Молитвослов

[Раб божий Константин]

Акафист преподобному Иосифу Волоцкому, Волоколамскому чудотворцу.
[spoiler]Кондак 1


Избранный угодниче Христов и дивный благочестия подвижниче, преподобне отче (наш) Иосифе, иже сугубый свыше дар приемый боговедения же и исцелений, яко имеяй дерзновение ко Святей Троице, моли избавитися нам от находящих бед и скорбей и болезней, да любовию зовем ти: Радуйся, преподобне отче (наш)* Иосифе, богомудре, чудотворче.


Икос 1


Ангела во плоти тя ведуще, преподобне Иосифе, посланна от Бога, да явит тобою в человецех образ истиннаго благочестия и добрых дел, чудящеся путем Его, во временнем житии твоем явленным, и величие благоутробия Его прославляюще, во умилении сердечнем взываем ти сице: Радуйся, добраго корене отрасле благородная; радуйся, лозо винограда Христова многоплодная. Радуйся, чадо молитвы родителей благочестивых; радуйся, надеждо и утешение сердец их боголюбивых. Радуйся, издетска страх Господень стяжавый; радуйся, семя слова Божия от юности восприявый. Радуйся, измлада смирения и молчания хранителю; радуйся, молитвы и воздержания ревнителю. Радуйся, преподобне отче (наш) Иосифе, богомудре, чудотворче.


Кондак 2


Видя Христос благое сердца твоего изволение и рачение, яко от юности немолчно прославлял еси имя Господне чтением и пением псалмов и песней священных во святем храме Его, в скинии небесней вчини совершенных возносити ему купно с ними ангельское пение: Аллилуиа.


Икос 2


Разумев от писаний отеческих благих мира сего тщету, исход же от временнаго сего жития непрестанно помышляя и пребывая присно в сокровеннем подвизе молитвы, никакоже сердцем прилепился еси к сущим от мира, разве точию к единому достойнейшему от сверстник твоих, с нимже и путь богоугоднаго иноческаго жития от дней отрочества предъизбрал еси, преподобне. Темже ублажаем тя сице: Радуйся, цвете благоуханный добраго воспитания; радуйся, сосуде Божественнаго избрания. Радуйся, в разуме Богом просвещенный; радуйся, сердцем в Бозе утвержденный. Радуйся, образе содружества непорочнаго и нелестнаго; радуйся, вседушевне взыскавый царствия небеснаго. Радуйся, преподобне отче (наш) Иосифе, богомудре, чудотворче.


Кондак 3


Бурю помышлений мирских препобеждая благодатию Христовою, помыслом лучшим востекл еси к небесным, преподобне, в горняя вперив ум твой безмятежный и безстрастный, и волю всецело покорив под иго Христово, тело же твое соделал еси жилищем Духа Святаго, и отнюдуже и в телеси, яко безплотен, со безплотными взывал еси Богу: Аллилуиа.


Икос 3


Гневность имеяй о совершеннем житии христианстем и от писаний отеческих научен, еже вдати себе в послушание искусну руководителю и наставнику нелестну, в юности родители твоя оставил еси, преподобне, и положил еси в сердцы твоем вопросити духовнаго старца Варсонофия, да аще что речет, буди то тебе, яко слово Самаго Бога, еже и свершися во благое Божиим устроением; сего ради, толикое веры твоея упование ублажающе, взываем ти: Радуйся, яко любезная и красная мира сего презрел еси; радуйся, яко Небесных и нетленных желанием вожделел еси. Радуйся, внутреннею Креста Христова красотою восхищенный; радуйся, силою Свыше на труд кpecтоношения облеченный. Радуйся, волею твердою воли своея отрекийся; радуйся, отсечением страстей угодивый Богу и спасыйся. Радуйся, преподобне отче (наш) Иосифе, богомудре, чудотворче.


Кондак 4


Силою любве Божия влеком к вящшему жития иноческаго совершенству и мудре последуя совету и благословению прозорливаго и святаго старца Варсонофия, пришел еси во обитель преподобнаго Пафнутия и того умолил еси прияти тя в послушание, да купно с ним в трудех и подвизех выну благоугождаяй Богу, воспеваеши: Аллилуиа.


Икос 4


Провидя духом благое произволение юноши, чистоту же душевную и благодатное призвание его, преподобный Пафнутий абие облече его во иноческий образ и возложи нань иго послушаний, яже со усердием в простоте и в терпении мнозе исполняше, яко быти ему образом безпрекословнаго повиновения, труда и благочестия; темже ныне зовем ему сице: Радуйся, тесный путь спасения от юности возлюбивый; радуйся, ярем Господень на выю свою возложивый. Радуйся, священными обеты волю свою связавый; радуйся, себе и весь живот свой Господеви предавый. Радуйся, коемуждо во благо усердный служителю; радуйся, болящих и немощных упокоителю. Радуйся, помыслы плотския силою молитвы прогоняяй; радуйся, сомнящихся в вере словом Божиим утверждаяй. Радуйся, преподобне отче (наш) Иосифе, богомудре, чудотворче.


Кондак 5


Божественною любовию распаляем, и ближних твоих, иже в мире, не отверглся еси сердцем, преподобне: слышав бо старца отца твоего в разслаблении телеснем суща, умолил еси преподобнаго Пафнутия во обитель того прияти и надолзе послужил еси болящему родителю твоему, со всяким рачением призирая его и питая телесне рукама твоима и духовне словом Божиим до самыя кончины, яко тому взывати к тебе: "Не аз ти отец, но ты ми отец еси". Сей убо труд любве твоей сыновния восхваляюще, яко жертву богоприятну, поем: Аллилуиа.


Икос 5


Имый во обители осмьнадесять лет жития в послушании, бдении, пощении и научении писанием святых и духоносных отец, егда наста час блаженныя кончины преподобнаго Пафнутия, начальствовати по нем, аще и не хотяй, призван был еси и во пресвитера поставлен, да управиши добре собранное им стадо Христово; ты же вмале начальствовав, паки управляем восхотел еси быти, да приумножиши добродетелей нетленная сокровища. Темже, дивящеся ревностному добротолюбию и смиренномудрию твоему, вопием ти: Радуйся, лишении телесными многа блага духовная собравый; радуйся, нищетою дарования небесная стяжавый. Радуйся, молчания изрядный хранителю; радуйся, строгих уставов иноческих блюстителю. Радуйся, болящим, яко братии Христовой, послуживый; радуйся, высокий образ любве сыновния явивый. Радуйся, власти над другими и чести уклонивыйся; радуйся, паки, яко слуга незнаемь, во обитель Кириллову вселивыйся. Радуйся, тамо брашна уготовляти определенный; радуйся, и в рубище рабстем познанный и обличенный. Радуйся, преподобне отче (наш) Иосифе, богомудре, чудотворче.


Кондак 6


Купцу уподобился еси, ищущему добраго бисера, Иосифе преподобне, егда в послушании и всяцем подвизе духовнем благоискусен быв, обители иноческия посещал еси: да испытно познаеши в тех лучшая и совершеннейшая и приусвоиши на пользу душ стада твоего словеснаго, еже радостию велиею возрадовася возвращению твоему, благодарственно взывая Пастыреначальнику Христу: Аллилуиа.


Икос 6


Слышав благоверный князь Борис о пришествии преподобнаго Иосифа в его пределы, изшед усердно моляше и, да изберет в его наследии место, да соградит на нем святую обитель и пребывает в ней со иноки, еже и свершися, дыханию бурну указующу место, и устроися рачением князя, паче же благословением Божиим по молитвам преподобнаго, емуже с любовию взываем сице: Радуйся, высоких подвигов жития христианского ревнителю; радуйся, новоначальных искусный руководителю. Радуйся, неизменное правило поста и покаяния; радуйся, хранителю непрестаннаго воздержания. Радуйся, мирским наставниче жизни богоугодныя; радуйся, основателю обители благоплодныя. Радуйся, яко благая начинания твоя Христос благослови; радуйся, яко сотрудника тебе в лице державнаго яви. Радуйся, преподобне отче (наш) Иосифе, богомудре, чудотворче.


Кондак 7


Велие стяжав сокровище любве, преподобне, якоже во дни первых христиан, имже бе сердце и душа едина и от нихже никтоже от имений глаголаше что свое быти, судил еси и во иноцех обители твоея, яко изволением сердца отвергшихся мира и его стяжаний, уставити сицеваго жительства образ, да вси вкупе едино взыщут стяжание вечное, Бога, Емуже и да взывают выну: Аллилуиа.


Икос 7


Новаго Феодосия, общих житий начальника, зрит в тебе страна Российская, преподобне отче Иосифе, якоже бо той, иноческия обеты восприяв, всем сердцем и душею уставом общаго иноческаго жития предан бяше, сице и ты, сим шествуяй путем, в терпении мнозе заповедем общежития святых отец неуклонно последовал еси, темже от чтущих тя слышиши таковая: Радуйся, общее житие монашествующих основавый; радуйся, тем всеоружие благочестия им подавый. Радуйся, общими труды праздных помыслов шатания упразднивши; радуйся, теми, яко бронею, страстей разжженныя стрелы отразивый. Радуйся, вселивый во обители дух общаго воздержания; радуйся, потребивый в ней плевелы любостяжания. Радуйся, бодрствованию духовному многи иноки научивый; радуйся, до конца жития первый в труждающихся бывый. Радуйся, преподобне отче (наш) Иосифе, богомудре, чудотворче.


Кондак 8


Странник пришел еси в пустыню отечествия твоего, преподобне, и абие домо владыка явился еси Богу, преклоньшу сердце во власти сущаго благовернаго князя Бориса еже послужити от имений своих на созидание церкве каменныя на месте сем, благоукрасити же ю боголепно, и келлии воздвигнути множащимся братиям, да и зде сими, яко на небеси святыми Ангелы, возносится Богу песнь: Аллилуиа.


Икос 8


Видяще ревностное по Бозе и жестокое житие преподобнаго Иосифа и братии, непрестанно в трудех и пощении подвизающихся и ходящих в рубищных и худых одеждах, нецыи от инок и всякаго чина мирских людей и князей не точию сих не отвращахуся, но паче ревностию духовною горяще и во обители купно с ними подвизатися желающе, приношаху ту имения своя на пользу общую; темже здателю тоя возглашаем тако: Радуйся, мудре предначертавый обитель нову; радуйся, поревновавый нищетолюбному житию Христову. Радуйся, святыя храмы во обители создавый; радуйся, мног собор монашествующих собравый. Радуйся, яко труд твой свыше благословися; радуйся, яко святое желание сердца твоего совершися. Радуйся, яко во обители твоей мнози души своя спасоша; радуйся, яко из нея пастыреначальницы изыдоша. Радуйся, преподобне отче (наш) Иосифе, богомудре, чудотворче.


Кондак 9


Всем сердцем возлюбивый Бога и многа дарования духовная от Него восприемый, преподобне Иосифе, и пред человеки толику благодать обрел еси, яко не точию мнози от простых, но и князи, требующе твоих наставлений, в послушание тебе вдаяху себе совершенно, имже миротворец был еси, исходатайствовав благоволение самодержца князю Юрию, иже неповинне оклеветан, под страхом смертным бяше, избавлен же быв, в радости душевней возопи Богу: Аллилуиа.


Икос 9


Благодать Божественная, привлекаемая молитвами преподобнаго, яве знаменася в нем даровании чудотворений и ведением сокровенных: умерша бо благочестиваго князя Иоанна молитвою своею возбуди, да конечне предуготовится покаянием и восприимет залог жизни вечныя, и тако да отыдет ко Господу; темже во гресех живущии и действеннаго возбуждения на покаяние требующии возопиим к нему: Радуйся, благочестивых отрадо и утешение; радуйся, колеблющихся в вере твердое ограждение. Радуйся, отчаяваюшихся утверждаяй во уповании; радуйся, просветивый многих твоими писании. Радуйся, мир посреде враждующих устрояяй; радуйся, неповинныя от смерти избавляяй. Радуйся, умирающия возставляяй на покаяние; радуйся, всем внушаяй жизни вечныя взыскание. Радуйся, шествовавый путем трудным и тесным; радуйся, возводяй других к обителем небесным. Радуйся, преподобне отче (наш) Иосифе, богомудре, чудотворче.


Кондак 10


Новоустроенну обитель преподобнаго Иосифа испыта Господь посещением гнева Своего, купно же и милости: за грехи бо людския глад крепок наведе на землю Волоколамску и на вся окрестныя веси, яко многим людем безгодно погибати. Преподобный же, уведев сия, усугуби во обители моление и отверзе житницы тоя алчущим; раздав же вся сущая и не могий ктому не точию тысящ пришедшаго народа, но ниже братии своея препитати, посла заимовати на обитель сребро и куплю деяй семен хлебных, никакоже остави требующия погибати гладом, детем же их малым особь созда дом, дондеже державный благочестивый Царь Василий, слышав сия, внезапу прииде во обитель и дарова довольная ко призрению бедствующих, иже, видяще в сем милосердующую руку Божию, во умилении сердец вознесоша хвалебный глас Богу: Аллилуиа.


Икос 10


Благому изволению державнаго последующе, мнози от военачальники князей удельных и иных христолюбцев богатая даяния в обитель Иосифову приношаху, яко всем пришедшим к ней глада ради безбедно в домы своя возвратитися и новым изобилием благословитися обители преподобнаго, к немуже взываем ныне: Радуйся, надеждо светлая в нужде и обстоянии сущих; радуйся, покровителю сирых и крова неимущих. Радуйся, гладом погибающих питателю; радуйся, чадом их виталища созидателю. Радуйся, милости источниче неистощимый; радуйся, скорбящих утешителю незримый. Радуйся, последняя твоя взаим Богови давый; радуйся, добрым расточением сущих богатая собравый. Радуйся, преподобне отче (наш) Иосифе, богомудре, чудотворче.


Кондак 11


Ведый от Божественных писаний, яко един уповающий на Господа поженет тысящи, и два двигнета тмы, не убоялся еси, преподобне, един со святым Геннадием сонмищу сильных поборников суетных лжеучений противустати, и оружием истины в конец сих поразил еси: вси бо разсеяшася, яко прах пред лицем ветра, тебе же благодарственно сердцем и усты взывающу: Аллилуиа.


Икос 11


"Веруяй в Мя, — рече Господь, — реки от чрева его истекут воды живы". Сия убо в тебе оправдишася, досточудне Иосифе; не бо священным догматом богословия во училищи некоем наставлен был еси, но сам живою верою сердца взыскуяй Бога, истину обрел еси в слове Божии и писаниих отеческих и явился еси оплот необорим Православия. Темже взываем ти: Радуйся, лжеучителей злых лукавство разоривый; радуйся, сомнящихся в православней вере утвердивый. Радуйся, бодрый учения Христова защитниче; радуйся, боголюбивою ревностию возжженный светильниче. Радуйся, благопотребне во отечествии твоем возсиявый; радуйся, веру в делех жития твоего показавый. Радуйся, разумных и препростых благоискусный учителю; радуйся, ближних и дальних россиян просветителю. Радуйся, преподобне отче (наш) Иосифе, богомудре, чудотворче.


Кондак 12


Миру водворившуся в Церкви дух злобы паки, пакости дея, подвигну сердце волоцкаго владетеля корысти ради многа смущения и утеснения творити обители, еще же и осуждение неправедно воздвигнути на преподобнаго, еже и паде на главу осудившаго; собором бо священным преподобный Иосиф с великою честию оправдан бысть, присно воспеваяй Богу: Аллилуиа.


Икос 12


Течение жития скончавая в трудех и молитвах, и подвизех благочестия, завеща преподобный неизменно хранити преданный им устав, знаменательно прирек: аще получу от Бога милость, то обитель сия ничимже скудна будет, и тако, завесу плоти отложив, отыде ко Господу и по сих исцеления подаваше больным, приходящим с молитвою к его мощем. Сего ради приносим ему похваления таковая: Радуйся, чистоты душевныя хранителю нелицемерный; радуйся, истинный рабе Христов благий и верный. Радуйся, стрелами вражиих навет неуязвимый; радуйся, спасаемых вождю непобедимый. Радуйся, досточудный образе терпения; радуйся, наставниче нелестнаго благоговения. Радуйся, и по отшествии обитель твою соблюдаяй; радуйся, молящимся благопотребная подаваяй. Радуйся, от Господа венец правды восприявый; радуйся, славою чудотворений просиявый. Радуйся, преподобне отче (наш) Иосифе, богомудре, чудотворче.


Кондак 13


О преподобне и богоносне отче (наш) Иосифе! Воспоминающе ныне подвиги и труды твоя, яже о Христе содеянная, мы, грешнии и недостойнии раби твои, смиренно просим тя: моли Милостиваго Бога, да дарует мир жительству нашему и Церкви Своей Святей, да оградит ю от всех душепагубных и безбожных учений, нам же да подаст вся благопотребная в житии сем и в будущем веце да сподобит нас воспевати Ему: Аллилуиа.


(Этот кондак читается трижды, затем икос 1 и кондак 1)






Молитвы преподобному Иосифу Волоцкому, Волоколамскому чудотворцу


Молитва первая


О великий наставниче, ревнителю и учителю православныя веры, святе премудре Иосифе! Приими моление нас, грешных, тебе приносимое, и теплым предстательством умоли в Троице славимаго Бога, да ниспослет богатыя Своя милости нам, грешным, да утвердит во Святой Своей Православней Церкви правую веру и благочестие: пастырем ея да подаст святую ревность о спасении словеснаго стада, яко да верующих соблюдут, неверующих же и отпадших от истинныя веры вразумят и обратят. Нам же всем испроси вся благопотребная во временнем сем житии и полезная к вечному спасению нашему. Помяни стадо твое, еже собрал еси, не забуди посещати чад твоих и, яко чадолюбивый отец, не презри, ниже отрини моления наша, но воздежи руце твои молитвеннеи ко Господу Богу, да отложит праведный гнев Свой, движимый на ны, и избавит нас от враг видимых и невидимых, от глада, потопа, меча, смертоносныя язвы, нашествия иноплеменных и междоусобныя брани. Ей, премилосердый заступниче наш, преславный чудотворче, всех нас управи в мире и покаянии скончати живот наш и преселитися со упованием в блаженная селения райская, идеже непрестанно славословится всепетое имя Отца и Сына и Святаго Духа. Аминь.


Молитва вторая


О преблаженне и приснославне отче наш Иосифе! Ведуще твое велие к Богу дерзновение и к твоему твердому заступлению прибегающе, в сокрушении сердца молим тя: озари нас светом дарованныя тебе благодати и молитвами твоими помози нам бурное море жития сего преити безмятежно и пристанища спасения неблазненно достигнути: порабощени бо суще суетными, и грехолюбиви, и немощни еже от обышедших нас зол возникнути, к кому прибегнем, аще не к тебе, явившему неоскудеваемое богатство милости в земнем житии твоем? Веруем же, яко и по отшествии твоем множайшее стяжал еси дарование милосердовати бедствующим. Темже убо, припадающе ныне к цельбоносней иконе твоей, умиленно просим тя, святче Божий: сам искушен быв, помози и нам, искушаемым; постом и бдением поправый силу демонскую, и нас от нападений вражиих защити; препитавый гладом погибающих, и нам испроси у Господа изобилие плодов земных и вся яже ко спасению потребная; посрамивый еретическая мудрования, Церковь Святую от ересей и расколов, и смущений молитвами твоими огради: да тожде мудрствуем вси, единем сердцем славяще Святую, Единосущную, Животворящую и Нераздельную Троицу, Отца и Сына и Святаго Духа, во вся веки. Аминь.


Молитва третья


О великий православныя веры ревнителю и учителю, святе премудре Иосифе! Приими моление, от нас, грешных, тебе приносимое, и теплым предстательством умоли в Троице славимаго Бога, да низпослет Он богатыя Своя милости нам, грешным, и рабам Божиим (имена), да отложит праведный гнев Свой, движимый на ны, да избавит нас и зде поминаемых от враг видимых и невидимых. Ей, премилосердый заступниче наш, испроси молитвами твоими нам прощение грехов, исправление жития нашего, от болезней и всяких недугов исцеление, от наветов и козней диавольских избавление, паче же спасение душам нашим подаждь и небесных благ восприятия сподоби, благодатию и человеколюбием Живоначальныя Троицы, Отца и Сына и Святаго Духа, во веки веков.



Тропарь преподобному Иосифу, игумену Волоцкому, чудотворцу


Тропарь, глас 4


Яко постников удобрение и отцев красоту, милости подателя, рассуждения светильника, вси вернии, сошедшеся, восхвалим кротости учителя и ересей посрамителя, премудраго Иосифа, Российскую звезду, молящася Господу помиловатися душам нашим.[/spoiler]

[Раб божий Константин]

Святому и праведному Иосифу Обручнику Пресвятыя Девы Марии.
[spoiler]Избранный хранителю Пресвятыя Девы Марии, пестуне и кормителю Богочеловека, праведный Иосифе, прославляя служение Твое неизреченной тайне воплощения Бога Слова, похвальная восписуем ти: Ты же ныне предстоя Престолу Христа Бога нашего и имея велие дерзновение к Нему, молися о нас, взывающих ти:

Радуйся, праведный Иосифе, скорый помощниче и молитвенниче о душах наших.

Икос 1
Ангелом непостижимую тайну рождения Бога Слова от Пренепорочныя Девы соблюдая чисту от клеветы людей и коварства диавола, тебе, праведный Иосифе, смиреннаго тектора избра Бог быти хранителя и свидетеля девства Пресвятыя Марии. Темже прославляя тя, яко избраннаго таинника Божия, взываем ти:

Радуйся, честная отрасле от корене Иессеева;

Радуйся, внутрь украшенный царским величием.

Радуйся, скудостию в земном духовное стяжавый богатство;

Радуйся, безвестностию славу вечную обретый.

Радуйся, славный паче царей;

Радуйся, праведный паче патриархов и праотцев.

Радуйся, праведный Иосифе, скорый помощниче и молитвенниче о душах наших.

Кондак 2
Видя Деву Марию при храме воспитавшуся совершеннолетию сущу, первосвященник Захария возопи ко Господу: Господи, покажи мужа достойнаго обручитися с Девою; егда же процвете жезл Иосифа, вручая ему Деву, воспеваше Богу: Аллилуиа.

Икос 2
Разумна есть всем концом земли праведность Твоя, святый Иосифе, яко несравненныя чести сподобился еси обручником быти Преблагословенныя Девы, из Неяже безмужно произыде Христос Бог: ты бо крепкия ради веры, чистоты, смирения и преспеяния во всех добродетелех на сие избран был еси. Темже взываем ти:

Радуйся, праведне, Чистейшей обручивыйся;

Радуйся, муже веры, приявший под кров свой Святую Деву Марию, верою соделавшуюся Престолом Божиим.

Радуйся, смиренный духом;

Радуйся, простый сердцем.

Радуйся, добродетелями украшенный;

Радуйся, святый Святейшей послуживший.

Радуйся, праведный Иосифе, скорый помощниче и молитвенниче о душах наших.

Кондак 3
Сила Вышняго осени тогда к зачатию неискусобрачную, дивной тайны не ведущу Иосифу, да от самого Бога наученный, возопиет к Нему: Аллилуиа.

Икос 3
Имущую Богоприятную утробу Деву видев Иосиф, смятеся, зря не к брачней и бракоокрадованную помышляя: но праведен сый, восхоте ю тай пустити Богу ведущему вся суд вверяя, и нас научив взывати к нему:

Радуйся, целомудрия ревнителю;

Радуйся, Израильтянине, в немже лести несть.

Радуйся, благий сердцем;

Радуйся, кроткий нравы.

Радуйся, все упование на Бога полагаяй;

Радуйся, промышлению Его себе и других вверяяй.

Радуйся, праведный Иосифе, скорый помощниче и молитвенниче о душах наших.

Кондак 4
Бурю помышлений сумнительных целомудреннаго Иосифа укрощая, Ангел открывает тайну рождения от Безневестныя Марии Сына Божия, Спасителя мира, якоже глагола: и наречеши имя Ему Иисус: Той бо спасет люди Своя от грех их, Емуже вопием вси: Аллилуиа.

Икос 4
Слышав в писании Господа глаголющаго: "се Дева во чреве приимет и родит сына Еммануила", веровал еси, праведный Иосифе, глаголанному от Ангела, яко книгу запечатленную, в нейже перстом Отчим написася Слово, приял еси Марию в дом свой, яко раю служа Непорочней со страхом и ревностию. Сего ради взываем ти:

Радуйся, яко приложил еси сердце твое к познанию Закона Божия;

Радуйся, яко открыл еси смысл твой к принятию тайн Божиих.

Радуйся, яко прежде всех людей сподобился еси уведети велию благочестия тайну, яко на земли явися Бог;

Радуйся, яко познал еси пришествие Его быти ради спасения людей от грех их.

Радуйся, яко несомненно уверовал еси, яже быша тебе откровена;

Радуйся, яко вера вменися тебе в правду.

Радуйся, праведный Иосифе, скорый помощниче и молитвенниче о душах наших.

Кондак 5
Богоизбранную Отроковицу приимши в дом свой, блаженне Иосифе, любил еси Ю яко обручницу, почитал еси Ю яко Пресвятую Деву и Матерь Спасителя мира, и служил Ей со страхом и благоговением, вседушно подвизался, да совершатся вся в законе и пророцех писанная, и купно с Мариею вопия Богу: Аллилуиа.

Икос 5
Видев в яслех вифлеемских звезду возсиявшую от Иакова, первый поклонился еси Рожденному: и егда небо - звезду, Ангели - пение, пастыри - исповедание и волсви поклонение и дары приношаху Ему, ты же, праведный Иосифе, всего себе принесл еси в дар Господу, и жизнь, и попечения, и труды отдавая на служение Ему. Сего ради вопием ти:

Радуйся, узревший прежде всех восхождение на земли незаходимаго Солнца Правды;

Радуйся, первый на земли свидетелю и служителю воплощения Сына Божия, прежде век от Отца рожденнаго.

Радуйся, тектоне земный, сподобивыйся имени отца Архитектона Небеснаго;

Радуйся, хранителю и попечителю отрочати, Емуже со страхом служат чини Ангельские.

Радуйся, благоговейный служителю Матери Бога Слова.

Радуйся, праведный Иосифе, скорый помощниче и молитвенниче о душах наших.

Кондак 6
Проповеданнаго законом и пророки яко человека осмодневна обрезал еси, и хранимое в Троичном Совете имя Иисус, яко драгоценный бисер от сокровищ пренебесных принесенный во откровение всех людей подал еси, Иосифе, имже Ангелов удивив, человека обрадовав, демонов устрашив, и яко миром благовонным всю вселенную облагоухав, возопил еси к Богу: Аллилуиа.

Икос 6
Возсиявший тебе, праведный Иосифе, в Младенце Иисусе, проречением Симеона, свет во откровение языков и славу людей Израилевых, абие облаком скорби покрывается: народ бо смущается, Ирод беснуется, души отрочати ища, в сердце Матери оружие пройти предрекается, да вера и терпение твое явны будут всем. Темже тебе, яко крепкому в терпении и в вере непоколебимому, взываем:

Радуйся, яко злато в горниле очищаемый непрестанно искушениями;

Радуйся, в радости смиренный, в скорби же терпеливый.

Радуйся, всегда верный тайнам вверенным тебе;

Радуйся, в мужестве непоколебимый.

Радуйся, верою, яко звездою в мрачных путех жизни руководимый;

Радуйся, упование на Бога, яко якорь в бурях житейскаго плавания имевый.

Радуйся, праведный Иосифе, скорый помощниче и молитвенниче о душах наших.

Кондак 7
Хотяй спасти от злобы Иродовы пришедшего спасти мир, не вопрошал еси, дивный Иосифе, Ангела дающаго Ти повеление о бегстве в Египет: иныя Спасаяй Себе ли не может спасти: но яко муж веры, яко новый Авраам, выну готов сый на послушание, не помышляя о трудах пути, ниже испытуя времени возвращения, абие же с Мариею и Младенцем устремился еси в Египет радостно вопия Богу: Аллилуиа.

Икос 7
Новый в Египте показался еси Иосиф паче онаго древняго патриарха, спасшаго люди Египетския от глада: ты бо спасл еси от смерти Спасителя мира, и людем Египетским гладом нечестия гибнущим хлеб животный принесл еси, и семена вечной жизни насеял еси, от них же возрасте дивное прозябение в пустынях египетских. Темже вопием ти:

Радуйся, скорби и труды Христа ради в пути радостно терпевый;

Радуйся, детоводителю Отрока Иисуса, в пустыни водившаго иногда Израиля столпом огненным и облачным.

Радуйся, питателю Питавшаго люди Своя манною;

Радуйся, носивший на руках Творца и носителя всея твари.

Радуйся, спасый от Иродовы злобы спасшаго иногда люди Божии от горькой работы Фараоновой;

Радуйся, Египту за рабство благодать сыноположения предуказавый.

Радуйся, праведный Иосифе, скорый помощниче и молитвенниче о душах наших.

Кондак 8
Странное видев чудо, еже о Иисусе, Бога по предречению родитися во плоти имеюща, и младенца повита в яслех Деву Матерь, Ангелов славословие и плоти обрезание, волхвов с востока пришествие с дары на поклонение, и бегство в Египет от Иродова неистовства, спасение всех людей и свет языков, якоже рече Симеон, и оружие в сердце Родившей, познал еси Бога истинна быти и истинна Человека, и сего ради возопил еси Ему: Аллилуиа.

Икос 8
Всего себе предав Богу, чрез Ангела воззвавшему Сына Своего из Египта, последовал еси велению Его и вселился еси с Иисусом и Материю Его в Назарете, да сбудется слово пророка о Нем, яко Назорей наречется. Темже и мы тебе, яко верному слуге Божию, вопием:

Радуйся, споспешниче Божия изволения;

Радуйся, соучастниче Божия домостроительства.

Радуйся, присный собеседниче Ангелов;

Радуйся, на земли в глубины тайн небесных посвященный.

Радуйся, пророков проречения о Иисусе слышавый;

Радуйся, вся благоговейно в глубине сердца сохранивый, никомуже поведая.

Радуйся, праведный Иосифе, скорый помощниче и молитвенниче о душах наших.

Кондак 9
Всяко колено небесных, земных и преисподних покланяется о имени Иисусовом: тебе же, чудный Иосифе, повинуяся бе Отроча Иисус, яко отцу. Мы же таковому к тебе снисхождению Господа чудящеся вопием Ему: Аллилуиа.

Икос 9
Вития многовещанная недоумеют по достоянию восхвалити тя, праведный Иосифе: Матерь Божия, Царица Неба и земли именует тя господином Своим, воплотившийся Сын Божий нарицает тя отцем, и дом твой на земли бысть вместилище святыни пренебесныя, яко в нем обиташе Царь Неба и земли. Темже мы смиренно вопием ти:

Радуйся, избранниче Божий, иже храняше кивот святыни пренебесныя;

Радуйся, дивный тектоне, в егоже доме живяше Творец Неба и земли.

Радуйся, питателю и попечителю Отрока Иисуса, иже яко Бог, дает бытие всем тварям и промышляет о всем мире, видимом и невидимом;

Радуйся, яко на земли сподобился еси лицезрети Сына Божия, и держати Его в объятиях и лобызати Его.

Радуйся, яко и по отшествии в горния обители во свете лица Его, Царя славы, блаженствуеши, и выну прославлявши Его со Отцем и Святым Духом.

Радуйся, праведный Иосифе, скорый помощниче и молитвенниче о душах наших.

Кондак 10
Спасти можеши и всякаго к твоему предстательству и заступлению прибегающаго, блаженне Иосифе, како бо, иже на земли бе повинуяся тебе во всем, не услышит тя предстояща ныне пред Ним на небе, и вопиюща с Ангельскими лики: Аллилуиа.

Икос 10
Стена еси крепкая всем к твоему предстательству прибегающим, праведный Иосифе, темже не презри и нас к твоему заступлению притекающих, в бурях искушений, в бедах и скорбех житейских взывающих ти:

Радуйся, скорый заступниче наш в нуждах и напастех;

Радуйся, сильный предстателю о нас пред Богом.

Радуйся, твердое упование наше в буре смущения и недоумений;

Радуйся, скорое избавление от клеветы человеческия.

Радуйся, питателю Того, иже носит всяческая глаголом силы Своея;

Радуйся, избавляющий нас от глада душевнаго и всякия скорби.

Радуйся,праведный Иосифе, скорый помощниче и молитвенниче о душах наших.

Кондак 11
Пение всеумиленное приносим ти, богомудре Иосифе, и молим тя, якоже хранил еси от всякаго вреда и озлобления Самого Христа Господа, сохрани своим предстательством пред Ним Церковь Его Святую Православную от всякаго озлобления врагов видимых и невидимых, огради заступлением твоим от всякия козни православных христиан, да тихое и безмолвное житие провождающе, вопием Богу: Аллилуиа.

Икос 11
Светоподательна светильника сущим во тьме неразумия явльшагося, узрел еси во храме двоенадесятилетняго Отрока Иисуса, подающа свет истиннаго ведения учителям закона Божия, и открывающа тайну своего великаго служения по предопределению Отца Небеснаго. Темже вопием ти:

Радуйся, верный хранителю закона отеческаго;

Радуйся, яко ревнуя о соблюдении закона, и Отрока Иисуса в дом Отца Небеснаго приводил еси.

Радуйся, егда оста Отрок Иисус в Иерусалиме, мневше Его в дружине суща, вкупе с Материю Его отечески печалися о Нем;

Радуйся, яко иска Его во сродницех и знаемых и не обретше, возвратися в Иерусалим, и по триех днех обрете Его в церкви, седящаго посреде учителей, и послушающаго их, и вопрошающаго их.

Радуйся, яко слышал еси откровение тайны, егда глаголаше Отрок Иисус: не весте ли, яко в тех яже Отца Моего, достоит быти Ми;

Радуйся, видевый и свидетельствовавый, яко Иисус преспеваше премудрости ю и возрастом и благодати ю у Бога и человек.

Радуйся, праведный Иосифе, скорый помощниче и молитвенниче о душах наших.

Кондак 12
Благодатию у Бога и человеков видя преспевающа Отрока Иисуса, и с возрастом тела премудростию преспевающа, вся слагал еси в сердце твоем, яко раб верный храня вверенное сокровище в тайне, до дне, внегда начаша вопити Ему вси верующии яко Богу и Спасителю мира: Аллилуиа.

Икос 12
Поюще труды и подвиги твоя, славим и блаженное успение твое: на руках бо Бога Слова и Матери Его сладце почил еси от трудов твоих, праведный Иосифе, блаженной вечности имея несомненное уверение. Темже вопием ти:

Радуйся, верный в великом служении;

Радуйся, сего ради величайшей почести от Бога сподобивыйся.

Радуйся, содруживыйся на земли с славою и красотою неба;

Радуйся, Отцем будущего века в будущий век с миром отпущенный.

Радуйся, благовествовавый Давиду радость велию;

Радуйся, всем сущим во аде весть известную принесший, яко прииде Христос, имеяй свободити и спасти род человеческий.

Радуйся, праведный Иосифе, скорый помощниче и молитвенниче о душах наших.

Кондак 13
О, святый и праведный Иосифе! Приими сие малое моление наше, и твоим сильным ходатайством ко Христу Богу умоли Его, да благодатию Своею соделает нас тверды и непоколебимы в православной вере, ревностны и непреткновенны в соблюдении заповедей Его, и дарует вся полезная к временному и вечному житию нам, вопиющим Ему: Аллилуиа, аллилуиа, аллилуиа.

Сей Кондак чти трижды. По сем - икос 1-й "Ангелом непостижимую тайну..." и Кондак 1-й "Избранный хранителю...".[/spoiler]

[Раб божий Константин]

Акафист святому праведному Иосифу Прекрасному.
[spoiler]Кондак 1
         
         Избранный Богом великий праведниче Иосифе, возлюбленный сыне отца твоего Иакова и верный хранителю завета праотцев Авраама и Исаа-ка, воистинну был еси прообразом во страдании Христа Спасителя. Мы же, восхваляюще терпение твое в злоключении и мужество во искушении, ра-достно взываем ти:
         Радуйся, великий праведниче, Иосифе Прекрасный.
         
         Икос 1
         
         Ангели удивишася терпению и незлобию твоему, смиренномудрый Ио-сифе, како зависти ради братий твоих ввержен быв в ров, взывал еси лю-бимому отцу твоему: «отче Иакове! братия навсегда разлучиша мя с тобою и сего ради не могу аз быти утешением твоей старости, не узрю более седин твоих». Мы же, ублажая сыновнюю любовь твою, со умилением взываем:
         Радуйся, любимый сыне патриарха Иакова;
         радуйся, избранный Богом на спасение Израиля.
         Радуйся, заповеди Божии в сердце носивый;
         радуйся, до закона Божия закон сохранивый.
         Радуйся, веру Авраамову стяжавый;
         радуйся, Исаакову послушанию подражавый.
         Радуйся, великий праведниче, Иосифе прекрасный.
         
         Кондак 2
         
         Видя патриарх Иаков кроткий и незлобивый нрав твой, праведней Ио-сифе, возлюби тя паче братий твоих и облече в багряную ризу, зане имел еси благоволение Божие, Емуже во смирении взывал еси: Аллилуиа.
         
         Икос 2
         
         Разум, озаренный Духом Святым, имел еси, Иосифе, открывая будущее в сновидении отцу и братиям твоим, глаголя: «се, солнце, луна и одинна-дцать звезд поклонишася ми». Отец же твой Иаков, не разумев видения се-го, со укорением отвещаше ти: «ужели аз и мати, и братия твоя приидем и поклонимся ти до земли?» Мы же, восхваляюще мудрость твою, вопием:
         Радуйся, сновидений откровение;
         радуйся, отцу твоему утешение.
         Радуйся, трудов его упокоение;
         радуйся, старости его подкрепление.
         Радуйся, прежде Моисеа пророчеством одаренный;
         радуйся, саном патриарха почтенный.
         Радуйся, великий праведниче, Иосифе прекрасный.
         
         Кондак 3
         
         Силою зависти исполнишася братия твоя, егда по повелению старца отца шел еси в долину Хеврон. Реша бо неции от них: «се, грядет сновидец, убием его». Брат же Рувим, хотяще спасти тя от смерти, рече им: «не про-ливайте крови брата вашего, не налагайте нань рук своих». Ты же, незло-биве, отдавая лобзание им, воспевал еси Богу: Аллилуиа.
         
         Икос 3
         
         Имея помысл чист и непорочную душу, блаженне Иосифе, умолял еси братьев твоих помиловати тя, егда они ввергоша тя в глубокий ров. Мы же, зело сострадая тебе, из глубины души взываем:
         Радуйся, яко в ров вверженный, братьев твоих умолявый;
         радуйся, яко ко отцу твоему велиим гласом взывавый.
         Радуйся, яко в разлуке с любимым отцем твоим горько рыдавый;
         радуйся, яко от стонов и слез твоих изнемогавый.
         Радуйся, яко и матерь твою Рахиль на помощь призывавый;
         радуйся, яко всю надежду твою на Бога отцев полагавый.
         Радуйся, великий праведниче, Иосифе прекрасный.
         
         Кондак 4
         
         Бурею волнения смутися родитель твой и видя окровавленную ризу твою, Иосифе, глагола: «кий зверь растерза сына моего?» Посем прови-дя целость одежды твоея, горестно взываше: «о, чадо! не зверь снеде тело твое, но людие убиша тя». Тогда посыпав пеплом главу свою и оглашая воздух рыданьми, великий патриарх взываше Богу плачевную песнь: Ал-лилуиа.
         Икос 4
         
         Слыша исмаильтяне вопли и рыдания твоя, Иосифе, над могилою Ра-хили, егда ведоша тя в дальнюю страну, вопросиша: «кто ты, чий раб, и кто есть пастухи, продавшии тя нам?» Ты же, отвещав им, рече: «ни раб, ни злодей, но любимый есмь сын отца моего, пастухи же есть братия моя, за-висти ради продавшии мя вам». Мы же, воспоминающе слезы и страдания твоя, зовем ти:
         Радуйся, яко от братий твоих претерпевый озлобление;
         радуйся, яко велие показавый смирение.
         Радуйся, ангелом удивление;
         радуйся, пророком Божиим похваление.
         Радуйся, мучеником во страдании радование;
         радуйся, всем праведным веселие.
         Радуйся, великий праведниче, Иосифе прекрасный.
         
         Кондак 5
         
         Божиим промыслом введе тя, мудрый Иосифе, царедворец фараона в дом свой и постави управляти всеми имениями своими. Жена же господина прельстися благолепием лица твоего, ласканьми тщашеся запяти тя, не возмогши же одолети твердости целомудрия твоего, возглагола зло во уши господина и той всади тя в темницу, идеже пребывая возносил еси скорб-ную песнь Богу: Аллилуиа.
         Икос 5
         
         Видя фараон, царь Египетский, сон, призва тя, Иосифе, да разъясниши виденное. Удивляяся мудрости, исходящей из уст твоих, возложи на тя зла-тую цепь и перстень на руку твою, и даде ти колесницу царскую и власть великую над всем Египтом. Мы же, зряще Божие благоволение, явленное на тебе, вопием ти сице:
         Радуйся, царским достоинством почтенный;
         радуйся, от Бога на великое служение возведенный.
         Радуйся, целомудрием одеянный;
         радуйся, пророчеством сновидений прославленный.
         Радуйся, страданиями украшенный;
         радуйся, любовию и честию от всех превознесенный.
         Радуйся, великий праведниче, Иосифе прекрасный.
         
         Кондак 6
         
         Проповедницы невинности твоея, целомудренне Иосифе, явишася ца-редворец Пентефрий вкупе с женою своею, некогда оклеветавшии тя; уст-рашеннии же переменой звания узника на властителя, истину вины своея открывают ти и прощение от тебе просят. Ты же, незлобиве, вся в волю Божию предал еси, радостно вопия: Аллилуиа.
         
         
         Икос 6
         
         Возсиял еси великою славою в земли Египетстей, премудрый Иосифе. Делая правду, собирал еси пшеницу на гладное время, о немже прорекл еси царю в истолковании его дивнаго сна. Егда же наста время исполнения твоего пророчества, вси людие притекаху к тебе, да напитаеши их. Мы же, воспоминающе сия, благодарственно ти возглашаем:
         Радуйся, вся благая на многая лета собравый;
         радуйся, люди избранныя препитавый.
         Радуйся, яко в стране чуждей законы отеческия сохранивый;
         радуйся, яко данный ти от Бога талант умноживый.
         Радуйся, яко в продолжение рода твоего даде ти фараон Асенефу;
         радуйся, яко во отраду даровал тебе Бог чада Манассию и Ефрема.
         Радуйся, великий праведниче, Иосифе прекрасный.
         
         Кондак 7
         
         Хотя Иаков спасти люди от глада, посла сыны своя во Египет, да купят хлеба: бе бо велий глад по всей земли. Пришедше сыны Израилевы во страну Египетскую, поклонишася Иосифу до земли: не познаша бо, яко брат им есть. Он же абие позна их, вопроси: «откуду есте вы? приидоша со-глядати землю сию?» Тогда отвещаша ему братия горестно: «ни, господине, мы раби твои, людие честнии, приидоша купити пищи. Мы, дванадесять сынов единаго отца, любимаго же его сына растерза зверь, а меньший брат вкупе со отцем взывают непрестанно Богу отцев плачевную песнь: Алли-луиа».
         Икос 7
         
         Новая драгая порфира Иосифа омочается слезами, вопль и рыдания его возносятся ко Творцу: «О, Боже Всевышний, жив еще отец мой Иаков!» Посем велиим гласом к братии восклицает: «аз есмь Иосиф, брат ваш, не бойтесь! вы продасте мя, но Бог отцев наших посла мя пред вами, да сохра-ню вы и препитаю от глада. Шедше, поведайте отцу моему, да грядет со всем домом своим и видит славу мою». Мы же, чтуще таковую любовь твою ко отцу и братии твоей, умильно зовем ти:
         Радуйся, мудрый и славный управителю;         радуйся, чтущих память твою дивный покровителю.
         Радуйся, велию любовь к братии показавый;
         радуйся, за обиды кротостию и незлобием им отвещавый.
         Радуйся, победивый коварство древняго змия;
         радуйся, преславный молитвенниче о всем мире.
         Радуйся, великий праведниче, Иосифе прекрасный.
         Кондак 8
         
         Странно и дивно бе слышати Иакову: «жив сын твой Иосиф!» Кое сердце старческое стерпит, кия очи слезы не излиют, кий глас не возопиет благих подателю Богу благодарственную песнь: Аллилуиа.
         
         Икос 8
         
         Весь дом Израиля возрадовася пришествием братии Иосифа, видевше кони и колесницы фараоновы, да шествует старец во Египет к возлюблен-ному сыну своему. Паде пред Богом Иаков моляся, да покажет волю святую Свою; и слышит в нощи: «Иакове, Иакове! Аз, Бог отца твоего, не бойся, иди во Египет, и Аз тамо буду с тобою, сын же твой Иосиф закроет ти очи своею рукою». Мы же, мысленно зряще блаженнаго Иосифа во объятиях отчих, тако взываем:
         Радуйся, сиянием небеснаго света озаренный;
         радуся, отцем твоим в радости благословенный.
         Радуйся, яко в твоем царстве Христос младенствуя от Ирода скрыся;
         радуйся, яко Отец Славы воззва Сына Своего Единородного от Египта возвратитися.
         Радуйся, венчанный от Бога венцем нетления;
         радуйся, всем нам образ непорочнаго пред Богом служения.
         Радуйся, великий праведниче, Иосифе прекрасный.
         
         Кондак 9
         
         Вси людие радостно поклонишася Иосифу, видевше грядуща его на встречу Израилю, отцу своему, и на выи его слезы проливающа. И поселися Иаков в цветущей земли тоя страны, воспевая Богу: Аллилуиа.
         
         Икос 9
         
         Витии многовещаннии не возмогут достойно восхвалити чудное житие твое, прекрасне Иосифе. Отцы святии уподобиша тя Сыну Божию, Церковь же Христова до ныне песньми красными воспевает тя в дни страданий Ис-купителя мира. Мы же, недостойнии, воспоминающе славную память твою, на рыдание приложим рыдание, зовуще из глубины души:
         Радуйся, из рова, аки из гроба, возставый;
         радуйся, на тридесяти сребренницех проданный.
         Радуйся, во изгнании твоем велие целомудрие показавый;
         радуйся, в скорбех твоих надежду на Бога полагавый.
         Радуйся, отцев святыя Церкве чудное прославление;
         радуйся, непорочных праотцев радость и веселие.
         Радуйся, великий праведниче, Иосифе прекрасный.
         
         Кондак 10
         
         Спасены быша сыны Израиля и в изобилии хваляху Бога. Состарився же Иаков, призва дети твоя, Иосифе, и руце пременяя на главах их, изображаше крест Христов, Емуже мы поклоняющеся зовем: Аллилуиа.
         
         Икос 10
         
         Царствуеши ныне, славне Иосифе, не во Египте, но в вышнем Иеруса-лиме, и зриши сбытие прообразов. Прейде сень законная, Благодати при-шедшей, о Нейже пророчествоваша отцы святии. Умирая, Иаков благо-слови сыны твоя, провещая им будущее. Тебе же, блаженне Иосифе, больша всех братий твоих, дивная прорече. Закрыв же очи отцу твоему, велий плач сотворил еси по нем. Мы же, восхваляя таковую любовь твою, благоговей-ное приносим пение:
         Радуйся, благословенный от отца благословениями свыше;
         радуйся, яко благословения сии превышают горы и холмы.
         Радуйся, яко святым Крестом благословишася твои дети;
         радуйся, яко сим благословением достигоша они жизни вечныя.
         Радуйся, дивный прообразе Христова воскресения;
         радуйся, избранниче Божий и праведных украшение.
         Радуйся, великий праведниче, Иосифе прекрасный.
         
         Кондак 11
         
         Песньми сладкими воспевают тя отцы Христовой Церкви, приснопа-мятне Иосифе. Наипаче похвали тя великий творец канонов Андрей Крит-ский. Приими же и от нас недостойных, великий праведниче, смиренное моление, да подражая твоим добродетелем, возможем богоугодно пети Соз-дателю нашему хвалебную песнь: Аллилуиа.
         
         Икос 11
         
         Светильник светлый угасает: боголюбезный Иосиф волею Божиею прилагается ко отцем своим. С миром и любовию благословляя братию свою, он слезно умоляет их, глаголя: «аз умираю, вы же изнесите кости моя, егда посетит вы Бог и изведет из земли сея в землю обетованную». Мы же, сла-вяще Господа, показавшаго тя, дивным во святых Своих, умильным сердцем зовем:
         Радуйся, яко, умирая, братию миром и любовию благословляеши;
         радуйся, яко в землю обетования кости своя изнести им завещаеши.
         Радуйся, яко во светлостех святых вечно почиваеши;
         радуйся, яко со ангелы и всеми святыми за весь мир Господа умоляе-ши.
         Радуйся, яко клеветы и поношения терпеливо переносити нам помо-гаеши;
         радуйся, яко леность и нерадение о деле Божием в нас искореняеши.
         Радуйся, великий праведниче, Иосифе прекрасный.
         
         Кондак 12
         
         Благодать от Господа испроси нам, просящим твоея помощи, славный Иосифе. Умоли Господа сил о нас грешных, да со страхом проходим попри-ще земнаго нашего жития и, уповая на твое предстательство, получим от Всещедраго Бога всех наших грехов прощение и мирную христианскую кончину, да со всеми благоугодившими Богу воспоем, радуяся, ангельскую песнь: Аллилуиа.
         Икос 12
         
         Поюще святое житие твое, достохвальне Иосифе, ублажаем целомудрие и подвиги твоя, величаем узы и страдания, чтим непорочное преставление, поклоняемся честным мощем твоим и усердно молим: не возгнушайся нас, недостойных, но приими наше хвалебное пение, да прославляя торжество твое, в радости взываем:
         Радуйся, великий праведниче, купно с возлюбленными Богом Авраа-мом, Исааком и Иаковом;
         радуйся, предивный молитвенниче во святых Бога Израилева.
         Радуйся, носителей имени твоего неусыпный хранителю;
         радуйся, всем притекающим к тебе от бед избавителю.
         Радуйся, девственником и подвижником наставниче и укрепление;
         радуйся, болящим и немощствующим скорое исцеление.
         Радуйся, великий праведниче, Иосифе прекрасный.
         
         Кондак 13
         
         О, великая слава праотцев Христовых, преблаженный Иосифе! При-ими наше благодарственное пение и вознеси о нас грешных моление ко Пресвятей Троице, да избавимся вси вечнаго мучения и наследники Царст-вия Небеснаго будем, в радости поюще победную песнь: Аллилуиа.
         (Сей кондак чтется трижды; посем икос 1 и кондак 1)
         
         МОЛИТВА
         святому праведному Иосифу Прекрасному
         О, святый праведниче, целомудренне Иосифе! Услыши нас грешных, молящихся тебе и к твоему предстательству усердно притекающих, прося-щих милостиваго твоего заступления. Помози нам, святче Божий: веру хри-стианскую до конца жития нашего содержати, заповеди Божия неленостно исполняти, обидящим прощати, чистоту и целомудрие хранити и всех ближних преискренне любити. О, великий праведниче! во дни земнаго твоего жития ты сам искушен быв, можеши и нам искушаемым помощи, яко немощни есмы и нерадим о нашем спасении. Умоляем тя, угодниче Бо-жий, воззови ко Творцу всяческих, да ниспослет Он ангелов света, ихже отец твой Иаков виде восходящими и низходящими на землю, да освятят они нашу грешную землю и люди, погибающия неверием, оскорбляющим величие Божие. Припади к Божией Матери, Заступнице рода христианска-го, много бо может молитва Ея, да остаток дней наших поживем в покаянии и творении добрых дел. О, предивный заступниче! не забуди чтущих пре-светлую память твою и приими наша теплыя слезы, накропляющия стра-ницы великия книги твоего бытия. Подвигни на молитву с собою святых праотцев Авраама, Исаака и Иакова, несогрешивших пред Богом, да и мы со всеми благоугодившими Ему поклонимся в Троице Святей славимому Богу, Отцу и Сыну и Святому Духу, ныне и присно и во веки веков. Аминь.[/spoiler]

[Раб божий Константин]

АКАФИСТ Священномученику Ипполиту епископу Римскому.
[spoiler]ТРОПАРЬ
От Бога свыше благодать приял еси духовную // священномучениче Ипполите, // душу твою привел еси кровию ко Христу, // мученик истинен был еси, // соборы страдальцев водяй, // и еретических учений зломыслие победив, // яко добрый пастырь душу твою положивый за овцы своя, // спасаяй от бед и напастей вся верныя, // благоприятными молитвами твоими, // отче преславне.


КОНДАК
Светлостию огня Божественнаго // возсия душа твоя, // благодатию Христовою, // окормляя словесное стадо, // явился еси священномучениче изряден, // радуйся Владыце поя, // Ипполите, отче наш.


КОНДАК 1
Избранный чудотворче, великий пред Господом о нас молитвенниче, // многоцелебный источниче благодати Духа Святаго исполненный, // Ипполите священномучениче // Ты же яко имеяй дерзновение возносити молитвы о нас пред Престолом Бога Всевышнего, от всяких нас бед, скорбей и напастей свободи, // благодарственно тебе зовущих:
Радуйся, Ипполите священномучениче //, пастырю добрый паствы Христовой.


ИКОС 1
Ангелом земным явися светлое житие твое, священномучениче Ипполите во Остии Римской пристани. Ты бо стадо словесное, от Христа врученное, добре упасл еси, сугубым венцем от Него украшен быв, блаженне. Приношение Авелево превошел еси в страданиях за веру Христову. Сего ради приими прославления наша, вопиющия ти с умилением сице:
Радуйся, пастырю любвеобильный, душу свою положивый за други своя.
Радуйся, веру Христову во страданиях своих зело прославивый.
Радуйся, кровию своею многия неверныя ко Христу обративый.
Радуйся, славы Христовой верный ревнителю.
Радуйся, веру, надежду и любовь ко Творцу до конца сохранивый.
Радуйся, Церкве Христовой страже неустрашимый.
Радуйся, Ипполите священномучениче //, пастырю добрый паствы Христовой.


КОНДАК 2
Видя Господь чистоту веры твоея и ревность стояти за истину, даде ти разум просвещен и светел, яко учении и писании твоими толковати Священныя Писания во спасение верны и обличение еретичествующих. Подвиги и труды твоими верныя чада паствы твое укрепляшеся и в радосте пояху Богу: Аллилуйя.


ИКОС 2
Разум просвещен имея, блаженне Ипполите, потщался еси Господеви служити молитвами твоими, внимая Божественным словесем Его в служении паствы твоея. Плоть твою духове поработил еси, и незлобием побеждая враги, возвещал еси людем спасительную веру Христову. Сего ради и мы с любовию тебе зовем:
Радуйся, веру Христову во Остии насадивый.
Радуйся, яко тамо же мутныя воды многобожия истребивый.
Радуйся, идолопоклонников к вере спасительной направивый.
Радуйся, теми же истину веры Христовой прославивый.
Радуйся, велия подвиги во служении показавый.
Радуйся, Ипполите священномучениче //, пастырю добрый паствы Христовой.


КОНДАК 3
Силою Божественною укреплен, невозвратно Господу последовал еси, наставляя верныя ко спасению, да познают вси неверующии Творца своего и Бога нашего и да поют Ему благодарне: Аллилуйя.


ИКОС 3
Имея велие дерзновение, священномучениче Ипполите, ко исполнению заповедей Господних, душу твою, любве ради, положил еси за други своя. Небоязненно явился еси ты на суд неправедный и обличив мучителя в бесчеловечности и называя его кровопийцем. Воспоминая подвиги и страдания твоя прославим мы с любовию тя сице:
Радуйся, судилищу неправедному дерзновенно представый.
Радуйся, мучителя в бесчеловечности обличивый.
Радуйся, безбоязненноего же кровопийцей назвавый.
Радуйся, соборища нечестивых не убоявыйся.
Радуйся, мучений лютых не устрашивыйся.
Радуйся, Божественную истину пред всеми защитивый.
Радуйся, Ипполите священномучениче //, пастырю добрый паствы Христовой.


КОНДАК 4
Буря гонений и страданий не устраши тя, священномучениче Христов, егда разъяренный мучитель предаде тя на мучения лютыя. Твердейша адаманта явися душа твоя во исповедании веры Христовой. Не убоялся еси ни прещения, ни мучительства, Богоизбрание, но дерзновенно пред всеми в радостей воспевал песнь Богу: Аллилуйя.


ИКОС 4
Слышавше от тебе Божественныя глаголы, блаженне Ипполите, нечестивый судие злобою распыхахуся, видя яко многолюдие от пути нечестия отвращахуся и веру Христову исповедаху, взывая, яко велик Бог христианский. Сие воспоминая, блажим тя похвалами сими:
Радуйся, священномучениче Христов, мучении своими веру прославивый.
Радуйся, страдании твоими, многия к вере Христовой призвавый.
Радуйся, безбожных и нечестивых безбоязненно обличивый.
Радуйся, иго Христово мужественно на себе возложивый.
Радуйся, адского змия уста заградивый.
Радуйся, венцем мученическим чрез страдания украшенный.
Радуйся, Ипполите священномучениче //, пастырю добрый паствы Христовой.


КОНДАК 5
Боготочный источниче глаголов уст твоих явися, досточудне, в дерзновении твоем. Наставлял бо и укреплял еси вся верныя в вере Христовой, прелести тьму отгоняя. Яко многосветлая звезда был еси пастве твоей, вразумляя и укрепляя с любовию пети Богу: Аллилуйя.


ИКОС 5
Видевшие еретичествующих глагольное зломыслие Духом победив, блаженне, священномученик изряден любовию Владыки был еси, призывая верныя дерзновенно исповедати Истину Христа. Мы же укрепляемии поручениями сими смиренномудренно взываем ти:
Радуйся, правды Божественнней служителю ревностный.
Радуйся, Церкви Христовой светильниче богосветлый.
Радуйся, звездо лучезарная чистотою сияющая.
Радуйся, яко маслина, дому Божию плоды приносящая.
Радуйся, святителей собеседниче предивный.
Радуйся, воине Христов, во страданиях непобедимый.
Радуйся, Ипполите священномучениче //, пастырю добрый паствы Христовой.


КОНДАК 6
Проповедником истины Христовой ты был еси, блаженне Ипполите, и мученическим венцем блистая, от Господа увенчан был еси. Ты, яко мученик истинен священником был еси, и мучеником во святительстве пребыл еси, сугубыми блистая даровании призывал верныя во умилении пети Богу: Аллилуйя.


ИКОС 6
Возсия миру всему христианскому честная память твоя. Ты бо явился людем светом Божественным ко просвещению языков и славою Бога Вышняго. И память твоя в роды родов прославляема бысть и по смерти твоея. Ученейшем бо христианским богословом ты был еси, и труды твоя вещаху о тебе, яко образцы древне- церковнаго учительства. За таковыя деяния твоя прими и похвалы сия:
Радуйся, яко словесныя овцы Христовы в послушании Божии воспитавый.
Радуйся, яко и в самом себе храм Бога жива уготовавый.
Радуйся, яко многия души верныя Христу уневестивый.
Радуйся, истиный подражателю Христова смирения.
Радуйся, учителю смирения Божия и кроткаго послушания.
Радуйся, неверных богомудренное обличение.
Радуйся, Ипполите священномучениче //, пастырю добрый паствы Христовой.


КОНДАК 7
Хотяще всем спастися и в разум Божий приити, призывал ты еси, священномучениче Ипполите, на судилищи неправедном вся предстоящии ко спасению, познати Бога Истиннаго. Ему Единому воспевати хвалебную песнь: Аллилуйя.


ИКОС 7
Новаго исповедника и священномученика прослави Господь за страдания твоя и истязания, блаженне Ипполите. Яко град на верху горы укрытися не может, тако и ты, святителю Божий.Преклонныя годы и немощное естество показа силу Божию в немощах совершающуюся. Не устраши тя истязания и смерть в руце Бога Твоего предал еси душу твою. Зряще ревность твою по славе Божией поем ти:
Радуйся, блаженне, ни во что же вменивый истязания мучителей.
Радуйся, яко преклонныя годы твоя явилися венцем святости.
Радуйся, небоязненно веру Христову даже до смерти проповедавый.
Радуйся, научающий не боятися веру Божию пред неверными прославляти.
Радуйся, верующих в Промысел Божий укрепляющий.
Радуйся, нечестивых пред всеми обличающий.
Радуйся, Ипполите священномучениче //, пастырю добрый паствы Христовой.


КОНДАК 8
Странно и прискорбно видети старца, убеленнаго сединами, пред разъяренным судиею за веру Христову

страдавшаго. Ты еси, яко агнец Божий, блаженне Ипполите, после долгих истязаний, связанный по рукам и ногам был еси брошен в море. Не убояся сего, ты и из пучины моря дивному во святых Своих, взывал еси Богу: Аллилуйя.


ИКОС 8
Всего себе предав Творцу своему, душа твоя возсия на тверди небесней, прия по смерти твоея светлый венче за страдания от Господа. Слики святых, предстоя у Престола Вседержителя немолчное пение приносиши о всех чтущих тя, с верою тебе молящиися и прославляющии тако:
Радуйся, яко житием своим ты Богу угодивый.
Радуйся, вси заповеди Господни в чистоте сохранивый.
Радуйся, злонамерения богомерзких мучителей истребивый.
Радуйся, цевнице Божественныя, во страданиях всех украшающая.
Радуйся, зрителю славы Божественныя неизреченныя.
Радуйся, всех молящихся тебе усердно помогающий.
Радуйся, Ипполите священномучениче //, пастырю добрый паствы Христовой.


КОНДАК 9
Всякия напасти, скорби и мучения, ты священномучениче Ипполите, претерпел еси в земной жизни твоей. Крепость мужества души твоея удиви естество ангельское, узревша тя непобидима мученика Христова. Море отдаде тело твое на брег Остии пристани Римской, и чада паствы твоея со благоговением взяша е, положи тело твое во храме града Рима, поя дивному во святых Богу: Аллилуйя.


ИКОС 9
Витийство человеческое не возможе по достоянию своему изрещи подвиги и труды твоя, мучения и страдания за веру Христову претерпевша. Ты, яко пастырь добрый, упасл еси стадо твое на ниве Христовой, наставляя и обличая, наказуя и милуя, вся к Богу приводяй, да ничтоже погибе, но имать живот вечен. Темже и нам, к тебе пребегающим испроси у Господа спасения, блаженне Ипполите, вопиющих тебе:
Радуйся, яко истинную мудрость и страх Божий всегда имевый.
Радуйся, иго Христово благое восприявый.
Радуйся, язвы Господа на теле твоем понесший.
Радуйся, в жертву Христову самаго себе принесший.
Радуйся, яко чрез тебя многи к Богу обратишася.
Радуйся, яко ко преславным мученикам приложивыйся.
Радуйся, Ипполите священномучениче //, пастырю добрый паствы Христовой.


КОНДАК 10
Спасти хотя паству твою и многия верныя во Христе живущия не убоялся еси убивающих тело, блаженне Ипполите, истину рекл еси на судилище неправедном, не убоялся еси мучителей, не устрашился истязаний тела твоего, сохранив непорочность Богоугоднаго жития твоего, поюще Богу в мученическом подвиге песнь: Аллилуйя.


ИКОС 10
Стена еси спасительная и твердость веры укрепления был ты еси всем верным христианом, священномучениче Ипполите. Ты был еси учеником святаго Иринея епископа Лионскаго, и яко известный богослов Христовой Церкви, написаны тобою многи сочинения, крепивших веру в Бога. Слова твои являлися спасительны и просты крепя вся верныя в единстве к Богу, за вся труды твоя восхвалим тя мы сице:
Радуйся, пастырю добрый, о славе Божией ревновавый.
Радуйся, яко феникс, в дому Божием процветший.
Радуйся, светильниче Божий, седящих во тьме озаривший.
Радуйся, дивная величия Божия верным открывший.
Радуйся, источниче Божий, жажду духовную многим открывший.
Радуйся, соблазнами мира себе не прельстивший.
Радуйся, Ипполите священномучениче //, пастырю добрый паствы Христовой.


КОНДАК 11
Пение похвальное Господу совершашеся в храме святых мучеников Лаврентия и папы Дамаса града Рима, идеже положися тело твое. Вси бо вернии, приходящии в храм сей святый, молят тя, священномученика Христова, якоже хранил еси паству твою от всякого вреда и озлобления в земной жизни твоея, тако буди и по смерти твоея помощь и заступление твое всем чтущим тя. Богу же поющим хвалу: Аллилуйя.


ИКОС 11
Светозарная свеща, просвещающая души верныя бысть душа твоя, священномучениче Ипполите, у Престола Божия предстоящая. Молим тя, угодниче Божий, умоли Господа Сил о всех кающихся грешниках, и всех нас укрепи на твердом камени веры Христовой святыми поучении твоими, во умилении тебе поющими:
Радуйся, веры Христовой непоколебимый столпе.
Радуйся, претыкающихся о камень соблазна наставниче.
Радуйся, душепагубных ересей искоренителю.Радуйся, премудрый наставниче паствы твоея и учителю.
Радуйся, древней церковной проповеди блюстителю.
Радуйся, ревностный пастырю Богом прославленный.
Радуйся, Ипполите священномучениче //, пастырю добрый паствы Христовой.


КОНДАК 12
Благодать Божия прослави тя, священномучениче Ипполите, в житии твоем, и по смерти твоея яко дивнаго во святых Своих Бог прославляет тя во святых мощех твоих. Вси бо притекающии с верою к тебе приемлют благодатныя врачевания, их же и мы просяще тя молим избави и всех нас от всякия нужды и болезней, да поем во смирении сердец наших Богу: Аллилуйя.


ИКОС 12
Поюще досточудныя подвиги и страдания твоя, со умилением сердец славим тя, славнаго священномученика Божия, яко не устраши тя ни печения, ни смерть. Подвигом добрым подвизался еси, веру в чистоте сохранив, и всем явился еси, яко истинный светоч Христов, и праведных духов сопричастниче. Мы же недостойнии память твою чтущии, глаголем ти:
Радуйся, дивная величия Божия всем возвещающии.
Радуйся, скоропредстательный помощниче бедствующих.
Радуйся, иго Христово на рамо свое восприемый.
Радуйся, пламенную любовь ко Господу во страданиях своих показавый.
Радуйся, образ жития твоего всем нам по смерти оставивый.
Радуйся, чтущих любовию память твою от бед и скорбей покрывающий.
Радуйся, Ипполите священномучениче //, пастырю добрый паствы Христовой.


КОНДАК 13
О, предивный священномучениче Ипполите, приими нынешнее похвальное сие моление от нас недостойных и твоим ходатайством у Престола Божия испроси нам в вере Христовой укрепление, от бед и напастей избавление, миру умирение, ересей избавление. Болящим здравие и благоденствие по молитвам твоим Господь ниспошлет всем нам, да сподобимся с тобою пети Всеблагому Творцу и Богу нашему: Аллилуйя, Аллилуйя, Аллилуйя.
(Этот кондак читается трижды, затем читается икос 1 и кондак 1.)


МОЛИТВА
О, преславный и дивный страстотерпче, Архиерее Христов, священномучениче Ипполите. К тебе, яко истинному ходатаю и молитвеннику у Престола Божия мы недостойнии прибегаем и смиренно молимся. Ты, яко пастырь добрый, душу свою положивый за овцы своя, приисполнен быв любве и веры Христовой, укрепи и нас на стези спасения, да не погибнем люте. Ты бо приял от Господа благодать и силу за тяжкая и многая страдания твоя, чтущия память твою, помогати и от бед избавляти, избави и нас, молитвенниче всеславне, всяких раздоров и нестроений. Божественным венцем украшенный и каплями кровей твоих священства одежду украсил еси, всеблаженне Ипполите, украси благолепием святительства Архиереи и вся священноначалия. Нас же всех, призывающих тя с верою и любовию избави от всякаго злаго обстояния, наипаче от еретического зломыслия и басней эллинских. Мир умири предстательством пред Господом, безумныя вразуми и в вере Христовой укрепи, согревая огнем молитвы твоея охладевшия сердца наша, да сподобит Господь нас грешных Небеснаго Царствия Своего, и со всеми святыми прославляти всечестное и великолепое имя Отца и Сына и Святаго Духа, ныне и присно и во веки веков. Аминь.[spoiler]

[Раб божий Константин]

Преподобный Иринарх, затворник Ростовского Борисо-Глебского монастыря, что на Устье.
[spoiler](память 13 января и 23 мая (Собор Ростово-Ярославских святых) по старому стилю)

Акафист преподобному Иринарху, затворнику Ростовскому

Кондак 1

Избранный угодниче Христов и преславный чудотворче Иринарше, дивно на земли в чине ангельстем пожил еси и ныне, яко имеяй велие дерзновение ко Господу, буди теплый о нас пред Богом заступник, да с любовию зовем ти: Радуйся, Иринарше преподобне, пустынножителей светлое украшение.

Икос 1

Ангел земный и человек небесный явился еси преподобне Иринарше: от юности бо твоея Господеви благоугождая, все житие твое в добровольном подвизе страдальчествования проводил еси и Рая присноблаженнаго достигл еси, идеже ныне ликуя, услыши и нас, на земли поющих ти таковая: Радуйся, православныя церкве Христовы превеликое украшение. Радуйся, отечествия твоего светильниче пресветлый. Радуйся, любовию ко Господу сердце твое от юности уязвивый. Радуйся, и сам от Него возлюблен бывый. Радуйся, воине Христов добропобедный. Радуйся, силою свыше облеченный. Радуйся, Царствия Небеснаго наследниче. Радуйся, о всех чтущих тя усердный молитвенниче. Радуйся, Иринарше преподобне, пустынножителей светлое украшение.

Кондак 2

Видевше рождшии тя и знаемии, яко Благодать Божия почи на тебе, блаженне, радостию Святою радовахуся, и Христа о сем славляху, поюще Ему: Аллилуиа.

Икос 2

Разума Божественна исполнився, познал еси, преподобне, яко благо есть мужу, иже возмет ярем Господень на ся от юности своея, и сего ради во след Христа со усердием потекл еси. Темже зовем ти: Радуйся, иго Господне на себе вселюбезно приявый.Радуйся, в терпении спасения души своея искавый. Радуйся, во смирении твоем Сыну Божию, смирившемуся до рабия образа, подражавый. Радуйся, Бога и ближняго твоего паче себе возлюбивый. Радуйся, слезами на земли сеявый. Радуйся, притекающих к заступлению твоему послушателю скорый. Радуйся, Иринарше преподобне, пустынножителей светлое украшение.

Кондак 3

Сила Вышняго от юности даровася ти, блаженне: далече бо сый, кончину отца твоего умныма очима узревый, и братиям своим по плоти о сем возвестивый, сим удивил еси тыя и научил еси звати Богу: Аллилуиа.

Икос 3

Имый всеусердное о спасении души твоея попечение, во обитель страстотерпцев Христовых Бориса и Глеба притекл еси, и тамо, пред игуменом пад, о вчинении себе в лик иноков всеусердно молил еси, еже и улучил еси приемый постриг главы твоея во отвержение мира и сует его. Мы же сия зряще, таковая поем ти: Радуйся, мирская возненавидевый, да Христов раб будеши. Радуйся, постниче терпеливейший, хлебом живота вечнаго душу твою питавый. Радуйся, во плоти небесный жителю. Радуйся, наставниче великий к путем спасения. Радуйся, трудолюбием твоим во обители Борисоглебстей просиявый. Радуйся, страстотерпче Христов долготерпеливе. Радуйся, постников похвало и славо. Радуйся, воздержания подвижников чистейшее зерцало. Радуйся, Иринарше преподобне, пустынножителей светлое украшение.

Кондак 4

Бурю велию напастей воздвиже на тя ненавидяй добра диавол, обаче не поколеба доблести души твоея, посреди пещи искушений немолчно Богови зовущаго: Аллилуиа.

Икос 4

Слышав Господа в Евангелии своем глаголюща, яко многими скорбьми подобает нам в Царствие Небесное внити, уготовал еси плещи твоя на раны и ланите на заушения, всякое озлобление ради Христа претерпети готовый. Мы же, сицевую высоту духовныя жизни твоея зряще, ублажаем тя похвалы таковыми: Радуйся, всего себе в волю Господню предавый. Радуйся, Христа Распятаго паче всего возлюбивый. Радуйся, терпением злостраданий Иову себе уподобивый. Радуйся, язвы Господа Иисуса на теле твоем носивый. Радуйся, узы Христовы на ся возложивый. Радуйся, ужема железныма коварства вряжия связавый. Радуйся, величием подвигов своих ангелы возвеселивый. Радуйся, жестоким твоим житием человеки удививый. Радуйся, Иринарше преподобне, пустынножителей светлое украшение.

Кондак 5

Боготечней звезде подобяся, протекл еси земное поприще твое, Иринарше, всемогущею Благодатию Божиею покрываем, и небесных видений сподобляем, в нощех и во днех поя Владыце: Аллилуиа.

Икос 5

Видевше тя иноцы обители, в ней же подвизался еси, земная презирающа, и в рубех и необувенныма ногама ходяща,вознегодоваша и двакраты из ограды своея извергоша. Ты же, незлобив сый, во град Ростов текл еси, о изгнавших тя молитвы возсылая. Сего ради приими от нас сицевая: Радуйся, терпением скорбей всяческих просиявый. Радуйся, вольною нищетою вечное богатство стяжавый. Радуйся, всяцем образом Владыце всех угодивый. Радуйся, равноангельное житие на земли поживый. Радуйся, веры светлый светильниче. Радуйся, ко грядущему граду верный наставниче. Радуйся, вся земная во уметы вменивый. Радуйся, незлобием твоим ризы души своея убеливый. Радуйся, Иринарше преподобне, пустынножителей светлое украшение.

Кондак 6

Проповедницы воли Божественныя о тебе явишася самобратия Святая Роман с Давидом, и в видении тебе представше, во обитель свою, из неяже изгнан был еси, паки тя глашаху. Ты же от видения воспрянув, и радости исполнься, Богови воззвал еси: Аллилуиа.

Икос 6

Возсиявша благодатна светильника, яви тя Господь, егда не ведомыми судьбами своими из ограды обители святых мучеников во град Ростов тя изведе, да и во обителех Авраамиевой и Лазаревой прославится о тебе имя Его. Мы же таковому о тебе Божию смотрению удивльшеся, глаголем ти таковая: Радуйся, орудием воли Божия бывый. Радуйся, во смиренномудрии поживый. Радуйся, страсти в души твоей искоренивый. Радуйся, явлением ти преподобнаго Авраамия почтенный. Радуйся, союзом любве со блаженным Иоанном себе связавый. Радуйся, прозорливым глаголом уст его внимавый. Радуйся, стогны ростовския подвиги твоими освятивый Радуйся, о всех притекающих к тебе усердный молитвенниче. Радуйся, Иринарше преподобне, пустынножителей светлое украшение.

Кондак 7

Хотяй всем спастися Владыка Господь чудным гласом воспяти тя от намерения твоего оставити пределы ростовския и к северу уклонитися. Ты же, послушлив сый, всего себе воли Его предав, воззвал еси Ему: Аллилуиа.

Икос 7

Новый воистинну Даниил явился еси, преподобне, в дивнем видении твоем узревый грядущия судьбы Царства Российскаго, и повеление от Бога прием, потекл еси ко граду Москве, идеже царю Василию небоязненно рекл еси о всех, хотящих быти. Мы же, тайнозрению твоему дивящеся, сицевая тебе приносим: Радуйся, провидче дивный, будущая яко настоящая, узревый. Радуйся, духом твоим о сих вельми возскорбевый. Радуйся, веления Божия послушниче усердный. Радуйся, небоязненно повеленная ти цареви явивый. Радуйся, словесы твоими сего укрепивый. Радуйся, беззаконий сынов ея твердейший обличителю. Радуйся, о спасении Царства Российскаго богоугодный молитвенниче. Радуйся, о мире Державы Российския пред Господем предстателю. Радуйся, Иринарше преподобне, пустынножителей светлое украшение.

Кондак 8

Странен и дивен путь спасения протекл еси, блаженне, егда от иконы Распятия Христова повеление восприим, в затвор вшел еси, в нем же тело твое ужема железныма связав и множество железных крестов на ся возложив, во дни и нощи Владыце твоему звал еси: Аллилуиа.

Икос 8

Весь был еси умом и сердцем в горнем, аще и в хижине малей заключився, преподобне. Тем же и ныне водворяяся на небеси, заступаеши всех, верою и любовию вопиющих ти таковая: Радуйся, в терпении и злострадании житие твое препроводивый. Радуйся, волю свою заповедем Господним покоривый. Радуйся, благодатию Духа Святаго осиянный. Радуйся, источниче чудес богодарованный. Радуйся, исцелений независтный подателю. Радуйся, немудрых богомудрый наказателю. Радуйся, правды Божия нелицеприемный возвестителю. Радуйся, обидимых многомощный защитителю. Радуйся, Иринарше преподобне, пустынножителей светлое украшение.

Кондак 9

Во всяких напастех и скорбех всем был еси утешитель благодатный, тугу сердечную страждущих словесы и молитвами твоими прогоняя, и во уповании на помощь Вышняго тех укрепляя, и научая пети Ему: Аллилуиа.

Икос 9

Витии многословесныя по достоянию восхвалити не возмогут мужества души твоея, богомудре отче наш Иринарше: варваром бо на обитель твою находящим и иноком ю оставльшим, ты един пребыти зде не убоялся ecи, Богу себе вручая. Темже любовию восхваляем тя сице: Радуйся, убивающих тело, души же убити не могущих, не устрашивыйся. Радуйся, воине Христов непоколебимый. Радуйся, жизнь будущаго века паче временнаго жития возлюбивый. Радуйся, силою словес твоих, благодати исполненных, врагов обличивый. Радуйся, теми ярость сих в кротость преложивый. Радуйся, пред военачальники вражиими православна и верна быти Царю своему исповедавый. Радуйся, хищений их небоязненный обличителю. Радуйся, грядущаго на них гнева Божия верный возвестителю. Радуйся, Иринарше преподобне, пустынножителей светлое украшение.

Кондак 10

Спастися хотящим человеком, добр вождь явился еси, преподобне, от египта страстей в земли обетованней тех путеводствуя и ученьми своими наказуя, во еже пети Творцу всех: Аллилуиа.

Икос 10

Стену необоримую и ограждение нерушимое не точию обители твоей и стране ростовстей, но и всей Державе Российстей дарова тя Господь, всеблаженне, ибо благоприятными твоими молитвами оныя ограждаеши и от нахождения иноплеменных свобождаеши. За сия убо приими от нас похвалы сицевыя: Радуйся, российстей земли Богом дарованный защитителю. Радуйся, святыя обители твоея неусыпный хранителю. Радуйся, любовь твою ко отечествию земному в житии своем явивый. Радуйся, туюжде любовь к нему и по смерти сохранивый. Радуйся, князя Димитрия Крестом Христовым благословивый. Радуйся, небоязненно тещи на освобождение царствующаго града Москвы глаголы своими того утвердивый. Радуйся, свобождению царскаго града предивный помощниче. Радуйся, светом небесным, приходящия к тебе озаряяй. Радуйся, Иринарше преподобне, пустынножителей светлое украшение.

Кондак 11

Пение непрестанное во всем житии твоем Богови приносил, еси, преподобне отче наш Иринарше. Ныне же от нас воспеваемый и по достоянию ублажаемый на земли, тамо, на небеси, купно со ангелы прославльшему тя дивно Господеви зовеши: Аллилуиа.

Икос 11

Светозарна светильника яви тя, блаженне, Христос Бог, егоже сиянием людие просвещаются, и тебе, яко спасения их виновнику, приносят таковая: Радуйся, доблий подвижниче, враги спасения победивый. Радуйся, изгнания благодушно приявый. Радуйся, изриновение из затвора твоего и биения злых человек претерпевый. Радуйся, душу твою дарованьми небесными украсивый. Радуйся, в воздаяние трудов твоих и болезней силу прозрения и чудодействия получивый. Радуйся, мучительства злых бесов человеки свобождаяй. Радуйся, даровании Божиих всем подателю. Радуйся, ко грядущему Граду Небесному верный наставниче. Радуйся, Иринарше преподобне, пустынножителей светлое украшение.

Кондак 12

Благодатию, данною ти от Бога, отче, преведи ны безбедно по бурному морю житейскому, и в тихое пристанище Небеснаго Царствия сподоби достигнути, да тамо, вкупе с Тобою, в безконечныя веки Владыце нашему поем: Аллилуиа.

Икос 12

Поем дивное твое житие, блажим великия и преславныя твоя подвиги, почитаем честную и достохвальную кончину твою, величаем небесную славу твою и от избытка сердец наших похвальная зовем ти сице: Радуйся, в чертозе небеснем лику святых сопричтенный. Радуйся, христианом скорый помощниче. Радуйся, нищету совершенную до конца сохранивый. Радуйся, тягчайшия вериги твоя, яко утварь драгую, на плещех своих носивый. Радуйся, врачеваний безмездных всемилостивый подателю. Радуйся, ленивых к подвигом возбудителю. Радуйся, исправления грешников поручителю. Радуйся, обители твоея и страны ростовския славо. Радуйся, Иринарше преподобне, пустынножителей светлое украшение.

Кондак 13

О всехвальный угодниче Христов и чудотворче предивный, преподобне и преблаженне отче наш Иринарше, с верою и любовию вопием тебе всеусердно: приими ныне малое моление сие наше, и умоли Милостиваго Бога, да избавит нас от всяких бед и напастей, и будущия свободит муки, вопиющих Ему: Аллилуиа, Аллилуиа, Аллилуиа.



(Этот кондак читается трижды, затем икос 1 и кондак 1)



Молитвы преподобному Иринарху, затворнику Ростовскому

Молитва первая

О великий угодниче Христов, добропроизвольный страдальче, новопросиявый чудесы, отче наш Иринарше. Российстей земли удобрение, граду Ростову похвало, обители сей велие украшение и утверждение! Кто не удивится твоему самопроизвольному и долголетнему страдальческому терпению: Тридесять бо лет в тесней и хладней хижине себе заключил еси, хлад, алчбу и изнурение плоти Царствия ради Небеснаго понесл еси, к сему же и изгнание из обители, по наваждению вражию, безропотно претерпел еси. Вемы же, яко посреди умолен быв от братии, яко незлобивый агнец, паки в обитель твою возвратился еси и в туюжде хижину вселился еси, яко адамант твердый, на невидимая бесовская полчища и видимыя враги твоя терпением себе вооружив. Егда же попущением Божиим наидоша на обитель сию польстии ратницы, сих не убоялся еси смертнаго прещения, но уцеломудрився словом, во своя си возвратитися сотворил еси. Сего ради Всеблагий Бог, видя твою веру и страдальческое долготерпение, дар прозорливства и исцеления тебе дарова: бесным бо исцеление, хромым доброхождение, слепым прозрение подавал еси, и иная многая с верою к тебе приходящим во благо даже доднесь чудодействуеши. Мы же недостойнии, таковая чудеса видяще и радости исполняющеся, взываем к тебе сице: радуйся, доблественный страдальче и бесов победителю, радуйся скорый наш помощниче и теплый к Богу молитвенниче. Услыши убо и нас грешных, молящихся тебе и прибегающих под кров твой: яви милостивное предстательство твое о нас ко Всевышнему и исходатайствуй твоими богоприятными молитвами вся полезная ко спасению душ и телес наших, сохрани святую обитель сию, всякий град и весь и всякую страну христианскую от всех наветов вражиих, в скорбех же и болезнех наших подавай нам руку помощи, да твоим ходатайством и заступлением, благодатию же и милосердием Христа Бога нашего, избавимся и мы недостойнии, по отшествии от жития сего, шуияго стояния, и да сподобимся деснаго со всеми святыми во веки веков. Аминь.

Молитва вторая

О преподобне отче Иринарше! Се мы молим тя усердно: буди ходатай наш присный, испроси нам, рабам Божиим (имена), от Христа Бога мир, тишину, благоденствие, здравие и спасение, и от всех врагов видимых и невидимых ограждение, покрый же нас ходатайством твоим от нахождения всяких бед и скорбей, паче же от искушений врага темнаго, да вси мы с тобою прославляем всесвятое имя Отца и Сына и Святаго Духа, ныне и присно и во веки веков. Аминь.

Молитва третья

О предивный и преславный чудотворче, преподобне и достоблаженне отче Иринарше! Величающе труды твоя и болезни и прославляюще великое твое дерзновение ко Господу, тебе, яко отца чадолюбива, молим: ходатайствы твоими испроси нам у Господа, яже на пользу душам и телесем нашим: веру праву, надежду несомненну, любовь нелицемерну, во искушеиих мужество, в злостраданиих терпение, в благочестии преспеяния, и благословение свыше на вся благая дела и начинания наша. Испроси угодниче Христов у Всемогущаго Бога: страждущую страну Российскую от лютых безбожник и власти их да свободит, и да воставит престол православных царей: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Не забуди, чудотворче святый, милостивно присещати обитель твою, вся грады и веси страны нашея, сохраняя и соблюдая молитвами твоими от всякаго зла. Помяни всех, веру к тебе имущих и имя твое на помощь призывающих, и вся во благих прошения их милостивно исполни. Ей, святче Божий, не лиши и нас грешных твоего заступления, сподобляя нас кончину жития благую улучити и Царствия Небеснаго наследники быти, да воспоем и прославим дивнаго во святых своих Бога, Отца, и Сына и Святаго Духа, в безконечеыя веки веков. Аминь.



Тропарь преподобному Иринарху, затворнику Ростовскому

Тропарь, глас 4

Яко мученика добропроизвольна и преподобных удобрение, звезду Ростовскую, в затворе, узах и веригах Господеви благоугодившаго и чудес благодать от Него приемшаго, Иринарха предивнаго песньми хвалебными почтим и, к нему припадающе, умильно глаголем: отче преподобне, моли Христа Бога спастися душам нашим.[/spoiler]

[Раб божий Константин]

Акафист святой великомученице Ирине

Празднование 5/18 мая.
[spoiler]Тропарь, глас 4

Агница Твоя, Иисусе, Ирина, зовет велиим гласом: Тебе, Женише мой, люблю, и Тебе ищущи, страдальчествую и сраспинаюся и спогребаюся Крещению Твоему и стражду Тебе ради, яко да царствую в Тебе и умираю за Тя, да и живу с Тобою; но яко жертву непорочную приими мя, с любовию пожершуюся Тебе. Тоя молитвами, яко Милостив, спаси души наша.

 

Кондак 1

Избранной Богом от идолослужительнаго рода на просвещение языков, богомудрей и преславней невесте Христовой Ирине, благодарственное и хвалебное пение воспоем ти молитвенницы твои, святая и многострадальная великомученице Ирино. Ты же, имущи дерзновение ко Господу, от всяких нас бед и скорбей свободи, да зовем ти: Радуйся, Ирино, невеста Христова преславная.

 

Икос 1

Ангельскую честную и вселюбезную чистоту, святая мученице Ирино, непорочно сохранила еси, со Ангелы купно сподобилася еси Богу трисвятую песнь воспевати на небеси, услыши нас, тебе верно поющих на земли: 

Радуйся, отроковице, Богом Отцем предуставленная быти сообразна в страдании образу Сына Его; 

радуйся, Сыном Божиим из тьмы в благодатный свет призванная. 

Радуйся, яко приимше Духа Святаго в отрочестве идолослужение отринула еси; 

радуйся, земнаго обручника паче Небеснаго знати не восхотела еси. 

Радуйся, убелившая ризы твоя в крови Агнчей на земли; 

радуйся, в Небеснем Чертозе со Христом царствуеши на Небеси; 

Радуйся, Ирино, невесто Христова преславная.

 

Кондак 2

Видяще, святая мученице Ирино себе на величественнем столпе от Отца поставлену, помышляше себе, о промысле Божием разумевая, о творчестем создании небеси и земли и бездушных идолех, умне восходяще от тьмы ко свету, от идолослужения к истинному Богу, Емуже вернии воспевают: Аллилуиа.

 

Икос 2

Божией Премудрости вместилище ты была еси, непорочная отроковице, измлада от любви к миру и вся, яже в мире, отвергшаяся. Всею душею Твоею Христа Жениха возлюбила еси, Емуже равноапостольно послужила еси, среди неверных проповедуя им Истиннаго Бога. Сего ради таковому твоему разуму дивяся, глаголем: 

Радуйся, премудрая Евангельская Дево, правой веры и дел благих исполненная; 

радуйся, паче мудрецов мира сего разумнейшая. 

Радуйся, о проповедании веры богоглаголивыя уста апостольския; 

радуйся, христианских дев украшение. 

Радуйся, оружием Креста Христова демоны отгоняющая; 

радуйся, верная ко Господу о нашем спасении молитвеннице. 

Радуйся, Ирино, невесто Христова преславная.

 

Кондак 3

Сила Божия дадеся тебе, святая великомученице Ирино, во святем Крещении, егда пресвитер Тимофей, просветив тя, даде тебе послание святых апостолов, сим призывая тя на великое апостольское служение. Ты же, исполнившись Духа премудрости, пред лицем царя, отца твоего Ликиния, все златые идолы безбоязненно сокрушила еси и яко раба Господня едину православную веру в Бога Отца и Сына и Святаго Духа исповедала еси, зовуще Ему: Аллилуия.

 

Икос 3

Имущи, святая Ирино, свыше данную тебе премудрость и силу, егда многажды понукаема от Ликиния, отца твоего, поклонитися идолом, именуя тя Пенелопою, но ты рекла ему: «Не извращай моего имене, Ирина аз есмь, нареченная Ангелом в видении, и тако наименовася во святем Крещении. Не поклонюся бесам, имже вы поклоняетесь, аз Единому Богу, Создателю моему, поклоняюся и яко Жениха моего люблю». За такое убо дерзновение приими от нас похвалу сию: 

Радуйся, столпе веры, утверждение Христианскаго жития; 

радуйся, детище, Богом просвещенное во святем Крещении. 

Радуйся, орлице Царя Небеснаго, Богом дарованная на просвещение языков; 

радуйся, в стране царствования Отца Твоего идольскаго служения искоренительнице. 

Радуйся, яко подвиг твой многострадальный предвозвестили голубь, кокош и вран, принесши ти маслину, венец и змия; 

радуйся, яко предрек тебе Апелиан учитель: маслина – твое добронравие, венец – венец славы, а змий – враг, гласит страдания.

Радуйся, Ирино, невесто Христова преславная.

 

Кондак 4

Бури тяжких искушений воздвигл на тя враг души спасения, егда отец казнить приказал тя, поврещи свирепым коням на глумление и удов раздробление. Но егда ты помолишася, свирепейший конь, отрешившись, оторваша Ликинию руку и топташа его. Тебя же человеческим гласом славною мученицею нарекл есть. Ты же была невредима, воскресила отца своего во имя Христа Сына Божия. Он же со множеством народа уверовавше, восхвалил Бога: Аллилуия.

 

Икос 4

Слыша от тебе злочестивый царь Седекия словеса разумна о вере Христовой, распылашася на тя злобою; паче же егда рекла ему: «Не сяду с сонмом суетным и с законопреступниками не вниду, готова аз на всякия пытки и не пощажу плоти моея за Христа, Господа моего». И вверже тя в глубину рва, идеже гады ядовиты. И тамо пребыша десять дний невредимо со Ангелом, хранящим тя. Видящи вси сия тобою чудодеемая, взываше: 

Радуйся, младая страстотерпица, за мужественное исповедание веры много пострадавшая; 

радуйся, агнице кроткая, идольския суетныя лести обличительнице. 

Радуйся, яко тобою посрамися лукавый враг, видя себе побежденным; 

радуйся, о тебе бо радуются вся небесныя силы, видя побеждающу лютых мучителей. 

Радуйся, твоими подвигами многи богохульники правители к Богу приведшая; 

радуйся, многострадальная дщи немилостиваго царя Ликиния. 

Радуйся, Ирино, невесто Христова преславная.

 

Кондак 5

Богосветлой звезде подобна была еси, великомученице Ирино, множество племен и языков ко спасению приведшая. Три идолоязыческия страны со епархами и клевретами просветила еси. Тяжкие страдания от мучителей Седекия и Саваха претерпела еси, трижды железною пилою перепиливаема и на мельничном колесе раздробляема. О великомученице! Твоих страданий небесная стихия, гром и молния, не стерпеша и нечестивыя поразиша. Люди же увероваше, со трепетом Бога прославляя и поя Ему: Аллилуия.

 

Икос 5

Видевше царь Савах, яко сила Божия, в тебе чудодействуемая, поборяет и посрамляет его безумныя веления, ополчив сто тысящ воинов на Магеддон, град, идеже ты молилася Господу о поражении слепотою грядущих и по ослеплении их паки умолила Всевышняго даровати им зрение. Сия радости мы исполненны, глаголем тебе сице: 

Радуйся, святая Ирино, тобою бо свет Христов возсия в странах языческих; 

радуйся, богопротивных царей и воинов дивное вразумление. 

Радуйся, града Магеддона преславное защищение; 

радуйся, веры православныя исповедание и света Евангельскаго сияние. 

Радуйся, закона Божия верная хранительнице;

радуйся, многострадальная Богоневесто, от лютаго Седекия многажды палимая.

Радуйся, Ирино, невесто Христова преславная.

 

Кондак 6

Проповедником Богоносным апостолом поревновала еси, пред мучителеми безбоязненно Христа Бога проповедала еси, Егоже ради тяжкия раны, узы и темницу претерпела еси; во огни на костре в медных пещех палима была еси, но сохранил тя Ангел Господень во славу Божию, и мы взываем Богу Всемогущему: Аллилуиа.

 

Икос 6

Возсиял есть в сердцы твоем свет богоразумия, свет Господа Иисуса Христа. Той, яко Жених твой возлюбленный, укрепляше тя страдающу сопричастницу Его страданий, егда вонзили тебе в пяты острые гвозди и обуздавши яко осля, пять поприщ насильно ведоша тя, ты же в страшнем страдании своем моляся Богу, тысящи народа просветила, беззаконных же мучителей развершаяся земля поглотила есть, мы же вопием ти: 

Радуйся, Ирино, рабе Господня и молитвеннице наша; 

радуйся, голубице кроткая, язвы ради Господа носившая. 

Радуйся, от гвоздичных, кровию истекающих ран, Ангелом исцеленная; 

радуйся, яко тебе Господь даровал силу и мудрость побеждати противостоящих истине. 

Радуйся, яко тобою от многих ран и болезней кающиися исцеляются; 

радуйся, яко твоею молитвою бесы прогоняются и прокаженнии очищаются. 

Радуйся, Ирино, невесто Христова преславная.

 

Кондак 7

Восхотев безумный мучитель тя, святая Ирино, ко идолослужению преклонити, увещевая тя пожрети идолом жертву, ты же, Крестом оградившись, воскликнула: «Аз приношу жертву Богу Всевышнему, Иже обладает жизнию и смертию всех людий. Вразумись же царю, прельщенный сатаною!» Освирепевший мучитель, скрежеща зубами, приказал в медных пещех трикраты палити тя, но Ангел Господень, пламень остудив, сохранил тя невредно на славу славящим Бога песнью: Аллилуия.

 

Икос 7

Новую показа ярость безчеловечия злобный Вавадон, егда тебя, святая мученице Ирино, повелев, железными цепями привязану к раскаленней решотце, поливать на тя масло и смолу. Ты же, Божия страдалице, бе в пламени горяща, со Ангелом отрешившим от решотцы и охлаждающим тя, Бога славила. Изумившись мучитель таковому чуду, пал к стопам твоим, прося прощения и святых молитв за всю страну, обратившуюся ко Господу. Мы же с любовию взываем к тебе: 

Радуйся, многострадальная мученице, за Христову Церковь много претерпевшая; 

радуйся, святая девице, Христа ради в пещех и на кострех палимая. 

Радуйся, за спасение людей на раскаленней решотце жегомая; 

радуйся, великая страстотерпице, Христа ради тяжко мучимая. 

Радуйся, яко твоими страданиями мног народ к признанию Бога истиннаго привела еси; 

радуйся, врагов Церкви победительнице и в бедах наших скорая помощнице. 

Радуйся, Ирино, невесто Христова преславная.

 

Кондак 8

Странные и страшные страдания святой мученицы видевше, вернии удивишася, како младая отроковица, суще в юном телеси, мужественно за Христа муки претерпевает, да и мы исполнишеся умиления, благодарно возопиим Богу: Аллилуиа.

 

Икос 8

Весь сладчайший Иисус сладость тебе бысть, мученице Ирино, ты же горькия муки и тяжкие истязания за Христа и спасение людий от седми мучителий претерпела еси, и яко агница от нечестиваго Савария мечем усечена и погребена была еси, и после же из мертвых возстала с райскою ветвию в руках, и в Месемврии к царю явилася на вразумление и посрамление богохульников. Со страхом к твоим ногам пал царь-убийца, взывая: «Велик Бог Христианский!» Просвети и нас, святая Ирино, да зовем ти: 

Радуйся, святая равноапостольная Ирино, просветительница стран языческих; 

радуйся, реко исполненная благодати Божией. 

Радуйся, боговозлюбленная ластовице, из небожителей возванная на спасение богохульных и отверженных; 

радуйся, преславная мученице, многия богопротивныя просветившая. 

Радуйся, яко силою Божиею демонстии коварства упразднила еси; 

радуйся, блаженная страстотерпице, райскую ветвь от Христа приимшая. 

Радуйся, Ирино, невесто Христова преславная.

 

Кондак 9

Вся небесныя силы возрадовася, восхваляя Бога, даровавшаго тебе таковое мужество и непоколебимую твердость побеждати во брани душепагубных аспидов. Ты бо, укрепляемая силою Божиею, в тысящах языки просвещая, радовалася воспевая Богу: Аллилуиа.

 

Икос 9

Ветии многовещаннии риторскими своими языки не возмогут изрещи твоих болезненных страданий и мученических подвигов, яже за Христа претерпела еси. Кто может исчести твоя безчисленная страдания, кия содрогают нас, поющих тебе: 

Радуйся, чудодейственное зрелище Ангелом и человеком; 

радуйся, яко твоим терпением мучителей удивила еси. 

Радуйся, кровь свою за Христа Жениха твоего источила еси; 

радуйся, учеников похвало и верных радование. 

Радуйся, лозо плодовитая сада Иисусова; 

радуйся, доброплодная ветвь винограда Христова. 

Радуйся, Ирино, невесто Христова преславная.

 

Кондак 10

Спасти восхотевши души, во тьме идолослужения погибающия, боголюбивая мученице Ирино, ты, ревнуя о Господе. якоже Илиа, силою Божиею идолы сокрушала, бесы прогоняла, мучителей обличала и посрамляла. Богу же победную песнь непрестанно воспевала: Аллилуиа.

 

Икос 10

Стена крепка и непоколебима во исповедании православныя веры пребыла еси; не пощадила ты сладкоцветущей юности твоея, презрела еси вся царская достояния отца своего. Возжелала чрез мученическую смерть уневеститися Христу и с ним быти в Ангельстем ликостоянии. Мы же, поминающе твоя подвиги и страдания, ублажаем тя сице: 

Радуйся, течение мученическаго пути добре скончавшая; 

радуйся, житием твоим равноапостольстим Господу послужившая. 

Радуйся, силою свыше на брань с сопротивными препоясанная; 

радуйся, верным христианом крепкое заступление. 

Радуйся, безпомощным заступнице, сирот покровительнице; 

радуйся, мучеников радование, девственников славо. 

Радуйся, Ирино, невесто Христова преславная.

 

Кондак 11

Пение наше хвалебное по достоянию воспевати недоумевает ум наш, святая мученице Ирино, ты бо подражала еси распятому Агнцу – Христу. Положила еси душу свою за други своя, ибо больше сия любве никтоже имать. Обаче мы, вси благодарни суще, поем Богу: Аллилуиа.

 

Икос 11

Светозарный светильник истиннаго света сущим на земли ты являешися, богоизбранная отроковице, просвещаеши сердца верных, исцеляеши недужных и прокаженных, притекающих к тебе с любовию, разслабленным и слепорожденным здравие подаеши, благодарящим тя тако: 

Радуйся, о спасении грешных сильная ходатаице; 

радуйся, обидимых заступнице, злочестивых поборающая. 

Радуйся, сосуде благ небесных; 

радуйся, златая кадильнице, фимиам молитвы о нас Богу приносящая. 

Радуйся, сокровище даров Божиих неиждиваемое; 

радуйся, яко тебе Господь Царство свое даровал есть. 

Радуйся, Ирино, невесто Христова преславная.

 

Кондак 12

Благодать тебе дана, яко апостолом, слово Божие грешному миру вещати, омраченныя от идолослужения отвращати и всем в подвизех земных помогати. О достославная раба Господня, много потрудившаяся за род христианский, молися за нас ко Всемилостивому Богу, Спасителю нашему, да сподобит и нас в сем и в будущем веце Бога в Троице прославляти: Аллилуиа.

 

Икос 12

Воспеваем твоя славная подвиги, почитаем страдания твоя, хвалим долготерпение, ублажаем святую твою кончину, славим твое в немощнем теле непобедимое мужество, имже попрала еси вся мудрования мира сего. В память твоих подвигов и страданий приими от нас хвалебное пение сие: 

Радуйся, от девственных ликов в чертог небесный введенная; 

радуйся, от мученических полков под венец славы во гласе радования провождаемая. 

Радуйся, от небожителей досточудное о Господе приемшая целование; 

радуйся, яко награда твоя радость вечная во светлости святых. 

Радуйся, яко тобою от нечаянныя смерти уповаем сохранитися; 

радуйся, твоим заступлением Царствия Божия чаем сподобитися. 

Радуйся, Ирино, невесто Христова преславная.

 

Кондак 13

О преславная и всехвальная святая великомученице Ирино! Приими от нас сие малое хвалебное пение и не престани молитися о нас ко Господу Богу, да избавит нас от враг видимых и невидимых и твоим заступлением сподобит нас вечнаго Царствия, идеже вкупе с тобою и всеми святыми чаем воспевати Богу: Аллилуиа.

Трижды.

 

Икос 1

Ангельскую честную и вселюбезную чистоту, святая мученице Ирино, непорочно сохранила еси, со Ангелы купно сподобилася еси Богу трисвятую песнь воспевати на небеси, услыши нас, тебе верно поющих на земли: 

Радуйся, отроковице, Богом Отцем предуставленная быти сообразна в страдании образу Сына Его; 

радуйся, Сыном Божиим из тьмы в благодатный свет призванная. 

Радуйся, яко приимше Духа Святаго в отрочестве идолослужение отринула еси; 

радуйся, земнаго обручника паче Небеснаго знати не восхотела еси. 

Радуйся, убелившая ризы твоя в крови Агнчей на земли; 

радуйся, в Небеснем Чертозе со Христом царствуеши на Небеси; 

Радуйся, Ирино, невесто Христова преславная.

 

Кондак 1

Избранной Богом от идолослужительнаго рода на просвещение языков, богомудрей и преславней невесте Христовой Ирине, благодарственное и хвалебное пение воспоем ти молитвенницы твои, святая и многострадальная великомученице Ирино. Ты же, имущи дерзновение ко Господу, от всяких нас бед и скорбей свободи, да зовем ти: Радуйся, Ирино, невеста Христова преславная.

 

Молитва

О многострадальная и преславная Ирино, невесто Христова всехвальная, угоднице Божия! Ты предстоиши у Престола Пресвятыя Троицы и наслаждаешися неизреченнаго блаженства. Призри убо милостивно на нас, приносящих ти хвалебное пение сие, испроси нам милость, отпущение грехов у Преблагаго Господа, вемы бо, воистинну вемы, яко вся, елико восхощеши, испросити у Него можеши. Темже убо смиренно припадаем к тебе и просим: умилостиви Владыку неба и земли, да подаст нам дух твоея ревности ко хранению святых Его заповедей, яко да возможем земное поприще в добродетельном житии проводити, райских селений унаследовати и тамо с тобою и всеми святыми прославляти Отца и Сына и Святаго Духа во веки веков. Аминь.

 

 

Святая великомученица Ирина жила в I веке и до крещения носила имя Пенелопа. Она была дочерью язычника Ликиния, правителя области Мигдония (Македония). Ликиний построил для дочери отдельный роскошный дворец, где она жила со своей воспитательницей Карией, окруженнная сверстницами и слугами. Ежедневно к Пенелопе приходил наставник по имени Апелиан, который обучал ее наукам. Апелиан был христианином; во время учения он говорил девице о Христе Спасителе и наставил ее христианскому учению и христианским добродетелям. Когда Пенелопа подросла, родители стали думать о ее замужестве. В этот период жизни Господь вразумил ее чудесным образом: к ней в окно прилетали одна за другой три птицы – голубь с масличной веткой, орел с венком и ворон со змеей. Учитель Пенелопы Апелиан объяснил ей значение этого знамения: голубь, означавший добродетели девицы – смирение, кротость и целомудрие, принес масличную ветвь – благодать Божию, получаемую в Крещении; орел – знамение высоты духа, достигаемой через богомыслие, - принес венок за победу над невидимым врагом как награду от Господа; ворон же принес змею в знак того, что диавол ополчится на нее и будет доставлять печали, скорби и гонения. В конце беседы Апелиан сказал, что Господь желает обручить ее Себе и что Пенелопа претерпит многие страдания за своего Небеснаго Жениха. После этого Пенелопа отказалась от замужества, приняла Крещение от руки апостола Тимофея, ученика святого апостола Павла, и была наречена Ириной. Она стала убеждать и своих родителей принять христианскую веру. Мать радовалась обращению дочери ко Христу; отец вначале не препятствовал дочери, но затем стал требовать от нее поклонения языческим божествам. Когда же святая Ирина твердо и решительно отказалась, разгневанный Ликиний велел связать свою дочь и бросить под копыта свирепых коней. Но кони остались неподвижными, лишь один из них оторвался от привязи, бросился на Ликиния, ухватил зубами его за правую руку, вырвал ее из плеча, а самого Ликиния сбил и начал топтать. Тогда святую деву развязали, и по ее молитве Ликиний в присутствии очевидцев встал невредимый, со здоровой рукой. Видя такое чудо, Ликиний с женой и множеством народа, числом около 3000 человек, уверовал во Христа и отрекся от языческих богов. Оставив управление областью, Ликиний поселился во дворце своей дочери, намереваясь посвятить себя служению Господу Иисусу Христу. Святая же Ирина начала проповедовать учение Христово среди язычников и обращала их на путь спасения. Она жила в доме своего учителя Апелиана. Узнав об этом,  Седекия, новый правитель области, призвал Апелиана и спросил об образе жизни Ирины. Апелиан ответил, что Ирина, как и другие христиане, живет в строгом воздержании, в непрестанной молитве и чтении Божественных книг. Седекия призвал к себе святую и начал убеждать ее прекратить проповедь о Христе и принести жертву богам. Святая Ирина бестрепетно исповедала свою веру перед правителем, не устрашившись его угроз и готовясь достойно претерпеть страдания за Христа. По приказанию Седекии она была брошена в ров, наполненный змеями и гадами. Десять дней пробыла во рву святая и осталась невредима, ибо Ангел Господень сохранил ее и приносил ей пищу. Седекия приписал это чудо волшебству и предал святую страшным пыткам: приказал перепилить ее железной пилой. Но пилы ломались одна за другой и не причиняли вреда телу святой девы. Наконец четвертая пила обагрила тело мученицы кровью. Седекия со смехом сказал мученице: «Где же Бог твой? Если у Него есть сила, пусть Он тебе поможет». Внезапно поднялся вихрь, блеснула ослепительная молния, поразившая многих мучителей, раздался гром и полился сильный дождь. Видя такое знамение с неба, многие уверовали во Христа Спасителя. Седекия не вразумился явным проявлением силы Божией и предал святую новым пыткам, но Господь сохранил ее невредимой. Наконец народ возмутился, глядя на страдания невинной девы, восстал против Седекии и изгнал его. Сменившие Седекию правители также подвергали святую Ирину разным жестоким мукам, во время которых силой Божией она продолжала оставаться невредимой, а народ под влиянием ее проповеди и совершавшихся чудес все в большем числе обращался ко Христу, оставляя поклонение идолам. Всего святой Ириной было обращено свыше 10 000 язычников. Из своего родного города Мигдонии святая перешла в город Каллиполь и там продолжала проповедовать о Христе. Правитель города по имени Вавадон подверг мученицу новым казням, но, увидев, что святая остается невредимой, вразумился и уверовал во Христа. Вместе с ним уверовало большое число язычников, которые все приняли святое Крещение от апостола Тимофея. После этого святая Ирина посетила и другие города – Константину, Месемврию с проповедью о Христе, творя чудеса, исцеляя больных и претерпевая страдания за Христа. В городе Ефесе Господь открыл ей, что приблизилось время ее кончины. Тогда святая Ирина в сопровождении своего учителя старца Апелиана и других христиан удалилась за город к горной пещере и, осенив себя крестным знамением, вошла в нее, указав своим спутникам закрыть вход в пещеру большим камнем, что и было исполнено. Когда на четвертый день после этого христиане посетили пещеру, то тела святой в ней не обрели. Так преставилась святая великомученица Ирина.[/spoiler]

[Раб божий Константин]

Акафист свщмч. Исидору Юрьевскому.
[spoiler]Кондак 1
Приидите вернии, восхвалим в песнех священномученика Исидора / и с ним семьдесят два мученика, / иже пострадаша во граде нашем за Церковь святую Православную, / во еже утвердити нас в вере святей истинней, / во еже последовати нам учению отцев наших, / и еже жити нам по заповедем Господним / и тако скончавши житие сие достигнути райская селения с песнию: Радуйся, Исидоре, православныя веры твердый хранителю.

Икос 1
Во Юрьеве, граде Ливонстем, егоже основа князь Ярославль Богомудрый, издревле быша два храма: Святителя и чудотворца Николая и святаго великомученика Георгия, в храмех тех священнодействоваху иереи благоговейнии Исидор и Иоанн, иже беша ревнители веры православныя. На сие благонравное житие их с любовию взирающе и крепцей вере их подражати желающе, мы грешнии радостно взываем:
Радуйся, Исидоре, добрый наш пастырю.
Радуйся, истинныя веры учителю.
Радуйся, образе жития христианскаго.
Радуйся, тихий и кроткий наставниче.
Радуйся, чад наших премудрый блюстителю.
Радуйся, юным путь жизни указующий.
Радуйся, жен и мужей изрядный водителю.
Радуйся, старцев опора и радосте.
Радуйся, Исидоре, Православныя веры твердый хранителю.

Кондак 2
Во дни тыя врази православныя к вере латинстей всех принуждаху и православных людей угнетати начаша. Паства же святаго Исидора твердо стояше в вере отцев и Богу всегда воспеваше: Аллилуиа.

Икос 2
Пастырь святой Иоанн гонения за веру терпя, оставив пределы Юрьева града, в Псковстей земле прияв иноческий чин, основа Печерскую славную монахов обитель, иерей же Исидор во граде пребываше и с паствой усердно моляшеся, сего ради вси тако взываху ему:
Радуйся, малаго стада пастырю твердый.
Радуйся, вождю наш прекрепкий.
Радуйся, веры святыя хранителю добрый.
Радуйся, двере овцам.
Радуйся, овцы глашавый по имени.
Радуйся, яко паства глас твой послуша.
Радуйся, таин Божиих дивный строителю.
Радуйся, пастырю душу свою положивый за агнцы духовныя.
Радуйся, Исидоре, Православныя веры твердый хранителю.

Кондак 3
Враг рода человеческа и человекоубийца искони диавол, не могущий взирати на славное житие Исидора пресвитера Божия, и на твердое Православия укрепление, внуши старейшинам града погубити его и не дати верным едиными усты взывати ко Господу: Аллилуиа.

Икос 3
Имея в сердце своем твердую веру, приспевашу празднику Богоявления Господня, священник Исидор и православнии христиане изыдоша на реку Омовжу со святыми иконы на освящение воды. Тогда посланнии от Бискупа и старейшин града емше иерея Исидора и с ним бывшия мужи и жены и приведоша ко властем града, дабы от Православныя веры сих отвратити, мы же, ублажая душевную крепость святых мучеников, тако взываем:
Радуйся, Исидоре, веры Православныя ревнителю.
Радуйся, обычаев святоотеческих исполнителю.
Радуйся, на реку Омовжу, аки на Иордан, последовавый.
Радуйся, воды реки на освящение паствы своей благословивый.
Радуйся, гласу Господню на водах вопиющу внимавый.
Радуйся, духа премудрости, духа разума и духа страха Божия на реце взыскавый.
Радуйся, освятити воды и верующих у Господа просивый.
Радуйся, путь Господень уготовати люди призывавый.
Радуйся, Исидоре, Православныя веры твердый хранителю.

Кондак 4
Веден был еси руками нечестивых, священномучениче Исидоре, со семьдесятью мученики к судиям града, и в темницу заключен быв радостно воззва Богу песнь: Аллилуиа.

Икос 4
Суди неправеднии многими словесы своими увещеваху исповедники Латинскую веру прияши, иерей же Исидор, и иже с ним велие дерзновение показаша, славяху святую веру Православную и обличаша Латинская лжемудрования и отступства, мы же дивяся мужеству страстотерпцев вопием сице:
Радуйся, Исидоре, в темницу Христа ради вверженный.
Радуйся, чад своих веру Православную держати до конца увещававый.
Радуйся, учителю истиннаго Богопознания.
Радуйся, обличителю злочестиваго неверия.
Радуйся, имже Латинстии обычаи изгоняются.
Радуйся, имже семена правды Христовой посеяваются.
Радуйся, пастырь, не себе угождаяй.
Радуйся, стадо Христово от волков хищных верно ограждаяй.
Радуйся, Исидоре, Православныя веры твердый хранителю.

Кондак 5
Боготечная звезда явился еси, священномучениче Исидоре, стране Прибалтийстей: мученическим подвигом веру Православную запечатлев, призывая всех к вере истинней, верно воспевати Богу: Аллилуиа.

Икос 5
Видевше беззаконии, яко невозможно есть обратити святыя мученики от истинныя веры, изведше их из темницы и поставивше в судище на испытание, увещаваша их прияти веру Латинскую. Мы же твердому Православия исповеднику вопием тако:
Радуйся, Исидоре, о исхождении Святаго Духа токмо от Отца исповедавый.
Радуйся, служение Божественныя Литургии на опресноках обличивый.
Радуйся, учение Евангельское пред неверными утвердивый.
Радуйся, истинное предание церковное исполнивый.
Радуйся, правил седми вселенских соборов блюстителю.
Радуйся, чистое учение веры пред судиями исповедавый.
Радуйся, лжемудрования их низложивый.
Радуйся, верою своею правило веры нам показавый.
Радуйся, Исидоре, Православныя веры твердый хранителю.

Кондак 6
Славяще страдания святых мученик, молимся Христу Богу согрешений оставление даровати нам, празднующим с любовию святую память их и вопиющих Богу: Аллилуиа.

Икос 6
Видяще крепкое святых в Православней вере, судии градскии распалишася гневом и повелеша затворити их в темнице. Священник же Божий Исидор много поучаше дружину свою и увещеваше ю пострадати за веру, и мы недостойнии сим поучениям вместе соузники внимающе, со умилением глаголем сицевая:
Радуйся, Исидоре, добрый рабе Христов.
Радуйся, исполнивый жизнию слово Божие.
Радуйся, апостолов подражателю.
Радуйся, подвига мучеников ревнителю.
Радуйся, вождю добрый и сильный словом и делом.
Радуйся, лживая мудрования и вражию лесть отвергший.
Радуйся, яко теплотою веры твоея наша хладная сердца возгреваеши.
Радуйся, яко малодушныя мужеству научаеши.
Радуйся, Исидоре, Православныя веры твердый хранителю.

Кондак 7
Хотя привести вся люди ко Христу, молился еси, Исидоре, да открыет Он сердца их ко приятию света истины, люди же поучал еси хранити веру Православную, яко залог всех благ временных и вечных. Темже молитеся, святии мученицы, и нам до конца жития своего соблюсти веру Православную, да вопием купно с вами вси чистою душею: Аллилуиа.

Икос 7
В темнице суще воспеваху святии стратотерпцы песнь сию: «святии мученицы, иже добре страдальчествовавшии и венчавшиеся, молитеся ко Господу помиловатися душам нашим». Господи, укрепи рабов Своих шествовати путем сих исповедников веры и благослови нас сице прославляти их:
Радуйся, Исидоре, до конца жития своего веру истинную сохранивый.
Радуйся, чад своих духовных в ней утвердивый.
Радуйся, правую веру посреди судища небоязненно проповедавый.
Радуйся, вражию гордыню до конца низложивый.
Радуйся, венец правды от Господа восприявый.
Радуйся, венцем мученическим от Господа увенчанный.
Радуйся, упование на Единаго Бога возложивый.
Радуйся, Бога на дело Божие паче всего возлюбивый.
Радуйся, Исидоре, Православныя веры твердый хранителю.

Кондак 8
Странно и радостно сие бысть, яко сонм мучеников со пресвитером Исидором едиными усты и единым сердцем исповеда веру православную, в темнице поя Богу: Аллилуиа.

Икос 8
В темнице обратившись к востоку, начаша святии мученицы со слезами священная песнопения Господу воспевати. Иерей же Исидор с великим благоговением причастися святых и животворящих Таин, и причасти и сущих с ним и тако укрепишася вси на предлежащий им подвиг. Укрепите в вере истинней и нас, святии мученицы, вас восхваляющих:
Радуйся, Исидоре, до конца Иисуса Сына Божия возлюбивый.
Радуйся, за имя Его с любовию душу свою положивый.
Радуйся, Христовым страстем подражателю.
Радуйся, временную сию жизнь ни во что же вменивый.
Радуйся, бренное тело свое за Христа отдавый.
Радуйся, к лику святых мученик сопричтенный.
Радуйся, временныя скорби мужественно претерпевый.
Радуйся, вечное блаженство от Христа приявый.
Радуйся, Исидоре, Православныя веры твердый хранителю.

Кондак 9
Всем верным был священномучениче еси, образ словом, житием, любовию, духом, верою, чистотою и добре памятуют тя православнии людие и с тобою воспевают Спасителю Богу: Аллилуиа.

Икос 9
Витии церковнии сплетающе венцы мучеником за веру Христову восхваляют тя, отче Исидоре, воспоминающе, како нечестивии, разжегшиися яростию, изведоша тя из темницы с прочими узники и ввергоша тя во всех священных одеждах во глубину реки Омовжи, с тобою же и семьдесят и два верных чад твоих и тако вси предаша дух свой Господу. На сей мученический конец твой взирающе, припадаем к иконе твоей и со умилением вопием:
Радуйся, Исидоре, яко возрадовавшася душа твоя о Господе, облекшаго тя в ризу спасения.
Радуйся, во одежду веселия одеянный.
Радуйся, в тебе бо десница Господня прославися в крепости.
Радуйся, Крест Господень на рамо восприявый и за Господом последовавый.
Радуйся, благодать Божию, яко миро на главу приявый.
Радуйся, от Господа силою препоясанный и на высоких поставленный.
Радуйся, священниче Божий, облекшийся в правду.
Радуйся, преподобне, радостию Господней возрадовавшийся.
Радуйся, Исидоре, Православныя веры твердый хранителю.

Кондак 10
Спасти хотя душу свою, до смерти подвизался еси подвигом добрым, течение жития мученически скончал еси, веру соблюл еси, темже и уготовася ти венец правды от Христа Бога нашего, Ему же вси поем: Аллилуиа.

Икос 10
Бысть со святыми мученики и жена некая, имевше на руце своей младенца, триех лет суща, егоже отторгнуша судии от руки матере, дитя же, видя матерь свою потопленну. Сотворив трикраты крестное знамение, ввержеся в воду и тако прият мученическую кончину. Людие же, окрест стоящии, взываху радостно:
Радуйся, Исидоре, чад своих духовных ко Христу приведый.
Радуйся, люди веровати в Бога даже до смерти научивый.
Радуйся, не убоявыйся тело убивающаго.
Радуйся, душу предавый в руце Господни.
Радуйся, яко ныне во обителех райских услаждаешися.
Радуйся, и по смерти пред Господем живый.
Радуйся, и ныне молитвы наша приемляй.
Радуйся, теплый предстателю наш пред Господом Богом.
Радуйся, Исидоре, Православныя веры твердый хранителю.

Кондак 11
Пение умиленное приносим ти, заступниче наш, просяще твоея помощи и ходатайства пред Богом: укрепи нас в вере православней, якоже укреплял еси некогда чада своя духовная, да вси с тобою воспоим песнь: Аллилуиа.

Икос 11
Светильницы богосветлии явишася людем святии мученицы, егда пришедшей весне и воде разлившейся, обретоша телеса ваша вверху реки Омовжи, яко три поприща от града, на брезе лежащая, вси во единем месте и ничимже поврежденная. Оставшиися тогда православнии, вземше мощи их, погребоша на месте том, иных же, принесше во град Юрьев, положиша в землю, песни надгробныя воспевающе:
Радуйся, Исидоре, блаженне, непорочне, в законе Господни ходивый.
Радуйся, яко жива есть душа твоя и восхваляет Господа дивнаго во святых своих.
Радуйся, яко уготовася тебе место упокоения.
Радуйся, яко душа твоя во благих водворися.
Радуйся, яко во блаженном успении вечный покой обрел еси.
Радуйся, яко память твоя в род и род.
Радуйся, яко со святыми ныне упокоился еси.
Радуйся, яко свету невечернему преставился еси.
Радуйся, Исидоре, Православныя веры твердый хранителю.

Кондак 12
Благодать Пресвятаго Духа испроси нам, преблагий пастырю наш, от Всещедраго Бога и Спаса нашего, да не безплодна будет в нас проповеданная тобою святая вера, но да уклоняющеся от путей нечестия и заблуждений, ходим во свете заповедей Божиих, воспевающе всегда в сердцах: Аллилуиа.

Икос 12
Поюще праведное житие твое, Исидоре блаженне, славяще кончину твоя рождения бысть в жизнь вечную, к ней же и нас привлецы зовущих:
Радуйся, Исидоре, церкви Христовы похвало и украшение.
Радуйся, православия проповедниче громогласный.
Радуйся, почитаемый на земли.
Радуйся, увенчанный на небеси.
Радуйся, молитвенниче наш усердный.
Радуйся, помощниче наш скорый.
Радуйся, земли прибалтийския защитниче верный.
Радуйся, града Юрьева ограждение и покрове.
Радуйся, Исидоре, Православныя веры твердый хранителю.

Кондак 13
О, преславный священномучениче Исидоре, приими сие моление наше, в похвалу тебе возносимое, и моли Христа Бога о всех нас, да утвердит Господь жизнь нашу в любви к Богу и ближним, да подаст нам покаяние нелицемерное и да обрящем вси милосердие его в день судный, в радости поюще песнь: Аллилуиа. (трижды)

(И чтется: Икос 1 и Кондак 1)

МОЛИТВА
О, всечестный отче Исидоре, земли Российския светильниче, Церкви Православныя многоценное украшение, воззри с небеси очами пресветлыми во глубину сердец наших и озари наши темныя души лучем огненным веры твоея и пробуди к покаянию нашу совесть нечистую. Ты некогда брошен бысть в пучину водную и во одеждах священства потоплен в ней, ныне протяни руку помощи нам, во одежде страстей в пучине грехов утопающим, и помози нам во Христа крестившимся во Христа облекшися, яви нам недостойным силу душевную и твою крепость сердечную, дабы мы возмогли на ню, яко на трость оперетися и от падений греховных нашу немощь великую сею тростию отгнати. Ты привел еси с собою за Веру Православную сонм мученик святых, научи и нас ко Христу люди привлекати, а не соблазняти их скверною нашею. И якоже быстрины речныя изнесоша на сушу телеса ваша, идеже яко святыя мощи обретшася, тако молитеся и о нас, мученицы святии, да изнесет Господь наши души и телеса из пучины греха на сушу праведности и да обрящет нас тамо в покаянии и вере скончавшихся.
Глаголет бо Соломон премудрый, в день памяти вашея чтенный: «Аще людие пред лицем человеческим муку приимут, упование их безсмертия исполнено».
Укрепи и в нас, Исидоре преблаженне, сию надежду безсмертия, да не угаснет светильник веры нашея, погашенный от дуновения диавола.
Благослови нас, отче святый, крепкий верою, не ослабший надеждою и любовию к людем горящий, благослови нас святым осенением во имя Пресвятыя Троицы: Отца и Сына и Святаго Духа. Аминь.[/spoiler]

[Раб божий Константин]

Акафист святому апостолу из 12-ти Иуде-Фаддею, брату Господню, помогающему христианам в безвыходных и запутанных ситуациях.
[spoiler]Кондак 1
Избранный апостоле и друже Христов, мрежею проповеди твоея многия души человеческия уловивый и ко Христу приведый, и великие чудеса сотворивый, Иудо-Фаддее богоблаженне, в песнях восхваляем тя, яко заступника и покровителя нашего; ты же, яко имеяй дерзновение ко Господу, молися Ему выну за ны грешныя и от всяких бед нас свобождай, да зовем ти:
Радуйся, апостоле святый Иудо-Фаддее, скорый помощниче и молитвениче о душах наших!

Икос 1
Ангелов Творец и Владыка, Христос, Бог Наш, спасти хотя род человеческий, во плоть нашу облечеся и со человеки поживе, и, егда исполниша времена, учеников призва себе и сопричти тя, всеславный Иудо-Фаддее, сродника своего по плоти, к лику святых апостол Своих; ты же во благовестии евангельском усердно подвизался еси и мученически живот свой скончавше, востекл еси в чертози Отца Небеснаго, идеже со ангелы и всеми святыми молишися о всех, взывающих ти сице:
Радуйся, рода Давидова отрасле благородная;
Радуйся, лозо вертограда Христова многоплодная;
Радуйся, велие дерзновение ко Господу стяжавый!
Радуйся, дар чудотворений свыше приявый!
Радуйся, души многих Христу уневестивый!
Радуйся, за овцы своя душу твою положивый!
Радуйся, грешных милостивый заступниче!
Радуйся, бедствующих скорый помощниче!
Радуйся, апостоле святый Иудо-Фаддее, скорый помощниче и молитвениче о душах наших!

Кондак 2
Видев благочестивый и праведный Иосиф сына своего Иуду в вере отцев своих и исполнении закона Моисеева добре утвержденнаго, преуспевающа возрастом и премудростью, любовию к храму Господню озареннаго, в радости воспел есть о тебе Богу: «Аллилуйя!»

Икос 2
Разум богомудрый имея, яко преславный праотец твой Соломон, всем сердцем возлюбил еси, Иудо достохвальне, премудрость Божию, ею же и взыскал еси прилежно от дней юности твоея; тем же от Отца Небеснаго дарование прием, в добродетельном житии твоем праведником ветхозаветным поревновал еси. Мы же, вся сия ныне славословяще, зовем ти сице:
Радуйся, от дней детства твоего водительству Духа Святаго прилежавый;
Радуйся, добродетелем великих предков твоих подражавый;
Радуйся, подобнее Аврааму во всем житии непорочно пред Богом поживый;
Радуйся, Исааково послушание пред святым отцем твоим явивый;
Радуйся, путем Иаковия смиренномудрия ходивый;
Радуйся, Иосифу чистоту и смиренномудрия стяжавый;
Радуйся, Моисееву любовь к людем своим в себе явивый;
Радуйся, в покаянии и кротости Давиду поревновавый;
Радуйся, апостоле святый Иудо-Фаддее, скорый помощниче и молитвениче о душах наших!

Кондак 3
Силою и благодатию Всесвятаго Духа озаренный, неверия и неблагомыслие отринув, преславный Иудо, верно последовал еси Спасителю Нашему, от Него же возлюблен был еси и к лику избранных дванадесяти апостол сопричтен был еси; и, яко ревнитель Славы Его, новое имя Фаддея, си есть «хвалящего», получил еси. Мы же, сие ныне поминающе,, просим тя, учениче Христов, испроси и нам у Творца Нашего ревность о спасении душ наших и Славе Божьей, да сподобимся купно с тобою выну Господа хвалити, воспевая Ему: «Аллилуйя!».

Икос 3
Имел еси едино попечение, богоблаженне Иудо-Фаддее, во еже верно служити и благоугождати Христу Богу, Его сопутник верный, ученик благоговейный и самовидец великих и преславных чудес сподобился еси быти. Мы же, вся сия поминающе просим тя, апостоле святый, исполни и нас духа Премудрости Божией, сердца наша в любви ко Христу и ближним нашим утверди и приими милостивно похвалы сия:
Радуйся, прежде всего о Бозе мыслити научающий!
Радуйся, богопротивные учения отвергати нас подвизающий!
Радуйся, волны сомнений о камень веры разбивающий!
Радуйся, от теплохладия и маловерия нас исцеляющий!
Радуйся, духом ревности по Бозе сердца наши наполняющий!
Радуйся, премудрости евангельскою души наши обогащающий!
Радуйся, заповеди Христовы исполняти нас наставляющий!
Радуйся, апостоле святый Иудо-Фаддее, скорый помощниче и молитвениче о душах наших!

Кондак 4
Бурю сомнений и маловерия горячими молитвы твоима победил еси до конца, богомудрый Фаддее, и благим и верным последователем воплотившегося Господа Иисуса явился еси, вся слова Его в сердце своем слагая. Мы же сие просим, вспоминая тя, апостоле преславне, научи и нас Спасителя паче всего земного любити, да сподобимся купно с тобою воспевати Ему: «Аллилуйя!»

Икос 4
Слыша на вечерии тайней прощальную беседу Божественнаго Учителя ко учеником Своим, глаголам еси Ему, апостоле Иудо-Фаддее: «... Господи, и что бысть, яко нам хощещи явитися, а не мирови». Спаситель же отвеща и рече ти: «аще кто любить Мя, слово Мое соблюдет и Отец Мой возлюбит Его и к Нему приидема и обитель у Него сотворим». (Ин: 14:22-23). Мы же, вся сия ныне поминаще, просим тя, угодниче Христов, утверди и нас в вере и верности, яже к Богу, и приими милостливо величания сия:
Радуйся, от путей Каиновых нас удаляющий (Иуда 1:11)!
Радуйся, в единости веры (Иуда 1:19) нас утверждающий!
Радуйся, благосердие с мудростию сопрягати научающий!
Радуйся, светом Божиим от растления нас соблюдающий!
Радуйся, от похотей и страстей плотских нас отвращающий!
Радуйся, дев и юношей в целомудрии укрепляющий!
Радуйся, супругов в любви и единомыслии сохраняющий!
Радуйся, дух милосердия в сердцах наших пробуждающий!
Радуйся, апостоле святый Иудо-Фаддее, скорый помощниче и молитвениче о душах наших!

Кондак 5
Богоявленней звезде, во дни древни премудрых волхвов к Солнцу правды путеводившей, уподобился еси, богоносне апостоле Фаддее, сам благодатию Божиею от силы в силу восходя и приводя с собою ко Христу Спасителю всех, взыскующих спасения вечнаго. Тем же и мы, немерцающим сиянием славы твоея озаримы, в радости духовней о тебе, Господеви, вопием: «Аллилуйя!».

Икос 5
Видевше Христа жизнедавца, тридневно воскресшего от мертвых и дверьми затворенными вошедшего ко учеником Своим и «Мир вам!» рекшего, богоблаженне апостоле Фаддее, возрадовался еси зело и Тому, аки Богу Всемогущему, поклонился еси, и народом языческим после же возвестил истину Святаго Воскресения Его. Мы же, сие ныне поминающе, просим тя, угодниче Христов: наполни души наши радостию пасхальной и приими милостивно величаия сия:
Радуйся, свет Христов в сердце твоем носивый!
Радуйся, светом истины сущих во мраце озаривый!
Радуйся, яко тобою ум наш в богомыслии!
Радуйся, яко тобою мрак неведения прогонятся!
Радуйся, от заблуждений духовных нас исцеляющий!
Радуйся, от пристрастий греховных нас освобождающий!
Радуйся, к искреннему покаянию нас призывающий!
Радуйся, к небесем умы и сердца наши обращающий!
Радуйся, апостоле святый Иудо-Фаддее, скорый помощниче и молитвениче о душах наших!

Кондак 6
Проповедника Евангелия Христова и возвестителя воли Господней сотвори тя Всемогущей и Милосердный Бог наш, егда в день святей Пятинадесятницы сниди на тя, всехвальный Иудо-Фаддее, Дух Святый и даров благодати Свое тя исполни. Мы же ныне молим тя, апостоле преславне, вознеси молитвы твоея о нас ко Всеблагому Утешителю, да сподобимся купно с тобою во веки веков Святей Троице воспевати: «Аллилуйя!».

Икос 6
Возсиял еси, светоносный учениче Спасов, яко светильник лучезарный во странах языческих, ибо ты не точно во пределех земнаго отечества твоего, но и в Сирии, Персии, Аравии и Месопотамии, возвестил еси сущем во тьме и сени смертной спасительную во Всеблагага Господа Нашего Иисуса Христа, наставляя людей новообращенных паче всего земнаго Господа любити, злых обычаев отвергатися и любовь к ближним делом и молитвой являти. Сему же научи нас, всехвальный апостоле Иудо-Фаддее и благоутробно приими величания сия:
Радуйся, сеявый мудро на ниве Христовой!
Радуйся, строивый Церковь на камени твердом!
Радуйся, любовию Христовою вся побеждавый!
Радуйся, духовныя младенцы с любовию окормлявый!
Радуйся, супротивников Спасовых в чада Божии преложивый!
Радуйся, святым крещением грехи их омывый!
Радуйся, познанием веры дух тех укрепивый!
Радуйся, заповеди евангельския их творити научивый!
Радуйся, апостоле святый Иудо-Фаддее, скорый помощниче и молитвениче о душах наших!

Кондак 7
Хотяще утвердитите род христианский в вере и любви ко Господу, богославне апостоле Иудо-Фаддее, в назидание и просвещение оставил еси нам священное послание твое, да тобою вразуемляемые и направляемые, от лжеучений и прелести бесовстей и развращения духовнаго удалимся, соблюдая себе в любви Божией, ждуще милости от Господа Нашего, Иисуса Христа, в жизнь вечную и поя Ему о тебе: «Аллилуйя!».

Икос 7
Новое и преславное чудо сотвори, Всеблагий Спаситель Наш, егда собра во граде Иерусалима от всех концов земли учеников Своих, дабы возмогли они всечестному успению Матери Его послужити. Пречистая же Дева, видевшее тя, сродника своего, Иудо-Фаддее, на облаце приспевшего к Ней, возрадовыя и сподоби тя беседы Своея и благословения предсмертнаго. Ты же, апостоле Христов, радости о богославном успении Матери Спасителя исполнившись, за вся сия благодари и славословии Премудраго и Милосерднаго Господа Нашего. Мы же, вся сия поминающе, таковые похвалы приносим ти:
Радуйся, аки Матерь, свято преславную Деву почитавый!
Радуйся, благим словам Ея всем сердцем внимавый!
Радуйся, Христа в руце душу Матери Своея приемшего сретавый!
Радуйся, погребению Пречистыя Богородицы достойно послуживый!
Радуйся, со всеми святыми и ангелы Ея во славе ныне созерцающий!
Радуйся, милосердие Приснодевы к нам приклоняющий!
Радуйся, купно с Нею о спасении нашем Христа умоляющий!
Радуйся, свято и праведно почитати Ея нас научающий!
Радуйся, апостоле святый Иудо-Фаддее, скорый помощниче и молитвениче о душах наших!

Кондак 8
Странно есть людем маловерным видети и слышати, яко ты, все славный и досточудный апостоле Фаддее, притекающих к тебе, и предстательства твоего с верою и надеждою просящих от обстояний безысходных и скорбей великих исхищаеши и подвизаеши тобою нам благодеющему Всемилостивому Богу умиленно взываем: «Аллилуйя!»

Икос 8
Всем, к тебе молитвенно прибегающим, любовь и благосердие твое изобильно являеши, и многожды самые прошения наша исполнением предваряеши, ибо дадеся от Милосерднаго Господа Нашего ти благодать преславная: враждующих примиряти, духи нечистыя изгоняти, скорби и печали наши утоляти, ожесточенныя сердца умягчати; ты же, аки апостол и сродник Христов, дерзновение велие стяжавше, непристанно ходатайствуеши за ны пред престолом Вседержателя и подвизаеши умиленным сердцем приносити ти похвалы сия:
Радуйся, предстателю крепкий на тя уповающих!
Радуйся, заступниче скорый тя призывающих!
Радуйся, из пучин отчаяния нас изводящий!
Радуйся, светом надежды души наши озаряющий!
Радуйся, веру в Милосердие Божие в сердцах наших воскрешающий!
Радуйся, выну на Господа уповати наставляющий!
Радуйся, прощати и благословляти ближних нас научающий!
Радуйся, от напрасныя смерти нас сохраняющий!
Радуйся, апостоле святый Иудо-Фаддее, скорый помощниче и молитвениче о душах наших!

Кондак 9
Всякия беды, скорби и напасти избавляеши нас, пречудный апостоле Фаддее, твоими теплыми к Богу молитвами; сего же ради, мы грешныя, к представительству твоему прибегая, молим тя, отче святый, испроси нам вся ко временной и вечной жизни полезная, да сподобимся Горнего Иерусалима достигнути и купно с тобою Господеви воспевати: «Аллилуйя!».

Икос 9
Витийство человеческое не довлеет к достойному прославлению твоих подвигов и чудес, богославный апостоле Иудо-Фаддее, ибо кто возможет воспети велию веру и люби Господу, кто изочтет вся труды твоя, ими же трудимся еси во благовести Христове, кто убо воздаст достодолжную славу тебе мученическия кончины твоея ради. Мы же, уповая, на милосердие твое к нам, учениче Спасов, просим тя: благоутробно и милостиво приими сия малыя наша и нехитростные песни, в похвалу тебе приносимыя с верою и любовию, и услыши нас, вопиющих ти сице:
Радуйся, в неизреченной славе Христа созерцающий!
Радуйся, во благоухании святыни присно почивающий!
Радуйся, от востока и запада хвалимый и превозносимый!
Радуйся, от всех концов земли величаемый и прославляемый!
Радуйся, всех приходящих к тебе благодатию озаряющий!
Радуйся, скорби наши в радость претворяющий!
Радуйся, молитвами твоими от вечной гибели нас спасающий!
Радуйся, за вся Творца благодарити нас научающий!
Радуйся, апостоле святый Иудо-Фаддее, скорый помощниче и молитвениче о душах наших!

Кондак 10
Спасительнаго подвига ищуще, богомудрый учениче Спасов, взял еси крест Христов и Христу последовал еси, егда заточение темничное, оскорбления, надругания, биения и иные муки разнообразныя претерпел еси, на Единаго Господа все упование твое возлагая в вере, и верность Ему до конца земнаго жития соблюл ея еси песнопоя Господеви (ангельскую песнь): «Аллилуйя!».

Икос 10
Стена крепкая, козньми врага неодоленная, пребыл еси до конца, апостоле Христов и стратотерпче Иудо-Фаддее, ибо ты мученически пострадати за имя Христово и кровию запетлети истину проповеди твоея сподобился еси, егда в пределех армянских от рук злочестивых распятие на древе крестном и уязвление от стрел кротце претерпел еси. Мы же ныне, таковую христоподражательную кончину твою воспоминающе, почитаем болезни и труды твоя и восписуем ти сице:
Радуйся, последователю верный распятаго Учителя!
Радуйся, споспешниче усердный ада Разрушителя!
Радуйся, ризы твоя в крови Агнчей убеливый!
Радуйся, в дому Отца Небеснаго обитель себе сотворивый!
Радуйся, с Небесными Силами Бога прославляющий!
Радуйся, со апостолы и мученики Творца величающий!
Радуйся, телесныя и дешевныя недуги наша исцеляющий!
Радуйся, в вере и благочестии нас укрепляющий!
Радуйся, апостоле святый Иудо-Фаддее, скорый помощниче и молитвениче о душах наших!

Кондак 11
Пение наше всякое побеждается, и многое множество хвалебных песен, воспеваемых ти, несть довольно, дабы по достоянию восхвалити тя, апостоле святый Иудо-Фаддее; обаче молитвами твоими получающее от Христа Бога благодения многообразныя, благодарни сущи, поем о тебе Ему: «Аллилуйя!»

Икос 11
Света нетварнаго зритель и славы Божественныя сопричастник воистину явился еси, всехвальный Иудо-Фаддее. Сего ради молим тя: не престани молитися о всей Церкви Христовой купно со всеми апостолы и мученики, да дарует нам Господь разум к проповеданию Евангелия Своего и да споспешествует всеблагомощная сил Христова благовестником нашим. О сем же воздыхая, тебе, богоносный апостоле, таковые похвалы приносим:
Радуйся, яко и по преставлении твоем с нами пребываеши!
Радуйся, яко во обителех небесных почивая, нас не оставляеши!
Радуйся, омраченные умы наши просветляющий!
Радуйся, окаменелыя сердца наши оживляющий!
Радуйся, от плевел ненависти их исцеляющий!
Радуйся, неверных светом веры Христовой озаряющий!
Радуйся, сомневающихся в вере утверждающий!
Радуйся, делателей на нивы Христовы посылающий!
Радуйся, апостоле святый Иудо-Фаддее, скорый помощниче и молитвениче о душах наших!

Кондак 12
Благодать, данную ти от Бога ведуще, всечестную память твою все радостно празднуем, светозарный апостоле Иудо-Фаддее, и , со умилением сердечным притекающе ко святому образу твоему, смиренно просим: сохрани нас в жизни сей во святей вере Христовой и во всяком благочестии и чистоте, да и смертнем успении нашем обращения достойны воспевати Богу: «Аллилуйя».

Икос 12
Воспевая дивное житие твое, святый и преславный Иудо-Фаддее, брате Господень, прославляем великие и преславные подвиги и труды твои, воспеваем мученическую кончину и почитаем тя, яко небеснаго предстателя нашего, ты бо от бед и скорбей избавляеши, недуги врачуеши, печали утоляеши всех любящих тя. Сего же ради благодарим и величаем дивно прославившего тя Триединаго Господа, даровавшего нам таковаго молитвенника и чудотворца, Его умоли спастися всем, поющим ти таковая:
Радуйся, милосердие Бога-Отца к нам приклоняющий!
Радуйся, кающихся грешников со Спасателем примиряющий!
Радуйся, плоды Духа Святаго стяжати нам помогающий!
Радуйся, праведно почитати Святую Троицу нас научающий!
Радуйся, покровом молитв твоих от всякаго зла нас соблюдающий!
Радуйся, светом радости души наши озаряющий!
Радуйся, блага временныя и вечныя нам источающий!
Радуйся, от враг видимых и невидимых нас избавляющий!
Радуйся, апостоле святый Иудо-Фаддее, скорый помощниче и молитвениче о душах наших!

Кондак 13
О преславный апостоле Иудо-Фаддее, брате Господень, теплотою любве твоея к Творцу и Спасу Нашему, посети и согрей души наша и прими убогое сие приношение наше, яко венец похвалы сердечныя, и, яко фимиам благовонный, вознеси молитву твою Отцу всех и Владыце и испроси земли нашей – мира благодейственнаго; Церквам Божиим – единства и благосостояния; нам же всем – чистоты сердечныя и любве непорочныя, да тобою охраняемы и спасаемы, Господеви вопием: «Аллилуйя!».
Сей кондак читается трижды; затем паки Икос 1 и Кондак 1.



Апостола Иуду – Фаддея, автора послания в Новом Завете, искони почитают на Украине, эта древнеславянская традиция там сохранилась и до наших дней (есть и польский вариант – у них очень распространено имя Тадеуш), он действительно помогает в безвыходных ситуациях, а также тем, кто содействует распространению его почитания.[/spoiler]

[Раб божий Константин]

По благословению Святейшего Патриарха Московского и всея Руси Алексия II
Акафист святой Иулиании Вяземской
[spoiler]Кондак 1
Избранную от великоиментаго боярскаго рода, женскую слабость мужески поправшую и разжженнаго похотью мучителя чистотою своею посрамившую, Иулианию славную, вернии, песньми почтим, точит бо нам неоскудно исцеления и молит о спасении всех, зовущих ей:
Радуйся, Иулиание, благоверная княгиня целомудренная.

Икос 1
Ангелов сожительница и страстотерпцем сопричастница быти сподобилася еси, всечестная Иулиание, ангельскую бо чистоту от пелен сохранила еси и тоя ради мученическую кончину доблественно восприяла еси: и ныне со ангельскими лики и мучеников сонмы Престолу Всесвятыя Троицы предстоящи, моли о помиловании нас, приносящих ти похвальная сия:
Радуйся, даров духовных исполненная.
Радуйся, венцем мученическим украшенная.
Радуйся, непоколебимый во искушениях терпения столпе.
Радуйся, твердое во обстояниях мужества основание.
Радуйся, добродетели неувядаемыи цвете.
Радуйся, лозы Христовой многострадальная розго.
Радуйся, благочестия честное прозябение.
Радуйся, чистоты доброто и похваление.
Радуйся, голубице, крыла позлащенная имущая.
Радуйся, теми в райская обители возлетевшая.
Радуйся, Иулиание, благоверная княгиня целомудренная.

Кондак 2
Видящи мати твоя, благоверная Иулиание, всю скорбь и тяготу вдовства своего, еще малолетней ти сущей моляще Всесильнаго Бога, да возрастит и усовершит тя Своею благодатию, и купно с тобою пояше Ему: Аллилуиа.

Икос 2
Разумом неомраченным греховными страстьми издетска разумевши необыменнаго Бога, Иулиание богомудрая, несомненно в Того веровала еси, и неизреченная и спасительныя повеления Его соблюдши, подвизаеши пети тебе звании сими:
Радуйся, ум свои к Божественней высоте вперившая.
Радуйся, одеяние души твоея чистотою украсившая.
Радуйся, силу Божию в немощном естестве своем показавшая.
Радуйся, венец победный от Десницы Живоносныя приявшая.
Радуйся, цвете чистоты, среди кала греховнаго проросший.
Радуйся, крине целомудрия, посреди терния похотей душегубительных процветшии.
Радуйся, чистая ластовице.
Радуйся, красная горлице.
Радуйся, яко в молитве тайно бдела еси.
Радуйся, яко писаньми богодухновенными насладилася еси.
Радуйся, Иулиание, благоверная княгиня целомудренная.

Кондак 3
Силою благодати Божией сохраняема, блаженная княгиня Иулиание, во благочестии от юных лет возрастала еси, и от силы в силу, и от славы в славу восходила еси, воспевающи укрепляющему тя Богу благодарственную песнь: Аллилуиа.

Икос 3
Имущи в сердце своем огнь любви ко Христу Богу, грех и нас ради человек распеншагося Господа, выну помышляла еси, прехвальная Иулиание: темже ко страстем себе от младенства приуготовила еси и научила еси всех вопити тебе сице:
Радуйся, любовь ко Христу в себе возжегшая.
Радуйся, тоя ради любве тягчайшия муки претерпевшая.
Радуйся, яко Жениха Безсмертнаго возжелала еси.
Радуйся, яко Тому в дар страдания своя принесла еси.
Радуйся, яко красотою страданий твоих Прекрасному Жениху Христу уподобилася еси.
Радуйся, яко Крест Господень на рамо вземши, воздержанием Сему последовала еси.
Радуйся, благочестия ревнительнице.
Радуйся, на врага добляя победительнице.
Радуйся, яко тобою от нечистых похотей избавляемся.
Радуйся, яко тобою от пагубных страстей свобождаемся.
Радуйся, Иулиание, благоверная княгиня целомудренная.

Кондак 4
Бурю жития долу влекущаго, и наслаждения красоты, и славу цветущую, яко временну оставльши, блаженная Иулиание, добротою красною целомудрия распаляема, ко Христу прилепилася еси, поющи Ему: Аллилуиа.

Икос 4
Слышавши богоименитая Иулиание иерея некоего сказания о подвизех мучеников, Христа Господа больши живота своего возлюблыших и за имя Христово смерть радостно приявших, ревностию о подвизех сих воспламеняшеся и к святости и чистоте христианстей понуждашеся. Мы же, ведуще сия, восхваляем тя сице:
Радуйся, яко о подвизех мученических возревновала еси,
Радуйся, красоту духовную и доброту телесную в себе сочетавшая.
Радуйся, благоухания духовнаго нас исполняющая.
Радуйся, тьму бесовскую далече отгоняющая.
Радуйся, благ духовных и телесных подательнице.
Радуйся, у Престола Божия за нас присная ходатаице.
Радуйся, яко о Господе ликуеши.
Радуйся, яко лучами благодати Божиеи исполняешися.
Радуйся, Иулиание, благоверная княгиня целомудренная.

Кондак 5
Богсиянную звезду, от града Торжка взошедшую и небесными светлостьми возсиявшую, видим тя, всехвальная княгиня Иулиание: и ныне во светлостех мучеников святых пребывавши, купно с ними восхваляющи Светоподателя всяческих и поющи Тому: Аллилуиа.

Икос 5
Видев тя беззаконный князь Юрий, елико душевною красотою сияющую, тако и телесным добротством блистающу, и похотью нечистою распаляем, восхоте обольстити тя. Ты же, всечестная Иулиание, рачение плоти превозмогши, яко воистину крепкий адамант целомудрия явилася еси. Сего ради любовию вопием ти:
Радуйся, чистоты забрало боговидное.
Радуйся, естества цвете благороднейший.
Радуйся, елеем благочестия превращенная.
Радуйся, чистоту душевную и телесную соблюдшая.
Радуйся, в женстем естестве мужескую доброту явившая.
Радуйся, невидимую державу противных сил победившая.
Радуйся, паче сильных мужей крепчайшая.
Радуйся, премудрых века сего мудрейшая.
Радуйся, яко врага льстивого крепкая сопротивоборница явилася еси.
Радуйся, яко мужески подвиг претерпела еси.
Радуйся, Иулиание, благоверная княгиня целомудренная.

Кондак 6
Проповедник твоея чистоты и праведности явися мучитель твой, святая княгиня Иулиание, ты бо доброте красней души твоея страстьми осквернится не стерпела еси, доброту несказанную честнаго Жениха твоего уразумевши и плотскую любовь твердо отвергла еси, воспевающе Христу Богу победную песнь: Аллилуиа.

Икос 6
Возсияла еси светлостьми добродетелей твоих, преславная Иулиание, и подвигом мученическим украсилася еси. Темже паче солнца сияеши и просвещаеши всех, твою светоносную память совершающих верно и приносящих ти хваления сия:
Радуйся, мужественная мученице.
Радуйся, плотских страстей целительнице.
Радуйся, яко крин добродетельми твоими процветшая.
Радуйся, целомудренным путем шествовавшая.
Радуйся, адскую гордость отвергшая.
Радуйся, небесную сладость возлюбившая.
Радуйся, пламень похоти разжженныя мудрованием угасившая.
Радуйся, свещу душевную неугасимую соблюдшая.
Радуйся, яко стремление нечистоты опалила еси.
Радуйся, яко на высоту добродетелеи взошла еси.
Радуйся, Иулиание, благоверная княгиня целомудренная.

Кондак 7
Хотя ласкосердый мучитель похоти своея желание улучити, ласкательными словесы и мольбы многими и коварством и прещении грозными соблазнити тя покушашеся: ты же, всеславная, плоти мудрование отвергши, болезненне вопияла еси: не разлучит мене любве Христовой ни славы обещание, ни мук прещение, и радостно взывала еси Ему: Аллилуиа.

Икос 7
Новую безчеловечия ярость показа неистовый мучитель твой, досточудная Иулиание, егда слугам повеле сотворити ног твоих отъятие и рук отсечение и в реку Тверцу воврещи бездыханное тело твое. Мы же таковому зверонравию содрогающеся, твоя страсти восхваляюще, вопием ти сице:
Радуйся, мучеников радование.
Радуйся, целомудренных похваление.
Радуйся, струями кровей твоих землю оросившая.
Радуйся, отсечение удов телесных претерпевшая.
Радуйся, к лику мученическому сопричтенная.
Радуйся, одеждою чистоты испещренная.
Радуйся, кровию своею освятившаяся.
Радуйся, тлителя целомудрия поправшая.
Радуйся, яко сердечным рачением твоим Ангелы удивила еси.
Радуйся, яко мужеским сплетением врага невидимого низложила еси.
Радуйся, Иулиание, благоверная княгиня целомудренная.

Кондак 8
Странствия земнаго течения мученически скончавши, ко Христу, Неприступному Свету, взошла еси, достохвальная Иулиание. Ему же ныне предстоиши духовно ликовствующи и воспевающи радостную песнь: Аллилуиа.

Икос 8
Всю лесть змиину низложила еси, и Ангельские лики возвеселила еси, преблаженная Иулиание, на камени бо твердо целомудрия утвердившеся, убийцу врага посрамила еси и венец победный от Христа Царя достоино восприяла еси. Сего ради слышиши от нас похвалы сия:
Радуйся, духом своим безплотныя удивившая.
Радуйся, мужеством своим тех возвеселившая.
Радуйся, в жертву себе Богу предавшая
Радуйся, жертва благоприятная Тому явившаяся.
Радуйся, яко страсти многих мук претерпела еси.
Радуйся, яко к сиянию незаходимаго света преставилася еси.
Радуйся, тела мертвенного не пощадившая.
Радуйся, безсмертие неиждиваемое наследовавшая.
Радуйся, яко преступнаго мучителя советы избегла еси.
Радуйся, яко страдальческим путем во обители Небесныя взошла еси.
Радуйся, Иулиание, благоверная княгиня целомудренная.

Кондак 9
Всецелу себе самою Богу принесла еси, богомудрая Иулиание, и Божественную силу в немощи своей совершила еси, в женстем естестве невидимую державу и силы ея победивши. Тем же убо во дворы Господа твоего, яко дева мудра свещу носящи вошла еси, поющи Тому хвалебную песнь: Аллилуиа.

Икос 9
Витии красноглаголивых лик не возможет достойно восхвалити тя, всехвальная Иулиание, како бо ты чудодетельне явила еси тело твое, противу быстрин речных плывущи, разслабленному некоему, по брегу Тверцы идущему. Таковому промышлению о тебе Божию чудящеся, во умилении сердец наших приносим ти похвальная сия:
Радуйся, зарями чудес твоих сияющая.
Радуйся, богато нам чудесы источающая.
Радуйся, яко каплями кровей твоих души твоеи багряницу многоценну исткала еси.
Радуйся, яко теми в ризу нетленнаго веселия одеялася еси.
Радуйся, елей Божия Благодати искапающая.
Радуйся, яко благовонный фимиам ко Христу Богу вознесшаяся.
Радуйся, тленную славу презревшая.
Радуйся, венцем нетления венчавшаяся.
Радуйся, яко страданьми твоими, яко злато в горниле, искусилася еси.
Радуйся, яко честное жилище Спасу Христу соделалася еси.
Радуйся, Иулиание, благоверная княгиня целомудренная.

Кондак 10
Спастися хотя всем человеком Щедродатель Господь дарова нам святое тело твое, блаженная Иулиание, яко сосуд избранный и источник благодатный, от негоже вси вернии токи исцелении черплюще, выну вопиют прославляшему тя Богу: Аллилуиа.

Икос 10
Стена еси твердая и крепкое забрало граду нашему, святая мученице Иулиание, и всех, с верою и любовию прибегающих к тебе, знамении дивных исполняеми о величии явльшагося в тебе Бога вещающих. Сего ради приими от нас пения сия:
Радуйся, чудеса возсиявшая.
Радуйся, цельбы нам источающая.
Радуйся, страстей лютых утоление.
Радуйся, в скорбех сущих заступление.
Радуйся, яко недуги неисцельныя врачующи.
Радуйся, яко огненное опаление уставляющи.
Радуйся, источниче исцелений неоскудеваемый.
Радуйся, сокровище Божиих даровании неиждиваемое.
Радуйся, яко духи лукавыя отгоняеши.
Радуйся, яко в печалех всем помогавши.
Радуйся, Иулиание, благоверная княгиня целомудренная.

Кондак 11
Пению нашему похвальному вонми, угоднице Божия Иулиание, аще бо и ни единоже наше слово довольно было, уповаем бо тобою прощение согрешений наших получити и милость от Благодеющаго всяческих улучити, да вкупе с тобою воспоем Ему: Аллилуиа.

Икос 11
Светозарными сияньми Христа, Невечерняго Солнца, душу и сердце свое озарила еси, богомудрая Иулиание, и к Нему утреневала еси: темже и к Свету присночудному преложилася еси. Им же просвещаеши всех, любовию почитающих тя и приносящих ти сицевая:
Радуйся, в чертоги Небесныя вселившаяся.
Радуйся, к вечным обителем преставившаяся.
Радуйся, к Свету невещественному возшедшая.
Радуйся, целомудрия любовию в горняя скиния вознесшаяся.
Радуйся, яко благодати Христовы благоуханием в небеснем вертограде ныне исполняешися.
Радуйся, яко Божественным славы зрением во обителех светозарных ныне утешаешися.
Радуйся, доблественная страстотерпице.
Радуйся, вечного блаженства наследнице.
Радуйся, яко мрак страстей разгоняеши.
Радуйся, яко славою Божиею исполняешися.
Радуйся, Иулиание, благоверная княгиня целомудренная.

Кондак 12
Благодать прияла еси страсти плотския целити, прехвальная мученице Иулиание, и нас, усердно воспевающих тя, душевных и телесных болезней избави твоими яже к Богу молитвами, да дерзновенно вопием Ему: Аллилуиа.

Икос 12
Поюще подвиги твоего предивнаго жития, твоя преславная и богатодательная благодеяния, тобою нам дарованная, ублажаем тя, блаженная княгине Иулиание, блаженна бо воистину явилася еси и в житии твоем, и в смерти, и по смерти твоей. Сего ради воспеваем тя похвалами сими:
Радуйся, нищету духовную возлюбившая.
Радуйся, вся красная мира сего презревшая.
Радуйся, в плаче о Господе слезами очи своя оросившая.
Радуйся, правды небесныя возжаждавшая.
Радуйся, земли кротких наследнице.
Радуйся, преудобренная страстотерпице.
Радуйся, милость от Бога восприявшая.
Радуйся, чистотою сердечною Того узревшая.
Радуйся, яко миром духовным облагоухаеши.
Радуйся, яко мзду небесную достойно восприяла еси.
Радуйся, Иулиание, благоверная княгиня целомудренная.

Кондак 13
О святая мученице, благоверная княгиня Иулиание! Тебе, у Престола Господа Славы молящеися за ны, мы, грешнии, на земли живущии, приносим хвалебное сие благодарение и усердно просим тя: моли Всещедраго Бога пробавити милость Свою на землю Российскую, утвердити ны в православии и благочестии, даровати нам прощение согрешении, избавится нам от напрасныя смерти и будущия муки, да с тобою во веки поем Ему: Аллилуиа.
Этот Кондак читается трижды, затем 1-й Икос «Ангелов сожительница...» и 1-й Кондак: «Избранную...»

Величание
Величаем тя, святая благоверная княгиня Иулиание, и чтим честная страдания твоя, ты бо молиши за нас Христа Бога нашего.

Молитва ко святой Благоверной княгине Иулилнии Вяземской
О всехвальная мученице, святая угоднице Божия, благоверная княгиня Иулиание! Ты супружеския ради чистоты душу свою положила еси и за целомудрие даже до крови подвизалася еси, и сего ради, аще и жена была еси, обаче к лику праведных дев сопричтена быти сподбилася еси.
К тебе, велие дерзновение ко Владыце стяжавшеи, смиренно притекаем и умильно просим тя: подаждь нам отраду и свобождение от плотския брани, житие целомудренное и благочестное в супружестве, девстве пребывание, се бо страстми плотскими обуреваемся, и грехов многих пучина объяла есть ны. Темже и несть мы достоины ниже взирати на высоту Небесную, ниже Господа в помощь свою призывати.
Буди нам помощница во спасение скорая и от зол и обстоянии избавительница неодолимая. Всех, с верою несумненною к Богу приходящих и молитвенно к тебе притекающих, от всяких бед душевных и телесных свободи, скорбящия обрадуй, труждающимся помози, плачущия утеши, изнемогающия поддержи, нападствуемым буди заступница, вдовицам и сирым защитница, младенцем питательница.
Помози нам, да не погибнем со страстьми и похотьми нашими, но да управим живот наш во всяком благочестии и чистоте, яко да соделаем телеса наша храм живущаго в нас Духа Святаго и прославим благодать и милость Триединаго Бога во веки веков. Аминь.

Тропарь глас 2
Благочестно в законе поживши и благими делы украсившися, яко крепкии адамант явися, целомудренная святая благоверная княгиня Иулиание, тленную славу и добротство телесное презревши, злокозненнаго врага победила еси, целомудрия ради мученическую смерть прияла еси. Сего ради от Христа Бога нетленным и вечным венцем венчавшися, ныне с лики мученик ликуеши и нам велия чудеса, приходящим ко гробу твоему, обильно источаеши. Темже ти вопием: молися Христу Богу о всех нас, верою и любовию страдания твоя почитающих.

Кондак глас 2
Воспоем днесь Благодетеля всех Бога, прославившего в России Иулианию богомудрую, да молитвами ея подаст душам нашим грехов оставление и велию милость.

Святая мученица Иулиания была женой Вяземского князя Симеона Мстиславича. После завоевания Смоленска Литвой он разделял изгнание из родной земли вместе со Смоленским князем Юрием Святославичем. Великий князь Василий Московский дал им в удел город Торжок. Князь Юрий прельстился красотой Иулиании и пытался склонить ее к прелюбодеянию, но все усилия его были тщетны.
Юрий убил мужа Иулиании, надеясь после этого насильно овладеть ею. Иулиания, защищаясь от насильника, ударила его ножом. Разъяренный Юрии гнался за ней с мечом, отрубил ей руки и ноги, а тело велел бросить в реку Тверцу. После этого, как пишет летописец, «...бысть ему грех и студ велик и с того бежа к Орде, не терпя горького своего безчестия». Произошло это в 1406 году. Мучимый совестью от совершенного злодейства, Юрий нигде не мог найти покоя и в конце концов пришел в Веневский Успенский монастырь, где и провел остаток жизни в покаянии и слезах. Раскаявшийся убийца скончался в 1408 г. и стал местночтимым святым.
Весной 1407 г. больной крестьянин увидел, что по реке Тверце плывет против течения тело убиенной княгини и услышал голос, повелевший собрать духовенство и совершить погребение тела у южных дверей Спасо-Преображенского собора города Торжка. В тот же момент крестьянин исцелился. Воля святой мученицы была исполнена, и во время погребения многие больные получили исцеление. С тех пор святой княгини Иулиании постоянно приходили люди с верой в её благодатную помощь.
В 1598 г. соборный диакон Иоанн после сорокадневной молитвы и поста решил тайно открыть ее могилу. Но из гробницы вырвался огонь и ожег его лицо, так что он долгое время провел в тяжелой болезни. «Не следует видеть тело мое, пока не будет на то воли Божией!» — был к нему голос. Через два месяца диакон получил исцеление после многих усердных молитв у гробницы мученицы.
В 1815 г. разбирали старый Спасо-Преображенский собор и стала видна часть гробницы. Больные, касавшиеся ее, получали исцеления. В 1819 г. в соборе был устроен придел в честь святой княгини. Драгоценная рака с мощами ее пребывала в новом Спасо-Преображенском соборе. Невинно убиенный супруг ее, князь Симеон, также почитался в Торжке местно.В 1918 г. Спасо-Преображенский собор был закрыт. До 1930 г. мощи покоились в храме Архангела Михаила. С тех пор судьба их неизвестна.
Благоверные княгини — прежде всего верные жены и помощницы мужу в его трудах. Хранение святыни брака — один из величайших подвигов человека, и темные силы любыми средствами пытаются разрушить всякий брак, в котором супруги приближаются к восстановлению единства, явленного в жизни святых Петра и Февронии Муромских. Святая Иулиания Вяземская — хранительница и защитница целомудрия. Но целомудрие — один из трех обетов, которые дают при монашеском постриге (два других — послушание и нестяжание). Поэтому она является помощницей и всем тем, кто идет тесным путем монашества.[/spoiler]

[Раб божий Константин]

Акафист праведней Иулиании Милостивей, яже в селе Лазареве, близ града Мурома.

День памяти 2/15 января.
[spoiler]23 декабря 1930 года
Печатать благословляется.
Митрополит Евлогий.

Кондак 1-й
Избранная Богом, праведная и милостивая Иулиание, яже в попечениих мирских сущи, во Христе душею, яко на небеси жившая; и в молве мнозей пребывающи, молчание внутрь сердца возлюбившая. Прославляюще прославльшаго тя Господа, умильно воспеваем ти похвальную песнь. Ты же, в житии своем претерпевши лютыя скорби, молися о нас, обуреваемых напастьми и грехами, и испроси нам от Милостиваго Спаса, бед избавление и душам спасение; да благодаряще Бога, тя славим, зовуще:
Радуйся, Милостивая Иулиание, похвало Муромская и жен украшение!

Икос 1-й
Ангел чист сущи, от младых ногтей равноангельнаго иноческаго жития возжелела еси; Содетель же всех, глубиною премудрости вся строяй, ин путь спасения тебе предустави, - еже в браце честнем святым житием Ему угодити. Сего ради испытании многими к Царствию Божию измлада веде тя: отроковица бо, шести лет еще сущи, прискорбна явилася еси сирота; млада же юница бывши, матерний крест кротце прияла еси. Мы же таковому чудному Промыслу недоумевающи, обаче с верою возхваляем тя умильно:
Радуйся, от родителей нищелюбных – Иустина и Стефаниды в богатстве рожденная.
Радуйся, матере лишившися, вне крова отеческаго сиротою вскормленная.
Радуйся, лилие благоуханная, в тишине лесов Муромских возращенная.
Радуйся, звездо светозарная, в селении Лазаревском Богом возженная.
Радуйся, любовь ко Христу и Пречистей Его Матери в сердце стяжавшая.
Радуйся, агнице чистая, иноческаго чина, измлада искавшая.
Радуйся, послушнице кроткая, Божиею волею мужу врученная.
Радуйся, праведная мати, в мире поживши, во святых нареченная.
Радуйся, Милостивая Иулиание, похвало Муромская и жен украшение.

Кондак 2-й
Видя тя враг рода христианскаго, в бдениих нощных стоящую, наведе страхования мерзкая; ты же, блаженная юнице, к своему наставнику, Николаю предивному, воззвала еси с молитвою слезною. И абие явися ти Чудотворец; беси же, яко дым, исчезоша; Святитель же благослови тя, глаголя: О, дщи моя, крепко мужайся! Христос бо Господь повеле ми от всякаго соблюдати тя зла. Ты же воспевай Ему небоязненно, ангельски немолчно зовущи всегда: Аллилуиа.

Икос 2-й
Разум человеческий недоумевает, како, блаженная мати, в суете житейстей пребывающи, душею в чертозех небесных немятежно обитала еси; и в богатстве обильнем живущи, яко на чуждее и сирым врученное, безстрастне взирала еси; в браце же честнем крест свой несущи, яко инокиня в мире сущи, многая чада святая воспитала еси. Мы же, от человек невозможная ведуще, Бога же вся могущаго восхваляюще, с верою несумненною почитаем тя сице:
Радуйся, горлице молчаливая, непрестанною молитвою с Богом беседовавшая.
Радуйся, ученице послушливая, в изобилии и скудости еже жити изведавшая. [Филип. 4, 12.]
Радуйся, супружнице верная, образом кротости мужа спасающая.
Радуйся, мати многострадальная, чад своих Господу чистых вручающая.
Радуйся, жено целомудренная, чадородием со святынею Богу угодившая. [Тим 2, 15.]
Радуйся, госпоже милостивая, слугам своим Евангельски кротце служившая.
Радуйся, рабо Христова, заповеди Его в житии сохранившая.
Радуйся, Павлова послушница, во славу Божию вся сотворившая. [I Кор. 10, 31.]
Радуйся, Милостивая Иулиание, похвало Муромская и жен украшение.

Кондак 3-й
Сила Всевышняго дарова тебе крепость безропотне тяжкий твой крест понести, егда чистыя души четырех сынов и двух дщерей твоих, во младенчестве сущих, яко птицы быстрокрылыя, возлетевша блаженно. Ты же, о, Богомудрая Мати, сама яко горлица Божия, к селениям райским душея парящая, за вся благодаряше Бога и останком живых утешашеся. О успших же, с Иовом праведным умильне глаголаше: Господь даде, Господь отъя. Ныне же Чадца моя малая Бога со ангелы славят пресладце, о своих же родителех тепле Его умоляют, от чистых устен приносяще серафимскую песнь: Аллилуиа.

Икос 3-й
Имеющи сердце, всех милующее, благодатныя любве присполненное, воистину мати милостивая, Иулиание, явилася еси во дни посещения Божия твоея страны тяжким гладом: сама бо в нужде пребывающи, алчущим-жаждущим пища, слепым и хромым путевождь, безкровным покров и одежда, всем утешение бяше. Нищая же гладная братия, Богу хвалу воздающе, ублажаху тя сице усердно:
Радуйся, мрачную глада годину светом любве озарившая.
Радуйся, в образе нищия братии – милость Христу сотворившая.
Радуйся, якоже теплое солнце, сеющая блага земная.
Радуйся, шуйца твоя бо не ведяше, яже творяше десная.
Радуйся, хлебом питающи алчущих, от смерти и мук избавлявшая.
Радуйся, словом приветливым греющи, унылых зело утешавшая.
Радуйся, Божия Царства искавши, раздавшая блага телесная.
Радуйся, други богатством стяжавши, обретшая кровы небесные. [Лк. 16, 9.]
Радуйся, Милостивая Иулиание, похвало Муромская и жен украшение.

Кондак 4-й
В бурю беды всенародныя, егда по грехом своим людие язвою смертною наказани быша; тщанием многим, душе милосердная, слово Христа о болящих творящи, тайне от присных тем помогаше; молитвы усердны о тех возносящи, дар исцелений от Бога прияше; за успших служения в храме просящи, в вечный покой провождаше. Ныне же благословенное Царство, идеже не ведят болезнь, ни печаль, приемши от Бога, ликуя, поеши Ему: Аллилуиа.

Икос 4-й
Слышащи в един из дней горьких о лютем убийстве слугою твоего старейшаго сына, уязвилася еси матерним сердцем, о крестоносная жено! Обаче не тако смертию его огорчися, колико о внезапней кончине души опечалися; еще о преступнем убийце зело сокушашеся. Но Самого Христа вспоминающи, в Гефсимании капли крове проливающа, в молитвах к Нему укрепляшеся, матернюю скорбь в волю Его погрузивши. Мы же вере смиренней твоей изумляющеся, воспеваем достойно похвальная:
Радуйся, на житие земное, яко на странствие скорбное взирающая.
Радуйся, успение присных, яко разлучение краткое помышляющая.
Радуйся, печали мирския упованием на волю Божию утишавшая.
Радуйся, супруга унылаго, не якоже жена Иова, в вере укреплявшая.
Радуйся, убийцу безумнаго, яко и Христос распявших, простившая.
Радуйся, Царства Небеснаго сыну от Искупителя мира просившая.
Радуйся, от мира земнаго сердце свое скорбьми отревавшая.
Радуйся, крестным страданием паче к Богу любовь возгревавшая.
Радуйся, Милостивая Иулиание, похвало Муромская и жен украшение.

Кондак 5-й
Божиею волею и другий сын твой возлюбленный раннюю смерть восприя в служении ратнем. Ты же и сей крест безмолвне приявши, отрасль младую твою молитвами многими, четыредесятькратными жертвами, щедрою милостынею светло почтила еси. Словесы же благими утешивши мужа, да паки не погубит надежды на Бога, сама со слезами умильными, яко голубица раненая, нощьми многими тихо моляшеся, об оставлении мира помышляющи, надгробныя же рыдания претворяющи в хвалебную Вседержителю песнь: Аллилуиа.

Икос 5-й
Видев тя супруг твой, в обитель от мира сокрытися жаждущую, умоляше тя не оставляти его сира с пятерицею чад. Ты же, о кроткая агница, волю свою других ради смиренно отсецати научившися, послушне рекла еси: «Воля Господня да будет!» И паки восприявши на рамена, лютыми скорбьми изъязвленная, данный от Бога ти крест подвига в мире житейстем, бдения, пост и молитвы паче умножила еси, и в браце яко сущая пустынница безбрачне живущи. Мы же послушанию твоему и подвигу в мире дивящеся, восхваляем смиренно:
Радуйся, сочетанная тайною брака, егоже храняше с трезвением.
Радуйся, супружнице верная мужу, емуже служаше с смирением.
Радуйся, подвижнице крепкая в мире, свой крест перенесши с терпением.
Радуйся, победнице страстныя плоти, врага одолевши борением.
Радуйся, белыя ризы душевныя в темнем мире хранившая.
Радуйся, звездо тихо мерцавшая, в мятеже житействем светившая.
Радуйся, молебнице теплая в браце, и образ монахом горением.
Радуйся, страдалице, кроткая мати, святым подражавши мучением.
Радуйся, Милостивая Иулиание, похвало Муромская и жен украшение.

Кондак 6-й
Проповедником жития твоего крестного явися твой сын Каллистрат, иже поведаше миру тайный и дивный твой подвиг: беша молитвы твои всенощныя; остры полена для тела на ложе; твердыя руце от многих поклонов; плоть же сухая от зельных постов; очи, омытыя слезными реки; чистый язык, воспевающий песнь: Аллилуиа.

Икос 6-й
Возсия благодать в твоем сердце, о мати святая, и воспери тя к молитве паче всего; во огни Божественнем пламенеющи, яко птица небесная к Богу влекущися, посещати храм Божий восхотела еси: горе бо твой дух возношашеся там, всяку житейску печаль отложив; и в скорбех утешашеся сладце, дар благодати от Отца получив. Мы же, ленивии, ревность по Бозе в души твоей зряще, токмо языком возможем прославити тя, сице зовуще:
Радуйся, огнь благодати приемши, от земли к небеси восперившаяся.
Радуйся, райскую сладость вкусивши, во Христе Иисусе возвеселившаяся.
Радуйся, любовию к Богу горящи, дар слез от Него получившая.
Радуйся, молитвы келейны творящи, храм паче дома любившая.
Радуйся, об искуплении Господни помышляющи, в пяток без пищи уединявшаяся.
Радуйся, ангелом безплотным подражающи, от сна для молитвы уклонявшаяся.
Радуйся, благодать в сердце стяжавши, храм Божий в себе сотворившая.
Радуйся, Тайны Святыя приемлющи, Троицу Святую в душу вселившая.
Радуйся, Милостивая Иулиание, похвало Муромская и жен украшение.

Кондак 7-й
Хотящи, по смерти подружия твоего, всею душею к небеси прилепитися, подвиги к подвигом прилагала еси, о, праведная; паче же Христу подражающи, во смирении и любви подвизалася еси. Сего ради дар умиления слезнаго и сердце всех милующее, от Него получила еси; еще на земли, яко не небе, живущи, и Богу хвалу приносящи: Аллилуиа.

Икос 7-й
Новое знамение яви Господь над тобою: одежды бо теплыя всем раздающи, лютей зиме тогда сущей, в Божию церковь ходити престала еси. Во едино же утро пришедый в храм праведнаго Лазаря Божий служитель, от иконы Пречистыя Божия Матере услыша глас, сице глаголющь: «Иди и рцы Милостивей вдове Иулиании: чесо ради в Церковь не приходит на молитву? И домовная молитва богоприятна, но не яко церковная.» И по сем и еще изрече: «Вы же почитайте ю, уже бо она не меньши шестидесяти лет; и Дух Свят в ней почивает». Ты же со страхом о чуде сем дивнем в слух восприявши, и молчати всех слышавших умоливши, в храм Божий к Пречистей Владычице весьма устремися, с теплыми слезами икону лобзающи и пения молебныя смиренно возносящи. Людие же вернии радующеся светло, яко Радость всех радостей, Царица Небесная, тако Тебе возлюби, прославляху тя весело:
Радуйся, всем сердцем Христа возлюбившая.
Радуйся, моления теплы Ему возносившая.
Радуйся, любовь выше молитвы и поста почитавшая.
Радуйся, вся службы Церковныя всегда посещавшая.
Радуйся, от Божия Матере Милостивою нареченная.
Радуйся, от Духа Святаго вся внутрь осененная.
Радуйся, не от человек, но от Богородицы славу святыя приявшая.
Радуйся, заре тихокрылая, Муромский край осиявшая.
Радуйся, Милостивая Иулиание, похвало Муромская и жен украшение.

Кондак 8-й
Странно и дивно есть зрети, како возлюбленным чадом своим Бог на земли вящшия дарует скорби, яко залог к ним любве Своея. Сего ради тебе, о блаженная велию милость от Матере Божия в храме приемшей, подобаше и крест восприяти преболий; да Богу любовь благодарную паче покажеши, сама же прославишися, и люди скорбящия терпети научиши, за вся воспевати хвалу: Аллилуиа.

Икос 8-й
Промыслом непостижным великому гладу страну твою паки постигшу, тогда оскудеша вси тако, яко и самей вдове Милостивой нищета приключися презельная. Обаче на промысл Господний себе и своих чад вручивши, терпети им вся заповеда до смерти; и такожде слуги своя умоляше прилежне, да чужду отнюдь чесому не дерзнут прикасатися. Они же послушнии, аще и страждуще, заповедь ту сохраниша, тебе же глаголаша сице:
Радуйся, утеха едина в тяжкую годину великаго глада.
Радуйся, плотию страдавшая, паче искавшая небеснаго града.
Радуйся, в грозных явлениих Божии веления и гнев созерцавшая.
Радуйся, матерски чадом, мучимым гладом, и всем сострадавшая.
Радуйся, силою веры скорби без меры сама пережившая.
Радуйся, чада послушная и слуги единодушныя Кресту научавшая.
Радуйся, плачущим сплачущи, о людех, состраждущи, Бога молившая.
Радуйся, сердцем горящим, душею скорбящая за Русь прегрешившую.
Радуйся, Милостивая Иулиание, похвало Муромская и жен украшение.

Кондак 9-й
Всяко животное, пищу себе во благовремении приимше, хвалит Тя, Бога благаго, прещедрую руку Твою и прежде прошения всем отверзающаго. Но угодница крепкая, Царства небеснаго ищущи, аще земных Твоих благ и лишися, Тебе николиже преста вопияти хвалу: Аллилуиа.

Икос 9-й
Витии земнии недоумевают языком своим изобразити томления матерних душ, страданьми возлюбленных чад сокрушаемых; ты же, страдалица твердая, милость свою на всех разливающи, хлеба же чадом своим найти не могущи, от травы лебеды тех питающи, многажды их утешаше, глаголющи: «Слава Богу за вся!» - Мы же терпения силе от тя поучающеся, гласы похвальными чествуем тепле:
Радуйся, странная миру земному, странница по-миру горце скитавшаяся.
Радуйся, града небеснаго ищущи, сира бездомна в сем мире оставльшаяся.
Радуйся, многим богатством владеющи, нища и гладна и нага явившаяся.
Радуйся, милостыни прежде дающи, с чады своими и хлеба лишившаяся.
Радуйся, будущия радости чающи, крест настоящий с надеждою взявшая.
Радуйся, воли Господни предавшися, путь нищеты и скитаний приявшая.
Радвуйся, страсти Христовы предзрящи, крест свой безропотне в жизни терпевшая.
Радуйся, в немощех Духом укрепльшися, в скорбех за вся славу Богу воспевшая.
Радуйся, Милостивая Иулиание, похвало Муромская и жен украшение.

Кондак 10-й
Спасти свою душу хотящи измлада, о Бозе всем сердцем в молве помышляла еси; о родных, яко Марфа, усердне пекущися, духом Мариину часть возлюила еси; блаженныя жизни желающи присно, о смертнем конце непрестанную память хранила еси, Иисусову в сердце молитву творящи, - и ею свой горький живот услаждающи; дондеже круга небеснаго, края желаний, достигла еси, преподобная, Богу зовущи: Аллилуиа.

Икос 10-й
Стена нерушимая волны житейскими, мужества силу в немощнем теле являла еси; естества же закону повинующися и многими скорбьми удрученная, в старости добре к концу жития доспела еси. Бог же благий, и единый Святый, маргаритою чистою тя зрети желая, посла ти болезнь в другий день Рождества Своего; да и ты, Симеону подобно, узревши Спасителя Мира, речеши Ему, отходящи: Рабу Твою с миром Владыко, от жизни сея отпусти; да узрю Тя, Единую Славу мою, и души моея грешныя Спаса. Сродницы же твои соболезнующе, утешаху тя добре:
Радуйся, море переплывшая, в тихую пристань грядущая.
Радуйся, мир сей оставляющи, Чертога небеснаго ждущая.
Радуйся, никогоже судивши, и сама Судией несудимая.
Радуйся, милость сотворшая, к девам премудрым вводимая.
Радуйся, в обители горния на крылех голубиныя кротости возлетающая.
Рдауйся, прежде вечныя жизни Христа, Тихий Свет, созерцающая.
Радуйся, в Отчий чертог, яко луч пресветлый текущая.
Радуйся, в Дусе Святем с ликом святых пребывати имущая.
Радуйся, Милостивая Иулиание, похвало Муромская и жен украшение.

Кондак 11-й
Пение ангельское в вышних чертозех услышати жаждущи, слезных молитв на земли не остави и на смертнем одре: страждущи телом зело, и во дни возлежащи, нощию тайне к молитве себе воздвизаше, яко свеща догорающа, пламень последний даяше. Егда же о подвизе новем уведаша, ты им, о горлице Божия, кротце глагола: «И от болящаго Бог востязует молитвы духовныя!» Якоже и ангели хвалять Его непрестанно, зовуще всегда: Аллилуиа.

Икос 11-й
Светом святым, благодатию Духа, вельми освященна, сама за убогую грешницу всегда почиташе себе. Сего ради на милость Спасителя токмо надеющися, слезно святейшия Тайны, по Исповеди теплей прияла еси, о честная. И тако с Твоим Искупителем сердцем соединившися, и залог вечнаго Царства несумненно приявши, завет о любви и молитве и милостыни чадом и всем завещала еси.
Посем же возлегши, чотки молитвенныя вземши, и крест сотворивши, последнее слово рече: «Слава Богу всех ради! В руце Твои предаю дух мой. Аминь». И тако, яко свеща догоревши, тихо от земли в селения нетленныя отлетела еси, - в нощнем видении повелевши погребсти тело ея возле подружия мужа.
Мы же твоей непостыдней и мирней кончине умильне со сродники присными радующеся, во след твоему восхождению славно со ангелы хвалим, поюще:
Радуйся, смирения образ явившая в тяжкий последний твой час.
Радуйся, молитвы зерцало нам бывшая, дондеже взор твой угас.
Радуйся, невеста Христова, венцем над главою Женихом украшенная.
Радуйся, святыни храм чист, пред концем убрусом белым от Бога покровенная.
Радуйся, паче крин сельных по смерти в теле святем облагоуханная.
Радуйся, свещами, невидимою Силою возденными, в нощи осиянная.
Радуйся, милости ради к убогим, прешедшая легце мытарства.
Радуйся, кресты претерпевшая многи, достигшая Божия царства.
Радуйся, Милостивая Иулиание, похвало Муромская и жен украшение.

Кондак 12-й
Благодать за оставленный мир приносити молитвы приемши, возлюбленных и любящих тя на земли, любовию своею не оставила еси, небесных обителей светло достигши, блаженныя радости с прежде усопшими сподобилася еси. Духом же твоим наставляемии сынове твои благочестную жизнь проводиша, православие святое хранити друг друга учаще. Единая же дщерь твоя, Феодосия, вместо тебе иноческий чин восприемши, свято во схиме скончася, к тебе, яко птенец под криле, возлетевши. И мы днесь от сердца с любовию песни тебе составляюще, молим прилежно: моли и о нас Христа Бога, да с тобою вси песнь вознесем Ему присно и во веки веков: Аллилуиа.

Икос 12-й
Поет тебе, жено святая, веселыя песни надгробныя, Церковь Христова преславная, дивно и красно обретши, мощи твоя благовонны; и к лику святых тя сочисливши, от Самей Богоматере прежде зело ублаженую, радуется ныне пресветло: достойно бо славити Бога прославльших; честь бо, святым воздаваемая, Богу, во Святых почивающему, богоприличне возносится. Темже и мы, православнии людие, сердцем играюще, в Дусе ликующе, с Ангелы Церкви днесь вси припеваем согласно:
Радуйся, Муромския земли украшение.
Радуйся, Российския страны удобрение.
Радуйся, христианских жен красото.
Радуйся, и матерей святых высото.
Радуйся, ангельски в рай вознесенная.
Радуйся, Господом благословенная.
Радуйся, сродник своих похваление.
Радуйся, чтущих тя всех утешение.
Радуйся, Милостивая Иулиание, похвало Муромская и жен украшение.

Кондак 13-й
О, милостивая и чистая голубице, блаженная и праведная Иулиание! Обычною ти любвию приими похвалы сия теплыя; и яко мати жалостливая, о чадех своих пекущаяся, испроси нам от Спаса Премилостиваго единую милость – Духа Святаго Божественную благодать, в ней же свя блага земная и небесная суть сокровенна; да ею обогатившеся, безбедне житие сие скорбное прейдем и с тобою блаженное Царство Пресвятыя Троицы улучим, славно зовуще Ей: Аллилуиа, Аллилуиа, Аллилуиа.
/Сие – трижды; посем – 1-й икос, и кондак 1-й./

Молитвы ко Св. Иулиании Милостивой

Молитва 1-я
О, блаженная и Праведная Иулиание, от Пресвятыя Богородицы вдовою Милостивою чудне нареченная! К тебе, матери жалостливей, усердне притекаем, милость и нам подати молящеся. Ты бо, в житии своем кресты многи претерпевши, и сама искушена по всяческим бывши, молитвами своими можеши и нам помощи в горестех наших: яко одержимы есмы грехми многими, отягчени скорбьми велиими, и враги лютыми обуреваеми есмы. Испроси убо и нам, о крестоносная мати, дух кротости и терпения, во гресех искреннее покаяние, на враги невидимыя силу противления и тех одоления и во всех бедах и напастех твердое на волю Божию упование; да безропотне, во спасение душ наших, возмем крест свой, за Христом Спасителем нашим верно грядуще.
Паче же, Милостивая угоднице Божия, моли Премилостиваго Бога, да вселит и в нас, яко же в тя, благодать сердца, всех милующаго; и самех врагов благословляющаго; точию же себе единех тебе подобно, во гресех укоряющаго: любы бо, беззаконий наших ради, зело оскуде; и токмо именем единем себе являем ученики Христовы; сердцем же и делы язычницы суще, о себе самех самолюбне пекущися.
Исходатайствуй, о блаженная, и стране твоей Российстей и всем в разсеянии сущим, мир и благоденствие, наипаче же к твоему древлему благочестию возвращение, злобы и зависти угашение, братолюбия и примирения умножение, от страстей же покаянием очищение и благодатию освящение. Да вси паки единеми усты и единем сердцем исповемы Троицу Единосущную и Нераздельную во веки веков. Аминь.

Молитва 2-я
О, Милостивая Иулиание, сирых заступница, Крестоносная Мати, Щедрою десницею одари и нас, ныне тебе молящихся и испроси у Премилостиваго Бога, Ему же имя – Любы есть, богатыя милости: матерем чадородящем, буди благая помощница; в браце - чистоты и любве святая хранительница; чад малых и юности – мудрая скормительница; сирых и скорбных – жалостливая утешительница; грехами обуреваемых – сострадательная врачебница; от врагов искушаемых – крепкая защитница; и всем просящим твоего заступления Милостивая, перед Богом и Пречистою Богородицею – ходатаица.
Наипаче же умоли, святая угодница даровати нам благодать Всесвятаго Духа; да ею в житии сем охранаяемии и непрестанно спасаемии, с тобою прославим Премилостиваго Искупителя нашего Господа и Спаса Иисуса Христа, Емуже слава подобает со Всеблагим Его Отцем и Святым Прещедрым Духом, во веки веков. Аминь.


Иулиания, праведная, упоминается в числе святых Муромских в рукописи XVII века. В царствование Иоанна IV родилась Иулиания в пределах города Мурома от благочестивых родителей, дворян Недюревых. С юных лет начала проводить она время в посте, молитве и уединении и потому желала отречься от мира, но ее выдали замуж за дворянина Георгия Осорьина, человека добродетельнаго и богатаго. Блаженная Иулиания благочестивою своею жизнию умела обрести спасение и в дому своем. Она была попечительною материю всех неимущих и страждущих. Отказывая себе во всем, она до конца жизни своей не переставала оказывать благодеяния ближним. Праведная Иулиания скончалась 2 января 1604 года и погребена близ Мурома, в церкви св. Лазаря, в селе Лазаревском, где и память ея чтится 2 января за благоговейное житие ея, исполненное всех христианских добродетелей.[/spoiler]

[Раб божий Константин]

Святой праведной деве Иулиании, княжне Ольшанской.
[spoiler]Тропарь

Яко непорочная невеста Нетленнаго Жениха Христа, // праведная дево Иулиание, // со светлою свещею добрых дел // вошла еси в чертог Его Небесный // и тамо со святыми блаженства вечнаго наслаждаешися //. Тем же моли, Его же возлюбила еси // и Ему же девство твое обручила еси, // спастися душам нашим //.



Кондак 1

Избранной Господом девственною чистотою, // Богоблаженная дево Иулиание, // явилася еси Руси православной теплая молитвеннице, // благодатию духа Святаго исполненная, // предстояще Престолу Бога Вседержителя, // вознеси молитвы твоя о спасении нас грешных, // со умилением тебя взывающих, //

Радуйся, святая дево Иулиание, // непорочная Христова невесто прекрасная.



Икос 1

Ангельским житием и девственною чистотою в житиии земном украшенная, радостию о духе Святе была еси своим родителем, святая праведная дево Иулиание, княжна своего рода Ольшанского. Возлюбила бо еси молитвы, пост и бдение, ради спасения души, мирскую же славу презревши, возжеле небесную. Мы же память твою чтущи вопием ти сице:

Радуйся, дево святая, девственную чистоту свою, Богу посвятившая.

Радуйся, целомудренная дщере, с юных лет своих Христа возлюбившая.

Радуйся, отрасле чистоты, небесную радость от Бога приявшая.

Радуйся, княжно Ольшанская, родители своя в вере Божией укрепившая.

Радуйся, юносте благословенная, путь спасения юным открывающая.

Радуйся, святая дево Иулиание, // непорочная Христова невесто прекрасная.



Кондак 2

Видя Господь чистое житие твое с младых лет совершаемое во спасение души твоея, кротость и целомудрие, яви тя яко светлую свещу, указующую путь спасения во тьме неведения пребывающих, подая благодать сугубую всем Богу вопиющим: Аллилуйя.



Икос 2

Благоразумне заповеди Божией исполняя, святая дево Иулиания, велию силу благодати Духа Святаго в себе обрела еси. Молим тя, известная наших желаний ходатаице, принеси о всех чтущих тя молитвы твоя ко Господу, с любовию взывающих ти глаголами сицевыми:

Радуйся, ходатаице наша у Престола Божия непостыдная.

Радуйся, даров духовных всем к тебе притекающим у Господа испрошающая.

Радуйся, свеще светлая, путь к спасению верным освещающая.

Радуйся, яко предстательством твоим пред Господом о нас молящаяся.

Радуйся, Божий храм девственною чистотою украсившая.

Радуйся, святая дево Иулиание, // непорочная Христова невесто прекрасная.



Кондак 3

Сила Господа Всевышняго сохрани твое целомудрие в земном житии твоем. Девственною чистотою отошла еси в райские селения ко Творцу неба и земли. И тамо, яко цветоч прекраснейший, украшаеши собою места светла Царствие Небеснаго, воспевая со всеми святыми песнь Богови: Аллилуйя.



Икос 3

Имуще дар благодати Божией, святая девственница Иулиание, неоскудно помогаеши жаждущим спасения. Ты бо сохраняеши девство и чистоту, к тебе прибегающим, и молиши Господа о всех заблудших и веру потерявших, да вси приидем в радость Господа Бога нашего по молитвам твоим, воспевая ти:

Радуйся, девственница чистая, многия девы к вере Христовой обратившая.

Радуйся, души страдающии молитвою твоею ко Господу, врачующая.

Радуйся, чистоту и смирение собою являющая.

Радуйся, яко недуги различны молитвами твоими ко Господу целиши.

Радуйся, души отчаянных ко Христу направляющая.

Радуйся, всех во едино стадо Христово собирающая.

Радуйся, святая дево Иулиание, // непорочная Христова невесто прекрасная.



Кондак 4

Буря душевных помыслов смути митрополита Петра Могилу о мощах твоих, чистая дево Иулиание, маловерие и смущение поколеба его за мысли сии лукавыя, вразумляя его и на путь Истины Христовой направляя, пети Богу нашему: Аллилуйя.



Икос 4

Слыша о дивнем чудесе бывшем при обретении честных мощей твоих, святая дево Иулиание, яко тело твое быть аки живо во гробе, источая благоухание, братия Лавры печерския поставиша гроб твой в Велицею лаврской церкви. Достойные похвалы приношаху ти гласы сицевыми:

Радуйся, дево честная Богу чистотою молитвенною угодившая.

Радуйся, яко память твоя, братиею монастырскою величается.

Радуйся, яко тя невестою Христовою небесныя силы нарицают.

Радуйся, яко ты еси града Киева молитвеннице святая.

Радуйся, яко и вся Русь Православная тя пред Господом величает.

Радуйся, яко помощнице ты еси великая всех скорбящих и угнетенных.

Радуйся, святая дево Иулиание, // непорочная Христова невесто прекрасная.



Кондак 5

Благоблаженная дщерь Создателя нашего, девственницей и чистотою прославилася еси в житии своем. По смерти же мощи твоя благодатныя источают врачевство всем болящим, с верою к тебе прибегающим и молитвенно тя величающе гласами сицевыми поюще Богу: Аллилуйя.



Икос 5

Видеша тя во гробе, яко живу, множеством украшений одеяну, некий тать укра кольцо драгое с руки твоея. Внезапно закрича гласом великим и паде мертв. Чудо бысть сие на вразумление многим, да познают, яко ты еси грозная карательнице татей и верная защитительнице честне живущих, взывающих к тебе тако:

Радуйся, дево, непорочности и добрых дел благословление.

Радуйся, обидимых заступнице и всех скорбящих утешение.

Радуйся, татей и злых человек грозно карающая.

Радуйся, честне живущих радосте и охранение.

Радуйся, яко просящих защиты и вспоможения не отторгающая.

Радуйся, яко помощь небесную нуждающимся всем испросщающая.

Радуйся, святая дево Иулиание, // непорочная Христова невесто прекрасная.



Кондак 6

Проповедницею истины бысть житие твое, дево святая, и по смерти твоей в нетлении телеси твоего явилася миру источником дара исцелений. Вси бо притекающии к раце твоей с верою и любовию приемлют исцеления от недуг многих, в радости Богу вопиюще: Аллилуйя.



Икос 6

Светом Богоразумная явися мощи твоя в церкви Печерстей, дево честная знамения и чудеса источая. Вси бо величая тя, дивную во святых Господу Богу угодившую со умилением и любовию восхваляют тя сице:

Радуйся, цвете прекраснейший, рая небесного.

Радуйся, дивная похвало юностей непорочной.

Радуйся, лозо виноградная вертограда Божественнаго.

Радуйся, многия девы на путь ко Христу направляющая.

Радуйся, в светлости райския стези указующая.

Радуйся, церкви Печерстей лампадо Божественная.

Радуйся, святая дево Иулиание, // непорочная Христова невесто прекрасная.



Кондак 7

Хотяще воздати похвалу и честь деве святой Иулиании, святитель Петр Могила положи мощи во драгую раку и написа словеса сия: «по воле Творца Неба и земли живе во вся лета Иулиание, помощнице и великая в Небе заступница, и зде кости ея- врачевство противу всех страданий»... Памятуя сие и мы вси дивному во святых своих Богу вопием: Аллилуйя.



Икос 7

Новое чудо бысть в Велицей Лавре Печерстей у раце святыя девы Иулиании, яко та явися некому игумену монастыря Киевскому. Рече бо ему дева святая: «Аз бо есмь Иулиания, мощи коея почитывают в церкви Печерстей. Ты же не чтеши мя. Ради сего Господь посла тебе знамение сие, да веру имаши, яко аз причтена Богом ко святым девам, угодившим Ему», мы же воспоминая чудо сие воспоем ти во умилении зовуще:

Радуйся, дево святая, Господом Богом к святым девам причтенная.

Радуйся, яко ты еси в вере крепцей к Господу игумена укрепившая.

Радуйся, яко знамением сим и многие другия от неверия отвратившая.

Радуйся, яко мощи твоя зело прословляющая.

Радуйся, яко чтущия тя молитвою укрепляющая.

Радуйся, святая дево Иулиание, // непорочная Христова невесто прекрасная.



Кондак 8

Странное и преславное житие непорочныя девы Иулиании, удивиша многие, ищущии спасения. Явилася бо еси миру во девстве добротами преощищена, и в нетленном телеси, же Престолу Божию престоя, со всеми святыми непрестанно поеши песнь Богу: Аллилуйя.



Икос 8

Всех Творец и Создатель призва тя, святую деву, в чудесный свет Царствия Своего, Ты же велику силу восприимше, с Господем соединися. Не забуди и о нас, молитвеннице наша, умоляя Христа и Бога нашего о спасении всех нас, взывающих ти:

Радуйся, мудрая дево, с мудрыми девами в Царствие Небесное вшедшая.

Радуйся, свет Божественный душею своею узревшая.

Радуйся, велику силу благодати Господней приявшая.

Радуйся, сласти телесныя в мире сем презревшая.

Радуйся, с лики небесными Творца прославляющая.

Радуйся, делы благими душу свою украсившая.

Радуйся, святая дево Иулиание, // непорочная Христова невесто прекрасная.



Кондак 9

Вси ангелы небесныя зело воспеша непорочную деву Иулианию, яко душа твоя исполнися благодати Духа Пресвятого и вечныя жизни от Господа сподобившаяся. Умоли и о нас, дево чистая, Спаса нашего, да не погибнут души наша, непрестанно взывающии Господу: Аллилуйя.



Икос 9

Ветии многоглаголемые земных похвал изрещи не довлеют хвалы твоея, како ты являешися утверждением праведности и целомудрия. Како юная девственнице прияла благодать Божественную помогати в мире сем живущим хранити девство и чистоту к тебе прибегающим и вопиющим ти:

Радуйся, дево честная, благодать от Господа чтущим тя испрошающая.

Радуйся, во страдании живущих, молитвенно всем помогающая.

Радуйся, стези Господнии ищущим спасения указующая.

Радуйся, с юных лет своих ты Христу послужившая

Радуйся, славы божественныя ты удостоившаяся.

Радуйся, со Христом ты себе сочетавшая.

Радуйся, святая дево Иулиание, // непорочная Христова невесто прекрасная.



Кондак 10

Спаса нашего Христа Бога возлюбившая и с юных лет Ему девство свое обручившая, дево праведная Иулиание. Ты со светлою свещею с мудрыми девами ко Христу пришедшая и в чертог Его украшенный добротами души твоея всельшаяся непрестанно поеши песнь: Аллилуйя



Икос 10

Стена тверда бысть душа твоя в вере Христа Бога нашего, и яко свеща огнем Божественным возгорашеся, тако ты любовию соею возгореся к Создателю твоему. Чтущим же святую память твою, дево святая, буди заступлением непостыдным и надеждою неизменяемою, величие твое прославляющих глаголы сицевыми:

Радуйся, душевныя страсти своя ты умертвившая.

Радуйся, ко спасению всех призывающая.

Радуйся, благочестию нас научающая.

Радуйся, в повелении Божием многи укрепившая.

Радуйся, от искушений и злых человек прибегающих к тебе охранившая.

Радуйся, святая дево Иулиание, // непорочная Христова невесто прекрасная.



Кондак 11

Пение Богу непрестанно возносимое, ты святая дево, приносиши о чтущих тя, и имя твое прославляющих, Веру Православную, укрепляеши и духовное единение утверждаеши, всем помощи твоея просящим, Богу же вопиющим: Аллилуйя.



Икос 11

Светозарная радости душа твоя исполнится и неизреченныя любве Божественная, егда призва тя Господь от земных в небесныя селения райския. На свещнице небеснем, яко свеща горящая, душа твоя нощныя тьмы греховныя наши отгоняет и на стезю спасения всем путь указует. Припадая и мы из глубины сердец наших прославим тя сице:

Радуйся, жизни вечныя ты наша ходатаице преблагая.

Радуйся, яко за Русь Православную, ты молитвеннице пресвятая.

Радуйся, всем ищущим милосердия Божия всегда помогающая.

Радуйся, кадильнице благовонная молитвы о нас Богу приносящая.

Радуйся, дево, рясны златыми ты одеянная.

Радуйся, светом Божественным ты озаренная.

Радуйся, святая дево Иулиание, // непорочная Христова невесто прекрасная.



Кондак 12

Благодать Божественная ти дана от Господа сохраняти девственную чистоту и целомудрие. Честныя мощи твоя источают Божественныя дары исцелений и от внезапныя смерти избавления всем почитающим Тя и к Богу молитвенно прибегающим, вопиюще Ему: Аллилуйя.



Икос 12

Поет и хвалит тя в молитвах вся Киевская Русь и мир православный, ублажая святую кончину твою, яко мощи твоя положены бысте во ближних пещерах велицей Лавры Киево-Печерстей. Являешися бо тамо вторыми мощами из всех святых жен сподобившихся быти в ней, да и со всеми святыми отцы Печерстими и тя прославляем глаголами сими:

Радуйся, дево святая, яко и с преподобными отцы в Лавре прославляемая.

Радуйся, чистая, яко сердцем чистым Бога узревшая.

Радуйся, кроткая, яко кротостию своею многия ко Христу обратившая.

Радуйся, девственнице, с девствующими девами возвеличенная.

Радуйся, усердная молитвеннице, у Престола Божия молитвы о нас приносящая.

Радуйся, яко Русь православная житием твоим величается.

Радуйся, святая дево Иулиание, // непорочная Христова невесто прекрасная.



Кондак 13

О, святая непорочная и целомудренная дево Иулиание! Моление наше недостойное прими и принеси его ко Престолу Бога Вседержителя, прося чтущии тя, избавити от скорбей и болезней, от злых человек и напрасныя смерти. Ты бо еси молитвеннице помощнице и великая в Небе заступнице, да с тобою и мы воспоем победную песнь Богу нашему: Аллилуйя, Аллилуйя, Аллилуйя.

(Этот кондак читается трижды, затем читается икос 1 и кондак 1.)

Молитва

О, святая праведная дево Иулиание, княжно Ольшанская, помощнице всем жаждущим спасения исцеления от болезней душ и телес, принеси молитвы наша Приснодеве Марии за вся людии к вере Православней, да укрепят любовь взаимную и духовное единство. Ты, мудрая дево, велие силу благодати Божия в себе показавшая и в сонме святых Печерских прославленная, укрепи исповедников веры Православныя, подаждь им твердость и мужество, обрати заблудших к покаянию и исправлению, сохрани всю страну наша от глада, труса, потопа, огня, междуусобныя брани и от всех врагов видимых и невидимых. О, святая агнице Божие, яко имея дар мнози болезни целити и от всех козней врагов ограждати, исцели убо наша страсти душевныя и облегчи тяжкия болезни телесныя, отраду в скорбех даруй и избави нас от всяких бед и напастей. Призри на вся предстоящия честным твоим мощем (иконе) просящим твоея помощи сердцем сокрушенным и духом смиренным, да принесем во всем житии нашем плоды духовныя: любовь, благость, милосердие, веру, кротость, воздержание, да сподобимся жизни вечныя и да любовию твоею ограждаеми поем прослаленному тя Господу Иисусу Христу, Ему же подобает всякая слава и честь со Безначальным Его отцем и Пресвятым Животворящим Его Духом, ныне и присно, и во веки веков. Аминь.[/spoiler]

[Раб божий Константин]

АКАФИСТ всем преподобным Киево-Печерским.
[spoiler]
Кондак 1
      Богоизбранный полче и личе богокрасный, преподобнии отцы наши Печерстии, чудес многих источницы, иноческаго, постническаго общежития на Руси первоучители и наставницы, сие вам от душевнаго желания дерзаем принести похвальное пение. Вы же, яко имущи велие дерзновение к подвигоположнику Христу Богу нашему, молитеся Ему, молим вы, от всяких бед и зол нам избавитися, да с благодарением зовем вам:
     Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.


Икос 1
      Ангелоподобнаго возжеласте жития, отцы богомудрии, мирския многомятежныя молвы избегосте, в пещерах тесных и темных вселистеся, идеже труды велии и подвиги подъясте, да Христа приобрящете; темже и слышите от немощных нас и грешных сия песнопения:
     Радуйся, Антоние, воздержания, смирения, послушания и безмолвия зерцало;
     Pадуйся, веры православныя крепкое забрало.
     Радуйся, Феодосие, монашеская похвало;
     Pадуйся, обители твоея велелепная славо.
     Радуйся, Михаиле, первый архипастырю наш и учителю;
     Pадуйся, веры Христовой усердный насадителю и идолослужения искоренителю.
     Радуйся, Прохоре, чудотворче всеблаженный, хлебы сущими от былий и солию от пепла, гладом тающия люди пропитавый.
     Радуйся, Иоанне, постом неизреченным просиявый.
     Радуйтеся, Феодоре и Василие, во временней жизни взаимным любве Христове соузом себе связавшии;
     Pадуйтеся, от корыстолюбиваго князя Мстислава крепко пострадавшии.
     Радуйтеся, яко и по блаженней кончине вашей во единей раце дружелюбно почиете;
     Pадуйтеся, яко во единем часе к престолу Божию предстасте.
     Радуйтеся, вси преподобнии отцы наши Печерстии, всемирнии светильницы, великии и пpecлавнии чудотворцы.


Кондак 2
      Видя Христос Господь, яко во имя Его снидостеся купножительствовати, посреде вас обретеся, пособствуя вам в различных подвизех, наипаче же во брани со духи злобы поднебесней, и обогащаше вас благодатию Духа Пресвятаго: одному подая дар пророчества, другому же дары исцелений, иному власть изгоняти духи нечистии, вы же благодать сию приемши, не вознесостеся духом своим, но в простоте души и сердца со смирением и благодарением Благодателю Богу песнь воспесте: Аллилуиа.


Икос 2
      Разум неуклонен имуще и крепкою верою в Бога вооружившеся, пути спасительнаго держастеся, отцы прехвальнии, егоже и совершисте преславно с помощию Христа и Пречистой Его Матери; сию помощь и нам, хотящим богоугодному житию вашему подражати, испросите у престола Всевышняго, да благодарно воспоем вам:
     Радуйся, Поликарпе, главо пресветлая, жития святых конечнее списавый и воедино собравый;
     Pадуйся, яко с ними у престола Троицы Пресвятыя представый.
     Радуйся, Варлааме, уме благодатный, пещеру темную и тесную светлым и пространным палатам предпочтый;
     Pадуйся, златотканныя одежды на рубы иноческия пременивый.
     Радуйся, Дамиане, целебниче безмездный, молитвами и святым елеем болящих уврачевавый;
     Pадуйся, купножития на небесех с преподобным Феодосием у Господа себе испросивый.
     Радуйся, Никодиме, в печении хлебов священных тридесят лет потрудивыйся.
     Радуйся, Лаврентие, в затворе теснейшем многолетно подвизавыйся.
     Радуйся, Афанасие, дар слез и умиления от Господа получивый.
     Радуйся, Еразме, за украшение храма Божия Матере палату красоты неизреченныя в Небеснем Царстве от Христа стяжавый.
     Радуйся, Луко, заповедей Божиих усердный делателю.
     Радуйся, Нектарие, послушания неленостный исполнителю.
     Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.


Кондак 3
      Силою и благодатию, данною ти свыше, в животе твоем, Агапите блаженне, болезни различныя врачевавый. Благодать сия и сила тебе и ныне присущая, паче же и умножися. Темже молим тя: исцели наша недуги, уврачуй страсти душевныя и телесныя, да здрави суще душею и телом, воспоем прославльшему тя Христу: Аллилуиа.


Икос 3
      Имущи к вам веру, любовь и усердие, ходатаи будете жизни вечныя, отцы богоприятнии! Ваши бо молитвы многомогущии у престола Божия; сего ради и прибегаем к вам, яко великим помощникам нашим и заступникам, славяще вас сице:
     Радуйся, Иоанне, яко послушание и по кончине своей проявил еси;
     Pадуйся, яко старшему брату свой смертный одр уступил еси.
     Радуйся, Феофиле, яко братним послушанием от гнева исцелился еси;
     Pадуйся, яко вместо гнева умиление и слезы непрестанныя возымел еси.
     Радуйся, Кукшо священномучениче, яко язычников множество ко Христовой вере привел еси;
     Pадуйся, яко за Христа со учеником твоим во главу усечен был еси.
     Радуйся, Алексие, молитвы умныя добрый делателю.
     Радуйся, Григорие, икон святых благоговейный писателю.
     Радуйся, Савво, чудес великих творителю.
     Радуйся, Сергие, послушания прехвальный рачителю.
     Радуйся, Меркурие, житию безплотных поревнователю.
     Радуйся, Пимене многоболезненный, крепкий на Бога упователю.
     Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.


Кондак 4
      Бурный и широкий жития мирскаго путь возненавидевше, возлюбисте же вседушно узкую и прискорбную жития монашескаго стезю и сею усердна потекосте, отцы богомудрии; темже и Господь, видя ваше благое произволение, заповеда Ангелом своим споспешествовати вам и укрепляти вас. Сего ради, хотящему всем человеком спастися Христу, поем: Аллилуиа.


Икос 4
      Слышаще людие, яко Господь прославил святым нетлением телеса ваша и дарова вам благодать целити недуги и болезни, темже притекают к вам движимые верою, с Востока, Запада, Севера и Юга, похваляюще вас приветствии таковыми:
     Радуйся, Несторе, первый Русский бытописателю;
     Pадуйся, житий святых отцов Печерстих сказателю и усердный им во всем подражателю.
     Радуйся, Евстратие, доблий мучениче и постниче, сообразно самому Христу пострадавый;
     Pадуйся, все язвы Господа Иисуса на теле своем понесый.
     Радуйся, Елладие, затворников похвало.
     Радуйся, Иеремие, прозорливых славо.
     Радуйся, Моисее, целомудрия светило.
     Радуйся, Иоанне, девства победо.
     Радуйся, Марко, его же честнии руце гробы святым ископаша;
     Pадуйся, его же гласа мертвии послушаша.
     Радуйся, Николо княже, в послушание братии Печерстей всецело себе предавый.
     Радуйся, Григорие, иже потоплением в реце кончину блаженную приявый, его же тело пречестное в келлии чудесно обретеся.
     Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.


Кондак 5
      Видя Дионисий богомудрый телеса ваша во гробех святолепно почивающа, яже вниде покадити в день Пасхи Христовой, от избытка любве и благоговения к вам воззва: «Святии отцы и братия, ныне есть велик денъ: Христос воскресе!» И, о чудесе! Слышит абие от вас громогласное: «Воистину воскресе!» Дивяшеся чудеси сему преславному, поем воскресшему и пребывающему во век века Христу Богу: Аллилуиа.


Икос 5
      Разумнии звезды небесе пещернаго вы есте, отцы прехвальнии, путь иноческаго жития освещающии и на круге Русския Церкве православныя пресветло блистающии. Слава бо всечестных подвигов ваших во вся мира концы протече, исповедание же святыя веры вашея всю Вселенную облиста: того ради и дерзаем приносити вам сия убогия наша пения:
     Радуйся, Онисиме, яко теснотою затвора пещернаго в пространная селения райския прошел еси;
     Pадуйся, яко алчбою и жаждою насыщение бесконечное лицезрения Божия узрел еси.
     Радуйся, Матфее, яко за чистоту души и тела дара пророческаго сподоблен еси;
     Pадуйся, яко кротостию и незлобием высоких добродетелей достигл еси.
     Радуйся, Исаие, кладезю глубокий смирения;
     Pадуйся, источниче неиссякаемый чудотворений.
     Радуйся, Авраамие, сыне святаго трудолюбия.
     Радуйся, Нифонте святителю, поборниче Православия.
     Радуйся, Сильвестре, бисере пречестный.
     Радуйся, Пимене, сосуде Духа Святаго избранный.
     Радуйся, Онуфрие, языком молчаливый, умом хваливый Бога.
     Pадуйся, Анатолие, терпеливый душею, разумом целомудренный.
     Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.


Кондак 6
      Проповедницей нам является честная десница твоя, Спиридоне богоприятне, ею же православных чад твоих поучаеши, како персты слагати подобает во изображение креста святаго на челе, уста же расколоучителей заграждаеши, яве обличая их неправое учение о перстосложении; сим бо образом осенив себе крестным знамением отошел еси ко Христу, Ему же предстоя молися, да угасит безмерно горящую пещь страстей наших, да дарует нам истинное усердие славословити Его непрестанно во псалмех и пениих духовных в сей жизни и в будущей да сподобит нас пети Ему: Аллилуиа.


Икос 6
      Возсия яко пресветлое светило богознаменитая обитель ваша, отцы преподобнии и всю землю Русскую благодатию Божиею просвети: юже кровными поты воздвигосте и на ню же благодать свыше молитвами вашими и святыми подвиги привлекосте, ревнуя бо поревновасте пророчеству, еже рече: «На горах сих возсияет благодать Божия и вера умножится». Темже к вам, яко виновником пророчества онаго зовем:
     Радуйся, Арефо, яко Господь милость свою на тебе удиви;
     Pадуйся, яко Господь украденное богатство твое в милостыню тебе вмени.
     Радуйся, Феофиле, ему же земля бысть ложем, власяница одеждею.
     Радуйся, Сисое, ему же бдение бысть сном, слезы успокоением.
     Радуйся, Алипие, ему же Ангели в трудех святаго иконописания помощники быша.
     Радуйся, Симоне cвятитeлю, его же святии руцы жития святых написаша и нам на пользу душевную предаша.
     Радуйся, Никоне, Антония первый благоговейный учениче.
     Pадуйся, Феодосия в делех монастырских усердный сотрудниче и в душеспасительных подвизех рачительный соучастниче.
     Радуйся, Феофане, яко тело постом умертвил еси.
     Радуйся, Онисифоре, яко душу бденными молитвами оживил еси.
     Радуйся, Макарие, яко за жизнь святую истлением тела от Господа почелся еси.
     Радуйся, Анастасие, диаконе благоговейный и страдальче предивный.
     Радуйтеся, вси преподобнии отцы наши Печерстии, всемирнии светильницы, великии и пpecлавнии чудотворцы.


Кондак 7
      Хотя преблагий Господь страну нашу благодатию Своей обогатити и дати образ хотящим спастися, подвиже вас Духом Святым на вельми скорбное и богоугодное житие, им же удивисте не токмо человеков на земли, но и Ангелов на небеси: вы бо, о, отцы богоноснии, в пещерах заключившеся, аки во гробех, всеусердно в теплоте сердца и души, Единому Богу поработасте, богокрасно поюще песнь: Аллилуиа.


Икос 7
      Новыя жизни иноческия отцами и учителями явистеся, яже на Руси ниже именовася когда, сию вы насадисте и добре укоренисте. Темже безчисленныя множества монашествующих последующе душеспасительным стезям вашим благодарно вам воспевают:
     Радуйся, Авраамие, яко Христа Господа всею душею и сердцем возлюбил еси;
     Pадуйся, яко Его ради и труды велии затвора пещернаго подъял еси.
     Радуйтеся и вы, дванадесять братий прекраснии, яко церковь Божия Матере небеси подобную украсили есте;
     Pадуйтеся, яко за труды ваша динарий от Сына Ея Христа Бога, Царство Небесное восприяли есте.
     Радуйся, Исаакие, яко премногими страдании диавольскую прелесть низложил еси.
     Радуйся, Илие, яко воздержания подвиги и безстрастия благодатию обогатился еси.
     Радуйся, младенче мучениче Иоанне, яко кровь твою святую неповинно за Христа пролиял еси.
     Pадуйся, Никоне, яко на кресте простершему волею длани Христу терпением и незлобием вельми угодил еси.
     Радуйся, святителю Ефреме, яко пчела сот пресладок, тако ты Устав студийский в обитель Печерскую принесл еси.
     Радуйся, Тите блаженне, яко гневнаго беса смирением попрал еси;
     Pадуйся, яко тьму лукавых демонов далече от нас прогоняеши;
     Радуйся, яко свет, еже не гневатися на ближняго, собою нам проливаеши.
     Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.


Кондак 8
      Странное и преславное чудо благодати небесныя проявися воочию всех верных: пещера разбойников в храм Божий соделася: идеже бо грех преизобилова, тамо благодать приумножися, идеже терн беззакония укоренися, тамо кедры рая Христова возрасташа, идеже блато смрадное греха бяше, тамо источницы безсмертия воскипеша, идеже смерть обладаше, тамо Господь воцарися. Дивящеся изменению десницы Вышняго, зовем: Аллилуиа.


Икос 8
      Все ваше, преблаженные отцы, тщание, желание и попечение бяше, да всезлобному рода христианскаго врагу гордую главу попрати и сотрети, Господа же Иисуса Христа в душах и телесах ваших да возвеличите и прославите; сего ради приветствуем и вас сице:
     Радуйся, священномучениче Лукиане, яко уготовася тебе небесное жилище;
     Pадуйся, яко страдальцу, даровася тебе нескончаемое райское покоище.
     Радуйся, Лаврентие, яко суеты мирския избегл еси;
     Pадуйся, яко к общежитию с миром ангельским востекл eси.
     Радуйся, Пафнутие, яко, помня час смертный, непрестанно слезил еси;
     Pадуйся, яко при кончине от Ангелов утешения сподобился еси.
     Радуйся, Мартирие, яко за великую чистоту и постнические подвиги дара целити болезни сподоблен был еси.
     Радуйся, иерарше Иларионе, яко стадо словесных овец Христовых на пажитех Православия добре упасл еси.
     Радуйся, княже Феодоре, яко в честь и во славу Церкви православней много потрудился еси.
     Радуйся, Дионисие, яко «воистину воскресе Гоcподь» от преподобных отцев в день Пасхи услышал еси.
     Радуйся, Афанасие, яко красная мира сего презрев, блату вменил еси.
     Радуйся, святителю Феофиле, пастырю добрый, яко за пасомых тобою и живот положити готов был еси.
     Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.


Кондак 9
      Всем есте вся, отцы преподобнии, небесная бо врачества предлагаете нам и к безмездным лечбам своим вся ны созываете, не хитростьми человеческими, ни обязаньми, но действием Святаго Духа душевныя и телесныя исцеления преестественне подаете, еже приемлюще обильно, род всяк и возраст Благодателю и Промыслителю зовет благодарно: Аллилуиа.


Икос 9
      Витии многовещаннии риторскими своими языки не возмогут достойно воспевати вашея святыни, тем паче аз убогий словом и разумом, киими песньми восхвалю вас, о отцы, Ангелом равночестнии, обаче побужден усердием и любовию яже к вам, дерзаю венчати вас сими недостойными моими похвалами:
     Радуйся, Зиноне, постом и многими иными подвиги иноческаго жития светло просиявый;
     Pадуйся, смирением, кротостию и послушанием землю кротких наследивый.
     Радуйся, Григорие, яко зелием, им же питался, здравие болящим преподавый.
     Радуйся, Ипатие, святым отцем в болезнех со всеусердием послуживый и за сия благодать Духа исцеляти недуги восприявый.
     Радуйтеся, отцы преподобнии, их же пречестнии главы во здравие душ и телес наших миро источают;
     Pадуйтеся, их же пресвятии души в неизреченней славе Божию престолу предстоят.
     Радуйся, Моисее, яко молитвами, постом и веригами страсти умертвил еси.
     Радуйся, Иосифе, яко вратами смиреннаго и усерднаго послушания в вечный покой вшел еси.
     Радуйся, Павле, яко николиже в праздности времене препроводил еси, темже со труждающимися и обремененными водворился еси.
     Радуйся, Сисое, яко чрезмерными подвигами постничества не токмо человеков, но и Ангелов удивил еси.
     Радуйтеся, Леонтие и Геронтие, яко из младенчества Христа возлюбили есте;
     Pадуйтеся, яко во отрочестве в подвизех наставником соравнялися есте.
     Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.


Кондак 10
      Спасти хотя многих, всех обращения и спасения милостивно ищай премилосердный Христос Бог наш, других вас отцев Египта, Фиваиды и Палестины, — Руси прояви, да вами многих вразумит и покажет вашим житием путь ко спасению, в чем вы потруждшеся, добре преуспеете, в неведении сущих Евангельстей истине неленостно поучая, к правоверию приведосте и к хранению Божиих заповедей и богоугодному и чистому житию словом и делом непрестанно возбуждасте, Богу Помощнику песнь поюще: Аллилуиа.


Икос 10
      Стеною твердою и ограждением крепким будете нам, всехвальнии отцы, с теплою верою, усердием и любовию к вам прибегающим, ограждающе нас противу чувственных и мысленных врагов наших, да не убоимся их, но да побеждаим тии молитвами вашими ко Христу Богу, зовуще с благодарением к вам сице:
     Радуйся, Несторе, нижняя презревый, вышняя же возлюбивый;
     Pадуйся, яко пред кончиною самого Господа Иисуса Христа со Ангелы видети сподобивыйся.
     Радуйся, Феодоре, яко хранение устом своим положил еси.
     Радуйся, Памво исповедниче, боги языческия проклявый, имя же Господа небесе и земли исповедавый.
     Радуйся, Софроние, затвором крепким и железом тело стеснивый, душею же и умом со псалмопением к небеси непрестанно паривый.
     Радуйся, Панкратие, яко болящим благодатию Духа Святаго исцеления источаеши.
     Радуйся, Антоние, яко духи лукавыя от приходящих к тебе с верою проганяеши.
     Радуйся, Мардарие, нищеты и нестяжания любителю.
     Радуйся, Аммоне, древним отцем святым в подвизех всеусердный подражателю.
     Радуйся, Пиоре, страсти телесныя огнем воздержания попаливый.
     Радуйся, Мартирие, добродетельным нравом душу просветивый.
     Радуйся Руфе, во образ житием своим постникам и подвижникам бывый.
     Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.


Кондак 11
      Пение всякое хвалебное побеждается множеством преславных ваших подвигов и трудов чрезмерных, превосходящих житие человечестее, но ангельскому подобное: и похвалам от Ангел паче, а не от человек вам приносимым быти достояше, обаче усердное наше видяще произволение, с верою и любовию приносимое нами приимите пение и испросите нам оставление грехов, и да в добром исправлении и покаянии скончаем временное сие житие наше, в вечном же да сподобимся молитвами вашими пети Богу: Аллилуиа.


Икос 11
      Свет вам незаходимый возсия возненавидевшим страстей тьму, угодницы Божии преславнии: веселие же нескончаемое восприя вас, добрый подвиг со тщанием скончавшим. Темже предстояще престолу Христову, поминайте нас поющих вам сия:
     Радуйся, Евфросиние, горняго Иерусалима дши пречестная;
     Pадуйся, дольняго Иерусалима, нашего града Киева, мати пресветлая.
     Радуйся, Иулиане, дево, лилие прекрасная, произростшая в земном Христовом саде;
     Pадуйся, процветшая в небесном Его вертограде.
     Радуйся, Макарие священномучениче, яко до смерти верен пастырь был еси;
     Pадуйся, яко прежде, неже прияти ти престол на земли чувственный, на престолы мысленные предпослался еси.
     Радуйся, Кассиане, затворниче дивный.
     Радуйся, Арсение, яко за богоугодные временные, вечно от Христа упокоен еси.
     Радуйся, Евфимие, яко пощения ради твоего великаго и немолчнаго славословия Богу, райских сладостей насыщаешися и со Ангелы поеши.
     Радуйся, Вениамине, яко раздав имения твоя, на лоне Авраама почиваеши.
     Радуйся, Тите, яко земнаго царя воинство оставль, да Небесному Царю храбрейший воин будеши.
     Радуйся, Ахило, яко от юности распялся еси житию и страстем, да распеншагося волею на кресте Христа приобрящеши.
     Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.


Кондак 12
      Благодатию Всемилостиваго и Всещедраго Бога житием равноангельным пожисте, отцы духоноснии, чудеса многи содеясте, храм Пречистей Госпоже Деве Богородице пречуден создасте и яко невесту прекрасну златом, сребром и камением многоценным украсисте, в онь же людие от всея Вселенныя приходяще, восхваляют о вас Христа Бога, поюще Ему: Аллилуиа.


Икос 12
      Поюще ваше безмолвное житие, похваляем подвиги ваша — пост, молитвы, слезы, коленопреклонения, всенощныя бдения, плоти умервщления, духа сокрушение, долулегания, смирение, кротость, молчание, терпение, нищету, нeстяжание и вся та чтим, яже любви ради Христовы подъясте, тако воспевающе:
     Радуйтеся, Паисие и Меркурие, яко в неразлучней жизни и единодушней любви братской пожисте на земли;
     Pадуйтеся, яко единою жизнию и радостию вкупе наслаждаетеся со Христом и на небеси.
     Радуйся, Макарие, яко Самуил в юном возрасте в служение Господу предназначен был еси.
     Радуйся, Пимене, яко пшеница гумна Христова, в житницы небесныя предопределен еси.
     Радуйся, Силуане, яко на крилех поста и молитвы к Богу возлетел еси.
     Радуйся, Агафоне, яко на плещех добродетелей высоких в горныя подъят еси.
     Радуйся, Захарие, яко бесом страшен был еси, Ангелом же собеседник явился еси, с ними же и ко престолу Троицы Пресвятыя воспарил еси.
     Радуйся, Игнатие, княже пресветлый пещернаго града;
     Pадуйся, пастырю преподобный богоизбраннаго стада.
     Радуйся, мучениче младенче, яко за Христа от Ирода бесчеловечнаго чашу смерти испивый;
     Pадуйся, землю Востока кровию освятивый и нашу страну пришествием твоим благословивый.
     Радуйся, Лонгине, яко путем узким право шествовал еси, им же и рая Божия доспел еси.
     Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.


Кондак 13
      О Всеблаженнии и всяких похвалений превышнии, преподобнии отцы наши Печерстии, приимите сие малое вам приношение, якоже и Господь прият две лепты вдовицы: и не возгнушайтеся молением нашим, яко и Христос не возгнушался лобзания блудницы, и сподобите нас ходатайством вашим ко Господу в добром исправлении и покаянии скончати житие сие и с молитвою во устех, в сердце и душе отьити от сея временныя жизни к вечней, и предстати престолу Всевышняго, идеже вы предстоите и со Архангелы и Ангелы и со всеми святыми, песнь поюще: Аллилуиа.

Этот кондак читается трижды, затем икос 1-й и кондак 1-й

Молитва всем преподобным Киево-Печерским
      Преподобнии и богоноснии отцы наши Антоние и Феодосие, и вси преподобнии Печерстии, светила земная пресветлая, от темных мест пещерных в земли Русской славно просиявшии, и сию многими светозарными ангелонравнаго вашего жития звездами онебесившии, всю же Вселенную высоких добродетелей светлостьми и чудес божественных блистаньми удивившии, и ныне смертным западом плотски на время во гроб зашедше, душами со Христом Солнцем Правды, суще праведницы просвещаетеся, яко солнце во Царствии Небеснем: идеже молитвенная ваша к Богу Свету лучи о Отечестве своем простирающе, не забудите и нас, всегдашния своя молитвенники, в нощи страстей и скорбей пребывающия, свыше благодатными призирати осиянии; яко да во свете добродетельнаго вашего жития право ходяще, сподобимся зрети свет неприкосновенныя славы Божия, хваляще Его купно с вами в нескончаемыя веки. Аминь.


Молитва иная
      О угодницы Христовы, преподобнии отцы наши Антоние и Феодосие и вси святии Киево-Печерстии, светильницы пресветлые, святостию иноческаго жития первые просиявшие на земле Российстей, покровители града Киева и всего отечества нашего! К вам, молитвенникам теплым и предстателям непостыдным, усердно притекаем, в нуждах и скорбях наших утешения и помощи просяще. Помозите нам, рабам Божиим (имена), заступницы наши! Утвердите нас в вере святей, сохраните Церковь Божию от пагубных ересей и расколов, научите нас всегда творити заповеди Божия и вся предания церковная, от отец нам заповеданная, будите нам благосердые отцы и теплые молитвенницы, яко да прославим имя Живоначальныя Троицы, Отца и Сына и Святаго Духа во веки. Аминь.


Тропарь Собору преподобных отцев Киево-Печерских, в Дальних пещерах (преподобного Феодосия) почивающих
Тропарь, глас 4:
      Мысленное солнце и светлую луну первоначальных Печерских, со всем собором преподобных днесь почтим: тии бо церковную твердь озаряюще, просвещают во тьме страстей бедствующих, и подают от Христа Бога молитвами своими помощь во всех скорбех и душам нашим просят избавления.


Кондак, глас 8:
      Избраннии от родов угодницы Божии, святии преподобнии Печерстии, на сих горах добродетельми просиявшии, и вас земля не потаила есть, но небо отверзеся вам и райское селение. Темже мы похвальныя песни Богу прославльшему вас в памяти вашей приносим: вы же, яко имущии дерзновение, ваш собор почитающих от всех бед молитвами вашими заступайте, яко заступницы наши и к Богу ходатаи.


Тропарь преподобным отцам Киево-Печерским, в Ближних (Антониевых) пещерах почивающих
Тропарь, глас 4:
      Столп огнезрачный и светоносное солнце, возсиявшее на горе Печерстей, великаго Антония со всем собором Богоносных отец приводим Тебе, Христе, в молитву, ихже ради молим подаждь обители нашей благодать и душам нашим велию милость.


Ин тропарь, глас 2:
      Егда снидосте во гробы и самех себе заключисте, тогда страсти умертвивше плотския, спогребостеся Христу, Богоноснии, и диавольския в подземных разрушисте ограды. Сего ради ангели венцы с Небес вам подают.


Кондак, глас 8:
      Отцы всечестнии, личе богокрасный, чудес многих источницы, миро источающии, сокровища краснобогатная Господня, в земли сокровенная, не престайте, молим вы, о нас молитися ко Господу да зовем вам: радуйтеся, всему миру светильницы.


Ин кондак, глас 2:
      Лик постнический собрася умне, мысленныма зряще очима, приидите, людие, хвалами почтите, покланяющеся мощем их, любовныя принесите дары, тии бо суть к Богу ходатае и молитвенницы о душах наших.


Величание
      Величаем вас, преподобнии отцы наши Печерскии, и чтим святую память вашу, вы бо молите о нас Христа Бога нашего.


Празднование собора всех преподобных отцев Киево-Печерских в неделю 2-ю Великого поста.

Собор преподобных отцев Киево-Печерских, в Ближних пещерах (преподобного Антония) почивающих 28 сентября/11 октября

Собор преподобных отцев Киево-Печерских, в Дальних пещерах (преподобного Феодосия) почивающих 28 августа/10 сентября.[/spoiler]

[Раб божий Константин]

АКАФИСТ СВЯТЫМ ДЕВЯТОЧИСЛЕННЫМ МУЧЕНИКОМ, ИЖЕ В КИЗИЦЕ.
[spoiler]Кондак 1

Избрании от Царя Сил, Господа Иисуса,/ страстотерпцы Христовы девяточисленнии,/ от различных стран в граде Кизице во едино собраннии/ и Христа дерзновенне, мук и смерти не убоявшеся, исповедавшии,/ торжествуем духовне во святем празднице вашем/ и, воспевающе благодатную терпения вашего доблесть,/ молим вас, вои Христовы многострадальнии и утвержденнии в воле Христовой,/ и нам спасения испросите, зовущим:/

Радуйтеся, прехвальнии/ мученицы Христовы девяточисленнии.

Икос 1

Яко Ангели премирнии, вознесшеся мыслию от земных к небесным, ко Христу, Владыце всех, непрестанно веры очима взирающе, мученицы святии, Феогниде, Руфе, Антипатре, Феостихе, Артемо, Магне, Феодоте, Фавмасие, Филимоне, посреде кумирослужителей града Кизического исповедасте себе безбоязненно христианы быти и, силою Божиею укрепляеми, многия муки мужественне за Христа претерпесте и под меч главы ваша преклонисте, темже, ублажающе страдания ваша и усекновение, глаголем:

Радуйтеся, земныя радости презревшии;

Радуйтеся, благ небесных возжелавшии.

Радуйтеся, исповедницы Христовы непобедимии, веру непорочну соблюдшии;

Радуйтеся, страсти Христове последовавшии и смерть Христову смертию своею подражавшии.

Радуйтеся, силою Воскресшаго державу адову поправшии;

Радуйтеся, души своя в руце Божии предавшии и победныя венцы приемшии.

Радуйтеся, прехвальнии мученицы Христовы девяточисленнии.

Кондак 2

Видяще идолов полн сущь град Кизический, вы, о богомудренное мучеников Христовых сочетание девяточисленное, возмутистеся духом и, ревностию о Бозе горяще и благодатию Божественною укрепляеми, начасте провещавати и учити о имени Господа Иисуса, заблуждение идольское обличающе; людие же, тьмою неверия ослепленнии, взяша вас абие и связанных, аки злодеев, градскому в Кизице князю на истязание представиша; вы же стасте пред нечестивым князем и, оболкшеся во вся оружия Божия, яко воини Христовы вернии, никакоже отступисте от взбраннаго Воеводы, Господа своего, взывающе Ему: Аллилуиа.

Икос 2

Разумевше , яко претерпевый до конца, той спасен будет, терпением текосте, страстотерпцы Христовы, на предлежащий вам подвиг, взирающе на Начальника веры и Совершителя Иисуса, и муки и терзания телес ваших претерпели есте, радующеся и красующеся ранами, яже подъяли есте за любовь ко Господу вашему, темже:

Радуйтеся, яко Христа Господа, за ны душу Свою на Кресте положившаго, и вы, святии мученицы, взаим возлюбисте;

Радуйтеся, яко потщастеся Тому быти подобны мук терпением.

Радуйтеся, страдания и муки в торжество веры обратившии;

Радуйтеся, Христа ради излиявшимися кровью прославленнии.

Радуйтеся, яко блаженна земля, напоившаяся кровью вашими;

Радуйтеся, яко души своя любовию за Христа положисте.

Радуйтеся, прехвальнии мученицы Христовы девяточисленнии.

Кондак 3

Силою Божиею укрепляемии, мученицы девяточисленнии предивнии, не убоястеся прещений зловернаго князя Кизическаго, ниже козней невидимаго князя мира сего, но свидетельствовасте о Христе Иисусе, усты вашими исповедающе Того истиннаго быти Бога, Той бо даде вам уста и премудрость, имже не можаше что противу отвещати мучитель, но посрамляшеся, истиною побеждаемый, еще же и страданьми вашими свидетельствовасте все ваше к Богу желание, и ужасахуся людие, видяще ваше доблественное терпение, и познаваху на вас силу и помощь всесильнаго Бога, Емуже взывасте: Аллилуиа.

Икос 3

Имуще в памяти словеса Господня: и влас главы вашея не погибнет, веровасте тако: не токмо власы, Христа ради терзаемии, цели явятся во славе воскресения, но и самое тело, раны и раздробление за Христа претерпевшее, цело востанет со славою многою. Сего ради, страстотерпцы Христовы досточуднии, верою укрепляеми и о надежде славы Божия хвалящеся, доброе течение мученическаго подвига совершисте и души своя святыя в руце Бога предасте, темже и мы возносим вам сия песненныя хвалы:

Радуйтеся, пречудное мужество явившии;

Радуйтеся, яко надеждою воскресения Христос непобедимы вас пред мучители сотвори.

Радуйтеся, яко Христос преобразит тело смирения вашего, во еже быти сему сообразну телу славы Его;

Радуйтеся, вечныя блаженныя жизни сопричастницы.

Радуйтеся, яко со Ангелы песнь победную воспеваете.

Радуйтеся, прехвальнии мученицы Христовы девяточисленнии.

Кондак 4

Мучимый за святую веру во имя Христа Господа, буря искушений и бед возшуме на тя, Феогниде, но не возможе поколебати храмины души твоея, основана бо бе на Камени, Иже есть Христос, Сын Бога Живаго; егда бо приведоша тя к князю градскому на судище, тебе, во свидетельство мучителем, ни темница, ни жестокая биения и раны не отвергоша от Христа, но, по земле протяженный и нещадно жилами биенный и ногтьми железными стружаемый, в страдании крепок и мужествен явился еси, струями же кровей своих, яко багряницею, одеявся и сердечное око к Богу вперив, воспевал еси Ему: Аллилуиа.

Икос 4

Слышавше грозное повеление владыки нечестиваго, да отвергшеся Христа, жертвы принесете идолом, видяще же мучительская орудия, уготованная на вы, страстотерпцы достославнии, помыслисте день втораго пришествия на землю Владыки Христа и нестерпимый гнев суда Его, егда приидет во славе Своей с небес и вси святии Ангели с Ним; сего ради, воини Христовы, неодоленнии в терпении мнозе, предастеся на раны и муки Царствия ради Небеснаго, приимите убо от нас хвалебныя песни сия:

Радуйтеся, помянувшии словеса Господня: отвергшийся Мене пред человеки, отвержен будет пред Ангелы Божиими;

Радуйтеся, внимавшии глаголанным от Христа: не убойтеся от убивающих тело, души же не могущих убити, убойтеся же паче могущаго и душу, и тело погубити в геенне.

Радуйтеся, рекшии сами себе: мучительства ярых человек временна суть, муки же геенския вечны; да избудем мук вечных, временных убоятися не имамы;

Радуйтеся, раби Христовы, вернии даже до смерти, имже воздаст Господь венец живота.

Радуйтеся, яко на страшнем судищи Господь сущим одесную сопричтет вас и части возлюбивших Его сподобит;

Радуйтеся, имже речет Царь Славы: приидите, благословеннии Отца Моего, наследуйте уготованное вам Царствие от сложения мира.

Радуйтеся, прехвальнии мученицы Христовы девяточисленнии.

Кондак 5

Боготечная звезда, путеводящая к Солнцу Правды - Христу Богу, явился еси, святый мучениче Руфе, и светом подвига твоего страдальческаго возсиял еси людем, во тьме неверия седящим, сила бо благодати Господни в немощи твоей совершашеся. Сего ради, связанный по рукама и ногама, безчестие и поругание претерпел еси, на муки дерзнул еси и жизни не пощадил еси за Господа своего, но, жезлием и бичи узлаты жестоко биен и огнем опаляем, взывал еси к Нему велегласно: Аллилуиа.

Икос 5

Видевше себе в узах страждущия за имя Господа Иисуса Христа, Егоже возлюбисте и в Негоже веровасте, вы, страдальцы Христовы девяточисленнии, Духом Святым в скорби вашей и тесноте темничней утешаеми, радующеся, друг ко другу глаголасте: плоти и крови не пощадим, станем небоязненно ко всякому мучению, умрем о Христе, да во вся веки поживем с Ним, ликующе непрестанно. Темже, подвиги ваша чудныя славяще, восхваляем вас сице:

Радуйтеся, сердца ваша в руце Божии положившии;

Радуйтеся, благодати Святаго Духа избрании сосуди.

Радуйтеся, прекрасное Духа Святаго жилище;

Радуйтеся, правду, мир и радость о Дусе Святе стяжавшии.

Радуйтеся, вечныя нам радости благоприятнии ходатаи;

Радуйтеся, Духом Владычним утвержденнии, Имже радость спасения о Господе дадеся.

Радуйтеся, прехвальнии мученицы Христовы девяточисленнии.

Кондак 6

Проповедник Христова нас ради страдания явился еси, мучениче святый Антипатре, к столбу бо привязанный и терновными розгами биен злобными мучители, сообразен был еси Христу Господу, венцем от терния увенчану. Сего ради ко Христу взирал еси, нас ради уязвленному и поруганному, и, терпя за Него многия муки, якоже и Той претерпе за ны, воспевал еси Ему, Владыце твоему, от любве крепкия: Аллилуиа.

Икос 6

Возсиясте, святии девяточисленнии страстотерпцы, в граде Кизице светоч добродетелей христианских, яко светоносных звезд схождение, и просветисте нощь глубокую идолослужения. Христос бо Господь манием Своим Божественным посла вас, яко овцы посреде волков; вы же Агнцу Христу, волею закланному за мир Сыну Божию, истиннии последователие показастеся, мудростию Божиею, яже о Дусе Святе, просвещаемии, уразуместе мимоходящую жизнь и нерадисте о муках, вечныя ради жизни правую веру соблюдасте, о чесом удивляющеся, вопием к вам сице:

Радуйтеся, яко по слову Господню, мудри яко змия, мудри во благое, и цели яко голубие, прости во злое, бысте;

Радуйтеся, яко подобящеся Христу, Иже кроток бе и смирен сердцем, и вы досады и укорения кротце претерпесте.

Радуйтеся, яко в злостраданиих не противистеся озлоблявшим вас, но во смирении вашем яко овцы на заколение ведостеся;

Радуйтеся, яко добродетелем Христовым подражасте в житии своем.

Радуйтеся, агнцы, Христу себе в жертву принесшии;

Радуйтеся, ихже Христос ублажи и наследники земли живых показа.

Радуйтеся, прехвальнии мученицы Христовы девяточисленнии.

Кондак 7

Хотя враг спасения рода человеческаго устрашити тя, небоязненнаго воина Христова, страстотерпче святый Феостихе, подвиже на гнев и ярость злочестиваго князя града Кизика, иже повеле люте мучити тя; ты же, биен быв палицами без пощадения, чрепы строган и рожны избоден, благодарил еси Христа, яко сподоби тя мучения страдати, славы ради имене Его святаго. Силою Божиею укрепляем, отразил еси совет невидимаго врага и верно воспевал еси Богу: Аллилуиа.

Икос 7

Дивный Христос Бог и прославляяйся во святых Своих, дарова вам, мученицы, не токмо единомудренне в Него веровати, но и ходити единомышлением в добрем исповедании Божества Его и по Нем страдати. Христос бо собра вас, пресветлое мученическое воинство, в собор мучеников един, в Церковь Бога Жива, и пребысть с вами, темже радостно приносим вам таковая:

Радуйтеся, яко и вам рече Господь во Евангелии: идеже еста два или трие, собрани во имя Мое, ту есмь посреде их;

Радуйтеся, яко и вас утеши евангельским глаголом: в мире скорбни будете, но дерзайте: Аз победих мир.

Радуйтеся, яко и вам обетова, глаголя: се Аз с вами есмь во вся дни до скончания века;

Радуйтеся, яко дадеся вам победа Господем нашим Иисусом Христом.

Радуйтеся, яко благодатию Божиею укрепляеми, противитися мучителем, паче же и всей диавольстей силе, возмогосте;

Радуйтеся, яко Христос Бог бысть вам столп крепости от лица вражия.

Радуйтеся, прехвальнии мученицы Христовы девяточисленнии.

Кондак 8

Странноужасную и жестокую шествовал еси стезю, Артемо, мучеником славо, к колеси привязанный и сверху горы долу низпущенный, яко уди твои сокрушишася. Путь же твоего страдания подобно свету светится, Света Незаходимаго лучами озарен, зане на Господа взирал еси, мыслию и любовию ко Христу привязан. Христос бо Сила, Бог и Господь, Емуже взывал еси, страстотерпче: Аллилуиа.

Икос 8

Весь сонм ваш, мученицы святии девяточисленнии, надеястеся на Христа Бога нашего, яко имать с высоты смотрети на подвиг ваш со множеством святых Ангелов и помогати вам, немощным, будет. Верен же Бог, Иже не остави вас искуситися паче, еже могосте, но сотвори со искушением и избавление, яко возмощи вам понести, темже приимите от нас похвалы сия:

Радуйтеся, яко Бог утеши вас во всякой скорби вашей;

Радуйтеся, зане якоже избыточествоваху страдания Христова и вас, тако Христом избыточествова и утешение ваше.

Радуйтеся, яко сила Христова вселися в вы, сего ради вся возмогосте о укреплявшем вы Иисусе Христе;

Радуйтеся, яко любы Божия излияся в сердца ваша Духом Святым и дарова вам упование славы Божия непостыдное.

Радуйтеся, яко Господь Сил, Помощник в скорбех, с вами бысть, и ничтоже возможе вас разлучити от любве Божия;

Радуйтеся, яко души ваша, яко птицы, избавишася от сети ловящих и возлетеша в прекрасная селения райская.

Радуйтеся, прехвальнии мученицы Христовы девяточисленнии.

Кондак 9

Все тело твое уязвенно до костей имел еси, добрый страдальче Магне, егда мучитель, обнажив тя, на земли простре и бияше по хребту без милости и по чреву надолзе, таже клещами разжженными терзаше тя. Господь же, невидимою силою тебе соприсутствуя, облегчаваше болезни твоя и утверждаше сердце твое в терпении и любви Божественней, темже в муках воспевал еси Христу Богу: Аллилуиа.

Икос 9

Витии многовещаннии не возмогут изрещи вам достойныя хвалы, мученицы Христовы девяточисленнии, мечем бо преклонисте выи Христа ради, преклонышаго небеса и сошедшаго, и излиясте кровь вашу, общницы Сего страстей бывше. Мы же, недостойнии, сия песненныя дары приносим вам, глаголюще:

Радуйтеся, Христос бо даде вам чашу Свою пити и крещением, имже Сам крестися, креститися;

Радуйтеся, яко пред очима суть Божиима путие и подвизи ваши.

Радуйтеся, Христа вседушно возлюбившии;

Радуйтеся, яко со Христом пострадасте, да с Ним и прославитеся.

Радуйтеся, вечную славу и одеяние нетления от Него приемшии;

Радуйтеся, яко сокровища небесная вас прияша, яко пшеницу зрелу.

Радуйтеся, прехвальнии мученицы Христовы девяточисленнии.

Кондак 10

Спасти пришедшаго мир, любовию Сына Божия разжигаем, Феодоте мучениче, огня сильнейший явился еси. На сковраду пальну, вельми разжжену, наг возложенный, таже в клокочущий коноб вверженный, опаление и муку горькую доблественне презрел еси; от любве же Христовы никакоже разлучився, Тому пел еси умиленно: Аллилуиа.

Икос 10

Царю Предвечному, Христу во всем послушливи бывше, мученицы многострадальнии, от различных мест и стран в Кизице собрастеся во едино, и, во град вшедше, Христа Сына Божия, во плоти пришедшаго, проповедасте, славнии, и без страха слово Божие глаголасте. Егда же людие града Кизика благовествования Христова не прияша, вас же мукам и казням и лютой смерти предаша, вы, благовестницы Божии, исходяще оттуда не телом, но душею, не прах, прилепший вам от града, оттрясосте им от ног ваших, но бренная телеса ваша, за благовестие Христа умученная, остависте во свидетельство на ня в день судный, темже благоговейно взываем вам:

Радуйтеся, вашими христопоследовательными стопами во град Кизик шествовавшии;

Радуйтеся, Евангелия Христова благовестницы.

Радуйтеся, яко Бога воплощенна проповедасте;

Радуйтеся, яко муки, огнь и мечное усечение за Него в сладость вменисте.

Радуйтеся, яко людем, иже не прияша вы, ниже послушаша вас, во свидетельство подвига вашего, во спасение их подъятаго, телеса ваша честная остависте;

Радуйтеся, яко течение мученическаго подвига добре скончасте, веру соблюдосте, прочее соблюдется вам венец правды.

Радуйтеся, прехвальнии мученицы Христовы девяточисленнии.

Кондак 11

Пение приносим, Фавмасие, тебе, мучениче. Душа твоя яви крепкое терпение и подвига доблесть, приложиша бо тебе немилостивии мучителие раны к ранам и болезни к болезнем, ибо ножем избождаху и резаху плоть твою, еще же и копием ребра твоя люте пронзиша. Ты же, мучениче Фавмасие, сообразен быв Христу Господу, на Кресте от единаго из воинов копием в ребра прободенному, глаголал еси, радуяся и славя Бога: Аллилуиа.

Икос 11

Светоприемная богосиянная свеща сущим во тьме неверия и многобожия идольскаго явишася нетленная телеса ваша, святии девяточисленнии мученицы. Егда, воцарившуся великому Констатину, преста гонение и свет благочестия возсия по вселенней, тогда бо в Кизице, в храме вашем, многая чудеса и исцеления от святых мощей ваших быша, и того ради множество народа невернаго обращахуся ко Христу. Темже в похвалу вашу зовем:

Радуйтеся, яко людие града Кизика, зряще благодать Божию, в многоцелебных мощех ваших чудодействующую, прияша святую веру во Христе;

Радуйтеся, яко идоли и идольстии храми в Кизице сокрушишася, а вместо тех храми Божии воздвигошася.

Радуйтеся, подателие неоскуднии исцелений;

Радуйтеся, велия бо ваша, мученик Христовых, богоблагодатная сила, во гробех бо лежите и духи злобы прогоняете, и, яко живи, верою притекающим даете прошения.

Радуйтеся, яко чудес предивных сиянием верныя озаряете и неверныя ко Христу обращаете;

Радуйтеся, святыя бо мощи ваша яко знамя победное всем явишася.

Радуйтеся, прехвальнии мученицы Христовы девяточисленнии.

Кондак 12

Благодать Божественная укрепляше тя в мученичестем подвизе, Филимоне страстотерпче: за ребра багром железным оцепленный и на древе ужасно повешенный, непреклонен пребыл еси во исповедании Христа и Бога, Емуже хвалебную песнь воспевал еси: Аллилуиа.

Икос 12

Поюще многая и преславная чудотворения ваша, восхваляем вас, всехвальнии мученицы Христовы девяточисленнии: егда бо в Кизице благовернии христиане телеса ваша, из-под спуда земнаго изъемше и нетленная обретше, в храм, во имя ваше созданный, внесоша, чудесы, яко светлыми лучами, возсиясте от святых мощей ваших. Мы же, любовию воспевающе данную вам от Бога благодать исцелений, зовем:

Радуйтеся, яко по кончине вашей чудесныя целеб источники источи Христос Бог в прославление ваше;

Радуйтеся, духов нечистых от человека прогонителие.

Радуйтеся, сляченных целителие и трясавичными болезньми одержимых всеконечнии уврачевателие;

Радуйтеся, яко воднаго труда избавися муж некий, прикоснувся честней раце мощей ваших.

Радуйтеся, яко и самим призыванием честных имен ваших трясавичный недуг отгоняется и всякая болезнь всех с верою притекающих врачуется;

Радуйтеся, добропобеднии мученицы, венцы победы от Христа Спаса нашего увенчаннии, яко страдания ваша возмеришася вам славою и честию Царствия Небеснаго.

Радуйтеся, прехвальнии мученицы Христовы девяточисленнии.

Кондак 13

О добропобеднии и многострадальнии мученицы Христовы девяточисленнии, милостивно приимите от нас, недостойных и грешных, возносимое к вам ныне хвалебное песнословие; и, яко предстоятелие горния славы, имущии дерзновение много ко Христу Богу нашему, помяните ны, ублажающия вас любовию и чтущия ваша чудныя подвиги; испросите нам у Господа оставление грехов, в вере утверждение, в добрых делех укрепление, от бед и напастей избавление, да всегда благодарными усты воспеваем Богу: Аллилуиа.

Этот кондак читается трижды, затем 1-й икос и 1-й кондак.

Молитва 1

(из службы, составленной святителем Димитрием, митрополитом Ростовским, чудотворцем)

О всехвальнии святии мученицы, доблественнии раби Христовы, Феогниде, Руфе, Антипатре, Феостихе, Артемо, Магне, Феодоте, Фавмасие и Филимоне, иже Христа ради от различных стран собрастеся и Того совершенна Бога и Человека дерзновенно в Кизице проповедасте; принуждаеми бывше кумиром поклонитися, идолы попрасте и князя посрамисте, различных томлений и огненных прещений не убоястеся, и по различнем страдании острием меча посечени бысте, и пролиясте за Христа кровь свою, яко воду, и тою, яко багряницею, Церковь Христову, яко невесту, украсисте; темже и ныне, увенчаннии неувядаемым венцем безсмертныя славы, присно в неизглаголанней радости с лики ангельскими в небесных селениих водворяетеся, Божественным светом облистаеми и зрением Его доброты неизреченныя наслаждающеся. Сего ради и мы, смиреннии, к вам притекаем и, умильно на святый ваш образ взирающе, молим: вы молите за ны Христа Бога, яко дерзновение к Нему имущии, да вашими святыми молитвами всякаго недуга душевнаго и телеснаго избавимся. Вам бо от Бога дадеся врачебный дар от всяких скорбей с верою к вам припадающия целити, якоже и онаго славнаго мужа от трясавичныя болезни уврачевасте, да и мы, вернии, тожде получивше, почитаем вас, святии мученицы, толика дарования имущих от Христа Бога, Емуже и слава купно со Отцем и Духом Святым всегда, ныне и присно и во веки веков. Аминь.

Молитва 2

О велицыи угодницы Божии, святии мученицы Христовы: Феогниде, Руфе, Антипатре, Феостихе, Артемо, Магне, Феодоте, Фавмасие и Филимоне! Вы Царя Христа вернии слуги бысте и подвигом добрым подвизастеся, претерпевше за Него муки; темже, по неложному Его глаголу: идеже есмь Аз, ту и слуга Мой будет, - и вы ныне со Ангелы предстоите Владыце Христу и с высоты небесныя славы призираете милостивно на храм ваш и на моляющихся в нем.

Умолите убо Господа Сил Церковь Его Святую и православное Отечество наше сохранити от напастей и бед, от всех враг видимых и невидимых, низложити прелесть неверия и безбожия и стадо Христово избавити от волков, губящих е, глаголющих лукавое - доброе, и доброе - лукавое, полагающих тьму - свет, и свет - тьму; от шатания умов, яко трость, ветром колеблемых, и от греховнаго душ разслабления.

Богодарованную благодать чудес ваших, мученицы Христовы девяточисленнии, прострите ко всем нам, верою к вам прибегающим, и вся наша недуги душевныя и телесныя уврачуйте, и вся прошения наша во благо исполните.

Ей, страстотерпцы святии, молите за ны Господа, да низпослет нам Божественную благодать и дар Святаго Духа, всегда немощная врачующаго и оскудевающая восполняющаго, во ежи соделовати нам спасение свое, заступлением Христа Спаса нашего, и избавитися нам от сети вражия и грехов, и помиловатися душам нашим, да и мы купно с вами и всеми святыми прославим Бога, в Троице славимаго, Отца и Сына и Святаго Духа. Аминь.

Святии девяточисленнии мученицы, молите Бога о нас.

Тропарь, глас 8:

Святии девяточисленнии мученицы,/ от различных градов во един лик совокупившеся манием Божественным,/ мужественно за Христа пострадасте,/ невидимаго врага победисте,/ зловерныя князи и мучители посрамисте вашим терпением,/ огнем же любве Божия разжизаеми,/ вещественно вас огнь мучающий во хлад преложисте,/ темже дадеся вам от Христа Бога благодать/ трясавичную исцеляти болезнь,/ от неяже и многовидных страстей/ милостивно спасайте и нас предстательством вашим, молимся.

Кондак, глас 2:

Твердый и всесветлый лик мученик девяти,/ Трисолнечнаго Божества исповедницы,/ на судищи Тому начально взываху:/ кровь и души наша с телесы,/ яко непорочную жертву, приносим Тебе, Владыко:/ в лицех небесных Твоих сопричти, яко Бог Милостивый.

Величание:

Величаем вас, святии девяточисленнии мученицы, и чтим честная страдания ваша, яже за Христа претерпели есте.[/spoiler]

[Раб божий Константин]

Акафист священномyченикy Кипpианy и святой мученице Иyстине.
[spoiler]Кондак 1
Избpанный от диавольскаго слyжения на слyжение истинномy Богy и к ликy святых сопpичтенный, cвященномyчиниче Кипpиане, моли Хpиста Бога избавитися нам от сетей лyкаваго и побеждати миp, плоть и диавола, да зовем ти: Радyйся, священномyчиниче Кипpиане, скоpый помошниче и молитвенниче о дyшах наших.

Икос 1
Ангельския силы yдивишася, како от хyдожества волшебнаго обpатился еси, богомyдpе, к познанию Божественномy, покаянием обpел еси ангельское безстpастное житие. Мы же, обpащению твоемy дивящеся, вопием ти таковая:
Радyйся, обpащением твоим Ангелов yдививый;
Радyйся, лик святых возвеселивый;
Радyйся, мyдpость свою показавый;
Радyйся, за Хpиста венец пpиявый;
Радyйся, яко тобою бесы отгоняются;
Радyйся, яко тобою болезни исцеляются;
Радyйся, священномyчиниче Кипpиане, скоpый помошниче и
молитвенниче о дyшах наших.

Кондак 2
От хyдожества волшебнаго обpатився, богомyдpе, к познанию Божественномy, показался еси миpy вpач мyдpейший, исцеления даpyя чествyющим тя, Кипpиане со Иyстиною, с неюже молися Человеколюбцy Владыце, спасти дyши наша, поющих: Аллилyиа.

Икос 2
Разум несовершенен к pазyмению Истины Божественныя имея, в ослеплении языческом сyщy, бесовские хитрости изучая, yсеpдно тpyдился еси. Hо ypазyмев, яко боятся Креста Господня, немощи демонския познал еси, и отвpатився слyжения лyкаваго, во Храм Господень пpитекл еси, сего pади зовем ти:
Радyйся, хитpости демонския изyчивый;
Радyйся, пpелести слyжения его обличивый;
Радyйся, змия лyкаваго посpамивый;
Радyйся, мyдpых миpа сего мyдpейший;
Радyйся, pазyмнейших pазyмнейший;
Радyйся, священномyчиниче Кипpиане, скоpый помошниче и молитвенниче о дyшах наших.

Кондак 3
Сила Вышняго пpосветила есть yм твой, Кипpиане, егда не имеяше yспеха в чаpодействе Аглаида ко Иyстине, бесы pекли ти: мы Кpеста боимся и силy теpяем, егда Иyстина молитися имать. Он же pече им: аще вы Кpеста боитесь, то колико Распятый на Кpесте стpашнее вам есть, и познав слабость бесовскyю, вшед в Хpам Господень, пояше со всеми веpными: Аллилyиа.

Икос 3
Имеяй yм пpосвященный силою свыше, Кипpиан шедше к епископy пpося кpещения си, но той yбоявся отказал емy. Святый же иде в хpам Господень и стояше на Литypгии, не вышел есть из хpама, егда диакон возгласил: "оглашенные изыдите." "Hе выйдy из хpама, - pече Кипpиан ко епископy, - дондеже не окpестиши мя." Мы же, pадyющеся твоемy вpазyмлению, поем ти таковая:
Радyйся, силою свыше пpосвещенный;
Радyйся, Господом вpазyмленный;
Радyйся, силy Кpеста познавый;
Радyйся, демонов от себя отгнавый;
Радyйся, жизнь свою испpавивый;
Радyйся, стопы в Цеpковь напpавивый;
Радyйся, священномyчиниче Кипpиане, скоpый помошниче и
молитвенниче о дyшах наших.

Кондак 4
Бypя помышлений одеpжаше тя: како пpияти кpещение. Взем же свои чаpодейския книги, святый сложиша их на сpедине гpада и сжегл есть их, поя Богy: Аллилyиа.

Икос 4
Услышав о тебе епископ, о благом намеpении во Хpиста облещися, кpестил тя и чтецом во хpаме Божием поставил. Сего pади вопием ти сице:
Радyйся, дyхов злобы победивый;
Радyйся, чаpодейския книги попаливый;
Радyйся, хpистианином быти возжелавый;
Радyйся, святое кpещение пpиявый;
Радyйся, епископом наставленный;
Радyйся, чтецом во хpаме поставленный;
Радyйся, священномyчиниче Кипpиане, скоpый помошниче и молитвенниче о дyшах наших.

Кондак 5
Боготканнyю одеждy святаго кpещения пpиявше, о Кипpиане, yсеpдно молился к Богy о пpощении гpехов пpежде содеянных, неyстанно воспевая Богy: Аллилyиа.

Икос 5
Видев епископ подвиги и тpyды твоя, священномyчиниче Кипpиане, пост, многонощное бдение, коленопpиклонение, молитвы слезныя, и по пpешествии месяца поставил тя диаконом. Мы же, благодаpяще Бога, восхваляем тя:
Радyйся, день и нощь к Богy взывавый;
Радyйся, pyце свои к Hемy пpостиpавый;
Радyйся, о пpощении Того пpосивый;
Радyйся, слезныя молитвы Емy пpиносивый;
Радyйся, пламеннyю любовь к Богy показавый;
Радyйся, священномyчиниче Кипpиане, скоpый помошниче и
молитвенниче о дyшах наших.

Кондак 6
Пpоповедник истины Хpистовой явился еси, славный священномyчиниче Кипpиане, поpевновавый боговидцам Апостолом, пpосвещая люди Хpистовым yчением, они же познавше Господа Иисyса Хpиста поют Богy: Аллилyиа.

Икос 6
Возсия в сеpдце твоем свет Божественныя благодати, Кипpиане, вознесе тя на высотy дyховнаго совеpшенства, сана священническаго достигший, а послежде во епископа посвященный. Сего pади молитвами твоими ко Господy пpосвети и наша сеpдца тепле молящихся ти:
Радyйся, во епископа посвященный;
Радyйся, на высотy оpла вознесенный;
Радyйся, гpаде, веpхy гоpы стоящий;
Радyйся, светильниче пpед Богом гоpящий;
Радyйся, молитвенниче к Богy неyстанный;
Радyйся, yчителю, Богом даpованный;
Радyйся, священномyчиниче Кипpиане, скоpый помошниче и
молитвенниче о дyшах наших.

Кондак 7
Хотя Человеколюбец Господь всем спастися, даpова нам дивнаго молитвенника, застyпника и целителя от дyхов злобы поднебесных, делы бо и словесы твоими пpиводил еси многих к покаянию и испpавлению гpеховныя жизни, наyчая всех пети Богy: Аллилyиа.

Икос 7
Hовый мyдpейший вpач еси миpy, священномyчениче Кипpиане, понеже молитве твоей никакия чаpодейственныя дела пpотивостати не могyте, сейчас же pазpyшаются и пpогоняются, от злых человек пyщенныя и лyкавых бесов. Мы же видяще в тебе таковyю Божию силy, вопием ти сице:
Радyйся, волшебных козней pазpyшителю;
Радyйся, стpашных бесов пpогонителю;
Радyйся, от тебя же дyхи злобы, яко дым исчезают;
Радyйся, тяжко мyчимых скоpо оставляют;
Радyйся, от бед и скоpбей скоpо избавляющий;
Радyйся, стpадания в pадость обpащающий;
Радyйся, священномyчиниче Кипpиане, скоpый помошниче и молитвенниче о дyшах наших.

Кондак 8
Стpанное чyдо является пpитекающим к тебе с веpою, священномyчиниче Кипpиане, ибо данною тебе от Бога благодатию изгоняти дyхи нечистыя, мyчащия человека, бесы изгоняются, больные изцеляются, и поют Богy: Аллилyиа.

Икос 8
Всем сеpдцем пpедался еси Богy, и всею дyшею возлюбил еси Его, все твое тщание и желание напpавляя во еже исполнити волю Его, ты же, яко пастыpь добpый, не отpинyл еси бедами отягченных; но пpедстательствyеши в молитвах пpед Господом, даpyя исцеления и yтешение. Мы же, восхваляюще любовь твою к Богy, взываем ти сице:
Радyйся, всем сеpдцем Хpиста возлюбивый;
Радyйся, добpодетельми пpеисполненный;
Радyйся, недyгyющим и pазслабленным поможение;
Радyйся, в скоpбех и печалех yтешение;
Радyйся, наветов и искyшений от миpа, плоти и диавола находящих, пpогонителю;
Радyйся, всех болезней дyшевных и телесных изцелителю;
Радyйся, священномyчиниче Кипpиане, скоpый помошниче и молитвенниче о дyшах наших.

Кондак 9
Вся Ангельская воинства возвеселистася, видя тя воина Цаpя Hебеснаго непоколебима и со деpзновением Хpиста пpоповедавша, егда веден был на мечное сечение вместе со Иyстиною. Ты же болезноваше за нея: да не отpечется от Хpиста, егда yвидит тя yсекнyта, yвещал еси мyчителей, да испеpва ю, а по ней и тя yсекнyю, подклонив же под меч главы своя Богy воспели есте:
Аллилyиа.

Икос 9
Ветии многовещании не возмогyт по достоянию восхвалити стpадания ваша за Хpиста, не yбоялися есте пpещений лютых; но со светлыми лицами пpедставше сyдилищy всех веpных воспевати вам сице:
Радyйся, веpы Хpистовой непоколебимии исповедницы;
Радyйся, Пpечистыя Тpоицы деpзновении пpоповедницы;
Радyйся, мyчения лютая ни во чтоже вменившии;
Радyйся, стpадания ваша в хpамах Божиих величаются;
Радyйся, священномyчиниче Кипpиане, скоpый помошниче и молитвенниче о дyшах наших.

Кондак 10
Спасти хотя дyши всех одеpжимых нечистыми дyхами, не пpеставал еси взывати ко Господy, священномyчиниче Кипpиане, тебе бо дадеся благодать молитися за ны, да помилованы и очищены воспоем Богy: Аллилyиа.

Икос 10
Стена твеpдая и кpепкая огpада бyди нам, священномyчиниче Кипpиане, от вpаг видимых и невидимых, с теплою веpою и любовию к тебе пpибегающих, да огpаждаемы и спасаемы тобою, воспоем ти сице:
Радyйся, смиpением дyхов злобы победивый;
Радyйся, огнем молитвы стpелы вpажия попаливый;
Радyйся, от вpаг видимых и невидимых стено и огpаждение;
Радyйся, Пpавославныя Цеpкви пpеславное yкpашение;
Радyйся, оставленных вpачами пpедивное поможение;
Радyйся, пpелюбимое скоpбящих yтешение;
Радyйся, священномyчиниче Кипpиане, скоpый помошниче и молитвенниче о дyшах наших.

Кондак 11
Пение непpестанное Пpесвятей Тpоице паче иных пpинесл еси, священномyчениче Кипpиане, за Господню милость к падшим гpешником, Иже благоволи недостойного достойным сотвоpити и сопpичесть святомy Его стадy. Мы же, благодаpяще Бога за таковyю милость к нам гpешным, зовем Емy: Аллилyиа.

Икос 11
Светозаpная свеща был еси, богомyдpе, в Цеpкви Хpистовой, пpосвещая невещественным светом дyши веpных. Пpосвети и наша гpехом отягченная сеpдца, поющих ти таковая:
Радyйся, яко Господь милость Свою к падшим гpешником на тебе показал еси;
Радyйся, из pова погибели яко овча заблyдшее изъял есть;
Радyйся, из недостойного достойным сотвоpенный;
Радyйся, святомy стадy Хpистовy сопpичтенный;
Радyйся, яко светом невещественным дyши пpосвещаеши;
Радyйся, заблyдших на пyть пpавый наставляеши;
Радyйся, священномyчиниче Кипpиане, скоpый помошниче и молитвенниче о дyшах наших.

Кондак 12
Благодать дана ти от Бога попиpати силy вpажию и всякое сатанинское нахождение, победил бо еси вpаги твоя и мyченической кончины достигл еси, ныне же пpедстоя пpестолy Цаpя славы, молися о нас, да избавимся от пленения диавольского, и избавлены вопием Богy: Аллилyиа.

Икос 12
Поюще pевность твою по Бозе, дивная и пpеславная чyдеса твоя, величаем и восхваляем тя, священномyчениче Кипpиане, таковyю благодать от Бога пpиемшаго, молим же тя, егда в час смеpти нашея демонския полчища окpyжат дyши наша, тогда явм нам застyпление свое, да избавлении тобою, воззовем ти сице:
Радyйся, от находящих сил скоpое защищение;
Радyйся, от скоpбей и печалей избавление;
Радyйся, Хpиста до конца возлюбивый;
Радyйся, дyшy свою за Hего положивый;
Радyйся, в Кpове Агнчей омывыйся;
Радyйся, во двоpех Господних вселивыйся;
Радyйся, к сонмy святых сопpичтенный;
Радyйся, Тpисиянным Светом озаpенный;
Радyйся, священномyчиниче Кипpиане, скоpый помошниче и молитвенниче о дyшах наших.

Кондак 13
О пpедивный и пpеславный yгодниче Божий, священномyчениче Кипpиане, скоpый помошниче всем к тебе пpибегающим, пpиими от нас недостойных хвалебное пение сие, от недyгов исцели, от вpаг видимых и невидимых застyпи и вечнаго мyчения избавитися нам Господа yмоли, да с тобою воспеваем: Аллилyиа (тpижды).
Этот кондак читается тpижды, потом снова читается икос 1, кондак 1, и читается молитва.

Молитва священномyченикy Кипpианy
О, святый yгодниче Божий, священномyчениче Кипpиане, скоpый помошниче и молитвенниче о всех к тебе пpибегающих. Пpиими от нас недостойных хваление наше, и испpоси нам y Господа Бога в немощех yкpепление, в болезнех исцеление, в печалех yтешение и всем вся полезная в жизни нашей. Вознеси ко Господy благомощнyю, твою
молитвy, да огpадит нас от падений наших гpеховных, да наyчит нас истинномy покаянию, да избавит нас от пленения диавольскаго и всякаго действия дyхов нечистых, и избавит от обидящих нас. Бyди нам кpепкий побоpник на вся вpаги видимыя и невидимыя, во искyшении подаждь нам теpпение и в час кончины нашей яви нам застyпление от истязателей на воздyшных мытаpствах наших, да водимыя тобою достигнем Гоpняго Иеpyсалима и сподобимся в Hебесном Цаpствии со всеми святыми славити и воспевати Всесвятое имя Отца и Сына и Святаго Дyха во веки веков. Аминь.

Молитва священномyченикy Кипpианy и святой мученице Иустине
О святие священномучениче Киприане и мученице Иустина! Внемлите смиренному молению нашему. Аще бо временное житие ваше мученически за Христа скончали есте, но духом от нас не отступаете есте, присно по заповедем Господним шествовати нас научающе и крест свой терпеливо нести нам пособствующе. Се, дерзновением ко Христу Богу и Пречистей Его Матери стяжали есте. Темже и ныне будите молитвенницы и ходатаи о нас недостойных. Будите нам заступницы крепции, да заступлением вашим сохраняеми невредимы, от бесов, волхвов и от человек злых пребудем, славяще Святую Троицу, Отца и Сына и Святаго Духа, ныне и присно и во веки веков. Аминь.[/spoiler]

[Раб божий Константин]

Акафист святому преподобному и богоносному отцу нашему Киприану Стороженскому.
[spoiler]Кондак 1
Избранный наставниче и предивный пред Богом о нас попечителю, во всяком благом устремлении скорый помощниче и пасхальной радости Духа Свята испросителю, преподобне отче Киприане, возсиявый земли Ладожскей, аки чудный свет; многим воздержанием житие твое украсивый на земли, сего ради и венцем венчанный на Небеси, яко прехвальный подвижниче жития строгаго; похвальное воспеваем ти пение. Ты же, имеяй велие дерзновение ко Всесвятей Троице, от всяких нас бед свободи, с любовию зовущих ти:
Радуйся, преподобне отче Киприане, чудотворче и дивный молитвенниче о душах наших.

Икос 1
Ангелом Творец, благоплодную бо доброту сердца твоего провидев, призва тя, всеблаженне отче наш Киприане, от чреды разбойников морских во служение Себе и людем Своим в лице преподобных, благодатию своею преобрази душу твою, озари тя и дарова тя миру в утешение, праведных дел во утверждение, промысла и воли Божией во исполнение. Мы же, обряще сокровища сия, с радостию вопием ти:
Радуйся, воине Христов добропобедный,
Радуйся, Живаго Бога служителю благий и верный.
Радуйся, на высоту самоотверженной пламенней лювови восшедый.
Радуйся, яко светло озаряеши всех ублажающих тя,
Радуйся, во грехе отпавшим от Христа возвращение ко Спасителю.
Радуйся, истиннаго просвещения и христианскаго благочестия ревностный насадителю,
Радуйся, кающихся грешников, сирых и убогих милостивый покровителю.
Радуйся, преподобне отче Киприане, чудотворче и дивный молитвенниче о душах наших.

Кондак 2
Видев тя на езере Ладожскем и иных просторах водных разбоем и грабежами промышляющего, святый преподобный Андриан Ондрусовский, возвести ти пагубу пути сего и к покаянию и примирению со Христом подвигни, ты же, Киприане, глаголом богоноснаго старца слелуя, отвратился еси от мерзости греховней и начало благое в Бозе положил еси, воспевая просветившему тя Всеблагому Спасителю песнь покаяния и благодарения: Аллилуйя!

Икос 2
Разум и вся чувства твоя в вере Христовой утвердил еси, добромысленный Киприане, советом старца Андриана внимая, слезами горячими покаяния глубочайшего омыл еси грехьми оскверненную душу твою, евангельского образу благорузумнаго разбойника последовавше, олицетворяющего всех верующих и упование на Милосердие Христово непреложно возлагающих. Сему же и нас, грешных и неразумных чад Отца Небеснаго, настави, да славим тя, заступниче наш и покровителю, славословиями сими:
Радуйся, советом нечестивых не покоривыйся.
Радуйся, дом добродетели на камени заповедей утвердивый;
Радуйся, фараона мысленнаго в море смирения потопивый;
Радуйся, противу мира, плоти и диавола брань мужески подъявшый;
Радуйся, венец победы от Подвигоположника приимый;
Радуйся, Господа серафимскою любовию возлюбивый;
Радуйся, чести безплотных на небеси сподобльшийся;
Радуйся, идеже Христос в телеси, тамо и ты пребываеши:
Радуйся, преподобне отче Киприане, чудотворче и дивный молитвенниче о душах наших.

Кондак 3
Сила велия любве ко иноческому житию явися в тебе, отче Кипране, яко некий огнь божественный в душе твоей распаляемь. Сего ради, оставив мир и вся сокровища твоя, неправедно добытыя, покаянными слезами омывая велию скверну греховную, на служение Христово уготовал еси душу твою, притекл еси в пределы Сторожевския, иже на брезех езера Ладожскего суть, благодарне за благодать примирения поя на всякое время Всемилосердному Иисусу: Аллилуиа.

Икос 3
Имея крепкую веру, и возжелав спасения вечнаго, пустынный мыс возлюбил, блаженне Кипране. Крест святый водрузил на нем и часовню поставил с малой хижиной; и всем прежним соратником твоим по промыслу разбойному, яко облак светел и росоносен явился еси, пламень праведно движимаго на ны за грехи наша гнева небеснаго утишающий и зной страстей душевных и телесных охлаждающий, иссохшия сердца наша оживляющий и плоды добродетелей приносити помогающий всем воспевающим ти таковая:
Радуйся, всего себя водительству Божию предавый;
Радуйся, узкий путь монашескаго жития избравый;
Радуйся, древних подвижников усердный соревнителю;
Радуйся, добродетелей христианских рачителю;
Радуйся, любовь велию к Богу показавый ;
Радуйся, в силе Его преспевавый;
Радуйся, пустыннолюбцев в искании Бога усердный сподвижниче;
Радуйся, за враги своя и за вся теплейший молитвенниче;
Радуйся, преподобне отче Киприане, чудотворче и дивный молитвенниче о душах наших.

Кондак 4
Бурю лютых искушений всеусердным упованием твоим на Христа Распятаго победил еси, богоблаженне Киприане, и в новосозданней обители с радостию трудныя подвизи богоугодныя подъял еси, яко крест нищетолюбия от Господа добровольно на рамена свои приял еси, в Богообщении, во благости и чистоте пожившие, житие твое благоугодное с неземным умилением и даром слез в образ подражания нам оставил еси. Мы же, дивящеся Божию попечению о тебе, святый отче, с надеждою вопием Вседиржителю Нашему: Аллилуиа.

Икос 4
Видевше по Бозе житие твое, преподобне отче, ближния и дальния прихождаху к тебе, единии благословения ради и наставления твоего, друзии прошения ради молитв твоих, инии - во еже обитати с тобою, овии воззрения токмо ради на пресветлое лице твое. Ты же, любвиобильне, содержа во уме слово Господне: грядущего ко мне не изжену вон, никогоже отринул еси. Темже приими от нас песнь сию:
Радуйся, непостижимую действующую в тебе силу Божию явивый;
Радуйся, звездо, путь ко Христу показующая;
Радуйся, заблуждших исправление от путей беззаконных;
Радуйся, благодатный врачу убогих и немощных;
Радуйся, щите веры, притупивый стрелы лукавых;
Радуйся, молние, разгоняющая враги видимыя и невидимыя;
Радуйся, поборниче Христов, в мужестве твердый и неодолимый;
Радуйся, столпе Святыя Церкве Христовы непоколебимый;
Радуйся, преподобне отче Киприане, чудотворче и дивный молитвенниче о душах наших.

Кондак 5
Божию милость видим на тебе, преподобне отче Киприане, яко предстательством твоим пред Всемогущим Господем Нашим путников, по водам шествующим, от бури избавляеши, корабли от ярых волн по молитвам твоим укрываеши, яко щитом от смерти благодатным Божиим заступлением окружаеши, в покаянии утверждати всех не уставаеши. Сего ради и мы благодарственно вопием о тебе Всемудрому и Премилосердному Господу: Аллилуиа.

Икос 5
Видевши обитель твою, всехвальный отче Киприане, велием, но с любовию подъятым трудом, созданную, красующуюся миром и иноческими добродетельми, московский святый благоверный царь Феодор Первый радуяся о Милосерднем Спасе Нашем, новый светильник в земли Российскей возжегшем, и дарами и грамотами одари богоспасаемый монастырь твой. Мы же славим Всесвятаго Господа Нашего и тебе, прехвальне Киприане, величаем сице:
Радуйся, яко красная мира сего ни во что же вменивший;
Радуйся, в тиши лесной спасение искавший;
Радуйся, ко Единому Господу очеса своя выну имевший;
Радуйся, во вся дни живота своего упование свое в Нем утверждавший;
Радуйся, всякия правды Спасовой исполнению послуживший;
Радуйся, Христову веру и благочестие в стране нашей утверждавший;
Радуйся, таинству спасения людей российских послуживший;
Радуйся, сего ради всем благовестие Христово им возвестивший;
Радуйся, преподобне отче Киприане, чудотворче и дивный молитвенниче о душах наших.

Кондак 6
Проповедник истины и пастырь добрый явился еси, всехвальне Киприане, одебелевшия сердца к покаянию обращая и сострадати немощным душею навык, яко приял еси от Господа любовь нелицемерну, тою и наша сердца возгрей воспевати присно Богу во умилении и исповедании теплом, и ближнему во благое послужити настави ны, вопиющия о тебе Госповеди: «Аллилуйя!»

Икос 6
Воссиял еси светом любве небесныя всем ближним твоим, прехвальне отче Киприане, яко воистину пастырь добрый людем твоим явился еси, веру живую и действенную в сердцах возгревая, умиления дар подая и ожесточение сердечное милостивно врачуя, братий твоих пастырской мудрости обучил еси, еже сострадати всякому грешному человеку тех наставляя, и друг друга тяготы носити поучая, сего же ради с надеждою вопием ти сице:
Радуйся, чистоты сердечной изрядное умножение;
Радуйся, ревнующим о правде пречудное укрепление;
Радуйся, дивное сияние вечней истины Евангельския.
Радуйся, великий предстателю бедствующих в море житейстем;
Радуйся, благодатный утешителю всех имя твое славящих;
Радуйся, скорый послушниче всех с верою тя призывающих;
Радуйся, сущих в пленении освобождение;
Радуйся, от глада и болезней наше спасение;
Радуйся, преподобне отче Киприане, чудотворче и дивный молитвенниче о душах наших.

Кондак 7
Хотя Человеколюбец Господь явити в тебе, преподобне отче наш Киприане, свое неизреченное к людям милосердие, показа тя яко воистину светило богосветлое: ты же исполняше завет святаго старца Андриана был для всех отцем и наставником, врачем немощей духовных и телесных. Темже, сиянием подвигов твоих просвещены и хлебом учения твоего насыщени, тебе усердно величаем и прославльшему тя Христу вопием: Аллилуиа.

Икос 7
Дивным и святым подвигом пречуднаго Андриана Ондрусовскаго, житию его безпорочно последовал еси, преславне отче наш Киприане. Братии служением неленостным, пощением, бдением, еще же и плоти твоем, умерщвлением: мы же видяще толикия труды твоя, спасения ради подъятыя в хладнем полноцнем краю подъятыя, величаем мужество и мудрость твою духовную и таковыя похвалы с любовию приносим ти:
Радуйся, в подвизех древним пустынником поревновавый;
Радуйся, мучительства страстей мудре избежавый;
Радуйся, единому Богу служити восхотевый;
Радуйся, мраз и глад мужески претерпевый;
Радуйся, любовию Божественною душу и тело твое согревавый;
Радуйся, злострадания телесная паче плотскаго упокоения возлюбивый;
Радуйся, яко пищи безсмерныя ныне причащаешися;
Радуйся, яко упокоением Небеснаго Царствия ныне наслаждаешися;
Радуйся, преподобне отче Киприане, чудотворче и дивный молитвенниче о душах наших.

Кондак 8
Странно маловерующим слышати, како преобрази тя Всемогущий Господь и из ветхаго в злобе своей человека сотвори тя, всехвальне отче Киприане, воистину светило богосветлое: во Христе чадолюбивым отцем и смиренным наставником, немощей духовных и недугов телесных врачевателем, сего же ради молим тя: испроси нам вся потребная к животу и благочестию, избави нас от бедственных падений, бесовских искушений, болезненней печали и во Царствие Небесное приведи ны, яко вовеки с тобою сподобимся Господеви воспевати : «Аллилцуйя!»

Икос 8
Весь еси милость неоскудевающая и подвига зерцало нетускнеющее был еси, богоносне отче наш Киприане. Видяще же ревностное по Бозе и жестокое житие твое и братии в пределех полноцных, непрестанно в трудех и пощении подвизающихся и ходящих в рубищных и худых одеждах, нецыи от инок но паче ревностию духовною горяще и во обители купно с ними подвизатися желающе, приношаху ту имения своя на пользу общую; темже здателю тоя возглашаем тако:
Радуйся, шествовавый путем трудным и тесным;
Радуйся, возводяй других к Обителем Небесным;
Радуйся, надеждо светлая в нужде и обстоянии сущих;
Радуйся, покровителю сирых и крова неимущих;
Радуйся, обидимых вусемудрый и благостный утешителю;
Радуйся, гонимых всемилостивый заступниче и покровителю;
Радуйся, в малом верных выну укрепляющий;
Радуйся, возлюбивших Господа окормляющий;
Радуйся, преподобне отче Киприане, чудотворче и дивный молитвенниче о душах наших.

Кондак 9
Всякия похвалы и славословия достойна есть любы твоя, прехвальне Кириане, яка крепчае Смерти бысть, ибо Бога бо возлюбил еси всею душею и крепостию твоею и ближняго твоего, яко сам себе и множае паче себе, яко еще на земли сый, оляденевшия сердца ко Господу обращал еси, темже и ныне ходатайства твоего просим, память твою чтущии верно, вопиюще с надеждою на предстательство твое Господеви: «Аллилуйя»

Икос 9
Витии любомудрии прославляют славных мира сего деяния, мы же твоим житием честным красуемся, святче Божий, и прославляем преставление твое святое и многая чудеса, тобою содеянная сразу же по кончине твоей и содеваемая от рода в род: воистину бо не вотще чудотворец именуешися, преблаженне, и достойно слышиши хвалебныя песни таковыя:
Радуйся, в добродетелях и почитании старших наставляющий;
Радуйся, страх смерти и болезни в душах наших побеждающий;
Радуйся, благодатную силу исцеления просящим подающий;
Радуйся, от проказы греховныя нас избавляющий;
Радуйся, радостию и любовию жаждущих напояющий;
Радуйся, светом веры и надежды нас озаряющий;
Радуйся, в шествии путем заповедей Христовых укрепляющий;
Радуйся, несение ига крестнаго пречудно облегчавающий;
Радуйся, преподобне отче Киприане, чудотворче и дивный молитвенниче о душах наших.

Кондак 10
Спасительнаго твоего подвига, угодниче Христов, достиг скончания, и душу твою в руце Божий предал еси, сподобился достойно встати у Престола Вседержителя, идеже со всеми святыми предстоиши во славе невечерней, Тем же и нам, святую память твою, преподобне Киприане Сторожевский, почитающим, твердую руку помощи твоея подаждь и грехми присно погружаемых от смертоносных глубин изведи и прочее жития время в покаянии истеннем скончати помози и от вечнаго гнева спаситися сподоби, поющим: Аллилуиа.

Икос 10
Стену несокрушимую и утверждение непреоборимое обретоша тя, богоносне Киприане, православнии людие не точию края Ладожскего, но и всей вселенней, ибо по скончании иноческаго и воистину равноангельнаго жития твоего, угодниче Божий, по всем концем земли чудеса совершаеши еси изрядна и преславна, предстоя Богу, тебе подавшему залог Божественен и венец нетленен и славу вечную. Сего ради вернии воспевают тебе:
Радуйся, пресветлый светильниче, возсиявый на тверди Небесней;
Радуйся, в немерцающем свете с Господем пребываяй;
Радуйся, теплый ходатаю у Престола Господня о всех, чтущих святую память твою;
Радуйся, Небесный покровителю страны нашея, града и храма, идеже почивают святыя мощи твоя;
Радуйся, заповеди Господни творити с радостью о Спасе научающий;
Радуйся, окамененная сердца во источницы милования обращающий;
Радуйся, возлагающим по Бозе упование на тя пособствующий;
Радуйся, от врагов видимых и невидимых всех нас обороняющий;
Радуйся, преподобне отче Киприане, чудотворче и дивный молитвенниче о душах наших.

Кондак 11
Пение хвалебное приносим ти, богоблаженный отче наш Киприане, и молим тя усердно, испроси, святче Божий, у Предвечнего Отца Небеснаго, да обрящем в житии сем вразумление и дар покаяния, в Истине Христовой утверждение и спасительной благодати стяжания, помози нам, небесный заступниче наш, твоим добродетелям подражати, надежду твою на любовь и правду Божию стяжати, да возможем богоугодно пети Создателю нашему: Аллилуиа.

Икос 11
Светоприимный и богосветлый светильник сущим во тьме неразумия людем русским, Всеблагим Господем возженаго, зрим тя, всеблаженный отче наш Киприане, возсиял бо еси светом добродетельнаго жития твоего, (егда оскуде на Руси преподобный), и наставил чад твоих духовных и ближних еси к разуму истинному, вся зарею словес Божиих ум просветил еси. Сего ради простим тя, угодниче Христов, настави и нас бытии истинными учениками Спасителя Нашего и прими благосклонно возносимыя тебе похвалы сия:
Радуйся, многих сынов Российских из бездны греховныя восхитивый;
Радуйся, тех на путь покаяния наставый;
Радуйся, не токмо верных, но и неверных любовию объявый;
Радуйся, милование Христово к немощным и грешным проповедавый;
Радуйся, души от горькаго сна лености и бездеятельности возбудаяй;
Радуйся, искренния слезы умиления и радости из потухших очес источаяй,
Радуйся, сердца окамененныя благодатно исцеляющий и умягчающий;
Радуйся, к действенному исправлению грешники скоро побуждающий;
Радуйся, преподобне отче Киприане, чудотворче и дивный молитвенниче о душах наших.

Кондак 12
Благодать дарова ти обильную Христос Бог наш, святе Киприане, во еже путеводити люди ко спасению. И ныне источают оную честныя мощи твоя, недугующия душею и телом исцеляя. Почитающееся же тебя с верою, надеждою и любовию, молим убо тя: предстательством твоим у Спаса Христа помози нам, преподобне отче, благочестно на земли пожити, да и Царствия Небеснаго сподобимся, поюще о тебе Всемудраму Господу Нашему: Аллилуиа.

Икос 12
Поюще твоя чудеса и в Бозе житие твое, святый преподобный отче наш Киприане, недоумеваем, како достойно изрещи сладость благ, ихже вкушаеши на небеси; како подробне исчислити преславная твоя деяния, от нихже множайшия утаена суть от мира и единому Богу доведома; обаче, очима веры зряще тя среди избранных Божиих и назирающею отонуду нас любовию твоею побеждаеми, с отрадою и надеждою взываем ти:
Радуйся, со всеми святыми на небесех торжествующий;
Радуйся, с ними песнь победную Богу воспевающий;
Радуйся, духовнаго просвещения светильниче небосветлый;
Радуйся, милосердия и милостыни источниче неисчерпаемый;
Радуйся, злобы бесовския мрак преславно отгоняющий;
Радуйся, человеки от бед и скорбей скоро избавляющий;
Радуйся, блуждающих по морю жития сего мудре окормляющий;
Радуйся, к гавани спасения всех нас с любовию направляющий;
Радуйся, преподобне отче Киприане, чудотворче и дивный молитвенниче о душах наших.

Кондак 13
О предивный угодниче Христов, преподобне отче наш Киприане, приими малое сие моление наше в похвалу от благодарных сердец тебе возносимое, и предстоя ныне в славе пред Престолом Царя царей, Господа нашего Иисуса Христа, пред лицем Заступнице Небесней рода христианскаго, Всепетой Матери нашей, молися о всех нас: проси, святче Божий, да обрящем во спасение милосердие Их на земли и сподобимся в вечней радости Пресвятей Троице присно воспевати: Аллилуиа.
(Сей Кондак читается трижды,а затем Икос 1 и Кондак 1).

Молитва первая
О священная главо, преподобне и богоносне отче наш Киприане, изрядный угодниче Пресвятыя и Единосущныя Троицы, являющий многия милости живущим во святей обители твоей, и всем, с верою и любовию притекающим к тебе.
Испроси нам вся благопотребная к житию сему временному, и нужная к вечному спасению нашему. Пособствуй предстательством твоим, угодниче Божий, всем нам, к мощем твоим святым припадающим, на враги видимыя и невидимыя одоление, да в мире глубоце пребудет Святая Церковь Христова, и в благоустроении зиждется обитель, юже ты основа, во всяком благочестии нерушимо.
Буди всем нам, чудотворче святый, помощник скорый во всякой скорби и обстоянии. Наипаче же в час кончины нашея явися нам заступник благосердный, да не предани будем на мытарствах воздушных власти злобнаго миродержца, но да сподобимся непреткновеннаго восхода в Царствие Небесное.
Ей, отче, молитвенниче наш присный! Не посрами упования нашего, не презри смиренная моления наша, и предстательствуй за нас пред престолом Живоначальныя Троицы, да сподобимся вкупе с тобою и со всеми святыми, мы недостойнии, в селениих райских славити величие, благодать и милость Единаго в Троице Бога, Отца и Сына и Святаго Духа, во веки веков. Аминь.

Молитва вторая
О преподобне отче Киприане, чудотворче преславный и молитвенниче за род христианский! Се мы, грехми и треволненьми житейскаго моря обуреваеми, от глубины сердечныя взываем ти: не остави нас, немощных, печальных и унылых призрением милостивнаго твоего заступления! Во дни земнаго жития твоего явился еси болящим безмездным целителем, алчущим милостивым кормителем, заблуждшим наставником, скорбящим и обидимым утешителем милосердным и всем притекающим к тебе скорым помощником и чадолюбивым отцем. И ныне вемы, яко дана тебе от Господа и Пречистой Богородицы благодать молитися за ны.
О верный слуго Христов, сторицею возрастивый данный тебе талант, уврачуй страсти душ и телес наших, укрепи в добродетели и настави на путь покаяния: умягчи наша злая и хладная сердца, да паче всего возлюбим Христа, в Немже и ближняго своего. Умоли Господа сил низпослати милость Свою многострадальному Отечеству нашему и святей обители сей, в ней же подвизался еси, да тихое и безмолвное житие поживем во всяком благочестии и чистоте: и тако достигнем в немятежное пристанище Небеснаго Царствия, идеже ты в незаходимей сияеши славе, воспевая со всеми святыми хвалебную песнь Отцу и Сыну и Святому Духу, ныне и присно и во веки веков. Аминь.


Молитва Третья
О угодниче Христов преподобне отче наш Киприане! Услыши нас недостойных и молящихся тебе, и буди нам помощник в скорбех наших и нуждах. Яви нам примером своим усмирение страстей наших и пагубных деяний наших прогнание, и избави нас от напастей и искушений вражиих и множества прегрешений находящих на ны. Явися по морю плавающим кормчим и утопающим благонадежное избавление, наипаче же от духов нечистых освобождение и всех наветов противу нас содержимых очищение и помощь. Поминай нас в своих благоприятных молитвах перед Христом Богом, да сохранит Он нас от искушений, болезней и скорбей, да дарует нам смирение, любовь, рассуждение и кротость, и да сподобит в День Судный десное стояние и наслаждение во Царствии Божием во веки веков. Аминь.

Тропарь гл 6
Раскаянием велиим свою жизнь изменил еси,/и непрестанною молитвою во сто трудов обитель воздвигл еси,/победив еси бесовское ополчение смирением,/Киприане отче наш,// моли Христа Бога помиловати души наша.

Кондак гл.2
Яко разбойника благоразумного и раскаявшегося,/чистотою душевною вооружився и последовав еси Христу Богу,/болезнуя всем сердцем о всех,с верою притекающим к тебе:/наипаче же смирению,терпению и любве научаеши,/сего ради почитаем тя преподобне отче наш Киприане.[/spoiler]