Молитвослов

[Раб божий Константин]

Акафист святителю Макарию, митрополиту Московскому и всея Руси, чудотворцу.
[spoiler]Кондак 1


Избранный и чудный архиерею Церкве Российския, града Москвы первопрестольниче, блаженне святителю Макарие! Восхваляем тя ныне мы, недостойнии, но, яко имея дерзновение у Святыя Троицы, предстательством твоим Небесным помогай нам, сущим в бедах и скорбех, радостно взывающим ти: Радуйся, блаженне Макарие, похвало церкве Христовы и предивный чудотворче.


Икос 1


Ангела земнаго и человека Небеснаго прославляем тя, яко ревнителя Православия: от земных бо к Небесным обителем возшел еси. И ныне, предстоя Престолу Святыя Троицы вкупе с лики чудотворцев Российских, не престай моляся о воспевающих тя: Радуйся, корене благаго ветве многоплодная; Радуйся, благочестивых родителей плоде богодарованный. Радуйся, от юности возлюбивый Бога всем сердцем твоим; Радуйся, яко Ему Единому работати возжелел еси. Радуйся, яко измлада мудрости прилежал еси; Радуйся, поста и молитвы ревностный блюстителю. Радуйся, блаженне Макарие, похвало Церкве Христовы и предивный чудотворче.


Кондак 2


Видя тщету мирскаго жития, блаженне святителю Макарие, во ограду обители преподобнаго Пафнутия Боровскаго удалился еси, идеже имя египетскаго пустынника, монашествующих наставника, Макария Великаго, приял еси и, яко звезда небосветлая возрастая на тверди церковней, весь живот свой от младых ногтей Богу предал еси, сердцем и усты непрестанно поя Ему: Аллилуиа.


Икос 2


Разум твой богодухновенный, научением книжным в Пафнутиево-Боровстем монастыре просвещаемый, богомыслию предал еси, блаженне Макарие, молитвою и пощением во служение Богу себе уготовляя. Восхваляюще же ныне твоя благая тщания, взываем ти сице: Радуйся, яко, отложив вся мирския сласти, Христов ярем носити изволил еси; Радуйся, юность твою, яко жертву непорочну, отвержением мира Богу принесый. Радуйся, в постех и подвизех твоих добродетельми украсивыйся; Радуйся, ангельски во плоти поживый. Радуйся, монашескаго послушания светлый облаче; Радуйся, иноков обители Боровския украшение. Радуйся, блаженне Макарие, похвало Церкве Христовы и предивный чудотворче.


Кондак 3


Силою Вышняго, уготовлявшаго тя во спасение многих, досточудне святителю, ведом был еси от силы в силу во святем житии твоем, день и нощь поучался еси в Законе Господни, присно взывая Богу: Аллилуиа.


Икос 3


Имея чистое житие и душу непорочну, в монашеския ризы облеклся еси, еще млад сый, и, подвигом добрым труждаяся, искус жестокаго жития прошед и саном архимандрита обители Лужецкия от первосвятителя Даниила почтен быв, ревностно подвизался еси о спасении Богом данного тебе стада словеснаго, с нимже и мы днесь радостно взываем: Радуйся, красото смиренномудрия и воздержания; Радуйся, образе кротости и послушания. Радуйся, соборов иноческих похваление; Радуйся, преподобных и праведных сонаследниче. Радуйся, премудрый монахов наставниче; Радуйся, добрый о них попечителю. Радуйся, блаженне Макарие, похвало Церкве Христовы и предивный чудотворче.


Кондак 4


Бури страстей избежав, архипастырски трудился еси, святителю отче Макарие; достойный служитель святыя Софии, Премудрости Божия, явился еси и сокровища премудрости ревностно собирати потщался еси, ко просвещению народов российских, научая разумно пети Богу: Аллилуиа.


Икос 4


Слышавше ближнии и дальнии людие, дивляхуся о трудех твоих неустанных, имиже трудился еси на кафедре богоспасаемых градов Великаго Новаграда и Пскова, и радовахуся, яко приял еси жезл архипастыря от митрополита Российскаго Даниила. Мы же, овцы пажити твоея, светом твоего богораэумия озаряеми, вопием ти: Радуйся, на престоле святительстем достойно возседый; Радуйся, архиерею и премудрый учителю. Радуйся, в подвизе учительства неустанный ревнителю; Радуйся, винограда Христова усердный делателю. Радуйся, яко твоим благословением некрещеная лопь светом Евангелия просвещена бысть; Радуйся, благочиния монастырскаго мудрый устроителю. Радуйся, блаженне Макарие, похвало Церкве Христовы и предивный чудотворче.


Кондак 5


Боготечному солнцу уподобился еси, блаженне Макарие, егда волею Пастыреначальника Христа на свещнице Церкве Российския собором архиереев поставлен был еси, да светиши светло отечествию твоему. Мы же Небесному Царю, Триединому Богу, дивно прославльшему тя, поем: Аллилуиа.


Икос 5


Видевше тя православнии людие, яко светило безоблачно сияюща многими дарованьми, радовахуся. Ты же, добрый пастырю Христов, мучениколюбец сый, соборне уставил еси празднования творити святым новым чудотворцем земли нашея, ихже Господь Бог прослави, якоже Своя угодники, многими различными чудесы и знаменьми. Мы же, чудящеся о таковей неизреченней благости Божией, Церкви нашей Российстей дарованней, умильно взываем ти сице: Радуйся, святителю, други Божия достолепно прославивый; Радуйся, деяния подвижников российских писанию предавый. Радуйся, труды и подвиги мужей святых в песнех славословивый; Радуйся, образы новых чудотворцев благоговейно писавый и лобызавый. Радуйся, научивый паству достойно покланятися святым новым чудотворцем; Радуйся, яко купно с сими святыми ныне и от нас славословие приемлеши. Радуйся, блаженне Макарие, похвало Церкве Христовы и предивный чудотворче.


Кондак 6


Проповедник веры Православныя и ревнитель благочестия словом и житием был еси, достославне святителю, блаженне Макарие, потщался еси труды неленостными нравы и обычаи людей российских исправити, научая непрестанно воспевати Богу: Аллилуиа.


Икос 6


Возсиял еси, яко звезда лучезарная, в Церкви Российстей светом Христова учения и ревностию твоею о славе Божией, иерарше блаженне, и созвал еси великий собор, Стоглав нарицаемый, ко исправлению и утверждению в добродетелех верных чад, внимающих учению Христову и похваляющих тя сице: Радуйся, благочиния церковнаго строгий блюстителю; Радуйся, яко тобою вера Христова утвердися. Радуйся, чтения и пения Божественнаго искусный учителю; Радуйся, соблазнов и нестроений мудрый искоренителю. Радуйся, яко страх Божий, начало премудрости, в сердцах пасомых насаждал еси; Радуйся, яко праведныя жизни образ верным подавал еси. Радуйся, блаженне Макарие, похвале Церкве Христовы и предивный чудотворче.


Кондак 7


Хотяй враг спасения рода человческаго нарушити мир Церкве нашея, воздвиже еретическое мудрование в людех о Божестве, и о Церкви, и о православных догматех веры христианския. Мы же, трепетни суще о таковем злочестии, прославляем святителя Макария, православных догматов защитителя, взывающе Богу: Аллилуиа.


Икос 7


Новаго тя Петра Александрийскаго и Николая Мирликийскаго зрим, святителю Макарие: овии отсекоша Ариа безумнаго, раздравшаго, яко ризу Церковь Христову, ты же еретическая лжемудрования соборне осудил еси, прелесть их посрамив да не сеют злобы своея в роде человечестем, и тако утвержден бысть истинный Закон Христов. Мы же, чада Церкве Православныя, благодарно прославляем тя, блаженне Макарие: Радуйся, Православия великий ревнителю; Радуйся, стада Христова от волков хищных верный оградителю. Радуйся, жезлом догматов лжемудрствование посрамивый; Радуйся, небрегущия о святыни от Церкве Божия отлучивый. Радуйся, презрители законоположений церковных низложивый; Радуйся, громе, поражаяй злочестивых. Радуйся, блаженне Макарие, похвало Церкве Христовы и предивный чудотворче.


Кондак 8


Странника и пришельца в мире сем себе помышляя, святителю отче наш Макарие, в подвизех и постех присно пребывая, кроток же, смирен и милостив был еси, отроком в незлобии подражая всегда, совершен умом быв, поя Всемилостивому Богу: Аллилуиа.


Икос 8


Весь ум твой, святителю, вперил еси к Богу, пастырски врученное тебе от Христа стадо упасл еси: лица бо сильных не стыдяся, наставлял еси их на путь спасения, его ради чтуще святую память твою, любовию ти вопием: Радуйся, великий благочестия столпе; Радуйся, святопомазанная главо, честный наш учителю. Радуйся, Христа Господа всею душею и сердцем возлюбивый; Радуйся, христианскаго благочестия истинный ревнителю. Радуйся, неутомимый проповедниче Евангелия Христова; Радуйся, каменю драгий, всю землю Российскую украшаяй. Радуйся, блаженне Макарие, похвало Церкве Христовы и предивный чудотворче.


Кондак 9


Всего себе вперив в премудрость книжную, составил еси многими труды и подвиги Великия Четия Минеи во славу Божию, в похвалу святых и в научение всему роду православному. Мы же, дивящеся дарованней ти от Бога премудрости, прославляем тя, зовуще Богу: Аллилуиа.


Икос 9


Витии любомудрии прославляют деяния славных мира сего, ты же, пчеле уподоблялся, воедино собирал еси жития иже в постех просиявших и за Христа кровь свою пролиявших. Мы же, писании твоими просвещаеми, поем и благодарим тя за толикие труды твоя и преусердно приносим ти сицевая: Радуйся, книжную премудрость, яко бисер, собравый; Радуйся, сокровища премудрости чадом Божиим явивый. Радуйся, имиже люди российския просветивый; Радуйся, деяния святых писанию предавый. Радуйся, начало книгопечатанию положивый; Радуйся, духовный пастырю словесных овец. Радуйся, блаженне Макарие, похвало Церкве Христовы и предивный чудотворче.


Кондак 10


Спасти хотя душу твою, святителю, покоя духовнаго возжелел еси, хотя оставити первосвятительский престол и паству российскую, но, умолен быв от собора святителей и самодержцем державным, показал еси нам пример послушания Церкви Христове, да поем Богу: Аллилуиа.


Икос 10


Стена и крепкое ограждение земли Российстей был еси, святителю, многими добродетельми украсивыйся, постнически пожив, течение скончав, ко отшествию от земнаго бытия приблизился еси и предал еси душу свою в руце Бога Жива. Собор же народа многа, стекшеся ко одру твоему и видевше лик твой, яко свет сияющий, чистаго и непорочнаго жития твоего ради, прославиша Бога, даровавшаго таковаго светильника, вопиюще: Радуйся, святителю, пред кончиною твоею явления Богоматере сподобивыйся; Радуйся, мирно и радостно час кончины твоея сретивый. Радуйся, яко пресветлое житие твое на земли прешел еси; Радуйся, святителю, и по смерти твоей нас не оставляяй. Радуйся, яко и по преставлении твоем с нами пребываеши; Радуйся, гражданине Иерусалима Небеснаго. Радуйся, блаженне Макарие, похвало Церкве Христовы и предивный чудотворче.


Кондак 11


Пение наше молебное презри, богомудре и блаженне отче, любовию подвизаеми, к честному образу твоему притекаем и, прославляюще Триединаго Бога, молимтися: молися выну у Престола Господа Славы избавитися нам от мятежей и треволнений, да благодарне зовем Богу: Аллилуиа.


Икос 11


Светодательная свеща явился еси стране нашей, Макарие чудный, и по смерти своей. Темже сиянием учений и трудов твоих озаряеми, почитаем святую память твою, просвети убо очи наша душевная, да благодарно взываем ти: Радуйся, бедствия, грядущая на землю Российскую, предзревый; Радуйся, о всех людех российских усердный молитвенниче. Радуйся, вместо временных вечная блага нам подаваяй; Радуйся, бисере честный, сиянием Небесныя славы сердца наша увеселяяй. Радуйся, светильниче многосветлый, светом истиннаго богопознания нас озаряяй; Радуйся, святителей Московских достойный преемниче. Радуйся, блаженне Макарие, похвало Церкве Христовы и предивный чудотворче.


Кондак 12


Благодать Господню и благовременную помощь испроси нам, святителю Макарие, во дни нестроений и буди нам в скорбех утешитель и в бедах заступник. Молим тя, иерарше блаженне, пролей за нас теплую молитву ко Господу, да сохранит Церковь Российскую невреждену от ересей и расколов и спасет вопиющих Ему: Аллилуиа.


Икос 12


Поюще преславное житие твое и богомудрая деяния, святителю отче Макарие, блаженству тезоименитый, восхваляем Подателя всех благих, Бога, даровавшаго в последняя времена стране нашей великаго чудотворца. Озари, иерарше чудный, нас светоизлиянием твоея благодати, увеселяя сердца наша пети ти со умилением: Радуйся, Православия поборниче нелицемерный; Радуйся, архиереев доброто, священников и иноков похвало. Радуйся, звездо, сияющая во тьме сущим; Радуйся, первопастырю и учителю христоименитых людей земли нашея. Радуйся, иконописче благоговеен, дела рук своих посвящаяй Богу; Радуйся, от Царя Небеснаго венец славы приемый. Радуйся, блаженне Макарие, похвало Церкве Христовы и предивный чудотворче.


Кондак 13


О чудотворче преславный и боголюбезный пастырю, первопрестольниче изрядный, великое украшение церковное, всем архиереем и иереем неленостный учителю, всея российския паствы истинное управление, святителю Макарие чудный! Милостивно прием сие малое моление наше, в похвалу тебе приносимое, умоли Господа Бога даровати мир душам нашим, Церкви и стране, да взываем присно: Аллилуиа.


(Этот кондак читается трижды, затем икос 1 и кондак 1)



Молитва святителю Макарию, митрополиту Московскому и всея Руси


О великий святителю, Церкве Российския первопрестольниче, града Москвы пастырю и учителю, отче наш Макарие блаженне, добре подвиг жития твоего совершивый и дерзновение у Господа стяжавый! К тебе во умилении сердец наших припадаем и усердно молим: буди о нас теплый предстатель у Престола Вседержителева и умоли Всеблагаго Бога: да не презрит нас, во многая и лютыя грехи впадших, но дарует нам вся благая и потребная, яже ко спасению. Вемы бо, яко немощни есмы, но молим тя усердно, святителю Божий, предстательством твоим сохрани невредимо всероссийскую паству, юже во святительстве твоем добре упасл еси. Архиереем и пресвитером у Господа испроси мудростъ, во еже право правити слово Божественныя истины, жертвенную любовь и ревностъ о спасении, да не погибнет ни един от паствы их; иночествующих в подвизех укрепи, в мире живущим истинный и потребньй им, иже во Христе Иисусе образ жительствования покажи; веру нашу укрепи, любви нелицемерней друг ко другу научи, в надежде на милосердие Божие утверди. Еще же молим тя, святителю, испроси нам у Всемилостиваго Бога духа разума и премудрости, да украсимся истинным боговедением спасительных писаний святых отец и мудростию их творений. Ей, святителю Божий, о мире всего мира Господа умоли, страну нашу твоим предстательством в мире и безмятежии соблюди; вся люди отечества нашего в добрем расположении друг ко другу сохрани и чужды междоусобных нестроений покажи; вся грады и веси добре сохрани, святую веру в людех непорочну соблюди. Буди всем нам скорый помощник в нуждах наших, да тобою окормляеми, мирно и благочестно поживем в жизни сей, да сподобимся и вечных благ восприятия на Небеси, славяще и превозносяще Отца и Сына и Святаго Духа и твое милостивное о нас предстательство во веки веков. Аминь.



Тропарь святителю Макарию, митрополиту Московскому и Всея Руси


Тропарь, глас 4


Яко великим пастырем единонравна, и учителем вселенныя единомысленна, Божии Премудрости служителя изрядна, иже блаженству тезоимениту днесь вернии вси воспоим: Христа Бога моли, святителю Макарие, умирити мир и спасти души наша.


Кондак, глас 3


Богомудрым учением и книжным списанием потщался еси, святителю Макарие, люди Российския просветити, и святых земли нашея прославити. Сего ради чуден пронаречеся, преемниче первопрестольников Российских. Моли сохранитися нам в вере и благочестии невредимо.[/spoiler]

[Раб божий Константин]

Акафист Преподобному Макарию Писемскому.
[spoiler]Кондак 1
Возбранный Воеводо и дивный во святых твоих, Господи яви нам угодника тя, преподобне отче наш Макарие, да твоими молитвами в мире скорбнем странствия земного, сподобимся взывати тебе:
Радуйся, преподобне отче наш Макарие, теплый молитвенниче ко Господу и чудотворче.

Икос 1
Кто возможет воспети тя по достоянию, преподобне отче наш Макарие, ангел бо во плоти на земли явился еси, в пустыню вселивыйся, да Единому Богу послужиши, труды ко трудам прилагая, сего ради и мы чада твоя к тебе взываем сице:
Радуйся, прямым путем шествовавый ко Господу.
Радуйся едино и сердце имел еси, да Ему послужиши.
Радуйся, яко видя Господь труды твоя и во всем тебе помощник явися.
Радуйся, яко Господь тебе наставника послал еси.
Радуйся, яко наставнику твоему преподобному Павлу выю свою покорил еси.
Радуйся, яко наставника твоего любовь снискал еси.
Радуйся, яко двадесять годов совокупно с ним пожил .
Радуйся, яко с наставником твоим дни и нощи славословил Господа.
Радуйся, яко небопарнии орли, умом и сердцем к небеси возлетели есте.
Радуйся, преподобне отче наш Макарие, теплый молитвенниче ко Господу и Чудотворче.

Кондак 2
Все житие твое яко един день,едино желание имети в сердце Господа, сего ради постом и молитвою изнурял еси плоть твою, да чист соделаешися от страстей, Всесильному Богу воспевал во веки: Аллилуя.

Икос 2
Восхоте ненавистник всякого добра, диявол, да возвратишися вспять из пустыни, восхотевый тя от пути истиннаго отвратити, уныние и тугу сердечную наведе на тя. Непреклонными мольбами ты си далече от себе отгоняя, сего ради и мы воспеваем тебе таковая:
Радуйся теплый молитвенниче наш ко Господу.
Радуйся, много может молитва праведного, спопешествующая во благое.
Радуйся, яко и мы тобою спасаемся.
Радуйся, яко тобою от лютых бед избавляемся.
Радуйся, яко и мы с тобою мир с Богом имамы.
Радуйся, болезней наших целителю.
Радуйся, во всех бедах наших скорый помощниче.
Радуйся и по смерти все наше упование.
Радуйся, преподобне отче наш Макарие теплый молитвенниче ко Господу и чудотворче.

Кондак 3
Ты моя крепость Господи, взывал отче Макарие, Ты мое радование, ты и жизнь моя. Что хощу на земли и что я желаю на небеси, токмо непрестанно пети тебе: Аллилуя.

Икос 3
Вся тленная в мире сем проходит и уходит, слава, богатство, честь и юность земная, токмо вечны труды и добродетели, Вечны грехи покоянием не омытии, но последних ты страхом вечных мук отвращался еси, паче же пламения любовию ко Господу, сего ради тебе поем таковая:
Радуйся, душу твою принесый в дар Господу.
Радуйся, вся красная мира сего оставивый.
Радуйся, смирением украшенный.
Радуйся, терпением возвеличенный.
Радуйся, милосердием от Господа почтенный.
Радуйся, никакоже возвеличелся еси трудами твоими,
Радуйся, яко раб непотребный себе пред всеми поставивый.
Радуйся, яко Сам Господь тебе возвеличил еси.
Радуйся, даром чудес тебе обогатил еси.
Радуйся, преподобне отче наш Макарие, теплый молитвенниче ко Господу и Чудотворче.


Кондак 4
Нужды и скорби на раменах своих понесл еси, тяжесть креста услаждал еси взиранием на Подвигоположника Господа Иисуса и радостно взывал еси: Аллилуя.

Икос 4
Всем еси помощник показался еси, преподобне отче наш Макарие, Милостливого Бога о нас умоляеши и отчаявшимся во своем спасении, новую милость нам подаеши. Паки и паки в благодарности тебе поем таковая:
Радуйся, милостивый о нас ходотаю пред Господом .
Радуйся, о прощении грехов наших Господа умоляеши.
Радуйся, ходатаю нам царствия небесного.
Радуйся, ангельская твоя душа веселится на небеси.
Радуйся пред престолом Господа предстоиши.
Радуйся, со Архангелы и Ангелы непрестанно в сладости неизреченно славиши Господа.
Радуйся, и наше моление не тщетно от тебе отходит.
Радуйся, в нуждах и печалех, яко чадолюбивый отец утешаеши.
Радуйся душам нашим и телесам нашим мир и разум испрошаеши.
Радуйся, преподобне оче наш Макарие, теплый молитвенниче ко Господу и Чудотворче.

Кондак 5
Сердца наша в плену греховном, жаждут света невечерня, яко сродные по благодати, омывшиеся банею крещения и искуплении Распятием Господа нашего. Но затемнохом ризы крещения и распинаем паки Христа. Моли же о нас, угодниче Божий, да и мы покоянием яко вторым крещением омыем души наша и с тобою воспоем Милосердному Господу во веки: Аллилуя.


Икос 5
Иже на всякое время и на всякий час подобает славити Господа, славословити Его угодники, воспевая его силу: слава давшему тебе крепость, слава венчавшему тя, слава действующему тобой всем исцеления. Сего ради и мы, угодниче Божий Макарие, поем тебе таковая:
Радуйся, страсти душевные исцеляеши.
Радуйся, бальзам живительный душам нашим являешися.
Радуйся, теплоту душевную нам даруеши.
Радуйся, чувства душ наших к молитве уклоняеши.
Радуйся, от душепагубного зла нас отвращаеши.
Радуйся в мире и любви дни жития нашего препроводити повелеваеши.
Радуйся, мысли наша памяти о смерти научаеши.
Радуйся, ко всему в мире земному не пристращатися повелеваеши.
Радуйся, преподобне отче наш Макарие, теплый молитвенниче и Чудотворче.

Кондак 6
Несть услады в сердце, в мире несть отдохновения души на земли. Страсти,яко змия, вползают в сердце и разрушают покой и здравие. Красота, богатсво, слава временная рарушаются и дают душе тоску и уныние. Но ты, преподобне отче наш Макарие, сохрани и спаси нас святыми твоими молитвами, да и мы, избавлени от искушений, поем смиренно Богу: Аллилуя.


Икос 6
Яко рыба без воды жити не может, тако и твоя душа, и твоя услада есть житие о Господе, ты весь сеи предался Ему, яко ветвь от древа по слову Евангелия: Христос Лоза, ты же лозие Его.Сего ради тебе вопиим:
Радуйся, Христа паче всего возлюбивый.
Радуйся и Христом возлюбленный.
Радуйся во Отчих объятиях житие твое препроводил еси.
Радуйся, о теле своем нерадел еси.
Радуйся, яко в подвигах своих паче и паче возмогал еси.
Радуйся, яко пощением душу свою очистил еси, тело же утончил еси.
Радуйся, внешний человек тлел еси в тебе.
Радуйся, яко внутренний сугубо обновлялся.
Радуйся, яко плоть свою распял еси, да Христавым наречешися.
Радуйся, яко со Христом царствуеши и нас в молитвах своих воспоминаеши. Радуйся, преподобне отче наш Макарие.

Кондак 7
Яко родник, ни на час, ни на мгновение не оставлял своего течения, тако и твоя душа ни на едино мгновение не оставляла молитвенного внимания, но непрестанно молясь ко Господу, взывал еси ему во умилении сердца: Аллилуя.

Икос7
Яко камень тверд и неприклонен, тако и твое житие, преподобне наш макарие, на камени веры утвердил еси себе, непрестанно шествуя правыми стезями, злых далече уклоняяся. Житием твоим паче слова, всех приходящих к тебе поучал еси, сего ради вопием к тебе таковая:
Радуйся, все житие твое в молитве и трудах препроводивый.
Радуйся, в ископании кладезя водного потрудивыйся.
Радуйся, яко в горний Иерусалим отшел от нас.
Радуйся, яко мощи своя оставил еси нам.
Радуйся, к раке мощей твоих яко к тебе прибегаем.
Радуйся, яко помощи твоя недужным подают исцеления.
Радуйся, яко мощи твоя душею болящим подают утешение.
Радуйся, яко уныние от нас отгоняеши.
Радуйся, яко Господа Бога о нас умоляеши.
Радуйся, светлая наше надеждо.
Радуйся, в бедах и скорбех наших заступление.
Радуйся, яко лукавых духов от нас прогоняеши.
Радуйся, преподобнай отче наш макарие, теплый молитвенниче ко Господу и Чудотворче.

Кондак 8
Молим тя, преподобне отче наш Макарие, не отступися от нас во временной сей жизни, но буди нам всегдашний молитвенник ко Господу. Не забуди нас грешных, да не умрем в злых деяниях наших, но да в покаянии скончаем дни живота нашего, и по смерти нашея не остави нас, да и мы смиренно Богу вопием: Аллилуя.

Икос 8
Помощниче наш теплый, ты наша отрадо, надеждо и заступление. Тобою бо мы грешнии надеемся улучити милость Божию и по смерти нашея. Твоими молитвами да избавимся от адовых нерешимых уз, сего ради умильно тебе вопием таковая: Радуйся, яко тобою вечныя смерти грешницы избегают.
Радуйся, яко тобою раскаявшиеся царствие небесное улучшают.
Радуйся, ходатаю вечная жизни.
Радуйся, истинный путеволителю наш в царствие небесное.
Радуйся, надеждо нашего спасения.
Радуйся, и земное житие наше устрояеши.
Радуйся, мир и благословение нам даруеши.
Радуйся, страсти наша утешаеши.
Радуйся со славою пребываеши на небеси.
Радуйся, монашествующих правило и удобрение.
Радуйся, преподобне отче наш Макарие, теплый молитвенниче ко Господу и Чудотворче.

Кондак 9
Ум и сердце к тебе возношу отче наш Макарие, молю у тебе помощи, яко многих зол исполнися душа моя, взывая тебе: очистя мя грешного своими молитвами, простри ми руку помощи, да и я грешник воспою смиренно Богу: Аллилуя.

Икос 9
Яко бальзам благовонный являешися душам нашим, преподобне отче Макарие, твоими молитвами умягчаеши бесплодные сердца наша и даруеши слёзы покояния оскверненным беззакониями душам нашим, сего ради тебе взываем сице:
Радуйся, грехи наша прощаеши.
Радуйся, помоще наша и заступление.
Радуйся, никакожде к прогневавшим тя зла не имевый.
Радуйся, незлобием душу свою украсивый.
Радуйся, твоею молитвою спасаемся.
Радуйся, в трудные минуты жития нашего нам помогаеши.
Радуйся, брашно алчущим давати повелеваеши.
Радуйся преподобне отче наш Макарие, теплый молитвенниче ко Господу и Чудотоврче.

Кондак 10
Беды и напасти, яко волны морския нас потопляют:но ты, угодниче Христов Макарие, исхити нас из пропасти погибели и помози проити воды напастей, да и мы, яко израильтяне, воду прошед яко сушу, сподобимся вместе с тобою пети Избавителю и Богу:Аллилуя.

Икос 10
Яко птица каждое мгновение пребывает от опастности от ловца, от хищника, от злого человека, тако и наша душа каждую минуту бывает в опасности от сетей лукавых, от видимых врагов и невидимых и несть спасения надежды, аще бы не имели святые молитвенники, сего ради вопием к тебе, угодниче Божий, таковая: Радуйся, чистоту телесную и чистоту душувную сохранивый аки жемчужину. Радуйся, сия в дар драгоценный Господу своему принесый.
Радуйся, яко за сие светлое одеждою от ангела одеянный.
Радуйся, яко в чертог брачный на пир агнчий в ней возшел еси.
Радуйся, от Господа возвеличенный.
Радуйся, яко от господа почтенный.
Радуйся, яко насыщаешися Его лицезрения.
Радуйся, яко Господь в тебе и ты в нем еси.
Радуйся, яко с Ним в неизреченней славе ликуеши.
Радуйся, преподобне отче наш Макарие, теплый наш молитвенниче ко Господу и Чудотворче.

Кондак 11
Дние, яко сень презодят и приближают к концу житие наше. Что возглаголем за все дни наша, что принесем в дар Отцу нашему? Обаче одни грехи, беззакония, нерадения и леностии, и что ожидает нам от Праведного Судии и Владыки, как не вечные муки от бесплоднаго раскаяния нашего и невозвратно ушедших днях жития нашего. Но ты, преподобне отче наш Макарие, ороси росою благодати души наша и представи Престолу божию совесть нашу чисту, да и мы грешнии воспоем Богу: Аллилуя.

Икос 11
Яко бесплодная смоковница, листьями трепещущая, тако и житие наше на земли, тщеславия листьями покровенно, отнюдь не имея добрых дел, яко плодов Господу И несть покояния в окамененных сердцах наших. Сего ради, яко смоковницы и мы боимся усечения вечнаго, вопием тебе таковая:
Радуйся, твердое наше упование.
Радуйся, светильниче душам нашим.
Радуйся, наша моления ко Господу приносиши.
Радуйся, монашествующих славо.
Радуйся, житие твое исполнено елеем добрых дел.
Радуйся, яко грозд спелый принеслся еси господу своему.
Радуйся, яко в тихое пристанище вшел еси.
Радуйся, преподобне отче наш Макарие, теплый молитвенниче кл Господу и Чудотворче.

Кондак 12
Яко звезда пресветлая явился еси преподобне отче наш Макарие, сияя лучами Солнца Иисуса Христа и нас просвещающая лучами Его благодати. Ныне убо зрим тя на небеси предстоящим Пресвятий Троице во мнозем Дерзновении и трисиянными лучами осияваема и нас освящая вопити Троице во едином лице: Аллилуия.

Икос 12
Кто возможет восхвалить тя по достоянию, преподобне, яко един удаливыйся в пучстыню со зверьми, славити и пети господа своего. Яко столп крепкий, не возвратился еси вспять, но вземши рало, шествовал еси узким путем, взыскуя вечного царствия небесного. Сего ради вопием тебе таковая:
Радуйся, угодниче Божий, искушения от врагов доблественно претерпевый. Радуйся, от плоти, мира и диявола чистоту души твоея сохранивый.
Радуйся, Ангелов славо.
Радуйся человеков спасение.
Радуйся, прославляющая тя прославляя.
Радуйся, молящияся тебе от бед избавляяй.
Радуйся скорое наше услышание.
Радуйся, и посмерти нашея заступление.
Радуйся, на суде Христовом за нас ходотаю.
Радуйся, яко тобою вечные муки избавляемся.
Радуйся, преподобне отче наш Макарие, теплый молитвенниче ко Господу и Чудотворче.

Кондак 13
О Богомудрый и Богоносный угодниче Макарие, избави нас от тяжких скорбей, бед и напастей. Умоли о нас недостойных Господа преити нам попреще земныя жизни в смирении, терпении и покоянии, и по смерти нашея избавитися нам от мытарств горьких и вечных мук, и неосужденных предстати пред Престолом Господа и Владыки нашего и с тобою в радости и умилении сердца возопити Ему: Аллилуяю
(Сей кондак читать трижды)

Икос1 и Кондак1.

Молитва
О Священная Главо, преподобне преблаженне отче наш Макарие, не забудь убогих твоих до конца. Но поминай нас всегда во святых твоих и богоприятных молитвах к богу. Помяни стадо твоё, еже сам насадил еси и не забуди посещати чад твоих, но моли за ны ко Господу и не презри нас верую и любовию чтущих святую память твою. Помяни нас недостойных у Престола Вседержителя и не престай молитеся ко Христу Богу: тебе бо дадеся благодать за ны молитися. Не мним бо тя суща мертва, аще бо и телом преставился от нас, но и по смерти убо жив пребываеши. Не отступи от нас, молим тя, преподобне отче наш Макарие, избави нас от всякая прелести бесовские и козней диавольских. Пастырю наш добрыя, се бо мощей твоих рака пред очима нашима видима есть всегда, но твоя святая душа со Ангельскими воинствы со безплотные лики с небесными силами всегда предстоящи достойно веселится. Ведуще тя воистину и по смерти жива суща, тебе припадаем, тебе молимся, еже молится за ны Всесильному Богу о пользе душ наших и испросити время на покояние, паче же невозбранно проити от земли на небо. Мытарств же горьких, бесов воздушных и князей и вечныя муки да избавимся, и небесного царствия наследницы будем со всеми угодившими Господу нашему Иисусу Христу. Ему же подобает всякая слава, честь и поклонение со безначальным Его Отцем, и Пресвятым и животворящем Его Духом, ныне и присно и во веки веков. Аминь.

Тропарь, Глас1
Пустынный житель, и в телеси Ангел и чудотворец явился еси Богоносе Отче наш Макарие, постом, бдением, молитвою, небесная дарования приим, исцеляеши недужные, и души верою притекающих Ти. Слава давшему Тебе крепость. Слава венчавшему Тя. Слава дествующему Тобою всем исцеления.

Кондак, глас 8
Воздержанием плоть изнурил еси, и непрестанными молитвами яко Ангел возвысился еси. Струями же слезными бесовские полки погрузил еси, и ныне во свете невечернем ликуеши у Хритса бога, и приходящим ко святому твоему гробу неоскудно исцеление подаеши, верою вопиющим Тебе:
Радуйся Отче Макарие преподобне.


Житие приеподобного Макария Писемского
(память преподобного Макария Писемского 23 января и 22 июня нового стиля)

Преподобный Макарий происходил из рода бояр Писемских, издавна принадлежащих к селу Покровское (ныне не существующее) на реке Письме, что в 25 верстах от г.Буя и в 75 верстах от г.Костромы.
Первоначальные наставления в иноческом житии прп. Макарий получил от прп. Сергия Радонежского. Но по выхаде из Радонежской обители почти постоянным его наставником был прп.Павел Комельский-Обнорский, который и сам был учеником игумена Радонежского. Но прежде водворения на Обноре прп.Павел 50 лет провел в разных монастырях и пустынях, в том числе и в великой Авраамиевой пустыне. Направляясь отсюда в Комельский лес, прп.Павел остановился в безлюдной местности, на берегу неширокой лесной реки Письмы, в современном Буйском лесу на крутом правом берегу ея, поселился первоначальнов совершенном одиночестве, но после нескольких лет пребывания здесь, пришёл к нему благоговейный инок Макарий, и жил он здесь долгое время в иноческих подвигах, в совершенном уединении. Но когда стали стекаться к нему ученики и селиться около его уединенной келии, он по совету своего наставника и по его ходотайству перед властями основал для братии обитель Преображения Господня и был в ней первым игуменом.
Прп.Павел поржил с Макарием более 20 лет. Затем отправился в путь на поиски так ему дорогого безмолвного места пустыннаго подвига, встретив на своем пути пустое дупло огромной устаревшей липы, прп.Павел поселился в нем, прожив около 3-х лет, после чего удалился на реку Обнору, что было около 1389 г.
Если время основания обители восходит к 1414г., то основание Макариевой пустыни нужно относить также к первой четверти 15 века.
Отдельной службы прп.Макария не сохранилось, но память его издавна совершается вместе с прп.Павлом Обнорским 10 (23) января. Эта дата преставления прп.Павла Обнорского в 1429 году.
Учитывая их совместную подвижнеческую жизнь Святая Церковь установила совершать молитвенную память обоих святых в один день.
Молитвенная память прп.Макария совершается и летом 9 (22) июня.Непреложным свидетельством богоугодной жизни прп.Макария на месте основания им святой обители служат святые мощи, почивающие здесь опд спудом деревянного храма во имя Преподобного Макария. Верующие едут поклониться Святому угоднику, попросить помощи, исцеления, взять воды из колодца, выкопанного 600 лет назад руками прп.Макария. Над гробом прп.Макария Писемского совершаются много чудес и исцелений, находятся без вести пропавшие люди, кто с верою и любовию призывает его святое имя.[/spoiler]

[Раб божий Константин]

Акафист святому преподобному Макарию Римлянину, Новоградскому чудотворцу.
[spoiler]Кондак 1
Избранный и дивный подражателю пророков Илии и Крестителя, пустынным житием им поревновавый и совершенно Богу угодивый, преподобне отче Макарие. Песньми восхваляем тя с любовию, святаго заступника нашего. Ты же, яко имеяй дерзновение ко Господу, молися непрестанно о спасении нас грешных, и от всяких бед свобождай зовущих ти:
Радуйся, Макарие, великий пустынножителю.

Икос 1
Ангелом любезную чистоту юности твоея возлюбив, преподобне отче Макарие, Ветхий Рим отечество твое оставил еси, и во страну Российскую яко нищ и странен пришел еси, да зде обрящеши пристанище благоприятное ко спасению. Темже славим тя, яко истиннаго последователя Христова, и зовем ти хвалебно:
Радуйся, Рима доброе прозябение.
Радуйся, Новаграда духовное украшение.
Радуйся, Евангелиа Христова верный послушателю.
Радуйся, заповедей Иисусовых ревностный исполнителю.
Радуйся, Единаго Христа от всея души твоея возлюбивый.
Радуйся, стезею правою вослед Его ходивый.
Радуйся, постом умертвивый в себе душетленныя страсти.
Радуйся, молитвами усердными отразивый вся искушения диавольская.
Радуйся, возшедый на высоту совершенства духовнаго.
Радуйся, приникий во глубину смирения святаго.
Радуйся, слез твоих теченьми уплодоносивый пустыню неплодную.
Радуйся, из глубины воздыханьми привлекий на ню Божию благодать.
Радуйся, Макарие, великий пустынножителю.

Кондак 2
Видев Всевидец Господь благое души твоея изволение, отче Макарие, еже служити и благоугождати Ему в безмолвии пустыннем, указа тебе пустыню блатную и непроходимую в пределех Великаго Новаграда, да вселишися тамо, един Единому Богу работати в пениих, бдениих и пощениих. Ты же пустыню, от Бога тебе указанную, обрет, вселился еси в ней, яко в раи сладости зовый: Аллилуиа.

Икос 2
Разумев место, от Бога тебе указанное к совершению тамо подвигов пустынных, и возлюбив е, отче Макарие, со слезами теплыми Богу молился еси, да сподобит тя скончати на нем житие твое земное, и псаломски взывал еси: «Се покой мой, зде вселюся во век». Мы же воспоминающе таковое твое благое изволение, вопием ти сице:
Радуйся, безмолвия любителю, пустыню подвиги твоими освятивый.
Радуйся, жестокое пустынное житие проходивый.
Радуйся, псалмопении немолчными Бога славивый.
Радуйся, молитвы непрестанныя Господеви возносивый.
Радуйся, постниче не изнемогаяй, былием пустынным питавыйся.
Радуйся, трудолюбче нелицемерный, праздность возненавидевый.
Радуйся, худыя и многошвенныя ризы носивый.
Радуйся, вериги железныя Христа ради на ся возложивый.
Радуйся, коленопреклонения многая совершавый.
Радуйся, в терпении и смирении преуспеявый.
Радуйся, слезами молитвенными орошенный.
Радуйся, равноангелен на земли бывый.
Радуйся, Макарие, великий пустынножителю.

Кондак 3
Силою Божиею укрепляемь, Макарие преподобне, великия подвиги и труды пустынныя благодушно проходил еси, и вся страхования и искушения диавольская молитвою усердною отразил еси, знамением креста Христова враги невидимыя прогоняя и побеждая, во еже не можащи им приближитися к тебе, егда пел еси Богу хвалебную песнь: Аллилуиа.

Икос 3
Имея помысл чист и непорочну душу, отче Макарие, в пустыннем безмолвии видений небесных сподобился еси, и ангелов собеседник был еси, иже утешении благодатными услаждаху тебе скорби пустыннаго пребывания. Сего ради слышиши от нас благохваления таковая:
Радуйся, рабе Господень благий и верный.
Радуйся, молитвенниче благоприятный и многослезный.
Радуйся, ангельскаго посещения удостоенный.
Радуйся, на земли небесная созерцавый.
Радуйся, учителю благочестия.
Радуйся, наставниче богомудрия.
Радуйся, древо благосеннолиственное, в пустыни возрастшее.
Радуйся, плоды сладкия Христу принесый.
Радуйся, пустыню уплодоносивый.
Радуйся, пустынное озлобление мужески терпевый.
Радуйся, путем тесным шествовавый.
Радуйся, пространство Царствия Божия обретый.
Радуйся, Макарие, великий пустынножителю.

Кондак 4
Бурю многомятежную житейскаго моря безбедно прешел еси, преподобне отче Макарие, и во пристанище безстрастия достигл еси, направляемь заповедьми Христа Бога, яже быша светильник ногама твоима и свет стезям твоим. Темже на земли достойно и праведно воспевал еси Триединому Богу: Аллилуиа.

Икос 4
Слышавше глаголы твоя богодухновенныя, ловцы зверей дивиих, обретшии кущу твою в пустыни, отче Макарие, ангела паче, неже человека, мняху тя быти, и радовахуся зело, сподобльшеся твое благословение и молитвы получити. Ты же хлеб твой сухий с ними разделил еси, и путь им правый указав, слышал еси от них благодарственныя глаголы сицевыя:
Радуйся, правило веры истинныя.
Радуйся, образе кротости духовныя.
Радуйся, человече Божий, преподобием украшенный.
Радуйся, воине Христов, враги невидимыя победивый.
Радуйся, мира дольняго мудрый странниче.
Радуйся, пустыннолюбивый Господень избранниче.
Радуйся, великих пустынножителей верный подражателю.
Радуйся, древних богоносных отец ревностный последователю.
Радуйся, пустыню непроходимую в жилище себе избравый.
Радуйся, дебрь блатную славословии Божиими огласивый.
Радуйся, богопросвещенный подвижниче.
Радуйся, ангелонравный человече.
Радуйся, Макарие, великий пустынножителю.

Кондак 5
Боготечное светило быв, отче Макарие, к солнцу правды Христу приводил еси человеки, приходившыя к тебе в пустыню послушати от тебе глаголы жизни вечныя. Ибо дадеся тебе от Господа благодать поучения духовнаго, и бысть язык твой яко трость книжника скорописца, начертаваяй на сердцах человеческих спасительныя заповеди Христа Бога, Емуже умиленно пел еси: Аллилуиа.

Икос 5
Видев люди, приходившыя к тебе в пустыню, отче Макарие, церковь тамо во имя Пресвятыя Богородицы, честнаго и славнаго Ея Успения, соорудил еси. И обитель иноческую устроил еси, таже священства благодать восприем, игумен тоя обители был еси, приводяй братию твою пустынную ко спасению. О сем тя хвалим и зовем:
Радуйся, непорочный олтаря Господня служителю.
Радуйся, Таинств Божественных достойный совершителю.
Радуйся, преподобнии руце твои со дерзновением горе воздеявый.
Радуйся, молитвы благоумиленныя у престола Божия приносивый.
Радуйся, пастырю добрый собраннаго тобою стада пустынных овец.
Радуйся, неусыпный делателю винограда Христова.
Радуйся, сотворивый и научивый, и того ради велий нареченный во Царствии Небеснем.
Радуйся, отечески возлюбивый всю о Христе братию твою.
Радуйся, учивый благовременно чада твоя духовная богоугождению истинному.
Радуйся, бывый образе преподобия твоим учеником.
Радуйся, имя Господа Иисуса во устех и в сердце твоем непрестанно имевый.
Радуйся, скорби и лишения пустынныя радостно терпевый.
Радуйся, Макарие, великий пустынножителю.

Кондак 6
Проповедник был еси евангельскаго учения братии твоей, преподобне отче Макарие, и чада твоя духовная верно руководил еси к Царствию Небесному, идеже есть жилище всех спасенных милосердием Христа Бога, пришедшаго в мир спасти падшее человечество и давшаго людем во спасение Своя божественныя заповеди, имже последовав, соделался еси истинный Его угодник, немолчно воспевая Ему песнь хвалы и благодарения: Аллилуиа.

Икос 6
Возсиял еси в пустыни светом благоразумия, отче Макарие, и дебрь блатную и неудобопроходимую во училище благочестия претворил еси богомудрыми твоими словесы, имиже приходившыя к тебе верно наставлял еси на стезю богоугождения и спасения. Тебе убо, святому учителю небесныя истины, благодарно зовем:
Радуйся, Евангелиа Христова немолчный проповедниче.
Радуйся, апостольских преданий ревностный хранителю.
Радуйся, верою правою и делы благими Богу угодивый.
Радуйся, вослед тебе и чада твоя духовная к Нему приведый.
Радуйся, не сокрывый таланта, тебе врученнаго Домовладыкою.
Радуйся, куплю многу им сотворивый, спасение душ человеческих.
Радуйся, пустыню облагоухавый сладким благоуханием Христовым.
Радуйся, в ней насадивый духовныя цветы добродетелей.
Радуйся, яко твоими ученьми грешнии к Богу в покаянии обратишася.
Радуйся, яко твоими наставленьми заблуждшии правый путь спасения обретоша.
Радуйся, ближних твоих искренно возлюбивый.
Радуйся, спасению их душевному усердно послуживый.
Радуйся, Макарие, великий пустынножителю.

Кондак 7
Хотение имел еси, преподобне отче Макарие, еже Богу благоугождати и спасению душевному ближних твоих благочестно служити. Темже всех приходивших к тебе приимал еси с любовию, и яко кормчий добрый, утомленныя треволнением житейскаго моря приводил еси в тихое пристанище пустыннаго иноческаго жития, поучая их сердцем и усты немолчно возглашати Богу: Аллилуиа.

Икос 7
Новаго тя Макариа Великаго, наставника душеспасительнаго, яви Христос во стране Российстей, преподобне отче, и дивными дары Божия благодати обогати тебе, душевныя ради твоея чистоты и многия святости: дадеся бо ти свыше благодать чудотворения и прозорливства, и был еси пророк и врач безмездный людем, иже научишася звати тебе:
Радуйся, крине пустыннаго прозябения.
Радуйся, маслино Божия благословения.
Радуйся, пустыню духовно уплодоносивый.
Радуйся, обитель иноческую в ней возградивый.
Радуйся, чада послушания и смирения в ней населивый.
Радуйся, отец истинный учеником твоим бывый.
Радуйся, болящыя молитвою твоею исцеливый.
Радуйся, скорбящыя словесы твоими богомудрыми утешивый.
Радуйся, будущая яко настоящая созерцавый.
Радуйся, помышления человеческая прозревавый.
Радуйся, древним пророком равночестный.
Радуйся, даров Святаго Духа преисполненный.
Радуйся, Макарие, великий пустынножителю.

Кондак 8
Странник и пришлец был еси во стране Российстей, преподобне отче Макарие, непрестанно взыскуяй Отечества Горняго, Иерусалима Небеснаго. Темже всякое попечение о земнем стяжании отложил еси, и в крайней нищете жизнь твою провождал еси, да обогатишися нетленным златом от праведнаго Мздовоздателя Христа Бога, Емуже присно пел еси: Аллилуиа.

Икос 8
Весь в Бозе быв, преподобне отче Макарие, во глубочайшую пустыню от обители твоея удалился еси, и на острове посреде блата кущу себе поставив, в безмолвии совершеннем молитвами непрестанными с Богом беседовал еси, мшиц угрызение и пустынное озлобление мужественно терпя. Поминающе убо таковое твое терпение и злострадание, яко мучеников сострадальца чествуем тя звании сими:
Радуйся, безстрастие совершенное стяжавый.
Радуйся, безмолвия ненарушимаго возжелевый.
Радуйся, молитвы непрестанныя возлюбивый.
Радуйся, образ злострадания и долготерпения себе явивый.
Радуйся, тело твое мшиц угрызением уязвивый.
Радуйся, нищелюбец крайний бывый.
Радуйся, блаженство нищих духом унаследивый.
Радуйся, о едином на потребу всегда помышлявый.
Радуйся, на земли небесно поживый.
Радуйся, во плоти безплотным поревновавый.
Радуйся, мучеников сострадальче.
Радуйся, преподобных красото.
Радуйся, Макарие, великий пустынножителю.

Кондак 9
Всем приходившым к тебе в пустыню, преподобне отче макарие, бысть дивно видети тя, в раздранней и многошвенней ризе ходившаго, вериги тяжкия на раменах носившаго и в месте блатнем уединенно пребывавшаго, вне всякаго человеческаго утешения. Обаче ты вся приходившыя со светлым лицем и любовию отеческою приимал еси, богатыя и убогия, вельможи и простыя, и коемуждо слово душеполезно изрекал еси, увещавая их благоугождати Богу верою правою и делы благими и звати Ему: Аллилуиа.

Икос 9
Витии премудрыя превозшел еси благодатным действом словес твоих, преподобне отче Макарие, зане теми грешныя на покаяние приводил еси, кающыяся уцеломудрил еси, подвизающыяся в добродетели укрепил еси, и всем путь спасительный ко Христу показал еси, по немуже сам неуклонно шествовал еси до блаженныя твоея кончины, достоин воистинну явився похвал таковых:
Радуйся, написавый на скрижалех сердца твоего закон Христов.
Радуйся, провозвестник его ближним твоим бывый.
Радуйся, яко быша словеса твоя меда сладчайша жаждавшым учения духовнаго.
Радуйся, яко твоими наставленьми спасошася мнози.
Радуйся, из глубины пустыни светивый миру.
Радуйся, от дебри блатныя возсиявый зарею благоразумия.
Радуйся, Российския страны благодатное озарение.
Радуйся, Новаграда духовное просвещение.
Радуйся, главо святая, благодатию Божиею осененная.
Радуйся, источниче обильный учения душеспасительнаго.
Радуйся, проповедниче сладкоглаголивый, вещавый словеса жизни вечныя.
Радуйся, уготовавый ученьми твоими Господеви подвижники совершенныя.
Радуйся, Макарие, великий пустынножителю.

Кондак 10
Спасения надежду стяжал еси при исходе твоем, преподобне отче Макарие, и якоже пшеница зрелая, во время пожатая, кончиною святою преселился еси от земли во обители горния, прияти мзду от руки праведнаго Мздовоздателя Христа, Иже вчини душу твою со святыми, немолчно возглашающими пред Престолом Славы Его победную песнь: Аллилуиа.

Икос 10
Царя Небеснаго Христа верный раб и угодник был еси, преподобне отче Макарие. Темже и доныне место пустынное твоих подвигов ясно свидетельствует о твоем богоугождении, яко ты со Христом во обителех блаженства вечнаго водворяешися, благоухание чудное испущая от честнаго твоего гроба. Сего ради вопием ти:
Радуйся, радостно предавый душу твою в руце Божии.
Радуйся, святую кончину получивый в возмездие трудов твоих.
Радуйся, благоухание сладостное испустивый от мертваго твоего телесе.
Радуйся, сие благоухание и доныне испущаяй верным от честнаго твоего гроба.
Радуйся, мощами твоими в пустыни твоей погребенный.
Радуйся, душею безсмертною в Сионе Горнем водворенный.
Радуйся, в недрех земных смиренно почиваяй.
Радуйся, от раки твоея преславно исцеления источаяй.
Радуйся, чудесы многими прославленный.
Радуйся, сострадания к людем преисполненный.
Радуйся, благий целебниче недугов душевных и телесных.
Радуйся, небесный заступниче с верою к тебе притекающих.
Радуйся, Макарие, великий пустынножителю.

Кондак 11
Пение Пресвятей Троице горе приносиши, преподобне отче Макарие, и присно ходатайствуеши за люди, молитвенно тя почитающыя, прося им мира свыше и благопоспешения во всем благом. Молися, угодниче Божий, и за нас смиренных и грешных, подвиги твоя хвалебно воспоминающих и имя твое святое в помощь призывающих, да не лишени будем наследия небеснаго и пения со святыми: Аллилуиа.

Икос 11
Светильника тя благодатнаго вемы, преподобне отче Макарие, и прославляем прославльшаго тя Господа, Иже чудесы многими гроб твой ознаменова. Струи бо исцелений благодатных источаеши верным, во еже вопити тебе:
Радуйся, земный ангеле.
Радуйся, небесный человече.
Радуйся, безмезднаго врачевания источниче.
Радуйся, милости духовныя подателю.
Радуйся, мироположнице благоухания Христова.
Радуйся, услаждаяй душы наша вонею сладкою от святаго твоего гроба.
Радуйся, скорбящих утешителю.
Радуйся, болящих целителю.
Радуйся, в сониих и видениих верныя посещаяй.
Радуйся, пустыню твою чудесы прославляяй.
Радуйся, смирением высокая стяжавый.
Радуйся, дерзновение многое ко Господу получивый.
Радуйся, Макарие, великий пустынножителю.

Кондак 12
Благодать от Господа испроси нам, преподобне отче Макарие, почитающым с любовию святую память твою и усердно притекающым к честней раце мощей твоих святых, от неяже чудесная исцеления подаеши недужным. Темже прилежно молимся тебе: исцели наша недуги душевныя и телесныя, и помози нам предстательством твоим спасение вечное получити, да вкупе с тобою воспоем Дивному во святых Своих Богу: Аллилуиа.

Икос 12
Поюще подвиги твоя пустынныя, преподобне отче Макарие, ублажаем равноангельное житие твое, имже поучаеши нас ко славословию Христа Бога, явившаго тя чудотворца преславна. Темже припадающе к раце мощей твоих, умильно глаголем:
Радуйся, Пресвятыя Троицы верный угодниче.
Радуйся, Пресвятыя Богородицы усердный славителю.
Радуйся, ангельских ликов собеседниче.
Радуйся, всех святых сожителю.
Радуйся, пустынножителей славо и похвало.
Радуйся, Российския Церкве духовная лепото.
Радуйся, пустыни твоея сокровище благодатное.
Радуйся, недугующих врачевство Богом дарованное.
Радуйся, приходящих на поклонение мощем твоим святым благий предстателю.
Радуйся, почитающих святую память твою небесный покровителю.
Радуйся, душ и телес наших целебниче.
Радуйся, преславный и предивный чудотворче.
Радуйся, Макарие, великий пустынножителю.

Кондак 13
О преподобне и богоносне отче Макарие! Вонми милостивно гласу моления нашего, и приими сие малое похвальное пение, с верою и любовию тебе приносимое от нас недостойных, и умоли Господа и Владыку нашего, избавити нас от погибели вечныя и сподобити блаженства святых, вопиющих Ему вечно хвалебную песнь: Аллилуиа.
Этот Кондак читается трижды, затем Икос 1-й и Кондак 1-й

Молитва святому преподобному Макарию Римлянину, Новоградскому чудотворцу
О священная главо, земный ангеле и небесный человече, преподобне и богоносне отче Макарие! Припадаем ти с верою и любовию и молимся прилежно: яви нам смиренным и грешным святое твое заступление. Се бо, грех ради наших, не имамы свободы чад Божиих просити о потребах наших Господа и Владыку нашего, но тебе молитвенника благоприятнаго к Нему предлагаем, и просим тя со усердием многим: испроси нам у благости Его благопотребныя дары душам и телесем нашым; веру праву, надежду спасения несомненну, любовь ко всем нелицемерну, во искушениих мужество, в злостраданиих терпение, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и безмятежное житие, благую христианскую кончину и добрый ответ на Страшнем Суде Христове.
Испроси, угодниче Божий, у Царя царствующих и Господа господствующих: страждущую страну Российскую от лютых безбожник и власти их да свободит, и да возставит престол православных правителей; верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш.
Не забуди, преподобне отче, и пустынное место подвигов твоих, но благоволи о нем и прослави е чудотворении твоими: и всех, приходящих на поклонение мощем твоим святым, от искушений диавольских и всякаго зла милостивно избави.
Ей, чудотворче святый! Не лиши нас помощи твоея небесныя, но молитвами твоими вся ны приведи во пристанище спасения, и наследники яви нас всесветлаго Царствия Христова, да поем и славим неизреченныя щедроты Человеколюбца Бога, Отца и Сына и Святаго Духа, и твое святое отеческое заступление, во веки веков. Аминь.[/spoiler]

[Раб божий Константин]

Акафист святому преподобному и богоносному отцу нашему Максиму Греку.
[spoiler]Кондак 1
Избранный служителю Предвечнаго Слова, всехвальне отче наш Максиме, в преславней земли Греческой прозябший и в державе российстей подвизи просиявший, поучениями и писании твоима в благочестии и богообщении нас утвердивый, величаем ныне многотрудное житие твое и на предстательство твое пред престолом Триипостаснаго Бога нашего упование свое возлагая, вопием ти сице:
Радуйся, преподобне и богоносне отче Максиме, на путь спасение вечнаго нас наставляющий!

Икос 1
Ангелов и человеков Творец и всея твари Зиждитель, содержаяй в деснице своей судьбы царств и народов и над каждым из чад своих отеческое промышления являяй, произрасти тя, богомудре отче наш Максиме, от корени именитаго и рода знатнаго, благоволи украсити тя в премудрости отец святых и аки просветителя всемудраго направи тя в великое княжество Московское, да укрепиши народ русстий в вере истинней и подлинными наследниками духовнаго богатства Византии ны сотвориши. Мы, сия ныне поминающе, просим тя, приклони к нам милосердие Всемудраго и Всемогущего Отца Небеснаго и приими милостивно похвалы сия:
Радуйся, богодухновенных отец достойных приемниче и сонаследниче;
Радуйся, философов и риторов премудрых пречудный наставниче;
Радуйся, всех истины взыскующих небесным благословением осеняющий;
Радуйся, от путей соблазнов и прельщений их удаляющий;
Радуйся, в богомыслии разум нас утверждающий;
Радуйся, в сердцех наших пламень любви к Богу и ближним возжигающий;
Радуйся, тихим светом надежды ны благодатно озаряяй;
Радуйся, в вере твердыми выну быти ны сподобляяй;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 2
Видевше благочестивыя и богомудрыя родителя твоя, святый Максиме, запущение отчизны их по падении преславнаго царствия греческаго, обаче уразумеша, яко выну милостив есть Господь к верным своим, и во уповании таковом и житии по заповедем евангельским тя утвердиша. Мы же, сия воспоминающе, Господеви поем: Аллилуйа!

Икос 2
Разум твой в послушание вере отдавше, преславными родители твоима и иныма добрыма наставники поучаемый, богоносне Максиме, в благословении пред Творцем всяческих начаток премудрости твоея и дел благих положил еси; послеже усердно поработал еси учения отец святых и философов премудрых постигая, восходя по лествице добродетелей в меру возраста духовнаго. Сего ради величаем тя сице:
Радуйся, дары благости и добраго совета нас преображающий;
Радуйся, кротостию голубиною и мудростию змеиною нас обогощающий;
Радуйся, ко усердному чтению святаго Писания ны побуждаяй;
Радуйся, к усиленной молитве и в псалмопении нас утверждающий;
Радуйся, в трезвлении духовнем и уповании на Бога всех нас утверждающий;
Радуйся, душетленных навыков и злых обычаев удалятися нас научающий;
Радуйся, в соблазнех и прельщении сущих помощь небесную посылающий;
Радуйся, в милосердии к себе и ближним наших взрастати нам помогающий;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 3
Силою благодати Божия хранимый, блаженне Максиме, в земли италийстей сый, не врежден пребыл еси от тлетворнаго духа века того, и, пчеле трудолюбивей подобно, нектар благий мудрости отовсюду сбирал еси, в познании истины Христовей возрастая; Иерониму благочестивому внимая к иноческому житию устремил еси мудрое сердце твое, отче святый; Господеви же неустанно возносил еси пение ангельское: Аллилуйа!

Икос 3
Имуще в души твоея ревностное желание Спасителю Нашему, за ны Распятому, всеусердно послужити удалился еси, богославне Максиме, из чудней земли Италийстей на преславну гору Афонскую, идеже монашество и священство сподобился еси прияти: наставлением старец святогорских следуя, от добродетели к добродели восходил еси, угодниче Христов, внутреннею человека обновляюще и образ Божий в себе отверзая. Сему же деланию духовному и нас настави, да зовем ти:
Радуйся, от суеты мирския к священному безмолвию притекий;
Радуйся, упокоение от невзгод и треволнений в тихих обителех обретый;
Радуйся, свет нетварный еще на земли созерцавый;
Радуйся, неизреченную сладость богообщения познавый;
Радуйся, духовныя очи наша ко зрению Бога изощряющий;
Радуйся, ушеса наша к слышанию небесных глагол отверзающий;
Радуйся, даром различения духов нас обогащаяяй;
Радуйся, от заблуждений и падений духовных нас свобождаяй;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 4
Бурю страстей и сомнений греховных молитвою, постом и трезвением сердечным победил еси, всехвальне отче наш Максиме, ибо на твердом камени истиннаго и неприложнаго исповедания Христова положил еси основание душевной храмины твоея. Сего ради молим тя: утверди и нас в неприложном уповании на Милосердие Святей Троицы, да с тобою сподобимся во веки воспевати: Аллилуйа!

Икос 4
Слышавше благоверный великий князь Московский Василий Третий, яко во обителех афонскиих книжницы велемудрыя и философы богопросвещенныя обретаются, повеле призвати оныя в державу свою, дабы народ русский в вере Христовой и делании заповедей евангельских утвердити и укрепити. Ты же, преблагословенный Максиме, благодатию Божиею присноукрепляемый, отбыл еси в пределы московския, дабы волю Божию исполнити и правду Его явити в стране нашей. Сего ради просим тя: нас, слабых в вере и в уповании на Христа, Господа Нашего, укрепи, да зовем ти сице:
Радуйся, тягот дороги дальния и жития в пределех северных не убоявыйся;
Радуйся, чуждый кровию, обаче духом своим для русскаго народа ставший;
Радуйся, землю греческую и российскую паки и паки в вере соединяющий;
Радуйся, от суеты и преходящих пристрастий ны исцеляющий;
Радуйся, к вечней правде Божией взоры духа обращати ны научающий;
Радуйся, идолы духовные о камень истины Христовей разбивающий;
Радуйся, Христа – Спасителя паче всего земнаго чтити подвизающий;
Радуйся, милость Всенепорочней Богоматери к нам приклоняющий;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 5
Богоявленней и боготочней звезде, путь ко Христу озаряющей и освящающей воистину уподобился еси, преподобне отче наш Максиме, егда в пределех российстих сый, истину Божию безстрашно исповедал и проповедал еси, суеверия языческия и звездопоклонническую ересь, мздоимство и неправдолюбие, забвение заповедей и любви к ближнему всеусердно обличал еси. Сего ради просим тя, всеблагий наставниче наш, научи нас токмо Спасителю служити, не соблазняясь земными преходящима благами и сподоби во веки нужно с тобою выну воспевати Христу: Аллилуйа!

Икос 5
Видевше тя, благословенне отче наш Максиме, благочестивыя русстии люди, почаху прихождити к тебе в прехвальную Чуда Святаго архистратига Михаила обитель, иже во граде Москвы, совета, наставления, утешения и молитвы твоея ради. Ты же, никого от пришедших не отринув, ко пользе ближних твоих всеусердно послужил еси. Мы же, веруя, яко ты ныне во благодати Господней сый, сугубо внемлеши мольбам нашим с надеждою, отрадою и умилением воспеваем ти сице:
Радуйся, старче благий, в возрастании богопознания ближних твоих утверждавый;
Радуйся, от духовной дремоты и праздности духа приходивших к тебе исцелявый;
Радуйся, подлинному благочестию и любви к ближнему я научавый;
Радуйся, в уповании на Премудрость Милосерднаго Творца их укреплявый;
Радуйся, от закваски фарисейския и лицемерия преславно исцеляяй;
Радуйся, от теплохладия и омертвления сердечнаго благодатно избавляяй;
Радуйся, о просвещении духовных очес наших Бога умоляяй;
Радуйся, в тишине помыслов хвалити Христа всех нас подвизаяй;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 6
Проповедник и ревнитель жития благочестиваго воистину явился еси, всеблагохвальне отче наш Максиме Святогорче, яко твердо и неукоснительно обличал еси, незнание истин веры Христовой, несоблюдение заповедей Спасовых, исполнение токмо внешняго обряда, безо всякого подвига духовнаго в суетней надежде токмо на внешнее благочестие, наставлял бо еси всем сердцем и всем помышлением, всем естеством нашим возлюбити Иисуса Сладчайшаго и умиленно воспевати Ему благодарения: Аллилуйа!

Икос 6
Возсиял еси светом богодарованныя премудрости твоея, о всехвальне отче наш Максиме, в земле Русстей, яко мнозиих во истине Христовой преславно утвердил, яко книзи Писания священнаго, святых отец творения и толкования перевел еси с наречия греческаго и латинскаго на язык словенский, яко богомудрия сочинения в назидание и пользу нам оставил еси, преподобне. Сего ради, величая прехвальные труды твоя, глаголим ти сице:
Радуйся, от мрака невежества к свету Премудрости Божия возводяй;
Радуйся, заблуждающихся и сомневающихся ко истине Христовой кротце приводяй;
Радуйся, труд переводчиков и книжных справщиков с небес благословляющий;
Радуйся, филологом и языковедам помощь твою посылающий;
Радуйся, разум богословов и благовестников светом небесным осеняющий;
Радуйся, иноков и мирян в богоугодном житии и милосердии укрепление;
Радуйся, пресвитеров в благочестии и трезвлении утверждение;
Радуйся, архиереев во трудех их благодатное удобрение;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 7
Хотяще нам славити тя, о богоносне отче наш Максиме, ведаем убо, яко язык человеческий не возможет достойно воспети всю полноту богоугодных подвигов твоих, все терпение твое, яже подъял еси, егда иерарси нечестивыя Тайн Божественных тя лишиша. Како убо возможно воспети глубину смирения твоего и высоту упования на Всемогущество и Любовь Отца Нашего Небеснаго, иже, аки слугу своего возлюбленнаго и ученика Христова прия тя и на лоне Авраамовем на веки упокои тя? Сего ради на предстательство твое надеяние наше возлагая, поим о тебе Вседержителю: Аллилуйа!

Икос 7
Новый Максим – исповедник воистину явился еси, преподобне отче, яко же и святый твой покровитель исповедал еси пред властителями нечестивыми истину учения Спасителя Нашего, от коей ни одесную и ни ошуюю не отошел еси, отче святый и богомудрый. Сего же ради от властей предержащих лишения, изгнание и заточение темничное притерпел еси. Мы же, исповеднические подвизи твоя желая славосновити, таковыя похвалы приносим ти:
Радуйся, во страданиях твоих десницею Всевышняго укрепленный;
Радуйся, яко злато в горниле испытаний тяжких преображенный;
Радуйся, купно с исповедническими лики во славе ныне торжествуяй;
Радуйся, купно с благовестники и просветители хвалу Богу воспеваяй;
Радуйся, подобно Златоусту, за вся благодарити Творца нас научаяй;
Радуйся, в радости и благоденствии помнити о милостех Господних подвизаяй;
Радуйся, в час скорби упование на высшее милосердие возлагати наставляяй;
Радуйся, горести и страдания наши в отраду и благополучие пречудно претворяяй;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 8
Странно бе людем благочестивым и благосердным зрети, яко ты, святый Максиме, в темнице заключенный и право писати лишенный, углием на стенах канон Всесвятому Духу-Параклиту написал еси; мы же, величая веру твою в животворящую благодать Всеблагаго Утешителя, смирение и незлобие твое воспеваем со умилением и просим тя, отче святый, сподоби и нас милости и даров Святаго Духа, да поем Ему всерадостно: Аллилуйа!

Икос 8
Всего себе подвигл еси на служение Господеви, богославне отче наш Максиме, ибо несомненне веровал еси, яко «во Отце существенне и Дух: от Него бо, аки от Единаго Начала, соприсносущна Оба сияют и пребывают о Себе в Живоначальных Ипостасех Своих». Мы же ныне величаем тя, святый отче, неизреченных тайн Божественных созерцателя всеблагоговейнаго, еще на земли нетварным сиянием осененнаго и просим тя: молитвы благоприятными твоима озари и нас светом Фаворстим и приими благосклонно лики сия:
Радуйся, Живоначальныя и Единосущныя Троицы Всесвятые премудрый служителю;
Радуйся, величая Отца Предвечнаго и Безначальнаго всеблагий тайнозрителю;
Радуйся, Сына Божия, Искупителя, вернейший последователю;
Радуйся, милосердия Всесвятого Параклита к нам всеусердный приклонителю;
Радуйся, ангельских хоров и собора праведных вседостойный сонаследниче;
Радуйся, преподобных отец афонских сомолитвенниче и собеседниче;
Радуйся, земли российския и еллинския вседрагое украшение;
Радуйся, Вселенския Церкви Христовой преизрядное похвало и утверждение;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 9
Всяческия муки душевныя и телесныя с достоинством священноинока и кротостию претерпел еси, всеблаженне Максиме; сего же ради утешения преславного сподобился еси от Господа Нашего, иже посла к тебе единаго от ангел своих, иже возвести ти, яко терпением твоим венец нетленный на небесех обрести имаши. Ты же, отче преподобне, с благодарностию воспел еси Господеви: Аллилуйа!

Икос 9
Вития многовещанныя и поэты всеискусныя, аки рыбы безгласные, немеют пред величием подвигов твоих, богоблаженне отче наш Максиме, ибо кто возможет достойно и всеправедно воспети вся труды твоея, яже подъял еси вящей славы Божия ради и пользы и просвещения ближних твоих, в странех италийской, греческой и в пределех державы российстей, ибо кто по достоянию воспоет терпения и муки твоея, иже с надеждою велиею и кротостию ангельскаго приял еси, обаче на милость твою к нам уповая, смиренным сердцем возносим ти похвалы сия:
Радуйся, усыпленных совестей скорый возбудителю;
Радуйся, сомнений и треволнений душевных благостный умирителю;
Радуйся, всех чтущих память твою преславный хранителю;
Радуйся, носителей имени твоего благодатный попечителю;
Радуйся, благих дел и милосердия богомудрый наставниче;
Радуйся, изгнанных, униженных и обездоленных небесный заступниче;
Радуйся, правды ради подвизающихся всеблагий покровителю;
Радуйся, неправедно гонимых и обидимых предобрый утешителю;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 10
Спасительный подвиг твой, о всеславне Максиме, совершивше, в руце Божии дух твой предал еси, с надеждою и отрадою велиею; ангелы же Господни вознесоша душу твою во обители Отчии; идеже Вседержатель венча тя нетленным венцем; сего ради просим тя, святый отче наш Максиме, егда же и мы оным сном смертным усыпати начнем, умоли Господа кротко душу нашу от тела отделити и власти бесовские ны избавити, да с тобою купно Всесвятей Троице воспоим: Аллилуйа!

Икос 10
Стеною всеблагомощных молитв твоих храниши днесь весь род христианский, о преподобне отче наш Максиме, и во всяком скорбном обстоянии помощь твою даруеши всем, имя твое всечестное призывающим. Ты бо во дни брани со шведами явился еси святому благоверному царю Феодору Первому, иже опочи под стогнами града Юрьева и глаголал еси ему: «Изыди из шатра, да не убиен будеши», и тако живот его сохрани, послеже и иных чудес множество сотворил еси. Сего ради мы с любовью таковыя похвалы тебе приносим:
Радуйся, благочестивейшаго государя от погибели лютей на поле брани сохранивый;
Радуйся, благоволение и милость твою велиему множеству чтущих тя явивый;
Радуйся, от опасений и злых человек выну нас оберегаяй;
Радуйся, от прельщений и искушений бесовстих ны избавляяй;
Радуйся, благоговению пред святынею церковною нас обогащающий;
Радуйся, узким путем шествовати ко Господу научающий;
Радуйся, от широких дорог соблазнов ны удаляющий;
Радуйся, от уз неведения, заблуждений и недоумений скоро разрешающий;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 11
Пения акафистное радостно приносим ти, о богоблаженне отче наш Максиме, и молим убо тя: всеблагомощным предстательством твоим исцели недуги наши душевныя и болезни телесныя, отврати от суеты помышления наши, настави нас в благочестивом житии, бедным отраду и утешение ниспошли, богатых к милосердию и благотворению подвигни, и всех нас настави нелицемерно Господеви воспевати: Аллилуйа!

Икос 11
Свет нетварный купно с сонмом отец преподобных созерцаеши ныне, богоблаженне отче наш Максиме, яко предстояй пред престолом Всесвятыя и Единосущныя Троицы и молишися о спасении и благоденствии всех христиан. Мы же, Святую память твою почитающе, с надеждою взываем к тебе, угодниче Христов, сотвори твою молитву о нас, да отстранимся от греха и возможем еще на земли суще возрадоватися о Господе, молитвами угодников своих, милующего преизобильно и спасающего ны. Сего ради мы паки со умилением произносим ти похвалы сия:
Радуйся, благовестников в делах проповеди Евангелия укрепляющий;
Радуйся, делателей на пустующия нивы Господни посылающий;
Радуйся, ревновати о спасении ближних нас научающий;
Радуйся, словеса мудрыя во уста наши влагающий;
Радуйся, от сомнений и маловерия скоро исцеляющий;
Радуйся, в час недоумения разум наш мыслию благою озаряющий;
Радуйся, внутренний мрак душ наших светом Христовым озаряющий;
Радуйся, от теплохладия и немилосердия сердца наша освобождающий;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 12
Благодать и дары Всепреблагаго и Всепресвятаго Духа Утешителя, Хранителя жизни нашея испроси нам, всеблагословенне отче Максиме, ты бо ныне во славе купно со праведными сыны Божиими и сонмами херувимов и серафимов предстоиши огнезрачному престолу Триипостасного Бога Нашего и простираеши преподобническия руце твои ко Отцу Света и Творцу миров и взываюши Ему: Аллилуйа!

Икос 12
Стеною богоприятных молитв твоих, преподобне отче наш Максиме, огради ны ото всякаго зла, скорбей и болезней избави ны, не посрами убо упования нашего, вемы бо, яко много может молитва твоя, отче праведный, у Царя Небеснаго, яко ты в сомне преподобных отец предстоиши пред престолом Всевышнего и предстательствуеши о всех, вопиющих ти сице:
Радуйся, покаянием души наши обновляти научаяй;
Радуйся, от уныния и тоски всех нас исцеляяй;
Радуйся, от ропота и неверия благодатное свобождение;
Радуйся, милосердия Божия к нам приклонение;
Радуйся, не творение, а Творца Предвечнаго, чтити ны научающий;
Радуйся, от суемудрия и пустословия ны отвращающий;
Радуйся, в преподобии и правде ны преславно утверждающий;
Радуйся, в Бозе все житие наше благодатно устрояющий;
Радуйся, преподобне и богоносне отце наш Максиме, на путь спасения вечнаго нас наставляющий!

Кондак 13
О преблагословенне отче, предобрый наш заступниче и любимый покровителю, всехвальне Максиме Святогорче! Милостивно приими усердное возносимое тебе пение и хваление, настави ны, пользуясь благами земными, не грешити против Господа Нашего; сподоби веру нашу плодотворней быти дел благих ради, яко да сподобимся в мире скончати земное житие наша и возможем с тобою купно Иисусу Сладчайшему во веки воспевати: Аллилуйа!
Сей Кондак глаголется троекратно, и затем паки Икос 1 и Кондак!

Конец и Богу Слава![/spoiler]

[Раб божий Константин]

Акафист святому новосвященномученику Максиму, первомученику Лемковскому
Егоже память святая Церковь совершает месяца иулиа в 24 день, таже августа в 24 день.
[spoiler]Кондак 1
Священномученику Максиму грешнии возносим победительныя и благодарственныя хваления, не бо яко наемник, душу свою за стадо свое положи, сего ради крепость неодолимую и венец нетленен победы от руку Христа пастыреначальника прият; темже поем ему:
Радуйся, величайший Максиме, страждущым и обидимым заступниче.

Икос 1
От глубины веры твоея, юже родители твоя благочестивая, Тимофей и Христина, в тебе всадиста и тя добре воспитаста, в любви к Богу и искреннему, и в благоговении к Божественным. Сего ради да радуется земля Лемковщина, место рождества твоего, святе, и с нами купно да вопиет чаду своему:
Радуйся, отроче родителема богобоязненныма рожденное в дому благочестивом.
Радуйся, яко бо плодовитая маслина, возрасл еси окрест трапезы отца твоего.
Радуйся, Ждиние, яже якоже древний Вифлеем, ничимже меньша еси в селениих земли твоея.
Радуйся, яко от тебе просия новый священномученик, доблий оружник веры православныя.
Радуйся, земле лемковская, ибо по вековным гонением и работе, твое отроча свободи тя жертвою своею.
Радуйся, той бо утверди в тебе веру православную, яко да духом и истиною Богу поклонишися.
Радуйтеся, горы Карпатския, отонудуже Максим прииде в помощь людем лемковским.
Радуйтеся, ибо кровию своею мученическою всех вас освяти.
Радуйтеся, яко исповеданием своим люди своя в вере святей укрепи.
Радуйся, теплый молитвенниче наших времен, Бога о нас грешных умоляющий.
Радуйся, егоже прошения о почитающих тя слышатся пред престолом Вышняго.
Радуйся, ходатайствуяй о спасении рода твоего и соотечественников твоих.
Радуйся, величайший Максиме, страждущым и обидимым заступниче.

Кондак 2
Егда в монастырь латиномудрствующих вшел еси вере учитися, отвратил еси лице твое от нечестия монашествующих тамо, и от презрения их к роду твоему. Темже на гору Почаевскую потекл еси, к тихому пристанищу святыя Лавры, идеже в чистоте и целомудрии истинам святыя веры православныя поучался еси, яко да возможеши в правде Богу молитися: Аллилуиа.

Икос 2
Како возможем восхвалити твое мужество и подвиг по достоянию, святе Максиме; еда возмогут устне наша бренная составити словеса чистыя хвалы; обаче приими сие убогое приношение наше, якоже вдовы две лепте Христос прият, и не отвержи нас верою зовущих ти:
Радуйся, сатане одолети нам помагаяй.
Радуйся, душетленныя демоны, хищницам птицам подобныя, от нас прогоняяй.
Радуйся, козни еретик волконравных познавати нас научаяй.
Радуйся, их зверовидныя хищения на ум и сердца наша гнушаяйся.
Радуйся, премогаяй вся искушения.
Радуйся, крилома духа твоего мысленне нас покрываяй и сохраняяй.
Радуйся, яко споборник и заступник наш, помогаяй нам во всех нуждах.
Радуйся, крепкий совоинственниче нам противу князя в мiре сем напасти творящаго.
Радуйся, мечу духа, обострен во еже разсещи лжеверие.
Радуйся, безбожия прогонителю.
Радуйся, яко уметы вся мимотекущая презревый.
Радуйся, плоть свою духу твоему покоривый.
Радуйся, величайший Максиме, страждущым и обидимым заступниче.

Кондак 3
От силы вышняго, яже осеняше тя в пастырстем твоем служении и жестоком заключении, святый священномучениче Максиме: незыблемо бо к вере святей православней прилепився, кончину твою доблественно сретил еси. Тем благодаряще Бога люди твоя присно поют Ему: Аллилуиа.

Икос 3
Любве ради к роду твоему многострадальному приял еси рукоположение во иереа, рукою блаженнейшаго иерарха Антония, и послан был еси в землю рода твоего пасти Христово стадо, смущаемое неисчетными хищники. Ныне же со бесплотными вои на небесех пребывая, слышиши от нас сицевая:
Радуйся, двери благоутробия Божия грешным отверзаяй.
Радуйся, кающымся грешником прощение от Бога подаваяй.
Радуйся, духа истины чистым сердцем получивый.
Радуйся, яко укреплься житием твоим и терпением ума, попрал еси прелесть мысленнаго сопостата.
Радуйся, щите веры, в брани противу врагов нас сохраняяй.
Радуйся, егоже тело многоценное оружием нечестивых умертвися.
Радуйся, яко в ризу, кровию твоею обагренную, Христу преставился еси.
Радуйся, конец желанный достиг, ныне лицезриши Спаса и Господа возлюбленнаго твоего.
Радуйся, пламень страстей утоляяй небесною прохладою.
Радуйся, огнь трясавицы в болезнех наших угашаяй.
Радуйся, землю окропивый кровию твоею.
Радуйся, ногама диавола поправый.
Радуйся, величайший Максиме, страждущым и обидимым заступниче.

Кондак 4
Бури сумнений и помыслов сопротивных не убойтеся, благочестивии лемковские людие, ниже да удалят вы от еже держатися крепко о вере истинней, ибо святый Максим доблественне душу свою положи, да утвердятся душы вашя во святей православней вере жертвою его. Сего ради, благодаряще о богоприятнем его исповедании, вопием Богу: Аллилуиа.

Икос 4
Слышавше о благочестии твоем, православнии люди Грабы к тебе притекоша умоляюще тя упасти их стадо благоверное; и служение сие взяв на ся, не яко наемник был еси, но пастырь истинный явился еси, душу свою за овцы полагаяй. Темже по достоянию тебе похвалы сия тебе воспеваем:
Радуйся, вся до конца претерпети, от Христа милостиваго благодать получивый.
Радуйся, яко Той укрепляше тя в лютейших муках.
Радуйся, в бедах и скорбех сущыя к заступлением святых прибегати наставляяй.
Радуйся, во всех нуждах наших к Богу обращатися нас научаяй.
Радуйся, терзания тела твоего доблественне претерпевый.
Радуйся, мужеством и терпением твоим мучителя неистовати сотворивый.
Радуйся, силу того упразднивый.
Радуйся, в любви к Богу и людем твоим Господу преставленный.
Радуйся, веры в Бога крепость явивый.
Радуйся, верныя Искупителя нашего прославляти подвизаяй.
Радуйся, образом жития твоего и смерти, многия ко Господу обративый.
Радуйся, яко долготерпением твоим венец правды на небеси приял еси.
Радуйся, величайший Максиме, страждущым и обидимым заступниче.

Кондак 5
Егда убиша тело твое, душа твоя горе возлете, во еже сопричтатися святым человеком и ангелом в превыспренних, чудное купнотворя с ними созвездие на тверди церковней, коегождо благодати яко звезда, верныя светом своим озаряющей, поющыя Богу: Аллилуиа.

Икос 5
Страстотерпчеству твоему дивятся даже маловернии и нелюбовнии, священномучениче; якоже бо отроцы святии, в пещи вавилонстей вверженныя, неуклонны во исповедании истиннаго Бога пребыша, сице и ты недвижимь был еси во исповедании веры православныя. Сего ради восхваляем мужество и терпение твое, поюще сице:
Радуйся, лукавствия диавола и аггелов его разоряющий.
Радуйся, всю силу их упраздняющий.
Радуйся, немощны их являющий.
Радуйся, творящий я ужасатися и трястися.
Радуйся, верныя ко спасению путеводящий.
Радуйся, заблуждающымся дерзостный обличителю.
Радуйся, в подвизе возвращения униатов в Церковь святую до конца отвергший себе самого.
Радуйся, ибо словеса Христовы, яко претерпевый до конца спасен будет, на тя исполнися.
Радуйся, угодниче Божий, Царствие вечное наследовавый.
Радуйся, праведнаго жития образе.
Радуйся, путь истиннаго покаяния еретиком являющий.
Радуйся, величайший Максиме, страждущым и обидимым заступниче.

Кондак 6
Воистинну виновен папа римский о заключении неправеднем твоем и умучении, величайший Максиме; от дмения бо властию своею хотяше поработити лемковския люди заблуждением своим. Обаче ведомым им тобою ко истинному свету православия, тии избавишася от козней и лукавствий онаго, и паки прицепишася к вере отцев своих, весело поюще: Аллилуиа.

Икос 6
От света изливаемаго на всех обидимых, жертвою доблественною твоею, новомучениче! Огненным бо мечем благодати Божиея вооружився, тьму лжи разгнал еси от безутешно утомляемых в сени латинских заблуждений долгия веки. Сего ради, восхваляюще Бога, дивнаго во святых своих, зовем ти:
Радуйся, горлицы светозарнейший светильниче.
Радуйся, тамо яко солнце сияющий, всех окормляя к тихому пристанищу.
Радуйся, имже сатана посрамися.
Радуйся, имже Христос прославися.
Радуйся, страстотерпцев сиятельная славо.
Радуйся, яко вещание страдания твоего радостию верныя исполняет.
Радуйся, сокровище даров изрядных Духа.
Радуйся, житием твоим Господу благоугодивый.
Радуйся, плевелы, в ниву церковную насажденныя исконным врагом человек исторгающий.
Радуйся, егоже терпение мучителем острое обличение бяше.
Радуйся, еретическия заблуждения испровергший.
Радуйся, совет нечестивых разгоняющий.
Радуйся, величайший Максиме, страждущым и обидимым заступниче.

Кондак 7
Мнозии от соотечественников твоих во узилища неправедно ввержени и убиени быша во время великия брани; аще и горькую чашу испиша, обаче мужеская жертва твоя сердца их вдохновляше, и руце и устны воздевше, Господеви православно песнь воспеша: Аллилуиа.

Икос 7
Вернии града Горлицы взяша святыя мощи твоя по блаженном отшествии твоем и честне земли предаша я, близ места убиения твоего, праведне Максиме; мощи же твоя честныя купель сотворишася, присно подавающий исцелений дарования, верою к ним притекающым и тебе зовущым:
Радуйся, с небеси на братию твою на земли призирающий.
Радуйся, о всех в помощь тебе призывающих молящийся.
Радуйся, образом жития святаго твоего последовати Христу всех нас зовущый.
Радуйся, безпредельное величие Божие именем твоим знаменующий.
Радуйся, ищущих спасение досточудный к Всевышнему окормителю.
Радуйся, по узкому и правому пути ко Христу шествовавый.
Радуйся, яко вшел еси в небесныя чертози.
Радуйся, словес еретиков отвративыйся.
Радуйся, яко исповедав святую веру Христову пред человеки, свидетеля Христа имееши пред Отцем небесным.
Радуйся, верный рабе Христов, верности ради Царствие вышнее наследивый.
Радуйся, купно со ангелы пребывающий, всех святых присный.
Радуйся, Господа Христа всею крепостию возлюбивый.
Радуйся, величайший Максиме, страждущым и обидимым заступниче.

Кондак 8
Безсердечный мучитель, извлекий тя от узкия келии и поставивый тя посреде стогны Горлицы, во еже умертвити тя. Но вся злоба и ярость его тщетны бесте, ибо вместо еже православие смертно уязвити, той содела тя мученика, в вои небесными непрестанно поюща: Аллилуиа.

Икос 8
Вся земля лемковская днесь ликовствует, наипаче же грады и веси земнаго пришельствия твоего, Максиме; святая Ждыня, идеже родился еси, благочестная Граба, идеже святыя Тайны Христовы священнодействовал еси, и честная Горлица, идеже кровь пречестную твою за Господа твоего пролиял еси. Мы же, силу ходатайства твоего за обидимых добре ведуще, благодарственне вопием ти:
Радуйся, дар исцелений от Духа приявый.
Радуйся, дар сей на пользу ближняго иждививый.
Радуйся, вся болезни врачующий.
Радуйся, от всякаго недуга избавляющий.
Радуйся, страдания в радость претворяющий.
Радуйся, вся исцеления сия во славу Божию творящий.
Радуйся, о пощадении временнаго живота твоего мучителя не умолявый.
Радуйся, яко страданьми и смертию твоею Царствие небесное приобрел еси.
Радуйся, христомученичеством твоим истинную твою любовь ко Господу явивый.
Радуйся, твердо о Господе держатися, даже до пролития крове, истинно нас учивый.
Радуйся, яко в багряницу нетления на небеси облеклся еси.
Радуйся, латиномудрствующих прельщения отвергший.
Радуйся, величайший Максиме, страждущым и обидимым заступниче.

Кондак 9
Руки и гласы возвышающе к всемогущему Богу во хвалениих и молениях, Божии безплотны ангели, удивистеся и почудистеся крепости священномученика Максима, неубоявшагося прещеньми мучителя, егоже страха не смущашеся, яко неимуща власти душу его убити. Сего ради вси чини небеснии всесильному Богу нашему поют: Аллилуиа.

Икос 9
Мзду велию в превыспренних приобрел еси от подвигоположника Христа Бога нашего, величайший Максиме, ибо течение скончал еси и веру соблюл еси. Сего ради краснословеснейшии ветии лютых времен наших, яко рыбы немы пребывают, немогуще по достоянию восхвалити тя. Мы же почитающии тя, вопием ти сице:
Радуйся, долготерпением твоим ангелов и человеков удививый.
Радуйся, смертию за Христа веру свою исповедавый.
Радуйся, крепким исповеданием твоим всех православных христиан вдохновивый.
Радуйся, твердое упование на Бога возложивый.
Радуйся, яко бодростне поспешал еси к благоуханному м?ру Христа.
Радуйся, благоволение Всевышняго снискавый.
Радуйся, в дому Божии насажденная маслино.
Радуйся, высокий кедре ливанский.
Радуйся, небесных чинов радование.
Радуйся, богохульных еретик посрамление.
Радуйся, о душах овец твоих пещися рачение теплое имевый.
Радуйся, славу мiра сего во юродство вменивый.
Радуйся, величайший Максиме, страждущым и обидимым заступниче.

Кондак 10
Умирая от язв твоих, богоприятный глас возвысил еси и всем во услышание провещал еси; да пребудет вера православная! Тогда мучитель смертне удари тя и чистую свою душу в руку Владыки твоего предал еси, Емуже поем вси: Аллилуиа!

Икос 10
О столпе православия, угнетаемым защитниче и ходатаю! Благодарственная приносим милостивому Спасу нашему, яко даровал есть нам таковаго великаго ходатая пред световидным Престолом Его; ибо Максим святый во славе предстоит небесному Царю, непрестанно моляся о чтущих память его и взывающих ему:
Радуйся, прежде брани усердною молитвою к Богу укрепивыйся.
Радуйся, смирен духом бывый.
Радуйся, простоту сердца имевый.
Радуйся, поборниче веры, Богови угодити паче всех избравый.
Радуйся, земле плодоносная, семя словесе Божия в себе приявшая.
Радуйся, ниво, сторичественный плод приносящая.
Радуйся, пшеницо, в муку небесному хлебу сомленная.
Радуйся, в житницы Божественныя вложенный.
Радуйся, на промысл Божий все упование твое возложивый.
Радуйся, бисер многоценный обрет, вся стяжания своя продавый и сего купивый.
Радуйся, корабль души своея в житейстем море окормивый.
Радуйся, волны и камение мори сего спасительно прошедший.
Радуйся, величайший Максиме, страждущым и обидимым заступниче.

Кондак 11
Псалмы и пеньми, и песньми духовными величаем новаго священомученика Максима; яко бо делатель верный винограда Христова, кровь его вино сотворися, веселящее сердца человеков, услаждающее вся верныя и недоумения еретиков исполняющее, немогущих православно пети Богу: Аллилуиа.

Икос 11
Вся грады и селения лемковския исполнишася света, яко возвысися Максим святый, якоже светильник благолепный, ясно сияющий светом благодати и всех путеводящий по правому и узкому пути Православия, ведущему к небесным селением. Сего ради сокрушенно вопием ему:
Радуйся, непобедимый споборниче, дарованный нам от Бога.
Радуйся, теплейший наш заступниче.
Радуйся, всею душею ко Христу прилепивыйся.
Радуйся, на высоту добродетелей возшедый.
Радуйся, мученичества многострадальнаго подвига неубоявыйся.
Радуйся, мудре, житие временное на вечное пременивый.
Радуйся, истины безбоязненный проповедниче.
Радуйся, благочестия крепкий оружниче.
Радуйся, всю душу твою Господеви освятивый.
Радуйся, вся взыграния плоти увядивый.
Радуйся, всяк недуг и болезнь исцеляти от Господа дар получивый.
Радуйся, умертвивших тя еретиков мудрейший.
Радуйся, величайший Максиме, страждущым и обидимым заступниче.

Кондак 12
Внемля глас хваления и молитв наших, величайший Максим, моли милостиваго Искупителя нашего, да возниспослет нам грешным лучезарную благодать свою, яко да просветятся сердца наша, да озарится ум наш, яко да со всеми исповедающими Триединаго Бога возопием: Аллилуиа.

Икос12
Приидите все Церкве празднолюбцы и мучениколюбцы Христовы, и лик составите днесь, в память святаго Максима. Се бо многоценныя мощи его яко солнце утреннее просияша и седящыя во мраце озариша, сердца окаменевшая согреша. Сего ради ликующе, поем ему сицевая:
Радуйся, вся красная в мiре сем преобидевший.
Радуйся, избранниче Божий.
Радуйся, веры благочестное правило.
Радуйся, верно и непорочно вся заповеди Господни сохранивый.
Радуйся, царей и императоров преславнейший.
Радуйся, мужески иго Христово носивый.
Радуйся, вся мимотекущия прелести мiра сего отвергший.
Радуйся, жертву живую себе самаго Господу принесший.
Радуйся, богокрасныя правды наставниче.
Радуйся, яко тебе ради всесвятое имя Господне по всей подсолнечней прославляется.
Радуйся, пред Пресвятою Троицею наш заступниче.
Радуйся, мучениче доблий, лику преславному праведных сопричтавшыйся.
Радуйся, величайший Максиме, страждущым и обидимым заступниче.

Кондак 13
Троицы неслитное единство исповедший и живот свой за православную веру положший, и Господу своему и Владыце благоугодивший, Максим святый, ныне в лице мучеников предстоит, благолепно одеян и венцем украшен, от Христа приобретенным за подвиг его, и со всеми святыми радостно поет: Аллилуиа, Аллилуиа, Аллилуиа.
Кондак сей глаголется трижды, по немже паки глаголется икос 1, и кондак 1.

Молитва ко святому священномученику Максиму
О святый священномучениче Максиме! Нескончаемаго блаженства на небеси ныне причастник еси, идеже несредственно лик Христов во славе созерцаеши, невещественныя благодати Его исполненный. Сего ради ведуще тя и защитителя обидимыми и страждущым, тепле умоляем тя: моли Господа и Бога нашего Иисуса Христа исполнити сердца лемковских людей любовию к церкви их и твердости, во еже крепко держатися о вере отечестей, яко да не окаменеют сердца их, да не нападут на ня волцы еретицы и заблудят их, во еже растерзати я, ниже да совратят их козни и лукавствия демонския от пути в безводное прелести безпутие. Ей, отче, Богу возлюбленне! Воздей руце твои ко Всевышнему и умоли Его даровати нам мир и благоденствие, да не рекут нечестивии: где есть Бог их? Твоим бо мужеским исповеданием соделался еси велий молитвенник за всех память твою святую чтущих и к честным мощем твоим притекающих. Ты же выну Христа умоляеши даровати нам мир и помиловати душы нашя. Аминь.[/spoiler]

[Раб божий Константин]

Акафист святой преподобной Манефе Гомельской.
[spoiler]Кондак 1
Яко светильница явилася еси всесветлая,/ добродетелей светлостию озаряеши верных исполнения,/ всея Гомельския земли молитвенница,/ хвалебное пение ти приносим,/ преподобная мати наша Манефо,/ во всяких бедах и напастех заступай нас, грешных, вопиющих к тебе://
Радуйся, преподобная мати наша Манефо, новая похвало и земли нашея утверждение.

Икос 1
Ангельски пожившая на земли и Ангелом равностоятельница явилася еси на небеси, с теми же и неизреченныя оныя наслаждаешися доброты, преподобная мати, помощнице и теплая заступнице наша, восхваляем тя песньми сицевыми:
Радуйся, родителей благочестивых плод целомудренныя чистоты.
Радуйся, славо и заступление граду нашему.
Радуйся, нашея земли прозябение святое.
Радуйся, Гомелю похвало.
Радуйся, яко из млада Богу послужила еси.
Радуйся, яко гласу Божию в совести внимавшая.
Радуйся, Царствия Небеснаго наследнице.
Радуйся, вечныя славы сопричастнице.
Радуйся, преподобная мати наша Манефо, новая похвало и земли нашея утверждение.

Кондак 2
От юности твоея сосуд избранный себе Богу явила еси, преподобная мати наша Манефо, добрыми твоими деянии: воздержанием, молитвою и милостынею, чистотою душевною и телесною, любовию же и смиренномудрием. Темже Небесному Царю и Владыце всех угодила еси и, пресветлым Небесным венцем украсившися, воспеваеши песнь: Аллилуия.

Икос 2
Райскую жизнь и тамо святых селение всегда во уме своем поминающи, преподобная, в слезах и воздыханиих сердечных всю свою жизнь прешла еси. Сего ради и по смерти Христос прослави тя песньми сицевыми:
Радуйся, Манефо, светильнице солнцу подобная.
Радуйся, зерцало и образе всем православным людем.
Радуйся, пещь страстей юности угасившая воздержанием.
Радуйся, постом и бдением плоть свою сокрушившая.
Радуйся, добре преуспевшая ко приятию ангельскаго образа.
Радуйся, евангельскаго по Бозе жития ревнительнице.
Радуйся, заповедей Господних строгая исполнительнице.
Радуйся, преступающих оныя скоро обличающая.
Радуйся, преподобная мати наша Манефо, новая похвало и земли нашея утверждение.

Кондак 3
От духовнаго наставника, схиигумена Макария, наставляема, послушания добрая рачительнице, преподобная Манефо, от мирскаго мятежа удалившися и инокиня бывши изрядная, добрым подвигом подвизалася еси; и ныне, вкупе со старцем твоим предстоиши у Престола Владыки Христа, воспеваеши песнь: Аллилуия.

Икос 3
Егда обеты иночества Господеви воздала еси, все твое умное желание к Богу направила еси. Мы же познавше по Бозе житие твое, прославляем Бога, укрепившаго тя, и приносим тебе таковая:
Радуйся, Духа Святаго вселение.
Радуйся, светило благочестия.
Радуйся, обители твоея присное радование.
Радуйся, преподобных украшение.
Радуйся, Богомудрая мати Манефо.
Радуйся, иночествующих славо и похвало.
Радуйся, образе терпения и незлобия.
Радуйся, преподобных сонаследнице.
Радуйся, преподобная мати наша Манефо, новая похвало и земли нашея утверждение.

Кондак 4
Божественный свет осия жилище твое, преподобная, егда в час молитвы твоея Сама Пречистая Дева, пришедши к тебе со схимонахом Артемием, рече: Мне молись. Сего ради мы веруем, яко Дева Мария внемлет прошением призывающих имя святое Ея и Сыну Ея зовущих: Аллилуия.

Икос 4
Слышаще и видяще святое жилище твое, преподобная, людие устремишася вси к тебе, поучахуся о словесех твоих и подвизех, прославляху Бога и тебе величаху, зовуще ти:
Радуйся, Пречистыя Богородицы верная служительнице.
Радуйся, присно славительнице имени Ея преблагословеннаго.
Радуйся, яко Владычицею хранимая, греховных падений избегла еси.
Радуйся, покрову Ея себя предавшая.
Радуйся, обитель Ея яко тихое пристанище избравшая.
Радуйся, яко тамо отвергшаяся воли своея.
Радуйся, Небесе и земли Царицу лицезревшая.
Радуйся, о сем преисполнившаяся радости духовныя.
Радуйся, преподобная мати наша Манефо, новая похвало и земли нашея утверждение.

Кондак 5
Воздержание, молитву и любовь стяжавши, преподобная, образ иноческаго жития явилася еси, в немже преуспети пособствуй ходатайством твоим и нам, вопиющим песнь Богу: Аллилуия.

Икос 5
Яко финикс процвете тело твое нетлением, преподобная, и, яко кедр, иже в Ливане, умножишася чудеса, приносяще благодатную помощь всем с верою приходящим. Мы же, дивящеся таковому о тебе Божию промышлению, со умилением вопием ти:
Радуйся, исполненная Христовы красоты.
Радуйся, доме добродетелей.
Радуйся, благоутробия сокровище.
Радуйся, благочестия столпе непоколебимый.
Радуйся, храме Всесвятыя Троицы.
Радуйся, всех святых сожительнице.
Радуйся, смирения и незлобия учительнице.
Радуйся, терпения и миролюбия наставнице.
Радуйся, преподобная мати наша Манефо, новая похвало и земли нашея утверждение.

Кондак 6
Услышана была еси, мати Манефо, от Бога, яко молитва твоего смирения облаки пройде. Темже молитвенныя воздыхания твоя Вышний приемля, даде убийце некоему дух прав, имже умилився, в покаяние прииде. Вси же, дивяся чуду сицевому, воспеша Богу дивную песнь: Аллилуия.

Икос 6
Дар Божий прият молитв твоих крепость, вся совершаеши, преподобная, мудре и преславно. Мы же грешнии, любовию к тебе подвизаеми, дерзаем ублажати тя сице:
Радуйся, яко чудесы Бог тя прославляет.
Радуйся, яко твоими молитвами сопротивнии побеждаются.
Радуйся, притекающим к тебе спасения ходатаице.
Радуйся, христоименитым людем похвало и утверждение.
Радуйся, добродетелей украшение.
Радуйся, сирым прибежище.
Радуйся, благочестия наставнице.
Радуйся, грешников исправительнице.
Радуйся, преподобная мати наша Манефо, новая похвало и земли нашея утверждение.

Кондак 7
Преподобная мати наша Манефо, вся сущия с тобою учила еси, глаголя: чада, никтоже, в лености пребывай, достоин будущих благ, но законно зде страждущии, тамо законно увенчаются праведными венцы и воспоют Богу ангельскую песнь: Аллилуия.

Икос 7
Видяще, яко мзда твоя многа на небеси, мы вернии, житие твое земное разсмотревше, от сего научихомся, колико может вера, деяньми споспешествуема. Сего ради прими, благосердая, похвалы сия:
Радуйся, приятельнице дарований.
Радуйся, ходатаице всех ко спасению.
Радуйся, скорбящим утешение.
Радуйся, исполняющая радости притекающих к тебе.
Радуйся, яко молитвою и богомыслием укрепилася еси.
Радуйся, яко разум духовный прияла еси.
Радуйся, милостиву душу имущая.
Радуйся, яко нищим была еси питательница неоскудная.
Радуйся, преподобная мати наша Манефо, новая похвало и земли нашея утверждение.

Кондак 8
Се воистину исполнишася словеса Господня: Кости твоя утучнеют и будут, яко вертоград напоенный, и яко источник, ему же не оскуде вода. По Господню сему словеси и ты, преподобная мати, пред Отцем Небесным прославлена еси и со всеми святыми выну зовешь Святей Троице: Аллилуия.

Икос 8
Тесным путем в житии своем шествовала еси и Небесных селений радостне достигла еси, идеже предстоиши Престолу Пресвятыя Троицы, дарованьми чудес обогащаема. Мы же мысленно споследствующе ти, взываем с любовию таковая:
Радуйся, сирым и вдовицам крепкая помощнице.
Радуйся, града нашего стено необоримая.
Радуйся, всем прибегающим к тебе во благое разрешение.
Радуйся, всех кающихся с Богом примирительнице.
Радуйся, милости пучино неисчерпаемая.
Радуйся, гордости прогонительнице.
Радуйся, враждующих примиряющая.
Радуйся, совести пробуждающая.
Радуйся, преподобная мати наша Манефо, новая похвало и земли нашея утверждение.

Кондак 9
Коль велико, преподобная мати, человеколюбие твое, вемы вси, ибо прежде смерти своя вся христоименитыя люди учила еси разумно жити и заповеди Господни блюсти, славу же Ему возносити, вопиюще: Аллилуия.

Икос 9
Како убо воспоем твое пресветлое житие и премногия твоя добродетели, преподобная мати наша, знамения же и чудеса, имиже вся просвещаеши, яко солнце? Того ради ныне во свете святых пребывающи, поминай творящия память твою песньми сицевыми:
Радуйся, сущим в бедах скорая помощнице.
Радуйся, обидящих строгая наказательнице.
Радуйся, обидимых крепкая защитнице.
Радуйся, во успении своем нас не оставляющая.
Радуйся, телеса наша безмездне врачующая.
Радуйся, души наша молитвами твоими спасающая.
Радуйся, исполнительнице неисповедимых Божиих судеб.
Радуйся, всем послужившая до последняго дне живота своего.
Радуйся, преподобная мати наша Манефо, новая похвало и земли нашея утверждение.

Кондак 10
Конец болезней обрела еси, преподобная, наслаждение еже в Раи, от теснаго бо пути достигла еси к пространству Царствия Божия, всемудрая, благословящи Бога песнию: Аллилуия.

Икос 10
Имущи душу милостиву, и чист помысл, и сердце бодро, веру неблазненну и любовь воистину нелицемерну, от земли преставилася еси к Небесным и с лики праведных водворяешися. Темже тя благочестно славим вси и почитаем священными песньми сицевыми:
Радуйся, всех преподобных Белорусских сподвижнице.
Радуйся, ревностию по Бозе преподобной Евфросинии подражавшая.
Радуйся, Софии Слуцкия великодушие стяжавшая.
Радуйся, Валентине Минской равночестная.
Радуйся, цвете нетления, землю Гомельскую облагоухавшая.
Радуйся, Церкви Божия украшение.
Радуйся, миру светильнице всесветлая.
Радуйся, жительнице рая Небеснаго.
Радуйся, преподобная мати наша Манефо, новая похвало и земли нашея утверждение.

Кондак 11
Егда приидоша священницы к могиле твоей, преподобная, хотящи прияти тело твое, тогда, гроб открывше, видеша лежащия твоя мощи святолепно, и радующися воспеша Богу дивную песнь: Аллилуия.

Икос 11
Добродетели твоя, яко цветы благоуханныя и яко камение драгоценныя, имиже и угодила еси нетленному Царю и Владыце всех. Темже любовию поем тя и верно ублажаем, взывающе тебе сицевая:
Радуйся, яко пчела цвет добродетелей мудро изыскавшая.
Радуйся, дар прозрения стяжавшая.
Радуйся, детей молитве научающая.
Радуйся, от недуга пианства многи избавляющая.
Радуйся, пролитие дарований духовных.
Радуйся, милостиво свыше на нас призирающая.
Радуйся, терпением древнему Иову уподобившаяся.
Радуйся, святолепне скончавшаяся.
Радуйся, преподобная мати наша Манефо, новая похвало и земли нашея утверждение.

Кондак 12
Мощи твоя положенныя в церкви, преподобная, благоухание испущают притекающим с верою, и память твоя веселит сердца наша. Тем, Владыце предстоящи, поминай нас, с любовию прославляющих Его ангельскою песнью: Аллилуиа.

Икос 12
Житие на земли благочестно скончавши, чистое селение Святому Духу явилася еси, преподобная, просвещающи с верою приходящия к честным мощем твоим. Тем и мы, честную твою обстояще раку, тя прославляем песньми сицевыми:
Радуйся, сокровище многоценное от земли возсиявшее.
Радуйся, мощи твоя во благословение граду нашему давшая.
Радуйся, яко мощи сия токи чудес источают.
Радуйся, яко чудеса от них восхваляти тя благодарне подвизают.
Радуйся, яко тление не пр

Икоснуся костем твоим.
Радуйся, имиже оздравляются богатии и убозии.
Радуйся, имиже смиренно преклоняются славнии и именитии.
Радуйся, о ней же спасаемся вси.
Радуйся, преподобная мати наша Манефо, новая похвало и земли нашея утверждение.

Кондак 13
О, преподобная мати наша Манефо, память твоя славна и успение со святыми! Нынешнее наша моление приемши, моли Всемилостиваго Бога избавити град наш от бед временных и вечных, умоли Господа в день страшнаго суда Его помиловати нас и избавити осуждения вечнаго, да сподобимся воспевати Ему песнь хвалы и благодарения: Аллилуия.

Молитва
О, преподобная мати наша Манефо, чистою душею твоею в Небесных обителех в лике святых водворилася еси, на земли же с нами телесем нетленным пребываеши! Киими достойными похвалы прославим Тя или како наречем Тя? Ты бо всем сердцем возлюбила еси нас, сама же паче всех в Законе Господне день и нощь поучалася еси, желая во служении ближним добрым примером быти. Славим убо тя яко утешительницу скорбящим, врача недугующим и предстательницу у престола Божия о спасении душ во веки веков. Аминь.

Тропарь, глас 4
Веселися земля Гомельская, / се бо Господь яви дивную подвижницу, / во тьме греховной яко солнце воссиявшую. / И во иночестем чине Евангелие людем, притекающим к ней возвещавшую. / Ныне же нетленным телесем пребывая, / спасай нас молитвами твоими, // Манефо, мати преподобная.

Кондак, глас 6
Измлада претерпела еси страдания телесныя, / приведшия тя дивно ко Христу. / И в чине Ангельстем Господеви послужила еси, / Манефо славная, / просвещая люди во мраке неверия седящия. / Умоляла еси Господа / даровати страждущим исцеления. / И ныне моли Христа Бога спастися душам нашим.

Величание
Ублажаем тя, преподобная мати наша Манефо, и чтим святую память твою, наставнице монахинь и собеседнице Ангелом.

+1984, память 29 июля / 11 августа, прославление совершено в кафедральном соборе Гомеля 11 августа 2007 г.[/spoiler]

[Раб божий Константин]

Акафист святой преподобномученице Марии Гатчинской, преславной покровительнице нашей.
[spoiler]Кондак 1.

Избранней Предвечным Господом и Возлюбленной Богоматерию, преславней и пречудней невесте и страстотерпице Христовой, наставнице, защитнице, утешительнице благодатней и небесной покровительнице нашей, благодарственная восписуем ти, молитвенницы твои, святая и всехвальная мати наша Марие. Ты же, яко имуще дерзновение ко Господу, от всяких бед, зол и болезней свобождай нас, с любовию, радостию и надеждою тебе ныне зовущих:
Радуйся, святая преподобная мати наша Марие, мученице Христова и наставнице богомудрая!

Икос 1

Ангелов и человеков Творец Всемудрый Господь Наш, дарова тя, блаженная мати наша Марие, яко многоценное сокровище, людем российским, во дни великия смуты и мятежа братоубийственнаго, да видяще равноангельное житие твое и выну текущий источник исцеляющей благодати, не погибнут до конца во гресех своих и обратятся в покаянии к Создателю своему, тебе же благодарственно воспоют похвальную песнь сице:
Радуйся, голубице, под кровом Всевышняго вогнездившаяся;
Радуйся, с мудрыми девами в брачный чертог радостно возшедшая;
Радуйся, звездо, во мраце безбожия светло возсиявшая;
Радуйся, житием твоим Солнце Правды, Христа проповедавшая;
Радуйся, страдания Его ради добропобедно претерпевшая;
Радуйся, венец нетленный от Подвигоположника приимшая;
Радуйся, достойныя плоды покаяния приносити нас научающая;
Радуйся, печали наша в умиленной радости растворяющая;
Радуйся, святая преподобная мати наша Марие, мученице Христова и наставнице богомудрая!

Кондак 2

Видя Господь благое сердца твоего изволение, яко издетска послужити Ему восхотела еси, призва тя на тесный и прискорбный путь подвиг многотрудных, к Царствию Небесному ведущий: Ты же всем сердцем, всею душею и всею крепостию твоею Бога возлюбивши непрестанно взывала еси: Аллилуиа.

Икос 2

Рaзумом богопросвещeнным в познaнии истины Евангелия Христова преуспевaла еси от утра жизни твоея, достоблажeнная мати, мудростию духовною обогащaяся, исполняяся крепости божеcтвенныя, в добродетелех христианских невозврaтно душу твою утверждая. Темже мы, покланяющеся милоcердному Богу, такова дивна сокровища тебе даровaвшему, во умилeнии глаголем ти:
Радуйся, добраго корене отрасле благородная;
Радуйся, лозо винограда Христова многоплодная;
Рaдуйся, плaменем божеcтвенныя любве от юности возжжeнная;
Рaдуйся, многими добродетельми от млaдости украшeнная;
Радуйся, светом твоим нашу тьму греховную разгоняющая;
Радуйся, теплотою любви твоея наша хладная сердца согревающая;
Радуйся, козни вражия предстательством твоим разрушающая;
Радуйся, сладостию молитв твоих скорби наша растворяющая;
Радуйся, святая преподобная мати наша Марие, мученице
Христова и наставнице богомудрая!

Кондaк 3

Силе духовней, от тебе исходящей, дивляхуся людие, наставницу добрую и милосeрдную утешительницу в тебя обретше: любовию твоeю согревaеми, к тебе благодарeнием простирaхуся, рaдостию воспевaюще Богу: Аллилуиа.


Икос 3

Имела еси едино попечение, святая мати, да спасеши душу твою и представиши ю Христу. Благий же и Человеколюбец Господь, видев таковое твое произволение, призывает тя быти наставницей людей страждущих и в вере колеблемых, наставницей благой и утешительницей богомудрой, и безбоязненной проповедницею слова Божия в годину смут и гонений. Мы же тебе, яко верной служительнице Господней, вопием:
Радуйтеся, плач пред Богом и умиление блаженное обретшая;
Радуйтеся, смирением своим высокая, нищетою же богатая явившая; Радуйся, правду, мир и радость о Дусе Святе стяжавшая;
Радуйся, милосердием и любовию к ближним своим исполненная;
Радуйся, сердца наша благодатию Божиею, тебе данною, очищающая; Радуйся, очи наши духовныя к зрению Бога изощряющая.
Радуйся, к терпению бед, лишений и скорбей нас воодушевляющая; Радуйся, в пренесении испытаний и гонений нас укрепляющая;
Радуйся, святая преподобная мати наша Марие, мученице Христова и наставнице богомудрая!


Кондaк 4

Буря беззаконий поколеба держaву российскую в годину испытaний лютых: злоба и уныние, скорбь и рыдания исполниша многострадaльное отeчество нaше. Тобою же, святая мати, и тебе единонрaвными, церковь русская враты адовыми не одолена сохранися. Людие же, видяще непоколебиму веру твою, и светильник твой присно горящ, наставлениями твоими укрепляемы, с надеждою воспевaху Всемогущему Богу: Аллилуиа.

Икос 4

Слышаша людие града Гатчины боговдохновенныя поучения твоя, богоносная мати, к покаянию и исправлению жительства своего устремившеся, от грехов и страстей отвращающеся, в разум истинный прихождаху, отчаяния и скорби своя верою и надеждою на Милосердие Божие досточудно побеждаху; и твоею учительною беседою назидающеся, образом же жития твоего умиляющеся, глаголаху:
Радуйся, в помрачении страстей пребывающих просветительнице;
Радуйся, в суете и самозабвении жительствующих вразумительнице;
Радуйся, в недоумении и заблуждении сущих руководительнице;
Радуйся, добре жити начинающих управительнице;
Радуйся, малодушием и унынием колеблемых укрепительнице;
Радуйся, в небрежении спящих возбудительнице;
Радуйся, бодрости и трезвения предобрая учительнице;
Радуйся, чистаго и непорочнаго жития неусыпающая хранительнице;
Радуйся, святая преподобная мати наша Марие, мученице Христова и наставнице богомудрая!

Кондак 5

Боготечную звезду зрим тя, угоднице Божия, тя бо, восприимшую великия страдания, прослави убо тя Господь, яко сбышаша на тебе словеса апостольския «сила Божия в немощи совершается», ты бо благодать Духа Всесвятаго восприяла еси и Его дарами ближним твоим с любовию послужила еси, в вере, надежде и любви богомудро их утверждая. Мы же, вся сия ныне поимнающе, взираем ныне с любовию на честный образ твой, приклоняем колена, со умилением поя: Аллилуиа.

Икос 5

Видеша тя, угоднице Божия, ближния и други твоя, яко воистинну сосуд избранный Божия благодати, егда богомудрым святителем Вениамина наставляема, чин ангельский восприяв, подвигов твоих богоугодных не оставила еси, святая Марие, но многообразными деяньми плоть твою усмиряя, в молитвах за церковь и отечество и трудех преуспевала еси. Мы же таковым подвигом твоим дивящеся, не престанем славити тя:
Радуйся, монашеского жития истинный ревнительнице;
Радуйся, иноческих обетов пламенный исполнительнице;
Радуйся, никогоже от приходящих к тебе отвергавшая;
Радуйся, любовию твоею вся покрывавщая;
Радуйся, яко тобою ум наш в Богомыслии научается;
Радуйся, яко тобою мрак неведения прогоняется;
Радуйся, от плевел ненависти сердца наша очищающая;
Радуйся, заповеди Евангельския исполняти нас подвизающая;
Радуйся, святая преподобная мати наша Марие, мученице Христова и наставнице богомудрая!

Кондак 6

Проповедницею быв житием твоим евангельских добродетелей, мати блаженная, плоть твою постом и молитвою поработила еси, своими великима подвигами всезлобнаго врага посрамила еси, и ко свету Христовой истины многия люди града Гатчины привела еси, поучая непрестанно молитися друг за друга и выну благодарити и славословити Милосерднаго Господа нашего, поя Ему: Аллилуиа.

Икос 6

Возсия немеркнущий свет Богопознания, в боголюбивой душе твоей, святая мати Марие, вознесе тя на высоту духовнаго совершенства, яко на некий таемный Фавор, отонюдуже и наша затемненным души твоим молитвенным пред Господем предстательством просвети, во еже глаголати тебе сия похвалы:
Радуйся, исполнение заветов пастыря кронштадтского явившая;
Радуйся, многих святых добродетели в себе совокупившая;
Радуйся, яко солнце, в Царствии небесном сияющая;
Радуйся, в радости Творца благодарити нас побуждающая;
Радуйся, безвестная и тайная премудрости Божия нам открывающая;
Радуйся, благия мысли и чувства в недоумении нам сущим внушающая;
Радуйся, святыя желания и намерения ко спасению нашему в сердца нам влагающая;
Радуйся, от всея души и сердца возносимая к вам прошения наша исполняющая;
Радуйся, во всех нуждах, бедах и обстояниих нам помогающая.
Радуйся, святая преподобная мати наша Марие, мученице Христова и наставнице богомудрая!

Кондак 7

Хотящих восхвалити подвигов трудов твоих и чудная деяния, вразуми нас, святая мати наша Марие, недоумеем бо изрещи достойныя тебе хвалы. Обаче во всех трудех и подвизех благодать Божию в тебе видяще, воспеваем о тебе Христу Богу: Аллилуиа.

Икос 7

Новую тя исповедницу и мученицу Христову, на небесех и на земли Всеблагим Господем Нашим прославленную, позна многострадaльная Россия, рaнами безчисленными изъязвлeнная, кровию мученическою обильно напоeнная, увенчaнная слaвою множества святых мужей и жен своих. Почитaюще тя, богоблаженнная Марие, яко единую от сих достойнейших и слaвнейших дщерей российских, пение хвалeбное приносим ти сице:
Радуйся, в неизреченной славе Творца миров созерцающая;
Радуйся, со всеми ангелы и святыми хвалу Ему воспевающая;
Радуйся, милосердие Бога-Отца к нам приклоняющая;
Радуйся, о вечнем спасении нашем Христа - Спасителя умоляющая;
Радуйся, плоды (дары) Духа Святаго стяжати нам помогающая;
Радуйся, свято и праведно Всесвятую Богородицу почитати научающая;
Радуйся, кающимся слезы утешительныя низпосылающая;
Радуйся, пламень злобный струями любве твоея угошающая;
Радуйся, святая преподобная мати наша Марие, мученице Христова и наставнице богомудрая!

Кондак 8.

Странницу и пришелицу помышляла еси в себе быти в мире сем, преблаженная мати Марие; темже грядущаго града Иерусалима Небеснаго взыскуя, вся помышления твоя к небеси непрестанно возносила еси, и яко в тимпане, во умерщвленнем телеси, сладце воспевала еси победную песнь Христу Богу: Аллилуиа.

Икос 8

Всю себе воли Господни предaв, страдания Его рaди за чeсть почитaла еси, досточудная мати, егда нечестивии, видя плоды просвещения духовнаго, взращенныя тобою, взяша тя купно со сродники твоима и в темницу ввергоша; ты бо узах суще, от гонителей веры Христовой оскорбления, надругания, заушение и лютыя биения незлобливе прияла еси, молящее Всеблагаго Спасителя о даровании ти в муках терпения и во страдания – укрепления. Мы же, покланяющеся мужеству и долготерпению твоему, хваления приносим ти таковaя:
Радуйся, последовательнице верная Распятаго Учителя;
Радуйся, споспешнице всеусердная ада Разрушителя;
Радуйся, страстотерпице, Христа безстрaшно исповедавшая;
Радуйся, боязни и стрaха человеческаго не ведавшая;
Радуйся, крилами богомыслия сети вражия сокрушившая;
Радуйся, злобные умышления того доброславно посрамившая;
Радуйся, прощати и благословляти ближних нас научающая;
Радуйся, в кротости и смирении нас укрепляющая;
Радуйся, святая преподобная мати наша Марие, мученице Христова и наставнице богомудрая!

Кондак 9

Всякия болезни душевныя и телесныя, всякия беды нужды плоти и духа нашего избави нас, всехвальная Марие, да веру твою в Подателя жизни вечныя видевше, в вере нашей да укрепимся невозбранно и дерзновенно с тобою пети крепость дающему Богу: Аллилуия!

Икос 9

Ветия многовещанныя не возмогут по достоянию воспети страдания твоя за Христа, святая преподобная мати наша Марие, яко в темнице заточенная, угоднице Божия, николиже возроптала еси, поминающе глаголы Господни: «Блажени есте, егда поносят вам, и ижденут, и рекут всяк зол глагол, на вы лжуще Мене ради, радуйтеся и веселитеся, яко мзда ваша многа на небесех». Мы же, сии глаголы почитающе, поем:
Радуйся, врeменныя жизни покой, прaвды Божия рaди презревшая.
Радуйся, за Христа узы и темницу всерадостно приявшая.
Радуйся, истинную рaдость во страдaниих о Господе обретaвшая;
Радуйся, сими страдании в подвизе Христовы любве возрастaвшая.
Радуйся, враги твоя в незлобии евангельском простившая.
Радуйся, образ терпения и себе отречения добльственне явившая.
Радуйся, тихий свет любве на всех обильно изливaвшая;
Радуйся, множество людeй окрест себе спасaвшая.
Радуйся, святая преподобная мати наша Марие, мученице Христова и наставнице богомудрая!

Кондaк 10

Спаcти хотя душу свою, Богомудрая Марие, смирeние крестное вкупе со иными добродетельми в дaр Господу принeсла еси, уничижaющым, мучащим и гонящым тя николиже противляяся; пристaнище последнее земнaго жития твоего в мрачней лечебнице темничней обрела еси, идеже ты вслед апостолу помышляла еси «аще бо живем, Господеви живем, аще бо умираем, Господеви умираем» (Рим. 14:; благодатию Христовой вспомошествуема путь страданий добропобедно прошла еси, неустанно воспевая всечастно укреплявшему тя Господу: Аллилуиа

Икос 10

Стену необориму стяжала еси благодать Господню, блаженная мати Марие, защищaюшую тя от враг невидимых, не могущих души твоея погубити: достойна бо тоя благодати явилася еси богоугодными труды твоими и умилeнными молитвами и велиим упованием на Распятаго Спасителя, веровала бо еси несомненно, яко смерть тела не есть конец, что Сам Христос есть путь в святыне веры и в лице Своем - истина, и в таинствах благодатных, и в существе своем - жизнь безконечная. Мы же, неизреченное величие любви твоея к Богу воспеваем и велией вере твоей подражати желая, таковыя похвалы смиренне приносим ти:
Радуйся, во испытаниях своих веру крепку, яко Авраам, явившая;
Радуйся, в злостраданиях терпение твердое, яко Иов, показавшая;
Радуйся, не суетному унынию, но Божьему благоволению себе предавшая;
Радуйся, Христу Богу в кротости и смирении подражавшая;
Радуйся, во гласе пения ангельскаго на небо душею твоею воспарившая;
Радуйся, мученический полк и праведных лики на небесех возвеселившая;
Радуйся, с девствующими, яко девственница возвеличенная;
Радуйся, венцем нетленным от руки Христовы увенчанная;
Радуйся, святая преподобная мати наша Марие, мученице Христова и наставнице богомудрая!

Кондак 11

Пение хвалебное приносим тебе, богоносная мати наша Марие, и с любовию припадающе ко изображению честнаго лика твоего, восхваляем ангелоподобное житие твое и мученическую кончину. Ты же, предстоя престолу Пресвятыя Троицы, не престай моляся о нас, ублажающих тя, купно со всеми новомучениками и исповедниками российскими, да сподобимся небеснаго селения достигнути и гласом радования воспети Богу ангельскую песнь: Аллилуиа.

Икос 11

Свет Христов, просвещаяй и освящаяй всяческая, озари душу твою, cстрастотерпице богомудрая, темже и по кончине твоей честныя мощи и иконныя подобия лика твоего неоскудно источают исцеления, утешение и радость всем болящим, скорбящим и унылым, подвизая оных подражати тебе во исповедании, терпении, мужестве и крепцей любви ко Христу, еюже пламенея, дивный образ терпения в злостраданиих явила еси и нас научаеши воспевати тебе тако:
Радуйся, телеса наша прикосновением к раце мощей твоих врачуеши;
Радуйся, души наши молитвами твоими к райскому блаженству возводиши;
Радуйся, любити Бога и творити волю Его нас наставляющая;
Радуйся, от заблуждений духовных нас свобождающая;
Радуйся, всех молящихся тебе под покров Всевышняго приводящая;
Радуйся, из пучин отчаяния к свету надежды нас возводящая;
Радуйся, от закваски фарисейской нас ограждающая;
Радуйся, от праздности и слабости духа исцеляющая;
Радуйся, святая преподобная мати наша Марие, мученице Христова и наставнице богомудрая!

Кондaк 12

Благодати обитaющей в тебе дивящеся, величaем тя, преподобная мати нaша Марие: веруем, яко дела Божия на земли совершив, и страдания велия претерпев, ныне с Господем во обителех Его почивaеши, призирaя на нaс с высоты небеcныя, и приклоняя к нaм вышнее милоcердие. На твое заступлeние надеющеся, и на благодaтную помощь твою уповaюще, поeм Дивному во Святых Своих Богу: Аллилуиа.


Икос 12

Поюще твоя крепкия подвиги, почитаем страдания твоя, хвалим долготерпение твое, ублажаем твою кончину, прославляем твое, в женстем естестве показавшееся непобедимое мужество, имже на земли и на небеси прославилася еси, святая преподобномученице Марие, и твоих ради победоносных подвигов и страданий похвальная восписуем ти и просим тя, мати святая, укрепи в житии добродетельнем и научи нас, да возможем святому твоему житию подражатели быти и благодарственно восхвалим тя сице:
Радуйся, тяжкия и неисцельныя болезни телес наших исцеляющая;
Радуйся, внутренний мрак душ наших светом Христовым озаряющая;
Радуйся, пламень молитвы в сердцах наших возжигающая;
Радуйся, подлинной любви христианской всех научающая;
Радуйся, друг друга тяготы носити нас наставляющая;
Радуйся, к небесам умы и сердца наши обращающая;
Радуйся, от вражды друг к другу христиан исцеляющая;
Радуйся, радостию духовней души наши наполняющая;
Радуйся, святая преподобная мати наша Марие, мученице Христова и наставнице богомудрая!

Кондaк 13

О, всехвальная святая преподобномученице Марие. Нынешнее наше моление приемши, от всякия болезни, напасти, клеветы человеческия и от враг видимых и невидимых нас избави, да тихое и мирное житие поживше во юдоли земной, блаженство райское на небеси наследим и купно с тобою сподобимся Святых Святейшему Слову выну воспевати песнь: Аллилуиа.
(сей Кондак глаголи трижды, посем Икос 1 и Кондак 1)

Молитвы к преподобномученице Марии Гатчинской

Молитва первая

О святая преподобная мати Марие, молитвеннице за весь род христианский! Се мы, грехми и треволненьми житейскаго моря обуреваеми, от глубины сердечныя взываем ти: не остави нас, немощных, печальных и унылых призрением милостивнаго твоего заступления!
Во дни земнаго жития твоего явилася еси болящим безмездная целительница, заблуждшим наставница, скорбящим и обидимым утешительница милосердная и всем притекающим к тебе скорая помощница и чадолюбивая мати. И ныне вемы, яко дана тебе от Господа и Пречистой Богородицы благодать молитися за ны.
О верная слуго Христова, сторицею возрастившая данный тебе талант, уврачуй страсти душ и телес наших, укрепи в добродетели и настави на путь покаяния: умягчи наша злая и хладная сердца, да паче всего возлюбим Христа, в Немже и ближняго своего. Умоли Господа сил низпослати милость Свою многострадальному Отечеству нашему, да тихое и безмолвное житие поживем во всяком благочестии и чистоте: и тако достигнем в немятежное пристанище Небеснаго Царствия, идеже ты в незаходимей сияеши славе, воспевая со всеми святыми хвалебную песнь Отцу и Сыну и Святому Духу, ныне и присно и во веки веков. Аминь.

Молитва вторая

О достоблаженная старице наша, преподобная мати Марие, недужных и скорбных скорая утешительнице и целительнице! Приими ныне моление недостойных чад твоих и донеси сей малый плод сердец и устен наших ко престолу Божию, да предстательством твоим низпослет нам Милосердный Господь щедроты Своя: подаст благоденствие Отечеству нашему: избавит от труса, огня, меча, нашествия иноплеменник и междоусобныя брани: недужным дарует исцеление, скорбящим утешение: гордых смирит, нерадивых к покаянию обратит, монашествуюших дух в горении к Богу укрепит: всем Христианом подаст, яже ко спасению потребная: наипаче же явит нам милость на Страшнем судище Своем и вселит в обители Небесныя со всеми святыми: Емуже подобает хвала и слава, честь и держава, Отцу и Сыну и Святому Духу, ныне и присно и во веки веков. Аминь. Молитва

Молитва третья

О, святая преподобная мати Марие! Подвигом добрым подвизалася на земли, восприяла еси на небесех венец правды, егоже уготовал Господь всем любящим Его. Темже предстояще пред образом твом честным, радуемся о преславнем скончании земнаго жития твоего и чтем святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойнии есмы, видети благая на земли живых, славяще дивного во святых Своих Бога, Отца и Сына и Святаго Духа, ныне и во веки веков. Аминь.[/spoiler]

[Раб божий Константин]

Акафист преподобной матери нашей Марии Египетской.
[spoiler]Кондак 1
Избранной от Господа во образ спасения всем грешным и отчаянным, из глубины греха востекшей на высоту безстрастия, похвальная пения приносим ти, мати преподобная, ты же, яко имея дерзновение к щедрому Богу, молитвами твоими настави на стезю твоего покаяния любовию тебе зовущих:
Радуйся, чудо милосердия Божия, Марие равноангельная.

Икос 1
Ангела во плоти узрев тя в пустыни Иорданской великий Зосима, на воздусе стоящую и о мире молящуюся, со удивлением и ужасом одержим весь трепетом быв, слезами обливаяся, вопияше тебе таковая:
Радуйся, благодати и света исполненная.
Радуйся, прозрения даром украшенная.
Радуйся, в молитвах твоих к Богу на воздусе вземлемая.
Радуйся, пустынное сокровище, от мира утаенное.
Радуйся, безплотных сожительнице.
Радуйся, Духа Святаго селение.
Радуйся, чудо милосердия Божия, Марие равноангельная.

Кондак 2
Видяще старца благоговейнаго ужаса исполнена, тихим гласом рекла еси тому преподобная: не бойся, авво Зосимо, несмь дух, но земля, прах, и пепел, и всячески плоть, ничтоже духовное когда помыслившая и ни единыя добродетели имущая. Жена есмь грешница, недостойная взирати на небо, и со страхом грешными усты зову Богу: Аллилуиа.

Икос 2
Разумети ищя дивную тайну, в тебе сокровенную, старец паде пред ногама твоима, глаголя: заклинаю тя именем Господа нашего Иисуса Христа, Егоже ради наготу носиши сию, не скрый от мене жития твоего, да величия Божия яве сотвориши. С нимже и мы дерзаем ублажити тя сице:
Радуйся, смирения светлая высото.
Радуйся, дарований духовных богаство неисчерпаемое.
Радуйся, любве ради Божия тело свое умертвившая.
Радуйся, в пустыни непроходней едина, с единым Богом пребывшая.
Радуйся, райскою красотою сияющая.
Радуйся, безстрастия светом озаренная.
Радуйся, чудо милосердия Божия, Марие равноангельная.

Кондак 3
Силою Вышняго укрепляема, исповем ти, человече Божий, грехи и беззакония моя, - отвещала еси Зосиме, - стыжуся, отче, прости мя, но понеже тело мое наго видел еси, обнажу ти и дела моя, обаче молю тя первее: не бежи от мене, не терпя слышати безместная, яже аз содеях; но милосердствуя о мне, молися за мя, блудную, и Богу невозгнушавшуся мною зови: Аллилуиа.

Икос 3
Имея милосердие неизреченное, с мытари и грешники вечерявый, Той и мне, в глубину погибели падшей, простре руку Свою божественную, егда бо возжелах аз внити в храм Господень, некая сила возбрани ми вход, сердца же моего коснувыйся свет разума показа ми тину дел моих и начат плакатися о гресех, в перси биющи и горько рыдающи, мы же, покаянию твоему веселящеся, пение приносим ти сицевое:
Радуйся, яко нощи прешедшей возсиявает ти заря спасения.
Радуйся, яко глас Христов призывает овча заблуждшее от дебрей далеких греха.
Радуйся, яко слезными токи омываеши вся твоя скверны.
Радуйся, яко слезами твоими очищаеши одеяние души твоея.
Радуйся, яко Отец щедрот объятия Своея любве тебе отверзает.
Радуйся, яко ведый твоя тайная рукописания грехов твоих раздирает.
Радуйся, чудо милосердия Божия, Марие равноангельная.

Кондак 4
Бурею скорбных помыслов одержима, узрела еси во угле притвора церковнаго икону Причистыя Богоматери и, стеня, воззвала еси к Ней: повели, о Владычице, да и мне, недостойной, отверзутся божественныя входы, и буди Ты ми Споручница, яко егда узрю Крест Сына Твоего, мира и яже в мире отвергуся и изыду, аможе Ты повелиши мне, зовущи Богу: Аллилуиа.

Икос 4
Слышавше глас издалеча глаголющь: аще Иордан прейдеши добре покой обрящеши, на колена падши пред Приснодевою, рекла еси: о Владычице! Не гнушается девственная чистота Твоя моея недостойныя молитвы, буди мне спасения учительница, руководствующая на путь покаяния! Тем убо Ангели Божии, написующе исповедание твое, возглашаху тебе в той час сицевая:
Радуйся, от тмы греха к чистому свету покаяния преходящая.
Радуйся, неистовство страстей и любовь плотскую отринувшая.
Радуйся, вся узы и сети врага растерзавшая.
Радуйся, тяжкое бремя студныя работы диавола во благое и легкое иго Христово пременившая.
Радуйся, от смерти греховныя к вечному животу возстающая.
Радуйся, от врат погибели к вратам рая восходящая.
Радуйся, чудо милосердия Божия, Марие равноангельная.

Кондак 5
Богосветлыми лучами благодати просвещает тя Прествятая Дева, Та бо споручница грешных к Богу сущи, отверзает тебе двери милосердия Божия и врата храма святаго, в оньже внитши, со многими слезами поклонилася еси Живоносному Древу, имже мир спасен бысть, и распеншемуся Господу, Кровь Свою за твое избавление излиявшему, благодарственно воспела еси: Аллилуиа.

Икос 5
Видев тайны Божия и како готов есть приимати кающихся, всехвальная Мария, воззвала еси всем сердцем: Владычице Богородице! Не остави мене! – и устремилася еси в пустыню об он пол Иордана, мы же, почитая бегство твое, сретаем тя пении сими:
Радуйся, яко всепрощающею любовию Спаса уранися сердце твое.
Радуйся, яко сокровище благодати, тобою приятое, потщалася еси сокрыти в пустыни.
Радуйся, яко мира греховныя сладости скоротечно и невозвратно отбегла еси.
Рабуйся, яко бегством твоим демоны огнем попалила еси.
Радуйся, яко тем бегством небеса возрадовала еси.
Радуйся, чудо милосердия Божия, Марие равноангельная.

Кондак 6
Проповедуеши всем падшым и отчаянным, всечестная, Божие человеколюбие и силу покаяния, како грешную душу омывает, очищает, светлит и возводит горе и веселие творит Ангелом Божиим, с нимиже и мы бренными усты зовем: Аллилуиа.

Икос 6
Возсия мирови от пустыни Иорданской свет великих подвигов твоих, Марие приснославная, многия бо лета, аки адамант тверд и столп непоколетим, пребыла еси, яко со зверьми лютыми, с похотьми твоими борющеся и оружием креста отражая разжженныя стрелы лукаваго, сего ради дивящеся пачеестественному терпению твоему, любовию зовем ти:
Радуйся, яко злострадания и труд в пустыни четыредесять осмь лет понесла еси.
Радуйся, яко солнечнаго зноя опаление, наготу и мраз нощный претерпела еси.
Радуйся, яко гладом и жаждою истаявала еси.
Радуйся, яко всякое пожелание плоти конечно умертвила еси.
Радуйся, яко в борьбе со грехом, в тебе живущим, до крове подвизалася еси.
Радуйся, чудо милосердия Божия, Марие равноангельная.

Кондак 7
Хотя препятие сотворити твоему светлому к небеси шествию, всеблаженая, исконный враг рода человеческаго не престаяше влагати ти помыслы нечистыя, огнь греховный в удесех твоих разжигая и предлагая тебе на память прежняго жития твоего, ты же, многострадальная, повергалася еси на землю, слезами обливаяся и призывая в помощь Приснодеву, и не воставала еси от земли день и нощь дондеже сладкий свет осияваше тя, воздвизая благодарственно пети Богу: Аллилуиа.

Икос 7
Новый человек, по Богу созданный, явилася еси преподобная, умертвив бо всеконечно ветхаго человека, во Христа облеклася еси всечудная, седмьнадесят лет безчисленныя беды пострадах: Зосиме рекла еси, оттолеже и до днесь сила Божия грешную мою душу и тело смиренное соблюде, приими убо и от нас, недостойных, похвалы сицевыя:
Радуйся, яко умертвила еси страстей взыграния.
Радуйся, яко самое естество победила еси.
Радуйся, яко всякий грех от души и плоти твоея потребила еси.
Радуйся, яко в сердце и умерщвленных удесех твоих носиши Иисуса, тобою любимаго.
Радуйся, яко облеклася еси в одежду веселия духовнаго,
Радуйся, яко вошла еси в вечный покой Сына Божия.
Радуйся, чудо милосердия Божия, Марие равноангельная.

Кондак 8
Странное и преславное изменение твое, преподобная, видяще, демонов темныя полки горько рыдаху, вся же силы небесныя радостию играюще, песнь Христу воспеваху, прославляюще Божие милосердие, грехами людскими непреодоленное, велиим гласом зовуще: Аллилуиа.

Икос 8
Вся была еси в Бозе, Марие всебогатая, егда Зосима, обходя пустыню, видетя тя сподобися. «Заклинаю тя, отче, Спасителем Богом, да никомуже речеши, яже слышал еси от мене, дондеже Бог от земли возмет Мя», - вещала еси тому: ныне с миром отидиши, в посте же грядущаго лета причасти мя Святых Христовых Таин на брезе Иорданстем, то рекши, аки горлица пустыннолюбивая и неудержимая, от очию старца скрылася еси, той же поклонився до земли и целова место, идеже стоясте стопы ног твоих, зовый таковая:
Радуйся, яко обнажившися студа греховнаго, паче снега убелилася еси.
Радуйся, яко паче лучей солнечных просветилася еси.
Радуйся, яко вся грехи твоя забвенны и прощенны суть у Бога.
Радуйся, яко часть твоя со святыми.
Радуйся, яко первее блудница, днесь невеста Христова сотворилася еси.
Радуйся, чудо милосердия Божия, Марие равноангельная.

Кондак 9
Всяк помысл и ум ужасают болезни твоя, всехвальная, како труд пустыни любве ради Божией претерпела еси, взываше превеликий во отцех Зосима, рыдая: О мати духовная! Ты Богу приблизилася еси, хотел бых, аще бы можно было, во след тебе ходити и зрети честное лице твое и купно с тобою немолчно пети: Аллилиуиа.

Икос 9
Витийство земнородных не довлеет достойно похвалити твоя подвиги, всечестная, кто же доволен изрещи слезныя токи, яже пролияла еси в молитвах к Богу! Кто болезни твоя изочтет, кто исповесть всенощныя бдения, борения и тесноту жития твоего, пустыню всю чудесы просветивши, яко солнце, просияла еси, всечудная, тем убо молим тя: озари лучами света твоего наши сердца и испроси оставление грехов всем вопиющым тебе таковая:
Радуйся, помраченный образ Божий в светлости велицей в себе возобразившая.
Радуйся, небесными ароматы благоухающая.
Радуйся, звездами чудес украшенная.
Радуйся, лучами добродетелей сияющая.
Радуйся, величия Божия всем концем земли благовествующая.
Радуйся, небо и землю к пению славы Господа твоего призывающая.
Радуйся, чудо милосердия Божия, Марие равноангельная.

Кондак 10
Спасителя Бога животворящее Тело и Кровь вземше, в день таинственныя Христовы вечери, авва Зосима, по завещанию твоему, в вечер зело поздень изыде на брег Иордана, неуклонно в пустыню лунным светом осияваетую зря, и молящеся к Богу, глаголя: покажи ми, Господи, сокровище Твое, еже в пустыни сокрыл еси! Покажи ми ангела во плоти, да не отиду тощь, нося моя грехи на обличение, но, да радуяся, зову Тебе: Аллилуиа.

Икос 10
Стену непроходну мысляше старец быти Иордану реце, между ним и тобою, преподобная: обаче ты, став на одной стране реки, знамением крестным Иордан знаменала еси и купно с тем знамением взошла еси на воду: Зосима же, видев идущу тя к себе верху воды, ужасеся и радостию вопияше тебе:
Радуйся, горнаяго рая Божия обитательнице.
Радуйся, яко тварь повинуется велению твоему.
Радуйся, яко волны стелятся под честныя нозе твои.
Радуйся, яко Иордан тебе служит, луна и звезды небесныя дивятся святыни твоей.
Радуйся, силы Божией дивное проявление.
Радуйся, храм одушевленный Бога живаго.
Радуйся, чудо милосердия Божия, Марие равноангельная.

Кондак 11
Пение подобаше тебе приностити всемогущему Богу, авво, по воде шествующе рекла еси тому: что твориши священник сый, како дерзаеши кланятися мне, убозей, сам носяй страшныя Тайны Христа Бога! Имже верою и любовию, прах и земля покланяющися, со страхом зовуще: Аллилуиа.

Икос 11
Светом небесным блистаяся, причастилася еси Божественных Таин и радости премирныя исполнися, на небо руце воздевши, рекла еси: ныне отпущаеши рабу Твою, Владыко! Обращся к старцу, вещала еси: прости, авво Зосимо! В грядущее же лето узриши мя паки в пустыни, якоже хощет Господь, моли Его о мне, отче мой, моли, поминая всегда мое окаянство. И паки Иордан знаменавши, прешла еси верху той воды, старец же, не смея надолзе держати тя, стеня и рыдая, взываше в след тебе таковая:
Радуйся, мертвость Иисуса в теле носящая.
Радуйся, воскресения Его славою сияющая.
Радуйся, благодатию, яко ризою света, облеченная.
Радуйся, яко ангели Божии дивятся чистоте твоей.
Радуйся, яко силы адския ужасаются и трепещут от славы твоея.
Радуйся, светозарная обитель Всесвятыя Троицы.
Радуйся, чудо милосердия Божия, Марие равноангельная.

Кондак 12
Благодатию Божественною окриляема во един час долготу пустыни прешла еси и в нощь спасительныя Христовой стрвсти, по причащении Божественныя Тайныя вечери, сном святым уснула еси, о мире моляся, дух твой Господу предала еси, Емуже со ангелы в неисповедимой радости завеши ныне: Аллилуиа.

Икос 12
Поюще надгробное пение богомудрый Зосима, нозе твои честныя слезами омываше, и много молився тебе, покрыв тело твое землею, наго сущее и ничтоже имеющее, точию ветхую мантию, юже исперва тебе даде, радостию и страхом многим одержим, величию Божию дивяся, стояше зовый к тебе таковая:
Радуйся, яко чадо света сущи прешла еси к Свету невечернему.
Радуйся, яко дух твой с веселием прияша селения святых.
Радуйся, яко тело твое упокоися в могиле, юже лев от пустыни тебе ископа.
Радуйся, яко тобою показа мне Господь, колико отстою от меры совершенства.
Радуйся, о всем мире к Богу ходатаице.
Радуйся, постников высото, преподобных славо страдальцев красото.
Радуйся, чудо милосердия Божия, Марие равноангельная.

Кондак 13
О преподобная мати, богоблаженная Марие! Приими от нас ныне приносимое тебе моление и, Свету неприступному предостоя, молися всещедрому Богу, да милостив быв, ниспослет светозарную благодать покаяния всем заблуждшым чадом небеснаго Отца и от греха к отеческому дому востекших в райских селениих сподобит вкупе с тобою во веки благодарственно пети Ему: Аллилуиа, Аллилуиа, Аллилуиа.
Трижды, затем Икос 1 и Кондак 1.

Молитва преподобной матери Марии Египетской
О равноангельная и всесветлая Марие преподобная, убелившая ризу души своея в Крови Агнчей и зраящая ныне на небеси невечерний свет Царствия Небеснаго Христова, помяни мя, грешнаго и убогаго раба твоего, в Богопроиятных твоих к Богу молитвах и защити мя от ловления врага, веси бо его козни и лютую в сем житии на ны брань, даруй ми слезы покаяния, омывающе душевную мою скверну, испроси ми оставление грехов и жития исправление, избави мя от злых моих обычаев, лености и нерадения, научи мя постоянству и крепости в борьбе с моими греховными навыками, напечатлети в сердце моем и уме пресветлый образ тобою любимаго Христа, уязви мою душу Его всепрощающею любовию, да не оскорблю милосердие Его новыми грехами, умоли о мне и милостивую споручницу твою, Пречистую Деву Богородицу, да и мне, недостойному, дарует всесильную Свою помощь и наставит на стезю спасения, во исходе же от сего мира, о мати преподобная, сподоби мя причащения Святых Божественных Таин: в страшный час смерти помози, на воздушных мытарствах заступи и предстательством твоим отверзи ми двери Небеснаго Царствия, идеже по трудех и подвизех ныне водворяешися, зря и прославляя пресладкаго Искупителя твоего, пришедшаго в мир грешныя спасти и Божествееною Своею Кровию омывающаго нас от всякаго греха. Емуже слава, честь и поклонение со Безначальным Его Отцем и Пречистым и Животворящим Духом в безконечныя веки. Аминь.

Молитва Господу нашему Иисусу Христу
Господи, согрешихом на небо и пред Тобою! Приими обращение и покаяние наше, приими наше стенание и вопль наш даже до смерти, приими нас, окаянных, живших безстудно, приими нас, Владыко, проведших всю жизнь в распутстве и во всяком лукавстве и нечистоте, приими нас и не воздай нам по делом рук наших. Господи! Обрати нас! Господи, вразуми нас! И не прогневайся на нас! Но буди милостив ко грехом нашым. Подаждь нам, Господи, Твою крепкую руку, яко Петру утопающу, и возведи к вечному пристанищу: к Тебе прибегаем, Сыне Божий, Тя исповедуем и в руце Твои жизнь нашу предаем, яко Ты еси упование наше крепкое и спасение несомненное, и Тебе славу возсылаем, со Безначальным Твоим Отцем и Всесвятым и Животворящим Твоим Духом, ныне, и присно, и во веки веков. Аминь.

Молитва Божией Матери
О Пресвятая Владычице моя Богородице, Небесная Царице, спаси и избави мя, грешнаго раба Твоего, от напрасныя клеветы, от всяких бед, и напасти, и внезапныя смерти. Помилуй мя в дневных часех, и в утренних, и вечерних, и во всякое время сохрани мя: стояща, сидяща, соблюди и на всяком пути ходяща, и в нощных часех спяща - снабди, покрый и заступи, защити мя, Владычице Богородице, от всех враг моих, видимых и невидимых, и от вякаго злаго обстояния на всяком месте и на всякое время, буди ми, Мати Преблагая, необоримая стена и крепкое заступление всегда и во веки веков. Аминь.

По благословлению Блаженнейшего Владимира, митрополита Киевского и всея Украины.[/spoiler]

[Раб божий Константин]

Акафист преподобной Марии Египетской иной.
[spoiler]Кондак 1
Избранной Богом от падшаго рода подвигом тяжким стяжавшей велию славу на небеси, мы, земнороднии, смиренно взываем ти, святая Марие, моли за нас Господа Бога, да исхитит нас из рова страстей похвальная ти воспевающих: Радуйся, Преподобная Мати Марие, Ангели подвигом своим удивившая.

Икос 1
Ангели изумевшася внезапной перемене в тебе, Преподобная Мати, как ты во единем часе оставила еси широкий путь, ведущий в пагубу и вступила на узкую стезю спасения. Приими от нас, Христова Угоднице, радостное сие пение: Радуйся, Божию Матерь молившая, да удостоит припасть у Креста; Радуйся, чистую Деву просившая, да прощения вымолит у Христа. Радуйся, Деве святей обещавшая не возвратитися на пагубный путь; Радуйся, горькие слезы лиявшая на больную Преподобная грудь. Радуйся, яко Заступницей скоро в молитве была услышана ты; Радуйся, яко в том же часе свободно могла ко Кресту подойти. Радуйся, древо умильно лобзавшая, на немже распят был Христос; Радуйся, всем существом трепетавшая, потоки излившая слез. Радуйся, тут же решение приявшая не возвратитися вспять; Радуйся, иго Христово и бремя Его избравшая взяти себе. Радуйся, сим ты решением твердым во главу сатану поразила еси; Радуйся, яко об одном решении радость велия бысть на небеси. Радуйся, Преподобная Мати Марие, Ангелы подвигом своим удивившая.

Кондак 2
Видя неизреченную любовь к тебе Божией Матери, Преподобная, яко по слезной молитве твоей сотвори в той же час невозбранный вход твой к Пречистому Древу Креста в праздник честнаго его воздвижения, и сподоби облобызати оное, ты же в радостном трепете о милости Божией воспевала Ему: Аллилуиа.

Икос 2
Разумом и сердцем своим прияла еси, Святая Марие, неуклонное решение отныне не возвратитися на путь страстей, в умилении сердца молиши Пресвятую Деву Богородицу указати ти место спасения и внезапу услышала еси таинственный глас, указующий таковым местом пустыню Иорданскую. Приими от нас, Преподобная, похвалу сицевую: Радуйся, благодарившая Заступницу Мира за вход невозбранный ко Кресту; Радуйся, Споручницей Деву избравшая отныне служить токмо Христу. Радуйся, чистую Деву молившая спасения ти путь указати; Радуйся, от иконы приемшая местом подвига пустыню избрати. Радуйся, в тот час отрешившая мира сего суету; Радуйся, тут же на кораблице отплывшая по Иорданову сторону ту. Радуйся, в земли пустынней Божией Матерью хранимая ты; Радуйся, миром греховным незримая, избегшая его суеты. Радуйся, яко наветы диавола Крестом отражавшая; Радуйся, в подвизе тяжцем избранная, радовавшаяся со Христом. Радуйся, страхи и глад терпевшая ради Него; Радуйся, прелести мира презревшая ради Единаго Христа. Радуйся, Преподобная Мати Марие, Ангели подвигом своим удивившая.

Кондак 3
Силою свыше укрепляема пребывала еси в пустыне, Преподобная Мати, помощию Господа хранимая, выну воспевая Ему: Аллилуиа.

Икос 3
Имея воистину велие хотети преподобный Зосима видети избранницу Божиею высотою жития своего его превозшедшей, егда наступиша дни святыя Четыредесятницы, отъиде в пустыню за Иорданскую и обрете волею Божиею тебе, Преподобная, ты же смирения ради, не хотяще явитися людем, прежде бежала еси от него, последе же умолена быша преподобным удостоила еси его беседы с тобою, не возгнушайся и нашей беседы смиренныя, угоднице Божия, но приими похвалу сицевую: Радуйся, в пустыне покаяние приносившая; Радуйся, дни и ночи в ней плакавшая. Радуйся, слезами всю землю оросившая; Радуйся, достигшая небесной высоты. Радуйся, от смрада житейскаго бежавшая; Радуйся, притекшая в пустынный покой. Радуйся, под ношею крестною страдавшая; Радуйся, яко всегда Господь с тобою. Радуйся, за подвиги Христом возвеличенная; Радуйся, прославленная еще на земле. Радуйся, прозорливостью Господом отличена; Радуйся, яко по имени Зосиму назвала еси. Радуйся, Преподобная Мати Марие, Ангелы подвигом своим удивившая.

Кондак 4
Бурею священнаго ужаса объят бысть преподобный Зосима, яко ты николиже знавшая его по имени, умолиши рассказати ему житие твое дивное. Ты же, смиренная угоднице, не утаила еси пред ним прежней своей греховной жизни, да прославится в тебе Господь, щедро награждающий кающихся: Мы благодарим Создателя, моляще Его, да не отринет Он и нашего покаяния, и в радостном уповании поем Ему: Аллилуиа.

Икос 4
Слышаше преподобный Зосима, како ты с мужеством перенесла еси вся тяжести пустыннаго жития в борьбе с искушениями и диаволом, удивишася и с умилением к тебе взываше: Радуйся, в пустыне только питавшая кореньями тело твое; Радуйся, на Господа всю печаль возлагавшая, да не покинет создание свое. Радуйся, мнозех превозшедшая в подвизе тяжцем своем; Радуйся, в рай за сие ты возшедшая и увенчана светлым венцем. Радуйся, Божиим Духом научена в пустыне писанию; Радуйся, Им Всеблагим, вручены ти дары святой красоты. Радуйся, Духа Святаго сосудом, Марие, сподобилась быти; Радуйся, яко на пути твоем трудном, стремилась для Господа пожити. Радуйся, руку на плуг положившая не возвратитися вспять; Радуйся, всем существом Христа полюбившая, приявшая Его благодать. Радуйся, крином в пустыне прекраснейшим все житие ты цвела; Радуйся, смиренною, благоухающею для Господа Бога была еси. Радуйся, Преподобная Мати Марие, Ангелы подвигом своим удивившая.

Кондак 5
Боготочною кровию искупивый ны, Господи, не призвал еси праведныя, но грешныя на покаяние, сподоби и нас подражати житию твоея угодницы Марии, и во веки благодарным сердцем славословити Тя райскою песнею: Аллилуиа.

Икос 5
Видев тя Зосима, Преподобная, стоящую на воздусе и молящуюся, трепетом объят бысть недоумевая, како в падении пребывающей ранее, человеце, толицей благодати сподобися, умиленно возблагодаря Господа и воспета сице: Радуйся, святостью жизни достигшая дара предвидения; Радуйся, монастырские тайны раскрывшая пред Зосимой своими усты. Радуйся, Ангелом уподобилась блистанием своей чистоты; Радуйся, яко стояти сподобилась на воздусе блаженная. Радуйся, пред Зосимой строгия подвиги скрыла еси; Радуйся, с неба явления многия утаила еси. Радуйся, ради святаго спасения хранила лишь в сердце своем; Радуйся, Зосиме молчать повелевшая о себе до кончины твоей. Радуйся, прославленной не восхотевшая быть на земли от людей; Радуйся, яко сорок семь лет неизвестною пребывала в пустынном житии. Радуйся, такожде со стези крестной хотяще неведомой всем отойти; Радуйся, Преподобная Мати Марие, Ангелы подвигом своим удивившая.

Кондак 6
Проповедуют Ангелы на небеси чудное твое житие, блаженная пустыннице, яко ты в немощнем телеси стяжала велию силу духа и сокрушила еси козни сатанинския. Мы вкупе с Ангелы прославляем Господа, давшаго тебе крепость Своею благодатию и поем Ему: Аллилуиа.

Икос 6
Возсиявше в ти, Божия Угоднице, великая жажда вкушания Пречистых Христовых тайн, просиша Зосиму явитися в будущее лето, в день святаго Великаго Четверга со святыми Дарами на берег реки Иордана, да сподобишися ты сего святейшаго Дара. Мы, прославляя в тебе ревность теснейшаго соединения с Господом нашим Иисусом Христом, похвальная ти зовем: Радуйся, жаждою святою томимая причащения ради святых Даров; Радуйся, в сердце твоем бысть хранимая ко Господу Богу любовь. Радуйся, всю себе ты уневестила, Преподобная, Спасу Христу; Радуйся, кротость, смирение стяжавшая в Ангельскую чистоту. Радуйся, скоро с Зосимой простилася, жено святой красоты; Радуйся, тут же от глаз его скрылася, Марие, вглубь пустыни. Радуйся, в сердце Зосимы оставила умиления восторг; Радуйся, ум сего старца направила на размышленный поток. Радуйся, яко драгую жемчужину, мысль о тебе он унес; Радуйся, яко весь путь до обители омочен от радостных слез. Радуйся, яко долго в очах его старческих образ твой чудный стоял; Радуйся, токмо чрез лето свиданием старец себя утешал. Радуйся, Преподобная Мати Марие, Ангелы подвигом своим удивившая.

Кондак 7
Хотяще соблюсти устав святыя обители, отпустиша игумен иноцы своя на подвиг молчания и наивящей молитвы в пустыни дальния. Преподобный же Зосима не можаще отправиться болезни ради, о нейже предрекала ему ты, Святая Марие, с радостным трепетом ожидавше Великаго Четверга, в онь же день условия ради, обещавши причаститися, преклоняшеся пред непостижимыми судьбами Божиими воспеша Богу: Аллилуиа.

Икос 7
Новым священным трепетом объята душа преподобнаго старца, когда насташа Великий день совершения тайныя Вечери нашим Господом, взяше с собою святейшия Дары, идоша на берег реки, святая, причастити тя, Мати блаженная, мы вкупе со святым старцем благоговеем пред Господом, идущим к тебе в тайнах Своих пречистых. И тебе, достойней невесте Сладчайшаго Жениха, с любовию шествующей на брак Агнчий, умильно взываем: Радуйся, яко святым Иереем исполнена просьба твоя; Радуйся, яко со святыми Дарами прииде на берег трепеща. Радуйся, яко в ночь страсти Христовой хотяще причастницей быти; Радуйся, яко тех в страданиях участница будеши на небеси с ним жити. Радуйся, яко смути преподобнаго отсутствием долгой порой; Радуйся, яко смущение подобная бысть твоя переправа рекой. Радуйся, яко при сиянии месяца ты показалася в дали; Радуйся, стопами идущая к противоположному берегу реки. Радуйся, знамением крестным спасительным, Иордан осенила рукой; Радуйся, яко по суху, без всякаго смущения пошла рекой. Радуйся, яко видения ради сего в страхе бысть Иерей; Радуйся, яко его ты успокоила речью святой своей. Радуйся, Преподобная Мати Марие, Ангелы подвигом своим удивившая.

Кондак 8
Странницы и пришельцы вси есмы на земли, по глаголу апостола, странницей пребывала и ты в пустыне своей до дне своего преставления, Агнице Христова Марие, да от Иерусалима земнаго переселившаяся в Иерусалим Горний, славословити Творцу святою райскою песнею: Аллилуиа.

Икос 8
Весь сладость, все твое желание бысть Господь Иисус, Егоже ты принимаше с трепетом в тайнах пречистых из рук блаженнаго старца. Мы, взирая на тя, поистине на достойную причастницу сего святейшаго Дара, с любовию тебе зовем: Радуйся, в тайнах святых обрученная с Безсмертным твоим Женихом; Радуйся, Им за сие украшенная райским нетленным венцем. Радуйся, тя по приятию Божиих Даров окружи дивный свет; Радуйся, яко на тя не можаше Зосима без страха смотрети. Радуйся, с веселием тихим Симеона молитву прочла; Радуйся, взор свой умиленный на руце к небу сейчас вознесла. Радуйся, пищи небесной вкусившая, земной не хотяще приняти; Радуйся, дары любве у Зосимы зерна три решила взяти. Радуйся, яко после своего причастия не долго на бреге пребыла еси; Радуйся, Преподобная Мати Марие, Ангелы подвигом своим удивившая.

Кондак 9
Всякий чин ангельский и человецы благословляюще Господа, како Он совершаше силу в немощных людех, укрепляше и тя, многопобедная угоднице, в подвизе своем пустынном терпяще убо в обнаженнем твоем телеси хлад и зной нестерпимый к тому же и страх, и глад и многия злохитрыя искушения от диавола. Ты же за таковую помощь от Господа выну воспевала Ему: Аллилуиа.

Икос 9
Витийствующий язык не можаше изобразити, яже творишися в душе праведнаго Зосима по уходе твоем, таинственная пустыннице, ты образом своим, исполненным благодати Духа Всесвятаго, вперила духовный взор старца в размышления горняя, како Бог перстнаго человека всемогуществом Своим подымаше до Ангельския высоты, приими вкупе с Зосимою смиренную нашу похвалу: Радуйся, в ней же свой ум сохранившая, не разсеянными соблазна страстьми; Радуйся, яко тяготилася встречей с земными людьми. Радуйся, скоро в пустыню стремилася к беседе со Ангелы ты; Радуйся, тамо дни и ночи молилася, незримая миром в тиши. Радуйся, яко от всех удалилася, спасения ради в глуши; Радуйся, только лишь звезды небесныя быша свидетели слез. Радуйся, в сии минуты чудесныя, любовию взирал Сам Христос; Радуйся, яко Споручницу дивную ты веселила собой. Радуйся, помощию Ея сильною в вечный достигла покой; Радуйся, вновь Зосиму просившая, чрез лето в пустыню придти. Радуйся, вновь его ожидавшая с надеждой тебе обрести; Радуйся, Преподобная Мати Марие, Ангелы подвигом своим удивившая.

Кондак 10
Спастися хотящим нам буди молитвенницей у Престола Всевышняго, Преподобная Мати, да и мы, избегши искушений всяческих, сподобимся вкупе с тобою выну славословити Господа и пети Ему: Аллилуиа.

Икос 10
Стена еси всем подвижникам, Пресвятая Богородице, от злохитрых козней диавола, спасла еси избравшую тебя Споручницей, пред Сыном сладчайшим Твоим, не посрамила еси ея упования, Пречистая, и довела до вожделенных врат рая. Сподоби нас грешных достойно восхвалити святую угодницу твою Марию песнопениями сими: Радуйся, яко со трепетом радостным ожидавше Зосима тебя; Радуйся, всей мыслею сладостной он утешал себя. Радуйся, яко в поста дни великие, он в пустыню с любовью ушел; Радуйся, яко до места свидания, двадцать дней всего шествовал он. Радуйся, яко в смущении горестном, старец искаше тебя; Радуйся, яко волнений исполненный, старец не помнил себя. Радуйся, яко на песце озаренную светом небес, тебя он обрел; Радуйся, с миром ты сим разлученная, в вечный отъиде покой. Радуйся, с горьким рыданием старец над телом склонился твоим; Радуйся, яко не верил Зосима очам престарелым своим. Радуйся, яко ты уже давно пересилилася в дивный небесный чертог; Радуйся, вечно теперь веселишися, ушла от скорбей и тревог. Радуйся, Преподобная Мати Марие, Ангелы подвигом своим удивившая.

Кондак 11
Пением ангельским восхваляема и сонмом их окруженная, вознесеся душа твоя праведная ко престолу Всевышняго во гласе радования воспевати Господа Богокрасною песнею: Аллилуиа.

Икос 11
Святым Духом Божиим озаренный бысть лик твой преподобный, старец же Зосима в велие смущение прииде, яко не уведе имени твоего, блаженная, абие узре надпись у главы твоея начертанную бысть на земле: Радуйся, яко уведе Зосима о преставлении дни; Радуйся, яко смиренной Марией названной была ты в словах. Радуйся, яко преставилась Богу еще лето прошлое ты; Радуйся, в день своего святаго причастия сподобилась отойти. Радуйся, вдруг из пустыни сей жгучей к страху два льва подошли; Радуйся, яко ногами могучими вырыв могилу, ушли. Радуйся, яко с молитвой горячей предал земле он твой прах; Радуйся, яко долго стоял над могилою старец в умильных слезах. Радуйся, тихо устами дрожащими старец молитву совершал; Радуйся, в судьбах Непостижимаго с любовию он прославлял. Радуйся, Преподобная Мати Марие, Ангелы подвигом своим удивившая.

Кондак 12
Благодать испроси нам у Бога, чистая Христова невеста Марие, да помилует он нас в день страшнаго суда Своего и да причислит к избранному своему стаду, и да сподобит выну воспевати Ему: Аллилуиа.

Икос 12
Поюще твое покаяние, емуже удивишася Ангелы на небеси и вси страдания твоя безпримерныя, их же не можеши изобразити некий язык человеческий с любовию и радостию ти вопием: Радуйся, яко за плоть обнаженную ныне чудною ризою покрыта в раю; Радуйся, зноем в пустыне сожженная, на небеси прохлады вкушаеши струю. Радуйся, глад постоянный терпевшая, ныне в небе насыщена хлебом Христа; Радуйся, всякия скорби понесшая, ныне в радости глас произносят уста. Радуйся, яко в тяжцей борьбе со диаволем пребывала семнадцать ты лет; Радуйся, яко ты за победу прославлена, окружи тя за то дивный свет. Радуйся, яко премудрая Дево не погасила светильник свой; Радуйся, яко от Крестнаго Древа — неуклонный ко спасению подвиг был твой. Радуйся, Деве Святой обещавшая, Ея помощию не сбиться с пути; Радуйся, много в пустыне страдавшая, не попустила в уклон отойти. Радуйся, знамением крестным разрушила козни врагов; Радуйся, яко ты ныне вкушаеши от Божиих щедрот и даров. Радуйся, Преподобная Мати Марие. Ангелы подвигом своим удивившая.

Кондак 13
О, Святая, всехвальная и многопобедная угоднице Христова, Марие, покаяния образ преизящнейший! Молим Тя, испроси нам у Господа Бога силу Его благодати, загладити и нам тьму грехов наших, с сокрушенными слезами о них и да сподобимся в обители покаявшихся получити утешения вечнаго по неложному обещанию, и с лики Ангельскими воспевати Пресвятую Троицу ангельскою песнею: Аллилуиа, Аллилуиа, Аллилуиа.
(Этот кондак читается трижды, затем икос 1 и кондак 1)

Молитвы преподобной Марии Египетской

Молитва первая
О великая Христова угодница, преподобная мати Марие! Услыши недостойную молитву нас, грешных (имена), избави нас, преподобная мати, от страстей, воюющих на души наша, от всякия печали и находяшия напасти, от внезапныя смерти и от всякаго зла, в час же разлучения души от тела отжени, святая угодница, всякую лукавую мысль и лукавые бесы, яко да приимет души наша с миром в место светло Христос Господь Бог наш, яко от Него очищение грехов, и Той есть спасение душ наших, Емуже подобает всякая слава, честь и поклонение, со Отцем и Святым Духом, ныне и присно и во веки веков.

Молитва вторая
О великая Христова угоднице преподобная Марие! На Небеси Престолу Божию предстоящи, на земли же духом любве с нами пребывающи, имеющи дерзновение ко Господу, моли спасти рабы Его, к тебе с любовию притекающыя. Испроси нам у Великомилостиваго Владыки и Господа веры непорочное соблюдение, градов и весей наших утверждение, от глада и пагубы избавление, скорбящым утешение, недугующым — исцеление, падшим — возстание, заблуждшым — укрепление, в делах благих преспеяние и благословение, сиротам и вдовицам — заступление и отшедшим от сего жития — вечное упокоение, всем же нам в день Страшного Суда одесную страны общники быти и блаженный глас Судии Моего услышати: приидите, благословеннии Отца Моего, наследуйте уготованное вам Царствие от сложения мира, и тамо пребывания во веки получити. Аминь.

Молитва третья
Святая и великая угоднице Христова Марие! Ангелы удивившая безпримерным подвигом своим. Молим тя, блаженная, предстоя ныне у Престола Всесвятыя Троицы, умоли Господа, обретшая велие дерзновение пред Ним, да сподобит Он и нас подобно тебе, покаятися в тмочисленных согрешениях наших, и да простит нас, и да наказав ны зде по Своему человеколюбию, не погубит и нас в будущем веце. Моли, святая Марие, Пресвятую твою Споручницу, укрепившую тя в подвизе твоем тяжцем, да укрепит Она и нас, Всесвятая, всесильною помощью Своею, на сем земном тернистом пути, и яко ты, облобызав с верою и любовию Бесчестный Крест Христов, восприяла благодать Его Всесильную в борьбе со диаволом, миром и плотию и доблестию разрушила еси все козни сатаны, тако да сподобимся и мы помощию Животворящаго Древа Креста Господня, разрушити все преграды греха к достижению горняго царствия и, удостоившись вечныя жизни, вкупе с тобою выну воспевати Пресвятую Троицу во Единем существе Отца и Сына и Святаго Духа во веки веков. Аминь.[/spoiler]

[Раб божий Константин]

Акафист преподобной Марии Египетской иной с изменениями.
[spoiler]Кондак 1

Избранной Богом от падшаго рода, подвигом тяжким стяжавшей велию славу на небеси, мы, земнороднии, смиренно взываем ти, Святая Марие, моли о нас Господа, да исхитит нас из рова страстей, похвальная ти воспевающих: Радуйся, Преподобная Мати Марие, Ангелы подвиги своими удивившая.

Икос 1

Ангели удивишася внезапному изменению жития твоего, Преподобная мати, како ты оставивши широкий путь, ведущий в пагубу, стала еси на узкую стезю спасения. Приими же от нас, Христова Угоднице, похвальное пение сие:
Радуйся, все упование на Господа и Его Пречистую Матерь возложившая.
Радуйся, во уповании своем не постыжденная.
Радуйся, не возвращатися на путь пагубный обещавшая.
Радуйся, молитвы теплыя ко Господу возносившая.
Радуйся, живот твой всецело в руце Божии предавшая.
Радуйся, иго Христово и бремя Его избравшая себе.
Радуйся, яко сим намерением диаволу досадила еси.
Радуйся, яко сего ради радость велия бысть на небеси.
Радуйся, Преподобная Мати Марие, Ангелы подвиги своими удивившая.


Кондак 2

Видя неизреченную любовь к тебе Божией Матери, яко по слезной молитве твоей абие сотвори невозбранным вход твой к пречестному древу Креста в праздник Честнаго его Воздвижения. Ты же, лобызая оный, в радостном трепете о милости Божией воспела еси о сем: Аллилуиа.

Икос 2.

Разумом и сердцем своим прияла еси, святая Марие, неуклонное намерение: отныне не возвращатися на путь страстей, в умилении сердца молящи Пресвятую Деву Богородицу указати ти место спасения. И внезапу услышала еси таинственный глас, указующий таковым местом пустыню Иорданскую. Приими же от нас, Преподобная, похвалу сицевую:
Радуйся, Чистую Деву молившая спасения ти путь указати.
Радуйся, от иконы Ея приемшая весть о месте подвига твоего.
Радуйся, благодарившая Заступницу мира яко услышана бысть молитва твоя.
Радуйся, в земли пустынней Божией Материю хранимая.
Радуйся, яко наветы диавола Крестом отражавшая.
Радуйся, в подвизе непрестанно пребывавшая.
Радуйся, страхования и глад спасения ради терпевшая.
Радуйся, ради Господа прелести мира презревшая.
Радуйся, Преподобная Мати Марие, Ангелы подвиги своими удивившая.

Кондак 3

Силою свыше укрепляема пребыла еси в пустыни, Преподобная Мати, благодатию Божиею хранимая, выну воспевая Господу: Аллилуиа.

Икос З

Имея преподобный Зосима хотение велие зрети подвижника, высотою жития своего его превозшедшаго: егда наступиша дни святыя Четыредесятницы отыде в пустыню Заиорданскую и обрете волею Божиею тебе, преподобная. Ты же смирения ради, не хотяше явитися людем, прежде бежала еси от него, послежде же умолена бывши, с кротостию беседовала еси с ним. Не возгнушайся и нашея смиренныя беседы с тобою, угоднице Божия, но приими похвалу таковую:
Радуйся, в пустыни покаяние приносившая.
Радуйся, дни и нощи о гресех своих рыдавшая.
Радуйся, слезами землю оросившая.
Радуйся, достигшая высоты небесныя.
Радуйся, от мрака греховнаго бежавшая.
Радуйся, иго Христово радостно подъемшая.
Радуйся, за подвиги Христом возвеличенная.
Радуйся, прозорливостию от Господа почтенная.
Радуйся, Преподобная Мати Марие, Ангелы подвиги своими удивившая.

Кондак 4

Бурею священнаго ужаса объят бысть преподобный Зосима, яко ты, николиже знавшая его, по имени наименовала еси. По сем же умоли тя старец поведати ему житие твое. Ты же, смиренная угоднице, не утаила еси пред ним прежния своея греховныя жизни, да прославится в тебе Господь, щедро воздающий кающимся: мы же благодарим Создателя, моляще Его, да не отринет Он и нашего покаяния, и в радостном уповании поем Ему: Аллилуиа.

Икос 4

Слышаше преподобный Зосима како с мужеством претерпела еси вся тяготы пустыннаго жития в борьбе с искушениями и диаволом, удивишася, и со умилением к тебе взываше:
Радуйся, яко на Господа всю печаль возлагавшая.
Радуйся, мнозех в подвизе превозшедшая.
Радуйся, вся козни диавольския победившая.
Радуйся, светлым венцем увенчанная.
Радуйся, яко Божиим Духом научена в пустыни Писанию.
Радуйся, яко Утешителем Всеблагим, вручены ти дары благодатныя.
Радуйся, всем естеством Христа возлюбившая и благодать Его приемшая.
Радуйся, крином прекраснейшим в пустыни процветшая.
Радуйся, Преподобная Мати Марие, Ангелы подвиги своими удивившая.

Кондак 5

Боготочною Кровию искупивый ны, Господи, не призвал еси праведныя, но грешныя на покаяние. Сподоби и нас подражати житию Твоея угодницы Марии и во веки благодарным сердцем славословити Тя песнию: Аллилуиа.

Икос 5

Видев тя Зосима на воздусе стоящую и молящуюся, трепетом объят бысть, недоумевая, како ты в падении ранее пребывшая, толикия благодати сподобилася еси. Мы же, умиленно благодаря Господа, вопием тебе сице:
Радуйся, святостию жития дара предвидения достигшая.
Радуйся, яко чистотою Ангелом уподобилася еси.
Радуйся, блаженная, на воздусе стояти сподобльшаяся.
Радуйся, яко от людей на земли прославленною быти не восхотевшая.
Радуйся, яко четыредесят и седмь лет неведомою в пустынном житии пребыла еси.
Радуйся, спасения ради многия скорби претерпела еси.
Радуйся, яко за подвиги твоя мзду во Царствии Небеснем прияла еси
Радуйся, яко Господем на небесех прославлена еси.
Радуйся, Преподобная Мати Марие, Ангелы подвиги своими удивившая.

Кондак 6

Воспевают Ангели на Небеси чудное твое житие, блаженная пустыннице, яко ты в немощнем телеси стяжала еси велию силу духа и скорушила еси козни диавольския. Мы же вкупе со Ангелы прославляем Господа, давшаго тебе крепость Своея благодати и поем Ему: Аллилуиа.

Икос 6

Возсиявше в тебе, Божия угоднице, великая жажда причастия Пречистых Тайн Христовых. Сего ради просила еси Зосиму приити в будущее лето, в день Святаго Великаго Четвертка со Святыми Дарами на брег реки Иордана, да сподобишися и ты сего Святейшего Дара. Мы же, прославляя в тебе велию любовь ко Господу, похвальная взываем ти:
Радуйся, кротость, смирение и чистоту Ангельскую стяжавшая.
Радуйся, житие в посте и молитве проводившая.
Радуйся, воле Божией себе всецело предавшая.
Радуйся, спасения ради хлад и зной терпевшая.
Радуйся, алкавшая и жаждавшая правды Божией.
Радуйся, тесным и прискорбным путем в Царствие Небесное вшедшая.
Радуйся, нам образ терпения оставившая.
Радуйся, на пути спасения нас укрепляющая.
Радуйся, Преподобная Мати Марие, Ангелы подвиги своими удивившая.

Кондак 7

Наступишему времени Святыя Четерыдесятницы, отпусти игумен иноки своя на подвиг молчания и наивящей молитвы в пустыни дальния. Преподобный же Зосима не можаше изыти, болезни ради, о ней же предрекала еси ему ты, Святая Марие. Он же, преклоняяся пред непостижимыми судьбами Божиими, воспеваше: Аллилуиа.

Икос 7

Трепетом священным объята бысть душа преподобнаго старца, егда насташа Великий день воспоминания совершения Господом нашим Тайны Вечери: взяше бо с собою Святейшия Дары, иде на брег реки причастити тя, блаженная мати. Мы же благоговения исполнени к тебе, яко достойней невесте Сладчайшаго Жениха, с любовию шествующей на брак Агнчий, умильно взываем:
Радуйся, лепоту мира презревшая.
Радуйся, единаго на потребу взыскавшая.
Радуйся, вся утехи земныя во уметы вменившая.
Радуйся, всю славу мира смирением поправшая.
Радуйся, подвигом добрым подвизавшаяся.
Радуйся, страхом Божиим всякое греховное желание побеждавшая.
Радуйся, от треволнений мира в небурном пристанищи укрывшаяся.
Радуйся, яко неизреченныя радости в мире горнем днесь наслаждаешися.
Радуйся, Преподобная Мати Марие, Ангелы подвиги своими удивившая.

Кондак 8

Странницы и пришельцы вси есмы на земли, по глаголу апостола, странницей пребыла еси и ты в пустыни до дне своего преставления, угоднице Христова Марие, егда от Иерусалима земнаго преселилася еси в Иерусалим Горний славословити Святую Троицу песнию: Аллилуиа.

Икос 8

Весь сладость и все желание твое бысть Господь Иисус, Его же ты прияла еси со трепетом в Пречистых Тайнах из рук блаженнаго старца. Мы же, взирая на тя, яко поистине достойную причастницу сего Святейшаго Дара, с любовию тебе взываем:
Радуйся, небесная паче всего возлюбившая.
Радуйся, в горниле скорбей паче злата очищенная.
Радуйся, глубочайшим смирением себе украсившая.
Радуйся, нищетою духовною Царствие Небесное обретшая.
Радуйся, во плаче о гресех своих Господом утешенная.
Радуйся, за кротость души твоея наследие жизни вечныя получившая.
Радуйся, в земном житии правды Христовы, а не брашна тленнаго искавшая.
Радуйся, ныне на небесех нетленною пищею наслаждающаяся.
Радуйся, Преподобная Мати Марие, Ангелы подвиги своими удивившая.

Кондак 9

Всякий чин ангельский и человеческий удивися, како ты в обнаженнем телеси твоем хлад и зной нестерпимый, ктому же страх, и глад, и многия злохитрыя искушения от диавола претерпела еси. Ты же, Господом укрепляема, выну воспевала еси Ему: Аллилуиа.

Икос 9

Витийствующий язык не возможет изрещи, яже уготова Бог любящим Его: ихже око не виде, и ухо не слыша, и на сердце человеку не взыдоша. Ты же, преподобная, наслаждаяся ныне сих изобильно, не забуди и нас, зовущих ти:
Радуйся, нетленных благ небесных наследнице.
Радуйся, жизни вечныя причастнице.
Радуйся, неизреченную славу Божию присно созерцающая.
Радуйся, во свете невещественном непрестанно пребывающая.
Радуйся, по достоянию от Господа возвеличенная.
Радуйся, за смиренномудрие от Него превознесенная.
Радуйся, слезами покаяния скверну греховную омывшая.
Радуйся, в чертог небесный Господом призванная.
Радуйся, Преподобная Мати Марие, Ангелы подвиги своими удивившая.

Кондак 10

Спастися хотящим нам, буди молитвенницей у Престола Всевышняго, Преподобная Мати, да и мы, избегши искушений всяческих, сподобимся вкупе с тобою выну славословити Господа и пети Ему: Аллилуиа.

Икос 10

Стена еси всем подвижникам, Пресвятая Богородице, от злохитрых козней диавола: спасла бо еси избравшую Тя Споручницею пред Сыном Твоим, не посрамила еси ея упования, Пречистая, и довела еси ю до вожделенных врат Царствия Небесного. Сподоби же и нас, грешных, достойно восхвалити преподобную Марию пении сими:
Радуйся, великая Христова угоднице, верным путь спасения указующая.
Радуйся, мыслию сладостною о Царствии Небеснем нас утешающая.
Радуйся, яко в поста дни великие к покаянию нас побуждающая.
Радуйся, яко житием своим научающая нас все упование на Господа возлагати.
Радуйся, Пречистую Деву Споручницею себе избравшая.
Радуйся, яко сим научающая и нас вручати себе Ея всесильному предстательству.
Радуйся, яко о гресех своих в пустыни рыдавшая, ныне же на небесех утешающаяся.
Радуйся, алкавшая и жаждавшая Христа ради, ныне же с Ним насыщаешися вечныя радости.
Радуйся, Преподобная Мати Марие, Ангелы подвиги своими удивившая.

Кондак 11

Пением Ангельским восхваляема и сонмом святых окружаема, вознесеся душа твоя праведная в селения Небесная, да во гласе радования воспеваеши Господа Богокрасною песнию: Аллилуиа.

Икос 11

Святым Духом по преставлении твоем озарен бысть лик твой, святая Марие. Преподобный же Зосима в велие смущение прииде, яко не уведе имене твоего, блаженная. Егда же узревши его у главы твоея на земли начертанное – возрадовася. Мы же вопием ти:
Радуйся, по отшествии от земных в Небесных обителех водворенная.
Радуйся, за смирение венцем славы увенчанная.
Радуйся, за победу над страстьми на престоле Царствия посажденная.
Радуйся, от манны сокровенныя за сокрушение и слезы услаждаемая.
Радуйся, за многия лишения от Древа Животнаго ныне питаемая.
Радуйся, с Царицею Небесною у престола Царя царей предстоящая.
Радуйся, со Ангелы и всеми святыми за нас молящаяся.
Радуйся, чтущих тя, теплотою любве согревати не престающая.
Радуйся, Преподобная Мати Марие, Ангелы подвиги своими удивившая.

Кондак 12

Благодать испроси нам у Бога, славная Христова угоднице Марие, да помилует Он нас в день Судный, и да сопричтет к избранному Своему стаду, и сподобит выну воспевати Ему: Аллилуиа.

Икос 12

Поюще твое покаяние, емуже удивишася Ангели на Небеси, и вся страдания твоя неизглаголанная, ихже не может изобразити никий язык человеческий, с любовию и радостию вопием ти:
Радуйся, яко за плоть обнаженную - ныне чудною ризою покрыта еси на небесех.
Радуйся, яко зноем в пустыни сожженная, ныне прохладу райскую вкушаеши.
Радуйся, глад непрестанно терпевшая, ныне же насыщаешися пищею небесною.
Радуйся, всякия скорби понесшая, ныне же наслаждаешися гласом радования.
Радуйся, яко премудрая дева не угасила еси светильник свой.
Радуйся, образ истиннаго покаяния нам являющая.
Радуйся, побеждати мир и вся наветы вражия нам помогающая.
Радуйся, о всем мире теплая предстательнице.
Радуйся, Преподобная Мати Марие, Ангелы подвиги своими удивившая.

Кондак 13

О, Святая и всехвальная преподобная мати Марие, покаяния образе преизящнейший! Моли о нас Господа и Владыку нашего, да простив нам согрешения наша, сподобит в обителех Небесных получити вечное утешение, по неложному Его обещанию, и с лики Ангельскими да воспоем Пресвятей Троице: Аллилуиа.
(Сей кондак чти трижды, и паки икос 1 и кондак 1)

Молитва преподобней Матери нашей Марии Египетской.

Святая и великая угоднице Христова Марие, ангелы подвигом твоим удивившая! Молим тя: предстоя ныне у престола Всесвятыя Троицы, умоли Господа, яко обретшая велие дерзновение пред Ним, да сподобит и нас, подобно тебе, покаятися во многочисленных согрешениях наших, и да простив нас, не погубит ны в будущем веце. Моли, святая Марие, Пресвятую твою Споручницу, укрепившую тя в подвизе твоем, да укрепит Она и нас всесильною помощию Своею на сем земном тернистом пути. И, яко ты, облобызав с верою и любовию Честный Крест Христов, восприяла благодать Его в борьбе с диаволом, миром и плотию, и доблестно разрушила еси вся козни вражия, тако да сподобимся и мы помощию Животворящаго Древа Креста Господня разрушити вся преграды греха к достижению Горняго Царствия и, удостоившись вечныя жизни, вкупе с тобою выну да воспоем Пресвятую Троицу во единем существе Отца и Сына и Святаго Духа во веки веков. Аминь.[/spoiler]

[Раб божий Константин]

Акафист преподобной Марии Египетской  третий.
[spoiler]Кондак 1
Избранней от Господа во образ спасения всем грешным и отчаянным, из глубины греха востекшей на высоту безстрастия, похвальная пения приносим ти, мати преподобная. Ты же, яко имущи дерзновение к щедрому Богу, молитвами твоими настави на стезю твоего покаяния любовию зовущих ти:
Радуйся, преподобная мати Марие, чудо Божия милосердия.

Икос 1
Ангел возбрани тебе, в тине блудней пребывающей, внити в церковь с народом, текшим на поклонение Честному Кресту Господню. Егда же ты отступи в студе и нечаянии, коснуся очесем сердца твоего свет разума спасительнаго. И начат убо плакати, и рыдати, и в перси бити, воздыхания из глубины сердца износящи. Мы же таковое покаяние твое прославляюще, со благоговением я радостию глаголем ти сице:
Радуйся, мглы греха избежавшая;
Радуйся, тучами слез душу свою уяснившая.
Радуйся, к ревности жития непорочнаго усердно себе воздвигшая;
Радуйся, покаяния светом сердце свое озарившая.
Радуйся, целомудрия зерцало;
Радуйся, Духа Святаго жилище.
Радуйся, Горняго мира украшение;
Радуйся, Ангелов и человеков радование.
Радуйся, преподобная мати Марие, чудо Божия милосердия.

Кондак 2
Видящи, святая, в притворе храма икону Владычицы, рече к Ней: «О, Дево; рождшая плотию Бога Слова! Буди ми Ты Поручница достовернейшая к Рожденному из Тебе, яко уже ктому телесе моего не имам осквернити блужением. Повели, Владычице, да и мне, недостойней, невозбранен вход будет в церковь, да узрю Честное Древо, на немже пригвоздися Сын Твой, и воспою Ему с благодарением: Аллилуия».

Икос 2
Уразуме, Марие, тайны Божия, и како готов есть приимати кающихся, егда без труда вниде внутрь церкве и Животворящего Креста древо видети сподобися. Сего ради паки притекла еси к честному образу Пресвятыя Богородицы и смиренно молила еси Владычицу, да будет ти спасения Учительница, руководствующи к покаянию, и да управит путь твой. Мы же, видяще твое неотступное упование на милость Царицы Небесныя, радующеся, поем ти:
Радуйся, яко креста образ возжелавши видете, себе миру распяла еси;
Радуйся, яко Христа всем сердцем возлюбила еси.
Радуйся, с верою и любовию понесшая крест свой и Христу последовавшая;
Радуйся, Поручницею Матерь Божию стяжавшая.
Радуйся, яко сласти отбегши, чистоты возжелала еси.
Радуйся, яко показала еси нам стезю ведущую к жизни негиблющей.
Радуйся, ищущим пути ко спасению наставнице благодатная;
Радуйся, крепостию произволения твоего демоны посрамившая.
Радуйся, преподобная мати Марие, чудо Божия милосердия.

Кондак 3
Силою любве утверждающися, день той в пути к реце Иордану ты, блаженная Марие, сконча по гласу Владычицы: «Аще, Иордан прейдеши, добр покой обрящеши». Достигши же святыя реки, от ея воды руце и лице умы и в церкви святаго Иоанна Крестителя причастися Животворящих Таин Христовых. И посем воспела еси со умилением Богу: Аллилуия.

Икос 3
Имущи полтретья* хлеба, не устрашилася еси, яко горлица пустыннолюбивая и яко елень, жаждущий на источницы водныя, устремитися, всеблаженная мати, в пустыню. Темже таковую твою ревность ублажающе, со умилением зовем ти:
Радуйся, в церкви проповедника покаяния причастившаяся;
Радуйся, в Крестителеве обиталищи, пустыни, вселившаяся.
Радуйся, прелести мира сего спасения ради презревшая;
Радуйся, временная и земная уметы быти вменившая.
Радуйся, яко равноангельскому житию подражала еси;
Радуйся, яко вся прилоги мира, плоти и диавола победила еси.
Радуйся, скорогибнущих благ мира сего отвержение;
Радуйся, пустынножителей красото.
Радуйся, преподобная мати Марие, чудо Божия милосердия.

Кондак 4
Бурю внутрь имела еси страстей губительных, яко со зверьми лютыми, с похотьми безумными борющися в пустыни. Огнь бо внутрь сердца страстнаго возгарашеся и всю паляше тя. Ты же, слезящи и в перси биющи, воспоминала еси обеты, яже сотворила бе, исходящи в пустыню сию, и молила Матерь Божию отгнати от тебе помышления, сице тя смущавшая. Темже мы, недостойнии, Богу, укреплявшему тя, поем: Аллилуия.

Икос 4
Имела еси, Марие преславная, небо покровом и землю одром упокоения телу, зноем опаляему и мразом померзаему, емуже ни малаго угождения не попускала еси, да не возобладает плоть над духом твоим, любовию ко Господу пламеневшим. Мы же, слышаще твое пачеестественное терпение и многая злострадания, приносим ти от усердия нашего песноглашения сия:
Радуйся, многия скорби и беды претерпевшая;
Радуйся, молитвою твоею вся побеждавшая.
Радуйся, самоотвержение чудное показавшая;
Радуйся, столпе терпения и утверждение добродетели.
Радуйся, яко страсти плотския мечем воздержания посекла еси;
Радуйся, яко струями слез твоих пустыню всю напоила еси.
Радуйся, мученице безкровная, за Христа в пустыни страдавшая;
Радуйся, в женстем естестве крепость мужескую показавшая.
Радуйся, преподобная мати Марие, чудо Божия милосердия.

Кондак 5
Боготечную звезду зрящи пред собою, Поручницу твою, Матерь Божию, помышляла еси Ю преступление твое судящую и мучение за преступление грозно показующую, повергала себе на землю и не восставала еси день и нощь, непрестанно просящи помощи у Пречистыя Богородицы, Юже и воистинну Помощницу имела еси, вопиющи Богу: Аллилуия.

Икос 5
Видевше, блаженная мати, свет сладкий, тя осиявающий, от треволнения изымающий и помыслы греховныя отгоняющий, удивлялася еси несказанному милосердию Божию, и яко вся возможна человеку о укрепляющем Бозе, Егоже силою в немощней плоти Великия подвиги совершила еси и многия страдания претерпела еси любве ради Христовы. Мы же приносим ти многохвальное пение, с веселием зовуще:
Радуйся, от единаго Господа спасения искавшая;
Радуйся, к Матери Его со слезами горькими припадавшая.
Радуйся, яко, на икону Владычицы мысленне взирающи, страстей наветы посрамляла еси;
Радуйся, яко болезньми многими здравие души стяжала еси.
Радуйся, телесная движения и разжжения воздержанием поистинне изсушившая;
Радуйся, страстей свирепство жительством своим угасившая.
Радуйся, высотою подвига твоего Ангелы удивившая;
Радуйся, житием твоим духи тьмы посрамившая.
Радуйся, преподобная мати Марие, чудо Божия милосердия.

Кондак 6
Проповедника дел твоих избра Господь Зосиму и приведе его в пустыню. Он же надеяся обрести некоего от отец, тамо подвизающагося, иже бы могл пользовати его, и узрев тя, нагу и черну телом, начат вслед тебе тещи и слезно вопити: «Стани и подаждь ми молитву твою и благословение ради истиннаго Бога, Егоже ради в пустыни сей живеше и Емуже поеши непрестанно: Аллилуия».

Икос 6
Возсияла еси в пустыни, яко свеща многосветлая, преподобная мати, подвиги твоими. Сего ради узре тя Зосима во время молитвы твоей возвышену яко на лакоть един от земли и на воздусе стоящую. Страхом же множайшим содержимь, поверже себе на землю и глагола:
Радуйся, пустынное сокровище, от мира утаенное;
Радуйся, прозрения даром украшенная.
Радуйся, наготу Христа ради носивая;
Радуйся, словом Божиим покрывавшаяся.
Радуйся, научающая нас презирати плоть свою, преходит бо;
Радуйся, поучающая прилежати о души, вещи безсмертней.
Радуйся, великая угодница Христова, в мире премирно пожившая;
Радуйся, первее блудница, ныне же невеста Христова, целомудрием блистающая.
Радуйся, преподобная мати Марие, чудо Божия милосердия.

Кондак 7
Хотя Господь явити дела твоя миру, да величия Божия явлены будут, внуши старцу Зосиме припадати к ногама твоима, умоляя тя не скрыта от него жития твоего. Ты же, яко неимущая добродетелей, поведала еси первее старцу токмо о греховней жизни твоей, скрывающи подвиги и борения в пустыни, всех нас научающи в смирении взывати Богу: Аллилуия.

Икос 7
Новое чудо явил есть Господь, показав тя, книгам никогдаже учившуюся, словеса от Священнаго Писания произносящую. Ты же рече Зосиме, удивльшемуся о сем: «Слово Божие живо и действенно учит разуму человека». Мы же, прославляюще Бога, творящего славная и неизреченная, дающаго великая любящим Его, зовем ти сице:
Радуйся, воздержанием ум твой просветившая;
Радуйся, добродетелей добротою душу твою облиставшая.
Радуйся, смирением высокая стяжавшая;
Радуйся, нищетою богатство нетленное снискавшая.
Радуйся, Божественными видении и детельми душу свою украсившая;
Радуйся, честне приятелище Духа Святаго.
Радуйся, непостыдное христиан прибежище;
Радуйся, Ангелов собеседнице и преподобных жен похвало.
Радуйся, преподобная мати Марие, чудо Божия милосердия.

Кондак 8
Странное и дивное смирение явила еси, егда просила старца: «Заклинаю тя воплощением Слова Божия молитися за мя, блудницу, и да никомуже речеши о мне, дондеже Бог от земли возьмет мя. В пост же грядущаго лета не преходи Иордан, но в день таинственныя вечери возьми от Тела и Крови Христовы и пожди мя на оной Иордана стране, да, пришедше, причащуся Пречистых Даров, ихже усердно желаю, и абие прославлю Всещедраго Бога, зовущи Ему: Аллилуия».

Икос 8
Весь бе трепетом объят, Зосима поклонися до земли и целова место, идеже стояху стопы ногу твоею, и возвратися, хваля и благословя Христа Бога нашего. Лету прешедшу, сотвори Зосима завещанное ему и седе на брезе Иорданове, ждый тя, честная мати, слезя и помышляя: «Увы мне, несть корабля, и како Иордан прейдет и приидет ко мне, недостойному». Мы же, благодать, данную ти свыше, познавше, ублажаем тя звании сими:
Радуйся, из глубины греха на высоту безстрастия востекшая;
Радуйся, в пустыни непроходней едина с единым Богом пребывшая.
Радуйся, яко душу твою к безстрастию возвысила еси;
Радуйся, яко чистоту душевную и телесную стяжала еси.
Радуйся, даров Святаго Духа вместилище;
Радуйся, Церкве Христовы Божественное удобрение.
Радуйся, яко Ангели Божии дивятся чистоте твоей;
Радуйся, постников высото и преподобных славо.
Радуйся, преподобная мати Марие, чудо Божия милосердия.

Кондак 9
Всякое естество ангельское удивися, егда виде тя знамением крестным Иордан знаменавшую и купно с тем взошедшую на воду и ходящую верху ея, яко посуху. Зосима же в страхе хоте поклонитися ти, но ты возбрани ему. Он же, послушав тя, токмо рече Богу: Аллилуия.

Икос 9
Ветии многовещаннии недоумеют, како восхвалити твою ангелоподобную чистоту, терпение и покаяние, имиже Богу угодила еси и явилася еси равноангельна на земли. Зосима, ужасом содержимь быв от предивнаго видения на Иордане, рече: «Воистинну Бог неложен есть, обешавый уподобити Себе тех, иже по силе своей очищают себе». Темже и мы, ублажающе тя, глаголем сице:
Радуйся, иорданския воды немокренными ногами прешедшая;
Радуйся, на земли небесно пожившая.
Радуйся, страстей твоих образы благочестно истребившая;
Радуйся, изображение добродетелей в души твоей написавшая.
Радуйся, подвигом добрым подвизавшаяся;
Радуйся, плоть твою духови поработившая.
Радуйся, мертвость Иисуса в теле носящая;
Радуйся, воскресения Его славою сияющая.
Радуйся, преподобная мати Марие, чудо Божия милосердия.

Кондак 10
Спасительных Таин Христовых причастившися, рече преподобная: «Ныне отпущаеши рабу Твою, Владыко, по глаголу Твоему с миром...» После сего проси Зосиму в грядущее лето прийти на оный поток, идеже ему первее собеседова. Он же отвеща ти: «Хотел бы, аще бы мощно было, в след тебе ходити и выну зрети честное лице твое, поя купно с тобою Богу: Аллилуия».

Икос 10
«Стена есть мне и подкрепление глагол Божий, — рече, мати, вземше у старца, просящаго тя подкрепитися, токмо три зерна сочива. — Довлеет сие благодати духовней, хранящей естество души нескверненное». Мы же о сем дивимся и хвалебно зовем ти:
Радуйся, озарившая ум свой сиянием добродетелей;
Радуйся, соделавшая душу твою Божественныя Троицы жилище.
Радуйся, яко коварства вражия оскудеша вся крепким постом и молитвою твоею;
Радуйся, яко слезами твоими уранила еси страстная взыграния.
Радуйся, воздержанием тела своего плотская стремления истончившая;
Радуйся, мольбами твоими пред Господом и нас от страстей избавляющая.
Радуйся, долготерпеливно упованием на Господа укреплявшаяся;
Радуйся, и нам крепкую веру и надежду подающая.
Радуйся, преподобная мати Марие, чудо Божия милосердия.

Кондак 11
Пение надгробное тебе сотвори Зосима, достигнув, лету мимошедшу, места, еже поток знаменавше, и обрет тя лежащую мертву, лице на восток обращенно имущую. Позна же из надписи на земли при главе твоея имя твое и ужасеся, уразумев, яко ты, Божественных Таин причастившися, во един час прешла еси путь, иже сам он прейде, двадесять дний трудяся. Тем же дивящеся сему возопи Богу: Аллилуия.

Икос 11
Видев Зосима льва, телу твоему предстояща и лижуща нозе твои, трепетен быв. Знаменався же крестным знамением, верова, яко невредно будет сохранен силою лежащия. Лев же, ископав ров, елико довольно бе покрыти тело твое погребаемое, в пустыню, яко тихо овча, удалися. Зосима же во своя возвратися, хвали Бога и тебе взывая сице:
Радуйся, яко небесную достигла еси жизнь нескончаемую;
Радуйся, яко сподобилася еси с девами внити внутрь чертога Жениха твоего и Владыки.
Радуйся, венцем безсмертныя жизни от Господа увенчанная;
Радуйся, во обители райския со славою восприятая.
Радуйся, яко ныне со Ангелы ликуеши;
Радуйся, яко ныне на небесех Владыце всех предстоиши.
Радуйся, молитвеннице о нас непостыдная;
Радуйся, заступнице наша непобедимая.
Радуйся, преподобная мати Марие, чудо Божия милосердия.

Кондак 12
Благодать, данную ти от Бога, ведуще, восхваляем твое в подвизех изрядное житие и просим тя, мати блаженная, помози нам в чистоте и целомудрии пожити, укрепи, богоблаженная, молитвами твоими и нас, да сподобимся выну воспевати хвалебную песнь Богови: Аллилуия.

Икос 12
Поюще подвиги многострадальнаго и предивнаго жития твоего, славим и ублажаем тя, преподобная, яко многомощную молитвенницу о нас пред Господем. Не забуди нас, почитающих имя твое святое и взывающих ти:
Радуйся, призывающим тя теплая молитвеннице;
Радуйся, от Господа всех благих нам подательнице.
Радуйся, изнемогающих в брани укрепляющая;
Радуйся, унывающих скоро ободряющая.
Радуйся, в бедах и скорбех помощнице нам благодатная;
Радуйся, страждущих целительнице скорая и чудная.
Радуйся, от плотския брани молящияся к тебе избавляющая;
Радуйся, яко твоим пособием сокрушаются козни вражия.
Радуйся, преподобная мати Марие, чудо Божия милосердия.

Кондак 13
О преславная и предивная мати Марие! Молися присно Христу Богу нашему даровати нам грехов оставление и жития исправление, да тако Небеснаго Царствия наследницы будем, в радости поюще с тобою и со всеми святыми Спасителю нашему благодарственную песнь: Аллилуия.
Этот Кондак читается трижды, затем 1-й Икос «Ангел возбрани тебе...» и 1-й Кондак «Избранней от Господа...».

Молитва преподобной Марии Египетской
О великая Христова угодница, преподобная мати Марие! Услыши недостойную молитву нас, грешных (имена), избави нас, преподобная мати, от страстей, воюющих на души наша, от всякия печали и находяшия напасти, от внезапныя смерти и от всякаго зла, в час же разлучения души от тела отжени, святая угодница, всякую лукавую мысль и лукавые бесы, яко да приимет души наша с миром в место светло Христос Господь Бог наш, яко от Него очищение грехов, и Той есть спасение душ наших, Емуже подобает всякая слава, честь и поклонение, со Отцем и Святым Духом, ныне и присно и во веки веков.

Молитва иная
О великая Христова угоднице преподобная Марие! На Небеси Престолу Божию предстоящи, на земли же духом любве с нами пребывающи, имеющи дерзновение ко Господу, моли спасти рабы Его, к тебе с любовию притекающыя. Испроси нам у Великомилостиваго Владыки и Господа веры непорочное соблюдение, градов и весей наших утверждение, от глада и пагубы избавление, скорбящым утешение, недугующым — исцеление, падшим — возстание, заблуждшым — укрепление, в делах благих преспеяние и благословение, сиротам и вдовицам — заступление и отшедшим от сего жития — вечное упокоение, всем же нам в день Страшного Суда одесную страны общники быти и блаженный глас Судии Моего услышати: приидите, благословеннии Отца Моего, наследуйте уготованное вам Царствие от сложения мира, и тамо пребывания во веки получити. Аминь.

Молитва третья
О равноангельная и всесветлая Марие преподобная, убелившая ризу души своея в Крови Агнчей и зрящая ныне на небеси невечерний свет Царствия Небеснаго Христова, помяни мя, грешнаго и убогаго раба твоего, в богоприятных твоих к Богу молитвах к защити мя от ловления врага, веси бо его козни и лютую в сем житии на ны брань, даруй ми слезы покаяния, омывающия душевную мою скверну, испроси ми оставление грехов и жития исправление, избави мя от злых моих обычаев, лености и нерадения, научи мя постоянству и крепости в борьбе с моими греховными навыками, напечатлей в сердце моем и уме пресветлый образ тобою любимаго Христа, уязви мою душу Его всепрощающею любовию, да не оскорблю милосердие Его новыми грехами. Умоли о мне и милостивую Поручницу твою, Пречистую Деву Богородицу, да и мне, недостойному, дарует всесильную Свою помощь и наставит на стезю спасения. Во исходе же от сего мира, о мати преподобная, сподоби мя причащения Святых Божественных Таин, в страшный час смерти помози, на воздушных мытарствах заступи и предстательством твоим отверзи ми двери Небеснаго Царствия, идеже по трудех и подвизех ныне водворяешися, зрящи и прославляющи пресладкаго Искупителя твоего, пришедшаго в мир грешныя спасти и Божественною Своею Кровию омывающаго нас от всякаго греха. Емуже слава, честь и поклонение со Безначальным Его Отцем и Пречистым и Животворящим Духом в безконечныя веки. Аминь.

Тропарь преподобной Марии Египетской
Тропарь, глас 8:
В тебе, мати, известно спасеся еже по образу: приимши бо крест последовала еси Христу, и дающи учила еси презирати убо плоть, преходит бо: прилежати же о души, вещи безсмертней. Темже и со Ангелы срадуется, преподобная Марие, дух твой.

Кондак, глас 3:
Блудами первее преисполнена всяческими, Христова невеста днесь покаянием явися, ангельское жительство подражающи демоны Креста оружием погубляет. Сего ради Царствия невеста явилася еси, Марие преславная.

Кондак, глас 4:
Греха мглы избежавши, покаяния светом озаривши твое сердце славная, пришла еси ко Христу: сего всенепорочную и святую матерь молитвенницу милостивную принесла еси. Отонудуже и прегрешений обрела еси оставление, и со Ангелы присно срадуешися.

Величание
Ублажаем тя, преподобная мати Марие, и чтим святую память твою, ты бо молиши за нас Христа Бога нашего.

Празднование 1/14 апреля и в неделю 5-ю Великого поста.[/spoiler]

[Раб божий Константин]

Cвятой равноапостольной Марии Магдалине
[spoiler]Уготованная Господом к равноапостольному служению, святая Марие Магдалино, возлюбленному ти Христу последовала еси: темже песньми с любовию восхваляем тя; ты же, яко имущая дерзновение велие ко Господу, от всяких нас бед молитвами твоими избави, да с радостию выну зовем ти:

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.

Икос 1
Ангелов Творец и Господь сил, прсдуведевый благое произволение твое, святая мироносице, от града Магдалы избра тя, свободив от диавольския сети: ты же по сих верная служительница Господеви явилася еси, ревнующи о прославлении Его житием и служением. Мы же, чудящеся таковому о тебе Божию смотрению, в умилении сердец зовем ти:

Радуйся, от Сына Божия из тьмы диавольския в чудный свет Его призванная;

Радуйся, Того благодатию телом и духом до конца чиста пребывшая.

Радуйся, с чистотою сердца и нищету духовную до конца сохранившая;

Радуйся, первее всех воскресшаго Христа узрети сподобившаяся.

Радуйся, силу вражию добре победившая;

Радуйся, крепкою верою и теплою любовию ко Христу Богу просиявшая.

Радуйся, всем сердцем Спаса Христа возлюбившая;

Радуйся, верно Тому даже до смерти послужившая.

Радуйся, душею твоею благодатно обновившаяся;

Радуйся, проповедь Евангелия в сокровище сердца своего вместившая.

Радуйся, проповедь воскресения Апостолом возвестившая;

Радуйся, ангельскою беседою почтенная.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.

Кондак 2
Видящи святая Мария себе от седьми лютых бесов избавлену, всем сердцем победителю ада Христу Богу прилепися, вся люди научающи не усты токмо, но и всем житием Богу служити, вопиющи Тому: Аллилуйя.

Икос 2
Разум человеческий недоумевает, помышляя, из каковыя беды на высоту ангелоподобнаго жития благодатию Христовою возшла еси, достохвальная Марие Магдалино. Темже и мы, добрую тя предстательницу имуще, молимся тебе тепле: избави и нас от бездны греховныя, да любовию вопием ти таковая:

Радуйся, лютаго демонскаго рабства избегшая;

Радуйся, лесть лукавых бесов яве обличившая.

Радуйся, в напасти вражией ко Христу Богу прибегати всех научившая;

Радуйся, никомуже отчаяватися в велицей греховней скорби побуждающая.

Радуйся, ко святости всем грешником путь показавшая;

Радуйся, всемощную силу благодати Христовы познавшая.

Радуйся, достойнаго Богу благодарения добрая наставнице;

Радуйся, истиннаго богохваления верная учительнице.

Радуйся, в житии твоем правый путь земнаго течения нам показавшая;

Радуйся, всем грешником пред Богом благая заступнице.

Радуйся, душ наших от лести сатанинския защитнице;

Радуйся, во всякой скорби теплая ко Христу наша ходатаице.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.

Кондак 3
Силою Божественныя благодати, купно же и своим благим произволением безпечально оставила еси дом отца твоего, якоже древле Авраам, и радостно последовала еси Христу Богу: темже молим тя, ученице Христу славная Марие, молитвами твоими и наша сердца просвети любовию к Богу, да и ныне и присно взываем Тому: Аллилуйя.

Икос 3
Имущи богодарованную ти премудрости силу, мужески отвергла еси, Марие Магдалино, сего мира красная, и яко ученица добрая, премногим милосердием обнищавшему за ны Слову истинно послужила еси. Сего ради и мы со умилением вопием ти:

Радуйся, добрая Христова ученице;

Радуйся, истинныя любве к Богу наставнице. Радуйся, суету мира сего добре познавшая;

Радуйся, мужески его радости отвергшая.

Радуйся, красная мира ни во чтоже вменившая;

Радуйся, чину иноческому добрый путь жития предпоказавшая.

Радуйся, всех ко Христу Богу путеводствующая;

Радуйся, для дел милосердия из дому земнаго изшедшая.

Радуйся, Христово милосердие зде и на небеси обретшая;

Радуйся, яко тем блаженства вечнаго достигшая.

Радуйся, мудрая агнице, от злых волков к доброму пастырю Христу прибегшая;

Радуйся, во двор словесных овец Его вшедшая.

Радуйся, святая равноапостольная Марие Магдалино паче всех благ Сладчайшаго Господа Иисуса возлюбившая.

Кондак 4
Буря бесовския ярости превеликою силою устремися на храм души твоея, святая Марие, но того поколебати до конца не возможе: обрела бо еси спасение на твердом веры Христовы камени, на немже ты, мудрая жено, недвижимо стоящи, учиши всех всеблагому Богу воспевати песнь: Аллилуйя.

Икос 4
Слышаще, богомудрая Марие, яко в последовании Христу обрела еси истинное веселие сердца, правду, мир и радость о Дусе Святе, тщимся и мы явитися в лице причастник сего Царства Божия. Тебе же, яко причастнице того сущей и путь нам к нему показавшей, рцем вси таковая:

Радуйся, небесную Иисусову сладость возлюбившая;

Радуйся, жизнь истинную во Христе обретшая.

Радуйся, тояжде образ и нам верно показавшая;

Радуйся, в радости небесней ныне присно живущая.

Радуйся, райския снеди выну вкушающая;

Радуйся, огнь любве к Богу в сердце твоем возжегшая.

Радуйся, Христом Богом, яко раба Ему верная, возлюбленная;

Радуйся, прилежная о нас к Богу молитвеннице. Радуйся, в бедах наших помощнице;

Радуйся, наша благая и кроткая учительнице.

Радуйся, Духа Святаго пречестное жилище;

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.

Кондак 5
Боготечная звезда спутствующи Христу, славная Марие, посреде мироносиц явилася еси. С ними же ныне выну предстоящи Святей Троице, и нас молитвами твоими к священному тех лику совокупи, путь темный жития нашего светом твоим озаряющи, да радостно возопием Богу: Аллилуйя.

Икос 5
Видящи, святая Марие, Христа Бога на кресте висяща, дивное мужество показала еси: мнози бо от ученик Учителя своего оставиша; ты же, непрестанными божественными ученьми Того душу и мысль разжегши, немощь естества женскаго превозмогла еси и тако причастилася еси спасительной Христовой страсти. Сего ради мы, сицевое твое доблественное мужество зряще, вопием ти:

Радуйся, мудрых жен красоте и удобрение;

Радуйся, христиан всех доброе радование.

Радуйся, Христу Богу, на кресте висящу, сострадавшая;

Радуйся, непоколебимей любви к Тому нам путь показавшая.

Радуйся, сицевою любовию в предстательстве о нас к Богу дерзновение велие обретшая;

Радуйся, женам доброто и похваление.

Радуйся, христианом крепкое прибежище;

Радуйся, паче сильных мужей крепчайшая.

Радуйся, мудрецов мира сего мудрейшая;

Радуйся, яко тебе тайная премудрости Своея Бог явил есть.

Радуйся, яко тебе истинному богословию Сам Бог Слово научил есть;

Радуйся, Христа Бога паче жизни своея возлюбившая.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.

Кондак 6
Благодатию твоею немощная врачуеши и некрепкия сосуды тверды соделоваеши, Христе Царю. Мироносицы бо жены у Креста Твоего мужески предстоят и благодать крестную всем небоязненно возвещают; лицы же мудрых жен, ликам ангельским уподобитися тщащеся, бодренно выну взывают Троице Святей: Аллилуйя.

Икос 6
Взыскующи озаритися светом истиннаго богоразумия, егда Бога на Кресте висяща видела еси, глаголала еси слезящи, дивная Марие: како Жизнь смерть вольную ныне приемлет? Мы же, славное просвещение твое благодатию Святаго Духа ведуще, вопием ти сицевая:

Радуйся, Христа распята от глубины души оплакавшая;

Радуйся, веселие вечное в селениих небесных обретшая.

Радуйся, нам образ добраго плача показавшая;

Радуйся, яко ты еси наше непрестанное радование.

Радуйся, всех скорбящих утешение неложное;

Радуйся, яко Христу, Его ради, на земли спострадала еси.

Радуйся, яко с Ним о Нем на небеси прославляешися;

Радуйся, всех врагов наших крепкая победительнице.

Радуйся, во всех скорбех наших скорая помощнице;

Радуйся, яко всем христианом воспоминание твое пресладко.

Радуйся, яко всей Церкви Христовой имя твое пречестно;

Радуйся, истинная лозо винограда Христова.

Радуйся, святая равноапостольная Марие Магдалине, паче всех благ Сладчайшаго Господа Иисуса возлюбившая.

Кондак 7
Хотящи уразумети Креста всепобедительную силу, до конца Христовой страсти предстояла еси у Креста Спасова со иными женами, преславная Марие. Матери же Господни болезненно состраждущи, тако недоуменно вопияла еси: что сие есть странное чудо? Содержай всю тварь пострадати изволи. Мы же на Живоносный Крест волею вознесшемуся любовию вопием: Аллилуйя.

Икос 7
Дивная жена явилася еси, блаженная Марие, любовию твоею ко Христу Богу: тую бо горестными изъявляя рыданьми, ко снятому со Креста припадающи, слезами пречистыя язвы Его омыла еси. Еще же благообразному Иосифу и правдолюбивому Никодиму последующи, ко гробу Спасову со иными святыми женами текла еси, ово плачущи, ово плачущую неутешно Матерь Его Пренепорочную, Ей же душу лютое оружие пройде, утешающи. Мы же, такову твою доблесть ведуще, смиренно взываем ти:

Радуйся, пречистыя язвы Христовы слезами омывшая;

Радуйся, Матери Того Пренепорочней яве сострадавшая.

Радуйся, Христа даже до гроба не оставившая;

Радуйся, во гроб полагавшуюся Жизнь недоуменно зревшая.

Радуйся, слезам покаяния наша добрая учительнице;

Радуйся, теми слезами греховныя скверны омывати нас наставляющая.

Радуйся, теми же сердце наше окамененное умягчати побуждающая;

Радуйся, образ истинной мудрости нам показавшая.

Радуйся, памятовати выну страсти Христовы нас научающая;

Радуйся, славная Марие, купно с Пренепорочною Девою Мариею, наша верная ходатаице.

Радуйся, добрая слуго Христова;

Радуйся, Господеви, а не человеком угождавшая.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.

Кондак 8
Странно, богомудрая Марие, явися тебе погребение всем жизнь подающаго Жизнодавца: Того любовию уязвляема, еще сущей тьме, ко гробу Его принесла еси миро и слезныя пролила еси ароматы. Темже и пребываеши ныне во благовонных рая селениих, со ангельскими лики взывающи выну Богу: Аллилуйя.

Икос 8
Весь сладость, весь радость, весь жизнь тебе бысть Иисус, святая Марие, того ради, видевши камень взят от гроба, Сего же не обретши, рыдающи текла еси к живому веры камени Симону и другому, егоже любляше Иисус, ученику, болезненно глаголющи има: взяша Господа от гроба и не вем, где положиша Его. Ныне же ты, свободившися от скорби тоя, со Христом вечно радуешися на небеси. Мы же на земли в таковую радость молитвами твоими внити чающе, со умилением вопием ти тако:

Радуйся, сиянием любве твоея ко Христу тьму ночную победившая;

Радуйся, нощному бдению в молитве нас научившая.

Радуйся, светом вечным на небеси осиянная;

Радуйся, нищетою духовною Царство Небесное купившая.

Радуйся, яко по скорби о страстех Христовых обрела еси обильное утешение;

Радуйся, жено кроткая, наследнице земли небеснаго рая.

Радуйся, алкавшая и жаждавшая правды Христовы, яко ты ныне насыщаешися трапезы небесныя;

Радуйся, милостивая, милость Владыки обретшая и о нашем помиловании Того усердно просящая.

Радуйся, ты бо ныне, яко чистая сердцем, Бога лицем к лицу зриши;

Радуйся, яко сподобилася еси первее всех видети воскресение Христа, Вечнаго Мира.

Радуйся, изгнанная правды ради Христовы, яко твое есть Царство Божие;

Радуйся, приобретшая вечное веселие и мзду многу на небесех.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.

Кондак 9
Всяк чин ангельский удивися великой тайне славнаго воскресения Твоего, Христе Царю: ад же притрепетен бысть, видев, яко снизшел еси в преисподняя земли и сокрушил еси вереи вечныя, содержащия связанныя, Христе. Мы же радости жен мироносиц сорадующеся, с веселием вопием: Аллилуйя.

Икос 9
Витий многовещанных языки не довлеют достойно изрещи великую скорбь твою, славная Марие, егда стояла еси вне гроба плачущи. Кто бо возможет реши болезнь души твоея, егда не обрела еси во гробе паче жизни своея возлюбленнаго ти Господа? Прискорбное сердце твое не возможе внимати утешению Ангелов светлых. Сицевую скорбь твою со умилением воспоминающе, воспеваем ти таковая:

Радуйся, видети Христа Иисуса в пещеру приникшая;

Радуйся, ныне Того на престоле славы седяща зрящая.

Радуйся, светлых небожителей еще сущи на земли узревшая;

Радуйся, от тех глас радости воскресения Христова приимшая.

Радуйся, яко ты с ними ныне присно радуешися;

Радуйся, любовию миро Христу принесшая.

Радуйся, во благоухающую мира Христова воню сладце притекшая;

Радуйся, отвергшая радостей мира греховнаго горечь.

Радуйся, возлюбившая небесную Иисусову сладость;

Радуйся, добрая леторасле сада Иисусова.

Радуйся, благоплодная лозо вертограда Божия;

Радуйся, преукрашенный храм Духа Всесвятаго явльшаяся.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.

Кондак 10
Спасти хотя мир, аще и во гроб снизшел еси безсмертне, но адову разрушил еси силу и воскресл еси, яко победитель, Христе Боже, женам мироносицам вещавый: радуйтеся. С ними же и мы ныне песнь радости приносим Ти: Аллилуйя.

Икос 10
Стены каменныя твердое бысть любовь твоя к возлюбльшему тя Христу, мироносице славная Магдалино Марие. Темже едина видела еси прежде инех Живота нашего из гроба возставша. Вертоградаря же Того непщевала еси быти и вопияла еси Тому, забывши естества немощь: аще ты еси взял Его, повеждь ми, где еси положил Его, и аз возьму Его. Но сладостный Того глас показа ти Учителя, нас же глашати научи тебе сице:

Радуйся, истиннаго Вертоградаря воскресша первее инех узревшая;

Радуйся, в вертограде небеснем водворившаяся.

Радуйся, гроздием Божия благодати ныне выну питающаяся;

Радуйся, вином райских радостей веселящаяся.

Радуйся, яко твоя любовь к Богу естество победила есть;

Радуйся, яко тая и нас ревности Божией научила есть.

Радуйся, из уст Христовых вещание воскресения первее приемшая;

Радуйся, Апостолом глаголы радости первее возвестившая.

Радуйся, вечную радость на небеси обретшая;

Радуйся, яко ты и нас к той радости тобою зовеши.

Радуйся, яко о сем о нас к Богу выну ходатайствуеши;

Радуйся, яко Тому молитвы о нас тепле, приносиши.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.

Кондак 11
Ни едино же слово довлеет воспети по достоянию божественную радость воскресения Христова, юже со иными женами, славная Марие, Апостолом возвести в сей нареченный и святый день, праздников праздник и торжество из торжеств. Темже, пред величием неизреченных щедрот Твоих, Христе Царю, на нас бывших, преклоняющеся, со смирением и любовию зовем Ти: Аллилуйя.

Икос 11
Светозарная звезда греховному миру явилася еси, Магдалино Марие, егда по славнем Спасове вознесении, грады и веси преходящи и слово Евангелия всюду возвещающи, многи подклонила еси под благое иго Христово. Достигши же даже до древняго Рима, мужески Тиверию кесарю предстала еси и тому образом краснаго яйца и мудрыми словесы живоносную силу Христа уяснила есн, лукаваго же Пилата и безбожнаго архиерея обличала еси, да по беззаконным делом своим достойная приимут, таковому подвигу апостольства твоего дивящеся, радостно вопием ти сице:

Радуйся, Христова учения славная благовестительнице;

Радуйся, язычсския тьмы светозарная прогонительнице.

Радуйся, греховные узы многих человек разрешившая;

Радуйся, Христовой мудрости всех научившая.

Радуйся, многие люди из тьмы неведения в чудный Христа свет приведшая;

Радуйся, образ твердаго стояния за правду Христову нам показавшая.

Радуйся, спасение душ грешников паче своея жизни возлюбившая;

Радуйся, заповеди Христовы добре уразумевшая.

Радуйся, тем верно последовавшая;

Радуйся, тьму языческую дерзновенно обличившая.

Радуйся, гнева Кесарева не убоявшаяся;

Радуйся, злобу и коварство врагов Христовых тому показавшая.

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.

Кондак 12
Благодати от Бога изобильно исполненная, множество душ ко Христу привела еси, славная Марие, посем же пришла еси во Ефес, идеже апостольски любовию с Апостолом любве спасению человек послуживши, блаженным успением ко Господу преставилася еси, Емуже ныне с многочисленными небесными, певцы выну поеши: Аллилуйя.

Икос 12
Поюще твое достохвальное житие на земли и славу, яже на небеси, радостно славим, поем и величаем дивнаго во святых Своих Царя Небеснаго, зане не токмо сама ты, святая Марие, Того благодатию, в селениях праведных ныне ликуеши, но и нас веселиши на земли, оставивши нам многоценное миро мощей твоих яже мудрый Лев царь из Ефеса в Константин град, пренести повеле. Тыя и мы, яко источающия благодать неоскудную всем любовию притекающим, верою и любовию мысленно лобызающе, умильно воспеваем ти таковая:

Радуйся, на земли любовию ко Христу горевшая;

Радуйся, на небеси в райския обители Того вселившаяся.

Радуйся, верным твердое заступление;

Радуйся, благовонное миро, Церковь благоухающее.

Радуйся, кадильнице златая, фимиам молитвы о нас к Богу выну приносящая;

Радуйся, источник исцелений неоскудный.

Радуйся, сокровище Божией благодати неиждиваемое;

Радуйся, ангельских ликов верная Соучастнице.

Радуйся, небесных чертогов славная жительнице;

Радуйся, яко мзда твоя многа есть на небесех.

Радуйся, яко радость твоя вечна есть во обителех святых;

Радуйся, яко ты и нам прияти радость, благодать же и славу выну ходатайствуешь

Радуйся, святая равноапостольная Марие Магдалино, паче всех благ Сладчайшаго Господа Иисуса возлюбившая.

Кондак 13
О пречудное и предивное жен украшение, всем же христианом похвала и радование, Апостолом равная явльшаяся, мироносице славная Магдалино Марие! Нынешнее наше моление приемши, от всяких нас бед и скорбей душевных и телесных, и от враг видимых и невидимых, на нас находящих, избави и к Царствию Небесному ходатайством твоим направи всех, со умилением и любовию поющих о тебе Богу: Аллилуйя.

Сей Кондак глаголи трижды. Также: Икос 1: Ангелов Творец: и Кондак 1: Уготованная Господом.[/spoiler]

[Раб божий Константин]

Акафист святой великомученице Марине.
[spoiler]День памяти великомученицы Марины 17/30 июля

Кондак 1
Избранней Богом от языческаго рода, премудрой невесте Христовой, града Антиохии заступнице небесней, благодарственная восписуем ти, молитвенницы твои, святая и многострадальная великомученице Марино. Ты же, имущи дерзновение ко Господу, от всяких бед, зол и болезней свобождай нас, с любовию зовущих:
Радуйся, великомученице Марино, невесто Христова всехвальная.

Икос 1
Ангелов Творец, ведый благое произволение твое, святая мученице, яви тя за веру Христову непобедиму страстотерпицу. Ты бо добротою телесе и красотою души просияла еси в дому отца твоего идолослужителя, обаче, светом благодати просвещенная, веру истинную познала еси, отеческое нечестие отринувши. Мы же, дивящеся таковому о тебе Божию смотрению, во умилении сердец зовем ти:
Радуйся, отроковице, Богом избранная;
Радуйся, от юности добродетельным житием украшенная.
Радуйся, измлада суету жизни земныя презревшая;
Радуйся, истинную мудрость возлюбившая.
Радуйся, крине девства, посреде терния языческаго возращенная;
Радуйся, от малых лет благодатию свыше осененная.
Радуйся, святое целомудрие и девство добре сохранившая;
Радуйся, во образ христианским девам свыше пронареченная.
Радуйся, Христа всем сердцем возлюбившая;
Радуйся, вольная страдания за имя Его претерпевшая.
Радуйся, Церкве Православныя пресветлое украшение;
Радуйся, яко имя твое во всем мире христианствем прославляется.
Радуйся, великомученице Марино, невесто Христова всехвальная.

Кондак 2
Видя благолепие лица твоего, людие дивляхуся, не ведяще красоты души твоея. Ты же, святая дево, мира многомятежие отвергши, к горнему возвела еси ум твой и возжелела еси венцем мученическим украситися от возлюбленнаго тобою Жениха Христа, воспевающи Ему радостно песнь: Аллилуия.

Икос 2
Разум твой, не просвещен еще святым крещением, святая Марино, просвети Господь, научая тя славити Единаго и Истиннаго Бога, нечестивый же родитель твой отречеся от тебе, но не возможе отторгнути от веры истинныя, в нейже ты непоколебима пребывала еси. Темже и нас в добродетелех веры и любве укрепи, зовущих ти:
Радуйся, нрав ангельский от младенчества стяжавшая;
Радуйся, от юности всю себе Богу предавшая.
Радуйся, благоухание добродетелей от юности возлюбившая;
Радуйся, красотою души и телесе многих удивившая.
Радуйся, девственнице, юным девам незримая помощнице;
Радуйся, рода христианскаго украшение.
Радуйся, истины Царствия Божия уразумевшая;
Радуйся, свыше избранная на подвиг исповедания Христа.
Радуйся, блогочестие в себе воспитавшая;
Радуйся, идольскаго служения прелесть обличившая.
Радуйся, блаженная, земным отцем за веру Христову гонимая;
Радуйся, Небеснаго Отца дщи честная,
Радуйся, великомученице Марино, невесто Христова всехвальная.

Кондак 3
Силою свыше препоясанная, возмогла еси победити искушение, егда гонитель христиан епарх Олимврий удивися красоте твоей и возжела взяти тя в жены, словесы ласкательными убеждая тя принести жертву идолом. Ты же, славу мира сего презревши, исповедала еси себе христианку и отвергла еси жениха земнаго, Жениха безсмертнаго, Жизнодавца Христа, взыскующи. Таковому дерзновению твоему дивящеся, воспоем укрепившему тя Господу песнь: Аллилуия.

Икос 3
Имущи в сердце своем твердую веру во Христа, яко овча на заколение, привелася еси мучительскому судищу, Марино преславная, идеже дерзновенно Вседержителя всех Бога проповедала еси пред народом и, силою Божественною укрепляема, судей нечестивых посрамила еси. Приими убо от любве нашея приносимыя тебе похвалы:
Радуйся, многобожия лесть обличившая;
Радуйся, истинныя веры поборнице.
Радуйся, от юности идолослужение презревшая;
Радуйся, истинное богопочитание даже до смерти возлюбившая.
Радуйся, кроме Небеснаго иного жениха знати не восхотевшая;
Радуйся, соблюдшая чистоту девства твоего.
Радуйся, замыслы мучителя твоего Олимврия разсеявшая;
Радуйся, гнева его не убоявшаяся.
Радуйся, голубице кроткая и страдалице Христа ради;
Радуйся, Сыном Божиим призванная в чудный свет веры и благодати Его.
Радуйся, добродетельным житием своим сосуд Духа Святаго соделавшаяся;
Радуйся, звездо светозарная, во Антиохии Богом возжженная.
Радуйся, великомученице Марино, невесто Христова всехвальная.

Кондак 4
Бурею ярости одержим, безумный мучитель повеле тело твое лютым мукам предати, тогда оружие врага изнеможе и кровьми твоими земля освятися. Ты же, доблественне претерпевши муки злыя, взирающи на воздаяние будущее и возмогающи вся о Господе, со умилением взывала еси укрепившему тя Христу Богу: Аллилуия.

Икос 4
Слышав от тебе нечестивый мучитель мужественное исповедание веры Христовы, заключи тя в темницу, идеже сам князь тьмы во образе змия явися, хотя устрашити тя. Ты же, дево чистая, непобедимою силою Креста укрепляемая, ополчение самаго диавола отразила еси и благодать прияла еси отгоняти духи нечистыя и силу вражию сокрушати. Сего ради и мы, слышавше, како посрамися диавол, от девы побеждаем, радостно вопием ти сице:
Радуйся, неправедному судищи дерзновенно представшая;
Радуйся, христианку себе исповедавшая.
Радуйся, всемощную силу благодати Христовы познавшая;
Радуйся, злобы неверных не устрашившаяся.
Радуйся, святая дева, мучителей своих посрамившая;
Радуйся, паче сильных мужей крепчайшая.
Радуйся, темничное заключение Христа ради претерпевшая;
Радуйся, силою Креста главу диавола сокрушившая.
Радуйся, во плоти сущи, безплотнаго врага поправшая;
Радуйся, козней диавола победительнице.
Радуйся, истинная Христовых Страстей причастнице;
Радуйся яко мзда твоя многа на Небесех.
Радуйся, великомученице Марино, невесто Христова всехвальная.

Кондак 5
Боготочней звезде подобна была еси, Марино, егда, в темнице заключенная, ликующи славословила еси Христа, Жениха своего. Сего ради удостои тя Господь дивнаго видения Креста и голубицы и исцели тя от всех ран, радость даруя и на новый подвиг укрепляя. Темже молим: уврачуй раны греховныя всех любовию чтущих тя и воспевающих Богу: Аллилуия.

Икос 5
Видя епарх Олимврий святую Марину, изведену из темницы, здраву и светлу, разъярися злобою и паки предаде ю на муки, повелев пригвоздити на древе и свещами горящими палити тело ея. Обаче огнь вещественный не возможе изнурити тя, святая отроковице, огнем бо любве Божественныя озаряема и трием отроком подобящися, попрала еси огнь сей. Темже нестерпимаго огня вечнаго избави всех чтущих тя и воспевающих тако:
Радуйся, кровию своею торжество веры истинныя утвердившая;
Радуйся, яка Сам Господь свыше призре на твоя страдания.
Радуйся, в темнице дивнаго видения сподобившаяся;
Радуйся, честный Крест Господа твоего узревшая.
Радуйся, язвы Христовы на теле твоем носившая;
Радуйся, от всех язв тех Господем исцеленная.
Радуйся, на подвиг мученичества свыше укрепленная;
Радуйся, Божественным светом осиянная.
Радуйся, огнем земным Христа ради опаленная;
Радуйся, Божественным огнем сердца наша возжигающая.
Радуйся, велиара лютаго победившая;
Радуйся яко силы адския трепещут славы твоея.
Радуйся, великомученице Марино, невесто Христова всехвальная.

Кондак 6
Проповедница чудес и славы Божия явилася еси, великомученице Марино, егда вверже тя в воду мучитель, повелев утопити тя связану. Тогда дарова Господь знамение всему народу: возсия над главою мученицы свет несказанный, явися столп огненный с крестом и белая голубица с венцем златым. И бысть глас свыше, глаголяй: мир тебе, невесто Христова Марино, ныне же приимеши венец неувядаемый от руки Господни и почиеши в Царствии Небеснем. Сего ради мы прославляем Бога, давшаго тебе благодать таковую, и поем Ему: Аллилуия.

Икос 6
Возсияла еси, яко светозарная звезда, и Божественною благодатию отгнала еси многобожия тьму, святая Марино, просветивши многия люди, иже видеша чудеса Божия, на тебе явленная; тогда великое множество мужей и жен увероваша во Христа и мученическую кончину прияша, крестящеся кровию своею. Просвети и нас, о Марино, омраченных мглою греховною, и светом невечерним озари тя славящих и поющих ти таковая:
Радуйся, в страданиих, яко злато в горниле, очистившаяся;
Радуйся, твердейшая адаманта в терпении твоем показавшаяся.
Радуйся, языческое служение поправшая;
Радуйся, силу Божию пред нечестивыми проповедовавшая.
Радуйся, светом Божественным души собравшихся озарившая;
Радуйся, к вере истинней многих приведшая.
Радуйся, предивная поборнице веры Христовы;
Радуйся, путеводная звездо всем ищущим спасения.
Радуйся, страдании своими ко Христу людей возводящая;
Радуйся, чудес Его проповеднице.
Радуйся, огнем ревности по славе Божией горевшая;
Радуйся непорочная голубице, возлетевшая в Небесныя обители.
Радуйся, великомученице Марино, невесто Христова всехвальная.

Кондак 7
Хотящим нам прославити подвиги твоя и чудеса, великомученице преславная, воспоминаем слова псалмопевца, иже древле, Духом Господним озаренный, пророчески пояше: проидохом сквозе огнь и воду, и извел еси ны в покой. Ты же, святая Марино, делом сие исполнила еси, яко огнем и водою искушена была еси, и, врага невидимаго поразивши, вошла еси в чертог Небесный со Христом, Женихом твоим, поющи Ему: Аллилуия.

Икос 7
Яко новое светило на тверди небесней, возсияла еси всему христианскому поду, святая страдалице Марино, егда, во главу усеченная, душу свою предала еси Христу, Жениху твоему. Темже мы, блогоговейне воспоминающе страдания и подвиги твоя, с любовию зовем ти сице:
Радуйся, веру, надежду и любовь до конца схранившая;
Радуйся, смерти телесныя не устрашившаяся.
Радуйся, радостно за Главу Церкве, Христа, под меч главу свою приклонившая;
Радуйся, венец славы из рук Господа приявшая.
Радуйся, яко, мученмя твоя зряще, множество людей к Богу обратишася;
Радуйся, твоя бо кончина просвети умы помраченныя.
Радуйся, сквозе огнь и воду мучений в покой небесный вшедшая;
Радуйся, струи милости верным изливающая.
Радуйся, во успении твоем многая и великая чудеса сотворшая;
Радуйся, цветом неувядаемым украшенная на Небеси.
Радуйся, премудрая евангельская дево, светильник горящий имущая;
Радуйся к мученическому воинству сопричтенная.
Радуйся, великомученице Марино, невесто Христова всехвальная.

Кондак 8
Странствие земное совершивши и путь мученический прошедши, страстотерпице святая Марино, водворилася еси в Царстве Света, обаче люди, с любовию тебе молящияся, не оставила еси, прияла бо еси благодать побеждати врага рода человеческаго и многия недуги душ и телес наших врачевати. Темже благодарно тя славим и Богу, тя возвеличившему, поем ангельскую песнь: Аллилуия.

Икос 8
Вся Небесныя силы возрадовашася, воспевающе Бога, даровавшаго тебе, святая Марино, таковое мужество и непоколебимую твердость во исповедании веры Христовы. Тем и по смерти честное тело твое, нетленно сохраненное, положено бысть Божиим изволением во граде Антиохии, источающе обилие чудес с верою к твоему заступлению прибегающим и молитвенно тебе взывающим:
Радуйся, нетлением мощей славно от Бога возвеличенная;
Радуйся, яко мощей твоих демони трепещут.
Радуйся, яко честныя мощи твоя во граде Антиохии многими чудесы прославишася;
Радуйся, теми бо и великий Царьград освятися.
Радуйся, яко честныя мощи твоя доныне Господь сохрани в земли Италийстей;
Радуйся, яко благоволи Бог пренести десницу твою на Святую Гору Афонскую.
Радуйся, всех православных христиан заступнице;
Радуйся, радости нам и благодати вечныя ходатаице.
Радуйся, преславная чудотворице;
Радуйся, огнем молитвы стрелы вражия попаляющая.
Радуйся, беды и печали от любящих тя отгоняющая;
Радуйся, всем призывающим тя скорую помощь подающая.
Радуйся, великомученице Марино, невесто Христова всехвальная.

Кондак 9
Вси правовернии людие российстии проповедуют благодатную твою помощь стране нешей, от лет бо древних и до ныне отцы и матери нарекают именем твоим дщерей своих, и лика твоего изображения чудесы прославишася в церквах наших. Темже тя по долгу ублажающе, поем тобою чудодействующему Богу: Аллилуия.

Икос 9
Ветии мира сего не возмогут по достоянию восхвалити страдания и добродетели твоя, великомученице Марино. Темже и мы, недостойнии, воспети желающе Владыку и Жизнодавца, давшаго тебе крепость самаго диавола не убоятися и мучителей победити, молим тя, призри на сие воздыхание сердец наших и неотступна буди нам помощница, вся благая дарующи предстательством твоим всем поющим тебе тако:
Радуйся, дева, райскою красотою сияющая;
Радуйся, радуйся, лилие благоуханная, благодатию Божиею возращенная.
Радуйся, страстотерпице, вся узы и сети врага растерзавшая;
Радуйся, маслино благоплодная, елей милости обильно нам источающая.
Радуйся, храме непорочности и чистоты;
Радуйся, о спасении грешных теплая ходатаице у Отца Небеснаго.
Радуйся, сущим в темницах и узах утешительнице;
Радуйся, людем, за Христа пострадавшим, путь к Небу показавшая.
Радуйся, на духи нечистыя власть от Господа приемшая;
Радуйся, в напастех вражиих ко Христу Богу прибегати нас научающая.
Радуйся, недугов лютых прогонительнице;
Радуйся, болезней неисцельных целительнице.
Радуйся, великомученице Марино, невесто Христова всехвальная.

Кондак 10
Спасти хотя всех, благоизволи Господь святыя мощи твоя, великомученице Марино, сохранити во утешение всем верным, яко, от Востока возсиявши, ныне в странах Запада просвещаеши всех чтущих тя и припадающих к цельбоносным мощем твоим, да твоими чудесы и молитвами пробуждаются людие от жизни греховныя к жизни святей, воспевающе Тварцу своему и Богу: Аллилуия.

Икос 10
Стеною молитв твоих, великомученице Марино, сохраняй страну нашу Российскую, и вся верныя, в ней живущия и подвизающияся, путем правым во Царствие Небесное руководи, зане дадеся тебе благодать молитися о людех православных не токмо земли Греческия, но и во всех странах христианских. Сего ради и от нас с любовию приносимое благодарное славословие приими:
Радуйся, яко тобою имя Христово в мире прославляется;
Радуйся, яко тобою вернии благ вечных сподобляются.
Радуйся, се бо Ангели с тобою ликуют на Небеси;
Радуйся, яко и человецы восхваляют тя на земли.
Радуйся, всех православных на путь спасения направляющая;
Радуйся, грешных на покаяние наставляющая.
Радуйся, от людей российских с любовию прославляемая;
Радуйся, о стране нашей пред Богом и Пресвятою Богородицею ходатаице.
Радуйся, девам и женам российским помощнице милостивая богодарованная;
Радуйся, о всех людех земли нашея молитвеннице усердная.
Радуйся, любящим тя святою любовию воздающая;
Радуйся, с Царицею Небесе и земли о всем мире молящаяся.
Радуйся, великомученице Марино, невесто Христова всехвальная.

Кондак 11
Пение Единому и Истинному Богу принесла еси, Марино, не точию словом, но вольным себе в жертву принесением; подражающи бо распятому за ны Христу, положила еси душу свою за веру истинную и возлетела еси, яко голубица, во обители Небесныя крилами чистоты и любве Божественныя. Ныне же со Ангелы и всеми святыми радующися, воспеваеши Человеколюбцу Богу победную песнь: Аллилуия.

Икос 11
Возсиявши нам, яко звезда многосветлая, мрак демонский твоими молитвами отгоняеши, святая великомученице Марино; темже молим ти ся: омраченная страстьми сердца наша просвети и благодать Божественную подаждь, испроси нам грехов оставление у Всемилостиваго Бога, яка да верою, радостию духовною и любовию зовем ти:
Радуйся, Церкве Христовы пресветлая звездо;
Радуйся, светильниче, мир озаряяй.
Радуйся, в немерцающем свете душею пребывающая;
Радуйся, яко паче лучей солнечных благодатию просияла еси.
Радуйся, яко светом невещественным души просвещаеши;
Радуйся, яко заблуждших на путь истины наставляеши.
Радуйся, пред Престолом Господним лампадо неугасимая;
Радуйся, озарившая всю вселенную светом подвига твоего.
Радуйся, всесветлая, благодатию, яко ризою света, облеченная;
Радуйся, Трисиянным светом озаренная.
Радуйся, свеще, Богом возжженная;
Радуйся, яко зриши ныне свет неизреченный.
Радуйся, великомученице Марино, невесто Христова всехвальная.

Кондак 12
Благодатию исполняется обитель Ватопедская, имущи сокровище неоскудное, десницу твою, великомученице Марино, от неяже миро Божественное исцелений миру источается, и отгоняются демонстии полцы призыванием имене твоего святаго. Темже и нас, память твою светло празднующих, благодати исполни молитвами твоими, да воспоем вкупе со святогорцы чудес подателю Богу: Аллилуия.

Икос 12
Поюще Бога, дивнаго во святых Своих, ублажаем тя, невесто Христова и великомученице Марино, почитаем страдания твоя, славим долготерпение и непобедимое мужество, хвалим мученическую кончину твою. Ты бо на земли силою Божиею победила еси сатану, явльшагося пред очима твоима, ныне же, предстоящи Престолу Царя Славы, молися о нас, да избавит Господь от действа диавольскаго и от всяких бед чтущих святую память твою и воспевающих сице:
Радуйся, благодатию Божиею прославленная;
Радуйся, в дому Отца Небеснаго обитель себе сотворившая.
Радуйся, Христу, Жениху твоему, спострадавшая;
Радуйся, блаженства святых удостоенная.
Радуйся, дев христианских украшение;
Радуйся, горняго мира достойная обитательнице.
Радуйся, исповеднице веры во Христа неустрашимая;
Радуйся, с мученики и всеми святыми ликовствующая.
Радуйся, угоднице Божия, житию великих святых сопричастнице;
Радуйся, яко со всеми избранными Божиими присно торжествуеши.
Радуйся, на Небеси со дерзновением Богу предстоящая;
Радуйся, дивная всем православным христианом помощнице.
Радуйся, великомученице Марино, невесто Христова всехвальная.

Кондак 13
О предивная и чистая голубице, святая великомкченице Марино, невесто Христова всехвальная, приими сие малое моление от любящих тя и благоприятными твоими к Богу молитвами от враг видимых и невидимых избави, от всяких белезней душевных и телесных свободи и от вечнаго мучения твоим ходатайством сохрани, да сподобимся с тобою в райских селениих воспевати Блгу победную песнь: Аллилуия.
Этот кондак читается трижды: затем читаются иклс 1-й: Ангелов Творец...и кондак 1-й: Избранней Богом...

Молитва
О святая дево и великомученице Марино, истинная Жениха твоего Христа невесто, во граде Антиохии за веру Христову пострадавшая, сквозе огнь и воду прошедшая и в Царствии Небеснем водворившаяся! Ты от юности всею душею и всем сердцем возлюбила еси Христа, Бога нашего, Тому единому послужити желающи. Ты силою благочестия своего, целомудрием и праведностию просияла еси, поживши свято и непрочно посреде неверных. Ты, благодатию Божиею от ран дивно исцеленная, изумила еси мучителей твоих и многих неверных привела еси к познанию Истиннаго Бога. Ты силою Божиею попрала еси диавола, явльшагося пред очима твоима, и благодать прияла еси во брани врага рода человеческаго побеждати. Ты еси всея Церкве Христовы светильник пресветлый, теплая к Богу молитвенница и всем прибегающим к тебе с верою скорая заступница. О святая Марино, руководи нас к Небесному Отечеству, подаждь нам ревность о спасении, направи стопы наша к деланию заповедей Христовых, на путь подвига духовнаго и исправления жизни. Поминай нас молитвою твоею, помози всем нам жити целомудренно, праведно и благочестиво. Услыши ны, страстотерпице Христова, и умоли Человеколюбца Бога, да подаст Он ходатайством твоим Отечеству нашему мир и блогоустроение, всем православным христианом утверждение в вере, благочестии и чистоте, да укрепит в нас братскую любовь, да очистит нас, грешных, от скверны и пороков, да сохранит нас от действа вражия, и помилует Своею благодатию, и Царствия Небеснаго наследники соделает, идеже купно с тобою прославим дивнаго во святых Своих Бога, Отца и Сына и Святаго Духа, всегда, ныне и присно, и во веки веков. Аминь.

Тропарь, глас 4:
Агница Твоя, Иисусе, Марина / зовет велиим гласом: / Тебе, Женише мой, люблю, / и, Тебе ищущи, страдальчествую, / и сраспинаюся, и спогребаюся крещению Твоему, / и стражду Тебе ради, / яко да царствую в Тебе, / и умираю за Тя, да и живу с Тобою, / но, яко жертву непорочную, приими мя, с любовию пожершуюся Тебе. / Тоя молитвами, // яко Милостив, спаси души наша.

Кондак, глас 3:
Марина днесь вражию главу сокрушает, / победы венец с Небесе приемши. / Егоже бо пророцы удержати не возмогоша, / того она, связавши, уязви. / Сего ради показася мучеником украшение, // вкупе же и похвала.

Ин кондак, глас 3:
Девства добротами преиспещрена, дево, / нетленными венцы венчалася еси, Марино, / кровьми же мученичества обагрена, / чудесы просветившися исцелений, / благочестно, мученице, прияла еси // почесть победы твоего страдания.


Издание Саввино-Сторожевмкого ставропигиального мужского монастыря
Издательство «Благо», Москва, 2002

По молитвенному прошению р. Божией Марины Игнатьевой

Одобрено Издательским Советом Русской Православной Церкви

Для келейного чтения.[/spoiler]

[Раб божий Константин]

Акафист преподобному Марону Пустыннику Сирийскому.
[spoiler]Кондак 1
Избранный угодниче Христов и чудотворче, преподобне отче наш Мароне, похвальное пение приносим ти, любовию чтущии твоя подвиги и труды, ими же Богу угодил еси, от Него же и дар исцеления недугов приял еси, яко имеяй дерзновение к Подателю здравия, от всяких нас бед и болезней свободи, да зовем ти:

Радуйся, Мароне пустынниче, скорбных врачу и иноков наставниче.

Икос 1
Ангельский нрав имел еси, отче преподобне, и яко бесплотный, непорочное житие совершил еси на земли, дивный образ совершенства духовнаго нам оставив, да подражаем добродетелем твоим и зовем ти сице:

Радуйся, от юности Господа Единого всем сердцем возлюбивый; радуйся, вся красная мира сего нивочтоже вменивый.

Радуйся, постом и бдением молитвенным плоть твою удручивый; радуйся, непорочный сосуде Божией благодати.

Радуйся, жилище Духа Святаго, украшенное чистотою; радуйся, мужу желаний духовных.

Радуйся, главо, освященная десницею Всевышняго; радуйся, безмолвия рачителю.

Радуйся, молву суетную возненавидевый; радуйся, богомыслия высото.

Радуйся, Сирийския страны прозябение святое; радуйся, Церкви Кирския красото и похваление.

Радуйся, Мароне пустынниче, скорбных врачу и иноков наставниче.

Кондак 2
Видя Господь душу твою яко ниву благовозделанную, к плодоносию духовному, к исканию единаго на потребу направи твой помысл, преподобне. Тем же любве ради Христовы мир оставил еси и всякаго пристрастия суетнаго свободився, притекл еси в пустыню Кирскую Сирии Евфратской на подвиги иноческия, зовый спасающему тя Богу: Аллилуйя.

Икос 2
Разумом богопросвещенным познал еси суету мира сего и непостоянство, в нем же радость сменяется скорбию, благополучие - нечаянными бедами. Тем же вечных благ возжелал еси, отче преподобне, и сия взыскати потщался еси отречением мирских благ и вольною нищетою, подвизая нас звати тебе:

Радуйся, пустынного безмолвия любителю; радуйся, смирения и нестяжания рачителю.

Радуйся, истиннаго самоотвержения совершенный образе; радуйся, иноческаго равноангельнаго жития всеизрядное явление.

Радуйся, правило веры и благочестия; радуйся, зерцало терпеливаго послушания.

Радуйся, слезы духовныя стяжавый; радуйся, плачем временным блаженство вечное снискавый.

Радуйся, молитвами непрестанными прилоги вражия сокрушивый; радуйся, бдением и трудами плоть твою духови покоривый.

Радуйся, постом и воздержанием страсти укротивый; радуйся, суд Божий и муки вечныя приснопамятовавый.

Радуйся, Мароне пустынниче, скорбных врачу и иноков наставниче.

Кондак 3
Силой Всевышняго осененный и укрепленный, в иночестем пострижении власов главы твоея все плотское мудрование отложил еси, преподобне, и яко воин благоискусный, власяницу иноческую в броню спасения стяжав, и непобедимым оружием Креста Христова вооружився, крепко ратовал еси противу врага невидимаго, диавола, смирением глубоким побеждая его вознесенную гордыню и выну вопия ко Господу: Аллилуйя.

Икос 3
Имея помышление о совершенном отрешении от соблазнов мира сего, пришел еси в пустыню суровую сирийскую, обрел еси тамо гору высокую, на ней же древле требище идольское бяше, и Богу освятив, в нем пребывал еси, имея небо покровом и землю одром упокоения, и кожаныя ветхия ризы одеянием многотрудному твоему телу, зноем опаляему и мразом померзаему, емуже ни малого угождения попускал еси, да не возобладает плоть над духом твоим, любовию ко Господу пламеневшим. Тем же зовем ти:

Радуйся, пустыню подвиги твоими освятивый; радуйся, жестокое житие пустынное проходивый.

Радуйся, песнопениями немолчными Бога славивый; радуйся, молитвы непрестанныя Господеви возносивый.

Радуйся, постниче не изнемогаяй, былием пустынным питавыйся; радуйся, трудолюбче нелицемерный, праздность возненавидивый.

Радуйся, многошвенныя ризы носивый; радуйся, в терпении и смирении преуспевый.

Радуйся, равноангелен на земли бывый; радуйся, презревый славу человеческую.

Радуйся, сокрушивый сети фарисейского тщеславия и гордыни; радуйся, поправый высокоумия душевредную прелесть.

Радуйся, Мароне пустынниче, скорбных врачу и иноков наставниче.

Кондак 4
Буря искушений и устремлений диавольских не возможе поколебати храмины твоея душевныя, преподобне отче, основана бо бе на твердом камени веры во Христа и хранима трезвением, трудами и молитвами непрестанными, ими же непрестанно противоборствовал еси врагу рода человеческаго на месте древнего владычества его: тем же и ныне к тихому пристанищу притекл с лики искупленных в мире, победивших же мир, вопиеши Христу: Аллилуйя.

Икос 4
Слышавше мнози о богоугодном житии твоем, отче Мароне, прихождаху к тебе, ови послушати поучений твоих душеполезных, ови же иночествовати с тобою в обители твоей пустынней, их же ты с отеческою любовию приемля, руководствовал еси стезею правою ко спасению, яко всем звати тебе:

Радуйся, веры истинныя правило; радуйся, кротости духовныя образе.

Радуйся, человече Божий, преподобием украшенный; радуйся, воине Христов, полки невидимых врагов победивый.

Радуйся, мира дольняго мудрый странниче; радуйся, мира горняго достойный насельниче.

Радуйся, в добродетелех благоискусный подвижниче; радуйся, сопричтенный к лику великих пустынножителей.

Радуйся, богомудрый множества сирийских иноков начальниче; радуйся, многая души человеческия Христу уневестивый.

Радуйся, мнозии монастыри руками ученик своих в сирийских пустынех учредивый; радуйся, великий авво множества отцев.

Радуйся, Мароне пустынниче, скорбных врачу и иноков наставниче.

Кондак 5
Боготечное светило быв, всех к Солнцу Правды Христу путеводил еси, угодниче Божий, словом и примером жития твоего святаго, еже все посвящено бысть на служение Богу и ближним твоим. Темже блаженство со святыми унаследовал еси и с ними вечно поеши хвалебную песнь Спасителю Богу: Аллилуйя.

Икос 5
Видевше Ангельстии чинове равноангельное житие твое, отче богоблаженне, смирения твоего глубину, молитвы неотступность, воздержания твердость и велию ревность духа твоего о чистоте, удивишася и прославиша Человеколюбца Бога, укрепляющаго немощное естество человеческое. Мы же ублажаем тя и зовем:

Радуйся, светильниче пустынный, просветивый страну Сирийскую сиянием твоих добродетелей; радуйся, монашествующих дивное украшение.

Радуйся, цвете благоуханный пустыннаго прозябения; радуйся, древо благоплодное небеснаго насаждения.

Радуйся, преподобием и правдою одеянный; радуйся, союзом добродетелей удобренный.

Радуйся, помазание приемый Святаго Духа; радуйся, освященный сосуде благодати Божией.

Радуйся, рабе Христов благий и верный; радуйся, слуго Господень истинный.

Радуйся, заповеди Господни исполнивый и оным научивый учеников твоих; радуйся, великий учителю иноков пустыннолюбивых.

Радуйся, Мароне пустынниче, скорбных врачу и иноков наставниче.

Кондак 6
Проповедник был еси евангельских добродетелей братии твоей, преподобне отче Мароне, и чада твоя духовныя верно руководил еси к вышнему Сиону, идеже есть жилище всех спасенных милосердием Христа Бога, пришедшаго в мир спасти падшее человечество и давшаго Своя спасительныя заповеди во спасение всем, иже подобно тебе, возлюбиша Его сердцем чистым и навыкоша пети Ему: Аллилуйя.

Икос 6
Возсияв в пустыни твоей яко богосветлое светило, отче наш Мароне, светом добрых дел твоих озарил еси души и сердца человеков, искавших от тебе наставитися во спасение: мнози бо ведяху тя равноангельна житием и прихождаху к тебе, да слышат от тебе глаголы живота вечнаго. Тебе убо, святому учителю небесныя истины, сотворшему и научившему, и мы смиреннии зовем хвалебно:

Радуйся, Евангелия Христова немолчный проповедниче, радуйся, апостольских преданий ревностный хранителю.

Радуйся, Православия святыя догматы в душе твоей добре утвердивый; радуйся, верою правою и делы благими Богу угодивый.

Радуйся, во след себе собор учеников твоих ко Христу приведый; радуйся, с ними, яко отец со чады, прияти почести небесныя от Господа возшедый.

Радуйся, не скрывый талант, тебе врученный Всевышним Домовладыкою; радуйся, куплю многу им сотворивый, спасение душ человеческих.

Радуйся, яко твоими ученьми грешнии покаянием Богу угодиша; радуйся, яко твоими наставленьми заблудшии правый путь спасения обретоша.

Радуйся, ближния твоя искренне возлюбивый; радуйся, спасению их душевному усердно послуживый.

Радуйся, Мароне пустынниче, скорбных врачу и иноков наставниче.

Кондак 7
Хотение едино имел еси, преподобне отче, еже Богу благоугождати, и спасению душевному ближних твоих благочестно послужити, темже обитель твоя святая бысть пристанище благоутишное всякому человеку, треволнением моря житейскаго утомленному. Ты бо, яко кормчий добрый, вся ученики твоя и приходящия к тебе люди наставлял еси словом и примером твоим вдали мира и сует его, сердцем и усты немолчно возглашати Богу: Аллилуйя.

Икос 7
Новая звезда светозарная на тверди Церкви Христовой возсиял еси, богоблаженне отче, в пустыни в начале подвига иноческаго уединенно пребывая, в молитвах, лощениях и трудах непрестанных, еже видя Всевидец Господь, собра к тебе паству иноков пустыннолюбивых, иже хотяху жити с тобою и назидатися от тебе во спасение: и тамо среди разрушеннаго владычества древняго омрачителя языков, основал еси селение Богу Единому Истинному, обитель свою, яко крин в пустыни процветшую духовно. Темже прославляем тя сими достодолжными похвалы:

Радуйся, преподобне, святостию и чистотою светло украшенный; радуйся, богоносне, дарами божественными свыше одаренный.

Радуйся, пастырю добрый тобою собраннаго стада словесных овец; радуйся, пустыню непроходимую в вертоград духовный трудами твоими претворивый.

Радуйся, вся страхования и привидения вражия молитвами твоими посрамивый; радуйся, нищий духом, но многих богатящий.

Радуйся, постническаго лика украшение; радуйся, звездо сияющая в сонме преподобных.

Радуйся, яко тесный и прискорбный путь паче пространнаго возлюбил еси; радуйся, воздержанием вся страсти умертвивый.

Радуйся, прежде умертвия твоего мертв бывый греху; радуйся, плоть твою духови любомудренно покоривый.

Радуйся, Мароне пустынниче, скорбных врачу и иноков наставниче.

Кондак 8
Странное и преславное чудо видится всем притекающим к тебе, отче наш Мароне, яко дивно прослави тя Господь: приял бо еси от него дар демоны прогоняти, недуги врачевати, скорбящих утешати, ожесточенныя сердца умягчати, да вси воспевают чудодействующему тобою Господу: Аллилуйя.

Икос 8
Все твое, преблаженне и богоносне отче, тщание и все о том бяше попечение, да выну всезлобному рода христианскаго врагу сопротивлятися и гордую его злобу попирати дивным оружием смирения, поста, безстрастия, труда, молитв непрестанных с коленопреклонением и покаянными слезами, и сими сам улучив победу на супостаты, стяжал еси от Господа дар и всем от лукаваго стужаемым помогати. Помози убо и нам, отче преподобне, твоими молитвами противитися искушениям вражиим и подражати тебе в побеждении страстей наших, да зовем ти:

Радуйся, смирением гордость душепагубную поправый; радуйся, кротостию пламень гнева в себе погасивый.

Радуйся, яко воздержанием и бдением целомудренно душу и тело твое соблюл еси; радуйся, гордыни диавольстей низложителю.

Радуйся, бесов прогонителю; радуйся, силу вражию поправый.

Радуйся, в силе Божией преспевавый; радуйся, лжи лукаваго обличителю.

Радуйся, прельщения бесовскаго посрамителю; радуйся, власть на духи нечистыя приявый.

Радуйся, яко тобою гоними, тии из одержимых ими скоро убегают; радуйся, яко бесныя, к тебе приводимии, здравии и смыслящии от тебе отходят.

Радуйся, Мароне пустынниче, скорбных врачу и иноков наставниче.

Кондак 9
Всем приходившим к тебе, молитвы и благословения ради, преподобне отче, дивно бысть видети тя, в ветсей и многошвенней кожаней ризе ходяща и зело нищетно под древом или во дни болезни в пещере пребывающа, всех - богатых и убогих, вельмож и простых, равно с любовию принимал еси и коемуждо слово на пользу душевную изрекал еси. Смиренно молим тя и нам во дни напасти, искушения, недоумения и сомнений притекающим к тебе, возглаголи слово утешения, наставления и ободрения, да поем предстательством твоим чудодействующему нам Господу: Аллилуйя.

Икос 9
Ветий премудрых превзошел еси, преподобне отче, благодатным помазанием словес твоих, ими же грешныя на покаяние приводил еси, подвизающияся в добродетели укрепил еси, и всем путь спасительный ко Христу показал еси, по нему же сам неуклонно шествовал еси до блаженныя твоея кончины, достойный воистину похвал таковых:

Радуйся, Сирийския Православныя Церкве светильниче немерцающий; радуйся, и в Российстей стране яко целитель изрядный издревле чтомый.

Радуйся, во дни жития твоего на земли и язычники ублажаемый; радуйся, христианскому роду присное утешение.

Радуйся, любящим и чтущим тя ходатаю спасения душам и телесем здравия; радуйся, пустынный гражданине, грады и веси наполнивый славою твоих подвигов.

Радуйся, маслино Божия благословения, ея же плодами напиташася вернии; радуйся, приведый ко Христу ученики твоя в добродетелех преуспевшия.

Радуйся, уготовавый житием и наставленьми твоими Господеви подвижники совершенныя; радуйся, полка иноческаго воевода благоискусный.

Радуйся, пустынножителей руководителю предивный; радуйся, храму сему, имени твоему посвященному, покрове Богом данный.

Радуйся, Мароне пустынниче, скорбных врачу и иноков наставниче.

Кондак 10
Спасти хотя многих к тебе прибегавших, не точию с тобою иночествовати хотящих, руку помощи милостивно подавал еси, но и различными мирскими делы, напастьми и скорбми отягченных и утесненных тако утешал, якоже родитель чада своя во обстоянии скорбей и болезней сущия утешает, отраду им своим попечением подавая и отеческою любовию тяжесть печалей облегчая. За таковое твое благодетельство и язычники нечестивыми чтом бысть, преподобне, вернии же, облагодетельствованнии тобою, благодарственно воспеваху Богу: Аллилуйя.

Икос 10
Стена заступления быша молитвы твоя, чудотворче святый, всем с верою к тебе притекающим во всякой скорби, ибо чистоты ради твоея сердечныя, сила духовная от Бога тебе даровася болящих исцеляти, бедствующим помогати, яко славити ближним и дальним величие Божие, в тебе явленное, и звати тебе сице:

Радуйся, сосуде, источаяй елей Божия милосердия; радуйся, живоносный источниче, струи исцелений изливающий нам.

Радуйся, скорый возстановителю здравия в немощи лежащих; радуйся, всех недугов, паче же болезней лютыя трясавицы и огневицы, целителю.

Радуйся, сляченных и увечных здравых сотворивый; радуйся, печальных утешителю.

Радуйся, бедствующим на помощь ускоривый; радуйся, разслабленных благосердый укрепителю.

Радуйся, безмездный врачу болезней душевных и телесных; радуйся, подателю врачеваний всем, притекающим к тебе с верою.

Радуйся, совершителю многих дивных чудес; радуйся, яко обилие благодати Божия прияти сподобился еси.

Радуйся, Мароне пустынниче, скорбных врачу и иноков наставниче.

Кондак 11
Пение всеумиленное Пресвятей Троице принесл еси при исходе твоем, преподобне отче наш Мароне, и яко пшеница зрелая, во время пожатая, являя в краткой, но тяжкой болезни предсмертной и немощь плоти, и силу духа своего, кончиною благою преселился еси от земли в обители горния, прияти награду от руки праведного Мздовоздаятеля Христа, Иже вчини душу твою со духи святых, немолчно возглашающих пред престолом славы Его победную песнь: Аллилуйя.

Икос 11
Светозарный светильник Божия благодати, озаряяй Сирийскую страну, явился еси, преподобне, духовным сиянием подвигов и чудес просветивый пустыню и в ней обители иноческия многия устроивый, и сие сияние твое духовное побуди святителя церкве Кирския почтити тя, авву знаменитаго и преславнаго, благодатию священства славы ради Церкве Христовой. Аще и тужаше дух твой, ужасаяся высоты сея, но смиренное послушание явил еси святителю и священства благодать восприяти не уклонился еси, подвизая всех согласно звати тебе:

Радуйся, место, оскверненное языческими идоложертвенными приношениями, освятивый совершением безкровныя Евхаристическия жертвы; радуйся, сея Божественный литургийныя жертвы достойный совершителю.

Радуйся, Алтаря Господня благоговейный служителю; радуйся, преподобне, руце твои со многим дерзновением ко Господу воздеявый.

Радуйся, молитвы теплейшия от сердца чиста к Престолу Вседержителя возносивый; радуйся, мастию священства умащенная главо.

Радуйся, вождю благоискусный воинов духовных; радуйся, свеще в молитве к Богу возженная.

Радуйся, маслино, елей милостей Божиих источившая всесильными молитвами твоими; радуйся, чаше, жаждущих утешения и врачевания напоившая.

Радуйся, даром чудотворения облагодатствованный; радуйся, телес наших благодатное богодарованное врачевание и о душах наших благоприятное предстательство.

Радуйся, Мароне пустынниче, скорбных врачу и иноков наставниче.

Кондак 12
Благодать, данную ти от Бога ведуще, радостно имя твое воспоминаем, преподобне отче наш Мароне, и с теплым усердием ко всечестному образу твоему притекаем, прилежно моляще чудотворения даром от Господа прославленного: подаждь цельбу всем болящим, наипаче же страждущим огневицею и трясавицею с верою к тебе прибегающим, избави и всех нас от всякия нужды и печали, да поем Богу: Аллилуйя.

Икос 12
Поюще славную кончину твою, стекошася ко гробу твоему иноков лицы и верных множество и со благоговением подъемше святыя мощи твоя, изнесоша я в ближнюю весь, идеже последи создан бяше велий благолепный храм во имя твое, преподобне, в нем же и положены быша многоцелебныя мощи твоя. И мы молящеся в сем храме, имени твоему посвященном, предстояще пред цельбоносным образом твоим и частию святых мощей твоих, чудесы благоухающих, прилежно молим тя: услыши нас всегда, твоего предстательства просящих за скорбных, недугующих и страждущих, к тебе вопиющих:

Радуйся, дарования чудес исцеления исполненный; радуйся, печальных отрадо.

Радуйся, немощствующих врачу; радуйся, щедрот и милования струя неизсякаемая.

Радуйся, любве и сострадания явление обильное; радуйся, телес наших богодарованное врачевание. Р

адуйся, о душах наших благоприятное предстательство; радуйся, добрый наш наставниче.

Радуйся, о спасении нас грешных сильный ходатаю; радуйся, благосердый помощниче всех, благочестно совершающих память твою.

Радуйся, целителю наш скорый; радуйся, заступниче наш теплый.

Радуйся, Мароне пустынниче, скорбных врачу и иноков наставниче.

Кондак 13
О преподобне и богоносне отче наш Мароне Чудотворче! Приими сие похвальное пение, от нас недостойных во умилении тебе приносимое и не преставай молитися за всех недугующих и скорбящих, к твоему предстательству с верою притекающих, и подавай и всем нам твоими богоприятными молитвами вся благопотребная в жизни сей и к вечному спасению полезная, и сподоби вкупе с тобою во Царствии Небесном непрестанно пети Богу: Аллилуйя.

Сей кондак глаголи трижды, паки икос 1 и кондак 1.

Молитва Преподобному Марону


О возлюбленная и священная главо, преподобне и богоносне отче наш Мароне! Назирай свыше милостивно нас грешных и молися Владыце милостивому и всещедрому всех благ Подателю Богу о соблюдении страны нашея. Буди молебник и о нас грешных! К страшному Господу Саваофу честныя своя руце в час сей простри, и от Него милость и щедроты испроси, и приими ны во свое ходатайство и заступление, от всех бед и лютых болезней сохрани, и от всяких страстей свободи, и от нестерпимыя и неутешимыя огневицы и трясавицы молитвами твоими избави нас, и от нападения бесов, от видимых и невидимых врагов соблюди, и согрешениям нашим прощение испроси, и спасенны Христу представи ны, и милостивно, в день Страшнаго Суда, с радостию предстати нам пред лицем неизреченныя славы Его сподоби, и милостивное призвание в Царство Небесное от Него услышати, и в неизреченней радости зрети преславную Его лица доброту сподоби благодатию и человеколюбием Господа Бога и Спаса нашего Иисуса Христа: яко держава Его благословенна и препрославленна со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.


Тропарь, глас 4
Пресветлое житие твое, отче Мароне, Ангелы удивило есть, и бесовская шатания яве устраши. Верных же собрания светло украси. К Небесному Христову жилишу, повелевая шествовати всегда, Егоже моли от тли и бед избавитися, верою творящим всечестную память твою.
Кондак, глас 5
Страстей пещь, преподобне, угасил еси воздержания росою. Дарованием обогатился еси исцелений от Бога, Мароне, приял еси целити верным болезни тяжкия, и бесов отгонити полки. Сего ради с веселием почитаем тя.[/spoiler]

[Раб божий Константин]

Акафист преподобному и богоносному отцу нашему Мартирию Зеленецкому чудотворцу.
[spoiler]Тропарь, глас 2-й

От юности, богоблаженне, Христа возлюбив, отечество оставил еси и, всех мирских мятежей уклонився, в тихое пристанище пречестныя обители Богоматерни достигл еси: отонудуже уведев непроходную пустыню, крестовидною зарею показанную желательне ю обрел еси и, в ней вселився, иночествующих собрал еси, и сих ученьми своими, яко лествицею восходную на небо, трудолюбно тщался еси возводити к Богу. Емуже молися, богомудре Мартирие, даровати нам на враги победы и душам нашим велию милость.

 

Кондак 1

Избранниче благодати Божией, преподобне отче наш Мартирие, от юности твоея Христа возлюбил еси и Тому невозвратно последовал еси. Обитель Зеленецкую создав, в той многия к спасении управил еси. Чудесы украсився в житии, в маститей старости преставился еси и, днесь на небесех ликующе выну молишися за ны. Мы же, светло память тою празднующе, тако тя величаем:

Радуйся, Мартирие, скорый наш помощниче, Зеленецкий чудотворче!

 

Икос 1

Ангели и архангели и вся воинства небесная Христа песньми превозносят. Сим же и духи праведник совершенных сликовстуют, в них же лице тя зряще, тако хвалим достойно, нашего заступника:

Радуйся, от юности небеснаго отечествия взыскавый!

Радуйся, вся мира сего красная ни во что же вменивый!

Радуйся, Христови единому послуживый!

Радуйся, сего ради крест жития иноческаго приемый!

Радуйся, обитель Зеленецкую устроивый!

Радуйся, создавый иноком виталище безпечальное!

Радуйся, братии ради многи труды претерпевый!

Радуйся, еще в житии чудесы от Бога прославленный!

Радуйся, царевича от смертнаго одра воздвигнувый!

Радуйся, в житии явления Матере Божия удостоенный!

Радуйся, лику праведных вчиненный!

Радуйся, Мартирие, скорый наш помощниче, Зеленецкий чудотворче!

 

Кондак 2

Видел еси, преподобне Мартирие, смерть родителей твоих, и от сего еще в младости познал еси, яко странники и пришельцы есмы в юдоли сей земной. Море же житейское зря напастей, бурею воздвизаемое, к тихому пристанищу устремился еси. В церковь бо, яко в корабль, притекл еси и небесным кормчим Христом в селения горняя управлен был еси, идеже днесь радостно вопиеши Богови: Аллилуиа!

 

Икос 2

Уразумел еси пути спасительныя, отче наш Мартирие, егда, иерея Благовещенския церкве Бориса посещая, поучениям его внимал еси. И, тому последовав, в великолуцкую обитель Сергиеву преселился еси и вся иноческаго жития тяготы понесл еси. Темже тако ти рцем:

Радуйся, Великих Лук произрастание дивное!

Радуйся, сирото, сохраненное Богом от напастей всяческих!

Радуйся, яко посла ти Господь родителя нова иерея праведна!

Радуйся, яко любовию той благому игу Христову тя покори!

Радуйся, сладце послушавый того от писания назидания!

Радуйся, часте входивый в храм Благовещения Пречистыя!

Радуйся, молитвою тамо умудрявыйся!

Радуйся, приятием Пречистых Таин укреплявыйся!

Радуйся, прочее дня проводивый в трудех всяческих!

Радуйся, целомудрие душевное и телесное нерушимо соблюдый!

Радуйся, достойно на подвиг иноческого жития вшедый во обитель Великолуцкую!

Радуйся, Мартирие, скорый наш помощниче, Зеленецкий чудотворче!

 

Кондак 3

Силою благодати Божией снабдеваем, седмь лет со наставником твоим пребыл еси, преподобне, иже многим полезным тя научи. Наипаче же учаше болящих поскору Святых Таин сподобляти, зане по смерти той душе, яко несущей святая, демони никако же могут касатися, ангели же ю сретают с песнию: Аллилуиа!

 

Икос 3

Имений не стяжав, стяжал еси мудрость жизни по Бозе, преподобне Мартирие, яко бо семя, в землю вметаемо, новы класы возращает, тако и поучения наставника твоего быша души твоей семенем жизни вечныя. Сего ради тя ублажаем:

Радуйся, послушанием украсивыйся!

Радуйся, постом истончивый плоти страстная!

Радуйся, препобеждавый сон молитвенным бдением!

Радуйся, трудом земледелия укрепивый силы своя!

Радуйся, послуживый больным во врачебнице!

Радуйся, омывавый струпы гнойная и язвы неисцельныя!

Радуйся, поскорбевый с скорбящими!

Радуйся, немощных роптания кротце понесый!

Радуйся, заповедь Христову деянием совершивый!

Радуйся, милостиве, яко вечное помилование стяжал еси!

Радуйся, тако себе предуготовавый к пострижению иноческому!

Радуйся, Мартирие, скорый наш помощниче, Зеленецкий чудотворче!

 

Кондак 4

Буря греховная многи люди погуби. Обаче силою благодати Христовы мнози спасение улучают, живуще благочестне, монаси и мирстии. Кийждо приемлет, еже по мере сил обретает, ов о чадех спасается, ов же иночестии приемлет обеты и Богови деннонощно поет песнь серафимскую: Аллилуиа!

 

Икос 4

Слышав Иисуса Христа, рекша о иночестем житии: «могий вместити, да вместит», и зря себе к оному преклоненна, усердно молил еси, преподобне, наставника, да желание твое освятит и укрепит пострижением, еже и получил еси. Тем же тебе вопием:

Радуйся, яко остригл еси власы главы твоея в знамение мироотречения!

Радуйся, яко облеклся еси в хитон вольныя нищеты!

Радуйся, приемый рясу аки одежду веселия!

Радуйся, препоясавый бедра свои яко силою истины!

Радуйся, мантиею, аки бронею правды, одеявыйся!

Радуйся, покрывый главу свою покрывалом смирения!

Радуйся, с одеянием сандалий не скор бывый на творение воли своея!

Радуйся, глаголом Божиим, аки мечем вооруживыйся в всегдашней молитве Иисусовой!

Радуйся, крест, щит веры приим, с любовию облобызавый и!

Радуйся, свещу взем, свещею благочестия явивыйся последи!

Радуйся, приятый в воинства противу мира, плоти и диавола!

Радуйся, Мартирие, скорый наш помощниче, Зеленецкий чудотворче!

Кондак 5

Боготечная звезда древле приведе мудрецы восточныя к яслям Вифлеемским, идеже тии обретоша Царя царствующих и Господа господствующих. Тако и тя, преподобне Мартирие, путь иноческаго жития приведе последи в селения горняя, идеже рожденному от Девы выну приносится спасенными песнь великая и хвалебная: Аллилуиа!

 

Икос 5

Врагу, присно на пустынных мужей страхованиями многими нападающу, житием молитвенным противустал еси, преподобне, и жестоким страстей умерщвлением. Мы же, чудящиеся твоему терпению брани, от того воздвигнутыя, умиленно поем ти хвалы:

Радуйся, добре преуспевый в иночестих подвизех!

Радуйся, пустыннаго жительства возжелевый зело!

Радуйся, молитвою на сие Божия благословения просивый!

Радуйся, удостоивыйся явления преподобнаго Михаила Клопскаго!

Радуйся, яко той благослови твое изволение!

Радуйся, за шестьдесят поприщ от обители наченый пустынное жительство!

Радуйся, яко велию брань воздвигоша противу тя зде злии демоны!

Радуйся, яко множицею воплями в время полунощи устрашаху тя!

Радуйся, избити мняще, ничтоже ти зло сотворити можаху!

Радуйся, яко прогонял еси я молитвою, аки пламенным мечем!

Радуйся, силою креста Христова посрамивый силу вражию!

Радуйся, Мартирие, скорый наш помощниче, Зеленецкий чудотворче!

 

Кондак 6

Проповедниче благочестия, егда узрел еси, преподобне Мартирие, образ Владычицы нашея Богородицы в столпе огненне и светле в стране Тихфинстей, зело умилился еси Божию к себе милосердию. Егда же в град Смоленск богомоления ради вшел еси, явишася ти преподобнии Авраамий и Ефрем и паки пустынное ти прорекоша житие, сладце воспел еси: Аллилуиа!

 

Икос 6

Возсия благодать Божия в обители Тихфинстей, егда тамо пожил еси с учеником своим Авраамием, иже и сподобися зрети крест звезден, назнаменующ место твоея обители. Тем же ти рцем тако:

Радуйся, на Господа возложивый все свое упование!

Радуйся, исшедый на поклонение святым мощем преподобных Авраамия и Ефрема!

Радуйся, преподобне, преподобных собеседниче!

Радуйся, незримый днесь споспешниче ко святым местом шествующим!

Радуйся, пришедый на поклонение иконе Богоматери Тихфинстей!

Радуйся, яко тамо добродетельным житием просиял еси!

Радуйся, ключехранителю, отверзавый и затворявый двери храмовныя!

Радуйся, днесь вводяй в врата небесныя молитвою за немощную братию!

Радуйся, прославивый приявшую тя обитель равноангельным житием!

Радуйся, исшедший из тоя на подвиг устроения новыя!

Радуйся, вожегий светильник во спасение немощным!

Радуйся, Мартирие, скорый наш помощниче, Зеленецкий чудотворче!

 

Кондак 7

Хотяй един Богови молитися и быти в безмолвии, отшел еси, преподобне, в место, над ним же Авраамий крест виде звезден, и обрел еси тое, яко остров зелен посреде вод блатных, лес же, аки страж ночный, покой его от пришествия мирских людей храняше. Вельми ти любезна обретеся пустыня сия прегорчайшая, юже видящи, умиленно воспел еси: Аллилуиа!

 

Икос 7

Новая купель Силоамская бысть ти, преподобне, Зеленецкая пустынь, в той бо от немощных и страстных естества очистил еси себе бдением и постом и деланием духовным, и угоден Господеви явился еси, сего ради и мы тако ублажаем:

Радуйся, обретый место, ти Богом на вселенне уготованое!

Радуйся, не убоявыйся пустыннаго одиночества!

Радуйся, памятовавый, яко с тобою бе присно Господь!

Радуйся, яко Илия на Кармиле, молился еси ту!

Радуйся, яко Иоанн в Иорданской пустыне постом украсился еси!

Радуйся, ревнителю преподобных Онуфрия, Макария и Антония, великих отцев!

Радуйся, проразумевый абие бывшую кознь диавола!

Радуйся, предрекий приведшу тя мужеви Иосифу дщери смерть диавлим ухищрением бывшую!

Радуйся, открывый, яко утопшая лику мученичу причтеся Божией милостью!

Радуйся, вола погибша в ветвех древесных диавольским кознованием объявивый томужде!

Радуйся, тако от уныния мужа благоговейна спасый!

Радуйся, Мартирие, скорый наш помощниче, Зеленецкий чудотворче!

 

Кондак 8

Странники и пришельцы есмы на земли сей, преподобне, присно ны враг искушает, страсти возмущая, уныние вселяя, и многи поставляет препоны текущим по пути в горний Иерусалим. Аще же что и благо сотоворим ближнему, тщится, да погибнет мзда, скорбьми абие нама отмстити. Бог же сия терпит, якоже древле Иовле поругание, дя вящее дасть утешение последи поющим: Аллилуиа!

 

Икос 8

Всяк в житии крест скорбей и печалей, его же кому даде Господь, преносит, и аще в уныние не впадет, последи сугубо прославляется. Тако и ты, отче, вся претерпев, милостей Господних сподобился еси, сего ради тя ублажаем:

Радуйся, изначала соградивый часовницу и малу хижину!

Радуйся, ту сладце деннонощно моливыйся Богови!

Радуйся, Христа ради претерпевый зной и мразы многие!

Радуйся, питавыйся, яже точию ти приношаху окрестнии!

Радуйся, вскоре утешенный видением огненного столпа с рукою, искры разметающею!

Радуйся, яко сия знаменаше обилие благодати, от тебе исходити имущия ко братии!

Радуйся, светильниче, его же познаша вскоре вернии!

Радуйся, яко не отгнал еси жаждавших с тобою пожити!

Радуйся, яко приимал еси от мира к тебе притекающих!

Радуйся, пастырю словесных овец!

Радуйся, послуживый немощному человечеству до скончания живота!

Радуйся, Мартирие, скорый наш помощниче, Зеленецкий чудотворче!

 

Кондак 9

Всего себе принесл еси в жертву, Богови угодную. Многие труды, скорби и печали понесл еси, устрояя обитель и служаще братии, иже от язв мирския суеты мудре в чистоту жития богоугоднаго влекл еси, словеса и деяния молитвою укрепляяй. Два же храма и келлии соградил и обитель стеною древяною оградил еси, да яко же в вертограде цветы источают благоухания, иноцы зде угодне Богови поют: Аллилуиа!

 

Икос 9

Ветвьми древо благосеннолиственное прикрывает многия, и ты, преподобне, многия прикрыл еси от наветов вражиих и моря житейскаго бурь. Мнози бо к тебе притекоша во обитель Зеленецкую, их же ради игуменства сан многопопечительный и священство приял еси и в царствующий град потребных ради обители пешешествовал еси. Сего ради ублажаем тя:

Радуйся, светильниче, осиявый темную страну!

Радуйся, создателю храмов, в нихже имя Божие прославляется!

Радуйся, аки сокровище велие внесый в оныя святыя иконы, от настоятеля ти прежде вданныя!

Радуйся, постом, слезами и молитвою создавый основание обители непоколебимое!

Радуйся, благочестием привлекий многие щедродатели!

Радуйся, к тебе бо, яко пчела ко улию, приношаху боголюбцы сокровища своя!

Радуйся, вероваху бо. Яко тако творяще взаим даяху Богови!

Радуйся, яко един благий Феодор согради ти вся потребная!

Радуйся, поучаяй, яко обителей лепота молитвою иноков стяжавается!

Радуйся, яко за добро, ти данное, молился усердно сам и вся братия твоя!

Радуйся, образе истиннаго иноческаго жития!

Радуйся, Мартирие, скорый наш помощниче, Зеленецкий чудотворче!

 

Кондак 10

Спасительныя милости сподобился еси, преподобне отче Мартирие. Единожды по молитве мало уснувшу ти, узрел еси Матерь Божию. В девичьем образе бе Пречистая, умиленна лицем и прекрасна, бровьми черна. На главе бяше златый венец, от камений многоценных светящий зело. Ты же, Ю узрев, с слезами умиления преклонився, воспел еси: Аллилуиа!

 

Икос 10

Стена ти нерушимая бысть, преподобне, икона Тихфинская, ею же благослови тя настоятель, егда в Зеленецкий оток отхождал еси. Егда же Пречистую зрети удостоился еси, абие невидимей бывшей, на икону сию воззрел еси и познав еси, яко в подобии тоя иконы бе Владычица. Яже памятующи, тако ти рцем:

Радуйся, истинный Пречистыя святых икон чтителю!

Радуйся, истиннаго святых икон почитания научителю!

Радуйся, Пречистыя Владычицы лик, слезами исполненный и прекрасный видети удостоенный!

Радуйся, яко келейнии иконы твои и днесь осеняют гроб твой!

Радуйся, яко покланяющеся им, честь не древу, но на нем изображенным воздаем!

Радуйся, яко не доскам и вапам, но написанному Божеству на них поклонение приносим!

Радуйся, яко лики святых и твой лобызающе, аки нози ваша лобызаем!

Радуйся, яко фимиамом молитву нашу знаменуем!

Радуйся, свещи возжигающе, о свете, в нем же Бог живет, памятуем!

Радуйся, яко от икон твоих исходит сила целебная!

Радуйся, яко возложением их мертва воскреси Господь!

Радуйся, Мартирие, скорый наш помощниче, Зеленецкий чудотворче!

 

Кондак 11

Песни надгробныя и последнее целование сменися пением хвалебным милости Божией и слезами радости, егда, в Москву ти шествующу, во Твери, у царя Симеона сына Иоанна воскресил еси молитвою и святых икон твоих возложение по силе благодати Христовы, ти данныя. Сего ради зело возлюби Сиемеон обитель твою, преподобне, и три новы храмы ту согради, да о чудеси сем выну Богови возносится песнь хвалебная: Аллилуиа!

 

Икос 11

Яко светильника тя благочестия почитающий царь Симеон много потребными обитель твою снабде. Егда же скончался еси, преподобне, чтый вельми память твою святитель Корнилий, Новуграду владыка мудрый, зело возлюби и преукраси, идеже и место упокоения си избра. Яже памятующи и обитель твою ради веры и терпения украшену видящи, тако тебе вопием:

Радуйся, искателю царствия Божия, емуже вся земная приложишася!

Радуйся, яко обитель твоя потребными не оскуде!

Радуйся, яко тремя храмами, яко купель тремя свещи, осияся сия!

Радуйся, яко недужнии душею ту оздравляхуся!

Радуйся, яко царие и простии, богатии и убозии, досезающие ю, во спасение назидахуся!

Радуйся, яко умершего отрока в утешение родителема воскресил еси!

Радуйся, яко тем силу благодати Божия явил еси!

Радуйся, научаяй тем, яко в Бозе живот наш и смерть скончаваются!

Радуйся, проповедниче Божия всемогущества!

Радуйся, благодати сосуде преисполненный!   

Радуйся, от гроба твоего источаяй многообразная исцеления!

Радуйся, Мартирие, скорый наш помощниче, Зеленецкий чудотворче!

 

Кондак 12

Благодати Божией избранниче, преподобне отче наш Мартирие, егда состарелся еси и остави тя крепость твоя, сам рукама своима место упокоения и гроб соделал еси. Провидя же кончину свою, добре поучал еси братию твою, еже жити и достойно пети выну Богову: Аллилуиа!

 

Икос 12

Поем твоя милости и чудеса, преподобне отче наш Мартирие, выну бо и по преставлении твоем нас не оставляеши и молитвами твоими у Господа потребная, яже к животу и благочестию, исходатайствуеши, егда тя с верою и любовию призываем, и молишися, во еже спастися всем. Сего ради от благодарных сердец ти вопием усердно:

Радуйся, молитвенниче наш усердный!

Радуйся, помощниче наш скорый!

Радуйся, мир всем православным пред кончиною твоею завещавый!

Радуйся, о мире всего мира незримый ходатаю!

Радуйся, на суше и в мори от всех оставленным помощь подаваяй!

Радуйся, недугующих от смертнаго одра к жизни возвращаяй!

Радуйся, всех душевных и телесных недугов врачю!

Радуйся, от злых духов мучимых избавителю!

Радуйся, скорбных сердце незримое умиротворение!

Радуйся, покрове к тебе притекающих!

Радуйся, о спасении всех теплый молитвенниче!

Радуйся, Мартирие, скорый наш помощниче, Зеленецкий чудотворче!

 

Кондак 13

О, преподобне и богоносне отче наш Мартирие! Приими малое со умилением ти приносимое нами моление сие, и со Пречистою Материю Господа и всеми святыми молися Господу Иисусу Христу, да избавит нас от всяких бед и скорбей, от враг видимых и невидимых, от напрасныя смерти и будущих мук, и сподобит со избранными Его воспевати Троице Святей во веки: Аллилуиа!

Сей кондак глаголится трижды и паки икос 1 и кондак 1

 

Молитва преподобному и богоносному отцу нашему Мартирию, Зеленецкому чудотворцу

О, пастырю добрый, наставниче наш, преподобне отче Мартирие! Услыши еже к тебе ныне приносимое моление наше. Вемы бо, яко духом с нами пребываеши. Ты убо, преподобне, яко имея дерзновение ко Владыце Иисусу Христу, Богу нашему, и к Пречистей Богоматери, буди ходатай и молитвенник теплый о обители сей, юже возградил еси, и о нас, недостойных рабех, живущих в ней, - ея же ты просветитель сый и начальник, богособранному твоему братству помощник и заступник присно являешися, - яко да твоим предстательством и молитвами невредимы на месте сем пребудем: от бесов же и злых человек ненаветованны от всех бед и напастей свободни сохранимся. Всем же отовсюду приходящим во святую обитель твою, и молящимся тебе с верою, и поклоняющимся раце мощей твоих, о еже избавитися от всякия скорби, болезни и напасти, милостивне поспеши, - даровати же православным мир, тишину, благоденствие и изобилие плодов земных. И о всех нас теплый предстатель ко Господу и помощник душам нашим буди, еже отпуститися нам согрешениям нашим и молитвами твоими, святе, избавитися нам вечнаго мучения и сподобитися Царствия со всеми святыми, да славу, благодарение и поклонение возсылаем Единому Богу, в Троице славимому, Отцу и Сыну и Святому Духу, ныне и присно и во секи веков. Аминь.[/spoiler]