сладчайший Иисyсе, Слове Божий, Девы Сыне, Тебе нас pади на земли явльшагося, вся тваpь исповеда быти Твоpца и Владыкy всяческих, волны моpския подстилашася Ти под нозе ходящy, yмолкахy ветpы Твоим повелением, меpтвии словом Твоим возстах, солнце Тебе yмиpающy помеpче, земля Тебе потpясеся, небо Тебе возходящy отвеpзеся.
Тем yбо и ныне молим Тя, pаби Твои, Владыко, постели под нозе Твои вся наша помышления и чyвства сеpдечная, запpети волнению стpастей, возстави ны от смеpти гpеховныя, сотвоpи, да пpед светом любве Твоея помеpкнyт для нас навсегда вся славная и кpасная сyетнаго миpа, да потpясyтся стpахом дyщи наша и отвеpзyтся сеpдца к пpиятию Тебе, Hевечеpняго света, пpосвещающаго всякаго человека, гpядyщаго в миp.
Сподоби ныне изыти любовию в сpетение Тебе, нисходящемy на землю нас pади и в день исхода нашего от вpеменнаго жития сего, yсpящи нас, возходящих от земли милосеpдием Твоим, пpиими в небесныя Твоя селения и сотвоpи пpичастники славнаго Цаpствия Твоего, да со Ангелы святыми поем и славим Тя, Спаса дyш наших, со Безначальным Твоим Отцем и с Пpесвятым Дyхом, Единаго в Тpоице Бога, Егоже славят солнце и лyна, пpевозносят все тваpи, славословит pод человеческий и немолчо гоpе воспевают силы небесныя в безконечныя веки. Аминь.[/spoiler]

[Раб божий Константин]

Акафист Рождеству Христову третий.
[spoiler]Кондак 1
Возбранный и прежде век от Отца Рожденный, Спас мира и Царь веков, яко Отроча родися нам, Сын, и дадеся нам. Сей ныне волею плоть приим от Девы и, яко разумное Солнце Правды, сущим во тьме и сени смертней седящим Боголепно возсия. Приидите, возрадуемся, зряще Бога во плоти, в Вифлееме нас ради пеленами повиваема, и с волхвы и пастырьми Сему покланяющеся, велегласно возопиим:
Слава в вышних Богу и на земли мир, в человецех благоволение.

Икос 1
Ангели древле у врат Эдема древу жизни отпадшаго Адама стрегуще, ныне же от веси Вифлеемския радость велию земнородным благовествуют, яже будет всем людем: яко родися Спас, Иже есть Христос Господь, в яслех безсловесных плотию младенствующе. Приидите, вернии, Матерь Спасову прославим, по Рождестве паки явльшуюся Деву, и со Ангелы и пастырьми песнь достойную в вертепе от Нея Рождшемуся воспоем:
Слава Тебе, Пребезначальное Влово, Бог сый, человек явивыйся;
слава Тебе, Боже Великий и Вечный, Своего Божества не отступльше, из боку Девичу воплотивыйся.
Слава Тебе, Сыне Божий - Сыне Девы, зрак раба приимшему;
слава Тебе, Слове Божий, Неизследиме, в юдоль нашего изгнания пришедшему.
Слава Тебе, Превечное Слово, истощанием странным от Девы миру возсиявый;
слава Тебе, Премудросте Божия и Сило, нас ради по нам обнищавый.
Слава Тебе, Невесты Пречистыя пребогатое Рождество, Егоже славы полны суть Небеса;
слава Тебе, возсиявшее Солнце Правды, Имже радости исполняется вся земля.
Слава в вышних Богу и на земли мир, в человецех благоволение.

Кондак 2
Видевше Творец и Зиждитель всяческих гиблема человека, егоже рукама созда, милосердствуя о нем, приклонив небеса, на землю сниде, высотою Царствуяй Небес, землею содеяся, - Егоже Отце прежде век раждает, да падшее обновит человеческое естество. Его зряще Самаго и Человека и Бога, ликовствующе со всеми небесными и земными, хвалящими предивное Божие снисхождение, вопием Ему: Аллилуиа.

Икос 2
Разумети велию благочестия тайну хотяще, человецы пастырие реша друг ко другу: прейдем до Вифлеема, и видим глагол сей бывший, егоже Господь сказа нам. И поспешшеся приидоша, и обретоша Мариам же и Иосифа, и Младенца в яслех, и поклонишася Ему, славяще и хваляще Бога о всех, яже слышаша и видеша, якоже глаголано бысть к ним. С ними же и мы, сбытие тайны нашего спасения зряще, от Девы плотию Рождшемуся, яко Царю и Богу нашему, принесем сия похвалы:
Слава Тебе, Отчиим благоволением явльшуся от Девы, всяческая радости исполняя;
слава Тебе, Собезначальне Отцу, пленным отпущение, слепым прозрение от Отца возвещая.
Слава Тебе, Отчия славы сияние Божества, в залог спасения мира в яслех положенный;
слава Тебе, Бог сый, Иисусом Сладчайшим Иосифу от Ангела пронареченный.
Слава Тебе, Огнезрачный, горе Херувимы, долу же во объятиях Пречистыя Девы дориносимый;
слава Тебе, Отчее Сияние, Свет во откровение языков, тьмою необъемлемый.
Слава Тебе, Агнче Божий, еще Предтече во чреве сущу, предивное взыграние;
слава Тебе, Сыне Неискусобрачныя Невесты, праматере Евы неложное радование.
Слава в вышних Богу и на земли мир, в человецех благоволение.

Кондак 3
Силы Небесныя чудящеся, како Отца Собезначальное Слово, дланию же содержащее тварь, из Неискусомужныя Своея Матере, яко от Девственнаго облака прошед, плотски в вертеп вселися, и яко престол ясли вменив. Емуже они со страхом и трепетом служащии, человеком возвестиша: се вам знамение: обрящете Младенца повита, лежаща в яслех. Сему падше, людие, поклонитеся, и с веселием воспойте: Аллилуиа.

Икос 3
Имеяй престол небо и подножие землю, в малый внити тщится вертеп, зане не обретеся Ему места во обители, идеже Дева Мария, Херувимом подобяся, яко Младенца Христа на руку носящи и любовию согревающи, воспеваше: Сыне Мой и Творче Мой! Како пеленами повию Тя яко Младенца? Како сосцы питаю Тя, питающаго всяческая? Како Твоей паче ума нищете удивлюся? Како Сына Моего нареку Тя, Раба Твоя сущи? Темже убо, Божию снисхождению дивящеся, со Пречистою Материю песнь принесем Владыце:
Слава Тебе, Един творяй чудеса, яко престол славы херувимския утробу Девичу освятивый;
слава Тебе, Един Сый Святыя Троицы, спасение и мир земли погибельней благовестивый.
Слава Тебе, Младенче Блаженный, род человечь от работы тления свободившему;
слава Тебе, Восточе востоков, сущия во тьме и сени смертней обожившему.
Слава Тебе, ни от крове, ни от похоти плотския Родившемуся;
слава Тебе, Непостижиме, пеленами повиваемь, сети диавола упразднившему.
Слава Тебе, Утешителю сумнящихся, Иосифова смущения предивное разрешение;
слава Тебе, Слове необыменный, волхвов и пастырей священнолепное поклонение.
Слава в вышних Богу и на земли мир, в человецех благоволение.

Кондак 4
Бурею помышлений сумнительных мятется Ирод и весь Иерусалим с ним: злобою снедаемь, богоборец яряшеся, яко Бог во плоти явися. Тварь же вся, играюще, дары своя Христу в Вифлееме Рождшуся приносит: Ангели пение, небеса звезду, волсви дары, пастырие чудо, земля вертеп, пустыня ясли, мы же Матерь Деву, вопиюще: с нами Бог, - Властитель мира, - Отец будущаго века, - Аллилуиа.

Икос 4
Слыша Иосиф весть от Ангела: востав, пойми Отроча и Матерь Его, и бежи во Египет, и буди тамо, дондеже реку ти: хощет бо Ирод искати Отрочате, да погубит Е. Востав же Иосиф ото сна, поят Отроча и Матерь Его нощию, и отыде во Египет. Слыши небо, и внушай земле: Бог же и Творец, нас ради человек, и нашего ради спасения, плоть приим, от рук Ирода злочестиваго бегает, смирения образ показуя, да и мы сетей и ловлений диавола всячески убегаем, и в Свете Богопознания Избавителю душ наших вопием:
Слава Тебе, Вседержителю Едине Господи, дивно вселенней возсиявый;
слава Тебе, Свете Невечерний, ищущим Тебе чистым сердцем путь звездою указавый.
Слава Тебе, Царю царствующих, безумие Ирода-детоубийцы славно посрамивший;
слава Тебе, Непобедиме, младенцы Вифлеемския лепотою херувимскою украсивый.
Слава Тебе, обилием кровей их пламя духа огнедышущего охладивый;
слава Тебе, не имеяй где главы подклонити, мир Божеством Своим облагодатствовавый.
Слава Тебе, и Присноцветущей Деве, во утробе Своей Тебе - плод Божественный согревшей;
слава Тебе, и Преблагословенней Богородительнице, от рук Ирода злочестиваго Тебе сохраньшей.
Слава в вышних Богу и на земли мир, в человецех благоволение.

Кондак 5
Боготечная звезда с небесе волхвом от страны Персския путь к явльшемуся Солнцу Правды показует, да идолослужителие суще, неизреченному Таинству уверовавше, всему миру пришествие Мессии благовествуют, злонравному же Ироду, возпылавшему Цвет от корене Иессеова, из земли Обетованныя изторгнути, свидетельствуют: яко родися Христос от Девы, Емуже они, аще и столь далече суще, приидоша со дары, яко Царю и Богу поклонитися, и чистым сердцем воспети Ему: Аллилуиа.

Икос 5
Провидев Тя в дусе богоглаголивый Исаия, Господи, яко хощеши от Девы родитися и человеком явитися, вопияше: Слышите убо, доме Давидов: се Дева во чреве приимет, и родит Сына, и нарекут имя Ему Еммануил. Услишите даже до последних земли, могущии покоряйтеся, яко с нами Бог! Приидите, вси людие, сбытие велие тайны сея зряще, яко Младенца в вертепе и яслех вмещаема, подымем Зиждителя, и радующеся, боголепно вопием:
Слава Тебе, Грядый Адама воззвати, Путь, и Истину, и Живот миру показующий;
слава Тебе, Отроча Младо - Превечный Боже, Отчиим подобием сияющий.
Слава Тебе, Осмодневен по Матери, Безначален же по Отцу, смирением обрезания жало греховное пресекавший;
слава Тебе, сия претерпевая, да всех чадами Божиими соделаеши.
Слава Тебе, жизни Подателю, долу снисшедый, да нас горе вознесеши;
слава Тебе, паче раба Себе умаливый, да нас рабства греховнаго избавиши.
Слава Тебе, Емуже небеса звездою послужити тщатся;
слава Тебе, Егоже дух злобы поднебесный страшится, яко мир спасется.
Слава в вышних Богу и на земли мир, в человецех благоволение.

Кондак 6
Проповедует и радуется дивный старец Симеон, якоже иногда Исаия пророк, егда от жертвенника Господня рукою Серафима угль огненный уст его коснуся, приемля от рук Пречистыя Богоматере Тебе Господа своего и Владыка, и глаголаше: Сей есть, Егоже Отец Небесный уготова пред лицем всех людей, Свет во откровение языком, на падение, и на востание многим, Иже нас ради явися яко человек, да избавит мир от клятвы законныя. Емуже покланяющеся, сладце вопием: Аллилуиа.

Икос 6
Возсия мирови небесе и земли Творец - Христос Спас нас, из утробы Девы Чистыя прошед, во славе, яко Избавитель мира, вражды средостение разорити грядет: правдою препоясан по чреслех Своих, и истиною обвит по ребрам Своим, да поразит землю словом уст Своих, и обличит славныя земли правостию дел Своих. Егоже море виде и побеже, Иордан возвратися вспять; мы же, спасение получивше, яко Благодетелю и Богу нашему поем:
Слава Тебе, Ветхий деньми, яко Младенец, руками Девы - Матере Своея, Богу Отцу принесенный;
слава Тебе, усты праведнаго Симеона пред лицем всех людей благословенный.
Слава Тебе, Источниче благодати неисчерпаемый, Троическое поклонение в струях Иорданских миру явивый;
слава Тебе, от раба Крещаемый, невидимую главу змиеву тамо сокрушивый.
Слава Тебе, Сыне Божий - Возлюбленный, благоволением Отца Небеснаго свыше свидетельствованный;
слава Тебе, Агнче Божий, вземляй грехи мира, Предтечею на Иордане миру указанный.
Слава Тебе, богатый в милости, Завета Новаго Божественное основание;
слава Тебе, красный добротою, паче всех сынов человеческих, прошедших и грядущих родов непререкаемое упование.
Слава в вышних Богу и на земли мир, в человецех благоволение.

Кондак 7
Хотяй сокровенную тайну любве Отца Небеснаго к роду человеческому открыти, яко агнец на заколение, в яслех безсловесных положился еси, и во Иордане главу Твою Предтече смиренне преклонил еси, Христе Боже наш. Слыша же Тя иногда Адам в раи ходяща, страхом сокрыся, мы же, видяще Тя в рабием зраце славу Божества Своего сокрывающа, да обветшавшее грехом естество наше банею крещения обновиши, и душу Свою за ны положиши, благодарно вопием Ти: Аллилуиа.

Икос 7
Новое и преславное чудо, яко бо на руно дождь, во чрево Девы снисшел еси, Христе, и яко капли дождевнии, излияся благодать Твоя на вся живущия на земли, прежде под клятвою законною бывшия, да познают Тебе Единаго Истиннаго Бога, и имут радость свою исполнену в Тебе; и, воспрянув от беззаконий своих, приидут, и припадут к Тебе, - Источнику жизни вечныя, и яко дары принесут Тебе сия похвалы:
Слава Тебе, Свете, превышший всех светлостей, Моисею древле в хладе тонком, задняя Твоя показавый;
слава Тебе, Слово Отчее Пребожественное, зарею невечерняго дне ныне миру возсиявый.
Слава Тебе, Боже Предвечный, тако о нас земнородных возблаговоливый;
слава Тебе, Сыне Давидов, яко матерь рождение свое, нас возлюбивый.
Слава Тебе, Любовь Святейшая, присно горящая и никогдаже угасающая;
слава Тебе, Спасе премилосердый, вся скорбящия и обремененныя радости исполняющий.
Слава Тебе, украсившему вселенную величием Премудрости и Божественной красоты;
слава Тебе, отверзшему земнородным источник Божественныя любви.
Слава в вышних Богу и на земли мир, в человецех благоволение.

Кондак 8
Странно бе слышати Ироду от волхвов о Рождестве Христове, странно бе и старцем Иерусалимским зрети Отрока Иисуса в церкви, послушающа и вопрошающа их, и ужасатися о разуме и о ответех Его. Не разумеша бо Писания, идеже пророк Давид предрек о Нем: Сын Мой еси Ты, Аз днесь родих Тя; Седи одесную Мене, дондеже положу враги Твоя подножие ног Твоих. Они же, Ироду злочестивому ревнующе, изрекут страшная: да распят будет! Зависти бо ради, грядущему Мессии Христу не воспеша: Аллилуиа.

Икос 8
Весь явился еси на земли, якоже на небеси, Свете Единоначальный и Трисиянный, да Твоими светосиятельными лучами души наша озариши, и животворящее питие Твоея любви всем открыеши, Непостижиме Господи, и сице человека, егоже создал еси, божественною лепотою благодатствуеши, и храм Твоего Божества, световиден и чист покажеши, ангельской славе сопричтеши. Мы же, иже Херувимы тайнообразующе и Животворящей Троице трисвятую песнь Тебе ради припевающе, приносим Ти сия благодарственныя похвалы:
Слава Тебе, Владыко Премилосерде, долу снисшедый, да кающимся грешником доступен будеши;
слава Тебе, Боже Непостижиме, давый Себе познати, да прежнее сыновство нам даруеши.
Слава Тебе, светодательный Источниче, тьму греховнаго неведения просвещающий;
слава Тебе, Хлебе, сшедый с небесе, манною божественнаго разума нас питающий.
Слава Тебе, показавшему нам человеколюбия Твоего Пребожественное снисхождение;
слава Тебе, недомысленное и несказанное мира от пагубы греховныя избавление.
Слава Тебе, Источниче Благодати соделавый человека храмом невместимаго Божества;
слава Тебе, Красото пресветлаго торжества, Еюже наполняются небеса и земля.
Слава в вышних Богу и на земли мир, в человецех благоволение.

Кондак 9
Все естество ангельское и человеческое в тесном вертепе, яко в царском чертозе, совокупльшеся, ликовствует: небесных Престолов превышний Владыка, и премирных Господствий всеистинный Господь, за человеколюбие на земли явися и с человеки пожити возжеле, да свободит род Адамов от мучительства адова. Воистину сый Бог наш превечный, и Человек нов, воплотивыйся волею и смиривыйся Божеством, во еже уготовати земнородным стезю ко спасению и даровати безсмертие Божественное воспевающим Ему: Аллилуиа.

Икос 9
Витии многовещаннии недоумеют бо глаголати, какоже прежде век на Престоле Огнезрачном в вышних Седяй со Отцем Безначальным и Божественным Духом, ныне из Девы воплощься яко человек, сообразен бренному умалению, богатство обожения носяй, нас же, сущия рабы врага и греха, примирити Богу тщится. Да веселятся небесная, да радуются земная; да отрыгнут горы веселия, и холми правду, яко помилова Господь люди Своя, и смиренных людей утеши, яко во век милость Его. Мы же, со всеми верными, Божие благоволение славословящими, песнь приносим Владыце:
Слава Тебе, неисповедимая совершенств Высото, прародителей же наших греховнаго поползновения избавление;
слава Тебе, неизследимая тайн Пучино, в Рождестве Твоем всему миру даровавый спасение.
Слава Тебе, отцев Боже, прелюбимое патриархов величание и пресладостное пророков исполнение;
слава Тебе, видимых и невидимых Содетелю, судеб мира настоящих и грядущих премудрое строение.
Слава Тебе, Любовь неизреченная, образом и подобием Твоим в Адаме нас почтый;
слава Тебе, главы змиевы Сокрушителю, от смертоноснаго яда сего души наша исцеливый.
Слава Тебе, Рождеству Твоему преславному покланяющихся Божественным благоуханием исполняяй;
слава Тебе, дары сердец своих Тебе приносящих, яко жертву благовонную освящаяй.
Слава в вышних Богу и на земли мир, в человецех благоволение.

Кондак 10
Спасения залог, - Камень нерукосечный от несекомыя горы, - Девы Чистыя, краеугольный отсечеся Христос Бог, да разстоящаяся естества, от востока и запада, севера и юга, Светом Своего Божественнаго Откровения к Богопознанию приведет и общницы радости ангельския соделает, и сице в лицех Небесных и земных Церковь вечно торжествующую утвердит. Егоже, яко Агнца Непорочна и не вкусивша скверны, звезда яви, яко Бог есть, за спасение мира волею пожретися грядый; Имже весь мир просвещаяйся, ликовствующе, вопиет: Алллилуиа.

Икос 10
Царю Превечный, прародителей наших, заповедь Божию преслушавших, и по грехопадении не оставивый, но на упование спасения прямо Едема вселивый. Ныне же Адамову нищету восприем, плотию на земли прозябл еси, Христе Боже наш, да Едема дверь, прежде затворенную, паки отверзеши, и стезю легкоходную в Царствие Небесное верным уготовиши, идеже, малым чим от Ангел разнствуя славою, яко новосаждения масличная, окрест трапезы славы Отчей, в лепоте Божественней, усыновиши, во еже непрестанно приносити Тебе сия похвалы:
Слава Тебе, Создателю всяческих, Един имеяй безсмертие и во свете живый неприступном;
слава Тебе, премилостивый, греха первороднаго мир свободивый, греху неискусный.
Слава Тебе, Спасителю мира, вся скорби наша и болезни на Себе приемый;
слава Тебе, Пастырю добрейший, в залог спасения миру душу Свою предложивый.
Слава Тебе, Церкве Зиждителю, в основание Ея, яко Бог и Человек, Себе положивый;
слава Тебе, Отчее Сияние и Духа Святаго дыхание, образа Твоего неизменное начертание в душах наших не возбранивый.
Слава Тебе, пресладкий Иисусе, волю Отца Своего Небеснаго преславно исполнивший;
слава Тебе, Спасе всещедрый, яко Исаак древле, жертвенною любовию миру послуживый.
Слава в вышних Богу и на земли мир, в человецех благоволение.

Кондак 11Пение ангельское приносит Ти Святая Церковь, всещедре Спасе, и велегласно вопиет: Рождество Твое, Христе Боже наш, возсия мирови свет разума: в нем бо звездам служащии, звездою учахуся Тебе кланятися, Солнцу Правды, и Тебе ведяще с высоту востока в мир пришедшаго, людие пакибытием утешаются, Пречистую же Матерь Твою, Едину высшую небес, яко Престол Херувимский, и Пречистый храм Твоего Божества, непрестанно величают, и Тебе, Свету Трисиянному, с веселием вопиют: Аллилуиа.

Икос 11
Светодательный Источник и заря Трисиятельнаго Божества возсия вселенней Рождество Твое, Спасе мира, в нем бо Отчее благоволение познахом: тако бо возлюби Бог мир яко и Сына Своего Единороднаго дал есть, да всяк веруяй в Онь, не погибнет, но имать живот вечный. Мы же, богатством человеколюбия Твоего, Спасе, облагодатствовани суще, неисповедимое снисхождение и безбедное истощание Твое славим и, веселяшеся, сице Тебе взываем:
Слава Тебе, пришествием Твоим мир, заматерелый в растлении греховном, обновивый;
слава Тебе, Премилосерде, злобою диавола прельщенныя паки Богу возвративый.
Слава Тебе, Источниче разума, ум наш от помыслов лукавых очищающий;
слава Тебе, Пастырю пастырей, от тьмы неведения к Свету евангельския Истины нас наставляющий.
Слава Тебе, Свете немеркнущий яслей Вифлеемских, Ты наша радость, надежда и упование;
слава Тебе, сладосте сердечная, не отвергающийся нашего слезнаго покаяния.
Слава Тебе, теплото любимая, в отчаянии греховнем сущих надеждою прощения согревающий;
слава Тебе, в скорбех и печалех, и в страшный час смерти нас не оставляющий.
Слава в вышних Богу и на земли мир, в человецех благоволение.

Кондак 12
Благости и радости, и Божественныя славы, имиже наполняются Херувими и Серафими, и вся небесныя силы, исполнися земля и вси живущии на ней, егда яко Человек в вертепе Вифлеемстем человеком приразился еси, небесных и земных Царю, понеже таинство преславное - Евангелие Отчее: яко семя Жены сотрет главу змия, исполнися, - Бог во плоти на земли явися, да Собою всяческая ко Отцу приведет. Сему Твоему благоволению, Владыко наш и Господи, вся земля ангельски вопиет: Аллилуиа.

Икос 12
Поюще Твоего, Спасе, вочеловечения неизреченное таинство, веруем со пророком: днесь бо, яко агнец незлобивый, на заколение уготованный, в яслех безсловесных положился еси. Сему преславному сбытию дивящеся, Небо и земля, и Ангелов чины, и всяк язык земных, дароносяще всяческая, исповедует: нас бо ради родися Отроча младо Превечный Бог! Мы же, яко явльшемуся Богу и на земли виденному, и Богу и Отцу Соприсносущному, дерзаем приносити Тебе сия похвалы:
Слава Тебе, всяческая носяй глаголы, рождение свыше, - водою и духом, человеком возвестивый;
слава Тебе, якоже Моисей вознесе змию в пустыни, тако вознестися за спасение мира возблаговоливый.
Слава Тебе, Отца Небеснаго предивный Сыне, источник безсмертия - Кровь и Воду из ребр Твоих миру источивый;
слава Тебе, положением души Твоея за ны, Церковь спасительную нам воздвигнувый.
Слава Тебе, Радосте пресветлая, о Тебе бо, вернии, утверждение надежды имуще, радуемся;
слава Тебе, богатство неистощимое, Егоже причащатися в невечернем дни Царствия Твоего надеющееся, хвалимся.
Слава Тебе, Надеждо ненадежных божественнаго веселия непроходимое торжество;
слава Тебе, безлетный Свете, Явльший всему миру Триипостасное Божество.
Слава в вышних Богу и на земли мир, в человецех благоволение.

Кондак 13
О неизреченная и неизглаголанная щедрот бездно, Агнче Божий, Иисусе Христе, младенчествующий плотию, юже в ложеснах Девы Неискусомужныя Духом Святым исткал еси, да человеком единосущный явишися, и всяку слезу и воздыхание от лица земнородных отъимеши, и сих Твоего неприступнаго Божества причастницы соделаеши. Прими от нас убогое сие славословие и, якоже в ясли бессловесныя, вниди в сердца наша, и сии в жилище Себе освяти, и Светом Твоего Трисиятельнаго Божества нас озари, да со всеми небесными и земными принесем Ти ангельскую песнь: Аллилуиа.
Этот Кондак читается трижды. Затем Икос 1 и Кондак 1.

Молитва
Пребезначальное Начало, Боже Святый и Вечный, и всея твари Содетелю! Киими словесы возблагодарим и киими песньми возвеличим Твое нас ради человек неизреченное снисхождение, волею Божества Своего не отступльше, и недр Отчих не разлучаяся, Бог сый, яко Человек, в вертепе безсловеснем ныне положился еси, Христе Боже наш!
Кто исповесть неизглаголаннаго сего Таинства величие и преславнаго сбытия Таинство: Сын Божий, Сын Девы является, да свободит мир от клятвы законныя, и сыны греха и беззакония - чадами Божиими, наследниками вечных благ соделает, - Себе же, яко жертву непорочную и Всесвятую, в залог спасения падшаго человека да принесет.
Иисусе Сладчайший, Владыко Всемилостивый! Твоим Пребожественным снисхождением юдоль земная в храм Божественныя Славы Твоея освятися, и все живущии на ней небесным веселием исполнишася. Сподоби убо и нас в день Преславнаго Рождества Твоего чистым сердцем и отверстою душею исповедати Тя истиннаго Агнца Божия, услаждающаго и укрепляющаго нас надеждою грядущих благ в немеркнующем Свете Трисиятельнаго Божества, Имже вся живет и движется, Имже обновление нашего первообразнаго бытия да усовершится.
Ей, Господи, всякаго благодеяния богатый Дателю, и Подателю Благий, за еже тако возлюбил еси мир, яко вся скорби и болезни наша на Себе понести изволил еси, не остави нас, дондеже суета земная скорбьми и напастьми не изсушила души наша, и не погибе путь спасения под ногама нашима, да не посмеются о нас врази наши, но даруй нам в свете Твоего Божественнаго Откровения познати путь мира, добра и истины, и воззови ненасытною жаждою по Тебе, Спасителе нашем, во еже творити волю Твою Преблагую во страсе Твоем. И в похвалу неизреченному снисхождению Твоем, яко кадило благовонное, приносити Тебе житие нескверное и любовь нелицемерную, да в делех наших и во уповании веры нашея непрестанно совершается воля Твоя Святая, и во веки не умолкнет под небесем слава Твоя; слава, - яко Единороднаго от Отца, исполнь благодати и истины. Яко о Тебе, ныне плотию от Безневестныя и Пречистыя Девы Марии Рождшемся, вся колена небесная и земная, радости исполняющеся, велегласно исповедуют: с нами Бог, Емуже честь и поклонение подобает - Отцу, и Сыну, и Святому Духу, во веки веков. Аминь.[/spoiler]

[Раб божий Константин]

Акафист преподобному Роману Киржачскому.
[spoiler]Кондак 1
Избранный преподобным чудотворцем Сергием, потщался еси подражати житию его, горячим желанием Божественныя любве разжигаем, преподобне отче наш Романе, моли Христа Бога всяких искушений, бед и наветов вражиих избегнути нам, радостными песньми с любовию восхваляющим тя, небеснаго предстателя и заступника нашего:
Радуйся, Романе, преподобне отче наш!

Икос 1
Ангелов светоносную чистоту возлюбив от юности твоея, преподобне, равноангельскому поревновал еси житию учителя твоего преблаженнаго, подражая ему во всех добродетелях, того ради и мы, любовию побеждаеми, славим тя и глаголем:
Радуйся, Божественною любовию воспламененный;
Радуйся, тоя огнем ко иноческому житию привлеченный.
Радуйся, во обитель Пресвятыя Троицы вселивыйся;
Радуйся, добрым сердцем ко Христу устремивыйся.
Радуйся, дивному Сергию себя в послушание предавый;
Радуйся, кротость и смирение от того усвоивый.
Радуйся, просвещенным умом Святей Троице послуживый;
Радуйся, честное обиталище Святаго Духа.
Радуйся, истинный святаго учителя ревнителю;
Радуйся, заповедей Христовый усердный исполнителю.
Радуйся, образе кротости духовныя;
Радуйся, яко достигл еси чистоты сердечныя.
Радуйся, Романе, преподобне отче наш!


Кондак 2
Видя подвиги о Бозе и молитвенныя труды великаго отца нашего Сергия, Романе богомудре, уподобился еси тому безмолвием и жестоким пребыванием и купно с ним воспевал еси ангельскую песнь Пресвятей Троице: Аллиллуиа.

Икос 2
Разум небесный стяжав, усмотрев суету мира сего, предпочел еси удалитися мирскаго мятежа, о спасении души твоея ревнуя и взыскуя прежде всего Царствия Божия и правды Его; мы же, разумное желание твое ублажающе, воспеваем ти сице:
Радуйся, суету земную ни во чтоже вменивый;
Радуйся, небесная сокровища возлюбивый.
Радуйся, в Горняя течение твое направивый;
Радуйся, всего себя Единому Богу предавый.
Радуйся, яко добродетелей плод красный обрел еси;
Радуйся, яко сокрушение сердечное стяжал еси.
Радуйся, умиленныя молитвы Господу возносивый;
Радуйся, страстная взыграния плачем угасивый.
Радуйся, страхом Божиим присно возгреваемый;
Радуйся, благоговейным служением учителя удививый.
Радуйся, священнаго безмолвия рачителю;
Радуйся, ветхаго человека страстей искоренителю.
Радуйся, Романе, преподобне отче наш!

Кондак 3
Сила Божия укрепляше тя, преподобне Романе, егда мира отвергся, иноческое житие восприял еси. Темже обитель Пресвятыя Троицы, в ней же подвизался еси неленостно, Христу работая в посте и молитве, мужественно оставил еси и за чудным учителем последовал еси, верою воспевая Богу: Аллилуиа.

Икос 3
Имеяй мудрого наставника во иночестем житии, авву Сергия, не оставил еси его, но вослед за ним в пустынное обителище исшел еси, преданно в пути ему послужил еси; мы же твоей верности и послушанию удивляющеся, вопием ти таковая:
Радуйся, святое послушание избравый;
Радуйся, верою и милующею любвию исполненный.
Радуйся, богоноснаго Сергия сотаинниче;
Радуйся, светлая звездо иночества русскаго.
Радуйся, дерзновенную молитву стяжавый;
Радуйся, верою крепкою учителя умоливый.
Радуйся, твоея ради жажды источник воскипел из горы;
Радуйся, правило веры и благочестия.
Радуйся, Христа, яко бисер многоценный, обрел еси;
Радуйся, яко сердце теплотою Утешителя согрел еси.
Радуйся, светлый лучу Солнца Правды;
Радуйся, трудниче прилежный нивы Христовы.
Радуйся, Роман, преподобне отче наш!

Кондак 4
Бурею помышлений сумнительных смущаеми есмы, кто бо может по достоянию восхвалити жития твоего суровое пребывание в дебрех Киржачских, идеже ты, отче Романе, со учителем твоим пречудным непрестанно вопиял еси дивному во святых Своих, в Троице славимому Богу: Аллилуиа.

Икос 4
Слышав богоносный святитель и новый чудотворец Алексий о смиренномудрии твоем, како в чину ученик своих преподобный Сергий сотвори тя, како избра тя из среды иноков своих и посла во град Москву священства благодать прияти от руки его, с любовию тя приял еси и пастыря вернаго стаду твоему поставил еси. Ныне убо и мы со слезами припадающе благодарственно вопием ти таковая:
Радуйся, яко в дебрь Киржачскую вселился еси;
Радуйся, яко молвы житейския тамо избегл еси.
Радуйся, аввою великим от среды ученик его избранный;
Радуйся, во игумена новыя обители премудро им поставленный.
Радуйся, горлица пустыннолюбная и добровидная;
Радуйся, непрекословный послушниче игумена великаго.
Радуйся, светильниче рассуждения неусыпный;
Радуйся, сладкий плод послушания Христу принесый.
Радуйся, образ смиренномудрия и терпения нам явивый;
Радуйся, многих в подвизех иноческих укрепивый.
Радуйся, по лествице сияющих добродетелей к Богу возшедый;
Радуйся, красный цвете, в Горних селениях процветый.
Радуйся, Романе, преподобне отче наш!

Кондак 5
Боготечней звезде подобен явился еси, преподобне, наставляя люди земли Владимирския на путь спасения; темже молим тя: просвети и наша сердца, мраком житейских попечений омраченныя, научая нас богоугодно житие сие проходити и достойно воспевати Богу, спасающему нас молитв твоих ради, песнь: Аллилуиа.

Икос 5
Видевше людие ближних и дальних весей и градов богоугодное житие твое, живо стекахуся во обитель Благовещения Пресвятыя Богородицы, яже на Киржаче реце, идеже ты пастырь по богомудром авве послушания ради поставляешися: инии желая услышати твоих душеполезных поучений, инии же подвизатися вкупе с тобою хотяще. Ты же всех любезно приемля, согревал еси сердца их любовию Божественною. Ныне убо и мы, смиренно к тебе прибегающе, сице глаголем:
Радуйся, яко житием твоим святым весь пустынную просветил еси;
Радуйся, яко северную пустыню во град обительный преобразовал еси.
Радуйся, приходящим к тебе путь в Горняя указавый;
Радуйся, чуднаго наставника преемниче бывый.
Радуйся, Пресвятей Владычице во обители Ея верно послуживый;
Радуйся, богоугодно в мире и тишине поживый.
Радуйся, пастырю добрый и долготерпеливый;
Радуйся, яко иноков стадо богомудро упасл еси.
Радуйся, сердечнаго плача богодухновенный учителю;
Радуйся, нестяжательнаго жития насадителю.
Радуйся, заблуждших кротостию исправляяй;
Радуйся, приходящих к тебе смирению научаяй.
Радуйся, Романе, преподобный отче наш!

Кондак 6
Проповедник неленостный веры Христовы явился еси, преподобне Романе, боговедению и благочестию поучая братию свою и вся люди, во обитель Благовещения Пречистыя Владычицы нашея приходящия, словом спасения, паче же святым образом жития твоего наставляя, да возмогут благоприятно пети Единому Истинному Богу: Алллилуиа.

Икос 6
Возсияв светом богоразумия твоего людем земли Русския, егда узреша подвиги и труды твоя, мужественно Христа ради подъятыя, озари и нас лучами добродететлей твоих, да к тебе, яко к теплому о нас молитвеннику, вопием хвалебно:
Радуйся, воли Божия скорый слышателю и исполнителю;
Радуйся, чистоты душевныя и целомудрия рачителю.
Радуйся, скорбящих утешителю и нищих питателю;
Радуйся, незлобия и безгневия стяжателю.
Радуйся, книжныя премудрости наставниче предобрый;
Радуйся, прибегающих к тебе помощниче предивный.
Радуйся, овец Христовых пастырю верный;
Радуйся, благий вождю духоноснаго воинства.
Радуйся, ревностный последователю отцев богоносных;
Радуйся, милостей Божиих присный ходатаю.
Радуйся, трезвения непрестаннаго ревнителю;
Радуйся, самоукорения и покаяния учителю.
Радуйся, Романе, преподобне отче наш!

Кондак 7
Хотя тесным путем и скорбным последовати Христу, нас ради путем крестным шедшему, пустынный трудолюбник показался еси; заповеди Господни совершив, достигл еси небеснаго воздаяния, от века угодившим Богови уготованнаго, идеже веселяся, благодарно вопиеши Творцу всяческих: Аллилуиа.

Икос 7
Новаго тя по благочестию ревнителя познав авва Сергий, с коим же со всеусердием трудился еси в созидании новыя обители северныя. Господу споспешествующу, скоро храм Благовещения Пресвятыя Богородицы создася, идеже иноцы и людие мирстии воспеша ти сице:
Радуйся, яко вкупе с наставником обитель Пречистыя благоукрашал еси;
Радуйся, яко благоволение Небеснаго Отца наследовал еси.
Радуйся, веру несокрушимую делы явивый;
Радуйся, небо церковное собою украсивый.
Радуйся, Христу уподобивыйся в совершеннем терпении;
Радуйся, наставляяй людей множество, чающих спасения.
Радуйся, святая чада о Христе стяжавый;
Радуйся, на пажити духовней тех добре препитавый.
Радуйся, молитвы чистыя смиренный стяжателю;
Радуйся, Таин Христовых благий раздаятелю.
Радуйся, благочестия святых добрый подражателю;
Радуйся, великий пред Богом угодниче.
Радуйся, Романе, преподобне отче наш!

Кондак 8
Странствовав во град Москву, отче Романе, изволением богомудраго учителя твоего, да благодать священства приимеши и наставления новаго чудотворца, пречестнаго святителя Алексия, услышиши, како вопевати во вся дни Богови: Аллилуиа.

Икос 8
Всем воистину дивен явился еси, еще сый на земли, в подвизех иноческаго жития, о Бозе и угождении Ему со ученики беседовал еси, умоляя чада своя духовная ничтоже предпочитати паче любве Христовы. Темже и мы, любовию побуждаемии, научихомся пети тебе таковая:
Радуйся, огнем страха Божия в себе страсти попаливый;
Радуйся, душу теплыми молитвами очистивый.
Радуйся, сердце покаянными слезами омывый.
Радуйся, яко ангел, во благочестии недвижно пребывый.
Радуйся, яко грешники сокрушению сердечному наставлял еси;
Радуйся, яко отец любвеобильный чадом духовным был еси.
Радуйся, яко непоколебимый столп, веру ограждал еси;
Радуйся, яко милосердию Господа ради научал еси.
Радуйся, венец небесный, обретый терпением;
Радуйся, причастник блаженства ангельского явивыйся смирением.
Радуйся, кротостию Царства Божия достигнувый;
Радуйся, нищету духовную стяжавый.
Радуйся, Романе, преподобне отче наш!

Кондак 9
Всякое духовное утешение почерпал еси, преподобне, от содружества с радонежским чудотворцем, тщася последовати того житию, славу земную ни во чтоже вменяти, честь временную презирати, постом и молитвою Богови угождати. Темже иноков собиратель явился еси, от умиленныя души всегда зовый Господеви: Аллилуиа.

Икос 9
Житие богомудрое стяжал еси от собеседования с досточудным аввою Сергием, словом спасения от него назидаяся, да и приходящим к тебе покажеши верный путь ко Господу. Настави заповедем Божиим и нас, взывающих тебе тако:
Радуйся, Церкве Русския преславное похваление;
Радуйся, собора преподобных отцев световидное украшение.
Радуйся, смиренных на высоту небесную возвышение;
Радуйся, добродетельми душу, яко камением драгим, украсил еси.
Радуйся, сладколаголивый проповедниче;
Радуйся, богомудрый монахов наставниче.
Радуйся, лозо многоплодная винограда Христова;
Радуйся, добрый делателю вертограда Небеснаго.
Радуйся, светозарная звездо града Киржача;
Радуйся, Небесному Жениху души чад твоих уневестивый.
Радуйся, многоразличными подвиги подвизавыйся;
Радуйся, Отечество Небесное наследивый.
Радуйся, Романе, преподобне отче наш!

Кондак 10
Спасения души твоея ища от юности, вся в мире сем красная оставил еси и собранных игуменом Троицким иноков пастырь сподобился еси были; богоугодно пожив, ныне на небесех предстоиши Господеви, Емуже на земли благоугождал еси, вопия: Аллилуиа.

Икос 10
Стена еси тверда обители Благовещения от врагов невидимых, темже и мы к заступлению твоему усердно прибегаем и молимся: от всяких нас бед и напастей заступай и ограждай, да взываем ти радостно:
Радуйся, чудотворцем и преподобным именованный;
Радуйся, молитвенниче за грешников неусыпный.
Радуйся, в мире праведно жизнь земную скончавый;
Радуйся, преселивыйся от земли в Чертози Небесныя.
Радуйся, яко присно за чада твоя предстательствуеши;
Радуйся, яко у Престола Божия о нас, недостойных, ходатайствуеши.
Радуйся, вшедый в радость Господа твоего;
Радуйся, яко и по смерти землю Владимирскую не оставивый.
Радуйся, благодатию исцелений от Христа Бога прославленный;
Радуйся, в день памяти твоея милость велию явивый.
Радуйся, скорбящую о чаде своем мать утешивый;
Радуйся, расслабленней отроковице здравие подавый.
Радуйся, Романе, преподобне отче наш!

Кондак 11
Пение всеумиленное приносим Христу Богу, прославляющему тя, преблаженне, яко дарова нам таковаго честнаго рачителя о спасении нас, грешных. Темже славим тя, просяще твоего молитвенного предстательства ко Господу, Емуже в радости блаженней сподобимся вечно воспевати: Аллилуиа.

Икос 11
Светом ангелоподобнаго иноческаго жития душу твою просвещенную увидев, первоучитель твой великий постави тя по себе пастыря иноков, им собранных во обители Благовещения, да будеши многим вождь во Отечество Небесное, неленостно научая их спасению. Сие воспоминающе, молим тя: приведи нас к свету спасения, да возможем достойно благохвалити тя песньми сицевыми:
Радуйся, во время искушения огненнаго нас не оставивый;
Радуйся, от разорения град твой и оитель святую соблюдый.
Радуйся, от сокрушения храм Пречистыя Владычицы оградивый;
Радуйся, к теплым мольбам любящих тя слух приклонивый.
Радуйся, святыя мощи твоя, яко сокровище, явити изволивый;
Радуйся, милость велию от Царицы Небесныя получивый.
Радуйся, скоро прошения наша исполняющий;
Радуйся, небесный светильниче неугасимый.
Радуйся, милования источниче неоскудеваемый;
Радуйся, благодати Святаго Духа кладезю неисчерпаемый.
Радуйся, в делании заповедей сердца наша утверждаяй;
Радуйся, скорбящих о гресех всерадостно утешаяй.
Радуйся, Романе, преподобне отче наш!

Кондак 12
Благодатию священства освященный, потщался еси всех к покаянию призывати, не презри и ныне людей града твоего, в суете сущих и молитвы на месте сем возносящих, да вкупе с тобою чистым сердцем вопиют Богу: Аллилуиа.

Икос 12
Поюще дивнаго во святых своих Бога, преподобне отче наш Романе, восхваляюще многия подвиги и труды твоя в жизни сей, молим тя: не возгнушайся пений наших молебных и низпосли нам, грешным, дары благости Божия, ко спасению благопотребныя, да со умилением взываем ти сице:
Радуйся, всех святых земли Русския сонаследниче;
Радуйся, всем православным, вопиющим к тебе, скорый заступниче.
Радуйся, с богомудрым учителем твоим на небесех присно ликуеши;
Радуйся, ходатайством твоим верных спасаеши.
Радуйся, благодатное Отечества нашего прославление;
Радуйся, града твоего и земли Владимирския похвало и утверждение.
Радуйся, в скорбех сущих присное наше утешение;
Радуйся, Церкве Православныя драгое украшение.
Радуйся, тихий свете Киржачския земли;
Радуйся, чистое отражение Божественныя славы.
Радуйся, лучами святыни твоея нас озаряяй;
Радуйся, милостивое заступление Божия Матере к нам приклоняяй.
Радуйся, Романе, преподобне отче наш!

Кондак 13
О великий и преславный заступниче наш, Романе блаженне! Припадающе с верою и любовию, молим тя: приими сие малое наше приношение и испроси нам у Христа Бога утверждение в вере и благочестии, здравие и спасение и от всех бед избавление, сподоби же Царствие Небесное получити и в радости со всеми святыми и тобою пети Спасителю нашему Богу: Аллилуиа.
Этот кондак читается трижды, затем 1-й икос "Ангелов светоносную чистоту..." и 1-й кондак "Избранный преподобным чудотворцем Сергием..."

Молитва
О предивный угодниче Божий, преподобне отче наш Романе! Града Киржача и земли Владимирския драгоценное украшение, иночествующих богомудрый начальниче и всех притекающих к Тебе добрый наставниче! Ты глагола Сергия великаго послушал еси и твердым стопам его искренне последовал еси. Темже пастырь ревностный обители Благовещения Пресвятыя Богородицы во граде сем был еси. Ныне же, со дерзновением предстоя Престолу Вседержителя, неотступно молишися о чтущих и прославляющих святую память твою. Усердно и прилежно молим тя, отче предивне, неотступно предстательствуй о всех нас Всемилостивому Владыце Господу Иисусу Христу, да твоими теплыми и святыми мольбами дарует нам, немощным и многогрешным, оставление беззаконий наших, тяжко оскорбляющих Всесвятаго Бога и Его любовь к нам, да обратит нас на путь Божественных заповедей Его, ведущих в жизнь вечную, да омоет нас, окаменелых сердцем, слезами искренняго и истиннаго покаяния. Испроси, угодниче великий, вышний мир и тишину граду твоему, обители твоей и стране нашей многострадальней, веры православныя утверждение, людем верным здравие и спасение, иночествующим во бдениях молитвенных и трудах укрепление. Огради нас молитвами твоими от всяких зол, бед и напастей, от лютаго нашествия иноплеменных, от врагов видимых и невидимых сохрани. Испроси нам у Всещедраго Царя и Бога время на исправление наше и в день Страшнаго Суда не остави нас без заступления твоего, да тако зде богоугодно поживше, сподобимся наследия вечнаго. Таможе ты со учителем твоим, богодухновенным аввою Сергием, со всем светозарным собором святых земли Русския и со всеми святыми непрестанно воспеваеши Безначальнаго Отца со Единородным Его Сыном и Всесвятым и Благим и Животворящим Его Духом ныне и присно и во веки веков. Аминь.[/spoiler]

[Раб божий Константин]

АКАФИСТ святому благоверному князю Роману Рязанскому.
[spoiler]Кондак 1
     Избранный от князей Российских на подвиг мученический и убиенный от язык безбожных, боголюбный угодниче Христов, страстотерпче княже Романе! Восхваляем велие терпение твое и за веру Христову твердое стояние. Ты же, яко имеяй дерзновение ко Господу, не престай молити о нас Царя Небеснаго, да выну тебе взываем:
     Радуйся, благоверный княже Романе, святый мучениче и предивный чудотворче!


Икос 1
     Ангельское твое незлобие и сердца кротость многия людие земли твоея к ти привлекоша. Ты бо, яко добрый виноградарь, непрестанная попечения о стране Рязанстей, вверенней от Господа, имевый, вся во славу Божию творил еси. Темже и мы тебе, страха Божия исполненну, любовию вопием таковая:
     Радуйся, воине Христов, единому Богу послуживый;
     Pадуйся, крепкий адаманте, козньми вражиими непобедимый.
     Радуйся, не себе, не миру, но Единому Богу поработивыйся;
     Pадуйся, словом Божиим наставленный и просвещенный.
     Радуйся, житием твоим Бога прославивый;
     Pадуйся, ближняго своего по заповеди Христовой яко сам себе возлюбивый.
     Радуйся, судие праведный и мудрый градоправителю;
     Pадуйся, яко чистым сердцем и ныне Бога зриши.
     Радуйся, благоверный княже Романе, святый мучениче и предивный чудотворче!


Кондак 2
     Видя богоугодное твое житие, позавидова всезлобный диавол, воздвиже на тя враги твоя, иже оклеветаху тебе пред ханом, рекше: хулит тя и веру твою; ты же, кротче и незлобиве княже Романе, не причастен был еси вине сей, не имея злобы ни на когоже, да выну чистыми усты принесеши Богу: Аллилуиа.


Икос 2
     Разум просвещен имея Богомыслием, путь далече во Орду надлежать узрел еси, оправдания ради пред нечестивым владыкою; темже и сыном твоим повелевый послушание матери своей имети; управление градов им вручая, благословение отчее даде. Сие же разлучение с присными твоими, ихже не надеяшеся ктому зрети, со умилением во уме своем видяще, тепле тебе взываем:
     Радуйся, красная мира сего ни во что вменивый;
     Pадуйся, скоро и не озираяся вспять, всех и вся Господа ради оставивый.
     Радуйся, яко слово Господне «иже любит сына или дщерь паче Мене, несть Мене достоин», свято соблюл еси;
     Pадуйся, ни единаго в мире паче Господа возлюбивый.
     Радуйся, в кротости и смирении ко владыце земному потекий;
     Pадуйся, Владыку Небеснаго выну в сердце твоем имевый.
     Радуйся, слезы супруги и чад твоих в дар Господу принесый;
     Pадуйся, на заколение радостно грядый.
     Радуйся, благоверный княже Романе, святый мучениче и предивный чудотворче!


Кондак 3
     Силою Божиею укрепляемь, во Орду к бесерменом зловерным прибыл еси и, сердцем открытым представ нечестиву, рекл еси: «ни тебе, хане, ниже веры твоея похулих!» Хан же, кротостию и чистотою взора твоего смущаемь, милостивно возжела пустити тя, токмо повеле тебе единою главу пред неверною их книгою, «Коран» нарицаему, преклонити и довлеет во свидетельство им; но ты, исповедниче Христов, ни мало медля, воззвал еси: «Христианин есмь! И воистину вера христианская свята есть». И абие воспел еси Богу: Аллилуиа.


Икос 3
     Имея ревность велию о Господе и любовь к людем нелицемерную, княже Романе, потщился еси ложность учения Магометова показати и порочное житие того последователей обличити, Христово же всесвятое учение разъяснит и призвати слепых ко прозрению и веры Православныя приятию. Темже и мы, ревностию твоею наученнии, воспеваем тебе сице:
     Радуйся, великий проповедниче славы Христовы;
     Pадуйся, изобличителю невеждества агарянскаго.
     Радуйся, к любви Господни нас призываяй;
     Pадуйся, потщивыйся и нечестивых обратити ко Господу.
     Радуйся, не преклонивый главы твоея пред ложью;
     Pадуйся, яко в темницу неустрашимь веден бил еси.
     Радуйся, на казнь лютую за веру Христову готовый;
     Pадуйся, вси козни нечестивых посрамивый.
     Радуйся, благоверный княже Романе, святый мучениче и предивный чудотворче!


Кондак 4
     Бурею злобною нападоша на тя, исповедниче Христов, посрамленнии тобою врази Христови и первее извлекоша честный язык твой, но, егоже нечестивыми руками отсекше, тебе проповедати тем воспретити не возмогли суть; обаче без языка гласом велиим воспел еси: Аллилуиа.


Икос 4
     Слышавше враждовавшии на тя мучители твое громкое Богу хваление и безконечною злобою воспылавше, уста тебе заткнуша платом, да бы задыхаяся не возмогл проповедати Воскресшаго. Но ты, святый страстотерпче, не смущался сим новым насилием, взором вдохновенным Христа Бога нашего исповедал еси. Темже и мы, терпением твоим умиленнии, немолчно взываем ти:
     Радуйся, никоею страстию в проповедании Христа запинаемый;
     Pадуйся, и без языка глаголати могий.
     Радуйся, велию любовь ко Господу явивый;
     Pадуйся, вся члены твоя Господу посвятивый.
     Радуйся, чистый взор твой ко Господу возведый и тем о Нем проповедавый;
     Pадуйся, и взором твоим в трепет нечестивых приведый.
     Радуйся, яко не от себе глаголавый;
     Pадуйся, по слову Иисусову Духом Божиим в той час наученный.
     Радуйся, благоверный княже Романе, святый мучениче и предивный чудотворче!


Кондак 5
     Боготечным звездам уподобится очи твои, княже Романе, но беззаконницы, от геены яростно распаленнии, ослепиша тя, страстотерпче. Мы же, страдании твоими наученнии, пети навыкохом: Аллилуиа.


Икос 5
     Видевше твое Богом укрепляемое терпение, нечестиви, наченше издеватися над честным твоим ликом, со злобою адскою урезаша ланиты твоя. Пречестною твоею кровию омывыйся, страстотерпче, зверское жестокосердие с велиим терпением и кротостию ради Господа понесл еси. Темже любовию воспеваем ти:
     Радуйся, Христа ради истязанный;
     Pадуйся, красоту земную на лепоту Небесную пременивый.
     Радуйся, яко велия страдания помощию Христовою претерпел еси;
     Pадуйся, ни единым воплем, ниже стоном усладивый слуха нечестивцев.
     Радуйся, ланиты твоя окровавленныя Господу принесый;
     Pадуйся, Тому в терпении своем смиренно подражавый.
     Радуйся, яко очи твои и язык твой Богу, иже созда их, принесл еси;
     Pадуйся, яко всего себе на убиение за Христа отдал еси.
     Радуйся, благоверный княже Романе, святый мучениче и предивный чудотворче!


Кондак 6
     Провозвестник явися любве Христовы к нам, Романе святый, прославляя ю страдании твоими. Ушеса и нос мучителие твои отсекоша ти, обаче вся сия пречудно претерпел еси, Богу во глубине души вопия: Аллилуиа.


Икос 6
     Возсия свет благодати Божия в тебе, страстотерпче святый, ибо муки и страдания нечеловеческая с терпением ангельским претерпел еси, Богом укрепляемь. Руку твоею суставы с дикою яростию безбожницы преломили суть, не ведуще, како еще истязати тя, благоверне! Тем велиему терпению твоему дивящеся, вопием ти сице:
     Радуйся, воине Христов, страстьми непобедимый;
     Pадуйся, яко длани и персты, прежде делы добрыми Богу послужившыя, на поругание предал еси;
     Pадуйся, едина язва сый не преставый благодушие претерпевати вся;
     Pадуйся, по слову Господа, терпением твоим душу твою стяжавый.
     Радуйся, яко не токмо плоть, но и кости сокрушены имый;
     Pадуйся, вся сия страсти безропотно претерпевый.
     Радуйся, и велия муки сия ни во что Креста Христова ради вменивый;
     Pадуйся, за смирение и кротость Богом возлюбленный.
     Радуйся, благоверный княже Романе, святый мучениче и предивный чудотворче!


Кондак 7
     Хотящии довершити злая своя отсекоша десную твою, еюже знамение креста на челе своем выну полагал еси и еюже милостыню неоскудную подавал еси, таже и шуйцу твою, яже по заповеди Христовой не веда, еже десная творит. Темиже ранами и злострадании наученнии, Богу вопием: Аллилуиа.


Икос 7
     Новое страдание уготовали ти суть нечестивии, нозе твои честнеи, выну добрым путем шествовавшии, отсекше, един стан со главою оставили ти, великомучениче! Темже мукам твоим покланяющеся, приносим ти сицевая:
     Радуйся, десницу твою Господу принесый и шуйцу;
     Pадуйся, и всем собою пренебрегай ради Господа, Его же Десница и Шуйца нас ради пригвождение бысте.
     Радуйся, в Его Пречистеи Руце дух свой предати готовый;
     Pадуйся, еще мало потерпети имый, но муки нестерпимыя несший.
     Радуйся, истощенный любве ради Божественныя, зане и любы оная тебе ради истощена бысть;
     Pадуйся, нуждниче, терпением велием Царствие Божие восхитивый.
     Радуйся, елико много пострадал еси, толико во сто крат более Господом возлюблен был еси;
     Pадуйся, все Ему пожрети пожелавый и вся премирныя радости в раю пресветлем улучивый.
     Радуйся, благоверный княже Романе, святии мучениче и предивный чудотворче!


Кондак 8
     Странноужасных страданий твоих безтрепетно не возможем описание чести. Уже единое дыхание живым тебе быти показующе, откры нечестивым, яко время есть последнее злодеяние над тобою совершити. Наста бо час кончины твоея честныя, Романе святый! Ибо мучителие твои, содравше кожу с главы твоея, оную отсекли суть. Дух же твой востече на Небеса, идеже выну со Ангелы воспевавши Богу: Аллилуиа.


Икос 8
     Всем православным образ терпения мученическаго явил еси, злостраждущим веру укрепляя, любовь ко Господу и людем, ихже Той любити повелел есть, умножая, и нечестивым спастися желая; муки же лютыя до конца претерпевый, главу твою на позорище на копиих водруженную уже с небес узрел еси. Темже на икону твою с любовию взирающе, тепле вопием ти:
     Радуйся, образе кротости и совершеннаго терпения;
     Pадуйся, приятелище великаго у Господа дерзновения.
     Радуйся, яко дана тебе благодать за ны молитися;
     Pадуйся, притекающих к тебе тщи не оставляяй.
     Радуйся, яко ничтоже крепко есть, яко молитва страстотерпча;
     Pадуйся, и нашу немощную молитву укрепляяй.
     Радуйся, пред Господем присно предстояй;
     Pадуйся, Ему со Ангельскими лики хвалу воспеваяй.
     Радуйся, благоверный княже Романе, святый мучениче и предивный чудотворче!


Кондак 9
     Возшедый на небеса и духом в райских селениях обитаяй, нас на земли, в печали сущих, не забывавши, да мы, тебе прославляюще, Богу вопием: Аллилуиа.


Икос 9
     Витии многовещании не возмогут благохвалити по достоянию твою крепость мученическую, твое терпение и велию любовь ко Господу, мы же бренными усты дерзаем воспевати тебе:
     Радуйся, крепкий столпе веры православныя;
     Pадуйся, безбоязненный обличителю ереси инославныя.
     Радуйся, яко богохульники бесерменския посрамил еси;
     Pадуйся, яко за веру святую постоял еси.
     Радуйся, яко и нас научаеши лжеверие изобличати;
     Pадуйся, яко в борениих за веру Христову заступаеши.
     Радуйся, яко Церковь Российская обрете в тебе непрестаннаго ходатая;
     Pадуйся, страны Рязанския еси немолчный молитвенниче.
     Радуйся, благоверный княже Романе, святый мучениче и предивный чудотворче!


Кондак 10
     Спасти хотя душу свою, красная мира сего презрел еси, темже убо и нас, чтущих память твою, горняя мудрствовати, а не земная научаеши, паче себе и присных своих в волю Божию предающе, выну Богу вопити: Аллилуиа.


Икос 10
     Стену необоримую имеют страстотерпцы Христа Бога, Иже глаголется мучеников крепость; и тебе, благоверне Романе, бысть Христос непобедимая крепость, Имже вся страсти претерпел еси, Имже во обители райския призван был еси. Зряще тебе в мире премирнем пребывающа, немолчно вопием ти:
     Радуйся, прилоги демонскими преустрашен бывый;
     Pадуйся, силою Креста и Именем сладчайшаго Иисуса оградивыйся.
     Радуйся, яко страна Рязанская непрестанно молитвою твоею ограждается;
     Pадуйся, яко и иныя веси державы Российския не оставлявши.
     Радуйся, яко на пользу душ наших во мнозех градех ныне прославляешися;
     Pадуйся, яко теплую любовь к тебе людей чрез пастырей их вручаеши.
     Радуйся, добрых и верных градоправителей верный споспешниче;
     Pадуйся, врагом страны Российския страшный воеводо.
     Радуйся, благоверный княже Романе, святый мучениче и предивный чудотворче!


Кондак 11
     Пение всеумиленное приносим ти, страстотерпче! Ты же со Ангельскими лики славу Божию воспевая, не забуди и нас недостойных, дабы и нам, спасение душ наших улучивше, с тобою вкупе пети Богу: Аллилуиа.


Икос 11
     Светозарное светило солнечное тма нощная есть пред незаходимым светом славы Божия, еюже наслаждаешися в райских селениих, Романе, единому в Троице славимому Богу предстоя; темже и мы, во тме греховней блуждающии, умиленно тебе взываем:
     Радуйся, светом Божественным озаряемый и нам, грешным, его испросити могий;
     Pадуйся, сподвижники твоя и слуги крепостию веры твоея удививый и обрадовавый.
     Радуйся, яко и власи главы твоея изочтени быша;
     Pадуйся, яко ни един от них без воли Божия паде.
     Радуйся, плотию далече от земнаго отечествия почиваяй;
     Pадуйся, духом в Небесное Отечествие востекий.
     Радуйся, яко воля Божия о тебе совершися;
     Pадуйся, яко восприял еси лучшая и полезнейшая для души твоея.
     Радуйся, благоверный княже Романе, святый мучениче и предивный чудотворче!


Кондак 12
     Благодати Божия исполненный, и на нас молитвами твоими ю призываяй; научи ны всеблагой воли Божии совершение покоритися, с любовию храняще Того повеления; да не оставит Господь в час смертный люди Своя, но да сподобит с тобою присно взывати Ему: Аллилуиа.


Икос 12
     Поюще велие о тебе Божественное промышление и всесильную помощь в странноужасных муках твоих, восхваляем терпения твоего крепость, ублажаем нелицемерную любовь твою к Богу и, тепле воспоминающе вся тобою Господа ради претерпенная и Христом Богом зело возлюбленная, в похвалу тебе поем:
     Радуйся, яко Господь в Небесный Чертог тебе всели;
     Pадуйся, яко подвиг твой подвигоположник Христос увенча;
     Радуйся, воине Христов, на земли непобедимый бывый.
     Pадуйся, и на небеси с вои Ангельскими вселенный.
     Радуйся, вся, яже зде оставил еси, тамо стократно от Господа приявый.
     Pадуйся, душу твою Жениху Небесному уневестивый.
     Радуйся, аще же и погребен еси забвением людей, память твою скорбьми жизни воскресивый.
     Pадуйся, о нас, грешных, пред Господем усердную молитву возносяй.     Радуйся, благоверный княже Романе, святый мучениче и предивный чудотворче!


Кондак 13
     О, преславный угодниче Христов, великомучениче княже Романе! Приими сие малое моление наше и, предстоя у Престола Вседержителя, моли Его избавити от находящих на ны бед, вопиющия о тебе: Аллилуиа.

Этот кондак читается трижды, затем 1-й икос и 1-й кондак

Молитва Роману Рязанскому, страстотеpпцу
     Святый славный великомучениче, благоверный княже Романе, покровителю и заступниче земли Рязанския! Веруем и уповаем, яко страданьми и богоугодною жизнию твоею стяжавый велию милость и дерзновение у Господа Бога, не забыл еси достояния твоего земнаго, отечества нашего, в немже обуреваеми есмы, раби твои, многими напастьми вражиими и страстьми житейскими. Темже просим тя: молитвами и предстательством твоим умоли Господа нашего Иисуса Христа, да избавит нас от всяких бед и злых обстояний, от всяких недугов и болезней и от всех врагов, видимых и невидимых. О великий угодниче Божий! Воздохни о нас, грешных, ко Владыце всяческих, да простит нам вся согрешения наша и низпослет на ны благодать Всесвятаго Духа, да преставше всякаго сквернодейства, прочее время живота нашего во всяком благочестии и чистоте поживем и, тако благоугодивше Господу, сподобимся жизни вечноблаженныя, поюще и воспевающе превеликое милосердие Божие и твое милостивое предстательство за нас у Престола Божия во веки веков. Аминь.


Молитва иная
     О преславный страстотерпче, великий угодниче Божий, принеси нашу слезную молитву Господу Богу нашему, умилостиви Его к нам, грешным, да отымет гнев свой праведный и умирит страну нашу многострадальную; да утвердит благоденствие и тишину, да низпослет нам изобилие плодов земных и да возбранит врагом нашим обиду творити сирым и безпомощным. Темже, припадающе к иконе твоей, воспоминаем с верою страдания твоя, за Христа претерпенная, и молим тя: не остави нас и испроси нам у Господа благая временная и вечная, да славим прославльшаго тя Бога во веки. Аминь.


Тропарь, глас 1:
     Мученьми странноужасными и доблестию всех преудивил еси, княже Романе: честных бо членов твоих по составом резание и всего телесе твоего раздробление претерпел еси за веру Христову. Темже и возшел еси к Престолу Царя славы и явился еси новый предстатель Церкве Рязанския. Молися убо ко Господу, да мир и благоденствие дарует граду нашему, и испроси у Него милость и спасение чтущим священную память твою, многострадальне.


Кондак, глас 2:
     Оклеветанный пред ханом в хулении зловерия его, дерзновенно предстал еси судищу нечестивому, убоявся же Страшнаго Суда Христова, ханское повеление и страх презрел еси, святый Романе. Жестоко биемый и мучимый вопиял еси: «Христианин есмь», телом яко розга режемый, в страданиих уподобился еси Иакову Персянину и явился еси великомученик изрядный, столп и утверждение Церкве Рязанския, заступник и воевода Российский преславный.


Величание
     Величаем тя, святый великомучениче княже Романе, и чтим честная страдания твоя, яже за Христа претерпел еси.[/spoiler]

[Раб божий Константин]

Акафист преподобному Роману Сладкопевцу.
[spoiler]Кондак 1
Избранный подвижниче и земный ангеле Христов, Божественными добродетельми Духа измлада украсився, Романе премудре, пением прекрасным Церкве Христовы служитель был еси, яко да вопием ти:
Радуйся, сладкопевче Романе, красото церковная.

Икос 1
Ангельское житие возлюбил еси от юности, ум на Божественная возвел, временная и земная пренебрегл еси, тем убо вселися в тя Святый Дух, Егоже благодатию украшен еси, сего ради с любовию вопием ти сице:
Радуйся, чистотою Ангелом уподобился еси.
Радуйся, постом и бдением безстрастия достигл еси.
Радуйся, светильниче Божественнаго света.
Радуйся, молитв благовонное кадило.
Радуйся, грамоте необученный, разумом стремивыйся к Богу.
Радуйся, добрыми делы премудрыя превосходивый.
Радуйся, сладкопевче Романе, красото церковная.

Кондак 2
Видя сердца твоего благое намерение, Господь предначерта узкий и тернистый путь твоего спасения. Темже иго Христово благое и легкое усердне восприяв, смирен и послушлив был еси, воспевая всех Творцу и Богу: Аллилуиа.

Икос 2
Разум Божественных Писаний истинною премудростию стяжав, что по апостолу первее чиста есть, потом же мирна, кротка, благопокорлива, исполнися милости и плодов благих, несумненно и нелицемерно. Мы же, дивящеся чистоте твоей, воспеваем:
Радуйся, на Бога Промыслителя всю надежду возложивый.
Радуйся, токмо Его благоволения взыскавый.
Радуйся, в послушании усердно трудивыйся.
Радуйся, в сердце имевый страх Божий.
Радуйся, житием добродетельным на земли просветивыйся.
Радуйся, за сие любовь Божию на небесех снискавый.
Радуйся, сладкопевче Романе, красото церковная.

Кондак 3
Силою любве утверждаяся, поревновал еси евангельское житие стяжати по образу преподобных отцев. Егда же даде ти Господь разумение сего благоугождения, воспел еси со умилением: Аллилуиа.

Икос 3
Имея крепкую веру во благое промышление Божие о спасении человека, притекл еси к честному образу Пресвятыя Богородицы, сопредсташа в церкви Влахернстей, и смиренно молил еси Владычицу, да управит путь твой. Мы же, видяще твое неотступное упование на милость Царицы Небесныя, поем ти:
Радуйся, Божия Матере верное и возлюбленное чадо.
Радуйся, силы Ея священнаго покрова тайное постижение.
Радуйся, Заступницы Усердныя благоговейный почитателю.
Радуйся, теплыя в нощи молитвы к Ней слезно возносивый.
Радуйся, тако утешение в сердце своем обретый.
Радуйся, сладкопевче Романе, красото церковная.

Кондак 4
Бурю многих бед, зависти ради за усердие к послушанию претерпел еси, благий. Обаче за поношение и уничижение воздавал еси кротостию и смирением, мы же мнозе дивящеся незлобию и терпению твоему взываем: Аллилуиа.

Икос 4
Слыша и видя премногую добродетель твою, возлюби тя святейший патриарх, даде с клиром ти равную часть, мы же о сем веселящеся глаголем сице:
Радуйся, всем сердцем Господа возлюбивый.
Радуйся, посрамление завистное приемый в навечерие Рождества Христова.
Радуйся, пред иконою Пресвятыя Богородицы утешение взыскавый.
Радуйся, кротостию уничижение победивый.
Радуйся, явивый сердечныя простоты образ светлый.
Радуйся, умягчивый сердца обидчиков твоих.
Радуйся, сладкопевче Романе, красото церковная.

Кондак 5
Богопесненную любовь и сердце чистое к достижению небеснаго отечества, яко светильник, во уме твоем выну содержа, тою прославил еси Небеснаго Отца, воспевая Ему: Аллилуиа.

Икос 5
Видяще, о пречудне Романе, любовь твою к Богу, юже в сердце твоем выну храниму, сию созерцающе сице рцем вси:
Радуйся, трость песнописца послушная, в руце Христове содержимая.
Радуйся, единаго Христа от сердца возлюбивый.
Радуйся, в радость Господа вшедый.
Радуйся, Тому единому всею душею прилепивыйся.
Радуйся, сладостьми духовными нас насыщаяй.
Радуйся, возлюбленный к Богу о нас предстателю.
Радуйся, сладкопевче Романе, красото церковная.

Кондак 6
Проповедник неоскудеваемыя благодати и милости Божия явился еси ты, блаженне, егда от Царицы Небесныя во сне приял свиток книжный на снедение: тем убо умудрен, нача разумно пети во славу Божию, святым же писати похвальная,взывая с верою: Аллилуиа.

Икос 6
Возсиял еси аки звезда многосветлая, исполнившись премудрости великия, ибо Владычица, яко некогда Сын Ея Своим апостолом, отверзла тебе ум к разумению Писаний, сего ради ублажаем тя, зовуще:
Радуйся, любве евангельския сокровище.
Радуйся, Духа Святаго вместилище.
Радуйся, от Девы Богоблагодатныя дерзновение приемый.
Радуйся, благодарение от сердца чистаго Наставнице своей возносивый.
Радуйся, сладость отречения воли своея познавый.
Радуйся, за кротость и смирение великий дар Божий приявый.
Радуйся, сладкопевче Романе, красото церковная.

Кондак 7
Хотяще вознести достойное благодарение Царице Небесней, возшел еси, Романе блаженне, на амвон церковный и воспел гласом сладким кондак свой, глаголя: Дева днесь Пресущественнаго рождает. Тем и мы Пречистей воспеваем: Аллилуиа.

Икос 7
Дивная звезда явился еси ты, сладкопевче преблагий, украшение изящное Церкве Христовы. Давидову кротость, Иаковле беззлобие и терпение Иовле стяжал еси, мы же вопием ти:
Радуйся, милости Божия стяжателю.
Радуйся, к Богу присный о нас предстателю.
Радуйся, ангельским пением просветивыйся.
Радуйся, лучезарный светильниче.
Радуйся, непоколебимый столпе веры Христовы.
Радуйся, сладкопевче Романе, красото церковная.

Кондак 8
Вси же видяще и слышаще, удивишася, яко течаше от уст твоих, аки река, премудрость. Постыдишася же клирицы, оскорбившие тя, досаждаху о простоте и невежествии, и покаявшеся припадоша к ногам твоим, прощения просяще и славяще Бога, поя Ему: Аллилуиа.

Икос 8
Весь огнем Божественныя любве исполненный, в терпении стяжав Дух Святый, по слову Евангелия Христова. Мы же, любовию твоею побеждаеми, дерзаем звати тебе таковая:
Радуйся, яко дивный образ Отца Небеснаго в себе явивый.
Радуйся, братию враждовавшу на тя, любовию Христовою возлюбивый.
Радуйся, благая за злая воздававый.
Радуйся, пример братолюбия христианскаго всем нам оставивый.
Радуйся, злых приводяй к постыжению.
Радуйся, скорбящим подаяй утешение.
Радуйся, сладкопевче Романе, красото церковная.

Кондак 9
Все естество человеческое и лики Ангелов восхваляют тя, премудре отче, яко послушник, смирения исполненный, приял еси блаженный путь Христов, водворися в Царстви Небеснем, поюще: Аллилуиа.

Икос 9
Вития многовещанныя не довлеют изглаголати чистоту духовную, юже имел ты, блаженне Романе; и нас научи вере крепцей и безропотному послушанию, с любовию зовущих ти:
Радуйся, паствы твоея изрядный послушниче.
Радуйся, Ангелов собеседниче.
Радуйся, алчущих жизни вечныя питателю.
Радуйся, мудрых словес насадителю.
Радуйся, умильно Божию славу воспевый.
Радуйся, сладкогласную струну Божественнаго дара приемый.
Радуйся, сладкопевче Романе, красото церковная.

Кондак 10
Спасти хотя род человеческий, верный путеводитель явился еси, дивно возглашая славу Божию. Мы же, внимая слову мудрости твоея, с веселием прославляем Господа, воспевая: Аллилуиа.

Икос 10
Царя Небеснаго, Егоже славословят Херувимы и Серафимы, житием, верою и любовию всеусерднейший служитель был еси, преподобне, яко крин благоуханный, со всеми избранниками Пречистыя Богородицы у Престола Всесвятыя Троицы предстал еси, тем радостно зовем ти:
Радуйся, благий ходатаю о нас ко Господу.
Радуйся, молитвенниче пресветлый и прелюбимый.
Радуйся, яко равноангельную красоту стяжал еси.
Радуйся, яко нищетою духовною обогатился еси.
Радуйся, яко разум свой ко Господу отверзл еси.
Радуйся, сладкопевче Романе, красото церковная.

Кондак 11
Пение умиленное приносим ти, скорому помощнику в нуждах и печалех всем, к тебе с верою и любовию притекающих. Тем же твоими песнопеньми в Церкви Божией прославляется Бог, Дивный во святых Своих, зовущих непрестанно: Аллилуиа.

Икос 11
Яко светлейший светильник и молитвенник явился еси, Романе богоблаженне. Ныне Владыце всех предстоя и дерзновение к Нему стяжав, моли о нас, совершающих светлую память твою, зовуще:
Радуйся, Богу единому послуживый.
Радуйся, вся заповеди Божия исполнивый.
Радуйся, обителей Небесных удостоивыйся.
Радуйся, горния славы приобщивыйся.
Радуйся, гласе благознаменитых словес.
Радуйся, в песнопениях богослове сладкозвучный.
Радуйся, сладкопевче Романе, красото церковная.

Кондак 12
Благодати Божия сокровища наследовал еси, Богородицу Марию богомудра имел еси Учителя, вразумляющу тя и научающу пети: Аллилуиа.

Икос 12
Поюще твое достохвальное житие на земли, радостно славим Дивнаго во святых Своих Царя Небеснаго. Того благодатию в селениих праведных ныне ликуеши, идеже зриши славу Божию нескончаемую. Мы же умильно воспеваем ти:
Радуйся, яко красоту и славу мира сего отрясл еси.
Радуйся, яко душу твою вперил еси к горнему званию.
Радуйся, яко твоих глагол вещание Вселенную исполни.
Радуйся, научаяй знанию спасительному всех.
Радуйся, златокованная трубо, славу Божию со ангелы возвещающая.
Радуйся, Богом увенчанный, в молитвах своих нас не оставляющий.
Радуйся, сладкопевче Романе, красото церковная.

Кондак 13
О, преблаженне и Богоносне отче Романе! Приими сие малое молитвенное приношение наше, и с Пресвятою Владычицею принеси молитву ко Господу Богу, да избавит нас от всякого вреда и скорби, и сподобит Своего Небеснаго Царствия, идеже вси, присно торжествующе, немолчно воспевают: Аллилуиа.
(Этот Кондак читается трижды, затем Икос 1 и Кондак 1)

Молитва преподобному Роману Сладкопевцу
О, преблаженне отче наш, Романе Сладкопевче! Призри от горния славы на нас, смиренных и немощных, твоея помощи и утешения просящих. Приникни к нам благосердием твоим и помози заповеди Гоподни непорочно сохраняти, веру православную крепко содержати, покаяние во гресех наших усердно Богу приносити.
Научи нас, уневестившихся Христу, работати Ему со страхом и радоватися с трепетом. Избави нас от печали и уныния, отжени от нас гордость и славолюбие, да воспоем славу Божию, да восхощем токмо славы небесныя.
О, святый отче, всели в нас любовь нелицемерную к ближним, послушание безропотное начальником и страх Божий в сердца наша. Даруй познати сладость отречения воли своея, верой крепкой во благое Промышление Божие о спасении человека освяти души наша. Низпосли нам благословение от Господа, да понесем благое иго Христово в долготерпении до конца дней наших, да сподобимся с мудрыми девами внити во брачный чертог Жениха своего Небеснаго и купно со Ангелами воспевати славу величия Его, Отца и Сына и Святаго Духа во веки веков. Аминь.

День памяти: Октябрь 1
Преподобный Роман, прозванный «Сладкопевцем», был по происхождению греком и родился в середине V столетия в сирийском городе Емесе. Получив образование, он стал диаконом в Воскресенском храме в городе Бейруте. При императоре Анастасии Дикоре (401-518 гг.) он переехал в Константинополь и стал клириком при патриаршем храме Святой Софии. Он усердно помогал при богослужениях, хотя не отличался ни голосом, ни слухом. Однако патриарх Евфимий любил Романа и даже приблизил его к себе за его искреннюю веру и добродетельную жизнь.
Расположение патриарха к святому Роману возбудило против него нескольких соборных клириков, которые стали его притеснять. На одном из предрождественских богослужений эти клирики вытолкнули Романа на амвон храма и заставили петь. Храм был переполнен богомольцами, служил сам патриарх в присутствии императора и придворной свиты. Смущенный и напуганный, святой Роман своим дрожащим голосом и невнятным пением всенародно осрамился.
Придя домой совершенно подавленным, святой Роман ночью долго и напряженно молился перед иконой Божией Матери, изливая свою скорбь. Богородица явилась ему, подала бумажный свиток и велела съесть его. И вот совершилось чудо: Роман получил красивый, мелодичный голос и одновременно поэтический дар. В приливе вдохновения он тут же составил свой знаменитый кондак праздника Рождества Христова: «Дева днесь Пресущественнаго раждает, и земля вертеп Неприступному приносит; Ангели с пастырьми славословят, волсви же со звездою путешествуют; нас бо ради родис я Отроча Младо, Превечный Бог».
На следующий день святой Роман пришел в храм к всенощной под Рождество Христово. Он настоял, чтобы ему разрешили снова спеть на амвоне, и на этот раз так прекрасно спел составленный им гимн «Дева днесь», что вызвал всеобщий восторг. Император и патриарх благодарили святого Романа, а люди назвали его Сладкопевцем. С тех пор святой Роман украшал богослужения своим дивным пением и вдохновенными молитвами.
Любимый всеми, святой Роман стал учителем пения в Константинополе и высоко поднял благолепие православных богослужений. За свой поэтический дар он занял почетное место среди церковных песнописцев. Ему приписывают более тысячи молитв и гимнов на различные праздники. В особенности славится акафист Благовещению Божией Матери, который поется в пятую субботу Великого поста. По его образцу составлялись прочие акафисты. Скончался преподобный Роман в 556 году.[/spoiler]

[Раб божий Константин]

Акафист новомучеником, исповедником и страстотерпцем, в земли Российстей просиявшим.
[spoiler]Кондак 1
Избраннии новомученицы и исповедницы Российстии, свидетелие Христовы, агнцы новозакланнии, кровию своею ризы Церкве нашея украсившии. Вы, прещений мучителей не убоявшеся, любовь к Богу даже до смерти явили есте и в жизни вечней к Нему дерзновение стяжали есте. Темже, предстояще престолу Вседержителя, поминайте нас, любовию вас почитающих и вопиющих:
Радуйтеся, новомученицы и исповедницы Российстии, Церкве нашея похвало и украшение.

Икос 1
Ангелов Творец и мира Зиждитель от века предъизбра вас, яко верныя свидетели Своя в земли Российстей, и в годину тяжких испытаний благодать и силу вам дарова. Вы же, веру Православную миру безбожному явивше, твердым исповеданием, изгнанием и терпением страданий Христа прославили есте. Сего ради и мы прославляем вас сице:
Радуйтеся, измлада Христа возлюбившии;
Радуйтеся, глас Пастыря Добраго послушавшии.
Радуйтеся, Царства Божия внутрь себе присно искавшии;
Радуйтеся, крест на рамо свое вземшии.
Радуйтеся, славу мира сего отринувшии;
Радуйтеся, за Христа страдания претерпевшии.
Радуйтеся, любве ради Божии смерть приемшии;
Радуйтеся, небеснаго Царствия достигшии;
Радуйтеся, новомученицы и исповедницы Российстии, Церкве нашея похвало и украшение.

Кондак 2
Видя отечество наше в бедах и скорбех сущее, святителю отче Тихоне, богоизбранный патриарше земли нашея, призывал еси верная чада Церкве Российския за Христа и веру Православную мужественне стояти. Сам же, по вся дни умирая за паству твою, исповедник непоколебимый явился еси, воспевая Богу: Аллилуиа.

Икос 2
Разумом Божественным просвещаемь, святителю отче Тихоне, Церковь Русскую мудре управил еси, и, безбожныя гонители обличая, паству твою подвиги новомучеников почитати призывал еси. Сего ради вопием тебе сице: Радуйся, первосвятителей Московских благодатный преемниче; радуйся, Земли Русския великий печальниче. Радуйся, апостольских преданий усердный хранителю; радуйся, сокровищ Православныя веры благоговейный блюстителю. Радуйся, благодать Духа Святаго в сердце присно имевый; радуйся, разделения церковная любовию врачевавый. Радуйся, заточение и поругания мужественне претерпевый; радуйся, крестный путь с паствою твоею прошедый.
Радуйтеся, новомученицы и исповедницы Российстии, Церкве нашея похвало и украшение.

Кондак 3
Силою, данною вам свыше, страстотерпцы славнии, царю Николае и царице Александро, царевичу Алексие и царевны Ольго, Татиано, Марие и Анастасие, лишение царства и славы земныя со смирением восприяли есте. Страданием же вольным даже до смерти Христу последовали есте и за убивающия вы молилися есте, вопиюще Богу: Аллилуиа.

Икос 3
Имуще веру несумненну, яко вся от Бога суть, изгнание, поругание и темничное заточение мужественне претерпели есте, царственнии страстотерпцы, и мученических венцев сподобилися есте. Сего ради вопием вам сице:
Радуйтеся, венец и похвало рода царскаго и богоизбраннаго;
Радуйтеся, преславныя отрасли корене благочестиваго.
Радуйтеся, царствия земнаго лишение со смирением приемшии;
Радуйтеся, страдании вашими Царствия Небеснаго сподобльшиися.
Радуйтеся, за враги своя усердно молившиися;
Радуйтеся, всем сердцем Бога взыскавшии.
Радуйтеся, образ исповедничества верным людем показавшии;
Радуйтеся, седмочисленнии страстотерпцы, во едином дусе Богу представшии.
Радуйтеся, новомученицы и исповедницы Российстии, Церкве нашея похвало и украшение.

Кондак 4
Бурею гонений на Церковь Русскую обдержими, святителие Божии, верою и страданьми мученическими благодать Христову стяжали есте и, корабль церковный неврежденно сохранивше, подражатели первым мучеником явилися есте. С ними же на Небесех взываете Богу победную песнь: Аллилуиа.

Икос 4
Ведуще глас евангельский, яко пастырь добрый душу свою полагает за овцы, священномученицы доблии, любве ради Христовы и паствы своея изгнания, глад, хлад, зной солнечный и работы горькия претерпели есте, смертию мученическою житие свое увенчавше. Сего ради и мы с любовию прославляем вас сице:
Радуйтеся, залог Христов добре сохранившии;
Радуйтеся, житием и смертию образ верным показавшии.
Радуйтеся, жертву безкровную благоговейне совершавшии;
Радуйтеся, самех себе в жертву живую принесшии.
Радуйтеся, Церкве Российския славо;
Радуйтеся, отечества нашего украшение.
Радуйтеся, паствы вашея ко Христу путеводителие;
Радуйтеся, догматов церковных ревностнии блюстителие.
Радуйтеся, новомученицы и исповедницы Российстии, Церкве нашея похвало и украшение.

Кондак 5
Богосветлыя звезды на небе церковнем явилися есте, священноисповедницы Российстии, и, поношения, заточения, изгнания и горькия работы претерпевше, Господа Иисуса Христа мужественне исповедали есте. Таже, благочестно в мире поживше, путь ко спасению во тьме безбожия явили есте, научающе верныя присно благодарственно пети Богу: Аллилуиа.

Икос 5
Видевше разорение земли Русския и беззаконие велие, опустошившее ю, вы, священноисповедницы славнии, страха и смерти не убоялися есте и, подвиги исповедничества благоухающе, яко крини сельнии посреде пустыни, процвели есте. Сего ради прославляем вас сице:
Радуйтеся, молитвою теплою сердца ваша в подвизе утверждавшии;
Радуйтеся, твердым исповеданием веры просиявшии.
Радуйтеся, во страданиих терпение и кротость явившии;
Радуйтеся, яко агнцы незлобивии посреде волков ходившии.
Радуйтеся, службу Божию во узах совершавшии;
Радуйтеся, соузники в терпении укреплявшии.
Радуйтеся, души ваша за паству полагавшии;
Радуйтеся, посреде гонений благодатию Божиею хранимии.
Радуйтеся, новомученицы и исповедницы Российстии, Церкве нашея похвало и украшение.

Кондак 6
Проповедует Церковь Российская подвиги ваша, преподобномученицы достославнии, поты трудов и кровию мучений землю нашу освятившии. Вы бо, слезы покаяния души ваша омывше, в жертву живую, благоприятную Господеви, себе предуготовили есте. Ныне же Ему дерзновенно предстоите и взываете победную песнь: Аллилуиа.

Икос 6
Возсия свет Христов в сердцах ваших, преподобномученицы, вы бо, яко воини добропобеднии, молитву во всеоружие приемше, веры правыя никакоже отпали есте и, узы темничныя, мучения тяжкая и работы горькия претерпевше, лютую смерть от безбожных прияли есте. Сего ради прославляем вас сице:
Радуйтеся, путь истиннаго Богопознания нам показавшии;
Радуйтеся, души ваша за Христа положившии.
Радуйтеся, язвы Господа Иисуса Христа на телесех ваших носившии;
Радуйтеся, вся тленная мира сего презревшии.
Радуйтеся, любовь Христову к мучителем явившии;
Радуйтеся, молитву за ненавидящих вас пролиявшии.
Радуйтеся, велие дерзновение ко Господу стяжавшии;
Радуйтеся, подвиги постническими и кровию вашею землю Русскую освятившии.
Радуйтеся, новомученицы и исповедницы Российстии, Церкве нашея похвало и украшение.

Кондак 7
Хотяще во дни гонений безбожных на Церковь Русскую веру твердую и любовь ко Господу сохранити, преподобноисповедницы честнии, поношения, заточения, изгнания и горькия работы, Христа ради претерпели есте. Таже, благочестно в мире поживше, многим путь ко спасению показали есте, научающе пети Богу победную песнь: Аллилуиа.

Икос 7
Новыя исповедники показа вас Господь, преподобнии отцы наша, егда прииде испытати люди Своя, вас же, блаженнии, обрете рабы бдящия, смирением и добродетельми украшенныя. Сего ради прославляем вас сице:
Радуйтеся, иго благое на рамена своя вземшии;
Радуйтеся, подвиги поста и молитвы просиявшии.
Радуйтеся, мужество и крепость в страданиих явившии;
Радуйтеся, исповеданием вашим веру запечатлевшии.
Радуйтеся, верность Христу в житии вашем сохранившии;
Радуйтеся, многия люди в вере правей наставившии.
Радуйтеся, заповедей Христовых вернии исполнителие;
Радуйтеся, подвигов новомучеников истиннии свидетелие.
Радуйтеся, новомученицы и исповедницы Российстии, Церкве нашея похвало и украшение.

Кондак 8
Странное чудо миру явисте, новомученицы Российстии, вы бо, во страдании крепость показавше, силою Христовою безбожныя одолесте и смертию вашею воскресение Христово проповедасте. Ныне же у престола Божия предстоите и воспеваете победную песнь: Аллилуиа.

Икос 8
Вся красная мира сего презревше, святии новомученицы Российстии, во след Господу крестным путем последовали есте и по заповеди евангельстей мзду многу на Небесех обрели есте. Сего ради приимите от нас похвалы сицевая:
Радуйтеся, вернии сыны Церкве Российския, безбожных гонителей не убоявшиися;
Радуйтеся, узы темничныя, труды горькия и изгнания претерпевшии.
Радуйтеся, древним мучеником в страданиих уподобившиися;
Радуйтеся, талант, врученный вам Господем, терпением преумножившии.
Радуйтеся, блаженство изгнанных правды ради верою достигшии;
Радуйтеся, кровию вашею Землю Русскую освятившии.
Радуйтеся, страдании вашими образ верным подающии;
Радуйтеся, венцы нетленныя от Христа Бога приемшии.
Радуйтеся, новомученицы и исповедницы Российстии, Церкве нашея похвало и украшение.

Кондак 9
Всяческая страдания за Христа претерпевше, исповедницы преславнии, веру Православную сохранили есте и, терпением гонители Церкве Русския посрамивше, благочестием в мире возсияли есте. Ныне же престолу Божию предстоите и воспеваете хвалебную песнь: Аллилуиа.

Икос 9
Ветии церковнии недоумевают како воспети вас по достоянию, новии исповедницы Церкве Русския, вы бо в скорбех, изгнаниих и заточениих Христа, истиннаго Бога, прославили есте и верным путь ко спасению указали есте. Мы же, прибегающе к молитвенному предстательству вашему, дерзаем ублажати вас сице:
Радуйтеся, все упование на Бога возложившии;
Радуйтеся, подвиг исповедничества в терпении совершившии.
Радуйтеся, мучителей безбожных не убоявшиися;
Радуйтеся, немощныя в вере укрепившии.
Радуйтеся, работы горькия в сладость духовную восприемшии;
Радуйтеся, сердца ваша Богу в жертву принесшии.
Радуйтеся, страданием души ваша очистившии;
Радуйтеся, житием святым образ верным показавшии.
Радуйтеся, новомученицы и исповедницы Российстии, Церкве нашея похвало и украшение.

Кондак 10
Спасти хотя Господь множество жен и дев, во обители иноческия тыя призва. Во дни же гонений безбожных мужескую крепость им дарова, еже за имя Свое пострадати и терпением многим Царствия Небеснаго достигнути, да, яко мудрыя девы, в чертозе брачнем Христу Жениху воспевают песнь: Аллилуиа.

Икос 10
Стена и помощь благонадежная бысть Богородица вам, святыя преподобныя жены, мученицы и исповедницы, в скорбех, изгнаниих и узах пребывающим. Вы бо любовию и труды людем страждущим, яко Самому Сыну Ея, послужисте. Темже с благодарением вас ублажаем:
Радуйтеся, преподобномученицы, яко агницы непорочныя, за Христа закланныя;
Радуйтеся, преподобноисповедницы, яко голубицы чистыя, сетей врага избавльшыяся.
Радуйтеся, житейская попечения во иночестве отринувшыя;
Радуйтеся, во страданиих Христу, яко мироносицы, последовавшыя.
Радуйтеся, гонений жестоких и смерти лютыя не убоявшыяся;
Радуйтеся, в мучениих благодатию Божиею укрепляемыя.
Радуйтеся, евангельски, яко Мария, благую часть избравшыя;
Радуйтеся, яко Марфа Христу, ближним послужившыя.
Радуйтеся, новомученицы и исповедницы Российстии, Церкве нашея похвало и украшение.

Кондак 11
Пение всеумиленное приносим вам, новомученицы и исповедницы Российския, вы бо, благочестно в законе Господни пожившя, веру Православную сохранили есте и смертию мученическою и терпением страданий за Христа гонители Церкве Русския посрамили есте. Ныне же, во Царствии Небеснем ликующя, воспеваете Богу победную песнь: Аллилуиа.

Икос 11
Светом евангельским просвещенныя и заповеди Господни сохраньшыя, святыя жены и девы, добродетельное житие во дни гонений лютых страданием вольным увенчали есте и воистинну новыя мученицы и исповедницы явилися есте. Сего ради воспеваем вас сице:
Радуйтеся, мученицы, любовию ко Христу страх смерти превозмогшыя;
Радуйтеся, исповедницы, в страданиих за Христа веру и надежду соблюдшыя.
Радуйтеся, подвиги вашими Ангелы возве¬селившыя;
Радуйтеся, немощь естества женскаго словом Божиим препобедившыя.
Радуйтеся, Христовы заповеди житием и смертию исполнившыя;
Радуйтеся, мудрости евангельских дев подражавшыя.
Радуйтеся, мужем своим в гонениих последовавшыя;
Радуйтеся, ныне купно с ними венцы Небесными увенчанныя.
Радуйтеся, новомученицы и исповедницы Российстии, Церкве нашея похвало и украшение.

Кондак 12
Благодатное утверждение Церкве нашея имамы вас, новомученицы и исповедницы Российстии. Вы бо, сердцем верующе в правду, усты же Господа Иисуса Христа во спасение исповедавше, заточения, изгнания, горькия работы и смерть претерпели есте. Ныне же молитеся ко Господу о нас, земных сродницех ваших, да присно с вами поем Богу: Аллилуиа.

Икос 12
Поюще вашу небесную славу, страстотерпцы Христовы, лобызаем язвы ваша, вы бо, стопам древних мученик последующе, не уклонистеся скорби, ни убоястеся темницы, горькими работы, гладом и хладом изморени бысте и, многовидными муками умерщвляеми, яко агнцы незлобивии, веры ради пострадасте и смерть приясте. Темже приимите от нас похвалы сицевыя:
Радуйтеся, святителие Христови, добре Церковь управившии;
Радуйтеся, иереи Божии, души за паству полагавшии.
Радуйтеся, царственнии страстотерпцы, от богоборных властей смерть и поругание приемшии;
Радуйтеся, благовернии князие и княгини, благочестие даже до смерти соблюдшии.
Радуйтеся, преподобнии мужие, праведное житие венцем страдания увенчавшии;
Радуйтеся, преподобныя жены, крепость и мужество в страданиих явившыя.
Радуйтеся, вси православнии христианы, за пределами отечества многоразличне пострадавшии;
Радуйтеся, вси ведомии и неведомии, Богом увенчаннии людие.
Радуйтеся, новомученицы и исповедницы Российстии, Церкве нашея похвало и украшение.

Кондак 13
О, преславнии новомученицы и исповедницы Российстии! Приимите малое сие моление наше, в похвалу вам ныне приносимое, и молитеся ко Христу Богу, да укрепит в людех дух братолюбия и благочестия, да утвердит во Отечестве нашем веру Православную и сподобит нас купно с вами воспевати Ему: Аллилуиа.
Трижды. Таже Икос 1 и Кондак 1.

Молитва
О, святии новомученицы и исповедницы Российстии:/ святителие и пастырие Церкве Христовы,/ царственнии страстотерпцы,/ благовернии князие и княгини,/ доблии воини, монаси и мирстии,/ благочестивии мужие и жены,/ во всяцем возрасте и сословии за Христа пострадавшии,/ верность Ему даже до смерти свидетельствовавшии/ и венец жизни от Него приемшии!
Вы во дни гонения лютаго,/ землю нашу от безбожных постигшаго,/ на судищах, в заточениих и пропастех земных,/ в горьких работах и всяких скорбных обстояниих/ образ терпения и непостыднаго упования мужественне явили есте./ Ныне же, в раи сладости наслаждающеся,/ пред Престолом Божиим во славе предстоите/ и присно хвалу и ходатайство со Ангелы и всеми святыми Триединому Богу возносите.
Сего ради мы, недостойнии,/ молим вас, святии сродницы наши:/ не забудите земнаго отечества вашего,/ грехом Каинова братоубийства,/ поруганием святынь, безбожием и нашими беззаконии отягченнаго./ Умолите Господа Сил,/ да утвердит Церковь Свою непоколебиму в мире сем многомятежнем и лукавом;/ да возродит в Земли нашей дух братолюбия и мира;/ да паки будем мы царское священие,/ род Божий, избранный и святый,/ присно с вами славящий Отца и Сына и Святаго Духа во веки веков. Аминь.[/spoiler]

[Раб божий Константин]

Господь Саваоф



Благословен еси, Господи, Боже Отче Саваофе. Яко единаго Сына Твоего и Святаго Духа низпослал еси нам. И тем, просвятив вселенную, спас еси нас, Человеколюбче, слава Тебе.
[spoiler]Бог сотворил весь мир из ничего, одним Своим словом. Он все может сделать, что пожелает.

Бог - высочайшее существо. Ему нет равного никого и нигде, ни на земле, ни на небе.

Мы, люди, своим разумом вполне постичь Его не можем. И сами ничего нем огли бы узнать о Нем, если бы Сам Бог не открыл нам о Себе. Что мы знаем о Боге, все открыто нам Им Самим.

Когда Бог сотворил первых людей - Адама и Еву, то являлся им в раю и открывал им о Себе: как Он сотворил мир, как нужно веровать в Единого истинного Бога и как исполнять волю Его.

Это учение Божие сначала передавалось устно из рода в род, а потом, по внушению Божию, было записано Моисеем и другими пророками в священные книги.

Наконец, Сам Сын Божий, Иисус Христос, явился на земле и дополнил все, что нужно знать людям о Боге. Он открыл людям великую тайну, что Бог один, но троичен в Лицах.Первое Лицо - Бог Отец, второе Лицо - Бог Сын, третье Лицо - Бог Дух Святой.

Это не три Бога, а один Бог в трех Лицах, Троица Единосущная и Нераздельная.

Все три Лица имеют одинаковое Божеское достоинство, нет между ними ни старшего, ни младшего; как Бог Отец есть истинный Бог, так и Бог Сын есть истинный Бог, так и Дух Святой есть истинный Бог.

Различаются Они только тем, что Бог Отец ни от кого не рождается и не исходит; Сын Божий рождается от Бога Отца, а Дух Святой исходит от Бога Отца

Иисус Христос через раскрытие тайны Пресвятой Троицы научил нас не только истинно поклоняться Богу, но и любить Бога, так как все три Лица Пресвятой Троицы - Отец, Сын и Святой Дух - вечно пребывают друг с другом в непрерывной любви и составляют Собою одно Существо. Бог есть всесовершеннейшая Любовь.

Великую тайну, которую открыл нам Бог о Себе - тайну Святой Троицы, наш слабый ум не может вместить, понять.



(Из книги «Закон Божий», руководство для семьи и школы.

Издательство Украинской Православной Церкви - 2000 г.)





Акафист Богу Отцу Господу Саваофу



Кондак 1

Взбранный Воевода небесных и Огненных Сил, Господи Боже Саваофе, яко созданный Тобою аз, раб Твой, духовныя пения восписую Тебе, сый неисчерпаемый источник благости, от всяких бед свободи мя, зовуще: Господи Боже, Отче Саваофе, помилуй мя.

Икос 1

Архангелов и Ангелов начало, Властей, Престолов, Господствий, Сил Небесных, Херувимов и Серафимов и всего мира Творче, Судия и Господи отверзи ми, яко же Моисею недоуменный ум и язык на славословие чудного Твоего имени, да вопию Ти таковая: Господи Боже, Адонай Елой Великий и Чудный. Господи Боже, Альфа Всесовершенный. Господи Боже, Омега при сущый. Господи Боже, Боже духов. Господи Боже, святый Творче миров. Господи Боже, крепкий Царю Царей. Господи Боже, Безсмертный, победителю ада и смерти. Господи Боже, Силою Всеобладающий. Господи Боже, Отче Саваофе, помилуй мя.

Кондак 2

Видя, Господи Боже Отче, триипостасное Божество Твое в Сыне рождаемое, в Животворящем Духе, от Тебя исходящем с верою, надеждою и любовию Тебе, Отцу и Сыну и Святому Духу пою: Аллилуиа.

Икос 2

Разум, дарованный ми Тобою, Господи, на похвалу Пречистого имени Твоего посвящаю и во умилении сердца вопию: Господи, да святится имя Твое! Господи, да приидет Царствие Твое. Господи, да будет воля Твоя во мне грешном. Господи, хлеб наш насущный даждь мне днесь. Господи, остави ми долги моя вся. Господи, избави мя от лукавого. Господи, прежде даже до конца не погибну, спаси мя. Господи, сохрани мя от телесного ада. Господи, сподоби мя пресветлого рая. Господи, научи мя творити волю Твою. Господи Боже, Отче Саваофе, помилуй мя.

Кондак 3

Силою свыше Моисея и Аарона облекий, Господи, не посрамление гордого фараона, облецы и мя во всеоружие Твоя сопротивления козням диавольским, поправ злохитрое их коварство, с благодарным сердцем и умиленною душею вопию Тебе во веки: Аллилуиа.

Икос 3

Имея, Господи, богатство благости неизследимое, Адама призвал еси в рай из небытия, Аавраама в Ханааю, Моисея из купины, призови убо и меня к созерцанию Существа Твоего. Да, видя Тя разумно, воспою Ти тако: Господи Боже, Чудный в существе. Господи Боже, Дивный в совете. Господи Боже, Таинственный в промысле. Господи Боже, Всесильный во создании. Господи Боже, Премудрый во управлении. Господи Боже, Праведный в суде. Господи Боже, Всещедрый во мзде. Господи Боже, Животворящий во славе. Господи Боже, Всевидящий душе. Господи Боже, одухотворяй ангелов. Господи Боже, одушевляй человеков. Господи Боже, Отче Саваофе, помилуй мя.

Кондак 4

Бурю сатанинской войны на погибель ему устрояй, низвержен бо бысть с небеси и из ангелов света стал темным бесом. Аз есмь земля, сый и пепел, малым, сый удаленный от Ангелов дерзаю воспевати Тебе, Творцу моему: Аллилуиа.

Икос 4

Слышаша и видеша Ангельский чин победу Твою над диаволом на небеси, воспеша песнь: Аллилуиа. Яко воцарися Господь Вседержитель, азмь же на земли долу вопию Ти тако: Господи, да слышны будут чудеса Твоя во всем. Господи, побори всех врагов борящих на ны. Господи, победи все стрелы лукавого. Господи, победи мысленного диавола. Господи, покори гордого Аммана. Господи, порази Малика лукавого. Господи, потопи древнего фараона. Господи, спаси мя, яко же Моисея и Аарона. Господи Боже, Отче Саваофе, помилуй мя.

Кондак 5

Боготечною рекою благости, излияна в струях Божественной крови Единородного Сына Твоего, обновивый мир, обнови и во утробе моей дух правый, сердце чисто созижди во мне, и мысль благую подаждь ми. Да со духи и души праведными пою Богу моему: Аллилуиа.

Икос 5

Яко видя пророк Исая на Престоле превознесенно Тя Бога, азмъ окаянный имамы к Тебе вопити таковая: Господи Боже, Всевышний, услыши мой вопль. Господи Боже, Всеблагий, очисти сердце мое. Господи Боже, Всемогущий, просвети мысль мою. Господи Боже, Превечный, от века в вечность призови мя. Господи Боже, Пресовершенный, усоверши мя. Господи Боже, Самодержавный, управи мя. Господи Боже, Благославенный, благослови мы. Господи Боже, Праведнейший, оправдай мя. Господи Боже, Отче Саваофе, помилуй мя.

Кондак 6

Пророков речение предвозвездеших нам, Господи, тайну Воплощения Единородного Сына Твоего и излияние Святого Духа на верных, сбытие зряще удивляются и благовейно почитая непостежимое смотрение Твое, вопием: Аллилуиа.

Икос 6

Возсия, Господи, свет благословления Твоего во тьме неверия идолослужений и озарив сердца неверующих лучем Евангельского Благовестия, того ради праведных от тьмы к свету, от идолослужения к Богопознанию вопию Ти тако: Господи Боже, творяй Ангелы Своя духом. Господи Боже, Архангелом даяй крепость. Господи Боже, умудряяй Херувимов. Господи Боже, воспламеняяй Серафимов. Господи Боже, научай пророков. Господи Боже, освящаяй Апостолов. Господи Боже, Судия Властей. Господи Боже, Отче Саваофе, помилуй мя.

Кондак 7

Хотяй спастися и в разум истино прийти, дал еси доброго пастыря Единородного Сына Твоего Иисуса Христа иже положи душу Свою за овцы, тем же спаси люди Твоя, Господи, и благослови достояние Твое. Да вкупе еси, едиными усты и единым сердцем поем Тебе: Аллилуиа.

Икос 7

Дивны суть дела твоя, Господи, и непреступен свет лица Твоего нам грешным, обаче напоследок веков благоволил еси явити нам преблаженный зрак лица Твоего в подобие Богочеловека. Сего ради со страхом зову Ти тако: Господи Боже, пошли нам свет Твой для веры. Господи Боже, открой нам истину для надежды. Господи Боже, подай нам огонь Твой для любви. Господи Боже, вдохни дух Твой для проречения. Господи Боже, даруй премудрость для Благовестия. Господи Боже, умножи крепость на одоление невидимых врагов. Господи Боже, сотри их, яко прах пред лицем ветра. Господи Боже, освяти видения добра и зла. Господи Боже, Отче Саваофе, помилуй мя.

Кондак 8

Страшно есть впасть в руце гнева Твоего, Господи, сего ради яко пророк Давид припадаю к Тебе, Источнику света и жизни Подателю, и умиленно вопию Ти: Помилуй мя, Боже, по велицей милости Твоей и сопричти мя избранному Твоему стаду, да водвори в селения Твоих обителей; ныне вопию Тебе, Спасу мира: Аллилуиа.

Икос 8

Весь еси желание, весь еси сладость, живот и блаженство наше, Господи. Сего ради недостойный азъ погружаюсь в бездне Твоея благости и вопию Ти из глубины души: Господи Боже, не лиши меня небесных благ Твоих. Господи Боже, избави мя от вечныя муки. Господи Боже, сохрани мя от козней диавольских. Господи Боже, отврати от меня беды и напасти. Господи Боже, спаси мя от сетей вражиих. Господи Боже, избави мя от скорбей и болезней. Господи Боже, укрепи мя в нужде и печали. Господи Боже, не допусти мя до отчаяния. Господи Боже, избави мя от ожесточения. Господи Боже, покрый мя от всякого зла. Господи Боже, подаждь ми конец благий. Господи Боже, Отче Саваофе, помилуй мя.

Кондак 9

Вся небесная Ангельская Воинства непрестанными гласы взывают: Свят, Свят, Свят Господь Саваоф исполнь небо и земля славы Твоея; подражая оным, яко же и мы бренными усты на земли немолчными песнями вопием Ему: Аллилуиа.

Икос 9

Явиши древле в Вавилоне отроцы ввержены в пещь. По указанию нечестивого царя Навуходоносора брошены бо в пещи быша, воспеши Богу песнь глаголаши: Благословен еси, Господи, с ними же и мы купно, многогрешные, вопием Ти: Господи Боже, благословен Ты, яко усыновил мя еси. Господи Боже, благословен Ты, яко врата райские отверзл еси. Господи Боже, благословен Ты еси, светом Евангельским озарил мя еси. Господи Боже, благословен Ты еси, яко на путь спасения наставил мя еси. Господи Боже, Отче Саваофе, помилуй мя.

Кондак 10

Спасти хотяй заблудившегося человека, послал еси Боже Отче Единородного Сына Твоего, восприяше на себе плоть человеческую и крестную смерть, загладише проклятие, произнесенное Тобою на род человеческий: того ради поклоняющиеся Тебе вкупе со Единородным Твоим Сыном и Животворящим Духом поют: Аллилуиа.

Икос 10

Царю небесный, Боже Отче Саваофе, вся словом и Духом Твоим исполняя, Сокровище благих и жизни Подателю, призри с небеси от Святого жилища Твоего оком милосердия на чада Твоя, приносящие Тебе хвалы таковая: Господи Боже, Ты еси Зиждитель Премудрейший. Господи Боже, Ты еси Повелитель Самодержавнейший. Господи Боже, Ты еси Спаситель Сладчайший. Господи Боже, Ты еси утешитель Желаннейший. Господи Боже, Ты еси Царь царей Правосуднейший. Господи Боже, Ты еси Судия судей Страшнейший. Господи Боже, Ты еси Отец отцов Всемилостивейший. Господи Боже, Ты еси Духа Святого Ниспослателю. Господи Боже, Отче Саваофе, помилуй мя.

Кондак 11

Пение наше не довлеет Ти, Господи Творче всяких! Яко вся ничтоже суть перед Тобою! Тем же, яко создание Твое, Боголюбную песнь воспеваем: Аллилуиа.

Икос 11

Света Подателю и веков Творче, Господи, от высоты Твоего Боговеления наставил еси, да яко же многоочитии Херувими и шестокрылатии Серафими, предстоящие Великолепному Престолу Твоему, непрестанно славословив, восхваляют Тя и азъ, недостойный, благодарные пения приношу Ти таковая: Господи Боже, дивный источниче Духа. Господи Боже, Всещедрый подателю жизни. Господи Боже, Всеблагий подателю благодати. Господи Боже, непостижимый по Божеству. Господи Боже, слышащий по Духу. Господи Боже, вся освещаяй Духом. Господи Боже, Отче Саваофе, помилуй мя.

Кондак 12

Боже духов и всякия плоти, Тебе поклоняется и перед Тобою трепещет всякое колено небесных, земных и преисподних! И всяк язык исповедует, яко Ты еси Бог Богов и Господь Господей; того ради поклоняющиеся Тебе со страхом и трепетом, яко Богу и Творцу моему, пою Ти: Аллилуиа.

Икос 12

Поюще Твое бытие, величие, честь и славу, видя Апостол, восхищенный до третьего Небеси, рече во удивлении: О, глубино богатства, премудрости и разума Божия! С великой преданностью перед Тобою благоговею, падши долу молю Тя: Господи Боже, Отче мой, усынови мя Возлюбленным Сыном Твоим. Господи Боже, Отче мой, усоверши мя Животворящим Духом Твоим. Господи Боже, Отче мой, огради мя Пресветлыми Ангелами Твоими. Господи Боже, Отче мой, защити мя молитвами святых Твоих угодников. Господи Боже, Отче мой, сотвори со мною по милости Твоей, ниже со беззаконием моим. Господи Боже, Отче мой, азъ же, яко человек согреших, Ты же, яко Бог щедр и долготерпелив, помилуй мя, видя немощь души моея. Господи Боже, Отче Саваофе, помилуй мя.

Кондак 13

О, Всеблагий Всещедрый Боже Отче Саваофе, приими наше малое моление, яко приял еси смиренную жертву Авелеву, и сопричти мя в Сыне благодати и наследника Царствия Твоего Небесного соделай да со святыми Твоими вкупе и со Святым Духом вопию Ти: Аллилуиа, Аллилуиа, Аллилуиа.



(Этот кондак читается трижды, затем икос 1 и кондак 1)



Молитва Богу Отцу Господу Саваофу

О, Всемогущий Державный Царю! Воссидяй на облацех, почивая в Вышних, иже есть Благословен на тверди небесной. Свят, Свят, Свят Господь Саваоф исполнь небо и земля славы Твоея! Осанна в Вышних! Исполни, Боже Вседержителю, сие наше смиренное моление и прошение раб твоих ( имя рекл ), да будут ушеса Твоя внемлюще гласу молений наших, святый Господи! Милостиво призри и услыши нас, рабов Твоих ( имя рекл) от земли на небо вопиющих Тебе: спаси, сохрани и помилуй нас, избави от всяких бед и напастей и всякого зла, защити Духом Святым во дни и нощи и на всякий час подаждь ми победы и всем, Тебе молящимся, силу Твою Божественную, Благодать чудодейственную, силу и крепость исполненную. Силою Честного и Животворящаго Креста Господня победи всех врагов наших видимых же и невидимых, сотвори их, яко овцы, и развей их, яко прах пред лицем ветра, да познают имя Твое, Господи да постыдятся во веки, яко Ты еси Вышний по всей земли и несть студа уповающим на Тя во веки веков. Аминь.[/spoiler]

[Раб божий Константин]

Преподобный Савва Вишерский, чудотворец
(память 1 октября по старому стилю).
[spoiler]Акафист святому преподобному Савве Вишерскому, чудотворцу

Кондак 1
Избранный и дивный отче Савво, просвещенный от трисияннаго света, ты нас омраченных греховными страстьми просвети и твоими молитвами от всех бед избави, да зовем тебе: Радуйся, Савво, новгородский чудотворче.



Икос 1
Ангельския чины возрадовашася твоим подвигом, ими же в пустыни упражнялся еси в посте и молитвах; и ныне мы, почитая тя собеседника ангелов, сицевая вопием тебе:

Радуйся, небесный жителю;

Радуйся, страстей разрушителю.

Радуйся, воздержание явивый;

Радуйся, вишерскую пустыню просветивый.

Радуйся, на спасение учителю;

Радуйся, безмолвия рачителю.

Радуйся, скорый помощниче;

Радуйся, на путь правый наставляяй.

Радуйся, Царствие Небесное возвещаяй;

Радуйся, унывающих утешение.

Радуйся, грешных исправление;

Радуйся, Савво, новгородский чудотворче.


Кондак 2
Видящи народ странный и чудный жития твоего образ, преподобне отче Савво, вельми удивися; темже и мы, размышляя твоя подвиги, поем Богу: Аллилуиа.


Икос 2
Разуму податися нам Божественному помолися, преподобне Савво; ты бо, Божественным сияющи светом, со ангелы водворяющийся, приими радостно похвалы тебе приносящих:

Радуйся, добродетельми пресиявый;

Радуйся, благодать стяжавый.

Радуйся, чистоты хранителю;

Радуйся, безмолвия любителю.

Радуйся, Божиих дарований исполнение;

Радуйся, в человеках чудное удивление.

Радуйся, Троичнаго света зрителю;

Радуйся, бесов устрашителю.

Радуйся, к подвигам проповедниче;

Радуйся, небесный исповедниче.

Радуйся, яко печали отгоняеши;

Радуйся, яко помощь подаваеши.

Радуйся, Савво, новгородский чудотворче.


Кондак 3
Сила Вышняго осени тя, преподобне Савво, и показа селение и жилище Святаго Духа, Его же и мы почитающе, поем Богу: Аллилуиа.


Икос 3
Имуще тя велика, отче, заступника и скораго в напастех помощника, твою святую память торжествующе, сия тебе вопием:

Радуйся, скорбящих утешение;

Радуйся, Святаго Духа селение.

Радуйся, Святыя Троицы служителю;

Радуйся, унывающих посетителю.

Радуйся, бесовския силы прогнание;

Радуйся, болящих здравие и врачевание.

Радуйся, столпе веры утвержденный;

Радуйся, учителю совершенный.

Радуйся, к спасению предводителю;

Радуйся, бедствующих защитителю.

Радуйся, добродетель укрепивый;

Радуйся, богатство ни во чтоже вменивый.

Радуйся, Савво, новгородский чудотворче.


Кондак 4
Бурю страстей многомятежнаго мира возненавидевый, отче преподобный Савво, устранился еси сует, ныне же Богу предстоиши с небесными силами и поеши купно с ними: Аллилуиа.


Икос 4
Светозарную лучу имуще тя вернии, богоносный отче Савво, просвети и вразуми наша сердца, мы же вопием тебе сице:

Радуйся, Новуграду украшение;

Радуйся, Вишерския пустыни озарение.

Радуйся, христианская красото;

Радуйся, российская доброто.

Радуйся, благодатию озаряющий;

Радуйся, чудесами просвещающий.

Радуйся, исцеления источниче;

Радуйся, бедствующих помощниче.

Радуйся, в болезнех врачу и целителю;

Радуйся, скорый послушателю.

Радуйся, учением мир просвещающий;

Радуйся, славу Божию умножающий.

Радуйся, Савво, новгородский чудотворче.


Кондак 5
Боготечную зарю увидевше тя, отче, в пустыни, людие яко учителя светоносна придержашася тебе и о сем воспеша Богу: Аллилуиа.


Икос 5
Видя твое житие, народ великаго Новаграда, Савво преподобне, нача благоговейно тебе почитати, и мы тебе вопием:

Радуйся, в севере сияющий;

Радуйся, чудесами просвещающий.

Радуйся, наставниче великий спасения;

Радуйся, послушателю евангельскаго учения.

Радуйся, иго Христово восприявый;

Радуйся, добродетелями возсиявый.

Радуйся, неусыпный предстателю;

Радуйся, о всех верных ходатаю.

Радуйся, вещателю сладкословесный;

Радуйся, изъявляющий таинства небесная.

Радуйся, христианское похваление;

Радуйся, противных побеждение.

Радуйся, Савво, новгородский чудотворче.


Кондак 6
Проповеди евангельския Творца, яже не пещися яже в мире, послушавый, преподобный отче Савво, и нам от Христа получити безстрастие умоли, вопиющим Богу: Аллилуиа.


Икос 6
Возсиял еси от тферския страны, преподобный отче Савво, и освятил еси новоградския пустыни, избави нас от вражиих наветов, вопиющих сице:

Радуйся, крест твой носивый;

Радуйся, духи лукавствия покоривый.

Радуйся, славы вечныя ходатаю;

Радуйся, спасительных благ подателю.

Радуйся, почитаемый на земли;

Радуйся, увенчанный на небеси.

Радуйся, страстей избавляющий;

Радуйся, уз греховных свобождающий.

Радуйся, яко мзда твоя вечная;

Радуйся, яко радость твоя безконечная.

Радуйся, венец небесный получивший;

Радуйся, Савво, новгородский чудотворче.


Кондак 7
Изшедшу архиепископу Иоанну в пустыню, еже видети тебе, преподобне Савво, познав тя, отче, дивно Богу работающа, возгласи: Аллилуиа.


Икос 7
Новый воистинну подвижник на страсти явился еси, преподобный отче Савво; кто изочтет твои постническия подвиги; мы же, почитающе тебе, вопием:

Радуйся, постом страсти покоривый;

Радуйся, тмы князя победивый.

Радуйся, всякое желание увядил еси;

Радуйся, яко безстрастен явился еси.

Радуйся, подвигов совершение;

Радуйся, пустыни украшение.

Радуйся, постников славо;

Радуйся, воздержания зерцало.

Радуйся, всякую добродетель изобразивый;

Радуйся, иго Христово возлюбивый.

Радуйся, истинную веру утверждающий;

Радуйся, в невечернем дни пребывающий.

Радуйся, Савво, новгородский чудотворче.


Кондак 8
Странное твое житие бысть, преподобный отче Савво, ты, на небо показуя путь, на высоту столпа возшел еси и учил мудрствовати горняя, а не дольная, ныне же в вышнем селении поеши Богу: Аллилуиа.


Икос 8
Весь был еси в вышних и горе оком твоея души взирал еси непрестанно, и ныне заступаеши всех вопиющих сицевая:

Радуйся, великий пустынножителю;

Радуйся, пророкам ревнителю.

Радуйся, стопам Христовым подражавый;

Радуйся, в пустыни пресиявый.

Радуйся, совершенства учителю;

Радуйся, врагов прогонителю.

Радуйся, Христу угодивый;

Радуйся, равноангельно поживый.

Радуйся, яко благодати всем просиши;

Радуйся, яко молитвы о всех приносиши.

Радуйся, яко всякую добродетель изобразил еси;

Радуйся, яко равноангельскую честь получил еси.

Радуйся, Савво, новгородский чудотворче.


Кондак 9
Всякое естество удивися тебе, преподобный отче Савво; мира бо красная от сердца возненавидевый и единаго Бога возлюбивый, явился еси яко ангел, поя Богу: Аллилуиа.


Икос 9
Витийстии языцы восхвалити тя по достоянию не могут, отче богомудре Савво, ты бо от юности Богу приближился еси, мы же сицевая вопием тебе:

Радуйся, благочестия утверждение;

Радуйся, крепкое заступление.

Радуйся, недугов тму отгоняяй;

Радуйся, на путь правый наставляяй.

Радуйся, яко к Божию хотению управляеши;

Радуйся, благодеяния всем подаваяй.

Радуйся, моления Вышнему приносяй;

Радуйся, о всех страждущих просяй.

Радуйся, падших грехами возстание;

Радуйся, отчаянных воззвание.

Радуйся, пустынножителей удобрение;

Радуйся, монашествующих укрепление.

Радуйся, Савво, новгородский чудотворче.


Кондак 10
Спастися хотяще, вернии от напастей различных, отче преподобный Савво, тя предстателя поставляют, ты бо ко спасению наставляеши вопиющих Богу: Аллилуиа.


Икос 10
Стену тя, заступника и молитвенника тепла обретше, преподобне отче Савво, тебе же присному сущу молитвеннику сицевая приносим пения:

Радуйся, в бедах сущим посетителю;

Радуйся, Божиих повелений исполнителю.

Радуйся, яко молитвою врагов изнурил еси;

Радуйся, яко пути Господня сохранил еси.

Радуйся, страсти умертвивый;

Радуйся, равноангельскую чистоту сохранивый.

Радуйся, от юности мира отрекийся;

Радуйся, безплотным подобен явивыйся.

Радуйся, яко крест на раме понесл еси;

Радуйся, яко небесную радость приял еси.

Радуйся, российский светильниче;

Радуйся, крепкий наш защитниче.

Радуйся, Савво, новгородский чудотворче.


Кондак 11
Пение по достоянию воздати тебе несть возможно, преподобный отче Савво, ты бо Божественную благодать нам ходатайствуеши и Богу со ангелы поеши: Аллилуиа.


Икос 11
Светоприемный светильниче и великий угодниче Савво, ты, многими добродетелями сияющь, вшел еси в небесная святая и предстал еси ко Господу, идеже и нас поминай, вопиющих тебе сице:

Радуйся, яко Божественный закон соблюл еси;

Радуйся, яко Богу посвятился еси.

Радуйся, приятый в горняя селения;

Радуйся, наслаждающийся небеснаго веселия.

Радуйся, Христианы утверждающий;

Радуйся, от врагов освобождающий.

Радуйся, яко безплотен поживый;

Радуйся, яко безплотным причтен еси.

Радуйся, благодати нам ходатаю;

Радуйся, благодеяний подателю.

Радуйся, яко врагов наших посрамляеши;

Радуйся, яко наветы их разрушаеши.

Радуйся, Савво, новгородский чудотворче.


Кондак 12
Благодать, данную тебе, преподобне отче Савво, и подвиги твоя изрещи не можем, в пустыни бо нестяжательно живший, сего ради на небесех радуешися и поеши песнь: Аллилуиа.


Икос 12
Поем доблественныя подвиги твоя, ублажаем достохвальную кончину, почитаем священную память твою, преподобне отче Савво, и похвальная сице вопием:

Радуйся, в чертог небесный введенный;

Радуйся, в число святых учиненный.

Радуйся, православным поборниче;

Радуйся, Христианом помощниче.

Радуйся, вражды разрушителю;

Радуйся, врагов истребителю.

Радуйся, верным мир и утверждение;

Радуйся, скорое от врагов освобождение.

Радуйся, злобы земныя губителю;

Радуйся, отчаянных посетителю.

Радуйся, в сожительство чинов небесных учиненный;

Радуйся, от святых ликов в чертог введенный.

Радуйся, Савво, новгородский чудотворче.


Кондак 13
О всехвальный и предивный угодниче Христов, Савво преподобный, молимся и вопием тебе всеусердно: приими малое сие от нас моление, умоли милостиваго Бога, да избавит нас от всяких бед и будущих измет мук, вопиющих: Аллилуиа.
(Этот кондак читается трижды, затем икос 1 и кондак 1)


Молитвы преподобному Савве Вишерскому, чудотворцу


Молитва первая
О великий угодниче, преславный чудотворче и обители сея богодухновенный наставниче, Савво всеблаженне, душею на небеси Престолу всех Царя предстоящий, телом же во святей обители сей почивающий, и различная чудеса повсюду молитвами твоими совершаяй, призри милостивно на предстоящия и твоего ко Господу Богу ходатайства во обдержащих нуждах люди просящия: вси бо мы, по множеству грехов наших, не точию смеем принести когда молебный глас, но ниже возвести очес своих на небо; ты же, яко стяжавый дерзновение, принеси за всех, к честней раце твоей притекающих, теплыя молитвы к Господу, еже избавитися нам от глада, потопа, труса, огня, меча и брани, от людей и от диавола бывающия, и от всякия душевныя и телесныя болезни; да избавившеся сих и работая Господу, Ему же предстоиши, внидем в некончаемый покой и прославим тамо с тобою всех благих подателя Бога, всегда, ныне и присно, и во веки веков, аминь.


Молитва вторая
О преизящный и великий угодниче Господень Савво, похваляем твоя славная чудотворения, прославляем житие твое святое; никтоже возможет изчести терпение и подвиги твои святыя; ты бо отечество и род оставил еси, в пустыню достиг и, ученики собрав, составил обитель, воздвигнув столп, и на нем подвизался еси, сохраняя стадо твое словесное; иже неправедно иногда нашедших разбойнически на обитель твою увидел еси и токмо жеpла ударением устрашил еси, и ныне устраши, отче преподобный, всех врагов, возстающих на нас; умоли милостиваго Бога, да отпустит нам прегрешения наша и сподобит нас купно радости вечныя наслаждатися со всеми святыми, ныне и присно, и во веки веков, аминь.


Тропарь преподобному Савве Вишерскому, Новгородскому
Тропарь, глас 4
От юности твоея весь Богу поработился еси, блаженне, и Того ради любве отечество и род оставил еси, в пустыню вселився и в ней жестокое житие показав, чудес дарования от Господа приял еси, Савво преподобне, моли Христа Бога спастися душам нашим.

Преподобный Савва происходил из Тверского княжества, из города Кашина и был вторым из восьми сыновей Кашинского боярина Ивана Васильевича Борозды, из рода славного и всеми уважаемого. С юных лет Савва отличался добродетельной жизнью, подражал иноческим подвигам и, приняв постриг в одном из тверских монастырей, безропотно нес различные монастырские послушания. Он отличался необыкновенным смирением и вызывал глубокое почтение и у мирских жителей, и у монахов. Монахи почитали его за ангела и избрали игуменом. Но Савву тяготила слава человеческая, и он, покинув родные места, долгое время жил в совершенной безвестности, а позже, ревнуя о высших подвигах, отправился на Афон.
По возвращении с Афона, под видом бедного неизвестного странника, он пришел на реку Вишеру, руководимый Богом, водрузил крест и, устроив небольшой шалаш, стал проводить отшельническую жизнь. Однажды проходивший мимо житель Новгорода увидел преподобного погрузившимся в глубокую молитву и как бы не чувствующим, что все лицо его было покрыто комарами, так что его совсем не было видно. Изумленный прохожий поведал другим о случившемся, и все поняли, что отшельник — истинно Божий человек. Но Савва удалился в еще более уединенное место, продолжая упражняться в посте и молитве, проводя жизнь, исполненную лишений. Молва же о святой жизни преподобного распространилась по окрестностям, и соседние жители стали приходить к нему и доставлять посильные приношения. Слух о святом угоднике Божием дошел до архиепископа Иоанна, бывшего тогда на Новгородской кафедре, и он послал разузнать о преподобном Савве, кто и каков он, а по получении ответа, уразумев в Савве человека духовного, сам отправился на встречу с ним. Смирение и нестяжательность Саввы покорили святителя, и он полюбил блаженного и оказывал ему помощь всем необходимым.
Между тем Савва задумал основать обитель и стал своими руками строить кельи для приходивших иноков. Однажды по внушению дьявола пришли к нему разбойники с коварным намерением. Он же, прозрев их замысел, попросил их помочь ему поднять дерево, при этом велел им взяться за тонкий конец, а сам взялся за толстый. Разбойники так и не смогли сдвинуть с места свой конец, а Савва один поднял дерево, чем и поразил их, и они со стыдом и страхом поспешили удалиться.
Позже Савва с братией поселились у реки Вишеры и соорудили и освятили церковь в честь Вознесения Господня. По устроении обители преподобный Савва поставил себе столп и, взойдя на него, всю седмицу до субботы проводил на нем в посте и молитве; в субботу же сходил со столпа к братии, причащался с ними Святых Тайн, выстаивал воскресную службу, разделял трапезу и после душеполезного поучения вновь всходил на столп до следующей субботы. Живя на столпе, Савва хранил обитель своими молитвами. Однажды к монастырю подошли разбойники, чтобы разграбить его, но святой, поняв их злой умысел, стал стучать жезлом по стене, обратив их в бегство, объятых страхом. Об этом чуде Церковь воспевает в службе преподобному.
Между тем к преподобному Савве продолжали отовсюду стекаться и иноки, и миряне ради пользы духовной, которую от него получали, ибо он, по апостолу, всем был вся, всех наставляя, обо всех болезнуя и заботясь. Пребывая в подвигах и перенося суровые лишения и всякого рода скорби, блаженный на восьмидесятом году от рождения впал в телесный недуг. Готовясь разрешиться от тела и отдать последний долг природе, он призвал к себе всю братию и обратился к ней с предсмертными душеполезными наставлениями, в особенности о том, чтобы они твердо и неизменно пребывали в православии и соблюдения иноческих обетов, более же всего преуспевали в смирении. "В чем вы видели меня подвизающимся, то и сами творите," — сказал в заключение старец. После сего, поручив монастырь и братию заботам и попечениям архиепископа Новгородского, причастившись Святых Христовых Таин, он мирно предал душу свою Господу 1 октября 1460 года.
По прошествии довольно продолжительного времени, в обители произошел сильный пожар, так что она вся сгорела: и церковь, и кельи, и столп преподобного. Но гроб его, находившийся между церковью и столпом, и часовня над гробом не потерпели никакого вреда. Это было первое чудо по преставлении святого. С того времени при гробе стали совершаться различные чудеса. Однажды настоятель Саввинской обители игумен Геласий исцелился от отравления по молитвам Саввы, явившегося ему в сновидении. Он поведал об этом Новгородскому архиепископу Ионе, и тот совершил пред гробом преподобного Саввы молебное пение, приказав написать икону святого и составить ему службу и житие.
Празднование в честь преподобного Саввы установлено Русской Церковью соборным определением 1549 года и совершается 1 октября.[/spoiler]

[Раб божий Константин]

Акафист преподобному Савве Крыпецкому чудотворцу.
[spoiler]Кондак 1

Возбранный чудотворче и угодниче Христов, преподобне отче наш Савво, похвальныя приносим ти, молитвенницы твоя, творящии, всечестную память твою, ты же яко имеяй велие дерзновение ко Господу, от всяких нас бед и скорбей свободи, зовущих: Радуйся преподобне Савво, отче преблаженнейший.



Икос 1

Ангелов Господь, провидев твое, преподобне, равноангельское житие, приведе тя от чуждыя страны и просвети тобою пределы наши. Сего ради и мы сретаем тя глаголюще: Радуйся, сродники и дом отеческий оставивый. Радуйся, всю красоту мирскую презревый. Радуйся, отче от Святыя горы Афона к нам пришедый. Радуйся, образ и правило жития иноческаго нам показавый. Радуйся, человече не от чуждыя страны, но от Бога к нам пришедый. Радуйся, нашу полунощную страну своим пришествием озаривый. Радуйся, звездо, от востока нам возсиявшая. Радуйся, заре, нас в темной стране пребывающих осветившая. Радуйся, преподобне Савво, отче преблаженнейший.



Кондак 2

Видя в себе призвание от Бога, пустынное житие проводити, потщился еси Ему угодная творити, в пустыни Богу взывая: Аллилуиа.



Икос 2

Разум Божественный настави тя, Савво, отче наш, егда оставив Отечество свое, во град Псков пришел еси, и во обители Рождества Пресвятыя Богородицы водворился еси, и в ней подвигом добрым подвизался еси. Сего ради восхваляем тя сице: Радуйся, свеще Божественнаго пламене. Радуйся, ум Христов имевый. Радуйся, заповеди Божии свято соблюдавый. Радуйся, иноческаго правила исполнителю. Радуйся, подвигом добрым подвизавыйся. Радуйся, молитвами яко крилами возлетаяй к Богу. Радуйся, уготовивый в себе жилище Духу Святому. Радуйся, сияние чистоты. Радуйся, преподобне Савво, отче преблаженнейший.









Кондак 3

Сила смирения твоего отведе тя, преподобне, от тщетных похвал человеческих к преподобному Евфросину, с ним же возжелал еси пети Богу: Аллилуиа.

Икос 3

Имея послушание крепкое во обители преподобнаго Евфросина вся повеленная тебе исполнил еси благопокорно. Сего ради тебе вопием ти таковая: Радуйся, иноче ревностный. Радуйся, труды ко трудам приложивый. Радуйся, повиновение к наставнику твоему сохранивый. Радуйся, в послушании твоем смирение возрастивый. Радуйся, возревновавый Евфросина шествовати неуклонно. Радуйся, на многия труды себе покоривый. Радуйся, ревнителю послушания в младости. Радуся, украшенный добродетельми в старости. Радуйся, преподобне Савво, отче преблаженнейший.

Кондак 4

Бурею жития мирскаго отягчаеми, удивляемся егда дерзаем уразумети, како непроходимую пустыню соделал еси яко крин цветущую и в ней сладостно пел: Аллилуиа.

Икос 4

Слышав от учеников преподобнаго Евфросина и от окрестных жителей, яко на пятьнадесять поприщ есть место безлюдное, Крыпец именуемое, восхотел еси в месте том особь во уединении поработати Богу. Сего ради приемли от нас похвалы такова: Радуйся, пустынный Христов учениче. Радуйся, избранниче Божий. Радуйся, в подвизе твоем от Господа помощь приявый. Радуйся, благодати Божия вместилище. Радуйся, пустыннаго жития насаждение. Радуйся, пустыню соделавый в храм Богу. Радуйся, возлюбивый уединения сладость. Радуйся, вместо житейския молвы молитву избравый. Радуйся, преподобне Савво, отче преблаженнейший.



Кондак 5

Благосветлый светильник явился еси во тьме, сияющий в пустыни крыпецстей, егда сокрылся тамо ради Бога, Тому ангельски служити, Тому всецело работати с песнию: Аллилуиа.

Икос 5

Виде учитель твой, преподобный Евфросин, яко совершеннаго послушания исполнился еси, отче Савво, сего ради слышав желание твое пред Господем одиночествовати в пустыни, уразуме в желании твоем Духа Святаго внушение, и благословив тя на новый подвиг рече: иди с миром темже и мы ти сице вопием: Радуйся, единаго Бога служителю. Радуйся, бесов из пустыни прогонителю. Радуйся, послушания нелицемернаго хранителю. Радуйся, наставника твоего благословения блюстителю. Радуйся, громе на диявола возгремевый. Радуйся, искушения его отразивый. Радуйся, пустынническими подвиги себе возвеличивый. Радуйся, уединенным молением твоим обильную благодать стяжавый. Радуйся, преподобне Савво, отче преблаженнейший.

Кондак 6

Проповедник Божия слова был еси егда прихождаху к тебе окрестнии жители, послушати душеполезнаго учения твоего, ихже поучал еси отчуждатися всех мирских сладостей, в чистоте и целомудрии проводити время жития взывая к Богу: Аллилуиа.

Икос 6

Возсиявый в пустыни свет веры твоея, многие боголюбцы привлече идти к тебе на иноческое сожительство ихже ты с любовию принимал еси к себе. Тогда же и храм во славу Христа Бога и возлюбленнаго ученика Его Иоанна Богослова воздвизал еси и наставление иночествующим преподал еси. Тебе убо, яко богомудрому наставнику иноков возглашаем сице: Радуйся, притекающих к тебе с любовию принимавый. Радуйся, оставивых мир сей Христа ради, яко птицы под кров свой собираяй. Радуйся, ничтоже свое, но вся обще имети повелевый. Радуйся, любовь нелицемерну между собою всем заповедавый имети. Радуйся, в житии сем великое смирение имети наказуяй. Радуйся, от нечистоты греховныя воздержатися повелевый. Радуйся, кротости и смирения Христова истинный подражателю. Радуйся, Христовым путем, жизнь твою прошедый. Радуйся, преподобне Савво, отче преблаженнейший.

Кондак 7

Хотя приложити доброе тщание об устроении братства подвижников создал еси храм во имя возлюбленного ученика Христова и явился еси благий отец и наставник всех собравшихся к тебе христолюбцев и с ними вкупе пел еси: Аллилуиа.



Икос 7

Новые твои подвиги зряще начаша к тебе блаженому отцу приходити христолюбивии псковстии людие, на сооружение обители милостыню многу подавающе. Ты же поставив во игумена обители твоея инока Кассиана, пребывал еси свободен от дел правления, поучая приходящих к тебе слову Божию, сего ради ублажаем тя сице: Радуйся, светильниче всесветлый. Радуйся, нсставниче монахов. Радуйся, чистоты селение. Радуйся, Христово благоухание. Радуйся, тобою собранным инокам Отческое завещание оставивый. Радуйся, отгнавый заблуждение от овец твоих. Радуйся, от труда рук твоих питавый алчущия. Радуйся, во обители твоей дом призрения бедных учинивый. Радуйся, преподобне Савво, отче преблаженнейший.

Кондак 8

Странное чудо видим на тебе преподобне, како прослави тя Бог еще на земли, небесною славою, зане работал еси Ему со страхом и трепетом. Темже Благодарственно вопием Ему: Аллилуиа.



Икос 8

Весь был еси в вышних преподобне Савво, и содержал еси твердо уставы обители твоея. Сего ради возбранил еси болящей княгине Псковстей внити в монастырь твой, приняв мужа ея, самой преподал еси благословение и исцелил ю вне врат монастырских. Темже прославляюще Господа, даровавшего тебе дар таковых чудес, приносим ти похвалы сицевая: Радуйся, силою Божией исцеления подаваяй. Радуйся, дар чудотворений от Христа приемый. Радуйся, болезней целителю. Радуйся, подаваяй нам исцеление в недугах наших. Радуйся, с любовию сретавый мужей, приходящих во обитель твою. Радуйся, и князя супружницы в болезни сущей, вход во обитель возбранивый. Радуйся, твердый уставов обители твоей хранителю. Радуйся, не воззревый на лице сильных земли. Радуйся, преподобне Савво, отче преблаженнейший.



Кондак 9

Всякая верных душа удивися богатству благодати, данным тебе от Бога Вседержителя, и силу чудес твоих благоговейно прослави ты бо во плоти сый, возымел еси власть над духи нечистыми. Сего ради чудодеющему во всех Богу вопием: Аллилуиа.

Икос 9

Ветийство человеческое не может изрещи силы Божия, Его промышление о тебе, како прослави тя яко светоносителя света Хрис-това в земли нашей. Мы же святость твою верою почитающе святче Божий вопием ти сице: Радуйся, заре солнца правды, пределы града Пскова озаряющая. Радуйся, многих грешников ко спасению наставивый. Радуйся, море, всякое нечестие потопляющее. Радуйся, благочестием сердца верных напояяй. Радуйся, жестокою стезю мира сего к небесным вратам прошедый. Радуйся, за подвиги твоя возмездие небесных благ получивый. Радуйся, воине Небеснаго Царя против невидимых враг. Радуйся, Благоуханный крине в небесных вертоградех процветший. Радуйся, преподобне Савво, отче преблаженнейший.

Кондак 10

Спасти хотя душ человеческих, учил еси покаянию люди мирския. Такожде и по преставлении твоем не оставляеши вразумляти их яко же и от гроба твоего слышати нам глас твой учительный, да в чистоте сердца нашего поем Христу: Аллилуиа.

Икос 10

Стена был еси обители твоей, Савво, отче наш, темже пришедших разбойников, дерзнувших разорити обитель твою, устрашил еси явлением жезла твоего, послежде на покаяние тех наставил еси, пою-щих ти сице: Радуйся, о людех грешных пекущийся. Радуйся, от греха к покаянию обращаяй. Радуйся, в покаянии к тебе приходящих милуяй. Радуйся, подражателю милосердия Отца Небеснаго. Радуйся, присный предстателю у престола Божия. Радуйся, обитель твою добре хранящий. Радуйся, сокровище милосердия и любве. Радуйся, истинный пастырю душ человеческих. Радуйся, преподобне Савво, отче преблаженнейший.



Кондак 11

Пение Благодарственное воспеваем о истиннем твоем о душах людских попечении, яко помиловал еси люди, забывшая Бога и привел еси их вкупе с тобою, Савво отче, пети песнь: Аллилуиа.

Икос 11

Светоподательница светильника под спудом сокрываема шестьдесят лет, яви тя Бог учеником твоим, иже при строении храма обретоша мощи твоя. Мы же, мощем твоим честным поклоняющиеся, с благодарением и радостию взываем сице: Радуйся, класы многоплодныя хлеба жизни возрастивый. Радуйся, мощи твоя нам оставивый яко драгоценную святыню. Радуйся, от мощей твоих токи исцеления испущаяй. Радуйся, человека хотяща умрети язвою, молитвами твоими исцеливый. Радуйся, болезни зубныя, трясавицы и беснования врачуяй. Радуйся, смертоносную язву прикосновением к твоему гробу и перстию от него исцеливый. Радуйся, к людем немощным сострадательно приникаяй. Радуйся, преподобне Савво, отче преблаженнейший.





Кондак 12

Благодать изобильную и велие дерзновение ко Христа Богу стяжал еси Савво отче, сего ради не остави нас, творящих всечестную память твою и не забуди нас грешных в жизни сей и в будущем веце, поющих Богу: Аллилуиа.



Икос 12

Поюще святую и подвижническую память твою, преподобне отче, просим тя мы, достойные всякого осуждения н муки, да не воздаст нам праведный Судия по делом нашим, но да явит нам свое человеколюбие, сего ради вопиет к тебе таковая: Радуйся, отче, во Христе вечно пребываяй. Радуйся, чистоты небесныя сияние. Радуйся, слава граду нашему Пскову. Радуйся, каменю веры несокрушимый. Радуйся, столпе терпения в бедах незыблемый. Радуйся, пустыни твоея великое украшение. Радуйся, звездо, сияющая во мраце жития мирскаго. Радуйся, молитвами твоими нас от лукавого избавляяй. Радуйся, преподобне Савво, отче преблаженнейший.



Кондак 13

О, преподобне отче наш Савво, приими от нас сие моление наше и вознеси е на жертвенник Божий, да простит нам вся наша согрешения и да сподобит нас спасения вечнаго, вопиющих Ему: Аллилуиа.

(Этот кондак читается трижды, затем икос 1 и кондак 1).[/spoiler]

[Раб божий Константин]

Акафист преподобному и богоносному отцу нашему Савве Освященному Иерусалимскому,
егоже память празднуется в 5 декабря.
[spoiler]Кондак 1.

Избранный чудотворче и предивный угодниче христов, преподобне отче Савво, миру православному светильниче и теплый о нас пред Богом молитвенниче! Величаем прославльшаго тя Господа, восхваляюще любовию равноангельное житие твое. Ты же, яко имеяй велие дерзновение ко Господу, от всяких нас бед свободи, да с радостию зовем ти:
Радуйся, пресветлая монахов похвало, Савво преподобне.

Икос 1.
Ангелов Творец и всея твари Содетель избра тя от младенства, преподобне, прославити трисиятельное имя Его: ты бо, осмилетен сый вся красная мира тленнаго презрев, во обитель святую притекл еси, идеже яко ангел земный богоугодно подвизался еси. Темже и вселися в тя благодать Пресвятаго Духа, Егоже действом светло украшаяся, ангелоподобное житие показал еси. Мы же, зряще велия исправления твоя, с любовию вопием тебе сице:
Радуйся, родителей благочестивых благословенный плоде;

Радуйся, каппадокийския страны святое украшение.

Радуйся, палестинския земли и града Иерусалима светильниче;

Радуйся, во иорданстей пустыни со ангелы вселивыйся.

Радуйся, яко жертву живую себе Господви принесл еси.

Радуйся, евангелиа Христова усердный последователю;

Радуйся, заповедей Господних верный блюстителю.

Радуйся, яко от юности игу Христову себе поработил еси;

Радуйся, яко красоту тленную и мирскую сладость ни во чтоже вменил еси.

Радуйся, Божия разума исполненный;

Радуйся, благодатию Духа святаго приосененный.
Радуйся, пресветлая монахов похвало, Савво преподобне.

Кондак 2.
Видев всеведец Господь благое души твоея произволение, еже работати ему усердно вся дни живота твоего, еще во юности прослави тя божественною Своею силою: любве бо ради братския в разжженную пещь вступив и одежды твоя неопалены сохранив, благодатию Божиею неврежден от огня пребыл еси. Сего ради прославляюще Царя славы Христа, прославляющаго святыя своя, вопием ему: Аллилуиа.

Икос 2.
Разум просвещен от Бога имея, преподобне отче Савво, диавольския искушения присно разумевал еси; егда бо прелестник рода человеческаго искуси тя взяти плод древа прежде старчаго благословения, абие помянул еси прародители, в раи прельстишася. Темже поверг плод на землю; ногами сей попрал еси, заповедав себе до смерти не вкусити плода сего, главу древняго sмия сокрушая. Сего ради приими от нас похвалы сия:
Радуйся, от юности постническое житие показавый;

Радуйся, на высоту добродетелей возшедый.

Радуйся, монашескаго жития и устава истовое правило;

Радуйся, ревностный исполнителю отеческих преданий.

Радуйся, яко любве ради брата в пещный пламень вшел еси;

Радуйся, яко силою благодати Христовы от огня не опален изшел еси.

Радуйся, всецелое послушание Господу Богу совершивый;

Радуйся, главу древняго запинателя сокрушивый.

Радуйся, на высоту безстрастия возшедый;

Радуйся, козни демонския до конца победивый.

Радуйся, благое иго Христово на рамена твоя восприявый;

Радуйся, закона бж~ия от всея души взыскавый.
Радуйся, пресветлая монахов похвало, Савво преподобне.

Кондак 3.
Сила Вышняго, просвещающая всякаго человека, грядущаго в мир, и показующая пути правыя, настави тя, преподобне отче Савво, достигнути святаго града Иерусалима, идеже поклонился еси Живоносному Гробу воскресшаго Христа, и со слезами облобызав, благодарственно воспел еси ему песнь: Аллилуиа.

Икос 3.
Имея велию ревность о подвизе монашескаго равноапостольнаго жития, преподобне, потщался еси ити во иорданскую пустыню, идеже наставника себе обрет великаго Евфимиа и того житию достойно поревновав, святому Крестителю Христову Иоанну в подвизех твоих уподобился еси. Мы же, дивящеся богатству добродетелей твоих, усердно вопием ти:
Радуйся, житию безплотных поревновавый;

Радуйся, подвигом древних святых отец достойно подражавый.

Радуйся, пустыни иорданския благодатное прозябение;

Радуйся, святаго жития благоухание.

Радуйся, благодати Христовы сосуде избранный;

Радуйся, пустынное житие паче всего возлюбивый.

Радуйся, страстей терния усердно исторгавый;

Радуйся, во юном возрасте мудростию Христовою просвещенный.

Радуйся, чистоты душевныя и телесныя усердный ревнителю;

Радуйся, умнаго трезвения неусыпный хранителю.

Радуйся, лествицею добродетелей к небесным обителем возшедый;

Радуйся, яко финикс в пустыни процветый.
Радуйся, пресветлая монахов похвало, Савво преподобне.

Кондак 4.
Бурю внутрь помыслов и страстей волны безбедно прешед, преподобне отче Савво, обрел еси тихое пристанище Христа, Емуже неленостно во мнозе долготерпении поработал еси; отнюдуже божественною благодатию Христовою восходя от силы в силу от деяния к боговидению, небеснаго Сиона достигл еси, идеже со ангелы поеши Троице Святей песнь: Аллилуиа.

Икос 4.
Слышаще дивная твоя наставления, яже не точию в словесех, но и в подвизех твоих являл еси, прихождаху к тебе издалеча жаждущии спасения, подражати добродетелем твоим отче, мудро назидав и к Небесному Царствию управляя всех, верою притекающих к тебе, светильник православия соделался еси. Сего ради с любовию вопием ти:
Радуйся, наставниче монахов Богомудрый;

Радуйся, овец христовых добрый пастырю.

Радуйся, ко спасению верный путеводителю;

Радуйся, постников дивный учителю.

Радуйся, крепкое падающих возведение;

Радуйся, правостоящих утверждение.

Радуйся, Евангелиа Христова усердный послушателю;

Радуйся, иноческаго жития добрый наставниче.

Радуйся, яко огнем молитвы стрелы вражия попалил еси;

Радуйся, яко еще во плоти сый, райскую сладость предвкусил еси.

Радуйся, пустынный жителю и в телеси ангеле: Радуйся, вселенныя светильниче.
Радуйся, пресветлая монахов похвало, Савво преподобне.

Кондак 5.
Боготечней звезде уподобился еси, блаженне Савво, смирением возвышаемый и в горняя чертоги востекий, научая всех горняя мудрствовати, а не земная, от страстей отрешатися, со Христом жити и от сердца воспевати ему: Аллилуиа.

Икос 5.
Видевше тя ученицы твои наставника премудра и знамением небесныя благодати сияюща, дивляхуся, тщащеся твоему житию подражати; яко бо луча светлаго солнца правды, просветися житие твое. Сего ради слыши от всех похвальная пения таковая:
Радуйся, восточная звездо златозарнейшая;

Радуйся, ангелов собеседниче.

Радуйся, постников похвало;

Радуйся, безмолвствующих славо.

Радуйся, учителю смирения и целомудрия;

Радуйся, образе кротости и послушания.

Радуйся, яко во глубины нищеты духовныя приникл еси;

Радуйся, яко на высоту добродетелей возшел еси.

Радуйся, яко путь к животу вечному обрел еси;

Радуйся, яко исправлении твоими безплотныя удивил еси.

Радуйся, множество душ уневестивый Христу;

Радуйся, купно с ними пребываяй в радости Господа твоего.
Радуйся, пресветлая монахов похвало, Савво преподобне.

Кондак 6.
Проповедник и исполнитель евангельских словес, еже не скрывати себе сокровищ на земли, явился еси, еже Единаго Господа искати во вся дни жизни своея, всем сердцем тому прилеплятися и непрестанно пети ему: Аллилуиа.

Икос 6.
Возсия свет божественный, в нощи молящуся тебе, преподобне, показуя столпом огненным пещеру нерукотворену, юже храм соделал еси, и тамо великую лавру устроил, богоугодныя подвиги и молитвенныя труды показал еси. Мы же, величию благодати Вышняго, на тебе почившия, дивящеся, умиленно взываем:
Радуйся, яко видения пренебеснаго света сподобился еси;

Радуйся, яко благоволением Божиим великую лавру устроил еси и в ню множество иноков собрал еси.

Радуйся, Духовныя овцы к горнему царствию добре управивый;

Радуйся, многая чудеса благодатию Святаго Духа сотворивый.

Радуйся, ленивыя подвигнувый ревностными подвиги твоего жития христолюбиваго;

Радуйся, печальных скорое утешение.

Радуйся, Евангелиа Христова богомудрый учителю;

Радуйся, провозвестниче путей господних.

Радуйся, вся во уметы вменивый, да Христа приобрящеши;

Радуйся, Христу невозвратно последовавый.

Радуйся, благий и верный рабе Христов;

Радуйся, добрый делателю винограда Христова.
Радуйся, пресветлая монахов похвало, Савво преподобне.

Кондак 7.
Хотя верен быти до конца Иисусу Христу, Сыну Божию, вземшему грехи мира, кротость, незлобие, смирение в сердце твоем добре насадил еси, богоносе отче Савво, и всякия скорби, укорения и досаждения радостно претерпел еси, ведая, яко многими скорбьми подобает внити в Царство Небесное. Сего ради, несением креста Христова и терпением скорбей, еще на земли душу твою во обитель Пресвятыя Троицы устроил еси, Ейже ныне предстоиши со ангелы и вопиеши ангельскую песнь: Аллилуиа.

Икос 7.
Дивный воистину победоносец показался еси на страсти плотския, богоблаженне; вся бо разжженныя стрелы лукаваго постом, бдением и слезными молитвами угасил еси. Темже вопием тебе сицевая:
Радуйся, крест Христов на рамена твоя восприемый;

Радуйся, крестом сим яко лествицею на небо возшедый.

Радуйся, терпения и незлобия рачителю;

Радуйся, иноков добре подвизающихся молитвенный пред Богом предстателю.

Радуйся, веры православныя мощный защитниче;

Радуйся, Небеснаго Царствия наследниче.

Радуйся, благодатию Божиею приосененный;

Радуйся, яко образ страстей Христовых в сердце твоем предписал еси.

Радуйся, светом трисолнечным Святыя Троицы озаренный;

Радуйся, яко душевныма очима присно Господа созерцал еси.

Радуйся, яко благодатию Божиею вся провидел еси;

Радуйся, благодатными чудесы житие твое озаривый.
Радуйся, пресветлая монахов похвало, Савво преподобне.

Кондак 8.
Странника и пришельца помышлял еси в себе быти в мире сем, преблаженне отче Савво; темже грядущаго града Иерусалима Небеснаго взыскуя, вся помышления твоя к небеси непрестанно возносил еси, и яко в тимпане, во умерщвленнем телеси, сладце воспевал еси победную песнь Христу Богу: Аллилуиа.

Икос 8.
Весь облеклся еси во оружия Божия, преподобне; темже возмогл еси всю силу диаволю низложити. Помози убо и нам, преблаженне отче, молитвами твоими избыти сетей вражиих, да благодарственно зовем тебе сице:
Радуйся, столпе непреклонный терпения;

Радуйся, ревнителю от мира удаления.

Радуйся, яко державно плотския страсти низложил еси;

Радуйся, яко плоть твою духови покорил еси.

Радуйся, яко во бденных молитвах неослабно пребывал еси;

Радуйся, яко умерщвлением плоти безстрастие стяжал еси.

Радуйся, яко всякое наслаждение земное возненавидел еси;

Радуйся, яко тесным и прискорбным путем ходил еси.

Радуйся, яко язвы Господа Иисуса Христа на теле твоем носил еси;

Радуйся, яко силою креста Господня демонския козни сокрушил еси.

Радуйся, вышних идеже Христос седе одесную Отца присно искавый;

Радуйся, мысленным оком к невечернему свету Христу непрестанно взиравый.

Радуйся, пресветлая монахов похвало, Савво преподобне.

Кондак 9.
Всякое естество ангельское прослави тя, и Церковь восхвали, преподобне отче Савво; ты бо царя неправо мудрствующа и севировы ересеначальники противящыяся православней Церкви небоязненно обличил еси, и все духовное воинство православия совокупив ересь в конец низложил еси, нас же всех во правоверии утвердив, научил еси единогласно воспевати триединому Богу: Аллилуиа.

Икос 9.
Ветия многовещанныя недоумеют достойно восхвалити тя, преблаженне; паче бо естества человеческаго подвизался еси во вся дни жития твоего. Темже чудесы Христос Бог тебе обогати, яко и зверие дивии повиновахуся и служаху тебе, во дни же глада молитвою твоею небо дождь даде на землю суху. Сего ради, любовию подвизаеми, вопием тебе таковая:
Радуйся, Церкве православныя похвало;

Радуйся, еретиков и всех противников правоверия обличителю.

Радуйся, яко людей увещати о истине православия потщался еси;

Радуйся, за истину православия многия труды и подвиги подъемый.

Радуйся, православныя веры светило и утверждение;

Радуйся, пророком, апостолом и святителем сопричтенный.

Радуйся, христиан правоверных молитвенное ограждение;

Радуйся, еретических учений разорителю;

Радуйся, православных догматов уяснителю.

Радуйся, всем подвизающымся о православии помощниче;

Радуйся, пастырей православныя Церкве споспешниче.
Радуйся, пресветлая монахов похвало, Савво преподобне.

Кондак 10.
Спасти хотя множество людей твоим попечением, премилосердый Господь достойна тя наставника избра, преблаженне отче Савво; мнози бо тобою на путь спасения наставлени быша, и многи обители твоим тщанием устроишася, в нихже научал еси немолчно воспевати единому Богу: Аллилуиа.

Икос 10.
Стена твердая и крепкое ограждение православных явился еси, преподобне; ходатайством бо твоим мир Церкви Божией даровася. Темже молим тя, преблаженне, буди помощник во всех скорбех и напастех и нам, к заступлению твоему прибегающым, да со умилением вопием тебе сице:
Радуйся, пустынниче, мирскую суету возненавидевый и единаго Бога искавый;

Радуйся, олтаря Господня служителю благоговейный.

Радуйся, со всяким тщанием Господу благоугождавый;

Радуйся, пламенную любовь ко Христу явивый.

Радуйся, многия обители созидавый;

Радуйся, множество чад духовных внутрь собравый.

Радуйся, во оскудениих и лишениих на Бога уповавый;

Радуйся, верою и упованием изобилие плодов земных приемый.

Радуйся, тезоименитыя тебе обители страже неусыпный;

Радуйся, в бедах, напастех и скорбех помощниче неотступный.

Радуйся, иноков ко спасению добрый путеводителю;

Радуйся, многомощный молитвенниче о душах наших.

Радуйся, пресветлая монахов похвало, Савво преподобне.

Кондак 11.
Пение хвалебное приносим тебе, преподобне отче Савво, и с любовию припадающе ко изображению честнаго лика твоего, восхваляем ангелоподобное житие твое. Ты же, предстоя престолу Пресвятыя Троицы, не престай моляся о нас, ублажающих тя, да сподобимся небеснаго селения достигнути и гласом радования воспети Богу ангельскую песнь: Аллилуиа.

Икос 11.
Светозарный светильник Божия благодати был еси, преблаженне; сего ради в смертнем успении твоем душа твоя, яко солнце сияющи, вознесена бысть святыми ангелы в небесныя обители. Мы же, поминающе твою блаженную кончину и на небеси прославление, радостно вопием ти:

Радуйся, угодниче Божий, течение твоея жизни благочестно скончавый;

Радуйся, веру, надежду и любовь до конца сохранивый.

Радуйся, яко царство и славу вечную наследовал еси;

Радуйся, яко по трудех жития земнаго в небесных селениих водворился еси.

Радуйся, нетленным венцем славы небесныя от руки Вседержителя увенчанный;

Радуйся, блаженство райское со всеми святыми восприемый.

Радуйся, ангеле земный и человече небесный;

Радуйся, на небеси и на земли от Господа прославленный.

Радуйся, живоносный источниче, благодать исцеления изливаяй;

Радуйся, одержимых недуги благодатию Божиею исцеляяй.

Радуйся, яко с высоты небесныя на нас [и обитель твою] призираеши;

Радуйся, яко всех нас от напастей сохраняеши.
Радуйся, пресветлая монахов похвало, Савво преподобне.

Кондак 12.
Благодать и велие твое дерзновение пред Богом ведуще, богоносне отче Савво, усердно вопием тебе; не престай моляся тепле ко Господу, да сохранит святую Церковь Свою непозыблему от неверия, ересей и раскола, да избавит нас от бед и лютых обстояний и приведет в царство Свое небесное, яко да поем со благодарением тобою благодеющему нам дивному во святых Богу: Аллилуиа.

Икос 12.
Поюще прославльшаго тя Господа и ублажающе тя, преблаженне отче, прилежно молимся тебе, еже сподобитися и нам ходатайством твоим неосужденно предстати Страшному Судищу Христову, да с радостию и любовию воспоминающе твое молитвенное о нас пред Богом предстательство, благохвально зовем тебе сице:
Радуйся, пречестное селение Пресвятыя Троицы;

Радуйся, избранное Святаго Духа жилище.

Радуйся, сияние незаходимаго солнца;

Радуйся, лучами подвигов твоих монашеское житие озаряяй.

Радуйся, достойный ангелов собеседниче;

Радуйся, мучеников и преподобных на небеси сожителю.

Радуйся, яко мзда твоя многа на небеси; Радуйся, Церкве православныя украшение;

Радуйся, в бедах сущым скорое вспоможение.

Радуйся, теплый о нас молитвенниче;

Радуйся, присный иноков помощниче и заступниче.
Радуйся, пресветлая монахов похвало, Савво преподобне.

Кондак 13.
О великий и дивный угодниче Христов, преподобне отче Савво! Приими милостивно сие малое моление, от усердия нашего в похвалу тебе приносимое, и твоим молитвенным предстательством у престола Царя Небеснаго испроси нам, еже избавитися в жизни сей от всех бед и напастей, в смертнем же успении нашем благую часть спасения и наследие вечных благ получити, яко да сподобимся с тобою и со всеми святыми в радости вечней во веки воспевати Христу Богу спасителю нашему: Аллилуиа.
Сей кондак глаголется трижды. Посем икос 1-й и кондак 1-й.

Молитва преподобному и богоносному отцу нашему Савве Освященному, глаголемая в день празднования памяти его.
О предивный и всехвальный угодниче Божий, преподобне отче Савво! Днесь во святем храме твоем, благоговейно предстояще пред святою иконою твоею и радостно совершающе пресветлую память твою, ублажаем тя заступника нашего. Почитающе же твое велие дерзновение пред Господем, смиренно молим тя, преблаженне: приими милостивно от нас хвалебное пение сие, от любве и усердия тебе приносимое. И, яко имеяй велие дерзновение ко Господу, потщися богоприятным твоим ходатайством испросити у Царя царствующих и Господа господствующих, яко да пробавит великия и богатыя милости своя на нас грешных, да подаст нам дух правыя веры, дух ведения и любве, дух мира и радости о Дусе святе, да избавит от бед и напастей, да низпослет вся полезная ко спасению душ наших. Всем же православным да ниспослет мир, тишину, безмятежие, усердие ко исполнению заповедей его, изобилие плодов земных: и да избавит всю русскую страну от глада, труса, потопа, огня, меча, нашествия иноплеменных и междоусобныя брани, смертоносныя язвы и от всякаго зла. Ей, угодниче Божий! Не презри молений наших, но услыши нас молящихся тебе, и под кровом заступления твоего сохрани нас [и обитель сию] ненаветны от враг видимых и невидимых, да сподобимся скончати житие наше в покаянии и восприимем вечная благая во царствии Христа Бога нашего, идеже восхвалим с тобою и всеми святыми достопоклоняемое имя Пресвятыя Троицы, Отца и Сына и Святаго Духа, во веки веков. Аминь.[/spoiler]

[Раб божий Константин]

Йже во святых отца нашего Саввы,
перваго архиепископа и учителя Сербскаго.
[spoiler]С вятитель Богоприятен и пастырь истинен,/
столп непревратен, / основание веры неподвй-
жимо,/ благочестия степень непоколеблемый, /
забрало Церкве нерушимо, / святителем доброта и
чудес источник, Савво, был еси,/ тем тя ублажаем
благочестйвно песньми/ и всесвященную твою
совершаем память.[/spoiler]